𑁪𑁯. 𑀘𑀢𑀼𑀭𑀸𑀭𑀓𑁆𑀔𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁪𑁬𑁧-𑁨. 𑀅𑀲𑀼𑀪𑀦𑁆𑀢𑀺 𑀅𑀲𑀼𑀪𑀪𑀸𑀯𑀦𑀸. 𑀇𑀫𑁂 𑀘𑀢𑁆𑀢𑀸𑀭𑁄 𑀘𑀢𑀼𑀭𑀸𑀭𑀓𑁆𑀔𑀸 𑀦𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀸𑀦𑀺 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀆𑀭𑀓𑀢𑁆𑀢𑀸𑀤𑀺𑀦𑀸’’𑀢𑀺𑀆𑀤𑀺𑀫𑀸𑀳. 𑀆𑀭𑀓𑀢𑁆𑀢𑀸𑀤𑀺𑀦𑀸𑀢𑀺 𑀏𑀢𑁆𑀣 𑀆𑀭𑀓𑀢𑁆𑀢𑀸, 𑀅𑀭𑀻𑀦𑀁 𑀅𑀭𑀸𑀦𑀜𑁆𑀘 𑀳𑀢𑀢𑁆𑀢𑀸, 𑀧𑀘𑁆𑀘𑀬𑀸𑀤𑀻𑀦𑀁 𑀅𑀭𑀳𑀢𑁆𑀢𑀸, 𑀧𑀸𑀧𑀓𑀭𑀡𑁂 𑀭𑀳𑀸𑀪𑀸𑀯𑀸𑀢𑀺 𑀇𑀫𑁂𑀳𑀺 𑀢𑀸𑀯 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑁄 𑀪𑀕𑀯𑀸 𑀅𑀭𑀳𑀦𑁆𑀢𑀺 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀆𑀭𑀓𑀢𑁆𑀢𑀸 𑀳𑀢𑀢𑁆𑀢𑀸 𑀘, 𑀓𑀺𑀮𑁂𑀲𑀸𑀭𑀻𑀦 𑀲𑁄 𑀫𑀼𑀦𑀺;

𑀳𑀢𑀲𑀁𑀲𑀸𑀭𑀘𑀓𑁆𑀓𑀸𑀭𑁄, 𑀧𑀘𑁆𑀘𑀬𑀸𑀤𑀻𑀦 𑀘𑀸𑀭𑀳𑁄;

𑀦 𑀭𑀳𑁄 𑀓𑀭𑁄𑀢𑀺 𑀧𑀸𑀧𑀸𑀦𑀺, 𑀅𑀭𑀳𑀁 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺. (𑀧𑀸𑀭𑀸. 𑀅𑀝𑁆𑀞. 𑁧.𑁧; 𑀯𑀺𑀲𑀼𑀤𑁆𑀥𑀺. 𑁧.𑁧𑁩𑁦);

𑀪𑀕𑀯𑀸 𑀧𑀦 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀲𑀼𑀯𑀺𑀤𑀽𑀭𑀯𑀺𑀤𑀽𑀭𑁂 𑀞𑀺𑀢𑁄 𑀫𑀕𑁆𑀕𑁂𑀦 𑀲𑀯𑀸𑀲𑀦𑀓𑀺𑀮𑁂𑀲𑀸𑀦𑀁 𑀳𑀢𑀢𑁆𑀢𑀸, 𑀢𑀲𑁆𑀫𑀸 ‘‘𑀆𑀭𑀓𑀢𑁆𑀢𑀸 𑀅𑀭𑀳’’𑀦𑁆𑀢𑀺 𑀯𑀼𑀢𑁆𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑁄 𑀢𑀢𑁄 𑀆𑀭𑀓𑀸 𑀦𑀸𑀫;

𑀬𑀲𑁆𑀲 𑀬𑁂𑀦𑀸𑀲𑀫𑀗𑁆𑀕𑀺𑀢𑀸;

𑀅𑀲𑀫𑀗𑁆𑀕𑀻 𑀘 𑀤𑁄𑀲𑁂𑀳𑀺,

𑀦𑀸𑀣𑁄 𑀢𑁂𑀦𑀸𑀭𑀳𑀁 𑀫𑀢𑁄’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁫);

𑀪𑀕𑀯𑀢𑀸 𑀧𑀦 𑀲𑀩𑁆𑀩𑀓𑀺𑀮𑁂𑀲𑀸𑀭𑀬𑁄 𑀳𑀢𑀸, 𑀢𑀲𑁆𑀫𑀸 ‘‘𑀅𑀭𑀻𑀦𑀁 𑀳𑀢𑀢𑁆𑀢𑀸𑀧𑀺 𑀅𑀭𑀳’’𑀦𑁆𑀢𑀺 𑀯𑀼𑀢𑁆𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑀲𑁆𑀫𑀸 𑀭𑀸𑀕𑀸𑀤𑀺𑀲𑀗𑁆𑀔𑀸𑀢𑀸, 𑀲𑀩𑁆𑀩𑁂𑀧𑀺 𑀅𑀭𑀬𑁄 𑀳𑀢𑀸;

𑀧𑀜𑁆𑀜𑀸𑀲𑀢𑁆𑀣𑁂𑀦 𑀦𑀸𑀣𑁂𑀦, 𑀢𑀲𑁆𑀫𑀸𑀧𑀺 𑀅𑀭𑀳𑀁 𑀫𑀢𑁄’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁬);

𑀬𑀁 𑀧𑀦𑁂𑀢𑀁 𑀅𑀯𑀺𑀚𑁆𑀚𑀸𑀪𑀯𑀢𑀡𑁆𑀳𑀸𑀫𑀬𑀦𑀸𑀪𑀺𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀸𑀭𑀁 𑀚𑀭𑀸𑀫𑀭𑀡𑀦𑁂𑀫𑀺 ‘‘𑀆𑀲𑀯𑀲𑀫𑀼𑀤𑀬𑀸 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑁄’’𑀢𑀺 (𑀫. 𑀦𑀺. 𑁧.𑁧𑁦𑁩) 𑀯𑀘𑀦𑀢𑁄 𑀆𑀲𑀯𑀲𑀫𑀼𑀤𑀬𑀫𑀬𑁂𑀦 𑀅𑀓𑁆𑀔𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀢𑀺𑀪𑀯𑀭𑀣𑁂 𑀬𑁄𑀚𑀺𑀢𑀁 𑀅𑀦𑀸𑀤𑀺𑀓𑀸𑀮𑀧𑁆𑀧𑀯𑀢𑁆𑀢𑀁 𑀲𑀁𑀲𑀸𑀭𑀘𑀓𑁆𑀓𑀁, 𑀢𑀲𑁆𑀲 𑀪𑀕𑀯𑀢𑁄 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀧𑀸𑀤𑁂𑀳𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀬 𑀲𑀤𑁆𑀥𑀸𑀳𑀢𑁆𑀣𑁂𑀦 𑀓𑀫𑁆𑀫𑀓𑁆𑀔𑀬𑀓𑀭𑀜𑀸𑀡𑀨𑀭𑀲𑀼𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑁂 𑀅𑀭𑀸 𑀳𑀢𑀸. 𑀢𑀲𑁆𑀫𑀸 ‘‘𑀅𑀭𑀸𑀦𑀁 𑀳𑀢𑀢𑁆𑀢𑀸 𑀅𑀭𑀳’’𑀦𑁆𑀢𑀺 𑀯𑀼𑀢𑁆𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀭𑀸 𑀲𑀁𑀲𑀸𑀭𑀘𑀓𑁆𑀓𑀲𑁆𑀲, 𑀳𑀢𑀸 𑀜𑀸𑀡𑀸𑀲𑀺𑀦𑀸 𑀬𑀢𑁄;

