𑁧. 𑀘𑀻𑀯𑀭𑀯𑀕𑁆𑀕𑁄

𑁧. 𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁨-𑁪𑁬𑁩) 𑀦𑀺𑀝𑁆𑀞𑀺𑀢𑀜𑁆𑀘 𑀢𑀁 𑀘𑀻𑀯𑀭𑀜𑁆𑀘𑀸𑀢𑀺 𑀦𑀺𑀝𑁆𑀞𑀺𑀢𑀘𑀻𑀯𑀭𑀁, 𑀦𑀺𑀝𑁆𑀞𑀺𑀢𑁂 𑀆𑀦𑀺𑀲𑀁𑀲𑀫𑀽𑀮𑀓𑁂 𑀘𑀻𑀯𑀭𑁂, 𑀧𑀘𑁆𑀘𑀸𑀲𑀸𑀘𑀻𑀯𑀭𑁂 𑀘𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀢𑀁 𑀘𑀻𑀯𑀭𑀁 𑀓𑀭𑀡𑁂𑀦𑀧𑀺 𑀦𑀺𑀝𑁆𑀞𑀺𑀢𑀁 𑀳𑁄𑀢𑀺 𑀦𑀸𑀲𑀦𑀸𑀤𑀻𑀳𑀺𑀧𑀺, 𑀢𑀲𑁆𑀫𑀸 ‘‘𑀲𑀽𑀘𑀺𑀓𑀫𑁆𑀫𑀧𑀭𑀺𑀬𑁄𑀲𑀸𑀦𑁂𑀦 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀁 𑀓𑀺𑀜𑁆𑀘𑀺 𑀲𑀽𑀘𑀺𑀬𑀸 𑀓𑀢𑁆𑀢𑀩𑁆𑀩𑀁 𑀧𑀸𑀲𑀓𑀧𑀝𑁆𑀝𑀕𑀡𑁆𑀞𑀺𑀓𑀧𑀝𑁆𑀝𑀧𑀭𑀺𑀬𑁄𑀲𑀸𑀦𑀓𑀫𑁆𑀫𑀁, 𑀢𑀁 𑀲𑀽𑀘𑀺𑀓𑀫𑁆𑀫𑀧𑀭𑀺𑀬𑁄𑀲𑀸𑀦𑀁 𑀦𑀸𑀫, 𑀢𑁂𑀦. 𑀦𑀝𑁆𑀞𑀦𑁆𑀢𑀺 𑀘𑁄𑀭𑀸𑀤𑀻𑀳𑀺 𑀳𑀝𑀁. 𑀏𑀢𑀫𑁆𑀧𑀺 𑀳𑀺 𑀓𑀭𑀡𑀧𑀮𑀺𑀩𑁄𑀥𑀲𑁆𑀲 𑀦𑀺𑀝𑁆𑀞𑀺𑀢𑀢𑁆𑀢𑀸 ‘‘𑀦𑀺𑀝𑁆𑀞𑀺𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀦𑀝𑁆𑀞𑀦𑁆𑀢𑀺 𑀉𑀧𑀘𑀺𑀓𑀸𑀤𑀻𑀳𑀺 𑀔𑀸𑀤𑀺𑀢𑀁. 𑀤𑀟𑁆𑀠𑀦𑁆𑀢𑀺 𑀅𑀕𑁆𑀕𑀺𑀦𑀸 𑀤𑀟𑁆𑀠𑀁. 𑀘𑀻𑀯𑀭𑀸𑀲𑀸 𑀯𑀸 𑀉𑀧𑀘𑁆𑀙𑀺𑀦𑁆𑀦𑀸𑀢𑀺 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀓𑀼𑀮𑁂 𑀘𑀻𑀯𑀭𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀬𑀸 𑀘𑀻𑀯𑀭𑀸𑀲𑀸 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺, 𑀲𑀸 𑀉𑀧𑀘𑁆𑀙𑀺𑀦𑁆𑀦𑀸. 𑀏𑀢𑁂𑀲𑀫𑁆𑀧𑀺 𑀓𑀭𑀡𑀧𑀮𑀺𑀩𑁄𑀥𑀲𑁆𑀲𑁂𑀯 𑀦𑀺𑀝𑁆𑀞𑀺𑀢𑀢𑁆𑀢𑀸 𑀦𑀺𑀝𑁆𑀞𑀺𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀇𑀫𑁂𑀲𑀼 𑀯𑀸’’𑀢𑀺𑀆𑀤𑀺. 𑀏𑀢𑁂𑀦 𑀘𑀻𑀯𑀭𑀧𑀮𑀺𑀩𑁄𑀥𑀸𑀪𑀸𑀯𑁄 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀘𑀻𑀯𑀭𑀲𑁆𑀲 𑀓𑀭𑀡𑀧𑀮𑀺𑀩𑁄𑀥𑁂 𑀉𑀧𑀘𑁆𑀙𑀺𑀦𑁆𑀦𑁂𑀢𑀺 𑀅𑀢𑁆𑀣𑁄’’𑀢𑀺. 𑀓𑀣𑀫𑁂𑀢𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀅𑀢𑁆𑀣𑀢𑀓𑀣𑀺𑀦𑀲𑁆𑀲 𑀳𑀻’’𑀢𑀺𑀆𑀤𑀺. 𑀧𑀜𑁆𑀘𑀸𑀦𑀺𑀲𑀁𑀲𑁂 𑀅𑀜𑁆𑀜𑀢𑁆𑀣 𑀕𑀦𑁆𑀢𑀼𑀁 𑀅𑀤𑀢𑁆𑀯𑀸 𑀲𑀗𑁆𑀕𑀡𑁆𑀳𑀦𑀝𑁆𑀞𑁂𑀦 𑀓𑀣𑀺𑀦𑀁, 𑀣𑀺𑀭𑀦𑁆𑀢𑀺 𑀅𑀢𑁆𑀣𑁄, 𑀅𑀢𑁆𑀣𑀢𑀁 𑀓𑀣𑀺𑀦𑀁 𑀬𑁂𑀦 𑀲𑁄 𑀅𑀢𑁆𑀣𑀢𑀓𑀣𑀺𑀦𑁄, 𑀢𑀲𑁆𑀲 𑀅𑀢𑁆𑀣𑀢𑀓𑀣𑀺𑀦𑀲𑁆𑀲. 𑀳𑀻𑀢𑀺 𑀓𑀸𑀭𑀡𑀢𑁆𑀣𑁂 𑀦𑀺𑀧𑀸𑀢𑁄. 𑀢𑀸𑀯 𑀓𑀣𑀺𑀦𑀸𑀦𑀺𑀲𑀁𑀲𑀁 𑀮𑀪𑀢𑀻𑀢𑀺 𑀏𑀢𑁆𑀣 𑀬𑁄 𑀅𑀢𑁆𑀣𑀢𑀓𑀣𑀺𑀦𑁄 𑀪𑀺𑀓𑁆𑀔𑀽𑀢𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁, 𑀢𑀸𑀯 𑀲𑁄 𑀅𑀢𑁆𑀣𑀢𑀓𑀣𑀺𑀦𑁄 𑀪𑀺𑀓𑁆𑀔𑀽𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀅𑀦𑀸𑀫𑀦𑁆𑀢𑀘𑀸𑀭𑀸𑀤𑀺𑀓𑀁 𑀓𑀣𑀺𑀦𑀸𑀦𑀺𑀲𑀁𑀲𑀁 𑀮𑀪𑀢𑀻𑀢𑀺 𑀅𑀢𑁆𑀣𑁄. ‘‘𑀅𑀢𑁆𑀣𑀢𑀓𑀣𑀺𑀦𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺 𑀇𑀤𑀁 𑀯𑀸 ‘‘𑀅𑀢𑁆𑀣𑀢𑀓𑀣𑀺𑀦𑁄 𑀪𑀺𑀓𑁆𑀔𑀽’’𑀢𑀺 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑀁 𑀓𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀘𑀻𑀯𑀭𑀧𑀮𑀺𑀩𑁄𑀥𑁄 𑀆𑀯𑀸𑀲𑀧𑀮𑀺𑀩𑁄𑀥𑁄𑀢𑀺 𑀤𑁆𑀯𑁂 𑀧𑀮𑀺𑀩𑁄𑀥𑀸. 𑀢𑁂𑀲𑀼 𑀏𑀓𑀧𑀮𑀺𑀩𑁄𑀥𑁂𑀧𑀺 𑀲𑀢𑀺 𑀬𑀲𑁆𑀫𑀸 𑀅𑀦𑀸𑀫𑀦𑁆𑀢𑀘𑀸𑀭𑀸𑀤𑀺𑀓𑀁 𑀆𑀦𑀺𑀲𑀁𑀲𑀁 𑀮𑀪𑀢𑀺, 𑀦𑀸𑀲𑀢𑀺. 𑀓𑀲𑁆𑀫𑀸? ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺’’𑀦𑁆𑀢𑀺 𑀏𑀢𑀲𑁆𑀲 𑀘𑀻𑀯𑀭𑀲𑁆𑀲 𑀓𑀭𑀡𑀧𑀮𑀺𑀩𑁄𑀥𑁂 𑀉𑀧𑀘𑁆𑀙𑀺𑀦𑁆𑀦𑁂𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀻𑀢𑀺. 𑀲𑀗𑁆𑀖𑀲𑁆𑀲𑀸𑀢𑀺 𑀲𑀗𑁆𑀖𑁂𑀦. 𑀓𑀢𑁆𑀢𑀭𑀺 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀉𑀩𑁆𑀪𑀢𑁂𑀢𑀺 𑀅𑀝𑁆𑀞𑀦𑁆𑀦𑀁 𑀫𑀸𑀢𑀺𑀓𑀸𑀦𑀫𑀜𑁆𑀜𑀢𑀭𑁂𑀦, 𑀅𑀦𑁆𑀢𑀭𑀼𑀩𑁆𑀪𑀸𑀭𑁂𑀦 𑀯𑀸 𑀉𑀤𑁆𑀥𑀝𑁂.

𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀓𑀣𑀺𑀦𑁂. 𑀉𑀩𑁆𑀪𑀸𑀭𑁄 𑀉𑀤𑁆𑀥𑀭𑀡𑀁. 𑀧𑀼𑀭𑀺𑀫𑀯𑀲𑁆𑀲𑀁𑀯𑀼𑀝𑁆𑀞𑁂 𑀢𑀺𑀁𑀲𑀫𑀢𑁆𑀢𑁂 𑀧𑀸𑀯𑁂𑀬𑁆𑀬𑀓𑁂 𑀪𑀺𑀓𑁆𑀔𑀽 𑀉𑀤𑁆𑀤𑀺𑀲𑁆𑀲 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼’’𑀦𑁆𑀢𑀺 𑀓𑀣𑀺𑀦𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁩𑁦𑁬) 𑀪𑀕𑀯𑀢𑀸 𑀓𑀣𑀺𑀦𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 ‘‘𑀅𑀬𑀜𑁆𑀳𑀺 𑀓𑀣𑀺𑀦𑀢𑁆𑀣𑀸𑀭𑁄 𑀦𑀸𑀫…𑀧𑁂… 𑀅𑀦𑀼𑀜𑁆𑀜𑀸𑀢𑁄’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀼𑀭𑀺𑀫𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀦𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑀁 𑀅𑀓𑀢𑁆𑀯𑀸 𑀧𑀼𑀭𑀺𑀫𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀯𑀼𑀝𑁆𑀞𑀯𑀲𑁆𑀲𑀯𑀲𑁂𑀦 𑀢𑀸𑀯 𑀧𑀼𑀭𑀺𑀫𑀺𑀓𑀸𑀬 𑀯𑀲𑁆𑀲𑀁 𑀉𑀧𑀕𑀢𑀸𑀬𑁂𑀯 𑀓𑀣𑀺𑀦𑀢𑁆𑀣𑀸𑀭𑀁 𑀮𑀪𑀦𑁆𑀢𑀺, 𑀦 𑀧𑀘𑁆𑀙𑀺𑀫𑀺𑀓𑀸𑀬 𑀉𑀧𑀕𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀯𑀼𑀝𑁆𑀞𑀯𑀲𑁆𑀲𑀯𑀲𑁂𑀦 𑀢𑀸𑀯 𑀏𑀯𑀁 𑀳𑁄𑀢𑀼, 𑀕𑀡𑀦𑀯𑀲𑁂𑀦 𑀢𑀁 𑀓𑀺𑀢𑁆𑀢𑀓𑀸 𑀮𑀪𑀦𑁆𑀢𑀻𑀢𑀺 𑀆𑀳 ‘‘𑀲𑁄’’𑀢𑀺𑀆𑀤𑀺. 𑀲𑁄𑀢𑀺 𑀓𑀣𑀺𑀦𑀢𑁆𑀣𑀸𑀭𑁄. 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦𑀸𑀢𑀺 𑀕𑀡𑀦𑀯𑀲𑁂𑀦 𑀧𑀘𑁆𑀙𑀺𑀫𑀓𑁄𑀝𑀺𑀬𑀸. 𑀧𑀜𑁆𑀘𑀦𑁆𑀦𑀁 𑀚𑀦𑀸𑀦𑀁 𑀯𑀝𑁆𑀝𑀢𑀻𑀢𑀺 𑀧𑀘𑁆𑀙𑀺𑀫𑀓𑁄𑀝𑀺𑀬𑀸 𑀘𑀢𑁆𑀢𑀸𑀭𑁄 𑀓𑀣𑀺𑀦𑀤𑀼𑀲𑁆𑀲𑀲𑁆𑀲 𑀤𑀸𑀬𑀓𑀸, 𑀏𑀓𑁄 𑀧𑀝𑀺𑀕𑁆𑀕𑀸𑀳𑀓𑁄𑀢𑀺 𑀧𑀜𑁆𑀘𑀦𑁆𑀦𑀁 𑀚𑀦𑀸𑀦𑀁 𑀯𑀝𑁆𑀝𑀢𑀺. 𑀓𑁂𑀘𑀺 𑀧𑀦 ‘‘𑀧𑀜𑁆𑀘𑀯𑀕𑁆𑀕𑀓𑀭𑀡𑀻𑀬𑀢𑁆𑀢𑀸 ‘𑀧𑀜𑁆𑀘𑀦𑁆𑀦𑀁 𑀚𑀦𑀸𑀦𑀁 𑀯𑀝𑁆𑀝𑀢𑀻’𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁 ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁆𑀯𑀸𑀬𑀁 𑀘𑀢𑀼𑀯𑀕𑁆𑀕𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀞𑀧𑁂𑀢𑁆𑀯𑀸 𑀢𑀻𑀡𑀺 𑀓𑀫𑁆𑀫𑀸𑀦𑀺 𑀉𑀧𑀲𑀫𑁆𑀧𑀤𑀁 𑀧𑀯𑀸𑀭𑀡𑀁 𑀅𑀩𑁆𑀪𑀸𑀦’’𑀦𑁆𑀢𑀺 𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁩𑁮𑁮) 𑀯𑀼𑀢𑁆𑀢𑀢𑁆𑀢𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀯𑀼𑀝𑁆𑀞𑀯𑀲𑁆𑀲𑀯𑀲𑁂𑀦 𑀧𑀼𑀭𑀺𑀫𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀅𑀦𑀜𑁆𑀜𑀸𑀢𑁄, 𑀬𑀲𑁆𑀫𑀸 𑀘 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀧𑀜𑁆𑀘𑀦𑁆𑀦𑀁 𑀚𑀦𑀸𑀦𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂. 𑀆𑀦𑀺𑀲𑀁𑀲𑁂𑀢𑀺 𑀅𑀦𑀸𑀫𑀦𑁆𑀢𑀘𑀸𑀭𑀸𑀤𑀺𑀓𑁂 𑀓𑀣𑀺𑀦𑀸𑀦𑀺𑀲𑀁𑀲𑁂. 𑀅𑀣 𑀧𑀦 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀯𑀲𑁆𑀲𑀁 𑀉𑀧𑀕𑀢𑀸, 𑀏𑀓𑁄 𑀧𑀭𑀺𑀧𑀼𑀡𑁆𑀡𑀯𑀲𑁆𑀲𑁄 𑀲𑀸𑀫𑀡𑁂𑀭𑁄 𑀲𑀘𑁂 𑀧𑀘𑁆𑀙𑀺𑀫𑀺𑀓𑀸𑀬 𑀉𑀧𑀲𑀫𑁆𑀧𑀚𑁆𑀚𑀢𑀺, 𑀕𑀡𑀧𑀽𑀭𑀓𑁄 𑀘𑁂𑀯 𑀳𑁄𑀢𑀺, 𑀆𑀦𑀺𑀲𑀁𑀲𑀜𑁆𑀘 𑀮𑀪𑀢𑀺. 𑀢𑀬𑁄 𑀪𑀺𑀓𑁆𑀔𑀽, 𑀤𑁆𑀯𑁂 𑀲𑀸𑀫𑀡𑁂𑀭𑀸, 𑀤𑁆𑀯𑁂 𑀪𑀺𑀓𑁆𑀔𑀽, 𑀢𑀬𑁄 𑀲𑀸𑀫𑀡𑁂𑀭𑀸, 𑀏𑀓𑁄 𑀪𑀺𑀓𑁆𑀔𑀼, 𑀘𑀢𑁆𑀢𑀸𑀭𑁄 𑀲𑀸𑀫𑀡𑁂𑀭𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀔𑀦𑁆𑀥𑀓𑁂 𑀯𑀼𑀢𑁆𑀢𑀸𑀬 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀬𑀸𑀢𑀺 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀇𑀤𑀁 𑀲𑀗𑁆𑀖𑀲𑁆𑀲 𑀓𑀣𑀺𑀦𑀤𑀼𑀲𑁆𑀲𑀁 𑀉𑀧𑁆𑀧𑀦𑁆𑀦𑀁. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀫𑀁 𑀓𑀣𑀺𑀦𑀤𑀼𑀲𑁆𑀲𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀤𑁂𑀬𑁆𑀬 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁, 𑀏𑀲𑀸 𑀜𑀢𑁆𑀢𑀺. 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀇𑀤𑀁 𑀲𑀗𑁆𑀖𑀲𑁆𑀲 𑀓𑀣𑀺𑀦𑀤𑀼𑀲𑁆𑀲𑀁 𑀉𑀧𑁆𑀧𑀦𑁆𑀦𑀁, 𑀲𑀗𑁆𑀖𑁄 𑀇𑀫𑀁 𑀓𑀣𑀺𑀦𑀤𑀼𑀲𑁆𑀲𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁂𑀢𑀺 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀫𑀲𑁆𑀲 𑀓𑀣𑀺𑀦𑀤𑀼𑀲𑁆𑀲𑀲𑁆𑀲 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀸𑀦𑀁 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁, 𑀲𑁄 𑀢𑀼𑀡𑁆𑀳𑀲𑁆𑀲. 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬. 𑀤𑀺𑀦𑁆𑀦𑀁 𑀇𑀤𑀁 𑀲𑀗𑁆𑀖𑁂𑀦 𑀓𑀣𑀺𑀦𑀤𑀼𑀲𑁆𑀲𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁, 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺 (𑀫𑀳𑀸𑀯. 𑁩𑁦𑁭) 𑁋

𑀏𑀯𑀁 𑀓𑀣𑀺𑀦𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀸𑀬 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀬. 𑀓𑀣𑀺𑀦𑀢𑁆𑀣𑀸𑀭𑀸𑀭𑀳𑀲𑁆𑀲𑀸𑀢𑀺 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁 𑀪𑀩𑁆𑀩𑀲𑁆𑀲. 𑀲𑁄 𑀘 𑀔𑁄 𑀧𑀼𑀩𑁆𑀩𑀓𑀭𑀡𑀚𑀸𑀦𑀦𑀸𑀤𑀻𑀳𑀺 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 ‘‘𑀅𑀝𑁆𑀞𑀥𑀫𑁆𑀫𑀓𑁄𑀯𑀺𑀤𑁄 𑀪𑀺𑀓𑁆𑀔𑀼, 𑀓𑀣𑀺𑀦𑀢𑁆𑀣𑀸𑀭𑀫𑀭𑀳𑀢𑀻’’𑀢𑀺. 𑀧𑀭𑀺𑀯𑀸𑀭𑁂𑀧𑀺 (𑀧𑀭𑀺. 𑁪𑁦𑁯) 𑀯𑀼𑀢𑁆𑀢𑀁 𑁋

‘‘𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀪𑀩𑁆𑀩𑁄 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁. 𑀓𑀢𑀫𑁂𑀳𑀺 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀪𑀩𑁆𑀩𑁄 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁? 𑀧𑀼𑀩𑁆𑀩𑀓𑀭𑀡𑀁 𑀚𑀸𑀦𑀸𑀢𑀺, 𑀧𑀘𑁆𑀘𑀼𑀤𑁆𑀥𑀸𑀭𑀁 𑀚𑀸𑀦𑀸𑀢𑀺, 𑀅𑀥𑀺𑀝𑁆𑀞𑀸𑀦𑀁 𑀚𑀸𑀦𑀸𑀢𑀺, 𑀅𑀢𑁆𑀣𑀸𑀭𑀁 𑀚𑀸𑀦𑀸𑀢𑀺, 𑀫𑀸𑀢𑀺𑀓𑀁 𑀚𑀸𑀦𑀸𑀢𑀺, 𑀧𑀮𑀺𑀩𑁄𑀥𑀁 𑀚𑀸𑀦𑀸𑀢𑀺, 𑀉𑀤𑁆𑀥𑀸𑀭𑀁 𑀚𑀸𑀦𑀸𑀢𑀺, 𑀆𑀦𑀺𑀲𑀁𑀲𑀁 𑀚𑀸𑀦𑀸𑀢𑀺, 𑀇𑀫𑁂𑀳𑀺 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀪𑀩𑁆𑀩𑁄 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼’’𑀦𑁆𑀢𑀺.

𑀏𑀢𑁆𑀣 𑀘 𑀧𑀼𑀩𑁆𑀩𑀓𑀭𑀡𑀁 𑀦𑀸𑀫 𑀥𑁄𑀯𑀦𑀯𑀺𑀘𑀸𑀭𑀡𑀘𑁆𑀙𑁂𑀤𑀦𑀩𑀦𑁆𑀥𑀦𑀲𑀺𑀩𑁆𑀩𑀦𑀭𑀚𑀦𑀓𑀧𑁆𑀧𑀓𑀭𑀡𑀁. 𑀧𑀘𑁆𑀘𑀼𑀤𑁆𑀥𑀸𑀭𑁄 𑀦𑀸𑀫 𑀧𑀼𑀭𑀸𑀡𑀲𑀗𑁆𑀖𑀸𑀝𑀺𑀆𑀤𑀻𑀦𑀁 𑀧𑀘𑁆𑀘𑀼𑀤𑁆𑀥𑀭𑀡𑀁. 𑀅𑀥𑀺𑀝𑁆𑀞𑀸𑀦𑀁 𑀦𑀸𑀫 𑀓𑀣𑀺𑀦𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀁. 𑀅𑀢𑁆𑀣𑀸𑀭𑁄 𑀦𑀸𑀫 𑀓𑀣𑀺𑀦𑀢𑁆𑀣𑀸𑀭𑁄. 𑀫𑀸𑀢𑀺𑀓𑀸 𑀦𑀸𑀫 𑀅𑀝𑁆𑀞 𑀫𑀸𑀢𑀺𑀓𑀸. 𑀧𑀮𑀺𑀩𑁄𑀥𑁄 𑀦𑀸𑀫 𑀆𑀯𑀸𑀲𑀧𑀮𑀺𑀩𑁄𑀥𑁄 𑀘𑀻𑀯𑀭𑀧𑀮𑀺𑀩𑁄𑀥𑁄𑀢𑀺 𑀤𑁆𑀯𑁂 𑀧𑀮𑀺𑀩𑁄𑀥𑀸. 𑀉𑀤𑁆𑀥𑀸𑀭𑁄 𑀦𑀸𑀫 𑀧𑀓𑁆𑀓𑀫𑀦𑀦𑁆𑀢𑀺𑀓𑀸𑀤𑀬𑁄. 𑀆𑀦𑀺𑀲𑀁𑀲𑁄 𑀦𑀸𑀫 𑀧𑀜𑁆𑀘𑀸𑀦𑀺𑀲𑀁𑀲𑀸.

𑀬𑀁 𑀧𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁩𑁦𑁬) 𑀯𑀼𑀢𑁆𑀢𑀁 ‘‘𑀓𑀣𑀺𑀦𑀁 𑀧𑀦 𑀓𑁂𑀦 𑀅𑀢𑁆𑀣𑀭𑀺𑀢𑀩𑁆𑀩𑀁? 𑀬𑀲𑁆𑀲 𑀲𑀗𑁆𑀖𑁄 𑀓𑀣𑀺𑀦𑀘𑀻𑀯𑀭𑀁 𑀤𑁂𑀢𑀺, 𑀲𑀗𑁆𑀖𑁂𑀦 𑀧𑀦 𑀓𑀲𑁆𑀲 𑀤𑀸𑀢𑀩𑁆𑀩𑀁? 𑀬𑁄 𑀚𑀺𑀡𑁆𑀡𑀘𑀻𑀯𑀭𑁄 𑀳𑁄𑀢𑀺, 𑀲𑀘𑁂 𑀩𑀳𑀽 𑀚𑀺𑀡𑁆𑀡𑀘𑀻𑀯𑀭𑀸 𑀳𑁄𑀦𑁆𑀢𑀺, 𑀯𑀼𑀟𑁆𑀠𑀲𑁆𑀲 𑀤𑀸𑀢𑀩𑁆𑀩𑀁. 𑀯𑀼𑀟𑁆𑀠𑁂𑀲𑀼𑀧𑀺 𑀬𑁄 𑀫𑀳𑀸𑀧𑀭𑀺𑀲𑁄 𑀢𑀤𑀳𑁂𑀯 𑀘𑀻𑀯𑀭𑀁 𑀓𑀢𑁆𑀯𑀸 𑀅𑀢𑁆𑀣𑀭𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀲 𑀤𑀸𑀢𑀩𑁆𑀩𑀁. 𑀲𑀘𑁂 𑀯𑀼𑀟𑁆𑀠𑁄 𑀦 𑀲𑀓𑁆𑀓𑁄𑀢𑀺, 𑀦𑀯𑀓𑀢𑀭𑁄 𑀲𑀓𑁆𑀓𑁄𑀢𑀺, 𑀢𑀲𑁆𑀲 𑀤𑀸𑀢𑀩𑁆𑀩𑀁. 𑀅𑀧𑀺𑀘 𑀲𑀗𑁆𑀖𑁂𑀦 𑀫𑀳𑀸𑀣𑁂𑀭𑀲𑁆𑀲 𑀲𑀗𑁆𑀕𑀳𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 ‘𑀢𑀼𑀫𑁆𑀳𑁂, 𑀪𑀦𑁆𑀢𑁂, 𑀕𑀡𑁆𑀳𑀣, 𑀫𑀬𑀁 𑀓𑀢𑁆𑀯𑀸 𑀤𑀲𑁆𑀲𑀸𑀫𑀸’𑀢𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺, 𑀢𑀫𑁆𑀧𑀺 𑀓𑀣𑀺𑀦𑀢𑁆𑀣𑀸𑀭𑀸𑀭𑀳𑀁𑀬𑁂𑀯 𑀕𑀳𑁂𑀢𑁆𑀯𑀸𑀯 𑀤𑀸𑀢𑀩𑁆𑀩𑀁. 𑀤𑁂𑀦𑁆𑀢𑁂𑀦 𑀧𑀦 𑀢𑀻𑀲𑀼 𑀘𑀻𑀯𑀭𑁂𑀲𑀼 𑀬𑀁 𑀬𑀁 𑀚𑀺𑀡𑁆𑀡𑀁 𑀳𑁄𑀢𑀺, 𑀢𑀁 𑀢𑀤𑀢𑁆𑀣𑀸𑀬 𑀤𑀸𑀢𑀩𑁆𑀩𑀁. 𑀧𑀓𑀢𑀺𑀬𑀸 𑀤𑀼𑀧𑀝𑁆𑀝𑀘𑀻𑀯𑀭𑀲𑁆𑀲 𑀤𑀼𑀧𑀝𑁆𑀝𑀢𑁆𑀣𑀸𑀬𑁂𑀯 𑀤𑀸𑀢𑀩𑁆𑀩𑀁. 𑀲𑀘𑁂𑀧𑀺𑀲𑁆𑀲 𑀏𑀓𑀧𑀝𑁆𑀝𑀘𑀻𑀯𑀭𑀁 𑀖𑀦𑀁 𑀳𑁄𑀢𑀺, 𑀓𑀣𑀺𑀦𑀲𑀸𑀝𑀓𑁄 𑀘 𑀧𑁂𑀮𑀯𑁄, 𑀲𑀸𑀭𑀼𑀧𑁆𑀧𑀢𑁆𑀣𑀸𑀬 𑀤𑀼𑀧𑀝𑁆𑀝𑀧𑁆𑀧𑀳𑁄𑀦𑀓𑀫𑁂𑀯 𑀤𑀸𑀢𑀩𑁆𑀩𑀁. ‘‘𑀅𑀳𑀁 𑀅𑀮𑀪𑀦𑁆𑀢𑁄 𑀏𑀓𑀧𑀝𑁆𑀝𑀁 𑀧𑀸𑀭𑀼𑀧𑀸𑀫𑀻’’𑀢𑀺 𑀯𑀤𑀦𑁆𑀢𑀲𑁆𑀲𑀸𑀧𑀺 𑀤𑀼𑀧𑀝𑁆𑀝𑀁 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀬𑁄 𑀧𑀦 𑀮𑁄𑀪𑀧𑀓𑀢𑀺𑀓𑁄 𑀳𑁄𑀢𑀺, 𑀢𑀲𑁆𑀲 𑀦 𑀤𑀸𑀢𑀩𑁆𑀩𑀁. 𑀢𑁂𑀦𑀸𑀧𑀺 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑁆𑀯𑀸 𑀧𑀘𑁆𑀙𑀸 𑀲𑀺𑀩𑁆𑀩𑁂𑀢𑁆𑀯𑀸 ‘‘𑀤𑁆𑀯𑁂 𑀘𑀻𑀯𑀭𑀸𑀦𑀺 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀦 𑀕𑀳𑁂𑀢𑀩𑁆𑀩𑀁.

𑀢𑁂𑀦𑀸𑀢𑀺 𑀓𑀣𑀺𑀦𑀢𑁆𑀣𑀸𑀭𑀓𑁂𑀦 𑀪𑀺𑀓𑁆𑀔𑀼𑀦𑀸. 𑀢𑀤𑀳𑁂𑀯𑀸𑀢𑀺 𑀢𑀲𑁆𑀫𑀺𑀁𑀬𑁂𑀯 𑀤𑀺𑀯𑀲𑁂. 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸𑀦𑀺 𑀯𑀸 𑀔𑀡𑁆𑀟𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀬𑀣𑀸 𑀧𑀜𑁆𑀘𑀔𑀡𑁆𑀟𑀺𑀓𑀸𑀤𑀻𑀦𑀁 𑀲𑀗𑁆𑀖𑀸𑀝𑀺𑀆𑀤𑀻𑀦𑀁 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑀧𑁆𑀧𑀳𑁄𑀦𑀓𑀸𑀦𑀺 𑀫𑀳𑀸𑀫𑀡𑁆𑀟𑀮𑀅𑀟𑁆𑀠𑀫𑀡𑁆𑀟𑀮𑀸𑀤𑀺𑀯𑀲𑁂𑀦 𑀧𑀜𑁆𑀘 𑀔𑀡𑁆𑀟𑀸𑀦𑀺 𑀯𑀸 𑀅𑀢𑀺𑀭𑁂𑀓𑀸𑀦𑀺 𑀯𑀸 𑀲𑀢𑁆𑀢𑀸𑀤𑀺𑀔𑀡𑁆𑀟𑀸𑀦𑀺 𑀳𑁄𑀦𑁆𑀢𑀺, 𑀏𑀯𑀁 𑀙𑀺𑀦𑁆𑀤𑀺𑀢𑁆𑀯𑀸. 𑀢𑀲𑁆𑀫𑀺𑀜𑁆𑀘 𑀓𑀣𑀺𑀦𑀘𑀻𑀯𑀭𑁂 𑀓𑀭𑀺𑀬𑀫𑀸𑀦𑁂 ‘‘𑀅𑀳𑀁 𑀣𑁂𑀭𑁄’’𑀢𑀺 𑀯𑀸 ‘‘𑀩𑀳𑀼𑀲𑁆𑀲𑀼𑀢𑁄’’𑀢𑀺 𑀯𑀸 𑀏𑀓𑁂𑀦𑀸𑀧𑀺 𑀅𑀓𑀸𑀢𑀼𑀁 𑀦 𑀮𑀩𑁆𑀪𑀢𑀺. 𑀅𑀦𑀸𑀤𑀭𑀺𑀬𑁂𑀦 𑀅𑀓𑀭𑁄𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀢𑀲𑁆𑀫𑀸 𑀲𑀩𑁆𑀩𑁂𑀳𑁂𑀯 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀥𑁄𑀯𑀦𑀙𑁂𑀤𑀦𑀲𑀺𑀩𑁆𑀩𑀦𑀭𑀚𑀦𑀸𑀦𑀺 𑀦𑀺𑀝𑁆𑀞𑀸𑀧𑁂𑀢𑀩𑁆𑀩𑀸𑀦𑀺. 𑀢𑁂𑀦𑀸𑀳 ‘‘𑀲𑁂𑀲𑀪𑀺𑀓𑁆𑀔𑀽𑀳𑀺𑀧𑀺 𑀢𑀲𑁆𑀲 𑀲𑀳𑀸𑀬𑁂𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀓𑀢𑀘𑀻𑀯𑀭𑀫𑁂𑀯𑀸𑀢𑀺 𑀦𑀺𑀝𑁆𑀞𑀺𑀢𑀧𑀭𑀺𑀓𑀫𑁆𑀫𑀫𑁂𑀯 𑀓𑀣𑀺𑀦𑀤𑀼𑀲𑁆𑀲𑀁. 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀅𑀦𑁆𑀢𑀭𑀯𑀸𑀲𑀓𑁄𑀧𑀺 𑀙𑀺𑀦𑁆𑀤𑀺𑀢𑁆𑀯𑀸𑀯 𑀓𑀸𑀢𑀩𑁆𑀩𑁄 𑀅𑀜𑁆𑀜𑀣𑀸 𑀅𑀢𑁆𑀣𑀸𑀭𑀯𑀺𑀧𑀢𑁆𑀢𑀺𑀢𑁄. 𑀬𑀣𑀸𑀳 𑁋

‘‘𑀓𑀣𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀅𑀦𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁? 𑀦 𑀉𑀮𑁆𑀮𑀺𑀔𑀺𑀢𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁…𑀧𑁂… 𑀦 𑀅𑀜𑁆𑀜𑀢𑁆𑀭 𑀧𑀜𑁆𑀘𑀓𑁂𑀦 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀓𑁂𑀦 𑀯𑀸 𑀢𑀤𑀳𑁂𑀯 𑀲𑀜𑁆𑀙𑀺𑀦𑁆𑀦𑁂𑀦𑀸’’𑀢𑀺 (𑀫𑀳𑀸𑀯. 𑁩𑁦𑁮).

