𑀲𑀸𑀲𑀦𑀧𑀝𑁆𑀞𑀸𑀦𑀯𑀸𑀭𑀯𑀡𑁆𑀡𑀦𑀸

𑁮𑁯. 𑀲𑀗𑁆𑀕𑀳𑀯𑀸𑀭𑀸𑀤𑀻𑀲𑀽𑀢𑀺 𑀲𑀗𑁆𑀕𑀳𑀯𑀸𑀭𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀯𑀸𑀭𑁂𑀲𑀼. 𑀲𑀭𑀽𑀧𑀢𑁄 𑀦 𑀤𑀲𑁆𑀲𑀺𑀢𑀁, 𑀅𑀢𑁆𑀣𑀢𑁄 𑀧𑀦 𑀤𑀲𑁆𑀲𑀺𑀢𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀫𑁂𑀯 𑀳𑀺 𑀅𑀢𑁆𑀣𑀢𑁄 𑀤𑀲𑁆𑀲𑀦𑀢𑁆𑀣𑀁 𑀉𑀤𑀸𑀳𑀭𑀡𑀪𑀸𑀯𑁂𑀦 𑀦𑀺𑀓𑁆𑀔𑀺𑀧𑀢𑀺, 𑀬𑀣𑀸 𑀫𑀽𑀮𑀧𑀤𑁂𑀳𑀺 𑀧𑀝𑁆𑀞𑀸𑀦𑀁 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀦𑁆𑀢𑀺. ‘‘𑀅𑀜𑁆𑀜𑀫𑀜𑁆𑀜𑀲𑀗𑁆𑀕𑀳𑁄’’𑀢𑀺 𑀇𑀤𑀁 𑀫𑀽𑀮𑀧𑀤𑀧𑀝𑁆𑀞𑀸𑀦𑀸𑀦𑀁 𑀅𑀜𑁆𑀜𑀫𑀜𑁆𑀜𑀢𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀢𑀸𑀬 𑀓𑀸𑀭𑀡𑀯𑀘𑀦𑀁 ‘‘𑀲𑀢𑀺 𑀅𑀦𑀼𑀧𑁆𑀧𑀯𑁂𑀲𑁂 𑀢𑀢𑁄 𑀯𑀺𑀦𑀺𑀕𑁆𑀕𑀸𑀫𑁄 𑀲𑀺𑀬𑀸’’𑀢𑀺. 𑀧𑀝𑁆𑀞𑀸𑀦𑀦𑁆𑀢𑀺 𑀏𑀢𑁆𑀣 𑀧-𑀇𑀢𑀺 𑀉𑀧𑀲𑀕𑁆𑀕𑀧𑀤𑀁, 𑀢𑀁 𑀧𑀦 ‘‘𑀯𑀺𑀪𑀢𑁆𑀢𑁂𑀲𑀼 𑀥𑀫𑁆𑀫𑁂𑀲𑀼 𑀬𑀁 𑀲𑁂𑀝𑁆𑀞𑀁, 𑀢𑀤𑀼𑀧𑀸𑀕𑀫𑀼’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀧𑀓𑀸𑀭𑀢𑁆𑀣𑀚𑁄𑀢𑀓𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀓𑀸𑀭𑁂𑀳𑀺 𑀞𑀸𑀦’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀧𑀓𑀸𑀭𑀢𑁆𑀣𑀚𑁄𑀢𑀓𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀓𑀸𑀭𑁂𑀳𑀺 𑀞𑀸𑀦’’𑀦𑁆𑀢𑀺 𑀆𑀳. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑁂. 𑀢𑀲𑁆𑀲𑀸𑀢𑀺 𑀤𑁂𑀲𑀦𑀸𑀲𑀗𑁆𑀔𑀸𑀢𑀲𑁆𑀲 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀲𑁆𑀲. 𑀢𑀣𑀸𑀪𑀸𑀯𑀤𑀻𑀧𑀦𑀦𑁆𑀢𑀺 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑁂𑀦 𑀧𑀯𑀢𑁆𑀢𑀺𑀢𑀢𑁆𑀢𑀸 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀢𑀸𑀤𑀺𑀧𑁆𑀧𑀓𑀸𑀭𑁂𑀳𑀺 𑀞𑀺𑀢𑀪𑀸𑀯𑁂𑀦 𑀤𑀻𑀧𑁂𑀢𑀩𑁆𑀩𑀢𑁆𑀢𑀸 ‘‘𑀤𑀻𑀧𑀺𑀲𑁆𑀲𑀢𑀻𑀢𑀺 𑀤𑀻𑀧𑀦’’𑀦𑁆𑀢𑀺 𑀓𑀢𑁆𑀯𑀸. 𑀧𑀢𑀺𑀝𑁆𑀞𑀳𑀦𑁆𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀬𑁄 𑀲𑀫𑀼𑀤𑀸𑀬𑀭𑀽𑀧𑁂𑀦 𑀕𑀳𑀺𑀢𑀸. 𑀏𑀢𑁂𑀳𑀺 𑀲𑀁𑀓𑀺𑀮𑁂𑀲𑀥𑀫𑁆𑀫𑀸𑀤𑀻𑀳𑀺, 𑀲𑀁𑀓𑀺𑀮𑁂𑀲𑀥𑀫𑁆𑀫𑀸𑀤𑀻𑀦𑀁 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀻𑀦𑀁 𑀧𑀯𑀢𑁆𑀢𑀦𑀼𑀧𑀸𑀬𑀢𑀸 𑀅𑀦𑀼𑀧𑀼𑀩𑁆𑀩𑀺𑀓𑀣𑀸𑀬 𑀲𑀸𑀫𑀼𑀓𑁆𑀓𑀁𑀲𑀺𑀓𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀤𑀻𑀧𑁂𑀢𑀩𑁆𑀩𑀸. 𑀢𑁂𑀲𑀦𑁆𑀢𑀺 𑀲𑀁𑀓𑀺𑀮𑁂𑀲𑀥𑀫𑁆𑀫𑀸𑀤𑀻𑀦𑀁. 𑀧𑀼𑀦 𑀢𑁂𑀲𑀦𑁆𑀢𑀺 𑀲𑀼𑀢𑁆𑀢𑀸𑀦𑀺 𑀲𑀦𑁆𑀥𑀸𑀬𑀸𑀳.

𑀕𑁄𑀝𑁆𑀞𑀸𑀢𑀺 𑀯𑀚𑀸. 𑀧𑀝𑁆𑀞𑀺𑀢𑀕𑀸𑀯𑁄𑀢𑀺 𑀕𑀢𑀕𑀸𑀯𑁄. 𑀆𑀕𑀢𑀝𑁆𑀞𑀸𑀦𑀲𑁆𑀫𑀺𑀦𑁆𑀢𑀺 𑀲𑀻𑀳𑀦𑀸𑀤𑀲𑀼𑀢𑁆𑀢𑀁 (𑀫. 𑀦𑀺. 𑁧.𑁧𑁫𑁬) 𑀯𑀤𑀢𑀺. 𑀧𑀯𑀢𑁆𑀢𑀕𑀫𑀦𑀢𑁆𑀢𑀸 𑀏𑀢𑁆𑀣𑀸𑀢𑀺 𑀯𑀘𑀦𑀲𑁂𑀲𑁄. 𑀅𑀣 𑀯𑀸 𑀕𑀘𑁆𑀙𑀢𑀺 𑀏𑀢𑁆𑀣𑀸𑀢𑀺 𑀕𑀫𑀦𑀁, 𑀤𑁂𑀲𑀦𑀸𑀜𑀸𑀡𑀲𑁆𑀲 𑀦𑀺𑀲𑁆𑀲𑀗𑁆𑀕𑀯𑀲𑁂𑀦 𑀧𑀯𑀢𑁆𑀢𑀕𑀫𑀦𑀤𑁂𑀲𑀪𑀸𑀯𑀢𑁄 𑀧𑀝𑁆𑀞𑀸𑀦𑀁 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀯𑁄𑀫𑀺𑀲𑁆𑀲𑀸𑀢𑀺 ‘‘𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘𑀸’’𑀢𑀺𑀆𑀤𑀺𑀦𑀸 𑀤𑀼𑀓𑀢𑀺𑀓𑀘𑀢𑀼𑀓𑁆𑀓𑀪𑀸𑀯𑁂𑀦 𑀫𑀺𑀲𑁆𑀲𑀺𑀢𑀸.

𑀲𑀁𑀓𑀺𑀮𑁂𑀲𑀪𑀸𑀯𑁂 𑀜𑀸𑀧𑁂𑀢𑀩𑁆𑀩𑁂 𑀧𑀯𑀢𑁆𑀢𑀁, 𑀢𑀁 𑀯𑀺𑀲𑀬𑀁 𑀓𑀢𑁆𑀯𑀸 𑀤𑁂𑀲𑀺𑀢𑀦𑁆𑀢𑀺 𑀅𑀢𑁆𑀣𑁄, 𑀅𑀢𑁆𑀣𑀫𑀢𑁆𑀢𑀯𑀘𑀦𑀜𑁆𑀘𑁂𑀢𑀁, 𑀲𑀁𑀓𑀺𑀮𑁂𑀲𑀪𑀸𑀕𑁂 𑀪𑀯𑀦𑁆𑀢𑀺 𑀲𑀤𑁆𑀤𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀲𑀁𑀓𑀺𑀮𑁂𑀲𑀪𑀸𑀕𑀺𑀓’’𑀦𑁆𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀲𑀁𑀓𑀺𑀮𑁂𑀲𑀪𑀸𑀕𑁄 𑀏𑀢𑀲𑁆𑀲 𑀅𑀢𑁆𑀣𑀺, 𑀲𑀁𑀓𑀺𑀮𑁂𑀲𑀪𑀸𑀕𑁂 𑀯𑀸 𑀦𑀺𑀬𑀼𑀢𑁆𑀢𑀁, 𑀲𑀁𑀓𑀺𑀮𑁂𑀲𑀪𑀸𑀕𑀲𑁆𑀲 𑀯𑀸 𑀧𑀩𑁄𑀥𑀦𑀲𑀻𑀮𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀓𑀁, 𑀢𑀤𑁂𑀯 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀦𑁆𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀤𑀸𑀮𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑀁, 𑀧𑀤𑀸𑀮𑀦𑀲𑀦𑁆𑀦𑀺𑀲𑁆𑀲𑀬𑀢𑀸 𑀘𑁂𑀢𑁆𑀣 𑀧𑀤𑀸𑀮𑀦𑀕𑁆𑀕𑀳𑀡𑁂𑀦 𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀲𑁂𑀓𑁆𑀔𑁂𑀢𑀺 𑀅𑀲𑁂𑀓𑁆𑀔𑀥𑀫𑁆𑀫𑁂. 𑀢𑁂𑀲𑀁 𑀯𑁄𑀫𑀺𑀲𑁆𑀲𑀓𑀦𑀬𑀯𑀲𑁂𑀦𑀸𑀢𑀺 𑀢𑁂𑀲𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀧𑀝𑀺𑀓𑁆𑀔𑁂𑀧𑀸𑀧𑀝𑀺𑀓𑁆𑀔𑁂𑀧𑀯𑁄𑀫𑀺𑀲𑁆𑀲𑀓𑀦𑀬𑀯𑀲𑁂𑀦.

‘‘𑀢𑀸𑀦𑀺 𑀧𑀦 𑀙 𑀤𑀼𑀓𑀸’’𑀢𑀺𑀆𑀤𑀺𑀦𑀸 𑀧𑀤𑀸𑀦𑀁 𑀕𑀳𑀡𑀧𑀭𑀺𑀘𑁆𑀙𑁂𑀤𑀢𑁄 𑀯𑀯𑀢𑁆𑀣𑀸𑀧𑀦𑀢𑀁 𑀯𑀢𑁆𑀯𑀸 𑀧𑀭𑀢𑁄 ‘‘𑀲𑀸𑀥𑀸𑀭𑀡𑀸𑀦𑀺 𑀓𑀢𑀸𑀦𑀻’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀬 𑀲𑀬𑀫𑁂𑀯 𑀲𑀭𑀽𑀧𑀢𑁄 𑀤𑀲𑁆𑀲𑁂𑀲𑁆𑀲𑀢𑀺. ‘‘𑀅𑀦𑀼𑀤𑁆𑀥𑀭𑀡𑁂 𑀓𑀸𑀭𑀡𑀁 𑀦𑀢𑁆𑀣𑀻’𑀢𑀺 𑀯𑀢𑁆𑀯𑀸 𑀉𑀤𑁆𑀥𑀭𑀡𑁂 𑀧𑀦 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀣𑀸 𑀳𑀺 𑀯𑀓𑁆𑀔𑀢𑀻’’𑀢𑀺𑀆𑀤𑀺𑀦𑀸 𑀧𑀸𑀴𑀺𑀫𑀸𑀳𑀭𑀺. 𑀯𑁄𑀤𑀸𑀦𑀁 𑀦𑀸𑀫 𑀲𑀁𑀓𑀺𑀮𑁂𑀲𑀢𑁄 𑀳𑁄𑀢𑀺 𑀲𑀁𑀓𑀺𑀮𑀺𑀝𑁆𑀞𑀲𑁆𑀲𑁂𑀯 𑀯𑁄𑀤𑀸𑀦𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸. 𑀬𑀲𑁆𑀫𑀸 𑀯𑁄𑀤𑀸𑀦𑀁 𑀢𑀤𑀗𑁆𑀕𑀸𑀤𑀺𑀯𑀲𑁂𑀦 𑀲𑀁𑀓𑀺𑀮𑁂𑀲𑀢𑁄 𑀯𑀺𑀲𑀼𑀚𑁆𑀛𑀦𑀁, 𑀢𑀲𑁆𑀫𑀸 ‘‘𑀢𑀁 𑀧𑀦 𑀅𑀢𑁆𑀣𑀢𑁄 𑀯𑀸𑀲𑀦𑀸𑀪𑀸𑀕𑀺𑀬𑀸𑀤𑀺 𑀏𑀯 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑁂𑀳𑀺 𑀯𑁄𑀤𑀸𑀦𑀁 𑀯𑀸𑀲𑀦𑀸𑀪𑀸𑀕𑀺𑀬𑀸𑀤𑀺𑀯𑀲𑁂𑀦 𑀳𑁄𑀢𑀺, 𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀻𑀳𑀺 𑀯𑁄𑀤𑀸𑀦𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀯𑀲𑁂𑀦, 𑀅𑀲𑁂𑀓𑁆𑀔𑀪𑀸𑀕𑀺𑀬𑀯𑀲𑁂𑀦 𑀯𑁄𑀤𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀏𑀯 𑀯𑁂𑀤𑀺𑀢𑀩𑁆𑀩𑀁. 𑀬𑀸𑀬𑀁 𑀤𑁂𑀲𑀦𑀸 𑀭𑀸𑀕𑀸𑀤𑀺𑀪𑀸𑀕𑀺𑀦𑀻 𑀲𑀺𑀬𑀸, 𑀲𑀸 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸. 𑀬𑀸𑀬𑀁 𑀤𑁂𑀲𑀦𑀸 𑀘𑀸𑀕𑀸𑀤𑀺𑀪𑀸𑀕𑀺𑀦𑀻 𑀲𑀺𑀬𑀸, 𑀲𑀸 𑀯𑀸𑀲𑀦𑀸𑀪𑀸𑀕𑀺𑀬𑀸. 𑀬𑀸 𑀧𑀦 𑀆𑀧𑀢𑁆𑀢𑀺𑀯𑀺𑀘𑁆𑀙𑁂𑀤𑀦𑀻 𑀲𑀸𑀯𑀲𑁂𑀲𑀁, 𑀅𑀦𑀯𑀲𑁂𑀲𑀜𑁆𑀘, 𑀲𑀸 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸, 𑀅𑀲𑁂𑀓𑁆𑀔𑀪𑀸𑀕𑀺𑀬𑀸 𑀘.

‘‘𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀧𑀞𑀫𑀫𑁂𑀯 𑀲𑀁𑀓𑀺𑀮𑁂𑀲𑀪𑀸𑀕𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀲𑀁𑀓𑀺𑀮𑁂𑀲𑁄 𑀢𑀺𑀯𑀺𑀥𑁄…𑀧𑁂… 𑀯𑀺𑀲𑀬𑀤𑀲𑁆𑀲𑀦𑀢𑁆𑀣𑀁 𑀆𑀭𑀤𑁆𑀥’’𑀦𑁆𑀢𑀺. 𑀪𑀯𑀭𑀸𑀕𑁄 𑀪𑀯𑀧𑀢𑁆𑀣𑀦𑀸. 𑀉𑀧𑁆𑀧𑀚𑁆𑀚𑀢𑀻𑀢𑀺 𑀦 𑀯𑀺𑀕𑀘𑁆𑀙𑀢𑀺. 𑀢𑀢𑁆𑀭 𑀢𑀢𑁆𑀭 𑀪𑀯𑁂𑀢𑀺 𑀬𑀤𑀺 𑀯𑀸 𑀓𑀸𑀫𑀪𑀯𑁂, 𑀬𑀤𑀺 𑀯𑀸 𑀭𑀽𑀧𑀪𑀯𑁂, 𑀬𑀤𑀺 𑀯𑀸 𑀅𑀭𑀽𑀧𑀪𑀯𑁂. 𑀧𑀤𑀦𑁆𑀢𑀭𑀲𑀁𑀬𑁄𑀚𑀦𑀯𑀲𑁂𑀦𑀸𑀢𑀺 𑀤𑀼𑀓𑀦𑀬𑁂𑀦𑁂𑀯 𑀧𑀤𑀦𑁆𑀢𑀭𑁂𑀦 𑀬𑁄𑀚𑀦𑀯𑀲𑁂𑀦. 𑀫𑀺𑀲𑁆𑀲𑀺𑀢𑀸𑀦𑀺 𑀓𑀢𑀸𑀦𑀻𑀢𑀺 𑀲𑀁𑀲𑀝𑁆𑀞𑀸𑀦𑀺 𑀓𑀢𑀸𑀦𑀺.

𑀏𑀓𑀓𑀘𑀢𑀼𑀓𑁆𑀓𑀯𑀲𑁂𑀦 𑀤𑀲𑁆𑀲𑀺𑀢𑀩𑁆𑀩𑀸𑀦𑀺 𑀧𑀤𑀸𑀦𑀺 𑀏𑀯 𑀕𑀳𑁂𑀢𑁆𑀯𑀸 𑀆𑀯𑀼𑀢𑁆𑀢𑀺𑀦𑀬𑀤𑀲𑁆𑀲𑀦𑀯𑀲𑁂𑀦 𑀫𑀺𑀲𑁆𑀲𑁂𑀢𑁆𑀯𑀸 𑀅𑀯𑀲𑀺𑀝𑁆𑀞𑀤𑀼𑀓𑀯𑀲𑁂𑀦, 𑀢𑀺𑀓𑀘𑀢𑀼𑀓𑁆𑀓𑀯𑀲𑁂𑀦 𑀘 𑀇𑀢𑀭𑁂 𑀅𑀝𑁆𑀞 𑀧𑀝𑁆𑀞𑀸𑀦𑀪𑀸𑀕𑀸 𑀤𑀲𑁆𑀲𑀺𑀢𑀸𑀢𑀺 𑀆𑀳 ‘‘𑀢𑀸𑀦𑀺𑀬𑁂𑀯 𑀬𑀣𑀸𑀯𑀼𑀢𑁆𑀢𑀸𑀦𑀺 𑀅𑀝𑁆𑀞 𑀲𑀼𑀢𑁆𑀢𑀸𑀦𑀻’’𑀢𑀺𑀆𑀤𑀺. 𑀘𑀢𑁆𑀢𑀸𑀭𑁄 𑀏𑀓𑀓𑀸𑀬𑁂𑀯 𑀧𑀸𑀴𑀺𑀬𑀁 𑀆𑀤𑀺𑀢𑁄 𑀤𑀲𑁆𑀲𑀺𑀢𑀸. 𑀙𑀤𑀼𑀓𑀸 𑀧𑀸𑀴𑀺𑀬𑀁 𑀆𑀕𑀢𑀸 𑀘𑀢𑁆𑀢𑀸𑀭𑁄, 𑀅𑀝𑁆𑀞𑀓𑀣𑀸𑀬𑀁 𑀤𑁆𑀯𑁂𑀢𑀺. 𑀘𑀢𑁆𑀢𑀸𑀭𑁄 𑀢𑀺𑀓𑀸 𑀧𑀸𑀴𑀺𑀬𑀁 𑀆𑀕𑀢𑀸 𑀤𑁆𑀯𑁂, 𑀅𑀝𑁆𑀞𑀓𑀣𑀸𑀬𑀁 𑀤𑁆𑀯𑁂𑀢𑀺. 𑀤𑁆𑀯𑁂 𑀘𑀢𑀼𑀓𑁆𑀓𑀸 𑀧𑀦 𑀅𑀝𑁆𑀞𑀓𑀣𑀸𑀬𑀫𑁂𑀯 𑀆𑀕𑀢𑀸. ‘‘𑀧𑀸𑀴𑀺𑀬𑀁 𑀅𑀦𑀸𑀕𑀢𑀸’’𑀢𑀺 𑀇𑀤𑀁 𑀲𑀭𑀽𑀧𑀢𑁄 𑀅𑀦𑀸𑀕𑀫𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦𑀬𑀢𑁄 𑀧𑀦 𑀆𑀕𑀢𑀪𑀸𑀯𑁄 𑀤𑀲𑁆𑀲𑀺𑀢𑁄 𑀏𑀯. 𑀬𑁂 𑀧𑀦𑁂𑀢𑁆𑀣 𑀧𑀸𑀴𑀺𑀬𑀁 𑀅𑀦𑀸𑀕𑀢𑀸, 𑀢𑁂𑀲𑀁 𑀉𑀤𑀸𑀳𑀭𑀡𑀸𑀦𑀺 𑀧𑀭𑀢𑁄 𑀤𑀲𑁆𑀲𑀬𑀺𑀲𑁆𑀲𑀸𑀫.

𑀲𑁄𑀴𑀲𑀳𑀻𑀢𑀺 𑀲𑁄𑀴𑀲𑀯𑀺𑀥𑁂𑀳𑀺. 𑀦 𑀳𑀺 𑀢𑀸𑀦𑀺 𑀲𑀼𑀢𑁆𑀢𑀸𑀦𑀺 𑀲𑁄𑀴𑀲𑁂𑀯, 𑀅𑀣 𑀔𑁄 𑀲𑁄𑀴𑀲𑀧𑁆𑀧𑀓𑀸𑀭𑀸𑀦𑀻𑀢𑀺 𑀫𑀽𑀮𑀕𑀡𑀦𑀁 𑀞𑀧𑁂𑀢𑁆𑀯𑀸 𑀓𑀸𑀭𑀡𑀲𑀼𑀢𑁆𑀢𑀮𑀤𑁆𑀥𑁂𑀦 𑀲𑀗𑁆𑀔𑀸𑀭𑀕𑀩𑁆𑀪𑁂𑀦 𑀢𑀤𑀦𑀼𑀭𑀽𑀧𑁄 𑀬𑁄 𑀕𑀡𑀦𑀯𑀺𑀢𑁆𑀣𑀸𑀭𑁄, 𑀢𑀲𑁆𑀲 𑀧𑀢𑁆𑀣𑀭𑀡𑀯𑀺𑀥𑀺 𑀧𑀝𑁆𑀞𑀸𑀦𑀦𑀬𑁄. 𑀇𑀫𑀺𑀦𑀸…𑀧𑁂… 𑀦𑀢𑁆𑀣𑀻𑀢𑀺 𑀬𑀣𑀸𑀯𑀼𑀢𑁆𑀢𑀧𑀝𑁆𑀞𑀸𑀦𑀯𑀺𑀦𑀺𑀫𑀼𑀢𑁆𑀢𑁄 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀧𑁆𑀧𑀤𑁂𑀲𑁄 𑀦 𑀯𑀺𑀚𑁆𑀚𑀢𑀺 𑀬𑀣𑀸𑀭𑀳𑀁 𑀢𑀁𑀢𑀁𑀧𑀝𑁆𑀞𑀸𑀦𑀪𑀸𑀯𑁂𑀦 𑀧𑀯𑀢𑁆𑀢𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀬𑀤𑀺 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺 𑀦𑀯𑀯𑀺𑀥𑀁 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀁 𑀬𑀣𑀸𑀯𑀼𑀢𑁆𑀢𑀧𑀝𑁆𑀞𑀸𑀦𑀯𑀲𑁂𑀦𑁂𑀯 𑀧𑀯𑀢𑁆𑀢𑀁, 𑀢𑀢𑁆𑀣 𑀓𑀣𑀫𑀺𑀥 𑀅𑀦𑀺𑀤𑀲𑁆𑀲𑀺𑀢𑀸𑀦𑀁 𑀕𑀸𑀣𑀸𑀤𑀻𑀦𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀺𑀪𑀸𑀯𑁄 𑀕𑀳𑁂𑀢𑀩𑁆𑀩𑁄𑀢𑀺 𑀧𑀜𑁆𑀳𑀁 𑀲𑀦𑁆𑀥𑀸𑀬 ‘‘𑀕𑀸𑀣𑀸𑀬 𑀕𑀸𑀣𑀸 𑀅𑀦𑀼𑀫𑀺𑀦𑀺𑀢𑀩𑁆𑀩𑀸’’𑀢𑀺𑀆𑀤𑀺𑀧𑀸𑀴𑀺 𑀧𑀯𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀣𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀅𑀬𑀁 𑀕𑀸𑀣𑀸 𑀯𑀺𑀬𑀸𑀢𑀺 ‘‘𑀓𑀸𑀫𑀦𑁆𑀥𑀸 𑀚𑀸𑀮𑀲𑀜𑁆𑀙𑀦𑁆𑀦𑀸, 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸, 𑀉𑀤𑁆𑀥𑀁 𑀅𑀥𑁄 𑀲𑀩𑁆𑀩𑀥𑀺 𑀯𑀺𑀧𑁆𑀧𑀫𑀼𑀢𑁆𑀢𑁄, 𑀬𑀲𑁆𑀲 𑀲𑁂𑀮𑀽𑀧𑀫𑀁 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀇𑀥 𑀉𑀤𑀸𑀳𑀝𑀕𑀸𑀣𑀸 𑀯𑀺𑀬. 𑀕𑀸𑀣𑀸𑀢𑀺 𑀅𑀜𑁆𑀜𑀸𑀧𑀺 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀆𑀕𑀢𑀸 𑀇𑀥 𑀅𑀦𑀼𑀤𑀸𑀳𑀝𑀸. 𑀲𑀁𑀯𑀡𑁆𑀡𑀦𑀸𑀓𑀸𑀮𑁂 𑀲𑀫𑁆𑀫𑀼𑀔𑀻𑀪𑀸𑀯𑁂𑀦 ‘‘𑀅𑀬𑀁 𑀕𑀸𑀣𑀸 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀸 𑀬𑀸 𑀓𑀸𑀘𑀺 𑀕𑀸𑀣𑀸 ‘‘𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸’’𑀢𑀺 𑀯𑀸 ‘‘𑀲𑀁𑀓𑀺𑀮𑁂𑀲𑀯𑀸𑀲𑀦𑀸𑀦𑀺𑀩𑁆𑀩𑁂𑀥𑀅𑀲𑁂𑀓𑁆𑀔𑀪𑀸𑀕𑀺𑀬𑀸’’𑀢𑀺 𑀯𑀸 𑀅𑀦𑀼𑀫𑀺𑀦𑀺𑀢𑀩𑁆𑀩𑀸 𑀦𑀬𑀕𑁆𑀕𑀸𑀳𑁂𑀦 𑀜𑀸𑀧𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀲𑀁𑀓𑀺𑀮𑁂𑀲…𑀧𑁂… 𑀚𑀸𑀦𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄’’𑀢𑀺. 𑀯𑀸-𑀲𑀤𑁆𑀤𑁄 𑀳𑀺 𑀇𑀥 𑀅𑀯𑀼𑀢𑁆𑀢𑀯𑀺𑀓𑀧𑁆𑀧𑀦𑀢𑁆𑀣𑁄. 𑀲𑁂𑀲𑀧𑀤𑁂𑀲𑀽𑀢𑀺 𑀯𑁂𑀬𑁆𑀬𑀸𑀓𑀭𑀡𑀲𑀼𑀢𑁆𑀢𑀧𑀤𑁂𑀲𑀼.

