𑁬. 𑀘𑁂𑀢𑁄𑀔𑀺𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁫. 𑀘𑁂𑀢𑁄 𑀢𑁂𑀳𑀺 𑀔𑀺𑀮𑀬𑀢𑀺 𑀣𑀤𑁆𑀥𑀪𑀸𑀯𑀁 𑀆𑀧𑀚𑁆𑀚𑀢𑀻𑀢𑀺 𑀘𑁂𑀢𑁄𑀔𑀺𑀮𑀸. 𑀢𑁂𑀦𑀸𑀳 ‘‘𑀘𑀺𑀢𑁆𑀢𑀲𑁆𑀲 𑀣𑀤𑁆𑀥𑀪𑀸𑀯𑀸’’𑀢𑀺. 𑀬𑀲𑁆𑀫𑀸 𑀢𑁂𑀳𑀺 𑀉𑀧𑁆𑀧𑀦𑁆𑀦𑁂𑀳𑀺 𑀘𑀺𑀢𑁆𑀢𑀁 𑀉𑀓𑁆𑀮𑀸𑀧𑀻𑀚𑀸𑀢𑀁 𑀞𑀸𑀦𑀁 𑀯𑀺𑀬 𑀅𑀫𑀦𑀼𑀜𑁆𑀜𑀁 𑀔𑁂𑀢𑁆𑀢𑀁 𑀯𑀺𑀬 𑀘 𑀔𑀸𑀡𑀼𑀓𑀦𑀺𑀘𑀺𑀢𑀁 𑀅𑀫𑀳𑀧𑁆𑀨𑀮𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑀘𑀯𑀭𑀪𑀸𑀯𑀸 𑀔𑀸𑀡𑀼𑀓𑀪𑀸𑀯𑀸’’𑀢𑀺. ‘‘𑀘𑀺𑀢𑁆𑀢𑀲𑁆𑀲𑀸’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀘𑀺𑀢𑁆𑀢𑀁 𑀩𑀦𑁆𑀥𑀺𑀢𑁆𑀯𑀸𑀢𑀺 𑀢𑀡𑁆𑀳𑀸𑀧𑀯𑀢𑁆𑀢𑀺𑀪𑀸𑀯𑀢𑁄 𑀓𑀼𑀲𑀮𑀘𑀸𑀭𑀲𑁆𑀲 𑀅𑀯𑀲𑀭𑀘𑀚𑀦𑀯𑀲𑁂𑀦 𑀘𑀺𑀢𑁆𑀢𑀁 𑀩𑀤𑁆𑀥𑀁 𑀯𑀺𑀬 𑀲𑀫𑁄𑀭𑁄𑀥𑁂𑀢𑁆𑀯𑀸. 𑀢𑁂𑀦𑀸𑀳 ‘‘𑀫𑀼𑀝𑁆𑀞𑀺𑀬𑀁 𑀓𑀢𑁆𑀯𑀸 𑀯𑀺𑀬 𑀕𑀡𑁆𑀳𑀦𑁆𑀢𑀻’’𑀢𑀺. 𑀲𑀤𑁆𑀤𑀢𑁆𑀣𑀢𑁄 𑀧𑀦 𑀘𑁂𑀢𑁄 𑀯𑀺𑀭𑀽𑀧𑀁 𑀦𑀺𑀩𑀦𑁆𑀥𑀻𑀬𑀢𑀺 𑀲𑀁𑀬𑀫𑀻𑀬𑀢𑀺 𑀏𑀢𑁂𑀳𑀻𑀢𑀺 𑀘𑁂𑀢𑀲𑁄 𑀯𑀺𑀦𑀺𑀩𑀦𑁆𑀥𑀸 𑀬𑀲𑁆𑀲 𑀘𑀢𑀼𑀩𑁆𑀩𑀺𑀥𑀁 𑀲𑀻𑀮𑀁 𑀅𑀔𑀡𑁆𑀟𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀲𑀼𑀧𑀭𑀺𑀲𑀼𑀤𑁆𑀥𑀁 𑀯𑀺𑀲𑁂𑀲𑀪𑀸𑀕𑀺𑀬𑀢𑁆𑀢𑀸 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀫𑀕𑁆𑀕𑀨𑀮𑀸𑀯𑀳𑀁 𑀫𑀳𑀸𑀲𑀗𑁆𑀖𑀭𑀓𑁆𑀔𑀺𑀢𑀢𑁆𑀣𑁂𑀭𑀲𑁆𑀲 𑀯𑀺𑀬, 𑀲𑁄 𑀢𑀸𑀤𑀺𑀲𑁂𑀦 𑀲𑀻𑀮𑁂𑀦 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀆𑀳 ‘‘𑀲𑀻𑀮𑁂𑀦 𑀯𑀼𑀤𑁆𑀥𑀺’’𑀦𑁆𑀢𑀺. 𑀬𑀲𑁆𑀲 𑀧𑀦 𑀅𑀭𑀺𑀬𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀦𑁆𑀢𑁄 𑀯𑀺𑀭𑀽𑀴𑁆𑀳𑀫𑀽𑀮𑁄 𑀯𑀺𑀬 𑀧𑀸𑀤𑀧𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄, 𑀲𑁄 𑀲𑀸𑀲𑀦𑁂 𑀯𑀺𑀭𑀽𑀴𑁆𑀳𑀺𑀁 𑀆𑀧𑀦𑁆𑀦𑁄𑀢𑀺 𑀆𑀳 ‘‘𑀫𑀕𑁆𑀕𑁂𑀦 𑀯𑀺𑀭𑀽𑀴𑁆𑀳𑀺’’𑀦𑁆𑀢𑀺. 𑀬𑁄 𑀲𑀩𑁆𑀩𑀲𑁄 𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄, 𑀲𑁄 𑀅𑀭𑀳𑀸 𑀲𑀻𑀮𑀸𑀤𑀺𑀥𑀫𑁆𑀫𑀓𑁆𑀔𑀦𑁆𑀥𑀧𑀸𑀭𑀺𑀧𑀽𑀭𑀺𑀬𑀸 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑁄 𑀳𑁄𑀢𑀻𑀢𑀺 𑀆𑀳 ‘‘𑀦𑀺𑀩𑁆𑀩𑀸𑀦𑁂𑀦 𑀯𑁂𑀧𑀼𑀮𑁆𑀮’’𑀦𑁆𑀢𑀺. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀅𑀢𑁆𑀣𑁄 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀩𑀼𑀤𑁆𑀥𑀸𑀦𑀁 𑀥𑀫𑁆𑀫𑀓𑀸𑀬𑁄 𑀯𑀺𑀬 𑀭𑀽𑀧𑀓𑀸𑀬𑁄𑀧𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀸𑀬 𑀅𑀦𑀼𑀢𑁆𑀢𑀭𑀕𑀼𑀡𑀸𑀥𑀺𑀝𑁆𑀞𑀸𑀦𑀢𑀸𑀬 𑀘 𑀅𑀧𑀘𑁆𑀘𑀓𑁆𑀔𑀓𑀸𑀭𑀻𑀦𑀁 𑀲𑀁𑀲𑀬𑀯𑀢𑁆𑀣𑀼 𑀳𑁄𑀢𑀺𑀬𑁂𑀯𑀸𑀢𑀺 ‘‘𑀲𑀭𑀻𑀭𑁂 