𑁪. 𑀧𑀝𑀺𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁧. 𑀤𑁂𑀲𑀦𑀸𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁫. 𑀅𑀦𑁆𑀯𑀢𑁆𑀣𑀲𑀜𑁆𑀜𑀢𑀦𑁆𑀢𑀺 𑀅𑀢𑁆𑀣𑀸𑀦𑀼𑀕𑀢𑀲𑀜𑁆𑀜𑀪𑀸𑀯𑀁, ‘‘𑀤𑁂𑀲𑀦𑀸𑀳𑀸𑀭𑁄’’𑀢𑀺 𑀅𑀬𑀁 𑀲𑀜𑁆𑀜𑀸 𑀅𑀦𑁆𑀯𑀢𑁆𑀣𑀸 𑀅𑀢𑁆𑀣𑀸𑀦𑀼𑀕𑀢𑀸𑀢𑀺 𑀅𑀢𑁆𑀣𑁄.

𑀅𑀯𑀼𑀢𑁆𑀢𑀫𑁂𑀯𑀸𑀢𑀺 𑀧𑀼𑀩𑁆𑀩𑁂 𑀅𑀲𑀁𑀯𑀡𑁆𑀡𑀺𑀢𑀧𑀤𑀫𑁂𑀯. ‘‘𑀥𑀫𑁆𑀫𑀁 𑀯𑁄’’𑀢𑀺𑀆𑀤𑀺 (𑀫. 𑀦𑀺. 𑁩.𑁪𑁨𑁦) 𑀯𑀘𑀦𑀲𑁆𑀲 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀢𑁆𑀣 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀧𑀺𑀝𑀓𑀲𑁆𑀲 𑀳𑀺 𑀩𑀼𑀤𑁆𑀥𑀯𑀘𑀦𑀲𑁆𑀲 𑀲𑀁𑀯𑀡𑁆𑀡𑀦𑀸𑀮𑀓𑁆𑀔𑀡𑀁 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀁, 𑀢𑀜𑁆𑀘 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑀗𑁆𑀕𑀸𑀳𑀓𑁂 𑀲𑀼𑀢𑁆𑀢𑀧𑀤𑁂 𑀲𑀁𑀯𑀡𑁆𑀡𑁂𑀢𑀩𑁆𑀩𑀪𑀸𑀯𑁂𑀦 𑀕𑀳𑀺𑀢𑁂 𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀢𑁂𑀦𑀸𑀳 ‘‘𑀤𑁂𑀲𑀦𑀸𑀳𑀸𑀭𑁂𑀦…𑀧𑁂… 𑀤𑀲𑁆𑀲𑁂𑀢𑀻’’𑀢𑀺.

𑀬𑁂𑀲𑀁 𑀅𑀲𑁆𑀲𑀸𑀤𑀸𑀤𑀻𑀦𑀁 𑀯𑀺𑀪𑀚𑀦𑀮𑀓𑁆𑀔𑀡𑁄 𑀤𑁂𑀲𑀦𑀸𑀳𑀸𑀭𑁄, 𑀢𑁂 𑀕𑀸𑀣𑀸𑀬, 𑀇𑀥𑀸𑀧𑀺 𑀘 𑀆𑀕𑀢𑁂 ‘‘𑀅𑀲𑁆𑀲𑀸𑀤𑀁 𑀆𑀤𑀻𑀦𑀯’’𑀦𑁆𑀢𑀺𑀆𑀤𑀺𑀦𑀸 𑀉𑀤𑀸𑀳𑀭𑀡𑀯𑀲𑁂𑀦 𑀯𑀺𑀪𑀚𑀺𑀢𑀼𑀁 ‘‘𑀢𑀢𑁆𑀣 𑀓𑀢𑀫𑁄 𑀅𑀲𑁆𑀲𑀸𑀤𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 ‘‘𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸’’𑀢𑀺 𑀕𑀸𑀣𑀸𑀬𑀁 𑀯𑀼𑀢𑁆𑀢𑁄 𑀓𑀢𑀫𑁄 𑀅𑀲𑁆𑀲𑀸𑀤𑁄. 𑀅𑀣 𑀯𑀸 ‘‘𑀅𑀲𑁆𑀲𑀸𑀤𑀁 𑀆𑀤𑀻𑀦𑀯’’𑀦𑁆𑀢𑀺𑀆𑀤𑀺𑀦𑀸 𑀬𑁄 𑀇𑀥 𑀅𑀲𑁆𑀲𑀸𑀤𑀸𑀤𑀻𑀦𑀁 𑀉𑀤𑁆𑀤𑁂𑀲𑁄, 𑀢𑀢𑁆𑀣 𑀓𑀢𑀫𑁄 𑀅𑀲𑁆𑀲𑀸𑀤𑁄𑀢𑀺 𑀘𑁂𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀓𑀫𑁆𑀫𑀓𑀭𑀡𑀢𑁆𑀣𑀪𑀺𑀦𑁆𑀦𑀲𑁆𑀲 𑀯𑀺𑀲𑀬𑀯𑀺𑀲𑀬𑀺𑀢𑀸𑀮𑀓𑁆𑀔𑀡𑀲𑁆𑀲 𑀅𑀲𑁆𑀲𑀸𑀤𑀤𑁆𑀯𑀬𑀲𑁆𑀲 𑀦𑀺𑀤𑀲𑁆𑀲𑀦𑀢𑁆𑀣𑀁 𑀕𑀸𑀣𑀸𑀤𑁆𑀯𑀬𑀼𑀤𑀸𑀳𑀭𑀡𑀁, 𑀢𑀣𑀸 𑀓𑀸𑀫𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀲𑁆𑀲, 𑀯𑀝𑁆𑀝𑀤𑀼𑀓𑁆𑀔𑀮𑀓𑁆𑀔𑀡𑀲𑁆𑀲 𑀘𑀸𑀢𑀺 𑀤𑀼𑀯𑀺𑀥𑀲𑁆𑀲𑀸𑀧𑀺 𑀆𑀤𑀻𑀦𑀯𑀲𑁆𑀲 𑀦𑀺𑀤𑀲𑁆𑀲𑀦𑀢𑁆𑀣𑀁 ‘‘𑀅𑀭𑀺𑀬𑀫𑀕𑁆𑀕𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀤𑀼𑀯𑀺𑀥𑀲𑁆𑀲𑀸𑀧𑀺 𑀦𑀺𑀲𑁆𑀲𑀭𑀡𑀲𑁆𑀲 𑀦𑀺𑀤𑀲𑁆𑀲𑀦𑀦𑀺𑀤𑀲𑁆𑀲𑀦𑀢𑁆𑀣𑀜𑁆𑀘 𑀤𑁆𑀯𑁂 𑀤𑁆𑀯𑁂 𑀕𑀸𑀣𑀸 𑀉𑀤𑀸𑀳𑀝𑀸.

𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺𑀦𑁆𑀢𑀺 (𑀚𑀸. 𑁧.𑁧𑁦.𑁧𑁦𑁨-𑁧𑁦𑁩; 𑀦𑁂𑀢𑁆𑀢𑀺. 𑁫, 𑁨𑁬, 𑁩𑁧; 𑀧𑁂𑀝𑀓𑁄. 𑁨𑁨) 𑀏𑀢𑁆𑀣 𑀥𑀫𑁆𑀫𑀘𑀸𑀭𑀺𑀦𑁄 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑁂𑀳𑀺 𑀲𑀸𑀢𑀺𑀲𑀬𑀸𑀭𑀓𑁆𑀔𑀸 𑀲𑀫𑁆𑀪𑀯𑀢𑀺, 𑀲𑀫𑁆𑀧𑀢𑁆𑀢𑀺𑀪𑀯𑀲𑁆𑀲𑀸𑀧𑀺 𑀯𑀺𑀧𑀭𑀺𑀡𑀸𑀫𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀳𑀺 𑀤𑀼𑀕𑁆𑀕𑀢𑀺𑀪𑀸𑀯𑁄 𑀇𑀘𑁆𑀙𑀺𑀢𑁄𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀦𑀺𑀲𑁆𑀲𑀭𑀡𑀁 𑀅𑀦𑀸𑀫𑀲𑀺𑀢𑁆𑀯𑀸’’𑀢𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀦𑀺𑀩𑁆𑀩𑀸𑀦𑀁 𑀯𑀸 𑀉𑀧𑀦𑀺𑀥𑀸𑀬 𑀲𑀩𑁆𑀩𑀸 𑀉𑀧𑀧𑀢𑁆𑀢𑀺𑀬𑁄 𑀤𑀼𑀕𑁆𑀕𑀢𑀻’’𑀢𑀺.

𑀅𑀯𑁂𑀓𑁆𑀔𑀲𑁆𑀲𑀽𑀢𑀺 𑀯𑀺𑀥𑀸𑀦𑀁. 𑀢𑀲𑁆𑀲𑀸 𑀧𑀦 𑀅𑀯𑁂𑀓𑁆𑀔𑀸𑀬 𑀧𑀯𑀢𑁆𑀢𑀺𑀆𑀓𑀸𑀭𑁄, 𑀯𑀺𑀲𑀬𑁄, 𑀓𑀢𑁆𑀢𑀸 𑀘 ‘‘𑀲𑀼𑀜𑁆𑀜𑀢𑁄, 𑀮𑁄𑀓𑀁, 𑀫𑁄𑀖𑀭𑀸𑀚𑀸’’𑀢𑀺 𑀧𑀤𑀢𑁆𑀢𑀬𑁂𑀦 𑀯𑀼𑀢𑁆𑀢𑀸𑀢𑀺 𑀆𑀳 𑁋 ‘‘𑀲𑀼𑀜𑁆𑀜𑀢𑁄…𑀧𑁂… 𑀆𑀡𑀢𑁆𑀢𑀻’’𑀢𑀺. 𑀢𑀢𑁆𑀣 𑀲𑀗𑁆𑀔𑀸𑀭𑀸𑀦𑀁 𑀲𑀼𑀜𑁆𑀜𑀢𑀸 𑀅𑀦𑀢𑁆𑀢𑀲𑀪𑀸𑀯𑀢𑀸𑀬, 𑀅𑀢𑁆𑀢𑀲𑀼𑀜𑁆𑀜𑀢𑀸𑀬 𑀘 𑀲𑀺𑀬𑀸. 𑀬𑀢𑁄 𑀢𑁂 𑀦 𑀯𑀲𑀯𑀢𑁆𑀢𑀺𑀦𑁄, 𑀅𑀢𑁆𑀢𑀲𑀸𑀭𑀯𑀺𑀭𑀳𑀺𑀢𑀸 𑀘, 𑀬𑀢𑁄 𑀢𑁂 𑀅𑀦𑀢𑁆𑀢𑀸, 𑀭𑀺𑀢𑁆𑀢𑀸, 𑀢𑀼𑀘𑁆𑀙𑀸 𑀘 𑀅𑀢𑁆𑀢𑀦𑀸, 𑀢𑀤𑀼𑀪𑀬𑀁 𑀤𑀲𑁆𑀲𑁂𑀢𑀺 ‘‘𑀅𑀯𑀲𑀯𑀢𑁆𑀢𑀺𑀢𑀸’’𑀢𑀺𑀆𑀤𑀺𑀦𑀸. 𑀏𑀯𑀁 𑀫𑀘𑁆𑀘𑀼𑀢𑀭𑁄 𑀲𑀺𑀬𑀸𑀢𑀺 𑀏𑀯𑀁 𑀧𑀝𑀺𑀧𑀢𑁆𑀢𑀺𑀬𑀸 𑀫𑀘𑁆𑀘𑀼𑀢𑀭𑁄 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀯𑀺𑀥𑀺𑀬𑀫𑀸𑀦𑀲𑁆𑀲 𑀫𑀘𑁆𑀘𑀼𑀢𑀭𑀡𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸 𑀤𑁂𑀲𑀦𑀸𑀬 𑀧𑀘𑁆𑀘𑀓𑁆𑀔𑀢𑁄 𑀲𑀺𑀚𑁆𑀛𑀫𑀸𑀦𑀁 𑀲𑀸𑀢𑀺𑀲𑀬𑀁 𑀨𑀮𑀦𑁆𑀢𑀺 𑀆𑀳 ‘‘𑀢𑀲𑁆𑀲 𑀬𑀁…𑀧𑁂… 𑀨𑀮’’𑀦𑁆𑀢𑀺.

𑁬. 𑀉𑀤𑀸𑀳𑀭𑀡𑀯𑀲𑁂𑀦𑀸𑀢𑀺 𑀦𑀺𑀤𑀲𑁆𑀲𑀦𑀯𑀲𑁂𑀦. 𑀢𑀢𑁆𑀣 ‘‘𑀧𑀼𑀕𑁆𑀕𑀮𑀯𑀺𑀪𑀸𑀕𑁂𑀦𑀸’’𑀢𑀺 𑀇𑀫𑀺𑀦𑀸 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀺𑀧𑀼𑀕𑁆𑀕𑀮𑀧𑀬𑁄𑀚𑀺𑀢𑁄 𑀅𑀲𑁆𑀲𑀸𑀤𑀸𑀤𑀻𑀲𑀼 𑀪𑀕𑀯𑀢𑁄 𑀤𑁂𑀲𑀦𑀸𑀯𑀺𑀲𑁂𑀲𑁄𑀢𑀺 𑀤𑀲𑁆𑀲𑁂𑀢𑀺.

𑀖𑀝𑀺𑀢𑀫𑀢𑁆𑀢𑀦𑁆𑀢𑀺 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀫𑀦𑁄𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑀲𑀦𑁆𑀢𑀸𑀦𑁂𑀦 𑀆𑀮𑀫𑁆𑀩𑀺𑀢𑀫𑀢𑁆𑀢𑀁. 𑀲𑀲𑁆𑀲𑀢𑀸𑀤𑀺𑀆𑀓𑀸𑀭𑀲𑁆𑀲𑀸𑀢𑀺 𑀲𑀲𑁆𑀲𑀢𑀼𑀘𑁆𑀙𑁂𑀤𑀸𑀓𑀸𑀭𑀲𑁆𑀲. 𑀇𑀤𑀜𑁆𑀳𑀺 𑀤𑁆𑀯𑀬𑀁 𑀥𑀫𑁆𑀫𑀤𑁂𑀲𑀦𑀸𑀬 𑀘𑀸𑀮𑁂𑀢𑀩𑁆𑀩𑀁, 𑀦 𑀅𑀦𑀼𑀮𑁄𑀫𑀺𑀓𑀔𑀦𑁆𑀢𑀺, 𑀬𑀣𑀸𑀪𑀽𑀢𑀜𑀸𑀡𑀁 𑀯𑀸. 𑀏𑀢𑀲𑁆𑀫𑀺𑀜𑁆𑀳𑀺 𑀘𑀢𑀼𑀓𑁆𑀓𑁂 𑀆𑀲𑀬𑀲𑀸𑀫𑀜𑁆𑀜𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀻 𑀘, 𑀔𑀦𑁆𑀢𑀺 𑀘𑁂𑀯𑀸𑀦𑀼𑀮𑁄𑀫𑀺𑀓𑀸;

𑀬𑀣𑀸𑀪𑀽𑀢𑀜𑁆𑀘 𑀬𑀁 𑀜𑀸𑀡𑀁, 𑀏𑀢𑀁 𑀆𑀲𑀬𑀲𑀜𑁆𑀜𑀺𑀢’’𑀦𑁆𑀢𑀺. (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁧.𑁧𑁩𑁬; 𑀤𑀻. 𑀦𑀺. 𑀝𑀻. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸; 𑀲𑀸𑀭𑀢𑁆𑀣. 𑀝𑀻. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸, 𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸; 𑀯𑀺. 𑀯𑀺. 𑀝𑀻. 𑁧.𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸);

𑀘𑀮𑀦𑀸𑀬𑀸𑀢𑀺 𑀯𑀺𑀓𑁆𑀔𑀫𑁆𑀪𑀦𑀸𑀬. 𑀧𑀭𑀸𑀦𑀼𑀯𑀢𑁆𑀢𑀺𑀬𑀸𑀢𑀺 𑀲𑀫𑀼𑀘𑁆𑀙𑁂𑀤𑀦𑀸𑀬. 𑀉𑀕𑁆𑀖𑀝𑀺𑀢𑁂 𑀚𑀸𑀦𑀸𑀢𑀻𑀢𑀺 𑀉𑀕𑁆𑀖𑀝𑀺𑀢𑀜𑁆𑀜𑀽𑀢𑀺 𑀫𑀽𑀮𑀯𑀺𑀪𑀼𑀚𑀸𑀤𑀺𑀧𑀓𑁆𑀔𑁂𑀧𑁂𑀦 𑀲𑀤𑁆𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀧𑀜𑁆𑀘𑀺𑀢𑀦𑁆𑀢𑀺 ‘‘𑀯𑀺𑀲𑀫𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀯𑀢𑁆𑀢𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁭𑁦) 𑀯𑀺𑀬 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀫𑀦𑁆𑀤𑀁 𑀲𑀡𑀺𑀓’’𑀦𑁆𑀢𑀺. 𑀦𑀺𑀲𑁆𑀲𑀭𑀡𑀆𑀤𑀻𑀦𑀯𑀦𑀺𑀲𑁆𑀲𑀭𑀡𑀅𑀲𑁆𑀲𑀸𑀤𑀸𑀤𑀻𑀦𑀯𑀦𑀺𑀲𑁆𑀲𑀭𑀡𑀸𑀦𑀁 𑀯𑀺𑀪𑀸𑀯𑀦𑀸 𑀯𑁂𑀦𑁂𑀬𑁆𑀬𑀢𑁆𑀢𑀬𑀯𑀺𑀦𑀬𑀦𑀲𑀫𑀢𑁆𑀣𑀸.

𑀘𑀢𑁆𑀢𑀸𑀭𑁄𑀢𑀺 𑀅𑀲𑁆𑀲𑀸𑀤𑁄 𑀘 𑀆𑀤𑀻𑀦𑀯𑁄 𑀘 𑀅𑀲𑁆𑀲𑀸𑀤𑁄 𑀆𑀤𑀻𑀦𑀯𑁄 𑀘 𑀅𑀲𑁆𑀲𑀸𑀤𑁄 𑀦𑀺𑀲𑁆𑀲𑀭𑀡𑀜𑁆𑀘𑀸𑀢𑀺 𑀏𑀢𑁂 𑀘𑀢𑁆𑀢𑀸𑀭𑁄. 𑀬𑀤𑀺 𑀦𑀺𑀲𑁆𑀲𑀭𑀡𑀯𑀺𑀪𑀸𑀯𑀦𑀸 𑀯𑁂𑀦𑁂𑀬𑁆𑀬𑀯𑀺𑀦𑀬𑀦𑀲𑀫𑀢𑁆𑀣𑀸, 𑀓𑀲𑁆𑀫𑀸 𑀧𑀜𑁆𑀘𑀫𑁄 𑀦 𑀕𑀳𑀺𑀢𑁄𑀢𑀺 𑀆𑀳 ‘‘𑀆𑀤𑀻𑀦𑀯𑀸𑀯𑀘𑀦𑀢𑁄’’𑀢𑀺. 𑀬𑀤𑀺 𑀳𑀺 𑀉𑀕𑁆𑀖𑀝𑀺𑀢𑀜𑁆𑀜𑀼𑀁 𑀲𑀦𑁆𑀥𑀸𑀬 𑀅𑀬𑀁 𑀦𑀬𑁄 𑀯𑀼𑀘𑁆𑀘𑀢𑀺, 𑀦𑀺𑀲𑁆𑀲𑀭𑀡𑀫𑀢𑁆𑀢𑁂𑀦 𑀲𑀺𑀤𑁆𑀥𑀁 𑀲𑀺𑀬𑀸. 𑀅𑀣 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀁, 𑀦𑁂𑀬𑁆𑀬𑀁 𑀯𑀸, 𑀆𑀤𑀻𑀦𑀯𑁄 𑀘 𑀦𑀺𑀲𑁆𑀲𑀭𑀡𑀜𑁆𑀘 𑀅𑀲𑁆𑀲𑀸𑀤𑁄 𑀘 𑀆𑀤𑀻𑀦𑀯𑁄 𑀦𑀺𑀲𑁆𑀲𑀭𑀡𑀜𑁆𑀘 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸? 𑀢𑀣𑀸 𑀅𑀧𑁆𑀧𑀯𑀢𑁆𑀢𑀢𑁆𑀢𑀸 𑀦 𑀕𑀳𑀺𑀢𑁄. 𑀢𑁂𑀦𑀸𑀳 ‘‘𑀆𑀤𑀻𑀦𑀯𑀸𑀯𑀘𑀦𑀢𑁄’’𑀢𑀺𑀆𑀤𑀺. 𑀤𑁂𑀲𑀦𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀕𑀳𑀺𑀢𑀁 ‘‘𑀲𑀼𑀢𑁆𑀢𑁂𑀓𑀤𑁂𑀲𑀁 𑀕𑀸𑀣𑀁 𑀯𑀸’’𑀢𑀺 𑀯𑀺𑀲𑁂𑀲𑁂𑀢𑀺. 𑀧𑀤𑀧𑀭𑀫𑀅𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀲𑀉𑀧𑀸𑀬𑀲𑁆𑀲 𑀦𑀺𑀲𑁆𑀲𑀭𑀡𑀲𑁆𑀲 𑀅𑀦𑀸𑀫𑀝𑁆𑀞𑀢𑁆𑀢𑀸.

‘‘𑀓𑀮𑁆𑀬𑀸𑀡’’𑀦𑁆𑀢𑀺 𑀇𑀫𑀺𑀦𑀸 𑀇𑀝𑁆𑀞𑀯𑀺𑀧𑀸𑀓𑁄, ‘‘𑀧𑀸𑀧𑀓’’𑀦𑁆𑀢𑀺 𑀅𑀦𑀺𑀝𑁆𑀞𑀯𑀺𑀧𑀸𑀓𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀅𑀬𑀁 𑀅𑀲𑁆𑀲𑀸𑀤𑁄, 𑀅𑀬𑀁 𑀆𑀤𑀻𑀦𑀯𑁄’’𑀢𑀺. 𑀮𑀸𑀪𑀸𑀤𑀻𑀦𑀁 𑀧𑀼𑀜𑁆𑀜𑀨𑀮𑀢𑁆𑀢𑀸 𑀢𑀤𑀦𑀼𑀭𑁄𑀥𑀁 𑀯𑀸 𑀲𑀦𑁆𑀥𑀸𑀬 ‘‘𑀅𑀬𑀁 𑀅𑀲𑁆𑀲𑀸𑀤𑁄’’𑀢𑀺 𑀯𑀼𑀢𑁆𑀢𑀁. 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 𑀅𑀮𑀸𑀪𑀸𑀤𑀻𑀦𑀁 𑀆𑀤𑀻𑀦𑀯𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀓𑀸𑀫𑀸𑀢𑀺 𑀓𑀺𑀮𑁂𑀲𑀓𑀸𑀫𑀲𑀳𑀺𑀢𑀸 𑀯𑀢𑁆𑀣𑀼𑀓𑀸𑀫𑀸. 𑀯𑀺𑀭𑀽𑀧𑀭𑀽𑀧𑁂𑀦𑀸𑀢𑀺 𑀅𑀧𑁆𑀧𑀢𑀺𑀭𑀽𑀧𑀸𑀓𑀸𑀭𑁂𑀦. 𑀫𑀣𑁂𑀦𑁆𑀢𑀻𑀢𑀺 𑀫𑀤𑁆𑀤𑀦𑁆𑀢𑀺. 𑀧𑀩𑁆𑀩𑀚𑀺𑀢𑁄𑀫𑁆𑀳𑀻𑀢𑀺 𑀧𑀩𑁆𑀩𑀚𑁆𑀚𑀁 𑀉𑀧𑀕𑀢𑁄 𑀅𑀫𑁆𑀳𑀺. 𑀅𑀧𑀡𑁆𑀡𑀓𑀦𑁆𑀢𑀺 𑀅𑀯𑀺𑀭𑀚𑁆𑀛𑀦𑀓𑀁. 𑀲𑀸𑀫𑀜𑁆𑀜𑀦𑁆𑀢𑀺 𑀲𑀫𑀡𑀪𑀸𑀯𑁄. 𑀲𑀫𑀺𑀢𑀧𑀸𑀧𑀪𑀸𑀯𑁄𑀬𑁂𑀯 𑀲𑁂𑀬𑁆𑀬𑁄 𑀲𑀼𑀦𑁆𑀤𑀭𑀢𑀭𑁄.

𑀢𑀢𑁆𑀣 ‘‘𑀓𑀸𑀫𑀸 𑀳𑀺 𑀘𑀺𑀢𑁆𑀭𑀸 𑀫𑀥𑀼𑀭𑀸 𑀫𑀦𑁄𑀭𑀫𑀸’’𑀢𑀺 𑀅𑀬𑀁 𑀅𑀲𑁆𑀲𑀸𑀤𑁄, ‘‘𑀯𑀺𑀭𑀽𑀧𑀭𑀽𑀧𑁂𑀦 𑀫𑀣𑁂𑀦𑁆𑀢𑀺 𑀘𑀺𑀢𑁆𑀢’’𑀦𑁆𑀢𑀺 𑀅𑀬𑀁 𑀆𑀤𑀻𑀦𑀯𑁄, ‘‘𑀅𑀧𑀡𑁆𑀡𑀓𑀁 𑀲𑀸𑀫𑀜𑁆𑀜’’𑀦𑁆𑀢𑀺 𑀇𑀤𑀁 𑀦𑀺𑀲𑁆𑀲𑀭𑀡𑀦𑁆𑀢𑀺 𑀆𑀳 ‘‘𑀅𑀬𑀁…𑀧𑁂… 𑀦𑀺𑀲𑁆𑀲𑀭𑀡𑀜𑁆𑀘𑀸’’𑀢𑀺.

𑀨𑀮𑀸𑀤𑀻𑀦𑀁 𑀏𑀓𑀓𑀯𑀲𑁂𑀦 𑀘 𑀢𑀺𑀓𑀯𑀲𑁂𑀦 𑀘 𑀧𑀸𑀴𑀺𑀬𑀁 𑀉𑀤𑀸𑀳𑀝𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀤𑀼𑀓𑀯𑀲𑁂𑀦𑀧𑀻’’𑀢𑀺.

𑀲𑀼𑀔𑀸 𑀧𑀝𑀺𑀧𑀤𑀸, 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸𑀢𑀺 𑀬𑀸 𑀤𑁆𑀯𑁂 𑀧𑀝𑀺𑀧𑀤𑀸, 𑀢𑀸𑀲𑀼 𑀏𑀓𑁂𑀓𑀸 𑀤𑀦𑁆𑀥𑀔𑀺𑀧𑁆𑀧𑀸𑀪𑀺𑀜𑁆𑀜𑀢𑀸𑀬 𑀤𑁆𑀯𑁂 𑀤𑁆𑀯𑁂 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀧𑀝𑀺𑀧𑀤𑀸𑀪𑀺𑀜𑁆𑀜𑀸𑀓𑀢𑁄 𑀯𑀺𑀪𑀸𑀕𑁄 𑀧𑀝𑀺𑀧𑀤𑀸𑀓𑀢𑁄 𑀳𑁄𑀢𑀻’’𑀢𑀺. 𑀓𑀢𑀧𑀼𑀩𑁆𑀩𑀓𑀺𑀘𑁆𑀘𑀲𑁆𑀲 𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼 𑀲𑀩𑁆𑀩𑀧𑀞𑀫𑀁 ‘‘𑀧𑀣𑀯𑀻’’𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀫𑀦𑀲𑀺𑀓𑀸𑀭𑁄 𑀧𑀞𑀫𑀲𑀫𑀦𑁆𑀦𑀸𑀳𑀸𑀭𑁄. 𑀉𑀧𑀘𑀸𑀭𑀦𑁆𑀢𑀺 𑀉𑀧𑀘𑀸𑀭𑀚𑁆𑀛𑀸𑀦𑀁. 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑀸𑀬 𑀛𑀸𑀦𑀫𑁆𑀧𑀺 ‘‘𑀧𑀝𑀺𑀧𑀤𑀸’’𑀢𑀺 𑀯𑀼𑀘𑁆𑀘𑀢𑀺. 𑀢𑀤𑀜𑁆𑀜𑀸 𑀳𑁂𑀝𑁆𑀞𑀺𑀫𑀧𑀜𑁆𑀜𑀢𑁄 𑀅𑀥𑀺𑀓𑀸 𑀧𑀜𑁆𑀜𑀸𑀢𑀺 𑀓𑀢𑁆𑀯𑀸 ‘‘𑀅𑀪𑀺𑀜𑁆𑀜𑀸’’𑀢𑀺 𑀯𑀼𑀘𑁆𑀘𑀢𑀺.

𑀓𑀺𑀮𑁂𑀲𑁂𑀢𑀺 𑀦𑀻𑀯𑀭𑀡𑀧𑁆𑀧𑀓𑀸𑀭𑁂, 𑀢𑀁𑀲𑀳𑀕𑀢𑀓𑀺𑀮𑁂𑀲𑁂 𑀘. 𑀅𑀗𑁆𑀕𑀧𑀸𑀢𑀼𑀪𑀸𑀯𑀦𑁆𑀢𑀺 𑀯𑀺𑀢𑀓𑁆𑀓𑀸𑀤𑀺𑀛𑀸𑀦𑀗𑁆𑀕𑀧𑀝𑀺𑀮𑀸𑀪𑀁.

𑀅𑀪𑀺𑀦𑀺𑀯𑀺𑀲𑀦𑁆𑀢𑁄𑀢𑀺 𑀧𑀝𑁆𑀞𑀧𑁂𑀦𑁆𑀢𑁄. 𑀭𑀽𑀧𑀸𑀭𑀽𑀧𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄𑀢𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑁂 𑀮𑀓𑁆𑀔𑀡𑀸𑀤𑀻𑀳𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑁄. 𑀧𑀭𑀺𑀕𑁆𑀕𑀳𑀺𑀢𑀭𑀽𑀧𑀸𑀭𑀽𑀧𑀲𑁆𑀲 𑀫𑀕𑁆𑀕𑀧𑀸𑀢𑀼𑀪𑀸𑀯𑀤𑀦𑁆𑀥𑀢𑀸 𑀘 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑀸𑀤𑀻𑀦𑀁 𑀓𑀺𑀘𑁆𑀙𑀲𑀺𑀤𑁆𑀥𑀺𑀬𑀸 𑀲𑀺𑀬𑀸𑀢𑀺 𑀦 𑀭𑀽𑀧𑀸𑀭𑀽𑀧𑀧𑀭𑀺𑀕𑁆𑀕𑀳𑀓𑀺𑀘𑁆𑀙𑀢𑀸𑀬 𑀏𑀯 𑀤𑀼𑀓𑁆𑀔𑀸𑀧𑀝𑀺𑀧𑀤𑀢𑀸 𑀯𑀢𑁆𑀢𑀩𑁆𑀩𑀸𑀢𑀺 𑀘𑁂? 𑀦, 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀧𑀦𑀸𑀤𑀻𑀦𑀁 𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑀫𑀦𑁆𑀤𑀢𑀸𑀬 𑀲𑀼𑀔𑀲𑀺𑀤𑁆𑀥𑀺𑀬𑀫𑁆𑀧𑀺 𑀢𑀣𑀸𑀲𑀺𑀤𑁆𑀥𑀯𑀺𑀧𑀲𑁆𑀲𑀦𑀸𑀲𑀳𑀕𑀢𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀫𑀦𑁆𑀤𑀢𑀸𑀬 𑀫𑀕𑁆𑀕𑀧𑀸𑀢𑀼𑀪𑀸𑀯𑀢𑁄. 𑀭𑀽𑀧𑀸𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀅𑀓𑀺𑀘𑁆𑀙𑁂𑀦𑀧𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸, 𑀓𑀺𑀘𑁆𑀙𑁂𑀦 𑀧𑀭𑀺𑀕𑁆𑀕𑀳𑀺𑀢𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀸𑀧𑁂𑀦𑁆𑀢𑁄𑀢𑀺 ‘‘𑀦𑀸𑀫𑀭𑀽𑀧𑀫𑀢𑁆𑀢𑀫𑁂𑀢𑀁, 𑀦 𑀅𑀜𑁆𑀜𑁄 𑀓𑁄𑀘𑀺 𑀲𑀢𑁆𑀢𑀸𑀤𑀺𑀓𑁄’’𑀢𑀺 𑀯𑀯𑀢𑁆𑀣𑀸𑀧𑀦𑀁 𑀓𑀭𑁄𑀦𑁆𑀢𑁄. 𑀓𑀢𑀭𑁄 𑀧𑀦𑁂𑀢𑁆𑀣 𑀯𑀸𑀭𑁄 𑀬𑀼𑀢𑁆𑀢𑀭𑀽𑀧𑁄𑀢𑀺? 𑀬𑁄 𑀓𑁄𑀘𑀺 𑀲𑀓𑀺𑀁, 𑀤𑁆𑀯𑀺𑀓𑁆𑀔𑀢𑁆𑀢𑀼𑀁, 𑀅𑀦𑁂𑀓𑀲𑀢𑀓𑁆𑀔𑀢𑁆𑀢𑀼𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 𑀳𑀺 𑀯𑀺𑀓𑁆𑀔𑀫𑁆𑀪𑀦𑀯𑀸𑀭𑁂𑀲𑀼 𑀲𑀓𑀺𑀁, 𑀤𑁆𑀯𑀺𑀓𑁆𑀔𑀢𑁆𑀢𑀼𑀜𑁆𑀘 𑀯𑀺𑀓𑁆𑀔𑀫𑁆𑀪𑀦𑀯𑀸𑀭𑁄 𑀲𑀼𑀔𑀸 𑀧𑀝𑀺𑀧𑀤𑀸 𑀏𑀯, 𑀦 𑀢𑀢𑁄 𑀉𑀤𑁆𑀥𑀁 𑀲𑀼𑀔𑀸 𑀧𑀝𑀺𑀧𑀤𑀸 𑀳𑁄𑀢𑀺, 𑀢𑀲𑁆𑀫𑀸 𑀢𑀺𑀓𑁆𑀔𑀢𑁆𑀢𑀼𑀁 𑀯𑀺𑀓𑁆𑀔𑀫𑁆𑀪𑀦𑀯𑀸𑀭𑀢𑁄 𑀧𑀝𑁆𑀞𑀸𑀬 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀧𑀺𑀘 𑀓𑀮𑀸𑀧𑀲𑀫𑁆𑀫𑀲𑀦𑀸𑀯𑀲𑀸𑀦𑁂 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀬 𑀉𑀧𑁆𑀧𑀦𑁆𑀦𑀲𑁆𑀲 𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀯𑀺𑀓𑁆𑀔𑀫𑁆𑀪𑀦𑁂𑀦 𑀓𑀺𑀘𑁆𑀙𑀢𑀸𑀯𑀸𑀭𑁄 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣 𑀤𑀦𑁆𑀥𑀢𑁆𑀢𑀸 𑀧𑀝𑀺𑀧𑀤𑀸𑀬 𑀏𑀢𑀲𑁆𑀲 𑀅𑀓𑀺𑀘𑁆𑀙𑀢𑁆𑀢𑁂𑀧𑀺 𑀧𑀼𑀭𑀺𑀫𑀸𑀦𑀁 𑀓𑀺𑀘𑁆𑀙𑀢𑁆𑀢𑁂 𑀤𑀼𑀓𑁆𑀔𑀸𑀧𑀝𑀺𑀧𑀤𑀢𑀸 𑀯𑀼𑀢𑁆𑀢𑀦𑀬𑀸𑀯. 𑀬𑀲𑁆𑀲 𑀧𑀦 𑀲𑀩𑁆𑀩𑀢𑁆𑀣 𑀅𑀓𑀺𑀘𑁆𑀙𑀢𑀸, 𑀢𑀲𑁆𑀲 𑀧𑀭𑀫𑀼𑀓𑁆𑀓𑀁𑀲𑀕𑀢𑀸 𑀲𑀼𑀔𑀸 𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸.

