𑁩. 𑀫𑀳𑀸𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁩. 𑀢𑀢𑁄 𑀧𑀭𑀦𑁆𑀢𑀺 𑀢𑀺𑀡𑁆𑀡𑀁 𑀚𑀦𑀸𑀦𑀁 𑀉𑀧𑀭𑀺 𑀲𑀗𑁆𑀖𑁄 𑀘𑀢𑀼𑀯𑀕𑁆𑀕𑀓𑀭𑀡𑀻𑀬𑀸𑀤𑀺𑀓𑀫𑁆𑀫𑁂𑀳𑀺 𑀧𑀝𑀺𑀓𑀫𑁆𑀫𑀧𑁆𑀧𑀢𑁆𑀢𑀢𑁆𑀢𑀸. 𑀕𑀸𑀫𑀁 𑀕𑀢𑁄𑀢𑀺 𑀯𑀼𑀘𑁆𑀘𑀢𑀺 𑀕𑀸𑀫𑀁 𑀉𑀤𑁆𑀤𑀺𑀲𑁆𑀲 𑀕𑀢𑀢𑁆𑀢𑀸, 𑀏𑀯𑀁 𑀲𑀸𑀯𑀢𑁆𑀣𑀺𑀁 𑀧𑀯𑀺𑀲𑀺𑀢𑀼𑀁 𑀯𑀺𑀳𑀸𑀭𑀢𑁄 𑀦𑀺𑀓𑁆𑀔𑀦𑁆𑀢𑀸 ‘‘𑀧𑀯𑀺𑀲𑀺𑀁𑀲𑀽’’𑀢𑀺 𑀯𑀼𑀢𑁆𑀢𑀸. 𑀧𑀭𑀺𑀜𑁆𑀜𑀦𑁆𑀢𑀺 𑀧𑀳𑀸𑀦𑀧𑀭𑀺𑀜𑁆𑀜𑀁. 𑀲𑀸 𑀳𑀺 𑀲𑀫𑀢𑀺𑀓𑁆𑀓𑀫𑁄, 𑀦 𑀇𑀢𑀭𑀸. 𑀭𑀽𑀧𑀯𑁂𑀤𑀦𑀸𑀲𑀼𑀧𑀻𑀢𑀺 ‘‘𑀭𑀽𑀧𑀸𑀦𑀁 𑀧𑀭𑀺𑀜𑁆𑀜𑀁, 𑀯𑁂𑀤𑀦𑀸𑀦𑀁 𑀧𑀭𑀺𑀜𑁆𑀜’’𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀓𑀸𑀫𑀁 𑀲𑀩𑁆𑀩𑁂𑀲𑀁 𑀢𑀺𑀢𑁆𑀣𑀺𑀬𑀸𑀦𑀁 𑀓𑀸𑀫𑀸𑀤𑀺𑀧𑀭𑀺𑀜𑁆𑀜𑀸𑀧𑀜𑁆𑀜𑀸𑀧𑀦𑀳𑁂𑀢𑀼𑀪𑀽𑀢𑁄 𑀲𑀫𑀬𑁄 𑀦𑀢𑁆𑀣𑀺, 𑀬𑁂𑀲𑀁 𑀧𑀦 𑀅𑀢𑁆𑀣𑀺, 𑀢𑁂 𑀉𑀧𑀸𑀤𑀸𑀬 ‘‘𑀲𑀓𑀲𑀫𑀬𑀁 𑀚𑀸𑀦𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁. ‘‘𑀬𑀢𑁄 𑀬𑀢𑁄 𑀔𑁄 𑀪𑁄 𑀅𑀬𑀁 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀏𑀢𑁆𑀢𑀸𑀯𑀢𑀸 𑀔𑁄 𑀪𑁄 𑀓𑀸𑀫𑀸𑀦𑀁 𑀧𑀭𑀺𑀜𑁆𑀜𑀸 𑀳𑁄𑀢𑀻’’𑀢𑀺 𑀏𑀯𑀁 𑀲𑀭𑀽𑀧𑀢𑁄 𑀧𑀞𑀫𑀚𑁆𑀛𑀸𑀦𑀁 𑀯𑀺𑀪𑀸𑀯𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀧𑀺 𑀓𑁂𑀯𑀮𑀁 𑀅𑀘𑁆𑀘𑀦𑁆𑀢𑀧𑁆𑀧𑀳𑀸𑀦𑀲𑀜𑁆𑀜𑀸𑀬 𑀓𑀸𑀫𑀸𑀦𑀁 𑀧𑀭𑀺𑀜𑁆𑀜𑀁 𑀧𑀜𑁆𑀜𑀧𑁂𑀬𑁆𑀬𑀼𑀁 𑀧𑀞𑀫𑀚𑁆𑀛𑀸𑀦𑀁 𑀯𑀤𑀫𑀸𑀦𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀸𑀤𑀺𑀲𑀲𑁆𑀲 𑀆𑀕𑀫𑀸𑀥𑀺𑀕𑀫𑀲𑁆𑀲𑀸𑀪𑀸𑀯𑀢𑁄. 𑀭𑀽𑀧𑀯𑁂𑀤𑀦𑀸𑀧𑀭𑀺𑀜𑁆𑀜𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀼𑀘𑁆𑀘𑁂𑀣𑀸𑀢𑀺 𑀯𑀼𑀘𑁆𑀘𑁂𑀬𑁆𑀬. 𑀤𑀼𑀢𑀺𑀬𑀧𑀤𑁂𑀧𑀻𑀢𑀺 ‘‘𑀅𑀦𑀼𑀲𑀸𑀲𑀦𑀺𑀬𑀸 𑀯𑀸 𑀅𑀦𑀼𑀲𑀸𑀲𑀦𑀺’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀯𑀸𑀓𑁆𑀬𑁂𑀧𑀺. 𑀢𑁂 𑀓𑀺𑀭 𑀪𑀺𑀓𑁆𑀔𑀽.

