𑁩𑁨. 𑀦𑀺𑀲𑁆𑀲𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁩𑁦. 𑀩𑁆𑀬𑀢𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 𑀓𑀺𑀢𑁆𑀢𑀸𑀯𑀢𑀸 𑀩𑁆𑀬𑀢𑁆𑀢𑁄 𑀳𑁄𑀢𑀻𑀢𑀺 𑀘𑁂? 𑀦𑀺𑀲𑁆𑀲𑀬𑀫𑀼𑀘𑁆𑀘𑀦𑀓𑁂𑀦 𑀧𑀦 𑀲𑀩𑁆𑀩𑀦𑁆𑀢𑀺𑀫𑁂𑀦 𑀥𑀫𑁆𑀫𑀧𑀭𑀺𑀘𑁆𑀙𑁂𑀤𑁂𑀦 𑀅𑀢𑁆𑀣𑀢𑁄 𑀘 𑀩𑁆𑀬𑀜𑁆𑀚𑀦𑀢𑁄 𑀘 𑀤𑁆𑀯𑁂 𑀫𑀸𑀢𑀺𑀓𑀸 𑀧𑀕𑀼𑀡𑀸 𑀯𑀸𑀘𑀼𑀕𑁆𑀕𑀢𑀸 𑀓𑀸𑀢𑀩𑁆𑀩𑀸, 𑀧𑀓𑁆𑀔𑀤𑀺𑀯𑀲𑁂𑀲𑀼 𑀥𑀫𑁆𑀫𑀲𑁆𑀲𑀸𑀯𑀦𑀢𑁆𑀣𑀸𑀬 𑀲𑀼𑀢𑁆𑀢𑀦𑁆𑀢𑀢𑁄 𑀘𑀢𑁆𑀢𑀸𑀭𑁄 𑀪𑀸𑀡𑀯𑀸𑀭𑀸, 𑀲𑀫𑁆𑀧𑀢𑁆𑀢𑀸𑀦𑀁 𑀧𑀭𑀺𑀲𑀸𑀦𑀁 𑀧𑀭𑀺𑀓𑀣𑀦𑀢𑁆𑀣𑀸𑀬 𑀅𑀦𑁆𑀥𑀓𑀯𑀺𑀦𑁆𑀤𑀫𑀳𑀸𑀭𑀸𑀳𑀼𑀮𑁄𑀯𑀸𑀤𑀥𑀫𑁆𑀫𑀓𑁆𑀔𑀦𑁆𑀥𑀲𑀤𑀺𑀲𑁄 𑀏𑀓𑁄 𑀓𑀣𑀸𑀫𑀕𑁆𑀕𑁄, 𑀲𑀗𑁆𑀖𑀪𑀢𑁆𑀢𑀫𑀗𑁆𑀕𑀮𑀸𑀫𑀗𑁆𑀕𑀮𑁂𑀲𑀼 𑀅𑀦𑀼𑀫𑁄𑀤𑀦𑀢𑁆𑀣𑀸𑀬 𑀢𑀺𑀲𑁆𑀲𑁄 𑀅𑀦𑀼𑀫𑁄𑀤𑀦𑀸, 𑀉𑀧𑁄𑀲𑀣𑀧𑁆𑀧𑀯𑀸𑀭𑀡𑀸𑀤𑀺𑀯𑀺𑀚𑀸𑀦𑀦𑀢𑁆𑀣𑀁 𑀓𑀫𑁆𑀫𑀸𑀓𑀫𑁆𑀫𑀯𑀺𑀦𑀺𑀘𑁆𑀙𑀬𑁄, 𑀲𑀫𑀡𑀥𑀫𑁆𑀫𑀓𑀭𑀡𑀢𑁆𑀣𑀁 𑀲𑀫𑀸𑀥𑀺𑀯𑀲𑁂𑀦 𑀯𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀯𑀸 𑀅𑀭𑀳𑀢𑁆𑀢𑀧𑀭𑀺𑀬𑁄𑀲𑀸𑀦𑀁 𑀏𑀓𑀁 𑀓𑀫𑁆𑀫𑀝𑁆𑀞𑀸𑀦𑀁 𑀏𑀢𑁆𑀢𑀓𑀁 𑀉𑀕𑁆𑀕𑀳𑁂𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀩𑁆𑀬𑀢𑁆𑀢𑁄 𑀦𑀸𑀫 𑀳𑁄𑀢𑀺 𑀘𑀸𑀢𑀼𑀤𑀺𑀲𑁄, 𑀇𑀢𑀭𑀣𑀸 𑀅𑀩𑁆𑀬𑀢𑁆𑀢𑁄.

