𑀫𑀽𑀮𑀲𑀺𑀓𑁆𑀔𑀸-𑀝𑀻𑀓𑀸

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑀲𑀩𑁆𑀩𑀓𑀸𑀫𑀤𑀤𑀁 𑀲𑀩𑁆𑀩𑀭𑀢𑀦𑁂 𑀭𑀢𑀦𑀢𑁆𑀢𑀬𑀁;

𑀉𑀢𑁆𑀢𑀫𑀁 𑀉𑀢𑁆𑀢𑀫𑀢𑀭𑀁, 𑀯𑀦𑁆𑀤𑀺𑀢𑁆𑀯𑀸 𑀯𑀦𑁆𑀤𑀦𑀸𑀭𑀳𑀁.

𑀘𑀭𑀡𑁂 𑀩𑁆𑀭𑀳𑁆𑀫𑀘𑀸𑀭𑀻𑀦𑀁, 𑀆𑀘𑀭𑀺𑀬𑀸𑀦𑀁 𑀲𑀺𑀭𑀁 𑀫𑀫;

𑀞𑀧𑁂𑀢𑁆𑀯𑀸𑀦 𑀓𑀭𑀺𑀲𑁆𑀲𑀸𑀫𑀺, 𑀫𑀽𑀮𑀲𑀺𑀓𑁆𑀔𑀢𑁆𑀣𑀯𑀡𑁆𑀡𑀦𑀁.

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸

𑀢𑀢𑁆𑀣𑀸𑀤𑁄 𑀢𑀸𑀯 𑀲𑀩𑁆𑀩𑀲𑀓𑁆𑀓𑀢𑀲𑁆𑀲 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑀲𑁆𑀲 𑀲𑀢𑁆𑀣𑀼𑀦𑁄 𑀧𑀡𑀸𑀫𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦𑀢𑁆𑀯𑀸 𑀦𑀸𑀣’’𑀦𑁆𑀢𑁆𑀬𑀸𑀤𑀺. 𑀦𑀸𑀣𑀁 𑀘𑀢𑀽𑀳𑀺 𑀦𑀸𑀣𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀪𑀕𑀯𑀦𑁆𑀢𑀁 𑀦𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀆𑀤𑁄 𑀆𑀤𑀺𑀫𑁆𑀳𑀺 𑀉𑀧𑀲𑀫𑁆𑀧𑀦𑁆𑀦𑀢𑁄 𑀧𑀝𑁆𑀞𑀸𑀬 𑀦𑀯𑀓𑁂𑀦 𑀪𑀺𑀓𑁆𑀔𑀼𑀦𑀸 𑀅𑀥𑀼𑀦𑀸 𑀧𑀩𑁆𑀩𑀚𑀺𑀢𑁂𑀦 𑀉𑀧𑀲𑀫𑁆𑀧𑀦𑁆𑀦𑁂𑀦 𑀫𑀽𑀮𑀪𑀸𑀲𑀸𑀬 𑀫𑀸𑀕𑀥𑀪𑀸𑀲𑀸𑀬 𑀲𑀺𑀓𑁆𑀔𑀺𑀢𑀼𑀁 𑀲𑀫𑀸𑀲𑀢𑁄 𑀲𑀗𑁆𑀔𑁂𑀧𑁂𑀦 𑀫𑀽𑀮𑀲𑀺𑀓𑁆𑀔𑀁 𑀅𑀳𑀁 𑀧𑀯𑀓𑁆𑀔𑀸𑀫𑀻𑀢𑀺 𑀧𑀺𑀡𑁆𑀟𑀢𑁆𑀣𑁄.

𑀅𑀬𑀁 𑀧𑀦 𑀅𑀯𑀬𑀯𑀢𑁆𑀣𑁄 𑁋 𑀦𑀢𑁆𑀯𑀸𑀢𑀺 𑀢𑀦𑁆𑀦𑀺𑀦𑁆𑀦𑀢𑀧𑁆𑀧𑁄𑀡𑀢𑀧𑁆𑀧𑀩𑁆𑀪𑀸𑀭𑁄 𑀳𑀼𑀢𑁆𑀯𑀸 𑀓𑀸𑀬𑀯𑀘𑀻𑀫𑀦𑁄𑀤𑁆𑀯𑀸𑀭𑁂𑀳𑀺 𑀯𑀦𑁆𑀤𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦𑀸𑀣𑀢𑀻𑀢𑀺 𑀦𑀸𑀣𑁄, 𑀯𑁂𑀦𑁂𑀬𑁆𑀬𑀸𑀦𑀁 𑀳𑀺𑀢𑀲𑀼𑀔𑀁 𑀫𑁂𑀢𑁆𑀢𑀸𑀬𑀦𑀯𑀲𑁂𑀦 𑀆𑀲𑀻𑀲𑀢𑀺 𑀧𑀢𑁆𑀣𑁂𑀢𑀻𑀢𑀺 𑀅𑀢𑁆𑀣𑁄, 𑀅𑀣 𑀯𑀸 𑀦𑀸𑀣𑀢𑀺 𑀯𑁂𑀦𑁂𑀬𑁆𑀬𑀕𑀢𑁂 𑀓𑀺𑀮𑁂𑀲𑁂 𑀉𑀧𑀢𑀸𑀧𑁂𑀢𑀻𑀢𑀺 𑀅𑀢𑁆𑀣𑁄, 𑀦𑀸𑀣𑀢𑀺 𑀯𑀸 𑀬𑀸𑀘𑀢𑀻𑀢𑀺 𑀅𑀢𑁆𑀣𑁄. 𑀪𑀕𑀯𑀸 𑀳𑀺 ‘‘𑀲𑀸𑀥𑀼, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀮𑁂𑀦 𑀓𑀸𑀮𑀁 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁮.𑁭) 𑀲𑀢𑁆𑀢𑀸𑀦𑀁 𑀢𑀁 𑀢𑀁 𑀳𑀺𑀢𑀧𑁆𑀧𑀝𑀺𑀧𑀢𑁆𑀢𑀺𑀁 𑀬𑀸𑀘𑀺𑀢𑁆𑀯𑀸𑀧𑀺 𑀓𑀭𑀼𑀡𑀸𑀬 𑀲𑀫𑀼𑀲𑁆𑀲𑀸𑀳𑀺𑀢𑁄 𑀢𑁂 𑀢𑀢𑁆𑀣 𑀦𑀺𑀬𑁄𑀚𑁂𑀢𑀺. 𑀧𑀭𑀫𑁂𑀦 𑀯𑀸 𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀩𑁆𑀩𑀲𑀢𑁆𑀢𑁂 𑀈𑀲𑀢𑀺 𑀅𑀪𑀺𑀪𑀯𑀢𑀻𑀢𑀺 𑀧𑀭𑀫𑀺𑀲𑁆𑀲𑀭𑁄 𑀪𑀕𑀯𑀸 ‘‘𑀦𑀸𑀣𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀩𑁆𑀩𑁄 𑀘𑀸𑀬𑀫𑀢𑁆𑀣𑁄 𑀲𑀤𑁆𑀤𑀲𑀢𑁆𑀣𑀸𑀦𑀼𑀲𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀯𑀓𑁆𑀔𑀸𑀫𑀻𑀢𑀺 𑀧𑀓𑀸𑀭𑁂𑀦 𑀓𑀣𑁂𑀲𑁆𑀲𑀸𑀫𑀺. 𑀫𑀽𑀮𑀲𑀺𑀓𑁆𑀔𑀸𑀢𑀺 𑀅𑀥𑀺𑀲𑀻𑀮𑀅𑀥𑀺𑀘𑀺𑀢𑁆𑀢𑀅𑀥𑀺𑀧𑀜𑁆𑀜𑀸𑀯𑀲𑁂𑀦 𑀢𑀺𑀲𑁆𑀲𑁄𑀧𑀺 𑀲𑀺𑀓𑁆𑀔𑀸, 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑀝𑁆𑀞𑁂𑀦 𑀫𑀽𑀮𑀸 𑀘 𑀲𑀸 𑀲𑀺𑀓𑁆𑀔𑀺𑀢𑀩𑁆𑀩𑀢𑁄 𑀲𑀺𑀓𑁆𑀔𑀸 𑀘𑀸𑀢𑀺 𑀫𑀽𑀮𑀲𑀺𑀓𑁆𑀔𑀸. 𑀕𑀦𑁆𑀣𑀯𑀲𑁂𑀦𑁂𑀢𑁆𑀣 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀢𑀤𑁆𑀤𑀻𑀧𑀦𑁄 𑀕𑀦𑁆𑀣𑁄 ‘‘𑀫𑀽𑀮𑀲𑀺𑀓𑁆𑀔𑀸’’𑀢𑀺 𑀯𑀼𑀘𑁆𑀘𑀢𑀺.

𑀢𑀢𑁆𑀣 𑀓𑀢𑀫𑀁 𑀲𑀻𑀮𑀁, 𑀓𑀢𑀫𑀁 𑀅𑀥𑀺𑀲𑀻𑀮𑀁, 𑀓𑀢𑀫𑀁 𑀘𑀺𑀢𑁆𑀢𑀁, 𑀓𑀢𑀫𑀁 𑀅𑀥𑀺𑀘𑀺𑀢𑁆𑀢𑀁, 𑀓𑀢𑀫𑀸 𑀧𑀜𑁆𑀜𑀸, 𑀓𑀢𑀫𑀸 𑀅𑀥𑀺𑀧𑀜𑁆𑀜𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀧𑀜𑁆𑀘𑀗𑁆𑀕𑀅𑀝𑁆𑀞𑀗𑁆𑀕𑀤𑀲𑀗𑁆𑀕𑀲𑀻𑀮𑀁 𑀢𑀸𑀯 𑀲𑀻𑀮𑀫𑁂𑀯. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁 𑀧𑀦 ‘‘𑀅𑀥𑀺𑀲𑀻𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀜𑁆𑀳𑀺 𑀲𑀽𑀭𑀺𑀬𑁄 𑀯𑀺𑀬 𑀧𑀚𑁆𑀚𑁄𑀢𑀸𑀦𑀁, 𑀲𑀺𑀦𑁂𑀭𑀼 𑀯𑀺𑀬 𑀧𑀩𑁆𑀩𑀢𑀸𑀦𑀁 𑀲𑀩𑁆𑀩𑀮𑁄𑀓𑀺𑀬𑀲𑀻𑀮𑀸𑀦𑀁 𑀅𑀥𑀺𑀓𑀜𑁆𑀘𑁂𑀯 𑀉𑀢𑁆𑀢𑀫𑀜𑁆𑀘. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀢𑁄𑀧𑀺 𑀘 𑀫𑀕𑁆𑀕𑀨𑀮𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀲𑀻𑀮𑀁 𑀅𑀥𑀺𑀲𑀻𑀮𑀁, 𑀢𑀁 𑀧𑀦 𑀇𑀥 𑀦𑀸𑀥𑀺𑀧𑁆𑀧𑁂𑀢𑀁. 𑀦 𑀳𑀺 𑀢𑀁 𑀲𑀺𑀓𑁆𑀔𑀦𑁆𑀢𑁄 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀺. 𑀓𑀸𑀫𑀸𑀯𑀘𑀭𑀸𑀦𑀺 𑀧𑀦 𑀅𑀝𑁆𑀞 𑀓𑀼𑀲𑀮𑀘𑀺𑀢𑁆𑀢𑀸𑀦𑀺, 𑀮𑁄𑀓𑀺𑀬𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀸𑀦𑀺 𑀘 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀘𑀺𑀢𑁆𑀢𑀫𑁂𑀯. 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀁 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀁 𑀧𑀦 ‘‘𑀅𑀥𑀺𑀘𑀺𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀜𑁆𑀳𑀺 𑀲𑀩𑁆𑀩𑀮𑁄𑀓𑀺𑀬𑀘𑀺𑀢𑁆𑀢𑀸𑀦𑀁 𑀅𑀥𑀺𑀓𑀜𑁆𑀘𑁂𑀯 𑀉𑀢𑁆𑀢𑀫𑀜𑁆𑀘. 𑀢𑀢𑁄𑀧𑀺 𑀘 𑀫𑀕𑁆𑀕𑀨𑀮𑀘𑀺𑀢𑁆𑀢𑀫𑁂𑀯 𑀅𑀥𑀺𑀘𑀺𑀢𑁆𑀢𑀁, 𑀢𑀁 𑀧𑀦 𑀇𑀥 𑀦𑀸𑀥𑀺𑀧𑁆𑀧𑁂𑀢𑀁. 𑀦 𑀳𑀺 𑀢𑀁 𑀲𑀺𑀓𑁆𑀔𑀦𑁆𑀢𑁄 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀺. ‘‘𑀅𑀢𑁆𑀣𑀺 𑀤𑀺𑀦𑁆𑀦𑀁, 𑀅𑀢𑁆𑀣𑀺 𑀬𑀺𑀝𑁆𑀞’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑀁 𑀧𑀜𑁆𑀜𑀸, 𑀢𑀺𑀮𑀓𑁆𑀔𑀡𑀸𑀓𑀸𑀭𑀧𑀭𑀺𑀘𑁆𑀙𑁂𑀤𑀓𑀁 𑀧𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 ‘‘𑀅𑀥𑀺𑀧𑀜𑁆𑀜𑀸’’𑀢𑀺 𑀯𑀼𑀘𑁆𑀘𑀢𑀺. 𑀲𑀸 𑀳𑀺 𑀲𑀩𑁆𑀩𑀮𑁄𑀓𑀺𑀬𑀧𑀜𑁆𑀜𑀸𑀦𑀁 𑀅𑀥𑀺𑀓𑀸 𑀘𑁂𑀯 𑀉𑀢𑁆𑀢𑀫𑀸 𑀘. 𑀢𑀢𑁄𑀧𑀺 𑀘 𑀫𑀕𑁆𑀕𑀨𑀮𑀧𑀜𑁆𑀜𑀸𑀯 𑀅𑀥𑀺𑀧𑀜𑁆𑀜𑀸, 𑀲𑀸 𑀧𑀦 𑀇𑀥 𑀦𑀸𑀥𑀺𑀧𑁆𑀧𑁂𑀢𑀸. 𑀦 𑀳𑀺 𑀢𑀁 𑀲𑀺𑀓𑁆𑀔𑀦𑁆𑀢𑁄 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀺.

𑀢𑀸𑀲𑀼 𑀢𑀻𑀲𑀼 𑀅𑀥𑀺𑀲𑀻𑀮𑀲𑀺𑀓𑁆𑀔𑀸 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀯𑀲𑁂𑀦 𑀤𑀼𑀯𑀺𑀥𑀫𑁆𑀧𑀺 𑀲𑀻𑀮𑀁 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂𑀦, 𑀢𑀧𑁆𑀧𑀝𑀺𑀧𑀓𑁆𑀔𑁂 𑀓𑀺𑀮𑁂𑀲𑁂 𑀢𑀤𑀗𑁆𑀕𑀧𑁆𑀧𑀳𑀸𑀦𑀯𑀲𑁂𑀦 𑀧𑀚𑀳𑀦𑁆𑀢𑁂𑀦 𑀲𑀺𑀓𑁆𑀔𑀺𑀢𑀩𑁆𑀩𑀸. 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸 𑀬𑀣𑀸𑀯𑀼𑀢𑁆𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀅𑀪𑀺𑀬𑁄𑀕𑀯𑀲𑁂𑀦 𑀛𑀸𑀦𑀧𑁆𑀧𑀝𑀺𑀧𑀓𑁆𑀔𑀸𑀦𑀁 𑀦𑀻𑀯𑀭𑀡𑀕𑀡𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁 𑀓𑀼𑀭𑀼𑀫𑀸𑀦𑁂𑀦 𑀲𑀺𑀓𑁆𑀔𑀺𑀢𑀩𑁆𑀩𑀸. 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸 𑀧𑀦 𑀬𑀣𑀸𑀦𑀼𑀭𑀽𑀧𑀁 𑀢𑀤𑀗𑁆𑀕𑀧𑁆𑀧𑀳𑀸𑀦𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀲𑀸𑀦𑀼𑀲𑀬𑁂 𑀓𑀺𑀮𑁂𑀲𑁂 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑁂𑀦 𑀲𑀺𑀓𑁆𑀔𑀺𑀢𑀩𑁆𑀩𑀸. 𑀢𑀲𑁆𑀫𑀸 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑀝𑁆𑀞𑁂𑀦 𑀫𑀽𑀮𑀸 𑀘 𑀲𑀸 𑀲𑀺𑀓𑁆𑀔𑀺𑀢𑀩𑁆𑀩𑀢𑁄 𑀲𑀺𑀓𑁆𑀔𑀸 𑀘𑀸𑀢𑀺 𑀫𑀽𑀮𑀲𑀺𑀓𑁆𑀔𑀸, 𑀓𑀫𑁆𑀫𑀯𑀘𑀦𑀺𑀘𑁆𑀙𑀸𑀬𑀁 ‘‘𑀫𑀽𑀮𑀲𑀺𑀓𑁆𑀔’’𑀦𑁆𑀢𑀺 𑀯𑀼𑀢𑁆𑀢𑀁.

𑀲𑀫𑀸𑀲𑀻𑀬𑀢𑁂 𑀲𑀗𑁆𑀔𑀺𑀧𑀻𑀬𑀢𑁂𑀢𑀺 𑀲𑀫𑀸𑀲𑁄, 𑀢𑀢𑁄 𑀲𑀫𑀸𑀲𑀢𑁄. 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦 𑀅𑀓𑀼𑀧𑁆𑀧𑁂𑀦 𑀞𑀸𑀦𑀸𑀭𑀳𑁂𑀦 𑀉𑀧𑀲𑀫𑁆𑀧𑀦𑁆𑀦𑁄𑀢𑀺 𑀪𑀺𑀓𑁆𑀔𑀼. 𑀢𑀢𑁆𑀣 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀬𑀸𑀬𑁂𑀦 𑀧𑀜𑁆𑀘𑀯𑀕𑁆𑀕𑀓𑀭𑀡𑀻𑀬𑁂 𑀓𑀫𑁆𑀫𑁂 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸, 𑀢𑁂𑀲𑀁 𑀆𑀕𑀢𑀢𑁆𑀢𑀸, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑀲𑁆𑀲 𑀆𑀳𑀝𑀢𑁆𑀢𑀸, 𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑀜𑁆𑀘 𑀅𑀧𑁆𑀧𑀝𑀺𑀓𑁆𑀓𑁄𑀲𑀦𑀢𑁄 𑀏𑀓𑀲𑁆𑀫𑀺𑀁 𑀓𑀫𑁆𑀫𑁂 𑀲𑀫𑀕𑁆𑀕𑀪𑀸𑀯𑀁 𑀉𑀧𑀕𑀢𑁂𑀦 𑀲𑀗𑁆𑀖𑁂𑀦 𑀢𑀻𑀳𑀺 𑀅𑀦𑀼𑀲𑁆𑀲𑀸𑀯𑀦𑀸𑀳𑀺 𑀏𑀓𑀸𑀬 𑀜𑀢𑁆𑀢𑀺𑀬𑀸 𑀓𑀸𑀢𑀩𑁆𑀩𑀓𑀫𑁆𑀫𑀲𑀗𑁆𑀔𑀸𑀢𑁂𑀦 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀥𑀫𑁆𑀫𑀺𑀓𑁂𑀦 𑀯𑀺𑀦𑀬𑀓𑀫𑁆𑀫𑁂𑀦 𑀯𑀢𑁆𑀣𑀼𑀜𑀢𑁆𑀢𑀺𑀅𑀦𑀼𑀲𑁆𑀲𑀸𑀯𑀦𑀲𑀻𑀫𑀸𑀧𑀭𑀺𑀲𑀸𑀲𑀫𑁆𑀧𑀢𑁆𑀢𑀺𑀲𑀫𑁆𑀧𑀦𑁆𑀦𑀢𑁆𑀢𑀸 𑀅𑀓𑁄𑀧𑁂𑀢𑀩𑁆𑀩𑀢𑀁, 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀢𑀁 𑀉𑀧𑀕𑀢𑁂𑀦 𑀞𑀸𑀦𑀸𑀭𑀳𑁂𑀦 𑀓𑀸𑀭𑀡𑀸𑀭𑀳𑁂𑀦 𑀲𑀢𑁆𑀣𑀼𑀲𑀸𑀲𑀦𑀸𑀭𑀳𑁂𑀦 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀫, 𑀉𑀧𑀭𑀺𑀪𑀸𑀯𑀁 𑀲𑀫𑀸𑀧𑀦𑁆𑀦𑁄 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀼𑀪𑀸𑀯𑁄 𑀳𑀺 𑀉𑀧𑀭𑀺𑀪𑀸𑀯𑁄. 𑀢𑀜𑁆𑀘𑁂𑀲 𑀬𑀣𑀸𑀯𑀼𑀢𑁆𑀢𑁂𑀦 𑀓𑀫𑁆𑀫𑁂𑀦 𑀲𑀫𑀸𑀧𑀦𑁆𑀦𑀢𑁆𑀢𑀸 ‘‘𑀉𑀧𑀲𑀫𑁆𑀧𑀦𑁆𑀦𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑁂𑀦 𑀪𑀺𑀓𑁆𑀔𑀼𑀦𑀸. 𑀊𑀦𑀧𑀜𑁆𑀘𑀯𑀲𑁆𑀲𑀢𑀸𑀬 𑀦𑀯𑀓𑁄, 𑀢𑁂𑀦 𑀦𑀯𑀓𑁂𑀦 𑀅𑀥𑀼𑀦𑀸 𑀧𑀩𑁆𑀩𑀚𑀺𑀢𑁂𑀦, 𑀅𑀘𑀺𑀭𑀧𑀩𑁆𑀩𑀚𑀺𑀢𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀤𑁄𑀢𑀺 𑀆𑀤𑀺𑀫𑁆𑀳𑀺𑀬𑁂𑀯𑀸𑀢𑀺 𑀅𑀢𑁆𑀣𑁄, 𑀆𑀤𑀺𑀢𑁄 𑀧𑀝𑁆𑀞𑀸𑀬𑀸𑀢𑀺 𑀯𑀸. 𑀅𑀧𑀺 𑀘 𑀣𑁂𑀭𑁄 ‘‘𑀆𑀤𑁄’’𑀢𑀺 𑀯𑀘𑀦𑁂𑀦 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀆𑀮𑀲𑀺𑀬𑀤𑁄𑀲𑁂𑀦, 𑀅𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑀸𑀦𑀁 𑀅𑀜𑁆𑀜𑀸𑀡𑀤𑁄𑀲𑁂𑀦 𑀘 𑀅𑀜𑁆𑀜𑀣𑀸 𑀧𑀝𑀺𑀧𑀚𑁆𑀚𑀦𑁆𑀢𑀸𑀦𑀁 𑀲𑀁𑀯𑁂𑀕𑀁 𑀚𑀦𑁂𑀢𑀺. 𑀓𑀣𑀁? 𑀅𑀢𑀺𑀤𑀼𑀮𑁆𑀮𑀪𑀁 𑀔𑀡𑀁 𑀲𑀫𑀯𑀸𑀬𑀁 𑀧𑀝𑀺𑀮𑀪𑀺𑀢𑁆𑀯𑀸 𑀢𑀗𑁆𑀔𑀡𑀁 𑀦 𑀓𑀼𑀲𑀻𑀢𑁂𑀦 𑀯𑀸 𑀦𑀺𑀭𑀢𑁆𑀣𑀓𑀓𑀣𑀸𑀧𑀲𑀼𑀢𑁂𑀦 𑀯𑀸 𑀯𑀻𑀢𑀺𑀦𑀸𑀫𑁂𑀢𑀩𑁆𑀩𑀁, 𑀓𑀺𑀁 𑀓𑀸𑀢𑀩𑁆𑀩𑀁? 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀦𑀺𑀭𑀦𑁆𑀢𑀭𑀫𑁂𑀯 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀆𑀤𑀭𑁄 𑀚𑀦𑁂𑀢𑀩𑁆𑀩𑁄𑀢𑀺.

‘‘𑀲𑀸 𑀫𑀸𑀕𑀥𑀻 𑀫𑀽𑀮𑀪𑀸𑀲𑀸, 𑀦𑀭𑀸 𑀬𑀸𑀬𑀸𑀤𑀺𑀓𑀧𑁆𑀧𑀺𑀓𑀸;

𑀩𑁆𑀭𑀳𑁆𑀫𑀸𑀦𑁄 𑀘𑀲𑁆𑀲𑀼𑀢𑀸𑀮𑀸𑀧𑀸, 𑀲𑀫𑁆𑀩𑀼𑀤𑁆𑀥𑀸 𑀘𑀸𑀧𑀺 𑀪𑀸𑀲𑀭𑁂’’𑀢𑀺. 𑁋

𑀯𑀘𑀦𑀢𑁄 𑀫𑀽𑀮𑀪𑀸𑀲𑀸𑀬𑀸𑀢𑀺 𑀫𑀸𑀕𑀥𑀫𑀽𑀮𑀸𑀬 𑀪𑀸𑀲𑀸𑀬, 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀬𑀸 𑀪𑀸𑀲𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀺𑀓𑁆𑀔𑀺𑀢𑀼𑀦𑁆𑀢𑀺 𑀉𑀕𑁆𑀕𑀡𑁆𑀳𑀺𑀢𑀼𑀁.

𑁧. 𑀧𑀸𑀭𑀸𑀚𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧. 𑀇𑀤𑀸𑀦𑀺 𑀲𑀩𑁆𑀩𑀲𑀺𑀓𑁆𑀔𑀸𑀦𑀁 𑀧𑀦 𑀫𑀽𑀮𑀪𑀽𑀢𑀢𑁆𑀢𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀯 𑀧𑀞𑀫𑀁 𑀯𑀼𑀢𑁆𑀢𑀸, 𑀢𑀢𑁆𑀭𑀸𑀧𑀺 𑀫𑀳𑀸𑀲𑀸𑀯𑀚𑁆𑀚𑀢𑁆𑀢𑀸, 𑀫𑀽𑀮𑀘𑁆𑀙𑁂𑀚𑁆𑀚𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀘 𑀲𑀩𑁆𑀩𑀧𑀞𑀫𑀁 𑀧𑀸𑀭𑀸𑀚𑀺𑀓𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀁 𑀦𑀺𑀫𑀺𑀢𑁆𑀢’’𑀦𑁆𑀢𑁆𑀬𑀸𑀤𑀺𑀫𑀸𑀳. 𑀢𑀢𑁆𑀣 𑀫𑀕𑁆𑀕𑀢𑁆𑀢𑀬𑁂 𑀲𑀁 𑀦𑀺𑀫𑀺𑀢𑁆𑀢𑀁 𑀧𑀯𑁂𑀲𑀦𑁆𑀢𑁄 𑀪𑀺𑀓𑁆𑀔𑀼 𑀘𑀼𑀢𑁄𑀢𑀺 𑀅𑀢𑁆𑀣𑁄. 𑀲𑀁 𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀁, 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀏𑀓𑀢𑀺𑀮𑀩𑀻𑀚𑀫𑀢𑁆𑀢𑀫𑁆𑀧𑀺 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀺𑀓𑁆𑀔𑀽𑀢𑀺 𑀅𑀦𑀺𑀓𑁆𑀔𑀺𑀢𑁆𑀢𑀲𑀺𑀓𑁆𑀔𑁄. 𑀫𑀕𑁆𑀕𑀢𑁆𑀢𑀬𑁂𑀢𑀺 𑀏𑀢𑁆𑀣 𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀯𑀲𑁂𑀦 𑀢𑀺𑀲𑁆𑀲𑁄 𑀇𑀢𑁆𑀣𑀺𑀬𑁄, 𑀢𑀬𑁄 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸, 𑀢𑀬𑁄 𑀧𑀡𑁆𑀟𑀓𑀸, 𑀢𑀬𑁄 𑀧𑀼𑀭𑀺𑀲𑀸𑀢𑀺 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀽𑀢𑀸𑀦𑀁 𑀦𑀺𑀫𑀺𑀢𑁆𑀢𑀸𑀦𑀁 𑀦𑀺𑀲𑁆𑀲𑀬𑀸 𑀤𑁆𑀯𑀸𑀤𑀲 𑀲𑀢𑁆𑀢𑀸 𑀳𑁄𑀦𑁆𑀢𑀺. 𑀢𑁂𑀲𑀁 𑀯𑀘𑁆𑀘𑀧𑀲𑁆𑀲𑀸𑀯𑀫𑀼𑀔𑀫𑀕𑁆𑀕𑀯𑀲𑁂𑀦 𑀢𑀬𑁄 𑀫𑀕𑁆𑀕𑀸. 𑀢𑀢𑁆𑀣 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀢𑀬𑁄, 𑀅𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀢𑀬𑁄, 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸 𑀢𑀬𑁄𑀢𑀺 𑀦𑀯, 𑀢𑀣𑀸 𑀫𑀦𑀼𑀲𑁆𑀲𑀼𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀤𑀻𑀦𑀁. 𑀫𑀦𑀼𑀲𑁆𑀲𑀧𑀡𑁆𑀟𑀓𑀸𑀤𑀻𑀦𑀁 𑀧𑀦 𑀯𑀘𑁆𑀘𑀫𑀼𑀔𑀫𑀕𑁆𑀕𑀯𑀲𑁂𑀦 𑀤𑁆𑀯𑁂 𑀤𑁆𑀯𑁂𑀢𑀺 𑀙, 𑀢𑀣𑀸 𑀫𑀦𑀼𑀲𑁆𑀲𑀧𑀼𑀭𑀺𑀲𑀸𑀤𑀻𑀦𑀦𑁆𑀢𑀺 𑀲𑀩𑁆𑀩𑁂𑀲𑀁 𑀯𑀲𑁂𑀦 𑀢𑀺𑀁𑀲 𑀫𑀕𑁆𑀕𑀸 𑀳𑁄𑀦𑁆𑀢𑀺. 𑀢𑁂 𑀲𑀩𑁆𑀩𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀇𑀥 ‘‘𑀫𑀕𑁆𑀕𑀢𑁆𑀢𑀬𑁂’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀺𑀁 𑀫𑀕𑁆𑀕𑀢𑁆𑀢𑀬𑁂, 𑀤𑁆𑀯𑀸𑀤𑀲𑀦𑁆𑀦𑀁 𑀲𑀢𑁆𑀢𑀸𑀦𑀁 𑀢𑀻𑀲𑀼 𑀫𑀕𑁆𑀕𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀫𑀕𑁆𑀕𑁂𑀢𑀺 𑀅𑀢𑁆𑀣𑁄. 𑀘𑀼𑀢𑁄𑀢𑀺 𑀲𑀓𑁆𑀓𑀢𑁆𑀢𑀸 𑀯𑀸 𑀩𑁆𑀭𑀳𑁆𑀫𑀢𑁆𑀢𑀸 𑀯𑀸 𑀘𑀼𑀢𑀲𑀢𑁆𑀢𑁄 𑀯𑀺𑀬 𑀲𑀸𑀲𑀦𑀢𑁄 𑀘𑀼𑀢𑁄 𑀳𑁄𑀢𑀺, 𑀧𑀸𑀭𑀸𑀚𑀺𑀓𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀧𑀯𑁂𑀲𑀦𑀁 𑀦𑀸𑀫 𑀦 𑀓𑁂𑀯𑀮𑀁 𑀅𑀢𑁆𑀢𑀼𑀧𑀓𑁆𑀓𑀫𑁂𑀦𑁂𑀯 𑀳𑁄𑀢𑀺, 𑀧𑀭𑀽𑀧𑀓𑁆𑀓𑀫𑁂𑀦𑀸𑀧𑀺 𑀳𑁄𑀢𑀺, 𑀢𑀢𑁆𑀣𑀸𑀧𑀺 𑀲𑁂𑀯𑀦𑀘𑀺𑀢𑁆𑀢𑁂 𑀲𑀢𑀺 𑀧𑀸𑀭𑀸𑀚𑀺𑀓𑁄 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀧𑀯𑁂𑀲𑀦𑀸’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀪𑀺𑀓𑁆𑀔𑀼 𑀧𑀯𑁂𑀲𑀦𑀝𑁆𑀞𑀺𑀢𑀉𑀤𑁆𑀥𑀭𑀡𑀧𑀯𑀺𑀝𑁆𑀞𑀓𑁆𑀔𑀡𑁂𑀲𑀼 𑀅𑀜𑁆𑀜𑀢𑀭𑀁 𑀔𑀡𑀁 𑀘𑁂𑀧𑀺 𑀲𑀸𑀤𑀺𑀬𑀁 𑀲𑀸𑀤𑀺𑀬𑀦𑁆𑀢𑁄 𑀲𑀘𑁂𑀧𑀺 𑀢𑀲𑁆𑀫𑀺𑀁 𑀔𑀡𑁂 𑀲𑁂𑀯𑀦𑀘𑀺𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀦𑁆𑀢𑁄, 𑀘𑀼𑀢𑁄 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. 𑀬𑁄 𑀧𑀦 𑀲𑀩𑁆𑀩𑀲𑁄 𑀅𑀲𑀸𑀤𑀺𑀬𑀦𑁆𑀢𑁄 𑀆𑀲𑀻𑀯𑀺𑀲𑀫𑀼𑀔𑀁 𑀅𑀗𑁆𑀕𑀸𑀭𑀓𑀸𑀲𑀼𑀁 𑀧𑀯𑀺𑀝𑁆𑀞𑀁 𑀯𑀺𑀬 𑀘 𑀫𑀜𑁆𑀜𑀢𑀺, 𑀲𑁄 𑀦𑀺𑀧𑁆𑀧𑀭𑀸𑀥𑁄 𑀳𑁄𑀢𑀺. 𑀏𑀢𑁆𑀣 𑀧𑀦 𑀞𑀺𑀢𑀁 𑀦𑀸𑀫 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀫𑀬𑀧𑁆𑀧𑀢𑁆𑀢𑀁. 𑀧𑀞𑀫𑀧𑀸𑀭𑀸𑀚𑀺𑀓𑀁.

𑁨-𑁭. 𑀇𑀤𑀸𑀦𑀺 𑀤𑀼𑀢𑀺𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀤𑀺𑀦𑁆𑀦𑀁 𑀫𑀸𑀦𑀼𑀲𑀁 𑀪𑀡𑁆𑀟’’𑀦𑁆𑀢𑁆𑀬𑀸𑀤𑀺𑀫𑀸𑀳. 𑀢𑀢𑁆𑀣 𑀬𑁄 𑀪𑀺𑀓𑁆𑀔𑀼 𑀅𑀤𑀺𑀦𑁆𑀦𑀁 𑀫𑀸𑀦𑀼𑀲𑀁 𑀕𑀭𑀼𑀓𑀁 𑀪𑀡𑁆𑀟𑀁 𑀧𑀜𑁆𑀘𑀯𑀻𑀲𑀸𑀯𑀳𑀸𑀭𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀅𑀯𑀳𑀸𑀭𑁂𑀦 𑀆𑀤𑀺𑀬𑀦𑁆𑀢𑁄 𑀘𑀼𑀢𑁄 𑀪𑀯𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀤𑀺𑀦𑁆𑀦𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀧𑀭𑀧𑀭𑀺𑀕𑁆𑀕𑀳𑀺𑀢𑀁 𑀲𑀲𑁆𑀲𑀸𑀫𑀺𑀓𑀁 𑀪𑀡𑁆𑀟𑀁, 𑀢𑀁 𑀢𑁂𑀳𑀺 𑀲𑀸𑀫𑀺𑀓𑁂𑀳𑀺 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀦 𑀤𑀺𑀦𑁆𑀦𑀦𑁆𑀢𑀺 𑀅𑀤𑀺𑀦𑁆𑀦𑀁, 𑀅𑀦𑀺𑀲𑁆𑀲𑀝𑁆𑀞𑀁 𑀅𑀧𑀭𑀺𑀘𑁆𑀘𑀢𑁆𑀢𑀁 𑀭𑀓𑁆𑀔𑀺𑀢𑀁 𑀕𑁄𑀧𑀺𑀢𑀁 𑀫𑀫𑀸𑀬𑀺𑀢𑀁 𑀧𑀭𑀧𑀭𑀺𑀕𑁆𑀕𑀳𑀺𑀢𑀁. 𑀫𑀦𑀼𑀲𑁆𑀲𑀲𑁆𑀲 𑀇𑀤𑀦𑁆𑀢𑀺 𑀫𑀸𑀦𑀼𑀲𑀁, 𑀫𑀦𑀼𑀲𑁆𑀲𑀲𑀦𑁆𑀢𑀓𑀁, ‘‘𑀪𑀡𑁆𑀟’’𑀦𑁆𑀢𑀺𑀫𑀺𑀦𑀸 𑀢𑀼𑀮𑁆𑀬𑀸𑀥𑀺𑀓𑀭𑀡𑀁. 𑀣𑁂𑀬𑁆𑀬𑀸𑀬𑁂𑀓𑁂𑀦𑀸𑀢𑀺 𑀣𑁂𑀬𑁆𑀬𑀸𑀬 𑀏𑀓𑁂𑀦, 𑀏𑀓𑁂𑀦 𑀅𑀯𑀳𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀮𑀺𑀗𑁆𑀕𑀪𑁂𑀤𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. ‘‘𑀣𑁂𑀬𑁆𑀬𑀸 𑀓𑁂𑀦𑀘𑀻’’𑀢𑀺 𑀯𑀸 𑀧𑀸𑀞𑁄. 𑀢𑀢𑁆𑀣 𑀣𑁂𑀦𑁄𑀢𑀺 𑀘𑁄𑀭𑁄, 𑀣𑁂𑀦𑀲𑁆𑀲 𑀪𑀸𑀯𑁄 𑀣𑁂𑀬𑁆𑀬𑀸, 𑀓𑀭𑀡𑀢𑁆𑀣𑁂 𑀘𑁂𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀢𑀲𑁆𑀫𑀸 𑀓𑁂𑀦𑀘𑀺 𑀣𑁂𑀬𑁆𑀬𑁂𑀦 𑀅𑀯𑀳𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀆𑀤𑀺𑀬𑀦𑁆𑀢𑀺 𑀆𑀤𑀺𑀬𑀦𑁆𑀢𑁄 𑀕𑀡𑁆𑀳𑀦𑁆𑀢𑁄. 𑀧𑀜𑁆𑀘𑀯𑀻𑀲𑀸𑀯𑀳𑀸𑀭𑁂𑀲𑀽𑀢𑀺 𑀧𑀜𑁆𑀘𑀧𑀜𑁆𑀘𑀓𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀧𑀜𑁆𑀘𑀯𑀻𑀲𑀢𑀺 𑀅𑀯𑀳𑀸𑀭𑀸. 𑀢𑀢𑁆𑀣 𑀧𑀜𑁆𑀘𑀧𑀜𑁆𑀘𑀓𑀸𑀦𑀺 𑀦𑀸𑀫 𑀦𑀸𑀦𑀸𑀪𑀡𑁆𑀟𑀧𑀜𑁆𑀘𑀓𑀁 𑀏𑀓𑀪𑀡𑁆𑀟𑀧𑀜𑁆𑀘𑀓𑀁 𑀲𑀸𑀳𑀢𑁆𑀣𑀺𑀓𑀧𑀜𑁆𑀘𑀓𑀁 𑀧𑀼𑀩𑁆𑀩𑀧𑁆𑀧𑀬𑁄𑀕𑀧𑀜𑁆𑀘𑀓𑀁 𑀣𑁂𑀬𑁆𑀬𑀸𑀯𑀳𑀸𑀭𑀧𑀜𑁆𑀘𑀓𑀦𑁆𑀢𑀺.