𑁧𑁬𑁫. 𑀦 𑀘𑁂𑀯 𑀲𑀫𑁆𑀧𑀸𑀬𑀺𑀲𑁆𑀲𑀦𑁆𑀢𑀻𑀢𑀺 𑀦 𑀘𑁂𑀯 𑀲𑀫𑁆𑀫𑀤𑁂𑀯 𑀧𑀓𑀸𑀭𑁂𑀳𑀺 𑀕𑀫𑁂𑀲𑁆𑀲𑀦𑁆𑀢𑀺 𑀜𑀸𑀧𑁂𑀲𑁆𑀲𑀦𑁆𑀢𑀺. 𑀢𑁂𑀦𑀸𑀳 ‘‘𑀲𑀫𑁆𑀧𑀸𑀤𑁂𑀢𑁆𑀯𑀸 𑀓𑀣𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀻’’𑀢𑀺. 𑀬𑀲𑁆𑀫𑀸 𑀅𑀯𑀺𑀲𑀬𑁂 𑀧𑀜𑁆𑀳𑁄 𑀧𑀼𑀘𑁆𑀙𑀺𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀲𑀤𑁂𑀯𑀓𑁂𑀢𑀺 𑀅𑀭𑀽𑀧𑀤𑁂𑀯𑀕𑁆𑀕𑀳𑀡𑀁. 𑀢𑁂 𑀳𑀺 𑀮𑁄𑀓𑀺𑀬𑀤𑁂𑀯𑁂𑀳𑀺 𑀤𑀻𑀖𑀸𑀬𑀼𑀓𑀢𑀸𑀤𑀺𑀦𑀸 𑀉𑀓𑁆𑀓𑀝𑁆𑀞𑀸. 𑀲𑀫𑀸𑀭𑀓𑁂𑀢𑀺 𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁. 𑀲𑀩𑁆𑀭𑀳𑁆𑀫𑀓𑁂𑀢𑀺 𑀭𑀽𑀧𑀸𑀯𑀘𑀭𑀩𑁆𑀭𑀳𑁆𑀫𑀕𑁆𑀕𑀳𑀡𑀁. 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸𑀢𑀺 𑀏𑀢𑁆𑀣 𑀲𑀫𑀡𑀕𑁆𑀕𑀳𑀡𑁂𑀦 𑀧𑀩𑁆𑀩𑀚𑀺𑀢𑁂, 𑀩𑁆𑀭𑀸𑀳𑁆𑀫𑀡𑀕𑁆𑀕𑀳𑀡𑁂𑀦 𑀚𑀸𑀢𑀺𑀩𑁆𑀭𑀸𑀳𑁆𑀫𑀡𑁂, 𑀧𑀼𑀦 𑀤𑁂𑀯𑀕𑁆𑀕𑀳𑀡𑁂𑀦 𑀲𑀫𑁆𑀫𑀼𑀢𑀺𑀤𑁂𑀯𑁂, 𑀫𑀦𑀼𑀲𑁆𑀲𑀕𑁆𑀕𑀳𑀡𑁂𑀦 𑀅𑀯𑀲𑀺𑀝𑁆𑀞𑀫𑀦𑀼𑀲𑁆𑀲𑀓𑀸𑀬𑀁 𑀧𑀭𑀺𑀬𑀸𑀤𑀺𑀬𑀢𑀺. 𑀮𑁄𑀓𑀧𑀚𑀸𑀕𑁆𑀕𑀳𑀡𑁂𑀦 𑀧𑀦 𑀧𑀬𑁄𑀚𑀦𑀁 𑀅𑀝𑁆𑀞𑀓𑀣𑀸𑀬𑀁 𑀤𑀲𑁆𑀲𑀺𑀢𑀫𑁂𑀯. 𑀅𑀜𑁆𑀜𑀣𑀸 𑀆𑀭𑀸𑀥𑀦𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀇𑀫𑀺𑀦𑀸 𑀓𑀸𑀫𑀭𑀽𑀧𑀯𑁂𑀤𑀦𑀸𑀲𑀼 𑀅𑀲𑁆𑀲𑀸𑀤𑀸𑀤𑀻𑀦𑀁 𑀬𑀸𑀣𑀸𑀯𑀢𑁄 𑀅𑀯𑀩𑁄𑀥𑁄 𑀏𑀯 𑀇𑀢𑁄 𑀩𑀸𑀳𑀺𑀭𑀓𑀸𑀦𑀁 𑀦𑀢𑁆𑀣𑀺, 𑀓𑀼𑀢𑁄 𑀧𑀯𑁂𑀤𑀦𑀸𑀢𑀺 𑀤𑀲𑁆𑀲𑁂𑀢𑀺.

𑁧𑁬𑁬. 𑀘𑀺𑀢𑁆𑀢𑀸𑀭𑀸𑀥𑀦𑀦𑁆𑀢𑀺 𑀬𑀸𑀣𑀸𑀯𑀧𑀯𑁂𑀤𑀦𑁂𑀦 𑀧𑀭𑁂𑀲𑀁 𑀘𑀺𑀢𑁆𑀢𑀲𑁆𑀲 𑀧𑀭𑀺𑀢𑁄𑀲𑀦𑀁. 𑀩𑀦𑁆𑀥𑀦𑀝𑁆𑀞𑁂𑀦 𑀕𑀼𑀡𑀸𑀢𑀺 𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀲𑁆𑀲 𑀧𑀘𑁆𑀘𑀬𑀪𑀸𑀯𑁂𑀦 𑀯𑀢𑁆𑀣𑀼𑀓𑀸𑀫𑁂𑀲𑀼𑀧𑀺 𑀩𑀦𑁆𑀥𑀦𑀝𑁆𑀞𑁄 𑀯𑀼𑀢𑁆𑀢𑁄, 𑀓𑁄𑀝𑁆𑀞𑀸𑀲𑀝𑁆𑀞𑁄 𑀯𑀸 𑀕𑀼𑀡𑀝𑁆𑀞𑁄 𑀤𑀝𑁆𑀞𑀩𑁆𑀩𑁄. 𑀢𑀭𑀬𑀦𑁆𑀢𑀻𑀢𑀺 𑀢𑀭𑀫𑀸𑀦𑀸 𑀬𑀦𑁆𑀢𑀺 𑀕𑀘𑁆𑀙𑀦𑁆𑀢𑀺. 𑀅𑀢𑀻𑀢𑀸𑀤𑀺𑀪𑀺𑀦𑁆𑀦𑀧𑀞𑀫𑀸𑀤𑀺𑀯𑀬𑀸 𑀏𑀯 𑀘𑀺𑀢𑁆𑀢𑀢𑀸 𑀭𑀸𑀲𑀺𑀪𑀸𑀯𑁂𑀦 𑀯𑀬𑁄𑀕𑀼𑀡𑀸𑀢𑀺 𑀕𑀳𑀺𑀢𑀸𑀢𑀺 𑀆𑀳 ‘‘𑀭𑀸𑀲𑀝𑁆𑀞𑁄 𑀕𑀼𑀡𑀝𑁆𑀞𑁄’’𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀢𑀁𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑁂𑀳𑀺 𑀯𑀺𑀚𑀸𑀦𑀺𑀢𑀩𑁆𑀩𑀸. 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀝𑁆𑀞𑀸𑀭𑀫𑁆𑀫𑀡𑀪𑀽𑀢𑀸𑀢𑀺 𑀲𑀪𑀸𑀯𑁂𑀦𑁂𑀯 𑀇𑀝𑁆𑀞𑀸𑀭𑀫𑁆𑀫𑀡𑀚𑀸𑀢𑀺𑀓𑀸, 𑀇𑀝𑁆𑀞𑀸𑀭𑀫𑁆𑀫𑀡𑀪𑀸𑀯𑀁 𑀯𑀸 𑀧𑀢𑁆𑀢𑀸. 𑀓𑀫𑀦𑀻𑀬𑀸𑀢𑀺 𑀓𑀸𑀫𑁂𑀢𑀩𑁆𑀩𑀸. 𑀫𑀦𑀯𑀟𑁆𑀠𑀦𑀓𑀸𑀢𑀺 𑀫𑀦𑁄𑀳𑀭𑀸. 𑀏𑀢𑁂𑀦 𑀧𑀭𑀺𑀓𑀧𑁆𑀧𑀦𑀢𑁄𑀧𑀺 𑀇𑀝𑁆𑀞𑀪𑀸𑀯𑀁 𑀕𑀡𑁆𑀳𑀸𑀢𑀺. 𑀧𑀺𑀬𑀚𑀸𑀢𑀺𑀓𑀸𑀢𑀺 𑀧𑀺𑀬𑀸𑀬𑀺𑀢𑀩𑁆𑀩𑀲𑀪𑀸𑀯𑀸. 𑀓𑀸𑀫𑀽𑀧𑀲𑀁𑀳𑀺𑀢𑀸𑀢𑀺 𑀓𑀸𑀫𑀭𑀸𑀕𑁂𑀦 𑀉𑀧𑁂𑀘𑁆𑀘 𑀲𑀦𑁆𑀥𑀸𑀦𑀺𑀬𑀸 𑀲𑀫𑁆𑀩𑀤𑁆𑀥𑀸 (𑀅. 𑀦𑀺. 𑀝𑀻. 𑁩.𑁬.𑁬𑁩) 𑀓𑀸𑀢𑀩𑁆𑀩𑀸𑀢𑀺 𑀆𑀳 ‘‘𑀆𑀭𑀫𑁆𑀫𑀡𑀁 𑀓𑀢𑁆𑀯𑀸’’𑀢𑀺.