𑁯𑁦. 𑀅𑀭𑀺𑀬𑀸𑀦𑀁 𑀥𑀫𑁆𑀫𑀦𑁆𑀢𑀺 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀪𑁂𑀤𑀁 𑀲𑀻𑀮𑀸𑀘𑀸𑀭𑀁. 𑀏𑀓𑀦𑁆𑀢𑀓𑀭𑀡𑀻𑀬𑀲𑁆𑀲 𑀅𑀓𑀭𑀡𑀫𑁆𑀧𑀺 𑀯𑀻𑀢𑀺𑀓𑁆𑀓𑀫𑁄 𑀏𑀯.

𑀅𑀯𑀺𑀚𑁆𑀚𑀸𑀤𑀺𑀓𑁂 𑀲𑀁𑀓𑀺𑀮𑁂𑀲𑀥𑀫𑁆𑀫𑁂 𑀢𑀤𑀗𑁆𑀕𑀸𑀤𑀺𑀯𑀲𑁂𑀦 𑀥𑀼𑀦𑀸𑀢𑀻𑀢𑀺 𑀥𑁄𑀦𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸. 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑀧𑀜𑁆𑀜𑀸𑀢𑀺 𑀧𑀦 𑀧𑀓𑀭𑀡𑁂𑀦 𑀅𑀯𑀘𑁆𑀙𑀺𑀦𑁆𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀘𑀭𑀦𑁆𑀢𑁄𑀢𑀺 𑀧𑀘𑁆𑀘𑀬𑀸𑀦𑀁 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀘𑁆𑀘𑀬𑀧𑀭𑀺𑀪𑁄𑀕𑁂 𑀆𑀤𑀻𑀦𑀯𑀁 𑀅𑀧𑀲𑁆𑀲𑀦𑁆𑀢𑁄 𑀇𑀡𑀧𑀭𑀺𑀪𑁄𑀕𑀯𑀲𑁂𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀦 𑀧𑀭𑀺𑀫𑀼𑀘𑁆𑀘𑀢𑀺 𑀦𑀺𑀭𑀬𑀸𑀤𑀺𑀤𑀼𑀓𑁆𑀔𑀢𑁄, 𑀯𑀝𑁆𑀝𑀤𑀼𑀓𑁆𑀔𑀢𑁄 𑀘.

𑀓𑀼𑀓𑁆𑀓𑀼𑀚𑀦𑀓𑀁 𑀦𑀸𑀫 𑀓𑀤𑀮𑀺𑀬𑀸 𑀧𑀼𑀧𑁆𑀨𑀦𑀸𑀴𑀺. 𑀧𑀭𑀸𑀪𑀯𑀸𑀬𑀸𑀢𑀺 𑀯𑀺𑀦𑀸𑀲𑀸𑀬. 𑀢𑀣𑀸𑀢𑀺 𑀬𑀣𑀸 𑀨𑀮𑀧𑀸𑀓𑀦𑁆𑀢𑀸 𑀓𑀤𑀮𑀻, 𑀏𑀯𑀁 𑀯𑁂𑀴𑀼𑀦𑀴𑀸𑀧𑀺 𑀑𑀲𑀥𑀺𑀚𑀸𑀢𑀺𑀓𑀢𑁆𑀢𑀸𑀢𑀺 𑀉𑀧𑀲𑀁𑀳𑀸𑀭𑀢𑁆𑀣𑁄 𑀢𑀣𑀸-𑀲𑀤𑁆𑀤𑁄. 𑀢𑁂𑀦𑀸𑀳 ‘‘𑀨𑀮𑀁 𑀯𑁂𑀴𑀼𑀁 𑀨𑀮𑀁 𑀦𑀴’’𑀦𑁆𑀢𑀺.

𑀲𑀼𑀔𑁂𑀢𑁆𑀢𑁂𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀓𑁄 𑀧𑀦 𑀯𑀸𑀤𑁄 𑀊𑀲𑀭𑀸𑀤𑀺𑀤𑁄𑀲𑀤𑀼𑀝𑁆𑀞𑁂𑀲𑀼 𑀔𑁂𑀢𑁆𑀢𑁂𑀲𑀽𑀢𑀺 𑀤𑀲𑁆𑀲𑁂𑀢𑀺. ‘‘𑀙𑀓𑀡…𑀧𑁂… 𑀅𑀢𑁆𑀣𑁄’’𑀢𑀺 𑀏𑀢𑁂𑀦 𑀬𑀣𑀸𑀯𑀼𑀢𑁆𑀢𑀅𑀪𑀺𑀲𑀗𑁆𑀔𑀭𑀡𑀸𑀪𑀸𑀯𑁂𑀦 𑀩𑀻𑀚𑀤𑁄𑀲𑀤𑀼𑀝𑁆𑀞𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁯𑁧. 𑀲𑀚𑁆𑀚𑀺𑀢𑀦𑁆𑀢𑀺 𑀲𑀜𑁆𑀚𑀺𑀢𑀁. 𑀅𑀧𑀭𑀺𑀓𑁆𑀔𑀢𑁂𑀢𑀺 𑀧𑀝𑀺𑀧𑀓𑁆𑀔𑁂𑀳𑀺 𑀥𑀫𑁆𑀫𑁂𑀳𑀺 𑀅𑀯𑀺𑀓𑁆𑀔𑀫𑁆𑀪𑀺𑀢𑁂 𑀅𑀭𑁄𑀕𑁂.

𑀬𑀸𑀬 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 ‘‘𑀓𑀺𑀁 𑀲𑀼𑀢𑀁 𑀫𑀬𑀸, 𑀓𑀺𑀁 𑀯𑀸 𑀲𑀼𑀡𑀸𑀫𑀻’’𑀢𑀺 𑀓𑀼𑀲𑀮𑀁 𑀕𑀯𑁂𑀲𑀻 𑀘𑀭𑀢𑀺, 𑀲𑀸 𑀥𑀫𑁆𑀫𑁄𑀚𑀧𑀜𑁆𑀜𑀸 𑀓𑀺𑀲𑁆𑀲𑀯𑀸 𑀦𑀸𑀫. 𑀤𑀼𑀩𑁆𑀪𑀸𑀲𑀺𑀢𑀸𑀢𑀺 𑀤𑀼𑀝𑁆𑀞𑀼 𑀪𑀸𑀲𑀺𑀢𑀸, 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀤𑁄𑀲𑀸𑀤𑀻𑀳𑀺 𑀤𑀼𑀝𑁆𑀞𑀸 𑀯𑀸 𑀪𑀸𑀲𑀺𑀢𑀸.

𑁯𑁨. 𑀯𑀺𑀘𑀺𑀦𑀸𑀢𑀻𑀢𑀺 𑀯𑀺𑀲𑁂𑀲𑀢𑁄 𑀘𑀺𑀦𑀸𑀢𑀺 𑀧𑀲𑀯𑀢𑀺.

𑀯𑀺𑀕𑀢𑀪𑀽𑀢𑀸𑀢𑀺 𑀯𑀺𑀕𑀢𑀲𑀘𑁆𑀘. 𑀢𑁂𑀦𑀸𑀳 ‘‘𑀅𑀮𑀻𑀓𑀯𑀸𑀤𑀻’’𑀢𑀺.

𑀅𑀯𑀚𑀸𑀢𑀧𑀼𑀢𑁆𑀢𑀸𑀢𑀺 𑀮𑀸𑀫𑀓𑀧𑀼𑀢𑁆𑀢. 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦𑀺𑀳𑀻𑀦𑀯𑀼𑀢𑁆𑀢𑀺𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀦𑁂𑀭𑀬𑀺𑀓𑁄𑀢𑀺 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀦𑀓𑁄. 𑀧𑀸𑀧𑀓𑀫𑁆𑀫𑀺𑀦𑁄 𑀧𑀧𑀢𑀦𑁆𑀢𑀺 𑀏𑀢𑁆𑀣𑀸𑀢𑀺 𑀧𑀧𑀢𑀁, 𑀦𑀭𑀓𑀁.

𑀢𑀡𑁆𑀳𑀸𑀤𑀻𑀦𑀁 𑀲𑀪𑀸𑀯𑀪𑁂𑀤𑀢𑁄𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀤𑀼𑀘𑁆𑀘𑀭𑀺𑀢𑀸𑀦𑀁 𑀢𑀡𑁆𑀳𑀸𑀬𑀦𑀯𑀺𑀧𑀭𑀻𑀢𑀤𑀲𑁆𑀲𑀦𑀤𑀼𑀝𑁆𑀞𑀘𑀭𑀺𑀢𑀢𑀸𑀲𑀗𑁆𑀔𑀸𑀢𑀲𑀪𑀸𑀯𑀯𑀺𑀪𑀸𑀕𑀢𑁄. 𑀅𑀯𑀢𑁆𑀣𑀸𑀪𑁂𑀤𑀢𑁄𑀢𑀺 𑀢𑀡𑁆𑀳𑀸𑀬 𑀙𑀦𑁆𑀤𑀧𑁂𑀫𑀮𑁄𑀪𑀭𑀸𑀕𑀦𑀦𑁆𑀤𑀻𑀧𑀺𑀧𑀸𑀲𑀸𑀫𑀼𑀘𑁆𑀙𑀸𑀤𑀬𑁄, 𑀤𑀺𑀝𑁆𑀞𑀺𑀬𑀸 𑀕𑀸𑀳𑀧𑀭𑀸𑀫𑀸𑀲𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀯𑀺𑀲𑀼𑀓𑀯𑀺𑀧𑁆𑀨𑀦𑁆𑀤𑀺𑀢𑀯𑀺𑀧𑀭𑀻𑀢𑀤𑀲𑁆𑀲𑀦𑀸𑀤𑀬𑁄, 𑀤𑀼𑀘𑁆𑀘𑀭𑀺𑀢𑀲𑁆𑀲 𑀢𑀺𑀭𑀘𑁆𑀙𑀸𑀦𑀧𑁂𑀢𑁆𑀢𑀺𑀯𑀺𑀲𑀬𑀅𑀲𑀼𑀭𑀬𑁄𑀦𑀺𑀕𑀸𑀫𑀺𑀢𑀸𑀤𑀬𑁄 𑀅𑀯𑀢𑁆𑀣𑀸𑀯𑀺𑀲𑁂𑀲𑀸. 𑀘-𑀲𑀤𑁆𑀤𑁂𑀦 𑀢𑁂𑀲𑀁 𑀓𑀸𑀫𑀢𑀡𑁆𑀳𑀸𑀤𑀺𑀭𑀽𑀧𑀢𑀡𑁆𑀳𑀸𑀤𑀺𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀸𑀤𑀺𑀲𑀲𑁆𑀲𑀢𑀕𑀸𑀳𑀸𑀤𑀺𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺- 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑁆𑀧𑀓𑀸𑀭𑀪𑁂𑀤𑁄 𑀲𑀗𑁆𑀕𑀬𑁆𑀳𑀢𑀺.

𑁯𑁩. 𑀯𑀺𑀧𑀼𑀮𑀦𑁆𑀢𑀺 𑀉𑀴𑀸𑀭𑀁, 𑀢𑁂𑀮𑀸𑀤𑀻𑀳𑀺 𑀘𑁂𑀯 𑀥𑀦𑀥𑀜𑁆𑀜𑀸𑀤𑀻𑀳𑀺 𑀘 𑀧𑀳𑀽𑀢𑀲𑀦𑁆𑀦𑀺𑀘𑀬𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁆𑀩𑀸𑀥𑀸𑀢𑀺 𑀚𑀦𑀲𑀁𑀫𑀤𑁆𑀤𑀲𑀗𑁆𑀖𑀝𑀸.

𑀤𑀡𑁆𑀟𑁂𑀦 𑀦 𑀳𑀺𑀁𑀲𑀢𑀻𑀢𑀺 𑀏𑀢𑁆𑀣 𑀯𑀼𑀢𑁆𑀢𑀁 𑀬𑀁 𑀤𑀡𑁆𑀟𑀦𑀺𑀥𑀸𑀦𑀁, 𑀢𑀁 𑀯𑀝𑁆𑀝𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑀁. 𑀢𑀤𑀼𑀪𑀬𑀲𑁆𑀲𑀸𑀧𑀺 𑀨𑀮𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄 𑀧𑀼𑀕𑁆𑀕𑀮𑁄’’𑀢𑀺𑀆𑀤𑀺𑀫𑀸𑀳.

𑁯𑁪. 𑀓𑀺𑀜𑁆𑀘𑀢𑀺 𑀢𑀁𑀲𑀫𑀗𑁆𑀕𑀺𑀦𑀁 𑀯𑀺𑀫𑀤𑁆𑀤𑀢𑀻𑀢𑀺 𑀓𑀺𑀜𑁆𑀘𑀦𑀁, 𑀭𑀸𑀕𑀸𑀤𑀺, 𑀧𑀮𑀺𑀩𑀼𑀦𑁆𑀥𑀢𑀺 𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀁 𑀦𑀺𑀯𑀸𑀭𑁂𑀢𑀻𑀢𑀺 𑀧𑀮𑀺𑀩𑁄𑀥𑁄, 𑀭𑀸𑀕𑀸𑀤𑀺𑀬𑁂𑀯, 𑀓𑀺𑀜𑁆𑀘𑀦𑀫𑁂𑀯 𑀧𑀮𑀺𑀩𑁄𑀥𑁄 𑀓𑀺𑀜𑁆𑀘𑀦𑀧𑀮𑀺𑀩𑁄𑀥𑁄. 𑀅𑀣 𑀯𑀸 𑀓𑀺𑀜𑁆𑀘𑀦𑀜𑁆𑀘 𑀧𑀮𑀺𑀩𑁄𑀥𑁄 𑀘 𑀓𑀺𑀜𑁆𑀘𑀦𑀧𑀮𑀺𑀩𑁄𑀥𑁄, 𑀆𑀫𑀺𑀲𑀓𑀺𑀜𑁆𑀘𑀺𑀓𑁆𑀔𑀜𑁆𑀘 𑀭𑀸𑀕𑀸𑀤𑀺𑀲𑀁𑀓𑀺𑀮𑁂𑀲𑁄 𑀘𑀸𑀢𑀺 𑀅𑀢𑁆𑀣𑁄.

𑀯𑀺𑀲𑁂𑀲𑀺𑀢𑀦𑁆𑀢𑀺 𑀯𑀺𑀮𑁄𑀫𑀁, 𑀯𑀺𑀲𑀫𑀁 𑀓𑀺𑀭𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀭𑀸𑀚𑀪𑀡𑁆𑀟𑀦𑁆𑀢𑀺 𑀑𑀭𑁄𑀥𑁂 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺.

𑀬𑀸𑀘𑀬𑁄𑀕𑁄𑀢𑀺 𑀬𑀸𑀘𑀦𑀬𑁄𑀕𑁄, 𑀬𑀸𑀘𑀓𑀸𑀦𑀁 𑀫𑀦𑁄𑀭𑀣𑀧𑀭𑀺𑀧𑀽𑀭𑀡𑀢𑁄. 𑀢𑁂𑀦𑀸𑀳 ‘‘𑀬𑀸𑀘𑀺𑀢𑀩𑁆𑀩𑀬𑀼𑀢𑁆𑀢𑁄’’𑀢𑀺. 𑀤𑀸𑀦𑀬𑀼𑀢𑁆𑀢𑁄𑀢𑀺 𑀲𑀢𑀢𑀁 𑀤𑀸𑀦𑀓𑀺𑀭𑀺𑀬𑀸𑀲𑀫𑀗𑁆𑀕𑀻. 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄𑀢𑀺 𑀏𑀢𑁆𑀣 𑀤𑀸𑀦𑀁 𑀦𑀸𑀫 𑀅𑀢𑁆𑀣𑀺𑀓𑀸𑀦𑀁 𑀬𑀣𑀸𑀥𑀺𑀧𑁆𑀧𑀸𑀬𑀧𑀝𑀺𑀬𑀢𑁆𑀢𑀧𑀭𑀺𑀘𑁆𑀘𑀸𑀕𑁄, 𑀲𑀁𑀯𑀺𑀪𑀸𑀕𑁄 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀅𑀧𑁆𑀧𑀫𑀢𑁆𑀢𑀓𑀢𑁄𑀧𑀺 𑀲𑀁𑀯𑀺𑀪𑀚𑀦𑀁. 𑀇𑀫𑁂𑀳𑀺 𑀔𑁄…𑀧𑁂… 𑀳𑁄𑀢𑀻𑀢𑀺 𑀏𑀢𑁆𑀣 𑀳𑁄𑀢𑀺𑀲𑀤𑁆𑀤𑁂𑀦 ‘‘𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀧𑀤𑀁 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁, 𑀦 ‘‘𑀲𑁄𑀢𑀸𑀧𑀦𑁆𑀦𑁄’’𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑁄𑀢𑀸𑀧𑀦𑁆𑀦𑁄…𑀧𑁂… 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀫𑁄 𑀳𑀺 𑀇𑀥 𑀯𑀺𑀥𑀻𑀬𑀢𑀺, 𑀦 𑀲𑁄𑀢𑀸𑀧𑀦𑁆𑀦𑀪𑀸𑀯𑁄, 𑀢𑁂𑀦 𑀲𑁄𑀢𑀸𑀧𑀦𑁆𑀦𑀮𑀓𑁆𑀔𑀡𑀫𑁂𑀢𑁂 𑀥𑀫𑁆𑀫𑀸, 𑀦 𑀲𑁄𑀢𑀸𑀧𑀦𑁆𑀦𑀪𑀸𑀯𑀮𑀓𑁆𑀔𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑀣𑀸 𑀳𑀺 ‘‘𑀲𑁄𑀢𑀸𑀧𑀦𑁆𑀦𑁂𑀦…𑀧𑁂… 𑀮𑀩𑁆𑀪𑀫𑀸𑀦𑀢𑀁 𑀤𑀲𑁆𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀁.

𑁯𑁫. 𑀮𑀧𑀢𑀺 𑀓𑀣𑁂𑀢𑀺 𑀏𑀢𑁂𑀦𑀸𑀢𑀺 𑀮𑀧𑀦𑀁, 𑀑𑀝𑁆𑀞𑀁.

𑁯𑁭. 𑀫𑀼𑀤𑀺𑀢𑁄𑀢𑀺 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸 𑀧𑀫𑀼𑀤𑀺𑀢𑁄.

𑁯𑁯. 𑀓𑀺𑀜𑁆𑀘𑀸𑀧𑀺 𑀉𑀤𑀢𑀸𑀭𑀻𑀢𑀺 𑀢𑀭𑀡𑀓𑀺𑀭𑀺𑀬𑀸 𑀅𑀢𑀻𑀢𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀢𑀭𑀡𑀫𑁂𑀯 𑀧𑀦 𑀕𑀳𑁂𑀢𑁆𑀯𑀸 𑀆𑀳 ‘‘𑀑𑀖𑀢𑀭𑀡𑀲𑁆𑀲 𑀅𑀭𑀺𑀬𑀫𑀕𑁆𑀕𑀓𑀺𑀘𑁆𑀘𑀢𑁆𑀢𑀸’’𑀢𑀺. 𑀏𑀯𑀁 𑀯𑀺𑀧𑁆𑀧𑀫𑀼𑀢𑁆𑀢𑁄, 𑀯𑀺𑀫𑀼𑀢𑁆𑀢𑁄𑀢𑀺 𑀘 𑀏𑀢𑁆𑀣 𑀫𑀼𑀘𑁆𑀘𑀦𑀓𑀺𑀭𑀺𑀬𑀸𑀬𑀧𑀺 𑀯𑀢𑁆𑀢𑀩𑁆𑀩𑀁.

𑁧𑁦𑁦. 𑀧𑀸𑀢𑀼-𑀲𑀤𑁆𑀤𑀧𑀼𑀩𑁆𑀩𑀓𑁄 𑀪𑀯𑀦𑁆𑀢𑀺-𑀲𑀤𑁆𑀤𑁄 𑀲𑀺𑀬𑀸 𑀉𑀧𑁆𑀧𑀸𑀤𑀧𑀭𑀺𑀬𑀸𑀬𑁄 𑀲𑀺𑀬𑀸 𑀆𑀯𑀺𑀪𑀸𑀯𑀧𑀭𑀺𑀬𑀸𑀬𑁄𑀢𑀺 ‘‘𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 𑀧𑀤𑀲𑁆𑀲 ‘‘𑀉𑀧𑁆𑀧𑀚𑁆𑀚𑀦𑁆𑀢𑀺, 𑀧𑀓𑀸𑀲𑁂𑀦𑁆𑀢𑀺 𑀘𑀸’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀧𑀸𑀢𑀼𑀪𑀽𑀢𑀥𑀫𑁆𑀫𑀲𑁆𑀲𑀸𑀢𑀺 𑀉𑀧𑁆𑀧𑀦𑁆𑀦𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀲𑁆𑀲, 𑀯𑀺𑀪𑀽𑀢𑀘𑀢𑀼𑀲𑀘𑁆𑀘𑀥𑀫𑁆𑀫𑀲𑁆𑀲 𑀯𑀸. 𑀦𑁄 𑀓𑀮𑁆𑀮𑁄𑀢𑀺 𑀦 𑀬𑀼𑀢𑁆𑀢𑁄. 𑀲𑀳𑁂𑀢𑀼𑀥𑀫𑁆𑀫𑀦𑁆𑀢𑀺 𑀏𑀢𑁆𑀣 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀯 𑀕𑀳𑀺𑀢𑀸, 𑀦 𑀧𑀘𑁆𑀘𑀬𑀥𑀫𑁆𑀫𑀸𑀢𑀺? 𑀦𑀬𑀺𑀤𑀫𑁂𑀯𑀁 𑀤𑀝𑁆𑀞𑀩𑁆𑀩𑀁 𑀧𑀘𑁆𑀘𑀬𑀥𑀫𑁆𑀫𑀸𑀦𑀫𑁆𑀧𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄. 𑀅𑀣 𑀯𑀸 𑀲𑀳𑁂𑀢𑀼𑀥𑀫𑁆𑀫𑀦𑁆𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁄 𑀧𑀥𑀸𑀦𑀪𑀸𑀯𑁂𑀦 𑀯𑀼𑀢𑁆𑀢𑁄, 𑀧𑀘𑁆𑀘𑀬𑀥𑀫𑁆𑀫𑁄 𑀧𑀦 𑀕𑀼𑀡𑀪𑀸𑀯𑁂𑀦𑀸𑀢𑀺 𑀏𑀯𑀫𑁂𑀢𑁆𑀣 𑀉𑀪𑀬𑁂𑀲𑀁 𑀯𑀼𑀢𑁆𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀆𑀭𑀜𑁆𑀜𑀓𑀦𑁆𑀢𑀺 𑀆𑀭𑀜𑁆𑀜𑀓𑀗𑁆𑀕𑀲𑀫𑀦𑁆𑀦𑀸𑀕𑀢𑀁. 𑀅𑀜𑁆𑀜𑀸𑀢𑁄𑀢𑀺 𑀧𑀭𑀺𑀘𑀬𑀯𑀲𑁂𑀦 𑀦 𑀜𑀸𑀢𑁄, 𑀅𑀲𑀁𑀲𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀦𑀺𑀘𑁆𑀘𑀦𑀯𑁄’’𑀢𑀺.

𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀯𑀺𑀭𑀳𑁂 𑀯𑁂𑀭𑀺𑀧𑀭𑀺𑀲𑀗𑁆𑀓𑀸𑀬 𑀅𑀪𑀸𑀯𑁂 𑀅𑀓𑀺𑀢𑁆𑀢𑀺𑀧𑀭𑀺𑀫𑀼𑀢𑁆𑀢𑀻𑀢𑀺 𑀏𑀯𑀫𑀸𑀤𑀻𑀳𑀺𑀧𑀺 𑀓𑀸𑀭𑀡𑁂𑀳𑀺 𑀓𑁄𑀥𑀧𑁆𑀧𑀳𑀸𑀦𑁂𑀦 𑀲𑀼𑀔𑀁 𑀲𑀼𑀧𑀢𑀺. 𑀓𑁄𑀥𑀧𑀭𑀺𑀴𑀸𑀳𑀸𑀪𑀸𑀯𑁄 𑀧𑀦 𑀧𑀸𑀓𑀝𑀢𑀭𑁄𑀢𑀺 𑀆𑀳 ‘‘𑀓𑁄𑀥…𑀧𑁂… 𑀲𑀬𑀢𑀻’’𑀢𑀺. 𑀯𑀺𑀲𑀫𑀽𑀮𑀲𑁆𑀲𑀸𑀢𑀺 𑀏𑀢𑁆𑀣 𑀯𑀺𑀲𑀲𑀭𑀺𑀓𑁆𑀔𑀢𑀸𑀬 ‘‘𑀯𑀺𑀲’’𑀦𑁆𑀢𑀺 𑀤𑀼𑀓𑁆𑀔𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀤𑀼𑀓𑁆𑀔𑀯𑀺𑀧𑀸𑀓𑀲𑁆𑀲𑀸’’𑀢𑀺. 𑀲𑀼𑀔𑀦𑁆𑀢𑀺 𑀘𑁂𑀢𑀲𑀺𑀓𑀲𑀼𑀔𑀁. 𑀅𑀓𑁆𑀓𑀼𑀝𑁆𑀞𑀲𑁆𑀲 𑀧𑀘𑁆𑀘𑀓𑁆𑀓𑁄𑀲𑀺𑀢𑁆𑀯𑀸 𑀘 𑀧𑀘𑁆𑀘𑀓𑁆𑀓𑁄𑀲𑀦𑀳𑁂𑀢𑀼 𑀉𑀧𑁆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸.

𑁧𑁦𑁧. 𑀲𑀮𑁆𑀮𑀼𑀩𑁆𑀩𑀸𑀳𑀦𑀁 𑀲𑀮𑁆𑀮𑀼𑀤𑁆𑀥𑀭𑀡𑀁.

𑀯𑀺𑀲𑀬𑀪𑁂𑀤𑁂𑀦, 𑀧𑀯𑀢𑁆𑀢𑀺𑀆𑀓𑀸𑀭𑀪𑁂𑀤𑁂𑀦 𑀘 𑀅𑀦𑁂𑀓𑀪𑁂𑀤𑀢𑁆𑀢𑀸 𑀓𑀸𑀫𑀲𑀜𑁆𑀜𑀸𑀬 𑀯𑀼𑀢𑁆𑀢𑀁 ‘‘𑀬𑀸𑀬 𑀓𑀸𑀬𑀘𑀻’’𑀢𑀺.

𑀤𑀸𑀦𑀫𑀼𑀔𑁂𑀦𑀸𑀢𑀺 𑀤𑀸𑀦𑁂𑀦 𑀫𑀼𑀔𑀪𑀽𑀢𑁂𑀦, 𑀤𑀸𑀦𑀁 𑀧𑀫𑀼𑀔𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄.

‘‘𑀅𑀭𑀺𑀬𑀫𑀕𑁆𑀕𑀲𑀫𑁆𑀧𑀸𑀧𑀦𑀯𑀲𑁂𑀦𑀸’’𑀢𑀺 𑀇𑀫𑀺𑀦𑀸 𑀅𑀦𑀼𑀓𑀫𑁆𑀧𑀸𑀦𑀼𑀤𑁆𑀤𑀬𑀸𑀦𑀁 𑀏𑀓𑀦𑁆𑀢𑀸𑀦𑀯𑀚𑁆𑀚𑀢𑀫𑁂𑀯 𑀯𑀺𑀪𑀸𑀯𑁂𑀢𑀺. ‘‘𑀅𑀦𑀼𑀓𑀫𑁆𑀧𑀸’’𑀢𑀺 𑀧𑀤𑀲𑁆𑀲𑀢𑁆𑀣𑀯𑀺𑀯𑀭𑀡𑀁 ‘‘𑀓𑀭𑀼𑀡𑀸𑀬𑀦𑀸’’𑀢𑀺, 𑀇𑀢𑀭𑀲𑁆𑀲 ‘‘𑀫𑁂𑀢𑁆𑀢𑀸𑀬𑀦𑀸’’𑀢𑀺.

𑁧𑁦𑁨. 𑀧𑀓𑀢𑀺𑀆𑀤𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀅𑀡𑀼𑀇𑀲𑁆𑀲𑀭𑀧𑀚𑀸𑀧𑀢𑀺𑀧𑀼𑀭𑀺𑀲𑀓𑀸𑀮𑀸𑀥𑀺𑀝𑁆𑀞𑀸𑀬𑀓𑀸𑀭𑀺𑀆𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺.

