𑁪𑁨. 𑀤𑁂𑀲𑀦𑀸𑀦𑀺𑀤𑁆𑀤𑁂𑀲𑁄

𑀤𑁂𑀲𑀦𑀸𑀢𑀺 𑁋

𑁩𑁮𑁨. 𑀘𑀸𑀕𑁄 𑀬𑁄 𑀪𑀺𑀓𑁆𑀔𑀼𑀪𑀸𑀯𑀲𑁆𑀲, 𑀲𑀸 𑀧𑀸𑀭𑀸𑀚𑀺𑀓𑀤𑁂𑀲𑀦𑀸;

𑀬𑀣𑀸𑀯𑀼𑀢𑁆𑀢𑁂𑀦 𑀯𑀼𑀝𑁆𑀞𑀸𑀦𑀁, 𑀕𑀭𑀼𑀓𑀸𑀧𑀢𑁆𑀢𑀺𑀤𑁂𑀲𑀦𑀸.

𑁩𑁮𑁩. 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸, 𑀧𑀕𑁆𑀕𑀡𑁆𑀳𑀺𑀢𑁆𑀯𑀸𑀦 𑀅𑀜𑁆𑀚𑀮𑀺𑀁;

𑀣𑀼𑀮𑁆𑀮𑀘𑁆𑀘𑀬𑀸𑀤𑀺𑀁 𑀤𑁂𑀲𑁂𑀬𑁆𑀬, 𑀏𑀯𑀫𑁂𑀓𑀲𑁆𑀲 𑀲𑀦𑁆𑀢𑀺𑀓𑁂.

𑁩𑁮𑁪. ‘‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁, 𑀢𑀁 𑀢𑀼𑀫𑁆𑀳𑀫𑀽𑀮𑁂 𑀧𑀝𑀺𑀤𑁂𑀲𑁂𑀫𑀻’’𑀢𑀺 𑀯𑀢𑁆𑀯𑀸 𑀢𑁂𑀦 ‘‘𑀧𑀲𑁆𑀲𑀲𑀺, 𑀆𑀯𑀼𑀲𑁄, 𑀢𑀁 𑀆𑀧𑀢𑁆𑀢𑀺’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀆𑀫, 𑀪𑀦𑁆𑀢𑁂, 𑀧𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀧𑀼𑀦 𑀢𑁂𑀦 ‘‘𑀆𑀬𑀢𑀺𑀁, 𑀆𑀯𑀼𑀲𑁄, 𑀲𑀁𑀯𑀭𑁂𑀬𑁆𑀬𑀸𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀼 𑀲𑀼𑀝𑁆𑀞𑀼, 𑀪𑀦𑁆𑀢𑁂, 𑀲𑀁𑀯𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁. ‘‘𑀅𑀳𑀁, 𑀪𑀦𑁆𑀢𑁂, 𑀤𑁆𑀯𑁂 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁, 𑀅𑀳𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑀸 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁, 𑀢𑀸 𑀢𑀼𑀫𑁆𑀳𑀫𑀽𑀮𑁂 𑀧𑀝𑀺𑀤𑁂𑀲𑁂𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁.