𑀢𑁂𑀦𑁂𑀯𑀸𑀳 ‘‘𑀅𑀘𑁆𑀙𑀺𑀦𑁆𑀦𑀸𑀲𑀺𑀩𑁆𑀩𑀺𑀢𑀁 𑀧𑀦 𑀦 𑀯𑀝𑁆𑀝𑀢𑀻’’𑀢𑀺. 𑀢𑁂𑀦 𑀪𑀺𑀓𑁆𑀔𑀼𑀦𑀸𑀢𑀺 𑀅𑀢𑁆𑀣𑀸𑀭𑀓𑁂𑀦 𑀪𑀺𑀓𑁆𑀔𑀼𑀦𑀸. 𑀅𑀢𑁆𑀣𑀭𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑀭𑀡𑀁 𑀓𑀸𑀢𑀩𑁆𑀩𑀁. 𑀢𑀜𑁆𑀘 𑀔𑁄 𑀢𑀣𑀸𑀯𑀘𑀻𑀪𑁂𑀤𑀓𑀭𑀡𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀣𑀸𑀳 𑁋

‘‘𑀲𑀘𑁂 𑀲𑀗𑁆𑀖𑀸𑀝𑀺𑀬𑀸 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀧𑁄𑀭𑀸𑀡𑀺𑀓𑀸 𑀲𑀗𑁆𑀖𑀸𑀝𑀺 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩𑀸, 𑀦𑀯𑀸 𑀲𑀗𑁆𑀖𑀸𑀝𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀸, ‘𑀇𑀫𑀸𑀬 𑀲𑀗𑁆𑀖𑀸𑀝𑀺𑀬𑀸 𑀓𑀣𑀺𑀦𑀁 𑀅𑀢𑁆𑀣𑀭𑀸𑀫𑀻’𑀢𑀺 𑀯𑀸𑀘𑀸 𑀪𑀺𑀦𑁆𑀤𑀺𑀢𑀩𑁆𑀩𑀸’’𑀢𑀺 (𑀧𑀭𑀺. 𑁪𑁧𑁩) 𑁋

𑀯𑀺𑀢𑁆𑀣𑀸𑀭𑁄. ‘‘𑀪𑀦𑁆𑀢𑁂, 𑀆𑀯𑀼𑀲𑁄’’𑀢𑀺 𑀘 ‘‘𑀅𑀦𑀼𑀫𑁄𑀤𑀣, 𑀅𑀦𑀼𑀫𑁄𑀤𑀸𑀳𑀻’’𑀢𑀺 𑀘 𑀯𑀘𑀦𑀪𑁂𑀤𑀁 𑀲𑀦𑁆𑀥𑀸𑀬 ‘‘𑀣𑁂𑀭𑀸𑀦𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀏𑀯𑀁 𑀅𑀢𑁆𑀣𑀸𑀭𑀓𑁂𑀦 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀯𑀺𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀦𑀼𑀫𑁄𑀤𑀓𑁂𑀳𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀳𑀺𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀅𑀦𑀼𑀫𑁄𑀤𑀸𑀫𑀸’’𑀢𑀺 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑀺 𑀕𑀸𑀭𑀯𑀯𑀲𑁂𑀦 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀏𑀯𑀁 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀏𑀓𑀓𑁂𑀦 ‘‘𑀅𑀦𑀼𑀫𑁄𑀤𑀸𑀫𑀸’’𑀢𑀺 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺, ‘‘𑀅𑀦𑀼𑀫𑁄𑀤𑀸𑀫𑀺’’𑀘𑁆𑀘𑁂𑀯 𑀯𑀢𑁆𑀢𑀩𑁆𑀩𑀦𑁆𑀢𑀺 𑀯𑀤𑀦𑁆𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀇𑀤𑀸𑀦𑀺 𑀓𑀣𑀺𑀦𑀸𑀦𑀺𑀲𑀁𑀲𑁂 𑀤𑀲𑁆𑀲𑁂𑀢𑀼𑀁 𑀪𑀽𑀫𑀺𑀁 𑀯𑀺𑀘𑀸𑀭𑀬𑀦𑁆𑀢𑁄 ‘‘𑀧𑀼𑀭𑀺𑀫𑀯𑀲𑁆𑀲𑀁𑀯𑀼𑀝𑁆𑀞𑁂𑀲𑀼𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑁂𑀲𑀁𑀬𑁂𑀯𑀸𑀢𑀺 𑀅𑀢𑁆𑀣𑀸𑀭𑀓𑀅𑀦𑀼𑀫𑁄𑀤𑀓𑀸𑀦𑀁𑀬𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀭𑀺𑀯𑀸𑀭𑁂 ‘‘𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁 𑀅𑀢𑁆𑀣𑀸𑀭𑀓𑀲𑁆𑀲 𑀘 𑀅𑀦𑀼𑀫𑁄𑀤𑀓𑀲𑁆𑀲 𑀘𑀸’’𑀢𑀺 (𑀧𑀭𑀺. 𑁪𑁦𑁩). 𑀢𑁂𑀢𑀺 𑀅𑀢𑁆𑀣𑀸𑀭𑀓𑀅𑀦𑀼𑀫𑁄𑀤𑀓𑀸. 𑀢𑀢𑁄 𑀧𑀝𑁆𑀞𑀸𑀬𑀸𑀢𑀺 𑀅𑀢𑁆𑀣𑀸𑀭𑀸𑀦𑀼𑀫𑁄𑀤𑀦𑀢𑁄 𑀧𑀝𑁆𑀞𑀸𑀬. 𑀬𑀸𑀯 𑀓𑀣𑀺𑀦𑀲𑁆𑀲𑀼𑀩𑁆𑀪𑀸𑀭𑀸𑀢𑀺 𑀦 𑀓𑁂𑀯𑀮𑀁 𑀘𑀻𑀯𑀭𑀫𑀸𑀲𑁂𑀬𑁂𑀯, 𑀅𑀣 𑀔𑁄 𑀅𑀝𑁆𑀞𑀦𑁆𑀦𑀁 𑀫𑀸𑀢𑀺𑀓𑀸𑀦𑀁 𑀅𑀜𑁆𑀜𑀢𑀭𑁂𑀦 𑀯𑀸 𑀅𑀦𑁆𑀢𑀭𑀼𑀩𑁆𑀪𑀸𑀭𑁂𑀦 𑀯𑀸 𑀬𑀸𑀯 𑀓𑀣𑀺𑀦𑀲𑁆𑀲𑀼𑀩𑁆𑀪𑀸𑀭𑀸 𑀧𑀜𑁆𑀘𑀸𑀦𑀺𑀲𑀁𑀲𑁂 𑀮𑀪𑀦𑁆𑀢𑀺, 𑀉𑀤𑁆𑀥𑀝𑁂 𑀧𑀦 𑀦 𑀮𑀪𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀢𑁂 𑀧𑀜𑁆𑀘𑀸𑀦𑀺𑀲𑀁𑀲𑁂 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀸𑀫𑀦𑁆𑀢𑀘𑀸𑀭𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀸𑀫𑀦𑁆𑀢𑀘𑀸𑀭𑁄 𑀦𑀸𑀫 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑁂𑀦 𑀦𑀺𑀫𑀦𑁆𑀢𑀺𑀢𑀲𑁆𑀲 𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀸 𑀓𑀼𑀮𑁂𑀲𑀼 𑀘𑀸𑀭𑀺𑀢𑁆𑀢𑀸𑀧𑀚𑁆𑀚𑀦𑀁. 𑀅𑀲𑀫𑀸𑀤𑀸𑀦𑀘𑀸𑀭𑁄 𑀦𑀸𑀫 𑀦𑀸𑀫𑁂𑀦𑀸𑀥𑀺𑀝𑁆𑀞𑀺𑀢𑀲𑁆𑀲 𑀘𑀻𑀯𑀭𑀲𑁆𑀲 𑀅𑀲𑀫𑀸𑀤𑀸𑀦𑀘𑀭𑀡𑀁, 𑀦𑀸𑀫𑁂𑀦𑀸𑀥𑀺𑀝𑁆𑀞𑀺𑀢𑀸𑀦𑀁 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀫𑀜𑁆𑀜𑀢𑀭𑀁 𑀘𑀻𑀯𑀭𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀅𑀭𑀼𑀡𑀼𑀝𑁆𑀞𑀸𑀧𑀦𑀦𑁆𑀢𑀺 𑀅𑀢𑁆𑀣𑁄, 𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀸𑀯𑀤𑀢𑁆𑀣𑀘𑀻𑀯𑀭𑀦𑁆𑀢𑀺 𑀬𑀸𑀯𑀢𑀸 𑀘𑀻𑀯𑀭𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀢𑀸𑀯𑀢𑀓𑀁 𑀅𑀦𑀥𑀺𑀝𑁆𑀞𑀺𑀢𑀁 𑀅𑀯𑀺𑀓𑀧𑁆𑀧𑀺𑀢𑀁 𑀘𑀻𑀯𑀭𑀥𑀸𑀭𑀡𑀁, 𑀤𑀲𑀸𑀳𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀘𑀻𑀯𑀭𑀲𑁆𑀲 𑀞𑀧𑀦𑀦𑁆𑀢𑀺 𑀅𑀢𑁆𑀣𑁄. 𑀕𑀡𑀲𑁆𑀲 𑀪𑁄𑀚𑀦𑀁 𑀕𑀡𑀪𑁄𑀚𑀦𑀁. 𑀕𑀡𑁄𑀢𑀺 𑀘𑁂𑀢𑁆𑀣 𑀘𑀢𑁆𑀢𑀸𑀭𑁄 𑀯𑀸 𑀢𑀢𑀼𑀢𑁆𑀢𑀭𑀺 𑀯𑀸 𑀪𑀺𑀓𑁆𑀔𑀽. 𑀢𑁂𑀲𑀁 𑀯𑀺𑀜𑁆𑀜𑀢𑁆𑀢𑀺𑀢𑁄 𑀯𑀸 𑀦𑀺𑀫𑀦𑁆𑀢𑀦𑀢𑁄 𑀯𑀸 𑀮𑀤𑁆𑀥𑀲𑁆𑀲 𑀑𑀤𑀦𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀅𑀜𑁆𑀜𑀢𑀭𑀪𑁄𑀚𑀦𑀲𑁆𑀲 𑀲𑀳 𑀕𑀳𑀡𑀦𑁆𑀢𑀺 𑀅𑀢𑁆𑀣𑁄. 𑀬𑁄 𑀘 𑀢𑀢𑁆𑀣 𑀘𑀻𑀯𑀭𑀼𑀧𑁆𑀧𑀸𑀤𑁄𑀢𑀺 𑀢𑀢𑁆𑀣 𑀓𑀣𑀺𑀦𑀢𑁆𑀣𑀢𑀲𑀻𑀫𑀸𑀬 𑀫𑀢𑀓𑀘𑀻𑀯𑀭𑀁 𑀯𑀸 𑀳𑁄𑀢𑀼, 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀤𑀺𑀦𑁆𑀦𑀁 𑀯𑀸 𑀲𑀗𑁆𑀖𑀺𑀓𑁂𑀦 𑀢𑀢𑁆𑀭𑀼𑀧𑁆𑀧𑀸𑀤𑁂𑀦 𑀆𑀪𑀢𑀁 𑀯𑀸 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀬𑀁 𑀲𑀗𑁆𑀖𑀺𑀓𑀁 𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀢𑁂𑀲𑀁 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀢𑀲𑁆𑀫𑀺𑀁 𑀆𑀯𑀸𑀲𑁂 𑀲𑀗𑁆𑀖𑀲𑁆𑀲 𑀉𑀧𑁆𑀧𑀦𑁆𑀦𑀘𑀻𑀯𑀭𑀜𑁆𑀘𑀸’’𑀢𑀺.

‘‘𑀬𑀁 𑀧𑀦 𑀢𑀢𑁆𑀣 𑀲𑀗𑁆𑀖𑀲𑁆𑀲 𑀉𑀧𑁆𑀧𑀦𑁆𑀦𑀁 𑀧𑀢𑁆𑀢𑀸𑀤𑀺 𑀯𑀸 𑀅𑀜𑁆𑀜𑀁 𑀪𑀡𑁆𑀟𑀁 𑀯𑀸, 𑀢𑀁 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀺. 𑀬𑀁 𑀧𑀦 𑀢𑀢𑁆𑀭𑀼𑀧𑁆𑀧𑀸𑀤𑁂𑀦 𑀢𑀡𑁆𑀟𑀼𑀮𑀸𑀤𑀺𑀦𑀸 𑀯𑀢𑁆𑀣𑀁 𑀘𑁂𑀢𑀸𑀧𑀺𑀢𑀁, 𑀅𑀢𑁆𑀣𑀢𑀓𑀣𑀺𑀦𑀸𑀦𑀫𑁂𑀯 𑀢𑀸𑀦𑀺 𑀯𑀢𑁆𑀣𑀸𑀦𑀺 𑀧𑀸𑀧𑀼𑀡𑀦𑁆𑀢𑀺. 𑀯𑀢𑁆𑀣𑁂𑀳𑀺 𑀧𑀦 𑀢𑀡𑁆𑀟𑀼𑀮𑀸𑀤𑀻𑀲𑀼 𑀘𑁂𑀢𑀸𑀧𑀺𑀢𑁂𑀲𑀼 𑀲𑀩𑁆𑀩𑁂𑀲𑀁 𑀢𑀸𑀦𑀺 𑀧𑀸𑀧𑀼𑀡𑀦𑁆𑀢𑀻’’𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀘𑁂𑀢𑀸𑀧𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀘𑀻𑀯𑀭𑀼𑀧𑁆𑀧𑀸𑀤𑁄 𑀦 𑀳𑁄𑀢𑀻𑀢𑀺 𑀲𑀼𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀦𑀢𑁆𑀣𑀢𑀓𑀣𑀺𑀦𑀸 𑀧𑀦 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀆𑀦𑀺𑀲𑀁𑀲𑁂𑀲𑀼 𑀘𑀻𑀯𑀭𑀫𑀸𑀲𑁂 𑀅𑀲𑀫𑀸𑀤𑀸𑀦𑀘𑀸𑀭𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀺𑀲𑀁𑀲𑁂 𑀮𑀪𑀦𑁆𑀢𑀺. 𑀬𑀤𑀺 𑀅𑀲𑀫𑀸𑀤𑀸𑀦𑀘𑀸𑀭𑁄𑀧𑀺 𑀮𑀩𑁆𑀪𑁂𑀬𑁆𑀬, 𑀧𑀸𑀯𑁂𑀬𑁆𑀬𑀓𑀸 𑀪𑀺𑀓𑁆𑀔𑀽 𑀯𑀲𑁆𑀲𑀁𑀯𑀼𑀝𑁆𑀞𑀸 𑀑𑀓𑀧𑀼𑀡𑁆𑀡𑁂𑀳𑀺 𑀘𑀻𑀯𑀭𑁂𑀳𑀺 𑀦 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑁂𑀬𑁆𑀬𑀼𑀁. 𑀬𑀲𑁆𑀫𑀸 𑀢𑀁 𑀦 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀘𑀻𑀯𑀭𑀫𑀸𑀲𑁂𑀧𑀺 𑀘𑀻𑀯𑀭𑀁 𑀲𑀫𑀸𑀤𑀸𑀬 𑀏𑀯 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀁𑀲𑀼.

𑀏𑀯𑀁 𑀓𑀣𑀺𑀦𑀢𑁆𑀣𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀉𑀩𑁆𑀪𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀁 𑀧𑀦𑁂𑀢𑀁 𑀓𑀣𑀺𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀸𑀢𑀺𑀓𑀸𑀢𑀺 𑀫𑀸𑀢𑀭𑁄, 𑀚𑀦𑁂𑀢𑁆𑀢𑀺𑀬𑁄𑀢𑀺 𑀅𑀢𑁆𑀣𑁄. 𑀓𑀣𑀺𑀦𑀼𑀩𑁆𑀪𑀸𑀭𑀜𑁆𑀳𑀺 𑀏𑀢𑀸 𑀅𑀝𑁆𑀞 𑀚𑀦𑁂𑀦𑁆𑀢𑀺. 𑀢𑀸𑀲𑀼 𑀧𑀓𑁆𑀓𑀫𑀦𑀁 𑀅𑀦𑁆𑀢𑁄 𑀏𑀢𑀺𑀲𑁆𑀲𑀸𑀢𑀺 𑀧𑀓𑁆𑀓𑀫𑀦𑀦𑁆𑀢𑀺𑀓𑀸. 𑀏𑀯𑀁 𑀲𑁂𑀲𑀸𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀬𑁄 𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀓𑀣𑀺𑀦𑀘𑀻𑀯𑀭𑀁 𑀆𑀤𑀸𑀬 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀦𑀺𑀭𑀧𑁂𑀓𑁆𑀔𑁄 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 𑀧𑀓𑁆𑀓𑀫𑀢𑀺, 𑀢𑀲𑁆𑀲𑁂𑀯𑀁 𑀧𑀓𑁆𑀓𑀫𑀢𑁄 𑀓𑀣𑀺𑀦𑀼𑀤𑁆𑀥𑀸𑀭𑁄 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑀸𑀬 𑀲𑀻𑀫𑀸𑀬 𑀳𑁄𑀢𑀻𑀢𑀺 𑀧𑀓𑁆𑀓𑀫𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀬𑁄 𑀧𑀦 𑀆𑀦𑀺𑀲𑀁𑀲𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺, 𑀢𑀲𑁆𑀲 𑀩𑀳𑀺𑀲𑀻𑀫𑀸𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 ‘‘𑀇𑀥𑁂𑀯𑀺𑀫𑀁 𑀓𑀭𑀺𑀲𑁆𑀲𑀸𑀫𑀺, 𑀦 𑀧𑀼𑀦 𑀢𑀁 𑀯𑀺𑀳𑀸𑀭𑀁 𑀕𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀦𑀺𑀭𑀧𑁂𑀓𑁆𑀔𑁄 𑀳𑀼𑀢𑁆𑀯𑀸 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀬𑀤𑀺 𑀧𑀦 𑀆𑀦𑀺𑀲𑀁𑀲𑀫𑀽𑀮𑀘𑀻𑀯𑀭𑀁 𑀆𑀤𑀸𑀬 𑀩𑀳𑀺𑀲𑀻𑀫𑀸𑀕𑀢𑁄 ‘‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀭𑀺𑀲𑁆𑀲𑀸𑀫𑀺, 𑀦 𑀘 𑀢𑀁 𑀆𑀯𑀸𑀲𑀁 𑀕𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀭𑁄𑀢𑀺, 𑀢𑀤𑀸 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀢𑀤𑁂𑀯 𑀆𑀦𑀺𑀲𑀁𑀲𑀘𑀻𑀯𑀭𑀁 𑀮𑀤𑁆𑀥𑀸 𑀢𑀁 𑀆𑀤𑀸𑀬 𑀩𑀳𑀺𑀲𑀻𑀫𑀁 𑀕𑀦𑁆𑀢𑁆𑀯𑀸 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀭𑀺𑀲𑁆𑀲𑀸𑀫𑀺, 𑀦 𑀕𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀓𑀭𑁄𑀦𑁆𑀢𑀲𑁆𑀲 𑀲𑀘𑁂 𑀢𑀁 𑀘𑀻𑀯𑀭𑀁 𑀦𑀲𑁆𑀲𑀢𑀺 𑀯𑀺𑀦𑀲𑁆𑀲𑀢𑀺 𑀟𑀬𑁆𑀳𑀢𑀺, 𑀦𑀸𑀲𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄 𑀳𑁄𑀢𑀺.

𑀲𑀘𑁂 𑀧𑀦 𑀆𑀦𑀺𑀲𑀁𑀲𑀘𑀻𑀯𑀭𑀁 𑀮𑀤𑁆𑀥𑀸 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀲𑀸𑀧𑁂𑀓𑁆𑀔𑁄𑀯 𑀩𑀳𑀺𑀲𑀻𑀫𑀸𑀕𑀢𑁄 ‘‘𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀳𑀺 𑀅𑀦𑁆𑀢𑀭𑀼𑀩𑁆𑀪𑀸𑀭𑀁 𑀓𑀢’’𑀦𑁆𑀢𑀺 𑀲𑀼𑀡𑀸𑀢𑀺, 𑀢𑀲𑁆𑀲 𑀲𑀯𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄 𑀳𑁄𑀢𑀺.

𑀆𑀲𑀸𑀬 𑀅𑀯𑀘𑁆𑀙𑁂𑀤𑁄 𑀏𑀢𑀺𑀲𑁆𑀲𑀸𑀢𑀺 𑀆𑀲𑀸𑀯𑀘𑁆𑀙𑁂𑀤𑀺𑀓𑀸. 𑀬𑁄 𑀧𑀦 𑀬𑁂𑀦 𑀓𑁂𑀦𑀘𑀺 ‘‘𑀢𑀼𑀬𑁆𑀳𑀁 𑀘𑀻𑀯𑀭𑀁 𑀤𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁄 𑀢𑀲𑁆𑀫𑀺𑀁 𑀘𑀻𑀯𑀭𑁂 𑀆𑀲𑀸𑀬 𑀯𑀺𑀳𑀸𑀭𑁂 𑀅𑀧𑁂𑀓𑁆𑀔𑀁 𑀧𑀳𑀸𑀬 𑀩𑀳𑀺𑀲𑀻𑀫𑀸𑀕𑀢𑁄 𑀧𑀼𑀦 𑀢𑁂𑀦 ‘‘𑀦 𑀲𑀓𑁆𑀓𑁄𑀫𑀺 𑀤𑀸𑀢𑀼’’𑀦𑁆𑀢𑀺 𑀯𑀼𑀢𑁆𑀢𑁂 𑀆𑀲𑀁 𑀙𑀺𑀦𑁆𑀤𑀢𑀺, 𑀢𑀲𑁆𑀲 𑀆𑀲𑀸𑀯𑀘𑁆𑀙𑁂𑀤𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄 𑀳𑁄𑀢𑀺.

𑀬𑁄 𑀧𑀦 𑀯𑀲𑁆𑀲𑀁𑀯𑀼𑀝𑁆𑀞𑀯𑀺𑀳𑀸𑀭𑀢𑁄 𑀅𑀜𑁆𑀜𑀁 𑀯𑀺𑀳𑀸𑀭𑀁 𑀲𑀸𑀧𑁂𑀓𑁆𑀔𑁄𑀯 𑀕𑀦𑁆𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂𑀬𑁂𑀯 𑀓𑀣𑀺𑀦𑀼𑀤𑁆𑀥𑀸𑀭𑀁 𑀯𑀻𑀢𑀺𑀦𑀸𑀫𑁂𑀢𑀺, 𑀢𑀲𑁆𑀲 𑀲𑀻𑀫𑀸𑀢𑀺𑀓𑁆𑀓𑀫𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄.

𑀲𑀳 𑀉𑀩𑁆𑀪𑀸𑀭𑁂𑀦𑀸𑀢𑀺 𑀲𑀳𑀼𑀩𑁆𑀪𑀸𑀭𑀸. 𑀆𑀦𑀺𑀲𑀁𑀲𑀘𑀻𑀯𑀭𑀁 𑀆𑀤𑀸𑀬 𑀲𑀸𑀧𑁂𑀓𑁆𑀔𑁄𑀯 𑀩𑀳𑀺 𑀕𑀦𑁆𑀢𑁆𑀯𑀸 𑀓𑀣𑀺𑀦𑀼𑀤𑁆𑀥𑀸𑀭𑀁 𑀲𑀫𑁆𑀪𑀼𑀡𑀦𑁆𑀢𑀲𑁆𑀲 𑀓𑀣𑀺𑀦𑀼𑀤𑁆𑀥𑀸𑀭𑁄 𑀲𑀳𑀼𑀩𑁆𑀪𑀸𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

‘‘𑀏𑀢𑀲𑁆𑀫𑀺𑀁 𑀧𑀦 𑀧𑀓𑁆𑀓𑀫𑀦𑀦𑁆𑀢𑀺𑀓𑁂 𑀓𑀣𑀺𑀦𑀼𑀤𑁆𑀥𑀸𑀭𑁂 𑀧𑀞𑀫𑀁 𑀘𑀻𑀯𑀭𑀧𑀮𑀺𑀩𑁄𑀥𑁄 𑀙𑀺𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀘𑀻𑀯𑀭𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑀸𑀤𑀺𑀓𑀲𑁆𑀲 𑀯𑀺𑀦𑀺𑀘𑁆𑀙𑀬𑀲𑁆𑀲 𑀯𑀺𑀢𑁆𑀣𑀸𑀭𑀢𑁄 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁩𑁧𑁧) 𑀯𑀼𑀢𑁆𑀢𑀢𑁆𑀢𑀸 𑁮 ‘‘𑀢𑀢𑁆𑀣 𑀯𑀺𑀢𑁆𑀣𑀸𑀭𑀯𑀺𑀦𑀺𑀘𑁆𑀙𑀬𑁄’’𑀢𑀺𑀆𑀤𑀺𑀫𑀸𑀳. 𑀅𑀢𑁆𑀣𑀸𑀭𑀼𑀩𑁆𑀪𑀸𑀭𑀸𑀦𑀁𑀬𑁂𑀯 𑀯𑀸 𑀯𑀺𑀢𑁆𑀣𑀸𑀭𑀯𑀺𑀦𑀺𑀘𑁆𑀙𑀬𑀲𑁆𑀲 𑀢𑀢𑁆𑀣𑀸𑀕𑀢𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑁂𑀲𑀧𑀮𑀺𑀩𑁄𑀥𑀸𑀪𑀸𑀯𑀦𑁆𑀢𑀺 𑀅𑀯𑀲𑁂𑀲𑀲𑁆𑀲 𑀧𑀮𑀺𑀩𑁄𑀥𑀲𑁆𑀲 𑀅𑀪𑀸𑀯𑀁, 𑀆𑀯𑀸𑀲𑀧𑀮𑀺𑀩𑁄𑀥𑀸𑀪𑀸𑀯𑀦𑁆𑀢𑀺 𑀅𑀢𑁆𑀣𑁄.

𑀅𑀲𑁆𑀲𑀸𑀢𑀺 𑀓𑀸𑀮𑀲𑁆𑀲. 𑀤𑀲𑀸𑀳𑀧𑀭𑀫𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀢𑀁 𑀤𑀲𑀸𑀳𑀧𑀭𑀫𑀁 𑀓𑀸𑀮’’𑀦𑁆𑀢𑀺. 𑀅𑀢𑀺𑀭𑁂𑀓𑀦𑁆𑀢𑀺 𑀅𑀥𑀺𑀓𑀁, 𑀲𑁄 𑀘 𑀅𑀥𑀺𑀓𑀪𑀸𑀯𑁄 𑀅𑀥𑀺𑀝𑁆𑀞𑀺𑀢𑀯𑀺𑀓𑀧𑁆𑀧𑀺𑀢𑀘𑀻𑀯𑀭𑀢𑁄𑀢𑀺 𑀆𑀳 ‘‘𑀅𑀥𑀺𑀝𑁆𑀞𑀺𑀢𑀯𑀺𑀓𑀧𑁆𑀧𑀺𑀢𑁂𑀲𑀽’’𑀢𑀺𑀆𑀤𑀺. 𑀔𑁄𑀫𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁩𑁬-𑁬𑁩𑁮) 𑀔𑁄𑀫𑀲𑀼𑀢𑁆𑀢𑁂𑀳𑀺 𑀯𑀸𑀬𑀺𑀢𑀁 𑀔𑁄𑀫𑀧𑀝𑁆𑀝𑀘𑀻𑀯𑀭𑀁. 𑀢𑀣𑀸 𑀲𑁂𑀲𑀸𑀦𑀺. 𑀓𑀫𑁆𑀩𑀮𑀁 𑀦𑀸𑀫 𑀫𑀦𑀼𑀲𑁆𑀲𑀮𑁄𑀫𑀯𑀸𑀴𑀮𑁄𑀫𑁂 𑀞𑀧𑁂𑀢𑁆𑀯𑀸 𑀲𑁂𑀲𑀮𑁄𑀫𑁂𑀳𑀺 𑀯𑀸𑀬𑀺𑀢𑁆𑀯𑀸 𑀓𑀢𑀯𑀢𑁆𑀣𑀁. 𑀲𑀸𑀡𑀁 𑀦𑀸𑀫 𑀲𑀸𑀡𑀯𑀸𑀓𑁂𑀳𑀺 𑀓𑀢𑀯𑀢𑁆𑀣𑀁. 𑀪𑀗𑁆𑀕𑀁 𑀦𑀸𑀫 𑀔𑁄𑀫𑀲𑀼𑀢𑁆𑀢𑀸𑀤𑀻𑀳𑀺 𑀧𑀜𑁆𑀘𑀳𑀺 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀯𑀢𑁆𑀣𑀁. ‘‘𑀧𑀸𑀝𑁂𑀓𑁆𑀓𑀁 𑀯𑀸𑀓𑀫𑀬𑀫𑁂𑀯𑀸’’𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀤𑀦𑀼𑀮𑁄𑀫𑀸𑀦𑀁 𑀯𑀸𑀢𑀺 𑀤𑀼𑀓𑀽𑀮𑀁 𑀧𑀢𑁆𑀢𑀼𑀡𑁆𑀡𑀁 𑀲𑁄𑀫𑀸𑀭𑀧𑀝𑁆𑀝𑀁 𑀘𑀻𑀦𑀧𑀝𑁆𑀝𑀁 𑀇𑀤𑁆𑀥𑀺𑀚𑀁 𑀤𑁂𑀯𑀤𑀺𑀦𑁆𑀦𑀦𑁆𑀢𑀺 𑀢𑁂𑀲𑀁 𑀔𑁄𑀫𑀸𑀤𑀻𑀦𑀁𑀬𑁂𑀯 𑀅𑀦𑀼𑀮𑁄𑀫𑀸𑀦𑀁 𑀙𑀦𑁆𑀦𑀁 𑀘𑀻𑀯𑀭𑀸𑀦𑀁 𑀯𑀸, 𑀢𑀢𑁆𑀣 𑀤𑀼𑀓𑀽𑀮𑀁 𑀲𑀸𑀡𑀲𑁆𑀲 𑀅𑀦𑀼𑀮𑁄𑀫𑀁 𑀯𑀸𑀓𑀫𑀬𑀢𑁆𑀢𑀸. 𑀧𑀢𑁆𑀢𑀼𑀡𑁆𑀡𑀤𑁂𑀲𑁂 𑀧𑀸𑀡𑀓𑁂𑀳𑀺 𑀲𑀜𑁆𑀚𑀸𑀢𑀯𑀢𑁆𑀣𑀁 𑀧𑀢𑁆𑀢𑀼𑀡𑁆𑀡𑀁. 𑀲𑁄𑀫𑀸𑀭𑀤𑁂𑀲𑁂 𑀚𑀸𑀢𑀁 𑀯𑀢𑁆𑀣𑀁 𑀲𑁄𑀫𑀸𑀭𑀧𑀝𑁆𑀝𑀁. 𑀢𑀣𑀸 𑀘𑀻𑀦𑀧𑀝𑁆𑀝𑀁. 𑀇𑀫𑀸𑀦𑀺 𑀢𑀻𑀡𑀺𑀧𑀺 𑀓𑁄𑀲𑁂𑀬𑁆𑀬𑀲𑁆𑀲 𑀅𑀦𑀼𑀮𑁄𑀫𑀸𑀦𑀺 𑀧𑀸𑀡𑀓𑁂𑀳𑀺 𑀓𑀢𑀲𑀼𑀢𑁆𑀢𑀫𑀬𑀢𑁆𑀢𑀸. 𑀇𑀤𑁆𑀥𑀺𑀚𑀁 𑀏𑀳𑀺𑀪𑀺𑀓𑁆𑀔𑀽𑀦𑀁 𑀧𑀼𑀜𑁆𑀜𑀺𑀤𑁆𑀥𑀺𑀬𑀸 𑀦𑀺𑀩𑁆𑀩𑀢𑁆𑀢𑀘𑀻𑀯𑀭𑀁. 𑀢𑀁 𑀧𑀦 𑀔𑁄𑀫𑀸𑀤𑀻𑀦𑀫𑀜𑁆𑀜𑀢𑀭𑀁 𑀳𑁄𑀢𑀻𑀢𑀺 𑀢𑁂𑀲𑀁𑀬𑁂𑀯 𑀅𑀦𑀼𑀮𑁄𑀫𑀁. 𑀤𑁂𑀯𑁂𑀳𑀺 𑀤𑀺𑀦𑁆𑀦𑀁 𑀘𑀻𑀯𑀭𑀁 𑀤𑁂𑀯𑀤𑀺𑀦𑁆𑀦𑀁, 𑀢𑀁 𑀓𑀧𑁆𑀧𑀭𑀼𑀓𑁆𑀔𑁂 𑀦𑀺𑀩𑁆𑀩𑀢𑁆𑀢𑀁 𑀚𑀸𑀮𑀺𑀦𑀺𑀬𑀸 𑀤𑁂𑀯𑀓𑀜𑁆𑀜𑀸𑀬 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀲𑁆𑀲 𑀤𑀺𑀦𑁆𑀦𑀯𑀢𑁆𑀣𑀲𑀤𑀺𑀲𑀁, 𑀢𑀫𑁆𑀧𑀺 𑀔𑁄𑀫𑀸𑀤𑀻𑀦𑀁𑀬𑁂𑀯 𑀅𑀦𑀼𑀮𑁄𑀫𑀁 𑀳𑁄𑀢𑀺 𑀢𑁂𑀲𑀼 𑀅𑀜𑁆𑀜𑀢𑀭𑀪𑀸𑀯𑀢𑁄.

