𑁪𑁧. 𑀧𑀓𑀺𑀡𑁆𑀡𑀓𑀦𑀺𑀤𑁆𑀤𑁂𑀲𑁄

𑀧𑀓𑀺𑀡𑁆𑀡𑀓𑀦𑁆𑀢𑀺 𑁋

𑁩𑁩𑁫. 𑀲𑀤𑁆𑀯𑀸𑀭𑀩𑀦𑁆𑀥𑀦𑁂 𑀞𑀸𑀦𑁂, 𑀲𑁄𑀤𑀼𑀓𑁆𑀔𑀮𑀓𑀧𑀸𑀲𑀓𑁂;

𑀲𑀬𑀦𑁆𑀢𑁂𑀦 𑀤𑀺𑀯𑀸 𑀤𑁆𑀯𑀸𑀭𑀁, 𑀩𑀦𑁆𑀥𑁂𑀬𑁆𑀬 𑀧𑀭𑀺𑀯𑀝𑁆𑀝𑀓𑀁.

𑁩𑁩𑁬. 𑀲𑀦𑁆𑀢𑁂 𑀯𑀺𑀜𑁆𑀜𑀼𑀫𑁆𑀳𑀺 𑀧𑀼𑀭𑀺𑀲𑁂, 𑀆𑀪𑁄𑀕𑁄 𑀘𑀸𑀧𑀺 𑀓𑀧𑁆𑀧𑀢𑀺;

𑀲𑀯𑀲𑁂 𑀢𑀁 𑀯𑀺𑀦𑀸𑀓𑀸𑀭𑀁, 𑀲𑀬𑀦𑁆𑀢𑁄 𑀤𑀼𑀓𑁆𑀓𑀝𑀁 𑀨𑀼𑀲𑁂.

𑁩𑁩𑁭. 𑀭𑀢𑀦𑀸𑀦𑀺𑀢𑁆𑀣𑀺𑀭𑀽𑀧𑀸𑀦𑀺, 𑀥𑀜𑁆𑀜𑀫𑀺𑀢𑁆𑀣𑀺𑀧𑀲𑀸𑀥𑀦𑀁;

𑀢𑀽𑀭𑀺𑀬𑀸𑀯𑀼𑀥𑀪𑀡𑁆𑀟𑀸𑀦𑀺, 𑀆𑀫𑀲𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑁩𑁩𑁮. 𑀲𑀺𑀢𑁆𑀣𑀢𑁂𑀮𑁄𑀤𑀢𑁂𑀮𑁂𑀳𑀺, 𑀨𑀡𑀳𑀢𑁆𑀣𑀨𑀡𑁂𑀳𑀺 𑀯𑀸;

𑀓𑁄𑀘𑁆𑀙𑁂𑀦𑀯𑀸𑀧𑀺 𑀬𑁄 𑀓𑁂𑀲𑁂, 𑀑𑀲𑀡𑁆𑀞𑁂𑀬𑁆𑀬𑀲𑁆𑀲 𑀤𑀼𑀓𑁆𑀓𑀝𑀁.

𑁩𑁩𑁯. 𑀦𑁂𑀓𑀧𑀸𑀯𑀼𑀭𑀡𑀸 𑀏𑀓𑀢𑁆𑀣𑀭𑀡𑀸 𑀯𑀸 𑀢𑀼𑀯𑀝𑁆𑀝𑀬𑀼𑀁;

𑀢𑀣𑁂𑀓𑀫𑀜𑁆𑀘𑁂 𑀪𑀼𑀜𑁆𑀚𑁂𑀬𑁆𑀬𑀼𑀁, 𑀏𑀓𑀲𑁆𑀫𑀺𑀁 𑀯𑀸𑀧𑀺 𑀪𑀸𑀚𑀦𑁂.

𑁩𑁪𑁦. 𑀘𑀢𑀼𑀭𑀗𑁆𑀕𑀼𑀮𑀢𑁄 𑀊𑀦𑀫𑀥𑀺𑀓𑀝𑁆𑀞𑀗𑁆𑀕𑀼𑀮𑀁 𑀢𑀣𑀸;

𑀤𑀦𑁆𑀢𑀓𑀝𑁆𑀞𑀁 𑀦 𑀔𑀸𑀤𑁂𑀬𑁆𑀬, 𑀮𑀲𑀼𑀡𑀁 𑀦 𑀅𑀓𑀮𑁆𑀮𑀓𑁄.