𑁧𑁬𑁭. 𑀲𑀜𑁆𑀜𑀁 𑀞𑀧𑁂𑀢𑁆𑀯𑀸𑀢𑀺 ‘‘𑀇𑀫𑀲𑁆𑀫𑀺𑀁 𑀅𑀗𑁆𑀕𑀼𑀮𑀺𑀓𑀸𑀤𑀺𑀧𑀩𑁆𑀩𑁂 𑀕𑀳𑀺𑀢𑁂 𑀲𑀢𑀁 𑀳𑁄𑀢𑀺, 𑀇𑀫𑀲𑁆𑀫𑀺𑀁 𑀲𑀳𑀲𑁆𑀲’’𑀦𑁆𑀢𑀺𑀆𑀤𑀺𑀦𑀸 𑀲𑀜𑁆𑀜𑀸𑀡𑀁 𑀓𑀢𑁆𑀯𑀸 𑀕𑀡𑀦𑀸. 𑀅𑀘𑁆𑀙𑀺𑀤𑁆𑀤𑀕𑀡𑀦𑀸𑀢𑀺 ‘‘𑀏𑀓𑀁 𑀤𑁆𑀯𑁂’’𑀢𑀺𑀆𑀤𑀺𑀦𑀸 𑀦𑀯𑀦𑁆𑀢𑀯𑀺𑀥𑀺𑀦𑀸 𑀦𑀺𑀭𑀦𑁆𑀢𑀭𑀕𑀡𑀦𑀸. 𑀧𑀺𑀡𑁆𑀟𑀕𑀡𑀦𑀸𑀢𑀺 𑀲𑀗𑁆𑀓𑀮𑀦𑀧𑀝𑀼𑀧𑁆𑀧𑀸𑀤𑀦𑀸𑀤𑀺𑀦𑀸 𑀧𑀺𑀡𑁆𑀟𑀺𑀢𑁆𑀯𑀸 𑀕𑀡𑀦𑀸. 𑀢𑁂𑀦𑀸𑀳 ‘‘𑀔𑁂𑀢𑁆𑀢𑀁 𑀑𑀮𑁄𑀓𑁂𑀢𑁆𑀯𑀸’’𑀢𑀺𑀆𑀤𑀺. 𑀓𑀲𑀦𑀁 𑀓𑀲𑀻𑀢𑀺 𑀓𑀲𑀺𑀕𑁆𑀕𑀳𑀡𑁂𑀦 𑀲𑀩𑁆𑀩𑁄 𑀓𑀲𑀺𑀧𑀝𑀺𑀩𑀤𑁆𑀥𑁄 𑀚𑀻𑀯𑀺𑀓𑀽𑀧𑀸𑀬𑁄 𑀕𑀳𑀺𑀢𑁄𑀢𑀺 𑀆𑀳 ‘‘𑀓𑀲𑀻𑀢𑀺 𑀓𑀲𑀺𑀓𑀫𑁆𑀫’’𑀦𑁆𑀢𑀺. 𑀚𑀗𑁆𑀖𑀯𑀡𑀺𑀚𑁆𑀚𑀸𑀢𑀺 𑀚𑀗𑁆𑀖𑀲𑀢𑁆𑀣𑀯𑀲𑁂𑀦 𑀯𑀡𑀺𑀚𑁆𑀚𑀁 𑀆𑀳, 𑀣𑀮𑀯𑀡𑀺𑀚𑁆𑀚𑀸𑀢𑀺 𑀲𑀓𑀝𑀲𑀢𑁆𑀣𑀯𑀲𑁂𑀦. 𑀆𑀤𑀺-𑀲𑀤𑁆𑀤𑁂𑀦 𑀦𑀸𑀯𑀸𑀧𑀡𑀸𑀤𑀺𑀯𑀲𑁂𑀦 𑀯𑁄𑀳𑀸𑀭𑀁. 𑀯𑀡𑀺𑀧𑁆𑀧𑀣𑁄𑀢𑀺 𑀯𑀡𑀺𑀚𑀫𑀕𑁆𑀕𑁄, 𑀤𑀸𑀦𑀕𑁆𑀕𑀳𑀡𑀯𑀲𑁂𑀦 𑀲𑀁𑀯𑁄𑀳𑀸𑀭𑁄𑀢𑀺 𑀅𑀢𑁆𑀣𑁄. 𑀉𑀲𑀽𑀦𑀁 𑀅𑀲𑀦𑀓𑀫𑁆𑀫𑀁 𑀇𑀲𑁆𑀲𑀢𑁆𑀢𑀁, 𑀥𑀦𑀼𑀲𑀺𑀧𑁆𑀧𑁂𑀦 𑀚𑀻𑀯𑀺𑀓𑀸, 𑀇𑀥 𑀧𑀦 𑀇𑀲𑁆𑀲𑀢𑁆𑀢𑀁 𑀯𑀺𑀬𑀸𑀢𑀺 𑀇𑀲𑁆𑀲𑀢𑁆𑀢𑀁, 𑀲𑀩𑁆𑀩𑀆𑀯𑀼𑀥𑀚𑀻𑀯𑀺𑀓𑀸𑀢𑀺 𑀆𑀳 ‘‘𑀆𑀯𑀼𑀥𑀁 𑀕𑀳𑁂𑀢𑁆𑀯𑀸 𑀉𑀧𑀝𑁆𑀞𑀸𑀦𑀓𑀫𑁆𑀫’’𑀦𑁆𑀢𑀺. 𑀧𑁄𑀭𑁄𑀳𑀺𑀘𑁆𑀘𑀸𑀫𑀘𑁆𑀘𑀓𑀫𑁆𑀫𑀸𑀤𑀺 𑀭𑀸𑀚𑀓𑀫𑁆𑀫𑀁.𑀆𑀤𑀺-𑀲𑀤𑁆𑀤𑁂𑀦 𑀭𑀣𑀲𑀺𑀧𑁆𑀧𑀔𑀢𑁆𑀢𑀯𑀺𑀚𑁆𑀚𑀸𑀲𑀺𑀧𑁆𑀧𑀸𑀤𑀺-𑀯𑀼𑀢𑁆𑀢𑀸𑀯𑀲𑁂𑀲𑀁 𑀫𑀳𑀸𑀲𑀺𑀧𑁆𑀧𑀁 𑀔𑀼𑀤𑁆𑀤𑀓𑀲𑀺𑀧𑁆𑀧𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀻𑀢𑀲𑁆𑀲 𑀧𑀼𑀭𑀓𑁆𑀔𑀢𑁄𑀢𑀺 𑀲𑀻𑀢𑀲𑁆𑀲 𑀧𑀼𑀭𑀢𑁄 𑀓𑀢𑁄. 𑀬𑁄 𑀳𑀺 𑀲𑀻𑀢𑀓𑀸𑀮𑁂 𑀚𑀻𑀯𑀺𑀓𑀸𑀳𑁂𑀢𑀼 𑀲𑀻𑀢𑀮𑀧𑀤𑁂𑀲𑀁 𑀧𑀓𑁆𑀔𑀦𑁆𑀤𑀢𑀺, 𑀲𑁄 𑀯𑀸𑀴𑀫𑀺𑀕𑀸𑀤𑀻𑀳𑀺 𑀯𑀺𑀬 𑀲𑀻𑀢𑁂𑀦 𑀧𑀭𑀺𑀧𑀸𑀢𑀺𑀬𑀫𑀸𑀦𑁄 𑀢𑁂𑀦 𑀧𑀼𑀭𑀢𑁄 𑀓𑀢𑁄 𑀯𑀺𑀬 𑀳𑁄𑀢𑀺. 𑀢𑁂𑀦𑀸𑀳 ‘‘𑀲𑀻𑀢𑁂𑀦 𑀩𑀸𑀥𑀺𑀬𑀫𑀸𑀦𑁄’’𑀢𑀺. 𑀉𑀡𑁆𑀳𑀲𑁆𑀲 𑀧𑀼𑀭𑀓𑁆𑀔𑀢𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀭𑀺𑀢𑁆𑀯𑀸𑀢𑀺 𑀲𑀁𑀲𑀧𑁆𑀧𑀺𑀢𑁆𑀯𑀸. 𑀖𑀝𑁆𑀝𑀺𑀬𑀫𑀸𑀦𑁄𑀢𑀺 𑀳𑀺𑀁𑀲𑀺𑀬𑀫𑀸𑀦𑁄 𑀩𑀸𑀥𑀺𑀬𑀫𑀸𑀦𑁄. 𑀆𑀩𑀸𑀥𑀦𑀁 𑀆𑀩𑀸𑀥𑁄, 𑀧𑀻𑀴𑀸𑀢𑀺 𑀅𑀢𑁆𑀣𑁄. 𑀓𑀸𑀫𑀳𑁂𑀢𑀼𑀦𑁆𑀢𑀺 𑀯𑀸 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄 𑀬𑀣𑀸 ‘‘𑀯𑀺𑀲𑀫𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀯𑀢𑁆𑀢𑀦𑁆𑀢𑀻’’𑀢𑀺 (𑀅. 𑀦𑀺. 𑁪.𑁭𑁦). 𑀢𑀣𑀸 𑀲𑁂𑀲𑀧𑀤𑀤𑁆𑀯𑀬𑁂𑀧𑀺. 𑀢𑁂𑀦𑁂𑀯𑀸𑀳 ‘‘𑀓𑀸𑀫𑀸𑀦𑀫𑁂𑀯 𑀳𑁂𑀢𑀽’’𑀢𑀺. 𑀓𑀸𑀫𑀸𑀦𑀁 𑀳𑁂𑀢𑀽𑀢𑀺 𑀏𑀢𑁆𑀣 𑀧𑀼𑀭𑀺𑀫𑀧𑀤𑀸𑀯𑀥𑀸𑀭𑀡𑀫𑀬𑀼𑀢𑁆𑀢𑀁 𑀢𑀤𑀜𑁆𑀜𑀧𑀘𑁆𑀘𑀬𑀧𑀝𑀺𑀓𑁆𑀔𑁂𑀧𑀸𑀧𑀢𑁆𑀢𑀺𑀢𑁄, 𑀢𑀣𑀸 𑀉𑀢𑁆𑀢𑀭𑀧𑀤𑀸𑀯𑀥𑀸𑀭𑀡𑀁 𑀓𑀸𑀫𑀸𑀦𑀁 𑀓𑀤𑀸𑀘𑀺 𑀅𑀳𑁂𑀢𑀼𑀪𑀸𑀯𑀲𑁆𑀲𑀧𑀺 𑀲𑀫𑁆𑀪𑀯𑀢𑁄, 𑀢𑀲𑁆𑀫𑀸 ‘‘𑀉𑀧𑁆𑀧𑀚𑁆𑀚𑀢𑀺𑀬𑁂𑀯𑀸’’𑀢𑀺 𑀯𑀼𑀢𑁆𑀢𑀁.

