𑁩𑁨. 𑀦𑀺𑀲𑁆𑀲𑀬𑀦𑀺𑀤𑁆𑀤𑁂𑀲𑁄

𑀦𑀺𑀲𑁆𑀲𑀬𑁄𑀢𑀺 𑁋

𑁨𑁩𑁦. 𑀩𑁆𑀬𑀢𑁆𑀢𑀲𑁆𑀲 𑀧𑀜𑁆𑀘𑀯𑀲𑁆𑀲𑀲𑁆𑀲, 𑀦𑀢𑁆𑀣𑀺 𑀦𑀺𑀲𑁆𑀲𑀬 𑀓𑀸𑀭𑀺𑀬𑀁;

𑀬𑀸𑀯𑀚𑀻𑀯𑀫𑁆𑀧𑀺 𑀅𑀩𑁆𑀬𑀢𑁆𑀢𑁄, 𑀦𑀺𑀲𑁆𑀲𑀺𑀢𑁄𑀬𑁂𑀯 𑀚𑀻𑀯𑀢𑀺.

𑁨𑁩𑁧. 𑀏𑀓𑀁𑀲𑀁 𑀘𑀻𑀯𑀭𑀁 𑀓𑀢𑁆𑀯𑀸, 𑀧𑀕𑁆𑀕𑀡𑁆𑀳𑀺𑀢𑁆𑀯𑀸𑀦 𑀅𑀜𑁆𑀚𑀮𑀺𑀁;

𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸, 𑀯𑀤𑁂 𑀬𑀸𑀯𑀢𑀢𑀻𑀬𑀓𑀁;

‘‘𑀆𑀘𑀭𑀺𑀬𑁄 𑀫𑁂, 𑀪𑀦𑁆𑀢𑁂, 𑀳𑁄𑀳𑀺,

𑀆𑀬𑀲𑁆𑀫𑀢𑁄 𑀦𑀺𑀲𑁆𑀲𑀸𑀬 𑀯𑀘𑁆𑀙𑀸𑀫𑀻’’𑀢𑀺.

𑁨𑁩𑁨. 𑀧𑀓𑁆𑀓𑀦𑁆𑀢𑁂 𑀧𑀓𑁆𑀔𑀲𑀗𑁆𑀓𑀦𑁆𑀢𑁂, 𑀯𑀺𑀩𑁆𑀪𑀦𑁆𑀢𑁂 𑀯𑀸𑀧𑀺 𑀦𑀺𑀲𑁆𑀲𑀬𑁄;

𑀫𑀭𑀡𑀸𑀡𑀢𑁆𑀢𑀼𑀧𑀚𑁆𑀛𑀸𑀬-𑀲𑀫𑁄𑀥𑀸𑀦𑁂𑀳𑀺 𑀲𑀫𑁆𑀫𑀢𑀺.

𑁨𑁩𑁩. 𑀦𑀺𑀲𑁆𑀲𑀸𑀬 𑀦 𑀯𑀲𑁂𑀮𑀚𑁆𑀚𑀺𑀁, 𑀅𑀧𑀼𑀩𑁆𑀩𑀁 𑀞𑀸𑀦𑀫𑀸𑀕𑀢𑁄;

𑀆𑀕𑀫𑁂 𑀘𑀢𑀼𑀧𑀜𑁆𑀘𑀸𑀳𑀁, 𑀜𑀸𑀢𑀼𑀁 𑀪𑀺𑀓𑁆𑀔𑀼𑀲𑀪𑀸𑀕𑀢𑀁.

𑁨𑁩𑁪. 𑀅𑀤𑁆𑀥𑀺𑀓𑀲𑁆𑀲 𑀕𑀺𑀮𑀸𑀦𑀲𑁆𑀲, 𑀕𑀺𑀮𑀸𑀦𑀼𑀧𑀝𑁆𑀞𑀓𑀲𑁆𑀲 𑀘;

𑀬𑀸𑀘𑀺𑀢𑀲𑁆𑀲 𑀅𑀭𑀜𑁆𑀜𑁂 𑀯𑀸, 𑀲𑀮𑁆𑀮𑀓𑁆𑀔𑀦𑁆𑀢𑁂𑀦 𑀨𑀸𑀲𑀼𑀓𑀁;

𑀲𑀪𑀸𑀕𑁂 𑀤𑀸𑀬𑀓𑁂𑀲𑀦𑁆𑀢𑁂, 𑀯𑀲𑀺𑀢𑀼𑀁 𑀢𑀸𑀯 𑀮𑀩𑁆𑀪𑀢𑀻𑀢𑀺.