𑀦𑀺𑀲𑁆𑀲𑀕𑁆𑀕𑀺𑀬𑁂𑀲𑀼 𑀧𑀦 ‘‘𑀇𑀤𑀁 𑀫𑁂, 𑀪𑀦𑁆𑀢𑁂, 𑀘𑀻𑀯𑀭𑀁 𑀤𑀲𑀸𑀳𑀸𑀢𑀺𑀓𑁆𑀓𑀦𑁆𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀇𑀫𑀸𑀳𑀁 𑀆𑀬𑀲𑁆𑀫𑀢𑁄 𑀦𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺. ‘‘𑀇𑀫𑀸𑀦𑀺 𑀫𑁂, 𑀪𑀦𑁆𑀢𑁂, 𑀘𑀻𑀯𑀭𑀸𑀦𑀺…𑀧𑁂… 𑀏𑀢𑀁 𑀫𑁂, 𑀪𑀦𑁆𑀢𑁂, 𑀘𑀻𑀯𑀭𑀁…𑀧𑁂… 𑀏𑀢𑀸𑀦𑀺 𑀫𑁂, 𑀪𑀦𑁆𑀢𑁂, 𑀘𑀻𑀯𑀭𑀸𑀦𑀺 𑀤𑀲𑀸𑀳𑀸𑀢𑀺𑀓𑁆𑀓𑀦𑁆𑀢𑀸𑀦𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺, 𑀏𑀢𑀸𑀦𑀸𑀳𑀁 𑀆𑀬𑀲𑁆𑀫𑀢𑁄 𑀦𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺.

𑁩𑁮𑁫. 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸𑀦 𑀤𑁂𑀲𑁂𑀬𑁆𑀬, 𑀆𑀧𑀢𑁆𑀢𑀺𑀁 𑀢𑁂𑀦 𑀪𑀺𑀓𑁆𑀔𑀼𑀦𑀸;

𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀆𑀧𑀢𑁆𑀢𑀺𑀁, 𑀤𑁂𑀬𑁆𑀬𑀁 𑀦𑀺𑀲𑁆𑀲𑀝𑁆𑀞𑀘𑀻𑀯𑀭𑀁.

‘‘𑀇𑀫𑀁, 𑀇𑀫𑀸𑀦𑀺, 𑀏𑀢𑀁, 𑀏𑀢𑀸𑀦𑀺 𑀘𑀻𑀯𑀭𑀸𑀦𑀺 𑀆𑀬𑀲𑁆𑀫𑀢𑁄 𑀤𑀫𑁆𑀫𑀻’’𑀢𑀺.

𑁩𑁮𑁬. (𑀓) 𑀇𑀤𑀁 𑀫𑁂, 𑀪𑀦𑁆𑀢𑁂, 𑀘𑀻𑀯𑀭𑀁 𑀭𑀢𑁆𑀢𑀺𑀯𑀺𑀧𑁆𑀧𑀯𑀼𑀢𑁆𑀣𑀁 𑀅𑀜𑁆𑀜𑀢𑁆𑀭 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸 𑀦𑀺𑀲𑁆𑀲𑀕𑁆𑀕𑀺𑀬𑀁.

(𑀔) 𑀇𑀤𑀁 𑀫𑁂, 𑀪𑀦𑁆𑀢𑁂, 𑀅𑀓𑀸𑀮𑀘𑀻𑀯𑀭𑀁 𑀫𑀸𑀲𑀸𑀢𑀺𑀓𑁆𑀓𑀦𑁆𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀁.

(𑀕) 𑀇𑀤𑀁 𑀫𑁂, 𑀪𑀦𑁆𑀢𑁂, 𑀧𑀼𑀭𑀸𑀡𑀘𑀻𑀯𑀭𑀁 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀥𑁄𑀯𑀸𑀧𑀺𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀁.

(𑀖) 𑀇𑀤𑀁 𑀫𑁂, 𑀪𑀦𑁆𑀢𑁂, 𑀘𑀻𑀯𑀭𑀁 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀳𑀢𑁆𑀣𑀢𑁄 𑀧𑀝𑀺𑀕𑁆𑀕𑀳𑀺𑀢𑀁 𑀅𑀜𑁆𑀜𑀢𑁆𑀭 𑀧𑀸𑀭𑀺𑀯𑀢𑁆𑀢𑀓𑀸 𑀦𑀺𑀲𑁆𑀲𑀕𑁆𑀕𑀺𑀬𑀁.