𑀉𑀝𑁆𑀞𑀳𑀢𑁄𑀢𑀺 𑀇𑀫𑀺𑀦𑀸 𑀉𑀝𑁆𑀞𑀸𑀦𑀯𑀻𑀭𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀆𑀚𑀻𑀯𑀲𑀫𑀼𑀝𑁆𑀞𑀸𑀧𑀓𑀯𑀻𑀭𑀺𑀬𑁂𑀦𑀸’’𑀢𑀺. 𑀢𑀁 𑀯𑀻𑀭𑀺𑀬𑀦𑁆𑀢𑀺 𑀆𑀚𑀻𑀯𑀺𑀓𑀲𑀫𑀼𑀝𑁆𑀞𑀸𑀧𑀓𑀯𑀻𑀭𑀺𑀬𑀁. 𑀧𑀼𑀩𑁆𑀩𑁂𑀦𑀸𑀧𑀭𑀁 𑀖𑀝𑁂𑀦𑁆𑀢𑀲𑁆𑀲𑀸𑀢𑀺 𑀆𑀭𑀫𑁆𑀪𑀢𑁄 𑀧𑀝𑁆𑀞𑀸𑀬 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑁂𑀦𑁆𑀢𑀲𑁆𑀲. 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑀩𑀮𑀯𑀲𑁄𑀓𑁂𑀦 𑀲𑁄𑀘𑀢𑀻𑀢𑀺 𑀘𑀺𑀢𑁆𑀢𑀲𑀦𑁆𑀢𑀸𑀧𑁂𑀦 𑀅𑀦𑁆𑀢𑁄 𑀦𑀺𑀚𑁆𑀛𑀸𑀬𑀢𑀺. 𑀓𑀸𑀬𑁂 𑀉𑀧𑁆𑀧𑀦𑁆𑀦𑀤𑀼𑀓𑁆𑀔𑁂𑀦𑀸𑀢𑀺 𑀢𑀲𑁆𑀲𑁂𑀯 𑀲𑁄𑀓𑀲𑁆𑀲 𑀯𑀲𑁂𑀦 𑀓𑀸𑀬𑁂 𑀉𑀧𑁆𑀧𑀦𑁆𑀦𑀤𑀼𑀓𑁆𑀔𑁂𑀦. 𑀲𑁄𑀓𑀼𑀤𑁆𑀤𑁂𑀲𑁂𑀦 𑀢𑀁 𑀢𑀁 𑀯𑀺𑀧𑁆𑀧𑀮𑀧𑁂𑀦𑁆𑀢𑁄 𑀯𑀸 𑀧𑀭𑀺𑀤𑁂𑀯𑀢𑀺. 𑀉𑀭𑀁 𑀢𑀸𑀴𑁂𑀢𑁆𑀯𑀸𑀢𑀺 𑀯𑀓𑁆𑀔𑀧𑁆𑀧𑀤𑁂𑀲𑀁 𑀧𑀳𑀭𑀺𑀢𑁆𑀯𑀸. ‘‘𑀫𑁄𑀖’’𑀦𑁆𑀢𑀺𑀆𑀤𑀺 𑀧𑀭𑀺𑀤𑁂𑀯𑀦𑀸𑀓𑀸𑀭𑀤𑀲𑁆𑀲𑀦𑀜𑁆𑀘𑁂𑀯 𑀲𑀫𑁆𑀫𑁄𑀳𑀸𑀧𑀚𑁆𑀚𑀦𑀸𑀓𑀸𑀭𑀤𑀲𑁆𑀲𑀦𑀜𑁆𑀘. 𑀫𑁂𑀢𑀺 𑀯𑀢𑁆𑀯𑀸 𑀧𑀼𑀦 𑀦𑁄𑀢𑀺 𑀧𑀼𑀣𑀼𑀯𑀘𑀦𑀁 𑀅𑀢𑁆𑀢𑀦𑁄 𑀉𑀪𑀬𑀣𑀸𑀧𑀺 𑀯𑁄𑀳𑀭𑀺𑀢𑀩𑁆𑀩𑀢𑁄, 𑀩𑁆𑀬𑀸𑀫𑀽𑀴𑁆𑀳𑀯𑀘𑀦𑀁 𑀯𑀸 𑀲𑁄𑀓𑀯𑀲𑁂𑀦.

