𑁨. 𑀲𑀻𑀳𑀦𑀸𑀤𑀯𑀕𑁆𑀕𑁄

𑁧. 𑀘𑀽𑀴𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁯. 𑀲𑀼𑀢𑁆𑀢𑀤𑁂𑀲𑀦𑀸𑀯𑀢𑁆𑀣𑀼𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀉𑀧𑁆𑀧𑀢𑁆𑀢𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺, 𑀲𑀸 𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀮𑀸𑀪𑀲𑀓𑁆𑀓𑀸𑀭𑀧𑀘𑁆𑀘𑀬𑀸𑀢𑀺 𑀮𑀸𑀪𑀲𑀓𑁆𑀓𑀸𑀭𑀦𑀺𑀫𑀺𑀢𑁆𑀢𑀁, 𑀪𑀕𑀯𑀢𑁄 𑀲𑀗𑁆𑀖𑀲𑁆𑀲 𑀘 𑀉𑀧𑁆𑀧𑀦𑁆𑀦𑀮𑀸𑀪𑀲𑀓𑁆𑀓𑀸𑀭𑀳𑁂𑀢𑀼, 𑀅𑀢𑁆𑀢𑀦𑁄 𑀯𑀸 𑀮𑀸𑀪𑀲𑀓𑁆𑀓𑀸𑀭𑀼𑀧𑁆𑀧𑀸𑀤𑀦𑀳𑁂𑀢𑀼. 𑀢𑀺𑀢𑁆𑀣𑀺𑀬𑀧𑀭𑀺𑀤𑁂𑀯𑀺𑀢𑁂𑀢𑀺 𑀢𑀺𑀢𑁆𑀣𑀺𑀬𑀸𑀦𑀁 ‘‘𑀓𑀺𑀁 𑀪𑁄 𑀲𑀫𑀡𑁄𑀬𑁂𑀯 𑀕𑁄𑀢𑀫𑁄 𑀲𑀫𑀡𑁄’’𑀢𑀺𑀆𑀤𑀺𑀦𑀸 𑀯𑀺𑀧𑁆𑀧𑀮𑀧𑀦𑀺𑀫𑀺𑀢𑁆𑀢𑀁. ‘‘𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑁄 𑀉𑀧𑁆𑀧𑀚𑁆𑀚𑀻’’𑀢𑀺 𑀯𑀢𑁆𑀯𑀸 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀢𑁆𑀣𑀁 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀢𑀼𑀧𑁆𑀧𑀫𑀸𑀡𑀺𑀓𑁄 𑀳𑀻’’𑀢𑀺𑀆𑀤𑀺𑀫𑀸𑀳. 𑀘𑀢𑁆𑀢𑀸𑀭𑀺 𑀧𑀫𑀸𑀡𑀸𑀦𑀺 𑀘𑀢𑀼𑀧𑁆𑀧𑀫𑀸𑀡𑀸𑀦𑀺, 𑀘𑀢𑀼𑀧𑁆𑀧𑀫𑀸𑀡𑀸𑀦𑀺 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀘𑀢𑀼𑀧𑁆𑀧𑀫𑀸𑀡𑀺𑀓𑁄. 𑀮𑁄𑀓𑁄𑀬𑁂𑀯 𑀲𑀗𑁆𑀕𑀫𑁆𑀫 𑀲𑀫𑀸𑀕𑀫𑁆𑀫 𑀯𑀲𑀦𑀝𑁆𑀞𑁂𑀦 𑀮𑁄𑀓𑀲𑀦𑁆𑀦𑀺𑀯𑀸𑀲𑁄, 𑀲𑀢𑁆𑀢𑀓𑀸𑀬𑁄𑀢𑀺 𑀅𑀢𑁆𑀣𑁄. 𑀧𑀫𑀺𑀦𑀸𑀢𑀺 𑀉𑀴𑀸𑀭𑀢𑀸𑀤𑀺𑀯𑀺𑀲𑁂𑀲𑀁 𑀏𑀢𑁂𑀦𑀸𑀢𑀺 𑀧𑀫𑀸𑀡𑀁 (𑀅. 𑀦𑀺. 𑀝𑀻. 𑁨.𑁪.𑁬𑁫) 𑀭𑀽𑀧𑀁 𑀭𑀽𑀧𑀓𑀸𑀬𑁄 𑀧𑀫𑀸𑀡𑀁 𑀏𑀢𑀲𑁆𑀲𑀸𑀢𑀺 𑀭𑀽𑀧𑀧𑁆𑀧𑀫𑀸𑀡𑁄. 𑀢𑀢𑁄 𑀏𑀯 𑀭𑀽𑀧𑁂 𑀧𑀲𑀦𑁆𑀦𑁄𑀢𑀺 𑀭𑀽𑀧𑀧𑁆𑀧𑀲𑀦𑁆𑀦𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀖𑁄𑀲𑁄𑀢𑀺 𑀧𑀯𑀢𑁆𑀢𑀣𑀼𑀢𑀺𑀖𑁄𑀲𑁄 (𑀅. 𑀦𑀺. 𑀝𑀻. 𑁨.𑁪.𑁬𑁫). 𑀮𑀽𑀔𑀦𑁆𑀢𑀺 𑀧𑀘𑁆𑀘𑀬𑀮𑀽𑀔𑀢𑀸. 𑀥𑀫𑁆𑀫𑁄𑀢𑀺 𑀲𑀻𑀮𑀸𑀤𑀬𑁄 𑀕𑀼𑀡𑀥𑀫𑁆𑀫𑀸 𑀅𑀥𑀺𑀧𑁆𑀧𑁂𑀢𑀸.

𑀢𑁂𑀲𑀁 𑀧𑀼𑀕𑁆𑀕𑀮𑀸𑀦𑀁. 𑀆𑀭𑁄𑀳𑀦𑁆𑀢𑀺 𑀉𑀘𑁆𑀘𑀢𑀁. 𑀲𑀸 𑀘 𑀔𑁄 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀮𑁂 𑀧𑀫𑀸𑀡𑀬𑀼𑀢𑁆𑀢𑀸 𑀤𑀝𑁆𑀞𑀩𑁆𑀩𑀸. 𑀧𑀭𑀺𑀡𑀸𑀳𑀦𑁆𑀢𑀺 𑀦𑀸𑀢𑀺𑀓𑀺𑀲𑀦𑀸𑀢𑀺𑀣𑀽𑀮𑀢𑀸𑀯𑀲𑁂𑀦 𑀫𑀺𑀢𑀧𑀭𑀺𑀡𑀸𑀳𑀁. 𑀲𑀡𑁆𑀞𑀸𑀦𑀦𑁆𑀢𑀺 𑀢𑁂𑀲𑀁 𑀢𑁂𑀲𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀲𑀼𑀲𑀡𑁆𑀞𑀺𑀢𑀢𑀁. 𑀧𑀸𑀭𑀺𑀧𑀽𑀭𑀺𑀦𑁆𑀢𑀺 𑀲𑀩𑁆𑀩𑁂𑀲𑀁 𑀲𑀭𑀻𑀭𑀸𑀯𑀬𑀯𑀸𑀦𑀁 𑀧𑀭𑀺𑀧𑀼𑀡𑁆𑀡𑀢𑀁 𑀅𑀯𑁂𑀓𑀮𑁆𑀮𑀢𑀁. 𑀢𑀢𑁆𑀣 𑀧𑀫𑀸𑀡𑀁 𑀕𑀳𑁂𑀢𑁆𑀯𑀸𑀢𑀺 𑀢𑀲𑁆𑀫𑀺𑀁 𑀭𑀽𑀧𑁂 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀁 𑀧𑀫𑀸𑀡𑀪𑀸𑀯𑀁 𑀉𑀧𑀸𑀤𑀸𑀬. 𑀧𑀲𑀸𑀤𑀁 𑀚𑀦𑁂𑀢𑀻𑀢𑀺 𑀅𑀥𑀺𑀫𑁄𑀓𑁆𑀔𑀁 𑀉𑀧𑁆𑀧𑀸𑀤𑁂𑀢𑀺.

𑀧𑀭𑀯𑀡𑁆𑀡𑀦𑀸𑀬𑀸𑀢𑀺 ‘‘𑀅𑀫𑀼𑀓𑁄 𑀏𑀤𑀺𑀲𑁄 𑀘 𑀏𑀤𑀺𑀲𑁄 𑀘𑀸’’𑀢𑀺 𑀬𑀲𑀕𑀼𑀡𑀯𑀘𑀦𑁂𑀦. 𑀧𑀭𑀣𑁄𑀫𑀦𑀸𑀬𑀸𑀢𑀺 𑀲𑀫𑁆𑀫𑀼𑀔𑀸𑀯 𑀧𑀭𑀲𑁆𑀲 𑀲𑀺𑀮𑀸𑀖𑀼𑀧𑁆𑀧𑀸𑀤𑀦𑁂𑀦 𑀅𑀪𑀺𑀢𑁆𑀣𑀯𑀦𑁂𑀦. 𑀧𑀭𑀧𑀲𑀁𑀲𑀦𑀸𑀬𑀸𑀢𑀺 𑀧𑀭𑀫𑁆𑀫𑀼𑀔𑀸 𑀧𑀭𑀲𑁆𑀲 𑀕𑀼𑀡𑀲𑀁𑀓𑀺𑀢𑁆𑀢𑀦𑁂𑀦. 𑀧𑀭𑀯𑀡𑁆𑀡𑀳𑀸𑀭𑀺𑀓𑀸𑀬𑀸𑀢𑀺 𑀧𑀭𑀫𑁆𑀧𑀭𑀯𑀡𑁆𑀡𑀳𑀸𑀭𑀺𑀓𑀸𑀬 𑀧𑀭𑀫𑁆𑀧𑀭𑀸𑀬 𑀧𑀭𑀲𑁆𑀲 𑀓𑀺𑀢𑁆𑀢𑀺𑀲𑀤𑁆𑀤𑀽𑀧𑀲𑀁𑀳𑀸𑀭𑁂𑀦. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀣𑀼𑀢𑀺𑀖𑁄𑀲𑁂.

𑀘𑀻𑀯𑀭𑀮𑀽𑀔𑀦𑁆𑀢𑀺 𑀣𑀽𑀮𑀚𑀺𑀡𑁆𑀡𑀩𑀳𑀼𑀢𑀼𑀦𑁆𑀦𑀓𑀢𑀸𑀤𑀺𑀁 𑀘𑀻𑀯𑀭𑀲𑁆𑀲 𑀮𑀽𑀔𑀪𑀸𑀯𑀁. 𑀧𑀢𑁆𑀢𑀮𑀽𑀔𑀦𑁆𑀢𑀺 𑀅𑀦𑁂𑀓𑀕𑀦𑁆𑀣𑀺𑀓𑀸𑀳𑀢𑀸𑀤𑀺𑀁 𑀧𑀢𑁆𑀢𑀲𑁆𑀲 𑀮𑀽𑀔𑀪𑀸𑀯𑀁. 𑀯𑀺𑀯𑀺𑀥𑀁 𑀯𑀸 𑀤𑀼𑀓𑁆𑀓𑀭𑀓𑀸𑀭𑀺𑀓𑀦𑁆𑀢𑀺 𑀥𑀼𑀢𑀗𑁆𑀕𑀲𑁂𑀯𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀁 𑀦𑀸𑀦𑀸𑀯𑀺𑀥𑀁 𑀤𑀼𑀓𑁆𑀓𑀭𑀘𑀭𑀺𑀬𑀁.

𑀲𑀻𑀮𑀁 𑀯𑀸 𑀧𑀲𑁆𑀲𑀺𑀢𑁆𑀯𑀸𑀢𑀺 𑀲𑀻𑀮𑀧𑀸𑀭𑀺𑀧𑀽𑀭𑀺𑀯𑀲𑁂𑀦 𑀯𑀺𑀲𑀼𑀤𑁆𑀥𑀁 𑀓𑀸𑀬𑀯𑀘𑀻𑀲𑀼𑀘𑀭𑀺𑀢𑀁 𑀜𑀸𑀡𑀘𑀓𑁆𑀔𑀼𑀦𑀸 𑀧𑀲𑁆𑀲𑀺𑀢𑁆𑀯𑀸. 𑀛𑀸𑀦𑀸𑀤𑀺𑀅𑀥𑀺𑀕𑀫𑀲𑀺𑀤𑁆𑀥𑀁 𑀲𑀫𑀸𑀥𑀺𑀁 𑀯𑀸. 𑀯𑀺𑀧𑀲𑁆𑀲𑀦𑀸𑀪𑀺𑀜𑁆𑀜𑀸𑀲𑀗𑁆𑀔𑀸𑀢𑀁 𑀧𑀜𑁆𑀜𑀁 𑀯𑀸.

𑀪𑀕𑀯𑀢𑁄 𑀲𑀭𑀻𑀭𑀁 𑀤𑀺𑀲𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀭𑀽𑀧𑀧𑁆𑀧𑀫𑀸𑀡𑁄𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀬𑁂𑀯 𑀧𑀲𑀻𑀤𑀢𑀺 𑀅𑀧𑀭𑀺𑀫𑀺𑀢𑀓𑀸𑀮𑀲𑀫𑀼𑀧𑀘𑀺𑀢𑀧𑀼𑀜𑁆𑀜𑀸𑀦𑀼𑀪𑀸𑀯𑀦𑀺𑀧𑁆𑀨𑀦𑁆𑀦𑀸𑀬 𑀲𑀩𑁆𑀩𑀲𑁄 𑀅𑀦𑀯𑀚𑁆𑀚𑀸𑀬 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀼𑀡𑁆𑀡𑀸𑀯𑀬𑀯𑀸𑀬 𑀭𑀽𑀧𑀓𑀸𑀬𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀢𑁆𑀢𑀸, 𑀬𑀲𑁆𑀲𑀸 𑀭𑀼𑀘𑀺𑀭𑀪𑀸𑀯𑁄 𑀯𑀺𑀲𑀼𑀤𑁆𑀥𑁂 𑀯𑀺𑀕𑀢𑀯𑀮𑀸𑀳𑀓𑁂 𑀤𑁂𑀯𑁂 𑀧𑀼𑀡𑁆𑀡𑀫𑀸𑀲𑀺𑀬𑀁 𑀧𑀭𑀺𑀧𑀼𑀡𑁆𑀡𑀓𑀮𑀸𑀪𑀸𑀕𑀫𑀡𑁆𑀟𑀮𑀁 𑀘𑀦𑁆𑀤𑀫𑀡𑁆𑀟𑀮𑀁 𑀅𑀪𑀺𑀪𑀯𑀺𑀢𑁆𑀯𑀸 𑀅𑀢𑀺𑀭𑁄𑀘𑀢𑀺, 𑀧𑀪𑀲𑁆𑀲𑀭𑀪𑀸𑀯𑁄 𑀲𑀭𑀤𑀲𑀫𑀬𑀁 𑀲𑀁𑀯𑀤𑁆𑀥𑀺𑀢𑀤𑀺𑀕𑀼𑀡𑀢𑁂𑀚𑀓𑀺𑀭𑀡𑀚𑀸𑀮𑀲𑀫𑀼𑀚𑁆𑀚𑀮𑀁 𑀲𑀽𑀭𑀺𑀬𑀫𑀡𑁆𑀟𑀮𑀁 𑀅𑀪𑀺𑀪𑀯𑀢𑀺, 𑀲𑁄𑀫𑁆𑀫𑀓𑀺𑀭𑀡𑀭𑀲𑀲𑀫𑀼𑀚𑁆𑀚𑀮𑀪𑀸𑀯𑁂𑀳𑀺 𑀢𑀤𑀼𑀪𑀬𑁂𑀳𑀺 𑀅𑀪𑀺𑀪𑀼𑀬𑁆𑀬 𑀯𑀢𑁆𑀢𑀫𑀸𑀦𑀁 𑀏𑀓𑀲𑁆𑀫𑀺𑀁 𑀔𑀡𑁂 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀯𑀺𑀚𑁆𑀚𑁄𑀢𑀦𑀲𑀫𑀢𑁆𑀣𑀁 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀧𑀪𑀸𑀲𑀫𑀼𑀤𑀬𑀁 𑀅𑀪𑀺𑀯𑀺𑀳𑀘𑁆𑀘 𑀪𑀸𑀲𑀢𑁂 𑀢𑀧𑀢𑁂 𑀯𑀺𑀭𑁄𑀘𑀢𑀺 𑀘.

𑀲𑀢𑀺𑀧𑀺 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑀸𑀤𑀻𑀦𑀁 𑀤𑀸𑀦𑀧𑀸𑀭𑀫𑀺𑀪𑀸𑀯𑁂 𑀧𑀭𑀺𑀘𑁆𑀘𑀸𑀕𑀯𑀺𑀲𑁂𑀲𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘𑁂𑀯 𑀲𑀼𑀤𑀼𑀓𑁆𑀓𑀭𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑀸𑀤𑀺𑀕𑁆𑀕𑀳𑀡𑀁, 𑀢𑀢𑁆𑀣𑀸𑀧𑀺 𑀘 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑀢𑁄 𑀯𑀺𑀲𑀼𑀁 𑀦𑀬𑀦𑀧𑀭𑀺𑀘𑁆𑀘𑀸𑀕𑀕𑁆𑀕𑀳𑀡𑀁, 𑀧𑀭𑀺𑀘𑁆𑀘𑀸𑀕𑀪𑀸𑀯𑀲𑀸𑀫𑀜𑁆𑀜𑁂𑀧𑀺 𑀭𑀚𑁆𑀚𑀧𑀭𑀺𑀘𑁆𑀘𑀸𑀕𑀢𑁄 𑀧𑀼𑀢𑁆𑀢𑀤𑀸𑀭𑀧𑀭𑀺𑀘𑁆𑀘𑀸𑀕𑀕𑁆𑀕𑀳𑀡𑀜𑁆𑀘 𑀓𑀢𑀁. 𑀆𑀤𑀺𑀦𑀸 𑀦𑀬𑁂𑀦𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀼𑀩𑁆𑀩𑀬𑁄𑀕𑀧𑀼𑀩𑁆𑀩𑀘𑀭𑀺𑀬𑀸𑀤𑀺𑀳𑁂𑀢𑀼𑀲𑀫𑁆𑀧𑀢𑁆𑀢𑀺𑀬𑀸, ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁧𑁫𑁭, 𑁨𑁫𑁫) 𑀯𑀼𑀢𑁆𑀢𑀸𑀬 𑀨𑀮𑀲𑀫𑁆𑀧𑀢𑁆𑀢𑀺𑀬𑀸, ‘‘𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁨𑁫𑁫) 𑀯𑀼𑀢𑁆𑀢𑀸𑀬 𑀲𑀢𑁆𑀢𑀼𑀧𑀓𑀸𑀭𑀓𑀺𑀭𑀺𑀬𑀸𑀬 𑀘 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀬𑁂𑀯 𑀧𑀲𑀻𑀤𑀢𑀺 𑀬𑀣𑀸𑀯𑀼𑀢𑁆𑀢𑀕𑀼𑀡𑀸𑀦𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀪𑀸𑀯𑀢𑁄 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀪𑀸𑀯𑀢𑁄 𑀘. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

‘‘𑀘𑀻𑀯𑀭𑀮𑀽𑀔𑀁 𑀤𑀺𑀲𑁆𑀯𑀸’’𑀢𑀺 𑀯𑀢𑁆𑀯𑀸 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁂 𑀪𑀕𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀸𑀡𑀧𑀁𑀲𑀼𑀓𑀽𑀮𑀘𑀻𑀯𑀭𑁂𑀦𑀸𑀢𑀺 𑀫𑀢𑀓𑀴𑁂𑀯𑀭𑀁 𑀧𑀮𑀺𑀯𑁂𑀞𑁂𑀢𑁆𑀯𑀸 𑀙𑀟𑁆𑀟𑀺𑀢𑁂𑀦 𑀢𑀼𑀫𑁆𑀩𑀫𑀢𑁆𑀢𑁂 𑀓𑀺𑀫𑀻 𑀧𑀧𑁆𑀨𑁄𑀝𑁂𑀢𑁆𑀯𑀸 𑀕𑀳𑀺𑀢𑁂𑀦 𑀲𑀸𑀡𑀧𑀁𑀲𑀼𑀓𑀽𑀮𑀘𑀻𑀯𑀭𑁂𑀦. 𑀪𑀸𑀭𑀺𑀬𑀦𑁆𑀢𑀺 𑀕𑀭𑀼𑀓𑀁, 𑀤𑀼𑀓𑁆𑀓𑀭𑀦𑁆𑀢𑀺 𑀅𑀢𑁆𑀣𑁄. 𑀯𑀥𑀼𑀬𑀼𑀯𑀢𑀻𑀫𑀚𑁆𑀛𑀺𑀫𑀺𑀢𑁆𑀣𑀺𑀯𑀲𑁂𑀦, 𑀩𑀸𑀮𑀬𑁄𑀩𑁆𑀩𑀦𑀧𑀼𑀭𑀸𑀡𑀯𑀲𑁂𑀦 𑀯𑀸 𑀢𑀺𑀯𑀺𑀥𑀦𑀸𑀝𑀓𑀢𑀸. 𑀳𑀭𑁂𑀡𑀼𑀬𑀽𑀲𑀁 𑀫𑀡𑁆𑀟𑀮𑀓𑀮𑀸𑀬𑀭𑀲𑁄. ‘‘𑀬𑀸𑀧𑁂𑀲𑁆𑀲𑀢𑀺 𑀦𑀸𑀫𑀸’’𑀢𑀺 𑀦𑀸𑀫-𑀲𑀤𑁆𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀦𑀸𑀫-𑀲𑀤𑁆𑀤𑀬𑁄𑀕𑁂𑀦 𑀳𑀺 𑀅𑀦𑀸𑀕𑀢𑀓𑀸𑀮𑀲𑁆𑀲 𑀯𑀺𑀬 𑀧𑀬𑁄𑀕𑁄, 𑀬𑀸𑀧𑁂𑀢𑀺 𑀇𑀘𑁆𑀘𑁂𑀯 𑀅𑀢𑁆𑀣𑁄. 𑀅𑀧𑁆𑀧𑀸𑀡𑀓𑀦𑁆𑀢𑀺 𑀦𑀺𑀭𑀲𑁆𑀲𑀸𑀲𑀁 𑀦𑀺𑀭𑁄𑀥𑀺𑀢𑀲𑁆𑀲𑀸𑀲𑀧𑀲𑁆𑀲𑀸𑀲𑀁.

𑀲𑀫𑀸𑀥𑀺𑀕𑀼𑀡𑀦𑁆𑀢𑀺 𑀲𑀸𑀥𑀸𑀭𑀡𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀢𑀺 𑀛𑀸𑀦𑀸𑀤𑀺𑀕𑁆𑀕𑀳𑀡𑁂𑀦. 𑀫𑀸𑀦𑀤𑀩𑁆𑀩𑀦𑀺𑀫𑁆𑀫𑀤𑀦𑁂𑀦 𑀦𑀺𑀩𑁆𑀩𑀺𑀲𑁂𑀯𑀦𑀪𑀸𑀯𑀸𑀧𑀸𑀤𑀦𑀫𑁆𑀧𑀺 𑀤𑀫𑀦𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀸𑀣𑀺𑀓𑀧𑀼𑀢𑁆𑀢𑀤𑀫𑀦𑀸𑀤𑀻𑀦𑀻’’𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀲𑀘𑁆𑀘𑀓𑀸𑀴𑀯𑀓𑀩𑀓𑀤𑀫𑀦𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀩𑀸𑀯𑁂𑀭𑀼𑀦𑁆𑀢𑀺 𑀏𑀯𑀁𑀦𑀸𑀫𑀓𑀁 𑀯𑀺𑀲𑀬𑀁. 𑀲𑀭𑀲𑀫𑁆𑀧𑀦𑁆𑀦𑁄𑀢𑀺 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀦 𑀲𑀭𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀢𑁂𑀦 𑀩𑁆𑀭𑀳𑁆𑀫𑀲𑁆𑀲𑀭𑀢𑀸𑀓𑀭𑀯𑀻𑀓𑀪𑀸𑀡𑀺𑀢𑀸𑀤𑀲𑁆𑀲𑀦𑁂𑀦 𑀮𑀓𑁆𑀔𑀡𑀳𑀸𑀭𑀦𑀬𑁂𑀦 𑀅𑀯𑀲𑁂𑀲𑀮𑀓𑁆𑀔𑀡𑀧𑀸𑀭𑀺𑀧𑀽𑀭𑀺𑀁 𑀯𑀺𑀬 𑀢𑀤𑀯𑀺𑀦𑀸𑀪𑀸𑀯𑀢𑁄 𑀩𑀼𑀤𑁆𑀥𑀸𑀦𑀁 𑀤𑁂𑀲𑀦𑀸𑀯𑀺𑀮𑀸𑀲𑀜𑁆𑀘 𑀯𑀺𑀪𑀸𑀯𑁂𑀢𑀺.

𑀳𑀢𑀧𑁆𑀧𑀪𑀸𑀢𑀺 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀯𑀺𑀕𑀢𑀢𑁂𑀚𑀸. 𑀓𑀸𑀴𑀧𑀓𑁆𑀔𑀽𑀧𑀫𑁂𑀢𑀺 𑀲𑀢𑁆𑀢𑀸𑀦𑀁 𑀩𑁆𑀬𑀸𑀫𑁄𑀳𑀦𑁆𑀥𑀓𑀸𑀭𑀸𑀪𑀺𑀪𑀯𑁂𑀦 𑀓𑀸𑀴𑀧𑀓𑁆𑀔𑀭𑀢𑁆𑀢𑀽𑀧𑀫𑁂. 𑀲𑀽𑀭𑀺𑀬𑁂𑀢𑀺 𑀲𑀽𑀭𑀺𑀬𑁂 𑀉𑀤𑀬𑀺𑀢𑁆𑀯𑀸 𑀑𑀪𑀸𑀲𑁂𑀦𑁆𑀢𑁂𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀺𑀗𑁆𑀖𑀸𑀝𑀓𑁂𑀢𑀺 𑀢𑀺𑀓𑁄𑀡𑀭𑀘𑁆𑀙𑀸𑀬𑀁. 𑀘𑀢𑀼𑀓𑁆𑀓𑁂𑀢𑀺 𑀲𑀦𑁆𑀥𑀺𑀬𑀁. 𑀧𑀭𑀺𑀤𑁂𑀯𑀦𑁆𑀢𑀻𑀢𑀺 𑀅𑀦𑀼𑀢𑁆𑀣𑀼𑀦𑀦𑀯𑀲𑁂𑀦 𑀯𑀺𑀧𑁆𑀧𑀮𑀧𑀦𑁆𑀢𑀺. 𑀲𑁄𑀓𑀸𑀥𑀺𑀓𑀓𑀢𑁄 𑀳𑀺 𑀯𑀘𑀻𑀧𑀮𑀸𑀧𑁄 𑀧𑀭𑀺𑀤𑁂𑀯𑁄. 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁂𑀬𑁂𑀯 𑀉𑀧𑁆𑀧𑀦𑁆𑀦𑀸𑀢𑀺 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀯𑀸𑀤𑀲𑁆𑀲 𑀧𑀼𑀭𑀸𑀢𑀦𑀪𑀸𑀯𑀁 𑀤𑀻𑀧𑁂𑀦𑁆𑀢𑀺.

𑀲𑁂𑀲𑀧𑀤𑁂𑀲𑀼𑀧𑀻𑀢𑀺 ‘‘𑀇𑀥 𑀤𑀼𑀢𑀺𑀬𑁄 𑀲𑀫𑀡𑁄’’𑀢𑀺𑀆𑀤𑀻𑀲𑀼 𑀲𑁂𑀲𑀯𑀸𑀭𑁂𑀲𑀼𑀧𑀺 (𑀅. 𑀦𑀺. 𑀝𑀻. 𑁨.𑁪.𑁨𑁪𑁧-𑁨𑁪𑁨) 𑀬𑀣𑀸 𑀳𑀺 ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺 (𑀧𑀸𑀭𑀸. 𑁧𑁧; 𑀤𑀻. 𑀦𑀺. 𑁧.𑁨𑁨𑁬; 𑀲𑀁. 𑀦𑀺. 𑁨.𑁧𑁫𑁨; 𑀅. 𑀦𑀺. 𑁪.𑁧𑁨𑁩) 𑀏𑀢𑁆𑀣 𑀓𑀢𑁄 𑀦𑀺𑀬𑀫𑁄 ‘‘𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀻’’𑀢𑀺 (𑀧𑀸𑀭𑀸. 𑁧𑁧; 𑀤𑀻. 𑀦𑀺. 𑁧.𑁨𑁨𑁬; 𑀲𑀁. 𑀦𑀺. 𑁨.𑁧𑁫𑁨; 𑀅. 𑀦𑀺. 𑁪.𑁧𑁨𑁩) 𑀏𑀢𑁆𑀣𑀸𑀧𑀺 𑀓𑀢𑁄𑀬𑁂𑀯 𑀳𑁄𑀢𑀺 𑀲𑀸𑀯𑀥𑀸𑀭𑀡𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸, 𑀏𑀯𑀫𑀺𑀥𑀸𑀧𑀻𑀢𑀺. 𑀢𑁂𑀦𑀸𑀳 ‘‘𑀤𑀼𑀢𑀺𑀬𑀸𑀤𑀬𑁄𑀧𑀻’’𑀢𑀺𑀆𑀤𑀺. 𑀲𑀸𑀫𑀜𑁆𑀜𑀨𑀮𑀸𑀥𑀺𑀕𑀫𑀯𑀲𑁂𑀦 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀲𑀫𑀡𑀪𑀸𑀯𑁄𑀢𑀺 𑀢𑁂𑀲𑀁 𑀯𑀲𑁂𑀦𑁂𑀢𑁆𑀣 𑀘𑀢𑁆𑀢𑀸𑀭𑁄 𑀲𑀫𑀡𑀸 𑀤𑁂𑀲𑀺𑀢𑀸𑀢𑀺 𑀢𑀫𑀢𑁆𑀣𑀁 𑀲𑀼𑀢𑁆𑀢𑀦𑁆𑀢𑀭𑁂𑀦 𑀲𑀫𑀢𑁆𑀣𑁂𑀢𑀼𑀁 ‘‘𑀢𑁂𑀦𑁂𑀯𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁂𑀦 𑀤𑁂𑀲𑀦𑀸𑀓𑁆𑀓𑀫𑁂𑀦 𑀘 𑀲𑀓𑀤𑀸𑀕𑀸𑀫𑀺𑀆𑀤𑀻𑀦𑀁 𑀤𑀼𑀢𑀺𑀬𑀸𑀤𑀺𑀢𑀸 𑀯𑀼𑀢𑁆𑀢𑀸𑀢𑀺 𑀲𑁄𑀢𑀸𑀧𑀦𑁆𑀦𑀲𑁆𑀲 𑀧𑀞𑀫𑀢𑀸 𑀅𑀯𑀼𑀢𑁆𑀢𑀲𑀺𑀤𑁆𑀥𑀸𑀢𑀺 𑀦 𑀘𑁄𑀤𑀺𑀢𑀸. 𑀨𑀮𑀝𑁆𑀞𑀓𑀲𑀫𑀡𑀸𑀯 𑀅𑀥𑀺𑀧𑁆𑀧𑁂𑀢𑀸 𑀲𑀫𑀺𑀢𑀧𑀸𑀧𑀲𑀫𑀡𑀕𑁆𑀕𑀳𑀡𑀢𑁄. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑁂 𑀯𑀺𑀬 𑀫𑀕𑁆𑀕𑀝𑁆𑀞𑀸 𑀢𑀤𑀢𑁆𑀣𑀸𑀬 𑀧𑀝𑀺𑀧𑀦𑁆𑀦𑀸 𑀘 𑀦 𑀕𑀳𑀺𑀢𑀸𑀢𑀺? 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀢𑁄. 𑀢𑀢𑁆𑀣 𑀳𑀺 𑀫𑀕𑁆𑀕𑀸𑀥𑀺𑀕𑀫𑀢𑁆𑀣𑀸𑀬 𑀯𑀺𑀧𑀲𑁆𑀲𑀦𑀸𑀧𑀺 𑀇𑀢𑁄 𑀩𑀳𑀺𑀤𑁆𑀥𑀸 𑀦𑀢𑁆𑀣𑀺, 𑀓𑀼𑀢𑁄 𑀫𑀕𑁆𑀕𑀨𑀮𑀸𑀦𑀻𑀢𑀺 𑀤𑀲𑁆𑀲𑁂𑀦𑁆𑀢𑁂𑀦 𑀪𑀕𑀯𑀢𑀸 ‘‘𑀜𑀸𑀬𑀲𑁆𑀲 𑀥𑀫𑁆𑀫𑀲𑁆𑀲 𑀧𑀤𑁂𑀲𑀯𑀢𑁆𑀢𑀻, 𑀇𑀢𑁄 𑀩𑀳𑀺𑀤𑁆𑀥𑀸 𑀲𑀫𑀡𑁄𑀧𑀺 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁. 𑀇𑀥 𑀧𑀦 𑀦𑀺𑀝𑁆𑀞𑀸𑀦𑀧𑁆𑀧𑀢𑁆𑀢𑀫𑁂𑀯 𑀢𑀁𑀢𑀁𑀲𑀫𑀡𑀪𑀸𑀯𑀁 𑀕𑀡𑁆𑀳𑀦𑁆𑀢𑁂𑀦 𑀨𑀮𑀝𑁆𑀞𑀓𑀲𑀫𑀡𑀸𑀯 𑀕𑀳𑀺𑀢𑀸 ‘‘𑀫𑀕𑁆𑀕𑀝𑁆𑀞𑀢𑁄 𑀨𑀮𑀝𑁆𑀞𑁄 𑀲𑀯𑀺𑀲𑁂𑀲𑀁 𑀤𑀓𑁆𑀔𑀺𑀡𑁂𑀬𑁆𑀬𑁄’’𑀢𑀺. 𑀲𑁆𑀯𑀸𑀬𑀫𑀢𑁆𑀣𑁄 𑀤𑁆𑀯𑀻𑀲𑀼 𑀲𑀼𑀢𑁆𑀢𑁂𑀲𑀼 𑀤𑁂𑀲𑀦𑀸𑀪𑁂𑀤𑁂𑀦𑁂𑀯 𑀯𑀺𑀜𑁆𑀜𑀸𑀬𑀢𑀻𑀢𑀺.

𑀭𑀺𑀢𑁆𑀢𑀸𑀢𑀺 𑀯𑀺𑀯𑀺𑀢𑁆𑀢𑀸. 𑀢𑀼𑀘𑁆𑀙𑀸𑀢𑀺 𑀦𑀺𑀲𑁆𑀲𑀸𑀭𑀸 𑀧𑀝𑀺𑀧𑀦𑁆𑀦𑀓𑀲𑀸𑀭𑀸𑀪𑀸𑀯𑀢𑁄. 𑀧𑀯𑀤𑀦𑁆𑀢𑀺 𑀏𑀢𑁂𑀳𑀻𑀢𑀺 𑀧𑀯𑀸𑀤𑀸, 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀦𑀸𑀦𑀸𑀤𑀺𑀝𑁆𑀞𑀺𑀤𑀻𑀧𑀓𑀸 𑀲𑀫𑀬𑀸𑀢𑀺 𑀆𑀳 ‘‘𑀘𑀢𑁆𑀢𑀸𑀭𑁄 𑀲𑀲𑁆𑀲𑀢𑀯𑀸𑀤𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀺. 𑀢𑁂𑀢𑀺 𑀬𑀣𑀸𑀯𑀼𑀢𑁆𑀢𑀲𑀫𑀡𑀸. 𑀏𑀢𑁆𑀣𑀸𑀢𑀺 ‘‘𑀧𑀭𑀧𑁆𑀧𑀯𑀸𑀤𑀸’’𑀢𑀺 𑀯𑀼𑀢𑁆𑀢𑁂 𑀩𑀸𑀳𑀺𑀭𑀓𑀲𑀫𑀬𑁂.

𑀬𑀦𑁆𑀢𑀺 𑀬𑀲𑁆𑀫𑀺𑀁. 𑀪𑀼𑀫𑁆𑀫𑀢𑁆𑀣𑁂 𑀳𑀺 𑀇𑀤𑀁 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀜𑀸𑀬𑁄 𑀯𑀼𑀘𑁆𑀘𑀢𑀺 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀅𑀭𑀺𑀬𑀫𑀕𑁆𑀕𑁄. 𑀢𑁂𑀦 𑀳𑀺 𑀦𑀺𑀩𑁆𑀩𑀸𑀦𑀁 𑀜𑀸𑀬𑀢𑀺 𑀕𑀫𑁆𑀫𑀢𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺. 𑀲𑁄 𑀏𑀯 𑀦𑀺𑀩𑁆𑀩𑀸𑀦𑀲𑀫𑁆𑀧𑀸𑀧𑀓𑀳𑁂𑀢𑀼𑀢𑀸𑀬 𑀥𑀫𑁆𑀫𑁄𑀢𑀺 𑀆𑀳 ‘‘𑀜𑀸𑀬𑀲𑁆𑀲 𑀥𑀫𑁆𑀫𑀲𑁆𑀲𑀸’’𑀢𑀺.

𑀢𑁂𑀲𑀁 𑀧𑀭𑀧𑁆𑀧𑀯𑀸𑀤𑀲𑀸𑀲𑀦𑀸𑀦𑀁 𑀅𑀔𑁂𑀢𑁆𑀢𑀢𑀸 𑀔𑁂𑀢𑁆𑀢𑀢𑀸 𑀘 𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀪𑀸𑀯𑀪𑀸𑀯𑀸 𑀲𑀼𑀧𑀭𑀺𑀲𑀼𑀤𑁆𑀥𑀲𑁆𑀲 𑀲𑀻𑀮𑀲𑁆𑀲 𑀲𑀼𑀧𑀭𑀺𑀲𑀼𑀤𑁆𑀥𑀸𑀬 𑀲𑀫𑀣𑀯𑀺𑀧𑀲𑁆𑀲𑀦𑀸𑀬 𑀅𑀪𑀸𑀯𑀢𑁄 𑀲𑀸𑀯𑀢𑁄 𑀘. 𑀢𑀤𑀼𑀪𑀬𑀜𑁆𑀘 𑀤𑀼𑀭𑀓𑁆𑀔𑀸𑀢𑀲𑁆𑀯𑀸𑀓𑁆𑀔𑀸𑀢𑀪𑀸𑀯𑀳𑁂𑀢𑀼𑀓𑀁, 𑀲𑁄 𑀘 𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑀯𑁂𑀤𑀺𑀢𑀢𑀸𑀬𑀸𑀢𑀺 𑀧𑀭𑀸𑀚𑀺𑀓𑀸𑀬 𑀲𑀢𑁆𑀣𑀼 𑀯𑀺𑀧𑀢𑁆𑀢𑀺𑀳𑁂𑀢𑀼𑀢𑀸𑀬 𑀲𑀸𑀲𑀦𑀲𑁆𑀲 𑀅𑀦𑀺𑀬𑁆𑀬𑀸𑀦𑀪𑀸𑀯𑁄𑀢𑀺 𑀤𑀲𑁆𑀲𑁂𑀢𑀺.

𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀧𑀭𑀺𑀬𑀸𑀬𑀢𑁄 𑀘 𑀧𑀸𑀴𑀺𑀬𑀸 𑀘 𑀲𑀫𑀢𑁆𑀣𑁂𑀢𑀼𑀁 ‘‘𑀢𑁂𑀦𑀸𑀳 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀧𑀸𑀴𑀺𑀁 𑀤𑀲𑁆𑀲𑁂𑀢𑁆𑀯𑀸 𑀉𑀧𑀫𑀸𑀧𑀤𑁂𑀲𑁂𑀦 𑀢𑀢𑁆𑀣 𑀲𑀼𑀢𑁆𑀢𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀬𑀲𑁆𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀲𑁆𑀫𑀸 𑀏𑀓𑀘𑁆𑀘𑀸𑀦𑀁 𑀯𑀺𑀲𑁂𑀲𑀢𑁄 𑀲𑀻𑀳𑀸𑀦𑀁 𑀧𑀼𑀭𑀺𑀫𑀁 𑀧𑀸𑀤𑀤𑁆𑀯𑀬𑀁 𑀳𑀢𑁆𑀣𑀓𑀺𑀘𑁆𑀘𑀫𑁆𑀧𑀺 𑀓𑀭𑁄𑀢𑀺, 𑀢𑀲𑁆𑀫𑀸 𑀆𑀳 ‘‘𑀲𑀼𑀭𑀢𑁆𑀢𑀳𑀢𑁆𑀣𑀧𑀸𑀤𑁄’’𑀢𑀺. 𑀲𑀻𑀳𑀲𑁆𑀲 𑀓𑁂𑀲𑀸 𑀦𑀸𑀫 𑀓𑁂𑀲𑀭𑀸𑀬𑀢𑀦𑀸 𑀔𑀦𑁆𑀥𑀮𑁄𑀫𑀸. 𑀕𑁄𑀘𑀭𑀺𑀬𑀳𑀢𑁆𑀣𑀺𑀓𑀼𑀮𑀁 𑀦𑀸𑀫 𑀧𑀓𑀢𑀺𑀳𑀢𑁆𑀣𑀺𑀓𑀼𑀮𑀁, 𑀬𑀁 ‘‘𑀓𑀸𑀮𑀸𑀯𑀓’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀖𑁄𑀝𑀓𑁄 𑀦𑀸𑀫 𑀅𑀲𑁆𑀲𑀔𑀴𑀼𑀗𑁆𑀓𑁄. 𑀲𑀺𑀦𑁂𑀭𑀼𑀧𑀭𑀺𑀪𑀡𑁆𑀟𑁂 𑀲𑀺𑀫𑁆𑀩𑀮𑀺𑀭𑀼𑀓𑁆𑀔𑁂𑀳𑀺 𑀲𑀜𑁆𑀙𑀸𑀤𑀺𑀢𑁄 𑀧𑀜𑁆𑀜𑀸𑀲𑀬𑁄𑀚𑀦𑁄 𑀤𑀳𑁄 𑀲𑀺𑀫𑁆𑀩𑀮𑀺𑀤𑀳𑁄, 𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀫𑀳𑀦𑁆𑀢𑀁 𑀲𑀺𑀫𑁆𑀩𑀮𑀺𑀯𑀦𑀁, 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀺𑀫𑁆𑀩𑀮𑀺𑀤𑀳𑀯𑀦𑁂’’𑀢𑀺. 𑀅𑀜𑁆𑀜𑀢𑀺𑀢𑁆𑀣𑀸𑀯𑀸𑀲𑀪𑀽𑀫𑀺𑀬𑀁 𑀇𑀫𑁂𑀲𑀼 𑀲𑀫𑀡𑁂𑀲𑀼 𑀏𑀓𑀘𑁆𑀘𑁄 𑀦 𑀉𑀧𑁆𑀧𑀚𑁆𑀚𑀢𑀺, 𑀈𑀤𑀺𑀲𑁄 𑀧𑀦𑁂𑀢𑁆𑀣 𑀯𑀺𑀓𑀧𑁆𑀧𑁄 𑀦𑀢𑁆𑀣𑀺, 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦 𑀉𑀧𑁆𑀧𑀚𑁆𑀚𑀦𑁆𑀢𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑀲𑀫𑀡𑁄𑀧𑀻’’𑀢𑀺 𑀆𑀳. 𑀅𑀭𑀺𑀬𑀫𑀕𑁆𑀕𑀧𑀭𑀺𑀓𑁆𑀔𑀢𑁂𑀢𑀺 𑀅𑀭𑀺𑀬𑀫𑀕𑁆𑀕𑀼𑀧𑁆𑀧𑀢𑁆𑀢𑀺𑀬𑀸 𑀅𑀪𑀺𑀲𑀗𑁆𑀔𑀢𑁂, 𑀬𑀤𑀸 𑀲𑀸𑀲𑀦𑀺𑀓𑀸𑀦𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀅𑀭𑀺𑀬𑀫𑀕𑁆𑀕𑁄 𑀤𑀺𑀩𑁆𑀩𑀢𑀺, 𑀢𑀤𑀸𑀢𑀺 𑀅𑀢𑁆𑀣𑁄.

𑀲𑀫𑁆𑀫𑀸𑀢𑀺 𑀲𑀼𑀝𑁆𑀞𑀼. 𑀲𑀼𑀝𑁆𑀞𑀼 𑀦𑀤𑀦𑀁 𑀦𑀸𑀫 𑀳𑁂𑀢𑀼𑀬𑀼𑀢𑁆𑀢𑀁 𑀲𑀼𑀝𑁆𑀞𑀼 𑀓𑀢𑁆𑀯𑀸 𑀓𑀣𑀦𑀦𑁆𑀢𑀺 𑀆𑀳 ‘‘𑀳𑁂𑀢𑀼𑀦𑀸’’𑀢𑀺. 𑀲𑁄 𑀘 𑀳𑁂𑀢𑀼 𑀅𑀯𑀺𑀧𑀭𑀻𑀢𑁄 𑀏𑀯 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀦𑀬𑁂𑀦𑀸’’𑀢𑀺, 𑀜𑀸𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀯𑀁𑀪𑀽𑀢𑁄 𑀘 𑀲𑁄 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀁 𑀓𑀭𑁄𑀢𑀺 𑀲𑀸𑀥𑁂𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀸𑀭𑀡𑁂𑀦𑀸’’𑀢𑀺. 𑀬𑀤𑀺 𑀢𑀺𑀭𑀘𑁆𑀙𑀸𑀦𑀲𑀻𑀳𑀲𑁆𑀲 𑀦𑀸𑀤𑁄 𑀲𑀩𑁆𑀩𑀢𑀺𑀭𑀘𑁆𑀙𑀸𑀦𑀏𑀓𑀘𑁆𑀘𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀦𑀸𑀤𑀢𑁄 𑀲𑁂𑀝𑁆𑀞𑀢𑁆𑀢𑀸 𑀲𑁂𑀝𑁆𑀞𑀦𑀸𑀤𑁄, 𑀓𑀺𑀫𑀗𑁆𑀕𑀁 𑀧𑀦 𑀢𑀣𑀸𑀕𑀢𑀲𑀻𑀳𑀦𑀸𑀤𑁄𑀢𑀺 𑀆𑀳 ‘‘𑀲𑀻𑀳𑀦𑀸𑀤𑀦𑁆𑀢𑀺 𑀲𑁂𑀝𑁆𑀞𑀦𑀸𑀤’’𑀦𑁆𑀢𑀺. 𑀬𑀤𑀺 𑀢𑀺𑀭𑀘𑁆𑀙𑀸𑀦𑀲𑀻𑀳𑀦𑀸𑀤𑀲𑁆𑀲 𑀲𑁂𑀝𑁆𑀞𑀦𑀸𑀤𑀢𑀸 𑀦𑀺𑀩𑁆𑀪𑀬𑀢𑀸𑀬 𑀅𑀧𑁆𑀧𑀝𑀺𑀲𑀢𑁆𑀢𑀼𑀢𑀸𑀬 𑀇𑀘𑁆𑀙𑀺𑀢𑀸, 𑀢𑀣𑀸𑀕𑀢𑀲𑀻𑀳𑀦𑀸𑀤𑀲𑁆𑀲𑁂𑀯 𑀅𑀬𑀫𑀢𑁆𑀣𑁄 𑀲𑀸𑀢𑀺𑀲𑀬𑁄𑀢𑀺 𑀆𑀳 ‘‘𑀅𑀪𑀻𑀢𑀦𑀸𑀤𑀁 𑀅𑀧𑁆𑀧𑀝𑀺𑀦𑀸𑀤’’𑀦𑁆𑀢𑀺. 𑀇𑀤𑀸𑀦𑀺𑀲𑁆𑀲 𑀲𑁂𑀝𑁆𑀞𑀦𑀸𑀤𑀪𑀸𑀯𑀁 𑀓𑀸𑀭𑀡𑁂𑀦 𑀧𑀝𑀺𑀧𑀸𑀤𑁂𑀦𑁆𑀢𑁄 ‘‘𑀇𑀫𑁂𑀲𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑁂𑀦 ‘‘𑀲𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀲𑀫𑀢𑁆𑀣𑁂𑀢𑀺. 𑀢𑀢𑁆𑀣 𑀅𑀢𑁆𑀣𑀺𑀢𑀸𑀬𑀸𑀢𑀺 𑀇𑀫𑀺𑀦𑀸 𑀲𑀻𑀳𑀦𑀸𑀤𑀲𑁆𑀲 𑀉𑀢𑁆𑀢𑀫𑀢𑁆𑀣𑀢𑀁 𑀤𑀲𑁆𑀲𑁂𑀢𑀺. 𑀪𑀽𑀢𑀝𑁆𑀞𑁄 𑀳𑀺 𑀉𑀢𑁆𑀢𑀫𑀝𑁆𑀞𑁄. 𑀢𑀸𑀬 𑀏𑀯 𑀪𑀽𑀢𑀝𑁆𑀞𑀢𑀸𑀬 𑀅𑀪𑀻𑀢𑀦𑀸𑀤𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑁂 𑀲𑀫𑀡𑀸…𑀧𑁂… 𑀦𑀸𑀫 𑀳𑁄𑀢𑀻’’𑀢𑀺 𑀆𑀳. 𑀅𑀪𑀽𑀢𑀜𑁆𑀳𑀺 𑀯𑀤𑀢𑁄 𑀓𑀼𑀢𑁄𑀘𑀺 𑀪𑀬𑀁 𑀯𑀸 𑀆𑀲𑀗𑁆𑀓𑀸 𑀯𑀸 𑀲𑀺𑀬𑀸𑀢𑀺 ‘‘𑀇𑀥𑁂𑀯𑀸’’𑀢𑀺 𑀦𑀺𑀬𑀫𑀲𑁆𑀲 𑀅𑀯𑀺𑀧𑀭𑀻𑀢𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀫𑁆𑀳𑀸𑀓𑀫𑁆𑀧𑀺…𑀧𑁂… 𑀅𑀧𑁆𑀧𑀝𑀺𑀦𑀸𑀤𑁄 𑀦𑀸𑀫 𑀳𑁄𑀢𑀻’’𑀢𑀺 𑀆𑀳. 𑀬𑀜𑁆𑀳𑀺 𑀅𑀜𑁆𑀜𑀢𑁆𑀣𑀸𑀧𑀺 𑀅𑀢𑁆𑀣𑀺, 𑀢𑀁 𑀇𑀥𑁂𑀯𑀸𑀢𑀺 𑀅𑀯𑀥𑀸𑀭𑁂𑀢𑀼𑀁 𑀦 𑀬𑀼𑀢𑁆𑀢𑀦𑁆𑀢𑀺.

𑁧𑁪𑁦. 𑀔𑁄𑀢𑀺 𑀅𑀯𑀥𑀸𑀭𑀡𑁂. 𑀢𑁂𑀦 𑀯𑀺𑀚𑁆𑀚𑀢𑀺 𑀏𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀬𑀦𑁆𑀢𑀺 𑀓𑀭𑀡𑀢𑁆𑀣𑁂 𑀧𑀘𑁆𑀘𑀢𑁆𑀢𑀦𑁆𑀢𑀺 𑀆𑀳 ‘‘𑀬𑁂𑀦 𑀓𑀸𑀭𑀡𑁂𑀦𑀸’’𑀢𑀺. 𑀢𑀺𑀢𑁆𑀣𑀁 𑀦𑀸𑀫 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀲𑁆𑀲 𑀓𑀲𑁆𑀲𑀘𑀺 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀲𑁆𑀲 𑀅𑀪𑀸𑀯𑀢𑁄. 𑀧𑀸𑀭𑀕𑀫𑀦𑀲𑀗𑁆𑀔𑀸𑀢𑀁 𑀢𑀭𑀡𑀁 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 (𑀅. 𑀦𑀺. 𑀝𑀻. 𑁨.𑁩.𑁬𑁨) 𑀢𑀢𑁆𑀣 𑀢𑀢𑁆𑀣𑁂𑀯 𑀅𑀧𑀭𑀸𑀧𑀭𑀁 𑀉𑀫𑁆𑀫𑀼𑀚𑁆𑀚𑀦𑀦𑀺𑀫𑀼𑀚𑁆𑀚𑀦𑀯𑀲𑁂𑀦 𑀧𑀺𑀮𑀯𑀦𑀦𑁆𑀢𑀺 𑀆𑀳 ‘‘𑀢𑀭𑀦𑁆𑀢𑀺 𑀉𑀧𑁆𑀧𑀮𑀯𑀦𑁆𑀢𑀻’’𑀢𑀺. 𑀉𑀧𑁆𑀧𑀸𑀤𑁂𑀢𑀸𑀢𑀺 𑀧𑀽𑀭𑀡𑀸𑀤𑀺𑀓𑁄. 𑀢𑀺𑀢𑁆𑀣𑁂 𑀚𑀸𑀢𑀸𑀢𑀺 𑀢𑀺𑀢𑁆𑀣𑀺𑀬𑀸, 𑀬𑀣𑀸𑀯𑀼𑀢𑁆𑀢𑀁 𑀯𑀸 𑀤𑀺𑀝𑁆𑀞𑀺𑀕𑀢𑀲𑀗𑁆𑀔𑀸𑀢𑀁 𑀢𑀺𑀢𑁆𑀣𑀁 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀢𑀺𑀢𑁆𑀣𑀺𑀓𑀸, 𑀢𑀺𑀢𑁆𑀣𑀺𑀓𑀸 𑀏𑀯 𑀢𑀺𑀢𑁆𑀣𑀺𑀬𑀸. 𑀅𑀲𑁆𑀲𑀲𑀦𑁆𑀢𑀺 𑀏𑀢𑁆𑀣, 𑀏𑀢𑁂𑀦𑀸𑀢𑀺 𑀯𑀸 𑀅𑀲𑁆𑀲𑀸𑀲𑁄, 𑀅𑀯𑀲𑁆𑀲𑀬𑁄.

𑀧𑀓𑀢𑀢𑁆𑀣𑀦𑀺𑀤𑁆𑀤𑁂𑀲𑁄 𑀬𑀁-𑀢𑀁-𑀲𑀤𑁆𑀤𑁄𑀢𑀺 𑀢𑀲𑁆𑀲 ‘‘𑀪𑀕𑀯𑀢𑀸’’𑀢𑀺𑀆𑀤𑀻𑀳𑀺 𑀧𑀤𑁂𑀳𑀺 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀲𑁆𑀲 𑀬𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀪𑀸𑀯𑁂𑀦 𑀪𑀕𑀯𑀸 𑀧𑀓𑀢𑁄 𑀲𑀢𑁆𑀣𑀼𑀪𑀸𑀯𑁂𑀦 𑀅𑀥𑀺𑀕𑀢𑁄 𑀲𑀼𑀧𑀸𑀓𑀝𑁄 𑀘, 𑀢𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀪𑀸𑀯𑀁 𑀲𑀤𑁆𑀥𑀺𑀁 𑀆𑀕𑀫𑀦𑀧𑀝𑀺𑀧𑀤𑀸𑀬 𑀅𑀢𑁆𑀣𑀪𑀸𑀯𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄 𑀲𑁄…𑀧𑁂… 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀆𑀳. 𑀲𑀢𑀺𑀧𑀺 𑀜𑀸𑀡𑀤𑀲𑁆𑀲𑀦𑀲𑀤𑁆𑀤𑀸𑀦𑀁 𑀇𑀥 𑀧𑀜𑁆𑀜𑀸𑀯𑁂𑀯𑀘𑀦𑀪𑀸𑀯𑁂 𑀢𑁂𑀦 𑀢𑁂𑀦 𑀯𑀺𑀲𑁂𑀲𑁂𑀦 𑀦𑁂𑀲𑀁 𑀲𑀯𑀺𑀲𑀬𑁂 𑀯𑀺𑀲𑁂𑀲𑀧𑁆𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 (𑀲𑀸𑀭𑀢𑁆𑀣. 𑀝𑀻. 𑀧𑀭𑀺𑀯𑀸𑀭 𑁩.𑁧) 𑀅𑀲𑀸𑀥𑀸𑀭𑀡𑀯𑀺𑀲𑁂𑀲𑀯𑀲𑁂𑀦 𑀯𑀺𑀚𑁆𑀚𑀸𑀢𑁆𑀢𑀬𑀯𑀲𑁂𑀦 𑀯𑀺𑀚𑁆𑀚𑀸𑀪𑀺𑀜𑁆𑀜𑀸𑀦𑀸𑀯𑀭𑀡𑀯𑀲𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑀁𑀲𑀘𑀓𑁆𑀔𑀼𑀯𑀲𑁂𑀦 𑀧𑀝𑀺𑀯𑁂𑀥𑀤𑁂𑀲𑀦𑀸𑀜𑀸𑀡𑀯𑀲𑁂𑀦 𑀘 𑀢𑁂 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂𑀲𑀁 𑀢𑁂𑀲’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀲𑀬𑀸𑀦𑀼𑀲𑀬𑀁 𑀚𑀸𑀦𑀢𑀸 𑀆𑀲𑀬𑀸𑀦𑀼𑀲𑀬𑀜𑀸𑀡𑁂𑀦, 𑀲𑀩𑁆𑀩𑀁 𑀜𑁂𑀬𑁆𑀬𑀥𑀫𑁆𑀫𑀁 𑀧𑀲𑁆𑀲𑀢𑀸 𑀲𑀩𑁆𑀩𑀜𑁆𑀜𑀼𑀢𑀸𑀦𑀸𑀯𑀭𑀡𑀜𑀸𑀡𑁂𑀳𑀺. 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀤𑀻𑀳𑀻𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀆𑀲𑀯𑀓𑁆𑀔𑀬𑀜𑀸𑀡𑁂𑀳𑀺. 𑀅𑀦𑀜𑁆𑀜𑀲𑀸𑀥𑀸𑀭𑀡𑀧𑀼𑀜𑁆𑀜𑀸𑀦𑀼𑀪𑀸𑀯𑀦𑀺𑀩𑁆𑀩𑀢𑁆𑀢𑁄 𑀅𑀦𑀼𑀢𑁆𑀢𑀭𑀜𑀸𑀡𑀸𑀥𑀺𑀕𑀫𑀮𑀤𑁆𑀥𑀧𑀼𑀭𑀸𑀯𑀢𑁆𑀢𑀓𑁄 𑀘 𑀪𑀕𑀯𑀢𑁄 𑀭𑀽𑀧𑀓𑀸𑀬𑁄 𑀅𑀢𑀺𑀓𑁆𑀓𑀫𑁆𑀫𑁂𑀯 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑀁 𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀲𑀩𑁆𑀩𑀲𑀢𑁆𑀢𑀸𑀦𑀁…𑀧𑁂… 𑀧𑀲𑁆𑀲𑀢𑀸’’𑀢𑀺. 𑀧𑀝𑀺𑀯𑁂𑀥𑀧𑀜𑁆𑀜𑀸𑀬𑀸𑀢𑀺 𑀫𑀕𑁆𑀕𑀧𑀜𑁆𑀜𑀸𑀬. 𑀢𑀸𑀬 𑀳𑀺 𑀲𑀩𑁆𑀩𑀲𑁄 𑀜𑁂𑀬𑁆𑀬𑀥𑀫𑁆𑀫𑁂𑀲𑀼 𑀲𑀫𑁆𑀫𑁄𑀳𑀲𑁆𑀲 𑀯𑀺𑀥𑀫𑀺𑀢𑀢𑁆𑀢𑀸 𑀧𑀘𑁆𑀙𑀸 𑀧𑀯𑀢𑁆𑀢𑀚𑀸𑀦𑀦𑀁 𑀢𑀲𑁆𑀲 𑀚𑀸𑀦𑀦𑀁 𑀯𑀺𑀬 𑀯𑀼𑀘𑁆𑀘𑀢𑀺.