(𑀗) 𑀇𑀤𑀁 𑀫𑁂, 𑀪𑀦𑁆𑀢𑁂, 𑀘𑀻𑀯𑀭𑀁 𑀅𑀜𑁆𑀜𑀸𑀢𑀓𑀁 𑀕𑀳𑀧𑀢𑀺𑀓𑀁 𑀅𑀜𑁆𑀜𑀢𑁆𑀭 𑀲𑀫𑀬𑀸 𑀯𑀺𑀜𑁆𑀜𑀸𑀧𑀺𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀁.

(𑀘) 𑀇𑀤𑀁 𑀫𑁂, 𑀪𑀦𑁆𑀢𑁂, 𑀘𑀻𑀯𑀭𑀁 𑀅𑀜𑁆𑀜𑀸𑀢𑀓𑀁 𑀕𑀳𑀧𑀢𑀺𑀓𑀁 𑀢𑀢𑀼𑀢𑁆𑀢𑀭𑀺 𑀯𑀺𑀜𑁆𑀜𑀸𑀧𑀺𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀁.

(𑀙) 𑀇𑀤𑀁 𑀫𑁂, 𑀪𑀦𑁆𑀢𑁂, 𑀘𑀻𑀯𑀭𑀁 𑀧𑀼𑀩𑁆𑀩𑁂 𑀅𑀧𑁆𑀧𑀯𑀸𑀭𑀺𑀢𑁄 𑀅𑀜𑁆𑀜𑀸𑀢𑀓𑀁 𑀕𑀳𑀧𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀺𑀓𑀧𑁆𑀧𑀁 𑀆𑀧𑀦𑁆𑀦𑀁 𑀦𑀺𑀲𑁆𑀲𑀕𑁆𑀕𑀺𑀬𑀁.

(𑀚) 𑀇𑀤𑀁 𑀫𑁂, 𑀪𑀦𑁆𑀢𑁂, 𑀘𑀻𑀯𑀭𑀁 𑀧𑀼𑀩𑁆𑀩𑁂 𑀅𑀧𑁆𑀧𑀯𑀸𑀭𑀺𑀢𑁄 𑀅𑀜𑁆𑀜𑀸𑀢𑀓𑁂 𑀕𑀳𑀧𑀢𑀺𑀓𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀺𑀓𑀧𑁆𑀧𑀁 𑀆𑀧𑀦𑁆𑀦𑀁 𑀦𑀺𑀲𑁆𑀲𑀕𑁆𑀕𑀺𑀬𑀁.

(𑀛) 𑀇𑀤𑀁 𑀫𑁂, 𑀪𑀦𑁆𑀢𑁂, 𑀘𑀻𑀯𑀭𑀁 𑀅𑀢𑀺𑀭𑁂𑀓𑀢𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑀦𑀸𑀬 𑀅𑀢𑀺𑀭𑁂𑀓𑀙𑀓𑁆𑀔𑀢𑁆𑀢𑀼𑀁 𑀞𑀸𑀦𑁂𑀦 𑀅𑀪𑀺𑀦𑀺𑀧𑁆𑀨𑀸𑀤𑀺𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀁.

(𑀜) 𑀇𑀤𑀁 𑀫𑁂, 𑀪𑀦𑁆𑀢𑁂, 𑀓𑁄𑀲𑀺𑀬𑀫𑀺𑀲𑁆𑀲𑀓𑀁 𑀲𑀦𑁆𑀣𑀢𑀁 𑀓𑀸𑀭𑀸𑀧𑀺𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀁.

(𑀝) 𑀇𑀤𑀁 𑀫𑁂, 𑀪𑀦𑁆𑀢𑁂, 𑀲𑀼𑀤𑁆𑀥𑀓𑀸𑀴𑀓𑀸𑀦𑀁 𑀏𑀴𑀓𑀮𑁄𑀫𑀸𑀦𑀁 𑀲𑀦𑁆𑀣𑀢𑀁 𑀓𑀸𑀭𑀸𑀧𑀺𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀁.