𑀓𑀸𑀫𑁂𑀲𑀽𑀢𑀺 𑀓𑀸𑀫𑀕𑀼𑀡𑁂𑀲𑀼 𑀭𑀽𑀧𑀸𑀤𑀺𑀯𑀺𑀲𑀬𑁂𑀲𑀼.

𑀩𑀳𑀮𑀓𑀺𑀮𑁂𑀲𑀢𑀸𑀬𑀸𑀢𑀺 𑀩𑀳𑀼𑀮𑀓𑀺𑀮𑁂𑀲𑀪𑀸𑀯𑁂𑀦. 𑀧𑀼𑀩𑁆𑀩𑀳𑁂𑀢𑀼𑀫𑀦𑁆𑀤𑀢𑀸𑀬𑀸𑀢𑀺 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀲𑁆𑀲 𑀓𑀼𑀲𑀮𑀲𑁆𑀲 𑀅𑀓𑀢𑀢𑁆𑀢𑀸.

𑀘𑀺𑀢𑁆𑀢𑀯𑀽𑀧𑀲𑀫𑀪𑀸𑀯𑀦𑀸𑀬𑀸𑀢𑀺 𑀘𑀺𑀢𑁆𑀢𑀯𑀽𑀧𑀲𑀫𑀓𑀭𑀪𑀸𑀯𑀦𑀸𑀬 𑀲𑀫𑀣𑀯𑀺𑀧𑀲𑁆𑀲𑀦𑀸𑀬.

𑀧𑀭𑀺𑀲𑁆𑀲𑀬𑀸 𑀲𑀻𑀮𑀸𑀤𑀺𑀧𑀭𑀺𑀧𑀽𑀭𑀡𑀲𑁆𑀲 𑀧𑀭𑀺𑀩𑀦𑁆𑀥𑀪𑀽𑀢𑀸 𑀓𑀺𑀮𑁂𑀲𑀸 𑀏𑀯. 𑀅𑀦𑀭𑀺𑀬𑀸 𑀧𑀜𑁆𑀜𑀸𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀸𑀢𑀼𑀫𑁂𑀯 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀜𑀸𑀡𑀲𑀺𑀭𑁂𑀦 𑀅𑀥𑁄𑀲𑀺𑀭𑀸 𑀳𑀼𑀢𑁆𑀯𑀸’’𑀢𑀺.

𑁧𑁦𑁩. 𑀪𑀕𑀯𑀢𑁄, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀯𑀲𑀦𑀬𑁄𑀕𑁆𑀬𑀪𑀸𑀯𑁄, 𑀢𑁂𑀳𑀺 𑀦𑀺𑀯𑀼𑀢𑁆𑀣𑀪𑀸𑀯𑁄 𑀘 𑀢𑀲𑁆𑀲 𑀲𑀸𑀢𑀺𑀲𑀬𑁄 𑀯𑀡𑁆𑀡𑁄𑀢𑀺 𑀯𑀼𑀢𑁆𑀢𑀁 ‘‘𑀧𑀞𑀫𑀕𑀸𑀣𑀸𑀬 𑀚𑁂𑀢𑀯𑀦𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑁆𑀯𑀸’’𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀕𑀸𑀫𑁂 𑀯𑀸 𑀬𑀤𑀺 𑀯𑀸𑀭𑀜𑁆𑀜𑁂, 𑀦𑀺𑀦𑁆𑀦𑁂 𑀯𑀸 𑀬𑀤𑀺 𑀯𑀸 𑀣𑀮𑁂;

𑀬𑀢𑁆𑀣 𑀅𑀭𑀳𑀦𑁆𑀢𑁄 𑀯𑀺𑀳𑀭𑀦𑁆𑀢𑀺, 𑀢𑀁 𑀪𑀽𑀫𑀺𑀭𑀸𑀫𑀡𑁂𑀬𑁆𑀬𑀓’’𑀦𑁆𑀢𑀺. (𑀥. 𑀧. 𑁯𑁮; 𑀣𑁂𑀭𑀕𑀸. 𑁯𑁯𑁧);

𑀇𑀥 𑀥𑀫𑁆𑀫𑀲𑀤𑁆𑀤𑁄 𑀲𑀫𑀸𑀥𑀺𑀧𑀭𑀺𑀬𑀸𑀬𑁄 ‘‘𑀏𑀯𑀁𑀥𑀫𑁆𑀫𑀸 𑀢𑁂 𑀪𑀕𑀯𑀦𑁆𑀢𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁧𑁩; 𑀫. 𑀦𑀺. 𑁩.𑁧𑁯𑁮; 𑀲𑀁. 𑀦𑀺. 𑁫.𑁩𑁭𑁮) 𑀯𑀺𑀬𑀸𑀢𑀺 𑀆𑀳 ‘‘𑀥𑀫𑁆𑀫𑁄𑀢𑀺 𑀲𑀫𑀸𑀥𑀻’’𑀢𑀺 𑀲𑀫𑀸𑀥𑀺𑀧𑀓𑁆𑀔𑀺𑀓𑀸 𑀥𑀫𑁆𑀫𑀸 𑀲𑀢𑀺𑀯𑀸𑀬𑀸𑀫𑀸.

𑀦𑀸𑀦𑀼𑀕𑀘𑁆𑀙𑁂𑀬𑁆𑀬𑀸𑀢𑀺 𑀦𑀸𑀦𑀼𑀢𑀲𑁂𑀬𑁆𑀬. 𑀅𑀦𑀼𑀢𑀲𑀦𑀫𑁂𑀯 𑀳𑀺 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀅𑀦𑀼𑀕𑀫𑀦𑀁. 𑀧𑀝𑀺𑀯𑀺𑀧𑀲𑁆𑀲𑁂𑀬𑁆𑀬𑀸𑀢𑀺 𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀲𑀦𑀫𑀸𑀳. 𑀬𑀫𑀓𑀢𑁄, 𑀳𑀺 𑀔𑀡𑀺𑀓𑀢𑁄, 𑀧𑀝𑀺𑀧𑀸𑀝𑀺𑀢𑁄 𑀘 𑀲𑀫𑁆𑀫𑀲𑀦𑀁 𑀯𑀺𑀧𑀲𑁆𑀲𑀦𑀸𑀬𑀧𑀺 𑀲𑀫𑁆𑀫𑀲𑀦𑀢𑁄 𑀧𑀝𑀺𑀯𑀺𑀧𑀲𑁆𑀲𑀦𑀸 𑀦𑀸𑀫. 𑀲𑀸 𑀳𑀺 𑀯𑀺𑀧𑀲𑁆𑀲𑀦𑀸𑀬 𑀤𑀺𑀝𑁆𑀞𑀺𑀉𑀕𑁆𑀖𑀸𑀝𑀦𑀫𑀸𑀦𑀲𑀫𑀼𑀕𑁆𑀖𑀸𑀝𑀦𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑀳𑁂𑀢𑀼𑀢𑀸𑀬 𑀯𑀺𑀲𑁂𑀲𑀢𑁄 𑀧𑀝𑀺𑀧𑀓𑁆𑀔𑁂𑀦 𑀅𑀲𑀁𑀳𑀻𑀭𑀅𑀲𑀁𑀓𑀼𑀧𑁆𑀧𑀦𑀳𑁂𑀢𑀼𑀪𑀽𑀢𑀸 𑀧𑀭𑀺𑀩𑁆𑀭𑀽𑀳𑀦𑀸 𑀳𑁄𑀢𑀺. ‘‘𑀧𑀼𑀦𑀧𑁆𑀧𑀼𑀦𑀁…𑀧𑁂… 𑀅𑀧𑁆𑀧𑁂𑀦𑁆𑀢𑁄’’𑀢𑀺 𑀏𑀢𑁂𑀦 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀥𑀫𑁆𑀫𑀸𑀦𑀼𑀩𑁆𑀭𑀽𑀳𑀦𑀁 𑀬𑀣𑀸 ‘‘𑀩𑁆𑀭𑀽𑀳𑁂𑀢𑀸 𑀲𑀼𑀜𑁆𑀜𑀸𑀕𑀸𑀭𑀸𑀦’’𑀦𑁆𑀢𑀺 (𑀫. 𑀦𑀺. 𑁧.𑁬𑁪) 𑀤𑀲𑁆𑀲𑁂𑀢𑀺.

𑀬𑀁 𑀓𑀺𑀜𑁆𑀘𑀺 𑀅𑀧𑀤𑀺𑀲𑀺𑀢𑁆𑀯𑀸 𑀧𑀝𑀺𑀜𑁆𑀜𑀸𑀤𑀸𑀦𑀁 𑀲𑀗𑁆𑀕𑀭𑁄. 𑀲𑁄 𑀧𑀦 𑀅𑀢𑁆𑀢𑀦𑁄 𑀓𑀺𑀘𑁆𑀘𑀯𑀺𑀲𑁂𑀲𑀁 𑀅𑀧𑀤𑀺𑀲𑀺𑀢𑁆𑀯𑀸 𑀫𑀺𑀢𑁆𑀢𑀲𑀦𑁆𑀣𑀯𑀯𑀲𑁂𑀦 𑀯𑀸 𑀓𑀸𑀮𑀸𑀕𑀫𑀦𑀁 𑀅𑀧𑀤𑀺𑀲𑀺𑀢𑁆𑀯𑀸 𑀓𑀺𑀜𑁆𑀘𑀺𑀓𑁆𑀔𑀸𑀦𑀼𑀧𑁆𑀧𑀤𑀸𑀦𑁂𑀦 𑀯𑀸 𑀧𑀝𑀺𑀩𑀸𑀳𑀓𑀭𑀡𑀁 𑀅𑀧𑀤𑀺𑀲𑀺𑀢𑁆𑀯𑀸 𑀩𑀮𑀕𑁆𑀕𑀩𑁄𑀥𑀯𑀲𑁂𑀦 𑀯𑀸 𑀲𑀺𑀬𑀸𑀢𑀺 𑀢𑀲𑁆𑀲 𑀫𑀺𑀢𑁆𑀢𑀓𑀭𑀡𑀸𑀤𑀺𑀧𑀭𑀺𑀬𑀸𑀬𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀗𑁆𑀕𑀭𑁄𑀢𑀺…𑀧𑁂… 𑀦𑀸𑀫’’𑀦𑁆𑀢𑀺. 𑀏𑀯𑀁 𑀧𑀝𑀺𑀧𑀦𑁆𑀦𑀢𑁆𑀢𑀸𑀢𑀺 𑀏𑀯𑀁 𑀅𑀦𑀺𑀘𑁆𑀘𑀲𑀜𑁆𑀜𑀸𑀫𑀼𑀔𑁂𑀦 𑀢𑀺𑀬𑀤𑁆𑀥𑀓𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀅𑀧𑁆𑀧𑀫𑀸𑀤𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀧𑀝𑀺𑀧𑀦𑁆𑀦𑀢𑁆𑀢𑀸.

𑀤𑀺𑀩𑁆𑀩𑀘𑀓𑁆𑀔𑀼 𑀲𑀼𑀯𑀺𑀲𑀼𑀤𑁆𑀥𑀦𑁆𑀢𑀺 𑀲𑀸𑀯𑀲𑁂𑀲𑀸 𑀤𑁂𑀲𑀦𑀸𑀢𑀺 𑀆𑀳 ‘‘𑀬𑀁 𑀲𑀘𑁆𑀙𑀺𑀓𑀭𑁄𑀢𑀻’’𑀢𑀺. 𑀭𑀽𑀧𑀸𑀬𑀢𑀦𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑁂𑀢𑀁.

𑁧𑁦𑁪. 𑀅𑀦𑁆𑀢𑀦𑁆𑀢𑀺 𑀲𑀗𑁆𑀔𑀸𑀭𑀸𑀦𑀁 𑀧𑀸𑀭𑀺𑀫𑀦𑁆𑀢𑀪𑀽𑀢𑀁. 𑀯𑁂𑀤𑀸𑀦𑀦𑁆𑀢𑀺 𑀫𑀕𑁆𑀕𑀜𑀸𑀡𑀯𑁂𑀤𑀸𑀦𑀫𑁂𑀯. 𑀅𑀭𑀳𑀢𑁆𑀢𑀸𑀥𑀺𑀕𑀫𑁂𑀦 𑀅𑀦𑁆𑀢𑀁 𑀧𑀭𑀺𑀬𑁄𑀲𑀸𑀦𑀁 𑀕𑀢𑀢𑁆𑀢𑀸. 𑀓𑀫𑁆𑀫𑀯𑀺𑀧𑀸𑀓𑀯𑀝𑁆𑀝𑀸𑀦𑀁, 𑀓𑀺𑀮𑁂𑀲𑀯𑀝𑁆𑀝𑀲𑁆𑀲𑀸𑀧𑀺 𑀘 𑀉𑀲𑁆𑀲𑀤𑁂𑀦 𑀉𑀧𑀘𑀬𑁂𑀦 𑀉𑀲𑁆𑀲𑀤𑀸, 𑀭𑀸𑀕𑀸𑀤𑀬𑁄.

𑀲𑀼𑀓𑁆𑀓𑁄𑀪𑀸𑀲𑀢𑀸𑀬 𑀲𑀼𑀓𑁆𑀓𑀸, 𑀅𑀪𑀺𑀯𑀺𑀲𑀺𑀝𑁆𑀞𑀕𑁆𑀕𑀳𑀸. 𑀲𑀩𑁆𑀩𑀸𑀦𑀺 𑀯𑀸 𑀢𑀸𑀭𑀓𑀭𑀽𑀧𑀸𑀦𑀺 𑀲𑀼𑀓𑁆𑀓𑀸. 𑀯𑀺𑀦𑁆𑀤𑀢𑀻𑀢𑀺 𑀉𑀧𑀮𑀪𑀢𑀺, 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀅𑀢𑁆𑀣𑁄.

‘‘𑀅𑀚𑁆𑀛𑀢𑁆𑀢𑀁 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁄 𑀳𑁄𑀢𑀻’’𑀢𑀺 𑀇𑀤𑀁 ‘‘𑀲𑀓𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺 𑀧𑀸𑀭𑀕𑀼𑀪𑀸𑀯𑀲𑁆𑀲 𑀯𑀺𑀲𑁂𑀲𑀺𑀢𑀢𑁆𑀢𑀸 𑀯𑀼𑀢𑁆𑀢𑀁, 𑀢𑀜𑁆𑀘 𑀔𑁄 𑀅𑀪𑀺𑀦𑀺𑀯𑁂𑀲𑁂𑀦𑁂𑀯 𑀤𑁂𑀲𑀺𑀢𑀁. ‘‘𑀲𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀅𑀪𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺 (𑀲𑀁. 𑀦𑀺. 𑁪.𑁪𑁬; 𑀧𑀝𑀺. 𑀫. 𑁧.𑁩) 𑀯𑀼𑀢𑁆𑀢𑀁. 𑀧𑀸𑀭𑀕𑀼𑀢𑀸 𑀘 𑀢𑁂𑀲𑀁 𑀔𑀦𑁆𑀥𑀸𑀦𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀯𑀲𑁂𑀦 𑀳𑁄𑀢𑀺. 𑀢𑀢𑁄 𑀘 𑀦𑁂𑀲𑀁 𑀳𑁂𑀢𑀼𑀪𑀽𑀢𑀲𑀫𑀼𑀤𑀬𑁂, 𑀢𑀤𑀧𑁆𑀧𑀯𑀢𑁆𑀢𑀺𑀮𑀓𑁆𑀔𑀡𑁂 𑀦𑀺𑀭𑁄𑀥𑁂, 𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀘 𑀧𑀳𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀸𑀯𑀦𑀸𑀪𑀺𑀲𑀫𑀬𑀧𑀸𑀭𑀺𑀧𑀽𑀭𑀺𑀯𑀲𑁂𑀦 𑀇𑀢𑀭𑀲𑀘𑁆𑀘𑁂𑀲𑀼𑀧𑀺 𑀧𑀸𑀭𑀕𑀼𑀪𑀸𑀯𑁄 𑀯𑀼𑀢𑁆𑀢𑁄 𑀏𑀯 𑀳𑁄𑀢𑀺. 𑀲𑀩𑁆𑀩𑀲𑁄 𑀳𑀺 𑀲𑀓𑀅𑀢𑁆𑀢𑀪𑀸𑀯𑀩𑁄𑀥𑁂𑀦𑀧𑀺 𑀘𑀢𑀼𑀲𑀘𑁆𑀘𑀸𑀪𑀺𑀲𑀫𑀬𑁄 𑀳𑁄𑀢𑀺𑀬𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀇𑀫𑀲𑁆𑀫𑀺𑀁𑀬𑁂𑀯 𑀩𑁆𑀬𑀸𑀫𑀫𑀢𑁆𑀢𑁂 𑀓𑀴𑁂𑀯𑀭𑁂 𑀲𑀲𑀜𑁆𑀜𑀺𑀫𑁆𑀳𑀺 𑀲𑀫𑀦𑀓𑁂 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀫𑀺, 𑀮𑁄𑀓𑀲𑀫𑀼𑀤𑀬𑀜𑁆𑀘𑀸’’𑀢𑀺𑀆𑀤𑀺 (𑀲𑀁. 𑀦𑀺. 𑁧.𑁧𑁦𑁭; 𑀅. 𑀦𑀺. 𑁪.𑁪𑁫). 𑀅𑀣 𑀯𑀸 𑀲𑀓𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀅𑀢𑁆𑀢𑀦𑁄 𑀥𑀫𑁆𑀫𑁂𑀲𑀼. 𑀅𑀢𑁆𑀢𑀥𑀫𑁆𑀫𑀸 𑀦𑀸𑀫 𑀅𑀢𑁆𑀣𑀓𑀸𑀫𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀲𑀻𑀮𑀸𑀤𑀺𑀥𑀫𑁆𑀫𑀸. 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀤𑀬𑁄 𑀳𑀺 𑀯𑁄𑀤𑀸𑀦𑀥𑀫𑁆𑀫𑀸 𑀏𑀓𑀦𑁆𑀢𑀳𑀺𑀢𑀲𑀼𑀔𑀲𑀫𑁆𑀧𑀸𑀤𑀦𑀢𑁄 𑀧𑀼𑀭𑀺𑀲𑀲𑁆𑀲 𑀲𑀓𑀥𑀫𑁆𑀫𑀸 𑀦𑀸𑀫, 𑀦 𑀅𑀦𑀢𑁆𑀣𑀸𑀯𑀳𑀸 𑀲𑀁𑀓𑀺𑀮𑁂𑀲𑀥𑀫𑁆𑀫𑀸 𑀯𑀺𑀬 𑀧𑀭𑀥𑀫𑁆𑀫𑀸. 𑀢𑁂𑀲𑀁 𑀲𑀻𑀮𑀸𑀤𑀻𑀦𑀁 𑀧𑀸𑀭𑀺𑀧𑀽𑀭𑀺𑀬𑀸 𑀧𑀸𑀭𑀁 𑀧𑀭𑀺𑀬𑀦𑁆𑀢𑀁 𑀕𑀢𑁄𑀢𑀺 𑀧𑀸𑀭𑀕𑀽. ‘‘𑀅𑀓𑁆𑀓𑀼𑀮 𑀧𑀓𑁆𑀓𑀼𑀮’’𑀇𑀢𑀺 𑀏𑀯𑀁 𑀯𑀺𑀳𑀺𑀁𑀲𑀦𑀓𑀧𑀬𑁄𑀕𑀁. 𑀅𑀚𑀓𑀮𑀸𑀧𑁂𑀦 (𑀉𑀤𑀸. 𑁭) 𑀳𑀺 𑀢𑀤𑀸 𑀪𑀕𑀯𑀦𑁆𑀢𑀁 𑀪𑀻𑀲𑀸𑀧𑁂𑀢𑀼𑀓𑀸𑀫𑁂𑀦 𑀓𑀢𑀁 𑀬𑀓𑁆𑀔𑀕𑀚𑁆𑀚𑀺𑀢𑀁 ‘‘𑀅𑀓𑁆𑀓𑀼𑀮 𑀧𑀓𑁆𑀓𑀼𑀮’’ 𑀇𑀢𑀺 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀲𑀢𑁆𑀢𑀸𑀦𑀁 𑀲𑁄𑀢𑀧𑀣𑀁 𑀅𑀕𑀫𑀸𑀲𑀺, 𑀢𑀲𑁆𑀫𑀸 𑀢𑀁 ‘‘𑀅𑀓𑁆𑀓𑀼𑀮𑀁 𑀧𑀓𑁆𑀓𑀼𑀮𑀓𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁.

𑀦𑀸𑀪𑀺𑀦𑀦𑁆𑀤𑀢𑀻𑀢𑀺 ‘‘𑀅𑀬𑀁 𑀫𑀁 𑀤𑀝𑁆𑀞𑀼𑀁 𑀆𑀕𑀢𑀸’’𑀢𑀺 𑀦 𑀢𑀼𑀲𑁆𑀲𑀢𑀺. 𑀬𑀲𑁆𑀫𑀸 𑀧𑀦 ‘‘𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁮𑁮) 𑀯𑀺𑀬 𑀲𑀫𑁆𑀧𑀝𑀺𑀘𑁆𑀙𑀦𑀢𑁆𑀣𑁄𑀧𑀺 𑀅𑀪𑀺𑀦𑀦𑁆𑀤𑀲𑀤𑁆𑀤𑁄 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑁂𑀦 𑀦 𑀲𑀫𑁆𑀧𑀝𑀺𑀘𑁆𑀙𑀢𑀻’’𑀢𑀺. 𑀦 𑀲𑁄𑀘𑀢𑀻𑀢𑀺 ‘‘𑀫𑀬𑀸 𑀅𑀲𑀫𑁆𑀫𑁄𑀤𑀺𑀢𑀸 𑀕𑀘𑁆𑀙𑀢𑀻’’𑀢𑀺 𑀦 𑀘𑀺𑀢𑁆𑀢𑀲𑀦𑁆𑀢𑀸𑀧𑀁 𑀆𑀧𑀚𑁆𑀚𑀢𑀺. ‘‘𑀲𑀗𑁆𑀕𑀸 𑀲𑀗𑁆𑀕𑀸𑀫𑀚𑀺𑀁 𑀫𑀼𑀢𑁆𑀢’’𑀦𑁆𑀢𑀺 𑀇𑀤𑀁 𑀅𑀪𑀺𑀦𑀦𑁆𑀤𑀲𑁄𑀘𑀦𑀸𑀦𑀁 𑀅𑀪𑀸𑀯𑀲𑁆𑀲 𑀓𑀸𑀭𑀡𑀯𑀘𑀦𑀁.

𑀢𑁂𑀦𑀸𑀢𑀺 𑀉𑀤𑀓𑁂 𑀦𑁆𑀳𑀸𑀦𑁂𑀦. 𑀢𑁂𑀦𑁂𑀯𑀸𑀳 ‘‘𑀦 𑀉𑀤𑀓𑁂𑀦 𑀲𑀼𑀘𑀻 𑀳𑁄𑀢𑀻’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀉𑀤𑀓𑀼𑀫𑁆𑀫𑀼𑀚𑁆𑀚𑀦𑀸𑀤𑀺𑀦𑀸 𑀦𑁂𑀯 𑀲𑀢𑁆𑀢𑀸𑀦𑀁 𑀲𑀼𑀘𑀺 𑀧𑀸𑀧𑀢𑁄 𑀲𑀼𑀤𑁆𑀥𑀺 𑀦𑀸𑀫 𑀳𑁄𑀢𑀻𑀢𑀺. 𑀉𑀤𑀓𑀼𑀫𑁆𑀫𑀼𑀚𑁆𑀚𑀦𑀸𑀤𑀻𑀦𑀺 𑀳𑀺 𑀇𑀥 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 ‘‘𑀉𑀤𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀤𑀓𑁂𑀦𑀸𑀢𑀺 𑀯𑀸 𑀉𑀫𑁆𑀫𑀼𑀚𑁆𑀚𑀦𑀸𑀤𑀺𑀓𑀺𑀭𑀺𑀬𑀸𑀲𑀸𑀥𑀦𑀪𑀽𑀢𑁂𑀦 𑀉𑀤𑀓𑁂𑀦 𑀲𑀢𑁆𑀢𑀸𑀦𑀁 𑀲𑀼𑀘𑀺 𑀧𑀸𑀧𑀲𑀼𑀤𑁆𑀥𑀺 𑀦 𑀳𑁄𑀢𑀻𑀢𑀺. 𑀅𑀣 𑀯𑀸 𑀲𑀼𑀘𑀺𑀢𑁂𑀦 𑀬𑀣𑀸𑀯𑀼𑀢𑁆𑀢𑁂𑀦 𑀉𑀤𑀓𑁂𑀦 𑀧𑀸𑀧𑀫𑀮𑀢𑁄 𑀲𑀼𑀤𑁆𑀥𑁄 𑀦𑀸𑀫 𑀲𑀢𑁆𑀢𑁄 𑀦 𑀳𑁄𑀢𑀻𑀢𑀺. 𑀬𑀤𑀺 𑀲𑀺𑀬𑀸, 𑀲𑀩𑁆𑀩𑁂𑀲𑀫𑁂𑀯 𑀫𑀘𑁆𑀙𑀩𑀦𑁆𑀥𑀸𑀦𑀁 𑀧𑀸𑀧𑀲𑀼𑀤𑁆𑀥𑀺 𑀲𑀺𑀬𑀸. 𑀢𑁂𑀦𑀸𑀳 ‘‘𑀩𑀳𑁆𑀯𑁂𑀢𑁆𑀣 𑀦𑁆𑀳𑀸𑀬𑀢𑀻 𑀚𑀦𑁄’’𑀢𑀺. 𑀫𑀸𑀢𑀼𑀖𑀸𑀢𑀸𑀤𑀺𑀧𑀸𑀧𑀓𑀫𑁆𑀫𑀓𑀸𑀭𑀻𑀦𑀁, 𑀅𑀜𑁆𑀜𑁂𑀲𑀜𑁆𑀘 𑀕𑁄𑀫𑀳𑀺𑀁𑀲𑀸𑀤𑀻𑀦𑀁 𑀉𑀤𑀓𑀁 𑀑𑀭𑁄𑀳𑀦𑁆𑀢𑀸𑀦𑀁 𑀅𑀦𑁆𑀢𑀫𑀲𑁄 𑀫𑀘𑁆𑀙𑀓𑀘𑁆𑀙𑀧𑁂 𑀉𑀧𑀸𑀤𑀸𑀬 𑀲𑀩𑁆𑀩𑁂𑀲𑀫𑁆𑀧𑀺 𑀧𑀸𑀧𑀲𑀼𑀤𑁆𑀥𑀺 𑀲𑀺𑀬𑀸, 𑀦 𑀧𑀦𑁂𑀯𑀁 𑀳𑁄𑀢𑀺. 𑀓𑀲𑁆𑀫𑀸? 𑀦𑁆𑀳𑀸𑀦𑀻𑀬𑀧𑀸𑀧𑀳𑁂𑀢𑀽𑀦𑀁 𑀅𑀧𑁆𑀧𑀝𑀺𑀧𑀓𑁆𑀔𑀪𑀸𑀯𑀢𑁄. 𑀬𑀜𑁆𑀳𑀺 𑀬𑀁 𑀯𑀺𑀦𑀸𑀲𑁂𑀢𑀺, 𑀲𑁄 𑀢𑀲𑁆𑀲 𑀧𑀝𑀺𑀧𑀓𑁆𑀔𑁄. 𑀬𑀣𑀸 𑀆𑀮𑁄𑀓𑁄 𑀅𑀦𑁆𑀥𑀓𑀸𑀭𑀲𑁆𑀲, 𑀯𑀺𑀚𑁆𑀚𑀸 𑀅𑀯𑀺𑀚𑁆𑀚𑀸𑀬, 𑀦 𑀏𑀯𑀁 𑀦𑁆𑀳𑀸𑀦𑀁 𑀧𑀸𑀧𑀲𑁆𑀲, 𑀢𑀲𑁆𑀫𑀸 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 ‘‘𑀦 𑀉𑀤𑀓𑁂𑀦 𑀲𑀼𑀘𑀻 𑀳𑁄𑀢𑀻’’𑀢𑀺. 𑀬𑁂𑀦 𑀧𑀦 𑀲𑀼𑀘𑀺 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀫𑁆𑀳𑀺 𑀲𑀘𑁆𑀘𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀘𑁆𑀘𑀦𑁆𑀢𑀺 𑀯𑀘𑀻𑀲𑀘𑁆𑀘𑀜𑁆𑀘 𑀯𑀺𑀭𑀢𑀺𑀲𑀘𑁆𑀘𑀜𑁆𑀘. 𑀅𑀣 𑀯𑀸 𑀲𑀘𑁆𑀘𑀦𑁆𑀢𑀺 𑀜𑀸𑀡𑀲𑀘𑁆𑀘𑀜𑁆𑀘𑁂𑀯 𑀧𑀭𑀫𑀢𑁆𑀣𑀲𑀘𑁆𑀘𑀜𑁆𑀘. 𑀥𑀫𑁆𑀫𑁄𑀢𑀺 𑀲𑁂𑀲𑁄 𑀅𑀭𑀺𑀬𑀥𑀫𑁆𑀫𑁄. 𑀲𑀘𑁆𑀘𑀲𑁆𑀲 𑀧𑀦𑁂𑀢𑁆𑀣 𑀯𑀺𑀲𑀼𑀁 𑀕𑀳𑀡𑀁 𑀢𑀲𑁆𑀲 𑀩𑀳𑀼𑀓𑀸𑀭𑀢𑀸𑀤𑀲𑁆𑀲𑀦𑀢𑁆𑀣𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀚𑀸𑀢𑀺𑀩𑀮𑀦𑀺𑀲𑁂𑀥𑀓𑀦𑁆𑀢𑀺 𑀚𑀸𑀢𑀺𑀫𑀢𑁆𑀢𑀩𑁆𑀭𑀸𑀳𑁆𑀫𑀡𑀸𑀦𑀁 𑀪𑁄𑀯𑀸𑀤𑀺𑀓𑀸𑀦𑀁 𑀧𑀝𑀺𑀲𑁂𑀥𑀓𑀁. 𑀚𑀸𑀢𑀺𑀯𑀸𑀤𑀲𑁆𑀲 𑀯𑀸 𑀦𑀺𑀲𑁂𑀥𑀓𑀁, ‘‘𑀦 𑀚𑀘𑁆𑀘𑀸 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀻’’𑀢𑀺 (𑀲𑀼. 𑀦𑀺. 𑁬𑁫𑁫) 𑀳𑀺 𑀯𑀼𑀢𑁆𑀢𑀁. 𑀣𑁂𑀭𑁄 𑀳𑀺 𑀢𑀣𑀸𑀯𑀸𑀤𑁂𑀦 𑀢𑁂 𑀅𑀦𑀺𑀕𑁆𑀕𑀡𑁆𑀳𑀦𑁆𑀢𑁄𑀧𑀺 𑀦𑀺𑀕𑁆𑀕𑀡𑁆𑀳𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑁧𑁦𑁫. 𑀯𑀺𑀫𑀼𑀢𑁆𑀢𑀺𑀬𑀦𑁆𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀁.