𑀬𑀣𑀸 𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑀓𑀺𑀘𑁆𑀙𑀢𑀸𑀬 𑀫𑀕𑁆𑀕𑀧𑀸𑀢𑀼𑀪𑀸𑀯𑀤𑀦𑁆𑀥𑀢𑀸𑀬 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀯𑀼𑀢𑁆𑀢𑀸, 𑀢𑀣𑀸 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 𑀘𑀢𑀼𑀢𑁆𑀣𑀻, 𑀢𑀤𑀼𑀪𑀬𑀯𑁄𑀫𑀺𑀲𑁆𑀲𑀢𑀸𑀯𑀲𑁂𑀦 𑀤𑀼𑀢𑀺𑀬𑀸, 𑀢𑀢𑀺𑀬𑀸 𑀘 𑀜𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀫𑀺𑀦𑀸…𑀧𑁂… 𑀯𑁂𑀤𑀺𑀢𑀩𑁆𑀩𑀸’’𑀢𑀺. 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀬𑁆𑀬𑀸𑀦𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 ‘‘𑀯𑀺𑀧𑀲𑁆𑀲𑀦𑀸𑀧𑀓𑁆𑀔𑀺𑀓𑀸 𑀏𑀯𑀸’’𑀢𑀺 𑀯𑀼𑀢𑁆𑀢𑀁.

𑀳𑁂𑀢𑀼𑀧𑀸𑀬𑀨𑀮𑁂𑀳𑀻𑀢𑀺 𑀏𑀢𑁆𑀣 𑀢𑀡𑁆𑀳𑀸𑀘𑀭𑀺𑀢𑀢𑀸, 𑀫𑀦𑁆𑀤𑀧𑀜𑁆𑀜𑀢𑀸 𑀘 𑀧𑀞𑀫𑀸𑀬 𑀧𑀝𑀺𑀧𑀤𑀸𑀬 𑀳𑁂𑀢𑀼, 𑀢𑀡𑁆𑀳𑀸𑀘𑀭𑀺𑀢𑀢𑀸, 𑀉𑀤𑀢𑁆𑀣𑀧𑀜𑁆𑀜𑀢𑀸 𑀘 𑀤𑀼𑀢𑀺𑀬𑀸𑀬, 𑀤𑀺𑀝𑁆𑀞𑀺𑀘𑀭𑀺𑀢𑀢𑀸, 𑀫𑀦𑁆𑀤𑀧𑀜𑁆𑀜𑀢𑀸 𑀘 𑀢𑀢𑀺𑀬𑀸𑀬, 𑀤𑀺𑀝𑁆𑀞𑀺𑀘𑀭𑀺𑀢𑀢𑀸, 𑀉𑀤𑀢𑁆𑀣𑀧𑀜𑁆𑀜𑀢𑀸 𑀘 𑀘𑀢𑀼𑀢𑁆𑀣𑀺𑀬𑀸. 𑀉𑀧𑀸𑀬𑁄 𑀧𑀦 𑀬𑀣𑀸𑀓𑁆𑀓𑀫𑀁 𑀲𑀢𑀺𑀲𑀫𑀸𑀥𑀺𑀯𑀻𑀭𑀺𑀬𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀦𑀺, 𑀲𑀢𑀺𑀧𑀝𑁆𑀞𑀸𑀦𑀛𑀸𑀦𑀲𑀫𑁆𑀫𑀧𑁆𑀧𑀥𑀸𑀦𑀲𑀘𑁆𑀘𑀸𑀦𑀺 𑀘 𑀉𑀧𑀦𑀺𑀲𑁆𑀲𑀬𑀪𑀽𑀢𑀸𑀦𑀺. 𑀨𑀮𑀁 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀬𑁆𑀬𑀸𑀦𑀁.

𑀲𑀫𑀸𑀥𑀺𑀫𑀼𑀔𑁂𑀦𑀸𑀢𑀺 𑀲𑀫𑀸𑀥𑀺𑀫𑀼𑀔𑁂𑀦 𑀪𑀸𑀯𑀦𑀸𑀦𑀼𑀬𑁄𑀕𑁂𑀦. 𑀢𑁂𑀦𑁂𑀯𑀸𑀳 ‘‘𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀸𑀬 𑀯𑀺𑀧𑀲𑁆𑀲𑀦𑀸𑀬𑀸’’𑀢𑀺. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑁂. 𑀯𑀓𑁆𑀔𑀢𑀺 ‘‘𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀲𑁂𑀓𑁆𑀔𑀨𑀮’’𑀦𑁆𑀢𑀺, ‘‘𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀓𑀸𑀫𑀥𑀸𑀢𑀼𑀲𑀫𑀢𑀺𑀓𑁆𑀓𑀫’’𑀦𑁆𑀢𑀺 𑀘. 𑀲𑁄𑀢𑀺 𑀅𑀦𑀸𑀕𑀸𑀫𑀻.

𑀢𑁂𑀦𑀸𑀢𑀺 𑀧𑀝𑀺𑀧𑀓𑁆𑀔𑁂𑀦. 𑀢𑀢𑁄𑀢𑀺 𑀧𑀝𑀺𑀧𑀓𑁆𑀔𑀢𑁄. 𑀲𑀫𑀸𑀦𑀸𑀥𑀺𑀓𑀭𑀡𑀯𑀲𑁂𑀦 𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀲𑀤𑁆𑀤𑀸𑀦𑀁 𑀲𑀫𑀸𑀲𑀁 𑀓𑀢𑁆𑀯𑀸 𑀪𑀺𑀦𑁆𑀦𑀸𑀥𑀺𑀓𑀭𑀡𑀯𑀲𑁂𑀦 𑀯𑀢𑁆𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀼𑀦 ‘‘𑀘𑁂𑀢𑀲𑁄 𑀯𑀸’’𑀢𑀺𑀆𑀤𑀺𑀦𑀸 𑀅𑀜𑁆𑀜𑀧𑀤𑀢𑁆𑀣𑀯𑀲𑁂𑀦 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀧𑀤𑀸𑀦𑀁 𑀲𑀫𑀸𑀲𑀁 𑀤𑀲𑁆𑀲𑁂𑀢𑀺. 𑀯𑀺𑀜𑁆𑀜𑀸𑀡𑀧𑀭𑀺𑀬𑀸𑀬𑁂𑀦 𑀘𑁂𑀢𑁄-𑀲𑀤𑁆𑀤𑁂𑀦 𑀯𑀼𑀢𑁆𑀢𑀬𑁄𑀚𑀦𑀸 𑀦 𑀲𑀫𑁆𑀪𑀯𑀢𑀻𑀢𑀺 𑀆𑀳 ‘‘𑀬𑀣𑀸𑀲𑀫𑁆𑀪𑀯’’𑀦𑁆𑀢𑀺.

𑀳𑀸-𑀲𑀤𑁆𑀤𑁄 𑀕𑀢𑀺𑀅𑀢𑁆𑀣𑁄, 𑀕𑀢𑀺 𑀘𑁂𑀢𑁆𑀣 𑀜𑀸𑀡𑀕𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀳𑀸𑀢𑀩𑁆𑀩𑀸𑀢𑀺 𑀕𑀫𑁂𑀢𑀩𑁆𑀩𑀸’’𑀢𑀺. 𑀦𑁂𑀢𑀩𑁆𑀩𑀸𑀢𑀺 𑀜𑀸𑀧𑁂𑀢𑀩𑁆𑀩𑀸.

𑁭. 𑀢𑀦𑁆𑀢𑀺 𑀧𑀼𑀕𑁆𑀕𑀮𑀯𑀺𑀪𑀸𑀕𑀁. 𑀜𑀸𑀡𑀯𑀺𑀪𑀸𑀕𑁂𑀦𑀸𑀢𑀺 𑀲𑀼𑀢𑀫𑀬𑀸𑀤𑀺𑀜𑀸𑀡𑀧𑁆𑀧𑀪𑁂𑀤𑁂𑀦. 𑀦𑀺𑀩𑁆𑀩𑀢𑁆𑀢𑀦𑀦𑁆𑀢𑀺 𑀉𑀧𑁆𑀧𑀸𑀤𑀦𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀉𑀕𑁆𑀖𑀝𑀺𑀢𑀜𑁆𑀜𑀼𑀢𑀸𑀢𑀺𑀆𑀤𑀺𑀧𑀼𑀕𑁆𑀕𑀮𑀯𑀺𑀪𑀸𑀕𑀪𑀽𑀢𑁂 𑀤𑁂𑀲𑀦𑀸𑀪𑀸𑀚𑀦𑁂. 𑀤𑁂𑀲𑀦𑀸𑀬𑀦𑁆𑀢𑀺 𑀲𑀼𑀢𑁆𑀢𑁂. 𑀢𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀢𑀁 𑀧𑀼𑀕𑁆𑀕𑀮𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁. ‘‘𑀲𑁆𑀯𑀸𑀬𑀁 𑀳𑀸𑀭𑁄 𑀓𑀣𑀁 𑀲𑀫𑁆𑀪𑀯𑀢𑀻’’𑀢𑀺 𑀓𑁂𑀘𑀺 𑀧𑀞𑀦𑁆𑀢𑀺.

𑀲𑀸𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀥𑀫𑁆𑀫𑀢𑁆𑀣𑀸𑀦𑀁 𑀯𑀻𑀫𑀁𑀲𑀦𑀧𑀜𑁆𑀜𑀸. 𑀅𑀥𑀺𑀓𑀸𑀭𑀢𑁄𑀢𑀺 ‘‘𑀲𑀢𑁆𑀣𑀸 𑀯𑀸 𑀥𑀫𑁆𑀫𑀁 𑀤𑁂𑀲𑀬𑀢𑀻’’𑀢𑀺𑀆𑀤𑀺𑀅𑀥𑀺𑀓𑀸𑀭𑀢𑁄. 𑀲𑀸𑀫𑀢𑁆𑀣𑀺𑀬𑀢𑁄 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀺𑀯𑁂𑀦𑁂𑀬𑁆𑀬𑀯𑀺𑀦𑀬𑀦𑀲𑀫𑀢𑁆𑀣𑀪𑀸𑀯𑀢𑁄. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲 𑀉𑀧𑀥𑀸𑀭𑀡𑀦𑁆𑀢𑀺 𑀏𑀢𑁆𑀣𑀸𑀧𑀺 ‘‘𑀅𑀥𑀺𑀓𑀸𑀭𑀢𑁄 𑀲𑀸𑀫𑀢𑁆𑀣𑀺𑀬𑀢𑁄 𑀯𑀸’’𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁.

‘‘𑀯𑀻𑀫𑀁𑀲𑀸𑀤𑀺𑀧𑀭𑀺𑀬𑀸𑀬𑀯𑀢𑀻 𑀧𑀞𑀫𑀯𑀺𑀓𑀧𑁆𑀧𑀯𑀲𑁂𑀦, 𑀯𑀻𑀫𑀁𑀲𑀸𑀤𑀺𑀯𑀺𑀪𑀸𑀕𑀯𑀢𑀻 𑀤𑀼𑀢𑀺𑀬𑀯𑀺𑀓𑀧𑁆𑀧𑀯𑀲𑁂𑀦, 𑀘𑀺𑀦𑁆𑀢𑀸𑀬 𑀳𑁂𑀢𑀼𑀪𑀽𑀢𑀸𑀬 𑀦𑀺𑀩𑁆𑀩𑀢𑁆𑀢𑀸 𑀘𑀺𑀦𑁆𑀢𑀸𑀫𑀬𑀻’’𑀢𑀺 𑀏𑀯𑀫𑀸𑀤𑀺𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀲𑀓𑁆𑀓𑀸 𑀬𑁄𑀚𑁂𑀢𑀼𑀦𑁆𑀢𑀺 𑀆𑀳 ‘‘𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸’’𑀢𑀺.

𑀲𑀼𑀢𑀘𑀺𑀦𑁆𑀢𑀸𑀫𑀬𑀜𑀸𑀡𑁂𑀲𑀽𑀢𑀺 𑀲𑀼𑀢𑀫𑀬𑀜𑀸𑀡𑁂 𑀘 𑀘𑀺𑀦𑁆𑀢𑀸𑀫𑀬𑀜𑀸𑀡𑁂 𑀘 𑀲𑀼𑀢𑀘𑀺𑀦𑁆𑀢𑀸𑀫𑀬𑀜𑀸𑀡𑁂𑀲𑀼 𑀘 𑀲𑀼𑀢𑀘𑀺𑀦𑁆𑀢𑀸𑀫𑀬𑀜𑀸𑀡𑁂𑀲𑀽𑀢𑀺 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀘𑀺𑀦𑁆𑀢𑀸𑀫𑀬𑀜𑀸𑀡𑁂𑀬𑁂𑀯 𑀳𑀺 𑀧𑀢𑀺𑀝𑁆𑀞𑀺𑀢𑀸 𑀫𑀳𑀸𑀩𑁄𑀥𑀺𑀲𑀢𑁆𑀢𑀸 𑀘𑀭𑀺𑀫𑀪𑀯𑁂 𑀯𑀺𑀧𑀲𑁆𑀲𑀦𑀁 𑀆𑀭𑀪𑀦𑁆𑀢𑀺, 𑀇𑀢𑀭𑁂 𑀲𑀼𑀢𑀘𑀺𑀦𑁆𑀢𑀸𑀫𑀬𑀜𑀸𑀡𑁂𑀲𑀽𑀢𑀺. 𑀢𑁂𑀳𑀻𑀢𑀺 𑀢𑀣𑀸 𑀧𑀞𑀦𑁆𑀢𑁂𑀳𑀺. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀉𑀧𑀸𑀤𑀸𑀭𑀽𑀧𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀅𑀭𑀽𑀧𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺𑀆𑀤𑀺𑀦𑀸 𑀧𑀝𑀺𑀧𑀤𑀸𑀓𑀣𑀸𑀬𑀁 (𑀦𑁂𑀢𑁆𑀢𑀺. 𑀅𑀝𑁆𑀞. 𑁫) 𑀯𑀼𑀢𑁆𑀢𑀦𑀬𑁂𑀦.

𑁮. 𑀧𑀭𑀢𑁄 𑀖𑁄𑀲𑁄 𑀧𑀘𑁆𑀘𑀬𑀪𑀽𑀢𑁄 𑀏𑀢𑀺𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀧𑀘𑁆𑀘𑀢𑁆𑀢𑀲𑀫𑀼𑀝𑁆𑀞𑀺𑀢𑁂𑀦 𑀘 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦𑀸’’𑀢𑀺 𑀇𑀤𑀁 𑀆𑀯𑀼𑀢𑁆𑀢𑀺𑀦𑀬𑁂𑀦 𑀤𑀼𑀢𑀺𑀬𑀁 𑀆𑀯𑀝𑁆𑀝𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦 𑀲𑀸𑀯𑀓𑀸𑀦𑀁 𑀪𑀸𑀯𑀦𑀸𑀫𑀬𑀜𑀸𑀡𑀼𑀧𑁆𑀧𑀢𑁆𑀢𑀺 𑀲𑀗𑁆𑀕𑀳𑀺𑀢𑀸 𑀳𑁄𑀢𑀺. 𑀲𑀸𑀯𑀓𑀸𑀦𑀫𑁂𑀯 𑀯𑀸 𑀜𑀸𑀡𑀼𑀧𑁆𑀧𑀢𑁆𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀸 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀺𑀯𑀺𑀪𑀸𑀕𑀓𑀣𑀦𑀢𑁄. 𑀏𑀢𑀲𑁆𑀫𑀺𑀁 𑀧𑀓𑁆𑀔𑁂 𑀧𑀼𑀩𑁆𑀩𑁂 𑀯𑀼𑀢𑁆𑀢𑀏𑀓𑀲𑁂𑀲𑀦𑀬𑁄𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑁄 𑀤𑀝𑁆𑀞𑀩𑁆𑀩𑁄. ‘‘𑀆𑀲𑀬𑀧𑀬𑁄𑀕𑀧𑀩𑁄𑀥𑀲𑁆𑀲 𑀦𑀺𑀧𑁆𑀨𑀸𑀤𑀺𑀢𑀢𑁆𑀢𑀸’’𑀢𑀺 𑀏𑀢𑁂𑀦 𑀧𑀘𑁆𑀙𑀺𑀫𑀘𑀓𑁆𑀓𑀤𑁆𑀯𑀬𑀧𑀭𑀺𑀬𑀸𑀧𑀦𑁆𑀦𑀸𑀦𑀺 𑀧𑀼𑀩𑁆𑀩𑀳𑁂𑀢𑀼𑀲𑀗𑁆𑀕𑀳𑀸𑀦𑀺 𑀲𑀼𑀢𑀘𑀺𑀦𑁆𑀢𑀸𑀫𑀬𑀜𑀸𑀡𑀸𑀦𑀺 𑀲𑀦𑁆𑀥𑀸𑀬 ‘‘𑀇𑀫𑀸 𑀤𑁆𑀯𑁂 𑀧𑀜𑁆𑀜𑀸 𑀅𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀢𑁆𑀣𑀺𑀪𑀸𑀯𑁄 𑀘𑁂𑀢𑀸𑀲𑀁 𑀧𑀝𑀺𑀧𑀓𑁆𑀔𑁂𑀦 𑀅𑀦𑀼𑀧𑀤𑁆𑀤𑀼𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀧𑀭𑀺𑀓𑁆𑀔𑀢𑀢𑁆𑀢𑀸 𑀅𑀦𑀪𑀺𑀲𑀗𑁆𑀔𑀢𑀢𑁆𑀢𑀸. 𑀲𑀼𑀢𑀫𑀬𑀜𑀸𑀡𑀲𑁆𑀲𑀸𑀧𑀺 𑀧𑀼𑀭𑀺𑀫𑀲𑀺𑀤𑁆𑀥𑀲𑁆𑀲.

𑁯. 𑀤𑁂𑀲𑀦𑀸𑀧𑀝𑀺𑀧𑀤𑀸𑀜𑀸𑀡𑀯𑀺𑀪𑀸𑀕𑁂𑀳𑀻𑀢𑀺 𑀦𑀺𑀲𑁆𑀲𑀭𑀡𑀤𑁂𑀲𑀦𑀸𑀤𑀺𑀤𑁂𑀲𑀦𑀸𑀯𑀺𑀪𑀸𑀕𑁂𑀳𑀺, 𑀤𑀼𑀓𑁆𑀔𑀸𑀧𑀝𑀺𑀧𑀤𑀸𑀤𑀺𑀧𑀝𑀺𑀧𑀤𑀸𑀯𑀺𑀪𑀸𑀕𑁂𑀳𑀺, 𑀲𑀼𑀢𑀫𑀬𑀜𑀸𑀡𑀸𑀤𑀺𑀜𑀸𑀡𑀯𑀺𑀪𑀸𑀕𑁂𑀳𑀺.

𑀅𑀯𑀲𑀺𑀝𑁆𑀞𑀧𑀸𑀭𑀺𑀲𑀚𑁆𑀚𑁂𑀦𑀸𑀢𑀺 𑀔𑀢𑁆𑀢𑀺𑀬𑀕𑀳𑀧𑀢𑀺𑀧𑀭𑀺𑀲𑀧𑀭𑀺𑀬𑀸𑀧𑀦𑁆𑀦𑁂𑀦. 𑀅𑀝𑁆𑀞𑀦𑁆𑀦𑀦𑁆𑀢𑀺 𑀔𑀢𑁆𑀢𑀺𑀬𑀧𑀭𑀺𑀲𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀲𑀫𑀡𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀢𑀸𑀯𑀢𑀺𑀁𑀲𑀫𑀸𑀭𑀩𑁆𑀭𑀳𑁆𑀫𑀧𑀭𑀺𑀲𑀸𑀢𑀺 𑀇𑀫𑀸𑀲𑀁 𑀅𑀝𑁆𑀞𑀦𑁆𑀦𑀁.

𑀲𑀫𑀢𑁆𑀣𑁂𑀢𑀻𑀢𑀺 𑀲𑀫𑀢𑁆𑀣𑀁 𑀲𑀫𑁆𑀩𑀦𑁆𑀥𑀢𑁆𑀣𑀁 𑀓𑀭𑁄𑀢𑀺.

𑀢𑀫𑁂𑀯 𑀤𑁆𑀯𑀸𑀤𑀲𑀧𑀤𑀪𑀸𑀯𑀁 𑀤𑀻𑀧𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀤𑀢𑁆𑀣𑀲𑁆𑀲𑀸𑀢𑀺 𑀙𑀙𑀓𑁆𑀓𑀧𑀭𑀺𑀬𑀸𑀬𑀢𑁆𑀣𑀲𑁆𑀲 (𑀫. 𑀦𑀺. 𑁩.𑁪𑁨𑁦 𑀆𑀤𑀬𑁄). 𑀲𑀩𑁆𑀩𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀢𑀸 𑀙𑀙𑀓𑁆𑀓𑀧𑀭𑀺𑀬𑀸𑀬𑀲𑁆𑀲, 𑀢𑀤𑀢𑁆𑀣𑀲𑁆𑀲 𑀘 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑁂𑀦 𑀲𑀼𑀢𑁆𑀢𑁂𑀦 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁩; 𑀧𑀝𑀺. 𑀫. 𑁨.𑁩𑁦) 𑀲𑀗𑁆𑀕𑀳𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀲𑁆𑀲𑀸𑀧𑀺…𑀧𑁂… 𑀯𑀺𑀪𑀸𑀯𑁂𑀦𑁆𑀢𑁄’’𑀢𑀺. 𑀯𑀺𑀲𑀬𑀺𑀪𑀸𑀯𑁂𑀦 𑀩𑁆𑀬𑀜𑁆𑀚𑀦𑀧𑀤𑀸𑀦𑀁, 𑀯𑀺𑀲𑀬𑀪𑀸𑀯𑁂𑀦 𑀅𑀢𑁆𑀣𑀧𑀤𑀸𑀦𑀁 𑀲𑀫𑁆𑀩𑀦𑁆𑀥𑀁 𑀲𑀦𑁆𑀥𑀸𑀬𑀸𑀳 ‘‘𑀢𑁂𑀲𑀁…𑀧𑁂… 𑀲𑀫𑁆𑀩𑀦𑁆𑀥𑀪𑀸𑀯’’𑀦𑁆𑀢𑀺.

𑀧𑀤𑀸𑀯𑀬𑀯𑁄 𑀅𑀓𑁆𑀔𑀭𑀸𑀦𑀺. 𑀧𑀤𑀢𑁆𑀣𑁄𑀢𑀺 𑀧𑀤𑀢𑁆𑀣𑀸𑀯𑀬𑀯𑁄. 𑀧𑀤𑀢𑁆𑀣𑀕𑁆𑀕𑀳𑀡𑀲𑁆𑀲𑀸𑀢𑀺 𑀧𑀤𑀢𑁆𑀣𑀸𑀯𑀩𑁄𑀥𑀲𑁆𑀲. 𑀯𑀺𑀲𑁂𑀲𑀸𑀥𑀸𑀦𑀁 𑀯𑀺𑀲𑁂𑀲𑀼𑀧𑁆𑀧𑀢𑁆𑀢𑀺. 𑀯𑀸𑀓𑁆𑀬𑀪𑁂𑀤𑁂𑀢𑀺 𑀯𑀸𑀓𑁆𑀬𑀯𑀺𑀲𑁂𑀲𑁂. 𑀘𑀺𑀢𑁆𑀢𑀧𑀭𑀺𑀢𑁄𑀲𑀦𑀁 𑀘𑀺𑀢𑁆𑀢𑀸𑀭𑀸𑀥𑀦𑀁. 𑀩𑀼𑀤𑁆𑀥𑀺𑀦𑀺𑀲𑀸𑀦𑀁 𑀧𑀜𑁆𑀜𑀸𑀬 𑀢𑁂𑀚𑀦𑀁 𑀢𑀺𑀓𑁆𑀔𑀪𑀸𑀯𑀓𑀭𑀡𑀁. 𑀦𑀸𑀦𑀸𑀯𑀸𑀓𑁆𑀬𑀯𑀺𑀲𑀬𑀢𑀸𑀧𑀺 𑀲𑀺𑀤𑁆𑀥𑀸 𑀳𑁄𑀢𑀺 𑀧𑀤𑀸𑀤𑀻𑀳𑀺𑀧𑀺 𑀲𑀗𑁆𑀓𑀸𑀲𑀦𑀲𑁆𑀲 𑀲𑀺𑀤𑁆𑀥𑀢𑁆𑀢𑀸. 𑀏𑀓𑀯𑀸𑀓𑁆𑀬𑀯𑀺𑀲𑀬𑀢𑀸𑀬 𑀳𑀺 𑀅𑀢𑁆𑀣𑀧𑀤𑀸𑀦𑀁 𑀲𑀗𑁆𑀓𑀸𑀲𑀦𑀸𑀤𑀬𑁄 𑀬𑀣𑀸𑀓𑁆𑀓𑀫𑀁 𑀅𑀓𑁆𑀔𑀭𑀸𑀤𑀺𑀯𑀺𑀲𑀬𑀸 𑀏𑀯𑀸𑀢𑀺 𑀦𑀺𑀬𑀫𑁄 𑀲𑀺𑀬𑀸. 𑀏𑀢𑁂𑀦𑀸𑀢𑀺 𑀅𑀢𑁆𑀣𑀧𑀤𑀸𑀦𑀁 𑀦𑀸𑀦𑀸𑀯𑀸𑀓𑁆𑀬𑀯𑀺𑀲𑀬𑀢𑁆𑀣𑁂𑀦.

𑀉𑀕𑁆𑀖𑀝𑀦𑀸𑀤𑀺𑀅𑀢𑁆𑀣𑀸𑀦𑀻𑀢𑀺 𑀉𑀕𑁆𑀖𑀝𑀦𑀯𑀺𑀧𑀜𑁆𑀘𑀦𑀦𑀬𑀦𑀧𑁆𑀧𑀬𑁄𑀚𑀦𑀸𑀦𑀺.

𑁧𑁦. 𑀉𑀧𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀉𑀧𑀝𑁆𑀞𑀺𑀢𑀦𑁆𑀢𑀺 𑀉𑀧𑀝𑁆𑀞𑀺𑀢𑀲𑀤𑁆𑀤𑀲𑁆𑀲 𑀅𑀥𑀺𑀓𑀭𑀡𑀢𑁆𑀣𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀉𑀧𑀢𑀺𑀝𑁆𑀞𑀦𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁 𑀬𑀣𑀸 ‘‘𑀧𑀤𑀓𑁆𑀓𑀦𑁆𑀢’’𑀦𑁆𑀢𑀺. 𑀢𑁂𑀦𑀸𑀳 ‘‘𑀇𑀤𑀁 𑀦𑁂𑀲’’𑀦𑁆𑀢𑀺𑀆𑀤𑀺. 𑀧𑀝𑀺𑀧𑀢𑁆𑀢𑀺𑀤𑁂𑀲𑀦𑀸𑀕𑀫𑀦𑁂𑀳𑀻𑀢𑀺 𑀧𑀝𑀺𑀧𑀢𑁆𑀢𑀺𑀕𑀫𑀦𑀤𑁂𑀲𑀦𑀸𑀕𑀫𑀦𑁂𑀳𑀺. ‘‘𑀓𑀺𑀘𑁆𑀙𑀁 𑀯𑀢𑀸𑀬𑀁 𑀮𑁄𑀓𑁄 𑀆𑀧𑀦𑁆𑀦𑁄 𑀚𑀸𑀬𑀢𑀺 𑀘…𑀧𑁂… 𑀚𑀭𑀸𑀫𑀭𑀡𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀚𑀭𑀸𑀫𑀭𑀡𑀢𑁄 𑀧𑀝𑁆𑀞𑀸𑀬 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀁 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀫𑀳𑀸𑀕𑀳𑀦𑀁 𑀙𑀺𑀦𑁆𑀤𑀺𑀢𑀼𑀁 𑀦𑀺𑀲𑀸𑀦𑀲𑀺𑀮𑀸𑀬𑀁 𑀨𑀭𑀲𑀼𑀁 𑀦𑀺𑀲𑁂𑀦𑁆𑀢𑁄 𑀯𑀺𑀬 𑀓𑀺𑀮𑁂𑀲𑀕𑀳𑀦𑀁 𑀙𑀺𑀦𑁆𑀤𑀺𑀢𑀼𑀁 𑀮𑁄𑀓𑀦𑀸𑀣𑁄 𑀜𑀸𑀡𑀨𑀭𑀲𑀼𑀁 𑀢𑁂𑀚𑁂𑀦𑁆𑀢𑁄 𑀩𑀼𑀤𑁆𑀥𑀪𑀸𑀯𑀸𑀬 𑀳𑁂𑀢𑀼𑀲𑀫𑁆𑀧𑀢𑁆𑀢𑀺𑀬𑀸 𑀧𑀭𑀺𑀧𑀸𑀓𑀕𑀢𑀢𑁆𑀢𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀥𑀺𑀕𑀫𑀸𑀬 𑀯𑀺𑀧𑀲𑁆𑀲𑀦𑀸𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀦𑁆𑀢𑁄 𑀅𑀦𑁆𑀢𑀭𑀦𑁆𑀢𑀭𑀸 𑀦𑀸𑀦𑀸𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀅𑀦𑀼𑀧𑀤𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑁄 𑀙𑀢𑁆𑀢𑀺𑀁𑀲𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀼𑀔𑁂𑀦 𑀬𑀁 𑀜𑀸𑀡𑀁 𑀧𑀯𑀢𑁆𑀢𑁂𑀲𑀺, 𑀢𑀁 ‘‘𑀫𑀳𑀸𑀯𑀚𑀺𑀭𑀜𑀸𑀡’’𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀫𑀸𑀧𑀢𑁆𑀢𑀺𑀲𑀜𑁆𑀘𑀸𑀭𑀺𑀫𑀳𑀸𑀯𑀚𑀺𑀭𑀜𑀸𑀡’’𑀦𑁆𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁩.𑁧𑁪𑁧) 𑀆𑀕𑀢𑀁, 𑀢𑀁 𑀤𑁂𑀯𑀲𑀺𑀓𑀁 𑀯𑀴𑀜𑁆𑀚𑀦𑀓𑀲𑀫𑀸𑀧𑀢𑁆𑀢𑀻𑀦𑀁 𑀧𑀼𑀭𑁂𑀘𑀭𑀸𑀦𑀼𑀘𑀭𑀜𑀸𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀁 𑀧𑀦 𑀯𑀓𑁆𑀔𑀢𑀺 ‘‘𑀜𑀸𑀡𑀯𑀚𑀺𑀭𑀫𑁄𑀳𑀚𑀸𑀮𑀧𑀤𑀸𑀮𑀦’’𑀦𑁆𑀢𑀺, 𑀢𑀁 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀜𑀸𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀩𑁆𑀭𑀳𑁆𑀫𑀼𑀦𑁄’’𑀢𑀺𑀆𑀤𑀺𑀫𑀸𑀳.

𑀤𑁂𑀲𑀦𑀸𑀬𑀸𑀢𑀺 𑀓𑀭𑀡𑀢𑁆𑀣𑁂 𑀇𑀤𑀁 𑀓𑀭𑀡𑀯𑀘𑀦𑀁. 𑀦𑀺𑀬𑀼𑀢𑁆𑀢𑁄𑀢𑀺 𑀏𑀢𑁆𑀣 𑀳𑁂𑀢𑀼𑀅𑀢𑁆𑀣𑁄 𑀅𑀦𑁆𑀢𑁄𑀦𑀻𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑁄𑀚𑀺𑀢𑁄’’𑀢𑀺 𑀆𑀳.

𑀤𑁂𑀲𑀦𑀸𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀯𑀺𑀘𑀬𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁧𑁧. 𑀚𑀸𑀢𑀺𑀮𑀺𑀗𑁆𑀕𑀓𑀸𑀮𑀲𑀸𑀥𑀦𑀯𑀺𑀪𑀢𑁆𑀢𑀺𑀲𑀗𑁆𑀔𑁆𑀬𑀸𑀯𑀺𑀲𑁂𑀲𑀸𑀤𑀺𑀢𑁄 𑀲𑀤𑁆𑀤𑀢𑁄 𑀧𑀤𑀯𑀺𑀘𑀬𑁄 𑀓𑀸𑀢𑀩𑁆𑀩𑁄. 𑀢𑀢𑁆𑀣 𑀓𑀭𑀺𑀬𑀫𑀸𑀦𑁄 𑀘 𑀬𑀣𑀸𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀬𑀸 𑀏𑀯 𑀓𑀢𑁄 𑀲𑀼𑀓𑀢𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀤𑀁 𑀦𑀸𑀫𑀧𑀤𑀁 …𑀧𑁂… 𑀅𑀬𑀁 𑀲𑀤𑁆𑀤𑀢𑁄 𑀧𑀤𑀯𑀺𑀘𑀬𑁄’’𑀢𑀺 𑀯𑀢𑁆𑀯𑀸 ‘‘𑀲𑁄 𑀧𑀦𑀸𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀯𑀢𑁆𑀢𑀩𑁆𑀩𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀢𑀺 𑀢𑀁𑀢𑀁𑀧𑀤𑀯𑀘𑀦𑀻𑀬𑀲𑁆𑀲 𑀅𑀢𑁆𑀣𑀲𑁆𑀲 𑀪𑁂𑀤𑀁 𑀯𑀢𑁆𑀯𑀸 𑀧𑀭𑀺𑀬𑀸𑀬𑁂𑀳𑀺 𑀯𑀺𑀯𑀭𑀺𑀢𑁆𑀯𑀸 𑀓𑀣𑀦𑀁.

𑀯𑀺𑀘𑀺𑀬𑀫𑀸𑀦𑀲𑁆𑀲 𑀲𑀼𑀢𑁆𑀢𑀧𑀤𑀲𑁆𑀲𑀸𑀢𑀺 𑀧𑀼𑀘𑁆𑀙𑀸𑀯𑀲𑁂𑀦 𑀧𑀯𑀢𑁆𑀢𑀲𑀼𑀢𑁆𑀢𑀧𑀤𑀲𑁆𑀲. ‘‘𑀲𑀼𑀢𑁆𑀢𑀦𑁆𑀢𑀭𑀧𑀤𑀸𑀦𑀺𑀧𑀺 𑀧𑀼𑀘𑁆𑀙𑀸𑀯𑀲𑁂𑀦𑁂𑀯 𑀧𑀯𑀢𑁆𑀢𑀸𑀦𑀻’’𑀢𑀺 𑀯𑀤𑀦𑁆𑀢𑀺 ‘‘𑀦 𑀲𑀩𑁆𑀩𑀫𑁆𑀧𑀺 𑀲𑀼𑀢𑁆𑀢𑀧𑀤’’𑀦𑁆𑀢𑀺. 𑀏𑀓𑀲𑁆𑀲𑁂𑀯 𑀧𑀤𑀲𑁆𑀲 𑀲𑀫𑁆𑀪𑀯𑀦𑁆𑀢𑀸𑀦𑀁 𑀅𑀦𑁂𑀓𑁂𑀲𑀁 𑀅𑀢𑁆𑀣𑀸𑀦𑀁 𑀉𑀤𑁆𑀥𑀸𑀭𑁄 𑀅𑀢𑁆𑀣𑀼𑀤𑁆𑀥𑀸𑀭𑁄. 𑀏𑀓𑀲𑁆𑀲𑁂𑀯 𑀧𑀦 𑀅𑀢𑁆𑀣𑀲𑁆𑀲 𑀲𑀫𑁆𑀪𑀯𑀦𑁆𑀢𑀸𑀦𑀁 𑀅𑀦𑁂𑀓𑁂𑀲𑀁 𑀧𑀤𑀸𑀦𑀁 𑀉𑀤𑁆𑀥𑀸𑀭𑁄 𑀧𑀤𑀼𑀤𑁆𑀥𑀸𑀭𑁄. 𑀲𑀩𑁆𑀩𑁂 𑀳𑀺 𑀲𑀁𑀯𑀡𑁆𑀡𑀺𑀬𑀫𑀸𑀦𑁂 𑀲𑀼𑀢𑁆𑀢𑁂 𑀮𑀩𑁆𑀪𑀫𑀸𑀦𑁂 𑀲𑀩𑁆𑀩𑁂 𑀧𑀤𑀢𑁆𑀣𑁂. 𑀦𑀯 𑀲𑀼𑀢𑁆𑀢𑀦𑁆𑀢𑁂𑀢𑀺 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺𑀯𑀲𑁂𑀦 𑀦𑀯𑀧𑁆𑀧𑀓𑀸𑀭𑁂 𑀲𑀼𑀢𑁆𑀢𑀲𑁆𑀫𑀺𑀁 𑀆𑀦𑁂𑀢𑁆𑀯𑀸 𑀯𑀺𑀘𑀺𑀦𑀢𑀻𑀢𑀺 𑀬𑁄𑀚𑀦𑀸. 𑀅𑀣 𑀯𑀸 ‘‘𑀲𑀩𑁆𑀩𑁂 𑀦𑀯 𑀲𑀼𑀢𑁆𑀢𑀦𑁆𑀢𑁂’’𑀢𑀺 𑀇𑀫𑀺𑀦𑀸 𑀧𑀯𑀺𑀘𑀬𑀮𑀓𑁆𑀔𑀡𑁂𑀦 𑀳𑀸𑀭𑁂𑀦 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀻𑀦𑀺 𑀲𑀩𑁆𑀩𑀸𑀦𑀺𑀧𑀺 𑀦𑀯𑀧𑁆𑀧𑀓𑀸𑀭𑀸𑀦𑀺 𑀲𑀼𑀢𑁆𑀢𑀸𑀦𑀺 𑀯𑀺𑀘𑀺𑀦𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺𑀓𑁂’’𑀢𑀺𑀆𑀤𑀺.