(𑀞) 𑀇𑀤𑀁 𑀫𑁂, 𑀪𑀦𑁆𑀢𑁂, 𑀲𑀦𑁆𑀣𑀢𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀢𑀼𑀮𑀁 𑀑𑀤𑀸𑀢𑀸𑀦𑀁 𑀢𑀼𑀮𑀁 𑀕𑁄𑀘𑀭𑀺𑀬𑀸𑀦𑀁 𑀓𑀸𑀭𑀸𑀧𑀺𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀁.

(𑀟) 𑀇𑀤𑀁 𑀫𑁂, 𑀪𑀦𑁆𑀢𑁂, 𑀲𑀦𑁆𑀣𑀢𑀁 𑀊𑀦𑀓𑀙𑀩𑁆𑀩𑀲𑁆𑀲𑀸𑀦𑀺 𑀓𑀸𑀭𑀸𑀧𑀺𑀢𑀁 𑀅𑀜𑁆𑀜𑀢𑁆𑀭 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸 𑀦𑀺𑀲𑁆𑀲𑀕𑁆𑀕𑀺𑀬𑀁.

(𑀠) 𑀇𑀤𑀁 𑀫𑁂, 𑀪𑀦𑁆𑀢𑁂, 𑀦𑀺𑀲𑀻𑀤𑀦𑀲𑀦𑁆𑀣𑀢𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀧𑀼𑀭𑀸𑀡𑀲𑀦𑁆𑀣𑀢𑀲𑁆𑀲 𑀲𑀸𑀫𑀦𑁆𑀢𑀸 𑀲𑀼𑀕𑀢𑀯𑀺𑀤𑀢𑁆𑀣𑀺𑀁 𑀓𑀸𑀭𑀸𑀧𑀺𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀁.

(𑀡) 𑀇𑀫𑀸𑀦𑀺 𑀫𑁂, 𑀪𑀦𑁆𑀢𑁂, 𑀏𑀴𑀓𑀮𑁄𑀫𑀸𑀦𑀺 𑀢𑀺𑀬𑁄𑀚𑀦𑀧𑀭𑀫𑀁 𑀅𑀢𑀺𑀓𑁆𑀓𑀸𑀫𑀺𑀢𑀸𑀦𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺.

(𑀢) 𑀇𑀫𑀸𑀦𑀺 𑀫𑁂, 𑀪𑀦𑁆𑀢𑁂, 𑀏𑀴𑀓𑀮𑁄𑀫𑀸𑀦𑀺 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀥𑁄𑀯𑀸𑀧𑀺𑀢𑀸𑀦𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺.

(𑀣) 𑀅𑀳𑀁, 𑀪𑀦𑁆𑀢𑁂, 𑀭𑀽𑀧𑀺𑀬𑀁 𑀧𑀝𑀺𑀕𑁆𑀕𑀳𑁂𑀲𑀺𑀁, 𑀇𑀤𑀁 𑀫𑁂, 𑀪𑀦𑁆𑀢𑁂, 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀇𑀫𑀸𑀳𑀁 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀚𑁆𑀚𑀸𑀫𑀺.

(𑀤) 𑀅𑀳𑀁, 𑀪𑀦𑁆𑀢𑁂, 𑀦𑀸𑀦𑀧𑁆𑀧𑀓𑀸𑀭𑀓𑀁 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀁 𑀲𑀫𑀸𑀧𑀚𑁆𑀚𑀺𑀁, 𑀇𑀤𑀁 𑀫𑁂, 𑀪𑀦𑁆𑀢𑁂, 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀇𑀫𑀸𑀳𑀁 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀚𑁆𑀚𑀸𑀫𑀻𑀢𑀺.

𑁩𑁮𑁭. 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸𑀦 𑀆𑀧𑀢𑁆𑀢𑀺𑀁, 𑀤𑁂𑀲𑁂𑀬𑁆𑀬𑀸𑀣 𑀕𑀺𑀳𑀺𑀁 𑀯𑀤𑁂;

‘‘𑀚𑀸𑀦𑀸𑀳𑀺𑀫’’𑀦𑁆𑀢𑀺 𑀇𑀫𑀺𑀦𑀸, 𑀲𑁄 𑀯𑀤𑁂𑀬𑁆𑀬𑀸𑀳𑀭𑀸𑀫𑀺 𑀓𑀺𑀁.

