𑀦𑀬𑀲𑀫𑀼𑀝𑁆𑀞𑀸𑀦𑀯𑀸𑀭𑀯𑀡𑁆𑀡𑀦𑀸

𑁭𑁯. ‘‘𑀯𑀺𑀲𑀬𑀪𑁂𑀤𑀢𑁄’’𑀢𑀺 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀯𑀺𑀯𑀭𑀺𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀬𑀢𑁄𑀢𑀺 𑀦𑀬𑀕𑁆𑀕𑀸𑀳𑀢𑁄. 𑀦 𑀳𑀺 𑀧𑀝𑀺𑀯𑁂𑀥𑀜𑀸𑀡𑀁 𑀯𑀺𑀬 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀧𑀘𑁆𑀘𑀓𑁆𑀔𑀢𑁄 𑀧𑀯𑀢𑁆𑀢𑀢𑀻𑀢𑀺. 𑀅𑀦𑀼𑀩𑀼𑀚𑁆𑀛𑀺𑀬𑀫𑀸𑀦𑁄𑀢𑀺 𑀅𑀪𑀺𑀲𑀫𑀬𑀜𑀸𑀡𑀲𑁆𑀲 𑀅𑀦𑀼𑀭𑀽𑀧𑀁 𑀩𑀼𑀚𑁆𑀛𑀺𑀬𑀫𑀸𑀦𑁄. 𑀬𑀣𑀸 𑀏𑀓𑀧𑀝𑀺𑀯𑁂𑀥𑁂𑀦𑁂𑀯 𑀫𑀕𑁆𑀕𑀜𑀸𑀡𑀁 𑀧𑀯𑀢𑁆𑀢𑀢𑀺, 𑀏𑀯𑀁 𑀢𑀤𑀦𑀼𑀘𑁆𑀙𑀯𑀺𑀓𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀕𑀬𑁆𑀳𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀦𑀦𑁆𑀤𑀺𑀬𑀸𑀯𑀝𑁆𑀝𑀸𑀤𑀻𑀦𑀁 𑀢𑀺𑀡𑁆𑀡𑀁 𑀅𑀢𑁆𑀣𑀦𑀬𑀪𑀸𑀯𑁄 𑀲𑀫𑀢𑁆𑀣𑀺𑀢𑁄 𑀳𑁄𑀢𑀻𑀢𑀺. 𑀢𑀣𑀸 𑀳𑀺 𑀅𑀢𑁆𑀣𑀯𑀺𑀲𑁂𑀲𑀲𑀭𑀽𑀧𑀢𑀸𑀬 𑀢𑀬𑁄 𑀦𑀬𑀸 ‘‘𑀲𑀼𑀢𑁆𑀢𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀸, 𑀧𑀤𑀢𑁆𑀣𑀯𑀺𑀘𑀸𑀭𑀪𑀸𑀯𑁂𑀧𑀺 𑀧𑀦 𑀳𑀸𑀭𑀸 ‘‘𑀩𑁆𑀬𑀜𑁆𑀚𑀦𑀯𑀺𑀘𑀬𑁄’’𑀢𑀺. 𑀬𑀤𑀺 𑀏𑀯𑀁 𑀓𑀣𑀁 𑀢𑀬𑁄𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀝𑀺𑀯𑀺𑀚𑁆𑀛𑀦𑁆𑀢𑀸𑀦𑀁 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀏𑀓𑀫𑁂𑀓𑁄 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀸𑀦𑀁 𑀯𑀺𑀪𑀸𑀕𑀢𑁄 𑀤𑁆𑀯𑀺𑀲𑀗𑁆𑀕𑀳𑁄𑀢𑀺 𑀬𑁄𑀚𑀦𑀸. 𑀘𑀢𑀼𑀙𑀅𑀝𑁆𑀞𑀤𑀺𑀲𑁄 𑀘𑀸𑀢𑀺 𑀦 𑀧𑀘𑁆𑀘𑁂𑀓𑀁 𑀢𑁂 𑀦𑀦𑁆𑀤𑀺𑀬𑀸𑀯𑀝𑁆𑀝𑀸𑀤𑀬𑁄 𑀘𑀢𑀼𑀙𑀅𑀝𑁆𑀞𑀤𑀺𑀲𑀸, 𑀅𑀣 𑀔𑁄 𑀬𑀣𑀸𑀓𑁆𑀓𑀫𑀦𑁆𑀢𑀺. ‘‘𑀏𑀯’’𑀦𑁆𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀦𑀺𑀕𑀫𑀦𑀁.

𑀢𑀣𑀸 𑀘𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀉𑀧𑀘𑀬𑁂𑀦 𑀲𑀫𑀢𑁆𑀣𑀦𑀸. 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀏𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀢𑁄 𑀧𑀝𑁆𑀞𑀸𑀦𑀓𑀣𑀸𑀬𑀁 𑀆𑀯𑀺 𑀪𑀯𑀺𑀲𑁆𑀲𑀢𑀺. ‘‘𑀅𑀦𑁆𑀥𑀁 𑀢𑀫𑀁 𑀢𑀤𑀸 𑀳𑁄𑀢𑀺, 𑀬𑀁 𑀮𑁄𑀪𑁄 𑀲𑀳𑀢𑁂 𑀦𑀭’’𑀦𑁆𑀢𑀺𑀆𑀤𑀺 (𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁨𑁮) 𑀯𑀘𑀦𑀢𑁄 𑀓𑀸𑀫𑀢𑀡𑁆𑀳𑀸𑀧𑀺 𑀧𑀝𑀺𑀘𑁆𑀙𑀸𑀤𑀦𑀲𑀪𑀸𑀯𑀸, 𑀬𑀢𑁄 𑀓𑀸𑀫𑀘𑁆𑀙𑀦𑁆𑀤𑀁 ‘‘𑀦𑀻𑀯𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀯𑀺𑀚𑁆𑀚𑀸𑀬 𑀧𑀦 𑀪𑀯𑁂𑀲𑀼 𑀆𑀤𑀻𑀦𑀯𑀧𑁆𑀧𑀝𑀺𑀘𑁆𑀙𑀸𑀤𑀦𑀁 𑀲𑀸𑀢𑀺𑀲𑀬𑀦𑁆𑀢𑀺. 𑀢𑀣𑀸 𑀅𑀯𑀺𑀚𑁆𑀚𑀸𑀧𑀺 𑀲𑀁𑀬𑁄𑀚𑀦𑀲𑀪𑀸𑀯𑀸, 𑀬𑀢𑁄 𑀲𑀸 𑀩𑀳𑀺𑀤𑁆𑀥𑀸 𑀲𑀁𑀬𑁄𑀚𑀦𑀪𑀸𑀯𑁂𑀦 𑀯𑀼𑀢𑁆𑀢𑀸. 𑀏𑀯𑀁 𑀲𑀦𑁆𑀢𑁂𑀧𑀺 𑀢𑀡𑁆𑀳𑀸𑀬 𑀩𑀦𑁆𑀥𑀦𑀝𑁆𑀞𑁄 𑀲𑀸𑀢𑀺𑀲𑀬𑁄 𑀅𑀧𑁂𑀓𑁆𑀔𑀺𑀢𑀪𑀸𑀯𑀢𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀣𑀸𑀧𑀺…𑀧𑁂… 𑀯𑀼𑀢𑁆𑀢’’𑀦𑁆𑀢𑀺 𑀆𑀳.

‘‘𑀲𑀁𑀬𑀼𑀢𑁆𑀢𑀸’’𑀢𑀺 𑀧𑀤𑀲𑁆𑀲 𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀫𑀺𑀲𑁆𑀲𑀺𑀢𑀸’’𑀢𑀺. ‘‘𑀅𑀯𑀺𑀚𑁆𑀚𑀸𑀪𑀺𑀪𑀽𑀢𑀸…𑀧𑁂… 𑀅𑀪𑀺𑀦𑀺𑀯𑀺𑀲𑀦𑁆𑀢𑀸’’𑀢𑀺 𑀏𑀢𑁂𑀦 𑀅𑀯𑀺𑀚𑁆𑀚𑀸𑀬 𑀅𑀬𑀸𑀣𑀸𑀯𑀕𑀳𑀡𑀳𑁂𑀢𑀼𑀢𑀁 𑀤𑀲𑁆𑀲𑁂𑀢𑀺, 𑀢𑀢𑁄 𑀲𑁄 𑀅𑀯𑀺𑀦𑁆𑀤𑀺𑀬𑀁 𑀯𑀺𑀦𑁆𑀤𑀢𑀻𑀢𑀺 𑀅𑀯𑀺𑀚𑁆𑀚𑀸𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀮𑀺𑀲𑁆𑀲𑀦𑀁 𑀉𑀧𑀢𑀸𑀧𑀦𑀦𑁆𑀢𑀺 𑀆𑀳 ‘‘𑀓𑀺𑀮𑀺𑀲𑁆𑀲𑀦𑀧𑁆𑀧𑀬𑁄𑀕𑀁 𑀅𑀢𑁆𑀢𑀧𑀭𑀺𑀢𑀸𑀧𑀦𑀧𑀝𑀺𑀧𑀢𑁆𑀢𑀺’’𑀦𑁆𑀢𑀺. 𑀅𑀮𑁆𑀮𑀻𑀬𑀦𑀁 𑀲𑁂𑀯𑀦𑀁.

𑀤𑀼𑀓𑁆𑀔𑀦𑁆𑀢𑀺 …𑀧𑁂… 𑀚𑀸𑀦𑀦𑁆𑀢𑀻𑀢𑀺 𑀅𑀢𑁆𑀢𑀦𑀸 𑀅𑀦𑀼𑀪𑀽𑀬𑀫𑀸𑀦𑀁 𑀢𑀣𑀸 𑀢𑀣𑀸 𑀉𑀧𑀝𑁆𑀞𑀺𑀢𑀁 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀼𑀓𑁆𑀔𑀁, 𑀇𑀢𑀭𑀫𑁆𑀧𑀺 𑀯𑀸 𑀏𑀓𑀤𑁂𑀲𑀁 𑀚𑀸𑀦𑀦𑁆𑀢𑀺. 𑀢𑀡𑁆𑀳𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀲𑀪𑀸𑀕𑀯𑀺𑀲𑀪𑀸𑀕𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀸𑀓𑀸𑀭𑀢𑁄 𑀢𑀢𑁆𑀣 𑀢𑁂𑀲𑀁 𑀜𑀸𑀡𑀁 𑀦𑀢𑁆𑀣𑁂𑀯𑀸𑀢𑀺𑀤𑀲𑁆𑀲𑁂𑀦𑁆𑀢𑁄 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺𑀫𑀸𑀳. 𑀧𑀯𑀢𑁆𑀢𑀺𑀧𑀯𑀢𑁆𑀢𑀺𑀳𑁂𑀢𑀼𑀫𑀢𑁆𑀢𑀫𑁆𑀧𑀻𑀢𑀺 ‘‘𑀧𑀯𑀢𑁆𑀢𑀺 𑀧𑀯𑀢𑁆𑀢𑀺𑀳𑁂𑀢𑀽’’𑀢𑀺 𑀏𑀢𑁆𑀢𑀓𑀫𑁆𑀧𑀺. 𑀓𑀸 𑀧𑀦 𑀓𑀣𑀸𑀢𑀺 𑀧𑀘𑀼𑀭𑀚𑀦𑀲𑀸𑀥𑀸𑀭𑀡𑁂 𑀮𑁄𑀓𑀺𑀬𑁂𑀧𑀺 𑀦𑀸𑀫 𑀅𑀢𑁆𑀣𑁂 𑀬𑁂𑀲𑀁 𑀜𑀸𑀡𑀲𑁆𑀲 𑀧𑀝𑀺𑀖𑀸𑀢𑁄, 𑀧𑀭𑀫𑀕𑀫𑁆𑀪𑀻𑀭𑁂 𑀅𑀭𑀺𑀬𑀸𑀦𑀁 𑀏𑀯 𑀯𑀺𑀲𑀬𑀪𑀽𑀢𑁂 𑀮𑁄𑀓𑀼𑀢𑁆𑀢𑀭𑁂 𑀦𑀺𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀳𑁂𑀢𑀼𑀲𑀗𑁆𑀔𑀸𑀢𑁂 𑀅𑀢𑁆𑀣𑁂 𑀓𑀸 𑀦𑀸𑀫 𑀓𑀣𑀸, 𑀙𑀺𑀦𑁆𑀦𑀸 𑀓𑀣𑀸𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀧𑀪𑁂𑀤𑀲𑁆𑀲 𑀓𑁂𑀯𑀮𑀲𑁆𑀲 𑀲𑀫𑀣𑀲𑁆𑀲 𑀢𑀸𑀤𑀺𑀲𑁂 𑀓𑀸𑀮𑁂 𑀩𑀸𑀳𑀺𑀭𑀓𑀸𑀦𑀜𑁆𑀘 𑀇𑀚𑁆𑀛𑀦𑀢𑁄 ‘‘𑀯𑀺𑀧𑀲𑁆𑀲𑀦𑀸𑀥𑀺𑀝𑁆𑀞𑀸𑀦’’𑀦𑁆𑀢𑀺 𑀯𑀺𑀲𑁂𑀲𑀺𑀢𑀁. 𑀯𑀽𑀧𑀲𑀫𑁄 𑀲𑀫𑀼𑀘𑁆𑀙𑁂𑀤𑁄, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺 𑀘.

‘‘𑀲𑀁𑀲𑀸𑀭𑀲𑁆𑀲 𑀅𑀦𑀼𑀧𑀘𑁆𑀙𑁂𑀤𑀦𑀢𑁄’’𑀢𑀺 𑀇𑀤𑀁 𑀤𑀺𑀝𑁆𑀞𑀺𑀕𑀢𑀸𑀦𑀁 𑀤𑀺𑀝𑁆𑀞𑀺𑀕𑀢𑀺𑀓𑀫𑀢𑀤𑀲𑁆𑀲𑀦𑀁. 𑀲𑁄 𑀳𑀺 𑀧𑀼𑀢𑁆𑀢𑀫𑀼𑀔𑀤𑀲𑁆𑀲𑀦𑁂 𑀅𑀲𑀢𑀺 𑀲𑀁𑀲𑀸𑀭𑁄 𑀉𑀘𑁆𑀙𑀺𑀚𑁆𑀚𑁂𑀬𑁆𑀬𑀸𑀢𑀺 𑀪𑀸𑀬𑀢𑀺. 𑀬𑀢𑁄 𑀯𑀼𑀢𑁆𑀢𑀁 𑁋

‘‘𑀕𑀡𑁆𑀟𑀼𑀧𑁆𑀧𑀸𑀤𑁄 𑀓𑀺𑀓𑀻 𑀘𑁂𑀯, 𑀓𑀼𑀦𑁆𑀢𑀻 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀺𑀓𑁄;

𑀏𑀢𑁂 𑀅𑀪𑀬𑀁 𑀪𑀸𑀬𑀦𑁆𑀢𑀺, 𑀲𑀫𑁆𑀫𑀽𑀴𑁆𑀳𑀸 𑀘𑀢𑀼𑀭𑁄 𑀚𑀦𑀸’’𑀢𑀺. (𑀲𑀼. 𑀦𑀺. 𑀅𑀝𑁆𑀞. 𑁨.𑁨𑁯𑁩; 𑀅. 𑀦𑀺. 𑀝𑀻. 𑁩.𑁫.𑁧𑁯𑁨);

𑀢𑀤𑀪𑀺𑀜𑁆𑀜𑀸𑀢𑀺 𑀢𑀁 𑀬𑀣𑀸𑀯𑀼𑀢𑁆𑀢𑀅𑀦𑁆𑀢𑀤𑁆𑀯𑀬𑀁 𑀅𑀪𑀺𑀚𑀸𑀦𑀦𑁆𑀢𑀺 𑀕𑀼𑀡𑀁 𑀆𑀭𑁄𑀧𑁂𑀢𑁆𑀯𑀸 𑀚𑀸𑀦𑀦𑁆𑀢𑀻𑀢𑀺 𑀢𑀤𑀪𑀺𑀜𑁆𑀜𑀸. 𑀅𑀢𑁆𑀣𑀪𑀜𑁆𑀚𑀦𑀢𑁄, 𑀭𑁄𑀕𑀕𑀡𑁆𑀟𑀲𑀮𑁆𑀮𑀲𑀤𑀺𑀲𑀢𑀸𑀬 𑀅𑀢𑁆𑀢𑀪𑀸𑀯𑀲𑀁𑀓𑀺𑀮𑁂𑀲𑀸𑀦𑀜𑁆𑀘 𑀭𑁄𑀕𑀕𑀡𑁆𑀟𑀲𑀮𑁆𑀮𑀢𑀸.

𑀲𑀓𑁆𑀓𑀸𑀬𑀤𑀲𑁆𑀲𑀦𑁂𑀢𑀺 𑀏𑀢𑁆𑀣 𑀤𑀺𑀝𑁆𑀞𑀺𑀤𑀲𑁆𑀲𑀦𑀁, 𑀲𑀓𑁆𑀓𑀸𑀬𑁄𑀯 𑀤𑀲𑁆𑀲𑀦𑀁 𑀲𑀓𑁆𑀓𑀸𑀬𑀤𑀲𑁆𑀲𑀦𑀦𑁆𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀲𑀦𑁆𑀢𑀺 𑀤𑀺𑀝𑁆𑀞𑀺𑀘𑀭𑀺𑀢𑀸𑀦𑀁. 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑁄 𑀩𑀮𑀯𑀸. 𑀢𑀲𑁆𑀫𑀸 𑀬𑀣𑀸𑀉𑀧𑀝𑁆𑀞𑀺𑀢𑀁 𑀭𑀽𑀧𑀁 ‘‘𑀅𑀢𑁆𑀢𑀸’’𑀇𑀘𑁆𑀘𑁂𑀯 𑀕𑀡𑁆𑀳𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀣𑀸 𑀯𑁂𑀤𑀦𑀸𑀤𑀺𑀁. 𑀢𑀡𑁆𑀳𑀸𑀘𑀭𑀺𑀢𑁄 𑀧𑀦 𑀬𑀣𑀸𑀉𑀧𑀝𑁆𑀞𑀺𑀢𑀁 𑀭𑀽𑀧𑀁 𑀢𑀡𑁆𑀳𑀸𑀯𑀢𑁆𑀣𑀼𑀁 𑀓𑀢𑁆𑀯𑀸 𑀅𑀢𑁆𑀢𑀦𑀺𑀬𑀸𑀪𑀺𑀦𑀺𑀯𑁂𑀲𑁂𑀦 𑀅𑀪𑀺𑀦𑀺𑀯𑀺𑀲𑀦𑁆𑀢𑀸 𑀢𑀤𑀜𑁆𑀜𑀫𑁂𑀯 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀦𑁆𑀢𑀺. 𑀏𑀯𑀁 𑀯𑁂𑀤𑀦𑀸𑀤𑀻𑀲𑀼. 𑀢𑁂𑀦𑀸𑀳 ‘‘𑀢𑀡𑁆𑀳𑀸𑀘𑀭𑀺𑀢𑀸’’𑀢𑀺𑀆𑀤𑀺. 𑀯𑀺𑀚𑁆𑀚𑀫𑀸𑀦𑁂𑀢𑀺 𑀧𑀭𑀫𑀢𑁆𑀣𑀢𑁄 𑀉𑀧𑀮𑀩𑁆𑀪𑀫𑀸𑀦𑁂. 𑀓𑀸𑀬𑁂𑀢𑀺 𑀲𑀫𑀽𑀳𑁂. 𑀤𑀺𑀝𑁆𑀞𑀺𑀬𑀸 𑀧𑀭𑀺𑀓𑀧𑁆𑀧𑀺𑀢𑁄 𑀅𑀢𑁆𑀢𑀸𑀤𑀺 𑀏𑀯 𑀧𑀭𑀫𑀢𑁆𑀣𑀢𑁄 𑀦𑀼𑀧𑀮𑀩𑁆𑀪𑀢𑀺, 𑀤𑀺𑀝𑁆𑀞𑀺 𑀧𑀦 𑀮𑀩𑁆𑀪𑀢𑁂𑀯𑀸𑀢𑀺 𑀆𑀳 ‘‘𑀲𑀢𑀻 𑀯𑀸 𑀯𑀺𑀚𑁆𑀚𑀫𑀸𑀦𑀸’’𑀢𑀺.

𑀲𑀓𑁆𑀓𑀸𑀬𑀤𑀲𑁆𑀲𑀦𑀫𑀼𑀔𑁂𑀦𑀸𑀢𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀫𑀼𑀔𑁂𑀦.

𑀉𑀘𑁆𑀙𑁂𑀤𑀲𑀲𑁆𑀲𑀢𑀦𑁆𑀢𑀺 𑀢𑀁𑀲𑀳𑀘𑀭𑀡𑀢𑁄 𑀉𑀘𑁆𑀙𑁂𑀤𑀲𑀲𑁆𑀲𑀢𑀤𑀺𑀝𑁆𑀞𑀺 𑀯𑀼𑀢𑁆𑀢𑀸. ‘‘𑀉𑀘𑁆𑀙𑁂𑀤𑀲𑀲𑁆𑀲𑀢𑀯𑀸𑀤𑀸’’𑀢𑀺𑀧𑀺 𑀧𑀸𑀞𑁄.

𑀓𑀲𑀺𑀡𑀸𑀬𑀢𑀦𑀸𑀦𑀻𑀢𑀺 𑀓𑀲𑀺𑀡𑀚𑁆𑀛𑀸𑀦𑀸𑀦𑀺.

𑀢𑁂𑀚𑁂𑀢𑁆𑀯𑀸𑀢𑀺 𑀦𑀺𑀲𑀸𑀦𑁂𑀢𑁆𑀯𑀸.

𑁮𑁧. 𑀏𑀢𑁆𑀢𑀸𑀯𑀢𑀸 𑀦𑀦𑁆𑀤𑀺𑀬𑀸𑀯𑀝𑁆𑀝𑀲𑁆𑀲 𑀪𑀽𑀫𑀺𑀭𑀘𑀦𑀯𑀲𑁂𑀦 𑀲𑀁𑀓𑀺𑀮𑁂𑀲𑀧𑀓𑁆𑀔𑁄 𑀤𑀲𑁆𑀲𑀺𑀢𑁄𑀢𑀺 𑀆𑀳 ‘‘𑀢𑀢𑁆𑀣 𑀤𑀺𑀝𑁆𑀞𑀺𑀘𑀭𑀺𑀢𑁄𑀢𑀺𑀆𑀤𑀺𑀦𑀸 𑀯𑁄𑀤𑀸𑀦𑀧𑀓𑁆𑀔𑀁 𑀤𑀲𑁆𑀲𑁂𑀢𑀻’’𑀢𑀺. ‘‘𑀬𑀲𑁆𑀫𑀸 𑀲𑀮𑁆𑀮𑁂𑀔𑁂 𑀢𑀺𑀩𑁆𑀩𑀕𑀸𑀭𑀯𑁄’’𑀢𑀺 𑀇𑀫𑀺𑀦𑀸 𑀢𑀢𑁆𑀣 𑀢𑀺𑀩𑁆𑀩𑀕𑀸𑀭𑀯𑀢𑁆𑀢𑀸 𑀲𑀁𑀮𑁂𑀔𑀸𑀦𑀼𑀲𑀦𑁆𑀢𑀢𑀯𑀼𑀢𑁆𑀢𑀺𑀦𑀸 𑀪𑀯𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀫𑀺𑀘𑁆𑀙𑀸𑀥𑀺𑀫𑁄𑀓𑁆𑀔𑁄 𑀲𑀤𑁆𑀥𑀸𑀧𑀢𑀺𑀭𑀽𑀧𑀓𑁄 𑀅𑀯𑀢𑁆𑀣𑀼𑀲𑁆𑀫𑀺𑀁 𑀧𑀲𑀸𑀤𑁄.

𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀥𑀫𑁆𑀫𑀫𑁂𑀯 𑀯𑀺𑀪𑀚𑀢𑀻𑀢𑀺 𑀆𑀳 ‘‘𑀲𑀢𑁆𑀢𑀸𑀧𑀺…𑀧𑁂… 𑀤𑀲𑁆𑀲𑁂𑀢𑀻’’𑀢𑀺.

𑀬𑁂 𑀳𑀺 𑀓𑁂𑀘𑀻𑀢𑀺 𑀏𑀢𑁆𑀣 𑀳𑀺-𑀲𑀤𑁆𑀤𑁄 𑀦𑀺𑀧𑀸𑀢𑀫𑀢𑁆𑀢𑀁. ‘‘𑀇𑀫𑀸𑀳𑀺 𑀏𑀯 𑀘𑀢𑀽𑀳𑀺 𑀧𑀝𑀺𑀧𑀤𑀸𑀳𑀻’’𑀢𑀺𑀧𑀺 𑀧𑀸𑀴𑀺. 𑀤𑀼𑀓𑁆𑀔𑀸𑀧𑀝𑀺𑀧𑀤𑀸𑀤𑀺𑀯𑀺𑀪𑀸𑀕𑁂𑀦 𑀫𑀕𑁆𑀕𑁄 𑀏𑀯 𑀇𑀥 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀧𑀝𑀺𑀧𑀤𑀸 𑀳𑀺 𑀫𑀕𑁆𑀕𑁄’’𑀢𑀺 𑀘𑀢𑀼𑀤𑁆𑀤𑀺𑀲𑀸𑀲𑀗𑁆𑀔𑀸𑀢𑀁 𑀫𑀕𑁆𑀕𑀦𑁆𑀢𑀺 𑀘𑀢𑀼𑀤𑁆𑀤𑀺𑀲𑀸𑀲𑀗𑁆𑀔𑀸𑀢𑀁 𑀧𑀯𑀢𑁆𑀢𑀦𑀼𑀧𑀸𑀬𑀁. 𑀤𑁆𑀯𑁂 𑀤𑀺𑀲𑀸 𑀏𑀢𑀺𑀲𑁆𑀲𑀸𑀢𑀺 𑀤𑁆𑀯𑀺𑀤𑀺𑀲𑀸. 𑀦𑀦𑁆𑀤𑀺𑀬𑀸𑀯𑀝𑁆𑀝𑀲𑁆𑀲𑀸𑀢𑀺 𑀦𑀦𑁆𑀤𑀺𑀬𑀸𑀯𑀝𑁆𑀝𑀦𑀬𑀲𑁆𑀲.

