𑁫. 𑀅𑀦𑀼𑀫𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁧. 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑀸𑀢𑀺 ‘‘𑀓𑀼𑀭𑀽𑀲𑀼, 𑀲𑀓𑁆𑀓𑁂𑀲𑀽’’𑀢𑀺 𑀘 𑀏𑀢𑁆𑀣 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦, ‘‘𑀪𑀕𑁆𑀕𑀸 𑀦𑀸𑀫 𑀚𑀸𑀦𑀧𑀤𑀺𑀦𑁄 𑀭𑀸𑀚𑀓𑀼𑀫𑀸𑀭𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀘𑀦𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀯𑀢𑁆𑀣𑀼𑀧𑀭𑀺𑀕𑁆𑀕𑀳𑀤𑀺𑀯𑀲𑁂𑀢𑀺 𑀦𑀕𑀭𑀫𑀸𑀧𑀦𑀢𑁆𑀣𑀁 𑀯𑀢𑁆𑀣𑀼𑀯𑀺𑀚𑁆𑀚𑀸𑀘𑀭𑀺𑀬𑁂𑀦 𑀦𑀕𑀭𑀝𑁆𑀞𑀸𑀦𑀲𑁆𑀲 𑀧𑀭𑀺𑀕𑁆𑀕𑀡𑁆𑀳𑀦𑀤𑀺𑀯𑀲𑁂. 𑀅𑀣𑀸𑀢𑀺 𑀧𑀘𑁆𑀙𑀸. 𑀦𑀕𑀭𑁂 𑀦𑀺𑀫𑁆𑀫𑀺𑀢𑁂𑀢𑀺 𑀢𑀢𑁆𑀣 𑀅𑀦𑀦𑁆𑀢𑀭𑀸𑀬𑁂𑀦 𑀦𑀕𑀭𑁂 𑀫𑀸𑀧𑀺𑀢𑁂. 𑀢𑀫𑁂𑀯 𑀲𑀼𑀲𑀼𑀫𑀸𑀭𑀕𑀺𑀭𑀡𑀁 𑀲𑀼𑀪𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 ‘‘𑀲𑀼𑀲𑀼𑀫𑀸𑀭𑀕𑀺𑀭𑀺’’𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀲𑀼𑀲𑀼𑀫𑀸𑀭𑀲𑀡𑁆𑀞𑀸𑀦𑀢𑁆𑀢𑀸 𑀲𑀼𑀲𑀼𑀫𑀸𑀭𑁄 𑀦𑀸𑀫 𑀏𑀓𑁄 𑀕𑀺𑀭𑀺, 𑀲𑁄 𑀢𑀲𑁆𑀲 𑀦𑀕𑀭𑀲𑁆𑀲 𑀲𑀫𑀻𑀧𑁂, 𑀢𑀲𑁆𑀫𑀸 𑀢𑀁 𑀲𑀼𑀲𑀼𑀫𑀸𑀭𑀕𑀺𑀭𑀺 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 ‘‘𑀲𑀼𑀲𑀼𑀫𑀸𑀭𑀕𑀺𑀭𑀻’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀓𑁂𑀘𑀺. 𑀪𑁂𑀲𑀓𑀴𑀸𑀢𑀺 𑀯𑀼𑀘𑁆𑀘𑀢𑀺 𑀖𑀫𑁆𑀫𑀡𑁆𑀟𑀕𑀘𑁆𑀙𑀁, 𑀓𑁂𑀘𑀺 ‘‘𑀲𑁂𑀢𑀭𑀼𑀓𑁆𑀔’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀩𑀳𑀼𑀮𑀢𑀸𑀬 𑀧𑀦 𑀢𑀁 𑀯𑀦𑀁 𑀪𑁂𑀲𑀓𑀴𑀸𑀯𑀦𑀦𑁆𑀢𑁂𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀪𑁂𑀲𑁄 𑀦𑀸𑀫 𑀏𑀓𑁄 𑀬𑀓𑁆𑀔𑁄 𑀅𑀬𑀼𑀢𑁆𑀢𑀓𑀸𑀭𑀻, 𑀢𑀲𑁆𑀲 𑀢𑀢𑁄 𑀕𑀴𑀺𑀢𑀝𑁆𑀞𑀸𑀦𑀢𑀸𑀬 𑀢𑀁 𑀯𑀦𑀁 𑀪𑁂𑀲𑀕𑀴𑀸𑀯𑀦𑀁 𑀦𑀸𑀫 𑀚𑀸𑀢𑀦𑁆𑀢𑀺 𑀓𑁂𑀘𑀺. 𑀅𑀪𑀬𑀤𑀺𑀦𑁆𑀦𑀝𑁆𑀞𑀸𑀦𑁂 𑀚𑀸𑀢𑀁 𑀯𑀺𑀭𑀽𑀴𑁆𑀳𑀁, 𑀲𑀁𑀯𑀤𑁆𑀥𑀦𑁆𑀢𑀺 𑀅𑀢𑁆𑀣𑁄.