𑁩𑁮𑁮. 𑀅𑀯𑀢𑁆𑀯𑀸𑀫𑀦𑁆𑀢𑀺 𑀢𑁂𑀮𑀸𑀤𑀺𑀁, 𑀯𑀤𑁂 𑀪𑀺𑀓𑁆𑀔𑀽𑀦 𑀓𑀧𑁆𑀧𑀺𑀬𑀁;

𑀬𑀁 𑀆𑀳𑀭𑀢𑀺 𑀲𑁄 𑀢𑁂𑀦, 𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀦 𑀓𑀧𑁆𑀧𑀺𑀬𑀁.

𑁩𑁮𑁯. 𑀮𑀩𑁆𑀪𑀁 𑀞𑀧𑁂𑀢𑁆𑀯𑀸 𑀤𑁆𑀯𑁂𑀧𑁂𑀢𑁂, 𑀲𑁂𑀲𑁂𑀳𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁;

𑀢𑀢𑁄 𑀅𑀜𑁆𑀜𑁂𑀦 𑀮𑀤𑁆𑀥𑁄𑀧𑀺, 𑀪𑀸𑀕𑁄 𑀢𑁂𑀲𑀁 𑀦 𑀓𑀧𑁆𑀧𑀢𑀺.

𑁩𑁯𑁦. 𑀭𑀼𑀓𑁆𑀔𑀘𑁆𑀙𑀸𑀬𑀸𑀧𑁆𑀬𑀦𑁆𑀢𑀫𑀲𑁄, 𑀢𑀦𑁆𑀦𑀺𑀩𑁆𑀩𑀢𑁆𑀢𑀸 𑀦 𑀓𑀧𑁆𑀧𑀢𑀺;

𑀦𑀺𑀲𑁆𑀲𑀝𑁆𑀞𑀁 𑀧𑀝𑀺𑀮𑀤𑁆𑀥𑀫𑁆𑀧𑀺, 𑀆𑀤𑀺𑀢𑁄 𑀲𑀦𑁆𑀣𑀢𑀢𑁆𑀢𑀬𑀁.

𑁩𑁯𑁧. 𑀦𑁄 𑀘𑁂 𑀮𑀪𑁂𑀣 𑀏𑀯𑀁 𑀲𑁄, 𑀇𑀫𑀁 𑀙𑀟𑁆𑀟𑁂𑀳𑀺 𑀲𑀁𑀲𑀺𑀬𑁄;

𑀏𑀯𑀫𑁆𑀧𑀺 𑀪𑀺𑀓𑁆𑀔𑀼 𑀙𑀟𑁆𑀟𑁂𑀬𑁆𑀬, 𑀦𑁄 𑀘𑁂 𑀮𑀪𑁂𑀣 𑀲𑀫𑁆𑀫𑀢𑁄.

𑁩𑁯𑁨. 𑀏𑀢𑀸𑀦𑀺 𑀤𑀼𑀢𑀺𑀬𑁄 𑀧𑀢𑁆𑀢𑁄, 𑀲𑀗𑁆𑀖𑁂 𑀲𑁂𑀲𑀸𑀦𑀺 𑀮𑀩𑁆𑀪𑀭𑁂;

𑀲𑀗𑁆𑀖𑁂𑀓𑀲𑁆𑀫𑀺𑀁 𑀕𑀡𑁂 𑀯𑀢𑁆𑀢𑀼𑀁, 𑀮𑀩𑁆𑀪𑀁 𑀪𑀸𑀲𑀦𑁆𑀢𑀭𑁂𑀦𑀧𑀺.