𑀮𑁄𑀓𑀦𑀸𑀣𑁂𑀦 𑀢𑁂𑀦𑁂𑀲, 𑀅𑀭𑀳𑀦𑁆𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁮);

𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀢𑁆𑀢𑀸 𑀘𑀻𑀯𑀭𑀸𑀤𑀻𑀦𑀁 𑀧𑀘𑁆𑀘𑀬𑀸𑀦𑀁 𑀉𑀢𑁆𑀢𑀫𑀧𑀽𑀚𑀸𑀬 𑀘 𑀬𑀼𑀢𑁆𑀢𑁄 𑀪𑀕𑀯𑀸, 𑀢𑀲𑁆𑀫𑀸 ‘‘𑀧𑀘𑁆𑀘𑀬𑀸𑀤𑀻𑀦𑀁 𑀅𑀭𑀳𑀢𑁆𑀢𑀸 𑀘 𑀅𑀭𑀳’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀧𑀽𑀚𑀸𑀯𑀺𑀲𑁂𑀲𑀁 𑀲𑀳 𑀧𑀘𑁆𑀘𑀬𑁂𑀳𑀺,

𑀬𑀲𑁆𑀫𑀸 𑀅𑀬𑀁 𑀅𑀭𑀳𑀢𑀺 𑀮𑁄𑀓𑀦𑀸𑀣𑁄;

𑀅𑀢𑁆𑀣𑀸𑀦𑀼𑀭𑀽𑀧𑀁 𑀅𑀭𑀳𑀦𑁆𑀢𑀺 𑀮𑁄𑀓𑁂,

𑀢𑀲𑁆𑀫𑀸 𑀚𑀺𑀦𑁄 𑀅𑀭𑀳𑀢𑀺 𑀦𑀸𑀫𑀫𑁂𑀢’’𑀦𑁆𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁯);

𑀬𑀣𑀸 𑀮𑁄𑀓𑁂 𑀓𑁂𑀘𑀺 𑀧𑀡𑁆𑀟𑀺𑀢𑀫𑀸𑀦𑀺𑀦𑁄 𑀅𑀲𑀺𑀮𑁄𑀓𑀪𑀬𑁂𑀦 𑀭𑀳𑁄 𑀧𑀸𑀧𑀸𑀦𑀺 𑀓𑀭𑁄𑀦𑁆𑀢𑀺, 𑀢𑀣𑀸 𑀪𑀕𑀯𑀸 𑀓𑀤𑀸𑀘𑀺𑀧𑀺 𑀦 𑀓𑀭𑁄𑀢𑀺, 𑀢𑀲𑁆𑀫𑀸 ‘‘𑀧𑀸𑀧𑀓𑀭𑀡𑁂 𑀭𑀳𑀸𑀪𑀸𑀯𑀸 𑀘 𑀅𑀭𑀳’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑀲𑁆𑀫𑀸 𑀦𑀢𑁆𑀣𑀺 𑀭𑀳𑁄 𑀦𑀸𑀫, 𑀧𑀸𑀧𑀓𑀫𑁆𑀫𑁂𑀲𑀼 𑀢𑀸𑀤𑀺𑀦𑁄;

𑀭𑀳𑀸𑀪𑀸𑀯𑁂𑀦 𑀢𑁂𑀦𑁂𑀲, 𑀅𑀭𑀳𑀁 𑀇𑀢𑀺 𑀯𑀺𑀲𑁆𑀲𑀼𑀢𑁄’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁧𑁩𑁦) 𑁋

𑀏𑀯𑀁 𑀆𑀭𑀓𑀢𑁆𑀢𑀸𑀤𑀺𑀦𑀸 𑀅𑀭𑀳𑀦𑁆𑀢𑀺 𑀪𑀸𑀯𑁂𑀢𑀩𑁆𑀩𑀁.

𑀲𑀫𑁆𑀫𑀸 𑀲𑀸𑀫𑀜𑁆𑀘 𑀲𑀩𑁆𑀩𑀥𑀫𑁆𑀫𑀸𑀦𑀁 𑀩𑀼𑀤𑁆𑀥𑀢𑁆𑀢𑀸 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀲𑀫𑁆𑀫𑀸𑀢𑀺 𑀜𑀸𑀬𑁂𑀦𑁂𑀯, 𑀅𑀪𑀺𑀜𑁆𑀜𑁂𑀬𑁆𑀬𑁂 𑀥𑀫𑁆𑀫𑁂 𑀅𑀪𑀺𑀜𑁆𑀜𑁂𑀬𑁆𑀬𑀢𑁄 𑀧𑀭𑀺𑀜𑁆𑀜𑁂𑀬𑁆𑀬𑁂 𑀥𑀫𑁆𑀫𑁂 𑀧𑀭𑀺𑀜𑁆𑀜𑁂𑀬𑁆𑀬𑀢𑁄 𑀧𑀳𑀸𑀢𑀩𑁆𑀩𑁂 𑀥𑀫𑁆𑀫𑁂 𑀧𑀳𑀸𑀢𑀩𑁆𑀩𑀢𑁄 𑀲𑀘𑁆𑀙𑀺𑀓𑀸𑀢𑀩𑁆𑀩𑁂 𑀥𑀫𑁆𑀫𑁂 𑀲𑀘𑁆𑀙𑀺𑀓𑀸𑀢𑀩𑁆𑀩𑀢𑁄 𑀪𑀸𑀯𑁂𑀢𑀩𑁆𑀩𑁂 𑀥𑀫𑁆𑀫𑁂 𑀪𑀸𑀯𑁂𑀢𑀩𑁆𑀩𑀢𑁄 𑀏𑀯𑀸𑀢𑀺 𑀅𑀢𑁆𑀣𑁄. 𑀲𑀸𑀫𑀜𑁆𑀘𑀸𑀢𑀺 𑀅𑀢𑁆𑀢𑀦𑀸𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀜𑁆𑀜𑀸𑀢𑀁, 𑀪𑀸𑀯𑁂𑀢𑀩𑁆𑀩𑀜𑁆𑀘 𑀪𑀸𑀯𑀺𑀢𑀁;

