𑁮. 𑀦𑀸𑀯𑀸𑀪𑀺𑀭𑀼𑀳𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀓𑀻𑀴𑀸𑀧𑀼𑀭𑁂𑀓𑁆𑀔𑀸𑀭𑁄𑀢𑀺 𑀮𑁄𑀓𑀲𑁆𑀲𑀸𑀤𑀫𑀺𑀢𑁆𑀢𑀲𑀦𑁆𑀣𑀯𑀯𑀲𑁂𑀦 𑀓𑀻𑀴𑀸𑀧𑀼𑀭𑁂𑀓𑁆𑀔𑀸𑀭𑁄. 𑀢𑀣𑁂𑀯𑀸𑀢𑀺 𑀓𑀻𑀴𑀸𑀯𑀲𑁂𑀦𑁂𑀯. 𑀅𑀕𑀸𑀫𑀓𑀢𑀻𑀭𑀧𑀲𑁆𑀲𑁂𑀦𑀸𑀢𑀺 𑀅𑀤𑁆𑀥𑀬𑁄𑀚𑀦𑀩𑁆𑀪𑀦𑁆𑀢𑀭𑁂 𑀕𑀸𑀫𑀸𑀦𑀁 𑀅𑀪𑀸𑀯𑀢𑁄 𑀅𑀕𑀸𑀫𑀓𑀢𑀻𑀭𑀧𑀲𑁆𑀲𑁂𑀦. 𑀧𑀸𑀴𑀺𑀬𑀁 ‘‘𑀉𑀤𑁆𑀥𑀁𑀕𑀸𑀫𑀺𑀦𑀺𑀁 𑀯𑀸 𑀅𑀥𑁄𑀕𑀸𑀫𑀺𑀦𑀺𑀁 𑀯𑀸’’𑀢𑀺 (𑀧𑀸𑀘𑀺. 𑁧𑁮𑁬) 𑀯𑀘𑀦𑀢𑁄 𑀧𑀦 𑀯𑀸𑀧𑀺𑀲𑀫𑀼𑀤𑁆𑀤𑀸𑀤𑀻𑀲𑀼 𑀓𑀻𑀴𑀸𑀧𑀼𑀭𑁂𑀓𑁆𑀔𑀸𑀭𑀢𑀸𑀬𑀧𑀺 𑀕𑀘𑁆𑀙𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀢𑁂𑀦𑀸𑀳 ‘‘𑀲𑀫𑀼𑀤𑁆𑀤𑁂 𑀧𑀦 𑀬𑀣𑀸𑀲𑀼𑀔𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀯𑀺𑀲𑀗𑁆𑀓𑁂𑀢𑁂𑀦𑀸𑀢𑀺 𑀇𑀥𑀸𑀧𑀺 𑀓𑀸𑀮𑀯𑀺𑀲𑀗𑁆𑀓𑁂𑀢𑁂𑀦𑁂𑀯 𑀅𑀦𑀸𑀧𑀢𑁆𑀢𑀺, 𑀢𑀺𑀢𑁆𑀣𑀯𑀺𑀲𑀗𑁆𑀓𑁂𑀢𑁂𑀦, 𑀧𑀦 𑀦𑀸𑀯𑀸𑀯𑀺𑀲𑀗𑁆𑀓𑁂𑀢𑁂𑀦 𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑁂𑀯.

𑀲𑁂𑀲𑀦𑁆𑀢𑀺 𑀲𑀤𑁆𑀥𑀺𑀁 𑀲𑀫𑀼𑀝𑁆𑀞𑀸𑀦𑀸𑀤𑀻𑀳𑀺 𑀅𑀯𑀲𑁂𑀲𑀁, 𑀓𑁂𑀘𑀺 𑀧𑀦 ‘‘𑀓𑀻𑀴𑀸𑀧𑀼𑀭𑁂𑀓𑁆𑀔𑀸𑀭𑁄 ‘𑀲𑀁𑀯𑀺𑀤𑀳𑀺𑀢𑁆𑀯𑀸’𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁧𑁮𑁮) 𑀯𑀘𑀦𑀢𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀅𑀓𑀼𑀲𑀮𑀘𑀺𑀢𑁆𑀢𑀁 𑀮𑁄𑀓𑀯𑀚𑁆𑀚𑀁, 𑀢𑀲𑁆𑀫𑀸 𑀲𑁂𑀲𑀁 𑀦𑀸𑀫 𑀞𑀧𑁂𑀢𑁆𑀯𑀸 ‘𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁 𑀢𑀺𑀘𑀺𑀢𑁆𑀢’𑀦𑁆𑀢𑀺 𑀇𑀤𑀁 𑀤𑁆𑀯𑀬𑀁 𑀅𑀯𑀲𑁂𑀲’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀓𑀻𑀴𑀸𑀧𑀼𑀭𑁂𑀓𑁆𑀔𑀸𑀭𑀢𑀸𑀬 𑀳𑀺 𑀅𑀪𑀺𑀭𑀼𑀳𑀺𑀢𑁆𑀯𑀸𑀧𑀺 𑀕𑀸𑀫𑀦𑁆𑀢𑀭𑁄𑀓𑁆𑀓𑀫𑀦𑁂, 𑀅𑀤𑁆𑀥𑀬𑁄𑀚𑀦𑀸𑀢𑀺𑀓𑁆𑀓𑀫𑁂 𑀯𑀸 𑀲𑀁𑀯𑁂𑀕𑀁 𑀧𑀝𑀺𑀮𑀪𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀯𑀸 𑀲𑀘𑁆𑀙𑀺𑀓𑀭𑁂𑀬𑁆𑀬, 𑀦𑀺𑀤𑁆𑀤𑀁 𑀯𑀸 𑀑𑀓𑁆𑀓𑀫𑁂𑀬𑁆𑀬, 𑀓𑀫𑁆𑀫𑀝𑁆𑀞𑀸𑀦𑀁 𑀯𑀸 𑀫𑀦𑀲𑀺 𑀓𑀭𑁄𑀦𑁆𑀢𑁄 𑀕𑀘𑁆𑀙𑁂𑀬𑁆𑀬, 𑀓𑀼𑀢𑁄 𑀘𑀲𑁆𑀲 𑀅𑀓𑀼𑀲𑀮𑀘𑀺𑀢𑁆𑀢𑀲𑀫𑀗𑁆𑀕𑀺𑀢𑀸, 𑀬𑁂𑀦𑀺𑀤𑀁 𑀲𑀺𑀓𑁆𑀔𑀸𑀧𑀤𑀁 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀮𑁄𑀓𑀯𑀚𑁆𑀚𑀜𑁆𑀘 𑀲𑀺𑀬𑀸𑀢𑀺.

𑀦𑀸𑀯𑀸𑀪𑀺𑀭𑀼𑀳𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.