𑁨𑁩𑁧. 𑀇𑀤𑀸𑀦𑀺 𑀦𑀺𑀲𑁆𑀲𑀬𑀕𑁆𑀕𑀳𑀡𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀁𑀲’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣 (𑀫𑀳𑀸𑀯. 𑁧𑁦𑁩) 𑀆𑀬𑀲𑁆𑀫𑀢𑁄𑀢𑀺 𑀆𑀬𑀲𑁆𑀫𑀦𑁆𑀢𑀁.

𑁨𑁩𑁨. 𑀇𑀤𑀸𑀦𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀥𑀸𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀓𑁆𑀓𑀦𑁆𑀢𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁, ‘‘𑀧𑀜𑁆𑀘𑀺𑀫𑀸, 𑀪𑀺𑀓𑁆𑀔𑀯𑁂, 𑀦𑀺𑀲𑁆𑀲𑀬𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑁄 𑀉𑀧𑀚𑁆𑀛𑀸𑀬𑀫𑁆𑀳𑀸. 𑀉𑀧𑀚𑁆𑀛𑀸𑀬𑁄 𑀧𑀓𑁆𑀓𑀦𑁆𑀢𑁄 𑀯𑀸 𑀳𑁄𑀢𑀺 𑀯𑀺𑀩𑁆𑀪𑀦𑁆𑀢𑁄 𑀯𑀸 𑀓𑀸𑀮𑀓𑀢𑁄 𑀯𑀸 𑀧𑀓𑁆𑀔𑀲𑀗𑁆𑀓𑀦𑁆𑀢𑁄 𑀯𑀸 𑀆𑀡𑀢𑁆𑀢𑀺𑀬𑁂𑀯 𑀧𑀜𑁆𑀘𑀫𑀻’’𑀢𑀺 (𑀫𑀳𑀸𑀯. 𑁮𑁩), ‘‘𑀙𑀬𑀺𑀫𑀸, 𑀪𑀺𑀓𑁆𑀔𑀯𑁂, 𑀦𑀺𑀲𑁆𑀲𑀬𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑁄 𑀆𑀘𑀭𑀺𑀬𑀫𑁆𑀳𑀸. 𑀆𑀘𑀭𑀺𑀬𑁄 𑀧𑀓𑁆𑀓𑀦𑁆𑀢𑁄 𑀯𑀸 𑀳𑁄𑀢𑀺 𑀯𑀺𑀩𑁆𑀪𑀦𑁆𑀢𑁄 𑀯𑀸 𑀓𑀸𑀮𑀓𑀢𑁄 𑀯𑀸 𑀧𑀓𑁆𑀔𑀲𑀗𑁆𑀓𑀦𑁆𑀢𑁄 𑀯𑀸 𑀆𑀡𑀢𑁆𑀢𑀺𑀬𑁂𑀯 𑀧𑀜𑁆𑀘𑀫𑀻, 𑀉𑀧𑀚𑁆𑀛𑀸𑀬𑁂𑀦 𑀯𑀸 𑀲𑀫𑁄𑀥𑀸𑀦𑀕𑀢𑁄 𑀳𑁄𑀢𑀻’’𑀢𑀺 𑀇𑀤𑀁 𑀧𑀦 𑀉𑀪𑀬𑀁 𑀇𑀥 𑀤𑀲𑁆𑀲𑀺𑀢𑀁. 𑀲𑀘𑁂 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀲𑀸𑀫𑀦𑁆𑀢𑀯𑀺𑀳𑀸𑀭𑁂𑀲𑀼𑀧𑀺 𑀅𑀧𑀭𑀺𑀓𑁆𑀔𑀺𑀢𑁆𑀢𑁂𑀲𑀼 𑀮𑁂𑀟𑁆𑀟𑀼𑀧𑀸𑀢𑀤𑁆𑀯𑀬𑀩𑁆𑀪𑀦𑁆𑀢𑀭𑁂 𑀯𑀲𑀦𑁆𑀢𑀺, 𑀦𑀺𑀲𑁆𑀲𑀬𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀧𑀭𑀺𑀓𑁆𑀔𑀺𑀢𑁆𑀢𑁂𑀲𑀼𑀧𑀺 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺 𑀏𑀓𑁂. 𑀆𑀘𑀭𑀺𑀬𑀸 𑀧𑀦 𑀦 𑀇𑀘𑁆𑀙𑀦𑁆𑀢𑀺. 𑀓𑀲𑁆𑀫𑀸𑀢𑀺 𑀘𑁂? 𑀦𑀺𑀲𑁆𑀲𑀬𑀕𑁆𑀕𑀳𑀡𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀻𑀦𑀁 𑀉𑀧𑀘𑀸𑀭𑀲𑀻𑀫𑀸𑀬 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸. 𑀮𑁂𑀟𑁆𑀟𑀼𑀧𑀸𑀢𑁂𑀦 𑀉𑀧𑀘𑀸𑀭𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑁄 𑀧𑀦 𑀅𑀧𑀭𑀺𑀓𑁆𑀔𑀺𑀢𑁆𑀢𑁂𑀲𑀼 𑀏𑀯 𑀮𑀩𑁆𑀪𑀢𑀺, 𑀦 𑀧𑀭𑀺𑀓𑁆𑀔𑀺𑀢𑁆𑀢𑁂𑀲𑀼. 𑀢𑀲𑁆𑀫𑀸 𑀆𑀘𑀭𑀺𑀬𑀸𑀦𑀁 𑀯𑀺𑀦𑀺𑀘𑁆𑀙𑀬𑁂𑀯 𑀞𑀸𑀢𑀩𑁆𑀩𑀁.