𑀲𑀯𑀸𑀲𑀦𑀦𑁆𑀢𑀺 𑀏𑀢𑁆𑀣 𑀔𑀻𑀡𑀸𑀲𑀯𑀲𑁆𑀲𑀸𑀧𑀺 𑀅𑀔𑀻𑀡𑀸𑀲𑀯𑀲𑀤𑀺𑀲𑀓𑀸𑀬𑀯𑀘𑀻𑀧𑀬𑁄𑀕𑀳𑁂𑀢𑀼𑀪𑀽𑀢𑀸 𑀲𑀦𑁆𑀢𑀸𑀦𑁂 𑀓𑀺𑀮𑁂𑀲𑀪𑀸𑀯𑀦𑀸 𑀯𑀸𑀲𑀦𑀸 𑀦𑀸𑀫 𑀆𑀬𑀲𑁆𑀫𑀢𑁄 𑀧𑀺𑀮𑀺𑀦𑁆𑀤𑀯𑀘𑁆𑀙𑀲𑁆𑀲 (𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁧𑁫; 𑀥. 𑀧. 𑀅𑀝𑁆𑀞. 𑁨.𑀧𑀺𑀮𑀺𑀦𑁆𑀤𑀯𑀘𑁆𑀙𑀢𑁆𑀣𑁂𑀭𑀯𑀢𑁆𑀣𑀼) 𑀯𑀲𑀮𑀯𑁄𑀳𑀸𑀭𑁄 𑀯𑀺𑀬, 𑀲𑀳 𑀯𑀸𑀲𑀦𑀸𑀬𑀸𑀢𑀺 𑀲𑀯𑀸𑀲𑀦𑀁, 𑀪𑀸𑀯𑀦𑀧𑀼𑀁𑀲𑀓𑀜𑁆𑀘𑁂𑀢𑀁 ‘‘𑀯𑀺𑀲𑀫𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀯𑀢𑁆𑀢𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁭𑁦) 𑀯𑀺𑀬. 𑀬𑀣𑀸𑀯𑀼𑀢𑁆𑀢𑀯𑀸𑀲𑀦𑀫𑁆𑀧𑀺 𑀅𑀲𑁂𑀲𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀼𑀫𑁆𑀫𑀕𑁆𑀕𑀧𑀭𑀺𑀳𑀭𑀡𑀯𑀲𑁂𑀦 𑀫𑀕𑁆𑀕𑀲𑀫𑁆𑀧𑀝𑀺𑀧𑀢𑁆𑀢𑀻𑀢𑀺 𑀫𑀕𑁆𑀕𑁂 𑀓𑀼𑀲𑀮𑁄 𑀅𑀫𑀕𑁆𑀕𑁂𑀧𑀺 𑀓𑀼𑀲𑀮𑁄 𑀏𑀯 𑀳𑁄𑀢𑀺. 𑀪𑀕𑀯𑀸 𑀧𑀦 𑀲𑀩𑁆𑀩𑀜𑁆𑀜𑀼𑀢𑀸𑀬 𑀲𑀩𑁆𑀩𑀢𑁆𑀣𑁂𑀯 𑀓𑀼𑀲𑀮𑁄𑀢𑀺 𑀆𑀳 ‘‘𑀫𑀕𑁆𑀕𑁂 𑀘 𑀅𑀫𑀕𑁆𑀕𑁂 𑀘 𑀓𑁄𑀯𑀺𑀤𑁄’’𑀢𑀺.

𑁧𑁦𑁬. 𑀢𑀫𑁂𑀦 𑀬𑀼𑀢𑁆𑀢𑁄𑀢𑀺 𑀬𑀣𑀸𑀯𑀼𑀢𑁆𑀢𑀢𑀫𑁄 𑀢𑀲𑁆𑀲 𑀅𑀢𑁆𑀣𑀻𑀢𑀺 𑀢𑀫𑁄, 𑀧𑀼𑀕𑁆𑀕𑀮𑁄. 𑀅𑀧𑁆𑀧𑀓𑀸𑀲𑀪𑀸𑀯𑁂𑀦 𑀞𑀺𑀢𑀸 𑀔𑀦𑁆𑀥𑀸𑀯 𑀢𑀫𑁄. 𑀆𑀮𑁄𑀓𑀪𑀽𑀢𑁄𑀢𑀺 𑀚𑀸𑀢𑀺𑀕𑀼𑀡𑀸𑀮𑁄𑀓𑁄, 𑀧𑀸𑀓𑀝𑀕𑀼𑀡𑁄𑀢𑀺 𑀅𑀢𑁆𑀣𑁄.

𑀓𑀺𑀮𑁂𑀲𑀫𑀬𑀁 𑀩𑀦𑁆𑀥𑀦𑀁 ‘‘𑀤𑀴𑁆𑀳’’𑀦𑁆𑀢𑀺 𑀯𑀤𑀦𑁆𑀢𑀺. 𑀬𑀢𑁄 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑀸 𑀩𑀼𑀤𑁆𑀥𑀸𑀯 𑀦𑀁 𑀙𑀺𑀦𑁆𑀤𑀦𑁆𑀢𑀺, 𑀦 𑀅𑀜𑁆𑀜𑁂.

𑀤𑀼𑀘𑁆𑀙𑁂𑀤𑀦𑀢𑁆𑀣𑁂𑀦 𑀲𑀢𑀺𑀧𑀺 𑀤𑀴𑁆𑀳𑀪𑀸𑀯𑁂 𑀲𑀺𑀣𑀺𑀮𑀯𑀼𑀢𑁆𑀢𑀺𑀢𑀁 𑀢𑀲𑁆𑀲 𑀤𑀻𑀧𑁂𑀢𑀼𑀁 ‘‘𑀩𑀦𑁆𑀥𑀦𑀪𑀸𑀯𑀫𑁆𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑁂𑀦 ‘‘𑀅𑀳𑁄 𑀲𑀼𑀔𑀼𑀫𑀢𑀭𑀁 𑀔𑁄, 𑀪𑀺𑀓𑁆𑀔𑀯𑁂, 𑀫𑀸𑀭𑀩𑀦𑁆𑀥𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑁧𑁦𑁭. 𑀬𑀤𑀺𑀧𑀺 𑀘𑁂𑀢𑀦𑀸 𑀓𑀼𑀲𑀮𑀸𑀓𑀼𑀲𑀮𑀲𑀸𑀥𑀸𑀭𑀡𑀸, 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 𑀢𑀲𑁆𑀲 𑀯𑀲𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀓𑀼𑀲𑀮𑀘𑁂𑀢𑀦𑀸𑀯𑀲𑁂𑀦 𑀘𑁂𑀢𑁂𑀢𑀻’’𑀢𑀺 𑀆𑀳. 𑀘𑁂𑀢𑀦𑀁 𑀅𑀪𑀺𑀲𑀦𑁆𑀤𑀳𑀦𑀁, 𑀘𑀺𑀢𑁆𑀢𑀲𑁆𑀲 𑀩𑁆𑀬𑀸𑀧𑀸𑀭𑀸𑀧𑀢𑁆𑀢𑀺𑀪𑀸𑀯𑁂𑀦 𑀧𑀯𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀘𑁂𑀢𑀦𑀸 𑀬𑀤𑀸 𑀯𑀺𑀜𑁆𑀜𑀢𑁆𑀢𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀢𑀤𑀸 𑀤𑀺𑀕𑀼𑀡𑀼𑀲𑁆𑀲𑀸𑀳𑀸𑀤𑀺𑀕𑀼𑀡𑀯𑀸𑀬𑀸𑀫𑀸 𑀯𑀺𑀬 𑀳𑀼𑀢𑁆𑀯𑀸 𑀧𑀸𑀓𑀝𑀁 𑀧𑀬𑁄𑀕𑀁 𑀦𑀺𑀧𑁆𑀨𑀸𑀤𑁂𑀢𑀺, 𑀢𑀲𑁆𑀫𑀸 ‘‘𑀧𑀓𑀧𑁆𑀧𑁂𑀢𑀻’’𑀢𑀺 𑀯𑀼𑀢𑁆𑀢𑀸. 𑀧𑀸𑀓𑀝𑀧𑁆𑀧𑀬𑁄𑀕𑀓𑀧𑁆𑀧𑀦𑀜𑁆𑀳𑁂𑀢𑁆𑀣 𑀧𑀓𑀧𑁆𑀧𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀢𑁂𑀦𑀸𑀳 ‘‘𑀢𑀫𑁂𑀯 𑀧𑀓𑀧𑁆𑀧𑁂𑀢𑀻’’𑀢𑀺. 𑀧𑀘𑁆𑀘𑀬𑀝𑁆𑀞𑁄 𑀇𑀥 𑀆𑀭𑀫𑁆𑀫𑀡𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 ‘‘𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺.

𑁧𑁦𑁮. 𑀬𑀣𑀸 𑀚𑀮𑀲𑀫𑀼𑀤𑁆𑀤𑀲𑁆𑀲 𑀯𑀻𑀘𑀺𑀲𑀫𑀼𑀝𑁆𑀞𑀸𑀦𑀯𑀲𑁂𑀦 𑀮𑀩𑁆𑀪𑀫𑀸𑀦𑁄 𑀯𑁂𑀕𑁄 ‘‘𑀯𑀻𑀘𑀺𑀫𑀬𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀘𑀓𑁆𑀔𑀼𑀲𑀫𑀼𑀤𑁆𑀤𑀲𑁆𑀲𑀸𑀧𑀺 𑀭𑀽𑀧𑀸𑀯𑀪𑀸𑀲𑀦𑀯𑀲𑁂𑀦 𑀮𑀩𑁆𑀪𑀫𑀸𑀦𑁄 𑀯𑁂𑀕𑁄 ‘‘𑀭𑀽𑀧𑀫𑀬𑁄’’𑀢𑀺 𑀯𑀼𑀢𑁆𑀢𑁄. 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀆𑀯𑀺𑀜𑁆𑀙𑀦𑀢𑁄𑀢𑀺 𑀆𑀓𑀟𑁆𑀠𑀦𑀢𑁄, 𑀆𑀓𑀟𑁆𑀠𑀦𑀜𑁆𑀘𑁂𑀢𑁆𑀣 𑀲𑀦𑁆𑀢𑀸𑀦𑀲𑁆𑀲 𑀢𑀦𑁆𑀦𑀺𑀦𑁆𑀦𑀪𑀸𑀯𑀳𑁂𑀢𑀼𑀢𑀸𑀬 𑀤𑀝𑁆𑀞𑀩𑁆𑀩𑀁.

𑀲𑀫𑀼𑀤𑀦𑀁 𑀓𑀺𑀮𑁂𑀲𑀢𑁂𑀫𑀦𑀁, 𑀅𑀯𑀲𑁆𑀲𑀯𑀳𑁂𑀢𑀼𑀢𑀸, 𑀓𑀺𑀮𑁂𑀲𑀸𑀦𑀁 𑀊𑀫𑀺𑀆𑀤𑀺𑀲𑀤𑀺𑀲𑀢𑀸 𑀲𑀫𑀸𑀯𑀝𑁆𑀝𑀦𑁂𑀦 𑀲𑀢𑁆𑀢𑀸𑀦𑀁 𑀅𑀦𑀢𑁆𑀣𑀸𑀯𑀳𑀢𑀸𑀬 𑀯𑁂𑀤𑀺𑀢𑀩𑁆𑀩𑀸. 𑀉𑀧𑀭𑀽𑀧𑀭𑀺𑀯𑁂𑀕𑀼𑀧𑁆𑀧𑀢𑁆𑀢𑀺𑀬𑀸 𑀉𑀧𑀕𑀢𑀲𑁆𑀲 𑀉𑀝𑁆𑀞𑀸𑀢𑀼𑀁 𑀅𑀧𑁆𑀧𑀤𑀸𑀦𑁂𑀦, 𑀕𑀼𑀡𑀲𑀸𑀭𑀯𑀺𑀦𑀸𑀲𑀦𑁂𑀦 𑀘 𑀓𑁄𑀥𑀼𑀧𑀦𑀸𑀳𑀸𑀤𑀻𑀦𑀁 𑀊𑀫𑀺𑀆𑀤𑀺𑀲𑀤𑀺𑀲𑀢𑀸 𑀤𑀝𑁆𑀞𑀩𑁆𑀩𑀸.

𑀅𑀪𑀺𑀫𑀼𑀔𑁄 𑀦𑀦𑁆𑀤𑀢𑀻𑀢𑀺 𑀢𑀤𑀸𑀭𑀫𑁆𑀫𑀡𑀁 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑀲𑀸𑀤𑀺𑀬𑀦𑁆𑀢𑁄 𑀲𑀫𑁆𑀧𑀝𑀺𑀘𑁆𑀙𑀢𑀺. 𑀅𑀪𑀺𑀯𑀤𑀢𑀻𑀢𑀺 𑀢𑀡𑁆𑀳𑀸𑀪𑀺𑀦𑀺𑀯𑁂𑀲𑀯𑀲𑁂𑀦 𑀅𑀪𑀺𑀦𑀺𑀯𑀺𑀲𑁆𑀲 𑀯𑀤𑀢𑀺. 𑀢𑀜𑁆𑀳𑀺𑀲𑁆𑀲 𑀅𑀪𑀺𑀦𑀺𑀯𑁂𑀲𑀁 𑀤𑀻𑀧𑁂𑀢𑀼𑀁 ‘‘𑀅𑀳𑁄 𑀲𑀼𑀔’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀚𑁆𑀛𑁄𑀲𑀸𑀦𑀁 𑀅𑀥𑀺𑀫𑀼𑀘𑁆𑀘𑀦𑀪𑀽𑀢𑀸𑀬 𑀢𑀡𑁆𑀳𑀸𑀬 𑀢𑀡𑁆𑀳𑀸𑀯𑀢𑁆𑀣𑀼𑀓𑀲𑁆𑀲 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀆𑀯𑁂𑀡𑀺𑀓𑀢𑀸𑀓𑀭𑀡𑀦𑁆𑀢𑀺 𑀆𑀳 ‘‘𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀻𑀢𑀺 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸’’𑀢𑀺.

𑁧𑁦𑁯. ‘‘𑀓𑀲𑁆𑀫𑀸’’𑀢𑀺𑀆𑀤𑀺𑀦𑀸 𑀲𑀦𑁆𑀢𑀸𑀧𑀤𑀼𑀓𑁆𑀔𑀸𑀦𑀁 𑀅𑀲𑀼𑀧𑁆𑀧𑀢𑀺𑀓𑀸𑀭𑀢𑀁 𑀆𑀳 ‘‘𑀬𑁂𑀦 𑀯𑀸 𑀧𑀓𑀸𑀭𑁂𑀦𑀸’’𑀢𑀺. 𑀬𑁂𑀦𑀸𑀢𑀺 𑀬𑁂𑀦 𑀯𑀸 𑀓𑀸𑀫𑀚𑁆𑀛𑁄𑀲𑀸𑀦𑀤𑀺𑀝𑁆𑀞𑀺𑀚𑁆𑀛𑁄𑀲𑀸𑀦𑀪𑀽𑀢𑁂𑀦 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀧𑁆𑀧𑀓𑀸𑀭𑁂𑀦. 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸 𑀢𑀣𑀸𑀭𑀽𑀧𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀯𑀟𑁆𑀠𑀺𑀜𑁆𑀘 𑀫𑀜𑁆𑀜𑀦𑁆𑀢𑀺. 𑀅𑀯𑀟𑁆𑀠𑀺 𑀏𑀯 𑀧𑀦 𑀳𑁄𑀢𑀺 𑀢𑀲𑁆𑀲 𑀧𑀓𑀸𑀭𑀲𑁆𑀲 𑀯𑀟𑁆𑀠𑀺𑀬𑀁 𑀅𑀦𑀼𑀧𑀸𑀬𑀪𑀸𑀯𑀢𑁄 𑀘 𑀉𑀧𑀸𑀬𑀪𑀸𑀯𑀢𑁄 𑀘 𑀅𑀯𑀟𑁆𑀠𑀺𑀬𑀁. 𑀢𑀣𑀸𑀧𑀻𑀢𑀺 𑀢𑀢𑁆𑀣 𑀢𑀢𑁆𑀣 𑀇𑀘𑁆𑀙𑀸𑀯𑀺𑀖𑀸𑀢𑀁 𑀧𑀸𑀧𑀼𑀡𑀦𑁆𑀢𑁄𑀧𑀺. 𑀬𑀲𑁆𑀫𑀸 𑀇𑀢𑁄 𑀩𑀸𑀳𑀺𑀭𑀓𑀸 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀪𑀯𑀦𑀺𑀲𑁆𑀲𑀭𑀡𑀁 𑀅𑀧𑁆𑀧𑀚𑀸𑀦𑀦𑁆𑀢𑁄 𑀫𑀦𑁆𑀤𑀓𑀺𑀮𑁂𑀲𑀁 𑀤𑀻𑀖𑀸𑀬𑀼𑀓𑀁 𑀲𑀼𑀔𑀩𑀳𑀼𑀮𑀁 𑀏𑀓𑀘𑁆𑀘𑀁 𑀪𑀯𑀁 𑀢𑁂𑀦𑁂𑀯 𑀫𑀦𑁆𑀤𑀓𑀺𑀮𑁂𑀲𑀸𑀤𑀺𑀪𑀸𑀯𑁂𑀦 ‘‘𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀲𑀫𑀦𑀼𑀧𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀪𑀯𑁂𑀦 𑀪𑀯𑀯𑀺𑀧𑁆𑀧𑀫𑁄𑀓𑁆𑀔𑀁 𑀯𑀤𑀦𑁆𑀢𑀻𑀢𑀺.

𑀪𑀯𑀤𑀺𑀝𑁆𑀞𑀺𑀲𑀳𑀕𑀢𑀸 𑀢𑀡𑁆𑀳𑀸 𑀧𑀼𑀭𑀺𑀫𑀧𑀤𑁂 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀪𑀯𑀢𑀡𑁆𑀳𑀸𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀪𑀯𑀢𑀡𑁆𑀳𑀸𑀢𑀺𑀆𑀤𑀻𑀲𑀼 𑀯𑀺𑀬𑀸’’𑀢𑀺.

𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀪𑀯𑁂.

𑀢𑀢𑁄 𑀏𑀯𑀸𑀢𑀺 𑀪𑀽𑀢𑀭𑀢𑀺𑀬𑀸 𑀏𑀯. 𑀅𑀜𑁆𑀜𑀫𑀜𑁆𑀜𑀜𑁆𑀳𑀺 𑀲𑀢𑁆𑀢𑀸𑀦𑀁 𑀙𑀦𑁆𑀤𑀭𑀸𑀕𑁄 𑀩𑀮𑀯𑀸 𑀳𑁄𑀢𑀺. 𑀅𑀦𑀯𑀲𑁂𑀲𑀢𑁄𑀢𑀺 𑀅𑀦𑀯𑀲𑁂𑀲𑁂𑀦, 𑀦 𑀓𑀺𑀜𑁆𑀘𑀺 𑀲𑁂𑀲𑁂𑀢𑁆𑀯𑀸.

𑀲𑀁𑀲𑀸𑀭𑀲𑁄𑀢𑀲𑁆𑀲 𑀅𑀦𑀼𑀓𑀽𑀮𑀪𑀸𑀯𑁂𑀦 𑀕𑀘𑁆𑀙𑀢𑀻𑀢𑀺 𑀅𑀦𑀼𑀲𑁄𑀢𑀕𑀸𑀫𑀻. 𑀢𑀲𑁆𑀲𑁂𑀯 𑀧𑀝𑀺𑀓𑁆𑀓𑀽𑀮𑀯𑀲𑁂𑀦 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀤𑀻𑀳𑀺 𑀧𑀯𑀢𑁆𑀢𑀢𑀻𑀢𑀺 𑀧𑀝𑀺𑀲𑁄𑀢𑀕𑀸𑀫𑀻, 𑀅𑀘𑀮𑀧𑁆𑀧𑀲𑀸𑀤𑀸𑀤𑀺𑀲𑀫𑀦𑁆𑀦𑀸𑀕𑀫𑁂𑀦 𑀞𑀺𑀢𑀲𑀪𑀸𑀯𑁄𑀢𑀺 𑀅𑀢𑁆𑀣𑁄.

𑁧𑁧𑁦. ‘‘𑀧𑀮𑀩𑁆𑀪𑀢𑀺, 𑀦𑀺𑀔𑀚𑁆𑀚𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀉𑀧𑀲𑀕𑁆𑀕𑁄 𑀧𑀤𑀯𑀟𑁆𑀠𑀦𑀫𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀪𑀺𑀚𑀸𑀢𑀺𑀓𑁄𑀢𑀺 𑀚𑀸𑀢𑀺𑀬𑁄’’𑀢𑀺. 𑀓𑀡𑁆𑀳𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀯𑀸 𑀓𑀡𑁆𑀳𑁄. 𑀧𑀞𑀫𑀯𑀬𑁂𑀧𑀺 𑀫𑀚𑁆𑀛𑀺𑀫𑀯𑀬𑁂𑀧𑀺 𑀧𑀸𑀧𑀲𑀫𑀗𑁆𑀕𑀻 𑀳𑀼𑀢𑁆𑀯𑀸 𑀞𑀺𑀢𑁄 𑀓𑀡𑁆𑀳𑀥𑀫𑁆𑀫𑁂 𑀅𑀪𑀺𑀚𑀸𑀬𑀢𑀺, 𑀧𑀘𑁆𑀙𑀸𑀧𑀺 𑀧𑀸𑀧𑀁 𑀧𑀲𑀯𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀓𑁆𑀓𑁄𑀢𑀺 𑀯𑀸 𑀏𑀢𑁆𑀣 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁧𑁧. 𑀧𑀼𑀭𑀺𑀫𑀲𑁆𑀫𑀺𑀦𑁆𑀢𑀺 𑀧𑀼𑀭𑀺𑀫𑀲𑁆𑀫𑀺𑀁 𑀧𑀤𑁂. 𑀯𑀺𑀲𑀬𑁂 𑀪𑀼𑀫𑁆𑀫𑀁 𑀢𑀢𑁆𑀣 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀧𑀢𑀺𑀝𑁆𑀞𑀸𑀧𑀦𑀢𑁄. 𑀤𑀼𑀢𑀺𑀬𑁂 𑀅𑀥𑀺𑀓𑀭𑀡𑁂, 𑀢𑀤𑀥𑀺𑀓𑀭𑀡𑀜𑁆𑀳𑀺 𑀦𑀺𑀩𑁆𑀩𑀸𑀦𑀦𑁆𑀢𑀺. 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑁂𑀲𑀼 𑀯𑀸 𑀯𑀺𑀲𑀺𑀝𑁆𑀞𑀥𑀫𑁆𑀫𑀤𑀲𑁆𑀲𑀦𑀢𑁆𑀣𑀁 𑀧𑀘𑁆𑀘𑀬𑀤𑀸𑀦𑀸𑀭𑀳𑀢𑁆𑀢𑀸𑀦𑀁 𑀲𑀫𑀥𑀼𑀭𑀢𑀸𑀦𑀺𑀤𑁆𑀤𑁂𑀲𑁄. 𑀅𑀣 𑀯𑀸 𑀬𑁂𑀦 𑀬𑁂𑀦 𑀧𑀦 𑀯𑀢𑁆𑀣𑀼𑀦𑀸𑀢𑀺 𑀭𑀽𑀧𑀸𑀭𑀽𑀧𑀦𑀺𑀭𑁄𑀥𑀸𑀤𑀺𑀦𑀸 𑀢𑀡𑁆𑀳𑀸𑀯𑀢𑁆𑀣𑀼𑀦𑀸. 𑀅𑀫𑀭𑀸𑀯𑀺𑀓𑁆𑀔𑁂𑀧𑀯𑀢𑁆𑀣𑀼𑀆𑀤𑀺𑀦𑀸𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀲𑀼𑀪𑀲𑀼𑀔𑀸𑀤𑀺𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀯𑀢𑁆𑀣𑀼𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀣𑀸 𑀯𑀸 𑀢𑀡𑁆𑀳𑀸𑀤𑀺𑀝𑁆𑀞𑀺𑀤𑀼𑀘𑁆𑀘𑀭𑀺𑀢𑀸𑀦𑀁 𑀯𑀲𑁂𑀦 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀲𑁆𑀲 𑀲𑀼𑀢𑁆𑀢𑀲𑁆𑀲 𑀯𑀺𑀪𑀸𑀕𑁄, 𑀏𑀯𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼𑀘𑀭𑀺𑀢𑀯𑀲𑁂𑀦 𑀢𑀡𑁆𑀳𑀸𑀯𑁄𑀤𑀸𑀦𑀪𑀸𑀕𑀺𑀬𑀸𑀤𑀺𑀲𑀼𑀢𑁆𑀢𑀯𑀺𑀪𑀸𑀕𑁄𑀢𑀺 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 ‘‘𑀢𑀡𑁆𑀳𑀸…𑀧𑁂… 𑀦𑀺𑀤𑁆𑀤𑀺𑀲𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁.

