𑁪𑁩. 𑀙𑀦𑁆𑀤𑀤𑀸𑀦𑀦𑀺𑀤𑁆𑀤𑁂𑀲𑁄

𑀙𑀦𑁆𑀤𑀤𑀸𑀦𑀸𑀤𑀻𑀢𑀺 𑁋

𑁩𑁯𑁯. 𑀪𑁂𑀭𑀺𑀁 𑀖𑀡𑁆𑀝𑀺𑀁 𑀧𑀢𑀸𑀴𑁂𑀢𑁆𑀯𑀸, 𑀓𑀫𑁆𑀫𑀧𑁆𑀧𑀢𑁆𑀢𑁂 𑀲𑀫𑀸𑀕𑀢𑁂;

𑀲𑀗𑁆𑀖𑁂 𑀳𑀭𑁂𑀬𑁆𑀬 𑀙𑀦𑁆𑀤𑀁 𑀯𑀸, 𑀧𑀸𑀭𑀺𑀲𑀼𑀤𑁆𑀥𑀺𑀁 𑀧𑀯𑀸𑀭𑀡𑀁.

𑁪𑁦𑁦. 𑀏𑀓𑀁 𑀪𑀺𑀓𑁆𑀔𑀼𑀁 𑀉𑀧𑀕𑁆𑀕𑀫𑁆𑀫, 𑀦𑀺𑀲𑀻𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁;

𑀅𑀜𑁆𑀚𑀮𑀺𑀁 𑀧𑀕𑁆𑀕𑀡𑁆𑀳𑀺𑀢𑁆𑀯𑀸𑀦, 𑀤𑀤𑁂 𑀙𑀦𑁆𑀤𑀁 𑀯𑀺𑀘𑀓𑁆𑀔𑀡𑁄.

𑁪𑁦𑁧. (𑀓) ‘‘𑀙𑀦𑁆𑀤𑀁 𑀤𑀫𑁆𑀫𑀺, 𑀙𑀦𑁆𑀤𑀁 𑀫𑁂 𑀳𑀭, 𑀙𑀦𑁆𑀤𑀁 𑀫𑁂 𑀆𑀭𑁄𑀘𑁂𑀳𑀻’’𑀢𑀺 𑀯𑀢𑁆𑀢𑀩𑁆𑀩𑀁.

(𑀔) 𑀧𑀸𑀭𑀺𑀲𑀼𑀤𑁆𑀥𑀺𑀁 𑀤𑁂𑀦𑁆𑀢𑁂𑀦 ‘‘𑀧𑀸𑀭𑀺𑀲𑀼𑀤𑁆𑀥𑀺𑀁 𑀤𑀫𑁆𑀫𑀺, 𑀧𑀸𑀭𑀺𑀲𑀼𑀤𑁆𑀥𑀺𑀁 𑀫𑁂 𑀳𑀭, 𑀧𑀸𑀭𑀺𑀲𑀼𑀤𑁆𑀥𑀺𑀁 𑀫𑁂 𑀆𑀭𑁄𑀘𑁂𑀳𑀻’’𑀢𑀺 𑀯𑀢𑁆𑀢𑀩𑁆𑀩𑀁.

𑁪𑁦𑁨. 𑀧𑀸𑀭𑀺𑀲𑀼𑀤𑁆𑀥𑀺𑀧𑁆𑀧𑀤𑀸𑀦𑁂𑀦, 𑀲𑀫𑁆𑀧𑀸𑀤𑁂𑀢𑀺 𑀉𑀧𑁄𑀲𑀣𑀁;

𑀲𑀗𑁆𑀖𑀲𑁆𑀲 𑀅𑀢𑁆𑀢𑀦𑁄 𑀘𑀸𑀧𑀺, 𑀲𑁂𑀲𑀓𑀫𑁆𑀫𑀁 𑀯𑀺𑀩𑀸𑀥𑀢𑀺.

𑁪𑁦𑁩. 𑀙𑀦𑁆𑀤𑀤𑀸𑀦𑁂𑀦 𑀲𑀗𑁆𑀖𑀲𑁆𑀲, 𑀤𑁆𑀯𑀬𑀁 𑀲𑀸𑀥𑁂𑀢𑀺 𑀦𑀢𑁆𑀢𑀦𑁄;

𑀢𑀲𑁆𑀫𑀸 𑀙𑀦𑁆𑀤𑀁 𑀤𑀤𑀦𑁆𑀢𑁂𑀦, 𑀤𑀸𑀢𑀩𑁆𑀩𑀸 𑀧𑀸𑀭𑀺𑀲𑀼𑀤𑁆𑀥𑀺𑀧𑀺.

