𑁭. 𑀯𑀦𑀧𑀢𑁆𑀣𑀧𑀭𑀺𑀬𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁦. 𑀯𑀦𑀻𑀬𑀢𑀺 𑀯𑀺𑀯𑁂𑀓𑀓𑀸𑀫𑁂𑀳𑀺 𑀪𑀚𑀻𑀬𑀢𑀺, 𑀯𑀦𑀼𑀢𑁂 𑀯𑀸 𑀢𑁂 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀯𑀲𑀦𑀢𑁆𑀣𑀸𑀬 𑀬𑀸𑀘𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀯𑀦𑀁, 𑀧𑀢𑀺𑀝𑁆𑀞𑀦𑁆𑀢𑀺 𑀏𑀢𑁆𑀣 𑀯𑀺𑀯𑁂𑀓𑀓𑀸𑀫𑀸 𑀬𑀣𑀸𑀥𑀺𑀧𑁆𑀧𑁂𑀢𑀯𑀺𑀲𑁂𑀲𑀸𑀥𑀺𑀕𑀫𑁂𑀦𑀸𑀢𑀺 𑀧𑀢𑁆𑀣𑀁, 𑀯𑀦𑁂𑀲𑀼 𑀧𑀢𑁆𑀣𑀁 𑀕𑀳𑀦𑀝𑁆𑀞𑀸𑀦𑁂 𑀲𑁂𑀦𑀸𑀲𑀦𑀁 𑀯𑀦𑀧𑀢𑁆𑀣𑀁. 𑀧𑀭𑀺𑀬𑀸𑀬𑀢𑀺 𑀅𑀢𑁆𑀢𑀦𑁄 𑀨𑀮𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀢𑁆𑀢𑀢𑀻𑀢𑀺 𑀧𑀭𑀺𑀬𑀸𑀬𑁄, 𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀯𑀦𑀧𑀢𑁆𑀣𑀧𑀭𑀺𑀬𑀸𑀬𑀦𑁆𑀢𑀺 𑀯𑀦𑀧𑀢𑁆𑀣𑀓𑀸𑀭𑀡’’𑀦𑁆𑀢𑀺. 𑀯𑀦𑀧𑀢𑁆𑀣𑀜𑁆𑀳𑀺 𑀢𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑁄 𑀉𑀧𑀦𑀺𑀲𑁆𑀲𑀬𑀓𑀸𑀭𑀡𑀁. 𑀢𑁂𑀦𑀸𑀳 ‘‘𑀯𑀦𑀧𑀢𑁆𑀣𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀻’’𑀢𑀺. 𑀧𑀭𑀺𑀬𑀸𑀬𑀢𑀺 𑀤𑁂𑀲𑁂𑀢𑀩𑁆𑀩𑀫𑀢𑁆𑀣𑀁 𑀧𑀢𑀺𑀝𑁆𑀞𑀧𑁂𑀢𑀻𑀢𑀺 𑀧𑀭𑀺𑀬𑀸𑀬𑁄, 𑀤𑁂𑀲𑀦𑀸. 𑀯𑀦𑀧𑀢𑁆𑀣𑀁 𑀆𑀭𑀩𑁆𑀪 𑀧𑀯𑀢𑁆𑀢𑀸 𑀤𑁂𑀲𑀦𑀸 𑀯𑀦𑀧𑀢𑁆𑀣𑀤𑁂𑀲𑀦𑀸, 𑀢𑀁, 𑀉𑀪𑀬𑀢𑁆𑀣𑀸𑀧𑀺 𑀯𑀦𑀧𑀢𑁆𑀣𑀕𑁆𑀕𑀳𑀡𑀁 𑀮𑀓𑁆𑀔𑀡𑀫𑀢𑁆𑀢𑀁 𑀕𑀸𑀫𑀸𑀤𑀻𑀦𑀫𑁆𑀧𑁂𑀢𑁆𑀣 𑀓𑀸𑀭𑀡𑀪𑀸𑀯𑀲𑁆𑀲, 𑀤𑁂𑀲𑀦𑀸𑀬 𑀯𑀺𑀲𑀬𑀪𑀸𑀯𑀲𑁆𑀲 𑀘 𑀮𑀩𑁆𑀪𑀫𑀸𑀦𑀢𑁆𑀢𑀸.