𑀤𑀻𑀖𑀢𑁄 𑀯𑀟𑁆𑀠𑀓𑀺𑀳𑀢𑁆𑀣𑀧𑁆𑀧𑀫𑀸𑀡𑀁, 𑀯𑀺𑀢𑁆𑀣𑀸𑀭𑀢𑁄 𑀢𑀢𑁄 𑀉𑀧𑀟𑁆𑀠𑀧𑁆𑀧𑀫𑀸𑀡𑀁 𑀯𑀺𑀓𑀧𑁆𑀧𑀦𑀼𑀧𑀕𑀁 𑀧𑀘𑁆𑀙𑀺𑀫𑀁. 𑀅𑀝𑁆𑀞𑀗𑁆𑀕𑀼𑀮𑀁 𑀲𑀼𑀕𑀢𑀗𑁆𑀕𑀼𑀮𑁂𑀦𑀸𑀢𑀺 𑀏𑀢𑁆𑀣 𑀲𑀼𑀕𑀢𑀗𑁆𑀕𑀼𑀮𑀁 𑀦𑀸𑀫 𑀇𑀤𑀸𑀦𑀺 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀫𑀲𑁆𑀲 𑀢𑀻𑀡𑀺 𑀅𑀗𑁆𑀕𑀼𑀮𑀸𑀦𑀺, 𑀢𑁂𑀦 𑀲𑀼𑀕𑀢𑀗𑁆𑀕𑀼𑀮𑁂𑀦 𑀅𑀝𑁆𑀞𑀗𑁆𑀕𑀼𑀮𑀁 𑀯𑀟𑁆𑀠𑀓𑀺𑀳𑀢𑁆𑀣𑀧𑁆𑀧𑀫𑀸𑀡𑀦𑁆𑀢𑀺 𑀅𑀢𑁆𑀣𑁄. 𑀘𑀢𑀼𑀭𑀗𑁆𑀕𑀼𑀮𑀯𑀺𑀢𑁆𑀣𑀢𑀦𑁆𑀢𑀺 𑀏𑀢𑁆𑀣𑀸𑀧𑀺 𑀬𑀣𑀸𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑁂𑀲𑀁 𑀧𑀦 𑀅𑀥𑀺𑀝𑁆𑀞𑀸𑀦𑀯𑀺𑀓𑀧𑁆𑀧𑀦𑀸𑀦𑀁 𑀅𑀪𑀸𑀯𑀢𑁄 𑀅𑀥𑀺𑀝𑁆𑀞𑀺𑀢𑀯𑀺𑀓𑀧𑁆𑀧𑀺𑀢𑁂𑀲𑀼 𑀅𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀇𑀤𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 𑀦𑀸𑀫 𑀳𑁄𑀢𑀺.

𑀢𑀁 𑀅𑀥𑀺𑀝𑁆𑀞𑀸𑀦𑀯𑀺𑀓𑀧𑁆𑀧𑀦𑀁 𑀓𑁂𑀦𑀸𑀓𑀸𑀭𑁂𑀦 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀁 𑀧𑀦 𑀯𑀼𑀢𑁆𑀢’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑀁 𑀧𑀦 𑀯𑀼𑀢𑁆𑀢𑀦𑁆𑀢𑀺 𑀅𑀢𑀺𑀭𑁂𑀓𑀘𑀻𑀯𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀥𑀺𑀝𑁆𑀞𑀺𑀢𑀯𑀺𑀓𑀧𑁆𑀧𑀺𑀢𑁂𑀲𑀼 𑀅𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸’’𑀢𑀺 𑀅𑀫𑁆𑀳𑁂𑀳𑀺 𑀬𑀁 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀼𑀦𑁆𑀢𑀺 𑀦𑀸𑀫𑀁 𑀯𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀼𑀁. 𑀦 𑀯𑀺𑀓𑀧𑁆𑀧𑁂𑀢𑀼𑀦𑁆𑀢𑀺 𑀲𑀗𑁆𑀖𑀸𑀝𑀺𑀆𑀤𑀺𑀦𑀸𑀫𑁂𑀦 𑀯𑀺𑀓𑀧𑁆𑀧𑁂𑀢𑀼𑀁 𑀦 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄. ‘‘𑀇𑀫𑀁 𑀘𑀻𑀯𑀭𑀁 𑀯𑀺𑀓𑀧𑁆𑀧𑁂𑀫𑀻’’𑀢𑀺 𑀧𑀦 𑀯𑀺𑀓𑀧𑁆𑀧𑁂𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀲𑀸𑀫𑀜𑁆𑀜𑀯𑀘𑀦𑀁 𑀧𑀦 𑀢𑀺𑀘𑀻𑀯𑀭𑀲𑁆𑀲 𑀓𑀡𑁆𑀟𑀼𑀧𑀝𑀺𑀘𑁆𑀙𑀸𑀤𑀺𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀦𑀁 𑀯𑀺𑀬 𑀓𑀸𑀮𑀯𑀲𑁂𑀦 𑀯𑀺𑀲𑁂𑀲𑀸𑀪𑀸𑀯𑀸 𑀘𑀲𑁆𑀲 𑀯𑀺𑀓𑀧𑁆𑀧𑁂𑀢𑀩𑁆𑀩𑀢𑀸𑀢𑀺 𑀤𑀲𑁆𑀲𑀦𑀢𑁆𑀣𑀁, 𑀦 𑀧𑀦 𑀲𑀩𑁆𑀩𑀣𑀸 𑀯𑀺𑀓𑀧𑁆𑀧𑀦𑀧𑀝𑀺𑀲𑁂𑀥𑀦𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀳𑀺 𑀧𑀼𑀭𑀸𑀡𑀘𑀻𑀯𑀭𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀦𑀯𑀲𑁆𑀲 𑀅𑀥𑀺𑀝𑁆𑀞𑀸𑀦𑀯𑀘𑀦𑀢𑁄, ‘‘𑀅𑀦𑀸𑀧𑀢𑁆𑀢𑀺 𑀅𑀥𑀺𑀝𑁆𑀞𑁂𑀢𑀺 𑀯𑀺𑀓𑀧𑁆𑀧𑁂𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 (𑀧𑀸𑀭𑀸. 𑁪𑁬𑁯) 𑀘 𑀢𑀺𑀘𑀻𑀯𑀭𑀲𑁆𑀲𑀧𑀺 𑀯𑀺𑀓𑀧𑁆𑀧𑀦𑀸𑀬 𑀑𑀓𑀸𑀲𑁄 𑀤𑀺𑀦𑁆𑀦𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀢𑀺𑀘𑀻𑀯𑀭𑀸𑀤𑀻𑀦𑀺 𑀳𑀺 𑀅𑀥𑀺𑀝𑁆𑀞𑀳𑀦𑁆𑀢𑁂𑀦 ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺𑀆𑀤𑀺𑀦𑀸 𑀢𑀁 𑀢𑀁 𑀦𑀸𑀫𑀁 𑀯𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀯𑀺𑀓𑀧𑁆𑀧𑁂𑀦𑁆𑀢𑁂𑀦 𑀧𑀦 ‘‘𑀇𑀫𑀁 𑀲𑀗𑁆𑀖𑀸𑀝𑀺’’𑀦𑁆𑀢𑀺𑀆𑀤𑀺𑀦𑀸 𑀢𑀲𑁆𑀲 𑀢𑀲𑁆𑀲 𑀘𑀻𑀯𑀭𑀲𑁆𑀲 𑀦𑀸𑀫𑀁 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀇𑀫𑀁 𑀘𑀻𑀯𑀭𑀁 𑀢𑀼𑀬𑁆𑀳𑀁 𑀯𑀺𑀓𑀧𑁆𑀧𑁂𑀫𑀻’’𑀢𑀺 𑀯𑀺𑀓𑀧𑁆𑀧𑁂𑀢𑀩𑁆𑀩𑀁. 𑀢𑀺𑀘𑀻𑀯𑀭𑀁 𑀯𑀸 𑀳𑁄𑀢𑀼, 𑀅𑀜𑁆𑀜𑀁 𑀯𑀸, 𑀬𑀤𑀺 𑀢𑀁 𑀢𑀁 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀺, 𑀅𑀯𑀺𑀓𑀧𑁆𑀧𑀺𑀢𑀁 𑀳𑁄𑀢𑀺, 𑀅𑀢𑀺𑀭𑁂𑀓𑀘𑀻𑀯𑀭𑀝𑁆𑀞𑀸𑀦𑁂𑀬𑁂𑀯 𑀢𑀺𑀝𑁆𑀞𑀢𑀺. 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼𑀦𑁆𑀢𑀺 𑀘𑀢𑀼𑀫𑀸𑀲𑀢𑁄 𑀧𑀭𑀁 ‘‘𑀇𑀫𑀁 𑀘𑀻𑀯𑀭𑀁 𑀯𑀺𑀓𑀧𑁆𑀧𑁂𑀫𑀻’’𑀢𑀺 𑀯𑀺𑀓𑀧𑁆𑀧𑁂𑀢𑀼𑀁. 𑀇𑀤𑀜𑁆𑀘 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀅𑀦𑀼𑀜𑁆𑀜𑀸𑀢𑀁. 𑀓𑁂𑀘𑀺 𑀧𑀦 (𑀲𑀸𑀭𑀢𑁆𑀣. 𑀝𑀻. 𑁨.𑁪𑁬𑁯) ‘‘𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑁆𑀯𑀸 𑀬𑀸𑀯 𑀆𑀕𑀸𑀫𑀺𑀲𑀁𑀯𑀘𑁆𑀙𑀭𑁂 𑀯𑀲𑁆𑀲𑀸𑀦𑀁 𑀘𑀢𑀼𑀫𑀸𑀲𑀁, 𑀢𑀸𑀯 𑀞𑀧𑁂𑀢𑀼𑀁 𑀅𑀦𑀼𑀜𑁆𑀜𑀸𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀢𑁄 𑀧𑀭𑀦𑁆𑀢𑀺 𑀆𑀩𑀸𑀥𑀢𑁄 𑀧𑀭𑀁. ‘‘𑀇𑀫𑀸𑀲𑀜𑁆𑀘 𑀧𑀦 𑀯𑀲𑁆𑀲𑀺𑀓𑀲𑀸𑀝𑀺𑀓𑀓𑀡𑁆𑀟𑀼𑀧𑀝𑀺𑀘𑁆𑀙𑀸𑀤𑀻𑀦𑀁 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑁆𑀯𑀸 𑀧𑀭𑀺𑀪𑁄𑀕𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀢𑀣𑀸𑀯𑀺𑀓𑀧𑁆𑀧𑀺𑀢𑀁 𑀅𑀜𑁆𑀜𑀦𑀸𑀫𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀅𑀥𑀺𑀝𑁆𑀞𑀸𑀢𑀩𑁆𑀩𑀯𑀺𑀓𑀧𑁆𑀧𑁂𑀢𑀩𑁆𑀩𑀢𑀸 𑀚𑀸𑀦𑀺𑀢𑀩𑁆𑀩𑀸𑀢𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀁 𑀯𑀺𑀓𑀧𑁆𑀧𑁂𑀢𑀩𑁆𑀩𑀦𑁆𑀢𑀺 𑀏𑀯𑀁 𑀅𑀥𑀺𑀝𑁆𑀞𑀸𑀦𑀯𑀺𑀓𑀧𑁆𑀧𑀦𑀸 𑀚𑀸𑀦𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑀧𑀜𑁆𑀘𑀧𑀭𑀺𑀫𑀸𑀡𑀁 𑀅𑀲𑁆𑀲𑀸𑀢𑀺 𑀧𑀜𑁆𑀘𑀓𑀁, 𑀫𑀼𑀝𑁆𑀞𑀺𑀲𑁆𑀲 𑀫𑀼𑀝𑁆𑀞𑀺𑀳𑀢𑁆𑀣𑀲𑁆𑀲 𑀲𑀫𑁆𑀩𑀦𑁆𑀥𑀁 𑀧𑀜𑁆𑀘𑀓𑀁 𑀫𑀼𑀝𑁆𑀞𑀺𑀧𑀜𑁆𑀘𑀓𑀁. 𑀏𑀲 𑀦 𑀬𑁄 𑀫𑀼𑀝𑁆𑀞𑀺𑀢𑁆𑀢𑀺𑀓𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀧𑀸𑀭𑀼𑀧𑀦𑁂𑀦𑀧𑀺 𑀲𑀓𑁆𑀓𑀸 𑀦𑀸𑀪𑀺𑀁 𑀧𑀝𑀺𑀘𑁆𑀙𑀸𑀤𑁂𑀢𑀼𑀦𑁆𑀢𑀺 𑀆𑀳 ‘‘𑀤𑁆𑀯𑀺𑀳𑀢𑁆𑀣𑁄𑀧𑀺 𑀯𑀝𑁆𑀝𑀢𑀻’’𑀢𑀺. 𑀦 𑀓𑁂𑀯𑀮𑀁 𑀅𑀟𑁆𑀠𑀢𑁂𑀬𑁆𑀬𑁄𑀯 𑀯𑀝𑁆𑀝𑀢𑀺, 𑀅𑀣 𑀔𑁄 𑀤𑁆𑀯𑀺𑀳𑀢𑁆𑀣𑁄𑀧𑀺 𑀯𑀝𑁆𑀝𑀢𑀻𑀢𑀺 𑀧𑀺-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀢𑀺𑀭𑁂𑀓𑀜𑁆𑀘𑀸𑀢𑀺 𑀲𑀼𑀕𑀢𑀘𑀻𑀯𑀭𑀧𑁆𑀧𑀫𑀸𑀡𑀫𑁆𑀧𑀺 𑀢𑀢𑁄 𑀅𑀥𑀺𑀓𑀫𑁆𑀧𑀺. 𑀧𑀘𑁆𑀘𑀼𑀤𑁆𑀥𑀭𑀸𑀫𑀻𑀢𑀺 𑀞𑀧𑁂𑀫𑀺, 𑀧𑀭𑀺𑀘𑁆𑀘𑀚𑀸𑀫𑀻𑀢𑀺 𑀯𑀸 𑀅𑀢𑁆𑀣𑁄. ‘‘𑀇𑀫𑀁 𑀘𑀻𑀯𑀭𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁪𑁬𑁯) 𑀏𑀯𑀫𑁆𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀓𑀸𑀬𑀯𑀺𑀓𑀸𑀭𑀁 𑀓𑀭𑁄𑀦𑁆𑀢𑁂𑀦𑀸𑀢𑀺 𑀳𑀢𑁆𑀣𑀸𑀤𑀺𑀦𑀸 𑀘𑀻𑀯𑀭𑀁 𑀧𑀭𑀸𑀫𑀲𑀦𑁆𑀢𑁂𑀦, 𑀘𑀸𑀮𑁂𑀦𑁆𑀢𑁂𑀦 𑀯𑀸. 𑀇𑀤𑀜𑁆𑀳𑀺 𑀅𑀥𑀺𑀝𑁆𑀞𑀸𑀦𑀁 𑀬𑁂𑀦 𑀓𑁂𑀦𑀘𑀺 𑀲𑀭𑀻𑀭𑀸𑀯𑀬𑀯𑁂𑀦 𑀅𑀨𑀼𑀲𑀦𑁆𑀢𑀲𑁆𑀲 𑀦 𑀯𑀝𑁆𑀝𑀢𑀺. 𑀤𑀼𑀯𑀺𑀥𑀦𑁆𑀢𑀺 𑀲𑀫𑁆𑀫𑀼𑀔𑀸𑀧𑀭𑀫𑁆𑀫𑀼𑀔𑀪𑁂𑀤𑁂𑀦 𑀤𑀼𑀯𑀺𑀥𑀁. 𑀯𑀸𑀘𑀸 𑀪𑀺𑀦𑁆𑀤𑀺𑀢𑀩𑁆𑀩𑀸𑀢𑀺 𑀯𑀘𑀦𑀁 𑀦𑀺𑀘𑁆𑀙𑀸𑀭𑁂𑀢𑀩𑁆𑀩𑀁. 𑀅𑀦𑁆𑀢𑁄𑀕𑀩𑁆𑀪𑀸𑀤𑀻𑀲𑀽𑀢𑀺 𑀅𑀦𑁆𑀢𑁄𑀕𑀩𑁆𑀪𑀉𑀧𑀭𑀺𑀧𑀸𑀲𑀸𑀤𑁂𑀲𑀼. 𑀲𑀸𑀫𑀦𑁆𑀢𑀯𑀺𑀳𑀸𑀭𑁂𑀢𑀺 𑀬𑀢𑁆𑀣 𑀢𑀤𑀳𑁂𑀯 𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑁂𑀢𑀼𑀁 𑀲𑀓𑁆𑀓𑀸, 𑀏𑀯𑀭𑀽𑀧𑁂 𑀲𑀫𑀻𑀧𑀯𑀺𑀳𑀸𑀭𑁂. 𑀇𑀤𑀜𑁆𑀘 𑀤𑁂𑀲𑀦𑀸𑀲𑀻𑀲𑀫𑀢𑁆𑀢𑀁, 𑀢𑀲𑁆𑀫𑀸 𑀤𑀽𑀭𑁂 𑀞𑀺𑀢𑀫𑁆𑀧𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀯𑀤𑀦𑁆𑀢𑀺. ‘‘𑀞𑀧𑀺𑀢𑀝𑁆𑀞𑀸𑀦𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀘𑀻𑀯𑀭𑀲𑀁𑀮𑀓𑁆𑀔𑀡𑀁 𑀯𑀼𑀢𑁆𑀢𑀁. 𑀦 𑀳𑀺 𑀞𑀧𑀺𑀢𑀝𑁆𑀞𑀸𑀦𑀫𑀢𑁆𑀢𑀲𑀮𑁆𑀮𑀓𑁆𑀔𑀡𑁂𑀦 𑀓𑀺𑀜𑁆𑀘𑀺 𑀧𑀬𑁄𑀚𑀦𑀁 𑀅𑀢𑁆𑀣𑀺.

𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀞𑀧𑀺𑀢𑀯𑀢𑁆𑀣𑁂𑀳𑀻𑀢𑀺 𑀧𑀘𑁆𑀘𑀢𑁆𑀣𑀭𑀡𑀫𑀼𑀔𑀧𑀼𑀜𑁆𑀙𑀦𑀘𑁄𑀴𑀧𑀭𑀺𑀓𑁆𑀔𑀸𑀭𑀘𑁄𑀴𑀯𑀲𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀞𑀧𑀺𑀢𑀯𑀢𑁆𑀣𑁂𑀳𑀺. 𑀅𑀥𑀺𑀝𑁆𑀞𑀸𑀦𑀢𑁄 𑀧𑀼𑀩𑁆𑀩𑁂 𑀲𑀗𑁆𑀖𑀸𑀝𑀺𑀆𑀤𑀺𑀯𑁄𑀳𑀸𑀭𑀲𑁆𑀲 𑀅𑀪𑀸𑀯𑀢𑁄 ‘‘𑀇𑀫𑀁 𑀧𑀘𑁆𑀘𑀼𑀤𑁆𑀥𑀭𑀸𑀫𑀻’’𑀢𑀺 𑀧𑀘𑁆𑀘𑀢𑁆𑀣𑀭𑀡𑀸𑀤𑀻𑀦𑀁 𑀯𑀺𑀲𑀼𑀁 𑀧𑀘𑁆𑀘𑀼𑀤𑁆𑀥𑀭𑀡𑀯𑀺𑀥𑀺𑀁 𑀤𑀲𑁆𑀲𑁂𑀢𑀺. 𑀧𑀘𑁆𑀘𑀢𑁆𑀣𑀭𑀡𑀸𑀤𑀺𑀦𑀸𑀫𑁂𑀦 𑀧𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀢𑁆𑀢𑀸 ‘‘𑀇𑀫𑀁 𑀧𑀘𑁆𑀘𑀢𑁆𑀣𑀭𑀡𑀁 𑀧𑀘𑁆𑀘𑀼𑀤𑁆𑀥𑀭𑀸𑀫𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀧𑀺 𑀦𑁂𑀯𑀢𑁆𑀣𑀺 𑀤𑁄𑀲𑁄. 𑀧𑀼𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀦𑀻𑀢𑀺 𑀲𑀗𑁆𑀖𑀸𑀝𑀺𑀆𑀤𑀺𑀦𑀸𑀫𑁂𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀦𑀺. 𑀧𑀭𑀺𑀓𑁆𑀔𑀸𑀭𑀘𑁄𑀴𑀓𑀲𑁆𑀲 𑀧𑀦 𑀧𑀭𑀺𑀓𑁆𑀔𑀸𑀭𑀘𑁄𑀴𑀯𑀲𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀞𑀧𑀺𑀢𑀯𑀢𑁆𑀣𑁂𑀳𑀺𑀧𑀺 𑀲𑀗𑁆𑀖𑀸𑀝𑀺𑀆𑀤𑀺𑀫𑁆𑀳𑀺 𑀓𑀢𑁂 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀧𑀼𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀦𑀢𑁆𑀣𑀺. 𑀧𑀼𑀩𑁆𑀩𑁂 𑀓𑀢𑀸𑀥𑀺𑀝𑁆𑀞𑀸𑀦𑀫𑁂𑀯 𑀅𑀥𑀺𑀝𑁆𑀞𑀸𑀦𑀁. 𑀅𑀥𑀺𑀝𑁆𑀞𑀺𑀢𑁂𑀦 𑀧𑀦 𑀢𑁂𑀦 𑀲𑀤𑁆𑀥𑀺𑀁 𑀫𑀳𑀦𑁆𑀢𑀢𑀭𑀫𑁂𑀯 𑀤𑀼𑀢𑀺𑀬𑀁 𑀧𑀝𑁆𑀝𑀁 𑀯𑀸 𑀔𑀡𑁆𑀟𑀁 𑀯𑀸 𑀲𑀁𑀲𑀺𑀩𑁆𑀩𑀦𑁆𑀢𑁂𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀁, 𑀲𑀫𑁂 𑀯𑀸 𑀔𑀼𑀤𑁆𑀤𑀓𑁂 𑀯𑀸 𑀅𑀥𑀺𑀝𑁆𑀞𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀲𑀼𑀔𑀧𑀭𑀺𑀪𑁄𑀕𑀢𑁆𑀣𑀦𑁆𑀢𑀺 𑀯𑀺𑀧𑁆𑀧𑀯𑀸𑀲𑀤𑁄𑀲𑀸𑀪𑀸𑀯𑀢𑁄 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀧𑁂𑀢𑁆𑀯𑀸 𑀥𑀫𑁆𑀫𑀲𑁆𑀲𑀯𑀦𑀸𑀤𑀺𑀦𑀸 𑀓𑀺𑀘𑁆𑀘𑁂𑀦 𑀅𑀜𑁆𑀜𑀢𑁆𑀣 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀦𑀺𑀲𑁆𑀲𑀚𑁆𑀚𑀦𑀁 𑀯𑀺𑀦𑀸𑀯 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀲𑀼𑀔𑀧𑀭𑀺𑀪𑁄𑀕𑀢𑁆𑀣𑀁. 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀸𑀢𑀼𑀦𑁆𑀢𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀼𑀁.

𑀅𑀦𑀢𑀺𑀭𑀺𑀢𑁆𑀢𑀧𑀫𑀸𑀡𑀸𑀢𑀺 ‘‘𑀤𑀻𑀖𑀲𑁄 𑀙 𑀯𑀺𑀤𑀢𑁆𑀣𑀺𑀬𑁄 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑀸, 𑀢𑀺𑀭𑀺𑀬𑀁 𑀅𑀟𑁆𑀠𑀢𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁫𑁪𑁩) 𑀯𑀼𑀢𑁆𑀢𑀧𑁆𑀧𑀫𑀸𑀡𑀢𑁄 𑀅𑀦𑀥𑀺𑀓𑀧𑀫𑀸𑀡𑀸. 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀩𑁆𑀩𑀸𑀢𑀺 𑀯𑀲𑁆𑀲𑀺𑀓𑀲𑀸𑀝𑀺𑀓𑀪𑀸𑀯𑀢𑁄 𑀅𑀧𑀦𑁂𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀩𑁆𑀩𑀸, 𑀳𑁂𑀫𑀦𑁆𑀢𑀲𑁆𑀲 𑀧𑀞𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀅𑀦𑁆𑀢𑁄𑀤𑀲𑀸𑀳𑁂 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀯𑀲𑁆𑀲𑀺𑀓𑀲𑀸𑀝𑀺𑀓𑀪𑀸𑀯𑀢𑁄 𑀅𑀧𑀦𑁂𑀢𑁆𑀯𑀸 ‘‘𑀇𑀫𑀁 𑀘𑀻𑀯𑀭𑀁 𑀢𑀼𑀬𑁆𑀳𑀁 𑀯𑀺𑀓𑀧𑁆𑀧𑁂𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀓𑀧𑁆𑀧𑁂𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀜𑁆𑀜𑀣𑀸 𑀳𑀺 ‘‘𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀯𑀲𑁆𑀲𑀸𑀦𑀫𑀸𑀲𑀸𑀢𑀺𑀓𑁆𑀓𑀫𑁂𑀦𑀸𑀧𑀺, 𑀓𑀡𑁆𑀟𑀼𑀧𑀝𑀺𑀘𑁆𑀙𑀸𑀤𑀺 𑀆𑀩𑀸𑀥𑀯𑀽𑀧𑀲𑀫𑁂𑀦𑀸𑀧𑀺 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀻’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀯𑀓𑁆𑀔𑀫𑀸𑀦𑀢𑁆𑀢𑀸 𑀯𑀲𑁆𑀲𑀸𑀦𑀫𑀸𑀲𑀢𑁄 𑀧𑀭𑀁 𑀅𑀲𑀢𑀺 𑀅𑀥𑀺𑀝𑁆𑀞𑀸𑀦𑁂 𑀓𑀺𑀁 𑀧𑀘𑁆𑀘𑀼𑀤𑁆𑀥𑀭𑁂𑀬𑁆𑀬𑀸𑀢𑀺 ‘‘𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸’’𑀢𑀺 𑀯𑀘𑀦𑀫𑁂𑀯 𑀦𑁄𑀧𑀧𑀚𑁆𑀚𑁂𑀬𑁆𑀬.

𑀓𑁂𑀘𑀺 𑀧𑀦 (𑀲𑀸𑀭𑀢𑁆𑀣. 𑀝𑀻. 𑁨.𑁪𑁬𑁯) ‘‘𑀬𑀣𑀸 𑀓𑀣𑀺𑀦𑀫𑀸𑀲𑀩𑁆𑀪𑀦𑁆𑀢𑀭𑁂 𑀉𑀧𑁆𑀧𑀦𑁆𑀦𑀘𑀻𑀯𑀭𑀁 𑀓𑀣𑀺𑀦𑀫𑀸𑀲𑀸𑀢𑀺𑀓𑁆𑀓𑀫𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺, 𑀏𑀯𑀫𑀬𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀧𑀺 𑀯𑀲𑁆𑀲𑀸𑀦𑀫𑀸𑀲𑀸𑀢𑀺𑀓𑁆𑀓𑀫𑁂 𑀦𑀺𑀲𑁆𑀲𑀕𑁆𑀕𑀺𑀬𑀸 𑀳𑁄𑀢𑀺. 𑀢𑀲𑁆𑀫𑀸 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀤𑀺𑀯𑀲𑁂 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀢𑀢𑁄 𑀧𑀭𑀁 𑀳𑁂𑀫𑀦𑁆𑀢𑀲𑁆𑀲 𑀧𑀞𑀫𑀤𑀺𑀯𑀲𑁂 𑀯𑀺𑀓𑀧𑁆𑀧𑁂𑀢𑀩𑁆𑀩𑀸𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄, 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀩𑁆𑀩𑀸𑀢𑀺 𑀧𑀤𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀘 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁. 𑀓𑀣𑀺𑀦𑀫𑀸𑀲𑁂 𑀉𑀧𑁆𑀧𑀦𑁆𑀦𑀜𑁆𑀳𑀺 𑀘𑀻𑀯𑀭𑀁 𑀅𑀢𑀺𑀭𑁂𑀓𑀘𑀻𑀯𑀭𑀝𑁆𑀞𑀸𑀦𑁂 𑀞𑀺𑀢𑀢𑁆𑀢𑀸 𑀅𑀯𑀲𑀸𑀦𑀤𑀺𑀯𑀲𑁂 𑀅𑀦𑀥𑀺𑀝𑁆𑀞𑀺𑀢𑀁 𑀓𑀣𑀺𑀦𑀫𑀸𑀲𑀸𑀢𑀺𑀓𑁆𑀓𑀫𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. 𑀅𑀬𑀁 𑀧𑀦 𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀞𑀧𑀺𑀢𑀢𑁆𑀢𑀸 𑀦 𑀢𑁂𑀦 𑀲𑀤𑀺𑀲𑀸𑀢𑀺 𑀯𑀲𑁆𑀲𑀸𑀦𑀸𑀢𑀺𑀓𑁆𑀓𑀫𑁂 𑀓𑀣𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺 𑀅𑀦𑀥𑀺𑀝𑁆𑀞𑀺𑀢𑀅𑀯𑀺𑀓𑀧𑁆𑀧𑀺𑀢𑀫𑁂𑀯 𑀳𑀺 𑀢𑀁 𑀓𑀸𑀮𑀸𑀢𑀺𑀓𑁆𑀓𑀫𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺, 𑀢𑀲𑁆𑀫𑀸 𑀳𑁂𑀫𑀦𑁆𑀢𑁂𑀧𑀺 𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀤𑀲𑀸𑀳𑀧𑀭𑀺𑀳𑀸𑀭𑀁 𑀮𑀪𑀢𑀺. 𑀏𑀯𑀁 𑀓𑀡𑁆𑀟𑀼𑀧𑀝𑀺𑀘𑁆𑀙𑀸𑀤𑀺𑀧𑀺 𑀅𑀥𑀺𑀝𑁆𑀞𑀸𑀦𑀯𑀺𑀚𑀳𑀦𑀢𑁄 𑀧𑀭𑀁 𑀤𑀲𑀸𑀳𑀧𑀭𑀺𑀳𑀸𑀭𑀁 𑀮𑀪𑀢𑀺. 𑀤𑀲𑀸𑀳𑀁 𑀧𑀦 𑀅𑀦𑀢𑀺𑀓𑁆𑀓𑀸𑀫𑁂𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀩𑁆𑀩𑀸. 𑀦𑀳𑀸𑀦𑀢𑁆𑀣𑀸𑀬 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀯𑀡𑁆𑀡𑀪𑁂𑀤𑀫𑀢𑁆𑀢𑀭𑀢𑁆𑀢𑀸𑀧𑀺 𑀘𑁂𑀲𑀸 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁. ‘‘𑀤𑁆𑀯𑁂 𑀧𑀦 𑀦 𑀯𑀝𑁆𑀝𑀦𑁆𑀢𑀻’’𑀢𑀺 𑀤𑁆𑀯𑀺𑀦𑁆𑀦𑀁 𑀅𑀥𑀺𑀝𑁆𑀞𑀸𑀦𑀸𑀪𑀸𑀯𑀢𑁄 𑀯𑀼𑀢𑁆𑀢𑀁. ‘‘𑀲𑀘𑁂 𑀯𑀲𑁆𑀲𑀸𑀦𑁂 𑀅𑀧𑀭𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺, 𑀧𑀼𑀭𑀺𑀫𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸, 𑀯𑀺𑀓𑀧𑁆𑀧𑁂𑀢𑁆𑀯𑀸 𑀘 𑀅𑀥𑀺𑀝𑁆𑀞𑀸𑀢𑀩𑁆𑀩𑀸’’𑀢𑀺 𑀯𑀤𑀦𑁆𑀢𑀺.

