𑁪. 𑀘𑀽𑀴𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁫. 𑀲𑀓𑁆𑀓𑁂𑀲𑀽𑀢𑀺 𑀏𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀢𑀁 𑀏𑀓𑀤𑁂𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄 𑀳𑀻’’𑀢𑀺 𑀆𑀳. 𑀢𑀢𑁆𑀣 𑀬𑁂𑀦 𑀭𑀸𑀚𑀓𑀼𑀫𑀸𑀭𑀸 𑀲𑀓𑁆𑀬𑀸 𑀦𑀸𑀫 𑀚𑀸𑀢𑀸, 𑀬𑀢𑁄 𑀢𑁂𑀲𑀁 𑀦𑀺𑀯𑀸𑀲𑀝𑁆𑀞𑀸𑀦𑀢𑀸𑀬 𑀚𑀦𑀧𑀤𑁄 𑀢𑀣𑀸 𑀯𑀼𑀘𑁆𑀘𑀢𑀺, 𑀢𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀲𑀓𑁆𑀬𑀸𑀦𑀁 𑀧𑀦 𑀉𑀧𑁆𑀧𑀢𑁆𑀢𑀺 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑁂 𑀆𑀕𑀢𑀸𑀯𑀸’’𑀢𑀺. 𑀓𑀧𑀺𑀮𑀯𑀢𑁆𑀣𑀽𑀢𑀺 𑀯𑀼𑀢𑁆𑀢𑀁 𑀧𑀼𑀭𑀺𑀫𑀲𑀜𑁆𑀜𑀸𑀯𑀲𑁂𑀦.

𑀦𑀸𑀦𑀧𑁆𑀧𑀓𑀸𑀭𑀓𑀦𑁆𑀢𑀺 ‘‘𑀮𑁄𑀪𑀥𑀫𑁆𑀫𑀸’’𑀢𑀺 𑀩𑀳𑀼𑀯𑀘𑀦𑀲𑁆𑀲 𑀦𑀺𑀫𑀺𑀢𑁆𑀢𑀁 𑀯𑀤𑀢𑀺. 𑀮𑁄𑀪𑁄 𑀳𑀺 𑀢𑁂𑀦 𑀢𑁂𑀦 𑀅𑀯𑀢𑁆𑀣𑀸𑀯𑀺𑀲𑁂𑀲𑁂𑀦 𑀧𑀯𑀢𑁆𑀢𑀺𑀆𑀓𑀸𑀭𑀪𑁂𑀤𑁂𑀦 ‘‘𑀙𑀦𑁆𑀤𑁄 𑀭𑀸𑀕𑁄𑀢𑀡𑁆𑀳𑀸 𑀆𑀲𑀢𑁆𑀢𑀺 𑀅𑀧𑁂𑀓𑁆𑀔𑀸’’𑀢𑀺𑀆𑀤𑀺𑀦𑀸 𑀅𑀦𑁂𑀓𑀧𑁆𑀧𑀪𑁂𑀤𑁄, 𑀮𑀼𑀩𑁆𑀪𑀦𑀮𑀓𑁆𑀔𑀡𑁂𑀦 𑀧𑀦 ‘‘𑀮𑁄𑀪𑁄’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀦𑀸𑀦𑀧𑁆𑀧𑀓𑀸𑀭𑀓𑀁 𑀮𑁄𑀪𑀁𑀬𑁂𑀯𑀸’’𑀢𑀺. 𑀢𑀣𑀸 ‘‘𑀤𑁄𑀲𑁄 𑀧𑀝𑀺𑀖𑁄 𑀓𑁄𑀥𑁄 𑀉𑀧𑀦𑀸𑀳𑁄 𑀯𑀺𑀭𑁄𑀥𑁄’’𑀢𑀺𑀆𑀤𑀺𑀦𑀸, ‘‘𑀫𑀼𑀬𑁆𑀳𑀦𑀁 𑀅𑀲𑀫𑀧𑁂𑀓𑁆𑀔𑀦𑀁 𑀅𑀧𑀘𑁆𑀘𑀯𑁂𑀓𑁆𑀔𑀡𑀸 𑀤𑀼𑀫𑁆𑀫𑁂𑀚𑁆𑀛𑀁 𑀩𑀸𑀮𑁆𑀬’’𑀦𑁆𑀢𑀺𑀆𑀤𑀺𑀦𑀸 (𑀥. 𑀲. 𑁩𑁯𑁦) 𑀘 𑀤𑁄𑀲𑀫𑁄𑀳𑀸𑀦𑀁 𑀦𑀸𑀦𑀧𑁆𑀧𑀓𑀸𑀭𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀇𑀢𑀭𑁂𑀲𑀼𑀧𑀺 𑀤𑁆𑀯𑀻𑀲𑀼 𑀏𑀲𑁂𑀯 𑀦𑀬𑁄’’𑀢𑀺. 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸𑀢𑀺 𑀧𑀭𑀺𑀢𑁄 𑀲𑀩𑁆𑀩𑀲𑁄 𑀆𑀤𑀸𑀬. 𑀕𑀳𑁂𑀢𑁆𑀯𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 ‘‘𑀕𑀳𑀡𑁂 𑀆𑀕𑀢’’𑀦𑁆𑀢𑀺. 𑀧𑀭𑀺𑀬𑀸𑀤𑀺𑀬𑀢𑀻𑀢𑀺 𑀧𑀭𑀺𑀓𑁆𑀔𑀻𑀡𑁄𑀢𑀺. 𑀤𑀻-𑀲𑀤𑁆𑀤𑀜𑁆𑀳𑀺 𑀲𑀤𑁆𑀤𑀯𑀺𑀤𑀽 𑀔𑀬𑀢𑁆𑀣𑀁 𑀯𑀤𑀦𑁆𑀢𑀺.

