𑁪𑁪. 𑀉𑀧𑁄𑀲𑀣𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁪𑁧𑁧. 𑀲𑀼𑀢𑁆𑀢𑀼𑀤𑁆𑀤𑁂𑀲𑁄 𑀲𑀗𑁆𑀖𑀲𑁆𑀲𑁂𑀯. 𑀲𑁂𑀲𑀸𑀦𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 𑀯𑀸.

𑁪𑁧𑁨. 𑀧𑀼𑀩𑁆𑀩𑀓𑀭𑀡𑁂 𑀧𑀼𑀩𑁆𑀩𑀓𑀺𑀘𑁆𑀘𑁂, 𑀧𑀢𑁆𑀢𑀓𑀮𑁆𑀮𑁂 𑀲𑀫𑀸𑀦𑀺𑀢𑁂𑀢𑀺 𑀲𑀩𑁆𑀩𑀧𑀞𑀫𑀁 𑀓𑀢𑁆𑀢𑀩𑁆𑀩𑀁 𑀧𑀼𑀩𑁆𑀩𑀓𑀭𑀡𑀁. 𑀢𑀤𑀦𑀦𑁆𑀢𑀭𑀁 𑀓𑀢𑁆𑀢𑀩𑁆𑀩𑀁 𑀧𑀼𑀩𑁆𑀩𑀓𑀺𑀘𑁆𑀘𑀁 𑀦𑀸𑀫. 𑀏𑀢𑁆𑀣 𑁋

‘‘𑀲𑀫𑁆𑀫𑀚𑁆𑀚𑀦𑀻 𑀧𑀤𑀻𑀧𑁄 𑀘, 𑀉𑀤𑀓𑀁 𑀆𑀲𑀦𑁂𑀦 𑀘;

𑀉𑀧𑁄𑀲𑀣𑀲𑁆𑀲 𑀏𑀢𑀸𑀦𑀺, 𑀧𑀼𑀩𑁆𑀩𑀓𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀺.

‘‘𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀉𑀢𑀼𑀓𑁆𑀔𑀸𑀦𑀁, 𑀪𑀺𑀓𑁆𑀔𑀼𑀕𑀡𑀦𑀸 𑀘 𑀑𑀯𑀸𑀤𑁄;

𑀉𑀧𑁄𑀲𑀣𑀲𑁆𑀲 𑀏𑀢𑀸𑀦𑀺, 𑀧𑀼𑀩𑁆𑀩𑀓𑀺𑀘𑁆𑀘𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑁋. (𑀫𑀳𑀸𑀯. 𑀅𑀝𑁆𑀞. 𑁧𑁬𑁮);

𑀏𑀯𑀁 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀧𑀼𑀩𑁆𑀩𑀓𑀭𑀡𑀜𑁆𑀘 𑀧𑀼𑀩𑁆𑀩𑀓𑀺𑀘𑁆𑀘𑀜𑁆𑀘 𑀯𑁂𑀤𑀺𑀢𑀩𑁆𑀩𑀁.

‘‘𑀉𑀧𑁄𑀲𑀣𑁄 𑀬𑀸𑀯𑀢𑀺𑀓𑀸 𑀘 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸,

𑀲𑀪𑀸𑀕𑀸𑀧𑀢𑁆𑀢𑀺𑀬𑁄 𑀘 𑀦 𑀯𑀺𑀚𑁆𑀚𑀦𑁆𑀢𑀺;

𑀯𑀚𑁆𑀚𑀦𑀻𑀬𑀸 𑀘 𑀧𑀼𑀕𑁆𑀕𑀮𑀸 𑀢𑀲𑁆𑀫𑀺𑀁 𑀦 𑀳𑁄𑀦𑁆𑀢𑀺,

𑀧𑀢𑁆𑀢𑀓𑀮𑁆𑀮𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑁋. (𑀫𑀳𑀸𑀯. 𑀅𑀝𑁆𑀞. 𑁧𑁬𑁮);