𑀧𑀫𑀸𑀡𑀬𑀼𑀢𑁆𑀢𑀦𑁆𑀢𑀺 ‘‘𑀤𑀻𑀖𑀲𑁄 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑀸 𑀤𑁆𑀯𑁂 𑀯𑀺𑀤𑀢𑁆𑀣𑀺𑀬𑁄, 𑀯𑀺𑀢𑁆𑀣𑀸𑀭𑀢𑁄 𑀤𑀺𑀬𑀟𑁆𑀠𑀁 𑀤𑀲𑀸 𑀯𑀺𑀤𑀢𑁆𑀣𑀻’’𑀢𑀺 (𑀧𑀸𑀘𑀺. 𑁫𑁩𑁧 𑀆𑀤𑀬𑁄) 𑀇𑀫𑀺𑀦𑀸 𑀧𑀫𑀸𑀡𑁂𑀦 𑀬𑀼𑀢𑁆𑀢𑀁. 𑀧𑀫𑀸𑀡𑀺𑀓𑀸𑀢𑀺 ‘‘𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑀸 𑀤𑀻𑀖𑀲𑁄 𑀘𑀢𑀲𑁆𑀲𑁄 𑀯𑀺𑀤𑀢𑁆𑀣𑀺𑀬𑁄, 𑀢𑀺𑀭𑀺𑀬𑀁 𑀤𑁆𑀯𑁂 𑀯𑀺𑀤𑀢𑁆𑀣𑀺𑀬𑁄’’𑀢𑀺 𑀏𑀯𑀁 𑀯𑀼𑀢𑁆𑀢𑀧𑁆𑀧𑀫𑀸𑀡𑀬𑀼𑀢𑁆𑀢𑀸. 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀩𑁆𑀩𑀸𑀢𑀺 𑀏𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀬𑀲𑁆𑀫𑀸 𑀪𑀺𑀓𑁆𑀔𑀽𑀦𑀁 𑀢𑀺𑀘𑀻𑀯𑀭𑁂 𑀧𑀭𑀺𑀧𑀼𑀡𑁆𑀡𑁂, 𑀅𑀢𑁆𑀣𑁂 𑀘 𑀲𑀢𑀺 𑀧𑀭𑀺𑀲𑁆𑀲𑀸𑀯𑀦𑀸𑀤𑀻𑀳𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀭𑀺𑀓𑁆𑀔𑀸𑀭𑀘𑁄𑀴𑀓’’𑀦𑁆𑀢𑀺 (𑀫𑀳𑀸𑀯. 𑁩𑁫𑁭) 𑀩𑀳𑀽𑀦𑀁 𑀧𑀢𑁆𑀢𑀢𑁆𑀣𑀯𑀺𑀓𑀧𑀭𑀺𑀲𑁆𑀲𑀸𑀯𑀦𑀸𑀤𑀻𑀦𑀁 𑀲𑀗𑁆𑀕𑀳𑀯𑀲𑁂𑀦 𑀧𑀭𑀺𑀓𑁆𑀔𑀸𑀭𑀘𑁄𑀴𑀸𑀥𑀺𑀝𑁆𑀞𑀸𑀦𑀫𑀦𑀼𑀜𑁆𑀜𑀸𑀢𑀁, 𑀢𑀲𑁆𑀫𑀸 ‘‘𑀧𑀭𑀺𑀓𑁆𑀔𑀸𑀭𑀘𑁄𑀴𑁂 𑀕𑀡𑀦𑀸 𑀦𑀢𑁆𑀣𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀪𑀕𑀯𑀢𑀸 𑀳𑀺 𑀬𑀁 𑀬𑀁 𑀪𑀺𑀓𑁆𑀔𑀽 𑀮𑀪𑀦𑁆𑀢𑀺, 𑀢𑀁 𑀢𑀁 𑀇𑀫𑀺𑀦𑀸 𑀯𑀺𑀥𑀸𑀦𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀼𑀦 ‘‘𑀬𑁂𑀦 𑀬𑁂𑀦 𑀧𑀭𑀺𑀲𑁆𑀲𑀸𑀯𑀦𑀸𑀤𑀺𑀦𑀸 𑀅𑀢𑁆𑀣𑁄 𑀳𑁄𑀢𑀺, 𑀢𑀁 𑀢𑀁 𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑀽’’𑀢𑀺 𑀅𑀦𑀼𑀓𑀫𑁆𑀧𑀸𑀬 𑀅𑀦𑀼𑀜𑁆𑀜𑀸𑀢𑀁. 𑀢𑁂𑀦𑁂𑀯𑀸𑀳 ‘‘𑀣𑀯𑀺𑀓𑀸𑀧𑀻’’𑀢𑀺𑀆𑀤𑀺. 𑀆𑀤𑀺𑀲𑀤𑁆𑀤𑁂𑀦 ‘‘𑀏𑀢𑀸𑀦𑀺 𑀘𑀻𑀯𑀭𑀸𑀦𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀸𑀦𑀺 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀅𑀲𑀫𑁆𑀫𑀼𑀔𑀸𑀥𑀺𑀝𑁆𑀞𑀸𑀦𑀁 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀢𑁆𑀣𑀸𑀬 𑀤𑀺𑀦𑁆𑀦𑀧𑀘𑁆𑀘𑀢𑁆𑀣𑀭𑀡𑁂 𑀘𑀸’’𑀢𑀺 𑀇𑀫𑀺𑀦𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀓𑁂𑀘𑀺 𑀧𑀦 (𑀲𑀸𑀭𑀢𑁆𑀣. 𑀝𑀻. 𑁨.𑁪𑁬𑁯) ‘‘𑀅𑀦𑀺𑀯𑀸𑀲𑁂𑀢𑁆𑀯𑀸, 𑀅𑀧𑀸𑀭𑀼𑀧𑀺𑀢𑁆𑀯𑀸 𑀘 𑀓𑁂𑀯𑀮𑀁 𑀧𑀜𑁆𑀘𑀧𑀻𑀞𑁂𑀲𑀼𑀬𑁂𑀯 𑀅𑀢𑁆𑀣𑀭𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀬𑀫𑀸𑀦𑀁 𑀧𑀘𑁆𑀘𑀢𑁆𑀣𑀭𑀡𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀫𑁆𑀧𑀺 𑀅𑀦𑀥𑀺𑀝𑁆𑀞𑀺𑀢𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀅𑀬𑀼𑀢𑁆𑀢𑀁 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀢𑁆𑀣𑀸𑀬 𑀤𑀺𑀦𑁆𑀦’’𑀦𑁆𑀢𑀺 𑀧𑀘𑁆𑀘𑀢𑁆𑀣𑀭𑀡𑀲𑁆𑀲 𑀯𑀺𑀲𑁂𑀲𑀺𑀢𑀢𑁆𑀢𑀸. 𑀪𑀺𑀲𑀺𑀩𑀺𑀩𑁆𑀩𑁄𑀳𑀦𑀧𑀸𑀯𑀸𑀭𑀓𑁄𑀚𑀯𑀸𑀦𑀫𑁆𑀧𑀺 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀢𑁄𑀬𑁂𑀯 𑀅𑀥𑀺𑀝𑁆𑀞𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀥𑀺𑀝𑁆𑀞𑀺𑀢𑀜𑁆𑀘 𑀧𑀦𑁂𑀢𑀁 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀢𑁄 𑀓𑀣𑀁 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀻𑀢𑀺 𑀆𑀳 ‘‘𑀲𑀩𑁆𑀩𑀜𑁆𑀘 𑀧𑀦𑁂𑀢’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑀡𑁂𑀦𑀸𑀢𑀺 𑀘𑁄𑀭𑀸𑀤𑀻𑀳𑀺 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑀡𑁂𑀦. 𑀳𑀻𑀦𑀸𑀬𑀸𑀯𑀢𑁆𑀢𑀦𑁂𑀦𑀸𑀢𑀺 𑀕𑀺𑀳𑀺𑀪𑀸𑀯𑀸𑀬 𑀆𑀯𑀢𑁆𑀢𑀦𑁂𑀦, 𑀯𑀺𑀩𑁆𑀪𑀫𑁂𑀦𑀸𑀢𑀺 𑀅𑀢𑁆𑀣𑁄, ‘‘𑀲𑀻𑀮𑀯𑀦𑁆𑀢𑁄𑀯 𑀳𑀼𑀢𑁆𑀯𑀸 𑀕𑀺𑀳𑀻 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀲𑁂𑀢𑀯𑀢𑁆𑀣𑀦𑀺𑀯𑀸𑀲𑀦𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀲𑁆𑀲 𑀲𑁂𑀢𑀯𑀢𑁆𑀣𑀦𑀺𑀯𑀸𑀲𑁄 𑀯𑀸 𑀓𑀸𑀲𑀸𑀬𑀘𑀚𑀦𑀁 𑀯𑀸 𑀳𑀻𑀦𑀸𑀬𑀸𑀯𑀢𑁆𑀢𑀦’’𑀦𑁆𑀢𑀺 𑀓𑁂𑀘𑀺. ‘‘‘𑀳𑀻𑀦𑀸𑀬𑀸𑀯𑀢𑁆𑀢𑀦𑁂𑀦𑀸’𑀢𑀺 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀺𑀬𑀸 𑀏𑀯 𑀅𑀥𑀺𑀝𑁆𑀞𑀸𑀦𑀯𑀺𑀚𑀳𑀦𑀁 𑀕𑀳𑀺𑀢𑀁 𑀳𑁄𑀢𑀺. 𑀲𑀸 𑀳𑀺 𑀬𑀤𑀸 𑀯𑀺𑀩𑁆𑀪𑀫𑀢𑀺, 𑀢𑀤𑀸 𑀅𑀲𑁆𑀲𑀫𑀡𑀻 𑀳𑁄𑀢𑀺. 𑀪𑀺𑀓𑁆𑀔𑀼 𑀧𑀦 𑀯𑀺𑀩𑁆𑀪𑀫𑀦𑁆𑀢𑁄𑀧𑀺 𑀬𑀸𑀯 𑀲𑀺𑀓𑁆𑀔𑀁 𑀦 𑀧𑀘𑁆𑀘𑀓𑁆𑀔𑀸𑀢𑀺, 𑀢𑀸𑀯 𑀪𑀺𑀓𑁆𑀔𑀼𑀬𑁂𑀯𑀸𑀢𑀺 𑀅𑀥𑀺𑀝𑁆𑀞𑀸𑀦𑀁 𑀦 𑀯𑀺𑀚𑀳𑀢𑀻’’𑀢𑀺 𑀅𑀧𑀭𑁂. 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑁂𑀦𑀸𑀢𑀺 𑀮𑀺𑀗𑁆𑀕𑁂 𑀞𑀺𑀢𑀲𑁆𑀲𑁂𑀯 𑀲𑀺𑀓𑁆𑀔𑀸𑀬 𑀧𑀘𑁆𑀘𑀓𑁆𑀔𑀸𑀦𑁂𑀦. 𑀬𑁄 𑀳𑀺 𑀪𑀺𑀓𑁆𑀔𑀼𑀮𑀺𑀗𑁆𑀕𑁂 𑀞𑀺𑀢𑁄𑀯 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀢𑀲𑁆𑀲 𑀓𑀸𑀬𑀮𑀕𑁆𑀕𑀫𑁆𑀧𑀺 𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀻𑀢𑀺. 𑀓𑀸𑀮𑀗𑁆𑀓𑀺𑀭𑀺𑀬𑀸𑀬𑀸𑀢𑀺 𑀫𑀭𑀡𑁂𑀦. 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑁂𑀦𑀸𑀢𑀺 𑀧𑀼𑀭𑀺𑀲𑀮𑀺𑀗𑁆𑀕𑀲𑁆𑀲, 𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀯𑀸 𑀧𑀭𑀺𑀯𑀢𑁆𑀢𑀦𑁂𑀦, 𑀧𑀼𑀭𑀺𑀲𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀧𑀸𑀢𑀼𑀪𑀸𑀯𑁂𑀦, 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑀮𑀺𑀗𑁆𑀕𑀧𑀸𑀢𑀼𑀪𑀸𑀯𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀓𑀦𑀺𑀝𑁆𑀞𑀗𑁆𑀕𑀼𑀮𑀺𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑁂𑀦𑀸𑀢𑀺 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑀺. 𑀑𑀭𑀢𑁄𑀢𑀺 𑀅𑀩𑁆𑀪𑀦𑁆𑀢𑀭𑀢𑁄. 𑀬𑁄 𑀧𑀦 𑀤𑀼𑀩𑁆𑀩𑀮𑀝𑁆𑀞𑀸𑀦𑁂 𑀧𑀞𑀫𑀁 𑀅𑀕𑁆𑀕𑀴𑀁 𑀤𑀢𑁆𑀯𑀸 𑀧𑀘𑁆𑀙𑀸 𑀤𑀼𑀩𑁆𑀩𑀮𑀝𑁆𑀞𑀸𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀧𑀦𑁂𑀢𑀺, 𑀅𑀥𑀺𑀝𑁆𑀞𑀸𑀦𑀁 𑀦 𑀪𑀺𑀚𑁆𑀚𑀢𑀺. 𑀫𑀡𑁆𑀟𑀮𑀧𑀭𑀺𑀯𑀢𑁆𑀢𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀤𑀼𑀧𑀝𑁆𑀝𑀲𑁆𑀲 𑀧𑀦 𑀏𑀓𑀲𑁆𑀫𑀺𑀁 𑀧𑀝𑀮𑁂 𑀙𑀺𑀤𑁆𑀤𑁂 𑀯𑀸 𑀚𑀸𑀢𑁂, 𑀕𑀮𑀺𑀢𑁂 𑀯𑀸 𑀅𑀥𑀺𑀝𑁆𑀞𑀸𑀦𑀁 𑀦 𑀪𑀺𑀚𑁆𑀚𑀢𑀺. 𑀔𑀼𑀤𑁆𑀤𑀓𑀁 𑀘𑀻𑀯𑀭𑀁 𑀫𑀳𑀦𑁆𑀢𑀁 𑀓𑀭𑁄𑀢𑀺, 𑀫𑀳𑀦𑁆𑀢𑀁 𑀯𑀸 𑀔𑀼𑀤𑁆𑀤𑀓𑀁 𑀓𑀭𑁄𑀢𑀺, 𑀅𑀥𑀺𑀝𑁆𑀞𑀸𑀦𑀁 𑀦 𑀪𑀺𑀚𑁆𑀚𑀢𑀺. 𑀉𑀪𑁄 𑀓𑁄𑀝𑀺𑀬𑁄 𑀫𑀚𑁆𑀛𑁂 𑀓𑀭𑁄𑀦𑁆𑀢𑁄 𑀲𑀘𑁂 𑀧𑀦 𑀧𑀞𑀫𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀘𑁆𑀙𑀸 𑀖𑀝𑁂𑀢𑀺, 𑀅𑀥𑀺𑀝𑁆𑀞𑀸𑀦𑀁 𑀪𑀺𑀚𑁆𑀚𑀢𑀺. 𑀅𑀣 𑀖𑀝𑁂𑀢𑁆𑀯𑀸 𑀙𑀺𑀦𑁆𑀤𑀢𑀺, 𑀦 𑀪𑀺𑀚𑁆𑀚𑀢𑀺. 𑀭𑀚𑀓𑁂𑀳𑀺 𑀥𑁄𑀯𑀸𑀧𑁂𑀢𑁆𑀯𑀸 𑀲𑁂𑀢𑀁 𑀓𑀭𑁄𑀦𑁆𑀢𑀲𑁆𑀲𑀸𑀧𑀺 𑀅𑀥𑀺𑀝𑁆𑀞𑀸𑀦𑀁 𑀅𑀥𑀺𑀝𑁆𑀞𑀸𑀦𑀫𑁂𑀯. 𑀯𑀲𑁆𑀲𑀸𑀦𑀫𑀸𑀲𑀸𑀢𑀺𑀓𑁆𑀓𑀫𑁂𑀦𑀸𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀢𑁂𑀦 𑀦 𑀓𑁂𑀯𑀮𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂𑀦 𑀤𑀸𑀦𑀸𑀤𑀺𑀦𑀸 𑀅𑀝𑁆𑀞𑀯𑀺𑀥𑁂𑀦𑁂𑀯 𑀓𑀸𑀭𑀡𑁂𑀦 𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀺, 𑀅𑀣 𑀔𑁄 𑀯𑀲𑁆𑀲𑀸𑀦𑀫𑀸𑀲𑀸𑀢𑀺𑀓𑁆𑀓𑀫𑁂𑀦𑀧𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀲 𑀦𑀬𑁄 𑀆𑀩𑀸𑀥𑀯𑀽𑀧𑀲𑀫𑁂𑀦𑀸𑀧𑀻𑀢𑀺 𑀏𑀢𑁆𑀣𑀸𑀧𑀺. 𑀯𑀺𑀓𑀧𑁆𑀧𑀦𑀲𑀺𑀓𑁆𑀔𑀸𑀧𑀤𑁂𑀢𑀺 (𑀧𑀸𑀘𑀺. 𑁩𑁭𑁨 𑀆𑀤𑀬𑁄) 𑀧𑀸𑀘𑀺𑀢𑁆𑀢𑀺𑀬𑁂 𑀲𑀼𑀭𑀸𑀧𑀸𑀦𑀯𑀕𑁆𑀕𑀲𑁆𑀲 𑀦𑀯𑀫𑀲𑀺𑀓𑁆𑀔𑀸𑀧𑀤𑁂.

𑀢𑀁 𑀅𑀢𑀺𑀓𑁆𑀓𑀸𑀫𑀬𑀢𑁄𑀢𑀺 𑀏𑀢𑁆𑀣 𑀢𑀦𑁆𑀢𑀺 𑀘𑀻𑀯𑀭𑀁, 𑀓𑀸𑀮𑀁 𑀯𑀸 𑀧𑀭𑀸𑀫𑀲𑀢𑀻𑀢𑀺 𑀆𑀳 ‘‘𑀢𑀁 𑀬𑀣𑀸𑀯𑀼𑀢𑁆𑀢𑀚𑀸𑀢𑀺𑀧𑁆𑀧𑀫𑀸𑀡’’𑀦𑁆𑀢𑀺𑀆𑀤𑀺. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲. 𑀢𑀲𑁆𑀲 𑀬𑁄 𑀅𑀭𑀼𑀡𑁄𑀢𑀺 𑀢𑀲𑁆𑀲 𑀘𑀻𑀯𑀭𑀼𑀧𑁆𑀧𑀸𑀤𑀤𑀺𑀯𑀲𑀲𑁆𑀲 𑀬𑁄 𑀅𑀢𑀺𑀓𑁆𑀓𑀦𑁆𑀢𑁄 𑀅𑀭𑀼𑀡𑁄. 𑀘𑀻𑀯𑀭𑀼𑀧𑁆𑀧𑀸𑀤𑀤𑀺𑀯𑀲𑁂𑀦 𑀲𑀤𑁆𑀥𑀺𑀦𑁆𑀢𑀺 𑀘𑀻𑀯𑀭𑀼𑀧𑁆𑀧𑀸𑀤𑀤𑀺𑀯𑀲𑀲𑁆𑀲 𑀅𑀭𑀼𑀡𑁂𑀦 𑀲𑀤𑁆𑀥𑀺𑀁. 𑀤𑀺𑀯𑀲𑀲𑀤𑁆𑀤𑁂𑀦 𑀘𑁂𑀢𑁆𑀣 𑀢𑀁𑀤𑀺𑀯𑀲𑀦𑀺𑀲𑁆𑀲𑀺𑀢𑁄 𑀅𑀭𑀼𑀡𑁄 𑀯𑀼𑀢𑁆𑀢𑁄. 𑀇𑀤𑀸𑀦𑀺 𑀬𑀲𑁆𑀲 𑀘 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁, 𑀬𑀣𑀸 𑀘 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀁 𑀕𑀳𑁂𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀦𑀬𑁄𑀢𑀺 𑀢𑀲𑁆𑀫𑀺𑀁 𑀦𑀺𑀲𑁆𑀲𑀚𑁆𑀚𑀦𑁂 𑀅𑀬𑀁 𑀯𑀺𑀥𑀺. 𑀅𑀜𑁆𑀜𑀣𑀸𑀧𑀻𑀢𑀺 𑀪𑀸𑀲𑀦𑁆𑀢𑀭𑁂𑀦𑀸𑀧𑀺, 𑀬𑀸𑀬 𑀓𑀸𑀬𑀘𑀺 𑀪𑀸𑀲𑀸𑀬𑀧𑀻𑀢𑀺 𑀅𑀢𑁆𑀣𑁄. 𑀧𑀝𑀺𑀩𑀮𑁂𑀦𑀸𑀢𑀺 𑀯𑀢𑁆𑀢𑀼𑀁 𑀲𑀫𑀢𑁆𑀣𑁂𑀦. 𑀆𑀬𑀢𑀺𑀁 𑀲𑀁𑀯𑀭𑁂𑀬𑁆𑀬𑀸𑀲𑀻𑀢𑀺 𑀉𑀧𑀭𑀺 𑀲𑀁𑀯𑀭𑀫𑀸𑀧𑀚𑁆𑀚𑁂𑀬𑁆𑀬𑀸𑀲𑀺, 𑀲𑀁𑀯𑀼𑀢𑀓𑀸𑀬𑀯𑀘𑀻𑀤𑁆𑀯𑀸𑀭𑁄 𑀪𑀯𑁂𑀬𑁆𑀬𑀸𑀲𑀻𑀢𑀺 𑀅𑀢𑁆𑀣𑁄. 𑀇𑀫𑀸𑀦𑀺 𑀘 ‘‘𑀧𑀲𑁆𑀲𑀲𑀻’’𑀢𑀺𑀆𑀤𑀻𑀦𑀺 𑀬𑀣𑀸𑀓𑁆𑀓𑀫𑀁 𑀧𑀝𑀺𑀕𑁆𑀕𑀸𑀳𑀓𑀤𑁂𑀲𑀓𑁂𑀳𑀺 𑀯𑀢𑁆𑀢𑀩𑁆𑀩𑀯𑀘𑀦𑀸𑀦𑀺. 𑀢𑀣𑀸 𑀳𑀺 ‘‘𑀧𑀲𑁆𑀲𑀲𑀻’’𑀢𑀺 𑀧𑀝𑀺𑀕𑁆𑀕𑀸𑀳𑀓𑁂𑀦 𑀯𑀢𑁆𑀢𑀩𑁆𑀩𑀯𑀘𑀦𑀁, ‘‘𑀆𑀫 𑀧𑀲𑁆𑀲𑀸𑀫𑀻’’𑀢𑀺 𑀢𑀤𑀦𑀼𑀤𑁂𑀲𑀓𑁂𑀦 𑀯𑀢𑁆𑀢𑀩𑁆𑀩𑀯𑀘𑀦𑀁. ‘‘𑀆𑀬𑀢𑀺𑀁 𑀲𑀁𑀯𑀭𑁂𑀬𑁆𑀬𑀸𑀲𑀻’’𑀢𑀺 𑀢𑀤𑀦𑀼𑀧𑁆𑀧𑀝𑀺𑀕𑁆𑀕𑀸𑀳𑀓𑁂𑀦 𑀯𑀢𑁆𑀢𑀩𑁆𑀩𑀯𑀘𑀦𑀁, ‘‘𑀲𑀸𑀥𑀼 𑀲𑀼𑀝𑁆𑀞𑀼 𑀲𑀁𑀯𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀤𑀦𑀼𑀤𑁂𑀲𑀓𑁂𑀦 𑀯𑀢𑁆𑀢𑀩𑁆𑀩𑀯𑀘𑀦𑀁. 𑀇𑀫𑀺𑀦𑀸 𑀘 𑀅𑀢𑁆𑀢𑀦𑁄 𑀆𑀬𑀢𑀺𑀁 𑀲𑀁𑀯𑀭𑁂 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀤𑁆𑀯𑀻𑀲𑀼, 𑀧𑀦 𑀲𑀫𑁆𑀩𑀳𑀼𑀮𑀸𑀲𑀼 𑀯𑀸𑀢𑀺 𑀤𑁆𑀯𑀻𑀲𑀼 𑀯𑀸 𑀲𑀫𑁆𑀩𑀳𑀼𑀮𑀸𑀲𑀼 𑀯𑀸 𑀆𑀧𑀢𑁆𑀢𑀻𑀲𑀼 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀘𑀦𑀪𑁂𑀤𑁄 𑀓𑀸𑀢𑀩𑁆𑀩𑁄. 𑀜𑀢𑁆𑀢𑀺𑀬𑀁 𑀆𑀧𑀢𑁆𑀢𑀺𑀁 𑀲𑀭𑀢𑀺 𑀯𑀺𑀯𑀭𑀢𑀻𑀢𑀺 𑀏𑀢𑁆𑀣 ‘‘𑀤𑁆𑀯𑁂 𑀆𑀧𑀢𑁆𑀢𑀺𑀬𑁄’’𑀢𑀺 𑀯𑀸 ‘‘𑀲𑀫𑁆𑀩𑀳𑀼𑀮𑀸 𑀆𑀧𑀢𑁆𑀢𑀺𑀬𑁄’’𑀢𑀺 𑀯𑀸 𑀯𑀘𑀦𑀪𑁂𑀤𑁄 𑀓𑀸𑀢𑀩𑁆𑀩𑁄. 𑀤𑁆𑀯𑀻𑀲𑀼, 𑀩𑀳𑀽𑀲𑀼 𑀯𑀸 𑀯𑀘𑀦𑀪𑁂𑀤𑁄 𑀓𑀸𑀢𑀩𑁆𑀩𑁄𑀢𑀺 ‘‘𑀲𑀗𑁆𑀖𑁄 𑀇𑀫𑀸𑀦𑀺 𑀘𑀻𑀯𑀭𑀸𑀦𑀻’’𑀢𑀺 𑀯𑀢𑁆𑀣𑀼𑀯𑀲𑁂𑀦 𑀯𑀘𑀦𑀪𑁂𑀤𑁄 𑀓𑀸𑀢𑀩𑁆𑀩𑁄.

𑀏𑀯𑀁 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀚𑁆𑀚𑀦𑀯𑀺𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀕𑀡𑀲𑁆𑀲 𑀦𑀺𑀲𑁆𑀲𑀚𑁆𑀚𑀦𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀕𑀡𑀲𑁆𑀲 𑀧𑀦 𑀦𑀺𑀲𑁆𑀲𑀚𑁆𑀚𑀦𑁆𑀢𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯𑀸𑀢𑀺 𑀦𑀺𑀲𑁆𑀲𑀚𑁆𑀚𑀦𑀸𑀧𑀢𑁆𑀢𑀺𑀧𑁆𑀧𑀝𑀺𑀕𑁆𑀕𑀳𑀡𑀦𑀺𑀲𑁆𑀲𑀝𑁆𑀞𑀘𑀻𑀯𑀭𑀤𑀸𑀦𑁂𑀲𑀼 ‘‘𑀆𑀬𑀲𑁆𑀫𑀦𑁆𑀢𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀯𑀘𑀦𑀪𑁂𑀤𑀁 𑀯𑀺𑀦𑀸 𑀅𑀯𑀲𑁂𑀲𑀁 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀚𑁆𑀚𑀦𑀸𑀤𑀻𑀲𑀼 𑀯𑀼𑀢𑁆𑀢𑀲𑀤𑀺𑀲𑀫𑁂𑀯𑀸𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀧𑀼𑀕𑁆𑀕𑀮𑀲𑁆𑀲 𑀦𑀺𑀲𑁆𑀲𑀚𑁆𑀚𑀦𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀕𑁆𑀕𑀮𑀲𑁆𑀲 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑁆𑀯𑀻𑀲𑀼, 𑀢𑀻𑀲𑀼 𑀯𑀸𑀢𑀺 𑀤𑁆𑀯𑀻𑀲𑀼, 𑀢𑀻𑀲𑀼 𑀯𑀸 𑀆𑀧𑀢𑁆𑀢𑀻𑀲𑀼 𑀘𑁂𑀯 𑀤𑀸𑀢𑀩𑁆𑀩𑀘𑀻𑀯𑀭𑁂𑀲𑀼 𑀘. 𑀬𑀣𑀸 𑀘 𑀕𑀡𑀲𑁆𑀲 𑀦𑀺𑀲𑁆𑀲𑀚𑁆𑀚𑀦𑁂, 𑀏𑀯𑀁 𑀤𑁆𑀯𑀺𑀦𑁆𑀦𑀁 𑀦𑀺𑀲𑁆𑀲𑀚𑁆𑀚𑀦𑁂𑀧𑀺 𑀧𑀸𑀴𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀤𑀺 𑀳𑀺 𑀯𑀺𑀲𑁂𑀲𑁄 𑀪𑀯𑁂𑀬𑁆𑀬, 𑀬𑀣𑁂𑀯 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀸𑀢𑀼𑀁, 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀓𑀸𑀢𑀩𑁆𑀩𑁄 𑁋 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀢𑁂 𑀪𑀺𑀓𑁆𑀔𑀽 𑀜𑀸𑀧𑁂𑀢𑀩𑁆𑀩𑀸’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁧𑁬𑁮) 𑀦𑀬𑁂𑀦 𑀢𑀺𑀡𑁆𑀡𑀁 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀯𑀢𑁆𑀯𑀸 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑁆𑀯𑀺𑀦𑁆𑀦𑀁 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀸𑀢𑀼𑀁, 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀓𑀢𑁆𑀢𑀩𑁆𑀩𑁄 𑁋 𑀣𑁂𑀭𑁂𑀦 𑀪𑀺𑀓𑁆𑀔𑀼𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀲𑀼𑀁𑀬𑁂𑀯 𑀤𑁆𑀯𑀺𑀦𑁆𑀦𑀁 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄 𑀯𑀼𑀢𑁆𑀢𑁄, 𑀏𑀯𑀁 𑀇𑀥𑀸𑀧𑀺 𑀯𑀺𑀲𑀼𑀁 𑀧𑀸𑀴𑀺𑀁 𑀯𑀤𑁂𑀬𑁆𑀬. 𑀬𑀲𑁆𑀫𑀸 𑀧𑀦 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀯𑀢𑁆𑀯𑀸𑀯 𑀕𑀢𑁄𑀢𑀺 𑀕𑀡𑀲𑁆𑀲 𑀯𑀼𑀢𑁆𑀢𑀸 𑀧𑀸𑀴𑀺𑀬𑁂𑀯𑁂𑀢𑁆𑀣 𑀧𑀸𑀴𑀺. 𑀆𑀧𑀢𑁆𑀢𑀺𑀧𑁆𑀧𑀝𑀺𑀕𑁆𑀕𑀳𑀡𑁂 𑀧𑀦 𑀅𑀬𑀁 𑀯𑀺𑀲𑁂𑀲𑁄 𑁋 𑀬𑀣𑀸 𑀕𑀡𑀲𑁆𑀲 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀆𑀧𑀢𑁆𑀢𑀺𑀬𑀸 𑀤𑁂𑀲𑀺𑀬𑀫𑀸𑀦𑀸𑀬 𑀆𑀧𑀢𑁆𑀢𑀺𑀧𑁆𑀧𑀝𑀺𑀕𑁆𑀕𑀸𑀳𑀓𑁄 𑀪𑀺𑀓𑁆𑀔𑀼 𑀜𑀢𑁆𑀢𑀺𑀁 𑀞𑀧𑁂𑀢𑀺, 𑀏𑀯𑀁 𑀅𑀝𑁆𑀞𑀧𑁂𑀢𑁆𑀯𑀸 𑀤𑁆𑀯𑀻𑀲𑀼 𑀅𑀜𑁆𑀜𑀢𑀭𑁂𑀦 𑀬𑀣𑀸 𑀏𑀓𑀧𑀼𑀕𑁆𑀕𑀮𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀏𑀯𑀁 𑀆𑀧𑀢𑁆𑀢𑀺 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸. 𑀤𑁆𑀯𑀺𑀦𑁆𑀦𑀜𑁆𑀳𑀺 𑀜𑀢𑁆𑀢𑀺𑀝𑁆𑀞𑀧𑀦𑀁 𑀦𑀸𑀫 𑀦𑀢𑁆𑀣𑀺. 𑀬𑀤𑀺 𑀲𑀺𑀬𑀸, 𑀤𑁆𑀯𑀺𑀦𑁆𑀦𑀁 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀯𑀺𑀲𑀼𑀁 𑀦 𑀯𑀤𑁂𑀬𑁆𑀬. 𑀦𑀺𑀲𑁆𑀲𑀝𑁆𑀞𑀘𑀻𑀯𑀭𑀤𑀸𑀦𑁂𑀧𑀺 𑀬𑀣𑀸 ‘‘𑀇𑀫𑀁 𑀘𑀻𑀯𑀭𑀁 𑀆𑀬𑀲𑁆𑀫𑀢𑁄 𑀤𑀫𑁆𑀫𑀻’’𑀢𑀺 𑀏𑀓𑁄 𑀯𑀤𑀢𑀺, 𑀏𑀯𑀁 ‘‘𑀫𑀬𑀁 𑀇𑀫𑀁 𑀘𑀻𑀯𑀭𑀁 𑀆𑀬𑀲𑁆𑀫𑀢𑁄 𑀤𑁂𑀫𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀇𑀢𑁄 𑀕𑀭𑀼𑀓𑀢𑀭𑀸𑀦𑀺𑀧𑀺 𑀳𑀺 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀸𑀦𑀺 𑀅𑀧𑀮𑁄𑀓𑁂𑀢𑁆𑀯𑀸 𑀓𑀸𑀢𑀩𑁆𑀩𑀸𑀦𑀻𑀢𑀺 𑀯𑀼𑀢𑁆𑀢𑀸𑀦𑀺 𑀅𑀢𑁆𑀣𑀺, 𑀢𑁂𑀲𑀁 𑀏𑀢𑀁 𑀅𑀦𑀼𑀮𑁄𑀫𑀁. 𑀢𑁂𑀦𑁂𑀯𑀸𑀳 ‘‘𑀤𑁆𑀯𑀺𑀦𑁆𑀦𑀁 𑀧𑀦𑀸’’𑀢𑀺𑀆𑀤𑀺. 𑀦𑀺𑀲𑁆𑀲𑀝𑁆𑀞𑀘𑀻𑀯𑀭𑀁 𑀧𑀦 𑀤𑀸𑀢𑀩𑁆𑀩𑀫𑁂𑀯, 𑀅𑀤𑀸𑀢𑀼𑀁 𑀦 𑀮𑀩𑁆𑀪𑀢𑀺. 𑀯𑀺𑀦𑀬𑀓𑀫𑁆𑀫𑀫𑀢𑁆𑀢𑀫𑁂𑀯 𑀳𑁂𑀢𑀁. 𑀦 𑀢𑀁 𑀢𑁂𑀦 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀤𑀺𑀦𑁆𑀦𑀫𑁂𑀯 𑀳𑁄𑀢𑀺. 𑀢𑁂𑀦𑀸𑀳 ‘‘𑀦𑀺𑀲𑁆𑀲𑀝𑁆𑀞𑀯𑀢𑁆𑀣𑀼’’𑀦𑁆𑀢𑀺𑀆𑀤𑀺.

𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀲𑀓𑀺𑀁 𑀦𑀺𑀯𑀢𑁆𑀣𑀁 𑀯𑀸 𑀲𑀓𑀺𑀁 𑀧𑀸𑀭𑀼𑀢𑀁 𑀯𑀸 𑀓𑀸𑀬𑀢𑁄 𑀅𑀫𑁄𑀘𑁂𑀢𑁆𑀯𑀸 𑀤𑀺𑀯𑀲𑀫𑁆𑀧𑀺 𑀘𑀭𑀢𑀺, 𑀏𑀓𑀫𑁂𑀯 𑀤𑀼𑀓𑁆𑀓𑀝𑀁. 𑀫𑁄𑀘𑁂𑀢𑁆𑀯𑀸 𑀦𑀺𑀯𑀸𑀲𑁂𑀢𑀺 𑀯𑀸 𑀧𑀸𑀭𑀼𑀧𑀢𑀺 𑀯𑀸, 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁. 𑀤𑀼𑀦𑁆𑀦𑀺𑀯𑀢𑁆𑀣𑀁 𑀯𑀸 𑀤𑀼𑀧𑁆𑀧𑀸𑀭𑀼𑀢𑀁 𑀯𑀸 𑀲𑀡𑁆𑀞𑀸𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀜𑁆𑀜𑀲𑁆𑀲 𑀢𑀁 𑀧𑀭𑀺𑀪𑀼𑀜𑁆𑀚𑀢𑁄𑀧𑀺 𑀅𑀦𑀸𑀧𑀢𑁆𑀢𑀺. ‘‘𑀅𑀜𑁆𑀜𑁂𑀦 𑀓𑀢𑀁 𑀧𑀝𑀺𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀻’’𑀢𑀺𑀆𑀤𑀺𑀯𑀘𑀦𑀜𑁆𑀘𑁂𑀢𑁆𑀣 (𑀧𑀸𑀭𑀸. 𑁫𑁭𑁦) 𑀲𑀸𑀥𑀓𑀁. 𑀤𑀲𑀸𑀳𑀁 𑀅𑀦𑀢𑀺𑀓𑁆𑀓𑀦𑁆𑀢𑁂𑀧𑀺 𑀅𑀢𑀺𑀓𑁆𑀓𑀦𑁆𑀢𑀲𑀜𑁆𑀜𑀺𑀦𑁄, 𑀯𑁂𑀫𑀢𑀺𑀓𑀲𑁆𑀲 𑀘 𑀤𑀼𑀓𑁆𑀓𑀝𑀦𑁆𑀢𑀺 𑀏𑀢𑁆𑀣𑀸𑀧𑀺 ‘‘𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲𑀸’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀅𑀢𑀺𑀓𑁆𑀓𑀦𑁆𑀢𑁂 𑀅𑀦𑀢𑀺𑀓𑁆𑀓𑀦𑁆𑀢𑀲𑀜𑁆𑀜𑀺𑀦𑁄𑀧𑀻𑀢𑀺 𑀤𑀲𑀸𑀳𑀁 𑀅𑀢𑀺𑀓𑁆𑀓𑀦𑁆𑀢𑁂 𑀘𑀻𑀯𑀭𑁂 ‘‘𑀅𑀦𑀢𑀺𑀓𑁆𑀓𑀦𑁆𑀢𑀁 𑀇𑀤’’𑀦𑁆𑀢𑀺 𑀏𑀯𑀁 𑀲𑀜𑁆𑀜𑀺𑀦𑁄, 𑀤𑀲𑀸𑀳𑁂 𑀯𑀸 𑀅𑀢𑀺𑀓𑁆𑀓𑀦𑁆𑀢𑁂 ‘‘𑀅𑀦𑀢𑀺𑀓𑁆𑀓𑀦𑁆𑀢𑁄 𑀤𑀲𑀸𑀳𑁄’’𑀢𑀺 𑀏𑀯𑀁 𑀲𑀜𑁆𑀜𑀺𑀦𑁄.