𑀧𑀳𑀸𑀢𑀩𑁆𑀩𑀁 𑀧𑀳𑀻𑀦𑀁 𑀫𑁂, 𑀢𑀲𑁆𑀫𑀸 𑀩𑀼𑀤𑁆𑀥𑁄𑀲𑁆𑀫𑀺 𑀩𑁆𑀭𑀸𑀳𑁆𑀫𑀡𑀸’’𑀢𑀺. (𑀫. 𑀦𑀺. 𑁨.𑁩𑁯𑁯; 𑀲𑀼. 𑀦𑀺. 𑁫𑁬𑁩);

‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑁂 𑀦𑀯𑀪𑁂𑀤𑁂 𑀪𑀕𑀯𑀢𑁄 𑀕𑀼𑀡𑁂 𑀬𑀸 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀦𑀢𑁄 𑀲𑀢𑀺𑀬𑁂𑀯 𑀅𑀦𑀼𑀲𑁆𑀲𑀢𑀺, 𑀧𑀯𑀢𑁆𑀢𑀺𑀢𑀩𑁆𑀩𑀝𑁆𑀞𑀸𑀦𑀫𑁆𑀳𑀺𑀬𑁂𑀯 𑀯𑀸 𑀧𑀯𑀢𑁆𑀢𑀢𑁆𑀢𑀸 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀅𑀦𑀼𑀭𑀽𑀧𑀸 𑀲𑀢𑀻𑀢𑀺 𑀅𑀦𑀼𑀲𑁆𑀲𑀢𑀺, 𑀩𑀼𑀤𑁆𑀥𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀸 𑀅𑀦𑀼𑀲𑁆𑀲𑀢𑀺 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺, 𑀬𑀸 𑀏𑀯𑀁 𑀦𑀯𑀯𑀺𑀥𑁂𑀦 𑀧𑀯𑀢𑁆𑀢𑀸 𑀲𑀢𑀺, 𑀲𑀸 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀸𑀓𑀸𑀭𑁂𑀦 𑀧𑀦 𑀆𑀘𑀭𑀺𑀬𑁂𑀦 𑀩𑀼𑀤𑁆𑀥𑀖𑁄𑀲𑁂𑀦 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁩 𑀆𑀤𑀬𑁄) 𑀯𑀼𑀢𑁆𑀢𑀸, 𑀅𑀢𑁆𑀣𑀺𑀓𑁂𑀦 𑀧𑀦 𑀢𑀢𑁄 𑀧𑀘𑁆𑀘𑀸𑀲𑀻𑀲𑀺𑀢𑀩𑁆𑀩𑀸.

𑁪𑁬𑁩-𑁪. 𑀘𑀢𑀼𑀭𑀸𑀭𑀓𑁆𑀔𑀸𑀬 𑀲𑀸𑀬𑀁𑀧𑀸𑀢𑀁 𑀪𑀸𑀯𑁂𑀢𑀩𑁆𑀩𑀢𑁆𑀢𑀸 𑀫𑁂𑀢𑁆𑀢𑀸𑀪𑀸𑀯𑀦𑀁 𑀤𑀲𑁆𑀲𑁂𑀦𑁆𑀢𑁂𑀦 𑀣𑁂𑀭𑁂𑀦 𑀲𑀩𑁆𑀩𑀢𑁆𑀣𑀓𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀯𑀲𑁂𑀦 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀢𑀭𑀣𑀸 ‘‘𑀅𑀢𑁆𑀢𑀸𑀦𑀁 𑀉𑀧𑀫𑀁 𑀓𑀢𑁆𑀯𑀸, 𑀦 𑀳𑀦𑁂𑀬𑁆𑀬 𑀦 𑀖𑀸𑀢𑀬𑁂’’𑀢𑀺 (𑀥. 𑀧. 𑁧𑁨𑁯-𑁧𑁩𑁦) 𑀯𑀘𑀦𑀢𑁄 𑀲𑀩𑁆𑀩𑀧𑀞𑀫𑀁 ‘‘𑀅𑀳𑀁 𑀲𑀼𑀔𑀺𑀢𑁄 𑀳𑁄𑀫𑀺, 𑀅𑀯𑁂𑀭𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀪𑀸𑀯𑁂𑀢𑁆𑀯𑀸𑀯 𑀅𑀢𑁆𑀢𑀦𑀺 𑀘𑀺𑀢𑁆𑀢𑀁 𑀦𑀺𑀧𑀭𑀺𑀩𑀦𑁆𑀥𑀫𑀸𑀦𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀤𑀻𑀲𑀼 𑀓𑀫𑁂𑀦 𑀪𑀸𑀯𑁂𑀢𑀩𑁆𑀩𑀸. 𑀅𑀢𑁆𑀢𑀦𑀺 𑀧𑀦 𑀅𑀧𑁆𑀧𑀦𑀸 𑀦 𑀳𑁄𑀢𑀺. 𑀕𑁄𑀘𑀭𑀕𑀸𑀫𑀫𑁆𑀳𑀺 𑀇𑀲𑁆𑀲𑀭𑁂 𑀚𑀦𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁧𑁬𑁫) 𑀕𑁄𑀘𑀭𑀕𑀸𑀫𑁂. 𑀲𑀻𑀫𑀝𑁆𑀞𑀲𑀗𑁆𑀖𑀢𑁄 𑀧𑀝𑁆𑀞𑀸𑀬 𑀧𑀭𑀺𑀘𑁆𑀙𑀺𑀚𑁆𑀚 𑀧𑀭𑀺𑀘𑁆𑀙𑀺𑀚𑁆𑀚𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀫𑁂𑀢𑁆𑀢𑀁 𑀪𑀸𑀯𑁂𑀦𑁆𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑁂 𑀫𑁂𑀢𑁆𑀢𑀸𑀬 𑀲𑀳𑀯𑀸𑀲𑀻𑀦𑀁 𑀫𑀼𑀤𑀼𑀘𑀺𑀢𑁆𑀢𑀁 𑀚𑀦𑁂𑀢𑀺, 𑀅𑀣𑀲𑁆𑀲 𑀲𑀼𑀔𑀲𑀁𑀯𑀸𑀲𑀢𑀸 𑀳𑁄𑀢𑀺. 𑀲𑀻𑀫𑀝𑁆𑀞𑀓𑀤𑁂𑀯𑀢𑀸𑀲𑀼 𑀫𑁂𑀢𑁆𑀢𑀸𑀬 𑀫𑀼𑀤𑀼𑀓𑀢𑀘𑀺𑀢𑁆𑀢𑀸𑀳𑀺 𑀤𑁂𑀯𑀢𑀸𑀳𑀺 𑀥𑀫𑁆𑀫𑀺𑀓𑀸𑀬 𑀭𑀓𑁆𑀔𑀸𑀬 𑀲𑀼𑀲𑀁𑀯𑀺𑀳𑀺𑀢𑀭𑀓𑁆𑀔𑁄 𑀳𑁄𑀢𑀺. 𑀕𑁄𑀘𑀭𑀕𑀸𑀫𑀫𑁆𑀳𑀺 𑀇𑀲𑁆𑀲𑀭𑀚𑀦𑁂 𑀫𑁂𑀢𑁆𑀢𑀸𑀬 𑀫𑀼𑀤𑀼𑀓𑀢𑀘𑀺𑀢𑁆𑀢𑀲𑀦𑁆𑀢𑀸𑀦𑁂𑀳𑀺 𑀇𑀲𑁆𑀲𑀭𑁂𑀳𑀺 𑀥𑀫𑁆𑀫𑀺𑀓𑀸𑀬 𑀭𑀓𑁆𑀔𑀸𑀬 𑀲𑀼𑀭𑀓𑁆𑀔𑀺𑀢𑀧𑀭𑀺𑀓𑁆𑀔𑀸𑀭𑁄 𑀳𑁄𑀢𑀺. 𑀢𑀢𑁆𑀣 𑀫𑀦𑀼𑀲𑁆𑀲𑁂 𑀫𑁂𑀢𑁆𑀢𑀸𑀬 𑀧𑀲𑀸𑀤𑀺𑀢𑀘𑀺𑀢𑁆𑀢𑁂𑀳𑀺 𑀢𑁂𑀳𑀺 𑀅𑀧𑀭𑀺𑀪𑀽𑀢𑁄 𑀳𑀼𑀢𑁆𑀯𑀸 𑀯𑀺𑀘𑀭𑀢𑀺. 𑀲𑀩𑁆𑀩𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀸𑀬 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀘𑀸𑀭𑁄 𑀳𑁄𑀢𑀺.

