𑁩𑁧. 𑀯𑀺𑀓𑀧𑁆𑀧𑀦𑀸𑀦𑀺𑀤𑁆𑀤𑁂𑀲𑁄

𑀯𑀺𑀓𑀧𑁆𑀧𑀦𑀸 𑀘𑁂𑀯𑀸𑀢𑀺 𑁋

𑁨𑁨𑁧. 𑀲𑀫𑁆𑀫𑀼𑀔𑀸 𑀧𑀭𑀫𑁆𑀫𑀼𑀔𑀸𑀢𑀺, 𑀤𑀼𑀯𑁂 𑀯𑀼𑀢𑁆𑀢𑀸 𑀯𑀺𑀓𑀧𑁆𑀧𑀦𑀸;

𑀲𑀫𑁆𑀫𑀼𑀔𑀸𑀬 𑀯𑀺𑀓𑀧𑁆𑀧𑁂𑀦𑁆𑀢𑁄, 𑀩𑁆𑀬𑀢𑁆𑀢𑀲𑁆𑀲𑁂𑀓𑀲𑁆𑀲 𑀲𑀦𑁆𑀢𑀺𑀓𑁂;

‘‘𑀇𑀫𑀁 𑀘𑀻𑀯𑀭𑀁 𑀢𑀼𑀬𑁆𑀳𑀁, 𑀯𑀺𑀓𑀧𑁆𑀧𑁂𑀫𑀻’’𑀢𑀺 𑀪𑀸𑀲𑀬𑁂.

𑁨𑁨𑁨. 𑀏𑀢𑁆𑀢𑀸𑀯𑀢𑀸 𑀦𑀺𑀥𑁂𑀢𑀼𑀁𑀯, 𑀓𑀧𑁆𑀧𑀢𑀻 𑀦 𑀘 𑀓𑀧𑁆𑀧𑀢𑀺;

𑀧𑀭𑀺𑀪𑁄𑀕𑀸𑀤𑀺𑀓𑀁 𑀢𑁂𑀦, 𑀅𑀧𑁆𑀧𑀘𑁆𑀘𑀼𑀤𑁆𑀥𑀝𑀪𑀸𑀯𑀢𑁄.

𑁨𑁨𑁩. ‘‘𑀫𑀬𑁆𑀳𑀁 𑀲𑀦𑁆𑀢𑀓𑀁 𑀧𑀭𑀺𑀪𑀼𑀜𑁆𑀚 𑀯𑀸 𑀯𑀺𑀲𑁆𑀲𑀚𑁆𑀚𑁂𑀳𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀳𑀻’’𑀢𑀺 𑁋

𑀢𑁂𑀦 𑀧𑀘𑁆𑀘𑀼𑀤𑁆𑀥𑀝𑁂𑀬𑁂𑀯, 𑀧𑀭𑀺𑀪𑁄𑀕𑀸𑀤𑀺 𑀓𑀧𑁆𑀧𑀢𑀺.

𑁨𑁨𑁪. 𑀅𑀧𑀭𑀸 𑀲𑀫𑁆𑀫𑀼𑀔𑀸𑀯𑁂𑀓𑀸, 𑀪𑀺𑀓𑁆𑀔𑀼𑀲𑁆𑀲𑁂𑀓𑀲𑁆𑀲 𑀲𑀦𑁆𑀢𑀺𑀓𑁂;

𑀕𑀳𑁂𑀢𑁆𑀯𑀸 𑀦𑀸𑀫𑀫𑁂𑀓𑀲𑁆𑀲, 𑀧𑀜𑁆𑀘𑀦𑁆𑀦𑀁 𑀲𑀳𑀥𑀫𑁆𑀫𑀺𑀦𑀁.

