𑁬. 𑀯𑀢𑁆𑀢𑀸𑀤𑀺𑀓𑀡𑁆𑀟𑀦𑀺𑀤𑁆𑀤𑁂𑀲𑁄

𑁯𑁬. 𑀉𑀧𑀚𑁆𑀛𑀸𑀘𑀭𑀺𑀬𑀯𑀢𑁆𑀢𑀜𑁆𑀘, 𑀕𑀫𑀺𑀓𑀸𑀕𑀦𑁆𑀢𑀼𑀓𑀫𑁆𑀧𑀺 𑀘;

𑀲𑁂𑀦𑀸𑀲𑀦𑀸𑀤𑀺𑀯𑀢𑁆𑀢𑀜𑁆𑀘, 𑀓𑀸𑀢𑀩𑁆𑀩𑀁 𑀧𑀺𑀬𑀲𑀻𑀮𑀺𑀦𑀸.

𑁯𑁭. 𑀳𑀢𑁆𑀣𑀧𑀸𑀲𑁂 𑀞𑀺𑀢𑁄 𑀓𑀺𑀜𑁆𑀘𑀺, 𑀕𑀳𑀺𑀢𑀩𑁆𑀩𑀁 𑀤𑀤𑁂 𑀢𑀺𑀥𑀸;

𑀕𑀳𑁂𑀢𑀼𑀓𑀸𑀫𑁄 𑀕𑀡𑁆𑀳𑁂𑀬𑁆𑀬, 𑀤𑁆𑀯𑀺𑀥𑀸𑀬𑀁 𑀲𑀫𑁆𑀧𑀝𑀺𑀕𑁆𑀕𑀳𑁄.

𑁯𑁮. 𑀲𑀗𑁆𑀖𑀸𑀝𑀺𑀫𑀼𑀢𑁆𑀢𑀭𑀸𑀲𑀗𑁆𑀕𑀁, 𑀢𑀣𑀸 𑀅𑀦𑁆𑀢𑀭𑀯𑀸𑀲𑀓𑀁;

‘‘𑀏𑀢𑀁 𑀇𑀫𑀁 𑀅𑀥𑀺𑀝𑁆𑀞𑀸𑀫𑀺’’, 𑀢𑀣𑀸 ‘‘𑀧𑀘𑁆𑀘𑀼𑀤𑁆𑀥𑀭𑀸𑀫𑀺’’𑀢𑀺.

𑁯𑁯. ‘‘𑀇𑀫𑀁 𑀇𑀫𑀸𑀦𑀺 𑀏𑀢𑀸𑀦𑀺, 𑀏𑀢𑀫𑁆𑀧𑀺 𑀘𑀻𑀯𑀭’’𑀦𑁆𑀢𑀺 𑀯𑀸;

‘‘𑀧𑀭𑀺𑀓𑁆𑀔𑀸𑀭𑀘𑁄𑀴𑀸𑀦𑀻’’𑀢𑀺, 𑀢𑀣𑀸 ‘‘𑀧𑀘𑁆𑀘𑀼𑀤𑁆𑀥𑀭𑀸𑀫𑀺’’𑀢𑀺.

𑁧𑁦𑁦. ‘‘𑀏𑀢𑀁 𑀇𑀫𑀁 𑀅𑀥𑀺𑀝𑁆𑀞𑀸𑀫𑀺, 𑀧𑀢𑁆𑀢𑀁 𑀧𑀘𑁆𑀘𑀼𑀤𑁆𑀥𑀭𑀸𑀫𑀺’’𑀢𑀺;

𑀏𑀯𑀁 𑀧𑀘𑁆𑀘𑀼𑀤𑁆𑀥𑀭𑁂𑀥𑀺𑀝𑁆𑀞𑁂, 𑀘𑀻𑀯𑀭𑀸𑀤𑀺𑀁 𑀬𑀣𑀸𑀯𑀺𑀥𑀺.

