𑁧𑁩. 𑀲𑀫𑀡𑀓𑀧𑁆𑀧𑀦𑀺𑀤𑁆𑀤𑁂𑀲𑁄

𑀲𑀫𑀡𑀓𑀧𑁆𑀧𑀸𑀢𑀺 𑁋

𑁧𑁨𑁫. 𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑁂, 𑀧𑀸𑀘𑀺𑀢𑁆𑀢𑀺 𑀓𑀢𑀓𑀧𑁆𑀧𑀺𑀬𑀁;

𑀦𑀔𑁂𑀦 𑀯𑀸𑀕𑁆𑀕𑀺𑀲𑀢𑁆𑀣𑁂𑀳𑀺, 𑀪𑀯𑁂 𑀲𑀫𑀡𑀓𑀧𑁆𑀧𑀺𑀬𑀁.

𑁧𑁨𑁬. 𑀲 𑀫𑀽𑀮𑀔𑀦𑁆𑀥𑀩𑀻𑀚𑀕𑁆𑀕-𑀨𑀴𑀼𑀩𑀻𑀚𑀧𑁆𑀧𑀪𑀸𑀯𑀺𑀢𑁄;

𑀆𑀭𑀫𑁆𑀪𑁂 𑀤𑀼𑀓𑁆𑀓𑀝𑀁 𑀩𑀻𑀚𑀁, 𑀪𑀽𑀢𑀕𑀸𑀫𑀯𑀺𑀬𑁄𑀚𑀺𑀢𑀁.

𑁧𑁨𑁭. 𑀦𑀺𑀩𑁆𑀩𑀝𑁆𑀝𑀩𑀻𑀚𑀁 𑀦𑁄𑀩𑀻𑀚-𑀫𑀓𑀢𑀜𑁆𑀘𑀸𑀧𑀺 𑀓𑀧𑁆𑀧𑀢𑀺;

𑀓𑀝𑀸𑀳𑀩𑀤𑁆𑀥𑀩𑀻𑀚𑀸𑀦𑀺, 𑀩𑀳𑀺𑀤𑁆𑀥𑀸 𑀯𑀸𑀧𑀺 𑀓𑀸𑀭𑀬𑁂.

𑁧𑁨𑁮. 𑀏𑀓𑀸𑀩𑀤𑁆𑀥𑁂𑀲𑀼 𑀩𑀻𑀚𑁂𑀲𑀼, 𑀪𑀸𑀚𑀦𑁂 𑀯𑀸𑀧𑀺 𑀪𑀽𑀫𑀺𑀬𑀁;

𑀓𑀢𑁂 𑀘 𑀓𑀧𑁆𑀧𑀺𑀬𑁂𑀓𑀲𑁆𑀫𑀺𑀁, 𑀲𑀩𑁆𑀩𑁂𑀲𑁆𑀯𑁂𑀯 𑀓𑀢𑀁 𑀪𑀯𑁂.

𑁧𑁨𑁯. 𑀦𑀺𑀓𑁆𑀔𑀺𑀢𑁆𑀢𑁂 𑀓𑀧𑁆𑀧𑀺𑀬𑀁 𑀓𑀢𑁆𑀯𑀸, 𑀫𑀽𑀮𑀧𑀡𑁆𑀡𑀸𑀦𑀺 𑀚𑀸𑀬𑀭𑀼𑀁;

𑀓𑀧𑁆𑀧𑀺𑀬𑀁 𑀧𑀼𑀦 𑀓𑀸𑀭𑁂𑀬𑁆𑀬, 𑀪𑀽𑀢𑀕𑀸𑀫𑁄 𑀳𑀺 𑀲𑁄 𑀢𑀤𑀸.