𑀇𑀤𑀁 𑀏𑀯𑀁 𑀧𑀯𑀢𑁆𑀢𑀦𑁆𑀢𑀺 𑀬𑀣𑀸 𑀤𑀼𑀘𑀺𑀦𑁆𑀢𑀺𑀢𑀸𑀤𑀺𑀯𑀲𑁂𑀦 𑀩𑀸𑀮𑁄 𑀳𑁄𑀢𑀺 𑀧𑀼𑀕𑁆𑀕𑀮𑁄, 𑀏𑀯𑀁 𑀢𑀲𑁆𑀲 𑀤𑀼𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀺𑀢𑀸𑀤𑀺𑀪𑀸𑀯𑀦𑀸𑀯𑀲𑁂𑀦 𑀧𑀯𑀢𑁆𑀢𑀁 𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀦𑀸𑀫 𑀲𑀼𑀢𑁆𑀢𑀦𑁆𑀢𑀺 𑀧𑀼𑀩𑁆𑀩𑁂 𑀲𑀁𑀓𑀺𑀮𑁂𑀲𑀥𑀫𑁆𑀫𑀯𑀺𑀪𑀸𑀕𑁂𑀦 𑀯𑀼𑀢𑁆𑀢𑀁 𑀇𑀤𑀸𑀦𑀺 𑀲𑀸𑀫𑀜𑁆𑀜𑀢𑁄 𑀲𑀗𑁆𑀕𑀳𑁂𑀢𑁆𑀯𑀸 𑀯𑀤𑀢𑀺. 𑀇𑀤𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀦𑁆𑀢𑀺 𑀏𑀢𑁆𑀣𑀸𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀺𑀮𑁂𑀲𑀝𑁆𑀞𑀸𑀦𑁂𑀳𑀻𑀢𑀺 𑀓𑀺𑀮𑁂𑀲𑀸𑀦𑀁 𑀧𑀯𑀢𑁆𑀢𑀺𑀝𑁆𑀞𑀸𑀦𑁂𑀳𑀺. 𑀓𑀺𑀮𑁂𑀲𑀸𑀯𑀢𑁆𑀣𑀸𑀳𑀻𑀢𑀺 𑀓𑀺𑀮𑁂𑀲𑀸𑀦𑀁 𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀲𑁂𑀲𑁂𑀳𑀺. 𑀓𑀸𑀫𑀭𑀸𑀕𑀸𑀤𑀻𑀳𑀺 𑀲𑀁𑀬𑀼𑀚𑁆𑀚𑀢𑀺 𑀓𑀸𑀫𑀭𑀸𑀕𑀸𑀤𑀺𑀳𑁂𑀢𑀼 𑀓𑀫𑁆𑀫𑀯𑀺𑀧𑀸𑀓𑀸𑀤𑀺𑀦𑀸. 𑀲𑀢𑀺𑀧𑀺 𑀢𑁂𑀲𑀁 𑀓𑀸𑀮𑀦𑁆𑀢𑀭𑀯𑀼𑀢𑁆𑀢𑀺𑀬𑀁 𑀲𑀁𑀬𑀼𑀢𑁆𑀢𑁄 𑀦𑀸𑀫 𑀳𑁄𑀢𑀺, 𑀬𑀢𑁄 𑀓𑀸𑀫𑀭𑀸𑀕𑀸𑀤𑀬𑁄 ‘‘𑀲𑀁𑀬𑁄𑀚𑀦’’𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀉𑀧𑀸𑀤𑀺𑀬𑀢𑀻𑀢𑀺 𑀤𑀴𑁆𑀳𑀁 𑀕𑀡𑁆𑀳𑀸𑀢𑀺 𑀧𑀯𑀢𑁆𑀢𑁂𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀢𑁆𑀢𑀸, 𑀉𑀢𑁆𑀢𑀸𑀦𑀢𑁆𑀢𑀸 𑀘 𑀲𑀁𑀯𑀡𑁆𑀡𑀺𑀢𑀁.

𑁧𑁧𑁨. 𑀉𑀤𑀸𑀳𑀭𑀡𑀯𑀲𑁂𑀦𑀸𑀢𑀺 𑀦𑀺𑀤𑀲𑁆𑀲𑀦𑀯𑀲𑁂𑀦, 𑀏𑀓𑀤𑁂𑀲𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀓𑀮𑀲𑁆𑀲 𑀳𑀺 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀲𑁆𑀲 𑀲𑁄𑀴𑀲𑀳𑀺 𑀧𑀝𑁆𑀞𑀸𑀦𑀪𑀸𑀕𑁂𑀳𑀺 𑀕𑀳𑀺𑀢𑀢𑁆𑀢𑀸. 𑀬𑀣𑀸 𑀢𑀤𑁂𑀓𑀤𑁂𑀲𑀸𑀦𑀁 𑀲𑁄𑀴𑀲𑀦𑁆𑀦𑀫𑁆𑀧𑀺 𑀧𑀝𑁆𑀞𑀸𑀦𑀪𑀸𑀕𑀸𑀦𑀁 𑀕𑀳𑀡𑀁 𑀉𑀤𑀸𑀳𑀭𑀡𑀫𑀢𑁆𑀢𑀁, 𑀢𑁂𑀲𑀁 𑀧𑀦 𑀲𑁄𑀴𑀲𑀦𑁆𑀦𑀁 𑀏𑀓𑀤𑁂𑀲𑀕𑁆𑀕𑀳𑀡𑀁 𑀉𑀤𑀸𑀳𑀭𑀡𑀦𑁆𑀢𑀺 𑀓𑀺𑀫𑁂𑀢𑁆𑀣 𑀯𑀢𑁆𑀢𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀓𑀤𑁂𑀲𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀅𑀢𑁆𑀣𑁄’’𑀢𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀧𑀸𑀴𑀺𑀬𑀁 𑀧𑀝𑁆𑀞𑀸𑀦𑀲𑁆𑀲 𑀏𑀓𑀤𑁂𑀲𑁄𑀯 𑀉𑀤𑀸𑀳𑀝𑁄, 𑀦 𑀅𑀯𑀲𑁂𑀲𑁄𑀢𑀺? 𑀦𑀬𑀦𑀺𑀤𑀲𑁆𑀲𑀦𑀢𑁆𑀣𑀁. 𑀇𑀫𑀺𑀦𑀸 𑀦𑀬𑁂𑀦 𑀅𑀯𑀲𑁂𑀲𑁄𑀧𑀺 𑀧𑀝𑁆𑀞𑀸𑀦𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀢𑀢𑁆𑀣 ‘‘𑀅𑀧𑁆𑀧𑀫𑁆𑀧𑀺 𑀘𑁂 𑀲𑀁𑀳𑀺𑀢 𑀪𑀸𑀲𑀫𑀸𑀦𑁄…𑀧𑁂… 𑀲 𑀪𑀸𑀕𑀯𑀸 𑀲𑀸𑀫𑀜𑁆𑀜𑀲𑁆𑀲 𑀳𑁄𑀢𑀻’’𑀢𑀺 (𑀥. 𑀧. 𑁨𑁦) 𑀇𑀤𑀁 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘. 𑀏𑀢𑁆𑀣 𑀳𑀺 ‘‘𑀅𑀧𑁆𑀧𑀫𑁆𑀧𑀺 𑀘𑁂 𑀲𑀁𑀳𑀺𑀢 𑀪𑀸𑀲𑀫𑀸𑀦𑁄’’𑀢𑀺 𑀇𑀤𑀁 𑀯𑀸𑀲𑀦𑀸𑀪𑀸𑀕𑀺𑀬𑀁, ‘‘𑀲 𑀪𑀸𑀕𑀯𑀸 𑀲𑀸𑀫𑀜𑁆𑀜𑀲𑁆𑀲 𑀳𑁄𑀢𑀻’’𑀢𑀺 𑀇𑀤𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁.

𑀢𑀣𑀸 𑀫𑀖𑀤𑁂𑀯𑀲𑀼𑀢𑁆𑀢𑀁. 𑀢𑀢𑁆𑀣 𑀳𑀺 ‘‘𑀪𑀽𑀢𑀧𑀼𑀩𑁆𑀩𑀁, 𑀆𑀦𑀦𑁆𑀤, 𑀇𑀫𑀺𑀲𑁆𑀲𑀸𑀬𑁂𑀯 𑀫𑀺𑀣𑀺𑀮𑀸𑀬𑀁 𑀫𑀖𑀤𑁂𑀯𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀥𑀫𑁆𑀫𑁂 𑀞𑀺𑀢𑁄 𑀫𑀳𑀸𑀥𑀫𑁆𑀫𑀭𑀸𑀚𑀸, 𑀥𑀫𑁆𑀫𑀁 𑀘𑀭𑀢𑀺 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀲𑀼 𑀦𑁂𑀕𑀫𑁂𑀲𑀼 𑀘𑁂𑀯 𑀚𑀦𑀧𑀤𑁂𑀲𑀼 𑀘, 𑀉𑀧𑁄𑀲𑀣𑀜𑁆𑀘 𑀉𑀧𑀯𑀲𑀢𑀺 𑀘𑀸𑀢𑀼𑀤𑁆𑀤𑀲𑀺𑀁, 𑀧𑀜𑁆𑀘𑀤𑀲𑀺𑀁, 𑀅𑀝𑁆𑀞𑀫𑀺𑀜𑁆𑀘 𑀧𑀓𑁆𑀔𑀲𑁆𑀲𑀸’’𑀢𑀺𑀆𑀤𑀺 (𑀫. 𑀦𑀺. 𑁨.𑁩𑁦𑁮), 𑀇𑀤𑀁 𑀯𑀸𑀲𑀦𑀸𑀪𑀸𑀕𑀺𑀬𑀁. ‘‘𑀇𑀤𑀁 𑀔𑁄 𑀧𑀦𑀸𑀦𑀦𑁆𑀤, 𑀏𑀢𑀭𑀳𑀺 𑀫𑀬𑀸 𑀓𑀮𑁆𑀬𑀸𑀡𑀁 𑀯𑀢𑁆𑀢𑀁 𑀦𑀻𑀳𑀭𑀺𑀢𑀁 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺 (𑀫. 𑀦𑀺. 𑁩.𑁧𑁮𑁯) 𑀇𑀤𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁. ‘‘𑀧𑀫𑀸𑀤𑀁 𑀅𑀧𑁆𑀧𑀫𑀸𑀤𑁂𑀦, 𑀬𑀤𑀸 𑀦𑀼𑀤𑀢𑀺 𑀧𑀡𑁆𑀟𑀺𑀢𑁄’’𑀢𑀺 (𑀥. 𑀧. 𑁨𑁮) 𑀇𑀤𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁. ‘‘𑀧𑀜𑁆𑀜𑀸𑀧𑀸𑀲𑀸𑀤…𑀧𑁂… 𑀅𑀯𑁂𑀓𑁆𑀔𑀢𑀻’’𑀢𑀺 (𑀥. 𑀧. 𑁨𑁮) 𑀇𑀤𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀦𑁆𑀢𑀺 𑀇𑀤𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘.

𑀢𑀣𑀸 ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀇𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺 (𑀲𑀁. 𑀦𑀺. 𑁫.𑁪𑁯𑁩) 𑀲𑀼𑀢𑁆𑀢𑀁. 𑀢𑀢𑁆𑀣 ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀻𑀢𑀺? 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀇𑀤𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁, ‘‘𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 (𑀲𑀁. 𑀦𑀺. 𑁫.𑁪𑁯𑁩) 𑀇𑀤𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁.

𑀭𑀝𑁆𑀞𑀧𑀸𑀮𑀲𑀼𑀢𑁆𑀢𑀁 (𑀫. 𑀦𑀺. 𑁨.𑁨𑁯𑁩 𑀆𑀤𑀬𑁄) 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘. 𑀢𑀢𑁆𑀣 𑀳𑀺 ‘‘𑀊𑀦𑁄 𑀮𑁄𑀓𑁄 𑀅𑀢𑀺𑀢𑁆𑀢𑁄 𑀢𑀡𑁆𑀳𑀸𑀤𑀸𑀲𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁨.𑁩𑁦𑁬) 𑀲𑀁𑀓𑀺𑀮𑁂𑀲𑁄 𑀯𑀺𑀪𑀢𑁆𑀢𑁄, ‘‘𑀏𑀓𑁄 𑀯𑀽𑀧𑀓𑀝𑁆𑀞𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁨.𑁨𑁯𑁯) 𑀅𑀲𑁂𑀓𑁆𑀔𑀥𑀫𑁆𑀫𑀸, 𑀇𑀢𑀭𑁂𑀦 𑀯𑀸𑀲𑀦𑀸𑀥𑀫𑁆𑀫𑀸𑀢𑀺.

‘‘𑀥𑀫𑁆𑀫𑁂 𑀘 𑀬𑁂 𑀅𑀭𑀺𑀬𑀧𑀯𑁂𑀤𑀺𑀢𑁂 𑀭𑀢𑀸, 𑀅𑀦𑀼𑀢𑁆𑀢𑀭𑁄 𑀢𑁂 𑀯𑀘𑀲𑀸 𑀫𑀦𑀲𑀸 𑀓𑀫𑁆𑀫𑀼𑀦𑀸 𑀘;

𑀢𑁂 𑀲𑀦𑁆𑀢𑀺𑀲𑁄𑀭𑀘𑁆𑀘𑀲𑀫𑀸𑀥𑀺𑀲𑀡𑁆𑀞𑀺𑀢𑀸, 𑀲𑀼𑀢𑀲𑁆𑀲 𑀧𑀜𑁆𑀜𑀸𑀬 𑀘 𑀲𑀸𑀭𑀫𑀚𑁆𑀛𑀕𑀽’’𑀢𑀺. (𑀲𑀼. 𑀦𑀺. 𑁩𑁩𑁨);

𑀇𑀤𑀁 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘. 𑀏𑀢𑁆𑀣 𑀳𑀺 ‘‘𑀥𑀫𑁆𑀫𑁂 𑀘 𑀬𑁂 𑀅𑀭𑀺𑀬𑀧𑀯𑁂𑀤𑀺𑀢𑁂 𑀭𑀢𑀸’’𑀢𑀺 𑀅𑀬𑀁 𑀯𑀸𑀲𑀦𑀸, ‘‘𑀅𑀦𑀼𑀢𑁆𑀢𑀭𑀸…𑀧𑁂… 𑀲𑀡𑁆𑀞𑀺𑀢𑀸’’𑀢𑀺 𑀅𑀬𑀁 𑀦𑀺𑀩𑁆𑀩𑁂𑀥𑁄, ‘‘𑀲𑀼𑀢𑀲𑁆𑀲 𑀧𑀜𑁆𑀜𑀸𑀬 𑀘 𑀲𑀸𑀭𑀫𑀚𑁆𑀛𑀕𑀽’’𑀢𑀺 𑀅𑀲𑁂𑀓𑁆𑀔𑀥𑀫𑁆𑀫𑀸.

𑀢𑀣𑀸 ‘‘𑀲𑀤𑁆𑀥𑁄 𑀲𑀼𑀢𑀯𑀸 𑀦𑀺𑀬𑀸𑀫𑀤𑀲𑁆𑀲𑀻’’𑀢𑀺 𑀕𑀸𑀣𑀸 (𑀲𑀼. 𑀦𑀺. 𑁩𑁭𑁩). 𑀢𑀢𑁆𑀣 𑀳𑀺 ‘‘𑀲𑀤𑁆𑀥𑁄 𑀲𑀼𑀢𑀯𑀸’’𑀢𑀺 𑀯𑀸𑀲𑀦𑀸, ‘‘𑀦𑀺𑀬𑀸𑀫𑀤𑀲𑁆𑀲𑀻 𑀯𑀕𑁆𑀕𑀕𑀢𑁂𑀲𑀼 𑀦 𑀯𑀕𑁆𑀕𑀲𑀸𑀭𑀺 𑀥𑀻𑀭𑁄, 𑀮𑁄𑀪𑀁 𑀤𑁄𑀲𑀁 𑀯𑀺𑀦𑁂𑀬𑁆𑀬 𑀧𑀝𑀺𑀖’’𑀦𑁆𑀢𑀺 𑀦𑀺𑀩𑁆𑀩𑁂𑀥𑁄, ‘‘𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬𑀸’’𑀢𑀺 𑀅𑀲𑁂𑀓𑁆𑀔𑀥𑀫𑁆𑀫𑀸.

𑀲𑀩𑁆𑀩𑀸𑀲𑀯𑀲𑀁𑀯𑀭𑁄 𑀧𑀭𑀺𑀲𑁆𑀲𑀬𑀸𑀤𑀻𑀦𑀁 𑀯𑀲𑁂𑀦 𑀲𑀩𑁆𑀩𑀪𑀸𑀕𑀺𑀬𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀳𑀺 𑀲𑀁𑀓𑀺𑀮𑁂𑀲𑀥𑀫𑁆𑀫𑀸, 𑀮𑁄𑀓𑀺𑀬𑀲𑀼𑀘𑀭𑀺𑀢𑀥𑀫𑁆𑀫𑀸, 𑀲𑁂𑀓𑁆𑀔𑀥𑀫𑁆𑀫𑀸, 𑀅𑀲𑁂𑀓𑁆𑀔𑀥𑀫𑁆𑀫𑀸 𑀘 𑀯𑀺𑀪𑀢𑁆𑀢𑀸. 𑀅𑀲𑀩𑁆𑀩𑀪𑀸𑀕𑀺𑀬𑀁 𑀧𑀦 ‘‘𑀧𑀲𑁆𑀲𑀁 𑀧𑀲𑁆𑀲𑀢𑀻’’𑀢𑀺𑀆𑀤𑀺𑀓𑀁 (𑀫. 𑀦𑀺. 𑁧.𑁨𑁦𑁩) 𑀉𑀤𑀓𑀸𑀤𑀺𑀅𑀦𑀼𑀯𑀸𑀤𑀦𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀫𑁂𑀢𑀲𑁆𑀫𑀺𑀁 𑀲𑁄𑀴𑀲𑀯𑀺𑀥𑁂 𑀲𑀸𑀲𑀦𑀧𑀝𑁆𑀞𑀸𑀦𑁂 𑀏𑀢𑁂 𑀢𑀡𑁆𑀳𑀸𑀤𑀺𑀯𑀲𑁂𑀦 𑀢𑀬𑁄 𑀲𑀁𑀓𑀺𑀮𑁂𑀲𑀪𑀸𑀕𑀸, 𑀯𑁄𑀤𑀸𑀦𑀸𑀤𑀺𑀯𑀲𑁂𑀦 𑀢𑀬𑁄 𑀯𑀸𑀲𑀦𑀸𑀪𑀸𑀕𑀸, 𑀲𑁂𑀓𑁆𑀔𑀸𑀦𑀁 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀦𑀁 𑀯𑀲𑁂𑀦 𑀢𑀬𑁄 𑀦𑀺𑀩𑁆𑀩𑁂𑀥𑀪𑀸𑀕𑀸, 𑀅𑀲𑁂𑀓𑁆𑀔𑀸𑀦𑀁 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀦𑀁 𑀏𑀯 𑀯𑀲𑁂𑀦 𑀢𑀬𑁄 𑀅𑀲𑁂𑀓𑁆𑀔𑀪𑀸𑀕𑀸, 𑀢𑁂𑀲𑀁 𑀯𑀲𑁂𑀦 𑀫𑀽𑀮𑀧𑀝𑁆𑀞𑀸𑀦𑀸𑀦𑀺 𑀏𑀯 𑀤𑁆𑀯𑀸𑀤𑀲 𑀳𑁄𑀦𑁆𑀢𑀺. 𑀢𑀸𑀦𑀺 𑀧𑀦 𑀯𑀺𑀢𑁆𑀣𑀸𑀭𑀦𑀬𑁂𑀦 𑀯𑀺𑀪𑀚𑀺𑀬𑀫𑀸𑀦𑀸𑀦𑀺 𑀙𑀦𑁆𑀦𑀯𑀼𑀢𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. 𑀬𑀣𑀸𑀤𑀲𑁆𑀲𑀦𑀁 𑀧𑀦𑁂𑀢𑀸𑀦𑀺 𑀉𑀤𑁆𑀥𑀭𑀺𑀢𑀩𑁆𑀩𑀸𑀦𑀺. 𑀢𑀸𑀦𑀺 𑀧𑀦 𑀬𑀲𑁆𑀫𑀸 𑀲𑀗𑁆𑀕𑀳𑀢𑁄 𑀓𑀸𑀫𑀢𑀡𑁆𑀳𑀸𑀤𑀺𑀯𑀲𑁂𑀦 𑀢𑀬𑁄 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀪𑀸𑀕𑀸, 𑀲𑀲𑁆𑀲𑀢𑀼𑀘𑁆𑀙𑁂𑀤𑀯𑀲𑁂𑀦 𑀤𑁆𑀯𑁂 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑀪𑀸𑀕𑀸, 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀯𑀲𑁂𑀦 𑀢𑀬𑁄 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀪𑀸𑀕𑀸𑀢𑀺 𑀅𑀝𑁆𑀞 𑀲𑀁𑀓𑀺𑀮𑁂𑀲𑀪𑀸𑀕𑀸. 𑀥𑀫𑁆𑀫𑀸𑀫𑀺𑀲𑀸𑀪𑀬𑀤𑀸𑀦𑀯𑀲𑁂𑀦 𑀢𑀺𑀯𑀺𑀥𑀁 𑀤𑀸𑀦𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼, 𑀓𑀸𑀬𑀲𑀼𑀘𑀭𑀺𑀢𑀸𑀤𑀺𑀯𑀲𑁂𑀦 𑀢𑀺𑀯𑀺𑀥𑀁 𑀲𑀻𑀮𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼, 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀤𑀼𑀯𑀺𑀥𑀁 𑀪𑀸𑀯𑀦𑀸𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀢𑀺 𑀅𑀝𑁆𑀞𑁂𑀯 𑀯𑀸𑀲𑀦𑀸𑀪𑀸𑀕𑀸.

𑀲𑀤𑁆𑀥𑀸𑀦𑀼𑀲𑀸𑀭𑀻 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀥𑀫𑁆𑀫𑀸𑀦𑀼𑀲𑀸𑀭𑀻 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀓𑀸𑀬𑀲𑀓𑁆𑀔𑀻𑀢𑀺 (𑀧𑀼. 𑀧. 𑀫𑀸𑀢𑀺𑀓𑀸 𑁭.𑁩𑁨-𑁩𑁬; 𑀧𑀼. 𑀧. 𑁨𑁬-𑁩𑁦) 𑀧𑀜𑁆𑀘𑀦𑁆𑀦𑀁 𑀲𑁂𑀓𑁆𑀔𑀸𑀦𑀁 𑀧𑀘𑁆𑀘𑁂𑀓𑀁 𑀢𑀬𑁄 𑀲𑀻𑀮𑀸𑀤𑀺𑀓𑁆𑀔𑀦𑁆𑀥𑀸𑀢𑀺 𑀧𑀦𑁆𑀦𑀭𑀲 𑀦𑀺𑀩𑁆𑀩𑁂𑀥𑀪𑀸𑀕𑀸, 𑀲𑀼𑀜𑁆𑀜𑀢𑀸𑀦𑀺𑀫𑀺𑀢𑁆𑀢𑀸𑀧𑀡𑀺𑀳𑀺𑀢𑀪𑁂𑀤𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀸𑀦𑀁 𑀢𑀬𑁄 𑀅𑀕𑁆𑀕𑀨𑀮𑀥𑀫𑁆𑀫𑀸, 𑀢𑁂𑀲𑀼 𑀧𑀘𑁆𑀘𑁂𑀓𑀁 𑀢𑀬𑁄 𑀢𑀬𑁄 𑀲𑀻𑀮𑀸𑀤𑀺𑀓𑁆𑀔𑀦𑁆𑀥𑀸, 𑀢𑀣𑀸 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀸𑀦𑀦𑁆𑀢𑀺 𑀅𑀝𑁆𑀞𑀸𑀭𑀲, 𑀲𑀺𑀓𑁆𑀔𑀺𑀢𑀩𑁆𑀩𑀸𑀪𑀸𑀯𑀲𑀸𑀫𑀜𑁆𑀜𑁂𑀦 𑀅𑀲𑀗𑁆𑀔𑀢𑀥𑀸𑀢𑀼𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀽𑀦𑀯𑀻𑀲𑀢𑀺 𑀅𑀲𑁂𑀓𑁆𑀔𑀪𑀸𑀕𑀸, 𑀇𑀢𑀺 𑀧𑀼𑀭𑀺𑀫𑀸𑀦𑀺 𑀏𑀓𑀢𑀺𑀁𑀲, 𑀇𑀫𑀸𑀦𑀺 𑀏𑀓𑀽𑀦𑀯𑀻𑀲𑀢𑀻𑀢𑀺 𑀲𑀫𑀧𑀜𑁆𑀜𑀸𑀲 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀺𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀇𑀫𑁂𑀲𑀁 𑀲𑀫𑀧𑀜𑁆𑀜𑀸𑀲𑀸𑀬 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀺𑀥𑀫𑁆𑀫𑀸𑀦𑀁 𑀯𑀲𑁂𑀦 𑀲𑀫𑀧𑀜𑁆𑀜𑀸𑀲 𑀲𑀼𑀢𑁆𑀢𑀸𑀦𑀺 𑀳𑁄𑀦𑁆𑀢𑀺.

𑀬𑀲𑁆𑀫𑀸 𑀘 𑀢𑁂 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀸 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀅𑀲𑀗𑁆𑀔𑀢𑀸𑀬 𑀥𑀸𑀢𑀼𑀬𑀸 𑀅𑀕𑁆𑀕𑀳𑀡𑁂𑀦 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀅𑀲𑁂𑀓𑁆𑀔𑀪𑀸𑀕𑀸𑀪𑀸𑀯𑀢𑁄 𑀦𑀯𑁂𑀯 𑀅𑀲𑁂𑀓𑁆𑀔𑀪𑀸𑀕𑀸𑀢𑀺 𑀲𑀫𑀘𑀢𑁆𑀢𑀸𑀮𑀻𑀲 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀧𑁂𑀝𑀓𑁂 ‘‘𑀘𑀢𑁆𑀢𑀸𑀭𑀻𑀲𑀸𑀬 𑀆𑀓𑀸𑀭𑁂𑀳𑀺 𑀧𑀭𑀺𑀬𑁂𑀲𑀺𑀢𑀩𑁆𑀩𑀁, 𑀧𑀜𑁆𑀜𑀸𑀲𑀸𑀬 𑀆𑀓𑀸𑀭𑁂𑀳𑀺 𑀲𑀸𑀲𑀦𑀧𑀝𑁆𑀞𑀸𑀦𑀁 𑀦𑀺𑀤𑁆𑀤𑀺𑀝𑁆𑀞’’𑀦𑁆𑀢𑀺 (𑀧𑁂𑀝𑀓𑁄. 𑁨𑁧) 𑀘 𑀯𑀼𑀢𑁆𑀢𑀁. 𑀲𑀗𑁆𑀕𑀳𑀢𑁄 𑀏𑀯 𑀧𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀯𑀺𑀢𑁆𑀣𑀸𑀭𑀦𑀬𑁂𑀦 𑀲𑁄𑀴𑀲 𑀳𑁄𑀦𑁆𑀢𑀺, 𑀧𑀼𑀦 𑀢𑀺𑀯𑀺𑀥𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀺𑀯𑀲𑁂𑀦 𑀤𑁆𑀯𑀸𑀤𑀲 𑀳𑁄𑀦𑁆𑀢𑀺, 𑀧𑀼𑀦 𑀢𑀡𑁆𑀳𑀸𑀤𑀺𑀝𑁆𑀞𑀺𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀢𑀡𑁆𑀳𑀸𑀤𑀺𑀝𑁆𑀞𑀺𑀤𑀼𑀘𑁆𑀘𑀭𑀺𑀢𑀯𑁄𑀤𑀸𑀦𑀪𑀸𑀯𑁂𑀦 𑀙 𑀳𑁄𑀦𑁆𑀢𑀺, 𑀧𑀼𑀦 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀤𑀲𑁆𑀲𑀦𑀪𑀸𑀕𑀺𑀬𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀦𑁆𑀢𑀺 𑀧𑀜𑁆𑀘 𑀳𑁄𑀦𑁆𑀢𑀺, 𑀧𑀼𑀦 𑀫𑀽𑀮𑀧𑀝𑁆𑀞𑀸𑀦𑀯𑀲𑁂𑀦 𑀘𑀢𑁆𑀢𑀸𑀭𑀺 𑀳𑁄𑀦𑁆𑀢𑀺, 𑀧𑀼𑀣𑀼𑀚𑁆𑀚𑀦𑀪𑀸𑀕𑀺𑀬𑀲𑁂𑀓𑁆𑀔𑀪𑀸𑀕𑀺𑀬𑀅𑀲𑁂𑀓𑁆𑀔𑀪𑀸𑀕𑀺𑀬𑀪𑀸𑀯𑁂𑀦 𑀢𑀻𑀡𑀺 𑀳𑁄𑀦𑁆𑀢𑀺, 𑀧𑀼𑀦 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀯𑁄𑀤𑀸𑀦𑀪𑀸𑀕𑀺𑀬𑀪𑀸𑀯𑁂𑀦 𑀤𑁆𑀯𑁂 𑀏𑀯 𑀳𑁄𑀦𑁆𑀢𑀺. 𑀧𑀝𑁆𑀞𑀸𑀦𑀪𑀸𑀯𑁂𑀦 𑀧𑀦 𑀏𑀓𑀯𑀺𑀥𑀫𑁂𑀯, 𑀇𑀢𑀺 𑀧𑀝𑁆𑀞𑀸𑀦𑀪𑀸𑀯𑁂𑀦 𑀏𑀓𑀯𑀺𑀥𑀫𑁆𑀧𑀺 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀪𑀸𑀕𑀺𑀬𑀪𑀸𑀯𑁂𑀦 𑀤𑀼𑀯𑀺𑀥𑀦𑁆𑀢𑀺 𑀯𑀺𑀪𑀸𑀕𑀢𑁄 𑀬𑀸𑀯 𑀙𑀦𑁆𑀦𑀯𑀼𑀢𑀸𑀥𑀺𑀓𑀁 𑀘𑀢𑀼𑀲𑀳𑀲𑁆𑀲𑀧𑁆𑀧𑀪𑁂𑀤𑀁 𑀳𑁄𑀢𑀺, 𑀢𑀸𑀯 𑀦𑁂𑀢𑀩𑁆𑀩𑀁. 𑀏𑀯𑀫𑁂𑀢𑀁 𑀧𑀝𑁆𑀞𑀸𑀦𑀁 𑀲𑀗𑁆𑀕𑀳𑀢𑁄, 𑀯𑀺𑀪𑀸𑀕𑀢𑁄 𑀘 𑀯𑁂𑀤𑀺𑀢𑀩𑁆𑀩𑀁.