𑁧𑁦𑁧. 𑀲𑀜𑁆𑀘𑀭𑀺𑀢𑁆𑀢𑀁 𑀯𑀺𑀦𑀸 𑀲𑁂𑀲𑀸, 𑀲𑀘𑀺𑀢𑁆𑀢𑀸 𑀕𑀭𑀼𑀓𑀦𑁆𑀢𑀺𑀫𑀸;

𑀅𑀘𑁆𑀙𑀺𑀦𑁆𑀦𑀁 𑀧𑀭𑀺𑀡𑀢𑀁 𑀳𑀺𑀢𑁆𑀯𑀸, 𑀦𑀺𑀲𑁆𑀲𑀕𑁆𑀕𑀺𑀬𑀫𑀘𑀺𑀢𑁆𑀢𑀓𑀁.

𑁧𑁦𑁨. 𑀧𑀤𑀲𑁄𑀥𑀫𑁆𑀫𑀁 𑀤𑀼𑀯𑁂 𑀲𑁂𑀬𑁆𑀬𑀸, 𑀇𑀢𑁆𑀣𑀺𑀬𑀸 𑀥𑀫𑁆𑀫𑀤𑁂𑀲𑀦𑀸;

𑀤𑀼𑀯𑁂 𑀲𑁂𑀦𑀸𑀲𑀦𑀸𑀦𑀻𑀧𑀺, 𑀲𑀺𑀩𑁆𑀩𑀦𑀁 𑀘𑀻𑀯𑀭𑀲𑁆𑀲𑀧𑀺.

𑁧𑁦𑁩. 𑀧𑀯𑀸𑀭𑀺𑀢𑀁 𑀲𑀼𑀭𑀸𑀧𑀸𑀦𑀁, 𑀧𑀜𑁆𑀘𑀲𑀦𑁆𑀦𑀺𑀥𑀺𑀆𑀤𑀺𑀓𑀁;

𑀚𑁄𑀢𑀺𑀦𑀼𑀚𑁆𑀚𑀸𑀮𑀦𑀜𑁆𑀘𑁂𑀯, 𑀓𑀧𑁆𑀧𑀩𑀺𑀦𑁆𑀤𑀼𑀫𑀦𑀸𑀤𑀺𑀓𑀁;

𑀕𑀸𑀫𑀧𑁆𑀧𑀯𑁂𑀲𑀦𑀦𑁆𑀢𑁂𑀢𑁂, 𑀧𑀸𑀘𑀺𑀢𑁆𑀢𑀻𑀲𑀼 𑀅𑀘𑀺𑀢𑁆𑀢𑀓𑀸.

𑁧𑁦𑁪. 𑀧𑀓𑀺𑀡𑁆𑀡𑀓𑁂𑀲𑀼 𑀉𑀤𑁆𑀤𑀺𑀲𑁆𑀲-𑀓𑀢𑀁 𑀳𑀺𑀢𑁆𑀯𑀸𑀜𑁆𑀜𑀫𑀁𑀲𑀓𑀁;

𑀏𑀓𑀢𑁆𑀣𑀭𑀡𑀧𑀸𑀯𑀼𑀭𑀡𑀁, 𑀏𑀓𑀫𑀜𑁆𑀘𑁂 𑀢𑀼𑀯𑀝𑁆𑀝𑀦𑀁;

𑀏𑀓𑀢𑁄 𑀪𑀼𑀜𑁆𑀚𑀦𑀜𑁆𑀘𑀸𑀧𑀺, 𑀦𑀘𑁆𑀘𑀕𑀻𑀢𑀸𑀤𑀺𑀲𑀢𑁆𑀢𑀧𑀺.

𑁧𑁦𑁫. 𑀅𑀓𑀸𑀬𑀩𑀦𑁆𑀥𑀦𑀜𑁆𑀘𑀸𑀧𑀺, 𑀧𑀢𑁆𑀢𑀳𑀢𑁆𑀣𑀓𑀯𑀸𑀝𑀓𑀁;

𑀅𑀘𑀺𑀢𑁆𑀢𑀓𑀫𑀺𑀤𑀁 𑀲𑀩𑁆𑀩𑀁, 𑀲𑁂𑀲𑀫𑁂𑀢𑁆𑀣 𑀲𑀘𑀺𑀢𑁆𑀢𑀓𑀁.