𑁩𑁯𑁩. (𑀓) 𑀅𑀳𑀁, 𑀪𑀦𑁆𑀢𑁂, 𑀦𑀸𑀦𑀧𑁆𑀧𑀓𑀸𑀭𑀓𑀁 𑀓𑀬𑀯𑀺𑀓𑁆𑀓𑀬𑀁 𑀲𑀫𑀸𑀧𑀚𑁆𑀚𑀺𑀁, 𑀇𑀤𑀁 𑀫𑁂, 𑀪𑀦𑁆𑀢𑁂, 𑀦𑀺𑀲𑁆𑀲𑀕𑁆𑀕𑀺𑀬𑀁.

(𑀔) 𑀅𑀬𑀁 𑀫𑁂, 𑀪𑀦𑁆𑀢𑁂, 𑀧𑀢𑁆𑀢𑁄 𑀤𑀲𑀸𑀳𑀸𑀢𑀺𑀓𑁆𑀓𑀦𑁆𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑁄.

(𑀕) 𑀅𑀬𑀁 𑀫𑁂, 𑀪𑀦𑁆𑀢𑁂, 𑀧𑀢𑁆𑀢𑁄 𑀊𑀦𑀧𑀜𑁆𑀘𑀩𑀦𑁆𑀥𑀦𑁂𑀦 𑀧𑀢𑁆𑀢𑁂𑀦 𑀘𑁂𑀢𑀸𑀧𑀺𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑁄, 𑀇𑀫𑀸𑀳𑀁 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀚𑁆𑀚𑀸𑀫𑀻𑀢𑀺.

𑁩𑁯𑁪. 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸𑀦 𑀤𑁂𑀲𑁂𑀬𑁆𑀬, 𑀆𑀧𑀢𑁆𑀢𑀺𑀁 𑀧𑀢𑁆𑀢𑀕𑀸𑀳𑀓𑀁;

𑀲𑀫𑁆𑀫𑀦𑁆𑀦𑀺𑀢𑁆𑀯𑀸𑀦 𑀲𑀗𑁆𑀖𑀲𑁆𑀲, 𑀧𑀢𑁆𑀢𑀦𑁆𑀢𑀁 𑀢𑀲𑁆𑀲 𑀤𑀸𑀧𑀬𑁂.

𑁩𑁯𑁫. (𑀓) 𑀇𑀤𑀁 𑀫𑁂, 𑀪𑀦𑁆𑀢𑁂, 𑀪𑁂𑀲𑀚𑁆𑀚𑀁 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀦𑁆𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀁.

(𑀔) 𑀇𑀤𑀁 𑀫𑁂, 𑀪𑀦𑁆𑀢𑁂, 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑀁 𑀅𑀢𑀺𑀭𑁂𑀓𑀫𑀸𑀲𑁂 𑀲𑁂𑀲𑁂 𑀕𑀺𑀫𑁆𑀳𑀸𑀦𑁂 𑀧𑀭𑀺𑀬𑀺𑀝𑁆𑀞𑀁, 𑀅𑀢𑀺𑀭𑁂𑀓𑀟𑁆𑀠𑀫𑀸𑀲𑁂 𑀲𑁂𑀲𑁂 𑀕𑀺𑀫𑁆𑀳𑀸𑀦𑁂 𑀓𑀢𑁆𑀯𑀸 𑀧𑀭𑀺𑀤𑀳𑀺𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀁.

(𑀕) 𑀇𑀤𑀁 𑀫𑁂, 𑀪𑀦𑁆𑀢𑁂, 𑀘𑀻𑀯𑀭𑀁 𑀪𑀺𑀓𑁆𑀔𑀼𑀲𑁆𑀲 𑀲𑀸𑀫𑀁 𑀤𑀢𑁆𑀯𑀸 𑀅𑀘𑁆𑀙𑀺𑀦𑁆𑀦𑀁 𑀦𑀺𑀲𑁆𑀲𑀕𑁆𑀕𑀺𑀬𑀁.