𑁧𑁬𑁮. 𑀇𑀥 𑀓𑀸𑀫𑀕𑁆𑀕𑀳𑀡𑁂𑀦 𑀯𑀺𑀲𑁂𑀲𑀢𑁄 𑀯𑀢𑁆𑀣𑀼𑀓𑀸𑀫𑀸 𑀕𑀳𑀺𑀢𑀸𑀢𑀺 𑀓𑀸𑀫𑀸𑀤𑀺𑀕𑁆𑀕𑀳𑀡𑀁 𑀓𑀢𑀁, 𑀦𑀸𑀦𑀦𑁆𑀢𑀭𑀺𑀬𑀢𑀸𑀬 𑀧𑀦 𑀓𑀺𑀮𑁂𑀲𑀓𑀸𑀫𑁄𑀧𑀺 𑀕𑀳𑀺𑀢𑁄 𑀏𑀯. 𑀅𑀲𑀺𑀘𑀫𑁆𑀫𑀦𑁆𑀢𑀺 𑀏𑀢𑁆𑀣 𑀘𑀫𑁆𑀫𑀕𑁆𑀕𑀳𑀡𑁂𑀦 𑀦 𑀓𑁂𑀯𑀮𑀁 𑀘𑀫𑁆𑀫𑀫𑀬𑀲𑁆𑀲, 𑀘𑀫𑁆𑀫𑀧𑀭𑀺𑀲𑀺𑀩𑁆𑀩𑀺𑀢𑀲𑁆𑀲𑁂𑀯 𑀯𑀸 𑀕𑀳𑀡𑀁, 𑀅𑀣 𑀔𑁄 𑀲𑀩𑁆𑀩𑀲𑁆𑀲𑀧𑀺 𑀆𑀯𑀼𑀥𑀩𑀸𑀥𑀓𑀲𑁆𑀲 𑀕𑀳𑀡𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀔𑁂𑀝𑀓𑀨𑀮𑀓𑀸𑀤𑀻𑀦𑀻’’𑀢𑀺 𑀆𑀳. 𑀆𑀤𑀺-𑀲𑀤𑁆𑀤𑁂𑀦 𑀲𑀭𑀸𑀤𑀺𑀲𑀗𑁆𑀕𑀳𑁄. 𑀥𑀦𑀼𑀓𑀮𑀸𑀧𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸𑀢𑀺 𑀥𑀦𑀼𑀜𑁆𑀘𑁂𑀯 𑀔𑀼𑀭𑀧𑁆𑀧𑀢𑀽𑀡𑀺𑀜𑁆𑀘 𑀲𑀦𑁆𑀦𑀬𑁆𑀳𑀺𑀢𑁆𑀯𑀸, 𑀥𑀦𑀼𑀤𑀡𑁆𑀟𑀲𑁆𑀲 𑀚𑀺𑀬𑀸𑀬 𑀢𑀣𑀸𑀪𑀸𑀯𑀓𑀭𑀡𑀸𑀤𑀺𑀧𑀺 (𑀅. 𑀦𑀺. 𑀝𑀻. 𑁩.𑁫.𑁭𑁬) 𑀥𑀦𑀼𑀦𑁄 𑀲𑀦𑁆𑀦𑀬𑁆𑀳𑀦𑀦𑁆𑀢𑀺. 𑀤𑁆𑀯𑀺𑀦𑁆𑀦𑀁 𑀲𑁂𑀦𑀸𑀦𑀁 𑀩𑁆𑀬𑀽𑀳𑀲𑀁𑀯𑀺𑀥𑀸𑀦𑁂𑀦 𑀯𑀸 𑀉𑀪𑀢𑁄𑀩𑁆𑀬𑀽𑀴𑁆𑀳𑀁. 𑀯𑀺𑀚𑁆𑀚𑁄𑀢𑀮𑀦𑁆𑀢𑁂𑀲𑀽𑀢𑀺 𑀦𑀺𑀲𑀺𑀢𑀧𑀻𑀢𑀨𑀮𑀢𑀸𑀬 𑀯𑀺𑀚𑁆𑀚𑁄𑀢𑀦𑀯𑀲𑁂𑀦 𑀧𑀭𑀺𑀯𑀢𑁆𑀢𑀫𑀸𑀦𑁂𑀲𑀼.

𑀧𑀸𑀓𑀸𑀭𑀲𑀫𑀻𑀧𑀸𑀢𑀺𑀲𑀗𑁆𑀔𑀸𑀭𑀢𑀸𑀬 𑀧𑀸𑀓𑀸𑀭𑀧𑀸𑀤𑀸 𑀉𑀧𑀓𑀸𑀭𑀺𑀬𑁄, 𑀬𑀸 ‘‘𑀉𑀤𑁆𑀤𑀸𑀧𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀢𑀤𑀦𑁆𑀢𑁂𑀦𑀸𑀢𑀺 𑀅𑀦𑁂𑀓𑀲𑀢𑀤𑀦𑁆𑀢𑀓𑁂𑀦, 𑀬𑀲𑁆𑀲 𑀢𑀺𑀔𑀺𑀡𑀤𑀦𑁆𑀢𑀸𑀦𑀺 𑀅𑀦𑁂𑀓𑀲𑀢𑀸𑀦𑀺 𑀫𑀽𑀮𑀸𑀦𑀺 𑀳𑁄𑀦𑁆𑀢𑀺. 𑀅𑀢𑀺𑀪𑀸𑀭𑀢𑀸𑀬 𑀤𑀲𑀯𑀻𑀲𑀫𑀢𑁆𑀢𑀸𑀧𑀺 𑀚𑀦𑀸 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀬𑀦𑁆𑀢𑀯𑀲𑁂𑀦 𑀧𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀩𑀦𑁆𑀥𑀺𑀢𑁆𑀯𑀸 𑀞𑀧𑁂𑀦𑁆𑀢𑀺. 𑀢𑁂𑀦𑀸𑀳 ‘‘𑀅𑀝𑁆𑀞𑀤𑀦𑁆𑀢𑀸𑀓𑀸𑀭𑁂𑀦𑀸’’𑀢𑀺𑀆𑀤𑀺. 𑀑𑀫𑀤𑁆𑀤𑀦𑁆𑀢𑀻𑀢𑀺 𑀑𑀝𑁆𑀞𑀧𑁂𑀦𑁆𑀢𑀺.

