𑁪. 𑀭𑀚𑀦𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁫𑁮. 𑀇𑀤𑀸𑀦𑀺 𑀢𑁂𑀲𑀁 𑀘𑀻𑀯𑀭𑀸𑀦𑀁 𑀭𑀚𑀦𑀯𑀺𑀥𑀸𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀭𑀚𑀦𑀸𑀦𑀺 𑀘𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀙 𑀭𑀚𑀦𑀸𑀦𑀺 𑀫𑀽𑀮𑀭𑀚𑀦𑀁 𑀔𑀦𑁆𑀥𑀭𑀚𑀦𑀁 𑀢𑀘𑀭𑀚𑀦𑀁 𑀧𑀢𑁆𑀢𑀭𑀚𑀦𑀁 𑀧𑀼𑀧𑁆𑀨𑀭𑀚𑀦𑀁 𑀨𑀮𑀭𑀚𑀦’’𑀦𑁆𑀢𑀺 (𑀫𑀳𑀸𑀯. 𑁩𑁪𑁪) 𑀏𑀯𑀁 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 ‘‘𑀙𑀧𑁆𑀧𑀓𑀸𑀭𑀸𑀦𑀺 𑀅𑀦𑀼𑀜𑁆𑀜𑀸𑀢𑀸𑀦𑀺 𑀲𑀢𑁆𑀣𑀼𑀦𑀸’’𑀢𑀺 𑀯𑀼𑀢𑁆𑀢𑀁.

𑁫𑁯. 𑀢𑀢𑁆𑀣 𑀫𑀽𑀮𑁂𑀢𑀺 𑀫𑀽𑀮𑀭𑀚𑀦𑁂𑀢𑀺 𑀅𑀢𑁆𑀣𑁄. 𑀳𑀮𑀺𑀤𑁆𑀤𑀺𑀁 𑀯𑀺𑀯𑀚𑁆𑀚𑀺𑀬 𑀲𑀩𑁆𑀩𑀁 𑀮𑀩𑁆𑀪𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀢𑀼𑀗𑁆𑀕𑀳𑀸𑀭𑀓𑁄 𑀦𑀸𑀫 𑀏𑀓𑁄 𑀲𑀓𑀡𑁆𑀝𑀓𑀭𑀼𑀓𑁆𑀔𑁄, 𑀢𑀲𑁆𑀲 𑀳𑀭𑀺𑀢𑀸𑀮𑀯𑀡𑁆𑀡𑀁 𑀔𑀦𑁆𑀥𑀭𑀚𑀦𑀁 𑀳𑁄𑀢𑀺. 𑀕𑀺𑀳𑀺𑀧𑀭𑀺𑀪𑀼𑀢𑁆𑀢𑀁 𑀧𑀦 𑀅𑀮𑁆𑀮𑀺𑀧𑀢𑁆𑀢𑁂𑀦 𑀏𑀓𑀯𑀸𑀭𑀁 𑀭𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀨𑀮𑀭𑀚𑀦𑁂 𑀅𑀓𑀧𑁆𑀧𑀺𑀬𑀁 𑀦𑀸𑀫 𑀦𑀢𑁆𑀣𑀺, 𑀲𑀩𑁆𑀩𑀁 𑀯𑀝𑁆𑀝𑀢𑀻𑀢𑀺. 𑀭𑀚𑀦𑀯𑀺𑀦𑀺𑀘𑁆𑀙𑀬𑁄.

𑀭𑀚𑀦𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.