(𑀖) 𑀇𑀤𑀁 𑀫𑁂, 𑀪𑀦𑁆𑀢𑁂, 𑀘𑀻𑀯𑀭𑀁 𑀲𑀸𑀫𑀁 𑀲𑀼𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀢𑀦𑁆𑀢𑀯𑀸𑀬𑁂𑀳𑀺 𑀯𑀸𑀬𑀸𑀧𑀺𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀁.

(𑀗) 𑀇𑀤𑀁 𑀫𑁂, 𑀪𑀦𑁆𑀢𑁂, 𑀘𑀻𑀯𑀭𑀁 𑀧𑀼𑀩𑁆𑀩𑁂 𑀅𑀧𑁆𑀧𑀯𑀸𑀭𑀺𑀢𑁄 𑀅𑀜𑁆𑀜𑀸𑀢𑀓𑀲𑁆𑀲 𑀕𑀳𑀧𑀢𑀺𑀓𑀲𑁆𑀲 𑀢𑀦𑁆𑀢𑀯𑀸𑀬𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀺𑀓𑀧𑁆𑀧𑀁 𑀆𑀧𑀦𑁆𑀦𑀁 𑀦𑀺𑀲𑁆𑀲𑀕𑁆𑀕𑀺𑀬𑀁.

(𑀘) 𑀇𑀤𑀁 𑀫𑁂, 𑀪𑀦𑁆𑀢𑁂, 𑀅𑀘𑁆𑀘𑁂𑀓𑀘𑀻𑀯𑀭𑀁 𑀘𑀻𑀯𑀭𑀓𑀸𑀮𑀲𑀫𑀬𑀁 𑀅𑀢𑀺𑀓𑁆𑀓𑀸𑀫𑀺𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀁.

(𑀙) 𑀇𑀤𑀁 𑀫𑁂, 𑀪𑀦𑁆𑀢𑁂, 𑀘𑀻𑀯𑀭𑀁 𑀅𑀢𑀺𑀭𑁂𑀓𑀙𑀸𑀭𑀢𑁆𑀢𑀁 𑀯𑀺𑀧𑁆𑀧𑀯𑀼𑀢𑁆𑀣𑀁 𑀅𑀜𑁆𑀜𑀢𑁆𑀭 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸 𑀦𑀺𑀲𑁆𑀲𑀕𑁆𑀕𑀺𑀬𑀁.

(𑀚) 𑀇𑀤𑀁 𑀫𑁂, 𑀪𑀦𑁆𑀢𑁂, 𑀚𑀸𑀦𑀁 𑀲𑀗𑁆𑀖𑀺𑀓𑀁 𑀮𑀸𑀪𑀁 𑀧𑀭𑀺𑀡𑀢𑀁 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑀺𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀇𑀫𑀸𑀳𑀁 𑀆𑀬𑀲𑁆𑀫𑀢𑁄 𑀦𑀺𑀲𑁆𑀲𑀚𑁆𑀚𑀸𑀫𑀻𑀢𑀺.

𑁩𑁯𑁬. 𑀲𑁂𑀲𑀁 𑀲𑀩𑁆𑀩𑀁 𑀬𑀣𑀸𑀬𑁄𑀕𑀁, 𑀆𑀤𑀺𑀫𑁆𑀳𑀺 𑀯𑀺𑀬 𑀬𑁄𑀚𑀬𑁂.

𑁩𑁯𑁭. (𑀓) 𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁. 𑀤𑁆𑀯𑁂 𑀲𑀫𑁆𑀩𑀳𑀼𑀮𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁.