𑀏𑀓𑀤𑀸𑀢𑀺 𑀆𑀫𑁂𑀟𑀺𑀢𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀏𑀓𑁂𑀓𑀲𑁆𑀫𑀺𑀁 𑀓𑀸𑀮𑁂’’𑀢𑀺. 𑀮𑁄𑀪𑀤𑁄𑀲𑀫𑁄𑀳𑀸𑀢𑀺 𑀧𑀞𑀫𑀫𑀕𑁆𑀕𑁂𑀦 𑀧𑀳𑀻𑀦𑀸𑀯𑀲𑁂𑀲𑀸 𑀮𑁄𑀪𑀤𑁄𑀲𑀫𑁄𑀳𑀸. 𑀦𑀺𑀭𑀯𑀲𑁂𑀲𑀸 𑀧𑀳𑀻𑀬𑀦𑁆𑀢𑀺, 𑀅𑀜𑁆𑀜𑀣𑀸 𑀤𑀼𑀢𑀺𑀬𑀫𑀕𑁆𑀕𑁂𑀦 𑀓𑀺𑀁 𑀓𑀢𑀁 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀫𑀼𑀤𑀸𑀘𑀸𑀭𑀧𑁆𑀧𑀢𑁆𑀢𑀁 𑀧𑀦 𑀤𑀺𑀲𑁆𑀯𑀸 ‘‘𑀅𑀧𑁆𑀧𑀳𑀻𑀦𑀁 𑀫𑁂 𑀅𑀢𑁆𑀣𑀻’’𑀢𑀺𑀧𑀺 𑀚𑀸𑀦𑀸𑀢𑀺. 𑀏𑀯𑀁 𑀓𑀣𑀁 𑀦𑀺𑀭𑀯𑀲𑁂𑀲𑀧𑁆𑀧𑀳𑀸𑀦𑀲𑀜𑁆𑀜𑀸𑀢𑀺 𑀆𑀳 ‘‘𑀅𑀧𑁆𑀧𑀳𑀻𑀦𑀓𑀁…𑀧𑁂… 𑀲𑀜𑁆𑀜𑀻 𑀳𑁄𑀢𑀻’’𑀢𑀺. 𑀏𑀯𑀁 𑀧𑀞𑀫𑀫𑀕𑁆𑀕𑁂𑀦𑁂𑀯 𑀲𑀫𑀼𑀘𑁆𑀙𑀺𑀦𑁆𑀦𑀲𑀁𑀲𑀬𑀲𑁆𑀲 ‘‘𑀓𑁄 𑀲𑀼 𑀦𑀸𑀫 𑀫𑁂 𑀥𑀫𑁆𑀫𑁄 𑀅𑀚𑁆𑀛𑀢𑁆𑀢𑀁 𑀅𑀧𑁆𑀧𑀳𑀻𑀦𑁄𑀢𑀺 𑀏𑀯𑀁 𑀲𑀦𑁆𑀥𑁂𑀳𑁄 𑀓𑀣𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀢𑁆𑀯𑀸 ‘‘𑀧𑀡𑁆𑀡𑀢𑁆𑀢𑀺𑀬𑀸 𑀅𑀓𑁄𑀯𑀺𑀤𑀢𑁆𑀢𑀸’’𑀢𑀺 𑀓𑀸𑀭𑀡𑀫𑀸𑀳. 𑀯𑀺𑀦𑀬𑀓𑀼𑀓𑁆𑀓𑀼𑀘𑁆𑀘𑀁 𑀯𑀺𑀬 𑀳𑀺 𑀧𑀡𑁆𑀡𑀢𑁆𑀢𑀺𑀬𑀁 𑀅𑀓𑀼𑀲𑀮𑀢𑀸𑀬 𑀅𑀭𑀺𑀬𑀸𑀦𑀫𑁆𑀧𑀺 𑀓𑀢𑁆𑀣𑀘𑀺 𑀯𑀺𑀫𑀢𑀺𑀫𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀬𑀣𑀸 𑀢𑀁 𑀲𑀩𑁆𑀩𑀲𑁄 𑀅𑀧𑁆𑀧𑀳𑀻𑀦𑀲𑀫𑁆𑀫𑁄𑀳𑀸𑀦𑀦𑁆𑀢𑀺. 𑀅𑀢𑁆𑀢𑀦𑁄 𑀅𑀯𑀺𑀲𑀬𑁂 𑀅𑀦𑀪𑀺𑀚𑀸𑀦𑀦𑀁 𑀧𑀡𑁆𑀡𑀢𑁆𑀢𑀺𑀓𑁄𑀲𑀮𑁆𑀮𑁂𑀦 𑀓𑀺𑀫𑁂𑀢𑁆𑀣 𑀧𑀬𑁄𑀚𑀦𑀁, 𑀧𑀘𑁆𑀘𑀯𑁂𑀓𑁆𑀔𑀡𑀸𑀫𑀢𑁆𑀢𑁂𑀦 𑀅𑀬𑀫𑀢𑁆𑀣𑁄 𑀲𑀺𑀚𑁆𑀛𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀺𑀁 𑀢𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀸 𑀦𑀢𑁆𑀣𑀻’’𑀢𑀺 𑀆𑀳. 𑀇𑀢𑀭𑁄 ‘‘𑀦𑀢𑁆𑀣𑀻’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀓𑀢𑁆𑀯𑀸 ‘‘𑀅𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀮𑀩𑁆𑀪𑀫𑀸𑀦𑀯𑀺𑀪𑀸𑀕𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀸𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀸. 𑀲𑀩𑁆𑀩𑁂𑀲𑀦𑁆𑀢𑀺 𑀲𑀩𑁆𑀩𑁂𑀲𑀁 𑀅𑀭𑀺𑀬𑀸𑀦𑀁. 𑀬𑀣𑀸 𑀧𑀭𑀺𑀧𑀼𑀡𑁆𑀡𑀸 𑀦 𑀳𑁄𑀢𑀺, 𑀦 𑀏𑀯𑀁 𑀲𑀩𑁆𑀩𑀲𑁄 𑀦 𑀳𑁄𑀢𑀻𑀢𑀺 𑀆𑀳 ‘‘𑀇𑀫𑀸𑀲𑀼 𑀧𑀦𑀸’’𑀢𑀺𑀆𑀤𑀺.