𑀯𑀸 𑀕𑀼𑀡𑁂 𑀯𑀸 𑀓𑀗𑁆𑀔𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀣𑀸 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀦 𑀅𑀦𑀼𑀩𑁆𑀬𑀜𑁆𑀚𑀦𑀸𑀤𑀬𑁄 𑀭𑀽𑀧𑀓𑀸𑀬𑀕𑀼𑀡𑀸 𑀕𑀳𑀺𑀢𑀸 𑀏𑀯 𑀳𑁄𑀦𑁆𑀢𑀺 𑀅𑀯𑀺𑀦𑀸𑀪𑀸𑀯𑀢𑁄𑀢𑀺 ‘‘𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀧𑁆𑀧𑀝𑀺𑀫𑀡𑁆𑀟𑀺𑀢’’𑀫𑀺𑀘𑁆𑀘𑁂𑀯 𑀯𑀼𑀢𑁆𑀢𑀁, 𑀏𑀯𑀁 𑀅𑀦𑀸𑀯𑀭𑀡𑀜𑀸𑀡𑁂𑀦 𑀲𑀩𑁆𑀩𑁂𑀧𑀺 𑀅𑀦𑀦𑁆𑀢𑀸𑀧𑀭𑀺𑀫𑁂𑀬𑁆𑀬𑀪𑁂𑀤𑀸 𑀥𑀫𑁆𑀫𑀓𑀸𑀬𑀕𑀼𑀡𑀸 𑀕𑀳𑀺𑀢𑀸 𑀏𑀯 𑀳𑁄𑀦𑁆𑀢𑀻𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀕𑁆𑀕𑀳𑀡𑀫𑁂𑀯 𑀓𑀢𑀁 𑀦𑀸𑀦𑀦𑁆𑀢𑀭𑀺𑀬𑀪𑀸𑀯𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀗𑁆𑀔𑀳𑀻𑀢𑀺 ‘‘𑀅𑀳𑁄 𑀯𑀢 𑀢𑁂 𑀕𑀼𑀡𑀸 𑀦 𑀪𑀯𑁂𑀬𑁆𑀬𑀼𑀁, 𑀪𑀯𑁂𑀬𑁆𑀬𑀼𑀁 𑀯𑀸’’𑀢𑀺 𑀧𑀢𑁆𑀣𑀦𑀼𑀧𑁆𑀧𑀸𑀤𑀦𑀯𑀲𑁂𑀦 𑀓𑀗𑁆𑀔𑀢𑀺. 𑀧𑀼𑀭𑀺𑀫𑁄 𑀳𑀺 𑀯𑀺𑀧𑀭𑀻𑀢𑀚𑁆𑀛𑀸𑀲𑀬𑁄, 𑀇𑀢𑀭𑁄 𑀬𑀣𑀸𑀪𑀽𑀢𑀜𑀸𑀡𑀚𑁆𑀛𑀸𑀲𑀬𑁄. 𑀯𑀺𑀘𑀺𑀦𑀦𑁆𑀢𑁄𑀢𑀺 𑀯𑀺𑀘𑀬𑀪𑀽𑀢𑀸𑀬 𑀧𑀜𑁆𑀜𑀸𑀬 𑀢𑁂 𑀯𑀺𑀯𑁂𑀘𑁂𑀢𑀼𑀓𑀸𑀫𑁄 𑀢𑀤𑀪𑀸𑀯𑀢𑁄 𑀓𑀺𑀘𑁆𑀙𑀁 𑀤𑀼𑀓𑁆𑀔𑀁 𑀆𑀧𑀚𑁆𑀚𑀢𑀺, 𑀓𑀺𑀘𑁆𑀙𑀧𑁆𑀧𑀢𑁆𑀢𑀺 𑀘 𑀢𑀢𑁆𑀣 𑀦𑀺𑀘𑁆𑀙𑁂𑀢𑀼𑀁 𑀅𑀲𑀫𑀢𑁆𑀣𑀢𑀸𑀬𑁂𑀯𑀸𑀢𑀺 𑀆𑀳 ‘‘𑀯𑀺𑀦𑀺𑀘𑁆𑀙𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺. 𑀯𑀺𑀕𑀢𑀸 𑀘𑀺𑀓𑀺𑀘𑁆𑀙𑀸𑀢𑀺 𑀯𑀺𑀘𑀺𑀓𑀺𑀘𑁆𑀙𑀸. 𑀅𑀥𑀺𑀫𑁄𑀓𑁆𑀔𑀁 𑀦 𑀧𑀝𑀺𑀮𑀪𑀢𑀻𑀢𑀺 ‘‘𑀏𑀯𑀫𑁂𑀢’’𑀦𑁆𑀢𑀺 𑀑𑀓𑀧𑁆𑀧𑀦𑀯𑀲𑁂𑀦 𑀕𑀼𑀡𑁂𑀲𑀼 𑀯𑀺𑀦𑀺𑀘𑁆𑀙𑀬𑀁 𑀦𑀸𑀥𑀺𑀕𑀘𑁆𑀙𑀢𑀺. 𑀑𑀢𑀭𑀺𑀢𑁆𑀯𑀸𑀢𑀺 𑀜𑀸𑀡𑁂𑀦 𑀅𑀦𑀼𑀧𑀯𑀺𑀲𑀺𑀢𑁆𑀯𑀸. 𑀧𑀲𑀻𑀤𑀺𑀢𑀼𑀦𑁆𑀢𑀺 ‘‘𑀧𑀲𑀦𑁆𑀦𑀭𑀽𑀧𑀥𑀫𑁆𑀫𑀓𑀸𑀬𑀕𑀼𑀡𑁂𑀳𑀺 𑀪𑀕𑀯𑀸’’𑀢𑀺 𑀧𑀲𑀻𑀤𑀺𑀢𑀼𑀁. 𑀅𑀦𑀸𑀯𑀺𑀮𑁄 𑀅𑀓𑀸𑀮𑀼𑀲𑁆𑀲𑁄 𑀳𑁄𑀢𑀼𑀁 𑀦 𑀲𑀓𑁆𑀓𑁄𑀢𑀺. ‘‘𑀓𑀗𑁆𑀔𑀢𑀻’’𑀢𑀺 𑀇𑀫𑀺𑀦𑀸 𑀤𑀼𑀩𑁆𑀩𑀮𑀸 𑀯𑀺𑀫𑀢𑀺 𑀯𑀼𑀢𑁆𑀢𑀸, ‘‘𑀯𑀺𑀘𑀺𑀓𑀺𑀘𑁆𑀙𑀢𑀻’’𑀢𑀺 𑀇𑀫𑀺𑀦𑀸 𑀫𑀚𑁆𑀛𑀺𑀫𑀸, ‘‘𑀦𑀸𑀥𑀺𑀫𑀼𑀘𑁆𑀘𑀢𑀻’’𑀢𑀺 𑀇𑀫𑀺𑀦𑀸 𑀩𑀮𑀯𑀢𑀻, ‘‘𑀦 𑀲𑀫𑁆𑀧𑀲𑀻𑀤𑀢𑀻’’𑀢𑀺 𑀇𑀫𑀺𑀦𑀸 𑀢𑀺𑀯𑀺𑀥𑀸𑀬𑀧𑀺 𑀯𑀺𑀫𑀢𑀺𑀬𑀸 𑀯𑀲𑁂𑀦 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀓𑀸𑀮𑀼𑀲𑁆𑀲𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀆𑀢𑀧𑁆𑀧𑀸𑀬𑀸𑀢𑀺𑀆𑀤𑀺𑀢𑁄 𑀢𑀧𑀢𑀺 𑀲𑀦𑁆𑀢𑀧𑀢𑀺 𑀓𑀺𑀮𑁂𑀲𑁂𑀢𑀺 𑀆𑀢𑀧𑁆𑀧𑀁, 𑀆𑀭𑀫𑁆𑀪𑀥𑀸𑀢𑀼, 𑀢𑀤𑀢𑁆𑀣𑀸𑀬. 𑀅𑀦𑀼𑀬𑁄𑀕𑀸𑀬𑀸𑀢𑀺 𑀬𑀣𑀸 𑀲𑀁𑀓𑀺𑀮𑁂𑀲𑀥𑀫𑁆𑀫𑀸𑀦𑀁 𑀅𑀯𑀲𑀭𑁄 𑀦 𑀳𑁄𑀢𑀺, 𑀏𑀯𑀁 𑀅𑀦𑀼 𑀅𑀦𑀼 𑀬𑀼𑀜𑁆𑀚𑀦𑀁 𑀅𑀦𑀼𑀬𑁄𑀕𑁄, 𑀦𑀺𑀓𑁆𑀓𑀫𑀥𑀸𑀢𑀼, 𑀢𑀤𑀢𑁆𑀣𑀸𑀬. 𑀢𑁂𑀦𑀸𑀳 ‘‘𑀧𑀼𑀦𑀧𑁆𑀧𑀼𑀦𑀁 𑀬𑁄𑀕𑀸𑀬𑀸’’𑀢𑀺. 𑀲𑀸𑀢𑀘𑁆𑀘𑀸𑀬𑀸𑀢𑀺 𑀬𑀣𑀸 𑀉𑀧𑀭𑀽𑀧𑀭𑀺 𑀯𑀺𑀲𑁂𑀲𑀸𑀥𑀺𑀕𑀫𑁄 𑀳𑁄𑀢𑀺, 𑀢𑀣𑀸 𑀲𑀢𑀢𑀲𑁆𑀲 𑀦𑀺𑀭𑀦𑁆𑀢𑀭𑀧𑀯𑀢𑁆𑀢𑀲𑁆𑀲 𑀅𑀦𑀼𑀬𑁄𑀕𑀲𑁆𑀲 𑀪𑀸𑀯𑁄 𑀲𑀸𑀢𑀘𑁆𑀘𑀁, 𑀧𑀭𑀓𑁆𑀓𑀫𑀥𑀸𑀢𑀼, 𑀢𑀤𑀢𑁆𑀣𑀸𑀬. 