𑀇𑀤𑀸𑀦𑀺 ‘‘𑀅𑀦𑀥𑀺𑀝𑁆𑀞𑀺𑀢𑁂 𑀅𑀥𑀺𑀝𑁆𑀞𑀺𑀢𑀲𑀜𑁆𑀜𑀺𑀦𑁄 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺𑀆𑀤𑀺𑀆𑀧𑀢𑁆𑀢𑀺𑀯𑀸𑀭𑀁 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀣𑀸𑀢𑀺 𑀬𑀣𑀸 𑀤𑀲𑀸𑀳𑀁 𑀅𑀢𑀺𑀓𑁆𑀓𑀦𑁆𑀢𑁂 𑀲𑀜𑁆𑀜𑀸𑀪𑁂𑀤𑁂𑀦 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀢𑀣𑀸 𑀅𑀦𑀥𑀺𑀝𑁆𑀞𑀺𑀢𑀸𑀤𑀻𑀲𑀼 𑀲𑀢𑁆𑀢𑀲𑀼 𑀯𑀺𑀓𑀧𑁆𑀧𑁂𑀲𑀼 𑀅𑀥𑀺𑀝𑁆𑀞𑀺𑀢𑀸𑀤𑀺𑀲𑀜𑁆𑀜𑀸𑀪𑁂𑀤𑀢𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀅𑀯𑀺𑀲𑁆𑀲𑀚𑁆𑀚𑀺𑀢𑁂 𑀯𑀺𑀲𑁆𑀲𑀚𑁆𑀚𑀺𑀢𑀲𑀜𑁆𑀜𑀺𑀦𑁄𑀢𑀺 𑀓𑀲𑁆𑀲𑀘𑀺 𑀅𑀤𑀺𑀦𑁆𑀦𑁂 𑀅𑀧𑀭𑀺𑀘𑁆𑀘𑀢𑁆𑀢𑁂 ‘‘𑀤𑀺𑀦𑁆𑀦𑀁 𑀧𑀭𑀺𑀘𑁆𑀘𑀢𑁆𑀢𑀁 𑀫𑀬𑀸’’𑀢𑀺 𑀏𑀯𑀁 𑀲𑀜𑁆𑀜𑀺𑀦𑁄. 𑀅𑀦𑀝𑁆𑀞𑁂 𑀦𑀝𑁆𑀞𑀲𑀜𑁆𑀜𑀺𑀦𑁄𑀢𑀺 𑀅𑀢𑁆𑀢𑀦𑁄 𑀘𑀻𑀯𑀭𑁂𑀦 𑀲𑀤𑁆𑀥𑀺𑀁 𑀩𑀳𑀽𑀦𑀺 𑀅𑀜𑁆𑀜𑁂𑀲𑀁 𑀘𑀻𑀯𑀭𑀸𑀦𑀺 𑀏𑀓𑀢𑁄 𑀞𑀧𑀺𑀢𑀸𑀦𑀺, 𑀢𑀸𑀦𑀺 𑀘𑁂 𑀘𑁄𑀭𑀸 𑀳𑀭𑀦𑁆𑀢𑀺, 𑀢𑀢𑁆𑀭𑁂𑀲 𑀅𑀢𑁆𑀢𑀦𑁄 𑀘𑀻𑀯𑀭𑁂 𑀅𑀦𑀝𑁆𑀞𑁂 𑀦𑀝𑁆𑀞𑀲𑀜𑁆𑀜𑀻 𑀳𑁄𑀢𑀺, 𑀢𑀲𑁆𑀲 𑀦𑀝𑁆𑀞𑀲𑀜𑁆𑀜𑀺𑀦𑁄. 𑀏𑀲 𑀦𑀬𑁄 𑀅𑀯𑀺𑀦𑀝𑁆𑀞𑀸𑀤𑀻𑀲𑀼𑀧𑀺. 𑀅𑀯𑀺𑀮𑀼𑀢𑁆𑀢𑁂𑀢𑀺 𑀏𑀢𑁆𑀣 𑀧𑀦 𑀕𑀩𑁆𑀪𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀲𑀬𑁆𑀳𑀸𑀯𑀳𑀸𑀭𑀯𑀲𑁂𑀦 𑀅𑀯𑀺𑀮𑀼𑀢𑁆𑀢𑁂𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀯𑀺𑀲𑁆𑀲𑀚𑁆𑀚𑀺𑀢𑁂𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯) 𑀅𑀜𑁆𑀜𑀲𑁆𑀲 𑀤𑀺𑀦𑁆𑀦𑁂. 𑀓𑀣𑀁 𑀧𑀦 𑀤𑀺𑀦𑁆𑀦𑀁 𑀳𑁄𑀢𑀺, 𑀓𑀣𑀁 𑀕𑀳𑀺𑀢𑀁? ‘‘𑀇𑀫𑀁 𑀢𑀼𑀬𑁆𑀳𑀁 𑀤𑁂𑀫𑀺, 𑀤𑀤𑀸𑀫𑀺, 𑀤𑀚𑁆𑀚𑀸𑀫𑀺, 𑀑𑀡𑁄𑀚𑁂𑀫𑀺, 𑀧𑀭𑀺𑀘𑁆𑀘𑀚𑀸𑀫𑀺, 𑀯𑀺𑀲𑁆𑀲𑀚𑁆𑀚𑀸𑀫𑀺, 𑀦𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺 𑀯𑀸 𑀯𑀤𑀢𑀺, ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑁂𑀫𑀺…𑀧𑁂… 𑀦𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺 𑀯𑀸 𑀯𑀤𑀢𑀺, 𑀲𑀫𑁆𑀫𑀼𑀔𑀸𑀧𑀺 𑀧𑀭𑀫𑁆𑀫𑀼𑀔𑀸𑀧𑀺 𑀤𑀺𑀦𑁆𑀦𑀁𑀬𑁂𑀯 𑀳𑁄𑀢𑀺. ‘‘𑀢𑀼𑀬𑁆𑀳𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀫𑀬𑁆𑀳𑀁 𑀕𑀡𑁆𑀳𑀸𑀫𑀻’’𑀢𑀺 𑀯𑀤𑀢𑀺, 𑀲𑀼𑀤𑀺𑀦𑁆𑀦𑀁, 𑀲𑀼𑀕𑁆𑀕𑀳𑀺𑀢𑀜𑁆𑀘. ‘‘𑀢𑀯 𑀲𑀦𑁆𑀢𑀓𑀁 𑀓𑀭𑁄𑀳𑀺, 𑀢𑀯 𑀲𑀦𑁆𑀢𑀓𑀁 𑀳𑁄𑀢𑀼, 𑀢𑀯 𑀲𑀦𑁆𑀢𑀓𑀁 𑀓𑀭𑀺𑀲𑁆𑀲𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀫𑀫 𑀲𑀦𑁆𑀢𑀓𑀁 𑀓𑀭𑁄𑀫𑀺, 𑀫𑀫 𑀲𑀦𑁆𑀢𑀓𑀁 𑀳𑁄𑀢𑀼, 𑀫𑀫 𑀲𑀦𑁆𑀢𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺, 𑀤𑀼𑀤𑁆𑀤𑀺𑀦𑁆𑀦𑀁, 𑀤𑀼𑀕𑁆𑀕𑀳𑀺𑀢𑀜𑁆𑀘. 𑀦𑁂𑀯 𑀤𑀸𑀢𑀸 𑀤𑀸𑀢𑀼𑀁 𑀚𑀸𑀦𑀸𑀢𑀺, 𑀦 𑀇𑀢𑀭𑁄 𑀕𑀳𑁂𑀢𑀼𑀁. 𑀲𑀘𑁂 𑀧𑀦 ‘‘𑀢𑀯 𑀲𑀦𑁆𑀢𑀓𑀁 𑀓𑀭𑁄𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀼, 𑀪𑀦𑁆𑀢𑁂, 𑀫𑀬𑁆𑀳𑀁 𑀕𑀡𑁆𑀳𑀸𑀫𑀻’’𑀢𑀺 𑀕𑀡𑁆𑀳𑀸𑀢𑀺, 𑀲𑀼𑀕𑁆𑀕𑀳𑀺𑀢𑀁, 𑀲𑀘𑁂 𑀧𑀦 𑀏𑀓𑁄 ‘‘𑀕𑀡𑁆𑀳𑀸𑀳𑀻’’𑀢𑀺 𑀯𑀤𑀢𑀺, 𑀇𑀢𑀭𑁄 ‘‘𑀦 𑀕𑀡𑁆𑀳𑀸𑀫𑀻’’𑀢𑀺 𑀯𑀤𑀢𑀺, 𑀧𑀼𑀦 𑀲𑁄 ‘‘𑀤𑀺𑀦𑁆𑀦𑀁 𑀫𑀬𑀸 𑀢𑀼𑀬𑁆𑀳𑀁, 𑀕𑀡𑁆𑀳𑀸𑀳𑀻’’𑀢𑀺 𑀯𑀤𑀢𑀺, 𑀇𑀢𑀭𑁄𑀧𑀺 ‘‘𑀦 𑀫𑀬𑁆𑀳𑀁 𑀇𑀫𑀺𑀦𑀸 𑀅𑀢𑁆𑀣𑁄’’𑀢𑀺 𑀯𑀤𑀢𑀺. 𑀢𑀢𑁄 𑀧𑀼𑀭𑀺𑀫𑁄𑀧𑀺 ‘‘𑀫𑀬𑀸 𑀤𑀺𑀦𑁆𑀦’’𑀦𑁆𑀢𑀺 𑀤𑀲𑀸𑀳𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀘𑁆𑀙𑀺𑀫𑁄𑀧𑀺 ‘‘𑀫𑀬𑀸 𑀧𑀝𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺, 𑀓𑀲𑁆𑀲𑀸𑀧𑀢𑁆𑀢𑀻𑀢𑀺? 𑀦 𑀓𑀲𑁆𑀲𑀘𑀺. 𑀬𑀲𑁆𑀲 𑀧𑀦 𑀭𑀼𑀘𑁆𑀘𑀢𑀺, 𑀢𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀬𑁄 𑀧𑀦 𑀅𑀥𑀺𑀝𑁆𑀞𑀸𑀦𑁂 𑀯𑁂𑀫𑀢𑀺𑀓𑁄, 𑀢𑁂𑀦 𑀓𑀺𑀁 𑀓𑀸𑀢𑀩𑁆𑀩𑀁? 𑀯𑁂𑀫𑀢𑀺𑀓𑀪𑀸𑀯𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀲𑀘𑁂 𑀅𑀦𑀥𑀺𑀝𑁆𑀞𑀺𑀢𑀁 𑀪𑀯𑀺𑀲𑁆𑀲𑀢𑀺, 𑀏𑀯𑀁 𑀫𑁂 𑀓𑀧𑁆𑀧𑀺𑀬𑀁 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁. 𑀦 𑀳𑀺 𑀏𑀯𑀁 𑀚𑀸𑀦𑀸𑀧𑁂𑀢𑁆𑀯𑀸 𑀯𑀺𑀦𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀫𑀼𑀲𑀸𑀯𑀸𑀤𑁄 𑀳𑁄𑀢𑀺.

𑀬𑀣𑀸 𑀘 𑀇𑀤𑀁, 𑀏𑀯𑀁 𑀇𑀢𑁄 𑀧𑀭𑀸𑀦𑀺𑀧𑀻𑀢𑀺 𑀬𑀣𑀸 𑀇𑀤𑀁 𑀅𑀢𑀺𑀭𑁂𑀓𑀘𑀻𑀯𑀭𑀥𑀸𑀭𑀡𑀲𑀺𑀓𑁆𑀔𑀸𑀧𑀤𑀁 𑀆𑀘𑀸𑀭𑀯𑀺𑀧𑀢𑁆𑀢𑀺, 𑀏𑀯𑀁 𑀇𑀢𑁄 𑀧𑀭𑀸𑀦𑀺𑀧𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀉𑀪𑀢𑁄𑀧𑀸𑀢𑀺𑀫𑁄𑀓𑁆𑀔𑁂𑀲𑀽’’𑀢𑀺𑀆𑀤𑀺. 𑀆𑀚𑀻𑀯𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀸 𑀧𑀦 𑀞𑀧𑁂𑀢𑁆𑀯𑀸 𑀤𑀼𑀩𑁆𑀪𑀸𑀲𑀺𑀢𑀁 𑀙 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀧𑀜𑁆𑀜𑀢𑁆𑀢𑀸𑀢𑀺 𑁋

‘‘𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀅𑀲𑀦𑁆𑀢𑀁 𑀅𑀪𑀽𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀉𑀮𑁆𑀮𑀧𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑀲𑀜𑁆𑀘𑀭𑀺𑀢𑁆𑀢𑀁 𑀲𑀫𑀸𑀧𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲. 𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 ‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀢𑀺, 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀸’𑀢𑀺 𑀪𑀡𑀢𑀺, 𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑀪𑀺𑀓𑁆𑀔𑀼 𑀧𑀡𑀻𑀢𑀪𑁄𑀚𑀦𑀸𑀦𑀺 𑀅𑀕𑀺𑀮𑀸𑀦𑁄 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑀪𑀺𑀓𑁆𑀔𑀼𑀦𑀻 𑀧𑀡𑀻𑀢𑀪𑁄𑀚𑀦𑀸𑀦𑀺 𑀅𑀕𑀺𑀮𑀸𑀦𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀧𑀸𑀝𑀺𑀤𑁂𑀲𑀦𑀻𑀬𑀲𑁆𑀲. 𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑀪𑀺𑀓𑁆𑀔𑀼 𑀲𑀽𑀧𑀁 𑀯𑀸 𑀑𑀤𑀦𑀁 𑀯𑀸 𑀅𑀕𑀺𑀮𑀸𑀦𑁄 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀭𑀺. 𑁨𑁮𑁭) 𑁋

𑀏𑀯𑀁 𑀧𑀸𑀭𑀸𑀚𑀺𑀓𑀸𑀤𑀺𑀯𑀲𑁂𑀦 𑀞𑀧𑁂𑀢𑁆𑀯𑀸 𑀤𑀼𑀩𑁆𑀪𑀸𑀲𑀺𑀢𑀁 𑀆𑀚𑀻𑀯𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀸 𑀙 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀧𑀜𑁆𑀜𑀢𑁆𑀢𑀸. 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀸 𑀧𑀸𑀘𑀺𑀢𑁆𑀢𑀺𑀬𑀤𑀼𑀓𑁆𑀓𑀝𑀯𑀲𑁂𑀦 𑀤𑁆𑀯𑁂 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀧𑀜𑁆𑀜𑀢𑁆𑀢𑀸𑀢𑀺 𑀲𑀫𑀦𑀼𑀪𑀸𑀲𑀦𑀸𑀬 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁂 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁, 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀏𑀯𑀁 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀸 𑀧𑀸𑀘𑀺𑀢𑁆𑀢𑀺𑀬𑀤𑀼𑀓𑁆𑀓𑀝𑀯𑀲𑁂𑀦 𑀤𑁆𑀯𑁂 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀧𑀜𑁆𑀜𑀢𑁆𑀢𑀸. 𑀏𑀢𑁆𑀣𑀸𑀢𑀺 𑀯𑀺𑀧𑀢𑁆𑀢𑀺𑀓𑀣𑀸𑀲𑀼.

𑀕𑀡𑀦𑀼𑀧𑀕𑀢𑀸𑀢𑀺 𑀤𑀺𑀯𑀲𑀕𑀡𑀦𑀁 𑀉𑀧𑀕𑀢𑀪𑀸𑀯𑁄. 𑀅𑀜𑁆𑀜𑁂𑀳𑀺 ‘‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑁂𑀫𑀸’’𑀢𑀺 𑀧𑀭𑀳𑀢𑁆𑀣𑁂 𑀤𑀺𑀦𑁆𑀦𑀫𑁆𑀧𑀺 ‘‘𑀦 𑀢𑀸𑀯 𑀢𑀁 𑀕𑀡𑀦𑀼𑀧𑀕𑀁, 𑀬𑀸𑀯 𑀦 𑀳𑀢𑁆𑀣𑀁 𑀕𑀘𑁆𑀙𑀢𑀻’’𑀢𑀺 (𑀫𑀳𑀸𑀯. 𑁨𑁫𑁯) 𑀘𑀫𑁆𑀫𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀢𑁆𑀢𑀸 𑀬𑀸𑀯 𑀆𑀳𑀭𑀺𑀢𑁆𑀯𑀸 𑀯𑀸 𑀦 𑀤𑀺𑀦𑁆𑀦𑀁, ‘‘𑀢𑀼𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀘𑀻𑀯𑀭𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀧𑀳𑀺𑀡𑀺𑀢𑁆𑀯𑀸 𑀯𑀸 𑀅𑀦𑀸𑀭𑁄𑀘𑀺𑀢𑀁, 𑀢𑀸𑀯 𑀤𑀺𑀯𑀲𑀕𑀡𑀦𑀁 𑀦 𑀉𑀧𑁂𑀢𑀺, 𑀅𑀦𑀥𑀺𑀝𑁆𑀞𑀺𑀢𑀁 𑀯𑀝𑁆𑀝𑀢𑀺. 𑀬𑀤𑀸 𑀧𑀦 𑀆𑀦𑁂𑀢𑁆𑀯𑀸 𑀤𑀺𑀦𑁆𑀦𑀁 𑀳𑁄𑀢𑀺, ‘‘𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀸 𑀲𑀼𑀢𑀁, 𑀢𑀢𑁄 𑀧𑀝𑁆𑀞𑀸𑀬 𑀕𑀡𑀦𑀼𑀧𑀕𑀁 𑀳𑁄𑀢𑀺, 𑀅𑀦𑁆𑀢𑁄𑀤𑀲𑀸𑀳𑁂 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀓𑀣𑀺𑀦𑀲𑀜𑁆𑀜𑀺𑀢𑀁 𑀲𑀫𑀼𑀝𑁆𑀞𑀸𑀦𑀫𑀲𑁆𑀲𑀸𑀢𑀺 𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀁, 𑀢𑀢𑀺𑀬𑀙𑀝𑁆𑀞𑀲𑀫𑀼𑀝𑁆𑀞𑀸𑀦𑀯𑀲𑁂𑀦 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀓𑀸𑀬𑀯𑀸𑀘𑀸𑀳𑀺 𑀓𑀢𑁆𑀢𑀩𑁆𑀩𑀅𑀥𑀺𑀝𑁆𑀞𑀸𑀦𑀯𑀺𑀓𑀧𑁆𑀧𑀦𑀸𑀦𑀁 𑀅𑀓𑀭𑀡𑁂𑀦 𑀓𑀸𑀬𑀯𑀸𑀘𑀢𑁄, 𑀘𑀺𑀢𑁆𑀢𑁂 𑀧𑀦 𑀲𑀢𑀺 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀥𑀺𑀝𑁆𑀞𑀸𑀦𑀸𑀯𑀺𑀓𑀧𑁆𑀧𑀦𑀯𑀲𑁂𑀦 𑀆𑀧𑀚𑁆𑀚𑀦𑀢𑁄 𑀅𑀓𑀺𑀭𑀺𑀬𑀁. 𑀅𑀚𑀸𑀦𑀦𑁆𑀢𑁄𑀧𑀺 𑀆𑀧𑀚𑁆𑀚𑀢𑀻𑀢𑀺 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁. 𑀓𑀸𑀬𑀤𑁆𑀯𑀸𑀭𑁂 𑀘 𑀯𑀘𑀻𑀤𑁆𑀯𑀸𑀭𑁂 𑀘 𑀓𑀢𑁆𑀢𑀩𑁆𑀩𑀸𑀓𑀭𑀡𑀢𑁄 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁.

𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀪𑀺𑀓𑁆𑀔𑀼𑀦𑀸𑀢𑀺 𑀪𑀺𑀓𑁆𑀔𑀼𑀲𑁆𑀲𑀸𑀢𑀺 𑀅𑀢𑁆𑀣𑁄, 𑀲𑀸𑀫𑀺𑀅𑀢𑁆𑀣𑁂 𑀘𑁂𑀢𑀁 𑀓𑀭𑀡𑀯𑀘𑀦𑀁. 𑀢𑁂𑀦𑀸𑀳 ‘‘𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂 𑀯𑀺𑀬𑀸’’𑀢𑀺𑀆𑀤𑀺. 𑀅𑀣 𑀓𑀲𑁆𑀫𑀸 𑀓𑀭𑀡𑀯𑀲𑁂𑀦𑁂𑀯 𑀓𑀭𑀡𑀯𑀘𑀦𑀲𑁆𑀲 𑀅𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 𑀲𑀸𑀫𑀺𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀓𑀭𑀡𑀯𑀲𑁂𑀦 𑀳𑀻’’𑀢𑀺𑀆𑀤𑀺. 𑀳𑀻𑀢𑀺 𑀓𑀸𑀭𑀡𑀢𑁆𑀣𑁂 𑀦𑀺𑀧𑀸𑀢𑁄. 𑀙𑀺𑀦𑁆𑀦𑀧𑀮𑀺𑀩𑁄𑀥𑁄𑀢𑀺 𑀙𑀺𑀦𑁆𑀦𑀘𑀻𑀯𑀭𑀸𑀯𑀸𑀲𑀧𑀮𑀺𑀩𑁄𑀥𑁄. 𑀏𑀓𑀸𑀯 𑀭𑀢𑁆𑀢𑀺 𑀏𑀓𑀭𑀢𑁆𑀢𑀁, 𑀲𑀫𑀸𑀲𑀦𑁆𑀢𑀕𑀢𑀲𑁆𑀲 𑀅𑀢𑁆𑀣𑀁. 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀲𑀫𑀸𑀳𑀸𑀭𑁄𑀢𑀺 𑀢𑀺𑀘𑀻𑀯𑀭𑀁. 𑀢𑁂𑀦 𑀢𑀺𑀘𑀻𑀯𑀭𑁂𑀦, 𑀢𑀻𑀳𑀺 𑀘𑀻𑀯𑀭𑁂𑀳𑀻𑀢𑀺 𑀅𑀢𑁆𑀣𑁄. 𑀏𑀓𑁂𑀦 𑀯𑀺𑀧𑁆𑀧𑀯𑀼𑀢𑁆𑀣𑁄𑀧𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁭𑁫-𑁪𑁭𑁬) 𑀳𑀺 𑀢𑀺𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀼𑀢𑁆𑀣𑁄 𑀦𑀸𑀫 𑀳𑁄𑀢𑀺 𑀧𑀝𑀺𑀲𑀺𑀤𑁆𑀥𑀧𑀭𑀺𑀬𑀸𑀧𑀦𑁆𑀦𑁂𑀦 𑀯𑀺𑀧𑁆𑀧𑀯𑀼𑀢𑁆𑀣𑀢𑁆𑀢𑀸, 𑀅𑀯𑀬𑀯𑁂𑀧𑀺 𑀯𑀸 𑀲𑀫𑀼𑀤𑀸𑀬𑀯𑁄𑀳𑀸𑀭𑀢𑁄. 𑀢𑁂𑀦𑀸𑀳 ‘‘𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀦𑀬𑁂𑀦𑀸’’𑀢𑀺𑀆𑀤𑀺.

𑀇𑀤𑀸𑀦𑀺 𑀯𑀺𑀧𑁆𑀧𑀯𑀸𑀲𑀮𑀓𑁆𑀔𑀡𑀯𑀯𑀢𑁆𑀣𑀸𑀧𑀦𑀢𑁆𑀣𑀁 ‘‘𑀕𑀸𑀫𑁄 𑀏𑀓𑀽𑀧𑀘𑀸𑀭𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀺𑀯𑁂𑀲𑀦𑀦𑁆𑀢𑀺 𑀉𑀤𑁄𑀲𑀺𑀢𑀸𑀤𑀻𑀦𑀁 𑀯𑀲𑁂𑀦 𑀅𑀓𑀢𑀸𑀬 𑀧𑀢𑀺𑀲𑁆𑀲𑀬𑀯𑀺𑀓𑀢𑀺𑀬𑀸 𑀅𑀥𑀺𑀯𑀘𑀦𑀁. 𑀉𑀤𑁄𑀲𑀺𑀢𑁄𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁮𑁨-𑁪𑁮𑁭) 𑀬𑀸𑀦𑀸𑀤𑀻𑀦𑀁 𑀪𑀡𑁆𑀟𑀸𑀦𑀁 𑀲𑀸𑀮𑀸. 𑀬𑁄 ‘‘𑀉𑀤𑀯𑀲𑀺𑀢𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀅𑀝𑁆𑀝𑁄𑀢𑀺 𑀧𑀝𑀺𑀭𑀸𑀚𑀸𑀤𑀺𑀧𑀝𑀺𑀩𑀸𑀳𑀦𑀢𑁆𑀣𑀁 𑀇𑀝𑁆𑀞𑀓𑀸𑀳𑀺 𑀓𑀢𑁄 𑀩𑀳𑀮𑀪𑀺𑀢𑁆𑀢𑀺𑀓𑁄 𑀘𑀢𑀼𑀧𑀜𑁆𑀘𑀪𑀽𑀫𑀺𑀓𑁄 𑀧𑀢𑀺𑀲𑁆𑀲𑀬𑀯𑀺𑀲𑁂𑀲𑁄. ‘‘𑀅𑀝𑁆𑀝𑁄𑀢𑀺 𑀩𑀳𑀮𑀪𑀺𑀢𑁆𑀢𑀺𑀓𑀕𑁂𑀳𑀁, 𑀬𑀲𑁆𑀲 𑀕𑁄𑀧𑀸𑀦𑀲𑀺𑀬𑁄 𑀅𑀕𑁆𑀕𑀳𑁂𑀢𑁆𑀯𑀸 𑀇𑀝𑁆𑀞𑀓𑀸𑀳𑀺 𑀏𑀯 𑀙𑀤𑀦𑀁 𑀳𑁄𑀢𑀻’’𑀢𑀺 𑀅𑀧𑀭𑁂. ‘‘𑀅𑀝𑁆𑀝𑀸𑀓𑀸𑀭𑁂𑀦 𑀓𑀭𑀻𑀬𑀢𑀻’’𑀢𑀺𑀧𑀺 𑀯𑀤𑀦𑁆𑀢𑀺. 𑀫𑀸𑀴𑁄𑀢𑀺 𑀏𑀓𑀓𑀽𑀝𑀲𑀗𑁆𑀕𑀳𑀺𑀢𑁄 𑀘𑀢𑀼𑀭𑀲𑁆𑀲𑀧𑀸𑀲𑀸𑀤𑁄, 𑀏𑀓𑀓𑀽𑀝𑀲𑀗𑁆𑀕𑀳𑀺𑀢𑁄 𑀯𑀸 𑀅𑀦𑁂𑀓𑀓𑁄𑀡𑀯𑀦𑁆𑀢𑁄 𑀧𑀢𑀺𑀲𑁆𑀲𑀬𑀯𑀺𑀲𑁂𑀲𑁄. ‘‘𑀫𑀸𑀴𑁄𑀢𑀺 𑀯𑀝𑁆𑀝𑀸𑀓𑀸𑀭𑁂𑀦 𑀓𑀢𑀲𑁂𑀦𑀸𑀲𑀦’’𑀦𑁆𑀢𑀺 𑀅𑀧𑀭𑁂. 𑀧𑀸𑀲𑀸𑀤𑁄𑀢𑀺 𑀤𑀻𑀖𑀧𑀸𑀲𑀸𑀤𑁄, 𑀅𑀟𑁆𑀠𑀬𑁄𑀕𑀸𑀤𑀺𑀪𑁂𑀤𑁄 𑀅𑀝𑁆𑀝𑀫𑀸𑀴𑀳𑀫𑁆𑀫𑀺𑀬𑀯𑀚𑁆𑀚𑀺𑀢𑁄 𑀲𑀩𑁆𑀩𑁄 𑀯𑀸 𑀧𑀸𑀲𑀸𑀤𑁄. 𑀳𑀫𑁆𑀫𑀺𑀬𑀦𑁆𑀢𑀺 𑀫𑀼𑀡𑁆𑀟𑀘𑁆𑀙𑀤𑀦𑀧𑀸𑀲𑀸𑀤𑁄. ‘‘𑀘𑀦𑁆𑀤𑀺𑀬𑀗𑁆𑀕𑀡𑀬𑀼𑀢𑁆𑀢’’𑀦𑁆𑀢𑀺 𑀅𑀧𑀭𑁂. 𑀦𑀸𑀯𑀸𑀢𑀺 𑀣𑀮𑀝𑁆𑀞𑀉𑀤𑀓𑀝𑁆𑀞𑀯𑀲𑁂𑀦 𑀤𑁆𑀯𑀺𑀥𑀸 𑀦𑀸𑀯𑀸. 𑀲𑀢𑁆𑀣𑁄𑀢𑀺 𑀚𑀗𑁆𑀖𑀲𑀢𑁆𑀣𑁄, 𑀲𑀓𑀝𑀲𑀢𑁆𑀣𑁄 𑀯𑀸. 𑀥𑀜𑁆𑀜𑀓𑀭𑀡𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁯𑁧-𑁪𑁯𑁪) 𑀔𑀮𑀁 𑀯𑀼𑀘𑁆𑀘𑀢𑀺. 𑀆𑀭𑀸𑀫𑁄𑀢𑀺 𑀧𑀼𑀧𑁆𑀨𑀸𑀭𑀸𑀫𑁄, 𑀨𑀮𑀸𑀭𑀸𑀫𑁄 𑀯𑀸. 𑀯𑀺𑀳𑀸𑀭𑁄𑀢𑀺 𑀲𑀧𑀭𑀺𑀓𑁆𑀔𑀺𑀢𑁆𑀢𑁄 𑀯𑀸 𑀅𑀧𑀭𑀺𑀓𑁆𑀔𑀺𑀢𑁆𑀢𑁄 𑀯𑀸 𑀲𑀓𑀮𑁄 𑀆𑀯𑀸𑀲𑁄. ‘‘𑀕𑁂𑀳𑀫𑁆𑀧𑀻’’𑀢𑀺 𑀓𑁂𑀘𑀺. 𑀦𑀺𑀯𑁂𑀲𑀦𑀸𑀤𑀻𑀦𑀺 𑀘𑁂𑀢𑁆𑀣 𑀕𑀸𑀫𑀢𑁄 𑀩𑀳𑀺 𑀦𑀺𑀯𑀺𑀝𑁆𑀞𑀸𑀦𑀺 𑀕𑀳𑀺𑀢𑀸𑀦𑀺. 𑀅𑀦𑁆𑀢𑁄𑀕𑀸𑀫𑁂 𑀞𑀺𑀢𑀸𑀦𑀁 𑀧𑀦 𑀕𑀸𑀫𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀢𑁆𑀢𑀸 𑀕𑀸𑀫𑀧𑀭𑀺𑀳𑀸𑀭𑁄𑀬𑁂𑀯𑀸𑀢𑀺. ‘‘𑀦𑀺𑀯𑁂𑀲𑀦𑀸𑀤𑀬𑁄 𑀳𑀫𑁆𑀫𑀺𑀬𑀧𑀭𑀺𑀬𑁄𑀲𑀸𑀦𑀸 𑀕𑀸𑀫𑀧𑀭𑀺𑀓𑁆𑀔𑁂𑀧𑀢𑁄 𑀩𑀳𑀺 𑀦𑀺𑀯𑀺𑀝𑁆𑀞𑀸’’𑀢𑀺 𑀅𑀧𑀭𑁂. 𑀳𑀢𑁆𑀣𑀧𑀸𑀲𑀸𑀢𑀺𑀓𑁆𑀓𑀫𑁂𑀢𑀺 𑀏𑀢𑁆𑀣 𑀳𑀢𑁆𑀣𑀧𑀸𑀲𑁄 𑀦𑀸𑀫 𑀅𑀟𑁆𑀠𑀢𑁂𑀬𑁆𑀬𑀭𑀢𑀦𑀧𑁆𑀧𑀫𑀸𑀡𑁄 𑀧𑀤𑁂𑀲𑁄, 𑀢𑀲𑁆𑀲 𑀅𑀢𑀺𑀓𑁆𑀓𑀫𑁄 𑀳𑀢𑁆𑀣𑀧𑀸𑀲𑀸𑀢𑀺𑀓𑁆𑀓𑀫𑁄, 𑀢𑀲𑁆𑀫𑀺𑀁 𑀳𑀢𑁆𑀣𑀧𑀸𑀲𑀸𑀢𑀺𑀓𑁆𑀓𑀫𑁂. 𑀳𑀢𑁆𑀣𑀧𑀸𑀲𑀩𑁆𑀪𑀦𑁆𑀢𑀭𑁂 𑀧𑀦 𑀯𑀢𑁆𑀣𑀼𑀁 𑀯𑀝𑁆𑀝𑀢𑀺. 𑀢𑀁 𑀧𑀫𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀘𑁂𑀧𑀺 𑀇𑀤𑁆𑀥𑀺𑀫𑀸 𑀪𑀺𑀓𑁆𑀔𑀼 𑀆𑀓𑀸𑀲𑁂 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀫𑁂𑀯 𑀳𑁄𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑁋 𑀲𑀘𑁂 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁭𑁭-𑁪𑁭𑁮) 𑀕𑀸𑀫𑁄 𑀏𑀓𑀲𑁆𑀲 𑀭𑀜𑁆𑀜𑁄 𑀯𑀸 𑀪𑁄𑀚𑀓𑀲𑁆𑀲 𑀯𑀸 𑀯𑀲𑁂𑀦 𑀏𑀓𑀓𑀼𑀮𑀲𑁆𑀲 𑀳𑁄𑀢𑀺, 𑀧𑀸𑀓𑀸𑀭𑀸𑀤𑀺𑀦𑀸 𑀧𑀭𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀏𑀓𑀽𑀧𑀘𑀸𑀭𑁄 𑀘, 𑀏𑀯𑀭𑀽𑀧𑁂 𑀕𑀸𑀫𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀫𑀺𑀁 𑀕𑀸𑀫𑀩𑁆𑀪𑀦𑁆𑀢𑀭𑁂 𑀬𑀣𑀸𑀭𑀼𑀘𑀺𑀢𑀝𑁆𑀞𑀸𑀦𑁂 𑀯𑀲𑀺𑀢𑀩𑁆𑀩𑀁, 𑀲𑀘𑁂 𑀅𑀧𑀭𑀺𑀓𑁆𑀔𑀺𑀢𑁆𑀢𑁄, 𑀬𑀲𑁆𑀫𑀺𑀁 𑀖𑀭𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀖𑀭𑁂 𑀯𑀲𑀺𑀢𑀩𑁆𑀩𑀁, 𑀢𑀲𑁆𑀲 𑀖𑀭𑀲𑁆𑀲 𑀲𑀫𑀦𑁆𑀢𑀢𑁄 𑀳𑀢𑁆𑀣𑀧𑀸𑀲𑀸 𑀯𑀸 𑀦 𑀯𑀺𑀚𑀳𑀺𑀢𑀩𑁆𑀩𑀁.