𑁮𑁨. 𑀯𑀺𑀯𑀢𑁆𑀢𑀢𑀺 𑀯𑀝𑁆𑀝𑀁 𑀏𑀢𑁆𑀣𑀸𑀢𑀺 𑀯𑀺𑀯𑀢𑁆𑀢𑀁, 𑀯𑀺𑀯𑀢𑁆𑀢𑀁 𑀏𑀯 𑀯𑀺𑀯𑀝𑁆𑀝𑀁, 𑀅𑀲𑀗𑁆𑀔𑀢𑀥𑀸𑀢𑀼, 𑀦𑀺𑀩𑁆𑀩𑀼𑀢𑀺 𑀏𑀯 𑀯𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀺𑀩𑁆𑀩𑀸𑀦’’𑀦𑁆𑀢𑀺.

‘‘𑀓𑀢𑁆𑀣 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀯𑀸 𑀧𑀸𑀴𑀺. 𑀉𑀧𑀘𑀬𑁂𑀢𑀺 𑀉𑀧𑀘𑀬𑀸𑀯𑀢𑁆𑀣𑀸𑀬𑀦𑁆𑀢𑀺 𑀅𑀢𑁆𑀣𑁄. 𑀤𑀲𑀦𑁆𑀦𑀦𑁆𑀢𑀺 𑀮𑁄𑀪𑀸𑀤𑀺𑀓𑀺𑀮𑁂𑀲𑀯𑀢𑁆𑀣𑀽𑀦𑀁. 𑀯𑀺𑀧𑀮𑁆𑀮𑀸𑀲𑀳𑁂𑀢𑀼𑀪𑀸𑀯𑀢𑁄𑀢𑀺 𑀲𑀼𑀪𑀲𑀜𑁆𑀜𑀸𑀤𑀺𑀯𑀺𑀧𑀮𑁆𑀮𑀸𑀲𑀳𑁂𑀢𑀼𑀓𑀪𑀸𑀯𑀢𑁄. 𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑀯𑀲𑁂𑀦 𑀳𑀺 𑀆𑀤𑀻𑀦𑀯𑁂𑀲𑀼 𑀏𑀯 𑀲𑀁𑀬𑁄𑀚𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀢𑀸. 𑀦 𑀳𑀺 𑀬𑀣𑀸𑀪𑀽𑀢𑀜𑀸𑀡𑁂 𑀲𑀢𑀺 𑀢𑀣𑀸 𑀲𑀫𑁆𑀪𑀯𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑀲𑀦𑁆𑀦𑀁…𑀧𑁂… 𑀪𑀸𑀯𑀢𑁄’’𑀢𑀺. 𑀤𑀲𑀯𑀺𑀥𑀓𑀸𑀭𑀡𑁂𑀢𑀺 𑀤𑀲𑀯𑀺𑀥𑁂 𑀓𑀸𑀭𑀡𑁂, 𑀤𑀲𑀯𑀺𑀥𑀲𑁆𑀲 𑀯𑀸 𑀓𑀸𑀭𑀡𑁂. 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀭𑀺𑀓𑁆𑀔𑀢𑀸 𑀥𑀫𑁆𑀫𑀸 𑀲𑀼𑀪𑀸𑀭𑀫𑁆𑀫𑀡𑀸𑀤𑀬𑁄.

𑀢𑀩𑁆𑀩𑀺𑀲𑀬𑀸 𑀓𑀺𑀮𑁂𑀲𑀸𑀢𑀺 𑀆𑀳𑀸𑀭𑀧𑀭𑀺𑀜𑁆𑀜𑀸𑀧𑀭𑀺𑀩𑀦𑁆𑀥𑀪𑀽𑀢𑀸 𑀓𑀺𑀮𑁂𑀲𑀸. 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑀸𑀬𑁂 𑀧𑀯𑀢𑁆𑀢𑀫𑀸𑀦𑁄 𑀧𑀞𑀫𑁄 𑀯𑀺𑀧𑀮𑁆𑀮𑀸𑀲𑁄 𑀓𑀸𑀬𑀲𑀫𑀼𑀤𑀸𑀬𑁂, 𑀓𑀸𑀬𑁂𑀓𑀤𑁂𑀲𑁂 𑀘 𑀓𑀩𑀴𑀻𑀓𑀸𑀭𑁂 𑀆𑀳𑀸𑀭𑁂 𑀧𑀯𑀢𑁆𑀢𑁄 𑀏𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀞𑀫𑁂 𑀆𑀳𑀸𑀭𑁂 𑀯𑀺𑀲𑀬𑀪𑀽𑀢𑁂 𑀧𑀞𑀫𑁄 𑀯𑀺𑀧𑀮𑁆𑀮𑀸𑀲𑁄 𑀧𑀯𑀢𑁆𑀢𑀢𑀻’’𑀢𑀺. 𑀢𑀣𑀸 𑀯𑁂𑀤𑀦𑀸𑀬𑀁 𑀧𑀯𑀢𑁆𑀢𑀫𑀸𑀦𑁄 𑀤𑀼𑀢𑀺𑀬𑀯𑀺𑀧𑀮𑁆𑀮𑀸𑀲𑁄 𑀢𑀧𑁆𑀧𑀘𑁆𑀘𑀬𑁂 𑀨𑀲𑁆𑀲𑀸𑀳𑀸𑀭𑁂, 𑀘𑀺𑀢𑁆𑀢𑁂 𑀧𑀯𑀢𑁆𑀢𑀫𑀸𑀦𑁄 𑀢𑀢𑀺𑀬𑀯𑀺𑀧𑀮𑁆𑀮𑀸𑀲𑁄 𑀢𑀧𑁆𑀧𑀘𑁆𑀘𑀬𑁂 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁂, 𑀥𑀫𑁆𑀫𑁂𑀲𑀼 𑀧𑀯𑀢𑁆𑀢𑀫𑀸𑀦𑁄 𑀘𑀢𑀼𑀢𑁆𑀣𑀯𑀺𑀧𑀮𑁆𑀮𑀸𑀲𑁄 𑀢𑀧𑁆𑀧𑀘𑁆𑀘𑀬𑁂 𑀯𑀺𑀜𑁆𑀜𑀸𑀡𑀸𑀳𑀸𑀭𑁂 𑀧𑀯𑀢𑁆𑀢𑁄 𑀏𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀘𑀢𑀼𑀢𑁆𑀣𑁂 𑀆𑀳𑀸𑀭𑁂 𑀘𑀢𑀼𑀢𑁆𑀣𑁄 𑀯𑀺𑀧𑀮𑁆𑀮𑀸𑀲𑁄’’𑀢𑀺. 𑀢𑁂𑀦𑀸𑀳 ‘‘𑀲𑁂𑀲𑀸𑀳𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄’’𑀢𑀺. 𑀆𑀳𑀸𑀭𑀲𑀻𑀲𑁂𑀦 𑀯𑀸 𑀆𑀳𑀸𑀭𑀧𑀝𑀺𑀩𑀤𑁆𑀥𑁄 𑀙𑀦𑁆𑀤𑀭𑀸𑀕𑁄 𑀕𑀳𑀺𑀢𑁄. 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀦𑁂𑀯𑀸𑀳 ‘‘𑀆𑀳𑀸𑀭𑀲𑀻𑀲𑁂𑀦 𑀢𑀩𑁆𑀩𑀺𑀲𑀬𑀸 𑀓𑀺𑀮𑁂𑀲𑀸 𑀅𑀥𑀺𑀧𑁆𑀧𑁂𑀢𑀸’’𑀢𑀺. 𑀧𑀞𑀫𑁂 𑀆𑀳𑀸𑀭𑁂 𑀯𑀺𑀲𑀬𑀪𑀽𑀢𑁂𑀢𑀺 𑀘 𑀧𑀞𑀫𑁂 𑀆𑀳𑀸𑀭𑁂 𑀙𑀦𑁆𑀤𑀭𑀸𑀕𑀲𑁆𑀲 𑀯𑀺𑀲𑀬𑀪𑀸𑀯𑀁 𑀧𑀢𑁆𑀢𑁂, 𑀢𑀩𑁆𑀪𑀸𑀯𑀁 𑀅𑀦𑀢𑀺𑀓𑁆𑀓𑀦𑁆𑀢𑁂𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀳𑀻𑀦𑀘𑁆𑀙𑀦𑁆𑀤𑀭𑀸𑀕𑀲𑁆𑀲 𑀳𑀺 𑀢𑀢𑁆𑀣 𑀯𑀺𑀧𑀮𑁆𑀮𑀸𑀲𑀸 𑀲𑀫𑁆𑀪𑀯𑀦𑁆𑀢𑀺, 𑀦 𑀇𑀢𑀭𑀲𑁆𑀲. 𑀢𑀣𑀸 𑀤𑀼𑀢𑀺𑀬𑀯𑀺𑀧𑀮𑁆𑀮𑀸𑀲𑀸𑀤𑀻𑀲𑀼 𑀅𑀧𑁆𑀧𑀳𑀻𑀦𑁂𑀲𑀼. 𑀇𑀢𑀭𑁂 𑀉𑀧𑀸𑀤𑀸𑀦𑀸𑀦𑀺 𑀧𑀯𑀢𑁆𑀢𑀦𑁆𑀢𑁂𑀯 𑀅𑀧𑁆𑀧𑀳𑀻𑀦𑀢𑁆𑀢𑀸𑀢𑀺 𑀆𑀳 ‘‘𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄’’𑀢𑀺. 𑀬𑀲𑁆𑀫𑀸 𑀘 𑀉𑀧𑀸𑀤𑀸𑀦𑀸𑀤𑀻𑀲𑀼 𑀅𑀧𑁆𑀧𑀳𑀻𑀦𑁂𑀲𑀼𑀧𑀺 𑀬𑁄𑀕𑀸𑀤𑀬𑁄 𑀧𑀯𑀢𑁆𑀢𑀦𑁆𑀢𑁂𑀯 𑀬𑀣𑀸𑀭𑀳𑀁 𑀢𑀁𑀲𑀪𑀸𑀯𑀢𑁆𑀢𑀸, 𑀢𑀤𑁂𑀓𑀝𑁆𑀞𑀲𑀪𑀸𑀯𑀢𑁄 𑀘, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑀧𑀸𑀴𑀺𑀬𑀁 ‘‘𑀧𑀞𑀫𑁂 𑀉𑀧𑀸𑀤𑀸𑀦𑁂 𑀧𑀞𑀫𑁄 𑀬𑁄𑀕𑁄’’𑀢𑀺𑀆𑀤𑀺. 𑀢𑁂𑀦𑀸𑀳 ‘‘𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄’’𑀢𑀺.

𑁮𑁩. 𑀅𑀧𑀭𑀺𑀚𑀸𑀦𑀦𑁆𑀢𑀲𑁆𑀲𑀸𑀢𑀺 𑀜𑀸𑀢𑀧𑀭𑀺𑀜𑁆𑀜𑀸𑀬, 𑀢𑀻𑀭𑀡𑀧𑀭𑀺𑀜𑁆𑀜𑀸𑀬, 𑀧𑀳𑀸𑀦𑀧𑀭𑀺𑀜𑁆𑀜𑀸𑀬𑀸𑀢𑀺 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀚𑀸𑀦𑀦𑁆𑀢𑀲𑁆𑀲, 𑀢𑁂𑀲𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀅𑀦𑀯𑀩𑀼𑀚𑁆𑀛𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑀺𑀩𑁆𑀩𑁄 𑀩𑀳𑀮𑁄 𑀙𑀦𑁆𑀤𑀭𑀸𑀕𑁄 𑀳𑁄𑀢𑀺 𑀢𑀡𑁆𑀳𑀸𑀘𑀭𑀺𑀢𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀢𑀺 𑀉𑀧𑀓𑁆𑀓𑀺𑀮𑁂𑀲𑀲𑁆𑀲 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑀲𑁆𑀲 𑀳𑁂𑀢𑀼𑀪𑀸𑀯𑀢𑁄𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬𑀸𑀳 ‘‘𑀯𑀼𑀢𑁆𑀢𑀦𑀬𑁂𑀦𑁂𑀯𑀸’’𑀢𑀺. 𑀲𑀼𑀪𑀲𑀼𑀔𑀲𑀜𑁆𑀜𑀸𑀓𑀸𑀫𑀼𑀧𑀸𑀤𑀸𑀦𑀓𑀸𑀫𑀪𑀯𑀬𑁄𑀕𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑀓𑀸𑀫𑀪𑀯𑀸𑀲𑀯- 𑀓𑀸𑀫𑀪𑀯𑁄𑀖𑀭𑀸𑀕𑀲𑀮𑁆𑀮𑀙𑀦𑁆𑀤𑀸𑀕𑀢𑀺𑀕𑀫𑀦𑀸𑀦𑀺 𑀢𑀡𑁆𑀳𑀸𑀧𑀓𑁆𑀔𑀺𑀓𑀢𑀸𑀬, 𑀢𑀡𑁆𑀳𑀸𑀲𑀪𑀸𑀯𑀢𑀸𑀬 𑀘 𑀢𑀡𑁆𑀳𑀸𑀧𑀥𑀸𑀦𑀸𑀦𑀺. 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑀤𑁄𑀲𑀲𑀮𑁆𑀮𑀤𑁄𑀲𑀸𑀕𑀢𑀺𑀕𑀫𑀦𑀸𑀦𑀺 𑀧𑀦 𑀢𑀡𑁆𑀳𑀸𑀪𑀸𑀯𑁂 𑀪𑀸𑀯𑀢𑁄, 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀢𑀡𑁆𑀳𑀸𑀯𑀺𑀲𑀬𑀢𑁄, 𑀲𑀩𑁆𑀩𑁂𑀲𑀁 𑀯𑀸 𑀢𑀡𑁆𑀳𑀸𑀯𑀺𑀲𑀬𑀢𑁄 𑀢𑀡𑁆𑀳𑀸𑀧𑀥𑀸𑀦𑀢𑀸 𑀮𑀩𑁆𑀪𑀢𑁂𑀯. 𑀧𑀘𑁆𑀙𑀺𑀫𑀓𑀸𑀦𑀁 𑀤𑀺𑀝𑁆𑀞𑀺𑀧𑀥𑀸𑀦𑀢𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀸.

𑁮𑁪. 𑀓𑀩𑀴𑀻𑀓𑀸𑀭𑁂 𑀆𑀳𑀸𑀭𑁂𑀢𑀺 𑀓𑀩𑀴𑀻𑀓𑀸𑀭𑀸𑀳𑀸𑀭𑀯𑀺𑀲𑀬𑁂 𑀙𑀦𑁆𑀤𑀭𑀸𑀕𑁂. ‘‘𑀅𑀧𑁆𑀧𑀳𑀻𑀦𑁂’’𑀢𑀺𑀆𑀤𑀺𑀓𑀁 𑀧𑀭𑀺𑀬𑀸𑀬𑀓𑀣𑀁 𑀫𑀼𑀜𑁆𑀘𑀺𑀢𑁆𑀯𑀸 𑀦𑀺𑀧𑁆𑀧𑀭𑀺𑀬𑀸𑀬𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁆𑀲 ‘‘𑀅𑀲𑀼𑀪𑀲𑀪𑀸𑀯𑀢𑁆𑀢𑀸, 𑀅𑀲𑀼𑀪𑀲𑀫𑀼𑀝𑁆𑀞𑀸𑀦𑀢𑁆𑀢𑀸 𑀘𑀸’’𑀢𑀺 𑀯𑀼𑀢𑁆𑀢𑀁. 𑀮𑀩𑁆𑀪𑀫𑀸𑀦𑁂 𑀳𑀺 𑀉𑀚𑀼𑀓𑁂 𑀅𑀢𑁆𑀣𑁂 𑀓𑀺𑀁 𑀧𑀭𑀺𑀬𑀸𑀬𑀓𑀣𑀸𑀬𑀸𑀢𑀺. 𑀙𑀦𑁆𑀤𑀭𑀸𑀕𑁄 𑀯𑀸 𑀢𑀢𑁆𑀣 𑀅𑀢𑁆𑀣𑀲𑀺𑀤𑁆𑀥𑁄𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀦 𑀳𑀺 𑀢𑀢𑁆𑀣 𑀅𑀲𑀢𑀺 𑀙𑀦𑁆𑀤𑀭𑀸𑀕𑁂 𑀯𑀺𑀧𑀮𑁆𑀮𑀸𑀲𑁄 𑀲𑀫𑁆𑀪𑀯𑀢𑀺. 𑀤𑀼𑀓𑁆𑀔𑀲𑀪𑀸𑀯𑀢𑁆𑀢𑀸𑀢𑀺 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀬 𑀤𑀼𑀓𑁆𑀔𑀲𑀪𑀸𑀯𑀢𑁆𑀢𑀸. 𑀤𑀼𑀓𑁆𑀔𑀧𑀘𑁆𑀘𑀬𑀢𑁆𑀢𑀸𑀢𑀺 𑀢𑀺𑀯𑀺𑀥𑀤𑀼𑀓𑁆𑀔𑀢𑀸𑀮𑀓𑁆𑀔𑀡𑀲𑁆𑀲 𑀤𑀼𑀓𑁆𑀔𑀲𑁆𑀲 𑀓𑀸𑀭𑀡𑀢𑁄. 𑀯𑀺𑀜𑁆𑀜𑀸𑀡𑁂 𑀦𑀺𑀘𑁆𑀘𑀲𑀜𑁆𑀜𑀺𑀦𑁄. 𑀢𑀣𑀸 𑀳𑀺 𑀲𑀸𑀢𑀺 𑀦𑀸𑀫 𑀪𑀺𑀓𑁆𑀔𑀼 𑀓𑁂𑀯𑀝𑁆𑀝𑀧𑀼𑀢𑁆𑀢𑁄 ‘‘𑀢𑀁𑀬𑁂𑀯 𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀻’’𑀢𑀺 𑀢𑀢𑁆𑀣 𑀦𑀺𑀘𑁆𑀘𑀸𑀪𑀺𑀦𑀺𑀯𑁂𑀲𑀁 𑀲𑀁𑀯𑁂𑀤𑁂𑀲𑀺. 𑀬𑁂𑀪𑀼𑀬𑁆𑀬𑁂𑀦 𑀲𑀗𑁆𑀔𑀸𑀭𑁂𑀲𑀼 𑀅𑀢𑁆𑀢𑀲𑀜𑁆𑀜𑀺𑀢𑀸 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 ‘‘𑀘𑁂𑀢𑀦𑀸 𑀅𑀢𑁆𑀢𑀸’’𑀢𑀺𑀆𑀤𑀺𑀤𑀺𑀝𑁆𑀞𑀺𑀧𑀭𑀺𑀤𑀻𑀧𑀦𑁂𑀲𑀼 𑀯𑁂𑀤𑀺𑀢𑀩𑁆𑀩𑀸. ‘‘𑀪𑀯𑀯𑀺𑀲𑀼𑀤𑁆𑀥𑀻’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀯𑀘𑀦𑀁 ‘‘𑀦𑀺𑀩𑁆𑀩𑀼𑀢𑀺𑀲𑀼𑀔’’𑀦𑁆𑀢𑀺. ‘‘𑀲𑀻𑀮𑀩𑁆𑀩𑀢𑁂𑀳𑀺…𑀧𑁂… 𑀲𑀼𑀔𑀦𑁆𑀢𑀺 𑀤𑀴𑁆𑀳𑀁 𑀕𑀡𑁆𑀳𑀸𑀢𑀻’’𑀢𑀺 𑀇𑀫𑀺𑀦𑀸 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁 𑀇𑀥 𑀪𑀯𑀼𑀧𑀸𑀤𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀲𑀗𑁆𑀔𑀸𑀢𑁂𑀦 𑀪𑀯𑀼𑀧𑀸𑀤𑀸𑀦𑁂𑀦𑀸’’𑀢𑀺.

𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀸𑀤𑀺𑀦𑀸. 𑀧𑀞𑀫𑁂 𑀬𑁄𑀕𑁂 𑀞𑀺𑀢𑁄𑀢𑀺 𑀧𑀞𑀫𑁂 𑀬𑁄𑀕𑁂 𑀧𑀢𑀺𑀝𑁆𑀞𑀺𑀢𑁄. 𑀅𑀧𑁆𑀧𑀳𑀻𑀦𑀸 𑀳𑀺 𑀓𑀺𑀮𑁂𑀲𑀸 𑀓𑀫𑁆𑀫𑀯𑀝𑁆𑀝𑀸𑀤𑀻𑀦𑀁 𑀓𑀸𑀭𑀡𑀪𑀽𑀢𑀸 𑀢𑀁𑀲𑀫𑀗𑁆𑀕𑀺𑀦𑁄 𑀲𑀢𑁆𑀢𑀲𑁆𑀲 𑀧𑀢𑀺𑀝𑁆𑀞𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀭𑀲𑁆𑀲 𑀅𑀪𑀺𑀚𑁆𑀛𑀸𑀬𑀦𑀁 𑀧𑀭𑀸𑀪𑀺𑀚𑁆𑀛𑀸𑀬𑀦𑀁. 𑀪𑀯𑀧𑀢𑁆𑀣𑀦𑀸𑀬 𑀪𑀯𑀤𑀺𑀝𑁆𑀞𑀺𑀪𑀯𑀭𑀸𑀕𑀯𑀲𑁂𑀦 𑀧𑀺𑀬𑀸𑀬𑀺𑀢𑀲𑁆𑀲 𑀯𑀢𑁆𑀣𑀼𑀦𑁄 𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀸𑀪𑀸𑀯𑁂 𑀤𑁄𑀫𑀦𑀲𑁆𑀲𑀼𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀪𑀯𑀭𑀸𑀕…𑀧𑁂… 𑀧𑀤𑀽𑀲𑁂𑀦𑁆𑀢𑀻’’𑀢𑀺.

𑀕𑀦𑁆𑀣𑀺𑀢𑁆𑀯𑀸𑀢𑀺 𑀕𑀦𑁆𑀣𑀺𑀁 𑀓𑀢𑁆𑀯𑀸. 𑀤𑁆𑀯𑀺𑀥𑀸𑀪𑀽𑀢𑀁 𑀭𑀚𑁆𑀚𑀼𑀆𑀤𑀺𑀓𑁂 𑀯𑀺𑀬 𑀕𑀦𑁆𑀣𑀺𑀓𑀭𑀡𑀜𑁆𑀳𑀺 𑀕𑀦𑁆𑀣𑀦𑀁. 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀦𑁆𑀢𑀸 𑀆𑀲𑀯𑀸𑀦𑀁 𑀉𑀧𑁆𑀧𑀢𑁆𑀢𑀺𑀳𑁂𑀢𑀼 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀢𑁆𑀢𑀸 𑀏𑀓𑀘𑁆𑀘𑁂 𑀓𑀺𑀮𑁂𑀲𑀸 𑀯𑀺𑀲𑁂𑀲𑀢𑁄 𑀆𑀲𑀯𑀼𑀧𑁆𑀧𑀢𑁆𑀢𑀺𑀳𑁂𑀢𑀼 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀅𑀝𑁆𑀞𑀓𑀣𑀸𑀬𑀁 𑀉𑀧𑁆𑀧𑀝𑀺𑀧𑀸𑀝𑀺𑀯𑀘𑀦𑀁. 𑀢𑀧𑁆𑀧𑀝𑀺𑀧𑀓𑁆𑀔𑁂 𑀯𑀺𑀲𑀬𑁂 𑀧𑀢𑁆𑀣𑁂𑀢𑀻𑀢𑀺 𑀬𑁄𑀚𑀦𑀸. 𑀢𑀩𑁆𑀩𑀺𑀲𑀬𑀩𑀳𑀼𑀮𑁂 𑀪𑀯𑁂 𑀧𑀢𑁆𑀣𑁂𑀢𑀻𑀢𑀺 𑀬𑀣𑀸 𑀫𑀸𑀦𑀼𑀲𑀓𑁂𑀳𑀺 𑀓𑀸𑀫𑁂𑀳𑀺 𑀦𑀺𑀩𑁆𑀩𑀺𑀦𑁆𑀦𑀭𑀽𑀧𑀸 𑀤𑁂𑀯𑀽𑀧𑀧𑀢𑁆𑀢𑀺. 𑀢𑀁𑀲𑀪𑀸𑀯𑀢𑁆𑀢𑀸𑀢𑀺 𑀤𑀺𑀝𑁆𑀞𑀺𑀲𑀪𑀸𑀯𑀢𑁆𑀢𑀸. 𑀅𑀧𑀭𑀸𑀧𑀭𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀁. 𑀏𑀓𑀘𑁆𑀘𑀸 𑀳𑀺 𑀤𑀺𑀝𑁆𑀞𑀺 𑀏𑀓𑀘𑁆𑀘𑀲𑁆𑀲 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑀲𑁆𑀲 𑀓𑀸𑀭𑀡𑀁 𑀳𑁄𑀢𑀺, 𑀬𑀣𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀇𑀢𑀭𑀸𑀲𑀁. 𑀅𑀪𑀺𑀦𑀺𑀯𑀺𑀲𑀦𑁆𑀢𑀲𑁆𑀲𑀸𑀢𑀺 𑀅𑀪𑀺𑀦𑀺𑀯𑁂𑀲𑀦𑀳𑁂𑀢𑀼. ‘‘𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀢𑁄…𑀧𑁂… 𑀅𑀯𑀺𑀚𑁆𑀚𑀸𑀲𑀯𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀇𑀤𑀁 𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑀲𑁆𑀲 𑀨𑀮𑀪𑀽𑀢𑀁 𑀅𑀯𑀺𑀚𑁆𑀚𑀸𑀲𑀯𑀁 𑀤𑀲𑁆𑀲𑁂𑀢𑀺 𑀏𑀓𑀦𑁆𑀢𑀯𑀲𑁆𑀲𑀺𑀫𑁂𑀖𑀯𑀼𑀝𑁆𑀞𑀸𑀦𑁂𑀦 𑀯𑀺𑀬 𑀫𑀳𑁄𑀖𑀧𑁆𑀧𑀯𑀢𑁆𑀢𑀺. 𑀅𑀯𑀺𑀚𑁆𑀚𑀸𑀲𑀯𑁄 𑀲𑀺𑀤𑁆𑀥𑁄 𑀳𑁄𑀢𑀺 𑀯𑀼𑀝𑁆𑀞𑀺𑀳𑁂𑀢𑀼𑀓𑀫𑀳𑁄𑀖𑀲𑀺𑀤𑁆𑀥𑀺𑀬𑀸 𑀉𑀧𑀭𑀺𑀫𑁂𑀖𑀯𑀼𑀝𑁆𑀞𑀸𑀦𑀁 𑀯𑀺𑀬.