𑀇𑀘𑁆𑀙𑀸𑀧𑁂𑀢𑀻𑀢𑀺 𑀬𑀁 𑀓𑀺𑀜𑁆𑀘𑀺 𑀅𑀢𑁆𑀢𑀦𑀺 𑀕𑀭𑀳𑀺𑀢𑀩𑁆𑀩𑀁 𑀯𑀢𑁆𑀢𑀼𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀇𑀘𑁆𑀙𑀁 𑀉𑀧𑁆𑀧𑀸𑀤𑁂𑀢𑀺, 𑀢𑀤𑀢𑁆𑀣𑀸𑀬 𑀢𑁂𑀲𑀁 𑀅𑀢𑁆𑀢𑀸𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀅𑀢𑁆𑀣𑁄. 𑀧𑀞𑀫𑀁 𑀤𑀺𑀦𑁆𑀦𑁄 𑀳𑀺𑀢𑀽𑀧𑀤𑁂𑀲𑁄 𑀑𑀯𑀸𑀤𑁄, 𑀅𑀧𑀭𑀸𑀧𑀭𑀁 𑀤𑀺𑀦𑁆𑀦𑁄 𑀅𑀦𑀼𑀲𑀸𑀲𑀦𑀻. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀻𑀢𑀯𑀺𑀲𑀬𑁄 𑀯𑀸 𑀑𑀯𑀸𑀤𑁄, 𑀅𑀦𑀸𑀕𑀢𑀯𑀺𑀲𑀬𑁄 𑀅𑀦𑀼𑀲𑀸𑀲𑀦𑀻. 𑀑𑀢𑀺𑀡𑁆𑀡𑀯𑀢𑁆𑀣𑀼𑀓𑁄 𑀑𑀯𑀸𑀤𑁄, 𑀇𑀢𑀭𑁄 𑀅𑀦𑀼𑀲𑀸𑀲𑀦𑀻. 𑀲𑁄 𑀘𑀸𑀢𑀺 𑀏𑀯𑀁 𑀧𑀯𑀸𑀭𑁂𑀢𑀸 𑀲𑁄 𑀪𑀺𑀓𑁆𑀔𑀼. 𑀤𑀼𑀓𑁆𑀔𑀁 𑀯𑀘𑁄 𑀏𑀢𑀲𑁆𑀫𑀺𑀁 𑀯𑀺𑀧𑁆𑀧𑀝𑀺𑀓𑀽𑀮𑀕𑁆𑀕𑀸𑀳𑁂 𑀯𑀺𑀧𑀘𑁆𑀘𑀦𑀻𑀓𑀲𑀸𑀢𑁂 𑀅𑀦𑀸𑀤𑀭𑁂 𑀧𑀼𑀕𑁆𑀕𑀮𑁂𑀢𑀺 𑀤𑀼𑀩𑁆𑀩𑀘𑁄. 𑀢𑁂𑀦𑀸𑀳 ‘‘𑀤𑀼𑀓𑁆𑀔𑁂𑀦 𑀯𑀢𑁆𑀢𑀩𑁆𑀩𑁄’’𑀢𑀺. 𑀉𑀧𑀭𑀺 𑀆𑀕𑀢𑁂𑀳𑀻𑀢𑀺 ‘‘𑀧𑀸𑀧𑀺𑀘𑁆𑀙𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁧𑁮𑁧) 𑀆𑀕𑀢𑁂𑀳𑀺 𑀲𑁄𑀴𑀲𑀳𑀺 𑀧𑀸𑀧𑀥𑀫𑁆𑀫𑁂𑀳𑀺. 