𑁮. 𑀫𑀥𑀼𑀧𑀺𑀡𑁆𑀟𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁯. 𑀚𑀸𑀢𑀺𑀯𑀦𑀦𑁆𑀢𑀺 𑀲𑀬𑀁𑀚𑀸𑀢𑀁 𑀯𑀦𑀁. 𑀢𑁂𑀦𑀸𑀳 ‘‘𑀅𑀭𑁄𑀧𑀺𑀫’’𑀦𑁆𑀢𑀺. 𑀧𑀝𑀺𑀲𑀮𑁆𑀮𑀸𑀦𑀢𑁆𑀣𑀸𑀬𑀸𑀢𑀺 𑀏𑀓𑀻𑀪𑀸𑀯𑀢𑁆𑀣𑀸𑀬, 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑀢𑁄 𑀯𑀸 𑀘𑀺𑀢𑁆𑀢𑀁 𑀧𑀝𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀅𑀘𑁆𑀘𑀦𑁆𑀢𑀲𑀦𑁆𑀢𑁂 𑀦𑀺𑀩𑁆𑀩𑀸𑀦𑁂 𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀅𑀮𑁆𑀮𑀻𑀬𑀸𑀧𑀦𑀢𑁆𑀣𑀁. 𑀤𑀡𑁆𑀟𑁄 𑀧𑀸𑀡𑀺𑀫𑁆𑀳𑀺 𑀅𑀲𑁆𑀲𑀸𑀢𑀺 𑀤𑀡𑁆𑀟𑀧𑀸𑀡𑀺. 𑀬𑀣𑀸 𑀲𑁄 ‘‘𑀤𑀡𑁆𑀟𑀧𑀸𑀡𑀻’’𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀡𑁆𑀟𑀯𑀺𑀢𑁆𑀢𑀢𑀸𑀬𑀸𑀢𑀺 𑀤𑀡𑁆𑀟𑁂 𑀲𑁄𑀡𑁆𑀟𑀢𑀸𑀬. 𑀲𑁄 𑀳𑀺 𑀤𑀡𑁆𑀟𑀧𑀲𑀼𑀢𑁄 𑀤𑀡𑁆𑀟𑀲𑀺𑀧𑁆𑀧𑁂 𑀘 𑀲𑀼𑀓𑀼𑀲𑀮𑁄 𑀢𑀢𑁆𑀣 𑀧𑀸𑀓𑀝𑁄 𑀧𑀜𑁆𑀜𑀸𑀢𑁄, 𑀢𑀲𑁆𑀫𑀸 𑀤𑀡𑁆𑀟𑀁 𑀕𑀳𑁂𑀢𑁆𑀯𑀸𑀯 𑀯𑀺𑀘𑀭𑀢𑀺. 𑀚𑀗𑁆𑀖𑀸𑀓𑀺𑀮𑀫𑀣𑀯𑀺𑀦𑁄𑀤𑀦𑀢𑁆𑀣𑀦𑁆𑀢𑀺 𑀭𑀸𑀚𑀲𑀪𑀸𑀬 𑀘𑀺𑀭𑀦𑀺𑀲𑀚𑁆𑀚𑀸𑀬 𑀉𑀧𑁆𑀧𑀦𑁆𑀦𑀚𑀗𑁆𑀖𑀸𑀧𑀭𑀺𑀲𑁆𑀲𑀫𑀲𑁆𑀲 𑀅𑀧𑀦𑀬𑀦𑀢𑁆𑀣𑀁. 𑀅𑀥𑀺𑀘𑁆𑀘𑀦𑀺𑀓𑁆𑀔𑀫𑀦𑁄𑀢𑀺 𑀬𑀸𑀤𑀺𑀘𑁆𑀙𑀓𑀦𑀺𑀓𑁆𑀔𑀫𑀦𑁄, 𑀦 𑀅𑀪𑀺𑀡𑁆𑀳𑀦𑀺𑀓𑁆𑀔𑀫𑀦𑁄. 𑀑𑀮𑀼𑀩𑁆𑀪𑀸𑀢𑀺 𑀲𑀦𑁆𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀞𑀺𑀢𑁄. 𑀬𑀣𑀸 𑀲𑁄 ‘‘𑀑𑀮𑀼𑀩𑁆𑀪𑀸’’𑀢𑀺 𑀯𑀼𑀢𑁆𑀢𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀕𑁄𑀧𑀸𑀮𑀓𑀤𑀸𑀭𑀓𑁄 𑀯𑀺𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁨𑁦𑁦. 𑀯𑀤𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀸𑀤𑁄, 𑀤𑀺𑀝𑁆𑀞𑀻𑀢𑀺 𑀆𑀳 ‘‘𑀓𑀺𑀁 𑀯𑀸𑀤𑀻𑀢𑀺, 𑀓𑀺𑀁 𑀤𑀺𑀝𑁆𑀞𑀺𑀓𑁄’’𑀢𑀺? 𑀓𑀺𑀫𑀓𑁆𑀔𑀸𑀬𑀻𑀢𑀺 𑀓𑀺𑀫𑀸𑀘𑀺𑀓𑁆𑀔𑀓𑁄, 𑀓𑀻𑀤𑀺𑀲𑀥𑀫𑁆𑀫𑀓𑀣𑁄? 𑀅𑀘𑀺𑀢𑁆𑀢𑀻𑀓𑀸𑀭𑁂𑀦𑀸𑀢𑀺 𑀅𑀦𑀸𑀤𑀭𑁂𑀦. 𑀢𑀣𑀸𑀧𑀼𑀘𑁆𑀙𑀦𑁂 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀲𑁆𑀫𑀸’’𑀢𑀺𑀆𑀤𑀺𑀫𑀸𑀳. 𑀦𑀲𑁆𑀲𑀢𑁂𑀢𑀦𑁆𑀢𑀺 𑀦𑀲𑁆𑀲𑀢𑀼 𑀏𑀢𑀁 𑀓𑀼𑀮𑀁.

𑀅𑀢𑁆𑀣𑀁 𑀦 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑀁 𑀘𑁂 𑀏𑀓𑀤𑁂𑀲𑁂𑀦 𑀚𑀸𑀦𑁂𑀬𑁆𑀬, 𑀢𑀁 𑀫𑀺𑀘𑁆𑀙𑀸 𑀕𑀳𑁂𑀢𑁆𑀯𑀸 𑀧𑀝𑀺𑀧𑁆𑀨𑀭𑀺𑀢𑁆𑀯𑀸𑀧𑀺 𑀢𑀺𑀝𑁆𑀞𑁂𑀬𑁆𑀬. 𑀢𑀲𑁆𑀲 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸𑀢𑀺 𑀢𑀤𑀲𑁆𑀲 𑀅𑀢𑁆𑀣𑀸𑀚𑀸𑀦𑀦𑀁 𑀪𑀕𑀯𑀢𑀸 𑀇𑀘𑁆𑀙𑀺𑀢𑀁. 𑀯𑀺𑀕𑁆𑀕𑀸𑀳𑀺𑀓𑀓𑀣𑀦𑁆𑀢𑀺 𑀯𑀺𑀕𑁆𑀕𑀳𑀓𑀣𑀁, 𑀲𑀸𑀭𑀫𑁆𑀪𑀓𑀣𑀦𑁆𑀢𑀺 𑀅𑀢𑁆𑀣𑁄. 𑀦𑀦𑀼 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀮𑁄𑀓𑁂 𑀧𑀼𑀣𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀦𑀸𑀦𑀸𑀯𑀸𑀤𑀸 𑀲𑀦𑁆𑀢𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀣𑀸𑀕𑀢𑁄 𑀳𑀻’’𑀢𑀺𑀆𑀤𑀺. 𑀦 𑀯𑀺𑀯𑀤𑀢𑀺 𑀯𑀺𑀯𑀸𑀤𑀳𑁂𑀢𑀼𑀓𑀸𑀦𑀁 𑀓𑀸𑀫𑀤𑀺𑀝𑁆𑀞𑀺𑀚𑁆𑀛𑁄𑀲𑀸𑀦𑀸𑀦𑀁 𑀫𑀕𑁆𑀕𑁂𑀦𑁂𑀯 𑀲𑀫𑀼𑀕𑁆𑀖𑀸𑀢𑀺𑀢𑀢𑁆𑀢𑀸, 𑀢𑀤𑀪𑀸𑀯𑀢𑁄 𑀧𑀦 𑀮𑁄𑀓𑁄 𑀢𑀣𑀸𑀕𑀢𑁂𑀦 𑀯𑀺𑀯𑀤𑀢𑀺. 𑀥𑀫𑁆𑀫𑀯𑀸𑀤𑀻 𑀬𑀣𑀸𑀪𑀽𑀢𑀯𑀸𑀤𑀻 𑀥𑀫𑁆𑀫𑀯𑀸𑀤𑀻𑀳𑀺 𑀦 𑀯𑀺𑀯𑀤𑀢𑀺 𑀢𑁂𑀲𑀁 𑀯𑀺𑀯𑀤𑀺𑀢𑀼𑀓𑀸𑀫𑀢𑀸𑀬 𑀏𑀯 𑀅𑀪𑀸𑀯𑀢𑁄, 𑀅𑀥𑀫𑁆𑀫𑀯𑀸𑀤𑀻 𑀧𑀦 𑀢𑀺𑀡𑀸𑀬𑀧𑀺 𑀦𑀫𑀜𑁆𑀜𑀫𑀸𑀦𑁄 𑀢𑁂𑀳𑀺 𑀓𑀺𑀜𑁆𑀘𑀺 𑀯𑀺𑀯𑀤𑀢𑀺. 𑀢𑁂𑀦𑀸𑀳 ‘‘𑀦, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀯𑀸𑀤𑀻 𑀓𑁂𑀦𑀘𑀺 𑀮𑁄𑀓𑀲𑁆𑀫𑀺𑀁 𑀯𑀺𑀯𑀤𑀢𑀻’’𑀢𑀺 (𑀲𑀁. 𑀦𑀺. 𑁩.𑁯𑁪). 𑀅𑀥𑀫𑁆𑀫𑀯𑀸𑀤𑀻 𑀧𑀦 𑀅𑀲𑀫𑀼𑀘𑁆𑀙𑀺𑀦𑁆𑀦𑀯𑀺𑀯𑀸𑀤𑀳𑁂𑀢𑀼𑀓𑀢𑁆𑀢𑀸 𑀯𑀺𑀯𑀤𑀢𑁂𑀯. 𑀢𑀣𑀸 𑀘𑀸𑀳 ‘‘𑀅𑀥𑀫𑁆𑀫𑀯𑀸𑀤𑀻𑀯 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀯𑀤𑀢𑀻’’𑀢𑀺.