𑁧𑁭𑁬. 𑀅𑀚𑁆𑀛𑀢𑁆𑀢𑀦𑁆𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀢𑀯 𑀲𑀦𑁆𑀢𑀸𑀦𑁂’’𑀢𑀺. 𑀅𑀧𑁆𑀧𑀳𑀻𑀦𑁄𑀢𑀺 𑀅𑀦𑀯𑀲𑁂𑀲𑀢𑁄 𑀅𑀧𑁆𑀧𑀳𑀻𑀦𑁄. 𑀤𑀼𑀯𑀺𑀥𑁂𑀢𑀺 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂. 𑀓𑀺𑀮𑁂𑀲𑀓𑀸𑀫𑁄𑀧𑀺 𑀳𑀺 𑀬𑀤𑀕𑁆𑀕𑁂𑀦 𑀅𑀲𑁆𑀲𑀸𑀤𑀻𑀬𑀢𑀺, 𑀢𑀤𑀕𑁆𑀕𑁂𑀦 𑀧𑀭𑀺𑀪𑀼𑀜𑁆𑀚𑀻𑀬𑀢𑀺.

𑁧𑁭𑁭. 𑀅𑀲𑁆𑀲𑀸𑀤𑀻𑀬𑀢𑀻𑀢𑀺 𑀅𑀲𑁆𑀲𑀸𑀤𑁄, 𑀲𑀼𑀔𑀁. 𑀅𑀧𑁆𑀧𑁄 𑀅𑀧𑁆𑀧𑀫𑀢𑁆𑀢𑀓𑁄 𑀅𑀲𑁆𑀲𑀸𑀤𑁄 𑀏𑀢𑁂𑀲𑀽𑀢𑀺 𑀅𑀧𑁆𑀧𑀲𑁆𑀲𑀸𑀤𑀸. 𑀢𑁂𑀦𑀸𑀳 ‘‘𑀧𑀭𑀺𑀢𑁆𑀢𑀲𑀼𑀔𑀸’’𑀢𑀺. 𑀧𑀭𑀺𑀬𑁂𑀲𑀦𑀤𑀼𑀓𑁆𑀔𑀸𑀤𑀺𑀳𑁂𑀢𑀼𑀓𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀢𑀢𑁆𑀣 𑀤𑀼𑀘𑁆𑀘𑀭𑀺𑀢𑀘𑀭𑀡𑁂𑀦 𑀲𑀫𑁆𑀧𑀭𑀸𑀬𑀺𑀓𑀜𑁆𑀘 𑀤𑀼𑀓𑁆𑀔𑀫𑁂𑀢𑁆𑀣 𑀓𑀸𑀫𑁂𑀲𑀼 𑀩𑀳𑀼𑀓𑀦𑁆𑀢𑀺 𑀩𑀳𑀼𑀤𑀼𑀓𑁆𑀔𑀸. 𑀩𑀳𑀼𑀧𑀸𑀬𑀸𑀲𑀸𑀢𑀺 𑀩𑀳𑀼𑀧𑀭𑀺𑀓𑁆𑀓𑀺𑀮𑁂𑀲𑀸. 𑀢𑁂 𑀧𑀦 𑀧𑀭𑀺𑀓𑁆𑀓𑀺𑀮𑁂𑀲𑀸 𑀯𑀓𑁆𑀔𑀫𑀸𑀦𑀦𑀬𑁂𑀦 𑀩𑀳𑀽𑀬𑁂𑀯𑁂𑀢𑁆𑀣 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀧𑀻𑀢𑀺 𑀆𑀳 ‘‘𑀤𑀺𑀝𑁆𑀞𑀥𑀫𑁆𑀫𑀺𑀓…𑀧𑁂… 𑀩𑀳𑀽’’𑀢𑀺. 