𑁧𑁯𑁧. 𑀦𑀺𑀲𑁆𑀲𑀸𑀬𑀸𑀢𑀺 𑀅𑀧𑀲𑁆𑀲𑀸𑀬, 𑀯𑀺𑀯𑁂𑀓𑀯𑀸𑀲𑀲𑁆𑀲 𑀅𑀧𑀲𑁆𑀲𑀬𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦 𑀉𑀧𑀝𑁆𑀞𑀸𑀢𑀻𑀢𑀺𑀆𑀤𑀻𑀳𑀺 𑀢𑀲𑁆𑀫𑀺𑀁 𑀯𑀦𑀧𑀢𑁆𑀣𑁂 𑀲𑁂𑀦𑀸𑀲𑀦𑀲𑀧𑁆𑀧𑀸𑀬𑀸𑀪𑀸𑀯𑀁, 𑀉𑀢𑀼𑀧𑀼𑀕𑁆𑀕𑀮𑀥𑀫𑁆𑀫𑀲𑁆𑀲𑀯𑀦𑀲𑀧𑁆𑀧𑀸𑀬𑀸𑀪𑀸𑀯𑀫𑁆𑀧𑀺 𑀯𑀸 𑀤𑀲𑁆𑀲𑁂𑀢𑀺. 𑀚𑀻𑀯𑀺𑀢𑀲𑀫𑁆𑀪𑀸𑀭𑀸𑀢𑀺 (𑀅. 𑀦𑀺. 𑀝𑀻. 𑁩.𑁯.𑁬) 𑀚𑀻𑀯𑀺𑀢𑀧𑁆𑀧𑀯𑀢𑁆𑀢𑀺𑀬𑀸 𑀲𑀫𑁆𑀪𑀸𑀭𑀸 𑀧𑀘𑁆𑀘𑀬𑀸. 𑀲𑀫𑀼𑀤𑀸𑀦𑁂𑀢𑀩𑁆𑀩𑀸𑀢𑀺 𑀲𑀫𑁆𑀫𑀸 𑀜𑀸𑀬𑁂𑀦 𑀅𑀦𑀯𑀚𑁆𑀚𑀉𑀜𑁆𑀙𑀸𑀘𑀭𑀺𑀬𑀸𑀤𑀺𑀦𑀸 𑀉𑀤𑁆𑀥𑀁 𑀉𑀤𑁆𑀥𑀁 𑀆𑀦𑁂𑀢𑀩𑁆𑀩𑀸 𑀧𑀸𑀧𑀼𑀡𑀺𑀢𑀩𑁆𑀩𑀸. 𑀢𑁂 𑀧𑀦 𑀢𑀣𑀸 𑀲𑀫𑀼𑀤𑀸𑀦𑀺𑀢𑀸 𑀲𑀫𑀸𑀳𑀝𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀲𑀫𑀸𑀳𑀭𑀺𑀢𑀩𑁆𑀩𑀸’’𑀢𑀺. 𑀤𑀼𑀓𑁆𑀔𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀲𑀼𑀮𑀪𑀼𑀧𑁆𑀧𑀸𑀤𑀸 𑀦 𑀳𑁄𑀦𑁆𑀢𑀺. 𑀏𑀢𑁂𑀦 𑀪𑁄𑀚𑀦𑀲𑀧𑁆𑀧𑀸𑀬𑀸𑀤𑀺𑀅𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀭𑀢𑁆𑀢𑀺𑀪𑀸𑀕𑀁 𑀯𑀸 𑀤𑀺𑀯𑀲𑀪𑀸𑀕𑀁 𑀯𑀸𑀢𑀺 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀭𑀢𑁆𑀢𑀺𑀓𑁄𑀝𑁆𑀞𑀸𑀲𑁂 𑀯𑀸 𑀤𑀺𑀯𑀲𑀓𑁄𑀝𑁆𑀞𑀸𑀲𑁂 𑀯𑀸’’𑀢𑀺. 𑀭𑀢𑁆𑀢𑀺𑀁𑀬𑁂𑀯 𑀧𑀓𑁆𑀓𑀫𑀺𑀢𑀩𑁆𑀩𑀁 𑀲𑀫𑀡𑀥𑀫𑁆𑀫𑀲𑁆𑀲 𑀢𑀢𑁆𑀣 𑀅𑀦𑀺𑀧𑁆𑀨𑀚𑁆𑀚𑀦𑀢𑁄.

𑁧𑁯𑁨-𑁩. 𑀲𑀗𑁆𑀔𑀸𑀧𑀻𑀢𑀺 ‘‘𑀬𑀤𑀢𑁆𑀣𑀫𑀳𑀁 𑀧𑀩𑁆𑀩𑀚𑀺𑀢𑁄, 𑀦 𑀫𑁂𑀢𑀁 𑀇𑀥 𑀦𑀺𑀧𑁆𑀨𑀚𑁆𑀚𑀢𑀺, 𑀘𑀻𑀯𑀭𑀸𑀤𑀺 𑀧𑀦 𑀲𑀫𑀼𑀤𑀸𑀕𑀘𑁆𑀙𑀢𑀺, 𑀦𑀸𑀳𑀁 𑀢𑀤𑀢𑁆𑀣𑀁 𑀧𑀩𑁆𑀩𑀚𑀺𑀢𑁄, 𑀓𑀺𑀁 𑀫𑁂 𑀇𑀥 𑀯𑀸𑀲𑁂𑀦𑀸’’𑀢𑀺 𑀧𑀝𑀺𑀲𑀗𑁆𑀔𑀸𑀬𑀧𑀺. 𑀅𑀦𑀦𑁆𑀢𑀭𑀯𑀸𑀭𑁂 𑀲𑀗𑁆𑀔𑀸𑀧𑀻𑀢𑀺 ‘‘𑀬𑀤𑀢𑁆𑀣𑀫𑀳𑀁 𑀧𑀩𑁆𑀩𑀚𑀺𑀢𑁄, 𑀢𑀁 𑀫𑁂 𑀇𑀥 𑀦𑀺𑀧𑁆𑀨𑀚𑁆𑀚𑀢𑀺, 𑀘𑀻𑀯𑀭𑀸𑀤𑀺 𑀧𑀦 𑀦 𑀲𑀫𑀼𑀤𑀸𑀕𑀘𑁆𑀙𑀢𑀺, 𑀦𑀸𑀳𑀁 𑀢𑀤𑀢𑁆𑀣𑀁 𑀧𑀩𑁆𑀩𑀚𑀺𑀢𑁄’’𑀢𑀺 𑀧𑀝𑀺𑀲𑀗𑁆𑀔𑀸𑀬𑀧𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀲𑀫𑀡𑀥𑀫𑁆𑀫𑀲𑁆𑀲 𑀦𑀺𑀧𑁆𑀨𑀚𑁆𑀚𑀦𑀪𑀸𑀯𑀁 𑀚𑀸𑀦𑀺𑀢𑁆𑀯𑀸’’𑀢𑀺.