𑀬𑀣𑀸 𑀘 𑀧𑀦𑀸𑀢𑀺 𑀏𑀢𑁆𑀣 𑀬𑀣𑀸-𑀲𑀤𑁆𑀤𑁄 ‘‘𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺, 𑀢𑀜𑁆𑀘 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁧𑁨𑁨) 𑀯𑀺𑀬 𑀓𑀸𑀭𑀡𑀢𑁆𑀣𑁄𑀢𑀺 𑀆𑀳 ‘‘𑀬𑁂𑀦 𑀓𑀸𑀭𑀡𑁂𑀦𑀸’’𑀢𑀺. 𑀓𑀸𑀭𑀡𑀸𑀓𑀸𑀭𑁄 𑀯𑀸 𑀇𑀥 𑀬𑀣𑀸-𑀲𑀤𑁆𑀤𑁂𑀦 𑀯𑀼𑀢𑁆𑀢𑁄, 𑀲𑁄 𑀧𑀦 𑀅𑀢𑁆𑀣𑀢𑁄 𑀓𑀸𑀭𑀡𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀬𑁂𑀦 𑀓𑀸𑀭𑀡𑁂𑀦𑀸’’𑀢𑀺. ‘‘𑀇𑀤𑀁 𑀓𑀣𑀁 𑀇𑀤𑀁 𑀓𑀣𑀁’’𑀢𑀺 𑀧𑀯𑀢𑁆𑀢𑀦𑀢𑁄 𑀓𑀣𑀁𑀓𑀣𑀸, 𑀯𑀺𑀘𑀺𑀓𑀺𑀘𑁆𑀙𑀸. 𑀲𑀸 𑀬𑀲𑁆𑀲 𑀦𑀢𑁆𑀣𑀺, 𑀲𑁄 𑀅𑀓𑀣𑀁𑀓𑀣𑀻, 𑀢𑀁 𑀅𑀓𑀣𑀁𑀓𑀣𑀺𑀁. 𑀯𑀺𑀧𑁆𑀧𑀝𑀺𑀲𑀸𑀭𑀓𑀼𑀓𑁆𑀓𑀼𑀘𑁆𑀘𑀁 𑀪𑀕𑀯𑀢𑀸 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦𑁂𑀯 𑀙𑀺𑀦𑁆𑀦𑀁, 𑀳𑀢𑁆𑀣𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀁 𑀅𑀕𑁆𑀕𑀫𑀕𑁆𑀕𑁂𑀦 𑀆𑀯𑁂𑀡𑀺𑀓𑀥𑀫𑁆𑀫𑀸𑀥𑀺𑀕𑀫𑀢𑁄. 𑀅𑀧𑀭𑀸𑀧𑀭𑀁 𑀉𑀧𑁆𑀧𑀚𑁆𑀚𑀦𑀓𑀪𑀯𑁄 ‘‘𑀪𑀯𑀸𑀪𑀯𑁄’’𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀧𑀼𑀦𑀧𑁆𑀧𑀼𑀦𑀩𑁆𑀪𑀯𑁂’’𑀢𑀺. 𑀲𑀁𑀯𑀭𑀸𑀲𑀁𑀯𑀭𑁄 𑀨𑀮𑀸𑀨𑀮𑀁 𑀯𑀺𑀬 𑀔𑀼𑀤𑁆𑀤𑀓𑀫𑀳𑀦𑁆𑀢𑁄 𑀪𑀯𑁄 ‘‘𑀪𑀯𑀸𑀪𑀯𑁄’’𑀢𑀺 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀳𑀻𑀦𑀧𑀡𑀻𑀢𑁂 𑀯𑀸 𑀪𑀯𑁂’’𑀢𑀺. 𑀪𑀯𑁄 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑁄 ‘‘𑀅𑀪𑀯𑁄’’𑀢𑀺 𑀯𑀼𑀘𑁆𑀘𑀢𑀺 𑀬𑀣𑀸 ‘‘𑀅𑀲𑁂𑀓𑁆𑀔𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑁧𑁧.𑀢𑀺𑀓𑀫𑀸𑀢𑀺𑀓𑀸). 𑀓𑀺𑀮𑁂𑀲𑀲𑀜𑁆𑀜𑀸𑀢𑀺 𑀓𑀸𑀫𑀲𑀜𑁆𑀜𑀸𑀤𑀺𑀓𑁂 𑀯𑀤𑀢𑀺. 𑀓𑀺𑀮𑁂𑀲𑀸 𑀏𑀯 𑀯𑀸 𑀲𑀜𑁆𑀜𑀸𑀦𑀸𑀫𑁂𑀦 𑀯𑀼𑀢𑁆𑀢𑀸 ‘‘𑀲𑀜𑁆𑀜𑀸 𑀧𑀳𑀸𑀬 𑀅𑀫𑀢𑀁 𑀏𑀯 𑀧𑀸𑀧𑀼𑀡𑀸𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀅𑀢𑁆𑀢𑀦𑁄 𑀔𑀻𑀡𑀸𑀲𑀯𑀪𑀸𑀯𑀁 𑀤𑀻𑀧𑁂𑀢𑀻𑀢𑀺 𑀇𑀫𑀺𑀦𑀸𑀯 𑀧𑀭𑁂𑀲𑀜𑁆𑀘 𑀢𑀣𑀢𑁆𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀺𑀪𑀸𑀯𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀻𑀳𑀭𑀺𑀢𑁆𑀯𑀸 𑀓𑀻𑀴𑀸𑀧𑁂𑀢𑁆𑀯𑀸𑀢𑀺 𑀦𑀻𑀳𑀭𑀺𑀢𑁆𑀯𑀸 𑀘𑁂𑀯 𑀓𑀻𑀴𑀸𑀧𑁂𑀢𑁆𑀯𑀸 𑀘, 𑀦𑀻𑀳𑀭𑀡𑀯𑀲𑁂𑀦 𑀯𑀸 𑀓𑀻𑀴𑀸𑀧𑁂𑀢𑁆𑀯𑀸. 𑀢𑀺𑀯𑀺𑀲𑀸𑀔𑀦𑁆𑀢𑀺 𑀢𑀺𑀪𑀗𑁆𑀕𑀪𑀸𑀓𑀼𑀝𑀺 𑀯𑀺𑀬 𑀦𑀮𑀸𑀝𑁂 𑀚𑀸𑀢𑀢𑁆𑀢𑀸 𑀦𑀮𑀸𑀝𑀺𑀓𑀁.

𑁨𑁦𑁧. 𑀓𑀺𑀦𑁆𑀢𑀺 𑀦𑀼 𑀔𑁄𑀢𑀺 𑀓𑀺𑀁 𑀓𑀸𑀭𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀦𑀼𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸𑀢𑀺 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀁 𑀉𑀝𑁆𑀞𑀧𑁂𑀢𑁆𑀯𑀸. 𑀬𑀢𑁄𑀦𑀺𑀤𑀸𑀦𑀦𑁆𑀢𑀺 𑀬𑀁𑀦𑀺𑀤𑀸𑀦𑀁, 𑀬𑀁𑀓𑀸𑀭𑀡𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀼𑀭𑀺𑀫𑀧𑀤𑁂 𑀳𑀺 𑀯𑀺𑀪𑀢𑁆𑀢𑀺 𑀅𑀮𑁄𑀧𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄, 𑀙𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀬𑀢𑀦𑀸𑀤𑀺𑀦𑀺𑀤𑀸𑀦𑀦𑁆𑀢𑀺 𑀅𑀬𑀫𑁂𑀯 𑀅𑀢𑁆𑀣𑁄. 𑀲𑀗𑁆𑀔𑀸𑀬𑀦𑁆𑀢𑀺 𑀲𑀗𑁆𑀔𑀸𑀪𑀸𑀯𑁂𑀦 𑀜𑀸𑀬𑀦𑁆𑀢𑀻𑀢𑀺 𑀲𑀗𑁆𑀔𑀸𑀢𑀺 𑀆𑀳 ‘‘𑀲𑀗𑁆𑀔𑀸𑀢𑀺 𑀓𑁄𑀝𑁆𑀞𑀸𑀲𑀸’’𑀢𑀺. 𑀓𑀸𑀫𑀜𑁆𑀘𑁂𑀢𑁆𑀣 𑀫𑀸𑀦𑁄𑀧𑀺 𑀧𑀧𑀜𑁆𑀘𑁄, 𑀅𑀪𑀺𑀦𑀦𑁆𑀤𑀦𑀲𑀪𑀸𑀯𑁂 𑀏𑀯 𑀧𑀦 𑀕𑀡𑁆𑀳𑀦𑁆𑀢𑁄 ‘‘𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀧𑀧𑀜𑁆𑀘𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 𑀆𑀳. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀅𑀪𑀺𑀦𑀦𑁆𑀤𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺. 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀲𑀩𑁆𑀩𑀲𑁄 𑀉𑀤𑁆𑀥𑀁 𑀉𑀤𑁆𑀥𑀁 𑀧𑀭𑀺𑀬𑀸𑀤𑀸𑀬 𑀧𑀯𑀢𑁆𑀢𑀦𑁆𑀢𑀺. 𑀫𑀭𑀺𑀬𑀸𑀤𑀢𑁆𑀣𑁄 𑀳𑀺 𑀅𑀬𑀫𑀸𑀓𑀸𑀭𑁄, 𑀢𑁂𑀦 𑀘 𑀬𑁄𑀕𑁂𑀦 𑀧𑀼𑀭𑀺𑀲𑀦𑁆𑀢𑀺 𑀉𑀧𑀬𑁄𑀕𑀯𑀘𑀦𑀁 𑀬𑀣𑀸 ‘‘𑀢𑀣𑀸𑀕𑀢𑀁, 𑀪𑀺𑀓𑁆𑀔𑀯𑁂, 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀤𑁆𑀯𑁂 𑀯𑀺𑀢𑀓𑁆𑀓𑀸 𑀲𑀫𑀼𑀤𑀸𑀘𑀭𑀦𑁆𑀢𑀻’’𑀢𑀺 (𑀇𑀢𑀺𑀯𑀼. 𑁩𑁮). 𑀢𑀡𑁆𑀳𑀸𑀤𑀬𑁄 𑀘 𑀬𑀣𑀸𑀲𑀓𑀁 𑀧𑀯𑀢𑁆𑀢𑀺𑀆𑀓𑀸𑀭𑀁 𑀅𑀯𑀺𑀮𑀗𑁆𑀖𑀦𑁆𑀢𑀺𑀬𑁄 𑀆𑀲𑁂𑀯𑀦𑀯𑀲𑁂𑀦 𑀉𑀧𑀭𑀽𑀧𑀭𑀺 𑀧𑀯𑀢𑁆𑀢𑀦𑁆𑀢𑀺. 𑀢𑀣𑀸 𑀳𑀺 𑀢𑀸 ‘‘𑀧𑀧𑀜𑁆𑀘𑀲𑀗𑁆𑀔𑀸’’𑀢𑀺 𑀯𑀼𑀢𑁆𑀢𑀸.

