𑁮. 𑀓𑀸𑀮𑀺𑀓𑀦𑀺𑀤𑁆𑀤𑁂𑀲𑁄

𑀓𑀸𑀮𑀺𑀓𑀸 𑀘𑀸𑀢𑀺 𑁋

𑁮𑁪. 𑀧𑀝𑀺𑀕𑁆𑀕𑀳𑀺𑀢𑀸 𑀘𑀢𑁆𑀢𑀸𑀭𑁄, 𑀓𑀸𑀮𑀺𑀓𑀸 𑀬𑀸𑀯𑀓𑀸𑀮𑀺𑀓𑀁;

𑀬𑀸𑀫𑀓𑀸𑀮𑀺𑀓𑀁 𑀲𑀢𑁆𑀢𑀸𑀳-𑀓𑀸𑀮𑀺𑀓𑀁 𑀬𑀸𑀯𑀚𑀻𑀯𑀺𑀓𑀁.

𑁮𑁫. 𑀧𑀺𑀝𑁆𑀞𑀁 𑀫𑀽𑀮𑀁 𑀨𑀮𑀁 𑀔𑀚𑁆𑀚𑀁, 𑀕𑁄𑀭𑀲𑁄 𑀥𑀜𑁆𑀜𑀪𑁄𑀚𑀦𑀁;

𑀬𑀸𑀕𑀼𑀲𑀽𑀧𑀧𑁆𑀧𑀪𑀼𑀢𑀬𑁄, 𑀳𑁄𑀦𑁆𑀢𑁂𑀢𑁂 𑀬𑀸𑀯𑀓𑀸𑀮𑀺𑀓𑀸.

𑁮𑁬. 𑀫𑀥𑀼𑀫𑀼𑀤𑁆𑀤𑀺𑀓𑀲𑀸𑀮𑀽𑀓-𑀘𑁄𑀘𑀫𑁄𑀘𑀫𑁆𑀩𑀚𑀫𑁆𑀩𑀼𑀚𑀁;

𑀨𑀸𑀭𑀼𑀲𑀁 𑀦𑀕𑁆𑀕𑀺𑀲𑀦𑁆𑀢𑀢𑁆𑀢𑀁, 𑀧𑀸𑀦𑀓𑀁 𑀬𑀸𑀫𑀓𑀸𑀮𑀺𑀓𑀁.

𑁮𑁭. 𑀲𑀸𑀦𑀼𑀮𑁄𑀫𑀸𑀦𑀺 𑀥𑀜𑁆𑀜𑀸𑀦𑀺, 𑀞𑀧𑁂𑀢𑁆𑀯𑀸 𑀨𑀮𑀚𑁄 𑀭𑀲𑁄;

𑀫𑀥𑀽𑀓𑀧𑀼𑀧𑁆𑀨𑀫𑀜𑁆𑀜𑀢𑁆𑀭, 𑀲𑀩𑁆𑀩𑁄 𑀧𑀼𑀧𑁆𑀨𑀭𑀲𑁄𑀧𑀺 𑀘.

𑁮𑁮. 𑀲𑀩𑁆𑀩𑀧𑀢𑁆𑀢𑀭𑀲𑁄 𑀘𑁂𑀯, 𑀞𑀧𑁂𑀢𑁆𑀯𑀸 𑀧𑀓𑁆𑀓𑀟𑀸𑀓𑀚𑀁;

𑀲𑀻𑀢𑁄𑀤𑀫𑀤𑁆𑀤𑀺𑀢𑁄𑀤𑀺𑀘𑁆𑀘-𑀧𑀸𑀓𑁄 𑀯𑀸 𑀬𑀸𑀫𑀓𑀸𑀮𑀺𑀓𑁄.

𑁮𑁯. 𑀲𑀧𑁆𑀧𑀺𑀦𑁄𑀦𑀻𑀢𑀢𑁂𑀮𑀸𑀦𑀺, 𑀫𑀥𑀼𑀨𑀸𑀡𑀺𑀢𑀫𑁂𑀯 𑀘;

𑀲𑀢𑁆𑀢𑀸𑀳𑀓𑀸𑀮𑀺𑀓𑀸 𑀲𑀧𑁆𑀧𑀺, 𑀬𑁂𑀲𑀁 𑀫𑀁𑀲𑀫𑀯𑀸𑀭𑀺𑀢𑀁.