𑀢𑀢𑁆𑀣 𑀲𑀯𑀺𑀜𑁆𑀜𑀸𑀡𑀓𑀸𑀯𑀺𑀜𑁆𑀜𑀸𑀡𑀓𑀫𑀺𑀲𑁆𑀲𑀓𑀪𑀡𑁆𑀟𑀯𑀲𑁂𑀦 𑀦𑀸𑀦𑀸𑀪𑀡𑁆𑀟𑀧𑀜𑁆𑀘𑀓𑀁, 𑀲𑀯𑀺𑀜𑁆𑀜𑀸𑀡𑀓𑀪𑀡𑁆𑀟𑀯𑀲𑁂𑀦 𑀏𑀓𑀪𑀡𑁆𑀟𑀧𑀜𑁆𑀘𑀓𑀁. 𑀢𑀢𑁆𑀣 𑀦𑀸𑀦𑀸𑀪𑀡𑁆𑀟𑀯𑀲𑁂𑀦 𑀢𑀸𑀯 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀬𑁄 𑀆𑀭𑀸𑀫𑀁 𑀅𑀪𑀺𑀬𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑀸𑀫𑀺𑀓𑀲𑁆𑀲 𑀯𑀺𑀫𑀢𑀺𑀁 𑀉𑀧𑁆𑀧𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀲𑀸𑀫𑀺𑀓𑁄 ‘‘𑀦 𑀫𑀬𑁆𑀳𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀅𑀜𑁆𑀜𑀲𑁆𑀲 𑀪𑀡𑁆𑀟𑀁 𑀳𑀭𑀦𑁆𑀢𑁄 𑀲𑀻𑀲𑁂 𑀪𑀸𑀭𑀁 𑀣𑁂𑀬𑁆𑀬𑀘𑀺𑀢𑁆𑀢𑁄 𑀆𑀫𑀲𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀨𑀦𑁆𑀤𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀔𑀦𑁆𑀥𑀁 𑀑𑀭𑁄𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀉𑀧𑀦𑀺𑀓𑁆𑀔𑀺𑀢𑁆𑀢𑀁 𑀪𑀡𑁆𑀟𑀁 ‘‘𑀤𑁂𑀳𑀺 𑀫𑁂 𑀪𑀡𑁆𑀟’’𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑁄 ‘‘𑀦𑀸𑀳𑀁 𑀕𑀡𑁆𑀳𑀸𑀫𑀻’’𑀢𑀺 𑀪𑀡𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑀸𑀫𑀺𑀓𑀲𑁆𑀲 𑀯𑀺𑀫𑀢𑀺𑀁 𑀉𑀧𑁆𑀧𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀲𑀸𑀫𑀺𑀓𑁄 ‘‘𑀦 𑀫𑀬𑁆𑀳𑀁 𑀤𑀲𑁆𑀲𑀢𑀻’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. ‘‘𑀲𑀳𑀪𑀡𑁆𑀟𑀳𑀸𑀭𑀓𑀁 𑀦𑁂𑀲𑁆𑀲𑀸𑀫𑀻’’𑀢𑀺 𑀧𑀞𑀫𑀁 𑀧𑀸𑀤𑀁 𑀲𑀗𑁆𑀓𑀸𑀫𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀤𑀼𑀢𑀺𑀬𑀁 𑀧𑀸𑀤𑀁 𑀲𑀗𑁆𑀓𑀸𑀫𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀣𑀮𑀝𑁆𑀞𑀁 𑀪𑀡𑁆𑀟𑀁 𑀣𑁂𑀬𑁆𑀬𑀘𑀺𑀢𑁆𑀢𑁄 𑀆𑀫𑀲𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀨𑀦𑁆𑀤𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀞𑀸𑀦𑀸 𑀘𑀸𑀯𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀅𑀬𑀫𑁂𑀢𑁆𑀣 𑀦𑀸𑀦𑀸𑀪𑀡𑁆𑀟𑀯𑀲𑁂𑀦 𑀬𑁄𑀚𑀦𑀸. 𑀏𑀓𑀪𑀡𑁆𑀟𑀯𑀲𑁂𑀦 𑀧𑀦 𑀲𑀲𑁆𑀲𑀸𑀫𑀺𑀓𑀁 𑀤𑀸𑀲𑀁 𑀯𑀸 𑀢𑀺𑀭𑀘𑁆𑀙𑀸𑀦𑀁 𑀯𑀸 𑀬𑀣𑀸𑀯𑀼𑀢𑁆𑀢𑁂𑀦 𑀅𑀪𑀺𑀬𑁄𑀕𑀸𑀤𑀺𑀦𑀸 𑀦𑀬𑁂𑀦 𑀆𑀤𑀺𑀬𑀢𑀺 𑀯𑀸 𑀳𑀭𑀢𑀺 𑀯𑀸 𑀅𑀯𑀳𑀭𑀢𑀺 𑀯𑀸 𑀇𑀭𑀺𑀬𑀸𑀧𑀣𑀁 𑀓𑁄𑀧𑁂𑀢𑀺 𑀯𑀸 𑀞𑀸𑀦𑀸 𑀘𑀸𑀯𑁂𑀢𑀺 𑀯𑀸𑀢𑀺. 𑀅𑀬𑀫𑁂𑀢𑁆𑀣 𑀏𑀓𑀪𑀡𑁆𑀟𑀯𑀲𑁂𑀦 𑀬𑁄𑀚𑀦𑀸.

𑀧𑀜𑁆𑀘 𑀅𑀯𑀳𑀸𑀭𑀸 𑀲𑀸𑀳𑀢𑁆𑀣𑀺𑀓𑁄 𑀆𑀡𑀢𑁆𑀢𑀺𑀓𑁄 𑀦𑀺𑀲𑁆𑀲𑀕𑁆𑀕𑀺𑀬𑁄 𑀅𑀢𑁆𑀣𑀲𑀸𑀥𑀓𑁄 𑀥𑀼𑀭𑀦𑀺𑀓𑁆𑀔𑁂𑀧𑁄𑀢𑀺. 𑀢𑀢𑁆𑀣 𑀲𑀸𑀳𑀢𑁆𑀣𑀺𑀓𑁄 𑀦𑀸𑀫 𑀧𑀭𑀲𑁆𑀲 𑀪𑀡𑁆𑀟𑀁 𑀲𑀳𑀢𑁆𑀣𑀸 𑀅𑀯𑀳𑀭𑀢𑀺. 𑀆𑀡𑀢𑁆𑀢𑀺𑀓𑁄 𑀦𑀸𑀫 ‘‘𑀅𑀲𑀼𑀓𑀲𑁆𑀲 𑀪𑀡𑁆𑀟𑀁 𑀅𑀯𑀳𑀭𑀸’’𑀢𑀺 𑀅𑀜𑁆𑀜𑀁 𑀆𑀡𑀸𑀧𑁂𑀢𑀺. 𑀦𑀺𑀲𑁆𑀲𑀕𑁆𑀕𑀺𑀬𑁄 𑀦𑀸𑀫 𑀅𑀦𑁆𑀢𑁄𑀲𑀼𑀗𑁆𑀓𑀖𑀸𑀢𑁂 𑀞𑀺𑀢𑁄 𑀩𑀳𑀺𑀲𑀼𑀗𑁆𑀓𑀖𑀸𑀢𑀁 𑀧𑀸𑀢𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀅𑀢𑁆𑀣𑀲𑀸𑀥𑀓𑁄 𑀦𑀸𑀫 ‘‘𑀅𑀲𑀼𑀓𑀁 𑀪𑀡𑁆𑀟𑀁 𑀬𑀤𑀸 𑀲𑀓𑁆𑀓𑁄𑀲𑀺, 𑀢𑀤𑀸 𑀅𑀯𑀳𑀭𑀸’’𑀢𑀺 𑀆𑀡𑀸𑀧𑁂𑀢𑀺. 𑀢𑀢𑁆𑀣 𑀲𑀘𑁂 𑀧𑀭𑁄 𑀅𑀦𑀦𑁆𑀢𑀭𑀸𑀬𑀺𑀓𑁄 𑀳𑀼𑀢𑁆𑀯𑀸 𑀢𑀁 𑀅𑀯𑀳𑀭𑀢𑀺, 𑀆𑀡𑀸𑀧𑀓𑁄 𑀆𑀡𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺, 𑀅𑀯𑀳𑀸𑀭𑀓𑁄 𑀧𑀦 𑀅𑀯𑀳𑀝𑀓𑀸𑀮𑁂, 𑀅𑀬𑀁 𑀅𑀢𑁆𑀣𑀲𑀸𑀥𑀓𑁄. 𑀥𑀼𑀭𑀦𑀺𑀓𑁆𑀔𑁂𑀧𑁄 𑀧𑀦 𑀉𑀧𑀦𑀺𑀓𑁆𑀔𑀺𑀢𑁆𑀢𑀪𑀡𑁆𑀟𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺 𑀇𑀤𑀁 𑀲𑀸𑀳𑀢𑁆𑀣𑀺𑀓𑀧𑀜𑁆𑀘𑀓𑀁.

𑀅𑀧𑀭𑁂𑀧𑀺 𑀧𑀜𑁆𑀘 𑀅𑀯𑀳𑀸𑀭𑀸 𑀧𑀼𑀩𑁆𑀩𑀧𑁆𑀧𑀬𑁄𑀕𑁄 𑀲𑀳𑀧𑁆𑀧𑀬𑁄𑀕𑁄 𑀲𑀁𑀯𑀺𑀥𑀸𑀯𑀳𑀸𑀭𑁄 𑀲𑀗𑁆𑀓𑁂𑀢𑀓𑀫𑁆𑀫𑀁 𑀦𑀺𑀫𑀺𑀢𑁆𑀢𑀓𑀫𑁆𑀫𑀦𑁆𑀢𑀺. 𑀢𑀢𑁆𑀣 𑀆𑀡𑀢𑁆𑀢𑀺𑀯𑀲𑁂𑀦 𑀧𑀼𑀩𑁆𑀩𑀧𑁆𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄, 𑀞𑀸𑀦𑀸𑀘𑀸𑀯𑀦𑀯𑀲𑁂𑀦 𑀲𑀳𑀧𑁆𑀧𑀬𑁄𑀕𑁄. 𑀲𑀁𑀯𑀺𑀥𑀸𑀯𑀳𑀸𑀭𑁄 𑀦𑀸𑀫 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 ‘‘𑀅𑀫𑀼𑀓𑀁 𑀦𑀸𑀫 𑀕𑁂𑀳𑀁 𑀕𑀦𑁆𑀢𑁆𑀯𑀸, 𑀙𑀤𑀦𑀁 𑀯𑀸 𑀪𑀺𑀦𑁆𑀤𑀺𑀢𑁆𑀯𑀸, 𑀲𑀦𑁆𑀥𑀺𑀁 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀪𑀡𑁆𑀟𑀁 𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀁𑀯𑀺𑀤𑀳𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀢𑁂𑀲𑀼 𑀏𑀓𑁄 𑀪𑀡𑁆𑀟𑀁 𑀅𑀯𑀳𑀭𑀢𑀺, 𑀢𑀲𑁆𑀲𑀼𑀤𑁆𑀥𑀸𑀭𑁂 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓𑀁. 𑀲𑀗𑁆𑀓𑁂𑀢𑀓𑀫𑁆𑀫𑀁 𑀦𑀸𑀫 𑀲𑀜𑁆𑀚𑀸𑀦𑀦𑀓𑀫𑁆𑀫𑀁 𑀓𑀸𑀮𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀲𑀜𑁆𑀜𑀸𑀓𑀭𑀡𑀁. 𑀏𑀢𑁆𑀣 𑀘 ‘‘𑀧𑀼𑀭𑁂𑀪𑀢𑁆𑀢𑀁 𑀅𑀯𑀳𑀭𑀸’’𑀢𑀺 𑀯𑀼𑀢𑁆𑀢𑁂 𑀅𑀚𑁆𑀚 𑀯𑀸 𑀧𑀼𑀭𑁂𑀪𑀢𑁆𑀢𑀁 𑀅𑀯𑀳𑀭𑀢𑀼, 𑀲𑁆𑀯𑁂 𑀯𑀸 𑀅𑀦𑀸𑀕𑀢𑁂 𑀲𑀁𑀯𑀘𑁆𑀙𑀭𑁂 𑀯𑀸, 𑀦𑀢𑁆𑀣𑀺 𑀯𑀺𑀲𑀗𑁆𑀓𑁂𑀢𑁄, 𑀲𑀗𑁆𑀓𑁂𑀢𑀓𑀸𑀭𑀓𑀲𑁆𑀲 𑀆𑀡𑀢𑁆𑀢𑀺𑀓𑁆𑀔𑀡𑁂, 𑀇𑀢𑀭𑀲𑁆𑀲 𑀞𑀸𑀦𑀸 𑀘𑀸𑀯𑀦𑁂𑀢𑀺 𑀏𑀯𑀁 𑀆𑀧𑀢𑁆𑀢𑀺 𑀉𑀪𑀺𑀦𑁆𑀦𑀁 𑀧𑀸𑀭𑀸𑀚𑀺𑀓𑀲𑁆𑀲. 𑀦𑀺𑀫𑀺𑀢𑁆𑀢𑀓𑀫𑁆𑀫𑀁 𑀦𑀸𑀫 𑀲𑀜𑁆𑀜𑀼𑀧𑁆𑀧𑀸𑀤𑀦𑀢𑁆𑀣𑀁 𑀓𑀲𑁆𑀲𑀘𑀺 𑀦𑀺𑀫𑀺𑀢𑁆𑀢𑀲𑁆𑀲 𑀓𑀭𑀡𑀁 𑀅𑀓𑁆𑀔𑀺𑀦𑀺𑀔𑀡𑀦𑀳𑀢𑁆𑀣𑀸𑀮𑀗𑁆𑀖𑀦𑀧𑀸𑀡𑀺𑀧𑁆𑀧𑀳𑀸𑀭𑀅𑀗𑁆𑀕𑀼𑀮𑀺𑀨𑁄𑀝𑀦𑀕𑀻𑀯𑀼𑀦𑁆𑀦𑀸𑀫𑀦𑀉𑀓𑁆𑀓𑀸𑀲𑀦𑀸𑀤𑀺𑀦𑀸 𑀅𑀦𑁂𑀓𑀧𑁆𑀧𑀓𑀸𑀭𑀁. 𑀅𑀯𑀳𑀸𑀭𑀓𑁄 𑀆𑀡𑀸𑀧𑀓𑁂𑀦 𑀬𑀁 𑀦𑀺𑀫𑀺𑀢𑁆𑀢𑀲𑀜𑁆𑀜𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀢𑀁 ‘‘𑀏𑀢’’𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀢𑀫𑁂𑀯 𑀅𑀯𑀳𑀭𑀢𑀺, 𑀉𑀪𑀺𑀦𑁆𑀦𑀁 𑀧𑀸𑀭𑀸𑀚𑀺𑀓𑀁. 𑀬𑀁 ‘‘𑀅𑀯𑀳𑀭𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 ‘‘𑀏𑀢’’𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀅𑀜𑁆𑀜𑀁 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀞𑀧𑀺𑀢𑀁 𑀅𑀯𑀳𑀭𑀢𑀺, 𑀫𑀽𑀮𑀝𑁆𑀞𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀇𑀤𑀁 𑀧𑀼𑀩𑁆𑀩𑀧𑁆𑀧𑀬𑁄𑀕𑀧𑀜𑁆𑀘𑀓𑀁.

𑀅𑀧𑀭𑁂𑀧𑀺 𑀧𑀜𑁆𑀘 𑀅𑀯𑀳𑀸𑀭𑀸 𑀣𑁂𑀬𑁆𑀬𑀸𑀯𑀳𑀸𑀭𑁄 𑀧𑀲𑀬𑁆𑀳𑀸𑀯𑀳𑀸𑀭𑁄 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄 𑀧𑀝𑀺𑀘𑁆𑀙𑀦𑁆𑀦𑀸𑀯𑀳𑀸𑀭𑁄 𑀓𑀼𑀲𑀸𑀯𑀳𑀸𑀭𑁄𑀢𑀺. 𑀢𑀢𑁆𑀣 𑀬𑁄 𑀓𑀽𑀝𑀫𑀸𑀦𑀓𑀽𑀝𑀓𑀳𑀸𑀧𑀡𑀸𑀤𑀻𑀳𑀺 𑀯𑀜𑁆𑀘𑁂𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀢𑀲𑁆𑀲𑁂𑀯𑀁 𑀕𑀡𑁆𑀳𑀢𑁄 𑀅𑀯𑀳𑀸𑀭𑁄 𑀣𑁂𑀬𑁆𑀬𑀸𑀯𑀳𑀸𑀭𑁄. 𑀬𑁄 𑀲𑀦𑁆𑀢𑀚𑁆𑀚𑁂𑀢𑁆𑀯𑀸 𑀲𑀬𑀁 𑀤𑀲𑁆𑀲𑁂𑀢𑁆𑀯𑀸 𑀢𑁂𑀲𑀁 𑀲𑀦𑁆𑀢𑀓𑀁 𑀕𑀡𑁆𑀳𑀸𑀢𑀺, 𑀬𑁄 𑀯𑀸 𑀅𑀢𑁆𑀢𑀦𑁄 𑀧𑀢𑁆𑀢𑀩𑀮𑀺𑀢𑁄 𑀘 𑀅𑀥𑀺𑀓𑀁 𑀩𑀮𑀓𑁆𑀓𑀸𑀭𑁂𑀦 𑀕𑀡𑁆𑀳𑀸𑀢𑀺 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀬𑁄 𑀯𑀺𑀬, 𑀢𑀲𑁆𑀲𑁂𑀯𑀁 𑀕𑀡𑁆𑀳𑀢𑁄 𑀅𑀯𑀳𑀸𑀭𑁄 𑀧𑀲𑀬𑁆𑀳𑀸𑀯𑀳𑀸𑀭𑁄. 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀕𑀡𑁆𑀳𑀢𑁄 𑀧𑀦𑀸𑀯𑀳𑀸𑀭𑁄 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄. 𑀲𑁄 𑀤𑀼𑀯𑀺𑀥𑁄 𑀪𑀡𑁆𑀟𑁄𑀓𑀸𑀲𑀧𑀭𑀺𑀓𑀧𑁆𑀧𑀯𑀲𑁂𑀦. 𑀢𑀢𑁆𑀭 𑀬𑁄 ‘‘𑀲𑀸𑀝𑀓𑁄 𑀘𑁂, 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀲𑀼𑀢𑁆𑀢𑀁 𑀘𑁂, 𑀦 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀅𑀦𑁆𑀥𑀓𑀸𑀭𑁂 𑀧𑀲𑀺𑀩𑁆𑀩𑀓𑀁 𑀕𑀡𑁆𑀳𑀸𑀢𑀺, 𑀢𑀢𑁆𑀭 𑀲𑀸𑀝𑀓𑁄 𑀘𑁂, 𑀉𑀤𑁆𑀥𑀸𑀭𑁂𑀬𑁂𑀯 𑀧𑀸𑀭𑀸𑀚𑀺𑀓𑀁, 𑀲𑀼𑀢𑁆𑀢𑀁 𑀘𑁂 𑀳𑁄𑀢𑀺, 𑀭𑀓𑁆𑀔𑀢𑀺. 𑀅𑀬𑀁 𑀪𑀡𑁆𑀟𑀧𑀭𑀺𑀓𑀧𑁆𑀧𑁄 𑀦𑀸𑀫. 𑀬𑁄 𑀞𑀸𑀦𑀁 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀪𑀡𑁆𑀟𑀁 𑀕𑀡𑁆𑀳𑀸𑀢𑀺, 𑀢𑀲𑁆𑀲 𑀢𑀁 𑀧𑀭𑀺𑀓𑀧𑁆𑀧𑀺𑀢𑀧𑀭𑀺𑀘𑁆𑀙𑁂𑀤𑀁 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀅𑀬𑀁 𑀑𑀓𑀸𑀲𑀧𑀭𑀺𑀓𑀧𑁆𑀧𑁄 𑀦𑀸𑀫. 𑀏𑀯𑀫𑀺𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀭𑀺𑀓𑀧𑁆𑀧𑀸𑀦𑀁 𑀯𑀲𑁂𑀦 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀕𑀡𑁆𑀳𑀢𑁄 𑀅𑀯𑀳𑀸𑀭𑁄 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄. 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀧𑀭𑀲𑁆𑀲 𑀪𑀡𑁆𑀟𑀁 𑀕𑀡𑁆𑀳𑀢𑁄 𑀅𑀯𑀳𑀸𑀭𑁄 𑀧𑀝𑀺𑀘𑁆𑀙𑀦𑁆𑀦𑀸𑀯𑀳𑀸𑀭𑁄 𑀦𑀸𑀫. 𑀓𑀼𑀲𑀁 𑀲𑀗𑁆𑀓𑀸𑀫𑁂𑀢𑁆𑀯𑀸 𑀅𑀯𑀳𑀭𑀡𑀁 𑀓𑀼𑀲𑀸𑀯𑀳𑀸𑀭𑁄. 𑀬𑁄 𑀓𑀼𑀲𑀁 𑀧𑀸𑀢𑁂𑀢𑁆𑀯𑀸 𑀘𑀻𑀯𑀭𑁂 𑀪𑀸𑀚𑀺𑀬𑀫𑀸𑀦𑁂 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑀲𑁆𑀲 𑀲𑀫𑀻𑀧𑁂 𑀞𑀺𑀢𑀁 𑀅𑀧𑁆𑀧𑀕𑁆𑀖𑀢𑀭𑀁 𑀯𑀸 𑀫𑀳𑀕𑁆𑀖𑀢𑀭𑀁 𑀯𑀸 𑀲𑀫𑀲𑀫𑀁 𑀯𑀸 𑀧𑀭𑀲𑁆𑀲 𑀓𑁄𑀝𑁆𑀞𑀸𑀲𑀁 𑀤𑀺𑀲𑁆𑀯𑀸 𑀲𑀘𑁂 𑀧𑀞𑀫𑀢𑀭𑀁 𑀧𑀭𑀓𑁄𑀝𑁆𑀞𑀸𑀲𑀢𑁄 𑀓𑀼𑀲𑀤𑀡𑁆𑀟𑀓𑀁 𑀉𑀤𑁆𑀥𑀭𑀢𑀺, 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑁂 𑀧𑀸𑀢𑁂𑀢𑀼𑀓𑀸𑀫𑀢𑀸𑀬 𑀉𑀤𑁆𑀥𑀸𑀭𑁂 𑀭𑀓𑁆𑀔𑀢𑀺, 𑀧𑀸𑀢𑀦𑁂𑀧𑀺 𑀭𑀓𑁆𑀔𑀢𑀺, 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑀢𑁄 𑀧𑀦 𑀓𑀼𑀲𑀤𑀡𑁆𑀟𑀁 𑀉𑀤𑁆𑀥𑀭𑀢𑀺, 𑀉𑀤𑁆𑀥𑀸𑀭𑁂 𑀭𑀓𑁆𑀔𑀢𑀺, 𑀢𑀁 𑀉𑀤𑁆𑀥𑀭𑀺𑀢𑁆𑀯𑀸 𑀧𑀭𑀓𑁄𑀝𑁆𑀞𑀸𑀲𑁂 𑀧𑀸𑀢𑁂𑀦𑁆𑀢𑀲𑁆𑀲 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀅𑀬𑀁 𑀓𑀼𑀲𑀸𑀯𑀳𑀸𑀭𑁄 𑀦𑀸𑀫𑀸𑀢𑀺 𑀇𑀫𑁂𑀲𑀼 𑀧𑀜𑁆𑀘𑀯𑀻𑀲𑀸𑀯𑀳𑀸𑀭𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀅𑀯𑀳𑀸𑀭𑁂𑀦 𑀕𑀡𑁆𑀳𑀦𑁆𑀢𑁄 𑀧𑀸𑀭𑀸𑀚𑀺𑀓𑁄 𑀪𑀯𑁂𑀢𑀺 𑀅𑀢𑁆𑀣𑁄.

𑀕𑀭𑀼𑀓𑀦𑁆𑀢𑀺 𑀧𑀜𑁆𑀘𑀫𑀸𑀲𑀓𑀁. 𑀯𑀻𑀲𑀢𑀺𑀫𑀸𑀲𑀓𑁄 𑀳𑀺 𑀓𑀳𑀸𑀧𑀡𑁄, 𑀓𑀳𑀸𑀧𑀡𑀲𑁆𑀲 𑀘𑀢𑀼𑀢𑁆𑀣𑁄 𑀪𑀸𑀕𑁄 𑀧𑀸𑀤𑁄 𑀦𑀸𑀫, 𑀢𑀲𑁆𑀫𑀸 𑀧𑀜𑁆𑀘𑀫𑀸𑀲𑀓𑀁 𑀯𑀸 𑀧𑀸𑀤𑀁 𑀯𑀸 𑀕𑀭𑀼𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 ‘‘𑀘𑀢𑁆𑀢𑀸𑀭𑁄 𑀯𑀻𑀳𑀬𑁄 𑀕𑀼𑀜𑁆𑀚𑀸, 𑀤𑁆𑀯𑁂 𑀕𑀼𑀜𑁆𑀚𑀸 𑀫𑀸𑀲𑀓𑁄 𑀪𑀯𑁂’’𑀢𑀺 𑀯𑀘𑀦𑀢𑁄 𑀯𑀻𑀳𑀺𑀯𑀲𑁂𑀦 𑀘𑀢𑁆𑀢𑀸𑀮𑀻𑀲 𑀯𑀻𑀳𑀬𑁄 𑀤𑀲 𑀕𑀼𑀜𑁆𑀚𑀸 𑀧𑀜𑁆𑀘𑀫𑀸𑀲𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀁 𑀧𑀦 𑀲𑀸𑀫𑀡𑁂𑀭𑀲𑀺𑀓𑁆𑀔𑀸𑀬𑀁 ‘‘𑀯𑀻𑀲𑀢𑀺𑀯𑀻𑀳𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀦𑁂𑀯 𑀧𑀸𑀴𑀺𑀬𑀁, 𑀦 𑀅𑀝𑁆𑀞𑀓𑀣𑀸𑀬𑀁 𑀅𑀢𑁆𑀣𑀺, 𑀯𑀻𑀫𑀁𑀲𑀺𑀢𑀩𑁆𑀩𑀫𑁂𑀢𑀁. 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀁.

𑁮. 𑀇𑀤𑀸𑀦𑀺 𑀢𑀢𑀺𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀦𑀼𑀲𑁆𑀲𑀧𑀸𑀡𑀁 𑀧𑀸𑀡𑁄’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑁄 𑀪𑀺𑀓𑁆𑀔𑀼 ‘‘𑀫𑀦𑀼𑀲𑁆𑀲𑀧𑀸𑀡𑁄’’ 𑀇𑀢𑀺 𑀚𑀸𑀦𑀦𑁆𑀢𑁄 𑀯𑀥𑀓𑀘𑀺𑀢𑁆𑀢𑁂𑀦 𑀫𑀦𑀼𑀲𑁆𑀲𑀧𑀸𑀡𑀁 𑀚𑀻𑀯𑀺𑀢𑀸 𑀯𑀺𑀬𑁄𑀚𑁂𑀢𑀺, 𑀲𑁄 𑀪𑀺𑀓𑁆𑀔𑀼 𑀲𑀸𑀲𑀦𑀸 𑀧𑀸𑀭𑀸𑀚𑀺𑀓𑁄 𑀳𑁄𑀢𑀻𑀢𑀺 𑀲𑀫𑀼𑀤𑀸𑀬𑀢𑁆𑀣𑁄.

𑀫𑀦𑀼𑀲𑁆𑀲𑀧𑀸𑀡𑀦𑁆𑀢𑀺 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀲𑀳𑀼𑀧𑁆𑀧𑀦𑁆𑀦𑀁 𑀅𑀢𑀺𑀧𑀭𑀺𑀢𑁆𑀢𑀁 𑀓𑀮𑀮𑀭𑀽𑀧𑀁 𑀆𑀤𑀺𑀁 𑀓𑀢𑁆𑀯𑀸 𑀧𑀓𑀢𑀺𑀬𑀸 𑀯𑀻𑀲𑀯𑀲𑁆𑀲𑀲𑀢𑀸𑀬𑀼𑀓𑀲𑁆𑀲 𑀲𑀢𑁆𑀢𑀲𑁆𑀲 𑀬𑀸𑀯 𑀫𑀭𑀡𑀓𑀸𑀮𑀸 𑀏𑀢𑁆𑀣𑀦𑁆𑀢𑀭𑁂 𑀅𑀦𑀼𑀧𑀼𑀩𑁆𑀩𑁂𑀦 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀅𑀢𑁆𑀢𑀪𑀸𑀯𑁄, 𑀏𑀲𑁄 𑀫𑀦𑀼𑀲𑁆𑀲𑀧𑀸𑀡𑁄 𑀦𑀸𑀫, 𑀏𑀯𑀭𑀽𑀧𑀁 𑀫𑀦𑀼𑀲𑁆𑀲𑀧𑀸𑀡𑀦𑁆𑀢𑀺 𑀅𑀢𑁆𑀣𑁄. 𑀧𑀸𑀡𑁄𑀢𑀺 𑀚𑀸𑀦𑀦𑁆𑀢𑀺 ‘‘𑀧𑀸𑀡𑁄’’ 𑀇𑀢𑀺 𑀚𑀸𑀦𑀦𑁆𑀢𑁄 ‘‘𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀫𑀻’’𑀢𑀺 𑀚𑀸𑀦𑀦𑁆𑀢𑁄. 𑀯𑀥𑀓𑀘𑁂𑀢𑀲𑀸𑀢𑀺 𑀯𑀥𑀓𑀘𑀺𑀢𑁆𑀢𑁂𑀦, 𑀇𑀢𑁆𑀣𑀫𑁆𑀪𑀽𑀢𑁂 𑀓𑀭𑀡𑀯𑀘𑀦𑀁, 𑀯𑀥𑀓𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀫𑀭𑀡𑀸𑀥𑀺𑀧𑁆𑀧𑀸𑀬𑁄 𑀳𑀼𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀚𑀻𑀯𑀺𑀢𑀸𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀢𑁄. 𑀬𑁄𑀢𑀺 𑀅𑀦𑀺𑀬𑀫𑀯𑀘𑀦𑀁. 𑀲𑁄𑀢𑀺 𑀏𑀢𑁂𑀦 𑀦𑀺𑀬𑀫𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀬𑁄𑀚𑁂𑀢𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀁 𑀓𑀮𑀮𑀓𑀸𑀮𑁂𑀧𑀺 𑀢𑀸𑀧𑀦𑀫𑀤𑁆𑀤𑀦𑁂𑀳𑀺 𑀯𑀸 𑀪𑁂𑀲𑀚𑁆𑀚𑀲𑀫𑁆𑀧𑀤𑀸𑀦𑁂𑀦 𑀯𑀸 𑀢𑀢𑁄 𑀯𑀸 𑀉𑀤𑁆𑀥𑀫𑁆𑀧𑀺 𑀢𑀤𑀦𑀼𑀭𑀽𑀧𑁂𑀦 𑀉𑀧𑀓𑁆𑀓𑀫𑁂𑀦 𑀚𑀻𑀯𑀺𑀢𑀸 𑀯𑀺𑀬𑁄𑀚𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀸𑀲𑀦𑀸𑀢𑀺 𑀧𑀭𑀸𑀧𑀼𑀩𑁆𑀩𑀚𑀺𑀥𑀸𑀢𑀼𑀧𑁆𑀧𑀬𑁄𑀕𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁, 𑀢𑁂𑀦 𑀲𑀢𑁆𑀣𑀼𑀲𑀸𑀲𑀦𑀢𑁄𑀢𑀺 𑀅𑀢𑁆𑀣𑁄. 𑀧𑀭𑀸𑀚𑀺𑀢𑁄𑀢𑀺 𑀧𑀭𑀸𑀚𑀬𑀫𑀸𑀧𑀦𑁆𑀦𑁄. 𑀳𑁄𑀢𑀻𑀢𑀺 𑀧𑀸𑀞𑀲𑁂𑀲𑁄. 𑀢𑀢𑀺𑀬𑀧𑀸𑀭𑀸𑀚𑀺𑀓𑀁.

𑁯. 𑀇𑀤𑀸𑀦𑀺 𑀘𑀢𑀼𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀛𑀸𑀦𑀸𑀤𑀺𑀪𑁂𑀤’’𑀦𑁆𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑁄 𑀪𑀺𑀓𑁆𑀔𑀼 𑀅𑀜𑁆𑀜𑀸𑀧𑀤𑁂𑀲𑀜𑁆𑀘 𑀅𑀥𑀺𑀫𑀸𑀦𑀜𑁆𑀘 𑀯𑀚𑁆𑀚𑁂𑀢𑁆𑀯𑀸 𑀳𑀤𑀬𑁂 𑀅𑀲𑀦𑁆𑀢𑀁 𑀛𑀸𑀦𑀸𑀤𑀺𑀪𑁂𑀤𑀁 𑀥𑀫𑁆𑀫𑀁 𑀫𑀦𑀼𑀲𑁆𑀲𑀚𑀸𑀢𑀺𑀓𑀲𑁆𑀲 𑀲𑀢𑁆𑀢𑀲𑁆𑀲 𑀯𑀤𑁂𑀬𑁆𑀬, 𑀢𑀲𑁆𑀫𑀺𑀁 𑀔𑀡𑁂 𑀜𑀸𑀢𑁂 𑀲𑁄 𑀢𑀢𑁄 𑀲𑀸𑀲𑀦𑀸 𑀧𑀸𑀭𑀸𑀚𑀺𑀓𑁄 𑀏𑀯 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀛𑀸𑀦𑀸𑀤𑀺𑀪𑁂𑀤𑀦𑁆𑀢𑀺 ‘‘𑀛𑀸𑀦𑀁 𑀯𑀺𑀫𑁄𑀓𑁆𑀔𑁄 𑀲𑀫𑀸𑀥𑀺 𑀲𑀫𑀸𑀧𑀢𑁆𑀢𑀺 𑀜𑀸𑀡𑀤𑀲𑁆𑀲𑀦𑀁 𑀫𑀕𑁆𑀕𑀪𑀸𑀯𑀦𑀸 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀯𑀺𑀦𑀻𑀯𑀭𑀡𑀢𑀸 𑀘𑀺𑀢𑁆𑀢𑀲𑁆𑀲 𑀲𑀼𑀜𑁆𑀜𑀸𑀕𑀸𑀭𑁂 𑀅𑀪𑀺𑀭𑀢𑀻’’𑀢𑀺 (𑀧𑀸𑀭𑀸. 𑁧𑁯𑁮) 𑀏𑀯𑀁 𑀯𑀼𑀢𑁆𑀢𑀁 𑀛𑀸𑀦𑀸𑀤𑀺𑀪𑁂𑀤𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁. 𑀳𑀤𑀬𑁂𑀢𑀺 𑀘𑀺𑀢𑁆𑀢𑁂. 𑀅𑀲𑀦𑁆𑀢𑀦𑁆𑀢𑀺 𑀅𑀲𑀁𑀯𑀺𑀚𑁆𑀚𑀫𑀸𑀦𑀁. 𑀅𑀜𑁆𑀜𑀸𑀧𑀤𑁂𑀲𑀦𑁆𑀢𑀺 ‘‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀺, 𑀲𑁄 𑀪𑀺𑀓𑁆𑀔𑀼 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀜𑁆𑀜𑀸𑀧𑀤𑁂𑀲𑀁 𑀯𑀚𑁆𑀚𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀺𑀦𑀸𑀢𑀺 𑀯𑀚𑁆𑀚𑀦𑀢𑁆𑀣𑁂 𑀦𑀺𑀧𑀸𑀢𑁄, 𑀢𑀲𑁆𑀲 𑀯𑀚𑁆𑀚𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀥𑀺𑀫𑀸𑀦𑀦𑁆𑀢𑀺 ‘‘𑀅𑀥𑀺𑀕𑀢𑀸 𑀫𑀬𑀸’’𑀢𑀺 𑀏𑀯𑀁 𑀉𑀧𑁆𑀧𑀦𑁆𑀦𑀁 𑀫𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀥𑀺𑀕𑀢𑁄 𑀫𑀸𑀦𑁄𑀢𑀺 𑀯𑀺𑀕𑁆𑀕𑀳𑁄, 𑀢𑀁 𑀅𑀥𑀺𑀫𑀸𑀦𑀁 𑀯𑀚𑁆𑀚𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀫𑀦𑀼𑀲𑁆𑀲𑀚𑀸𑀢𑀺𑀲𑁆𑀲𑀸𑀢𑀺 𑀫𑀦𑀼𑀲𑁆𑀲𑀚𑀸𑀢𑀺𑀓𑀲𑁆𑀲, 𑀦 𑀤𑁂𑀯𑀩𑁆𑀭𑀳𑁆𑀫𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀯𑀤𑁂𑀬𑁆𑀬𑀸𑀢𑀺 𑀆𑀭𑁄𑀘𑁂𑀬𑁆𑀬. 𑀜𑀸𑀢𑀓𑁆𑀔𑀡𑁂𑀢𑀺 𑀜𑀸𑀢𑁂 𑀔𑀡𑁂𑀢𑀺 𑀙𑁂𑀤𑁄, 𑀢𑀲𑁆𑀫𑀺𑀁 𑀢𑁂𑀦𑀸𑀭𑁄𑀘𑀺𑀢𑀓𑁆𑀔𑀡𑁂 𑀫𑀦𑀼𑀲𑁆𑀲𑀚𑀸𑀢𑀺𑀓𑁂𑀦 𑀜𑀸𑀢𑁂𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀢𑀺 𑀦𑀺𑀲𑁆𑀲𑀓𑁆𑀓𑁂 𑀓𑀭𑀡𑀯𑀘𑀦𑀁, 𑀢𑀢𑁄 𑀲𑀸𑀲𑀦𑀢𑁄 𑀧𑀸𑀭𑀸𑀚𑀺𑀓𑁄𑀢𑀺 𑀅𑀢𑁆𑀣𑁄. 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀁.

𑀧𑀸𑀭𑀸𑀚𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀕𑀭𑀼𑀓𑀸𑀧𑀢𑁆𑀢𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁦. 𑀇𑀤𑀸𑀦𑀺 𑀲𑀗𑁆𑀖𑀸𑀤𑀺𑀲𑁂𑀲𑀁 𑀧𑀓𑀸𑀲𑁂𑀢𑀼𑀁 ‘‘𑀫𑁄𑀘𑁂𑀢𑀼𑀓𑀸𑀫𑀘𑀺𑀢𑁆𑀢𑁂𑀦𑀸’’𑀢𑀺𑀆𑀤𑀺𑀫𑀸𑀭𑀤𑁆𑀥𑀁. 𑀢𑀢𑁆𑀣 𑀫𑁄𑀘𑁂𑀢𑀼𑀁 𑀓𑀸𑀫𑁂𑀢𑀻𑀢𑀺 𑀫𑁄𑀘𑁂𑀢𑀼𑀓𑀸𑀫𑀁, 𑀫𑁄𑀘𑁂𑀢𑀼𑀓𑀸𑀫𑀜𑁆𑀘 𑀢𑀁 𑀘𑀺𑀢𑁆𑀢𑀜𑁆𑀘𑀸𑀢𑀺 𑀫𑁄𑀘𑁂𑀢𑀼𑀓𑀸𑀫𑀘𑀺𑀢𑁆𑀢𑀁, 𑀢𑁂𑀦, 𑀫𑁄𑀘𑀦𑀲𑁆𑀲𑀸𑀤𑀘𑀺𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀓𑀸𑀤𑀲𑀦𑁆𑀦𑀜𑁆𑀳𑀺 𑀭𑀸𑀕𑀸𑀦𑀁 𑀏𑀓𑁂𑀦 𑀫𑁄𑀘𑀦𑀲𑁆𑀲𑀸𑀤𑁂𑀦 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀢𑁆𑀭𑀺𑀫𑁂 𑀏𑀓𑀸𑀤𑀲 𑀅𑀲𑁆𑀲𑀸𑀤𑀸 𑀫𑁄𑀘𑀦𑀲𑁆𑀲𑀸𑀤𑁄 𑀫𑀼𑀘𑁆𑀘𑀦𑀲𑁆𑀲𑀸𑀤𑁄 𑀫𑀼𑀢𑁆𑀢𑀲𑁆𑀲𑀸𑀤𑁄 𑀫𑁂𑀣𑀼𑀦𑀲𑁆𑀲𑀸𑀤𑁄 𑀨𑀲𑁆𑀲𑀲𑁆𑀲𑀸𑀤𑁄 𑀓𑀡𑁆𑀟𑀽𑀯𑀦𑀲𑁆𑀲𑀸𑀤𑁄 𑀤𑀲𑁆𑀲𑀦𑀲𑁆𑀲𑀸𑀤𑁄 𑀦𑀺𑀲𑀚𑁆𑀚𑀲𑁆𑀲𑀸𑀤𑁄 𑀯𑀸𑀘𑀲𑁆𑀲𑀸𑀤𑁄 𑀕𑁂𑀳𑀲𑀺𑀢𑀧𑁂𑀫𑀁 𑀯𑀦𑀪𑀗𑁆𑀕𑀺𑀬𑀦𑁆𑀢𑀺. 𑀢𑀢𑁆𑀣 𑀫𑁄𑀘𑀦𑀲𑁆𑀲𑀸𑀤𑀘𑁂𑀢𑀦𑀸𑀬 𑀘𑁂𑀢𑁂𑀦𑁆𑀢𑁄 𑀘𑁂𑀯 𑀅𑀲𑁆𑀲𑀸𑀤𑁂𑀦𑁆𑀢𑁄 𑀘 𑀉𑀧𑀓𑁆𑀓𑀫𑀢𑀺, 𑀫𑀼𑀘𑁆𑀘𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀦 𑀫𑀼𑀘𑁆𑀘𑀢𑀺 𑀘𑁂, 𑀣𑀼𑀮𑁆𑀮𑀘𑁆𑀘𑀬𑀁. 𑀲𑀘𑁂 𑀧𑀦 𑀲𑀬𑀦𑀓𑀸𑀮𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑁄 𑀳𑀼𑀢𑁆𑀯𑀸 𑀊𑀭𑀼𑀦𑀸 𑀯𑀸 𑀫𑀼𑀝𑁆𑀞𑀺𑀦𑀸 𑀯𑀸 𑀅𑀗𑁆𑀕𑀚𑀸𑀢𑀁 𑀕𑀸𑀴𑁆𑀳𑀁 𑀧𑀻𑀴𑁂𑀢𑁆𑀯𑀸 𑀫𑁄𑀘𑀦𑀢𑁆𑀣𑀸𑀬 𑀲𑀉𑀲𑁆𑀲𑀸𑀳𑁄 𑀲𑀼𑀧𑀢𑀺, 𑀲𑀼𑀧𑀦𑁆𑀢𑀲𑁆𑀲 𑀘𑀲𑁆𑀲 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀫𑀼𑀘𑁆𑀘𑀦𑀲𑁆𑀲𑀸𑀤𑁂 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀫𑀼𑀘𑁆𑀘𑀫𑀸𑀦𑀁 𑀅𑀲𑁆𑀲𑀸𑀤𑁂𑀢𑀺, 𑀦 𑀉𑀧𑀓𑁆𑀓𑀫𑀢𑀺, 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀫𑀼𑀢𑁆𑀢𑀲𑁆𑀲𑀸𑀤𑁂 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀫𑀼𑀢𑁆𑀢𑁂 𑀞𑀸𑀦𑀸 𑀘𑀼𑀢𑁂 𑀅𑀲𑀼𑀘𑀺𑀫𑁆𑀳𑀺 𑀧𑀘𑁆𑀙𑀸 𑀅𑀲𑁆𑀲𑀸𑀤𑁂𑀦𑁆𑀢𑀲𑁆𑀲 𑀯𑀺𑀦𑀸 𑀉𑀧𑀓𑁆𑀓𑀫𑁂𑀦 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀫𑁂𑀣𑀼𑀦𑀲𑁆𑀲𑀸𑀤𑁂 𑀫𑁂𑀣𑀼𑀦𑀭𑀸𑀕𑁂𑀦 𑀫𑀸𑀢𑀼𑀕𑀸𑀫𑀁 𑀕𑀡𑁆𑀳𑀸𑀢𑀺, 𑀢𑁂𑀦 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺, 𑀤𑀼𑀓𑁆𑀓𑀝𑀁 𑀧𑀦 𑀆𑀧𑀚𑁆𑀚𑀢𑀺. 𑀨𑀲𑁆𑀲𑀲𑁆𑀲𑀸𑀤𑁄 𑀤𑀼𑀯𑀺𑀥𑁄 𑀅𑀚𑁆𑀛𑀢𑁆𑀢𑀺𑀓𑁄 𑀩𑀸𑀳𑀺𑀭𑁄 𑀘𑀸𑀢𑀺. 𑀢𑀢𑁆𑀣 𑀅𑀢𑁆𑀢𑀦𑁄 𑀦𑀺𑀫𑀺𑀢𑁆𑀢𑀁 ‘‘𑀣𑀤𑁆𑀥𑀁, 𑀫𑀼𑀤𑀼𑀓𑀦𑁆𑀢𑀺 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀯𑀸 𑀮𑁄𑀮𑀪𑀸𑀯𑁂𑀦 𑀯𑀸 𑀓𑀻𑀴𑀸𑀧𑀬𑀢𑁄 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀩𑀸𑀳𑀺𑀭𑀨𑀲𑁆𑀲𑀲𑁆𑀲𑀸𑀤𑁂 𑀧𑀦 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀇𑀢𑁆𑀣𑀺𑀁 𑀨𑀼𑀲𑀢𑁄, 𑀆𑀮𑀺𑀗𑁆𑀕𑀢𑁄 𑀘 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺, 𑀓𑀸𑀬𑀲𑀁𑀲𑀕𑁆𑀕𑀲𑀗𑁆𑀖𑀸𑀤𑀺𑀲𑁂𑀲𑀁 𑀧𑀦 𑀆𑀧𑀚𑁆𑀚𑀢𑀺.

