𑁪. 𑀧𑀤𑀝𑁆𑀞𑀸𑀦𑀳𑀸𑀭𑀲𑀫𑁆𑀧𑀸𑀢𑀸𑀤𑀺𑀯𑀡𑁆𑀡𑀦𑀸

𑁬𑁬. 𑀬𑀲𑁆𑀫𑀸 𑀯𑀸 𑀲𑀁𑀓𑀺𑀮𑁂𑀲𑀢𑁄 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀭𑀓𑁆𑀔𑀺𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 𑀬𑀸𑀬𑀁 𑀭𑀓𑁆𑀔𑀺𑀢𑀘𑀺𑀢𑁆𑀢𑀢𑀸, 𑀲𑀸 𑀓𑀸𑀬𑀲𑀼𑀘𑀭𑀺𑀢𑀸𑀤𑀻𑀦𑀁 𑀢𑀺𑀡𑁆𑀡𑀁 𑀲𑀼𑀘𑀭𑀺𑀢𑀸𑀦𑀁 𑀧𑀤𑀝𑁆𑀞𑀸𑀦𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀢𑀸𑀥𑀻𑀦𑀦𑁆𑀢𑀺 𑀅𑀢𑁆𑀢𑀧𑀭𑀸𑀥𑀻𑀦𑀁.

𑀢𑀢𑁄 𑀏𑀯𑀸𑀢𑀺 𑀓𑀸𑀭𑀡𑀕𑁆𑀕𑀳𑀡𑁂𑀦 𑀨𑀮𑀲𑁆𑀲 𑀕𑀳𑀺𑀢𑀢𑁆𑀢𑀸 𑀏𑀯.

𑁬𑁮. 𑀢𑀢𑁆𑀣 𑀇𑀢𑀺𑀲𑀤𑁆𑀤𑁄𑀢𑀺 ‘‘𑀧𑀭𑀺𑀧𑀸𑀮𑀻𑀬𑀢𑀻’’𑀢𑀺 𑀇𑀢𑀺𑀲𑀤𑁆𑀤𑁄.

𑁭𑁩-𑁪. 𑀧𑀸𑀴𑀺𑀬𑀁 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸𑀦𑀻𑀢𑀺 𑀏𑀢𑁆𑀣 𑀲𑀤𑁆𑀥𑀸𑀯𑀻𑀭𑀺𑀬𑀲𑀢𑀺𑀦𑁆𑀤𑁆𑀭𑀺𑀬𑁂𑀳𑀺 𑀧𑀸𑀢𑀺𑀫𑁄𑀓𑁆𑀔𑀸𑀤𑀺 𑀢𑀺𑀯𑀺𑀥𑀁 𑀲𑀻𑀮𑀁 𑀕𑀳𑀺𑀢𑀁 𑀲𑁄𑀥𑁂𑀢𑀩𑁆𑀩𑀢𑁆𑀢𑀸. 𑀢𑁂𑀲𑀦𑁆𑀢𑀺 𑀢𑁂𑀳𑀺 𑀲𑀻𑀮𑀓𑁆𑀔𑀦𑁆𑀥𑁄 𑀲𑀗𑁆𑀕𑀳𑀺𑀢𑁄. 𑀲𑀫𑀸𑀥𑀺𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑁂𑀳𑀺 𑀲𑀫𑀸𑀥𑀺𑀧𑀜𑁆𑀜𑀸𑀓𑁆𑀔𑀦𑁆𑀥𑀸 𑀕𑀳𑀺𑀢𑀸𑀢𑀺 𑀧𑀸𑀓𑀝𑁄𑀬𑀫𑀢𑁆𑀣𑁄, 𑀢𑀣𑀸 𑀲𑁂𑀲𑀫𑁆𑀧𑀻𑀢𑀺 𑀆𑀳 ‘‘𑀇𑀢𑁄 𑀧𑀭𑁂𑀲𑀼…𑀧𑁂… 𑀯𑀼𑀢𑁆𑀢𑀦𑀬𑀫𑁂𑀯𑀸’’𑀢𑀺.

𑁭𑁬. 𑀳𑁂𑀢𑀼𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑀗𑁆𑀔𑀸𑀢𑀲𑁆𑀲𑀸𑀢𑀺 𑀏𑀢𑁆𑀣 𑀳𑁂𑀢𑀼𑀧𑀘𑁆𑀘𑀬𑀯𑀺𑀪𑀸𑀕𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯.

𑀧𑀤𑀝𑁆𑀞𑀸𑀦𑀳𑀸𑀭𑀲𑀫𑁆𑀧𑀸𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀺𑀲𑁆𑀲𑀓𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸

𑀇𑀤𑀸𑀦𑀺 𑀬𑀲𑁆𑀫𑀸 𑀲𑀼𑀢𑁆𑀢𑁂𑀲𑀼 𑀳𑀸𑀭𑀸𑀦𑀁 𑀬𑁄𑀚𑀦𑀸𑀦𑀬𑀤𑀲𑁆𑀲𑀦𑀢𑁆𑀢𑀸 𑀳𑀸𑀭𑀲𑀫𑁆𑀧𑀸𑀢𑀤𑁂𑀲𑀦𑀸 𑀳𑀸𑀭𑀯𑀺𑀪𑀗𑁆𑀕𑀤𑁂𑀲𑀦𑀸 𑀯𑀺𑀬 𑀦 𑀳𑀸𑀭𑀲𑀭𑀽𑀧𑀫𑀢𑁆𑀢𑀤𑀲𑁆𑀲𑀦𑀢𑁆𑀢𑀸, 𑀢𑀲𑁆𑀫𑀸 𑀧𑁂𑀝𑀓𑁄𑀧𑀤𑁂𑀲𑁂 𑀆𑀕𑀢𑀦𑀬𑀸𑀦𑀼𑀲𑀸𑀭𑁂𑀦 𑀅𑀧𑀭𑁂𑀳𑀺 𑀯𑀺𑀧𑀭𑀺𑀬𑀸𑀬𑁂𑀳𑀺 𑀳𑀸𑀭𑀲𑀫𑁆𑀧𑀸𑀢𑀬𑁄𑀚𑀦𑀸𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀚𑁆𑀚𑀸𑀯𑀺𑀚𑁆𑀚𑀸𑀬 𑀓𑀼𑀲𑀮𑀸𑀓𑀼𑀲𑀮𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸 𑀅𑀮𑁄𑀪𑀸𑀤𑁄𑀲𑀮𑁄𑀪𑀤𑁄𑀲𑀸𑀧𑀺 𑀧𑀭𑀫𑁆𑀧𑀭𑀪𑀸𑀯𑁂𑀦 𑀧𑀯𑀢𑁆𑀢𑀦𑁆𑀢𑀺 𑀦𑀺𑀤𑀸𑀦𑀪𑀸𑀯𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀙 𑀥𑀫𑁆𑀫𑀸…𑀧𑁂… 𑀫𑀽𑀮𑀸𑀦𑀻’’𑀢𑀺 𑀆𑀳. 𑀬𑀣𑀸 𑀘 𑀦𑀺𑀤𑀸𑀦𑀪𑀸𑀯𑁂𑀦 𑀧𑀼𑀩𑁆𑀩𑀗𑁆𑀕𑀫𑀢𑀸, 𑀏𑀯𑀁 𑀅𑀢𑁆𑀢𑀦𑁄 𑀯𑀲𑁂𑀯𑀢𑁆𑀢𑀦𑁂𑀦𑀸𑀧𑀺 𑀧𑀼𑀩𑁆𑀩𑀗𑁆𑀕𑀫𑀢𑀸 𑀮𑀩𑁆𑀪𑀢𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀸𑀥𑀺𑀧𑀢𑀺𑀓𑀸𑀦𑀁 𑀅𑀥𑀺𑀧𑀢𑀺, 𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺. 𑀅𑀮𑁄𑀪𑀲𑁆𑀲𑀸𑀢𑀺 𑀅𑀮𑁄𑀪𑀬𑀼𑀢𑁆𑀢𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲. 𑀦𑁂𑀓𑁆𑀔𑀫𑁆𑀫𑀘𑁆𑀙𑀦𑁆𑀤𑁂𑀦𑀸𑀢𑀺 𑀓𑀼𑀲𑀮𑀘𑁆𑀙𑀦𑁆𑀤𑁂𑀦. 𑀦𑁂𑀓𑁆𑀔𑀫𑁆𑀫𑀲𑀤𑁆𑀤𑁄 𑀧𑀩𑁆𑀩𑀚𑁆𑀚𑀸𑀤𑀻𑀲𑀼 𑀦𑀺𑀭𑀼𑀴𑁆𑀳𑁄. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀧𑀩𑁆𑀩𑀚𑁆𑀚𑀸 𑀧𑀞𑀫𑀁 𑀛𑀸𑀦𑀁, 𑀦𑀺𑀩𑁆𑀩𑀸𑀦𑀜𑁆𑀘 𑀯𑀺𑀧𑀲𑁆𑀲𑀦𑀸;

𑀲𑀩𑁆𑀩𑁂𑀧𑀺 𑀓𑀼𑀲𑀮𑀸 𑀥𑀫𑁆𑀫𑀸, ‘𑀦𑁂𑀓𑁆𑀔𑀫𑁆𑀫’𑀦𑁆𑀢𑀺 𑀧𑀯𑀼𑀘𑁆𑀘𑀭𑁂’’𑀢𑀺. (𑀇𑀢𑀺𑀯𑀼. 𑀅𑀝𑁆𑀞. 𑁧𑁦𑁯; 𑀤𑀻. 𑀦𑀺. 𑀝𑀻. 𑁨.𑁩𑁫𑁯; 𑀅. 𑀦𑀺. 𑀝𑀻. 𑁨.𑁨.𑁬𑁬) 𑁋