𑁩𑁪𑁧. 𑀳𑀻𑀦𑀼𑀓𑁆𑀓𑀝𑁆𑀞𑁂𑀳𑀺 𑀉𑀓𑁆𑀓𑀝𑁆𑀞𑀁, 𑀳𑀻𑀦𑀁 𑀯𑀸 𑀚𑀸𑀢𑀺𑀆𑀤𑀺𑀳𑀺;

𑀉𑀚𑀼𑀁 𑀯𑀸𑀜𑁆𑀜𑀸𑀧𑀤𑁂𑀲𑁂𑀦, 𑀯𑀤𑁂 𑀤𑀼𑀩𑁆𑀪𑀸𑀲𑀺𑀢𑀁 𑀤𑀯𑀸.

𑁩𑁪𑁨. 𑀤𑀻𑀖𑁂 𑀦𑀔𑁂 𑀘 𑀓𑁂𑀲𑁂 𑀘, 𑀦𑀸𑀲𑀮𑁄𑀫𑁂 𑀦 𑀥𑀸𑀭𑀬𑁂;

𑀦 𑀮𑀩𑁆𑀪𑀁 𑀯𑀻𑀲𑀢𑀺𑀫𑀝𑁆𑀞𑀁, 𑀲𑀫𑁆𑀩𑀸𑀥𑁂 𑀮𑁄𑀫𑀳𑀸𑀭𑀡𑀁.

𑁩𑁪𑁩. 𑀬𑀣𑀸𑀯𑀼𑀟𑁆𑀠𑀁 𑀦 𑀩𑀸𑀥𑁂𑀬𑁆𑀬, 𑀲𑀗𑁆𑀖𑀼𑀤𑁆𑀤𑀺𑀝𑁆𑀞𑀁𑀯 𑀲𑀗𑁆𑀖𑀺𑀓𑀁;

𑀅𑀥𑁄𑀢𑀅𑀮𑁆𑀮𑀧𑀸𑀤𑁂𑀳𑀺, 𑀦𑀓𑁆𑀓𑀫𑁂 𑀲𑀬𑀦𑀸𑀲𑀦𑀁;

𑀲𑀼𑀥𑁄𑀢𑀧𑀸𑀤𑀓𑀁 𑀯𑀸𑀧𑀺, 𑀢𑀣𑁂𑀯 𑀲𑀉𑀧𑀸𑀳𑀦𑁄.

𑁩𑁪𑁪. 𑀲𑀗𑁆𑀖𑀸𑀝𑀺𑀬𑀸 𑀦 𑀧𑀮𑁆𑀮𑀢𑁆𑀣𑁂, 𑀪𑀺𑀢𑁆𑀢𑀸𑀤𑀺𑀁 𑀦 𑀅𑀧𑀲𑁆𑀲𑀬𑁂;

𑀧𑀭𑀺𑀓𑀫𑁆𑀫𑀓𑀢𑀁 𑀲𑀦𑁆𑀢𑁂, 𑀉𑀤𑀓𑁂 𑀦𑁄 𑀦 𑀆𑀘𑀫𑁂.

𑁩𑁪𑁫. 𑀅𑀓𑀧𑁆𑀧𑀺𑀬𑀲𑀫𑀸𑀤𑀸𑀦𑁂, 𑀤𑀯𑀸 𑀲𑀺𑀮𑀸𑀧𑀯𑀺𑀚𑁆𑀛𑀦𑁂;

𑀤𑁂𑀲𑀦𑀸𑀬 𑀲𑀪𑀸𑀕𑀸𑀬, 𑀆𑀯𑀺𑀓𑀫𑁆𑀫𑁂 𑀘 𑀤𑀼𑀓𑁆𑀓𑀝𑀁.

𑁩𑁪𑁬. 𑀧𑀝𑀺𑀲𑁆𑀲𑀯𑀯𑀺𑀲𑀁𑀯𑀸𑀤𑁂, 𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲 𑀤𑀼𑀓𑁆𑀓𑀝𑀁;

𑀧𑀝𑀺𑀲𑁆𑀲𑀯𑀓𑁆𑀔𑀡𑁂 𑀏𑀯, 𑀧𑀸𑀘𑀺𑀢𑁆𑀢𑀺 𑀇𑀢𑀭𑀲𑁆𑀲 𑀢𑀼.

𑁩𑁪𑁭. 𑀦 𑀭𑀼𑀓𑁆𑀔𑀫𑀪𑀺𑀭𑀽𑀳𑁂𑀬𑁆𑀬, 𑀲𑀢𑀺 𑀓𑀺𑀘𑁆𑀘𑁂𑀯 𑀧𑁄𑀭𑀺𑀲𑀁;

𑀆𑀧𑀤𑀸𑀲𑀼 𑀬𑀣𑀸𑀓𑀸𑀫𑀁, 𑀓𑀧𑁆𑀧𑀢𑀻 𑀅𑀪𑀺𑀭𑀽𑀳𑀺𑀢𑀼𑀁.