𑀓𑀡𑁆𑀟𑀽𑀯𑀦𑀲𑁆𑀲𑀸𑀤𑁂 𑀤𑀤𑁆𑀤𑀼𑀓𑀘𑁆𑀙𑀼𑀧𑀺𑀴𑀓𑀧𑀸𑀡𑀓𑀸𑀤𑀻𑀦𑀁 𑀅𑀜𑁆𑀜𑀢𑀭𑁂𑀦 𑀔𑀚𑁆𑀚𑀫𑀸𑀦𑀁 𑀦𑀺𑀫𑀺𑀢𑁆𑀢𑀁 𑀓𑀡𑁆𑀟𑀽𑀯𑀦𑀲𑁆𑀲𑀸𑀤𑁂𑀦 𑀓𑀡𑁆𑀟𑀽𑀯𑀢𑁄 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺. 𑀤𑀲𑁆𑀲𑀦𑀲𑁆𑀲𑀸𑀤𑁂 𑀇𑀢𑁆𑀣𑀺𑀬𑀸 𑀅𑀦𑁄𑀓𑀸𑀲𑀁 𑀉𑀧𑀦𑀺𑀚𑁆𑀛𑀸𑀬𑀢𑁄 𑀅𑀲𑀼𑀘𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀺, 𑀤𑀼𑀓𑁆𑀓𑀝𑀁 𑀧𑀦 𑀳𑁄𑀢𑀺. 𑀦𑀺𑀲𑀚𑁆𑀚𑀲𑁆𑀲𑀸𑀤𑁂 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀭𑀳𑁄 𑀦𑀺𑀲𑀺𑀦𑁆𑀦𑀲𑁆𑀲 𑀫𑀼𑀢𑁆𑀢𑁂𑀧𑀺 𑀅𑀦𑀸𑀧𑀢𑁆𑀢𑀺, 𑀭𑀳𑁄𑀦𑀺𑀲𑀚𑁆𑀚𑀸𑀧𑀢𑁆𑀢𑀺 𑀧𑀦 𑀳𑁄𑀢𑀺. 𑀯𑀸𑀘𑀲𑁆𑀲𑀸𑀤𑁂 𑀫𑀸𑀢𑀼𑀕𑀸𑀫𑀁 𑀫𑁂𑀣𑀼𑀦𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸𑀳𑀺 𑀯𑀸𑀘𑀸𑀳𑀺 𑀑𑀪𑀸𑀲𑀦𑁆𑀢𑀲𑁆𑀲 𑀫𑀼𑀢𑁆𑀢𑁂𑀧𑀺 𑀅𑀦𑀸𑀧𑀢𑁆𑀢𑀺, 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀗𑁆𑀖𑀸𑀤𑀺𑀲𑁂𑀲𑀁 𑀧𑀦 𑀆𑀧𑀚𑁆𑀚𑀢𑀺. 𑀕𑁂𑀳𑀲𑀺𑀢𑀧𑁂𑀫𑁂 𑀫𑀸𑀢𑀸𑀤𑀻𑀦𑀁 𑀫𑀸𑀢𑀸𑀤𑀺𑀧𑁂𑀫𑁂𑀦 𑀆𑀮𑀺𑀗𑁆𑀕𑀦𑀸𑀤𑀺𑀁 𑀓𑀭𑁄𑀦𑁆𑀢𑀲𑁆𑀲 𑀫𑀼𑀢𑁆𑀢𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀯𑀦𑀪𑀗𑁆𑀕𑀁 𑀲𑀦𑁆𑀣𑀯𑀓𑀭𑀡𑀢𑁆𑀣𑀸𑀬 𑀇𑀢𑁆𑀣𑀺𑀬𑀸 𑀧𑁂𑀲𑀺𑀢𑀧𑀼𑀧𑁆𑀨𑀸𑀤𑀺𑀯𑀦𑀪𑀗𑁆𑀕𑀲𑀜𑁆𑀜𑀺𑀢𑀁 𑀧𑀡𑁆𑀡𑀸𑀓𑀸𑀭𑀁 ‘‘𑀇𑀢𑁆𑀣𑀦𑁆𑀦𑀸𑀫𑀸𑀬 𑀇𑀫𑀁 𑀧𑁂𑀲𑀺𑀢’’𑀦𑁆𑀢𑀺 𑀅𑀲𑁆𑀲𑀸𑀤𑁂𑀦 𑀆𑀫𑀲𑀦𑁆𑀢𑀲𑁆𑀲 𑀫𑀼𑀢𑁆𑀢𑁂𑀧𑀺 𑀅𑀦𑀸𑀧𑀢𑁆𑀢𑀻𑀢𑀺. 𑀏𑀯𑀫𑁂𑀢𑁂𑀲𑀼 𑀫𑁄𑀘𑀦𑀲𑁆𑀲𑀸𑀤𑁂𑀦 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀫𑁄𑀘𑁂𑀢𑀼…𑀧𑁂… 𑀦𑀸’’𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀫𑁄𑀘𑁂𑀢𑀼𑀓𑀸𑀫𑀁 𑀘𑀺𑀢𑁆𑀢𑀁 𑀬𑀲𑁆𑀲 𑀲𑁄𑀬𑀁 𑀫𑁄𑀘𑁂𑀢𑀼𑀓𑀸𑀫𑀘𑀺𑀢𑁆𑀢𑁄, 𑀢𑁂𑀦, 𑀇𑀢𑁆𑀣𑀫𑁆𑀪𑀽𑀢𑁂 𑀓𑀭𑀡𑀯𑀘𑀦𑀁, 𑀫𑁄𑀘𑁂𑀢𑀼𑀓𑀸𑀫𑀘𑀺𑀢𑁆𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀉𑀧𑀓𑁆𑀓𑀫𑁆𑀫𑀸𑀢𑀺 𑀳𑀢𑁆𑀣𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀺𑀫𑁄𑀘𑀬𑀦𑁆𑀢𑀺 𑀬𑀁 𑀅𑀦𑁆𑀢𑀫𑀲𑁄 𑀏𑀓𑀸 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸 𑀧𑀺𑀯𑁂𑀬𑁆𑀬, 𑀢𑀢𑁆𑀢𑀓𑀫𑁆𑀧𑀺 𑀯𑀺𑀫𑁄𑀘𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀲𑀼𑀓𑁆𑀓𑀦𑁆𑀢𑀺 𑀦𑀻𑀮𑀧𑀻𑀢𑀮𑁄𑀳𑀺𑀢𑁄𑀤𑀸𑀢𑀢𑀓𑁆𑀓𑀢𑁂𑀮𑀤𑀓𑀔𑀻𑀭𑀤𑀥𑀺𑀲𑀧𑁆𑀧𑀺𑀯𑀡𑁆𑀡𑀲𑀗𑁆𑀔𑀸𑀢𑁂𑀲𑀼 𑀤𑀲𑀯𑀺𑀥𑁂𑀲𑀼 𑀲𑀼𑀓𑁆𑀓𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀲𑀼𑀓𑁆𑀓𑀁. 𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀸𑀢𑀺 𑀬𑀸 𑀲𑀼𑀧𑀺𑀦𑀦𑁆𑀢𑁂 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀳𑁄𑀢𑀺, 𑀢𑀁 𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀫𑀡𑁄𑀢𑀺 𑀬𑁄 𑀓𑁄𑀘𑀺 𑀉𑀧𑀲𑀫𑁆𑀧𑀦𑁆𑀦𑁄. 𑀕𑀭𑀼𑀓𑀦𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀁. 𑀨𑀼𑀲𑁂𑀢𑀺 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀘𑁂𑀢𑀦𑀸 𑀉𑀧𑀓𑁆𑀓𑀫𑁄 𑀫𑀼𑀘𑁆𑀘𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀻𑀢𑀺. 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀺𑀓𑁆𑀔𑀸𑀧𑀤𑀁.

𑁧𑁧. 𑀇𑀤𑀸𑀦𑀺 𑀓𑀸𑀬𑀲𑀁𑀲𑀕𑁆𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦𑀸’’𑀢𑀺𑀆𑀤𑀺𑀫𑀸𑀭𑀤𑁆𑀥𑀁. 𑀪𑀺𑀓𑁆𑀔𑀼 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀫𑀦𑀼𑀲𑁆𑀲𑀺𑀢𑁆𑀣𑀺𑀲𑀜𑁆𑀜𑀻 𑀳𑀼𑀢𑁆𑀯𑀸 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀉𑀧𑀓𑁆𑀓𑀫𑀺𑀢𑁆𑀯𑀸 𑀫𑀦𑀼𑀲𑁆𑀲𑀺𑀢𑁆𑀣𑀺𑀁 𑀧𑀭𑀸𑀫𑀲𑀦𑁆𑀢𑁄 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦𑀸𑀢𑀺 𑀳𑀢𑁆𑀣𑀕𑁆𑀕𑀳𑀡𑀸𑀤𑀺𑀓𑀸𑀬𑀲𑀫𑁆𑀨𑀲𑁆𑀲𑁂𑀦 𑀭𑀸𑀕𑁂𑀦 𑀓𑀸𑀬𑀫𑀺𑀲𑁆𑀲𑀭𑀸𑀕𑁂𑀦. 𑀫𑀦𑀼𑀲𑁆𑀲𑀺𑀢𑁆𑀣𑀺𑀦𑁆𑀢𑀺 𑀢𑀤𑀳𑀼𑀚𑀸𑀢𑀫𑁆𑀧𑀺 𑀚𑀻𑀯𑀫𑀸𑀦𑀓𑀫𑀦𑀼𑀲𑁆𑀲𑀺𑀢𑁆𑀣𑀺𑀁. 𑀧𑀭𑀸𑀫𑀲𑀦𑁆𑀢𑀺 𑀧𑀭𑀸𑀫𑀲𑀦𑁆𑀢𑁄, 𑀇𑀢𑁆𑀣𑀻𑀢𑀺 𑀲𑀜𑁆𑀜𑀸 𑀇𑀢𑁆𑀣𑀺𑀲𑀜𑁆𑀜𑀸, 𑀲𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀇𑀢𑁆𑀣𑀺𑀲𑀜𑁆𑀜𑀻, 𑀇𑀢𑁆𑀣𑀺𑀲𑀜𑁆𑀜𑀻 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀇𑀢𑁆𑀣𑀺𑀲𑀜𑁆𑀜𑀺𑀢𑀸, 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁄, 𑀢𑁂𑀦 𑀭𑀸𑀕𑁂𑀦 𑀯𑀸𑀬𑀸𑀫𑁄, 𑀳𑀢𑁆𑀣𑀕𑁆𑀕𑀸𑀳𑀸𑀤𑀺𑀲𑀫𑀸𑀧𑀚𑁆𑀚𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀓𑀸𑀬𑀲𑀁𑀲𑀕𑁆𑀕𑀲𑀺𑀓𑁆𑀔𑀸𑀧𑀤𑀁.

𑁧𑁨. 𑀇𑀤𑀸𑀦𑀺 𑀤𑀼𑀝𑁆𑀞𑀼𑀮𑁆𑀮𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀲𑁆𑀲𑀸𑀤𑁂𑀦𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀲𑁆𑀲𑀸𑀤𑁂𑀦𑀸𑀢𑀺 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀫𑁂𑀣𑀼𑀦𑀥𑀫𑁆𑀫𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀯𑀸𑀘𑀲𑁆𑀲𑀸𑀤𑀭𑀸𑀕𑁂𑀦. 𑀫𑀕𑁆𑀕𑀁 𑀯𑀸𑀭𑀩𑁆𑀪 𑀫𑁂𑀣𑀼𑀦𑀦𑁆𑀢𑀺 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀸𑀦𑀁 𑀅𑀜𑁆𑀜𑀢𑀭𑀁 𑀫𑀕𑁆𑀕𑀁 𑀯𑀸 𑀫𑁂𑀣𑀼𑀦𑀁 𑀯𑀸 𑀆𑀭𑀩𑁆𑀪𑀸𑀢𑀺 𑀅𑀢𑁆𑀣𑁄. 𑀑𑀪𑀸𑀲𑀦𑁆𑀢𑁄𑀢𑀺 𑀅𑀯𑀪𑀸𑀲𑀦𑁆𑀢𑁄. 𑀫𑀦𑀼𑀲𑁆𑀲𑀺𑀢𑁆𑀣𑀺𑀦𑁆𑀢𑀺 𑀯𑀺𑀜𑁆𑀜𑀼𑀁 𑀧𑀝𑀺𑀩𑀮𑀁 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀁 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀁 𑀲𑀮𑁆𑀮𑀓𑁆𑀔𑀡𑀲𑀫𑀢𑁆𑀣𑀁 𑀫𑀦𑀼𑀲𑁆𑀲𑀺𑀢𑁆𑀣𑀺𑀁. 𑀲𑀼𑀡𑀫𑀸𑀦𑀦𑁆𑀢𑀺 𑀲𑀼𑀡𑀦𑁆𑀢𑀺𑀁. 𑀇𑀫𑀺𑀦𑀸 𑀧𑀝𑀺𑀩𑀮𑀸𑀬𑀧𑀺 𑀇𑀢𑁆𑀣𑀺𑀬𑀸 𑀅𑀯𑀺𑀜𑁆𑀜𑀢𑁆𑀢𑀺𑀧𑀣𑁂 𑀞𑀺𑀢𑀸𑀬 𑀤𑀽𑀢𑁂𑀦 𑀯𑀸 𑀧𑀡𑁆𑀡𑁂𑀦 𑀯𑀸 𑀆𑀭𑁄𑀘𑁂𑀦𑁆𑀢𑀲𑁆𑀲 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀧𑀢𑁆𑀢𑀺 𑀦 𑀳𑁄𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀇𑀢𑁆𑀣𑀺𑀲𑀜𑁆𑀜𑀺𑀢𑀸, 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀲𑁆𑀲𑀸𑀤𑀭𑀸𑀕𑁄, 𑀢𑁂𑀦 𑀭𑀸𑀕𑁂𑀦 𑀑𑀪𑀸𑀲𑀦𑀁, 𑀢𑀗𑁆𑀔𑀡𑀯𑀺𑀚𑀸𑀦𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀲𑁆𑀲𑀸𑀤𑀲𑀺𑀓𑁆𑀔𑀸𑀧𑀤𑀁.

𑁧𑁩. 𑀇𑀤𑀸𑀦𑀺 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀡𑁆𑀡’’𑀦𑁆𑀢𑁆𑀬𑀸𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑁄 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀯𑀢𑁆𑀯𑀸 𑀫𑁂𑀣𑀼𑀦𑀭𑀸𑀕𑁂𑀦 𑀇𑀢𑁆𑀣𑀺𑀁 𑀫𑁂𑀣𑀼𑀦𑀁 𑀬𑀸𑀘𑀫𑀸𑀦𑁄 𑀕𑀭𑀼𑀁 𑀨𑀼𑀲𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀡𑁆𑀡𑀁 𑀯𑀢𑁆𑀯𑀸𑀢𑀺 𑀕𑀼𑀡𑀁 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀢𑁆𑀯𑀸. 𑀅𑀢𑁆𑀢𑀦𑁄𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬𑀸𑀢𑀺 𑀫𑁂𑀣𑀼𑀦𑀥𑀫𑁆𑀫𑀲𑀗𑁆𑀔𑀸𑀢𑁂𑀦 𑀓𑀸𑀫𑁂𑀦 𑀧𑀸𑀭𑀺𑀘𑀭𑀺𑀬𑀸 𑀓𑀸𑀫𑀧𑀸𑀭𑀺𑀘𑀭𑀺𑀬𑀸, 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀓𑀸𑀫𑀧𑀸𑀭𑀺𑀘𑀭𑀺𑀬𑀸 𑀅𑀢𑁆𑀢𑀦𑁄𑀓𑀸𑀫𑀧𑀸𑀭𑀺𑀘𑀭𑀺𑀬𑀸, 𑀅𑀮𑀼𑀢𑁆𑀢𑀲𑀫𑀸𑀲𑁄𑀬𑀁. 𑀅𑀣 𑀯𑀸 𑀅𑀢𑁆𑀢𑀦𑁄𑀢𑀺 𑀓𑀢𑁆𑀯𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀅𑀢𑁆𑀢𑀦𑁄 𑀓𑀸𑀫𑀺𑀢𑀸 𑀇𑀘𑁆𑀙𑀺𑀢𑀸𑀢𑀺 𑀅𑀢𑁆𑀢𑀦𑁄𑀓𑀸𑀫𑀸, 𑀲𑀬𑀁 𑀫𑁂𑀣𑀼𑀦𑀭𑀸𑀕𑀯𑀲𑁂𑀦 𑀧𑀢𑁆𑀣𑀺𑀢𑀸𑀢𑀺 𑀅𑀢𑁆𑀣𑁄, 𑀅𑀢𑁆𑀢𑀦𑁄𑀓𑀸𑀫𑀸 𑀘 𑀲𑀸 𑀧𑀸𑀭𑀺𑀘𑀭𑀺𑀬𑀸 𑀘𑀸𑀢𑀺 𑀅𑀢𑁆𑀢𑀦𑁄𑀓𑀸𑀫𑀧𑀸𑀭𑀺𑀘𑀭𑀺𑀬𑀸, 𑀢𑀸𑀬 𑀅𑀢𑁆𑀢𑀦𑁄𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬, ‘‘𑀏𑀢𑀤𑀕𑁆𑀕𑀁, 𑀪𑀕𑀺𑀦𑀺, 𑀧𑀸𑀭𑀺𑀘𑀭𑀺𑀬𑀸𑀦𑀁, 𑀬𑀸 𑀫𑀸𑀤𑀺𑀲𑀁 𑀲𑀻𑀮𑀯𑀦𑁆𑀢𑀁 𑀓𑀮𑁆𑀬𑀸𑀡𑀥𑀫𑁆𑀫𑀁 𑀩𑁆𑀭𑀳𑁆𑀫𑀘𑀸𑀭𑀺𑀁 𑀏𑀢𑁂𑀦 𑀥𑀫𑁆𑀫𑁂𑀦 𑀧𑀭𑀺𑀘𑀭𑁂𑀬𑁆𑀬𑀸’’𑀢𑀺 𑀏𑀯𑀁 𑀯𑀡𑁆𑀡𑀁 𑀯𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀸𑀘𑀥𑀸𑀢𑀼𑀦𑁄 𑀤𑁆𑀯𑀺𑀓𑀫𑁆𑀫𑀺𑀓𑀢𑁆𑀢𑀸 ‘‘𑀇𑀢𑁆𑀣𑀺𑀁 𑀫𑁂𑀣𑀼𑀦𑀁 𑀬𑀸𑀘𑀫𑀸𑀦𑁄’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀢𑁆𑀣𑀺𑀦𑁆𑀢𑀺 𑀤𑀼𑀝𑁆𑀞𑀼𑀮𑁆𑀮𑁄𑀪𑀸𑀲𑀦𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀇𑀢𑁆𑀣𑀺𑀁. 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀇𑀢𑁆𑀣𑀺𑀲𑀜𑁆𑀜𑀺𑀢𑀸, 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀭𑀸𑀕𑁄, 𑀢𑁂𑀦 𑀭𑀸𑀕𑁂𑀦 𑀯𑀡𑁆𑀡𑀪𑀡𑀦𑀁, 𑀢𑀗𑁆𑀔𑀡𑀯𑀺𑀚𑀸𑀦𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀲𑀺𑀓𑁆𑀔𑀸𑀧𑀤𑀁.

𑁧𑁪. 𑀇𑀤𑀸𑀦𑀺 𑀲𑀜𑁆𑀘𑀭𑀺𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀦𑁆𑀤𑁂𑀲’’𑀦𑁆𑀢𑁆𑀬𑀸𑀤𑀺𑀫𑀸𑀭𑀤𑁆𑀥𑀁. 𑀢𑀢𑁆𑀣 𑀪𑀺𑀓𑁆𑀔𑀼 𑀧𑀼𑀭𑀺𑀲𑀲𑁆𑀲 𑀯𑀸 𑀲𑀦𑁆𑀤𑁂𑀲𑀁, 𑀇𑀢𑁆𑀣𑀺𑀬𑀸 𑀯𑀸 𑀲𑀦𑁆𑀤𑁂𑀲𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀯𑀻𑀫𑀁𑀲𑀺𑀢𑁆𑀯𑀸 𑀧𑀘𑁆𑀘𑀸𑀳𑀭𑀦𑁆𑀢𑁄 𑀕𑀭𑀼𑀓𑀁 𑀨𑀼𑀲𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀲𑀦𑁆𑀤𑁂𑀲𑀦𑁆𑀢𑀺 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀫𑀸𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺 ‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸’’𑀢𑀺 (𑀧𑀸𑀭𑀸. 𑁩𑁦𑁫) 𑀏𑀯𑀁 𑀯𑀼𑀢𑁆𑀢𑀁 𑀧𑀼𑀭𑀺𑀲𑀲𑁆𑀲 𑀲𑀸𑀲𑀦𑀁, ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀧𑀼𑀭𑀺𑀲𑀁 𑀩𑁆𑀭𑀽𑀳𑀺 ‘𑀅𑀳𑀁 𑀢𑀲𑁆𑀲 𑀪𑀭𑀺𑀬𑀸 𑀪𑀯𑀺𑀲𑁆𑀲𑀸𑀫𑀻’’𑀢𑀺 (𑀧𑀸𑀭𑀸. 𑁩𑁨𑁬-𑁩𑁨𑁭 𑀣𑁄𑀓𑀁 𑀯𑀺𑀲𑀤𑀺𑀲𑀁) 𑀏𑀯𑀁 𑀯𑀼𑀢𑁆𑀢𑀁 𑀇𑀢𑁆𑀣𑀺𑀬𑀸 𑀲𑀸𑀲𑀦𑀁. 𑀧𑀝𑀺𑀕𑁆𑀕𑀡𑁆𑀳𑀺𑀢𑁆𑀯𑀸𑀢𑀺 ‘‘𑀲𑀸𑀥𑀼 𑀉𑀧𑀸𑀲𑀓𑀸’’𑀢𑀺 𑀯𑀸 ‘‘𑀳𑁄𑀢𑀽’’𑀢𑀺 𑀯𑀸 ‘‘𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀯𑀸 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀯𑀸 𑀲𑀻𑀲𑀓𑀫𑁆𑀧𑀦𑀸𑀤𑀻𑀳𑀺 𑀯𑀸 𑀧𑀝𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀻𑀫𑀁𑀲𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀧𑀼𑀭𑀺𑀲𑀲𑁆𑀲 𑀯𑀸 𑀇𑀢𑁆𑀣𑀺𑀬𑀸 𑀯𑀸 𑀢𑁂𑀲𑀁 𑀅𑀯𑀲𑁆𑀲𑀸𑀭𑁄𑀘𑀦𑀓𑀸𑀦𑀁 𑀫𑀸𑀢𑀸𑀧𑀺𑀢𑀸𑀪𑀸𑀢𑀸𑀪𑀕𑀺𑀦𑀺𑀆𑀤𑀻𑀦𑀁 𑀯𑀸 𑀆𑀭𑁄𑀘𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀳𑀭𑀁𑀧𑀘𑁆𑀘𑀸𑀢𑀺 𑀏𑀢𑁆𑀣 ‘‘𑀧𑀘𑁆𑀘𑀸𑀳𑀭’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀙𑀦𑁆𑀤𑀳𑀸𑀦𑀺𑀪𑀬𑀸 𑀳𑀭-𑀲𑀤𑁆𑀤𑀁 𑀧𑀼𑀩𑁆𑀩𑀦𑀺𑀧𑀸𑀢𑀁 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀢𑁆𑀣 𑀧𑀳𑀺𑀢𑁂𑀦 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑁂𑀦 𑀆𑀭𑁄𑀘𑀺𑀢𑀸 𑀲𑀸 𑀇𑀢𑁆𑀣𑀻 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀢𑀼 𑀯𑀸 𑀧𑀝𑀺𑀓𑁆𑀔𑀺𑀧𑀢𑀼 𑀯𑀸 𑀮𑀚𑁆𑀚𑀸𑀬 𑀯𑀸 𑀢𑀼𑀡𑁆𑀳𑀻 𑀳𑁄𑀢𑀼, 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀳𑀭𑀦𑁆𑀢𑁄 𑀏𑀢𑁆𑀢𑀸𑀯𑀢𑀸 𑀇𑀫𑀸𑀬 𑀧𑀝𑀺𑀕𑁆𑀕𑀳𑀡𑀸𑀭𑁄𑀘𑀦𑀧𑁆𑀧𑀘𑁆𑀘𑀸𑀳𑀭𑀡𑀲𑀗𑁆𑀔𑀸𑀢𑀸𑀬 𑀢𑀺𑀯𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑁄 𑀪𑀺𑀓𑁆𑀔𑀼 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀢𑁂𑀲𑀁 𑀫𑀦𑀼𑀲𑁆𑀲𑀚𑀸𑀢𑀺𑀓𑀢𑀸, 𑀅𑀮𑀁𑀯𑀘𑀦𑀻𑀬𑀢𑀸, 𑀧𑀝𑀺𑀕𑁆𑀕𑀡𑁆𑀳𑀦𑀯𑀻𑀫𑀁𑀲𑀦𑀧𑁆𑀧𑀘𑁆𑀘𑀸𑀳𑀭𑀡𑀸𑀦𑀻𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀲𑀜𑁆𑀘𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀁.

𑁧𑁫. 𑀇𑀤𑀸𑀦𑀺 𑀅𑀫𑀽𑀮𑀓𑀁 𑀧𑀓𑀸𑀲𑁂𑀢𑀼𑀁 ‘‘𑀘𑀸𑀯𑁂𑀢𑀼𑀓𑀸𑀫𑁄’’𑀢𑀺𑀆𑀤𑀺𑀫𑀸𑀭𑀤𑁆𑀥𑀁. 𑀘𑀸𑀯𑁂𑀢𑀼𑀓𑀸𑀫𑁄 𑀪𑀺𑀓𑁆𑀔𑀼 𑀅𑀫𑀽𑀮𑀦𑁆𑀢𑀺𑀫𑀯𑀢𑁆𑀣𑀼𑀦𑀸 𑀅𑀜𑁆𑀜𑀁 𑀲𑀼𑀡𑀫𑀸𑀦𑀁 𑀪𑀺𑀓𑁆𑀔𑀼𑀁 𑀘𑁄𑀤𑁂𑀦𑁆𑀢𑁄 𑀯𑀸 𑀘𑁄𑀤𑀸𑀧𑁂𑀦𑁆𑀢𑁄 𑀯𑀸 𑀕𑀭𑀼𑀁 𑀨𑀼𑀲𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀘𑀸𑀯𑁂𑀢𑀼𑀓𑀸𑀫𑁄𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀸 𑀘𑀸𑀯𑁂𑀢𑀼𑀓𑀸𑀫𑁄. 𑀘𑁄𑀤𑁂𑀦𑁆𑀢𑁄𑀢𑀺 ‘‘𑀢𑁆𑀯𑀁 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀆𑀧𑀦𑁆𑀦𑁄𑀲𑀺, 𑀅𑀲𑁆𑀲𑀫𑀡𑁄𑀲𑀺, 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀲𑀻’’𑀢𑀺𑀆𑀤𑀻𑀳𑀺 𑀯𑀘𑀦𑁂𑀳𑀺 𑀲𑀬𑀁 𑀘𑁄𑀤𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀏𑀯𑀁 𑀘𑁄𑀤𑁂𑀦𑁆𑀢𑀲𑁆𑀲 𑀯𑀸𑀘𑀸𑀬 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀅𑀫𑀽𑀮𑀦𑁆𑀢𑀺𑀫𑀯𑀢𑁆𑀣𑀼𑀦𑀸𑀢𑀺 𑀬𑀁 𑀘𑁄𑀤𑀓𑁂𑀦 𑀘𑀼𑀤𑀺𑀢𑀓𑀫𑁆𑀳𑀺 𑀧𑀼𑀕𑁆𑀕𑀮𑁂 𑀅𑀤𑀺𑀝𑁆𑀞𑀁 𑀅𑀲𑀼𑀢𑀁 𑀅𑀧𑀭𑀺𑀲𑀗𑁆𑀓𑀺𑀢𑀁, 𑀇𑀤𑀁 𑀏𑀢𑁂𑀲𑀁 𑀤𑀲𑁆𑀲𑀦𑀲𑀯𑀦𑀧𑀭𑀺𑀲𑀗𑁆𑀓𑀺𑀢𑀲𑀗𑁆𑀔𑀸𑀢𑀸𑀦𑀁 𑀫𑀽𑀮𑀸𑀦𑀁 𑀅𑀪𑀸𑀯𑀢𑁄 𑀦𑀸𑀲𑁆𑀲 𑀫𑀽𑀮𑀦𑁆𑀢𑀺 𑀅𑀫𑀽𑀮𑀁, 𑀅𑀦𑁆𑀢𑀺𑀫𑀁 𑀯𑀢𑁆𑀣𑀼 𑀬𑀲𑁆𑀲 𑀧𑀸𑀭𑀸𑀚𑀺𑀓𑀲𑁆𑀲 𑀢𑀤𑀺𑀤𑀁 𑀅𑀦𑁆𑀢𑀺𑀫𑀯𑀢𑁆𑀣𑀼, 𑀅𑀫𑀽𑀮𑀜𑁆𑀘 𑀢𑀁 𑀅𑀦𑁆𑀢𑀺𑀫𑀯𑀢𑁆𑀣𑀼 𑀘𑁂𑀢𑀺 𑀅𑀫𑀽𑀮𑀦𑁆𑀢𑀺𑀫𑀯𑀢𑁆𑀣𑀼, 𑀢𑁂𑀦 𑀅𑀫𑀽𑀮𑀦𑁆𑀢𑀺𑀫𑀯𑀢𑁆𑀣𑀼𑀦𑀸, 𑀪𑀺𑀓𑁆𑀔𑀼𑀦𑁄 𑀅𑀦𑀼𑀭𑀽𑀧𑁂𑀲𑀼 𑀏𑀓𑀽𑀦𑀯𑀻𑀲𑀢𑀺𑀬𑀸 𑀧𑀸𑀭𑀸𑀚𑀺𑀓𑁂𑀲𑀼 𑀅𑀜𑁆𑀜𑀢𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀘𑁄𑀤𑀸𑀧𑀬𑀦𑁆𑀢𑀺 𑀘𑁄𑀤𑀸𑀧𑀬𑀦𑁆𑀢𑁄, 𑀢𑀲𑁆𑀲 𑀲𑀫𑀻𑀧𑁂 𑀞𑀢𑁆𑀯𑀸 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀢𑁆𑀯𑀸 𑀘𑁄𑀤𑀸𑀧𑁂𑀦𑁆𑀢𑁄 𑀢𑀲𑁆𑀲 𑀆𑀡𑀢𑁆𑀢𑀲𑁆𑀲 𑀯𑀸𑀘𑀸𑀬 𑀯𑀸𑀘𑀸𑀬 𑀕𑀭𑀼𑀁 𑀨𑀼𑀲𑁂𑀢𑀺 𑀅𑀢𑁆𑀣𑁄. 𑀲𑀼𑀡𑀫𑀸𑀦𑀦𑁆𑀢𑀺 𑀇𑀫𑀺𑀦𑀸 𑀧𑀭𑀫𑁆𑀫𑀼𑀔𑀸 𑀤𑀽𑀢𑁂𑀦 𑀯𑀸 𑀧𑀡𑁆𑀡𑁂𑀦 𑀯𑀸 𑀘𑁄𑀤𑁂𑀦𑁆𑀢𑀲𑁆𑀲 𑀦 𑀭𑀼𑀳𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀧𑀭𑀫𑁆𑀫𑀼𑀔𑀸 𑀧𑀦 𑀲𑀢𑁆𑀢𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀯𑀤𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀬𑀁 𑀘𑁄𑀤𑁂𑀢𑀺, 𑀢𑀲𑁆𑀲 𑀉𑀧𑀲𑀫𑁆𑀧𑀦𑁆𑀦𑁄𑀢𑀺 𑀲𑀗𑁆𑀔𑁆𑀬𑀽𑀧𑀕𑀫𑀦𑀁, 𑀢𑀲𑁆𑀫𑀺𑀁 𑀲𑀼𑀤𑁆𑀥𑀲𑀜𑁆𑀜𑀺𑀢𑀸, 𑀬𑁂𑀦 𑀧𑀸𑀭𑀸𑀚𑀺𑀓𑁂𑀦 𑀘𑁄𑀤𑁂𑀢𑀺, 𑀢𑀲𑁆𑀲 𑀤𑀺𑀝𑁆𑀞𑀸𑀤𑀺𑀯𑀲𑁂𑀦 𑀅𑀫𑀽𑀮𑀓𑀢𑀸, 𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑁂𑀦 𑀲𑀫𑁆𑀫𑀼𑀔𑀸 𑀘𑁄𑀤𑀦𑀸, 𑀢𑀲𑁆𑀲 𑀢𑀗𑁆𑀔𑀡𑀯𑀺𑀚𑀸𑀦𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀅𑀫𑀽𑀮𑀓𑀲𑀺𑀓𑁆𑀔𑀸𑀧𑀤𑀁.

𑁧𑁬. 𑀇𑀤𑀸𑀦𑀺 𑀅𑀜𑁆𑀜𑀪𑀸𑀕𑀺𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀮𑁂𑀲𑀫𑀢𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀮𑁂𑀲𑀫𑀢𑁆𑀢𑀫𑀼𑀧𑀸𑀤𑀸𑀬𑀸𑀢𑀺 𑀚𑀸𑀢𑀺𑀦𑀸𑀫𑀕𑁄𑀢𑁆𑀢𑀮𑀺𑀗𑁆𑀕𑀸𑀧𑀢𑁆𑀢𑀺𑀧𑀢𑁆𑀢𑀘𑀻𑀯𑀭𑀽𑀧𑀚𑁆𑀛𑀸𑀬𑀸𑀘𑀭𑀺𑀬𑀲𑁂𑀦𑀸𑀲𑀦𑀮𑁂𑀲𑀲𑀗𑁆𑀔𑀸𑀢𑁂𑀲𑀼 𑀤𑀲𑀲𑀼 𑀮𑁂𑀲𑁂𑀲𑀼 𑀬𑁄 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀤𑀺𑀲𑁆𑀲𑀢𑀺, 𑀢𑀁 𑀮𑁂𑀲𑀫𑀢𑁆𑀢𑀁 𑀉𑀧𑀸𑀤𑀸𑀬 𑀦𑀺𑀲𑁆𑀲𑀸𑀬 𑀪𑀺𑀓𑁆𑀔𑀼𑀁 𑀩𑁆𑀭𑀳𑁆𑀫𑀘𑀭𑀺𑀬𑀸 𑀘𑀸𑀯𑁂𑀢𑀼𑀓𑀸𑀫𑁄 𑀅𑀫𑀽𑀮𑀦𑁆𑀢𑀺𑀫𑀯𑀢𑁆𑀣𑀼𑀦𑀸 𑀲𑀼𑀡𑀫𑀸𑀦𑀁 𑀪𑀺𑀓𑁆𑀔𑀼𑀁 𑀘𑁄𑀤𑁂𑀦𑁆𑀢𑁄 𑀕𑀭𑀼𑀁 𑀨𑀼𑀲𑁂𑀢𑀺 𑀅𑀢𑁆𑀣𑁄. 𑀓𑀣𑀁? 𑀅𑀜𑁆𑀜𑁄 𑀔𑀢𑁆𑀢𑀺𑀬𑀚𑀸𑀢𑀺𑀓𑁄 𑀇𑀫𑀺𑀦𑀸 𑀘𑁄𑀤𑀓𑁂𑀦 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄 𑀳𑁄𑀢𑀺, 𑀲𑁄 𑀅𑀜𑁆𑀜𑀁 𑀅𑀢𑁆𑀢𑀦𑁄 𑀯𑁂𑀭𑀺𑀁 𑀔𑀢𑁆𑀢𑀺𑀬𑀚𑀸𑀢𑀺𑀓𑀁 𑀪𑀺𑀓𑁆𑀔𑀼𑀁 𑀧𑀲𑁆𑀲𑀺𑀢𑁆𑀯𑀸 𑀢𑀁 𑀔𑀢𑁆𑀢𑀺𑀬𑀚𑀸𑀢𑀺𑀮𑁂𑀲𑀁 𑀕𑀳𑁂𑀢𑁆𑀯𑀸 𑀏𑀯𑀁 ‘‘𑀔𑀢𑁆𑀢𑀺𑀬𑁄 𑀫𑀬𑀸 𑀤𑀺𑀝𑁆𑀞𑁄 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄, 𑀢𑁆𑀯𑀁 𑀔𑀢𑁆𑀢𑀺𑀬𑁄 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀆𑀧𑀦𑁆𑀦𑁄𑀲𑀻’’𑀢𑀺 𑀯𑀸 ‘‘𑀢𑁆𑀯𑀁 𑀲𑁄 𑀔𑀢𑁆𑀢𑀺𑀬𑁄, 𑀦𑀸𑀜𑁆𑀜𑁄, 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄𑀲𑀻’’𑀢𑀺 𑀯𑀸 𑀘𑁄𑀤𑁂𑀢𑀺, 𑀏𑀯𑀁 𑀦𑀸𑀫𑀮𑁂𑀲𑀸𑀤𑀬𑁄𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀗𑁆𑀕𑀸𑀦𑀺 𑀧𑀦𑁂𑀢𑁆𑀣 𑀅𑀦𑀦𑁆𑀢𑀭𑀲𑀤𑀺𑀲𑀸𑀦𑀺. 𑀅𑀜𑁆𑀜𑀪𑀸𑀕𑀺𑀬𑀲𑀺𑀓𑁆𑀔𑀸𑀧𑀤𑀁.

