𑁧𑁫. 𑀉𑀧𑀚𑁆𑀛𑀸𑀘𑀭𑀺𑀬𑀯𑀢𑁆𑀢𑀦𑀺𑀤𑁆𑀤𑁂𑀲𑁄

𑀉𑀧𑀚𑁆𑀛𑀸𑀘𑀭𑀺𑀬𑀯𑀢𑁆𑀢𑀸𑀦𑀻𑀢𑀺 𑁋

𑁧𑁪𑁫. 𑀦𑀺𑀲𑁆𑀲𑀸𑀬𑀼𑀧𑀚𑁆𑀛𑀸𑀘𑀭𑀺𑀬𑁂, 𑀯𑀲𑀫𑀸𑀦𑁄 𑀲𑀼𑀧𑁂𑀲𑀮𑁄;

𑀤𑀦𑁆𑀢𑀓𑀝𑁆𑀞𑀸𑀲𑀦𑀁 𑀢𑁄𑀬𑀁, 𑀬𑀸𑀕𑀼𑀁 𑀓𑀸𑀮𑁂 𑀤𑀤𑁂 𑀲𑀤𑀸.

𑁧𑁪𑁬. 𑀧𑀢𑁆𑀢𑁂 𑀯𑀢𑁆𑀢𑀁 𑀘𑀭𑁂 𑀕𑀸𑀫-𑀧𑁆𑀧𑀯𑁂𑀲𑁂 𑀕𑀫𑀦𑀸𑀕𑀫𑁂;

𑀆𑀲𑀦𑁂 𑀧𑀸𑀤𑀧𑀻𑀞𑁂 𑀘, 𑀓𑀣𑀮𑁄𑀧𑀸𑀳𑀦𑀘𑀻𑀯𑀭𑁂.

𑁧𑁪𑁭. 𑀧𑀭𑀺𑀪𑁄𑀚𑀦𑀻𑀬𑀧𑀸𑀦𑀻𑀬-𑀯𑀘𑁆𑀘𑀧𑁆𑀧𑀲𑁆𑀲𑀸𑀯𑀞𑀸𑀦𑀺𑀲𑀼;

𑀯𑀺𑀳𑀸𑀭𑀲𑁄𑀥𑀦𑁂 𑀯𑀢𑁆𑀢𑀁, 𑀧𑀼𑀦 𑀧𑀜𑁆𑀜𑀸𑀧𑀦𑁂 𑀢𑀣𑀸.

𑁧𑁪𑁮. 𑀦 𑀧𑀧𑁆𑀨𑁄𑀝𑁂𑀬𑁆𑀬 𑀲𑁄𑀥𑁂𑀦𑁆𑀢𑁄, 𑀧𑀝𑀺𑀯𑀸𑀢𑁂 𑀘 𑀲𑀗𑁆𑀕𑀡𑁂;

𑀯𑀺𑀳𑀸𑀭𑀁 𑀪𑀺𑀓𑁆𑀔𑀼 𑀧𑀸𑀦𑀻𑀬-𑀲𑀸𑀫𑀦𑁆𑀢𑀸 𑀲𑀬𑀦𑀸𑀲𑀦𑀁.

𑁧𑁪𑁯. 𑀦𑁆𑀳𑀸𑀦𑁂 𑀦𑁆𑀳𑀸𑀢𑀲𑁆𑀲 𑀓𑀸𑀢𑀩𑁆𑀩𑁂, 𑀭𑀗𑁆𑀕𑀧𑀸𑀓𑁂 𑀘 𑀥𑁄𑀯𑀦𑁂;

𑀲𑀺𑀩𑁆𑀩𑀦𑁂 𑀘𑀻𑀯𑀭𑁂 𑀣𑁂𑀯𑁂, 𑀭𑀚𑀦𑁆𑀢𑁄 𑀦 𑀯𑀚𑁂 𑀞𑀺𑀢𑁂.

