𑁨𑁨. 𑀉𑀧𑀸𑀳𑀦𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁭𑁫. 𑀦𑀯𑀸 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀸 𑀫𑀚𑁆𑀛𑀤𑁂𑀲𑁂 𑀦 𑀓𑀧𑁆𑀧𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀯𑀸𑀢𑀺 𑀏𑀓𑀯𑀸𑀭𑀫𑁆𑀧𑀺 𑀅𑀧𑁆𑀧𑀝𑀺𑀫𑀼𑀓𑁆𑀓𑀸. 𑀢𑀢𑁆𑀣 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀸 𑀘𑀢𑀼𑀧𑀝𑀮𑀢𑁄 𑀧𑀝𑁆𑀞𑀸𑀬 𑀯𑀼𑀘𑁆𑀘𑀦𑁆𑀢𑀺. 𑀲𑀫𑁆𑀪𑀯𑁂 𑀩𑁆𑀬𑀪𑀺𑀘𑀸𑀭𑁂 𑀘 𑀯𑀺𑀲𑁂𑀲𑀦𑀁 𑀲𑀸𑀢𑁆𑀣𑀓𑀁 𑀪𑀯𑀢𑀻𑀢𑀺 ‘‘𑀫𑀚𑁆𑀛𑀤𑁂𑀲𑁂’’𑀢𑀺 𑀯𑀺𑀲𑁂𑀲𑀦𑀁 𑀅𑀫𑀚𑁆𑀛𑀤𑁂𑀲𑀁 𑀩𑁆𑀬𑀪𑀺𑀘𑀭𑀢𑀻𑀢𑀺 𑀅𑀫𑀚𑁆𑀛𑀤𑁂𑀲𑁂 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀸 𑀓𑀧𑁆𑀧𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀦𑀯𑀸𑀢𑀺 𑀇𑀫𑀺𑀦𑀸 𑀅𑀦𑀯𑀸 𑀫𑀚𑁆𑀛𑀤𑁂𑀲𑁂𑀧𑀺. 𑀇𑀫𑀺𑀦𑀸 𑀧𑀦 𑀯𑀸𑀓𑁆𑀬𑁂𑀦 𑀫𑀚𑁆𑀛𑀤𑁂𑀲𑁂𑀧𑀺 𑀏𑀓𑀯𑀸𑀭𑀫𑁆𑀧𑀺 𑀧𑀝𑀺𑀫𑀼𑀓𑁆𑀓𑀸, 𑀅𑀜𑁆𑀜𑀢𑁆𑀣 𑀢𑀼 𑀲𑀩𑁆𑀩𑀸𑀧𑀺 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀸 𑀯𑀝𑁆𑀝𑀦𑁆𑀢𑀺, 𑀦 𑀲𑁂𑀲𑀸𑀢𑀺 𑀆𑀧𑀦𑁆𑀦𑀁, 𑀢𑀣𑀸𑀧𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀏𑀓𑀧𑀮𑀸𑀲𑀺𑀓𑀁 𑀉𑀧𑀸𑀳𑀦’’𑀦𑁆𑀢𑀺 (𑀫𑀳𑀸𑀯. 𑁨𑁪𑁫) 𑀯𑀼𑀢𑁆𑀢𑀢𑁆𑀢𑀸 𑀏𑀓𑀧𑀝𑀮𑀺𑀓𑀸𑀧𑀺 𑀯𑀝𑁆𑀝𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑀲𑁆𑀲𑀸𑀢𑀺 𑀫𑀚𑁆𑀛𑀤𑁂𑀲𑁂 𑀧𑀘𑁆𑀘𑀦𑁆𑀢𑀺𑀫𑁂𑀧𑀺 𑀕𑀺𑀮𑀸𑀦𑀸𑀕𑀺𑀮𑀸𑀦𑀲𑁆𑀲 𑀲𑀩𑁆𑀩𑀲𑁆𑀲. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀚𑁆𑀛𑀸𑀭𑀸𑀫𑁂 𑀉𑀧𑀸𑀳𑀦𑀁 𑀥𑀸𑀭𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁨𑁪𑁯) 𑀳𑀺 𑀲𑀸𑀫𑀜𑁆𑀜𑁂𑀦 𑀅𑀦𑀼𑀜𑁆𑀜𑀸𑀢𑀁. 𑀲𑀩𑁆𑀩𑀢𑁆𑀣𑀸𑀢𑀺 𑀕𑀸𑀫𑁂 𑀯𑀸 𑀅𑀭𑀜𑁆𑀜𑁂 𑀯𑀸 𑀆𑀭𑀸𑀫𑀢𑁄 𑀅𑀜𑁆𑀜𑀢𑁆𑀭. 𑀅𑀓𑀮𑁆𑀮𑀓𑀲𑁆𑀲 𑀘𑀸𑀢𑀺 𑀕𑀺𑀮𑀸𑀦𑀲𑁆𑀲𑁂𑀯.