𑁧𑁦𑁬. 𑀯𑀻𑀢𑀺𑀓𑁆𑀓𑀫𑀦𑀘𑀺𑀢𑁆𑀢𑁂𑀦, 𑀲𑀘𑀺𑀢𑁆𑀢𑀓𑀫𑀘𑀺𑀢𑁆𑀢𑀓𑀁;

𑀧𑀜𑁆𑀜𑀢𑁆𑀢𑀺𑀚𑀸𑀦𑀦𑁂𑀦𑀸𑀧𑀺, 𑀯𑀤𑀦𑁆𑀢𑀸𑀘𑀭𑀺𑀬𑀸 𑀢𑀣𑀸.

𑁧𑁦𑁭. 𑀧𑀼𑀩𑁆𑀩𑀓𑀭𑀡𑀸𑀤𑀺𑀓𑀁 𑀓𑀢𑁆𑀯𑀸, 𑀉𑀧𑁄𑀲𑀣𑀧𑁆𑀧𑀯𑀸𑀭𑀡𑀁;

𑀦𑀯𑀥𑀸 𑀤𑀻𑀧𑀺𑀢𑀁 𑀲𑀩𑁆𑀩𑀁, 𑀓𑀸𑀢𑀩𑁆𑀩𑀁 𑀧𑀺𑀬𑀲𑀻𑀮𑀺𑀦𑀸.

𑁧𑁦𑁮. 𑀲𑀫𑁆𑀫𑀚𑁆𑀚𑀦𑀻 𑀧𑀤𑀻𑀧𑁄 𑀘, 𑀉𑀤𑀓𑀁 𑀆𑀲𑀦𑁂𑀦 𑀘;

𑀉𑀧𑁄𑀲𑀣𑀲𑁆𑀲 𑀏𑀢𑀸𑀦𑀺, 𑀧𑀼𑀩𑁆𑀩𑀓𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁧𑁦𑁯. 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀉𑀢𑀼𑀓𑁆𑀔𑀸𑀦𑀁, 𑀪𑀺𑀓𑁆𑀔𑀼𑀕𑀡𑀦𑀸 𑀘 𑀑𑀯𑀸𑀤𑁄;

𑀉𑀧𑁄𑀲𑀣𑀲𑁆𑀲 𑀏𑀢𑀸𑀦𑀺, 𑀧𑀼𑀩𑁆𑀩𑀓𑀺𑀘𑁆𑀘𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁧𑁧𑁦. 𑀉𑀧𑁄𑀲𑀣𑁄 𑀬𑀸𑀯𑀢𑀺𑀓𑀸 𑀘 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸,

𑀲𑀪𑀸𑀕𑀸𑀧𑀢𑁆𑀢𑀺𑀬𑁄 𑀘 𑀦 𑀯𑀺𑀚𑁆𑀚𑀦𑁆𑀢𑀺;

𑀯𑀚𑁆𑀚𑀦𑀻𑀬𑀸 𑀘 𑀧𑀼𑀕𑁆𑀕𑀮𑀸 𑀢𑀲𑁆𑀫𑀺𑀁 𑀦 𑀳𑁄𑀦𑁆𑀢𑀺,

𑀧𑀢𑁆𑀢𑀓𑀮𑁆𑀮𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁧𑁧𑁧. 𑀧𑀼𑀩𑁆𑀩𑀓𑀭𑀡𑀧𑀼𑀩𑁆𑀩𑀓𑀺𑀘𑁆𑀘𑀸𑀦𑀺 𑀲𑀫𑀸𑀧𑁂𑀢𑁆𑀯𑀸 𑀤𑁂𑀲𑀺𑀢𑀸𑀧𑀢𑁆𑀢𑀺𑀓𑀲𑁆𑀲 𑀲𑀫𑀕𑁆𑀕𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼𑀁 𑀆𑀭𑀸𑀥𑀦𑀁 𑀓𑀭𑁄𑀫.