‘‘𑀦𑀦𑁆𑀤𑀻𑀭𑀸𑀕𑀲𑀳𑀕𑀢𑀸’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁧𑁪) 𑀯𑀺𑀬 𑀢𑀩𑁆𑀪𑀸𑀯𑀢𑁆𑀣𑁄 𑀲𑀳𑀕𑀢𑀲𑀤𑁆𑀤𑁄𑀢𑀺 𑀆𑀳 ‘‘𑀅𑀦𑀼𑀲𑀬…𑀧𑁂… 𑀪𑀽𑀢𑀸 𑀯𑀸’’𑀢𑀺. 𑀘𑀺𑀢𑁆𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑀲𑀗𑁆𑀔𑀸𑀢𑀁 𑀳𑀤𑀬𑀦𑁆𑀢𑀺 𑀯𑀺𑀧𑀸𑀓𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀯𑀺𑀧𑀸𑀓𑀯𑀝𑁆𑀝𑁂𑀧𑀺 𑀓𑀺𑀮𑁂𑀲𑀯𑀸𑀲𑀦𑀸𑀳𑀺𑀢𑀸 𑀅𑀢𑁆𑀣𑀺 𑀓𑀸𑀘𑀺 𑀯𑀺𑀲𑁂𑀲𑀫𑀢𑁆𑀢𑀸.

𑀮𑁄𑀪𑀲𑀳𑀕𑀢𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲. 𑀇𑀢𑀭𑀲𑁆𑀲 𑀤𑁄𑀲𑀲𑀳𑀕𑀢𑀸𑀤𑀺𑀓𑀲𑁆𑀲. 𑀩𑁆𑀬𑀜𑁆𑀚𑀦𑁂𑀦 𑀯𑀺𑀬 𑀪𑁄𑀚𑀦𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀅𑀪𑀺𑀲𑀗𑁆𑀔𑀭𑀡𑀁 𑀯𑀺𑀲𑁂𑀲𑀸𑀧𑀸𑀤𑀦𑀁 𑀉𑀧𑀲𑁂𑀘𑀦𑀁, 𑀦𑀦𑁆𑀤𑀻 𑀲𑀧𑁆𑀧𑀻𑀢𑀺𑀓𑀢𑀡𑁆𑀳𑀸 𑀉𑀧𑀲𑁂𑀘𑀦𑀁 𑀏𑀢𑀲𑁆𑀲𑀸𑀢𑀺 𑀦𑀦𑁆𑀤𑀽𑀧𑀲𑁂𑀘𑀦𑀁 𑀉𑀧𑀲𑁂𑀘𑀦𑀪𑀽𑀢𑀸𑀬𑀧𑀺 𑀦𑀦𑁆𑀤𑀺𑀬𑀸 𑀭𑀸𑀕𑀲𑀮𑁆𑀮𑀉𑀧𑀦𑀺𑀲𑀢𑁄. 𑀉𑀧𑀲𑀺𑀢𑁆𑀢𑁂 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀸 ‘‘𑀭𑀸𑀕𑀲𑀮𑁆𑀮𑁂𑀦 𑀦𑀦𑁆𑀤𑀽𑀧𑀲𑁂𑀘𑀦𑁂𑀦 𑀯𑀺𑀜𑁆𑀜𑀸𑀡𑁂𑀦𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀢𑀫𑀢𑁆𑀣𑀁 𑀧𑀸𑀓𑀝𑀁 𑀓𑀸𑀢𑀼𑀁 ‘‘𑀓𑁂𑀦 𑀧𑀦 𑀢𑀁 𑀦𑀦𑁆𑀤𑀽𑀧𑀲𑁂𑀘𑀦’’𑀦𑁆𑀢𑀺 𑀧𑀼𑀘𑁆𑀙𑀢𑀺.

𑀭𑀸𑀕𑀲𑀮𑁆𑀮𑁂𑀦𑀸𑀢𑀺 𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀭𑀸𑀕𑀲𑀮𑁆𑀮𑁂𑀦 𑀳𑁂𑀢𑀼𑀪𑀽𑀢𑁂𑀦𑀸’’𑀢𑀺 𑀆𑀳. 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑁆𑀣𑁄 𑀘𑁂𑀢𑁆𑀣 𑀳𑁂𑀢𑁆𑀯𑀢𑁆𑀣𑁄. 𑀉𑀧𑀕𑀦𑁆𑀢𑀩𑁆𑀩𑀢𑁄 𑀯𑀺𑀜𑁆𑀜𑀸𑀡𑁂𑀦𑀸𑀢𑀺 𑀯𑀺𑀪𑀢𑁆𑀢𑀺𑀁 𑀧𑀭𑀺𑀡𑀸𑀫𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. ‘‘𑀧𑀢𑀺𑀝𑁆𑀞𑀸𑀪𑀸𑀯𑀢𑁄’’𑀢𑀺 𑀇𑀫𑀺𑀦𑀸 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀬𑀸𑀤𑀺𑀧𑀘𑁆𑀘𑀬𑀢𑀁 𑀯𑀤𑀢𑀺. 𑀢𑁂𑀦𑀸𑀳 ‘‘𑀭𑀽𑀧𑀓𑁆𑀔𑀦𑁆𑀥𑀁 𑀦𑀺𑀲𑁆𑀲𑀸𑀬 𑀢𑀺𑀝𑁆𑀞𑀢𑀻’’𑀢𑀺. 𑀏𑀯𑀁 𑀤𑀼𑀢𑀺𑀬𑀸𑀤𑀺𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼𑀧𑀺 𑀦𑀺𑀲𑁆𑀲𑀬𑀸𑀤𑀺𑀧𑀘𑁆𑀘𑀬𑀢𑀸 𑀯𑀢𑁆𑀢𑀩𑁆𑀩𑀸 𑀧𑀢𑀺𑀝𑁆𑀞𑀸𑀯𑀘𑀦𑀢𑁄.

𑁮𑁫. 𑀬𑀤𑀺𑀧𑀺 𑀅𑀓𑀼𑀲𑀮𑀫𑀽𑀮𑀸𑀤𑀺𑀓𑁂 𑀢𑀺𑀧𑀼𑀓𑁆𑀔𑀮𑀲𑁆𑀲, 𑀢𑀡𑁆𑀳𑀸𑀤𑀺𑀓𑁂 𑀦𑀦𑁆𑀤𑀺𑀬𑀸𑀯𑀝𑁆𑀝𑀲𑁆𑀲 𑀤𑀺𑀲𑀸𑀪𑀸𑀯𑁂𑀦 𑀯𑀓𑁆𑀔𑀢𑀺, 𑀢𑀣𑀸𑀧𑀺 𑀅𑀜𑁆𑀜𑀫𑀜𑁆𑀜𑀸𑀦𑀼𑀧𑁆𑀧𑀯𑁂𑀲𑀢𑁄 𑀏𑀓𑀲𑁆𑀫𑀺𑀁 𑀦𑀬𑁂 𑀲𑀺𑀤𑁆𑀥𑁂 𑀇𑀢𑀭𑁂𑀧𑀺 𑀲𑀺𑀤𑁆𑀥𑀸 𑀏𑀯 𑀳𑁄𑀦𑁆𑀢𑀻𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 ‘‘𑀆𑀳𑀸𑀭𑀸𑀤𑀬𑁄…𑀧𑁂… 𑀯𑀯𑀢𑁆𑀣𑀧𑁂𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀓𑁆𑀔𑀫𑀸𑀦𑁂 𑀯𑀸 𑀅𑀓𑀼𑀲𑀮𑀫𑀽𑀮𑀢𑀡𑁆𑀳𑀸𑀤𑀺𑀓𑁂 𑀆𑀤𑀺𑀲𑀤𑁆𑀤𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 ‘‘𑀆𑀳𑀸𑀭𑀸𑀤𑀬𑁄’’𑀢𑀺 𑀯𑀤𑀦𑁆𑀢𑁄 ‘‘𑀦𑀬𑀸𑀦’’𑀦𑁆𑀢𑀺 𑀩𑀳𑀼𑀯𑀘𑀦𑀫𑀸𑀳. 𑀏𑀓𑀲𑁆𑀲 𑀅𑀢𑁆𑀣𑀲𑁆𑀲𑀸𑀢𑀺 𑀭𑀸𑀕𑀘𑀭𑀺𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀢𑀸𑀲𑀗𑁆𑀔𑀸𑀢𑀲𑁆𑀲 𑀏𑀓𑀲𑁆𑀲 𑀧𑀬𑁄𑀚𑀦𑀲𑁆𑀲. 𑀩𑁆𑀬𑀜𑁆𑀚𑀦𑀢𑁆𑀣𑁄𑀧𑀺 𑀕𑀳𑀺𑀢𑁄, 𑀦 𑀩𑁆𑀬𑀜𑁆𑀚𑀦𑀫𑁂𑀯 𑀕𑀳𑀺𑀢𑀦𑁆𑀢𑀺 𑀲𑀼𑀢𑁆𑀢𑀧𑀤𑀸𑀦𑀺 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀸𑀬𑀯𑀘𑀦𑀸𑀦𑀺 𑀬𑀣𑀸𑀭𑀳𑀁 𑀢𑀡𑁆𑀳𑀸𑀯𑀢𑁆𑀣𑀽𑀦𑀁 𑀢𑀢𑁆𑀣 𑀓𑀣𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀲𑀯𑀢𑁆𑀣𑀼𑀓𑀸 𑀢𑀡𑁆𑀳𑀸 𑀯𑀼𑀢𑁆𑀢𑀸’’𑀢𑀺. 𑀤𑁄𑀲𑀯𑀢𑁆𑀣𑀽𑀦𑀁, 𑀤𑀺𑀝𑁆𑀞𑀺𑀯𑀢𑁆𑀣𑀽𑀦𑀜𑁆𑀘 𑀢𑀢𑁆𑀣 𑀓𑀣𑀺𑀢𑀢𑁆𑀢𑀸 ‘‘𑀲𑀯𑀢𑁆𑀣𑀼𑀓𑁄 𑀤𑁄𑀲𑁄, 𑀲𑀯𑀢𑁆𑀣𑀼𑀓𑀸 𑀤𑀺𑀝𑁆𑀞𑀺 𑀘 𑀯𑀼𑀢𑁆𑀢𑀸’’𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬𑀸𑀳 ‘‘𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑀸’’𑀢𑀺.

𑀤𑀼𑀓𑁆𑀔𑀸𑀓𑀸𑀭𑁂𑀦 𑀲𑀳 𑀤𑀼𑀓𑁆𑀔𑀸𑀓𑀸𑀭𑀁 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀯𑀜𑁆𑀘𑁂𑀢𑀦𑁆𑀢𑀺 𑀬𑀤𑀺 𑀢𑀁𑀢𑀁𑀅𑀦𑀼𑀧𑀲𑁆𑀲𑀦𑀸𑀩𑀳𑀼𑀮𑀲𑁆𑀲 𑀯𑀲𑁂𑀦 𑀧𑀼𑀭𑀺𑀫𑀸𑀳𑀸𑀭𑀤𑁆𑀯𑀬𑀸𑀤𑀻𑀲𑀼 𑀯𑀺𑀫𑁄𑀓𑁆𑀔𑀫𑀼𑀔𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀁 𑀓𑀢𑀁, 𑀏𑀢𑀁 𑀏𑀯𑀫𑁂𑀯 𑀯𑁂𑀤𑀺𑀢𑀩𑁆𑀩𑀁, 𑀦 𑀅𑀜𑁆𑀜𑀣𑀸. 𑀢𑀢𑁆𑀣 𑀓𑀸𑀭𑀡𑀁 𑀯𑀤𑀦𑁆𑀢𑁄 ‘‘𑀦 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀅𑀭𑀺𑀬𑀫𑀕𑁆𑀕𑀸𑀦𑀁 𑀑𑀥𑀺𑀲𑁄 𑀓𑀺𑀮𑁂𑀲𑀧𑁆𑀧𑀚𑀳𑀦𑀢𑁄 𑀧𑀳𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀦𑀺𑀬𑀫𑁄 𑀅𑀢𑁆𑀣𑀺, 𑀦 𑀏𑀯𑀁 𑀯𑀺𑀧𑀲𑁆𑀲𑀦𑀸𑀬 𑀧𑀭𑀺𑀜𑁆𑀜𑀸𑀧𑀳𑀸𑀦𑀸𑀦𑀁 𑀅𑀦𑀺𑀘𑁆𑀘𑀦𑁆𑀢𑀺𑀓𑀢𑁆𑀢𑀸𑀢𑀺.

𑀅𑀧𑀭𑁂 𑀧𑀦𑀸𑀳𑀼 𑁋 𑀧𑀼𑀭𑀺𑀫𑁂 𑀆𑀳𑀸𑀭𑀤𑁆𑀯𑀬𑁂 𑀧𑀭𑀺𑀓𑀺𑀮𑁂𑀲𑀪𑀸𑀯𑁂𑀦, 𑀤𑀼𑀓𑁆𑀔𑀧𑀘𑁆𑀘𑀬𑀢𑁆𑀢𑀸 𑀘 𑀤𑀼𑀓𑁆𑀔𑀮𑀓𑁆𑀔𑀡𑀁 𑀲𑀼𑀧𑀸𑀓𑀝𑀁. 𑀢𑀢𑁆𑀣 𑀧𑀼𑀭𑀺𑀫𑁂 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀤𑁆𑀯𑀬𑀯𑀺𑀜𑁆𑀜𑀸𑀡𑀸𑀳𑀸𑀭𑁂 𑀢𑀢𑀺𑀬𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀁 𑀅𑀦𑀺𑀘𑁆𑀘𑀮𑀓𑁆𑀔𑀡𑀁, 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁂 𑀘𑀢𑀼𑀢𑁆𑀣𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀁 𑀅𑀦𑀢𑁆𑀢𑀮𑀓𑁆𑀔𑀡𑀁 𑀲𑀼𑀧𑀸𑀓𑀝𑀦𑁆𑀢𑀺 𑀢𑀺𑀲𑁆𑀲𑀦𑁆𑀦𑀁 𑀅𑀦𑀼𑀧𑀲𑁆𑀲𑀦𑀸𑀦𑀁 𑀧𑀯𑀢𑁆𑀢𑀺𑀫𑀼𑀔𑀢𑀸𑀬 𑀢𑁂𑀳𑀺 𑀅𑀧𑁆𑀧𑀡𑀺𑀳𑀺𑀢𑀸𑀤𑀺𑀯𑀺𑀫𑁄𑀓𑁆𑀔𑀫𑀼𑀔𑁂𑀳𑀺 𑀧𑀭𑀺𑀜𑁆𑀜𑀁 𑀕𑀘𑁆𑀙𑀦𑁆𑀢𑀻𑀢𑀺. 𑀢𑀣𑀸 𑀯𑀺𑀧𑀮𑁆𑀮𑀸𑀲𑀸𑀤𑀻𑀲𑀼 𑀧𑀼𑀭𑀺𑀫𑀤𑁆𑀯𑀬𑀁 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀁, 𑀇𑀢𑀭𑀤𑁆𑀯𑀬𑀁 𑀅𑀦𑀺𑀘𑁆𑀘𑀸𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀦𑀁. 𑀇𑀢𑀺 𑀧𑀯𑀢𑁆𑀢𑀺𑀫𑀼𑀔𑀢𑀸𑀬 𑀘 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀢𑀸𑀬 𑀘 𑀇𑀫𑁂 𑀥𑀫𑁆𑀫𑀸 𑀬𑀣𑀸𑀭𑀳𑀁 𑀅𑀧𑁆𑀧𑀡𑀺𑀳𑀺𑀢𑀸𑀤𑀺𑀯𑀺𑀫𑁄𑀓𑁆𑀔𑀫𑀼𑀔𑁂𑀳𑀺 𑀧𑀭𑀺𑀜𑁆𑀜𑁂𑀬𑁆𑀬𑀸, 𑀧𑀳𑀸𑀢𑀩𑁆𑀩𑀸 𑀘 𑀯𑀼𑀢𑁆𑀢𑀸. 𑀢𑀢𑁆𑀣 𑀲𑀼𑀪𑀲𑀼𑀔𑀲𑀜𑁆𑀜𑀸𑀓𑀸𑀫𑀼𑀧𑀸𑀤𑀸𑀦𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀓𑀸𑀫𑀬𑁄𑀕𑀪𑀯𑀬𑁄𑀕𑀅𑀪𑀺𑀚𑁆𑀛𑀸𑀓𑀸𑀬 𑀕𑀦𑁆𑀣𑀓𑀸𑀫𑀸𑀲𑀯𑀓𑀸𑀫𑁄𑀖 𑀪𑀯𑁄𑀖 𑀭𑀸𑀕𑀲𑀮𑁆𑀮𑀙𑀦𑁆𑀤𑀅𑀕𑀢𑀺𑀕𑀫𑀦𑀸𑀦𑀺 𑀲𑀼𑀔𑀲𑁆𑀲𑀸𑀤𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑀤𑁄𑀲𑀲𑀮𑁆𑀮𑀤𑁄𑀲𑀅𑀕𑀢𑀺𑀕𑀫𑀦𑀸𑀦𑀺 𑀧𑀯𑀢𑁆𑀢𑀺𑀫𑀼𑀔𑀢𑀸𑀬 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀫𑀼𑀔𑁂𑀦 𑀧𑀳𑀸𑀢𑀩𑁆𑀩𑀸𑀦𑀺. 𑀢𑀢𑀺𑀬𑀲𑀜𑁆𑀜𑀸𑀤𑀬𑁄 𑀦𑀺𑀘𑁆𑀘𑀸𑀪𑀺𑀦𑀺𑀯𑁂𑀲𑀢𑀦𑁆𑀦𑀺𑀫𑀺𑀢𑁆𑀢𑀸𑀳𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀫𑀼𑀔𑁂𑀦 𑀧𑀳𑀸𑀢𑀩𑁆𑀩𑀸. 𑀘𑀢𑀼𑀢𑁆𑀣𑀲𑀜𑁆𑀜𑀸𑀤𑀬𑁄 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑀢𑀦𑁆𑀦𑀺𑀢𑁆𑀢𑀸𑀳𑀺 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀫𑀼𑀔𑁂𑀦 𑀧𑀳𑀸𑀢𑀩𑁆𑀩𑀸. 𑀢𑀢𑁆𑀣 𑀫𑀸𑀦𑀲𑀮𑁆𑀮𑀪𑀬𑀅𑀕𑀢𑀺𑀕𑀫𑀦𑀸𑀦𑀁 𑀦𑀺𑀘𑁆𑀘𑀸𑀪𑀺𑀦𑀺𑀯𑁂𑀲𑀦𑀺𑀫𑀺𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀦 𑀳𑀺 𑀅𑀦𑀺𑀘𑁆𑀘𑀢𑁄 𑀧𑀲𑁆𑀲𑀢𑁄 𑀫𑀸𑀦𑀚𑀧𑁆𑀧𑀦𑀁, 𑀪𑀬𑀁 𑀯𑀸 𑀲𑀫𑁆𑀪𑀯𑀢𑀺. 𑀅𑀯𑀺𑀚𑁆𑀚𑀸𑀬𑁄𑀕𑀸𑀤𑀻𑀦𑀁 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑀦𑀺𑀫𑀺𑀢𑁆𑀢𑀢𑀸 𑀧𑀸𑀓𑀝𑀸 𑀏𑀯𑀸𑀢𑀺.

𑁮𑁬. 𑀅𑀧𑁆𑀧𑀫𑀜𑁆𑀜𑀸𑀯𑀚𑁆𑀚𑀸 𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀬𑁄 𑀤𑀺𑀩𑁆𑀩𑀯𑀺𑀳𑀸𑀭𑀸 ‘‘𑀤𑁂𑀯𑀽𑀧𑀧𑀢𑁆𑀢𑀺𑀲𑀁𑀯𑀢𑁆𑀢𑀦𑀺𑀓𑀓𑀼𑀲𑀮𑀲𑀫𑀸𑀧𑀢𑁆𑀢𑀺𑀬𑁄 𑀘𑀸’’𑀢𑀺 𑀓𑀢𑁆𑀯𑀸, 𑀲𑀢𑀺𑀧𑀺 𑀢𑀩𑁆𑀪𑀸𑀯𑁂 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀢𑁄, 𑀦𑀺𑀤𑁆𑀤𑁄𑀲𑀢𑀸𑀬 𑀘 𑀲𑁂𑀝𑁆𑀞𑀸 𑀯𑀺𑀳𑀸𑀭𑀸𑀢𑀺 𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀸, 𑀘𑀢𑀲𑁆𑀲𑁄 𑀨𑀮𑀲𑀫𑀸𑀧𑀢𑁆𑀢𑀺𑀬𑁄 𑀅𑀭𑀺𑀬𑀯𑀺𑀳𑀸𑀭𑀸 ‘‘𑀆𑀭𑀓𑀸 𑀓𑀺𑀮𑁂𑀲𑁂𑀳𑀺 𑀅𑀭𑀺𑀬𑀸𑀦𑀁 𑀯𑀺𑀳𑀸𑀭𑀸’’𑀢𑀺. 𑀘𑀢𑀲𑁆𑀲𑁄 𑀆𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀺𑀬𑁄 𑀆𑀦𑁂𑀜𑁆𑀚𑀯𑀺𑀳𑀸𑀭𑀸, 𑀲𑀢𑀺𑀧𑀺 𑀤𑁂𑀯𑀽𑀧𑀧𑀢𑁆𑀢𑀺𑀲𑀁𑀯𑀢𑁆𑀢𑀦𑀺𑀓𑀓𑀼𑀲𑀮𑀲𑀫𑀸𑀧𑀢𑁆𑀢𑀺𑀪𑀸𑀯𑁂 𑀆𑀦𑁂𑀜𑁆𑀚𑀲𑀦𑁆𑀢𑀢𑀸𑀳𑀺 𑀮𑁄𑀓𑀺𑀬𑁂𑀲𑀼 𑀲𑀺𑀔𑀸𑀧𑁆𑀧𑀢𑁆𑀢𑀺𑀢𑁄.

𑀅𑀥𑀺𑀓𑀭𑀡𑀪𑁂𑀤𑁂𑀦𑀸𑀢𑀺 𑀯𑀢𑁆𑀣𑀼𑀪𑁂𑀤𑁂𑀦.

𑀬𑀁 𑀅𑀪𑀺𑀡𑁆𑀳𑀁 𑀦 𑀧𑀯𑀢𑁆𑀢𑀢𑀺, 𑀢𑀁 𑀅𑀘𑁆𑀙𑀭𑀺𑀬𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀦𑁆𑀥𑀲𑁆𑀲…𑀧𑁂… 𑀉𑀧𑁆𑀧𑀚𑁆𑀚𑀦𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀥𑀺𑀢𑀺𑀝𑁆𑀞𑀢𑀺 𑀲𑀻𑀮𑀸𑀤𑀺 𑀏𑀢𑁂𑀦 𑀲𑀘𑁆𑀘𑁂𑀦, 𑀏𑀢𑁆𑀣 𑀯𑀸 𑀲𑀘𑁆𑀘𑁂 𑀦𑀺𑀫𑀺𑀢𑁆𑀢𑀪𑀽𑀢𑁂, 𑀅𑀥𑀺𑀝𑁆𑀞𑀸𑀦𑀫𑀢𑁆𑀢𑀫𑁂𑀯 𑀯𑀸 𑀢𑀁 𑀲𑀘𑁆𑀘𑀦𑁆𑀢𑀺 𑀏𑀯𑀁 𑀓𑀭𑀡𑀸𑀥𑀺𑀓𑀭𑀡𑀪𑀸𑀯𑀢𑁆𑀣𑀸 𑀧𑀘𑁆𑀘𑀬𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸 𑀲𑀫𑀸𑀦𑀸𑀥𑀺𑀓𑀭𑀡𑀲𑀫𑀸𑀲𑀧𑀓𑁆𑀔𑁂. 𑀢𑀣𑀸 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑀧𑀓𑁆𑀔𑁂. 𑀇𑀢𑀭𑀲𑁆𑀫𑀺𑀁 𑀧𑀦 𑀲𑀫𑀸𑀲𑁂 𑀓𑀭𑀡𑀸𑀥𑀺𑀓𑀭𑀡𑀢𑁆𑀣𑀸 𑀏𑀯, 𑀢𑁂 𑀘 𑀔𑁄 𑀲𑀻𑀮𑀸𑀤𑀺𑀯𑀲𑁂𑀦 𑀘 𑀯𑁂𑀤𑀺𑀢𑀩𑁆𑀩𑀸. 𑀲𑀼𑀔𑀦𑁆𑀢𑀺 𑀛𑀸𑀦𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀲𑀼𑀔𑀁. 𑀮𑁄𑀓𑀺𑀬𑀯𑀺𑀧𑀸𑀓𑀲𑀼𑀔𑀫𑁆𑀧𑀺 𑀮𑀩𑁆𑀪𑀢𑁂𑀯. ‘‘𑀦𑀸𑀜𑁆𑀜𑀢𑁆𑀭 𑀩𑁄𑀚𑁆𑀛𑀸…𑀧𑁂… 𑀧𑀸𑀡𑀺𑀦’’𑀦𑁆𑀢𑀺 (𑀲𑀁. 𑀦𑀺. 𑁧. 𑁯𑁮) 𑀳𑀺 𑀇𑀫𑀸𑀬 𑀕𑀸𑀣𑀸𑀬 𑀲𑀗𑁆𑀕𑀳𑀺𑀢𑀸 𑀅𑀦𑀢𑁆𑀢𑀧𑀭𑀺𑀳𑀸𑀭𑀫𑀼𑀔𑁂𑀦 𑀲𑀢𑁆𑀢𑀸𑀦𑀁 𑀅𑀪𑀬𑀸 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺𑀲𑀼𑀔𑀸𑀯𑀳𑀸 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀇𑀥 ‘‘𑀲𑀼𑀔𑀪𑀸𑀕𑀺𑀬𑀸’’𑀢𑀺 𑀯𑀼𑀢𑁆𑀢𑀸𑀢𑀺. 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀢𑁄𑀢𑀺 𑀨𑀭𑀡𑀯𑀲𑁂𑀦 𑀅𑀦𑀯𑀲𑁂𑀲𑀕𑁆𑀕𑀳𑀡𑀢𑁄.

