𑁨𑁮. 𑀓𑀫𑁆𑀫𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁯𑁯. 𑀅𑀥𑀫𑁆𑀫𑀓𑀫𑁆𑀫𑀦𑁆𑀢𑀺 𑀏𑀢𑁆𑀣 𑀓𑀣𑀁 𑀅𑀥𑀫𑁆𑀫𑀓𑀫𑁆𑀫𑀁 𑀳𑁄𑀢𑀻𑀢𑀺 𑀘𑁂? 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑀓𑀫𑁆𑀫𑀁? 𑀜𑀢𑁆𑀢𑀺𑀤𑀼𑀢𑀺𑀬𑁂 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑁂 𑀏𑀓𑀸𑀬 𑀜𑀢𑁆𑀢𑀺𑀬𑀸 𑀓𑀫𑁆𑀫𑀁 𑀓𑀭𑁄𑀢𑀺, 𑀦 𑀘 𑀓𑀫𑁆𑀫𑀯𑀸𑀘𑀁 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀅𑀥𑀫𑁆𑀫𑀓𑀫𑁆𑀫𑀁. 𑀤𑁆𑀯𑀻𑀳𑀺 𑀜𑀢𑁆𑀢𑀻𑀳𑀺 𑀓𑀫𑁆𑀫𑀁 𑀓𑀭𑁄𑀢𑀺, 𑀦 𑀘 𑀓𑀫𑁆𑀫𑀯𑀸𑀘𑀁 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀅𑀥𑀫𑁆𑀫𑀓𑀫𑁆𑀫𑀁. 𑀏𑀓𑀸𑀬 𑀓𑀫𑁆𑀫𑀯𑀸𑀘𑀸𑀬 𑀓𑀫𑁆𑀫𑀁 𑀓𑀭𑁄𑀢𑀺, 𑀦 𑀘 𑀜𑀢𑁆𑀢𑀺𑀁 𑀞𑀧𑁂𑀢𑀺, 𑀅𑀥𑀫𑁆𑀫𑀓𑀫𑁆𑀫𑀁. 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀓𑀫𑁆𑀫𑀁 𑀓𑀭𑁄𑀢𑀺, 𑀦 𑀘 𑀜𑀢𑁆𑀢𑀺𑀁 𑀞𑀧𑁂𑀢𑀺, 𑀅𑀥𑀫𑁆𑀫𑀓𑀫𑁆𑀫’’𑀦𑁆𑀢𑀺 (𑀫𑀳𑀸𑀯. 𑁩𑁮𑁭). 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀓𑀫𑁆𑀫𑁂𑀲𑀼𑀧𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀅𑀓𑀢𑁆𑀯𑀸 𑀅𑀜𑁆𑀜𑀣𑀸 𑀓𑀭𑀡𑀁 𑀅𑀥𑀫𑁆𑀫𑀓𑀫𑁆𑀫𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀯𑀕𑁆𑀕𑁂𑀦𑀸𑀢𑀺 𑀯𑀕𑁆𑀕𑁂𑀦 𑀲𑀗𑁆𑀖𑁂𑀦. 𑀓𑀣𑀜𑁆𑀘 𑀯𑀕𑁆𑀕𑀁 𑀳𑁄𑀢𑀻𑀢𑀺 𑀘𑁂? 𑀬𑀸𑀯𑀢𑀺𑀓𑀸 𑀘 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸, 𑀢𑁂 𑀅𑀦𑀸𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀅𑀦𑀸𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀧𑀝𑀺𑀓𑁆𑀓𑁄𑀲𑀦𑁆𑀢𑀺, 𑀯𑀕𑁆𑀕𑀓𑀫𑁆𑀫𑀦𑁆𑀢𑀺 𑀇𑀫𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀏𑀓𑁂𑀦𑀧𑀺 𑀅𑀗𑁆𑀕𑁂𑀦 𑀯𑀕𑁆𑀕𑀁 𑀳𑁄𑀢𑀺.