𑀧𑀥𑀸𑀦𑀸𑀬𑀸𑀢𑀺 𑀲𑀦𑁆𑀢𑀫𑁂𑀯𑀁 𑀢𑀺𑀯𑀺𑀥𑀥𑀸𑀢𑀼𑀲𑀁𑀯𑀟𑁆𑀠𑀺𑀢𑀸𑀦𑀼𑀪𑀸𑀯𑀁 𑀲𑀩𑁆𑀩𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀲𑀫𑀢𑁆𑀣𑀁 𑀧𑀥𑀸𑀦𑀲𑀗𑁆𑀔𑀸𑀢𑀁 𑀯𑀻𑀭𑀺𑀬𑀁, 𑀢𑀤𑀢𑁆𑀣𑀸𑀬. 𑀏𑀢𑁆𑀣 𑀘 𑀆𑀢𑀧𑁆𑀧𑀸𑀬 𑀘𑀺𑀢𑁆𑀢𑀁 𑀦 𑀦𑀫𑀢𑀺 𑀬𑀣𑀸𑀯𑀼𑀢𑁆𑀢𑀓𑀗𑁆𑀔𑀸𑀯𑀲𑁂𑀦, 𑀧𑀕𑁂𑀯 𑀅𑀦𑀼𑀬𑁄𑀕𑀸𑀤𑀺𑀅𑀢𑁆𑀣𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀘𑀢𑁆𑀢𑀸𑀭𑀺𑀧𑀺 𑀧𑀤𑀸𑀦𑀺 𑀕𑀳𑀺𑀢𑀸𑀦𑀺, 𑀅𑀦𑀯𑀲𑁂𑀲𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀯𑀸. 𑀓𑁂𑀘𑀺 𑀧𑀦 ‘‘𑀆𑀢𑀧𑁆𑀧𑀯𑁂𑀯𑀘𑀦𑀸𑀦𑁂𑀯 𑀅𑀦𑀼𑀬𑁄𑀕𑀸𑀤𑀺𑀧𑀤𑀸𑀦𑀻’’𑀢𑀺 𑀯𑀤𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀪𑀕𑀯𑀸 𑀲𑀢𑁆𑀣𑀭𑀺 𑀓𑀗𑁆𑀔𑀸𑀬 𑀘𑀺𑀢𑁆𑀢𑀲𑁆𑀲 𑀣𑀤𑁆𑀥𑀓𑀘𑀯𑀭𑀔𑀸𑀡𑀼𑀓𑀪𑀸𑀯𑁂𑀦 𑀅𑀓𑀼𑀲𑀮𑀪𑀸𑀯𑀸𑀤𑀺𑀆𑀧𑀸𑀤𑀦𑀢𑁄 𑀘𑁂𑀢𑁄𑀔𑀺𑀮𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀲𑀺𑀓𑁆𑀔𑀸𑀕𑁆𑀕𑀳𑀡𑁂𑀦 𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑀲𑁆𑀲 𑀕𑀳𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁂 𑀘 𑀧𑀝𑀺𑀯𑁂𑀥𑀥𑀫𑁆𑀫𑁂 𑀘𑀸’’𑀢𑀺. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁂 𑀬𑀢𑁆𑀣 𑀓𑀗𑁆𑀔𑀸𑀬 𑀲𑀫𑁆𑀪𑀯𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀼𑀭𑀸𑀲𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀬𑀺𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁 𑀧𑀭𑀫𑁆𑀧𑀭𑀸𑀬 𑀧𑀝𑀺𑀯𑁂𑀥𑀸𑀯𑀳𑀪𑀸𑀯𑀸𑀤𑀺𑀯𑀲𑁂𑀦𑀧𑀺 𑀏𑀓𑀘𑁆𑀘𑀸𑀦𑀁 𑀢𑀢𑁆𑀣 𑀲𑀁𑀲𑀬𑀼𑀧𑁆𑀧𑀢𑁆𑀢𑀺𑀢𑁄. 𑀬𑀣𑀸 𑀘 𑀧𑀝𑀺𑀯𑁂𑀥𑁂 𑀓𑀗𑁆𑀔𑀸 𑀯𑀼𑀢𑁆𑀢𑀸, 𑀏𑀯𑀁 𑀅𑀥𑀺𑀕𑀫𑀥𑀫𑁆𑀫𑁂𑀧𑀺 𑀧𑀯𑀢𑁆𑀢𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀳𑀺 𑀏𑀓𑀘𑁆𑀘𑁂 ‘‘𑀓𑀲𑀺𑀡𑀸𑀤𑀺𑀪𑀸𑀯𑀦𑀸𑀬 𑀛𑀸𑀦𑀸𑀦𑀺 𑀇𑀚𑁆𑀛𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. ‘‘𑀓𑀲𑀺𑀡𑀦𑀺𑀲𑁆𑀲𑀦𑁆𑀤𑁄 𑀆𑀭𑀼𑀧𑁆𑀧𑀸𑀢𑀺, 𑀫𑁂𑀢𑁆𑀢𑀸𑀤𑀺𑀦𑀺𑀲𑁆𑀲𑀦𑁆𑀤𑁄 𑀘𑀢𑀼𑀢𑁆𑀣𑀩𑁆𑀭𑀳𑁆𑀫𑀯𑀺𑀳𑀸𑀭𑁄’’𑀢𑀺 𑀏𑀯𑀫𑀸𑀤𑀺𑀦𑀸 𑀓𑀗𑁆𑀔𑀢𑀺𑀬𑁂𑀯𑀸𑀢𑀺. 𑀏𑀢𑁆𑀣 𑀘 𑀦𑀯𑀮𑁄𑀓𑀼𑀢𑁆𑀢𑀭𑁂𑀲𑀼 𑀧𑀜𑁆𑀜𑀢𑁆𑀢𑀺𑀬𑀁𑀬𑁂𑀯 𑀓𑀗𑁆𑀔𑀸𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸 𑀅𑀲𑀁𑀓𑀺𑀮𑁂𑀲𑀺𑀓𑀢𑁆𑀢𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀁.