‘‘𑀓𑁄𑀲𑀮𑀸𑀦𑀁 𑀧𑀼𑀭𑀸 𑀭𑀫𑁆𑀫𑀸’’𑀢𑀺𑀆𑀤𑀺𑀓𑀸 (𑀲𑀼. 𑀦𑀺. 𑁯𑁮𑁨) 𑀙𑀧𑀜𑁆𑀜𑀸𑀲 𑀕𑀸𑀣𑀸 𑀯𑀢𑁆𑀣𑀼𑀕𑀸𑀣𑀸. ‘‘𑀧𑀸𑀭𑀸𑀬𑀦𑀫𑀦𑀼𑀕𑀸𑀬𑀺𑀲𑁆𑀲’’𑀦𑁆𑀢𑀺 (𑀲𑀼. 𑀦𑀺. 𑁧𑁧𑁩𑁭 𑀆𑀤𑀬𑁄) 𑀧𑀦 𑀆𑀤𑀺𑀓𑀸 𑀏𑀓𑀽𑀦𑀯𑀻𑀲𑀢𑀺 𑀕𑀸𑀣𑀸 𑀅𑀦𑀼𑀕𑀻𑀢𑀺𑀕𑀸𑀣𑀸. 𑀇𑀤𑀁 𑀦𑀸𑀫𑀁 𑀓𑀢𑀦𑁆𑀢𑀺 𑀇𑀤𑀁 ‘‘𑀧𑀸𑀭𑀸𑀬𑀦’’𑀦𑁆𑀢𑀺 𑀦𑀸𑀫𑀁 𑀓𑀢𑀁. 𑀢𑁂𑀦𑀸𑀳 ‘‘𑀧𑀸𑀭𑀁 𑀕𑀫𑀦𑀻𑀬𑀸 𑀇𑀫𑁂 𑀥𑀫𑁆𑀫𑀸, 𑀢𑀲𑁆𑀫𑀸 𑀇𑀫𑀲𑁆𑀲 𑀥𑀫𑁆𑀫𑀧𑀭𑀺𑀬𑀸𑀬𑀲𑁆𑀲 ‘𑀧𑀸𑀭𑀸𑀬𑀦𑀦𑁆𑀢𑁆𑀯𑁂𑀯 𑀅𑀥𑀺𑀯𑀘𑀦’’’𑀦𑁆𑀢𑀺 (𑀲𑀼. 𑀦𑀺. 𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸; 𑀘𑀽𑀴𑀦𑀺. 𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸 𑁧𑁪𑁯 𑀆𑀤𑀬𑁄). 𑀩𑀼𑀤𑁆𑀥𑀺𑀬𑀁 𑀯𑀺𑀧𑀭𑀺𑀯𑀢𑁆𑀢𑀫𑀸𑀦𑀦𑁆𑀢𑀺 𑀇𑀫𑀲𑁆𑀲 𑀯𑀺𑀘𑀬𑀳𑀸𑀭𑀯𑀺𑀪𑀗𑁆𑀕𑀲𑁆𑀲 𑀤𑁂𑀲𑀦𑀸𑀓𑀸𑀮𑁂 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀅𑀢𑁆𑀢𑀦𑁄 𑀩𑀼𑀤𑁆𑀥𑀺𑀬𑀁 𑀯𑀢𑁆𑀢𑀫𑀸𑀦𑀁 𑀓𑀢𑁆𑀯𑀸 𑀏𑀯𑀫𑀸𑀳𑀸𑀢𑀺 𑀬𑁄𑀚𑀦𑀸.

𑀏𑀓𑀁𑀲𑀩𑁆𑀬𑀸𑀓𑀭𑀡𑀲𑁆𑀲 𑀅𑀬𑀦𑁆𑀢𑀺 𑀏𑀓𑀁𑀲𑀩𑁆𑀬𑀸𑀓𑀭𑀡𑀻𑀬𑀸, 𑀏𑀓𑀁𑀲𑁂𑀦 𑀯𑀸 𑀩𑁆𑀬𑀸𑀓𑀸𑀢𑀩𑁆𑀩𑀢𑁆𑀢𑀸 𑀏𑀓𑀁𑀲𑀩𑁆𑀬𑀸𑀓𑀭𑀡𑀻𑀬𑀸, 𑀏𑀓𑀁𑀲𑀩𑁆𑀬𑀸𑀓𑀭𑀡𑀬𑁄𑀕𑁆𑀕𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀞𑀧𑀦𑀻𑀬𑀸𑀢𑀺 𑀞𑀧𑁂𑀢𑀩𑁆𑀩𑀢𑁆𑀢𑀸 𑀅𑀩𑁆𑀬𑀸𑀓𑀭𑀡𑀻𑀬𑀸𑀢𑀺 𑀅𑀢𑁆𑀣𑁄. 𑀲𑀫𑀬𑀦𑁆𑀢𑀭𑀧𑀭𑀺𑀘𑀬𑁂𑀦 𑀦𑀺𑀯𑀸𑀭𑀡𑀥𑀫𑁆𑀫𑀁 𑀧𑀢𑀺 𑀲𑀁𑀲𑀬𑀧𑀓𑁆𑀔𑀦𑁆𑀤𑁄 𑀧𑀼𑀘𑁆𑀙𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀯𑀺𑀫𑀢𑀺𑀘𑁆𑀙𑁂𑀤𑀦’’𑀦𑁆𑀢𑀺. 𑀧𑀓𑀢𑀺𑀬𑀸 𑀧𑀦 𑀦𑀺𑀯𑀸𑀭𑀡𑀥𑀫𑁆𑀫𑀁 𑀅𑀚𑀸𑀦𑀦𑁆𑀢𑁄 𑀜𑀸𑀢𑀼𑀓𑀸𑀫𑀢𑀸𑀬 𑀧𑀼𑀘𑁆𑀙𑀢𑀻𑀢𑀺 𑀅𑀤𑀺𑀝𑁆𑀞𑀚𑁄𑀢𑀦𑀸𑀬 𑀧𑀼𑀘𑁆𑀙𑀸𑀧𑀺 𑀲𑀺𑀬𑀸. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀮𑁄𑀓𑀲𑁆𑀲 𑀦𑀺𑀯𑀸𑀭𑀡𑀸𑀤𑀻𑀦𑀺 𑀅𑀚𑀸𑀦𑀦𑁆𑀢𑁂𑀦𑀸’’𑀢𑀺.

𑀏𑀓𑀯𑀢𑁆𑀣𑀼𑀧𑀭𑀺𑀕𑁆𑀕𑀳𑀸𑀢𑀺 𑀏𑀓𑀲𑁆𑀲 𑀅𑀪𑀺𑀥𑁂𑀬𑁆𑀬𑀢𑁆𑀣𑀲𑁆𑀲 𑀕𑀳𑀡𑀢𑁄.

𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀓𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀯𑀝𑁆𑀝𑀧𑀓𑁆𑀔𑁂 𑀞𑀺𑀢𑀲𑁆𑀲 𑀲𑀤𑁆𑀥𑀸𑀤𑀬𑁄 𑀥𑀫𑁆𑀫𑀸, 𑀓𑀺𑀁 𑀧𑀦𑁂𑀢𑁆𑀣 𑀅𑀭𑀺𑀬𑀸𑀦𑀫𑁆𑀧𑀺 𑀇𑀦𑁆𑀤𑁆𑀭𑀺𑀬𑀮𑁄𑀓𑁂𑀦 𑀲𑀗𑁆𑀕𑀳𑁄 𑀳𑁄𑀢𑀻𑀢𑀺 𑀆𑀳 ‘‘𑀧𑀭𑀺𑀬𑀸𑀧𑀦𑁆𑀦𑀥𑀫𑁆𑀫𑀯𑀲𑁂𑀦𑀸’’𑀢𑀺𑀆𑀤𑀺.

𑀓𑀸𑀴𑀧𑀓𑁆𑀔𑀘𑀸𑀢𑀼𑀤𑁆𑀤𑀲𑀻𑀖𑀦𑀯𑀦𑀲𑀡𑁆𑀟𑀫𑁂𑀖𑀧𑀝𑀮𑀘𑁆𑀙𑀸𑀤𑀦𑀅𑀟𑁆𑀠𑀭𑀢𑁆𑀢𑀻𑀦𑀁 𑀯𑀲𑁂𑀦 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀦. 𑀯𑀺𑀯𑀺𑀘𑁆𑀙𑀸𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀬. 𑀢𑁂𑀦𑀸𑀳 ‘‘𑀯𑀺𑀘𑀺𑀓𑀺𑀘𑁆𑀙𑀸𑀳𑁂𑀢𑀽’’𑀢𑀺. 𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀁 ‘‘𑀅𑀲𑁆𑀲𑀸’’𑀢𑀺 𑀧𑀤𑀁 ‘‘𑀚𑀧𑁆𑀧𑀸𑀪𑀺𑀮𑁂𑀧𑀦𑀁 𑀅𑀲𑁆𑀲 𑀩𑁆𑀭𑀽𑀫𑀻’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀚𑀧𑁆𑀧𑀸 𑀢𑀡𑁆𑀳𑀸 𑀅𑀲𑁆𑀲 𑀮𑁄𑀓𑀲𑁆𑀲𑀸’’𑀢𑀺 𑀆𑀳. ‘‘𑀲𑀩𑁆𑀩𑀲𑀢𑁆𑀢𑀸𑀦’’𑀦𑁆𑀢𑀺𑀆𑀤𑀺𑀦𑀸, ‘‘𑀲𑀩𑁆𑀩𑀲𑁄𑀯𑀸’’𑀢𑀺𑀆𑀤𑀺𑀦𑀸 𑀘 𑀅𑀦𑁆𑀯𑀬𑀢𑁄, 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀲𑀸𑀢𑀺𑀲𑀬𑀁 𑀅𑀯𑀺𑀚𑁆𑀚𑀸𑀬 𑀦𑀻𑀯𑀭𑀡𑀪𑀸𑀯𑀁 𑀤𑀲𑁆𑀲𑁂𑀢𑀺. ‘‘𑀤𑀽𑀭𑁂 𑀲𑀦𑁆𑀢𑁄 𑀧𑀓𑀸𑀲𑀦𑁆𑀢𑀺 (𑀥. 𑀧. 𑁩𑁦𑁪; 𑀦𑁂𑀢𑁆𑀢𑀺. 𑁧𑁧), 𑀭𑀢𑁆𑀢𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀻’’𑀢𑀺 (𑀦𑁂𑀢𑁆𑀢𑀺. 𑁧𑁧, 𑁨𑁭) 𑀕𑀸𑀣𑀸𑀤𑁆𑀯𑀬𑁂𑀦𑀸𑀧𑀺 𑀅𑀦𑀼𑀕𑀻𑀢𑀺𑀯𑀺𑀘𑀬𑀁 𑀤𑀲𑁆𑀲𑁂𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀭𑀽𑀧𑀸𑀯𑀘𑀭𑀸𑀢𑀺 𑀭𑀽𑀧𑀸𑀯𑀘𑀭𑀲𑀢𑁆𑀢𑀸. 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸𑀬 𑀫𑀼𑀘𑁆𑀘𑀦𑀲𑁆𑀲 𑀓𑀸𑀭𑀡𑀯𑀘𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀢𑁄 𑀯𑀝𑁆𑀝𑀤𑀼𑀓𑁆𑀔𑀢𑁄 𑀫𑀼𑀘𑁆𑀘𑀦𑀁. 𑀢𑀁 𑀯𑀝𑁆𑀝𑀤𑀼𑀓𑁆𑀔𑀁 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀯𑀲𑁂𑀦 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀕𑀳𑀡𑁂𑀦.

𑀏𑀓𑀸𑀥𑀸𑀭𑀦𑁆𑀢𑀺 𑀏𑀓𑀯𑀢𑁆𑀣𑀼 𑀅𑀥𑀺𑀝𑁆𑀞𑀸𑀦𑀁. 𑀦𑀺𑀯𑀸𑀭𑀡𑀁 𑀯𑀺𑀓𑁆𑀔𑀫𑁆𑀪𑀦𑀁 𑀧𑀺𑀥𑀸𑀦𑀁 𑀲𑀫𑀼𑀘𑁆𑀙𑁂𑀤𑁄𑀢𑀺 𑀅𑀢𑁆𑀣𑀤𑁆𑀯𑀬𑀲𑁆𑀲 𑀧𑀼𑀘𑁆𑀙𑀺𑀢𑀢𑁆𑀢𑀸 ‘‘𑀅𑀦𑁂𑀓𑀸𑀥𑀸𑀭𑀁 𑀤𑀲𑁆𑀲𑁂𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀦𑀺𑀯𑀸𑀭𑀡𑀲𑀗𑁆𑀔𑀸𑀢𑀁 𑀲𑀁𑀯𑀭𑀁…𑀧𑁂… 𑀧𑀺𑀥𑀺𑀬𑁆𑀬𑀦𑁆𑀢𑀺 𑀧𑀘𑁆𑀙𑀺𑀚𑁆𑀚𑀦𑁆𑀢𑀻’’𑀢𑀺 (𑀲𑀼. 𑀦𑀺. 𑀅𑀝𑁆𑀞. 𑁨.𑁧𑁦𑁪𑁧; 𑀘𑀽𑀴𑀦𑀺. 𑀅𑀝𑁆𑀞. 𑁩). 𑀢𑀲𑁆𑀲𑀢𑁆𑀣𑁄 ‘‘𑀦𑀺𑀯𑀸𑀭𑀡𑀲𑀗𑁆𑀔𑀸𑀢𑀁 𑀯𑀺𑀓𑁆𑀔𑀫𑁆𑀪𑀦𑀁, 𑀲𑀁𑀯𑀭𑀁, 𑀧𑀺𑀥𑀸𑀦𑀜𑁆𑀘 𑀓𑀣𑁂𑀳𑀻’’𑀢𑀺.

‘‘𑀯𑁄𑀤𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀲𑁄𑀢𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀯𑀺𑀲𑀼𑀤𑁆𑀥𑀺, ‘‘𑀯𑀼𑀝𑁆𑀞𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑀼𑀘𑁆𑀙𑁂𑀤𑀯𑀺𑀲𑀼𑀤𑁆𑀥𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀧𑀼𑀘𑁆𑀙𑀸𑀬 𑀤𑀼𑀯𑀺𑀥𑀢𑁆𑀣𑀯𑀺𑀲𑀬𑀢𑀁 𑀯𑀺𑀯𑀭𑀺𑀢𑀼𑀁 ‘𑀏𑀯’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢’’𑀦𑁆𑀢𑀺. 𑀢𑀣𑀸 𑀘𑀸𑀳 ‘‘𑀯𑁄𑀤𑀸𑀬𑀢𑀺…𑀧𑁂… 𑀅𑀭𑀺𑀬𑀫𑀕𑁆𑀕𑁄’’𑀢𑀺.

𑀤𑀺𑀝𑁆𑀞𑀺𑀫𑀸𑀦𑀸𑀯𑀺𑀚𑁆𑀚𑀸𑀲𑁄𑀢𑀸𑀧𑀺 𑀢𑀡𑁆𑀳𑀸𑀲𑁄𑀢𑀸𑀦𑀼𑀕𑀸𑀢𑀺 𑀆𑀳 ‘‘𑀬𑁂𑀪𑀼𑀬𑁆𑀬𑁂𑀦 𑀅𑀦𑀼𑀭𑁄𑀥𑀯𑀲𑁂𑀦𑀸’’𑀢𑀺. 𑀉𑀧𑀘𑀸𑀭𑀯𑀲𑁂𑀦𑀸𑀢𑀺 𑀦𑀺𑀲𑁆𑀲𑀺𑀢𑀼𑀧𑀘𑀸𑀭𑀯𑀲𑁂𑀦. 𑀲𑀩𑁆𑀩𑀲𑁆𑀫𑀸𑀢𑀺 𑀘𑀓𑁆𑀔𑀼𑀢𑁄 𑀬𑀸𑀯 𑀫𑀦𑀢𑁄𑀢𑀺 𑀲𑀩𑁆𑀩𑀲𑁆𑀫𑀸 𑀤𑁆𑀯𑀸𑀭𑀢𑁄. 𑀲𑀩𑁆𑀩𑀧𑁆𑀧𑀓𑀸𑀭𑁂𑀦𑀸𑀢𑁆𑀢𑀺 𑀢𑀡𑁆𑀳𑀸𑀬𑀦𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀦𑀉𑀦𑁆𑀦𑀫𑀦𑀸𑀤𑀺𑀧𑁆𑀧𑀓𑀸𑀭𑁂𑀦.

𑀢𑀫𑁂𑀯 𑀲𑀢𑀺𑀦𑁆𑀢𑀺 𑀬𑀸𑀬𑀁 𑀲𑀢𑀺 𑀧𑀼𑀩𑁆𑀩𑀪𑀸𑀕𑁂 𑀲𑁄𑀢𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀯𑀼𑀢𑁆𑀢𑀸, 𑀢𑀫𑁂𑀯 𑀲𑀢𑀺𑀁. 𑀫𑀕𑁆𑀕𑀓𑁆𑀔𑀡𑁂 𑀲𑁄𑀢𑀸𑀦𑀁 𑀲𑀁𑀯𑀭𑀁 𑀧𑀺𑀥𑀸𑀦𑀁 𑀩𑁆𑀭𑀽𑀫𑀺. 𑀬𑀲𑁆𑀫𑀸 𑀧𑀦 𑀧𑀺𑀥𑀸𑀬𑀺𑀓𑀸𑀧𑀺 𑀲𑀢𑀺 𑀫𑀕𑁆𑀕𑀓𑁆𑀔𑀡𑁂 𑀧𑀜𑁆𑀜𑀸𑀦𑀼𑀕𑀸, 𑀧𑀜𑁆𑀜𑀸𑀓𑀺𑀘𑁆𑀘𑀫𑁂𑀯𑁂𑀢𑁆𑀣 𑀅𑀥𑀺𑀓𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀻𑀬𑀭𑁂’’𑀢𑀺.

𑀲𑀁𑀯𑀭𑀧𑀺𑀥𑀸𑀦𑀸𑀦𑀦𑁆𑀢𑀺 𑀏𑀢𑁆𑀣 𑀲𑀁𑀯𑀭𑀲𑀤𑁆𑀤𑁂𑀦 𑀦𑀺𑀯𑀸𑀭𑀡𑀁 𑀯𑀼𑀢𑁆𑀢𑀁.

𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀅𑀭𑀺𑀬𑀫𑀕𑁆𑀕𑁂 𑀅𑀦𑀥𑀺𑀕𑀢𑁂 𑀬𑀁 𑀬𑀁 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀦𑀸𑀭𑀳𑀁, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀥𑀺𑀕𑀢𑁂 𑀢𑀁 𑀢𑀁 𑀯𑀺𑀜𑁆𑀜𑀸𑀡𑀁 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁂𑀦 𑀦𑀺𑀭𑀼𑀚𑁆𑀛𑀢𑀺 𑀲𑀤𑁆𑀥𑀺𑀁 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀦𑀸𑀫𑀭𑀽𑀧𑁂𑀦𑀸𑀢𑀺 𑀆𑀳 ‘‘𑀢𑀲𑁆𑀲 𑀢𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀲𑀳𑁂𑀯𑀸’’𑀢𑀺. 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄 𑀳𑀺 𑀏𑀢𑁆𑀣 ‘‘𑀦𑀺𑀭𑁄𑀥𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸𑀢𑀺. 𑀅𑀦𑀼𑀲𑀦𑁆𑀥𑀻𑀬𑀢𑀺 𑀏𑀢𑁂𑀦𑀸𑀢𑀺 𑀅𑀦𑀼𑀲𑀦𑁆𑀥𑀺, 𑀇𑀥 𑀧𑀼𑀘𑁆𑀙𑀺𑀬𑀫𑀸𑀦𑁄 𑀅𑀢𑁆𑀣𑁄.

𑀲𑀳 𑀯𑀺𑀲𑀬𑁂𑀦 𑀤𑀲𑁆𑀲𑁂𑀢𑀼𑀦𑁆𑀢𑀺 𑀏𑀢𑁆𑀣 𑀲𑀘𑁆𑀘𑀸𑀦𑀺 𑀏𑀯 𑀯𑀺𑀲𑀬𑁄. 𑀧𑀳𑀸𑀢𑀩𑁆𑀩𑀲𑀪𑀸𑀯𑀁 𑀲𑀫𑀼𑀤𑀬𑀲𑀘𑁆𑀘𑀁, 𑀢𑀲𑁆𑀲 𑀯𑀺𑀲𑀬𑁄 𑀤𑀼𑀓𑁆𑀔𑀲𑀘𑁆𑀘𑀁. ‘‘𑀲𑀁𑀬𑁄𑀚𑀦𑀺𑀬𑁂𑀲𑀼, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀢𑀡𑁆𑀳𑀸 𑀧𑀯𑀟𑁆𑀠𑀢𑀻’’𑀢𑀺 (𑀲𑀁. 𑀦𑀺. 𑁨.𑁫𑁩, 𑁫𑁭) 𑀳𑀺 𑀯𑀼𑀢𑁆𑀢𑀁. 𑀧𑀳𑀸𑀬𑀓𑀲𑀪𑀸𑀯𑀁 𑀫𑀕𑁆𑀕𑀲𑀘𑁆𑀘𑀁, 𑀢𑀲𑁆𑀲 𑀯𑀺𑀲𑀬𑁄 𑀦𑀺𑀭𑁄𑀥𑀲𑀘𑁆𑀘𑀦𑁆𑀢𑀺 𑀆𑀳 ‘‘𑀲𑀳 𑀯𑀺𑀲𑀬𑁂𑀦…𑀧𑁂… 𑀲𑀘𑁆𑀘𑁂𑀲𑀽’’𑀢𑀺. 𑀓𑀸𑀫𑀜𑁆𑀘𑁂𑀢𑁆𑀣 ‘‘𑀲𑀫𑀼𑀤𑀬𑁄 𑀤𑁆𑀯𑀻𑀲𑀼 𑀪𑀽𑀫𑀻𑀲𑀼 𑀧𑀳𑀻𑀬𑀢𑀻’’𑀢𑀺 𑀆𑀭𑀤𑁆𑀥𑀁, ‘‘𑀤𑀲𑁆𑀲𑀦𑁂𑀦 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺, 𑀪𑀸𑀯𑀦𑀸𑀬 𑀲𑀢𑁆𑀢 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀻’’𑀢𑀺 𑀧𑀦 𑀯𑀺𑀪𑀸𑀕𑀯𑀘𑀦𑀫𑁂𑀯 𑀯𑀢𑁆𑀢𑀦𑁆𑀢𑀺 𑀆𑀳 ‘‘𑀧𑀳𑀸𑀬𑀓𑀯𑀺𑀪𑀸𑀕𑀫𑀼𑀔𑁂𑀦 𑀧𑀳𑀸𑀢𑀩𑁆𑀩𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼’’𑀦𑁆𑀢𑀺.

𑀦𑀺𑀭𑀯𑀲𑁂𑀲𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸 𑀢𑀢𑀺𑀬𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺, 𑀇𑀢𑀭𑁂 𑀘𑀢𑀼𑀢𑁆𑀣𑀫𑀕𑁆𑀕𑁂𑀦𑀸𑀢𑀺 𑀯𑀼𑀢𑁆𑀢𑀁 ‘‘𑀇𑀢𑀭𑁂𑀳𑀺 𑀧𑀦 𑀦𑀺𑀭𑀯𑀲𑁂𑀲’’𑀦𑁆𑀢𑀺. 𑀢𑀢𑁆𑀣𑀸𑀢𑀺 𑀓𑀫𑁆𑀫𑀯𑀺𑀧𑀸𑀓𑀯𑀝𑁆𑀝𑀧𑁆𑀧𑀪𑁂𑀤𑁂𑀦 𑀢𑁂𑀥𑀸𑀢𑀼𑀓𑁂 𑀪𑀯𑀢𑁆𑀢𑀬𑁂. 𑀲𑀁𑀬𑁄𑀚𑀦𑀯𑀲𑁂𑀦𑀸𑀢𑀺 𑀲𑀩𑁆𑀩𑀤𑀸 𑀬𑁄𑀚𑀦𑀯𑀲𑁂𑀦 𑀩𑀦𑁆𑀥𑀦𑀯𑀲𑁂𑀦.

𑁧𑁨. 𑀅𑀕𑁆𑀕𑀨𑀮𑀜𑀸𑀡𑀢𑀸𑀬 𑀏𑀓𑀫𑁆𑀧𑀺 𑀲𑀫𑀸𑀦𑀁 𑀢𑀦𑁆𑀦𑀺𑀫𑀺𑀢𑁆𑀢𑀲𑁆𑀲 𑀔𑀬𑀸𑀦𑀼𑀧𑁆𑀧𑀸𑀤𑀸𑀭𑀫𑁆𑀫𑀡𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑁆𑀲 𑀯𑀲𑁂𑀦 𑀨𑀮𑀯𑁄𑀳𑀸𑀭𑁂𑀦 𑀤𑁆𑀯𑁂 𑀦𑀸𑀫𑀸𑀦𑀺 𑀮𑀪𑀢𑀺.

𑀲𑁄𑀫𑀦𑀲𑁆𑀲𑀦𑀸𑀫𑀮𑀸𑀪𑁄 𑀇𑀫𑀺𑀦𑀸 𑀆𑀭𑀫𑁆𑀫𑀡𑀲𑀗𑁆𑀓𑁂𑀢𑁂𑀦𑀸𑀢𑀺 𑀢𑀤𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀔𑀬𑁂…𑀧𑁂… 𑀲𑀫𑀜𑁆𑀜𑀸𑀬𑀸’’𑀢𑀺 𑀆𑀳.

𑁧𑁩. 𑀢𑀕𑁆𑀕𑀳𑀡𑁂𑀦𑁂𑀯𑀸𑀢𑀺 𑀨𑀲𑁆𑀲𑀧𑀜𑁆𑀘𑀫𑀓𑀧𑀜𑁆𑀘𑀭𑀽𑀧𑀺𑀦𑁆𑀤𑁆𑀭𑀺𑀬𑀕𑁆𑀕𑀳𑀡𑁂𑀦𑁂𑀯. 𑀲𑀳𑀘𑀭𑀡𑀸𑀤𑀺𑀦𑀸𑀢𑀺 𑀲𑀳𑀚𑀸𑀢𑀸𑀤𑀺𑀅𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑀪𑀸𑀯𑁂𑀦 𑀘𑁂𑀯 𑀦𑀺𑀲𑁆𑀲𑀬𑀸𑀭𑀫𑁆𑀫𑀡𑀸𑀤𑀺𑀦𑀸 𑀘. ‘‘𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺 𑀇𑀫𑀺𑀦𑀸 𑀲𑀳𑀺𑀢𑀢𑀸 𑀅𑀯𑀺𑀲𑀺𑀝𑁆𑀞𑀢𑀸 𑀇𑀥𑀸𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀅𑀯𑀺𑀪𑀸𑀕𑁂𑀦 𑀕𑀳𑀡𑀻𑀬𑀪𑀸𑀯𑀁 𑀲𑀦𑁆𑀥𑀸𑀬𑀸’’𑀢𑀺.

𑀓𑀣𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀆𑀳 ‘‘𑀲𑀢𑀺𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀳𑀸𑀦𑀁 𑀇𑀥𑀸𑀥𑀺𑀧𑁆𑀧𑁂𑀢’’𑀦𑁆𑀢𑀺. 𑀦 𑀳𑀺 𑀲𑀫𑀸𑀥𑀺𑀦𑀸 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀳𑀸𑀦𑀁 𑀲𑀫𑁆𑀪𑀯𑀢𑀺.

𑀧𑀤𑀳𑀢𑀺 𑀏𑀢𑁂𑀦𑀸𑀢𑀺 𑀧𑀥𑀸𑀦𑀁, 𑀯𑀻𑀭𑀺𑀬𑀁. 𑀢𑁂𑀢𑀺 𑀯𑀻𑀭𑀺𑀬𑀲𑀗𑁆𑀔𑀸𑀭𑀸. 𑀏𑀓𑀭𑀲𑁂𑀦𑀸𑀢𑀺 𑀬𑀣𑀸 𑀇𑀦𑁆𑀤𑁆𑀭𑀺𑀬𑀸𑀦𑀺 𑀏𑀓𑀭𑀲𑀸𑀦𑀺 𑀳𑁄𑀦𑁆𑀢𑀺, 𑀏𑀯𑀁 𑀏𑀓𑀭𑀲𑀪𑀸𑀯𑁂𑀦 𑀲𑀭𑀡𑀢𑁄 𑀧𑀯𑀢𑁆𑀢𑀦𑀢𑁄. 𑀢𑀣𑀸 𑀧𑀯𑀢𑁆𑀢𑀺𑀬𑀸 𑀏𑀯 𑀲𑀼𑀝𑁆𑀞𑀼 𑀯𑀢 𑀯𑀻𑀭𑀺𑀬𑀁 𑀯𑀸𑀳𑁂𑀲𑀻𑀢𑀺 𑀬𑁄𑀕𑀺𑀦𑀸 𑀲𑀗𑁆𑀓𑀧𑁆𑀧𑁂𑀢𑀩𑁆𑀩𑀢𑁄 𑀢𑀤𑀼𑀧𑀕𑀯𑀻𑀭𑀺𑀬𑀯𑀸𑀳𑀦𑀝𑁆𑀞𑁂𑀦 ‘‘𑀲𑀫𑁆𑀧𑀳𑀁𑀲𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀏𑀯𑀁 𑀫𑁂…𑀧𑁂… 𑀳𑁂𑀢𑀼𑀪𑀸𑀯𑀢𑁄’’𑀢𑀺.

𑀇𑀤𑁆𑀥𑀺𑀲𑀤𑁆𑀤𑀲𑁆𑀲 𑀧𑀞𑀫𑁄 𑀓𑀢𑁆𑀢𑀼𑀅𑀢𑁆𑀣𑁄, 𑀤𑀼𑀢𑀺𑀬𑁄 𑀓𑀭𑀡𑀢𑁆𑀣𑁄 𑀯𑀼𑀢𑁆𑀢𑁄, 𑀧𑀸𑀤𑀲𑀤𑁆𑀤𑀲𑁆𑀲 𑀏𑀓𑁄 𑀓𑀭𑀡𑀢𑁆𑀣𑁄 𑀏𑀯. 𑀧𑀚𑁆𑀚𑀺𑀢𑀩𑁆𑀩𑀸 𑀘 𑀇𑀤𑁆𑀥𑀻 𑀯𑀼𑀢𑁆𑀢𑀸, 𑀦 𑀘 𑀇𑀚𑁆𑀛𑀦𑁆𑀢𑀺. 𑀧𑀚𑁆𑀚𑀺𑀢𑀩𑁆𑀩𑀸 𑀘 𑀇𑀤𑁆𑀥𑀻 𑀧𑀚𑁆𑀚𑀦𑀓𑀭𑀡𑁂𑀦 𑀧𑀸𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀸 𑀦 𑀳𑁄𑀦𑁆𑀢𑀻𑀢𑀺 ‘‘𑀧𑀞𑀫𑁂𑀦 𑀅𑀢𑁆𑀣𑁂𑀦 𑀇𑀤𑁆𑀥𑀺 𑀏𑀯 𑀧𑀸𑀤𑁄’’𑀢𑀺 𑀓𑀣𑀁 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀢𑀣𑀸 𑀇𑀤𑁆𑀥𑀺𑀓𑀺𑀭𑀺𑀬𑀸𑀓𑀭𑀡𑁂𑀦 𑀲𑀸𑀥𑁂𑀢𑀩𑁆𑀩𑀸 𑀩𑀼𑀤𑁆𑀥𑀺𑀲𑀗𑁆𑀔𑀸𑀢𑀸 𑀇𑀤𑁆𑀥𑀺 𑀧𑀚𑁆𑀚𑀦𑀓𑀺𑀭𑀺𑀬𑀸𑀓𑀭𑀡𑁂𑀦 𑀧𑀚𑁆𑀚𑀺𑀢𑀩𑁆𑀩𑀸𑀢𑀺 𑀤𑁆𑀯𑀺𑀦𑁆𑀦𑀁 𑀓𑀭𑀡𑀸𑀦𑀁 𑀦 𑀲𑀫𑀸𑀦𑀸𑀥𑀺𑀓𑀭𑀡𑀢𑀸 𑀲𑀫𑁆𑀪𑀯𑀢𑀻𑀢𑀺 ‘‘𑀤𑀼𑀢𑀺𑀬𑁂𑀦 𑀅𑀢𑁆𑀣𑁂𑀦 𑀇𑀤𑁆𑀥𑀺𑀬𑀸 𑀧𑀸𑀤𑁄’’𑀢𑀺 𑀓𑀣𑀁 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀘𑁂? 𑀲𑀓𑁆𑀓𑀸, 𑀧𑀸𑀤𑀲𑁆𑀲 𑀇𑀚𑁆𑀛𑀫𑀸𑀦𑀓𑁄𑀝𑁆𑀞𑀸𑀲 𑀇𑀚𑁆𑀛𑀦𑀓𑀭𑀡𑀽𑀧𑀸𑀬𑀪𑀸𑀯𑀢𑁄. 𑀅𑀣 𑀯𑀸 ‘‘𑀧𑀞𑀫𑁂𑀦 𑀅𑀢𑁆𑀣𑁂𑀦 𑀇𑀤𑁆𑀥𑀺𑀬𑀸 𑀧𑀸𑀤𑁄, 𑀤𑀼𑀢𑀺𑀬𑁂𑀦 𑀅𑀢𑁆𑀣𑁂𑀦 𑀇𑀤𑁆𑀥𑀺 𑀏𑀯 𑀧𑀸𑀤𑁄 𑀇𑀤𑁆𑀥𑀺𑀧𑀸𑀤𑁄’’𑀢𑀺 𑀏𑀯𑀁 𑀬𑁄𑀚𑀦𑀢𑁄. 𑀓𑀣𑀁? 𑀅𑀦𑀦𑁆𑀢𑀭𑀢𑁆𑀣𑁄 𑀧𑀘𑁆𑀘𑀸𑀲𑀢𑁆𑀢𑀺𑀜𑀸𑀬𑁂𑀦 𑀇𑀥 𑀧𑀞𑀫𑁄𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀢𑀢𑁄 𑀧𑀼𑀭𑀺𑀫𑁄 𑀤𑀼𑀢𑀺𑀬𑁄𑀢𑀺.