𑀧𑀓𑁆𑀓𑀦𑁆𑀢𑁂𑀢𑀺 𑀏𑀢𑁆𑀣 (𑀫𑀳𑀸𑀯. 𑀅𑀝𑁆𑀞. 𑁮𑁩) 𑀲𑀘𑁂 𑀆𑀘𑀭𑀺𑀬𑁄 𑀅𑀦𑁆𑀢𑁂𑀯𑀸𑀲𑀺𑀓𑀁 𑀅𑀦𑀸𑀫𑀦𑁆𑀢𑁂𑀢𑁆𑀯𑀸𑀯 𑀉𑀧𑀘𑀸𑀭𑀲𑀻𑀫𑀁 𑀅𑀢𑀺𑀓𑁆𑀓𑀫𑀢𑀺, 𑀦𑀺𑀲𑁆𑀲𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀲𑀘𑁂 𑀉𑀧𑀘𑀸𑀭𑀲𑀻𑀫𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸𑀯 𑀦𑀺𑀯𑀢𑁆𑀢𑀢𑀺, 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀆𑀘𑀭𑀺𑀬𑀁 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀕𑀫𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀆𑀘𑀭𑀺𑀬𑁄 𑀓𑀢𑁆𑀣𑀘𑀺 𑀕𑀦𑁆𑀢𑀼𑀓𑀸𑀫𑁄 𑀅𑀦𑁆𑀢𑁂𑀯𑀸𑀲𑀺𑀓𑀁 𑀆𑀧𑀼𑀘𑁆𑀙𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁄𑀧𑀺 ‘‘𑀲𑀸𑀥𑀼 𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀢𑀗𑁆𑀔𑀡𑁂 𑀏𑀯 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀏𑀯𑀁 𑀆𑀘𑀭𑀺𑀬𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀕𑀫𑀦𑁂𑀧𑀺. 𑀤𑁆𑀯𑀻𑀲𑀼𑀧𑀺 𑀅𑀦𑁆𑀢𑁄𑀯𑀺𑀳𑀸𑀭𑁂𑀬𑁂𑀯 𑀞𑀺𑀢𑁂𑀲𑀼 𑀆𑀘𑀭𑀺𑀬𑁄 𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑀁, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀯𑀸 𑀆𑀘𑀭𑀺𑀬𑀁 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸𑀯 𑀲𑀘𑁂 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑀢𑀺, 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀧𑀓𑁆𑀔𑀲𑀗𑁆𑀓𑀦𑁆𑀢𑁂 𑀯𑀸 𑀯𑀺𑀩𑁆𑀪𑀦𑁆𑀢𑁂 𑀯𑀸 𑀓𑀸𑀮𑀓𑀢𑁂 𑀯𑀸 𑀢𑀗𑁆𑀔𑀡𑁂𑀬𑁂𑀯 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀆𑀡𑀢𑁆𑀢𑀺 𑀦𑀸𑀫 𑀦𑀺𑀲𑁆𑀲𑀬𑀧𑁆𑀧𑀡𑀸𑀫𑀦𑀸. 𑀤𑀲𑁆𑀲𑀦𑀲𑀯𑀦𑀯𑀲𑁂𑀦 𑀤𑀼𑀯𑀺𑀥𑀁 𑀲𑀫𑁄𑀥𑀸𑀦𑀁.

𑁨𑁩𑁩. 𑀅𑀮𑀚𑁆𑀚𑀺𑀦𑁆𑀢𑀺 𑀏𑀢𑁆𑀣 𑁋

‘‘𑀲𑀜𑁆𑀘𑀺𑀘𑁆𑀘 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺;

𑀆𑀧𑀢𑁆𑀢𑀺𑀁 𑀧𑀭𑀺𑀕𑀽𑀳𑀢𑀺;

𑀅𑀕𑀢𑀺𑀕𑀫𑀦𑀜𑁆𑀘 𑀕𑀘𑁆𑀙𑀢𑀺;

𑀏𑀤𑀺𑀲𑁄 𑀯𑀼𑀘𑁆𑀘𑀢𑀺 𑀅𑀮𑀚𑁆𑀚𑀺𑀧𑀼𑀕𑁆𑀕𑀮𑁄’’𑀢𑀺. (𑀧𑀭𑀺. 𑁩𑁫𑁯) 𑁋

𑀏𑀯𑀁 𑀯𑀼𑀢𑁆𑀢𑀁. ‘‘𑀦 𑀪𑀺𑀓𑁆𑀔𑀯𑁂 𑀅𑀮𑀚𑁆𑀚𑀺𑀦𑀁 𑀦𑀺𑀲𑁆𑀲𑀸𑀬 𑀯𑀢𑁆𑀣𑀩𑁆𑀩𑀁. 𑀬𑁄 𑀯𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁧𑁨𑁦) 𑀳𑀺 𑀯𑀼𑀢𑁆𑀢𑀁.

𑁨𑁩𑁪. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁂𑀦 𑀪𑀺𑀓𑁆𑀔𑀼𑀦𑀸 𑀦𑀺𑀲𑁆𑀲𑀬𑀁 𑀅𑀮𑀪𑀫𑀸𑀦𑁂𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀼’’𑀦𑁆𑀢𑀺 (𑀫𑀳𑀸𑀯. 𑁧𑁨𑁧) 𑀯𑀼𑀢𑁆𑀢𑀢𑁆𑀢𑀸 ‘‘𑀅𑀤𑁆𑀥𑀺𑀓𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀲𑁆𑀲 𑀘 𑀬𑀸𑀘𑀺𑀢𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁂𑀦 𑀪𑀺𑀓𑁆𑀔𑀼𑀦𑀸 𑀦𑀺𑀲𑁆𑀲𑀬𑀁 𑀅𑀮𑀪𑀫𑀸𑀦𑁂𑀦 𑀬𑀸𑀘𑀺𑀬𑀫𑀸𑀦𑁂𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀼’’𑀦𑁆𑀢𑀺 (𑀫𑀳𑀸𑀯. 𑁧𑁨𑁧) 𑀳𑀺 𑀯𑀼𑀢𑁆𑀢𑀁. 𑀲𑀮𑁆𑀮𑀓𑁆𑀔𑁂𑀦𑁆𑀢𑁂𑀦 𑀨𑀸𑀲𑀼𑀓𑀦𑁆𑀢𑀺 𑀨𑀸𑀲𑀼𑀯𑀺𑀳𑀸𑀭𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁂𑀦. 𑀇𑀤𑀁 𑀧𑀦 𑀧𑀭𑀺𑀳𑀸𑀭𑀁 (𑀫𑀳𑀸𑀯. 𑀅𑀝𑁆𑀞. 𑁧𑁨𑁧) 𑀲𑁄𑀢𑀸𑀧𑀦𑁆𑀦𑀸𑀤𑀺𑀅𑀭𑀺𑀬𑀲𑀸𑀯𑀓𑁄 𑀯𑀸 𑀣𑀸𑀫𑀕𑀢𑀲𑀫𑀣𑀯𑀺𑀧𑀲𑁆𑀲𑀦𑀸𑀮𑀸𑀪𑀻 𑀯𑀸 𑀩𑀸𑀮𑀧𑀼𑀣𑀼𑀚𑁆𑀚𑀦𑁄 𑀯𑀸 𑀦 𑀮𑀪𑀢𑀺. 𑀬𑀲𑁆𑀲 𑀔𑁄 𑀧𑀦 𑀲𑀫𑀣𑀯𑀺𑀧𑀲𑁆𑀲𑀦𑀸 𑀢𑀭𑀼𑀡𑀸 𑀳𑁄𑀢𑀺, 𑀦 𑀣𑀸𑀫𑀕𑀢𑀸, 𑀅𑀬𑀁 𑀮𑀪𑀢𑀺. 𑀅𑀲𑀦𑁆𑀢𑁂 𑀦𑀺𑀲𑁆𑀲𑀬𑀤𑀸𑀬𑀓𑁂 ‘‘𑀬𑀤𑀸 𑀧𑀝𑀺𑀭𑀽𑀧𑁄 𑀦𑀺𑀲𑁆𑀲𑀬𑀤𑀸𑀬𑀓𑁄 𑀆𑀕𑀘𑁆𑀙𑀺𑀲𑁆𑀲𑀢𑀺, 𑀢𑀤𑀸 𑀢𑀲𑁆𑀲 𑀦𑀺𑀲𑁆𑀲𑀸𑀬 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑀁 𑀓𑀢𑁆𑀯𑀸 𑀬𑀸𑀯 𑀆𑀲𑀸𑀴𑁆𑀳𑀻𑀧𑀼𑀡𑁆𑀡𑀫𑀸, 𑀢𑀸𑀯 𑀯𑀲𑀺𑀢𑀼𑀁 𑀮𑀪𑀢𑀺. 𑀲𑀘𑁂 𑀧𑀦 𑀆𑀲𑀸𑀴𑁆𑀳𑀻𑀫𑀸𑀲𑁂 𑀦𑀺𑀲𑁆𑀲𑀬𑀤𑀸𑀬𑀓𑀁 𑀦 𑀮𑀪𑀢𑀺, 𑀬𑀢𑁆𑀣 𑀅𑀢𑁆𑀣𑀺, 𑀢𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀅𑀦𑁆𑀢𑁄𑀯𑀲𑁆𑀲𑁂 𑀧𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀼𑀁 𑀦 𑀯𑀝𑁆𑀝𑀢𑀺. 𑀲𑀪𑀸𑀕𑁂 𑀤𑀸𑀬𑀓𑁂 𑀅𑀲𑀦𑁆𑀢𑁂 𑀯𑀲𑀺𑀢𑀼𑀁 𑀮𑀩𑁆𑀪𑀢𑀻𑀢𑀺 𑀲𑀩𑁆𑀩𑀧𑀤𑁂𑀲𑀼 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀦𑀺𑀲𑁆𑀲𑀬𑀯𑀺𑀦𑀺𑀘𑁆𑀙𑀬𑁄.

𑀦𑀺𑀲𑁆𑀲𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.