𑀓𑀸𑀭𑀡𑁂𑀢𑀺 𑀧𑀯𑀢𑁆𑀢𑀺𑀧𑀘𑁆𑀘𑀬𑁂. 𑀏𑀓𑀸𑀬𑀢𑀦𑀫𑁆𑀧𑀺 …𑀧𑁂… 𑀦𑀢𑁆𑀣𑀻𑀢𑀺 𑀘𑀓𑁆𑀔𑀸𑀬𑀢𑀦𑀸𑀤𑀺 𑀏𑀓𑀫𑁆𑀧𑀺 𑀆𑀬𑀢𑀦𑀁 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁 𑀅𑀪𑀺𑀯𑀤𑀺𑀢𑀩𑁆𑀩𑀁 𑀅𑀚𑁆𑀛𑁄𑀲𑀺𑀢𑀩𑁆𑀩𑀜𑁆𑀘 𑀦𑀢𑁆𑀣𑀺 𑀘𑁂, 𑀦𑀦𑀼 𑀦𑀢𑁆𑀣𑀺 𑀏𑀯, 𑀓𑀲𑁆𑀫𑀸 ‘‘𑀦𑀢𑁆𑀣𑀺 𑀘𑁂’’𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀲𑀘𑁆𑀘𑀁 𑀦𑀢𑁆𑀣𑀺, 𑀅𑀧𑁆𑀧𑀳𑀻𑀦𑀸𑀪𑀺𑀦𑀦𑁆𑀤𑀦𑀸𑀪𑀺𑀯𑀤𑀦𑀅𑀚𑁆𑀛𑁄𑀲𑀸𑀦𑀸𑀦𑀁 𑀧𑀦 𑀧𑀼𑀣𑀼𑀚𑁆𑀚𑀦𑀸𑀦𑀁 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀸𑀤𑀺𑀧𑁆𑀧𑀓𑀸𑀭𑀸𑀦𑀺 𑀆𑀬𑀢𑀦𑀸𑀦𑀺 𑀳𑁄𑀦𑁆𑀢𑀻𑀢𑀺 𑀢𑁂𑀲𑀁 𑀦 𑀲𑀓𑁆𑀓𑀸 𑀦𑀢𑁆𑀣𑀻𑀢𑀺 𑀯𑀢𑁆𑀢𑀼, 𑀧𑀳𑀻𑀦𑀸𑀪𑀺𑀦𑀦𑁆𑀤𑀦𑀸𑀤𑀻𑀦𑀁 𑀧𑀦 𑀲𑀩𑁆𑀩𑀣𑀸 𑀦𑀢𑁆𑀣𑀻𑀢𑀺 ‘‘𑀦𑀢𑁆𑀣𑀺 𑀘𑁂’’𑀢𑀺 𑀯𑀼𑀢𑁆𑀢𑀁. 𑀅𑀳𑀁 𑀫𑀫𑀦𑁆𑀢𑀺 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀦𑁆𑀢𑀺 𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀸𑀬 ‘‘𑀅𑀳’’𑀦𑁆𑀢𑀺 𑀢𑀡𑁆𑀳𑀸𑀪𑀺𑀦𑀦𑁆𑀤𑀦𑀸𑀬 ‘‘𑀫𑀫’’𑀦𑁆𑀢𑀺 𑀭𑁄𑀘𑁂𑀢𑀩𑁆𑀩𑀁. 𑀅𑀪𑀺𑀯𑀤𑀺𑀢𑀩𑁆𑀩𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑀲𑀫𑀼𑀝𑁆𑀞𑀸𑀧𑀦𑀯𑀲𑁂𑀦 𑀯𑀢𑁆𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀅𑀳𑀁 𑀫𑀫𑀦𑁆𑀢𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺. 𑀅𑀚𑁆𑀛𑁄𑀲𑀺𑀢𑁆𑀯𑀸𑀢𑀺 𑀤𑀺𑀝𑁆𑀞𑀺 𑀢𑀡𑁆𑀳𑀸 𑀯𑀢𑁆𑀣𑀼𑀁 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀕𑀸𑀳𑀤𑁆𑀯𑀬𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀯𑀺𑀬 𑀓𑀢𑁆𑀯𑀸. 𑀢𑁂𑀦𑀸𑀳 ‘‘𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸’’𑀢𑀺. 𑀏𑀢𑁂𑀦𑀸𑀢𑀺 ‘‘𑀏𑀢𑁆𑀣 𑀘𑁂 𑀦𑀢𑁆𑀣𑀻’’𑀢𑀺𑀆𑀤𑀺𑀯𑀘𑀦𑁂𑀦. 𑀏𑀢𑁆𑀣𑀸𑀢𑀺 𑀆𑀬𑀢𑀦𑁂𑀲𑀼. 𑀢𑀡𑁆𑀳𑀸𑀤𑀻𑀦𑀁 𑀅𑀯𑀢𑁆𑀣𑀼𑀪𑀸𑀯𑀤𑀲𑁆𑀲𑀦𑀫𑀼𑀔𑁂𑀦 𑀢𑀡𑁆𑀳𑀸𑀤𑀻𑀦𑀁𑀬𑁂𑀯 𑀅𑀧𑁆𑀧𑀯𑀢𑁆𑀢𑀺𑀁 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀁 𑀓𑀣𑀺𑀢𑀦𑁆𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀏𑀲𑁂𑀯𑀦𑁆𑀢𑁄’’𑀢𑀺𑀆𑀤𑀺, 𑀅𑀬𑀫𑁂𑀯 𑀅𑀪𑀺𑀦𑀦𑁆𑀤𑀦𑀸𑀤𑀻𑀦𑀁 𑀦𑀢𑁆𑀣𑀺𑀪𑀸𑀯𑀓𑀭𑁄 𑀫𑀕𑁆𑀕𑁄, 𑀢𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀪𑀽𑀢𑀁 𑀨𑀮𑀁, 𑀢𑀁𑀦𑀺𑀲𑁆𑀲𑀭𑀡𑀁 𑀯𑀸 𑀦𑀺𑀩𑁆𑀩𑀸𑀦𑀁 𑀭𑀸𑀕𑀸𑀦𑀼𑀲𑀬𑀸𑀤𑀻𑀦𑀁 𑀅𑀦𑁆𑀢𑁄 𑀅𑀯𑀲𑀸𑀦𑀁 𑀅𑀧𑁆𑀧𑀯𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀬𑀁 …𑀧𑁂… 𑀅𑀦𑁆𑀢𑁄’’𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 ‘‘𑀏𑀲𑁂𑀯𑀦𑁆𑀢𑁄 𑀧𑀝𑀺𑀖𑀸𑀦𑀼𑀲𑀬𑀸𑀦𑀁’’𑀢𑀺𑀆𑀤𑀻𑀲𑀼 𑀲𑀩𑁆𑀩𑀧𑀤𑁂𑀲𑀼.

𑀆𑀤𑀺𑀬𑀢𑀻𑀢𑀺 𑀧𑀳𑀸𑀭𑀤𑀸𑀦𑀸𑀤𑀺𑀯𑀲𑁂𑀦 𑀕𑀬𑁆𑀳𑀢𑀺. 𑀫𑀢𑁆𑀣𑀓𑀧𑁆𑀧𑀢𑁆𑀢𑀁 𑀓𑀮𑀳𑀦𑁆𑀢𑀺 𑀪𑀡𑁆𑀟𑀦𑀸𑀤𑀺𑀫𑀢𑁆𑀢𑁂 𑀅𑀝𑁆𑀞𑀢𑁆𑀯𑀸 𑀫𑀼𑀔𑀲𑀢𑁆𑀢𑀻𑀳𑀺 𑀯𑀺𑀢𑀼𑀤𑀦𑀸𑀤𑀺𑀯𑀲𑁂𑀦 𑀫𑀢𑁆𑀣𑀓𑀧𑁆𑀧𑀢𑁆𑀢𑀁 𑀓𑀮𑀳𑀁. 𑀬𑀸𑀬 𑀓𑀭𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀺𑀭𑀼𑀤𑁆𑀥𑀕𑁆𑀕𑀸𑀳𑀯𑀲𑁂𑀦 𑀦𑀸𑀦𑀸𑀕𑀸𑀳𑀫𑀢𑁆𑀢𑀁, 𑀢𑀣𑀸 𑀯𑀺𑀭𑀼𑀤𑁆𑀥𑀯𑀸𑀤𑀯𑀲𑁂𑀦 𑀦𑀸𑀦𑀸𑀯𑀸𑀤𑀫𑀢𑁆𑀢𑀁. 𑀏𑀯𑀁 𑀧𑀯𑀢𑁆𑀢𑀦𑁆𑀢𑀺 𑀕𑀭𑀼𑀓𑀸𑀢𑀩𑁆𑀩𑁂𑀲𑀼𑀧𑀺 𑀕𑀸𑀭𑀯𑀁 𑀅𑀓𑀢𑁆𑀯𑀸 ‘‘𑀢𑀼𑀯𑀁 𑀢𑀼𑀯’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀁 𑀲𑀸𑀭𑀫𑁆𑀪𑀓𑀣𑀁, 𑀬𑀸𑀬 𑀘𑁂𑀢𑀦𑀸𑀬 𑀬𑀁 𑀓𑀭𑁄𑀢𑀺, 𑀲𑀸 𑀢𑀼𑀯𑀁 𑀢𑀼𑀯𑀁. 𑀦𑀺𑀲𑁆𑀲𑀸𑀬𑀸𑀢𑀺 𑀧𑀝𑀺𑀘𑁆𑀘, 𑀦𑀺𑀲𑁆𑀲𑀬𑀸𑀤𑀺𑀧𑀘𑁆𑀘𑀬𑁂 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀺𑀮𑁂𑀲𑀸𑀦𑀁 𑀉𑀧𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀢𑀸 𑀢𑀸𑀯 𑀆𑀬𑀢𑀦𑀸𑀦𑀁 𑀳𑁄𑀢𑀼 𑀢𑀩𑁆𑀪𑀸𑀯𑁂 𑀪𑀸𑀯𑀢𑁄, 𑀦𑀺𑀭𑁄𑀥𑀦𑀺𑀫𑀺𑀢𑁆𑀢𑀢𑀸 𑀧𑀦 𑀓𑀣𑀁. 𑀦 𑀳𑁂𑀢𑁆𑀣 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀁 𑀲𑀗𑁆𑀕𑀳𑁄 𑀮𑁄𑀓𑀺𑀬𑀸𑀦𑀁𑀬𑁂𑀯 𑀅𑀥𑀺𑀧𑁆𑀧𑁂𑀢𑀢𑁆𑀢𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀦𑀺𑀭𑀼𑀚𑁆𑀛𑀫𑀸𑀦𑀸𑀧𑀻’’𑀢𑀺𑀆𑀤𑀺. 𑀦𑀸𑀫𑀫𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀢𑁆𑀣𑀼𑀧𑁆𑀧𑀦𑁆𑀦𑀸, 𑀢𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸 𑀳𑁄𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀢𑀫𑀢𑁆𑀣𑀁 𑀲𑀼𑀢𑁆𑀢𑀦𑁆𑀢𑀭𑁂𑀦 𑀲𑀸𑀥𑁂𑀦𑁆𑀢𑁄 ‘‘𑀲𑁆𑀯𑀸𑀬𑀫𑀢𑁆𑀣𑁄’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀲𑀫𑀼𑀤𑀬𑀲𑀘𑁆𑀘𑀧𑀜𑁆𑀳𑁂𑀦𑀸𑀢𑀺 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑁂 𑀲𑀫𑀼𑀤𑀬𑀲𑀘𑁆𑀘𑀦𑀺𑀤𑁆𑀤𑁂𑀲𑁂𑀦. 𑀲𑁄 𑀳𑀺 ‘‘𑀓𑀢𑁆𑀣 𑀉𑀧𑁆𑀧𑀚𑁆𑀚𑀫𑀸𑀦𑀸’’𑀢𑀺𑀆𑀤𑀺𑀦𑀸 𑀧𑀼𑀘𑁆𑀙𑀸𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀧𑀜𑁆𑀳𑁄𑀢𑀺 𑀯𑀼𑀢𑁆𑀢𑁄. 𑀦𑀦𑀼 𑀢𑀢𑁆𑀣 𑀢𑀡𑁆𑀳𑀸𑀬 𑀉𑀧𑁆𑀧𑀢𑁆𑀢𑀺𑀦𑀺𑀭𑁄𑀥𑀸 𑀯𑀼𑀢𑁆𑀢𑀸, 𑀦 𑀲𑀩𑁆𑀩𑀓𑀺𑀮𑁂𑀲𑀸𑀦𑀦𑁆𑀢𑀺 𑀈𑀤𑀺𑀲𑀻 𑀘𑁄𑀤𑀦𑀸 𑀅𑀦𑀯𑀓𑀸𑀲𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑁂𑀯 𑀘𑀸’’𑀢𑀺𑀆𑀤𑀺𑀫𑀸𑀳. 𑀮𑀤𑁆𑀥𑀯𑁄𑀳𑀸𑀭𑁂𑀢𑀺 𑀇𑀫𑀺𑀦𑀸 𑀭𑀸𑀕𑀸𑀤𑀻𑀦𑀁 𑀅𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀢𑀸𑀬 𑀅𑀦𑁆𑀢𑁄𑀢𑀺 𑀲𑀫𑀜𑁆𑀜𑀸 𑀦𑀺𑀩𑁆𑀩𑀸𑀦𑀲𑁆𑀲𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁂𑀦𑁂𑀯 𑀅𑀪𑀺𑀦𑀦𑁆𑀤𑀦𑀸𑀤𑀻𑀦𑀁 𑀅𑀪𑀸𑀯𑁄𑀢𑀺 𑀘 𑀇𑀤𑀁 𑀲𑀁𑀯𑀡𑁆𑀡𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀣𑀁 𑀧𑀦 𑀲𑀩𑁆𑀩𑀲𑀗𑁆𑀔𑀢𑀯𑀺𑀦𑀺𑀲𑁆𑀲𑀝𑁂 𑀦𑀺𑀩𑁆𑀩𑀸𑀦𑁂 𑀅𑀓𑀼𑀲𑀮𑀥𑀫𑁆𑀫𑀸𑀦𑀁 𑀦𑀺𑀭𑁄𑀥𑀲𑀫𑁆𑀪𑀯𑁄𑀢𑀺 𑀆𑀳 ‘‘𑀬𑀜𑁆𑀳𑀺 𑀬𑀢𑁆𑀣 𑀦𑀢𑁆𑀣𑀺, 𑀢𑀁 𑀢𑀢𑁆𑀣 𑀦𑀺𑀭𑀼𑀤𑁆𑀥𑀁 𑀦𑀸𑀫 𑀳𑁄𑀢𑀻’’𑀢𑀺. 𑀬𑁆𑀯𑀸𑀬𑀁 𑀅𑀧𑁆𑀧𑀯𑀢𑁆𑀢𑀺𑀬𑀁 𑀦𑀺𑀭𑁄𑀥𑀯𑁄𑀳𑀸𑀭𑁄 𑀯𑀼𑀢𑁆𑀢𑁄, 𑀲𑁆𑀯𑀸𑀬𑀫𑀢𑁆𑀣𑁄 𑀦𑀺𑀭𑁄𑀥𑀧𑀜𑁆𑀳𑁂𑀦 𑀤𑀻𑀧𑁂𑀢𑀩𑁆𑀩𑁄. 𑀦 𑀳𑀺 𑀢𑀢𑁆𑀣 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸𑀢𑀺 𑀯𑀼𑀢𑁆𑀢𑀸, 𑀅𑀣 𑀔𑁄 𑀅𑀧𑁆𑀧𑀯𑀢𑁆𑀢𑀸 𑀏𑀯𑀸𑀢𑀺.