𑀅𑀭𑀻𑀦𑀦𑁆𑀢𑀺 𑀓𑀺𑀮𑁂𑀲𑀸𑀭𑀻𑀦𑀁, 𑀧𑀜𑁆𑀘𑀯𑀺𑀥𑀫𑀸𑀭𑀸𑀦𑀁 𑀯𑀸 𑀲𑀸𑀲𑀦𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀯𑀸 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁, 𑀢𑁂𑀲𑀁 𑀳𑀦𑀦𑀁 𑀧𑀸𑀝𑀺𑀳𑀸𑀭𑀺𑀬𑁂𑀳𑀺 𑀅𑀪𑀺𑀪𑀯𑀦𑀁 𑀅𑀧𑁆𑀧𑀝𑀺𑀪𑀸𑀦𑀢𑀸𑀓𑀭𑀡𑀁 𑀅𑀚𑁆𑀛𑀼𑀧𑁂𑀓𑁆𑀔𑀦𑀁 𑀯𑀸. 𑀓𑁂𑀲𑀺𑀯𑀺𑀦𑀬𑀲𑀼𑀢𑁆𑀢𑀜𑁆𑀘𑁂𑀢𑁆𑀣 (𑀅. 𑀦𑀺. 𑁪.𑁧𑁧𑁧) 𑀦𑀺𑀤𑀲𑁆𑀲𑀦𑀁. 𑀢𑀣𑀸 𑀘 𑀞𑀸𑀦𑀸𑀝𑁆𑀞𑀸𑀦𑀸𑀤𑀻𑀦𑀺 𑀯𑀸 𑀚𑀸𑀦𑀢𑀸, 𑀬𑀣𑀸𑀓𑀫𑁆𑀫𑀼𑀧𑀕𑁂 𑀲𑀢𑁆𑀢𑁂 𑀧𑀲𑁆𑀲𑀢𑀸, 𑀲𑀯𑀸𑀲𑀦𑀸𑀦𑀫𑀸𑀲𑀯𑀸𑀦𑀁 𑀔𑀻𑀡𑀢𑁆𑀢𑀸 𑀅𑀭𑀳𑀢𑀸, 𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀺𑀪𑁂𑀤𑁂 𑀥𑀫𑁆𑀫𑁂 𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀺𑀢𑁄 𑀅𑀯𑀺𑀧𑀭𑀻𑀢𑀸𑀯𑀩𑁄𑀥𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦. 𑀅𑀣 𑀯𑀸 𑀢𑀻𑀲𑀼 𑀓𑀸𑀮𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀢𑀸𑀬 𑀚𑀸𑀦𑀢𑀸, 𑀓𑀸𑀬𑀓𑀫𑁆𑀫𑀸𑀤𑀻𑀦𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀦𑁂𑀦 𑀦𑀺𑀲𑀫𑁆𑀫𑀓𑀸𑀭𑀺𑀢𑀸𑀬 𑀧𑀲𑁆𑀲𑀢𑀸, 𑀭𑀯𑀸𑀤𑀻𑀦𑀫𑁆𑀧𑀺 (𑀲𑀸𑀭𑀢𑁆𑀣. 𑀝𑀻. 𑀧𑀭𑀺𑀯𑀸𑀭 𑁩.𑁧) 𑀅𑀪𑀸𑀯𑀲𑀸𑀥𑀺𑀓𑀸𑀬 𑀧𑀳𑀸𑀦𑀲𑀫𑁆𑀧𑀤𑀸𑀬 𑀅𑀭𑀳𑀢𑀸, 𑀙𑀦𑁆𑀤𑀸𑀤𑀻𑀦𑀁 𑀅𑀳𑀸𑀦𑀺𑀳𑁂𑀢𑀼𑀪𑀽𑀢𑀸𑀬 𑀅𑀓𑁆𑀔𑀬𑀧𑀝𑀺𑀪𑀸𑀦𑀲𑀸𑀥𑀺𑀓𑀸𑀬 𑀲𑀩𑁆𑀩𑀜𑁆𑀜𑀼𑀢𑀸𑀬 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦. 𑀏𑀯𑀁 𑀤𑀲𑀩𑀮𑀅𑀝𑁆𑀞𑀸𑀭𑀲𑀸𑀯𑁂𑀡𑀺𑀓𑀩𑀼𑀤𑁆𑀥𑀥𑀫𑁆𑀫𑀯𑀲𑁂𑀦𑀧𑀺 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀬𑁂𑀢𑀺 𑀘𑀢𑀼𑀭𑁄 𑀥𑀫𑁆𑀫𑁂. 𑀅𑀢𑁆𑀢𑀦𑀻𑀢𑀺 𑀅𑀫𑁆𑀳𑁂𑀲𑀼. 𑀦 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀲𑀼 𑀉𑀧𑀢𑁆𑀣𑀫𑁆𑀪𑀁 𑀲𑀫𑁆𑀧𑀲𑁆𑀲𑀫𑀸𑀦𑀸, 𑀦 𑀓𑀸𑀬𑀩𑀮𑀁 𑀲𑀫𑁆𑀧𑀲𑁆𑀲𑀫𑀸𑀦𑀸𑀢𑀺 𑀬𑁄𑀚𑀦𑀸.

𑀉𑀧𑁆𑀧𑀦𑁆𑀦𑀧𑀲𑀸𑀤𑁄𑀢𑀺 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀁 𑀯𑀤𑀢𑀺. 𑀯𑀓𑁆𑀔𑀢𑀺 𑀳𑀺 ‘‘𑀘𑀢𑁆𑀢𑀸𑀭𑀺 𑀲𑁄𑀢𑀸𑀧𑀦𑁆𑀦𑀲𑁆𑀲 𑀅𑀗𑁆𑀕𑀸𑀦𑀺 𑀓𑀣𑀺𑀢𑀸𑀦𑀻’’𑀢𑀺 (𑀫. 𑀦𑀺. 𑀅𑀝𑁆𑀞. 𑁧.𑁧𑁪𑁦). 𑀓𑀸𑀫𑀁 𑀅𑀲𑁂𑀓𑁆𑀔𑀸𑀧𑀺 𑀅𑀲𑁂𑀓𑁆𑀔𑀸𑀬 𑀲𑀫𑀲𑀺𑀓𑁆𑀔𑀢𑀸𑀬 𑀲𑀳𑀥𑀫𑁆𑀫𑀺𑀓𑀸 𑀏𑀯, 𑀘𑀺𑀡𑁆𑀡𑀩𑁆𑀭𑀳𑁆𑀫𑀘𑀭𑀺𑀬𑀢𑀸𑀬 𑀧𑀦 𑀲𑀳𑀥𑀫𑁆𑀫𑀁 𑀘𑀭𑀦𑁆𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀸𑀢𑀺 𑀅𑀲𑁂𑀓𑁆𑀔𑀯𑀸𑀭𑁄 𑀦 𑀕𑀳𑀺𑀢𑁄. 𑀲𑀩𑁆𑀩𑁂𑀧𑁂𑀢𑁂𑀢𑀺 𑀏𑀢𑁂 𑀬𑀣𑀸𑀯𑀼𑀢𑁆𑀢𑀸 𑀪𑀺𑀓𑁆𑀔𑀼𑀆𑀤𑀬𑁄 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀘 𑀧𑀼𑀣𑀼𑀚𑁆𑀚𑀦𑀸 𑀅𑀭𑀺𑀬𑀸 𑀘𑀸𑀢𑀺 𑀲𑀩𑁆𑀩𑁂𑀧𑀺 𑀏𑀢𑁂 𑀢𑀁𑀢𑀁𑀲𑀺𑀓𑁆𑀔𑀸𑀳𑀺 𑀲𑀫𑀸𑀦𑀥𑀫𑁆𑀫𑀢𑁆𑀢𑀸 𑀲𑀳𑀥𑀫𑁆𑀫𑀢𑁆𑀢𑀸 ‘‘𑀲𑀳𑀥𑀫𑁆𑀫𑀺𑀓𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀇𑀤𑀸𑀦𑀺 𑀦𑀺𑀩𑁆𑀩𑀢𑁆𑀢𑀺𑀢𑀅𑀭𑀺𑀬𑀥𑀫𑁆𑀫𑀯𑀲𑁂𑀦𑁂𑀯 𑀲𑀳𑀥𑀫𑁆𑀫𑀺𑀓𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀫𑀕𑁆𑀕𑀤𑀲𑁆𑀲𑀦𑀫𑁆𑀳𑀻𑀢𑀺 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀺𑀯𑀲𑁂𑀦 𑀲𑀘𑁆𑀘𑀧𑀝𑀺𑀯𑁂𑀥𑁂𑀦 ‘‘𑀦𑀯 𑀫𑀕𑁆𑀕𑀗𑁆𑀕𑀸𑀦𑀺, 𑀅𑀝𑁆𑀞 𑀩𑁄𑀚𑁆𑀛𑀗𑁆𑀕𑀸𑀦𑀻’’𑀢𑀺𑀆𑀤𑀺𑀦𑀸 𑀯𑀺𑀯𑀸𑀤𑁄 𑀦𑀢𑁆𑀣𑀺. 𑀏𑀓𑀥𑀫𑁆𑀫𑀘𑀸𑀭𑀺𑀢𑀸𑀬𑀸𑀢𑀺 𑀲𑀫𑀸𑀦𑀥𑀫𑁆𑀫𑀘𑀸𑀭𑀺𑀢𑀸𑀬. 𑀦 𑀳𑀺 𑀧𑀝𑀺𑀯𑀺𑀤𑁆𑀥𑀲𑀘𑁆𑀘𑀸𑀦𑀁 ‘‘𑀫𑀬𑀸 𑀥𑀫𑁆𑀫𑁄 𑀲𑀼𑀤𑀺𑀝𑁆𑀞𑁄, 𑀢𑀬𑀸 𑀤𑀼𑀤𑁆𑀤𑀺𑀝𑁆𑀞𑁄’’𑀢𑀺𑀆𑀤𑀺𑀦𑀸 𑀯𑀺𑀯𑀸𑀤𑁄 𑀅𑀢𑁆𑀣𑀺. 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀗𑁆𑀖𑀸𑀢𑀸 𑀳𑀺 𑀢𑁂 𑀉𑀢𑁆𑀢𑀫𑀧𑀼𑀭𑀺𑀲𑀸. 𑀇𑀫𑀺𑀦𑀸𑀢𑀺 ‘‘𑀲𑀳𑀥𑀫𑁆𑀫𑀺𑀓𑀸 𑀔𑁄 𑀧𑀦𑀸’’𑀢𑀺𑀆𑀤𑀺𑀯𑀘𑀦𑁂𑀦. 𑀢𑀢𑁆𑀣 𑀧𑀺𑀬𑀫𑀦𑀸𑀧𑀕𑁆𑀕𑀳𑀡𑁂𑀦 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀸𑀧𑀤𑁂𑀲𑁂𑀦 𑀏𑀓𑀤𑁂𑀲𑁂𑀦 𑀕𑀳𑀺𑀢𑀁 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀁 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀬𑁂 𑀳𑀺 𑀲𑀫𑁆𑀧𑀦𑁆𑀦𑀲𑀻𑀮𑀸 𑀲𑀼𑀯𑀺𑀲𑀼𑀤𑁆𑀥𑀤𑀲𑁆𑀲𑀦𑀸, 𑀢𑁂 𑀯𑀺𑀜𑁆𑀜𑀽𑀦𑀁 𑀧𑀺𑀬𑀸 𑀫𑀦𑀸𑀧𑀸𑀢𑀺. 𑀏𑀢𑁆𑀢𑀸𑀯𑀢𑀸𑀢𑀺 ‘‘𑀅𑀢𑁆𑀣𑀺 𑀔𑁄 𑀦𑁄 𑀆𑀯𑀼𑀲𑁄’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂𑀦 𑀭𑀢𑀦𑀢𑁆𑀢𑀬𑀧𑀲𑀸𑀤𑀚𑁄𑀢𑀦𑁂𑀦 𑀅𑀓𑁆𑀔𑀸𑀢𑀸 𑀢𑁂𑀲𑀼 𑀢𑁂𑀲𑀼 𑀲𑀼𑀢𑁆𑀢𑀧𑀤𑁂𑀲𑁂𑀲𑀼.

𑁧𑁪𑁧. 𑀲𑀢𑁆𑀣𑀭𑀺 𑀧𑀲𑀸𑀤𑁄𑀢𑀺 𑀧𑀲𑀸𑀤𑀕𑁆𑀕𑀳𑀡𑁂𑀦 ‘‘𑀪𑀕𑀯𑀢𑀸’’𑀢𑀺𑀆𑀤𑀺𑀦𑀸 𑀯𑀸 𑀧𑀲𑀸𑀤𑀦𑀻𑀬𑀸 𑀥𑀫𑁆𑀫𑀸 𑀕𑀳𑀺𑀢𑀸. 𑀢𑁂𑀦 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀁 𑀤𑀲𑁆𑀲𑁂𑀢𑀺, 𑀢𑀣𑀸 ‘‘𑀥𑀫𑁆𑀫𑁂 𑀧𑀲𑀸𑀤𑁄’’𑀢𑀺 𑀇𑀫𑀺𑀦𑀸 𑀥𑀫𑁆𑀫𑀲𑀼𑀥𑀫𑁆𑀫𑀢𑀁, 𑀇𑀢𑀭𑁂𑀦 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀦𑁆𑀦𑀢𑀁. 𑀬𑁂𑀦 𑀘𑀺𑀢𑁆𑀢𑁂𑀦 𑀅𑀜𑁆𑀜𑀢𑁆𑀣 𑀅𑀦𑀼𑀧𑀮𑀩𑁆𑀪𑀫𑀸𑀦𑁂𑀦 𑀲𑀸𑀲𑀦𑁂𑀬𑁂𑀯 𑀲𑀫𑀡𑁄 𑀇𑀢𑁄 𑀩𑀳𑀺𑀤𑁆𑀥𑀸 𑀦𑀢𑁆𑀣𑀻𑀢𑀺 𑀅𑀬𑀫𑀢𑁆𑀣𑁄, 𑀲𑀫𑁆𑀫𑀤𑁂𑀯, 𑀧𑀢𑀺𑀝𑁆𑀞𑀸𑀧𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀬𑁄𑀚𑀦𑀸 𑁋 𑀬𑀲𑁆𑀫𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸, 𑀢𑀲𑁆𑀫𑀸 𑀅𑀢𑁆𑀣𑀺 𑀔𑁄 𑀦𑁄, 𑀆𑀯𑀼𑀲𑁄, 𑀲𑀢𑁆𑀣𑀭𑀺 𑀧𑀲𑀸𑀤𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑁆𑀢𑀸 𑀘𑀲𑁆𑀲 𑀲𑁆𑀯𑀸𑀔𑀸𑀢𑁄 𑀥𑀫𑁆𑀫𑁄𑀢𑀺 𑀅𑀢𑁆𑀣𑀺 𑀥𑀫𑁆𑀫𑁂 𑀧𑀲𑀸𑀤𑁄, 𑀢𑀢𑁄 𑀏𑀯 𑀘 𑀅𑀢𑁆𑀣𑀺 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀸𑀢𑀺 𑀲𑀳𑀥𑀫𑁆𑀫𑀺𑀓𑀸…𑀧𑁂… 𑀧𑀩𑁆𑀩𑀚𑀺𑀢𑀸 𑀘𑀸𑀢𑀺 𑀏𑀯𑀫𑁂𑀢𑁆𑀣 𑀲𑀢𑁆𑀣𑀭𑀺 𑀧𑀲𑀸𑀤𑁂𑀦 𑀥𑀫𑁆𑀫𑁂 𑀧𑀲𑀸𑀤𑁄, 𑀢𑁂𑀦 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀻𑀢𑀺 𑀅𑀬𑀜𑁆𑀘 𑀦𑀬𑁄 𑀮𑁂𑀲𑁂𑀦𑀧𑀺 𑀧𑀭𑀧𑁆𑀧𑀯𑀸𑀤𑁂𑀲𑀼 𑀦𑀢𑁆𑀣𑀻𑀢𑀺 𑀇𑀥𑁂𑀯 𑀲𑀫𑀡𑁄…𑀧𑁂… 𑀲𑀫𑀡𑁂𑀳𑀺 𑀅𑀜𑁆𑀜𑁂𑀳𑀻𑀢𑀺.

𑀧𑀝𑀺𑀯𑀺𑀤𑁆𑀥𑀲𑀘𑁆𑀘𑀸𑀦𑀁 𑀧𑀳𑀻𑀦𑀸𑀦𑀼𑀭𑁄𑀥𑀸𑀦𑀁 𑀕𑁂𑀳𑀲𑁆𑀲𑀺𑀢𑀧𑁂𑀫𑀲𑁆𑀲 𑀅𑀲𑀫𑁆𑀪𑀯𑁄 𑀏𑀯𑀸𑀢𑀺 ‘‘𑀇𑀤𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀏𑀯𑀁 ‘‘𑀉𑀧𑀚𑁆𑀛𑀸𑀬𑁂𑀦, 𑀪𑀺𑀓𑁆𑀔𑀯𑁂, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀫𑁆𑀳𑀺 𑀧𑀼𑀢𑁆𑀢𑀧𑁂𑀫𑀁 𑀉𑀧𑀝𑁆𑀞𑀧𑁂𑀢𑀩𑁆𑀩𑀁’’𑀢𑀺𑀆𑀤𑀺𑀯𑀘𑀦𑀁 (𑀫𑀳𑀸𑀯. 𑁬𑁫) 𑀓𑀣𑀦𑁆𑀢𑀺? 𑀦𑀬𑀺𑀤𑀁 𑀕𑁂𑀳𑀲𑁆𑀲𑀺𑀢𑀧𑁂𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀁𑀲𑀤𑀺𑀲𑀢𑁆𑀢𑀸 𑀧𑀦 𑀧𑁂𑀫𑀫𑀼𑀔𑁂𑀦 𑀯𑀼𑀢𑁆𑀢𑁄 𑀫𑁂𑀢𑁆𑀢𑀸𑀲𑁆𑀦𑁂𑀳𑁄. 𑀦 𑀳𑀺 𑀪𑀕𑀯𑀸 𑀪𑀺𑀓𑁆𑀔𑀽 𑀲𑀁𑀓𑀺𑀮𑁂𑀲𑁂 𑀦𑀺𑀬𑁄𑀚𑁂𑀢𑀺. 𑀏𑀯𑀭𑀽𑀧𑀁 𑀧𑁂𑀫𑀁 𑀲𑀦𑁆𑀥𑀸𑀬𑀸𑀢𑀺 𑀧𑀲𑀸𑀤𑀸𑀯𑀳𑀕𑀼𑀡𑀸𑀯𑀳𑀢𑁄 𑀧𑀽𑀭𑀡𑀸𑀤𑀻𑀲𑀼 𑀪𑀢𑁆𑀢𑀺 𑀧𑀲𑀸𑀤𑁄 𑀦 𑀳𑁄𑀢𑀺, 𑀧𑀲𑀸𑀤𑀧𑀢𑀺𑀭𑀽𑀧𑀓𑀸 𑀧𑀦 𑀮𑁄𑀪𑀧𑀯𑀢𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀸. 𑀣𑁂𑀭𑁄𑀢𑀺 𑀫𑀳𑀸𑀲𑀗𑁆𑀖𑀭𑀓𑁆𑀔𑀺𑀢𑀢𑁆𑀣𑁂𑀭𑁄. 𑀬𑁂𑀦 𑀅𑀝𑁆𑀞𑀓𑀣𑀸 𑀧𑁄𑀢𑁆𑀣𑀓𑀁 𑀆𑀭𑁄𑀧𑀺𑀢𑀸. 𑀏𑀓𑁄𑀯 𑀲𑀢𑁆𑀣𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀕𑀼𑀡𑀢𑁆𑀢𑀸, 𑀅𑀜𑁆𑀜𑀣𑀸 𑀅𑀦𑀘𑁆𑀙𑀭𑀺𑀬𑀢𑁆𑀢𑀸 𑀲𑀢𑁆𑀣𑀼𑀮𑀓𑁆𑀔𑀡𑀫𑁂𑀯 𑀦 𑀧𑀭𑀺𑀧𑀽𑀭𑁂𑀬𑁆𑀬. 𑀯𑀺𑀲𑀼𑀁 𑀓𑀢𑁆𑀯𑀸𑀢𑀺 𑀅𑀜𑁆𑀜𑁂𑀳𑀺 𑀯𑀺𑀯𑁂𑀘𑁂𑀢𑁆𑀯𑀸 𑀅𑀢𑁆𑀢𑀦𑁄 𑀆𑀯𑁂𑀡𑀺𑀓𑀁 𑀓𑀢𑁆𑀯𑀸. ‘‘𑀅𑀫𑁆𑀳𑀸𑀓𑀁 𑀲𑀢𑁆𑀣𑀸’’𑀢𑀺 𑀩𑁆𑀬𑀸𑀯𑀤𑀦𑁆𑀢𑀸𑀦𑀁 𑀅𑀜𑁆𑀜𑁂𑀲𑀁 𑀲𑀢𑁆𑀣𑀸 𑀦 𑀳𑁄𑀢𑀻𑀢𑀺 𑀅𑀢𑁆𑀣𑀢𑁄 𑀆𑀧𑀦𑁆𑀦𑀫𑁂𑀯 𑀳𑁄𑀢𑀺, 𑀢𑀣𑀸 𑀘 𑀧𑀤𑁂𑀲𑀯𑀢𑁆𑀢𑀺𑀦𑀺𑀁 𑀢𑀲𑁆𑀲 𑀲𑀢𑁆𑀣𑀼𑀢𑀁 𑀧𑀝𑀺𑀚𑀸𑀦𑀦𑁆𑀢𑀸 𑀧𑀭𑀺𑀧𑀼𑀡𑁆𑀡𑀮𑀓𑁆𑀔𑀡𑀲𑀢𑁆𑀣𑀼𑀢𑀁 𑀇𑀘𑁆𑀙𑀦𑁆𑀢𑀸𑀦𑀫𑁆𑀧𑀺 𑀢𑀢𑁄 𑀯𑀺𑀭𑀼𑀤𑁆𑀥𑀸 𑀲𑀢𑁆𑀣𑀼𑀪𑀸𑀯𑀧𑀭𑀺𑀬𑁂𑀲𑀦𑁂𑀦 𑀧𑀭𑀸𑀚𑀺𑀢𑀸 𑀳𑁄𑀦𑁆𑀢𑀺. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁂𑀢𑀺 𑀅𑀥𑀺𑀓𑀩𑁆𑀭𑀳𑁆𑀫𑀕𑀼𑀡𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺𑀧𑁆𑀧𑀪𑁂𑀤𑀲𑀫𑀬𑁂. 𑀢𑀢𑁆𑀣 𑀅𑀚𑀲𑀻𑀮…𑀧𑁂… 𑀓𑀼𑀓𑁆𑀓𑀼𑀭𑀲𑀻𑀮𑀸𑀤𑀻𑀲𑀽𑀢𑀺 𑀇𑀤𑀁 𑀬𑁂𑀪𑀼𑀬𑁆𑀬𑁂𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀢𑀸𑀤𑀺𑀲𑀁 𑀯𑀢𑀲𑀫𑀸𑀤𑀸𑀦𑀲𑀩𑁆𑀪𑀸𑀯𑀢𑁄 𑀯𑀼𑀢𑁆𑀢𑀁, 𑀆𑀤𑀺-𑀲𑀤𑁆𑀤𑁂𑀦 𑀬𑀫𑀦𑀺𑀬𑀫𑀘𑀸𑀢𑀼𑀬𑀸𑀫𑀲𑀁𑀯𑀭𑀸𑀤𑀻𑀦𑀁 𑀲𑀗𑁆𑀕𑀳𑁄𑀢𑀺. 𑀅𑀥𑀺𑀧𑁆𑀧𑀬𑀸𑀲𑁄𑀢𑀺 𑀅𑀥𑀺𑀓𑀁 𑀧𑀬𑀲𑀢𑀺 𑀧𑀬𑀼𑀚𑁆𑀚𑀢𑀺 𑀏𑀢𑁂𑀦𑀸𑀢𑀺 𑀅𑀥𑀺𑀧𑁆𑀧𑀬𑀸𑀲𑁄, 𑀲𑀯𑀺𑀲𑁂𑀲𑀁 𑀅𑀥𑀺𑀓𑀢𑁆𑀢𑀩𑁆𑀩𑀓𑀺𑀭𑀺𑀬𑀸 (𑀅. 𑀦𑀺. 𑀝𑀻. 𑁨.𑁩.𑁧𑁧𑁭). 𑀢𑁂𑀦𑀸𑀳 ‘‘𑀅𑀥𑀺𑀓𑀧𑁆𑀧𑀬𑁄𑀕𑁄’’𑀢𑀺.

𑀢𑀲𑁆𑀲 𑀧𑀲𑀸𑀤𑀲𑁆𑀲 𑀧𑀭𑀺𑀬𑁄𑀲𑀸𑀦𑀪𑀽𑀢𑀸𑀢𑀺 𑀢𑀲𑁆𑀲 𑀲𑀢𑁆𑀣𑀭𑀺 𑀥𑀫𑁆𑀫𑁂 𑀘 𑀧𑀲𑀸𑀤𑀲𑁆𑀲 𑀦𑀺𑀝𑁆𑀞𑀸𑀦𑀪𑀽𑀢𑀸. 𑀦𑀺𑀝𑁆𑀞𑀸𑀢𑀺 𑀫𑁄𑀓𑁆𑀔𑁄. 𑀲𑀫𑀬𑀯𑀸𑀤𑀻𑀦𑀜𑁆𑀳𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀤𑀼𑀧𑀤𑁂𑀲𑀓𑁂 𑀘 𑀧𑀲𑀸𑀤𑁄 𑀬𑀸𑀯𑀤𑁂𑀯 𑀫𑁄𑀓𑁆𑀔𑀸𑀥𑀺𑀕𑀫𑀦𑀝𑁆𑀞𑁄. 𑀤𑀺𑀝𑁆𑀞𑀺𑀕𑀢𑀺𑀓𑀸 𑀢𑀣𑀸 𑀢𑀣𑀸 𑀅𑀢𑁆𑀢𑀦𑁄 𑀮𑀤𑁆𑀥𑀺𑀯𑀲𑁂𑀦 𑀦𑀺𑀝𑁆𑀞𑀁 𑀧𑀭𑀺𑀓𑀧𑁆𑀧𑁂𑀦𑁆𑀢𑀺 𑀬𑁂𑀯𑀸𑀢𑀺 𑀆𑀳 ‘‘𑀦𑀺𑀝𑁆𑀞𑀁 𑀅𑀧𑀜𑁆𑀜𑀧𑁂𑀦𑁆𑀢𑁄 𑀦𑀸𑀫 𑀦𑀢𑁆𑀣𑀻’’𑀢𑀺. 𑀩𑁆𑀭𑀸𑀳𑁆𑀫𑀡𑀸𑀦𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀯𑀸𑀤𑀻𑀦𑀁. 𑀢𑁂𑀲𑀁 𑀏𑀓𑀘𑁆𑀘𑁂 𑀩𑁆𑀭𑀳𑁆𑀫𑀼𑀦𑀸 𑀲𑀮𑁄𑀓𑀢𑀸 𑀦𑀺𑀝𑁆𑀞𑀸𑀢𑀺 𑀯𑀤𑀦𑁆𑀢𑀺, 𑀏𑀓𑀘𑁆𑀘𑁂 𑀢𑀲𑁆𑀲 𑀲𑀫𑀻𑀧𑀢𑀸, 𑀏𑀓𑀘𑁆𑀘𑁂 𑀢𑁂𑀦 𑀲𑀁𑀬𑁄𑀕𑁄 𑀦𑀺𑀝𑁆𑀞𑀸𑀢𑀺 𑀯𑀤𑀦𑁆𑀢𑀺. 𑀢𑀢𑁆𑀣 𑀬𑁂 𑀲𑀮𑁄𑀓𑀢𑀸𑀯𑀸𑀤𑀺𑀦𑁄 𑀲𑀫𑀻𑀧𑀢𑀸𑀯𑀸𑀤𑀺𑀦𑁄 𑀘, 𑀢𑁂 𑀤𑁆𑀯𑁂𑀥𑀸𑀯𑀸𑀤𑀺𑀦𑁄, 𑀇𑀢𑀭𑁂 𑀅𑀤𑁆𑀯𑁂𑀥𑀸𑀯𑀸𑀤𑀺𑀦𑁄. 𑀲𑀩𑁆𑀩𑁂𑀧𑀺 𑀢𑁂 𑀅𑀢𑁆𑀣𑀢𑁄 𑀩𑁆𑀭𑀳𑁆𑀫𑀮𑁄𑀓𑀼𑀧𑀧𑀢𑁆𑀢𑀺𑀬𑀁𑀬𑁂𑀯 𑀦𑀺𑀝𑁆𑀞𑀸𑀲𑀜𑁆𑀜𑀺𑀦𑁄. 𑀢𑀢𑁆𑀣 𑀳𑀺 𑀦𑁂𑀲𑀁 𑀦𑀺𑀘𑁆𑀘𑀸𑀪𑀺𑀦𑀺𑀯𑁂𑀲𑁄 𑀬𑀣𑀸 𑀢𑀁 𑀩𑀓𑀲𑁆𑀲 𑀩𑁆𑀭𑀳𑁆𑀫𑀼𑀦𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀩𑁆𑀭𑀳𑁆𑀫𑀮𑁄𑀓𑁄 𑀦𑀺𑀝𑁆𑀞𑀸’’𑀢𑀺. 𑀩𑁆𑀭𑀳𑁆𑀫𑀮𑁄𑀓𑁄𑀢𑀺 𑀧𑀞𑀫𑀚𑁆𑀛𑀸𑀦𑀪𑀽𑀫𑀺. 𑀫𑀳𑀸𑀢𑀸𑀧𑀲𑀸𑀦𑀦𑁆𑀢𑀺 𑀯𑁂𑀔𑀦𑀲𑀸𑀤𑀺𑀢𑀸𑀧𑀲𑀸𑀦𑀁. 𑀫𑀳𑀸𑀩𑁆𑀭𑀳𑁆𑀫𑀸 𑀯𑀺𑀬 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀬𑀁 𑀆𑀪𑀲𑁆𑀲𑀭𑁂𑀲𑀼 𑀏𑀓𑁄 𑀲𑀩𑁆𑀩𑀲𑁂𑀝𑁆𑀞𑁄 𑀦𑀢𑁆𑀣𑀻𑀢𑀺 ‘‘𑀆𑀪𑀲𑁆𑀲𑀭𑀸’’𑀢𑀺 𑀧𑀼𑀣𑀼𑀯𑀘𑀦𑀁. 𑀧𑀭𑀺𑀩𑁆𑀩𑀸𑀚𑀓𑀸𑀦𑀦𑁆𑀢𑀺 𑀲𑀜𑁆𑀘𑀬𑀸𑀤𑀺𑀧𑀭𑀺𑀩𑁆𑀩𑀸𑀚𑀓𑀸𑀦𑀁. 𑀅𑀦𑁆𑀢𑁄 𑀘 𑀫𑀦𑁄 𑀘 𑀏𑀢𑀲𑁆𑀲 𑀦𑀢𑁆𑀣𑀻𑀢𑀺 𑀅𑀦𑀦𑁆𑀢𑀫𑀸𑀦𑀲𑁄. 𑀆𑀚𑀻𑀯𑀓𑀸𑀦𑀜𑁆𑀳𑀺 𑀲𑀩𑁆𑀩𑀤𑀸𑀪𑀸𑀯𑀢𑁄 𑀅𑀦𑀦𑁆𑀢𑁄, 𑀲𑀼𑀔𑀤𑀼𑀓𑁆𑀔𑀸𑀤𑀺𑀲𑀫𑀢𑀺𑀓𑁆𑀓𑀫𑀦𑀢𑁄 𑀅𑀫𑀸𑀦𑀲𑁄. 𑀇𑀫𑀺𑀦𑀸 𑀅𑀝𑁆𑀞𑀳𑀺 𑀮𑁄𑀓𑀥𑀫𑁆𑀫𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀢𑀁 𑀤𑀲𑁆𑀲𑁂𑀢𑀺.

𑀧𑀧𑀜𑁆𑀘𑁂 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑁄𑀯 𑀅𑀥𑀺𑀧𑁆𑀧𑁂𑀢𑀸 𑀫𑀫𑀗𑁆𑀓𑀸𑀭𑀅𑀳𑀗𑁆𑀓𑀸𑀭𑀯𑀺𑀕𑀫𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀬𑀣𑀸 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀏𑀓𑁄𑀯 𑀓𑀺𑀮𑁂𑀲𑁄 𑀮𑁄𑀪𑁄 𑀆𑀕𑀢𑁄, 𑀏𑀯𑀁 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀢𑀬𑁄 𑀓𑀺𑀮𑁂𑀲𑀸 𑀆𑀕𑀢𑀸 ‘‘𑀤𑁄𑀲𑁄 𑀫𑁄𑀳𑁄 𑀤𑀺𑀝𑁆𑀞𑀻’’𑀢𑀺. ‘‘𑀲𑀤𑁄𑀲𑀲𑁆𑀲𑀸’’𑀢𑀺 𑀳𑀺 𑀯𑀼𑀢𑁆𑀢𑀝𑁆𑀞𑀸𑀦𑁂 𑀧𑀝𑀺𑀖𑀁 𑀅𑀓𑀼𑀲𑀮𑀫𑀽𑀮𑀁 𑀕𑀳𑀺𑀢𑀁, ‘‘𑀧𑀝𑀺𑀯𑀺𑀭𑀼𑀤𑁆𑀥𑀲𑁆𑀲𑀸’’𑀢𑀺 𑀯𑀺𑀭𑁄𑀥𑁄, ‘‘𑀲𑀫𑁄𑀳𑀲𑁆𑀲𑀸’’𑀢𑀺 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁, ‘‘𑀅𑀯𑀺𑀤𑁆𑀤𑀲𑀼𑀦𑁄’’𑀢𑀺 𑀫𑀮𑁆𑀬𑀁, 𑀅𑀲𑀫𑁆𑀧𑀚𑀜𑁆𑀜𑀁 𑀯𑀸, ‘‘𑀲𑀉𑀧𑀸𑀤𑀸𑀦𑀲𑁆𑀲𑀸’’𑀢𑀺 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀕𑀳𑀡𑀁, ‘‘𑀧𑀧𑀜𑁆𑀘𑀸𑀭𑀸𑀫𑀲𑁆𑀲𑀸’’𑀢𑀺 𑀧𑀧𑀜𑁆𑀘𑀼𑀧𑁆𑀧𑀢𑁆𑀢𑀺𑀯𑀲𑁂𑀦.

𑀆𑀓𑀸𑀭𑀢𑁄𑀢𑀺 𑀧𑀯𑀢𑁆𑀢𑀺𑀆𑀓𑀸𑀭𑀢𑁄. 𑀧𑀤𑀦𑁆𑀢𑀭𑁂𑀦 𑀭𑀸𑀕𑀯𑀺𑀲𑁂𑀲𑀲𑁆𑀲 𑀯𑀼𑀘𑁆𑀘𑀫𑀸𑀦𑀢𑁆𑀢𑀸𑀆𑀤𑀺𑀢𑁄 𑀯𑀼𑀢𑁆𑀢𑀁 𑀲𑀭𑀸𑀕𑀯𑀘𑀦𑀁 𑀑𑀴𑀸𑀭𑀺𑀓𑀁 𑀭𑀸𑀕𑀯𑀺𑀲𑀬𑀦𑁆𑀢𑀺 𑀆𑀳 ‘‘𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀯𑀲𑁂𑀦𑀸’’𑀢𑀺. 𑀕𑀳𑀡𑀯𑀲𑁂𑀦𑀸𑀢𑀺 𑀤𑀴𑁆𑀳𑀕𑁆𑀕𑀳𑀡𑀯𑀲𑁂𑀦. ‘‘𑀅𑀦𑀼𑀭𑀼𑀤𑁆𑀥𑀧𑀝𑀺𑀯𑀺𑀭𑀼𑀤𑁆𑀥𑀲𑁆𑀲𑀸’’𑀢𑀺 𑀏𑀓𑀧𑀤𑀯𑀲𑁂𑀦 𑀧𑀸𑀴𑀺𑀬𑀁 𑀆𑀕𑀢𑀢𑁆𑀢𑀸 𑀏𑀓𑀚𑁆𑀛𑀁 𑀧𑀤𑀼𑀤𑁆𑀥𑀸𑀭𑁄 𑀓𑀢𑁄. 𑀢𑀢𑁆𑀣 𑀧𑀦 ‘‘𑀅𑀦𑀼𑀭𑀼𑀤𑁆𑀥𑀲𑁆𑀲𑀸’’𑀢𑀺 𑀲𑀼𑀪𑀯𑀲𑁂𑀦𑀸𑀢𑀺 𑀏𑀯𑀫𑀢𑁆𑀣𑁄 𑀯𑀢𑁆𑀢𑀩𑁆𑀩𑁄. 𑀦 𑀳𑀺 𑀧𑀝𑀺𑀯𑀺𑀭𑀼𑀚𑁆𑀛𑀦𑀁 𑀲𑀼𑀪𑀯𑀲𑁂𑀦 𑀳𑁄𑀢𑀺. 𑀧𑀧𑀜𑁆𑀘𑀼𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀓𑀺𑀮𑁂𑀲𑀓𑀫𑁆𑀫𑀯𑀺𑀧𑀸𑀓𑀸𑀦𑀁 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀧𑀘𑁆𑀘𑀬𑀢𑀸𑀬 𑀲𑀁𑀲𑀸𑀭𑀲𑁆𑀲 𑀧𑀧𑀜𑁆𑀘𑀦𑀁 𑀧𑀧𑀜𑁆𑀘𑁄, 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑀤𑀲𑁆𑀲𑀦𑀯𑀲𑁂𑀦. 𑀢𑀡𑁆𑀳𑀸 𑀳𑀺 𑀪𑀯𑀼𑀧𑁆𑀧𑀢𑁆𑀢𑀺𑀬𑀸 𑀯𑀺𑀲𑁂𑀲𑀧𑀘𑁆𑀘𑀬𑁄. 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀢𑀡𑁆𑀳𑀸𑀧𑀘𑁆𑀘𑀬𑀲𑁆𑀲 𑀉𑀧𑀸𑀤𑀸𑀦𑀲𑁆𑀲 𑀤𑀲𑁆𑀲𑀦𑀯𑀲𑁂𑀦, 𑀬𑀤𑀯𑀢𑁆𑀣𑀸 𑀢𑀡𑁆𑀳𑀸 𑀉𑀧𑀸𑀤𑀸𑀦𑀲𑁆𑀲 𑀧𑀘𑁆𑀘𑀬𑁄, 𑀢𑀤𑀯𑀢𑁆𑀣𑀸𑀤𑀲𑁆𑀲𑀦𑀯𑀲𑁂𑀦. 𑀨𑀮𑁂𑀦 𑀳𑀺 𑀳𑁂𑀢𑀼𑀯𑀺𑀲𑁂𑀲𑀓𑀺𑀢𑁆𑀢𑀦𑀫𑁂𑀢𑀦𑁆𑀢𑀺. 𑀏𑀯𑀁 𑀯𑀺𑀤𑁆𑀥𑀁𑀲𑁂𑀣𑀸𑀢𑀺 𑀓𑀸𑀫𑀭𑀸𑀕𑀪𑀯𑀢𑀡𑁆𑀳𑀸𑀤𑀺𑀯𑀲𑁂𑀦 𑀮𑁄𑀪𑀁 𑀓𑀲𑁆𑀫𑀸 𑀏𑀯𑀁 𑀯𑀺𑀧𑁆𑀧𑀓𑀺𑀭𑁂𑀣. 𑀢𑀡𑁆𑀳𑀸𑀓𑀭𑀡𑀯𑀲𑁂𑀦𑀸𑀢𑀺 𑀢𑀡𑁆𑀳𑀸𑀬𑀦𑀓𑀭𑀡𑀯𑀲𑁂𑀦 𑀲𑀼𑀪𑀸𑀓𑀸𑀭𑀕𑁆𑀕𑀳𑀡𑀯𑀲𑁂𑀦. 𑀲𑀼𑀪𑀦𑁆𑀢𑀺 𑀳𑀺 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑁄 𑀭𑀸𑀕𑁄 ‘‘𑀲𑀼𑀪’’𑀦𑁆𑀢𑀺 𑀯𑀼𑀢𑁆𑀢𑁄.

𑁧𑁪𑁨. 𑀯𑀤𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀸𑀤𑁄, 𑀤𑀺𑀝𑁆𑀞𑀺𑀯𑀸𑀤𑁄. 𑀤𑀺𑀝𑁆𑀞𑀺𑀯𑀲𑁂𑀦 𑀳𑀺 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘, 𑀅𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 𑀘 𑀤𑀺𑀝𑁆𑀞𑀺𑀕𑀢𑀺𑀓𑀸 𑀧𑀜𑁆𑀜𑀧𑁂𑀦𑁆𑀢𑀺. 𑀢𑁂𑀦𑀸𑀳 ‘‘𑀤𑁆𑀯𑁂𑀫𑀸, 𑀪𑀺𑀓𑁆𑀔𑀯𑁂, 𑀤𑀺𑀝𑁆𑀞𑀺𑀬𑁄’’𑀢𑀺 (𑀫. 𑀦𑀺. 𑁧.𑁧𑁪𑁨). 𑀢𑀡𑁆𑀳𑀸𑀭𑀳𑀺𑀢𑀸𑀬 𑀤𑀺𑀝𑁆𑀞𑀺𑀬𑀸 𑀅𑀪𑀸𑀯𑀢𑁄 𑀢𑀡𑁆𑀳𑀸𑀯𑀲𑁂𑀦𑁂𑀯 𑀘 𑀅𑀢𑁆𑀢𑀦𑁄 𑀲𑀲𑁆𑀲𑀢𑀪𑀸𑀯𑀸𑀪𑀺𑀦𑀺𑀯𑁂𑀲𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦𑀸’’𑀢𑀺. 𑀅𑀮𑁆𑀮𑀻𑀦𑀸𑀢𑀺 𑀦𑀺𑀲𑁆𑀲𑀺𑀢𑀸. 𑀉𑀧𑀕𑀢𑀸𑀢𑀺 𑀅𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀏𑀓𑀺𑀪𑀸𑀯𑀫𑀺𑀯 𑀕𑀢𑀸. 𑀅𑀚𑁆𑀛𑁄𑀲𑀺𑀢𑀸𑀢𑀺 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀸𑀧𑀺𑀢𑀸 𑀯𑀺𑀬 𑀢𑀤𑀦𑁆𑀢𑁄𑀕𑀥𑀸. 𑀢𑁂𑀦𑀸𑀳 ‘‘𑀅𑀦𑀼𑀧𑀯𑀺𑀝𑁆𑀞𑀸’’𑀢𑀺. 𑀬𑀣𑀸 𑀕𑀳𑀝𑁆𑀞𑀸𑀦𑀁 𑀓𑀸𑀫𑀚𑁆𑀛𑁄𑀲𑀸𑀦𑀁 𑀯𑀺𑀯𑀸𑀤𑀫𑀽𑀮𑀁, 𑀏𑀯𑀁 𑀧𑀩𑁆𑀩𑀚𑀺𑀢𑀸𑀦𑀁 𑀤𑀺𑀝𑁆𑀞𑀚𑁆𑀛𑁄𑀲𑀸𑀦𑀦𑁆𑀢𑀺 𑀆𑀳 ‘‘𑀯𑀺𑀪𑀯𑀤𑀺𑀝𑁆𑀞𑀺𑀬𑀸 𑀢𑁂 𑀧𑀝𑀺𑀯𑀺𑀭𑀼𑀤𑁆𑀥𑀸’’𑀢𑀺. 𑀤𑀺𑀝𑁆𑀞𑀺𑀯𑀺𑀭𑁄𑀥𑁂𑀦 𑀳𑀺 𑀤𑀺𑀝𑁆𑀞𑀺𑀕𑀢𑀺𑀓𑀯𑀺𑀭𑁄𑀥𑁄.

𑀔𑀡𑀺𑀓𑀲𑀫𑀼𑀤𑀬𑁄 𑀉𑀧𑁆𑀧𑀸𑀤𑀓𑁆𑀔𑀡𑁄𑀢𑀺 𑀆𑀳 ‘‘𑀤𑀺𑀝𑁆𑀞𑀻𑀦𑀁 𑀦𑀺𑀩𑁆𑀩𑀢𑁆𑀢𑀻’’𑀢𑀺. 𑀤𑀺𑀝𑁆𑀞𑀺𑀦𑀺𑀩𑁆𑀩𑀢𑁆𑀢𑀺𑀕𑁆𑀕𑀳𑀡𑁂𑀦𑁂𑀯 𑀘𑁂𑀢𑁆𑀣 𑀬𑀣𑀸 𑀤𑀺𑀝𑁆𑀞𑀻𑀦𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀢𑀸 𑀯𑀺𑀪𑀸𑀯𑀺𑀢𑀸, 𑀏𑀯𑀁 𑀤𑀺𑀝𑁆𑀞𑀺𑀯𑀢𑁆𑀣𑀼𑀦𑁄𑀧𑀻𑀢𑀺 𑀉𑀪𑀬𑁂𑀲𑀫𑁆𑀧𑀺 𑀅𑀦𑀺𑀘𑁆𑀘𑀢𑀸 𑀤𑀼𑀓𑁆𑀔𑀢𑀸 𑀅𑀦𑀢𑁆𑀢𑀢𑀸 𑀘 𑀯𑀺𑀪𑀸𑀯𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀸𑀦𑀺 𑀧𑀝𑀺𑀲𑀫𑁆𑀪𑀺𑀤𑀸𑀦𑀬𑁂𑀦 (𑀧𑀝𑀺. 𑀫. 𑁧.𑁧𑁨𑁨) ‘‘𑀧𑀘𑁆𑀘𑀬𑀲𑀫𑀼𑀤𑀬𑁄 𑀅𑀝𑁆𑀞 𑀞𑀸𑀦𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀔𑀦𑁆𑀥𑀸𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀔𑀦𑁆𑀥𑀸𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁 𑀆𑀭𑀫𑁆𑀫𑀡𑀝𑁆𑀞𑁂𑀦 ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 (𑀲𑀁. 𑀦𑀺. 𑁩.𑁮𑁧; 𑁪.𑁩𑁪𑁫). 𑀅𑀯𑀺𑀚𑁆𑀚𑀸𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁 𑀉𑀧𑀦𑀺𑀲𑁆𑀲𑀬𑀸𑀤𑀺𑀯𑀲𑁂𑀦 𑀧𑀘𑁆𑀘𑀬𑀪𑀸𑀯𑀢𑁄. 𑀬𑀣𑀸𑀳 𑁋 ‘‘𑀅𑀲𑁆𑀲𑀼𑀢𑀯𑀸, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄’’𑀢𑀺𑀆𑀤𑀺 (𑀫. 𑀦𑀺. 𑁧.𑁨, 𑁪𑁬𑁧; 𑀲𑀁. 𑀦𑀺. 𑁩.𑁧, 𑁭). 𑀨𑀲𑁆𑀲𑁄𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁. 𑀬𑀣𑀸 𑀘𑀸𑀳 ‘‘𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸 (𑀤𑀻. 𑀦𑀺. 𑁧.𑁧𑁧𑁮-𑁧𑁩𑁦), 𑀨𑀼𑀲𑁆𑀲 𑀨𑀼𑀲𑁆𑀲 𑀧𑀝𑀺𑀲𑀁𑀯𑁂𑀤𑀺𑀬𑀦𑁆𑀢𑀻’’𑀢𑀺 (𑀤𑀻. 𑀦𑀺. 𑁧.𑁧𑁪𑁪) 𑀘. 𑀲𑀜𑁆𑀜𑀸𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀲𑀜𑁆𑀜𑀸𑀦𑀺𑀤𑀸𑀦𑀸 𑀳𑀺 𑀧𑀧𑀜𑁆𑀘𑀲𑀗𑁆𑀔𑀸𑀢𑀺 (𑀲𑀼. 𑀦𑀺. 𑁮𑁮𑁦), 𑀧𑀣𑀯𑀺𑀁 𑀧𑀣𑀯𑀺𑀢𑁄 𑀲𑀜𑁆𑀜𑀢𑁆𑀯𑀸’’𑀢𑀺 (𑀫. 𑀦𑀺. 𑁧.𑁨) 𑀘 𑀆𑀤𑀺. 𑀯𑀺𑀢𑀓𑁆𑀓𑁄𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀢𑀓𑁆𑀓𑀜𑁆𑀘 𑀤𑀺𑀝𑁆𑀞𑀻𑀲𑀼 𑀧𑀓𑀧𑁆𑀧𑀬𑀺𑀢𑁆𑀯𑀸, 𑀲𑀘𑁆𑀘𑀁 𑀫𑀼𑀲𑀸𑀢𑀺 𑀤𑁆𑀯𑀬𑀥𑀫𑁆𑀫𑀫𑀸𑀳𑀽’’𑀢𑀺 (𑀲𑀼. 𑀦𑀺. 𑁮𑁯𑁨; 𑀫𑀳𑀸𑀦𑀺. 𑁧𑁨𑁧) ‘‘𑀢𑀓𑁆𑀓𑀻 𑀳𑁄𑀢𑀺 𑀯𑀻𑀫𑀁𑀲𑀻’’𑀢𑀺 (𑀤𑀻. 𑀦𑀺. 𑁧.𑁩𑁪) 𑀘 𑀆𑀤𑀺. 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁. 𑀬𑀣𑀸𑀳 𑀪𑀕𑀯𑀸 ‘‘𑀢𑀲𑁆𑀲𑁂𑀯 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀢𑁄 𑀙𑀦𑁆𑀦𑀁 𑀤𑀺𑀝𑁆𑀞𑀻𑀦𑀁 𑀅𑀜𑁆𑀜𑀢𑀭𑀸 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺, 𑀅𑀢𑁆𑀣𑀺 𑀫𑁂 𑀅𑀢𑁆𑀢𑀸𑀢𑀺 𑀅𑀲𑁆𑀲 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺 (𑀫. 𑀦𑀺. 𑁧.𑁧𑁯). 𑀲𑀫𑀼𑀝𑁆𑀞𑀸𑀢𑀺 𑀏𑀢𑁂𑀦𑀸𑀢𑀺 𑀲𑀫𑀼𑀝𑁆𑀞𑀸𑀦𑀁, 𑀢𑀲𑁆𑀲 𑀪𑀸𑀯𑁄 𑀲𑀫𑀼𑀝𑁆𑀞𑀸𑀦𑀝𑁆𑀞𑁄, 𑀢𑁂𑀦. 𑀔𑀡𑀺𑀓𑀢𑁆𑀣𑀗𑁆𑀕𑀫𑁄 𑀔𑀡𑀺𑀓𑀦𑀺𑀭𑁄𑀥𑁄. 𑀧𑀘𑁆𑀘𑀬𑀢𑁆𑀣𑀗𑁆𑀕𑀫𑁄 𑀅𑀯𑀺𑀚𑁆𑀚𑀸𑀤𑀻𑀦𑀁 𑀅𑀘𑁆𑀘𑀦𑁆𑀢𑀦𑀺𑀭𑁄𑀥𑁄. 𑀲𑁄 𑀧𑀦 𑀬𑁂𑀦 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄’’𑀢𑀺 𑀆𑀳. 𑀘𑀢𑁆𑀢𑀸𑀭𑁄 𑀳𑀺 𑀅𑀭𑀺𑀬𑀫𑀕𑁆𑀕𑀸 𑀬𑀣𑀸𑀭𑀳𑀁 𑀢𑀲𑁆𑀲 𑀢𑀲𑁆𑀲 𑀲𑀗𑁆𑀔𑀸𑀭𑀕𑀢𑀲𑁆𑀲 𑀅𑀘𑁆𑀘𑀦𑁆𑀢𑀦𑀺𑀭𑁄𑀥𑀳𑁂𑀢𑀼, 𑀔𑀡𑀺𑀓𑀦𑀺𑀭𑁄𑀥𑁄 𑀧𑀦 𑀅𑀳𑁂𑀢𑀼𑀓𑁄.

𑀆𑀦𑀺𑀲𑀁𑀲𑀦𑁆𑀢𑀺 𑀉𑀤𑀬𑀁. 𑀲𑁄 𑀧𑀦 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀯𑀲𑁂𑀦 𑀤𑀼𑀯𑀺𑀥𑁄. 𑀢𑀢𑁆𑀣 𑀲𑀫𑁆𑀧𑀭𑀸𑀬𑀺𑀓𑁄 𑀤𑀼𑀕𑁆𑀕𑀢𑀺𑀧𑀭𑀺𑀓𑀺𑀮𑁂𑀲𑀢𑀸𑀬𑀆𑀤𑀻𑀦𑀯𑀧𑀓𑁆𑀔𑀺𑀓𑁄 𑀏𑀯𑀸𑀢𑀺 𑀇𑀢𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀁 𑀲𑀦𑁆𑀥𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀆𑀤𑀻𑀦𑀯𑀫𑁆𑀧𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀺𑀝𑁆𑀞𑀺𑀕𑁆𑀕𑀳𑀡𑀫𑀽𑀮𑀓𑀁 𑀉𑀧𑀤𑁆𑀤𑀯’’𑀦𑁆𑀢𑀺𑀆𑀤𑀺𑀫𑀸𑀳. 𑀲𑁄𑀢𑀺𑀆𑀤𑀻𑀦𑀯𑁄. 𑀆𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀦𑀕𑁆𑀕𑀺𑀬𑀸𑀦𑀲𑀦𑀲𑀗𑁆𑀓𑀝𑀺𑀯𑀢𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀦𑀺𑀲𑁆𑀲𑀭𑀢𑀺 𑀏𑀢𑁂𑀦𑀸𑀢𑀺 𑀦𑀺𑀲𑁆𑀲𑀭𑀡𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑁂 𑀤𑀲𑁆𑀲𑀦𑀫𑀕𑁆𑀕𑁄 𑀏𑀯 𑀤𑀺𑀝𑁆𑀞𑀻𑀦𑀁 𑀦𑀺𑀲𑁆𑀲𑀭𑀡𑀁 𑀲𑀺𑀬𑀸, 𑀢𑀲𑁆𑀲 𑀧𑀦 𑀅𑀢𑁆𑀣𑀗𑁆𑀕𑀫𑀧𑀭𑀺𑀬𑀸𑀬𑁂𑀦 𑀕𑀳𑀺𑀢𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀢𑀦𑀺𑀲𑁆𑀲𑀝𑀁 𑀦𑀺𑀩𑁆𑀩𑀸𑀦𑀁 𑀤𑀺𑀝𑁆𑀞𑀻𑀳𑀺𑀧𑀺 𑀦𑀺𑀲𑁆𑀲𑀝𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀤𑀺𑀝𑁆𑀞𑀻𑀦𑀁 𑀦𑀺𑀲𑁆𑀲𑀭𑀡𑀁 𑀦𑀸𑀫 𑀦𑀺𑀩𑁆𑀩𑀸𑀦’’𑀦𑁆𑀢𑀺. 𑀇𑀫𑀺𑀦𑀸𑀢𑀺𑀆𑀤𑀻𑀲𑀼 𑀯𑀢𑁆𑀢𑀩𑁆𑀩𑀁 𑀅𑀦𑀼𑀬𑁄𑀕𑀯𑀢𑁆𑀢𑁂 𑀯𑀼𑀢𑁆𑀢𑀦𑀬𑀫𑁂𑀯.