𑁪𑁬𑁫-𑁬. 𑀯𑀡𑁆𑀡𑀢𑁄 𑀘 𑀲𑀡𑁆𑀞𑀸𑀦𑀢𑁄 𑀘 𑀑𑀓𑀸𑀲𑀢𑁄 𑀘 𑀤𑀺𑀲𑀢𑁄 𑀘 𑀧𑀭𑀺𑀘𑁆𑀙𑁂𑀤𑀢𑁄 𑀘 𑀓𑁂𑀲𑀸𑀤𑀺𑀓𑁄𑀝𑁆𑀞𑀸𑀲𑁂 𑀯𑀯𑀢𑁆𑀣𑀧𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 𑀯𑀡𑁆𑀡𑀢𑁄𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁧𑁧𑁦) 𑀓𑁂𑀲𑀸𑀤𑀻𑀦𑀁 𑀯𑀡𑁆𑀡𑀢𑁄. 𑀲𑀡𑁆𑀞𑀸𑀦𑀢𑁄𑀢𑀺 𑀢𑁂𑀲𑀁𑀬𑁂𑀯 𑀲𑀡𑁆𑀞𑀸𑀦𑀢𑁄. 𑀑𑀓𑀸𑀲𑀢𑁄𑀢𑀺 ‘‘𑀅𑀬𑀁 𑀓𑁄𑀝𑁆𑀞𑀸𑀲𑁄 𑀇𑀫𑀲𑁆𑀫𑀺𑀁 𑀦𑀸𑀫 𑀑𑀓𑀸𑀲𑁂 𑀧𑀢𑀺𑀝𑁆𑀞𑀺𑀢𑁄’’𑀢𑀺 𑀏𑀯𑀁 𑀢𑀲𑁆𑀲 𑀢𑀲𑁆𑀲 𑀑𑀓𑀸𑀲𑀢𑁄. 𑀤𑀺𑀲𑀢𑁄𑀢𑀺 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀦𑀸𑀪𑀺𑀢𑁄 𑀉𑀤𑁆𑀥𑀁 𑀉𑀧𑀭𑀺𑀫𑀸 𑀤𑀺𑀲𑀸, 𑀅𑀥𑁄 𑀳𑁂𑀝𑁆𑀞𑀺𑀫𑀸 𑀤𑀺𑀲𑀸, 𑀢𑀲𑁆𑀫𑀸 ‘‘𑀅𑀬𑀁 𑀓𑁄𑀝𑁆𑀞𑀸𑀲𑁄 𑀇𑀫𑀺𑀲𑁆𑀲𑀸 𑀦𑀸𑀫 𑀤𑀺𑀲𑀸𑀬𑀸’’𑀢𑀺 𑀤𑀺𑀲𑀸 𑀯𑀯𑀢𑁆𑀣𑀧𑁂𑀢𑀩𑁆𑀩𑀸. 𑀧𑀭𑀺𑀘𑁆𑀙𑁂𑀤𑀢𑁄𑀢𑀺 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑀢𑁄 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑀢𑁄𑀢𑀺 𑀤𑁆𑀯𑁂 𑀧𑀭𑀺𑀘𑁆𑀙𑁂𑀤𑀸. 𑀢𑀢𑁆𑀣 ‘‘𑀅𑀬𑀁 𑀓𑁄𑀝𑁆𑀞𑀸𑀲𑁄 𑀳𑁂𑀝𑁆𑀞𑀸 𑀘 𑀉𑀧𑀭𑀺 𑀘 𑀢𑀺𑀭𑀺𑀬𑀜𑁆𑀘 𑀇𑀫𑀺𑀦𑀸 𑀦𑀸𑀫 𑀧𑀭𑀺𑀘𑁆𑀙𑁂𑀤𑁄’’𑀢𑀺 𑀏𑀯𑀁 𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀓𑁂𑀲𑀸 𑀦 𑀮𑁄𑀫𑀸, 𑀮𑁄𑀫𑀸 𑀦 𑀓𑁂𑀲𑀸’’𑀢𑀺 𑀏𑀯𑀁 𑀅𑀫𑀺𑀲𑁆𑀲𑀓𑀯𑀲𑁂𑀦 𑀯𑀺𑀲𑀪𑀸𑀕𑀧𑀭𑀺𑀘𑁆𑀙𑁂𑀤𑁄.