𑁧𑁧𑁨. 𑀧𑀸𑀭𑀺𑀲𑀼𑀤𑁆𑀥𑀺𑀅𑀥𑀺𑀝𑁆𑀞𑀸𑀦-𑀲𑀼𑀢𑁆𑀢𑀼𑀤𑁆𑀤𑁂𑀲𑀯𑀲𑀸 𑀢𑀺𑀥𑀸;

𑀕𑀡𑀧𑀼𑀕𑁆𑀕𑀮𑀲𑀗𑁆𑀖𑀸 𑀘, 𑀢𑀁 𑀓𑀭𑁂𑀬𑁆𑀬𑀼𑀁 𑀬𑀣𑀸𑀓𑁆𑀓𑀫𑀁.

𑁧𑁧𑁩. 𑀘𑀸𑀢𑀼𑀤𑁆𑀤𑀲𑁄 𑀧𑀦𑁆𑀦𑀭𑀲𑁄, 𑀲𑀸𑀫𑀕𑁆𑀕𑀻 𑀤𑀺𑀦𑀢𑁄 𑀢𑀺𑀥𑀸;

𑀤𑀺𑀦𑀧𑀼𑀕𑁆𑀕𑀮𑀓𑀢𑁆𑀢𑀩𑁆𑀩𑀸-𑀓𑀸𑀭𑀢𑁄 𑀢𑁂 𑀦𑀯𑁂𑀭𑀺𑀢𑀸.

𑁧𑁧𑁪. 𑀢𑀬𑁄 𑀢𑀬𑁄𑀢𑀺 𑀓𑀢𑁆𑀯𑀸𑀦, 𑀤𑀺𑀦𑀧𑀼𑀕𑁆𑀕𑀮𑀪𑁂𑀤𑀢𑁄;

𑀢𑁂𑀯𑀸𑀘𑀻𑀤𑁆𑀯𑁂𑀓𑀯𑀸𑀘𑀻𑀢𑀺, 𑀦𑀯 𑀯𑀼𑀢𑁆𑀢𑀸 𑀧𑀯𑀸𑀭𑀡𑀸.

𑁧𑁧𑁫. 𑀓𑀢𑁆𑀢𑀺𑀓𑀦𑁆𑀢𑀺𑀫𑀧𑀓𑁆𑀔𑀫𑁆𑀳𑀸, 𑀳𑁂𑀫𑀁 𑀨𑀕𑁆𑀕𑀼𑀦𑀧𑀼𑀡𑁆𑀡𑀫𑀸;

𑀢𑀲𑁆𑀲 𑀅𑀦𑁆𑀢𑀺𑀫𑀧𑀓𑁆𑀔𑀫𑁆𑀳𑀸, 𑀕𑀺𑀫𑁆𑀳𑀁 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀸;

𑀯𑀲𑁆𑀲𑀓𑀸𑀮𑀁 𑀢𑀢𑁄 𑀲𑁂𑀲𑀁, 𑀘𑀢𑀼𑀯𑀻𑀲𑀢𑀼𑀧𑁄𑀲𑀣𑀸.

𑁧𑁧𑁬. 𑀘𑀸𑀢𑀼𑀤𑁆𑀤𑀲𑀸 𑀙 𑀏𑀢𑁂𑀲𑀼, 𑀧𑀓𑁆𑀔𑀸 𑀢𑀢𑀺𑀬𑀲𑀢𑁆𑀢𑀫𑀸;

𑀜𑁂𑀬𑁆𑀬𑀸 𑀧𑀦𑁆𑀦𑀭𑀲𑀸 𑀲𑁂𑀲𑀸, 𑀅𑀝𑁆𑀞𑀸𑀭𑀲 𑀉𑀧𑁄𑀲𑀣𑀸.

𑁧𑁧𑁭. ‘‘𑀙𑀦𑁆𑀤𑀁 𑀤𑀫𑁆𑀫𑀺, 𑀙𑀦𑁆𑀤𑀁 𑀫𑁂 𑀳𑀭, 𑀙𑀦𑁆𑀤𑀁 𑀫𑁂 𑀆𑀭𑁄𑀘𑁂𑀳𑀻’’𑀢𑀺 𑀙𑀦𑁆𑀤𑀁 𑀤𑀸𑀢𑀩𑁆𑀩𑀁.