𑀢𑁂 𑀘 𑀧𑀭𑀺𑀓𑁆𑀓𑀺𑀮𑁂𑀲𑀸 𑀬𑀲𑁆𑀫𑀸 𑀢𑀁𑀲𑀫𑀗𑁆𑀕𑀺𑀦𑁄 𑀳𑀺𑀢𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑁆𑀢𑀭𑀸𑀬𑀓𑀭𑀸 𑀇𑀥 𑀘𑁂𑀯 𑀧𑀭𑀮𑁄𑀓𑁂 𑀘 𑀆𑀤𑀻𑀦𑀯𑀓𑀸𑀭𑀡𑀜𑁆𑀘 𑀧𑀯𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀤𑀺𑀝𑁆𑀞𑀥𑀫𑁆𑀫𑀺𑀓…𑀧𑁂… 𑀩𑀳𑀽’’𑀢𑀺. 𑀏𑀯𑀁 𑀘𑁂𑀧𑀻𑀢𑀺 𑀏𑀯𑀁 ‘‘𑀅𑀧𑁆𑀧𑀲𑁆𑀲𑀸𑀤𑀸 𑀓𑀸𑀫𑀸’’𑀢𑀺𑀆𑀤𑀺𑀦𑀸 𑀆𑀓𑀸𑀭𑁂𑀦. 𑀦𑀬𑁂𑀦𑀸𑀢𑀺 𑀥𑀫𑁆𑀫𑁂𑀦. 𑀓𑀸𑀭𑀡𑁂𑀦𑀸𑀢𑀺 𑀬𑀼𑀢𑁆𑀢𑀺𑀬𑀸. 𑀲𑀼𑀝𑁆𑀞𑀼 𑀤𑀺𑀝𑁆𑀞𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬𑀸𑀢𑀺 𑀅𑀭𑀺𑀬𑀫𑀕𑁆𑀕𑀧𑀜𑁆𑀜𑀸𑀬. 𑀲𑀸 𑀘𑀢𑁆𑀢𑀸𑀭𑀺𑀧𑀺 𑀲𑀘𑁆𑀘𑀸𑀦𑀺 𑀯𑀺𑀲𑁂𑀲𑀢𑁄 𑀧𑀲𑁆𑀲𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀦𑀸𑀳 ‘‘𑀳𑁂𑀝𑁆𑀞𑀸𑀫𑀕𑁆𑀕𑀤𑁆𑀯𑀬𑀜𑀸𑀡𑁂𑀦𑀸𑀢𑀺 𑀅𑀢𑁆𑀣𑁄’’𑀢𑀺. 𑀧𑀻𑀢𑀺𑀲𑀼𑀔𑀦𑁆𑀢𑀺 𑀧𑀻𑀢𑀺𑀲𑀼𑀔𑀯𑀦𑁆𑀢𑀁 𑀛𑀸𑀦𑀤𑁆𑀯𑀬𑀁. 𑀤𑁆𑀯𑁂 𑀫𑀕𑁆𑀕𑁂𑀢𑀺 𑀳𑁂𑀝𑁆𑀞𑀸𑀫𑀕𑁆𑀕𑁂. 𑀆𑀯𑀝𑁆𑀝𑀦𑀲𑀻𑀮𑁄 𑀆𑀪𑀼𑀚𑀦𑀲𑀻𑀮𑁄 𑀦 𑀳𑁄𑀢𑀻𑀢𑀺 𑀅𑀦𑀸𑀯𑀝𑁆𑀝𑀻 𑀦𑁂𑀯 𑀳𑁄𑀢𑀺 𑀲𑀩𑁆𑀩𑀲𑁄 𑀅𑀧𑁆𑀧𑀳𑀻𑀦𑀓𑀸𑀫𑀭𑀸𑀕𑀙𑀦𑁆𑀤𑁄. 𑀢𑁂𑀦𑀸𑀳 ‘‘𑀓𑀲𑁆𑀫𑀸’’𑀢𑀺𑀆𑀤𑀺. 𑀑𑀭𑁄𑀥𑀦𑀸𑀝𑀓𑀸 𑀧𑀚𑀳𑀦𑀧𑀜𑁆𑀜𑀸𑀢𑀺 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀫𑀸𑀳.