𑁧𑁪𑁩. 𑀤𑀺𑀝𑁆𑀞𑀺𑀘𑁆𑀙𑁂𑀤𑀦𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀲𑀩𑁆𑀩𑀼𑀧𑀸𑀤𑀸𑀦𑀧𑀭𑀺𑀜𑁆𑀜𑀸𑀤𑀲𑁆𑀲𑀦𑁂𑀦 𑀲𑀩𑁆𑀩𑀲𑁄 𑀤𑀺𑀝𑁆𑀞𑀻𑀦𑀁 𑀲𑀫𑀼𑀘𑁆𑀙𑁂𑀤𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄. 𑀯𑀼𑀢𑁆𑀢𑀸𑀬𑁂𑀯𑀸𑀢𑀺 𑁋

‘‘𑀉𑀧𑀸𑀤𑀸𑀦𑀸𑀦𑀺 𑀘𑀢𑁆𑀢𑀸𑀭𑀺, 𑀢𑀸𑀦𑀺 𑀅𑀢𑁆𑀣𑀯𑀺𑀪𑀸𑀕𑀢𑁄;

𑀥𑀫𑁆𑀫𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀸, 𑀓𑀫𑀢𑁄 𑀘 𑀯𑀺𑀪𑀸𑀯𑀬𑁂’’𑀢𑀺. (𑀯𑀺𑀲𑀼𑀤𑁆𑀥𑀺. 𑁨.𑁬𑁪𑁫) 𑁋

𑀕𑀸𑀣𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀅𑀢𑁆𑀣𑀯𑀺𑀪𑀸𑀕𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀸𑀬𑁂𑀯. 𑀓𑀸𑀫𑀁 𑀇𑀢𑁄 𑀩𑀸𑀳𑀺𑀭𑀓𑀸𑀦𑀁 ‘‘𑀇𑀫𑀸𑀦𑀺 𑀉𑀧𑀸𑀤𑀸𑀦𑀸𑀦𑀺 𑀏𑀢𑁆𑀢𑀓𑀸𑀦𑀺 𑀘𑀢𑁆𑀢𑀸𑀭𑀺, 𑀦 𑀇𑀢𑁄 𑀪𑀺𑀬𑁆𑀬𑁄’’𑀢𑀺 𑀈𑀤𑀺𑀲𑀁 𑀜𑀸𑀡𑀁 𑀦𑀢𑁆𑀣𑀺, 𑀓𑁂𑀯𑀮𑀁 𑀧𑀦 𑀓𑁂𑀘𑀺 ‘‘𑀓𑀸𑀫𑀸 𑀧𑀳𑀸𑀢𑀩𑁆𑀩𑀸’’𑀢𑀺 𑀯𑀤𑀦𑁆𑀢𑀺, 𑀓𑁂𑀘𑀺 ‘‘𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄𑀢𑀺 𑀘, 𑀫𑀺𑀘𑁆𑀙𑀸’’𑀢𑀺 𑀯𑀤𑀦𑁆𑀢𑀺, 𑀅𑀧𑀭𑁂 ‘‘𑀲𑀻𑀮𑀩𑁆𑀩𑀢𑁂𑀦 𑀲𑀼𑀤𑁆𑀥𑀻𑀢𑀺 𑀘, 𑀫𑀺𑀘𑁆𑀙𑀸’’𑀢𑀺 𑀯𑀤𑀦𑁆𑀢𑀺, 𑀅𑀢𑁆𑀢𑀤𑀺𑀝𑁆𑀞𑀺𑀬𑀸 𑀧𑀦 𑀫𑀺𑀘𑁆𑀙𑀸𑀪𑀸𑀯𑀁 𑀲𑀩𑁆𑀩𑀲𑁄 𑀦 𑀚𑀸𑀦𑀦𑁆𑀢𑀺 𑀏𑀯. 𑀬𑀢𑁆𑀢𑀓𑀁 𑀧𑀦 𑀚𑀸𑀦𑀦𑁆𑀢𑀺, 𑀢𑀲𑁆𑀲𑀧𑀺 𑀅𑀘𑁆𑀘𑀦𑁆𑀢𑀧𑁆𑀧𑀳𑀸𑀦𑀁 𑀦 𑀚𑀸𑀦𑀦𑁆𑀢𑀺, 𑀢𑀣𑀸𑀧𑀺 𑀲𑀩𑁆𑀩𑀲𑁆𑀲 𑀧𑀭𑀺𑀜𑁆𑀜𑁂𑀬𑁆𑀬𑀲𑁆𑀲 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀜𑁆𑀜𑀧𑁂𑀫𑀇𑀘𑁆𑀘𑁂𑀯 𑀢𑀺𑀝𑁆𑀞𑀦𑁆𑀢𑀺. 𑀏𑀯𑀁𑀪𑀽𑀢𑀸𑀦𑀁 𑀧𑀦 𑀦𑁂𑀲𑀁 𑀢𑀢𑁆𑀣 𑀬𑀸𑀤𑀺𑀲𑀻 𑀧𑀝𑀺𑀧𑀢𑁆𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀲𑀢𑁆𑀣𑀸 ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀦𑁆𑀢𑀻𑀢𑀺 𑀲𑀁𑀯𑀺𑀚𑁆𑀚𑀦𑁆𑀢𑀺. 𑀢𑁂𑀦 𑀢𑁂𑀲𑀁 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀯𑀺𑀚𑁆𑀚𑀫𑀸𑀦𑀢𑀸𑀬 𑀅𑀯𑀺𑀘𑁆𑀙𑁂𑀤𑀢𑀁 𑀤𑀲𑁆𑀲𑁂𑀢𑀺. 𑀏𑀓𑁂𑀢𑀺 𑀏𑀓𑀘𑁆𑀘𑁂. 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀢𑀺 𑀧𑀩𑁆𑀩𑀚𑁆𑀚𑀼𑀧𑀕𑀫𑀦𑁂𑀦 𑀲𑀫𑀡𑀸, 𑀚𑀸𑀢𑀺𑀫𑀢𑁆𑀢𑁂𑀦 𑀘 𑀩𑁆𑀭𑀸𑀳𑁆𑀫𑀡𑀸. 𑀲𑀩𑁆𑀩𑁂𑀲𑀦𑁆𑀢𑀺 𑀅𑀦𑀯𑀲𑁂𑀲𑀸𑀦𑀁 𑀉𑀧𑀸𑀤𑀸𑀦𑀸𑀦𑀁 𑀲𑀫𑀢𑀺𑀓𑁆𑀓𑀫𑀁 𑀧𑀳𑀸𑀦𑀁. 𑀲𑀫𑁆𑀫𑀸 𑀦 𑀧𑀜𑁆𑀜𑀧𑁂𑀦𑁆𑀢𑀻𑀢𑀺 𑀬𑁂𑀲𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀲𑀫𑁆𑀫𑀸 𑀧𑀭𑀺𑀜𑁆𑀜𑀁 𑀦 𑀧𑀜𑁆𑀜𑀧𑁂𑀦𑁆𑀢𑀺. 𑀇𑀤𑀸𑀦𑀺 𑀢𑀁 𑀅𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀓𑁂𑀘𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑁄𑀢𑀺𑀓-𑀓𑀼𑀝𑀻𑀘𑀓-𑀩𑀳𑀽𑀤𑀓-𑀳𑀁𑀲-𑀧𑀭𑀫𑀳𑀁𑀲-𑀓𑀸𑀚𑀓-𑀢𑀺𑀤𑀡𑁆𑀟-𑀫𑁄𑀦𑀯𑀢-𑀲𑁂𑀯-𑀧𑀸𑀭𑀼𑀧𑀓-𑀧𑀜𑁆𑀘𑀫𑀭𑀢𑁆𑀢𑀺𑀓- 𑀲𑁄𑀫𑀓𑀸𑀭𑀓-𑀫𑀼𑀕𑀩𑁆𑀩𑀢-𑀘𑀭𑀩𑀸𑀓-𑀢𑀸𑀧𑀲-𑀦𑀺𑀕𑀦𑁆𑀣𑀸-𑀚𑀻𑀯𑀓-𑀇𑀲𑀺-𑀧𑀸𑀭𑀸𑀬𑀦𑀺𑀓-𑀧𑀜𑁆𑀘𑀸𑀢𑀧𑀺𑀓-𑀓𑀸𑀧𑀺𑀮- 𑀓𑀸𑀡𑀸𑀤-𑀲𑀁𑀲𑀸𑀭𑀫𑁄𑀘𑀓-𑀅𑀕𑁆𑀕𑀺𑀪𑀢𑁆𑀢𑀺𑀓-𑀫𑀕𑀯𑀢𑀺𑀓-𑀕𑁄𑀯𑀢𑀺𑀓-𑀓𑀼𑀓𑁆𑀓𑀼𑀭𑀯𑀢𑀺𑀓-𑀓𑀸𑀫𑀡𑁆𑀟𑀮𑀼𑀓- 𑀯𑀕𑁆𑀕𑀼𑀮𑀺𑀯𑀢𑀺𑀓-𑀏𑀓𑀲𑀸𑀝𑀓-𑀑𑀤𑀓𑀲𑀼𑀤𑁆𑀥𑀺𑀓-𑀲𑀭𑀻𑀭𑀲𑀦𑁆𑀢𑀸𑀧𑀓-𑀲𑀻𑀮𑀲𑀼𑀤𑁆𑀥𑀺𑀓-𑀛𑀸𑀦𑀲𑀼𑀤𑁆𑀥𑀺𑀓-𑀘𑀢𑀼𑀩𑁆𑀩𑀺𑀥- 𑀲𑀲𑁆𑀲𑀢𑀯𑀸𑀤𑀸𑀤𑀬𑁄 𑀙𑀦𑁆𑀦𑀯𑀼𑀢𑀺 𑀢𑀡𑁆𑀳𑀸𑀧𑀸𑀲𑁂𑀦 𑀟𑀁𑀲𑀦𑀢𑁄, 𑀅𑀭𑀺𑀬𑀥𑀫𑁆𑀫𑀲𑁆𑀲 𑀯𑀸 𑀯𑀺𑀩𑀸𑀥𑀦𑀢𑁄 𑀧𑀸𑀲𑀡𑁆𑀟𑀸. 𑀯𑀢𑁆𑀣𑀼𑀧𑀝𑀺𑀲𑁂𑀯𑀦𑀁 𑀓𑀸𑀫𑀦𑁆𑀢𑀺 𑀩𑁆𑀬𑀸𑀧𑀸𑀭𑀲𑁆𑀲 𑀯𑀢𑁆𑀣𑀼𑀦𑁄 𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑀁 𑀓𑀸𑀫𑀁. 𑀣𑁂𑀬𑁆𑀬𑁂𑀦 𑀲𑁂𑀯𑀦𑁆𑀢𑀻𑀢𑀺 𑀧𑀝𑀺𑀳𑀢𑁆𑀣𑀆𑀤𑀺𑀲𑀫𑀜𑁆𑀜𑀸𑀬 𑀮𑁄𑀓𑀲𑁆𑀲 𑀯𑀘𑀦𑀯𑀲𑁂𑀦 𑀲𑁂𑀯𑀦𑁆𑀢𑀺. 𑀢𑀻𑀡𑀺 𑀓𑀸𑀭𑀡𑀸𑀦𑀻𑀢𑀺 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀦𑀺 𑀤𑀺𑀝𑁆𑀞𑀺𑀯𑀺𑀲𑁂𑀲𑀪𑀽𑀢𑀸𑀦𑀺 𑀯𑀝𑁆𑀝𑀓𑀸𑀭𑀡𑀸𑀦𑀺.

𑀅𑀢𑁆𑀣𑀲𑀮𑁆𑀮𑀸𑀧𑀺𑀓𑀸𑀢𑀺 𑀅𑀢𑁆𑀣𑀲𑁆𑀲 𑀲𑀮𑁆𑀮𑀸𑀧𑀺𑀓𑀸, 𑀤𑁆𑀯𑀺𑀦𑁆𑀦𑀁 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑀮𑁆𑀮𑀸𑀧𑀯𑀺𑀪𑀸𑀯𑀺𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑁆𑀯𑀺𑀦𑁆𑀦𑀜𑁆𑀳𑀺 𑀯𑀘𑀦𑀁 𑀲𑀮𑁆𑀮𑀸𑀧𑁄. 𑀢𑁂𑀦𑀸𑀳 ‘‘𑀧𑀣𑀯𑀻 𑀓𑀺𑀭𑀸’’𑀢𑀺𑀆𑀤𑀺.

𑀬𑁄 𑀢𑀺𑀢𑁆𑀣𑀺𑀬𑀸𑀦𑀁 𑀅𑀢𑁆𑀢𑀦𑁄 𑀲𑀢𑁆𑀣𑀭𑀺 𑀥𑀫𑁆𑀫𑁂 𑀲𑀳𑀥𑀫𑁆𑀫𑀺𑀓𑁂𑀲𑀼 𑀘 𑀧𑀲𑀸𑀤𑁄 𑀯𑀼𑀢𑁆𑀢𑁄, 𑀢𑀲𑁆𑀲 𑀅𑀦𑀸𑀬𑀢𑀦𑀕𑀢𑀢𑁆𑀢𑀸 𑀅𑀧𑁆𑀧𑀲𑀸𑀤𑀓𑀪𑀸𑀯𑀤𑀲𑁆𑀲𑀦𑀁 𑀧𑀲𑀸𑀤𑀧𑀘𑁆𑀙𑁂𑀤𑁄. 𑀢𑀣𑀸𑀧𑀯𑀢𑁆𑀢𑁄 𑀯𑀸𑀤𑁄 𑀧𑀲𑀸𑀤𑀧𑀘𑁆𑀙𑁂𑀤𑀯𑀸𑀤𑁄 𑀯𑀼𑀢𑁆𑀢𑁄. 𑀏𑀯𑀭𑀽𑀧𑁂𑀢𑀺 𑀈𑀤𑀺𑀲𑁂 𑀯𑀼𑀢𑁆𑀢𑀦𑀬𑁂𑀦 𑀓𑀺𑀮𑁂𑀲𑀸𑀦𑀁 𑀅𑀦𑀼𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑁂. 𑀥𑀫𑁆𑀫𑁂𑀢𑀺 𑀥𑀫𑁆𑀫𑀧𑀢𑀺𑀭𑀽𑀧𑀓𑁂. 𑀯𑀺𑀦𑀬𑁂𑀢𑀺 𑀯𑀺𑀦𑀬𑀧𑀢𑀺𑀭𑀽𑀧𑀓𑁂. 𑀢𑀺𑀢𑁆𑀣𑀺𑀬𑀸 𑀳𑀺 𑀓𑁄𑀳𑀜𑁆𑀜𑁂 𑀞𑀢𑁆𑀯𑀸 𑀮𑁄𑀓𑀁 𑀯𑀜𑁆𑀘𑁂𑀦𑁆𑀢𑀸 𑀥𑀫𑁆𑀫𑀁 𑀓𑀣𑁂𑀫𑀸𑀢𑀺 ‘‘𑀲𑀢𑁆𑀢𑀺𑀫𑁂 𑀓𑀸𑀬𑀸 𑀅𑀓𑀝𑀸 𑀅𑀓𑀝𑀯𑀺𑀥𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁧𑁭𑁪) 𑀬𑀁 𑀓𑀺𑀜𑁆𑀘𑀺 𑀓𑀣𑁂𑀢𑁆𑀯𑀸 𑀢𑀣𑀸 ‘‘𑀯𑀺𑀦𑀬𑀁 𑀧𑀜𑁆𑀜𑀧𑁂𑀫𑀸’’𑀢𑀺 𑀕𑁄𑀲𑀻𑀮𑀯𑀕𑁆𑀕𑀼𑀮𑀺𑀯𑀢𑀸𑀤𑀻𑀦𑀺 𑀧𑀜𑁆𑀜𑀧𑁂𑀢𑁆𑀯𑀸 𑀢𑀸𑀤𑀺𑀲𑀁 𑀲𑀸𑀯𑀓𑁂 𑀲𑀺𑀓𑁆𑀔𑀸𑀧𑁂𑀢𑁆𑀯𑀸 ‘‘𑀥𑀫𑁆𑀫𑀯𑀺𑀦𑀬𑁄’’𑀢𑀺 𑀓𑀣𑁂𑀦𑁆𑀢𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 ‘‘𑀥𑀫𑁆𑀫𑀯𑀺𑀦𑀬𑁂’’𑀢𑀺. 𑀢𑁂𑀦𑀸𑀳 ‘‘𑀉𑀪𑀬𑁂𑀦𑀧𑀺 𑀅𑀦𑀺𑀬𑁆𑀬𑀸𑀦𑀺𑀓𑀁 𑀲𑀸𑀲𑀦𑀁 𑀤𑀲𑁆𑀲𑁂𑀢𑀻’’𑀢𑀺. 𑀧𑀭𑀺𑀢𑁆𑀢𑀫𑁆𑀧𑀺 𑀦𑀸𑀫 𑀧𑀼𑀜𑁆𑀜𑀁 𑀓𑀸𑀢𑀼𑀓𑀸𑀫𑀁 𑀫𑀘𑁆𑀙𑁂𑀭𑀫𑀮𑀸𑀪𑀺𑀪𑀽𑀢𑀢𑀸𑀬 𑀦𑀺𑀯𑀸𑀭𑁂𑀦𑁆𑀢𑀲𑁆𑀲 𑀅𑀦𑁆𑀢𑀭𑀸𑀬𑀁 𑀢𑀲𑁆𑀲 𑀓𑀭𑁄𑀢𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀯𑀺𑀜𑁆𑀜𑀽𑀳𑀺 𑀕𑀭𑀳𑀺𑀢𑀩𑁆𑀩𑀢𑀸 𑀲𑀫𑁆𑀧𑀭𑀸𑀬𑁂 𑀘 𑀤𑀼𑀕𑁆𑀕𑀢𑀺 𑀧𑀸𑀝𑀺𑀓𑀗𑁆𑀔𑀸, 𑀓𑀺𑀫𑀗𑁆𑀕𑀁 𑀧𑀦 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀸𑀯𑀳𑁂 𑀚𑀺𑀦𑀘𑀓𑁆𑀓𑁂 𑀧𑀳𑀸𑀭𑀤𑀸𑀬𑀺𑀦𑁄 𑀢𑀺𑀢𑁆𑀣𑀓𑀭𑀲𑁆𑀲 𑀢𑀤𑁄𑀯𑀸𑀤𑀓𑀭𑀲𑁆𑀲 𑀘𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑀫𑁆𑀳𑀺 𑀳𑀻’’𑀢𑀺𑀆𑀤𑀺𑀫𑀸𑀳. 𑀬𑀣𑀸 𑀲𑁄 𑀧𑀲𑀸𑀤𑁄 𑀲𑀫𑁆𑀧𑀭𑀸𑀬𑁂 𑀦 𑀲𑀫𑁆𑀫𑀕𑁆𑀕𑀢𑁄 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀯𑀲𑁂𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀜𑁆𑀘𑀺 𑀓𑀸𑀮𑀁 𑀕𑀦𑁆𑀢𑁆𑀯𑀸𑀧𑀺 𑀧𑀘𑁆𑀙𑀸 𑀯𑀺𑀦𑀲𑁆𑀲𑀢𑀺 𑀬𑁂𑀯𑀸’’𑀢𑀺 𑀆𑀳, 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁄 𑀯𑀺𑀬 𑀅𑀘𑁆𑀘𑀦𑁆𑀢𑀺𑀓𑁄 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀲𑀫𑁆𑀧𑀚𑁆𑀚𑀫𑀸𑀦𑀸 𑀬𑀣𑀸𑀯𑀺𑀥𑀺𑀧𑀝𑀺𑀧𑀢𑁆𑀢𑀺𑀬𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀆𑀯𑀳𑀢𑀺. 𑀓𑀫𑁆𑀫𑀲𑀭𑀺𑀓𑁆𑀔𑀓𑁂𑀦 𑀳𑀺 𑀯𑀺𑀧𑀸𑀓𑁂𑀦𑁂𑀯 𑀪𑀯𑀺𑀢𑀩𑁆𑀩𑀁. 𑀲𑀩𑁆𑀩𑀫𑁆𑀧𑀺 𑀓𑀸𑀭𑀡𑀪𑁂𑀤𑀦𑁆𑀢𑀺 𑀲𑀩𑁆𑀩𑀫𑁆𑀧𑀺 𑀬𑀣𑀸𑀯𑀼𑀢𑁆𑀢𑀁 𑀢𑀺𑀢𑁆𑀣𑀓𑀭𑀸𑀦𑀁 𑀲𑀸𑀯𑀓𑀸𑀦𑀁 𑀅𑀧𑀸𑀬𑀤𑀼𑀓𑁆𑀔𑀸𑀯𑀳𑀁 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀓𑀸𑀭𑀡𑀯𑀺𑀲𑁂𑀲𑀁. 𑀲𑁄 𑀧𑀦𑁂𑀲 𑀧𑀲𑀸𑀤𑁄 𑀦 𑀦𑀺𑀬𑁆𑀬𑀸𑀢𑀺 𑀫𑀺𑀘𑁆𑀙𑀢𑁆𑀢𑀧𑀓𑁆𑀔𑀺𑀓𑀢𑁆𑀢𑀸 𑀲𑀼𑀭𑀸𑀧𑀻𑀢𑀲𑀺𑀗𑁆𑀕𑀸𑀮𑁂 𑀧𑀲𑀸𑀤𑁄 𑀯𑀺𑀬. 𑀲𑀼𑀭𑀁 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀙𑀟𑁆𑀟𑀺𑀢𑀓𑀲𑀝𑀁 𑀲𑀼𑀭𑀸𑀚𑀮𑁆𑀮𑀺𑀓𑀁. 𑀩𑁆𑀭𑀸𑀳𑁆𑀫𑀡𑀸 𑀦𑀸𑀫 𑀥𑀦𑀮𑀼𑀤𑁆𑀥𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀇𑀫𑀁 𑀯𑀜𑁆𑀘𑁂𑀲𑁆𑀲𑀸𑀫𑀻’’𑀢𑀺. 𑀓𑀁𑀲𑀲𑀢𑀸𑀢𑀺 𑀓𑀳𑀸𑀧𑀡𑀲𑀢𑀸.

𑁧𑁪𑁪. 𑀢𑀲𑁆𑀲𑀸𑀢𑀺 𑀧𑀲𑀸𑀤𑀲𑁆𑀲. 𑀲𑀩𑁆𑀩𑁄𑀧𑀺 𑀮𑁄𑀪𑁄 𑀓𑀸𑀫𑀼𑀧𑀸𑀤𑀸𑀦𑀦𑁆𑀢𑁂𑀯 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀓𑀸𑀫𑀼𑀧𑀸𑀤𑀸𑀦𑀲𑁆𑀲 𑀧𑀳𑀸𑀦𑀧𑀭𑀺𑀜𑁆𑀜’’𑀦𑁆𑀢𑀺. 𑀏𑀯𑀭𑀽𑀧𑁂𑀢𑀺 𑀈𑀤𑀺𑀲𑁂 𑀲𑀩𑁆𑀩𑀲𑁄 𑀓𑀺𑀮𑁂𑀲𑀸𑀦𑀁 𑀉𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑁂. 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑀸𑀦𑀁 𑀅𑀧𑀸𑀬𑁂𑀲𑀼 𑀅𑀧𑀢𑀦𑀯𑀲𑁂𑀦 𑀥𑀸𑀭𑀡𑀝𑁆𑀞𑁂𑀦 𑀥𑀫𑁆𑀫𑁂. 𑀲𑀩𑁆𑀩𑀲𑁄 𑀯𑀺𑀦𑀬𑀦𑀝𑁆𑀞𑁂𑀦 𑀯𑀺𑀦𑀬𑁂. 𑀢𑀢𑁆𑀣 𑀪𑀯𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀸𑀬 𑀲𑀁𑀯𑀢𑁆𑀢𑀦𑁂.

𑀦𑀫𑀲𑁆𑀲𑀫𑀸𑀦𑁄 𑀅𑀝𑁆𑀞𑀸𑀲𑀺 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀧𑀘𑁆𑀘𑁂𑀓𑀩𑁄𑀥𑀺𑀧𑀸𑀭𑀫𑀻𑀦𑀁 𑀧𑀽𑀭𑀡𑁂𑀦 𑀢𑀢𑁆𑀣 𑀩𑀼𑀤𑁆𑀥𑀲𑀸𑀲𑀦𑁂 𑀧𑀭𑀺𑀘𑀬𑁂𑀦 𑀘 𑀪𑀕𑀯𑀢𑀺 𑀧𑀲𑀦𑁆𑀦𑀘𑀺𑀢𑁆𑀢𑀢𑀸𑀬 𑀘. ‘‘𑀉𑀮𑀽𑀓𑀸’’𑀢𑁆𑀬𑀸𑀤𑀺𑀕𑀸𑀣𑀸 𑀭𑀼𑀓𑁆𑀔𑀤𑁂𑀯𑀢𑀸𑀬 𑀪𑀸𑀲𑀺𑀢𑀸. 𑀓𑀸𑀮𑀼𑀝𑁆𑀞𑀺𑀢𑀦𑁆𑀢𑀺 𑀲𑀸𑀬𑀦𑁆𑀳𑀓𑀸𑀮𑁂 𑀤𑀺𑀯𑀸𑀯𑀺𑀳𑀸𑀭𑀢𑁄 𑀉𑀝𑁆𑀞𑀺𑀢𑀁. 𑀤𑀼𑀕𑁆𑀕𑀢𑁂𑀲𑁄 𑀦 𑀕𑀘𑁆𑀙𑀢𑀻𑀢𑀺 𑀤𑀼𑀕𑁆𑀕𑀢𑀺𑀁 𑀏𑀲𑁄 𑀦 𑀕𑀫𑀺𑀲𑁆𑀲𑀢𑀺. 𑀫𑁄𑀭𑀚𑀺𑀓𑁄 𑀫𑀼𑀭𑀚𑀯𑀸𑀤𑀓𑁄. 𑀫𑀳𑀸𑀪𑁂𑀭𑀺𑀯𑀸𑀤𑀓𑀯𑀢𑁆𑀣𑀼𑀆𑀤𑀻𑀦𑀺𑀧𑀺 𑀲𑀺𑀢𑀧𑀸𑀢𑀼𑀓𑀭𑀡𑀁 𑀆𑀤𑀺𑀁 𑀓𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸𑀦𑀺.

𑀧𑀭𑀫𑀢𑁆𑀣𑁂𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂. 𑀓𑀺𑀁 𑀧𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀥𑀫𑁆𑀫𑁂𑀧𑀺 𑀧𑀭𑀫𑀢𑁆𑀣𑁂 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀼𑀡𑀦𑁆𑀢𑀸𑀦𑀁. 𑀲𑀸𑀫𑀡𑁂𑀭𑀯𑀢𑁆𑀣𑀽𑀢𑀺 𑀧𑀩𑁆𑀩𑀚𑀺𑀢𑀤𑀺𑀯𑀲𑁂𑀬𑁂𑀯 𑀲𑀧𑁆𑀧𑁂𑀦 𑀤𑀝𑁆𑀞𑁄 𑀳𑀼𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑀁 𑀉𑀧𑀧𑀦𑁆𑀦𑀲𑀸𑀫𑀡𑁂𑀭𑀯𑀢𑁆𑀣𑀼.

𑀔𑀻𑀭𑁄𑀤𑀦𑀦𑁆𑀢𑀺 𑀔𑀻𑀭𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑀺𑀲𑁆𑀲𑀁 𑀑𑀤𑀦𑀁. 𑀢𑀺𑀫𑁆𑀩𑀭𑀼𑀲𑀓𑀦𑁆𑀢𑀺 𑀢𑀺𑀦𑁆𑀤𑀼𑀓𑀨𑀮𑀁. 𑀢𑀺𑀧𑀼𑀲𑀲𑀤𑀺𑀲𑀸 𑀏𑀓𑀸 𑀯𑀮𑁆𑀮𑀺𑀚𑀸𑀢𑀺 𑀢𑀺𑀫𑁆𑀩𑀭𑀼𑀲𑀁, 𑀢𑀲𑁆𑀲 𑀨𑀮𑀁 𑀢𑀺𑀫𑁆𑀩𑀭𑀼𑀲𑀓𑀦𑁆𑀢𑀺 𑀘 𑀯𑀤𑀦𑁆𑀢𑀺. 𑀓𑀓𑁆𑀓𑀸𑀭𑀺𑀓𑀦𑁆𑀢𑀺 𑀔𑀼𑀤𑁆𑀤𑀓𑀏𑀮𑀸𑀴𑀼𑀓𑀁. 𑀫𑀳𑀸𑀢𑀺𑀧𑀼𑀲𑀦𑁆𑀢𑀺 𑀘 𑀯𑀤𑀦𑁆𑀢𑀺. 𑀯𑀮𑁆𑀮𑀺𑀧𑀓𑁆𑀓𑀦𑁆𑀢𑀺 𑀔𑀼𑀤𑁆𑀤𑀓𑀢𑀺𑀧𑀼𑀲𑀯𑀮𑁆𑀮𑀺𑀬𑀸 𑀨𑀮𑀁. 𑀳𑀢𑁆𑀣𑀧𑀢𑀸𑀧𑀓𑀦𑁆𑀢𑀺 𑀫𑀦𑁆𑀤𑀸𑀫𑀼𑀔𑀺. 𑀅𑀫𑁆𑀩𑀓𑀜𑁆𑀚𑀺𑀓𑀦𑁆𑀢𑀺 𑀅𑀫𑁆𑀩𑀺𑀮𑀓𑀜𑁆𑀚𑀺𑀓𑀁. 𑀔𑀴𑀬𑀸𑀕𑀼𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀤𑁄𑀡𑀺𑀦𑀺𑀫𑁆𑀫𑀚𑁆𑀚𑀦𑀺𑀦𑁆𑀢𑀺 𑀲𑀢𑁂𑀮𑀁 𑀢𑀺𑀮𑀧𑀺𑀜𑁆𑀜𑀸𑀓𑀁. 𑀯𑀺𑀥𑀼𑀧𑀦𑀦𑁆𑀢𑀺 𑀘𑀢𑀼𑀭𑀲𑁆𑀲𑀩𑀻𑀚𑀦𑀺𑀁. 𑀢𑀸𑀮𑀯𑀡𑁆𑀝𑀦𑁆𑀢𑀺 𑀢𑀸𑀮𑀧𑀢𑁆𑀢𑁂𑀳𑀺 𑀓𑀢𑀫𑀡𑁆𑀟𑀮𑀩𑀻𑀚𑀦𑀺𑀁. 𑀫𑁄𑀭𑀳𑀢𑁆𑀣𑀦𑁆𑀢𑀺 𑀫𑁄𑀭𑀧𑀺𑀜𑁆𑀙𑁂𑀳𑀺 𑀓𑀢𑀁 𑀫𑀓𑀲𑀩𑀻𑀚𑀦𑀺𑀁.

𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑁂𑀯𑀸𑀢𑀺 𑀬𑀲𑁆𑀫𑀸 𑀇𑀥𑀸𑀧𑀺 𑀬𑀣𑀸𑀯𑀼𑀢𑁆𑀢𑀁 𑀲𑀩𑁆𑀩𑀫𑁆𑀧𑀺 𑀓𑀸𑀭𑀡𑀪𑁂𑀤𑀁 𑀏𑀓𑀢𑁄 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀲𑀢𑁆𑀣𑀸 ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀽’’𑀦𑁆𑀢𑀺𑀆𑀤𑀺𑀫𑀸𑀳, 𑀢𑀲𑁆𑀫𑀸 𑀢𑀢𑁆𑀣 𑀅𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀯𑀼𑀢𑁆𑀢𑀦𑀬𑀲𑁆𑀲 𑀅𑀦𑀼𑀲𑁆𑀲𑀭𑀡𑀯𑀲𑁂𑀦 𑀬𑁄𑀚𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀁.

𑁧𑁪𑁫. 𑀧𑀭𑀺𑀜𑁆𑀜𑀦𑁆𑀢𑀺 𑀧𑀳𑀸𑀦𑀧𑀭𑀺𑀜𑁆𑀜𑀁. 𑀢𑁂𑀲𑀁 𑀧𑀘𑁆𑀘𑀬𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀉𑀧𑀸𑀤𑀸𑀦𑀸𑀦𑀁 𑀧𑀭𑀺𑀜𑁆𑀜𑀸 𑀦𑀸𑀫 𑀧𑀳𑀸𑀦𑀧𑀭𑀺𑀜𑁆𑀜𑀸. 𑀢𑁂𑀲𑀁 𑀅𑀘𑁆𑀘𑀦𑁆𑀢𑀦𑀺𑀭𑁄𑀥𑁄 𑀅𑀥𑀺𑀧𑁆𑀧𑁂𑀢𑁄, 𑀲𑁄 𑀘 𑀧𑀘𑁆𑀘𑀬𑀦𑀺𑀭𑁄𑀥𑁂𑀦 𑀳𑁄𑀢𑀻𑀢𑀺 𑀢𑁂𑀲𑀁 𑀧𑀘𑁆𑀘𑀬𑀁 𑀫𑀽𑀮𑀓𑀸𑀭𑀡𑀢𑁄 𑀧𑀪𑀼𑀢𑀺 𑀤𑀲𑁆𑀲𑁂𑀢𑀼𑀁. 𑀅𑀬𑀦𑁆𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑁄 𑀏𑀢𑁆𑀣 ‘‘𑀇𑀫𑁂 𑀘𑀸’’𑀢𑀺𑀆𑀤𑀺𑀧𑀸𑀞𑁂 ‘‘𑀓𑀺𑀁 𑀦𑀺𑀤𑀸𑀦𑀸’’𑀢𑀺𑀆𑀤𑀺𑀲𑀫𑀸𑀲𑀧𑀤𑀸𑀦𑀁 𑀅𑀢𑁆𑀣𑁄. 𑀲𑀩𑁆𑀩𑀧𑀤𑁂𑀲𑀽𑀢𑀺 ‘‘𑀢𑀡𑁆𑀳𑀸𑀲𑀫𑀼𑀤𑀬𑀸’’𑀢𑀺𑀆𑀤𑀻𑀲𑀼 𑀲𑀩𑁆𑀩𑁂𑀲𑀼 𑀧𑀤𑁂𑀲𑀼. 𑀇𑀫𑀺𑀦𑀸 𑀏𑀯 𑀘 𑀲𑀩𑁆𑀩𑀕𑁆𑀕𑀳𑀡𑁂𑀦 ‘‘𑀨𑀲𑁆𑀲𑀦𑀺𑀤𑀸𑀦𑀸’’𑀢𑀺𑀆𑀤𑀻𑀦𑀫𑁆𑀧𑀺 𑀧𑀤𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀇𑀫𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀉𑀧𑀸𑀤𑀸𑀦𑀸𑀦𑀫𑁆𑀧𑀺 𑀲𑀫𑀼𑀤𑀬𑀁 𑀦 𑀚𑀸𑀦𑀦𑁆𑀢𑀺, 𑀓𑀼𑀢𑁄 𑀦𑀺𑀭𑁄𑀥𑀁, 𑀢𑀣𑀸𑀕𑀢𑁄 𑀧𑀦 𑀢𑁂𑀲𑀁 𑀢𑀧𑁆𑀧𑀘𑁆𑀘𑀬𑀧𑀘𑁆𑀘𑀬𑀸𑀦𑀫𑁆𑀧𑀺 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀬𑀸𑀣𑀸𑀯𑀢𑁄 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑁋 ‘‘𑀇𑀥𑁂𑀯, 𑀪𑀺𑀓𑁆𑀔𑀯𑁂, 𑀲𑀫𑀡𑁄…𑀧𑁂… 𑀲𑀼𑀜𑁆𑀜𑀸 𑀧𑀭𑀧𑁆𑀧𑀯𑀸𑀤𑀸 𑀲𑀫𑀡𑁂𑀪𑀺 𑀅𑀜𑁆𑀜𑁂𑀳𑀻’’𑀢𑀺 (𑀫. 𑀦𑀺. 𑁧.𑁧𑁩𑁯) 𑀬𑀣𑀸𑀭𑀤𑁆𑀥𑀲𑀻𑀳𑀦𑀸𑀤𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑁂 𑀘, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀉𑀧𑀸𑀤𑀸𑀦𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁧𑁪𑁫) 𑀦𑀬𑁂𑀦 𑀤𑁂𑀲𑀦𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀫𑀼𑀔𑁂𑀦 𑀑𑀢𑀸𑀭𑁂𑀦𑁆𑀢𑁄 𑀯𑀝𑁆𑀝𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀬𑀢𑁄 𑀘 𑀔𑁄’’𑀢𑀺𑀆𑀤𑀺𑀦𑀸 𑀯𑀺𑀯𑀝𑁆𑀝𑀁 𑀤𑀲𑁆𑀲𑁂𑀦𑁆𑀢𑁄 𑀅𑀭𑀳𑀢𑁆𑀢𑁂𑀦 𑀤𑁂𑀲𑀦𑀸𑀬 𑀓𑀽𑀝𑀁 𑀕𑀡𑁆𑀳𑀺, 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀲𑁆𑀫𑀸 𑀧𑀦 𑀪𑀕𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀘𑀽𑀴𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁨. 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑀯𑁂𑀲𑀸𑀮𑀻𑀦𑀕𑀭𑀯𑀡𑁆𑀡𑀦𑀸

𑁧𑁪𑁬. 𑀅𑀧𑀭𑀸𑀧𑀭𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁. 𑀯𑀺𑀲𑀸𑀮𑀻𑀪𑀽𑀢𑀢𑀸𑀬𑀸𑀢𑀺 𑀕𑀸𑀯𑀼𑀢𑀦𑁆𑀢𑀭𑀁 𑀕𑀸𑀯𑀼𑀢𑀦𑁆𑀢𑀭𑀁 𑀧𑀼𑀣𑀼𑀪𑀽𑀢𑀢𑀸𑀬. 𑀢𑀢𑁆𑀭𑀸𑀢𑀺 𑀢𑀲𑁆𑀲𑀁 𑀯𑀺𑀲𑀸𑀮𑀻𑀪𑀽𑀢𑀢𑀸𑀬𑀁. 𑀙𑀟𑁆𑀟𑀺𑀢𑀫𑀢𑁆𑀢𑁂𑀢𑀺 𑀯𑀺𑀲𑁆𑀲𑀝𑁆𑀞𑀫𑀢𑁆𑀢𑁂. 𑀊𑀫𑀺𑀪𑀬𑀸𑀤𑀻𑀳𑀻𑀢𑀺 𑀊𑀫𑀺𑀓𑀼𑀫𑁆𑀪𑀻𑀮𑀆𑀯𑀝𑁆𑀝𑀲𑀁𑀲𑀼𑀓𑀸𑀪𑀬𑁂𑀳𑀺. 𑀉𑀤𑀓𑀧𑁆𑀧𑀯𑀸𑀳𑁂𑀦𑀸𑀕𑀢𑀲𑁆𑀲𑀧𑀺 𑀘 𑀉𑀲𑁆𑀫𑀸 𑀦 𑀯𑀺𑀕𑀘𑁆𑀙𑀢𑀺, 𑀉𑀲𑁆𑀫𑀸 𑀘 𑀦𑀸𑀫 𑀈𑀤𑀺𑀲𑀲𑁆𑀲 𑀲𑀯𑀺𑀜𑁆𑀜𑀸𑀡𑀓𑀢𑀸𑀬 𑀪𑀯𑁂𑀬𑁆𑀬𑀸𑀢𑀺 ‘‘𑀲𑀺𑀬𑀸 𑀕𑀩𑁆𑀪𑁄’’𑀢𑀺 𑀘𑀺𑀦𑁆𑀢𑁂𑀲𑀺. 𑀢𑀣𑀸 𑀳𑀻𑀢𑀺𑀆𑀤𑀺 𑀢𑀢𑁆𑀣 𑀓𑀸𑀭𑀡𑀘𑀺𑀦𑁆𑀢𑀸. 𑀧𑀼𑀜𑁆𑀜𑀯𑀦𑁆𑀢𑀢𑀸𑀬 𑀤𑀼𑀕𑁆𑀕𑀦𑁆𑀥𑀁 𑀦𑀸𑀳𑁄𑀲𑀺, 𑀲𑀉𑀲𑀼𑀫𑀢𑀸𑀬 𑀧𑀽𑀢𑀺𑀓𑀪𑀸𑀯𑁄. 𑀤𑀸𑀭𑀓𑀸𑀦𑀁 𑀧𑀼𑀜𑁆𑀜𑀽𑀧𑀦𑀺𑀲𑁆𑀲𑀬𑀢𑁄 𑀅𑀗𑁆𑀕𑀼𑀝𑁆𑀞𑀓𑀢𑁄 𑀘𑀲𑁆𑀲 𑀔𑀻𑀭𑀁 𑀦𑀺𑀩𑁆𑀩𑀢𑁆𑀢𑀺, 𑀔𑀻𑀭𑀪𑀢𑁆𑀢𑀜𑁆𑀘 𑀮𑀪𑀺. 𑀘𑀭𑀺𑀫𑀓𑀪𑀯𑁂 𑀩𑁄𑀥𑀺𑀲𑀢𑁆𑀢𑁂 𑀓𑀼𑀘𑁆𑀙𑀺𑀕𑀢𑁂 𑀩𑁄𑀥𑀺𑀲𑀢𑁆𑀢𑀫𑀸𑀢𑀼 𑀯𑀺𑀬 𑀉𑀤𑀭𑀘𑁆𑀙𑀯𑀺𑀬𑀸 𑀅𑀘𑁆𑀙𑀯𑀺𑀧𑁆𑀧𑀲𑀦𑁆𑀦𑀢𑀸𑀬 𑀦𑀺𑀘𑁆𑀙𑀯𑀺 𑀯𑀺𑀬𑀸𑀢𑀺 𑀓𑀢𑁆𑀯𑀸 𑀆𑀳 ‘‘𑀦𑀺𑀘𑁆𑀙𑀯𑀻 𑀅𑀳𑁂𑀲𑀼’’𑀦𑁆𑀢𑀺. 𑀢𑁂𑀲𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑀸𑀭𑀓𑀸𑀦𑀁. 𑀫𑀸𑀢𑀸𑀧𑀺𑀢𑀭𑁄𑀢𑀺 𑀧𑁄𑀲𑀓𑀫𑀸𑀢𑀸𑀧𑀺𑀢𑀭𑁄. 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸 𑀭𑀸𑀚𑀸𑀦𑀁 𑀅𑀓𑀁𑀲𑀼 𑀭𑀚𑁆𑀚𑀲𑀫𑁆𑀧𑀢𑁆𑀢𑀺𑀬𑀸 𑀤𑀸𑀬𑀓𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸, 𑀅𑀲𑀫𑁆𑀪𑀺𑀦𑁆𑀦𑁂 𑀏𑀯 𑀭𑀸𑀚𑀓𑀼𑀮𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀘. 𑀓𑀼𑀫𑀸𑀭𑀲𑁆𑀲 𑀧𑀼𑀜𑁆𑀜𑀸𑀦𑀼𑀪𑀸𑀯𑀲𑀜𑁆𑀘𑁄𑀤𑀺𑀢𑀸 𑀤𑁂𑀯𑀢𑀸𑀥𑀺𑀕𑁆𑀕𑀳𑀺𑀢𑀸𑀢𑀺 𑀓𑁂𑀘𑀺.

𑀧𑀼𑀭𑀲𑁆𑀲 𑀅𑀧𑀭𑁂𑀢𑀺 𑀧𑀼𑀭𑀲𑁆𑀲 𑀅𑀧𑀭𑀤𑀺𑀲𑀸𑀬 𑀕𑀸𑀯𑀼𑀢𑀫𑀢𑁆𑀢𑁂 𑀞𑀸𑀦𑁂 𑀚𑀻𑀯𑀓𑀫𑁆𑀩𑀯𑀦𑀁 𑀯𑀺𑀬 𑀲𑀧𑀸𑀓𑀸𑀭𑀫𑀦𑁆𑀤𑀺𑀭𑀓𑁂. 𑀅𑀘𑀺𑀭𑀧𑀓𑁆𑀓𑀦𑁆𑀢𑁄𑀢𑀺 𑀏𑀢𑁆𑀣 𑀦 𑀤𑁂𑀲𑀦𑁆𑀢𑀭𑀧𑀓𑁆𑀓𑀫𑀦𑀁 𑀅𑀥𑀺𑀧𑁆𑀧𑁂𑀢𑀁, 𑀅𑀣 𑀔𑁄 𑀲𑀸𑀲𑀦𑀢𑁄 𑀅𑀧𑀓𑁆𑀓𑀫𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀩𑁆𑀪𑀫𑀺𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑁂𑀦𑁂𑀯𑀸𑀳 ‘‘𑀇𑀫𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀸’’𑀢𑀺. 𑀧𑀭𑀺𑀲𑀢𑀻𑀢𑀺 𑀧𑀭𑀺𑀲𑀸𑀬𑀁, 𑀚𑀦𑀲𑀫𑀽𑀳𑁂𑀢𑀺 𑀅𑀢𑁆𑀣𑁄. 𑀚𑀦𑀲𑀫𑀽𑀳𑀕𑀢𑁄 𑀧𑀦 ‘‘𑀧𑀭𑀺𑀲𑀫𑀚𑁆𑀛𑁂’’𑀢𑀺 𑀯𑀼𑀢𑁆𑀢𑁄. 𑀪𑀸𑀯𑀦𑀸𑀫𑀦𑀲𑀺𑀓𑀸𑀭𑁂𑀦 𑀯𑀺𑀦𑀸 𑀧𑀓𑀢𑀺𑀬𑀸𑀯 𑀫𑀦𑀼𑀲𑁆𑀲𑁂𑀳𑀺 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑁄 𑀥𑀫𑁆𑀫𑁄𑀢𑀺 𑀫𑀦𑀼𑀲𑁆𑀲𑀥𑀫𑁆𑀫𑁄, 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀸𑀯𑀳𑁄 𑀯𑀸 𑀥𑀫𑁆𑀫𑁄 𑀫𑀦𑀼𑀲𑁆𑀲𑀥𑀫𑁆𑀫𑁄, 𑀅𑀦𑀼𑀴𑀸𑀭𑀁 𑀧𑀭𑀺𑀢𑁆𑀢𑀓𑀼𑀲𑀮𑀁. 𑀬𑀁 𑀅𑀲𑀢𑀺𑀧𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑀢𑁆𑀢𑀢𑀺, 𑀬𑀜𑁆𑀘 𑀲𑀦𑁆𑀥𑀸𑀬𑀸𑀳 ‘‘𑀳𑀻𑀦𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀔𑀢𑁆𑀢𑀺𑀬𑁂 𑀉𑀧𑀧𑀚𑁆𑀚𑀢𑀻’’𑀢𑀺. ‘‘𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑁄’’𑀢𑀺 𑀩𑀼𑀤𑁆𑀥𑁂 𑀫𑀫𑀢𑁆𑀢𑀓𑀸𑀭𑀺𑀦𑁄 𑀩𑀼𑀤𑁆𑀥𑀫𑀸𑀫𑀓𑀸. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀤𑀺𑀯𑀡𑁆𑀡𑀦𑀸

𑀅𑀮𑀁 𑀅𑀭𑀺𑀬𑀸𑀬 𑀅𑀭𑀺𑀬𑀪𑀸𑀯𑀸𑀬𑀸𑀢𑀺 𑀅𑀮𑀫𑀭𑀺𑀬𑁄, 𑀭𑀽𑀧𑀸𑀬𑀢𑀦𑀁 𑀚𑀸𑀦𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀯𑀺𑀬 𑀧𑀲𑁆𑀲𑀢𑀺 𑀘𑀸𑀢𑀺 𑀜𑀸𑀡𑀤𑀲𑁆𑀲𑀦𑀁, 𑀤𑀺𑀩𑁆𑀩𑀘𑀓𑁆𑀔𑀼. 𑀲𑀫𑁆𑀫𑀲𑀦𑀼𑀧𑀕𑁂 𑀘 𑀧𑀦 𑀥𑀫𑁆𑀫𑁂 𑀮𑀓𑁆𑀔𑀡𑀢𑁆𑀢𑀬𑀜𑁆𑀘 𑀢𑀣𑀸 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺 𑀘𑀸𑀢𑀺 𑀜𑀸𑀡𑀤𑀲𑁆𑀲𑀦𑀁, 𑀯𑀺𑀧𑀲𑁆𑀲𑀦𑀸. 𑀦𑀺𑀩𑁆𑀩𑀸𑀦𑀁, 𑀘𑀢𑁆𑀢𑀸𑀭𑀺 𑀯𑀸 𑀲𑀘𑁆𑀘𑀸𑀦𑀺 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑀢𑁄 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺 𑀘𑀸𑀢𑀺 𑀜𑀸𑀡𑀤𑀲𑁆𑀲𑀦𑀁, 𑀫𑀕𑁆𑀕𑁄. 𑀨𑀮𑀁 𑀧𑀦 𑀦𑀺𑀩𑁆𑀩𑀸𑀦𑀯𑀲𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀧𑀘𑁆𑀘𑀯𑁂𑀓𑁆𑀔𑀡𑀸 𑀫𑀕𑁆𑀕𑀸𑀥𑀺𑀕𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀘𑁆𑀘𑀓𑁆𑀔𑀢𑁄 𑀚𑀸𑀦𑀦𑀝𑁆𑀞𑁂𑀦 𑀜𑀸𑀡𑀤𑀲𑁆𑀲𑀦𑀁, 𑀲𑀩𑁆𑀩𑀜𑁆𑀜𑀼𑀢𑀸 𑀅𑀦𑀸𑀯𑀭𑀡𑀢𑀸𑀬 𑀲𑀫𑀦𑁆𑀢𑀘𑀓𑁆𑀔𑀼𑀢𑀸𑀬 𑀘 𑀜𑀸𑀡𑀤𑀲𑁆𑀲𑀦𑀁. 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀅𑀥𑀺𑀧𑁆𑀧𑁂𑀢𑁄, 𑀢𑀲𑁆𑀫𑀺𑀜𑁆𑀳𑀺 𑀧𑀝𑀺𑀲𑀺𑀤𑁆𑀥𑁂 𑀲𑀩𑁆𑀩𑁂𑀲𑀫𑁆𑀧𑀺 𑀩𑀼𑀤𑁆𑀥𑀕𑀼𑀡𑀸𑀦𑀁 𑀅𑀲𑀫𑁆𑀪𑀯𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀢𑀜𑁆𑀳𑀺 𑀲𑁄 𑀪𑀕𑀯𑀢𑁄 𑀧𑀝𑀺𑀲𑁂𑀥𑁂𑀢𑀻’’𑀢𑀺.

𑀲𑀼𑀔𑀼𑀫𑀁 𑀥𑀫𑁆𑀫𑀦𑁆𑀢𑀭𑀁 𑀦𑀸𑀫 𑀛𑀸𑀦𑀯𑀺𑀧𑀲𑁆𑀲𑀦𑀸𑀤𑀺𑀓𑀁 𑀆𑀘𑀭𑀺𑀬𑀸𑀦𑀼𑀕𑁆𑀕𑀳𑁂𑀦 𑀕𑀳𑀺𑀢𑀁 𑀦𑀸𑀫 𑀦𑀢𑁆𑀣𑀺. 𑀢𑀓𑁆𑀓𑀧𑀭𑀺𑀬𑀸𑀳𑀢𑀦𑁆𑀢𑀺 ‘‘𑀇𑀢𑀺 𑀪𑀯𑀺𑀲𑁆𑀲𑀢𑀺, 𑀏𑀯𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀁𑀢𑀁𑀤𑀲𑁆𑀲𑁂𑀢𑀩𑁆𑀩𑀫𑀢𑁆𑀣𑀢𑀓𑁆𑀓𑀦𑁂𑀦 𑀯𑀺𑀢𑀓𑁆𑀓𑀦𑀫𑀢𑁆𑀢𑁂𑀦 𑀧𑀭𑀺𑀢𑁄 𑀆𑀳𑀢𑀁 𑀧𑀭𑀺𑀯𑀢𑁆𑀢𑀺𑀢𑀁 𑀓𑀢𑁆𑀯𑀸. 𑀢𑁂𑀦𑀸𑀳 ‘‘𑀢𑀓𑁆𑀓𑁂𑀢𑁆𑀯𑀸’’𑀢𑀺𑀆𑀤𑀺. 𑀮𑁄𑀓𑀺𑀬𑀧𑀜𑁆𑀜𑀁 𑀅𑀦𑀼𑀚𑀸𑀦𑀸𑀢𑀺 𑀉𑀧𑀦𑀺𑀲𑀺𑀦𑁆𑀦𑀧𑀭𑀺𑀲𑀸𑀬 𑀅𑀦𑀼𑀓𑀽𑀮𑀥𑀫𑁆𑀫𑀓𑀣𑀦𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀲𑀫𑀡𑁄 𑀕𑁄𑀢𑀫𑁄’’𑀢𑀺𑀆𑀤𑀺. 𑀧𑀝𑀺𑀪𑀸𑀢𑀻𑀢𑀺 𑀧𑀝𑀺𑀪𑀸𑀦𑀁, ‘‘𑀇𑀢𑀺 𑀯𑀓𑁆𑀔𑀸𑀫𑀻’’𑀢𑀺 𑀏𑀯𑀁𑀧𑀯𑀢𑁆𑀢𑀁 𑀓𑀣𑀦𑀘𑀺𑀢𑁆𑀢𑀁, 𑀢𑀢𑁄 𑀧𑀝𑀺𑀪𑀸𑀦𑀢𑁄 𑀚𑀸𑀦𑀦𑀁 𑀧𑀝𑀺𑀪𑀸𑀦𑀁, 𑀆𑀕𑀫𑀸𑀪𑀸𑀯𑀢𑁄 𑀲𑀬𑀫𑁂𑀯 𑀉𑀧𑀝𑁆𑀞𑀺𑀢𑀢𑁆𑀢𑀸 𑀲𑀬𑀁𑀧𑀝𑀺𑀪𑀸𑀦𑀁. 𑀢𑁂𑀦𑀸𑀳 ‘‘𑀇𑀫𑀺𑀦𑀸𑀲𑁆𑀲 𑀥𑀫𑁆𑀫𑁂𑀲𑀼 𑀧𑀘𑁆𑀘𑀓𑁆𑀔𑀪𑀸𑀯𑀁 𑀧𑀝𑀺𑀩𑀸𑀳𑀢𑀻’’𑀢𑀺. 𑀲𑀼𑀨𑀼𑀲𑀺𑀢𑀦𑁆𑀢𑀺 𑀦𑀺𑀩𑁆𑀩𑀺𑀯𑀭𑀁. 𑀅𑀨𑀼𑀲𑀺𑀢𑀢𑁆𑀢𑁂 𑀳𑀺 𑀲𑀼𑀔𑁂𑀦 𑀯𑀘𑀻𑀖𑁄𑀲𑁄 𑀦 𑀦𑀺𑀘𑁆𑀙𑀭𑀢𑀺. 𑀤𑀦𑁆𑀢𑀸𑀯𑀭𑀡𑀦𑁆𑀢𑀺 𑀑𑀝𑁆𑀞𑀤𑁆𑀯𑀬𑀁. 𑀚𑀺𑀯𑁆𑀳𑀸𑀧𑀺 𑀣𑀤𑁆𑀥𑀢𑀸𑀬 𑀲𑀼𑀔𑁂𑀦 𑀯𑀘𑀻𑀖𑁄𑀲𑁄 𑀦 𑀦𑀺𑀘𑁆𑀙𑀭𑀢𑀻𑀢𑀺 𑀆𑀳 ‘‘𑀫𑀼𑀤𑀼𑀓𑀸 𑀚𑀺𑀯𑁆𑀳𑀸’’𑀢𑀺. 𑀓𑀭𑀯𑀻𑀓𑀭𑀼𑀢𑀫𑀜𑁆𑀚𑀼𑀢𑀸𑀬 𑀫𑀥𑀼𑀭𑁄 𑀲𑀭𑁄. 𑀏𑀮𑀁 𑀯𑀼𑀘𑁆𑀘𑀢𑀺 𑀤𑁄𑀲𑁄, 𑀏𑀮𑀁 𑀕𑀴𑀢𑀻𑀢𑀺 𑀏𑀮𑀕𑀴𑀸, 𑀦 𑀏𑀮𑀕𑀴𑀸 𑀅𑀦𑁂𑀮𑀕𑀴𑀸, 𑀦𑀺𑀤𑁆𑀤𑁄𑀲𑀸, 𑀦 𑀭𑀼𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀫𑁂𑀢𑀁 𑀭𑀜𑁆𑀚𑀦𑀲𑁆𑀲𑁂𑀯 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀯𑀤𑀢𑀺.

𑀧𑀜𑁆𑀘 𑀥𑀫𑁆𑀫𑀸𑀢𑀺 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀪𑀽𑀢𑀸𑀦𑀁 𑀔𑀦𑁆𑀥𑀸𑀤𑀻𑀦𑀁 𑀉𑀕𑁆𑀕𑀳𑀡-𑀲𑀯𑀦-𑀥𑀸𑀭𑀡-𑀧𑀭𑀺𑀘𑀬-𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂 𑀲𑀦𑁆𑀥𑀸𑀬𑀸𑀳. 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬𑀸𑀢𑀺 𑀏𑀢𑁆𑀣 𑀲𑀫𑁆𑀫𑀸-𑀲𑀤𑁆𑀤𑁄 𑀉𑀪𑀬𑀢𑁆𑀣𑀸𑀧𑀺 𑀬𑁄𑀚𑁂𑀢𑀩𑁆𑀩𑁄 ‘‘𑀲𑀫𑁆𑀫𑀸 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬𑀸’’𑀢𑀺. 𑀬𑁄 𑀳𑀺 𑀲𑀫𑁆𑀫𑀸 𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑀢𑀺, 𑀢𑀲𑁆𑀲𑁂𑀯 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑁄 𑀳𑁄𑀢𑀺. 𑀬𑁄 𑀧𑀦 𑀯𑀼𑀢𑁆𑀢𑀦𑀬𑁂𑀦 𑀢𑀓𑁆𑀓𑀭𑁄, 𑀢𑀲𑁆𑀲 𑀦𑀺𑀬𑁆𑀬𑀸𑀦𑀁 𑀅𑀢𑁆𑀣𑀢𑁄 𑀥𑀫𑁆𑀫𑀲𑁆𑀲𑁂𑀯 𑀦𑀺𑀬𑁆𑀬𑀸𑀦𑀦𑁆𑀢𑀺 𑀆𑀳 ‘‘𑀲𑁄 𑀥𑀫𑁆𑀫𑁄…𑀧𑁂… 𑀦𑀺𑀬𑁆𑀬𑀸𑀢𑀺 𑀕𑀘𑁆𑀙𑀢𑀻’’𑀢𑀺.

𑁧𑁪𑁭. 𑀓𑁄𑀥𑀦𑁄𑀢𑀺 𑀓𑀼𑀚𑁆𑀛𑀦𑀲𑀻𑀮𑁄. 𑀬𑀲𑁆𑀫𑀸 𑀧𑀦 𑀲𑀼𑀦𑀓𑁆𑀔𑀢𑁆𑀢𑁄 𑀓𑁄𑀥𑀯𑀲𑁂𑀦 𑀓𑀼𑀭𑀽𑀭𑁄 𑀨𑀭𑀼𑀲𑀯𑀘𑀦𑁄 𑀘, 𑀢𑀲𑁆𑀫𑀸 𑀆𑀳 ‘‘𑀓𑁄𑀥𑀦𑁄𑀢𑀺 𑀘𑀡𑁆𑀟𑁄 𑀨𑀭𑀼𑀲𑁄 𑀘𑀸’’𑀢𑀺. 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀫𑀕𑁆𑀕𑀨𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑁄 𑀦𑀢𑁆𑀣𑀻𑀢𑀺 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑀸𑀦𑀁 𑀫𑀕𑁆𑀕𑀨𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑁄 𑀦𑀢𑁆𑀣𑀺. 𑀢𑀁 𑀩𑀼𑀤𑁆𑀥𑀸 ‘‘𑀫𑁄𑀖𑀧𑀼𑀭𑀺𑀲𑁄’’𑀢𑀺 𑀯𑀤𑀦𑁆𑀢𑀺 𑀬𑀣𑀸 𑀢𑀁 𑀲𑀼𑀤𑀺𑀦𑁆𑀦𑀮𑀸𑀴𑀼𑀤𑀸𑀬𑀺𑀆𑀤𑀺𑀓𑁂. 𑀉𑀧𑀦𑀺𑀲𑁆𑀲𑀬𑁂 𑀲𑀢𑀺𑀧𑀺 𑀢𑀲𑁆𑀫𑀺𑀁 𑀔𑀡𑁂 𑀫𑀕𑁆𑀕𑁂 𑀯𑀸 𑀨𑀮𑁂 𑀯𑀸 𑀅𑀲𑀢𑀺 ‘‘𑀫𑁄𑀖𑀧𑀼𑀭𑀺𑀲𑁄’’𑀢𑀺 𑀯𑀤𑀦𑁆𑀢𑀺 𑀬𑀣𑀸 𑀢𑀁 𑀥𑀦𑀺𑀬𑀽𑀧𑀲𑁂𑀦𑀢𑁆𑀣𑁂𑀭𑀸𑀤𑀺𑀓𑁂. 𑀲𑀫𑀼𑀘𑁆𑀙𑀺𑀦𑁆𑀦𑁄𑀧𑀦𑀺𑀲𑁆𑀲𑀬𑁂 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀬𑀣𑀸 ‘‘𑀫𑀓𑁆𑀔𑀮𑀺 𑀫𑁄𑀖𑀧𑀼𑀭𑀺𑀲𑁄 𑀫𑀦𑀼𑀲𑁆𑀲𑀔𑀺𑀧𑁆𑀧𑀁 𑀫𑀜𑁆𑀜𑁂’’𑀢𑀺 (𑀅. 𑀦𑀺. 𑁧.𑁩𑁧𑁧) 𑀢𑀣𑀸 𑀲𑀼𑀦𑀓𑁆𑀔𑀢𑁆𑀢𑁄𑀧𑀻𑀢𑀺 𑀆𑀳 ‘‘𑀇𑀫𑀲𑁆𑀲 𑀧𑀦𑀸’’𑀢𑀺𑀆𑀤𑀺. 𑀅𑀲𑁆𑀲𑀸𑀢𑀺 𑀏𑀢𑁂𑀦. 𑀓𑀢𑁆𑀢𑀭𑀺 𑀳𑀺𑀤𑀁 𑀲𑀸𑀫𑀺𑀯𑀘𑀦𑀁. 𑀓𑁄𑀥𑁂𑀦𑀸𑀢𑀺 𑀓𑁄𑀥𑀳𑁂𑀢𑀼𑀦𑀸.