𑀕𑀭𑀼𑀓𑀸𑀧𑀢𑁆𑀢𑀺𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀦𑀺𑀲𑁆𑀲𑀕𑁆𑀕𑀺𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁭. 𑀇𑀤𑀸𑀦𑀺 𑀘𑀻𑀯𑀭𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀓𑀧𑁆𑀧𑀦’’𑀦𑁆𑀢𑁆𑀬𑀸𑀤𑀺𑀫𑀼𑀤𑁆𑀥𑀝𑀁. 𑀬𑁄 𑀪𑀺𑀓𑁆𑀔𑀼 𑀅𑀓𑀸𑀮𑀘𑀻𑀯𑀭𑀁 𑀯𑀺𑀓𑀧𑁆𑀧𑀦𑀜𑁆𑀘 𑀅𑀥𑀺𑀝𑁆𑀞𑀸𑀦𑀜𑁆𑀘 𑀅𑀓𑀢𑁆𑀯𑀸 𑀤𑀲𑀸𑀳𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸𑀢𑀺 𑀧𑀺𑀡𑁆𑀟𑀢𑁆𑀣𑁄. 𑀢𑀢𑁆𑀣 𑀅𑀓𑀸𑀮𑀘𑀻𑀯𑀭𑀦𑁆𑀢𑀺 𑀅𑀓𑀸𑀮𑁂 𑀘𑀻𑀯𑀭𑀁, 𑀔𑁄𑀫𑀁 𑀓𑀧𑁆𑀧𑀸𑀲𑀺𑀓𑀁 𑀓𑁄𑀲𑁂𑀬𑁆𑀬𑀁 𑀓𑀫𑁆𑀩𑀮𑀁 𑀲𑀸𑀡𑀁 𑀪𑀗𑁆𑀕𑀦𑁆𑀢𑀺 𑀚𑀸𑀢𑀺𑀢𑁄 𑀙 𑀘𑀻𑀯𑀭𑀸𑀦𑀺, 𑀤𑀼𑀓𑀽𑀮𑀁 𑀧𑀝𑁆𑀝𑀼𑀡𑁆𑀡𑀁 𑀲𑁄𑀫𑀸𑀭𑀧𑀝𑁆𑀝𑀁 𑀘𑀻𑀦𑀧𑀝𑁆𑀝𑀁 𑀇𑀤𑁆𑀥𑀺𑀚𑀁 𑀤𑁂𑀯𑀤𑀺𑀦𑁆𑀦𑀦𑁆𑀢𑀺 𑀇𑀫𑀸𑀦𑀺 𑀧𑀦 𑀙 𑀅𑀦𑀼𑀮𑁄𑀫𑀘𑀻𑀯𑀭𑀸𑀦𑀺. 𑀢𑁂𑀲𑀼 𑀤𑀼𑀓𑀽𑀮𑀁 𑀲𑀸𑀡𑀲𑁆𑀲 𑀅𑀦𑀼𑀮𑁄𑀫𑀁 𑀯𑀸𑀓𑀫𑀬𑀢𑁆𑀢𑀸. 𑀧𑀝𑁆𑀝𑀼𑀡𑁆𑀡𑀸𑀤𑀻𑀦𑀺 𑀢𑀻𑀡𑀺 𑀓𑁄𑀲𑁂𑀬𑁆𑀬𑀲𑁆𑀲 𑀅𑀦𑀼𑀮𑁄𑀫𑀸𑀦𑀺 𑀧𑀸𑀡𑀓𑁂𑀳𑀺 𑀓𑀢𑀲𑀼𑀢𑁆𑀢𑀫𑀬𑀢𑁆𑀢𑀸. 𑀇𑀤𑁆𑀥𑀺𑀚𑀸𑀤𑀻𑀦𑀺 𑀤𑁆𑀯𑀬𑀸𑀦𑀺 𑀔𑁄𑀫𑀸𑀤𑀻𑀦𑀁 𑀅𑀦𑀼𑀮𑁄𑀫𑀸𑀦𑀺 𑀢𑁂𑀲𑀫𑀜𑁆𑀜𑀢𑀭𑀪𑀸𑀯𑀢𑁄. 𑀇𑀫𑁂𑀲𑀁 𑀙𑀦𑁆𑀦𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑀁 𑀅𑀓𑀸𑀮𑀘𑀻𑀯𑀭𑀁.

𑀯𑀺𑀓𑀧𑁆𑀧𑀦𑀫𑀥𑀺𑀝𑁆𑀞𑀸𑀦𑀦𑁆𑀢𑀺 𑀏𑀢𑁆𑀣 𑀧𑀦 𑀯𑀺𑀓𑀧𑁆𑀧𑀦𑀽𑀧𑀕𑀁 𑀅𑀥𑀺𑀝𑁆𑀞𑀸𑀦𑀽𑀧𑀕𑀜𑁆𑀘 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀧𑀸𑀴𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀬𑀸𑀫𑁂𑀦 𑀅𑀝𑁆𑀞𑀗𑁆𑀕𑀼𑀮𑀁 𑀲𑀼𑀕𑀢𑀗𑁆𑀕𑀼𑀮𑁂𑀦 𑀘𑀢𑀼𑀭𑀗𑁆𑀕𑀼𑀮𑀯𑀺𑀢𑁆𑀣𑀢𑀁 𑀧𑀘𑁆𑀙𑀺𑀫𑀘𑀻𑀯𑀭𑀁 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁫𑁮). 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀤𑀻𑀖𑀲𑁄 𑀤𑁆𑀯𑁂 𑀯𑀺𑀤𑀢𑁆𑀣𑀺𑀬𑁄, 𑀢𑀺𑀭𑀺𑀬𑀁 𑀯𑀺𑀤𑀢𑁆𑀣𑀺. 𑀤𑁆𑀯𑁂 𑀯𑀺𑀓𑀧𑁆𑀧𑀦𑀸 𑀲𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸 𑀘 𑀧𑀭𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸 𑀘. 𑀓𑀣𑀁? ‘‘𑀇𑀫𑀁 𑀘𑀻𑀯𑀭𑀁 𑀢𑀼𑀬𑁆𑀳𑀁 𑀯𑀺𑀓𑀧𑁆𑀧𑁂𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁, 𑀅𑀬𑀁 𑀲𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸. ‘‘𑀫𑀬𑁆𑀳𑀁 𑀲𑀦𑁆𑀢𑀓𑀁 𑀧𑀭𑀺𑀪𑀼𑀜𑁆𑀚 𑀯𑀸 𑀯𑀺𑀲𑁆𑀲𑀚𑁆𑀚𑁂𑀳𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀳𑀻’’𑀢𑀺, 𑀏𑀓𑀲𑁆𑀲 𑀲𑀦𑁆𑀢𑀺𑀓𑁂 ‘‘𑀇𑀫𑀁 𑀘𑀻𑀯𑀭𑀁 𑀢𑀺𑀲𑁆𑀲𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀓𑀧𑁆𑀧𑁂𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁, 𑀅𑀬𑀁 𑀅𑀧𑀭𑀸𑀧𑀺 𑀲𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸. 𑀢𑁂𑀦 𑀪𑀺𑀓𑁆𑀔𑀼𑀦𑀸 ‘‘𑀢𑀺𑀲𑁆𑀲𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀓𑀁 𑀧𑀭𑀺𑀪𑀼𑀜𑁆𑀚 𑀯𑀸 𑀯𑀺𑀲𑁆𑀲𑀚𑁆𑀚𑁂𑀳𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀳𑀻’’𑀢𑀺, ‘‘𑀇𑀫𑀁 𑀘𑀻𑀯𑀭𑀁 𑀢𑀼𑀬𑁆𑀳𑀁 𑀯𑀺𑀓𑀧𑁆𑀧𑀦𑀢𑁆𑀣𑀸𑀬 𑀤𑀫𑁆𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁, 𑀢𑁂𑀦 𑀯𑀢𑁆𑀢𑀩𑁆𑀩𑁄 ‘‘𑀓𑁄 𑀢𑁂 𑀫𑀺𑀢𑁆𑀢𑁄 𑀯𑀸 𑀲𑀦𑁆𑀤𑀺𑀝𑁆𑀞𑁄 𑀯𑀸 𑀲𑀫𑁆𑀪𑀢𑁆𑀢𑁄 𑀯𑀸’’𑀢𑀺, 𑀢𑀢𑁄 𑀇𑀢𑀭𑁂𑀦 ‘‘𑀢𑀺𑀲𑁆𑀲𑁄 𑀪𑀺𑀓𑁆𑀔𑀽’’𑀢𑀺 𑀯𑀢𑁆𑀢𑀩𑁆𑀩𑀁, 𑀧𑀼𑀦 𑀢𑁂𑀦 ‘‘𑀅𑀳𑀁 𑀢𑀺𑀲𑁆𑀲𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀫𑁆𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁, 𑀅𑀬𑀁 𑀧𑀭𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸. ‘‘𑀢𑀺𑀲𑁆𑀲𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀓𑀁 𑀧𑀭𑀺𑀪𑀼𑀜𑁆𑀚 𑀯𑀸 𑀯𑀺𑀲𑁆𑀲𑀚𑁆𑀚𑁂𑀳𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀳𑀻’’𑀢𑀺 𑀯𑀼𑀢𑁆𑀢𑁂 𑀧𑀘𑁆𑀘𑀼𑀤𑁆𑀥𑀸𑀭𑁄 𑀦𑀸𑀫 𑀳𑁄𑀢𑀺. 𑀩𑀳𑀼𑀓𑁂 ‘‘𑀇𑀫𑀸𑀦𑀻’’𑀢𑀺, 𑀅𑀳𑀢𑁆𑀣𑀧𑀸𑀲𑁂 ‘‘𑀏𑀢𑀁, 𑀏𑀢𑀸𑀦𑀻’’𑀢𑀺 𑀯𑀸. 𑀏𑀯𑀁 𑀯𑀺𑀓𑀧𑁆𑀧𑀦𑀜𑁆𑀘 𑀅𑀓𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀢𑀺𑀘𑀻𑀯𑀭𑀲𑁆𑀲 𑀧𑀦 𑀧𑀫𑀸𑀡𑀁 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀲𑀼𑀕𑀢𑀘𑀻𑀯𑀭𑀢𑁄 𑀊𑀦𑀓𑀁 𑀯𑀝𑁆𑀝𑀢𑀺, 𑀮𑀸𑀫𑀓𑀧𑀭𑀺𑀘𑁆𑀙𑁂𑀤𑁂𑀦 𑀲𑀗𑁆𑀖𑀸𑀝𑀺𑀬𑀸, 𑀉𑀢𑁆𑀢𑀭𑀸𑀲𑀗𑁆𑀕𑀲𑁆𑀲 𑀘 𑀤𑀻𑀖𑀢𑁄 𑀫𑀼𑀝𑁆𑀞𑀺𑀧𑀜𑁆𑀘𑀓𑀁, 𑀢𑀺𑀭𑀺𑀬𑀁 𑀫𑀼𑀝𑁆𑀞𑀺𑀢𑁆𑀢𑀺𑀓𑀁, 𑀅𑀦𑁆𑀢𑀭𑀯𑀸𑀲𑀓𑁄 𑀤𑀻𑀖𑀢𑁄 𑀫𑀼𑀝𑁆𑀞𑀺𑀧𑀜𑁆𑀘𑀓𑁄, 𑀢𑀺𑀭𑀺𑀬𑀁 𑀤𑁆𑀯𑀺𑀳𑀢𑁆𑀣𑁄𑀧𑀺 𑀅𑀟𑁆𑀠𑀢𑁂𑀬𑁆𑀬𑁄 𑀯𑀸 𑀯𑀝𑁆𑀝𑀢𑀺. 𑀯𑀼𑀢𑁆𑀢𑀧𑁆𑀧𑀫𑀸𑀡𑀢𑁄 𑀅𑀥𑀺𑀓𑀜𑁆𑀘 𑀊𑀦𑀓𑀜𑁆𑀘 ‘‘𑀧𑀭𑀺𑀓𑁆𑀔𑀸𑀭𑀘𑁄𑀴’’𑀦𑁆𑀢𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀤𑁆𑀯𑁂 𑀘𑀻𑀯𑀭𑀲𑁆𑀲 𑀅𑀥𑀺𑀝𑁆𑀞𑀸𑀦𑀸 𑀓𑀸𑀬𑁂𑀦 𑀯𑀸 𑀅𑀥𑀺𑀝𑁆𑀞𑁂𑀢𑀺, 𑀯𑀸𑀘𑀸𑀬 𑀯𑀸 𑀅𑀥𑀺𑀝𑁆𑀞𑁂𑀢𑀺. 𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀳𑀦𑁆𑀢𑁂𑀦 𑀭𑀚𑀺𑀢𑁆𑀯𑀸 𑀓𑀧𑁆𑀧𑀩𑀺𑀦𑁆𑀤𑀼𑀁 𑀤𑀢𑁆𑀯𑀸 𑀧𑀼𑀭𑀸𑀡𑀲𑀗𑁆𑀖𑀸𑀝𑀺𑀁 ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀧𑀘𑁆𑀘𑀼𑀤𑁆𑀥𑀭𑀸𑀫𑀻’’𑀢𑀺 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀦𑀯𑀁 𑀲𑀗𑁆𑀖𑀸𑀝𑀺𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀘𑀺𑀢𑁆𑀢𑁂𑀦 𑀆𑀪𑁄𑀕𑀁 𑀓𑀢𑁆𑀯𑀸 𑀓𑀸𑀬𑀯𑀺𑀓𑀸𑀭𑀁 𑀓𑀭𑁄𑀦𑁆𑀢𑁂𑀦 𑀓𑀸𑀬𑁂𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀸, 𑀇𑀤𑀁 𑀓𑀸𑀬𑁂𑀦 𑀅𑀥𑀺𑀝𑁆𑀞𑀸𑀦𑀁. 𑀢𑀁 𑀬𑁂𑀦 𑀓𑁂𑀦𑀘𑀺 𑀲𑀭𑀻𑀭𑀸𑀯𑀬𑀯𑁂𑀦 𑀅𑀨𑀼𑀲𑀦𑁆𑀢𑀲𑁆𑀲 𑀦 𑀯𑀝𑁆𑀝𑀢𑀺. 𑀯𑀸𑀘𑀸𑀬 𑀅𑀥𑀺𑀝𑁆𑀞𑀸𑀦𑀁 𑀧𑀦 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀯𑀸𑀘𑀸𑀬 𑀅𑀥𑀺𑀝𑁆𑀞𑀸𑀢𑀩𑁆𑀩𑀁, 𑀲𑀘𑁂 𑀳𑀢𑁆𑀣𑀧𑀸𑀲𑁂 ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺, 𑀲𑀘𑁂 𑀅𑀳𑀢𑁆𑀣𑀧𑀸𑀲𑁂 𑀞𑀧𑀺𑀢𑀝𑁆𑀞𑀸𑀦𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀏𑀢𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀯𑀸𑀘𑀸 𑀪𑀺𑀦𑁆𑀤𑀺𑀢𑀩𑁆𑀩𑀸. 𑀏𑀲 𑀦𑀬𑁄 𑀉𑀢𑁆𑀢𑀭𑀸𑀲𑀗𑁆𑀕𑁂, 𑀅𑀦𑁆𑀢𑀭𑀯𑀸𑀲𑀓𑁂 𑀘. 𑀢𑀺𑀘𑀻𑀯𑀭𑀸𑀤𑀻𑀦𑀺 𑀲𑀩𑁆𑀩𑀸𑀦𑀺 𑀏𑀓𑀢𑁄 𑀓𑀢𑁆𑀯𑀸 ‘‘𑀇𑀫𑀸𑀦𑀺 𑀘𑀻𑀯𑀭𑀸𑀦𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀸𑀦𑀺 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀅𑀥𑀺𑀝𑁆𑀞𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺. 𑀏𑀯𑀁 𑀅𑀥𑀺𑀝𑁆𑀞𑀸𑀦𑀜𑁆𑀘 𑀅𑀓𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀤𑀲 𑀅𑀳𑀸𑀦𑀺 𑀤𑀲𑀸𑀳𑀁. 𑀅𑀢𑀺𑀫𑀸𑀧𑁂𑀢𑀻𑀢𑀺 𑀅𑀢𑀺𑀓𑁆𑀓𑀸𑀫𑁂𑀢𑀺. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀦𑀺𑀲𑁆𑀲𑀚𑁆𑀚𑀦𑀁 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀧𑀼𑀩𑁆𑀩𑀪𑀸𑀕𑁂 𑀓𑀢𑁆𑀢𑀩𑁆𑀩𑀲𑁆𑀲 𑀯𑀺𑀦𑀬𑀓𑀫𑁆𑀫𑀲𑁆𑀲𑁂𑀢𑀁 𑀦𑀸𑀫𑀁, 𑀦𑀺𑀲𑁆𑀲𑀕𑁆𑀕𑀺𑀬𑀫𑀲𑁆𑀲 𑀅𑀢𑁆𑀣𑀻𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀓𑀺𑀁 𑀢𑀁? 𑀧𑀸𑀘𑀺𑀢𑁆𑀢𑀺𑀬𑀁, 𑀢𑀁 𑀅𑀢𑀺𑀓𑁆𑀓𑀸𑀫𑀬𑀢𑁄 𑀲𑀳𑀦𑀺𑀲𑁆𑀲𑀕𑁆𑀕𑀺𑀬𑀯𑀺𑀦𑀬𑀓𑀫𑁆𑀫𑀁 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸, 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀢𑀁 𑀧𑀦𑁂𑀢𑀁 𑀘𑀻𑀯𑀭𑀁 𑀬𑀁 𑀤𑀺𑀯𑀲𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀬𑁄 𑀅𑀭𑀼𑀡𑁄, 𑀲𑁄 𑀉𑀧𑁆𑀧𑀦𑁆𑀦𑀤𑀺𑀯𑀲𑀦𑀺𑀲𑁆𑀲𑀺𑀢𑁄, 𑀢𑀲𑁆𑀫𑀸 𑀘𑀻𑀯𑀭𑀼𑀧𑁆𑀧𑀸𑀤𑀤𑀺𑀯𑀲𑁂𑀦 𑀲𑀤𑁆𑀥𑀺𑀁 𑀏𑀓𑀸𑀤𑀲𑁂 𑀅𑀭𑀼𑀡𑀼𑀕𑁆𑀕𑀫𑀦𑁂 𑀤𑀲𑀸𑀳𑀸𑀢𑀺𑀓𑁆𑀓𑀫𑀺𑀢𑀁 𑀳𑁄𑀢𑀻𑀢𑀺. 𑀘𑀻𑀯𑀭𑀲𑁆𑀲 𑀅𑀢𑁆𑀢𑀦𑁄 𑀲𑀦𑁆𑀢𑀓𑀢𑀸, 𑀚𑀸𑀢𑀺𑀧𑁆𑀧𑀫𑀸𑀡𑀬𑀼𑀢𑁆𑀢𑀢𑀸, 𑀙𑀺𑀦𑁆𑀦𑀧𑀮𑀺𑀩𑁄𑀥𑀪𑀸𑀯𑁄, 𑀅𑀢𑀺𑀭𑁂𑀓𑀘𑀻𑀯𑀭𑀢𑀸, 𑀤𑀲𑀸𑀳𑀸𑀢𑀺𑀓𑁆𑀓𑀫𑁄𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀧𑀞𑀫𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀁.

𑁧𑁮. 𑀇𑀤𑀸𑀦𑀺 𑀤𑀼𑀢𑀺𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸’’𑀢𑁆𑀬𑀸𑀤𑀺𑀫𑀸𑀭𑀤𑁆𑀥𑀁. 𑀬𑁄 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀁 𑀯𑀚𑁆𑀚𑁂𑀢𑁆𑀯𑀸 𑀓𑀸𑀮𑀜𑁆𑀘 𑀯𑀺𑀦𑀸 𑀅𑀥𑀺𑀝𑁆𑀞𑀺𑀢𑀁 𑀢𑀺𑀘𑀻𑀯𑀭𑀁 𑀏𑀓𑀸𑀳𑀁 𑀅𑀢𑀺𑀓𑁆𑀓𑀫𑀸𑀧𑁂𑀢𑀺, 𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸𑀜𑁆𑀜𑀢𑁆𑀭𑀸𑀢𑀺 𑀬𑀁 𑀲𑀗𑁆𑀖𑁄 𑀕𑀺𑀮𑀸𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺𑀁 𑀤𑁂𑀢𑀺, 𑀢𑀁 𑀞𑀧𑁂𑀢𑁆𑀯𑀸. 𑀢𑀺𑀘𑀻𑀯𑀭𑀫𑀥𑀺𑀝𑁆𑀞𑀺𑀢𑀦𑁆𑀢𑀺 𑀓𑀭𑀡𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁, 𑀢𑁂𑀦 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀦𑀬𑁂𑀦 𑀅𑀥𑀺𑀝𑁆𑀞𑀺𑀢𑁂𑀲𑀼 𑀲𑀗𑁆𑀖𑀸𑀝𑀺𑀆𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀘𑀻𑀯𑀭𑁂𑀦. 𑀏𑀓𑀸𑀳𑀦𑁆𑀢𑀺 𑀏𑀓𑀭𑀢𑁆𑀢𑀁. 𑀅𑀢𑀺𑀫𑀸𑀧𑁂𑀢𑀻𑀢𑀺 𑀯𑀺𑀧𑁆𑀧𑀯𑀲𑀢𑀺, 𑀯𑀺𑀬𑀼𑀢𑁆𑀢𑁄 𑀯𑀲𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀅𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀭𑀢𑁆𑀢𑀫𑁆𑀧𑀺 𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀸𑀲𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀲𑀫𑀬𑀁 𑀯𑀺𑀦𑀸𑀢𑀺 𑀘𑀻𑀯𑀭𑀓𑀸𑀮𑀁 𑀯𑀚𑁆𑀚𑁂𑀢𑁆𑀯𑀸. 𑀅𑀥𑀺𑀝𑁆𑀞𑀺𑀢𑀘𑀻𑀯𑀭𑀢𑀸, 𑀅𑀦𑀢𑁆𑀣𑀢𑀓𑀣𑀺𑀦𑀢𑀸, 𑀅𑀮𑀤𑁆𑀥𑀲𑀫𑁆𑀫𑀼𑀢𑀺𑀢𑀸, 𑀭𑀢𑁆𑀢𑀺𑀯𑀺𑀧𑁆𑀧𑀯𑀸𑀲𑁄𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺. 𑀤𑀼𑀢𑀺𑀬𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀁.

𑁧𑁯. 𑀇𑀤𑀸𑀦𑀺 𑀧𑀼𑀭𑀸𑀡𑀘𑀻𑀯𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀜𑁆𑀜𑀸𑀢𑀺𑀓𑀸’’𑀢𑁆𑀬𑀸𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀅𑀜𑁆𑀜𑀸𑀢𑀺𑀓𑀸𑀢𑀺 𑀅𑀜𑁆𑀜𑀸𑀢𑀺𑀓𑀸𑀬 ‘‘𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄’’𑀢𑀺𑀆𑀤𑀻𑀲𑀼 𑀯𑀺𑀬, 𑀅𑀜𑁆𑀜𑀸𑀢𑀺𑀓𑀸𑀬 𑀦𑁂𑀯 𑀫𑀸𑀢𑀼𑀲𑀫𑁆𑀩𑀦𑁆𑀥𑁂𑀦 𑀦 𑀧𑀺𑀢𑀼𑀲𑀫𑁆𑀩𑀦𑁆𑀥𑁂𑀦 𑀲𑀫𑁆𑀩𑀤𑁆𑀥𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀺𑀓𑁆𑀔𑀼𑀦𑀺𑀬𑀸𑀢𑀺 𑀅𑀝𑁆𑀞𑀯𑀸𑀘𑀺𑀓𑀓𑀫𑁆𑀫𑁂𑀦 𑀉𑀧𑀲𑀫𑁆𑀧𑀦𑁆𑀦𑀸𑀬. 𑀆𑀓𑁄𑀝𑀸𑀧𑁂𑀢𑀻𑀢𑀺 𑀧𑀳𑀭𑀸𑀧𑁂𑀢𑀺. 𑀢𑀦𑁆𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀧𑀼𑀭𑀸𑀡𑀘𑀻𑀯𑀭𑀢𑀸, 𑀉𑀧𑀘𑀸𑀭𑁂 𑀞𑀢𑁆𑀯𑀸 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀆𑀡𑀸𑀧𑀦𑀁, 𑀢𑀲𑁆𑀲𑀸 𑀥𑁄𑀯𑀦𑀸𑀤𑀻𑀦𑀺 𑀘𑀸𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀧𑀼𑀭𑀸𑀡𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀁.

𑁨𑁦. 𑀓𑀺𑀜𑁆𑀘𑀺 𑀫𑀽𑀮𑀓𑀦𑁆𑀢𑀺 𑀓𑀺𑀜𑁆𑀘𑀺 𑀧𑀸𑀪𑀢𑀁. 𑀘𑀻𑀯𑀭𑀸𑀤𑀸𑀦𑁂𑀢𑀺 𑀘𑀻𑀯𑀭𑀲𑁆𑀲 𑀆𑀤𑀸𑀦𑁂 𑀘𑀻𑀯𑀭𑀧𑁆𑀧𑀝𑀺𑀕𑁆𑀕𑀳𑀡𑁂. 𑀯𑀺𑀓𑀧𑁆𑀧𑀦𑀽𑀧𑀕𑀘𑀻𑀯𑀭𑀢𑀸, 𑀧𑀸𑀭𑀺𑀯𑀢𑁆𑀢𑀓𑀸𑀪𑀸𑀯𑁄, 𑀅𑀜𑁆𑀜𑀸𑀢𑀺𑀓𑀸𑀬 𑀳𑀢𑁆𑀣𑀢𑁄 𑀕𑀳𑀡𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀘𑀻𑀯𑀭𑀧𑁆𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀁.

𑁨𑁧. 𑀅𑀧𑁆𑀧𑀯𑀸𑀭𑀺𑀢𑀦𑁆𑀢𑀺 ‘‘𑀯𑀤𑁂𑀬𑁆𑀬𑀸𑀣, 𑀪𑀦𑁆𑀢𑁂, 𑀬𑁂𑀦 𑀅𑀢𑁆𑀣𑁄’’𑀢𑀺 𑀇𑀘𑁆𑀙𑀸𑀧𑀺𑀢𑀁 𑀇𑀘𑁆𑀙𑀁 𑀭𑀼𑀘𑀺𑀁 𑀉𑀧𑁆𑀧𑀸𑀤𑀺𑀢𑀁, 𑀦 𑀧𑀯𑀸𑀭𑀺𑀢𑀦𑁆𑀢𑀺 𑀅𑀧𑁆𑀧𑀯𑀸𑀭𑀺𑀢𑀁. 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲𑀸𑀢𑀺 𑀬𑀸𑀘𑀦𑁆𑀢𑀲𑁆𑀲. 𑀅𑀜𑁆𑀜𑀢𑁆𑀭 𑀲𑀫𑀬𑀸𑀢𑀺 𑀦𑀝𑁆𑀞𑀘𑀻𑀯𑀭𑀓𑀸𑀮𑀁 𑀞𑀧𑁂𑀢𑁆𑀯𑀸. 𑀯𑀺𑀓𑀧𑁆𑀧𑀦𑀽𑀧𑀕𑀘𑀻𑀯𑀭𑀢𑀸, 𑀲𑀫𑀬𑀸𑀪𑀸𑀯𑁄, 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺, 𑀢𑀸𑀬 𑀘 𑀧𑀝𑀺𑀮𑀸𑀪𑁄𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺. 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀁.

𑁨𑁨. 𑀭𑀚𑀢𑀦𑁆𑀢𑀺 𑀭𑀽𑀧𑀺𑀬𑀁. 𑀚𑀸𑀢𑀭𑀽𑀧𑀦𑁆𑀢𑀺 𑀲𑀼𑀯𑀡𑁆𑀡𑀁. 𑀫𑀸𑀲𑀓𑀦𑁆𑀢𑀺 𑀢𑀬𑁄 𑀫𑀸𑀲𑀓𑀸 𑀮𑁄𑀳𑀫𑀸𑀲𑀓𑁄 𑀤𑀸𑀭𑀼𑀫𑀸𑀲𑀓𑁄 𑀚𑀢𑀼𑀫𑀸𑀲𑀓𑁄𑀢𑀺. 𑀢𑀢𑁆𑀣 𑀮𑁄𑀳𑀫𑀸𑀲𑀓𑁄𑀢𑀺 𑀢𑀫𑁆𑀩𑀮𑁄𑀳𑀸𑀤𑀻𑀳𑀺 𑀓𑀢𑀫𑀸𑀲𑀓𑁄. 𑀤𑀸𑀭𑀼𑀫𑀸𑀲𑀓𑁄𑀢𑀺 𑀲𑀸𑀭𑀤𑀸𑀭𑀼𑀦𑀸 𑀯𑀸 𑀯𑁂𑀴𑀼𑀧𑁂𑀲𑀺𑀓𑀸𑀬 𑀯𑀸 𑀅𑀦𑁆𑀢𑀫𑀲𑁄 𑀢𑀸𑀮𑀧𑀡𑁆𑀡𑁂𑀦𑀧𑀺 𑀭𑀽𑀧𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑀢𑀫𑀸𑀲𑀓𑁄. 𑀚𑀢𑀼𑀫𑀸𑀲𑀓𑁄𑀢𑀺 𑀮𑀸𑀔𑀸𑀬 𑀯𑀸 𑀦𑀺𑀬𑁆𑀬𑀸𑀲𑁂𑀦 𑀯𑀸 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀓𑀢𑀫𑀸𑀲𑀓𑁄. 𑀓𑀳𑀸𑀧𑀡𑀦𑁆𑀢𑀺 𑀲𑀼𑀯𑀡𑁆𑀡𑀫𑀬𑀁 𑀯𑀸 𑀭𑀽𑀧𑀺𑀬𑀫𑀬𑀁 𑀯𑀸 𑀧𑀸𑀓𑀢𑀺𑀓𑀁 𑀯𑀸. 𑀕𑀡𑁆𑀳𑁂𑀬𑁆𑀬𑀸𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀤𑀻𑀬𑀫𑀸𑀦𑀁 𑀯𑀸 𑀓𑀢𑁆𑀣𑀘𑀺 𑀞𑀺𑀢𑀁 𑀯𑀸 𑀦𑀺𑀧𑁆𑀧𑀭𑀺𑀕𑁆𑀕𑀳𑀁 𑀤𑀺𑀲𑁆𑀯𑀸 𑀲𑀬𑀁 𑀕𑀡𑁆𑀳𑁂𑀬𑁆𑀬. 𑀕𑀡𑁆𑀳𑀸𑀧𑁂𑀬𑁆𑀬𑀸𑀢𑀺 𑀢𑀤𑁂𑀯 𑀅𑀜𑁆𑀜𑁂𑀦 𑀕𑀸𑀳𑀸𑀧𑁂𑀬𑁆𑀬. 𑀦𑀺𑀲𑁆𑀲𑀕𑁆𑀕𑀻𑀢𑀺 𑀕𑀳𑀡𑀸𑀤𑀻𑀲𑀼 𑀬𑀁 𑀓𑀺𑀜𑁆𑀘𑀺 𑀓𑀭𑁄𑀦𑁆𑀢𑀲𑁆𑀲 𑀅𑀖𑀦𑀩𑀤𑁆𑀥𑁂𑀲𑀼 𑀯𑀢𑁆𑀣𑀼𑀕𑀡𑀦𑀸𑀬 𑀦𑀺𑀲𑁆𑀲𑀕𑁆𑀕𑀺 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀲𑀸𑀤𑀺𑀬𑁂𑀬𑁆𑀬 𑀯𑀸𑀢𑀺 𑀓𑀸𑀬𑀯𑀸𑀘𑀸𑀳𑀺 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀘𑀺𑀢𑁆𑀢𑁂𑀦 𑀅𑀥𑀺𑀯𑀸𑀲𑁂𑀬𑁆𑀬. 𑀚𑀸𑀢𑀭𑀽𑀧𑀭𑀚𑀢𑀪𑀸𑀯𑁄, 𑀅𑀢𑁆𑀢𑀼𑀤𑁆𑀤𑁂𑀲𑀺𑀓𑀢𑀸, 𑀕𑀳𑀡𑀸𑀤𑀻𑀲𑀼 𑀅𑀜𑁆𑀜𑀢𑀭𑀪𑀸𑀯𑁄𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀭𑀽𑀧𑀺𑀬𑀧𑁆𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀁.

𑁨𑁩. 𑀭𑀚𑀢𑀸𑀤𑀺𑀘𑀢𑀼𑀩𑁆𑀩𑀺𑀥𑀁 𑀅𑀓𑀧𑁆𑀧𑀺𑀬𑀁 𑀓𑀧𑁆𑀧𑀺𑀬𑁂𑀦𑀸𑀧𑀺 𑀧𑀭𑀺𑀯𑀢𑁆𑀢𑁂𑀬𑁆𑀬 𑀲𑀳𑀥𑀫𑁆𑀫𑀺𑀓𑁂 𑀞𑀧𑁂𑀢𑁆𑀯𑀸, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀅𑀓𑀧𑁆𑀧𑀺𑀬𑀦𑁆𑀢𑀺 𑀅𑀓𑀧𑁆𑀧𑀺𑀬𑀯𑀢𑁆𑀣𑀼𑀁. 𑀓𑀧𑁆𑀧𑀺𑀬𑁂𑀦𑀸𑀢𑀺 𑀓𑀧𑁆𑀧𑀺𑀬𑀯𑀢𑁆𑀣𑀼𑀦𑀸. 𑀲𑀳𑀥𑀫𑁆𑀫𑀺𑀓𑁂𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀺𑀲𑀸𑀫𑀡𑁂𑀭𑀲𑀸𑀫𑀡𑁂𑀭𑀺𑀲𑀺𑀓𑁆𑀔𑀫𑀸𑀦𑀲𑀗𑁆𑀔𑀸𑀢𑁂 𑀧𑀜𑁆𑀘 𑀲𑀳𑀥𑀫𑁆𑀫𑀺𑀓𑁂. 𑀭𑀽𑀧𑀺𑀬𑀪𑀸𑀯𑁄, 𑀧𑀭𑀺𑀯𑀢𑁆𑀢𑀦𑀜𑁆𑀘𑀸𑀢𑀺 𑀇𑀫𑀸𑀦𑁂𑀢𑁆𑀣 𑀤𑁆𑀯𑁂 𑀅𑀗𑁆𑀕𑀸𑀦𑀺. 𑀭𑀽𑀧𑀺𑀬𑀧𑀭𑀺𑀯𑀢𑁆𑀢𑀦𑀲𑀺𑀓𑁆𑀔𑀸𑀧𑀤𑀁.

𑁨𑁪. ‘‘𑀇𑀫𑀁 𑀧𑀢𑁆𑀢𑀁 𑀢𑀼𑀬𑁆𑀳𑀁 𑀯𑀺𑀓𑀧𑁆𑀧𑁂𑀫𑀻’’𑀢𑀺𑀆𑀤𑀺𑀦𑀸 𑀯𑀺𑀓𑀧𑁆𑀧𑀦𑀜𑁆𑀘 ‘‘𑀇𑀫𑀁 𑀧𑀢𑁆𑀢𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺𑀆𑀤𑀺𑀦𑀸 𑀅𑀥𑀺𑀝𑁆𑀞𑀸𑀦𑀜𑁆𑀘 𑀅𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀫𑀸𑀡𑀺𑀓𑀦𑁆𑀢𑀺 𑀏𑀢𑁆𑀣𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀅𑀦𑀼𑀧𑀳𑀢𑀧𑀼𑀭𑀸𑀡𑀲𑀸𑀮𑀺𑀢𑀡𑁆𑀟𑀼𑀮𑀸𑀦𑀁 𑀲𑀼𑀓𑁄𑀝𑁆𑀝𑀺𑀢𑀧𑀭𑀺𑀲𑀼𑀤𑁆𑀥𑀸𑀦𑀁 𑀤𑁆𑀯𑁂 𑀫𑀕𑀥𑀦𑀸𑀴𑀺𑀬𑁄 𑀕𑀳𑁂𑀢𑁆𑀯𑀸 𑀢𑁂𑀳𑀺 𑀢𑀡𑁆𑀟𑀼𑀮𑁂𑀳𑀺 𑀅𑀦𑀼𑀢𑁆𑀢𑀡𑁆𑀟𑀼𑀮𑀫𑀓𑀺𑀮𑀺𑀦𑁆𑀦𑀫𑀧𑀺𑀡𑁆𑀟𑀺𑀢𑀁 𑀲𑀼𑀯𑀺𑀲𑀤𑀁 𑀓𑀼𑀦𑁆𑀤𑀫𑀓𑀼𑀴𑀭𑀸𑀲𑀺𑀲𑀤𑀺𑀲𑀁 𑀅𑀯𑀲𑁆𑀲𑀸𑀯𑀺𑀢𑁄𑀤𑀦𑀁 𑀧𑀘𑀺𑀢𑁆𑀯𑀸 𑀦𑀺𑀭𑀯𑀲𑁂𑀲𑀁 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀑𑀤𑀦𑀲𑁆𑀲 𑀘𑀢𑀼𑀢𑁆𑀣𑀪𑀸𑀕𑀧𑁆𑀧𑀫𑀸𑀡𑁄 𑀦𑀸𑀢𑀺𑀖𑀦𑁄 𑀦𑀸𑀢𑀺𑀢𑀦𑀼𑀓𑁄 𑀳𑀢𑁆𑀣𑀳𑀸𑀭𑀺𑀬𑁄 𑀲𑀩𑁆𑀩𑀲𑀫𑁆𑀪𑀸𑀭𑀲𑀗𑁆𑀔𑀢𑁄 𑀫𑀼𑀕𑁆𑀕𑀲𑀽𑀧𑁄 𑀧𑀓𑁆𑀔𑀺𑀧𑀺𑀢𑀩𑁆𑀩𑁄, 𑀢𑀢𑁄 𑀆𑀮𑁄𑀧𑀲𑁆𑀲 𑀅𑀦𑀼𑀭𑀽𑀧𑀁 𑀬𑀸𑀯𑀘𑀭𑀺𑀫𑀸𑀮𑁄𑀧𑀧𑁆𑀧𑀳𑁄𑀦𑀓𑀁 𑀫𑀘𑁆𑀙𑀫𑀁𑀲𑀸𑀤𑀺𑀩𑁆𑀬𑀜𑁆𑀚𑀦𑀁 𑀧𑀓𑁆𑀔𑀺𑀧𑀺𑀢𑀩𑁆𑀩𑀁. 𑀲𑀧𑁆𑀧𑀺𑀢𑁂𑀮𑀢𑀓𑁆𑀓𑀭𑀲𑀓𑀜𑁆𑀚𑀺𑀓𑀸𑀤𑀻𑀦𑀺 𑀧𑀦 𑀅𑀕𑀡𑀦𑀽𑀧𑀕𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀳𑀺 𑀑𑀤𑀦𑀕𑀢𑀺𑀓𑀸𑀦𑀺 𑀦𑁂𑀯 𑀳𑀸𑀧𑁂𑀢𑀼𑀁, 𑀦 𑀯𑀟𑁆𑀠𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀏𑀯𑀫𑁂𑀢𑀁 𑀲𑀩𑁆𑀩𑀫𑁆𑀧𑀺 𑀧𑀓𑁆𑀔𑀺𑀢𑁆𑀢𑀁 𑀲𑀘𑁂 𑀧𑀦 𑀧𑀢𑁆𑀢𑀲𑁆𑀲 𑀫𑀼𑀔𑀯𑀝𑁆𑀝𑀺𑀬𑀸 𑀳𑁂𑀝𑁆𑀞𑀺𑀫𑀭𑀸𑀚𑀺𑀲𑀫𑀁 𑀢𑀺𑀝𑁆𑀞𑀢𑀺, 𑀲𑀼𑀢𑁆𑀢𑁂𑀦 𑀯𑀸 𑀳𑀻𑀭𑁂𑀦 𑀯𑀸 𑀙𑀺𑀦𑁆𑀤𑀦𑁆𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀯𑀸 𑀳𑀻𑀭𑀲𑁆𑀲 𑀯𑀸 𑀳𑁂𑀝𑁆𑀞𑀺𑀫𑀦𑁆𑀢𑀁 𑀨𑀼𑀲𑀢𑀺, 𑀅𑀬𑀁 𑀉𑀓𑁆𑀓𑀝𑁆𑀞𑁄 𑀦𑀸𑀫 𑀧𑀢𑁆𑀢𑁄. 𑀲𑀘𑁂 𑀢𑀁 𑀭𑀸𑀚𑀺𑀁 𑀅𑀢𑀺𑀓𑁆𑀓𑀫𑁆𑀫 𑀣𑀽𑀧𑀻𑀓𑀢𑀁 𑀢𑀺𑀝𑁆𑀞𑀢𑀺, 𑀅𑀬𑀁 𑀉𑀓𑁆𑀓𑀝𑁆𑀞𑁄𑀫𑀓𑁄 𑀦𑀸𑀫 𑀧𑀢𑁆𑀢𑁄. 𑀲𑀘𑁂 𑀢𑀁 𑀭𑀸𑀚𑀺𑀁 𑀦 𑀲𑀫𑁆𑀧𑀸𑀧𑀼𑀡𑀸𑀢𑀺, 𑀅𑀦𑁆𑀢𑁄𑀕𑀢𑀫𑁂𑀯 𑀳𑁄𑀢𑀺, 𑀅𑀬𑀁 𑀉𑀓𑁆𑀓𑀝𑁆𑀞𑀼𑀓𑁆𑀓𑀝𑁆𑀞𑁄 𑀦𑀸𑀫. 𑀉𑀓𑁆𑀓𑀝𑁆𑀞𑀢𑁄 𑀉𑀧𑀟𑁆𑀠𑀧𑁆𑀧𑀫𑀸𑀡𑁄 𑀫𑀚𑁆𑀛𑀺𑀫𑁄. 𑀫𑀚𑁆𑀛𑀺𑀫𑀢𑁄 𑀉𑀧𑀟𑁆𑀠𑀧𑁆𑀧𑀫𑀸𑀡𑁄 𑀑𑀫𑀓𑁄. 𑀢𑁂𑀲𑀫𑁆𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀘𑁆𑀘𑁂𑀢𑁂𑀲𑀼 𑀉𑀓𑁆𑀓𑀝𑁆𑀞𑀼𑀓𑁆𑀓𑀝𑁆𑀞𑁄 𑀘 𑀑𑀫𑀓𑁄𑀫𑀓𑁄 𑀘𑀸𑀢𑀺 𑀤𑁆𑀯𑁂 𑀅𑀧𑀢𑁆𑀢𑀸, 𑀲𑁂𑀲𑀸 𑀲𑀢𑁆𑀢 𑀧𑀢𑁆𑀢𑀸 𑀧𑀫𑀸𑀡𑀬𑀼𑀢𑁆𑀢𑀸 𑀦𑀸𑀫𑀸𑀢𑀺 𑀏𑀯𑀁 𑀧𑀫𑀸𑀡𑁂𑀦 𑀬𑀼𑀢𑁆𑀢𑁄 𑀧𑀫𑀸𑀡𑀺𑀓𑁄, 𑀢𑀁 𑀧𑀫𑀸𑀡𑀺𑀓𑀁. 𑀧𑀢𑁆𑀢𑀦𑁆𑀢𑀺 𑀲𑀢𑁆𑀢𑀲𑀼 𑀧𑀢𑁆𑀢𑁂𑀲𑀼 𑀅𑀜𑁆𑀜𑀢𑀭𑀁 𑀧𑀢𑁆𑀢𑀁. 𑀧𑀢𑁆𑀢𑀲𑁆𑀲 𑀅𑀢𑁆𑀢𑀦𑁄 𑀲𑀦𑁆𑀢𑀓𑀢𑀸, 𑀧𑀫𑀸𑀡𑀬𑀼𑀢𑁆𑀢𑀢𑀸, 𑀅𑀥𑀺𑀝𑁆𑀞𑀸𑀦𑀽𑀧𑀕𑀢𑀸, 𑀅𑀢𑀺𑀭𑁂𑀓𑀧𑀢𑁆𑀢𑀢𑀸, 𑀤𑀲𑀸𑀳𑀸𑀢𑀺𑀓𑁆𑀓𑀫𑁄𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀧𑀞𑀫𑀧𑀢𑁆𑀢𑀲𑀺𑀓𑁆𑀔𑀸𑀧𑀤𑀁.