𑁨𑁨𑁫. ‘‘𑀇𑀫𑀁 𑀘𑀻𑀯𑀭𑀁 𑀢𑀺𑀲𑁆𑀲𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀢𑀺𑀲𑁆𑀲𑀸𑀬 𑀪𑀺𑀓𑁆𑀔𑀼𑀦𑀺𑀬𑀸, 𑀢𑀺𑀲𑁆𑀲𑀲𑁆𑀲 𑀲𑀸𑀫𑀡𑁂𑀭𑀲𑁆𑀲, 𑀢𑀺𑀲𑁆𑀲𑀸𑀬 𑀲𑀸𑀫𑀡𑁂𑀭𑀺𑀬𑀸, 𑀢𑀺𑀲𑁆𑀲𑀸𑀬 𑀲𑀺𑀓𑁆𑀔𑀫𑀸𑀦𑀸𑀬 𑀯𑀺𑀓𑀧𑁆𑀧𑁂𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁.

𑀢𑁂𑀦 𑀪𑀺𑀓𑁆𑀔𑀼𑀦𑀸 ‘‘𑀢𑀺𑀲𑁆𑀲𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀢𑀺𑀲𑁆𑀲𑀸𑀬 𑀪𑀺𑀓𑁆𑀔𑀼𑀦𑀺𑀬𑀸, 𑀢𑀺𑀲𑁆𑀲𑀲𑁆𑀲 𑀲𑀸𑀫𑀡𑁂𑀭𑀲𑁆𑀲, 𑀢𑀺𑀲𑁆𑀲𑀸𑀬 𑀲𑀸𑀫𑀡𑁂𑀭𑀺𑀬𑀸, 𑀢𑀺𑀲𑁆𑀲𑀸𑀬 𑀲𑀺𑀓𑁆𑀔𑀫𑀸𑀦𑀸𑀬 𑀲𑀦𑁆𑀢𑀓𑀁 𑀧𑀭𑀺𑀪𑀼𑀜𑁆𑀚 𑀯𑀸 𑀯𑀺𑀲𑁆𑀲𑀚𑁆𑀚𑁂𑀳𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀳𑀻’’𑀢𑀺 𑀯𑀢𑁆𑀢𑀩𑁆𑀩𑀁.

𑁨𑁨𑁬. 𑀧𑀭𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑁂-𑀓𑀲𑁆𑀲𑀦𑁆𑀢𑀺𑀓𑁂𑀯𑀫𑀻𑀭𑀬𑁂;

‘‘𑀇𑀫𑀁 𑀘𑀻𑀯𑀭𑀁 𑀢𑀼𑀬𑁆𑀳𑀁 𑀯𑀺𑀓𑀧𑁆𑀧𑀦𑀢𑁆𑀣𑀸𑀬 𑀤𑀫𑁆𑀫𑀻’’𑀢𑀺.

𑁨𑁨𑁭. 𑀢𑁂𑀦 𑀯𑀢𑁆𑀢𑀩𑁆𑀩𑁄 ‘‘𑀓𑁄 𑀢𑁂 𑀫𑀺𑀢𑁆𑀢𑁄 𑀯𑀸 𑀲𑀦𑁆𑀤𑀺𑀝𑁆𑀞𑁄 𑀯𑀸’’𑀢𑀺. 𑀇𑀢𑀭𑁂𑀦 𑀘𑁂𑀯𑀁 𑀯𑀢𑁆𑀢𑀩𑁆𑀩𑀁 ‘‘𑀢𑀺𑀲𑁆𑀲𑁄 𑀪𑀺𑀓𑁆𑀔𑀽’’𑀢𑀺 𑀯𑀸 ‘‘𑀢𑀺𑀲𑁆𑀲𑀸 𑀪𑀺𑀓𑁆𑀔𑀼𑀦𑀻’’𑀢𑀺 𑀯𑀸 ‘‘𑀢𑀺𑀲𑁆𑀲𑁄 𑀲𑀸𑀫𑀡𑁂𑀭𑁄’’𑀢𑀺 𑀯𑀸 ‘‘𑀢𑀺𑀲𑁆𑀲𑀸 𑀲𑀸𑀫𑀡𑁂𑀭𑀻’’𑀢𑀺 𑀯𑀸 ‘‘𑀢𑀺𑀲𑁆𑀲𑀸 𑀲𑀺𑀓𑁆𑀔𑀫𑀸𑀦𑀸’’𑀢𑀺 𑀯𑀸.