𑁧𑁧𑁮. ‘‘𑀧𑀸𑀭𑀺𑀲𑀼𑀤𑁆𑀥𑀺𑀁 𑀤𑀫𑁆𑀫𑀺, 𑀧𑀸𑀭𑀺𑀲𑀼𑀤𑁆𑀥𑀺𑀁 𑀫𑁂 𑀳𑀭, 𑀧𑀸𑀭𑀺𑀲𑀼𑀤𑁆𑀥𑀺𑀁 𑀫𑁂 𑀆𑀭𑁄𑀘𑁂𑀳𑀻’’𑀢𑀺 𑀧𑀸𑀭𑀺𑀲𑀼𑀤𑁆𑀥𑀺 𑀤𑀸𑀢𑀩𑁆𑀩𑀸.

𑁧𑁧𑁯. ‘‘𑀧𑀯𑀸𑀭𑀡𑀁 𑀤𑀫𑁆𑀫𑀺, 𑀧𑀯𑀸𑀭𑀡𑀁 𑀫𑁂 𑀳𑀭, 𑀧𑀯𑀸𑀭𑀡𑀁 𑀫𑁂 𑀆𑀭𑁄𑀘𑁂𑀳𑀺, 𑀫𑀫𑀢𑁆𑀣𑀸𑀬 𑀧𑀯𑀸𑀭𑁂𑀳𑀻’’𑀢𑀺 𑀧𑀯𑀸𑀭𑀡𑀸 𑀤𑀸𑀢𑀩𑁆𑀩𑀸.

𑁧𑁨𑁦. 𑀆𑀧𑀢𑁆𑀢𑀺𑀤𑁂𑀲𑀓𑁂𑀦 ‘‘𑀅𑀳𑀁, 𑀪𑀦𑁆𑀢𑁂, 𑀲𑀫𑁆𑀩𑀳𑀼𑀮𑀸 𑀦𑀸𑀦𑀸𑀯𑀢𑁆𑀣𑀼𑀓𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁, 𑀢𑀸 𑀢𑀼𑀫𑁆𑀳𑀫𑀽𑀮𑁂 𑀧𑀝𑀺𑀤𑁂𑀲𑁂𑀫𑀻’’𑀢𑀺 𑀯𑀢𑁆𑀯𑀸 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁂𑀦 ‘‘𑀧𑀲𑁆𑀲𑀲𑀺, 𑀆𑀯𑀼𑀲𑁄, 𑀢𑀸 𑀆𑀧𑀢𑁆𑀢𑀺𑀬𑁄’’𑀢𑀺 𑀯𑀼𑀢𑁆𑀢𑁂 ‘‘𑀆𑀫, 𑀪𑀦𑁆𑀢𑁂, 𑀧𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀧𑀼𑀦 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁂𑀦 ‘‘𑀆𑀬𑀢𑀺𑀁, 𑀆𑀯𑀼𑀲𑁄, 𑀲𑀁𑀯𑀭𑁂𑀬𑁆𑀬𑀸𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀼, 𑀲𑀼𑀝𑁆𑀞𑀼, 𑀪𑀦𑁆𑀢𑁂 𑀲𑀁𑀯𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀯𑀸 𑀤𑁂𑀲𑁂𑀢𑀩𑁆𑀩𑀁.

𑁧𑁨𑁧. 𑀯𑁂𑀫𑀢𑀺𑀁 𑀆𑀭𑁄𑀘𑁂𑀦𑁆𑀢𑁂𑀦 ‘‘𑀅𑀳𑀁, 𑀪𑀦𑁆𑀢𑁂, 𑀲𑀫𑁆𑀩𑀳𑀼𑀮𑀸𑀲𑀼 𑀦𑀸𑀦𑀸𑀯𑀢𑁆𑀣𑀼𑀓𑀸𑀲𑀼 𑀆𑀧𑀢𑁆𑀢𑀻𑀲𑀼 𑀯𑁂𑀫𑀢𑀺𑀓𑁄, 𑀬𑀤𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀪𑀯𑀺𑀲𑁆𑀲𑀸𑀫𑀺, 𑀢𑀤𑀸 𑀢𑀸 𑀆𑀧𑀢𑁆𑀢𑀺𑀬𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀯𑀸 𑀆𑀭𑁄𑀘𑁂𑀢𑀩𑁆𑀩𑀁.