𑀇𑀫𑀲𑁆𑀲𑀸𑀧𑀺 𑀧𑀝𑁆𑀞𑀸𑀦𑀯𑀺𑀪𑀸𑀕𑀲𑁆𑀲, 𑀦 𑀧𑀼𑀭𑀺𑀫𑀲𑁆𑀲𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀮𑁄𑀓𑀺𑀓𑀁 𑀅𑀲𑁆𑀲𑀢𑁆𑀣𑀻𑀢𑀺, 𑀮𑁄𑀓𑀺𑀓𑀲𑀳𑀘𑀭𑀡𑀢𑁄 𑀯𑀸 𑀮𑁄𑀓𑀺𑀬𑀁, 𑀲𑀼𑀢𑁆𑀢𑀁 𑀧𑀤𑁂𑀲𑁂𑀦𑀸𑀢𑀺 𑀏𑀓𑀤𑁂𑀲𑁂𑀦. 𑀲𑀩𑁆𑀩𑀧𑀤𑁂𑀲𑀽𑀢𑀺 𑀢𑀁𑀢𑀁𑀢𑀺𑀓𑀸𑀦𑀁 𑀢𑀢𑀺𑀬𑀧𑀤𑁂𑀲𑀼. 𑀩𑀼𑀤𑁆𑀥𑀸𑀤𑀻𑀦𑀦𑁆𑀢𑀺 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑀸𑀦𑀁. 𑀥𑀫𑁆𑀫𑁄 𑀧𑀦𑁂𑀢𑁆𑀣 𑀩𑀼𑀤𑁆𑀥𑀸𑀤𑀺𑀕𑁆𑀕𑀳𑀡𑁂𑀦 𑀯𑁂𑀤𑀺𑀢𑀩𑁆𑀩𑁄, 𑀆𑀤𑀺𑀲𑀤𑁆𑀤𑁂𑀦 𑀯𑀸.

𑀧𑀭𑀺𑀡𑀫𑀢𑀻𑀢𑀺 𑀧𑀭𑀺𑀧𑀘𑁆𑀘𑀢𑀺. 𑀥𑀭𑀦𑁆𑀢𑀻𑀢𑀺 𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀺. 𑀦𑁆𑀢𑀺 𑀧𑀸𑀧𑀓𑀫𑁆𑀫𑀁. 𑀢𑁂𑀢𑀺 𑀓𑀼𑀲𑀮𑀸𑀪𑀺𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥𑀸. 𑀭𑀓𑁆𑀔𑀦𑁆𑀢𑀺 𑀯𑀺𑀧𑀸𑀓𑀤𑀸𑀦𑀢𑁄 𑀯𑀺𑀧𑀘𑁆𑀘𑀺𑀢𑀼𑀁 𑀑𑀓𑀸𑀲𑀁 𑀦 𑀤𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀘 𑀅𑀢𑁆𑀣𑁄 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑁂𑀲𑀼 𑀬𑀼𑀚𑁆𑀚𑀢𑀺, 𑀇𑀢𑀭𑀲𑁆𑀫𑀺𑀫𑁆𑀧𑀺 𑀬𑀣𑀸𑀭𑀳𑀁 𑀮𑀩𑁆𑀪𑀢𑁂𑀯. 𑀢𑁂𑀦𑀸𑀳 ‘‘𑀤𑀼𑀢𑀺𑀬𑁂 𑀯𑀸 𑀢𑀢𑀺𑀬𑁂 𑀯𑀸 𑀅𑀢𑁆𑀢𑀪𑀸𑀯𑁂’’𑀢𑀺.

𑁧𑁧𑁩. 𑀅𑀢𑁆𑀢𑀦𑁄 𑀅𑀦𑀯𑀚𑁆𑀚𑀲𑀼𑀔𑀸𑀯𑀳𑀁 𑀧𑀝𑀺𑀧𑀢𑁆𑀢𑀺𑀁 𑀧𑀝𑀺𑀧𑀚𑁆𑀚𑀦𑁆𑀢𑁄 𑀧𑀭𑀫𑀢𑁆𑀣𑀢𑁄 𑀅𑀢𑁆𑀢𑀓𑀸𑀫𑁄 𑀦𑀸𑀫𑀸𑀢𑀺 𑀆𑀳 ‘‘𑀅𑀢𑁆𑀢𑀦𑁄 𑀲𑀼𑀔𑀓𑀸𑀫𑁄’’𑀢𑀺. 𑀲𑀼𑀔𑀸𑀦𑀼𑀩𑀦𑁆𑀥𑀜𑁆𑀳𑀺 𑀲𑀼𑀔𑀁 𑀓𑀸𑀫𑁂𑀦𑁆𑀢𑁄 𑀲𑀼𑀔𑀫𑁂𑀯 𑀓𑀸𑀫𑁂𑀢𑀻𑀢𑀺 𑀘 𑀲𑀼𑀔𑀓𑀸𑀫𑁄𑀢𑀺.

𑀯𑀺𑀢𑁆𑀣𑀢𑀝𑁆𑀞𑁂𑀦𑀸𑀢𑀺 𑀲𑀼𑀯𑀺𑀧𑁆𑀨𑀸𑀭𑀤𑀺𑀝𑁆𑀞𑀻𑀦𑀁 𑀧𑀯𑀢𑁆𑀢𑀦𑀝𑁆𑀞𑀸𑀦𑀢𑀸𑀲𑀗𑁆𑀔𑀸𑀢𑁂𑀦 𑀯𑀺𑀢𑁆𑀣𑀸𑀭𑀝𑁆𑀞𑁂𑀦.

𑁧𑁧𑁪. 𑀤𑀺𑀝𑁆𑀞𑁂 𑀤𑀼𑀓𑁆𑀔𑀸𑀤𑀺𑀥𑀫𑁆𑀫𑁂𑀢𑀺 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑁂 𑀪𑀼𑀫𑁆𑀫𑀁, 𑀤𑀼𑀓𑁆𑀔𑀸𑀤𑀺𑀥𑀫𑁆𑀫𑁂 𑀤𑀺𑀝𑁆𑀞𑁂 𑀜𑀸𑀢𑁂𑀢𑀺 𑀅𑀢𑁆𑀣𑁄.

‘‘𑀉𑀤𑁆𑀥’’𑀦𑁆𑀢𑀺𑀆𑀤𑀺 𑀓𑀸𑀮𑀤𑁂𑀲𑀸𑀦𑀁 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀦𑁆𑀢𑀺 𑀆𑀳 ‘‘𑀉𑀤𑁆𑀥𑀦𑁆𑀢𑀺 𑀅𑀦𑀸𑀕𑀢𑀁, 𑀉𑀧𑀭𑀺 𑀘𑀸’’𑀢𑀺𑀆𑀤𑀺. 𑀕𑀫𑀦𑁂𑀦𑀸𑀢𑀺 𑀘𑀼𑀢𑀽𑀧𑀧𑀸𑀢𑀕𑀫𑀦𑁂𑀦.

𑁧𑁧𑁫. 𑀦𑀕𑀭𑀤𑁆𑀯𑀸𑀭𑀣𑀺𑀭𑀓𑀭𑀡𑀢𑁆𑀣𑀦𑁆𑀢𑀺 𑀦𑀕𑀭𑀲𑁆𑀲 𑀤𑁆𑀯𑀸𑀭𑀩𑀸𑀳𑀣𑀺𑀭𑀓𑀭𑀡𑀢𑁆𑀣𑀁. 𑀕𑀫𑁆𑀪𑀻𑀭𑀦𑁂𑀫𑀢𑀸𑀬𑀸𑀢𑀺 ‘‘𑀦𑁂𑀫𑀁’’𑀯𑀼𑀘𑁆𑀘𑀢𑀺 𑀦𑀺𑀔𑀸𑀢𑀣𑀫𑁆𑀪𑀸𑀤𑀻𑀦𑀁 𑀧𑀣𑀯𑀺𑀁 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀞𑀺𑀢𑀧𑁆𑀧𑀤𑁂𑀲𑁄, 𑀕𑀫𑁆𑀪𑀻𑀭𑀁 𑀦𑁂𑀫𑀁 𑀏𑀢𑀲𑁆𑀲𑀸𑀢𑀺 𑀕𑀫𑁆𑀪𑀻𑀭𑀦𑁂𑀫𑁄, 𑀢𑀲𑁆𑀲 𑀪𑀸𑀯𑁄 𑀕𑀫𑁆𑀪𑀻𑀭𑀦𑁂𑀫𑀢𑀸, 𑀢𑀸𑀬. 𑀓𑀫𑁆𑀧𑀦𑀁 𑀬𑀣𑀸𑀞𑀺𑀢𑀲𑁆𑀲 𑀇𑀢𑁄 𑀘𑀺𑀢𑁄 𑀘 𑀲𑀜𑁆𑀘𑁄𑀧𑀦𑀁, 𑀘𑀸𑀮𑀦𑀁 𑀞𑀺𑀢𑀝𑁆𑀞𑀸𑀦𑀢𑁄 𑀘𑀸𑀯𑀦𑀁. 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸𑀢𑀺 𑀅𑀯𑀺𑀧𑀭𑀻𑀢𑀲𑀪𑀸𑀯𑀸𑀪𑀺𑀲𑀫𑀬𑀯𑀲𑁂𑀦 𑀅𑀦𑀼𑀧𑀯𑀺𑀲𑀺𑀢𑁆𑀯𑀸, 𑀅𑀦𑀼𑀧𑀯𑀺𑀝𑁆𑀞𑁄 𑀯𑀺𑀬 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀲𑀁𑀬𑁄𑀚𑀦𑀸𑀦𑀁 𑀧𑀚𑀳𑀦𑀯𑀲𑁂𑀦𑀸𑀢𑀺 𑀕𑀸𑀣𑀸𑀬 𑀯𑀘𑀦𑀲𑁂𑀲𑀁 𑀆𑀦𑁂𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀅𑀣 𑀯𑀸 𑀧𑀳𑀸𑀢𑀩𑁆𑀩𑀲𑁆𑀲 𑀧𑀳𑀸𑀦𑁂𑀦 𑀯𑀺𑀦𑀸 𑀦 𑀪𑀸𑀯𑀦𑀸𑀲𑀺𑀤𑁆𑀥𑀻𑀢𑀺 𑀅𑀢𑁆𑀣𑀲𑀺𑀤𑁆𑀥𑀁 𑀧𑀳𑀸𑀢𑀩𑁆𑀩𑀧𑀳𑀸𑀦𑀁 𑀅𑀚𑁆𑀛𑀢𑁆𑀢𑀁, 𑀩𑀳𑀺𑀤𑁆𑀥𑀸𑀢𑀺 𑀧𑀤𑀤𑁆𑀯𑀬𑁂𑀦 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸𑀢𑀺 𑀑𑀭𑀫𑁆𑀪𑀸𑀕𑀺𑀬𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀁 𑀯𑀺𑀲𑀁𑀬𑁄𑀕𑀕𑀳𑀺𑀢𑁄𑀢𑀺 𑀇𑀫𑀫𑀢𑁆𑀣𑀁 𑀧𑀸𑀴𑀺𑀬𑀸 𑀲𑀫𑀢𑁆𑀣𑁂𑀢𑀼𑀁 ‘‘𑀢𑁂𑀦𑀸𑀳 𑀲𑀩𑁆𑀩𑀮𑁄𑀓𑁂’’𑀢𑀺 𑀯𑀼𑀢𑁆𑀢𑀁.

𑀅𑀮𑁄𑀪𑀲𑀻𑀲𑁂𑀦𑀸𑀢𑀺 𑀅𑀮𑁄𑀪𑁂𑀦 𑀧𑀼𑀩𑁆𑀩𑀗𑁆𑀕𑀫𑁂𑀦, 𑀬𑀢𑁄 𑀬𑁄𑀕𑀸𑀯𑀘𑀭𑁄 ‘‘𑀦𑁂𑀓𑁆𑀔𑀫𑁆𑀫𑀘𑁆𑀙𑀦𑁆𑀤𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀲𑀼𑀪𑀲𑀜𑁆𑀜𑀸 𑀭𑀸𑀕𑀧𑁆𑀧𑀝𑀺𑀧𑀓𑁆𑀔𑀢𑀸𑀬 ‘‘𑀯𑀺𑀲𑁂𑀲𑀢𑁄 𑀅𑀮𑁄𑀪𑀧𑁆𑀧𑀥𑀸𑀦𑀸’’𑀢𑀺 𑀯𑀼𑀢𑁆𑀢𑀸, 𑀤𑀲𑀸𑀲𑀼𑀪𑀯𑀲𑁂𑀦 𑀯𑀸. 𑀅𑀥𑀺𑀕𑀢𑀚𑁆𑀛𑀸𑀦𑀸𑀤𑀻𑀦𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀯𑀺𑀧𑀲𑁆𑀲𑀦𑀸𑀤𑀻𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀺𑀳𑀺𑀁𑀲𑀸𑀭𑀢𑀺𑀭𑀸𑀕𑀸𑀦𑀁 𑀩𑁆𑀬𑀸𑀧𑀸𑀤𑀳𑁂𑀢𑀼𑀓𑀢𑁄 𑀘𑀢𑁆𑀢𑀸𑀭𑁄𑀧𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑀸 𑀅𑀩𑁆𑀬𑀸𑀧𑀸𑀤𑀧𑀥𑀸𑀦𑀸𑀢𑀺 𑀆𑀳 ‘‘𑀘𑀢𑀼…𑀧𑁂… 𑀅𑀩𑁆𑀬𑀸𑀧𑀸𑀤𑁄 𑀥𑀫𑁆𑀫𑀧𑀤’’𑀦𑁆𑀢𑀺. 𑀅𑀥𑀺𑀕𑀢𑀸𑀦𑀺 𑀛𑀸𑀦𑀸𑀤𑀻𑀦𑀻𑀢𑀺 𑀬𑁄𑀚𑀦𑀸. 𑀤𑀲𑀸𑀦𑀼𑀲𑁆𑀲𑀢𑀺…𑀧𑁂… 𑀅𑀥𑀺𑀕𑀢𑀸𑀦𑀺 𑀲𑀫𑁆𑀫𑀸𑀲𑀢𑀺 𑀥𑀫𑁆𑀫𑀧𑀤𑀁 𑀲𑀢𑀺𑀲𑀻𑀲𑁂𑀦 𑀢𑁂𑀲𑀁 𑀅𑀥𑀺𑀕𑀦𑁆𑀢𑀩𑁆𑀩𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀦𑀸𑀧𑀸𑀦𑀪𑀸𑀯𑀦𑀸𑀬𑀁 𑀲𑀫𑀸𑀥𑀺𑀧𑀺 𑀧𑀥𑀸𑀦𑁄, 𑀦 𑀲𑀢𑀺 𑀏𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀤𑀲𑀓𑀲𑀺𑀡…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺 𑀥𑀫𑁆𑀫𑀧𑀤’’𑀦𑁆𑀢𑀺 𑀯𑀼𑀢𑁆𑀢𑀁. 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀯𑀲𑁂𑀦 𑀅𑀥𑀺𑀕𑀢𑀸𑀦𑀫𑁆𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑁧𑁧𑁬. 𑀉𑀧𑀮𑀓𑁆𑀔𑀡𑀓𑀸𑀭𑀡𑀸𑀦𑀻𑀢𑀺 𑀲𑀜𑁆𑀚𑀸𑀦𑀦𑀦𑀺𑀫𑀺𑀢𑁆𑀢𑀸𑀦𑀺.

𑀧𑀸𑀧𑀫𑁂𑀯 𑀧𑀸𑀧𑀺𑀬𑁄𑀢𑀺 𑀆𑀳 ‘‘𑀧𑀸𑀧𑀁 𑀳𑁄𑀢𑀻’’𑀢𑀺, ‘‘𑀧𑀸𑀧𑀺𑀬𑁄’’𑀢𑀺 𑀘 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀯𑀼𑀢𑁆𑀢𑀁. 𑀏𑀓𑀯𑀘𑀦𑁂 𑀩𑀳𑀼𑀯𑀘𑀦𑀦𑁆𑀢𑀺 𑀏𑀓𑀯𑀘𑀦𑁂 𑀯𑀢𑁆𑀢𑀩𑁆𑀩𑁂 𑀩𑀳𑀼𑀯𑀘𑀦𑀁 𑀯𑀼𑀢𑁆𑀢𑀁.

𑁧𑁧𑁭. 𑀑𑀮𑀻𑀬𑀦𑀢𑀡𑁆𑀳𑀸𑀪𑀺𑀦𑀺𑀯𑁂𑀲𑀯𑀲𑁂𑀦𑀸𑀢𑀺 𑀪𑀯𑀢𑀡𑁆𑀳𑀸𑀪𑀯𑀤𑀺𑀝𑁆𑀞𑀺𑀯𑀲𑁂𑀦. 𑀢𑀸 𑀳𑀺 𑀪𑀯𑁂𑀲𑀼 𑀲𑀢𑁆𑀢𑁂 𑀅𑀮𑁆𑀮𑀻𑀬𑀸𑀧𑁂𑀦𑁆𑀢𑀺. 𑀅𑀢𑀺𑀥𑀸𑀯𑀦𑀸𑀪𑀺𑀦𑀺𑀯𑁂𑀲𑀯𑀲𑁂𑀦𑀸𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀯𑀲𑁂𑀦. 𑀲𑀸 𑀳𑀺 𑀅𑀯𑀝𑁆𑀝𑀼𑀧𑀘𑁆𑀙𑁂𑀤𑀫𑁂𑀯 𑀯𑀝𑁆𑀝𑀼𑀧𑀘𑁆𑀙𑁂𑀤𑀁 𑀓𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀦𑀢𑁄 𑀅𑀢𑀺𑀥𑀸𑀯𑀦𑀸𑀪𑀺𑀦𑀺𑀯𑁂𑀲𑁄 𑀦𑀸𑀫. 𑀑𑀮𑀻𑀬𑀦𑁆𑀢𑀻𑀢𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀢𑁄 𑀲𑀗𑁆𑀓𑁄𑀘𑀁 𑀆𑀧𑀚𑁆𑀚𑀦𑁆𑀢𑀺. 𑀅𑀪𑀺𑀥𑀸𑀯𑀦𑁆𑀢𑀻𑀢𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀅𑀢𑀺𑀓𑁆𑀓𑀫𑀦𑁆𑀢𑀺.

𑀢𑁂𑀲𑀜𑁆𑀘𑀸𑀢𑀺 𑀢𑁂𑀲𑀁 𑀉𑀪𑀺𑀦𑁆𑀦𑀁 𑀅𑀪𑀺𑀦𑀺𑀯𑁂𑀲𑀸𑀦𑀁, 𑀢𑀤𑀜𑁆𑀜𑁂𑀲𑀜𑁆𑀘 𑀲𑀩𑁆𑀩𑀫𑀜𑁆𑀜𑀺𑀢𑀸𑀦𑀁.

𑁧𑁧𑁮. 𑀇𑀤𑀁 𑀇𑀝𑁆𑀞𑀯𑀺𑀧𑀸𑀓𑀁 𑀅𑀦𑀺𑀝𑁆𑀞𑀯𑀺𑀧𑀸𑀓𑀦𑁆𑀢𑀺 𑀇𑀤𑀁 𑀇𑀝𑁆𑀞𑀯𑀺𑀧𑀸𑀓𑀲𑀗𑁆𑀔𑀸𑀢𑀁 𑀅𑀦𑀺𑀝𑁆𑀞𑀯𑀺𑀧𑀸𑀓𑀲𑀗𑁆𑀔𑀸𑀢𑀁 𑀨𑀮𑀁.

‘‘𑀅𑀓𑀗𑁆𑀔𑀢𑁄 𑀦 𑀚𑀸𑀦𑁂𑀬𑁆𑀬𑀼’’𑀦𑁆𑀢𑀺 𑀏𑀢𑁂𑀦 ‘‘𑀆𑀓𑀗𑁆𑀔𑀢𑁄’’𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑀤𑀲𑁆𑀲𑀦𑀫𑀼𑀔𑁂𑀦 ‘‘𑀦 𑀚𑀜𑁆𑀜𑀸’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀦 𑀉𑀧𑀮𑀩𑁆𑀪𑀢𑀻𑀢𑀺 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑁧𑁨𑁦. 𑀢𑀸𑀦𑀻𑀢𑀺 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀕𑀢𑀺𑀦𑀺𑀫𑀺𑀢𑁆𑀢𑀸𑀦𑀺. 𑀧𑀢𑁆𑀣𑀭𑀡𑀸𑀓𑀸𑀭𑁄𑀬𑁂𑀯 𑀳𑁂𑀲, 𑀬𑀤𑀺𑀤𑀁 𑀙𑀸𑀬𑀸𑀦𑀁 𑀯𑁄𑀮𑀫𑁆𑀩𑀦𑀁. 𑀏𑀯𑀁 𑀳𑁄𑀢𑀻𑀢𑀺 ‘‘𑀅𑀓𑀢𑀁 𑀯𑀢 𑀫𑁂 𑀓𑀮𑁆𑀬𑀸𑀡’’𑀦𑁆𑀢𑀺𑀆𑀤𑀺𑀧𑁆𑀧𑀓𑀸𑀭𑁂𑀦 𑀯𑀺𑀧𑁆𑀧𑀝𑀺𑀲𑀸𑀭𑁄 𑀳𑁄𑀢𑀺.

𑁧𑁨𑁨. 𑀏𑀲𑀓𑁂𑀳𑀻𑀢𑀺 𑀕𑀯𑁂𑀲𑀓𑁂𑀳𑀺 𑀲𑀧𑀭𑀲𑀦𑁆𑀢𑀸𑀦𑁂 𑀲𑀫𑁆𑀧𑀸𑀤𑀓𑁂𑀳𑀺. 𑀤𑀼𑀓𑁆𑀔𑀼𑀤𑁆𑀭𑀬𑀦𑁆𑀢𑀺 𑀤𑀼𑀓𑁆𑀔𑀨𑀮𑀁. 𑀢𑀻𑀳𑀺 𑀓𑀸𑀭𑀡𑁂𑀳𑀻𑀢𑀺 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺. 𑀢𑀸𑀦𑀺 𑀳𑀺 𑀢𑀁𑀢𑀁𑀲𑀁𑀯𑀭𑀸𑀦𑀁 𑀤𑁆𑀯𑀸𑀭𑀪𑀸𑀯𑁂𑀦 𑀓𑀸𑀭𑀡𑀸𑀦𑀻𑀢𑀺 𑀯𑀼𑀢𑁆𑀢𑀸𑀦𑀺. 𑀢𑀻𑀳𑀺 𑀞𑀸𑀦𑁂𑀳𑀻𑀢𑀺 𑀯𑀸 𑀢𑀻𑀳𑀺 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑁂𑀳𑀺. 𑀧𑀺𑀳𑀺𑀢𑀦𑁆𑀢𑀺 𑀧𑀺𑀥𑀸𑀬𑀓𑀁.

‘‘𑀉𑀝𑁆𑀞𑀸𑀦𑀝𑁆𑀞𑀸𑀦𑀲𑀗𑁆𑀔𑀸𑀢’’𑀦𑁆𑀢𑀺 𑀇𑀤𑀁 𑀧𑀸𑀲𑀸𑀡𑀪𑀸𑀯𑀲𑀸𑀫𑀜𑁆𑀜𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁.

𑁧𑁨𑁩. 𑀭𑀚𑀫𑀺𑀲𑁆𑀲𑀓𑀦𑁆𑀢𑀺 𑀧𑀼𑀧𑁆𑀨𑀭𑀚𑀫𑀺𑀲𑁆𑀲𑀓𑀁. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀲𑁂𑀓𑁆𑀔𑀸𑀲𑁂𑀓𑁆𑀔𑀫𑀼𑀦𑀺𑀦𑁄. 𑀫𑀳𑀺𑀘𑁆𑀙𑀸𑀤𑀻𑀦𑀁 𑀯𑀺𑀬 𑀕𑀸𑀫𑁂 𑀘𑀭𑀡𑀧𑁆𑀧𑀘𑁆𑀘𑀬𑀸 𑀕𑀸𑀫𑀯𑀸𑀲𑀻𑀦𑀁 𑀲𑀤𑁆𑀥𑀸𑀳𑀸𑀦𑀺 𑀯𑀸 𑀪𑁄𑀕𑀳𑀸𑀦𑀺 𑀯𑀸 𑀦 𑀳𑁄𑀢𑀺, 𑀅𑀣 𑀔𑁄 𑀉𑀧𑀭𑀽𑀧𑀭𑀺 𑀯𑀼𑀤𑁆𑀥𑀺𑀬𑁂𑀯 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀸𑀓𑀢𑀺𑀓𑀫𑁂𑀯 𑀳𑁄𑀢𑀻’’𑀢𑀺 𑀆𑀳. 𑀅𑀚𑁆𑀛𑀢𑁆𑀢𑀺𑀓𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀁.

𑀢𑁂𑀦𑀸𑀢𑀺 𑀓𑀼𑀲𑀮𑁂𑀦 𑀓𑀸𑀬𑀯𑀘𑀻𑀓𑀫𑁆𑀫𑁂𑀦. 𑀣𑀺𑀭𑀪𑀸𑀯𑁄 𑀣𑀸𑀫𑀁 𑀦𑀸𑀫𑀸𑀢𑀺 𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀣𑀸𑀫𑀯𑀸𑀢𑀺 𑀞𑀺𑀢𑀺𑀫𑀸’’𑀢𑀺 𑀆𑀳.

𑀅𑀢𑁆𑀢𑀲𑀁𑀦𑀺𑀲𑁆𑀲𑀬𑀁 𑀧𑁂𑀫𑀁 𑀅𑀢𑁆𑀢𑀸𑀢𑀺 𑀕𑀳𑁂𑀢𑁆𑀯𑀸 ‘‘𑀅𑀢𑁆𑀢𑀲𑀫’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀢𑁆𑀢𑀧𑁂𑀫𑁂𑀦 𑀲𑀫𑀁 𑀧𑁂𑀫𑀁 𑀦𑀢𑁆𑀣𑀻’’𑀢𑀺. 𑀪𑀕𑀯𑀢𑁄 𑀯𑀺𑀧𑀲𑁆𑀲𑀦𑀸𑀜𑀸𑀡𑁄𑀪𑀸𑀲𑀧𑁆𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀜𑁆𑀜𑀸 𑀧𑀦…𑀧𑁂… 𑀲𑀓𑁆𑀓𑁄𑀢𑀻’’𑀢𑀺. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, 𑀧𑀦 𑀅𑀪𑀺𑀜𑁆𑀜𑀸𑀜𑀸𑀡𑀸𑀦𑀺 𑀘 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀁 𑀮𑁄𑀓𑀥𑀸𑀢𑀼𑀁 𑀑𑀪𑀸𑀲𑁂𑀦𑁆𑀢𑀺.

𑁧𑁨𑁪. 𑀓𑀺𑀲𑁆𑀲 𑀪𑀻𑀢𑀸𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀪𑀻𑀢𑀸.