𑀧𑀼𑀦 𑀢𑁂𑀦 ‘‘𑀅𑀳𑀁 𑀢𑀺𑀲𑁆𑀲𑀲𑁆𑀲 𑀢𑀺𑀲𑁆𑀲𑀸𑀬 𑀯𑀸 𑀤𑀫𑁆𑀫𑀻’’𑀢𑀺 𑀯𑀺𑀓𑀧𑁆𑀧𑁂𑀢𑁆𑀯𑀸 𑀢𑁂𑀦𑁂𑀯 ‘‘𑀢𑀺𑀲𑁆𑀲𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀢𑀺𑀲𑁆𑀲𑀸𑀬 𑀪𑀺𑀓𑁆𑀔𑀼𑀦𑀺𑀬𑀸, 𑀢𑀺𑀲𑁆𑀲𑀲𑁆𑀲 𑀲𑀸𑀫𑀡𑁂𑀭𑀲𑁆𑀲, 𑀢𑀺𑀲𑁆𑀲𑀸𑀬 𑀲𑀸𑀫𑀡𑁂𑀭𑀺𑀬𑀸, 𑀢𑀺𑀲𑁆𑀲𑀸𑀬 𑀲𑀺𑀓𑁆𑀔𑀫𑀸𑀦𑀸𑀬 𑀲𑀦𑁆𑀢𑀓𑀁 𑀧𑀭𑀺𑀪𑀼𑀜𑁆𑀚 𑀯𑀸 𑀯𑀺𑀲𑁆𑀲𑀚𑁆𑀚𑁂𑀳𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀳𑀻’’𑀢𑀺 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩𑀁.

𑁨𑁨𑁮. 𑀤𑀽𑀭𑀲𑀦𑁆𑀢𑀺𑀓𑀢𑁆𑀢𑁂𑀓𑀢𑁆𑀢𑀩𑀳𑀼𑀪𑀸𑀯𑀁 𑀯𑀺𑀚𑀸𑀦𑀺𑀬;

‘‘𑀏𑀢𑀁 𑀇𑀫’’𑀦𑁆𑀢𑀺 ‘‘𑀏𑀢𑀸𑀦𑀺, 𑀇𑀫𑀸𑀦𑀻’’𑀢𑁂𑀢𑁆𑀣 𑀬𑁄𑀚𑀬𑁂.

𑁨𑁨𑁯. 𑀤𑀲𑀸𑀳𑀁 𑀫𑀸𑀲𑀫𑁂𑀓𑀁 𑀯𑀸, 𑀧𑀜𑁆𑀘 𑀯𑀸 𑀓𑀣𑀺𑀦𑀢𑁆𑀣𑀢𑁂;

𑀧𑀸𑀭𑀺𑀧𑀽𑀭𑀢𑁆𑀣𑀫𑀽𑀦𑀲𑁆𑀲, 𑀧𑀘𑁆𑀘𑀸𑀲𑀸 𑀲𑀢𑀺 𑀫𑀸𑀲𑀓𑀁;

𑀦𑀼𑀧𑁆𑀧𑀸𑀤𑀬𑀢𑀺 𑀦𑀺𑀲𑁆𑀲𑀕𑁆𑀕𑀺𑀁, 𑀦𑀸𑀥𑀺𑀝𑁆𑀞𑀺𑀢𑀯𑀺𑀓𑀧𑁆𑀧𑀺𑀢𑀦𑁆𑀢𑀺.