𑀯𑀼𑀢𑁆𑀢𑀯𑀲𑁂𑀦 𑀧𑀢𑁆𑀢𑀓𑀮𑁆𑀮𑁂 𑀲𑀫𑀸𑀦𑀺𑀢𑁂, 𑀧𑀚𑁆𑀚𑀺𑀢𑁂𑀢𑀺 𑀅𑀢𑁆𑀣𑁄. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸. 𑀦𑀺𑀤𑀸𑀦𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀅𑀯𑀲𑁂𑀲𑀁 𑀲𑀼𑀢𑁂𑀦 𑀲𑀸𑀯𑁂𑀢𑀩𑁆𑀩𑀁, 𑀅𑀬𑀁 𑀧𑀞𑀫𑁄 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄. 𑀦𑀺𑀤𑀸𑀦𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀅𑀯𑀲𑁂𑀲𑀁 𑀲𑀼𑀢𑁂𑀦 𑀲𑀸𑀯𑁂𑀢𑀩𑁆𑀩𑀁, 𑀅𑀬𑀁 𑀤𑀼𑀢𑀺𑀬𑁄 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄. 𑀦𑀺𑀤𑀸𑀦𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀢𑁂𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑁂 𑀉𑀤𑁆𑀤𑀺𑀲𑀺𑀢𑁆𑀯𑀸 𑀅𑀯𑀲𑁂𑀲𑀁 𑀲𑀼𑀢𑁂𑀦 𑀲𑀸𑀯𑁂𑀢𑀩𑁆𑀩𑀁, 𑀅𑀬𑀁 𑀢𑀢𑀺𑀬𑁄 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄. 𑀦𑀺𑀤𑀸𑀦𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀢𑁂𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑁂 𑀉𑀤𑁆𑀤𑀺𑀲𑀺𑀢𑁆𑀯𑀸 𑀤𑁆𑀯𑁂 𑀅𑀦𑀺𑀬𑀢𑁂 𑀉𑀤𑁆𑀤𑀺𑀲𑀺𑀢𑁆𑀯𑀸 𑀅𑀯𑀲𑁂𑀲𑀁 𑀲𑀼𑀢𑁂𑀦 𑀲𑀸𑀯𑁂𑀢𑀩𑁆𑀩𑀁, 𑀅𑀬𑀁 𑀘𑀢𑀼𑀢𑁆𑀣𑁄 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄. 𑀯𑀺𑀢𑁆𑀣𑀸𑀭𑁂𑀦𑁂𑀯 𑀧𑀜𑁆𑀘𑀫𑁄. 𑀇𑀫𑁂 𑀔𑁄 𑀪𑀺𑀓𑁆𑀔𑀯𑁂 𑀧𑀜𑁆𑀘 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸’’𑀢𑀺 (𑀫𑀳𑀸𑀯. 𑁧𑁫𑁦) 𑀯𑀼𑀢𑁆𑀢𑀢𑁆𑀢𑀸 𑀲𑁄 𑀲𑀼𑀢𑁆𑀢𑀼𑀤𑁆𑀤𑁂𑀲𑁄 𑀧𑀜𑁆𑀘𑀥𑀸 𑀯𑀺𑀪𑀸𑀯𑀺𑀢𑁄𑀢𑀺 𑀅𑀢𑁆𑀣𑁄.

𑁪𑁧𑁩. 𑀯𑀺𑀦𑀸𑀦𑁆𑀢𑀭𑀸𑀬𑀦𑁆𑀢𑀺 (𑀫𑀳𑀸𑀯. 𑁧𑁫𑁦) 𑀭𑀸𑀚𑀦𑁆𑀢𑀭𑀸𑀬𑀸𑀤𑀺𑀤𑀲𑀯𑀺𑀥𑀁 𑀅𑀦𑁆𑀢𑀭𑀸𑀬𑀁 𑀯𑀺𑀦𑀸 𑀲𑀗𑁆𑀔𑁂𑀧𑁂𑀦𑀼𑀤𑁆𑀤𑁂𑀲𑁄 𑀯𑀺𑀦𑀺𑀯𑀸𑀭𑀺𑀢𑁄 𑀧𑀝𑀺𑀓𑁆𑀔𑀺𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀣𑁂𑀭𑁄𑀯𑀸𑀢𑀺 𑀲𑀗𑁆𑀖𑀢𑁆𑀣𑁂𑀭𑁄𑀯. 𑀏𑀢𑁆𑀣𑀸𑀢𑀺 𑀧𑀜𑁆𑀘𑀲𑀼 𑀉𑀤𑁆𑀤𑁂𑀲𑁂𑀲𑀼. ‘‘𑀤𑁆𑀯𑀻𑀲𑀼 𑀯𑀸 𑀢𑀻𑀲𑀼 𑀯𑀸 𑀯𑀺𑀲𑀤𑁂𑀲𑀼 𑀣𑁂𑀭𑁄𑀯 𑀇𑀲𑁆𑀲𑀭𑁄’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀅𑀯𑀢𑁆𑀢𑀦𑁆𑀢𑁂𑀧𑀺 𑀅𑀦𑁆𑀢𑀭𑀸𑀬𑁂 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑀺𑀲𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀢𑁆𑀣 𑀯𑀼𑀢𑁆𑀢𑀦𑁆𑀢𑀺 𑀘𑁂? ‘‘𑀬𑁄 𑀢𑀢𑁆𑀣 𑀪𑀺𑀓𑁆𑀔𑀼 𑀩𑁆𑀬𑀢𑁆𑀢𑁄 𑀧𑀝𑀺𑀩𑀮𑁄, 𑀢𑀲𑁆𑀲𑀸𑀥𑁂𑀬𑁆𑀬’’𑀦𑁆𑀢𑀺 (𑀫𑀳𑀸𑀯. 𑁧𑁫𑁫) 𑀯𑀼𑀢𑁆𑀢𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀬𑁄 𑀢𑀢𑁆𑀣 𑀪𑀺𑀓𑁆𑀔𑀼 𑀩𑁆𑀬𑀢𑁆𑀢𑁄 𑀧𑀝𑀺𑀩𑀮𑁄𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀤𑀳𑀭𑀲𑁆𑀲𑀸𑀧𑀺 𑀩𑁆𑀬𑀢𑁆𑀢𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑁄 𑀅𑀦𑀼𑀜𑁆𑀜𑀸𑀢𑁄, 𑀅𑀣 𑀔𑁄 𑀏𑀢𑁆𑀣 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 𑀲𑀘𑁂 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀧𑀜𑁆𑀘 𑀯𑀸 𑀘𑀢𑁆𑀢𑀸𑀭𑁄 𑀯𑀸 𑀢𑀬𑁄 𑀯𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸 𑀦𑀸𑀕𑀘𑁆𑀙𑀦𑁆𑀢𑀺, 𑀤𑁆𑀯𑁂 𑀧𑀦 𑀅𑀔𑀡𑁆𑀟𑀸 𑀲𑀼𑀯𑀺𑀲𑀤𑀸 𑀯𑀸𑀘𑀼𑀕𑁆𑀕𑀢𑀸 𑀳𑁄𑀦𑁆𑀢𑀺, 𑀣𑁂𑀭𑀸𑀬𑀢𑁆𑀢𑁄𑀯 𑀧𑀸𑀢𑀺𑀫𑁄𑀓𑁆𑀔𑁄. 𑀲𑀘𑁂 𑀧𑀦 𑀏𑀢𑁆𑀢𑀓𑀫𑁆𑀧𑀺 𑀯𑀺𑀲𑀤𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀩𑁆𑀬𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀬𑀢𑁆𑀢𑁄𑀯 𑀳𑁄𑀢𑀻’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀧𑀸𑀴𑀺𑀬𑀫𑁆𑀧𑀺 𑀯𑀼𑀢𑁆𑀢𑀫𑁂𑀯 ‘‘𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀏𑀓𑁄 𑀪𑀺𑀓𑁆𑀔𑀼 𑀲𑀸𑀫𑀦𑁆𑀢𑀸 𑀆𑀯𑀸𑀲𑀸 𑀲𑀚𑁆𑀚𑀼𑀓𑀁 𑀧𑀸𑀳𑁂𑀢𑀩𑁆𑀩𑁄 ‘𑀕𑀘𑁆𑀙, 𑀆𑀯𑀼𑀲𑁄, 𑀲𑀁𑀔𑀺𑀢𑁆𑀢𑁂𑀦 𑀯𑀸 𑀯𑀺𑀢𑁆𑀣𑀸𑀭𑁂𑀦 𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀆𑀕𑀘𑁆𑀙𑀸’’’𑀢𑀺 (𑀫𑀳𑀸𑀯. 𑁧𑁬𑁩).