𑀧𑀓𑀸𑀭𑁂𑀳𑀺 𑀆𑀯𑀳𑀁 𑀧𑀤𑀓𑁆𑀔𑀺𑀡𑀁, 𑀢𑀢𑁄 𑀧𑀤𑀓𑁆𑀔𑀺𑀡𑀢𑁄 𑀕𑀳𑀡𑀲𑀻𑀮𑁄 𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀻, 𑀦 𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀻 𑀅𑀧𑁆𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀻. 𑀯𑀸𑀫𑀢𑁄𑀢𑀺 𑀅𑀧𑀲𑀩𑁆𑀬𑀢𑁄, 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀲𑀦𑁆𑀢𑀲𑀫𑁆𑀪𑀸𑀯𑀦𑀧𑀢𑁆𑀣𑀦𑀸𑀦𑀦𑁆𑀢𑀺 𑀅𑀲𑀦𑁆𑀢𑁂𑀳𑀺 𑀅𑀯𑀺𑀚𑁆𑀚𑀫𑀸𑀦𑁂𑀳𑀺 𑀕𑀼𑀡𑁂𑀳𑀺 𑀲𑀫𑁆𑀪𑀸𑀯𑀦𑀲𑁆𑀲 𑀧𑀢𑁆𑀣𑀦𑀸𑀪𑀽𑀢𑀸𑀦𑀁. 𑀧𑀝𑀺-𑀲𑀤𑁆𑀤𑁄 𑀧𑀘𑁆𑀘𑀢𑁆𑀢𑀺𑀓𑀧𑀭𑀺𑀬𑀸𑀬𑁄, 𑀨𑀭𑀡𑀁 𑀯𑀸𑀬𑀫𑀦𑀁 𑀇𑀥 𑀢𑀣𑀸𑀯𑀝𑁆𑀞𑀸𑀦𑀦𑁆𑀢𑀺 𑀆𑀳 ‘‘𑀧𑀝𑀺𑀧𑁆𑀨𑀭𑀢𑀻𑀢𑀺 𑀧𑀝𑀺𑀯𑀺𑀭𑀼𑀤𑁆𑀥𑁄 𑀧𑀘𑁆𑀘𑀦𑀻𑀓𑁄 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀻’’𑀢𑀺. 𑀅𑀧𑀲𑀸𑀤𑁂𑀢𑀻𑀢𑀺 𑀔𑀺𑀧𑁂𑀢𑀺 𑀢𑀚𑁆𑀚𑁂𑀢𑀺. 𑀢𑀣𑀸𑀪𑀽𑀢𑁄 𑀘 𑀧𑀭𑀁 𑀖𑀝𑁆𑀝𑁂𑀦𑁆𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀖𑀝𑁆𑀝𑁂𑀢𑀻’’𑀢𑀺. 𑀧𑀝𑀺𑀆𑀭𑁄𑀧𑁂𑀢𑀻𑀢𑀺 𑀬𑀸𑀤𑀺𑀲𑁂𑀦 𑀯𑀼𑀢𑁆𑀢𑁄, 𑀢𑀲𑁆𑀲 𑀧𑀝𑀺𑀪𑀸𑀕𑀪𑀽𑀢𑀁 𑀤𑁄𑀲𑀁 𑀘𑁄𑀤𑀓𑀲𑁆𑀲 𑀉𑀧𑀭𑀺 𑀆𑀭𑁄𑀧𑁂𑀢𑀺.