𑁩𑁪𑁮. 𑀯𑀺𑀦𑀸𑀤𑁆𑀥𑀸𑀦𑀁 𑀯𑀚𑀦𑁆𑀢𑀲𑁆𑀲, 𑀤𑀼𑀓𑁆𑀓𑀝𑀁 𑀧𑀭𑀺𑀲𑀸𑀯𑀦𑀁;

𑀬𑀸𑀘𑀫𑀸𑀦𑀲𑁆𑀲 𑀅𑀤𑁆𑀥𑀸𑀦𑁂, 𑀅𑀤𑀤𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑁩𑁪𑁯. 𑀣𑀼𑀮𑁆𑀮𑀘𑁆𑀘𑀬𑀁 𑀨𑀼𑀲𑁂 𑀅𑀗𑁆𑀕𑀚𑀸𑀢𑀘𑁆𑀙𑁂𑀤𑁂𑀦 𑀤𑀼𑀓𑁆𑀓𑀝𑀁;

𑀆𑀩𑀸𑀥𑀧𑁆𑀧𑀘𑁆𑀘𑀬𑀸𑀜𑁆𑀜𑀢𑁆𑀭, 𑀲𑁂𑀲𑀗𑁆𑀕𑁂 𑀅𑀢𑁆𑀢𑀖𑀸𑀢𑀦𑁂.

𑁩𑁫𑁦. 𑀘𑀺𑀢𑁆𑀢𑀧𑁄𑀢𑁆𑀣𑀓𑀭𑀽𑀧𑀸𑀦𑀺, 𑀦 𑀓𑀭𑁂 𑀦 𑀘 𑀓𑀸𑀭𑀬𑁂;

𑀦 𑀯𑀼𑀝𑁆𑀞𑀸𑀧𑁂𑀬𑁆𑀬 𑀪𑀼𑀜𑁆𑀚𑀦𑁆𑀢𑀁, 𑀆𑀭𑀸𑀫𑀸𑀭𑀜𑁆𑀜𑀕𑁂𑀳𑀲𑀼.

𑁩𑁫𑁧. 𑀬𑀸𑀦𑀸𑀦𑀺 𑀧𑀼𑀫𑀬𑀼𑀢𑁆𑀢𑀸𑀦𑀺, 𑀲𑀺𑀯𑀺𑀓𑀁 𑀳𑀢𑁆𑀣𑀯𑀝𑁆𑀝𑀓𑀁;

𑀧𑀸𑀝𑀗𑁆𑀓𑀺𑀜𑁆𑀘 𑀕𑀺𑀮𑀸𑀦𑀲𑁆𑀲, 𑀓𑀧𑁆𑀧𑀢𑀻 𑀅𑀪𑀺𑀭𑀽𑀳𑀺𑀢𑀼𑀁.

𑁩𑁫𑁨. 𑀩𑀼𑀤𑁆𑀥𑀁 𑀥𑀫𑁆𑀫𑀜𑁆𑀘 𑀲𑀗𑁆𑀖𑀜𑁆𑀘, 𑀆𑀭𑀩𑁆𑀪 𑀓𑀭𑀡𑁂 𑀤𑀯𑀁;

𑀤𑀼𑀓𑁆𑀓𑀝𑀁 𑀧𑀭𑀺𑀲𑀁 𑀯𑀸𑀧𑀺, 𑀅𑀜𑁆𑀜𑀲𑁆𑀲 𑀉𑀧𑀮𑀸𑀴𑀦𑁂.

𑁩𑁫𑁩. 𑀓𑀸𑀬𑀁 𑀊𑀭𑀼𑀁 𑀦𑀺𑀫𑀺𑀢𑁆𑀢𑀁 𑀯𑀸, 𑀪𑀺𑀓𑁆𑀔𑀼𑀦𑀻𑀦𑀁 𑀦 𑀤𑀲𑁆𑀲𑀬𑁂;

𑀯𑀺𑀯𑀭𑀺𑀢𑁆𑀯𑀸 𑀦 𑀲𑀺𑀜𑁆𑀘𑁂𑀬𑁆𑀬, 𑀢𑀸 𑀓𑀤𑁆𑀤𑀫𑀼𑀤𑀓𑀸𑀤𑀺𑀦𑀸.