𑁧𑁭𑁯. 𑀅𑀲𑁆𑀲𑀸𑀤𑁄𑀧𑀺 𑀓𑀣𑀺𑀢𑁄, ‘‘𑀅𑀧𑁆𑀧𑀲𑁆𑀲𑀸𑀤𑀸’’𑀢𑀺 𑀳𑀺 𑀇𑀫𑀺𑀦𑀸 𑀬𑀸𑀯𑀢𑀓𑁄 𑀓𑀸𑀫𑁂𑀲𑀼 𑀅𑀲𑁆𑀲𑀸𑀤𑁄, 𑀢𑀁 𑀲𑀩𑁆𑀩𑀁 𑀅𑀦𑀯𑀲𑁂𑀲𑀢𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀘𑀲𑁆𑀲 𑀧𑀭𑀺𑀢𑁆𑀢𑀪𑀸𑀯𑁄 𑀤𑀲𑁆𑀲𑀺𑀢𑁄𑀢𑀺 𑀆𑀤𑀻𑀦𑀯𑁄𑀧𑀺 𑀓𑀣𑀺𑀢𑁄 𑀲𑀗𑁆𑀔𑁂𑀧𑁂𑀦𑁂𑀯 𑀲𑁂𑀲𑀲𑁆𑀲𑀆𑀤𑀻𑀦𑀯𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸. 𑀢𑀁 𑀓𑀣𑁂𑀢𑀼𑀦𑁆𑀢𑀺 𑀢𑀁 𑀦𑀺𑀲𑁆𑀲𑀭𑀡𑀁 ‘‘𑀏𑀓𑀦𑁆𑀢𑀲𑀼𑀔𑀧𑀝𑀺𑀲𑀁𑀯𑁂𑀤𑀻’’𑀢𑀺 𑀇𑀫𑀺𑀦𑀸 𑀓𑀣𑁂𑀢𑀼𑀁. 𑀇𑀫𑁂𑀳𑀺 𑀅𑀦𑁆𑀢𑁂𑀳𑀻𑀢𑀺 ‘‘𑀧𑀜𑁆𑀘𑀺𑀫𑁂, 𑀫𑀳𑀸𑀦𑀸𑀫, 𑀓𑀸𑀫𑀕𑀼𑀡𑀸’’𑀢𑀺𑀆𑀤𑀺𑀦𑀸 𑀓𑀸𑀫𑀕𑀼𑀡𑀤𑀲𑁆𑀲𑀦𑀫𑀼𑀔𑁂𑀦 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀁 ‘‘𑀉𑀩𑁆𑀪𑀝𑁆𑀞𑀓𑀸 𑀳𑁄𑀦𑁆𑀢𑀺 𑀆𑀲𑀦𑀧𑀝𑀺𑀓𑁆𑀔𑀺𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀅𑀦𑁆𑀢𑁂𑀳𑀺 𑀫𑀼𑀢𑁆𑀢𑀁 𑀫𑀫 𑀲𑀸𑀲𑀦𑀦𑁆𑀢𑀺, 𑀨𑀮𑀲𑀫𑀸𑀧𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑀢𑁆𑀢𑀸 𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀬𑀸 ‘‘𑀉𑀧𑀭𑀺𑀨𑀮𑀲𑀫𑀸𑀧𑀢𑁆𑀢𑀺𑀲𑀻𑀲𑁂𑀦 𑀲𑀓𑀮𑀲𑀸𑀲𑀦𑀁 𑀤𑀲𑁆𑀲𑁂𑀢𑀼’’𑀦𑁆𑀢𑀺 𑀆𑀳. 𑀕𑀺𑀚𑁆𑀛𑀲𑀤𑀺𑀲𑁄 𑀓𑀽𑀝𑁄𑀢𑀺 𑀫𑀚𑁆𑀛𑁂𑀧𑀤𑀮𑁄𑀧𑀻𑀲𑀫𑀸𑀲𑁄 𑀬𑀣𑀸 ‘‘𑀲𑀸𑀓𑀧𑀢𑁆𑀣𑀺𑀯𑁄’’𑀢𑀺 (𑀧𑀸𑀡𑀺𑀦𑀺. 𑁨.𑁧.𑁬𑁦). 𑀤𑀼𑀢𑀺𑀬𑁂 𑀧𑀦𑁂𑀢𑁆𑀣 𑀕𑀺𑀚𑁆𑀛𑀯𑀦𑁆𑀢𑀢𑀸𑀬 𑀕𑀺𑀚𑁆𑀛𑀸 𑀓𑀽𑀝𑁂 𑀏𑀢𑀲𑁆𑀲𑀸𑀢𑀺 𑀕𑀺𑀚𑁆𑀛𑀓𑀽𑀝𑁄. 𑀉𑀤𑁆𑀥𑀁𑀬𑁂𑀯 𑀢𑀺𑀝𑁆𑀞𑀦𑀓𑀸 𑀦𑀺𑀲𑀚𑁆𑀚𑀸𑀬 𑀯𑀼𑀝𑁆𑀞𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀏𑀓𑀝𑁆𑀞𑀸𑀦𑁂𑀦𑁂𑀯 𑀢𑀺𑀝𑁆𑀞𑀦𑀓𑀸. 𑀢𑁂𑀦𑀸𑀳 ‘‘𑀅𑀦𑀺𑀲𑀺𑀦𑁆𑀦𑀸’’𑀢𑀺. 𑀦𑀺𑀕𑀡𑁆𑀞𑀲𑁆𑀲𑀸𑀢𑀺 𑀦𑀸𑀝𑀧𑀼𑀢𑁆𑀢𑀲𑁆𑀲. 𑀦𑀢𑁆𑀣𑀺 𑀏𑀢𑀲𑁆𑀲 𑀧𑀭𑀺𑀲𑁂𑀲𑀦𑁆𑀢𑀺 𑀅𑀧𑀭𑀺𑀲𑁂𑀲𑀁. 𑀏𑀯𑀁 𑀲𑀗𑁆𑀔𑀸𑀪𑀯𑀘𑀦𑀫𑀢𑁆𑀢𑀫𑀲𑁆𑀲𑀸𑀢𑀺 𑀆𑀳 ‘‘𑀅𑀧𑀭𑀺𑀲𑁂𑀲𑀲𑀗𑁆𑀔𑀸𑀢’’𑀦𑁆𑀢𑀺. 