𑁨𑁫. 𑀬𑁄 𑀪𑀺𑀓𑁆𑀔𑀼 𑀧𑀜𑁆𑀘𑀩𑀦𑁆𑀥𑀦𑀢𑁄 𑀊𑀦𑀧𑀢𑁆𑀢𑁂 𑀲𑀢𑀺 𑀧𑀭𑀁 𑀧𑀦 𑀦𑀯𑀁 𑀧𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀢𑀲𑁆𑀲𑀧𑀺 𑀪𑀺𑀓𑁆𑀔𑀼𑀦𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀧𑀭𑀦𑁆𑀢𑀺 𑀅𑀜𑁆𑀜𑀁, ‘‘𑀦𑀯𑀁 𑀧𑀢𑁆𑀢’’𑀦𑁆𑀢𑀺𑀫𑀺𑀦𑀸 𑀢𑀼𑀮𑁆𑀬𑀸𑀥𑀺𑀓𑀭𑀡𑀁. 𑀅𑀥𑀺𑀝𑁆𑀞𑀸𑀦𑀽𑀧𑀕𑀧𑀢𑁆𑀢𑀲𑁆𑀲 𑀊𑀦𑀧𑀜𑁆𑀘𑀩𑀦𑁆𑀥𑀦𑀢𑀸, 𑀅𑀢𑁆𑀢𑀼𑀤𑁆𑀤𑁂𑀲𑀺𑀓𑀢𑀸, 𑀓𑀢𑀯𑀺𑀜𑁆𑀜𑀢𑁆𑀢𑀺, 𑀢𑀸𑀬 𑀘 𑀧𑀝𑀺𑀮𑀸𑀪𑁄𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺. 𑀊𑀦𑀧𑀜𑁆𑀘𑀩𑀦𑁆𑀥𑀦𑀲𑀺𑀓𑁆𑀔𑀸𑀧𑀤𑀁.

𑁨𑁬. 𑀬𑁄 𑀲𑀧𑁆𑀧𑀺𑀢𑁂𑀮𑀸𑀤𑀺𑀓𑀁 𑀧𑀦 𑀪𑁂𑀲𑀚𑁆𑀚𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀢𑁆𑀢𑀸𑀳𑀧𑀭𑀫𑀁 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀪𑀼𑀜𑁆𑀚𑀦𑁆𑀢𑁄 𑀲𑀢𑁆𑀢𑀸𑀳𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀲𑀧𑁆𑀧𑀺𑀢𑁂𑀮𑀸𑀤𑀺𑀓𑀦𑁆𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁄 𑀦𑀯𑀦𑀻𑀢𑀫𑀥𑀼𑀨𑀸𑀡𑀺𑀢𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀲𑀧𑁆𑀧𑀺 𑀦𑀸𑀫 𑀕𑀯𑀸𑀤𑀻𑀦𑀁 𑀲𑀧𑁆𑀧𑀺, 𑀬𑁂𑀲𑀁 𑀫𑀁𑀲𑀁 𑀓𑀧𑁆𑀧𑀢𑀺, 𑀢𑁂𑀲𑀁 𑀲𑀧𑁆𑀧𑀺, 𑀢𑀣𑀸 𑀦𑀯𑀦𑀻𑀢𑀁. 𑀢𑁂𑀮𑀁 𑀦𑀸𑀫 𑀢𑀺𑀮𑀲𑀸𑀲𑀧𑀫𑀥𑀼𑀓𑀏𑀭𑀡𑁆𑀟𑀯𑀲𑀸𑀤𑀻𑀳𑀺 𑀦𑀺𑀩𑁆𑀩𑀢𑁆𑀢𑀁. 𑀫𑀥𑀼 𑀦𑀸𑀫 𑀫𑀓𑁆𑀔𑀺𑀓𑀸𑀫𑀥𑀼𑀫𑁂𑀯. 𑀉𑀘𑁆𑀙𑀼𑀭𑀲𑀁 𑀉𑀧𑀸𑀤𑀸𑀬 𑀧𑀦 𑀅𑀧𑀓𑁆𑀓𑀸 𑀯𑀸 𑀅𑀯𑀢𑁆𑀣𑀼𑀓𑀧𑀓𑁆𑀓𑀸 𑀯𑀸 𑀲𑀩𑁆𑀩𑀸𑀧𑀺 𑀉𑀘𑁆𑀙𑀼𑀯𑀺𑀓𑀢𑀺 𑀨𑀸𑀡𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀪𑁂𑀲𑀚𑁆𑀚𑀯𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀁.

𑁨𑁭. 𑀪𑀺𑀓𑁆𑀔𑀼𑀲𑁆𑀲 𑀘𑀻𑀯𑀭𑀁 𑀤𑀢𑁆𑀯𑀸 𑀧𑀼𑀦 𑀢𑀁 𑀘𑀻𑀯𑀭𑀁 𑀲𑀓𑀲𑀜𑁆𑀜𑀸𑀬 𑀅𑀘𑁆𑀙𑀺𑀦𑁆𑀤𑀦𑁆𑀢𑀲𑁆𑀲 𑀯𑀸 𑀅𑀘𑁆𑀙𑀺𑀦𑁆𑀤𑀸𑀧𑀬𑀢𑁄𑀧𑀺 𑀯𑀸 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀤𑀢𑁆𑀯𑀸𑀢𑀺 𑀯𑁂𑀬𑁆𑀬𑀸𑀯𑀘𑁆𑀘𑀸𑀤𑀻𑀦𑀺 𑀧𑀘𑁆𑀘𑀸𑀲𑀻𑀲𑀫𑀸𑀦𑁄 𑀤𑀢𑁆𑀯𑀸. 𑀅𑀘𑁆𑀙𑀺𑀦𑁆𑀤𑀦𑁆𑀢𑀲𑁆𑀲𑀸𑀢𑀺 𑀯𑁂𑀬𑁆𑀬𑀸𑀯𑀘𑁆𑀘𑀸𑀤𑀻𑀦𑀺 𑀅𑀓𑀭𑁄𑀦𑁆𑀢𑀁 𑀤𑀺𑀲𑁆𑀯𑀸 𑀩𑀮𑀓𑁆𑀓𑀸𑀭𑁂𑀦 𑀕𑀡𑁆𑀳𑀦𑁆𑀢𑀲𑁆𑀲, 𑀢𑀣𑀸 𑀅𑀘𑁆𑀙𑀺𑀦𑁆𑀤𑀸𑀧𑀬𑀢𑁄𑀢𑀺. 𑀯𑀺𑀓𑀧𑁆𑀧𑀦𑀽𑀧𑀕𑀘𑀻𑀯𑀭𑀢𑀸, 𑀲𑀸𑀫𑀁𑀤𑀺𑀦𑁆𑀦𑀢𑀸, 𑀲𑀓𑀲𑀜𑁆𑀜𑀺𑀢𑀸, 𑀉𑀧𑀲𑀫𑁆𑀧𑀦𑁆𑀦𑀢𑀸, 𑀓𑁄𑀥𑀯𑀲𑁂𑀦 𑀅𑀘𑁆𑀙𑀺𑀦𑁆𑀤𑀦𑀁 𑀯𑀸 𑀅𑀘𑁆𑀙𑀺𑀦𑁆𑀤𑀸𑀧𑀦𑀁 𑀯𑀸𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀅𑀘𑁆𑀙𑀺𑀦𑁆𑀤𑀦𑀲𑀺𑀓𑁆𑀔𑀸𑀧𑀤𑀁.

𑁨𑁮. 𑀅𑀧𑁆𑀧𑀯𑀸𑀭𑀺𑀢𑀁 𑀅𑀜𑁆𑀜𑀸𑀢𑀺𑀁 𑀕𑀳𑀧𑀢𑀺𑀁 𑀲𑀼𑀢𑁆𑀢𑀁 𑀬𑀸𑀘𑀺𑀢𑁆𑀯𑀸 𑀜𑀸𑀢𑀺𑀧𑁆𑀧𑀯𑀸𑀭𑀺𑀢𑁂 𑀯𑀚𑁆𑀚𑁂𑀢𑁆𑀯𑀸 𑀢𑀦𑁆𑀢𑀯𑀸𑀬𑁂𑀳𑀺 𑀘𑀻𑀯𑀭𑀁 𑀯𑀸𑀬𑀸𑀧𑁂𑀦𑁆𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸𑀢𑀺 𑀧𑀺𑀡𑁆𑀟𑀢𑁆𑀣𑁄. 𑀢𑀢𑁆𑀣 𑀲𑀼𑀢𑁆𑀢𑀦𑁆𑀢𑀺 𑀙𑀩𑁆𑀩𑀺𑀥𑀁 𑀔𑁄𑀫𑀲𑀼𑀢𑁆𑀢𑀸𑀤𑀺𑀓𑀁 𑀯𑀸 𑀢𑁂𑀲𑀁 𑀅𑀦𑀼𑀮𑁄𑀫𑀁 𑀯𑀸. 𑀬𑀸𑀘𑀺𑀬𑀸𑀢𑀺 𑀘𑀻𑀯𑀭𑀢𑁆𑀣𑀸𑀬 𑀬𑀸𑀘𑀺𑀢𑁆𑀯𑀸. 𑀘𑀻𑀯𑀭𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑀺𑀢𑀲𑀼𑀢𑁆𑀢𑀁, 𑀅𑀢𑁆𑀢𑀼𑀤𑁆𑀤𑁂𑀲𑀺𑀓𑀢𑀸, 𑀅𑀓𑀧𑁆𑀧𑀺𑀬𑀢𑀦𑁆𑀢𑀯𑀸𑀬𑁂𑀦 𑀅𑀓𑀧𑁆𑀧𑀺𑀬𑀯𑀺𑀜𑁆𑀜𑀢𑁆𑀢𑀺𑀬𑀸 𑀯𑀸𑀬𑀸𑀧𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀼𑀢𑁆𑀢𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀁.

𑁨𑁯. 𑀬𑁄 𑀪𑀺𑀓𑁆𑀔𑀼 𑀲𑀗𑁆𑀖𑀲𑁆𑀲 𑀧𑀭𑀺𑀡𑀢𑀁 𑀮𑀸𑀪𑀁 𑀚𑀸𑀦𑀦𑁆𑀢𑁄 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑁂𑀢𑀺, 𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀚𑀸𑀦𑀦𑁆𑀢𑀺 𑀚𑀸𑀦𑀦𑁆𑀢𑁄. 𑀮𑀸𑀪𑀦𑁆𑀢𑀺 𑀮𑀪𑀺𑀢𑀩𑁆𑀩𑀁 𑀘𑀻𑀯𑀭𑀸𑀤𑀺𑀯𑀢𑁆𑀣𑀼𑀁. 𑀧𑀭𑀺𑀡𑀢𑀦𑁆𑀢𑀺 𑀲𑀗𑁆𑀖𑀲𑁆𑀲 𑀦𑀺𑀦𑁆𑀦𑀁 𑀲𑀗𑁆𑀖𑀲𑁆𑀲 𑀧𑁄𑀡𑀁 𑀲𑀗𑁆𑀖𑀲𑁆𑀲 𑀧𑀩𑁆𑀪𑀸𑀭𑀁 𑀳𑀼𑀢𑁆𑀯𑀸 𑀞𑀺𑀢𑀁. 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑁂𑀢𑀻𑀢𑀺 ‘‘𑀫𑀬𑁆𑀳𑀁 𑀤𑁂𑀣𑀸’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀅𑀢𑁆𑀢𑀦𑀺 𑀦𑀺𑀦𑁆𑀦𑀁 𑀓𑀭𑁄𑀢𑀺. 𑀲𑀗𑁆𑀖𑁂 𑀧𑀭𑀺𑀡𑀢𑀪𑀸𑀯𑁄, 𑀢𑀁 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑀦𑀁, 𑀧𑀝𑀺𑀮𑀸𑀪𑁄𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀧𑀭𑀺𑀡𑀸𑀫𑀦𑀲𑀺𑀓𑁆𑀔𑀸𑀧𑀤𑀁.

𑀦𑀺𑀲𑁆𑀲𑀕𑁆𑀕𑀺𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀸𑀘𑀺𑀢𑁆𑀢𑀺𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁦. 𑀇𑀤𑀸𑀦𑀺 𑀧𑀸𑀘𑀺𑀢𑁆𑀢𑀺𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂’’𑀢𑁆𑀬𑀸𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂𑀢𑀺 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁, 𑀢𑀲𑁆𑀫𑀸 𑀬𑁄 𑀪𑀺𑀓𑁆𑀔𑀼 𑀲𑀫𑁆𑀧𑀚𑀸𑀦𑀦𑁆𑀢𑁄 𑀫𑀼𑀲𑀸 𑀯𑀤𑀢𑀺, 𑀢𑀲𑁆𑀲 𑀢𑀦𑁆𑀦𑀺𑀫𑀺𑀢𑁆𑀢𑀁 𑀢𑀁𑀳𑁂𑀢𑀼 𑀢𑀧𑁆𑀧𑀘𑁆𑀘𑀬𑀸 𑀧𑀸𑀘𑀺𑀢𑁆𑀢𑀺𑀬𑀁 𑀉𑀤𑀻𑀭𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀼𑀜𑁆𑀘 𑀑𑀫𑀲𑀦𑁆𑀢𑀲𑁆𑀲𑀸𑀢𑀺 𑀚𑀸𑀢𑀺𑀦𑀸𑀫𑀕𑁄𑀢𑁆𑀢𑀓𑀫𑁆𑀫𑀲𑀺𑀧𑁆𑀧𑀯𑀬𑀆𑀩𑀸𑀥𑀮𑀺𑀗𑁆𑀕𑀓𑀺𑀮𑁂𑀲𑀸𑀧𑀢𑁆𑀢𑀺𑀅𑀓𑁆𑀓𑁄𑀲𑁂𑀲𑀼 𑀪𑀽𑀢𑁂𑀦 𑀯𑀸 𑀅𑀪𑀽𑀢𑁂𑀦 𑀯𑀸 𑀬𑁂𑀦 𑀓𑁂𑀦𑀘𑀺 𑀫𑀼𑀔𑀲𑀢𑁆𑀢𑀺𑀦𑀸 𑀪𑀺𑀓𑁆𑀔𑀼𑀁 𑀑𑀯𑀺𑀚𑁆𑀛𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀸𑀘𑀺𑀢𑁆𑀢𑀺𑀬𑀁 𑀉𑀤𑀻𑀭𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀧𑁂𑀲𑀼𑀜𑁆𑀜𑀳𑀭𑀡𑁂𑀧𑀺 𑀘𑀸𑀢𑀺 𑀪𑀺𑀓𑁆𑀔𑀼𑀲𑁆𑀲 𑀧𑁂𑀲𑀼𑀜𑁆𑀜𑀳𑀭𑀡𑁂, 𑀚𑀸𑀢𑀺𑀆𑀤𑀻𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀪𑀺𑀓𑁆𑀔𑀼𑀁 𑀅𑀓𑁆𑀓𑁄𑀲𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀼𑀢𑁆𑀯𑀸 𑀪𑀺𑀓𑁆𑀔𑀼𑀦𑁄 𑀧𑀺𑀬𑀓𑀫𑁆𑀬𑀢𑀸𑀬 𑀯𑀸 𑀪𑁂𑀤𑀸𑀥𑀺𑀧𑁆𑀧𑀸𑀬𑁂𑀦 𑀯𑀸 𑀬𑁄 𑀅𑀓𑁆𑀓𑀼𑀤𑁆𑀥𑁄, 𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀧𑁂𑀲𑀼𑀜𑁆𑀜𑀳𑀭𑀡𑀯𑀘𑀦𑁂 𑀧𑀸𑀘𑀺𑀢𑁆𑀢𑀺𑀬𑀁 𑀉𑀤𑀻𑀭𑀺𑀢𑀦𑁆𑀢𑀺 𑀅𑀢𑁆𑀣𑁄.

𑁩𑁧. 𑀲𑀗𑁆𑀕𑀻𑀢𑀺𑀢𑁆𑀢𑀬𑀫𑀸𑀭𑀼𑀴𑁆𑀳𑀁 𑀧𑀺𑀝𑀓𑀢𑁆𑀢𑀬𑀁 𑀥𑀫𑁆𑀫𑀁 𑀪𑀺𑀓𑁆𑀔𑀼𑀜𑁆𑀘 𑀪𑀺𑀓𑁆𑀔𑀼𑀦𑀺𑀜𑁆𑀘 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂𑀦 𑀧𑀼𑀕𑁆𑀕𑀮𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀧𑀤𑀁 𑀧𑀤𑀁 𑀪𑀡𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀤𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀁 𑀉𑀤𑀻𑀭𑀺𑀢𑀦𑁆𑀢𑀺 𑀲𑀫𑀼𑀤𑀸𑀬𑀢𑁆𑀣𑁄.

𑁩𑁨. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦𑁂𑀯𑀸𑀢𑀺 𑀪𑀺𑀓𑁆𑀔𑀼𑀁 𑀞𑀧𑁂𑀢𑁆𑀯𑀸 𑀅𑀦𑁆𑀢𑀫𑀲𑁄 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀽𑀢𑁂𑀦 𑀢𑀺𑀭𑀘𑁆𑀙𑀸𑀦𑀕𑀢𑁂𑀦𑀸𑀧𑀺 𑀲𑀳 𑀢𑀺𑀭𑀢𑁆𑀢𑀺𑀬𑀁 𑀲𑀬𑀺𑀢𑁆𑀯𑀸 𑀘𑀢𑀼𑀢𑁆𑀣𑀤𑀺𑀯𑀲𑁂 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀧𑀼𑀦 𑀲𑀳𑀲𑁂𑀬𑁆𑀬𑀸𑀬 𑀧𑀸𑀘𑀺𑀢𑁆𑀢𑀺 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀲𑀳𑀲𑁂𑀬𑁆𑀬𑀸𑀬𑀸𑀢𑀺 𑀲𑀩𑁆𑀩𑀘𑁆𑀙𑀦𑁆𑀦𑀧𑀭𑀺𑀘𑁆𑀙𑀺𑀦𑁆𑀦𑁂, 𑀬𑁂𑀪𑀼𑀬𑁆𑀬𑁂𑀦𑀘𑁆𑀙𑀦𑁆𑀦𑀧𑀭𑀺𑀘𑁆𑀙𑀺𑀦𑁆𑀦𑁂 𑀯𑀸 𑀲𑁂𑀦𑀸𑀲𑀦𑁂 𑀧𑀼𑀩𑁆𑀩𑀸𑀧𑀭𑀺𑀬𑁂𑀦 𑀯𑀸 𑀏𑀓𑀓𑁆𑀔𑀡𑁂 𑀯𑀸 𑀏𑀓𑀢𑁄 𑀦𑀺𑀲𑀚𑁆𑀚𑀦𑀸𑀬. 𑀢𑀢𑁆𑀣 𑀙𑀤𑀦𑀁 𑀅𑀦𑀸𑀳𑀘𑁆𑀘 𑀤𑀺𑀬𑀟𑁆𑀠𑀳𑀢𑁆𑀣𑀼𑀩𑁆𑀩𑁂𑀥𑁂𑀦 𑀧𑀸𑀓𑀸𑀭𑀸𑀤𑀺𑀦𑀸 𑀧𑀭𑀺𑀘𑁆𑀙𑀺𑀦𑁆𑀦𑀫𑁆𑀧𑀺 𑀲𑀩𑁆𑀩𑀧𑀭𑀺𑀘𑁆𑀙𑀺𑀦𑁆𑀦𑀫𑀺𑀘𑁆𑀘𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁩𑁩. 𑀏𑀓𑀭𑀢𑁆𑀢𑀫𑁆𑀧𑀺 𑀇𑀢𑁆𑀣𑀺𑀬𑀸 𑀲𑀤𑁆𑀥𑀺𑀁 𑀲𑁂𑀬𑁆𑀬𑀁 𑀓𑀧𑁆𑀧𑀬𑀢𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄𑀧𑀺 𑀧𑀸𑀘𑀺𑀢𑁆𑀢𑀺 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀇𑀢𑁆𑀣𑀺𑀬𑀸𑀢𑀺 𑀅𑀦𑁆𑀢𑀫𑀲𑁄 𑀢𑀤𑀳𑀼𑀚𑀸𑀢𑀸𑀬𑀧𑀺 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸. 𑀤𑁂𑀲𑁂𑀦𑁆𑀢𑀲𑁆𑀲 𑀯𑀺𑀦𑀸 𑀯𑀺𑀜𑁆𑀜𑀼𑀁, 𑀥𑀫𑁆𑀫𑀜𑁆𑀘 𑀙𑀧𑁆𑀧𑀤𑀼𑀢𑁆𑀢𑀭𑀺𑀦𑁆𑀢𑀺 𑀯𑀺𑀜𑁆𑀜𑀼𑀁 𑀧𑀼𑀭𑀺𑀲𑀁 𑀯𑀺𑀦𑀸 𑀇𑀢𑁆𑀣𑀺𑀬𑀸 𑀙𑀧𑁆𑀧𑀤𑀢𑁄 𑀉𑀢𑁆𑀢𑀭𑀺𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀸𑀘𑀺𑀢𑁆𑀢𑀺 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 ‘‘𑀙𑀧𑁆𑀧𑀤𑀼𑀢𑁆𑀢𑀭𑀺’’𑀦𑁆𑀢𑀺 𑀏𑀢𑁆𑀣 𑀏𑀓𑁄 𑀕𑀸𑀣𑀸𑀧𑀸𑀤𑁄 𑀏𑀓𑀁 𑀧𑀤𑀦𑁆𑀢𑀺 𑀏𑀯𑀁 𑀲𑀩𑁆𑀩𑀢𑁆𑀣 𑀧𑀤𑀧𑁆𑀧𑀫𑀸𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀙 𑀧𑀤𑀸𑀦𑀺 𑀙𑀧𑁆𑀧𑀤𑀁, 𑀙𑀧𑁆𑀧𑀤𑀢𑁄 𑀉𑀢𑁆𑀢𑀭𑀺𑀁 𑀙𑀧𑁆𑀧𑀤𑀼𑀢𑁆𑀢𑀭𑀺𑀁.

𑁩𑁪. 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀁 𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑁄 𑀤𑀼𑀝𑁆𑀞𑀼𑀮𑁆𑀮𑀁 𑀯𑀚𑁆𑀚𑀁 𑀅𑀪𑀺𑀓𑁆𑀔𑀼𑀦𑁄 𑀯𑀤𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀉𑀤𑀻𑀭𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀤𑀼𑀝𑁆𑀞𑀼𑀮𑁆𑀮𑀦𑁆𑀢𑀺 𑀇𑀥 𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀥𑀺𑀧𑁆𑀧𑁂𑀢𑀁. 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸𑀢𑀺 𑀬𑀁 𑀲𑀗𑁆𑀖𑁄 𑀅𑀪𑀺𑀡𑁆𑀳𑀸𑀧𑀢𑁆𑀢𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀬𑀢𑀺𑀁 𑀲𑀁𑀯𑀭𑀢𑁆𑀣𑀸𑀬 𑀆𑀧𑀢𑁆𑀢𑀻𑀦𑀜𑁆𑀘 𑀓𑀼𑀮𑀸𑀦𑀜𑁆𑀘 𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀯𑀸 𑀅𑀓𑀢𑁆𑀯𑀸 𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀅𑀧𑀮𑁄𑀓𑁂𑀢𑁆𑀯𑀸 𑀓𑀢𑀺𑀓𑀁 𑀓𑀭𑁄𑀢𑀺, 𑀢𑀁 𑀞𑀧𑁂𑀢𑁆𑀯𑀸. 𑀅𑀪𑀺𑀓𑁆𑀔𑀼𑀦𑁄𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲. 𑀯𑀤𑀦𑁆𑀢𑀲𑁆𑀲𑀸𑀢𑀺 𑀆𑀭𑁄𑀘𑁂𑀦𑁆𑀢𑀲𑁆𑀲.

𑁩𑁫. 𑀬𑁄 𑀅𑀓𑀧𑁆𑀧𑀺𑀬𑀁 𑀧𑀣𑀯𑀺𑀁 𑀔𑀡𑁂𑀬𑁆𑀬 𑀯𑀸 𑀔𑀡𑀸𑀧𑁂𑀬𑁆𑀬 𑀯𑀸, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸. 𑀢𑀢𑁆𑀣 𑀅𑀓𑀧𑁆𑀧𑀺𑀬𑀦𑁆𑀢𑀺 𑀉𑀤𑁆𑀥𑀦𑀧𑀘𑀦𑀸𑀤𑀺𑀯𑀲𑁂𑀦 𑀯𑀸 𑀢𑀣𑀸 𑀢𑀣𑀸 𑀅𑀤𑀟𑁆𑀠𑀸 𑀯𑀸 𑀚𑀸𑀢𑀧𑀣𑀯𑀻 𑀯𑀼𑀘𑁆𑀘𑀢𑀺. 𑀲𑀸 𑀢𑀺𑀯𑀺𑀥𑀸 𑀲𑀼𑀤𑁆𑀥𑀫𑀺𑀲𑁆𑀲𑀧𑀼𑀜𑁆𑀚𑀯𑀲𑁂𑀦. 𑀢𑀢𑁆𑀣 𑀲𑀼𑀤𑁆𑀥𑀧𑀣𑀯𑀻 𑀦𑀸𑀫 𑀧𑀓𑀢𑀺𑀬𑀸 𑀲𑀼𑀤𑁆𑀥𑀧𑀁𑀲𑀼 𑀯𑀸 𑀲𑀼𑀤𑁆𑀥𑀫𑀢𑁆𑀢𑀺𑀓𑀸 𑀯𑀸. 𑀫𑀺𑀲𑁆𑀲𑀧𑀣𑀯𑀻 𑀦𑀸𑀫 𑀬𑀢𑁆𑀣 𑀧𑀁𑀲𑀼𑀢𑁄 𑀯𑀸 𑀫𑀢𑁆𑀢𑀺𑀓𑀢𑁄 𑀯𑀸 𑀧𑀸𑀲𑀸𑀡𑀲𑀓𑁆𑀔𑀭𑀓𑀣𑀮𑀫𑀭𑀼𑀫𑁆𑀩𑀯𑀸𑀮𑀼𑀓𑀸𑀲𑀼 𑀅𑀜𑁆𑀜𑀢𑀭𑀲𑁆𑀲 𑀢𑀢𑀺𑀬𑀪𑀸𑀕𑁄 𑀳𑁄𑀢𑀺. 𑀧𑀼𑀜𑁆𑀚𑀧𑀣𑀯𑀻 𑀦𑀸𑀫 𑀅𑀢𑀺𑀭𑁂𑀓𑀘𑀸𑀢𑀼𑀫𑀸𑀲𑀁 𑀑𑀯𑀝𑁆𑀞𑁄 𑀧𑀁𑀲𑀼𑀧𑀼𑀜𑁆𑀚𑁄 𑀯𑀸 𑀫𑀢𑁆𑀢𑀺𑀓𑀸𑀧𑀼𑀜𑁆𑀚𑁄 𑀯𑀸 𑀳𑁄𑀢𑀺. 𑀯𑀼𑀢𑁆𑀢𑀮𑀓𑁆𑀔𑀡𑁂𑀦 𑀧𑀦 𑀫𑀺𑀲𑁆𑀲𑀓𑀧𑀼𑀜𑁆𑀚𑁄𑀧𑀺 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀞𑀺𑀢𑀲𑀼𑀔𑀼𑀫𑀭𑀚𑀫𑁆𑀧𑀺 𑀘 𑀤𑁂𑀯𑁂 𑀨𑀼𑀲𑀬𑀦𑁆𑀢𑁂 𑀲𑀓𑀺𑀁 𑀘𑁂 𑀢𑀺𑀦𑁆𑀢𑀁, 𑀘𑀸𑀢𑀼𑀫𑀸𑀲𑀘𑁆𑀘𑀬𑁂𑀦 𑀢𑀺𑀦𑁆𑀢𑁄𑀓𑀸𑀲𑁄 𑀧𑀼𑀜𑁆𑀚𑀧𑀣𑀯𑀻𑀲𑀗𑁆𑀔𑀫𑁂𑀯 𑀕𑀘𑁆𑀙𑀢𑀺. 𑀬𑁄 𑀪𑀺𑀓𑁆𑀔𑀼 𑀪𑀽𑀢𑀕𑀸𑀫𑀁 𑀯𑀺𑀓𑁄𑀧𑁂𑀬𑁆𑀬, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀪𑀽𑀢𑀕𑀸𑀫𑀦𑁆𑀢𑀺 𑀪𑀯𑀦𑁆𑀢𑀺, 𑀅𑀪𑀯𑀼𑀁 𑀘𑀸𑀢𑀺 𑀪𑀽𑀢𑀸, 𑀚𑀸𑀬𑀦𑁆𑀢𑀺 𑀯𑀟𑁆𑀠𑀦𑁆𑀢𑀺 𑀚𑀸𑀢𑀸 𑀯𑀟𑁆𑀠𑀺𑀢𑀸 𑀘𑀸𑀢𑀺 𑀅𑀢𑁆𑀣𑁄, 𑀕𑀸𑀫𑁄𑀢𑀺 𑀭𑀸𑀲𑀺, 𑀪𑀽𑀢𑀸𑀦𑀁 𑀕𑀸𑀫𑁄, 𑀪𑀽𑀢𑀸 𑀏𑀯 𑀯𑀸 𑀕𑀸𑀫𑁄𑀢𑀺 𑀪𑀽𑀢𑀕𑀸𑀫𑁄, 𑀧𑀢𑀺𑀝𑁆𑀞𑀺𑀢𑀳𑀭𑀺𑀢𑀢𑀺𑀡𑀭𑀼𑀓𑁆𑀔𑀸𑀤𑀻𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀁 𑀪𑀽𑀢𑀕𑀸𑀫𑀁. 𑀯𑀺𑀓𑁄𑀧𑁂𑀬𑁆𑀬𑀸𑀢𑀺 𑀙𑁂𑀤𑀦𑀪𑁂𑀤𑀦𑀸𑀤𑀻𑀦𑀺 𑀓𑀭𑁂𑀬𑁆𑀬.

𑁩𑁬. 𑀬𑁄 𑀪𑀺𑀓𑁆𑀔𑀼 𑀲𑀗𑁆𑀖𑀺𑀓𑀁 𑀫𑀜𑁆𑀘𑀸𑀤𑀺𑀁 𑀅𑀚𑁆𑀛𑁄𑀓𑀸𑀲𑁂 𑀲𑀦𑁆𑀣𑀭𑀡𑀸𑀤𑀺𑀓𑀁 𑀓𑀢𑁆𑀯𑀸 𑀆𑀧𑀼𑀘𑁆𑀙𑀦𑀸𑀤𑀺𑀓𑀁 𑀅𑀓𑀢𑁆𑀯𑀸 𑀬𑀸𑀢𑀺, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀲𑀗𑁆𑀖𑀺𑀓𑀦𑁆𑀢𑀺 𑀲𑀗𑁆𑀖𑀲𑁆𑀲 𑀲𑀦𑁆𑀢𑀓𑀁. 𑀫𑀜𑁆𑀘𑀸𑀤𑀺𑀦𑁆𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀧𑀻𑀞𑀪𑀺𑀲𑀺𑀓𑁄𑀘𑁆𑀙𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀦𑁆𑀣𑀭𑀡𑀸𑀤𑀺𑀓𑀦𑁆𑀢𑀺 𑀲𑀦𑁆𑀣𑀭𑀡𑀸𑀤𑀺𑀁 𑀓𑀢𑁆𑀯𑀸 𑀯𑀸 𑀓𑀸𑀭𑀸𑀧𑁂𑀢𑁆𑀯𑀸 𑀯𑀸. 𑀆𑀧𑀼𑀘𑁆𑀙𑀦𑀸𑀤𑀺𑀓𑀦𑁆𑀢𑀺 𑀆𑀧𑀼𑀘𑁆𑀙𑀦𑀁 𑀯𑀸 𑀉𑀤𑁆𑀥𑀭𑀡𑀁 𑀯𑀸 𑀉𑀤𑁆𑀥𑀭𑀸𑀧𑀦𑀁 𑀯𑀸𑀢𑀺 𑀅𑀢𑁆𑀣𑁄. 𑀬𑀸𑀢𑀻𑀢𑀺 𑀕𑀘𑁆𑀙𑀢𑀺.

𑁩𑁭. 𑀬𑁄 𑀪𑀺𑀓𑁆𑀔𑀼 𑀲𑀗𑁆𑀖𑀺𑀓𑀸𑀯𑀲𑀣𑁂 𑀲𑁂𑀬𑁆𑀬𑀁 𑀲𑀦𑁆𑀣𑀭𑀡𑀸𑀤𑀺𑀓𑀁 𑀓𑀢𑁆𑀯𑀸 𑀆𑀧𑀼𑀘𑁆𑀙𑀦𑀸𑀤𑀺𑀓𑀁 𑀅𑀓𑀢𑁆𑀯𑀸 𑀬𑀸𑀢𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀸𑀘𑀺𑀢𑁆𑀢𑀺 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀲𑀗𑁆𑀖𑀺𑀓𑀸𑀯𑀲𑀣𑁂𑀢𑀺 𑀲𑀗𑁆𑀖𑀲𑁆𑀲 𑀲𑀦𑁆𑀢𑀓𑁂 𑀆𑀯𑀲𑀣𑁂 𑀯𑀺𑀳𑀸𑀭𑁂 𑀕𑀩𑁆𑀪𑁂 𑀯𑀸 𑀅𑀜𑁆𑀜𑀲𑁆𑀫𑀺𑀁 𑀯𑀸 𑀲𑀩𑁆𑀩𑀧𑀭𑀺𑀘𑁆𑀙𑀺𑀦𑁆𑀦𑁂 𑀕𑀼𑀢𑁆𑀢𑀲𑁂𑀦𑀸𑀲𑀦𑁂. 𑀲𑁂𑀬𑁆𑀬𑀦𑁆𑀢𑀺 𑀪𑀺𑀲𑀺 𑀘𑀺𑀫𑀺𑀮𑀺𑀓𑀸 𑀧𑀸𑀯𑀼𑀭𑀡𑀁 𑀉𑀢𑁆𑀢𑀭𑀢𑁆𑀣𑀭𑀡𑀁 𑀪𑀽𑀫𑀢𑁆𑀣𑀭𑀡𑀁 𑀢𑀝𑁆𑀝𑀺𑀓𑀸 𑀘𑀫𑁆𑀫𑀓𑁆𑀔𑀡𑁆𑀟𑀁 𑀦𑀺𑀲𑀻𑀤𑀦𑀁 𑀧𑀘𑁆𑀘𑀢𑁆𑀣𑀭𑀡𑀁 𑀢𑀺𑀡𑀲𑀦𑁆𑀣𑀸𑀭𑁄 𑀧𑀡𑁆𑀡𑀲𑀦𑁆𑀣𑀸𑀭𑁄𑀢𑀺 𑀏𑀯𑀫𑀸𑀤𑀺𑀓𑀁. 𑀲𑀦𑁆𑀣𑀭𑀡𑀸𑀤𑀺𑀓𑀦𑁆𑀢𑀺 𑀢𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀅𑀢𑁆𑀣𑀭𑀡𑀸𑀤𑀺𑀓𑀁 𑀓𑀢𑁆𑀯𑀸 𑀯𑀸 𑀓𑀸𑀭𑀸𑀧𑁂𑀢𑁆𑀯𑀸 𑀯𑀸.