𑁨𑁦𑁩. 𑀏𑀯𑀁𑀲𑀫𑁆𑀧𑀤𑀦𑁆𑀢𑀺 𑀏𑀯𑀁𑀲𑀫𑁆𑀧𑀚𑁆𑀚𑀦𑀓𑀁 𑀏𑀯𑀁 𑀧𑀲𑁆𑀲𑀺𑀢𑀩𑁆𑀩𑀁 𑀇𑀤𑀁 𑀫𑀫 𑀅𑀚𑁆𑀛𑁂𑀲𑀦𑀁. 𑀢𑁂𑀦𑀸𑀳 ‘‘𑀈𑀤𑀺𑀲𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀚𑀸𑀦𑀁 𑀚𑀸𑀦𑀸𑀢𑀻𑀢𑀺 (𑀅. 𑀦𑀺. 𑀝𑀻. 𑁩.𑁧𑁦.𑁧𑁧𑁩-𑁧𑁧𑁬) 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀚𑀸𑀦𑀺𑀢𑀩𑁆𑀩𑀁 𑀲𑀩𑁆𑀩𑀁 𑀚𑀸𑀦𑀸𑀢𑀺. 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 𑀳𑀺 𑀅𑀯𑀺𑀲𑁂𑀲𑀕𑁆𑀕𑀳𑀡𑁂𑀦 𑀘 ‘‘𑀚𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀦𑀺𑀭𑀯𑀲𑁂𑀲𑀁 𑀜𑁂𑀬𑁆𑀬𑀚𑀸𑀢𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀢𑀩𑁆𑀩𑀺𑀲𑀬𑀸𑀬 𑀚𑀸𑀦𑀦𑀓𑀺𑀭𑀺𑀬𑀸𑀬 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯 𑀓𑀭𑀡𑀁 𑀪𑀯𑀺𑀢𑀼𑀁 𑀬𑀼𑀢𑁆𑀢𑀁. 𑀅𑀣 𑀯𑀸 𑀧𑀓𑀭𑀡𑀯𑀲𑁂𑀦 ‘‘𑀪𑀕𑀯𑀸’’𑀢𑀺 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑁂𑀦 𑀘𑀸𑀬𑀫𑀢𑁆𑀣𑁄 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀧𑀲𑁆𑀲𑀺𑀢𑀩𑁆𑀩𑀫𑁂𑀯 𑀧𑀲𑁆𑀲𑀢𑀻𑀢𑀺 𑀤𑀺𑀩𑁆𑀩𑀘𑀓𑁆𑀔𑀼-𑀧𑀜𑁆𑀜𑀸𑀘𑀓𑁆𑀔𑀼-𑀥𑀫𑁆𑀫𑀘𑀓𑁆𑀔𑀼-𑀩𑀼𑀤𑁆𑀥𑀘𑀓𑁆𑀔𑀼-𑀲𑀫𑀦𑁆𑀢𑀘𑀓𑁆𑀔𑀼-𑀲𑀗𑁆𑀔𑀸𑀢𑁂𑀳𑀺 𑀜𑀸𑀡𑀘𑀓𑁆𑀔𑀽𑀳𑀺 𑀧𑀲𑁆𑀲𑀺𑀢𑀩𑁆𑀩𑀁 𑀧𑀲𑁆𑀲𑀢𑀺 𑀏𑀯. 𑀅𑀣 𑀯𑀸 𑀚𑀸𑀦𑀁 𑀚𑀸𑀦𑀸𑀢𑀻𑀢𑀺 𑀬𑀣𑀸 𑀅𑀜𑁆𑀜𑁂 𑀲𑀯𑀺𑀧𑀮𑁆𑀮𑀸𑀲𑀸 𑀓𑀸𑀫𑀭𑀽𑀧𑀧𑀭𑀺𑀜𑁆𑀜𑀸𑀯𑀸𑀤𑀺𑀦𑁄 𑀚𑀸𑀦𑀦𑁆𑀢𑀸𑀧𑀺 𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀚𑀸𑀦𑀦𑁆𑀢𑀺, 𑀦 𑀏𑀯𑀁 𑀪𑀕𑀯𑀸. 𑀪𑀕𑀯𑀸 𑀧𑀦 𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀢𑁆𑀢𑀸 𑀚𑀸𑀦𑀦𑁆𑀢𑁄 𑀚𑀸𑀦𑀸𑀢𑀺 𑀏𑀯, 𑀤𑀺𑀝𑁆𑀞𑀺𑀤𑀲𑁆𑀲𑀦𑀲𑁆𑀲 𑀘 𑀅𑀪𑀸𑀯𑀸 𑀧𑀲𑁆𑀲𑀦𑁆𑀢𑁄 𑀧𑀲𑁆𑀲𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀤𑀲𑁆𑀲𑀦𑀧𑀭𑀺𑀡𑀸𑀬𑀓𑀝𑁆𑀞𑁂𑀦𑀸𑀢𑀺 𑀬𑀣𑀸 𑀘𑀓𑁆𑀔𑀼 𑀲𑀢𑁆𑀢𑀸𑀦𑀁 𑀤𑀲𑁆𑀲𑀦𑀢𑁆𑀣𑀁 𑀧𑀭𑀺𑀡𑁂𑀢𑀺, 𑀏𑀯𑀁 𑀮𑁄𑀓𑀲𑁆𑀲 𑀬𑀸𑀣𑀸𑀯𑀤𑀲𑁆𑀲𑀦𑀲𑀸𑀥𑀦𑀢𑁄 𑀤𑀲𑁆𑀲𑀦𑀓𑀺𑀘𑁆𑀘𑀧𑀭𑀺𑀡𑀸𑀬𑀓𑀝𑁆𑀞𑁂𑀦 𑀘𑀓𑁆𑀔𑀼𑀪𑀽𑀢𑁄, 𑀧𑀜𑁆𑀜𑀸𑀘𑀓𑁆𑀔𑀼𑀫𑀬𑀢𑁆𑀢𑀸 𑀯𑀸 𑀲𑀬𑀫𑁆𑀪𑀼𑀜𑀸𑀡𑁂𑀦 𑀧𑀜𑁆𑀜𑀸𑀘𑀓𑁆𑀔𑀼𑀁 𑀪𑀽𑀢𑁄 𑀧𑀢𑁆𑀢𑁄𑀢𑀺 𑀯𑀸 𑀘𑀓𑁆𑀔𑀼𑀪𑀽𑀢𑁄. 𑀜𑀸𑀡𑀪𑀽𑀢𑁄𑀢𑀺 𑀏𑀢𑀲𑁆𑀲 𑀘 𑀏𑀯𑀫𑁂𑀯 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀥𑀫𑁆𑀫𑀸 𑀯𑀸 𑀩𑁄𑀥𑀺𑀧𑀓𑁆𑀔𑀺𑀬𑀸 𑀢𑁂𑀳𑀺 𑀉𑀧𑁆𑀧𑀦𑁆𑀦𑀢𑁆𑀢𑀸 𑀮𑁄𑀓𑀲𑁆𑀲 𑀘 𑀢𑀤𑀼𑀧𑁆𑀧𑀸𑀤𑀦𑀢𑁄, 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀯𑀸 𑀥𑀫𑁆𑀫𑀁 𑀧𑀢𑁆𑀢𑁄𑀢𑀺 𑀥𑀫𑁆𑀫𑀪𑀽𑀢𑁄. 𑀩𑁆𑀭𑀳𑁆𑀫𑀸 𑀯𑀼𑀘𑁆𑀘𑀢𑀺 𑀫𑀕𑁆𑀕𑁄 𑀢𑁂𑀦 𑀉𑀧𑁆𑀧𑀦𑁆𑀦𑀢𑁆𑀢𑀸 𑀮𑁄𑀓𑀲𑁆𑀲 𑀘 𑀢𑀤𑀼𑀧𑁆𑀧𑀸𑀤𑀦𑀢𑁆𑀢𑀸, 𑀢𑀜𑁆𑀘 𑀲𑀬𑀫𑁆𑀪𑀼𑀜𑀸𑀡𑁂𑀦 𑀧𑀢𑁆𑀢𑁄𑀢𑀺 𑀩𑁆𑀭𑀳𑁆𑀫𑀪𑀽𑀢𑁄. 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀯𑀤𑀢𑀻𑀢𑀺 𑀯𑀢𑁆𑀢𑀸. 𑀘𑀺𑀭𑀁 𑀲𑀘𑁆𑀘𑀧𑀝𑀺𑀯𑁂𑀥𑀁 𑀧𑀯𑀢𑁆𑀢𑁂𑀦𑁆𑀢𑁄 𑀯𑀤𑀢𑀻𑀢𑀺 𑀧𑀯𑀢𑁆𑀢𑀸. 𑀅𑀢𑁆𑀣𑀁 𑀦𑀻𑀳𑀭𑀺𑀢𑁆𑀯𑀸𑀢𑀺 𑀤𑀼𑀓𑁆𑀔𑀸𑀤𑀺𑀅𑀢𑁆𑀣𑀁 𑀢𑀢𑁆𑀣𑀸𑀧𑀺 𑀧𑀻𑀴𑀦𑀸𑀤𑀺𑀅𑀢𑁆𑀣𑀁 𑀉𑀤𑁆𑀥𑀭𑀺𑀢𑁆𑀯𑀸. 𑀧𑀭𑀫𑀢𑁆𑀣𑀁 𑀯𑀸 𑀦𑀺𑀩𑁆𑀩𑀸𑀦𑀁 𑀧𑀸𑀧𑀬𑀺𑀢𑀸, 𑀅𑀫𑀢𑀲𑀘𑁆𑀙𑀺𑀓𑀺𑀭𑀺𑀬𑀁 𑀲𑀢𑁆𑀢𑁂𑀲𑀼 𑀉𑀧𑁆𑀧𑀸𑀤𑁂𑀦𑁆𑀢𑁄 𑀅𑀫𑀢𑀁 𑀤𑀤𑀸𑀢𑀻𑀢𑀺 𑀅𑀫𑀢𑀲𑁆𑀲 𑀤𑀸𑀢𑀸. 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁 𑀢𑀤𑀸𑀬𑀢𑁆𑀢𑀪𑀸𑀯𑀢𑁄 𑀥𑀫𑁆𑀫𑀲𑁆𑀲𑀸𑀫𑀻.

𑁨𑁦𑁪. 𑀲𑁄 𑀯𑀸 𑀉𑀤𑁆𑀤𑁂𑀲𑁄 𑀅𑀢𑁆𑀢𑀦𑁄𑀧𑀺 𑀳𑁄𑀢𑀻𑀢𑀺 𑀣𑁂𑀭𑁄 ‘‘𑀬𑀁 𑀔𑁄 𑀦𑁄’’𑀢𑀺 𑀆𑀳. 𑀲𑀩𑁆𑀩𑀮𑁄𑀓𑀲𑀸𑀥𑀸𑀭𑀡𑀸 𑀳𑀺 𑀩𑀼𑀤𑁆𑀥𑀸𑀦𑀁 𑀤𑁂𑀲𑀦𑀸𑀢𑀺. 𑀇𑀤𑀸𑀦𑀺 𑀬𑁂𑀳𑀺 𑀤𑁆𑀯𑀸𑀭𑀸𑀭𑀫𑁆𑀫𑀡𑁂𑀳𑀺 𑀧𑀼𑀭𑀺𑀲𑀁 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀢𑀸𑀦𑀺 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸 𑀤𑀲𑁆𑀲𑁂𑀢𑀼𑀁 𑀬𑁂𑀦 𑀲𑀴𑀸𑀬𑀢𑀦𑀯𑀺𑀪𑀗𑁆𑀕𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀓𑁆𑀔𑀼𑀜𑁆𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀦𑀺𑀲𑁆𑀲𑀬𑀪𑀸𑀯𑁂𑀦𑀸𑀢𑀺 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑁂𑀦. 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀘 𑀧𑀲𑀸𑀤𑀘𑀓𑁆𑀔𑀼𑀬𑁂𑀯 𑀳𑁄𑀢𑀺, 𑀦 𑀘𑀼𑀤𑁆𑀤𑀲𑀲𑀫𑁆𑀪𑀸𑀭𑀁, 𑀘𑀢𑀼𑀘𑀢𑁆𑀢𑀸𑀮𑀻𑀲𑀲𑀫𑁆𑀪𑀸𑀭𑀁 𑀯𑀸 𑀲𑀲𑀫𑁆𑀪𑀸𑀭𑀘𑀓𑁆𑀔𑀼𑀦𑁆𑀢𑀺 𑀆𑀳 ‘‘𑀘𑀓𑁆𑀔𑀼𑀧𑀲𑀸𑀤𑀜𑁆𑀘 𑀧𑀝𑀺𑀘𑁆𑀘𑀸’’𑀢𑀺. 𑀆𑀭𑀫𑁆𑀫𑀡𑀪𑀸𑀯𑁂𑀦𑀸𑀢𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑁂𑀦. 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀘 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀳𑁄𑀢𑀻𑀢𑀺 𑀆𑀳 ‘‘𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑁂 𑀘 𑀧𑀝𑀺𑀘𑁆𑀘𑀸’’𑀢𑀺.