𑀧𑀝𑀺𑀘𑀭𑀢𑀻𑀢𑀺 (𑀅. 𑀦𑀺. 𑀝𑀻. 𑁨.𑁩.𑁬𑁮) 𑀧𑀝𑀺𑀘𑁆𑀙𑀸𑀤𑀦𑀯𑀲𑁂𑀦 𑀘𑀭𑀢𑀺 𑀧𑀯𑀢𑁆𑀢𑀢𑀺, 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑁄 𑀏𑀯 𑀯𑀸 𑀘𑀭𑀢𑀺-𑀲𑀤𑁆𑀤𑁄 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀽𑀦𑀦𑁆𑀢𑀺 𑀆𑀳 ‘‘𑀧𑀝𑀺𑀘𑁆𑀙𑀸𑀤𑁂𑀢𑀻’’𑀢𑀺. 𑀅𑀜𑁆𑀜𑁂𑀦𑀜𑁆𑀜𑀦𑁆𑀢𑀺 𑀧𑀝𑀺𑀘𑁆𑀙𑀸𑀤𑀦𑀸𑀓𑀸𑀭𑀤𑀲𑁆𑀲𑀦𑀦𑁆𑀢𑀺 𑀆𑀳 ‘‘𑀅𑀜𑁆𑀜𑁂𑀦 𑀓𑀸𑀭𑀡𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀅𑀜𑁆𑀜𑀁 𑀓𑀸𑀭𑀡𑀁 𑀯𑀘𑀦𑀁 𑀯𑀸𑀢𑀺 𑀬𑀁 𑀘𑁄𑀤𑀓𑁂𑀦 𑀘𑀼𑀤𑀺𑀢𑀓𑀲𑁆𑀲 𑀤𑁄𑀲𑀯𑀺𑀪𑀸𑀯𑀦𑀁 𑀓𑀸𑀭𑀡𑀁, 𑀯𑀘𑀦𑀁 𑀯𑀸 𑀯𑀼𑀢𑁆𑀢𑀁, 𑀢𑀢𑁄 𑀅𑀜𑁆𑀜𑁂𑀦𑁂𑀯 𑀓𑀸𑀭𑀡𑁂𑀦, 𑀯𑀘𑀦𑁂𑀦 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑀺. 𑀓𑀸𑀭𑀡𑁂𑀦𑀸𑀢𑀺 𑀘𑁄𑀤𑀦𑀸𑀬 𑀅𑀫𑀽𑀮𑀺𑀓𑀪𑀸𑀯𑀤𑀻𑀧𑀦𑀺𑀬𑀸 𑀬𑀼𑀢𑁆𑀢𑀺𑀬𑀸. 𑀯𑀘𑀦𑁂𑀦𑀸𑀢𑀺 𑀢𑀤𑀢𑁆𑀣𑀩𑁄𑀥𑀦𑁂𑀦. 𑀓𑁄 𑀆𑀧𑀦𑁆𑀦𑁄𑀢𑀺𑀆𑀤𑀺𑀦𑀸 𑀘𑁄𑀤𑀦𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀯𑀺𑀓𑁆𑀔𑁂𑀧𑀸𑀧𑀚𑁆𑀚𑀦𑀁 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀺, 𑀩𑀳𑀺𑀤𑁆𑀥𑀸 𑀓𑀣𑀸𑀅𑀧𑀦𑀸𑀫𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀢𑀺 𑀅𑀬𑀫𑁂𑀯 𑀢𑁂𑀲𑀁 𑀯𑀺𑀲𑁂𑀲𑁄. 𑀢𑁂𑀦𑀸𑀳 ‘‘𑀇𑀢𑁆𑀣𑀦𑁆𑀦𑀸𑀫’’𑀦𑁆𑀢𑀺𑀆𑀤𑀺.

𑀅𑀧𑀤𑀻𑀬𑀦𑁆𑀢𑀺 𑀤𑁄𑀲𑀸 𑀏𑀢𑁂𑀦 𑀭𑀓𑁆𑀔𑀻𑀬𑀦𑁆𑀢𑀺, 𑀮𑀽𑀬𑀦𑁆𑀢𑀺, 𑀙𑀺𑀚𑁆𑀚𑀦𑁆𑀢𑀻𑀢𑀺 𑀯𑀸 𑀅𑀧𑀤𑀸𑀦𑀁, (𑀅. 𑀦𑀺. 𑀝𑀻. 𑁨.𑁩.𑁨) 𑀲𑀢𑁆𑀢𑀸𑀦𑀁 𑀲𑀫𑁆𑀫𑀸, 𑀫𑀺𑀘𑁆𑀙𑀸 𑀯𑀸 𑀧𑀯𑀢𑁆𑀢𑀧𑀬𑁄𑀕𑁄. 𑀢𑁂𑀦𑀸𑀳 ‘‘𑀅𑀢𑁆𑀢𑀦𑁄 𑀘𑀭𑀺𑀬𑀸𑀬𑀸’’𑀢𑀺.