𑁯𑁦. 𑀢𑁂𑀮𑀁 𑀢𑀺𑀮𑀯𑀲𑁂𑀭𑀡𑁆𑀟-𑀫𑀥𑀼𑀲𑀸𑀲𑀧𑀲𑀫𑁆𑀪𑀯𑀁;

𑀔𑀼𑀤𑁆𑀤𑀸𑀪𑀫𑀭𑀫𑀥𑀼𑀓𑀭𑀺-𑀫𑀓𑁆𑀔𑀺𑀓𑀸𑀳𑀺 𑀓𑀢𑀁 𑀫𑀥𑀼;

𑀭𑀲𑀸𑀤𑀺𑀉𑀘𑁆𑀙𑀼𑀯𑀺𑀓𑀢𑀺, 𑀧𑀓𑁆𑀓𑀸𑀧𑀓𑁆𑀓𑀸 𑀘 𑀨𑀸𑀡𑀺𑀢𑀁.

𑁯𑁧. 𑀲𑀯𑀢𑁆𑀣𑀼𑀧𑀓𑁆𑀓𑀸 𑀲𑀸𑀫𑀁 𑀯𑀸, 𑀯𑀲𑀸 𑀓𑀸𑀮𑁂 𑀅𑀫𑀸𑀦𑀼𑀲𑀸;

𑀅𑀜𑁆𑀜𑁂𑀲𑀁 𑀦 𑀧𑀘𑁂 𑀯𑀢𑁆𑀣𑀼𑀁, 𑀬𑀸𑀯𑀓𑀸𑀮𑀺𑀓𑀯𑀢𑁆𑀣𑀼𑀦𑀁.

𑁯𑁨. 𑀳𑀮𑀺𑀤𑁆𑀤𑀺𑀁 𑀲𑀺𑀗𑁆𑀕𑀺𑀯𑁂𑀭𑀜𑁆𑀘, 𑀯𑀘𑀢𑁆𑀢𑀁 𑀮𑀲𑀼𑀡𑀁 𑀯𑀘𑀸;

𑀉𑀲𑀻𑀭𑀁 𑀪𑀤𑁆𑀤𑀫𑀼𑀢𑁆𑀢𑀜𑁆𑀘𑀸𑀢𑀺𑀯𑀺𑀲𑀸 𑀓𑀝𑀼𑀭𑁄𑀳𑀺𑀡𑀻;

𑀧𑀜𑁆𑀘𑀫𑀽𑀮𑀸𑀤𑀺𑀓𑀜𑁆𑀘𑀸𑀧𑀺, 𑀫𑀽𑀮𑀁 𑀢𑀁 𑀬𑀸𑀯𑀚𑀻𑀯𑀺𑀓𑀁.

𑁯𑁩. 𑀩𑀺𑀴𑀗𑁆𑀕𑀁 𑀫𑀭𑀺𑀘𑀁 𑀕𑁄𑀝𑁆𑀞-𑀨𑀮𑀁 𑀧𑀺𑀧𑁆𑀨𑀮𑀺 𑀭𑀸𑀚𑀺𑀓𑀸;

𑀢𑀺𑀨𑀮𑁂𑀭𑀡𑁆𑀟𑀓𑀸𑀤𑀻𑀦𑀁, 𑀨𑀮𑀁 𑀢𑀁 𑀬𑀸𑀯𑀚𑀻𑀯𑀺𑀓𑀁.

𑁯𑁪. 𑀓𑀧𑁆𑀧𑀸𑀲𑀦𑀺𑀫𑁆𑀩𑀓𑀼𑀝𑀚𑀧𑀝𑁄𑀮𑀲𑀼𑀮𑀲𑀸𑀤𑀺𑀦𑀁;

𑀲𑀽𑀧𑁂𑀬𑁆𑀬𑀧𑀡𑁆𑀡𑀁 𑀯𑀚𑁆𑀚𑁂𑀢𑁆𑀯𑀸, 𑀧𑀡𑁆𑀡𑀁 𑀢𑀁 𑀬𑀸𑀯𑀚𑀻𑀯𑀺𑀓𑀁.

