𑁨𑁪. 𑀅𑀜𑁆𑀚𑀦𑀻𑀦𑀺𑀤𑁆𑀤𑁂𑀲𑁄

𑀅𑀜𑁆𑀚𑀦𑀻𑀢𑀺 𑁋

𑁧𑁮𑁨. 𑀯𑀝𑁆𑀝𑀸𑀝𑁆𑀞𑀲𑁄𑀴𑀲𑀁𑀲𑀸 𑀯𑀸, 𑀫𑀝𑁆𑀞𑀸 𑀯𑀝𑁆𑀝𑀢𑀺 𑀅𑀜𑁆𑀚𑀦𑀻;

𑀢𑀺𑀲𑁆𑀲𑁄𑀧𑀺 𑀫𑀽𑀮𑁂 𑀕𑀻𑀯𑀸𑀬𑀁, 𑀮𑁂𑀔𑀸 𑀏𑀓𑀸𑀯 𑀩𑀦𑁆𑀥𑀺𑀢𑀼𑀁.

𑁧𑁮𑁩. 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀫𑀸𑀮𑀸𑀤𑀺𑀓𑀫𑁆𑀫𑀁 𑀫𑀓𑀭𑀤𑀦𑁆𑀢𑀓𑀁;

𑀕𑁄𑀫𑀼𑀢𑁆𑀢𑀓𑀟𑁆𑀠𑀘𑀦𑁆𑀤𑀸𑀤𑀺-𑀯𑀺𑀓𑀸𑀭𑀁 𑀦𑁂𑀢𑁆𑀣 𑀯𑀝𑁆𑀝𑀢𑀺.

𑁧𑁮𑁪. 𑀮𑀩𑁆𑀪𑁂𑀓𑀯𑀡𑁆𑀡𑀲𑀼𑀢𑁆𑀢𑁂𑀦, 𑀲𑀺𑀩𑁆𑀩𑀺𑀢𑀼𑀁 𑀣𑀯𑀺𑀓𑀸 𑀢𑀣𑀸;

𑀲𑀺𑀧𑀸𑀝𑀺 𑀓𑀼𑀜𑁆𑀘𑀺𑀓𑀸𑀓𑁄𑀲𑁄, 𑀲𑀮𑀸𑀓𑀸𑀧𑀺 𑀅𑀘𑀺𑀢𑁆𑀢𑀓𑀸.

𑁧𑁮𑁫. 𑀲𑀗𑁆𑀔𑀦𑀸𑀪𑀺𑀯𑀺𑀲𑀸𑀡𑀝𑁆𑀞𑀺-𑀦𑀴𑀤𑀦𑁆𑀢𑀫𑀬𑀸 𑀢𑀣𑀸;

𑀨𑀮𑀓𑀝𑁆𑀞𑀫𑀬𑀸 𑀯𑁂𑀴𑀼-𑀮𑀸𑀔𑀸𑀮𑁄𑀳𑀫𑀬𑀸𑀧𑀺 𑀘.

𑁧𑁮𑁬. 𑀅𑀜𑁆𑀚𑀦𑀺𑀬𑁄 𑀲𑀮𑀸𑀓𑀸𑀬𑁄, 𑀥𑀽𑀫𑀦𑁂𑀢𑁆𑀢𑀸 𑀘 𑀮𑀩𑁆𑀪𑀭𑁂;

𑀢𑀣𑀸 𑀲𑀢𑁆𑀣𑀓𑀤𑀡𑁆𑀟𑀸𑀦𑀺, 𑀦𑀢𑁆𑀣𑀼𑀤𑀸𑀦𑀸 𑀘 𑀢𑀫𑁆𑀫𑀬𑀸𑀢𑀺.