‘‘𑀙𑀦𑁆𑀤𑀁 𑀘𑁂 𑀪𑀺𑀓𑁆𑀔𑀼 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸 𑀮𑀪𑀢𑀺 𑀲𑀫𑀸𑀥𑀺’’𑀦𑁆𑀢𑀺𑀆𑀤𑀺 (𑀯𑀺𑀪. 𑁪𑁩𑁨) 𑀯𑀘𑀦𑀢𑁄 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀻𑀢𑀺 𑀏𑀢𑁆𑀣𑀸𑀧𑀺 𑀙𑀦𑁆𑀤𑀸𑀥𑀺𑀧𑀢𑀺 𑀲𑀫𑀸𑀥𑀺 𑀙𑀦𑁆𑀤𑀲𑀫𑀸𑀥𑀻𑀢𑀺 𑀅𑀥𑀺𑀧𑀢𑀺𑀲𑀤𑁆𑀤𑀮𑁄𑀧𑀁 𑀓𑀢𑁆𑀯𑀸 𑀲𑀫𑀸𑀲𑁄 𑀯𑀼𑀢𑁆𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀅𑀥𑀺𑀧𑀢𑀺𑀲𑀤𑁆𑀤𑀢𑁆𑀣𑀤𑀲𑁆𑀲𑀦𑀯𑀲𑁂𑀦𑁂𑀯 𑀧𑀦 ‘‘𑀙𑀦𑁆𑀤𑀳𑁂𑀢𑀼𑀓𑁄, 𑀙𑀦𑁆𑀤𑀸𑀥𑀺𑀓𑁄 𑀯𑀸 𑀲𑀫𑀸𑀥𑀻’’𑀢𑀺 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 (𑀯𑀺𑀪. 𑀅𑀝𑁆𑀞. 𑁪𑁩𑁧) 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀇𑀥𑀸𑀧𑀺 𑀙𑀦𑁆𑀤𑀸𑀥𑀺𑀧𑀢𑀺 𑀲𑀫𑀸𑀥𑀺 𑀙𑀦𑁆𑀤𑀲𑀫𑀸𑀥𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀁 𑀧𑀦 𑀙𑀦𑁆𑀤𑀁 𑀯𑀼𑀢𑁆𑀢𑀦𑀬𑁂𑀦 𑀲𑀤𑁆𑀥𑀸𑀲𑀻𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀤𑁆𑀥𑀸𑀥𑀺𑀧𑀢𑁂𑀬𑁆𑀬𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸’’𑀢𑀺 𑀯𑀼𑀢𑁆𑀢𑀁. ‘‘𑀇𑀤𑀁 𑀧𑀥𑀸𑀦’’𑀦𑁆𑀢𑀺 𑀯𑀸 𑀯𑀻𑀭𑀺𑀬𑀁 𑀯𑀼𑀢𑁆𑀢𑀁. 𑀯𑀻𑀭𑀺𑀬𑀲𑀤𑁆𑀤𑀸𑀧𑁂𑀓𑁆𑀔𑀸𑀲𑀳𑀺𑀢𑀁 𑀏𑀓𑀯𑀘𑀦𑁂𑀦 𑀯𑀢𑁆𑀯𑀸 𑀘𑀢𑀼𑀩𑁆𑀩𑀺𑀥𑀲𑁆𑀲𑀧𑀺 𑀯𑀻𑀭𑀺𑀬𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀥𑀫𑁆𑀫𑀯𑀺𑀪𑀸𑀕𑁂𑀦 𑀘 ‘‘𑀇𑀫𑁂 𑀲𑀗𑁆𑀔𑀸𑀭𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀧𑀥𑀸𑀦𑀪𑀽𑀢𑀸 𑀲𑀗𑁆𑀔𑀸𑀭𑀸𑀢𑀺 𑀏𑀯𑀁 𑀲𑀫𑀸𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀗𑁆𑀔𑀢𑀲𑀗𑁆𑀔𑀸𑀭𑀸𑀤𑀺𑀦𑀺𑀯𑀢𑁆𑀢𑀦𑀢𑁆𑀣𑀜𑁆𑀘𑁂𑀢𑁆𑀣 𑀧𑀥𑀸𑀦𑀕𑁆𑀕𑀳𑀡𑀁. 𑀅𑀣 𑀯𑀸 𑀢𑀁 𑀢𑀁 𑀯𑀺𑀲𑁂𑀲𑀁 𑀲𑀗𑁆𑀔𑀭𑁄𑀢𑀻𑀢𑀺 𑀲𑀗𑁆𑀔𑀸𑀭𑁄, 𑀲𑀩𑁆𑀩𑀫𑁆𑀧𑀺 𑀯𑀻𑀭𑀺𑀬𑀁. 𑀢𑀢𑁆𑀣 𑀘𑀢𑀼𑀓𑀺𑀘𑁆𑀘𑀲𑀸𑀥𑀓𑀢𑁄 𑀅𑀜𑁆𑀜𑀲𑁆𑀲 𑀦𑀺𑀯𑀢𑁆𑀢𑀦𑀢𑁆𑀣𑀁 𑀧𑀥𑀸𑀦𑀕𑁆𑀕𑀳𑀡𑀦𑁆𑀢𑀺 𑀧𑀥𑀸𑀦𑀪𑀽𑀢𑀸 𑀲𑁂𑀝𑁆𑀞𑀪𑀽𑀢𑀸𑀢𑀺 𑀅𑀢𑁆𑀣𑁄.

𑀯𑀻𑀭𑀺𑀬𑀺𑀤𑁆𑀥𑀺𑀧𑀸𑀤𑀦𑀺𑀤𑁆𑀤𑁂𑀲𑁂 ‘‘𑀯𑀻𑀭𑀺𑀬𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢’’𑀦𑁆𑀢𑀺 (𑀯𑀺𑀪. 𑁪𑁩𑁫) 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀻𑀭𑀺𑀬𑀁 𑀆𑀕𑀢𑀁. 𑀢𑀢𑁆𑀣 𑀧𑀼𑀭𑀺𑀫𑀁 𑀲𑀫𑀸𑀥𑀺𑀯𑀺𑀲𑁂𑀲𑀦𑀁 ‘‘𑀯𑀻𑀭𑀺𑀬𑀸𑀥𑀺𑀧𑀢𑀺 𑀲𑀫𑀸𑀥𑀺 𑀯𑀻𑀭𑀺𑀬𑀲𑀫𑀸𑀥𑀻’’𑀢𑀺, 𑀤𑀼𑀢𑀺𑀬𑀁 𑀲𑀫𑀦𑁆𑀦𑀸𑀕𑀫𑀗𑁆𑀕𑀤𑀲𑁆𑀲𑀦𑀢𑁆𑀣𑀁. 𑀤𑁆𑀯𑁂 𑀏𑀯 𑀳𑀺 𑀲𑀩𑁆𑀩𑀢𑁆𑀣 𑀲𑀫𑀦𑁆𑀦𑀸𑀕𑀫𑀗𑁆𑀕𑀸𑀦𑀺 𑀲𑀫𑀸𑀥𑀺, 𑀧𑀥𑀸𑀦𑀲𑀗𑁆𑀔𑀸𑀭𑁄 𑀘. 𑀙𑀦𑁆𑀤𑀸𑀤𑀬𑁄 𑀲𑀫𑀸𑀥𑀺𑀯𑀺𑀲𑁂𑀲𑀦𑀸𑀦𑀺. 𑀧𑀥𑀸𑀦𑀲𑀗𑁆𑀔𑀸𑀭𑁄 𑀧𑀦 𑀧𑀥𑀸𑀦𑀯𑀘𑀦𑁂𑀦𑁂𑀯 𑀯𑀺𑀲𑁂𑀲𑀺𑀢𑁄, 𑀦 𑀙𑀦𑁆𑀤𑀸𑀤𑀻𑀳𑀻𑀢𑀺 𑀦 𑀇𑀥 𑀯𑀻𑀭𑀺𑀬𑀸𑀥𑀺𑀧𑀢𑀺𑀢𑀸 𑀧𑀥𑀸𑀦𑀲𑀗𑁆𑀔𑀸𑀭𑀲𑁆𑀲 𑀯𑀼𑀢𑁆𑀢𑀸 𑀳𑁄𑀢𑀺. 𑀯𑀻𑀭𑀺𑀬𑀜𑁆𑀘 𑀲𑀫𑀸𑀥𑀺𑀁 𑀯𑀺𑀲𑁂𑀲𑁂𑀢𑁆𑀯𑀸 𑀞𑀺𑀢𑀫𑁂𑀯 𑀲𑀫𑀦𑁆𑀦𑀸𑀕𑀫𑀗𑁆𑀕𑀯𑀲𑁂𑀦 𑀧𑀥𑀸𑀦𑀲𑀗𑁆𑀔𑀸𑀭𑀯𑀘𑀦𑁂𑀦 𑀯𑀼𑀢𑁆𑀢𑀦𑁆𑀢𑀺 𑀦𑀸𑀧𑀺 𑀤𑁆𑀯𑀻𑀳𑀺 𑀯𑀻𑀭𑀺𑀬𑁂𑀳𑀺 𑀲𑀫𑀦𑁆𑀦𑀸𑀕𑀫𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀬𑀲𑁆𑀫𑀸 𑀧𑀦 𑀙𑀦𑁆𑀤𑀸𑀤𑀻𑀳𑀺 𑀯𑀺𑀲𑀺𑀝𑁆𑀞𑁄 𑀲𑀫𑀸𑀥𑀺 𑀢𑀣𑀸 𑀯𑀺𑀲𑀺𑀝𑁆𑀞𑁂𑀦𑁂𑀯 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑁄 𑀧𑀥𑀸𑀦𑀲𑀗𑁆𑀔𑀸𑀭𑁄, 𑀲𑁂𑀲𑀥𑀫𑁆𑀫𑀸 𑀘, 𑀢𑀲𑁆𑀫𑀸 𑀲𑀫𑀸𑀥𑀺𑀯𑀺𑀲𑁂𑀲𑀦𑀸𑀦𑀁 𑀯𑀲𑁂𑀦 ‘‘𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸’’𑀢𑀺 𑀯𑀼𑀢𑁆𑀢𑀸. 𑀯𑀺𑀲𑁂𑀲𑀦𑀪𑀸𑀯𑁄 𑀘 𑀙𑀦𑁆𑀤𑀸𑀤𑀻𑀦𑀁 𑀢𑀁𑀢𑀁𑀅𑀧𑀲𑁆𑀲𑀬𑀦𑀯𑀲𑁂𑀦 𑀳𑁄𑀢𑀻𑀢𑀺 𑀙𑀦𑁆𑀤𑀲𑀫𑀸𑀥𑀺…𑀧𑁂… 𑀇𑀤𑁆𑀥𑀺𑀧𑀸𑀤𑀦𑁆𑀢𑀺 𑀏𑀢𑁆𑀣 𑀦𑀺𑀲𑁆𑀲𑀬𑀢𑁆𑀣𑁂𑀧𑀺 𑀧𑀸𑀤𑀲𑀤𑁆𑀤𑁂𑀦 𑀉𑀧𑀸𑀬𑀢𑁆𑀣𑁂𑀦 𑀙𑀦𑁆𑀤𑀸𑀤𑀻𑀦𑀁 𑀇𑀤𑁆𑀥𑀺𑀧𑀸𑀤𑀢𑀸 𑀯𑀼𑀢𑁆𑀢𑀸 𑀳𑁄𑀢𑀺. 𑀢𑀣𑀸 𑀳𑀺 𑀅𑀪𑀺𑀥𑀫𑁆𑀫𑁂 𑀉𑀢𑁆𑀢𑀭𑀘𑀽𑀴𑀪𑀸𑀚𑀦𑀻𑀬𑁂 ‘‘𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁄’’𑀢𑀺𑀆𑀤𑀺𑀦𑀸 (𑀯𑀺𑀪. 𑁪𑁫𑁭) 𑀙𑀦𑁆𑀤𑀸𑀤𑀻𑀦𑀫𑁂𑀯 𑀇𑀤𑁆𑀥𑀺𑀧𑀸𑀤𑀢𑀸 𑀯𑀼𑀢𑁆𑀢𑀸. 𑀧𑀜𑁆𑀳𑀸𑀧𑀼𑀘𑁆𑀙𑀓𑁂 𑀘 ‘‘𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑁋 𑀇𑀥 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀻’’𑀢𑀺 (𑀯𑀺𑀪. 𑁪𑁬𑁨) 𑀆𑀭𑀪𑀺𑀢𑁆𑀯𑀸𑀧𑀺 𑀧𑀼𑀦 𑀙𑀦𑁆𑀤𑀸𑀤𑀻𑀦𑀁𑀬𑁂𑀯 𑀓𑀼𑀲𑀮𑀸𑀤𑀺𑀪𑀸𑀯𑁄 𑀯𑀺𑀪𑀢𑁆𑀢𑁄. 𑀉𑀧𑀸𑀬𑀺𑀤𑁆𑀥𑀺𑀧𑀸𑀤𑀤𑀲𑁆𑀲𑀦𑀢𑁆𑀣𑀫𑁂𑀯 𑀳𑀺 𑀦𑀺𑀲𑁆𑀲𑀬𑀺𑀤𑁆𑀥𑀺𑀧𑀸𑀤𑀤𑀲𑁆𑀲𑀦𑀁 𑀓𑀢𑀁. 𑀅𑀜𑁆𑀜𑀣𑀸 𑀘𑀢𑀼𑀩𑁆𑀩𑀺𑀥𑀢𑀸𑀯 𑀦 𑀳𑁄𑀢𑀻𑀢𑀺. 𑀅𑀬𑀫𑁂𑀢𑁆𑀣 𑀧𑀸𑀴𑀺𑀯𑀲𑁂𑀦 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀤𑀗𑁆𑀕𑀲𑀫𑀼𑀘𑁆𑀙𑁂𑀤𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀢𑁆𑀢𑀁 𑀯𑀢𑁆𑀯𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀲𑁆𑀲 𑀅𑀯𑀘𑀦𑀁 ‘‘𑀙𑀦𑁆𑀤𑀲𑀫𑀸𑀥𑀺…𑀧𑁂… 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀻’’𑀢𑀺 (𑀯𑀺𑀪. 𑁪𑁩𑁨) 𑀪𑀸𑀯𑁂𑀢𑀩𑁆𑀩𑀸𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀯𑀼𑀢𑁆𑀢𑀢𑁆𑀢𑀸. 𑀪𑀸𑀯𑀺𑀢𑀺𑀤𑁆𑀥𑀺𑀧𑀸𑀤𑀲𑁆𑀲 𑀳𑀺 𑀲𑀘𑁆𑀙𑀺𑀓𑀸𑀢𑀩𑁆𑀩𑀸 𑀨𑀮𑀧𑀭𑀺𑀬𑀸𑀧𑀦𑁆𑀦𑀸 𑀇𑀤𑁆𑀥𑀺𑀧𑀸𑀤𑀸𑀢𑀺.

𑀯𑁄𑀲𑁆𑀲𑀕𑁆𑀕𑀲𑀤𑁆𑀤𑁄 𑀧𑀭𑀺𑀘𑁆𑀘𑀸𑀕𑀢𑁆𑀣𑁄, 𑀧𑀓𑁆𑀔𑀦𑁆𑀤𑀦𑀢𑁆𑀣𑁄 𑀘𑀸𑀢𑀺 𑀯𑁄𑀲𑁆𑀲𑀕𑁆𑀕𑀲𑁆𑀲 𑀤𑀼𑀯𑀺𑀥𑀢𑀸 𑀯𑀼𑀢𑁆𑀢𑀸. 𑀬𑀣𑀸𑀯𑀼𑀢𑁆𑀢𑁂𑀦 𑀧𑀓𑀸𑀭𑁂𑀦𑀸𑀢𑀺 𑀢𑀤𑀗𑁆𑀕𑀲𑀫𑀼𑀘𑁆𑀙𑁂𑀤𑀧𑁆𑀧𑀓𑀸𑀭𑁂𑀦, 𑀢𑀦𑁆𑀦𑀺𑀦𑁆𑀦𑀪𑀸𑀯𑀸𑀭𑀫𑁆𑀫𑀡𑀧𑁆𑀧𑀓𑀸𑀭𑁂𑀦 𑀘. 𑀧𑀭𑀺𑀡𑀫𑀦𑁆𑀢𑀁 𑀯𑀺𑀧𑀲𑁆𑀲𑀦𑀓𑁆𑀔𑀡𑁂.

𑁧𑁪. 𑀧𑀼𑀩𑁆𑀩𑀪𑀸𑀕𑀧𑀜𑁆𑀜𑀸𑀬𑀸𑀢𑀺 𑀏𑀓𑀸𑀯𑀚𑁆𑀚𑀦𑀦𑀸𑀦𑀸𑀯𑀚𑁆𑀚𑀦𑀯𑀻𑀣𑀻𑀲𑀼 𑀧𑀯𑀢𑁆𑀢𑀉𑀧𑀘𑀸𑀭𑀧𑀜𑁆𑀜𑀸𑀬. 𑀅𑀥𑀺𑀕𑀫𑀧𑀜𑁆𑀜𑀸𑀬𑀸𑀢𑀺 𑀅𑀧𑁆𑀧𑀦𑀸𑀧𑀜𑁆𑀜𑀸𑀬. 𑀧𑀼𑀦 𑀧𑀼𑀩𑁆𑀩𑀪𑀸𑀕𑀧𑀜𑁆𑀜𑀸𑀬𑀸𑀢𑀺 𑀦𑀸𑀦𑀸𑀯𑀚𑁆𑀚𑀦𑀼𑀧𑀘𑀸𑀭𑀧𑀜𑁆𑀜𑀸𑀬, 𑀧𑀝𑀺𑀲𑀦𑁆𑀥𑀺𑀧𑀜𑁆𑀜𑀸𑀬 𑀯𑀸. 𑀉𑀧𑀘𑀸𑀭𑀧𑀜𑁆𑀜𑀸𑀬𑀸𑀢𑀺 𑀏𑀓𑀸𑀯𑀚𑁆𑀚𑀦𑁂, 𑀲𑀩𑁆𑀩𑀢𑁆𑀣 𑀯𑀸 𑀧𑀯𑀢𑁆𑀢𑀉𑀧𑀘𑀸𑀭𑀧𑀜𑁆𑀜𑀸𑀬.

𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑁄𑀧𑀻𑀢𑀺 𑀬𑀣𑀸𑀯𑀼𑀢𑁆𑀢𑀸𑀬 𑀧𑀼𑀘𑁆𑀙𑀸𑀬 𑀯𑀺𑀲𑁆𑀲𑀚𑁆𑀚𑀦𑀯𑀺𑀘𑀬𑁄𑀧𑀺. 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑀸𑀢𑀺 𑀅𑀤𑀺𑀝𑁆𑀞𑀚𑁄𑀢𑀦𑀸, 𑀯𑀺𑀫𑀢𑀺𑀘𑁆𑀙𑁂𑀤𑀦𑀸 𑀘𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑀼𑀕𑀫𑀦𑁂𑀦.

𑁧𑁫. 𑀲𑁂𑀔𑁂 𑀅𑀲𑁂𑀔𑁂𑀢𑀺 𑀲𑁂𑀓𑁆𑀔𑁂 𑀅𑀭𑀺𑀬𑀧𑀼𑀕𑁆𑀕𑀮𑁂, 𑀅𑀲𑁂𑀓𑁆𑀔𑁂 𑀅𑀭𑀺𑀬𑀧𑀼𑀕𑁆𑀕𑀮𑁂. 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀧𑁆𑀧𑀳𑀸𑀦𑁂𑀢𑀺 𑀯𑀺𑀧𑀲𑁆𑀲𑀦𑀁 𑀧𑀼𑀭𑁂𑀘𑀸𑀭𑀺𑀓𑀁 𑀓𑀢𑁆𑀯𑀸 𑀧𑀯𑀢𑁆𑀢𑀓𑀺𑀮𑁂𑀲𑀧𑁆𑀧𑀳𑀸𑀦𑁂, 𑀧𑀳𑀸𑀦𑀸𑀪𑀺𑀲𑀫𑀬𑁂𑀢𑀺 𑀅𑀢𑁆𑀣𑁄.

‘‘𑀬𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸’’𑀢𑀺 𑀧𑀸𑀴𑀺𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 ‘‘𑀬𑀁 𑀅𑀦𑀺𑀘𑁆𑀘𑁂 𑀤𑀼𑀓𑁆𑀔𑁂 𑀅𑀦𑀢𑁆𑀢𑀦𑀻’’𑀢𑀺 𑀯𑀘𑀦𑀁 𑀏𑀯𑀫𑁆𑀧𑁂𑀢𑁆𑀣 𑀧𑀞𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁.

𑀲𑁂𑀲𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀥𑀫𑁆𑀫𑀸𑀢𑀺 𑀕𑁂𑀥𑀢𑁄 𑀅𑀯𑀲𑀺𑀝𑁆𑀞𑀲𑀁𑀓𑀺𑀮𑁂𑀲𑀥𑀫𑁆𑀫𑀸 𑀘 𑀲𑀩𑁆𑀩𑀯𑁄𑀤𑀸𑀦𑀥𑀫𑁆𑀫𑀸 𑀘. 𑀅𑀪𑀸𑀯𑁂𑀦𑀸𑀢𑀺 𑀅𑀪𑀸𑀯𑀦𑁂𑀦 𑀅𑀪𑀸𑀯𑀓𑀭𑀡𑁂𑀦.

𑀧𑀬𑁄𑀕𑀧𑀭𑀓𑁆𑀓𑀫𑀦𑁆𑀢𑀺 𑀪𑀼𑀲𑀁 𑀬𑁄𑀕𑁄 𑀧𑀬𑁄𑀕𑁄, 𑀧𑀬𑁄𑀕𑁄𑀯 𑀧𑀭𑀓𑁆𑀓𑀫𑁄 𑀧𑀬𑁄𑀕𑀧𑀭𑀓𑁆𑀓𑀫𑁄, 𑀘𑀺𑀢𑁆𑀢𑀁. 𑀉𑀓𑁆𑀔𑀺𑀧𑀢𑀻𑀢𑀺 𑀓𑁄𑀲𑀚𑁆𑀚𑀧𑀓𑁆𑀔𑁂 𑀧𑀢𑀺𑀢𑀼𑀁 𑀅𑀤𑁂𑀦𑁆𑀢𑁄 𑀓𑀼𑀲𑀮𑀧𑀓𑁆𑀔𑁂 𑀉𑀤𑁆𑀥𑀁 𑀔𑀺𑀧𑁂𑀦𑁆𑀢𑁄 𑀯𑀺𑀬 𑀧𑀯𑀢𑁆𑀢𑀢𑀺. 𑀧𑀥𑀸𑀦𑀯𑀻𑀭𑀺𑀬𑀦𑁆𑀢𑀺 𑀅𑀓𑀼𑀲𑀮𑀸𑀦𑀁 𑀅𑀦𑀼𑀧𑁆𑀧𑀸𑀤𑀦𑀝𑁆𑀞𑁂𑀦 𑀉𑀢𑁆𑀢𑀫𑀯𑀻𑀭𑀺𑀬𑀁. 𑀬𑁄𑀚𑁂𑀢𑀩𑁆𑀩𑀸𑀦𑀻𑀢𑀺 ‘‘𑀆𑀲𑁂𑀯𑀫𑀸𑀦𑁄 𑀯𑀸𑀬𑀫𑀢𑀻’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀅𑀦𑀼𑀧𑁆𑀧𑀦𑁆𑀦𑀸𑀢𑀺 𑀅𑀯𑀢𑁆𑀢𑀩𑁆𑀩𑀢𑀁 𑀆𑀧𑀦𑁆𑀦𑀸𑀦𑀦𑁆𑀢𑀺 𑀪𑀽𑀫𑀺𑀮𑀤𑁆𑀥𑀸𑀭𑀫𑁆𑀫𑀡𑀸𑀥𑀺𑀕𑁆𑀕𑀳𑀺𑀢𑀸𑀯𑀺𑀓𑁆𑀔𑀫𑁆𑀪𑀺𑀢𑀸𑀲𑀫𑀼𑀕𑁆𑀖𑀸𑀝𑀺𑀢𑀼𑀧𑁆𑀧𑀦𑁆𑀦𑀸𑀦𑀁.

𑁧𑁬. ‘‘𑀅𑀝𑁆𑀞𑀫𑀓𑀲𑁆𑀲 𑀇𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀧𑀞𑀫𑀫𑀕𑁆𑀕𑁂 𑀲𑀤𑁆𑀥𑀸𑀤𑀬𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀦𑁆𑀤𑁆𑀭𑀺𑀬𑀕𑁆𑀕𑀳𑀡𑀜𑁆𑀘 𑀧𑀸𑀴𑀺𑀬𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁.

𑀅𑀲𑀼𑀪𑀸𑀦𑀼𑀧𑀲𑁆𑀲𑀦𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀦𑁆𑀢𑀺 𑀆𑀳 ‘‘𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀬 𑀲𑀼𑀦𑀺𑀕𑁆𑀕𑀳𑀺𑀢𑁄 𑀓𑀸𑀫𑀯𑀺𑀢𑀓𑁆𑀓𑁄’’𑀢𑀺. 𑀲𑀫𑀸𑀥𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀓𑀸𑀫𑀯𑀺𑀢𑀓𑁆𑀓𑀫𑁆𑀧𑀺 𑀦𑀺𑀕𑁆𑀕𑀳𑁂𑀢𑁆𑀯𑀸 𑀏𑀯 𑀉𑀧𑁆𑀧𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀯𑀚𑁆𑀚𑀲𑀼𑀔𑀧𑀤𑀝𑁆𑀞𑀸𑀦𑁂𑀦𑀸’’𑀢𑀺𑀆𑀤𑀺𑀫𑀸𑀳. ‘‘𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀆𑀭𑀤𑁆𑀥𑀯𑀻𑀭𑀺𑀬𑁄’’𑀢𑀺𑀆𑀤𑀺𑀦𑀸 𑀥𑀫𑁆𑀫𑀘𑁆𑀙𑀦𑁆𑀤𑀢𑁄 𑀉𑀧𑁆𑀧𑀚𑁆𑀚𑀫𑀸𑀦𑁄 𑀯𑀻𑀭𑀺𑀬𑀘𑁆𑀙𑀦𑁆𑀤𑁄 𑀔𑀦𑁆𑀢𑀺𑀁 𑀧𑀭𑀺𑀩𑁆𑀭𑀽𑀳𑁂𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀦𑀯𑀚𑁆𑀚𑀥𑀫𑁆𑀫𑀸𑀦𑀁 𑀉𑀧𑀓𑀸𑀭𑀓𑀥𑀫𑁆𑀫𑀸𑀲𑁂𑀯𑀦𑀁 𑀯𑀺𑀬 𑀅𑀦𑀼𑀧𑀓𑀸𑀭𑀓𑀥𑀫𑁆𑀫𑀧𑀭𑀺𑀯𑀚𑁆𑀚𑀦𑀫𑁆𑀧𑀺 𑀧𑀜𑁆𑀜𑀸𑀦𑀺𑀲𑁂𑀯𑀦𑁂𑀦𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀲𑀫𑀸𑀥𑀺𑀆𑀤𑀻𑀦’’𑀦𑁆𑀢𑀺𑀆𑀤𑀺.

𑁧𑁭. 𑀲𑀩𑁆𑀩𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁 𑀤𑁂𑀲𑀦𑀁 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀯𑀺𑀪𑀚𑀺𑀢𑀼𑀁 ‘‘𑀮𑁄𑀓𑁄 𑀦𑀸𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀩𑁆𑀩𑀥𑀫𑁆𑀫𑀸𑀦𑀦𑁆𑀢𑀺…𑀧𑁂… 𑀤𑀲𑁆𑀲𑁂𑀢𑀼’’𑀦𑁆𑀢𑀺 𑀆𑀳. 𑀫𑀳𑀕𑁆𑀕𑀢𑀥𑀫𑁆𑀫𑁂𑀲𑀼 𑀞𑀸𑀦𑀁 𑀢𑀁𑀲𑀫𑁆𑀧𑀸𑀤𑀦𑀸𑀯. 𑀢𑀣𑀸 𑀲𑁂𑀲𑁂𑀲𑀼. 𑀯𑀟𑁆𑀠𑀺𑀬𑀫𑀸𑀦𑁂𑀲𑀽𑀢𑀺 𑀬𑀣𑀸 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀧𑀸𑀘𑀬𑀦𑁆𑀢𑀺, 𑀏𑀯𑀁 𑀩𑁆𑀭𑀽𑀳𑀺𑀬𑀫𑀸𑀦𑁂𑀲𑀼.

𑀤𑀲𑁆𑀲𑀦𑀧𑀭𑀺𑀜𑁆𑀜𑀸𑀢𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀲𑀮𑀓𑁆𑀔𑀡𑀢𑁄, 𑀧𑀘𑁆𑀘𑀬𑀢𑁄 𑀘 𑀧𑀭𑀺𑀚𑀸𑀦𑀦𑀸. 𑀢𑁂𑀦𑀸𑀳 ‘‘𑀜𑀸𑀢𑀧𑀭𑀺𑀜𑁆𑀜𑀸’’𑀢𑀺. 𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑁂𑀦 𑀲𑀤𑁆𑀥𑀺𑀁 𑀮𑀓𑁆𑀔𑀡𑀢𑁆𑀢𑀬𑀯𑀺𑀪𑀸𑀯𑀦𑀸 𑀇𑀥 ‘‘𑀪𑀸𑀯𑀦𑀸𑀧𑀭𑀺𑀜𑁆𑀜𑀸’’𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀪𑀸𑀯𑀦𑀸…𑀧𑁂… 𑀧𑀭𑀺𑀜𑁆𑀜𑀸 𑀘𑀸’’𑀢𑀺. 𑀤𑀲𑁆𑀲𑀦𑀢𑁆𑀣𑀸 𑀧𑀭𑀺𑀜𑁆𑀜𑀸 𑀤𑀲𑁆𑀲𑀦𑀧𑀭𑀺𑀜𑁆𑀜𑀸, 𑀪𑀸𑀯𑀦𑀢𑁆𑀣𑀸 𑀧𑀭𑀺𑀜𑁆𑀜𑀸 𑀪𑀸𑀯𑀦𑀸𑀧𑀭𑀺𑀜𑁆𑀜𑀸𑀢𑀺 𑀏𑀯𑀁 𑀯𑀸 𑀏𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀓𑀓𑁆𑀔𑀴𑀨𑀼𑀲𑀦𑀸𑀤𑀻𑀢𑀺 𑀓𑀓𑁆𑀔𑀴𑀸𑀤𑀺𑀨𑀼𑀲𑀦𑀸𑀤𑀺. 𑀅𑀪𑀺𑀚𑀸𑀦𑀺𑀢𑁆𑀯𑀸𑀢𑀺 𑀅𑀪𑀺𑀜𑁆𑀜𑀸𑀬 𑀧𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸, 𑀞𑀺𑀢𑀲𑁆𑀲 𑀅𑀪𑀺𑀚𑀸𑀦𑀦𑀳𑁂𑀢𑀼 𑀯𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀣𑁄𑀢𑀺 𑀨𑀮𑀁. 𑀦𑀬𑁄𑀢𑀺 𑀯𑀼𑀢𑁆𑀢𑀦𑀬𑁄.

‘‘𑀬𑀁 𑀅𑀲𑀗𑁆𑀔𑀢’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺. 𑀘𑀢𑀼𑀦𑀬𑀓𑁄𑀯𑀺𑀤𑁄𑀢𑀺 𑀏𑀓𑀢𑁆𑀢𑀦𑀸𑀦𑀢𑁆𑀢𑀸𑀤𑀺𑀦𑀬𑀘𑀢𑀼𑀓𑁆𑀓𑁂 𑀦𑀺𑀧𑀼𑀡𑁄. 𑀤𑁂𑀲𑀦𑀸𑀬𑀼𑀢𑁆𑀢𑀺𑀓𑀼𑀲𑀮𑁄𑀢𑀺 𑀥𑀫𑁆𑀫𑀸𑀦𑀁 𑀤𑁂𑀲𑀦𑀸𑀯𑀺𑀥𑀺𑀫𑁆𑀳𑀺 𑀓𑀼𑀲𑀮𑁄.

𑀲𑀤𑀺𑀲𑀻 𑀓𑀸𑀢𑀩𑁆𑀩𑀸 𑀲𑀁𑀲𑀦𑁆𑀤𑀦𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀦𑁂𑀢𑀩𑁆𑀩𑀸 ‘‘𑀅𑀬𑀁 𑀤𑁂𑀲𑀦𑀸 𑀇𑀫𑀸𑀬 𑀤𑁂𑀲𑀦𑀸𑀬 𑀏𑀯𑀁 𑀲𑀁𑀲𑀦𑁆𑀤𑀢𑀻’’𑀢𑀺. 𑀅𑀢𑁆𑀣𑀢𑁄 𑀅𑀧𑁂𑀢𑀦𑁆𑀢𑀺 𑀅𑀬𑀼𑀢𑁆𑀢𑀢𑁆𑀣𑀁. 𑀅𑀲𑀫𑁆𑀩𑀦𑁆𑀥𑀢𑁆𑀣𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀁 𑀅𑀲𑀫𑁆𑀩𑀦𑁆𑀥𑀧𑀤𑀢𑁆𑀣𑀁. 𑀦𑀦𑀼 𑀧𑀝𑁆𑀞𑀸𑀦𑀯𑀺𑀘𑀸𑀭𑁄 𑀦𑀬𑀯𑀺𑀘𑀸𑀭𑁄 𑀯𑀺𑀬 𑀳𑀸𑀭𑁂𑀳𑀺 𑀅𑀲𑀫𑁆𑀫𑀺𑀲𑁆𑀲𑁄 𑀯𑀺𑀘𑀸𑀭𑀡𑀦𑁆𑀢𑀭𑁄𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀇𑀥 𑀦𑀺𑀓𑁆𑀔𑀺𑀢𑁆𑀢𑁄𑀢𑀺 𑀇𑀥 𑀲𑀼𑀢𑁆𑀢𑀯𑀺𑀘𑀬𑁂 𑀲𑀼𑀢𑁆𑀢𑀢𑁆𑀣𑀯𑀺𑀘𑀸𑀭𑀪𑀸𑀯𑀢𑁄 𑀦𑀺𑀓𑁆𑀔𑀺𑀢𑁆𑀢𑁄, 𑀏𑀢𑁂𑀦 𑀯𑀸 𑀧𑀝𑁆𑀞𑀸𑀦𑀲𑁆𑀲 𑀳𑀸𑀭𑀦𑁆𑀢𑁄𑀕𑀥𑀪𑀸𑀯𑀤𑀲𑁆𑀲𑀦𑁂𑀦𑁂𑀯 𑀫𑀽𑀮𑀧𑀤𑀸𑀦𑀁 𑀯𑀺𑀬 𑀧𑀝𑁆𑀞𑀸𑀦𑀲𑁆𑀲 𑀧𑀤𑀢𑁆𑀣𑀦𑁆𑀢𑀭𑀸𑀪𑀸𑀯𑁄 𑀤𑀲𑁆𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲𑀸𑀢𑀺 𑀲𑀁𑀯𑀡𑁆𑀡𑀺𑀬𑀫𑀸𑀦𑀲𑀼𑀢𑁆𑀢𑀁 𑀲𑀦𑁆𑀥𑀸𑀬𑀸𑀳. 𑀓𑀲𑁆𑀫𑀺𑀁 𑀯𑀸 𑀧𑀤𑁂𑀢𑀺 𑀲𑀁𑀯𑀡𑁆𑀡𑀺𑀬𑀫𑀸𑀦𑀁 𑀕𑀸𑀣𑀁 𑀲𑀦𑁆𑀥𑀸𑀬𑀸𑀳. 𑀢𑀩𑁆𑀩𑀺𑀘𑀬𑁂𑀦𑀸𑀢𑀺 𑀧𑀼𑀘𑁆𑀙𑀸𑀤𑀺𑀯𑀺𑀘𑀬𑁂𑀦, 𑀅𑀲𑁆𑀲𑀸𑀤𑀸𑀤𑀺𑀯𑀺𑀘𑀬𑁂𑀦 𑀘.