𑀦𑀺𑀘𑁆𑀘𑀝𑁆𑀞𑁂𑀦 𑀲𑀢𑀢-𑀲𑀤𑁆𑀤𑁂𑀦 𑀅𑀪𑀺𑀡𑁆𑀳𑀧𑁆𑀧𑀯𑀢𑁆𑀢𑀺 𑀚𑁄𑀢𑀺𑀢𑀸 𑀲𑀺𑀬𑀸𑀢𑀺 ‘‘𑀲𑀫𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀦𑀺𑀭𑀦𑁆𑀢𑀭𑀧𑁆𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀻𑀢𑀺 𑀏𑀯𑀁 𑀯𑀸 𑀏𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑁧𑁮𑁦. 𑀬𑀁 𑀓𑀭𑁄𑀢𑀺, 𑀢𑀁 𑀚𑀸𑀦𑀸𑀢𑀻𑀢𑀺 𑀤𑀼𑀓𑁆𑀔𑀲𑁆𑀲 𑀦𑀺𑀚𑁆𑀚𑀭𑀡𑀔𑁂𑀧𑀦𑀁 𑀦𑀸𑀫 𑀯𑀺𑀜𑁆𑀜𑀽𑀦𑀁 𑀓𑀺𑀘𑁆𑀘𑀁, 𑀯𑀺𑀜𑁆𑀜𑀼𑀦𑀸 𑀘 𑀧𑀼𑀭𑀺𑀲𑁂𑀦 𑀓𑀢𑀸𑀓𑀢𑀁 𑀚𑀸𑀦𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀢𑀼𑀫𑁆𑀳𑁂𑀳𑀺 𑀧𑀼𑀭𑀸𑀡𑀸𑀦𑀁 𑀓𑀫𑁆𑀫𑀸𑀦𑀁 𑀩𑁆𑀬𑀦𑁆𑀢𑀺𑀪𑀸𑀯𑀁 𑀓𑀭𑁄𑀦𑁆𑀢𑁂𑀳𑀺 𑀧𑀞𑀫𑀁 𑀢𑀸𑀯 𑀏𑀢𑁆𑀢𑀓𑀸𑀦𑀺 𑀧𑀼𑀭𑀸𑀡𑀸𑀦𑀺 𑀓𑀫𑁆𑀫𑀸𑀦𑀻𑀢𑀺 𑀚𑀸𑀦𑀺𑀢𑀩𑁆𑀩𑀸𑀦𑀺, 𑀢𑀢𑁄 ‘‘𑀏𑀢𑁆𑀢𑀓𑀁 𑀓𑀸𑀮𑀁 𑀓𑀢𑁂𑀦 𑀢𑀧𑀲𑀸 𑀏𑀢𑁆𑀢𑀓𑀸𑀦𑀺 𑀢𑀸𑀦𑀺 𑀩𑁆𑀬𑀦𑁆𑀢𑀺𑀓𑀢𑀸𑀦𑀺, 𑀇𑀤𑀸𑀦𑀺 𑀏𑀢𑁆𑀢𑀓𑀸𑀦𑀺 𑀓𑀸𑀢𑀩𑁆𑀩𑀸𑀦𑀻’’𑀢𑀺𑀆𑀤𑀺𑀦𑀸 𑀅𑀬𑀁 𑀯𑀺𑀥𑀺 𑀧𑀼𑀭𑀺𑀲𑁂𑀦 𑀯𑀺𑀬 𑀅𑀢𑁆𑀢𑀦𑀸 𑀓𑀸𑀢𑀩𑁆𑀩𑀓𑀺𑀘𑁆𑀘𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀢𑀼𑀫𑁆𑀳𑁂𑀳𑀺𑀧𑀺 𑀢𑀣𑀸 𑀜𑀸𑀢𑀩𑁆𑀩𑀁 𑀲𑀺𑀬𑀸’’𑀢𑀺. 𑀲𑀼𑀤𑁆𑀥𑀦𑁆𑀢𑀦𑁆𑀢𑀺 𑀲𑀼𑀤𑁆𑀥𑀓𑁄𑀝𑁆𑀞𑀸𑀲𑀁, 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑀲𑀺𑀤𑁆𑀥𑀁 𑀓𑀫𑁆𑀫𑀓𑁆𑀔𑀬𑀁, 𑀢𑀢𑁄 𑀯𑀸 𑀤𑀼𑀓𑁆𑀔𑀓𑁆𑀔𑀬𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀤𑁆𑀥𑀦𑁆𑀢𑀁 𑀧𑀢𑁆𑀢𑁄 𑀅𑀢𑁆𑀣𑀻𑀢𑀺 𑀧𑀼𑀘𑁆𑀙𑀢𑀻𑀢𑀺 𑀇𑀫𑀺𑀦𑀸 𑀅𑀓𑀼𑀲𑀮𑀸𑀦𑀁 𑀧𑀳𑀸𑀦𑀁, 𑀓𑀼𑀲𑀮𑀸𑀦𑀁 𑀪𑀸𑀯𑀦𑀸 𑀘 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦𑀺𑀕𑀡𑁆𑀞𑀲𑀫𑀬𑁂 𑀦𑀢𑁆𑀣𑀺 𑀲𑀩𑁆𑀩𑀲𑁄 𑀯𑀺𑀲𑀼𑀤𑁆𑀥𑀺𑀪𑀸𑀯𑀦𑀸𑀬 𑀅𑀪𑀸𑀯𑀢𑁄, 𑀢𑀲𑁆𑀫𑀸 𑀓𑀼𑀢𑁄 𑀤𑀼𑀓𑁆𑀔𑀓𑁆𑀔𑀬𑀲𑁆𑀲 𑀲𑀫𑁆𑀪𑀯𑁄𑀢𑀺 𑀤𑀲𑁆𑀲𑁂𑀢𑀺.