𑀏𑀢𑁆𑀣 𑀘𑀓𑁆𑀔𑀼 𑀏𑀓𑀫𑁆𑀧𑀺 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀭𑀽𑀧𑀸𑀬𑀢𑀦𑀁 𑀧𑀦 𑀅𑀦𑁂𑀓𑀫𑁂𑀯 𑀲𑀁𑀳𑀢𑀦𑁆𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀦𑀺𑀲𑁆𑀲𑀬𑀪𑀸𑀯𑁂𑀦 ‘‘𑀘𑀓𑁆𑀔𑀼𑀧𑀲𑀸𑀤𑀜𑁆𑀘 𑀆𑀭𑀫𑁆𑀫𑀡𑀪𑀸𑀯𑁂𑀦 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑁂 𑀘𑀸’’𑀢𑀺 𑀯𑀘𑀦𑀪𑁂𑀤𑁄 𑀓𑀢𑁄. 𑀓𑀺𑀁 𑀧𑀦 𑀓𑀸𑀭𑀡𑀁 𑀘𑀓𑁆𑀔𑀼 𑀏𑀓𑀫𑁆𑀧𑀺 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀭𑀽𑀧𑀁 𑀧𑀦 𑀅𑀦𑁂𑀓𑀫𑁂𑀯𑀸𑀢𑀺? 𑀧𑀘𑁆𑀘𑀬𑀪𑀸𑀯𑀯𑀺𑀲𑁂𑀲𑀢𑁄. 𑀘𑀓𑁆𑀔𑀼 𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀇𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄 𑀳𑁄𑀦𑁆𑀢𑀁 𑀅𑀢𑁆𑀣𑀺𑀪𑀸𑀯𑁂𑀦𑁂𑀯 𑀳𑁄𑀢𑀺 𑀢𑀲𑁆𑀫𑀺𑀁 𑀲𑀢𑀺 𑀢𑀲𑁆𑀲 𑀪𑀸𑀯𑀢𑁄, 𑀅𑀲𑀢𑀺 𑀅𑀪𑀸𑀯𑀢𑁄, 𑀬𑀢𑁄 𑀢𑀁 𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀢𑀦𑁆𑀦𑀺𑀲𑁆𑀲𑀺𑀢𑀢𑀸 𑀘𑀲𑁆𑀲 𑀦 𑀏𑀓𑀤𑁂𑀲𑁂𑀦 𑀅𑀮𑁆𑀮𑀻𑀬𑀦𑀯𑀲𑁂𑀦 𑀇𑀘𑁆𑀙𑀺𑀢𑀩𑁆𑀩𑀸 𑀅𑀭𑀽𑀧𑀪𑀸𑀯𑀢𑁄. 𑀅𑀣 𑀔𑁄 𑀕𑀭𑀼𑀭𑀸𑀚𑀸𑀤𑀻𑀲𑀼 𑀲𑀺𑀲𑁆𑀲𑀭𑀸𑀚𑀧𑀼𑀭𑀺𑀲𑀸𑀤𑀻𑀦𑀁 𑀯𑀺𑀬 𑀢𑀧𑁆𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀬, 𑀇𑀢𑀭𑁂 𑀧𑀦 𑀧𑀘𑁆𑀘𑀬𑀸 𑀢𑁂𑀦 𑀢𑁂𑀦 𑀯𑀺𑀲𑁂𑀲𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀲𑀘𑀸𑀬𑀁 𑀧𑀘𑁆𑀘𑀬𑀪𑀸𑀯𑁄 𑀦 𑀏𑀓𑀲𑁆𑀫𑀺𑀁 𑀦 𑀲𑀫𑁆𑀪𑀯𑀢𑀻𑀢𑀺 𑀏𑀓𑀫𑁆𑀧𑀺 𑀘𑀓𑁆𑀔𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 ‘‘𑀘𑀓𑁆𑀔𑀼𑀜𑁆𑀘𑀸𑀯𑀼𑀲𑁄, 𑀧𑀝𑀺𑀘𑁆𑀘𑀸’’𑀢𑀺 𑀏𑀓𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀭𑀽𑀧𑀁 𑀧𑀦 𑀬𑀤𑀺𑀧𑀺 𑀘𑀓𑁆𑀔𑀼 𑀯𑀺𑀬 𑀧𑀼𑀭𑁂𑀚𑀸𑀢𑀅𑀢𑁆𑀣𑀺-𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺 𑀧𑀼𑀭𑁂𑀢𑀭𑀁 𑀉𑀧𑁆𑀧𑀦𑁆𑀦𑀁 𑀳𑀼𑀢𑁆𑀯𑀸 𑀯𑀺𑀚𑁆𑀚𑀫𑀸𑀦𑀓𑁆𑀔𑀡𑁂 𑀏𑀯 𑀉𑀧𑀓𑀸𑀭𑀓𑀢𑁆𑀢𑀸 𑀢𑀣𑀸𑀧𑀺 𑀅𑀦𑁂𑀓𑀫𑁂𑀯 𑀲𑀁𑀳𑀢𑀁 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀳𑁄𑀢𑀺 𑀆𑀭𑀫𑁆𑀫𑀡𑀪𑀸𑀯𑀢𑁄. 𑀬𑀜𑁆𑀳𑀺 𑀧𑀘𑁆𑀘𑀬𑀥𑀫𑁆𑀫𑀁 𑀲𑀪𑀸𑀯𑀪𑀽𑀢𑀁, 𑀧𑀭𑀺𑀓𑀧𑁆𑀧𑀺𑀢𑀸𑀓𑀸𑀭𑀫𑀢𑁆𑀢𑀁 𑀯𑀸 𑀯𑀺𑀜𑁆𑀜𑀸𑀡𑀁 𑀯𑀺𑀪𑀸𑀯𑁂𑀦𑁆𑀢𑀁 𑀧𑀯𑀢𑁆𑀢𑀢𑀺, 𑀢𑀤𑀜𑁆𑀜𑁂𑀲𑀜𑁆𑀘 𑀲𑀢𑀺𑀧𑀺 𑀧𑀘𑁆𑀘𑀬𑀪𑀸𑀯𑁂 𑀲𑁄 𑀢𑀲𑁆𑀲 𑀲𑀸𑀭𑀫𑁆𑀫𑀡𑀲𑀪𑀸𑀯𑀢𑀸𑀬 𑀬𑀁 𑀓𑀺𑀜𑁆𑀘𑀺 𑀅𑀦𑀸𑀮𑀫𑁆𑀪𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀼𑀁 𑀅𑀲𑀫𑀢𑁆𑀣𑀲𑁆𑀲 𑀑𑀮𑀼𑀩𑁆𑀪𑀧𑀯𑀢𑁆𑀢𑀺𑀓𑀸𑀭𑀡𑀪𑀸𑀯𑁂𑀦 𑀆𑀮𑀫𑁆𑀩𑀦𑀻𑀬𑀢𑁄 𑀆𑀭𑀫𑁆𑀫𑀡𑀁 𑀦𑀸𑀫, 𑀢𑀲𑁆𑀲 𑀬𑀲𑁆𑀫𑀸 𑀬𑀣𑀸 𑀢𑀣𑀸 𑀲𑀪𑀸𑀯𑀽𑀧𑀮𑀤𑁆𑀥𑀺 𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀮𑀸𑀪𑁄, 𑀢𑀲𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀭𑀽𑀧𑀁 𑀆𑀭𑀩𑁆𑀪 𑀧𑀯𑀢𑁆𑀢𑀫𑀸𑀦𑀁 𑀢𑀲𑁆𑀲 𑀲𑀪𑀸𑀯𑀁 𑀯𑀺𑀪𑀸𑀯𑁂𑀦𑁆𑀢𑀫𑁂𑀯 𑀧𑀯𑀢𑁆𑀢𑀢𑀺. 𑀲𑀸 𑀘𑀲𑁆𑀲 𑀇𑀦𑁆𑀤𑁆𑀭𑀺𑀬𑀸𑀥𑀻𑀦𑀯𑀼𑀢𑁆𑀢𑀺𑀓𑀲𑁆𑀲 𑀆𑀭𑀫𑁆𑀫𑀡𑀲𑀪𑀸𑀯𑀽𑀧𑀮𑀤𑁆𑀥𑀺 𑀦 𑀏𑀓𑀤𑁆𑀯𑀺𑀓𑀮𑀸𑀧𑀕𑀢𑀯𑀡𑁆𑀡𑀯𑀲𑁂𑀦 𑀳𑁄𑀢𑀺, 𑀦𑀸𑀧𑀺 𑀓𑀢𑀺𑀧𑀬𑀓𑀮𑀸𑀧𑀕𑀢𑀯𑀡𑁆𑀡𑀯𑀲𑁂𑀦, 𑀅𑀣 𑀔𑁄 𑀆𑀪𑁄𑀕𑀸𑀦𑀼𑀭𑀽𑀧𑀁 𑀆𑀧𑀸𑀣𑀕𑀢𑀯𑀡𑁆𑀡𑀯𑀲𑁂𑀦𑀸𑀢𑀺 𑀅𑀦𑁂𑀓𑀫𑁂𑀯 𑀭𑀽𑀧𑀁 𑀲𑀁𑀳𑀘𑁆𑀘𑀓𑀸𑀭𑀺𑀢𑀸𑀬 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀩𑀳𑀼𑀯𑀘𑀦𑀯𑀲𑁂𑀦𑀸𑀳.