𑀢𑁂𑀲𑀼 𑀇𑀥 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑀼𑀲𑀮𑀘𑁆𑀙𑀦𑁆𑀤𑁂𑀦𑀸’’𑀢𑀺. 𑀦𑁂𑀓𑁆𑀔𑀫𑁆𑀫𑀘𑁆𑀙𑀦𑁆𑀤𑁂𑀦 𑀉𑀧𑀦𑀺𑀲𑁆𑀲𑀬𑀪𑀽𑀢𑁂𑀦, 𑀦 𑀅𑀥𑀺𑀧𑀢𑀺𑀪𑀽𑀢𑁂𑀦. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀮𑁄𑀪𑀧𑁆𑀧𑀥𑀸𑀦𑁄 𑀘𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀳𑁄𑀢𑀺, 𑀦𑁂𑀓𑁆𑀔𑀫𑁆𑀫𑀘𑁆𑀙𑀦𑁆𑀤𑁂𑀦 𑀉𑀧𑀦𑀺𑀲𑁆𑀲𑀬𑀪𑀽𑀢𑁂𑀦 𑀫𑀦𑁄 𑀢𑀲𑁆𑀲 𑀧𑀼𑀩𑁆𑀩𑀗𑁆𑀕𑀫𑁄 𑀳𑁄𑀢𑀺. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑀬𑀤𑀕𑁆𑀕𑁂𑀦 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀫𑀦𑁄 𑀧𑀼𑀩𑁆𑀩𑀗𑁆𑀕𑀫𑀁, 𑀢𑀤𑀕𑁆𑀕𑁂𑀦 𑀢𑁂𑀲𑀁 𑀚𑁂𑀝𑁆𑀞𑀁, 𑀧𑀥𑀸𑀦𑀜𑁆𑀘𑀸𑀢𑀺 𑀯𑀼𑀢𑁆𑀢𑀁 ‘‘𑀫𑀦𑁄𑀲𑁂𑀝𑁆𑀞𑀸𑀢𑀺 𑀫𑀦𑁄 𑀢𑁂𑀲𑀁 𑀥𑀫𑁆𑀫𑀸𑀦’’𑀦𑁆𑀢𑀺𑀆𑀤𑀺. 𑀫𑀦𑁄𑀫𑀬𑀢𑀸 𑀫𑀦𑁂𑀦 𑀓𑀢𑀸𑀤𑀺𑀪𑀸𑀯𑁄, 𑀲𑁄 𑀘 𑀫𑀦𑀲𑁆𑀲 𑀢𑁂𑀲𑀁 𑀲𑀳𑀚𑀸𑀢𑀸𑀤𑀺𑀦𑀸 𑀧𑀘𑁆𑀘𑀬𑀪𑀸𑀯𑁄 𑀏𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀫𑀦𑁄𑀫𑀬𑀸𑀢𑀺…𑀧𑁂… 𑀧𑀘𑁆𑀘𑀬𑁄’’𑀢𑀺. 𑀢𑁂 𑀧𑀦𑀸𑀢𑀺 𑀏𑀢𑁆𑀣 𑀧𑀦-𑀲𑀤𑁆𑀤𑁄 𑀯𑀺𑀲𑁂𑀲𑀢𑁆𑀣𑀤𑀻𑀧𑀓𑁄, 𑀢𑁂𑀦𑁂𑀢𑀁 𑀤𑀲𑁆𑀲𑁂𑀢𑀺 𑁋 𑀬𑀤𑀺𑀧𑀺 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀙𑀦𑁆𑀤𑀸𑀤𑀬𑁄𑀧𑀺 𑀧𑀘𑁆𑀘𑀬𑀸 𑀏𑀯, 𑀇𑀦𑁆𑀤𑁆𑀭𑀺𑀬𑀸𑀤𑀺𑀧𑀘𑁆𑀘𑀬𑁂𑀦 𑀧𑀦 𑀲𑀯𑀺𑀲𑁂𑀲𑀁 𑀧𑀘𑁆𑀘𑀬𑀪𑀽𑀢𑀲𑁆𑀲 𑀫𑀦𑀲𑁆𑀲𑁂𑀯 𑀯𑀲𑁂𑀦𑁂𑀯 𑀯𑀼𑀢𑁆𑀢𑀁 ‘‘𑀫𑀦𑁄𑀫𑀬𑀸’’𑀢𑀺. 𑀢𑀢𑁆𑀣 𑀙𑀦𑁆𑀤𑀲𑀫𑀼𑀤𑀸𑀦𑀻𑀢𑀸𑀢𑀺 𑀬𑀣𑀸𑀯𑀼𑀢𑁆𑀢𑀦𑁂𑀓𑁆𑀔𑀫𑁆𑀫𑀸𑀤𑀺𑀙𑀦𑁆𑀤𑁂𑀦 𑀲𑀫𑁆𑀫𑀸 𑀉𑀤𑁆𑀥𑀫𑀼𑀤𑁆𑀥𑀁 𑀦𑀻𑀢𑀸, 𑀢𑀢𑁄 𑀲𑀫𑀼𑀤𑀸𑀕𑀢𑀸𑀢𑀺 𑀅𑀢𑁆𑀣𑁄. 𑀢𑀢𑁄 𑀏𑀯 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀸𑀤𑀺𑀢𑁄 𑀲𑀫𑀼𑀧𑁆𑀧𑀦𑁆𑀦𑀢𑁆𑀢𑀸 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑀲𑀫𑀼𑀝𑁆𑀞𑀸𑀦𑀸. 𑀢𑀚𑁆𑀚𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑁂𑀦 𑀲𑀳𑀸𑀥𑀺𑀝𑁆𑀞𑀸𑀦𑀢𑁄 𑀨𑀲𑁆𑀲𑀲𑀫𑁄𑀥𑀸𑀦𑀸. ‘‘𑀨𑀼𑀝𑁆𑀞𑁄, 𑀪𑀺𑀓𑁆𑀔𑀯𑁂, 𑀯𑁂𑀤𑁂𑀢𑀺, 𑀨𑀼𑀝𑁆𑀞𑁄 𑀲𑀜𑁆𑀚𑀸𑀦𑀸𑀢𑀺, 𑀨𑀼𑀝𑁆𑀞𑁄 𑀘𑁂𑀢𑁂𑀢𑀻’’𑀢𑀺 (𑀲𑀁. 𑀦𑀺. 𑁪.𑁯𑁩) 𑀳𑀺 𑀯𑀼𑀢𑁆𑀢𑀁. 𑀇𑀤𑀁 𑀫𑀦𑁄𑀓𑀫𑁆𑀫𑀦𑁆𑀢𑀺 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀘𑁄𑀧𑀦𑀁 𑀅𑀓𑀢𑁆𑀯𑀸 𑀲𑀤𑁆𑀥𑀸𑀲𑀫𑀦𑁆𑀦𑀸𑀕𑀢𑁂𑀦 𑀧𑀲𑀦𑁆𑀦𑁂𑀦 𑀫𑀦𑀲𑀸 𑀧𑀯𑀢𑁆𑀢𑀁 𑀇𑀤𑀁 𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀁. 𑀢𑀁 𑀧𑀦 𑀅𑀦𑀪𑀺𑀚𑁆𑀛𑀸𑀲𑀳𑀕𑀢𑀁, 𑀅𑀩𑁆𑀬𑀸𑀧𑀸𑀤𑀲𑀳𑀕𑀢𑀁, 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀳𑀕𑀢𑀦𑁆𑀢𑀺 𑀢𑀺𑀯𑀺𑀥𑀁 𑀳𑁄𑀢𑀺.

𑀪𑀸𑀲𑀢𑀻𑀢𑀺 𑀅𑀯𑀺𑀲𑀁𑀯𑀸𑀤𑀦𑀸𑀤𑀺𑀦𑀸 𑀯𑀸𑀘𑀗𑁆𑀕𑀘𑁄𑀧𑀦𑀸𑀯𑀲𑁂𑀦 𑀧𑀯𑀢𑁆𑀢𑁂𑀦𑁆𑀢𑀺𑀬𑀸 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀬𑀸 𑀲𑀸𑀥𑁂𑀢𑀩𑁆𑀩𑀁 𑀲𑀸𑀥𑁂𑀢𑀻𑀢𑀺 𑀅𑀢𑁆𑀣𑁄, 𑀢𑁂𑀦 𑀓𑀸𑀬𑀤𑁆𑀯𑀸𑀭𑀢𑁄 𑀧𑀯𑀢𑁆𑀢𑀓𑀼𑀲𑀮𑀯𑀘𑀻𑀓𑀫𑁆𑀫𑀫𑁆𑀧𑀺 𑀲𑀗𑁆𑀕𑀳𑀺𑀢𑀁 𑀳𑁄𑀢𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀯𑀺𑀧𑁆𑀨𑀸𑀭𑀢𑁄, 𑀢𑀣𑀸 𑀲𑀸𑀤𑀺𑀬𑀦𑀢𑁄 𑀘 𑀪𑀸𑀲𑀢𑀻’’𑀢𑀺. 𑀲𑀩𑁆𑀩𑀫𑁆𑀧𑀺 𑀯𑀘𑀻𑀓𑀫𑁆𑀫𑀁 𑀲𑀘𑁆𑀘𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁. 𑀓𑀭𑁄𑀢𑀻𑀢𑀺 𑀅𑀢𑁆𑀢𑀦𑁄, 𑀧𑀭𑁂𑀲𑀜𑁆𑀘 𑀳𑀺𑀢𑀸𑀳𑀺𑀢𑀸𑀦𑀺 𑀓𑀸𑀭𑀡𑀸𑀓𑀸𑀭𑀡𑁂𑀳𑀺 𑀓𑀸𑀬𑀗𑁆𑀕𑀘𑁄𑀧𑀦𑀸𑀯𑀲𑁂𑀦 𑀧𑀯𑀢𑁆𑀢𑁂𑀦𑁆𑀢𑀺𑀬𑀸 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀸 𑀲𑀸𑀥𑁂𑀢𑀩𑁆𑀩𑀁 𑀲𑀸𑀥𑁂𑀢𑀻𑀢𑀺 𑀅𑀢𑁆𑀣𑁄, 𑀢𑁂𑀦 𑀯𑀘𑀻𑀤𑁆𑀯𑀸𑀭𑀢𑁄 𑀧𑀯𑀢𑁆𑀢𑀓𑀼𑀲𑀮𑀓𑀸𑀬𑀓𑀫𑁆𑀫𑀫𑁆𑀧𑀺 𑀲𑀗𑁆𑀕𑀳𑀺𑀢𑀁 𑀳𑁄𑀢𑀺. 𑀢𑀣𑀸 𑀘 𑀯𑀓𑁆𑀔𑀢𑀺 ‘‘𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀯𑀺𑀧𑁆𑀨𑀸𑀭𑀢𑁄, 𑀢𑀣𑀸 𑀲𑀸𑀤𑀺𑀬𑀦𑀢𑁄 𑀘 𑀓𑀭𑁄𑀢𑀻’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁭𑁬 𑀫𑀺𑀲𑁆𑀲𑀓𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸). 𑀓𑀫𑁆𑀫𑀧𑀣𑀯𑀲𑁂𑀦 𑀕𑀬𑁆𑀳𑀫𑀸𑀦𑁂 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀲𑁂𑀦 𑀢𑀁 𑀢𑀺𑀯𑀺𑀥𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀇𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀸𑀤𑀲𑁆𑀲𑀺𑀢𑀸’’𑀢𑀺. 𑀤𑀲𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀯𑀲𑁂𑀦𑀸𑀧𑀺 𑀕𑀸𑀣𑀸𑀬 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀲𑁄 𑀧𑀲𑀦𑁆𑀦𑀘𑀺𑀢𑁆𑀢𑁄’’𑀢𑀺𑀆𑀤𑀺. 𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸 𑀓𑁂𑀯𑀮𑀁 𑀫𑀦𑀲𑀸 𑀧𑀯𑀢𑁆𑀢𑀢𑀻𑀢𑀺 𑀅𑀦𑀺𑀬𑀫𑀢𑁆𑀣𑁄 𑀯𑀸-𑀲𑀤𑁆𑀤𑁄. 𑀢𑀣𑀸 𑀘𑁂𑀯 𑀲𑀁𑀯𑀡𑁆𑀡𑀺𑀢𑀁.