𑀲𑀘𑁂 𑀕𑀸𑀫𑁄 𑀯𑁂𑀲𑀸𑀮𑀺𑀓𑀼𑀲𑀺𑀦𑀸𑀭𑀸𑀤𑀬𑁄 𑀯𑀺𑀬 𑀦𑀸𑀦𑀸𑀭𑀸𑀚𑀽𑀦𑀁 𑀯𑀸 𑀪𑁄𑀚𑀓𑀸𑀦𑀁 𑀯𑀸 𑀳𑁄𑀢𑀺, 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑁄 𑀘, 𑀏𑀯𑀭𑀽𑀧𑁂 𑀕𑀸𑀫𑁂 𑀬𑀲𑁆𑀫𑀺𑀁 𑀖𑀭𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀖𑀭𑁂 𑀯𑀸 𑀯𑀢𑁆𑀣𑀩𑁆𑀩𑀁, 𑀢𑀲𑁆𑀲 𑀖𑀭𑀲𑁆𑀲 𑀳𑀢𑁆𑀣𑀧𑀸𑀲𑀸 𑀯𑀸 𑀦 𑀯𑀺𑀚𑀳𑀺𑀢𑀩𑁆𑀩𑀁. 𑀬𑀲𑁆𑀲𑀸 𑀯𑀻𑀣𑀺𑀬𑀸 𑀖𑀭𑀁 𑀳𑁄𑀢𑀺, 𑀢𑀲𑁆𑀲𑀸 𑀯𑀻𑀣𑀺𑀬𑀸 𑀢𑀲𑁆𑀲 𑀖𑀭𑀲𑁆𑀲 𑀲𑀫𑁆𑀫𑀼𑀔𑀸𑀝𑁆𑀞𑀸𑀦𑁂 𑀲𑀪𑀸𑀬𑀁 𑀯𑀸 𑀖𑀭𑀤𑁆𑀯𑀸𑀭𑁂 𑀯𑀸 𑀯𑀢𑁆𑀣𑀩𑁆𑀩𑀁, 𑀢𑁂𑀲𑀁 𑀲𑀪𑀸𑀤𑁆𑀯𑀸𑀭𑀸𑀦𑀁 𑀳𑀢𑁆𑀣𑀧𑀸𑀲𑀸 𑀯𑀸 𑀦 𑀯𑀺𑀚𑀳𑀺𑀢𑀩𑁆𑀩𑀁.

𑀲𑀘𑁂 𑀲𑁄 𑀕𑀸𑀫𑁄 𑀅𑀧𑀭𑀺𑀓𑁆𑀔𑀺𑀢𑁆𑀢𑁄, 𑀬𑀲𑁆𑀫𑀺𑀁 𑀖𑀭𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀢𑀢𑁆𑀣 𑀯𑀸 𑀢𑀲𑁆𑀲 𑀳𑀢𑁆𑀣𑀧𑀸𑀲𑁂 𑀯𑀸 𑀯𑀢𑁆𑀣𑀩𑁆𑀩𑀁. 𑀦𑀺𑀯𑁂𑀲𑀦𑁂 𑀧𑀦 𑀲𑀘𑁂 𑀏𑀓𑀓𑀼𑀮𑀲𑁆𑀲 𑀦𑀺𑀯𑁂𑀲𑀦𑀁 𑀳𑁄𑀢𑀺, 𑀧𑀭𑀺𑀓𑁆𑀔𑀺𑀢𑁆𑀢𑀜𑁆𑀘, 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀯𑀢𑁆𑀣𑀩𑁆𑀩𑀁. 𑀅𑀧𑀭𑀺𑀓𑁆𑀔𑀺𑀢𑁆𑀢𑀁 𑀘𑁂 𑀳𑁄𑀢𑀺, 𑀬𑀲𑁆𑀫𑀺𑀁 𑀕𑀩𑁆𑀪𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀫𑀺𑀁 𑀯𑀢𑁆𑀣𑀩𑁆𑀩𑀁, 𑀢𑀲𑁆𑀲 𑀕𑀩𑁆𑀪𑀲𑁆𑀲 𑀳𑀢𑁆𑀣𑀧𑀸𑀲𑀸 𑀯𑀸 𑀦 𑀯𑀺𑀚𑀳𑀺𑀢𑀩𑁆𑀩𑀁.

𑀲𑀘𑁂 𑀦𑀸𑀦𑀸𑀓𑀼𑀮𑀲𑁆𑀲 𑀦𑀺𑀯𑁂𑀲𑀦𑀁 𑀳𑁄𑀢𑀺, 𑀧𑀭𑀺𑀓𑁆𑀔𑀺𑀢𑁆𑀢𑀜𑁆𑀘, 𑀬𑀲𑁆𑀫𑀺𑀁 𑀕𑀩𑁆𑀪𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀫𑀺𑀁 𑀕𑀩𑁆𑀪𑁂 𑀯𑀢𑁆𑀣𑀩𑁆𑀩𑀁, 𑀲𑀩𑁆𑀩𑁂𑀲𑀁 𑀲𑀸𑀥𑀸𑀭𑀡𑀤𑁆𑀯𑀸𑀭𑀫𑀽𑀮𑁂 𑀯𑀸 𑀢𑁂𑀲𑀁 𑀕𑀩𑁆𑀪𑀤𑁆𑀯𑀸𑀭𑀫𑀽𑀮𑀸𑀦𑀁 𑀳𑀢𑁆𑀣𑀧𑀸𑀲𑀸 𑀯𑀸 𑀦 𑀯𑀺𑀚𑀳𑀺𑀢𑀩𑁆𑀩𑀁. 𑀅𑀧𑀭𑀺𑀓𑁆𑀔𑀺𑀢𑁆𑀢𑀁 𑀘𑁂, 𑀬𑀲𑁆𑀫𑀺𑀁 𑀕𑀩𑁆𑀪𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀫𑀺𑀁 𑀕𑀩𑁆𑀪𑁂 𑀯𑀢𑁆𑀣𑀩𑁆𑀩𑀁, 𑀢𑀲𑁆𑀲 𑀕𑀩𑁆𑀪𑀲𑁆𑀲 𑀳𑀢𑁆𑀣𑀧𑀸𑀲𑀸 𑀯𑀸 𑀦 𑀯𑀺𑀚𑀳𑀺𑀢𑀩𑁆𑀩𑀁. 𑀏𑀲 𑀦𑀬𑁄 𑀉𑀤𑁄𑀲𑀺𑀢𑀸𑀤𑀻𑀲𑀼𑀧𑀺.

𑀲𑀢𑁆𑀣𑁄 𑀧𑀦 𑀚𑀗𑁆𑀖𑀲𑀢𑁆𑀣𑁄 𑀯𑀸 𑀳𑁄𑀢𑀼, 𑀲𑀓𑀝𑀲𑀢𑁆𑀣𑁄 𑀯𑀸. 𑀲𑀘𑁂 𑀏𑀓𑀓𑀼𑀮𑀲𑁆𑀲 𑀲𑀢𑁆𑀣𑁄 𑀳𑁄𑀢𑀺, 𑀲𑀢𑁆𑀣𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀭𑀢𑁄 𑀯𑀸 𑀧𑀘𑁆𑀙𑀢𑁄 𑀯𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀸 𑀦 𑀯𑀺𑀚𑀳𑀺𑀢𑀩𑁆𑀩𑀸, 𑀧𑀲𑁆𑀲𑀢𑁄 𑀅𑀩𑁆𑀪𑀦𑁆𑀢𑀭𑀁 𑀦 𑀯𑀺𑀚𑀳𑀺𑀢𑀩𑁆𑀩𑀁. 𑀲𑀘𑁂 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁮𑁯) 𑀲𑀢𑁆𑀣𑁄 𑀕𑀘𑁆𑀙𑀦𑁆𑀢𑁄 𑀕𑀸𑀫𑀁 𑀯𑀸 𑀦𑀤𑀺𑀁 𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀅𑀦𑁆𑀢𑁄𑀧𑀯𑀺𑀝𑁆𑀞𑁂𑀦 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑁄 𑀳𑀼𑀢𑁆𑀯𑀸 𑀑𑀭𑀜𑁆𑀘 𑀧𑀸𑀭𑀜𑁆𑀘 𑀨𑀭𑀺𑀢𑁆𑀯𑀸 𑀞𑀺𑀢𑁄 𑀳𑁄𑀢𑀺, 𑀲𑀢𑁆𑀣𑀧𑀭𑀺𑀳𑀸𑀭𑁄𑀯 𑀮𑀩𑁆𑀪𑀢𑀺. 𑀅𑀣 𑀕𑀸𑀫𑁂 𑀯𑀸 𑀦𑀤𑀺𑀬𑀸 𑀯𑀸 𑀧𑀭𑀺𑀬𑀸𑀧𑀦𑁆𑀦𑁄 𑀳𑁄𑀢𑀺 𑀅𑀦𑁆𑀢𑁄𑀧𑀯𑀺𑀝𑁆𑀞𑁄, 𑀕𑀸𑀫𑀧𑀭𑀺𑀳𑀸𑀭𑁄 𑀘𑁂𑀯 𑀦𑀤𑀺𑀧𑀭𑀺𑀳𑀸𑀭𑁄 𑀘 𑀮𑀩𑁆𑀪𑀢𑀺. 𑀲𑀘𑁂 𑀯𑀺𑀳𑀸𑀭𑀲𑀻𑀫𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀅𑀦𑁆𑀢𑁄𑀲𑀻𑀫𑀸𑀬 𑀘 𑀘𑀻𑀯𑀭𑀁 𑀳𑁄𑀢𑀺, 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀯𑀲𑀺𑀢𑀩𑁆𑀩𑀁. 𑀲𑀘𑁂 𑀩𑀳𑀺𑀲𑀻𑀫𑀸𑀬 𑀘𑀻𑀯𑀭𑀁 𑀳𑁄𑀢𑀺, 𑀲𑀢𑁆𑀣𑀲𑀫𑀻𑀧𑁂𑀬𑁂𑀯 𑀯𑀲𑀺𑀢𑀩𑁆𑀩𑀁. 𑀲𑀘𑁂 𑀕𑀘𑁆𑀙𑀦𑁆𑀢𑁄 𑀲𑀓𑀝𑁂 𑀯𑀸 𑀪𑀕𑁆𑀕𑁂, 𑀕𑁄𑀡𑁂 𑀯𑀸 𑀦𑀝𑁆𑀞𑁂 𑀅𑀦𑁆𑀢𑀭𑀸 𑀙𑀺𑀚𑁆𑀚𑀢𑀺, 𑀬𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀢𑀢𑁆𑀣 𑀯𑀲𑀺𑀢𑀩𑁆𑀩𑀁.

𑀔𑁂𑀢𑁆𑀢𑁂𑀧𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁯𑁦) 𑀲𑀘𑁂 𑀏𑀓𑀓𑀼𑀮𑀲𑁆𑀲 𑀔𑁂𑀢𑁆𑀢𑀁 𑀳𑁄𑀢𑀺, 𑀧𑀭𑀺𑀓𑁆𑀔𑀺𑀢𑁆𑀢𑀜𑁆𑀘, 𑀅𑀦𑁆𑀢𑁄𑀔𑁂𑀢𑁆𑀢𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑁄𑀔𑁂𑀢𑁆𑀢𑁂 𑀯𑀢𑁆𑀣𑀩𑁆𑀩𑀁. 𑀲𑀘𑁂 𑀅𑀧𑀭𑀺𑀓𑁆𑀔𑀺𑀢𑁆𑀢𑀁, 𑀳𑀢𑁆𑀣𑀧𑀸𑀲𑀸 𑀘𑀻𑀯𑀭𑀁 𑀦 𑀯𑀺𑀚𑀳𑀺𑀢𑀩𑁆𑀩𑀁. 𑀲𑀘𑁂 𑀦𑀸𑀦𑀸𑀓𑀼𑀮𑀲𑁆𑀲 𑀔𑁂𑀢𑁆𑀢𑀁 𑀳𑁄𑀢𑀺, 𑀧𑀭𑀺𑀓𑁆𑀔𑀺𑀢𑁆𑀢𑀜𑁆𑀘, 𑀅𑀦𑁆𑀢𑁄𑀔𑁂𑀢𑁆𑀢𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀔𑁂𑀢𑁆𑀢𑀤𑁆𑀯𑀸𑀭𑀫𑀽𑀮𑁂 𑀯𑀸 𑀯𑀢𑁆𑀣𑀩𑁆𑀩𑀁, 𑀢𑀲𑁆𑀲 𑀳𑀢𑁆𑀣𑀧𑀸𑀲𑀸 𑀯𑀸 𑀦 𑀯𑀺𑀚𑀳𑀺𑀢𑀩𑁆𑀩𑀁. 𑀲𑀘𑁂 𑀅𑀧𑀭𑀺𑀓𑁆𑀔𑀺𑀢𑁆𑀢𑀁, 𑀘𑀻𑀯𑀭𑀁 𑀳𑀢𑁆𑀣𑀧𑀸𑀲𑀸 𑀦 𑀯𑀺𑀚𑀳𑀺𑀢𑀩𑁆𑀩𑀁. 𑀏𑀲 𑀦𑀬𑁄 𑀥𑀜𑁆𑀜𑀓𑀭𑀡𑀸𑀭𑀸𑀫𑁂𑀲𑀼 𑀤𑁆𑀯𑀻𑀲𑀼𑀧𑀺. 𑀯𑀺𑀳𑀸𑀭𑁂 𑀧𑀦 𑀦𑀺𑀯𑁂𑀲𑀦𑁂 𑀯𑀼𑀢𑁆𑀢𑀲𑀤𑀺𑀲𑁄𑀯 𑀯𑀺𑀦𑀺𑀘𑁆𑀙𑀬𑁄.

𑀭𑀼𑀓𑁆𑀔𑀫𑀽𑀮𑁂 𑀧𑀦 𑀬𑀁 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂 𑀲𑀫𑀦𑁆𑀢𑀸 𑀙𑀸𑀬𑀸 𑀨𑀭𑀢𑀺, 𑀢𑀲𑁆𑀫𑀺𑀁 𑀞𑀸𑀦𑁂 𑀅𑀯𑀺𑀭𑀴𑁂 𑀧𑀤𑁂𑀲𑁂 𑀢𑀲𑁆𑀲 𑀙𑀸𑀬𑀸𑀬 𑀨𑀼𑀝𑁆𑀞𑁄𑀓𑀸𑀲𑀲𑁆𑀲 𑀅𑀦𑁆𑀢𑁄𑀬𑁂𑀯 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀲𑀘𑁂 𑀯𑀺𑀭𑀴𑀲𑀸𑀔𑀲𑁆𑀲 𑀭𑀼𑀓𑁆𑀔𑀲𑁆𑀲 𑀆𑀢𑀧𑁂𑀦 𑀨𑀼𑀝𑁆𑀞𑁄𑀓𑀸𑀲𑁂 𑀞𑀧𑁂𑀢𑀺, 𑀅𑀭𑀼𑀡𑀼𑀕𑁆𑀕𑀫𑀦𑁂 𑀘 𑀲𑁄 𑀪𑀺𑀓𑁆𑀔𑀼 𑀢𑀲𑁆𑀲 𑀳𑀢𑁆𑀣𑀧𑀸𑀲𑁂 𑀦 𑀳𑁄𑀢𑀺, 𑀅𑀜𑁆𑀜𑀲𑁆𑀫𑀺𑀁 𑀞𑀸𑀦𑁂 𑀢𑀲𑁆𑀲 𑀙𑀸𑀬𑀸𑀬𑀧𑀺 𑀳𑁄𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. 𑀲𑀘𑁂 𑀦𑀸𑀦𑀸𑀓𑀼𑀮𑀲𑁆𑀲 𑀭𑀼𑀓𑁆𑀔𑁄 𑀳𑁄𑀢𑀺, 𑀘𑀻𑀯𑀭𑀲𑁆𑀲 𑀳𑀢𑁆𑀣𑀧𑀸𑀲𑀸 𑀦 𑀯𑀺𑀚𑀳𑀺𑀢𑀩𑁆𑀩𑀁.

𑀅𑀚𑁆𑀛𑁄𑀓𑀸𑀲𑁂 𑀧𑀦 𑀯𑀺𑀜𑁆𑀛𑀸𑀝𑀯𑀺𑀆𑀤𑀻𑀲𑀼 𑀅𑀭𑀜𑁆𑀜𑁂𑀲𑀼𑀧𑀺 𑀲𑀫𑀼𑀤𑁆𑀤𑀫𑀚𑁆𑀛𑁂 𑀫𑀘𑁆𑀙𑀩𑀦𑁆𑀥𑀸𑀦𑀁 𑀅𑀕𑀫𑀦𑀧𑀣𑀤𑀻𑀧𑀓𑁂𑀲𑀼𑀧𑀺 𑀘𑀻𑀯𑀭𑀁 𑀞𑀧𑁂𑀢𑁆𑀯𑀸 𑀢𑀢𑁄 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑁂 𑀧𑀤𑁂𑀲𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀲𑀺𑀢𑀩𑁆𑀩𑀁, 𑀇𑀢𑁄 𑀅𑀜𑁆𑀜𑀢𑁆𑀣 𑀯𑀲𑀦𑁆𑀢𑁄 𑀯𑀺𑀧𑁆𑀧𑀯𑀼𑀢𑁆𑀣𑁄 𑀦𑀸𑀫 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀫𑀲𑁆𑀲 𑀧𑀦 𑀯𑀺𑀢𑁆𑀣𑀸𑀭𑀲𑁆𑀲 𑀇𑀥 𑀅𑀯𑀼𑀢𑁆𑀢𑀢𑁆𑀢𑀸, 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀜𑁆𑀘 𑀯𑀼𑀢𑁆𑀢𑀢𑁆𑀢𑀸 ‘‘𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣𑀸𑀢𑀺 ‘‘𑀢𑀺𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑁂𑀬𑁆𑀬𑀸’’𑀢𑀺 𑀏𑀢𑀲𑁆𑀫𑀺𑀁 𑀧𑀤𑁂. 𑀲𑀗𑁆𑀔𑁂𑀧𑁄𑀢𑀺 𑀲𑀗𑁆𑀔𑁂𑀧𑀯𑀡𑁆𑀡𑀦𑀸. 𑀏𑀢𑁆𑀣 𑀧𑀦 𑀧𑀸𑀴𑀺𑀬𑀁 (𑀧𑀸𑀭𑀸. 𑁪𑁭𑁭) ‘‘𑀕𑀸𑀫𑁄 𑀏𑀓𑀽𑀧𑀘𑀸𑀭𑁄 𑀦𑀸𑀦𑀽𑀧𑀘𑀸𑀭𑁄’’𑀢𑀺𑀆𑀤𑀺𑀦𑀸 𑀅𑀯𑀺𑀲𑁂𑀲𑁂𑀦 𑀫𑀸𑀢𑀺𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀧𑀺 𑀕𑀸𑀫𑀦𑀺𑀯𑁂𑀲𑀦𑀉𑀤𑁄𑀲𑀺𑀢𑀔𑁂𑀢𑁆𑀢𑀥𑀜𑁆𑀜𑀓𑀭𑀡𑀆𑀭𑀸𑀫𑀯𑀺𑀳𑀸𑀭𑀸𑀦𑀁 𑀏𑀓𑀽𑀧𑀘𑀸𑀭𑀦𑀸𑀦𑀽𑀧𑀘𑀸𑀭𑀢𑀸 ‘‘𑀕𑀸𑀫𑁄 𑀏𑀓𑀽𑀧𑀘𑀸𑀭𑁄 𑀦𑀸𑀫 𑀏𑀓𑀓𑀼𑀮𑀲𑁆𑀲 𑀕𑀸𑀫𑁄 𑀳𑁄𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑁄 𑀘 𑀅𑀧𑀭𑀺𑀓𑁆𑀔𑀺𑀢𑁆𑀢𑁄 𑀘𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁭𑁮) 𑀧𑀭𑀺𑀓𑁆𑀔𑀺𑀢𑁆𑀢𑀸𑀧𑀭𑀺𑀓𑁆𑀔𑀺𑀢𑁆𑀢𑀯𑀲𑁂𑀦 𑀯𑀺𑀪𑀢𑁆𑀢𑀸. 𑀅𑀝𑁆𑀝𑀫𑀸𑀴𑀧𑀸𑀲𑀸𑀤𑀳𑀫𑁆𑀫𑀺𑀬𑀦𑀸𑀯𑀸𑀲𑀢𑁆𑀣𑀭𑀼𑀓𑁆𑀔𑀫𑀽𑀮𑀅𑀚𑁆𑀛𑁄𑀓𑀸𑀲𑀸𑀦𑀁 𑀧𑀦 𑀏𑀯𑀁 𑀅𑀯𑀢𑁆𑀯𑀸 ‘‘𑀏𑀓𑀓𑀼𑀮𑀲𑁆𑀲 𑀅𑀝𑁆𑀝𑁄 𑀳𑁄𑀢𑀺, 𑀦𑀸𑀦𑀸𑀓𑀼𑀮𑀲𑁆𑀲 𑀅𑀝𑁆𑀝𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁮𑁪) 𑀦𑀬𑁂𑀦 𑀏𑀓𑀓𑀼𑀮𑀦𑀸𑀦𑀸𑀓𑀼𑀮𑀯𑀲𑁂𑀦 𑀘 𑀅𑀦𑁆𑀢𑁂 ‘‘𑀅𑀚𑁆𑀛𑁄𑀓𑀸𑀲𑁄 𑀏𑀓𑀽𑀧𑀘𑀸𑀭𑁄 𑀦𑀸𑀫 𑀅𑀕𑀸𑀫𑀓𑁂 𑀅𑀭𑀜𑁆𑀜𑁂 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀸 𑀏𑀓𑀽𑀧𑀘𑀸𑀭𑁄, 𑀢𑀢𑁄 𑀧𑀭𑀁 𑀦𑀸𑀦𑀽𑀧𑀘𑀸𑀭𑁄𑀢𑀺 (𑀧𑀸𑀭𑀸. 𑁪𑁯𑁪) 𑀘 𑀏𑀯𑀁 𑀏𑀓𑀽𑀧𑀘𑀸𑀭𑀦𑀸𑀦𑀽𑀧𑀘𑀸𑀭𑀢𑀸 𑀯𑀺𑀪𑀢𑁆𑀢𑀸. 𑀢𑀲𑁆𑀫𑀸 𑀕𑀸𑀫𑀸𑀤𑀻𑀲𑀼 𑀧𑀭𑀺𑀓𑁆𑀔𑀺𑀢𑁆𑀢𑀁 𑀏𑀓𑀽𑀧𑀘𑀸𑀭𑀁, 𑀅𑀧𑀭𑀺𑀓𑁆𑀔𑀺𑀢𑁆𑀢𑀁 𑀦𑀸𑀦𑀽𑀧𑀘𑀸𑀭𑀦𑁆𑀢𑀺 𑀘, 𑀅𑀝𑁆𑀝𑀸𑀤𑀺𑀲𑀼 𑀬𑀁 𑀏𑀓𑀓𑀼𑀮𑀲𑁆𑀲, 𑀢𑀁 𑀏𑀓𑀽𑀧𑀘𑀸𑀭𑀁, 𑀬𑀁 𑀦𑀸𑀦𑀸𑀓𑀼𑀮𑀲𑁆𑀲, 𑀢𑀁 𑀦𑀸𑀦𑀽𑀧𑀘𑀸𑀭𑀦𑁆𑀢𑀺 𑀘 𑀕𑀳𑁂𑀢𑀩𑁆𑀩𑀁. 𑀅𑀚𑁆𑀛𑁄𑀓𑀸𑀲𑁂 𑀯𑀼𑀢𑁆𑀢𑀦𑀬𑁂𑀦 𑀕𑀳𑁂𑀢𑀩𑁆𑀩𑀁. 𑀉𑀧𑀘𑀸𑀭𑁄𑀢𑀺 𑀳𑀺 ‘‘𑀕𑀸𑀫𑁄 𑀏𑀓𑀽𑀧𑀘𑀸𑀭𑁄 𑀦𑀸𑀦𑀽𑀧𑀘𑀸𑀭𑁄’’𑀢𑀺𑀆𑀤𑀻𑀲𑀼 𑀤𑁆𑀯𑀸𑀭𑀁, ‘‘𑀅𑀚𑁆𑀛𑁄𑀓𑀸𑀲𑁄 𑀏𑀓𑀽𑀧𑀘𑀸𑀭𑁄’’𑀢𑀺 𑀏𑀢𑁆𑀣 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀗𑁆𑀔𑀸𑀢𑀁 𑀧𑀫𑀸𑀡𑀦𑁆𑀢𑀺 𑀅𑀧𑀭𑁂.

𑀅𑀜𑁆𑀜𑀢𑁆𑀭 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸𑀢𑀺 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑁂𑀦 𑀤𑀺𑀦𑁆𑀦𑀸 𑀲𑀫𑁆𑀫𑀼𑀢𑀺 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺, 𑀢𑀁 𑀯𑀺𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀬𑀁 𑀲𑀗𑁆𑀖𑁄’’𑀢𑀺𑀆𑀤𑀺. 𑀅𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺𑀁 𑀤𑁂𑀢𑀻𑀢𑀺 𑀅𑀯𑀺𑀧𑁆𑀧𑀯𑀸𑀲𑀸 𑀲𑀫𑁆𑀫𑀼𑀢𑀺, 𑀅𑀯𑀺𑀧𑁆𑀧𑀯𑀸𑀲𑀸𑀬 𑀯𑀸 𑀲𑀫𑁆𑀫𑀼𑀢𑀺 𑀅𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺, 𑀢𑀁 𑀜𑀢𑁆𑀢𑀺𑀤𑀼𑀢𑀺𑀬𑁂𑀦 𑀓𑀫𑁆𑀫𑁂𑀦 𑀤𑁂𑀢𑀻𑀢𑀺 𑀅𑀢𑁆𑀣𑁄.

𑀲𑀦𑁆𑀢𑀭𑀼𑀢𑁆𑀢𑀭𑁂𑀦𑀸𑀢𑀺 ‘‘𑀅𑀦𑁆𑀢𑀭’’𑀦𑁆𑀢𑀺 𑀅𑀦𑁆𑀢𑀭𑀯𑀸𑀲𑀓𑁄 𑀯𑀼𑀘𑁆𑀘𑀢𑀺, ‘‘𑀉𑀢𑁆𑀢𑀭’’𑀦𑁆𑀢𑀺 𑀉𑀢𑁆𑀢𑀭𑀸𑀲𑀗𑁆𑀕𑁄, 𑀲𑀳 𑀅𑀦𑁆𑀢𑀭𑁂𑀦 𑀉𑀢𑁆𑀢𑀭𑀁 𑀲𑀦𑁆𑀢𑀭𑀼𑀢𑁆𑀢𑀭𑀁, 𑀢𑁂𑀦 𑀲𑀦𑁆𑀢𑀭𑀼𑀢𑁆𑀢𑀭𑁂𑀦, 𑀲𑀳 𑀅𑀦𑁆𑀢𑀭𑀯𑀸𑀲𑀓𑁂𑀦 𑀉𑀢𑁆𑀢𑀭𑀸𑀲𑀗𑁆𑀕𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀦𑁆𑀢𑁄𑀅𑀭𑀼𑀡𑁂 𑀧𑀘𑁆𑀘𑀼𑀤𑁆𑀥𑀝𑁂𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀲𑀫𑁆𑀧𑀸𑀧𑀼𑀡𑀺𑀢𑀼𑀫𑀲𑀓𑁆𑀓𑁄𑀦𑁆𑀢𑁂𑀦 𑀢𑀢𑁆𑀣𑁂𑀯 𑀞𑀢𑁆𑀯𑀸 𑀅𑀦𑁆𑀢𑁄 𑀅𑀭𑀼𑀡𑁂 𑀧𑀘𑁆𑀘𑀼𑀤𑁆𑀥𑀝𑁂. 𑀧𑀘𑁆𑀘𑀸𑀕𑀦𑁆𑀢𑀩𑁆𑀩𑀦𑁆𑀢𑀺 𑀬𑀣𑀸 𑀭𑁄𑀕𑁄 𑀦 𑀓𑀼𑀧𑁆𑀧𑀢𑀺, 𑀢𑀣𑀸 𑀧𑀼𑀦 𑀘𑀻𑀯𑀭𑀲𑁆𑀲 𑀞𑀧𑀺𑀢𑀝𑁆𑀞𑀸𑀦𑀁 𑀆𑀕𑀦𑁆𑀢𑀩𑁆𑀩𑀁. 𑀬𑀢𑁄 𑀧𑀝𑁆𑀞𑀸𑀬 𑀳𑀺 𑀲𑀢𑁆𑀣𑀁 𑀯𑀸 𑀧𑀭𑀺𑀬𑁂𑀲𑀢𑀺, ‘‘𑀕𑀘𑁆𑀙𑀸𑀫𑀻’’𑀢𑀺 𑀆𑀪𑁄𑀕𑀁 𑀯𑀸 𑀓𑀭𑁄𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀯𑀝𑁆𑀝𑀢𑀺. ‘‘𑀦 𑀤𑀸𑀦𑀺 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀧𑀦 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑁂𑀦 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩𑀁 ‘‘𑀅𑀢𑀺𑀭𑁂𑀓𑀘𑀻𑀯𑀭𑀝𑁆𑀞𑀸𑀦𑁂 𑀞𑀲𑁆𑀲𑀢𑀻’’𑀢𑀺. 𑀢𑁂𑀦𑀸𑀳 ‘‘𑀢𑀢𑁆𑀣𑁂𑀯 𑀯𑀸 𑀞𑀺𑀢𑁂𑀦 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩’’𑀦𑁆𑀢𑀺. 𑀲𑁄𑀢𑀺 𑀬𑀲𑁆𑀲 𑀲𑀫𑁆𑀫𑀼𑀢𑀺 𑀤𑀺𑀦𑁆𑀦𑀸, 𑀲𑁄 𑀭𑁄𑀕𑁄. 𑀮𑀤𑁆𑀥𑀓𑀧𑁆𑀧𑀺𑀬𑀫𑁂𑀯 𑀧𑀼𑀦 𑀲𑀫𑁆𑀫𑀼𑀢𑀺𑀤𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀥𑀺𑀝𑁆𑀞𑀺𑀢𑀘𑀻𑀯𑀭𑀢𑀸𑀢𑀺 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀦𑀬𑁂𑀦 𑀅𑀥𑀺𑀝𑁆𑀞𑀺𑀢𑀘𑀻𑀯𑀭𑀢𑀸. 𑀯𑀺𑀧𑁆𑀧𑀯𑀸𑀲𑁄 𑀦𑀸𑀫 𑀬𑀤𑀺 𑀩𑀤𑁆𑀥𑀲𑀻𑀫𑀸𑀬𑀁 𑀘𑀻𑀯𑀭𑀁 𑀳𑁄𑀢𑀺, 𑀢𑀢𑁄 𑀩𑀳𑀺 𑀅𑀭𑀼𑀡𑀼𑀝𑁆𑀞𑀸𑀧𑀦𑀁. 𑀅𑀣 𑀅𑀩𑀤𑁆𑀥𑀲𑀻𑀫𑀸𑀬𑀁, 𑀬𑀣𑀸𑀯𑀼𑀢𑁆𑀢𑀕𑀸𑀫𑀸𑀤𑀻𑀦𑀁 𑀩𑀳𑀺 𑀳𑀢𑁆𑀣𑀧𑀸𑀲𑀸𑀢𑀺𑀓𑁆𑀓𑀫𑁂 𑀅𑀭𑀼𑀡𑀼𑀝𑁆𑀞𑀸𑀧𑀦𑀁. 𑀩𑀤𑁆𑀥𑀲𑀻𑀫𑀸𑀬𑀁 𑀧𑀦 𑀬𑀢𑁆𑀣 𑀓𑀢𑁆𑀣𑀘𑀺 𑀘𑀻𑀯𑀭𑀁 𑀞𑀧𑁂𑀢𑁆𑀯𑀸 𑀅𑀦𑁆𑀢𑁄𑀲𑀻𑀫𑀸𑀬𑀫𑁂𑀯 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀲𑀺𑀢𑀼𑀁 𑀯𑀝𑁆𑀝𑀢𑀺. 𑀇𑀥 𑀅𑀧𑀘𑁆𑀘𑀼𑀤𑁆𑀥𑀭𑀡𑀁 𑀅𑀓𑀺𑀭𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀓𑀸𑀮𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂 𑀯𑀺𑀬 𑀏𑀢𑁆𑀣𑀸𑀧𑀺 𑀪𑀺𑀓𑁆𑀔𑀼𑀦𑀸𑀢𑀺 𑀲𑀸𑀫𑀺𑀅𑀢𑁆𑀣𑁂 𑀓𑀭𑀡𑀯𑀘𑀦𑀦𑁆𑀢𑀺 𑀆𑀳 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑀸’’𑀢𑀺𑀆𑀤𑀺. ‘‘𑀅𑀓𑀸𑀮𑀘𑀻𑀯𑀭𑀁 𑀦𑀸𑀫 𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀏𑀓𑀸𑀤𑀲𑀫𑀸𑀲𑁂 𑀉𑀧𑁆𑀧𑀦𑁆𑀦𑀁, 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀲𑀢𑁆𑀢𑀫𑀸𑀲𑁂 𑀉𑀧𑁆𑀧𑀦𑁆𑀦𑀁, 𑀓𑀸𑀮𑁂𑀧𑀺 𑀆𑀤𑀺𑀲𑁆𑀲 𑀤𑀺𑀦𑁆𑀦𑀁, 𑀏𑀢𑀁 𑀅𑀓𑀸𑀮𑀘𑀻𑀯𑀭𑀁 𑀦𑀸𑀫𑀸’’𑀢𑀺 (𑀧𑀸𑀭𑀸. 𑁫𑁦𑁦) 𑀧𑀤𑀪𑀸𑀚𑀦𑀺𑀬𑀁 𑀯𑀼𑀢𑁆𑀢𑀢𑁆𑀢𑀸 ‘‘𑀬𑁆𑀯𑀸𑀬𑀁 𑀅𑀦𑀢𑁆𑀣𑀢𑁂 𑀓𑀣𑀺𑀦𑁂’’𑀢𑀺𑀆𑀤𑀺𑀫𑀸𑀳. 𑀬𑁆𑀯𑀸𑀬𑀁 𑀘𑀻𑀯𑀭𑀓𑀸𑀮𑁄 𑀯𑀼𑀢𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀲𑁆𑀲𑀸𑀦𑀲𑁆𑀲𑀸𑀢𑀺 𑀯𑀲𑁆𑀲𑀸𑀦𑀲𑀗𑁆𑀔𑀸𑀢𑀲𑁆𑀲 𑀉𑀢𑀼𑀦𑁄. 𑀧𑀘𑁆𑀙𑀺𑀫𑁄 𑀫𑀸𑀲𑁄 𑀦𑀸𑀫 𑀘𑀻𑀯𑀭𑀫𑀸𑀲𑁄. 𑀢𑀲𑁆𑀫𑀺𑀜𑁆𑀳𑀺 𑀅𑀦𑀢𑁆𑀣𑀢𑁂𑀧𑀺 𑀓𑀣𑀺𑀦𑁂 𑀉𑀧𑁆𑀧𑀦𑁆𑀦𑀁 𑀘𑀻𑀯𑀭𑀁 𑀅𑀦𑀥𑀺𑀝𑁆𑀞𑀺𑀢𑀁, 𑀅𑀯𑀺𑀓𑀧𑁆𑀧𑀺𑀢𑀁 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀧𑀜𑁆𑀘 𑀫𑀸𑀲𑀸𑀢𑀺 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀫𑀸𑀲𑁄, 𑀳𑁂𑀫𑀦𑁆𑀢𑀺𑀓𑀸 𑀘𑀢𑁆𑀢𑀸𑀭𑁄 𑀘𑀸𑀢𑀺 𑀧𑀜𑁆𑀘 𑀫𑀸𑀲𑀸. 𑀅𑀜𑁆𑀜𑀤𑀸𑀢𑀺 𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀏𑀓𑀸𑀤𑀲𑀫𑀸𑀲𑁂, 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀲𑀢𑁆𑀢𑀫𑀸𑀲𑁂. 𑀓𑀸𑀮𑁂𑀧𑀻𑀢𑀺 ‘‘𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀘𑀻𑀯𑀭𑀫𑀸𑀲𑁄, 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀧𑀜𑁆𑀘 𑀫𑀸𑀲𑀸’’𑀢𑀺 𑀬𑀣𑀸𑀯𑀼𑀢𑁆𑀢𑀘𑀻𑀯𑀭𑀓𑀸𑀮𑁂𑀧𑀺. ‘‘𑀆𑀤𑀺𑀦𑀸 𑀦𑀬𑁂𑀦𑀸’’𑀢𑀺 𑀇𑀫𑀺𑀦𑀸 ‘‘𑀤𑀤𑀸𑀫𑀺 𑀤𑀚𑁆𑀚𑀸𑀫𑀻’’𑀢𑀺𑀆𑀤𑀻𑀦𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯) 𑀲𑀗𑁆𑀕𑀳𑁄. 𑀓𑀺𑀜𑁆𑀘𑀸𑀧𑀺 𑀘𑁂𑀢𑀸𑀦𑀺 𑀲𑀩𑁆𑀩𑀸𑀦𑀺 ‘‘𑀅𑀓𑀸𑀮𑀘𑀻𑀯𑀭’’𑀦𑁆𑀢𑀺 𑀯𑀼𑀢𑁆𑀢𑀸𑀦𑀺, 𑀢𑀣𑀸𑀧𑀺 𑀧𑀺𑀝𑁆𑀞𑀺𑀲𑀫𑀬𑁂𑀬𑁂𑀯 𑀉𑀧𑁆𑀧𑀦𑁆𑀦𑀸𑀦𑀺 ‘‘𑀅𑀓𑀸𑀮𑀘𑀻𑀯𑀭’’𑀦𑁆𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀸𑀦𑀺.