𑁧𑁨𑁨. ‘‘𑀅𑀚𑁆𑀚 𑀫𑁂 𑀉𑀧𑁄𑀲𑀣𑁄 ‘𑀧𑀦𑁆𑀦𑀭𑀲𑁄, 𑀘𑀸𑀢𑀼𑀤𑁆𑀤𑀲𑁄’𑀢𑀺 𑀯𑀸 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀯𑀸 𑀧𑀼𑀕𑁆𑀕𑀮𑁂𑀦 𑀅𑀥𑀺𑀝𑁆𑀞𑀸𑀦𑀼𑀧𑁄𑀲𑀣𑁄 𑀓𑀸𑀢𑀩𑁆𑀩𑁄.

𑁧𑁨𑁩. 𑀤𑁆𑀯𑀻𑀲𑀼 𑀧𑀦 𑀣𑁂𑀭𑁂𑀦 ‘‘𑀧𑀭𑀺𑀲𑀼𑀤𑁆𑀥𑁄 𑀅𑀳𑀁 𑀆𑀯𑀼𑀲𑁄, ‘𑀧𑀭𑀺𑀲𑀼𑀤𑁆𑀥𑁄’𑀢𑀺 𑀫𑀁 𑀥𑀸𑀭𑁂𑀳𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀢𑀩𑁆𑀩𑀁. 𑀦𑀯𑀓𑁂𑀦𑀧𑀺 𑀢𑀣𑁂𑀯 𑀯𑀢𑁆𑀢𑀩𑁆𑀩𑀁. ‘‘𑀪𑀦𑁆𑀢𑁂, 𑀥𑀸𑀭𑁂𑀣𑀸’’𑀢𑀺 𑀯𑀘𑀦𑀁 𑀯𑀺𑀲𑁂𑀲𑁄.

𑁧𑁨𑁪. 𑀢𑀻𑀲𑀼 𑀧𑀦 ‘‘𑀲𑀼𑀡𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑀸, 𑀅𑀚𑁆𑀚𑀼𑀧𑁄𑀲𑀣𑁄 𑀧𑀦𑁆𑀦𑀭𑀲𑁄, 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀫𑀬𑀁 𑀅𑀜𑁆𑀜𑀫𑀜𑁆𑀜𑀁 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸𑀫𑀸’’𑀢𑀺 𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀯𑀼𑀢𑁆𑀢𑀦𑀬𑁂𑀦 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄.

𑁧𑁨𑁫. ‘‘𑀅𑀚𑁆𑀚 𑀫𑁂 𑀧𑀯𑀸𑀭𑀡𑀸 ‘𑀘𑀸𑀢𑀼𑀤𑁆𑀤𑀲𑀻, 𑀧𑀦𑁆𑀦𑀭𑀲𑀻’𑀢𑀺 𑀯𑀸 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀯𑀸 𑀏𑀓𑁂𑀦 𑀧𑀯𑀸𑀭𑁂𑀢𑀩𑁆𑀩𑀁.

𑁧𑁨𑁬. 𑀤𑁆𑀯𑀻𑀲𑀼 𑀧𑀦 𑀣𑁂𑀭𑁂𑀦 ‘‘𑀅𑀳𑀁, 𑀆𑀯𑀼𑀲𑁄, 𑀆𑀬𑀲𑁆𑀫𑀦𑁆𑀢𑀁 𑀧𑀯𑀸𑀭𑁂𑀫𑀺 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸, 𑀯𑀤𑀢𑀼 𑀫𑀁 𑀆𑀬𑀲𑁆𑀫𑀸 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬, 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀯𑀸 𑀧𑀯𑀸𑀭𑁂𑀢𑀩𑁆𑀩𑀁. 𑀦𑀯𑀓𑁂𑀦𑀸𑀧𑀺 𑀢𑀣𑁂𑀯 𑀯𑀢𑁆𑀢𑀩𑁆𑀩𑀁. ‘‘𑀪𑀦𑁆𑀢𑁂’’𑀢𑀺 𑀯𑀘𑀦𑀁 𑀯𑀺𑀲𑁂𑀲𑁄.