𑀧𑀞𑀫𑀲𑁆𑀲 𑀲𑀢𑀺𑀧𑀝𑁆𑀞𑀸𑀦𑀲𑁆𑀲 𑀧𑀞𑀫𑀧𑀝𑀺𑀧𑀤𑀸𑀯𑀲𑁂𑀦 𑀧𑀯𑀢𑁆𑀢𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺. ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀧𑀝𑀺𑀧𑀤𑀸𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀦𑀸𑀦𑀦𑁆𑀢𑀭𑀺𑀬𑀓𑀢𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀺. 𑀲𑀢𑀺𑀧𑀺 𑀘 𑀲𑀩𑁆𑀩𑀸𑀳𑀺 𑀧𑀝𑀺𑀧𑀤𑀸𑀳𑀺 𑀲𑀩𑁆𑀩𑁂𑀲𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀦𑀺𑀬𑀫𑀸𑀪𑀸𑀯𑁂 𑀦𑀸𑀦𑀦𑁆𑀢𑀭𑀺𑀓𑀪𑀸𑀯𑁂𑀦 𑀤𑁂𑀲𑀦𑀸𑀓𑁆𑀓𑀫𑁂𑀦𑁂𑀯𑁂𑀢𑁆𑀣 𑀦𑁂𑀲𑀁 𑀅𑀬𑀫𑀦𑀼𑀓𑁆𑀓𑀫𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀯𑀸 𑀓𑀸𑀬𑀯𑁂𑀤𑀦𑀸𑀲𑀼 𑀲𑀼𑀪𑀲𑀼𑀔𑀲𑀜𑁆𑀜𑀸𑀦𑀁 𑀤𑀼𑀩𑁆𑀩𑀺𑀦𑀺𑀯𑁂𑀞𑀺𑀬𑀢𑀸𑀬 𑀅𑀲𑀼𑀪𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀦𑀁 𑀓𑀺𑀘𑁆𑀘𑀲𑀺𑀤𑁆𑀥𑀺𑀢𑁄 𑀧𑀼𑀭𑀺𑀫𑁂𑀦 𑀧𑀝𑀺𑀧𑀤𑀸𑀤𑁆𑀯𑀬𑁂𑀦 𑀧𑀼𑀭𑀺𑀫𑀁 𑀲𑀢𑀺𑀧𑀝𑁆𑀞𑀸𑀦𑀤𑁆𑀯𑀬𑀁 𑀬𑁄𑀚𑀺𑀢𑀁 𑀢𑀤𑀪𑀸𑀯𑀢𑁄. 𑀇𑀢𑀭𑁂𑀦 𑀇𑀢𑀭𑀁. 𑀢𑀸𑀦𑀺 𑀳𑀺 𑀧𑀼𑀭𑀺𑀫𑁂𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀓𑀢𑀓𑀫𑁆𑀫𑀲𑁆𑀲 𑀇𑀘𑁆𑀙𑀺𑀢𑀩𑁆𑀩𑀸𑀦𑀺. 𑀅𑀣 𑀯𑀸 𑀬𑀣𑀸 𑀢𑀡𑁆𑀳𑀸𑀘𑀭𑀺𑀢𑀤𑀺𑀝𑁆𑀞𑀺𑀘𑀭𑀺𑀢𑀸𑀦𑀁 𑀫𑀦𑁆𑀤𑀢𑀺𑀓𑁆𑀔𑀧𑀜𑁆𑀜𑀸𑀦𑀁 𑀯𑀲𑁂𑀦 𑀘𑀢𑀲𑁆𑀲𑁄 𑀧𑀝𑀺𑀧𑀤𑀸 𑀬𑁄𑀚𑀺𑀢𑀸, 𑀏𑀯𑀁 𑀘𑀢𑁆𑀢𑀸𑀭𑀺 𑀲𑀢𑀺𑀧𑀝𑁆𑀞𑀸𑀦𑀸𑀦𑀺 𑀲𑀫𑁆𑀪𑀯𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀧𑀝𑀺𑀧𑀤𑀸𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀅𑀬𑀫𑀦𑀼𑀓𑁆𑀓𑀫𑁄 𑀓𑀢𑁄.

‘‘𑀢𑀣𑀸’’𑀢𑀺 𑀇𑀫𑀺𑀦𑀸 𑀬𑀣𑀸 𑀲𑀫𑀸𑀦𑀧𑀝𑀺𑀧𑀓𑁆𑀔𑀢𑀸𑀬 𑀧𑀞𑀫𑀲𑁆𑀲 𑀲𑀢𑀺𑀧𑀝𑁆𑀞𑀸𑀦𑀲𑁆𑀲 𑀪𑀸𑀯𑀦𑀸 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀯𑀺𑀲𑁂𑀲𑀸𑀯𑀳𑀸, 𑀏𑀯𑀁 𑀧𑀻𑀢𑀺𑀲𑀳𑀕𑀢𑀸𑀤𑀺𑀲𑀫𑀸𑀦𑀢𑀸𑀬 𑀤𑀼𑀢𑀺𑀬𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀪𑀸𑀯𑀦𑀸 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀁 𑀯𑀺𑀲𑁂𑀲𑀸𑀯𑀳𑀸𑀢𑀺 𑀇𑀫𑀫𑀢𑁆𑀣𑀁 𑀉𑀧𑀲𑀁𑀳𑀭𑀢𑀺. 𑀧𑀻𑀢𑀺𑀧𑀝𑀺𑀲𑀁𑀯𑁂𑀤𑀦𑀸𑀤𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀲𑀼𑀔𑀧𑀝𑀺𑀲𑀁𑀯𑁂𑀤𑀦𑀁, 𑀘𑀺𑀢𑁆𑀢𑀲𑀗𑁆𑀔𑀸𑀭𑀧𑀝𑀺𑀲𑀁𑀯𑁂𑀤𑀦𑀁, 𑀧𑀲𑁆𑀲𑀫𑁆𑀪𑀦𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀘𑀺𑀢𑁆𑀢𑀲𑁆𑀲 𑀅𑀪𑀺𑀧𑁆𑀧𑀫𑁄𑀤𑀦𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁 𑀧𑀝𑀺𑀲𑀁𑀯𑁂𑀤𑀦𑀲𑀫𑀸𑀤𑀳𑀦𑀯𑀺𑀫𑁄𑀘𑀦𑀸𑀦𑀫𑁆𑀧𑀺 𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸. 𑀅𑀦𑀺𑀘𑁆𑀘𑀯𑀺𑀭𑀸𑀕𑀸𑀤𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀦𑀺𑀭𑁄𑀥𑀧𑀝𑀺𑀦𑀺𑀲𑁆𑀲𑀕𑁆𑀕𑀸 𑀲𑀗𑁆𑀕𑀬𑁆𑀳𑀦𑁆𑀢𑀺.

𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀏𑀢𑁆𑀣 𑀧𑀝𑀺𑀮𑀤𑁆𑀥𑀫𑀢𑁆𑀢𑀁 𑀧𑀞𑀫𑀚𑁆𑀛𑀸𑀦𑀁 𑀧𑀞𑀫𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺𑀬𑀸 𑀧𑀕𑀼𑀡𑀯𑀲𑀻𑀪𑀸𑀯𑀸𑀧𑀸𑀤𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀇𑀢𑀭𑀸𑀲𑀁. 𑀇𑀢𑀭𑀸𑀲𑀁 𑀧𑀦 𑀅𑀥𑀺𑀝𑁆𑀞𑀸𑀦𑀪𑀸𑀯𑁂𑀦 𑀧𑀭𑀫𑁆𑀧𑀭𑀸𑀬 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀅𑀭𑀢𑀺𑀭𑀸𑀕𑀸 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀸𑀤𑀬𑁄. 𑀲𑀼𑀔𑁂𑀦𑀸𑀢𑀺 𑀅𑀓𑀺𑀘𑁆𑀙𑁂𑀦, 𑀅𑀓𑀲𑀺𑀭𑁂𑀦𑀸𑀢𑀺 𑀅𑀢𑁆𑀣𑁄.

𑀤𑀺𑀩𑁆𑀩𑀯𑀺𑀳𑀸𑀭𑀸𑀤𑀺𑀓𑁂 𑀘𑀢𑁆𑀢𑀸𑀭𑁄 𑀯𑀺𑀳𑀸𑀭𑁂 𑀧𑀤𑀝𑁆𑀞𑀸𑀦𑀁 𑀓𑀢𑁆𑀯𑀸 𑀦𑀸𑀦𑀸𑀲𑀦𑁆𑀢𑀸𑀦𑁂𑀲𑀼 𑀉𑀧𑁆𑀧𑀦𑁆𑀦𑀸𑀬 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀬 𑀬𑀣𑀸𑀓𑁆𑀓𑀫𑀁 𑀅𑀦𑀼𑀧𑁆𑀧𑀦𑁆𑀦𑀸𑀓𑀼𑀲𑀮𑀸𑀦𑀼𑀧𑁆𑀧𑀸𑀤𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀯𑀺𑀲𑀬𑀁 𑀲𑀦𑁆𑀥𑀸𑀬 𑀧𑀸𑀴𑀺𑀬𑀁 ‘‘𑀧𑀞𑀫𑁄 𑀯𑀺𑀳𑀸𑀭𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀫𑁆𑀫𑀧𑁆𑀧𑀥𑀸𑀦𑀲𑀤𑀺𑀲𑀜𑁆𑀳𑁂𑀢𑁆𑀣 𑀲𑀫𑁆𑀫𑀧𑁆𑀧𑀥𑀸𑀦𑀁 𑀯𑀼𑀢𑁆𑀢𑀁. 𑀅𑀭𑀺𑀬𑀯𑀺𑀳𑀸𑀭𑁂 𑀘 𑀳𑁂𑀝𑁆𑀞𑀺𑀫𑁂 𑀦𑀺𑀲𑁆𑀲𑀸𑀬 𑀉𑀧𑀭𑀺𑀫𑀕𑁆𑀕𑀸𑀥𑀺𑀕𑀫𑀸𑀬 𑀯𑀸𑀬𑀫𑀦𑁆𑀢𑀲𑁆𑀲 𑀅𑀬𑀁 𑀦𑀬𑁄 𑀮𑀩𑁆𑀪𑀢𑀺. 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀲𑁆𑀲𑁂𑀯 𑀯𑀸 𑀲𑀫𑁆𑀫𑀧𑁆𑀧𑀥𑀸𑀦𑀲𑁆𑀲 𑀦𑀸𑀦𑀸𑀲𑀦𑁆𑀢𑀸𑀦𑀺𑀓𑀲𑁆𑀲 𑀬𑀣𑀸𑀯𑀼𑀢𑁆𑀢𑀯𑀺𑀧𑀲𑁆𑀲𑀦𑀸𑀕𑀫𑀦𑁂𑀦 𑀢𑀁𑀢𑀁𑀓𑀺𑀘𑁆𑀘𑀸𑀤𑀺𑀓𑀲𑁆𑀲 𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀲𑀓𑁆𑀓𑀸 𑀳𑀺 𑀯𑀺𑀧𑀲𑁆𑀲𑀦𑀸𑀕𑀫𑀦𑁂𑀦 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀺𑀢𑀺𑀓𑁆𑀔𑀢𑀸𑀯𑀺𑀲𑁂𑀲𑁄 𑀯𑀺𑀬 𑀯𑀻𑀭𑀺𑀬𑀲𑁆𑀲 𑀓𑀺𑀘𑁆𑀘𑀯𑀺𑀲𑁂𑀲𑀯𑀺𑀲𑀬𑁄 𑀫𑀕𑁆𑀕𑁄 𑀯𑀺𑀜𑁆𑀜𑀸𑀢𑀼𑀁.

𑀢𑀣𑀸 𑀲𑀺𑀔𑀸𑀧𑁆𑀧𑀢𑁆𑀢𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀤𑀺𑀩𑁆𑀩𑀯𑀺𑀳𑀸𑀭𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀁 𑀧𑀞𑀫𑀁 𑀲𑀫𑁆𑀫𑀧𑁆𑀧𑀥𑀸𑀦𑀁 𑀫𑀸𑀦𑀧𑁆𑀧𑀳𑀸𑀦𑀁 𑀉𑀓𑁆𑀓𑀁𑀲𑁂𑀢𑀺, 𑀩𑁆𑀭𑀳𑁆𑀫𑀯𑀺𑀳𑀸𑀭𑀲𑀦𑁆𑀦𑀺𑀲𑁆𑀲𑀬𑁂 𑀉𑀧𑁆𑀧𑀦𑁆𑀦𑀁 𑀤𑀼𑀢𑀺𑀬𑀁 𑀲𑀫𑁆𑀫𑀧𑁆𑀧𑀥𑀸𑀦𑀁 𑀓𑀸𑀫𑀸𑀮𑀬𑀲𑀫𑀼𑀕𑁆𑀖𑀸𑀢𑀁, 𑀅𑀭𑀺𑀬𑀯𑀺𑀳𑀸𑀭𑀲𑀦𑁆𑀦𑀺𑀲𑁆𑀲𑀬𑁂𑀦 𑀉𑀧𑁆𑀧𑀦𑁆𑀦𑀁 𑀢𑀢𑀺𑀬𑀁 𑀲𑀫𑁆𑀫𑀧𑁆𑀧𑀥𑀸𑀦𑀁 𑀅𑀯𑀺𑀚𑁆𑀚𑀸𑀧𑀳𑀸𑀦𑀁, 𑀲𑀦𑁆𑀢𑀯𑀺𑀫𑁄𑀓𑁆𑀔𑀲𑀦𑁆𑀦𑀺𑀲𑁆𑀲𑀬𑁂𑀦 𑀉𑀧𑁆𑀧𑀦𑁆𑀦𑀁 𑀘𑀢𑀼𑀢𑁆𑀣𑀁 𑀲𑀫𑁆𑀫𑀧𑁆𑀧𑀥𑀸𑀦𑀁 𑀪𑀯𑀽𑀧𑀲𑀫𑀁 𑀉𑀓𑁆𑀓𑀁𑀲𑁂𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀞𑀫𑀁 𑀲𑀫𑁆𑀫𑀧𑁆𑀧𑀥𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀧𑀳𑀻𑀦𑀫𑀸𑀦𑁄 𑀦 𑀯𑀺𑀲𑀁𑀯𑀸𑀤𑁂𑀬𑁆𑀬𑀸𑀢𑀺 𑀫𑀸𑀦𑀧𑁆𑀧𑀳𑀸𑀦𑀁 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁 𑀯𑀟𑁆𑀠𑁂𑀢𑀺 𑀯𑀺𑀲𑀁𑀯𑀸𑀤𑀦𑀦𑀺𑀫𑀺𑀢𑁆𑀢𑀲𑁆𑀲𑁂𑀯 𑀅𑀪𑀸𑀯𑀢𑁄. 𑀅𑀧𑁆𑀧𑀳𑀻𑀦𑀫𑀸𑀦𑁄 𑀳𑀺 𑀫𑀸𑀦𑀦𑀺𑀲𑁆𑀲𑀬𑁂𑀦 𑀓𑀺𑀜𑁆𑀘𑀺 𑀯𑀺𑀲𑀁𑀯𑀸𑀤𑁂𑀬𑁆𑀬. 𑀓𑀸𑀫𑀸𑀮𑀬𑁂, 𑀤𑀺𑀝𑁆𑀞𑀸𑀮𑀬𑁂 𑀘 𑀲𑀫𑀼𑀕𑁆𑀖𑀸𑀝𑀺𑀢𑁂 𑀘𑀸𑀕𑀧𑀝𑀺𑀧𑀓𑁆𑀔𑀲𑁆𑀲 𑀅𑀯𑀲𑀭𑁄 𑀏𑀯 𑀦𑀢𑁆𑀣𑀻𑀢𑀺 𑀆𑀮𑀬𑀲𑀫𑀼𑀕𑁆𑀖𑀸𑀢𑁄 𑀘𑀸𑀕𑀸𑀥𑀺𑀝𑁆𑀞𑀸𑀦𑀁 𑀯𑀟𑁆𑀠𑁂𑀢𑀺. 𑀅𑀯𑀺𑀚𑁆𑀚𑀸𑀬 𑀲𑀫𑀼𑀘𑁆𑀙𑀺𑀦𑁆𑀦𑀸𑀬 𑀧𑀜𑁆𑀜𑀸𑀩𑀼𑀤𑁆𑀥𑀺𑀬𑀸 𑀧𑀭𑀺𑀩𑀦𑁆𑀥𑁄𑀯 𑀦𑀢𑁆𑀣𑀺, 𑀪𑀯𑀲𑀗𑁆𑀔𑀸𑀭𑁂𑀲𑀼 𑀑𑀲𑁆𑀲𑀝𑁆𑀞𑁂𑀲𑀼 𑀅𑀪𑀯𑀽𑀧𑀲𑀫𑀲𑁆𑀲 𑀑𑀓𑀸𑀲𑁄𑀯 𑀦𑀢𑁆𑀣𑀻𑀢𑀺 𑀫𑀸𑀦𑀧𑁆𑀧𑀳𑀸𑀦𑀸𑀤𑀬𑁄 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀸𑀤𑀺𑀓𑁂 𑀲𑀁𑀯𑀟𑁆𑀠𑁂𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀫𑀸𑀦𑀧𑁆𑀧𑀳𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀯𑀺𑀲𑀁𑀯𑀸𑀤𑀦𑀲𑀻𑀮𑁄 𑀥𑀫𑁆𑀫𑀘𑁆𑀙𑀦𑁆𑀤𑀩𑀳𑀼𑀮𑁄 𑀙𑀦𑁆𑀤𑀸𑀥𑀺𑀧𑀢𑁂𑀬𑁆𑀬𑀁 𑀲𑀫𑀸𑀥𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀘𑀸𑀕𑀸𑀥𑀺𑀫𑀼𑀢𑁆𑀢𑁄 𑀦𑁂𑀓𑁆𑀔𑀫𑁆𑀫𑀚𑁆𑀛𑀸𑀲𑀬𑁄 𑀅𑀓𑁄𑀲𑀚𑁆𑀚𑀩𑀳𑀼𑀮𑀢𑀸𑀬 𑀯𑀻𑀭𑀺𑀬𑀸𑀥𑀺𑀧𑀢𑁂𑀬𑁆𑀬𑀁, 𑀜𑀸𑀡𑀼𑀢𑁆𑀢𑀭𑁄 𑀘𑀺𑀢𑁆𑀢𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀦𑁆𑀢𑁄 𑀘𑀺𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀁, 𑀯𑀽𑀧𑀲𑀦𑁆𑀢𑀲𑀪𑀸𑀯𑁄 𑀉𑀧𑀲𑀫𑀳𑁂𑀢𑀼𑀪𑀽𑀢𑀸𑀬 𑀯𑀻𑀫𑀁𑀲𑀸𑀬 𑀯𑀻𑀫𑀁𑀲𑀬𑀢𑁄 𑀯𑀻𑀫𑀁𑀲𑀸𑀥𑀺𑀧𑀢𑁂𑀬𑁆𑀬𑀁 𑀲𑀫𑀸𑀥𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀸𑀤𑀺𑀧𑀸𑀭𑀺𑀲𑀼𑀤𑁆𑀥𑀺𑀙𑀦𑁆𑀤𑀲𑀫𑀸𑀥𑀺𑀆𑀤𑀻𑀦𑀁 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁 𑀪𑀸𑀯𑀺𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀥𑀫𑁆𑀫𑀘𑁆𑀙𑀦𑁆𑀤𑀩𑀳𑀼𑀮𑁄 𑀙𑀦𑁆𑀤𑀲𑀫𑀸𑀥𑀺𑀫𑁆𑀳𑀺 𑀞𑀺𑀢𑁄 𑀇𑀝𑁆𑀞𑀸𑀦𑀺𑀝𑁆𑀞𑀙𑀴𑀸𑀭𑀫𑁆𑀫𑀡𑀸𑀧𑀸𑀢𑁂 𑀅𑀦𑀯𑀚𑁆𑀚𑀲𑁂𑀯𑀻 𑀳𑁄𑀢𑀺. 𑀆𑀭𑀤𑁆𑀥𑀯𑀻𑀭𑀺𑀬𑁄 𑀯𑀻𑀭𑀺𑀬𑀲𑀫𑀸𑀥𑀺𑀫𑁆𑀳𑀺 𑀞𑀺𑀢𑁄 𑀲𑀁𑀓𑀺𑀮𑁂𑀲𑀧𑀓𑁆𑀔𑀲𑁆𑀲 𑀲𑀦𑁆𑀢𑀧𑀦𑀯𑀲𑁂𑀦𑁂𑀯 𑀧𑀼𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺. 𑀘𑀺𑀢𑁆𑀢𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀦𑁆𑀢𑁄 𑀘𑀺𑀢𑁆𑀢𑀲𑀫𑀸𑀥𑀺𑀫𑁆𑀳𑀺 𑀞𑀺𑀢𑁄 𑀧𑀜𑁆𑀜𑀸𑀬 𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑀓𑁂 𑀥𑀫𑁆𑀫𑁂 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀩𑀼𑀤𑁆𑀥𑀺𑀁 𑀨𑀸𑀢𑀺𑀁 𑀕𑀫𑀺𑀲𑁆𑀲𑀢𑀺. 𑀯𑀻𑀫𑀁𑀲𑀸𑀲𑀫𑀸𑀥𑀺𑀫𑁆𑀳𑀺 𑀞𑀺𑀢𑁄 𑀥𑀫𑁆𑀫𑀯𑀺𑀘𑀬𑀩𑀳𑀼𑀮𑁄 𑀉𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀯𑀳𑀫𑁂𑀯 𑀧𑀝𑀺𑀧𑀢𑁆𑀢𑀺𑀁 𑀩𑁆𑀭𑀽𑀳𑁂𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀙𑀦𑁆𑀤𑀲𑀫𑀸𑀥𑀺 𑀪𑀸𑀯𑀺𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀤𑀽𑀭𑀸𑀤𑀽𑀭𑀧𑀘𑁆𑀘𑀢𑁆𑀣𑀺𑀓𑀦𑀺𑀯𑀸𑀭𑀡𑁂 𑀩𑀳𑀽𑀧𑀓𑀸𑀭𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀫𑁂𑀢𑁆𑀢𑀸𑀬 𑀯𑀺𑀲𑁂𑀲𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀢𑁄 𑀫𑁂𑀢𑁆𑀢𑀁 𑀯𑀟𑁆𑀠𑁂𑀢𑀺. 𑀢𑀧𑁂𑀦 𑀲𑀁𑀓𑀺𑀮𑁂𑀲𑀥𑀫𑁆𑀫𑁂 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄 𑀯𑀻𑀭𑀺𑀬𑀸𑀥𑀺𑀓𑁄 𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀢𑀁 𑀲𑀸𑀳𑀢𑁆𑀣𑀺𑀓𑀁 𑀓𑀭𑁄𑀢𑀻𑀢𑀺 𑀢𑀧𑁄 𑀓𑀭𑀼𑀡𑀁 𑀲𑀁𑀯𑀟𑁆𑀠𑁂𑀢𑀺. 𑀧𑀜𑁆𑀜𑀸 𑀧𑀭𑀺𑀬𑁄𑀤𑀸𑀧𑀺𑀢𑀸 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀥𑀫𑁆𑀫𑁂 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀻 𑀧𑀳𑀸𑀲𑀦𑀺𑀧𑀸𑀢𑀢𑁄 𑀫𑀼𑀤𑀺𑀢𑀁 𑀭𑀓𑁆𑀔𑀦𑁆𑀢𑀻 𑀧𑀭𑀺𑀩𑁆𑀭𑀽𑀳𑁂𑀢𑀺. 𑀉𑀧𑀥𑀺𑀦𑀺𑀲𑁆𑀲𑀕𑁆𑀕𑁄 𑀧𑀓𑁆𑀔𑀦𑁆𑀤𑁄 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑁄𑀯 𑀲𑀫𑁆𑀫𑀤𑁂𑀯 𑀲𑀢𑁆𑀢𑀲𑀗𑁆𑀔𑀸𑀭𑁂𑀲𑀼 𑀉𑀤𑀸𑀲𑀺𑀦𑁄 𑀳𑁄𑀢𑀻𑀢𑀺 𑀲𑁄 𑀉𑀧𑁂𑀓𑁆𑀔𑀸𑀯𑀺𑀳𑀸𑀭𑀁 𑀧𑀭𑀺𑀯𑀟𑁆𑀠𑁂𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀪𑀸𑀯𑀺𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀬𑁄 𑀬𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑁄, 𑀲𑁄 𑀢𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑀯𑀼𑀢𑁆𑀢𑁄’’𑀢𑀺.

𑁮𑁭. 𑀤𑀺𑀲𑀸𑀪𑀸𑀯𑁂𑀦𑀸𑀢𑀺 𑀦𑀬𑀸𑀦𑀁 𑀤𑀺𑀲𑀸𑀪𑀸𑀯𑁂𑀦𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀅𑀢𑁆𑀣𑁄𑀧𑀺𑀲𑁆𑀲 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀬𑁂𑀦 𑀘𑀢𑀼𑀓𑁆𑀓𑁂𑀦 𑀬𑀲𑁆𑀲 𑀭𑀸𑀕𑀘𑀭𑀺𑀢𑀸𑀤𑀺𑀧𑀼𑀕𑁆𑀕𑀮𑀲𑁆𑀲 𑀯𑁄𑀤𑀸𑀦𑀁 𑀯𑀺𑀲𑀼𑀤𑁆𑀥𑀺. 𑀬𑀣𑀸 𑀅𑀧𑀭𑀺𑀜𑁆𑀜𑀸𑀢𑀸, 𑀅𑀧𑁆𑀧𑀳𑀻𑀦𑀸 𑀘 𑀧𑀞𑀫𑀸𑀳𑀸𑀭𑀯𑀺𑀧𑀮𑁆𑀮𑀸𑀲𑀸𑀤𑀬𑁄 𑀭𑀸𑀕𑀘𑀭𑀺𑀢𑀸𑀤𑀻𑀦𑀁 𑀧𑀼𑀕𑁆𑀕𑀮𑀸𑀦𑀁 𑀉𑀧𑀓𑁆𑀓𑀺𑀮𑁂𑀲𑀸, 𑀏𑀯𑀁 𑀧𑀞𑀫𑀧𑀝𑀺𑀧𑀤𑀸𑀤𑀬𑁄 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀦𑁂𑀲𑀁 𑀯𑀺𑀲𑀼𑀤𑁆𑀥𑀺𑀬𑁄 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺 𑀆𑀳 ‘‘𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯𑀸’’𑀢𑀺.

𑀅𑀣 𑀯𑀸 𑀧𑀼𑀭𑀺𑀫𑀸𑀳𑀺 𑀤𑁆𑀯𑀻𑀳𑀺 𑀧𑀝𑀺𑀧𑀤𑀸𑀳𑀺 𑀲𑀺𑀚𑁆𑀛𑀫𑀸𑀦𑀸 𑀯𑀺𑀧𑀲𑁆𑀲𑀦𑀸 𑀅𑀢𑁆𑀢𑀦𑁄 𑀓𑀺𑀘𑁆𑀘𑀯𑀼𑀢𑁆𑀢𑀺𑀲𑀗𑁆𑀔𑀸𑀢𑀁 𑀧𑀯𑀢𑁆𑀢𑀺𑀤𑀼𑀓𑁆𑀔𑀫𑁆𑀧𑀺 𑀲𑀗𑁆𑀕𑀡𑁆𑀳𑀦𑁆𑀢𑀻 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀩𑀸𑀳𑀼𑀮𑁆𑀮𑀯𑀺𑀲𑁂𑀲𑀢𑁄 𑀤𑀼𑀓𑁆𑀔𑀮𑀓𑁆𑀔𑀡𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀻 ‘‘𑀅𑀧𑁆𑀧𑀡𑀺𑀳𑀺𑀢𑀁 𑀯𑀺𑀫𑁄𑀓𑁆𑀔𑀫𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀸. 𑀢𑀢𑀺𑀬𑀸𑀬 𑀧𑀝𑀺𑀧𑀤𑀸𑀬 𑀲𑀺𑀚𑁆𑀛𑀫𑀸𑀦𑀸 𑀲𑀼𑀔𑀧𑁆𑀧𑀯𑀢𑁆𑀢𑀺𑀓𑀢𑀸𑀬 𑀲𑀫𑁆𑀫𑀤𑁂𑀯 𑀲𑀦𑁆𑀢𑀢𑀺𑀖𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀯𑀺𑀪𑀸𑀯𑁂𑀦𑁆𑀢𑀻 ‘‘𑀅𑀦𑀺𑀫𑀺𑀢𑁆𑀢𑀁 𑀯𑀺𑀫𑁄𑀓𑁆𑀔𑀫𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀸. 𑀘𑀢𑀼𑀢𑁆𑀣𑀸𑀬 𑀧𑀦 𑀧𑀝𑀺𑀧𑀤𑀸𑀬 𑀲𑀺𑀚𑁆𑀛𑀫𑀸𑀦𑀸 𑀲𑀼𑀔𑀧𑁆𑀧𑀯𑀢𑁆𑀢𑀺𑀓𑀢𑀸𑀬, 𑀯𑀺𑀲𑀤𑀜𑀸𑀡𑀢𑀸𑀬 𑀘 𑀲𑀫𑀽𑀳𑀓𑀺𑀘𑁆𑀘𑀸𑀭𑀫𑁆𑀫𑀡𑀖𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀫𑁆𑀫𑀤𑁂𑀯 𑀅𑀦𑀢𑁆𑀢𑀮𑀓𑁆𑀔𑀡𑀁 𑀯𑀺𑀪𑀸𑀯𑁂𑀦𑁆𑀢𑀻 ‘‘𑀲𑀼𑀜𑁆𑀜𑀢𑀁 𑀯𑀺𑀫𑁄𑀓𑁆𑀔𑀫𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀸.

𑀢𑀣𑀸 𑀓𑀸𑀬𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸 𑀯𑀺𑀲𑁂𑀲𑀢𑁄 𑀤𑀼𑀓𑁆𑀔𑀮𑀓𑁆𑀔𑀡𑀁 𑀯𑀺𑀪𑀸𑀯𑁂𑀦𑁆𑀢𑀻, 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀅𑀦𑀺𑀘𑁆𑀘𑀮𑀓𑁆𑀔𑀡𑀁, 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀅𑀦𑀢𑁆𑀢𑀮𑀓𑁆𑀔𑀡𑀦𑁆𑀢𑀺 𑀢𑀸 𑀬𑀣𑀸𑀓𑁆𑀓𑀫𑀁 ‘‘𑀅𑀧𑁆𑀧𑀡𑀺𑀳𑀺𑀢𑀸𑀤𑀺𑀯𑀺𑀫𑁄𑀓𑁆𑀔𑀫𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀸.

𑀲𑀧𑁆𑀧𑀻𑀢𑀺𑀓𑀢𑀸𑀬 𑀅𑀲𑁆𑀲𑀸𑀤𑀸𑀦𑀺 𑀧𑀞𑀫𑀤𑀼𑀢𑀺𑀬𑀚𑁆𑀛𑀸𑀦𑀸𑀦𑀺 𑀯𑀺𑀭𑀚𑁆𑀚𑀦𑀯𑀲𑁂𑀦 𑀯𑀺𑀲𑁂𑀲𑀢𑁄 𑀤𑀼𑀓𑁆𑀔𑀢𑁄 𑀧𑀲𑁆𑀲𑀦𑁆𑀢𑀺𑀬𑀸 𑀯𑀺𑀧𑀲𑁆𑀲𑀦𑀸𑀬 𑀯𑀲𑁂𑀦 ‘‘𑀅𑀧𑁆𑀧𑀡𑀺𑀳𑀺𑀢𑀁 𑀯𑀺𑀫𑁄𑀓𑁆𑀔𑀫𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀸𑀦𑀺. 𑀢𑀢𑀺𑀬𑀁 𑀲𑀦𑁆𑀢𑀲𑀼𑀔𑀢𑀸𑀬 𑀩𑀸𑀳𑀺𑀭𑀓𑀸𑀦𑀁 𑀦𑀺𑀘𑁆𑀘𑀸𑀪𑀺𑀦𑀺𑀯𑁂𑀲𑀯𑀢𑁆𑀣𑀼𑀪𑀽𑀢𑀁 𑀲𑀪𑀸𑀯𑀢𑁄 ‘‘𑀅𑀦𑀺𑀘𑁆𑀘’’𑀦𑁆𑀢𑀺 𑀧𑀲𑁆𑀲𑀦𑁆𑀢𑀺𑀬𑀸 𑀯𑀺𑀧𑀲𑁆𑀲𑀦𑀸𑀬 𑀯𑀲𑁂𑀦 ‘‘𑀅𑀦𑀺𑀫𑀺𑀢𑁆𑀢𑀁 𑀯𑀺𑀫𑁄𑀓𑁆𑀔𑀫𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀁. 𑀘𑀢𑀼𑀢𑁆𑀣𑀁 𑀉𑀧𑀓𑁆𑀓𑀺𑀮𑁂𑀲𑀯𑀺𑀕𑀫𑀸𑀤𑀻𑀳𑀺 𑀧𑀭𑀺𑀲𑀼𑀤𑁆𑀥𑀁 𑀲𑀼𑀲𑀫𑀸𑀳𑀺𑀢𑀁 𑀬𑀣𑀸 𑀧𑀭𑁂𑀲𑀁, 𑀏𑀯𑀁 𑀅𑀢𑁆𑀢𑀦𑁄 𑀘 𑀬𑀣𑀸𑀪𑀽𑀢𑀲𑀪𑀸𑀯𑀸𑀯𑀩𑁄𑀥𑀳𑁂𑀢𑀼𑀢𑀸𑀬 𑀲𑀫𑁆𑀫𑀤𑁂𑀯 ‘‘𑀲𑀼𑀜𑁆𑀜’’𑀦𑁆𑀢𑀺 𑀧𑀲𑁆𑀲𑀦𑁆𑀢𑀺𑀬𑀸 𑀯𑀺𑀧𑀲𑁆𑀲𑀦𑀸𑀬 𑀯𑀲𑁂𑀦 ‘‘𑀲𑀼𑀜𑁆𑀜𑀢𑀁 𑀯𑀺𑀫𑁄𑀓𑁆𑀔𑀫𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀁.

𑀏𑀯𑀁 𑀯𑀺𑀳𑀸𑀭𑀸𑀦𑀁 𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑁂𑀯 𑀯𑀺𑀫𑁄𑀓𑁆𑀔𑀫𑀼𑀔𑀢𑀸, 𑀢𑀢𑁆𑀣 ‘‘𑀤𑀺𑀩𑁆𑀩𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀦𑀁 𑀲𑀦𑁆𑀢𑀲𑀼𑀔𑀢𑀸𑀬 𑀅𑀲𑁆𑀲𑀸𑀤𑀦𑀻𑀬𑀢𑀸’’𑀢𑀺𑀆𑀤𑀺𑀦𑀸 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀫𑀼𑀔𑀢𑀸 𑀬𑁄𑀚𑁂𑀢𑀩𑁆𑀩𑀸. 𑀅𑀭𑀺𑀬𑀯𑀺𑀳𑀸𑀭𑀲𑁆𑀲 𑀧𑀜𑁆𑀜𑀸𑀥𑀺𑀓𑀢𑁆𑀢𑀸 𑀯𑀺𑀲𑁂𑀲𑀢𑁄 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀲𑀦𑁆𑀦𑀺𑀲𑁆𑀲𑀬𑀢𑀸𑀬 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀢𑀸. 𑀆𑀦𑁂𑀜𑁆𑀚𑀯𑀺𑀳𑀸𑀭𑀲𑁆𑀲 𑀲𑀦𑁆𑀢𑀯𑀺𑀫𑁄𑀓𑁆𑀔𑀢𑀸𑀬 𑀅𑀦𑀺𑀘𑁆𑀘𑀮𑀓𑁆𑀔𑀡𑀧𑁆𑀧𑀝𑀺𑀯𑁂𑀥𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑀲𑀪𑀸𑀯𑀢𑁄 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀫𑀼𑀔𑀢𑀸 𑀬𑁄𑀚𑁂𑀢𑀩𑁆𑀩𑀸.

𑀢𑀣𑀸 𑀧𑀼𑀭𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁 𑀲𑀁𑀓𑀺𑀮𑁂𑀲𑀯𑀺𑀲𑀬𑀢𑁆𑀢𑀸 𑀓𑀺𑀮𑁂𑀲𑀤𑀼𑀓𑁆𑀔𑀯𑀻𑀢𑀺𑀓𑁆𑀓𑀫𑀲𑁆𑀲 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀩𑀸𑀳𑀼𑀮𑁆𑀮𑀢𑁆𑀢𑀸 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀫𑀼𑀔𑀢𑀸. 𑀢𑀢𑀺𑀬𑀲𑁆𑀲 𑀅𑀦𑀼𑀧𑁆𑀧𑀦𑁆𑀦𑀓𑀼𑀲𑀮𑀼𑀧𑁆𑀧𑀸𑀤𑀦𑁂𑀦 𑀥𑀫𑁆𑀫𑀸𑀦𑀁 𑀉𑀤𑀬𑀯𑀬𑀯𑀦𑁆𑀢𑀢𑀸𑀯𑀺𑀪𑀸𑀯𑀦𑀢𑁄 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀧𑀸𑀓𑀝𑀦𑁆𑀢𑀺 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀫𑀼𑀔𑀢𑀸. 𑀘𑀢𑀼𑀢𑁆𑀣𑀲𑁆𑀲 𑀉𑀧𑁆𑀧𑀦𑁆𑀦𑀸𑀦𑀁 𑀞𑀺𑀢𑀢𑁆𑀢𑀁 𑀩𑁆𑀬𑀸𑀧𑀸𑀭𑀸𑀧𑀚𑁆𑀚𑀦𑁂𑀦 𑀥𑀫𑁆𑀫𑀸𑀦𑀁 𑀅𑀯𑀲𑀯𑀢𑁆𑀢𑀺𑀢𑀸𑀤𑀻𑀧𑀦𑀢𑁄 𑀅𑀦𑀢𑁆𑀢𑀮𑀓𑁆𑀔𑀡𑀁 𑀲𑀼𑀧𑀸𑀓𑀝𑀦𑁆𑀢𑀺 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀫𑀼𑀔𑀢𑀸.

𑀫𑀸𑀦𑀧𑁆𑀧𑀳𑀸𑀦𑀸𑀮𑀬𑀲𑀫𑀼𑀕𑁆𑀖𑀸𑀢𑀸𑀦𑀁 𑀲𑀳𑀸𑀬𑀢𑀡𑁆𑀳𑀸𑀧𑀳𑀸𑀦𑀢𑀸𑀬 𑀢𑀡𑁆𑀳𑀸𑀧𑀡𑀺𑀥𑀺𑀯𑀺𑀲𑁄𑀥𑀦𑀢𑁄 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀫𑀼𑀔𑀢𑀸. 𑀅𑀯𑀺𑀚𑁆𑀚𑀸𑀧𑀳𑀸𑀦𑀲𑁆𑀲 𑀧𑀜𑁆𑀜𑀸𑀓𑀺𑀘𑁆𑀘𑀸𑀥𑀺𑀓𑀢𑀸𑀬 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀫𑀼𑀔𑀢𑀸. 𑀪𑀯𑀽𑀧𑀲𑀫𑀲𑁆𑀲 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀧𑀝𑀺𑀧𑀓𑁆𑀔𑀢𑀸𑀬 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀫𑀼𑀔𑀢𑀸.

𑀧𑀓𑀢𑀺𑀬𑀸 𑀤𑀼𑀓𑁆𑀔𑀲𑀪𑀸𑀯𑁂 𑀲𑀗𑁆𑀔𑀸𑀭𑁂 𑀜𑀸𑀡𑀲𑀘𑁆𑀘𑁂𑀦 𑀅𑀯𑀺𑀲𑀁𑀯𑀸𑀤𑁂𑀦𑁆𑀢𑁄 𑀤𑀼𑀓𑁆𑀔𑀢𑁄 𑀏𑀯 𑀧𑀲𑁆𑀲𑀢𑀺, 𑀘𑀸𑀕𑀸𑀥𑀺𑀯𑀺𑀫𑀼𑀢𑁆𑀢𑀢𑀸𑀬 𑀢𑀡𑁆𑀳𑀁 𑀯𑀺𑀤𑀽𑀭𑀻𑀓𑀭𑁄𑀦𑁆𑀢𑁄 𑀭𑀸𑀕𑀧𑁆𑀧𑀡𑀺𑀥𑀺𑀁 𑀯𑀺𑀲𑁄𑀲𑁂𑀢𑀻𑀢𑀺 𑀧𑀼𑀭𑀺𑀫𑀁 𑀅𑀥𑀺𑀝𑁆𑀞𑀸𑀦𑀤𑁆𑀯𑀬𑀁 ‘‘𑀅𑀧𑁆𑀧𑀡𑀺𑀳𑀺𑀢𑀁 𑀯𑀺𑀫𑁄𑀓𑁆𑀔𑀫𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀢𑀭𑀲𑁆𑀲 𑀧𑀦 𑀅𑀥𑀺𑀝𑁆𑀞𑀸𑀦𑀤𑁆𑀯𑀬𑀲𑁆𑀲 𑀲𑀼𑀜𑁆𑀜𑀢𑀸𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀫𑀼𑀔𑀢𑀸 𑀯𑀼𑀢𑁆𑀢𑀦𑀬𑀸 𑀏𑀯.

𑀙𑀦𑁆𑀤𑀸𑀥𑀺𑀧𑀢𑁂𑀬𑁆𑀬𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀯𑀺𑀲𑁂𑀲𑀢𑁄 𑀥𑀫𑁆𑀫𑀘𑁆𑀙𑀦𑁆𑀤𑀯𑀢𑁄 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀩𑀳𑀼𑀮𑀲𑁆𑀲 𑀳𑁄𑀢𑀺, 𑀯𑀻𑀭𑀺𑀬𑀸𑀥𑀺𑀧𑀢𑁂𑀬𑁆𑀬𑀸 𑀧𑀦 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀓𑁂 𑀯𑀺𑀦𑁄𑀤𑁂𑀦𑁆𑀢𑀲𑁆𑀲𑀸𑀢𑀺 𑀢𑀤𑀼𑀪𑀬𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀸 𑀯𑀺𑀧𑀲𑁆𑀲𑀦𑀸 𑀯𑀺𑀲𑁂𑀲𑀢𑁄 𑀭𑀸𑀕𑀸𑀤𑀺𑀧𑁆𑀧𑀡𑀺𑀥𑀻𑀦𑀁 𑀯𑀺𑀲𑁄𑀲𑀦𑀢𑁄 ‘‘𑀅𑀧𑁆𑀧𑀡𑀺𑀳𑀺𑀢𑀁 𑀯𑀺𑀫𑁄𑀓𑁆𑀔𑀫𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀸. 𑀘𑀺𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀁, 𑀯𑀻𑀫𑀁𑀲𑀸𑀥𑀺𑀧𑀢𑁂𑀬𑁆𑀬𑀜𑁆𑀘 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀸 𑀬𑀣𑀸𑀓𑁆𑀓𑀫𑀁 𑀅𑀦𑀺𑀘𑁆𑀘𑀸𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀩𑀸𑀳𑀼𑀮𑁆𑀮𑀢𑁄 ‘‘𑀅𑀦𑀺𑀫𑀺𑀢𑁆𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁, 𑀅𑀧𑁆𑀧𑀡𑀺𑀳𑀺𑀢𑀁 𑀯𑀺𑀫𑁄𑀓𑁆𑀔𑀫𑀼𑀔’’𑀦𑁆𑀢𑀺 𑀘 𑀯𑀼𑀢𑁆𑀢𑀸.

𑀅𑀪𑀺𑀚𑁆𑀛𑀸𑀯𑀺𑀦𑀬𑀦𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄, 𑀓𑀸𑀫𑀲𑀗𑁆𑀓𑀧𑁆𑀧𑀸𑀤𑀺𑀯𑀺𑀦𑁄𑀤𑀦𑁄 𑀢𑀧𑁄 𑀘 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀡𑀺𑀥𑀺𑀧𑀝𑀺𑀧𑀓𑁆𑀔𑀢𑁄 𑀅𑀧𑁆𑀧𑀡𑀺𑀳𑀺𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁, 𑀩𑀼𑀤𑁆𑀥𑀺 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀦𑀺𑀫𑀺𑀢𑁆𑀢𑀁, 𑀉𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀧𑀝𑀺𑀧𑀓𑁆𑀔𑁄𑀢𑀺 𑀢𑀤𑀼𑀪𑀬𑀲𑀦𑁆𑀦𑀺𑀲𑁆𑀲𑀬𑀸 𑀯𑀺𑀧𑀲𑁆𑀲𑀦𑀸 𑀬𑀣𑀸𑀓𑁆𑀓𑀫𑀁 ‘‘𑀲𑀼𑀜𑁆𑀜𑀢𑀁, 𑀅𑀦𑀺𑀫𑀺𑀢𑁆𑀢𑀁 𑀯𑀺𑀫𑁄𑀓𑁆𑀔𑀫𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀸.

𑀆𑀲𑀦𑁆𑀦𑀧𑀘𑁆𑀘𑀢𑁆𑀣𑀺𑀓𑀭𑀸𑀕𑀁 𑀧𑀝𑀺𑀩𑀸𑀳𑀦𑁆𑀢𑀻 𑀫𑁂𑀢𑁆𑀢𑀸 𑀭𑀸𑀕𑀧𑀡𑀺𑀥𑀺𑀬𑀸 𑀧𑀝𑀺𑀧𑀓𑁆𑀔𑁄, 𑀓𑀭𑀼𑀡𑀸 𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀸𑀓𑀸𑀭𑀯𑀼𑀢𑁆𑀢𑀺𑀓𑀸 𑀤𑀼𑀓𑁆𑀔𑀲𑀳𑀕𑀢𑀸𑀬 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀯𑀺𑀲𑁂𑀲𑀧𑀘𑁆𑀘𑀬𑁄𑀢𑀺 𑀢𑀤𑀼𑀪𑀬𑀲𑀦𑁆𑀦𑀺𑀲𑁆𑀲𑀬𑀸 𑀯𑀺𑀧𑀲𑁆𑀲𑀦𑀸 ‘‘𑀅𑀧𑁆𑀧𑀡𑀺𑀳𑀺𑀢𑀁 𑀯𑀺𑀫𑁄𑀓𑁆𑀔𑀫𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀸. 𑀫𑀼𑀤𑀺𑀢𑀸 𑀲𑀢𑁆𑀢𑀸𑀦𑀁 𑀫𑁄𑀤𑀕𑁆𑀕𑀳𑀡𑀩𑀳𑀼𑀮𑀸 𑀢𑀤𑀦𑀺𑀘𑁆𑀘𑀢𑀸𑀤𑀲𑁆𑀲𑀦𑀢𑁄 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀯𑀺𑀲𑁂𑀲𑀧𑀘𑁆𑀘𑀬𑁄𑀢𑀺 𑀢𑀦𑁆𑀦𑀺𑀲𑁆𑀲𑀬𑀸 𑀯𑀺𑀧𑀲𑁆𑀲𑀦𑀸 𑀅𑀦𑀺𑀫𑀺𑀢𑁆𑀢𑀁 𑀯𑀺𑀫𑁄𑀓𑁆𑀔𑀫𑀼𑀔𑀁. 𑀉𑀧𑁂𑀓𑁆𑀔𑀸 𑀜𑀸𑀡𑀓𑀺𑀘𑁆𑀘𑀸𑀥𑀺𑀓𑀢𑀸𑀬 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀯𑀺𑀲𑁂𑀲𑀧𑀘𑁆𑀘𑀬𑁄𑀢𑀺 𑀢𑀦𑁆𑀦𑀺𑀲𑁆𑀲𑀬𑀸 𑀯𑀺𑀧𑀲𑁆𑀲𑀦𑀸 ‘‘𑀲𑀼𑀜𑁆𑀜𑀢𑀁 𑀯𑀺𑀫𑁄𑀓𑁆𑀔𑀫𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀸𑀢𑀺 𑀏𑀯𑀫𑁂𑀢𑁆𑀣 𑀧𑀯𑀢𑁆𑀢𑀺𑀆𑀓𑀸𑀭𑀢𑁄 𑀯𑀺𑀧𑀲𑁆𑀲𑀢𑁄 𑀦𑀺𑀲𑁆𑀲𑀬𑀢𑁄, 𑀓𑀺𑀘𑁆𑀘𑀢𑁄 𑀘 𑀪𑀺𑀦𑁆𑀤𑀺𑀢𑁆𑀯𑀸 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺 𑀬𑁄𑀚𑀺𑀢𑀸𑀦𑀻𑀢𑀺.

𑀲𑀫𑀢𑀺𑀓𑁆𑀓𑀫𑀦𑀁 𑀧𑀭𑀺𑀜𑁆𑀜𑀸𑀧𑀳𑀸𑀦𑀜𑁆𑀘. 𑀲𑀧𑀭𑀲𑀦𑁆𑀢𑀸𑀦𑁂𑀢𑀺 𑀅𑀢𑁆𑀢𑀦𑁄, 𑀧𑀭𑁂𑀲𑀜𑁆𑀘 𑀲𑀦𑁆𑀢𑀸𑀦𑁂, 𑀢𑁂𑀦 𑀓𑀸𑀬𑀺𑀓𑁄, 𑀯𑀸𑀘𑀲𑀺𑀓𑁄 𑀘 𑀯𑀺𑀳𑀸𑀭𑁄 ‘‘𑀯𑀺𑀓𑁆𑀓𑀻𑀴𑀺𑀢’’𑀦𑁆𑀢𑀺 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀯𑀺𑀯𑀺𑀥𑁄 𑀳𑀸𑀭𑁄’’𑀢𑀺 𑀓𑀢𑁆𑀯𑀸. 𑀢𑀲𑁆𑀲 𑀧𑀦 𑀯𑀺𑀪𑀸𑀯𑀦𑀸 𑀇𑀥 𑀅𑀥𑀺𑀧𑁆𑀧𑁂𑀢𑀸 𑀦𑀬𑀲𑁆𑀲 𑀪𑀽𑀫𑀺𑀪𑀸𑀯𑀢𑁄. 𑀬𑁂𑀦 𑀧𑀝𑀺𑀧𑀓𑁆𑀔𑀪𑀸𑀯𑁂𑀦. 𑀢𑁂𑀲𑀁 𑀧𑀝𑀺𑀧𑀓𑁆𑀔𑀪𑀸𑀯𑁄𑀢𑀺 𑀢𑁂𑀲𑀁 𑀆𑀳𑀸𑀭𑀸𑀤𑀻𑀦𑀁 𑀧𑀝𑀺𑀧𑀓𑁆𑀔𑀪𑀸𑀯𑁄 𑀧𑀳𑀸𑀢𑀩𑁆𑀩𑀪𑀸𑀯𑁄 𑀧𑀝𑀺𑀧𑀤𑀸𑀤𑀻𑀦𑀁 𑀧𑀝𑀺𑀧𑀓𑁆𑀔𑀪𑀸𑀯𑁄 𑀧𑀳𑀸𑀬𑀓𑀪𑀸𑀯𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 𑀧𑀝𑀺𑀧𑀤𑀸𑀕𑁆𑀕𑀳𑀡𑁂𑀦 𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸. 𑀯𑀺𑀧𑀲𑁆𑀲𑀦𑀸 𑀘 𑀘𑀢𑁆𑀢𑀸𑀭𑁄 𑀆𑀳𑀸𑀭𑁂 𑀧𑀭𑀺𑀚𑀸𑀦𑀦𑁆𑀢𑀻 𑀢𑀧𑁆𑀧𑀝𑀺𑀩𑀤𑁆𑀥𑀙𑀦𑁆𑀤𑀭𑀸𑀕𑀁 𑀧𑀚𑀳𑀢𑀻𑀢𑀺 𑀉𑀚𑀼𑀓𑀫𑁂𑀯 𑀢𑁂𑀲𑀁 𑀧𑀝𑀺𑀧𑀓𑁆𑀔𑀢𑀸, 𑀏𑀯𑀁 𑀛𑀸𑀦𑀸𑀤𑀻𑀦𑀫𑁆𑀧𑀺 𑀉𑀧𑀸𑀤𑀸𑀦𑀸𑀤𑀺𑀧𑀝𑀺𑀧𑀓𑁆𑀔𑀢𑀸 𑀯𑁂𑀤𑀺𑀢𑀩𑁆𑀩𑀸 𑀢𑀤𑀼𑀧𑀤𑁂𑀲𑁂𑀦 𑀯𑀺𑀧𑀲𑁆𑀲𑀦𑀸𑀬 𑀓𑀣𑀺𑀢𑀢𑁆𑀢𑀸. 𑀯𑀺𑀧𑀮𑁆𑀮𑀸𑀲𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀧𑀝𑀺𑀧𑀓𑁆𑀔𑀪𑀸𑀯𑁄 𑀧𑀸𑀓𑀝𑁄 𑀏𑀯. 𑀦𑁆𑀢𑀺 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀁. 𑀯𑀻𑀲𑀢𑀺𑀬𑀸 𑀘𑀢𑀼𑀓𑁆𑀓𑁂𑀳𑀺 𑀯𑀺𑀲𑀪𑀸𑀕𑀢𑁄 𑀯𑀺𑀢𑁆𑀣𑀸𑀭𑁂𑀦 𑀯𑀺𑀪𑀢𑁆𑀢𑀦𑁆𑀢𑀺 𑀢𑀻𑀳𑀺 𑀧𑀤𑁂𑀳𑀺 𑀲𑀗𑁆𑀕𑀳𑁂𑀢𑁆𑀯𑀸 𑀓𑀣𑀺𑀓𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀲𑀗𑁆𑀔𑁂𑀧𑁂𑀦 𑀤𑀲𑁆𑀲𑁂𑀦𑁆𑀢𑁄’’𑀢𑀺.