𑀏𑀯𑀁 𑀧𑀜𑁆𑀘𑀳𑀺 𑀆𑀓𑀸𑀭𑁂𑀳𑀺 𑀯𑀯𑀢𑁆𑀣𑀸𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀫𑀦𑀲𑀺 𑀓𑀭𑁄𑀦𑁆𑀢𑁂𑀦 𑀏𑀯𑀁 𑀫𑀦𑀲𑀺 𑀓𑀸𑀢𑀩𑁆𑀩𑀦𑁆𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀼𑀧𑀼𑀩𑁆𑀩𑀢𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀼𑀧𑀼𑀩𑁆𑀩𑀢𑁄𑀢𑀺 𑀲𑀚𑁆𑀛𑀸𑀬𑀓𑀭𑀡𑀓𑀸𑀮𑀢𑁄 𑀧𑀝𑁆𑀞𑀸𑀬 ‘‘𑀓𑁂𑀲𑀸 𑀦𑀔𑀸’’𑀢𑀺 𑀏𑀯𑀁 𑀏𑀓𑀦𑁆𑀢𑀭𑀺𑀓𑀸𑀬 𑀯𑀸 ‘‘𑀮𑁄𑀫𑀸 𑀓𑁂𑀲𑀸’’𑀢𑀺 𑀏𑀯𑀁 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀯𑀸 𑀦 𑀫𑀦𑀲𑀺 𑀓𑀸𑀢𑀩𑁆𑀩𑀁, 𑀅𑀣 𑀔𑁄 ‘‘𑀓𑁂𑀲𑀸 𑀮𑁄𑀫𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀫𑀦𑀲𑀺 𑀓𑀸𑀢𑀩𑁆𑀩𑀁, 𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀫𑀦𑀲𑀺 𑀓𑀭𑁄𑀦𑁆𑀢𑁂𑀦𑀸𑀧𑀺 𑀦𑀸𑀢𑀺𑀲𑀻𑀖𑀁 𑀦𑀸𑀢𑀺𑀲𑀡𑀺𑀓𑀁 𑀫𑀦𑀲𑀺 𑀓𑀸𑀢𑀩𑁆𑀩𑀁, 𑀩𑀳𑀺𑀤𑁆𑀥𑀸 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑁂 𑀘𑁂𑀢𑀲𑁄 𑀯𑀺𑀓𑁆𑀔𑁂𑀧𑁄 𑀧𑀝𑀺𑀩𑀸𑀳𑀺𑀢𑀩𑁆𑀩𑁄. ‘‘𑀧𑀡𑁆𑀡𑀢𑁆𑀢𑀺𑀁 𑀲𑀫𑀢𑀺𑀓𑁆𑀓𑀫𑁆𑀫, 𑀫𑀼𑀜𑁆𑀘𑀦𑁆𑀢𑀲𑁆𑀲𑀸𑀦𑀼𑀧𑀼𑀩𑁆𑀩𑀢𑁄’’𑀢𑀺 𑀧𑀸𑀞𑁄 𑀕𑀳𑁂𑀢𑀩𑁆𑀩𑁄. 𑀏𑀯𑀜𑁆𑀳𑀺 𑀲𑀢𑀺 𑀪𑀸𑀯𑀦𑀸𑀓𑁆𑀓𑀫𑁂𑀦 𑀅𑀢𑁆𑀣𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑁄 𑀳𑁄𑀢𑀺. ‘‘𑀓𑁂𑀲𑀸 𑀮𑁄𑀫𑀸’’𑀢𑀺𑀆𑀤𑀺𑀧𑀜𑁆𑀜𑀢𑁆𑀢𑀺𑀁 𑀅𑀫𑀦𑀲𑀺𑀓𑀢𑁆𑀯𑀸 𑀧𑀝𑀺𑀓𑁆𑀓𑀽𑀮𑀪𑀸𑀯𑁂𑀦 𑀏𑀯𑀁 𑀘𑀺𑀢𑁆𑀢𑀁 𑀞𑀧𑁂𑀢𑀩𑁆𑀩𑀁. 𑀫𑀼𑀜𑁆𑀘𑀦𑁆𑀢𑀲𑁆𑀲𑀸𑀦𑀼𑀧𑀼𑀩𑁆𑀩𑀢𑁄𑀢𑀺 𑀬𑁄 𑀬𑁄 𑀓𑁄𑀝𑁆𑀞𑀸𑀲𑁄 𑀆𑀧𑀸𑀣𑀁 𑀦𑀸𑀕𑀘𑁆𑀙𑀢𑀺, 𑀢𑀁 𑀢𑀁 𑀅𑀦𑀼𑀧𑀼𑀩𑁆𑀩𑀢𑁄 𑀫𑀼𑀜𑁆𑀘𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄.