𑀏𑀯𑀁 𑀅𑀚𑀸𑀦𑀦𑀪𑀸𑀯𑁂 𑀲𑀢𑀻𑀢𑀺 ‘‘𑀅𑀳𑀼𑀯𑀫𑁆𑀳𑁂𑀯 𑀫𑀬’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀅𑀚𑀸𑀦𑀦𑁂 𑀲𑀢𑀺, 𑀢𑀲𑁆𑀫𑀺𑀁 𑀢𑀼𑀫𑁆𑀳𑁂𑀳𑀺 𑀅𑀜𑁆𑀜𑀸𑀬𑀫𑀸𑀦𑁂𑀢𑀺 𑀅𑀢𑁆𑀣𑁄. 𑀮𑀼𑀤𑁆𑀤𑀸𑀢𑀺 𑀖𑁄𑀭𑀸. 𑀢𑁂 𑀧𑀦 𑀬𑀲𑁆𑀫𑀸 𑀓𑀸𑀬𑀯𑀸𑀘𑀸𑀳𑀺 𑀦𑀺𑀳𑀻𑀦𑀫𑁂𑀯 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀮𑀼𑀤𑁆𑀤𑀸𑀘𑀸𑀭𑀸’’𑀢𑀺. 𑀮𑁄𑀳𑀺𑀢𑀧𑀸𑀡𑀺𑀢𑁆𑀯𑁂𑀯 𑀯𑀼𑀘𑁆𑀘𑀢𑀺 𑀢𑀚𑁆𑀚𑀸𑀓𑀺𑀭𑀺𑀬𑀸𑀘𑀭𑀡𑀢𑁄. 𑀫𑀸𑀕𑀯𑀺𑀓𑀓𑁂𑀯𑀝𑁆𑀝𑀘𑁄𑀭𑀖𑀸𑀢𑀓𑀸𑀤𑀬𑁄 𑀫𑀸𑀕𑀯𑀺𑀓𑀸𑀤𑀬𑁄. 𑀓𑀓𑁆𑀔𑀴𑀓𑀫𑁆𑀫𑀸𑀢𑀺 𑀨𑀭𑀼𑀲𑀓𑀫𑁆𑀫𑀸. 𑀢𑁂 𑀦𑀺𑀕𑀡𑁆𑀞𑁂𑀲𑀼 𑀧𑀩𑁆𑀩𑀚𑀦𑁆𑀢𑀻𑀢𑀺 𑀧𑀼𑀩𑁆𑀩𑁂 𑀫𑀳𑀸𑀤𑀼𑀓𑁆𑀔𑀲𑀁𑀯𑀢𑁆𑀢𑀦𑀺𑀬𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀳𑀺 𑀢𑀼𑀫𑁆𑀳𑁂 𑀏𑀢𑀭𑀳𑀺 𑀈𑀤𑀺𑀲𑀁 𑀫𑀳𑀸𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑀯𑀣𑀸𑀢𑀺 𑀤𑀲𑁆𑀲𑁂𑀢𑀺.

𑀯𑀸𑀤𑁂𑀢𑀺 𑀤𑀺𑀝𑁆𑀞𑀺𑀬𑀁, 𑀲𑀫𑀬𑁂𑀢𑀺 𑀅𑀢𑁆𑀣𑁄. 𑀲𑀼𑀔𑁂𑀦 𑀲𑀼𑀔𑀦𑁆𑀢𑀺 𑀏𑀢𑁆𑀣 𑀲𑀼𑀔𑁂𑀦𑀸𑀢𑀺 𑀧𑀝𑀺𑀧𑀢𑁆𑀢𑀺𑀲𑀼𑀔𑁂𑀦, 𑀲𑀼𑀔𑀸𑀬 𑀧𑀝𑀺𑀧𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑁄. 𑀲𑀼𑀔𑀦𑁆𑀢𑀺 𑀯𑀺𑀫𑁄𑀓𑁆𑀔𑀲𑀼𑀔𑀁, 𑀇𑀥 𑀮𑁄𑀓𑁂 𑀲𑀼𑀔𑀁 𑀅𑀥𑀺𑀕𑀘𑁆𑀙𑀦𑁆𑀢𑀸 𑀓𑀲𑀺𑀯𑀡𑀺𑀚𑁆𑀚𑀸𑀤𑀺𑀤𑀼𑀓𑁆𑀔𑀧𑀝𑀺𑀧𑀢𑁆𑀢𑀺𑀬𑀸𑀯 𑀅𑀥𑀺𑀕𑀘𑁆𑀙𑀦𑁆𑀢𑀺, 𑀏𑀯𑀁 𑀫𑁄𑀓𑁆𑀔𑀲𑀼𑀔𑀫𑁆𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀭𑀻𑀭𑀸𑀯𑀬𑀯𑀲𑀫𑁆𑀧𑀢𑁆𑀢𑀺𑀬𑀸𑀧𑀺 𑀩𑀺𑀫𑁆𑀩𑀺𑀦𑁄 𑀲𑀸𑀭𑁄𑀢𑀺 𑀩𑀺𑀫𑁆𑀩𑀺𑀲𑀸𑀭𑁄. 𑀢𑁂 𑀦𑀺𑀕𑀡𑁆𑀞𑀸…𑀧𑁂… 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺, 𑀦 𑀧𑀦 𑀪𑀕𑀯𑀢𑁄 𑀅𑀘𑁆𑀘𑀦𑁆𑀢𑀲𑀦𑁆𑀢𑀧𑀡𑀻𑀢𑀁 𑀦𑀺𑀩𑁆𑀩𑀸𑀦𑀲𑀼𑀔𑀧𑀝𑀺𑀯𑁂𑀤𑀦𑀁 𑀚𑀸𑀦𑀦𑁆𑀢𑀺. 𑀲𑀳𑀲𑀸𑀢𑀺 𑀭𑀯𑀸. 𑀅𑀧𑁆𑀧𑀝𑀺𑀲𑀗𑁆𑀔𑀸𑀢𑀺 𑀦 𑀧𑀝𑀺𑀲𑀗𑁆𑀔𑀸𑀬 𑀅𑀯𑀺𑀘𑀸𑀭𑁂𑀢𑁆𑀯𑀸. 𑀢𑁂𑀦𑀸𑀳 ‘‘𑀲𑀸𑀳𑀲𑀁 𑀓𑀢𑁆𑀯𑀸’’𑀢𑀺𑀆𑀤𑀺.