𑁩𑁫𑁪. 𑀦 𑀕𑀡𑁆𑀳𑀢𑁄 𑀘 𑀑𑀯𑀸𑀤𑀁, 𑀦 𑀧𑀘𑁆𑀘𑀸𑀳𑀭𑀢𑁄𑀧𑀺 𑀘;

𑀩𑀸𑀮𑀁 𑀕𑀺𑀮𑀸𑀦𑀁 𑀕𑀫𑀺𑀬𑀁, 𑀯𑀚𑁆𑀚𑀬𑀺𑀢𑁆𑀯𑀸𑀦 𑀤𑀼𑀓𑁆𑀓𑀝𑀁.

𑁩𑁫𑁫. 𑀮𑁄𑀓𑀸𑀬𑀢𑀁 𑀦 𑀯𑀸𑀘𑁂𑀬𑁆𑀬, 𑀧𑀮𑀺𑀢𑀁 𑀦 𑀘 𑀕𑀸𑀳𑀬𑁂;

𑀧𑁂𑀴𑀸𑀬𑀧𑀺 𑀦 𑀪𑀼𑀜𑁆𑀚𑁂𑀬𑁆𑀬, 𑀦 𑀓𑀻𑀴𑁂 𑀓𑀺𑀜𑁆𑀘𑀺 𑀓𑀻𑀴𑀺𑀢𑀁.

𑁩𑁫𑁬. 𑀧𑀸𑀭𑀼𑀧𑁂 𑀦 𑀦𑀺𑀯𑀸𑀲𑁂𑀬𑁆𑀬, 𑀕𑀺𑀳𑀺𑀧𑀸𑀭𑀼𑀢𑀦𑀺𑀯𑀸𑀲𑀦𑀁;

𑀲𑀁𑀯𑁂𑀮𑁆𑀮𑀺𑀬𑀁 𑀦𑀺𑀯𑀸𑀲𑁂𑀬𑁆𑀬, 𑀤𑀸𑀬𑀁 𑀦𑀸𑀮𑀺𑀫𑁆𑀧𑀬𑁂𑀬𑁆𑀬 𑀯𑀸.

𑁩𑁫𑁭. 𑀯𑀟𑁆𑀠𑀺𑀁 𑀧𑀬𑁄𑀚𑀬𑁂 𑀬𑀸𑀘𑁂, 𑀦𑁄𑀜𑁆𑀜𑀸𑀢𑀓𑀧𑁆𑀧𑀯𑀸𑀭𑀺𑀢𑁂;

𑀅𑀢𑁆𑀢𑀦𑁄 𑀧𑀭𑀺𑀪𑁄𑀕𑀢𑁆𑀣𑀁, 𑀤𑀺𑀦𑁆𑀦𑀫𑀜𑁆𑀜𑀲𑁆𑀲 𑀦𑁄 𑀤𑀤𑁂;

𑀅𑀕𑁆𑀕𑀁 𑀕𑀳𑁂𑀢𑁆𑀯𑀸 𑀪𑀼𑀢𑁆𑀯𑀸 𑀯𑀸, 𑀓𑀢𑀺𑀧𑀸𑀳𑀁 𑀧𑀼𑀦𑁄 𑀤𑀤𑁂.

𑁩𑁫𑁮. 𑀉𑀤𑁆𑀤𑀺𑀲𑁆𑀲 𑀬𑀸𑀘𑀦𑁂 𑀭𑀓𑁆𑀔𑀁, 𑀜𑀢𑁆𑀯𑀸𑀜𑀢𑁆𑀯𑀸 𑀯 𑀤𑀡𑁆𑀟𑀺𑀦𑀁;

𑀕𑀻𑀯𑀸𑀲𑁆𑀲 𑀤𑀡𑁆𑀟𑀺𑀢𑁂 𑀤𑀡𑁆𑀟𑁄, 𑀲𑀬𑀁 𑀤𑀡𑁆𑀟𑀸𑀧𑀦𑁂 𑀧𑀦;

𑀤𑀡𑁆𑀟𑀲𑁆𑀲 𑀅𑀕𑁆𑀖𑀪𑁂𑀤𑁂𑀦, 𑀜𑁂𑀬𑁆𑀬𑀸 𑀧𑀸𑀭𑀸𑀚𑀺𑀓𑀸𑀤𑀺𑀓𑀸.

𑁩𑁫𑁯. 𑀳𑀭𑀦𑁆𑀢𑁂𑀲𑀼 𑀧𑀭𑀺𑀓𑁆𑀔𑀸𑀭𑀁, ‘‘𑀘𑁄𑀭𑁄 𑀘𑁄𑀭𑁄’’𑀢𑀺 𑀪𑀸𑀲𑀺𑀢𑁂;

𑀅𑀦𑀢𑁆𑀣𑀸𑀬𑁂𑀲𑀁 𑀕𑀡𑁆𑀳𑀦𑁆𑀢𑁂, 𑀤𑀡𑁆𑀟𑀁 𑀕𑀻𑀯𑀸𑀲𑁆𑀲 𑀢𑀢𑁆𑀢𑀓𑀁.