𑀲𑀫𑀕𑁆𑀕𑁂𑀦𑀸𑀢𑀺 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦. 𑀓𑀣𑀁 𑀲𑀫𑀕𑁆𑀕𑀁 𑀳𑁄𑀢𑀻𑀢𑀺 𑀘𑁂? 𑀬𑀸𑀯𑀢𑀺𑀓𑀸 𑀘 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸, 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀆𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀦𑀧𑁆𑀧𑀝𑀺𑀓𑁆𑀓𑁄𑀲𑀦𑁆𑀢𑀺, 𑀲𑀫𑀕𑁆𑀕𑀓𑀫𑁆𑀫𑀦𑁆𑀢𑀺 𑀏𑀯𑀁.

𑀘𑀢𑀼𑀢𑁆𑀣𑀦𑁆𑀢𑀺 𑀲𑀫𑀕𑁆𑀕𑁂𑀦 𑀥𑀫𑁆𑀫𑀺𑀓𑀁. 𑀏𑀢𑁆𑀢𑀸𑀯𑀢𑀸 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀸𑀦𑀺, 𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫’’𑀦𑁆𑀢𑀺 (𑀫𑀳𑀸𑀯. 𑁩𑁮𑁪) 𑀏𑀯𑀁 𑀯𑀼𑀢𑁆𑀢𑀸𑀦𑀺 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀧𑀭𑀺𑀕𑁆𑀕𑀳𑀺𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁨𑁦𑁦-𑁨𑁦𑁨. 𑀤𑀲𑀯𑀕𑁆𑀕𑀺𑀓𑁄 (𑀫𑀳𑀸𑀯. 𑁩𑁮𑁮; 𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑀯𑀻𑀲𑀢𑀺𑀯𑀕𑁆𑀕𑀺𑀓𑁄 𑀘 𑀤𑀲𑀯𑀻𑀲𑀢𑀺𑀯𑀕𑁆𑀕𑀺𑀓𑁄. 𑀅𑀩𑁆𑀪𑀸𑀦𑁄𑀧𑀲𑀫𑁆𑀧𑀤𑀸𑀧𑁆𑀧𑀯𑀸𑀭𑀡𑀸 𑀞𑀧𑁂𑀢𑁆𑀯𑀸 𑀲𑀩𑁆𑀩𑀓𑀫𑁆𑀫𑁂𑀲𑀼 𑀓𑀫𑁆𑀫𑀧𑁆𑀧𑀢𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀇𑀢𑀭𑁄𑀢𑀺 𑀯𑀻𑀲𑀢𑀺𑀯𑀕𑁆𑀕𑁄 𑀘 𑀅𑀢𑀺𑀭𑁂𑀓𑀯𑀻𑀲𑀢𑀺𑀯𑀕𑁆𑀕𑁄 𑀘.