𑁧𑁨𑁭. 𑀢𑀻𑀲𑀼 𑀯𑀸 𑀘𑀢𑀽𑀲𑀼 𑀯𑀸 𑀧𑀦 ‘‘𑀲𑀼𑀡𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑀸, 𑀅𑀚𑁆𑀚 𑀧𑀯𑀸𑀭𑀡𑀸 𑀧𑀦𑁆𑀦𑀭𑀲𑀻, 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀫𑀬𑀁 𑀅𑀜𑁆𑀜𑀫𑀜𑁆𑀜𑀁 𑀧𑀯𑀸𑀭𑁂𑀬𑁆𑀬𑀸𑀫𑀸’’𑀢𑀺 𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀣𑁂𑀭𑁂𑀦 ‘‘𑀅𑀳𑀁, 𑀆𑀯𑀼𑀲𑁄, 𑀆𑀬𑀲𑁆𑀫𑀦𑁆𑀢𑁂 𑀧𑀯𑀸𑀭𑁂𑀫𑀺 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸, 𑀯𑀤𑀦𑁆𑀢𑀼 𑀫𑀁 𑀆𑀬𑀲𑁆𑀫𑀦𑁆𑀢𑀸 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬, 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀯𑀸 𑀧𑀯𑀸𑀭𑁂𑀢𑀩𑁆𑀩𑀁. 𑀦𑀯𑀓𑁂𑀳𑀺𑀧𑀺 𑀢𑀣𑁂𑀯 𑀧𑀝𑀺𑀧𑀸𑀝𑀺𑀬𑀸 𑀧𑀯𑀸𑀭𑁂𑀢𑀩𑁆𑀩𑀁. ‘‘𑀪𑀦𑁆𑀢𑁂’’𑀢𑀺𑀯𑀘𑀦𑀁 𑀯𑀺𑀲𑁂𑀲𑁄.

𑁧𑁨𑁮. 𑀘𑀢𑀽𑀳𑀺 𑀅𑀥𑀺𑀓𑁂𑀲𑀼 𑀧𑀦 ‘‘𑀲𑀼𑀡𑀸𑀢𑀼 𑀫𑁂 𑀆𑀯𑀼𑀲𑁄 𑀲𑀗𑁆𑀖𑁄, 𑀅𑀚𑁆𑀚 𑀧𑀯𑀸𑀭𑀡𑀸 𑀧𑀦𑁆𑀦𑀭𑀲𑀻, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀧𑀯𑀸𑀭𑁂𑀬𑁆𑀬𑀸’’𑀢𑀺 𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀯𑀼𑀟𑁆𑀠𑀢𑀭𑁂𑀦 ‘‘𑀲𑀗𑁆𑀖𑀁, 𑀆𑀯𑀼𑀲𑁄, 𑀧𑀯𑀸𑀭𑁂𑀫𑀺 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸, 𑀯𑀤𑀦𑁆𑀢𑀼 𑀫𑀁 𑀆𑀬𑀲𑁆𑀫𑀦𑁆𑀢𑁄 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬, 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀯𑀸 𑀧𑀯𑀸𑀭𑁂𑀢𑀩𑁆𑀩𑀁. 𑀦𑀯𑀓𑁂𑀳𑀺𑀧𑀺 𑀢𑀣𑁂𑀯 𑀧𑀝𑀺𑀧𑀸𑀝𑀺𑀬𑀸 ‘‘𑀲𑀗𑁆𑀖𑀁, 𑀪𑀦𑁆𑀢𑁂, 𑀧𑀯𑀸𑀭𑁂𑀫𑀺 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸, 𑀯𑀤𑀦𑁆𑀢𑀼 𑀫𑀁 𑀆𑀬𑀲𑁆𑀫𑀦𑁆𑀢𑁄 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬, 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀯𑀸 𑀧𑀯𑀸𑀭𑁂𑀢𑀩𑁆𑀩𑀁.

𑀫𑀽𑀮𑀲𑀺𑀓𑁆𑀔𑀸 𑀦𑀺𑀝𑁆𑀞𑀺𑀢𑀸.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