𑁧𑁭𑁬-𑁯. 𑀲𑀩𑁆𑀩…𑀧𑁂… 𑀭𑀢𑁆𑀢𑀸 𑀘 𑀉𑀧𑀸𑀳𑀦𑀸 𑀲𑀩𑁆𑀩…𑀧𑁂… 𑀯𑀺𑀘𑁆𑀙𑀺𑀓𑀸𑀴𑀺𑀓𑀸 𑀘…𑀧𑁂… 𑀤𑀻𑀧𑀻𑀦𑀁 𑀘𑀫𑁆𑀫𑁂𑀳𑀺 𑀘 𑀫𑀚𑁆𑀚𑀸𑀭…𑀧𑁂… 𑀘𑀫𑁆𑀫𑁂𑀳𑀺 𑀘 𑀧𑀭𑀺𑀓𑁆𑀔𑀝𑀸 𑀘 𑀉𑀧𑀸𑀳𑀦𑀸 𑀲𑀗𑁆𑀓𑀫𑀦𑀻𑀬𑀸 𑀧𑀸𑀤𑀼𑀓𑀸 𑀘 𑀓𑁄𑀘𑀺 𑀥𑀸𑀭𑁂𑀬𑁆𑀬, 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸. 𑀑𑀤𑀸𑀢𑀸𑀬 𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀸𑀬 𑀘 𑀅𑀪𑀸𑀯𑁂𑀧𑀺 𑀅𑀦𑀼𑀮𑁄𑀫𑀯𑀲𑁂𑀦𑁂𑀢𑁆𑀣 𑀯𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀦𑀻𑀮𑀓𑁄 𑀘 𑀑𑀤𑀸𑀢𑁄 𑀘𑀸𑀢𑀺𑀆𑀤𑀺𑀦𑀸 𑀤𑁆𑀯𑀦𑁆𑀤𑁄. 𑀲𑀩𑁆𑀩𑁂𑀯 𑀦𑀻𑀮𑀓…𑀧𑁂… 𑀓𑀡𑁆𑀳𑀓𑀸 𑀬𑀸𑀲𑀦𑁆𑀢𑀺 𑀲𑀫𑀸𑀲𑁄. ‘‘𑀫𑀳𑀸𑀭𑀗𑁆𑀕𑀸’’𑀢𑀺𑀆𑀤𑀻𑀲𑀼 𑀅𑀧𑁆𑀧𑀬𑀼𑀢𑁆𑀢𑁂𑀧𑀺 𑀲𑀩𑁆𑀩-𑀲𑀤𑁆𑀤𑁂 𑀧𑀓𑀭𑀡𑀯𑀲𑁂𑀦 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

‘‘𑀅𑀢𑁆𑀣𑀸 𑀧𑀓𑀭𑀡𑀸 𑀮𑀺𑀗𑁆𑀕𑀸, 𑀑𑀘𑀺𑀢𑁆𑀬𑀸 𑀓𑀸𑀮𑀤𑁂𑀲𑀢𑁄;