𑀇𑀦𑁆𑀤𑁆𑀭𑀺𑀬𑀸𑀦𑀦𑁆𑀢𑀺 𑀲𑀤𑁆𑀥𑀸𑀤𑀺𑀇𑀦𑁆𑀤𑁆𑀭𑀺𑀬𑀸𑀦𑀁. 𑀤𑀲𑀦𑁆𑀦𑀁 𑀘𑀢𑀼𑀓𑁆𑀓𑀸𑀦𑀁 𑀦𑀺𑀤𑁆𑀥𑀸𑀭𑀡𑀸𑀢𑀺 𑀬𑁄𑀚𑀦𑀸.

𑁮𑁮. 𑀦𑀺𑀕𑁆𑀕𑀘𑁆𑀙𑀢𑀻𑀢𑀺 𑀦𑀺𑀓𑁆𑀔𑀫𑀢𑀺. 𑀢𑀢𑁄 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑁄 𑀳𑀺 𑀦𑀺𑀕𑁆𑀕𑀘𑁆𑀙𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺. 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑁂𑀢𑀺 ‘‘𑀢𑀡𑁆𑀳𑀸𑀘𑀭𑀺𑀢𑁄 𑀫𑀦𑁆𑀤𑁄’’𑀢𑀺𑀆𑀤𑀺𑀦𑀸 (𑀦𑁂𑀢𑁆𑀢𑀺. 𑁬) 𑀯𑀼𑀢𑁆𑀢𑁂 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑁂. 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀘𑁂𑀢𑁆𑀣 𑀥𑀫𑁆𑀫𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀪𑀽𑀫𑀺𑀁 𑀦𑀺𑀤𑁆𑀤𑀺𑀲𑀺𑀢𑁆𑀯𑀸’’𑀢𑀺. 𑀢𑀢𑁄 𑀏𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀧𑀼𑀕𑁆𑀕𑀮𑀘𑀢𑀼𑀓𑁆𑀓𑀢𑁄 𑀏𑀯. 𑀇𑀢𑀭𑀢𑁆𑀣𑀸𑀧𑀻𑀢𑀺 ‘‘𑀲𑀼𑀔𑀸𑀬…𑀧𑁂… 𑀧𑀼𑀕𑁆𑀕𑀮𑀸’’𑀢𑀺 𑀏𑀢𑁆𑀣𑀸𑀧𑀺. 𑀲𑀸𑀥𑀸𑀭𑀡𑀸𑀬𑀸𑀢𑀺 𑀧𑀞𑀫𑀘𑀢𑀼𑀢𑁆𑀣𑀸𑀳𑀺𑀧𑀺 𑀯𑀺𑀫𑀺𑀲𑁆𑀲𑀸𑀬. 𑀬𑀣𑀸𑀯𑀼𑀢𑁆𑀢𑀸𑀲𑀽𑀢𑀺 𑀤𑀼𑀢𑀺𑀬𑀢𑀢𑀺𑀬𑀸𑀲𑀼.

𑀳𑁂𑀝𑁆𑀞𑀸𑀢𑀺 𑀤𑁂𑀲𑀦𑀸𑀳𑀸𑀭𑀯𑀺𑀪𑀗𑁆𑀕𑀯𑀺𑀘𑀬𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸𑀲𑀼.

𑀏𑀲𑁂𑀯 𑀦𑀬𑁄𑀢𑀺 𑀓𑀼𑀲𑀮𑀫𑀽𑀮𑀸𑀤𑀺𑀤𑁆𑀯𑀸𑀤𑀲𑀢𑀺𑀓𑀲𑀗𑁆𑀕𑀳𑁄 𑀅𑀦𑀯𑀚𑁆𑀚𑀧𑀓𑁆𑀔𑁄. ‘‘𑀯𑁄𑀤𑀸𑀬𑀢𑀺 𑀲𑀼𑀚𑁆𑀛𑀢𑀺 𑀏𑀢𑁂𑀦𑀸𑀢𑀺 𑀯𑁄𑀤𑀸𑀦’’𑀦𑁆𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁧𑁧) 𑀯𑀁 𑀦𑁂𑀢𑀩𑁆𑀩𑀢𑀁 𑀲𑀦𑁆𑀥𑀸𑀬𑀸𑀳.

𑀬𑀣𑀸 𑀳𑀸𑀭𑀉𑀤𑁆𑀤𑁂𑀲𑁄 𑀓𑀢𑁄, 𑀏𑀯𑀁 𑀦𑀬𑀸𑀦𑀁 𑀅𑀓𑀭𑀡𑁂 𑀓𑀸𑀭𑀡𑀁, 𑀧𑀬𑁄𑀚𑀦𑀜𑁆𑀘 𑀯𑀺𑀪𑀸𑀯𑁂𑀢𑀼𑀓𑀸𑀫𑁄 ‘‘𑀓𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀦𑀬𑁂𑀳𑀺 𑀦𑀬𑀦𑁆𑀢𑀭𑁂𑀳𑀺. 𑀲𑀫𑁆𑀪𑀯𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀉𑀧𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁. 𑀢𑀢𑁆𑀣 𑀲𑀫𑁆𑀪𑀯𑁄 𑀅𑀦𑀼𑀤𑁆𑀤𑁂𑀲𑀓𑁆𑀓𑀫𑁂𑀦 𑀦𑀺𑀤𑁆𑀤𑀺𑀲𑀦𑁂 𑀓𑀭𑀡𑀁 𑀤𑀲𑁆𑀲𑀦𑀁 𑀧𑀬𑁄𑀚𑀦𑀁. 𑀬𑀤𑀺 𑀳𑀺 𑀇𑀫𑁂 𑀦𑀬𑀸 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀯𑀲𑁂𑀦 𑀅𑀲𑀁𑀓𑀺𑀡𑁆𑀡𑀸 𑀪𑀯𑁂𑀬𑁆𑀬𑀼𑀁, 𑀳𑀸𑀭𑀸 𑀯𑀺𑀬 𑀉𑀤𑁆𑀤𑁂𑀲𑀸𑀦𑀼𑀓𑁆𑀓𑀫𑁂𑀦𑁂𑀯 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸 𑀲𑀺𑀬𑀼𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀳𑀸𑀭𑀸𑀦𑀁 𑀉𑀤𑁆𑀤𑁂𑀲𑀸𑀯𑀲𑀸𑀦𑁂 ‘‘𑀏𑀢𑁂 𑀲𑁄𑀴𑀲 𑀳𑀸𑀭𑀸 𑀧𑀓𑀺𑀢𑁆𑀢𑀺𑀢𑀸 𑀅𑀢𑁆𑀣𑀢𑁄 𑀅𑀲𑀁𑀓𑀺𑀡𑁆𑀡𑀸’’𑀢𑀺 (𑀦𑁂𑀢𑁆𑀢𑀺. 𑁧).

𑀬𑀲𑁆𑀫𑀸 𑀧𑀦𑁂𑀢𑁂 𑀫𑀽𑀮𑀧𑀤𑁂𑀳𑀺 𑀫𑀽𑀮𑀧𑀤𑀦𑁆𑀢𑀭𑀦𑀺𑀤𑁆𑀥𑀸𑀭𑀡𑁂𑀦 𑀅𑀜𑁆𑀜𑀫𑀜𑁆𑀜𑀁 𑀢𑁂 𑀦𑀺𑀕𑁆𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀏𑀓𑀲𑁆𑀫𑀺𑀁 𑀦𑀺𑀤𑁆𑀤𑀺𑀝𑁆𑀞𑁂 𑀇𑀢𑀭𑁄𑀧𑀺 𑀅𑀢𑁆𑀣𑀢𑁄 𑀦𑀺𑀤𑁆𑀤𑀺𑀝𑁆𑀞𑁄𑀬𑁂𑀯 𑀦𑀸𑀫 𑀳𑁄𑀢𑀻𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 ‘‘𑀉𑀤𑁆𑀤𑁂𑀲𑀸𑀦𑀼𑀓𑁆𑀓𑀫𑁂𑀦 𑀦𑀺𑀤𑁆𑀤𑁂𑀲𑁄 𑀦 𑀓𑀢𑁄’’𑀢𑀺.

𑀇𑀤𑀸𑀦𑀺 𑀢𑀫𑁂𑀯 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀧𑀞𑀫𑀦𑀬𑀢𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀡𑁆𑀳𑀸𑀤𑀺𑀝𑁆𑀞𑀺𑀘𑀭𑀺𑀢𑀯𑀲𑁂𑀦 𑀤𑁆𑀯𑀺𑀥𑀸 𑀧𑀼𑀕𑁆𑀕𑀮𑁂 𑀯𑀺𑀪𑀚𑀺𑀢𑁆𑀯𑀸 𑀢𑁂𑀲𑀁 𑀯𑀲𑁂𑀦 𑀦𑀦𑁆𑀤𑀺𑀬𑀸𑀯𑀝𑁆𑀝𑀦𑀬𑀁 𑀦𑀻𑀳𑀭𑀺𑀢𑁆𑀯𑀸 𑀧𑀼𑀦 𑀢𑁂 𑀏𑀯 𑀢𑀡𑁆𑀳𑀸𑀤𑀺𑀝𑁆𑀞𑀺𑀘𑀭𑀺𑀢𑁂 𑀘𑀢𑀼𑀧𑁆𑀧𑀝𑀺𑀧𑀤𑀸𑀯𑀺𑀪𑀸𑀕𑁂𑀦 𑀯𑀺𑀪𑀚𑀺𑀢𑁆𑀯𑀸 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀲𑁆𑀲 𑀦𑀬𑀲𑁆𑀲 𑀲𑀫𑁆𑀪𑀯𑁄 𑀤𑀲𑁆𑀲𑀺𑀢𑁄, 𑀢𑁂 𑀏𑀯 𑀘𑀢𑀼𑀧𑁆𑀧𑀝𑀺𑀧𑀤𑀸𑀪𑁂𑀤𑀪𑀺𑀦𑁆𑀦𑁂 𑀧𑀼𑀕𑁆𑀕𑀮𑁂 𑀧𑀼𑀦 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀺𑀯𑀺𑀪𑀸𑀕𑁂𑀦 𑀢𑀺𑀥𑀸 𑀯𑀺𑀪𑀚𑀺𑀢𑁆𑀯𑀸 𑀢𑀺𑀧𑀼𑀓𑁆𑀔𑀮𑀲𑁆𑀲 𑀦𑀬𑀲𑁆𑀲 𑀲𑀫𑁆𑀪𑀯𑁄 𑀤𑀲𑁆𑀲𑀺𑀢𑁄. 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀞𑀫𑀦𑀬𑀢𑁄…𑀧𑁂… 𑀦𑀺𑀤𑁆𑀤𑀺𑀝𑁆𑀞𑁄’’𑀢𑀺.

𑀬𑀲𑁆𑀫𑀸 𑀲𑀼𑀪𑀲𑀼𑀔𑀲𑀜𑁆𑀜𑀸𑀳𑀺 𑀮𑁄𑀪𑁄, 𑀦𑀺𑀘𑁆𑀘𑀲𑀜𑁆𑀜𑀸𑀬 𑀤𑁄𑀲𑁄 ‘‘𑀇𑀫𑀺𑀦𑀸 𑀫𑁂 𑀅𑀦𑀢𑁆𑀣𑁄 𑀓𑀢𑁄’’𑀢𑀺 𑀆𑀖𑀸𑀢𑀼𑀧𑁆𑀧𑀢𑁆𑀢𑀺𑀢𑁄, 𑀅𑀢𑁆𑀢𑀲𑀜𑁆𑀜𑀸𑀬 𑀫𑁄𑀳𑁄 𑀕𑀳𑀺𑀢𑁄 𑀳𑁄𑀢𑀺. 𑀢𑀣𑀸 𑀅𑀲𑀼𑀪𑀲𑀜𑁆𑀜𑀸𑀤𑀻𑀳𑀺 𑀅𑀮𑁄𑀪𑀸𑀤𑀬𑁄, 𑀢𑀲𑁆𑀫𑀸 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀯𑀲𑁂𑀦 𑀢𑀢𑀺𑀬𑀦𑀬𑀢𑁄 𑀤𑀼𑀢𑀺𑀬𑀦𑀬𑀲𑁆𑀲 𑀲𑀫𑁆𑀪𑀯𑁄. 𑀬𑀲𑁆𑀫𑀸 𑀧𑀦 𑀮𑁄𑀪𑁂 𑀲𑀢𑀺 𑀲𑀫𑁆𑀪𑀯𑀢𑁄 𑀮𑁄𑀪𑀕𑁆𑀕𑀳𑀡𑁂𑀦𑁂𑀯 𑀤𑁄𑀲𑁄 𑀕𑀬𑁆𑀳𑀢𑀺. 𑀮𑁄𑀪𑁄 𑀘 𑀢𑀡𑁆𑀳𑀸, 𑀫𑁄𑀳𑁄 𑀅𑀯𑀺𑀚𑁆𑀚𑀸, 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀅𑀮𑁄𑀪𑀸𑀤𑁄𑀲𑁂𑀳𑀺 𑀲𑀫𑀣𑁄 𑀕𑀬𑁆𑀳𑀢𑀺, 𑀅𑀫𑁄𑀳𑁂𑀦 𑀯𑀺𑀧𑀲𑁆𑀲𑀦𑀸, 𑀢𑀲𑁆𑀫𑀸 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀯𑀲𑁂𑀦𑁂𑀯 𑀤𑀼𑀢𑀺𑀬𑀦𑀬𑀢𑁄 𑀧𑀞𑀫𑀦𑀬𑀲𑁆𑀲 𑀲𑀫𑁆𑀪𑀯𑁄𑀢𑀺 𑀇𑀫𑀁 𑀯𑀺𑀲𑁂𑀲𑀁 𑀤𑀻𑀧𑁂𑀢𑀼𑀁 𑀉𑀤𑁆𑀤𑁂𑀲𑀸𑀦𑀼𑀓𑁆𑀓𑀫𑁂𑀦 𑀦𑀺𑀤𑁆𑀤𑁂𑀲𑁄 𑀦 𑀓𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀯𑀲𑁂𑀦 𑀧𑀦𑀸’’𑀢𑀺𑀆𑀤𑀺𑀫𑀸𑀳.

𑀢𑁂𑀦𑁂𑀯𑀸𑀢𑀺 𑀢𑀢𑀺𑀬𑀦𑀬𑀢𑁄 𑀤𑀼𑀢𑀺𑀬𑀦𑀬𑀲𑁆𑀲 𑀯𑀺𑀬 𑀤𑀼𑀢𑀺𑀬𑀦𑀬𑀢𑁄 𑀧𑀞𑀫𑀦𑀬𑀲𑁆𑀲𑀧𑀺 𑀲𑀫𑁆𑀪𑀯𑀢𑁄. 𑀏𑀯𑀁 𑀧𑀸𑀴𑀺𑀬𑀁 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀯𑀲𑁂𑀦 𑀆𑀕𑀢𑀁 𑀦𑀺𑀲𑁆𑀲𑀸𑀬 𑀅𑀝𑁆𑀞𑀓𑀣𑀸𑀬𑀁 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀯𑀲𑁂𑀦𑁂𑀯 𑀦𑀬𑀦𑀺𑀕𑁆𑀕𑀫𑁄 𑀦𑀺𑀤𑁆𑀥𑀸𑀭𑀺𑀢𑁄𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀬𑀤𑀺 𑀏𑀯𑀦𑁆𑀢𑀺 𑀧𑀸𑀴𑀺𑀬𑀁 𑀆𑀕𑀢𑀧𑁆𑀧𑀓𑀸𑀭𑀢𑁄 𑀅𑀜𑁆𑀜𑁂𑀦𑀧𑀺 𑀧𑀓𑀸𑀭𑁂𑀦 𑀦𑀬𑀸 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸, 𑀏𑀯𑀁 𑀲𑀦𑁆𑀢𑁂 𑀬𑀣𑀸 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀯𑀲𑁂𑀦 𑀧𑀞𑀫𑀦𑀬𑀢𑁄 𑀢𑀢𑀺𑀬𑀦𑀬𑀲𑁆𑀲, 𑀢𑀢𑀺𑀬𑀦𑀬𑀢𑁄 𑀤𑀼𑀢𑀺𑀬𑀦𑀬𑀲𑁆𑀲 𑀲𑀫𑁆𑀪𑀯𑁄 𑀤𑀲𑁆𑀲𑀺𑀢𑁄, 𑀏𑀯𑀁 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀯𑀲𑁂𑀦𑁂𑀯 𑀧𑀞𑀫𑀦𑀬𑀢𑁄 𑀢𑀢𑀺𑀬𑀦𑀬𑀤𑀼𑀢𑀺𑀬𑀦𑀬𑀸𑀦𑀁, 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀯𑀲𑁂𑀦𑁂𑀯 𑀤𑀼𑀢𑀺𑀬𑀦𑀬𑀢𑁄 𑀢𑀢𑀺𑀬𑀦𑀬𑀲𑁆𑀲 𑀲𑀫𑁆𑀪𑀯𑁄 𑀤𑀻𑀧𑁂𑀢𑀩𑁆𑀩𑁄𑀢𑀺 𑀇𑀫𑀫𑀢𑁆𑀣𑀫𑀸𑀳 ‘‘𑀤𑁆𑀯𑁂 𑀳𑀼𑀢𑁆𑀯𑀸…𑀧𑁂… 𑀲𑀺𑀬𑀸’’𑀢𑀺.

𑀢𑀢𑁆𑀣 𑀦𑀬𑁄𑀢𑀺 𑀧𑀘𑁆𑀙𑀸 𑀯𑀼𑀢𑁆𑀢𑀤𑀼𑀢𑀺𑀬𑀦𑀬𑁄. 𑀅𑀢𑁆𑀣𑀢𑁄𑀢𑀺 𑀅𑀢𑁆𑀣𑀸𑀧𑀢𑁆𑀢𑀺𑀢𑁄, 𑀅𑀢𑁆𑀣𑀢𑁄 𑀮𑀩𑁆𑀪𑀫𑀸𑀦𑀢𑁆𑀢𑀸 𑀏𑀯 𑀲𑀭𑀽𑀧𑁂𑀦 𑀦 𑀓𑀣𑀺𑀢𑁄𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀢𑀁 𑀅𑀢𑁆𑀣𑀸𑀧𑀢𑁆𑀢𑀺𑀁 𑀏𑀓𑀦𑁆𑀢𑀺𑀓𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑀼𑀧𑁆𑀧𑀯𑁂𑀲𑁄 𑀇𑀘𑁆𑀙𑀺𑀢𑁄 𑀢𑀁𑀢𑀁𑀦𑀬𑀫𑀽𑀮𑀧𑀤𑀸𑀦𑀁 𑀦𑀬𑀦𑁆𑀢𑀭𑀫𑀽𑀮𑀧𑀤𑁂𑀲𑀼 𑀲𑀫𑀯𑀭𑀼𑀚𑁆𑀛𑀦𑀢𑁄. 𑀢𑀣𑀸 𑀳𑀺 ‘‘𑀬𑀢𑁆𑀣 𑀲𑀩𑁆𑀩𑁄 𑀅𑀓𑀼𑀲𑀮𑀧𑀓𑁆𑀔𑁄 𑀲𑀗𑁆𑀕𑀳𑀁 𑀲𑀫𑁄𑀲𑀭𑀡𑀁 𑀕𑀘𑁆𑀙𑀢𑀺, 𑀬𑀢𑁆𑀣 𑀲𑀩𑁆𑀩𑁄 𑀓𑀼𑀲𑀮𑀧𑀓𑁆𑀔𑁄 𑀲𑀗𑁆𑀕𑀳𑀁 𑀲𑀫𑁄𑀲𑀭𑀡𑀁 𑀕𑀘𑁆𑀙𑀢𑀻’’𑀢𑀺 (𑀦𑁂𑀢𑁆𑀢𑀺. 𑁩) 𑀘 𑀯𑀼𑀢𑁆𑀢𑀁. 𑀅𑀬𑀜𑁆𑀘 𑀅𑀢𑁆𑀣𑁄𑀢𑀺 ‘‘𑀦𑀬𑀸𑀦𑀁 𑀅𑀜𑁆𑀜𑀫𑀜𑁆𑀜𑀅𑀦𑀼𑀧𑁆𑀧𑀯𑁂𑀲𑁄 𑀦𑀺𑀕𑁆𑀕𑀫𑁄’’𑀢𑀺 𑀅𑀬𑀁 𑀤𑀼𑀯𑀺𑀥𑁄 𑀅𑀢𑁆𑀣𑁄. 𑀧𑀺𑀝𑀓𑀸𑀦𑀁 𑀅𑀢𑁆𑀣𑀓𑀣𑀦𑀁 𑀧𑁂𑀝𑀓𑀁, 𑀲𑁄 𑀏𑀯 𑀉𑀧𑀤𑁂𑀲𑁄𑀢𑀺 𑀧𑁂𑀝𑀓𑁄𑀧𑀤𑁂𑀲𑁄, 𑀉𑀧𑀤𑁂𑀲𑀪𑀽𑀢𑀸 𑀧𑀭𑀺𑀬𑀢𑁆𑀢𑀺𑀲𑀁𑀯𑀡𑁆𑀡𑀦𑀸𑀢𑀺 𑀅𑀢𑁆𑀣𑁄.

𑀆𑀤𑀺𑀢𑁄 𑀧𑀝𑁆𑀞𑀸𑀬𑀸𑀢𑀺 𑀦𑀬𑀸𑀦𑀁 𑀅𑀜𑁆𑀜𑀫𑀜𑁆𑀜𑀅𑀦𑀼𑀧𑁆𑀧𑀯𑁂𑀲𑀦𑀺𑀕𑁆𑀕𑀫𑀫𑀢𑁆𑀢𑀫𑁂𑀯 𑀅𑀯𑀺𑀪𑀸𑀯𑁂𑀢𑁆𑀯𑀸 𑀦𑀬𑀯𑀺𑀘𑀸𑀭𑀲𑁆𑀲 𑀧𑀞𑀫𑀸𑀯𑀬𑀯𑀢𑁄 𑀧𑀪𑀼𑀢𑀺 𑀯𑀺𑀪𑀸𑀯𑀦𑀸 𑀤𑀻𑀧𑀦𑀸 𑀧𑀓𑀸𑀲𑀦𑀸.

𑀤𑁄𑀲𑀤𑀺𑀝𑁆𑀞𑀻𑀢𑀺 𑀅𑀧𑁆𑀧𑀲𑁆𑀲𑀸𑀤𑀢𑀸𑀤𑀺𑀤𑁄𑀲𑀕𑀸𑀳𑀺𑀓𑀤𑀺𑀝𑁆𑀞𑀻, 𑀤𑁄𑀲𑀤𑀲𑁆𑀲𑀺𑀦𑁄𑀢𑀺 𑀅𑀢𑁆𑀣𑁄. 𑀢𑁂 𑀳𑀺 𑀅𑀲𑀫𑀽𑀳𑀢𑀸𑀦𑀼𑀲𑀬𑀸, 𑀓𑀸𑀫𑁂𑀲𑀼 𑀘 𑀆𑀤𑀻𑀦𑀯𑀤𑀲𑁆𑀲𑀺𑀦𑁄. 𑀇𑀤𑀜𑁆𑀳𑀺 𑀦𑁂𑀲𑀁 𑀅𑀗𑁆𑀕𑀤𑁆𑀯𑀬𑀁 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀲𑁆𑀲 𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀦𑀢𑁆𑀣𑀺 𑀅𑀢𑁆𑀣𑁄𑀢𑀺 𑀬𑁄 𑀭𑀸𑀕𑀸𑀪𑀺𑀪𑀽𑀢𑁂𑀳𑀺 𑀅𑀦𑁆𑀥𑀩𑀸𑀮𑁂𑀳𑀺 𑀧𑀭𑀺𑀓𑀧𑁆𑀧𑀺𑀢𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀓𑀸𑀫𑁂𑀳𑀺 𑀅𑀢𑁆𑀣𑁄, 𑀲𑁄 𑀫𑀥𑀼𑀩𑀺𑀦𑁆𑀤𑀼𑀕𑀺𑀤𑁆𑀥𑀲𑁆𑀲 𑀫𑀥𑀼𑀮𑀺𑀢𑁆𑀢𑀲𑀢𑁆𑀣𑀥𑀸𑀭𑀸𑀯𑀮𑁂𑀳𑀦𑀲𑀤𑀺𑀲𑁄 𑀅𑀧𑁆𑀧𑀲𑁆𑀲𑀸𑀤𑁄 𑀩𑀳𑀼𑀤𑀼𑀓𑁆𑀔𑁄 𑀩𑀳𑀼𑀧𑀸𑀬𑀸𑀲𑁄 𑀩𑀳𑀼𑀆𑀤𑀻𑀦𑀯𑁄 𑀲𑀯𑀺𑀖𑀸𑀢𑁄 𑀲𑀧𑀭𑀺𑀴𑀸𑀳𑁄 𑀲𑀫𑁆𑀧𑀭𑀸𑀬𑀺𑀓𑁄 𑀢𑀣𑁂𑀯𑀸𑀢𑀺 𑀲𑀩𑁆𑀩𑀤𑀸𑀧𑀺 𑀯𑀺𑀜𑁆𑀜𑀽𑀚𑀸𑀢𑀺𑀓𑀲𑁆𑀲 𑀓𑀸𑀫𑁂𑀳𑀺 𑀧𑀬𑁄𑀚𑀦𑀁 𑀦 𑀯𑀺𑀚𑁆𑀚𑀢𑀺. 𑀅𑀦𑀚𑁆𑀛𑁄𑀲𑀺𑀢𑀸𑀢𑀺 𑀅𑀦𑀪𑀺𑀪𑀽𑀢𑀸 𑀯𑀺𑀳𑀭𑀦𑁆𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑀲𑀼𑀔𑀸 𑀧𑀝𑀺𑀧𑀤𑀸𑀢𑀺 𑀢𑁂𑀦 𑀫𑀦𑁆𑀤𑀓𑀺𑀮𑁂𑀲𑀪𑀸𑀯𑁂𑀦 𑀢𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀅𑀓𑀺𑀘𑁆𑀙𑁂𑀦 𑀲𑀺𑀚𑁆𑀛𑀫𑀸𑀦𑀸 𑀯𑀺𑀧𑀲𑁆𑀲𑀦𑀸 𑀧𑀝𑀺𑀧𑀤𑀸 ‘‘𑀲𑀼𑀔𑀸 𑀧𑀝𑀺𑀧𑀤𑀸’’𑀢𑀺 𑀯𑀼𑀘𑁆𑀘𑀢𑀺. 𑀅𑀚𑁆𑀛𑁄𑀲𑀺𑀢𑀸𑀢𑀺 𑀅𑀪𑀺𑀦𑀺𑀯𑀺𑀝𑁆𑀞𑀸. 𑀇𑀫𑁂 𑀲𑀩𑁆𑀩𑁂 𑀲𑀢𑁆𑀢𑀸𑀢𑀺 𑀇𑀫𑁂 𑀢𑀡𑁆𑀳𑀸𑀤𑀺𑀝𑁆𑀞𑀺𑀘𑀭𑀺𑀢𑀪𑀸𑀯𑁂𑀦 𑀤𑁆𑀯𑀺𑀥𑀸 𑀯𑀼𑀢𑁆𑀢𑀸 𑀅𑀧𑀭𑀺𑀫𑀸𑀡𑀧𑁆𑀧𑀪𑁂𑀤𑀸 𑀲𑀩𑁆𑀩𑁂𑀧𑀺 𑀧𑀝𑀺𑀧𑀚𑁆𑀚𑀦𑁆𑀢𑀸 𑀲𑀢𑁆𑀢𑀸.

