𑁨𑁫. 𑀅𑀓𑀧𑁆𑀧𑀺𑀬𑀲𑀬𑀦𑀦𑀺𑀤𑁆𑀤𑁂𑀲𑁄

𑀅𑀓𑀧𑁆𑀧𑀺𑀬𑀲𑀬𑀦𑀸𑀦𑀻𑀢𑀺 𑁋

𑁧𑁮𑁭. 𑀆𑀲𑀦𑁆𑀤𑀻 𑀢𑀽𑀮𑀻 𑀧𑀮𑁆𑀮𑀗𑁆𑀓𑁄, 𑀧𑀝𑀺𑀓𑀁 𑀕𑁄𑀦𑀘𑀺𑀢𑁆𑀢𑀓𑀁;

𑀧𑀝𑀮𑀻 𑀯𑀺𑀓𑀢𑀻 𑀉𑀤𑁆𑀤-𑀮𑁄𑀫𑀻 𑀏𑀓𑀦𑁆𑀢𑀮𑁄𑀫𑀺𑀓𑀸.

𑁧𑁮𑁮. 𑀓𑀼𑀢𑁆𑀢𑀁 𑀓𑁄𑀲𑁂𑀬𑁆𑀬𑀁 𑀓𑀝𑁆𑀝𑀺𑀲𑁆𑀲𑀁, 𑀳𑀢𑁆𑀣𑀺𑀅𑀲𑁆𑀲𑀭𑀣𑀢𑁆𑀣𑀭𑀸;

𑀚𑀺𑀦𑀧𑁆𑀧𑀯𑁂𑀡𑀺𑀓𑀤𑀮𑀻-𑀫𑀺𑀕𑀧𑁆𑀧𑀯𑀭𑀅𑀢𑁆𑀣𑀭𑀸.

𑁧𑁮𑁯. 𑀲𑀮𑁄𑀳𑀺𑀢𑀯𑀺𑀢𑀸𑀦𑀜𑁆𑀘𑀼-𑀪𑀢𑁄𑀭𑀢𑁆𑀢𑀽𑀧𑀥𑀸𑀦𑀓𑀁;

𑀅𑀓𑀧𑁆𑀧𑀺𑀬𑀸𑀦𑀺 𑀏𑀢𑀸𑀦𑀺, 𑀤𑀼𑀓𑁆𑀓𑀝𑀁 𑀧𑀭𑀺𑀪𑀼𑀜𑁆𑀚𑀢𑁄.

𑁧𑁯𑁦. 𑀆𑀲𑀦𑁆𑀤𑀸𑀤𑀺𑀢𑁆𑀢𑀬𑀸 𑀲𑁂𑀲𑁂, 𑀮𑀩𑁆𑀪𑀢𑁂 𑀕𑀺𑀳𑀺𑀲𑀦𑁆𑀢𑀓𑁂;

𑀥𑀫𑁆𑀫𑀸𑀲𑀦𑁂 𑀘 𑀪𑀢𑁆𑀢𑀕𑁆𑀕𑁂, 𑀖𑀭𑁂 𑀘𑀸𑀧𑀺 𑀦𑀺𑀲𑀻𑀤𑀺𑀢𑀼𑀁;

𑀪𑀽𑀫𑀢𑁆𑀣𑀭𑀡𑀲𑀗𑁆𑀔𑁂𑀧𑁂, 𑀲𑀬𑀺𑀢𑀼𑀜𑁆𑀘𑀸𑀧𑀺 𑀓𑀧𑁆𑀧𑀢𑀺.

𑁧𑁯𑁧. 𑀘𑀢𑀼𑀭𑀁𑀲𑀧𑀻𑀞𑀸 𑀲𑀢𑁆𑀢𑀗𑁆𑀕𑀸, 𑀧𑀜𑁆𑀘𑀗𑁆𑀕𑀸 𑀉𑀘𑁆𑀘𑀧𑀸𑀤𑀓𑀸;

𑀢𑀽𑀮𑁄𑀦𑀤𑁆𑀥𑀸 𑀖𑀭𑁂𑀬𑁂𑀯, 𑀫𑀜𑁆𑀘𑀧𑀻𑀞𑀸 𑀦𑀺𑀲𑀻𑀤𑀺𑀢𑀼𑀁.

𑁧𑁯𑁨. 𑀘𑁄𑀴𑀯𑀸𑀓𑀼𑀡𑁆𑀡𑀧𑀡𑁆𑀡𑀸𑀦𑀁, 𑀢𑀺𑀡𑀸𑀦𑀜𑁆𑀘𑁂𑀯 𑀧𑀽𑀭𑀺𑀢𑀸;

𑀘𑀻𑀯𑀭𑀘𑁆𑀙𑀯𑀺𑀬𑁄 𑀧𑀜𑁆𑀘, 𑀪𑀺𑀲𑀻 𑀲𑀩𑁆𑀩𑀢𑁆𑀣 𑀓𑀧𑁆𑀧𑀺𑀬𑀸.

𑁧𑁯𑁩. 𑀢𑀽𑀮𑀢𑁆𑀢𑀬𑀁 𑀪𑀺𑀲𑀺𑀕𑀩𑁆𑀪𑁄, 𑀮𑁄𑀫𑀸𑀦𑀺 𑀫𑀺𑀕𑀧𑀓𑁆𑀔𑀺𑀦𑀁;

𑀩𑀺𑀫𑁆𑀩𑁄𑀳𑀦𑁂 𑀅𑀦𑀼𑀜𑁆𑀜𑀸𑀢𑀁, 𑀢𑀽𑀮𑀯𑀚𑁆𑀚𑀸 𑀫𑀲𑀽𑀭𑀓𑁂.

𑁧𑁯𑁪. 𑀫𑀦𑀼𑀲𑁆𑀲𑀮𑁄𑀫𑀫𑀼𑀡𑁆𑀡𑀸𑀬𑀁, 𑀧𑀡𑁆𑀡𑁂 𑀧𑀼𑀧𑁆𑀨𑀁 𑀢𑀫𑀸𑀮𑀓𑀁;

𑀲𑀼𑀤𑁆𑀥𑀁 𑀦 𑀆𑀲𑀦𑀜𑁆𑀘𑁂𑀯, 𑀮𑀩𑁆𑀪𑀫𑀧𑁆𑀧𑀝𑀺𑀯𑁂𑀓𑁆𑀔𑀺𑀢𑀦𑁆𑀢𑀺.