𑁩𑁮-𑁯. 𑀬𑁄 𑀧𑀦 𑀪𑀺𑀓𑁆𑀔𑀼 𑀚𑀸𑀦𑀁 𑀲𑀧𑁆𑀧𑀸𑀡𑀓𑀁 𑀢𑁄𑀬𑀁 𑀧𑀭𑀺𑀪𑀼𑀜𑁆𑀚𑀬𑁂, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀸𑀘𑀺𑀢𑁆𑀢𑀺 𑀲𑀺𑀬𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀚𑀸𑀦𑀁 𑀲𑀧𑁆𑀧𑀸𑀡𑀓𑀦𑁆𑀢𑀺 ‘‘𑀲𑀧𑁆𑀧𑀸𑀡𑀓𑀫𑀺𑀤’’𑀦𑁆𑀢𑀺 𑀤𑀺𑀲𑁆𑀯𑀸 𑀯𑀸 𑀲𑀼𑀢𑁆𑀯𑀸 𑀯𑀸 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀚𑀸𑀦𑀦𑁆𑀢𑁄. 𑀢𑁄𑀬𑀦𑁆𑀢𑀺 𑀉𑀤𑀓𑀁. 𑀧𑀭𑀺𑀪𑀼𑀜𑁆𑀚𑀬𑁂𑀢𑀺 𑀧𑀭𑀺𑀪𑀼𑀜𑁆𑀚𑁂𑀬𑁆𑀬. 𑀬𑁄 𑀪𑀺𑀓𑁆𑀔𑀼 𑀧𑀸𑀭𑀺𑀯𑀢𑁆𑀢𑀓𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀘𑀻𑀯𑀭𑀁 𑀤𑁂𑀢𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀸𑀘𑀺𑀢𑁆𑀢𑀺 𑀲𑀺𑀬𑀸. 𑀘𑀻𑀯𑀭𑀧𑁆𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑁂 𑀪𑀺𑀓𑁆𑀔𑀼 𑀧𑀝𑀺𑀕𑁆𑀕𑀸𑀳𑀓𑁄 𑀇𑀥 𑀪𑀺𑀓𑁆𑀔𑀼𑀦𑀻, 𑀅𑀬𑀁 𑀯𑀺𑀲𑁂𑀲𑁄. 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀘𑀻𑀯𑀭𑀁 𑀲𑀺𑀩𑁆𑀩𑀢𑁄𑀧𑀺 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀸𑀘𑀺𑀢𑁆𑀢𑀺 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀘𑀻𑀯𑀭𑀦𑁆𑀢𑀺 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀽𑀧𑀕𑀁. 𑀲𑀺𑀩𑁆𑀩𑀢𑁄𑀢𑀺 𑀲𑀬𑀁 𑀲𑀺𑀩𑁆𑀩𑀦𑁆𑀢𑀲𑁆𑀲 𑀲𑀽𑀘𑀺𑀁 𑀧𑀯𑁂𑀲𑁂𑀢𑁆𑀯𑀸 𑀦𑀻𑀳𑀭𑀡𑁂 𑀧𑀬𑁄𑀕𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺. 𑀲𑀺𑀩𑁆𑀩𑀸𑀧𑁂𑀦𑁆𑀢𑀲𑁆𑀲 𑀧𑀦 ‘‘𑀲𑀺𑀩𑁆𑀩𑀸’’𑀢𑀺 𑀯𑀼𑀢𑁆𑀢𑁄 𑀲𑀘𑁂𑀧𑀺 𑀲𑀩𑁆𑀩𑀁 𑀲𑀽𑀘𑀺𑀓𑀫𑁆𑀫𑀁 𑀦𑀺𑀝𑁆𑀞𑀸𑀧𑁂𑀲𑀺, 𑀏𑀓𑀫𑁂𑀯 𑀧𑀸𑀘𑀺𑀢𑁆𑀢𑀺, 𑀆𑀡𑀢𑁆𑀢𑀲𑁆𑀲 𑀧𑀬𑁄𑀕𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺 𑀳𑁄𑀢𑀺. 𑀧𑀯𑀸𑀭𑁂𑀢𑁆𑀯𑀸𑀦 𑀅𑀢𑀺𑀭𑀺𑀢𑁆𑀢𑀁 𑀅𑀓𑀸𑀭𑁂𑀢𑁆𑀯𑀸 𑀪𑀼𑀜𑁆𑀚𑀢𑁄 𑀧𑀸𑀘𑀺𑀢𑁆𑀢𑀺 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀑𑀤𑀦𑁄 𑀲𑀢𑁆𑀢𑀼 𑀓𑀼𑀫𑁆𑀫𑀸𑀲𑁄 𑀫𑀘𑁆𑀙𑁄 𑀫𑀁𑀲𑀦𑁆𑀢𑀺 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑀁 𑀲𑀸𑀲𑀧𑀫𑀢𑁆𑀢𑀫𑁆𑀧𑀺 𑀅𑀚𑁆𑀛𑁄𑀳𑀭𑀺𑀢𑁆𑀯𑀸 𑀪𑁄𑀚𑀦𑀁 𑀧𑀝𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀅𑀜𑁆𑀜𑁂𑀦 𑀇𑀭𑀺𑀬𑀸𑀧𑀣𑁂𑀦 ‘‘𑀅𑀮𑀫𑁂𑀢𑀁 𑀲𑀩𑁆𑀩’’𑀦𑁆𑀢𑀺 𑀅𑀢𑀺𑀭𑀺𑀢𑁆𑀢𑀁 𑀅𑀓𑀸𑀭𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑁄 𑀧𑀸𑀘𑀺𑀢𑁆𑀢𑀺 𑀳𑁄𑀢𑀻𑀢𑀺.

𑁪𑁦. 𑀬𑁄 𑀪𑀺𑀓𑁆𑀔𑀼 𑀆𑀲𑀸𑀤𑀦𑀸𑀧𑁂𑀓𑁆𑀔𑁄 𑀪𑀼𑀢𑁆𑀢𑀸𑀯𑀺𑀁 𑀧𑀯𑀸𑀭𑀺𑀢𑀁 𑀪𑀺𑀓𑁆𑀔𑀼𑀁 ‘‘𑀳𑀦𑁆𑀤, 𑀪𑀺𑀓𑁆𑀔𑀼, 𑀔𑀸𑀤 𑀯𑀸 𑀪𑀼𑀜𑁆𑀚 𑀯𑀸’’𑀢𑀺 𑀅𑀦𑀢𑀺𑀭𑀺𑀢𑁆𑀢𑁂𑀦 𑀧𑀯𑀸𑀭𑁂𑀢𑀺, 𑀪𑁄𑀚𑀦𑁂 𑀪𑀼𑀢𑁆𑀢𑁂 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀉𑀤𑀻𑀭𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀆𑀲𑀸𑀤𑀦𑀸𑀧𑁂𑀓𑁆𑀔𑁄𑀢𑀺 𑀆𑀲𑀸𑀤𑀦𑀁 𑀘𑁄𑀤𑀦𑀁 𑀫𑀗𑁆𑀓𑀼𑀓𑀭𑀡𑀪𑀸𑀯𑀁 𑀅𑀧𑁂𑀓𑁆𑀔𑀫𑀸𑀦𑁄.

𑁪𑁧-𑁨. 𑀬𑁄 𑀪𑀺𑀓𑁆𑀔𑀼 𑀲𑀦𑁆𑀦𑀺𑀥𑀺𑀪𑁄𑀚𑀦𑀁 𑀪𑀼𑀜𑁆𑀚𑁂𑀬𑁆𑀬, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀸𑀘𑀺𑀢𑁆𑀢𑀺 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀲𑀦𑁆𑀦𑀺𑀥𑀺𑀪𑁄𑀚𑀦𑀦𑁆𑀢𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀏𑀓𑀭𑀢𑁆𑀢𑀁 𑀯𑀻𑀢𑀺𑀦𑀸𑀫𑀺𑀢𑀪𑁄𑀚𑀦𑀁. 𑀯𑀺𑀓𑀸𑀮𑁂 𑀬𑀸𑀯𑀓𑀸𑀮𑀺𑀓𑀁 𑀪𑀼𑀜𑁆𑀚𑀢𑁄 𑀯𑀸𑀧𑀺 𑀧𑀸𑀘𑀺𑀢𑁆𑀢𑀺 𑀲𑀺𑀬𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀯𑀺𑀓𑀸𑀮𑁂𑀢𑀺 𑀯𑀺𑀕𑀢𑀓𑀸𑀮𑁂, 𑀫𑀚𑁆𑀛𑀦𑁆𑀳𑀺𑀓𑀸𑀢𑀺𑀓𑁆𑀓𑀫𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸𑀢𑀺 𑀅𑀢𑁆𑀣𑁄. 𑀬𑀸𑀯𑀓𑀸𑀮𑀺𑀓𑀦𑁆𑀢𑀺 𑀯𑀦𑀫𑀽𑀮𑀨𑀮𑀸𑀤𑀺𑀓𑀁 𑀆𑀫𑀺𑀲𑀪𑁄𑀚𑀦𑀁. 𑀅𑀕𑀺𑀮𑀸𑀦𑁄 𑀪𑀺𑀓𑁆𑀔𑀼 𑀧𑀡𑀻𑀢𑀓𑀁 𑀲𑀧𑁆𑀧𑀺𑀪𑀢𑁆𑀢𑀸𑀤𑀺𑀓𑀫𑁆𑀧𑀺 𑀯𑀺𑀜𑁆𑀜𑀸𑀧𑁂𑀢𑁆𑀯𑀸𑀦 𑀪𑀼𑀜𑁆𑀚𑁂𑀬𑁆𑀬, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀸𑀘𑀺𑀢𑁆𑀢𑀺 𑀲𑀺𑀬𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀅𑀕𑀺𑀮𑀸𑀦𑁄𑀢𑀺 𑀓𑀮𑁆𑀮𑀓𑁄. 𑀧𑀡𑀻𑀢𑀓𑀦𑁆𑀢𑀺 𑀲𑀧𑁆𑀧𑀺𑀢𑁂𑀮𑀫𑀥𑀼𑀨𑀸𑀡𑀺𑀢𑀫𑀘𑁆𑀙𑀫𑀁𑀲𑀔𑀻𑀭𑀤𑀥𑀺𑀲𑀗𑁆𑀔𑀸𑀢𑁂𑀳𑀺 𑀲𑀁𑀲𑀝𑁆𑀞𑀁 𑀲𑀢𑁆𑀢𑀥𑀜𑁆𑀜𑀦𑀺𑀩𑁆𑀩𑀢𑁆𑀢𑀁 𑀧𑀡𑀻𑀢𑀪𑁄𑀚𑀦𑀁. 𑀬𑁄 𑀪𑀺𑀓𑁆𑀔𑀼 𑀤𑀦𑁆𑀢𑀓𑀝𑁆𑀞𑁄𑀤𑀓𑀁 𑀯𑀚𑁆𑀚𑁂𑀢𑁆𑀯𑀸 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑀁 𑀪𑀼𑀜𑁆𑀚𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀦𑁆𑀢𑀺 𑀓𑀸𑀬𑁂𑀦 𑀯𑀸 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀳𑀢𑁆𑀣𑀧𑀸𑀲𑁂 𑀞𑀢𑁆𑀯𑀸 𑀓𑀸𑀬𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀁 𑀅𑀜𑁆𑀜𑀢𑀭𑁂𑀦 𑀦 𑀤𑀺𑀦𑁆𑀦𑀁 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀁 𑀦𑀸𑀫.

𑁪𑁩. 𑀬𑁄 𑀪𑀺𑀓𑁆𑀔𑀼 𑀢𑀺𑀢𑁆𑀣𑀺𑀬𑀲𑁆𑀲 𑀲𑀳𑀢𑁆𑀣𑀢𑁄 𑀓𑀺𑀜𑁆𑀘𑀺 𑀪𑀼𑀜𑁆𑀚𑀺𑀢𑀩𑁆𑀩𑀁 𑀤𑀤𑁂𑀬𑁆𑀬, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀢𑀺𑀢𑁆𑀣𑀺𑀬𑀲𑁆𑀲𑀸𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑁆𑀲. 𑀓𑀺𑀜𑁆𑀘𑀺 𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀪𑁄𑀚𑀦𑀻𑀬𑀁. 𑀲𑀳𑀢𑁆𑀣𑀢𑁄𑀢𑀺 𑀲𑀳𑀢𑁆𑀣𑀸. 𑀬𑁄 𑀪𑀺𑀓𑁆𑀔𑀼 𑀫𑀸𑀢𑀼𑀕𑀸𑀫𑁂𑀦 𑀏𑀓𑀢𑁄 𑀭𑀳𑁄 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀬𑁆𑀬, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀭𑀳𑁄𑀢𑀺 𑀧𑀝𑀺𑀘𑁆𑀙𑀦𑁆𑀦𑁂. 𑀓𑀧𑁆𑀧𑁂𑀢𑀺 𑀓𑀧𑁆𑀧𑁂𑀬𑁆𑀬. 𑀏𑀓𑀢𑁄𑀢𑀺 𑀲𑀤𑁆𑀥𑀺𑀁.

𑁪𑁪. 𑀲𑀼𑀭𑀸𑀫𑁂𑀭𑀬𑀧𑀸𑀦𑁂𑀧𑀻𑀢𑀺 𑀏𑀢𑁆𑀣 𑀧𑀺𑀝𑁆𑀞𑀸𑀤𑀻𑀳𑀺 𑀓𑀢𑀁 𑀫𑀚𑁆𑀚𑀁 𑀲𑀼𑀭𑀸. 𑀧𑀼𑀧𑁆𑀨𑀸𑀤𑀻𑀳𑀺 𑀓𑀢𑁄 𑀆𑀲𑀯𑁄 𑀫𑁂𑀭𑀬𑀁. 𑀬𑁄 𑀪𑀺𑀓𑁆𑀔𑀼 𑀢𑀤𑀼𑀪𑀬𑀫𑁆𑀧𑀺 𑀩𑀻𑀚𑀢𑁄 𑀧𑀝𑁆𑀞𑀸𑀬 𑀓𑀼𑀲𑀕𑁆𑀕𑁂𑀦𑀸𑀧𑀺 𑀧𑀺𑀯𑀢𑀺, 𑀢𑀲𑁆𑀲 𑀢𑀧𑁆𑀧𑀸𑀦𑀧𑀘𑁆𑀘𑀬𑀸 𑀧𑀸𑀘𑀺𑀢𑁆𑀢𑀺𑀬𑀁 𑀉𑀤𑀻𑀭𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀗𑁆𑀕𑀼𑀮𑀺𑀧𑀢𑁄𑀤𑀓𑁂 𑀘𑀸𑀧𑀻𑀢𑀺 𑀅𑀗𑁆𑀕𑀼𑀮𑀻𑀳𑀺 𑀉𑀧𑀓𑀘𑁆𑀙𑀓𑀸𑀤𑀻𑀦𑀁 𑀖𑀝𑁆𑀝𑀦𑀧𑀘𑁆𑀘𑀬𑀸 𑀧𑀸𑀘𑀺𑀢𑁆𑀢𑀺 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀳𑀲𑀥𑀫𑁆𑀫𑁂𑀧𑀺 𑀘𑁄𑀤𑀓𑁂𑀢𑀺 𑀉𑀧𑀭𑀺𑀕𑁄𑀧𑁆𑀨𑀓𑁂 𑀉𑀤𑀓𑁂 𑀳𑀲𑀥𑀫𑁆𑀫𑁂 𑀓𑀻𑀴𑀸𑀦𑀺𑀫𑀺𑀢𑁆𑀢𑀁 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺 𑀲𑀺𑀬𑀸𑀢𑀺 𑀅𑀢𑁆𑀣𑁄.

𑁪𑁫. 𑀅𑀦𑀸𑀤𑀭𑁂𑀧𑀺 𑀧𑀸𑀘𑀺𑀢𑁆𑀢𑀻𑀢𑀺 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀥𑀫𑁆𑀫𑀲𑁆𑀲 𑀯𑀸 𑀅𑀦𑀸𑀤𑀭𑀓𑀭𑀡𑁂𑀧𑀺 𑀧𑀸𑀘𑀺𑀢𑁆𑀢𑀺 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀬𑁄 𑀪𑀺𑀓𑁆𑀔𑀼 𑀉𑀧𑀲𑀫𑁆𑀧𑀦𑁆𑀦𑁂𑀦 𑀧𑀜𑁆𑀜𑀢𑁆𑀢𑁂𑀦 𑀯𑀼𑀘𑁆𑀘𑀫𑀸𑀦𑁄 𑀢𑀲𑁆𑀲 𑀯𑀸 𑀯𑀘𑀦𑀁 𑀅𑀓𑀢𑁆𑀢𑀼𑀓𑀸𑀫𑀢𑀸𑀬, 𑀢𑀁 𑀯𑀸 𑀥𑀫𑁆𑀫𑀁 𑀅𑀲𑀺𑀓𑁆𑀔𑀺𑀢𑀼𑀓𑀸𑀫𑀢𑀸𑀬 𑀅𑀦𑀸𑀤𑀭𑀺𑀬𑀁 𑀓𑀭𑁄𑀢𑀺, 𑀢𑀲𑁆𑀲 𑀢𑀲𑁆𑀫𑀺𑀁 𑀅𑀦𑀸𑀤𑀭𑀺𑀬𑁂 𑀧𑀸𑀘𑀺𑀢𑁆𑀢𑀺 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀪𑀬𑀸𑀦𑀓𑀁 𑀓𑀣𑀁 𑀓𑀢𑁆𑀯𑀸 𑀯𑀸 𑀪𑀬𑀸𑀦𑀓𑀁 𑀭𑀽𑀧𑀁 𑀤𑀲𑁆𑀲𑁂𑀢𑁆𑀯𑀸 𑀯𑀸 𑀪𑀺𑀓𑁆𑀔𑀼𑀁 𑀪𑀻𑀲𑀬𑀢𑁄𑀧𑀺 𑀧𑀸𑀘𑀺𑀢𑁆𑀢𑀺 𑀲𑀺𑀬𑀸𑀢𑀺 𑀅𑀢𑁆𑀣𑁄.

𑁪𑁬. 𑀬𑁄 𑀪𑀺𑀓𑁆𑀔𑀼 𑀅𑀕𑀺𑀮𑀸𑀦𑁄 𑀓𑀺𑀜𑁆𑀘𑀺 𑀧𑀘𑁆𑀘𑀬𑀁 𑀞𑀧𑁂𑀢𑁆𑀯𑀸 𑀚𑁄𑀢𑀺𑀁 𑀚𑀮𑁂𑀬𑁆𑀬 𑀯𑀸 𑀚𑀮𑀸𑀧𑁂𑀬𑁆𑀬 𑀯𑀸, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀓𑀺𑀜𑁆𑀘𑀺 𑀧𑀘𑁆𑀘𑀬𑀦𑁆𑀢𑀺 𑀧𑀤𑀻𑀧𑀼𑀚𑁆𑀚𑀮𑀦𑀁 𑀯𑀸 𑀧𑀢𑁆𑀢𑀧𑀘𑀦𑀸𑀤𑀻𑀲𑀼 𑀚𑁄𑀢𑀺𑀓𑀭𑀡𑀁 𑀯𑀸𑀢𑀺 𑀏𑀯𑀭𑀽𑀧𑀁 𑀧𑀘𑁆𑀘𑀬𑀁 𑀞𑀧𑁂𑀢𑁆𑀯𑀸. 𑀚𑁄𑀢𑀺𑀦𑁆𑀢𑀺 𑀅𑀕𑁆𑀕𑀺𑀁.

𑁪𑁭-𑁮. 𑀓𑀧𑁆𑀧𑀩𑀺𑀦𑁆𑀤𑀼𑀁 𑀅𑀦𑀸𑀤𑀸𑀬 𑀦𑀯𑀘𑀻𑀯𑀭𑀪𑁄𑀕𑀺𑀦𑁄 𑀦𑀯𑀁 𑀘𑀻𑀯𑀭𑀁 𑀪𑀼𑀜𑁆𑀚𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀓𑀧𑁆𑀧𑀩𑀺𑀦𑁆𑀤𑀼𑀦𑁆𑀢𑀺 𑀫𑁄𑀭𑀓𑁆𑀔𑀺𑀫𑀡𑁆𑀟𑀮𑀫𑀗𑁆𑀕𑀼𑀮𑀧𑀺𑀝𑁆𑀞𑀻𑀦𑀁 𑀅𑀜𑁆𑀜𑀢𑀭𑀧𑁆𑀧𑀫𑀸𑀡𑀁 𑀓𑀧𑁆𑀧𑀩𑀺𑀦𑁆𑀤𑀼𑀁. 𑀅𑀦𑀸𑀤𑀸𑀬𑀸𑀢𑀺 𑀅𑀦𑀸𑀤𑀺𑀬𑀺𑀢𑁆𑀯𑀸. 𑀪𑀺𑀓𑁆𑀔𑀼𑀦𑁄 𑀘𑀻𑀯𑀭𑀸𑀤𑀺𑀓𑀁 𑀧𑀭𑀺𑀓𑁆𑀔𑀸𑀭𑀁 𑀅𑀧𑀦𑁂𑀢𑁆𑀯𑀸 𑀦𑀺𑀥𑁂𑀦𑁆𑀢𑀲𑁆𑀲 𑀯𑀸 𑀦𑀺𑀥𑀸𑀧𑁂𑀦𑁆𑀢𑀲𑁆𑀲 𑀯𑀸 𑀳𑀲𑀸𑀧𑁂𑀓𑁆𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀸𑀘𑀺𑀢𑁆𑀢𑀺 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀘𑀻𑀯𑀭𑀸𑀤𑀺𑀓𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀢𑁆𑀢𑀦𑀺𑀲𑀻𑀤𑀦𑀲𑀽𑀘𑀺𑀖𑀭𑀓𑀸𑀬𑀩𑀦𑁆𑀥𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀦𑀺𑀥𑁂𑀦𑁆𑀢𑀲𑁆𑀲𑀸𑀢𑀺 𑀦𑀺𑀤𑀳𑀦𑁆𑀢𑀲𑁆𑀲. 𑀳𑀲𑀸𑀧𑁂𑀓𑁆𑀔𑀲𑁆𑀲𑀸𑀢𑀺 𑀳𑀲𑀸𑀥𑀺𑀧𑁆𑀧𑀸𑀬𑀲𑁆𑀲. 𑀚𑀸𑀦𑀁 𑀧𑀸𑀡𑀁 𑀳𑀦𑁂 𑀪𑀺𑀓𑁆𑀔𑀼, 𑀢𑀺𑀭𑀘𑁆𑀙𑀸𑀦𑀕𑀢𑀫𑁆𑀧𑀺 𑀘𑀸𑀢𑀺 𑀬𑁄 𑀪𑀺𑀓𑁆𑀔𑀼 ‘‘𑀧𑀸𑀡𑁄’’𑀢𑀺 𑀚𑀸𑀦𑀦𑁆𑀢𑁄 𑀢𑀺𑀭𑀘𑁆𑀙𑀸𑀦𑀕𑀢𑀁 𑀧𑀸𑀡𑀁 𑀔𑀼𑀤𑁆𑀤𑀓𑀫𑁆𑀧𑀺 𑀫𑀳𑀦𑁆𑀢𑀫𑁆𑀧𑀺 𑀳𑀦𑁂𑀬𑁆𑀬, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄.

𑁪𑁯. 𑀙𑀸𑀤𑁂𑀢𑀼𑀓𑀸𑀫𑁄 𑀙𑀸𑀤𑁂𑀢𑀺, 𑀤𑀼𑀝𑁆𑀞𑀼𑀮𑁆𑀮𑀁 𑀪𑀺𑀓𑁆𑀔𑀼𑀦𑁄𑀧𑀺 𑀘𑀸𑀢𑀺 𑀬𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑁄 𑀤𑀼𑀝𑁆𑀞𑀼𑀮𑁆𑀮𑀲𑀗𑁆𑀔𑀸𑀢𑀁 𑀲𑀗𑁆𑀖𑀸𑀤𑀺𑀲𑁂𑀲𑀁 𑀙𑀸𑀤𑁂𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀙𑀸𑀤𑁂𑀢𑀺, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀇𑀢𑁆𑀣𑀺𑀬𑀸 𑀲𑀳 𑀲𑀁𑀯𑀺𑀥𑀸𑀬 𑀕𑀸𑀫𑀦𑁆𑀢𑀭𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑁫𑁦. 𑀪𑀺𑀓𑁆𑀔𑀼𑀁 𑀯𑀸 𑀧𑀳𑀭𑁂𑀬𑁆𑀬𑀸𑀣𑀸𑀢𑀺 𑀬𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀧𑀳𑀭𑁂𑀬𑁆𑀬, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸𑀢𑀺 𑀬𑁄𑀚𑀦𑀸. 𑀢𑀮𑀲𑀢𑁆𑀢𑀺𑀓𑀫𑀼𑀕𑁆𑀕𑀺𑀭𑁂𑀢𑀺 𑀬𑁄 𑀪𑀺𑀓𑁆𑀔𑀼 𑀧𑀳𑀭𑀡𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀓𑀸𑀬𑀁 𑀯𑀸 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀁 𑀯𑀸 𑀉𑀕𑁆𑀕𑀺𑀭𑁂𑀬𑁆𑀬, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀘𑁄𑀤𑁂𑀬𑁆𑀬 𑀯𑀸 𑀘𑁄𑀤𑀸𑀧𑁂𑀬𑁆𑀬, 𑀪𑀺𑀓𑁆𑀔𑀼𑀁 𑀅𑀫𑀽𑀮𑀓𑁂𑀦 𑀘𑀸𑀢𑀺 𑀬𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀅𑀫𑀽𑀮𑀓𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀘𑁄𑀤𑁂𑀬𑁆𑀬 𑀯𑀸 𑀘𑁄𑀤𑀸𑀧𑁂𑀬𑁆𑀬 𑀯𑀸, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀅𑀫𑀽𑀮𑀓𑁂𑀦𑀸𑀢𑀺 𑀤𑀺𑀝𑁆𑀞𑀸𑀤𑀺𑀫𑀽𑀮𑀯𑀺𑀭𑀳𑀺𑀢𑁂𑀦.

𑁫𑁧. 𑀓𑀼𑀓𑁆𑀓𑀼𑀘𑁆𑀘𑀼𑀧𑁆𑀧𑀸𑀤𑀦𑁂 𑀘𑀸𑀧𑀻𑀢𑀺 ‘‘𑀊𑀦𑀯𑀻𑀲𑀢𑀺𑀯𑀲𑁆𑀲𑁄 𑀢𑁆𑀯𑀁 𑀫𑀜𑁆𑀜𑁂’’𑀢𑀺𑀆𑀤𑀻𑀦𑀺 𑀪𑀡𑀦𑁆𑀢𑁄 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀸𑀤𑁂𑀬𑁆𑀬, 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀼𑀧𑁆𑀧𑀸𑀤𑀦𑀧𑀘𑁆𑀘𑀬𑀸 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀺. 𑀬𑁄 𑀪𑀺𑀓𑁆𑀔𑀼 𑀪𑀡𑁆𑀟𑀦𑀢𑁆𑀣𑀸𑀬 𑀪𑀡𑁆𑀟𑀦𑀚𑀸𑀢𑀸𑀦𑀁 𑀯𑀘𑀦𑀁 𑀲𑁄𑀢𑀼𑀁 𑀉𑀧𑀲𑁆𑀲𑀼𑀢𑀺𑀁 𑀬𑀸𑀢𑀺, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀪𑀡𑁆𑀟𑀦𑀢𑁆𑀣𑀸𑀬𑀸𑀢𑀺 𑀓𑀮𑀳𑀢𑁆𑀣𑀸𑀬. 𑀪𑀡𑁆𑀟𑀦𑀚𑀸𑀢𑀸𑀦𑀦𑁆𑀢𑀺 𑀓𑀮𑀳𑀚𑀸𑀢𑀸𑀦𑀁. 𑀉𑀧𑀲𑁆𑀲𑀼𑀢𑀺𑀦𑁆𑀢𑀺 𑀲𑀼𑀢𑀺𑀲𑀫𑀻𑀧𑀁.

𑁫𑁨. 𑀬𑁄 𑀪𑀺𑀓𑁆𑀔𑀼 𑀲𑀗𑁆𑀖𑀲𑁆𑀲 𑀧𑀭𑀺𑀡𑀸𑀫𑀺𑀢𑀁 𑀬𑀁 𑀮𑀸𑀪𑀁, 𑀢𑀁 𑀧𑀭𑀧𑀼𑀕𑁆𑀕𑀮𑀲𑁆𑀲 𑀦𑀸𑀫𑁂𑀢𑀺, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀦𑀸𑀫𑁂𑀢𑀻𑀢𑀺 𑀧𑀭𑀺𑀡𑀸𑀫𑁂𑀢𑀺. 𑀧𑀼𑀘𑁆𑀙𑀁 𑀅𑀓𑀢𑁆𑀯𑀸𑀢𑀺 ‘‘𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀦𑀁 𑀆𑀧𑀼𑀘𑁆𑀙𑀸𑀫𑀻’’𑀢𑀺 𑀯𑀸 ‘‘𑀕𑀸𑀫𑀁 𑀧𑀯𑀺𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀸 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸. 𑀲𑀦𑁆𑀢𑀪𑀺𑀓𑁆𑀔𑀼𑀦𑁆𑀢𑀺 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬 𑀤𑀲𑁆𑀲𑀦𑀽𑀧𑀘𑀸𑀭𑁂 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀬𑀁 𑀲𑀓𑁆𑀓𑀸 𑀳𑁄𑀢𑀺 𑀧𑀓𑀢𑀺𑀯𑀘𑀦𑁂𑀦 𑀆𑀧𑀼𑀘𑁆𑀙𑀺𑀢𑀼𑀁, 𑀢𑀸𑀤𑀺𑀲𑀁 𑀯𑀺𑀚𑁆𑀚𑀫𑀸𑀦𑀁 𑀪𑀺𑀓𑁆𑀔𑀼𑀁. 𑀕𑀸𑀫𑀲𑁆𑀲𑀸𑀢𑀺 𑀕𑀸𑀫𑀁, 𑀓𑀫𑁆𑀫𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀕𑀢𑁂𑀢𑀺 𑀲𑀫𑁆𑀧𑀤𑀸𑀦𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁, 𑀕𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀓𑀸𑀮𑁂 𑀕𑀸𑀫𑀁 𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀸𑀘𑀺𑀢𑁆𑀢𑀺𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀓𑀺𑀡𑁆𑀡𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁫𑁩. 𑀇𑀤𑀸𑀦𑀺 𑀧𑀓𑀺𑀡𑁆𑀡𑀓𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀗𑁆𑀖𑀺𑀓’’𑀦𑁆𑀢𑁆𑀬𑀸𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑁄 𑀪𑀺𑀓𑁆𑀔𑀼 𑀇𑀲𑁆𑀲𑀭𑁄 𑀳𑀼𑀢𑁆𑀯𑀸 𑀲𑀗𑁆𑀖𑀺𑀓𑀁 𑀕𑀭𑀼𑀪𑀡𑁆𑀟𑀁 𑀅𑀜𑁆𑀜𑀲𑁆𑀲 𑀤𑁂𑀢𑀺, 𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸. 𑀣𑁂𑀬𑁆𑀬𑀸𑀬 𑀅𑀜𑁆𑀜𑀲𑁆𑀲 𑀤𑁂𑀢𑀺, 𑀬𑀣𑀸𑀯𑀢𑁆𑀣𑀼 𑀧𑀸𑀭𑀸𑀚𑀺𑀓𑀸𑀤𑀺 𑀲𑀺𑀬𑀸, 𑀤𑀼𑀓𑁆𑀓𑀝𑀯𑀢𑁆𑀣𑀼 𑀤𑀼𑀓𑁆𑀓𑀝𑀁, 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀼 𑀣𑀼𑀮𑁆𑀮𑀘𑁆𑀘𑀬𑀁, 𑀧𑀸𑀭𑀸𑀚𑀺𑀓𑀯𑀢𑁆𑀣𑀼 𑀧𑀸𑀭𑀸𑀚𑀺𑀓𑀁 𑀲𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁫𑁪. 𑀓𑀼𑀲𑀸𑀤𑀺𑀫𑀬𑀘𑀻𑀭𑀸𑀦𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁄 𑀯𑀸𑀓𑀨𑀮𑀓𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀓𑀼𑀲𑀫𑀬𑀘𑀻𑀭𑀁 𑀯𑀸𑀓𑀫𑀬𑀘𑀻𑀭𑀁 𑀨𑀮𑀓𑀫𑀬𑀘𑀻𑀭𑀦𑁆𑀢𑀺. 𑀢𑀢𑁆𑀣 𑀓𑀼𑀲𑁂 𑀕𑀦𑁆𑀣𑁂𑀢𑁆𑀯𑀸 𑀓𑀢𑀘𑀻𑀭𑀁 𑀓𑀼𑀲𑀫𑀬𑀘𑀻𑀭𑀁. 𑀯𑀸𑀓𑀫𑀬𑀘𑀻𑀭𑀁 𑀦𑀸𑀫 𑀢𑀸𑀧𑀲𑀸𑀦𑀁 𑀯𑀓𑁆𑀓𑀮𑀁. 𑀨𑀮𑀓𑀫𑀬𑀘𑀻𑀭𑀁 𑀦𑀸𑀫 𑀨𑀮𑀓𑀲𑀡𑁆𑀞𑀸𑀦𑀸𑀦𑀺 𑀨𑀮𑀓𑀸𑀦𑀺 𑀲𑀺𑀩𑁆𑀩𑁂𑀢𑁆𑀯𑀸 𑀓𑀢𑀘𑀻𑀭𑀁. 𑀓𑀫𑁆𑀩𑀮𑀁 𑀓𑁂𑀲𑀯𑀸𑀮𑀚𑀦𑁆𑀢𑀺 𑀓𑁂𑀲𑀚𑀁 𑀓𑀫𑁆𑀩𑀮𑀁 𑀯𑀸𑀮𑀚𑀁 𑀓𑀫𑁆𑀩𑀮𑀁, 𑀓𑁂𑀲𑀓𑀫𑁆𑀩𑀮𑀁 𑀯𑀸𑀮𑀓𑀫𑁆𑀩𑀮𑀦𑁆𑀢𑀺 𑀅𑀢𑁆𑀣𑁄. 𑀓𑁂𑀲𑁂𑀳𑀺 𑀢𑀦𑁆𑀢𑁂 𑀯𑀸𑀬𑀺𑀢𑁆𑀯𑀸 𑀓𑀢𑀓𑀫𑁆𑀩𑀮𑀁 𑀓𑁂𑀲𑀓𑀫𑁆𑀩𑀮𑀁. 𑀘𑀫𑀭𑀺𑀯𑀸𑀮𑁂𑀳𑀺 𑀯𑀸𑀬𑀺𑀢𑁆𑀯𑀸 𑀓𑀢𑀓𑀫𑁆𑀩𑀮𑀁 𑀯𑀸𑀮𑀓𑀫𑁆𑀩𑀮𑀁. 𑀲𑀫𑀬𑀁 𑀯𑀺𑀦𑀸𑀢𑀺 𑀦𑀝𑁆𑀞𑀘𑀻𑀯𑀭𑀓𑀸𑀮𑀁 𑀞𑀧𑁂𑀢𑁆𑀯𑀸. 𑀥𑀸𑀭𑀬𑀢𑁄 𑀥𑀸𑀭𑀬𑀦𑁆𑀢𑀲𑁆𑀲. 𑀮𑀽𑀓𑀧𑀓𑁆𑀔𑀸𑀚𑀺𑀦𑀓𑁆𑀔𑀺𑀧𑀦𑁆𑀢𑀺 𑀉𑀮𑀽𑀓𑀧𑀓𑁆𑀔𑀺𑀅𑀚𑀺𑀦𑀓𑁆𑀔𑀺𑀧𑀁. 𑀢𑀢𑁆𑀣 𑀉𑀮𑀽𑀓𑀧𑀓𑁆𑀔𑀻𑀢𑀺 𑀉𑀮𑀽𑀓𑀲𑀓𑀼𑀡𑀧𑀓𑁆𑀔𑁂𑀳𑀺 𑀓𑀢𑀦𑀺𑀯𑀸𑀲𑀦𑀁. 𑀅𑀚𑀺𑀦𑀓𑁆𑀔𑀺𑀧𑀦𑁆𑀢𑀺 𑀲𑀮𑁄𑀫𑀁 𑀲𑀔𑀼𑀭𑀁 𑀅𑀚𑀺𑀦𑀫𑀺𑀕𑀘𑀫𑁆𑀫𑀁. 𑀦𑀝𑁆𑀞𑀘𑀻𑀯𑀭𑀓𑀸𑀮𑀁 𑀞𑀧𑁂𑀢𑁆𑀯𑀸 𑀇𑀫𑁂𑀲𑀼 𑀲𑀢𑁆𑀢𑀲𑀼 𑀯𑀢𑁆𑀣𑀽𑀲𑀼 𑀬𑀁 𑀓𑀺𑀜𑁆𑀘𑀺 𑀥𑀸𑀭𑀬𑀢𑁄 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄.

𑁫𑁫. 𑀲𑀢𑁆𑀣𑀓𑁂𑀦 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁 𑀲𑀢𑁆𑀣𑀓𑀫𑁆𑀫𑀁, 𑀢𑀲𑁆𑀫𑀺𑀁 𑀲𑀢𑁆𑀣𑀓𑀫𑁆𑀫𑁂. 𑀯𑀢𑁆𑀣𑀺𑀫𑁆𑀳𑀺 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁 𑀯𑀢𑁆𑀣𑀺𑀓𑀫𑁆𑀫𑀁, 𑀢𑀲𑁆𑀫𑀺𑀁 𑀯𑀢𑁆𑀣𑀺𑀓𑀫𑁆𑀫𑁂. 𑀲𑀁 𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀁. 𑀢𑀁 𑀙𑀺𑀦𑁆𑀤𑀢𑁄 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀁𑀲𑀸𑀤𑀺𑀪𑁄𑀚𑀦𑁂𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁄 𑀅𑀝𑁆𑀞𑀺𑀮𑁄𑀳𑀺𑀢𑀘𑀫𑁆𑀫𑀮𑁄𑀫𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀲𑁆𑀫𑀸 𑀫𑀦𑀼𑀲𑁆𑀲𑀸𑀦𑀁 𑀫𑀁𑀲𑀅𑀝𑁆𑀞𑀺𑀮𑁄𑀳𑀺𑀢𑀘𑀫𑁆𑀫𑀮𑁄𑀫𑀪𑁄𑀚𑀦𑀧𑀘𑁆𑀘𑀬𑀸 𑀣𑀼𑀮𑁆𑀮𑀘𑁆𑀘𑀬𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄.

𑁫𑁬. 𑀓𑀤𑀮𑁂𑀭𑀓𑀓𑁆𑀓𑀤𑀼𑀲𑁆𑀲𑀸𑀦𑀻𑀢𑀺 𑀏𑀢𑁆𑀣 𑀓𑀤𑀮𑀺𑀏𑀭𑀓𑀅𑀓𑁆𑀓𑀯𑀸𑀓𑁂𑀳𑀺 𑀓𑀢𑀸𑀦𑀺 𑀯𑀢𑁆𑀣𑀸𑀦𑀺 𑀥𑀸𑀭𑀬𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀧𑁄𑀢𑁆𑀣𑀓𑀦𑁆𑀢𑀺 𑀫𑀓𑀘𑀺𑀯𑀸𑀓𑁂𑀳𑀺 𑀓𑀢𑀁 𑀧𑁄𑀢𑁆𑀣𑀓𑀤𑀼𑀲𑁆𑀲𑀁. 𑀲𑀩𑁆𑀩𑀧𑀻𑀢𑀸𑀤𑀺𑀓𑀦𑁆𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀲𑀩𑁆𑀩𑀮𑁄𑀳𑀺𑀢𑀓𑀲𑀩𑁆𑀩𑀓𑀡𑁆𑀳𑀓𑀲𑀩𑁆𑀩𑀫𑀜𑁆𑀚𑁂𑀝𑁆𑀞𑀺𑀓𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀲𑀩𑁆𑀩𑀫𑁂𑀯 𑀦𑀻𑀮𑀓𑀁 𑀲𑀩𑁆𑀩𑀦𑀻𑀮𑀓𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀦𑀻𑀮𑀁 𑀉𑀫𑁆𑀫𑀸𑀭𑀧𑀼𑀧𑁆𑀨𑀯𑀡𑁆𑀡𑀁. 𑀧𑀻𑀢𑀁 𑀓𑀡𑀺𑀓𑀸𑀭𑀧𑀼𑀧𑁆𑀨𑀯𑀡𑁆𑀡𑀁. 𑀮𑁄𑀳𑀺𑀢𑀁 𑀚𑀬𑀲𑀼𑀫𑀦𑀧𑀼𑀧𑁆𑀨𑀯𑀡𑁆𑀡𑀁. 𑀓𑀡𑁆𑀳𑀓𑀁 𑀅𑀤𑁆𑀤𑀸𑀭𑀺𑀝𑁆𑀞𑀓𑀯𑀡𑁆𑀡𑀁. 𑀫𑀜𑁆𑀚𑁂𑀝𑁆𑀞𑀺𑀓𑀁 𑀮𑀸𑀔𑀸𑀭𑀲𑀯𑀡𑁆𑀡𑀁. 𑀇𑀫𑁂𑀲𑀼 𑀅𑀝𑁆𑀞𑀲𑀼 𑀯𑀢𑁆𑀣𑀽𑀲𑀼 𑀬𑀁 𑀓𑀺𑀜𑁆𑀘𑀺 𑀥𑀸𑀭𑀬𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄.