𑀯𑀺𑀘𑀬𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀬𑀼𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁧𑁮. 𑀏𑀯𑀫𑁂𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑁄 𑀦 𑀕𑀳𑁂𑀢𑀩𑁆𑀩𑁄, 𑀏𑀯𑀁 𑀧𑀦 𑀕𑀳𑁂𑀢𑀩𑁆𑀩𑁄𑀢𑀺 𑀅𑀕𑁆𑀕𑀳𑁂𑀢𑀩𑁆𑀩𑀕𑀳𑁂𑀢𑀩𑁆𑀩𑀸𑀦𑀁 𑀅𑀢𑁆𑀣𑀸𑀦𑀁 𑀯𑀺𑀚𑀳𑀦𑀕𑁆𑀕𑀳𑀡𑀢𑁆𑀣𑀸𑀬 𑀬𑀼𑀢𑁆𑀢𑀸𑀬𑀼𑀢𑁆𑀢𑀺𑀯𑀺𑀘𑀸𑀭𑀡𑀸𑀬𑀁 𑀯𑀚𑁆𑀚𑁂𑀢𑀩𑁆𑀩𑁂𑀲𑀼 𑀢𑀸𑀯 𑀧𑀞𑀫𑀁 𑀧𑀝𑀺𑀧𑀢𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀢𑀣𑀸𑀓𑀸𑀭𑁂𑀦 𑀕𑀬𑁆𑀳𑀫𑀸𑀦𑀸 𑀲𑀼𑀢𑁆𑀢𑀢𑁆𑀣𑀸 𑀯𑀺𑀲𑀬𑁄’’𑀢𑀺 𑀬𑀣𑀸 ‘‘𑀯𑀸𑀫𑀁 𑀫𑀼𑀜𑁆𑀘, 𑀤𑀓𑁆𑀔𑀺𑀡𑀁 𑀕𑀡𑁆𑀳𑀸’’𑀢𑀺 (𑀥. 𑀲. 𑀅𑀝𑁆𑀞. 𑁪𑁯𑁮; 𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁧.𑁧𑁪; 𑀲𑀁. 𑀦𑀺. 𑀝𑀻. 𑁧.𑁧.𑁨𑁧𑁩). 𑀯𑀚𑁆𑀚𑁂𑀢𑀩𑁆𑀩𑀪𑀸𑀯𑀢𑁄 𑀳𑀺 𑀲𑀼𑀢𑁆𑀢𑀧𑀤𑁂𑀳𑀺 𑀲𑀼𑀢𑁆𑀢𑀢𑁆𑀣𑁂 𑀯𑀺𑀯𑁂𑀘𑀺𑀢𑁂 𑀕𑀳𑁂𑀢𑀩𑁆𑀩𑀪𑀸𑀯𑁄 𑀘 𑀅𑀯𑀲𑀺𑀝𑁆𑀞𑁄 𑀳𑁄𑀢𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀫𑁂𑀢𑁆𑀢𑀸𑀯𑀺𑀳𑀸𑀭𑀲𑁆𑀲 𑀲𑀢𑁄 𑀩𑁆𑀬𑀸𑀧𑀸𑀤𑁄 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻’𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, ‘𑀩𑁆𑀬𑀸𑀧𑀸𑀤𑁄 𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀢𑀻’𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸’’𑀢𑀺 (𑀦𑁂𑀢𑁆𑀢𑀺. 𑁨𑁧).

𑀬𑀼𑀢𑁆𑀢𑀺𑀦𑀺𑀤𑁆𑀥𑀸𑀭𑀡𑁂𑀦 𑀅𑀬𑀣𑀸𑀲𑀪𑀸𑀯𑀢𑁄 𑀯𑀺𑀯𑁂𑀘𑀺𑀢𑁆𑀯𑀸 𑀬𑀣𑀸𑀲𑀪𑀸𑀯𑀢𑁄 𑀥𑀫𑁆𑀫𑀲𑁆𑀲 𑀕𑀳𑀡𑀓𑀸𑀭𑀡𑀸𑀦𑀺 𑀓𑀣𑁂𑀦𑁆𑀢𑁄 ‘‘𑀫𑀳𑀦𑁆𑀢𑀸 𑀅𑀧𑀤𑀺𑀲𑀺𑀢𑀩𑁆𑀩𑀸 𑀏𑀢𑁂𑀲𑀦𑁆𑀢𑀺 𑀫𑀳𑀸𑀧𑀤𑁂𑀲𑀸’’𑀢𑀺 𑀇𑀫𑀫𑀢𑁆𑀣𑀫𑀸𑀳 ‘‘𑀩𑀼𑀤𑁆𑀥𑀸𑀤𑀬𑁄’’𑀢𑀺𑀆𑀤𑀺𑀦𑀸. 𑀧𑀢𑀺𑀝𑁆𑀞𑀸𑀦𑀸𑀦𑀻𑀢𑀺 𑀧𑀢𑀺𑀝𑁆𑀞𑀸𑀦𑀲𑀸𑀥𑀦𑀸𑀦𑀺. 𑀲𑁂𑀲𑁂𑀲𑀽𑀢𑀺 𑀲𑀗𑁆𑀖𑀸𑀧𑀤𑁂𑀲𑀸𑀤𑀻𑀲𑀼. 𑀧𑀞𑀫𑀢𑁆𑀣𑁄 𑀏𑀯 𑀳𑀺 𑀇𑀥 𑀧𑀸𑀴𑀺 𑀆𑀕𑀢𑁄, 𑀯𑀺𑀦𑀺𑀘𑁆𑀙𑀬𑀦𑁂 𑀓𑀸𑀭𑀡𑀁 𑀫𑀳𑀸𑀧𑀤𑁂𑀲𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀼𑀢𑁆𑀢𑁄𑀢𑀭𑀡𑀸𑀤𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀲𑀼𑀢𑁆𑀢𑀸𑀦𑁄𑀢𑀭𑀡𑀸𑀤𑀺𑀧𑀺 𑀲𑀗𑁆𑀕𑀬𑁆𑀳𑀢𑀺. 𑀲𑀼𑀢𑁆𑀢𑁄𑀢𑀭𑀡𑀯𑀺𑀦𑀬𑀲𑀦𑁆𑀤𑀲𑁆𑀲𑀦𑀸𑀦𑀺 𑀳𑀺 𑀓𑁂𑀦𑀘𑀺 𑀬𑀣𑀸𑀪𑀢𑀲𑁆𑀲 𑀕𑀦𑁆𑀣𑀲𑁆𑀲 ‘‘𑀥𑀫𑁆𑀫𑁄’’𑀢𑀺 𑀯𑀺𑀦𑀺𑀘𑁆𑀙𑀬𑀦𑁂 𑀓𑀸𑀭𑀡𑀁. 𑀲𑀼𑀢𑁆𑀢𑀸𑀦𑁄𑀢𑀭𑀡𑀯𑀺𑀦𑀬𑀸𑀲𑀦𑁆𑀤𑀲𑁆𑀲𑀦𑀸𑀦𑀺 ‘‘𑀅𑀥𑀫𑁆𑀫𑁄’’𑀢𑀺. 𑀬𑀤𑀺 𑀏𑀯𑀦𑁆𑀢𑀺 𑀬𑀤𑀺 𑀬𑀣𑀸𑀪𑀢𑀲𑁆𑀲 𑀕𑀦𑁆𑀣𑀲𑁆𑀲 𑀲𑀼𑀢𑁆𑀢𑀯𑀺𑀦𑀬𑁂𑀳𑀺 𑀲𑀁𑀲𑀦𑁆𑀤𑀦𑀁 ‘‘𑀥𑀫𑁆𑀫𑁄’’𑀢𑀺, 𑀅𑀲𑀁𑀲𑀦𑁆𑀤𑀦𑀁 ‘‘𑀅𑀥𑀫𑁆𑀫𑁄’’𑀢𑀺 𑀯𑀺𑀦𑀺𑀘𑁆𑀙𑀬𑀓𑀸𑀭𑀡𑀁, 𑀏𑀯𑀁 𑀲𑀦𑁆𑀢𑁂𑀢𑀺 𑀅𑀢𑁆𑀣𑁄. 𑀲𑀫𑁆𑀧𑀤𑀻𑀬𑀢𑀺 𑀜𑀸𑀧𑀻𑀬𑀢𑀺 𑀥𑀫𑁆𑀫𑁄 𑀏𑀢𑁂𑀳𑀻𑀢𑀺 𑀲𑀫𑁆𑀧𑀤𑀸𑀬𑀸, 𑀅𑀓𑁆𑀔𑀸𑀢𑀸𑀭𑁄.

𑀯𑀺𑀦𑀻𑀬𑀦𑁆𑀢𑀺 𑀭𑀸𑀕𑀸𑀤𑀬𑁄 𑀏𑀢𑁂𑀦𑀸𑀢𑀺 𑀯𑀺𑀦𑀬𑁄, 𑀓𑀸𑀭𑀡𑀁. 𑀢𑁂𑀦𑀸𑀳 ‘‘𑀭𑀸𑀕𑀸𑀤𑀺𑀯𑀽𑀧𑀲𑀫𑀦𑀺𑀫𑀺𑀢𑁆𑀢’’𑀦𑁆𑀢𑀺. 𑀓𑀺𑀁 𑀧𑀦 𑀢𑀁? 𑀲𑀸𑀥𑀺𑀝𑁆𑀞𑀸𑀦𑀲𑀫𑀣𑀯𑀺𑀧𑀲𑁆𑀲𑀦𑀸𑀤𑀺𑀥𑀫𑁆𑀫𑀸. 𑀬𑁂 𑀧𑀭𑀢𑁄 ‘‘𑀢𑁂𑀘𑀢𑁆𑀢𑀸𑀮𑀻𑀲𑀁 𑀩𑁄𑀥𑀗𑁆𑀕𑀫𑀸 𑀥𑀫𑁆𑀫𑀸’’𑀢𑀺 (𑀦𑁂𑀢𑁆𑀢𑀺. 𑁨𑁪) 𑀯𑀓𑁆𑀔𑀢𑀺.

𑀯𑀺𑀦𑀬𑀫𑀳𑀸𑀧𑀤𑁂𑀲𑀸 𑀓𑀧𑁆𑀧𑀺𑀬𑀸𑀦𑀼𑀮𑁄𑀫𑀢𑁄 𑀅𑀦𑀼𑀮𑁄𑀫𑀓𑀧𑁆𑀧𑀺𑀬𑀁 𑀦𑀸𑀫, 𑀢𑀁𑀲𑀤𑀺𑀲𑀢𑀸𑀬 𑀲𑀼𑀢𑁆𑀢𑀦𑁆𑀢𑀫𑀳𑀸𑀧𑀤𑁂𑀲𑀸𑀧𑀺 𑀅𑀦𑀼𑀮𑁄𑀫𑀓𑀧𑁆𑀧𑀺𑀬𑀦𑁆𑀢𑀺 𑀅𑀝𑁆𑀞𑀓𑀣𑀸𑀯𑁄𑀳𑀸𑀭𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀁 𑀅𑀦𑀼𑀮𑁄𑀫𑀓𑀧𑁆𑀧𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀬𑀤𑀺𑀧𑀺 𑀢𑀢𑁆𑀣 𑀢𑀢𑁆𑀣 𑀧𑀯𑀢𑁆𑀢𑀸 𑀪𑀕𑀯𑀢𑁄 𑀧𑀓𑀺𑀡𑁆𑀡𑀓𑀤𑁂𑀲𑀦𑀸 𑀅𑀝𑁆𑀞𑀓𑀣𑀸, 𑀲𑀸 𑀧𑀦 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀲𑀗𑁆𑀕𑀸𑀬𑀺𑀢𑁆𑀯𑀸 𑀢𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀦𑀼𑀭𑀽𑀧𑁂𑀦 𑀯𑀸𑀘𑀦𑀸𑀫𑀕𑁆𑀕𑀁 𑀆𑀭𑁄𑀧𑀺𑀢𑀢𑁆𑀢𑀸 𑀆𑀘𑀭𑀺𑀬𑀯𑀸𑀤𑁄 𑀦𑀸𑀫. 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀘𑀭𑀺𑀬𑀯𑀸𑀤𑁄 𑀦𑀸𑀫 𑀅𑀝𑁆𑀞𑀓𑀣𑀸’’𑀢𑀺. 𑀢𑀺𑀲𑁆𑀲𑁄𑀧𑀺 𑀲𑀗𑁆𑀕𑀻𑀢𑀺𑀬𑁄 𑀆𑀭𑀼𑀴𑁆𑀳𑁄 𑀏𑀯 𑀳𑀺 𑀩𑀼𑀤𑁆𑀥𑀯𑀘𑀦𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀪𑀽𑀢𑁄 𑀓𑀣𑀸𑀫𑀕𑁆𑀕𑁄 𑀧𑀘𑁆𑀙𑀸 𑀢𑀫𑁆𑀩𑀧𑀡𑁆𑀡𑀺𑀬𑁂𑀳𑀺 𑀫𑀳𑀸𑀣𑁂𑀭𑁂𑀳𑀺 𑀲𑀻𑀳𑀴𑀪𑀸𑀲𑀸𑀬 𑀞𑀧𑀺𑀢𑁄. 𑀅𑀢𑁆𑀢𑀦𑁄𑀫𑀢𑀺 𑀣𑁂𑀭𑀯𑀸𑀤𑁄. 𑀲𑀫𑁂𑀦𑁆𑀢𑀫𑁂𑀯 𑀕𑀳𑁂𑀢𑀩𑁆𑀩𑀦𑁆𑀢𑀺 𑀬𑀣𑀸 𑀧𑀸𑀴𑀺𑀬𑀸 𑀲𑀁𑀲𑀦𑁆𑀤𑀢𑀺, 𑀏𑀯𑀁 𑀫𑀳𑀸𑀧𑀤𑁂𑀲𑀢𑁄 𑀅𑀢𑁆𑀣𑀸 𑀉𑀤𑁆𑀥𑀭𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀧𑀫𑀸𑀤𑀧𑀸𑀞𑀯𑀲𑁂𑀦 𑀆𑀘𑀭𑀺𑀬𑀯𑀸𑀤𑀲𑁆𑀲 𑀓𑀤𑀸𑀘𑀺 𑀧𑀸𑀴𑀺𑀬𑀸 𑀅𑀲𑀁𑀲𑀦𑁆𑀤𑀦𑀸𑀧𑀺 𑀲𑀺𑀬𑀸, 𑀲𑁄 𑀦 𑀕𑀳𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀲𑀼𑀢𑁆𑀢𑁂𑀦 𑀲𑀫𑁂𑀦𑁆𑀢𑁄 𑀏𑀯 𑀕𑀳𑁂𑀢𑀩𑁆𑀩𑁄’’𑀢𑀺.

𑀘𑀢𑀽𑀳𑀺 𑀫𑀳𑀸𑀧𑀤𑁂𑀲𑁂𑀳𑀺 𑀬𑀼𑀚𑁆𑀚𑀢𑀻𑀢𑀺 𑀘𑀢𑀽𑀳𑀺 𑀫𑀳𑀸𑀧𑀤𑁂𑀲𑁂𑀳𑀺 𑀦 𑀯𑀺𑀭𑀼𑀚𑁆𑀛𑀢𑀺. 𑀇𑀤𑀸𑀦𑀺 𑀢𑀁 𑀅𑀯𑀺𑀭𑀼𑀚𑁆𑀛𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁂𑀦 𑀬𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀼𑀢𑁆𑀢𑁄𑀢𑀭𑀡𑀸𑀤𑀺 𑀏𑀯 𑀳𑁂𑀢𑁆𑀣 𑀓𑀸𑀭𑀡𑀁. 𑀢𑀲𑁆𑀲 𑀘 𑀅𑀦𑁂𑀓𑀸𑀓𑀸𑀭𑀢𑀸𑀬 ‘‘𑀧𑀓𑀸𑀭𑁂𑀦𑀸’’𑀢𑀺 𑀯𑀼𑀢𑁆𑀢𑁄. 𑀲𑀁𑀯𑀡𑁆𑀡𑀺𑀬𑀫𑀸𑀦𑁂 𑀲𑀼𑀢𑁆𑀢𑁂 𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀪𑀢𑁂𑀦𑀸𑀢𑀺 𑀆𑀦𑀻𑀢𑁂𑀦. 𑀲𑀼𑀢𑁆𑀢𑀢𑁄𑀢𑀺 𑀲𑀼𑀢𑁆𑀢𑀦𑁆𑀢𑀭𑀢𑁄. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀓𑁂𑀦𑀘𑀺 𑀧𑀲𑀗𑁆𑀕𑁂𑀦 𑀲𑀼𑀢𑁆𑀢𑀦𑁆𑀢𑀭𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀆𑀦𑀻𑀢𑁂𑀦 𑀲𑀼𑀢𑁆𑀢𑀧𑀤𑁂𑀦 𑀲𑀼𑀢𑁆𑀢𑁄𑀢𑀭𑀡𑀸𑀤𑀺𑀦𑀸, 𑀓𑀸𑀭𑀡𑀧𑁆𑀧𑀓𑀸𑀭𑁂𑀦 𑀘 𑀘𑀢𑀼𑀫𑀳𑀸𑀧𑀤𑁂𑀲𑀸𑀯𑀺𑀭𑁄𑀥𑁂𑀦 𑀲𑀁𑀯𑀡𑁆𑀡𑀺𑀬𑀫𑀸𑀦𑁂 𑀲𑀼𑀢𑁆𑀢𑁂 𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀅𑀢𑁆𑀣𑀚𑀸𑀢𑀁 𑀕𑀳𑁂𑀢𑀩𑁆𑀩𑀦𑁆𑀢𑀺. 𑀢𑁂𑀦𑀸𑀳 ‘‘𑀢𑁂𑀦…𑀧𑁂… 𑀓𑀸𑀢𑀩𑁆𑀩𑀸’’𑀢𑀺. 𑀢𑀢𑁆𑀣 𑀬𑀼𑀢𑁆𑀢𑀺𑀳𑀸𑀭𑀬𑁄𑀚𑀦𑀸 𑀓𑀸𑀢𑀩𑁆𑀩𑀸𑀢𑀺 𑀬𑀼𑀢𑁆𑀢𑀺𑀦𑀺𑀤𑁆𑀥𑀸𑀭𑀡𑀯𑀲𑁂𑀦 𑀅𑀬𑀁 𑀬𑀼𑀢𑁆𑀢𑀺𑀳𑀸𑀭𑁄 𑀬𑁄𑀚𑁂𑀢𑀩𑁆𑀩𑁄. 𑀅𑀣 𑀯𑀸 𑀬𑀼𑀢𑁆𑀢𑀺𑀳𑀸𑀭𑀬𑁄𑀚𑀦𑀸 𑀓𑀸𑀢𑀩𑁆𑀩𑀸𑀢𑀺 𑀇𑀫𑀺𑀦𑀸 𑀳𑀸𑀭𑁂𑀦 𑀯𑀓𑁆𑀔𑀫𑀸𑀦𑀦𑀬𑁂𑀦 𑀬𑀼𑀢𑁆𑀢𑀺𑀕𑀯𑁂𑀲𑀦𑀁 𑀓𑀢𑁆𑀯𑀸 𑀢𑀸𑀬 𑀬𑀼𑀢𑁆𑀢𑀺𑀬𑀸 𑀲𑀩𑁆𑀩𑀳𑀸𑀭𑀬𑁄𑀚𑀦𑀸 𑀓𑀸𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀮𑀓𑁆𑀔𑀡𑀜𑁆𑀳𑁂𑀢𑀁 𑀬𑀼𑀢𑁆𑀢𑀺𑀕𑀯𑁂𑀲𑀦𑀸𑀬, 𑀬𑀤𑀺𑀤𑀁 𑀬𑀼𑀢𑁆𑀢𑀺𑀳𑀸𑀭𑁄. 𑀢𑁂𑀦𑀸𑀳 ‘‘𑀲𑀩𑁆𑀩𑁂𑀲𑀁 𑀳𑀸𑀭𑀸𑀦𑀁, 𑀬𑀸 𑀪𑀽𑀫𑀻, 𑀬𑁄 𑀘 𑀕𑁄𑀘𑀭𑁄 𑀢𑁂𑀲𑀁. ‘‘𑀬𑀼𑀢𑁆𑀢𑀸𑀬𑀼𑀢𑁆𑀢𑀧𑀭𑀺𑀓𑁆𑀔𑀸’’𑀢𑀺 (𑀦𑁂𑀢𑁆𑀢𑀺. 𑁪), ‘‘𑀇𑀫𑀸𑀬 𑀬𑀼𑀢𑁆𑀢𑀺𑀬𑀸 𑀅𑀜𑁆𑀜𑀫𑀜𑁆𑀜𑁂𑀳𑀺 𑀓𑀸𑀭𑀡𑁂𑀳𑀺 𑀕𑀯𑁂𑀲𑀺𑀢𑀩𑁆𑀩’’𑀦𑁆𑀢𑀺 (𑀦𑁂𑀢𑁆𑀢𑀺. 𑁨𑁦) 𑀘.

𑁧𑁯. 𑀬𑀤𑀺 𑀯𑀸 𑀲𑀩𑁆𑀩𑀸𑀦𑀺 𑀧𑀤𑀸𑀦𑀺 𑀏𑀓𑀁 𑀅𑀢𑁆𑀣𑀁 𑀅𑀪𑀺𑀯𑀤𑀦𑁆𑀢𑀻𑀢𑀺 𑀬𑁄𑀚𑀦𑀸.

𑁨𑁦. 𑀚𑀭𑀸𑀬𑀁 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀦𑁆𑀢𑀺 𑀞𑀺𑀢𑀲𑁆𑀲 𑀬𑀁 𑀅𑀜𑁆𑀜𑀣𑀢𑁆𑀢𑀁 𑀅𑀜𑁆𑀜𑀣𑀸𑀪𑀸𑀯𑁄, 𑀅𑀬𑀁 𑀚𑀭𑀸 𑀦𑀸𑀫. 𑀔𑀡𑀺𑀓𑀫𑀭𑀡𑀁 𑀔𑀡𑀺𑀓𑀦𑀺𑀭𑁄𑀥𑁄. 𑀲𑀫𑀼𑀘𑁆𑀙𑁂𑀤𑀫𑀭𑀡𑀁 𑀔𑀻𑀡𑀸𑀲𑀯𑀸𑀦𑀁 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀁.

𑀓𑁂𑀯𑀮𑀲𑁆𑀲𑀸𑀢𑀺 𑀚𑀭𑀸𑀬 𑀅𑀫𑀺𑀲𑁆𑀲𑀲𑁆𑀲. 𑀅𑀜𑁆𑀜𑀸𑀯 𑀚𑀭𑀸, 𑀅𑀜𑁆𑀜𑀁 𑀫𑀭𑀡𑀦𑁆𑀢𑀺 ‘‘𑀧𑀝𑀺𑀜𑁆𑀜𑀸𑀢𑀲𑁆𑀲 𑀓𑁂𑀯𑀮𑀲𑁆𑀲 𑀫𑀭𑀡𑀲𑁆𑀲 𑀤𑀺𑀝𑁆𑀞𑀢𑁆𑀢𑀸’’𑀢𑀺 𑀳𑁂𑀢𑀼. 𑀬𑀣𑀸 𑀢𑀁 𑀤𑁂𑀯𑀸𑀦𑀦𑁆𑀢𑀺 𑀲𑀤𑀺𑀲𑀽𑀤𑀸𑀳𑀭𑀡𑀁, 𑀯𑀺𑀲𑀤𑀺𑀲𑀽𑀤𑀸𑀳𑀭𑀡𑀁 𑀧𑀦 𑀇𑀤𑁆𑀥𑀺𑀧𑀸𑀤𑀸𑀤𑀬𑁄, 𑀅𑀦𑁆𑀯𑀬𑀩𑁆𑀬𑀢𑀺𑀭𑁂𑀓𑀸 𑀕𑀳𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀸.

𑀢𑁂𑀳𑀻𑀢𑀺 𑀚𑀭𑀸𑀫𑀭𑀡𑁂𑀳𑀺.

‘‘𑀚𑀻𑀭𑀡𑀪𑀺𑀚𑁆𑀚𑀦𑀲𑀪𑀸𑀯𑀸’’𑀢𑀺 𑀇𑀫𑀺𑀦𑀸 𑀮𑁂𑀲𑁂𑀦 𑀢𑀡𑁆𑀳𑀸𑀚𑀭𑀸𑀫𑀭𑀡𑀸𑀦𑀁 𑀅𑀦𑀜𑁆𑀜𑀢𑁆𑀢𑀁 𑀬𑁄𑀚𑁂𑀢𑀺. 𑀬𑀤𑀺𑀧𑀺 ‘‘𑀅𑀜𑁆𑀜𑀸 𑀢𑀡𑁆𑀳𑀸, 𑀅𑀜𑁆𑀜𑀸 𑀚𑀭𑀸, 𑀅𑀜𑁆𑀜𑀁 𑀫𑀭𑀡’’𑀦𑁆𑀢𑀺 𑀲𑀺𑀤𑁆𑀥𑁄𑀯𑀸𑀬𑀫𑀢𑁆𑀣𑁄, 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀦 𑀇𑀤’’𑀦𑁆𑀢𑀺𑀆𑀤𑀺, 𑀢𑀣𑀸𑀧𑀺 𑀲𑀓𑁆𑀓𑀼𑀡𑁂𑀬𑁆𑀬𑀧𑀭𑀺𑀳𑀸𑀭𑀸𑀬𑀁 𑀘𑁄𑀤𑀦𑀸𑀢𑀺 𑀅𑀚𑁆𑀛𑀸𑀭𑀼𑀴𑁆𑀳𑀁 𑀢𑀢𑁆𑀣 𑀤𑁄𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀤𑀺 𑀘 𑀬𑀣𑀸 𑀚𑀭𑀸𑀫𑀭𑀡’’𑀦𑁆𑀢𑀺 𑀧𑀸𑀴𑀺𑀧𑀯𑀢𑁆𑀢𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀤𑀺…𑀧𑁂… 𑀤𑀲𑁆𑀲𑁂𑀢𑀻’’𑀢𑀺 𑀆𑀳. 𑀪𑀸𑀯𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁂𑀲𑀦𑁆𑀢𑀺 𑀢𑀡𑁆𑀳𑀸𑀚𑀭𑀸𑀫𑀭𑀡𑀸𑀦𑀁.

‘‘𑀇𑀫𑀸𑀬 𑀬𑀼𑀢𑁆𑀢𑀺𑀬𑀸 𑀅𑀜𑁆𑀜𑀫𑀜𑁆𑀜𑁂𑀳𑀺 𑀓𑀸𑀭𑀡𑁂𑀳𑀺 𑀕𑀯𑁂𑀲𑀺𑀢𑀩𑁆𑀩’’𑀦𑁆𑀢𑀺 𑀘 𑀓𑁂𑀘𑀺 𑀧𑀞𑀦𑁆𑀢𑀺, 𑀩𑁆𑀬𑀜𑁆𑀚𑀦𑀢𑁄𑀧𑀺 𑀕𑀯𑁂𑀲𑀺𑀢𑀩𑁆𑀩𑀁, 𑀅𑀜𑁆𑀜𑀢𑁆𑀣 𑀅𑀢𑁆𑀣𑀢𑁄 𑀅𑀜𑁆𑀜𑀢𑁆𑀣𑀫𑁆𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀫𑁂𑀯 𑀩𑁆𑀬𑀜𑁆𑀚𑀦𑀢𑁄 𑀅𑀜𑁆𑀜𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 ‘‘𑀲𑀮𑁆𑀮𑁄𑀢𑀺 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀫𑁂𑀲𑀦𑁆𑀢𑀺 𑀲𑀮𑁆𑀮𑀥𑀽𑀧𑀸𑀬𑀦𑀸𑀦𑀁. 𑀇𑀘𑁆𑀙𑀸𑀯𑀺𑀧𑀭𑀺𑀬𑀸𑀬𑁂𑀢𑀺 𑀇𑀘𑁆𑀙𑀺𑀢𑀸𑀮𑀸𑀪𑁂, 𑀅𑀧𑁆𑀧𑀘𑁆𑀘𑀬𑀲𑀫𑀯𑀸𑀬𑁂 𑀯𑀸. 𑀇𑀤𑀫𑁆𑀧𑀺 𑀲𑀫𑀢𑁆𑀣𑀦𑀁 𑀳𑁄𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀲𑁆𑀲 𑀅𑀜𑁆𑀜𑀢𑁆𑀣𑀲𑁆𑀲 𑀩𑁆𑀬𑀢𑀺𑀭𑁂𑀓𑀤𑀲𑁆𑀲𑀦𑀪𑀸𑀯𑀢𑁄. 𑀚𑀭𑀸𑀫𑀭𑀡𑀯𑀺𑀧𑀭𑀺𑀬𑀸𑀬𑁂𑀢𑀺 𑀚𑀭𑀸𑀫𑀭𑀡𑁂 𑀅𑀲𑀢𑀺. 𑀦 𑀳𑀺 𑀬𑀣𑀸𑀥𑀺𑀧𑁆𑀧𑁂𑀢𑀚𑀭𑀸𑀫𑀭𑀡𑀸𑀪𑀸𑀯𑁂 𑀢𑀡𑁆𑀳𑀸 𑀦 𑀳𑁄𑀢𑀻𑀢𑀺.

𑀤𑁆𑀯𑀺𑀥𑀸 𑀯𑀼𑀢𑁆𑀢𑀸𑀢𑀺 𑀤𑁆𑀯𑀺𑀧𑁆𑀧𑀓𑀸𑀭𑁂𑀦 𑀯𑀼𑀢𑁆𑀢𑀸, 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀯𑀼𑀢𑁆𑀢𑀸. 𑀬𑀁 𑀇𑀤𑀁…𑀧𑁂… 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀯𑀸 𑀅𑀪𑀺𑀮𑀧𑀦𑀦𑁆𑀢𑀺 𑀏𑀯𑀁 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀲𑁂𑀲𑁄𑀢𑀺 𑀅𑀬𑀁 𑀏𑀢𑀸𑀲𑀁 𑀇𑀘𑁆𑀙𑀸𑀢𑀡𑁆𑀳𑀸𑀦𑀁 𑀧𑀓𑀢𑀺𑀲𑀗𑁆𑀔𑀸𑀢𑁄 𑀯𑀺𑀲𑁂𑀲𑁄. ‘‘𑀤𑁆𑀯𑀻𑀳𑀺 𑀦𑀸𑀫𑁂𑀳𑀻’’𑀢𑀺𑀧𑀺 𑀧𑀸𑀴𑀺. 𑀬𑀤𑀺𑀧𑀺 𑀏𑀯𑀦𑁆𑀢𑀺 𑀓𑀸𑀫𑀁 𑀯𑀺𑀲𑀬𑀯𑀺𑀲𑁂𑀲𑁂𑀲𑀼 𑀏𑀯𑀁 𑀬𑀣𑀸𑀯𑀼𑀢𑁆𑀢𑀅𑀯𑀢𑁆𑀣𑀸𑀯𑀺𑀲𑁂𑀲𑁂𑀦 𑀇𑀘𑁆𑀙𑀸𑀢𑀡𑁆𑀳𑀸𑀦𑀁 𑀅𑀢𑁆𑀣𑀺 𑀓𑀸𑀘𑀺 𑀪𑁂𑀤𑀫𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑀪𑀸𑀯𑀢𑁄 𑀧𑀦 𑀪𑁂𑀤𑁄 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀣𑀸𑀧𑀻’’𑀢𑀺 𑀆𑀳.

𑀇𑀘𑁆𑀙𑀦𑁆𑀢𑀻𑀢𑀺 𑀓𑀸𑀫𑁂𑀦𑁆𑀢𑀺. 𑀢𑀡𑁆𑀳𑀸𑀬𑀦𑀸 𑀧𑀸𑀢𑀼𑀓𑀸𑀫𑀢𑀸. 𑀲𑀦𑁆𑀢𑀸𑀧𑀦𑀝𑁆𑀞𑁂𑀦𑀸𑀢𑀺 𑀧𑀭𑀺𑀤𑀳𑀦𑀪𑀸𑀯𑁂𑀦. 𑀆𑀓𑀟𑁆𑀠𑀦𑀝𑁆𑀞𑁂𑀦𑀸𑀢𑀺 𑀅𑀯𑀳𑀭𑀡𑀝𑁆𑀞𑁂𑀦. 𑀲𑀭𑀺𑀢𑀸𑀦𑀻𑀢𑀺 𑀭𑀸𑀕𑀯𑀲𑁂𑀦 𑀅𑀮𑁆𑀮𑀸𑀦𑀺. 𑀢𑀁𑀲𑀫𑁆𑀧𑀬𑀼𑀢𑁆𑀢𑀧𑀻𑀢𑀺𑀯𑀲𑁂𑀦 𑀲𑀺𑀦𑀺𑀤𑁆𑀥𑀸𑀦𑀺 𑀲𑀺𑀦𑁂𑀳𑀺𑀢𑀸𑀦𑀺. 𑀯𑀺𑀲𑀢𑁆𑀢𑀺𑀓𑀸𑀢𑀺 𑀯𑀺𑀢𑁆𑀣𑀢𑀸 𑀭𑀽𑀧𑀸𑀤𑀻𑀲𑀼 𑀢𑁂𑀪𑀽𑀫𑀓𑀥𑀫𑁆𑀫𑁂𑀲𑀼 𑀩𑁆𑀬𑀸𑀧𑀦𑀯𑀲𑁂𑀦. 𑀯𑀺𑀲𑀝𑀸𑀢𑀺 𑀧𑀼𑀭𑀺𑀫𑀯𑁂𑀯𑀘𑀦𑀫𑁂𑀯 𑀢-𑀓𑀸𑀭𑀲𑁆𑀲 𑀝-𑀓𑀸𑀭𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀯𑀺𑀲𑀸𑀮𑀸𑀢𑀺 𑀯𑀺𑀧𑀼𑀮𑀸. 𑀯𑀺𑀲𑀓𑁆𑀓𑀢𑀻𑀢𑀺 𑀧𑀭𑀺𑀲𑀓𑁆𑀓𑀢𑀺 𑀲𑀳𑀢𑀺. 𑀭𑀢𑁆𑀢𑁄 𑀳𑀺 𑀭𑀸𑀕𑀯𑀢𑁆𑀣𑀼𑀦𑀸 𑀧𑀸𑀤𑁂𑀦 𑀢𑀸𑀴𑀺𑀬𑀫𑀸𑀦𑁄𑀧𑀺 𑀲𑀳𑀢𑀺. ‘‘𑀑𑀲𑀓𑁆𑀓𑀦𑀁, 𑀯𑀺𑀧𑁆𑀨𑀦𑁆𑀤𑀦𑀁 𑀯𑀸 𑀯𑀺𑀲𑀓𑁆𑀓𑀦’’𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀦𑀺𑀘𑁆𑀘𑀸𑀤𑀺𑀓𑀁 𑀦𑀺𑀘𑁆𑀘𑀸𑀤𑀺𑀢𑁄 𑀕𑀡𑁆𑀳𑀦𑁆𑀢𑀻 𑀯𑀺𑀲𑀁𑀯𑀸𑀤𑀺𑀓𑀸 𑀳𑁄𑀢𑀺. 𑀯𑀺𑀲𑀁𑀳𑀭𑀢𑀻𑀢𑀺 𑀢𑀣𑀸 𑀢𑀣𑀸 𑀓𑀸𑀫𑁂𑀲𑀼 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀦𑁆𑀢𑀻 𑀯𑀺𑀯𑀺𑀥𑁂𑀳𑀺 𑀆𑀓𑀸𑀭𑁂𑀳𑀺 𑀦𑁂𑀓𑁆𑀔𑀫𑁆𑀫𑀸𑀪𑀺𑀫𑀼𑀔𑀧𑁆𑀧𑀯𑀢𑁆𑀢𑀺𑀢𑁄 𑀘𑀺𑀢𑁆𑀢𑀁 𑀲𑀁𑀳𑀭𑀢𑀺 𑀲𑀁𑀔𑀺𑀧𑀢𑀺. 𑀯𑀺𑀲𑀁 𑀯𑀸 𑀤𑀼𑀓𑁆𑀔𑀁, 𑀢𑀁 𑀳𑀭𑀢𑀺, 𑀯𑀳𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀦𑀺𑀩𑁆𑀩𑀢𑁆𑀢𑀓𑀲𑁆𑀲 𑀓𑀫𑁆𑀫𑀲𑁆𑀲 𑀳𑁂𑀢𑀼𑀪𑀸𑀯𑀢𑁄 𑀯𑀺𑀲𑀫𑀽𑀮𑀸, 𑀯𑀺𑀲𑀁 𑀯𑀸 𑀤𑀼𑀓𑁆𑀔𑀸𑀤𑀺𑀪𑁂𑀤𑀸 𑀯𑁂𑀤𑀦𑀸 𑀫𑀽𑀮𑀁 𑀏𑀢𑀸𑀬𑀸𑀢𑀺 𑀯𑀺𑀲𑀫𑀽𑀮𑀸, 𑀤𑀼𑀓𑁆𑀔𑀲𑀫𑀼𑀤𑀬𑀢𑁆𑀢𑀸 𑀯𑀺𑀲𑀁 𑀨𑀮𑀁 𑀏𑀢𑀺𑀲𑁆𑀲𑀸𑀢𑀺 𑀯𑀺𑀲𑀨𑀮𑀸. 𑀭𑀽𑀧𑀸𑀤𑀺𑀤𑀼𑀓𑁆𑀔𑀲𑁆𑀲𑁂𑀯 𑀧𑀭𑀺𑀪𑁄𑀕𑁄 𑀏𑀢𑀸𑀬, 𑀦 𑀅𑀫𑀢𑀲𑁆𑀲𑀸𑀢𑀺 𑀯𑀺𑀲𑀧𑀭𑀺𑀪𑁄𑀕𑀸. 𑀲𑀩𑁆𑀩𑀢𑁆𑀣 𑀦𑀺𑀭𑀼𑀢𑁆𑀢𑀺𑀯𑀲𑁂𑀦 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀬𑁄 𑀧𑀦𑁂𑀢𑁆𑀣 𑀧𑀥𑀸𑀦𑁄 𑀅𑀢𑁆𑀣𑁄, 𑀢𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 ‘‘𑀯𑀺𑀲𑀢𑀸 𑀯𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀲𑀺𑀦𑁂𑀳𑀦𑀁 𑀧𑁂𑀫𑀓𑀭𑀡𑀁. 𑀩𑀦𑁆𑀥𑀦𑀝𑁆𑀞𑁂𑀦𑀸𑀢𑀺 𑀲𑀁𑀬𑁄𑀚𑀦𑀝𑁆𑀞𑁂𑀦. 𑀆𑀲𑀻𑀲𑀦𑀝𑁆𑀞𑁂𑀦𑀸𑀢𑀺 𑀇𑀘𑁆𑀙𑀦𑀝𑁆𑀞𑁂𑀦. 𑀅𑀪𑀺𑀦𑀦𑁆𑀤𑀦𑀝𑁆𑀞𑁂𑀦𑀸𑀢𑀺 𑀅𑀲𑁆𑀲𑀸𑀤𑀦𑀝𑁆𑀞𑁂𑀦, 𑀲𑀫𑁆𑀧𑀝𑀺𑀘𑁆𑀙𑀦𑀝𑁆𑀞𑁂𑀦 𑀯𑀸.