𑁧𑁮𑁩. 𑀅𑀦𑀼𑀫𑀺𑀦𑀺𑀢𑀩𑁆𑀩𑀦𑁆𑀢𑀺 𑀅𑀦𑀼 𑀅𑀦𑀼 𑀫𑀺𑀦𑀺𑀢𑀩𑁆𑀩𑁄 𑀚𑀸𑀦𑀺𑀢𑀩𑁆𑀩𑁄. 𑀅𑀢𑁆𑀢𑀸𑀦𑀁 𑀅𑀦𑀼𑀫𑀺𑀦𑀺𑀢𑀩𑁆𑀩𑀦𑁆𑀢𑀺 𑀘 𑀇𑀤𑀁 𑀧𑀘𑁆𑀘𑀢𑁆𑀢𑁂 𑀉𑀧𑀬𑁄𑀕𑀯𑀘𑀦𑀁. 𑀢𑁂𑀦𑀸𑀳 ‘‘𑀅𑀦𑀼𑀫𑀺𑀦𑀺𑀢𑀩𑁆𑀩𑁄 𑀢𑀼𑀮𑁂𑀢𑀩𑁆𑀩𑁄 𑀢𑀻𑀭𑁂𑀢𑀩𑁆𑀩𑁄’’𑀢𑀺. 𑀅𑀢𑁆𑀢𑀸𑀦𑀁 𑀅𑀦𑀼𑀫𑀺𑀦𑀺𑀢𑀩𑁆𑀩𑀦𑁆𑀢𑀺 𑀯𑀸 𑀅𑀢𑁆𑀢𑀦𑀺 𑀅𑀦𑀼𑀫𑀸𑀦𑀜𑀸𑀡𑀁 𑀧𑀯𑀢𑁆𑀢𑁂𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀅𑀧𑁆𑀧𑀺𑀬𑀪𑀸𑀯𑀸𑀯𑀳𑀸 𑀫𑀬𑀺 𑀧𑀯𑀢𑁆𑀢𑀸 𑀧𑀸𑀧𑀺𑀘𑁆𑀙𑀢𑀸 𑀧𑀸𑀧𑀺𑀘𑁆𑀙𑀸𑀪𑀸𑀯𑀢𑁄 𑀧𑀭𑀲𑁆𑀫𑀺𑀁 𑀧𑀯𑀢𑁆𑀢𑀧𑀸𑀧𑀺𑀘𑁆𑀙𑀢𑀸 𑀯𑀺𑀬. 𑀏𑀲 𑀦𑀬𑁄 𑀲𑁂𑀲𑀥𑀫𑁆𑀫𑁂𑀲𑀼𑀧𑀺. 𑀅𑀧𑀭𑁄 𑀦𑀬𑁄 𑁋 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀺𑀬𑀪𑀸𑀯𑀁 𑀇𑀘𑁆𑀙𑀦𑁆𑀢𑁂𑀦 𑀧𑀸𑀧𑀺𑀘𑁆𑀙𑀢𑀸 𑀧𑀳𑀸𑀢𑀩𑁆𑀩𑀸 𑀲𑀻𑀮𑀯𑀺𑀲𑀼𑀤𑁆𑀥𑀺𑀳𑁂𑀢𑀼𑀪𑀸𑀯𑀢𑁄 𑀅𑀢𑁆𑀢𑀼𑀓𑁆𑀓𑀁𑀲𑀦𑀸𑀤𑀺𑀧𑁆𑀧𑀳𑀸𑀦𑀁 𑀯𑀺𑀬. 𑀲𑁂𑀲𑀥𑀫𑁆𑀫𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁧𑁮𑁪. 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑁄𑀢𑀺 ‘‘𑀦 𑀧𑀸𑀧𑀺𑀘𑁆𑀙𑁄 𑀪𑀯𑀺𑀲𑁆𑀲𑀸𑀫𑀺, 𑀦 𑀧𑀸𑀧𑀺𑀓𑀸𑀦𑀁 𑀇𑀘𑁆𑀙𑀸𑀦𑀁 𑀯𑀲𑀁 𑀕𑀢𑁄’’𑀢𑀺𑀆𑀤𑀺𑀦𑀸 𑀧𑀢𑀺 𑀧𑀢𑀺 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸 𑀜𑀸𑀡𑀘𑀓𑁆𑀔𑀼𑀦𑀸 𑀅𑀯𑁂𑀓𑁆𑀔𑀺𑀢𑀩𑁆𑀩𑀁, 𑀜𑀸𑀡𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀧𑀸𑀧𑀺𑀘𑁆𑀙𑀢𑀸𑀤𑀻𑀦𑀁 𑀧𑀳𑀸𑀦𑀁 𑀧𑀢𑀺 𑀅𑀯𑁂𑀓𑁆𑀔𑀺𑀢𑀩𑁆𑀩𑀁, 𑀅𑀬𑀜𑁆𑀘 𑀅𑀢𑁆𑀣𑁄 𑀢𑀩𑁆𑀩-𑀲𑀤𑁆𑀤𑀲𑁆𑀲 𑀪𑀸𑀯𑀢𑁆𑀣𑀢𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄, 