𑀤𑀲𑀯𑀺𑀥𑀲𑁆𑀲 𑀓𑀼𑀲𑀮𑀓𑀫𑁆𑀫𑀲𑁆𑀲𑀸𑀢𑀺 𑀤𑀲𑀯𑀺𑀥𑀲𑁆𑀲 𑀓𑀼𑀲𑀮𑀓𑀫𑁆𑀫𑀧𑀣𑀓𑀫𑁆𑀫𑀲𑁆𑀲, 𑀯𑀓𑁆𑀔𑀫𑀸𑀦𑀦𑀬𑁂𑀦 𑀯𑀸 𑀤𑀲𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀲𑀗𑁆𑀔𑀸𑀢𑀲𑁆𑀲 𑀓𑀼𑀲𑀮𑀓𑀫𑁆𑀫𑀲𑁆𑀲. 𑀦𑀦𑀼 𑀢𑀢𑁆𑀣 𑀤𑀸𑀦𑀸𑀤𑀺𑀫𑀬𑀁 𑀢𑀺𑀯𑀺𑀥𑀫𑁂𑀯 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀯𑀼𑀢𑁆𑀢𑀦𑁆𑀢𑀺? 𑀲𑀘𑁆𑀘𑀁, 𑀢𑀁 𑀧𑀦 𑀇𑀢𑀭𑁂𑀲𑀁 𑀢𑀤𑀦𑁆𑀢𑁄𑀕𑀥𑀢𑁆𑀢𑀸.

‘‘𑀲𑀼𑀔𑀫𑀦𑁆𑀯𑁂𑀢𑀻’’𑀢𑀺 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀁 𑀲𑀼𑀔𑀸𑀦𑀼𑀕𑀫𑀁 𑀯𑀺𑀢𑁆𑀣𑀸𑀭𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀥𑀲𑁆𑀲𑀼 𑀧𑀼𑀭𑀺𑀲𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀯𑀁 𑀲𑀦𑁆𑀢𑀦𑁆𑀢𑀺 𑀏𑀯𑀁 𑀪𑀽𑀢𑀁, 𑀅𑀧𑁆𑀧𑀳𑀻𑀦𑀸𑀦𑀼𑀲𑀬𑁄 𑀳𑀼𑀢𑁆𑀯𑀸 𑀲𑀼𑀔𑀯𑁂𑀤𑀦𑀻𑀬𑀨𑀲𑁆𑀲𑀲𑀫𑁆𑀪𑀽𑀢𑀦𑁆𑀢𑀺 𑀅𑀢𑁆𑀣𑁄.

𑀢𑀢𑁆𑀣 ‘‘𑀬𑀁 𑀫𑀦𑁄’’𑀢𑀺𑀆𑀤𑀺𑀦𑀸 𑀕𑀸𑀣𑀸𑀢𑁆𑀣𑀯𑀲𑁂𑀦 𑀘𑀢𑀼𑀲𑀘𑁆𑀘𑀁 𑀦𑀺𑀤𑁆𑀥𑀸𑀭𑁂𑀢𑀺. 𑀆𑀤𑀺𑀢𑁄 𑀯𑀯𑀢𑁆𑀣𑀸𑀧𑀺𑀢𑁂𑀲𑀼 𑀔𑀦𑁆𑀥𑀸𑀤𑀻𑀲𑀼 𑀔𑀦𑁆𑀥𑀫𑀼𑀔𑁂𑀦 𑀲𑀘𑁆𑀘𑀸𑀦𑀁 𑀓𑀣𑀺𑀢𑀢𑁆𑀢𑀸 𑀲𑀢𑁆𑀢𑀸𑀦𑀁 𑀪𑀺𑀦𑁆𑀦𑀭𑀼𑀘𑀺𑀪𑀸𑀯𑀢𑁄 𑀦𑀸𑀦𑀸𑀦𑀬𑁂𑀳𑀺 𑀯𑀺𑀧𑀲𑁆𑀲𑀦𑀸𑀪𑀽𑀫𑀺𑀓𑁄𑀲𑀮𑁆𑀮𑀢𑁆𑀣𑀁, 𑀧𑀼𑀩𑁆𑀩𑀸𑀧𑀭𑀲𑀫𑁆𑀩𑀦𑁆𑀥𑀤𑀲𑁆𑀲𑀦𑀢𑁆𑀣𑀜𑁆𑀘 𑀏𑀯𑀁 𑀯𑀼𑀢𑁆𑀢𑀁 ‘‘𑀏𑀯𑀁…𑀧𑁂… 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸𑀦𑀻’’𑀢𑀺. 𑀲𑀘𑁆𑀘𑀫𑀼𑀔𑁂𑀦 𑀅𑀲𑁆𑀲𑀸𑀤𑀸𑀤𑀺𑀓𑁂 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀤𑁂𑀲𑀦𑀸𑀳𑀸𑀭𑀲𑀫𑁆𑀧𑀸𑀢𑀁 𑀬𑁄𑀚𑁂𑀢𑀼𑀁 ‘‘𑀢𑀢𑁆𑀣 𑀲𑀫𑀼𑀤𑀬𑁂𑀦𑀸’’𑀢𑀺𑀆𑀤𑀺𑀫𑀸𑀳, 𑀢𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀬𑀜𑁆𑀳𑁂𑀢𑁆𑀣 𑀅𑀜𑁆𑀜𑀫𑁆𑀧𑀺 𑀅𑀢𑁆𑀣𑀢𑁄 𑀦 𑀯𑀺𑀪𑀢𑁆𑀢𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸, 𑀉𑀢𑁆𑀢𑀸𑀦𑀢𑁆𑀣𑀢𑁆𑀢𑀸 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀫𑀦𑀦𑀮𑀓𑁆𑀔𑀡𑁂𑀢𑀺 𑀫𑀦𑀦𑀮𑀓𑁆𑀔𑀡𑀳𑁂𑀢𑀼. ‘‘𑀫𑀦𑀦𑀮𑀓𑁆𑀔𑀡𑁂𑀦𑀸’’𑀢𑀺 𑀯𑀸 𑀧𑀸𑀞𑁄. 𑀈𑀳𑀸𑀪𑀸𑀯𑀢𑁄 𑀩𑁆𑀬𑀸𑀧𑀸𑀭𑀸𑀪𑀸𑀯𑀢𑁄. 𑀬𑁂𑀦 𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀫𑀦𑁄 ‘‘𑀧𑀲𑀦𑁆𑀦𑁄’’𑀢𑀺 𑀯𑀼𑀢𑁆𑀢𑁄, 𑀢𑀲𑁆𑀲 𑀧𑀲𑀸𑀤𑀲𑁆𑀲 𑀓𑀺𑀘𑁆𑀘𑀁 𑀫𑀦𑁂 𑀆𑀭𑁄𑀧𑁂𑀢𑁆𑀯𑀸 𑀆𑀳 ‘‘𑀅𑀓𑀸𑀮𑀼𑀲𑀺𑀬𑀢𑁄, 𑀆𑀭𑀫𑁆𑀫𑀡𑀲𑁆𑀲 𑀑𑀓𑀧𑁆𑀧𑀦𑀢𑁄 𑀘 𑀧𑀲𑀦𑁆𑀦𑁂𑀦𑀸’’𑀢𑀺. 𑀢𑀣𑀸 𑀲𑀸𑀤𑀺𑀬𑀦𑀢𑁄𑀢𑀺 𑀯𑀸𑀘𑀸𑀬 𑀯𑀢𑁆𑀢𑀩𑁆𑀩𑀁 𑀅𑀯𑀢𑁆𑀯𑀸𑀯 𑀨𑀲𑁆𑀲𑀲𑀸𑀤𑀺𑀬𑀦𑀢𑁄 𑀅𑀦𑀼𑀚𑀸𑀦𑀢𑁄. 𑀤𑀼𑀢𑀺𑀬𑁂 𑀢𑀣𑀸 𑀲𑀸𑀤𑀺𑀬𑀦𑀢𑁄𑀢𑀺 𑀓𑀸𑀬𑁂𑀦 𑀓𑀸𑀢𑀩𑁆𑀩𑀁 𑀬𑀣𑀸 𑀓𑀢𑀁 𑀳𑁄𑀢𑀺, 𑀢𑀣𑀸 𑀯𑀸𑀘𑀸𑀬 𑀲𑀁𑀯𑀺𑀥𑀸𑀦𑀢𑁄. 𑀢𑀣𑀸 𑀧𑀲𑀼𑀢𑀢𑁆𑀢𑀸𑀢𑀺 𑀬𑀣𑀸 𑀲𑀼𑀔𑀫𑀦𑁆𑀯𑁂𑀢𑀺, 𑀢𑀣𑀸 𑀉𑀧𑀘𑀺𑀢𑀢𑁆𑀢𑀸 𑀏𑀯𑀸𑀢𑀺 𑀅𑀢𑁆𑀣𑁄. 𑀢𑀢𑁄𑀢𑀺 𑀢𑀢𑁄 𑀓𑀸𑀭𑀡𑀸, 𑀫𑀦𑀲𑀸 𑀧𑀲𑀦𑁆𑀦𑁂𑀦, 𑀪𑀸𑀲𑀦𑁂𑀦, 𑀓𑀭𑀡𑁂𑀦 𑀘 𑀳𑁂𑀢𑀼𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀜𑁆𑀜𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀧𑀦 𑀅𑀢𑁆𑀣𑁂. 𑀢𑀢𑁄𑀢𑀺 𑀢𑀢𑁄 𑀏𑀯. 𑀬𑁄 𑀳𑀺 𑀧𑀲𑀦𑁆𑀦𑀫𑀦𑁄 𑀢𑁂𑀦 𑀬𑀁 𑀪𑀸𑀲𑀦𑀁, 𑀓𑀭𑀡𑀜𑁆𑀘, 𑀢𑀢𑁄 𑀏𑀯 𑀦𑀁 𑀲𑀼𑀔𑀫𑀦𑁆𑀯𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀸𑀢𑀪𑀸𑀯𑀢𑁄𑀢𑀺 𑀲𑀸𑀢𑀯𑁂𑀤𑀦𑀸𑀪𑀸𑀯𑀢𑁄. 𑀇𑀝𑁆𑀞𑀪𑀸𑀯𑀢𑁄𑀢𑀺 𑀫𑀦𑀸𑀧𑀪𑀸𑀯𑀢𑁄. 𑀓𑀫𑁆𑀫𑀢𑁄 𑀯𑀺𑀧𑀸𑀓𑀼𑀧𑁆𑀧𑀢𑁆𑀢𑀺𑀨𑀮𑀤𑀸𑀦𑀲𑀫𑀢𑁆𑀣𑀪𑀸𑀯𑁂𑀦 𑀓𑀫𑁆𑀫𑀲𑁆𑀲 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀯𑀺𑀧𑀸𑀓𑀲𑁆𑀲𑁂𑀯 𑀅𑀦𑀺𑀩𑁆𑀩𑀢𑁆𑀢𑀢𑁆𑀢𑀸𑀢𑀺 𑀆𑀳 ‘‘𑀓𑀢𑀽…𑀧𑁂… 𑀅𑀦𑁆𑀯𑁂𑀢𑀻𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀓𑀸𑀭𑀡𑀸𑀬𑀢𑁆𑀢 𑀯𑀼𑀢𑁆𑀢𑀺𑀢𑁄𑀢𑀺 𑀓𑀢𑀪𑀸𑀯𑀳𑁂𑀢𑀼𑀓𑀢𑁆𑀢𑀸 𑀓𑀫𑁆𑀫𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀲𑀗𑁆𑀓𑀦𑁆𑀢𑀺𑀢𑁄𑀢𑀺 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀓𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑀁, 𑀢𑀤𑀜𑁆𑀜𑀲𑀦𑁆𑀢𑀸𑀦𑀸 𑀲𑀗𑁆𑀓𑀫𑀦𑀢𑁄.