𑁧𑁩𑁦. 𑀲𑀧𑀡𑁆𑀡𑁄 𑀯𑀸 𑀅𑀧𑀡𑁆𑀡𑁄 𑀯𑀸, 𑀲𑁂𑀯𑀸𑀮𑁄𑀤𑀓𑀲𑀫𑁆𑀪𑀯𑁄;

𑀘𑁂𑀢𑀺𑀬𑀸𑀤𑀻𑀲𑀼 𑀲𑁂𑀯𑀸𑀮𑁄, 𑀦𑀺𑀩𑁆𑀩𑀝𑁆𑀝𑀤𑁆𑀯𑀢𑁆𑀢𑀺𑀧𑀢𑁆𑀢𑀓𑁄;

𑀪𑀽𑀢𑀕𑀸𑀫𑁄𑀯 𑀩𑀻𑀚𑀫𑁆𑀧𑀺, 𑀫𑀽𑀮𑀧𑀡𑁆𑀡𑁂 𑀯𑀺𑀦𑀺𑀕𑁆𑀕𑀢𑁂.

𑁧𑁩𑁧. 𑀖𑀝𑀸𑀤𑀺𑀧𑀺𑀝𑁆𑀞𑁂 𑀲𑁂𑀯𑀸𑀮𑁄, 𑀫𑀓𑀼𑀴𑀁 𑀅𑀳𑀺𑀙𑀢𑁆𑀢𑀓𑀁;

𑀤𑀼𑀓𑁆𑀓𑀝𑀲𑁆𑀲𑁂𑀯 𑀯𑀢𑁆𑀣𑀽𑀦𑀺, 𑀨𑀼𑀮𑁆𑀮𑀫𑀩𑁆𑀬𑀯𑀳𑀸𑀭𑀺𑀓𑀁.

𑁧𑁩𑁨. 𑀮𑀸𑀔𑀸𑀦𑀺𑀬𑁆𑀬𑀸𑀲𑀙𑀢𑁆𑀢𑀸𑀦𑀺, 𑀅𑀮𑁆𑀮𑀭𑀼𑀓𑁆𑀔𑁂 𑀯𑀺𑀓𑁄𑀧𑀺𑀬;

𑀕𑀡𑁆𑀳𑀢𑁄 𑀢𑀢𑁆𑀣 𑀧𑀸𑀘𑀺𑀢𑁆𑀢𑀺, 𑀙𑀺𑀦𑁆𑀤𑀢𑁄 𑀯𑀸𑀧𑀺 𑀅𑀓𑁆𑀔𑀭𑀁.

𑁧𑁩𑁩. 𑀧𑀻𑀴𑁂𑀢𑀼𑀁 𑀦𑀸𑀴𑀺𑀓𑁂𑀭𑀸𑀤𑀺𑀁, 𑀤𑀸𑀭𑀼𑀫𑀓𑁆𑀓𑀝𑀓𑀸𑀤𑀺𑀦𑀸;

𑀙𑀺𑀦𑁆𑀤𑀺𑀢𑀼𑀁 𑀕𑀡𑁆𑀞𑀺𑀓𑀁 𑀓𑀸𑀢𑀼𑀁, 𑀢𑀺𑀡𑀸𑀤𑀺𑀁 𑀦 𑀘 𑀓𑀧𑁆𑀧𑀢𑀺.

𑁧𑁩𑁪. 𑀪𑀽𑀢𑀕𑀸𑀫𑀁 𑀯 𑀩𑀻𑀚𑀁 𑀯𑀸, 𑀙𑀺𑀦𑁆𑀤 𑀪𑀺𑀦𑁆𑀤𑁄𑀘𑀺𑀦𑀸𑀳𑀺 𑀯𑀸;

𑀨𑀸𑀮𑁂𑀳𑀺 𑀯𑀺𑀚𑁆𑀛 𑀧𑀘 𑀯𑀸, 𑀦𑀺𑀬𑀫𑁂𑀢𑁆𑀯𑀸 𑀦 𑀪𑀸𑀲𑀬𑁂.

𑁧𑁩𑁫. 𑀇𑀫𑀁 𑀓𑀭𑁄𑀳𑀺 𑀓𑀧𑁆𑀧𑀺𑀬𑀁, 𑀇𑀫𑀁 𑀕𑀡𑁆𑀳𑁂𑀤𑀫𑀸𑀳𑀭;

𑀇𑀫𑀁 𑀤𑁂𑀳𑀺 𑀇𑀫𑀁 𑀲𑁄𑀥𑁂𑀳𑁂𑀯𑀁 𑀯𑀝𑁆𑀝𑀢𑀺 𑀪𑀸𑀲𑀺𑀢𑀼𑀦𑁆𑀢𑀺.