𑀞𑀧𑁂𑀢𑁆𑀯𑀸𑀢𑀺 𑀧𑀯𑀢𑁆𑀢𑁂𑀢𑁆𑀯𑀸. 𑀯𑀘𑀦𑀻𑀬𑁄 𑀬𑀸𑀘𑀓𑀸𑀦𑀦𑁆𑀢𑀺 𑀬𑁄𑀚𑀦𑀸, 𑀬𑀸𑀘𑀺𑀢𑀩𑁆𑀩𑀬𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀬𑀜𑁆𑀜𑀉𑀧𑀓𑁆𑀔𑀭𑁄𑀢𑀺 𑀬𑀜𑁆𑀜𑁄𑀧𑀓𑀭𑀡𑀁. ‘‘𑀏𑀢𑁂𑀲𑀼 𑀥𑀫𑁆𑀫𑁂𑀲𑀼 𑀞𑀺𑀢𑁄 𑀘𑀢𑀽𑀲𑀽’’𑀢𑀺 𑀯𑀼𑀢𑁆𑀢𑀁 𑀘𑀢𑀼𑀓𑁆𑀓𑀁 𑀯𑀯𑀢𑁆𑀣𑀧𑁂𑀢𑀼𑀁 ‘‘𑀲𑀤𑁆𑀥𑁄𑀢𑀺 𑀏𑀓𑀁 𑀅𑀗𑁆𑀕’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀕𑀸𑀣𑀸𑀬𑀁 𑀯𑀼𑀢𑁆𑀢𑀥𑀫𑁆𑀫𑁂 𑀤𑁆𑀯𑁂 𑀤𑁆𑀯𑁂 𑀏𑀓𑀁 𑀓𑀢𑁆𑀯𑀸 𑀅𑀗𑁆𑀕𑀓𑀭𑀡𑀁 𑀤𑀼𑀓𑀦𑀬𑁄.

𑀚𑀸𑀢𑀺𑀥𑀫𑁆𑀫𑀦𑁆𑀢𑀺 𑀧𑀯𑀢𑁆𑀢𑀺𑀥𑀫𑁆𑀫𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑁧𑁨𑁫. 𑀲𑀘𑁆𑀘𑁂𑀓𑀤𑁂𑀲𑀢𑁄 𑀲𑀘𑁆𑀘𑀲𑀫𑀼𑀤𑀸𑀬𑁄 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀢𑁄 𑀯𑀺𑀲𑀺𑀝𑁆𑀞𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀭𑀫𑀢𑁆𑀣𑀲𑀘𑁆𑀘𑀁 𑀯𑀸 𑀳𑁄𑀢𑀽’’𑀢𑀺 𑀆𑀳. 𑀘𑀢𑀼𑀭𑁄 𑀧𑀤𑀸𑀢𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺, 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁, 𑀘𑀢𑁆𑀢𑀸𑀭𑁄 𑀥𑀫𑁆𑀫𑀓𑁄𑀝𑁆𑀞𑀸𑀲𑀸𑀢𑀺 𑀅𑀢𑁆𑀣𑁄. 𑀓𑁂𑀯𑀮𑀁 𑀲𑀢𑁆𑀢𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀫𑁂𑀯 𑀘𑀢𑀼𑀧𑀤𑀕𑁆𑀕𑀳𑀡𑀁, 𑀦 𑀅𑀥𑀺𑀕𑀢𑀥𑀫𑁆𑀫𑀸𑀦𑀼𑀭𑀽𑀧𑀢𑀸𑀬.

𑀦𑀺𑀫𑁆𑀫𑀤𑀸𑀢𑀺 𑀦 𑀫𑀤𑀸.

‘‘𑀲𑀘𑁆𑀘𑀯𑀸𑀤𑀻 𑀚𑀺𑀦𑁄 𑀭𑁄𑀫𑁄’’𑀢𑀺𑀧𑀺 𑀧𑀸𑀞𑁄. 𑀢𑀢𑁆𑀣 𑀭𑁄𑀫𑁄𑀢𑀺 𑀤𑀺𑀝𑁆𑀞𑀺𑀭𑀸𑀕𑀭𑀢𑁆𑀢𑀸𑀦𑀁 𑀢𑀺𑀢𑁆𑀣𑀺𑀬𑀸𑀦𑀁, 𑀢𑀺𑀢𑁆𑀣𑀓𑀭𑀸𑀦𑀜𑁆𑀘 𑀅𑀥𑀫𑁆𑀫𑀯𑀸𑀤𑀻𑀦𑀁 𑀭𑀸𑀕𑀯𑀺𑀧𑀭𑀻𑀢𑀥𑀫𑁆𑀫𑀤𑁂𑀲𑀦𑀢𑁄 𑀪𑀬𑀚𑀦𑀓𑁄, 𑀅𑀥𑀫𑁆𑀫𑀯𑀸𑀤𑀻𑀦𑀁 𑀯𑀸 𑀢𑀢𑁆𑀣 𑀆𑀤𑀻𑀦𑀯𑀤𑀲𑁆𑀲𑀦𑁂𑀦 𑀪𑀸𑀬𑀺𑀢𑀩𑁆𑀩𑁄, 𑀅𑀧𑁆𑀧𑀳𑀻𑀦𑀸𑀲𑀁𑀯𑀭𑀸𑀦𑀁 𑀯𑀸 𑀤𑀼𑀭𑀼𑀧𑀲𑀗𑁆𑀓𑀫𑀦𑀢𑁄 𑀤𑀼𑀭𑀸𑀲𑀤𑁄𑀢𑀺 𑀅𑀢𑁆𑀣𑁄.

𑀲𑀘𑁆𑀘𑁄 𑀘 𑀲𑁄 𑀥𑀫𑁆𑀫𑁄 𑀘𑀸𑀢𑀺 𑀲𑀘𑁆𑀘𑀥𑀫𑁆𑀫𑁄. 𑀢𑁂𑀦𑀸𑀳 ‘‘𑀏𑀓𑀦𑁆𑀢𑀦𑀺𑀲𑁆𑀲𑀭𑀡𑀪𑀸𑀯𑁂𑀦𑀸’’𑀢𑀺𑀆𑀤𑀺.

𑀏𑀓𑀸𑀬𑀦𑀪𑀸𑀯𑀦𑁆𑀢𑀺 𑀏𑀓𑀫𑀕𑁆𑀕𑀪𑀸𑀯𑀁, 𑀅𑀜𑁆𑀜𑀫𑀕𑁆𑀕𑀪𑀸𑀯𑀦𑁆𑀢𑀺 𑀅𑀢𑁆𑀣𑁄.

𑀤𑀲𑁆𑀲𑀦𑀪𑀸𑀕𑀺𑀬𑀁 𑀪𑀸𑀯𑀦𑀸𑀪𑀸𑀕𑀺𑀬𑀦𑁆𑀢𑀺 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀫𑁂𑀯 𑀤𑁆𑀯𑀺𑀥𑀸 𑀯𑀺𑀪𑀚𑀺𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀻𑀳𑀺 𑀘𑀢𑀽𑀳𑀺 𑀧𑀤𑁂𑀳𑀻’’𑀢𑀺. 𑀲𑁂𑀲𑀢𑁆𑀢𑀺𑀓𑀸𑀦𑀦𑁆𑀢𑀺 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀢𑁆𑀢𑀺𑀓𑀸𑀤𑀻𑀦𑀁 𑀅𑀝𑁆𑀞𑀦𑁆𑀦𑀁 𑀢𑀺𑀓𑀸𑀦𑀁. 𑀲𑁂𑀲𑀧𑀤𑀸𑀦𑀜𑁆𑀘𑀸𑀢𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘𑀸𑀢𑀺𑀆𑀤𑀺𑀫𑀺𑀲𑁆𑀲𑀓𑀧𑀤𑀸𑀦𑀜𑁆𑀘. 𑀘-𑀲𑀤𑁆𑀤𑁂𑀦 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀺𑀧𑀤𑀸𑀦𑀺 𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀮𑁄𑀓𑀺𑀬𑀢𑁆𑀢𑀺𑀓𑀲𑁆𑀲𑁂𑀯 𑀳𑀺 ‘‘𑀲𑁂𑀲𑀧𑀤𑀸𑀦𑀻’’𑀢𑀺 𑀯𑀼𑀢𑁆𑀢𑁂𑀳𑀺 𑀫𑀺𑀲𑁆𑀲𑀓𑀧𑀤𑁂𑀳𑀺 𑀏𑀯𑀁 𑀲𑀁𑀲𑀦𑁆𑀤𑀦𑁂 𑀦𑀬𑀤𑀲𑁆𑀲𑀦𑀁, 𑀇𑀢𑀭𑁂𑀲𑀁 𑀧𑀦 𑀢𑀺𑀓𑀸𑀦𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀺𑀧𑀤𑁂𑀳𑀺 𑀘𑁂𑀯 𑀲𑁂𑀲𑀧𑀤𑁂𑀳𑀺 𑀘 𑀲𑀁𑀲𑀦𑁆𑀤𑀦𑁂 𑀇𑀤𑀁 𑀦𑀬𑀤𑀲𑁆𑀲𑀦𑀦𑁆𑀢𑀺 ‘‘𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀫𑀢𑀺𑀓𑁆𑀓𑀫𑀦𑀦𑁆𑀢𑀺 𑀧𑀳𑀸𑀦𑀁. 𑀲𑀢𑀺𑀧𑀺 𑀯𑀸𑀲𑀦𑀸𑀪𑀸𑀕𑀺𑀬𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀥𑀫𑁆𑀫𑀸𑀦𑀁 𑀮𑁄𑀓𑀺𑀬𑀪𑀸𑀯𑁂 𑀧𑀼𑀭𑀺𑀫𑁂𑀳𑀺 𑀧𑀦 𑀧𑀘𑁆𑀙𑀺𑀫𑀸 𑀧𑀳𑀸𑀢𑀩𑁆𑀩𑀸 𑀢𑀤𑀗𑁆𑀕𑀯𑀲𑁂𑀦, 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀘. 𑀏𑀯𑀁 𑀧𑀚𑀳𑀦𑀲𑀫𑀢𑁆𑀣𑀢𑀸𑀬 𑀧𑀳𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀲𑁆𑀲 𑀲𑀫𑀢𑀺𑀓𑁆𑀓𑀫𑀸𑀬 𑀳𑁄𑀢𑀻’’𑀢𑀺. 𑀲𑀁𑀓𑀺𑀮𑁂𑀲𑀥𑀫𑁆𑀫𑀸𑀦𑀁 𑀲𑀫𑀢𑀺𑀓𑁆𑀓𑀫𑁂𑀦 𑀅𑀥𑀺𑀕𑀦𑁆𑀢𑀩𑁆𑀩𑀸 𑀯𑁄𑀤𑀸𑀦𑀥𑀫𑁆𑀫𑀸 𑀯𑀺𑀬𑀸𑀢𑀺 𑀬𑁄𑀚𑀦𑀸. 𑀪𑀸𑀯𑀦𑀸 𑀦𑀸𑀫 𑀢𑀺𑀯𑀺𑀥𑀸 𑀛𑀸𑀦𑀪𑀸𑀯𑀦𑀸, 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸, 𑀫𑀕𑁆𑀕𑀪𑀸𑀯𑀦𑀸𑀢𑀺. 𑀢𑀸𑀲𑀼 𑀫𑀕𑁆𑀕𑀪𑀸𑀯𑀦𑀸𑀬 𑀕𑀳𑀺𑀢𑀸𑀬 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸 𑀕𑀳𑀺𑀢𑀸 𑀏𑀯 𑀳𑁄𑀢𑀻𑀢𑀺 𑀢𑀁 𑀅𑀦𑀸𑀫𑀲𑀺𑀢𑁆𑀯𑀸 𑀇𑀢𑀭𑀸 𑀤𑁆𑀯𑁂 𑀏𑀯 𑀕𑀳𑀺𑀢𑀸. 𑀢𑀣𑀸𑀧𑀺 ‘‘𑀪𑀸𑀯𑀦𑀸𑀪𑀸𑀕𑀺𑀬𑀲𑁆𑀲 𑀲𑀼𑀢𑁆𑀢𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬𑀸’’𑀢𑀺 𑀯𑀼𑀢𑁆𑀢𑁂 𑀓𑀺𑀁 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀲𑁂𑀓𑁆𑀔𑀲𑁆𑀲 𑀛𑀸𑀦𑀪𑀸𑀯𑀦𑀸𑀧𑀺 𑀧𑀝𑀺𑀦𑀺𑀲𑁆𑀲𑀝𑁆𑀞𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀧𑀸𑀴𑀺𑀬𑀁 ‘‘𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀢𑁆𑀣’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀲𑁂𑀓𑁆𑀔𑀥𑀫𑁆𑀫𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀫𑀕𑁆𑀕𑀪𑀸𑀯𑀦𑀸𑀓𑀺𑀘𑁆𑀘𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 ‘‘𑀛𑀸𑀦𑀪𑀸𑀯𑀦𑀸𑀧𑀺 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀢𑁆𑀣𑀸 𑀏𑀯𑀸’’𑀢𑀺 𑀆𑀳.

𑀏𑀓𑀁 𑀏𑀯 𑀪𑀯𑀩𑀻𑀚𑀁 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁 𑀏𑀓𑀩𑀻𑀚𑀁, 𑀢𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀏𑀓𑀩𑀻𑀚𑀻. 𑀲𑀦𑁆𑀥𑀸𑀯𑀺𑀢𑁆𑀯𑀸 𑀲𑀫𑀸𑀕𑀦𑁆𑀢𑁆𑀯𑀸, 𑀦𑀺𑀩𑁆𑀩𑀢𑁆𑀢𑀦𑀯𑀲𑁂𑀦 𑀉𑀧𑀕𑀦𑁆𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀁𑀲𑀭𑀺𑀢𑁆𑀯𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀓𑀼𑀮𑀁 𑀓𑀼𑀮𑀁 𑀕𑀘𑁆𑀙𑀢𑀻𑀢𑀺 𑀓𑁄𑀮𑀁𑀓𑁄𑀮𑁄. 𑀧𑀼𑀭𑀺𑀫𑀧𑀤𑁂 𑀅𑀦𑀼𑀦𑀸𑀲𑀺𑀓𑀮𑁄𑀧𑀁 𑀅𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄.

𑀢𑁂𑀲𑀁 𑀲𑁄𑀢𑀸𑀧𑀦𑁆𑀦𑀸𑀦𑀁. 𑀏𑀢𑀁 𑀧𑀪𑁂𑀤𑀦𑁆𑀢𑀺 𑀏𑀓𑀩𑀻𑀚𑀺𑀆𑀤𑀺𑀯𑀺𑀪𑀸𑀕𑀁. 𑀧𑀼𑀭𑀺𑀫𑀪𑀯𑀲𑀺𑀤𑁆𑀥𑀁 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀧𑀼𑀜𑁆𑀜𑀓𑀫𑁆𑀫𑀁 𑀇𑀥 𑀧𑀼𑀩𑁆𑀩𑀳𑁂𑀢𑀼 𑀦𑀸𑀫. 𑀬𑁄 ‘‘𑀓𑀢𑀧𑀼𑀜𑁆𑀜𑀢𑀸’’𑀢𑀺 𑀯𑀼𑀘𑁆𑀘𑀢𑀺, 𑀲𑁄 𑀧𑀞𑀫𑀫𑀕𑁆𑀕𑁂 𑀲𑀸𑀥𑀺𑀢𑁂 𑀘𑀭𑀺𑀢𑀢𑁆𑀣𑀢𑀸𑀬 𑀯𑀺𑀧𑀓𑁆𑀓𑀯𑀺𑀧𑀸𑀓𑀁 𑀯𑀺𑀬 𑀓𑀫𑁆𑀫𑀁 𑀉𑀧𑀭𑀺𑀫𑀫𑀕𑁆𑀕𑀸𑀦𑀁 𑀉𑀧𑀦𑀺𑀲𑁆𑀲𑀬𑁄 𑀦 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀉𑀧𑀭𑀺…𑀧𑁂… 𑀆𑀧𑀚𑁆𑀚𑀢𑀻’’𑀢𑀺. 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀦𑀺𑀭𑀢𑁆𑀣𑀓𑀢𑀸 𑀆𑀧𑀚𑁆𑀚𑀢𑀺 𑀧𑀞𑀫𑀫𑀕𑁆𑀕𑁂𑀦𑁂𑀯 𑀢𑁂𑀳𑀺 𑀓𑀸𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀲𑀸𑀥𑀺𑀢𑀢𑁆𑀢𑀸. 𑀧𑀞𑀫𑀫𑀕𑁆𑀕𑁂…𑀧𑁂… 𑀆𑀧𑀚𑁆𑀚𑀢𑀻𑀢𑀺 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀅𑀢𑁆𑀣𑀓𑀺𑀭𑀺𑀬𑀸𑀲𑀫𑁆𑀪𑀯𑀢𑁄. 𑀏𑀯𑀁 𑀢𑀺𑀡𑁆𑀡𑀁 𑀯𑀸𑀤𑀸𑀦𑀁 𑀬𑀼𑀢𑁆𑀢𑀺𑀅𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀘𑀢𑀼𑀢𑁆𑀣𑀯𑀸𑀤𑁄 𑀏𑀯𑁂𑀢𑁆𑀣 𑀬𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀧𑀲𑁆𑀲𑀦𑀸…𑀧𑁂… 𑀬𑀼𑀚𑁆𑀚𑀢𑀻’’𑀢𑀺. ‘‘𑀲𑀘𑁂 𑀳𑀻’’𑀢𑀺𑀆𑀤𑀺𑀦𑀸 𑀢𑀁 𑀬𑀼𑀢𑁆𑀢𑀺𑀁 𑀯𑀺𑀪𑀸𑀯𑁂𑀢𑀺. 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀧𑀭𑀺𑀧𑀓𑁆𑀓𑀢𑀸𑀬 𑀇𑀦𑁆𑀤𑁆𑀭𑀺𑀬𑀸𑀦𑀁 𑀢𑀺𑀓𑁆𑀔𑀢𑀸𑀬 𑀜𑀸𑀡𑀲𑁆𑀲 𑀯𑀺𑀲𑀤𑀢𑀸𑀬 𑀯𑀺𑀧𑀲𑁆𑀲𑀦𑀸𑀬 𑀩𑀮𑀯𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀳𑀺 𑀯𑁄𑀫𑀺𑀲𑁆𑀲𑀓𑀦𑀬𑁂𑀦 𑀲𑀁𑀲𑀭𑀡𑀓𑁄 𑀇𑀥𑀸𑀥𑀺𑀧𑁆𑀧𑁂𑀢𑁄 ‘‘𑀤𑁂𑀯𑁂 𑀘𑁂𑀯 𑀫𑀸𑀦𑀼𑀲𑁂 𑀘 𑀲𑀦𑁆𑀥𑀸𑀯𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀇𑀥 𑀓𑀸𑀫𑀪𑀯𑁂 𑀞𑀺𑀢𑁄 𑀇𑀥𑀝𑁆𑀞𑀓𑁄. 𑀫𑀦𑀼𑀲𑁆𑀲𑀤𑁂𑀯𑀮𑁄𑀓𑀽𑀧𑀧𑀚𑁆𑀚𑀦𑀢𑁄 𑀑𑀓𑀸𑀭𑁂𑀦 𑀯𑁄𑀓𑀺𑀡𑁆𑀡𑁄. 𑀅𑀭𑀺𑀬𑀲𑀸𑀯𑀓𑀲𑁆𑀲 𑀢𑀁𑀢𑀁𑀲𑀢𑁆𑀢𑀦𑀺𑀓𑀸𑀬𑀼𑀧𑀧𑀢𑁆𑀢𑀺 𑀢𑀲𑁆𑀲 𑀢𑀲𑁆𑀲 𑀲𑁄𑀥𑀦𑀲𑀤𑀺𑀲𑀁 𑀓𑀺𑀮𑁂𑀲𑀫𑀮𑀸𑀤𑀺𑀅𑀦𑀢𑁆𑀣𑀸𑀧𑀦𑀬𑀦𑀢𑁄𑀢𑀺 𑀆𑀳 ‘‘𑀙 𑀤𑁂𑀯𑀮𑁄𑀓𑁂 𑀲𑁄𑀥𑁂𑀢𑁆𑀯𑀸’’𑀢𑀺. ‘‘𑀅𑀓𑀦𑀺𑀝𑁆𑀞𑁂 𑀞𑀢𑁆𑀯𑀸’’𑀢𑀺 𑀏𑀢𑁂𑀦 𑀳𑁂𑀝𑁆𑀞𑀸𑀩𑁆𑀭𑀳𑁆𑀫𑀮𑁄𑀓𑀲𑁄𑀥𑀦𑀁 𑀯𑀼𑀢𑁆𑀢𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀤𑁆𑀥𑀁 𑀥𑀼𑀭𑀁 𑀓𑀢𑁆𑀯𑀸𑀢𑀺 𑀲𑀤𑁆𑀥𑀁 𑀥𑀼𑀭𑀁 𑀚𑁂𑀝𑁆𑀞𑀓𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸. 𑀲𑀤𑁆𑀥𑀸𑀬 𑀅𑀦𑀼𑀲𑁆𑀲𑀢𑀺 𑀧𑀝𑀺𑀧𑀢𑁆𑀢𑀺, 𑀲𑀤𑁆𑀥𑀁 𑀯𑀸 𑀧𑀼𑀩𑁆𑀩𑀪𑀸𑀕𑀺𑀬𑀁 𑀅𑀦𑀼𑀲𑁆𑀲𑀢𑀺, 𑀲𑀤𑁆𑀥𑀸𑀬 𑀯𑀸 𑀅𑀦𑀼𑀲𑀭𑀡𑀲𑀻𑀮𑁄𑀢𑀺 𑀲𑀤𑁆𑀥𑀸𑀦𑀼𑀲𑀸𑀭𑀻. 𑀥𑀫𑁆𑀫𑀸𑀦𑀼𑀲𑀸𑀭𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀥𑀫𑁆𑀫𑁄𑀢𑀺 𑀧𑀦𑁂𑀢𑁆𑀣 𑀧𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀤𑁆𑀤𑀳𑀦𑁆𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄. 𑀬𑀤𑀺𑀧𑀺 𑀲𑀩𑁆𑀩𑀣𑀸 𑀅𑀯𑀺𑀫𑀼𑀢𑁆𑀢𑁄, 𑀲𑀤𑁆𑀥𑀸𑀫𑀢𑁆𑀢𑁂𑀦 𑀧𑀦 𑀯𑀺𑀫𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀲𑀤𑁆𑀥𑀸𑀬 𑀯𑀸 𑀅𑀥𑀺𑀫𑀼𑀢𑁆𑀢𑁄𑀢𑀺 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀉𑀧𑀭𑀺𑀫𑀕𑁆𑀕𑀯𑀺𑀧𑀲𑁆𑀲𑀦𑀸𑀬 𑀩𑀮𑀯𑀫𑀦𑁆𑀤𑀫𑀦𑁆𑀤𑀢𑀭𑀪𑀸𑀯𑁂𑀦. 𑀤𑀺𑀝𑁆𑀞𑀺𑀬𑀸 𑀧𑀢𑁆𑀢𑁄𑀢𑀺 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄, 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑀲𑀗𑁆𑀔𑀸𑀢𑀸𑀬 𑀤𑀺𑀝𑁆𑀞𑀺𑀬𑀸 𑀦𑀺𑀭𑁄𑀥𑀧𑁆𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀦𑁆𑀢𑀁 𑀯𑀸 𑀧𑀢𑁆𑀢𑁄𑀢𑀺 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄, 𑀤𑀲𑁆𑀲𑀦𑀲𑀗𑁆𑀔𑀸𑀢𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀧𑁆𑀧𑀯𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀞𑀫𑀨𑀮𑀢𑁄 𑀧𑀝𑁆𑀞𑀸𑀬 𑀳𑀺 𑀬𑀸𑀯 𑀅𑀕𑁆𑀕𑀫𑀕𑁆𑀕𑀸 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀸𑀢𑀺. 𑀇𑀤𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀲𑁄𑀢𑀸𑀧𑀦𑁆𑀦𑀸𑀦𑀁 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀢𑀸𑀯𑀘𑀦𑀁. 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀦𑁆𑀢𑀺 𑀘𑀢𑀲𑁆𑀲𑁄 𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀬𑁄, 𑀘𑀢𑀲𑁆𑀲𑁄 𑀅𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀬𑁄𑀢𑀺 𑀅𑀝𑁆𑀞 𑀯𑀺𑀫𑁄𑀓𑁆𑀔𑀸, 𑀢𑁂𑀲𑀁.

𑀨𑀼𑀝𑁆𑀞𑀦𑁆𑀢𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀓𑀸𑀬𑀲𑀓𑁆𑀔𑀻, 𑀨𑀼𑀝𑁆𑀞𑀸𑀦𑀁 𑀅𑀦𑁆𑀢𑁄 𑀨𑀼𑀝𑁆𑀞𑀦𑁆𑀢𑁄, 𑀨𑀼𑀝𑁆𑀞𑀸𑀦𑀁 𑀅𑀭𑀽𑀧𑀚𑁆𑀛𑀸𑀦𑀸𑀦𑀁 𑀅𑀦𑀦𑁆𑀢𑀭𑁄 𑀓𑀸𑀮𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁, 𑀨𑀼𑀝𑁆𑀞𑀸𑀦𑀦𑁆𑀢𑀭𑀓𑀸𑀮𑀫𑁂𑀯 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, ‘‘𑀯𑀺𑀲𑀫𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀯𑀢𑁆𑀢𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁭𑁦) 𑀯𑀺𑀬 𑀯𑀸 𑀪𑀸𑀯𑀦𑀧𑀼𑀁𑀲𑀓𑀦𑁆𑀢𑀺 𑀏𑀢𑀁 𑀤𑀝𑁆𑀞𑀩𑁆𑀩𑀁. 𑀬𑁄 𑀳𑀺 𑀅𑀭𑀽𑀧𑀚𑁆𑀛𑀸𑀦𑁂𑀦 𑀭𑀽𑀧𑀓𑀸𑀬𑀢𑁄, 𑀦𑀸𑀫𑀓𑀸𑀬𑁂𑀓𑀤𑁂𑀲𑀢𑁄 𑀘 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑁄, 𑀢𑁂𑀦 𑀦𑀺𑀭𑁄𑀥𑀲𑀗𑁆𑀔𑀸𑀢𑁄 𑀯𑀺𑀫𑁄𑀓𑁆𑀔𑁄 𑀆𑀮𑁄𑀘𑀺𑀢𑁄 𑀧𑀓𑀸𑀲𑀺𑀢𑁄 𑀯𑀺𑀬 𑀳𑁄𑀢𑀺, 𑀦 𑀓𑀸𑀬𑁂𑀦 𑀲𑀘𑁆𑀙𑀺𑀓𑀢𑁄, 𑀦𑀺𑀭𑁄𑀥𑀁 𑀧𑀦 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀏𑀓𑀘𑁆𑀘𑁂𑀲𑀼 𑀆𑀲𑀯𑁂𑀲𑀼 𑀔𑁂𑀧𑀺𑀢𑁂𑀲𑀼 𑀢𑁂𑀦 𑀲𑁄 𑀲𑀘𑁆𑀙𑀺𑀓𑀢𑁄 𑀳𑁄𑀢𑀺. 𑀢𑀲𑁆𑀫𑀸 𑀲𑁄 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀦𑀺𑀭𑁄𑀥𑀁 𑀬𑀣𑀸𑀆𑀮𑁄𑀘𑀺𑀢𑀁 𑀦𑀸𑀫𑀓𑀸𑀬𑁂𑀦 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 ‘‘𑀓𑀸𑀬𑀲𑀓𑁆𑀔𑀻’’𑀢𑀺 𑀯𑀼𑀘𑁆𑀘𑀢𑀺, 𑀦 𑀢𑀼 𑀯𑀺𑀫𑀼𑀢𑁆𑀢𑁄 𑀏𑀓𑀘𑁆𑀘𑀸𑀦𑀁 𑀏𑀯 𑀆𑀲𑀯𑀸𑀦𑀁 𑀅𑀧𑀭𑀺𑀓𑁆𑀔𑀻𑀡𑀢𑁆𑀢𑀸.