𑁯𑁫. 𑀞𑀧𑁂𑀢𑁆𑀯𑀸 𑀉𑀘𑁆𑀙𑀼𑀦𑀺𑀬𑁆𑀬𑀸𑀲𑀁,

𑀲𑀭𑀲𑀁 𑀉𑀘𑁆𑀙𑀼𑀚𑀁 𑀢𑀘𑀁;

𑀦𑀺𑀬𑁆𑀬𑀸𑀲𑁄 𑀘 𑀢𑀘𑁄 𑀲𑀩𑁆𑀩𑁄,

𑀮𑁄𑀡𑀁 𑀮𑁄𑀳𑀁 𑀲𑀺𑀮𑀸 𑀢𑀣𑀸.

𑁯𑁬. 𑀲𑀼𑀤𑁆𑀥𑀲𑀺𑀢𑁆𑀣𑀜𑁆𑀘 𑀲𑁂𑀯𑀸𑀮𑁄, 𑀬𑀜𑁆𑀘 𑀓𑀺𑀜𑁆𑀘𑀺 𑀲𑀼𑀛𑀸𑀧𑀺𑀢𑀁;

𑀯𑀺𑀓𑀝𑀸𑀤𑀺𑀧𑁆𑀧𑀪𑁂𑀤𑀜𑁆𑀘, 𑀜𑀸𑀢𑀩𑁆𑀩𑀁 𑀬𑀸𑀯𑀚𑀻𑀯𑀺𑀓𑀁.

𑁯𑁭. 𑀫𑀽𑀮𑀁 𑀲𑀸𑀭𑀁 𑀢𑀘𑁄 𑀨𑁂𑀕𑁆𑀕𑀼, 𑀧𑀡𑁆𑀡𑀁 𑀧𑀼𑀧𑁆𑀨𑀁 𑀨𑀮𑀁 𑀮𑀢𑀸;

𑀆𑀳𑀸𑀭𑀢𑁆𑀣 𑀫𑀲𑀸𑀥𑁂𑀦𑁆𑀢𑀁, 𑀲𑀩𑁆𑀩𑀁 𑀢𑀁 𑀬𑀸𑀯𑀚𑀻𑀯𑀺𑀓𑀁.

𑁯𑁮. 𑀲𑀩𑁆𑀩𑀓𑀸𑀮𑀺𑀓𑀲𑀫𑁆𑀪𑁄𑀕𑁄, 𑀓𑀸𑀮𑁂 𑀲𑀩𑁆𑀩𑀲𑁆𑀲 𑀓𑀧𑁆𑀧𑀢𑀺;

𑀲𑀢𑀺 𑀧𑀘𑁆𑀘𑀬𑁂 𑀯𑀺𑀓𑀸𑀮𑁂, 𑀓𑀧𑁆𑀧𑀢𑁂 𑀓𑀸𑀮𑀺𑀓𑀢𑁆𑀢𑀬𑀁.

𑁯𑁯. 𑀓𑀸𑀮𑀬𑀸𑀫𑀫𑀢𑀺𑀓𑁆𑀓𑀦𑁆𑀢𑀸, 𑀧𑀸𑀘𑀺𑀢𑁆𑀢𑀺𑀁 𑀚𑀦𑀬𑀦𑁆𑀢𑀼𑀪𑁄;

𑀚𑀦𑀬𑀦𑁆𑀢𑀺 𑀉𑀪𑁄𑀧𑁂𑀢𑁂, 𑀅𑀦𑁆𑀢𑁄𑀯𑀼𑀢𑁆𑀣𑀜𑁆𑀘 𑀲𑀦𑁆𑀦𑀺𑀥𑀺𑀁.

𑁧𑁦𑁦. 𑀲𑀢𑁆𑀢𑀸𑀳𑀓𑀸𑀮𑀺𑀓𑁂 𑀲𑀢𑁆𑀢, 𑀅𑀳𑀸𑀦𑀺 𑀅𑀢𑀺𑀦𑀸𑀫𑀺𑀢𑁂;

𑀧𑀸𑀘𑀺𑀢𑁆𑀢𑀺 𑀧𑀸𑀴𑀺𑀦𑀸𑀭𑀼𑀴𑁆𑀳𑁂, 𑀲𑀧𑁆𑀧𑀺𑀆𑀤𑀺𑀫𑁆𑀳𑀺 𑀤𑀼𑀓𑁆𑀓𑀝𑀁.