𑀆𑀥𑀺𑀧𑀘𑁆𑀘𑀬𑁄𑀕𑀢𑁄𑀢𑀺 𑀲𑀳𑀚𑀸𑀢𑀸𑀥𑀺𑀧𑀢𑀺𑀯𑀲𑁂𑀦 𑀆𑀥𑀺𑀧𑀘𑁆𑀘𑀬𑀼𑀢𑁆𑀢𑀢𑁆𑀢𑀸. 𑀲𑀳𑀚𑀸𑀢𑀥𑀫𑁆𑀫𑀸𑀦𑀜𑁆𑀳𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀫𑀦𑀲𑁆𑀲 𑀯𑀲𑁂𑀦 𑀧𑀼𑀩𑁆𑀩𑀗𑁆𑀕𑀫𑀢𑀸 𑀇𑀥𑀸𑀥𑀺𑀧𑁆𑀧𑁂𑀢𑀸. 𑀢𑀢𑁄 𑀏𑀯𑀸𑀢𑀺 𑀆𑀥𑀺𑀧𑀘𑁆𑀘𑀬𑁄𑀕𑀢𑁄 𑀏𑀯. 𑀫𑀦𑀲𑁆𑀲𑀸𑀢𑀺 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀢𑁂𑀲𑀁 𑀥𑀫𑁆𑀫𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀼𑀲𑀮𑀪𑀸𑀯𑁄 𑀬𑀼𑀚𑁆𑀚𑀢𑀺 𑀧𑀲𑀸𑀤𑀲𑁆𑀲 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀳𑁂𑀢𑀼𑀓𑀢𑁆𑀢𑀸. 𑀦𑀦𑀼 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑁂𑀲𑀼 𑀢𑁂𑀲𑀁 𑀲𑀸𑀯𑀓𑀸𑀦𑀁 𑀲𑀤𑁆𑀥𑀸 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀦𑀸𑀬𑀁 𑀲𑀤𑁆𑀥𑀸, 𑀢𑀤𑀸𑀓𑀸𑀭𑀸 𑀧𑀦 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀢𑀣𑀸 𑀯𑀼𑀘𑁆𑀘𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀦𑀸𑀬𑀁 𑀧𑀲𑀸𑀤𑁄’’𑀢𑀺𑀆𑀤𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁭𑁬 𑀫𑀺𑀲𑁆𑀲𑀓𑀳𑀸𑀭𑀲𑀫𑁆𑀧𑀸𑀢𑀯𑀡𑁆𑀡𑀦𑀸). 𑀲𑀼𑀔𑀁 𑀅𑀦𑁆𑀯𑁂𑀢𑀻𑀢𑀺 𑀬𑀼𑀚𑁆𑀚𑀢𑀺 𑀓𑀫𑁆𑀫𑀲𑁆𑀲 𑀨𑀮𑀤𑀸𑀦𑁂 𑀲𑀫𑀢𑁆𑀣𑀪𑀸𑀯𑀢𑁄. 𑀬𑀣𑀸 𑀳𑀺 𑀓𑀢𑀁 𑀓𑀫𑁆𑀫𑀁 𑀨𑀮𑀤𑀸𑀦𑀲𑀫𑀢𑁆𑀣𑀁 𑀳𑁄𑀢𑀺, 𑀢𑀣𑀸 𑀓𑀢𑀁 𑀉𑀧𑀘𑀺𑀢𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀫𑀦𑁄𑀧𑀯𑀺𑀘𑀸𑀭𑀸 𑀇𑀥 𑀦𑁂𑀓𑁆𑀔𑀫𑁆𑀫𑀲𑀺𑀢𑀸 𑀲𑁄𑀫𑀦𑀲𑁆𑀲𑀽𑀧𑀯𑀺𑀘𑀸𑀭𑀸, 𑀉𑀧𑁂𑀓𑁆𑀔𑀽𑀧𑀯𑀺𑀘𑀸𑀭𑀸 𑀘 𑀯𑁂𑀤𑀺𑀢𑀩𑁆𑀩𑀸 𑀓𑀼𑀲𑀮𑀸𑀥𑀺𑀓𑀸𑀭𑀢𑁆𑀢𑀸. 𑀢𑁂 𑀧𑀦 𑀬𑀲𑁆𑀫𑀸 𑀘𑀺𑀢𑁆𑀢𑀁 𑀦𑀺𑀲𑁆𑀲𑀸𑀬𑁂𑀯 𑀧𑀯𑀢𑁆𑀢𑀦𑁆𑀢𑀺, 𑀦𑀸𑀦𑀺𑀲𑁆𑀲𑀸𑀬, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀫𑀦𑁄 𑀫𑀦𑁄𑀧𑀯𑀺𑀘𑀸𑀭𑀸𑀦𑀁 𑀧𑀤𑀝𑁆𑀞𑀸𑀦’’𑀦𑁆𑀢𑀺. 𑀓𑀼𑀲𑀮𑀧𑀓𑁆𑀔𑀲𑁆𑀲 𑀧𑀤𑀝𑁆𑀞𑀸𑀦𑀦𑁆𑀢𑀺 𑀏𑀢𑁆𑀣 𑀓𑀼𑀲𑀮𑁄 𑀢𑀸𑀯 𑀨𑀲𑁆𑀲𑁄 𑀓𑀼𑀲𑀮𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀲𑀜𑁆𑀜𑀸𑀓𑁆𑀔𑀦𑁆𑀥𑀲𑁆𑀲 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑁆𑀲 𑀲𑀳𑀚𑀸𑀢𑀸𑀤𑀺𑀦𑀸 𑀧𑀘𑁆𑀘𑀬𑁄 𑀳𑁄𑀢𑀺. ‘‘𑀨𑀼𑀝𑁆𑀞𑁄, 𑀪𑀺𑀓𑁆𑀔𑀯𑁂, 𑀯𑁂𑀤𑁂𑀢𑀺, 𑀨𑀼𑀝𑁆𑀞𑁄 𑀲𑀜𑁆𑀚𑀸𑀦𑀸𑀢𑀺, 𑀨𑀼𑀝𑁆𑀞𑁄 𑀘𑁂𑀢𑁂𑀢𑀻’’𑀢𑀺 (𑀲𑀁. 𑀦𑀺. 𑁪.𑁯𑁩) 𑀯𑀼𑀢𑁆𑀢𑀁. 𑀏𑀯𑀁 𑀯𑁂𑀤𑀦𑀸𑀤𑀻𑀦𑀫𑁆𑀧𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀤𑁆𑀥𑀸𑀤𑀻𑀦𑀫𑁆𑀧𑀺 𑀧𑀘𑁆𑀘𑀬𑀪𑀸𑀯𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀲𑀩𑁆𑀩𑀲𑁆𑀲𑀸𑀢𑀺 𑀘𑀢𑀼𑀪𑀽𑀫𑀓𑀲𑁆𑀲. 𑀓𑀸𑀫𑀸𑀯𑀘𑀭𑀸 𑀳𑀺 𑀓𑀼𑀲𑀮𑀸 𑀥𑀫𑁆𑀫𑀸 𑀬𑀣𑀸𑀭𑀳𑀁 𑀘𑀢𑀼𑀪𑀽𑀫𑀓𑀲𑁆𑀲𑀸𑀧𑀺 𑀓𑀼𑀲𑀮𑀲𑁆𑀲 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀯𑀁 𑀇𑀢𑀭𑀪𑀽𑀫𑀓𑀸𑀧𑀺.

‘‘𑀧𑀲𑀦𑁆𑀦𑁂𑀦 𑀫𑀦𑀲𑀸 𑀪𑀸𑀲𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑀺𑀲𑁂𑀲𑀢𑁄 𑀲𑀫𑁆𑀫𑀸𑀯𑀸𑀘𑀸𑀧𑀘𑁆𑀘𑀬𑀁 𑀪𑀸𑀲𑀦𑀁 𑀇𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀪𑀸𑀲𑀢𑀻𑀢𑀺 𑀲𑀫𑁆𑀫𑀸𑀯𑀸𑀘𑀸’’𑀢𑀺. 𑀢𑀢𑁆𑀣𑀸𑀬𑀫𑀥𑀺𑀧𑁆𑀧𑀸𑀬𑁄 ‘‘𑀪𑀸𑀲𑀢𑀻𑀢𑀺 𑀬𑀫𑀺𑀤𑀁 𑀧𑀤𑀁, 𑀇𑀫𑀺𑀦𑀸 𑀲𑀫𑁆𑀫𑀸𑀯𑀸𑀘𑀸 𑀕𑀳𑀺𑀢𑀸 𑀳𑁄𑀢𑀻’’𑀢𑀺. 𑀓𑀭𑁄𑀢𑀻𑀢𑀺 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀼𑀧𑀭𑀺𑀲𑀼𑀤𑁆𑀥𑁂 𑀓𑀸𑀬𑀯𑀘𑀻𑀓𑀫𑁆𑀫𑁂 𑀞𑀺𑀢𑀲𑁆𑀲 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺, 𑀦 𑀇𑀢𑀭𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 ‘‘𑀢𑁂 𑀲𑀫𑁆𑀫𑀸𑀆𑀚𑀻𑀯𑀲𑁆𑀲 𑀧𑀤𑀝𑁆𑀞𑀸𑀦’’𑀦𑁆𑀢𑀺. 𑀢𑀢𑁆𑀣 𑀢𑁂𑀢𑀺 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸. 𑀬𑀲𑁆𑀫𑀸 𑀧𑀦 𑀆𑀚𑀻𑀯𑀝𑁆𑀞𑀫𑀓𑁂 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀲𑁆𑀲 𑀉𑀧𑁆𑀧𑀦𑁆𑀦𑀸𑀦𑀼𑀧𑁆𑀧𑀦𑁆𑀦𑀸𑀦𑀁 𑀅𑀓𑀼𑀲𑀮𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀦𑀼𑀧𑁆𑀧𑀸𑀤𑀦𑀸𑀦𑀺, 𑀅𑀦𑀼𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀦𑀧𑀸𑀭𑀺𑀧𑀽𑀭𑀺𑀬𑀸 𑀘 𑀲𑀫𑁆𑀪𑀯𑀦𑁆𑀢𑀺, 𑀢𑀣𑀸 𑀲𑀫𑁆𑀫𑀸𑀯𑀸𑀬𑀸𑀫𑁂 𑀞𑀺𑀢𑀲𑁆𑀲𑁂𑀯 𑀓𑀸𑀬𑀸𑀤𑀻𑀲𑀼 𑀲𑀼𑀪𑀲𑀜𑁆𑀜𑀸𑀤𑀺𑀯𑀺𑀤𑁆𑀥𑀁𑀲𑀺𑀦𑀻 𑀲𑀫𑁆𑀫𑀸𑀲𑀢𑀺 𑀲𑀫𑁆𑀪𑀯𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀫𑁆𑀫𑀸𑀆𑀚𑀻𑀯𑁄…𑀧𑁂…𑀧𑀤𑀝𑁆𑀞𑀸𑀦’’𑀦𑁆𑀢𑀺. 𑀚𑁂𑀝𑁆𑀞𑀓𑀲𑀻𑀮𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄, 𑀲𑀤𑁆𑀥𑀸𑀲𑀸𑀥𑀦𑁄 𑀘 𑀲𑁄𑀢𑀺 𑀆𑀳 ‘‘𑀢𑀁 𑀲𑀻𑀮𑀲𑁆𑀲 𑀧𑀤𑀝𑁆𑀞𑀸𑀦’’𑀦𑁆𑀢𑀺.

