𑁧𑁪. 𑀪𑀽𑀫𑀺𑀦𑀺𑀤𑁆𑀤𑁂𑀲𑁄

𑀪𑀽𑀫𑀺𑀬𑁄𑀢𑀺 𑁋

𑁧𑁩𑁬. 𑀲𑀫𑁆𑀫𑀼𑀢𑀼𑀲𑁆𑀲𑀸𑀯𑀦𑀦𑁆𑀢𑀸 𑀘, 𑀕𑁄𑀦𑀺𑀲𑀸𑀤𑀻 𑀕𑀳𑀸𑀧𑀢𑀺;

𑀓𑀧𑁆𑀧𑀺𑀬𑀸 𑀪𑀽𑀫𑀺𑀬𑁄 𑀬𑀸𑀲𑀼, 𑀯𑀼𑀢𑁆𑀣𑀁 𑀧𑀓𑁆𑀓𑀜𑁆𑀘 𑀓𑀧𑁆𑀧𑀢𑀺.

𑁧𑁩𑁭. 𑀯𑀸𑀲𑀢𑁆𑀣𑀸𑀬 𑀓𑀢𑁂 𑀕𑁂𑀳𑁂, 𑀲𑀗𑁆𑀖𑀺𑀓𑁂 𑀯𑁂𑀓𑀲𑀦𑁆𑀢𑀓𑁂;

𑀓𑀧𑁆𑀧𑀺𑀬𑀸 𑀓𑀼𑀝𑀺 𑀮𑀤𑁆𑀥𑀩𑁆𑀩𑀸, 𑀲𑀳𑀲𑁂𑀬𑁆𑀬𑀧𑁆𑀧𑀳𑁄𑀦𑀓𑁂.

𑁧𑁩𑁮. 𑀕𑁂𑀳𑁂 𑀲𑀗𑁆𑀖𑀲𑁆𑀲 𑀯𑁂𑀓𑀲𑁆𑀲, 𑀓𑀭𑀫𑀸𑀦𑁂𑀯𑀫𑀻𑀭𑀬𑀁;

𑀧𑀞𑀫𑀺𑀝𑁆𑀞𑀓𑀣𑀫𑁆𑀪𑀸𑀤𑀺𑀁, 𑀞𑀧𑁂𑀬𑁆𑀬𑀼𑀲𑁆𑀲𑀸𑀯𑀦𑀦𑁆𑀢𑀺𑀓𑀸;

‘‘𑀓𑀧𑁆𑀧𑀺𑀬𑀓𑀼𑀝𑀺𑀁 𑀓𑀭𑁄𑀫, 𑀓𑀧𑁆𑀧𑀺𑀬𑀓𑀼𑀝𑀺𑀁 𑀓𑀭𑁄𑀫𑀸’’𑀢𑀺.

𑁧𑁩𑁯. 𑀬𑁂𑀪𑀼𑀬𑁆𑀬𑁂𑀦𑀸𑀧𑀭𑀺𑀓𑁆𑀔𑀺𑀢𑁆𑀢𑁄, 𑀆𑀭𑀸𑀫𑁄 𑀲𑀓𑀮𑁄𑀧𑀺 𑀯𑀸;

𑀯𑀼𑀘𑁆𑀘𑀢𑁂 ‘‘𑀕𑁄𑀦𑀺𑀲𑀸𑀤𑀻’’𑀢𑀺, 𑀲𑀫𑁆𑀫𑀼𑀢𑀻 𑀲𑀗𑁆𑀖𑀲𑀫𑁆𑀫𑀢𑀸.

𑁧𑁪𑁦. 𑀪𑀺𑀓𑁆𑀔𑀼𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂𑀳𑀺, 𑀤𑀺𑀦𑁆𑀦𑁄 𑀢𑁂𑀲𑀁𑀯 𑀲𑀦𑁆𑀢𑀓𑁄;

𑀅𑀢𑁆𑀣𑀸𑀬 𑀓𑀧𑁆𑀧𑀓𑀼𑀝𑀺𑀬𑀸, 𑀕𑁂𑀳𑁄 𑀕𑀳𑀧𑀢𑀻 𑀫𑀢𑁄.

𑁧𑁪𑁧. 𑀅𑀓𑀧𑁆𑀧𑀓𑀼𑀝𑀺𑀬𑀸 𑀯𑀼𑀢𑁆𑀣𑀲𑀧𑁆𑀧𑀺𑀆𑀤𑀻𑀳𑀺 𑀫𑀺𑀲𑁆𑀲𑀺𑀢𑀁;

𑀯𑀚𑁂𑀬𑁆𑀬 𑀅𑀦𑁆𑀢𑁄𑀯𑀼𑀢𑁆𑀣𑀢𑁆𑀢𑀁, 𑀧𑀼𑀭𑀺𑀫𑀁 𑀓𑀸𑀮𑀺𑀓𑀤𑁆𑀯𑀬𑀁.

𑁧𑁪𑁨. 𑀢𑁂𑀳𑁂𑀯 𑀪𑀺𑀓𑁆𑀔𑀼𑀦𑀸 𑀧𑀓𑁆𑀓𑀁, 𑀓𑀧𑁆𑀧𑀢𑁂 𑀬𑀸𑀯𑀚𑀻𑀯𑀺𑀓𑀁;

𑀦𑀺𑀭𑀸𑀫𑀺𑀲𑀁𑀯 𑀲𑀢𑁆𑀢𑀸𑀳𑀁, 𑀲𑀸𑀫𑀺𑀲𑁂 𑀲𑀸𑀫𑀧𑀸𑀓𑀢𑀸.

𑁧𑁪𑁩. 𑀉𑀲𑁆𑀲𑀸𑀯𑀦𑀦𑁆𑀢𑀺𑀓𑀸 𑀬𑁂𑀳𑀺, 𑀣𑀫𑁆𑀪𑀸𑀤𑀻𑀳𑀺 𑀅𑀥𑀺𑀝𑁆𑀞𑀺𑀢𑀸;

𑀢𑁂𑀲𑀼𑀬𑁂𑀯𑀸𑀧𑀦𑀻𑀢𑁂𑀲𑀼, 𑀢𑀤𑀜𑁆𑀜𑁂𑀲𑀼𑀧𑀺 𑀢𑀺𑀝𑁆𑀞𑀢𑀺.

𑁧𑁪𑁪. 𑀲𑀩𑁆𑀩𑁂𑀲𑀼 𑀅𑀧𑀦𑀻𑀢𑁂𑀲𑀼, 𑀪𑀯𑁂 𑀚𑀳𑀺𑀢𑀯𑀢𑁆𑀣𑀼𑀓𑀸;

𑀕𑁄𑀦𑀺𑀲𑀸𑀤𑀻 𑀧𑀭𑀺𑀓𑁆𑀔𑀺𑀢𑁆𑀢𑁂, 𑀲𑁂𑀲𑀸 𑀙𑀤𑀦𑀯𑀺𑀩𑁆𑀪𑀫𑀸𑀢𑀺.