𑁧𑁦𑁧. 𑀦𑀺𑀲𑁆𑀲𑀝𑁆𑀞𑀮𑀤𑁆𑀥𑀁 𑀫𑀓𑁆𑀔𑁂𑀬𑁆𑀬, 𑀦𑀗𑁆𑀕𑀁 𑀦𑀚𑁆𑀛𑁄𑀳𑀭𑁂𑀬𑁆𑀬 𑀘;

𑀯𑀺𑀓𑀧𑁆𑀧𑁂𑀦𑁆𑀢𑀲𑁆𑀲 𑀲𑀢𑁆𑀢𑀸𑀳𑁂, 𑀲𑀸𑀫𑀡𑁂𑀭𑀲𑁆𑀲𑀥𑀺𑀝𑁆𑀞𑀢𑁄;

𑀫𑀓𑁆𑀔𑀦𑀸𑀤𑀺𑀜𑁆𑀘 𑀦𑀸𑀧𑀢𑁆𑀢𑀺, 𑀅𑀜𑁆𑀜𑀲𑁆𑀲 𑀤𑀤𑀢𑁄𑀧𑀺 𑀘.

𑁧𑁦𑁨. 𑀬𑀸𑀯𑀓𑀸𑀮𑀺𑀓𑀆𑀤𑀻𑀦𑀺, 𑀲𑀁𑀲𑀝𑁆𑀞𑀸𑀦𑀺 𑀲𑀳𑀢𑁆𑀢𑀦𑀸;

𑀕𑀸𑀳𑀸𑀧𑀬𑀦𑁆𑀢𑀺 𑀲𑀩𑁆𑀪𑀸𑀯𑀁, 𑀢𑀲𑁆𑀫𑀸 𑀏𑀯𑀫𑀼𑀤𑀻𑀭𑀺𑀢𑀁.

𑁧𑁦𑁩. 𑀧𑀼𑀭𑁂 𑀧𑀝𑀺𑀕𑁆𑀕𑀳𑀺𑀢𑀜𑁆𑀘, 𑀲𑀢𑁆𑀢𑀸𑀳𑀁 𑀬𑀸𑀯𑀚𑀻𑀯𑀺𑀓𑀁;

𑀲𑁂𑀲𑀓𑀸𑀮𑀺𑀓𑀲𑀫𑁆𑀫𑀺𑀲𑁆𑀲𑀁, 𑀧𑀸𑀘𑀺𑀢𑁆𑀢𑀺 𑀧𑀭𑀺𑀪𑀼𑀜𑁆𑀚𑀢𑁄.

𑁧𑁦𑁪. 𑀬𑀸𑀯𑀓𑀸𑀮𑀺𑀓𑀲𑀫𑁆𑀫𑀺𑀲𑁆𑀲𑀁, 𑀇𑀢𑀭𑀁 𑀓𑀸𑀮𑀺𑀓𑀢𑁆𑀢𑀬𑀁;

𑀧𑀝𑀺𑀕𑁆𑀕𑀳𑀺𑀢𑀁 𑀢𑀤𑀳𑀼, 𑀢𑀤𑀳𑁂𑀯 𑀘 𑀪𑀼𑀜𑁆𑀚𑀬𑁂.

𑁧𑁦𑁫. 𑀬𑀸𑀫𑀓𑀸𑀮𑀺𑀓𑀲𑀫𑁆𑀫𑀺𑀲𑁆𑀲𑀁, 𑀲𑁂𑀲𑀫𑁂𑀯𑀁 𑀯𑀺𑀚𑀸𑀦𑀺𑀬𑀁;

𑀲𑀢𑁆𑀢𑀸𑀳𑀓𑀸𑀮𑀺𑀓𑀫𑀺𑀲𑁆𑀲𑀜𑁆𑀘, 𑀲𑀢𑁆𑀢𑀸𑀳𑀁 𑀓𑀧𑁆𑀧𑀢𑁂𑀢𑀭𑀦𑁆𑀢𑀺.