𑀢𑁂𑀲𑀦𑁆𑀢𑀺 𑀓𑀸𑀬𑀯𑀘𑀻𑀓𑀫𑁆𑀫𑀸𑀦𑀁. 𑀓𑀫𑁆𑀫𑀧𑀘𑁆𑀘𑀬𑀢𑀸𑀬𑀸𑀢𑀺 𑀓𑀼𑀲𑀮𑀓𑀫𑁆𑀫𑀳𑁂𑀢𑀼𑀓𑀢𑀸𑀬.

𑀧𑀤𑀢𑁆𑀣𑁄 𑀘 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀫𑀦𑀦𑀢𑁄 𑀆𑀭𑀫𑁆𑀫𑀡𑀯𑀺𑀚𑀸𑀦𑀦𑀢𑁄’’𑀢𑀺𑀆𑀤𑀺𑀦𑀸.

𑀅𑀬𑀁 𑀆𑀯𑀝𑁆𑀝𑁄𑀢𑀺 𑀅𑀬𑀁 𑀲𑀪𑀸𑀕𑀯𑀺𑀲𑀪𑀸𑀕𑀥𑀫𑁆𑀫𑀸𑀯𑀝𑁆𑀝𑀦𑀯𑀲𑁂𑀦 𑀆𑀯𑀝𑁆𑀝𑁄. 𑀏𑀢𑁆𑀣 𑀳𑀺 𑀓𑀼𑀲𑀮𑀫𑀽𑀮𑀲𑀫𑁆𑀫𑀢𑁆𑀢𑀫𑀕𑁆𑀕𑀸𑀤𑀺𑀦𑀺𑀤𑁆𑀥𑀸𑀭𑀡𑀸 𑀲𑀪𑀸𑀕𑀥𑀫𑁆𑀫𑀸𑀯𑀝𑁆𑀝𑀦𑀸. 𑀅𑀯𑀺𑀚𑁆𑀚𑀸𑀪𑀯𑀢𑀡𑁆𑀳𑀸𑀦𑀁 𑀦𑀺𑀤𑁆𑀥𑀸𑀭𑀡𑀸 𑀯𑀺𑀲𑀪𑀸𑀕𑀥𑀫𑁆𑀫𑀸𑀯𑀝𑁆𑀝𑀦𑀸.

𑀯𑀺𑀪𑀢𑁆𑀢𑀺𑀳𑀸𑀭𑁂 𑀧𑀤𑀝𑁆𑀞𑀸𑀦𑀪𑀽𑀫𑀺𑀯𑀺𑀪𑀸𑀕𑀸 𑀯𑀼𑀢𑁆𑀢𑀦𑀬𑀸, 𑀲𑀼𑀯𑀺𑀜𑁆𑀜𑁂𑀬𑁆𑀬𑀸 𑀘𑀸𑀢𑀺 𑀥𑀫𑁆𑀫𑀯𑀺𑀪𑀸𑀕𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀬𑀺𑀤’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀦𑀬𑀺𑀤𑀁 𑀬𑀣𑀸𑀭𑀼𑀢𑀯𑀲𑁂𑀦 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀲𑀼𑀢𑁆𑀢𑀲𑁆𑀲 𑀦𑁂𑀬𑁆𑀬𑀢𑁆𑀣𑀢𑀁 𑀯𑀢𑁆𑀯𑀸 ‘‘𑀬𑁄𑀳𑀻’’𑀢𑀺𑀆𑀤𑀺𑀦𑀸 𑀢𑀁 𑀯𑀺𑀯𑀭𑀢𑀺. ‘‘𑀤𑀼𑀓𑁆𑀔𑀫𑁂𑀯 𑀅𑀦𑁆𑀯𑁂𑀢𑀻’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀳𑀺𑀢𑁂𑀲𑀺𑀢𑀸 𑀓𑀼𑀲𑀮𑀫𑁂𑀯𑀸𑀢𑀺? 𑀦𑀬𑀺𑀤𑀫𑀻𑀤𑀺𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀥𑀫𑁆𑀫𑀁 𑀧𑀦 𑀥𑀫𑁆𑀫𑁄𑀢𑀺, 𑀥𑀫𑁆𑀫𑀜𑁆𑀘 𑀧𑀦 𑀅𑀥𑀫𑁆𑀫𑁄𑀢𑀺 𑀤𑀻𑀧𑀦𑁂𑀦 𑀮𑁄𑀓𑀲𑁆𑀲 𑀲𑀩𑁆𑀩𑀸𑀦𑀢𑁆𑀣𑀩𑀻𑀚𑀪𑀽𑀢𑁂𑀲𑀼 𑀲𑀓𑀮𑀳𑀺𑀢𑀲𑀼𑀔𑀼𑀧𑀸𑀬𑀧𑀝𑀺𑀓𑁆𑀔𑁂𑀧𑀓𑁂𑀲𑀼 𑀢𑀺𑀢𑁆𑀣𑀓𑀭𑁂𑀲𑀼 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀯𑀲𑁂𑀦 𑀧𑀯𑀢𑁆𑀢𑀫𑀺𑀘𑁆𑀙𑀸𑀥𑀺𑀫𑁄𑀓𑁆𑀔𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑁄 𑀳𑀺 𑀮𑁄𑀓𑁂 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀧𑀼𑀜𑁆𑀜𑀁 𑀓𑀸𑀢𑀼𑀓𑀸𑀫𑀁 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 𑀧𑀝𑀺𑀩𑀸𑀳𑀢𑀺, 𑀲𑁄𑀧𑀺 𑀕𑀸𑀭𑀬𑁆𑀳𑁄, 𑀓𑀺𑀫𑀗𑁆𑀕𑀁 𑀧𑀦 𑀅𑀭𑀺𑀬𑀯𑀺𑀦𑀬𑁂 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀧𑀝𑀺𑀩𑀸𑀳𑀦𑁆𑀢𑁂𑀲𑀽𑀢𑀺 𑀤𑀼𑀓𑁆𑀔𑀨𑀮𑀸𑀯 𑀢𑀢𑁆𑀣 𑀲𑀫𑁆𑀪𑀸𑀯𑀦𑀸𑀧𑀲𑀁𑀲𑀸 𑀧𑀬𑀺𑀭𑀼𑀧𑀸𑀲𑀦𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋 ‘‘𑀦 𑀔𑁄 𑀅𑀳𑀁, 𑀫𑁄𑀖𑀧𑀼𑀭𑀺𑀲, 𑀅𑀭𑀳𑀢𑁆𑀢𑀲𑁆𑀲 𑀫𑀘𑁆𑀙𑀭𑀸𑀬𑀸𑀫𑀺, 𑀅𑀧𑀺𑀘 𑀢𑀼𑀬𑁆𑀳𑁂𑀯𑁂𑀢𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁…𑀧𑁂… 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺 (𑀤𑀻. 𑀦𑀺. 𑁩.𑁭), ‘‘𑀬𑁄 𑀦𑀺𑀦𑁆𑀤𑀺𑀬𑀁 𑀧𑀲𑀁𑀲𑀢𑀺 (𑀲𑀼. 𑀦𑀺. 𑁬𑁬𑁩; 𑀲𑀁. 𑀦𑀺. 𑁧.𑁧𑁮𑁦, 𑁧𑁮𑁧; 𑀅. 𑀦𑀺. 𑁪.𑁩; 𑀦𑁂𑀢𑁆𑀢𑀺. 𑁯𑁨), 𑀲𑀩𑁆𑀩𑀲𑁆𑀲𑀸𑀧𑀺 𑀅𑀦𑀢𑁆𑀣𑀲𑁆𑀲 𑀫𑀽𑀮𑀁 𑀩𑀸𑀮𑀽𑀧𑀲𑁂𑀯𑀦𑀸’’𑀢𑀺 𑀘.

𑀇𑀤𑀜𑁆𑀳𑀺 𑀲𑀼𑀢𑁆𑀢𑀦𑁆𑀢𑀺 ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸…𑀧𑁂…𑀧𑀤’’𑀦𑁆𑀢𑀺 (𑀥. 𑀧. 𑁧, 𑁨) 𑀧𑀞𑀫𑀁 𑀕𑀸𑀣𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀏𑀢𑀲𑁆𑀲𑀸𑀢𑀺 𑀲𑀁𑀯𑀡𑁆𑀡𑀺𑀬𑀫𑀸𑀦𑀲𑀼𑀢𑁆𑀢𑀲𑁆𑀲.

𑀓𑀺𑀘𑁆𑀘𑀧𑀜𑁆𑀜𑀢𑁆𑀢𑀻𑀢𑀺 𑀅𑀥𑀺𑀧𑀢𑀺𑀧𑀘𑁆𑀘𑀬𑀲𑀗𑁆𑀔𑀸𑀢𑀲𑁆𑀲 𑀓𑀺𑀘𑁆𑀘𑀲𑁆𑀲 𑀧𑀜𑁆𑀜𑀸𑀧𑀦𑀁. 𑀧𑀥𑀸𑀦𑀧𑀜𑁆𑀜𑀢𑁆𑀢𑀻𑀢𑀺 𑀧𑀥𑀸𑀦𑀪𑀸𑀯𑀲𑁆𑀲 𑀧𑀜𑁆𑀜𑀸𑀧𑀦𑀸. 𑀲𑀳𑀚𑀸𑀢𑀧𑀜𑁆𑀜𑀢𑁆𑀢𑀻𑀢𑀺 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀫𑀦𑀲𑀸 𑀲𑀳𑀪𑀸𑀯𑀧𑀜𑁆𑀜𑀸𑀧𑀦𑀸.

𑀫𑀳𑀸𑀪𑀽𑀢𑀸𑀢𑀻𑀢𑀺 𑀇𑀢𑀺𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀢𑁂𑀦 𑀫𑀳𑀸𑀪𑀽𑀢𑀸𑀯𑀺𑀦𑀸𑀪𑀸𑀯𑀻 𑀲𑀩𑁆𑀩𑁄 𑀭𑀽𑀧𑀥𑀫𑁆𑀫𑁄 𑀲𑀗𑁆𑀕𑀬𑁆𑀳𑀢𑀺.

‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸’’𑀢𑀺 𑀲𑀫𑀸𑀲𑀧𑀤𑁂 ‘‘𑀫𑀦𑁄’’𑀢𑀺 𑀧𑀤𑀁 𑀢𑀤𑀯𑀬𑀯𑀫𑀢𑁆𑀢𑀦𑁆𑀢𑀺 𑀆𑀳 ‘‘𑀦𑁂𑀯 𑀧𑀤𑀲𑀼𑀤𑁆𑀥𑀻’’𑀢𑀺. 𑀢𑁂𑀦𑁂𑀯𑀸𑀳 ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸𑀢𑀺 𑀧𑀤𑀲𑀼𑀤𑁆𑀥𑀻’’𑀢𑀺. ‘‘𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻’’𑀢𑀺 𑀇𑀤𑀁 𑀲𑀼𑀔𑀸𑀦𑀼𑀕𑀫𑀲𑁆𑀲 𑀉𑀤𑀸𑀳𑀭𑀡𑀫𑀢𑁆𑀢𑀁, 𑀦 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀧𑀭𑀺𑀲𑀫𑀸𑀧𑀦𑀁. ‘‘𑀲𑀼𑀔𑀫𑀦𑁆𑀯𑁂𑀢𑀻’’𑀢𑀺 𑀧𑀦 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀧𑀭𑀺𑀲𑀫𑀸𑀧𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀧𑀤𑀲𑀼𑀤𑁆𑀥𑀺 𑀘𑁂𑀯 𑀆𑀭𑀫𑁆𑀪𑀲𑀼𑀤𑁆𑀥𑀺 𑀘𑀸’’𑀢𑀺.

𑀏𑀓𑀢𑁆𑀢𑀢𑀸𑀢𑀺 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸𑀤𑀺𑀲𑀸𑀫𑀜𑁆𑀜𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀯𑁂𑀫𑀢𑁆𑀢𑀢𑀸 ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸’’𑀢𑀺𑀆𑀤𑀺𑀦𑀸 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀥𑀫𑁆𑀫𑁂 𑀧𑀲𑀸𑀤𑁄 𑀥𑀸𑀭𑀡𑀸𑀬 𑀦𑀺𑀯𑀢𑁆𑀢𑁂𑀢𑁆𑀯𑀸 𑀧𑀲𑀦𑁆𑀦𑀲𑀗𑁆𑀔𑀸𑀢𑁂 𑀯𑀺𑀲𑁂𑀲𑁂 𑀅𑀯𑀝𑁆𑀞𑀸𑀧𑀦𑀢𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀲𑀸𑀤𑁄 𑀲𑀺𑀦𑁂𑀳𑀲𑀪𑀸𑀯𑁄, 𑀅𑀲𑁆𑀲𑀤𑁆𑀥𑀺𑀬𑀁 𑀯𑀺𑀬 𑀮𑀽𑀔𑀲𑀪𑀸𑀯𑀁 𑀤𑁄𑀲𑀁 𑀯𑀺𑀦𑁄𑀤𑁂𑀢𑀻𑀢𑀺 𑀆𑀳 ‘‘𑀩𑁆𑀬𑀸𑀧𑀸𑀤𑀯𑀺𑀓𑁆𑀔𑀫𑁆𑀪𑀦𑀢𑁄’’𑀢𑀺. 𑀩𑀳𑀺𑀤𑁆𑀥𑀸𑀢𑀺 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀁 𑀲𑀦𑁆𑀥𑀸𑀬𑀸𑀳. 𑀑𑀓𑀧𑁆𑀧𑀦𑀢𑁄𑀢𑀺 𑀆𑀭𑀫𑁆𑀫𑀡𑀁 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀅𑀦𑀼𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀲𑀤𑁆𑀤𑀳𑀦𑀢𑁄.

𑀤𑁂𑀬𑁆𑀬𑀥𑀫𑁆𑀫𑀸𑀤𑀬𑁄𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀲𑀁𑀯𑁂𑀕𑀳𑀺𑀭𑁄𑀢𑁆𑀢𑀧𑁆𑀧𑀓𑀲𑀺𑀡𑀫𑀡𑁆𑀟𑀮𑀸𑀤𑀬𑁄 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀇𑀝𑁆𑀞𑀸𑀭𑀫𑁆𑀫𑀡𑀸𑀤𑀬𑁄𑀢𑀺 𑀆𑀤𑀺𑀲𑀤𑁆𑀤𑁂𑀦 𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸, 𑀤𑁆𑀯𑀸𑀭𑀥𑀫𑁆𑀫𑀸, 𑀫𑀦𑀲𑀺𑀓𑀸𑀭𑁄𑀢𑀺 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀨𑀲𑁆𑀲𑁄𑀢𑀺 𑀬𑀣𑀸 𑀯𑁂𑀤𑀦𑀸𑀤𑀻𑀦𑀁 𑀇𑀝𑁆𑀞𑀸𑀭𑀫𑁆𑀫𑀡𑀸𑀤𑀬𑁄 𑀧𑀘𑁆𑀘𑀬𑁄, 𑀏𑀯𑀁 𑀨𑀲𑁆𑀲𑁄𑀧𑀻𑀢𑀺 𑀧𑀘𑁆𑀘𑀬𑀢𑀸𑀲𑀸𑀫𑀜𑁆𑀜𑀫𑁂𑀯 𑀉𑀧𑀲𑀁𑀳𑀭𑀢𑀺 𑀢𑀣𑀸-𑀲𑀤𑁆𑀤𑁄. 𑀯𑁂𑀤𑀦𑀸𑀤𑀻𑀦𑀦𑁆𑀢𑀺 𑀳𑀺 𑀯𑁂𑀤𑀦𑀸𑀤𑀬𑁄 𑀢𑀬𑁄 𑀔𑀦𑁆𑀥𑀸 𑀕𑀳𑀺𑀢𑀸. 𑀯𑀺𑀜𑁆𑀜𑀸𑀡𑀲𑁆𑀲 𑀯𑁂𑀤𑀦𑀸𑀤𑀬𑁄𑀢𑀺 𑀦𑀸𑀫𑀭𑀽𑀧𑀁 𑀲𑀦𑁆𑀥𑀸𑀬 𑀯𑀤𑀢𑀺.

‘‘𑀲𑀻𑀮𑀫𑀬𑀲𑁆𑀲 𑀅𑀤𑁄𑀲𑁄 𑀧𑀤𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁 𑀔𑀦𑁆𑀢𑀺𑀧𑀥𑀸𑀦𑀢𑁆𑀢𑀸 𑀲𑀻𑀮𑀲𑁆𑀲. 𑀅𑀥𑀺𑀝𑁆𑀞𑀸𑀢𑀻𑀢𑀺 𑀅𑀦𑀼𑀬𑀼𑀜𑁆𑀚𑀢𑀺 𑀉𑀧𑁆𑀧𑀸𑀤𑁂𑀢𑀺. 𑀲𑁄𑀢𑀺 𑀏𑀯𑀁 𑀓𑀼𑀲𑀮𑀘𑀺𑀢𑁆𑀢𑀁 𑀪𑀸𑀯𑁂𑀦𑁆𑀢𑁄. ‘‘𑀅𑀦𑀼𑀧𑁆𑀧𑀦𑁆𑀦𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀪𑀸𑀯𑀦𑀸𑀧𑀳𑀸𑀦𑀲𑀫𑀸𑀭𑁄𑀧𑀦𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀯𑀲𑁂𑀦 𑀕𑀸𑀣𑀸𑀬 𑀅𑀢𑁆𑀣𑀁 𑀯𑀺𑀘𑀺𑀦𑀺𑀢𑁆𑀯𑀸 𑀲𑀫𑀸𑀭𑁄𑀧𑁂𑀢𑀺, 𑀏𑀯𑀫𑁆𑀧𑀺 𑀲𑀓𑁆𑀓𑀸 𑀬𑁄𑀚𑁂𑀢𑀼𑀦𑁆𑀢𑀺 𑀯𑀸𑀲𑀦𑀸𑀪𑀸𑀕𑀺𑀬𑀯𑀲𑁂𑀦 𑀧𑀤𑀝𑁆𑀞𑀸𑀦𑀦𑀺𑀤𑁆𑀤𑁂𑀲𑁂 𑀉𑀤𑀸𑀳𑀭𑀻𑀬𑀢𑀺.

𑀏𑀯𑀁 ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸’’𑀢𑀺 𑀕𑀸𑀣𑀸𑀬 𑀯𑀲𑁂𑀦 𑀳𑀸𑀭𑀲𑀫𑁆𑀧𑀸𑀢𑀬𑁄𑀚𑀦𑀸𑀯𑀺𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀕𑀸𑀣𑀸𑀦𑁆𑀢𑀭𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀢𑀣𑀸 𑀤𑀤𑀢𑁄 𑀧𑀼𑀜𑁆𑀜’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀪𑀸𑀯𑀦𑀸𑀫𑀬𑀦𑁆𑀢𑀺 𑀧𑀜𑁆𑀜𑀸𑀪𑀸𑀯𑀦𑀸𑀫𑀬𑀁.

‘‘𑀅𑀮𑁄𑀪𑁄 𑀓𑀼𑀲𑀮𑀫𑀽𑀮’’𑀦𑁆𑀢𑀺𑀆𑀤𑀺 𑀤𑀸𑀦𑀸𑀤𑀻𑀦𑀁 𑀅𑀮𑁄𑀪𑀸𑀤𑀺𑀧𑀥𑀸𑀦𑀢𑁆𑀢𑀸 𑀯𑀼𑀢𑁆𑀢𑀁, 𑀲𑀩𑁆𑀩𑀢𑁆𑀣 𑀘 ‘‘𑀯𑀼𑀢𑁆𑀢’’𑀦𑁆𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀢𑁂𑀲𑀦𑁆𑀢𑀺 𑀭𑀸𑀕𑀸𑀤𑀻𑀦𑀁. 𑀦𑀺𑀲𑁆𑀲𑀭𑀡𑀦𑁆𑀢𑀺 𑀘 𑀧𑀭𑀺𑀦𑀺𑀩𑁆𑀩𑀸𑀦𑀫𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺.

𑀧𑀭𑀺𑀘𑁆𑀘𑀸𑀕𑀲𑀻𑀮𑁄 𑀅𑀮𑁄𑀪𑀚𑁆𑀛𑀸𑀲𑀬𑁄 𑀓𑀸𑀫𑁂𑀲𑀼 𑀆𑀤𑀻𑀦𑀯𑀤𑀲𑁆𑀲𑀸𑀯𑀻 𑀲𑀫𑁆𑀫𑀤𑁂𑀯 𑀲𑀻𑀮𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑀆𑀳 ‘‘𑀤𑀤𑀢𑁄…𑀧𑁂… 𑀧𑀤𑀝𑁆𑀞𑀸𑀦’’𑀦𑁆𑀢𑀺. 𑀇𑀥 𑀑𑀴𑀸𑀭𑀺𑀓𑀸 𑀦𑀸𑀫 𑀓𑀺𑀮𑁂𑀲𑀸 𑀯𑀻𑀢𑀺𑀓𑁆𑀓𑀫𑀸𑀯𑀢𑁆𑀣𑀸𑀦𑀁, 𑀢𑀧𑁆𑀧𑀳𑀸𑀦𑀁 𑀢𑀤𑀗𑁆𑀕𑀧𑁆𑀧𑀳𑀸𑀦𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀫𑀚𑁆𑀛𑀺𑀫𑀸𑀦𑀦𑁆𑀢𑀺 𑀧𑀭𑀺𑀬𑀼𑀝𑁆𑀞𑀸𑀦𑀸𑀯𑀢𑁆𑀣𑀸𑀦𑀁. 𑀲𑀼𑀔𑀼𑀫𑀸𑀦𑀦𑁆𑀢𑀺 𑀅𑀦𑀼𑀲𑀬𑀸𑀯𑀢𑁆𑀣𑀸𑀦𑀁. 𑀓𑀢𑀸𑀯𑀻𑀪𑀽𑀫𑀺 𑀦𑁆𑀢𑀺 𑀔𑀻𑀡𑀸𑀲𑀯𑀪𑀽𑀫𑀺𑀁.