𑀅𑀜𑁆𑀜𑀸𑀳𑀺 𑀯𑁂𑀤𑀦𑀸𑀳𑀺 𑀅𑀯𑁄𑀫𑀺𑀲𑁆𑀲𑀁 𑀏𑀓𑀦𑁆𑀢𑀁 𑀲𑀼𑀔𑀁 𑀏𑀓𑀦𑁆𑀢𑀲𑀼𑀔𑀁, 𑀢𑀲𑁆𑀲 𑀧𑀝𑀺𑀲𑀁𑀯𑁂𑀤𑀻. 𑀢𑁂𑀦𑀸𑀳 ‘‘𑀦𑀺𑀭𑀦𑁆𑀢𑀭𑀲𑀼𑀔𑀧𑀝𑀺𑀲𑀁𑀯𑁂𑀤𑀻’’𑀢𑀺. 𑀓𑀣𑀸𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀦𑁆𑀢𑀺 ‘‘𑀏𑀓𑀦𑁆𑀢𑀲𑀼𑀔𑀧𑀝𑀺𑀲𑀁𑀯𑁂𑀤𑀻’’𑀢𑀺 𑀏𑀯𑀁 𑀆𑀭𑀤𑁆𑀥𑀓𑀣𑀸𑀬 𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀁. 𑀭𑀸𑀚𑀯𑀸𑀭𑁂𑀢𑀺 𑀭𑀸𑀚𑀸𑀦𑀁 𑀉𑀤𑁆𑀤𑀺𑀲𑁆𑀲 𑀆𑀕𑀢𑀤𑁂𑀲𑀦𑀸𑀯𑀸𑀭𑁂. 𑀲𑀼𑀔𑀁 𑀧𑀼𑀘𑁆𑀙𑀺𑀢𑀼𑀁 𑀳𑁄𑀢𑀻𑀢𑀺 ‘‘𑀬𑀤𑀺 𑀲𑀢𑁆𑀢 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺 𑀦𑀧𑁆𑀧𑀳𑁄𑀢𑀺, 𑀓𑀺𑀁 𑀙 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺 𑀧𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀧𑀼𑀘𑁆𑀙𑀦𑀲𑀼𑀔𑀁 𑀳𑁄𑀢𑀺. ‘‘𑀅𑀳𑀁 𑀔𑁄’’𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑁄 𑀲𑀼𑀤𑁆𑀥𑀯𑀸𑀭𑁄 𑀲𑀼𑀤𑁆𑀥𑀦𑀺𑀲𑁆𑀲𑀦𑁆𑀤𑀲𑁆𑀲 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀲𑁆𑀲 𑀯𑀲𑁂𑀦 𑀆𑀕𑀢𑀢𑁆𑀢𑀸. 𑀅𑀦𑀘𑁆𑀙𑀭𑀺𑀬𑀁 𑀳𑁄𑀢𑀺, 𑀲𑀢𑁆𑀢 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺 𑀧𑀳𑁄𑀦𑁆𑀢𑀲𑁆𑀲 𑀏𑀓𑀲𑁆𑀫𑀺𑀁 𑀭𑀢𑁆𑀢𑀺𑀦𑁆𑀤𑀺𑀯𑁂 𑀓𑀺𑀁 𑀯𑀢𑁆𑀢𑀩𑁆𑀩𑀦𑁆𑀢𑀺. 𑀉𑀢𑁆𑀢𑀸𑀦𑀢𑁆𑀣𑀫𑁂𑀯 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸.

𑀘𑀽𑀴𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.