𑁪𑁦𑁪. 𑀳𑀭𑁂𑀬𑁆𑀬𑁂𑀓𑁄 𑀩𑀳𑀽𑀦𑀫𑁆𑀧𑀺, 𑀧𑀭𑀫𑁆𑀧𑀭𑀸 𑀦 𑀳𑀸𑀭𑀬𑁂;

𑀧𑀭𑀫𑁆𑀧𑀭𑀸𑀳𑀝𑀸 𑀙𑀦𑁆𑀤-𑀧𑀸𑀭𑀺𑀲𑀼𑀤𑁆𑀥𑀺 𑀦 𑀕𑀘𑁆𑀙𑀢𑀺.

𑁪𑁦𑁫. 𑀲𑀩𑁆𑀩𑀽𑀧𑀘𑀸𑀭𑀁 𑀓𑀢𑁆𑀯𑀸𑀦, 𑀏𑀯𑀁 𑀤𑁂𑀬𑁆𑀬𑀸 𑀧𑀯𑀸𑀭𑀡𑀸. ‘‘𑀧𑀯𑀸𑀭𑀡𑀁 𑀤𑀫𑁆𑀫𑀺, 𑀧𑀯𑀸𑀭𑀡𑀁 𑀫𑁂 𑀳𑀭, 𑀧𑀯𑀸𑀭𑀡𑀁 𑀫𑁂 𑀆𑀭𑁄𑀘𑁂𑀳𑀺, 𑀫𑀫𑀢𑁆𑀣𑀸𑀬 𑀧𑀯𑀸𑀭𑁂𑀳𑀻’’𑀢𑀺.

𑁪𑁦𑁬. 𑀆𑀭𑁄𑀘𑁂𑀢𑁆𑀯𑀸𑀣 𑀲𑁄 𑀲𑀗𑁆𑀖𑀁, 𑀧𑀯𑀸𑀭𑁂𑀬𑁆𑀬𑁂𑀯𑀫𑀸𑀕𑀢𑁄. ‘‘𑀇𑀢𑁆𑀣𑀦𑁆𑀦𑀸𑀫𑁄, 𑀪𑀦𑁆𑀢𑁂, 𑀲𑀗𑁆𑀖𑀁 𑀧𑀯𑀸𑀭𑁂𑀢𑀺 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸, 𑀯𑀤𑀢𑀼 𑀢𑀁 𑀲𑀗𑁆𑀖𑁄 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬, 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀢𑀻’’𑀢𑀺.

𑁪𑁦𑁭. 𑀕𑀳𑁂𑀢𑁆𑀯𑀸 𑀧𑀸𑀭𑀺𑀲𑀼𑀤𑁆𑀥𑀺𑀁 𑀯𑀸, 𑀙𑀦𑁆𑀤𑀁 𑀯𑀸𑀧𑀺 𑀧𑀯𑀸𑀭𑀡𑀁;

𑀳𑀸𑀭𑀓𑁄 𑀲𑀗𑁆𑀖𑀫𑀧𑁆𑀧𑀢𑁆𑀯𑀸, 𑀯𑀺𑀩𑁆𑀪𑀫𑁂𑀬𑁆𑀬 𑀫𑀭𑁂𑀬𑁆𑀬 𑀯𑀸.

𑁪𑁦𑁮. 𑀲𑀸𑀫𑀡𑁂𑀭𑀸𑀤𑀺𑀪𑀸𑀯𑀁 𑀯𑀸,

𑀧𑀝𑀺𑀚𑀸𑀦𑁂𑀬𑁆𑀬 𑀦𑀸𑀳𑀝𑀸;

𑀧𑀢𑁆𑀯𑀸 𑀲𑀗𑁆𑀖𑀁 𑀢𑀣𑀸 𑀳𑁂𑀬𑁆𑀬,

𑀆𑀳𑀝𑀸 𑀳𑁄𑀢𑀺 𑀳𑀸𑀭𑀓𑁄.

𑁪𑁦𑁯. 𑀲𑀗𑁆𑀖𑀧𑁆𑀧𑀢𑁆𑀢𑁄 𑀧𑀫𑀢𑁆𑀢𑁄 𑀯𑀸, 𑀲𑀼𑀢𑁆𑀢𑁄 𑀦𑀸𑀭𑁄𑀘𑀬𑁂𑀬𑁆𑀬 𑀯𑀸;

𑀅𑀦𑀸𑀧𑀢𑁆𑀢𑀺𑀯 𑀲𑀜𑁆𑀘𑀺𑀘𑁆𑀘, 𑀦𑀸𑀭𑁄𑀘𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺.