𑁩𑁦. 𑀯𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁧𑁩. 𑀇𑀤𑀸𑀦𑀺 𑀆𑀕𑀦𑁆𑀢𑀼𑀓𑀯𑀢𑁆𑀢𑀸𑀤𑀻𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀯𑀢𑁆𑀢’’𑀦𑁆𑀢𑀺 𑀫𑀸𑀢𑀺𑀓𑀸𑀧𑀤𑀁 𑀉𑀤𑁆𑀥𑀝𑀁. 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 (𑀘𑀽𑀴𑀯. 𑁩𑁫𑁬 𑀆𑀤𑀬𑁄; 𑀘𑀽𑀴𑀯. 𑀅𑀝𑁆𑀞. 𑁩𑁫𑁭 𑀆𑀤𑀬𑁄) 𑀯𑀺𑀳𑀸𑀭𑀲𑁆𑀲 𑀧𑀭𑀺𑀓𑁆𑀔𑁂𑀧𑀁, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀤𑁆𑀯𑀻𑀳𑀺 𑀮𑁂𑀟𑁆𑀟𑀼𑀧𑀸𑀢𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀝𑁆𑀞𑀸𑀦𑀁 𑀧𑀢𑁆𑀯𑀸 𑀉𑀧𑀸𑀳𑀦𑀁 𑀑𑀫𑀼𑀜𑁆𑀘𑀺𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀉𑀧𑀸𑀳𑀦𑀁 𑀤𑀡𑁆𑀟𑀓𑁂𑀦 𑀕𑀳𑁂𑀢𑁆𑀯𑀸 𑀙𑀢𑁆𑀢𑀁 𑀅𑀧𑀦𑀸𑀫𑁂𑀢𑁆𑀯𑀸 𑀲𑀻𑀲𑀁 𑀯𑀺𑀯𑀭𑀺𑀢𑁆𑀯𑀸 𑀲𑀻𑀲𑁂 𑀘𑀻𑀯𑀭𑀁 𑀔𑀦𑁆𑀥𑁂 𑀓𑀭𑀺𑀢𑁆𑀯𑀸 𑀲𑀸𑀥𑀼𑀓𑀁 𑀅𑀢𑀭𑀫𑀸𑀦𑁂𑀦 𑀆𑀭𑀸𑀫𑁄 𑀧𑀯𑀺𑀲𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑁨𑁧𑁪. 𑀧𑀼𑀘𑁆𑀙𑁂𑀬𑁆𑀬 𑀲𑀬𑀦𑀸𑀲𑀦𑀦𑁆𑀢𑀺 ‘‘𑀓𑀢𑀫𑀁 𑀫𑁂 𑀲𑁂𑀦𑀸𑀲𑀦𑀁 𑀧𑀸𑀧𑀼𑀡𑀸𑀢𑀺, 𑀓𑀺𑀁 𑀅𑀚𑁆𑀛𑀸𑀯𑀼𑀢𑁆𑀣𑀁 𑀯𑀸 𑀅𑀦𑀚𑁆𑀛𑀸𑀯𑀼𑀢𑁆𑀣𑀁 𑀯𑀸’’𑀢𑀺 𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑁨𑁧𑁫-𑁬. 𑀫𑀜𑁆𑀘𑀧𑀻𑀞𑀸𑀤𑀺𑀤𑀸𑀭𑀼𑀪𑀡𑁆𑀟𑀜𑁆𑀘 (𑀘𑀽𑀴𑀯. 𑁩𑁬𑁦; 𑀘𑀽𑀴𑀯. 𑀅𑀝𑁆𑀞. 𑁩𑁬𑁦) 𑀭𑀚𑀦𑀪𑀸𑀚𑀦𑀸𑀤𑀺𑀫𑀢𑁆𑀢𑀺𑀓𑀸𑀪𑀡𑁆𑀟𑀜𑁆𑀘. 𑀆𑀧𑀼𑀘𑁆𑀙𑀸𑀢𑀺 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀲𑀸𑀫𑀡𑁂𑀭𑀲𑁆𑀲 𑀯𑀸 𑀆𑀭𑀸𑀫𑀺𑀓𑀲𑁆𑀲 𑀯𑀸 ‘‘𑀆𑀯𑀼𑀲𑁄 𑀇𑀫𑀁 𑀚𑀕𑁆𑀕𑀸𑀳𑀻’’𑀢𑀺 𑀆𑀭𑁄𑀘𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀣𑀸𑀢𑀺 𑀏𑀯𑀁 𑀅𑀓𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁨𑁧𑁭-𑁮. 𑀯𑀼𑀟𑁆𑀠𑀸𑀕𑀦𑁆𑀢𑀼𑀓𑀲𑁆𑀲𑀸𑀢𑀺 𑀏𑀢𑁆𑀣 (𑀘𑀽𑀴𑀯. 𑁩𑁫𑁮 𑀆𑀤𑀬𑁄; 𑀘𑀽𑀴𑀯. 𑀅𑀝𑁆𑀞. 𑁩𑁫𑁯 𑀆𑀤𑀬𑁄) 𑀤𑀽𑀭𑀢𑁄𑀯 𑀤𑀺𑀲𑁆𑀯𑀸 𑀬𑀤𑀺 ‘‘𑀯𑀼𑀟𑁆𑀠𑁄’’𑀢𑀺 𑀚𑀸𑀦𑀸𑀢𑀺, 𑀢𑀲𑁆𑀫𑀺𑀁 𑀅𑀦𑀸𑀕𑀢𑁂 𑀏𑀯 𑀆𑀲𑀦𑀧𑀜𑁆𑀜𑀸𑀧𑀦𑀸𑀤𑀺𑀯𑀢𑁆𑀢𑀁 𑀓𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀧𑀸𑀤𑁄𑀤𑀧𑁆𑀧𑀪𑀼𑀢𑀺𑀦𑁆𑀢𑀺 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀧𑀸𑀦𑀻𑀬𑁂𑀦 𑀆𑀧𑀼𑀘𑁆𑀙𑀦𑁆𑀢𑁂𑀦 𑀲𑀘𑁂 𑀲𑀓𑀺𑀁 𑀆𑀦𑀻𑀢𑀁 𑀧𑀸𑀦𑀻𑀬𑀁 𑀲𑀩𑁆𑀩𑀁 𑀧𑀺𑀯𑀢𑀺, 𑀧𑀼𑀦𑀧𑀺 𑀆𑀧𑀼𑀘𑁆𑀙𑀺𑀢𑀩𑁆𑀩𑁄 𑀏𑀯. 𑀧𑀜𑁆𑀜𑀧𑁂𑀢𑀺 ‘‘𑀏𑀢𑀁 𑀢𑀼𑀫𑁆𑀳𑀸𑀓𑀁 𑀲𑁂𑀦𑀸𑀲𑀦𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀏𑀯𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑁨𑁧𑁯-𑁨𑁦. ‘‘𑀪𑀺𑀓𑁆𑀔𑀸𑀘𑀸𑀭𑀕𑀸𑀫𑁄 𑀇𑀢𑁄 𑀤𑀽𑀭𑁂’’𑀢𑀺 𑀯𑀸 ‘‘𑀲𑀦𑁆𑀢𑀺𑀓𑁂’’𑀢𑀺 𑀯𑀸 ‘‘𑀓𑀸𑀮𑀲𑁆𑀲𑁂𑀯 𑀧𑀺𑀡𑁆𑀟𑀸𑀬 𑀘𑀭𑀺𑀢𑀩𑁆𑀩’’𑀦𑁆𑀢𑀺 𑀯𑀸 ‘‘𑀉𑀧𑀝𑁆𑀞𑀸𑀓𑁂 𑀘𑀭𑀺𑀢𑀩𑁆𑀩’’𑀦𑁆𑀢𑀺 𑀯𑀸 𑀕𑁄𑀘𑀭𑁄 𑀆𑀘𑀺𑀓𑁆𑀔𑀺𑀢𑀩𑁆𑀩𑁄. 𑀅𑀕𑁄𑀘𑀭𑁄𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸𑀦𑀁 𑀯𑀸 𑀕𑀸𑀫𑁄, 𑀧𑀭𑀺𑀘𑁆𑀙𑀺𑀦𑁆𑀦𑀪𑀺𑀓𑁆𑀔𑀓𑁄 𑀯𑀸 𑀕𑀸𑀫𑁄, 𑀬𑀢𑁆𑀣 𑀏𑀓𑀲𑁆𑀲 𑀯𑀸 𑀤𑁆𑀯𑀺𑀦𑁆𑀦𑀁 𑀯𑀸 𑀪𑀺𑀓𑁆𑀔𑀸 𑀤𑀻𑀬𑀢𑀺, 𑀲𑁄 𑀆𑀘𑀺𑀓𑁆𑀔𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀓𑀢𑀺𑀓𑀦𑁆𑀢𑀺 𑀲𑀗𑁆𑀖𑀲𑁆𑀲 𑀓𑀢𑀺𑀓𑀝𑁆𑀞𑀸𑀦𑀁. ‘‘𑀇𑀫𑀁 𑀓𑀸𑀮𑀁 𑀧𑀯𑀺𑀲𑀺𑀢𑀩𑁆𑀩𑀁, 𑀇𑀫𑀁 𑀓𑀸𑀮𑀁 𑀦𑀺𑀓𑁆𑀔𑀫𑀺𑀢𑀩𑁆𑀩’’𑀦𑁆𑀢𑀺 𑀏𑀯𑀁 𑀧𑀯𑁂𑀲𑀦𑀦𑀺𑀓𑁆𑀔𑀫𑀦𑀓𑀸𑀮𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀓𑁂𑀲𑀼𑀘𑀺 𑀞𑀸𑀦𑁂𑀲𑀼 𑀅𑀫𑀦𑀼𑀲𑁆𑀲𑀸 𑀯𑀸 𑀯𑀸𑀴𑀸 𑀯𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀏𑀯𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀫𑁂𑀯. 𑀦𑀺𑀲𑀺𑀦𑁆𑀦𑁄𑀯𑀸𑀢𑀺 𑀇𑀤𑀁 𑀆𑀧𑀢𑁆𑀢𑀺𑀅𑀪𑀸𑀯𑀫𑀢𑁆𑀢𑀤𑀻𑀧𑀓𑀁, 𑀉𑀝𑁆𑀞𑀳𑀺𑀢𑁆𑀯𑀸𑀧𑀺 𑀲𑀩𑁆𑀩𑀁 𑀓𑀸𑀢𑀼𑀁 𑀯𑀝𑁆𑀝𑀢𑁂𑀯. 𑀯𑀢𑁆𑀢𑀯𑀺𑀦𑀺𑀘𑁆𑀙𑀬𑁄.

𑀯𑀢𑁆𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.