𑀲𑀤𑁆𑀤𑀢𑁆𑀣𑀸 𑀯𑀺𑀪𑀚𑀻𑀬𑀦𑁆𑀢𑀺, 𑀦 𑀲𑀤𑁆𑀤𑀸𑀬𑁂𑀯 𑀓𑁂𑀯𑀮𑀸’’𑀢𑀺. 𑁋

𑀳𑀺 𑀯𑀼𑀢𑁆𑀢𑀁. 𑀘𑀺𑀢𑁆𑀭𑀸𑀢𑀺 𑀯𑀺𑀘𑀺𑀢𑁆𑀭𑀸. 𑀦𑀻𑀮𑀧𑀻𑀢𑀸𑀤𑀻 𑀯𑀤𑁆𑀥𑀸𑀬𑁂𑀯 𑀬𑀸𑀲𑀦𑁆𑀢𑀺 𑀲𑀫𑀸𑀲𑁄. 𑀆𑀤𑀺-𑀲𑀤𑁆𑀤𑁂𑀦 𑀑𑀤𑀸𑀢𑀸𑀤𑀻𑀦𑀁 𑀕𑀳𑀡𑀁. 𑀢𑀺𑀢𑁆𑀢𑀺𑀭𑀧𑀢𑁆𑀢𑀲𑀤𑀺𑀲𑁄 𑀯𑀺𑀘𑀺𑀢𑁆𑀢𑁄 𑀯𑀡𑁆𑀡𑁄 𑀢𑀺𑀢𑁆𑀢𑀺𑀭𑀧𑀢𑁆𑀢-𑀲𑀤𑁆𑀤𑁂𑀦 𑀕𑀳𑀺𑀢𑁄. 𑀢𑀫𑁂𑀢𑁂𑀲𑀫𑀢𑁆𑀣𑀻𑀢𑀺 𑀢𑀺𑀢𑁆𑀢𑀺𑀭𑀧𑀢𑁆𑀢𑀺𑀓𑀸. 𑀫𑁂𑀡𑁆𑀟𑀲𑁆𑀲 𑀘 𑀅𑀚𑀲𑁆𑀲 𑀘 𑀯𑀺𑀲𑀸𑀡𑀲𑀤𑀺𑀲𑀸 𑀯𑀤𑁆𑀥𑀸 𑀬𑀸𑀲𑀦𑁆𑀢𑀺 𑀩𑀸𑀳𑀺𑀭𑀢𑁆𑀣𑁄. 𑀢𑀸 𑀧𑀦 𑀓𑀡𑁆𑀡𑀺𑀓𑀝𑁆𑀞𑀸𑀦𑁂 𑀫𑁂𑀡𑁆𑀟𑀓𑀅𑀚𑀯𑀺𑀲𑀸𑀡𑀲𑀡𑁆𑀞𑀸𑀦𑁂 𑀯𑀤𑁆𑀥𑁂 𑀬𑁄𑀚𑁂𑀢𑁆𑀯𑀸 𑀓𑀢𑀸. 𑀏𑀲 𑀦𑀬𑁄 𑀯𑀺𑀘𑁆𑀙𑀺𑀓𑀸𑀴𑀺𑀓𑀸𑀤𑀻𑀲𑀼. 𑀧𑀡𑁆𑀳𑀺𑀧𑀺𑀥𑀸𑀦𑀢𑁆𑀣𑀁 𑀢𑀮𑁂 𑀔𑀮𑁆𑀮𑀁 𑀩𑀤𑁆𑀥𑀁 𑀬𑀸𑀲𑀦𑁆𑀢𑀺 𑀯𑀺𑀕𑁆𑀕𑀳𑁄. 𑀚𑀗𑁆𑀖𑀢𑁄 𑀲𑀩𑁆𑀩𑀧𑀸𑀤𑀧𑁆𑀧𑀝𑀺𑀘𑁆𑀙𑀸𑀤𑀦𑀓𑀁 𑀧𑀼𑀝𑀁 𑀩𑀤𑁆𑀥𑀁 𑀬𑀸𑀲𑀦𑁆𑀢𑀺 𑀩𑀳𑀼𑀩𑁆𑀩𑀻𑀳𑀺. 𑀢𑀽𑀮𑀁 𑀧𑀺𑀘𑀼 𑀧𑀼𑀡𑁆𑀡𑀁 𑀬𑀸𑀲𑀦𑁆𑀢𑀺 𑀅𑀜𑁆𑀜𑀧𑀤𑀢𑁆𑀣𑁄. 