𑀲𑀼𑀔𑁂𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀻𑀢𑀺 𑀓𑀺𑀮𑁂𑀲𑁂 𑀅𑀓𑀺𑀘𑁆𑀙𑁂𑀦 𑀧𑀚𑀳𑀦𑁆𑀢𑀺. ‘‘𑀇𑀫𑀸 𑀘𑀢𑀲𑁆𑀲𑁄 𑀧𑀝𑀺𑀧𑀤𑀸’’𑀢𑀺𑀆𑀤𑀺 𑀧𑀝𑀺𑀧𑀤𑀸𑀦𑀁 𑀏𑀢𑁆𑀢𑀸𑀯𑀢𑀸𑀬𑀁, 𑀯𑀺𑀲𑀬𑀪𑀸𑀯𑀓𑀺𑀘𑁆𑀘𑁂𑀲𑀼 𑀘 𑀩𑁆𑀬𑀪𑀺𑀘𑀸𑀭𑀸𑀪𑀸𑀯𑀤𑀲𑁆𑀲𑀦𑀁. 𑀅𑀬𑀁 𑀧𑀝𑀺𑀧𑀤𑀸𑀢𑀺 𑀦𑀺𑀕𑀫𑀦𑀁, 𑀅𑀬𑀁 𑀧𑀝𑀺𑀧𑀤𑀸 𑀬𑀸𑀬 𑀯𑀲𑁂𑀦 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀲𑁆𑀲 𑀦𑀬𑀲𑁆𑀲 𑀪𑀽𑀫𑀺𑀤𑀲𑁆𑀲𑀦𑀢𑁆𑀣𑀁 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀦𑀺𑀤𑁆𑀥𑀸𑀭𑀺𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑀢𑀼𑀓𑁆𑀓𑀫𑀕𑁆𑀕𑁂𑀦 𑀓𑀺𑀮𑁂𑀲𑁂 𑀦𑀺𑀤𑁆𑀤𑀺𑀲𑀢𑀻𑀢𑀺 𑀅𑀦𑀦𑁆𑀢𑀭𑀁 𑀯𑀓𑁆𑀔𑀫𑀸𑀦𑁂𑀦 𑀆𑀳𑀸𑀭𑀸𑀤𑀺𑀘𑀢𑀼𑀓𑁆𑀓𑀫𑀕𑁆𑀕𑁂𑀦 𑀤𑀲𑀯𑀢𑁆𑀣𑀼𑀓𑁂 𑀓𑀺𑀮𑁂𑀲𑀲𑀫𑀽𑀳𑁂 𑀦𑀺𑀤𑁆𑀤𑀺𑀲𑀢𑀺. 𑀘𑀢𑀼𑀓𑁆𑀓𑀫𑀕𑁆𑀕𑁂𑀦 𑀅𑀭𑀺𑀬𑀥𑀫𑁆𑀫𑁂𑀲𑀼 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸𑀢𑀺 𑀢𑀧𑁆𑀧𑀝𑀺𑀧𑀓𑁆𑀔𑁂𑀦 𑀧𑀝𑀺𑀧𑀤𑀸𑀤𑀺𑀘𑀢𑀼𑀓𑁆𑀓𑀫𑀕𑁆𑀕𑁂𑀦 𑀅𑀭𑀺𑀬𑀥𑀫𑁆𑀫𑁂𑀲𑀼 𑀩𑁄𑀥𑀺𑀧𑀓𑁆𑀔𑀺𑀬𑁂𑀲𑀼 𑀯𑀺𑀲𑀬𑀪𑀽𑀢𑁂𑀲𑀼 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀸.

𑀇𑀤𑀜𑁆𑀘 𑀧𑀫𑀸𑀡𑀁 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸𑀢𑀺 𑀇𑀫𑁂𑀲𑀁 𑀯𑀺𑀧𑀮𑁆𑀮𑀸𑀲𑀸𑀦𑀁 𑀧𑀯𑀢𑁆𑀢𑀺𑀬𑀸 𑀧𑀫𑀸𑀡𑀁, 𑀬𑀤𑀺𑀤𑀁 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀸𑀯𑀤𑁂𑀯 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀧𑀭𑀺𑀜𑁆𑀜𑀁 𑀦 𑀕𑀘𑁆𑀙𑀦𑁆𑀢𑀺, 𑀢𑀸𑀯𑀤𑁂𑀯 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑁂 𑀯𑀺𑀪𑀚𑀦𑁆𑀢𑀺. 𑀬𑀸𑀯𑀤𑁂𑀯 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸 𑀅𑀧𑁆𑀧𑀳𑀻𑀦𑀸, 𑀢𑀸𑀯𑀤𑁂𑀯 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺 𑀧𑀭𑀺𑀩𑁆𑀭𑀽𑀳𑀦𑁆𑀢𑀻𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣 𑀬𑀣𑀸𑀭𑀳𑀁 𑀯𑀢𑁆𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀏𑀯𑀁 𑀇𑀫𑀸𑀦𑀺 𑀲𑀩𑁆𑀩𑀸𑀦𑀺 𑀤𑀲 𑀧𑀤𑀸𑀦𑀻’’𑀢𑀺. ‘‘𑀬𑁄𑀚𑁂𑀢𑀩𑁆𑀩𑀸𑀦𑀻’’𑀢𑀺 𑀘 𑀯𑀘𑀦𑀲𑁂𑀲𑁄.

‘‘𑀅𑀪𑀺𑀚𑁆𑀛𑀸𑀬 𑀕𑀦𑁆𑀣𑀢𑀻’’𑀢𑀺 𑀇𑀫𑀺𑀦𑀸 𑀅𑀪𑀺𑀚𑁆𑀛𑀸𑀬𑀦𑀫𑁂𑀯 𑀕𑀦𑁆𑀣𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀧𑀧𑀜𑁆𑀘𑁂𑀦𑁆𑀢𑁄𑀢𑀺 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄.

𑀯𑀺𑀧𑁆𑀧𑀝𑀺𑀲𑀸𑀭𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑁄 𑀓𑀺𑀮𑁂𑀲𑀸𑀦𑀁 𑀆𑀲𑀯𑀦𑀦𑁆𑀢𑀺 𑀆𑀳 ‘‘𑀆𑀲𑀯𑀦𑁆𑀢𑀻’’𑀢𑀺. 𑀓𑀺𑀁 𑀯𑀺𑀧𑁆𑀧𑀝𑀺𑀲𑀸𑀭𑀸𑀢𑀺 𑀢𑁂𑀦 𑀓𑀺𑀮𑁂𑀲𑀸𑀦𑀁 𑀯𑀻𑀢𑀺𑀓𑁆𑀓𑀫𑀯𑀢𑁆𑀣𑀼𑀁 𑀯𑀤𑀢𑀺. 𑀬𑀲𑁆𑀫𑀸 𑀅𑀧𑁆𑀧𑀳𑀻𑀦𑀸𑀦𑀼𑀲𑀬𑀲𑁆𑀲𑁂𑀯 𑀯𑀺𑀧𑁆𑀧𑀝𑀺𑀲𑀸𑀭𑀸, 𑀦 𑀇𑀢𑀭𑀲𑁆𑀲, 𑀢𑀲𑁆𑀫𑀸 ‘‘𑀬𑁂 𑀯𑀺𑀧𑁆𑀧𑀝𑀺𑀲𑀸𑀭𑀸, 𑀢𑁂 𑀅𑀦𑀼𑀲𑀬𑀸’’𑀢𑀺 𑀯𑀼𑀢𑁆𑀢𑀁. 𑀧𑀤𑀤𑁆𑀯𑀬𑁂𑀦𑀧𑀺 𑀨𑀮𑀽𑀧𑀘𑀸𑀭𑁂𑀦 𑀓𑀸𑀭𑀡𑀁 𑀯𑀼𑀢𑁆𑀢𑀁.

𑀧𑀞𑀫𑁂𑀦 𑀧𑀤𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀤𑀲𑀲𑀼 𑀲𑀼𑀢𑁆𑀢𑀧𑀤𑁂𑀲𑀼 𑀧𑀞𑀫𑁂𑀦 𑀧𑀤𑁂𑀦. 𑀧𑀞𑀫𑀸𑀬 𑀤𑀺𑀲𑀸𑀬𑀸𑀢𑀺 𑀢𑀤𑀢𑁆𑀣𑀲𑀗𑁆𑀔𑀸𑀢𑀸𑀬 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀲𑁆𑀲 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀧𑀞𑀫𑀸𑀬 𑀤𑀺𑀲𑀸𑀬.

𑀇𑀢𑀻𑀢𑀺 𑀏𑀯𑀁, 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀓𑀼𑀲𑀮𑀸𑀓𑀼𑀲𑀮𑀸𑀦𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀅𑀦𑀯𑀚𑁆𑀚𑀲𑀸𑀯𑀚𑁆𑀚𑀥𑀫𑁆𑀫𑀸𑀦𑀁. 𑀧𑀓𑁆𑀔𑀧𑀝𑀺𑀧𑀓𑁆𑀔𑀯𑀲𑁂𑀦𑀸𑀢𑀺 𑀯𑁄𑀤𑀸𑀦𑀧𑀓𑁆𑀔𑀢𑀧𑁆𑀧𑀝𑀺𑀧𑀓𑁆𑀔𑀯𑀲𑁂𑀦. 𑀬𑁄𑀚𑀦𑀸𑀢𑀺 𑀧𑀞𑀫𑀤𑀺𑀲𑀸𑀤𑀺𑀪𑀸𑀯𑁂𑀦 𑀬𑀼𑀢𑁆𑀢𑁂 𑀓𑀢𑁆𑀯𑀸 𑀫𑀦𑀲𑀸𑀦𑀼𑀧𑁂𑀓𑁆𑀔𑀦𑀸. ‘‘𑀫𑀦𑀲𑀸 𑀯𑁄𑀮𑁄𑀓𑀬𑀢𑁂’’𑀢𑀺 (𑀦𑁂𑀢𑁆𑀢𑀺. 𑁪) 𑀳𑀺 𑀯𑀼𑀢𑁆𑀢𑀁.

𑀢𑀲𑁆𑀲𑀸𑀢𑀺 𑀤𑀺𑀲𑀸𑀮𑁄𑀓𑀦𑀲𑁆𑀲. 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀁 𑀧𑀭𑀺𑀬𑁄𑀲𑀸𑀦𑀢𑀸 𑀇𑀦𑁆𑀤𑁆𑀭𑀺𑀬𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀬𑁂𑀲𑀜𑁆𑀳𑀺 𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑀲𑁂𑀦 𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀦𑀺 𑀲𑀺𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀯𑀲𑁂𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀁 𑀧𑀭𑀺𑀬𑁄𑀲𑀸𑀦𑀢𑀸. 𑀢𑀢𑁆𑀣 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀲𑁄𑀢𑀸𑀧𑀦𑁆𑀦𑁄 𑀳𑀺 𑀲𑀤𑁆𑀥𑀸𑀬 𑀧𑀭𑀺𑀧𑀽𑀭𑀺𑀓𑀸𑀭𑀻. 𑀲𑀓𑀤𑀸𑀕𑀸𑀫𑀺𑀨𑀮𑁂 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀲𑀓𑀤𑀸𑀕𑀸𑀫𑀻 𑀳𑀺 𑀆𑀭𑀤𑁆𑀥𑀯𑀻𑀭𑀺𑀬𑁄 𑀉𑀧𑀭𑀺𑀫𑀕𑁆𑀕𑀸𑀥𑀺𑀕𑀫𑀸𑀬. 𑀅𑀦𑀸𑀕𑀸𑀫𑀺𑀨𑀮𑁂 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀅𑀦𑀸𑀕𑀸𑀫𑀻 𑀲𑀫𑀸𑀥𑀺𑀲𑁆𑀫𑀺𑀁 𑀧𑀭𑀺𑀧𑀽𑀭𑀺𑀓𑀸𑀭𑀻. 𑀅𑀕𑁆𑀕𑀨𑀮𑁂 𑀅𑀭𑀳𑀢𑁆𑀢𑁂 𑀲𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀜𑁆𑀘 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀅𑀭𑀳𑀸 𑀳𑀺 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑁄, 𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑁄 𑀘𑀸𑀢𑀺.

𑀅𑀧𑀭𑁂 𑀧𑀦𑀸𑀳𑀼 𑁋 𑀲𑀤𑁆𑀥𑀸𑀩𑀮𑁂𑀦 𑀲𑀼𑀪𑀲𑀜𑁆𑀜𑀸𑀬 𑀧𑀳𑀸𑀦𑀁. 𑀲𑀤𑁆𑀤𑀳𑀦𑁆𑀢𑁄 𑀳𑀺 𑀧𑀝𑀺𑀓𑁆𑀓𑀽𑀮𑀫𑀦𑀲𑀺𑀓𑀸𑀭𑁂 𑀓𑀫𑁆𑀫𑀁 𑀓𑀭𑁄𑀢𑀺. 𑀯𑀻𑀭𑀺𑀬𑀩𑀮𑁂𑀦 𑀲𑀼𑀔𑀲𑀜𑁆𑀜𑀸𑀬 𑀧𑀳𑀸𑀦𑀁. 𑀯𑀻𑀭𑀺𑀬𑀯𑀸 𑀳𑀺 𑀲𑀼𑀔𑀲𑁆𑀲𑀸𑀤𑀁 𑀅𑀪𑀺𑀪𑀯𑀺𑀢𑁆𑀯𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀫𑀦𑀼𑀬𑀼𑀜𑁆𑀚𑀢𑀺. 𑀲𑀫𑀸𑀥𑀺𑀩𑀮𑁂𑀦 𑀦𑀺𑀘𑁆𑀘𑀲𑀜𑁆𑀜𑀸𑀬 𑀧𑀳𑀸𑀦𑀁. 𑀲𑀫𑀸𑀳𑀺𑀢𑁄 𑀳𑀺 𑀲𑀗𑁆𑀔𑀸𑀭𑀸𑀦𑀁 𑀉𑀤𑀬𑀩𑁆𑀩𑀬𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀅𑀦𑀺𑀘𑁆𑀘𑀲𑀜𑁆𑀜𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀜𑀸𑀩𑀮𑁂𑀦 𑀅𑀢𑁆𑀢𑀲𑀜𑁆𑀜𑀸𑀬 𑀧𑀳𑀸𑀦𑀁. 𑀧𑀜𑁆𑀜𑀯𑀸 𑀳𑀺 𑀲𑀗𑁆𑀔𑀸𑀭𑀸𑀦𑀁 𑀅𑀯𑀲𑀯𑀢𑁆𑀢𑀺𑀢𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀅𑀢𑁆𑀢𑀲𑀼𑀜𑁆𑀜𑀢𑀁 𑀧𑀝𑀺𑀯𑀺𑀚𑁆𑀛𑀢𑀺. 𑀲𑀢𑀺 𑀧𑀦 𑀲𑀩𑁆𑀩𑀢𑁆𑀣𑀸𑀧𑀺 𑀇𑀘𑁆𑀙𑀺𑀢𑀩𑁆𑀩𑀸. 𑀢𑁂𑀦𑀸𑀳 ‘‘𑀲𑀢𑀺𑀁 𑀘 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀢𑁆𑀣𑀺𑀓𑀁 𑀯𑀤𑀸𑀫𑀻’’𑀢𑀺 (𑀲𑀁. 𑀦𑀺. 𑁫.𑁨𑁩𑁪; 𑀫𑀺. 𑀧. 𑁨.𑁧.𑁧𑁩). 𑀏𑀯𑀁 𑀘𑀢𑀼𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀬𑀻𑀦𑀁 𑀘𑀢𑀼𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀸𑀭𑀺𑀧𑀽𑀭𑀺𑀝𑁆𑀞𑀸𑀦𑀁 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀘𑀢𑀼𑀯𑀺𑀧𑀮𑁆𑀮𑀸𑀲𑀫𑀼𑀔𑀸𑀦𑀁 𑀘𑀢𑀼𑀦𑁆𑀦𑀁 𑀤𑀺𑀲𑀸𑀦𑀁 𑀧𑀭𑀺𑀬𑁄𑀲𑀸𑀦𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺.

‘‘𑀮𑁄𑀪𑁄 𑀅𑀓𑀼𑀲𑀮𑀫𑀽𑀮’’𑀦𑁆𑀢𑀺𑀆𑀤𑀺 𑀮𑁄𑀪𑀸𑀤𑀻𑀦𑀁 𑀳𑁂𑀢𑀼𑀨𑀮𑀪𑀸𑀯𑁂𑀦 𑀲𑀫𑁆𑀧𑀬𑀼𑀢𑁆𑀢𑀢𑀸𑀬 𑀤𑀲𑁆𑀲𑀦𑀁.

𑀢𑀢𑁆𑀣 𑀫𑀦𑀸𑀧𑀺𑀓𑁂𑀦𑀸𑀢𑀺 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀫𑀦𑀸𑀧𑀺𑀓𑁂𑀦𑀸𑀧𑀺 𑀳𑀺 𑀆𑀭𑀫𑁆𑀫𑀡𑁂𑀦 𑀯𑀺𑀧𑀭𑀺𑀬𑁂𑀲𑀯𑀲𑁂𑀦 𑀮𑁄𑀪𑁄 𑀉𑀧𑁆𑀧𑀚𑁆𑀚𑀢𑀺. 𑀫𑀦𑀸𑀧𑀺𑀓𑁂𑀦𑀸𑀢𑀺 𑀯𑀸 𑀫𑀦𑀸𑀧𑀺𑀓𑀸𑀓𑀸𑀭𑁂𑀦. 𑀨𑀲𑁆𑀲𑀯𑁂𑀤𑀦𑀽𑀧𑀯𑀺𑀘𑀸𑀭𑀭𑀸𑀕𑀯𑀺𑀢𑀓𑁆𑀓𑀧𑀭𑀺𑀴𑀸𑀳𑀸 𑀲𑀳𑀚𑀸𑀢𑀸𑀧𑀺 𑀮𑀩𑁆𑀪𑀦𑁆𑀢𑀺, 𑀅𑀲𑀳𑀚𑀸𑀢𑀸𑀧𑀺. ‘‘𑀉𑀧𑁆𑀧𑀸𑀤𑁄’’𑀢𑀺 𑀏𑀢𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀲𑀗𑁆𑀔𑀸𑀭𑀕𑁆𑀕𑀳𑀡𑀦𑁆𑀢𑀺 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀉𑀧𑁆𑀧𑀸𑀤𑀮𑀓𑁆𑀔𑀡𑀲𑁆𑀲𑁂𑀯 𑀧𑀦 𑀕𑀳𑀡𑁂 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀦 𑀳𑀺 𑀉𑀧𑁆𑀧𑀸𑀤𑁄 𑀉𑀧𑁆𑀧𑀚𑁆𑀚𑀢𑀺, 𑀭𑀸𑀕𑀚𑀧𑀭𑀺𑀴𑀸𑀳𑀳𑁂𑀢𑀼𑀓𑀢𑀸 𑀘 𑀢𑁂𑀲𑀁 𑀭𑀸𑀕𑀲𑁆𑀲 𑀢𑀡𑁆𑀳𑀸𑀲𑀪𑀸𑀯𑀢𑁆𑀢𑀸. 𑀢𑀡𑁆𑀳𑀸 𑀳𑀺 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑁄, 𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀤𑀼𑀓𑁆𑀔𑀦𑁆𑀢𑀺. 𑀢𑀣𑀸 𑀘 𑀯𑀼𑀢𑁆𑀢𑀁 ‘‘𑀢𑀡𑁆𑀳𑀸𑀲𑀳𑀚𑀸𑀢𑀯𑁂𑀤𑀦𑀸𑀬 𑀧𑀦 𑀮𑁄𑀪𑁄 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑁂𑀳𑀺 𑀘 𑀧𑀘𑁆𑀘𑀬𑁄’’𑀢𑀺. 𑀏𑀯𑀁 𑀇𑀝𑁆𑀞𑀸𑀭𑀫𑁆𑀫𑀡𑁂 𑀉𑀧𑁆𑀧𑀦𑁆𑀦𑀮𑁄𑀪𑀲𑀳𑀕𑀢𑀲𑀼𑀔𑀯𑁂𑀤𑀦𑀸𑀬 𑀉𑀤𑀬𑁄 𑀇𑀥 ‘‘𑀉𑀧𑁆𑀧𑀸𑀤𑁄 𑀲𑀗𑁆𑀔𑀢𑀮𑀓𑁆𑀔𑀡’’𑀦𑁆𑀢𑀺 𑀯𑀼𑀢𑁆𑀢𑁄, 𑀢𑀲𑁆𑀲𑀸 𑀯𑀺𑀧𑀭𑀺𑀡𑀸𑀫𑁄 ‘‘𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸’’𑀢𑀺. 𑀯𑀺𑀧𑀭𑀺𑀡𑀸𑀫𑀸𑀯𑀢𑁆𑀣𑀸 𑀘 𑀉𑀤𑀬𑀸𑀯𑀢𑁆𑀣𑀁 𑀯𑀺𑀦𑀸 𑀦 𑀳𑁄𑀢𑀻𑀢𑀺 𑀲𑀸 𑀢𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑁆𑀢𑀻 𑀯𑀺𑀬 𑀯𑀼𑀢𑁆𑀢𑀸 ‘‘𑀉𑀧𑁆𑀧𑀸𑀤𑀁…𑀧𑁂… 𑀤𑀼𑀓𑁆𑀔𑀢𑀸’’𑀢𑀺.

𑀤𑁄𑀲𑁄 𑀅𑀓𑀼𑀲𑀮𑀫𑀽𑀮𑀦𑁆𑀢𑀺𑀆𑀤𑀻𑀲𑀼𑀧𑀺 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀦𑀸𑀫 𑀚𑀭𑀸, 𑀢𑀁 𑀦𑀺𑀲𑁆𑀲𑀸𑀬 𑀤𑁄𑀫𑀦𑀲𑁆𑀲𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁄 𑀯𑀼𑀢𑁆𑀢𑀁 ‘‘𑀞𑀺𑀢𑀲𑁆𑀲…𑀧𑁂… 𑀤𑀼𑀓𑁆𑀔𑀤𑀼𑀓𑁆𑀔𑀢𑀸’’𑀢𑀺. 𑀤𑁄𑀲𑀚𑀧𑀭𑀺𑀴𑀸𑀳𑀳𑁂𑀢𑀼𑀓𑀢𑀸 𑀚𑀭𑀸𑀬 𑀤𑁄𑀲𑀩𑀳𑀼𑀮𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀦𑀘𑀺𑀭𑁂𑀦 𑀚𑀻𑀭𑀡𑀢𑁄 𑀯𑁂𑀤𑀺𑀢𑀩𑁆𑀩𑀸.

𑀯𑀬𑁄𑀢𑀺 𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑁄𑀥𑁄. 𑀅𑀦𑀺𑀘𑁆𑀘𑀢𑀸𑀯𑀲𑁂𑀦 𑀘 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀯𑀬…𑀧𑁂… 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸’’𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔’’𑀦𑁆𑀢𑀺 (𑀲𑀁. 𑀦𑀺. 𑁩.𑁧𑁫, 𑁪𑁫, 𑁭𑁬; 𑀧𑀝𑀺. 𑀫. 𑁨.𑁧𑁦). 𑀫𑁄𑀳𑀚𑀧𑀭𑀺𑀴𑀸𑀳𑀳𑁂𑀢𑀼𑀓𑀢𑀸 𑀯𑀬𑀮𑀓𑁆𑀔𑀡𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀲𑀫𑁆𑀫𑁄𑀳𑀦𑀺𑀫𑀺𑀢𑁆𑀢𑀢𑁆𑀢𑀸, 𑀫𑀭𑀡𑀲𑁆𑀲 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀢𑁆𑀢𑀸 𑀘 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀮𑁄𑀪𑀸𑀤𑀻𑀦𑀁 𑀧𑀜𑁆𑀜𑀸𑀤𑀺𑀧𑀸𑀭𑀺𑀧𑀽𑀭𑀺𑀳𑁂𑀢𑀼𑀓𑀢𑀸 𑀬𑀣𑀸𑀭𑀳𑀁 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀲𑀳𑀚𑀸𑀢𑀓𑁄𑀝𑀺𑀬𑀸 𑀘 𑀧𑀘𑁆𑀘𑀬𑀪𑀸𑀯𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀲𑀩𑁆𑀩𑁂 𑀳𑀺 𑀓𑀼𑀲𑀮𑀸 𑀥𑀫𑁆𑀫𑀸 𑀲𑀩𑁆𑀩𑁂𑀲𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀬𑀣𑀸𑀲𑀫𑁆𑀪𑀯𑀁 𑀧𑀘𑁆𑀘𑀬𑀯𑀺𑀲𑁂𑀲𑀸 𑀳𑁄𑀦𑁆𑀢𑀺 𑀏𑀯𑀸𑀢𑀺. 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀲𑀦𑁆𑀦𑀺𑀲𑁆𑀲𑀬𑁄 𑀉𑀧𑀯𑀺𑀘𑀸𑀭𑁄 𑀅𑀩𑁆𑀬𑀸𑀧𑀸𑀤𑀽𑀧𑀯𑀺𑀘𑀸𑀭𑁄. 𑀅𑀯𑀺𑀳𑀺𑀁𑀲𑀽𑀧𑀘𑀸𑀭𑁂𑀧𑀺 𑀏𑀲𑁂𑀯 𑀦𑀬𑁄.