‘‘𑀓𑀸𑀮𑁂 𑀲𑀗𑁆𑀖𑀲𑁆𑀲 𑀇𑀤𑀁 𑀅𑀓𑀸𑀮𑀘𑀻𑀯𑀭’’𑀦𑁆𑀢𑀺 𑀤𑀺𑀦𑁆𑀦𑀁 𑀧𑀦 𑀅𑀓𑀸𑀮𑀘𑀻𑀯𑀭𑀲𑀸𑀫𑀜𑁆𑀜𑀢𑁄 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀯𑀼𑀢𑁆𑀢𑀁. 𑀬𑀣𑀸 𑀧𑀺𑀝𑁆𑀞𑀺𑀲𑀫𑀬𑁂 𑀉𑀧𑁆𑀧𑀦𑁆𑀦𑀁 𑀘𑀻𑀯𑀭𑀁 𑀯𑀼𑀝𑁆𑀞𑀯𑀲𑁆𑀲𑁂𑀳𑀺, 𑀲𑁂𑀲𑁂𑀳𑀺 𑀘 𑀲𑀫𑁆𑀫𑀼𑀔𑀻𑀪𑀽𑀢𑁂𑀳𑀺 𑀪𑀸𑀚𑁂𑀢𑀼𑀁 𑀮𑀩𑁆𑀪𑀢𑀻𑀢𑀺 𑀅𑀓𑀸𑀮𑀘𑀻𑀯𑀭𑀁 𑀦𑀸𑀫 𑀚𑀸𑀢𑀁, 𑀢𑀣𑁂𑀯𑀺𑀤𑀫𑁆𑀧𑀻𑀢𑀺 𑀢𑀤𑀺𑀤𑀁 𑀅𑀓𑀸𑀮𑀘𑀻𑀯𑀭𑀲𑀸𑀫𑀜𑁆𑀜𑀁. 𑀬𑀤𑀺 𑀏𑀯𑀁 ‘‘𑀧𑀼𑀕𑁆𑀕𑀮𑀲𑁆𑀲 𑀯𑀸 𑀇𑀤𑀁 𑀢𑀼𑀬𑁆𑀳𑀁 ‘𑀤𑀫𑁆𑀫𑀻’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑀺𑀦𑁆𑀦’’𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦 𑀳𑀺 𑀧𑀼𑀕𑁆𑀕𑀮𑀲𑁆𑀲 𑀆𑀤𑀺𑀲𑁆𑀲 𑀤𑀺𑀦𑁆𑀦𑀁 𑀓𑁂𑀦𑀘𑀺 𑀪𑀸𑀚𑀦𑀻𑀬𑀁 𑀳𑁄𑀢𑀻𑀢𑀺? 𑀦𑀸𑀬𑀁 𑀯𑀺𑀭𑁄𑀥𑁄, 𑀆𑀤𑀺𑀲𑁆𑀲 𑀤𑀸𑀦𑀲𑀸𑀫𑀜𑁆𑀜𑀢𑁄 𑀮𑀩𑁆𑀪𑀫𑀸𑀦𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺. 𑀅𑀢𑁆𑀢𑀦𑁄 𑀯𑀸 𑀥𑀦𑁂𑀦𑀸𑀢𑀺 𑀅𑀢𑁆𑀢𑀦𑁄 𑀓𑀧𑁆𑀧𑀸𑀲𑀲𑀼𑀢𑁆𑀢𑀸𑀤𑀺𑀦𑀸 𑀥𑀦𑁂𑀦. 𑀇𑀫𑀲𑁆𑀲 ‘‘𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀲𑀻𑀫𑀸𑀬 𑀤𑁂𑀢𑀻’’𑀢𑀺𑀆𑀤𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀦𑀬𑁂𑀦 𑀯𑀼𑀢𑁆𑀢𑀁. 𑀏𑀢𑁆𑀣 𑀧𑀦 𑀲𑀻𑀫𑀸𑀬 𑀤𑀸𑀦𑀁 𑀏𑀓𑀸 𑀫𑀸𑀢𑀺𑀓𑀸, 𑀓𑀢𑀺𑀓𑀸𑀬 𑀤𑀸𑀦𑀁 𑀤𑀼𑀢𑀺𑀬𑀸…𑀧𑁂… 𑀧𑀼𑀕𑁆𑀕𑀮𑀲𑁆𑀲 𑀤𑀸𑀦𑀁 𑀅𑀝𑁆𑀞𑀫𑀸.

‘‘𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑁂𑀦𑀸’’𑀢𑀺 𑀇𑀫𑀺𑀦𑀸 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀥𑀼𑀯𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀸𑀤𑀺𑀢𑁄 𑀧𑀞𑀫𑀮𑁂𑀟𑁆𑀟𑀼𑀧𑀸𑀢𑀲𑁆𑀲 𑀅𑀦𑁆𑀢𑁄 𑀉𑀧𑀘𑀸𑀭𑀲𑀻𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀇𑀤𑀸𑀦𑀺 𑀤𑀼𑀢𑀺𑀬𑀮𑁂𑀟𑁆𑀟𑀼𑀧𑀸𑀢𑀲𑁆𑀲𑀧𑀺 𑀅𑀦𑁆𑀢𑁄 𑀉𑀧𑀘𑀸𑀭𑀲𑀻𑀫𑀸𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀥𑀼𑀯𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀫𑁆𑀧𑀺 𑀲𑀻𑀫𑀸𑀧𑀭𑀺𑀬𑀦𑁆𑀢𑀕𑀢𑀫𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀆𑀯𑀸𑀲𑁂 𑀯𑀟𑁆𑀠𑀦𑁆𑀢𑁂 𑀯𑀟𑁆𑀠𑀢𑀻𑀢𑀺 𑀲𑀘𑁂 𑀉𑀧𑀘𑀸𑀭𑀢𑁄 𑀅𑀩𑀳𑀺𑀪𑀽𑀢𑁄 𑀳𑀼𑀢𑁆𑀯𑀸 𑀆𑀯𑀸𑀲𑁄 𑀯𑀟𑁆𑀠𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀪𑀺𑀓𑁆𑀔𑀽𑀲𑀼𑀧𑀺 𑀯𑀟𑁆𑀠𑀦𑁆𑀢𑁂𑀲𑀼 𑀯𑀟𑁆𑀠𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀲𑀘𑁂 𑀯𑀺𑀳𑀸𑀭𑁂 𑀲𑀦𑁆𑀦𑀺𑀧𑀢𑀺𑀢𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑀸 𑀳𑀼𑀢𑁆𑀯𑀸 𑀬𑁄𑀚𑀦𑀲𑀢𑀫𑁆𑀧𑀺 𑀧𑀽𑀭𑁂𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀺, 𑀬𑁄𑀚𑀦𑀲𑀢𑀫𑁆𑀧𑀺 𑀉𑀧𑀘𑀸𑀭𑀲𑀻𑀫𑀸𑀯 𑀳𑁄𑀢𑀺, 𑀲𑀩𑁆𑀩𑁂𑀲𑀁 𑀮𑀸𑀪𑁄 𑀧𑀸𑀧𑀼𑀡𑀸𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁭𑁯) 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀯𑀼𑀢𑁆𑀢𑀁. 𑀪𑀺𑀓𑁆𑀔𑀼𑀦𑀻𑀦𑀁 𑀆𑀭𑀸𑀫𑀧𑀯𑁂𑀲𑀦𑀲𑁂𑀦𑀸𑀲𑀦𑀸𑀧𑀼𑀘𑁆𑀙𑀦𑀸𑀦𑀻𑀢𑀺 𑀆𑀕𑀦𑁆𑀢𑀼𑀓𑀕𑀫𑀺𑀓𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀆𑀭𑀸𑀫𑀧𑀯𑁂𑀲𑀦𑀸𑀧𑀼𑀘𑁆𑀙𑀦𑀁, 𑀲𑁂𑀦𑀸𑀲𑀦𑀸𑀧𑀼𑀘𑁆𑀙𑀦𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 𑀆𑀕𑀦𑁆𑀢𑀼𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀆𑀭𑀸𑀫𑀧𑀯𑁂𑀲𑀦𑀁 𑀆𑀧𑀼𑀘𑁆𑀙𑀺𑀢𑀩𑁆𑀩𑀁, 𑀕𑀫𑀺𑀓𑀸𑀬 𑀲𑀗𑁆𑀖𑀺𑀓𑀁 𑀤𑀲𑀯𑀺𑀥𑀁 𑀲𑁂𑀦𑀸𑀲𑀦𑀁. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 ‘‘𑀪𑀺𑀓𑁆𑀔𑀼𑀦𑀻𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀕𑀫𑀺𑀓𑀲𑁆𑀲 𑀧𑀦 𑀪𑀺𑀓𑁆𑀔𑀼𑀲𑁆𑀲𑀸𑀧𑀺 𑀇𑀫𑀺𑀲𑁆𑀲𑀸𑀬𑁂𑀯 𑀲𑀻𑀫𑀸𑀬 𑀯𑀲𑁂𑀦 𑀲𑁂𑀦𑀸𑀲𑀦𑀸𑀧𑀼𑀘𑁆𑀙𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀧𑀭𑀺𑀯𑀸𑀲𑀫𑀸𑀦𑀢𑁆𑀢𑀸𑀭𑁄𑀘𑀦𑀦𑁆𑀢𑀺 𑀧𑀸𑀭𑀺𑀯𑀸𑀲𑀺𑀓𑀫𑀸𑀦𑀢𑁆𑀢𑀘𑀸𑀭𑀻𑀦𑀁 𑀧𑀭𑀺𑀯𑀸𑀲𑀸𑀭𑁄𑀘𑀦𑀁, 𑀫𑀸𑀦𑀢𑁆𑀢𑀸𑀭𑁄𑀘𑀦𑀜𑁆𑀘. 𑀯𑀲𑁆𑀲𑀘𑁆𑀙𑁂𑀤𑀦𑀺𑀲𑁆𑀲𑀬𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀤𑀺𑀯𑀺𑀥𑀸𑀦𑀦𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑀯𑀺𑀥𑀸𑀦𑀁, 𑀦𑀺𑀲𑁆𑀲𑀬𑀕𑁆𑀕𑀸𑀳𑀯𑀺𑀥𑀸𑀦𑀁, 𑀲𑁂𑀦𑀸𑀲𑀦𑀕𑁆𑀕𑀸𑀳𑀯𑀺𑀥𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀆𑀤𑀺𑀲𑀤𑁆𑀤𑁂𑀦 𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺, 𑀮𑀸𑀪𑀕𑁆𑀕𑀸𑀳𑁄 𑀆𑀕𑀦𑁆𑀢𑀼𑀓𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀆𑀭𑀸𑀫𑀧𑀯𑁂𑀲𑀦𑀦𑁆𑀢𑀺 𑀏𑀯𑀫𑀸𑀤𑀺𑀓𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀇𑀫𑀺𑀲𑁆𑀲𑀸𑀯 𑀲𑀻𑀫𑀸𑀬 𑀯𑀲𑁂𑀦𑀸𑀢𑀺 𑀉𑀧𑀘𑀸𑀭𑀲𑀻𑀫𑀸𑀬𑁂𑀯𑀸𑀢𑀺 𑀬𑀣𑀸𑀲𑀫𑁆𑀪𑀯𑀁 𑀅𑀦𑁆𑀢𑁄, 𑀩𑀳𑀺 𑀘 𑀇𑀫𑀲𑁆𑀲 𑀲𑀩𑁆𑀩𑀲𑁆𑀲 𑀮𑀩𑁆𑀪𑀦𑀢𑁄 𑀯𑀼𑀢𑁆𑀢𑀁.

𑀮𑀸𑀪𑀢𑁆𑀣𑀸𑀬 𑀞𑀧𑀺𑀢𑀸 𑀲𑀻𑀫𑀸 𑀮𑀸𑀪𑀲𑀻𑀫𑀸 (𑀫𑀳𑀸𑀯. 𑁩𑁭𑁯), 𑀲𑀸 𑀘 𑀔𑁄 𑀦𑁂𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀅𑀦𑀼𑀜𑁆𑀜𑀸𑀢𑀸, 𑀦 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺 𑀞𑀧𑀺𑀢𑀸, 𑀅𑀧𑀺𑀘 𑀔𑁄 𑀮𑀸𑀪𑀤𑀸𑀬𑀓𑁂𑀳𑀺. 𑀢𑁂𑀦𑀸𑀳 ‘‘𑀬𑀁 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀬𑁄’’𑀢𑀺𑀆𑀤𑀺. 𑀲𑀫𑀦𑁆𑀢𑀸𑀢𑀺 𑀯𑀺𑀳𑀸𑀭𑀲𑁆𑀲 𑀲𑀫𑀦𑁆𑀢𑀸. 𑀬𑀦𑁆𑀢𑀺 𑀲𑀼𑀗𑁆𑀓𑀲𑀲𑁆𑀲𑀸𑀤𑀺. ‘‘𑀲𑀻𑀫𑀁 𑀞𑀧𑁂𑀦𑁆𑀢𑀻’’𑀢𑀺 𑀧𑀸𑀞𑀲𑁂𑀲𑁄. 𑀏𑀓𑀲𑁆𑀲 𑀭𑀜𑁆𑀜𑁄 𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑀦𑁆𑀢𑀺 𑀘𑁄𑀴𑀪𑁄𑀕𑁄 𑀓𑁂𑀭𑀴𑀪𑁄𑀕𑁄𑀢𑀺 𑀏𑀯𑀁 𑀏𑀓𑁂𑀓𑀲𑁆𑀲 𑀭𑀜𑁆𑀜𑁄 𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑀁. 𑀤𑁆𑀯𑀺𑀥𑀸 𑀆𑀧𑁄 𑀕𑀢𑁄 𑀏𑀢𑁆𑀣𑀸𑀢𑀺 𑀤𑀻𑀧𑁄, 𑀑𑀖𑁂𑀦 𑀅𑀦𑀚𑁆𑀛𑁄𑀢𑁆𑀣𑀢𑁄 𑀪𑀽𑀫𑀺𑀪𑀸𑀕𑁄, 𑀲𑁄𑀯 𑀲𑀻𑀫𑀸 𑀤𑀻𑀧𑀲𑀻𑀫𑀸. 𑀢𑁂𑀦𑀸𑀳 𑀲𑀫𑀼𑀤𑁆𑀤𑀦𑁆𑀢𑁂𑀦𑀸’’𑀢𑀺𑀆𑀤𑀺. 𑀘𑀓𑁆𑀓𑀯𑀸𑀴𑀲𑀻𑀫𑀸 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑁂𑀦𑁂𑀯 𑀧𑀭𑀺𑀘𑁆𑀙𑀺𑀦𑁆𑀦𑀸𑀢𑀺 𑀆𑀳 ‘‘𑀏𑀓𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀧𑀭𑀺𑀓𑁆𑀔𑁂𑀧𑀩𑁆𑀪𑀦𑁆𑀢𑀭𑀁 𑀘𑀓𑁆𑀓𑀯𑀸𑀴𑀲𑀻𑀫𑀸’’𑀢𑀺.

𑀲𑁂𑀲𑀸𑀢𑀺 𑀔𑀡𑁆𑀟𑀲𑀻𑀫𑀸𑀤𑀬𑁄. 𑀔𑀡𑁆𑀟𑀲𑀻𑀫𑀸𑀬 𑀤𑁂𑀫𑀸𑀢𑀺 𑀤𑀺𑀦𑁆𑀦𑀦𑁆𑀢𑀺 𑀔𑀡𑁆𑀟𑀲𑀻𑀫𑀸𑀬 𑀓𑁂𑀦𑀘𑀺 𑀓𑀫𑁆𑀫𑁂𑀦 𑀲𑀦𑁆𑀦𑀺𑀧𑀢𑀺𑀢𑀁 𑀲𑀗𑁆𑀖𑀁 𑀤𑀺𑀲𑁆𑀯𑀸 ‘‘𑀔𑀡𑁆𑀟𑀲𑀻𑀫𑀸𑀬𑀁 𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀤𑀺𑀦𑁆𑀦𑀁. 𑀔𑀡𑁆𑀟𑀲𑀻𑀫𑀸𑀬 𑀞𑀺𑀢𑁂 𑀭𑀼𑀓𑁆𑀔𑁂 𑀯𑀸 𑀧𑀩𑁆𑀩𑀢𑁂 𑀯𑀸 𑀞𑀺𑀢𑁄𑀧𑀺 𑀳𑁂𑀝𑁆𑀞𑀸 𑀯𑀸 𑀧𑀣𑀯𑀺𑀯𑁂𑀫𑀚𑁆𑀛𑀕𑀢𑁄𑀧𑀺 𑀔𑀡𑁆𑀟𑀲𑀻𑀫𑀸𑀬𑁂𑀯 𑀞𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀫𑀸𑀦𑀲𑀁𑀯𑀸𑀲𑀲𑀻𑀫𑀸𑀬 𑀤𑀺𑀦𑁆𑀦𑀦𑁆𑀢𑀺 ‘‘𑀲𑀫𑀸𑀦𑀲𑀁𑀯𑀸𑀲𑀲𑀻𑀫𑀸𑀬 𑀤𑀫𑁆𑀫𑀻’’𑀢𑀺 𑀤𑀺𑀦𑁆𑀦𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀔𑀡𑁆𑀟𑀲𑀻𑀫𑀸 𑀲𑀻𑀫𑀦𑁆𑀢𑀭𑀺𑀓𑀝𑁆𑀞𑀸𑀦𑀁 𑀦 𑀧𑀸𑀧𑀼𑀡𑀸𑀢𑀺 𑀢𑀢𑁆𑀣 𑀲𑀫𑀸𑀦𑀲𑀁𑀯𑀸𑀲𑀲𑀻𑀫𑀸𑀬 𑀅𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀫𑀸𑀦𑀲𑀁𑀯𑀸𑀲𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀲𑀼 𑀤𑀺𑀦𑁆𑀦𑀲𑁆𑀲 𑀇𑀤𑀁 𑀦𑀸𑀦𑀸𑀢𑁆𑀢𑀁 𑁋 ‘‘𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀬 𑀤𑀫𑁆𑀫𑀻’’𑀢𑀺 𑀤𑀺𑀦𑁆𑀦𑀁 𑀕𑀸𑀫𑀝𑁆𑀞𑀸𑀦𑀁 𑀦 𑀧𑀸𑀧𑀼𑀡𑀸𑀢𑀺. 𑀓𑀲𑁆𑀫𑀸? ‘‘𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘𑀸’’𑀢𑀺 (𑀫𑀳𑀸𑀯. 𑁧𑁪𑁪) 𑀯𑀼𑀢𑁆𑀢𑀢𑁆𑀢𑀸. ‘‘𑀲𑀫𑀸𑀦𑀲𑀁𑀯𑀸𑀲𑀲𑀻𑀫𑀸𑀬 𑀤𑀫𑁆𑀫𑀻’’𑀢𑀺 𑀤𑀺𑀦𑁆𑀦𑀁 𑀧𑀦 𑀕𑀸𑀫𑁂 𑀞𑀺𑀢𑀸𑀦𑀫𑁆𑀧𑀺 𑀧𑀸𑀧𑀼𑀡𑀸𑀢𑀻𑀢𑀺. 𑀅𑀩𑁆𑀪𑀦𑁆𑀢𑀭𑀲𑀻𑀫𑀸𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀲𑀼 𑀤𑀺𑀦𑁆𑀦𑀦𑁆𑀢𑀺 𑀢𑀢𑁆𑀣 𑀉𑀧𑁄𑀲𑀣𑀸𑀤𑀺𑀅𑀢𑁆𑀣𑀸𑀬 𑀲𑀦𑁆𑀦𑀺𑀧𑀢𑀺𑀢𑁂 𑀤𑀺𑀲𑁆𑀯𑀸 ‘‘𑀇𑀫𑀺𑀲𑁆𑀲𑀸 𑀅𑀩𑁆𑀪𑀦𑁆𑀢𑀭𑀲𑀻𑀫𑀸𑀬 𑀤𑁂𑀫𑀸’’𑀢𑀺𑀆𑀤𑀺𑀦𑀸 𑀤𑀺𑀦𑁆𑀦𑀁. 𑀚𑀦𑀧𑀤𑀭𑀝𑁆𑀞𑀭𑀚𑁆𑀚𑀤𑀻𑀧𑀘𑀓𑁆𑀓𑀯𑀸𑀴𑀲𑀻𑀫𑀸𑀲𑀼𑀧𑀺 𑀕𑀸𑀫𑀲𑀻𑀫𑀸𑀤𑀻𑀲𑀼 𑀯𑀼𑀢𑁆𑀢𑀲𑀤𑀺𑀲𑁄𑀯 𑀯𑀺𑀦𑀺𑀘𑁆𑀙𑀬𑁄𑀢𑀺 𑀆𑀳 ‘‘𑀚𑀦𑀧𑀤𑀲𑀻𑀫𑀸𑀤𑀻𑀲𑀽’’𑀢𑀺𑀆𑀤𑀺. 𑀏𑀓𑁄𑀧𑀺 𑀕𑀦𑁆𑀢𑁆𑀯𑀸 𑀲𑀩𑁆𑀩𑁂𑀲𑀁 𑀲𑀗𑁆𑀕𑀡𑁆𑀳𑀺𑀢𑀼𑀁 𑀮𑀪𑀢𑀻𑀢𑀺 𑀏𑀓𑁄𑀧𑀺 𑀕𑀦𑁆𑀢𑁆𑀯𑀸 𑀇𑀥 𑀯𑀲𑁆𑀲𑀕𑁆𑀕𑁂𑀦 𑀪𑀸𑀚𑁂𑀢𑁆𑀯𑀸 𑀕𑀳𑁂𑀢𑁆𑀯𑀸 𑀆𑀕𑀦𑁆𑀢𑀼𑀁 𑀮𑀪𑀢𑀻𑀢𑀺 𑀅𑀢𑁆𑀣𑁄. 𑀏𑀓𑁄𑀢𑀺 𑀲𑀪𑀸𑀕𑁄 𑀏𑀓𑁄 𑀪𑀺𑀓𑁆𑀔𑀼, 𑀅𑀬𑀫𑁆𑀧𑀺 𑀪𑀸𑀕𑀫𑁂𑀯 𑀕𑀳𑁂𑀢𑀼𑀁 𑀮𑀪𑀢𑀺. 𑀢𑁂𑀦𑀸𑀳 ‘‘𑀲𑀪𑀸𑀕𑀸𑀦𑀁 𑀪𑀸𑀕𑀁 𑀕𑀡𑁆𑀳𑀸𑀢𑀻’’𑀢𑀺.

𑀏𑀯𑀁 𑀢𑀸𑀯 𑀬𑁄 𑀲𑀻𑀫𑀁 𑀧𑀭𑀸𑀫𑀲𑀺𑀢𑁆𑀯𑀸 𑀤𑁂𑀢𑀺, 𑀢𑀲𑁆𑀲 𑀤𑀸𑀦𑁂 𑀯𑀺𑀦𑀺𑀘𑁆𑀙𑀬𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀬𑁄 ‘‘𑀅𑀲𑀼𑀓𑀲𑀻𑀫𑀸𑀬𑀸’’𑀢𑀺 𑀯𑀢𑁆𑀢𑀼𑀁 𑀦 𑀚𑀸𑀦𑀸𑀢𑀺, 𑀓𑁂𑀯𑀮𑀁 ‘‘𑀲𑀻𑀫𑀸’’𑀢𑀺 𑀯𑀘𑀦𑀫𑀢𑁆𑀢𑀫𑁂𑀯 𑀚𑀸𑀦𑀦𑁆𑀢𑁄 𑀯𑀺𑀳𑀸𑀭𑀁 𑀆𑀕𑀦𑁆𑀢𑁆𑀯𑀸 ‘‘𑀲𑀻𑀫𑀸𑀬 𑀤𑀫𑁆𑀫𑀻’’𑀢𑀺 𑀯𑀸 ‘‘𑀲𑀻𑀫𑀝𑁆𑀞𑀓𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀯𑀸 𑀪𑀡𑀢𑀺, 𑀢𑀢𑁆𑀣 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁄 𑀧𑀦 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. 𑀓𑀢𑀭𑀦𑁆𑀢𑀺 𑀓𑀢𑀭𑀲𑀻𑀫𑀁. 𑀅𑀳𑀫𑁂𑀢𑀁 𑀪𑁂𑀤𑀁 𑀦 𑀚𑀸𑀦𑀸𑀫𑀻𑀢𑀺 𑀅𑀳𑀁 ‘‘𑀅𑀲𑀼𑀓𑀸 𑀲𑀻𑀫𑀸’’𑀢𑀺 𑀏𑀢𑀁 𑀯𑀺𑀪𑀸𑀕𑀁 𑀦 𑀚𑀸𑀦𑀸𑀫𑀺. 𑀉𑀧𑀘𑀸𑀭𑀲𑀻𑀫𑀝𑁆𑀞𑁂𑀳𑀺 𑀪𑀸𑀚𑁂𑀢𑀩𑁆𑀩𑀁 𑀮𑀸𑀪𑀲𑁆𑀲 𑀉𑀧𑀘𑀸𑀭𑀲𑀻𑀫𑀸𑀬 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀸𑀢𑀺 𑀲𑀫𑀸𑀦𑀮𑀸𑀪𑀓𑀢𑀺𑀓𑀸.

𑀬𑀢𑁆𑀣 𑀫𑀬𑁆𑀳𑀁 𑀥𑀼𑀯𑀓𑀸𑀭𑀸 𑀓𑀭𑀻𑀬𑀦𑁆𑀢𑀻𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁭𑁯) 𑀏𑀢𑁆𑀣 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀢𑀲𑁆𑀲 𑀘𑀻𑀯𑀭𑀤𑀸𑀬𑀓𑀲𑁆𑀲 𑀲𑀦𑁆𑀢𑀓𑀁 𑀲𑀗𑁆𑀖𑀲𑁆𑀲 𑀧𑀸𑀓𑀯𑀢𑁆𑀢𑀁 𑀯𑀸 𑀯𑀢𑁆𑀢𑀢𑀺. 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀪𑀸𑀭𑀁 𑀓𑀢𑁆𑀯𑀸 𑀲𑀤𑀸 𑀕𑁂𑀳𑁂 𑀪𑁄𑀚𑁂𑀢𑀺, 𑀬𑀢𑁆𑀣 𑀯𑀸 𑀅𑀦𑁂𑀦 𑀆𑀯𑀸𑀲𑁄 𑀯𑀸 𑀓𑀸𑀭𑀺𑀢𑁄, 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀯𑀸 𑀦𑀺𑀩𑀤𑁆𑀥𑀸𑀦𑀺, 𑀇𑀫𑁂 𑀥𑀼𑀯𑀓𑀸𑀭𑀸 𑀦𑀸𑀫. 𑀬𑁂𑀦 𑀧𑀦 𑀲𑀓𑀮𑁄𑀧𑀺 𑀯𑀺𑀳𑀸𑀭𑁄 𑀧𑀢𑀺𑀝𑁆𑀞𑀸𑀧𑀺𑀢𑁄, 𑀢𑀢𑁆𑀣 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀢𑁂𑀦𑀸𑀳 ‘‘𑀬𑀢𑁆𑀣 𑀢𑀲𑁆𑀲 𑀧𑀸𑀓𑀯𑀢𑁆𑀢𑀁 𑀯𑀸 𑀯𑀢𑁆𑀢𑀢𑀻’’𑀢𑀺𑀆𑀤𑀺. 𑀢𑀢𑁆𑀣 𑀧𑀸𑀓𑀯𑀢𑁆𑀢𑀦𑁆𑀢𑀺 𑀤𑀸𑀦𑀯𑀢𑁆𑀢𑀁. 𑀯𑀢𑁆𑀢𑀢𑀻𑀢𑀺 𑀧𑀯𑀢𑁆𑀢𑀢𑀺. 𑀬𑀢𑁄𑀢𑀺 𑀬𑀲𑁆𑀫𑀸 𑀯𑀺𑀳𑀸𑀭𑀸. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀯𑀺𑀳𑀸𑀭𑁂𑀲𑀼. 𑀫𑀸𑀢𑀺𑀓𑀁 𑀆𑀭𑁄𑀧𑁂𑀢𑁆𑀯𑀸𑀢𑀺 𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀩𑀳𑀼𑀢𑀭𑀸, 𑀏𑀓𑀲𑁆𑀫𑀺𑀁 𑀣𑁄𑀓𑀢𑀭𑀸, 𑀏𑀓𑀜𑁆𑀘 𑀯𑀢𑁆𑀣𑀁, 𑀥𑀼𑀯𑀓𑀸𑀭𑀝𑁆𑀞𑀸𑀦𑀜𑁆𑀘 𑀩𑀳𑀼𑀓𑀁, 𑀓𑀢𑁆𑀣 𑀤𑁂𑀫𑀸𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, 𑀬𑀤𑀺 𑀧𑀦 𑀫𑀜𑁆𑀘𑁄 𑀯𑀸 𑀧𑀻𑀞𑀁 𑀯𑀸 𑀏𑀓𑀫𑁂𑀯 𑀳𑁄𑀢𑀺, 𑀢𑀁 𑀧𑀼𑀘𑁆𑀙𑀺𑀢𑁆𑀯𑀸 𑀬𑀲𑁆𑀲 𑀯𑀸 𑀯𑀺𑀳𑀸𑀭𑀲𑁆𑀲, 𑀏𑀓𑀯𑀺𑀳𑀸𑀭𑁂𑀧𑀺 𑀯𑀸 𑀬𑀲𑁆𑀲 𑀲𑁂𑀦𑀸𑀲𑀦𑀲𑁆𑀲 𑀲𑁄 𑀯𑀺𑀘𑀸𑀭𑁂𑀢𑀺, 𑀢𑀢𑁆𑀣 𑀤𑀸𑀢𑀩𑁆𑀩𑀁. 𑀲𑀘𑁂𑀧𑀺 ‘‘𑀅𑀲𑀼𑀓𑀪𑀺𑀓𑁆𑀔𑀼 𑀕𑀡𑁆𑀳𑀢𑀽’’𑀢𑀺 𑀯𑀤𑀢𑀺, 𑀯𑀝𑁆𑀝𑀢𑀺. 𑀅𑀣 ‘‘𑀫𑀬𑁆𑀳𑀁 𑀥𑀼𑀯𑀓𑀸𑀭𑁂 𑀤𑁂𑀣𑀸’’𑀢𑀺 𑀯𑀢𑁆𑀯𑀸 𑀅𑀯𑀺𑀘𑀸𑀭𑁂𑀢𑁆𑀯𑀸𑀯 𑀕𑀘𑁆𑀙𑀢𑀺, 𑀲𑀗𑁆𑀖𑀲𑁆𑀲𑀧𑀺 𑀯𑀺𑀘𑀸𑀭𑁂𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀁 𑀧𑀦 𑀯𑀺𑀘𑀸𑀭𑁂𑀢𑀩𑁆𑀩𑀁 𑁋 ‘‘𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑁂 𑀤𑁂𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀢𑀢𑁆𑀣 𑀲𑁂𑀦𑀸𑀲𑀦𑀁 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺, 𑀬𑀢𑁆𑀣 𑀦𑀧𑁆𑀧𑀳𑁄𑀢𑀺, 𑀢𑀢𑁆𑀣 𑀤𑀸𑀢𑀩𑁆𑀩𑀁. 𑀲𑀘𑁂 𑀏𑀓𑁄 𑀪𑀺𑀓𑁆𑀔𑀼 ‘‘𑀫𑀬𑁆𑀳𑀁 𑀯𑀲𑀦𑀝𑁆𑀞𑀸𑀦𑁂 𑀲𑁂𑀦𑀸𑀲𑀦𑀧𑀭𑀺𑀪𑁄𑀕𑀪𑀡𑁆𑀟𑀁 𑀦𑀢𑁆𑀣𑀻’’𑀢𑀺 𑀯𑀤𑀢𑀺, 𑀢𑀢𑁆𑀣 𑀤𑀸𑀢𑀩𑁆𑀩𑀁.