𑁪𑁧𑁪. 𑀉𑀤𑁆𑀤𑀺𑀲𑀦𑁆𑀢𑁂 𑀯𑀸𑀢𑀺 (𑀫𑀳𑀸𑀯. 𑁧𑁭𑁨) 𑀧𑀸𑀢𑀺𑀫𑁄𑀓𑁆𑀔𑁂 𑀉𑀤𑁆𑀤𑀺𑀲𑀺𑀬𑀫𑀸𑀦𑁂 𑀲𑀫𑀸 𑀯𑀸 𑀣𑁄𑀓𑀢𑀭𑀸 𑀯𑀸 𑀬𑀤𑀺 𑀆𑀕𑀘𑁆𑀙𑁂𑀬𑁆𑀬𑀼𑀁, 𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞𑀁, 𑀢𑁂𑀳𑀺 𑀲𑀤𑁆𑀥𑀺𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀯𑀲𑁂𑀲𑀓𑀁 𑀲𑁄𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑁪𑁧𑁫. 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂 (𑀫𑀳𑀸𑀯. 𑁧𑁭𑁨) 𑀯𑀸 𑀲𑀓𑀮𑀸𑀬 𑀯𑀸 𑀏𑀓𑀘𑁆𑀘𑀸𑀬 𑀯𑀸 𑀧𑀭𑀺𑀲𑀸𑀬 𑀯𑀼𑀝𑁆𑀞𑀺𑀢𑀸𑀬 𑀲𑀫𑀸 𑀯𑀸 𑀣𑁄𑀓𑀢𑀭𑀸 𑀯𑀸 𑀬𑀤𑀺 𑀆𑀕𑀘𑁆𑀙𑁂𑀬𑁆𑀬𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀸𑀭𑀺𑀲𑀼𑀤𑁆𑀥𑀺𑀦𑁆𑀢𑀺 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁. 𑀓𑀭𑁂𑀬𑁆𑀬𑁂𑀲𑀦𑁆𑀢𑀺 𑀓𑀭𑁂𑀬𑁆𑀬 𑀏𑀲𑀁, 𑀏𑀢𑁂𑀲𑀁 𑀲𑀦𑁆𑀢𑀺𑀓𑁂𑀢𑀺 𑀅𑀢𑁆𑀣𑁄. 𑀩𑀳𑀼𑀓𑀸𑀣 𑀘𑁂𑀢𑀺 𑀅𑀣 𑀩𑀳𑀼𑀓𑀸 𑀘𑁂, 𑀧𑀼𑀦 𑀆𑀕𑀢𑀸 𑀩𑀳𑀼𑀓𑀸 𑀘𑁂𑀢𑀺 𑀅𑀢𑁆𑀣𑁄,. ‘‘𑀉𑀤𑁆𑀤𑀺𑀲𑁆𑀲𑀫𑀸𑀦𑁂, 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂 𑀏𑀓𑀘𑁆𑀘𑀸𑀬 𑀯𑀼𑀝𑁆𑀞𑀺𑀢𑀸𑀬 𑀲𑀓𑀮𑀸𑀬 𑀯𑀼𑀝𑁆𑀞𑀺𑀢𑀸𑀬𑀸’’𑀢𑀺 (𑀫𑀳𑀸𑀯. 𑁧𑁭𑁨) 𑀆𑀕𑀢𑁂𑀲𑀼 𑀲𑀩𑁆𑀩𑀯𑀺𑀓𑀧𑁆𑀧𑁂𑀲𑀼 𑀧𑀼𑀩𑁆𑀩𑀓𑀺𑀘𑁆𑀘𑀁 𑀓𑀢𑁆𑀯𑀸 𑀧𑀼𑀦 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀢𑀺 𑀅𑀢𑁆𑀣𑁄.

