𑁭. 𑀧𑀯𑀸𑀭𑀡𑀸𑀦𑀺𑀤𑁆𑀤𑁂𑀲𑁄

𑀧𑀯𑀸𑀭𑀡𑀸𑀢𑀺 𑁋

𑁭𑁩. 𑀬𑁂𑀦𑀻𑀭𑀺𑀬𑀸𑀧𑀣𑁂𑀦𑀸𑀬𑀁, 𑀪𑀼𑀜𑁆𑀚𑀫𑀸𑀦𑁄 𑀧𑀯𑀸𑀭𑀺𑀢𑁄;

𑀢𑀢𑁄 𑀅𑀜𑁆𑀜𑁂𑀦 𑀪𑀼𑀜𑁆𑀚𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀦𑀢𑀺𑀭𑀺𑀢𑁆𑀢𑀓𑀁.

𑁭𑁪. 𑀅𑀲𑀦𑀁 𑀪𑁄𑀚𑀦𑀜𑁆𑀘𑁂𑀯, 𑀅𑀪𑀺𑀳𑀸𑀭𑁄 𑀲𑀫𑀻𑀧𑀢𑀸;

𑀓𑀸𑀬𑀯𑀸𑀘𑀸𑀧𑀝𑀺𑀓𑁆𑀔𑁂𑀧𑁄, 𑀧𑀜𑁆𑀘𑀅𑀗𑁆𑀕𑀸 𑀧𑀯𑀸𑀭𑀡𑀸.

𑁭𑁫. 𑀑𑀤𑀦𑁄 𑀲𑀢𑁆𑀢𑀼 𑀓𑀼𑀫𑁆𑀫𑀸𑀲𑁄, 𑀫𑀘𑁆𑀙𑁄 𑀫𑀁𑀲𑀜𑁆𑀘 𑀪𑁄𑀚𑀦𑀁;

𑀲𑀸𑀮𑀺 𑀯𑀻𑀳𑀺 𑀬𑀯𑁄 𑀓𑀗𑁆𑀕𑀼, 𑀓𑀼𑀤𑁆𑀭𑀽𑀲𑀯𑀭𑀕𑁄𑀥𑀼𑀫𑀸;

𑀲𑀢𑁆𑀢𑀦𑁆𑀦𑀫𑁂𑀲𑀁 𑀥𑀜𑁆𑀜𑀸𑀦𑀁, 𑀑𑀤𑀦𑁄 𑀪𑁄𑀚𑁆𑀚𑀬𑀸𑀕𑀼 𑀘.

𑁭𑁬. 𑀲𑀸𑀫𑀸𑀓𑀸𑀤𑀺𑀢𑀺𑀡𑀁 𑀓𑀼𑀤𑁆𑀭𑀽𑀲𑀓𑁂 𑀯𑀭𑀓𑀘𑁄𑀭𑀓𑁄;

𑀯𑀭𑀓𑁂 𑀲𑀸𑀮𑀺𑀬𑀜𑁆𑀘𑁂𑀯, 𑀦𑀻𑀯𑀸𑀭𑁄 𑀲𑀗𑁆𑀕𑀳𑀁 𑀕𑀢𑁄.

𑁭𑁭. 𑀪𑀝𑁆𑀞𑀥𑀜𑁆𑀜𑀫𑀬𑁄 𑀲𑀢𑁆𑀢𑀼, 𑀓𑀼𑀫𑁆𑀫𑀸𑀲𑁄 𑀬𑀯𑀲𑀫𑁆𑀪𑀯𑁄;

𑀫𑀁𑀲𑁄 𑀘 𑀓𑀧𑁆𑀧𑀺𑀬𑁄 𑀯𑀼𑀢𑁆𑀢𑁄, 𑀫𑀘𑁆𑀙𑁄 𑀉𑀤𑀓𑀲𑀫𑁆𑀪𑀯𑁄.