𑀬𑀁 𑀧𑀦 𑀧𑀝𑁆𑀞𑀸𑀦𑁂 (𑀧𑀝𑁆𑀞𑀸. 𑁧.𑁧.𑁨 𑀧𑀘𑁆𑀘𑀬𑀦𑀺𑀤𑁆𑀤𑁂𑀲) ‘‘𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑀁, 𑀢𑀁 𑀬𑀸𑀤𑀺𑀲𑀁 𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁄, 𑀢𑀸𑀤𑀺𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀻𑀤𑀺𑀲𑀁 𑀧𑀦 𑀢𑀦𑁆𑀢𑀺? 𑀲𑀫𑀼𑀤𑀺𑀢𑀦𑁆𑀢𑀺 𑀧𑀸𑀓𑀝𑁄𑀬𑀫𑀢𑁆𑀣𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀬𑀤𑁂𑀓𑁂 𑀯𑀤𑀦𑁆𑀢𑀺 ‘‘𑀆𑀬𑀢𑀦𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀬𑁄 𑀲𑀮𑁆𑀮𑀓𑁆𑀔𑀡𑀯𑀺𑀲𑀬𑀸, 𑀦 𑀤𑁆𑀭𑀩𑁆𑀬𑀲𑀮𑁆𑀮𑀓𑁆𑀔𑀡𑀯𑀲𑁂𑀦𑀸’’𑀢𑀺, 𑀢𑀫𑁆𑀧𑀺 𑀲𑀼𑀯𑀼𑀢𑁆𑀢𑀫𑁂𑀯 𑀳𑁄𑀢𑀺. 𑀦 𑀘𑁂𑀢𑁆𑀣 𑀲𑀫𑀼𑀤𑀸𑀬𑀸𑀭𑀫𑁆𑀫𑀡𑀢𑀸 𑀆𑀲𑀗𑁆𑀓𑀺𑀢𑀩𑁆𑀩𑀸 𑀲𑀫𑀼𑀤𑀸𑀬𑀸𑀪𑁄𑀕𑀲𑁆𑀲𑁂𑀯 𑀅𑀪𑀸𑀯𑀢𑁄, 𑀲𑀫𑀼𑀤𑀺𑀢𑀸 𑀧𑀦 𑀯𑀡𑁆𑀡𑀥𑀫𑁆𑀫𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀓𑀣𑀁 𑀧𑀦 𑀧𑀘𑁆𑀘𑁂𑀓𑀁 𑀅𑀲𑀫𑀢𑁆𑀣𑀸 𑀲𑀫𑀼𑀤𑀺𑀢𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀦 𑀳𑀺 𑀧𑀘𑁆𑀘𑁂𑀓𑀁 𑀤𑀝𑁆𑀞𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀅𑀦𑁆𑀥𑀸 𑀲𑀫𑀼𑀤𑀺𑀢𑀸 𑀧𑀲𑁆𑀲𑀦𑁆𑀢𑀻𑀢𑀺? 𑀦𑀬𑀺𑀤𑀫𑁂𑀓𑀦𑁆𑀢𑀺𑀓𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀲𑀫𑀢𑁆𑀣𑀸𑀦𑀫𑁆𑀧𑀺 𑀲𑀺𑀯𑀺𑀓𑀸𑀯𑀳𑀦𑀸𑀤𑀻𑀲𑀼 𑀲𑀫𑀢𑁆𑀣𑀢𑀸𑀬 𑀤𑀲𑁆𑀲𑀦𑀢𑁄. 𑀓𑁂𑀲𑀸𑀤𑀻𑀦𑀜𑁆𑀘 𑀬𑀲𑁆𑀫𑀺𑀁 𑀞𑀸𑀦𑁂 𑀞𑀺𑀢𑀸𑀦𑀁 𑀧𑀘𑁆𑀘𑁂𑀓𑀁 𑀯𑀡𑁆𑀡𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀲𑀫𑀼𑀤𑀺𑀢𑀸𑀦𑀁 𑀢𑀁 𑀕𑀳𑁂𑀢𑀼𑀁 𑀲𑀓𑁆𑀓𑀸𑀢𑀺 𑀪𑀺𑀬𑁆𑀬𑁄𑀧𑀺 𑀢𑁂𑀲𑀁 𑀲𑀁𑀳𑀘𑁆𑀘𑀓𑀸𑀭𑀺𑀢𑀸 𑀧𑀭𑀺𑀩𑁆𑀬𑀢𑁆𑀢𑀸. 𑀏𑀢𑁂𑀦 𑀓𑀺𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀧𑀭𑀫𑀸𑀡𑀼𑀭𑀽𑀧𑀁 𑀆𑀭𑀫𑁆𑀫𑀡𑀁, 𑀉𑀤𑀸𑀳𑀼 𑀢𑀁𑀲𑀫𑀼𑀤𑀸𑀬𑁄𑀢𑀺𑀆𑀤𑀺𑀓𑀸 𑀘𑁄𑀤𑀦𑀸 𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀲𑁄𑀢𑀜𑁆𑀘, 𑀆𑀯𑀼𑀲𑁄, 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀦𑀸𑀫𑀸𑀢𑀺 𑀘𑀓𑁆𑀔𑀼𑀦𑀺𑀲𑁆𑀲𑀺𑀢𑀭𑀽𑀧𑀯𑀺𑀚𑀸𑀦𑀦𑀮𑀓𑁆𑀔𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀦𑀸𑀫 𑀉𑀧𑁆𑀧𑀚𑁆𑀚𑀢𑀺.

𑀢𑀺𑀡𑁆𑀡𑀁 𑀲𑀗𑁆𑀕𑀢𑀺𑀬𑀸𑀢𑀺 𑀘𑀓𑁆𑀔𑀼, 𑀭𑀽𑀧𑀁, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀦𑁆𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺𑀬𑀸 𑀲𑀫𑁄𑀥𑀸𑀦𑁂𑀦. 𑀨𑀲𑁆𑀲𑁄 𑀦𑀸𑀫𑀸𑀢𑀺 𑀅𑀭𑀽𑀧𑀥𑀫𑁆𑀫𑁄𑀧𑀺 𑀲𑀫𑀸𑀦𑁄 𑀆𑀭𑀫𑁆𑀫𑀡𑁂 𑀨𑀼𑀲𑀦𑀸𑀓𑀸𑀭𑁂𑀦𑁂𑀯 𑀧𑀯𑀢𑁆𑀢𑀦𑀢𑁄 𑀨𑀼𑀲𑀦𑀮𑀓𑁆𑀔𑀡𑁄 𑀨𑀲𑁆𑀲𑁄 𑀦𑀸𑀫 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺. 𑀲𑀳𑀚𑀸𑀢𑀸𑀤𑀺𑀯𑀲𑁂𑀦𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀬 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀸𑀤𑀺𑀯𑀲𑁂𑀦, 𑀅𑀦𑀦𑁆𑀢𑀭𑀸𑀬 𑀅𑀦𑀦𑁆𑀢𑀭𑀸𑀤𑀺𑀯𑀲𑁂𑀦, 𑀇𑀢𑀭𑀸𑀬 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀧𑀘𑁆𑀘𑀬𑀪𑀸𑀯𑀢𑁄 𑀨𑀲𑁆𑀲𑀧𑀘𑁆𑀘𑀬𑀸 𑀨𑀲𑁆𑀲𑀓𑀸𑀭𑀡𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀅𑀦𑀼𑀪𑀯𑀦𑀲𑀫𑀓𑀸𑀮𑀫𑁂𑀯 𑀆𑀭𑀫𑁆𑀫𑀡𑀲𑁆𑀲 𑀲𑀜𑁆𑀚𑀸𑀦𑀦𑀁 𑀳𑁄𑀢𑀻𑀢𑀺 ‘‘𑀢𑀸𑀬 𑀯𑁂𑀤𑀦𑀸𑀬 𑀬𑀁 𑀆𑀭𑀫𑁆𑀫𑀡𑀁 𑀯𑁂𑀤𑁂𑀢𑀺, 𑀢𑀤𑁂𑀯 𑀲𑀜𑁆𑀜𑀸 𑀲𑀜𑁆𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑀁. 𑀘𑀓𑁆𑀔𑀼𑀤𑁆𑀯𑀸𑀭𑀺𑀓𑀸 𑀥𑀫𑁆𑀫𑀸 𑀇𑀥𑀸𑀥𑀺𑀧𑁆𑀧𑁂𑀢𑀸𑀢𑀺 𑀢𑀤𑀦𑀼𑀲𑀸𑀭𑁂𑀦 𑀧𑀦 𑀅𑀧𑀭𑀸𑀧𑀭𑀼𑀧𑁆𑀧𑀦𑁆𑀦𑀸𑀦𑀁 𑀯𑁂𑀤𑀦𑀸𑀤𑀻𑀦𑀁 𑀕𑀳𑀡𑁂 𑀲𑀢𑀺, 𑀬𑀦𑁆𑀢𑀺 𑀯𑀸 𑀓𑀸𑀭𑀡𑀯𑀘𑀦𑀁, 𑀬𑀲𑁆𑀫𑀸 𑀆𑀭𑀫𑁆𑀫𑀡𑀁 𑀯𑁂𑀤𑁂𑀢𑀺, 𑀢𑀲𑁆𑀫𑀸 𑀢𑀁 𑀲𑀜𑁆𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀦 𑀳𑀺 𑀅𑀲𑀢𑀺 𑀯𑁂𑀤𑀬𑀺𑀢𑁂 𑀓𑀤𑀸𑀘𑀺 𑀲𑀜𑁆𑀜𑀼𑀧𑁆𑀧𑀢𑁆𑀢𑀺 𑀅𑀢𑁆𑀣𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀜𑁆𑀜𑀸𑀬 𑀳𑀺 𑀬𑀣𑀸𑀲𑀜𑁆𑀜𑀸𑀢𑀁 𑀯𑀺𑀚𑁆𑀚𑀫𑀸𑀦𑀁, 𑀅𑀯𑀺𑀚𑁆𑀚𑀫𑀸𑀦𑀁 𑀯𑀸 𑀆𑀭𑀫𑁆𑀫𑀡𑀁 𑀯𑀺𑀢𑀓𑁆𑀓𑀯𑀲𑁂𑀦 𑀧𑀭𑀺𑀓𑀧𑁆𑀧𑁂𑀢𑀺, 𑀬𑀣𑀸𑀧𑀭𑀺𑀓𑀧𑁆𑀧𑀺𑀢𑀜𑁆𑀘 𑀢𑀁 𑀤𑀺𑀝𑁆𑀞𑀺𑀢𑀡𑁆𑀳𑀸𑀫𑀸𑀦𑀫𑀜𑁆𑀜𑀦𑀸𑀳𑀺 𑀫𑀜𑁆𑀜𑀫𑀸𑀦𑁄 𑀧𑀧𑀜𑁆𑀘𑁂𑀢𑀻𑀢𑀺 𑀯𑀼𑀢𑁆𑀢𑁄. 𑀢𑁂𑀦𑁂𑀯𑀸𑀳 ‘‘𑀧𑀣𑀯𑀺𑀁 𑀧𑀣𑀯𑀺𑀢𑁄 𑀲𑀜𑁆𑀚𑀸𑀦𑀸’’𑀢𑀺, ‘‘𑀧𑀣𑀯𑀺𑀁 𑀧𑀣𑀯𑀺𑀢𑁄 𑀲𑀜𑁆𑀜𑀢𑁆𑀯𑀸 𑀧𑀣𑀯𑀺𑀁 𑀫𑀜𑁆𑀜𑀢𑀻’’𑀢𑀺𑀆𑀤𑀺 (𑀫. 𑀦𑀺. 𑁧.𑁨), ‘‘𑀢𑀓𑁆𑀓𑀜𑁆𑀘 𑀤𑀺𑀝𑁆𑀞𑀻𑀲𑀼 𑀧𑀓𑀧𑁆𑀧𑀬𑀺𑀢𑁆𑀯𑀸, 𑀲𑀘𑁆𑀘𑀁 𑀫𑀼𑀲𑀸𑀢𑀺 𑀤𑁆𑀯𑀬𑀥𑀫𑁆𑀫𑀫𑀸𑀳𑀽’’𑀢𑀺 (𑀲𑀼. 𑀦𑀺. 𑁮𑁯𑁨; 𑀫𑀳𑀸𑀦𑀺. 𑁧𑁨𑁧) 𑀘. 𑀩𑀮𑀧𑁆𑀧𑀢𑁆𑀢𑀧𑀧𑀜𑁆𑀘𑀯𑀲𑁂𑀦𑁂𑀯𑀸𑀬𑀫𑀢𑁆𑀣𑀯𑀡𑁆𑀡𑀦𑀸 𑀓𑀢𑀸, 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀧𑀭𑀺𑀤𑀼𑀩𑁆𑀩𑀮𑀯𑀲𑁂𑀦.