𑀪𑀕𑀯𑀢𑁄𑀢𑀺 𑀲𑀫𑁆𑀧𑀤𑀸𑀦𑀯𑀘𑀦𑀁 𑀓𑀼𑀤𑁆𑀥𑀧𑀤𑀸𑀧𑁂𑀓𑁆𑀔𑀸𑀬. 𑀧𑀼𑀩𑁆𑀩𑁂𑀢𑀺 𑀪𑀺𑀓𑁆𑀔𑀼𑀓𑀸𑀮𑁂. 𑀲𑀤𑁆𑀤𑀁 𑀲𑁄𑀢𑀼𑀓𑀸𑀫𑁄𑀢𑀺 𑀲𑁄 𑀓𑀺𑀭 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀤𑁂𑀯𑀢𑀸𑀦𑀁 𑀭𑀽𑀧𑀁 𑀧𑀲𑁆𑀲𑀦𑁆𑀢𑁄 𑀑𑀝𑁆𑀞𑀘𑀮𑀦𑀁 𑀧𑀲𑁆𑀲𑀢𑀺, 𑀦 𑀧𑀦 𑀲𑀤𑁆𑀤𑀁 𑀲𑀼𑀡𑀸𑀢𑀺, 𑀢𑀲𑁆𑀫𑀸 𑀢𑀸𑀲𑀁 𑀲𑀤𑁆𑀤𑀁 𑀲𑁄𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀤𑁆𑀤𑀁 𑀲𑁄𑀢𑀼𑀓𑀸𑀫𑁄…𑀧𑁂… 𑀧𑀼𑀘𑁆𑀙𑀻’’𑀢𑀺. 𑀲𑁄 𑀘 𑀅𑀢𑀻𑀢𑁂 𑀏𑀓𑀁 𑀲𑀻𑀮𑀯𑀦𑁆𑀢𑀁 𑀪𑀺𑀓𑁆𑀔𑀼𑀁 𑀓𑀡𑁆𑀡𑀲𑀓𑁆𑀔𑀮𑀺𑀬𑀁 𑀧𑀳𑀭𑀺𑀢𑁆𑀯𑀸 𑀩𑀥𑀺𑀭𑀫𑀓𑀸𑀲𑀺, 𑀢𑀲𑁆𑀫𑀸 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄𑀧𑀺 𑀅𑀪𑀩𑁆𑀩𑁄𑀯 𑀤𑀺𑀩𑁆𑀩𑀲𑁄𑀢𑀸𑀥𑀺𑀕𑀫𑀸𑀬. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀉𑀧𑀦𑀺𑀲𑁆𑀲𑀬𑁄 𑀦𑀢𑁆𑀣𑀻𑀢𑀺 𑀜𑀢𑁆𑀯𑀸 𑀧𑀭𑀺𑀓𑀫𑁆𑀫𑀁 𑀦 𑀓𑀣𑁂𑀲𑀻’’𑀢𑀺. 𑀘𑀺𑀦𑁆𑀢𑁂𑀲𑀻𑀢𑀺 𑀅𑀢𑁆𑀢𑀦𑁄 𑀫𑀺𑀘𑁆𑀙𑀸𑀧𑀭𑀺𑀯𑀺𑀢𑀓𑁆𑀓𑀺𑀢𑁂𑀦 𑀅𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀦𑁆𑀢𑁄 𑀘𑀺𑀦𑁆𑀢𑁂𑀲𑀺.

𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀸𑀯𑀩𑁄𑀥𑀦𑀢𑁄 𑀅𑀪𑁂𑀤𑁄𑀧𑀘𑀸𑀭𑁂𑀦 ‘‘𑀤𑁂𑀲𑀦𑀸𑀥𑀫𑁆𑀫𑁄 𑀦𑀺𑀬𑁆𑀬𑀸𑀦𑀺𑀓𑁄’’𑀢𑀺 𑀯𑀼𑀢𑁆𑀢𑁄. 𑀦𑀺𑀬𑁆𑀬𑀸𑀦𑁄 𑀯𑀸 𑀅𑀭𑀺𑀬𑀫𑀕𑁆𑀕𑁄 𑀩𑁄𑀥𑁂𑀢𑀩𑁆𑀩𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀦𑀺𑀬𑁆𑀬𑀸𑀦𑀺𑀓𑁄 𑀤𑁂𑀲𑀦𑀸𑀥𑀫𑁆𑀫𑁄. 𑀅𑀢𑁆𑀢𑀦𑀺 𑀅𑀢𑁆𑀣𑀺𑀢𑀁 𑀤𑀲𑁆𑀲𑁂𑀢𑀺 𑀓𑀺𑀘𑁆𑀘𑀲𑀺𑀤𑁆𑀥𑀺𑀤𑀲𑁆𑀲𑀦𑁂𑀦 𑀢𑀢𑁆𑀣 𑀢𑀢𑁆𑀣 𑀧𑀸𑀓𑀝𑀻𑀓𑀢𑀢𑁆𑀢𑀸, 𑀦 𑀧𑀝𑀺𑀜𑁆𑀜𑀸𑀫𑀢𑁆𑀢𑁂𑀦. 𑀢𑀣𑀸 𑀳𑀺 𑀬𑀣𑀸𑀧𑀭𑀸𑀥𑀁 𑀢𑀁𑀢𑀁𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀬𑀣𑀸𑀥𑀫𑁆𑀫𑀁 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀜𑁆𑀘 𑀅𑀯𑀺𑀧𑀭𑀻𑀢𑀥𑀫𑁆𑀫𑀤𑁂𑀲𑀦𑀸𑀬 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀬𑀣𑀸𑀪𑀺𑀲𑀗𑁆𑀔𑀢𑀧𑀜𑁆𑀳𑀸𑀦𑀁 𑀢𑀤𑀚𑁆𑀛𑀸𑀲𑀬𑀸𑀦𑀼𑀓𑀽𑀮𑀁 𑀞𑀸𑀦𑀲𑁄 𑀯𑀺𑀲𑁆𑀲𑀚𑁆𑀚𑀦𑁂𑀦 𑀘 𑀪𑀕𑀯𑀢𑁄 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀜𑀸𑀡𑀘𑀸𑀭𑀪𑀸𑀯𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀯𑀺𑀜𑁆𑀜𑀽𑀦𑀁 𑀧𑀸𑀓𑀝𑀁, 𑀢𑀣𑀸 𑀢𑀢𑁆𑀣 𑀢𑀢𑁆𑀣 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀸𑀤𑀻𑀲𑀼 𑀇𑀤𑁆𑀥𑀺𑀯𑀺𑀥𑀜𑀸𑀡𑀸𑀤𑀻𑀦𑀻𑀢𑀺. 𑀢𑁂𑀦𑀸𑀳 ‘‘𑀫𑀬𑁆𑀳𑀜𑁆𑀘𑀸’’𑀢𑀺𑀆𑀤𑀺. 𑀅𑀦𑁆𑀯𑁂𑀢𑀺 𑀬𑀣𑀸𑀕𑀳𑀺𑀢𑀲𑀗𑁆𑀓𑁂𑀢𑀲𑁆𑀲 𑀅𑀦𑀼𑀕𑀫𑀦𑀯𑀲𑁂𑀦 𑀏𑀢𑀺 𑀚𑀸𑀦𑀸𑀢𑀻𑀢𑀺 𑀅𑀦𑁆𑀯𑀬𑁄. 𑀢𑁂𑀦𑀸𑀳 ‘‘𑀅𑀦𑀼𑀩𑀼𑀚𑁆𑀛𑀢𑀻𑀢𑀺 𑀅𑀢𑁆𑀣𑁄’’𑀢𑀺. 𑀲𑀗𑁆𑀓𑁂𑀢𑀸𑀦𑀼𑀕𑀫𑀦𑀜𑁆𑀘𑁂𑀢𑁆𑀣 ‘‘𑀬𑀣𑀸𑀧𑀭𑀸𑀥𑀁 𑀢𑀁𑀢𑀁𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀬𑀣𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀬𑁄𑀚𑀦𑀸 𑀓𑀢𑀸, 𑀏𑀯𑀁 ‘‘𑀏𑀯𑀭𑀽𑀧𑀫𑁆𑀧𑀺 𑀦𑀸𑀫 𑀫𑀬𑁆𑀳𑀁 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑀗𑁆𑀔𑀸𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫’’𑀦𑁆𑀢𑀺𑀆𑀤𑀺𑀦𑀸 𑀢𑀢𑁆𑀣 𑀢𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀲𑀩𑀮𑀜𑀸𑀡𑀯𑀡𑁆𑀡𑀦𑀸

𑁧𑁪𑁮. 𑀬𑀤𑀺𑀧𑀺 𑀆𑀤𑀺𑀢𑁄 𑀅𑀪𑀺𑀜𑁆𑀜𑀸𑀢𑁆𑀢𑀬𑀯𑀲𑁂𑀦 𑀤𑁂𑀲𑀦𑀸𑀬 𑀆𑀕𑀢𑀢𑁆𑀢𑀸 𑀘𑁂𑀢𑁄𑀧𑀭𑀺𑀬𑀜𑀸𑀡𑀸𑀦𑀦𑁆𑀢𑀭𑀁 𑀉𑀧𑀭𑀺 𑀢𑀺𑀲𑁆𑀲𑁄 𑀅𑀪𑀺𑀜𑁆𑀜𑀸 𑀯𑀢𑁆𑀢𑀩𑁆𑀩𑀸 𑀲𑀺𑀬𑀼𑀦𑁆𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀅𑀢𑁆𑀣𑀢𑁄 𑀧𑀦 𑀯𑀺𑀚𑁆𑀚𑀸𑀢𑁆𑀢𑀬𑀁 𑀬𑀣𑀸𑀯𑀼𑀢𑁆𑀢𑀅𑀪𑀺𑀜𑁆𑀜𑀸𑀢𑁆𑀢𑀬𑀫𑁂𑀯𑀸𑀢𑀺 𑀓𑀢𑁆𑀯𑀸 ‘‘𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀯𑀢𑁆𑀢𑀩𑁆𑀩𑀸 𑀲𑀺𑀬𑀼’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 ‘‘𑀢𑀸𑀲𑀼 𑀯𑀼𑀢𑁆𑀢𑀸𑀲𑀼 𑀉𑀧𑀭𑀺 𑀤𑀲𑀩𑀮𑀜𑀸𑀡𑀁 𑀦 𑀧𑀭𑀺𑀧𑀽𑀭𑀢𑀻’’𑀢𑀺 𑀯𑀼𑀢𑁆𑀢𑀁, 𑀦𑀦𑀼 𑀇𑀫𑀸𑀦𑀺 𑀜𑀸𑀡𑀸𑀦𑀺 𑀲𑁂𑀲𑀸𑀪𑀺𑀜𑁆𑀜𑀸 𑀯𑀺𑀬 𑀅𑀢𑁆𑀢𑀦𑁄 𑀯𑀺𑀲𑀬𑀲𑁆𑀲 𑀅𑀪𑀺𑀚𑀸𑀦𑀦𑀝𑁆𑀞𑀁 𑀉𑀧𑀸𑀤𑀸𑀬 𑀅𑀪𑀺𑀜𑁆𑀜𑀸𑀲𑀼 𑀯𑀢𑁆𑀢𑀩𑁆𑀩𑀸𑀦𑀺, 𑀅𑀓𑀫𑁆𑀧𑀺𑀬𑀝𑁆𑀞𑀁 𑀧𑀦 𑀉𑀧𑀢𑁆𑀣𑀫𑁆𑀪𑀦𑀝𑁆𑀞𑀜𑁆𑀘 𑀉𑀧𑀸𑀤𑀸𑀬 𑀩𑀮𑀜𑀸𑀡𑁂𑀲𑀼 𑀬𑀣𑀸 𑀲𑀫𑁆𑀫𑀸𑀲𑀢𑀺𑀆𑀤𑀬𑁄 𑀇𑀦𑁆𑀤𑁆𑀭𑀺𑀬𑀩𑀮𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑁂𑀲𑀽𑀢𑀺? 𑀦𑀬𑀺𑀤𑀫𑁂𑀯𑀁. 𑀢𑀢𑁆𑀣 𑀳𑀺 𑀥𑀫𑁆𑀫𑀸𑀦𑀁 𑀥𑀫𑁆𑀫𑀓𑀺𑀘𑁆𑀘𑀯𑀺𑀲𑁂𑀲𑀯𑀺𑀪𑀸𑀯𑀦𑀧𑀭𑀸𑀬 𑀤𑁂𑀲𑀦𑀸𑀬 𑀯𑀼𑀢𑁆𑀢𑀁, 𑀇𑀥 𑀧𑀦 𑀲𑀢𑁆𑀣𑀼 𑀕𑀼𑀡𑀯𑀺𑀲𑁂𑀲𑀯𑀺𑀪𑀸𑀯𑀦𑀧𑀭𑀸𑀬 𑀤𑁂𑀲𑀦𑀸𑀬 𑀢𑀣𑀸 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸 𑀅𑀢𑁆𑀣𑀢𑁄 𑀅𑀦𑀜𑁆𑀜𑀢𑁆𑀢𑀸, 𑀏𑀓𑀘𑁆𑀘𑀸𑀦𑀁 𑀧𑀼𑀣𑀼𑀚𑁆𑀚𑀦𑀸𑀦𑀁 𑀏𑀯𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑁂𑀬𑁆𑀬 ‘‘𑀓𑀺𑀫𑀺𑀤𑀁 𑀪𑀕𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀕𑀼𑀡𑁂 𑀧𑀼𑀦𑀧𑀺 𑀕𑀡𑁆𑀳𑀦𑁆𑀢𑁄 𑀕𑀼𑀡𑀸𑀥𑀺𑀓𑀤𑀲𑁆𑀲𑀦𑀁 𑀓𑀭𑁄𑀢𑀻’’𑀢𑀺. 𑀢𑀲𑁆𑀫𑀸 𑀲𑀼𑀯𑀼𑀢𑁆𑀢𑀫𑁂𑀢𑀁 ‘‘𑀉𑀧𑀭𑀺 𑀤𑀲𑀩𑀮𑀜𑀸𑀡𑀁 𑀦 𑀧𑀭𑀺𑀧𑀽𑀭𑀢𑀻’’𑀢𑀺.

𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀸𑀦𑀻𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁 (𑀅. 𑀦𑀺. 𑀝𑀻. 𑁩.𑁧𑁦.𑁨𑁧), 𑀦𑀦𑀼 𑀘𑁂𑀢𑀸𑀦𑀺 𑀲𑀸𑀯𑀓𑀸𑀦𑀫𑁆𑀧𑀺 𑀏𑀓𑀘𑁆𑀘𑀸𑀦𑀁 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺? 𑀓𑀸𑀫𑀁 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀬𑀸𑀤𑀺𑀲𑀸𑀦𑀺 𑀧𑀦 𑀩𑀼𑀤𑁆𑀥𑀸𑀦𑀁 𑀞𑀸𑀦𑀸𑀝𑁆𑀞𑀸𑀦𑀜𑀸𑀡𑀸𑀤𑀻𑀦𑀺, 𑀦 𑀢𑀸𑀤𑀺𑀲𑀸𑀦𑀺 𑀢𑀤𑀜𑁆𑀜𑁂𑀲𑀁 𑀓𑀤𑀸𑀘𑀺𑀧𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀸𑀦𑀻𑀢𑀺. 𑀢𑁂𑀦𑀸𑀳 ‘‘𑀢𑀣𑀸𑀕𑀢𑀲𑁆𑀲𑁂𑀯 𑀩𑀮𑀸𑀦𑀻’’𑀢𑀺. 𑀇𑀫𑀫𑁂𑀯 𑀳𑀺 𑀬𑀣𑀸𑀯𑀼𑀢𑁆𑀢𑀮𑁂𑀲𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀢𑀤𑀪𑀸𑀯𑀢𑁄 𑀆𑀲𑀬𑀸𑀦𑀼𑀲𑀬𑀜𑀸𑀡𑀸𑀤𑀻𑀲𑀼 𑀏𑀯 𑀅𑀲𑀸𑀥𑀸𑀭𑀡𑀕𑀼𑀡𑀲𑀫𑀜𑁆𑀜𑀸 𑀦𑀺𑀭𑀼𑀴𑁆𑀳𑀸. 𑀓𑀸𑀫𑀁 𑀜𑀸𑀡𑀩𑀮𑀸𑀦𑀁 𑀜𑀸𑀡𑀲𑀫𑁆𑀪𑀸𑀭𑁄 𑀯𑀺𑀲𑁂𑀲𑀧𑀘𑁆𑀘𑀬𑁄, 𑀧𑀼𑀜𑁆𑀜𑀲𑀫𑁆𑀪𑀸𑀭𑁄𑀧𑀺 𑀧𑀦 𑀦𑁂𑀲𑀁 𑀧𑀘𑁆𑀘𑀬𑁄 𑀏𑀯, 𑀜𑀸𑀡𑀲𑀫𑁆𑀪𑀸𑀭𑀲𑁆𑀲𑀧𑀺 𑀯𑀸 𑀧𑀼𑀜𑁆𑀜𑀲𑀫𑁆𑀪𑀸𑀭𑀪𑀸𑀯𑀢𑁄 ‘‘𑀧𑀼𑀜𑁆𑀜𑀼𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀆𑀕𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁.

𑀧𑀓𑀢𑀺𑀳𑀢𑁆𑀣𑀺𑀓𑀼𑀮𑀦𑁆𑀢𑀺 (𑀲𑀁. 𑀦𑀺. 𑁨.𑁨𑁨) 𑀕𑀺𑀭𑀺𑀘𑀭𑀦𑀤𑀻𑀘𑀭𑀯𑀦𑀘𑀭𑀸𑀤𑀺𑀧𑁆𑀧𑀪𑁂𑀤𑀸 𑀕𑁄𑀘𑀭𑀺𑀬𑀓𑀸𑀮𑀸𑀯𑀓𑀦𑀸𑀫𑀸 𑀲𑀩𑁆𑀩𑀸𑀧𑀺 𑀩𑀮𑁂𑀦 𑀧𑀸𑀓𑀢𑀺𑀓𑀸 𑀳𑀢𑁆𑀣𑀺𑀚𑀸𑀢𑀺. 𑀤𑀲𑀦𑁆𑀦𑀁 𑀧𑀼𑀭𑀺𑀲𑀸𑀦𑀦𑁆𑀢𑀺 𑀣𑀸𑀫𑀫𑀚𑁆𑀛𑀺𑀫𑀸𑀦𑀁 𑀤𑀲𑀦𑁆𑀦𑀁 𑀧𑀼𑀭𑀺𑀲𑀸𑀦𑀁. 𑀏𑀓𑀲𑁆𑀲 𑀢𑀣𑀸𑀕𑀢𑀲𑁆𑀲 𑀓𑀸𑀬𑀩𑀮𑀦𑁆𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀏𑀓𑀲𑁆𑀲𑀸𑀢𑀺 𑀘 𑀢𑀣𑀸 𑀳𑁂𑀝𑁆𑀞𑀸𑀓𑀣𑀸𑀬𑀁 𑀆𑀕𑀢𑀢𑁆𑀢𑀸 𑀤𑁂𑀲𑀦𑀸𑀲𑁄𑀢𑁂𑀦 𑀯𑀼𑀢𑁆𑀢𑀁. 𑀦𑀸𑀭𑀸𑀬𑀦𑀲𑀗𑁆𑀖𑀸𑀢𑀩𑀮𑀦𑁆𑀢𑀺 𑀏𑀢𑁆𑀣 𑀦𑀸𑀭𑀸 𑀯𑀼𑀘𑁆𑀘𑀦𑁆𑀢𑀺 𑀭𑀲𑁆𑀫𑀺𑀬𑁄, 𑀢𑀸 𑀩𑀳𑀽 𑀦𑀸𑀦𑀸𑀯𑀺𑀥𑀸 𑀇𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀦𑀸𑀭𑀸𑀬𑀦𑀁, 𑀯𑀚𑀺𑀭𑀁, 𑀢𑀲𑁆𑀫𑀸 𑀦𑀸𑀭𑀸𑀬𑀦𑀲𑀗𑁆𑀖𑀸𑀢𑀩𑀮𑀦𑁆𑀢𑀺 𑀯𑀚𑀺𑀭𑀲𑀗𑁆𑀖𑀸𑀢𑀩𑀮𑀦𑁆𑀢𑀺 𑀅𑀢𑁆𑀣𑁄. 𑀜𑀸𑀡𑀩𑀮𑀁 𑀧𑀦 𑀧𑀸𑀴𑀺𑀬𑀁 𑀆𑀕𑀢𑀫𑁂𑀯, 𑀦 𑀓𑀸𑀬𑀩𑀮𑀁 𑀯𑀺𑀬 𑀅𑀝𑁆𑀞𑀓𑀣𑀸𑀭𑀼𑀴𑁆𑀳𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀲𑀁𑀬𑀼𑀢𑁆𑀢𑀓𑁂 𑀆𑀕𑀢𑀸𑀦𑀺 𑀢𑁂𑀲𑀢𑁆𑀢𑀢𑀺 𑀜𑀸𑀡𑀸𑀦𑀺 𑀲𑀢𑁆𑀢𑀲𑀢𑁆𑀢𑀢𑀺 𑀜𑀸𑀡𑀸𑀦𑀻’’𑀢𑀺 𑀯𑀼𑀢𑁆𑀢𑀁 (𑀯𑀺𑀪. 𑀫𑀽𑀮𑀝𑀻. 𑁭𑁬𑁦), 𑀢𑀢𑁆𑀣 𑀧𑀦 𑀦𑀺𑀤𑀸𑀦𑀯𑀕𑁆𑀕𑁂 𑀲𑀢𑁆𑀢𑀲𑀢𑁆𑀢𑀢𑀺 𑀆𑀕𑀢𑀸𑀦𑀺 𑀘𑀢𑀼𑀘𑀢𑁆𑀢𑀸𑀭𑀻𑀲𑀜𑁆𑀘, 𑀢𑁂𑀲𑀢𑁆𑀢𑀢𑀺 𑀧𑀦 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 (𑀧𑀝𑀺. 𑀫. 𑁧.𑁭𑁩 𑀫𑀸𑀢𑀺𑀓𑀸) 𑀲𑀼𑀢𑀫𑀬𑀸𑀤𑀻𑀦𑀺 𑀆𑀕𑀢𑀸𑀦𑀺 𑀤𑀺𑀲𑁆𑀲𑀦𑁆𑀢𑀺, 𑀦 𑀲𑀁𑀬𑀼𑀢𑁆𑀢𑀓𑁂. 𑀅𑀜𑁆𑀜𑀸𑀦𑀺𑀧𑀻𑀢𑀺 𑀏𑀢𑁂𑀦 𑀜𑀸𑀡𑀯𑀢𑁆𑀣𑀼𑀯𑀺𑀪𑀗𑁆𑀕𑁂 𑀏𑀓𑀓𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, 𑀅𑀜𑁆𑀜𑀢𑁆𑀣 𑀘 ‘‘𑀧𑀼𑀩𑁆𑀩𑀦𑁆𑀢𑁂 𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 (𑀥. 𑀲. 𑁧𑁦𑁭𑁬) 𑀩𑁆𑀭𑀳𑁆𑀫𑀚𑀸𑀮𑀸𑀤𑀻𑀲𑀼 (𑀤𑀻. 𑀦𑀺. 𑁧.𑁩𑁬) 𑀘 ‘‘𑀢𑀬𑀺𑀤𑀁 𑀢𑀣𑀸𑀕𑀢𑁄 𑀧𑀚𑀸𑀦𑀸𑀢𑀺, 𑀇𑀫𑀸𑀦𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀸𑀦𑀺 𑀏𑀯𑀁 𑀕𑀳𑀺𑀢𑀸𑀦𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸𑀦𑀺 𑀅𑀦𑁂𑀓𑀸𑀦𑀺 𑀜𑀸𑀡𑀧𑁆𑀧𑀪𑁂𑀤𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀸𑀣𑀸𑀯𑀧𑀝𑀺𑀯𑁂𑀥𑀢𑁄 𑀲𑀬𑀜𑁆𑀘 𑀅𑀓𑀫𑁆𑀧𑀺𑀬𑀁 𑀧𑀼𑀕𑁆𑀕𑀮𑀜𑁆𑀘 𑀢𑀁𑀲𑀫𑀗𑁆𑀕𑀺𑀁 𑀦𑁂𑀬𑁆𑀬𑁂𑀲𑀼 𑀅𑀥𑀺𑀩𑀮𑀁 𑀓𑀭𑁄𑀢𑀻𑀢𑀺 𑀆𑀳 ‘‘𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀉𑀧𑀢𑁆𑀣𑀫𑁆𑀪𑀦𑀝𑁆𑀞𑁂𑀦 𑀘𑀸’’𑀢𑀺.

𑀉𑀲𑀪𑀲𑁆𑀲 𑀇𑀤𑀦𑁆𑀢𑀺 𑀆𑀲𑀪𑀁, (𑀅. 𑀦𑀺. 𑀝𑀻. 𑁨.𑁪.𑁮) 𑀲𑁂𑀝𑁆𑀞𑀁 𑀞𑀸𑀦𑀁. 𑀲𑀩𑁆𑀩𑀜𑁆𑀜𑀼𑀢𑀧𑀝𑀺𑀚𑀸𑀦𑀦𑀯𑀲𑁂𑀦 𑀅𑀪𑀺𑀫𑀼𑀔𑀁 𑀕𑀘𑁆𑀙𑀦𑁆𑀢𑀺, 𑀅𑀝𑁆𑀞 𑀯𑀸 𑀧𑀭𑀺𑀲𑀸 𑀉𑀧𑀲𑀗𑁆𑀓𑀫𑀦𑁆𑀢𑀻𑀢𑀺 𑀆𑀲𑀪𑀸, 𑀧𑀼𑀩𑁆𑀩𑀩𑀼𑀤𑁆𑀥𑀸. 𑀇𑀤𑀁 𑀧𑀦𑀸𑀢𑀺 𑀩𑀼𑀤𑁆𑀥𑀸𑀦𑀁 𑀞𑀸𑀦𑀁 𑀲𑀩𑁆𑀩𑀜𑁆𑀜𑀼𑀢𑀫𑁂𑀯 𑀯𑀤𑀢𑀺. 𑀢𑀺𑀝𑁆𑀞𑀫𑀸𑀦𑁄𑀯𑀸𑀢𑀺 𑀅𑀯𑀤𑀦𑁆𑀢𑁄𑀧𑀺 (𑀲𑀁. 𑀦𑀺. 𑀝𑀻. 𑁨.𑁨.𑁨𑁨) 𑀢𑀺𑀝𑁆𑀞𑀫𑀸𑀦𑁄𑀯 𑀧𑀝𑀺𑀚𑀸𑀦𑀸𑀢𑀺 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀉𑀧𑀕𑀘𑁆𑀙𑀢𑀻𑀢𑀺 𑀅𑀦𑀼𑀚𑀸𑀦𑀸𑀢𑀺.

𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀽𑀢𑀺 ‘‘𑀅𑀪𑀺𑀚𑀸𑀦𑀸𑀫𑀺 𑀔𑁄 𑀧𑀦𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀅𑀦𑁂𑀓𑀲𑀢𑀁 𑀔𑀢𑁆𑀢𑀺𑀬𑀧𑀭𑀺𑀲𑀁…𑀧𑁂… 𑀢𑀢𑁆𑀭 𑀯𑀢 𑀫𑀁 𑀪𑀬𑀁 𑀯𑀸 𑀲𑀸𑀭𑀚𑁆𑀚𑀁 𑀯𑀸 𑀑𑀓𑁆𑀓𑀫𑀺𑀲𑁆𑀲𑀢𑀻𑀢𑀺 𑀦𑀺𑀫𑀺𑀢𑁆𑀢𑀫𑁂𑀢𑀁, 𑀲𑀸𑀭𑀺𑀧𑀼𑀢𑁆𑀢, 𑀦 𑀲𑀫𑀦𑀼𑀧𑀲𑁆𑀲𑀸𑀫𑀻’’𑀢𑀺 (𑀫. 𑀦𑀺. 𑁧.𑁧𑁫𑁧) 𑀯𑀼𑀢𑁆𑀢𑀸𑀲𑀼 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼. 𑀅𑀪𑀻𑀢𑀦𑀸𑀤𑀁 𑀦𑀤𑀢𑀻𑀢𑀺 𑀧𑀭𑀢𑁄 𑀤𑀲𑁆𑀲𑀺𑀢𑀜𑀸𑀡𑀬𑁄𑀕𑁂𑀦 𑀤𑀲𑀩𑀮𑁄𑀳𑀦𑁆𑀢𑀺 𑀅𑀪𑀻𑀢𑀦𑀸𑀤𑀁 𑀦𑀤𑀢𑀺. 𑀲𑀻𑀳𑀦𑀸𑀤𑀲𑀼𑀢𑁆𑀢𑁂𑀦 𑀔𑀦𑁆𑀥𑀯𑀕𑁆𑀕𑁂 (𑀲𑀁. 𑀦𑀺. 𑁩.𑁭𑁮) 𑀆𑀕𑀢𑁂𑀦.

‘‘𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀘𑀢𑀼𑀘𑀓𑁆𑀓𑀁 𑀯𑀢𑁆𑀢𑀢𑀻’’𑀢𑀺 (𑀅. 𑀦𑀺. 𑁪.𑁩𑁧) 𑀲𑀼𑀢𑁆𑀢𑀲𑁂𑀲𑁂𑀦 𑀲𑀧𑁆𑀧𑀼𑀭𑀺𑀲𑀽𑀧𑀲𑁆𑀲𑀬𑀸𑀤𑀻𑀦𑀁 𑀨𑀮𑀲𑀫𑁆𑀧𑀢𑁆𑀢𑀺𑀧𑀯𑀢𑁆𑀢𑀺, 𑀧𑀼𑀭𑀺𑀫𑀲𑀧𑁆𑀧𑀼𑀭𑀺𑀲𑀽𑀧𑀲𑁆𑀲𑀬𑀸𑀤𑀺𑀁 𑀉𑀧𑀦𑀺𑀲𑁆𑀲𑀸𑀬 𑀧𑀘𑁆𑀙𑀺𑀫𑀲𑀧𑁆𑀧𑀼𑀭𑀺𑀲𑀽𑀧𑀲𑁆𑀲𑀬𑀸𑀤𑀻𑀦𑀁 𑀲𑀫𑁆𑀧𑀢𑁆𑀢𑀺𑀧𑀯𑀢𑁆𑀢𑀺 𑀯𑀸 𑀯𑀼𑀢𑁆𑀢𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀢𑀢𑁆𑀣 𑀘 𑀘𑀓𑁆𑀓-𑀲𑀤𑁆𑀤𑀲𑁆𑀲 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀘𑀓𑁆𑀓𑀲𑀡𑁆𑀞𑀸𑀦𑀸 𑀅𑀲𑀦𑀺 𑀏𑀯 𑀅𑀲𑀦𑀺𑀯𑀺𑀘𑀓𑁆𑀓𑀁. 𑀉𑀭𑀘𑀓𑁆𑀓𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀆𑀡𑀸𑀲𑀫𑀽𑀳𑀸𑀤𑀻𑀲𑀼𑀧𑀺 𑀘𑀓𑁆𑀓-𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀲𑀗𑁆𑀖𑀪𑁂𑀤𑀁 𑀓𑀭𑀺𑀲𑁆𑀲𑀸𑀫 𑀘𑀓𑁆𑀓𑀪𑁂𑀤’’𑀦𑁆𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁪𑁦𑁯; 𑀘𑀽𑀴𑀯. 𑁩𑁪𑁩) 𑀳𑀺 𑀆𑀡𑀸 ‘‘𑀘𑀓𑁆𑀓’’𑀦𑁆𑀢𑀺 𑀯𑀼𑀢𑁆𑀢𑀸, ‘‘𑀤𑁂𑀯𑀘𑀓𑁆𑀓𑀁 𑀅𑀲𑀼𑀭𑀘𑀓𑁆𑀓’’𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑀝𑀻. 𑁨.𑁪.𑁮) 𑀲𑀫𑀽𑀳𑁄𑀢𑀺. 𑀧𑀝𑀺𑀯𑁂𑀥𑀦𑀺𑀝𑁆𑀞𑀢𑁆𑀢𑀸 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁 𑀧𑀝𑀺𑀯𑁂𑀥𑁄𑀢𑀺 ‘‘𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀧𑀝𑀺𑀮𑀤𑁆𑀥𑀲𑁆𑀲𑀧𑀺 𑀤𑁂𑀲𑀦𑀸𑀜𑀸𑀡𑀲𑁆𑀲 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺 𑀧𑀭𑀲𑁆𑀲 𑀩𑀼𑀚𑁆𑀛𑀦𑀫𑀢𑁆𑀢𑁂𑀦 𑀳𑁄𑀢𑀻𑀢𑀺 ‘‘𑀅𑀜𑁆𑀜𑀸𑀢𑀓𑁄𑀡𑁆𑀟𑀜𑁆𑀜𑀲𑁆𑀲 𑀲𑁄𑀢𑀸𑀧𑀢𑁆𑀢𑀺…𑀧𑁂… 𑀨𑀮𑀓𑁆𑀔𑀡𑁂 𑀧𑀯𑀢𑁆𑀢𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁄 𑀧𑀭𑀁 𑀧𑀦 𑀬𑀸𑀯 𑀧𑀭𑀺𑀦𑀺𑀩𑁆𑀩𑀸𑀦𑀸 𑀤𑁂𑀲𑀦𑀸𑀜𑀸𑀡𑀧𑁆𑀧𑀯𑀢𑁆𑀢𑀺 𑀢𑀲𑁆𑀲𑁂𑀯 𑀧𑀯𑀢𑁆𑀢𑀺𑀢𑀲𑁆𑀲 𑀥𑀫𑁆𑀫𑀘𑀓𑁆𑀓𑀲𑁆𑀲 𑀞𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁 𑀧𑀯𑀢𑁆𑀢𑀺𑀢𑀘𑀓𑁆𑀓𑀲𑁆𑀲 𑀘𑀓𑁆𑀓𑀯𑀢𑁆𑀢𑀺𑀦𑁄 𑀘𑀓𑁆𑀓𑀭𑀢𑀦𑀲𑁆𑀲 𑀞𑀸𑀦𑀁 𑀯𑀺𑀬.

‘‘𑀢𑀺𑀝𑁆𑀞𑀢𑀻’’𑀢𑀺 𑀯𑀼𑀢𑁆𑀢𑀁, 𑀓𑀺𑀁 𑀪𑀽𑀫𑀺𑀬𑀁 𑀧𑀼𑀭𑀺𑀲𑁄 𑀯𑀺𑀬? 𑀦𑁄𑀢𑀺 𑀆𑀳 ‘‘𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸’’𑀢𑀺. 𑀞𑀸𑀦𑀦𑁆𑀢𑀺 𑀘𑁂𑀢𑁆𑀣 𑀅𑀢𑁆𑀢𑀮𑀸𑀪𑁄 𑀥𑀭𑀫𑀸𑀦𑀢𑀸 𑀘, 𑀦 𑀕𑀢𑀺𑀦𑀺𑀯𑀢𑁆𑀢𑀻𑀢𑀺 𑀆𑀳 ‘‘𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀧𑀯𑀢𑁆𑀢𑀢𑀺 𑀘𑀸’’𑀢𑀺. 𑀬𑀢𑁆𑀣 𑀧𑀦𑁂𑀢𑀁 𑀤𑀲𑀩𑀮𑀜𑀸𑀡𑀁 𑀯𑀺𑀢𑁆𑀣𑀸𑀭𑀺𑀢𑀁, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀪𑀺𑀥𑀫𑁆𑀫𑁂 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀲𑀫𑀸𑀤𑀺𑀬𑀦𑁆𑀢𑀻𑀢𑀺 𑀲𑀫𑀸𑀤𑀸𑀦𑀸𑀦𑀺, 𑀢𑀸𑀦𑀺 𑀧𑀦 𑀲𑀫𑀸𑀤𑀺𑀬𑀺𑀢𑁆𑀯𑀸 𑀓𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀲𑀫𑀸𑀤𑀺𑀬𑀺𑀢𑁆𑀯𑀸 𑀓𑀢𑀸𑀦’’𑀦𑁆𑀢𑀺. 𑀓𑀫𑁆𑀫𑀫𑁂𑀯 𑀯𑀸 𑀓𑀫𑁆𑀫𑀲𑀫𑀸𑀤𑀸𑀦𑀦𑁆𑀢𑀺 𑀏𑀢𑁂𑀦 𑀲𑀫𑀸𑀤𑀸𑀦𑀲𑀤𑁆𑀤𑀲𑁆𑀲 𑀅𑀧𑀼𑀩𑁆𑀩𑀢𑁆𑀣𑀸𑀪𑀸𑀯𑀁 𑀤𑀲𑁆𑀲𑁂𑀢𑀺 𑀫𑀼𑀢𑁆𑀢𑀕𑀢𑀲𑀤𑁆𑀤𑁂 𑀕𑀢𑀲𑀤𑁆𑀤𑀲𑁆𑀲 𑀯𑀺𑀬. 𑀕𑀢𑀻𑀢𑀺 𑀦𑀺𑀭𑀬𑀸𑀤𑀺𑀕𑀢𑀺𑀬𑁄. 𑀉𑀧𑀥𑀻𑀢𑀺 𑀅𑀢𑁆𑀢𑀪𑀸𑀯𑁄. 𑀓𑀸𑀮𑁄𑀢𑀺 𑀓𑀫𑁆𑀫𑀲𑁆𑀲 𑀯𑀺𑀧𑀘𑁆𑀘𑀦𑀸𑀭𑀳𑀓𑀸𑀮𑁄. 𑀧𑀬𑁄𑀕𑁄𑀢𑀺 𑀯𑀺𑀧𑀸𑀓𑀼𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑀪𑀽𑀢𑀸 𑀓𑀺𑀭𑀺𑀬𑀸.

𑀅𑀕𑀢𑀺𑀕𑀸𑀫𑀺𑀦𑀺𑀦𑁆𑀢𑀺 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀁. 𑀯𑀓𑁆𑀔𑀢𑀺 𑀳𑀺 ‘‘𑀦𑀺𑀩𑁆𑀩𑀸𑀦𑀜𑁆𑀘𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀧𑀚𑀸𑀦𑀸𑀫𑀺 𑀦𑀺𑀩𑁆𑀩𑀸𑀦𑀕𑀸𑀫𑀺𑀜𑁆𑀘 𑀫𑀕𑁆𑀕𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤’’𑀦𑁆𑀢𑀺 (𑀫. 𑀦𑀺. 𑁧.𑁧𑁫𑁩). 𑀩𑀳𑀽𑀲𑀼𑀧𑀺 𑀫𑀦𑀼𑀲𑁆𑀲𑁂𑀲𑀼 𑀏𑀓𑀫𑁂𑀯 𑀧𑀸𑀡𑀁 𑀖𑀸𑀢𑁂𑀦𑁆𑀢𑁂𑀲𑀼 𑀓𑀸𑀫𑀁 𑀲𑀩𑁆𑀩𑁂𑀲𑀁 𑀘𑁂𑀢𑀦𑀸 𑀢𑀲𑁆𑀲𑁂𑀯𑁂𑀓𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀭𑀫𑁆𑀫𑀡𑀸, 𑀢𑀁 𑀧𑀦 𑀓𑀫𑁆𑀫𑀁 𑀢𑁂𑀲𑀁 𑀦𑀸𑀦𑀸𑀓𑀸𑀭𑀁. 𑀢𑁂𑀲𑀼 (𑀯𑀺𑀪. 𑀅𑀝𑁆𑀞. 𑁮𑁧𑁧) 𑀳𑀺 𑀏𑀓𑁄 𑀆𑀤𑀭𑁂𑀦 𑀙𑀦𑁆𑀤𑀚𑀸𑀢𑁄 𑀓𑀭𑁄𑀢𑀺, 𑀏𑀓𑁄 ‘‘𑀏𑀳𑀺 𑀢𑁆𑀯𑀫𑁆𑀧𑀺 𑀓𑀭𑁄𑀳𑀻’’𑀢𑀺 𑀧𑀭𑁂𑀳𑀺 𑀦𑀺𑀧𑁆𑀧𑀻𑀴𑀺𑀢𑁄 𑀓𑀭𑁄𑀢𑀺, 𑀏𑀓𑁄 𑀲𑀫𑀸𑀦𑀘𑁆𑀙𑀦𑁆𑀤𑁄 𑀯𑀺𑀬 𑀳𑀼𑀢𑁆𑀯𑀸 𑀅𑀧𑁆𑀧𑀝𑀺𑀩𑀸𑀳𑀫𑀸𑀦𑁄 𑀯𑀺𑀘𑀭𑀢𑀺. 𑀢𑁂𑀲𑀼 𑀏𑀓𑁄 𑀢𑁂𑀦𑁂𑀯 𑀓𑀫𑁆𑀫𑁂𑀦 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺, 𑀏𑀓𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁, 𑀏𑀓𑁄 𑀧𑁂𑀢𑁆𑀢𑀺𑀯𑀺𑀲𑀬𑁂. 𑀢𑀁 𑀢𑀣𑀸𑀕𑀢𑁄 𑀆𑀬𑀽𑀳𑀦𑀓𑁆𑀔𑀡𑁂 𑀏𑀯 𑁋 ‘‘𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀆𑀬𑀽𑀳𑀺𑀢𑀢𑁆𑀢𑀸 𑀏𑀲 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀏𑀲 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁, 𑀏𑀲 𑀧𑁂𑀢𑁆𑀢𑀺𑀯𑀺𑀲𑀬𑁂’’𑀢𑀺 𑀚𑀸𑀦𑀸𑀢𑀺. 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀫𑀸𑀦𑀫𑁆𑀧𑀺 𑁋 ‘‘𑀏𑀲 𑀫𑀳𑀸𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀏𑀲 𑀉𑀲𑁆𑀲𑀤𑀦𑀺𑀭𑀬𑁂’’𑀢𑀺 𑀚𑀸𑀦𑀸𑀢𑀺. 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀫𑀸𑀦𑀫𑁆𑀧𑀺 𑁋 ‘‘𑀏𑀲 𑀅𑀧𑀸𑀤𑀓𑁄 𑀪𑀯𑀺𑀲𑁆𑀲𑀢𑀺, 𑀏𑀲 𑀤𑁆𑀯𑀺𑀧𑀸𑀤𑀓𑁄, 𑀏𑀲 𑀘𑀢𑀼𑀧𑁆𑀧𑀤𑁄, 𑀏𑀲 𑀩𑀳𑀼𑀧𑁆𑀧𑀤𑁄’’𑀢𑀺 𑀚𑀸𑀦𑀸𑀢𑀺. 𑀧𑁂𑀢𑁆𑀢𑀺𑀯𑀺𑀲𑀬𑁂 𑀦𑀺𑀩𑁆𑀩𑀢𑁆𑀢𑀫𑀸𑀦𑀫𑁆𑀧𑀺 𑁋 ‘‘𑀏𑀲 𑀦𑀺𑀚𑁆𑀛𑀸𑀫𑀢𑀡𑁆𑀳𑀺𑀓𑁄 𑀪𑀯𑀺𑀲𑁆𑀲𑀢𑀺, 𑀏𑀲 𑀔𑀼𑀧𑁆𑀧𑀺𑀧𑀸𑀲𑀺𑀓𑁄, 𑀏𑀲 𑀧𑀭𑀤𑀢𑁆𑀢𑀽𑀧𑀚𑀻𑀯𑀻’’𑀢𑀺 𑀚𑀸𑀦𑀸𑀢𑀺. 𑀢𑁂𑀲𑀼 𑀘 𑀓𑀫𑁆𑀫𑁂𑀲𑀼 𑁋 ‘‘𑀇𑀤𑀁 𑀓𑀫𑁆𑀫𑀁 𑀧𑀝𑀺𑀲𑀦𑁆𑀥𑀺𑀫𑀸𑀓𑀟𑁆𑀠𑀺𑀲𑁆𑀲𑀢𑀺, 𑀇𑀤𑀁 𑀅𑀜𑁆𑀜𑁂𑀦 𑀤𑀺𑀦𑁆𑀦𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀉𑀧𑀥𑀺𑀯𑁂𑀧𑀓𑁆𑀓𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀚𑀸𑀦𑀸𑀢𑀺.

𑀢𑀣𑀸 𑀲𑀓𑀮𑀕𑀸𑀫𑀯𑀸𑀲𑀺𑀓𑁂𑀲𑀼 𑀏𑀓𑀢𑁄 𑀧𑀺𑀡𑁆𑀟𑀧𑀸𑀢𑀁 𑀤𑀤𑀫𑀸𑀦𑁂𑀲𑀼 𑀓𑀸𑀫𑀁 𑀲𑀩𑁆𑀩𑁂𑀲𑀫𑁆𑀧𑀺 𑀘𑁂𑀢𑀦𑀸 𑀧𑀺𑀡𑁆𑀟𑀧𑀸𑀢𑀸𑀭𑀫𑁆𑀫𑀡𑀸𑀯, 𑀢𑀁 𑀧𑀦 𑀓𑀫𑁆𑀫𑀁 𑀢𑁂𑀲𑀁 𑀦𑀸𑀦𑀸𑀓𑀸𑀭𑀁. 𑀢𑁂𑀲𑀼 𑀳𑀺 𑀏𑀓𑁄 𑀆𑀤𑀭𑁂𑀦 𑀓𑀭𑁄𑀢𑀻𑀢𑀺 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀁, 𑀢𑀲𑁆𑀫𑀸 𑀢𑁂𑀲𑀼 𑀓𑁂𑀘𑀺 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀓𑁂𑀘𑀺 𑀫𑀦𑀼𑀲𑁆𑀲𑀮𑁄𑀓𑁂, 𑀢𑀁 𑀢𑀣𑀸𑀕𑀢𑁄 𑀆𑀬𑀽𑀳𑀦𑀓𑁆𑀔𑀡𑁂𑀬𑁂𑀯 𑀚𑀸𑀦𑀸𑀢𑀺 𑁋 ‘‘𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀆𑀬𑀽𑀳𑀺𑀢𑀢𑁆𑀢𑀸 𑀏𑀲 𑀫𑀦𑀼𑀲𑁆𑀲𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀏𑀲 𑀤𑁂𑀯𑀮𑁄𑀓𑁂, 𑀢𑀢𑁆𑀣𑀸𑀧𑀺 𑀏𑀲 𑀔𑀢𑁆𑀢𑀺𑀬𑀓𑀼𑀮𑁂, 𑀏𑀲 𑀩𑁆𑀭𑀸𑀳𑁆𑀫𑀡𑀓𑀼𑀮𑁂, 𑀏𑀲 𑀯𑁂𑀲𑁆𑀲𑀓𑀼𑀮𑁂, 𑀏𑀲 𑀲𑀼𑀤𑁆𑀤𑀓𑀼𑀮𑁂, 𑀏𑀲 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀲𑀼, 𑀏𑀲 𑀦𑀺𑀫𑁆𑀫𑀸𑀦𑀭𑀢𑀻𑀲𑀼, 𑀏𑀲 𑀢𑀼𑀲𑀺𑀢𑁂𑀲𑀼, 𑀏𑀲 𑀬𑀸𑀫𑁂𑀲𑀼, 𑀏𑀲 𑀢𑀸𑀯𑀢𑀺𑀁𑀲𑁂𑀲𑀼, 𑀏𑀲 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂𑀲𑀼, 𑀏𑀲 𑀪𑀼𑀫𑁆𑀫𑀤𑁂𑀯𑁂𑀲𑀽’’𑀢𑀺𑀆𑀤𑀺𑀦𑀸 𑀢𑀢𑁆𑀣 𑀢𑀢𑁆𑀣 𑀳𑀻𑀦𑀧𑀡𑀻𑀢𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀅𑀧𑁆𑀧𑀧𑀭𑀺𑀯𑀸𑀭𑀫𑀳𑀸𑀧𑀭𑀺𑀯𑀸𑀭𑀢𑀸𑀤𑀺𑀪𑁂𑀤𑀁 𑀢𑀁 𑀢𑀁 𑀯𑀺𑀲𑁂𑀲𑀁 𑀆𑀬𑀽𑀳𑀦𑀓𑁆𑀔𑀡𑁂𑀬𑁂𑀯 𑀚𑀸𑀦𑀸𑀢𑀺.

𑀢𑀣𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀦𑁆𑀢𑁂𑀲𑀼𑀬𑁂𑀯 𑁋 ‘‘𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀏𑀲 𑀓𑀺𑀜𑁆𑀘𑀺 𑀲𑀮𑁆𑀮𑀓𑁆𑀔𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀏𑀲 𑀫𑀳𑀸𑀪𑀽𑀢𑀫𑀢𑁆𑀢𑀫𑁂𑀯 𑀯𑀯𑀢𑁆𑀣𑀧𑁂𑀲𑁆𑀲𑀢𑀺, 𑀏𑀲 𑀭𑀽𑀧𑀧𑀭𑀺𑀕𑁆𑀕𑀳𑁂𑀬𑁂𑀯 𑀞𑀲𑁆𑀲𑀢𑀺, 𑀏𑀲 𑀅𑀭𑀽𑀧𑀧𑀭𑀺𑀕𑁆𑀕𑀳𑁂𑀬𑁂𑀯, 𑀏𑀲 𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑁂𑀬𑁂𑀯, 𑀏𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀏𑀯, 𑀏𑀲 𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀸𑀬 𑀏𑀯, 𑀏𑀲 𑀧𑀞𑀫𑀨𑀮𑁂𑀬𑁂𑀯, 𑀏𑀲 𑀤𑀼𑀢𑀺𑀬𑀨𑀮𑁂 𑀏𑀯, 𑀏𑀲 𑀢𑀢𑀺𑀬𑀨𑀮𑁂 𑀏𑀯, 𑀏𑀲 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺 𑀚𑀸𑀦𑀸𑀢𑀺. 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀲𑀼𑀧𑀺 𑁋 ‘‘𑀇𑀫𑀲𑁆𑀲 𑀧𑀭𑀺𑀓𑀫𑁆𑀫𑀫𑀢𑁆𑀢𑀫𑁂𑀯 𑀪𑀯𑀺𑀲𑁆𑀲𑀢𑀺, 𑀏𑀲 𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑁆𑀲𑀢𑀺, 𑀏𑀲 𑀅𑀧𑁆𑀧𑀦𑀁 𑀏𑀯 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀏𑀲 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 𑀚𑀸𑀦𑀸𑀢𑀺. 𑀢𑁂𑀦𑀸𑀳 ‘‘𑀇𑀫𑀲𑁆𑀲 𑀘𑁂𑀢𑀦𑀸’’𑀢𑀺𑀆𑀤𑀺.

𑀓𑀸𑀫𑀦𑀢𑁄, 𑀓𑀸𑀫𑁂𑀢𑀩𑁆𑀩𑀢𑁄, 𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑀢𑁄 𑀘 𑀓𑀸𑀫𑁄 𑀥𑀸𑀢𑀼 𑀓𑀸𑀫𑀥𑀸𑀢𑀼. 𑀆𑀤𑀺-𑀲𑀤𑁆𑀤𑁂𑀦 𑀩𑁆𑀬𑀸𑀧𑀸𑀤𑀥𑀸𑀢𑀼-𑀭𑀽𑀧𑀥𑀸𑀢𑀼-𑀆𑀤𑀻𑀦𑀁 𑀲𑀗𑁆𑀕𑀳𑁄. 𑀯𑀺𑀮𑀓𑁆𑀔𑀡𑀢𑀸𑀬𑀸𑀢𑀺 𑀯𑀺𑀲𑀤𑀺𑀲𑀲𑀪𑀸𑀯𑀢𑀸𑀬. 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀮𑁄𑀓𑀦𑁆𑀢𑀺 𑀅𑀦𑁂𑀓𑀥𑀸𑀢𑀼𑀁 𑀦𑀸𑀦𑀸𑀥𑀸𑀢𑀼𑀁 𑀔𑀦𑁆𑀥𑀮𑁄𑀓𑀁 𑀆𑀬𑀢𑀦𑀮𑁄𑀓𑀁 𑀥𑀸𑀢𑀼𑀮𑁄𑀓𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻𑀢𑀺 𑀬𑁄𑀚𑀦𑀸. ‘‘𑀅𑀬𑀁 𑀭𑀽𑀧𑀓𑁆𑀔𑀦𑁆𑀥𑁄 𑀦𑀸𑀫…𑀧𑁂… 𑀅𑀬𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀦𑀸𑀫. 𑀢𑁂𑀲𑀼𑀧𑀺 𑀏𑀓𑀯𑀺𑀥𑁂𑀦 𑀭𑀽𑀧𑀓𑁆𑀔𑀦𑁆𑀥𑁄, 𑀏𑀓𑀸𑀤𑀲𑀯𑀺𑀥𑁂𑀦 𑀭𑀽𑀧𑀓𑁆𑀔𑀦𑁆𑀥𑁄 (𑀯𑀺𑀪. 𑁩𑁩). 𑀏𑀓𑀯𑀺𑀥𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀩𑀳𑀼𑀯𑀺𑀥𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 (𑀯𑀺𑀪. 𑁩𑁪-𑁬𑁧). 𑀏𑀓𑀯𑀺𑀥𑁂𑀦 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀩𑀳𑀼𑀯𑀺𑀥𑁂𑀦 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 (𑀯𑀺𑀪. 𑁬𑁨-𑁯𑁧). 𑀏𑀓𑀯𑀺𑀥𑁂𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀩𑀳𑀼𑀯𑀺𑀥𑁂𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 (𑀯𑀺𑀪. 𑁯𑁨-𑁧𑁨𑁦). 𑀏𑀓𑀯𑀺𑀥𑁂𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀩𑀳𑀼𑀯𑀺𑀥𑁂𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺 (𑀯𑀺𑀪. 𑁧𑁨𑁧-𑁧𑁪𑁯) 𑀏𑀯𑀁 𑀢𑀸𑀯 𑀔𑀦𑁆𑀥𑀮𑁄𑀓𑀲𑁆𑀲, ‘‘𑀇𑀤𑀁 𑀘𑀓𑁆𑀔𑀸𑀬𑀢𑀦𑀁 𑀦𑀸𑀫…𑀧𑁂… 𑀇𑀤𑀁 𑀥𑀫𑁆𑀫𑀸𑀬𑀢𑀦𑀁 𑀦𑀸𑀫. 𑀢𑀢𑁆𑀣 𑀤𑀲𑀸𑀬𑀢𑀦𑀸 𑀓𑀸𑀫𑀸𑀯𑀘𑀭𑀸, 𑀤𑁆𑀯𑁂 𑀘𑀸𑀢𑀼𑀪𑀽𑀫𑀓𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁧𑁫𑁬-𑁧𑁭𑁧) 𑀆𑀬𑀢𑀦𑀮𑁄𑀓𑀲𑁆𑀲, ‘‘𑀅𑀬𑀁 𑀘𑀓𑁆𑀔𑀼𑀥𑀸𑀢𑀼 𑀦𑀸𑀫…𑀧𑁂… 𑀅𑀬𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀦𑀸𑀫, 𑀢𑀢𑁆𑀣 𑀲𑁄𑀴𑀲 𑀥𑀸𑀢𑀼𑀬𑁄 𑀓𑀸𑀫𑀸𑀯𑀘𑀭𑀸, 𑀤𑁆𑀯𑁂 𑀘𑀸𑀢𑀼𑀪𑀽𑀫𑀓𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁧𑁭𑁨-𑁧𑁮𑁮) 𑀥𑀸𑀢𑀼𑀮𑁄𑀓𑀲𑁆𑀲 𑀅𑀦𑁂𑀓𑀲𑀪𑀸𑀯𑀁 𑀦𑀸𑀦𑀸𑀲𑀪𑀸𑀯𑀜𑁆𑀘 𑀧𑀚𑀸𑀦𑀸𑀢𑀺. 𑀦 𑀓𑁂𑀯𑀮𑀁 𑀉𑀧𑀸𑀤𑀺𑀦𑁆𑀦𑀓𑀲𑀗𑁆𑀔𑀸𑀭𑀮𑁄𑀓𑀲𑁆𑀲𑁂𑀯, 𑀅𑀣 𑀔𑁄 𑀅𑀦𑀼𑀧𑀸𑀤𑀺𑀦𑁆𑀦𑀓𑀲𑀗𑁆𑀔𑀸𑀭𑀮𑁄𑀓𑀲𑁆𑀲𑀧𑀺 𑁋 ‘‘𑀇𑀫𑀸𑀬 𑀦𑀸𑀫 𑀥𑀸𑀢𑀼𑀬𑀸 𑀉𑀲𑁆𑀲𑀦𑁆𑀦𑀢𑁆𑀢𑀸 𑀇𑀫𑀲𑁆𑀲 𑀭𑀼𑀓𑁆𑀔𑀲𑁆𑀲 𑀔𑀦𑁆𑀥𑁄 𑀲𑁂𑀢𑁄, 𑀇𑀫𑀲𑁆𑀲 𑀓𑀸𑀴𑁄, 𑀇𑀫𑀲𑁆𑀲 𑀫𑀝𑁆𑀞𑁄, 𑀇𑀫𑀲𑁆𑀲 𑀲𑀓𑀡𑁆𑀝𑀓𑁄, 𑀇𑀫𑀲𑁆𑀲 𑀩𑀳𑀮𑀢𑁆𑀢𑀘𑁄, 𑀇𑀫𑀲𑁆𑀲 𑀢𑀦𑀼𑀢𑁆𑀢𑀘𑁄, 𑀇𑀫𑀲𑁆𑀲 𑀧𑀢𑁆𑀢𑀁 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀺𑀯𑀲𑁂𑀦 𑀏𑀯𑀭𑀽𑀧𑀁, 𑀇𑀫𑀲𑁆𑀲 𑀧𑀼𑀧𑁆𑀨𑀁 𑀦𑀻𑀮𑀁 𑀧𑀻𑀢𑀁 𑀮𑁄𑀳𑀺𑀢𑀁 𑀑𑀤𑀸𑀢𑀁 𑀲𑀼𑀕𑀦𑁆𑀥𑀁 𑀤𑀼𑀕𑁆𑀕𑀦𑁆𑀥𑀁, 𑀇𑀫𑀲𑁆𑀲 𑀨𑀮𑀁 𑀔𑀼𑀤𑁆𑀤𑀓𑀁 𑀫𑀳𑀦𑁆𑀢𑀁 𑀤𑀻𑀖𑀁 𑀭𑀲𑁆𑀲𑀁 𑀯𑀝𑁆𑀝𑀁 𑀲𑀼𑀲𑀡𑁆𑀞𑀸𑀦𑀁 𑀤𑀼𑀲𑁆𑀲𑀡𑁆𑀞𑀸𑀦𑀁 𑀫𑀼𑀤𑀼𑀓𑀁 𑀨𑀭𑀼𑀲𑀁 𑀲𑀼𑀕𑀦𑁆𑀥𑀁 𑀤𑀼𑀕𑁆𑀕𑀦𑁆𑀥𑀁 𑀫𑀥𑀼𑀭𑀁 𑀢𑀺𑀢𑁆𑀢𑀓𑀁 𑀓𑀝𑀼𑀓𑀁 𑀅𑀫𑁆𑀩𑀺𑀮𑀁 𑀓𑀲𑀸𑀯𑀁, 𑀇𑀫𑀲𑁆𑀲 𑀓𑀡𑁆𑀝𑀓𑁄 𑀢𑀺𑀔𑀺𑀡𑁄 𑀓𑀼𑀡𑁆𑀞𑁄 𑀉𑀚𑀼𑀓𑁄 𑀓𑀼𑀝𑀺𑀮𑁄 𑀢𑀫𑁆𑀩𑁄 𑀓𑀸𑀴𑁄 𑀑𑀤𑀸𑀢𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀧𑀚𑀸𑀦𑀸𑀢𑀺. 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀤𑀻𑀦𑀁 𑀏𑀯 𑀳𑀺 𑀏𑀢𑀁 𑀩𑀮𑀁, 𑀦 𑀅𑀜𑁆𑀜𑁂𑀲𑀁.

𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀦𑁆𑀢𑀺 𑀦𑀸𑀦𑀸𑀅𑀚𑁆𑀛𑀸𑀲𑀬𑀢𑀁. 𑀅𑀥𑀺𑀫𑀼𑀢𑁆𑀢𑀺 𑀦𑀸𑀫 𑀅𑀚𑁆𑀛𑀸𑀲𑀬𑀥𑀸𑀢𑀼 𑀅𑀚𑁆𑀛𑀸𑀲𑀬𑀲𑀪𑀸𑀯𑁄. 𑀲𑁄 𑀧𑀦 𑀳𑀻𑀦𑀧𑀡𑀻𑀢𑀢𑀸𑀲𑀸𑀫𑀜𑁆𑀜𑁂𑀦 𑀧𑀸𑀴𑀺𑀬𑀁 𑀤𑁆𑀯𑀺𑀥𑀸𑀯 𑀯𑀼𑀢𑁆𑀢𑁄𑀧𑀺 𑀳𑀻𑀦𑀧𑀡𑀻𑀢𑀸𑀤𑀺𑀪𑁂𑀤𑁂𑀦 𑀅𑀦𑁂𑀓𑀯𑀺𑀥𑁄𑀢𑀺 𑀆𑀳 ‘‘𑀳𑀻𑀦𑀸𑀤𑀻𑀳𑀺 𑀅𑀥𑀺𑀫𑀼𑀢𑁆𑀢𑀻𑀳𑀺 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀪𑀸𑀯’’𑀦𑁆𑀢𑀺. 𑀢𑀢𑁆𑀣 𑀢𑀢𑁆𑀣 𑀬𑁂 𑀬𑁂 𑀲𑀢𑁆𑀢𑀸 𑀬𑀁𑀬𑀁𑀅𑀥𑀺𑀫𑀼𑀢𑁆𑀢𑀺𑀓𑀸, 𑀢𑁂 𑀢𑁂 𑀢𑀁𑀢𑀤𑀥𑀺𑀫𑀼𑀢𑁆𑀢𑀺𑀓𑁂 𑀏𑀯 𑀲𑁂𑀯𑀦𑁆𑀢𑀺 𑀪𑀚𑀦𑁆𑀢𑀺 𑀧𑀬𑀺𑀭𑀼𑀧𑀸𑀲𑀦𑁆𑀢𑀺 𑀥𑀸𑀢𑀼𑀲𑀪𑀸𑀕𑀢𑁄. 𑀬𑀣𑀸 𑀕𑀽𑀣𑀸𑀤𑀻𑀦𑀁 𑀥𑀸𑀢𑀼𑀲𑀪𑀸𑀯𑁄 𑀏𑀲𑁄, 𑀬𑀁 𑀕𑀽𑀣𑀸𑀤𑀻𑀳𑀺 𑀏𑀯 𑀲𑀁𑀲𑀦𑁆𑀤𑀦𑁆𑀢𑀺 𑀲𑀫𑁂𑀦𑁆𑀢𑀺, 𑀏𑀯𑀁 (𑀧𑀼𑀕𑁆𑀕𑀮𑀸𑀦𑀁 𑀅𑀚𑁆𑀛𑀸𑀲𑀬𑀲𑁆𑀲𑁂𑀯𑁂𑀲 𑀲𑀪𑀸𑀯𑁄, 𑀬𑀁) (𑀯𑀺𑀪. 𑀫𑀽𑀮𑀝𑀻. 𑁮𑁧𑁩) 𑀳𑀻𑀦𑀚𑁆𑀛𑀸𑀲𑀬𑀸 𑀤𑀼𑀲𑁆𑀲𑀻𑀮𑀸𑀤𑀻𑀳𑀺 𑀏𑀯 𑀲𑀁𑀲𑀦𑁆𑀤𑀦𑁆𑀢𑀺 𑀲𑀫𑁂𑀦𑁆𑀢𑀺, 𑀲𑀫𑁆𑀧𑀦𑁆𑀦𑀲𑀻𑀮𑀸𑀤𑀬𑁄 𑀘 𑀲𑀫𑁆𑀧𑀦𑁆𑀦𑀲𑀻𑀮𑀸𑀤𑀻𑀳𑁂𑀯. 𑀢𑀁 𑀦𑁂𑀲𑀁 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀁 𑀪𑀕𑀯𑀸 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻𑀢𑀺.

𑀯𑀼𑀤𑁆𑀥𑀺𑀜𑁆𑀘 𑀳𑀸𑀦𑀺𑀜𑁆𑀘𑀸𑀢𑀺 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀲𑀸𑀫𑀢𑁆𑀣𑀺𑀬𑀢𑁄 𑀅𑀥𑀺𑀓𑀢𑀁 𑀅𑀦𑀥𑀺𑀓𑀢𑀜𑁆𑀘. 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑀦𑀺𑀤𑁆𑀤𑁂𑀲𑁂 (𑀯𑀺𑀪. 𑁮𑁧𑁪; 𑀧𑀝𑀺. 𑀫. 𑁧.𑁧𑁧𑁩) ‘‘𑀆𑀲𑀬𑀁 𑀚𑀸𑀦𑀸𑀢𑀺 𑀅𑀦𑀼𑀲𑀬𑀁 𑀚𑀸𑀦𑀸𑀢𑀻’’𑀢𑀺 𑀆𑀲𑀬𑀸𑀤𑀺𑀚𑀸𑀦𑀦𑀁 𑀓𑀲𑁆𑀫𑀸 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺? 𑀆𑀲𑀬𑀚𑀸𑀦𑀦𑀸𑀤𑀺𑀦𑀸 𑀬𑁂𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀧𑀭𑁄𑀧𑀭𑁂𑀳𑀺 𑀲𑀢𑁆𑀢𑀸 𑀓𑀮𑁆𑀬𑀸𑀡𑀧𑀸𑀧𑀸𑀲𑀬𑀸𑀤𑀺𑀓𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀚𑀸𑀦𑀦𑀲𑁆𑀲 𑀯𑀺𑀪𑀸𑀯𑀦𑀢𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀆𑀲𑀬𑀸𑀦𑀼𑀲𑀬𑀜𑀸𑀡𑀸𑀦𑀁 𑀯𑀺𑀲𑀼𑀁 𑀅𑀲𑀸𑀥𑀸𑀭𑀡𑀢𑀸, 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸𑀜𑀸𑀡𑀸𑀦𑀁 𑀯𑀺𑀲𑀼𑀁 𑀩𑀮𑀢𑀸 𑀘 𑀲𑀺𑀤𑁆𑀥𑀸 𑀳𑁄𑀢𑀺. 𑀢𑀢𑁆𑀣 𑀆𑀲𑀬𑀦𑁆𑀢𑀺 𑀬𑀢𑁆𑀣 𑀲𑀢𑁆𑀢𑀸 𑀦𑀺𑀯𑀲𑀦𑁆𑀢𑀺, 𑀢𑀁 𑀢𑁂𑀲𑀁 𑀦𑀺𑀯𑀸𑀲𑀝𑁆𑀞𑀸𑀦𑀁 𑀤𑀺𑀝𑁆𑀞𑀺𑀕𑀢𑀁 𑀯𑀸 𑀬𑀣𑀸𑀪𑀽𑀢𑀜𑀸𑀡𑀁 𑀯𑀸 𑀆𑀲𑀬𑁄.𑀅𑀦𑀼𑀲𑀬𑁄 𑀅𑀧𑁆𑀧𑀳𑀻𑀦𑀪𑀸𑀯𑁂𑀦 𑀣𑀸𑀫𑀕𑀢𑁄 𑀓𑀺𑀮𑁂𑀲𑁄. 𑀢𑀁 𑀧𑀦 𑀪𑀕𑀯𑀸 𑀲𑀢𑁆𑀢𑀸𑀦𑀁 𑀆𑀲𑀬𑀁 𑀚𑀸𑀦𑀦𑁆𑀢𑁄 𑀢𑁂𑀲𑀁 𑀢𑁂𑀲𑀁 𑀤𑀺𑀝𑁆𑀞𑀺𑀕𑀢𑀸𑀦𑀁, 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀜𑀸𑀡𑀸𑀦𑀜𑁆𑀘 𑀅𑀧𑁆𑀧𑀯𑀢𑁆𑀢𑀺𑀓𑁆𑀔𑀡𑁂𑀧𑀺 𑀚𑀸𑀦𑀸𑀢𑀺. 𑀯𑀼𑀢𑁆𑀢𑀁 𑀳𑁂𑀢𑀁 𑁋

‘‘𑀓𑀸𑀫𑀁 𑀲𑁂𑀯𑀦𑁆𑀢𑀁𑀬𑁂𑀯 𑀪𑀕𑀯𑀸 𑀚𑀸𑀦𑀸𑀢𑀺 ‘𑀅𑀬𑀁 𑀧𑀼𑀕𑁆𑀕𑀮𑁄 𑀓𑀸𑀫𑀕𑀭𑀼𑀓𑁄 𑀓𑀸𑀫𑀸𑀲𑀬𑁄 𑀓𑀸𑀫𑀸𑀥𑀺𑀫𑀼𑀢𑁆𑀢𑁄’𑀢𑀺. 𑀓𑀸𑀫𑀁 𑀲𑁂𑀯𑀦𑁆𑀢𑀜𑁆𑀜𑁂𑀯 𑀚𑀸𑀦𑀸𑀢𑀺 ‘𑀅𑀬𑀁 𑀧𑀼𑀕𑁆𑀕𑀮𑁄 𑀦𑁂𑀓𑁆𑀔𑀫𑁆𑀫𑀕𑀭𑀼𑀓𑁄 𑀦𑁂𑀓𑁆𑀔𑀫𑁆𑀫𑀸𑀲𑀬𑁄 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑁄’𑀢𑀺. 𑀦𑁂𑀓𑁆𑀔𑀫𑁆𑀫𑀁 𑀲𑁂𑀯𑀦𑁆𑀢𑀜𑁆𑀜𑁂𑀯 𑀚𑀸𑀦𑀸𑀢𑀺. 𑀩𑁆𑀬𑀸𑀧𑀸𑀤𑀁, 𑀅𑀩𑁆𑀬𑀸𑀧𑀸𑀤𑀁, 𑀣𑀺𑀦𑀫𑀺𑀤𑁆𑀥𑀁, 𑀆𑀮𑁄𑀓𑀲𑀜𑁆𑀜𑀁 𑀲𑁂𑀯𑀦𑁆𑀢𑀁𑀬𑁂𑀯 𑀚𑀸𑀦𑀸𑀢𑀺 ‘𑀅𑀬𑀁 𑀧𑀼𑀕𑁆𑀕𑀮𑁄 𑀣𑀺𑀦𑀫𑀺𑀤𑁆𑀥𑀕𑀭𑀼𑀓𑁄 𑀣𑀺𑀦𑀫𑀺𑀤𑁆𑀥𑀸𑀲𑀬𑁄 𑀣𑀺𑀦𑀫𑀺𑀤𑁆𑀥𑀸𑀥𑀺𑀫𑀼𑀢𑁆𑀢𑁄’𑀢𑀺’’ (𑀧𑀝𑀺. 𑀫. 𑁧.𑁧𑁧𑁩).

𑀧𑀞𑀫𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀦𑁆𑀢𑀺 𑀭𑀽𑀧𑀸𑀯𑀘𑀭𑀸𑀦𑀁 𑀧𑀞𑀫𑀸𑀤𑀻𑀦𑀁 𑀧𑀘𑁆𑀘𑀦𑀻𑀓𑀛𑀸𑀧𑀦𑀝𑁆𑀞𑁂𑀦 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀝𑁆𑀞𑁂𑀦 𑀘 𑀛𑀸𑀦𑀸𑀦𑀁. 𑀘𑀢𑀼𑀓𑁆𑀓𑀦𑀬𑁂𑀦 𑀳𑁂𑀢𑀁 𑀯𑀼𑀢𑁆𑀢𑀁. 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀦𑁆𑀢𑀺 𑀏𑀢𑁆𑀣 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀅𑀧𑁆𑀧𑀺𑀢𑀧𑁆𑀧𑀺𑀢𑀓𑁆𑀔𑀡𑁂 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀯𑀺𑀫𑀼𑀘𑁆𑀘𑀦𑀢𑁄 𑀆𑀭𑀫𑁆𑀫𑀡𑁂 𑀘 𑀅𑀥𑀺𑀫𑀼𑀘𑁆𑀘𑀦𑀢𑁄 𑀯𑀺𑀫𑁄𑀓𑁆𑀔𑀸 𑀦𑀸𑀫, 𑀅𑀝𑁆𑀞𑀫𑁄 𑀧𑀦 𑀲𑀩𑁆𑀩𑀲𑁄 𑀲𑀜𑁆𑀜𑀸𑀯𑁂𑀤𑀬𑀺𑀢𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀅𑀧𑀕𑀫𑀯𑀺𑀫𑁄𑀓𑁆𑀔𑁄 𑀦𑀸𑀫. 𑀘𑀢𑀼𑀓𑁆𑀓𑀦𑀬𑀧𑀜𑁆𑀘𑀓𑀦𑀬𑁂𑀲𑀼 𑀧𑀞𑀫𑀛𑀸𑀦𑀲𑀫𑀸𑀥𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁄 𑀦𑀸𑀫, 𑀧𑀜𑁆𑀘𑀓𑀦𑀬𑁂 𑀤𑀼𑀢𑀺𑀬𑀚𑁆𑀛𑀸𑀦𑀲𑀫𑀸𑀥𑀺 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁄, 𑀦𑀬𑀤𑁆𑀯𑀬𑁂𑀧𑀺 𑀉𑀧𑀭𑀺 𑀢𑀻𑀲𑀼 𑀛𑀸𑀦𑁂𑀲𑀼 𑀲𑀫𑀸𑀥𑀺 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁄, 𑀲𑀫𑀸𑀧𑀢𑁆𑀢𑀻𑀲𑀼 𑀧𑀝𑀺𑀧𑀸𑀝𑀺𑀬𑀸 𑀅𑀝𑁆𑀞𑀦𑁆𑀦𑀁 𑀲𑀫𑀸𑀥𑀻𑀢𑀺𑀧𑀺 𑀦𑀸𑀫𑀁, 𑀲𑀫𑀸𑀧𑀢𑁆𑀢𑀻𑀢𑀺𑀧𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀩𑁆𑀪𑀸𑀯𑀢𑁄, 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀢𑀤𑀪𑀸𑀯𑀢𑁄 𑀦 𑀲𑀫𑀸𑀥𑀻𑀢𑀺 𑀦𑀸𑀫𑀁. 𑀳𑀸𑀦𑀪𑀸𑀕𑀺𑀬𑀥𑀫𑁆𑀫𑀦𑁆𑀢𑀺 𑀅𑀧𑁆𑀧𑀕𑀼𑀡𑁂𑀳𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀳𑀺 𑀯𑀼𑀝𑁆𑀞𑀺𑀢𑀲𑁆𑀲 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 𑀓𑀸𑀫𑀸𑀤𑀺𑀅𑀦𑀼𑀧𑀓𑁆𑀔𑀦𑁆𑀤𑀦𑀁. 𑀯𑀺𑀲𑁂𑀲𑀪𑀸𑀕𑀺𑀬𑀥𑀫𑁆𑀫𑀦𑁆𑀢𑀺 𑀧𑀕𑀼𑀡𑁂𑀳𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀳𑀺 𑀯𑀼𑀝𑁆𑀞𑀺𑀢𑀲𑁆𑀲 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀧𑀓𑁆𑀔𑀦𑁆𑀤𑀦𑀁. 𑀇𑀢𑀺 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 𑀓𑀸𑀫𑀸𑀤𑀺𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀧𑀓𑁆𑀔𑀦𑁆𑀤𑀦𑀸𑀦𑀺 𑀳𑀸𑀦𑀪𑀸𑀕𑀺𑀬𑀯𑀺𑀲𑁂𑀲𑀪𑀸𑀕𑀺𑀬𑀥𑀫𑁆𑀫𑀸𑀢𑀺 𑀤𑀲𑁆𑀲𑀺𑀢𑀸𑀦𑀺, 𑀢𑁂𑀳𑀺 𑀧𑀦 𑀛𑀸𑀦𑀸𑀦𑀁 𑀢𑀁𑀲𑀪𑀸𑀯𑀢𑀸 𑀥𑀫𑁆𑀫-𑀲𑀤𑁆𑀤𑁂𑀦 𑀯𑀼𑀢𑁆𑀢𑀸. 𑀢𑀲𑁆𑀫𑀸𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀳𑁂𑀢𑀼𑀪𑀸𑀯𑁂𑀦 𑀧𑀘𑁆𑀘𑀸𑀫𑀲𑀢𑀺. 𑀯𑁄𑀤𑀸𑀦𑀦𑁆𑀢𑀺 𑀧𑀕𑀼𑀡𑀢𑀸𑀲𑀗𑁆𑀔𑀸𑀢𑀁 𑀯𑁄𑀤𑀸𑀦𑀁. 𑀢𑀜𑁆𑀳𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀳𑀺 𑀯𑀼𑀝𑁆𑀞𑀳𑀺𑀢𑁆𑀯𑀸 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀅𑀥𑀺𑀕𑀫𑀲𑁆𑀲 𑀧𑀘𑁆𑀘𑀬𑀢𑁆𑀢𑀸 ‘‘𑀯𑀼𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑁂 (𑀅. 𑀦𑀺. 𑀝𑀻. 𑁩.𑁧𑁦.𑁨𑁧) 𑀧𑀦 ‘‘𑀦𑀺𑀭𑁄𑀥𑀢𑁄 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀦𑀦𑁆𑀢𑀺 𑀧𑀸𑀴𑀺 𑀦𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀺, 𑀢𑁂 ‘‘𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀇𑀫𑀸𑀬 𑀧𑀸𑀴𑀺𑀬𑀸 (𑀧𑀝𑁆𑀞𑀸. 𑁧.𑁧.𑁪𑁧𑁭) 𑀧𑀝𑀺𑀲𑁂𑀥𑁂𑀢𑀩𑁆𑀩𑀸. 𑀬𑁄 𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀲𑀫𑀸𑀦𑁄 𑀏𑀯 ‘‘𑀦 𑀮𑀪𑀸𑀫𑀳’’𑀦𑁆𑀢𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀲𑀫𑀸𑀦𑀁 𑀏𑀯 ‘‘𑀦 𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺 𑀲𑀜𑁆𑀜𑀻 𑀳𑁄𑀢𑀺, 𑀲𑁄 𑀲𑀫𑁆𑀧𑀢𑁆𑀢𑀺𑀁𑀬𑁂𑀯 𑀲𑀫𑀸𑀦𑀁 ‘‘𑀯𑀺𑀧𑀢𑁆𑀢𑀻’’𑀢𑀺 𑀧𑀘𑁆𑀘𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁧𑁪𑁯. 𑀅𑀧𑁆𑀧𑀦𑀦𑁆𑀢𑀺 𑀦𑀺𑀕𑀫𑀦𑀁. 𑀦 𑀢𑀣𑀸 𑀤𑀝𑁆𑀞𑀩𑁆𑀩𑀦𑁆𑀢𑀺 𑀬𑀣𑀸 𑀧𑀭𑀯𑀸𑀤𑀺𑀦𑀸 𑀯𑀼𑀢𑁆𑀢𑀁, 𑀢𑀣𑀸 𑀦 𑀤𑀝𑁆𑀞𑀩𑁆𑀩𑀁. 𑀲𑀓𑀲𑀓𑀓𑀺𑀘𑁆𑀘𑀫𑁂𑀯 𑀚𑀸𑀦𑀸𑀢𑀻𑀢𑀺 𑀞𑀸𑀦𑀸𑀝𑁆𑀞𑀸𑀦𑀚𑀸𑀦𑀦𑀸𑀤𑀺𑀁 𑀲𑀓𑀁 𑀲𑀓𑀁𑀬𑁂𑀯 𑀓𑀺𑀘𑁆𑀘𑀁 𑀓𑀸𑀢𑀼𑀁 𑀚𑀸𑀦𑀸𑀢𑀺, 𑀬𑀣𑀸𑀲𑀓𑀫𑁂𑀯 𑀯𑀺𑀲𑀬𑀁 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀢𑀫𑁆𑀧𑀻𑀢𑀺 𑀢𑁂𑀳𑀺 𑀤𑀲𑀩𑀮𑀜𑀸𑀡𑁂𑀳𑀺 𑀚𑀸𑀦𑀺𑀢𑀩𑁆𑀩𑀫𑁆𑀧𑀺. 𑀓𑀫𑁆𑀫𑀦𑁆𑀢𑀭𑀯𑀺𑀧𑀸𑀓𑀦𑁆𑀢𑀭𑀫𑁂𑀯𑀸𑀢𑀺 𑀓𑀫𑁆𑀫𑀦𑁆𑀢𑀭𑀲𑁆𑀲𑀯𑀺𑀧𑀸𑀓𑀦𑁆𑀢𑀭𑀫𑁂𑀯 𑀚𑀸𑀦𑀸𑀢𑀺, 𑀘𑁂𑀢𑀦𑀸𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀦𑀺𑀭𑀬𑀸𑀤𑀺𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀪𑀽𑀢𑁂 𑀓𑀫𑁆𑀫𑀦𑁆𑀢𑀺 𑀕𑀳𑁂𑀢𑁆𑀯𑀸 𑀆𑀳 ‘‘𑀓𑀫𑁆𑀫𑀧𑀭𑀺𑀘𑁆𑀙𑁂𑀤𑀫𑁂𑀯𑀸’’𑀢𑀺. 𑀥𑀸𑀢𑀼𑀦𑀸𑀦𑀢𑁆𑀢𑀜𑁆𑀘 𑀥𑀸𑀢𑀼𑀦𑀸𑀦𑀢𑁆𑀢𑀓𑀸𑀭𑀡𑀜𑁆𑀘 𑀥𑀸𑀢𑀼𑀦𑀸𑀦𑀢𑁆𑀢𑀓𑀸𑀭𑀡𑀦𑁆𑀢𑀺 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀢𑀜𑁆𑀳𑀺 𑀜𑀸𑀡𑀁 𑀢𑀤𑀼𑀪𑀬𑀫𑁆𑀧𑀺 𑀚𑀸𑀦𑀸𑀢𑀺, ‘‘𑀇𑀫𑀸𑀬 𑀦𑀸𑀫 𑀥𑀸𑀢𑀼𑀬𑀸 𑀉𑀲𑁆𑀲𑀦𑁆𑀦𑀢𑁆𑀢𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑀅𑀝𑁆𑀞. 𑁮𑁧𑁨) 𑀢𑀣𑀸 𑀘𑁂𑀯 𑀲𑀁𑀯𑀡𑁆𑀡𑀺𑀢𑀁. 𑀲𑀘𑁆𑀘𑀧𑀭𑀺𑀘𑁆𑀙𑁂𑀤𑀫𑁂𑀯𑀸𑀢𑀺 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀺𑀯𑀲𑁂𑀦 𑀲𑀘𑁆𑀘𑀸𑀦𑀁 𑀧𑀭𑀺𑀘𑁆𑀙𑀺𑀦𑁆𑀤𑀦𑀫𑁂𑀯. 𑀅𑀧𑁆𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀅𑀝𑁆𑀞𑀫𑀦𑀯𑀫𑀩𑀮𑀸𑀦𑀺 𑀯𑀺𑀬 𑀢𑀁𑀲𑀤𑀺𑀲𑀁 𑀇𑀤𑁆𑀥𑀺𑀯𑀺𑀥𑀜𑀸𑀡𑀁 𑀯𑀺𑀬 𑀯𑀺𑀓𑀼𑀩𑁆𑀩𑀺𑀢𑀼𑀁. 𑀏𑀢𑁂𑀦𑀲𑁆𑀲 𑀩𑀮𑀲𑀤𑀺𑀲𑀢𑀜𑁆𑀘 𑀦𑀺𑀯𑀸𑀭𑁂𑀢𑀺. 𑀛𑀸𑀦𑀸𑀤𑀺𑀜𑀸𑀡𑀁 𑀯𑀺𑀬 𑀯𑀸 𑀅𑀧𑁆𑀧𑁂𑀢𑀼𑀁 𑀯𑀺𑀓𑀼𑀩𑁆𑀩𑀺𑀢𑀼𑀜𑁆𑀘. 𑀬𑀤𑀺𑀧𑀺 𑀳𑀺 ‘‘𑀛𑀸𑀦𑀸𑀤𑀺𑀧𑀘𑁆𑀘𑀯𑁂𑀓𑁆𑀔𑀡𑀸𑀜𑀸𑀡𑀁 𑀲𑀢𑁆𑀢𑀫𑀩𑀮’’𑀦𑁆𑀢𑀺 𑀢𑀲𑁆𑀲 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀢𑀸 𑀯𑀼𑀢𑁆𑀢𑀸, 𑀢𑀣𑀸𑀧𑀺 ‘‘𑀛𑀸𑀦𑀸𑀤𑀻𑀳𑀺 𑀯𑀺𑀦𑀸 𑀧𑀘𑁆𑀘𑀯𑁂𑀓𑁆𑀔𑀡𑀸 𑀦𑀢𑁆𑀣𑀻’’𑀢𑀺 𑀛𑀸𑀦𑀸𑀤𑀺𑀲𑀳𑀕𑀢𑀁 𑀜𑀸𑀡𑀁 𑀢𑀤𑀦𑁆𑀢𑁄𑀕𑀥𑀁 𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀛𑀸𑀦𑀸𑀤𑀺𑀓𑀺𑀘𑁆𑀘𑀁 𑀯𑀺𑀬 𑀦 𑀲𑀩𑁆𑀩𑀁 𑀩𑀮𑀓𑀺𑀘𑁆𑀘𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀛𑀸𑀦𑀁 𑀳𑀼𑀢𑁆𑀯𑀸 𑀅𑀧𑁆𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀇𑀤𑁆𑀥𑀺 𑀳𑀼𑀢𑁆𑀯𑀸 𑀯𑀺𑀓𑀼𑀩𑁆𑀩𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀓𑀲𑁆𑀲𑀘𑀺 𑀩𑀮𑀲𑁆𑀲 𑀛𑀸𑀦𑀇𑀤𑁆𑀥𑀺𑀪𑀸𑀯𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀓𑀺𑀘𑁆𑀘𑀯𑀺𑀲𑁂𑀲𑀯𑀲𑁂𑀦𑀧𑀺 𑀤𑀲𑀩𑀮𑀜𑀸𑀡𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀦𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀢𑀓𑁆𑀓𑀢𑁆𑀢𑀺𑀓𑀪𑀽𑀫𑀦𑁆𑀢𑀭𑀯𑀲𑁂𑀦𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀝𑀺𑀧𑀸𑀝𑀺𑀬𑀸𑀢𑀺𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀝𑀺𑀧𑀸𑀝𑀺𑀬𑀸.

𑀅𑀦𑀼𑀧𑀤𑀯𑀡𑁆𑀡𑀦𑀁 𑀓𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀮𑁂𑀲𑀸𑀯𑀭𑀡𑀁 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀓𑀺𑀮𑁂𑀲𑀸𑀯𑀭𑀡𑀲𑁆𑀲 𑀅𑀪𑀸𑀯𑁄 𑀆𑀲𑀯𑀓𑁆𑀔𑀬𑀸𑀥𑀺𑀕𑀫𑀲𑁆𑀲 𑀞𑀸𑀦𑀁, 𑀢𑀩𑁆𑀪𑀸𑀯𑁄 𑀅𑀝𑁆𑀞𑀸𑀦𑀁, 𑀅𑀦𑀥𑀺𑀕𑀫𑀲𑁆𑀲 𑀧𑀦 𑀢𑀤𑀼𑀪𑀬𑀁 𑀬𑀣𑀸𑀓𑁆𑀓𑀫𑀁 𑀅𑀝𑁆𑀞𑀸𑀦𑀜𑁆𑀘 𑀞𑀸𑀦𑀜𑁆𑀘𑀸𑀢𑀺 𑀢𑀢𑁆𑀣 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀮𑁄𑀓𑀺𑀬…𑀧𑁂… 𑀤𑀲𑁆𑀲𑀦𑀢𑁄 𑀘𑀸’’𑀢𑀺 𑀆𑀳. 𑀢𑀢𑁆𑀣 𑀮𑁄𑀓𑀺𑀬𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀞𑀺𑀢𑀺 𑀆𑀲𑀯𑀓𑁆𑀔𑀬𑀸𑀥𑀺𑀕𑀫𑀲𑁆𑀲 𑀞𑀸𑀦𑀁 𑀓𑀺𑀮𑁂𑀲𑀸𑀯𑀭𑀡𑀸𑀪𑀸𑀯𑀲𑁆𑀲 𑀓𑀸𑀭𑀡𑀢𑁆𑀢𑀸. 𑀲𑀸 𑀳𑀺 𑀢𑀲𑁆𑀫𑀺𑀁 𑀲𑀢𑀺 𑀦 𑀳𑁄𑀢𑀺, 𑀅𑀲𑀢𑀺 𑀘 𑀳𑁄𑀢𑀺. 𑀏𑀢𑁂𑀦 𑀢𑀲𑁆𑀲𑀸 𑀅𑀝𑁆𑀞𑀺𑀢𑀺𑀬𑀸 𑀢𑀲𑁆𑀲 𑀅𑀝𑁆𑀞𑀸𑀦𑀢𑀸 𑀯𑀼𑀢𑁆𑀢𑀸 𑀏𑀯. 𑀦𑁂𑀲𑀁 𑀯𑁂𑀦𑁂𑀬𑁆𑀬𑀲𑀢𑁆𑀢𑀸𑀦𑀁. 𑀥𑀸𑀢𑀼𑀯𑁂𑀫𑀢𑁆𑀢𑀤𑀲𑁆𑀲𑀦𑀢𑁄𑀢𑀺 𑀓𑀸𑀫𑀥𑀸𑀢𑀼𑀆𑀤𑀻𑀦𑀁 𑀧𑀯𑀢𑁆𑀢𑀺𑀪𑁂𑀤𑀤𑀲𑁆𑀲𑀦𑀢𑁄. 𑀬𑀤𑀕𑁆𑀕𑁂𑀦 𑀥𑀸𑀢𑀼𑀯𑁂𑀫𑀢𑁆𑀢𑀁 𑀚𑀸𑀦𑀸𑀢𑀺, 𑀢𑀤𑀕𑁆𑀕𑁂𑀦 𑀘𑀭𑀺𑀬𑀸𑀯𑀺𑀲𑁂𑀲𑀫𑁆𑀧𑀺 𑀚𑀸𑀦𑀸𑀢𑀺. 𑀥𑀸𑀢𑀼𑀯𑁂𑀫𑀢𑁆𑀢𑀤𑀲𑁆𑀲𑀦𑀢𑁄𑀢𑀺 𑀯𑀸 𑀥𑀫𑁆𑀫𑀥𑀸𑀢𑀼𑀯𑁂𑀫𑀢𑁆𑀢𑀤𑀲𑁆𑀲𑀦𑀢𑁄. 𑀲𑀩𑁆𑀩𑀸𑀧𑀺 𑀳𑀺 𑀘𑀭𑀺𑀬𑀸 𑀥𑀫𑁆𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀸 𑀏𑀯𑀸𑀢𑀺. 𑀧𑀬𑁄𑀕𑀁 𑀅𑀦𑀸𑀤𑀺𑀬𑀺𑀢𑁆𑀯𑀸𑀧𑀺 𑀲𑀦𑁆𑀢𑀢𑀺𑀫𑀳𑀸𑀫𑀢𑁆𑀢𑀸𑀤𑀻𑀦𑀁 (𑀥. 𑀧. 𑁧𑁪𑁨) 𑀯𑀺𑀬. 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀦𑀼𑀪𑀸𑀯𑀢𑁄 𑀧𑀢𑁆𑀢𑀩𑁆𑀩𑁂𑀦𑀸𑀢𑀺 𑀏𑀢𑁆𑀣 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀧𑀭𑀲𑁆𑀲 𑀳𑀤𑀬𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀬𑀮𑁄𑀳𑀺𑀢𑀯𑀡𑁆𑀡𑀤𑀲𑁆𑀲𑀦𑀫𑀼𑀔𑁂𑀦 𑀢𑀤𑀸 𑀧𑀯𑀢𑁆𑀢𑀫𑀸𑀦𑀘𑀺𑀢𑁆𑀢𑀚𑀸𑀦𑀦𑀢𑁆𑀣𑀁 𑀧𑀭𑀺𑀓𑀫𑁆𑀫𑀓𑀭𑀡𑀁 𑀦𑀸𑀫 𑀲𑀸𑀯𑀓𑀸𑀦𑀁, 𑀢𑀜𑁆𑀘 𑀔𑁄 𑀆𑀤𑀺𑀓𑀫𑁆𑀫𑀺𑀓𑀸𑀦𑀁, 𑀬𑀢𑁄 𑀤𑀺𑀩𑁆𑀩𑀘𑀓𑁆𑀔𑀼𑀆𑀦𑀼𑀪𑀸𑀯𑀢𑁄 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀧𑀢𑁆𑀢𑀩𑁆𑀩𑀢𑀸 𑀲𑀺𑀬𑀸, 𑀩𑀼𑀤𑁆𑀥𑀸𑀦𑀁 𑀧𑀦 𑀬𑀤𑀺𑀧𑀺 𑀆𑀲𑀯𑀓𑁆𑀔𑀬𑀜𑀸𑀡𑀸𑀥𑀺𑀕𑀫𑀢𑁄 𑀧𑀕𑁂𑀯 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀥𑀺𑀕𑀫𑁄, 𑀢𑀣𑀸𑀧𑀺 𑀢𑀣𑀸 𑀧𑀭𑀺𑀓𑀫𑁆𑀫𑀓𑀭𑀡𑀁 𑀦𑀢𑁆𑀣𑀺 𑀯𑀺𑀚𑁆𑀚𑀸𑀢𑁆𑀢𑀬𑀲𑀺𑀤𑁆𑀥𑀺𑀬𑀸 𑀲𑀺𑀚𑁆𑀛𑀦𑀢𑁄. 𑀲𑁂𑀲𑀸𑀪𑀺𑀜𑁆𑀜𑀸𑀢𑁆𑀢𑀬𑁂 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀥𑀺𑀕𑀫𑁂𑀦 𑀧𑀢𑁆𑀢𑀦𑁆𑀢𑀺 𑀘 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀻𑀢𑀺 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀼𑀦 𑀏𑀯𑀭𑀽𑀧𑀺𑀁 𑀯𑀸𑀘𑀁 𑀦 𑀯𑀓𑁆𑀔𑀸𑀫𑀻𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀦𑁆𑀢𑁄 𑀢𑀁 𑀯𑀸𑀘𑀁 𑀧𑀚𑀳𑀢𑀺 𑀦𑀸𑀫. 𑀯𑀸𑀘𑀸𑀬 𑀧𑀦 𑀲𑁄 𑀅𑀢𑁆𑀣𑁄 𑀧𑀸𑀓𑀝𑁄 𑀳𑁄𑀢𑀻𑀢𑀺 ‘‘𑀯𑀤𑀦𑁆𑀢𑁄’’𑀢𑀺 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀺𑀁 𑀦 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀤𑀺𑀝𑁆𑀞𑀺𑀕𑁆𑀕𑀸𑀳𑀧𑀝𑀺𑀓𑁆𑀔𑁂𑀧𑁄. 𑀤𑀺𑀝𑁆𑀞𑀺𑀬𑀸 𑀅𑀦𑀼𑀧𑁆𑀧𑀸𑀤𑀦𑀁 𑀧𑀚𑀳𑀦𑀫𑁂𑀯𑀸𑀢𑀺 𑀆𑀳 ‘‘𑀧𑀚𑀳𑀦𑁆𑀢𑁄’’𑀢𑀺. 𑀲𑁄 𑀅𑀭𑀺𑀬𑀽𑀧𑀯𑀸𑀤𑀻 𑀦𑀺𑀭𑀬𑁂 𑀞𑀧𑀺𑀢𑁄𑀬𑁂𑀯, 𑀦𑀸𑀲𑁆𑀲 𑀦𑀺𑀭𑀬𑀽𑀧𑀧𑀢𑁆𑀢𑀺𑀬𑀸 𑀓𑁄𑀘𑀺 𑀯𑀺𑀩𑀦𑁆𑀥𑁄 𑀏𑀓𑀁𑀲𑀺𑀓𑁄 𑀅𑀬𑀫𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀲𑁆𑀲𑀸𑀢𑀺 𑀏𑀓𑀁𑀲𑀺𑀓𑀪𑀸𑀯𑀲𑁆𑀲. 𑀲𑀺𑀓𑁆𑀔𑀸𑀳𑀺 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀳𑀺, 𑀢𑀤𑀢𑁆𑀣𑀸𑀬 𑀯𑀺𑀧𑀲𑁆𑀲𑀦𑀸𑀬 𑀘 𑀯𑀺𑀦𑀸 𑀅𑀜𑁆𑀜𑀸𑀭𑀸𑀥𑀦𑀲𑁆𑀲 𑀅𑀲𑀫𑁆𑀪𑀯𑀢𑁄 ‘‘𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀯𑀢𑁆𑀯𑀸 𑀧𑀼𑀦 𑀆𑀲𑀦𑁆𑀦𑀢𑀭𑁂 𑀲𑀻𑀮𑀸𑀤𑀺𑀓𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀮𑁄𑀓𑀼𑀢𑁆𑀢𑀭𑀯𑀲𑁂𑀦𑁂𑀯 𑀯𑀺𑀦𑀺𑀯𑀢𑁆𑀢𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺 𑀆𑀳, 𑀢𑀲𑁆𑀫𑀸 𑀅𑀕𑁆𑀕𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀸 𑀲𑀻𑀮𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀅𑀕𑁆𑀕𑀫𑀕𑁆𑀕𑀝𑁆𑀞𑀲𑁆𑀲 𑀳𑀺 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀏𑀓𑀁𑀲𑀺𑀓𑀸 𑀅𑀜𑁆𑀜𑀸𑀭𑀸𑀥𑀦𑀸, 𑀇𑀢𑀭𑁂𑀲𑀁 𑀅𑀦𑁂𑀓𑀁𑀲𑀺𑀓𑀸𑀢𑀺. 𑀲𑀫𑁆𑀧𑀚𑁆𑀚𑀦𑀁 𑀲𑀫𑁆𑀧𑀤𑀸, 𑀦𑀺𑀧𑁆𑀨𑀢𑁆𑀢𑀻𑀢𑀺 𑀅𑀢𑁆𑀣𑁄, 𑀢𑀲𑁆𑀫𑀸 𑀏𑀯𑀁𑀲𑀫𑁆𑀧𑀤𑀦𑁆𑀢𑀺 𑀏𑀯𑀁𑀅𑀯𑀺𑀭𑀚𑁆𑀛𑀦𑀓𑀦𑀺𑀧𑁆𑀨𑀢𑁆𑀢𑀺𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀇𑀫𑀫𑁆𑀧𑀺 𑀓𑀸𑀭𑀡’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀓𑀸𑀭𑀡𑀦𑁆𑀢𑀺 𑀬𑀼𑀢𑁆𑀢𑀺. 𑀢𑀢𑁆𑀭𑀸𑀬𑀁 𑀬𑀼𑀢𑁆𑀢𑀺𑀦𑀺𑀤𑁆𑀥𑀸𑀭𑀡𑀸 ‘‘𑀦𑀺𑀭𑀬𑀽𑀧𑀕𑁄 𑀅𑀭𑀺𑀬𑀽𑀧𑀯𑀸𑀤𑀻 𑀢𑀤𑀸𑀤𑀸𑀬𑀲𑁆𑀲 𑀅𑀯𑀺𑀚𑁆𑀚𑀫𑀸𑀦𑀢𑁄 𑀲𑁂𑀬𑁆𑀬𑀣𑀸𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀻’’𑀢𑀺. 𑀏𑀢𑁆𑀣 𑀘 ‘‘𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬𑀸’’𑀢𑀺𑀆𑀤𑀺𑀯𑀘𑀦𑁂𑀦 𑀢𑀤𑀸𑀤𑀸𑀬𑀲𑁆𑀲 𑀅𑀧𑁆𑀧𑀳𑀸𑀦𑁂𑀦 𑀘 𑀅𑀭𑀺𑀬𑀽𑀧𑀯𑀸𑀤𑁄 𑀅𑀦𑁆𑀢𑀭𑀸𑀬𑀺𑀓𑁄 𑀅𑀦𑀢𑁆𑀣𑀸𑀯𑀳𑁄 𑀘, 𑀧𑀳𑀸𑀦𑁂𑀦 𑀧𑀦 𑀅𑀘𑁆𑀘𑀬𑀁 𑀤𑁂𑀲𑁂𑀢𑁆𑀯𑀸 𑀔𑀫𑀸𑀧𑀦𑁂𑀦 𑀅𑀦𑀦𑁆𑀢𑀭𑀸𑀬𑀺𑀓𑁄 𑀅𑀢𑁆𑀣𑀸𑀯𑀳𑁄 𑀘 𑀬𑀣𑀸 𑀢𑀁 𑀯𑀼𑀝𑁆𑀞𑀺𑀢𑀸 𑀤𑁂𑀲𑀺𑀢𑀸 𑀘 𑀆𑀧𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀤𑀲𑀩𑀮𑀜𑀸𑀡𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀯𑁂𑀲𑀸𑀭𑀚𑁆𑀚𑀜𑀸𑀡𑀯𑀡𑁆𑀡𑀦𑀸

𑁧𑁫𑁦. 𑀩𑁆𑀬𑀸𑀫𑁄𑀳𑀪𑀬𑀯𑀲𑁂𑀦 (𑀅. 𑀦𑀺. 𑀝𑀻. 𑁨.𑁪.𑁮) 𑀲𑀭𑀡𑀧𑀭𑀺𑀬𑁂𑀲𑀦𑀁 𑀲𑀸𑀭𑀚𑁆𑀚𑀦𑀁 𑀲𑀸𑀭𑀤𑁄, 𑀩𑁆𑀬𑀸𑀫𑁄𑀳𑀪𑀬𑀁, 𑀯𑀺𑀕𑀢𑁄 𑀲𑀸𑀭𑀤𑁄 𑀏𑀢𑀲𑁆𑀲𑀸𑀢𑀺 𑀯𑀺𑀲𑀸𑀭𑀤𑁄, 𑀢𑀲𑁆𑀲 𑀪𑀸𑀯𑁄 𑀯𑁂𑀲𑀸𑀭𑀚𑁆𑀚𑀁. 𑀢𑀁 𑀧𑀦 𑀜𑀸𑀡𑀲𑀫𑁆𑀧𑀤𑀁 𑀧𑀳𑀸𑀦𑀲𑀫𑁆𑀧𑀤𑀁 𑀤𑁂𑀲𑀦𑀸𑀯𑀺𑀲𑁂𑀲𑀲𑀫𑁆𑀧𑀤𑀁 𑀔𑁂𑀫𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀁 𑀘𑀢𑀼𑀩𑁆𑀩𑀺𑀥𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁. 𑀢𑁂𑀦𑀸𑀳 ‘‘𑀘𑀢𑀽𑀲𑀼 𑀞𑀸𑀦𑁂𑀲𑀽’’𑀢𑀺𑀆𑀤𑀺. 𑀤𑀲𑁆𑀲𑀺𑀢𑀥𑀫𑁆𑀫𑁂𑀲𑀽𑀢𑀺 𑀯𑀼𑀢𑁆𑀢𑀥𑀫𑁆𑀫𑁂𑀲𑀼. 𑀯𑀘𑀦𑀫𑀢𑁆𑀢𑀫𑁂𑀯 𑀳𑀺 𑀢𑁂𑀲𑀁, 𑀦 𑀧𑀦 𑀤𑀲𑁆𑀲𑀦𑀁 𑀢𑀸𑀤𑀺𑀲𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀅𑀪𑀸𑀯𑀢𑁄. 𑀪𑀕𑀯𑀢𑀸 𑀏𑀯 𑀯𑀸 ‘‘𑀇𑀫𑁂 𑀥𑀫𑁆𑀫𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀸’’𑀢𑀺 𑀧𑀭𑀲𑁆𑀲 𑀯𑀘𑀦𑀯𑀲𑁂𑀦 𑀤𑀲𑁆𑀲𑀺𑀢𑀥𑀫𑁆𑀫𑁂𑀲𑀼. ‘‘𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺𑀆𑀤𑀻𑀲𑀼 (𑀯𑀺𑀪. 𑁭𑁧𑁮) 𑀯𑀺𑀬 𑀥𑀫𑁆𑀫-𑀲𑀤𑁆𑀤𑁄 𑀳𑁂𑀢𑀼𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀲𑀳𑀥𑀫𑁆𑀫𑁂𑀦𑀸𑀢𑀺 𑀲𑀳𑁂𑀢𑀼𑀦𑀸’’𑀢𑀺. 𑀳𑁂𑀢𑀽𑀢𑀺 𑀘 𑀉𑀧𑀧𑀢𑁆𑀢𑀺𑀲𑀸𑀥𑀦𑀳𑁂𑀢𑀼 𑀯𑁂𑀤𑀺𑀢𑀩𑁆𑀩𑁄, 𑀦 𑀓𑀸𑀭𑀓𑁄 𑀲𑀫𑁆𑀧𑀸𑀧𑀓𑁄 𑀘. 𑀅𑀧𑁆𑀧𑀫𑀸𑀡𑀦𑁆𑀢𑀺 𑀅𑀦𑀺𑀤𑀲𑁆𑀲𑀦𑀁. 𑀦𑀺𑀤𑀲𑁆𑀲𑀦𑀜𑁆𑀳𑀺 𑀅𑀦𑁆𑀯𑀬𑀢𑁄 𑀩𑁆𑀬𑀢𑀺𑀭𑁂𑀓𑀢𑁄 𑀧𑀫𑀸𑀡𑀗𑁆𑀕𑀢𑀸𑀬 ‘‘𑀧𑀫𑀸𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀘𑁄𑀤𑀦𑀸𑀬 𑀓𑀸𑀭𑀡𑀁. 𑀢𑀢𑁆𑀣 𑀘𑁄𑀤𑀓𑁄 𑀘𑁄𑀤𑀦𑀁 𑀓𑀭𑁄𑀢𑀻𑀢𑀺 𑀓𑀸𑀭𑀡𑀁, 𑀥𑀫𑁆𑀫𑁄 𑀘𑁄𑀤𑀦𑀁 𑀓𑀭𑁄𑀢𑀺 𑀏𑀢𑁂𑀦𑀸𑀢𑀺 𑀓𑀸𑀭𑀡𑀁. 𑀢𑁂𑀦𑀸𑀳 ‘‘𑀧𑀼𑀕𑁆𑀕𑀮𑁄𑀧𑀻’’𑀢𑀺𑀆𑀤𑀺. 𑀔𑁂𑀫𑀦𑁆𑀢𑀺 𑀓𑁂𑀦𑀘𑀺 𑀅𑀧𑁆𑀧𑀝𑀺𑀩𑀦𑁆𑀥𑀺𑀬𑀪𑀸𑀯𑁂𑀦 𑀅𑀦𑀼𑀧𑀤𑁆𑀤𑀼𑀢𑀢𑀁.

𑀅𑀦𑁆𑀢𑀭𑀸𑀬𑁄 𑀏𑀢𑁂𑀲𑀁 𑀅𑀢𑁆𑀣𑀺, 𑀅𑀦𑁆𑀢𑀭𑀸𑀬𑁂𑀯𑀸 𑀬𑀼𑀢𑁆𑀢𑀸𑀢𑀺 𑀅𑀦𑁆𑀢𑀭𑀸𑀬𑀺𑀓𑀸. 𑀏𑀯𑀁𑀪𑀽𑀢𑀸 𑀧𑀦 𑀢𑁂 𑀬𑀲𑁆𑀫𑀸 𑀅𑀦𑁆𑀢𑀭𑀸𑀬𑀓𑀭𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀆𑀳 ‘‘𑀅𑀦𑁆𑀢𑀭𑀸𑀬𑀁 𑀓𑀭𑁄𑀦𑁆𑀢𑀻𑀢𑀺 𑀅𑀦𑁆𑀢𑀭𑀸𑀬𑀺𑀓𑀸’’𑀢𑀺. 𑀅𑀲𑀜𑁆𑀘𑀺𑀘𑁆𑀘 𑀯𑀻𑀢𑀺𑀓𑁆𑀓𑀫𑁄 𑀦 𑀢𑀣𑀸 𑀲𑀸𑀯𑀚𑁆𑀚𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀲𑀜𑁆𑀘𑀺𑀘𑁆𑀘 𑀯𑀻𑀢𑀺𑀓𑁆𑀓𑀦𑁆𑀢𑀸’’𑀢𑀺. 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀢𑀺𑀆𑀤𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀇𑀢𑀭𑁂𑀲𑀫𑁆𑀧𑀺 𑀘𑀢𑀼𑀦𑁆𑀦𑀁 ‘‘𑀅𑀦𑁆𑀢𑀭𑀸𑀬𑀺𑀓𑀸’’𑀢𑀺 𑀯𑀼𑀢𑁆𑀢𑀥𑀫𑁆𑀫𑀸𑀦𑀁 𑀢𑀩𑁆𑀪𑀸𑀯𑁂 𑀩𑁆𑀬𑀪𑀺𑀘𑀸𑀭𑀸𑀪𑀸𑀯𑀢𑁄. 𑀇𑀥 𑀧𑀦 𑀫𑁂𑀣𑀼𑀦𑀥𑀫𑁆𑀫𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀇𑀤𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀯𑀼𑀢𑁆𑀢𑀁 𑀅𑀭𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀁 (𑀧𑀸𑀘𑀺. 𑁪𑁧𑁭-𑁪𑁨𑁨) 𑀯𑀺𑀬. 𑀬𑀲𑁆𑀫𑀸 𑀢𑀗𑁆𑀔𑀡𑀫𑁆𑀧𑀺 𑀓𑀸𑀫𑁂𑀲𑀼 (𑀅. 𑀦𑀺. 𑀝𑀻. 𑁨.𑁪.𑁮) 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀯𑀺𑀭𑀢𑁆𑀢𑁄 (𑀅. 𑀦𑀺. 𑀝𑀻. 𑁨.𑁪.𑁮) 𑀳𑁄𑀢𑀺 𑀘𑁂, 𑀯𑀺𑀲𑁂𑀲𑀁 𑀅𑀥𑀺𑀕𑀘𑁆𑀙𑀢𑀺, 𑀦 𑀓𑀸𑀫𑁂𑀲𑀼 𑀆𑀲𑀢𑁆𑀢𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀫𑁂𑀣𑀼𑀦𑀁…𑀧𑁂… 𑀅𑀦𑁆𑀢𑀭𑀸𑀬𑁄 𑀳𑁄𑀢𑀻’’𑀢𑀺. 𑀢𑀢𑁆𑀣 𑀬𑀲𑁆𑀲 𑀓𑀲𑁆𑀲𑀘𑀻𑀢𑀺 𑀦 𑀓𑁂𑀯𑀮𑀁 𑀧𑀩𑁆𑀩𑀚𑀺𑀢𑀲𑁆𑀲𑁂𑀯, 𑀅𑀣 𑀔𑁄 𑀬𑀲𑁆𑀲 𑀓𑀲𑁆𑀲𑀘𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀫𑁂𑀣𑀼𑀦𑀫𑀦𑀼𑀬𑀼𑀢𑁆𑀢𑀲𑁆𑀲, 𑀫𑀼𑀲𑁆𑀲𑀢𑁂𑀯𑀸𑀧𑀺 𑀲𑀸𑀲𑀦’’𑀦𑁆𑀢𑀺. 𑀢𑀲𑁆𑀫𑀺𑀁 𑀅𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑁂𑀢𑀺 𑀢𑀲𑁆𑀫𑀺𑀁 𑀧𑀭𑁂𑀦 𑀧𑀭𑀺𑀓𑀧𑁆𑀧𑀺𑀢𑀅𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑀦𑀺𑀫𑀺𑀢𑁆𑀢𑀁. 𑀦𑀺𑀫𑀺𑀢𑁆𑀢𑀢𑁆𑀣𑁂 𑀳𑀺 𑀇𑀤𑀁 𑀓𑀫𑁆𑀫𑀲𑀁𑀬𑁄𑀕𑁂 𑀪𑀼𑀫𑁆𑀫𑀁.

𑀘𑀢𑀼𑀯𑁂𑀲𑀸𑀭𑀚𑁆𑀚𑀜𑀸𑀡𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀝𑁆𑀞𑀧𑀭𑀺𑀲𑀯𑀡𑁆𑀡𑀦𑀸

𑁧𑁫𑁧. 𑀧𑀼𑀭𑀺𑀲𑀲𑁆𑀲 𑀲𑀽𑀭𑀢𑀭𑀪𑀸𑀯𑁄 𑀦𑀸𑀫 𑀲𑀗𑁆𑀕𑀸𑀫𑁂 𑀧𑀸𑀓𑀝𑁄 𑀳𑁄𑀢𑀺, 𑀦 𑀕𑁂𑀳𑁂 𑀦𑀺𑀲𑀺𑀦𑁆𑀦𑀓𑀸𑀮𑁂, 𑀏𑀯𑀁 𑀯𑁂𑀲𑀸𑀭𑀚𑁆𑀚𑀜𑀸𑀡𑀲𑁆𑀲 𑀆𑀦𑀼𑀪𑀸𑀯𑁄 𑀧𑀡𑁆𑀟𑀺𑀢𑀧𑀭𑀺𑀲𑀸𑀲𑀼 𑀬𑀢𑁆𑀣 𑀓𑀢𑁆𑀣𑀘𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀯𑁂𑀲𑀸𑀭𑀚𑁆𑀚𑀜𑀸𑀡𑀲𑁆𑀲 𑀩𑀮𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺 𑀆𑀳. 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀦𑁆𑀢𑀺 𑀞𑀸𑀦𑀲𑀻𑀲𑁂𑀦 𑀲𑀦𑁆𑀦𑀺𑀧𑀢𑀺𑀢𑀔𑀢𑁆𑀢𑀺𑀬𑀧𑀭𑀺𑀲𑀫𑁂𑀯 𑀤𑀲𑁆𑀲𑁂𑀢𑀺. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑀢𑁆𑀣𑀸𑀢𑀺 𑀅𑀢𑀺𑀤𑁂𑀲𑁂𑀦 𑀆𑀯𑀺𑀪𑀸𑀯𑀺𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀸𑀭𑀓𑀸𑀬𑀺𑀓𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁 𑀲𑀤𑀺𑀲𑀢𑁆𑀣𑀯𑀺𑀲𑀬𑀢𑁆𑀢𑀸 𑀅𑀢𑀺𑀤𑁂𑀲𑀲𑁆𑀲. 𑀬𑀣𑀸 𑀳𑀺 𑀔𑀢𑁆𑀢𑀺𑀬𑀸𑀦𑀁 𑀲𑀫𑀽𑀳𑁄 𑀔𑀢𑁆𑀢𑀺𑀬𑀧𑀭𑀺𑀲𑀸𑀢𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀺, 𑀦 𑀏𑀯𑀁 ‘‘𑀫𑀸𑀭𑀧𑀭𑀺𑀲𑀸’’𑀢𑀺 𑀏𑀢𑁆𑀣, 𑀫𑀸𑀭𑀲𑁆𑀲 𑀧𑀭𑀺𑀲𑀸𑀢𑀺 𑀧𑀦 𑀫𑀸𑀭𑀧𑀭𑀺𑀲𑀸𑀢𑀺 𑀅𑀬𑀫𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀦𑀸𑀳 ‘‘𑀫𑀸𑀭𑀓𑀸𑀬𑀺𑀓𑀸𑀦𑀁…𑀧𑁂… 𑀦 𑀫𑀸𑀭𑀸𑀦’’𑀦𑁆𑀢𑀺. 𑀫𑀸𑀭𑀓𑀸𑀬𑀺𑀓𑀸𑀦𑀦𑁆𑀢𑀺 𑀫𑀸𑀭𑀧𑀓𑁆𑀔𑀺𑀬𑀸𑀦𑀁. 𑀉𑀕𑁆𑀕𑀝𑁆𑀞𑀸𑀦𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀲𑀸𑀭𑀚𑁆𑀚𑀺𑀢𑀩𑁆𑀩𑀝𑁆𑀞𑀸𑀦𑀤𑀲𑁆𑀲𑀦𑀯𑀲𑁂𑀦, 𑀏𑀯𑀁 𑀉𑀕𑁆𑀕𑀸 𑀔𑀢𑁆𑀢𑀺𑀬𑀸 𑀅𑀢𑁆𑀢𑀦𑁄 𑀧𑀼𑀜𑁆𑀜𑀢𑁂𑀚𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀩𑁆𑀭𑀸𑀳𑁆𑀫𑀡𑀸 𑀢𑀻𑀲𑀼 𑀯𑁂𑀤𑁂𑀲𑀽𑀢𑀺 𑀇𑀤𑀁 𑀇𑀢𑀭𑁂𑀲𑀁 𑀅𑀯𑀺𑀲𑀬𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀯𑁂𑀤𑁂 𑀲𑀚𑁆𑀛𑀸𑀬𑀦𑁆𑀢𑀸𑀧𑀺 𑀳𑀺 𑀔𑀢𑁆𑀢𑀺𑀬𑀸 𑀯𑁂𑀲𑁆𑀲𑀸 𑀘 𑀢𑀤𑀢𑁆𑀣𑀯𑀺𑀘𑀸𑀭𑀡𑀸𑀬 𑀬𑁂𑀪𑀼𑀬𑁆𑀬𑁂𑀦 𑀅𑀲𑀫𑀢𑁆𑀣𑀸 𑀏𑀯𑀸𑀢𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀬𑀸𑀫𑀸𑀤𑀺𑀧𑀭𑀺𑀲𑀸 𑀦 𑀕𑀳𑀺𑀢𑀸𑀢𑀺? 𑀪𑀼𑀲𑀁 𑀓𑀸𑀫𑀸𑀪𑀺𑀕𑀺𑀤𑁆𑀥𑀢𑀸𑀬 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀯𑀺𑀭𑀳𑀢𑁄. 𑀬𑀸𑀫𑀸𑀤𑀬𑁄 𑀳𑀺 𑀉𑀴𑀸𑀭𑀼𑀴𑀸𑀭𑁂 𑀓𑀸𑀫𑁂 𑀧𑀝𑀺𑀲𑁂𑀯𑀦𑁆𑀢𑀸 𑀢𑀢𑁆𑀣𑀸𑀪𑀺𑀕𑀺𑀤𑁆𑀥𑀢𑀸𑀬 𑀥𑀫𑁆𑀫𑀲𑁆𑀲𑀯𑀦𑀸𑀬 𑀲𑀪𑀸𑀯𑁂𑀦 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀦 𑀩𑀼𑀤𑁆𑀥𑀸𑀦𑀜𑁆𑀘 𑀆𑀦𑀼𑀪𑀸𑀯𑁂𑀦 𑀆𑀓𑀟𑁆𑀠𑀺𑀬𑀫𑀸𑀦𑀸 𑀓𑀤𑀸𑀘𑀺 𑀢𑁂𑀲𑀁 𑀧𑀬𑀺𑀭𑀼𑀧𑀸𑀲𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀺 𑀢𑀸𑀤𑀺𑀲𑁂 𑀫𑀳𑀸𑀲𑀫𑀬𑁂. 𑀢𑁂𑀦𑁂𑀯 𑀳𑀺 𑀯𑀺𑀫𑀸𑀦𑀯𑀢𑁆𑀣𑀼𑀤𑁂𑀲𑀦𑀸𑀧𑀺 𑀢𑀦𑁆𑀦𑀺𑀫𑀺𑀢𑁆𑀢𑀸 𑀩𑀳𑀼𑀮𑀸 𑀦𑀸𑀳𑁄𑀲𑀺. 𑀫𑀦𑀼𑀲𑁆𑀲𑀸𑀦𑀁 𑀯𑀲𑁂𑀦𑀸𑀬𑀁 𑀓𑀢𑀸.