𑁧𑁬𑁯. 𑀲𑀦𑁆𑀥𑀺𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺 𑀘𑁄𑀭𑀺𑀓𑀸𑀬 𑀚𑀻𑀯𑀺𑀢𑀼𑀓𑀸𑀫𑀸. 𑀦𑀺𑀮𑁆𑀮𑁄𑀧𑀦𑁆𑀢𑀺 𑀦𑀺𑀲𑁆𑀲𑁂𑀲𑀯𑀺𑀮𑁄𑀧𑀁, 𑀏𑀓𑀁 𑀧𑀭𑀺𑀢𑁆𑀢𑀁 𑀕𑀸𑀫𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀢𑀢𑁆𑀣 𑀓𑀺𑀜𑁆𑀘𑀺𑀧𑀺 𑀕𑀬𑁆𑀳𑀽𑀧𑀕𑀁 𑀅𑀲𑁂𑀲𑁂𑀢𑁆𑀯𑀸 𑀓𑀭𑀫𑀭𑀕𑁆𑀕𑀳𑀡𑀁. 𑀢𑁂𑀦𑀸𑀳 ‘‘𑀫𑀳𑀸𑀯𑀺𑀮𑁄𑀧’’𑀦𑁆𑀢𑀺. 𑀧𑀦𑁆𑀣𑀤𑀼𑀳𑀦𑀓𑀫𑁆𑀫𑀁 𑀅𑀝𑀯𑀺𑀫𑀕𑁆𑀕𑁂 𑀞𑀢𑁆𑀯𑀸 𑀅𑀤𑁆𑀥𑀺𑀓𑀸𑀦𑀁 𑀯𑀺𑀮𑀼𑀫𑁆𑀧𑀦𑀁. 𑀧𑀳𑀸𑀭𑀲𑀸𑀥𑀦𑀢𑁆𑀣𑀁 (𑀅. 𑀦𑀺. 𑀝𑀻. 𑁨.𑁨.𑁧) 𑀤𑀡𑁆𑀟𑀧𑁆𑀧𑀳𑀸𑀭𑀲𑁆𑀲 𑀲𑀼𑀔𑀲𑀺𑀤𑁆𑀥𑀺𑀅𑀢𑁆𑀣𑀁. 𑀓𑀜𑁆𑀚𑀺𑀢𑁄 𑀦𑀺𑀩𑁆𑀩𑀢𑁆𑀢𑀁 𑀓𑀜𑁆𑀚𑀺𑀬𑀁, 𑀆𑀭𑀦𑀸𑀮𑀁. 𑀬𑀁 ‘‘𑀩𑀺𑀮𑀗𑁆𑀕’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀢𑀁 𑀬𑀢𑁆𑀣 𑀲𑀺𑀜𑁆𑀘𑀢𑀺, 𑀲𑀸 𑀓𑀜𑁆𑀚𑀺𑀬𑀉𑀓𑁆𑀔𑀮𑀺𑀓𑀸. 𑀩𑀺𑀮𑀗𑁆𑀕𑀣𑀸𑀮𑀺𑀓𑀲𑀤𑀺𑀲𑀓𑀭𑀡𑀁 𑀩𑀺𑀮𑀗𑁆𑀕𑀣𑀸𑀮𑀺𑀬𑀁. 𑀲𑀻𑀲𑀓𑀧𑀸𑀮𑀁 𑀉𑀧𑁆𑀧𑀸𑀝𑁂𑀢𑁆𑀯𑀸𑀢𑀺 𑀅𑀬𑁄𑀕𑀼𑀴𑀧𑀯𑁂𑀲𑀦𑀧𑁆𑀧𑀫𑀸𑀡𑀁 𑀙𑀺𑀤𑁆𑀤𑀁 𑀓𑀢𑁆𑀯𑀸. 𑀲𑀗𑁆𑀔𑀫𑀼𑀡𑁆𑀟𑀓𑀫𑁆𑀫𑀓𑀸𑀭𑀡𑀦𑁆𑀢𑀺 𑀲𑀗𑁆𑀔𑀁 𑀯𑀺𑀬 𑀫𑀼𑀡𑁆𑀟𑀓𑀫𑁆𑀫𑀓𑀸𑀭𑀡𑀁.

𑀭𑀸𑀳𑀼𑀫𑀼𑀔𑀓𑀫𑁆𑀫𑀓𑀸𑀭𑀡𑀦𑁆𑀢𑀺 𑀭𑀸𑀳𑀼𑀫𑀼𑀔𑀕𑀢-𑀲𑀽𑀭𑀺𑀬𑀲𑀤𑀺𑀲-𑀓𑀫𑁆𑀫𑀓𑀸𑀭𑀡𑀁. 𑀚𑁄𑀢𑀺𑀫𑀸𑀮𑀺𑀓𑀦𑁆𑀢𑀺 𑀚𑁄𑀢𑀺𑀫𑀸𑀮𑀯𑀦𑁆𑀢𑀁 𑀓𑀫𑁆𑀫𑀓𑀸𑀭𑀡𑀁. 𑀳𑀢𑁆𑀣𑀧𑀚𑁆𑀚𑁄𑀢𑀺𑀓𑀦𑁆𑀢𑀺 𑀳𑀢𑁆𑀣𑀧𑀚𑁆𑀚𑁄𑀢𑀦𑀓𑀫𑁆𑀫𑀓𑀸𑀭𑀡𑀁. 𑀏𑀭𑀓𑀯𑀢𑁆𑀢𑀓𑀫𑁆𑀫𑀓𑀸𑀭𑀡𑀦𑁆𑀢𑀺 𑀏𑀭𑀓𑀯𑀢𑁆𑀢𑀲𑀤𑀺𑀲𑁂 𑀲𑀭𑀻𑀭𑀢𑁄 𑀩𑀤𑁆𑀥𑁂 𑀉𑀧𑁆𑀧𑀸𑀝𑀦𑀓𑀫𑁆𑀫𑀓𑀸𑀭𑀡𑀁. 𑀘𑀻𑀭𑀓𑀯𑀸𑀲𑀺𑀓𑀓𑀫𑁆𑀫𑀓𑀸𑀭𑀡𑀦𑁆𑀢𑀺 𑀲𑀭𑀻𑀭𑀢𑁄 𑀉𑀧𑁆𑀧𑀸𑀝𑀺𑀢𑀩𑀤𑁆𑀥𑀘𑀻𑀭𑀓𑀸𑀳𑀺 𑀦𑀺𑀯𑀸𑀲𑀸𑀧𑀦𑀓𑀫𑁆𑀫𑀓𑀸𑀭𑀡𑀁. 𑀢𑀁 𑀓𑀭𑁄𑀦𑁆𑀢𑀸 𑀬𑀣𑀸 𑀕𑀻𑀯𑀢𑁄 𑀧𑀝𑁆𑀞𑀸𑀬 𑀩𑀤𑁆𑀥𑁂 𑀓𑀦𑁆𑀢𑀺𑀢𑁆𑀯𑀸 𑀓𑀝𑀺𑀬𑀫𑁂𑀯 𑀞𑀧𑁂𑀦𑁆𑀢𑀺, 𑀏𑀯𑀁 𑀕𑁄𑀧𑁆𑀨𑀓𑀢𑁄 𑀧𑀝𑁆𑀞𑀸𑀬 𑀓𑀦𑁆𑀢𑀺𑀢𑁆𑀯𑀸 𑀓𑀝𑀺𑀬𑀫𑁂𑀯 𑀞𑀧𑁂𑀦𑁆𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀓𑀝𑀺𑀢𑁄 𑀧𑀝𑁆𑀞𑀸𑀬 𑀓𑀦𑁆𑀢𑀺𑀢𑁆𑀯𑀸 𑀕𑁄𑀧𑁆𑀨𑀓𑁂𑀲𑀼 𑀞𑀧𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀡𑁂𑀬𑁆𑀬𑀓𑀓𑀫𑁆𑀫𑀓𑀸𑀭𑀡𑀦𑁆𑀢𑀺 𑀏𑀡𑀻𑀫𑀺𑀕𑀲𑀤𑀺𑀲𑀓𑀫𑁆𑀫𑀓𑀸𑀭𑀡𑀁. 𑀅𑀬𑀯𑀮𑀬𑀸𑀦𑀺 𑀤𑀢𑁆𑀯𑀸𑀢𑀺 𑀅𑀬𑀯𑀮𑀬𑀸𑀦𑀺 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸. 𑀅𑀬𑀲𑀽𑀮𑀸𑀦𑀺 𑀓𑁄𑀝𑁆𑀝𑁂𑀦𑁆𑀢𑀻𑀢𑀺 𑀓𑀧𑁆𑀧𑀭𑀚𑀡𑁆𑀡𑀼𑀓𑀓𑁄𑀝𑀻𑀲𑀼 𑀅𑀬𑀲𑀽𑀮𑀸𑀦𑀺 𑀧𑀯𑁂𑀲𑁂𑀦𑁆𑀢𑀺. 𑀦𑁆𑀢𑀺 𑀢𑀁 𑀢𑀣𑀸𑀓𑀢𑀓𑀫𑁆𑀫𑀓𑀸𑀭𑀡𑀁 𑀲𑀢𑁆𑀢𑀁.