𑁪𑁬𑁭. 𑀇𑀤𑀸𑀦𑀺 𑀬𑀣𑀸 𑀧𑀝𑀺𑀓𑁆𑀓𑀽𑀮𑀫𑀦𑀲𑀺𑀓𑀸𑀭𑁄 𑀓𑀸𑀢𑀩𑁆𑀩𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀡𑁆𑀡𑀆𑀲𑀬𑀲𑀡𑁆𑀞𑀸𑀦𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁂𑀳𑀺 𑀯𑀡𑁆𑀡𑀸𑀤𑀻𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀧𑀝𑀺𑀓𑁆𑀓𑀽𑀮𑀸𑀢𑀺 𑀪𑀸𑀯𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 (𑀯𑀺𑀪. 𑀅𑀝𑁆𑀞. 𑁩𑁫𑁬; 𑀯𑀺𑀲𑀼𑀤𑁆𑀥𑀺. 𑁧.𑁧𑁭𑁮) 𑀓𑁂𑀲𑀸 𑀢𑀸𑀯 𑀯𑀡𑁆𑀡𑀢𑁄𑀧𑀺 𑀧𑀝𑀺𑀓𑁆𑀓𑀽𑀮𑀸. 𑀢𑀣𑀸 𑀳𑀺 𑀬𑀸𑀕𑀼𑀪𑀢𑁆𑀢𑀸𑀤𑀻𑀲𑀼 𑀓𑁂𑀲𑀯𑀡𑁆𑀡𑀁 𑀓𑀺𑀜𑁆𑀘𑀺 𑀤𑀺𑀲𑁆𑀯𑀸 𑀚𑀺𑀕𑀼𑀘𑁆𑀙𑀦𑁆𑀢𑀺. 𑀲𑀡𑁆𑀞𑀸𑀦𑀢𑁄𑀧𑀺 𑀧𑀝𑀺𑀓𑁆𑀓𑀽𑀮𑀸. 𑀢𑀣𑀸 𑀳𑀺 𑀭𑀢𑁆𑀢𑀺𑀁 𑀪𑀼𑀜𑁆𑀚𑀦𑁆𑀢𑀸 𑀓𑁂𑀲𑀲𑀡𑁆𑀞𑀸𑀦𑀁 𑀫𑀓𑀘𑀺𑀯𑀸𑀓𑀸𑀤𑀺𑀓𑀁 𑀙𑀼𑀧𑀺𑀢𑁆𑀯𑀸 𑀚𑀺𑀕𑀼𑀘𑁆𑀙𑀦𑁆𑀢𑀺. 𑀢𑁂𑀮𑀫𑀓𑁆𑀔𑀦𑀸𑀤𑀺𑀯𑀺𑀭𑀳𑀺𑀢𑀸𑀦𑀜𑁆𑀘 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀸𑀦𑀜𑁆𑀘 𑀕𑀦𑁆𑀥𑁄 𑀅𑀢𑀺𑀯𑀺𑀬 𑀧𑀝𑀺𑀓𑁆𑀓𑀽𑀮𑁄𑀢𑀺 𑀕𑀦𑁆𑀥𑀢𑁄𑀧𑀺 𑀧𑀝𑀺𑀓𑁆𑀓𑀽𑀮𑀸. 𑀅𑀲𑀼𑀘𑀺𑀝𑁆𑀞𑀸𑀦𑁂 𑀚𑀸𑀢𑀲𑀽𑀧𑁂𑀬𑁆𑀬𑀧𑀡𑁆𑀡𑀁 𑀯𑀺𑀬 𑀧𑀼𑀩𑁆𑀩𑀮𑁄𑀳𑀺𑀢𑀫𑀼𑀢𑁆𑀢𑀓𑀭𑀻𑀲𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀺𑀦𑀺𑀲𑁆𑀲𑀦𑁆𑀤𑁂𑀦 𑀚𑀸𑀢𑀢𑁆𑀢𑀸 𑀆𑀲𑀬𑀢𑁄𑀧𑀺 𑀧𑀝𑀺𑀓𑁆𑀓𑀽𑀮𑀸. 𑀕𑀽𑀣𑀭𑀸𑀲𑀺𑀫𑁆𑀳𑀺 𑀉𑀝𑁆𑀞𑀺𑀢𑀓𑀡𑁆𑀡𑀺𑀓𑀁 𑀯𑀺𑀬 𑀏𑀓𑀢𑀺𑀁𑀲𑀓𑁄𑀝𑁆𑀞𑀸𑀲𑀭𑀸𑀲𑀺𑀫𑁆𑀳𑀺 𑀚𑀸𑀢𑀢𑁆𑀢𑀸 𑀑𑀓𑀸𑀲𑀢𑁄𑀧𑀺 𑀧𑀝𑀺𑀓𑁆𑀓𑀽𑀮𑀸. 𑀉𑀤𑁆𑀥𑀼𑀫𑀸𑀢𑀓𑀁 𑀯𑀺𑀦𑀻𑀮𑀓𑀁 𑀯𑀺𑀧𑀼𑀩𑁆𑀩𑀓𑀁 𑀯𑀺𑀘𑁆𑀙𑀺𑀤𑁆𑀤𑀓𑀁 𑀯𑀺𑀓𑁆𑀔𑀸𑀬𑀺𑀢𑀓𑀁 𑀯𑀺𑀓𑁆𑀔𑀺𑀢𑁆𑀢𑀓𑀁 𑀳𑀢𑀯𑀺𑀓𑁆𑀔𑀺𑀢𑁆𑀢𑀓𑀁 𑀮𑁄𑀳𑀺𑀢𑀓𑀁 𑀧𑀼𑀴𑀯𑀓𑀁 𑀅𑀝𑁆𑀞𑀺𑀓𑀦𑁆𑀢𑀺 𑀇𑀫𑁂𑀲𑀼 𑀉𑀤𑁆𑀥𑀼𑀫𑀸𑀢𑀓𑀸𑀤𑀻𑀲𑀼 𑀯𑀢𑁆𑀣𑀽𑀲𑀼 𑀅𑀲𑀼𑀪𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀸 𑀪𑀸𑀯𑀦𑀸 𑀯𑀸 𑀅𑀲𑀼𑀪𑀁 𑀦𑀸𑀫𑀸𑀢𑀺 𑀅𑀢𑁆𑀣𑁄.