𑁪𑁧𑁬. 𑀇𑀢𑀭𑀸𑀦𑀦𑁆𑀢𑀺 𑀆𑀕𑀦𑁆𑀢𑀼𑀓𑀸𑀦𑀁. 𑀲𑀘𑁂𑀢𑀭𑁄𑀢𑀺 𑀲𑀘𑁂 𑀘𑀸𑀢𑀼𑀤𑁆𑀤𑀲𑀺𑀓𑁄𑀢𑀺 𑀅𑀢𑁆𑀣𑁄. 𑀲𑀫𑀸𑀦𑁂𑀢𑀭𑁂𑀦𑀼𑀯𑀢𑁆𑀢𑀦𑁆𑀢𑀽𑀢𑀺 𑀲𑀫𑀸 𑀯𑀸 𑀊𑀦𑀸 𑀯𑀸 𑀇𑀢𑀭𑁂 𑀆𑀕𑀦𑁆𑀢𑀼𑀓𑀸 𑀧𑀼𑀭𑀺𑀫𑀸𑀦𑀁 𑀆𑀯𑀸𑀲𑀺𑀓𑀸𑀦𑀁 𑀅𑀦𑀼𑀯𑀢𑁆𑀢𑀦𑁆𑀢𑀽𑀢𑀺 𑀅𑀢𑁆𑀣𑁄. 𑀲𑀘𑁂𑀥𑀺𑀓𑀸𑀢𑀺 𑀆𑀕𑀦𑁆𑀢𑀼𑀓𑀸 𑀲𑀘𑁂 𑀅𑀥𑀺𑀓𑀸, 𑀧𑀼𑀭𑀺𑀫𑀸 𑀆𑀯𑀸𑀲𑀺𑀓𑀸 𑀅𑀦𑀼𑀯𑀢𑁆𑀢𑀦𑁆𑀢𑀽𑀢𑀺 𑀅𑀢𑁆𑀣𑁄. 𑀲𑁂𑀲𑁂𑀧𑁆𑀬𑀬𑀁 𑀦𑀬𑁄𑀢𑀺 ‘‘𑀆𑀕𑀦𑁆𑀢𑀼𑀓𑀸𑀦𑀁 𑀧𑀦𑁆𑀦𑀭𑀲𑁄 𑀳𑁄𑀢𑀺, 𑀆𑀯𑀸𑀲𑀺𑀓𑀸𑀦𑀁 𑀘𑀸𑀢𑀼𑀤𑁆𑀤𑀲𑁄’’𑀢𑀺 𑀇𑀢𑀭𑁂𑀧𑀺 𑀲𑀫𑀣𑁄𑀓𑀸 𑀆𑀕𑀦𑁆𑀢𑀼𑀓𑀸 𑀆𑀯𑀸𑀲𑀺𑀓𑀸𑀦𑀁 𑀅𑀦𑀼𑀯𑀢𑁆𑀢𑀦𑁆𑀢𑀽𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑁪𑁧𑁭. 𑀫𑀽𑀮𑀝𑁆𑀞𑀸𑀢𑀺 𑀆𑀯𑀸𑀲𑀺𑀓𑀸. 𑀲𑀫𑀣𑁄𑀓𑀸𑀦𑀁 𑀆𑀕𑀦𑁆𑀢𑀼𑀓𑀸𑀦𑀁. 𑀲𑀸𑀫𑀕𑁆𑀕𑀺𑀁 𑀤𑁂𑀦𑁆𑀢𑀼 𑀓𑀸𑀫𑀢𑁄𑀢𑀺 𑀬𑀤𑀺 𑀇𑀘𑁆𑀙𑀦𑁆𑀢𑀺, 𑀤𑁂𑀦𑁆𑀢𑀽𑀢𑀺 𑀅𑀢𑁆𑀣𑁄.

𑁪𑁧𑁮. 𑀦𑁄 𑀘𑁂 𑀤𑁂𑀦𑁆𑀢𑀺, 𑀆𑀕𑀦𑁆𑀢𑀼𑀓𑁂𑀳𑀺 𑀩𑀳𑀺 𑀕𑀦𑁆𑀢𑁆𑀯𑀸𑀦 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀅𑀦𑀺𑀘𑁆𑀙𑀸𑀬 𑀲𑀸𑀫𑀕𑁆𑀕𑀻 𑀤𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁧𑁯. ‘‘𑀦 𑀪𑀺𑀓𑁆𑀔𑀯𑁂 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁂𑀦 𑀲𑀜𑁆𑀘𑀺𑀘𑁆𑀘 𑀦 𑀲𑀸𑀯𑁂𑀢𑀩𑁆𑀩𑀁. 𑀬𑁄 𑀦 𑀲𑀸𑀯𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺𑀯𑀼𑀢𑁆𑀢𑀢𑁆𑀢𑀸 (𑀫𑀳𑀸𑀯. 𑁧𑁫𑁪) ‘‘𑀲𑀸𑀯𑁂𑀬𑁆𑀬 𑀲𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁂𑀦 𑀯𑀸𑀬𑀫𑀺𑀢𑀼𑀁 𑀓𑀣𑀁 𑀲𑀸𑀯𑁂𑀬𑁆𑀬𑀦𑁆𑀢𑀺, 𑀯𑀸𑀬𑀫𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻’’𑀢𑀺 (𑀫𑀳𑀸𑀯. 𑁧𑁫𑁪) 𑀯𑀼𑀢𑁆𑀢𑀢𑁆𑀢𑀸 ‘‘𑀲𑀜𑁆𑀘𑀺𑀘𑁆𑀘 𑀅𑀲𑁆𑀲𑀸𑀯𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀼𑀢𑁆𑀢𑀁.