𑀧𑀭𑀘𑀓𑁆𑀓𑀯𑀸𑀴𑁂𑀲𑀼 𑀘 𑀫𑀦𑀼𑀲𑁆𑀲𑀸𑀦𑀁 𑀯𑀺𑀲𑁂𑀲𑀸𑀥𑀺𑀕𑀫𑁄 𑀦𑀢𑁆𑀣𑀻𑀢𑀺 𑀧𑀼𑀘𑁆𑀙𑀢𑀺 ‘‘𑀓𑀺𑀁 𑀧𑀦 𑀪𑀕𑀯𑀸 𑀅𑀜𑁆𑀜𑀸𑀦𑀺 𑀘𑀓𑁆𑀓𑀯𑀸𑀴𑀸𑀦𑀺𑀧𑀺 𑀕𑀘𑁆𑀙𑀢𑀻’’𑀢𑀺. 𑀇𑀢𑀭𑁄 𑀬𑀤𑀺𑀧𑀺 𑀢𑁂𑀲𑀁 𑀅𑀭𑀺𑀬𑀥𑀫𑁆𑀫𑀸𑀥𑀺𑀕𑀫𑁄 𑀦𑀢𑁆𑀣𑀺, 𑀯𑀸𑀲𑀦𑀸𑀬 𑀧𑀦 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀫𑀕𑀘𑁆𑀙𑀢𑀻’’𑀢𑀺 𑀆𑀳. 𑀓𑁂𑀬𑀽𑀭𑀁 𑀦𑀸𑀦𑀸𑀯𑀺𑀥𑀭𑀢𑀦𑀧𑀭𑀺𑀲𑀺𑀩𑁆𑀩𑀺𑀢𑀲𑀼𑀯𑀡𑁆𑀡𑀚𑀸𑀮𑀯𑀺𑀦𑀤𑁆𑀥𑀁 𑀪𑀼𑀚𑀸𑀪𑀭𑀡𑀁. 𑀅𑀗𑁆𑀕𑀤𑀁 𑀦𑀸𑀦𑀸𑀕𑀦𑁆𑀥𑀕𑀦𑁆𑀥𑀺𑀢𑀁, 𑀓𑁂𑀯𑀮𑀁 𑀯𑀸 𑀲𑀼𑀯𑀡𑁆𑀡𑀫𑀬𑀁 𑀩𑀸𑀳𑀼𑀯𑀮𑀬𑀁. 𑀙𑀺𑀦𑁆𑀦𑀲𑁆𑀲𑀭𑀸𑀢𑀺 𑀤𑁆𑀯𑀺𑀥𑀸𑀪𑀽𑀢𑀲𑁆𑀲𑀭𑀸 (𑀤𑀻. 𑀦𑀺. 𑀝𑀻. 𑁨.𑁧𑁭𑁨) 𑀕𑀕𑁆𑀕𑀭𑀲𑁆𑀲𑀭𑀸𑀢𑀺 𑀕𑀕𑁆𑀕𑀭𑀺𑀓𑀸𑀬 𑀯𑀺𑀬 𑀕𑀕𑁆𑀕𑀭𑀸𑀬𑀫𑀸𑀦𑀔𑀭𑀲𑁆𑀲𑀭𑀸 (𑀤𑀻. 𑀦𑀺. 𑀝𑀻. 𑁨.𑁧𑁭𑁨; 𑀅. 𑀦𑀺. 𑀝𑀻. 𑁩.𑁮.𑁬𑁯). 𑀪𑀸𑀲𑀦𑁆𑀢𑀭𑀦𑁆𑀢𑀺 𑀢𑁂𑀲𑀁 𑀪𑀸𑀲𑀁 (𑀤𑀻. 𑀦𑀺. 𑀝𑀻. 𑁨.𑁧𑁭𑁨; 𑀅. 𑀦𑀺. 𑀝𑀻. 𑁩.𑁮.𑁬𑁯) 𑀲𑀦𑁆𑀥𑀸𑀬𑀸𑀳. ‘‘𑀯𑀻𑀫𑀁𑀲𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀁 𑀯𑀺𑀯𑀭𑀺𑀢𑀼𑀁 ‘‘𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀲𑀗𑁆𑀕𑀫𑁆𑀫𑀸𑀢𑀺 𑀲𑀫𑀸𑀕𑀦𑁆𑀢𑁆𑀯𑀸. 𑀆𑀤𑀺𑀢𑁄 𑀮𑀸𑀧𑁄 𑀆𑀮𑀸𑀧𑁄, 𑀯𑀘𑀦𑀧𑀝𑀺𑀯𑀘𑀦𑀯𑀲𑁂𑀦 𑀲𑀫𑀁 𑀮𑀸𑀧𑁄 𑀲𑀮𑁆𑀮𑀸𑀧𑁄. 𑀲𑀫𑁆𑀫𑀸, 𑀲𑀫𑀜𑁆𑀜𑀸 𑀯𑀸 𑀓𑀣𑀸 𑀲𑀁𑀓𑀣𑀸, 𑀲𑀁𑀓𑀣𑀸𑀯 𑀲𑀸𑀓𑀘𑁆𑀙𑀸.

𑀅𑀝𑁆𑀞𑀧𑀭𑀺𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀬𑁄𑀦𑀺𑀯𑀡𑁆𑀡𑀦𑀸

𑁧𑁫𑁨. 𑀬𑀯𑀦𑁆𑀢𑀺 𑀢𑀸𑀬 𑀲𑀢𑁆𑀢𑀸 𑀅𑀫𑀺𑀲𑁆𑀲𑀺𑀢𑀸𑀧𑀺 𑀲𑀫𑀸𑀦𑀚𑀸𑀢𑀺𑀢𑀸𑀬 𑀫𑀺𑀲𑁆𑀲𑀺𑀢𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀬𑁄𑀦𑀺. 𑀲𑀸 𑀧𑀦 𑀅𑀢𑁆𑀣𑀢𑁄 𑀅𑀡𑁆𑀟𑀸𑀤𑀺𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀯𑀺𑀲𑀺𑀝𑁆𑀞𑁄 𑀔𑀦𑁆𑀥𑀸𑀦𑀁 𑀪𑀸𑀕𑀲𑁄 𑀧𑀯𑀢𑁆𑀢𑀺𑀯𑀺𑀲𑁂𑀲𑁄𑀢𑀺 𑀆𑀳 ‘‘𑀔𑀦𑁆𑀥𑀓𑁄𑀝𑁆𑀞𑀸𑀲𑁄 𑀬𑁄𑀦𑀺 𑀦𑀸𑀫𑀸’’𑀢𑀺. 𑀅𑀡𑁆𑀟𑁂 𑀚𑀸𑀢𑀸𑀢𑀺 𑀧𑀞𑀫𑀸𑀬 𑀚𑀸𑀢𑀺𑀬𑀸 𑀯𑀲𑁂𑀦 𑀯𑀼𑀢𑁆𑀢𑀁, 𑀤𑀼𑀢𑀺𑀬𑀸𑀬 𑀧𑀦 𑀅𑀡𑁆𑀟𑀢𑁄, 𑀅𑀡𑁆𑀟𑁂 𑀯𑀸 𑀪𑀺𑀚𑁆𑀚𑀫𑀸𑀦𑁂 𑀚𑀸𑀢𑀸𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀅𑀪𑀺𑀦𑀺𑀩𑁆𑀪𑀺𑀚𑁆𑀚 𑀚𑀸𑀬𑀦𑁆𑀢𑀻’’𑀢𑀺. 𑀯𑀺𑀦𑀸𑀢𑀺 𑀏𑀢𑁂𑀳𑀺 𑀅𑀡𑁆𑀟𑀸𑀤𑀻𑀳𑀺 𑀩𑀸𑀳𑀺𑀭𑀧𑀘𑁆𑀘𑀬𑁂𑀳𑀺 𑀯𑀺𑀦𑀸. 𑀉𑀧𑁆𑀧𑀢𑀺𑀢𑁆𑀯𑀸 𑀯𑀺𑀬𑀸𑀢𑀺 𑀉𑀧𑁆𑀧𑀚𑁆𑀚𑀦𑀯𑀲𑁂𑀦 𑀧𑀢𑀺𑀢𑁆𑀯𑀸 𑀯𑀺𑀬. 𑀩𑀸𑀳𑀺𑀭𑀧𑀘𑁆𑀘𑀬𑀦𑀺𑀭𑀧𑁂𑀓𑁆𑀔𑀢𑁆𑀢𑀸𑀬𑁂𑀯 𑀯𑀸 𑀉𑀧𑀧𑀢𑀦𑁂 𑀲𑀸𑀥𑀼𑀓𑀸𑀭𑀺𑀦𑁄 𑀉𑀧𑀧𑀸𑀢𑀺𑀓𑀸, 𑀢𑁂 𑀏𑀯 𑀇𑀥 𑀑𑀧𑀧𑀸𑀢𑀺𑀓𑀸𑀢𑀺 𑀯𑀼𑀢𑁆𑀢𑀸. 𑀆𑀤𑀺-𑀲𑀤𑁆𑀤𑁂𑀦 𑀕𑀩𑁆𑀪𑀫𑀮𑁂 𑀦𑀺𑀩𑁆𑀩𑀢𑁆𑀢𑀫𑀳𑀸𑀧𑀤𑀼𑀫𑀓𑀼𑀫𑀸𑀭𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀦𑀺𑀚𑁆𑀛𑀸𑀫𑀢𑀡𑁆𑀳𑀺𑀓𑀧𑁂𑀢𑀸𑀦𑀁 𑀦𑀺𑀘𑁆𑀘𑀁 𑀤𑀼𑀓𑁆𑀔𑀸𑀢𑀼𑀭𑀢𑀸𑀬 𑀓𑀸𑀫𑀲𑁂𑀯𑀦𑀸 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑁂 𑀕𑀩𑁆𑀪𑀲𑁂𑀬𑁆𑀬𑀓𑀸 𑀦 𑀳𑁄𑀦𑁆𑀢𑀺, 𑀚𑀸𑀮𑀯𑀦𑁆𑀢𑀢𑀸𑀬 𑀦 𑀢𑀸𑀲𑀁 𑀓𑀼𑀘𑁆𑀙𑀺𑀬𑀁 𑀕𑀩𑁆𑀪𑁄 𑀲𑀡𑁆𑀞𑀸𑀢𑀺, 𑀢𑀲𑁆𑀫𑀸 𑀢𑁂 𑀑𑀧𑀧𑀸𑀢𑀺𑀓𑀸𑀬𑁂𑀯 𑀲𑀁𑀲𑁂𑀤𑀚𑀢𑁆𑀢𑀸𑀬𑀧𑀺 𑀅𑀲𑀫𑁆𑀪𑀯𑀢𑁄. 𑀦𑁂𑀭𑀬𑀺𑀓𑀸 𑀯𑀺𑀬𑀸𑀢𑀺 𑀦𑀺𑀤𑀲𑁆𑀲𑀦𑀸𑀧𑀤𑁂𑀲𑁂𑀦 𑀢𑁂𑀲𑀫𑁆𑀧𑀺 𑀑𑀧𑀧𑀸𑀢𑀺𑀓𑀢𑁆𑀢𑀁 𑀤𑀻𑀧𑁂𑀢𑀺. 𑀅𑀯𑀲𑁂𑀲𑀸𑀢𑀺 𑀦𑀺𑀚𑁆𑀛𑀸𑀫𑀢𑀡𑁆𑀳𑀺𑀓𑀦𑁂𑀭𑀬𑀺𑀓𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀯𑀺𑀦𑀺𑀧𑀸𑀢𑀺𑀓𑀸. 𑀬𑀓𑁆𑀔𑀸𑀦𑀁 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀢𑀸𑀬 𑀑𑀧𑀧𑀸𑀢𑀺𑀓𑀪𑀸𑀯𑁂 𑀏𑀯 𑀆𑀧𑀦𑁆𑀦𑁂 𑀢𑀁 𑀦𑀺𑀯𑀢𑁆𑀢𑁂𑀢𑀼𑀁 ‘‘𑀏𑀯𑀁 𑀬𑀓𑁆𑀔𑀸𑀧𑀻’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀢𑁂 𑀦 𑀪𑀼𑀫𑁆𑀫𑀤𑁂𑀯𑀸 𑀦 𑀘 𑀯𑀺𑀦𑀺𑀧𑀸𑀢𑀺𑀓𑀸𑀢𑀺.

𑀘𑀢𑀼𑀬𑁄𑀦𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀕𑀢𑀺𑀯𑀡𑁆𑀡𑀦𑀸

𑁧𑁫𑁩. 𑀕𑀦𑁆𑀢𑀩𑁆𑀩𑀸𑀢𑀺 𑀉𑀧𑀧𑀚𑁆𑀚𑀺𑀢𑀩𑁆𑀩𑀸. 𑀬𑀣𑀸 𑀳𑀺 𑀓𑀫𑁆𑀫𑀪𑀯𑁄 𑀧𑀭𑀫𑀢𑁆𑀣𑀢𑁄 𑀅𑀲𑀢𑀺𑀧𑀺 𑀓𑀸𑀭𑀓𑁂 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀸 𑀲𑀺𑀤𑁆𑀥𑁄 𑀢𑀁𑀲𑀫𑀗𑁆𑀕𑀺𑀦𑀸 𑀲𑀦𑁆𑀢𑀸𑀦𑀮𑀓𑁆𑀔𑀡𑁂𑀦 𑀲𑀢𑁆𑀢𑁂𑀦 𑀓𑀢𑁄𑀢𑀺 𑀯𑁄𑀳𑀭𑀻𑀬𑀢𑀺, 𑀢𑀣𑀸 𑀉𑀧𑀧𑀢𑁆𑀢𑀺𑀪𑀯𑀮𑀓𑁆𑀔𑀡𑀸 𑀕𑀢𑀺𑀬𑁄 𑀧𑀭𑀫𑀢𑁆𑀣𑀢𑁄 𑀅𑀲𑀢𑀺𑀧𑀺 𑀕𑀫𑀓𑁂 𑀢𑀁𑀢𑀁𑀓𑀫𑁆𑀫𑀯𑀲𑁂𑀦 𑀬𑁂𑀲𑀁 𑀢𑀸𑀦𑀺 𑀓𑀫𑁆𑀫𑀸𑀦𑀺, 𑀢𑁂𑀳𑀺 𑀕𑀦𑁆𑀢𑀩𑁆𑀩𑀸𑀢𑀺 𑀯𑁄𑀳𑀭𑀻𑀬𑀦𑁆𑀢𑀻𑀢𑀺. 𑀏𑀯𑀁 𑀲𑀤𑁆𑀤𑀢𑁆𑀣𑀢𑁄 𑀕𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀣𑀼𑀤𑁆𑀥𑀸𑀭𑀦𑀬𑁂𑀦𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑁂𑀲𑀼 𑀦𑀺𑀭𑀬𑀸𑀤𑀺𑀪𑁂𑀤𑁂𑀲𑀼 𑀉𑀧𑀧𑀢𑁆𑀢𑀺𑀪𑀯𑁂𑀲𑀼 𑀕𑀢𑀺-𑀲𑀤𑁆𑀤𑁄 𑀦𑀺𑀭𑀽𑀴𑁆𑀳𑁄, 𑀢𑀢𑁄 𑀅𑀜𑁆𑀜𑀢𑁆𑀣𑀸𑀧𑀺 𑀕𑀢𑀺𑀲𑀤𑁆𑀤𑀧𑁆𑀧𑀯𑀢𑁆𑀢𑀺 𑀅𑀢𑁆𑀣𑀺, 𑀢𑀁 𑀏𑀓𑁂𑀦 𑀕𑀢𑀺-𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀆𑀳 ‘‘𑀕𑀢𑀺𑀕𑀢𑀻’’𑀢𑀺 𑀬𑀣𑀸 ‘‘𑀤𑀼𑀓𑁆𑀔𑀤𑀼𑀓𑁆𑀔𑀁, (𑀲𑀁. 𑀦𑀺. 𑁪.𑁩𑁨𑁭) 𑀭𑀽𑀧𑀭𑀽𑀧’’𑀦𑁆𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁪𑁪𑁯) 𑀘. 𑀉𑀧𑁆𑀧𑀸𑀤𑀸𑀯𑀢𑁆𑀣𑀸𑀬 𑀕𑀫𑀦𑀁 𑀉𑀧𑀕𑀫𑀦𑀦𑁆𑀢𑀺 ‘‘𑀦𑀺𑀩𑁆𑀩𑀢𑁆𑀢𑀺𑀕𑀢𑀻’’𑀢𑀺 𑀯𑀼𑀢𑁆𑀢𑀸. 𑀕𑀢𑀺𑀦𑁆𑀢𑀺 𑀘𑀺𑀢𑁆𑀢𑀕𑀢𑀺𑀁. 𑀢𑁂𑀦𑀸𑀳 ‘‘𑀅𑀚𑁆𑀛𑀸𑀲𑀬𑀕𑀢𑀺 𑀦𑀸𑀫𑀸’’𑀢𑀺, 𑀅𑀚𑁆𑀛𑀸𑀲𑀬𑀧𑁆𑀧𑀯𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀤𑀝𑁆𑀞𑀓𑀣𑀸𑀬𑀁 (𑀫. 𑀦𑀺. 𑀅𑀝𑁆𑀞. 𑁨.𑁫𑁦𑁩) 𑀧𑀦 ‘‘𑀕𑀢𑀺𑀦𑁆𑀢𑀺 𑀦𑀺𑀧𑁆𑀨𑀢𑁆𑀢𑀺’’𑀦𑁆𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀩𑁆𑀭𑀳𑁆𑀫𑀦𑀺𑀫𑀦𑁆𑀢𑀦𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁫𑁦𑁩) 𑀳𑀺 𑀅𑀬𑀁 𑀧𑀸𑀴𑀻𑀢𑀺. 𑀚𑀼𑀢𑀺𑀦𑁆𑀢𑀺 𑀆𑀦𑀼𑀪𑀸𑀯𑀁. 𑀯𑀺𑀪𑀯𑁄𑀢𑀺 𑀯𑀺𑀦𑀸𑀲𑁄. 𑀲𑁄 𑀳𑀺 𑀯𑀺𑀕𑀫𑁄𑀢𑀺 𑀅𑀢𑁆𑀣𑁂𑀦 𑀕𑀢𑀺. 𑀢𑁂𑀦𑁂𑀯 𑀦𑀺𑀩𑁆𑀩𑀸𑀦𑀁 𑀅𑀭𑀳𑀢𑁄 𑀕𑀢𑀻𑀢𑀺 (𑀧𑀭𑀺. 𑁩𑁩𑁯) 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀁 𑀅𑀭𑀳𑀢𑁄 𑀕𑀢𑀺 𑀯𑀺𑀕𑀫𑁄 𑀯𑀺𑀪𑀯𑁄𑀢𑀺 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀽𑀦𑀁. 𑀤𑁆𑀯𑁂𑀬𑁂𑀯 𑀕𑀢𑀺𑀬𑁄𑀢𑀺 𑀤𑁆𑀯𑁂𑀯 𑀦𑀺𑀧𑁆𑀨𑀢𑁆𑀢𑀺𑀬𑁄𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀅𑀬𑀁 𑀦𑀺𑀧𑁆𑀨𑀢𑁆𑀢𑀺𑀕𑀢𑀺 𑀦𑀸𑀫𑀸’’𑀢𑀺.

𑀬𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀩𑁆𑀭𑀽𑀳𑁂𑀦𑁆𑀢𑁄 𑀏𑀯 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀬𑁄, 𑀲𑀼𑀔𑀁. 𑀦𑀢𑁆𑀣𑀺 𑀏𑀢𑁆𑀣 𑀅𑀬𑁄𑀢𑀺 𑀦𑀺𑀭𑀬𑁄. 𑀢𑀢𑁄 𑀏𑀯 𑀭𑀫𑀺𑀢𑀩𑁆𑀩𑀁 𑀅𑀲𑁆𑀲𑀸𑀤𑁂𑀢𑀩𑁆𑀩𑀁 𑀢𑀢𑁆𑀣 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦𑀺𑀭𑀢𑀺𑀅𑀢𑁆𑀣𑁂𑀦 𑀦𑀺𑀭𑀲𑁆𑀲𑀸𑀤𑀝𑁆𑀞𑁂𑀦 𑀦𑀺𑀭𑀬𑁄’’𑀢𑀺. 𑀢𑀺𑀭𑀺𑀬𑀁 𑀅𑀜𑁆𑀘𑀺𑀢𑀸𑀢𑀺 𑀤𑁂𑀯𑀫𑀦𑀼𑀲𑁆𑀲𑀸𑀤𑀬𑁄 𑀯𑀺𑀬 𑀉𑀤𑁆𑀥𑀁 𑀤𑀻𑀖𑀸 𑀅𑀳𑀼𑀢𑁆𑀯𑀸 𑀢𑀺𑀭𑀺𑀬𑀁 𑀤𑀻𑀖𑀸𑀪𑀺 𑀅𑀢𑁆𑀣𑁄. 𑀧𑀓𑀝𑁆𑀞𑀢𑁄 𑀲𑀼𑀔𑀢𑁄 𑀅𑀬𑀦𑀁 𑀅𑀧𑀕𑀫𑁄 𑀧𑁂𑀘𑁆𑀘𑀪𑀸𑀯𑁄, 𑀢𑀁 𑀧𑁂𑀘𑁆𑀘𑀪𑀸𑀯𑀁 𑀧𑀢𑁆𑀢𑀸𑀦𑀁 𑀯𑀺𑀲𑀬𑁄𑀢𑀺 𑀧𑁂𑀢𑀬𑁄𑀦𑀺𑀫𑁂𑀯 𑀯𑀤𑀢𑀺. 𑀫𑀦𑀲𑁄 𑀉𑀲𑁆𑀲𑀦𑁆𑀦𑀢𑁆𑀢𑀸𑀢𑀺 𑀲𑀢𑀺𑀲𑀽𑀭𑀪𑀸𑀯𑀩𑁆𑀭𑀳𑁆𑀫𑀘𑀭𑀺𑀬𑀬𑁄𑀕𑁆𑀬𑀢𑀸𑀤𑀺𑀕𑀼𑀡𑀯𑀲𑁂𑀦 𑀉𑀧𑀘𑀺𑀢𑀫𑀸𑀦𑀲𑀢𑀸𑀬 𑀉𑀓𑁆𑀓𑀝𑁆𑀞𑀕𑀼𑀡𑀘𑀺𑀢𑁆𑀢𑀢𑀸𑀬𑀸𑀢𑀺 𑀅𑀢𑁆𑀢𑁄. 𑀅𑀬𑀁 𑀧𑀦𑀢𑁆𑀣𑁄 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸𑀳 𑁋 ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀞𑀸𑀦𑁂𑀳𑀺 𑀚𑀫𑁆𑀩𑀼𑀤𑀻𑀧𑀺𑀓𑀸 𑀫𑀦𑀼𑀲𑁆𑀲𑀸 𑀉𑀢𑁆𑀢𑀭𑀓𑀼𑀭𑀼𑀓𑁂 𑀫𑀦𑀼𑀲𑁆𑀲𑁂 𑀅𑀥𑀺𑀕𑁆𑀕𑀡𑁆𑀳𑀦𑁆𑀢𑀺 𑀤𑁂𑀯𑁂 𑀘 𑀢𑀸𑀯𑀢𑀺𑀁𑀲𑁂. 𑀓𑀢𑀫𑁂𑀳𑀺 𑀢𑀻𑀳𑀺? 𑀲𑀽𑀭𑀸 𑀲𑀢𑀺𑀫𑀦𑁆𑀢𑁄 𑀇𑀥 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’’𑀢𑀺 (𑀅. 𑀦𑀺. 𑁯.𑁨𑁧). 𑀢𑁂𑀳𑀺 𑀧𑀦 𑀲𑀫𑀸𑀦𑀭𑀽𑀧𑀸𑀤𑀺𑀢𑀸𑀬 𑀲𑀤𑁆𑀥𑀺𑀁 𑀧𑀭𑀺𑀢𑁆𑀢𑀤𑀻𑀧𑀯𑀸𑀲𑀻𑀳𑀺 𑀇𑀢𑀭𑀫𑀳𑀸𑀤𑀻𑀧𑀯𑀸𑀲𑀺𑀦𑁄𑀧𑀺 𑀫𑀦𑀼𑀲𑁆𑀲𑀸𑀢𑁂𑀯 𑀧𑀜𑁆𑀜𑀸𑀬𑀺𑀁𑀲𑀼. 𑀮𑁄𑀓𑀺𑀬𑀸 𑀧𑀦 ‘‘𑀫𑀦𑀼𑀦𑁄 𑀅𑀧𑀘𑁆𑀘𑀪𑀸𑀯𑁂𑀦 𑀫𑀦𑀼𑀲𑁆𑀲𑀸’’𑀢𑀺 𑀯𑀤𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀁 𑀯𑀺𑀫𑀸𑀦𑀯𑀢𑁆𑀣𑀼𑀲𑀁𑀯𑀡𑁆𑀡𑀦𑀸𑀬𑀁 (𑀯𑀺. 𑀯. 𑀅𑀝𑁆𑀞. 𑁩) 𑀯𑀼𑀢𑁆𑀢𑀦𑀬𑁂𑀦 𑀕𑀳𑁂𑀢𑀩𑁆𑀩𑁄. 𑀆𑀦𑀼𑀪𑀸𑀯𑁂𑀳𑀻𑀢𑀺 𑀤𑁂𑀯𑀸𑀦𑀼𑀪𑀸𑀯𑀲𑀗𑁆𑀔𑀸𑀢𑁂𑀳𑀺 𑀇𑀤𑁆𑀥𑀺𑀯𑀺𑀲𑁂𑀲𑁂𑀳𑀺. 𑀢𑀢𑁆𑀣 𑀓𑀸𑀫𑀸 𑀤𑁂𑀯𑀸 𑀓𑀸𑀫𑀕𑀼𑀡𑁂𑀳𑀺 𑀘𑁂𑀯 𑀇𑀤𑁆𑀥𑀺𑀯𑀺𑀲𑁂𑀲𑁂𑀳𑀺 𑀘 𑀇𑀢𑀭𑁂 𑀇𑀤𑁆𑀥𑀺𑀯𑀺𑀲𑁂𑀲𑁂𑀳𑁂𑀯 𑀤𑀺𑀩𑁆𑀩𑀦𑁆𑀢𑀺 𑀓𑀻𑀴𑀦𑁆𑀢𑀺 𑀚𑁄𑀢𑀦𑁆𑀢𑀺, 𑀲𑀭𑀡𑀦𑁆𑀢𑀺 𑀯𑀸 𑀕𑀫𑁆𑀫𑀦𑁆𑀢𑀺, 𑀅𑀪𑀺𑀢𑁆𑀣𑀯𑀺𑀬𑀦𑁆𑀢𑀻𑀢𑀺 𑀯𑀸 𑀤𑁂𑀯𑀸𑀢𑀺.

𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀜𑁆𑀘𑀸𑀢𑀺𑀆𑀤𑀻𑀲𑀽𑀢𑀺 𑀏𑀢𑁆𑀣 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀧𑁂𑀢𑁆𑀢𑀺𑀯𑀺𑀲𑀬𑀕𑁆𑀕𑀳𑀡𑁂𑀦 𑀔𑀦𑁆𑀥𑀸𑀦𑀁 𑀏𑀯 𑀕𑀳𑀡𑀁 𑀢𑁂𑀲𑀁 𑀢𑀸𑀤𑀺𑀲𑀲𑁆𑀲 𑀧𑀭𑀺𑀘𑁆𑀙𑀺𑀦𑁆𑀦𑀲𑁆𑀲 𑀑𑀓𑀸𑀲𑀲𑁆𑀲 𑀅𑀪𑀸𑀯𑀢𑁄. 𑀬𑀢𑁆𑀣 𑀯𑀸 𑀢𑁂 𑀅𑀭𑀜𑁆𑀜𑀲𑀫𑀼𑀤𑁆𑀤𑀧𑀩𑁆𑀩𑀢𑀸𑀤𑀺𑀓𑁂 𑀦𑀺𑀩𑀤𑁆𑀥𑀯𑀸𑀲𑀁 𑀯𑀲𑀦𑁆𑀢𑀺, 𑀢𑀸𑀤𑀺𑀲𑀲𑁆𑀲 𑀞𑀸𑀦𑀲𑁆𑀲 𑀯𑀲𑁂𑀦 𑀑𑀓𑀸𑀲𑁄𑀧𑀺 𑀕𑀳𑁂𑀢𑀩𑁆𑀩𑁄. 𑀦𑀺𑀭𑀬𑀽𑀧𑀕𑀸𑀤𑀻𑀳𑀺 𑀲𑀢𑁆𑀢𑁂𑀳𑀺 𑀫𑀕𑁆𑀕𑀺𑀢𑀩𑁆𑀩𑀢𑁄 𑀫𑀕𑁆𑀕𑁄 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀸 𑀧𑀝𑀺𑀧𑀤𑀸 𑀘𑀸𑀢𑀺 𑀢𑀁 𑀢𑀁 𑀓𑀫𑁆𑀫𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀉𑀪𑀬𑁂𑀦𑀧𑀻’’𑀢𑀺𑀆𑀤𑀺. 𑀬𑀣𑀸 𑀘 𑀧𑀝𑀺𑀧𑀦𑁆𑀦𑁄𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀽𑀧𑀘𑀺𑀢𑀸𑀓𑀸𑀭𑀫𑀸𑀳. 𑀏𑀢𑁆𑀣 𑀘 𑀦𑀺𑀭𑀬𑀕𑀸𑀫𑀺𑀜𑁆𑀘 𑀫𑀕𑁆𑀕𑀁 𑀦𑀺𑀭𑀬𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀦𑁆𑀢𑀺 𑀇𑀫𑀺𑀦𑀸 𑀲𑀸𑀥𑀸𑀭𑀡𑀢𑁄 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀬𑀁 𑀓𑀫𑁆𑀫𑀁 𑀯𑀢𑁆𑀯𑀸 𑀧𑀼𑀦 𑀢𑀁 𑀢𑀁 𑀲𑀦𑁆𑀢𑀸𑀦𑀧𑀢𑀺𑀢𑀢𑀸𑀬 𑀅𑀲𑀸𑀥𑀸𑀭𑀡𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸𑀧𑀝𑀺𑀧𑀦𑁆𑀦𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀦𑀺𑀧𑀢𑀦𑁆𑀢𑀻𑀢𑀺 𑀯𑀺𑀯𑀲𑀸, 𑀯𑀺𑀭𑀽𑀧𑀁 𑀯𑀸 𑀦𑀺𑀧𑀢𑀦𑁆𑀢𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀧𑀜𑁆𑀘𑀕𑀢𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 ‘‘𑀦𑀺𑀩𑁆𑀩𑀸𑀦𑀜𑁆𑀘𑀸𑀳’’𑀦𑁆𑀢𑀺𑀆𑀤𑀺𑀫𑀸𑀳𑀸𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬𑀸𑀳 ‘‘𑀇𑀤𑀁 𑀧𑀦𑀸’’𑀢𑀺𑀆𑀤𑀺. 𑀦 𑀳𑀺 𑀪𑀕𑀯𑀸 𑀅𑀢𑁆𑀢𑀦𑁄 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀁 𑀯𑀺𑀪𑀸𑀯𑁂𑀦𑁆𑀢𑁄 𑀲𑀸𑀯𑀲𑁂𑀲𑀁 𑀓𑀢𑁆𑀯𑀸 𑀤𑁂𑀲𑀦𑀁 𑀤𑁂𑀲𑁂𑀢𑀺.

𑀧𑀜𑁆𑀘𑀕𑀢𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀜𑀸𑀡𑀧𑀯𑀢𑁆𑀢𑀸𑀓𑀸𑀭𑀯𑀡𑁆𑀡𑀦𑀸

𑁧𑁫𑁪. 𑀜𑀸𑀡𑀧𑁆𑀧𑀯𑀢𑁆𑀢𑀸𑀓𑀸𑀭𑀦𑁆𑀢𑀺 𑀜𑀸𑀡𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑀁, 𑀜𑀸𑀡𑀲𑁆𑀲 𑀯𑀸 𑀧𑀯𑀢𑁆𑀢𑀺𑀧𑀓𑀸𑀭𑀁. 𑀏𑀓𑀦𑁆𑀢𑀤𑀼𑀓𑁆𑀔𑀸𑀢𑀺 𑀏𑀓𑀦𑁆𑀢𑁂𑀦 𑀤𑀼𑀓𑁆𑀔𑀸 𑀅𑀘𑁆𑀘𑀦𑁆𑀢𑀤𑀼𑀓𑁆𑀔𑀸. 𑀢𑀸 𑀧𑀦 𑀲𑀩𑁆𑀩𑀓𑀸𑀮𑀁 𑀤𑀼𑀓𑁆𑀔𑀸 𑀲𑀼𑀔𑀸𑀮𑀬𑁂𑀦𑀧𑀺 𑀅𑀲𑀫𑁆𑀫𑀺𑀲𑁆𑀲𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦𑀺𑀘𑁆𑀘𑀤𑀼𑀓𑁆𑀔𑀸 𑀦𑀺𑀭𑀦𑁆𑀢𑀭𑀤𑀼𑀓𑁆𑀔𑀸’’𑀢𑀺. 𑀩𑀳𑀮𑀸𑀢𑀺 𑀅𑀢𑀦𑀼𑀓𑀸, 𑀫𑀳𑀦𑁆𑀢𑀸𑀢𑀺 𑀅𑀢𑁆𑀣𑁄. 𑀢𑀺𑀩𑁆𑀩𑀸𑀢𑀺 𑀯𑀸 𑀢𑀺𑀔𑀺𑀡𑀸. 𑀔𑀭𑀸𑀢𑀺 𑀓𑀓𑁆𑀔𑀴𑀸. 𑀓𑀝𑀼𑀓𑀸𑀢𑀺 𑀯𑀸 𑀅𑀦𑀺𑀝𑁆𑀞𑀸. 𑀓𑀲𑁆𑀲𑀢𑀺 𑀔𑀡𑀻𑀬𑀢𑀻𑀢𑀺 𑀓𑀸𑀲𑀼, 𑀆𑀯𑀸𑀝𑁄. 𑀓𑀲𑀻𑀬𑀢𑀺 𑀘𑀻𑀬𑀢𑀻𑀢𑀺 𑀓𑀸𑀲𑀼, 𑀭𑀸𑀲𑀺. 𑀨𑀼𑀦𑀦𑁆𑀢𑀻𑀢𑀺 𑀤𑁆𑀯𑀻𑀳𑀺 𑀳𑀢𑁆𑀣𑁂𑀳𑀺 𑀅𑀗𑁆𑀕𑀸𑀭𑀸𑀦𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀝𑀺𑀯𑀸𑀢𑀁 𑀑𑀨𑀼𑀦𑀦𑁆𑀢𑀺, 𑀢𑁂𑀦 𑀢𑁂𑀲𑀁 𑀲𑀓𑀮𑀲𑀭𑀻𑀭𑀁 𑀟𑀬𑁆𑀳𑀢𑀺. 𑀢𑁂𑀦𑀸𑀳 ‘‘𑀧𑀭𑀺𑀤𑀟𑁆𑀠𑀕𑀢𑁆𑀢𑀸’’𑀢𑀺. 𑀧𑀼𑀭𑀺𑀲𑀧𑁆𑀧𑀫𑀸𑀡𑀁 𑀧𑁄𑀭𑀺𑀲𑀁. 𑀏𑀓𑀧𑀣𑁂𑀦𑁂𑀯𑀸𑀢𑀺 𑀏𑀓𑀫𑀕𑁆𑀕𑀪𑀽𑀢𑁂𑀦𑁂𑀯. 𑀅𑀦𑀼𑀓𑁆𑀓𑀫𑀦𑀻𑀬𑁂𑀦𑀸𑀢𑀺 𑀉𑀓𑁆𑀓𑀫𑀺𑀢𑀼𑀁 𑀅𑀧𑀓𑁆𑀓𑀫𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁂𑀦.

𑀦𑀦𑀼 𑀘 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀡𑁆𑀡𑀸𑀭𑀫𑁆𑀫𑀡𑀁, 𑀢𑁂𑀦 𑀓𑀣𑀁 𑀭𑀽𑀧𑀦𑁆𑀢𑀭𑀲𑀫𑀗𑁆𑀕𑀺𑀁 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀁 ‘‘𑀅𑀬𑀁 𑀲𑁄’’𑀢𑀺 𑀚𑀸𑀦𑀸𑀢𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀢𑁆𑀣 𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺. 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑁂𑀦 ‘‘𑀅𑀬𑀁 𑀲𑁄’’𑀢𑀺 𑀲𑀮𑁆𑀮𑀓𑁆𑀔𑁂𑀢𑀺, 𑀢𑀲𑁆𑀲 𑀧𑀦 𑀤𑀺𑀩𑁆𑀩𑀘𑀓𑁆𑀔𑀼𑀆𑀦𑀼𑀪𑀸𑀯𑁂𑀦 𑀧𑀢𑁆𑀢𑀩𑁆𑀩𑀢𑁆𑀢𑀸 ‘‘𑀤𑀺𑀩𑁆𑀩𑀘𑀓𑁆𑀔𑀼𑀩𑀮𑀁 𑀦𑀸𑀫 𑀏𑀢𑀦𑁆𑀢𑀺 𑀯𑀼𑀢𑁆𑀢𑀁.

𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 ‘‘𑀕𑀽𑀣𑀓𑀽𑀧𑁄 𑀯𑀺𑀬 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀤𑀝𑁆𑀞𑀩𑁆𑀩𑀸’’𑀢𑀺𑀆𑀤𑀺𑀦𑀸 𑀅𑀗𑁆𑀕𑀸𑀭𑀓𑀸𑀲𑀼𑀧𑀫𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀩𑀳𑀼𑀮𑀸 𑀏𑀢𑀸𑀲𑀽𑀢𑀺 𑀤𑀼𑀓𑁆𑀔𑀩𑀳𑀼𑀮𑀸. 𑀩𑀳𑀮𑀧𑀢𑁆𑀢𑀧𑀮𑀸𑀲𑁄𑀢𑀺 𑀅𑀯𑀺𑀭𑀴𑀢𑀦𑀼𑀯𑀺𑀧𑀼𑀮𑀧𑀡𑁆𑀡𑁄. 𑀲𑀼𑀔𑀧𑀭𑀺𑀪𑁄𑀕𑀁 𑀫𑀳𑀸𑀧𑀸𑀲𑀸𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀻𑀖𑀧𑀸𑀲𑀸𑀤𑁄’’𑀢𑀺 𑀯𑀼𑀢𑁆𑀢𑀁 𑀘𑀢𑀼𑀭𑀲𑁆𑀲𑀧𑀸𑀲𑀸𑀤𑀸𑀤𑀻𑀦𑀁 𑀔𑀼𑀤𑁆𑀤𑀓𑀢𑁆𑀢𑀸. 𑀉𑀡𑁆𑀡𑀸𑀫𑀬𑀅𑀢𑁆𑀣𑀭𑀡𑁂𑀦𑀸𑀢𑀺 𑀉𑀡𑁆𑀡𑀸𑀫𑀬𑀮𑁄𑀳𑀺𑀢𑀅𑀢𑁆𑀣𑀭𑀡𑁂𑀦. 𑀉𑀢𑁆𑀢𑀭𑀁 𑀉𑀧𑀭𑀺𑀪𑀸𑀕𑀁 𑀙𑀸𑀤𑁂𑀢𑀻𑀢𑀺 𑀉𑀢𑁆𑀢𑀭𑀘𑁆𑀙𑀤𑁄, 𑀯𑀺𑀢𑀸𑀦𑀁. 𑀢𑀁 𑀧𑀦 𑀮𑁄𑀳𑀺𑀢𑀯𑀺𑀢𑀸𑀦𑀁 𑀇𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 ‘‘𑀭𑀢𑁆𑀢𑀯𑀺𑀢𑀸𑀦𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑀅𑀧𑀭𑀪𑀸𑀕𑀬𑁄𑀚𑀦𑀸𑀢𑀺 𑀧𑀸𑀴𑀺𑀬𑀁 ‘‘𑀅𑀧𑀭𑁂𑀦 𑀲𑀫𑀬𑁂𑀦𑀸’’𑀢𑀺 𑀯𑀼𑀢𑁆𑀢𑀲𑁆𑀲 𑀅𑀧𑀭𑀪𑀸𑀕𑀲𑁆𑀲 𑀬𑁄𑀚𑀦𑀸. 𑀲𑀸 𑀧𑀦 𑀏𑀓𑀤𑁂𑀲𑁂𑀦 𑀧𑀼𑀭𑀺𑀫𑀪𑀸𑀕𑁂 𑀯𑀼𑀢𑁆𑀢𑁂 𑀏𑀯 𑀲𑀼𑀯𑀺𑀜𑁆𑀜𑁂𑀬𑁆𑀬𑀸 𑀳𑁄𑀢𑀻𑀢𑀺 ‘‘𑀬𑀣𑀸 𑀲𑁄’’𑀢𑀺𑀆𑀤𑀺𑀫𑀸𑀳. 𑀫𑀕𑁆𑀕𑀸𑀭𑀼𑀴𑁆𑀳𑀫𑁂𑀯𑀸𑀢𑀺 𑀫𑀕𑁆𑀕𑀁 𑀉𑀧𑀕𑀢𑀫𑀢𑁆𑀢𑀫𑁂𑀯.

𑀦𑀺𑀬𑀫𑀸𑀪𑀸𑀯𑀸𑀢𑀺 ‘‘𑀤𑀺𑀩𑁆𑀩𑀘𑀓𑁆𑀔𑀼𑀦𑀸𑀯 𑀧𑀲𑁆𑀲𑀢𑀻’’𑀢𑀺 𑀦𑀺𑀬𑀫𑀲𑁆𑀲 𑀅𑀪𑀸𑀯𑀸. ‘‘𑀤𑀺𑀩𑁆𑀩𑀘𑀓𑁆𑀔𑀼𑀦𑀸𑀧𑀺 𑀧𑀲𑁆𑀲𑀺𑀲𑁆𑀲𑀢𑀻’’𑀢𑀺 𑀇𑀤𑀁 𑀦 𑀅𑀦𑀼𑀢𑁆𑀢𑀭𑀲𑀼𑀔𑀸𑀦𑀼𑀪𑀯𑀦𑀲𑁆𑀲 𑀤𑀺𑀩𑁆𑀩𑀘𑀓𑁆𑀔𑀼𑀕𑁄𑀘𑀭𑀢𑁆𑀢𑀸 𑀯𑀼𑀢𑁆𑀢𑀁, 𑀅𑀦𑀸𑀕𑀢𑀲𑁆𑀲 𑀧𑀦 𑀢𑀲𑁆𑀲 𑀤𑀺𑀩𑁆𑀩𑀘𑀓𑁆𑀔𑀼𑀧𑀭𑀺𑀪𑀡𑁆𑀟𑀪𑀽𑀢𑁂𑀦 𑀅𑀦𑀸𑀕𑀢𑀁𑀲𑀜𑀸𑀡𑁂𑀦 𑀤𑀲𑁆𑀲𑀦𑀫𑁂𑀯𑀸𑀢𑀺 𑀓𑀸𑀭𑀡𑀽𑀧𑀘𑀸𑀭𑁂𑀦 𑀯𑀼𑀢𑁆𑀢𑀁. 𑀧𑀸𑀴𑀺𑀬𑀁 𑀧𑀦 ‘‘𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺’’𑀘𑁆𑀘𑁂𑀯 𑀯𑀼𑀢𑁆𑀢𑀁. ‘‘𑀅𑀢𑁆𑀣𑀢𑁄 𑀧𑀦 𑀦𑀸𑀦𑀸 𑀳𑁄𑀢𑀻’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀤𑁂𑀯𑀮𑁄𑀓𑀲𑀼𑀔𑀁 𑀳𑀻’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀬𑀣𑀸𑀤𑀲𑁆𑀲𑀺𑀢𑀉𑀧𑀫𑀸𑀳𑀺𑀧𑀺 𑀅𑀬𑀫𑀢𑁆𑀣𑁄 𑀧𑀸𑀓𑀝𑁄 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀧𑀫𑀸𑀬𑀫𑁆𑀧𑀻’’𑀢𑀺𑀆𑀤𑀺𑀫𑀸𑀳. 𑀕𑁄𑀢𑁆𑀭𑀪𑀼𑀜𑀸𑀡𑀼𑀧𑁆𑀧𑀸𑀤𑀢𑁄 𑀧𑀝𑁆𑀞𑀸𑀬 𑀦𑀺𑀭𑁄𑀥𑀁 𑀧𑀲𑁆𑀲𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀫𑀕𑁆𑀕𑀨𑀮𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀘𑁂𑀯 𑀧𑀭𑀢𑁄 𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀯𑀲𑁂𑀦 𑀘 𑀅𑀭𑀺𑀬𑀲𑀸𑀯𑀓𑁄 𑀦𑀺𑀭𑁄𑀥𑁂 𑀲𑀬𑀺𑀢𑁄 𑀯𑀺𑀬 𑀳𑁄𑀢𑀺 𑀢𑀤𑀧𑀲𑁆𑀲𑀬𑁂𑀦𑁂𑀯 𑀧𑀯𑀢𑁆𑀢𑀦𑀢𑁄𑀢𑀺 𑀆𑀳 ‘‘𑀦𑀺𑀭𑁄𑀥𑀲𑀬𑀦𑀯𑀭𑀕𑀢’’𑀦𑁆𑀢𑀺. 𑀢𑁂𑀦𑀸𑀳 ‘‘𑀦𑀺𑀩𑁆𑀩𑀸𑀦𑀸…𑀧𑁂… 𑀧𑀲𑁆𑀲𑀢𑀻’’𑀢𑀺.

𑀜𑀸𑀡𑀧𑀯𑀢𑁆𑀢𑀸𑀓𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀤𑀺𑀲𑀼𑀤𑁆𑀥𑀺𑀯𑀡𑁆𑀡𑀦𑀸

𑁧𑁫𑁫. 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀆𑀤𑀺𑀅𑀦𑀼𑀲𑀦𑁆𑀥𑀺𑀢𑁆𑀢𑀬𑀢𑁄 𑀅𑀜𑁆𑀜𑀢𑁆𑀢𑀸 ‘‘𑀧𑀸𑀝𑀺𑀬𑁂𑀓𑁆𑀓𑀁 𑀅𑀦𑀼𑀲𑀦𑁆𑀥𑀺𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀦 𑀓𑁂𑀯𑀮𑀁 ‘‘𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬 𑀲𑀼𑀤𑁆𑀥𑀺 𑀳𑁄𑀢𑀻’’𑀢𑀺 𑀏𑀯𑀁𑀮𑀤𑁆𑀥𑀺𑀓𑁄 𑀏𑀯, 𑀅𑀣 𑀔𑁄 𑀤𑀼𑀓𑁆𑀓𑀭𑀘𑀸𑀭𑀻𑀲𑀼 𑀅𑀪𑀺𑀧𑁆𑀧𑀲𑀦𑁆𑀦𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀢𑀼𑀓𑀼𑀡𑁆𑀟𑀺𑀓𑁄𑀢𑀺 𑀤𑁆𑀯𑀻𑀳𑀺 𑀧𑀸𑀤𑁂𑀳𑀺 𑀳𑀢𑁆𑀣𑁂𑀳𑀻𑀢𑀺 𑀘𑀢𑀽𑀳𑀺 𑀅𑀗𑁆𑀕𑁂𑀳𑀺 𑀓𑀼𑀡𑁆𑀟𑀦𑀓𑁄 𑀆𑀳𑀺𑀡𑁆𑀟𑀦𑀓𑁄. 𑀙𑀫𑀸𑀦𑀺𑀓𑀺𑀡𑁆𑀡𑀦𑁆𑀢𑀺 𑀪𑀽𑀫𑀺𑀬𑀁 𑀔𑀺𑀢𑁆𑀢𑀁. 𑀪𑀓𑁆𑀔𑀲𑀦𑁆𑀢𑀺 𑀆𑀳𑀸𑀭𑀁.

𑀫𑀘𑁆𑀙𑀭𑀺𑀬𑀫𑀮𑀸𑀤𑀺𑀧𑀸𑀧𑀥𑀫𑁆𑀫𑀯𑀺𑀕𑀫𑀦𑀢𑁄 𑀫𑁂𑀢𑁆𑀢𑀸𑀤𑀺𑀕𑀼𑀡𑀸𑀦𑀼𑀩𑁆𑀭𑀽𑀳𑀦𑀢𑁄 𑀘 𑀩𑁆𑀭𑀳𑁆𑀫𑀁 𑀲𑁂𑀝𑁆𑀞𑀁 𑀘𑀭𑀺𑀬𑀦𑁆𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀤𑀸𑀦𑀁. 𑀢𑀣𑀸 𑀳𑀺 𑀢𑀁 𑀪𑀕𑀯𑀢𑀸 𑀧𑀡𑁆𑀟𑀺𑀢𑀧𑀜𑁆𑀜𑀢𑁆𑀢𑀁 𑀯𑀼𑀢𑁆𑀢𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀬𑀣𑀸𑀭𑀳𑀁 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑀸𑀬𑁄 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑁄. 𑀓𑀺𑀦𑁆𑀢𑀺 𑀓𑀻𑀤𑀺𑀲𑀁. 𑀯𑀢𑀦𑁆𑀢𑀺 𑀲𑀫𑀸𑀤𑀺𑀦𑁆𑀦𑀯𑀢𑀁. 𑀲𑀼𑀘𑀺𑀡𑁆𑀡𑀲𑁆𑀲𑀸𑀢𑀺 𑀲𑀼𑀝𑁆𑀞𑀼 𑀘𑀺𑀡𑁆𑀡𑀲𑁆𑀲 𑀧𑀼𑀜𑁆𑀜𑀲𑁆𑀲. 𑀇𑀤𑁆𑀥𑀻𑀢𑀺 𑀆𑀦𑀼𑀪𑀸𑀯𑁄. 𑀚𑀼𑀢𑀻𑀢𑀺 𑀯𑀢𑁆𑀣𑀸𑀪𑀭𑀡𑁄𑀪𑀸𑀲𑀲𑀫𑀼𑀚𑁆𑀚𑀮𑀸 𑀲𑀭𑀻𑀭𑀧𑁆𑀧𑀪𑀸. 𑀩𑀮𑀯𑀻𑀭𑀺𑀬𑀽𑀧𑀧𑀢𑁆𑀢𑀻𑀢𑀺 𑀓𑀸𑀬𑀩𑀮𑁂𑀦 𑀘𑁂𑀯 𑀉𑀲𑁆𑀲𑀸𑀳𑁂𑀦 𑀘 𑀲𑀫𑀦𑁆𑀦𑀸𑀕𑀫𑁄.

𑀢𑁂𑀦 𑀧𑀸𑀡𑀺 𑀓𑀸𑀫𑀤𑀤𑁄𑀢𑀺 𑀢𑁂𑀦 𑀅𑀤𑁆𑀥𑀺𑀓𑀸𑀦𑀁 𑀉𑀧𑀕𑀘𑁆𑀙𑀦𑁆𑀢𑀸𑀦𑀁 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀅𑀲𑀬𑁆𑀳𑀲𑁂𑀝𑁆𑀞𑀺𑀦𑁄 𑀤𑀸𑀦𑀝𑁆𑀞𑀸𑀦𑀤𑀲𑁆𑀲𑀦𑀫𑀬𑁂𑀦 𑀧𑀼𑀜𑁆𑀜𑁂𑀦 𑀇𑀤𑀸𑀦𑀺 𑀫𑀬𑁆𑀳𑀁 𑀳𑀢𑁆𑀣𑁄 𑀓𑀧𑁆𑀧𑀭𑀼𑀓𑁆𑀔𑁄 𑀯𑀺𑀬 𑀓𑀸𑀫𑀤𑀤𑁄 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀤𑀸𑀬𑀻, 𑀓𑀸𑀫𑀤𑀤𑁄 𑀳𑁄𑀦𑁆𑀢𑁄 𑀘 𑀫𑀥𑀼𑀲𑁆𑀲𑀯𑁄 𑀇𑀝𑁆𑀞𑀯𑀢𑁆𑀣𑀼𑀯𑀺𑀲𑁆𑀲𑀚𑁆𑀚𑀦𑀓𑁄 𑀚𑀸𑀢𑁄. 𑀢𑁂𑀦 𑀫𑁂 𑀩𑁆𑀭𑀳𑁆𑀫𑀘𑀭𑀺𑀬𑁂𑀦𑀸𑀢𑀺 𑀢𑁂𑀦 𑀫𑀫 𑀬𑀣𑀸𑀯𑀼𑀢𑁆𑀢𑀓𑀸𑀬𑀯𑁂𑀬𑁆𑀬𑀸𑀯𑀝𑀺𑀬𑀓𑀫𑁆𑀫𑀲𑀗𑁆𑀔𑀸𑀢𑁂𑀦 𑀲𑁂𑀝𑁆𑀞𑀘𑀭𑀺𑀬𑁂𑀦. 𑀧𑀼𑀜𑁆𑀜𑀦𑁆𑀢𑀺 𑀧𑀼𑀜𑁆𑀜𑀨𑀮𑀁. 𑀢𑀫𑁆𑀧𑀺 𑀳𑀺 𑀧𑀼𑀚𑁆𑀚𑀲𑀪𑀸𑀯𑀢𑁄, 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀯𑀸 ‘‘𑀏𑀯𑀫𑀺𑀤𑀁 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁮𑁦) ‘‘𑀧𑀼𑀜𑁆𑀜’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀸𑀳𑀝𑀸𑀦𑀺 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀁 𑀬𑀣𑀸 ‘‘𑀢𑀺𑀪𑀯𑀁, 𑀢𑀺𑀲𑀓𑀝’’𑀦𑁆𑀢𑀺 𑀘. 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀫𑀺𑀦𑁆𑀢𑀺 𑀥𑀫𑁆𑀫𑀤𑁂𑀲𑀦𑀸𑀬. 𑀲𑀸 𑀳𑀺 𑀯𑀺𑀦𑁂𑀬𑁆𑀬𑀸𑀦𑀁 𑀩𑁆𑀭𑀳𑁆𑀫𑀪𑀸𑀯𑀸𑀯𑀳𑀦𑀢𑁄 𑀩𑁆𑀭𑀳𑁆𑀫𑀁 𑀲𑁂𑀝𑁆𑀞𑀁 𑀘𑀭𑀺𑀬𑀁, 𑀩𑁆𑀭𑀳𑁆𑀫𑀼𑀦𑁄 𑀯𑀸 𑀪𑀕𑀯𑀢𑁄 𑀯𑀸𑀘𑀲𑀺𑀓𑀁 𑀘𑀭𑀺𑀬𑀦𑁆𑀢𑀺 ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀲𑀳𑀲𑁆𑀲𑀁 𑀫𑀘𑁆𑀘𑀼𑀳𑀸𑀬𑀺𑀦𑀦𑁆𑀢𑀺 𑀲𑀳𑀲𑁆𑀲𑀫𑀢𑁆𑀢𑀸 𑀅𑀭𑀳𑀢𑁆𑀢𑀲𑀫𑀥𑀺𑀕𑀫𑁂𑀦 𑀫𑀘𑁆𑀘𑀼𑀯𑀺𑀲𑀬𑀸𑀢𑀺𑀓𑁆𑀓𑀫𑁂𑀦 𑀫𑀘𑁆𑀘𑀼𑀧𑀳𑀸𑀬𑀺𑀦𑁄 𑀚𑀸𑀢𑀸. 𑀩𑁆𑀭𑀳𑁆𑀫𑀘𑀸𑀭𑀻 𑀪𑀯𑀺𑀲𑁆𑀲𑀸𑀫𑀸𑀢𑀺 𑀏𑀢𑁆𑀣 𑀬𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀢𑁂 𑀩𑁆𑀭𑀳𑁆𑀫𑀘𑀸𑀭𑀺𑀦𑁄𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀆𑀳 ‘‘𑀫𑁂𑀣𑀼𑀦𑀯𑀺𑀭𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀸’’𑀢𑀺.