𑁭𑁮. 𑀪𑀼𑀜𑁆𑀚𑀦𑁆𑀢𑁄 𑀪𑁄𑀚𑀦𑀁 𑀓𑀧𑁆𑀧-𑀫𑀓𑀧𑁆𑀧𑀁 𑀯𑀸 𑀦𑀺𑀲𑁂𑀥𑀬𑀁;

𑀧𑀯𑀸𑀭𑁂𑀬𑁆𑀬𑀸𑀪𑀺𑀳𑀝𑀁 𑀓𑀧𑁆𑀧𑀁, 𑀢𑀦𑁆𑀦𑀸𑀫𑁂𑀦 𑀇𑀫𑀦𑁆𑀢𑀺 𑀯𑀸.

𑁭𑁯. 𑀮𑀸𑀚𑀸 𑀢𑀁𑀲𑀢𑁆𑀢𑀼𑀪𑀢𑁆𑀢𑀸𑀦𑀺, 𑀕𑁄𑀭𑀲𑁄 𑀲𑀼𑀤𑁆𑀥𑀔𑀚𑁆𑀚𑀓𑁄;

𑀢𑀡𑁆𑀟𑀼𑀮𑀸 𑀪𑀝𑁆𑀞𑀧𑀺𑀝𑁆𑀞𑀜𑁆𑀘, 𑀧𑀼𑀣𑀼𑀓𑀸 𑀯𑁂𑀴𑀼𑀆𑀤𑀺𑀦𑀁.

𑁮𑁦. 𑀪𑀢𑁆𑀢𑀁 𑀯𑀼𑀢𑁆𑀢𑀸𑀯𑀲𑁂𑀲𑀸𑀦𑀁, 𑀭𑀲𑀬𑀸𑀕𑀼 𑀭𑀲𑁄𑀧𑀺 𑀘;

𑀲𑀼𑀤𑁆𑀥𑀬𑀸𑀕𑀼𑀨𑀮𑀸𑀤𑀻𑀦𑀺, 𑀦 𑀚𑀦𑁂𑀦𑁆𑀢𑀺 𑀧𑀯𑀸𑀭𑀡𑀁.

𑁮𑁧. 𑀧𑀯𑀸𑀭𑀺𑀢𑁂𑀦 𑀯𑀼𑀝𑁆𑀞𑀸𑀬, 𑀅𑀪𑀼𑀢𑁆𑀢𑁂𑀦 𑀘 𑀪𑁄𑀚𑀦𑀁;

𑀅𑀢𑀺𑀭𑀺𑀢𑁆𑀢𑀁 𑀦 𑀓𑀸𑀢𑀩𑁆𑀩𑀁, 𑀬𑁂𑀦 𑀬𑀁 𑀯𑀸 𑀧𑀼𑀭𑁂 𑀓𑀢𑀁.

𑁮𑁨. 𑀓𑀧𑁆𑀧𑀺𑀬𑀁 𑀕𑀳𑀺𑀢𑀜𑁆𑀘𑁂𑀯𑀼-𑀘𑁆𑀘𑀸𑀭𑀺𑀢𑀁 𑀳𑀢𑁆𑀣𑀧𑀸𑀲𑀕𑀁;

𑀅𑀢𑀺𑀭𑀺𑀢𑁆𑀢𑀁 𑀓𑀭𑁄𑀦𑁆𑀢𑁂𑀯𑀁, ‘‘𑀅𑀮𑀫𑁂𑀢’’𑀦𑁆𑀢𑀺 𑀪𑀸𑀲𑀢𑀼.

𑁮𑁩. 𑀦 𑀓𑀭𑁂𑀦𑀼𑀧𑀲𑀫𑁆𑀧𑀦𑁆𑀦-𑀳𑀢𑁆𑀣𑀕𑀁 𑀧𑁂𑀲𑀬𑀺𑀢𑁆𑀯𑀸𑀧𑀺;

𑀓𑀸𑀭𑁂𑀢𑀼𑀁 𑀮𑀩𑁆𑀪𑀢𑁂 𑀲𑀩𑁆𑀩𑁄, 𑀪𑀼𑀜𑁆𑀚𑀺𑀢𑀼𑀁 𑀢𑀫𑀓𑀸𑀭𑀓𑁄𑀢𑀺.