𑁪𑁨𑁦. 𑀢𑀣𑀸𑀢𑀺 𑀤𑀼𑀓𑁆𑀓𑀝𑀦𑁆𑀢𑀺 𑀅𑀢𑁆𑀣𑁄. 𑀓𑀮𑁆𑀮𑁄𑀢𑀺 𑀅𑀕𑀺𑀮𑀸𑀦𑁄. 𑀧𑁂𑀲𑀺𑀢𑁄𑀢𑀺 𑀆𑀡𑀢𑁆𑀢𑁄. ‘‘𑀦 𑀪𑀺𑀓𑁆𑀔𑀯𑁂 𑀣𑁂𑀭𑁂𑀦 𑀆𑀡𑀢𑁆𑀢𑁂𑀦 𑀅𑀕𑀺𑀮𑀸𑀦𑁂𑀦 𑀦 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁. 𑀬𑁄 𑀦 𑀲𑀫𑁆𑀫𑀚𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺𑀆𑀤𑀺 (𑀫𑀳𑀸𑀯. 𑁧𑁫𑁯) 𑀯𑀼𑀢𑁆𑀢𑀁.

𑁪𑁨𑁧-𑁩. 𑀇𑀤𑀸𑀦𑀺 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀫𑁆𑀫𑀚𑁆𑀚𑀺𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀜𑁆𑀚𑀮𑀺𑀁 (𑀫𑀳𑀸𑀯. 𑁧𑁬𑁮) 𑀧𑀕𑁆𑀕𑀬𑁆𑀳𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀢𑀺 𑀅𑀯𑀲𑁂𑀲𑀸 𑀤𑁆𑀯𑁂 𑀏𑀯𑀁 𑀲𑀫𑀼𑀤𑀻𑀭𑀺𑀬𑀸 𑀯𑀢𑁆𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀸𑀤𑀺𑀓𑀭𑀡𑀯𑀲𑁂𑀦 𑀲𑀫𑀢𑁆𑀢𑀧𑀼𑀩𑁆𑀩𑀸𑀭𑀫𑁆𑀪𑁂𑀦 𑀢𑁂 𑀤𑁆𑀯𑁂 𑀪𑀺𑀓𑁆𑀔𑀽 𑀦𑀯𑁂𑀦 𑀏𑀯𑀫𑀻𑀭𑀺𑀬𑀸 𑀯𑀢𑁆𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑁪𑁨𑁪-𑁫. 𑀇𑀤𑀸𑀦𑀺 𑀤𑁆𑀯𑀻𑀳𑀺 𑀓𑀢𑁆𑀢𑀩𑁆𑀩𑀁 𑀤𑀲𑁆𑀲𑁂𑀢𑀼𑀁 ‘‘𑀤𑁆𑀯𑀻𑀲𑀼 𑀣𑁂𑀭𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑁪𑁨𑁬. 𑀏𑀢𑁆𑀢𑀸𑀯𑀢𑀸 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀢𑀼𑀦𑁆𑀦𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼’’𑀦𑁆𑀢𑀺 (𑀫𑀳𑀸𑀯. 𑁧𑁬𑁮) 𑀘 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀸𑀢𑀼’’𑀦𑁆𑀢𑀺 (𑀫𑀳𑀸𑀯. 𑁧𑁬𑁮) 𑀘 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑁆𑀯𑀺𑀦𑁆𑀦𑀁 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀸𑀢𑀼’’𑀦𑁆𑀢𑀺 (𑀫𑀳𑀸𑀯. 𑁧𑁬𑁮) 𑀘 𑀯𑀼𑀢𑁆𑀢𑀁 𑀲𑀗𑁆𑀖𑀼𑀧𑁄𑀲𑀣𑀜𑁆𑀘 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀢𑁆𑀣 𑀏𑀓𑁄 𑀪𑀺𑀓𑁆𑀔𑀼 𑀯𑀺𑀳𑀭𑀢𑀺, 𑀢𑀲𑁆𑀲 𑀅𑀦𑀼𑀜𑁆𑀜𑀸𑀢𑀁 𑀅𑀥𑀺𑀝𑁆𑀞𑀸𑀦𑀼𑀧𑁄𑀲𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀩𑁆𑀩𑀓𑀺𑀘𑁆𑀘’’𑀦𑁆𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀘 𑀧𑀼𑀩𑁆𑀩𑀓𑀺𑀘𑁆𑀘𑀁 𑀦𑀸𑀫 𑀲𑀫𑁆𑀫𑀚𑁆𑀚𑀦𑀸𑀤𑀺𑀓𑀁𑀬𑁂𑀯.