𑀏𑀯𑀭𑀽𑀧𑀦𑁆𑀢𑀺 𑀏𑀤𑀺𑀲𑀁 𑀲𑀼𑀧𑁆𑀧𑀝𑀺𑀧𑀢𑁆𑀢𑀺-𑀉𑀚𑀼𑀧𑁆𑀧𑀝𑀺𑀧𑀢𑁆𑀢𑀺-𑀜𑀸𑀬𑀧𑁆𑀧𑀝𑀺𑀧𑀢𑁆𑀢𑀺-𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀢𑁆𑀢𑀺-𑀲𑀗𑁆𑀔𑀸𑀢𑀁 𑀲𑀫𑁆𑀫𑀸𑀧𑀝𑀺𑀧𑀤𑀁. 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀬𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲 𑀅𑀦𑀼𑀥𑀫𑁆𑀫𑀪𑀽𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀜𑁆𑀳𑀺 𑀫𑀕𑁆𑀕𑀨𑀮𑀲𑀺𑀓𑁆𑀔𑀸𑀳𑀺 𑀇𑀫𑀸𑀲𑀁 𑀯𑀺𑀲𑁂𑀲𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀲𑀺𑀓𑁆𑀔𑀸𑀕𑁆𑀕𑀳𑀡𑁂𑀦 𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑀲𑁆𑀲 𑀕𑀳𑀺𑀢𑀢𑁆𑀢𑀸’’𑀢𑀺. 𑀏𑀢𑁆𑀣 𑀘 𑀬𑀣𑀸 𑀯𑀺𑀘𑀺𑀓𑀺𑀘𑁆𑀙𑀸 𑀯𑀢𑁆𑀣𑀼𑀢𑁆𑀢𑀬𑀲𑁆𑀲 𑀲𑀺𑀓𑁆𑀔𑀸𑀬 𑀘 𑀕𑀼𑀡𑁂𑀲𑀼 𑀅𑀦𑀥𑀺𑀫𑀼𑀘𑁆𑀘𑀦𑀅𑀲𑀫𑁆𑀧𑀲𑀻𑀤𑀦𑀯𑀲𑁂𑀦 𑀅𑀧𑁆𑀧𑀝𑀺𑀧𑀢𑁆𑀢𑀺𑀪𑀸𑀯𑀢𑁄 𑀘𑀺𑀢𑁆𑀢𑀲𑁆𑀲 𑀣𑀤𑁆𑀥𑀪𑀸𑀯𑁄 𑀆𑀲𑀧𑁆𑀧𑀦𑀧𑀭𑀺𑀲𑀧𑁆𑀧𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀓𑀘𑀯𑀭𑀔𑀸𑀡𑀼𑀓𑀪𑀸𑀯𑁄 𑀘, 𑀏𑀯𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀆𑀖𑀸𑀢𑀘𑀡𑁆𑀟𑀺𑀓𑁆𑀓𑀸𑀤𑀺𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀣𑀤𑁆𑀥𑀪𑀸𑀯𑁄 𑀘 𑀉𑀧𑀳𑀦𑀦𑀯𑀺𑀭𑀼𑀚𑁆𑀛𑀦𑀸𑀤𑀺𑀯𑀲𑁂𑀦 𑀓𑀘𑀯𑀭𑀔𑀸𑀡𑀼𑀓𑀪𑀸𑀯𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀅𑀭𑀺𑀬𑀲𑀗𑁆𑀖𑀯𑀺𑀲𑀬𑀸 𑀯𑀺𑀘𑀺𑀓𑀺𑀘𑁆𑀙𑀸, 𑀧𑀼𑀕𑁆𑀕𑀮𑀯𑀺𑀲𑀬𑀸 𑀓𑀸𑀘𑀺 𑀦𑀢𑁆𑀣𑀻𑀢𑀺 𑀲𑀗𑁆𑀖𑀯𑀺𑀲𑀬𑀸𑀯 𑀕𑀳𑀺𑀢𑀸, 𑀲𑀸𑀲𑀦𑀺𑀓𑀯𑀲𑁂𑀦 𑀘𑀸𑀬𑀁 𑀘𑁂𑀢𑁄𑀔𑀺𑀮𑀤𑁂𑀲𑀦𑀸𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀯𑀺𑀲𑀬𑁄𑀯 𑀓𑁄𑀧𑁄 𑀕𑀳𑀺𑀢𑁄.

𑁧𑁮𑁬. 𑀬𑀣𑀸 𑀯𑀢𑁆𑀣𑀼𑀓𑀸𑀫𑁄, 𑀏𑀯𑀁 𑀓𑀺𑀮𑁂𑀲𑀓𑀸𑀫𑁄𑀧𑀺 𑀅𑀲𑁆𑀲𑀸𑀤𑀦𑀻𑀬𑁄 𑀏𑀯𑀸𑀢𑀺 ‘‘𑀓𑀺𑀮𑁂𑀲𑀓𑀸𑀫𑁂𑀧𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 𑀪𑀕𑀯𑀸 ‘‘𑀭𑀽𑀧𑀢𑀡𑁆𑀳𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀻’’𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁪𑁦𑁦; 𑀫. 𑀦𑀺. 𑁧.𑁧𑁩𑁩; 𑀯𑀺𑀪. 𑁨𑁦𑁩). 𑀓𑀸𑀫𑀦𑀺𑀤𑁆𑀤𑁂𑀲𑁂 (𑀫𑀳𑀸𑀦𑀺. 𑁧) 𑀲𑀩𑁆𑀩𑁂𑀧𑀺 𑀢𑁂𑀪𑀽𑀫𑀓𑀸 𑀥𑀫𑁆𑀫𑀸 𑀓𑀸𑀫𑀦𑀻𑀬𑀝𑁆𑀞𑁂𑀦 ‘‘𑀓𑀸𑀫𑀸’’𑀢𑀺 𑀯𑀼𑀢𑁆𑀢𑀸, 𑀩𑀮𑀯𑀓𑀸𑀫𑀭𑀸𑀕𑀯𑀢𑁆𑀣𑀼𑀪𑀽𑀢𑀸𑀬𑁂𑀯𑁂𑀢𑁆𑀣 𑀓𑀸𑀫𑀕𑁆𑀕𑀳𑀡𑁂𑀦 𑀕𑀳𑀺𑀢𑀸𑀢𑀺. 𑀯𑀺𑀦𑀺𑀩𑀤𑁆𑀥𑀯𑀢𑁆𑀣𑀼𑀪𑀸𑀯𑁂𑀦 𑀬𑀣𑀸 𑀯𑀺𑀲𑀼𑀁 𑀅𑀢𑁆𑀢𑀦𑁄 𑀓𑀸𑀬𑁄 𑀕𑀳𑀺𑀢𑁄, 𑀢𑀣𑀸 𑀧𑀭𑁂𑀲𑀁 𑀢𑀣𑀸𑀭𑀽𑀧𑀸 𑀭𑀽𑀧𑀥𑀫𑁆𑀫𑀸 𑀲𑀫𑀽𑀳𑀝𑁆𑀞𑁂𑀦𑀸𑀢𑀺 𑀆𑀳 ‘‘𑀭𑀽𑀧𑁂𑀢𑀺 𑀩𑀳𑀺𑀤𑁆𑀥𑀸𑀭𑀽𑀧𑁂’’𑀢𑀺. 𑀬𑀣𑀸 𑀳𑀺 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄 𑀭𑀸𑀕𑁄 𑀛𑀸𑀦𑀸𑀤𑀺𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀯𑀺𑀦𑀺𑀩𑀤𑁆𑀥𑀸𑀬 𑀲𑀁𑀯𑀢𑁆𑀢𑀢𑀺, 𑀏𑀯𑀁 𑀅𑀢𑁆𑀢𑀦𑁄 𑀓𑀸𑀬𑁂 𑀅𑀧𑁂𑀓𑁆𑀔𑀸 𑀩𑀳𑀺𑀤𑁆𑀥𑀸 𑀘 𑀲𑀓𑀧𑀭𑀺𑀓𑁆𑀔𑀸𑀭𑀜𑀸𑀢𑀺𑀫𑀺𑀢𑁆𑀢𑀸𑀤𑀻𑀲𑀼 𑀅𑀧𑁂𑀓𑁆𑀔𑀸𑀢𑀺. 𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀭𑀽𑀧𑁂𑀢𑀺 𑀭𑀽𑀧𑀚𑁆𑀛𑀸𑀦𑁂’’𑀢𑀺𑀆𑀤𑀺𑀦𑀸 𑀧𑀧𑀜𑁆𑀘𑁂𑀦𑁆𑀢𑀺. 𑀢𑀤𑀬𑀼𑀢𑁆𑀢𑀁 𑀛𑀸𑀦𑀸𑀥𑀺𑀕𑀫𑀯𑀺𑀦𑀺𑀩𑀤𑁆𑀥𑀸𑀦𑀁 𑀲𑀻𑀮𑀲𑁆𑀲 𑀘 𑀲𑀁𑀓𑀺𑀮𑁂𑀲𑀪𑀽𑀢𑀸𑀦𑀁 𑀘𑁂𑀢𑁄𑀯𑀺𑀦𑀺𑀩𑀤𑁆𑀥𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸.