𑀩𑀴𑀺𑀲𑀫𑀁𑀲𑀺𑀓𑀦𑁆𑀢𑀺 𑀩𑀴𑀺𑀲𑁂𑀳𑀺 𑀫𑀁𑀲𑀼𑀧𑁆𑀧𑀸𑀝𑀦𑀓𑀫𑁆𑀫𑀓𑀸𑀭𑀡𑀁. 𑀓𑀳𑀸𑀧𑀡𑀺𑀓𑀦𑁆𑀢𑀺 𑀓𑀳𑀸𑀧𑀡𑀫𑀢𑁆𑀢𑀲𑁄 𑀙𑀺𑀦𑁆𑀤𑀦𑀓𑀫𑁆𑀫𑀓𑀸𑀭𑀡𑀁. 𑀓𑁄𑀝𑁆𑀝𑁂𑀦𑁆𑀢𑀻𑀢𑀺 𑀙𑀺𑀦𑁆𑀤𑀦𑁆𑀢𑀺. 𑀔𑀸𑀭𑀸𑀧𑀢𑀘𑁆𑀙𑀺𑀓𑀦𑁆𑀢𑀺 𑀢𑀘𑁆𑀙𑁂𑀢𑁆𑀯𑀸 𑀔𑀸𑀭𑀸𑀯𑀲𑀺𑀜𑁆𑀘𑀦𑀓𑀫𑁆𑀫𑀓𑀸𑀭𑀡𑀁. 𑀧𑀮𑀺𑀖𑀧𑀭𑀺𑀯𑀢𑁆𑀢𑀺𑀓𑀦𑁆𑀢𑀺 𑀧𑀮𑀺𑀖𑀲𑁆𑀲 𑀯𑀺𑀬 𑀧𑀭𑀺𑀯𑀢𑁆𑀢𑀦𑀓𑀫𑁆𑀫𑀓𑀸𑀭𑀡𑀁. 𑀏𑀓𑀸𑀩𑀤𑁆𑀥𑀁 𑀓𑀭𑁄𑀦𑁆𑀢𑀺 𑀅𑀬𑀲𑀽𑀮𑀲𑁆𑀲 𑀓𑁄𑀝𑁆𑀝𑀦𑁂𑀦. 𑀧𑀮𑀸𑀮𑀧𑀻𑀞𑀓𑀦𑁆𑀢𑀺 𑀧𑀮𑀸𑀮𑀧𑀻𑀞𑀲𑁆𑀲 𑀯𑀺𑀬 𑀲𑀭𑀻𑀭𑀲𑁆𑀲 𑀲𑀁𑀯𑁂𑀮𑁆𑀮𑀦𑀓𑀫𑁆𑀫𑀓𑀸𑀭𑀡𑀁. 𑀓𑀸𑀭𑀡𑀺𑀓𑀸𑀢𑀺 𑀖𑀸𑀢𑀦𑀓𑀸𑀭𑀓𑀸. 𑀧𑀮𑀸𑀮𑀯𑀝𑁆𑀝𑀺𑀁 𑀯𑀺𑀬 𑀓𑀢𑁆𑀯𑀸𑀢𑀺 𑀬𑀣𑀸 𑀧𑀮𑀸𑀮𑀧𑀻𑀞𑀁 𑀓𑀭𑁄𑀦𑁆𑀢𑀸 𑀧𑀮𑀸𑀮𑀯𑀝𑁆𑀝𑀺𑀁 𑀓𑀢𑁆𑀯𑀸 𑀲𑀁𑀯𑁂𑀮𑁆𑀮𑀦𑀯𑀲𑁂𑀦 𑀦𑀁 (𑀅. 𑀦𑀺. 𑀝𑀻. 𑁨.𑁨.𑁧) 𑀯𑁂𑀞𑁂𑀦𑁆𑀢𑀺, 𑀏𑀯𑀁 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀙𑀸𑀢𑀓𑁂𑀳𑀻𑀢𑀺 𑀩𑀼𑀪𑀼𑀓𑁆𑀔𑀺𑀢𑁂𑀳𑀺 𑀓𑁄𑀮𑁂𑀬𑁆𑀬𑀓𑀲𑀼𑀦𑀔𑁂𑀳𑀺. 𑀩𑀮𑀯𑀦𑁆𑀢𑁄 𑀳𑀺 𑀢𑁂 𑀚𑀯𑀬𑁄𑀕𑁆𑀕𑀸 𑀲𑀽𑀭𑀸 𑀘 𑀳𑁄𑀦𑁆𑀢𑀺. 𑀓𑀫𑁆𑀫𑀯𑀲𑁂𑀦 𑀲𑀫𑁆𑀧𑀭𑁂𑀢𑀺 𑀏𑀢𑁆𑀣𑀸𑀢𑀺 𑀲𑀫𑁆𑀧𑀭𑀸𑀬𑁄, 𑀧𑀭𑀮𑁄𑀓𑁄. 𑀢𑀢𑁆𑀣 𑀪𑀯𑁄𑀢𑀺 𑀲𑀫𑁆𑀧𑀭𑀸𑀬𑀺𑀓𑁄.

𑁧𑁭𑁦. 𑀙𑀦𑁆𑀤𑀭𑀸𑀕𑁄 𑀯𑀺𑀦𑀻𑀬𑀢𑀺 𑀘𑁂𑀯 𑀧𑀳𑀻𑀬𑀢𑀺 𑀘 𑀏𑀢𑁆𑀣𑀸𑀢𑀺 𑀦𑀺𑀩𑁆𑀩𑀸𑀦𑀁 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀜𑁆𑀘𑀸𑀢𑀺. 𑀢𑁂𑀦𑀸𑀳 ‘‘𑀦𑀺𑀩𑁆𑀩𑀸𑀦𑀜𑁆𑀳𑀻’’𑀢𑀺. 𑀢𑀢𑁆𑀣 𑀆𑀕𑀫𑁆𑀫𑀸𑀢𑀺 𑀇𑀤𑀁 𑀬𑁄 𑀙𑀦𑁆𑀤𑀭𑀸𑀕𑀁 𑀯𑀺𑀦𑁂𑀢𑀺 𑀧𑀚𑀳𑀢𑀺, 𑀢𑀲𑁆𑀲 𑀆𑀭𑀫𑁆𑀫𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀻𑀢𑀺 𑀇𑀫𑀺𑀦𑀸 𑀜𑀸𑀢𑀢𑀻𑀭𑀡𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀓𑁄 𑀧𑀦 𑀯𑀸𑀤𑁄 𑀧𑀳𑀸𑀦𑀧𑀭𑀺𑀜𑁆𑀜𑀸𑀬𑀸𑀢𑀺 𑀤𑀲𑁆𑀲𑁂𑀢𑀺? 𑀢𑀣𑀪𑀸𑀯𑀸𑀬𑀸𑀢𑀺 𑀧𑀭𑀺𑀚𑀸𑀦𑀦𑀓𑀪𑀸𑀯𑀸𑀬.