𑁪𑁬𑁮. 𑀬𑀁 𑀧𑀦𑁂𑀢𑀁 𑀅𑀭𑀳𑀦𑁆𑀢𑀸𑀦𑀁 𑀯𑀝𑁆𑀝𑀤𑀼𑀓𑁆𑀔𑀲𑀫𑀼𑀘𑁆𑀙𑁂𑀤𑀲𑀗𑁆𑀔𑀸𑀢𑀁 𑀲𑀫𑀼𑀘𑁆𑀙𑁂𑀤𑀫𑀭𑀡𑀁 (𑀯𑀺𑀲𑀼𑀤𑁆𑀥𑀺. 𑁧.𑁧𑁬𑁭), 𑀲𑀗𑁆𑀔𑀸𑀭𑀸𑀦𑀁 𑀔𑀡𑀪𑀗𑁆𑀕𑀲𑀗𑁆𑀔𑀸𑀢𑀁 𑀔𑀡𑀺𑀓𑀫𑀭𑀡𑀁, ‘‘𑀭𑀼𑀓𑁆𑀔𑁄 𑀫𑀢𑁄, 𑀮𑁄𑀳𑀁 𑀫𑀢’’𑀦𑁆𑀢𑀺𑀆𑀤𑀺 𑀲𑀫𑁆𑀫𑀼𑀢𑀺𑀫𑀭𑀡𑀜𑁆𑀘, 𑀦 𑀢𑀁 𑀇𑀥 𑀅𑀥𑀺𑀧𑁆𑀧𑁂𑀢𑀁. 𑀇𑀥 𑀧𑀦 𑀫𑀭𑀡𑀦𑁆𑀢𑀺 𑀏𑀓𑀪𑀯𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀘𑁆𑀙𑁂𑀤𑁄 𑀅𑀥𑀺𑀧𑁆𑀧𑁂𑀢𑁄. 𑀢𑀫𑁆𑀧𑀺 𑀓𑀸𑀮𑀫𑀭𑀡𑀁 𑀅𑀓𑀸𑀮𑀫𑀭𑀡𑀦𑁆𑀢𑀺 𑀤𑀼𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀓𑀸𑀮𑀫𑀭𑀡𑀁 𑀧𑀼𑀜𑁆𑀜𑀓𑁆𑀔𑀬𑁂𑀦 𑀯𑀸 𑀆𑀬𑀼𑀓𑁆𑀔𑀬𑁂𑀦 𑀯𑀸 𑀉𑀪𑀬𑀓𑁆𑀔𑀬𑁂𑀦 𑀯𑀸 𑀳𑁄𑀢𑀺, 𑀅𑀓𑀸𑀮𑀫𑀭𑀡𑀁 𑀉𑀧𑀧𑀻𑀴𑀓𑀉𑀧𑀘𑁆𑀙𑁂𑀤𑀓𑀓𑀫𑁆𑀫𑀯𑀲𑁂𑀦. ‘‘𑀫𑀭𑀡𑀁 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀸 ‘‘𑀚𑀻𑀯𑀺𑀢𑀁 𑀉𑀘𑁆𑀙𑀺𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀯𑀸 ‘‘𑀫𑀭𑀡𑀁 𑀫𑀭𑀡’’𑀦𑁆𑀢𑀺 𑀯𑀸 𑀬𑁄𑀦𑀺𑀲𑁄 𑀪𑀸𑀯𑀬𑀺𑀢𑁆𑀯𑀸𑀦𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁬𑁯-𑁭𑁦. 𑀬𑀲𑁆𑀲 𑀧𑀦 𑀏𑀢𑁆𑀢𑀸𑀯𑀢𑀸 𑀉𑀧𑀘𑀸𑀭𑀚𑁆𑀛𑀸𑀦𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀦 𑀯𑀥𑀓𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑁄 𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀢𑁄 𑀉𑀧𑀲𑀁𑀳𑀭𑀡𑀢𑁄 𑀓𑀸𑀬𑀩𑀳𑀼𑀲𑀸𑀥𑀸𑀭𑀡𑀢𑁄 𑀆𑀬𑀼𑀤𑀼𑀩𑁆𑀩𑀮𑀢𑁄 𑀅𑀦𑀺𑀫𑀺𑀢𑁆𑀢𑀢𑁄 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀢𑁄 𑀔𑀡𑀧𑀭𑀺𑀢𑁆𑀢𑀢𑁄𑀢𑀺 𑀇𑀫𑁂𑀳𑀺 𑀅𑀝𑁆𑀞𑀳𑀺 𑀆𑀓𑀸𑀭𑁂𑀳𑀺 𑀫𑀭𑀡𑀁 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀁, 𑀇𑀤𑀸𑀦𑀺 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀯𑀥𑀓𑀲𑁆𑀲𑁂𑀯𑀼𑀧𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀅𑀲𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀲𑀻𑀲𑀁 𑀙𑀺𑀦𑁆𑀤𑀺𑀢𑀼𑀁 𑀞𑀺𑀢𑀯𑀥𑀓𑁄 𑀯𑀺𑀬 𑀫𑀭𑀡𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀫𑁂𑀯𑀸𑀢𑀺 𑀪𑀸𑀯𑀦𑀸 𑀫𑀭𑀡𑀲𑁆𑀲𑀢𑀺 𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀲𑀩𑁆𑀩𑀢𑁆𑀣. 𑀲𑀩𑁆𑀩𑀁 𑀆𑀭𑁄𑀕𑁆𑀬𑀁 𑀩𑁆𑀬𑀸𑀥𑀺𑀧𑀭𑀺𑀬𑁄𑀲𑀸𑀦𑀁, 𑀲𑀩𑁆𑀩𑀁 𑀬𑁄𑀩𑁆𑀩𑀦𑀁 𑀚𑀭𑀸𑀧𑀭𑀺𑀬𑁄𑀲𑀸𑀦𑀁, 𑀲𑀩𑁆𑀩𑀁 𑀚𑀻𑀯𑀺𑀢𑀁 𑀫𑀭𑀡𑀧𑀭𑀺𑀬𑁄𑀲𑀸𑀦𑀁, 𑀢𑀲𑁆𑀫𑀸 ‘‘𑀅𑀬𑀁 𑀬𑁄𑀩𑁆𑀩𑀦𑀸𑀤𑀺𑀓𑀸𑀬𑀲𑀫𑁆𑀧𑀢𑁆𑀢𑀺 𑀢𑀸𑀯𑀤𑁂𑀯 𑀲𑁄𑀪𑀢𑀺, 𑀬𑀸𑀯 𑀫𑀭𑀡𑀲𑀗𑁆𑀔𑀸𑀢𑀸 𑀯𑀺𑀧𑀢𑁆𑀢𑀺 𑀦 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀢𑁄 𑀘, 𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀉𑀧𑀲𑀁𑀳𑀭𑀡𑀢𑁄 𑀫𑀭𑀡𑀁 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀁 𑀬𑀲𑀫𑀳𑀢𑁆𑀢𑀢𑁄 𑀧𑀼𑀜𑁆𑀜𑀫𑀳𑀢𑁆𑀢𑀢𑁄 𑀣𑀸𑀫𑀫𑀳𑀢𑁆𑀢𑀢𑁄 𑀇𑀤𑁆𑀥𑀺𑀫𑀳𑀢𑁆𑀢𑀢𑁄 𑀧𑀜𑁆𑀜𑀸𑀫𑀳𑀢𑁆𑀢𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑁄𑀢𑀺. 𑀢𑀢𑁆𑀣 ‘‘𑀇𑀤𑀁 𑀫𑀭𑀡𑀁 𑀦𑀸𑀫 𑀫𑀳𑀸𑀬𑀲𑀸𑀦𑀁 𑀫𑀳𑀸𑀧𑀭𑀺𑀯𑀸𑀭𑀸𑀦𑀁 𑀫𑀳𑀸𑀲𑀫𑁆𑀫𑀢𑀫𑀦𑁆𑀥𑀸𑀢𑀸𑀤𑀻𑀦𑀫𑁆𑀧𑀺 𑀉𑀧𑀭𑀺 𑀧𑀢𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀫𑀬𑁆𑀳𑀁 𑀉𑀧𑀭𑀺 𑀦 𑀧𑀢𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀬𑀲𑀫𑀳𑀢𑁆𑀢𑀢𑁄,

‘‘𑀚𑁄𑀢𑀺𑀓𑁄 𑀚𑀝𑀺𑀮𑁄 𑀉𑀕𑁆𑀕𑁄,

𑀫𑁂𑀡𑁆𑀟𑀓𑁄 𑀅𑀣 𑀧𑀼𑀡𑁆𑀡𑀓𑁄;

𑀏𑀢𑁂 𑀘𑀜𑁆𑀜𑁂 𑀘 𑀬𑁂 𑀮𑁄𑀓𑁂,

𑀫𑀳𑀸𑀧𑀼𑀜𑁆𑀜𑀸𑀢𑀺 𑀯𑀺𑀲𑁆𑀲𑀼𑀢𑀸;

𑀲𑀩𑁆𑀩𑁂 𑀫𑀭𑀡𑀫𑀸𑀧𑀦𑁆𑀦𑀸,

𑀫𑀸𑀤𑀺𑀲𑁂𑀲𑀼 𑀓𑀣𑀸𑀯 𑀓𑀸’’𑀢𑀺. 𑁋

𑀏𑀯𑀁 𑀧𑀼𑀜𑁆𑀜𑀫𑀳𑀢𑁆𑀢𑀢𑁄,

‘‘𑀯𑀸𑀲𑀼𑀤𑁂𑀯𑁄 𑀩𑀮𑀤𑁂𑀯𑁄, 𑀪𑀻𑀫𑀲𑁂𑀦𑀸𑀤𑀬𑁄 𑀫𑀳𑀸;