𑁩𑁬𑁦. 𑀯𑀺𑀖𑀸𑀲𑀼𑀘𑁆𑀘𑀸𑀭𑀲𑀗𑁆𑀓𑀸𑀭-𑀫𑀼𑀢𑁆𑀢𑀁 𑀙𑀟𑁆𑀟𑁂𑀬𑁆𑀬 𑀤𑀼𑀓𑁆𑀓𑀝𑀁;

𑀩𑀳𑀺 𑀧𑀸𑀓𑀸𑀭𑀓𑀼𑀝𑁆𑀝𑀸𑀦𑀁, 𑀯𑀴𑀜𑁆𑀚𑁂 𑀦𑀸𑀯𑀮𑁄𑀓𑀺𑀬;

𑀳𑀭𑀺𑀢𑁂 𑀯𑀸𑀧𑀺 𑀯𑀻𑀳𑀸𑀤𑀺-𑀦𑀸𑀴𑀺𑀓𑁂𑀭𑀸𑀤𑀺𑀭𑁄𑀧𑀺𑀫𑁂.

𑁩𑁬𑁧. 𑀬𑁄𑀚𑀸𑀧𑁂𑀢𑀼𑀁 𑀧𑀬𑁄𑀚𑁂𑀢𑀼𑀁, 𑀧𑀬𑀼𑀢𑁆𑀢𑀸𑀦𑀺 𑀘 𑀧𑀲𑁆𑀲𑀺𑀢𑀼𑀁;

𑀦 𑀮𑀩𑁆𑀪𑀁 𑀥𑀫𑁆𑀫𑀬𑀼𑀢𑁆𑀢𑀫𑁆𑀧𑀺, 𑀦𑀘𑁆𑀘𑀁 𑀕𑀻𑀢𑀜𑁆𑀘 𑀯𑀸𑀤𑀺𑀢𑀁;

‘‘𑀉𑀧𑀳𑀸𑀭𑀁 𑀓𑀭𑁄𑀫𑀸’’𑀢𑀺, 𑀯𑀼𑀢𑁆𑀢𑁂 𑀯𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁.

𑁩𑁬𑁨. 𑀭𑀸𑀚𑀸𑀕𑀸𑀭𑀁 𑀧𑁄𑀓𑁆𑀔𑀭𑀡𑀺𑀁, 𑀉𑀬𑁆𑀬𑀸𑀦𑀁 𑀘𑀺𑀢𑁆𑀢𑀕𑀸𑀭𑀓𑀁;

𑀓𑀻𑀴𑀢𑁆𑀣𑀁 𑀕𑀘𑁆𑀙𑀢𑁄 𑀤𑀝𑁆𑀞𑀼𑀁, 𑀆𑀭𑀸𑀫𑀁 𑀤𑀼𑀓𑁆𑀓𑀝𑀁 𑀓𑀢𑀁.

𑁩𑁬𑁩. 𑀦𑀯𑁂 𑀦 𑀧𑀝𑀺𑀩𑀸𑀳𑁂𑀬𑁆𑀬𑀸-𑀲𑀦𑁂𑀦𑀼𑀡𑁆𑀳𑁂 𑀦 𑀘𑀻𑀯𑀭𑀁;

𑀦𑀺𑀤𑀳𑁂𑀬𑁆𑀬 𑀔𑀫𑀸𑀧𑁂𑀬𑁆𑀬, 𑀕𑀭𑀼𑀦𑀸 𑀘 𑀧𑀡𑀸𑀫𑀺𑀢𑁄.

𑁩𑁬𑁪. 𑀅𑀓𑁆𑀓𑁄𑀲𑀦𑁂 𑀧𑀭𑀫𑁆𑀫𑀼𑀔𑀸, 𑀆𑀧𑀢𑁆𑀢𑀻𑀳𑀺 𑀘 𑀲𑀢𑁆𑀢𑀳𑀺;

𑀪𑀺𑀓𑁆𑀔𑀼𑀁 𑀉𑀧𑀸𑀲𑀓𑀁 𑀯𑀸𑀧𑀺, 𑀅𑀜𑁆𑀜𑁂𑀦𑁂𑀯 𑀘 𑀤𑀼𑀓𑁆𑀓𑀝𑀁.