𑀓𑀫𑁆𑀫𑀢𑁆𑀣𑀢𑀸𑀯𑀲𑁂𑀦 𑀧𑀦 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀢𑁆𑀢𑀸𑀦’’𑀦𑁆𑀢𑀺 𑀧𑀘𑁆𑀘𑀢𑁆𑀢𑁂 𑀉𑀧𑀬𑁄𑀕𑀯𑀘𑀦𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀲𑀺𑀓𑁆𑀔𑀦𑁆𑀢𑁂𑀦𑀸𑀢𑀺 𑀢𑀺𑀲𑁆𑀲𑁄𑀧𑀺 𑀲𑀺𑀓𑁆𑀔𑀸 𑀲𑀺𑀓𑁆𑀔𑀦𑁆𑀢𑁂𑀦. 𑀢𑁂𑀦𑀸𑀳 ‘‘𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺.

𑀢𑀺𑀮𑀓𑀦𑁆𑀢𑀺 𑀓𑀸𑀴𑀢𑀺𑀮𑀲𑁂𑀢𑀢𑀺𑀮𑀸𑀤𑀺𑀢𑀺𑀮𑀓𑀁. 𑀲𑀩𑁆𑀩𑀧𑁆𑀧𑀳𑀸𑀦𑀦𑁆𑀢𑀺 𑀲𑀩𑁆𑀩𑀧𑁆𑀧𑀓𑀸𑀭𑀧𑁆𑀧𑀳𑀸𑀦𑀁. 𑀨𑀮𑁂 𑀆𑀕𑀢𑁂𑀢𑀺 𑀨𑀮𑁂 𑀉𑀧𑁆𑀧𑀦𑁆𑀦𑁂. 𑀦𑀺𑀩𑁆𑀩𑀸𑀦𑁂 𑀆𑀕𑀢𑁂𑀢𑀺 𑀦𑀺𑀩𑁆𑀩𑀸𑀦𑀲𑁆𑀲 𑀅𑀥𑀺𑀕𑀢𑀢𑁆𑀢𑀸. 𑀪𑀺𑀓𑁆𑀔𑀼𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 ‘‘𑀲𑁄 𑀲𑀫𑀡𑁄, 𑀲 𑀪𑀺𑀓𑁆𑀔𑀽’’𑀢𑀺 𑀏𑀯𑀁 𑀯𑀼𑀢𑁆𑀢𑀪𑀺𑀓𑁆𑀔𑀽𑀦𑀁 𑀧𑀸𑀢𑀺𑀫𑁄𑀓𑁆𑀔𑀁, 𑀦 𑀉𑀧𑀲𑀫𑁆𑀧𑀦𑁆𑀦𑀸𑀦𑀁 𑀏𑀯 𑀦 𑀧𑀩𑁆𑀩𑀚𑀺𑀢𑀸𑀦𑀁 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀲𑁆𑀫𑀸 𑀘𑀺𑀤𑀁 𑀪𑀺𑀓𑁆𑀔𑀼𑀧𑀸𑀢𑀺𑀫𑁄𑀓𑁆𑀔𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀇𑀤𑀁 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼’’𑀦𑁆𑀢𑀺𑀆𑀤𑀺. 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑀼𑀁 𑀦 𑀯𑀝𑁆𑀝𑀢𑀺 𑀅𑀢𑁆𑀢𑀯𑀺𑀲𑀼𑀤𑁆𑀥𑀺𑀬𑀸 𑀏𑀓𑀦𑁆𑀢𑀳𑁂𑀢𑀼𑀪𑀸𑀯𑀢𑁄.

𑀅𑀦𑀼𑀫𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.