𑀘𑀓𑁆𑀔𑀼𑀭𑀽𑀧𑀸𑀤𑀻𑀳𑀺 𑀓𑀸𑀭𑀡𑁂𑀳𑀻𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀨𑀲𑁆𑀲𑀯𑁂𑀤𑀦𑀸𑀲𑀜𑁆𑀜𑀸𑀯𑀺𑀢𑀓𑁆𑀓𑁂𑀳𑀺 𑀓𑀸𑀭𑀡𑀪𑀽𑀢𑁂𑀳𑀺. 𑀅𑀓𑀸𑀭𑀡𑀪𑀽𑀢𑀸𑀦𑀫𑁆𑀧𑀺 𑀢𑁂𑀲𑀁 𑀅𑀢𑁆𑀣𑀺𑀢𑀸𑀬 𑀓𑀸𑀭𑀡𑀕𑁆𑀕𑀳𑀡𑀁. 𑀧𑀭𑀺𑀜𑁆𑀜𑀸𑀢𑀸 𑀳𑀺 𑀢𑁂 𑀅𑀓𑀸𑀭𑀡𑀁. 𑀢𑁂𑀦𑀸𑀳 ‘‘𑀅𑀧𑀭𑀺𑀜𑁆𑀜𑀸𑀢𑀓𑀸𑀭𑀡’’𑀦𑁆𑀢𑀺. 𑀢𑀻𑀳𑀺𑀧𑀺 𑀧𑀭𑀺𑀜𑁆𑀜𑀸𑀳𑀺 𑀅𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀓𑀁. 𑀅𑀪𑀺𑀪𑀯𑀦𑁆𑀢𑀻𑀢𑀺 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀺. 𑀲𑀳𑀚𑀸𑀢𑀸 𑀳𑁄𑀦𑁆𑀢𑀻𑀢𑀺 𑀏𑀢𑁆𑀣 ‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀅𑀢𑁆𑀣𑀺 𑀓𑀼𑀲𑀮𑁄’𑀢𑀺𑀆𑀤𑀺𑀯𑀘𑀦𑀢𑁄 𑀯𑁂𑀤𑀦𑀸𑀲𑀜𑁆𑀜𑀸 𑀅𑀲𑀳𑀚𑀸𑀢𑀸𑀧𑀺 𑀕𑀳𑁂𑀢𑀩𑁆𑀩𑀸. 𑀬𑀤𑀺 𑀏𑀯𑀦𑁆𑀢𑀺 ‘‘𑀧𑀧𑀜𑁆𑀘𑁂𑀢𑀻’’𑀢𑀺 𑀏𑀢𑁆𑀣 𑀬𑀤𑀺 𑀧𑀜𑁆𑀘𑀤𑁆𑀯𑀸𑀭𑀚𑀯𑀦𑀲𑀳𑀚𑀸𑀢𑀸 𑀧𑀧𑀜𑁆𑀘𑀲𑀗𑁆𑀔𑀸 𑀅𑀥𑀺𑀧𑁆𑀧𑁂𑀢𑀸 𑀢𑀸𑀲𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀺𑀲𑀬𑀢𑁆𑀢𑀸, 𑀓𑀲𑁆𑀫𑀸 𑀅𑀢𑀻𑀢𑀸𑀦𑀸𑀕𑀢𑀕𑁆𑀕𑀳𑀡𑀁 𑀓𑀢𑀦𑁆𑀢𑀺 𑀘𑁄𑀤𑁂𑀢𑀺. 𑀇𑀢𑀭𑁄 ‘‘𑀢𑀣𑀸 𑀉𑀧𑁆𑀧𑀚𑁆𑀚𑀦𑀢𑁄’’𑀢𑀺𑀆𑀤𑀺𑀦𑀸 𑀧𑀭𑀺𑀳𑀭𑀢𑀺. 𑀢𑀢𑁆𑀣 𑀢𑀣𑀸 𑀉𑀧𑁆𑀧𑀚𑁆𑀚𑀦𑀢𑁄𑀢𑀺 𑀬𑀣𑀸 𑀯𑀢𑁆𑀢𑀫𑀸𑀦𑀓𑀸𑀮𑁂, 𑀏𑀯𑀁 𑀅𑀢𑀻𑀢𑀓𑀸𑀮𑁂 𑀅𑀦𑀸𑀕𑀢𑀓𑀸𑀮𑁂 𑀘 𑀘𑀓𑁆𑀔𑀼𑀤𑁆𑀯𑀸𑀭𑁂 𑀧𑀧𑀜𑁆𑀘𑀲𑀗𑁆𑀔𑀸𑀦𑀁 𑀉𑀧𑁆𑀧𑀚𑁆𑀚𑀦𑀢𑁄 𑀅𑀢𑀻𑀢𑀸𑀦𑀸𑀕𑀢𑀕𑁆𑀕𑀳𑀡𑀁 𑀓𑀢𑀁, 𑀦 𑀅𑀢𑀻𑀢𑁂𑀲𑀼, 𑀅𑀦𑀸𑀕𑀢𑁂𑀲𑀼 𑀯𑀸 𑀘𑀓𑁆𑀔𑀼𑀭𑀽𑀧𑁂𑀲𑀼 𑀘𑀓𑁆𑀔𑀼𑀤𑁆𑀯𑀸𑀭𑀺𑀓𑀸𑀦𑀁 𑀢𑀸𑀲𑀁 𑀉𑀧𑁆𑀧𑀚𑁆𑀚𑀦𑀢𑁄.

𑀫𑀦𑀜𑁆𑀚𑀸𑀯𑀼𑀲𑁄, 𑀧𑀝𑀺𑀘𑁆𑀘𑀸𑀢𑀺 𑀏𑀢𑁆𑀣 𑀤𑀼𑀯𑀺𑀥𑀁 𑀫𑀦𑀁 𑀓𑁂𑀯𑀮𑀁 𑀪𑀯𑀗𑁆𑀕𑀁, 𑀲𑀸𑀯𑀚𑁆𑀚𑀦𑀁 𑀯𑀸. 𑀤𑀼𑀯𑀺𑀥𑀸 𑀳𑀺 𑀓𑀣𑀸. 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀓𑀣𑀸𑀬𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀘𑀮𑀺𑀢𑀁 𑀪𑀯𑀗𑁆𑀕𑀁 𑀫𑀦𑁄𑀤𑁆𑀯𑀸𑀭𑀁 𑀦𑀸𑀫, 𑀘𑀓𑁆𑀔𑀸𑀤𑀺 𑀯𑀺𑀬 𑀭𑀽𑀧𑀸𑀤𑀺𑀦𑀸 𑀬𑁂𑀦 𑀢𑀁 𑀖𑀝𑁆𑀝𑀺𑀢𑀁 𑀢𑀢𑁆𑀣 𑀉𑀧𑀭𑀺 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀬𑀸 𑀤𑁆𑀯𑀸𑀭𑀪𑀸𑀯𑀢𑁄. 𑀧𑀘𑁆𑀘𑀬𑀓𑀣𑀸𑀬𑀁 𑀲𑀸𑀯𑀚𑁆𑀚𑀦𑀪𑀯𑀗𑁆𑀕𑀁, ‘‘𑀫𑀦𑁄𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀅𑀢𑁆𑀣𑀺 𑀓𑀼𑀲𑀮𑁄’’𑀢𑀺𑀆𑀤𑀻𑀲𑀼 𑀳𑀺 𑀲𑀸𑀯𑀚𑁆𑀚𑀦𑀫𑀦𑁄𑀲𑀫𑁆𑀨𑀲𑁆𑀲𑁄 𑀇𑀘𑁆𑀙𑀺𑀢𑁄, 𑀦 𑀪𑀯𑀗𑁆𑀕𑀫𑀦𑁄𑀲𑀫𑁆𑀨𑀲𑁆𑀲𑁄 𑀅𑀲𑀫𑁆𑀪𑀯𑀢𑁄. 𑀢𑀢𑁆𑀣 𑀧𑀞𑀫𑀦𑀬𑀁 𑀲𑀦𑁆𑀥𑀸𑀬𑀸𑀳 ‘‘𑀫𑀦𑀦𑁆𑀢𑀺 𑀪𑀯𑀗𑁆𑀕𑀘𑀺𑀢𑁆𑀢’’𑀦𑁆𑀢𑀺. 𑀥𑀫𑁆𑀫𑁂𑀢𑀺 𑀢𑁂𑀪𑀽𑀫𑀓𑀥𑀫𑁆𑀫𑀸𑀭𑀫𑁆𑀫𑀡𑀦𑁆𑀢𑀺 𑀇𑀫𑀺𑀦𑀸 𑀲𑀪𑀸𑀯𑀥𑀫𑁆𑀫𑁂𑀲𑀼 𑀏𑀯 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀻𑀢𑀺 𑀓𑁂𑀘𑀺, 𑀢𑀤𑀬𑀼𑀢𑁆𑀢𑀁 𑀢𑀤𑀼𑀧𑀸𑀤𑀸𑀦𑀸𑀬𑀧𑀺 𑀧𑀜𑁆𑀜𑀢𑁆𑀢𑀺𑀬𑀸 𑀥𑀫𑁆𑀫𑀸𑀭𑀫𑁆𑀫𑀡𑀢𑀸𑀬 𑀯𑀼𑀢𑁆𑀢𑀢𑁆𑀢𑀸. 𑀇𑀥 𑀧𑀦 𑀢𑁂𑀪𑀽𑀫𑀓𑀸𑀧𑀺 𑀥𑀫𑁆𑀫𑀸 𑀮𑀩𑁆𑀪𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀢𑁂𑀪𑀽𑀫𑀓𑀥𑀫𑁆𑀫𑀸𑀭𑀫𑁆𑀫𑀡’’𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀧𑀜𑁆𑀜𑀢𑁆𑀢𑀺𑀬𑀸 𑀅𑀦𑀸𑀭𑀫𑁆𑀫𑀡𑀢𑁆𑀢𑀸. 𑀏𑀯𑀜𑁆𑀘𑁂𑀢𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀅𑀦𑀸𑀭𑀫𑁆𑀫𑀡𑀸 𑀦𑀸𑀫 𑀲𑀺𑀬𑀼𑀁. 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀓𑀣𑀸𑀬𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺 𑀯𑀺𑀬 𑀆𑀯𑀚𑁆𑀚𑀦𑀫𑁆𑀧𑀺 𑀤𑁆𑀯𑀸𑀭𑀧𑀓𑁆𑀔𑀺𑀓𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀫𑀦𑁄𑀯𑀺𑀜𑁆𑀜𑀸𑀡𑀦𑁆𑀢𑀺 𑀆𑀯𑀚𑁆𑀚𑀦𑀁 𑀯𑀸’’𑀢𑀺. 𑀧𑀘𑁆𑀘𑀬𑀓𑀣𑀸𑀬𑀁 𑀧𑀦 𑀆𑀯𑀚𑁆𑀚𑀦𑀁 𑀕𑀳𑀺𑀢𑀦𑁆𑀢𑀺 ‘‘𑀚𑀯𑀦𑀁 𑀯𑀸’’𑀢𑀺 𑀯𑀼𑀢𑁆𑀢𑀁. 𑀦𑀬𑀤𑁆𑀯𑀬𑁂 𑀥𑀫𑁆𑀫𑀸𑀦𑀁 𑀲𑀳𑀚𑀸𑀢𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀆𑀯𑀚𑁆𑀚𑀦𑁂 𑀕𑀳𑀺𑀢𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀼𑀢𑁆𑀢𑀫𑁂𑀯𑀸𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀬𑀼𑀢𑁆𑀢𑀫𑁂𑀯.

𑀲𑁄 𑀬𑀸𑀯 𑀦 𑀧𑀘𑁆𑀘𑀬𑀧𑀝𑀺𑀯𑁂𑀥𑁄 𑀲𑀫𑁆𑀪𑀯𑀢𑀺, 𑀢𑀸𑀯 𑀧𑀜𑁆𑀜𑀢𑁆𑀢𑀺𑀫𑀼𑀔𑁂𑀦𑁂𑀯 𑀲𑀪𑀸𑀯𑀥𑀫𑁆𑀫𑀸 𑀧𑀜𑁆𑀜𑀸𑀬𑀦𑁆𑀢𑀺 𑀧𑀘𑁆𑀘𑁂𑀓𑀁 𑀅𑀧𑀜𑁆𑀜𑀸𑀧𑀦𑁂𑀢𑀺 𑀆𑀳 ‘‘𑀨𑀲𑁆𑀲𑁄 𑀦𑀸𑀫 𑀏𑀓𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺. 𑀏𑀯𑀁 𑀨𑀲𑁆𑀲𑀧𑀜𑁆𑀜𑀢𑁆𑀢𑀺𑀁 𑀧𑀜𑁆𑀜𑀧𑁂𑀲𑁆𑀲𑀢𑀻𑀢𑀺 𑀧𑀜𑁆𑀜𑀧𑁂𑀢𑁆𑀯𑀸 𑀢𑀩𑁆𑀩𑀺𑀲𑀬𑀤𑀲𑁆𑀲𑀦𑀁 𑀜𑀸𑀡𑀁 𑀉𑀧𑁆𑀧𑀸𑀤𑁂𑀲𑁆𑀲𑀢𑀺. 𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀻𑀢𑀺 𑀇𑀫𑀲𑁆𑀫𑀺𑀁 𑀘𑀓𑁆𑀔𑀼𑀆𑀤𑀺𑀓𑁂 𑀧𑀘𑁆𑀘𑀬𑁂 𑀲𑀢𑀺 𑀇𑀤𑀁 𑀨𑀲𑁆𑀲𑀸𑀤𑀺𑀓𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀤𑁆𑀯𑀸𑀤𑀲𑀸𑀬𑀢𑀦𑀯𑀲𑁂𑀦𑀸𑀢𑀺 𑀤𑁆𑀯𑀸𑀤𑀲𑀦𑁆𑀦𑀁 𑀆𑀬𑀢𑀦𑀸𑀦𑀁 𑀯𑀲𑁂𑀦 𑀆𑀕𑀢𑁂𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀬𑀯𑀲𑁂𑀦. 𑀤𑁆𑀯𑀸𑀤𑀲𑀸𑀬𑀢𑀦𑀧𑀝𑀺𑀓𑁆𑀔𑁂𑀧𑀯𑀲𑁂𑀦𑀸𑀢𑀺 ‘‘𑀇𑀫𑀲𑁆𑀫𑀺𑀁 𑀅𑀲𑀢𑀺 𑀇𑀤𑀁 𑀦 𑀳𑁄𑀢𑀻’’𑀢𑀺 𑀧𑀘𑁆𑀘𑀬𑀸𑀪𑀸𑀯𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀪𑀸𑀯𑀤𑀲𑁆𑀲𑀦𑀓𑁆𑀓𑀫𑁂 𑀤𑁆𑀯𑀸𑀤𑀲𑀦𑁆𑀦𑀁 𑀆𑀬𑀢𑀦𑀸𑀦𑀁 𑀧𑀝𑀺𑀓𑁆𑀔𑁂𑀧𑀯𑀲𑁂𑀦.

𑀲𑀸𑀯𑀓𑁂𑀦 𑀧𑀜𑁆𑀳𑁄 𑀓𑀣𑀺𑀢𑁄𑀢𑀺 𑀅𑀬𑀁 𑀧𑀜𑁆𑀳𑁄 𑀲𑀸𑀯𑀓𑁂𑀦 𑀓𑀣𑀺𑀢𑁄, 𑀇𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀫𑀸 𑀦𑀺𑀓𑁆𑀓𑀗𑁆𑀔𑀸 𑀅𑀳𑀼𑀯𑀢𑁆𑀣. 𑀅𑀣 𑀯𑀸 𑀲𑀁𑀔𑀺𑀢𑁆𑀢𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦 𑀯𑀺𑀪𑀚𑀦𑁆𑀢𑁂𑀦 𑀏𑀢𑀤𑀕𑁆𑀕𑁂 𑀞𑀧𑀺𑀢𑁂𑀦 𑀫𑀳𑀸𑀲𑀸𑀯𑀓𑁂𑀦 𑀧𑀜𑁆𑀳𑁄 𑀓𑀣𑀺𑀢𑁄𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀏𑀢𑀲𑁆𑀫𑀺𑀁 𑀧𑀜𑁆𑀳𑁂 𑀫𑀸 𑀦𑀺𑀓𑁆𑀓𑀗𑁆𑀔𑀸 𑀅𑀳𑀼𑀯𑀢𑁆𑀣, 𑀳𑁂𑀭𑀜𑁆𑀜𑀺𑀓𑁂 𑀲𑀢𑀺 𑀓𑀳𑀸𑀧𑀡𑀁 𑀲𑀬𑀁 𑀦𑀺𑀘𑁆𑀙𑀺𑀦𑀦𑁆𑀢𑀸 𑀯𑀺𑀬 𑀅𑀳𑀼𑀢𑁆𑀯𑀸 𑀪𑀕𑀯𑀢𑁄 𑀏𑀯 𑀲𑀦𑁆𑀢𑀺𑀓𑁂 𑀦𑀺𑀓𑁆𑀓𑀗𑁆𑀔𑀸 𑀳𑁄𑀣.

𑁨𑁦𑁫. 𑀆𑀓𑀭𑁄𑀦𑁆𑀢𑀺 𑀨𑀮𑀁 𑀢𑀸𑀬 𑀢𑀸𑀬 𑀫𑀭𑀺𑀬𑀸𑀤𑀸𑀬 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀻𑀢𑀺 𑀆𑀓𑀸𑀭𑀸, 𑀓𑀸𑀭𑀡𑀸𑀦𑀺. 𑀧𑀸𑀝𑀺𑀬𑁂𑀓𑁆𑀓𑀓𑀸𑀭𑀡𑁂𑀳𑀻𑀢𑀺 𑀙𑀦𑁆𑀦𑀁 𑀤𑁆𑀯𑀸𑀭𑀸𑀦𑀁 𑀯𑀲𑁂𑀦 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀧𑀜𑁆𑀘𑀓𑀸𑀭𑀡𑀲𑁆𑀲 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀯𑀼𑀢𑁆𑀢𑀁. 𑀅𑀣 𑀯𑀸 𑀬𑀤𑀺𑀧𑀺 𑀬𑀢𑁆𑀢𑀓𑁂𑀳𑀺 𑀥𑀫𑁆𑀫𑁂𑀳𑀺 𑀬𑀁 𑀨𑀮𑀁 𑀦𑀺𑀩𑁆𑀩𑀢𑁆𑀢𑀢𑀺, 𑀢𑁂𑀲𑀁 𑀲𑀫𑀼𑀤𑀺𑀢𑀸𑀦𑀁𑀬𑁂𑀯 𑀓𑀸𑀭𑀡𑀪𑀸𑀯𑁄 𑀲𑀸𑀫𑀕𑁆𑀕𑀺𑀬𑀸𑀯 𑀨𑀮𑀼𑀧𑁆𑀧𑀢𑁆𑀢𑀺𑀢𑁄, 𑀢𑀣𑀸𑀧𑀺 𑀧𑀘𑁆𑀘𑁂𑀓𑀁 𑀢𑀲𑁆𑀲 𑀓𑀸𑀭𑀡𑀫𑁂𑀯𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀧𑀸𑀝𑀺𑀬𑁂𑀓𑁆𑀓𑀓𑀸𑀭𑀡𑁂𑀳𑀻’’𑀢𑀺. 𑀧𑀤𑁂𑀳𑀻𑀢𑀺 𑀦𑀸𑀫𑀸𑀤𑀺𑀧𑀤𑁂𑀳𑀺 𑀘𑁂𑀯 𑀢𑀁𑀲𑀫𑀼𑀤𑀸𑀬𑀪𑀽𑀢𑁂𑀳𑀺 𑀯𑀸𑀓𑁆𑀬𑁂𑀳𑀺 𑀘. 𑀢𑁂𑀦𑀸𑀳 ‘‘𑀅𑀓𑁆𑀔𑀭𑀲𑀫𑁆𑀧𑀺𑀡𑁆𑀟𑀦𑁂𑀳𑀻’’𑀢𑀺. 𑀅𑀓𑁆𑀔𑀭𑀸𑀦𑀺𑀬𑁂𑀯 𑀳𑀺 𑀅𑀢𑁆𑀣𑁂𑀲𑀼 𑀬𑀣𑀸𑀯𑀘𑁆𑀘𑀁 𑀧𑀤𑀯𑀸𑀓𑁆𑀬𑀪𑀸𑀯𑁂𑀦 𑀧𑀭𑀺𑀘𑁆𑀙𑀺𑀚𑁆𑀚𑀦𑁆𑀢𑀺. 𑀩𑁆𑀬𑀜𑁆𑀚𑀦𑁂𑀳𑀻𑀢𑀺 𑀅𑀢𑁆𑀣𑀲𑁆𑀲 𑀅𑀪𑀺𑀩𑁆𑀬𑀜𑁆𑀚𑀦𑀢𑁄 𑀩𑁆𑀬𑀜𑁆𑀚𑀦𑀲𑀜𑁆𑀜𑀺𑀢𑁂𑀳𑀺 𑀯𑀡𑁆𑀡𑁂𑀳𑀺. 𑀢𑀸𑀦𑀺 𑀧𑀦 𑀬𑀲𑁆𑀫𑀸 𑀧𑀭𑀺𑀬𑀸𑀬𑀲𑁆𑀲 𑀅𑀓𑁆𑀔𑀭𑀡𑀢𑁄 ‘‘𑀅𑀓𑁆𑀔𑀭𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀲𑁆𑀫𑀸 𑀆𑀳 ‘‘𑀅𑀓𑁆𑀔𑀭𑁂𑀳𑀻’’𑀢𑀺. 𑀏𑀢𑁆𑀣 𑀘 𑀇𑀫𑁂𑀳𑀺 𑀆𑀓𑀸𑀭𑁂𑀳𑀺 𑀇𑀫𑁂𑀳𑀺 𑀧𑀤𑀩𑁆𑀬𑀜𑁆𑀚𑀦𑁂𑀳𑀺 𑀧𑀧𑀜𑁆𑀘𑀲𑀫𑀼𑀤𑀸𑀘𑀸𑀭𑀲𑁆𑀲 𑀯𑀝𑁆𑀝𑀲𑁆𑀲 𑀘 𑀯𑀺𑀯𑀝𑁆𑀝𑀲𑁆𑀲 𑀘 𑀤𑀲𑁆𑀲𑀦𑀅𑀢𑁆𑀣𑁄 𑀯𑀺𑀪𑀢𑁆𑀢𑁄𑀢𑀺 𑀬𑁄𑀚𑀦𑀸. 𑀧𑀡𑁆𑀟𑀺𑀘𑁆𑀘𑁂𑀦𑀸𑀢𑀺 𑀧𑀜𑁆𑀜𑀸𑀬. ‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀧𑀡𑁆𑀟𑀺𑀢𑁄 𑀳𑁄𑀢𑀺? 𑀬𑀢𑁄 𑀔𑁄 𑀪𑀺𑀓𑁆𑀔𑀼 𑀥𑀸𑀢𑀼𑀓𑀼𑀲𑀮𑁄 𑀘 𑀳𑁄𑀢𑀻’’𑀢𑀺 (𑀫. 𑀦𑀺. 𑁩.𑁧𑁨𑁪) 𑀆𑀤𑀺𑀲𑀼𑀢𑁆𑀢𑀧𑀤𑀯𑀲𑁂𑀦 𑀧𑀡𑁆𑀟𑀺𑀢𑀮𑀓𑁆𑀔𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀢𑀽𑀳𑀺 𑀯𑀸 𑀓𑀸𑀭𑀡𑁂𑀳𑀻’’𑀢𑀺𑀆𑀤𑀺𑀫𑀸𑀳. 𑀲𑀘𑁆𑀘𑀧𑀝𑀺𑀯𑁂𑀥𑀯𑀲𑁂𑀦 𑀧𑀡𑁆𑀟𑀺𑀘𑁆𑀘𑀁 𑀤𑀲𑁆𑀲𑀺𑀢𑀦𑁆𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀯𑀲𑁂𑀦 𑀫𑀳𑀸𑀧𑀜𑁆𑀜𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀳𑀦𑁆𑀢𑁂 𑀅𑀢𑁆𑀣𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀕𑀼𑀴𑀧𑀽𑀯𑀦𑁆𑀢𑀺 𑀕𑀼𑀴𑁂 𑀫𑀺𑀲𑁆𑀲𑀺𑀢𑁆𑀯𑀸 𑀓𑀢𑀧𑀽𑀯𑀁. 𑀩𑀤𑁆𑀥𑀲𑀢𑁆𑀢𑀼𑀕𑀼𑀴𑀓𑀦𑁆𑀢𑀺 𑀫𑀥𑀼𑀲𑀓𑁆𑀔𑀭𑀸𑀳𑀺 𑀧𑀺𑀡𑁆𑀟𑀻𑀓𑀢𑀁 𑀲𑀢𑁆𑀢𑀼𑀧𑀺𑀡𑁆𑀟𑀁. 𑀅𑀲𑁂𑀘𑀺𑀢𑀩𑁆𑀩𑀓𑀁 𑀫𑀥𑀼𑀆𑀤𑀺𑀦𑀸 𑀧𑀕𑁂𑀯 𑀢𑁂𑀳𑀺 𑀲𑀫𑀬𑁄𑀚𑀺𑀢𑀩𑁆𑀩𑀢𑁆𑀢𑀸. 𑀘𑀺𑀦𑁆𑀢𑀓𑀚𑀸𑀢𑀺𑀓𑁄𑀢𑀺 𑀥𑀫𑁆𑀫𑀘𑀺𑀦𑁆𑀢𑀸𑀬 𑀘𑀺𑀦𑁆𑀢𑀓𑀲𑀪𑀸𑀯𑁄. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦𑁂𑀯𑀲𑁆𑀲𑀸𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦𑁂𑀯 𑀅𑀲𑁆𑀲 𑀲𑀼𑀢𑁆𑀢𑀲𑁆𑀲 𑀕𑀼𑀡𑀁 𑀧𑀭𑀺𑀘𑁆𑀙𑀺𑀦𑁆𑀤𑀸𑀧𑁂𑀢𑁆𑀯𑀸 𑀦𑀸𑀫𑀁 𑀕𑀡𑁆𑀳𑀸𑀧𑁂𑀲𑁆𑀲𑀸𑀫𑀺.

𑀫𑀥𑀼𑀧𑀺𑀡𑁆𑀟𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.