𑁧𑁫𑁦. 𑀏𑀓𑀘𑁆𑀘𑀲𑁆𑀲 𑀅𑀦𑀸𑀧𑀼𑀘𑁆𑀙𑀸, 𑀧𑀢𑁆𑀢𑀁 𑀯𑀸 𑀘𑀻𑀯𑀭𑀸𑀦𑀺 𑀯𑀸;

𑀦 𑀤𑀤𑁂𑀬𑁆𑀬 𑀦 𑀕𑀡𑁆𑀳𑁂𑀬𑁆𑀬, 𑀧𑀭𑀺𑀓𑁆𑀔𑀸𑀭𑀜𑁆𑀘 𑀓𑀺𑀜𑁆𑀘𑀦𑀁.

𑁧𑁫𑁧. 𑀏𑀓𑀘𑁆𑀘𑀁 𑀧𑀘𑁆𑀙𑀢𑁄 𑀓𑀸𑀢𑀼𑀁, 𑀕𑀦𑁆𑀢𑀼𑀁 𑀯𑀸 𑀢𑀲𑁆𑀲 𑀧𑀘𑁆𑀙𑀢𑁄;

𑀧𑀺𑀡𑁆𑀟𑀧𑀸𑀢𑀜𑁆𑀘 𑀦𑀺𑀦𑁆𑀦𑁂𑀢𑀼𑀁, 𑀦𑀻𑀳𑀭𑀸𑀧𑁂𑀢𑀼𑀫𑀢𑁆𑀢𑀦𑁄.

𑁧𑁫𑁨. 𑀓𑀺𑀘𑁆𑀘𑀬𑀁 𑀧𑀭𑀺𑀓𑀫𑁆𑀫𑀁 𑀯𑀸, 𑀓𑁂𑀲𑀘𑁆𑀙𑁂𑀤𑀜𑁆𑀘 𑀅𑀢𑁆𑀢𑀦𑁄;

𑀓𑀸𑀭𑀸𑀧𑁂𑀢𑀼𑀁 𑀯 𑀓𑀸𑀢𑀼𑀁 𑀯𑀸, 𑀅𑀦𑀸𑀧𑀼𑀘𑁆𑀙𑀸 𑀦 𑀯𑀝𑁆𑀝𑀢𑀺.

𑁧𑁫𑁩. 𑀕𑀸𑀫𑀁 𑀲𑀼𑀲𑀸𑀦𑀁 𑀦𑀺𑀲𑁆𑀲𑀻𑀫𑀁, 𑀤𑀺𑀲𑀁 𑀯𑀸 𑀕𑀦𑁆𑀢𑀼𑀫𑀺𑀘𑁆𑀙𑀢𑁄;

𑀅𑀢𑁆𑀢𑀦𑁄 𑀓𑀺𑀘𑁆𑀘𑀬𑀁 𑀯𑀸𑀧𑀺, 𑀅𑀦𑀸𑀧𑀼𑀘𑁆𑀙𑀸 𑀦 𑀯𑀝𑁆𑀝𑀢𑀺.

𑁧𑁫𑁪. 𑀉𑀧𑁆𑀧𑀦𑁆𑀦𑀁 𑀅𑀭𑀢𑀺𑀁 𑀤𑀺𑀝𑁆𑀞𑀺𑀁, 𑀓𑀼𑀓𑁆𑀓𑀼𑀘𑁆𑀘𑀁 𑀯𑀸 𑀯𑀺𑀦𑁄𑀤𑀬𑁂;

𑀓𑀭𑁂𑀬𑁆𑀬 𑀯𑀸𑀧𑀺 𑀉𑀲𑁆𑀲𑀼𑀓𑁆𑀓𑀁, 𑀲𑀗𑁆𑀖𑀸𑀬𑀢𑁆𑀢𑁂𑀲𑀼 𑀓𑀫𑁆𑀫𑀲𑀼.

𑁧𑁫𑁫. 𑀕𑀺𑀮𑀸𑀦𑁂𑀲𑀼 𑀉𑀧𑀝𑁆𑀞𑁂𑀬𑁆𑀬, 𑀯𑀼𑀝𑁆𑀞𑀸𑀦𑀁 𑀦𑁂𑀲𑀫𑀸𑀕𑀫𑁂;

𑀯𑀢𑁆𑀢𑀪𑁂𑀤𑁂𑀦 𑀲𑀩𑁆𑀩𑀢𑁆𑀣, 𑀅𑀦𑀸𑀤𑀭𑁂𑀦 𑀤𑀼𑀓𑁆𑀓𑀝𑀦𑁆𑀢𑀺.