𑁫𑁦. 𑀯𑀺𑀧𑀲𑁆𑀲𑀦𑀸𑀦𑀺𑀤𑁆𑀤𑁂𑀲𑁄

𑀯𑀺𑀧𑀲𑁆𑀲𑀦𑀸𑀢𑀺 𑁋

𑁪𑁭𑁧. 𑀦𑀸𑀫𑀭𑀽𑀧𑀁 𑀧𑀭𑀺𑀕𑁆𑀕𑀬𑁆𑀳, 𑀢𑀢𑁄 𑀢𑀲𑁆𑀲 𑀘 𑀧𑀘𑁆𑀘𑀬𑀁;

𑀳𑀼𑀢𑁆𑀯𑀸 𑀅𑀪𑀸𑀯𑀢𑁄𑀦𑀺𑀘𑁆𑀘𑀸, 𑀉𑀤𑀬𑀩𑁆𑀩𑀬𑀧𑀻𑀴𑀦𑀸.

𑁪𑁭𑁨. 𑀤𑀼𑀓𑁆𑀔𑀸 𑀅𑀯𑀲𑀯𑀢𑁆𑀢𑀺𑀢𑁆𑀢𑀸, 𑀅𑀦𑀢𑁆𑀢𑀸𑀢𑀺 𑀢𑀺𑀮𑀓𑁆𑀔𑀡𑀁;

𑀆𑀭𑁄𑀧𑁂𑀢𑁆𑀯𑀸𑀦 𑀲𑀗𑁆𑀔𑀸𑀭𑁂, 𑀲𑀫𑁆𑀫𑀲𑀦𑁆𑀢𑁄 𑀧𑀼𑀦𑀧𑁆𑀧𑀼𑀦𑀁;

𑀧𑀸𑀧𑀼𑀡𑁂𑀬𑁆𑀬𑀸𑀦𑀼𑀧𑀼𑀩𑁆𑀩𑁂𑀦, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑀦𑁆𑀢𑀺.

𑀦𑀺𑀕𑀫𑀦𑀓𑀣𑀸

𑁪𑁭𑁩. 𑀅𑀥𑀺𑀲𑀻𑀮𑀸𑀥𑀺𑀘𑀺𑀢𑁆𑀢𑀸𑀦𑀁, 𑀅𑀥𑀺𑀧𑀜𑁆𑀜𑀸𑀬 𑀲𑀺𑀓𑁆𑀔𑀦𑀸;

𑀪𑀺𑀓𑁆𑀔𑀼𑀓𑀺𑀘𑁆𑀘𑀫𑀢𑁄 𑀔𑀼𑀤𑁆𑀤𑀲𑀺𑀓𑁆𑀔𑀸𑀬𑀁 𑀲𑀫𑀼𑀤𑀸𑀳𑀝𑀸.

𑁪𑁭𑁪. 𑀫𑀳𑀢𑁄 𑀓𑀺𑀢𑁆𑀢𑀺𑀲𑀤𑁆𑀤𑀲𑁆𑀲, 𑀬𑀲𑁆𑀲 𑀮𑁄𑀓𑀯𑀺𑀘𑀸𑀭𑀺𑀦𑁄;

𑀧𑀭𑀺𑀲𑁆𑀲𑀫𑁄 𑀦 𑀲𑀫𑁆𑀪𑁄𑀢𑀺, 𑀫𑀸𑀮𑀼𑀢𑀲𑁆𑀲𑁂𑀯 𑀦𑀺𑀘𑁆𑀘𑀲𑁄.

𑁪𑁭𑁫. 𑀢𑁂𑀦 𑀥𑀫𑁆𑀫𑀲𑀺𑀭𑀻𑀓𑁂𑀦, 𑀢𑀫𑁆𑀩𑀧𑀡𑁆𑀡𑀺𑀬𑀓𑁂𑀢𑀼𑀦𑀸;

𑀣𑁂𑀭𑁂𑀦 𑀭𑀘𑀺𑀢𑀸 𑀥𑀫𑁆𑀫𑀯𑀺𑀦𑀬𑀜𑁆𑀜𑀼𑀧𑀲𑀁𑀲𑀺𑀢𑀸.

𑁪𑁭𑁬. 𑀏𑀢𑁆𑀢𑀸𑀯𑀢𑀸𑀬𑀁 𑀦𑀺𑀝𑁆𑀞𑀸𑀦𑀁, 𑀔𑀼𑀤𑁆𑀤𑀲𑀺𑀓𑁆𑀔𑀸 𑀉𑀧𑀸𑀕𑀢𑀸;

𑀧𑀜𑁆𑀘𑀫𑀢𑁆𑀢𑁂𑀳𑀺 𑀕𑀸𑀣𑀸𑀦𑀁, 𑀲𑀢𑁂𑀳𑀺 𑀧𑀭𑀺𑀫𑀸𑀡𑀢𑁄𑀢𑀺.

𑀔𑀼𑀤𑁆𑀤𑀲𑀺𑀓𑁆𑀔𑀸 𑀦𑀺𑀝𑁆𑀞𑀺𑀢𑀸.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