𑁬. 𑀘𑀻𑀯𑀭𑀲𑀺𑀩𑁆𑀩𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀽𑀘𑀺𑀁 𑀧𑀯𑁂𑀲𑁂𑀢𑁆𑀯𑀸 𑀧𑀯𑁂𑀲𑁂𑀢𑁆𑀯𑀸 𑀦𑀻𑀳𑀭𑀡𑁂𑀢𑀺 𑀆𑀭𑀸𑀧𑀣𑁂 𑀆𑀭𑀸𑀧𑀣𑁂 𑀧𑀸𑀘𑀺𑀢𑁆𑀢𑀺𑀬𑀁. ‘‘𑀲𑀺𑀩𑁆𑀩𑀺𑀲𑁆𑀲𑀸𑀫𑀻’’𑀢𑀺 𑀧𑀦 𑀯𑀺𑀘𑀸𑀭𑁂𑀦𑁆𑀢𑀲𑁆𑀲, 𑀙𑀺𑀦𑁆𑀤𑀦𑁆𑀢𑀲𑁆𑀲𑀸𑀧𑀺 𑀤𑀼𑀓𑁆𑀓𑀝𑀁. 𑀲𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀯𑀺𑀚𑁆𑀛𑀺𑀢𑁆𑀯𑀸 𑀲𑀓𑀺𑀁 𑀦𑀻𑀳𑀭𑀦𑁆𑀢𑀲𑁆𑀲𑀸𑀢𑀺 𑀲𑀓𑀮𑀲𑀽𑀘𑀺𑀁 𑀅𑀦𑀻𑀳𑀭𑀦𑁆𑀢𑁄 𑀤𑀻𑀖𑀲𑀼𑀢𑁆𑀢𑀧𑁆𑀧𑀯𑁂𑀲𑀦𑀢𑁆𑀣𑀁 𑀲𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀯𑀺𑀚𑁆𑀛𑀺𑀢𑁆𑀯𑀸 𑀲𑀓𑀺𑀁 𑀦𑀻𑀳𑀭𑀦𑁆𑀢𑀲𑁆𑀲. ‘‘𑀲𑀺𑀩𑁆𑀩𑀸’’𑀢𑀺 𑀯𑀼𑀢𑁆𑀢𑁄𑀢𑀺 𑀲𑀓𑀺𑀁 ‘‘𑀘𑀻𑀯𑀭𑀁 𑀲𑀺𑀩𑁆𑀩𑀸’’𑀢𑀺 𑀯𑀼𑀢𑁆𑀢𑁄. 𑀦𑀺𑀝𑁆𑀞𑀸𑀧𑁂𑀢𑀻𑀢𑀺 𑀲𑀩𑁆𑀩𑀁 𑀲𑀽𑀘𑀺𑀓𑀫𑁆𑀫𑀁 𑀧𑀭𑀺𑀬𑁄𑀲𑀸𑀧𑁂𑀢𑀺. 𑀢𑀲𑁆𑀲 𑀆𑀭𑀸𑀧𑀣𑁂 𑀆𑀭𑀸𑀧𑀣𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀆𑀡𑀢𑁆𑀢𑀲𑁆𑀲 𑀲𑀽𑀘𑀺𑀁 𑀧𑀯𑁂𑀲𑁂𑀢𑁆𑀯𑀸 𑀧𑀯𑁂𑀲𑁂𑀢𑁆𑀯𑀸 𑀦𑀻𑀳𑀭𑀡𑁂 𑀏𑀓𑀫𑁂𑀓𑀁 𑀧𑀸𑀘𑀺𑀢𑁆𑀢𑀺𑀬𑀁.

𑀉𑀤𑀸𑀬𑀺𑀢𑁆𑀣𑁂𑀭𑀦𑁆𑀢𑀺 𑀮𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑀁. 𑀯𑀼𑀢𑁆𑀢𑀮𑀓𑁆𑀔𑀡𑀁 𑀲𑀺𑀩𑁆𑀩𑀦𑀁 𑀯𑀸 𑀲𑀺𑀩𑁆𑀩𑀸𑀧𑀦𑀁 𑀯𑀸𑀢𑀺 ‘‘𑀲𑀽𑀘𑀺𑀁 𑀧𑀯𑁂𑀲𑁂𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀮𑀓𑁆𑀔𑀡𑀁 𑀲𑀺𑀩𑁆𑀩𑀦𑀁 𑀯𑀸 𑀲𑀺𑀩𑁆𑀩𑀸𑀧𑀦𑀁 𑀯𑀸.

𑀘𑀻𑀯𑀭𑀲𑀺𑀩𑁆𑀩𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.