𑀤𑀤𑀢𑁄𑀢𑀺 𑀫𑀕𑁆𑀕𑀲𑀳𑀕𑀢𑁂𑀦 𑀅𑀮𑁄𑀪𑁂𑀦 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀪𑀬𑀤𑀸𑀦𑀁 𑀤𑀤𑀢𑁄. 𑀧𑀼𑀜𑁆𑀜𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀁. 𑀲𑀁𑀬𑀫𑀢𑁄𑀢𑀺 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑁂𑀳𑀺 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑁂𑀳𑀺 𑀤𑀺𑀝𑁆𑀞𑁂𑀓𑀝𑁆𑀞𑀸𑀤𑀺𑀲𑀁𑀓𑀺𑀮𑁂𑀲𑀢𑁄 𑀫𑀕𑁆𑀕𑀲𑀁𑀬𑀫𑁂𑀦 𑀲𑀁𑀬𑀫𑀦𑁆𑀢𑀲𑁆𑀲. 𑀯𑁂𑀭𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀸𑀧𑀁. 𑀓𑀼𑀲𑀮𑁄𑀢𑀺 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀓𑀼𑀲𑀮𑁄 𑀯𑀺𑀘𑀓𑁆𑀔𑀡𑁄. 𑀚𑀳𑀸𑀢𑀺 𑀧𑀸𑀧𑀓𑀦𑁆𑀢𑀺 𑀢𑁂𑀳𑀺 𑀢𑁂𑀳𑀺 𑀫𑀕𑁆𑀕𑁂𑀳𑀺 𑀢𑀁 𑀢𑀁 𑀧𑀳𑀸𑀢𑀩𑁆𑀩𑀁 𑀧𑀸𑀧𑀥𑀫𑁆𑀫𑀁 𑀑𑀥𑀺𑀲𑁄 𑀚𑀳𑀸𑀢𑀺 𑀲𑀫𑀼𑀘𑁆𑀙𑀺𑀦𑁆𑀤𑀢𑀺. 𑀢𑁂𑀦𑀸𑀳 ‘‘𑀫𑀕𑁆𑀕𑁄 𑀯𑀼𑀢𑁆𑀢𑁄’’𑀢𑀺.

‘‘𑀤𑀤𑀢𑁄’’𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀅𑀯𑀺𑀪𑀸𑀕𑁂𑀦 𑀓𑀼𑀲𑀮𑀫𑀽𑀮𑀸𑀦𑀺 𑀉𑀤𑁆𑀥𑀝𑀸𑀦𑀻𑀢𑀺 𑀇𑀤𑀸𑀦𑀺 𑀯𑀺𑀪𑀸𑀕𑁂𑀦 𑀢𑀸𑀦𑀺 𑀉𑀤𑁆𑀥𑀭𑀦𑁆𑀢𑁄 ‘‘𑀮𑁄𑀓𑀺𑀬𑀓𑀼𑀲𑀮𑀫𑀽𑀮’’𑀦𑁆𑀢𑀺𑀆𑀤𑀺𑀫𑀸𑀳.

𑀧𑀼𑀣𑀼𑀚𑁆𑀚𑀦𑀪𑀽𑀫𑀺 𑀲𑁂𑀓𑁆𑀔𑀪𑀽𑀫𑀺 𑀤𑀲𑁆𑀲𑀺𑀢𑀸 𑀧𑀳𑀸𑀦𑀲𑁆𑀲 𑀯𑀺𑀧𑁆𑀧𑀓𑀢𑀪𑀸𑀯𑀤𑀻𑀧𑀦𑀢𑁄. 𑀅𑀲𑁂𑀓𑁆𑀔𑀪𑀽𑀫𑀺 𑀤𑀲𑁆𑀲𑀺𑀢𑀸 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀤𑀻𑀧𑀦𑀢𑁄.

𑀲𑀕𑁆𑀕𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀢𑁆𑀢𑀺.

𑀧𑀼𑀜𑁆𑀜𑁂 𑀓𑀣𑀺𑀢𑁂 𑀧𑀼𑀜𑁆𑀜𑀨𑀮𑀫𑁆𑀧𑀺 𑀓𑀣𑀺𑀢𑀫𑁂𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀤𑀤𑀢𑁄…𑀧𑁂… 𑀤𑁂𑀲𑀦𑀫𑀸𑀳𑀸’’𑀢𑀺. 𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑁂𑀦 𑀯𑀺𑀦𑀸 𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀼𑀲𑀮𑁄…𑀧𑁂… 𑀤𑁂𑀲𑀦𑀫𑀸𑀳𑀸’’𑀢𑀺.

𑀯𑁂𑀭𑀲𑀤𑁆𑀤𑁄 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀺𑀧𑀸𑀧𑀥𑀫𑁆𑀫𑁂𑀲𑀼𑀧𑀺 𑀦𑀺𑀭𑀼𑀴𑁆𑀳𑁄𑀢𑀺 𑀯𑀼𑀢𑁆𑀢𑀁 ‘‘𑀏𑀯𑀁 𑀲𑀩𑁆𑀩𑀸𑀦𑀺𑀧𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸𑀦𑀻’’𑀢𑀺. 𑀤𑁆𑀯𑁂𑀧𑀺 𑀯𑀺𑀫𑀼𑀢𑁆𑀢𑀺𑀬𑁄 𑀲𑁂𑀓𑁆𑀔𑀸𑀲𑁂𑀓𑁆𑀔𑀯𑀺𑀫𑀼𑀢𑁆𑀢𑀺𑀬𑁄, 𑀲𑀉𑀧𑀸𑀤𑀺𑀲𑁂𑀲𑀅𑀦𑀼𑀧𑀸𑀤𑀺𑀲𑁂𑀲𑀯𑀺𑀫𑀼𑀢𑁆𑀢𑀺𑀬𑁄 𑀘. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀦𑀺𑀩𑁆𑀩𑀼𑀢𑁄𑀢𑀺 𑀤𑁆𑀯𑁂 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑁄’’𑀢𑀺𑀆𑀤𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁭𑁬).

𑀓𑀸𑀭𑀡𑀽𑀧𑀘𑀸𑀭𑁂𑀦, 𑀓𑀸𑀭𑀡𑀕𑁆𑀕𑀳𑀡𑁂𑀦 𑀯𑀸 𑀨𑀮𑀁 𑀕𑀳𑀺𑀢𑀦𑁆𑀢𑀺 𑀆𑀳 ‘‘𑀤𑁆𑀯𑁂 𑀲𑀼𑀕𑀢𑀺𑀬𑁄’’𑀢𑀺𑀆𑀤𑀺. 𑀯𑀝𑁆𑀝𑀯𑀺𑀯𑀝𑁆𑀝𑀲𑀫𑁆𑀧𑀢𑁆𑀢𑀺𑀬𑁄 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀨𑀮𑀁, 𑀢𑀲𑁆𑀲 𑀤𑀸𑀦𑀁 𑀲𑀻𑀮𑀁 𑀪𑀸𑀯𑀦𑀸 𑀉𑀧𑀸𑀬𑁄, ‘‘𑀲𑀫𑁆𑀧𑀢𑁆𑀢𑀺𑀤𑁆𑀯𑀬𑀁 𑀇𑀘𑁆𑀙𑀦𑁆𑀢𑁂𑀦 𑀤𑀸𑀦𑀸𑀤𑀻𑀲𑀼 𑀅𑀧𑁆𑀧𑀫𑀢𑁆𑀢𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀅𑀬𑀫𑁂𑀢𑁆𑀣 𑀪𑀕𑀯𑀢𑁄 𑀆𑀡𑀢𑁆𑀢𑀻𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬𑀸𑀳 ‘‘𑀨𑀮𑀸𑀤𑀻𑀦𑀺 𑀬𑀣𑀸𑀭𑀳𑀁 𑀯𑁂𑀤𑀺𑀢𑀩𑁆𑀩𑀸𑀦𑀻’’𑀢𑀺.

𑀯𑀺𑀘𑀬𑁄𑀢𑀺 𑀯𑀺𑀘𑀬𑀳𑀸𑀭𑀲𑀫𑁆𑀧𑀸𑀢𑁄, 𑀲𑁄 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺. ‘‘𑀢𑀺𑀯𑀺𑀥𑀫𑁆𑀧𑀺 𑀤𑀸𑀦𑀫𑀬’’𑀦𑁆𑀢𑀺𑀆𑀤𑀺𑀦𑀸 𑀧𑀤𑀢𑁆𑀣𑀯𑀺𑀘𑀬𑀁 𑀤𑀲𑁆𑀲𑁂𑀢𑀺, 𑀢𑁂𑀦 𑀅𑀲𑁆𑀲𑀸𑀤𑀸𑀤𑀬𑁄, 𑀇𑀢𑀭𑁂 𑀘 𑀯𑀺𑀘𑀬𑀳𑀸𑀭𑀧𑀤𑀢𑁆𑀣𑀸 𑀅𑀢𑁆𑀣𑀢𑁄 𑀯𑀺𑀘𑀺𑀢𑀸 𑀏𑀯 𑀳𑁄𑀦𑁆𑀢𑀻𑀢𑀺. 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀲𑁆𑀲 𑀧𑀭𑀺𑀘𑁆𑀘𑀸𑀕𑁄 𑀯𑀼𑀢𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑁄𑀢𑀺 𑀲𑀓𑀮𑁄 𑀅𑀦𑀯𑀲𑁂𑀲𑀢𑁄 𑀓𑀺𑀘𑁆𑀘𑀲𑁆𑀲 𑀯𑀼𑀢𑁆𑀢𑀢𑁆𑀢𑀸.

𑀤𑀸𑀦𑀸𑀪𑀺𑀭𑀢𑀲𑁆𑀲 𑀘𑀸𑀕𑀸𑀥𑀺𑀝𑁆𑀞𑀸𑀦𑀁 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀤𑀤𑀢𑁄…𑀧𑁂… 𑀧𑀤𑀝𑁆𑀞𑀸𑀦’’𑀦𑁆𑀢𑀺. 𑀯𑀺𑀭𑀢𑀺𑀲𑀘𑁆𑀘𑁂, 𑀯𑀘𑀻𑀲𑀘𑁆𑀘𑁂 𑀘 𑀢𑀺𑀝𑁆𑀞𑀢𑁄 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀁𑀬𑀫…𑀧𑁂… 𑀧𑀤𑀝𑁆𑀞𑀸𑀦’’𑀦𑁆𑀢𑀺. 𑀓𑁄𑀲𑀮𑁆𑀮𑀬𑁄𑀕𑀢𑁄 𑀘 𑀧𑀸𑀧𑀧𑁆𑀧𑀳𑀸𑀦𑀢𑁄 𑀘 𑀧𑀜𑁆𑀜𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀓𑀼𑀲𑀮𑁄…𑀧𑁂… 𑀧𑀤𑀝𑁆𑀞𑀸𑀦’’𑀦𑁆𑀢𑀺. 𑀅𑀦𑀯𑀲𑁂𑀲𑀭𑀸𑀕𑀸𑀤𑀻𑀲𑀼 𑀧𑀳𑀻𑀦𑁂𑀲𑀼 𑀉𑀧𑀲𑀫𑁄 𑀉𑀧𑀝𑁆𑀞𑀺𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀭𑀸𑀕…𑀧𑁂… 𑀧𑀤𑀝𑁆𑀞𑀸𑀦’’𑀦𑁆𑀢𑀺.