(𑀔) 𑀕𑀸𑀭𑀬𑁆𑀳𑀁, 𑀪𑀦𑁆𑀢𑁂, 𑀥𑀫𑁆𑀫𑀁 𑀆𑀧𑀚𑁆𑀚𑀺𑀁 𑀅𑀲𑀧𑁆𑀧𑀸𑀬𑀁 𑀧𑀸𑀝𑀺𑀤𑁂𑀲𑀦𑀻𑀬𑀁, 𑀢𑀁 𑀧𑀝𑀺𑀤𑁂𑀲𑁂𑀫𑀻𑀢𑀺. 𑀢𑁂𑀦 ‘‘𑀧𑀲𑁆𑀲𑀲𑀺, 𑀆𑀯𑀼𑀲𑁄, 𑀢𑀁 𑀥𑀫𑁆𑀫’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁.

(𑀕) 𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁. 𑀤𑁆𑀯𑁂 𑀲𑀫𑁆𑀩𑀳𑀼𑀮𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁.

(𑀖) 𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀤𑀼𑀩𑁆𑀪𑀸𑀲𑀺𑀢𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁. 𑀤𑁆𑀯𑁂 𑀲𑀫𑁆𑀩𑀳𑀼𑀮𑀸 𑀤𑀼𑀩𑁆𑀪𑀸𑀲𑀺𑀢𑀸𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁. 𑀢𑀸 𑀢𑀼𑀫𑁆𑀳𑀫𑀽𑀮𑁂 𑀧𑀝𑀺𑀤𑁂𑀲𑁂𑀫𑀻𑀢𑀺.

(𑀗) ‘‘𑀅𑀳𑀁, 𑀪𑀦𑁆𑀢𑁂, 𑀤𑁆𑀯𑁂 𑀦𑀸𑀦𑀸𑀯𑀢𑁆𑀣𑀼𑀓𑀸 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁. 𑀲𑀫𑁆𑀩𑀳𑀼𑀮𑀸 𑀦𑀸𑀦𑀸𑀯𑀢𑁆𑀣𑀼𑀓𑀸 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁, 𑀢𑀸 𑀢𑀼𑀫𑁆𑀳𑀫𑀽𑀮𑁂 𑀧𑀝𑀺𑀤𑁂𑀲𑁂𑀫𑀻’’𑀢𑀺 𑀯𑀢𑁆𑀯𑀸 𑀢𑁂𑀦 ‘‘𑀧𑀲𑁆𑀲𑀲𑀺, 𑀆𑀯𑀼𑀲𑁄, 𑀢𑀸 𑀆𑀧𑀢𑁆𑀢𑀺𑀬𑁄’’𑀢𑀺 𑀯𑀼𑀢𑁆𑀢𑁂 ‘‘𑀆𑀫, 𑀪𑀦𑁆𑀢𑁂, 𑀧𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀧𑀼𑀦 𑀢𑁂𑀦 ‘‘𑀆𑀬𑀢𑀺𑀁, 𑀆𑀯𑀼𑀲𑁄, 𑀲𑀁𑀯𑀭𑁂𑀬𑁆𑀬𑀸𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀼 𑀲𑀼𑀝𑁆𑀞𑀼, 𑀪𑀦𑁆𑀢𑁂, 𑀲𑀁𑀯𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁.

𑁩𑁯𑁮. 𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀁, 𑀅𑀦𑀸𑀧𑀢𑁆𑀢𑀺𑀜𑁆𑀘 𑀤𑁂𑀲𑀺𑀢𑀁;

𑀦𑀸𑀦𑀸 𑀲𑀁𑀯𑀸𑀲𑀦𑀺𑀲𑁆𑀲𑀻𑀫𑀝𑁆𑀞𑀺𑀢𑀸𑀦𑀁 𑀘𑀢𑀼𑀧𑀜𑁆𑀘𑀳𑀺;

𑀫𑀦𑀲𑀸 𑀧𑀓𑀢𑀢𑁆𑀢𑀸𑀦𑀁, 𑀦𑀸𑀦𑁂𑀓𑀸𑀢𑀺 𑀦 𑀤𑁂𑀲𑀬𑁂𑀢𑀺.