𑀦𑀸𑀢𑀺𑀓𑁆𑀓𑀫𑀸𑀫𑀸𑀢𑀺 𑀦 𑀅𑀢𑀺𑀘𑀭𑀸𑀫 𑀅𑀕𑀫𑀦𑀻𑀬𑀝𑁆𑀞𑀸𑀦𑁂𑀧𑀺 𑀇𑀢𑀭𑀢𑁆𑀣𑀸𑀧𑀺 𑀦 𑀯𑀻𑀢𑀺𑀓𑁆𑀓𑀫𑀸𑀫. 𑀢𑁂𑀦𑀸𑀳 ‘‘𑀅𑀜𑁆𑀜𑀢𑁆𑀭 𑀢𑀸𑀳𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫𑀸’’𑀢𑀺. 𑀅𑀫𑁆𑀳𑀦𑁆𑀢𑀺 𑀅𑀫𑁆𑀳𑀸𑀓𑀁.

𑀅𑀢𑁆𑀢𑀤𑀫𑀦𑀯𑀲𑁂𑀦𑀸𑀢𑀺 𑀬𑀣𑀸𑀧𑀝𑀺𑀜𑁆𑀜𑀁 𑀅𑀭𑀳𑀦𑁆𑀢𑀸𑀦𑀁 𑀅𑀦𑀼𑀓𑀭𑀡𑀸𑀓𑀸𑀭𑁂𑀦 𑀧𑀯𑀢𑁆𑀢𑀘𑀺𑀢𑁆𑀢𑀤𑀫𑀦𑀯𑀲𑁂𑀦, 𑀫𑀦𑀘𑁆𑀙𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀤𑀫𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀺𑀔𑀸𑀧𑁆𑀧𑀢𑁆𑀢𑀲𑁂𑀝𑁆𑀞𑀘𑀭𑀺𑀬𑀢𑀸𑀬 𑀅𑀭𑀺𑀬𑀫𑀕𑁆𑀕𑁄 𑀩𑁆𑀭𑀳𑁆𑀫𑀘𑀭𑀺𑀬𑀁. 𑀩𑁆𑀭𑀳𑁆𑀫𑀁 𑀲𑁂𑀝𑁆𑀞𑀁 𑀘𑀭𑀢𑀺 𑀏𑀢𑁂𑀦𑀸𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀲𑀢𑁆𑀣𑀼𑀲𑀸𑀲𑀦𑀁.

𑀅𑀢𑀭𑀫𑀸𑀦𑀸𑀦𑀦𑁆𑀢𑀺 𑀦 𑀢𑀭𑀫𑀸𑀦𑀸𑀦𑀁 𑀤𑁂𑀲𑀓𑀸𑀮𑀁 𑀉𑀤𑀺𑀓𑁆𑀔𑀦𑁆𑀢𑀸𑀦𑀁. 𑀨𑀮𑀸𑀲𑀸𑀯 𑀲𑀫𑀺𑀚𑁆𑀛𑀢𑀻𑀢𑀺 𑀲𑀼𑀤𑀼𑀮𑁆𑀮𑀪𑀨𑀮𑁂𑀧𑀺 𑀆𑀲𑀸 𑀲𑀫𑁆𑀫𑀸𑀧𑀬𑁄𑀕𑀫𑀦𑁆𑀯𑀸𑀬 𑀲𑀫𑀺𑀚𑁆𑀛𑀢𑀺 𑀏𑀯. 𑀯𑀺𑀧𑀓𑁆𑀓𑀩𑁆𑀭𑀳𑁆𑀫𑀘𑀭𑀺𑀬𑁄𑀲𑁆𑀫𑀻𑀢𑀺 𑀯𑀺𑀲𑁂𑀲𑁂𑀦 𑀦𑀺𑀧𑁆𑀨𑀦𑁆𑀦𑀧𑀡𑀻𑀢𑀚𑁆𑀛𑀸𑀲𑀬𑁄 𑀧𑀭𑀺𑀧𑀼𑀡𑁆𑀡𑀉𑀴𑀸𑀭𑀫𑀦𑁄𑀭𑀣𑁄. 𑀲𑁄 𑀳𑀺 𑀲𑁂𑀝𑁆𑀞𑀫𑀦𑁄𑀲𑀫𑀸𑀘𑀸𑀭𑀢𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑁄.

𑀇𑀤𑀫𑁂𑀯 𑀲𑀼𑀢𑁆𑀢𑀁 𑀆𑀕𑀢𑀝𑁆𑀞𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀇𑀤𑀫𑁂𑀯 𑀲𑀼𑀢𑁆𑀢𑀧𑀤𑀁 ‘‘𑀯𑀻𑀭𑀺𑀬𑀁 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀆𑀕𑀢𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀯𑀻𑀭𑀺𑀬𑀜𑁆𑀳𑀺 𑀢𑀲𑁆𑀫𑀺𑀁 𑀯𑀺𑀲𑀬𑁂 𑀉𑀢𑁆𑀢𑀫𑀁 𑀧𑀭𑀫𑀼𑀓𑁆𑀓𑀁𑀲𑀕𑀢𑀁 𑀢𑀸𑀤𑀺𑀲𑀘𑀭𑀺𑀬𑀸𑀳𑁂𑀢𑀼 𑀘𑀸𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀇𑀥 𑀯𑀼𑀢𑁆𑀢𑀁. 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀤𑀼𑀓𑁆𑀓𑀭𑀓𑀺𑀭𑀺𑀬𑀸𑀬 𑀲𑀸𑀥𑀓𑀲𑁆𑀲 𑀘𑀢𑀼𑀩𑁆𑀩𑀺𑀥𑀲𑁆𑀲 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀆𑀓𑀸𑀭𑀲𑁆𑀲 𑀯𑀲𑁂𑀦 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁.

𑀓𑁄𑀘𑀺 𑀙𑀺𑀦𑁆𑀦𑀪𑀺𑀦𑁆𑀦𑀧𑀝𑀧𑀺𑀮𑁄𑀢𑀺𑀓𑀥𑀭𑁄 𑀤𑀲𑀦𑁆𑀢𑀬𑀼𑀢𑁆𑀢𑀲𑁆𑀲 𑀯𑀢𑁆𑀣𑀲𑁆𑀲 𑀅𑀪𑀸𑀯𑀢𑁄 𑀦𑀺𑀘𑁆𑀘𑁂𑀮𑁄𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑁂𑀬𑁆𑀬𑀸𑀢𑀺 𑀢𑀁 𑀦𑀺𑀯𑀢𑁆𑀢𑁂𑀦𑁆𑀢𑁄 𑀆𑀳 ‘‘𑀦𑀕𑁆𑀕𑁄’’𑀢𑀺. 𑀏𑀯𑀁 𑀅𑀓𑀸𑀲𑀺𑀁, 𑀏𑀯𑀫𑁆𑀧𑀺 𑀲𑀢𑁆𑀢𑀧𑀻𑀴𑀸 𑀫𑀸 𑀅𑀳𑁄𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 ‘‘𑀅𑀪𑀺𑀳𑀝𑀁 𑀦 𑀲𑀸𑀤𑀺𑀬𑀸𑀫𑀻’’𑀢𑀺𑀆𑀤𑀺 (𑀫. 𑀦𑀺. 𑁧.𑁧𑁫𑁫) 𑀪𑀺𑀓𑁆𑀔𑀸𑀧𑀭𑀺𑀬𑁂𑀲𑀦𑁂 𑀉𑀓𑁆𑀓𑀝𑁆𑀞𑀘𑀸𑀭𑀺𑀢𑀸𑀤𑀲𑁆𑀲𑀦𑀁, 𑀏𑀯𑀁 ‘‘𑀦𑀏𑀳𑀺 𑀪𑀤𑁆𑀤𑀦𑁆𑀢𑀺𑀓𑀸𑀤𑀺𑀪𑀸𑀯𑁄𑀧𑀻’’𑀢𑀺 𑀕𑀳𑁂𑀢𑀩𑁆𑀩𑀁. 𑀧𑀼𑀭𑀺𑀲𑀦𑁆𑀢𑀭𑀕𑀢𑀸𑀬𑀸𑀢𑀺 𑀧𑀼𑀭𑀺𑀲𑀲𑀫𑀻𑀧𑀕𑀢𑀸𑀬. 𑀲𑀁𑀓𑀺𑀢𑁆𑀢𑀻𑀬𑀦𑁆𑀢𑀺 𑀏𑀢𑀸𑀬𑀸𑀢𑀺 𑀲𑀁𑀓𑀺𑀢𑁆𑀢𑀺, 𑀕𑀸𑀫𑀯𑀸𑀲𑀺𑀆𑀤𑀻𑀳𑀺 𑀲𑀫𑀼𑀤𑀸𑀬𑀯𑀲𑁂𑀦 𑀓𑀭𑀺𑀬𑀫𑀸𑀦𑀓𑀺𑀭𑀺𑀬𑀸. 𑀇𑀥 𑀧𑀦 𑀪𑀢𑁆𑀢𑀲𑀁𑀓𑀺𑀢𑁆𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀲𑀁𑀓𑀺𑀢𑁆𑀢𑁂𑀢𑁆𑀯𑀸 𑀓𑀢𑀪𑀢𑁆𑀢𑁂𑀲𑀽’’𑀢𑀺. 𑀤𑀤𑀦𑁆𑀢𑀺 𑀢𑀸𑀬𑀸𑀢𑀺 𑀤𑀢𑁆𑀢𑀺. 𑀏𑀓𑀸𑀳𑀁 𑀅𑀦𑁆𑀢𑀭𑀪𑀽𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀏𑀓𑀸𑀳𑀺𑀓𑀁. 𑀏𑀲 𑀦𑀬𑁄 𑀲𑁂𑀲𑀧𑀤𑁂𑀲𑀼𑀧𑀺. 𑀏𑀓𑀸𑀳𑀯𑀸𑀭𑁂𑀦𑀸𑀢𑀺 𑀏𑀓𑀸𑀳𑀺𑀓𑀯𑀸𑀭𑁂𑀦. ‘‘𑀏𑀓𑀸𑀳𑀺𑀓’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀯𑀺𑀥𑀺𑀫𑁂𑀯 𑀧𑀝𑀺𑀧𑀸𑀝𑀺𑀬𑀸 𑀧𑀯𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀇𑀢𑀺 𑀏𑀯𑀭𑀽𑀧’’𑀦𑁆𑀢𑀺𑀆𑀤𑀺.

𑀏𑀭𑀓𑀢𑀺𑀡𑀸𑀤𑀻𑀦𑀺 𑀯𑀸𑀢𑀺 𑀏𑀭𑀓𑀢𑀺𑀡𑀸𑀤𑀻𑀦𑀺 𑀕𑀦𑁆𑀣𑀺𑀢𑁆𑀯𑀸 𑀓𑀢𑀦𑀺𑀯𑀸𑀲𑀦𑀸𑀦𑀺 𑀙𑀯𑀤𑀼𑀲𑁆𑀲𑀸𑀦𑀺, 𑀦𑀺𑀳𑀻𑀦𑀤𑀼𑀲𑁆𑀲𑀸𑀦𑀻𑀢𑀺 𑀅𑀢𑁆𑀣𑁄. 𑀢𑀦𑁆𑀢𑀸𑀯𑀼𑀢𑀸𑀦𑀦𑁆𑀢𑀺 𑀢𑀦𑁆𑀢𑀁 𑀧𑀲𑀸𑀭𑁂𑀢𑁆𑀯𑀸 𑀯𑀻𑀢𑀸𑀦𑀁. 𑀧𑀓𑀢𑀺𑀓𑀡𑁆𑀝𑀓𑁂𑀢𑀺 𑀲𑀮𑀸𑀓𑀓𑀡𑁆𑀝𑀓𑁂.

𑁧𑁫𑁬. 𑀦𑁂𑀓𑀯𑀲𑁆𑀲𑀕𑀡𑀲𑀜𑁆𑀚𑀸𑀢𑀦𑁆𑀢𑀺 𑀅𑀦𑁂𑀓𑀯𑀲𑁆𑀲𑀲𑀫𑀽𑀳𑀲𑀜𑁆𑀚𑀸𑀢𑀁. 𑀦𑀦𑀼 𑀘 𑀇𑀤𑀸𑀦𑁂𑀯 ‘‘𑀲𑀸𑀬𑀢𑀢𑀺𑀬𑀓𑀫𑁆𑀧𑀺 𑀉𑀤𑀓𑁄𑀭𑁄𑀳𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀁, ‘‘𑀦𑁂𑀓𑀯𑀲𑁆𑀲𑀕𑀡𑀺𑀓𑀁 𑀭𑀚𑁄𑀚𑀮𑁆𑀮𑀁 𑀓𑀸𑀬𑁂 𑀲𑀦𑁆𑀦𑀺𑀘𑀺𑀢’’𑀦𑁆𑀢𑀺 𑀘, 𑀢𑀤𑀼𑀪𑀬𑀁 𑀏𑀓𑀲𑁆𑀫𑀺𑀁 𑀓𑀣𑀁 𑀲𑀫𑁆𑀪𑀯𑀢𑀻𑀢𑀺 𑀆𑀳 ‘‘𑀇𑀤𑀁 𑀅𑀢𑁆𑀢𑀦𑁄 𑀭𑀚𑁄𑀚𑀮𑁆𑀮𑀓𑀯𑀢𑀲𑀫𑀸𑀤𑀸𑀦𑀓𑀸𑀮𑀁 𑀲𑀦𑁆𑀥𑀸𑀬 𑀯𑀤𑀢𑀻’’𑀢𑀺. 𑀏𑀢𑁂𑀦𑁂𑀯 ‘‘𑀅𑀘𑁂𑀮𑀓𑁄 𑀳𑁄𑀫𑀻’’𑀢𑀺 𑀯𑀼𑀢𑁆𑀢𑀅𑀘𑁂𑀮𑀓𑀧𑀝𑀺𑀜𑁆𑀜𑀸, ‘‘𑀲𑀸𑀡𑀸𑀦𑀺𑀧𑀺 𑀥𑀸𑀭𑁂𑀫𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀙𑀦𑁆𑀦𑀓𑀧𑀝𑀺𑀜𑁆𑀜𑀸, 𑀢𑀢𑁆𑀣𑀸𑀧𑀺 𑀲𑀸𑀡-𑀫𑀲𑀸𑀡-𑀙𑀯𑀤𑀼𑀲𑁆𑀲𑀸𑀤𑀺-𑀦𑀺𑀯𑀢𑁆𑀣-𑀧𑀝𑀺𑀜𑁆𑀜𑀸 𑀘 𑀅𑀯𑀺𑀭𑀼𑀤𑁆𑀥𑀸𑀢𑀺 𑀤𑀝𑁆𑀞𑀩𑁆𑀩𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀮𑁂 𑀢𑀣𑀸 𑀢𑀣𑀸 𑀧𑀝𑀺𑀧𑀦𑁆𑀦𑀢𑁆𑀢𑀸. 𑀢𑁂𑀢𑀺 𑀅𑀘𑁂𑀮𑀓𑀸. 𑀲𑀗𑁆𑀖𑀸𑀢𑀦𑁆𑀢𑀺 𑀲𑀩𑁆𑀩𑀲𑁄 𑀖𑀸𑀢𑀁. 𑀢𑁂𑀦𑀸𑀳 ‘‘𑀯𑀥’’𑀦𑁆𑀢𑀺. 𑀲𑀻𑀮𑀯𑀸 𑀦𑀸𑀫 𑀦𑀢𑁆𑀣𑀺 ‘‘𑀅𑀦𑀪𑀺𑀲𑀦𑁆𑀥𑀺𑀓𑀫𑁆𑀧𑀺 𑀧𑀸𑀧𑀁 𑀳𑁄𑀢𑀻’’𑀢𑀺 𑀏𑀯𑀁 𑀮𑀤𑁆𑀥𑀺𑀓𑀢𑁆𑀢𑀸. 𑀲𑀻𑀮𑀁 𑀅𑀥𑀺𑀝𑁆𑀞𑀸𑀬𑀸𑀢𑀺 𑀇𑀤𑀁 𑀧𑀝𑀺𑀓𑁆𑀓𑀫𑀦𑀓𑀺𑀭𑀺𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀧𑀸𑀲𑀡𑁆𑀟𑀧𑀭𑀺𑀕𑁆𑀕𑀳𑀡𑀢𑁆𑀣𑀸𑀬𑀸𑀢𑀺 𑀧𑀸𑀲𑀡𑁆𑀟𑁂𑀲𑀼 𑀅𑀲𑀸𑀭𑀲𑀸𑀭𑀪𑀸𑀯𑀯𑀻𑀫𑀁𑀲𑀦𑀢𑁆𑀣𑀸𑀬. 𑀢𑀁 𑀧𑀩𑁆𑀩𑀚𑁆𑀚𑀦𑁆𑀢𑀺 𑀆𑀚𑀻𑀯𑀓𑀧𑀩𑁆𑀩𑀚𑁆𑀚𑀁. 𑀯𑀺𑀓𑀝𑀪𑁄𑀚𑀦𑁂𑀢𑀺 𑀯𑀺𑀓𑀢𑀪𑁄𑀚𑀦𑁂 𑀯𑀺𑀭𑀽𑀧𑀪𑁄𑀚𑀦𑁂. 𑀢𑁂𑀦𑀸𑀳 ‘‘𑀅𑀧𑀓𑀢𑀺𑀪𑁄𑀚𑀦𑁂’’𑀢𑀺.

𑁧𑁫𑁭. 𑀪𑀺𑀁𑀲𑀦𑀓𑀢𑀲𑁆𑀫𑀺𑀦𑁆𑀢𑀺 𑀪𑀸𑀯𑀲𑀸𑀥𑀦𑀪𑀸𑀯𑀻 𑀇𑀤𑀁 𑀧𑀤𑀦𑁆𑀢𑀺 𑀆𑀳 ‘‘𑀪𑀺𑀁𑀲𑀦𑀓𑀢𑀲𑁆𑀫𑀺𑀁 𑀪𑀺𑀁𑀲𑀦𑀓𑀓𑀺𑀭𑀺𑀬𑀸𑀬𑀸’’𑀢𑀺. ‘‘𑀪𑀺𑀁𑀲𑀦𑀓𑀢𑁆𑀢𑀲𑁆𑀫𑀺’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀏𑀓𑀲𑁆𑀲 𑀢-𑀓𑀸𑀭𑀲𑁆𑀲 𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀬𑁂𑀪𑀼𑀬𑁆𑀬𑀕𑁆𑀕𑀳𑀡𑀁 𑀮𑁄𑀫𑀯𑀦𑁆𑀢𑀯𑀲𑁂𑀦𑀧𑀺 𑀬𑁄𑀚𑁂𑀢𑀩𑁆𑀩𑀁, 𑀦 𑀮𑁄𑀫𑀯𑀲𑁂𑀦𑀸𑀢𑀺 𑀆𑀳 ‘‘𑀩𑀳𑀼𑀢𑀭𑀸𑀦𑀁 𑀯𑀸’’𑀢𑀺𑀆𑀤𑀺.

𑀲𑀼-𑀲𑀤𑁆𑀤𑁂 𑀉-𑀓𑀸𑀭𑀲𑁆𑀲 𑀑-𑀓𑀸𑀭𑀁 𑀓𑀢𑁆𑀯𑀸 𑀧𑀸𑀴𑀺𑀬𑀁 ‘‘𑀲𑁄𑀢𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀢𑀤𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀲𑀼𑀢𑀢𑁆𑀢𑁄’’𑀢𑀺 𑀆𑀳. 𑀲𑀼𑀝𑁆𑀞𑀼 𑀅𑀯𑀢𑀢𑁆𑀢𑁄𑀢𑀺 𑀯𑀸 𑀲𑁄𑀢𑀢𑁆𑀢𑁄. 𑀲𑁄𑀲𑀺𑀦𑁆𑀦𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀼𑀤𑁆𑀥𑀺𑀯𑀲𑀦𑀢𑁆𑀣𑀸𑀬𑀸𑀢𑀺 𑀲𑀁𑀲𑀸𑀭𑀲𑀼𑀤𑁆𑀥𑀺𑀕𑀯𑁂𑀲𑀦𑀢𑁆𑀣𑀸𑀬.

𑀯𑀺𑀳𑀸𑀭𑀲𑁆𑀫𑀺𑀦𑁆𑀢𑀺 𑀧𑀘𑁆𑀘𑀢𑁆𑀢𑁂 𑀪𑀼𑀫𑁆𑀫𑀯𑀘𑀦𑀦𑁆𑀢𑀺 𑀆𑀳 ‘‘𑀯𑀺𑀳𑀸𑀭𑁄 𑀏𑀯 𑀳𑀺 ‘𑀯𑀺𑀳𑀸𑀭𑀲𑁆𑀫𑀺’𑀦𑁆𑀢𑀺 𑀯𑀼𑀢𑁆𑀢𑁄’’𑀢𑀺. 𑀢𑁂𑀦𑁂𑀯 𑀘𑀸𑀢𑀺 𑀢𑁂𑀦𑁂𑀯 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑀯𑀲𑁂𑀦. 𑀏𑀯𑀁 𑀅𑀢𑁆𑀣𑁄𑀢𑀺 𑀅𑀬𑀁 𑀏𑀯𑀁 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀤𑀼𑀓𑁆𑀔𑀧𑁆𑀧𑀢𑁆𑀢𑁄𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀼𑀔𑀤𑀼𑀓𑁆𑀔𑁂 𑀮𑀸𑀪𑀸𑀮𑀸𑀪𑀸𑀤𑀺𑀓𑁂 𑀘. 𑀢𑀼𑀮𑀺𑀢𑁄𑀢𑀺 𑀢𑀼𑀮𑀸𑀲𑀤𑀺𑀲𑁄.

𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀤𑀺𑀲𑀼𑀤𑁆𑀥𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀳𑀸𑀭𑀲𑀼𑀤𑁆𑀥𑀺𑀯𑀡𑁆𑀡𑀦𑀸

𑁧𑁫𑁮. 𑀲𑀼𑀚𑁆𑀛𑀺𑀢𑀼𑀦𑁆𑀢𑀺 𑀲𑀁𑀲𑀸𑀭𑀢𑁄 𑀲𑀼𑀚𑁆𑀛𑀺𑀢𑀼𑀁.

𑁧𑁫𑁯. 𑀆𑀲𑀻𑀢𑀺𑀓𑀧𑀩𑁆𑀩𑀸𑀦𑀻𑀢𑀺 𑀆𑀲𑀻𑀢𑀺𑀓𑀧𑀺𑀝𑁆𑀞𑀺𑀧𑀩𑁆𑀩𑀸𑀦𑀺, ‘‘𑀓𑀸𑀴𑀧𑀩𑁆𑀩𑀸𑀦𑀻’’𑀢𑀺 𑀯𑀤𑀦𑁆𑀢𑀺. 𑀧𑀩𑁆𑀩𑀸𑀦𑀁 𑀫𑀚𑁆𑀛𑁂. 𑀉𑀦𑁆𑀦𑀢𑀼𑀦𑁆𑀦𑀢𑀸𑀦𑀻𑀢𑀺 𑀫𑀁𑀲𑁂 𑀫𑀺𑀮𑀸𑀢𑁂 𑀤𑁆𑀯𑀺𑀦𑁆𑀦𑀁 𑀲𑀦𑁆𑀥𑀻𑀦𑀁 𑀅𑀦𑁆𑀢𑀭𑁂 𑀯𑀸𑀢𑁂𑀦𑀼𑀤𑁆𑀥𑀼𑀫𑀸𑀢𑀥𑀫𑀦𑀻𑀚𑀸𑀮𑀢𑀸𑀬 𑀉𑀦𑁆𑀦𑀢𑀸𑀦𑀺 𑀉𑀦𑁆𑀦𑀢𑀸𑀦𑀻𑀢𑀺. 𑀆𑀦𑀺𑀲𑀤𑀦𑁆𑀢𑀺 𑀆𑀦𑀺𑀲𑀤𑀝𑁆𑀞𑀸𑀦𑀁. 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀦𑁆𑀢𑀺 𑀧𑀁𑀲𑀽𑀳𑀺, 𑀯𑀸𑀮𑀺𑀓𑀸𑀳𑀺 𑀯𑀸 𑀦𑀺𑀘𑀺𑀢𑀁 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁. 𑀲𑀭𑀧𑁄𑀗𑁆𑀔𑁂𑀦𑀸𑀢𑀺 𑀲𑀭𑀲𑁆𑀲 𑀧𑁄𑀗𑁆𑀔𑀧𑁆𑀧𑀤𑁂𑀲𑁂𑀦, 𑀲𑀭𑀧𑁄𑀗𑁆𑀔𑀲𑀜𑁆𑀜𑀺𑀢𑁂𑀦 𑀯𑀸 𑀫𑀕𑁆𑀕𑁂𑀦. 𑀅𑀓𑁆𑀓𑀦𑁆𑀢𑀦𑁆𑀢𑀺 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑀁. 𑀢𑀓𑁆𑀓𑀕𑁄𑀴𑀺𑀓𑀲𑀤𑀺𑀲𑀸𑀦𑀁, 𑀲𑀭𑀻𑀭𑀖𑀁𑀲𑀦𑀢𑁆𑀣𑀁 𑀓𑀢 𑀓𑀼𑀭𑀼𑀯𑀺𑀦𑁆𑀤𑀕𑁄𑀴𑀓𑀸𑀦𑀁 𑀯𑀸 𑀆𑀯𑀴𑀺 𑀯𑀝𑁆𑀝𑀦𑀸𑀳𑀸𑀭𑁄. 𑀯𑀁𑀲𑀢𑁄𑀢𑀺 𑀧𑀺𑀝𑁆𑀞𑀺𑀯𑀁𑀲𑀢𑁄. 𑀫𑀡𑁆𑀟𑀮𑁂𑀢𑀺 𑀪𑀺𑀢𑁆𑀢𑀺𑀧𑀸𑀤𑀸𑀦𑀁 𑀫𑀢𑁆𑀣𑀓𑁂 𑀞𑀧𑀺𑀢𑀫𑀡𑁆𑀟𑀮𑀓𑁂 𑀲𑀻𑀲𑀕𑁆𑀕𑁂𑀦 𑀧𑀢𑀺𑀝𑁆𑀞𑀳𑀦𑁆𑀢𑀺. 𑀦 𑀏𑀯𑀁 𑀨𑀸𑀲𑀼𑀴𑀺𑀬𑁄𑀢𑀺 𑀬𑀣𑀸 𑀬𑀣𑀸 𑀯𑀼𑀢𑁆𑀢𑀕𑁄𑀧𑀸𑀦𑀲𑀺𑀬𑁄 𑀧𑀧𑀢𑀸 𑀢𑀺𑀝𑁆𑀞𑀦𑁆𑀢𑀺, 𑀦 𑀏𑀯𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀨𑀸𑀲𑀼𑀓𑀸𑀧𑀺 𑀧𑀧𑀢𑀸 𑀞𑀺𑀢𑀸.

𑀑𑀓𑁆𑀔𑀸𑀬𑀺𑀓𑀸𑀢𑀺 𑀅𑀯𑀓𑁆𑀔𑀸𑀬𑀺𑀓𑀸, 𑀳𑁂𑀝𑁆𑀞𑀸 𑀳𑀼𑀢𑁆𑀯𑀸 𑀦𑀺𑀦𑁆𑀦𑀪𑀸𑀯𑁂𑀦 𑀧𑀜𑁆𑀜𑀸𑀬𑀫𑀸𑀦𑀸. 𑀏𑀯𑀭𑀽𑀧𑀸𑀢𑀺 𑀬𑀣𑀸𑀯𑀼𑀢𑁆𑀢𑀭𑀽𑀧𑀸, 𑀦𑀺𑀦𑁆𑀦𑀢𑀭𑀸𑀢𑀺 𑀅𑀢𑁆𑀣𑁄. 𑀬𑀸𑀯 𑀧𑀺𑀝𑁆𑀞𑀺𑀓𑀡𑁆𑀝𑀓𑀁𑀅𑀮𑁆𑀮𑀻𑀦𑀸 𑀳𑁄𑀢𑀻𑀢𑀺 𑀫𑀬𑁆𑀳𑀁 𑀉𑀤𑀭𑀘𑁆𑀙𑀯𑀺 𑀬𑀸𑀯 𑀧𑀺𑀝𑁆𑀞𑀺𑀓𑀡𑁆𑀝𑀓𑀁, 𑀢𑀸𑀯 𑀢𑀁 𑀆𑀳𑀘𑁆𑀘 𑀞𑀺𑀢𑀢𑁆𑀢𑀸 𑀅𑀮𑁆𑀮𑀻𑀦𑀸 𑀳𑁄𑀢𑀺 𑀉𑀤𑀭𑀺𑀬𑀲𑁆𑀲 𑀧𑀭𑀺𑀓𑁆𑀔𑀬𑁂𑀦 𑀅𑀦𑁆𑀢𑀸𑀦𑀜𑁆𑀘 𑀲𑀼𑀝𑁆𑀞𑀼𑀫𑀺𑀮𑀸𑀢𑀢𑀸𑀬. 𑀪𑀸𑀭𑀺𑀬𑀪𑀸𑀭𑀺𑀬𑀸𑀢𑀺 𑀕𑀭𑀼𑀢𑀭𑀸. 𑀲𑀳𑀉𑀤𑀭𑀘𑁆𑀙𑀯𑀺𑀁 𑀧𑀺𑀝𑁆𑀞𑀺𑀓𑀡𑁆𑀝𑀓𑀁, 𑀲𑀳𑀧𑀺𑀝𑁆𑀞𑀺𑀓𑀡𑁆𑀝𑀓𑀁 𑀉𑀤𑀭𑀘𑁆𑀙𑀯𑀺𑀦𑁆𑀢𑀺 𑀬𑁄𑀚𑀦𑀸. 𑀦𑁂𑀯 𑀦𑀺𑀓𑁆𑀔𑀫𑀢𑀺 𑀆𑀳𑀸𑀭𑀲𑀦𑁆𑀦𑀺𑀲𑁆𑀲𑀬𑀆𑀧𑁄𑀥𑀸𑀢𑀼𑀬𑀸 𑀲𑀩𑁆𑀩𑀲𑁄 𑀯𑀺𑀲𑀼𑀓𑁆𑀔𑀢𑁆𑀢𑀸. 𑀧𑀽𑀢𑀺𑀫𑀽𑀮𑀸𑀦𑀻𑀢𑀺 𑀮𑁄𑀫𑀫𑀽𑀮𑀸𑀦𑀁 𑀧𑀭𑀺𑀩𑁆𑀭𑀽𑀳𑀦𑀓𑁂 𑀫𑀁𑀲𑁂 𑀮𑁄𑀳𑀺𑀢𑁂 𑀘 𑀧𑀭𑀺𑀓𑁆𑀔𑀻𑀡𑁂 𑀢𑀸𑀦𑀺 𑀲𑀼𑀓𑁆𑀔𑀸𑀦𑀺 𑀞𑀸𑀦𑀢𑁄 𑀪𑀝𑁆𑀞𑀸𑀦𑀺 𑀅𑀪𑀸𑀯𑁂𑀦𑁂𑀯 ‘‘𑀧𑀽𑀢𑀺𑀫𑀽𑀮𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺. 𑀢𑁂𑀦𑀸𑀳 ‘‘𑀢𑀲𑁆𑀲 𑀧𑀦𑀸’’𑀢𑀺𑀆𑀤𑀺.

𑀅𑀥𑀺𑀕𑀢𑀸𑀢𑀺 𑀇𑀤𑀸𑀦𑀺 𑀅𑀥𑀺𑀕𑀢𑀸. 𑀬𑀣𑀸 𑀏𑀢𑀭𑀳𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀅𑀥𑀺𑀕𑀢𑀢𑁆𑀢𑀸𑀢𑀺 𑀇𑀫𑀺𑀦𑀸 𑀓𑀺𑀜𑁆𑀘𑀸𑀧𑀺 𑀫𑀳𑀸𑀩𑁄𑀥𑀺𑀲𑀢𑁆𑀢𑀸 𑀧𑀭𑀺𑀧𑀸𑀓𑀕𑀢𑀜𑀸𑀡𑀸 𑀯𑀲𑀻𑀪𑀽𑀢𑀚𑁆𑀛𑀸𑀦𑀸𑀪𑀺𑀜𑁆𑀜𑀸 𑀯𑀺𑀧𑀲𑁆𑀲𑀦𑀸𑀬 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀬𑀣𑀸 𑀘 𑀦𑁂𑀲𑀁 𑀘𑀭𑀺𑀫𑀪𑀯𑁂 𑀯𑀺𑀧𑀲𑁆𑀲𑀦𑀸𑀘𑀸𑀭𑁄, 𑀦 𑀢𑀣𑀸 𑀢𑀤𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀢𑀤𑁂𑀯𑀸𑀢𑀺 𑀬𑀁 𑀬𑁂𑀦 𑀯𑀼𑀢𑁆𑀢𑀁 𑀅𑀢𑁆𑀣𑀚𑀸𑀢𑀁, 𑀏𑀢𑀤𑁂𑀯 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀧𑀸𑀞𑀧𑀤𑁂𑀲𑁂 𑀬𑀼𑀢𑁆𑀢𑀁 𑀧𑀼𑀩𑁆𑀩𑁂𑀦𑀸𑀧𑀭𑀁 𑀅𑀯𑀺𑀭𑀼𑀚𑁆𑀛𑀦𑀢𑁄. 𑀇𑀢𑀭𑀣𑀸𑀢𑀺 𑀪𑀺𑀓𑁆𑀔𑀽𑀳𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀅𑀦𑀦𑀼𑀭𑀽𑀧𑁄 𑀲𑀺𑀬𑀸 ‘‘𑀇𑀫𑀺𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀸𑀬 𑀅𑀜𑁆𑀜𑀢𑁆𑀢𑁂.

𑀆𑀳𑀸𑀭𑀲𑀼𑀤𑁆𑀥𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀁𑀲𑀸𑀭𑀲𑀼𑀤𑁆𑀥𑀺𑀆𑀤𑀺𑀯𑀡𑁆𑀡𑀦𑀸

𑁧𑁬𑁦. 𑀲𑀁𑀲𑀸𑀭𑁂𑀦𑀸𑀢𑀺 𑀅𑀧𑀭𑀸𑀧𑀭𑀁 𑀘𑀯𑀦𑀼𑀧𑀧𑀚𑁆𑀚𑀦𑀯𑀲𑁂𑀦 𑀪𑀯𑁂𑀲𑀼 𑀲𑀁𑀲𑀭𑀡𑁂𑀦. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀔𑀦𑁆𑀥𑀸𑀦𑀜𑁆𑀘 𑀧𑀝𑀺𑀧𑀸𑀝𑀺, 𑀥𑀸𑀢𑀼𑀆𑀬𑀢𑀦𑀸𑀦 𑀘;

𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀯𑀢𑁆𑀢𑀫𑀸𑀦𑀸, 𑀲𑀁𑀲𑀸𑀭𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺. (𑀯𑀺𑀲𑀼𑀤𑁆𑀥𑀺. 𑁨.𑁬𑁧𑁯; 𑀤𑀻. 𑀦𑀺. 𑀅𑀝𑁆𑀞. 𑁨.𑁯𑁫; 𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁬𑁦; 𑀅. 𑀦𑀺. 𑀅𑀝𑁆𑀞. 𑁨.𑁪.𑁧𑁯𑁯; 𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀯𑀺𑀪. 𑀅𑀝𑁆𑀞. 𑁨𑁨𑁬; 𑀲𑀼. 𑀦𑀺. 𑀅𑀝𑁆𑀞. 𑁨.𑁫𑁨𑁩; 𑀉𑀤𑀸. 𑀅𑀝𑁆𑀞. 𑁩𑁯; 𑀇𑀢𑀺𑀯𑀼. 𑀅𑀝𑁆𑀞. 𑁧𑁪, 𑁫𑁮; 𑀣𑁂𑀭𑀕𑀸. 𑀅𑀝𑁆𑀞. 𑁧.𑁬𑁭, 𑁯𑁯; 𑀩𑀼. 𑀯𑀁. 𑀅𑀝𑁆𑀞. 𑁫𑁮; 𑀘𑀽𑀴𑀦𑀺. 𑀅𑀝𑁆𑀞. 𑁬; 𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁧𑁭; 𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁧.𑁧𑁨𑁭; 𑀅. 𑀦𑀺. 𑀝𑀻. 𑁨.𑁪.𑁯; 𑀲𑀸𑀭𑀢𑁆𑀣. 𑀝𑀻. 𑁧.𑁧);

𑀩𑀳𑀼𑀓𑀦𑁆𑀢𑀺 𑀩𑀳𑀼𑀓𑀸𑀮𑀁 𑀩𑀳𑀼𑀓𑁆𑀔𑀢𑁆𑀢𑀼𑀁. 𑀉𑀧𑀧𑀚𑁆𑀚𑀺𑀢𑁆𑀯𑀸𑀢𑀺 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸. 𑀆𑀯𑀸𑀲𑁂𑀦𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀢𑁆𑀢𑀸𑀯𑀸𑀲𑁂 𑀆𑀯𑀲𑀦𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀚𑀻𑀯𑀦𑁂𑀦. 𑀔𑀦𑁆𑀥𑀸𑀬𑁂𑀯 𑀯𑀼𑀢𑁆𑀢𑀸 𑀢𑁂𑀲𑀁𑀬𑁂𑀯 𑀧𑀯𑀢𑁆𑀢𑀺𑀯𑀺𑀲𑁂𑀲𑀲𑁆𑀲 𑀢𑁂𑀦 𑀢𑁂𑀦 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀩𑀳𑀼𑀬𑀸𑀕𑁂𑀢𑀺 𑀅𑀚𑀲𑀽𑀓𑀭𑀕𑁄𑀫𑀸𑀬𑁆𑀯𑀸𑀤𑀺𑀓𑁂 𑀩𑀳𑀼𑀯𑀺𑀥𑁂 𑀫𑀳𑀸𑀬𑀜𑁆𑀜𑁂. 𑀩𑀳𑀼𑀅𑀕𑁆𑀕𑀻𑀢𑀺 𑀯𑀸𑀘𑀸𑀧𑁂𑀬𑁆𑀬𑀸𑀤𑀺𑀯𑀲𑁂𑀦 𑀅𑀦𑁆𑀢𑀫𑀲𑁄 𑀧𑀸𑀓𑀬𑀜𑁆𑀜𑀸𑀤𑀺𑀯𑀲𑁂𑀦 𑀘 𑀩𑀳𑀼𑀓𑁂𑀧𑀺 𑀅𑀕𑁆𑀕𑀻 𑀧𑀭𑀺𑀘𑀭𑀡𑁂𑀦.

𑁧𑁬𑁧. 𑀩𑀸𑀮𑀤𑀸𑀭𑀓𑁄𑀧𑀺 ‘‘𑀤𑀳𑀭𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀢𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀬𑀼𑀯𑀸’’𑀢𑀺 𑀯𑀼𑀢𑁆𑀢𑀁. 𑀅𑀢𑀺𑀓𑁆𑀓𑀦𑁆𑀢𑀧𑀞𑀫𑀯𑀬𑀸 𑀲𑀢𑁆𑀢𑀸 𑀲𑀪𑀸𑀯𑁂𑀦 𑀧𑀮𑀺𑀢𑀲𑀺𑀭𑀸 𑀳𑁄𑀦𑁆𑀢𑀻𑀢𑀺 𑀧𑀞𑀫𑀯𑀬𑁂 𑀞𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀲𑀼𑀓𑀸𑀴𑀓𑁂𑀲𑁄’’𑀢𑀺 𑀯𑀼𑀢𑁆𑀢𑀁. 𑀚𑀭𑀸𑀚𑀺𑀡𑁆𑀡𑁄𑀢𑀺 𑀚𑀭𑀸𑀬 𑀚𑀺𑀡𑁆𑀡𑁄, 𑀦 𑀅𑀓𑀸𑀮𑀺𑀓𑁂𑀦 𑀚𑀭𑀸𑀬 𑀅𑀪𑀺𑀪𑀽𑀢𑁄. 𑀉𑀓𑁆𑀓𑀁𑀲𑀕𑀢𑀩𑀼𑀤𑁆𑀥𑀢𑀸𑀬 𑀯𑀼𑀤𑁆𑀥𑁄. 𑀢𑁂𑀦𑀸𑀳 ‘‘𑀯𑀟𑁆𑀠𑀺𑀢𑁆𑀯𑀸 𑀞𑀺𑀢𑀅𑀗𑁆𑀕𑀧𑀘𑁆𑀘𑀗𑁆𑀕𑁄’’𑀢𑀺, 𑀆𑀭𑁄𑀳𑀧𑀭𑀺𑀡𑀸𑀳𑀯𑀲𑁂𑀦 𑀯𑀼𑀤𑁆𑀥𑀺𑀭𑀳𑀺𑀢𑁄𑀢𑀺 𑀅𑀢𑁆𑀣𑁄. 𑀚𑀸𑀢𑀺𑀫𑀳𑀮𑁆𑀮𑀓𑁄𑀢𑀺 𑀚𑀸𑀢𑀺𑀬𑀸 𑀫𑀳𑀮𑁆𑀮𑀓𑁄, 𑀦 𑀪𑁄𑀕𑀧𑀭𑀺𑀯𑀸𑀭𑀸𑀤𑀻𑀳𑀻𑀢𑀺 𑀅𑀢𑁆𑀣𑁄. 𑀅𑀤𑁆𑀥𑀕𑀢𑁄𑀢𑀺 𑀏𑀢𑁆𑀣 𑀅𑀤𑁆𑀥-𑀲𑀤𑁆𑀤𑁄 𑀤𑀻𑀖𑀓𑀸𑀮𑀯𑀸𑀘𑀻𑀢𑀺 𑀆𑀳 ‘‘𑀩𑀳𑀼𑀅𑀤𑁆𑀥𑀸𑀦𑀁 𑀕𑀢𑁄’’𑀢𑀺. 𑀯𑀬𑁄𑀢𑀺𑀆𑀤𑀺𑀧𑀤𑀮𑁄𑀧𑁂𑀦𑀸𑀬𑀁 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀧𑀘𑁆𑀙𑀺𑀫𑀯𑀬’’𑀦𑁆𑀢𑀺. 𑀧𑀤𑀲𑀢𑀫𑁆𑀧𑀺…𑀧𑁂… 𑀲𑀫𑀢𑁆𑀣𑀢𑀸𑀢𑀺 𑀧𑀤𑀲𑀢𑀫𑁆𑀧𑀺 𑀧𑀤𑀲𑀳𑀲𑁆𑀲𑀫𑁆𑀧𑀺 𑀲𑁄𑀢𑀧𑀣𑀫𑀸𑀕𑀘𑁆𑀙𑀦𑁆𑀢𑀫𑁂𑀯 𑀉𑀕𑁆𑀕𑀳𑀡𑀲𑀫𑀢𑁆𑀣𑀢𑀸 𑀧𑀭𑀺𑀕𑁆𑀕𑀳𑁂𑀢𑀼𑀁 𑀲𑀫𑀢𑁆𑀣𑀢𑀸. 𑀅𑀬𑀜𑁆𑀘 𑀕𑀢𑀺𑀬𑀸 𑀩𑁆𑀬𑀸𑀧𑀸𑀭𑁄𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁 𑀕𑀳𑀡𑀫𑀢𑁆𑀢𑀪𑀸𑀯𑀢𑁄. 𑀢𑀤𑁂𑀯𑀸𑀢𑀺 𑀧𑀤𑀲𑀢𑀫𑁆𑀧𑀺 𑀧𑀤𑀲𑀳𑀲𑁆𑀲𑀫𑁆𑀧𑀺. 𑀆𑀥𑀸𑀭𑀡𑀁 𑀅𑀧𑀺𑀮𑀸𑀧𑀦𑀯𑀲𑁂𑀦 𑀳𑀤𑀬𑁂 𑀥𑀸𑀭𑀡𑀁. 𑀉𑀧𑀦𑀺𑀩𑀦𑁆𑀥𑀦𑀁 𑀬𑀣𑀸 𑀦 𑀧𑀫𑀼𑀝𑁆𑀞𑀁 𑀳𑁄𑀢𑀺, 𑀢𑀣𑀸 𑀉𑀧𑁂𑀘𑁆𑀘 𑀅𑀧𑀭𑀸𑀧𑀭𑀁 𑀦𑀺𑀩𑀦𑁆𑀥𑀦𑀁. 𑀅𑀬𑀁 𑀧𑀦 𑀲𑀢𑀺𑀬𑀸 𑀩𑁆𑀬𑀸𑀧𑀸𑀭𑁄𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀧𑀸𑀴𑀺𑀬𑀜𑁆𑀘 ‘‘𑀧𑀭𑀫𑀸𑀬 𑀕𑀢𑀺𑀬𑀸 𑀘 𑀲𑀢𑀺𑀬𑀸 𑀘 𑀥𑀺𑀢𑀺𑀬𑀸 𑀘𑀸’’𑀢𑀺 𑀯𑀼𑀢𑁆𑀢𑀁, 𑀧𑀭𑀢𑁄 𑀘 ‘‘𑀏𑀯𑀁 𑀅𑀥𑀺𑀫𑀢𑁆𑀢𑀕𑀢𑀺𑀫𑀦𑁆𑀢𑁄’’𑀢𑀺 𑀯𑀼𑀢𑁆𑀢𑀁. 𑀲𑀫𑀢𑁆𑀣𑀯𑀻𑀭𑀺𑀬𑀁 𑀥𑀺𑀢𑀺 𑀦𑀸𑀫𑀸𑀢𑀺 𑀯𑀺𑀲𑀺𑀝𑁆𑀞𑀯𑀺𑀲𑀬𑀁 𑀤𑀲𑁆𑀲𑁂𑀦𑁆𑀢𑁄 𑀬𑀣𑀸𑀯𑀼𑀢𑁆𑀢𑀲𑀢𑀺𑀲𑀫𑀸𑀬𑁄𑀕𑀁 𑀢𑀲𑁆𑀲 𑀤𑀻𑀧𑁂𑀢𑀺. 𑀢𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀕𑀢𑀺𑀲𑀢𑀺𑀥𑀺𑀢𑀻𑀳𑀺 𑀲𑀼𑀪𑀥𑀸𑀢𑀯𑀘𑀻𑀧𑀭𑀺𑀘𑀺𑀢𑀲𑁆𑀲 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲 𑀆𑀕𑀫𑀯𑀲𑁂𑀦 𑀅𑀢𑁆𑀣𑀤𑀲𑁆𑀲𑀦𑀲𑀫𑀢𑁆𑀣𑀢𑀸 𑀬𑀼𑀢𑁆𑀢𑀺𑀯𑀲𑁂𑀦 𑀓𑀸𑀭𑀡𑀤𑀲𑁆𑀲𑀦𑀲𑀫𑀢𑁆𑀣𑀢𑀸.

𑀤𑀴𑁆𑀳𑀁 (𑀅. 𑀦𑀺. 𑀝𑀻. 𑁩.𑁯.𑁩𑁮) 𑀣𑀺𑀭𑀁 𑀥𑀦𑀼 𑀏𑀢𑀲𑁆𑀲𑀸𑀢𑀺 𑀤𑀴𑁆𑀳𑀥𑀦𑁆𑀯𑀸, 𑀲𑁄 𑀏𑀯 𑀇𑀥 ‘‘𑀤𑀴𑁆𑀳𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑁄. 𑀧𑀝𑀺𑀲𑀢𑁆𑀢𑀼𑀯𑀺𑀥𑀫𑀦𑀢𑁆𑀣𑀁 𑀥𑀦𑀼𑀁 𑀕𑀡𑁆𑀳𑀸𑀢𑀻𑀢𑀺 𑀥𑀦𑀼𑀕𑁆𑀕𑀳𑁄, 𑀲𑁄 𑀏𑀯 𑀉𑀲𑀼𑀁 𑀲𑀭𑀁 𑀅𑀲𑀢𑀺 𑀔𑀺𑀧𑀢𑀻𑀢𑀺 𑀇𑀲𑁆𑀲𑀸𑀲𑁄𑀢𑀺 𑀆𑀳 ‘‘𑀥𑀦𑀼𑀁 𑀕𑀳𑁂𑀢𑁆𑀯𑀸 𑀞𑀺𑀢𑁄 𑀇𑀲𑁆𑀲𑀸𑀲𑁄’’𑀢𑀺. 𑀤𑁆𑀯𑀺𑀲𑀳𑀲𑁆𑀲𑀧𑀮𑀁 𑀮𑁄𑀳𑀸𑀤𑀺𑀪𑀸𑀭𑀁 𑀯𑀳𑀺𑀢𑀼𑀁 𑀲𑀫𑀢𑁆𑀣𑀁 𑀤𑁆𑀯𑀺𑀲𑀳𑀲𑁆𑀲𑀣𑀸𑀫𑀁. 𑀢𑁂𑀦𑀸𑀳 ‘‘𑀤𑁆𑀯𑀺𑀲𑀳𑀲𑁆𑀲𑀣𑀸𑀫𑀁 𑀦𑀸𑀫𑀸’’𑀢𑀺𑀆𑀤𑀺. 𑀤𑀡𑁆𑀟𑁂𑀢𑀺 𑀥𑀦𑀼𑀤𑀡𑁆𑀟𑁂. 𑀬𑀸𑀯 𑀓𑀡𑁆𑀟𑀧𑁆𑀧𑀫𑀸𑀡𑀸𑀢𑀺 𑀤𑀻𑀖𑀢𑁄 𑀬𑀢𑁆𑀢𑀓𑀁 𑀓𑀡𑁆𑀟𑀲𑁆𑀲 𑀧𑀫𑀸𑀡𑀁, 𑀢𑀢𑁆𑀢𑀓𑁂 𑀥𑀦𑀼𑀤𑀡𑁆𑀟𑁂 𑀉𑀓𑁆𑀔𑀺𑀢𑁆𑀢𑀫𑀢𑁆𑀢𑁂 𑀆𑀭𑁄𑀧𑀺𑀢𑁄 𑀘𑁂𑀯 𑀳𑁄𑀢𑀺 𑀚𑀺𑀬𑀸𑀤𑀡𑁆𑀟𑁄, 𑀲𑁄 𑀘 𑀪𑀸𑀭𑁄 𑀧𑀣𑀯𑀺𑀢𑁄 𑀫𑀼𑀘𑁆𑀘𑀢𑀺, 𑀏𑀯𑀁 𑀇𑀤𑀁 ‘‘𑀤𑁆𑀯𑀺𑀲𑀳𑀲𑁆𑀲𑀣𑀸𑀫𑀁 𑀦𑀸𑀫 𑀥𑀦𑀽𑀢𑀺 𑀤𑀝𑁆𑀞𑀩𑁆𑀩𑀁. 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑁄𑀢𑀺 𑀉𑀕𑁆𑀕𑀳𑀺𑀢𑀥𑀦𑀼𑀲𑀺𑀧𑁆𑀧𑁄. 𑀓𑀢𑀳𑀢𑁆𑀣𑁄𑀢𑀺 𑀣𑀺𑀭𑀢𑀭𑀁 𑀮𑀓𑁆𑀔𑁂𑀲𑀼 𑀅𑀯𑀺𑀭𑀚𑁆𑀛𑀦𑀲𑀭𑀓𑁆𑀔𑁂𑀧𑁄. 𑀈𑀤𑀺𑀲𑁄 𑀧𑀦 𑀢𑀢𑁆𑀣 𑀯𑀲𑀻𑀪𑀽𑀢𑁄 𑀓𑀢𑀳𑀢𑁆𑀣𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀘𑀺𑀡𑁆𑀡𑀯𑀲𑀻𑀪𑀸𑀯𑁄’’𑀢𑀺. 𑀓𑀢𑀁 𑀭𑀸𑀚𑀓𑀼𑀮𑀸𑀤𑀻𑀲𑀼 𑀉𑀧𑁂𑀘𑁆𑀘 𑀅𑀲𑀦𑀁 𑀏𑀢𑁂𑀦 𑀲𑁄 𑀓𑀢𑀽𑀧𑀸𑀲𑀦𑁄𑀢𑀺 𑀆𑀳 ‘‘𑀭𑀸𑀚𑀓𑀼𑀮𑀸𑀤𑀻𑀲𑀼 𑀤𑀲𑁆𑀲𑀺𑀢𑀲𑀺𑀧𑁆𑀧𑁄’’𑀢𑀺. 𑀏𑀯𑀁 𑀓𑀢𑀦𑁆𑀢𑀺 𑀏𑀯𑀁 𑀅𑀦𑁆𑀢𑁄𑀲𑀼𑀲𑀺𑀭𑀓𑀭𑀡𑀸𑀤𑀺𑀦𑀸 𑀲𑀮𑁆𑀮𑀳𑀼𑀓𑀁 𑀓𑀢𑀁.

𑀑𑀮𑁄𑀓𑁂𑀢𑀻𑀢𑀺 𑀉𑀤𑀺𑀓𑁆𑀔𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀢𑁂𑀲𑀁 𑀯𑀸𑀭𑁄 𑀧𑀜𑁆𑀜𑀸𑀬𑀢𑀻𑀢𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 ‘‘𑀅𑀬𑀁 𑀧𑀞𑀫𑀁 𑀧𑀼𑀘𑁆𑀙𑀢𑀺, 𑀅𑀬𑀁 𑀤𑀼𑀢𑀺𑀬’’𑀦𑁆𑀢𑀺𑀆𑀤𑀺𑀦𑀸 𑀧𑀼𑀘𑁆𑀙𑀦𑀯𑀸𑀭𑁄 𑀢𑀸𑀤𑀺𑀲𑀲𑁆𑀲 𑀧𑀜𑁆𑀜𑀯𑀢𑁄 𑀧𑀜𑁆𑀜𑀸𑀬𑀢𑀺 𑀲𑀼𑀔𑀼𑀫𑀲𑁆𑀲 𑀅𑀦𑁆𑀢𑀭𑀲𑁆𑀲 𑀮𑀩𑁆𑀪𑀦𑀢𑁄. 𑀩𑀼𑀤𑁆𑀥𑀸𑀦𑀁 𑀧𑀦 𑀯𑀸𑀭𑁄𑀢𑀺 𑀈𑀤𑀺𑀲𑁂 𑀞𑀸𑀦𑁂 𑀩𑀼𑀤𑁆𑀥𑀸𑀦𑀁 𑀤𑁂𑀲𑀦𑀸𑀯𑀸𑀭𑁄 𑀅𑀜𑁆𑀜𑁂𑀲𑀁 𑀦𑀧𑀜𑁆𑀜𑀸𑀬𑀦𑀢𑁄 𑀩𑀼𑀤𑁆𑀥𑀸𑀦𑀁𑀬𑁂𑀯 𑀧𑀜𑁆𑀜𑀸𑀬𑀢𑀺. 𑀇𑀤𑀸𑀦𑀺 𑀢𑀫𑁂𑀯 𑀧𑀜𑁆𑀜𑀸𑀬𑀦𑀢𑀁 𑀬𑀼𑀢𑁆𑀢𑀺𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀙𑀸𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀅𑀘𑁆𑀙𑀭𑀸𑀲𑀗𑁆𑀖𑀸𑀝𑀫𑀢𑁆𑀢𑁂 𑀔𑀡𑁂 𑀅𑀦𑁂𑀓-𑀓𑁄𑀝𑀺𑀲𑀳𑀲𑁆𑀲-𑀘𑀺𑀢𑁆𑀢𑀧𑀯𑀢𑁆𑀢𑀺𑀲𑀫𑁆𑀪𑀯𑀢𑁄 ‘‘𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀙𑀸𑀬𑀁 𑀅𑀢𑀺𑀓𑁆𑀓𑀫𑀦𑀢𑁄 𑀧𑀼𑀭𑁂𑀢𑀭𑀁𑀬𑁂𑀯 𑀪𑀕𑀯𑀸…𑀧𑁂… 𑀓𑀣𑁂𑀢𑀻’’𑀢𑀺 𑀯𑀢𑁆𑀯𑀸 𑀢𑀢𑁄 𑀮𑀳𑀼𑀢𑀭𑀸𑀧𑀺 𑀲𑀢𑁆𑀣𑀼 𑀤𑁂𑀲𑀦𑀸𑀧𑀯𑀢𑁆𑀢𑀺 𑀅𑀢𑁆𑀣𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀺𑀝𑁆𑀞𑀦𑁆𑀢𑀼 𑀯𑀸 𑀢𑀸𑀯 𑀏𑀢𑁂’’𑀢𑀺𑀆𑀤𑀺𑀫𑀸𑀳. 𑀇𑀤𑀸𑀦𑀺 𑀢𑀢𑁆𑀣 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁄𑀴𑀲 𑀧𑀤𑀸𑀦𑀺 𑀓𑀣𑁂𑀢𑀻𑀢𑀺 𑀏𑀢𑁂𑀦 𑀮𑁄𑀓𑀺𑀬𑀚𑀦𑀲𑁆𑀲 𑀏𑀓𑀧𑀤𑀼𑀘𑁆𑀘𑀸𑀭𑀡𑀓𑁆𑀔𑀡𑁂 𑀪𑀕𑀯𑀸 𑀅𑀝𑁆𑀞𑀯𑀻𑀲𑀲𑀢𑀧𑀤𑀸𑀦𑀺 𑀓𑀣𑁂𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀤𑀸𑀦𑀺 𑀢𑀲𑁆𑀲𑀧𑀺 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀥𑀫𑁆𑀫𑁄𑀢𑀺 𑀧𑀸𑀴𑀺. 𑀧𑀚𑁆𑀚𑀢𑀺 𑀅𑀢𑁆𑀣𑁄 𑀏𑀢𑁂𑀦𑀸𑀢𑀺 𑀧𑀤𑀁, 𑀢𑀤𑀢𑁆𑀣𑁄. 𑀅𑀢𑁆𑀣𑀁 𑀩𑁆𑀬𑀜𑁆𑀚𑁂𑀢𑀻𑀢𑀺 𑀩𑁆𑀬𑀜𑁆𑀚𑀦𑀁, 𑀅𑀓𑁆𑀔𑀭𑀁. 𑀢𑀜𑁆𑀳𑀺 𑀧𑀤𑀯𑀸𑀓𑁆𑀬𑀓𑁆𑀔𑀭𑀪𑀸𑀯𑁂𑀳𑀺 𑀧𑀭𑀺𑀘𑁆𑀙𑀺𑀚𑁆𑀚𑀫𑀸𑀦𑀁 𑀢𑀁 𑀢𑀁 𑀅𑀢𑁆𑀣𑀁 𑀩𑁆𑀬𑀜𑁆𑀚𑁂𑀢𑀺 𑀧𑀓𑀸𑀲𑁂𑀢𑀺. 𑀢𑁂𑀦𑀸𑀳 ‘‘𑀥𑀫𑁆𑀫𑀧𑀤𑀩𑁆𑀬𑀜𑁆𑀚𑀦𑀦𑁆𑀢𑀺 𑀧𑀸𑀴𑀺𑀬𑀸 𑀧𑀤𑀩𑁆𑀬𑀜𑁆𑀚𑀦𑀁, 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀩𑁆𑀬𑀜𑁆𑀚𑀦𑀓𑀁 𑀅𑀓𑁆𑀔𑀭’’𑀦𑁆𑀢𑀺. 𑀏𑀢𑁂𑀦 𑀅𑀧𑀭𑀸𑀧𑀭𑁂𑀳𑀺 𑀧𑀤𑀩𑁆𑀬𑀜𑁆𑀚𑀦𑁂𑀳𑀺 𑀲𑀼𑀘𑀺𑀭𑀫𑁆𑀧𑀺 𑀓𑀸𑀮𑀁 𑀓𑀣𑁂𑀦𑁆𑀢𑀲𑁆𑀲 𑀢𑀣𑀸𑀕𑀢𑀲𑁆𑀲 𑀦 𑀓𑀤𑀸𑀘𑀺 𑀢𑁂𑀲𑀁 𑀧𑀭𑀺𑀬𑀸𑀤𑀸𑀦𑀁 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀜𑁆𑀳𑀁 𑀩𑁆𑀬𑀸𑀓𑀭𑁄𑀦𑁆𑀢𑀺 𑀏𑀢𑁂𑀦𑀸𑀢𑀺 𑀧𑀜𑁆𑀳𑀩𑁆𑀬𑀸𑀓𑀭𑀡𑀁, 𑀢𑀣𑀸𑀧𑀯𑀢𑁆𑀢𑀧𑀝𑀺𑀪𑀸𑀦𑀁. 𑀅𑀧𑀭𑀺𑀓𑁆𑀔𑀬𑀧𑀝𑀺𑀪𑀸𑀦𑀸 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄, 𑀬𑀢𑁄 𑀯𑀼𑀢𑁆𑀢𑀁 ‘‘𑀦𑀢𑁆𑀣𑀺 𑀥𑀫𑁆𑀫𑀤𑁂𑀲𑀦𑀸𑀬 𑀳𑀸𑀦𑀻’’𑀢𑀺 (𑀤𑀻. 𑀦𑀺. 𑀝𑀻. 𑁩.𑁧𑁪𑁧, 𑁩𑁦𑁫; 𑀯𑀺𑀪. 𑀫𑀽𑀮𑀝𑀻. 𑁧.𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸). 𑀢𑁂𑀦𑀸𑀳 ‘‘𑀇𑀫𑀺𑀦𑀸 𑀓𑀺𑀁 𑀤𑀲𑁆𑀲𑁂𑀢𑀻’’𑀢𑀺𑀆𑀤𑀺. 𑀢𑀣𑀸 𑀆𑀲𑀦𑁆𑀦𑀧𑀭𑀺𑀦𑀺𑀩𑁆𑀩𑀸𑀦𑀲𑁆𑀲𑀧𑀺 𑀪𑀕𑀯𑀢𑁄 𑀤𑁂𑀲𑀦𑀸𑀬 𑀇𑀢𑀭𑀸𑀬 𑀘 𑀯𑀺𑀲𑁂𑀲𑀸𑀢𑀸𑀯𑁄𑀢𑀺 𑀧𑀞𑀫𑀩𑀼𑀤𑁆𑀥𑀯𑀘𑀦𑀫𑁆𑀧𑀺 𑀫𑀚𑁆𑀛𑀺𑀫𑀩𑀼𑀤𑁆𑀥𑀯𑀘𑀦𑀫𑁆𑀧𑀺 𑀧𑀘𑁆𑀙𑀺𑀫𑀩𑀼𑀤𑁆𑀥𑀯𑀘𑀦𑀫𑁆𑀧𑀺 𑀲𑀤𑀺𑀲𑀫𑁂𑀯. 𑀆𑀲𑀻𑀢𑀺𑀓𑀯𑀲𑁆𑀲𑀢𑁄 𑀧𑀭𑀁 𑀧𑀜𑁆𑀘𑀫𑁄 𑀆𑀬𑀼𑀓𑁄𑀝𑁆𑀞𑀸𑀲𑁄.