𑁨𑁦𑁩. 𑀇𑀤𑀸𑀦𑀺 𑀓𑀫𑁆𑀫𑀧𑁆𑀧𑀢𑁆𑀢𑁂 𑀘 𑀙𑀦𑁆𑀤𑀸𑀭𑀳𑁂 𑀘 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀼𑀯𑀕𑁆𑀕𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 (𑀧𑀭𑀺. 𑁪𑁮𑁮, 𑁪𑁯𑁭; 𑀧𑀭𑀺. 𑁪𑁮𑁭-𑁪𑁮𑁮) 𑀧𑀓𑀢𑀢𑁆𑀢𑀸 𑀦𑀸𑀫 𑀬𑁂 𑀧𑀸𑀭𑀸𑀚𑀺𑀓𑀉𑀓𑁆𑀔𑀺𑀢𑁆𑀢𑀮𑀤𑁆𑀥𑀺𑀦𑀸𑀦𑀸𑀲𑀁𑀯𑀸𑀲𑀓𑀸 𑀦 𑀳𑁄𑀦𑁆𑀢𑀺. 𑀧𑀭𑁂𑀢𑀺 𑀏𑀓𑀲𑀻𑀫𑀝𑁆𑀞𑀸 𑀧𑀓𑀢𑀢𑁆𑀢𑀸 𑀪𑀺𑀓𑁆𑀔𑀽. 𑀬𑀤𑀺 𑀧𑀓𑀢𑀢𑁆𑀢𑀸 𑀪𑀺𑀓𑁆𑀔𑀽𑀧𑀺 𑀅𑀜𑁆𑀜𑀢𑀭𑀁 𑀕𑀸𑀫𑀲𑀻𑀫𑀁 𑀯𑀸 𑀦𑀤𑀻𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑀔𑀡𑁆𑀟𑀲𑀻𑀫𑀸𑀲𑀼 𑀯𑀸 𑀅𑀜𑁆𑀜𑀢𑀭𑀁 𑀧𑀯𑀺𑀲𑀺𑀢𑁆𑀯𑀸 𑀞𑀺𑀢𑀸 𑀳𑁄𑀦𑁆𑀢𑀺, 𑀦𑁂𑀯 𑀓𑀫𑁆𑀫𑀧𑁆𑀧𑀢𑁆𑀢𑀸, 𑀦 𑀙𑀦𑁆𑀤𑀸𑀭𑀳𑀸. 𑀦 𑀳𑀺 𑀢𑁂𑀲𑀁 𑀙𑀦𑁆𑀤𑁄 𑀯𑀸 𑀧𑀸𑀭𑀺𑀲𑀼𑀤𑁆𑀥𑀺 𑀯𑀸 𑀆𑀕𑀘𑁆𑀙𑀢𑀺 𑀅𑀜𑁆𑀜𑀲𑀻𑀫𑀸𑀬𑀁 𑀞𑀺𑀢𑀢𑁆𑀢𑀸. 𑀲𑁂𑀲𑁂𑀧𑀻𑀢𑀺 𑀧𑀜𑁆𑀘𑀯𑀕𑁆𑀕𑀸𑀤𑀺𑀓𑀭𑀡𑀻𑀬𑁂𑀧𑀻𑀢𑀺 𑀅𑀢𑁆𑀣𑁄.

𑁨𑁦𑁪. 𑀅𑀲𑀁𑀯𑀸𑀲𑀕𑀡𑀧𑀽𑀭𑀁 𑀯𑀸 𑀓𑀢𑁆𑀯𑀸 𑀓𑀢𑀁 𑀓𑀫𑁆𑀫𑀁 𑀓𑀼𑀧𑁆𑀧𑀜𑁆𑀘 𑀳𑁄𑀢𑀺, 𑀓𑀸𑀭𑀓𑀸𑀦𑀜𑁆𑀘 𑀤𑀼𑀓𑁆𑀓𑀝𑀦𑁆𑀢𑀺 𑀅𑀢𑁆𑀣𑁄. ‘‘𑀬𑀲𑁆𑀲 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀁𑀘𑀢𑀼𑀢𑁆𑀣𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬, 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬’’𑀦𑁆𑀢𑀺 (𑀫𑀳𑀸𑀯. 𑁩𑁮𑁯) 𑀯𑀼𑀢𑁆𑀢𑀢𑁆𑀢𑀸 ‘‘𑀓𑀫𑁆𑀫𑀸𑀭𑀳𑀕𑀡𑀧𑀽𑀭𑀁 𑀯𑀸’’𑀢𑀺 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀧𑀭𑀺𑀯𑀸𑀲𑀸𑀤𑀺𑀓𑀫𑁆𑀫𑀸𑀦𑀁𑀬𑁂𑀯 𑀧𑀭𑀺𑀲𑀢𑁄 𑀯𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀕𑀭𑀼𑀓𑀝𑁆𑀞𑀕𑀡𑀧𑀽𑀭𑀁 𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑀫𑁆𑀧𑀺 𑀅𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑁄 𑀧𑀦 𑀲𑀩𑁆𑀩𑀢𑁆𑀣 𑀕𑀡𑀧𑀽𑀭𑀓𑁄 𑀳𑁄𑀢𑀺 𑀏𑀯.