𑀧𑀮𑀺𑀕𑀼𑀡𑁆𑀞𑁂𑀢𑀻𑀢𑀺 𑀧𑀮𑀺𑀕𑀼𑀡𑁆𑀞𑁄, 𑀉𑀧𑀭𑀺𑀧𑀸𑀤𑀢𑀮𑀫𑀢𑁆𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑀩𑀦𑁆𑀥𑁄, 𑀢𑁂𑀦 𑀬𑁄𑀚𑁂𑀢𑁆𑀯𑀸 𑀓𑀢𑀸 𑀧𑀸𑀮𑀺𑀕𑀼𑀡𑁆𑀞𑀺𑀫𑀸, 𑀯𑀺𑀘𑀺𑀢𑁆𑀭𑀸 𑀳𑀺 𑀢𑀤𑁆𑀥𑀺𑀢𑀯𑀼𑀢𑁆𑀢𑀺. 𑀯𑀺𑀘𑁆𑀙𑀺𑀓𑀸𑀦𑀁 𑀅𑀴𑀲𑀤𑀺𑀲𑀁 𑀦𑀗𑁆𑀕𑀼𑀝𑁆𑀞𑀲𑀤𑀺𑀲𑀁 𑀩𑀤𑁆𑀥𑀫𑁂𑀢𑀸𑀲𑀦𑁆𑀢𑀺 𑀯𑀺𑀘𑁆𑀙𑀺𑀓𑀸𑀴𑀺𑀓𑀸. 𑀲𑀻𑀳𑀩𑁆𑀬𑀕𑁆𑀖𑀼𑀤𑁆𑀤𑀸𑀚𑀺𑀦𑀤𑀻𑀧𑀻𑀦𑀁 𑀘𑀫𑁆𑀫𑁂𑀳𑀺 𑀘𑀸𑀢𑀺 𑀧𑀓𑀭𑀡𑀢𑁄 𑀅𑀚𑀺𑀦𑀸 𑀦𑀸𑀫 𑀫𑀺𑀕𑀸. 𑀉𑀮𑀽𑀓𑀸 𑀧𑀓𑁆𑀔𑀺𑀩𑀺𑀴𑀸𑀭𑀸. 𑀲𑀗𑁆𑀓𑀫𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀏𑀢𑀸𑀳𑀻𑀢𑀺 𑀲𑀗𑁆𑀓𑀫𑀦𑀻𑀬𑀸. 𑀢𑀸 𑀧𑀦 𑀢𑀸𑀮𑀧𑀡𑁆𑀡𑀸𑀤𑀻𑀳𑀺 𑀓𑀢𑀸 𑀲𑀁𑀳𑀸𑀭𑀺𑀬𑀸.

𑁧𑁮𑁦. 𑀲𑀓𑀮𑀁 𑀏𑀓𑀤𑁂𑀲𑀁 𑀯𑀸 𑀧𑀼𑀜𑁆𑀙𑀺𑀢𑁆𑀯𑀸𑀯𑀸𑀢𑀺 𑀬𑁄𑀚𑀦𑀸. 𑀔𑀮𑁆𑀮𑀓𑀸𑀤𑀺𑀓𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀫𑁂𑀡𑁆𑀟𑀯𑀺𑀲𑀸𑀡𑀯𑀤𑁆𑀥𑀺𑀓𑀸𑀤𑀺𑀓𑀁 𑀲𑀩𑁆𑀩𑀁 𑀲𑀗𑁆𑀕𑀡𑁆𑀳𑀸𑀢𑀻𑀢𑀺.

𑀉𑀧𑀸𑀳𑀦𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.