𑀓𑀼𑀲𑀮𑁄𑀢𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀓𑁄𑀲𑀮𑁆𑀮𑀲𑀫𑁆𑀫𑀸𑀤𑀺𑀝𑁆𑀞𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀓𑀼𑀲𑀮𑁄…𑀧𑁂… 𑀫𑀕𑁆𑀕𑀗𑁆𑀕𑀸𑀤𑀺𑀪𑀸𑀯𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸’’𑀢𑀺. 𑀆𑀤𑀺𑀲𑀤𑁆𑀤𑁂𑀦 𑀩𑁄𑀥𑀺𑀧𑀓𑁆𑀔𑀺𑀬𑀪𑀸𑀯𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀔𑁂𑀧𑁂𑀢𑀩𑁆𑀩𑀪𑀸𑀯𑁂𑀦𑀸𑀢𑀺 𑀧𑀳𑀸𑀢𑀩𑁆𑀩𑀪𑀸𑀯𑁂𑀦.

𑀅𑀯𑁂𑀭𑀢𑀦𑁆𑀢𑀺 𑀅𑀲𑀧𑀢𑁆𑀢𑀢𑀁. 𑀓𑀼𑀲𑀮𑀥𑀫𑁆𑀫𑁂𑀳𑀻𑀢𑀺 𑀅𑀦𑀯𑀚𑁆𑀚𑀥𑀫𑁆𑀫𑁂𑀳𑀺, 𑀨𑀮𑀦𑀺𑀩𑁆𑀩𑀸𑀦𑁂𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀸𑀦𑀲𑁆𑀲 𑀫𑀳𑀧𑁆𑀨𑀮𑀢𑀸, 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀲𑀢𑁆𑀣𑀼 𑀅𑀦𑀼𑀢𑁆𑀢𑀭𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑁄, 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺 𑀇𑀫𑁂𑀲𑀁 𑀧𑀘𑁆𑀘𑀯𑁂𑀓𑁆𑀔𑀡𑀸 𑀇𑀫𑀲𑁆𑀲 𑀤𑀸𑀦𑀲𑁆𑀲 𑀦𑀺𑀤𑀸𑀦𑀦𑁆𑀢𑀺 𑀅𑀬𑀫𑀢𑁆𑀣𑁄 𑀧𑀸𑀴𑀺𑀬𑀁 𑀦𑀺𑀭𑀼𑀴𑁆𑀳𑁄𑀯. 𑀦𑀺𑀩𑁆𑀩𑀘𑀦𑀦𑀺𑀤𑀸𑀦𑀲𑀦𑁆𑀥𑀬𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀯𑀸𑀢𑀺 𑀆𑀳 ‘‘𑀦𑀺𑀩𑁆𑀩𑀘𑀦𑀦𑀺𑀤𑀸𑀦𑀲𑀦𑁆𑀥𑀬𑁄 𑀯𑀢𑁆𑀢𑀩𑁆𑀩𑀸’’𑀢𑀺.

𑀧𑀝𑀺𑀧𑀓𑁆𑀔𑀦𑀺𑀤𑁆𑀤𑁂𑀲𑁂𑀦 𑀲𑀫𑀼𑀤𑀬𑁄𑀢𑀺 𑀤𑁂𑀲𑀦𑀢𑁆𑀣𑀁 𑀧𑀝𑀺𑀧𑀓𑁆𑀔𑀦𑀺𑀤𑁆𑀤𑁂𑀲𑀦𑁂𑀦 𑀦𑀺𑀤𑁆𑀥𑀸𑀭𑀺𑀢𑁄 𑀅𑀬𑀁 𑀫𑀘𑁆𑀙𑀭𑀺𑀬𑀸𑀤𑀺𑀲𑀁𑀓𑀺𑀮𑁂𑀲𑀧𑀓𑁆𑀔𑀺𑀓𑁄 𑀲𑀫𑀼𑀤𑀬𑁄. 𑀅𑀮𑁄𑀪𑁂𑀦…𑀧𑁂… 𑀤𑀸𑀦𑀸𑀤𑀻𑀳𑀻𑀢𑀺 𑀬𑁂𑀳𑀺 𑀅𑀮𑁄𑀪𑀸𑀤𑀻𑀳𑀺 𑀤𑀸𑀦𑀸𑀤𑀬𑁄 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺, 𑀢𑀸𑀦𑀺 𑀤𑀸𑀦𑀸𑀤𑀺𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀸𑀦𑀻𑀢𑀺 𑀓𑀼𑀲𑀮𑀫𑀽𑀮𑀸𑀦𑀺 𑀦𑀺𑀤𑁆𑀥𑀸𑀭𑁂𑀢𑀺 ‘‘𑀇𑀫𑀸𑀦𑀺 𑀢𑀻𑀡𑀺 𑀓𑀼𑀲𑀮𑀸𑀦𑀻’’𑀢𑀺. 𑀢𑁂𑀲𑀦𑁆𑀢𑀺 𑀓𑀼𑀲𑀮𑀫𑀽𑀮𑀸𑀦𑀁.

𑀪𑀬𑀳𑁂𑀢𑀼 𑀤𑁂𑀢𑀺 𑀧𑀡𑁆𑀡𑀸𑀓𑀸𑀭𑀸𑀤𑀺𑀯𑀲𑁂𑀦. 𑀭𑀸𑀕𑀳𑁂𑀢𑀼 𑀤𑁂𑀢𑀺 𑀲𑀪𑀸𑀕𑀯𑀢𑁆𑀣𑀼𑀲𑁆𑀲. 𑀆𑀫𑀺𑀲𑀓𑀺𑀜𑁆𑀘𑀺𑀓𑁆𑀔𑀳𑁂𑀢𑀼 𑀤𑁂𑀢𑀺 𑀮𑀜𑁆𑀚𑀸𑀤𑀺𑀯𑀲𑁂𑀦. 𑀅𑀦𑀼𑀓𑀫𑁆𑀧𑀦𑁆𑀢𑁄 𑀯𑀸 𑀓𑀭𑀼𑀡𑀸𑀔𑁂𑀢𑁆𑀢𑁂. 𑀅𑀧𑀘𑀬𑀫𑀸𑀦𑁄 𑀕𑀼𑀡𑀔𑁂𑀢𑁆𑀢𑁂, 𑀉𑀧𑀓𑀸𑀭𑀔𑁂𑀢𑁆𑀢𑁂 𑀯𑀸. 𑀪𑀬𑀽𑀧𑀭𑀢𑁄𑀢𑀺 𑀪𑀬𑁂𑀦 𑀑𑀭𑀢𑁄. 𑀢𑁂𑀦 𑀢𑀣𑀸𑀭𑀽𑀧𑁂𑀦 𑀲𑀁𑀬𑀫𑁂𑀦 𑀯𑁂𑀭𑀁 𑀦 𑀘𑀺𑀬𑀢𑁂𑀯. 𑀏𑀯𑀁 𑀲𑀩𑁆𑀩𑀲𑁆𑀲 𑀅𑀓𑀼𑀲𑀮𑀲𑁆𑀲 𑀧𑀸𑀧𑀓𑁄 𑀯𑀺𑀧𑀸𑀓𑁄𑀢𑀺 𑀬𑁄𑀚𑀦𑀸.

‘‘𑀤𑀤𑀢𑁄’’𑀢𑀺𑀆𑀤𑀺𑀦𑀸 𑀬𑀣𑀸 𑀤𑀸𑀦𑀧𑀝𑀺𑀓𑁆𑀔𑁂𑀧𑁂𑀦 𑀧𑀭𑀺𑀯𑀢𑁆𑀢𑀦𑀁 𑀤𑀲𑁆𑀲𑀺𑀢𑀁, 𑀏𑀯𑀁 𑀧𑀳𑀸𑀦𑀧𑀝𑀺𑀓𑁆𑀔𑁂𑀧𑁂𑀦𑀧𑀺 𑀧𑀭𑀺𑀯𑀢𑁆𑀢𑀦𑀁 𑀤𑀲𑁆𑀲𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀅𑀓𑀼𑀲𑀮𑁄 𑀧𑀦 𑀦 𑀚𑀳𑀸𑀢𑀻’’𑀢𑀺.

𑀓𑀫𑁆𑀫𑀨𑀮𑀁 𑀲𑀤𑁆𑀤𑀳𑀦𑁆𑀢𑁄 𑀤𑀸𑀦𑀓𑀺𑀭𑀺𑀬𑀸𑀬𑀁 𑀧𑀤𑀳𑀦𑁆𑀢𑁄 𑀬𑁂𑀦 𑀯𑀺𑀥𑀺𑀦𑀸 𑀤𑀸𑀦𑀁 𑀤𑀸𑀢𑀩𑁆𑀩𑀁, 𑀢𑀢𑁆𑀣 𑀲𑀢𑀺𑀁 𑀉𑀧𑀝𑁆𑀞𑀧𑁂𑀦𑁆𑀢𑁄 𑀘𑀺𑀢𑁆𑀢𑀁 𑀲𑀫𑀸𑀤𑀳𑀦𑁆𑀢𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀧𑀼𑀭𑀓𑁆𑀔𑀭𑁄𑀦𑁆𑀢𑁄 𑀤𑀸𑀦𑁂 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀳𑁄𑀢𑀻𑀢𑀺 𑀆𑀳 ‘‘𑀤𑀸𑀦𑀁 𑀦𑀸𑀫…𑀧𑁂… 𑀳𑁄𑀢𑀻’’𑀢𑀺.

𑀪𑀸𑀯𑀦𑀸𑀧𑀳𑀸𑀦𑀲𑀫𑀸𑀭𑁄𑀧𑀦𑀸𑀦𑀺 𑀧𑀸𑀴𑀺𑀬𑀁 𑀲𑀭𑀽𑀧𑀢𑁄 𑀯𑀺𑀜𑁆𑀜𑀸𑀬𑀦𑁆𑀢𑀻𑀢𑀺 𑀧𑀤𑀝𑁆𑀞𑀸𑀦𑀯𑁂𑀯𑀘𑀦𑀲𑀫𑀸𑀭𑁄𑀧𑀦𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀁 𑀲𑀻𑀮𑀲𑁆𑀲 𑀧𑀤𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀁. 𑀅𑀜𑁆𑀜𑀜𑁆𑀘 𑀬𑀤𑁂𑀢𑁆𑀣 𑀅𑀢𑁆𑀣𑀢𑁄 𑀦 𑀯𑀺𑀪𑀢𑁆𑀢𑀁, 𑀢𑀁 𑀯𑀼𑀢𑁆𑀢𑀦𑀬𑀢𑁆𑀢𑀸, 𑀉𑀢𑁆𑀢𑀸𑀦𑀢𑁆𑀣𑀢𑁆𑀢𑀸 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀳𑀸𑀭𑀲𑀫𑁆𑀧𑀸𑀢𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.