𑀅𑀪𑁂𑀤𑁂𑀦𑀸𑀢𑀺 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀆𑀤𑀺𑀪𑁂𑀤𑁂𑀦 𑀯𑀺𑀦𑀸. ‘‘𑀅𑀪𑁂𑀤𑁂𑀦𑀸’’𑀢𑀺 𑀘 𑀇𑀤𑀁 ‘‘𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀓𑀸𑀬𑀲𑀓𑁆𑀔𑀺𑀦𑁄’’𑀢𑀺 𑀇𑀥𑀸𑀧𑀺 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀬𑀣𑁂𑀯 𑀳𑀺 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀆𑀤𑀺𑀪𑁂𑀤𑀸𑀦𑀸𑀫𑀲𑀦𑁂𑀦𑁂𑀯 𑀏𑀓𑁄 𑀅𑀦𑀸𑀕𑀸𑀫𑀻 𑀳𑁄𑀢𑀺, 𑀏𑀯𑀁 𑀬𑀣𑀸𑀯𑀼𑀢𑁆𑀢𑀪𑁂𑀤𑀆𑀫𑀲𑀦𑁂𑀦𑁂𑀯 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄, 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄, 𑀓𑀸𑀬𑀲𑀓𑁆𑀔𑀻𑀢𑀺 𑀢𑀬𑁄 𑀅𑀦𑀸𑀕𑀸𑀫𑀺𑀦𑁄 𑀳𑁄𑀦𑁆𑀢𑀺. 𑀅𑀬𑀜𑁆𑀘 𑀅𑀦𑀸𑀕𑀸𑀫𑀺𑀦𑁄 𑀢𑀸𑀤𑀺𑀲𑀫𑀯𑀢𑁆𑀣𑀸𑀪𑁂𑀤𑀁 𑀕𑀳𑁂𑀢𑁆𑀯𑀸 𑀕𑀡𑀦𑀸 𑀓𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀅𑀯𑀺𑀳𑀸𑀤𑀻𑀲𑀽’’𑀢𑀺𑀆𑀤𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀧𑀜𑁆𑀜𑀸𑀬 𑀏𑀯 𑀯𑀺𑀫𑀼𑀢𑁆𑀢𑁄, 𑀦 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀪𑀽𑀢𑁂𑀦 𑀲𑀸𑀢𑀺𑀲𑀬𑁂𑀦 𑀲𑀫𑀸𑀥𑀺𑀦𑀸𑀧𑀻𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄. 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀢𑀺 𑀉𑀪𑁄𑀳𑀺 𑀪𑀸𑀕𑁂𑀳𑀺 𑀉𑀪𑀢𑁄𑀪𑀸𑀕𑀢𑁄 𑀯𑀺𑀫𑀼𑀢𑁆𑀢𑁄. 𑀓𑀺𑀮𑁂𑀲𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑀺𑀦𑁆𑀦𑁂𑀳𑀺 𑀭𑀽𑀧𑀓𑀸𑀬𑀦𑀸𑀫𑀓𑀸𑀬𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀓𑁆𑀔𑀫𑁆𑀪𑀦…𑀧𑁂… 𑀯𑀺𑀫𑀼𑀢𑁆𑀢𑁄 𑀦𑀸𑀫𑀸’’𑀢𑀺 𑀆𑀳. 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑀸 𑀭𑀽𑀧𑀓𑀸𑀬𑀢𑁄, 𑀅𑀕𑁆𑀕𑀫𑀕𑁆𑀕𑁂𑀦 𑀅𑀭𑀽𑀧𑀓𑀸𑀬𑀢𑁄 𑀯𑀺𑀫𑀼𑀢𑁆𑀢𑀁. 𑀬𑀣𑀸𑀳 𑁋

‘‘𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀬𑁂 𑀢𑁂 𑀲𑀦𑁆𑀢𑀸 𑀯𑀺𑀫𑁄𑀓𑁆𑀔𑀸 𑀅𑀢𑀺𑀓𑁆𑀓𑀫𑁆𑀫 𑀭𑀽𑀧𑁂 𑀆𑀭𑀼𑀧𑁆𑀧𑀸, 𑀢𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄’’𑀢𑀺 (𑀫. 𑀦𑀺. 𑁨.𑁧𑁮𑁨).

𑀬𑀁 𑀧𑀦 𑀫𑀳𑀸𑀦𑀺𑀤𑀸𑀦𑀲𑀼𑀢𑁆𑀢𑁂 ‘‘𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺𑀆𑀤𑀺𑀓𑁂 (𑀤𑀻. 𑀦𑀺. 𑁨.𑁧𑁨𑁯) 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀅𑀦𑁆𑀢𑁂 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀯𑀢𑁆𑀯𑀸 𑁋

‘‘𑀬𑀢𑁄 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀇𑀫𑁂 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀅𑀦𑀼𑀮𑁄𑀫𑀫𑁆𑀧𑀺 𑀲𑀫𑀸𑀧𑀚𑁆𑀚𑀢𑀺…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄, 𑀇𑀫𑀸𑀬 𑀘, 𑀆𑀦𑀦𑁆𑀤, 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀺𑀬𑀸 𑀅𑀜𑁆𑀜𑀸 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀺 𑀉𑀢𑁆𑀢𑀭𑀺𑀢𑀭𑀸 𑀯𑀸 𑀧𑀡𑀻𑀢𑀢𑀭𑀸 𑀯𑀸 𑀦𑀢𑁆𑀣𑀻’’𑀢𑀺 (𑀤𑀻. 𑀦𑀺. 𑁨.𑁧𑁩𑁦) 𑁋

𑀯𑀼𑀢𑁆𑀢𑀁, 𑀢𑀁 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀲𑁂𑀝𑁆𑀞𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀲𑁆𑀫𑀸 𑀆𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀻𑀲𑀼 𑀏𑀓𑀸𑀬𑀧𑀺 𑀭𑀽𑀧𑀓𑀸𑀬𑁄 𑀯𑀺𑀓𑁆𑀔𑀫𑁆𑀪𑀺𑀢𑁄 𑀏𑀯 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀘𑀢𑀼𑀦𑁆𑀦𑀁 𑀆𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀻𑀦𑀁, 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀘 𑀮𑀸𑀪𑀻𑀦𑀁 𑀯𑀲𑁂𑀦 𑀧𑀜𑁆𑀘 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀲 𑀦𑀬𑁄 𑀓𑀸𑀬𑀲𑀓𑁆𑀔𑀺𑀫𑁆𑀳𑀺𑀧𑀺. 𑀅𑀝𑁆𑀞𑀯𑀺𑀫𑁄𑀓𑁆𑀔𑁂𑀓𑀤𑁂𑀲𑁂𑀧𑀺 𑀳𑀺 𑀅𑀝𑁆𑀞𑀯𑀺𑀫𑁄𑀓𑁆𑀔𑀲𑀫𑀜𑁆𑀜𑀸 𑀬𑀣𑀸 ‘‘𑀮𑁄𑀓𑁂 𑀲𑀢𑁆𑀢𑀸’’𑀢𑀺.

𑀢𑁂𑀭𑀲𑀲𑀼 𑀲𑀻𑀲𑁂𑀲𑀼 𑀧𑀮𑀺𑀩𑁄𑀥𑀲𑀻𑀲𑀸𑀤𑀻𑀦𑀺, 𑀧𑀯𑀢𑁆𑀢𑀲𑀻𑀲𑀜𑁆𑀘 𑀧𑀭𑀺𑀬𑀸𑀤𑀺𑀬𑀺𑀢𑀩𑁆𑀩𑀸𑀦𑀺, 𑀅𑀥𑀺𑀫𑁄𑀓𑁆𑀔𑀲𑀻𑀲𑀸𑀤𑀻𑀦𑀺 𑀧𑀭𑀺𑀬𑀸𑀤𑀓𑀸𑀦𑀺, 𑀕𑁄𑀘𑀭𑀲𑀻𑀲𑀁 𑀧𑀭𑀺𑀬𑀸𑀤𑀓𑀨𑀮𑀁. 𑀢𑀜𑁆𑀳𑀺 𑀯𑀺𑀲𑀬𑀚𑁆𑀛𑀢𑁆𑀢𑀁 𑀨𑀮𑀁, 𑀯𑀺𑀫𑁄𑀓𑁆𑀔𑁄 𑀧𑀭𑀺𑀬𑀸𑀤𑀓𑀲𑁆𑀲 𑀫𑀕𑁆𑀕𑀲𑁆𑀲, 𑀨𑀮𑀲𑁆𑀲 𑀘 𑀆𑀭𑀫𑁆𑀫𑀡𑀁. 𑀲𑀗𑁆𑀔𑀸𑀭𑀲𑀻𑀲𑀁 𑀲𑀗𑁆𑀔𑀸𑀭𑀯𑀺𑀯𑁂𑀓𑀪𑀽𑀢𑁄 𑀦𑀺𑀭𑁄𑀥𑁄𑀢𑀺 𑀧𑀭𑀺𑀬𑀸𑀤𑀺𑀬𑀺𑀢𑀩𑁆𑀩𑀸𑀦𑀁, 𑀧𑀭𑀺𑀬𑀸𑀤𑀓𑀨𑀮𑀸𑀦𑀜𑁆𑀘 𑀲𑀳 𑀯𑀺𑀲𑀬𑀲𑀁𑀲𑀺𑀤𑁆𑀥𑀺𑀤𑀲𑁆𑀲𑀦𑁂𑀦 𑀲𑀫𑀲𑀻𑀲𑀺𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 (𑀧𑀝𑀺. 𑀫. 𑁧.𑁮𑁭) 𑀢𑁂𑀭𑀲 𑀲𑀻𑀲𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀇𑀥 𑀧𑀦 ‘‘𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀆𑀲𑀯𑀧𑀭𑀺𑀬𑀸𑀤𑀸𑀦𑀜𑁆𑀘 𑀳𑁄𑀢𑀺 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀜𑁆𑀘𑀸’’𑀢𑀺 (𑀧𑀼. 𑀧. 𑁧𑁬) 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀬𑀁 𑀆𑀕𑀢𑀢𑁆𑀢𑀸 𑀢𑁂𑀲𑀼 𑀓𑀺𑀮𑁂𑀲𑀧𑀯𑀢𑁆𑀢𑀲𑀻𑀲𑀸𑀦𑀁 𑀏𑀯 𑀯𑀲𑁂𑀦 𑀬𑁄𑀚𑀦𑀁 𑀓𑀭𑁄𑀦𑁆𑀢𑁄 ‘‘𑀓𑀺𑀮𑁂𑀲𑀲𑀻𑀲’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀯𑀢𑁆𑀢𑀲𑀻𑀲𑀫𑁆𑀧𑀺 𑀫𑀕𑁆𑀕𑁄 𑀧𑀯𑀢𑁆𑀢𑀺𑀢𑁄 𑀯𑀼𑀝𑁆𑀞𑀳𑀦𑁆𑀢𑁄 𑀘𑀼𑀢𑀺𑀢𑁄 𑀉𑀤𑁆𑀥𑀁 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑁂𑀦 𑀬𑀤𑀺𑀧𑀺 𑀧𑀭𑀺𑀬𑀸𑀤𑀺𑀬𑀢𑀺, 𑀬𑀸𑀯 𑀧𑀦 𑀘𑀼𑀢𑀺, 𑀢𑀸𑀯 𑀧𑀯𑀢𑁆𑀢𑀺𑀲𑀫𑁆𑀪𑀯𑀢𑁄 ‘‘𑀧𑀯𑀢𑁆𑀢𑀲𑀻𑀲𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀘𑀼𑀢𑀺𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀢𑀻’’𑀢𑀺 𑀆𑀳.

𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑁂𑀦 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀁 𑀯𑀺𑀬 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀸, 𑀧𑀘𑁆𑀘𑀯𑁂𑀓𑁆𑀔𑀡𑀯𑀸𑀭𑀸 𑀘 𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑀲𑁆𑀲𑁂𑀯 𑀯𑀸𑀭𑀸𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀦𑁆𑀢𑀺. ‘‘𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀻’’𑀢𑀺 (𑀫. 𑀦𑀺. 𑁧.𑁭𑁮; 𑀲𑀁. 𑀦𑀺. 𑁩.𑁧𑁨, 𑁧𑁪) 𑀳𑀺 𑀯𑀘𑀦𑀢𑁄 𑀧𑀘𑁆𑀘𑀯𑁂𑀓𑁆𑀔𑀡𑀧𑀭𑀺𑀲𑀫𑀸𑀧𑀦𑁂𑀦 𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑀁 𑀲𑀫𑀸𑀧𑀺𑀢𑀁 𑀦𑀸𑀫 𑀳𑁄𑀢𑀺. 𑀢𑀁 𑀧𑀦 𑀧𑀭𑀺𑀲𑀫𑀸𑀧𑀦𑀁 𑀬𑀤𑀺 𑀘𑀼𑀢𑀺𑀘𑀺𑀢𑁆𑀢𑁂𑀦 𑀳𑁄𑀢𑀺, 𑀢𑁂𑀦𑁂𑀯 𑀚𑀻𑀯𑀺𑀢𑀧𑀭𑀺𑀲𑀫𑀸𑀧𑀦𑀜𑁆𑀘 𑀳𑁄𑀢𑀻𑀢𑀺 𑀇𑀫𑀸𑀬 𑀯𑀸𑀭𑀘𑀼𑀢𑀺𑀲𑀫𑀢𑀸𑀬 𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸𑀦𑀁 𑀅𑀧𑀼𑀩𑁆𑀩𑀸𑀘𑀭𑀺𑀫𑀢𑀸 𑀳𑁄𑀢𑀻𑀢𑀺 𑀆𑀳 ‘‘𑀯𑀸𑀭𑀲𑀫𑀢𑀸𑀬𑀸’’𑀢𑀺. 𑀪𑀯𑀗𑁆𑀕𑀁 𑀑𑀢𑀭𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑁄𑀢𑀺 𑀏𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀦𑀘𑀺𑀢𑁆𑀢𑀫𑁂𑀯 𑀪𑀗𑁆𑀕𑁄𑀢𑁆𑀢𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀘𑀭𑀺𑀢𑀦𑁆𑀢𑀺 𑀘𑀭𑀺𑀢𑀸 𑀓𑀸𑀬𑀯𑀘𑀻𑀫𑀦𑀧𑁆𑀧𑀯𑀢𑁆𑀢𑀺. 𑀏𑀢𑁆𑀣 𑀘 𑀬𑁂𑀦 𑀭𑀸𑀕𑀸𑀥𑀺𑀓𑀪𑀸𑀯𑁂𑀦 𑀧𑀼𑀕𑁆𑀕𑀮𑁄 ‘‘𑀭𑀸𑀕𑀘𑀭𑀺𑀢𑁄’’𑀢𑀺 𑀮𑀓𑁆𑀔𑀻𑀬𑀢𑀺, 𑀢𑀬𑀺𑀤𑀁 𑀮𑀓𑁆𑀔𑀡𑀁. 𑀢𑁂𑀦𑀸𑀳 ‘‘𑀭𑀸𑀕𑀚𑁆𑀛𑀸𑀲𑀬𑁄 𑀭𑀸𑀕𑀸𑀥𑀺𑀓𑁄𑀢𑀺 𑀅𑀢𑁆𑀣𑁄’’𑀢𑀺, 𑀢𑁂𑀦 𑀅𑀧𑁆𑀧𑀳𑀻𑀦𑀪𑀸𑀯𑁂𑀦 𑀲𑀦𑁆𑀢𑀸𑀦𑁂 𑀣𑀸𑀫𑀕𑀢𑀲𑁆𑀲 𑀭𑀸𑀕𑀲𑁆𑀲 𑀩𑀮𑀪𑀸𑀯𑁄 𑀮𑀓𑁆𑀔𑀻𑀬𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼𑀧𑀺.

𑀲𑀻𑀮𑀯𑀦𑁆𑀢𑁂𑀳𑀻𑀢𑀺 𑀆𑀤𑀺𑀲𑀤𑁆𑀤𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀻𑀮𑀯𑀦𑁆𑀢𑀸𑀤𑀻𑀳𑀻’’𑀢𑀺. 𑀆𑀤𑀺𑀲𑀤𑁆𑀤𑁂𑀦 𑀤𑀸𑀬𑀓𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀆𑀭𑀫𑁆𑀫𑀡𑀪𑀽𑀢𑀸 𑀜𑁂𑀬𑁆𑀬𑀦𑁆𑀢𑀺 𑀆𑀭𑀫𑁆𑀫𑀡𑀪𑀽𑀢𑀸𑀯 𑀜𑁂𑀬𑁆𑀬𑀁.

𑀧𑀼𑀣𑀼𑀚𑁆𑀚𑀦𑀪𑀽𑀫𑀺𑀆𑀤𑀻𑀲𑀽𑀢𑀺 𑀧𑀼𑀣𑀼𑀚𑁆𑀚𑀦𑀲𑁂𑀓𑁆𑀔𑀸𑀲𑁂𑀓𑁆𑀔𑀪𑀽𑀫𑀻𑀲𑀼. 𑀢𑀢𑁆𑀣 𑀧𑀼𑀣𑀼𑀚𑁆𑀚𑀦𑀪𑀽𑀫𑀺𑀯𑀲𑁂𑀦 𑀲𑀁𑀯𑀭𑁄, 𑀲𑁂𑀓𑁆𑀔𑀪𑀽𑀫𑀺𑀯𑀲𑁂𑀦 𑀧𑀳𑀸𑀦𑀪𑀸𑀯𑀦𑀸, 𑀅𑀲𑁂𑀓𑁆𑀔𑀪𑀽𑀫𑀺𑀯𑀲𑁂𑀦 𑀲𑀘𑁆𑀙𑀺𑀓𑀺𑀭𑀺𑀬𑀸, 𑀧𑀼𑀣𑀼𑀚𑁆𑀚𑀦𑀪𑀽𑀫𑀺𑀲𑁂𑀓𑁆𑀔𑀪𑀽𑀫𑀺𑀯𑀲𑁂𑀦 𑀯𑀸 𑀬𑀣𑀸𑀭𑀳𑀁 𑀲𑀁𑀯𑀭𑀧𑀳𑀸𑀦𑀪𑀸𑀯𑀦𑀸. 𑀧𑀼𑀩𑁆𑀩𑀪𑀸𑀕𑀺𑀬𑀸 𑀳𑀺 𑀲𑀁𑀯𑀭𑀧𑀳𑀸𑀦𑀪𑀸𑀯𑀦𑀸 𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑀫𑁆𑀪𑀯𑀦𑁆𑀢𑀺, 𑀇𑀢𑀭𑀸 𑀲𑁂𑀓𑁆𑀔𑀲𑁆𑀲, 𑀅𑀲𑁂𑀓𑁆𑀔𑀪𑀽𑀫𑀺𑀯𑀲𑁂𑀦 𑀲𑀘𑁆𑀙𑀺𑀓𑀺𑀭𑀺𑀬𑀸. 𑀦𑀬𑀢𑁄 𑀤𑀲𑁆𑀲𑀺𑀢𑀦𑁆𑀢𑀺 ‘‘𑀬𑀁, 𑀪𑀺𑀓𑁆𑀔𑀯𑁂, 𑀫𑀬𑀸 ‘𑀇𑀤𑀁 𑀦 𑀓𑀧𑁆𑀧𑀢𑀻’𑀢𑀺 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑀁 𑀘𑁂 𑀓𑀧𑁆𑀧𑀺𑀬𑀁 𑀅𑀦𑀼𑀮𑁄𑀫𑁂𑀢𑀺, 𑀅𑀓𑀧𑁆𑀧𑀺𑀬𑀁 𑀧𑀝𑀺𑀩𑀸𑀳𑀢𑀺, 𑀢𑀁 𑀯𑁄 𑀓𑀧𑁆𑀧𑀢𑀻’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁩𑁦𑁫) 𑀦𑀬𑀤𑀲𑁆𑀲𑀦𑀯𑀲𑁂𑀦 𑀧𑀓𑀸𑀲𑀺𑀢𑀁. 𑀲𑀭𑀸𑀕𑀸𑀤𑀺𑀲𑀁𑀯𑀢𑁆𑀢𑀦𑀦𑁆𑀢𑀺 𑀲𑀭𑀸𑀕𑀸𑀤𑀺𑀪𑀸𑀯𑀸𑀬 𑀲𑀁𑀯𑀢𑁆𑀢𑀦𑀁.

𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀕𑁆𑀕𑀢𑁄𑀢𑀺 ‘‘𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘𑀸’’𑀢𑀺𑀆𑀤𑀺𑀦𑀸 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀻𑀦𑀁 𑀧𑀤𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑀁𑀲𑀕𑁆𑀕𑀢𑁄. 𑀅𑀦𑁂𑀓𑀯𑀺𑀥𑁄𑀢𑀺 𑀤𑁆𑀯𑀸𑀤𑀲𑀯𑀺𑀥𑁄 𑀬𑀸𑀯 𑀤𑁆𑀯𑀸𑀦𑀯𑀼𑀢𑀸𑀥𑀺𑀓𑀘𑀢𑀼𑀲𑀳𑀲𑁆𑀲𑀯𑀺𑀥𑁄𑀧𑀺 𑀅𑀦𑁂𑀓𑀧𑁆𑀧𑀓𑀸𑀭𑁄. 𑀮𑁄𑀓𑀺𑀬𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀸𑀤𑀺𑀲𑀁𑀲𑀕𑁆𑀕𑀢𑁄𑀢𑀺 𑀆𑀤𑀺𑀲𑀤𑁆𑀤𑁂𑀦 𑀮𑁄𑀓𑀺𑀬𑀁 𑀜𑀸𑀡𑀁, 𑀮𑁄𑀓𑀼𑀢𑁆𑀢𑀭𑀁 𑀜𑀸𑀡𑀁, 𑀮𑁄𑀓𑀺𑀬𑀜𑁆𑀘 𑀮𑁄𑀓𑀼𑀢𑁆𑀢𑀭𑀜𑁆𑀘 𑀜𑀸𑀡𑀁, 𑀮𑁄𑀓𑀺𑀬𑀁 𑀜𑁂𑀬𑁆𑀬𑀁, 𑀮𑁄𑀓𑀼𑀢𑁆𑀢𑀭𑀁 𑀜𑁂𑀬𑁆𑀬𑀁, 𑀮𑁄𑀓𑀺𑀬𑀜𑁆𑀘 𑀮𑁄𑀓𑀼𑀢𑁆𑀢𑀭𑀜𑁆𑀘 𑀜𑁂𑀬𑁆𑀬𑀁, 𑀮𑁄𑀓𑀺𑀬𑀁 𑀜𑀸𑀡𑀜𑁆𑀘 𑀜𑁂𑀬𑁆𑀬𑀜𑁆𑀘, 𑀮𑁄𑀓𑀼𑀢𑁆𑀢𑀭𑀁 𑀜𑀸𑀡𑀜𑁆𑀘 𑀜𑁂𑀬𑁆𑀬𑀜𑁆𑀘, 𑀮𑁄𑀓𑀺𑀬𑀜𑁆𑀘 𑀮𑁄𑀓𑀼𑀢𑁆𑀢𑀭𑀜𑁆𑀘 𑀜𑀸𑀡𑀜𑁆𑀘 𑀜𑁂𑀬𑁆𑀬𑀜𑁆𑀘𑀸𑀢𑀺𑀆𑀤𑀺𑀓𑁄 𑀲𑀫𑁆𑀪𑀯𑀦𑁆𑀢𑁄 𑀧𑀝𑁆𑀞𑀸𑀦𑀪𑁂𑀤𑁄 𑀲𑀗𑁆𑀕𑀳𑀺𑀢𑁄. 𑀉𑀪𑀬𑀢𑁆𑀣𑀸𑀢𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀺𑀓𑁂, 𑀮𑁄𑀓𑀺𑀬𑀸𑀤𑀺𑀓𑁂 𑀘. 𑀬𑀣𑀸𑀭𑀳𑀦𑁆𑀢𑀺 𑀬𑁄 𑀬𑁄 𑀲𑀁𑀲𑀕𑁆𑀕𑀯𑀲𑁂𑀦 𑀬𑁄𑀚𑀦𑀁 𑀅𑀭𑀳𑀢𑀺, 𑀲𑁄 𑀲𑁄 𑀥𑀫𑁆𑀫𑁄. 𑀲𑀫𑁆𑀪𑀯𑀸𑀯𑀺𑀭𑁄𑀥𑁂𑀦𑁂𑀯 𑀳𑀺 𑀬𑁄𑀚𑀦𑀸. 𑀦 𑀳𑀺 ‘‘𑀮𑁄𑀓𑀺𑀬𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬’’𑀦𑁆𑀢𑀺𑀆𑀤𑀺𑀦𑀸 𑀬𑁄𑀚𑀦𑀸 𑀲𑀫𑁆𑀪𑀯𑀢𑀺.

𑀢𑀻𑀲𑀼 𑀧𑀺𑀝𑀓𑁂𑀲𑀼 𑀮𑀩𑁆𑀪𑀫𑀸𑀦𑀲𑁆𑀲𑀸𑀢𑀺 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀆𑀭𑀼𑀴𑁆𑀳𑁂 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀉𑀧𑀮𑀩𑁆𑀪𑀫𑀸𑀦𑀲𑁆𑀲 𑀯𑀺𑀚𑁆𑀚𑀫𑀸𑀦𑀲𑁆𑀲, 𑀏𑀢𑁂𑀦 𑀦 𑀓𑁂𑀯𑀮𑀁 𑀲𑀗𑁆𑀕𑀳𑁄 𑀏𑀯 𑀬𑀣𑀸𑀯𑀼𑀢𑁆𑀢𑀪𑁂𑀤𑀸𑀦𑀁 𑀧𑀝𑁆𑀞𑀸𑀦𑀪𑀸𑀕𑀸𑀦𑀁 𑀦𑀺𑀤𑁆𑀥𑀸𑀭𑀡𑀸𑀬 𑀓𑀸𑀭𑀡𑀁, 𑀅𑀣 𑀔𑁄 𑀧𑀸𑀴𑀺𑀬𑀁 𑀤𑀲𑁆𑀲𑀦𑀜𑁆𑀘𑀸𑀢𑀺 𑀯𑀺𑀪𑀸𑀯𑁂𑀢𑀺. 𑀢𑁂𑀦𑀸𑀳 ‘‘𑀬𑀁 𑀤𑀺𑀲𑁆𑀲𑀢𑀺 𑀢𑀸𑀲𑀼 𑀢𑀸𑀲𑀼 𑀪𑀽𑀫𑀻𑀲𑀽’’𑀢𑀺. ‘‘𑀢𑁂𑀦𑁂𑀯 𑀳𑀻’’𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀸𑀞𑀸𑀦𑀼𑀕𑀫𑀁 𑀤𑀲𑁆𑀲𑁂𑀢𑀺.

𑀲𑀸𑀲𑀦𑀧𑀝𑁆𑀞𑀸𑀦𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀦𑀓𑀣𑀸𑀯𑀡𑁆𑀡𑀦𑀸

𑀲𑀤𑁆𑀥𑀫𑁆𑀫𑀸𑀯𑀢𑀭𑀝𑁆𑀞𑀸𑀦𑁂𑀢𑀺 𑀤𑁂𑀲𑀦𑁆𑀢𑀭𑀢𑁄 𑀆𑀕𑀦𑁆𑀢𑁆𑀯𑀸 𑀲𑀤𑁆𑀥𑀫𑁆𑀫𑀲𑁆𑀲 𑀅𑀯𑀢𑀭𑀡𑁄𑀓𑀸𑀲𑀪𑀽𑀢𑁂 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀥𑀸𑀭𑀡𑀧𑀭𑀺𑀘𑀬𑀧𑀭𑀺𑀧𑀼𑀘𑁆𑀙𑀸𑀫𑀦𑀲𑀺𑀓𑀸𑀭𑀩𑀳𑀼𑀮𑀸𑀦𑀁 𑀦𑀺𑀯𑀸𑀲𑀝𑁆𑀞𑀸𑀦𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁, 𑀅𑀢𑁆𑀢𑀦𑁄 𑀯𑀸 𑀲𑀦𑁆𑀢𑀸𑀦𑁂 𑀧𑀭𑀺𑀬𑀢𑁆𑀢𑀺𑀲𑀤𑁆𑀥𑀫𑁆𑀫𑀲𑁆𑀲 𑀅𑀦𑀼𑀧𑁆𑀧𑀯𑁂𑀲𑀦𑀝𑁆𑀞𑀸𑀦𑀢𑀸𑀬 𑀏𑀯𑀁 𑀯𑀼𑀢𑁆𑀢𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀦𑁂𑀢𑁆𑀢𑀺𑀅𑀝𑁆𑀞𑀓𑀣𑀸𑀬 𑀮𑀻𑀦𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑁂𑀢𑁆𑀢𑀺𑀧𑁆𑀧𑀓𑀭𑀡-𑀝𑀻𑀓𑀸 𑀦𑀺𑀝𑁆𑀞𑀺𑀢𑀸.