𑁨𑁧. 𑀅𑀦𑀪𑀺𑀭𑀢𑀻𑀢𑀺 𑀉𑀓𑁆𑀓𑀡𑁆𑀞𑀸. 𑀜𑀸𑀡𑀦𑀺𑀩𑁆𑀩𑀺𑀤𑀸𑀢𑀺 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸. 𑀬𑀣𑀸 𑀘 𑀤𑀼𑀓𑁆𑀔𑀽…𑀧𑁂… 𑀘𑀸𑀭𑁂𑀲𑀼 𑀬𑀼𑀢𑁆𑀢𑀺 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸.

𑀲𑀼𑀔𑀸𑀧𑀝𑀺𑀧𑀤𑀸𑀤𑀦𑁆𑀥𑀸𑀪𑀺𑀜𑁆𑀜𑀸 𑀲𑀼𑀔𑀸𑀧𑀝𑀺𑀧𑀤𑀸𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀲𑀼𑀔𑀸𑀧𑀝𑀺𑀧𑀤𑀸𑀤𑀬𑁄. 𑀬𑁄 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀯𑀺𑀲𑁂𑀲𑀁 𑀅𑀥𑀺𑀕𑀦𑁆𑀢𑀼𑀁 𑀪𑀩𑁆𑀩𑁄, 𑀢𑀲𑁆𑀲 𑀲𑀼𑀔𑀸𑀧𑀝𑀺𑀧𑀤𑀸𑀬𑁄𑀕𑁆𑀬𑀲𑁆𑀲 𑀯𑀺𑀬 𑀓𑀭𑀺𑀬𑀫𑀸𑀦𑀸 𑀥𑀫𑁆𑀫𑀤𑁂𑀲𑀦𑀸 𑀯𑀺𑀲𑁂𑀲𑀸𑀯𑀳𑀸 𑀦 𑀳𑁄𑀢𑀺, 𑀢𑀲𑁆𑀫𑀸 𑀲𑀸 𑀦 𑀬𑀼𑀢𑁆𑀢𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀭𑀸𑀕𑀘𑀭𑀺𑀢𑁄’’𑀢𑀺𑀆𑀤𑀺𑀦𑀸. 𑀭𑀸𑀕𑀘𑀭𑀺𑀢𑀲𑁆𑀲 𑀢𑀣𑀸 𑀢𑀣𑀸 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁, 𑀑𑀓𑀸𑀭𑀁, 𑀲𑀁𑀓𑀺𑀮𑁂𑀲𑀁, 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀜𑁆𑀘 𑀅𑀯𑀺𑀪𑀸𑀯𑁂𑀢𑁆𑀯𑀸 𑀆𑀤𑀺𑀢𑁄 𑀯𑀺𑀧𑀲𑁆𑀲𑀦𑀸𑀓𑀣𑀸𑀯 𑀓𑀭𑀺𑀬𑀫𑀸𑀦𑀸 𑀦 𑀯𑀺𑀲𑁂𑀲𑀸𑀯𑀳𑀸 𑀳𑁄𑀢𑀺 𑀆𑀲𑀬𑀲𑁆𑀲 𑀅𑀲𑁄𑀥𑀺𑀢𑀢𑁆𑀢𑀸𑀢𑀺 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀧𑀸𑀴𑀺𑀬𑀁 ‘‘𑀯𑀺𑀧𑀲𑁆𑀲𑀦𑀸…𑀧𑁂… 𑀤𑁂𑀲𑀦𑀸’’𑀢𑀺 𑀆𑀳𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀧𑀤𑁂𑀲𑀼𑀧𑀻𑀢𑀺 𑀬𑀣𑀸 ‘‘𑀭𑀸𑀕𑀘𑀭𑀺𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀭𑀸𑀕𑀘𑀭𑀺𑀢𑀓𑁄𑀝𑁆𑀞𑀸𑀲𑀯𑀲𑁂𑀦 𑀧𑀸𑀴𑀺𑀬𑀁 𑀤𑁂𑀲𑀦𑀸𑀬 𑀅𑀬𑀼𑀢𑁆𑀢𑀺 𑀯𑀼𑀢𑁆𑀢𑀸, 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀧𑀤𑁂𑀲𑀼𑀧𑀺 𑀤𑁄𑀲𑀘𑀭𑀺𑀢𑀓𑁄𑀝𑁆𑀞𑀸𑀲𑀸𑀤𑀻𑀲𑀼𑀧𑀺 ‘‘𑀤𑁄𑀲𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀲𑀼𑀪𑀁 𑀤𑁂𑀲𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 𑀧𑀸𑀴𑀺𑀬𑀁 𑀅𑀯𑀼𑀢𑁆𑀢𑁄𑀧𑀺 𑀬𑀣𑀸𑀲𑀫𑁆𑀪𑀯𑀫𑀢𑁆𑀣𑁄 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑁄. 𑀓𑀲𑁆𑀫𑀸 𑀧𑀦 𑀬𑀼𑀢𑁆𑀢𑀺𑀳𑀸𑀭𑁂 𑀅𑀬𑀼𑀢𑁆𑀢𑀺𑀦𑀺𑀤𑁆𑀥𑀸𑀭𑀡𑀸 𑀓𑀢𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀲𑁂𑀲𑁂𑀲𑀼𑀧𑀺 𑀤𑁄𑀲𑀘𑀭𑀺𑀢𑀸𑀤𑀺𑀯𑀲𑁂𑀦 𑀦𑀺𑀤𑁆𑀥𑀸𑀭𑀺𑀢𑁂𑀲𑀼 𑀅𑀬𑀼𑀢𑁆𑀢𑀺𑀕𑀯𑁂𑀲𑀦𑁂𑀲𑀼 𑀅𑀬𑀫𑁂𑀯 𑀉𑀧𑀸𑀬𑁄. 𑀅𑀦𑀼𑀮𑁄𑀫𑀧𑁆𑀧𑀳𑀸𑀦’’𑀦𑁆𑀢𑀺𑀧𑀺 𑀧𑀸𑀴𑀺, 𑀲𑁄 𑀏𑀯𑀢𑁆𑀣𑁄.

‘‘𑀬𑀸𑀯𑀢𑀺𑀓𑀸 𑀜𑀸𑀡𑀲𑁆𑀲 𑀪𑀽𑀫𑀻’’𑀢𑀺 𑀏𑀢𑁂𑀦 𑀬𑀼𑀢𑁆𑀢𑀺𑀳𑀸𑀭𑀲𑁆𑀲 𑀫𑀳𑀸𑀯𑀺𑀲𑀬𑀢𑀁 𑀤𑀲𑁆𑀲𑁂𑀢𑀺. 𑀓𑀲𑁆𑀫𑀸 𑀧𑀦𑀸𑀬𑀁 𑀫𑀳𑀸𑀯𑀺𑀲𑀬𑁄𑀢𑀺? 𑀬𑀼𑀢𑁆𑀢𑀺𑀯𑀺𑀘𑀸𑀭𑀪𑀸𑀯𑀢𑁄, 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀦𑀸𑀦𑀸𑀦𑀬𑀦𑀺𑀧𑀼𑀡𑀸𑀤𑀺𑀕𑀼𑀡𑀯𑀺𑀲𑁂𑀲𑀬𑁄𑀕𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀽’’𑀢𑀺 𑀆𑀳.

𑀅𑀧𑀭𑀪𑀸𑀕𑁂𑀢𑀺 𑀧𑀘𑁆𑀙𑀸𑀪𑀸𑀕𑁂. 𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀪𑀸𑀕𑀲𑁆𑀲 𑀅𑀧𑀭𑀺𑀳𑀻𑀦𑀢𑀸𑀯𑀘𑀦𑀢𑁄 𑀅𑀬𑁄𑀕𑁄 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀲𑀢𑁄’’𑀢𑀺. 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑀢𑁄 𑀏𑀯𑀸𑀢𑀺 𑀧𑀝𑀺𑀧𑀓𑁆𑀔𑀢𑁆𑀢𑀸 𑀏𑀯.

𑀧𑀳𑀸𑀦𑁂𑀓𑀝𑁆𑀞𑀪𑀸𑀯𑀢𑁄 𑀤𑀺𑀝𑁆𑀞𑀺𑀫𑀜𑁆𑀜𑀺𑀢𑀲𑁆𑀲. 𑀆𑀤𑀻𑀦𑀯𑀤𑀲𑁆𑀲𑀦𑁂𑀦 𑀯𑀺𑀢𑀓𑁆𑀓𑀁 𑀚𑀺𑀕𑀼𑀘𑁆𑀙𑀦𑁆𑀢𑀸 𑀤𑀼𑀢𑀺𑀬𑀚𑁆𑀛𑀸𑀦𑀲𑁆𑀲 𑀆𑀲𑀦𑁆𑀦𑀉𑀧𑀘𑀸𑀭𑀚𑁆𑀛𑀸𑀦𑀥𑀫𑁆𑀫𑀸𑀧𑀺 𑀯𑀺𑀢𑀓𑁆𑀓𑀸𑀭𑀫𑁆𑀫𑀡𑀸 𑀦 𑀳𑁄𑀦𑁆𑀢𑀺, 𑀧𑀕𑁂𑀯 𑀤𑀼𑀢𑀺𑀬𑀚𑁆𑀛𑀸𑀦𑀥𑀫𑁆𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀆𑀭𑀫𑁆𑀫𑀡𑀓𑀭𑀡𑀢𑁆𑀣𑁄 𑀳𑁂𑀢𑁆𑀣 𑀲𑀳𑀕𑀢𑀲𑀤𑁆𑀤𑁄’’𑀢𑀺.

𑀏𑀯𑀁 𑀬𑀼𑀢𑁆𑀢𑀺𑀳𑀸𑀭𑀮𑀓𑁆𑀔𑀡𑀁 𑀆𑀕𑀫𑀢𑁄 𑀬𑀼𑀢𑁆𑀢𑀸𑀬𑀼𑀢𑁆𑀢𑀯𑀺𑀘𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀆𑀕𑀫𑀸𑀦𑀼𑀕𑀢𑀸𑀬 𑀬𑀼𑀢𑁆𑀢𑀺𑀬𑀸𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁 𑀕𑀼𑀡𑀫𑀼𑀔𑁂𑀦 𑀤𑁄𑀲𑀯𑀺𑀪𑀚𑀦𑀁 𑀯𑀺𑀪𑀚𑀦𑁆𑀢𑁄 ‘‘𑀅𑀧𑀺𑀘𑁂𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀬𑀼𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀤𑀝𑁆𑀞𑀸𑀦𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁨𑁨. 𑀢𑁂𑀲𑀁 𑀢𑁂𑀲𑀦𑁆𑀢𑀺 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀁, 𑀢𑁂𑀦 𑀬𑁂 𑀲𑀼𑀢𑁆𑀢𑁂 𑀯𑀼𑀢𑁆𑀢𑀸 𑀘 𑀥𑀫𑁆𑀫𑀸, 𑀬𑁂 𑀘 𑀢𑁂𑀲𑀁 𑀓𑀸𑀭𑀡𑀪𑀽𑀢𑀁, 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀩𑁆𑀩𑀥𑀫𑁆𑀫𑀬𑀸𑀣𑀸𑀯𑀅𑀲𑀫𑁆𑀧𑀝𑀺𑀯𑁂𑀥𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀢𑁆𑀣 𑀧𑀦 𑀲𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀧𑀺𑀬𑀸𑀬𑀺𑀢𑀩𑁆𑀩𑀚𑀸𑀢𑀺𑀬𑀦𑁆𑀢𑀺 𑀧𑁂𑀫𑀦𑀻𑀬𑀲𑀪𑀸𑀯𑀁. 𑀫𑀺𑀘𑁆𑀙𑀸𑀧𑀝𑀺𑀧𑀤𑀸𑀢𑀺 𑀧𑀫𑀸𑀤𑀸𑀧𑀢𑁆𑀢𑀺, 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑁄 𑀯𑀸. 𑀏𑀓𑀯𑀸𑀭𑀁 𑀉𑀧𑁆𑀧𑀦𑁆𑀦𑀸𑀧𑀺 𑀧𑀸𑀡𑀸𑀢𑀺𑀧𑀸𑀢𑀘𑁂𑀢𑀦𑀸 𑀯𑁂𑀭𑀧𑁆𑀧𑀲𑀯𑀦𑀢𑁄 𑀤𑁄𑀲𑀲𑁆𑀲, 𑀏𑀓𑀯𑀸𑀭𑀁 𑀉𑀧𑁆𑀧𑀦𑁆𑀦𑀸𑀧𑀺 𑀧𑀫𑀸𑀤𑀸𑀧𑀢𑁆𑀢𑀺, 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑁄 𑀯𑀸 𑀫𑁄𑀳𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀦𑁆𑀢𑀺 𑀧𑀸𑀴𑀺𑀬𑀁 𑀅𑀯𑀼𑀢𑁆𑀢𑀫𑁆𑀧𑀺 𑀦𑀬𑀢𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀤𑁄𑀲𑀲𑁆𑀲…𑀧𑁂… 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀆𑀳. 𑀦𑀺𑀫𑀺𑀢𑁆𑀢𑀢𑁆𑀣𑀕𑁆𑀕𑀳𑀡𑀮𑀓𑁆𑀔𑀡𑀁 𑀯𑀡𑁆𑀡𑀲𑀡𑁆𑀞𑀸𑀦𑀁, 𑀅𑀦𑀼𑀩𑁆𑀬𑀜𑁆𑀚𑀦𑀢𑁆𑀣𑀕𑁆𑀕𑀳𑀡𑀮𑀓𑁆𑀔𑀡𑀁 𑀅𑀦𑀼𑀩𑁆𑀬𑀜𑁆𑀚𑀦𑀦𑁆𑀢𑀺 ‘‘𑀦𑀺𑀫𑀺𑀢𑁆𑀢𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀳𑀡𑀮𑀓𑁆𑀔𑀡𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣 𑀦𑀺𑀫𑀺𑀢𑁆𑀢𑀁 𑀇𑀢𑁆𑀣𑀺𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁. 𑀅𑀦𑀼𑀩𑁆𑀬𑀜𑁆𑀚𑀦𑀁 𑀳𑀢𑁆𑀣𑀧𑀸𑀤𑀳𑀲𑀺𑀢𑀓𑀣𑀺𑀢𑀸𑀤𑀺. 𑀨𑀲𑁆𑀲𑁄 𑀧𑀘𑁆𑀘𑀬𑁄 𑀏𑀢𑀺𑀲𑁆𑀲𑀸𑀢𑀺 𑀨𑀲𑁆𑀲𑀧𑀘𑁆𑀘𑀬𑀸, 𑀢𑀁𑀪𑀸𑀯𑁄 𑀨𑀲𑁆𑀲𑀧𑀘𑁆𑀘𑀬𑀢𑀸. 𑀅𑀲𑁆𑀲𑀸𑀤𑁂𑀢𑀺 𑀏𑀢𑀸𑀬𑀸𑀢𑀺 𑀅𑀲𑁆𑀲𑀸𑀤𑁄, 𑀢𑀡𑁆𑀳𑀸.

𑀯𑀢𑁆𑀣𑀽𑀦𑀺 𑀜𑁂𑀬𑁆𑀬𑀥𑀫𑁆𑀫𑁄𑀢𑀺 𑀆𑀳 ‘‘𑀯𑀢𑁆𑀣𑀼𑀅𑀯𑀺𑀧𑁆𑀧𑀝𑀺𑀧𑀢𑁆𑀢𑀺 𑀯𑀺𑀲𑀬𑀲𑀪𑀸𑀯𑀧𑀝𑀺𑀯𑁂𑀥𑁄’’𑀢𑀺. 𑀇𑀥𑀸𑀥𑀺𑀧𑁆𑀧𑁂𑀢𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀻𑀮𑀲𑀫𑀸𑀥𑀺𑀲𑀫𑁆𑀧𑀤𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀓𑀤𑁂𑀲𑀼𑀧𑀮𑀓𑁆𑀔𑀡𑀯𑀲𑁂𑀦, 𑀯𑀡𑁆𑀡𑀕𑀦𑁆𑀥𑀭𑀸𑀕𑀺𑀲𑀧𑁆𑀧𑀸𑀬𑀯𑀲𑁂𑀦 𑀯𑀸 𑀧𑀸𑀴𑀺𑀬𑀁 ‘‘𑀯𑀺𑀦𑀻𑀮𑀓𑀯𑀺𑀧𑀼𑀩𑁆𑀩𑀓𑀕𑁆𑀕𑀳𑀡𑀮𑀓𑁆𑀔𑀡𑀸 𑀅𑀲𑀼𑀪𑀲𑀜𑁆𑀜𑀸’’𑀢𑀺 𑀯𑀢𑁆𑀯𑀸 ‘‘𑀢𑀲𑁆𑀲𑀸 𑀦𑀺𑀩𑁆𑀩𑀺𑀤𑀸𑀧𑀤𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁 𑀦𑀺𑀩𑁆𑀩𑀺𑀤𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀺𑀩𑁆𑀩𑀺𑀤𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀭𑀺𑀢𑀲𑁆𑀲𑀦𑀢𑁄 𑀯𑀺𑀲𑁂𑀲𑁂𑀢𑀼𑀁 ‘‘𑀜𑀸𑀡𑁂𑀦𑀸’’𑀢𑀺 𑀯𑀺𑀲𑁂𑀲𑀺𑀢𑀁. 𑀢𑀣𑀸 𑀧𑀯𑀢𑁆𑀢𑀦𑁆𑀢𑀺 𑀦𑀺𑀩𑁆𑀩𑀺𑀤𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀦𑀁.

𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀦𑁆𑀢𑀺𑀬𑀸 𑀯𑀺𑀤𑁂𑀳𑀭𑀜𑁆𑀜𑁄 𑀥𑀻𑀢𑀸𑀬 𑀭𑀼𑀘𑀸𑀬 𑀚𑀸𑀢𑀺𑀲𑁆𑀲𑀭𑀜𑀸𑀡𑀁 𑀓𑀫𑁆𑀫𑀲𑁆𑀲𑀓𑀢𑀜𑁆𑀜𑀸𑀡𑀲𑁆𑀲 𑀓𑀸𑀭𑀡𑀁 𑀅𑀳𑁄𑀲𑀺, 𑀦 𑀧𑀦 𑀅𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀢𑁄, 𑀅𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀦𑁆𑀢𑀲𑁆𑀲 𑀢𑀲𑁆𑀲𑁂𑀯 𑀭𑀜𑁆𑀜𑁄 𑀲𑁂𑀦𑀸𑀧𑀢𑀺𑀦𑁄 𑀅𑀮𑀸𑀢𑀲𑁆𑀲 𑀩𑀻𑀚𑀓𑀲𑁆𑀲 𑀤𑀸𑀲𑀲𑁆𑀲𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑀲𑁆𑀲 𑀘…𑀧𑁂… 𑀉𑀤𑀸𑀳𑀭𑀺𑀢𑀩𑁆𑀩𑁄’’𑀢𑀺 𑀆𑀳. 𑀲𑁄𑀢𑀺 𑀧𑀲𑀸𑀤𑁄. 𑀅𑀯𑀢𑁆𑀣𑀸𑀯𑀺𑀲𑁂𑀲𑁄𑀢𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀦𑀸𑀯𑀺𑀮𑀪𑀸𑀯𑀮𑀓𑁆𑀔𑀺𑀢𑁄 𑀅𑀯𑀢𑁆𑀣𑀸𑀪𑁂𑀤𑁄. 𑀆𑀬𑀢𑀦𑀕𑀢𑁄𑀢𑀺 𑀞𑀸𑀦𑀕𑀢𑁄, 𑀭𑀢𑀦𑀢𑁆𑀢𑀬𑀯𑀺𑀲𑀬𑁄𑀢𑀺 𑀅𑀢𑁆𑀣𑁄. ‘‘𑀓𑀸𑀬𑁄’’𑀢𑀺𑀆𑀤𑀺𑀦𑀸 𑀅𑀯𑀢𑁆𑀣𑀸𑀯𑀺𑀲𑁂𑀲𑁂𑀦 𑀯𑀺𑀦𑀸 𑀲𑀪𑀸𑀯𑀲𑀺𑀤𑁆𑀥𑀫𑁂𑀯 𑀧𑀤𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀺.

𑀇𑀫𑀲𑁆𑀫𑀺𑀁 𑀘 𑀞𑀸𑀦𑁂 𑀧𑀸𑀴𑀺𑀬𑀁 𑀧𑀼𑀩𑁆𑀩𑁂 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀧𑀤𑀝𑁆𑀞𑀸𑀦𑀁 𑀦𑀺𑀤𑁆𑀥𑀸𑀭𑀺𑀢𑀁, 𑀢𑁂 𑀥𑀫𑁆𑀫𑀸 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀧𑀤𑀝𑁆𑀞𑀸𑀦𑀸𑀦𑀺 𑀳𑁄𑀦𑁆𑀢𑀺, 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀭𑁄 𑀦𑀬𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀲𑁆𑀲𑀸𑀤𑀫𑀦𑀲𑀺𑀓𑀸𑀭𑁄 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀮𑀓𑁆𑀔𑀡𑁄 𑀯𑀼𑀢𑁆𑀢𑁄 𑀦𑀺𑀤𑀲𑁆𑀲𑀦𑀫𑀢𑁆𑀢𑀅𑀢𑁆𑀣𑁄𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀬𑁂𑀪𑀼𑀬𑁆𑀬𑁂𑀦 𑀲𑀢𑁆𑀢𑀸𑀦𑀁 𑀮𑁄𑀪𑀯𑀲𑁂𑀦 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸 𑀲𑀁𑀯𑀢𑁆𑀢𑀦𑁆𑀢𑀻𑀢𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀸 𑀏𑀯𑀁 𑀯𑀼𑀢𑁆𑀢𑀁. 𑀉𑀧𑀧𑀢𑁆𑀢𑀺 𑀏𑀯 𑀑𑀧𑀧𑀘𑁆𑀘𑀬𑀁, 𑀢𑀲𑁆𑀲 𑀪𑀸𑀯𑁄 𑀑𑀧𑀧𑀘𑁆𑀘𑀬𑀺𑀓𑀦𑁆𑀢𑀺 𑀆𑀳 ‘‘𑀉𑀧𑀧𑀢𑁆𑀢𑀺𑀪𑀯𑀪𑀸𑀯𑁂𑀦𑀸’’𑀢𑀺. 𑀯𑀯𑀢𑁆𑀣𑀺𑀢𑀪𑀸𑀯𑁄𑀢𑀺 𑀯𑀯𑀢𑁆𑀣𑀺𑀢𑀪𑀸𑀯𑁄 𑀭𑀽𑀧𑀲𑁆𑀲 𑀤𑀲𑁆𑀲𑀦𑀸𑀤𑀺𑀧𑀝𑀺𑀦𑀺𑀬𑀢𑀸𑀭𑀫𑁆𑀫𑀡𑀓𑀺𑀘𑁆𑀘𑀢𑀸. 𑀪𑀯𑀲𑁆𑀲 𑀅𑀗𑁆𑀕𑀸𑀦𑀻𑀢𑀺 𑀪𑀯𑀲𑁆𑀲 𑀓𑀸𑀭𑀡𑀸𑀦𑀺. 𑀤𑀼𑀢𑀺𑀬𑁂 𑀅𑀗𑁆𑀕𑀸𑀦𑀻𑀢𑀺 𑀅𑀯𑀬𑀯𑀸, 𑀓𑀫𑁆𑀫𑀯𑀝𑁆𑀝𑀫𑁆𑀧𑀺 𑀯𑀸 𑀓𑀸𑀭𑀡𑀗𑁆𑀕𑀪𑀸𑀯𑁂𑀦 𑀬𑁄𑀚𑁂𑀢𑀩𑁆𑀩𑀁.

𑀓𑀫𑁆𑀫𑀝𑁆𑀞𑀸𑀦𑀲𑁆𑀲𑀸𑀢𑀺 𑀪𑀸𑀯𑀦𑀸𑀬 𑀩𑁆𑀭𑀽𑀳𑀦𑀸 𑀯𑀟𑁆𑀠𑀦𑀸. 𑀢𑁂𑀲𑀽𑀢𑀺 𑀢𑀺𑀢𑁆𑀣𑀜𑁆𑀜𑀼𑀢𑀸𑀤𑀻𑀲𑀼. 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲 𑀲𑀫𑁆𑀫𑀤𑁂𑀯 𑀧𑀬𑀺𑀭𑀼𑀧𑀸𑀲𑀦𑀸𑀬𑀧𑀻𑀢𑀺 𑀢𑀁 𑀦𑀺𑀲𑁆𑀲𑀸𑀬 𑀮𑀤𑁆𑀥𑁂𑀦 𑀲𑀩𑁆𑀩𑀸𑀬 𑀥𑀫𑁆𑀫𑀲𑁆𑀲𑀯𑀦𑁂𑀦 𑀥𑀫𑁆𑀫𑀼𑀧𑀲𑀁𑀳𑀺𑀢𑀁 𑀧𑀸𑀫𑁄𑀚𑁆𑀚𑀁 𑀳𑁄𑀢𑀻𑀢𑀺 𑀢𑀺𑀢𑁆𑀣𑀜𑁆𑀜𑀼𑀢𑀸 𑀧𑀻𑀢𑀜𑁆𑀜𑀼𑀢𑀸𑀬 𑀧𑀤𑀝𑁆𑀞𑀸𑀦𑀁. 𑀏𑀯𑀁 𑀬𑀸𑀬 𑀯𑀺𑀫𑀼𑀢𑁆𑀢𑀺𑀬𑀸 𑀲𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀳𑁄𑀢𑀻𑀢𑀺 𑀲𑀸 𑀢𑀲𑁆𑀲 𑀧𑀤𑀝𑁆𑀞𑀸𑀦𑀦𑁆𑀢𑀺 𑀅𑀬𑀫𑀢𑁆𑀣𑁄 𑀧𑀸𑀓𑀝𑁄𑀢𑀺 𑀆𑀳 ‘‘𑀧𑀼𑀭𑀺𑀫𑀸𑀦𑀁…𑀧𑁂… 𑀲𑀼𑀯𑀺𑀜𑁆𑀜𑁂𑀬𑁆𑀬𑁄 𑀏𑀯𑀸’’𑀢𑀺. 𑀲𑀳 𑀅𑀥𑀺𑀝𑁆𑀞𑀸𑀦𑁂𑀦𑀸𑀢𑀺 𑀜𑀸𑀢𑀧𑀭𑀺𑀜𑁆𑀜𑀸𑀬 𑀲𑀤𑁆𑀥𑀺𑀁. 𑀜𑀸𑀢𑀧𑀭𑀺𑀜𑁆𑀜𑀸 𑀳𑀺 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀅𑀥𑀺𑀝𑁆𑀞𑀸𑀦𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀧𑀤𑀝𑁆𑀞𑀸𑀦𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀮𑀓𑁆𑀔𑀡𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁨𑁩. ‘‘𑀮𑀓𑁆𑀔𑀡𑀳𑀸𑀭𑀲𑁆𑀲 𑀯𑀺𑀲𑀬𑀁 𑀧𑀼𑀘𑁆𑀙𑀢𑀻’’𑀢𑀺 𑀯𑀼𑀢𑁆𑀢𑀁, ‘‘𑀓𑁄 𑀧𑀦 𑀢𑀲𑁆𑀲 𑀯𑀺𑀲𑀬𑁄’’𑀢𑀺 𑀯𑀼𑀢𑁆𑀢𑁂 𑀲𑀫𑀸𑀦𑀮𑀓𑁆𑀔𑀡𑀸 𑀅𑀯𑀼𑀢𑁆𑀢𑀥𑀫𑁆𑀫𑀸. 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀬 𑀲𑀫𑀸𑀭𑀤𑁆𑀥𑀸𑀬 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀤𑀬𑁄 𑀲𑀼𑀔𑁂𑀦𑁂𑀯 𑀲𑀺𑀚𑁆𑀛𑀦𑁆𑀢𑀻𑀢𑀺 𑀢𑀩𑁆𑀩𑀘𑀦𑁂𑀦 𑀯𑁂𑀤𑀦𑀸𑀕𑀢𑀸𑀲𑀢𑀺𑀆𑀤𑀻𑀦𑀁 𑀯𑀼𑀢𑁆𑀢𑀪𑀸𑀯𑁄 𑀤𑀲𑁆𑀲𑀺𑀢𑁄 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀲𑁆𑀲 𑀲𑀤𑁆𑀥𑀸𑀦𑀼𑀕𑁆𑀕𑀳𑀺𑀢𑀸𑀦𑀺 𑀯𑀻𑀭𑀺𑀬𑀲𑀢𑀺𑀲𑀫𑀸𑀥𑀺𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀸𑀥𑀦𑀁, 𑀏𑀯𑀁 𑀇𑀢𑀭𑁂𑀲𑀫𑁆𑀧𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀬𑀁 𑀅𑀢𑁆𑀣𑁄 𑀅𑀝𑁆𑀞𑀓𑀣𑀸𑀬𑀫𑁂𑀯 (𑀦𑁂𑀢𑁆𑀢𑀺. 𑀅𑀝𑁆𑀞. 𑁫𑁧) 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑁂𑀲𑀼𑀧𑀺 𑀏𑀓𑀮𑀓𑁆𑀔𑀡𑀢𑀸𑀦𑀺𑀤𑁆𑀤𑁂𑀲𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀭𑀢𑁄𑀢𑀺 𑀘𑀢𑀼𑀩𑁆𑀬𑀽𑀳𑀳𑀸𑀭𑀯𑀡𑁆𑀡𑀦𑀸𑀬𑀁 (𑀦𑁂𑀢𑁆𑀢𑀺. 𑀅𑀝𑁆𑀞. 𑁨𑁦).

𑀅𑀲𑀫𑁆𑀫𑀺𑀲𑁆𑀲𑀢𑁄𑀢𑀺 𑀯𑁂𑀤𑀦𑀸𑀤𑀬𑁄𑀧𑀺 𑀏𑀢𑁆𑀣 𑀲𑀺𑀢𑀸 𑀏𑀢𑁆𑀣 𑀧𑀝𑀺𑀲𑀦𑁆𑀥𑀸𑀢𑀺 𑀓𑀸𑀬𑁂 𑀯𑁂𑀤𑀦𑀸𑀤𑀺𑀅𑀦𑀼𑀧𑀲𑁆𑀲𑀦𑀸𑀧𑀲𑀗𑁆𑀕𑁂𑀧𑀺 𑀆𑀧𑀦𑁆𑀦𑁂 𑀢𑀤𑀲𑀫𑁆𑀫𑀺𑀲𑁆𑀲𑀢𑁄𑀢𑀺 𑀅𑀢𑁆𑀣𑁄.