𑀅𑀬𑀁 𑀢𑀺𑀧𑀼𑀓𑁆𑀔𑀮𑁄 𑀦𑀸𑀫 𑀤𑀼𑀢𑀺𑀬𑁄 𑀦𑀬𑁄 𑀲𑀤𑁆𑀥𑀺𑀁 𑀤𑀺𑀲𑀸𑀮𑁄𑀓𑀦𑀦𑀬𑁂𑀦 𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀯𑀘𑀦𑀲𑁂𑀲𑁄. ‘‘𑀇𑀫𑁂 𑀘𑀢𑁆𑀢𑀸𑀭𑁄’’𑀢𑀺𑀆𑀤𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦𑁂𑀯 𑀦𑀦𑁆𑀤𑀺𑀬𑀸𑀯𑀝𑁆𑀝𑀲𑁆𑀲 𑀦𑀬𑀲𑁆𑀲 𑀪𑀽𑀫𑀺𑀤𑀲𑁆𑀲𑀦𑀢𑁆𑀣𑀁 𑀆𑀭𑀤𑁆𑀥𑀁. 𑀇𑀫𑁂 𑀬𑀣𑀸𑀯𑀼𑀢𑁆𑀢𑀧𑀝𑀺𑀧𑀤𑀸𑀘𑀢𑀼𑀓𑁆𑀓𑀲𑁆𑀲 𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀸. 𑀯𑀺𑀲𑁂𑀲𑁂𑀦𑀸𑀢𑀺 𑀤𑀺𑀝𑁆𑀞𑀺𑀢𑀡𑁆𑀳𑀸𑀲𑀦𑁆𑀦𑀺𑀲𑁆𑀲𑀬𑀢𑀸𑀯𑀺𑀲𑁂𑀲𑁂𑀦. 𑀤𑀺𑀝𑁆𑀞𑀺𑀘𑀭𑀺𑀢𑁄 𑀳𑀺 𑀢𑀺𑀓𑁆𑀔𑀧𑀜𑁆𑀜𑁄, 𑀫𑀦𑁆𑀤𑀧𑀜𑁆𑀜𑁄 𑀘 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀘 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀘 𑀦𑀺𑀬𑁆𑀬𑀸𑀢𑀻𑀢𑀺 𑀤𑁆𑀯𑀺𑀥𑀸 𑀯𑀼𑀢𑁆𑀢𑁄𑀢𑀺. 𑀢𑀣𑀸 𑀢𑀡𑁆𑀳𑀸𑀘𑀭𑀺𑀢𑁄 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀘 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀘 𑀦𑀺𑀬𑁆𑀬𑀸𑀢𑀻𑀢𑀺 𑀤𑁆𑀯𑀺𑀥𑀸 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑀺𑀢𑁄 𑀘𑀸𑀬𑀫𑀢𑁆𑀣𑁄. 𑀢𑁂𑀦𑀸𑀳 ‘‘𑀤𑁆𑀯𑁂 𑀳𑁄𑀦𑁆𑀢𑀺 𑀤𑀺𑀝𑁆𑀞𑀺𑀘𑀭𑀺𑀢𑁄 𑀘 𑀢𑀡𑁆𑀳𑀸𑀘𑀭𑀺𑀢𑁄 𑀘𑀸’’𑀢𑀺.

𑀘𑀢𑁆𑀢𑀸𑀭𑁄 𑀳𑀼𑀢𑁆𑀯𑀸𑀢𑀺 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀲𑁆𑀲 𑀦𑀬𑀲𑁆𑀲 𑀪𑀽𑀫𑀺𑀤𑀲𑁆𑀲𑀦𑁂 𑀘𑀢𑁆𑀢𑀸𑀭𑁄 𑀳𑀼𑀢𑁆𑀯𑀸 𑀞𑀺𑀢𑀸, 𑀘𑀢𑀼𑀧𑁆𑀧𑀝𑀺𑀧𑀤𑀸𑀯𑀲𑁂𑀦 𑀘𑀢𑁆𑀢𑀸𑀭𑁄 𑀓𑀢𑁆𑀯𑀸 𑀯𑀼𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀢𑀬𑁄 𑀳𑁄𑀦𑁆𑀢𑀻𑀢𑀺 𑀢𑀺𑀧𑀼𑀓𑁆𑀔𑀮𑀲𑁆𑀲 𑀦𑀬𑀲𑁆𑀲 𑀪𑀽𑀫𑀺𑀤𑀲𑁆𑀲𑀦𑁂 𑀉𑀕𑁆𑀖𑀝𑀺𑀢𑀜𑁆𑀜𑀼𑀆𑀤𑀺𑀯𑀲𑁂𑀦 𑀢𑀬𑁄 𑀪𑀯𑀦𑁆𑀢𑀺. 𑀢𑀬𑁄 𑀳𑀼𑀢𑁆𑀯𑀸𑀢𑀺 𑀢𑀣𑀸 𑀢𑀬𑁄 𑀳𑀼𑀢𑁆𑀯𑀸 𑀞𑀺𑀢𑀸 𑀢𑀬𑁄 𑀓𑀢𑁆𑀯𑀸 𑀓𑀣𑀺𑀢𑀸. 𑀤𑁆𑀯𑁂 𑀳𑁄𑀦𑁆𑀢𑀻𑀢𑀺 𑀇𑀤𑀸𑀦𑀺 𑀦𑀦𑁆𑀤𑀺𑀬𑀸𑀯𑀝𑁆𑀝𑀲𑁆𑀲 𑀦𑀬𑀲𑁆𑀲 𑀪𑀽𑀫𑀺𑀤𑀲𑁆𑀲𑀦𑁂 𑀤𑁆𑀯𑁂 𑀪𑀯𑀦𑁆𑀢𑀺. 𑀅𑀚𑁆𑀛𑁄𑀲𑀸𑀦𑀦𑁆𑀢𑀺 𑀤𑀺𑀝𑁆𑀞𑀺𑀅𑀚𑁆𑀛𑁄𑀲𑀸𑀦𑀁. 𑀅𑀪𑀺𑀦𑀺𑀯𑁂𑀲𑁄𑀢𑀺 𑀢𑀡𑁆𑀳𑀸𑀪𑀺𑀦𑀺𑀯𑁂𑀲𑁄. 𑀅𑀳𑀁𑀓𑀸𑀭𑁄𑀢𑀺 𑀅𑀳𑀁𑀫𑀸𑀦𑁄 ‘‘𑀅𑀳’’𑀦𑁆𑀢𑀺 𑀯𑀸 𑀓𑀭𑀡𑀁 𑀅𑀳𑀁𑀓𑀸𑀭𑁄. 𑀤𑀺𑀝𑁆𑀞𑀺𑀫𑀸𑀦𑀫𑀜𑁆𑀜𑀦𑀸𑀦𑀁 𑀯𑀲𑁂𑀦 ‘‘𑀅𑀳𑀫𑀲𑁆𑀫𑀻’’𑀢𑀺 𑀲𑀫𑀦𑀼𑀧𑀲𑁆𑀲𑀦𑀸 𑀫𑀫𑀁𑀓𑀸𑀭𑁄, 𑀫𑀫𑀸𑀬𑀦𑀁 𑀢𑀡𑁆𑀳𑀸𑀕𑁆𑀕𑀸𑀳𑁄.

𑀤𑀲𑀧𑀤𑀸𑀦𑀺 ‘‘𑀧𑀞𑀫𑀸 𑀤𑀺𑀲𑀸’’𑀢𑀺 𑀓𑀸𑀢𑀩𑁆𑀩𑀸𑀦𑀻𑀢𑀺 𑀦𑀦𑁆𑀤𑀺𑀬𑀸𑀯𑀝𑁆𑀝𑀲𑁆𑀲 𑀦𑀬𑀲𑁆𑀲 ‘‘𑀧𑀞𑀫𑀸 𑀤𑀺𑀲𑀸’’𑀢𑀺 𑀓𑀭𑀡𑀻𑀬𑀸𑀦𑀺, ‘‘𑀧𑀞𑀫𑀸 𑀤𑀺𑀲𑀸’’𑀢𑀺 𑀯𑀯𑀢𑁆𑀣𑀧𑁂𑀢𑀩𑁆𑀩𑀸𑀦𑀻𑀢𑀺 𑀅𑀢𑁆𑀣𑁄. 𑀲𑀁𑀔𑀺𑀢𑁆𑀢𑁂𑀦…𑀧𑁂… 𑀧𑀓𑁆𑀔𑀲𑁆𑀲𑀸𑀢𑀺 𑀅𑀦𑁂𑀓𑀧𑁆𑀧𑀪𑁂𑀤𑀲𑁆𑀲𑀧𑀺 𑀓𑀡𑁆𑀳𑀧𑀓𑁆𑀔𑀲𑁆𑀲 𑀲𑀁𑀓𑀺𑀮𑁂𑀲𑀧𑀓𑁆𑀔𑀲𑁆𑀲 𑀅𑀢𑁆𑀣𑀁 𑀲𑀁𑀔𑀺𑀢𑁆𑀢𑁂𑀦 𑀲𑀗𑁆𑀔𑁂𑀧𑁂𑀦 𑀧𑀝𑀺𑀧𑀓𑁆𑀔𑁂 𑀯𑀢𑁆𑀢𑀫𑀸𑀦𑁂 𑀯𑁄𑀤𑀸𑀦𑀥𑀫𑁆𑀫𑁂 𑀉𑀤𑁆𑀤𑀺𑀲𑁆𑀲 𑀜𑀸𑀧𑁂𑀦𑁆𑀢𑀺 𑀧𑀓𑀸𑀲𑁂𑀦𑁆𑀢𑀺, 𑀧𑀞𑀫𑀸 𑀓𑀸𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀤𑀲 𑀧𑀤𑀸𑀦𑀺 𑀤𑀼𑀢𑀺𑀬𑀓𑀸𑀦𑀻𑀢𑀺 𑀢𑀡𑁆𑀳𑀸𑀤𑀺𑀓𑀸 𑀤𑀲 𑀓𑁄𑀝𑁆𑀞𑀸𑀲𑀸 ‘‘𑀤𑀼𑀢𑀺𑀬𑀸 𑀤𑀺𑀲𑀸’’𑀢𑀺 𑀓𑀸𑀢𑀩𑁆𑀩𑀸. ‘‘𑀲𑀁𑀔𑀺𑀢𑁆𑀢𑁂𑀦…𑀧𑁂… 𑀓𑀡𑁆𑀳𑀧𑀓𑁆𑀔𑀲𑁆𑀲𑀸’’𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁.

𑀬𑁄𑀦𑀺𑀲𑁄𑀢𑀺 𑀉𑀧𑀸𑀬𑀲𑁄. 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀧𑀞𑀫𑀫𑀦𑀲𑀺𑀓𑀸𑀭𑁄. 𑀧𑀜𑁆𑀜𑀸𑀢𑀺 𑀲𑀼𑀢𑀘𑀺𑀦𑁆𑀢𑀸𑀫𑀬𑀻 𑀧𑀜𑁆𑀜𑀸, 𑀛𑀸𑀦𑀸𑀪𑀺𑀜𑁆𑀜𑀸 𑀘. 𑀦𑀺𑀩𑁆𑀩𑀺𑀤𑀸𑀢𑀺 𑀦𑀺𑀩𑁆𑀩𑁂𑀥𑀜𑀸𑀡𑀁. 𑀲𑁄𑀫𑀦𑀲𑁆𑀲𑀥𑀫𑁆𑀫𑀽𑀧𑀲𑀜𑁆𑀳𑀺𑀢𑀁 𑀧𑀫𑁄𑀤𑀸𑀤𑀺𑀲𑀳𑀕𑀢𑀁 𑀘𑁂𑀢𑀲𑀺𑀓𑀲𑀼𑀔𑀁.

𑀓𑀼𑀲𑀮𑀧𑀓𑁆𑀔𑁂 𑀘𑀸𑀢𑀺 𑀘-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄, 𑀢𑁂𑀦 𑀉𑀪𑀬𑀧𑀓𑁆𑀔𑀢𑁄 𑀲𑀫𑀼𑀘𑁆𑀘𑀬𑀯𑀲𑁂𑀦 𑀘𑀢𑀲𑁆𑀲𑁄 𑀤𑀺𑀲𑀸, 𑀦 𑀧𑀘𑁆𑀘𑁂𑀓𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀢𑁂𑀲𑀦𑁆𑀢𑀺 𑀢𑀡𑁆𑀳𑀸𑀤𑀻𑀦𑀁, 𑀢𑀡𑁆𑀳𑀸𑀬, 𑀢𑀡𑁆𑀳𑀸𑀧𑀓𑁆𑀔𑀺𑀓𑀸𑀦𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀲𑀢𑀺𑀧𑀺 𑀅𑀦𑀯𑀲𑁂𑀲𑀢𑁄 𑀭𑀸𑀕𑁂 𑀧𑀳𑀻𑀬𑀫𑀸𑀦𑁂 𑀅𑀦𑀯𑀲𑁂𑀲𑀢𑁄 𑀅𑀯𑀺𑀚𑁆𑀚𑀸𑀧𑀺 𑀧𑀳𑀻𑀬𑀢𑁂𑀯, 𑀭𑀸𑀕𑀲𑁆𑀲 𑀧𑀦 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀉𑀚𑀼𑀧𑀝𑀺𑀧𑀓𑁆𑀔𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀭𑀸𑀕𑀯𑀺𑀭𑀸𑀕𑀸’’𑀢𑀺 𑀯𑀼𑀢𑁆𑀢𑀁. 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀜𑁆𑀘 𑀅𑀢𑁆𑀣𑁄 ‘‘𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁪𑁩𑁮) 𑀆𑀕𑀢𑀧𑀸𑀴𑀺𑀬𑀸 𑀅𑀢𑁆𑀣𑀯𑀡𑁆𑀡𑀦𑀸𑀯𑀲𑁂𑀦 𑀯𑀼𑀢𑁆𑀢𑀸, 𑀇𑀥 𑀧𑀦 ‘‘𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀲𑁂𑀓𑁆𑀔𑀨𑀮𑀁, 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀅𑀲𑁂𑀓𑁆𑀔𑀨𑀮’’𑀦𑁆𑀢𑀺𑀆𑀤𑀺𑀦𑀸 (𑀦𑁂𑀢𑁆𑀢𑀺. 𑁫𑁧) 𑀯𑁂𑀯𑀘𑀦𑀲𑀫𑀸𑀭𑁄𑀧𑀦𑁂 𑀆𑀕𑀢𑀢𑁆𑀢𑀸 𑀧𑀼𑀭𑀺𑀫𑀸 𑀅𑀦𑀸𑀕𑀸𑀫𑀺𑀨𑀮𑀁. 𑀢𑀜𑁆𑀳𑀺 𑀓𑀸𑀫𑀭𑀸𑀕𑀲𑁆𑀲 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀢𑁄 𑀲𑀫𑀸𑀥𑀺𑀧𑀸𑀭𑀺𑀧𑀽𑀭𑀺𑀬𑀸𑀯 𑀯𑀺𑀲𑁂𑀲𑀢𑁄 ‘‘𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀧𑀘𑁆𑀙𑀺𑀫𑀸 𑀅𑀭𑀳𑀢𑁆𑀢𑀨𑀮𑀁 𑀢𑀡𑁆𑀳𑀸𑀬, 𑀅𑀯𑀺𑀚𑁆𑀚𑀸𑀬 𑀘 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑀢𑁄, 𑀧𑀜𑁆𑀜𑀸𑀧𑀸𑀭𑀺𑀧𑀽𑀭𑀺𑀬𑀸 𑀘 ‘‘𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺.

𑀢𑀢𑁆𑀣𑀸𑀢𑀺 𑀦𑀦𑁆𑀤𑀺𑀬𑀸𑀯𑀝𑁆𑀝𑀦𑀬𑁂. 𑀢𑁂𑀲𑀽𑀢𑀺 ‘‘𑀘𑀢𑁆𑀢𑀸𑀭𑀺 𑀧𑀤𑀸𑀦𑀻’’𑀢𑀺 𑀯𑀼𑀢𑁆𑀢𑁂𑀲𑀼 𑀢𑀡𑁆𑀳𑀸𑀤𑀻𑀲𑀼 𑀘𑀢𑀽𑀲𑀼 𑀫𑀽𑀮𑀧𑀤𑁂𑀲𑀼. 𑀇𑀥 𑀲𑀫𑁄𑀲𑀭𑀡𑀦𑁆𑀢𑀺 𑀲𑀗𑁆𑀕𑀳𑁄 𑀯𑀼𑀢𑁆𑀢𑁄, 𑀲𑁄 𑀘 𑀲𑀪𑀸𑀯𑀢𑁄, 𑀲𑀪𑀸𑀕𑀢𑁄 𑀘 𑀳𑁄𑀢𑀻𑀢𑀺 𑀢𑀡𑁆𑀳𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀤𑀲𑁆𑀲𑁂𑀢𑁆𑀯𑀸 ‘‘𑀢𑁂𑀲𑀼 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸𑀦𑀺 𑀲𑀫𑁄𑀲𑀭𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀫𑀣𑀁 𑀪𑀚𑀦𑁆𑀢𑀺 𑀲𑀪𑀸𑀯𑀢𑁄, 𑀲𑀪𑀸𑀕𑀢𑁄 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀧𑀲𑁆𑀲𑀦𑀁 𑀪𑀚𑀦𑁆𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀦𑀬𑀸𑀥𑀺𑀝𑁆𑀞𑀸𑀦𑀸𑀦𑀁 𑀦𑀬𑀸𑀥𑀺𑀝𑁆𑀞𑀸𑀦𑁂 𑀅𑀦𑀼𑀧𑁆𑀧𑀯𑁂𑀲𑁄 𑀦𑀬𑀸𑀦𑀁 𑀦𑀬𑁂𑀲𑀼 𑀅𑀦𑀼𑀧𑁆𑀧𑀯𑁂𑀲𑁄 𑀏𑀯 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀢𑀺𑀧𑀼𑀓𑁆𑀔𑀮𑁄…𑀧𑁂… 𑀅𑀦𑀼𑀧𑁆𑀧𑀯𑀺𑀲𑀦𑁆𑀢𑀻’’𑀢𑀺.

𑀅𑀮𑁄𑀪𑀸𑀫𑁄𑀳𑀧𑀓𑁆𑀔𑀁 𑀅𑀪𑀚𑀸𑀧𑁂𑀢𑁆𑀯𑀸 𑀅𑀤𑁄𑀲𑀧𑀓𑁆𑀔𑀁 𑀪𑀚𑀸𑀧𑁂𑀢𑀩𑁆𑀩𑀲𑁆𑀲 𑀦𑀦𑁆𑀤𑀺𑀬𑀸𑀯𑀝𑁆𑀝𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀫𑀽𑀮𑀧𑀤𑀲𑁆𑀲 𑀅𑀪𑀸𑀯𑀢𑁄 𑀅𑀤𑁄𑀲𑁄 𑀏𑀓𑀲𑀼𑀢𑁆𑀢𑀓𑁄𑀝𑀺𑀬𑀸 𑀏𑀓𑀓𑁄𑀯 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀤𑁄𑀲𑁄 𑀅𑀤𑁄𑀲𑁄 𑀏𑀯𑀸’’𑀢𑀺. 𑀤𑁄𑀲𑁄 𑀤𑁄𑀲𑁄 𑀏𑀯𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀫𑁄𑀲𑀭𑀦𑁆𑀢𑀺 𑀲𑀪𑀸𑀕𑀢𑁄 𑀘 𑀲𑀪𑀸𑀯𑀢𑁄 𑀘 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀪𑀽𑀫𑀺 𑀕𑁄𑀘𑀭𑁄𑀢𑀺 𑀘 𑀫𑀽𑀮𑀧𑀤𑀸𑀦𑀺 𑀏𑀯 𑀲𑀦𑁆𑀥𑀸𑀬 𑀯𑀤𑀢𑀺. 𑀏𑀓𑁂𑀓𑀁 𑀦𑀬𑀁 𑀅𑀦𑀼𑀧𑁆𑀧𑀯𑀺𑀲𑀢𑀺 𑀢𑀁𑀢𑀁𑀫𑀽𑀮𑀧𑀤𑀸𑀦𑀼𑀧𑁆𑀧𑀯𑁂𑀲𑀢𑁄. 𑀓𑀼𑀲𑀮𑁂 𑀯𑀸 𑀯𑀺𑀜𑁆𑀜𑀸𑀢𑁂 𑀅𑀓𑀼𑀲𑀮𑁄 𑀧𑀝𑀺𑀧𑀓𑁆𑀔𑁄, 𑀅𑀓𑀼𑀲𑀮𑁂 𑀯𑀸 𑀓𑀼𑀲𑀮𑁄 𑀧𑀝𑀺𑀧𑀓𑁆𑀔𑁄 𑀅𑀦𑁆𑀯𑁂𑀲𑀺𑀢𑀩𑁆𑀩𑁄 𑀲𑀁𑀯𑀡𑁆𑀡𑀺𑀬𑀫𑀸𑀦𑀲𑀼𑀢𑁆𑀢𑀧𑀤𑀸𑀦𑀼𑀭𑀽𑀧𑀢𑁄 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑁄. 𑀅𑀦𑁆𑀯𑁂𑀲𑀦𑀸 𑀉𑀧𑀧𑀭𑀺𑀓𑁆𑀔𑀸 ‘‘𑀤𑀺𑀲𑀸𑀮𑁄𑀓𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀦𑀬𑁄 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄𑀢𑀺 𑀢𑀣𑀸 𑀅𑀦𑁆𑀯𑁂𑀲𑀺𑀢𑁆𑀯𑀸 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀤𑀺𑀲𑀸 𑀯𑀯𑀢𑁆𑀣𑀧𑁂𑀢𑁆𑀯𑀸 𑀲𑁄 𑀲𑁄 𑀦𑀬𑁄 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑁄. 𑀬𑀣𑀸 𑀫𑀽𑀮𑀧𑀤𑁂𑀲𑀼 𑀫𑀽𑀮𑀧𑀤𑀸𑀦𑀁 𑀅𑀦𑀼𑀧𑁆𑀧𑀯𑁂𑀲𑁄 𑀲𑀁𑀯𑀡𑁆𑀡𑀺𑀢𑁄, 𑀇𑀫𑀺𑀦𑀸𑀯 𑀦𑀬𑁂𑀦 𑀫𑀽𑀮𑀧𑀤𑀢𑁄 𑀫𑀽𑀮𑀧𑀤𑀸𑀦𑀁 𑀦𑀺𑀤𑁆𑀥𑀸𑀭𑀡𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀏𑀓𑀫𑁆𑀳𑀺…𑀧𑁂… 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸𑀦𑀻’’𑀢𑀺 𑀆𑀳. ‘‘𑀏𑀓𑁂𑀓𑀲𑁆𑀫𑀺𑀜𑁆𑀳𑀻’’𑀢𑀺𑀆𑀤𑀺 𑀓𑀸𑀭𑀡𑀯𑀘𑀦𑀁.

𑀢𑀢𑁆𑀣 𑀢𑀢𑁆𑀣𑀸𑀢𑀺 𑀏𑀓𑁂𑀓𑀲𑁆𑀫𑀺𑀁 𑀦𑀬𑁂. 𑀏𑀓𑀲𑁆𑀫𑀺𑀁 𑀥𑀫𑁆𑀫𑁂 𑀯𑀺𑀜𑁆𑀜𑀸𑀢𑁂𑀢𑀺 𑀢𑀡𑁆𑀳𑀸𑀤𑀺𑀓𑁂 𑀏𑀓𑀲𑁆𑀫𑀺𑀁 𑀫𑀽𑀮𑀧𑀤𑀥𑀫𑁆𑀫𑁂 𑀲𑀭𑀽𑀧𑀢𑁄, 𑀦𑀺𑀤𑁆𑀥𑀸𑀭𑀡𑀯𑀲𑁂𑀦 𑀯𑀸 𑀯𑀺𑀜𑁆𑀜𑀸𑀢𑁂. 𑀲𑀩𑁆𑀩𑁂 𑀥𑀫𑁆𑀫𑀸 𑀯𑀺𑀜𑁆𑀜𑀸𑀢𑀸 𑀳𑁄𑀦𑁆𑀢𑀻𑀢𑀺 𑀢𑀤𑀜𑁆𑀜𑀫𑀽𑀮𑀧𑀤𑀪𑀽𑀢𑀸 𑀲𑀩𑁆𑀩𑁂 𑀮𑁄𑀪𑀸𑀤𑀬𑁄 𑀯𑀺𑀜𑁆𑀜𑀸𑀢𑀸 𑀦𑀬𑀲𑁆𑀲 𑀪𑀽𑀫𑀺𑀘𑀭𑀡𑀸𑀬𑁄𑀕𑁆𑀬𑀢𑀸𑀬 𑀧𑀓𑀸𑀲𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺. ‘‘𑀇𑀫𑁂𑀲’’𑀦𑁆𑀢𑀺𑀆𑀤𑀺 𑀦𑀬𑀢𑁆𑀢𑀬𑀤𑀺𑀲𑀸𑀪𑀽𑀢𑀥𑀫𑁆𑀫𑀸𑀦𑀁 𑀫𑀢𑁆𑀣𑀓𑀧𑀸𑀧𑀦𑁂𑀦 𑀢𑀺𑀡𑁆𑀡𑀁 𑀦𑀬𑀸𑀦𑀁 𑀓𑀽𑀝𑀕𑁆𑀕𑀳𑀡𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀧𑀼𑀦 ‘‘𑀇𑀫𑁂𑀲𑀽’’𑀢𑀺𑀆𑀤𑀺 𑀓𑀫𑁆𑀫𑀦𑀬𑀤𑁆𑀯𑀬𑀲𑁆𑀲 𑀯𑀺𑀪𑀸𑀕𑀯𑀺𑀪𑀸𑀯𑀦𑀁, 𑀢𑀁 𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀦𑀬𑀲𑀫𑀼𑀝𑁆𑀞𑀸𑀦𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.