𑁫𑁭-𑁮. 𑀳𑀢𑁆𑀣𑀺𑀲𑁆𑀲𑀼𑀭𑀕𑀲𑁄𑀡𑀸𑀦𑀦𑁆𑀢𑀺 𑀳𑀢𑁆𑀣𑀺𑀅𑀲𑁆𑀲𑀉𑀭𑀕𑀲𑁄𑀡𑀸𑀦𑀁 𑀫𑀁𑀲𑀁 𑀅𑀝𑁆𑀞𑀺𑀭𑀼𑀥𑀺𑀭𑀘𑀫𑁆𑀫𑀮𑁄𑀫𑀸𑀦𑀺. 𑀲𑀻𑀳𑀩𑁆𑀬𑀕𑁆𑀖𑀘𑁆𑀙𑀤𑀻𑀧𑀺𑀦𑀦𑁆𑀢𑀺 𑀲𑀻𑀳𑀩𑁆𑀬𑀕𑁆𑀖𑀅𑀘𑁆𑀙𑀤𑀻𑀧𑀻𑀦𑀁 𑀫𑀁𑀲𑀸𑀤𑀻𑀦𑀺. 𑀢𑀭𑀘𑁆𑀙𑀲𑁆𑀲 𑀘 𑀫𑀁𑀲𑀸𑀤𑀺𑀁 𑀉𑀤𑁆𑀤𑀺𑀲𑁆𑀲𑀓𑀢𑀫𑀁𑀲𑀜𑁆𑀘 𑀅𑀦𑀸𑀧𑀼𑀘𑁆𑀙𑀺𑀢𑀫𑀁𑀲𑀜𑁆𑀘 𑀪𑀼𑀜𑁆𑀚𑀢𑁄 𑀤𑀼𑀓𑁆𑀓𑀝𑀁 𑀲𑀺𑀬𑀸. 𑀤𑀓𑀢𑀺𑀢𑁆𑀣𑀸𑀤𑀺𑀓𑀦𑁆𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁄 𑀯𑀘𑁆𑀘𑀧𑀲𑁆𑀲𑀸𑀯𑀓𑀼𑀝𑀺𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀦 𑀬𑀸𑀢𑀸𑀦𑀼𑀧𑀼𑀩𑁆𑀩𑀁 𑀆𑀕𑀢𑀧𑁆𑀧𑀝𑀺𑀧𑀸𑀝𑀺𑀁 𑀳𑀺𑀢𑁆𑀯𑀸𑀦 𑀯𑀚𑁆𑀚𑁂𑀢𑁆𑀯𑀸 𑀦𑀳𑀸𑀦𑀢𑀺𑀢𑁆𑀣𑀜𑁆𑀘 𑀯𑀘𑁆𑀘𑀓𑀼𑀝𑀺𑀜𑁆𑀘 𑀧𑀲𑁆𑀲𑀸𑀯𑀓𑀼𑀝𑀺𑀜𑁆𑀘 𑀯𑀚𑁂 𑀯𑀚𑁂𑀬𑁆𑀬 𑀕𑀘𑁆𑀙𑁂𑀬𑁆𑀬, 𑀤𑀼𑀓𑁆𑀓𑀝𑀁 𑀢𑀲𑁆𑀲 𑀲𑀺𑀬𑀸𑀢𑀺 𑀅𑀢𑁆𑀣𑁄.

𑁫𑁯. 𑀲𑀳𑀲𑀸𑀢𑀺 𑀯𑁂𑀕𑀲𑀸 𑀯𑁂𑀕𑁂𑀦. 𑀯𑀼𑀩𑁆𑀪𑀚𑀺𑀢𑁆𑀯𑀸𑀦𑀸𑀢𑀺 𑀅𑀦𑁆𑀢𑀭𑀯𑀸𑀲𑀓𑀁 𑀤𑀽𑀭𑀢𑁄𑀯 𑀉𑀓𑁆𑀔𑀺𑀧𑀺𑀢𑁆𑀯𑀸, 𑀯-𑀓𑀸𑀭𑁄 𑀲𑀦𑁆𑀥𑀺𑀯𑀲𑁂𑀦𑀸𑀕𑀢𑁄. 𑀧𑀯𑀺𑀲𑁂𑀢𑀺 𑀧𑀯𑀺𑀲𑁂𑀬𑁆𑀬. 𑀯𑀘𑁆𑀘𑀧𑀲𑁆𑀲𑀸𑀯𑀓𑀼𑀝𑀺𑀓𑀦𑁆𑀢𑀺 𑀯𑀘𑁆𑀘𑀓𑀼𑀝𑀺𑀓𑀁 𑀧𑀲𑁆𑀲𑀸𑀯𑀓𑀼𑀝𑀺𑀓𑀁. 𑀯𑀺𑀲𑁂𑀢𑀺 𑀧𑀯𑀺𑀲𑁂𑀬𑁆𑀬. 𑀬𑁄 𑀪𑀺𑀓𑁆𑀔𑀼 𑀯𑀘𑁆𑀘𑀧𑀲𑁆𑀲𑀸𑀯𑀓𑀼𑀝𑀺𑀓𑀁 𑀲𑀳𑀲𑀸 𑀧𑀯𑀺𑀲𑁂𑀬𑁆𑀬 𑀯𑀸 𑀦𑀺𑀓𑁆𑀔𑀫𑁂𑀬𑁆𑀬 𑀯𑀸, 𑀉𑀩𑁆𑀪𑀚𑀺𑀢𑁆𑀯𑀸 𑀯𑀸 𑀧𑀯𑀺𑀲𑁂𑀬𑁆𑀬 𑀯𑀸 𑀦𑀺𑀓𑁆𑀔𑀫𑁂𑀬𑁆𑀬 𑀯𑀸, 𑀉𑀓𑁆𑀓𑀸𑀲𑀺𑀓𑀁 𑀯𑀚𑁆𑀚𑁂𑀢𑁆𑀯𑀸 𑀢𑀁 𑀧𑀯𑀺𑀲𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑁬𑁦. 𑀦𑀺𑀢𑁆𑀣𑀼𑀦𑀦𑁆𑀢𑁄 𑀯𑀘𑁆𑀘𑀁 𑀓𑀭𑁂𑀬𑁆𑀬 𑀤𑀦𑁆𑀢𑀓𑀝𑁆𑀞𑀜𑁆𑀘 𑀔𑀸𑀤𑀦𑁆𑀢𑁄, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀯𑀘𑁆𑀘𑀧𑀲𑁆𑀲𑀸𑀯𑀤𑁄𑀡𑀻𑀦𑀁 𑀩𑀳𑀺 𑀯𑀘𑁆𑀘𑀸𑀤𑀺𑀓𑀁 𑀯𑀘𑁆𑀘𑀧𑀲𑁆𑀲𑀸𑀯𑀁 𑀓𑀭𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸.

𑁬𑁧. 𑀔𑀭𑁂𑀦 𑀘𑀸𑀯𑀮𑁂𑀔𑁂𑀬𑁆𑀬𑀸𑀢𑀺 𑀨𑀸𑀮𑀺𑀢𑀓𑀝𑁆𑀞𑁂𑀦 𑀯𑀸 𑀨𑀭𑀼𑀲𑁂𑀦 𑀯𑀸 𑀕𑀡𑁆𑀞𑀺𑀓𑁂𑀦 𑀯𑀸 𑀧𑀽𑀢𑀺𑀓𑀝𑁆𑀞𑁂𑀦 𑀯𑀸 𑀲𑀼𑀲𑀺𑀭𑁂𑀦 𑀯𑀸 𑀅𑀯𑀮𑁂𑀔𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀓𑀝𑁆𑀞𑀦𑁆𑀢𑀺 𑀅𑀯𑀮𑁂𑀔𑀦𑀓𑀝𑁆𑀞𑀁. 𑀓𑀽𑀧𑀓𑁂𑀢𑀺 𑀯𑀘𑁆𑀘𑀓𑀽𑀧𑀓𑁂. 𑀊𑀳𑀢𑀜𑁆𑀘𑀸𑀢𑀺 𑀕𑀽𑀣𑀫𑀓𑁆𑀔𑀺𑀢𑀜𑁆𑀘. 𑀦 𑀥𑁄𑀯𑁂𑀬𑁆𑀬𑀸𑀢𑀺 𑀅𑀢𑁆𑀢𑀦𑀸 𑀯𑀸 𑀦 𑀥𑁄𑀯𑁂𑀬𑁆𑀬 𑀧𑀭𑁂𑀦 𑀯𑀸 𑀦 𑀥𑁄𑀯𑀸𑀧𑁂𑀬𑁆𑀬. 𑀉𑀓𑁆𑀮𑀸𑀧𑀜𑁆𑀘𑀸𑀢𑀺 𑀓𑀘𑀯𑀭𑀜𑁆𑀘. 𑀦 𑀲𑁄𑀥𑀬𑁂𑀦 𑀲𑀫𑁆𑀫𑀚𑁆𑀚𑁂𑀬𑁆𑀬.

𑁬𑁨. 𑀘𑀧𑀼𑀘𑀧𑀽𑀢𑀺 𑀲𑀤𑁆𑀤𑀁 𑀓𑀢𑁆𑀯𑀸 𑀉𑀤𑀓𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀲𑁆𑀲 𑀆𑀘𑀫𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀅𑀦𑀚𑁆𑀛𑀺𑀝𑁆𑀞𑁄𑀯𑀸𑀢𑀺 𑀅𑀦𑀸𑀡𑀢𑁆𑀢𑁄𑀬𑁂𑀯. 𑀣𑁂𑀭𑁂𑀦𑀸𑀢𑀺 𑀲𑀗𑁆𑀖𑀢𑁆𑀣𑁂𑀭𑁂𑀦. 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁. 𑀉𑀤𑁆𑀤𑀺𑀲𑁂 𑀉𑀤𑁆𑀤𑀺𑀲𑁂𑀬𑁆𑀬, 𑀤𑀼𑀓𑁆𑀓𑀝𑀁 𑀲𑀺𑀬𑀸.

𑁬𑁩. 𑀅𑀦𑀸𑀧𑀼𑀘𑁆𑀙𑀸𑀬 𑀧𑀜𑁆𑀳𑀲𑁆𑀲 𑀓𑀣𑀦𑁂, 𑀅𑀦𑀸𑀧𑀼𑀘𑁆𑀙𑀸𑀬 𑀧𑀜𑁆𑀳𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂, 𑀅𑀦𑀸𑀧𑀼𑀘𑁆𑀙𑀸𑀬 𑀲𑀚𑁆𑀛𑀸𑀬𑀓𑀭𑀡𑁂, 𑀅𑀦𑀸𑀧𑀼𑀘𑁆𑀙𑀸𑀬 𑀧𑀤𑀻𑀧𑀚𑀸𑀮𑀦𑁂, 𑀅𑀦𑀸𑀧𑀼𑀘𑁆𑀙𑀸𑀬 𑀧𑀤𑀻𑀧𑀯𑀺𑀚𑁆𑀛𑀸𑀧𑀦𑁂𑀢𑀺 𑀇𑀫𑁂𑀲𑀼 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸.

𑁬𑁪. 𑀅𑀦𑀸𑀧𑀼𑀘𑁆𑀙𑀸 𑀯𑀸𑀢𑀧𑀸𑀦𑀓𑀯𑀸𑀝𑀸𑀦𑀺 𑀯𑀺𑀯𑀭𑁂𑀬𑁆𑀬 𑀯𑀸 𑀣𑀓𑁂𑀬𑁆𑀬 𑀯𑀸, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀦𑁆𑀤𑀦𑀸𑀤𑀺𑀦𑁆𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁄 𑀯𑀦𑁆𑀤𑀸𑀧𑀦𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀬𑁄 𑀪𑀺𑀓𑁆𑀔𑀼 𑀦𑀕𑁆𑀕𑁄 𑀯𑀦𑁆𑀤𑀦𑀁 𑀓𑀭𑁂𑀬𑁆𑀬, 𑀯𑀦𑁆𑀤𑀸𑀧𑀦𑀁 𑀓𑀭𑁂𑀬𑁆𑀬, 𑀕𑀫𑀦𑀁 𑀓𑀭𑁂𑀬𑁆𑀬, 𑀪𑁄𑀚𑀦𑀁 𑀓𑀭𑁂𑀬𑁆𑀬, 𑀧𑀺𑀯𑀦𑀁 𑀓𑀭𑁂𑀬𑁆𑀬, 𑀔𑀸𑀤𑀦𑀁 𑀓𑀭𑁂𑀬𑁆𑀬, 𑀕𑀳𑀡𑀁 𑀓𑀭𑁂𑀬𑁆𑀬, 𑀤𑀸𑀦𑀁 𑀓𑀭𑁂𑀬𑁆𑀬, 𑀢𑀲𑁆𑀲 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁬𑁫. 𑀢𑀺𑀧𑀝𑀺𑀘𑁆𑀙𑀦𑁆𑀦𑀓𑀁 𑀯𑀺𑀦𑀸𑀢𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀧𑀝𑀺𑀘𑁆𑀙𑀸𑀤𑀺𑀬𑁄 𑀚𑀦𑁆𑀢𑀸𑀖𑀭𑀧𑁆𑀧𑀝𑀺𑀘𑁆𑀙𑀸𑀤𑀺𑀁 𑀉𑀤𑀓𑀧𑁆𑀧𑀝𑀺𑀘𑁆𑀙𑀸𑀤𑀺𑀁 𑀯𑀢𑁆𑀣𑀧𑁆𑀧𑀝𑀺𑀘𑁆𑀙𑀸𑀤𑀺’’𑀦𑁆𑀢𑀺 (𑀘𑀽𑀴𑀯. 𑁨𑁬𑁧) 𑀏𑀯𑀁 𑀯𑀼𑀢𑁆𑀢𑀸 𑀢𑀺𑀲𑁆𑀲𑁄 𑀧𑀝𑀺𑀘𑁆𑀙𑀸𑀤𑀺𑀬𑁄 𑀲𑀫𑀸𑀳𑀝𑀸𑀢𑀺 ‘‘𑀢𑀺𑀧𑀝𑀺𑀘𑁆𑀙𑀸𑀤𑀻’’𑀢𑀺 𑀯𑀼𑀢𑁆𑀢𑀁. 𑀢𑀺𑀧𑀝𑀺𑀘𑁆𑀙𑀦𑁆𑀦𑀓𑀁 𑀞𑀧𑁂𑀢𑁆𑀯𑀸 𑀧𑀭𑀺𑀓𑀫𑁆𑀫𑀁 𑀲𑀬𑀁 𑀓𑀭𑁂𑀬𑁆𑀬, 𑀧𑀭𑀁 𑀓𑀸𑀭𑀸𑀧𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀬𑁄 𑀪𑀺𑀓𑁆𑀔𑀼 𑀦𑀳𑀸𑀬𑀁 𑀦𑀳𑀸𑀬𑀦𑁆𑀢𑁄 𑀓𑀼𑀝𑁆𑀝𑁂 𑀯𑀸 𑀣𑀫𑁆𑀪𑁂 𑀯𑀸 𑀢𑀭𑀼𑀫𑁆𑀳𑀺 𑀯𑀸 𑀓𑀸𑀬𑀁 𑀉𑀧𑀖𑀁𑀲𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸.

𑁬𑁬. 𑀬𑁄 𑀪𑀺𑀓𑁆𑀔𑀼 𑀦𑀳𑀸𑀬𑀦𑁆𑀢𑁄 𑀓𑀼𑀭𑀼𑀯𑀺𑀦𑁆𑀤𑀓𑀲𑀼𑀢𑁆𑀢𑁂𑀦 𑀓𑀸𑀬𑀁 𑀖𑀁𑀲𑁂𑀬𑁆𑀬, 𑀓𑀸𑀬𑀢𑁄 𑀓𑀸𑀬𑁂𑀦 𑀅𑀜𑁆𑀜𑀫𑀜𑁆𑀜𑀁 𑀖𑀁𑀲𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁄 𑀅𑀕𑀺𑀮𑀸𑀦𑁄 𑀲𑀉𑀧𑀸𑀳𑀦𑁄 𑀩𑀳𑀸𑀭𑀸𑀫𑁂 𑀩𑀳𑀺𑀆𑀭𑀸𑀫𑁂 𑀘𑀭𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁬𑁭. 𑀲𑀩𑁆𑀩𑀦𑀻𑀮𑀸𑀤𑀺𑀓𑀫𑁆𑀧𑀺 𑀘𑀸𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁄 𑀮𑁄𑀳𑀺𑀢𑁄𑀤𑀸𑀢𑀧𑀻𑀢𑀓𑀡𑁆𑀳𑀫𑀜𑁆𑀚𑁂𑀝𑁆𑀞𑀫𑀳𑀸𑀭𑀗𑁆𑀕𑀫𑀳𑀸𑀦𑀸𑀫𑀭𑀗𑁆𑀕𑀭𑀢𑁆𑀢𑀸𑀤𑀬𑁄 𑀉𑀧𑀸𑀳𑀦𑀸𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀬𑁄 𑀪𑀺𑀓𑁆𑀔𑀼 𑀲𑀩𑁆𑀩𑀦𑀻𑀮𑀲𑀩𑁆𑀩𑀮𑁄𑀳𑀺𑀢𑀸𑀤𑀺𑀓𑀁 𑀉𑀧𑀸𑀳𑀦𑀁 𑀥𑀸𑀭𑁂𑀢𑀺, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁄 𑀪𑀺𑀓𑁆𑀔𑀼 𑀭𑀢𑁆𑀢𑁄 𑀭𑀢𑁆𑀢𑀘𑀺𑀢𑁆𑀢𑁄 𑀢𑀤𑀳𑀼𑀚𑀸𑀢𑀸𑀬𑀧𑀺 𑀇𑀢𑁆𑀣𑀺𑀬𑀸 𑀦𑀺𑀫𑀺𑀢𑁆𑀢𑀁 𑀧𑀲𑁆𑀲𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸. 𑀬𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀤𑀸𑀬𑀺𑀬𑀸 𑀪𑀺𑀓𑁆𑀔𑀤𑀸𑀬𑀺𑀓𑀸𑀬 𑀇𑀢𑁆𑀣𑀺𑀬𑀸 𑀫𑀼𑀔𑀁 𑀧𑀲𑁆𑀲𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸.

𑁬𑁮-𑁯. 𑀬𑁄 𑀪𑀺𑀓𑁆𑀔𑀼 𑀉𑀚𑁆𑀛𑀸𑀦𑀲𑀜𑁆𑀜𑀻 𑀳𑀼𑀢𑁆𑀯𑀸 𑀅𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀢𑁆𑀢𑀁 𑀯𑀸 𑀧𑀲𑁆𑀲𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸. 𑀆𑀤𑀸𑀲𑀸𑀤𑀺𑀫𑁆𑀳𑀺 𑀉𑀤𑀓𑀧𑀢𑁆𑀢𑁂 𑀅𑀢𑁆𑀢𑀦𑁄 𑀫𑀼𑀔𑀁 𑀧𑀲𑁆𑀲𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸. 𑀉𑀘𑁆𑀘𑀸𑀲𑀦𑀫𑀳𑀸𑀲𑀦𑁂 𑀦𑀺𑀲𑀚𑁆𑀚𑀸𑀤𑀺𑀁 𑀦𑀺𑀲𑀻𑀤𑀦𑀲𑀬𑀦𑀸𑀤𑀺𑀁 𑀓𑀭𑁄𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀁 𑀲𑀺𑀬𑀸. 𑀉𑀓𑁆𑀔𑀺𑀢𑁆𑀢𑀸𑀦𑀼𑀧𑀲𑀫𑁆𑀧𑀦𑁆𑀦𑀦𑀸𑀦𑀸𑀲𑀁𑀯𑀸𑀲𑀓𑀸𑀤𑀻𑀦𑀁 𑀯𑀦𑁆𑀤𑀦𑁂𑀧𑀺 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀉𑀓𑁆𑀔𑀺𑀢𑁆𑀢𑁄𑀢𑀺 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀢𑁆𑀢𑀓𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑀺𑀢𑁆𑀢𑀓𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑀺𑀢𑁆𑀢𑀓𑁄𑀢𑀺 𑀢𑀺𑀯𑀺𑀥𑁄𑀧𑀺 𑀇𑀥𑀸𑀥𑀺𑀧𑁆𑀧𑁂𑀢𑁄. 𑀅𑀦𑀼𑀧𑀲𑀫𑁆𑀧𑀦𑁆𑀦𑁄𑀢𑀺 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀺𑀲𑀸𑀫𑀡𑁂𑀭𑀲𑀸𑀫𑀡𑁂𑀭𑀺𑀲𑀺𑀓𑁆𑀔𑀫𑀸𑀦𑀧𑀡𑁆𑀟𑀓𑀇𑀢𑁆𑀣𑀺𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀢𑀓𑀸 𑀕𑀳𑀺𑀢𑀸. 𑀦𑀸𑀦𑀸𑀲𑀁𑀯𑀸𑀲𑀓𑀸𑀢𑀺 𑀮𑀤𑁆𑀥𑀺𑀦𑀸𑀦𑀸𑀲𑀁𑀯𑀸𑀲𑀓𑀸 𑀕𑀳𑀺𑀢𑀸. 𑀆𑀤𑀺-𑀲𑀤𑁆𑀤𑁂𑀦 𑀙𑀺𑀦𑁆𑀦𑀫𑀽𑀮𑀓𑀸 𑀕𑀳𑀺𑀢𑀸.

𑁭𑁦-𑁭𑁧. 𑀬𑁄 𑀤𑀻𑀖𑀸𑀲𑀦𑁂 𑀧𑀡𑁆𑀟𑀓𑀺𑀢𑁆𑀣𑀻𑀳𑀺 𑀧𑀡𑁆𑀟𑀓𑁂𑀦 𑀯𑀸 𑀇𑀢𑁆𑀣𑀺𑀬𑀸 𑀯𑀸 𑀉𑀪𑀢𑁄𑀩𑁆𑀬𑀜𑁆𑀚𑀦𑁂𑀦 𑀯𑀸 𑀏𑀓𑀢𑁄 𑀦𑀺𑀲𑀻𑀤𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸. 𑀅𑀤𑀻𑀖𑁂 𑀆𑀲𑀦𑁂𑀢𑀺 𑀭𑀲𑁆𑀲𑁂 𑀆𑀲𑀦𑁂. 𑀬𑁄 𑀪𑀺𑀓𑁆𑀔𑀼 𑀭𑀲𑁆𑀲𑀸𑀲𑀦𑁂 𑀫𑀜𑁆𑀘𑁂 𑀯𑀸 𑀧𑀻𑀞𑁂 𑀯𑀸 𑀅𑀲𑀫𑀸𑀦𑀸𑀲𑀦𑀺𑀓𑁂𑀦 𑀏𑀓𑀢𑁄 𑀲𑀬𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀨𑀮𑀧𑀼𑀧𑁆𑀨𑀸𑀤𑀺𑀓𑀦𑁆𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀯𑁂𑀴𑀼𑀘𑀼𑀡𑁆𑀡𑀤𑀦𑁆𑀢𑀓𑀝𑁆𑀞𑀫𑀢𑁆𑀢𑀺𑀓𑀸𑀤𑀬𑁄 𑀲𑀗𑁆𑀕𑀳𑀺𑀢𑀸. 𑀓𑀼𑀮𑀲𑀗𑁆𑀕𑀳𑀢𑁆𑀣𑀸𑀬 𑀨𑀮𑀧𑀼𑀧𑁆𑀨𑀸𑀤𑀺𑀓𑀁 𑀤𑀤𑀢𑁄 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁭𑁨-𑁩. 𑀬𑁄 𑀪𑀺𑀓𑁆𑀔𑀼 𑀕𑀦𑁆𑀣𑀺𑀫𑀸𑀤𑀺𑀁 𑀲𑀬𑀁 𑀓𑀭𑁂𑀬𑁆𑀬, 𑀧𑀭𑀁 𑀓𑀸𑀭𑀸𑀧𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸. 𑀬𑁄 𑀪𑀺𑀓𑁆𑀔𑀼 𑀚𑀺𑀦𑁂𑀦 𑀯𑀸𑀭𑀺𑀢𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸. 𑀅𑀩𑁆𑀬𑀢𑁆𑀢𑁄 𑀩𑀸𑀮𑁄 𑀬𑁄 𑀪𑀺𑀓𑁆𑀔𑀼 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂 𑀅𑀦𑀺𑀲𑁆𑀲𑀸𑀬 𑀦𑀺𑀲𑁆𑀲𑀬𑀁 𑀅𑀕𑁆𑀕𑀳𑁂𑀢𑁆𑀯𑀸 𑀯𑀲𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸. 𑀬𑁄 𑀪𑀺𑀓𑁆𑀔𑀼 𑀅𑀦𑀼𑀜𑁆𑀜𑀸𑀢𑁂𑀳𑀺 𑀫𑀸𑀢𑀸𑀧𑀺𑀢𑀼𑀆𑀤𑀻𑀳𑀺 𑀧𑀼𑀕𑁆𑀕𑀮𑁂𑀳𑀺 𑀅𑀜𑁆𑀜𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀪𑁂𑀲𑀚𑁆𑀚𑀁 𑀓𑀭𑁂𑀬𑁆𑀬 𑀯𑀸 𑀯𑀤𑁂𑀬𑁆𑀬 𑀯𑀸, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸. 𑀲𑀸𑀧𑀢𑁆𑀢𑀺𑀓𑁄 𑀬𑁄 𑀪𑀺𑀓𑁆𑀔𑀼 𑀉𑀧𑁄𑀲𑀣𑀧𑁆𑀧𑀯𑀸𑀭𑀡𑀁 𑀓𑀭𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀚𑀺𑀦𑁂𑀦 𑀪𑀕𑀯𑀢𑀸 𑀯𑀸𑀭𑀺𑀢𑀸 𑀚𑀺𑀦𑀯𑀸𑀭𑀺𑀢𑀸, 𑀚𑀺𑀦𑀯𑀸𑀭𑀺𑀢𑀸 𑀘 𑀢𑁂 𑀧𑀘𑁆𑀘𑀬𑀸 𑀘𑁂𑀢𑀺 𑀚𑀺𑀦𑀯𑀸𑀭𑀺𑀢𑀧𑀘𑁆𑀘𑀬𑀸, 𑀢𑁂 𑀚𑀺𑀦𑀯𑀸𑀭𑀺𑀢𑀧𑀘𑁆𑀘𑀬𑁂. 𑀤𑁆𑀯𑁂𑀫𑀸𑀢𑀺𑀓𑀸𑀅𑀧𑁆𑀧𑀕𑀼𑀡𑀢𑀸𑀬 𑀅𑀩𑁆𑀬𑀢𑁆𑀢𑁄.

𑁭𑁪. 𑀬𑁄 𑀪𑀺𑀓𑁆𑀔𑀼 𑀆𑀪𑁄𑀕𑀁 𑀯𑀸 𑀦𑀺𑀬𑁄𑀕𑀁 𑀯𑀸 𑀯𑀚𑁆𑀚𑁂𑀢𑁆𑀯𑀸 𑀤𑁆𑀯𑀸𑀭𑀩𑀦𑁆𑀥𑀸𑀤𑀺𑀓𑁂 𑀞𑀸𑀦𑁂 𑀧𑀭𑀺𑀯𑀢𑁆𑀢𑀓𑀯𑀸𑀝𑀓𑀁 𑀅𑀧𑀺𑀥𑀸𑀬 𑀤𑀺𑀯𑀸 𑀲𑀬𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀤𑁆𑀯𑀸𑀭𑀩𑀦𑁆𑀥𑀸𑀤𑀺𑀓𑁂𑀢𑀺 𑀬𑁂𑀦 𑀓𑁂𑀦𑀘𑀺 𑀧𑀭𑀺𑀓𑁆𑀔𑀺𑀢𑁆𑀢𑁂 𑀅𑀩𑁆𑀪𑁄𑀓𑀸𑀲𑁂𑀧𑀺 𑀭𑀼𑀓𑁆𑀔𑀫𑀽𑀮𑁂𑀧𑀺 𑀅𑀦𑁆𑀢𑀫𑀲𑁄 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀬𑀼𑀢𑁆𑀢𑀆𑀓𑀸𑀲𑀗𑁆𑀕𑀡𑁂𑀧𑀺. 𑀅𑀧𑀺𑀥𑀸𑀬𑀸𑀢𑀺 𑀅𑀧𑀺𑀤𑀳𑀺𑀢𑁆𑀯𑀸. 𑀯𑀺𑀦𑀸𑀪𑁄𑀕𑀦𑁆𑀢𑀺 ‘‘𑀏𑀲 𑀤𑁆𑀯𑀸𑀭𑀁 𑀚𑀕𑁆𑀕𑀺𑀲𑁆𑀲𑀢𑀻’’𑀢𑀺 𑀆𑀪𑁄𑀕𑀁 𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦𑀺𑀬𑁄𑀕𑀦𑁆𑀢𑀺 𑀅𑀯𑀲𑀝𑁆𑀞𑀸𑀦𑀁, 𑀅𑀢𑁆𑀢𑀦𑁄 𑀅𑀯𑀲𑀁 𑀩𑀳𑀼𑀲𑀸𑀥𑀸𑀭𑀡𑀝𑁆𑀞𑀸𑀦𑀁 𑀞𑀧𑁂𑀢𑁆𑀯𑀸. ‘‘𑀲𑀯𑀲𑁄’’𑀢𑀺 𑀯𑀸 𑀧𑀸𑀞𑁄, 𑀲𑀯𑀲𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀤𑀺𑀯𑀸𑀢𑀺 𑀤𑀺𑀯𑀸𑀓𑀸𑀮𑁂.

𑁭𑁫. 𑀥𑀜𑁆𑀜𑀦𑁆𑀢𑀺 𑀲𑀸𑀮𑀺 𑀯𑀻𑀳𑀺 𑀬𑀯𑁄 𑀕𑁄𑀥𑀼𑀫𑁄 𑀓𑀗𑁆𑀕𑀼 𑀯𑀭𑀓𑁄 𑀓𑀼𑀤𑁆𑀭𑀽𑀲𑀓𑁄𑀢𑀺 𑀲𑀢𑁆𑀢𑀯𑀺𑀥𑀁 𑀥𑀜𑁆𑀜𑀁. 𑀇𑀢𑁆𑀣𑀺𑀭𑀽𑀧𑀦𑁆𑀢𑀺 𑀤𑀸𑀭𑀼𑀮𑁄𑀳𑀫𑀬𑀸𑀤𑀺𑀇𑀢𑁆𑀣𑀺𑀭𑀽𑀧𑀁. 𑀭𑀢𑀦𑀦𑁆𑀢𑀺 𑀫𑀼𑀢𑁆𑀢𑀸𑀤𑀺𑀤𑀲𑀯𑀺𑀥𑀁 𑀭𑀢𑀦𑀁. 𑀆𑀯𑀼𑀥𑀦𑁆𑀢𑀺 𑀲𑀢𑁆𑀢𑀺𑀢𑁄𑀫𑀭𑀸𑀤𑀺𑀲𑀩𑁆𑀩𑀸𑀯𑀼𑀥𑀪𑀡𑁆𑀟𑀁. 𑀇𑀢𑁆𑀣𑀺𑀧𑀲𑀸𑀥𑀦𑀦𑁆𑀢𑀺 𑀇𑀢𑁆𑀣𑀺𑀬𑀸 𑀲𑀻𑀲𑀸𑀤𑀺𑀅𑀮𑀗𑁆𑀓𑀸𑀭𑀁. 𑀢𑀽𑀭𑀺𑀬𑀪𑀡𑁆𑀟𑀦𑁆𑀢𑀺 𑀥𑀫𑀦𑀲𑀗𑁆𑀔𑀸𑀤𑀺𑀲𑀩𑁆𑀩𑀁 𑀢𑀽𑀭𑀺𑀬𑀪𑀡𑁆𑀟𑀁. 𑀨𑀮𑀭𑀼𑀓𑁆𑀔𑁂𑀢𑀺 𑀨𑀮𑀺𑀢𑀭𑀼𑀓𑁆𑀔𑁂. 𑀧𑀼𑀩𑁆𑀩𑀡𑁆𑀡𑀸𑀤𑀺𑀓𑀦𑁆𑀢𑀺 𑀫𑀼𑀕𑁆𑀕𑀫𑀸𑀲𑀸𑀤𑀺𑀓𑀁. 𑀆𑀤𑀺-𑀲𑀤𑁆𑀤𑁂𑀦 𑀯𑀸𑀓𑀼𑀭𑀓𑀼𑀫𑀺𑀦𑀸𑀤𑀬𑁄 𑀕𑀳𑀺𑀢𑀸. 𑀏𑀢𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀆𑀫𑀲𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄.

𑁭𑁬. 𑀲𑀲𑀺𑀢𑁆𑀣𑁄𑀤𑀓𑀢𑁂𑀮𑁂𑀳𑀻𑀢𑀺 𑀬𑁄 𑀧𑀦 𑀫𑀥𑀼𑀲𑀺𑀢𑁆𑀣𑀓𑀢𑁂𑀮𑁂𑀦 𑀯𑀸 𑀉𑀤𑀓𑀫𑀺𑀲𑁆𑀲𑀓𑀢𑁂𑀮𑁂𑀦 𑀯𑀸 𑀬𑁂𑀦 𑀓𑁂𑀦𑀘𑀺 𑀘𑀺𑀓𑁆𑀔𑀮𑁆𑀮𑁂𑀦 𑀯𑀸. 𑀨𑀡𑀳𑀢𑁆𑀣𑀨𑀡𑁂𑀳𑀺 𑀯𑀸𑀢𑀺 𑀤𑀦𑁆𑀢𑀫𑀬𑀸𑀤𑀺𑀨𑀡𑁂𑀦 𑀯𑀸 𑀨𑀡𑀓𑀺𑀘𑁆𑀘𑀲𑀸𑀥𑀓𑁂𑀳𑀺 𑀳𑀢𑁆𑀣𑀗𑁆𑀕𑀼𑀮𑀻𑀳𑀺 𑀯𑀸 𑀓𑁄𑀘𑁆𑀙𑁂𑀦 𑀯𑀸 𑀓𑁂𑀲𑀫𑁄𑀲𑀡𑁆𑀞𑀦𑁂 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀏𑀓𑀲𑁆𑀫𑀺𑀁 𑀪𑀸𑀚𑀦𑁂 𑀪𑁄𑀚𑀦𑀦𑀺𑀫𑀺𑀢𑁆𑀢𑁂 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄.

𑁭𑁭. 𑀤𑁆𑀯𑁂 𑀪𑀺𑀓𑁆𑀔𑀽 𑀏𑀓𑀢𑁆𑀣𑀭𑀡𑀸 𑀲𑀬𑁂𑀬𑁆𑀬𑀽𑀁, 𑀤𑁆𑀯𑁂 𑀪𑀺𑀓𑁆𑀔𑀽 𑀏𑀓𑀧𑀸𑀯𑀼𑀭𑀡𑀸 𑀲𑀬𑁂𑀬𑁆𑀬𑀼𑀁, 𑀤𑁆𑀯𑁂 𑀪𑀺𑀓𑁆𑀔𑀽 𑀏𑀓𑀫𑀜𑁆𑀘𑀓𑁂 𑀲𑀬𑁂𑀬𑁆𑀬𑀼𑀁, 𑀢𑁂𑀲𑀁 𑀤𑀼𑀓𑁆𑀓𑀝𑀸𑀦𑀺 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀫𑀸𑀡𑀢𑁄 𑀅𑀥𑀺𑀓𑀁 𑀯𑀸 𑀊𑀦𑀁 𑀯𑀸 𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀅𑀥𑀺𑀓𑀦𑁆𑀢𑀺 𑀅𑀝𑁆𑀞𑀗𑁆𑀕𑀼𑀮𑀢𑁄 𑀅𑀥𑀺𑀓𑀁. 𑀊𑀦𑀦𑁆𑀢𑀺 𑀘𑀢𑀼𑀭𑀗𑁆𑀕𑀼𑀮𑀢𑁄 𑀊𑀦𑀁.

𑁭𑁮. 𑀬𑁄 𑀪𑀺𑀓𑁆𑀔𑀼 𑀦𑀘𑁆𑀘𑀜𑁆𑀘 𑀕𑀻𑀢𑀜𑁆𑀘 𑀯𑀸𑀤𑀺𑀢𑀜𑁆𑀘 𑀬𑁄𑀚𑁂𑀢𑀺 𑀯𑀸 𑀬𑁄𑀚𑀸𑀧𑁂𑀢𑀺 𑀯𑀸, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸. 𑀢𑁂𑀲𑀁 𑀦𑀘𑁆𑀘𑀸𑀦𑀁 𑀤𑀲𑁆𑀲𑀦𑀁, 𑀢𑁂𑀲𑀁 𑀕𑀻𑀢𑀸𑀦𑀁 𑀲𑀯𑀦𑀁, 𑀢𑁂𑀲𑀁 𑀯𑀸𑀤𑀺𑀢𑀸𑀦𑀁 𑀲𑀯𑀦𑀜𑁆𑀘 𑀓𑀭𑁄𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄.

𑁭𑁯. 𑀯𑀻𑀳𑀸𑀤𑀺𑀭𑁄𑀧𑀺𑀫𑁂𑀢𑀺 𑀯𑀻𑀳𑀺𑀆𑀤𑀻𑀦𑀁 𑀭𑀼𑀳𑀦𑀝𑁆𑀞𑀸𑀦𑁂. 𑀩𑀳𑀺𑀧𑀸𑀓𑀸𑀭𑀓𑀼𑀝𑁆𑀝𑀓𑁂𑀢𑀺 𑀧𑀸𑀓𑀸𑀭𑀓𑀼𑀝𑁆𑀝𑀸𑀦𑀁 𑀩𑀳𑀺. 𑀯𑀘𑁆𑀘𑀸𑀤𑀺𑀙𑀟𑁆𑀟𑀦𑀸𑀤𑀺𑀫𑁆𑀳𑀻𑀢𑀺 𑀯𑀘𑁆𑀘𑀧𑀲𑁆𑀲𑀸𑀯𑀲𑀗𑁆𑀓𑀸𑀭𑀘𑀮𑀓𑀸𑀤𑀻𑀦𑀁 𑀙𑀟𑁆𑀟𑀦𑀯𑀺𑀲𑁆𑀲𑀚𑁆𑀚𑀦𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀤𑀻𑀖𑀓𑁂𑀲𑀸𑀤𑀺𑀥𑀸𑀭𑀡𑁂𑀢𑀺 𑀤𑀻𑀖𑀓𑁂𑀲𑀥𑀸𑀭𑀡𑁂 𑀤𑀻𑀖𑀦𑀔𑀥𑀸𑀭𑀡𑁂 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄.

𑁮𑁦. 𑀦𑀔𑀫𑀝𑁆𑀞𑀓𑀭𑀡𑀸𑀤𑀺𑀫𑁆𑀳𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀭𑀚𑀦𑀓𑀭𑀡𑀁 𑀕𑀳𑀺𑀢𑀁. 𑀲𑀫𑁆𑀩𑀸𑀥𑁂 𑀮𑁄𑀫𑀳𑀸𑀭𑀡𑁂𑀢𑀺 𑀲𑀫𑁆𑀩𑀸𑀥𑁂 𑀉𑀧𑀓𑀘𑁆𑀙𑀓𑀫𑀼𑀢𑁆𑀢𑀓𑀭𑀡𑀝𑁆𑀞𑀸𑀦𑁂 𑀮𑁄𑀫𑀼𑀤𑁆𑀥𑀭𑀡𑁂. 𑀲𑀉𑀧𑀸𑀳𑀦𑁄 𑀪𑀺𑀓𑁆𑀔𑀼 𑀧𑀭𑀺𑀓𑀫𑁆𑀫𑀓𑀢𑀁 𑀪𑀽𑀫𑀺𑀁 𑀅𑀓𑁆𑀓𑀫𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁮𑁧. 𑀅𑀥𑁄𑀢𑀅𑀮𑁆𑀮𑀧𑀸𑀤𑁂𑀳𑀻𑀢𑀺 𑀬𑁄 𑀪𑀺𑀓𑁆𑀔𑀼 𑀅𑀥𑁄𑀢𑀧𑀸𑀤𑁂𑀳𑀺 𑀯𑀸 𑀅𑀮𑁆𑀮𑀧𑀸𑀤𑁂𑀳𑀺 𑀯𑀸 𑀲𑀗𑁆𑀖𑀺𑀓𑀁 𑀫𑀜𑁆𑀘𑀁 𑀯𑀸 𑀧𑀻𑀞𑀁 𑀯𑀸 𑀅𑀓𑁆𑀓𑀫𑁂𑀬𑁆𑀬, 𑀧𑀭𑀺𑀓𑀫𑁆𑀫𑀓𑀢𑀁 𑀪𑀺𑀢𑁆𑀢𑀺𑀁 𑀯𑀸 𑀓𑀸𑀬𑀢𑁄 𑀆𑀫𑀲𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄.