𑀅𑀯𑀬𑀯𑀺𑀕𑀸𑀳𑀲𑀫𑀜𑁆𑀜𑀸𑀢𑀺𑀥𑀸𑀯𑀦𑀲𑀸𑀭𑀸𑀤𑀸𑀦𑀸𑀪𑀺𑀦𑀺𑀯𑁂𑀲𑀦𑀺𑀲𑁂𑀥𑀦𑀢𑁆𑀣𑀁 𑀓𑀸𑀬𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀳𑀺, 𑀢𑀸𑀦𑀺 𑀘 𑀓𑁂𑀲𑀸𑀤𑀻𑀳𑀺, 𑀓𑁂𑀲𑀸𑀤𑀺𑀓𑁂 𑀘 𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑁂𑀳𑀺 𑀯𑀺𑀦𑀺𑀩𑁆𑀪𑀼𑀚𑀺𑀢𑀼𑀁 ‘‘𑀢𑀣𑀸 𑀦 𑀓𑀸𑀬𑁂’’𑀢𑀺𑀆𑀤𑀺𑀫𑀸𑀳. 𑀧𑀸𑀲𑀸𑀤𑀸𑀤𑀺𑀦𑀕𑀭𑀸𑀯𑀬𑀯𑀲𑀫𑀽𑀳𑁂 𑀅𑀯𑀬𑀯𑀺𑀯𑀸𑀤𑀺𑀦𑁄𑀧𑀺 𑀅𑀯𑀬𑀯𑀺𑀕𑀸𑀳𑀡𑀁 𑀓𑀭𑁄𑀦𑁆𑀢𑀺. 𑀦𑀕𑀭𑀁 𑀦𑀸𑀫 𑀓𑁄𑀘𑀺 𑀅𑀢𑁆𑀣𑁄 𑀅𑀢𑁆𑀣𑀻𑀢𑀺 𑀧𑀦 𑀓𑁂𑀲𑀜𑁆𑀘𑀺 𑀲𑀫𑀜𑁆𑀜𑀸𑀢𑀺𑀥𑀸𑀯𑀦𑀁 𑀲𑀺𑀬𑀸𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀲𑀫𑀜𑁆𑀜𑀸𑀢𑀺𑀥𑀸𑀯𑀦𑁂 𑀦𑀕𑀭𑀦𑀺𑀤𑀲𑁆𑀲𑀦𑀁 𑀯𑀼𑀢𑁆𑀢𑀁. 𑀅𑀜𑁆𑀜𑁄 𑀓𑁄𑀘𑀺 𑀲𑀢𑁆𑀢𑀸𑀤𑀺𑀓𑁄. 𑀬𑀁 𑀧𑀲𑁆𑀲𑀢𑀺 𑀇𑀢𑁆𑀣𑀺𑀁, 𑀧𑀼𑀭𑀺𑀲𑀁 𑀯𑀸. 𑀦𑀦𑀼 𑀘𑀓𑁆𑀔𑀼𑀦𑀸 𑀇𑀢𑁆𑀣𑀺𑀧𑀼𑀭𑀺𑀲𑀤𑀲𑁆𑀲𑀦𑀁 𑀦𑀢𑁆𑀣𑀻𑀢𑀺? 𑀲𑀘𑁆𑀘𑀁 𑀦𑀢𑁆𑀣𑀺, ‘‘𑀇𑀢𑁆𑀣𑀺𑀁 𑀧𑀲𑁆𑀲𑀸𑀫𑀺, 𑀧𑀼𑀭𑀺𑀲𑀁 𑀧𑀲𑁆𑀲𑀸𑀫𑀻’’𑀢𑀺 𑀧𑀦 𑀧𑀯𑀢𑁆𑀢𑀲𑀫𑀜𑁆𑀜𑀸𑀯𑀲𑁂𑀦 ‘‘𑀬𑀁 𑀧𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀫𑀺𑀘𑁆𑀙𑀸𑀤𑀲𑁆𑀲𑀦𑁂𑀦 𑀯𑀸 𑀤𑀺𑀝𑁆𑀞𑀺𑀬𑀸 𑀬𑀁 𑀧𑀲𑁆𑀲𑀢𑀺, 𑀦 𑀢𑀁 𑀤𑀺𑀝𑁆𑀞𑀁 𑀭𑀽𑀧𑀸𑀬𑀢𑀦𑀁 𑀳𑁄𑀢𑀺, 𑀭𑀽𑀧𑀸𑀬𑀢𑀦𑀁 𑀯𑀸 𑀢𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀢𑀁 𑀓𑁄𑀲𑀸𑀤𑀺𑀪𑀽𑀢𑀼𑀧𑀸𑀤𑀸𑀬𑀲𑀫𑀽𑀳𑀲𑀗𑁆𑀔𑀸𑀢𑀁 𑀤𑀺𑀝𑁆𑀞𑀁 𑀦 𑀳𑁄𑀢𑀺, 𑀤𑀺𑀝𑁆𑀞𑀁 𑀯𑀸 𑀬𑀣𑀸𑀯𑀼𑀢𑁆𑀢𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀬𑀁 𑀤𑀺𑀝𑁆𑀞𑀁 𑀢𑀁 𑀦 𑀧𑀲𑁆𑀲𑀢𑀻𑀢𑀺 𑀬𑀁 𑀭𑀽𑀧𑀸𑀬𑀢𑀦𑀁, 𑀓𑁂𑀲𑀸𑀤𑀺𑀪𑀽𑀢𑀼𑀧𑀸𑀤𑀸𑀬𑀲𑀫𑀽𑀳𑀲𑀗𑁆𑀔𑀸𑀢𑀁 𑀯𑀸 𑀤𑀺𑀝𑁆𑀞𑀁, 𑀢𑀁 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀪𑀽𑀢𑀢𑁄 𑀦 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑀦 𑀅𑀜𑁆𑀜𑀥𑀫𑁆𑀫𑀸𑀦𑀼𑀧𑀲𑁆𑀲𑀻𑀢𑀺 𑀦 𑀅𑀜𑁆𑀜𑀲𑀪𑀸𑀯𑀸𑀦𑀼𑀧𑀲𑁆𑀲𑀻, 𑀅𑀲𑀼𑀪𑀸𑀤𑀺𑀢𑁄 𑀅𑀜𑁆𑀜𑀸𑀓𑀸𑀭𑀸𑀦𑀼𑀧𑀲𑁆𑀲𑀻 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀧𑀣𑀯𑀻𑀓𑀸𑀬𑀦𑁆𑀢𑀺 𑀓𑁂𑀲𑀸𑀤𑀺𑀁 𑀧𑀣𑀯𑀻𑀥𑀫𑁆𑀫𑀲𑀫𑀽𑀳𑀢𑁆𑀢𑀸 ‘‘𑀓𑀸𑀬𑁄’’𑀢𑀺 𑀯𑀤𑀢𑀺, 𑀮𑀓𑁆𑀔𑀡𑀧𑀣𑀯𑀺𑀫𑁂𑀯 𑀯𑀸 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑀁 𑀲𑀓𑀮𑀲𑀭𑀻𑀭𑀕𑀢𑀁 𑀧𑀼𑀩𑁆𑀩𑀸𑀧𑀭𑀺𑀬𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀁 𑀲𑀫𑀽𑀳𑀯𑀲𑁂𑀦 𑀕𑀳𑁂𑀢𑁆𑀯𑀸 ‘‘𑀓𑀸𑀬𑁄’’𑀢𑀺 𑀯𑀤𑀢𑀺. 𑀏𑀯𑀁 𑀅𑀜𑁆𑀜𑀢𑁆𑀣𑀸𑀧𑀺.

𑀆𑀓𑀸𑀭𑀲𑀫𑀽𑀳𑀲𑀗𑁆𑀔𑀸𑀢𑀲𑁆𑀲𑀸𑀢𑀺 𑀅𑀦𑀺𑀘𑁆𑀘𑀢𑀸𑀤𑀺𑀆𑀓𑀸𑀭𑀲𑀫𑀼𑀤𑀸𑀬𑀧𑀭𑀺𑀬𑀸𑀬𑀲𑁆𑀲.

𑀢𑀻𑀲𑀼 𑀪𑀯𑁂𑀲𑀼 𑀓𑀺𑀮𑁂𑀲𑁂𑀢𑀺 𑀪𑀯𑀢𑁆𑀢𑀬𑀯𑀺𑀲𑀬𑀓𑀺𑀮𑁂𑀲𑁂. 𑀲𑀩𑁆𑀩𑀢𑁆𑀣𑀺𑀓𑀦𑁆𑀢𑀺 𑀲𑀩𑁆𑀩𑀢𑁆𑀣 𑀮𑀻𑀦𑁂, 𑀉𑀤𑁆𑀥𑀢𑁂 𑀘 𑀘𑀺𑀢𑁆𑀢𑁂 𑀇𑀘𑁆𑀙𑀺𑀢𑀩𑁆𑀩𑀢𑁆𑀣𑀸, 𑀲𑀩𑁆𑀩𑁂 𑀯𑀸 𑀮𑀻𑀦𑁂, 𑀉𑀤𑁆𑀥𑀢𑁂 𑀘 𑀪𑀸𑀯𑁂𑀢𑀩𑁆𑀩𑀸 𑀩𑁄𑀚𑁆𑀛𑀗𑁆𑀕𑀸 𑀅𑀢𑁆𑀣𑀺𑀓𑀸 𑀏𑀢𑀸𑀬𑀸𑀢𑀺 𑀲𑀩𑁆𑀩𑀢𑁆𑀣𑀺𑀓𑀸. 𑀅𑀦𑁆𑀢𑁄 𑀲𑀗𑁆𑀓𑁄𑀘𑁄𑀢𑀺 𑀅𑀦𑁆𑀢𑁄 𑀑𑀮𑀻𑀬𑀦𑀸, 𑀓𑁄𑀲𑀚𑁆𑀚𑀦𑁆𑀢𑀺 𑀅𑀢𑁆𑀣𑁄.

𑁨𑁪. 𑀕𑀳𑀺𑀢𑁂𑀲𑀽𑀢𑀺 𑀪𑀸𑀯𑀦𑀸𑀕𑁆𑀕𑀳𑀡𑁂𑀦 𑀕𑀳𑀺𑀢𑁂𑀲𑀼, 𑀪𑀸𑀯𑀺𑀢𑁂𑀲𑀽𑀢𑀺 𑀅𑀢𑁆𑀣𑁄, 𑀯𑀘𑀦𑁂𑀦 𑀯𑀸 𑀕𑀳𑀺𑀢𑁂𑀲𑀼. 𑀪𑀸𑀯𑀦𑀸𑀕𑁆𑀕𑀳𑀡𑀤𑀻𑀧𑀦𑀢𑁆𑀣𑀢𑁆𑀢𑀸 𑀧𑀦 𑀯𑀘𑀦𑁂𑀦 𑀕𑀳𑀡𑀲𑁆𑀲 𑀪𑀸𑀯𑀦𑀸𑀕𑁆𑀕𑀳𑀡𑀫𑁂𑀢𑁆𑀣 𑀧𑀥𑀸𑀦𑀁. 𑀬𑀲𑁆𑀲 𑀲𑀢𑀺𑀧𑀝𑁆𑀞𑀸𑀦𑀸 𑀪𑀸𑀯𑀺𑀢𑀸, 𑀢𑀲𑁆𑀲 𑀲𑀫𑁆𑀫𑀧𑁆𑀧𑀥𑀸𑀦𑀸𑀤𑀬𑁄 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀦 𑀪𑀸𑀯𑀺𑀢𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻𑀢𑀺 𑀘 𑀲𑀫𑀸𑀦𑀮𑀓𑁆𑀔𑀡𑀢𑀸𑀧𑀤𑁂𑀲𑁂𑀦 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 ‘‘𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀪𑀸𑀯𑀺𑀬𑀫𑀸𑀦𑁂𑀲𑀼 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀯𑀺𑀧𑀮𑁆𑀮𑀸𑀲𑀸 𑀧𑀳𑀻𑀬𑀦𑁆𑀢𑀺 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀸𑀯𑀢𑁄. ‘‘𑀆𑀳𑀸𑀭𑀲𑀫𑀼𑀤𑀬𑀸 𑀓𑀸𑀬𑀲𑁆𑀲 𑀲𑀫𑀼𑀤𑀬𑁄, 𑀨𑀲𑁆𑀲𑀲𑀫𑀼𑀤𑀬𑀸 𑀯𑁂𑀤𑀦𑀸𑀦𑀁 𑀲𑀫𑀼𑀤𑀬𑁄 (𑀲𑀁. 𑀦𑀺. 𑁫.𑁪𑁦𑁮), 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 (𑀲𑀁. 𑀦𑀺. 𑁧.𑁧, 𑁩𑁯; 𑀫. 𑀦𑀺. 𑁩.𑁧𑁨𑁬; 𑀫𑀳𑀸𑀯. 𑁧; 𑀉𑀤𑀸. 𑁧; 𑀯𑀺𑀪. 𑁨𑁨𑁫) 𑀯𑀘𑀦𑀢𑁄 𑀓𑀸𑀬𑀸𑀤𑀻𑀦𑀁 𑀲𑀫𑀼𑀤𑀬𑀪𑀽𑀢𑀸 𑀓𑀩𑀴𑀻𑀓𑀸𑀭𑀸𑀳𑀸𑀭𑀨𑀲𑁆𑀲𑀫𑀦𑁄𑀲𑀜𑁆𑀘𑁂𑀢𑀦𑀸𑀯𑀺𑀜𑁆𑀜𑀸𑀡𑀸𑀳𑀸𑀭𑀸𑀓𑀸𑀬𑀸𑀤𑀻𑀦𑀁 𑀧𑀭𑀺𑀚𑀸𑀦𑀦𑁂𑀦 𑀧𑀭𑀺𑀜𑁆𑀜𑀸𑀢𑀸 𑀳𑁄𑀦𑁆𑀢𑀺 𑀢𑀧𑁆𑀧𑀝𑀺𑀧𑀓𑁆𑀔𑀧𑁆𑀧𑀳𑀸𑀦𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀢𑁆𑀢𑀸𑀭𑁄 𑀆𑀳𑀸𑀭𑀸’’𑀢𑀺𑀆𑀤𑀺𑀫𑀸𑀳. 𑀲𑀩𑁆𑀩𑀢𑁆𑀣𑀸𑀢𑀺 ‘‘𑀉𑀧𑀸𑀤𑀸𑀦𑁂𑀳𑀺 𑀅𑀦𑀼𑀧𑀸𑀤𑀸𑀦𑁄 𑀪𑀯𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼.

𑀢𑀢𑁆𑀣 𑀬𑀲𑁆𑀫𑀸 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀲𑀯𑀺𑀲𑁂𑀲𑀸 𑀓𑀸𑀬𑁂 𑀮𑀩𑁆𑀪𑀦𑁆𑀢𑀻𑀢𑀺 𑀯𑀺𑀲𑁂𑀲𑁂𑀦 𑀓𑀸𑀬𑁄 𑀓𑀸𑀫𑀼𑀧𑀸𑀤𑀸𑀦𑀲𑁆𑀲 𑀯𑀢𑁆𑀣𑀼, 𑀲𑀼𑀔𑀯𑁂𑀤𑀦𑀲𑁆𑀲𑀸𑀤𑀯𑀲𑁂𑀦 𑀧𑀭𑀮𑁄𑀓𑀦𑀺𑀭𑀧𑁂𑀓𑁆𑀔𑁄 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺 (𑀤𑀻. 𑀦𑀺. 𑁧.𑁧𑁭𑁧; 𑀫. 𑀦𑀺. 𑁧.𑁪𑁪𑁫; 𑁨.𑁯𑁪-𑁯𑁫, 𑁨𑁨𑁫; 𑁩.𑁯𑁧, 𑁧𑁧𑁬; 𑀲𑀁. 𑀦𑀺. 𑁩.𑁨𑁧𑁦; 𑀥. 𑀲. 𑁧𑁨𑁨𑁧; 𑀯𑀺𑀪. 𑁯𑁩𑁮) 𑀧𑀭𑀸𑀫𑀸𑀲𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀲𑁆𑀲 𑀯𑁂𑀤𑀦𑀸, 𑀘𑀺𑀢𑁆𑀢𑁂 𑀦𑀺𑀘𑁆𑀘𑀕𑁆𑀕𑀳𑀡𑀯𑀲𑁂𑀦 𑀲𑀲𑁆𑀲𑀢𑀲𑁆𑀲 ‘‘𑀅𑀢𑁆𑀢𑀦𑁄 𑀲𑀻𑀮𑀸𑀤𑀺𑀯𑀲𑁂𑀦 𑀧𑀭𑀺𑀲𑀼𑀤𑁆𑀥𑀧𑀭𑀸𑀫𑀲𑀦𑀁 𑀳𑁄𑀢𑀻’’𑀢𑀺 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀲𑁆𑀲 𑀘𑀺𑀢𑁆𑀢𑀁, 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁂𑀦 𑀪𑀽𑀢𑀁 𑀪𑀽𑀢𑀢𑁄 𑀅𑀧𑀲𑁆𑀲𑀦𑁆𑀢𑀲𑁆𑀲 ‘‘𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑁄 𑀳𑁄𑀢𑀻’’𑀢𑀺 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀲𑁆𑀲 𑀥𑀫𑁆𑀫𑀸 𑀯𑀢𑁆𑀣𑀼, 𑀢𑀲𑁆𑀫𑀸 ‘‘𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀪𑀸𑀯𑀺𑀬𑀫𑀸𑀦𑁂𑀲𑀼 𑀉𑀧𑀸𑀤𑀸𑀦𑁂𑀳𑀺 𑀅𑀦𑀼𑀧𑀸𑀤𑀸𑀦𑁄 𑀪𑀯𑀢𑀻’’𑀢𑀺 𑀯𑀼𑀢𑁆𑀢𑀁.

𑀬𑀲𑁆𑀫𑀸 𑀧𑀦 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀸𑀬𑁄 𑀓𑀸𑀫𑀬𑁄𑀕𑀲𑁆𑀲 𑀯𑀢𑁆𑀣𑀼, 𑀪𑀯𑁂𑀲𑀼 𑀲𑀼𑀔𑀕𑁆𑀕𑀳𑀡𑀯𑀲𑁂𑀦 𑀪𑀯𑀲𑁆𑀲𑀸𑀤𑁄 𑀳𑁄𑀢𑀻𑀢𑀺 𑀪𑀯𑀬𑁄𑀕𑀲𑁆𑀲 𑀯𑁂𑀤𑀦𑀸, 𑀲𑀦𑁆𑀢𑀢𑀺𑀖𑀦𑀕𑁆𑀕𑀳𑀡𑀯𑀲𑁂𑀦 𑀘𑀺𑀢𑁆𑀢𑁂 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑁄 𑀳𑁄𑀢𑀻𑀢𑀺 𑀤𑀺𑀝𑁆𑀞𑀺𑀬𑁄𑀕𑀲𑁆𑀲𑀘𑀺𑀢𑁆𑀢𑀁, 𑀥𑀫𑁆𑀫𑀯𑀺𑀦𑀺𑀩𑁆𑀪𑁄𑀕𑀲𑁆𑀲 𑀤𑀼𑀓𑁆𑀓𑀭𑀢𑁆𑀢𑀸, 𑀥𑀫𑁆𑀫𑀸𑀦𑀁 𑀥𑀫𑁆𑀫𑀫𑀢𑁆𑀢𑀢𑀸𑀬 𑀘 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀢𑁆𑀢𑀸 𑀲𑀫𑁆𑀫𑁄𑀳𑁄 𑀳𑁄𑀢𑀻𑀢𑀺 𑀅𑀯𑀺𑀚𑁆𑀚𑀸𑀬𑁄𑀕𑀲𑁆𑀲 𑀥𑀫𑁆𑀫𑀸, 𑀯𑀢𑁆𑀣𑀼, 𑀢𑀲𑁆𑀫𑀸 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀬 𑀢𑁂𑀲𑀼 𑀢𑁂𑀲𑀁 𑀧𑀳𑀸𑀦𑀲𑀺𑀤𑁆𑀥𑀺𑀢𑁄 𑀬𑁄𑀕𑁂𑀳𑀺 𑀯𑀺𑀲𑀁𑀬𑀼𑀢𑁆𑀢𑀢𑀸 𑀯𑀼𑀢𑁆𑀢𑀸. 𑀏𑀢𑁂𑀦𑁂𑀯 𑀆𑀲𑀯𑁂𑀳𑀺 𑀅𑀦𑀸𑀲𑀯𑀢𑀸, 𑀑𑀖𑁂𑀳𑀺 𑀦𑀺𑀢𑁆𑀢𑀺𑀡𑁆𑀡𑀢𑀸 𑀘 𑀲𑀁𑀯𑀡𑁆𑀡𑀺𑀢𑀸 𑀳𑁄𑀢𑀺 𑀓𑀸𑀫𑀭𑀸𑀕𑀸𑀤𑀻𑀦𑀁 𑀏𑀯 𑀓𑀸𑀫𑀬𑁄𑀕𑀓𑀸𑀫𑀸𑀲𑀯𑀓𑀸𑀫𑁄𑀖𑀸𑀤𑀺𑀪𑀸𑀯𑀢𑁄.

𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀸𑀬𑁄 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑀲𑁆𑀲 𑀯𑀢𑁆𑀣𑀼, ‘‘𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀧𑀝𑀺𑀖𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺 (𑀫. 𑀦𑀺. 𑁧.𑁪𑁬𑁫) 𑀤𑀼𑀓𑁆𑀔𑀤𑀼𑀓𑁆𑀔𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀲𑀗𑁆𑀔𑀸𑀭𑀤𑀼𑀓𑁆𑀔𑀪𑀽𑀢𑀸 𑀯𑁂𑀤𑀦𑀸 𑀯𑀺𑀲𑁂𑀲𑁂𑀦 𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑀲𑁆𑀲 𑀯𑀢𑁆𑀣𑀼, 𑀘𑀺𑀢𑁆𑀢𑁂 𑀦𑀺𑀘𑁆𑀘𑀸𑀪𑀺𑀦𑀺𑀯𑁂𑀲𑀯𑀲𑁂𑀦 𑀲𑀲𑁆𑀲𑀢𑀲𑁆𑀲 ‘‘𑀅𑀢𑁆𑀢𑀦𑁄 𑀲𑀻𑀮𑁂𑀦 𑀲𑀼𑀤𑁆𑀥𑀻’’𑀢𑀺𑀆𑀤𑀺𑀧𑀭𑀸𑀫𑀲𑀦𑀁 𑀳𑁄𑀢𑀻𑀢𑀺 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀲𑁆𑀲 𑀘𑀺𑀢𑁆𑀢𑀁 𑀯𑀢𑁆𑀣𑀼, 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀤𑀲𑁆𑀲𑀦𑀸𑀪𑀸𑀯𑀢𑁄 𑀪𑀯𑀯𑀺𑀪𑀯𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑁄 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄 𑀳𑁄𑀢𑀻𑀢𑀺 𑀢𑀲𑁆𑀲 𑀥𑀫𑁆𑀫𑀸 𑀯𑀢𑁆𑀣𑀽𑀢𑀺 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀲𑁂𑀲𑀢𑁄 𑀓𑀸𑀬𑁄 𑀭𑀸𑀕𑀲𑀮𑁆𑀮𑀲𑁆𑀲 𑀯𑀢𑁆𑀣𑀼, 𑀯𑁂𑀤𑀦𑀸 𑀤𑁄𑀲𑀲𑀮𑁆𑀮𑀲𑁆𑀲, ‘‘𑀘𑀺𑀢𑁆𑀢𑀁 𑀦𑀺𑀘𑁆𑀘𑀕𑁆𑀕𑀳𑀡𑀯𑀲𑁂𑀦 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑀁 𑀅𑀢𑁆𑀢𑀸𑀦𑀁 𑀲𑁂𑀬𑁆𑀬𑀸𑀤𑀺𑀢𑁄 𑀤𑀳𑀢𑀻’’𑀢𑀺 𑀘𑀺𑀢𑁆𑀢𑀁 𑀫𑀸𑀦𑀲𑀮𑁆𑀮𑀲𑁆𑀲, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀥𑀫𑁆𑀫𑀸 𑀫𑁄𑀳𑀲𑀮𑁆𑀮𑀲𑁆𑀲 𑀯𑀢𑁆𑀣𑀽𑀢𑀺 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀬𑀲𑁆𑀫𑀸 𑀧𑀦 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀻𑀳𑀺 𑀓𑀸𑀬𑀯𑁂𑀤𑀦𑀸𑀘𑀺𑀢𑁆𑀢𑀥𑀫𑁆𑀫𑁂𑀲𑀼 𑀧𑀭𑀺𑀜𑁆𑀜𑀸𑀢𑁂𑀲𑀼 𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀸 𑀧𑀭𑀺𑀜𑁆𑀜𑀸𑀢𑀸 𑀳𑁄𑀦𑁆𑀢𑀺, 𑀘𑀺𑀢𑁆𑀢𑁂 𑀳𑀺 𑀧𑀭𑀺𑀜𑁆𑀜𑀸𑀢𑁂 𑀲𑀜𑁆𑀜𑀸𑀧𑀺 𑀧𑀭𑀺𑀜𑁆𑀜𑀸𑀢𑀸𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀘𑀲𑁆𑀲 𑀧𑀭𑀺𑀜𑁆𑀜𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑀢𑀣𑀸 𑀯𑀺𑀲𑁂𑀲𑀢𑁄 𑀓𑀸𑀬𑁂 𑀲𑀸𑀧𑁂𑀓𑁆𑀔𑀸 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀻𑀢𑀺 𑀓𑀸𑀬𑁄 𑀙𑀦𑁆𑀤𑀸𑀕𑀢𑀺𑀬𑀸 𑀯𑀢𑁆𑀣𑀼, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀦𑀸 𑀩𑁆𑀬𑀸𑀧𑀸𑀤𑀲𑁆𑀲 𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀸 𑀤𑁄𑀲𑀸𑀕𑀢𑀺𑀬𑀸 𑀯𑀢𑁆𑀣𑀼, 𑀲𑀦𑁆𑀢𑀢𑀺𑀖𑀦𑀕𑁆𑀕𑀳𑀡𑀯𑀲𑁂𑀦 𑀲𑀭𑀸𑀕𑀸𑀤𑀺𑀘𑀺𑀢𑁆𑀢𑁂 𑀲𑀫𑁆𑀫𑁄𑀳𑁄 𑀳𑁄𑀢𑀻𑀢𑀺 𑀫𑁄𑀳𑀸𑀕𑀢𑀺𑀬𑀸 𑀘𑀺𑀢𑁆𑀢𑀁, 𑀥𑀫𑁆𑀫𑀲𑀪𑀸𑀯𑀸𑀦𑀯𑀩𑁄𑀥𑁂𑀦 𑀪𑀬𑀁 𑀳𑁄𑀢𑀻𑀢𑀺 𑀪𑀬𑀸𑀕𑀢𑀺𑀬𑀸 𑀥𑀫𑁆𑀫𑀸 𑀯𑀢𑁆𑀣𑀽𑀢𑀺 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀬 𑀅𑀕𑀢𑀺𑀕𑀫𑀦𑀧𑁆𑀧𑀳𑀸𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀅𑀕𑀢𑀺𑀕𑀫𑀦𑁂𑀳𑀺 𑀘 𑀦 𑀅𑀕𑀢𑀺𑀁 𑀕𑀘𑁆𑀙𑀢𑀻’’𑀢𑀺.

‘‘𑀅𑀓𑀼𑀲𑀮𑀲𑁆𑀲 𑀲𑁄𑀫𑀦𑀲𑁆𑀲𑀲𑁆𑀲 𑀯𑀲𑁂𑀦𑀸’’𑀢𑀺 𑀇𑀤𑀁 ‘‘𑀅𑀬𑀫𑁆𑀧𑀺 𑀅𑀢𑁆𑀣𑁄 𑀲𑀫𑁆𑀪𑀯𑀢𑀻’’𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺 (𑀫. 𑀦𑀺. 𑁧.𑁪𑁬𑁫) 𑀧𑀦 𑀯𑀘𑀦𑀢𑁄 𑀲𑀼𑀔𑀯𑁂𑀤𑀦𑀸𑀕𑁆𑀕𑀳𑀡𑁂𑀦 𑀢𑀢𑁆𑀣𑀸𑀦𑀼𑀲𑀬𑀦𑁂𑀦 𑀲𑀫𑀼𑀤𑀬𑀲𑀘𑁆𑀘𑀁 𑀤𑁂𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀤𑁂𑀲𑀺𑀢𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀤𑀼𑀓𑁆𑀔𑀤𑀼𑀓𑁆𑀔𑀕𑁆𑀕𑀳𑀡𑁂𑀦 𑀲𑀸𑀢𑀺𑀲𑀬𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀧𑀓𑀸𑀲𑀺𑀢𑀁 𑀳𑁄𑀢𑀻𑀢𑀺 𑀧𑀸𑀴𑀺𑀬𑀁 ‘‘𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀤𑁂𑀲𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀳𑀘𑀭𑀡𑀸𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸𑀬𑀁 (𑀦𑁂𑀢𑁆𑀢𑀺. 𑀅𑀝𑁆𑀞. 𑁫 𑀆𑀤𑀬𑁄) 𑀯𑀼𑀢𑁆𑀢𑀁.

𑀮𑀓𑁆𑀔𑀡𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀘𑀢𑀼𑀩𑁆𑀬𑀽𑀳𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁨𑁫. 𑀳𑀸𑀭𑀸𑀦𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀺𑀯𑀘𑀦𑀁. 𑀳𑀸𑀭𑁂𑀲𑀼 𑀇𑀫𑀲𑁆𑀲 𑀘𑀢𑀼𑀩𑁆𑀬𑀽𑀳𑀳𑀸𑀭𑀲𑁆𑀲 𑀯𑀺𑀲𑁂𑀲𑀢𑁄 𑀲𑀼𑀢𑁆𑀢𑀲𑁆𑀲 𑀩𑁆𑀬𑀜𑁆𑀚𑀦𑀯𑀺𑀘𑀬𑀪𑀸𑀯𑀢𑁄𑀢𑀺 𑀬𑁄𑀚𑀦𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀩𑁆𑀬𑀜𑁆𑀚𑀦…𑀧𑁂… 𑀤𑀲𑁆𑀲𑁂𑀢𑀻’’𑀢𑀺. 𑀬𑀸𑀬𑀸𑀢𑀺 𑀦𑀺𑀭𑀼𑀢𑁆𑀢𑀺𑀬𑀸.

𑀬𑀣𑀸𑀭𑀳𑀦𑁆𑀢𑀺 𑀲𑀁𑀯𑀡𑁆𑀡𑀺𑀬𑀫𑀸𑀦𑁂 𑀲𑀼𑀢𑁆𑀢𑁂 𑀬𑀁 𑀬𑀁 𑀅𑀭𑀳𑀢𑀺 𑀦𑀺𑀩𑁆𑀩𑀘𑀦𑀁 𑀯𑀢𑁆𑀢𑀼𑀁, 𑀢𑀁𑀢𑀁𑀮𑁄𑀓𑀲𑀫𑀜𑁆𑀜𑀸𑀦𑀼𑀭𑁄𑀥𑁂𑀦𑁂𑀯. 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸 𑀲𑀫𑁆𑀧𑀸𑀤𑁂𑀢𑁆𑀯𑀸 𑀧𑀘𑁆𑀙𑀸 𑀲𑀘𑁆𑀘𑀸𑀪𑀺𑀲𑀫𑀬𑀁 𑀧𑀸𑀧𑀼𑀡𑀸𑀢𑀻𑀢𑀺 𑀆𑀳 ‘‘𑀲𑀫𑁆𑀫𑀼𑀢𑀺…𑀧𑁂… 𑀳𑁄𑀢𑀻’’𑀢𑀺, 𑀢𑀁𑀢𑀁𑀧𑀜𑁆𑀜𑀢𑁆𑀢𑀺𑀕𑁆𑀕𑀳𑀡𑀫𑀼𑀔𑁂𑀦 𑀧𑀭𑀫𑀢𑁆𑀣𑀕𑁆𑀕𑀳𑀡𑀁 𑀳𑁄𑀢𑀻𑀢𑀺 𑀏𑀯𑀁 𑀯𑀸 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄.

𑀬𑀫𑀺𑀤𑀁 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀭𑀽𑀧𑀲𑀦𑁆𑀢𑀸𑀦𑀁 𑀲𑀦𑁆𑀥𑀸𑀬 ‘‘𑀉𑀪𑀬𑀫𑀦𑁆𑀢𑀭𑁂𑀦𑀸’’𑀢𑀺 𑀇𑀥 𑀯𑀼𑀢𑁆𑀢𑀁. 𑀑𑀢𑀭𑀡𑀳𑀸𑀭𑁂 (𑀦𑁂𑀢𑁆𑀢𑀺. 𑀅𑀝𑁆𑀞. 𑁪𑁨 𑀆𑀤𑀬𑁄) 𑀧𑀦𑀲𑁆𑀲 𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀨𑀲𑁆𑀲𑀸𑀤𑀺𑀥𑀫𑁆𑀫𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀉𑀪𑀬𑀫𑀦𑁆𑀢𑀭𑁂𑀦𑀸𑀢𑀺 𑀨𑀲𑁆𑀲𑀲𑀫𑀼𑀤𑀺𑀢𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀧𑀦𑀸𑀳𑀼 ‘‘𑀅𑀦𑁆𑀢𑀭𑁂𑀦𑀸𑀢𑀺 𑀯𑀘𑀦𑀁 𑀧𑀦 𑀯𑀺𑀓𑀧𑁆𑀧𑀦𑁆𑀢𑀭𑀤𑀻𑀧𑀦’’𑀦𑁆𑀢𑀺. 𑀢𑀲𑁆𑀫𑀸 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑁋 𑀦 𑀇𑀫𑀁 𑀮𑁄𑀓𑀁, 𑀦 𑀳𑀼𑀭𑀁 𑀮𑁄𑀓𑀁, 𑀅𑀣 𑀔𑁄 𑀉𑀪𑀬𑀫𑀦𑁆𑀢𑀭𑁂𑀦𑀸𑀢𑀺. 𑀅𑀧𑀭𑁄 𑀯𑀺𑀓𑀧𑁆𑀧𑁄 𑁋 𑀉𑀪𑀬𑀫𑀦𑁆𑀢𑀭𑁂𑀦𑀸𑀢𑀺 𑀯𑀸 𑀯𑀘𑀦𑀁 𑀯𑀺𑀓𑀧𑁆𑀧𑀦𑁆𑀢𑀭𑀸𑀪𑀸𑀯𑀤𑀻𑀧𑀦𑀁. 𑀢𑀲𑁆𑀲𑀢𑁆𑀣𑁄 𑁋 𑀦 𑀇𑀫𑀁 𑀮𑁄𑀓𑀁, 𑀦 𑀳𑀼𑀭𑀁 𑀮𑁄𑀓𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺 𑀛𑀸𑀬𑀻, 𑀉𑀪𑀬𑀫𑀦𑁆𑀢𑀭𑁂𑀦 𑀧𑀦 𑀅𑀜𑁆𑀜𑀁 𑀞𑀸𑀦𑀁 𑀅𑀢𑁆𑀣𑀻𑀢𑀺.