𑁩𑁬𑁫. 𑀦 𑀮𑀩𑁆𑀪𑀁 𑀯𑀺𑀦𑀺𑀧𑀸𑀢𑁂𑀢𑀼𑀁, 𑀲𑀤𑁆𑀥𑀸𑀤𑁂𑀬𑁆𑀬𑀜𑁆𑀘 𑀘𑀻𑀯𑀭𑀁;

𑀮𑀩𑁆𑀪𑀁 𑀧𑀺𑀢𑀽𑀦𑀁 𑀲𑁂𑀲𑀸𑀦𑀁, 𑀜𑀸𑀢𑀻𑀦𑀫𑁆𑀧𑀺 𑀦 𑀮𑀩𑁆𑀪𑀢𑀺.

𑁩𑁬𑁬. 𑀯𑀲𑁆𑀲𑀁𑀯𑀼𑀢𑁆𑀣𑁄𑀜𑁆𑀜𑀢𑁄𑀜𑁆𑀜𑀢𑁆𑀭, 𑀪𑀸𑀕𑀁 𑀕𑀡𑁆𑀳𑁂𑀬𑁆𑀬 𑀤𑀼𑀓𑁆𑀓𑀝𑀁;

𑀧𑀝𑀺𑀤𑁂𑀬𑁆𑀬 𑀦𑀝𑁆𑀞𑁂 𑀚𑀺𑀡𑁆𑀡𑁂, 𑀕𑀻𑀯𑀸 𑀦𑁄 𑀤𑁂𑀬𑁆𑀬 𑀘𑁄𑀤𑀺𑀢𑁄;

𑀥𑀼𑀭𑀦𑀺𑀓𑁆𑀔𑁂𑀧𑀢𑁄 𑀢𑁂𑀲𑀁, 𑀳𑁄𑀢𑀺 𑀪𑀡𑁆𑀟𑀕𑁆𑀖𑀓𑀸𑀭𑀺𑀬𑁄.

𑁩𑁬𑁭. 𑀦 𑀲𑀦𑁆𑀢𑀭𑀼𑀢𑁆𑀢𑀭𑁄 𑀕𑀸𑀫𑀁, 𑀓𑀮𑁆𑀮𑁄 𑀯𑀸 𑀲𑀉𑀧𑀸𑀳𑀦𑁄;

𑀧𑀯𑀺𑀲𑁂𑀬𑁆𑀬 𑀦 𑀥𑀸𑀭𑁂𑀬𑁆𑀬, 𑀘𑀸𑀫𑀭𑀻𑀫𑀓𑀲𑀩𑀻𑀚𑀦𑀺𑀁.

𑁩𑁬𑁮. 𑀅𑀕𑀺𑀮𑀸𑀦𑁄 𑀦 𑀙𑀺𑀦𑁆𑀤𑁂𑀬𑁆𑀬, 𑀓𑁂𑀲𑁂 𑀓𑀢𑁆𑀢𑀭𑀺𑀬𑀸 𑀩𑀳𑀺;

𑀆𑀭𑀸𑀫𑀢𑁄 𑀦 𑀥𑀸𑀭𑁂𑀬𑁆𑀬, 𑀙𑀢𑁆𑀢𑀁 𑀮𑀩𑁆𑀪𑀢𑀺 𑀕𑀼𑀢𑁆𑀢𑀺𑀬𑀸.

𑁩𑁬𑁯. 𑀕𑀸𑀳𑁂𑀬𑁆𑀬 𑀦𑀼𑀪𑀢𑁄𑀓𑀸𑀚𑀁, 𑀏𑀓𑀦𑁆𑀢𑀭𑀺𑀓𑀓𑀸𑀚𑀓𑀁;

𑀲𑀻𑀲𑀓𑁆𑀔𑀦𑁆𑀥𑀓𑀝𑀺𑀪𑀸𑀭𑀸, 𑀳𑀢𑁆𑀣𑁄𑀮𑀫𑁆𑀩𑁄 𑀘 𑀮𑀩𑁆𑀪𑀢𑀺.

𑁩𑁭𑁦. 𑀆𑀧𑀢𑁆𑀢𑀺𑀬𑀸 𑀅𑀦𑁄𑀓𑀸𑀲-𑀓𑀢𑀁 𑀘𑁄𑀤𑁂𑀬𑁆𑀬 𑀤𑀼𑀓𑁆𑀓𑀝𑀁;

𑀲𑀼𑀤𑁆𑀥𑀲𑁆𑀲 𑀘 𑀅𑀯𑀢𑁆𑀣𑀼𑀲𑁆𑀫𑀺𑀁, 𑀢𑀣𑀸 𑀑𑀓𑀸𑀲𑀓𑀸𑀭𑀡𑁂.