𑁧𑁯𑁫-𑁭. 𑀲𑁄 𑀧𑀼𑀕𑁆𑀕𑀮𑁄 𑀅𑀦𑀸𑀧𑀼𑀘𑁆𑀙𑀸 𑀧𑀓𑁆𑀓𑀫𑀺𑀢𑀩𑁆𑀩𑀁, 𑀦𑀸𑀦𑀼𑀩𑀦𑁆𑀥𑀺𑀢𑀩𑁆𑀩𑁄𑀢𑀺 ‘‘𑀲𑁄 𑀧𑀼𑀕𑁆𑀕𑀮𑁄’’𑀢𑀺 𑀧𑀤𑀲𑁆𑀲 ‘‘𑀦𑀸𑀦𑀼𑀩𑀦𑁆𑀥𑀺𑀢𑀩𑁆𑀩𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀬𑀲𑁆𑀲 𑀬𑁂𑀦 𑀳𑀺 𑀲𑀫𑁆𑀩𑀦𑁆𑀥𑁄, 𑀤𑀽𑀭𑀝𑁆𑀞𑁂𑀦𑀧𑀺 𑀲𑁄 𑀪𑀯𑀢𑀺. 𑀢𑀁 𑀧𑀼𑀕𑁆𑀕𑀮𑀦𑁆𑀢𑀺 ‘‘𑀲𑁄 𑀧𑀼𑀕𑁆𑀕𑀮𑁄’’𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀁 𑀉𑀧𑀬𑁄𑀕𑀯𑀲𑁂𑀦 𑀧𑀭𑀺𑀡𑀸𑀫𑁂𑀢𑁆𑀯𑀸 𑀢𑀁 𑀧𑀼𑀕𑁆𑀕𑀮𑀁 𑀅𑀦𑀸𑀧𑀼𑀘𑁆𑀙𑀸 𑀧𑀓𑁆𑀓𑀫𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀯𑀲𑁂𑀦 𑀳𑀺 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁄𑀢𑀺. 𑀢𑀁 𑀆𑀧𑀼𑀘𑁆𑀙𑀸 𑀧𑀓𑁆𑀓𑀫𑀺𑀢𑀩𑁆𑀩𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀆𑀧𑀼𑀘𑁆𑀙𑀸 𑀧𑀓𑁆𑀓𑀫𑀺𑀢𑀩𑁆𑀩𑀦𑁆𑀢𑀺 𑀘 𑀓𑀢𑀜𑁆𑀜𑀼𑀢𑀓𑀢𑀯𑁂𑀤𑀺𑀢𑀸𑀬 𑀦𑀺𑀬𑁄𑀚𑀦𑀁.

𑁧𑁯𑁮. 𑀏𑀯𑀭𑀽𑀧𑁄𑀢𑀺 𑀬𑀁 𑀦𑀺𑀲𑁆𑀲𑀸𑀬 𑀪𑀺𑀓𑁆𑀔𑀼𑀦𑁄 𑀕𑀼𑀡𑁂𑀳𑀺 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸, 𑀧𑀘𑁆𑀘𑀬𑁂𑀳𑀺 𑀘 𑀦 𑀧𑀭𑀺𑀲𑁆𑀲𑀫𑁄, 𑀏𑀯𑀭𑀽𑀧𑁄 𑀤𑀡𑁆𑀟𑀓𑀫𑁆𑀫𑀸𑀤𑀻𑀳𑀺 𑀦𑀺𑀕𑁆𑀕𑀡𑁆𑀳𑀸𑀢𑀺 𑀘𑁂𑀧𑀺, 𑀦 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀲𑀘𑁂𑀧𑀻’’𑀢𑀺𑀆𑀤𑀺𑀦𑀸.

𑀯𑀦𑀧𑀢𑁆𑀣𑀧𑀭𑀺𑀬𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.