𑁮𑁨-𑁩. 𑀲𑀗𑁆𑀖𑀸𑀝𑀺𑀬𑀸𑀧𑀺 𑀧𑀮𑁆𑀮𑀢𑁆𑀣𑁂𑀢𑀺 𑀅𑀥𑀺𑀝𑁆𑀞𑀺𑀢𑀘𑀻𑀯𑀭𑁂𑀦 𑀯𑀺𑀳𑀸𑀭𑁂 𑀯𑀸 𑀅𑀦𑁆𑀢𑀭𑀖𑀭𑁂 𑀯𑀸 𑀧𑀮𑁆𑀮𑀢𑁆𑀣𑀺𑀓𑀁 𑀓𑀭𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀤𑀼𑀧𑁆𑀧𑀭𑀺𑀪𑀼𑀜𑁆𑀚𑁂𑀬𑁆𑀬 𑀘𑀻𑀯𑀭𑀦𑁆𑀢𑀺 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑀁 𑀘𑀻𑀯𑀭𑀁 𑀤𑀼𑀧𑁆𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑁂𑀬𑁆𑀬. 𑀅𑀓𑀸𑀬𑀩𑀦𑁆𑀥𑀦𑁄𑀢𑀺 𑀓𑀸𑀬𑀩𑀦𑁆𑀥𑀦𑀯𑀺𑀭𑀳𑀺𑀢𑁄 𑀪𑀺𑀓𑁆𑀔𑀼 𑀕𑀸𑀫𑀁 𑀯𑀚𑁂𑀬𑁆𑀬 𑀕𑀘𑁆𑀙𑁂𑀬𑁆𑀬. 𑀬𑁄 𑀪𑀺𑀓𑁆𑀔𑀼 𑀯𑀘𑁆𑀘𑀓𑀁 𑀉𑀘𑁆𑀘𑀸𑀭𑀁 𑀓𑀢𑁆𑀯𑀸𑀦 𑀉𑀤𑀓𑁂 𑀲𑀦𑁆𑀢𑁂 𑀦𑀸𑀘𑀫𑁂𑀬𑁆𑀬 𑀉𑀤𑀓𑀲𑀼𑀤𑁆𑀥𑀺𑀁 𑀦 𑀓𑀭𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀲𑀫𑀸𑀤𑁂𑀬𑁆𑀬 𑀅𑀓𑀧𑁆𑀧𑀺𑀬𑁂𑀢𑀺 𑀪𑀺𑀓𑁆𑀔𑀼𑀁 𑀯𑀸 𑀲𑀸𑀫𑀡𑁂𑀭𑀸𑀤𑀺𑀓𑁂 𑀲𑁂𑀲𑀲𑀳𑀥𑀫𑁆𑀫𑀺𑀓𑁂 𑀯𑀸 𑀅𑀓𑀧𑁆𑀧𑀺𑀬𑁂 𑀦𑀺𑀬𑁄𑀚𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀲𑀪𑀸𑀕𑀸𑀧𑀢𑁆𑀢𑀺𑀬𑀸 𑀤𑁂𑀲𑀦𑀸𑀭𑁄𑀘𑀦𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀲𑀪𑀸𑀕𑀸𑀢𑀺 𑀏𑀢𑁆𑀣 𑀯𑀢𑁆𑀣𑀼𑀲𑀪𑀸𑀕𑀢𑀸𑀯 𑀇𑀥𑀸𑀥𑀺𑀧𑁆𑀧𑁂𑀢𑀸, 𑀦 𑀆𑀧𑀢𑁆𑀢𑀺𑀲𑀪𑀸𑀕𑀢𑀸.

𑁮𑁪. 𑀦 𑀯𑀲𑁂 𑀯𑀲𑁆𑀲𑀦𑁆𑀢𑀺 𑀬𑁄 𑀪𑀺𑀓𑁆𑀔𑀼 𑀯𑀲𑁆𑀲𑀁 𑀦 𑀯𑀲𑁂𑀬𑁆𑀬 𑀦 𑀉𑀧𑀕𑀘𑁆𑀙𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸. 𑀯𑀺𑀲𑀁𑀯𑀸𑀤𑁂 𑀲𑀼𑀤𑁆𑀥𑀘𑀺𑀢𑁆𑀢𑁂𑀢𑀺 𑀏𑀢𑁆𑀣 𑀲𑀫𑁆𑀧𑀤𑀸𑀦𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁, 𑀧𑀝𑀺𑀲𑁆𑀲𑀯𑀁 𑀯𑀺𑀲𑀁𑀯𑀸𑀤𑁂𑀦𑁆𑀢𑀲𑁆𑀲 𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀯𑀲𑁆𑀲𑀁 𑀯𑀲𑀺𑀢𑁆𑀯𑀸 𑀅𑀦𑀦𑀼𑀜𑁆𑀜𑀸𑀢𑀓𑀺𑀘𑁆𑀘𑀢𑁄 𑀅𑀦𑀦𑀼𑀜𑁆𑀜𑀸𑀢𑀓𑀺𑀘𑁆𑀘𑁂𑀦 𑀪𑀺𑀓𑁆𑀔𑀼𑀦𑁄 𑀕𑀫𑀦𑁂 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑁮𑁫. 𑀆𑀧𑀤𑀁 𑀯𑀚𑁆𑀚𑁂𑀢𑁆𑀯𑀸 𑀢𑀭𑀼𑀲𑁆𑀲 𑀉𑀤𑁆𑀥𑀁 𑀧𑁄𑀭𑀺𑀲𑀫𑁆𑀳𑀸 𑀅𑀪𑀺𑀭𑀼𑀳𑀡𑁂 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀧𑀤𑀦𑁆𑀢𑀺 𑀅𑀦𑁆𑀢𑀭𑀸𑀬𑀁. 𑀢𑀭𑀼𑀲𑁆𑀲𑀸𑀢𑀺 𑀭𑀼𑀓𑁆𑀔𑀲𑁆𑀲. 𑀧𑁄𑀭𑀺𑀲𑀫𑁆𑀳𑀸𑀢𑀺 𑀏𑀓𑀧𑁄𑀭𑀺𑀲𑀧𑁆𑀧𑀫𑀸𑀡𑀸 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀧𑀜𑁆𑀘𑀳𑀢𑁆𑀣𑀸. 𑀅𑀧𑀭𑀺𑀲𑁆𑀲𑀸𑀯𑀦𑁄 𑀬𑁄 𑀪𑀺𑀓𑁆𑀔𑀼 𑀅𑀤𑁆𑀥𑀸𑀦𑀁 𑀕𑀘𑁆𑀙𑁂𑀬𑁆𑀬, 𑀬𑁄 𑀘 𑀪𑀺𑀓𑁆𑀔𑀼 𑀢𑀁 𑀧𑀭𑀺𑀲𑁆𑀲𑀸𑀯𑀦𑀁 𑀬𑀸𑀘𑀢𑁄 𑀦 𑀤𑀤𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀬𑁄𑀚𑀦𑀸. 𑀅𑀤𑁆𑀥𑀸𑀦𑀦𑁆𑀢𑀺 𑀅𑀤𑁆𑀥𑀬𑁄𑀚𑀦𑀫𑁂𑀯 𑀅𑀦𑁆𑀢𑀺𑀫𑀫𑀤𑁆𑀥𑀸𑀦𑀁.

𑁮𑁬. 𑀅𑀢𑁆𑀢𑀦𑁄 𑀖𑀸𑀢𑀦𑁂 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁄 𑀪𑀺𑀓𑁆𑀔𑀼 𑀇𑀢𑁆𑀣𑀺𑀭𑀽𑀧𑀸𑀤𑀺𑀭𑀽𑀧𑀁 𑀓𑀭𑁂𑀬𑁆𑀬 𑀯𑀸 𑀓𑀸𑀭𑀸𑀧𑁂𑀬𑁆𑀬 𑀯𑀸, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸. 𑀫𑀸𑀮𑀸𑀤𑀺𑀓𑀁 𑀯𑀺𑀘𑀺𑀢𑁆𑀢𑀁 𑀞𑀧𑁂𑀢𑁆𑀯𑀸 𑀚𑀸𑀢𑀓𑀸𑀤𑀺𑀯𑀢𑁆𑀣𑀼𑀁 𑀲𑀬𑀁 𑀓𑀭𑁂𑀬𑁆𑀬, 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁮𑁭. 𑀪𑀼𑀜𑁆𑀚𑀦𑁆𑀢𑀫𑀼𑀝𑁆𑀞𑀧𑁂𑀢𑀺 𑀬𑁄 𑀪𑀺𑀓𑁆𑀔𑀼 𑀪𑀼𑀜𑁆𑀚𑀦𑁆𑀢𑀁 𑀉𑀝𑁆𑀞𑀸𑀧𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸. 𑀪𑀢𑁆𑀢𑀲𑀸𑀮𑀸𑀤𑀻𑀲𑀼 𑀯𑀼𑀟𑁆𑀠𑀸𑀦𑀁 𑀑𑀓𑀸𑀲𑀁 𑀅𑀤𑀢𑁆𑀯𑀸 𑀦𑀺𑀲𑀻𑀤𑀢𑁄 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑁮𑁮. 𑀬𑀸𑀦𑀸𑀦𑀻𑀢𑀺 𑀯𑀬𑁆𑀳𑀁 𑀭𑀣𑁄 𑀲𑀓𑀝𑀁 𑀲𑀦𑁆𑀤𑀫𑀸𑀦𑀺𑀓𑀸𑀤𑀻𑀦𑀺. 𑀓𑀮𑁆𑀮𑀓𑁄𑀢𑀺 𑀅𑀕𑀺𑀮𑀸𑀦𑁄. 𑀅𑀕𑀺𑀮𑀸𑀦𑁄 𑀬𑁄 𑀪𑀺𑀓𑁆𑀔𑀼 𑀬𑀸𑀦𑀸𑀦𑀺 𑀅𑀪𑀺𑀭𑀼𑀳𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀯𑀤𑁂 𑀤𑀯𑀦𑁆𑀢𑀺 𑀓𑁂𑀴𑀺𑀁 𑀯𑀤𑁂𑀬𑁆𑀬, 𑀭𑀢𑀦𑀢𑁆𑀢𑀬𑀁 𑀆𑀭𑀩𑁆𑀪 𑀓𑁂𑀴𑀺𑀁 𑀯𑀤𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀧𑀭𑀺𑀲𑀸𑀬 𑀉𑀧𑀮𑀸𑀮𑀦𑁂 𑀤𑀼𑀓𑁆𑀓𑀝𑀁 𑀳𑁄𑀢𑀺.

𑁮𑁯. 𑀓𑀸𑀬𑀸𑀤𑀺𑀦𑁆𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁄 𑀊𑀭𑀼𑀦𑀺𑀫𑀺𑀢𑁆𑀢𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀓𑀸𑀬𑀁 𑀯𑀸 𑀊𑀭𑀼𑀁 𑀯𑀸 𑀦𑀺𑀫𑀺𑀢𑁆𑀢𑀁 𑀯𑀸 𑀯𑀺𑀯𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀦 𑀤𑀲𑁆𑀲𑀬𑁂 𑀦 𑀤𑀲𑁆𑀲𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀮𑁄𑀓𑀸𑀬𑀢𑀁 𑀢𑀺𑀭𑀘𑁆𑀙𑀸𑀦𑀸𑀤𑀺𑀯𑀺𑀚𑁆𑀚𑀁 𑀦 𑀘 𑀲𑀬𑀁 𑀯𑀸𑀘𑁂𑀬𑁆𑀬, 𑀧𑀭𑀜𑁆𑀘 𑀦 𑀯𑀸𑀘𑀸𑀧𑁂𑀬𑁆𑀬. 𑀧𑀮𑀺𑀢𑀁 𑀕𑀡𑁆𑀳𑁂𑀬𑁆𑀬 𑀯𑀸 𑀕𑀡𑁆𑀳𑀸𑀧𑁂𑀬𑁆𑀬 𑀯𑀸, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀬𑁄𑀚𑀦𑀸.

𑁯𑁦-𑁯𑁨. 𑀬𑀢𑁆𑀣 𑀓𑀢𑁆𑀣𑀘𑀺 𑀧𑁂𑀴𑀸𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀪𑀢𑁆𑀢𑀁 𑀪𑀼𑀜𑁆𑀚𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀢𑁆𑀢𑀳𑀢𑁆𑀣𑀓𑁄 𑀬𑁄 𑀪𑀺𑀓𑁆𑀔𑀼 𑀯𑀸𑀢𑀧𑀸𑀦𑀁 𑀯𑀸 𑀓𑀯𑀸𑀝𑀁 𑀯𑀸 𑀧𑀡𑀸𑀫𑁂 𑀧𑀡𑀸𑀫𑁂𑀬𑁆𑀬, 𑀲𑁄𑀤𑀓𑀁 𑀧𑀢𑁆𑀢𑀁 𑀉𑀡𑁆𑀳𑁂𑀬𑁆𑀬 𑀉𑀡𑁆𑀳𑁂 𑀑𑀢𑀸𑀧𑁂𑀬𑁆𑀬 𑀯𑀸 𑀧𑀝𑀺𑀲𑀸𑀫𑁂𑀬𑁆𑀬 𑀯𑀸, 𑀯𑁄𑀤𑀓𑀁 𑀧𑀢𑁆𑀢𑀁 𑀅𑀢𑀺𑀉𑀡𑁆𑀳𑁂𑀬𑁆𑀬 𑀅𑀢𑀺𑀞𑀧𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀬𑁄 𑀪𑀺𑀓𑁆𑀔𑀼 𑀧𑀢𑁆𑀢𑀁 𑀪𑀽𑀫𑀺𑀬𑀁 𑀯𑀸 𑀅𑀗𑁆𑀓𑁂 𑀯𑀸 𑀫𑀜𑁆𑀘𑁂 𑀯𑀸 𑀧𑀻𑀞𑁂 𑀯𑀸 𑀫𑀺𑀟𑁆𑀠𑀦𑁆𑀢𑁂 𑀯𑀸 𑀧𑀭𑀺𑀪𑀡𑁆𑀟𑀦𑁆𑀢𑁂 𑀯𑀸 𑀧𑀸𑀤𑁂 𑀯𑀸 𑀙𑀢𑁆𑀢𑁂 𑀯𑀸 𑀞𑀧𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀽𑀫𑀺𑀬𑀦𑁆𑀢𑀺 𑀬𑁂𑀦 𑀓𑁂𑀦𑀘𑀺 𑀅𑀦𑀢𑁆𑀣𑀢𑀸𑀬 𑀧𑀁𑀲𑀼𑀲𑀓𑁆𑀔𑀭𑀫𑀺𑀲𑁆𑀲𑀸𑀬. 𑀅𑀗𑁆𑀓𑁂𑀢𑀺 𑀤𑁆𑀯𑀺𑀦𑁆𑀦𑀁 𑀊𑀭𑀽𑀦𑀁 𑀫𑀚𑁆𑀛𑁂. 𑀫𑀺𑀟𑁆𑀠𑀦𑁆𑀢𑁂𑀢𑀺 𑀫𑀺𑀟𑁆𑀠𑀧𑀭𑀺𑀬𑀦𑁆𑀢𑁂. 𑀧𑀭𑀺𑀪𑀡𑁆𑀟𑀦𑁆𑀢𑁂𑀢𑀺 𑀩𑀸𑀳𑀺𑀭𑀧𑀲𑁆𑀲𑁂 𑀓𑀢𑀸𑀬 𑀢𑀦𑀼𑀓𑀫𑀺𑀟𑁆𑀠𑀺𑀬𑀸 𑀅𑀦𑁆𑀢𑁂. 𑀬𑁄 𑀪𑀺𑀓𑁆𑀔𑀼 𑀘𑀮𑀓𑀸𑀤𑀺𑀁 𑀯𑀸 𑀧𑀢𑁆𑀢𑁂 𑀞𑀧𑁂𑀬𑁆𑀬, 𑀧𑀢𑁆𑀢𑁂 𑀯𑀸 𑀳𑀢𑁆𑀣𑀥𑁄𑀯𑀦𑁂 𑀳𑀢𑁆𑀣𑀲𑁆𑀲 𑀥𑁄𑀯𑀦𑀧𑁆𑀧𑀘𑁆𑀘𑀬𑀸 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁯𑁩. 𑀉𑀘𑁆𑀙𑀺𑀝𑁆𑀞𑀁 𑀫𑀼𑀔𑀥𑁄𑀯𑀦𑀁 𑀉𑀤𑀓𑀫𑁆𑀧𑀺 𑀧𑀢𑁆𑀢𑁂𑀦 𑀦𑀻𑀳𑀭𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀁 𑀲𑀺𑀬𑀸. 𑀬𑁄 𑀪𑀺𑀓𑁆𑀔𑀼 𑀅𑀓𑀧𑁆𑀧𑀺𑀬𑀁 𑀧𑀢𑁆𑀢𑀁 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀅𑀓𑀧𑁆𑀧𑀺𑀬𑀁 𑀧𑀢𑁆𑀢𑀦𑁆𑀢𑀺 𑀤𑀸𑀭𑀼𑀫𑀬𑀧𑀢𑁆𑀢𑀸𑀤𑀺𑀁.

𑁯𑁪. 𑀬𑁄 𑀪𑀺𑀓𑁆𑀔𑀼 𑀔𑀺𑀧𑀺𑀢𑁂 ‘‘𑀚𑀻𑀯𑀸’’𑀢𑀺 𑀯𑀤𑁂 𑀯𑀤𑁂𑀬𑁆𑀬, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀬𑁄 𑀪𑀺𑀓𑁆𑀔𑀼 𑀧𑀭𑀺𑀫𑀡𑁆𑀟𑀮𑀓𑀸𑀤𑀺𑀫𑁆𑀳𑀺 𑀧𑀜𑁆𑀘𑀲𑀢𑁆𑀢𑀢𑀺 𑀲𑁂𑀔𑀺𑀬𑁂 𑀅𑀦𑀸𑀤𑀭𑁄 𑀳𑀼𑀢𑁆𑀯𑀸 𑀦 𑀲𑀺𑀓𑁆𑀔𑀢𑀺, 𑀢𑀲𑁆𑀲 𑀤𑀼𑀓𑁆𑀓𑀝𑀁 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁯𑁫. 𑀬𑁄 𑀪𑀺𑀓𑁆𑀔𑀼 𑀪𑀡𑁆𑀟𑀸𑀕𑀸𑀭𑁂 𑀧𑀬𑀼𑀢𑁄 𑀫𑀸𑀢𑀼𑀬𑀸 𑀧𑀺𑀢𑀼𑀦𑁄 𑀘 𑀪𑀡𑁆𑀟𑀓𑀁 𑀕𑁄𑀧𑁂𑀬𑁆𑀬, 𑀅𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀸𑀘𑀺𑀢𑁆𑀢𑀺𑀬𑀁 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀧𑀬𑀼𑀢𑁄𑀢𑀺 𑀪𑀡𑁆𑀟𑀸𑀕𑀸𑀭𑁂 𑀩𑁆𑀬𑀸𑀧𑀸𑀭𑀯𑀲𑁂𑀦 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁄. 𑀕𑁄𑀧𑀬𑁂𑀢𑀺 𑀕𑁄𑀧𑁂𑀬𑁆𑀬. 𑀬𑁄 𑀪𑀺𑀓𑁆𑀔𑀼 𑀤𑀯𑀸𑀬 𑀳𑀻𑀦𑁂𑀦 𑀚𑀸𑀢𑀺𑀆𑀤𑀺𑀦𑀸 𑀉𑀢𑁆𑀢𑀫𑀫𑁆𑀧𑀺 𑀯𑀤𑁂𑀬𑁆𑀬, 𑀤𑀼𑀩𑁆𑀪𑀸𑀲𑀺𑀢𑀁 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀳𑀻𑀦𑁂𑀳𑀺 𑀯𑀸 𑀉𑀓𑁆𑀓𑀝𑁆𑀞𑁂𑀳𑀺 𑀯𑀸 𑀚𑀸𑀢𑀺𑀆𑀤𑀻𑀳𑀺 𑀏𑀯𑀁 𑀉𑀓𑁆𑀓𑀝𑁆𑀞𑀁 𑀯𑀸 𑀳𑀻𑀦𑀁 𑀯𑀸 ‘‘𑀘𑀡𑁆𑀟𑀸𑀮𑁄𑀲𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀉𑀚𑀼𑀁 𑀯𑀸 ‘‘𑀲𑀦𑁆𑀢𑀺 𑀇𑀥𑁂𑀓𑀘𑁆𑀘𑁂 𑀘𑀡𑁆𑀟𑀸𑀮𑀯𑁂𑀦𑀦𑁂𑀲𑀸𑀤𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀜𑁆𑀜𑀸𑀧𑀤𑁂𑀲𑁂𑀦 𑀯𑀸 𑀉𑀧𑀲𑀫𑁆𑀧𑀦𑁆𑀦𑀁 𑀯𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀯𑀸 𑀅𑀓𑁆𑀓𑁄𑀲𑀸𑀥𑀺𑀧𑁆𑀧𑀸𑀬𑀁 𑀯𑀺𑀦𑀸 𑀓𑁂𑀯𑀮𑀁 𑀓𑀻𑀴𑀸𑀥𑀺𑀧𑁆𑀧𑀸𑀬𑁂𑀦 𑀯𑀤𑁂𑀬𑁆𑀬, 𑀤𑀼𑀩𑁆𑀪𑀸𑀲𑀺𑀢𑀁 𑀲𑀺𑀬𑀸𑀢𑀺.

𑀧𑀓𑀺𑀡𑁆𑀡𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀯𑀢𑁆𑀢𑀸𑀤𑀺𑀓𑀡𑁆𑀟𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁬. 𑀇𑀤𑀸𑀦𑀺 𑀯𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀉𑀧𑀚𑁆𑀛𑀸𑀘𑀭𑀺𑀬𑀯𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀧𑀚𑁆𑀛𑀸𑀬𑀯𑀢𑁆𑀢𑀜𑁆𑀘 𑀆𑀘𑀭𑀺𑀬𑀯𑀢𑁆𑀢𑀜𑁆𑀘 𑀕𑀫𑀺𑀓𑀯𑀢𑁆𑀢𑀜𑁆𑀘 𑀆𑀕𑀦𑁆𑀢𑀼𑀓𑀯𑀢𑁆𑀢𑀜𑁆𑀘 𑀲𑁂𑀦𑀸𑀲𑀦𑀸𑀤𑀺𑀯𑀢𑁆𑀢𑀜𑁆𑀘 𑀧𑀺𑀬𑀲𑀻𑀮𑁂𑀦 𑀪𑀺𑀓𑁆𑀔𑀼𑀦𑀸 𑀓𑀸𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀫𑀺𑀓𑀸𑀕𑀦𑁆𑀢𑀼𑀓𑀦𑁆𑀢𑀺 𑀕𑀫𑀺𑀓𑀁 𑀆𑀕𑀦𑁆𑀢𑀼𑀓𑀦𑁆𑀢𑀺 𑀙𑁂𑀤𑁄, 𑀕𑀫𑀺𑀓𑀯𑀢𑁆𑀢𑀁 𑀆𑀕𑀦𑁆𑀢𑀼𑀓𑀯𑀢𑁆𑀢𑀜𑁆𑀘𑀸𑀢𑀺 𑀅𑀢𑁆𑀣𑁄.

𑁯𑁭. 𑀤𑀸𑀢𑀼𑀓𑀸𑀫𑁄 𑀳𑀢𑁆𑀣𑀧𑀸𑀲𑁂 𑀞𑀺𑀢𑁄 𑀓𑀺𑀜𑁆𑀘𑀺 𑀕𑀳𑀺𑀢𑀩𑁆𑀩𑀁 𑀏𑀓𑁂𑀦 𑀧𑀼𑀭𑀺𑀲𑁂𑀦 𑀕𑀳𑀺𑀢𑀩𑁆𑀩𑀁 𑀉𑀓𑁆𑀔𑀺𑀧𑀦𑀓𑁆𑀔𑀫𑀁 𑀯𑀢𑁆𑀣𑀼𑀁 𑀢𑀺𑀥𑀸 𑀢𑀻𑀲𑀼 𑀧𑀓𑀸𑀭𑁂𑀲𑀼 𑀏𑀓𑁂𑀦𑀸𑀓𑀸𑀭𑁂𑀦 𑀤𑀤𑁂𑀬𑁆𑀬, 𑀕𑀳𑁂𑀢𑀼𑀓𑀸𑀫𑁄 𑀪𑀺𑀓𑁆𑀔𑀼 𑀤𑁆𑀯𑀺𑀥𑀸 𑀤𑁆𑀯𑀻𑀲𑀼 𑀏𑀓𑁂𑀦 𑀕𑀡𑁆𑀳𑁂𑀬𑁆𑀬, 𑀅𑀬𑀁 𑀧𑀜𑁆𑀘𑀗𑁆𑀕𑁄 𑀧𑀝𑀺𑀕𑁆𑀕𑀳𑁄𑀢𑀺 𑀅𑀢𑁆𑀣𑁄.

𑁯𑁮-𑁧𑁦𑁦. 𑀤𑀽𑀭𑁂 𑀞𑀺𑀢𑀁 𑀘𑀻𑀯𑀭𑀁 𑀞𑀧𑀺𑀢𑁄𑀓𑀸𑀲𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀏𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. 𑀳𑀢𑁆𑀣𑀧𑀸𑀲𑁂 𑀞𑀺𑀢𑀁 𑀳𑀢𑁆𑀣𑁂𑀦 𑀆𑀫𑀲𑀺𑀢𑁆𑀯𑀸 ‘‘𑀇𑀫’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. ‘‘𑀏𑀢𑀁 𑀅𑀥𑀺𑀝𑁆𑀞𑀸𑀫𑀺, 𑀇𑀫𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀇𑀫𑁂𑀲𑀁 𑀧𑀤𑀸𑀦𑀁 𑀫𑀚𑁆𑀛𑁂 𑀲𑀗𑁆𑀖𑀸𑀝𑀺𑀆𑀤𑀻𑀲𑀼 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑁆𑀯𑀸 𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑁂𑀬𑁆𑀬. 𑀓𑀣𑀁? ‘‘𑀏𑀢𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀺, 𑀇𑀫𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀅𑀥𑀺𑀝𑁆𑀞𑁂𑀬𑁆𑀬. 𑀏𑀯𑀁 𑀲𑁂𑀲𑁂𑀲𑀼 𑀘 𑀘𑀻𑀯𑀭𑁂𑀲𑀼. 𑀬𑀣𑀸 𑀘𑀻𑀯𑀭𑀸𑀤𑀺𑀁 𑀯𑀺𑀥𑀸𑀦𑀁 𑀏𑀯𑀁 𑀧𑀢𑁆𑀢𑁂𑀧𑀺 𑀅𑀥𑀺𑀝𑁆𑀞𑁂𑀬𑁆𑀬 𑀧𑀘𑁆𑀘𑀼𑀤𑁆𑀥𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑁧𑁦𑁧. 𑀲𑀜𑁆𑀘𑀭𑀺𑀢𑁆𑀢𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀕𑀭𑀼𑀓𑀸 𑀘 𑀧𑀸𑀭𑀸𑀚𑀺𑀓𑀸 𑀘 𑀲𑀘𑀺𑀢𑁆𑀢𑀓𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑁆𑀢𑀺𑀫𑀸𑀢𑀺 𑀧𑀸𑀭𑀸𑀚𑀺𑀓𑀸. 𑀅𑀘𑁆𑀙𑀺𑀦𑁆𑀦𑀲𑀺𑀓𑁆𑀔𑀸𑀧𑀤𑀁, 𑀧𑀭𑀺𑀡𑀢𑀲𑀺𑀓𑁆𑀔𑀸𑀧𑀤𑀜𑁆𑀘𑀸𑀢𑀺 𑀇𑀫𑀁 𑀤𑁆𑀯𑀬𑀁 𑀞𑀧𑁂𑀢𑁆𑀯𑀸 𑀲𑁂𑀲𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀅𑀘𑀺𑀢𑁆𑀢𑀓𑀦𑁆𑀢𑀺 𑀅𑀢𑁆𑀣𑁄.

𑁧𑁦𑁨-𑁩. 𑀕𑀸𑀫𑀧𑁆𑀧𑀯𑁂𑀲𑀦𑀦𑁆𑀢𑁂𑀢𑁂𑀢𑀺 𑀕𑀸𑀫𑀧𑁆𑀧𑀯𑁂𑀲𑀦𑀁 𑀇𑀢𑀺 𑀏𑀢𑁂. 𑀧𑀸𑀘𑀺𑀢𑁆𑀢𑀻𑀲𑀼 𑀏𑀢𑁂 𑀧𑀤𑀲𑁄𑀥𑀫𑁆𑀫𑀸𑀤𑀬𑁄 𑀕𑀸𑀫𑀧𑁆𑀧𑀯𑁂𑀲𑀦𑀦𑁆𑀢𑀸 𑀲𑀢𑁆𑀢𑀭𑀲 𑀲𑀺𑀓𑁆𑀔𑀸𑀧𑀤𑀸 𑀅𑀘𑀺𑀢𑁆𑀢𑀓𑀸.

𑁧𑁦𑁪-𑁫. 𑀧𑀓𑀺𑀡𑁆𑀡𑀓𑁂𑀲𑀼 𑀉𑀤𑁆𑀤𑀺𑀲𑁆𑀲𑀓𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀫𑀁𑀲𑀓𑀁 𑀲𑁂𑀲𑀫𑀁𑀲𑀁 𑀅𑀘𑀺𑀢𑁆𑀢𑀓𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀧𑀓𑀺𑀡𑁆𑀡𑀓𑁂𑀲𑀼 𑀅𑀜𑁆𑀜𑀫𑀁𑀲𑀸𑀤𑀺𑀓𑀁 𑀧𑀢𑁆𑀢𑀳𑀢𑁆𑀣𑁄 𑀓𑀯𑀸𑀝𑀓𑀦𑁆𑀢𑀁 𑀢𑁂𑀭𑀲𑀯𑀺𑀥𑀁 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀅𑀘𑀺𑀢𑁆𑀢𑀓𑀁, 𑀲𑁂𑀲𑀁 𑀲𑀩𑁆𑀩𑀁 𑀲𑀘𑀺𑀢𑁆𑀢𑀓𑀦𑁆𑀢𑀺 𑀅𑀢𑁆𑀣𑁄.

𑁧𑁦𑁬. 𑀆𑀘𑀭𑀺𑀬𑀸 𑀯𑀻𑀢𑀺𑀓𑁆𑀓𑀫𑀦𑀘𑀺𑀢𑁆𑀢𑁂𑀦 𑀲𑀘𑀺𑀢𑁆𑀢𑀓𑀁 𑀅𑀘𑀺𑀢𑁆𑀢𑀓𑀦𑁆𑀢𑀺 𑀯𑀤𑀦𑁆𑀢𑀺, 𑀧𑀜𑁆𑀜𑀢𑁆𑀢𑀺𑀚𑀸𑀦𑀦𑁂𑀦 𑀘𑀺𑀢𑁆𑀢𑁂𑀦 𑀢𑀣𑀸 𑀲𑀘𑀺𑀢𑁆𑀢𑀓𑀁 𑀅𑀘𑀺𑀢𑁆𑀢𑀓𑀦𑁆𑀢𑀺 𑀆𑀘𑀭𑀺𑀬𑀸 𑀯𑀤𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸-𑀲𑀤𑁆𑀤𑁂𑀦 ‘‘𑀲𑀘𑀺𑀢𑁆𑀢𑀓𑀁 𑀅𑀘𑀺𑀢𑁆𑀢𑀓’’𑀦𑁆𑀢𑀺 𑀇𑀤𑀁 𑀕𑀳𑀺𑀢𑀁.

𑁧𑁦𑁭-𑁯. 𑀧𑀼𑀩𑁆𑀩𑀓𑀭𑀡𑀸𑀤𑀺𑀓𑀦𑁆𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁄 𑀧𑀼𑀩𑁆𑀩𑀓𑀺𑀘𑁆𑀘𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣 𑁋

‘‘𑀲𑀫𑁆𑀫𑀚𑁆𑀚𑀦𑀻 𑀧𑀤𑀻𑀧𑁄 𑀘, 𑀉𑀤𑀓𑀁 𑀆𑀲𑀦𑁂𑀦 𑀘;

𑀉𑀧𑁄𑀲𑀣𑀲𑁆𑀲 𑀏𑀢𑀸𑀦𑀺, 𑀧𑀼𑀩𑁆𑀩𑀓𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀺.

‘‘𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀉𑀢𑀼𑀓𑁆𑀔𑀸𑀦𑀁, 𑀪𑀺𑀓𑁆𑀔𑀼𑀕𑀡𑀦𑀸 𑀘 𑀑𑀯𑀸𑀤𑁄;

𑀉𑀧𑁄𑀲𑀣𑀲𑁆𑀲 𑀏𑀢𑀸𑀦𑀺, 𑀧𑀼𑀩𑁆𑀩𑀓𑀺𑀘𑁆𑀘𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑁋

𑀏𑀯𑀁 𑀧𑀼𑀩𑁆𑀩𑀓𑀭𑀡𑀸𑀤𑀺𑀓𑀁 𑀦𑀯𑀥𑀸 𑀤𑀻𑀧𑀺𑀢𑀁 𑀲𑀩𑁆𑀩𑀁 𑀉𑀧𑁄𑀲𑀣𑀧𑁆𑀧𑀯𑀸𑀭𑀡𑀁 𑀧𑀺𑀬𑀲𑀻𑀮𑀺𑀦𑀸 𑀓𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑁧𑁧𑁨. 𑀬𑀣𑀸𑀓𑁆𑀓𑀫𑀦𑁆𑀢𑀺 𑀏𑀢𑁆𑀣𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀕𑀡𑁄 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀭𑁂𑀬𑁆𑀬, 𑀧𑀼𑀕𑁆𑀕𑀮𑁄 𑀅𑀥𑀺𑀝𑁆𑀞𑀸𑀦𑀉𑀧𑁄𑀲𑀣𑀁 𑀓𑀭𑁂𑀬𑁆𑀬, 𑀲𑀗𑁆𑀖𑁄 𑀲𑀼𑀢𑁆𑀢𑀼𑀤𑁆𑀤𑁂𑀲𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸𑀢𑀺.

𑁧𑁧𑁩. 𑀘𑀸𑀢𑀼𑀤𑁆𑀤𑀲𑁄 𑀧𑀦𑁆𑀦𑀭𑀲𑁄, 𑀲𑀸𑀫𑀕𑁆𑀕𑀻 𑀤𑀺𑀦𑀢𑁄 𑀢𑀺𑀥𑀸𑀢𑀺 𑀘𑀸𑀢𑀼𑀤𑁆𑀤𑀲𑁄 𑀉𑀧𑁄𑀲𑀣𑁄, 𑀧𑀦𑁆𑀦𑀭𑀲𑁄 𑀉𑀧𑁄𑀲𑀣𑁄, 𑀲𑀸𑀫𑀕𑁆𑀕𑀻𑀉𑀧𑁄𑀲𑀣𑁄𑀢𑀺 𑀤𑀺𑀦𑀢𑁄 𑀢𑀺𑀥𑀸 𑀳𑁄𑀦𑁆𑀢𑀺. 𑀤𑀺𑀦𑀢𑁄 𑀧𑀼𑀕𑁆𑀕𑀮𑀢𑁄 𑀓𑀢𑁆𑀢𑀩𑁆𑀩𑀸𑀓𑀸𑀭𑀢𑁄 𑀢𑁂 𑀉𑀧𑁄𑀲𑀣𑀸 𑀦𑀯 𑀇𑀢𑀺 𑀈𑀭𑀺𑀢𑀸𑀢𑀺 𑀅𑀢𑁆𑀣𑁄.

𑁧𑁧𑁪. 𑀢𑁂𑀯𑀸𑀘𑀻 𑀤𑁆𑀯𑁂𑀓𑀯𑀸𑀘𑀻𑀢𑀺 𑀢𑁂𑀯𑀸𑀘𑀺𑀓𑀸 𑀧𑀯𑀸𑀭𑀡𑀸, 𑀤𑁆𑀯𑁂𑀯𑀸𑀘𑀺𑀓𑀸 𑀧𑀯𑀸𑀭𑀡𑀸, 𑀏𑀓𑀯𑀸𑀘𑀺𑀓𑀸 𑀧𑀯𑀸𑀭𑀡𑀸 𑀇𑀢𑀺 𑀦𑀯 𑀧𑀯𑀸𑀭𑀡𑀸 𑀯𑀼𑀢𑁆𑀢𑀸.

𑁧𑁧𑁫. 𑀢𑀲𑁆𑀲𑀸𑀢𑀺 𑀨𑀕𑁆𑀕𑀼𑀦𑀫𑀸𑀲𑀲𑁆𑀲. 𑀢𑀢𑁄 𑀲𑁂𑀲𑀦𑁆𑀢𑀺 𑀆𑀲𑀸𑀴𑁆𑀳𑀺𑀅𑀦𑁆𑀢𑀺𑀫𑀧𑀓𑁆𑀔𑀫𑁆𑀳𑀸 𑀬𑀸𑀯 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸 𑀯𑀲𑁆𑀲𑀓𑀸𑀮𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀳𑀺 𑀏𑀓𑀲𑁆𑀫𑀺𑀁 𑀲𑀁𑀯𑀘𑁆𑀙𑀭𑁂 𑀘𑀢𑀼𑀯𑀻𑀲𑀢𑀺𑀉𑀧𑁄𑀲𑀣𑀸 𑀳𑁄𑀦𑁆𑀢𑀺.

𑁧𑁧𑁬. 𑀏𑀢𑁂𑀲𑀽𑀢𑀺 𑀏𑀢𑁂𑀲𑀼 𑀢𑀻𑀲𑀼 𑀘𑀢𑀽𑀲𑀼 𑀏𑀓𑁂𑀓𑀲𑁆𑀫𑀺𑀁 𑀉𑀢𑀼𑀫𑁆𑀳𑀺 𑀢𑀢𑀺𑀬𑀧𑀓𑁆𑀔𑀸 𑀲𑀢𑁆𑀢𑀫𑀧𑀓𑁆𑀔𑀸. 𑀘𑀸𑀢𑀼𑀤𑁆𑀤𑀲𑀸𑀢𑀺 𑀙 𑀘𑀸𑀢𑀼𑀤𑁆𑀤𑀲𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯𑀸𑀢𑀺.

𑀯𑀢𑁆𑀢𑀸𑀤𑀺𑀓𑀡𑁆𑀟𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀦𑀓𑀣𑀸

𑀏𑀢𑁆𑀢𑀸𑀯𑀢𑀸 𑀲𑀫𑀸𑀭𑀤𑁆𑀥𑀸, 𑀫𑀽𑀮𑀲𑀺𑀓𑁆𑀔𑀢𑁆𑀣𑀯𑀡𑁆𑀡𑀦𑀸;

𑀦𑀺𑀝𑁆𑀞𑀺𑀢𑀸 𑀬𑀸 𑀲𑀫𑀸𑀲𑁂𑀦, 𑀅𑀟𑁆𑀠𑀫𑀸𑀲𑀲𑁆𑀲 𑀅𑀘𑁆𑀘𑀬𑁂.

𑀅𑀥𑀼𑀦𑀽𑀧𑀲𑀫𑁆𑀧𑀦𑁆𑀦𑀸𑀦𑀁, 𑀳𑀺𑀢𑀢𑁆𑀣𑀸𑀬 𑀲𑀫𑀸𑀲𑀢𑁄;

𑀇𑀫𑀁 𑀅𑀢𑁆𑀣𑀁 𑀯𑀡𑁆𑀡𑀬𑀢𑀸, 𑀬𑀁 𑀧𑀼𑀜𑁆𑀜𑀁𑀥𑀺𑀕𑀢𑀁 𑀫𑀬𑀸.

𑀢𑁂𑀦 𑀧𑀼𑀜𑁆𑀜𑁂𑀦𑀬𑀁 𑀮𑁄𑀓𑁄, 𑀲𑀼𑀔𑀸𑀬 𑀧𑀝𑀺𑀧𑀢𑁆𑀢𑀺𑀬𑀸;

𑀧𑀸𑀧𑀼𑀡𑀸𑀢𑀼 𑀯𑀺𑀲𑀼𑀤𑁆𑀥𑀸𑀬, 𑀦𑀺𑀩𑁆𑀩𑀸𑀦𑀁 𑀅𑀚𑀭𑀁 𑀧𑀤𑀁.

𑀦𑀸𑀦𑀸𑀢𑀭𑀼𑀕𑀡𑀸𑀓𑀺𑀡𑁆𑀡𑁂, 𑀦𑀸𑀦𑀸𑀓𑀼𑀲𑀮𑀓𑀸𑀫𑀺𑀦𑁄;

𑀭𑀫𑁆𑀫𑁂 𑀬𑀼𑀤𑁆𑀥𑀸𑀦𑀧𑀢𑀺𑀦𑁄, 𑀯𑀺𑀳𑀸𑀭𑁂 𑀯𑀲𑀢𑀸 𑀲𑀢𑀸.

𑀲𑀸𑀲𑀦𑁂 𑀲𑀺𑀤𑁆𑀥𑀺𑀧𑀢𑁆𑀢𑀲𑁆𑀲, 𑀲𑀺𑀤𑁆𑀥𑀺𑀦𑀸 𑀜𑀸𑀡𑀲𑀺𑀤𑁆𑀥𑀺𑀦𑀸;

𑀧𑀡𑁆𑀟𑀺𑀢𑁂𑀦 𑀓𑀢𑀸 𑀏𑀲𑀸, 𑀫𑀽𑀮𑀲𑀺𑀓𑁆𑀔𑀢𑁆𑀣𑀯𑀡𑁆𑀡𑀦𑀸.