𑁧𑁬𑁨. 𑀓𑀸𑀫𑀜𑁆𑀘𑁂𑀢𑁆𑀣 𑀪𑀕𑀯𑀢𑀸 𑀦𑀸𑀕𑀲𑀫𑀸𑀮𑀢𑁆𑀣𑁂𑀭𑀲𑁆𑀲 𑀅𑀘𑁆𑀙𑀭𑀺𑀬𑀅𑀩𑁆𑀪𑀼𑀢𑀧𑀯𑁂𑀤𑀦𑀫𑀼𑀔𑁂𑀦 𑀅𑀢𑁆𑀢𑀦𑁄 𑀮𑁄𑀫𑀸𑀦𑀁 𑀳𑀝𑁆𑀞𑀪𑀸𑀯𑀲𑁆𑀲 𑀧𑀯𑁂𑀤𑀺𑀢𑀢𑁆𑀢𑀸 ‘‘𑀮𑁄𑀫𑀳𑀁𑀲𑀦𑀧𑀭𑀺𑀬𑀸𑀬𑁄’’𑀢𑀺 𑀦𑀸𑀫𑀁 𑀕𑀳𑀺𑀢𑀁, 𑀢𑀣𑀸𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺-𑀅𑀦𑀜𑁆𑀜𑀲𑀸𑀥𑀸𑀭𑀡𑀜𑀸𑀡𑀸𑀦𑀼𑀪𑀸𑀯-𑀯𑀺𑀪𑀸𑀯𑀦𑀸𑀤𑀺𑀯𑀲𑁂𑀦 𑀲𑁄𑀴𑀲𑀲𑀫𑀽𑀳𑀢𑁄 𑀲𑀻𑀳𑀦𑀸𑀤𑀲𑁆𑀲 𑀦𑀤𑀦𑁂𑀦 𑀤𑁂𑀲𑀦𑀸𑀬 𑀧𑀯𑀢𑁆𑀢𑀺𑀢𑀢𑁆𑀢𑀸 ‘‘𑀫𑀳𑀸𑀲𑀻𑀳𑀦𑀸𑀤𑁄’’𑀢𑁆𑀯𑁂𑀯 𑀲𑀗𑁆𑀕𑀻𑀢𑀺𑀓𑀸𑀭𑀫𑀳𑀸𑀣𑁂𑀭𑁂𑀳𑀺 𑀦𑀸𑀫𑀁 𑀞𑀧𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁩. 𑀫𑀳𑀸𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁩. 𑀢𑀢𑁄 𑀧𑀭𑀦𑁆𑀢𑀺 𑀢𑀺𑀡𑁆𑀡𑀁 𑀚𑀦𑀸𑀦𑀁 𑀉𑀧𑀭𑀺 𑀲𑀗𑁆𑀖𑁄 𑀘𑀢𑀼𑀯𑀕𑁆𑀕𑀓𑀭𑀡𑀻𑀬𑀸𑀤𑀺𑀓𑀫𑁆𑀫𑁂𑀳𑀺 𑀧𑀝𑀺𑀓𑀫𑁆𑀫𑀧𑁆𑀧𑀢𑁆𑀢𑀢𑁆𑀢𑀸. 𑀕𑀸𑀫𑀁 𑀕𑀢𑁄𑀢𑀺 𑀯𑀼𑀘𑁆𑀘𑀢𑀺 𑀕𑀸𑀫𑀁 𑀉𑀤𑁆𑀤𑀺𑀲𑁆𑀲 𑀕𑀢𑀢𑁆𑀢𑀸, 𑀏𑀯𑀁 𑀲𑀸𑀯𑀢𑁆𑀣𑀺𑀁 𑀧𑀯𑀺𑀲𑀺𑀢𑀼𑀁 𑀯𑀺𑀳𑀸𑀭𑀢𑁄 𑀦𑀺𑀓𑁆𑀔𑀦𑁆𑀢𑀸 ‘‘𑀧𑀯𑀺𑀲𑀺𑀁𑀲𑀽’’𑀢𑀺 𑀯𑀼𑀢𑁆𑀢𑀸. 𑀧𑀭𑀺𑀜𑁆𑀜𑀦𑁆𑀢𑀺 𑀧𑀳𑀸𑀦𑀧𑀭𑀺𑀜𑁆𑀜𑀁. 𑀲𑀸 𑀳𑀺 𑀲𑀫𑀢𑀺𑀓𑁆𑀓𑀫𑁄, 𑀦 𑀇𑀢𑀭𑀸. 𑀭𑀽𑀧𑀯𑁂𑀤𑀦𑀸𑀲𑀼𑀧𑀻𑀢𑀺 ‘‘𑀭𑀽𑀧𑀸𑀦𑀁 𑀧𑀭𑀺𑀜𑁆𑀜𑀁, 𑀯𑁂𑀤𑀦𑀸𑀦𑀁 𑀧𑀭𑀺𑀜𑁆𑀜’’𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀓𑀸𑀫𑀁 𑀲𑀩𑁆𑀩𑁂𑀲𑀁 𑀢𑀺𑀢𑁆𑀣𑀺𑀬𑀸𑀦𑀁 𑀓𑀸𑀫𑀸𑀤𑀺𑀧𑀭𑀺𑀜𑁆𑀜𑀸𑀧𑀜𑁆𑀜𑀸𑀧𑀦𑀳𑁂𑀢𑀼𑀪𑀽𑀢𑁄 𑀲𑀫𑀬𑁄 𑀦𑀢𑁆𑀣𑀺, 𑀬𑁂𑀲𑀁 𑀧𑀦 𑀅𑀢𑁆𑀣𑀺, 𑀢𑁂 𑀉𑀧𑀸𑀤𑀸𑀬 ‘‘𑀲𑀓𑀲𑀫𑀬𑀁 𑀚𑀸𑀦𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁. ‘‘𑀬𑀢𑁄 𑀬𑀢𑁄 𑀔𑁄 𑀪𑁄 𑀅𑀬𑀁 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀏𑀢𑁆𑀢𑀸𑀯𑀢𑀸 𑀔𑁄 𑀪𑁄 𑀓𑀸𑀫𑀸𑀦𑀁 𑀧𑀭𑀺𑀜𑁆𑀜𑀸 𑀳𑁄𑀢𑀻’’𑀢𑀺 𑀏𑀯𑀁 𑀲𑀭𑀽𑀧𑀢𑁄 𑀧𑀞𑀫𑀚𑁆𑀛𑀸𑀦𑀁 𑀯𑀺𑀪𑀸𑀯𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀧𑀺 𑀓𑁂𑀯𑀮𑀁 𑀅𑀘𑁆𑀘𑀦𑁆𑀢𑀧𑁆𑀧𑀳𑀸𑀦𑀲𑀜𑁆𑀜𑀸𑀬 𑀓𑀸𑀫𑀸𑀦𑀁 𑀧𑀭𑀺𑀜𑁆𑀜𑀁 𑀧𑀜𑁆𑀜𑀧𑁂𑀬𑁆𑀬𑀼𑀁 𑀧𑀞𑀫𑀚𑁆𑀛𑀸𑀦𑀁 𑀯𑀤𑀫𑀸𑀦𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀸𑀤𑀺𑀲𑀲𑁆𑀲 𑀆𑀕𑀫𑀸𑀥𑀺𑀕𑀫𑀲𑁆𑀲𑀸𑀪𑀸𑀯𑀢𑁄. 𑀭𑀽𑀧𑀯𑁂𑀤𑀦𑀸𑀧𑀭𑀺𑀜𑁆𑀜𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀼𑀘𑁆𑀘𑁂𑀣𑀸𑀢𑀺 𑀯𑀼𑀘𑁆𑀘𑁂𑀬𑁆𑀬. 𑀤𑀼𑀢𑀺𑀬𑀧𑀤𑁂𑀧𑀻𑀢𑀺 ‘‘𑀅𑀦𑀼𑀲𑀸𑀲𑀦𑀺𑀬𑀸 𑀯𑀸 𑀅𑀦𑀼𑀲𑀸𑀲𑀦𑀺’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀯𑀸𑀓𑁆𑀬𑁂𑀧𑀺. 𑀢𑁂 𑀓𑀺𑀭 𑀪𑀺𑀓𑁆𑀔𑀽.

𑁧𑁬𑁫. 𑀦 𑀘𑁂𑀯 𑀲𑀫𑁆𑀧𑀸𑀬𑀺𑀲𑁆𑀲𑀦𑁆𑀢𑀻𑀢𑀺 𑀦 𑀘𑁂𑀯 𑀲𑀫𑁆𑀫𑀤𑁂𑀯 𑀧𑀓𑀸𑀭𑁂𑀳𑀺 𑀕𑀫𑁂𑀲𑁆𑀲𑀦𑁆𑀢𑀺 𑀜𑀸𑀧𑁂𑀲𑁆𑀲𑀦𑁆𑀢𑀺. 𑀢𑁂𑀦𑀸𑀳 ‘‘𑀲𑀫𑁆𑀧𑀸𑀤𑁂𑀢𑁆𑀯𑀸 𑀓𑀣𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀻’’𑀢𑀺. 𑀬𑀲𑁆𑀫𑀸 𑀅𑀯𑀺𑀲𑀬𑁂 𑀧𑀜𑁆𑀳𑁄 𑀧𑀼𑀘𑁆𑀙𑀺𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀲𑀤𑁂𑀯𑀓𑁂𑀢𑀺 𑀅𑀭𑀽𑀧𑀤𑁂𑀯𑀕𑁆𑀕𑀳𑀡𑀁. 𑀢𑁂 𑀳𑀺 𑀮𑁄𑀓𑀺𑀬𑀤𑁂𑀯𑁂𑀳𑀺 𑀤𑀻𑀖𑀸𑀬𑀼𑀓𑀢𑀸𑀤𑀺𑀦𑀸 𑀉𑀓𑁆𑀓𑀝𑁆𑀞𑀸. 𑀲𑀫𑀸𑀭𑀓𑁂𑀢𑀺 𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁. 𑀲𑀩𑁆𑀭𑀳𑁆𑀫𑀓𑁂𑀢𑀺 𑀭𑀽𑀧𑀸𑀯𑀘𑀭𑀩𑁆𑀭𑀳𑁆𑀫𑀕𑁆𑀕𑀳𑀡𑀁. 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸𑀢𑀺 𑀏𑀢𑁆𑀣 𑀲𑀫𑀡𑀕𑁆𑀕𑀳𑀡𑁂𑀦 𑀧𑀩𑁆𑀩𑀚𑀺𑀢𑁂, 𑀩𑁆𑀭𑀸𑀳𑁆𑀫𑀡𑀕𑁆𑀕𑀳𑀡𑁂𑀦 𑀚𑀸𑀢𑀺𑀩𑁆𑀭𑀸𑀳𑁆𑀫𑀡𑁂, 𑀧𑀼𑀦 𑀤𑁂𑀯𑀕𑁆𑀕𑀳𑀡𑁂𑀦 𑀲𑀫𑁆𑀫𑀼𑀢𑀺𑀤𑁂𑀯𑁂, 𑀫𑀦𑀼𑀲𑁆𑀲𑀕𑁆𑀕𑀳𑀡𑁂𑀦 𑀅𑀯𑀲𑀺𑀝𑁆𑀞𑀫𑀦𑀼𑀲𑁆𑀲𑀓𑀸𑀬𑀁 𑀧𑀭𑀺𑀬𑀸𑀤𑀺𑀬𑀢𑀺. 𑀮𑁄𑀓𑀧𑀚𑀸𑀕𑁆𑀕𑀳𑀡𑁂𑀦 𑀧𑀦 𑀧𑀬𑁄𑀚𑀦𑀁 𑀅𑀝𑁆𑀞𑀓𑀣𑀸𑀬𑀁 𑀤𑀲𑁆𑀲𑀺𑀢𑀫𑁂𑀯. 𑀅𑀜𑁆𑀜𑀣𑀸 𑀆𑀭𑀸𑀥𑀦𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀇𑀫𑀺𑀦𑀸 𑀓𑀸𑀫𑀭𑀽𑀧𑀯𑁂𑀤𑀦𑀸𑀲𑀼 𑀅𑀲𑁆𑀲𑀸𑀤𑀸𑀤𑀻𑀦𑀁 𑀬𑀸𑀣𑀸𑀯𑀢𑁄 𑀅𑀯𑀩𑁄𑀥𑁄 𑀏𑀯 𑀇𑀢𑁄 𑀩𑀸𑀳𑀺𑀭𑀓𑀸𑀦𑀁 𑀦𑀢𑁆𑀣𑀺, 𑀓𑀼𑀢𑁄 𑀧𑀯𑁂𑀤𑀦𑀸𑀢𑀺 𑀤𑀲𑁆𑀲𑁂𑀢𑀺.

𑁧𑁬𑁬. 𑀘𑀺𑀢𑁆𑀢𑀸𑀭𑀸𑀥𑀦𑀦𑁆𑀢𑀺 𑀬𑀸𑀣𑀸𑀯𑀧𑀯𑁂𑀤𑀦𑁂𑀦 𑀧𑀭𑁂𑀲𑀁 𑀘𑀺𑀢𑁆𑀢𑀲𑁆𑀲 𑀧𑀭𑀺𑀢𑁄𑀲𑀦𑀁. 𑀩𑀦𑁆𑀥𑀦𑀝𑁆𑀞𑁂𑀦 𑀕𑀼𑀡𑀸𑀢𑀺 𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀲𑁆𑀲 𑀧𑀘𑁆𑀘𑀬𑀪𑀸𑀯𑁂𑀦 𑀯𑀢𑁆𑀣𑀼𑀓𑀸𑀫𑁂𑀲𑀼𑀧𑀺 𑀩𑀦𑁆𑀥𑀦𑀝𑁆𑀞𑁄 𑀯𑀼𑀢𑁆𑀢𑁄, 𑀓𑁄𑀝𑁆𑀞𑀸𑀲𑀝𑁆𑀞𑁄 𑀯𑀸 𑀕𑀼𑀡𑀝𑁆𑀞𑁄 𑀤𑀝𑁆𑀞𑀩𑁆𑀩𑁄. 𑀢𑀭𑀬𑀦𑁆𑀢𑀻𑀢𑀺 𑀢𑀭𑀫𑀸𑀦𑀸 𑀬𑀦𑁆𑀢𑀺 𑀕𑀘𑁆𑀙𑀦𑁆𑀢𑀺. 𑀅𑀢𑀻𑀢𑀸𑀤𑀺𑀪𑀺𑀦𑁆𑀦𑀧𑀞𑀫𑀸𑀤𑀺𑀯𑀬𑀸 𑀏𑀯 𑀘𑀺𑀢𑁆𑀢𑀢𑀸 𑀭𑀸𑀲𑀺𑀪𑀸𑀯𑁂𑀦 𑀯𑀬𑁄𑀕𑀼𑀡𑀸𑀢𑀺 𑀕𑀳𑀺𑀢𑀸𑀢𑀺 𑀆𑀳 ‘‘𑀭𑀸𑀲𑀝𑁆𑀞𑁄 𑀕𑀼𑀡𑀝𑁆𑀞𑁄’’𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀢𑀁𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑁂𑀳𑀺 𑀯𑀺𑀚𑀸𑀦𑀺𑀢𑀩𑁆𑀩𑀸. 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀝𑁆𑀞𑀸𑀭𑀫𑁆𑀫𑀡𑀪𑀽𑀢𑀸𑀢𑀺 𑀲𑀪𑀸𑀯𑁂𑀦𑁂𑀯 𑀇𑀝𑁆𑀞𑀸𑀭𑀫𑁆𑀫𑀡𑀚𑀸𑀢𑀺𑀓𑀸, 𑀇𑀝𑁆𑀞𑀸𑀭𑀫𑁆𑀫𑀡𑀪𑀸𑀯𑀁 𑀯𑀸 𑀧𑀢𑁆𑀢𑀸. 𑀓𑀫𑀦𑀻𑀬𑀸𑀢𑀺 𑀓𑀸𑀫𑁂𑀢𑀩𑁆𑀩𑀸. 𑀫𑀦𑀯𑀟𑁆𑀠𑀦𑀓𑀸𑀢𑀺 𑀫𑀦𑁄𑀳𑀭𑀸. 𑀏𑀢𑁂𑀦 𑀧𑀭𑀺𑀓𑀧𑁆𑀧𑀦𑀢𑁄𑀧𑀺 𑀇𑀝𑁆𑀞𑀪𑀸𑀯𑀁 𑀕𑀡𑁆𑀳𑀸𑀢𑀺. 𑀧𑀺𑀬𑀚𑀸𑀢𑀺𑀓𑀸𑀢𑀺 𑀧𑀺𑀬𑀸𑀬𑀺𑀢𑀩𑁆𑀩𑀲𑀪𑀸𑀯𑀸. 𑀓𑀸𑀫𑀽𑀧𑀲𑀁𑀳𑀺𑀢𑀸𑀢𑀺 𑀓𑀸𑀫𑀭𑀸𑀕𑁂𑀦 𑀉𑀧𑁂𑀘𑁆𑀘 𑀲𑀦𑁆𑀥𑀸𑀦𑀺𑀬𑀸 𑀲𑀫𑁆𑀩𑀤𑁆𑀥𑀸 (𑀅. 𑀦𑀺. 𑀝𑀻. 𑁩.𑁬.𑁬𑁩) 𑀓𑀸𑀢𑀩𑁆𑀩𑀸𑀢𑀺 𑀆𑀳 ‘‘𑀆𑀭𑀫𑁆𑀫𑀡𑀁 𑀓𑀢𑁆𑀯𑀸’’𑀢𑀺.

𑁧𑁬𑁭. 𑀲𑀜𑁆𑀜𑀁 𑀞𑀧𑁂𑀢𑁆𑀯𑀸𑀢𑀺 ‘‘𑀇𑀫𑀲𑁆𑀫𑀺𑀁 𑀅𑀗𑁆𑀕𑀼𑀮𑀺𑀓𑀸𑀤𑀺𑀧𑀩𑁆𑀩𑁂 𑀕𑀳𑀺𑀢𑁂 𑀲𑀢𑀁 𑀳𑁄𑀢𑀺, 𑀇𑀫𑀲𑁆𑀫𑀺𑀁 𑀲𑀳𑀲𑁆𑀲’’𑀦𑁆𑀢𑀺𑀆𑀤𑀺𑀦𑀸 𑀲𑀜𑁆𑀜𑀸𑀡𑀁 𑀓𑀢𑁆𑀯𑀸 𑀕𑀡𑀦𑀸. 𑀅𑀘𑁆𑀙𑀺𑀤𑁆𑀤𑀕𑀡𑀦𑀸𑀢𑀺 ‘‘𑀏𑀓𑀁 𑀤𑁆𑀯𑁂’’𑀢𑀺𑀆𑀤𑀺𑀦𑀸 𑀦𑀯𑀦𑁆𑀢𑀯𑀺𑀥𑀺𑀦𑀸 𑀦𑀺𑀭𑀦𑁆𑀢𑀭𑀕𑀡𑀦𑀸. 𑀧𑀺𑀡𑁆𑀟𑀕𑀡𑀦𑀸𑀢𑀺 𑀲𑀗𑁆𑀓𑀮𑀦𑀧𑀝𑀼𑀧𑁆𑀧𑀸𑀤𑀦𑀸𑀤𑀺𑀦𑀸 𑀧𑀺𑀡𑁆𑀟𑀺𑀢𑁆𑀯𑀸 𑀕𑀡𑀦𑀸. 𑀢𑁂𑀦𑀸𑀳 ‘‘𑀔𑁂𑀢𑁆𑀢𑀁 𑀑𑀮𑁄𑀓𑁂𑀢𑁆𑀯𑀸’’𑀢𑀺𑀆𑀤𑀺. 𑀓𑀲𑀦𑀁 𑀓𑀲𑀻𑀢𑀺 𑀓𑀲𑀺𑀕𑁆𑀕𑀳𑀡𑁂𑀦 𑀲𑀩𑁆𑀩𑁄 𑀓𑀲𑀺𑀧𑀝𑀺𑀩𑀤𑁆𑀥𑁄 𑀚𑀻𑀯𑀺𑀓𑀽𑀧𑀸𑀬𑁄 𑀕𑀳𑀺𑀢𑁄𑀢𑀺 𑀆𑀳 ‘‘𑀓𑀲𑀻𑀢𑀺 𑀓𑀲𑀺𑀓𑀫𑁆𑀫’’𑀦𑁆𑀢𑀺. 𑀚𑀗𑁆𑀖𑀯𑀡𑀺𑀚𑁆𑀚𑀸𑀢𑀺 𑀚𑀗𑁆𑀖𑀲𑀢𑁆𑀣𑀯𑀲𑁂𑀦 𑀯𑀡𑀺𑀚𑁆𑀚𑀁 𑀆𑀳, 𑀣𑀮𑀯𑀡𑀺𑀚𑁆𑀚𑀸𑀢𑀺 𑀲𑀓𑀝𑀲𑀢𑁆𑀣𑀯𑀲𑁂𑀦. 𑀆𑀤𑀺-𑀲𑀤𑁆𑀤𑁂𑀦 𑀦𑀸𑀯𑀸𑀧𑀡𑀸𑀤𑀺𑀯𑀲𑁂𑀦 𑀯𑁄𑀳𑀸𑀭𑀁. 𑀯𑀡𑀺𑀧𑁆𑀧𑀣𑁄𑀢𑀺 𑀯𑀡𑀺𑀚𑀫𑀕𑁆𑀕𑁄, 𑀤𑀸𑀦𑀕𑁆𑀕𑀳𑀡𑀯𑀲𑁂𑀦 𑀲𑀁𑀯𑁄𑀳𑀸𑀭𑁄𑀢𑀺 𑀅𑀢𑁆𑀣𑁄. 𑀉𑀲𑀽𑀦𑀁 𑀅𑀲𑀦𑀓𑀫𑁆𑀫𑀁 𑀇𑀲𑁆𑀲𑀢𑁆𑀢𑀁, 𑀥𑀦𑀼𑀲𑀺𑀧𑁆𑀧𑁂𑀦 𑀚𑀻𑀯𑀺𑀓𑀸, 𑀇𑀥 𑀧𑀦 𑀇𑀲𑁆𑀲𑀢𑁆𑀢𑀁 𑀯𑀺𑀬𑀸𑀢𑀺 𑀇𑀲𑁆𑀲𑀢𑁆𑀢𑀁, 𑀲𑀩𑁆𑀩𑀆𑀯𑀼𑀥𑀚𑀻𑀯𑀺𑀓𑀸𑀢𑀺 𑀆𑀳 ‘‘𑀆𑀯𑀼𑀥𑀁 𑀕𑀳𑁂𑀢𑁆𑀯𑀸 𑀉𑀧𑀝𑁆𑀞𑀸𑀦𑀓𑀫𑁆𑀫’’𑀦𑁆𑀢𑀺. 𑀧𑁄𑀭𑁄𑀳𑀺𑀘𑁆𑀘𑀸𑀫𑀘𑁆𑀘𑀓𑀫𑁆𑀫𑀸𑀤𑀺 𑀭𑀸𑀚𑀓𑀫𑁆𑀫𑀁.𑀆𑀤𑀺-𑀲𑀤𑁆𑀤𑁂𑀦 𑀭𑀣𑀲𑀺𑀧𑁆𑀧𑀔𑀢𑁆𑀢𑀯𑀺𑀚𑁆𑀚𑀸𑀲𑀺𑀧𑁆𑀧𑀸𑀤𑀺-𑀯𑀼𑀢𑁆𑀢𑀸𑀯𑀲𑁂𑀲𑀁 𑀫𑀳𑀸𑀲𑀺𑀧𑁆𑀧𑀁 𑀔𑀼𑀤𑁆𑀤𑀓𑀲𑀺𑀧𑁆𑀧𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀻𑀢𑀲𑁆𑀲 𑀧𑀼𑀭𑀓𑁆𑀔𑀢𑁄𑀢𑀺 𑀲𑀻𑀢𑀲𑁆𑀲 𑀧𑀼𑀭𑀢𑁄 𑀓𑀢𑁄. 𑀬𑁄 𑀳𑀺 𑀲𑀻𑀢𑀓𑀸𑀮𑁂 𑀚𑀻𑀯𑀺𑀓𑀸𑀳𑁂𑀢𑀼 𑀲𑀻𑀢𑀮𑀧𑀤𑁂𑀲𑀁 𑀧𑀓𑁆𑀔𑀦𑁆𑀤𑀢𑀺, 𑀲𑁄 𑀯𑀸𑀴𑀫𑀺𑀕𑀸𑀤𑀻𑀳𑀺 𑀯𑀺𑀬 𑀲𑀻𑀢𑁂𑀦 𑀧𑀭𑀺𑀧𑀸𑀢𑀺𑀬𑀫𑀸𑀦𑁄 𑀢𑁂𑀦 𑀧𑀼𑀭𑀢𑁄 𑀓𑀢𑁄 𑀯𑀺𑀬 𑀳𑁄𑀢𑀺. 𑀢𑁂𑀦𑀸𑀳 ‘‘𑀲𑀻𑀢𑁂𑀦 𑀩𑀸𑀥𑀺𑀬𑀫𑀸𑀦𑁄’’𑀢𑀺. 𑀉𑀡𑁆𑀳𑀲𑁆𑀲 𑀧𑀼𑀭𑀓𑁆𑀔𑀢𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀭𑀺𑀢𑁆𑀯𑀸𑀢𑀺 𑀲𑀁𑀲𑀧𑁆𑀧𑀺𑀢𑁆𑀯𑀸. 𑀖𑀝𑁆𑀝𑀺𑀬𑀫𑀸𑀦𑁄𑀢𑀺 𑀳𑀺𑀁𑀲𑀺𑀬𑀫𑀸𑀦𑁄 𑀩𑀸𑀥𑀺𑀬𑀫𑀸𑀦𑁄. 𑀆𑀩𑀸𑀥𑀦𑀁 𑀆𑀩𑀸𑀥𑁄, 𑀧𑀻𑀴𑀸𑀢𑀺 𑀅𑀢𑁆𑀣𑁄. 𑀓𑀸𑀫𑀳𑁂𑀢𑀼𑀦𑁆𑀢𑀺 𑀯𑀸 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄 𑀬𑀣𑀸 ‘‘𑀯𑀺𑀲𑀫𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀯𑀢𑁆𑀢𑀦𑁆𑀢𑀻’’𑀢𑀺 (𑀅. 𑀦𑀺. 𑁪.𑁭𑁦). 𑀢𑀣𑀸 𑀲𑁂𑀲𑀧𑀤𑀤𑁆𑀯𑀬𑁂𑀧𑀺. 𑀢𑁂𑀦𑁂𑀯𑀸𑀳 ‘‘𑀓𑀸𑀫𑀸𑀦𑀫𑁂𑀯 𑀳𑁂𑀢𑀽’’𑀢𑀺. 𑀓𑀸𑀫𑀸𑀦𑀁 𑀳𑁂𑀢𑀽𑀢𑀺 𑀏𑀢𑁆𑀣 𑀧𑀼𑀭𑀺𑀫𑀧𑀤𑀸𑀯𑀥𑀸𑀭𑀡𑀫𑀬𑀼𑀢𑁆𑀢𑀁 𑀢𑀤𑀜𑁆𑀜𑀧𑀘𑁆𑀘𑀬𑀧𑀝𑀺𑀓𑁆𑀔𑁂𑀧𑀸𑀧𑀢𑁆𑀢𑀺𑀢𑁄, 𑀢𑀣𑀸 𑀉𑀢𑁆𑀢𑀭𑀧𑀤𑀸𑀯𑀥𑀸𑀭𑀡𑀁 𑀓𑀸𑀫𑀸𑀦𑀁 𑀓𑀤𑀸𑀘𑀺 𑀅𑀳𑁂𑀢𑀼𑀪𑀸𑀯𑀲𑁆𑀲𑀧𑀺 𑀲𑀫𑁆𑀪𑀯𑀢𑁄, 𑀢𑀲𑁆𑀫𑀸 ‘‘𑀉𑀧𑁆𑀧𑀚𑁆𑀚𑀢𑀺𑀬𑁂𑀯𑀸’’𑀢𑀺 𑀯𑀼𑀢𑁆𑀢𑀁.

𑀉𑀝𑁆𑀞𑀳𑀢𑁄𑀢𑀺 𑀇𑀫𑀺𑀦𑀸 𑀉𑀝𑁆𑀞𑀸𑀦𑀯𑀻𑀭𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀆𑀚𑀻𑀯𑀲𑀫𑀼𑀝𑁆𑀞𑀸𑀧𑀓𑀯𑀻𑀭𑀺𑀬𑁂𑀦𑀸’’𑀢𑀺. 𑀢𑀁 𑀯𑀻𑀭𑀺𑀬𑀦𑁆𑀢𑀺 𑀆𑀚𑀻𑀯𑀺𑀓𑀲𑀫𑀼𑀝𑁆𑀞𑀸𑀧𑀓𑀯𑀻𑀭𑀺𑀬𑀁. 𑀧𑀼𑀩𑁆𑀩𑁂𑀦𑀸𑀧𑀭𑀁 𑀖𑀝𑁂𑀦𑁆𑀢𑀲𑁆𑀲𑀸𑀢𑀺 𑀆𑀭𑀫𑁆𑀪𑀢𑁄 𑀧𑀝𑁆𑀞𑀸𑀬 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑁂𑀦𑁆𑀢𑀲𑁆𑀲. 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑀩𑀮𑀯𑀲𑁄𑀓𑁂𑀦 𑀲𑁄𑀘𑀢𑀻𑀢𑀺 𑀘𑀺𑀢𑁆𑀢𑀲𑀦𑁆𑀢𑀸𑀧𑁂𑀦 𑀅𑀦𑁆𑀢𑁄 𑀦𑀺𑀚𑁆𑀛𑀸𑀬𑀢𑀺. 𑀓𑀸𑀬𑁂 𑀉𑀧𑁆𑀧𑀦𑁆𑀦𑀤𑀼𑀓𑁆𑀔𑁂𑀦𑀸𑀢𑀺 𑀢𑀲𑁆𑀲𑁂𑀯 𑀲𑁄𑀓𑀲𑁆𑀲 𑀯𑀲𑁂𑀦 𑀓𑀸𑀬𑁂 𑀉𑀧𑁆𑀧𑀦𑁆𑀦𑀤𑀼𑀓𑁆𑀔𑁂𑀦. 𑀲𑁄𑀓𑀼𑀤𑁆𑀤𑁂𑀲𑁂𑀦 𑀢𑀁 𑀢𑀁 𑀯𑀺𑀧𑁆𑀧𑀮𑀧𑁂𑀦𑁆𑀢𑁄 𑀯𑀸 𑀧𑀭𑀺𑀤𑁂𑀯𑀢𑀺. 𑀉𑀭𑀁 𑀢𑀸𑀴𑁂𑀢𑁆𑀯𑀸𑀢𑀺 𑀯𑀓𑁆𑀔𑀧𑁆𑀧𑀤𑁂𑀲𑀁 𑀧𑀳𑀭𑀺𑀢𑁆𑀯𑀸. ‘‘𑀫𑁄𑀖’’𑀦𑁆𑀢𑀺𑀆𑀤𑀺 𑀧𑀭𑀺𑀤𑁂𑀯𑀦𑀸𑀓𑀸𑀭𑀤𑀲𑁆𑀲𑀦𑀜𑁆𑀘𑁂𑀯 𑀲𑀫𑁆𑀫𑁄𑀳𑀸𑀧𑀚𑁆𑀚𑀦𑀸𑀓𑀸𑀭𑀤𑀲𑁆𑀲𑀦𑀜𑁆𑀘. 𑀫𑁂𑀢𑀺 𑀯𑀢𑁆𑀯𑀸 𑀧𑀼𑀦 𑀦𑁄𑀢𑀺 𑀧𑀼𑀣𑀼𑀯𑀘𑀦𑀁 𑀅𑀢𑁆𑀢𑀦𑁄 𑀉𑀪𑀬𑀣𑀸𑀧𑀺 𑀯𑁄𑀳𑀭𑀺𑀢𑀩𑁆𑀩𑀢𑁄, 𑀩𑁆𑀬𑀸𑀫𑀽𑀴𑁆𑀳𑀯𑀘𑀦𑀁 𑀯𑀸 𑀲𑁄𑀓𑀯𑀲𑁂𑀦.

𑁧𑁬𑁮. 𑀇𑀥 𑀓𑀸𑀫𑀕𑁆𑀕𑀳𑀡𑁂𑀦 𑀯𑀺𑀲𑁂𑀲𑀢𑁄 𑀯𑀢𑁆𑀣𑀼𑀓𑀸𑀫𑀸 𑀕𑀳𑀺𑀢𑀸𑀢𑀺 𑀓𑀸𑀫𑀸𑀤𑀺𑀕𑁆𑀕𑀳𑀡𑀁 𑀓𑀢𑀁, 𑀦𑀸𑀦𑀦𑁆𑀢𑀭𑀺𑀬𑀢𑀸𑀬 𑀧𑀦 𑀓𑀺𑀮𑁂𑀲𑀓𑀸𑀫𑁄𑀧𑀺 𑀕𑀳𑀺𑀢𑁄 𑀏𑀯. 𑀅𑀲𑀺𑀘𑀫𑁆𑀫𑀦𑁆𑀢𑀺 𑀏𑀢𑁆𑀣 𑀘𑀫𑁆𑀫𑀕𑁆𑀕𑀳𑀡𑁂𑀦 𑀦 𑀓𑁂𑀯𑀮𑀁 𑀘𑀫𑁆𑀫𑀫𑀬𑀲𑁆𑀲, 𑀘𑀫𑁆𑀫𑀧𑀭𑀺𑀲𑀺𑀩𑁆𑀩𑀺𑀢𑀲𑁆𑀲𑁂𑀯 𑀯𑀸 𑀕𑀳𑀡𑀁, 𑀅𑀣 𑀔𑁄 𑀲𑀩𑁆𑀩𑀲𑁆𑀲𑀧𑀺 𑀆𑀯𑀼𑀥𑀩𑀸𑀥𑀓𑀲𑁆𑀲 𑀕𑀳𑀡𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀔𑁂𑀝𑀓𑀨𑀮𑀓𑀸𑀤𑀻𑀦𑀻’’𑀢𑀺 𑀆𑀳. 𑀆𑀤𑀺-𑀲𑀤𑁆𑀤𑁂𑀦 𑀲𑀭𑀸𑀤𑀺𑀲𑀗𑁆𑀕𑀳𑁄. 𑀥𑀦𑀼𑀓𑀮𑀸𑀧𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸𑀢𑀺 𑀥𑀦𑀼𑀜𑁆𑀘𑁂𑀯 𑀔𑀼𑀭𑀧𑁆𑀧𑀢𑀽𑀡𑀺𑀜𑁆𑀘 𑀲𑀦𑁆𑀦𑀬𑁆𑀳𑀺𑀢𑁆𑀯𑀸, 𑀥𑀦𑀼𑀤𑀡𑁆𑀟𑀲𑁆𑀲 𑀚𑀺𑀬𑀸𑀬 𑀢𑀣𑀸𑀪𑀸𑀯𑀓𑀭𑀡𑀸𑀤𑀺𑀧𑀺 (𑀅. 𑀦𑀺. 𑀝𑀻. 𑁩.𑁫.𑁭𑁬) 𑀥𑀦𑀼𑀦𑁄 𑀲𑀦𑁆𑀦𑀬𑁆𑀳𑀦𑀦𑁆𑀢𑀺. 𑀤𑁆𑀯𑀺𑀦𑁆𑀦𑀁 𑀲𑁂𑀦𑀸𑀦𑀁 𑀩𑁆𑀬𑀽𑀳𑀲𑀁𑀯𑀺𑀥𑀸𑀦𑁂𑀦 𑀯𑀸 𑀉𑀪𑀢𑁄𑀩𑁆𑀬𑀽𑀴𑁆𑀳𑀁. 𑀯𑀺𑀚𑁆𑀚𑁄𑀢𑀮𑀦𑁆𑀢𑁂𑀲𑀽𑀢𑀺 𑀦𑀺𑀲𑀺𑀢𑀧𑀻𑀢𑀨𑀮𑀢𑀸𑀬 𑀯𑀺𑀚𑁆𑀚𑁄𑀢𑀦𑀯𑀲𑁂𑀦 𑀧𑀭𑀺𑀯𑀢𑁆𑀢𑀫𑀸𑀦𑁂𑀲𑀼.

𑀧𑀸𑀓𑀸𑀭𑀲𑀫𑀻𑀧𑀸𑀢𑀺𑀲𑀗𑁆𑀔𑀸𑀭𑀢𑀸𑀬 𑀧𑀸𑀓𑀸𑀭𑀧𑀸𑀤𑀸 𑀉𑀧𑀓𑀸𑀭𑀺𑀬𑁄, 𑀬𑀸 ‘‘𑀉𑀤𑁆𑀤𑀸𑀧𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀢𑀤𑀦𑁆𑀢𑁂𑀦𑀸𑀢𑀺 𑀅𑀦𑁂𑀓𑀲𑀢𑀤𑀦𑁆𑀢𑀓𑁂𑀦, 𑀬𑀲𑁆𑀲 𑀢𑀺𑀔𑀺𑀡𑀤𑀦𑁆𑀢𑀸𑀦𑀺 𑀅𑀦𑁂𑀓𑀲𑀢𑀸𑀦𑀺 𑀫𑀽𑀮𑀸𑀦𑀺 𑀳𑁄𑀦𑁆𑀢𑀺. 𑀅𑀢𑀺𑀪𑀸𑀭𑀢𑀸𑀬 𑀤𑀲𑀯𑀻𑀲𑀫𑀢𑁆𑀢𑀸𑀧𑀺 𑀚𑀦𑀸 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀬𑀦𑁆𑀢𑀯𑀲𑁂𑀦 𑀧𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀩𑀦𑁆𑀥𑀺𑀢𑁆𑀯𑀸 𑀞𑀧𑁂𑀦𑁆𑀢𑀺. 𑀢𑁂𑀦𑀸𑀳 ‘‘𑀅𑀝𑁆𑀞𑀤𑀦𑁆𑀢𑀸𑀓𑀸𑀭𑁂𑀦𑀸’’𑀢𑀺𑀆𑀤𑀺. 𑀑𑀫𑀤𑁆𑀤𑀦𑁆𑀢𑀻𑀢𑀺 𑀑𑀝𑁆𑀞𑀧𑁂𑀦𑁆𑀢𑀺.

𑁧𑁬𑁯. 𑀲𑀦𑁆𑀥𑀺𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺 𑀘𑁄𑀭𑀺𑀓𑀸𑀬 𑀚𑀻𑀯𑀺𑀢𑀼𑀓𑀸𑀫𑀸. 𑀦𑀺𑀮𑁆𑀮𑁄𑀧𑀦𑁆𑀢𑀺 𑀦𑀺𑀲𑁆𑀲𑁂𑀲𑀯𑀺𑀮𑁄𑀧𑀁, 𑀏𑀓𑀁 𑀧𑀭𑀺𑀢𑁆𑀢𑀁 𑀕𑀸𑀫𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀢𑀢𑁆𑀣 𑀓𑀺𑀜𑁆𑀘𑀺𑀧𑀺 𑀕𑀬𑁆𑀳𑀽𑀧𑀕𑀁 𑀅𑀲𑁂𑀲𑁂𑀢𑁆𑀯𑀸 𑀓𑀭𑀫𑀭𑀕𑁆𑀕𑀳𑀡𑀁. 𑀢𑁂𑀦𑀸𑀳 ‘‘𑀫𑀳𑀸𑀯𑀺𑀮𑁄𑀧’’𑀦𑁆𑀢𑀺. 𑀧𑀦𑁆𑀣𑀤𑀼𑀳𑀦𑀓𑀫𑁆𑀫𑀁 𑀅𑀝𑀯𑀺𑀫𑀕𑁆𑀕𑁂 𑀞𑀢𑁆𑀯𑀸 𑀅𑀤𑁆𑀥𑀺𑀓𑀸𑀦𑀁 𑀯𑀺𑀮𑀼𑀫𑁆𑀧𑀦𑀁. 𑀧𑀳𑀸𑀭𑀲𑀸𑀥𑀦𑀢𑁆𑀣𑀁 (𑀅. 𑀦𑀺. 𑀝𑀻. 𑁨.𑁨.𑁧) 𑀤𑀡𑁆𑀟𑀧𑁆𑀧𑀳𑀸𑀭𑀲𑁆𑀲 𑀲𑀼𑀔𑀲𑀺𑀤𑁆𑀥𑀺𑀅𑀢𑁆𑀣𑀁. 𑀓𑀜𑁆𑀚𑀺𑀢𑁄 𑀦𑀺𑀩𑁆𑀩𑀢𑁆𑀢𑀁 𑀓𑀜𑁆𑀚𑀺𑀬𑀁, 𑀆𑀭𑀦𑀸𑀮𑀁. 𑀬𑀁 ‘‘𑀩𑀺𑀮𑀗𑁆𑀕’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀢𑀁 𑀬𑀢𑁆𑀣 𑀲𑀺𑀜𑁆𑀘𑀢𑀺, 𑀲𑀸 𑀓𑀜𑁆𑀚𑀺𑀬𑀉𑀓𑁆𑀔𑀮𑀺𑀓𑀸. 𑀩𑀺𑀮𑀗𑁆𑀕𑀣𑀸𑀮𑀺𑀓𑀲𑀤𑀺𑀲𑀓𑀭𑀡𑀁 𑀩𑀺𑀮𑀗𑁆𑀕𑀣𑀸𑀮𑀺𑀬𑀁. 𑀲𑀻𑀲𑀓𑀧𑀸𑀮𑀁 𑀉𑀧𑁆𑀧𑀸𑀝𑁂𑀢𑁆𑀯𑀸𑀢𑀺 𑀅𑀬𑁄𑀕𑀼𑀴𑀧𑀯𑁂𑀲𑀦𑀧𑁆𑀧𑀫𑀸𑀡𑀁 𑀙𑀺𑀤𑁆𑀤𑀁 𑀓𑀢𑁆𑀯𑀸. 𑀲𑀗𑁆𑀔𑀫𑀼𑀡𑁆𑀟𑀓𑀫𑁆𑀫𑀓𑀸𑀭𑀡𑀦𑁆𑀢𑀺 𑀲𑀗𑁆𑀔𑀁 𑀯𑀺𑀬 𑀫𑀼𑀡𑁆𑀟𑀓𑀫𑁆𑀫𑀓𑀸𑀭𑀡𑀁.

𑀭𑀸𑀳𑀼𑀫𑀼𑀔𑀓𑀫𑁆𑀫𑀓𑀸𑀭𑀡𑀦𑁆𑀢𑀺 𑀭𑀸𑀳𑀼𑀫𑀼𑀔𑀕𑀢-𑀲𑀽𑀭𑀺𑀬𑀲𑀤𑀺𑀲-𑀓𑀫𑁆𑀫𑀓𑀸𑀭𑀡𑀁. 𑀚𑁄𑀢𑀺𑀫𑀸𑀮𑀺𑀓𑀦𑁆𑀢𑀺 𑀚𑁄𑀢𑀺𑀫𑀸𑀮𑀯𑀦𑁆𑀢𑀁 𑀓𑀫𑁆𑀫𑀓𑀸𑀭𑀡𑀁. 𑀳𑀢𑁆𑀣𑀧𑀚𑁆𑀚𑁄𑀢𑀺𑀓𑀦𑁆𑀢𑀺 𑀳𑀢𑁆𑀣𑀧𑀚𑁆𑀚𑁄𑀢𑀦𑀓𑀫𑁆𑀫𑀓𑀸𑀭𑀡𑀁. 𑀏𑀭𑀓𑀯𑀢𑁆𑀢𑀓𑀫𑁆𑀫𑀓𑀸𑀭𑀡𑀦𑁆𑀢𑀺 𑀏𑀭𑀓𑀯𑀢𑁆𑀢𑀲𑀤𑀺𑀲𑁂 𑀲𑀭𑀻𑀭𑀢𑁄 𑀩𑀤𑁆𑀥𑁂 𑀉𑀧𑁆𑀧𑀸𑀝𑀦𑀓𑀫𑁆𑀫𑀓𑀸𑀭𑀡𑀁. 𑀘𑀻𑀭𑀓𑀯𑀸𑀲𑀺𑀓𑀓𑀫𑁆𑀫𑀓𑀸𑀭𑀡𑀦𑁆𑀢𑀺 𑀲𑀭𑀻𑀭𑀢𑁄 𑀉𑀧𑁆𑀧𑀸𑀝𑀺𑀢𑀩𑀤𑁆𑀥𑀘𑀻𑀭𑀓𑀸𑀳𑀺 𑀦𑀺𑀯𑀸𑀲𑀸𑀧𑀦𑀓𑀫𑁆𑀫𑀓𑀸𑀭𑀡𑀁. 𑀢𑀁 𑀓𑀭𑁄𑀦𑁆𑀢𑀸 𑀬𑀣𑀸 𑀕𑀻𑀯𑀢𑁄 𑀧𑀝𑁆𑀞𑀸𑀬 𑀩𑀤𑁆𑀥𑁂 𑀓𑀦𑁆𑀢𑀺𑀢𑁆𑀯𑀸 𑀓𑀝𑀺𑀬𑀫𑁂𑀯 𑀞𑀧𑁂𑀦𑁆𑀢𑀺, 𑀏𑀯𑀁 𑀕𑁄𑀧𑁆𑀨𑀓𑀢𑁄 𑀧𑀝𑁆𑀞𑀸𑀬 𑀓𑀦𑁆𑀢𑀺𑀢𑁆𑀯𑀸 𑀓𑀝𑀺𑀬𑀫𑁂𑀯 𑀞𑀧𑁂𑀦𑁆𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀓𑀝𑀺𑀢𑁄 𑀧𑀝𑁆𑀞𑀸𑀬 𑀓𑀦𑁆𑀢𑀺𑀢𑁆𑀯𑀸 𑀕𑁄𑀧𑁆𑀨𑀓𑁂𑀲𑀼 𑀞𑀧𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀡𑁂𑀬𑁆𑀬𑀓𑀓𑀫𑁆𑀫𑀓𑀸𑀭𑀡𑀦𑁆𑀢𑀺 𑀏𑀡𑀻𑀫𑀺𑀕𑀲𑀤𑀺𑀲𑀓𑀫𑁆𑀫𑀓𑀸𑀭𑀡𑀁. 𑀅𑀬𑀯𑀮𑀬𑀸𑀦𑀺 𑀤𑀢𑁆𑀯𑀸𑀢𑀺 𑀅𑀬𑀯𑀮𑀬𑀸𑀦𑀺 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸. 𑀅𑀬𑀲𑀽𑀮𑀸𑀦𑀺 𑀓𑁄𑀝𑁆𑀝𑁂𑀦𑁆𑀢𑀻𑀢𑀺 𑀓𑀧𑁆𑀧𑀭𑀚𑀡𑁆𑀡𑀼𑀓𑀓𑁄𑀝𑀻𑀲𑀼 𑀅𑀬𑀲𑀽𑀮𑀸𑀦𑀺 𑀧𑀯𑁂𑀲𑁂𑀦𑁆𑀢𑀺. 𑀦𑁆𑀢𑀺 𑀢𑀁 𑀢𑀣𑀸𑀓𑀢𑀓𑀫𑁆𑀫𑀓𑀸𑀭𑀡𑀁 𑀲𑀢𑁆𑀢𑀁.

𑀩𑀴𑀺𑀲𑀫𑀁𑀲𑀺𑀓𑀦𑁆𑀢𑀺 𑀩𑀴𑀺𑀲𑁂𑀳𑀺 𑀫𑀁𑀲𑀼𑀧𑁆𑀧𑀸𑀝𑀦𑀓𑀫𑁆𑀫𑀓𑀸𑀭𑀡𑀁. 𑀓𑀳𑀸𑀧𑀡𑀺𑀓𑀦𑁆𑀢𑀺 𑀓𑀳𑀸𑀧𑀡𑀫𑀢𑁆𑀢𑀲𑁄 𑀙𑀺𑀦𑁆𑀤𑀦𑀓𑀫𑁆𑀫𑀓𑀸𑀭𑀡𑀁. 𑀓𑁄𑀝𑁆𑀝𑁂𑀦𑁆𑀢𑀻𑀢𑀺 𑀙𑀺𑀦𑁆𑀤𑀦𑁆𑀢𑀺. 𑀔𑀸𑀭𑀸𑀧𑀢𑀘𑁆𑀙𑀺𑀓𑀦𑁆𑀢𑀺 𑀢𑀘𑁆𑀙𑁂𑀢𑁆𑀯𑀸 𑀔𑀸𑀭𑀸𑀯𑀲𑀺𑀜𑁆𑀘𑀦𑀓𑀫𑁆𑀫𑀓𑀸𑀭𑀡𑀁. 𑀧𑀮𑀺𑀖𑀧𑀭𑀺𑀯𑀢𑁆𑀢𑀺𑀓𑀦𑁆𑀢𑀺 𑀧𑀮𑀺𑀖𑀲𑁆𑀲 𑀯𑀺𑀬 𑀧𑀭𑀺𑀯𑀢𑁆𑀢𑀦𑀓𑀫𑁆𑀫𑀓𑀸𑀭𑀡𑀁. 𑀏𑀓𑀸𑀩𑀤𑁆𑀥𑀁 𑀓𑀭𑁄𑀦𑁆𑀢𑀺 𑀅𑀬𑀲𑀽𑀮𑀲𑁆𑀲 𑀓𑁄𑀝𑁆𑀝𑀦𑁂𑀦. 𑀧𑀮𑀸𑀮𑀧𑀻𑀞𑀓𑀦𑁆𑀢𑀺 𑀧𑀮𑀸𑀮𑀧𑀻𑀞𑀲𑁆𑀲 𑀯𑀺𑀬 𑀲𑀭𑀻𑀭𑀲𑁆𑀲 𑀲𑀁𑀯𑁂𑀮𑁆𑀮𑀦𑀓𑀫𑁆𑀫𑀓𑀸𑀭𑀡𑀁. 𑀓𑀸𑀭𑀡𑀺𑀓𑀸𑀢𑀺 𑀖𑀸𑀢𑀦𑀓𑀸𑀭𑀓𑀸. 𑀧𑀮𑀸𑀮𑀯𑀝𑁆𑀝𑀺𑀁 𑀯𑀺𑀬 𑀓𑀢𑁆𑀯𑀸𑀢𑀺 𑀬𑀣𑀸 𑀧𑀮𑀸𑀮𑀧𑀻𑀞𑀁 𑀓𑀭𑁄𑀦𑁆𑀢𑀸 𑀧𑀮𑀸𑀮𑀯𑀝𑁆𑀝𑀺𑀁 𑀓𑀢𑁆𑀯𑀸 𑀲𑀁𑀯𑁂𑀮𑁆𑀮𑀦𑀯𑀲𑁂𑀦 𑀦𑀁 (𑀅. 𑀦𑀺. 𑀝𑀻. 𑁨.𑁨.𑁧) 𑀯𑁂𑀞𑁂𑀦𑁆𑀢𑀺, 𑀏𑀯𑀁 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀙𑀸𑀢𑀓𑁂𑀳𑀻𑀢𑀺 𑀩𑀼𑀪𑀼𑀓𑁆𑀔𑀺𑀢𑁂𑀳𑀺 𑀓𑁄𑀮𑁂𑀬𑁆𑀬𑀓𑀲𑀼𑀦𑀔𑁂𑀳𑀺. 𑀩𑀮𑀯𑀦𑁆𑀢𑁄 𑀳𑀺 𑀢𑁂 𑀚𑀯𑀬𑁄𑀕𑁆𑀕𑀸 𑀲𑀽𑀭𑀸 𑀘 𑀳𑁄𑀦𑁆𑀢𑀺. 𑀓𑀫𑁆𑀫𑀯𑀲𑁂𑀦 𑀲𑀫𑁆𑀧𑀭𑁂𑀢𑀺 𑀏𑀢𑁆𑀣𑀸𑀢𑀺 𑀲𑀫𑁆𑀧𑀭𑀸𑀬𑁄, 𑀧𑀭𑀮𑁄𑀓𑁄. 𑀢𑀢𑁆𑀣 𑀪𑀯𑁄𑀢𑀺 𑀲𑀫𑁆𑀧𑀭𑀸𑀬𑀺𑀓𑁄.

𑁧𑁭𑁦. 𑀙𑀦𑁆𑀤𑀭𑀸𑀕𑁄 𑀯𑀺𑀦𑀻𑀬𑀢𑀺 𑀘𑁂𑀯 𑀧𑀳𑀻𑀬𑀢𑀺 𑀘 𑀏𑀢𑁆𑀣𑀸𑀢𑀺 𑀦𑀺𑀩𑁆𑀩𑀸𑀦𑀁 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀜𑁆𑀘𑀸𑀢𑀺. 𑀢𑁂𑀦𑀸𑀳 ‘‘𑀦𑀺𑀩𑁆𑀩𑀸𑀦𑀜𑁆𑀳𑀻’’𑀢𑀺. 𑀢𑀢𑁆𑀣 𑀆𑀕𑀫𑁆𑀫𑀸𑀢𑀺 𑀇𑀤𑀁 𑀬𑁄 𑀙𑀦𑁆𑀤𑀭𑀸𑀕𑀁 𑀯𑀺𑀦𑁂𑀢𑀺 𑀧𑀚𑀳𑀢𑀺, 𑀢𑀲𑁆𑀲 𑀆𑀭𑀫𑁆𑀫𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀻𑀢𑀺 𑀇𑀫𑀺𑀦𑀸 𑀜𑀸𑀢𑀢𑀻𑀭𑀡𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀓𑁄 𑀧𑀦 𑀯𑀸𑀤𑁄 𑀧𑀳𑀸𑀦𑀧𑀭𑀺𑀜𑁆𑀜𑀸𑀬𑀸𑀢𑀺 𑀤𑀲𑁆𑀲𑁂𑀢𑀺? 𑀢𑀣𑀪𑀸𑀯𑀸𑀬𑀸𑀢𑀺 𑀧𑀭𑀺𑀚𑀸𑀦𑀦𑀓𑀪𑀸𑀯𑀸𑀬.