𑁨𑁮. 𑀓𑀫𑁆𑀫𑀦𑀺𑀤𑁆𑀤𑁂𑀲𑁄

𑀓𑀫𑁆𑀫𑀜𑁆𑀘𑀸𑀢𑀺 𑁋

𑁧𑁯𑁯. 𑀯𑀕𑁆𑀕𑁂𑀦 𑀅𑀥𑀫𑁆𑀫𑀓𑀫𑁆𑀫𑀁, 𑀲𑀫𑀕𑁆𑀕𑁂𑀦 𑀅𑀥𑀫𑁆𑀫𑀺𑀓𑀁;

𑀯𑀕𑁆𑀕𑁂𑀦 𑀥𑀫𑁆𑀫𑀓𑀫𑁆𑀫𑀜𑁆𑀘, 𑀲𑀫𑀕𑁆𑀕𑁂𑀦 𑀘 𑀥𑀫𑁆𑀫𑀺𑀓𑀁;

𑀘𑀢𑀼𑀢𑁆𑀣𑀁𑀬𑁂𑀯𑀸𑀦𑀼𑀜𑁆𑀜𑀸𑀢𑀁, 𑀲𑁂𑀲𑀓𑀫𑁆𑀫𑁂𑀲𑀼 𑀤𑀼𑀓𑁆𑀓𑀝𑀁.

𑁨𑁦𑁦. 𑀘𑀢𑀼𑀯𑀕𑁆𑀕𑁄 𑀧𑀜𑁆𑀘𑀯𑀕𑁆𑀕𑁄, 𑀤𑀲𑀯𑀻𑀲𑀢𑀺𑀯𑀕𑁆𑀕𑀺𑀓𑁄;

𑀢𑀺𑀭𑁂𑀓𑀯𑀻𑀲𑀢𑀺𑀯𑀕𑁆𑀕𑁄, 𑀧𑀜𑁆𑀘 𑀲𑀗𑁆𑀖𑀸 𑀯𑀺𑀪𑀸𑀯𑀺𑀢𑀸.

𑁨𑁦𑁧. 𑀘𑀢𑀼𑀯𑀕𑁆𑀕𑁂𑀢𑁆𑀣 𑀅𑀩𑁆𑀪𑀸𑀦𑀼-𑀧𑀲𑀫𑁆𑀧𑀤𑀸𑀧𑀯𑀸𑀭𑀡𑀸;

𑀧𑀜𑁆𑀘𑀯𑀕𑁆𑀕𑁄 𑀘 𑀅𑀩𑁆𑀪𑀸𑀦𑀁, 𑀫𑀚𑁆𑀛𑀤𑁂𑀲𑀼𑀧𑀲𑀫𑁆𑀧𑀤𑀁.

𑁨𑁦𑁨. 𑀤𑀲𑀯𑀕𑁆𑀕𑁄 𑀘 𑀅𑀩𑁆𑀪𑀸𑀦𑀁, 𑀞𑀧𑁂𑀢𑁆𑀯𑀸 𑀲𑀩𑁆𑀩𑀓𑀫𑁆𑀫𑀺𑀓𑁄;

𑀇𑀢𑀭𑁄 𑀲𑀩𑁆𑀩𑀓𑀫𑁆𑀫𑁂𑀲𑀼, 𑀓𑀫𑁆𑀫𑀧𑁆𑀧𑀢𑁆𑀢𑁄𑀢𑀺 𑀤𑀻𑀧𑀺𑀢𑁄.

𑁨𑁦𑁩. 𑀘𑀢𑀼𑀯𑀕𑁆𑀕𑁂𑀦 𑀓𑀢𑁆𑀢𑀩𑁆𑀩𑁂, 𑀘𑀢𑁆𑀢𑀸𑀭𑁄 𑀧𑀓𑀢𑀢𑁆𑀢𑀓𑀸;

𑀓𑀫𑁆𑀫𑀧𑁆𑀧𑀢𑁆𑀢𑀸 𑀧𑀭𑁂 𑀙𑀦𑁆𑀤𑀸-𑀭𑀳𑀸 𑀲𑁂𑀲𑁂𑀧𑁆𑀬𑀬𑀁 𑀦𑀬𑁄.