𑁨𑁦𑁫. 𑀯𑀸𑀭𑁂𑀬𑁆𑀬𑀸𑀢𑀺 𑀧𑀝𑀺𑀓𑁆𑀔𑀺𑀧𑁂𑀬𑁆𑀬. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑀓𑀫𑁆𑀫𑁂 𑀓𑀬𑀺𑀭𑀫𑀸𑀦𑁂 𑀧𑀝𑀺𑀓𑁆𑀓𑁄𑀲𑀺𑀢𑀼’’𑀦𑁆𑀢𑀺 (𑀫𑀳𑀸𑀯. 𑁧𑁫𑁪) 𑀳𑀺 𑀯𑀼𑀢𑁆𑀢𑀁. 𑀅𑀦𑁆𑀢𑀭𑀸𑀬𑁂 𑀲𑀢𑀻𑀢𑀺 𑀅𑀢𑁆𑀣𑁄. ‘‘𑀅𑀥𑀫𑁆𑀫𑀓𑀫𑁆𑀫𑀁 𑀇𑀤𑀁, 𑀦 𑀫𑁂𑀢𑀁 𑀔𑀫𑀢𑀻’’𑀢𑀺 𑀏𑀯𑀁 𑀤𑁆𑀯𑁂 𑀢𑀬𑁄 𑀅𑀜𑁆𑀜𑀫𑀜𑁆𑀜𑀁 𑀤𑀺𑀝𑁆𑀞𑀺𑀁 𑀆𑀯𑀺 𑀓𑀭𑁂𑀬𑁆𑀬𑀼𑀦𑁆𑀢𑀺 𑀅𑀢𑁆𑀣𑁄. 𑀬𑀤𑀺 𑀏𑀓𑁄 𑀳𑁄𑀢𑀺, ‘‘𑀦 𑀫𑁂𑀢𑀁 𑀔𑀫𑀢𑀻’’𑀢𑀺 𑀏𑀯𑀁 𑀅𑀥𑀺𑀝𑁆𑀞𑀸𑀦𑀁 𑀓𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀢𑀸𑀯𑀢𑀸 𑀏𑀢𑁂 𑀦𑀺𑀭𑀸𑀧𑀢𑁆𑀢𑀺𑀓𑀸 𑀳𑁄𑀦𑁆𑀢𑀺, 𑀅𑀦𑁆𑀢𑀭𑀸𑀬𑀸 𑀘 𑀫𑀼𑀘𑁆𑀘𑀦𑁆𑀢𑀺, 𑀓𑀫𑁆𑀫𑀁 𑀧𑀦 𑀅𑀥𑀫𑁆𑀫𑀢𑁆𑀢𑀸 𑀓𑀼𑀧𑁆𑀧𑀫𑁂𑀯. 𑀯𑀸𑀭𑁂𑀦𑁆𑀢𑁂𑀯 𑀢𑀢𑁄𑀥𑀺𑀓𑀸𑀢𑀺 𑀏𑀢𑁆𑀣 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀧𑀜𑁆𑀘𑀳𑀺 𑀧𑀝𑀺𑀓𑁆𑀓𑁄𑀲𑀺𑀢𑀼𑀁, 𑀤𑁆𑀯𑀻𑀳𑀺 𑀢𑀻𑀳𑀺 𑀤𑀺𑀝𑁆𑀞𑀺𑀁 𑀆𑀯𑀺 𑀓𑀸𑀢𑀼𑀁, 𑀏𑀓𑁂𑀦 𑀅𑀥𑀺𑀝𑁆𑀞𑀸𑀢𑀼𑀁, ‘‘𑀦 𑀫𑁂𑀢𑀁 𑀔𑀫𑀢𑀻’’𑀢𑀺 (𑀫𑀳𑀸𑀯. 𑁧𑁫𑁪) 𑀯𑀼𑀢𑁆𑀢𑀢𑁆𑀢𑀸 𑀘𑀢𑁆𑀢𑀸𑀭𑁄 𑀯𑀸 𑀧𑀜𑁆𑀘 𑀯𑀸 𑀯𑀸𑀭𑁂𑀦𑁆𑀢𑀺 𑀏𑀯𑀸𑀢𑀺 𑀅𑀢𑁆𑀣𑁄.