𑀩𑀮𑀸 𑀫𑀘𑁆𑀘𑀼𑀯𑀲𑀁 𑀧𑀢𑁆𑀢𑀸, 𑀫𑀸𑀤𑀺𑀲𑁂𑀲𑀼 𑀓𑀣𑀸𑀯 𑀓𑀸’’𑀢𑀺. 𑁋

𑀏𑀯𑀁 𑀣𑀸𑀫𑀫𑀳𑀢𑁆𑀢𑀢𑁄,

‘‘𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀸𑀤𑀻𑀦𑀁 𑀫𑀳𑀺𑀤𑁆𑀥𑀺𑀓𑀸𑀦𑀫𑁆𑀧𑀺 𑀉𑀧𑀭𑀺 𑀧𑀢𑀢𑀺, 𑀫𑀸𑀤𑀺𑀲𑁂𑀲𑀼 𑀓𑀣𑀸𑀯 𑀓𑀸’’𑀢𑀺 𑀏𑀯𑀁 𑀇𑀤𑁆𑀥𑀺𑀫𑀳𑀢𑁆𑀢𑀢𑁄, ‘‘𑀲𑀸𑀭𑀺𑀧𑀼𑀢𑁆𑀢𑀸𑀤𑀻𑀦𑀁 𑀫𑀳𑀸𑀧𑀜𑁆𑀜𑀸𑀦𑀫𑁆𑀧𑀺 𑀉𑀧𑀭𑀺 𑀧𑀢𑀢𑀺, 𑀫𑀸𑀤𑀺𑀲𑁂𑀲𑀼 𑀓𑀣𑀸𑀯 𑀓𑀸’’𑀢𑀺 𑀏𑀯𑀁 𑀧𑀜𑁆𑀜𑀸𑀫𑀳𑀢𑁆𑀢𑀢𑁄. 𑀏𑀯𑀁 𑀇𑀢𑀭𑁂𑀲𑀫𑁆𑀧𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀫𑁆𑀧𑀺 𑀫𑀳𑀦𑁆𑀢𑀪𑀸𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀢𑁂𑀲𑀫𑁆𑀧𑀺 𑀉𑀧𑀭𑀺 𑀫𑀭𑀡𑀁 𑀧𑀢𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀫𑀬𑁆𑀳𑀁 𑀉𑀧𑀭𑀺 𑀦 𑀧𑀢𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀉𑀧𑀲𑀁𑀳𑀭𑀡𑀢𑁄 𑀘, ‘‘𑀅𑀬𑀁 𑀓𑀸𑀬𑁄 𑀩𑀳𑀼𑀲𑀸𑀥𑀸𑀭𑀡𑁄 𑀅𑀚𑁆𑀛𑀢𑁆𑀢𑀺𑀓𑀸𑀦𑀁𑀬𑁂𑀯 𑀅𑀦𑁂𑀓𑀲𑀢𑀸𑀦𑀁 𑀭𑁄𑀕𑀸𑀦𑀁 𑀩𑀸𑀳𑀺𑀭𑀸𑀦𑀁 𑀅𑀳𑀺𑀯𑀺𑀘𑁆𑀙𑀺𑀓𑀸𑀤𑀻𑀦𑀜𑁆𑀘𑀸’’𑀢𑀺 𑀓𑀸𑀬𑀩𑀳𑀼𑀲𑀸𑀥𑀸𑀭𑀡𑀢𑁄 𑀘, ‘‘𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀧𑀝𑀺𑀩𑀤𑁆𑀥𑀁 𑀚𑀻𑀯𑀺𑀢’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀆𑀬𑀼𑀤𑀼𑀩𑁆𑀩𑀮𑀢𑁄 𑀘,

‘‘𑀚𑀻𑀯𑀺𑀢𑀁 𑀩𑁆𑀬𑀸𑀥𑀺 𑀓𑀸𑀮𑁄 𑀘,

𑀤𑁂𑀳𑀦𑀺𑀓𑁆𑀔𑁂𑀧𑀦𑀁 𑀕𑀢𑀺;

𑀧𑀜𑁆𑀘𑁂𑀢𑁂 𑀚𑀻𑀯𑀮𑁄𑀓𑀲𑁆𑀫𑀺𑀁;

𑀅𑀦𑀺𑀫𑀺𑀢𑁆𑀢𑀸 𑀦 𑀦𑀸𑀬𑀭𑁂’’𑀢𑀺. (𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁨𑁦; 𑀚𑀸. 𑀅𑀝𑁆𑀞. 𑁨.𑁨.𑁩𑁪) 𑁋

𑀏𑀯𑀁 𑀓𑀸𑀮𑀯𑀯𑀢𑁆𑀣𑀸𑀦𑀲𑁆𑀲 𑀅𑀪𑀸𑀯𑀢𑁄 𑀘, ‘‘𑀬𑁄, 𑀪𑀺𑀓𑁆𑀔𑀯𑁂, 𑀘𑀺𑀭𑀁 𑀚𑀻𑀯𑀢𑀺, 𑀲𑁄 𑀯𑀲𑁆𑀲𑀲𑀢𑀁 𑀚𑀻𑀯𑀢𑀺 𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄’’𑀢𑀺 (𑀲𑀁. 𑀦𑀺. 𑁧.𑁧𑁪𑁫) 𑀯𑀼𑀢𑁆𑀢𑀢𑁆𑀢𑀸 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀅𑀤𑁆𑀥𑀸𑀦𑀲𑁆𑀲 𑀧𑀭𑀺𑀘𑁆𑀙𑁂𑀤𑀸𑀘 𑀪𑀸𑀯𑀦𑀸 𑀫𑀭𑀡𑀲𑁆𑀲𑀢𑀺 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀔𑀡𑀧𑀭𑀺𑀢𑁆𑀢𑀢𑁄 𑀘 𑀫𑀭𑀡𑀲𑁆𑀲𑀢𑀺 𑀪𑀸𑀯𑁂𑀢𑀩𑁆𑀩𑀸.

‘‘𑀚𑀻𑀯𑀺𑀢𑀁 𑀅𑀢𑁆𑀢𑀪𑀸𑀯𑁄 𑀘,

𑀲𑀼𑀔𑀤𑀼𑀓𑁆𑀔𑀸 𑀘 𑀓𑁂𑀯𑀮𑀸;

𑀏𑀓𑀘𑀺𑀢𑁆𑀢𑀲𑀫𑀸𑀬𑀼𑀢𑁆𑀢𑀸,

𑀮𑀳𑀼 𑀲𑁄 𑀯𑀢𑁆𑀢𑀢𑁂 𑀔𑀡𑁄’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁧𑁭𑁬) 𑁋

𑀳𑀺 𑀯𑀼𑀢𑁆𑀢𑀁. 𑀘𑀢𑀼𑀭𑀸𑀭𑀓𑁆𑀔𑀯𑀺𑀦𑀺𑀘𑁆𑀙𑀬𑁄.

𑀘𑀢𑀼𑀭𑀸𑀭𑀓𑁆𑀔𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.