𑁨𑁦𑁪. 𑀘𑀢𑀼𑀯𑀕𑁆𑀕𑀸𑀤𑀺𑀓𑀢𑁆𑀢𑀩𑁆𑀩𑀁, 𑀅𑀲𑀁𑀯𑀸𑀲𑀓𑀫𑁆𑀫𑀸𑀭𑀳;

𑀕𑀭𑀼𑀓𑀝𑁆𑀞𑁂𑀲𑁆𑀯𑀜𑁆𑀜𑀢𑀭𑀁, 𑀓𑀢𑁆𑀯𑀸𑀦 𑀕𑀡𑀧𑀽𑀭𑀓𑀁;

𑀧𑀭𑀺𑀯𑀸𑀲𑀸𑀤𑀺𑀓𑀁 𑀓𑀫𑁆𑀫𑀁, 𑀓𑀢𑀁 𑀓𑀼𑀧𑁆𑀧𑀜𑁆𑀘 𑀤𑀼𑀓𑁆𑀓𑀝𑀁.

𑁨𑁦𑁫. 𑀅𑀥𑀫𑁆𑀫𑀓𑀫𑁆𑀫𑀁 𑀯𑀸𑀭𑁂𑀬𑁆𑀬, 𑀅𑀦𑁆𑀢𑀭𑀸𑀬𑁂 𑀤𑀼𑀯𑁂 𑀢𑀬𑁄;

𑀤𑀺𑀝𑁆𑀞𑀸𑀯𑀺𑀫𑁂𑀓𑁄𑀥𑀺𑀝𑁆𑀞𑀸𑀦𑀁, 𑀯𑀸𑀭𑁂𑀦𑁆𑀢𑁂𑀯 𑀢𑀢𑁄𑀥𑀺𑀓𑀸.

𑁨𑁦𑁬. 𑀓𑀫𑁆𑀫𑀸𑀭𑀳𑀸 𑀅𑀲𑀁𑀯𑀸𑀲𑀸, 𑀔𑀺𑀢𑁆𑀢𑀘𑀺𑀢𑁆𑀢𑀤𑀼𑀔𑀝𑁆𑀝𑀺𑀢𑀸;

𑀏𑀢𑁂𑀲𑀁 𑀲𑀗𑁆𑀖𑀫𑀚𑁆𑀛𑀫𑁆𑀳𑀺, 𑀧𑀝𑀺𑀓𑁆𑀔𑁂𑀧𑁄 𑀦 𑀭𑀼𑀳𑀢𑀺.

𑁨𑁦𑁭. 𑀧𑀓𑀢𑀢𑁆𑀢𑁂𑀓𑀲𑀻𑀫𑀝𑁆𑀞-𑀲𑀫𑀲𑀁𑀯𑀸𑀲𑀪𑀺𑀓𑁆𑀔𑀼𑀦𑁄;

𑀆𑀭𑁄𑀘𑁂𑀦𑁆𑀢𑀲𑁆𑀲𑀦𑁆𑀢𑀫𑀲𑁄-𑀦𑀦𑁆𑀢𑀭𑀲𑁆𑀲𑀸𑀧𑀺 𑀭𑀽𑀳𑀢𑀺.

𑁨𑁦𑁮. 𑀓𑁄𑀧𑁂𑀢𑀼𑀁 𑀥𑀫𑁆𑀫𑀺𑀓𑀁 𑀓𑀫𑁆𑀫𑀁, 𑀧𑀝𑀺𑀓𑁆𑀓𑁄𑀲𑁂𑀬𑁆𑀬 𑀲𑀫𑁆𑀫𑀼𑀔𑀸;

𑀢𑀺𑀭𑁄𑀓𑁆𑀔𑀸 𑀓𑀸𑀬𑀲𑀸𑀫𑀕𑁆𑀕𑀺𑀁, 𑀙𑀦𑁆𑀤𑀁 𑀦𑁄 𑀤𑁂𑀬𑁆𑀬 𑀤𑀼𑀓𑁆𑀓𑀝𑀦𑁆𑀢𑀺.