𑁩𑁭𑁧. 𑀅𑀝𑁆𑀞𑀗𑁆𑀕𑀼𑀮𑀸𑀥𑀺𑀓𑀁 𑀫𑀜𑁆𑀘𑀧𑀝𑀺𑀧𑀸𑀤𑀁 𑀦 𑀥𑀸𑀭𑀬𑁂;

𑀧𑀓𑀢𑀗𑁆𑀕𑀼𑀮𑁂𑀦 𑀲𑀢𑁆𑀢𑀸𑀦𑀁, 𑀫𑀜𑁆𑀘𑀁 𑀯𑀸 𑀉𑀘𑁆𑀘𑀧𑀸𑀤𑀓𑀁.

𑁩𑁭𑁨. 𑀫𑀽𑀕𑀩𑁆𑀩𑀢𑀸𑀤𑀺𑀁 𑀕𑀡𑁆𑀳𑁂𑀬𑁆𑀬, 𑀤𑀼𑀓𑁆𑀓𑀝𑀁 𑀢𑀺𑀢𑁆𑀣𑀺𑀬𑀩𑁆𑀩𑀢𑀁;

𑀔𑀼𑀭𑀪𑀡𑁆𑀟𑀁 𑀧𑀭𑀺𑀳𑀭𑁂, 𑀢𑀣𑀸 𑀦𑁆𑀳𑀸𑀧𑀺𑀢𑀧𑀼𑀩𑁆𑀩𑀓𑁄.

𑁩𑁭𑁩. 𑀬𑀁 𑀓𑀺𑀜𑁆𑀘𑀺 𑀬𑀸𑀘𑀺𑀢𑀼𑀁 𑀳𑀢𑁆𑀣𑀓𑀫𑁆𑀫𑀁 𑀢𑀤𑀦𑀼𑀲𑀸𑀭𑀢𑁄;

𑀮𑀤𑁆𑀥𑀁 𑀕𑀳𑁂𑀢𑀼𑀁 𑀦𑀺𑀓𑁆𑀓𑀫𑁆𑀫𑀫𑀬𑀸𑀘𑀺𑀢𑁆𑀯𑀸𑀧𑀺 𑀓𑀧𑁆𑀧𑀢𑀺;

𑀓𑀸𑀭𑁂𑀢𑀼𑀫𑀸𑀳𑀭𑀸𑀧𑁂𑀢𑀼𑀁, 𑀬𑀁 𑀓𑀺𑀜𑁆𑀘𑀺𑀧𑀭𑀲𑀦𑁆𑀢𑀓𑀁.

𑁩𑁭𑁪. 𑀕𑀺𑀳𑀻𑀦𑀁 𑀕𑁄𑀧𑀓𑁂 𑀤𑁂𑀦𑁆𑀢𑁂, 𑀕𑀳𑁂𑀢𑀼𑀁 𑀤𑁂𑀢𑀺 𑀬𑀢𑁆𑀢𑀓𑀁;

𑀮𑀩𑁆𑀪𑀁 𑀬𑀣𑀸𑀧𑀭𑀺𑀘𑁆𑀙𑁂𑀤𑀁, 𑀲𑀗𑁆𑀖𑀘𑁂𑀢𑀺𑀬𑀲𑀦𑁆𑀢𑀓𑁂.

𑁩𑁭𑁫. 𑀤𑁆𑀯𑀻𑀳𑀸𑀧𑀚𑁆𑀚𑁂𑀬𑁆𑀬 𑀆𑀧𑀢𑁆𑀢𑀺𑀁, 𑀓𑀸𑀬𑀯𑀸𑀘𑀸𑀳𑀺 𑀯𑀸 𑀙𑀳𑀺;

𑀅𑀮𑀚𑁆𑀚𑀺𑀜𑁆𑀜𑀸𑀡𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀢𑁆𑀢𑀸 𑀲𑀢𑀺𑀧𑁆𑀮𑀯𑀸;

𑀅𑀓𑀧𑁆𑀧𑀺𑀬𑁂 𑀯𑀸 𑀓𑀧𑁆𑀧𑀺𑀬𑁂, 𑀓𑀧𑁆𑀧𑀸𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸.

𑁩𑁭𑁬. 𑀅𑀮𑀚𑁆𑀚𑀺𑀜𑁆𑀜𑀸𑀡𑀢𑀸𑀧𑀢𑁆𑀢𑀺𑀁, 𑀓𑀸𑀬𑀯𑀸𑀘𑀸𑀳𑀺 𑀙𑀸𑀤𑀬𑁂;

𑀮𑀺𑀗𑁆𑀕𑁂 𑀲𑀗𑁆𑀖𑁂 𑀕𑀡𑁂𑀓𑀲𑁆𑀫𑀺𑀁, 𑀘𑀢𑀼𑀥𑀸𑀧𑀢𑁆𑀢𑀺𑀯𑀼𑀝𑁆𑀞𑀺𑀢𑀺.