𑀬𑀸𑀯𑀤𑀢𑁆𑀣𑀦𑁆𑀢𑀺 𑀬𑀸𑀯 𑀅𑀢𑁆𑀣𑁂𑀢𑀺 𑀅𑀪𑀺𑀓𑀗𑁆𑀔𑀢𑀺, 𑀢𑀸𑀯. 𑀢𑁂𑀦𑀸𑀳 ‘‘𑀬𑀢𑁆𑀢𑀓𑀁 𑀇𑀘𑁆𑀙𑀢𑀺, 𑀢𑀢𑁆𑀢𑀓’’𑀦𑁆𑀢𑀺. 𑀦𑁆𑀢𑀺 𑀬𑀸𑀯𑀤𑀢𑁆𑀣𑀁 𑀉𑀤𑀭𑀧𑀽𑀭𑀁 𑀪𑀼𑀢𑁆𑀢𑀁. 𑀅𑀯𑀤𑁂𑀳𑀦𑀢𑁄 𑀧𑀽𑀭𑀡𑀢𑁄. 𑀲𑁂𑀬𑁆𑀬𑀲𑀼𑀔𑀦𑁆𑀢𑀺 𑀲𑁂𑀬𑁆𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑀓𑀲𑀼𑀔𑀁. 𑀧𑀲𑁆𑀲𑀲𑀼𑀔𑀦𑁆𑀢𑀺 𑀧𑀲𑁆𑀲𑀸𑀦𑀁 𑀲𑀫𑁆𑀧𑀭𑀺𑀯𑀢𑁆𑀢𑀦𑁂𑀦 𑀉𑀧𑁆𑀧𑀚𑁆𑀚𑀦𑀓𑀲𑀼𑀔𑀁. 𑀦𑀺𑀤𑁆𑀤𑀸𑀲𑀼𑀔𑀦𑁆𑀢𑀺 𑀦𑀺𑀤𑁆𑀤𑀸𑀬𑀦𑁂𑀦 𑀉𑀧𑁆𑀧𑀚𑁆𑀚𑀦𑀓𑀲𑀼𑀔𑀁.

𑀲𑀻𑀮𑁂𑀦𑀸𑀢𑀺𑀆𑀤𑀺 𑀧𑀢𑁆𑀣𑀦𑀸𑀓𑀸𑀭𑀤𑀲𑁆𑀲𑀦𑀁. 𑀯𑀢𑀲𑀫𑀸𑀤𑀸𑀦𑀦𑁆𑀢𑀺 𑀥𑀼𑀢𑀗𑁆𑀕𑀸𑀤𑀺𑀯𑀢𑀸𑀦𑀼𑀝𑁆𑀞𑀸𑀦𑀁. 𑀢𑀧𑁄𑀢𑀺 𑀯𑀻𑀭𑀺𑀬𑀸𑀭𑀫𑁆𑀪𑁄. 𑀲𑁄 𑀳𑀺 𑀓𑀺𑀮𑁂𑀲𑀸𑀦𑀁 𑀢𑀧𑀦𑀝𑁆𑀞𑁂𑀦 𑀦𑀺𑀕𑁆𑀕𑀡𑁆𑀳𑀦𑀝𑁆𑀞𑁂𑀦 𑀢𑀧𑀘𑀭𑀡𑀦𑁆𑀢𑀺 𑀯𑀼𑀢𑁆𑀢𑀁.

𑁧𑁮𑁯. 𑀙𑀦𑁆𑀤𑀁 𑀦𑀺𑀲𑁆𑀲𑀸𑀬𑀸𑀢𑀺 𑀙𑀦𑁆𑀤𑀁 𑀥𑀼𑀭𑀁, 𑀙𑀦𑁆𑀤𑀁 𑀚𑁂𑀝𑁆𑀞𑀓𑀁, 𑀙𑀦𑁆𑀤𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀯𑀲𑁂𑀦 𑀙𑀦𑁆𑀤𑀁 𑀦𑀺𑀲𑁆𑀲𑀸𑀬. 𑀚𑁂𑀝𑁆𑀞𑀓𑀝𑁆𑀞𑁂𑀦 𑀧𑀥𑀸𑀦𑀪𑀽𑀢𑀸, 𑀧𑀥𑀸𑀦𑀪𑀸𑀯𑀁 𑀯𑀸 𑀧𑀢𑁆𑀢𑀸𑀢𑀺 𑀧𑀥𑀸𑀦𑀪𑀽𑀢𑀸. 𑀢𑁂𑀳𑀺 𑀥𑀫𑁆𑀫𑁂𑀳𑀻𑀢𑀺 𑀙𑀦𑁆𑀤𑀦𑀺𑀲𑁆𑀲𑀬𑁂𑀦 𑀧𑀯𑀢𑁆𑀢𑀲𑀫𑀸𑀥𑀺𑀦𑀸 𑀘𑁂𑀯 ‘‘𑀧𑀥𑀸𑀦𑀲𑀗𑁆𑀔𑀸𑀭𑁄’’𑀢𑀺 𑀯𑀼𑀢𑁆𑀢𑀯𑀻𑀭𑀺𑀬𑁂𑀦 𑀘. 𑀉𑀧𑁂𑀢𑀦𑁆𑀢𑀺 𑀲𑀫𑁆𑀧𑀬𑀼𑀢𑁆𑀢𑀁. 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀺, 𑀦𑀺𑀧𑁆𑀨𑀢𑁆𑀢𑀺𑀅𑀢𑁆𑀣𑁂𑀦 𑀧𑀝𑀺𑀮𑀸𑀪𑀝𑁆𑀞𑁂𑀦 𑀘𑀸𑀢𑀺 𑀅𑀢𑁆𑀣𑁄, 𑀢𑀲𑁆𑀲𑀸 𑀇𑀤𑁆𑀥𑀺𑀬𑀸 𑀧𑀸𑀤𑀁 𑀧𑀸𑀤𑀓𑀁 𑀧𑀤𑀝𑁆𑀞𑀸𑀦𑀪𑀽𑀢𑀁. 𑀅𑀣 𑀯𑀸 𑀇𑀚𑁆𑀛𑀦𑁆𑀢𑀺 𑀢𑀸𑀬 𑀇𑀤𑁆𑀥𑀸 𑀯𑀼𑀤𑁆𑀥𑀸 𑀉𑀓𑁆𑀓𑀁𑀲𑀕𑀢𑀸 𑀳𑁄𑀦𑁆𑀢𑀻𑀢𑀺 𑀇𑀤𑁆𑀥𑀺, 𑀲𑀸𑀯 𑀉𑀧𑀭𑀺𑀯𑀺𑀲𑁂𑀲𑀸𑀦𑀁 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀧𑀸𑀤𑁄. 𑀢𑁂𑀦𑀸𑀳 ‘‘𑀇𑀤𑁆𑀥𑀺𑀪𑀽𑀢𑀁 𑀯𑀸 𑀧𑀸𑀤𑀦𑁆𑀢𑀺 𑀇𑀤𑁆𑀥𑀺𑀧𑀸𑀤’’𑀦𑁆𑀢𑀺. 𑀲𑁂𑀲𑁂𑀲𑀼𑀧𑀻𑀢𑀺 𑀯𑀻𑀭𑀺𑀬𑀺𑀤𑁆𑀥𑀺𑀧𑀸𑀤𑀸𑀤𑀻𑀲𑀼𑀧𑀺. 𑀅𑀲𑁆𑀲𑀸𑀢𑀺 𑀇𑀤𑁆𑀥𑀺𑀧𑀸𑀤𑀲𑁆𑀲. 𑀅𑀢𑁆𑀣𑁄 𑀤𑀻𑀧𑀺𑀢𑁄𑀢𑀺 𑀤𑀻𑀧𑀦𑀢𑁆𑀣𑀁 𑀓𑀢𑀁, 𑀢𑀲𑁆𑀫𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁨.𑁩𑁬𑁯) 𑀢𑀲𑁆𑀲 𑀅𑀢𑁆𑀣𑀯𑀺𑀘𑀸𑀭𑁄 𑀕𑀳𑁂𑀢𑀩𑁆𑀩𑁄. 𑀇𑀤𑁆𑀥𑀺𑀧𑀸𑀤𑀸𑀦𑀁 𑀲𑀫𑀸𑀥𑀺𑀧𑀥𑀸𑀦𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁 𑀓𑀣𑀺𑀢’’𑀦𑁆𑀢𑀺. 𑀢𑁂𑀲𑀁 𑀢𑁂𑀲𑀁 𑀓𑀼𑀲𑀮𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀉𑀧𑁆𑀧𑀸𑀤𑀦𑀓𑀺𑀭𑀺𑀬𑀸𑀬 𑀉𑀧𑁆𑀧𑀦𑁆𑀦𑀸𑀦𑀁 𑀧𑀭𑀺𑀩𑁆𑀭𑀽𑀳𑀦𑀓𑀺𑀭𑀺𑀬𑀸𑀬 𑀉𑀲𑁆𑀲𑀳𑀦𑀢𑁄 𑀉𑀲𑁆𑀲𑁄𑀴𑁆𑀳𑀻, 𑀣𑀸𑀫𑀧𑁆𑀧𑀢𑁆𑀢𑀸 𑀧𑀭𑀓𑁆𑀓𑀫𑀥𑀸𑀢𑀼. 𑀲𑀸 𑀧𑀦 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀯𑀺𑀲𑁂𑀲𑀧𑀘𑁆𑀘𑀬𑀪𑀽𑀢𑀸 𑀢𑁂 𑀉𑀧𑀸𑀤𑀸𑀬 ‘‘𑀧𑀜𑁆𑀘𑀫𑀻’’𑀢𑀺 𑀯𑀼𑀢𑁆𑀢𑀸, 𑀲𑀸 𑀘 𑀬𑀲𑁆𑀫𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀲𑀼 𑀢𑀢𑁆𑀣 𑀘𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀲𑀼 𑀲𑀸𑀥𑁂𑀢𑀩𑁆𑀩𑀁 𑀯𑀻𑀭𑀺𑀬𑀁, 𑀢𑀲𑁆𑀫𑀸 𑀆𑀳 ‘‘𑀉𑀲𑁆𑀲𑁄𑀴𑁆𑀳𑀻𑀢𑀺 𑀲𑀩𑁆𑀩𑀢𑁆𑀣 𑀓𑀢𑁆𑀢𑀩𑁆𑀩𑀯𑀻𑀭𑀺𑀬𑀁 𑀤𑀲𑁆𑀲𑁂𑀢𑀻’’𑀢𑀺. 𑀧𑀼𑀩𑁆𑀩𑀪𑀸𑀕𑀺𑀬𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀸𑀥𑀦𑀁 𑀧𑀳𑀸𑀢𑀩𑁆𑀩𑀥𑀫𑁆𑀫𑀯𑀺𑀪𑀸𑀕𑁂𑀦 𑀪𑀺𑀦𑁆𑀤𑀺𑀢𑁆𑀯𑀸 𑀆𑀳 ‘‘𑀧𑀜𑁆𑀘 𑀘𑁂𑀢𑁄𑀔𑀺𑀮𑀧𑁆𑀧𑀳𑀸𑀦𑀸𑀦𑀺 𑀧𑀜𑁆𑀘 𑀯𑀺𑀦𑀺𑀩𑀦𑁆𑀥𑀧𑁆𑀧𑀳𑀸𑀦𑀸𑀦𑀻’’𑀢𑀺. 𑀪𑀩𑁆𑀩𑁄𑀢𑀺 𑀬𑀼𑀢𑁆𑀢𑁄 𑀅𑀭𑀳𑀢𑀺 𑀦𑀺𑀧𑁆𑀨𑀢𑁆𑀢𑀺𑀬𑀸. 𑀜𑀸𑀡𑁂𑀦𑀸𑀢𑀺 𑀫𑀕𑁆𑀕𑀜𑀸𑀡𑁂𑀦. 𑀓𑀺𑀮𑁂𑀲𑀪𑁂𑀤𑀸𑀬𑀸𑀢𑀺 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑀸𑀬. 𑀔𑁂𑀫𑀲𑁆𑀲𑀸𑀢𑀺 𑀅𑀦𑀼𑀧𑀤𑁆𑀤𑀯𑀲𑁆𑀲.

𑀲𑀫𑁆𑀪𑀸𑀯𑀦𑀢𑁆𑀣𑁂𑀢𑀺 (𑀲𑀸𑀭𑀢𑁆𑀣. 𑀝𑀻. 𑁧.𑁧𑁧; 𑀅. 𑀦𑀺. 𑀝𑀻. 𑁩.𑁭.𑁭𑁧) ‘‘𑀅𑀧𑀺 𑀦𑀸𑀫𑁂𑀯𑀁 𑀲𑀺𑀬𑀸’’𑀢𑀺 𑀯𑀺𑀓𑀧𑁆𑀧𑀦𑀢𑁆𑀣𑁄 𑀲𑀫𑁆𑀪𑀸𑀯𑀦𑀢𑁆𑀣𑁄. 𑀏𑀯𑀁 𑀳𑀻𑀢𑀺 𑀏𑀯𑀁 𑀏𑀓𑀫𑁂𑀯 𑀲𑀗𑁆𑀔𑁆𑀬𑀁 𑀅𑀯𑀢𑁆𑀯𑀸 𑀅𑀧𑀭𑀸𑀬 𑀲𑀗𑁆𑀔𑁆𑀬𑀸𑀬 𑀲𑀤𑁆𑀥𑀺𑀁 𑀯𑀘𑀦𑀁 𑀮𑁄𑀓𑁂 𑀲𑀺𑀮𑀺𑀝𑁆𑀞𑀯𑀘𑀦𑀁 𑀳𑁄𑀢𑀺 𑀬𑀣𑀸 ‘‘𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀉𑀤𑀓𑀨𑀼𑀲𑀺𑀢𑀸𑀦𑀻’’𑀢𑀺. 𑀲𑀫𑁆𑀫𑀸 𑀅𑀥𑀺𑀲𑀬𑀺𑀢𑀸𑀦𑀻𑀢𑀺 𑀧𑀸𑀤𑀸𑀤𑀻𑀳𑀺 𑀅𑀢𑁆𑀢𑀦𑀸 𑀦𑁂𑀲𑀁 𑀓𑀺𑀜𑁆𑀘𑀺 𑀉𑀧𑀖𑀸𑀢𑀁 𑀅𑀓𑀭𑁄𑀦𑁆𑀢𑀺𑀬𑀸 𑀩𑀳𑀺𑀯𑀸𑀢𑀸𑀤𑀺𑀧𑀭𑀺𑀲𑁆𑀲𑀬𑀧𑀭𑀺𑀳𑀭𑀡𑀢𑁆𑀣𑀁 𑀲𑀫𑁆𑀫𑀤𑁂𑀯 𑀉𑀧𑀭𑀺 𑀲𑀬𑀺𑀢𑀸𑀦𑀺. 𑀉𑀢𑀼𑀁 𑀕𑀸𑀳𑀸𑀧𑁂𑀦𑁆𑀢𑀺𑀬𑀸𑀢𑀺 𑀢𑁂𑀲𑀁 𑀅𑀮𑁆𑀮𑀲𑀺𑀦𑁂𑀳𑀧𑀭𑀺𑀬𑀸𑀤𑀸𑀦𑀢𑁆𑀣𑀁 𑀅𑀢𑁆𑀢𑀦𑁄 𑀓𑀸𑀬𑀼𑀲𑁆𑀫𑀸𑀯𑀲𑁂𑀦 𑀉𑀢𑀼𑀁 𑀕𑀡𑁆𑀳𑀸𑀧𑁂𑀦𑁆𑀢𑀺𑀬𑀸. 𑀢𑁂𑀦𑀸𑀳 ‘‘𑀉𑀲𑁆𑀫𑀻𑀓𑀢𑀸𑀦𑀻’’𑀢𑀺. 𑀲𑀫𑁆𑀫𑀸 𑀧𑀭𑀺𑀪𑀸𑀯𑀺𑀢𑀸𑀦𑀻𑀢𑀺 𑀲𑀫𑁆𑀫𑀤𑁂𑀯 𑀲𑀩𑁆𑀩𑀲𑁄 𑀓𑀼𑀓𑁆𑀓𑀼𑀝𑀯𑀸𑀲𑀦𑀸𑀬 𑀯𑀸𑀲𑀺𑀢𑀸𑀦𑀺. 𑀢𑁂𑀦𑀸𑀳 ‘‘𑀓𑀼𑀓𑁆𑀓𑀼𑀝𑀕𑀦𑁆𑀥𑀁 𑀕𑀸𑀳𑀸𑀧𑀺𑀢𑀸𑀦𑀻’’𑀢𑀺. 𑀅𑀬𑀜𑁆𑀘 𑀓𑀼𑀓𑁆𑀓𑀼𑀝𑀕𑀦𑁆𑀥𑀧𑀭𑀺𑀪𑀸𑀯𑀦𑀸 𑀲𑀫𑁆𑀫𑀸𑀅𑀥𑀺𑀲𑀬𑀦𑀲𑀫𑁆𑀫𑀸𑀧𑀭𑀺𑀲𑁂𑀤𑀦𑀦𑀺𑀧𑁆𑀨𑀢𑁆𑀢𑀺𑀬𑀸 ‘‘𑀅𑀦𑀼𑀦𑀺𑀧𑁆𑀨𑀸𑀤𑀻’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑁧.𑁧𑁧) 𑀤𑀝𑁆𑀞𑀩𑁆𑀩𑀸. 𑀢𑁂𑀳𑀺 𑀧𑀦 𑀲𑀤𑁆𑀥𑀺𑀁𑀬𑁂𑀯 𑀇𑀚𑁆𑀛𑀦𑀢𑁄 𑀯𑀼𑀢𑁆𑀢𑀁 ‘‘𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑁂𑀦𑀸’’𑀢𑀺. 𑀓𑀺𑀜𑁆𑀘𑀸𑀧𑀺 𑀦 𑀏𑀯𑀁 ‘‘𑀅𑀳𑁄 𑀯𑀢𑀺𑀫𑁂’’𑀢𑀺𑀆𑀤𑀺𑀦𑀸 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀓𑀸𑀭𑀡𑀲𑁆𑀲 𑀧𑀦 𑀲𑀫𑁆𑀧𑀸𑀤𑀺𑀢𑀢𑁆𑀢𑀸 𑀅𑀣 𑀔𑁄 𑀪𑀩𑁆𑀩𑀸𑀯 𑀅𑀪𑀺𑀦𑀺𑀩𑁆𑀪𑀺𑀚𑁆𑀚𑀺𑀢𑀼𑀦𑁆𑀢𑀺 𑀬𑁄𑀚𑀦𑀸. 𑀓𑀲𑁆𑀫𑀸 𑀪𑀩𑁆𑀩𑀸𑀢𑀺 𑀆𑀳 ‘‘𑀢𑁂 𑀳𑀺 𑀬𑀲𑁆𑀫𑀸 𑀢𑀸𑀬𑀸’’𑀢𑀺𑀆𑀤𑀺. 𑀏𑀢𑁆𑀣 𑀬𑀣𑀸 𑀓𑀧𑀸𑀮𑀲𑁆𑀲 𑀢𑀦𑀼𑀢𑀸 𑀆𑀮𑁄𑀓𑀲𑁆𑀲 𑀅𑀦𑁆𑀢𑁄 𑀧𑀜𑁆𑀜𑀸𑀬𑀫𑀸𑀦𑀲𑁆𑀲 𑀓𑀸𑀭𑀡𑀁, 𑀢𑀣𑀸 𑀓𑀧𑀸𑀮𑀲𑁆𑀲 𑀢𑀦𑀼𑀢𑀸𑀬 𑀦𑀔𑀲𑀺𑀔𑀸𑀫𑀼𑀔𑀢𑀼𑀡𑁆𑀟𑀓𑀸𑀦𑀁 𑀔𑀭𑀢𑀸𑀬 𑀘 𑀅𑀮𑁆𑀮𑀲𑀺𑀦𑁂𑀳𑀲𑁆𑀲 𑀧𑀭𑀺𑀬𑀸𑀤𑀸𑀦𑀁 𑀓𑀸𑀭𑀡𑀯𑀘𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀢𑀲𑁆𑀫𑀸𑀢𑀺 𑀆𑀮𑁄𑀓𑀲𑁆𑀲 𑀅𑀦𑁆𑀢𑁄 𑀧𑀜𑁆𑀜𑀸𑀬𑀫𑀸𑀦𑀢𑁄, 𑀲𑀬𑀜𑁆𑀘 𑀧𑀭𑀺𑀧𑀸𑀓𑀕𑀢𑀢𑁆𑀢𑀸.

𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀦𑁆𑀢𑀺 𑀑𑀧𑀫𑁆𑀫𑀢𑁆𑀣𑀲𑁆𑀲 𑀉𑀧𑀫𑁂𑀬𑁆𑀬𑁂𑀦 𑀲𑀫𑁆𑀫𑀤𑁂𑀯 𑀧𑀝𑀺𑀧𑀸𑀤𑀦𑀁. 𑀅𑀢𑁆𑀣𑁂𑀦𑀸𑀢𑀺 𑀉𑀧𑀫𑁂𑀬𑁆𑀬𑀢𑁆𑀣𑁂𑀦. 𑀬𑀣𑀸 𑀓𑀼𑀓𑁆𑀓𑀼𑀝𑀺𑀬𑀸 𑀅𑀡𑁆𑀟𑁂𑀲𑀼 𑀢𑀺𑀯𑀺𑀥𑀓𑀺𑀭𑀺𑀬𑀸𑀬 𑀓𑀭𑀡𑀁 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀸𑀦𑀁 𑀅𑀡𑁆𑀟𑀓𑁄𑀲𑀢𑁄 𑀦𑀺𑀓𑁆𑀔𑀫𑀦𑀲𑁆𑀲 𑀫𑀽𑀮𑀓𑀸𑀭𑀡𑀁, 𑀏𑀯𑀁 𑀪𑀺𑀓𑁆𑀔𑀼𑀦𑁄 𑀉𑀲𑁆𑀲𑁄𑀴𑁆𑀳𑀻𑀧𑀦𑁆𑀦𑀭𑀲𑀸𑀦𑀺 𑀅𑀗𑁆𑀕𑀸𑀦𑀺 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀢𑁄 𑀦𑀺𑀓𑁆𑀔𑀫𑀦𑀲𑁆𑀲 𑀫𑀽𑀮𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀢𑀲𑁆𑀲𑀸 𑀓𑀼𑀓𑁆𑀓𑀼𑀝𑀺𑀬𑀸…𑀧𑁂… 𑀲𑀫𑀦𑁆𑀦𑀸𑀕𑀢𑀪𑀸𑀯𑁄’’𑀢𑀺. 𑀧𑀝𑀺𑀘𑁆𑀙𑀸𑀤𑀦𑀲𑀸𑀫𑀜𑁆𑀜𑁂𑀦 𑀅𑀯𑀺𑀚𑁆𑀚𑀸𑀬 𑀅𑀡𑁆𑀟𑀓𑁄𑀲𑀲𑀤𑀺𑀲𑀢𑀸𑀬 𑀩𑀮𑀯𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀲𑁆𑀲 𑀢𑀦𑀼𑀪𑀸𑀯𑁄, 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀧𑀭𑀺𑀡𑀸𑀫𑀓𑀸𑀮𑁄 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀪𑀸𑀯𑀸𑀧𑀢𑁆𑀢𑀺, 𑀢𑀤𑀸 𑀘 𑀲𑀸 𑀫𑀕𑁆𑀕𑀜𑀸𑀡𑀕𑀩𑁆𑀪𑀁 𑀥𑀸𑀭𑁂𑀦𑁆𑀢𑀻 𑀯𑀺𑀬 𑀳𑁄𑀢𑀻𑀢𑀺 𑀆𑀳 ‘‘𑀕𑀩𑁆𑀪𑀕𑁆𑀕𑀳𑀡𑀓𑀸𑀮𑁄’’𑀢𑀺. 𑀅𑀪𑀺𑀜𑁆𑀜𑀸𑀧𑀓𑁆𑀔𑁂𑀢𑀺 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀧𑀓𑁆𑀔𑁂. 𑀮𑁄𑀓𑀼𑀢𑁆𑀢𑀭𑀸𑀪𑀺𑀜𑁆𑀜𑀸 𑀳𑀺 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑀺𑀓𑀸𑀢𑀺. 𑀕𑀸𑀣𑀸𑀬 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀳𑀭𑀢𑀻𑀢𑀺 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀯𑀺𑀦𑁂𑀬𑁆𑀬𑀲𑀦𑁆𑀢𑀸𑀦𑀕𑀢𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀖𑀝𑁆𑀝𑁂𑀢𑀺, 𑀬𑀣𑀸𑀞𑀸𑀦𑁂 𑀞𑀸𑀢𑀼𑀁 𑀦 𑀤𑁂𑀢𑀺.

𑀧𑀝𑀺𑀲𑀗𑁆𑀔𑀸𑀦𑀧𑁆𑀧𑀳𑀸𑀦𑀦𑁆𑀢𑀺 𑀢𑀤𑀗𑁆𑀕𑀧𑁆𑀧𑀳𑀸𑀦𑀧𑀼𑀩𑁆𑀩𑀓𑀁 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁. 𑀧𑀼𑀩𑁆𑀩𑀪𑀸𑀕𑀺𑀬𑀸 𑀇𑀤𑁆𑀥𑀺𑀧𑀸𑀤𑀸 𑀧𑀸𑀴𑀺𑀬𑀁 𑀕𑀳𑀺𑀢𑀸𑀢𑀺 ‘‘𑀇𑀤𑁆𑀥𑀺𑀧𑀸𑀤𑁂𑀳𑀺 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀉𑀲𑁆𑀲𑁄𑀴𑁆𑀳𑀺𑀧𑀦𑁆𑀦𑀭𑀲𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀪𑀩𑁆𑀩𑁄 𑀅𑀪𑀺𑀦𑀺𑀩𑁆𑀩𑀺𑀤𑀸𑀬𑀸’’𑀢𑀺𑀆𑀤𑀺𑀯𑀘𑀦𑀢𑁄 (𑀫. 𑀦𑀺. 𑁧.𑁧𑁮𑁯) 𑀮𑁄𑀓𑀼𑀢𑁆𑀢𑀭𑀺𑀤𑁆𑀥𑀺𑀧𑀸𑀤𑀸 𑀧𑀦 𑀲𑀫𑁆𑀩𑁄𑀥𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀸. 𑀫𑀕𑁆𑀕𑁂 𑀆𑀕𑀢𑁂𑀢𑀺 𑀉𑀲𑁆𑀲𑁄𑀴𑁆𑀳𑀻𑀧𑀦𑁆𑀦𑀭𑀲𑀗𑁆𑀕𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑀬𑀢𑁄 𑀫𑀕𑁆𑀕𑁂 𑀆𑀕𑀢𑁂 𑀉𑀧𑁆𑀧𑀦𑁆𑀦𑁂, 𑀧𑀸𑀴𑀺𑀬𑀁 𑀯𑀸 𑀅𑀪𑀺𑀦𑀺𑀩𑁆𑀪𑀺𑀤𑀸𑀲𑀫𑁆𑀩𑁄𑀥𑀕𑁆𑀕𑀳𑀡𑁂𑀳𑀺 𑀫𑀕𑁆𑀕𑁂 𑀆𑀕𑀢𑁂. 𑀨𑀮𑁂 𑀆𑀕𑀢𑁂𑀢𑀺 𑀏𑀢𑁆𑀣𑀸𑀧𑀺 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀦𑀺𑀩𑁆𑀩𑀸𑀦𑀲𑁆𑀲 𑀧𑀦 𑀧𑀸𑀴𑀺𑀬𑀁 𑀅𑀦𑀸𑀕𑀢𑀢𑁆𑀢𑀸 𑀦𑀺𑀲𑁆𑀲𑀭𑀡𑀧𑁆𑀧𑀳𑀸𑀦𑀁 𑀦 𑀕𑀳𑀺𑀢𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀘𑁂𑀢𑁄𑀔𑀺𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.