𑁨𑁦𑁬. 𑀇𑀤𑀸𑀦𑀺 𑀬𑁂𑀳𑀺 𑀧𑀝𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺, 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀓𑀫𑁆𑀫𑀸𑀭𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀔𑀺𑀢𑁆𑀢𑀘𑀺𑀢𑁆𑀢-𑀕𑁆𑀕𑀳𑀡𑁂𑀦 𑀉𑀫𑁆𑀫𑀢𑁆𑀢𑀓𑁄𑀧𑀺 𑀕𑀳𑀺𑀢𑁄𑀯. 𑀏𑀢𑁂𑀲𑀦𑁆𑀢𑀺 𑀬𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸, 𑀢𑁂𑀲𑀁 𑀧𑀝𑀺𑀓𑁆𑀔𑁂𑀧𑁄 𑀦 𑀭𑀼𑀳𑀢𑀻𑀢𑀺 𑀅𑀢𑁆𑀣𑁄.

𑁨𑁦𑁭. 𑀇𑀤𑀸𑀦𑀺 𑀬𑀲𑁆𑀲 𑀧𑀝𑀺𑀓𑁆𑀔𑁂𑀧𑁄 𑀭𑀼𑀳𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀓𑀢𑀢𑁆𑀢𑁂𑀓𑀲𑀻𑀫𑀝𑁆𑀞-𑀲𑀫𑀲𑀁𑀯𑀸𑀲𑀪𑀺𑀓𑁆𑀔𑀼𑀦𑁄’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 (𑀫𑀳𑀸𑀯. 𑁩𑁯𑁪) 𑁋 𑀏𑀯𑀭𑀽𑀧𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀓𑁆𑀓𑁄𑀲𑀦𑀸 𑀅𑀦𑁆𑀢𑀫𑀲𑁄 𑀆𑀦𑀦𑁆𑀢𑀭𑀲𑁆𑀲𑀸𑀧𑀺 𑀆𑀭𑁄𑀘𑁂𑀦𑁆𑀢𑀲𑁆𑀲 𑀭𑀼𑀳𑀢𑀻𑀢𑀺. ‘‘𑀪𑀺𑀓𑁆𑀔𑀼𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀓𑀢𑀢𑁆𑀢𑀲𑁆𑀲 𑀲𑀫𑀸𑀦𑀲𑀁𑀯𑀸𑀲𑀺𑀓𑀲𑁆𑀲 𑀲𑀫𑀸𑀦𑀲𑀻𑀫𑀸𑀬𑀁 𑀞𑀺𑀢𑀲𑁆𑀲 𑀅𑀦𑁆𑀢𑀫𑀲𑁄 𑀆𑀦𑀦𑁆𑀢𑀭𑀺𑀓𑀲𑁆𑀲𑀧𑀺 𑀪𑀺𑀓𑁆𑀔𑀼𑀦𑁄 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀲𑀗𑁆𑀖𑀫𑀚𑁆𑀛𑁂 𑀧𑀝𑀺𑀓𑁆𑀓𑁄𑀲𑀦𑀸 𑀭𑀼𑀳𑀢𑀻’’𑀢𑀺 (𑀫𑀳𑀸𑀯. 𑁩𑁯𑁪) 𑀯𑀼𑀢𑁆𑀢𑀁.

𑁨𑁦𑁮. 𑀲𑀫𑁆𑀫𑀼𑀔𑀸 𑀬𑀤𑀺 𑀧𑀝𑀺𑀓𑁆𑀓𑁄𑀲𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀢𑀺𑀭𑁄𑀓𑁆𑀔𑀸𑀢𑀺 𑀧𑀭𑀫𑁆𑀫𑀼𑀔𑀸. 𑀓𑀸𑀬𑀲𑀸𑀫𑀕𑁆𑀕𑀺𑀁 𑀯𑀸 𑀙𑀦𑁆𑀤𑀁 𑀯𑀸 𑀦𑁄 𑀤𑀤𑁂𑀬𑁆𑀬, 𑀤𑀼𑀓𑁆𑀓𑀝𑀦𑁆𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀯𑀺𑀦𑀺𑀘𑁆𑀙𑀬𑁄.

𑀓𑀫𑁆𑀫𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.