𑁩𑁦. 𑀯𑀢𑁆𑀢𑀦𑀺𑀤𑁆𑀤𑁂𑀲𑁄

𑀯𑀢𑁆𑀢𑀦𑁆𑀢𑀺 𑁋

𑁨𑁧𑁩. 𑀆𑀕𑀦𑁆𑀢𑀼𑀓𑁄 𑀦 𑀆𑀭𑀸𑀫𑀁, 𑀧𑀯𑀺𑀲𑁂 𑀲𑀉𑀧𑀸𑀳𑀦𑁄;

𑀲𑀙𑀢𑁆𑀢𑁄𑀕𑀼𑀡𑁆𑀞𑀺𑀢𑁄 𑀲𑀻𑀲𑁂, 𑀓𑀭𑀺𑀢𑁆𑀯𑀸 𑀯𑀸𑀧𑀺 𑀘𑀻𑀯𑀭𑀁.

𑁨𑁧𑁪. 𑀧𑀸𑀦𑀻𑀬𑁂𑀦 𑀦 𑀥𑁄𑀯𑁂𑀬𑁆𑀬, 𑀧𑀸𑀤𑁂 𑀯𑀼𑀟𑁆𑀠𑀢𑀭𑁂𑀧𑀺 𑀘;

𑀆𑀯𑀸𑀲𑀺𑀓𑁂𑀪𑀺𑀯𑀸𑀤𑁂𑀬𑁆𑀬, 𑀧𑀼𑀘𑁆𑀙𑁂𑀬𑁆𑀬 𑀲𑀬𑀦𑀸𑀲𑀦𑀁.

𑁨𑁧𑁫. 𑀕𑀫𑀺𑀓𑁄 𑀧𑀝𑀺𑀲𑀸𑀫𑁂𑀢𑁆𑀯𑀸, 𑀤𑀸𑀭𑀼𑀫𑀢𑁆𑀢𑀺𑀓𑀪𑀡𑁆𑀟𑀓𑀁;

𑀯𑀺𑀳𑀸𑀭𑀜𑁆𑀘 𑀣𑀓𑁂𑀢𑁆𑀯𑀸𑀦, 𑀆𑀧𑀼𑀘𑁆𑀙 𑀲𑀬𑀦𑀸𑀲𑀦𑀁.

𑁨𑁧𑁬. 𑀆𑀧𑀼𑀘𑁆𑀙𑀺𑀢𑀩𑁆𑀩𑁂 𑀅𑀲𑀢𑀺, 𑀲𑀁𑀕𑁄𑀧𑁂𑀢𑁆𑀯𑀸𑀦 𑀲𑀸𑀥𑀼𑀓𑀁;

𑀧𑀓𑁆𑀓𑀫𑁂𑀬𑁆𑀬𑀜𑁆𑀜𑀣𑀸 𑀢𑀲𑁆𑀲, 𑀧𑀓𑁆𑀓𑀦𑁆𑀢𑀼𑀁 𑀦 𑀘 𑀓𑀧𑁆𑀧𑀢𑀺.

𑁨𑁧𑁭. 𑀆𑀯𑀸𑀲𑀺𑀓𑁄 𑀧𑀜𑁆𑀜𑀸𑀧𑁂𑀬𑁆𑀬, 𑀯𑀼𑀟𑁆𑀠𑀸𑀕𑀦𑁆𑀢𑀼𑀲𑁆𑀲 𑀆𑀲𑀦𑀁;

𑀉𑀧𑀦𑀺𑀓𑁆𑀔𑀺𑀧𑁂 𑀧𑀸𑀤𑁄𑀤-𑀧𑁆𑀧𑀪𑀼𑀢𑀺𑀁 𑀧𑀢𑁆𑀢𑀘𑀻𑀯𑀭𑀁.

𑁨𑁧𑁮. 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸𑀦 𑀕𑀡𑁆𑀳𑁂𑀬𑁆𑀬, 𑀧𑀸𑀦𑀻𑀬𑁂𑀦 𑀘 𑀧𑀼𑀘𑁆𑀙𑀬𑁂;

𑀆𑀕𑀦𑁆𑀢𑀼𑀓𑁂𑀪𑀺𑀯𑀸𑀤𑁂𑀬𑁆𑀬, 𑀧𑀜𑁆𑀜𑀧𑁂 𑀲𑀬𑀦𑀸𑀲𑀦𑀁.

𑁨𑁧𑁯. 𑀅𑀚𑁆𑀛𑀸𑀯𑀼𑀢𑁆𑀣𑀫𑀯𑀼𑀢𑁆𑀣𑀁 𑀯𑀸, 𑀕𑁄𑀘𑀭𑀸𑀕𑁄𑀘𑀭𑀁 𑀯𑀤𑁂;

𑀯𑀘𑁆𑀘𑀧𑀲𑁆𑀲𑀸𑀯𑀞𑀸𑀦𑀸𑀦𑀺, 𑀓𑀢𑀺𑀓𑀁 𑀲𑁂𑀓𑁆𑀔𑀲𑀫𑁆𑀫𑀼𑀢𑀺𑀁.

𑁨𑁨𑁦. 𑀧𑀯𑁂𑀲𑀦𑀺𑀓𑁆𑀔𑀫𑁂 𑀓𑀸𑀮𑀁, 𑀧𑀭𑀺𑀪𑁄𑀚𑀺𑀬𑀧𑀸𑀦𑀺𑀬𑀁;

𑀦𑀺𑀲𑀺𑀦𑁆𑀦𑁄𑀯 𑀦𑀯𑀓𑀲𑁆𑀲, 𑀏𑀢𑀁 𑀲𑀩𑁆𑀩𑀁 𑀲𑀫𑀼𑀤𑁆𑀤𑀺𑀲𑁂𑀢𑀺.