𑀬𑁂𑀧𑀺 𑀘 ‘‘𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻, 𑀲𑀫𑁆𑀪𑀯𑁂𑀲𑀻’’𑀢𑀺 𑀘 𑀇𑀫𑁂𑀲𑀁 𑀲𑀼𑀢𑁆𑀢𑀧𑀤𑀸𑀦𑀁 𑀅𑀢𑁆𑀣𑀁 𑀫𑀺𑀘𑁆𑀙𑀸 𑀕𑀳𑁂𑀢𑁆𑀯𑀸 𑀅𑀢𑁆𑀣𑀺 𑀏𑀯 𑀅𑀦𑁆𑀢𑀭𑀸𑀪𑀯𑁄𑀢𑀺 𑀯𑀤𑀦𑁆𑀢𑀺, 𑀢𑁂𑀧𑀺 𑀬𑀲𑁆𑀫𑀸 𑀅𑀯𑀺𑀳𑀸𑀤𑀻𑀲𑀼 𑀢𑀢𑁆𑀣 𑀢𑀢𑁆𑀣 𑀆𑀬𑀼𑀯𑁂𑀫𑀚𑁆𑀛𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀦𑁆𑀢𑀭𑀸 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑁂𑀦 𑀅𑀦𑀯𑀲𑁂𑀲𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀻𑀢𑀺 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻, 𑀦 𑀅𑀦𑁆𑀢𑀭𑀸𑀪𑀯𑀪𑀽𑀢𑁄𑀢𑀺 𑀧𑀼𑀭𑀺𑀫𑀲𑁆𑀲 𑀲𑀼𑀢𑁆𑀢𑀧𑀤𑀲𑁆𑀲 𑀅𑀢𑁆𑀣𑁄. 𑀧𑀘𑁆𑀙𑀺𑀫𑀲𑁆𑀲 𑀘 𑀬𑁂 𑀪𑀽𑀢𑀸 𑀏𑀯, 𑀦 𑀧𑀼𑀦 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂 𑀳𑀺 (𑀓𑀣𑀸. 𑀅𑀦𑀼𑀝𑀻. 𑁫𑁦𑁭) 𑀔𑀻𑀡𑀸𑀲𑀯𑀸, 𑀧𑀼𑀭𑀺𑀫𑀧𑀤𑁂𑀳𑀺 ‘‘𑀪𑀽𑀢𑀸’’𑀢𑀺 𑀯𑀼𑀢𑁆𑀢𑀸. 𑀢𑀩𑁆𑀩𑀺𑀧𑀭𑀻𑀢𑀢𑀸𑀬 𑀲𑀫𑁆𑀪𑀯𑀁 𑀏𑀲𑀦𑁆𑀢𑀻𑀢𑀺 𑀲𑀫𑁆𑀪𑀯𑁂𑀲𑀺𑀦𑁄. 𑀅𑀧𑁆𑀧𑀳𑀻𑀦𑀪𑀯𑀲𑀁𑀬𑁄𑀚𑀦𑀢𑁆𑀢𑀸 𑀲𑁂𑀓𑁆𑀔𑀸, 𑀧𑀼𑀣𑀼𑀚𑁆𑀚𑀦𑀸 𑀘. 𑀘𑀢𑀽𑀲𑀼 𑀯𑀸 𑀬𑁄𑀦𑀻𑀲𑀼 𑀅𑀡𑁆𑀟𑀚𑀚𑀮𑀸𑀩𑀼𑀚𑀲𑀢𑁆𑀢𑀸 𑀬𑀸𑀯 𑀅𑀡𑁆𑀟𑀓𑁄𑀲𑀁, 𑀯𑀢𑁆𑀣𑀺𑀓𑁄𑀲𑀜𑁆𑀘 𑀦 𑀪𑀺𑀦𑁆𑀤𑀦𑁆𑀢𑀺, 𑀢𑀸𑀯 𑀲𑀫𑁆𑀪𑀯𑁂𑀲𑀻 𑀦𑀸𑀫. 𑀅𑀡𑁆𑀟𑀓𑁄𑀲𑀢𑁄, 𑀯𑀢𑁆𑀣𑀺𑀓𑁄𑀲𑀢𑁄 𑀘 𑀩𑀳𑀺 𑀦𑀺𑀓𑁆𑀔𑀦𑁆𑀢𑀸 𑀪𑀽𑀢𑀸 𑀦𑀸𑀫. 𑀲𑀁𑀲𑁂𑀤𑀚𑀑𑀧𑀧𑀸𑀢𑀺𑀓𑀸 𑀘 𑀧𑀞𑀫𑀘𑀺𑀢𑁆𑀢𑀓𑁆𑀔𑀡𑁂 𑀲𑀫𑁆𑀪𑀯𑁂𑀲𑀻 𑀦𑀸𑀫, 𑀤𑀼𑀢𑀺𑀬𑀘𑀺𑀢𑁆𑀢𑀓𑁆𑀔𑀡𑀢𑁄 𑀧𑀝𑁆𑀞𑀸𑀬 𑀪𑀽𑀢𑀸 𑀦𑀸𑀫. 𑀬𑁂𑀦 𑀯𑀸 𑀇𑀭𑀺𑀬𑀸𑀧𑀣𑁂𑀦 𑀚𑀸𑀬𑀦𑁆𑀢𑀺, 𑀬𑀸𑀯 𑀢𑀢𑁄 𑀅𑀜𑁆𑀜𑀁 𑀦 𑀧𑀸𑀧𑀼𑀡𑀦𑁆𑀢𑀺, 𑀢𑀸𑀯 𑀲𑀫𑁆𑀪𑀯𑁂𑀲𑀻, 𑀢𑀢𑁄 𑀧𑀭𑀁 𑀪𑀽𑀢𑀸𑀢𑀺 𑀅𑀢𑁆𑀣𑁄, 𑀢𑀲𑁆𑀫𑀸 𑀦𑀢𑁆𑀣𑀻𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀲𑀢𑀺 𑀳𑀺 𑀉𑀚𑀼𑀓𑁂 𑀧𑀸𑀴𑀺𑀅𑀦𑀼𑀕𑀢𑁂 𑀅𑀢𑁆𑀣𑁂 𑀓𑀺𑀁 𑀅𑀦𑀺𑀤𑁆𑀥𑀸𑀭𑀺𑀢𑀲𑀸𑀫𑀢𑁆𑀣𑀺𑀬𑁂𑀦 𑀅𑀦𑁆𑀢𑀭𑀸𑀪𑀯𑁂𑀦 𑀅𑀢𑁆𑀢𑀪𑀸𑀯𑀧𑀭𑀺𑀓𑀧𑁆𑀧𑀺𑀢𑁂𑀦 𑀧𑀬𑁄𑀚𑀦𑀦𑁆𑀢𑀺.

𑀬𑀁 𑀧𑀦 𑀬𑁂 ‘‘𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸𑀦𑀁 𑀥𑀫𑁆𑀫𑀸𑀦𑀁 𑀅𑀯𑀺𑀘𑁆𑀙𑁂𑀤𑁂𑀦 𑀤𑁂𑀲𑀦𑁆𑀢𑀭𑁂𑀲𑀼 𑀧𑀸𑀢𑀼𑀪𑀸𑀯𑁄 𑀤𑀺𑀝𑁆𑀞𑁄. 𑀬𑀣𑀸 𑀢𑀁 𑀯𑀻𑀳𑀺𑀆𑀤𑀺𑀅𑀯𑀺𑀜𑁆𑀜𑀸𑀡𑀓𑀲𑀦𑁆𑀢𑀸𑀦𑁂, 𑀏𑀯𑀁 𑀲𑀯𑀺𑀜𑁆𑀜𑀸𑀡𑀓𑀲𑀦𑁆𑀢𑀸𑀦𑁂𑀧𑀺 𑀅𑀯𑀺𑀘𑁆𑀙𑁂𑀤𑁂𑀦 𑀤𑁂𑀲𑀦𑁆𑀢𑀭𑁂𑀲𑀼 𑀧𑀸𑀢𑀼𑀪𑀸𑀯𑁂𑀦 𑀪𑀯𑀺𑀢𑀩𑁆𑀩𑀁. 𑀅𑀬𑀜𑁆𑀘 𑀦𑀬𑁄 𑀲𑀢𑀺 𑀅𑀦𑁆𑀢𑀭𑀸𑀪𑀯𑁂 𑀬𑀼𑀚𑁆𑀚𑀢𑀺, 𑀦𑀸𑀜𑁆𑀜𑀣𑀸’’𑀢𑀺 𑀬𑀼𑀢𑁆𑀢𑀺𑀁 𑀯𑀤𑀦𑁆𑀢𑀺. 𑀢𑁂𑀳𑀺 𑀇𑀤𑁆𑀥𑀺𑀫𑀢𑁄 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑀲𑁆𑀲 𑀘𑀺𑀢𑁆𑀢𑀸𑀦𑀼𑀕𑀢𑀺𑀓𑀁 𑀓𑀸𑀬𑀁 𑀅𑀥𑀺𑀝𑁆𑀞𑀳𑀦𑁆𑀢𑀲𑁆𑀲 𑀔𑀡𑁂𑀦 𑀩𑁆𑀭𑀳𑁆𑀫𑀮𑁄𑀓𑀢𑁄 𑀇𑀥𑀽𑀧𑀲𑀗𑁆𑀓𑀫𑀦𑁂, 𑀇𑀢𑁄 𑀯𑀸 𑀩𑁆𑀭𑀳𑁆𑀫𑀮𑁄𑀓𑀕𑀫𑀦𑁂 𑀬𑀼𑀢𑁆𑀢𑀺 𑀯𑀢𑁆𑀢𑀩𑁆𑀩𑀸. 𑀬𑀤𑀺 𑀲𑀩𑁆𑀩𑀢𑁆𑀣𑁂𑀯 𑀯𑀺𑀘𑁆𑀙𑀺𑀦𑁆𑀦𑀤𑁂𑀲𑁂 𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺 𑀦 𑀇𑀘𑁆𑀙𑀺𑀢𑀸, 𑀬𑀤𑀺𑀧𑀺 𑀲𑀺𑀬𑀸 ‘‘𑀇𑀤𑁆𑀥𑀺𑀯𑀺𑀲𑀬𑁄 𑀅𑀘𑀺𑀦𑁆𑀢𑁂𑀬𑁆𑀬𑁄’’𑀢𑀺, 𑀢𑀁 𑀇𑀥𑀸𑀧𑀺 𑀲𑀫𑀸𑀦𑀁 ‘‘𑀓𑀫𑁆𑀫𑀯𑀺𑀧𑀸𑀓𑁄 𑀅𑀘𑀺𑀦𑁆𑀢𑁂𑀬𑁆𑀬𑁄’’𑀢𑀺 𑀯𑀘𑀦𑀢𑁄, 𑀢𑀲𑁆𑀫𑀸 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀫𑁂𑀯. 𑀅𑀘𑀺𑀦𑁆𑀢𑁂𑀬𑁆𑀬𑀲𑀪𑀸𑀯𑀸 𑀳𑀺 𑀲𑀪𑀸𑀯𑀥𑀫𑁆𑀫𑀸, 𑀢𑁂 𑀓𑀢𑁆𑀣𑀘𑀺 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀯𑀺𑀘𑁆𑀙𑀺𑀦𑁆𑀦𑀤𑁂𑀲𑁂 𑀧𑀸𑀢𑀼𑀪𑀯𑀦𑁆𑀢𑀺, 𑀓𑀢𑁆𑀣𑀘𑀺 𑀅𑀯𑀺𑀘𑁆𑀙𑀺𑀦𑁆𑀦𑀤𑁂𑀲𑁂 𑀘. 𑀢𑀣𑀸 𑀳𑀺 𑀫𑀼𑀔𑀖𑁄𑀲𑀸𑀤𑀻𑀳𑀺 𑀅𑀜𑁆𑀜𑀲𑁆𑀫𑀺𑀁 𑀤𑁂𑀲𑁂 𑀆𑀤𑀸𑀲𑀧𑀩𑁆𑀩𑀢𑀧𑁆𑀧𑀤𑁂𑀲𑀸𑀤𑀺𑀓𑁂 𑀧𑀝𑀺𑀩𑀺𑀫𑁆𑀩𑀧𑀝𑀺𑀖𑁄𑀲𑀸𑀤𑀺𑀓𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀦𑀺𑀩𑁆𑀩𑀢𑁆𑀢𑀫𑀸𑀦𑀁 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀦 𑀲𑀩𑁆𑀩𑀁 𑀲𑀩𑁆𑀩𑀢𑁆𑀣 𑀉𑀧𑀦𑁂𑀢𑀩𑁆𑀩𑀦𑁆𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀧𑀝𑀺𑀩𑀺𑀫𑁆𑀩𑀲𑁆𑀲 𑀉𑀤𑀸𑀳𑀭𑀡𑀪𑀸𑀯𑀲𑀸𑀥𑀦𑀸𑀤𑀺𑀓𑁄 𑀅𑀦𑁆𑀢𑀭𑀸𑀪𑀯𑀯𑀺𑀘𑀸𑀭𑁄 𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑀲𑁆𑀲𑀝𑀻𑀓𑀸𑀬𑀁 (𑀓𑀣𑀸. 𑀅𑀦𑀼𑀝𑀻. 𑁫𑁦𑁭) 𑀕𑀳𑁂𑀢𑀩𑁆𑀩𑁄.

𑀅𑀧𑀭𑁂 𑀧𑀦 ‘‘𑀇𑀥𑀸𑀢𑀺 𑀓𑀸𑀫𑀪𑀯𑁄, 𑀳𑀼𑀭𑀦𑁆𑀢𑀺 𑀅𑀭𑀽𑀧𑀪𑀯𑁄, 𑀉𑀪𑀬𑀫𑀦𑁆𑀢𑀭𑁂𑀦𑀸𑀢𑀺 𑀭𑀽𑀧𑀪𑀯𑁄 𑀯𑀼𑀢𑁆𑀢𑁄’’𑀢𑀺 𑀯𑀤𑀦𑁆𑀢𑀺, ‘‘𑀇𑀥𑀸𑀢𑀺 𑀧𑀘𑁆𑀘𑀬𑀥𑀫𑁆𑀫𑀸, 𑀳𑀼𑀭𑀦𑁆𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸, 𑀉𑀪𑀬𑀫𑀦𑁆𑀢𑀭𑁂𑀦𑀸𑀢𑀺 𑀧𑀡𑁆𑀡𑀢𑁆𑀢𑀺𑀥𑀫𑁆𑀫𑀸 𑀯𑀼𑀢𑁆𑀢𑀸’’𑀢𑀺 𑀘 𑀯𑀤𑀦𑁆𑀢𑀺, 𑀢𑀁 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀦𑀢𑁆𑀣𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀯𑀲𑀺𑀝𑁆𑀞𑀁 𑀭𑀽𑀧𑀦𑁆𑀢𑀺 𑀆𑀧𑁄𑀥𑀸𑀢𑀼𑀆𑀓𑀸𑀲𑀥𑀸𑀢𑀽𑀳𑀺 𑀲𑀤𑁆𑀥𑀺𑀁 𑀮𑀓𑁆𑀔𑀡𑀭𑀽𑀧𑀸𑀦𑀺, 𑀑𑀚𑀜𑁆𑀘 𑀲𑀦𑁆𑀥𑀸𑀬𑀸𑀳 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀭𑀽𑀧𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀢𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁 𑀦 𑀚𑀸𑀦𑀦𑁆𑀢𑀺 𑀦 𑀜𑀸𑀬𑀦𑁆𑀢𑀺 ‘‘𑀛𑀸𑀬𑀫𑀸𑀦𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀘𑀢𑀼𑀩𑁆𑀬𑀽𑀳𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀆𑀯𑀝𑁆𑀝𑀳𑀸𑀭𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁨𑁯. 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀤𑁆𑀥𑀁𑀲𑀦𑀲𑀪𑀸𑀯𑀢𑁆𑀢𑀸, 𑀅𑀓𑀼𑀲𑀮𑀸𑀦𑀁 𑀯𑀸 𑀧𑀚𑀳𑀦𑁂 𑀓𑀼𑀲𑀮𑀸𑀦𑀁 𑀲𑀫𑁆𑀧𑀸𑀤𑀦𑁂 𑀧𑀝𑁆𑀞𑀧𑀦𑀲𑀪𑀸𑀯𑀢𑁆𑀢𑀸 𑀆𑀭𑀫𑁆𑀪𑀥𑀸𑀢𑀼. 𑀢𑀣𑀸𑀪𑀽𑀢𑀸𑀢𑀺 𑀲𑀻𑀮𑀸𑀤𑀻𑀳𑀺 𑀲𑀫𑀗𑁆𑀕𑀻𑀪𑀽𑀢𑀸. 𑀓𑀸𑀫𑀥𑀸𑀢𑀼𑀆𑀤𑀺𑀓𑀸 𑀢𑀺𑀥𑀸𑀢𑀼𑀬𑁄𑀯 𑀢𑁂𑀥𑀸𑀢𑀼. 𑀢𑀲𑁆𑀲 𑀅𑀪𑀺𑀪𑀯𑀦𑀢𑁄 𑀢𑁂𑀥𑀸𑀢𑀼𑀇𑀲𑁆𑀲𑀭𑁄 𑀫𑀘𑁆𑀘𑀼𑀭𑀸𑀚𑀸. 𑀅𑀦𑀸𑀤𑀺𑀫𑀢𑀺𑀲𑀁𑀲𑀸𑀭𑁂 𑀘𑀺𑀭𑀓𑀸𑀮𑀁 𑀮𑀤𑁆𑀥𑀧𑀢𑀺𑀝𑁆𑀞𑀸𑀧𑀺 𑀅𑀘𑀺𑀭𑀓𑀸𑀮𑀁 𑀪𑀸𑀯𑀺𑀢𑁂𑀳𑀺 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀼𑀘𑁆𑀙𑀺𑀦𑁆𑀤𑀦𑀻𑀬𑀢𑁆𑀢𑀸 𑀅𑀩𑀮𑀸 𑀓𑀺𑀮𑁂𑀲𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀩𑀮𑀁 𑀤𑀼𑀩𑁆𑀩𑀮’’𑀦𑁆𑀢𑀺. 𑀢𑁂𑀦𑀸𑀳 ‘‘𑀅𑀩𑀮𑀸 𑀦𑀁 𑀩𑀮𑀻𑀬𑀦𑁆𑀢𑀻’’𑀢𑀺.

𑀇𑀤𑀁 𑀯𑀘𑀦𑀁 𑀅𑀬𑀁 𑀕𑀸𑀣𑀸𑀧𑀸𑀤𑁄. 𑀲𑀫𑀸𑀥𑀺𑀲𑁆𑀲 𑀧𑀤𑀝𑁆𑀞𑀸𑀦𑀦𑁆𑀢𑀺 𑀏𑀢𑁆𑀣 𑀲𑀫𑀸𑀥𑀺𑀲𑁆𑀲 𑀓𑀸𑀭𑀡𑀁 𑀲𑀫𑀢𑀸𑀦𑀼𑀬𑁄𑀕𑁂 𑀦𑀺𑀬𑁄𑀚𑀦𑀢𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀧𑀧𑀜𑁆𑀘𑀸𑀢𑀺 𑀭𑀸𑀕𑀸𑀤𑀬𑁄𑀯. 𑀢𑀣𑀸 𑀘𑁂𑀯 𑀲𑀁𑀯𑀡𑁆𑀡𑀺𑀢𑀦𑁆𑀢𑀺 𑀤𑁂𑀲𑀦𑀸𑀬 𑀧𑀤𑀝𑁆𑀞𑀸𑀦𑀪𑀸𑀯𑁂𑀦𑁂𑀯 𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀓𑀢𑀸𑀢𑀺 𑀅𑀢𑁆𑀣𑁄.

𑀦𑁆𑀢𑀺 𑀢𑀁 𑀤𑁂𑀲𑀦𑀁. 𑀢𑀲𑁆𑀲𑀸𑀢𑀺 𑀲𑀪𑀸𑀕𑀸𑀤𑀺𑀯𑀲𑁂𑀦 𑀆𑀯𑀝𑁆𑀝𑀦𑀲𑁆𑀲. 𑀧𑀭𑀺𑀧𑀓𑁆𑀓𑀜𑀸𑀡𑀸𑀦𑀁 𑀯𑀺𑀲𑁂𑀲𑀸𑀥𑀺𑀕𑀫𑀸𑀬. 𑀮𑀸𑀪𑀯𑀺𑀦𑀺𑀘𑁆𑀙𑀬𑀧𑀭𑀺𑀕𑁆𑀕𑀳𑀫𑀘𑁆𑀙𑀭𑀺𑀬𑀸𑀦𑀻𑀢𑀺𑀆𑀤𑀻𑀲𑀼 𑀮𑀸𑀪𑁄𑀢𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀧𑁆𑀧𑀝𑀺𑀮𑀸𑀪𑁄. 𑀲𑁄 𑀧𑀭𑀺𑀬𑁂𑀲𑀦𑀸𑀬 𑀲𑀢𑀺 𑀳𑁄𑀢𑀻𑀢𑀺 𑀧𑀭𑀺𑀬𑁂𑀲𑀦𑀸𑀕𑁆𑀕𑀳𑀡𑁂𑀦 𑀕𑀳𑀺𑀢𑁄. 𑀯𑀺𑀦𑀺𑀘𑁆𑀙𑀬𑁄𑀢𑀺 ‘‘𑀏𑀢𑁆𑀢𑀓𑀁 𑀫𑁂 𑀭𑀽𑀧𑀸𑀭𑀫𑁆𑀫𑀡𑀢𑁆𑀣𑀸𑀬 𑀪𑀯𑀺𑀲𑁆𑀲𑀢𑀺, 𑀏𑀢𑁆𑀢𑀓𑀁 𑀲𑀤𑁆𑀤𑀸𑀤𑀺𑀆𑀭𑀫𑁆𑀫𑀡𑀢𑁆𑀣𑀸𑀬, 𑀏𑀢𑁆𑀢𑀓𑀁 𑀫𑀬𑁆𑀳𑀁, 𑀏𑀢𑁆𑀢𑀓𑀁 𑀧𑀭𑀲𑁆𑀲, 𑀏𑀢𑁆𑀢𑀓𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀺, 𑀏𑀢𑁆𑀢𑀓𑀁 𑀦𑀺𑀤𑀳𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀯𑀺𑀢𑀓𑁆𑀓𑁄 𑀯𑀺𑀦𑀺𑀘𑁆𑀙𑀬𑁄. 𑀲𑁄 𑀮𑀸𑀧𑀺𑀢𑀳𑁂𑀢𑀼𑀓𑀢𑁆𑀢𑀸 𑀧𑀭𑀺𑀬𑁂𑀲𑀦𑀫𑀽𑀮𑀓𑀢𑀸𑀬 𑀧𑀭𑀺𑀬𑁂𑀲𑀦𑀸𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑁄, 𑀢𑀣𑀸 𑀧𑀭𑀺𑀕𑁆𑀕𑀳𑀫𑀘𑁆𑀙𑀭𑀺𑀬𑀸𑀦𑀺. 𑀢𑀢𑁆𑀣 𑀧𑀭𑀺𑀕𑁆𑀕𑀳𑁄 ‘‘𑀫𑀫 𑀇𑀤’’𑀦𑁆𑀢𑀺 𑀧𑀭𑀺𑀕𑁆𑀕𑀡𑁆𑀳𑀦𑀁. 𑀫𑀘𑁆𑀙𑀭𑀺𑀬𑀁 ‘‘𑀫𑀬𑁆𑀳𑁂𑀯 𑀳𑁄𑀢𑀽’’𑀢𑀺 𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑀸𑀲𑀳𑀦𑀁. 𑀢𑁂𑀦𑁂𑀯𑀲𑁆𑀲 𑀧𑁄𑀭𑀸𑀡𑀸 𑀏𑀯𑀁 𑀯𑀘𑀦𑀢𑁆𑀣𑀁 𑀯𑀤𑀦𑁆𑀢𑀺 ‘‘𑀫𑀬𑁆𑀳𑁂𑀯𑀺𑀤𑀫𑀘𑁆𑀙𑀭𑀺𑀬𑀁 𑀳𑁄𑀢𑀼, 𑀫𑀸 𑀅𑀜𑁆𑀜𑁂𑀲𑀁 𑀅𑀘𑁆𑀙𑀭𑀺𑀬𑀁 𑀳𑁄𑀢𑀽𑀢𑀺 𑀧𑀯𑀢𑁆𑀢𑀢𑁆𑀢𑀸 𑀫𑀘𑁆𑀙𑀭𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁨.𑁧𑁦𑁩; 𑀅. 𑀦𑀺. 𑀅𑀝𑁆𑀞. 𑁩.𑁯.𑁨𑁩). 𑀧𑀭𑀺𑀪𑁄𑀕𑀢𑁆𑀣𑀸𑀦𑀁 𑀧𑀦 𑀯𑀺𑀦𑀺𑀘𑁆𑀙𑀬𑀸𑀤𑀻𑀦𑀁 𑀧𑀭𑀺𑀪𑁄𑀕𑀦𑁆𑀢𑁄𑀕𑀥𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀙𑀦𑁆𑀤𑀭𑀸𑀕𑁄 𑀤𑀼𑀩𑁆𑀩𑀮𑀭𑀸𑀕𑁄. 𑀅𑀚𑁆𑀛𑁄𑀲𑀸𑀦𑀁 ‘‘𑀫𑀫 𑀇𑀤’’𑀦𑁆𑀢𑀺 𑀢𑀡𑁆𑀳𑀸𑀯𑀲𑁂𑀦 𑀩𑀮𑀯𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺 𑀆𑀳 ‘‘𑀙𑀦𑁆𑀤𑀭𑀸𑀕𑀅𑀚𑁆𑀛𑁄𑀲𑀸𑀦𑀸 𑀢𑀡𑁆𑀳𑀸 𑀏𑀯𑀸’’𑀢𑀺. 𑀆𑀭𑀓𑁆𑀔𑀦𑀺𑀫𑀺𑀢𑁆𑀢𑀁 𑀤𑁆𑀯𑀸𑀭𑀧𑀺𑀤𑀳𑀦𑀫𑀜𑁆𑀚𑀽𑀲𑀸𑀕𑁄𑀧𑀦𑀸𑀤𑀺𑀦𑀸 𑀲𑀼𑀝𑁆𑀞𑀼 𑀭𑀓𑁆𑀔𑀡𑀦𑀺𑀫𑀺𑀢𑁆𑀢𑀁. 𑀧𑀸𑀧𑀸𑀦𑀺 𑀓𑀭𑁄𑀦𑁆𑀢𑁄 𑀧𑀭𑀺𑀪𑁄𑀕𑀦𑀺𑀫𑀺𑀢𑁆𑀢𑀁 𑀭𑀢𑁆𑀢𑁄 𑀕𑀺𑀤𑁆𑀥𑁄 𑀕𑀥𑀺𑀢𑁄 𑀫𑀼𑀘𑁆𑀙𑀺𑀢𑁄 𑀳𑀼𑀢𑁆𑀯𑀸 𑀫𑀺𑀕𑁄𑀯 𑀧𑀭𑀺𑀪𑀼𑀜𑁆𑀚𑀦𑀦𑀺𑀫𑀺𑀢𑁆𑀢𑀁 𑀧𑀫𑀸𑀤𑀁 𑀆𑀧𑀚𑁆𑀚𑀢𑀻𑀢𑀺 𑀏𑀯𑀁 𑀧𑀭𑀺𑀬𑁂𑀦𑀸𑀭𑀓𑁆𑀔𑀸 𑀧𑀭𑀺𑀪𑁄𑀕𑀦𑀺𑀫𑀺𑀢𑁆𑀢𑀁. 𑀧𑀫𑀸𑀤𑁄 𑀢𑀺𑀯𑀺𑀥𑁄 𑀢𑀡𑁆𑀳𑀸𑀬 𑀯𑀲𑁂𑀦 𑀓𑀣𑀺𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀺𑀯𑀺𑀥𑁄 𑀢𑀡𑁆𑀳𑀸𑀬𑀸𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀆𑀳.

𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 ‘‘𑀓𑀢𑀫𑁂𑀦 𑀉𑀧𑀸𑀤𑀸𑀦𑁂𑀦 𑀲𑀉𑀧𑀸𑀤𑀸𑀦𑀸’’𑀢𑀺 𑀯𑀺𑀪𑀸𑀕𑁂𑀦 𑀧𑀼𑀘𑁆𑀙𑀺𑀢𑁆𑀯𑀸𑀧𑀺 ‘‘𑀅𑀯𑀺𑀚𑁆𑀚𑀸𑀬 𑀘 𑀢𑀡𑁆𑀳𑀸𑀬 𑀘𑀸’’𑀢𑀺 𑀅𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀡𑁆𑀳𑀜𑁆𑀘 𑀅𑀯𑀺𑀚𑁆𑀚𑀜𑁆𑀘 𑀘𑀢𑀼𑀭𑀼𑀧𑀸𑀤𑀸𑀦𑀁 𑀯𑀲𑁂𑀦𑀸𑀢𑀺 𑀓𑀸𑀫𑀼𑀧𑀸𑀤𑀸𑀦𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀉𑀧𑀸𑀤𑀸𑀦𑀸𑀦𑀁 𑀯𑀲𑁂𑀦 𑀯𑀺𑀪𑀚𑀺𑀢𑁆𑀯𑀸 𑀔𑀦𑁆𑀥𑀸𑀦𑀁 𑀤𑀼𑀓𑁆𑀔𑀪𑀸𑀯𑁂𑀦 𑀤𑀼𑀓𑁆𑀔𑀲𑀘𑁆𑀘𑀪𑀸𑀯𑁂𑀦 𑀲𑀳 𑀧𑀭𑀺𑀜𑁆𑀜𑁂𑀬𑁆𑀬𑀪𑀸𑀯𑀁, 𑀉𑀧𑀸𑀤𑀸𑀦𑀸𑀦𑀁 𑀲𑀫𑀼𑀤𑀬𑀪𑀸𑀯𑁂𑀦 𑀲𑀫𑀼𑀤𑀬𑀲𑀘𑁆𑀘𑀪𑀸𑀯𑁂𑀦 𑀲𑀳 𑀧𑀳𑀸𑀢𑀩𑁆𑀩𑀪𑀸𑀯𑀁 𑀤𑀲𑁆𑀲𑁂𑀢𑀻𑀢𑀺 𑀬𑁄𑀚𑀦𑀸.

𑁩𑁦. ‘‘𑀬𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄 𑀢𑀺𑀯𑀺𑀥𑁄 𑀧𑀫𑀸𑀤𑁄 𑀧𑀭𑀺𑀬𑁂𑀲𑀢𑀺, 𑀆𑀭𑀓𑁆𑀔𑀡𑀜𑁆𑀘 𑀓𑀭𑁄𑀢𑀺, 𑀧𑀭𑀺𑀪𑁄𑀕𑀦𑀺𑀫𑀺𑀢𑁆𑀢𑀜𑁆𑀘𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀫𑀸𑀤𑁄 𑀳𑀺 𑀧𑀫𑀚𑁆𑀚𑀦𑁆𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀪𑁄𑀕𑀸𑀦𑀁 𑀧𑀭𑀺𑀬𑁂𑀲𑀦𑀸𑀬, 𑀆𑀭𑀓𑁆𑀔𑀡𑀸𑀬 𑀘 𑀳𑁂𑀢𑀼𑀪𑀽𑀢𑁄 𑀓𑀢𑁆𑀢𑀼𑀪𑀸𑀯𑁂𑀦 𑀉𑀧𑀘𑀭𑀺𑀢𑁄, 𑀧𑀭𑀺𑀪𑁄𑀕𑀲𑁆𑀲 𑀧𑀦 𑀦𑀺𑀫𑀺𑀢𑁆𑀢𑀁. ‘‘𑀢𑀧𑁆𑀧𑀝𑀺𑀧𑀓𑁆𑀔𑁂𑀦𑀸’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀯𑀺𑀯𑀭𑀢𑀺 ‘‘𑀅𑀧𑁆𑀧𑀫𑀸𑀤𑀸𑀦𑀼𑀬𑁄𑀕𑁂𑀦𑀸’’𑀢𑀺, 𑀢𑁂𑀦 𑀲𑀫𑀣𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀔𑁂𑀧𑀦𑀸𑀢𑀺 𑀔𑀬𑀧𑀸𑀧𑀦𑀸. 𑀯𑁄𑀤𑀸𑀦𑀧𑀓𑁆𑀔𑀯𑀺𑀲𑀪𑀸𑀕𑀥𑀫𑁆𑀫𑀯𑀲𑁂𑀦𑀸𑀢𑀺 𑀯𑁄𑀤𑀸𑀦𑀧𑀓𑁆𑀔𑁄 𑀘 𑀲𑁄 𑀧𑀫𑀸𑀤𑀲𑁆𑀲 𑀯𑀺𑀲𑀪𑀸𑀕𑀥𑀫𑁆𑀫𑁄 𑀘𑀸𑀢𑀺 𑀯𑁄𑀤𑀸𑀦…𑀧𑁂… 𑀥𑀫𑁆𑀫𑁄, 𑀲𑀫𑀣𑁄, 𑀢𑀲𑁆𑀲 𑀯𑀲𑁂𑀦.

𑀲𑀫𑀣𑁂 𑀲𑀢𑀻𑀢𑀺 𑀅𑀥𑀺𑀝𑁆𑀞𑀸𑀦𑀪𑀽𑀢𑁂 𑀛𑀸𑀦𑁂 𑀲𑀢𑀺, 𑀢𑀁 𑀧𑀸𑀤𑀓𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀸 𑀧𑀜𑁆𑀜𑀸𑀢𑀺 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀧𑀜𑁆𑀜𑀸. 𑀢𑁂𑀦𑀸𑀳 ‘‘𑀅𑀬𑀁 𑀯𑀺𑀧𑀲𑁆𑀲𑀦𑀸’’𑀢𑀺. 𑀧𑀳𑀻𑀦𑁂𑀲𑀽𑀢𑀺 𑀧𑀳𑀻𑀬𑀫𑀸𑀦𑁂𑀲𑀼.

𑀯𑁄𑀤𑀸𑀦𑀧𑀓𑁆𑀔𑀦𑁆𑀢𑀺 𑀆𑀭𑀫𑁆𑀪𑀥𑀸𑀢𑀼𑀆𑀤𑀺𑀯𑁄𑀤𑀸𑀦𑀧𑀓𑁆𑀔𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸. 𑀯𑀺𑀲𑀪𑀸𑀕𑀥𑀫𑁆𑀫𑀯𑀲𑁂𑀦𑀸𑀢𑀺 𑀧𑀫𑀸𑀤𑀯𑀲𑁂𑀦𑁂𑀯. 𑀲𑀪𑀸𑀕𑀥𑀫𑁆𑀫𑀯𑀲𑁂𑀦𑀸𑀢𑀺 𑀧𑀼𑀩𑁆𑀩𑁂 𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀆𑀭𑀫𑁆𑀪𑀥𑀸𑀢𑀼𑀆𑀤𑀺𑀯𑁄𑀤𑀸𑀦𑀥𑀫𑁆𑀫𑀲𑁆𑀲 𑀲𑀫𑀣𑀸𑀤𑀺𑀲𑀪𑀸𑀕𑀥𑀫𑁆𑀫𑀯𑀲𑁂𑀦.

𑀧𑀼𑀦 𑀅𑀧𑀭𑀺𑀬𑁄𑀤𑀸𑀧𑀦𑀺𑀬𑀁 𑀲𑀺𑀔𑀸𑀧𑁆𑀧𑀢𑁆𑀢𑀧𑀭𑀺𑀬𑁄𑀤𑀸𑀧𑀦𑀁 𑀇𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀢𑀁 𑀧𑀦 𑀅𑀭𑀳𑀢𑁆𑀢𑁂𑀦 𑀳𑁄𑀢𑀻’’𑀢𑀺.

𑀫𑁄𑀳𑀲𑀫𑀼𑀝𑁆𑀞𑀸𑀦𑀢𑀸 𑀯𑀼𑀢𑁆𑀢𑀸 ‘‘𑀫𑁄𑀳𑁄 𑀏𑀯 𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺 𑀓𑀢𑁆𑀯𑀸. 𑀅𑀜𑁆𑀜𑀣𑀸 𑀧𑀺𑀲𑀼𑀡𑀸𑀯𑀸𑀘𑀸𑀬 𑀤𑁄𑀲𑀲𑀫𑀼𑀝𑁆𑀞𑀸𑀦𑀢𑀸 𑀫𑀼𑀲𑀸𑀯𑀸𑀤𑀲𑁆𑀲 𑀯𑀺𑀬 𑀫𑁄𑀳𑀲𑀫𑀼𑀝𑁆𑀞𑀸𑀦𑀪𑀸𑀯𑀸 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸.

𑀓𑀫𑁆𑀫𑀧𑀣𑀪𑀸𑀯𑀁 𑀧𑀢𑁆𑀢𑀸𑀦𑀁, 𑀅𑀧𑁆𑀧𑀢𑁆𑀢𑀸𑀦𑀜𑁆𑀘 𑀅𑀓𑀼𑀲𑀮𑀥𑀫𑁆𑀫𑀸𑀦𑀁 ‘‘𑀲𑀩𑁆𑀩𑀧𑀸𑀧’’𑀦𑁆𑀢𑀺 𑀧𑀤𑁂𑀦 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀓𑀫𑁆𑀫𑀧𑀣𑀓𑀫𑁆𑀫𑀯𑀺𑀪𑀸𑀕𑁂𑀦𑀸’’𑀢𑀺.

𑁩𑁧. 𑀲𑁂𑀲𑀧𑀤𑀸𑀦𑀦𑁆𑀢𑀺 ‘‘𑀓𑀼𑀲𑀮𑀲𑁆𑀲 𑀉𑀧𑀲𑀫𑁆𑀧𑀤𑀸’’𑀢𑀺𑀆𑀤𑀻𑀦𑀁 (𑀤𑀻. 𑀦𑀺. 𑁨.𑁯𑁦; 𑀥. 𑀧. 𑁧𑁮𑁩; 𑀦𑁂𑀢𑁆𑀢𑀺. 𑁩𑁦, 𑁫𑁦, 𑁧𑁧𑁬, 𑁧𑁨𑁪; 𑀧𑁂𑀝𑀓𑁄. 𑁨𑁯) 𑀕𑀸𑀣𑀸𑀬 𑀅𑀯𑀲𑀺𑀝𑁆𑀞𑀧𑀤𑀸𑀦𑀁. 𑀬𑀣𑀸𑀥𑀺𑀕𑀢𑀦𑁆𑀢𑀺 𑀅𑀢𑁆𑀢𑀦𑀸 𑀅𑀥𑀺𑀕𑀢𑀧𑁆𑀧𑀓𑀸𑀭𑀁, 𑀧𑀘𑁆𑀙𑀸 𑀪𑀽𑀫𑀺𑀤𑀺𑀲𑀸.