𑁩𑁭𑁭. 𑀧𑀭𑀺𑀓𑀣𑁄𑀪𑀸𑀲𑀯𑀺𑀜𑁆𑀜𑀢𑁆𑀢𑀺, 𑀦 𑀮𑀩𑁆𑀪𑀸 𑀧𑀘𑁆𑀘𑀬𑀤𑁆𑀯𑀬𑁂;

𑀯𑀺𑀜𑁆𑀜𑀢𑁆𑀢𑀺𑀬𑁂𑀯 𑀢𑀢𑀺𑀬𑁂, 𑀲𑁂𑀲𑁂 𑀲𑀩𑁆𑀩𑀫𑁆𑀧𑀺 𑀮𑀩𑁆𑀪𑀢𑀺.

𑁩𑁭𑁮. 𑀦 𑀭𑀽𑀳𑀢𑀘𑁆𑀘𑀬𑁂 𑀤𑀸𑀦𑀁, 𑀧𑀜𑁆𑀘𑀦𑁆𑀦𑀁 𑀲𑀳𑀥𑀫𑁆𑀫𑀺𑀦𑀁;

𑀲𑀗𑁆𑀖𑀲𑁆𑀲𑁂𑀯 𑀘 𑀢𑀁 𑀳𑁄𑀢𑀺, 𑀕𑀺𑀳𑀻𑀦𑀁 𑀧𑀦 𑀭𑀽𑀳𑀢𑀺.

𑁩𑁭𑁯. 𑀪𑀺𑀓𑁆𑀔𑀼 𑀯𑀸 𑀲𑀸𑀫𑀡𑁂𑀭𑁄 𑀯𑀸, 𑀓𑀸𑀮𑀁 𑀓𑀬𑀺𑀭𑀸𑀣𑀽𑀧𑀲𑁆𑀲𑀬𑁂;

𑀪𑀺𑀓𑁆𑀔𑀼𑀲𑀗𑁆𑀖𑁄𑀯 𑀤𑀸𑀬𑀚𑁆𑀚𑁄, 𑀢𑀢𑁆𑀣 𑀲𑁂𑀲𑁂𑀧𑁆𑀬𑀬𑀁𑀦𑀬𑁄.

𑁩𑁮𑁦. 𑀧𑀼𑀭𑀺𑀫𑀲𑁆𑀲𑁂𑀯𑀺𑀫𑀁 𑀤𑀺𑀦𑁆𑀦𑀁, 𑀤𑁂𑀳𑀺 𑀦𑁂𑀢𑁆𑀯𑀸𑀲𑀼𑀓𑀲𑁆𑀲𑀢𑀺;

𑀧𑀘𑁆𑀙𑀺𑀫𑀲𑁆𑀲𑁂𑀯 𑀤𑀫𑁆𑀫𑀻𑀢𑀺, 𑀤𑀺𑀦𑁆𑀦𑀁 𑀜𑀢𑁆𑀯𑀸 𑀇𑀫𑀁 𑀯𑀺𑀥𑀺𑀁;

𑀕𑀡𑁆𑀳𑁂 𑀯𑀺𑀲𑁆𑀲𑀸𑀲𑀕𑀸𑀳𑀁 𑀯𑀸𑀥𑀺𑀝𑁆𑀞𑁂 𑀫𑀢𑀓𑀘𑀻𑀯𑀭𑀁.

𑁩𑁮𑁧. 𑀮𑁄𑀳𑀪𑀡𑁆𑀟𑁂 𑀧𑀳𑀭𑀡𑀺𑀁, 𑀤𑀸𑀭𑀼𑀪𑀡𑁆𑀟𑁂 𑀘 𑀤𑀸𑀭𑀼𑀚𑀁;

𑀧𑀢𑁆𑀢𑀁 𑀧𑀸𑀤𑀼𑀓𑀧𑀮𑁆𑀮𑀗𑁆𑀓𑀁, 𑀆𑀲𑀦𑁆𑀤𑀺𑀁 𑀫𑀢𑁆𑀢𑀺𑀓𑀸𑀫𑀬𑁂;

𑀞𑀧𑁂𑀢𑁆𑀯𑀸 𑀓𑀧𑁆𑀧𑀢𑀺 𑀲𑀩𑁆𑀩𑀁, 𑀓𑀢𑀓𑀁 𑀓𑀼𑀫𑁆𑀪𑀓𑀸𑀭𑀺𑀓𑀦𑁆𑀢𑀺.