𑁪𑁨𑁭. 𑀲𑀗𑁆𑀖𑀼𑀧𑁄𑀲𑀣𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀅𑀥𑀺𑀝𑁆𑀞𑀸𑀦𑀉𑀧𑁄𑀲𑀣𑀸𑀦𑀁 𑀯𑀲𑁂𑀦 𑀢𑀁 𑀢𑀁 𑀉𑀧𑁄𑀲𑀣𑀁 𑀬𑀤𑀺 𑀓𑀬𑀺𑀭𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁨𑁮. 𑀯𑀕𑁆𑀕𑁂 (𑀫𑀳𑀸𑀯. 𑁧𑁭𑁩) 𑀘 𑀲𑀫𑀕𑁆𑀕𑁂 𑀘 ‘‘𑀯𑀕𑁆𑀕𑁄’’𑀢𑀺 𑀲𑀜𑁆𑀜𑀺𑀦𑁄 𑀘 ‘‘𑀯𑀕𑁆𑀕𑁄 𑀦𑀼 𑀔𑁄, 𑀲𑀫𑀕𑁆𑀕𑁄 𑀦𑀼 𑀔𑁄’’𑀢𑀺 𑀏𑀯𑀁 𑀯𑀺𑀫𑀢𑀺𑀲𑁆𑀲 𑀘 𑀤𑀼𑀓𑁆𑀓𑀝𑀁, ‘‘𑀦𑀲𑁆𑀲𑀦𑁆𑀢𑁂𑀢𑁂 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑀏𑀯𑀁 𑀅𑀦𑀸𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀺𑀪𑀸𑀯𑀁 𑀜𑀢𑁆𑀯𑀸 𑀪𑁂𑀤𑀸𑀥𑀺𑀧𑁆𑀧𑀸𑀬𑁂𑀦 𑀉𑀧𑁄𑀲𑀣𑀁 𑀓𑀭𑁄𑀢𑁄 𑀣𑀼𑀮𑁆𑀮𑀘𑁆𑀘𑀬𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀤𑀼𑀪𑀬𑁂𑀧𑀺 ‘‘𑀲𑀫𑀕𑁆𑀕𑁄’’𑀢𑀺 𑀲𑀜𑁆𑀜𑀺𑀦𑁄 𑀅𑀦𑀸𑀧𑀢𑁆𑀢𑀺.

𑁪𑁨𑁯-𑁪𑁩𑁦. 𑀲𑁂𑀲𑀲𑀳𑀥𑀫𑁆𑀫𑀺𑀓𑀸 𑀦𑀸𑀫 𑀪𑀺𑀓𑁆𑀔𑀼𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀘𑀢𑁆𑀢𑀸𑀭𑁄. 𑀅𑀪𑀩𑁆𑀩𑀲𑁆𑀲𑀸𑀢𑀺 𑀏𑀢𑁆𑀣 𑀧𑀡𑁆𑀟𑀓𑀣𑁂𑀬𑁆𑀬𑀲𑀁𑀯𑀸𑀲𑀓 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓 𑀢𑀺𑀭𑀘𑁆𑀙𑀸𑀦𑀕𑀢 𑀫𑀸𑀢𑀼𑀖𑀸𑀢𑀓 𑀧𑀺𑀢𑀼𑀖𑀸𑀢𑀓 𑀅𑀭𑀳𑀦𑁆𑀢𑀖𑀸𑀢𑀓 𑀪𑀺𑀓𑁆𑀔𑀼𑀦𑀺𑀤𑀽𑀲𑀓 𑀲𑀗𑁆𑀖𑀪𑁂𑀤𑀓 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸 𑀅𑀪𑀩𑁆𑀩𑀸 𑀕𑀳𑀺𑀢𑀸. 𑀏𑀢𑁆𑀣 𑀧𑀦 𑀦𑀸𑀕𑀫𑀸𑀡𑀯𑀓𑀸𑀤𑀬𑁄 𑀢𑀺𑀭𑀘𑁆𑀙𑀸𑀦𑀕𑀢𑀧𑀓𑁆𑀔𑀺𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁂𑀲𑀁 𑀦𑀺𑀲𑀺𑀦𑁆𑀦𑀧𑀭𑀺𑀲𑀸𑀬𑀜𑁆𑀘 𑀧𑀸𑀢𑀺𑀫𑁄𑀓𑁆𑀔𑀁 𑀦 𑀉𑀤𑁆𑀤𑀺𑀲𑁂𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀣𑀸𑀢𑀺 𑀬𑁄 𑀧𑀦 𑀲𑀗𑁆𑀖𑁄 𑀲𑀪𑀸𑀕𑀸𑀧𑀢𑁆𑀢𑀺𑀓𑁄, 𑀲𑁄𑀧𑀺 𑀦 𑀉𑀤𑁆𑀤𑀺𑀲𑁂, 𑀧𑀭𑀺𑀯𑀼𑀢𑁆𑀣𑁂𑀦 𑀙𑀦𑁆𑀤𑁂𑀦𑀧𑀺 𑀦 𑀉𑀤𑁆𑀤𑀺𑀲𑁂𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀧𑀦 𑀘𑀢𑀼𑀩𑁆𑀩𑀺𑀥𑀁 𑀧𑀸𑀭𑀺𑀯𑀸𑀲𑀺𑀬𑀁 𑀧𑀭𑀺𑀲𑀧𑀸𑀭𑀺𑀯𑀸𑀲𑀺𑀬𑀁 𑀭𑀢𑁆𑀢𑀺𑀧𑀸𑀭𑀺𑀯𑀸𑀲𑀺𑀬𑀁 𑀙𑀦𑁆𑀤𑀧𑀸𑀭𑀺𑀯𑀸𑀲𑀺𑀬𑀁 𑀅𑀚𑁆𑀛𑀸𑀲𑀬𑀧𑀸𑀭𑀺𑀯𑀸𑀲𑀺𑀬𑀦𑁆𑀢𑀺.

𑀏𑀢𑁆𑀣 𑀧𑀦 𑀪𑀺𑀓𑁆𑀔𑀽 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀲𑀦𑁆𑀦𑀺𑀧𑀢𑀺𑀢𑀸 𑀫𑁂𑀖𑀸𑀤𑀻𑀳𑀺 𑀉𑀧𑀤𑁆𑀤𑀼𑀢𑀸 ‘‘𑀅𑀦𑁄𑀓𑀸𑀲𑀸 𑀫𑀬𑀁, 𑀅𑀜𑁆𑀜𑀢𑁆𑀭 𑀕𑀘𑁆𑀙𑀸𑀫𑀸’’𑀢𑀺 𑀙𑀦𑁆𑀤𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 𑀉𑀝𑁆𑀞𑀳𑀦𑁆𑀢𑀺. 𑀇𑀤𑀁 𑀧𑀭𑀺𑀲𑀧𑀸𑀭𑀺𑀯𑀸𑀲𑀺𑀬𑀁. 𑀓𑀺𑀜𑁆𑀘𑀸𑀧𑀺 𑀧𑀭𑀺𑀲𑀧𑀸𑀭𑀺𑀯𑀸𑀲𑀺𑀬𑀁, 𑀙𑀦𑁆𑀤𑀲𑁆𑀲 𑀧𑀦 𑀅𑀯𑀺𑀲𑁆𑀲𑀝𑁆𑀞𑀢𑁆𑀢𑀸 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑀧𑀼𑀦𑀧𑀺 𑀪𑀺𑀓𑁆𑀔𑀽𑀦𑀁 ‘‘𑀉𑀧𑁄𑀲𑀣𑀸𑀤𑀻𑀦𑀺 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀭𑀢𑁆𑀢𑀺𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀸𑀦𑀁𑀬𑁂𑀯 𑀅𑀭𑀼𑀡𑁄 𑀉𑀕𑁆𑀕𑀘𑁆𑀙𑀢𑀺. 𑀲𑀘𑁂 ‘‘𑀘𑀸𑀢𑀼𑀤𑁆𑀤𑀲𑀺𑀓𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀲𑀺𑀦𑁆𑀦𑀸, ‘‘𑀧𑀦𑁆𑀦𑀭𑀲𑁄’’𑀢𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦𑁆𑀦𑀭𑀲𑀺𑀓𑀁 𑀓𑀸𑀢𑀼𑀁 𑀦𑀺𑀲𑀺𑀦𑁆𑀦𑀸, 𑀧𑀸𑀝𑀺𑀧𑀤𑁂 𑀅𑀦𑀼𑀧𑁄𑀲𑀣𑁂 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀅𑀜𑁆𑀜𑀁 𑀧𑀦 𑀲𑀗𑁆𑀖𑀓𑀺𑀘𑁆𑀘𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀇𑀤𑀁 𑀭𑀢𑁆𑀢𑀺𑀧𑀸𑀭𑀺𑀯𑀸𑀲𑀺𑀬𑀁 𑀦𑀸𑀫.

𑀧𑀼𑀦 𑀪𑀺𑀓𑁆𑀔𑀽 ‘‘𑀬𑀁𑀓𑀺𑀜𑁆𑀘𑀺𑀤𑁂𑀯 𑀅𑀩𑁆𑀪𑀸𑀦𑀸𑀤𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀺, 𑀢𑀢𑁆𑀭𑁂𑀓𑁄 𑀦𑀓𑁆𑀔𑀢𑁆𑀢𑀧𑀸𑀞𑀓𑁄 𑀏𑀯𑀁 𑀯𑀤𑀢𑀺 ‘‘𑀅𑀚𑁆𑀚 𑀦𑀓𑁆𑀔𑀢𑁆𑀢𑀁 𑀤𑀸𑀭𑀼𑀡’’𑀦𑁆𑀢𑀺, 𑀢𑁂 𑀢𑀲𑁆𑀲 𑀯𑀘𑀦𑁂𑀦 𑀙𑀦𑁆𑀤𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺. 𑀅𑀣𑀜𑁆𑀜𑁄 𑀆𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀦𑀓𑁆𑀔𑀢𑁆𑀢𑁂𑀦, 𑀓𑀭𑁄𑀣𑀸’’𑀢𑀺 𑀯𑀤𑀢𑀺. 𑀇𑀤𑀁 𑀙𑀦𑁆𑀤𑀧𑀸𑀭𑀺𑀯𑀸𑀲𑀺𑀬𑀜𑁆𑀘𑁂𑀯 𑀅𑀚𑁆𑀛𑀸𑀲𑀬𑀧𑀸𑀭𑀺𑀯𑀸𑀲𑀺𑀬𑀜𑁆𑀘. 𑀢𑀲𑁆𑀫𑀺𑀁 𑀧𑀸𑀭𑀺𑀯𑀸𑀲𑀺𑀬𑁂 𑀧𑀼𑀦 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀁 𑀅𑀦𑀸𑀦𑁂𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀇𑀤𑀁 𑀲𑀦𑁆𑀥𑀸𑀬 ‘‘𑀙𑀦𑁆𑀤𑁂𑀦 𑀧𑀭𑀺𑀯𑀼𑀢𑁆𑀣𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑁪𑁩𑁧. 𑀆𑀧𑀦𑁆𑀦𑀫𑀸𑀧𑀢𑁆𑀢𑀺𑀁 (𑀫𑀳𑀸𑀯. 𑁧𑁬𑁯; 𑀫𑀳𑀸𑀯. 𑀅𑀝𑁆𑀞. 𑁧𑁬𑁯) 𑀅𑀤𑁂𑀲𑀬𑀺𑀢𑁆𑀯𑀸𑀦 𑀯𑀸 ‘‘𑀅𑀳𑀁, 𑀆𑀯𑀼𑀲𑁄, 𑀇𑀢𑁆𑀣𑀦𑁆𑀦𑀸𑀫𑀸𑀬 𑀆𑀧𑀢𑁆𑀢𑀺𑀬𑀸 𑀯𑁂𑀫𑀢𑀺𑀓𑁄, 𑀬𑀤𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀪𑀯𑀺𑀲𑁆𑀲𑀸𑀫𑀺, 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀯𑀺𑀫𑀢𑀺𑀁 𑀅𑀦𑀸𑀯𑀺𑀓𑀢𑁆𑀯𑀸𑀦 𑀯𑀸 ‘‘𑀦 𑀘 𑀪𑀺𑀓𑁆𑀔𑀯𑁂 𑀅𑀦𑀼𑀧𑁄𑀲𑀣𑁂 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀲𑀗𑁆𑀖𑀲𑀸𑀫𑀕𑁆𑀕𑀺𑀬𑀸’’𑀢𑀺 (𑀫𑀳𑀸𑀯. 𑁧𑁮𑁩) 𑀯𑀼𑀢𑁆𑀢𑀢𑁆𑀢𑀸 𑀅𑀦𑀼𑀧𑁄𑀲𑀣𑁂𑀧𑀺 𑀯𑀸 𑀓𑀸𑀢𑀼𑀁 𑀦 𑀘 𑀓𑀧𑁆𑀧𑀢𑀻𑀢𑀺 𑀅𑀢𑁆𑀣𑁄.

𑁪𑁩𑁨. ‘‘𑀦 𑀘 𑀪𑀺𑀓𑁆𑀔𑀯𑁂 𑀢𑀤𑀳𑀼𑀧𑁄𑀲𑀣𑁂 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀯𑀸 𑀅𑀦𑀸𑀯𑀸𑀲𑁄 𑀯𑀸 𑀕𑀦𑁆𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸’’𑀢𑀺 (𑀫𑀳𑀸𑀯. 𑁧𑁮𑁧) 𑀯𑀼𑀢𑁆𑀢𑀢𑁆𑀢𑀸 ‘‘𑀅𑀝𑁆𑀞𑀺𑀢𑁄𑀧𑁄𑀲𑀣𑀸𑀯𑀸𑀲𑀸’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁮𑁧) 𑀯𑀼𑀢𑁆𑀢𑀁. 𑀦 𑀯𑀚𑁂 𑀦 𑀕𑀘𑁆𑀙𑁂. 𑀅𑀥𑀺𑀝𑁆𑀞𑀸𑀢𑀼𑀁 𑀲𑀻𑀫𑀫𑁂𑀯 𑀯𑀸𑀢𑀺 𑀲𑀘𑁂 𑀯𑀺𑀳𑀸𑀭𑁂 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀉𑀧𑁄𑀲𑀣𑀸𑀥𑀺𑀝𑁆𑀞𑀸𑀦𑀢𑁆𑀣𑀁 𑀲𑀻𑀫𑀸𑀧𑀺 𑀦𑀤𑀻𑀧𑀺 𑀦 𑀕𑀦𑁆𑀢𑀩𑁆𑀩𑀸. 𑀲𑀘𑁂 𑀧𑀦𑁂𑀢𑁆𑀣 𑀓𑁄𑀘𑀺 𑀪𑀺𑀓𑁆𑀔𑀼 𑀳𑁄𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀯𑀺𑀲𑁆𑀲𑀝𑁆𑀞𑀉𑀧𑁄𑀲𑀣𑀸𑀧𑀺 𑀆𑀯𑀸𑀲𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀏𑀯𑀁 𑀕𑀢𑁄 𑀅𑀥𑀺𑀝𑁆𑀞𑀸𑀢𑀼𑀫𑁆𑀧𑀺 𑀮𑀪𑀢𑀻𑀢𑀺. 𑀉𑀧𑁄𑀲𑀣𑀯𑀺𑀦𑀺𑀘𑁆𑀙𑀬𑁄.

𑀉𑀧𑁄𑀲𑀣𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.