𑁧𑁭𑁧. 𑀅𑀧𑀭𑀺𑀢𑁆𑀢𑁂𑀦𑀸𑀢𑀺 𑀅𑀳𑀻𑀦𑁂𑀦. 𑀯𑀺𑀧𑀼𑀮𑁂𑀦𑀸𑀢𑀺 𑀫𑀳𑀢𑀸. 𑀬𑀤𑀺 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁, 𑀯𑀡𑁆𑀡𑀤𑀲𑀓𑀁 𑀓𑀲𑁆𑀫𑀸 𑀦 𑀕𑀳𑀺𑀢𑀦𑁆𑀢𑀺 𑀆𑀳 ‘‘𑀫𑀸𑀢𑀼𑀕𑀸𑀫𑀲𑁆𑀲 𑀳𑀻’’𑀢𑀺𑀆𑀤𑀺. 𑀪𑁄𑀚𑀦𑀲𑀫𑁆𑀧𑀤𑀸𑀤𑀻𑀦𑀁 𑀅𑀮𑀸𑀪𑁂𑀧𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀤𑀼𑀕𑁆𑀕𑀢𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀲𑁆𑀲𑀧𑀻’’𑀢𑀺 𑀯𑀼𑀢𑁆𑀢𑀁. 𑀣𑁄𑀓𑀁 𑀣𑁄𑀓𑀁 𑀯𑀡𑁆𑀡𑀸𑀬𑀢𑀦𑀁 𑀧𑀲𑀻𑀤𑀢𑀺 𑀫𑀁𑀲𑀲𑁆𑀲 𑀧𑀭𑀺𑀩𑁆𑀭𑀽𑀳𑀦𑀢𑁄 𑀣𑀦𑀫𑀁𑀲𑀸𑀦𑀺 𑀯𑀟𑁆𑀠𑀦𑁆𑀢𑀺 𑀚𑀸𑀬𑀦𑁆𑀢𑀺. 𑀯𑀡𑁆𑀡𑁂𑀢𑀺 𑀳𑀤𑀬𑀗𑁆𑀕𑀢𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀯𑀡𑁆𑀡𑁄. 𑀲𑁄 𑀏𑀯 𑀲𑀸𑀫𑀕𑁆𑀕𑁄𑀧𑀪𑁄𑀕𑀸𑀤𑀺𑀦𑀸 𑀦𑀺𑀪𑀸𑀢𑀻𑀢𑀺 𑀦𑀺𑀪𑀸. 𑀢𑁂𑀦𑀸𑀳 ‘‘𑀯𑀡𑁆𑀡𑀦𑀺𑀪𑀸𑀢𑀺 𑀯𑀡𑁆𑀡𑁄𑀬𑁂𑀯𑀸’’𑀢𑀺.

𑀪𑁄𑀕𑁆𑀕𑀦𑁆𑀢𑀺 𑀅𑀢𑀺𑀯𑀺𑀬 𑀯𑀗𑁆𑀓𑀢𑀸𑀬 𑀪𑁄𑀕𑁆𑀕𑀁. 𑀢𑀸𑀤𑀺𑀲𑀁 𑀧𑀦 𑀲𑀭𑀻𑀭𑀁 𑀪𑀕𑁆𑀕𑀁 𑀯𑀺𑀬 𑀳𑁄𑀢𑀻𑀢𑀺 𑀆𑀳 ‘‘𑀪𑀕𑁆𑀕’’𑀦𑁆𑀢𑀺. 𑀢𑁂𑀦𑀸𑀳 ‘‘𑀇𑀫𑀺𑀦𑀸𑀧𑀺𑀲𑁆𑀲 𑀯𑀗𑁆𑀓𑀪𑀸𑀯𑀫𑁂𑀯 𑀤𑀻𑀧𑁂𑀢𑀻’’𑀢𑀺. 𑀤𑀦𑁆𑀢𑀸𑀦𑀁 𑀙𑀺𑀦𑁆𑀦𑀪𑀺𑀦𑁆𑀦𑀢𑀸𑀬 𑀏𑀓𑀘𑁆𑀘𑀸𑀦𑀁 𑀧𑀢𑀦𑁂𑀦 𑀘 𑀔𑀡𑁆𑀟𑀺𑀢𑀤𑀦𑁆𑀢𑀁. 𑀓𑁂𑀲𑀸𑀦𑀁 𑀲𑁂𑀢𑀯𑀡𑁆𑀡𑀢𑀸𑀬 𑀧𑀮𑀺𑀢𑀦𑁆𑀢𑀺 𑀆𑀳 ‘‘𑀧𑀡𑁆𑀟𑀭𑀓𑁂𑀲’’𑀦𑁆𑀢𑀺. 𑀓𑁂𑀲𑀸𑀦𑀁 𑀫𑀢𑁆𑀢𑀲𑁄 𑀲𑀺𑀬𑀦𑁂 𑀔𑀮𑁆𑀮𑀸𑀝𑀯𑁄𑀳𑀸𑀭𑁄𑀢𑀺 𑀩𑀳𑀼𑀲𑁄 𑀲𑀺𑀬𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀫𑀳𑀸𑀔𑀮𑁆𑀮𑀸𑀝𑀲𑀻𑀲’’𑀦𑁆𑀢𑀺. 𑀯𑀲𑁆𑀲𑀲𑀢𑀺𑀓𑀓𑀸𑀮𑁂 𑀉𑀧𑁆𑀧𑀚𑁆𑀚𑀦𑀢𑀺𑀮𑀓𑀸𑀦𑀺 𑀲𑀦𑁆𑀥𑀸𑀬𑀸𑀳 ‘‘𑀢𑀺𑀮𑀓𑀸𑀳𑀢𑀕𑀢𑁆𑀢’’𑀦𑁆𑀢𑀺. 𑀢𑀸𑀦𑀺 𑀧𑀦 𑀓𑀸𑀦𑀺𑀘𑀺 𑀲𑁂𑀢𑀸𑀦𑀺 𑀳𑁄𑀦𑁆𑀢𑀺 𑀓𑀸𑀦𑀺𑀘𑀺 𑀓𑀸𑀴𑀸𑀦𑀻𑀢𑀺 𑀆𑀳 ‘‘𑀲𑁂𑀢𑀓𑀸𑀴𑀢𑀺𑀮𑀓𑁂𑀳𑀻’’𑀢𑀺. 𑀩𑁆𑀬𑀸𑀥𑀺𑀓𑀦𑁆𑀢𑀺 𑀲𑀜𑁆𑀘𑀸𑀢𑀩𑁆𑀬𑀸𑀥𑀺𑀁. 𑀩𑀸𑀴𑁆𑀳𑀕𑀺𑀮𑀸𑀦𑀦𑁆𑀢𑀺 𑀫𑀸𑀭𑀡𑀦𑁆𑀢𑀺 𑀓𑀕𑁂𑀮𑀜𑁆𑀜𑁂𑀦 𑀕𑀺𑀮𑀸𑀦𑀁.

𑁧𑁭𑁩. 𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 𑀢𑀲𑁆𑀫𑀺𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀡𑀲𑀫𑀬𑁂. 𑀦 𑀘𑁂𑀢𑁂𑀢𑀻𑀢𑀺 𑀦 𑀅𑀪𑀺𑀲𑀦𑁆𑀤𑀳𑀢𑀺. 𑀩𑁆𑀬𑀸𑀩𑀸𑀥𑀦𑀝𑁆𑀞𑁂𑀦 𑀩𑁆𑀬𑀸𑀩𑀸𑀥𑁄, 𑀩𑁆𑀬𑀸𑀩𑀸𑀥𑁄𑀯 𑀩𑁆𑀬𑀸𑀩𑀚𑁆𑀛𑀁, 𑀦𑀢𑁆𑀣𑀺 𑀏𑀢𑁆𑀣 𑀩𑁆𑀬𑀸𑀩𑀚𑁆𑀛𑀦𑁆𑀢𑀺 𑀅𑀩𑁆𑀬𑀸𑀩𑀚𑁆𑀛𑀁, 𑀤𑀼𑀓𑁆𑀔𑀭𑀳𑀺𑀢𑀁. 𑀢𑁂𑀦𑀸𑀳 ‘‘𑀦𑀺𑀤𑁆𑀤𑀼𑀓𑁆𑀔𑀫𑁂𑀯𑀸’’𑀢𑀺.

𑁧𑁭𑁪. 𑀅𑀦𑀺𑀘𑁆𑀘𑀸𑀤𑀺𑀆𑀓𑀸𑀭𑁄𑀢𑀺 𑀅𑀦𑀺𑀘𑁆𑀘𑀸𑀓𑀸𑀭𑁄 𑀤𑀼𑀓𑁆𑀔𑀸𑀓𑀸𑀭𑁄 𑀯𑀺𑀧𑀭𑀺𑀡𑀸𑀫𑀸𑀓𑀸𑀭𑁄 𑀘𑀮𑀸𑀤𑀺𑀆𑀓𑀸𑀭𑁄 𑀘.

𑀫𑀳𑀸𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.