𑀲𑀗𑁆𑀖𑀲𑁆𑀲 𑀤𑀫𑁆𑀫𑀻𑀢𑀺 𑀤𑀺𑀦𑁆𑀦𑀦𑁆𑀢𑀺 ‘‘𑀇𑀫𑀸𑀦𑀺 𑀘𑀻𑀯𑀭𑀸𑀦𑀺 𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀏𑀯𑀁 𑀤𑀺𑀦𑁆𑀦𑀁. 𑀢𑀢𑁄 𑀩𑀳𑀺𑀤𑁆𑀥𑀸𑀧𑀻𑀢𑀺 𑀉𑀧𑀘𑀸𑀭𑀲𑀻𑀫𑀸𑀢𑁄 𑀩𑀳𑀺𑀤𑁆𑀥𑀸𑀧𑀺. 𑀢𑁂𑀳𑀺 𑀲𑀤𑁆𑀥𑀺𑀦𑁆𑀢𑀺 𑀉𑀧𑀘𑀸𑀭𑀲𑀻𑀫𑀸𑀕𑀢𑁂𑀳𑀺 𑀲𑀤𑁆𑀥𑀺𑀁. 𑀏𑀓𑀸𑀩𑀤𑁆𑀥𑀸𑀦𑀜𑁆𑀘 𑀧𑀸𑀧𑀼𑀡𑀸𑀢𑀺 𑀧𑀭𑀺𑀲𑀸𑀯𑀲𑁂𑀦 𑀯𑀟𑁆𑀠𑀺𑀢𑀸 𑀲𑀻𑀫𑀸 𑀳𑁄𑀢𑀻𑀢𑀺 𑀓𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀉𑀧𑀘𑀸𑀭𑀲𑀻𑀫𑀸𑀕𑀢𑀸𑀦𑀁 𑀧𑀸𑀧𑀼𑀡𑀸𑀢𑀺, 𑀬𑀲𑁆𑀫𑀸 𑀘 𑀢𑀢𑁄 𑀩𑀳𑀺𑀤𑁆𑀥𑀸𑀧𑀺 𑀉𑀧𑀘𑀸𑀭𑀲𑀻𑀫𑁄𑀓𑁆𑀓𑀦𑁆𑀢𑁂𑀳𑀺 𑀏𑀓𑀸𑀩𑀤𑁆𑀥𑀸𑀦𑀁 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀫𑀸. 𑀢𑁂𑀲𑀦𑁆𑀢𑀺 𑀉𑀧𑀘𑀸𑀭𑀲𑀻𑀫𑀸𑀕𑀢𑀸𑀦𑀁, 𑀢𑀢𑁄 𑀩𑀳𑀺𑀤𑁆𑀥𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑀸𑀦𑀜𑁆𑀘. 𑀕𑀸𑀳𑀢𑁂 𑀲𑀢𑀻𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑀸𑀤𑀺𑀓𑁂 𑀕𑀡𑁆𑀳𑀦𑁆𑀢𑁂 𑀲𑀢𑀺. 𑀅𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀻𑀢𑀺 𑀉𑀧𑀘𑀸𑀭𑀲𑀻𑀫𑀸𑀬𑀁 𑀞𑀺𑀢𑁂𑀳𑀺 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸 𑀓𑀸𑀮𑀁 𑀖𑁄𑀲𑁂𑀢𑁆𑀯𑀸 𑀮𑀸𑀪𑀪𑀸𑀚𑀦𑀝𑁆𑀞𑀸𑀦𑀁 𑀅𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀉𑀧𑀘𑀸𑀭𑀲𑀻𑀫𑀸𑀬 𑀧𑀯𑀺𑀝𑁆𑀞𑀸𑀦𑀁, 𑀢𑁂𑀳𑀺 𑀯𑀸 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑀸𑀦𑀁 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀳𑀸𑀭𑀤𑁆𑀯𑀸𑀭𑁂 𑀯𑀸 𑀅𑀦𑁆𑀢𑁄𑀯𑀺𑀳𑀸𑀭𑁂𑀬𑁂𑀯 𑀯𑀸 𑀞𑀺𑀢𑀸𑀦𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀪𑀸𑀕𑁄 𑀤𑀸𑀢𑀩𑁆𑀩𑁄𑀢𑀺 𑀲𑀗𑁆𑀖𑀦𑀯𑀓𑀲𑁆𑀲 𑀤𑀺𑀦𑁆𑀦𑁂𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀼𑀢𑀺𑀬𑀪𑀸𑀕𑁂 𑀧𑀦 𑀣𑁂𑀭𑀸𑀲𑀦𑀁 𑀆𑀭𑀼𑀴𑁆𑀳𑁂 𑀆𑀕𑀢𑀸𑀦𑀁 𑀧𑀞𑀫𑀪𑀸𑀕𑁄 𑀦 𑀧𑀸𑀧𑀼𑀡𑀸𑀢𑀺. 𑀤𑀼𑀢𑀺𑀬𑀪𑀸𑀕𑀢𑁄 𑀯𑀲𑁆𑀲𑀕𑁆𑀕𑁂𑀦 𑀤𑀸𑀢𑀩𑁆𑀩𑀁.

𑀲𑀘𑁂 𑀧𑀦 ‘‘𑀩𑀳𑀺𑀉𑀧𑀘𑀸𑀭𑀲𑀻𑀫𑀸𑀬𑀁 𑀞𑀺𑀢𑀸𑀦𑀁 𑀤𑁂𑀣𑀸’’𑀢𑀺 𑀯𑀤𑀦𑁆𑀢𑀺, 𑀦 𑀤𑀸𑀢𑀩𑁆𑀩𑀁. 𑀬𑀤𑀺 𑀧𑀦 𑀯𑀺𑀳𑀸𑀭𑁄 𑀫𑀳𑀸 𑀳𑁄𑀢𑀺, 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀯𑀢𑁆𑀣𑁂𑀲𑀼 𑀤𑀻𑀬𑀫𑀸𑀦𑁂𑀲𑀼 𑀅𑀮𑀲𑀚𑀸𑀢𑀺𑀓𑀸 𑀫𑀳𑀸𑀣𑁂𑀭𑀸 𑀧𑀘𑁆𑀙𑀸 𑀆𑀕𑀘𑁆𑀙𑀦𑁆𑀢𑀺, ‘‘𑀪𑀦𑁆𑀢𑁂, 𑀯𑀻𑀲𑀢𑀺𑀯𑀲𑁆𑀲𑀸𑀦𑀁 𑀤𑀻𑀬𑀢𑀺, 𑀢𑀼𑀫𑁆𑀳𑀸𑀓𑀁 𑀞𑀺𑀢𑀺𑀓𑀸 𑀅𑀢𑀺𑀓𑁆𑀓𑀦𑁆𑀢𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀞𑀺𑀢𑀺𑀓𑀁 𑀞𑀧𑁂𑀢𑁆𑀯𑀸 𑀢𑁂𑀲𑀁 𑀤𑀢𑁆𑀯𑀸 𑀧𑀘𑁆𑀙𑀸 𑀞𑀺𑀢𑀺𑀓𑀸𑀬 𑀤𑀸𑀢𑀩𑁆𑀩𑀁.

‘‘𑀅𑀲𑀼𑀓𑀯𑀺𑀳𑀸𑀭𑁂 𑀓𑀺𑀭 𑀩𑀳𑀼𑀘𑀻𑀯𑀭𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀲𑀼𑀢𑁆𑀯𑀸 𑀬𑁄𑀚𑀦𑀦𑁆𑀢𑀭𑀺𑀓𑀯𑀺𑀳𑀸𑀭𑀢𑁄𑀧𑀺 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺, 𑀲𑀫𑁆𑀧𑀢𑁆𑀢𑀲𑀫𑁆𑀧𑀢𑁆𑀢𑀸𑀦𑀁 𑀞𑀺𑀢𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀤𑀸𑀢𑀩𑁆𑀩𑀁, 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀘𑀻𑀯𑀭𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁩𑁭𑁯) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀇𑀫𑀸𑀦𑀺 𑀘𑀻𑀯𑀭𑀸𑀦𑀺 𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀤𑀺𑀦𑁆𑀦𑁂𑀲𑀼 𑀯𑀺𑀦𑀺𑀘𑁆𑀙𑀬𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀩𑀳𑀺𑀉𑀧𑀘𑀸𑀭𑀲𑀻𑀫𑀸𑀬𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 ‘‘𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀤𑀺𑀦𑁆𑀦𑁂𑀲𑀼 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀓𑀸𑀩𑀤𑁆𑀥𑀧𑀭𑀺𑀲𑀸𑀬 𑀧𑀸𑀧𑀼𑀡𑀸𑀢𑀻𑀢𑀺 𑀲𑀘𑁂 𑀬𑁄𑀚𑀦𑀁 𑀨𑀭𑀺𑀢𑁆𑀯𑀸 𑀧𑀭𑀺𑀲𑀸 𑀞𑀺𑀢𑀸 𑀳𑁄𑀢𑀺, 𑀏𑀓𑀸𑀩𑀤𑁆𑀥𑀸 𑀘𑁂, 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀻𑀢𑀺 𑀅𑀢𑁆𑀣𑁄. 𑀏𑀓𑀸𑀩𑀤𑁆𑀥𑀢𑀸 𑀘𑁂𑀢𑁆𑀣 𑀤𑁆𑀯𑀸𑀤𑀲𑀳𑀢𑁆𑀣𑀩𑁆𑀪𑀦𑁆𑀢𑀭𑀢𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀸. 𑀢𑁂𑀦𑀸𑀳 ‘‘𑀬𑁂 𑀧𑀦𑀸’’𑀢𑀺𑀆𑀤𑀺.

𑀉𑀪𑀢𑁄𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁭𑁯) ‘‘𑀉𑀪𑀢𑁄𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀤𑀺𑀦𑁆𑀦𑀁. ‘‘𑀤𑁆𑀯𑁂𑀥𑀸𑀲𑀗𑁆𑀖𑀲𑁆𑀲 𑀤𑀫𑁆𑀫𑀺, 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀦𑀁 𑀤𑀫𑁆𑀫𑀺, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀘 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀉𑀪𑀢𑁄𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀫𑁂𑀯 𑀳𑁄𑀢𑀺. 𑀉𑀧𑀟𑁆𑀠𑀁 𑀪𑀺𑀓𑁆𑀔𑀽𑀦𑀁, 𑀉𑀧𑀟𑁆𑀠𑀁 𑀪𑀺𑀓𑁆𑀔𑀼𑀦𑀻𑀦𑀁 𑀤𑀸𑀢𑀩𑁆𑀩𑀦𑁆𑀢𑀺 𑀤𑁆𑀯𑁂 𑀪𑀸𑀕𑁂 𑀲𑀫𑁂 𑀓𑀢𑁆𑀯𑀸 𑀏𑀓𑁄 𑀪𑀸𑀕𑁄 𑀪𑀺𑀓𑁆𑀔𑀽𑀦𑀁, 𑀏𑀓𑁄 𑀪𑀸𑀕𑁄 𑀪𑀺𑀓𑁆𑀔𑀼𑀦𑀻𑀦𑀁 𑀤𑀸𑀢𑀩𑁆𑀩𑁄. 𑀕𑀳𑁂𑀢𑀼𑀁 𑀮𑀪𑀢𑀺 𑀉𑀪𑀢𑁄𑀲𑀗𑁆𑀖𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑁂𑀢𑀺𑀬𑀲𑁆𑀲𑀸𑀢𑀺 𑀣𑀽𑀧𑀸𑀤𑀺𑀦𑁄. 𑀢𑀜𑁆𑀳𑀺 𑀥𑀸𑀢𑀸𑀬𑀢𑀦𑀸𑀤𑀺𑀪𑀸𑀯𑁂𑀦 𑀘𑀺𑀢𑀢𑁆𑀢𑀸, 𑀮𑁄𑀓𑀲𑁆𑀲 𑀘𑀺𑀢𑁆𑀢𑀻𑀓𑀸𑀭𑀝𑁆𑀞𑀸𑀦𑀢𑀸𑀬 𑀘 ‘‘𑀘𑁂𑀢𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀦 𑀓𑁄𑀘𑀺 𑀯𑀺𑀲𑁂𑀲𑁄𑀢𑀺 𑀆𑀳 ‘‘𑀇𑀥 𑀧𑀦 𑀘𑁂𑀢𑀺𑀬𑀲𑁆𑀲𑀸’’𑀢𑀺𑀆𑀤𑀺.

‘‘𑀉𑀪𑀢𑁄𑀲𑀗𑁆𑀖𑀲𑁆𑀲 𑀘 𑀢𑀼𑀬𑁆𑀳𑀜𑁆𑀘 𑀘𑁂𑀢𑀺𑀬𑀲𑁆𑀲 𑀘𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀤𑁆𑀯𑀸𑀯𑀻𑀲𑀢𑀺𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀤𑀲 𑀪𑀺𑀓𑁆𑀔𑀽𑀦𑀁, 𑀤𑀲 𑀪𑀺𑀓𑁆𑀔𑀼𑀦𑀻𑀦𑀁, 𑀏𑀓𑁄 𑀧𑀼𑀕𑁆𑀕𑀮𑀲𑁆𑀲, 𑀏𑀓𑁄 𑀘𑁂𑀢𑀺𑀬𑀲𑁆𑀲 𑀤𑀸𑀢𑀩𑁆𑀩𑁄. 𑀢𑀢𑁆𑀣 𑀧𑀼𑀕𑁆𑀕𑀮𑁄 𑀲𑀗𑁆𑀖𑀢𑁄𑀧𑀺 𑀅𑀢𑁆𑀢𑀦𑁄 𑀯𑀲𑁆𑀲𑀕𑁆𑀕𑁂𑀦 𑀧𑀼𑀦 𑀕𑀳𑁂𑀢𑀼𑀁 𑀮𑀪𑀢𑀺, 𑀘𑁂𑀢𑀺𑀬𑀲𑁆𑀲 𑀏𑀓𑁄𑀬𑁂𑀯. 𑀅𑀬𑀁 𑀧𑀦 𑀯𑀸𑀭𑁄 𑀬𑀣𑀸𑀯𑀼𑀢𑁆𑀢𑁂𑀦𑁂𑀯 𑀦𑀬𑁂𑀦 𑀜𑀸𑀬𑀢𑀻𑀢𑀺 𑀓𑀢𑁆𑀯𑀸 𑀇𑀥 𑀦 𑀯𑀼𑀢𑁆𑀢𑁄. 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁩𑁭𑁯) 𑀧𑀦 𑀯𑀼𑀢𑁆𑀢𑁄𑀬𑁂𑀯.

𑀦 𑀫𑀚𑁆𑀛𑁂 𑀪𑀺𑀦𑁆𑀤𑀺𑀢𑁆𑀯𑀸 𑀤𑀸𑀢𑀩𑁆𑀩𑀁 ‘‘𑀪𑀺𑀓𑁆𑀔𑀼𑀦𑀻𑀦’’𑀦𑁆𑀢𑀺 𑀧𑀼𑀕𑁆𑀕𑀮𑀺𑀓𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀧𑀼𑀕𑁆𑀕𑀮𑁄 𑀯𑀺𑀲𑀼𑀁 𑀦 𑀮𑀪𑀢𑀻𑀢𑀺 𑀧𑀼𑀩𑁆𑀩𑁂 𑀯𑀺𑀬 𑀯𑀺𑀲𑀼𑀁 𑀧𑀼𑀕𑁆𑀕𑀮𑀺𑀓𑀓𑁄𑀝𑁆𑀞𑀸𑀲𑀁 𑀦 𑀮𑀪𑀢𑀺. 𑀧𑀸𑀧𑀼𑀡𑀦𑀝𑁆𑀞𑀸𑀦𑀢𑁄 𑀏𑀓𑀫𑁂𑀯 𑀮𑀪𑀢𑀻𑀢𑀺 𑀅𑀢𑁆𑀢𑀦𑁄 𑀯𑀲𑁆𑀲𑀕𑁆𑀕𑁂𑀦 𑀧𑀢𑁆𑀢𑀩𑁆𑀩𑀝𑁆𑀞𑀸𑀦𑀢𑁄 𑀏𑀓𑀫𑁂𑀯 𑀓𑁄𑀝𑁆𑀞𑀸𑀲𑀁 𑀮𑀪𑀢𑀺. 𑀓𑀲𑁆𑀫𑀸? 𑀪𑀺𑀓𑁆𑀔𑀼𑀲𑀗𑁆𑀖𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸. ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀢𑀼𑀬𑁆𑀳𑀜𑁆𑀘 𑀘𑁂𑀢𑀺𑀬𑀲𑁆𑀲 𑀘𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀘𑁂𑀢𑀺𑀬𑀲𑁆𑀲 𑀏𑀓𑀧𑀼𑀕𑁆𑀕𑀮𑀧𑀝𑀺𑀯𑀻𑀲𑁄 𑀮𑀩𑁆𑀪𑀢𑀺, 𑀧𑀼𑀕𑁆𑀕𑀮𑀲𑁆𑀲 𑀯𑀺𑀲𑀼𑀁 𑀦 𑀮𑀩𑁆𑀪𑀢𑀺. 𑀢𑀲𑁆𑀫𑀸 𑀏𑀓𑀁 𑀘𑁂𑀢𑀺𑀬𑀲𑁆𑀲 𑀤𑀢𑁆𑀯𑀸 𑀅𑀯𑀲𑁂𑀲𑀁 𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀕𑀡𑁂𑀢𑁆𑀯𑀸 𑀪𑀸𑀚𑁂𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀘𑁂𑀢𑀺𑀬𑀲𑁆𑀲 𑀘𑀸𑀢𑀺 𑀯𑀼𑀢𑁆𑀢𑁂 𑀧𑀦𑀸’’𑀢𑀺𑀆𑀤𑀺.

𑀢𑁂𑀳𑀺 𑀲𑀤𑁆𑀥𑀺𑀁 𑀧𑀼𑀕𑁆𑀕𑀮𑀘𑁂𑀢𑀺𑀬𑀧𑀭𑀸𑀫𑀲𑀦𑀁 𑀅𑀦𑀦𑁆𑀢𑀭𑀦𑀬𑀲𑀤𑀺𑀲𑀫𑁂𑀯𑀸𑀢𑀺 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀧𑀼𑀕𑁆𑀕𑀮𑀲𑁆𑀲 𑀘 𑀘𑁂𑀢𑀺𑀬𑀲𑁆𑀲 𑀘 𑀕𑀳𑀡𑀁 𑀅𑀦𑀦𑁆𑀢𑀭𑀦𑀬𑀲𑀤𑀺𑀲𑀫𑁂𑀯𑀸𑀢𑀺 𑀅𑀢𑁆𑀣𑁄. ‘‘𑀪𑀺𑀓𑁆𑀔𑀽𑀦𑀜𑁆𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀢𑀼𑀬𑁆𑀳𑀜𑁆𑀘, 𑀪𑀺𑀓𑁆𑀔𑀽𑀦𑀜𑁆𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀘𑁂𑀢𑀺𑀬𑀲𑁆𑀲 𑀘, 𑀪𑀺𑀓𑁆𑀔𑀽𑀦𑀜𑁆𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀢𑀼𑀬𑁆𑀳𑀜𑁆𑀘 𑀘𑁂𑀢𑀺𑀬𑀲𑁆𑀲 𑀘𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀘𑁂𑀢𑀺𑀬𑀲𑁆𑀲 𑀏𑀓𑀧𑀝𑀺𑀯𑀻𑀲𑁄 𑀮𑀩𑁆𑀪𑀢𑀺, 𑀧𑀼𑀕𑁆𑀕𑀮𑀲𑁆𑀲 𑀯𑀺𑀲𑀼𑀁 𑀦𑀢𑁆𑀣𑀺, 𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀕𑀡𑁂𑀢𑁆𑀯𑀸𑀯 𑀪𑀸𑀚𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀼𑀕𑁆𑀕𑀮𑀲𑁆𑀲 𑀯𑀺𑀲𑀼𑀁 𑀦 𑀮𑀩𑁆𑀪𑀢𑀻𑀢𑀺 𑀧𑀼𑀕𑁆𑀕𑀮𑀲𑁆𑀲 𑀯𑀺𑀲𑀼𑀁 𑀧𑀝𑀺𑀯𑀻𑀲𑁄 𑀦 𑀮𑀩𑁆𑀪𑀢𑀺, 𑀯𑀲𑁆𑀲𑀕𑁆𑀕𑁂𑀦 𑀏𑀓𑁄𑀯 𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄. ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀘𑁂𑀢𑀺𑀬𑀲𑁆𑀲 𑀘𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀘𑁂𑀢𑀺𑀬𑀲𑁆𑀲 𑀯𑀺𑀲𑀼𑀁 𑀧𑀝𑀺𑀯𑀻𑀲𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀘𑁂𑀢𑀺𑀬𑀲𑁆𑀲 𑀧𑀦 𑀮𑀩𑁆𑀪𑀢𑀻’’𑀢𑀺. ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀢𑀼𑀬𑁆𑀳𑀜𑁆𑀘 𑀘𑁂𑀢𑀺𑀬𑀲𑁆𑀲 𑀘𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀘𑁂𑀢𑀺𑀬𑀲𑁆𑀲𑁂𑀯 𑀯𑀺𑀲𑀼𑀁 𑀮𑀩𑁆𑀪𑀢𑀺, 𑀦 𑀧𑀼𑀕𑁆𑀕𑀮𑀲𑁆𑀲. 𑀘𑁂𑀢𑀺𑀬𑀲𑁆𑀲 𑀧𑀦 𑀮𑀩𑁆𑀪𑀢𑀺𑀬𑁂𑀯𑀸𑀢𑀺 ‘‘𑀪𑀺𑀓𑁆𑀔𑀽𑀦𑀜𑁆𑀘 𑀘𑁂𑀢𑀺𑀬𑀲𑁆𑀲 𑀘𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀘𑁂𑀢𑀺𑀬𑀲𑁆𑀲 𑀯𑀺𑀲𑀼𑀁 𑀧𑀝𑀺𑀯𑀻𑀲𑁄 𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄. ‘‘𑀪𑀺𑀓𑁆𑀔𑀽𑀦𑀜𑁆𑀘 𑀢𑀼𑀬𑁆𑀳𑀜𑁆𑀘 𑀘𑁂𑀢𑀺𑀬𑀲𑁆𑀲 𑀘𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀘𑁂𑀢𑀺𑀬𑀲𑁆𑀲𑁂𑀯 𑀯𑀺𑀲𑀼𑀁 𑀮𑀩𑁆𑀪𑀢𑀺, 𑀦 𑀧𑀼𑀕𑁆𑀕𑀮𑀲𑁆𑀲. 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁 𑀆𑀤𑀺𑀁 𑀓𑀢𑁆𑀯𑀸𑀧𑀺 𑀏𑀯𑀫𑁂𑀯 𑀬𑁄𑀚𑁂𑀢𑀩𑁆𑀩𑀁.

𑀏𑀢𑁆𑀣𑀸𑀳 𑁋 𑀬𑀁 𑀧𑀦𑁂𑀢𑀭𑀳𑀺 (𑀫𑀳𑀸𑀯. 𑀅𑀝𑁆𑀞. 𑁩𑁭𑁯) 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑀸 𑀲𑀥𑀸𑀢𑀼𑀓𑀁 𑀧𑀝𑀺𑀫𑀁 𑀯𑀸 𑀘𑁂𑀢𑀺𑀬𑀁 𑀯𑀸 𑀞𑀧𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀉𑀪𑀢𑁄𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑁂𑀦𑁆𑀢𑀺, 𑀧𑀝𑀺𑀫𑀸𑀬 𑀯𑀸 𑀘𑁂𑀢𑀺𑀬𑀲𑁆𑀲 𑀯𑀸 𑀧𑀼𑀭𑀢𑁄 𑀆𑀥𑀸𑀭𑀓𑁂 𑀧𑀢𑁆𑀢𑀁 𑀞𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑁄𑀤𑀓𑀁 𑀤𑀢𑁆𑀯𑀸 ‘‘𑀩𑀼𑀤𑁆𑀥𑀸𑀦𑀁 𑀤𑁂𑀫𑀸’’𑀢𑀺, 𑀢𑀢𑁆𑀣 𑀬𑀁 𑀧𑀞𑀫𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀤𑁂𑀦𑁆𑀢𑀺, 𑀯𑀺𑀳𑀸𑀭𑀁 𑀯𑀸 𑀆𑀳𑀭𑀺𑀢𑁆𑀯𑀸 ‘‘𑀇𑀤𑀁 𑀘𑁂𑀢𑀺𑀬𑀲𑁆𑀲 𑀤𑁂𑀫𑀸’’𑀢𑀺 𑀧𑀺𑀡𑁆𑀟𑀧𑀸𑀢𑀜𑁆𑀘 𑀫𑀸𑀮𑀸𑀕𑀦𑁆𑀥𑀸𑀤𑀻𑀦𑀺 𑀘 𑀤𑁂𑀦𑁆𑀢𑀺, 𑀢𑀢𑁆𑀣 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀫𑀸𑀮𑀸𑀕𑀦𑁆𑀥𑀸𑀤𑀻𑀦𑀺 𑀢𑀸𑀯 𑀘𑁂𑀢𑀺𑀬𑁂 𑀆𑀭𑁄𑀧𑁂𑀢𑀩𑁆𑀩𑀸𑀦𑀺, 𑀯𑀢𑁆𑀣𑁂𑀳𑀺 𑀧𑀝𑀸𑀓𑀸, 𑀢𑁂𑀮𑁂𑀦 𑀧𑀤𑀻𑀧𑀸 𑀓𑀸𑀢𑀩𑁆𑀩𑀸, 𑀧𑀺𑀡𑁆𑀟𑀧𑀸𑀢𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀧𑀦 𑀬𑁄 𑀦𑀺𑀩𑀤𑁆𑀥𑀘𑁂𑀢𑀺𑀬𑀚𑀕𑁆𑀕𑀓𑁄 𑀳𑁄𑀢𑀺 𑀧𑀩𑁆𑀩𑀚𑀺𑀢𑁄 𑀯𑀸 𑀕𑀳𑀝𑁆𑀞𑁄 𑀯𑀸, 𑀢𑀲𑁆𑀲 𑀤𑀸𑀢𑀩𑁆𑀩𑀸𑀦𑀺. 𑀦𑀺𑀩𑀤𑁆𑀥𑀚𑀕𑁆𑀕𑀓𑁂 𑀅𑀲𑀢𑀺 𑀆𑀳𑀝𑀪𑀢𑁆𑀢𑀁 𑀞𑀧𑁂𑀢𑁆𑀯𑀸 𑀯𑀢𑁆𑀢𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀉𑀧𑀓𑀝𑁆𑀞𑁂 𑀓𑀸𑀮𑁂 𑀪𑀼𑀜𑁆𑀚𑀺𑀢𑁆𑀯𑀸 𑀧𑀘𑁆𑀙𑀸𑀧𑀺 𑀯𑀢𑁆𑀢𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺𑀬𑁂𑀯.

𑀫𑀸𑀮𑀸𑀕𑀦𑁆𑀥𑀸𑀤𑀻𑀲𑀼 𑀘 𑀬𑀁 𑀓𑀺𑀜𑁆𑀘𑀺 ‘‘𑀇𑀤𑀁 𑀳𑀭𑀺𑀢𑁆𑀯𑀸 𑀘𑁂𑀢𑀺𑀬𑀧𑀽𑀚𑀁 𑀓𑀭𑁄𑀣𑀸’’𑀢𑀺 𑀯𑀼𑀢𑁆𑀢𑁂 𑀤𑀽𑀭𑀫𑁆𑀧𑀺 𑀳𑀭𑀺𑀢𑁆𑀯𑀸 𑀧𑀽𑀚𑁂𑀢𑀩𑁆𑀩𑀁. ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀳𑀭𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀳𑀭𑀺𑀢𑀩𑁆𑀩𑀁. 𑀲𑀘𑁂 𑀧𑀦 ‘‘𑀅𑀳𑀁 𑀧𑀺𑀡𑁆𑀟𑀸𑀬 𑀘𑀭𑀸𑀫𑀺, 𑀆𑀲𑀦𑀲𑀸𑀮𑀸𑀬𑀁 𑀪𑀺𑀓𑁆𑀔𑀽 𑀅𑀢𑁆𑀣𑀺, 𑀢𑁂 𑀳𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀪𑀦𑁆𑀢𑁂, 𑀢𑀼𑀬𑁆𑀳𑀁𑀬𑁂𑀯 𑀤𑀫𑁆𑀫𑀻’’𑀢𑀺 𑀯𑀤𑀢𑀺, 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀣 𑀧𑀦 ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀳𑀭𑀦𑁆𑀢𑀲𑁆𑀲 𑀕𑀘𑁆𑀙𑀢𑁄 𑀅𑀦𑁆𑀢𑀭𑀸𑀯 𑀓𑀸𑀮𑁄 𑀉𑀧𑀓𑀝𑁆𑀞𑁄 𑀳𑁄𑀢𑀺, 𑀅𑀢𑁆𑀢𑀦𑁄 𑀧𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺.

𑀯𑀲𑁆𑀲𑀁𑀯𑀼𑀝𑁆𑀞𑀲𑀗𑁆𑀖𑀲𑁆𑀲 𑀤𑀫𑁆𑀫𑀻𑀢𑀺 𑀯𑀤𑀢𑀻𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁭𑁯) ‘‘𑀯𑀲𑁆𑀲𑀁𑀯𑀼𑀝𑁆𑀞𑀲𑀗𑁆𑀖𑀲𑁆𑀲 𑀇𑀫𑀸𑀦𑀺 𑀘𑀻𑀯𑀭𑀸𑀦𑀺 𑀤𑀫𑁆𑀫𑀻’’𑀢𑀺 𑀯𑀤𑀢𑀺. 𑀢𑁂𑀲𑀁 𑀩𑀳𑀺𑀲𑀻𑀫𑀝𑁆𑀞𑀸𑀦𑀫𑁆𑀧𑀺 𑀧𑀸𑀧𑀼𑀡𑀸𑀢𑀻𑀢𑀺 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀩𑀳𑀺𑀲𑀻𑀫𑀝𑁆𑀞𑀸𑀦𑀫𑁆𑀧𑀺 𑀬𑀸𑀯 𑀓𑀣𑀺𑀦𑀲𑁆𑀲 𑀉𑀩𑁆𑀪𑀸𑀭𑀸 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀫𑀸 𑀤𑀺𑀲𑀸𑀧𑀓𑁆𑀓𑀦𑁆𑀢𑀲𑁆𑀲𑀸𑀧𑀺 𑀲𑀢𑀺 𑀧𑀝𑀺𑀕𑁆𑀕𑀸𑀳𑀓𑁂 𑀤𑀸𑀢𑀩𑁆𑀩𑀁. 𑀅𑀦𑀢𑁆𑀣𑀢𑁂 𑀧𑀦 𑀓𑀣𑀺𑀦𑁂 𑀅𑀦𑁆𑀢𑁄𑀳𑁂𑀫𑀦𑁆𑀢𑁂, 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀤𑀺𑀦𑁆𑀦𑀁 𑀧𑀘𑁆𑀙𑀺𑀫𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀫𑁆𑀧𑀺 𑀧𑀸𑀧𑀼𑀡𑀸𑀢𑀺. 𑀬𑀢𑁆𑀣 𑀓𑀢𑁆𑀣𑀘𑀻𑀢𑀺 𑀬𑁂𑀲𑀼 𑀓𑁂𑀲𑀼𑀘𑀺 𑀯𑀺𑀳𑀸𑀭𑁂𑀲𑀼. 𑀏𑀯𑀁 𑀯𑀤𑀢𑀻𑀢𑀺 ‘‘𑀯𑀲𑁆𑀲𑀁𑀯𑀼𑀝𑁆𑀞𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀯𑀤𑀢𑀺. 𑀢𑀢𑁆𑀭 𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑀁 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀺 𑀧𑀺𑀝𑁆𑀞𑀺𑀲𑀫𑀬𑁂 𑀉𑀧𑁆𑀧𑀦𑁆𑀦𑀢𑁆𑀢𑀸. 𑀲𑀘𑁂 𑀧𑀦 ‘‘𑀯𑀲𑁆𑀲𑀁 𑀯𑀲𑀦𑁆𑀢𑀸𑀦𑀁 𑀤𑀫𑁆𑀫𑀻’’𑀢𑀺 𑀯𑀤𑀢𑀺, 𑀅𑀦𑁆𑀢𑁄𑀯𑀲𑁆𑀲𑁂𑀬𑁂𑀯 𑀯𑀲𑁆𑀲𑀁 𑀯𑀲𑀦𑁆𑀢𑀸𑀯 𑀮𑀪𑀦𑁆𑀢𑀺, 𑀙𑀺𑀦𑁆𑀦𑀯𑀲𑁆𑀲𑀸 𑀦 𑀮𑀪𑀦𑁆𑀢𑀺. 𑀘𑀻𑀯𑀭𑀫𑀸𑀲𑁂 𑀧𑀦 ‘‘𑀯𑀲𑁆𑀲𑀁 𑀯𑀲𑀦𑁆𑀢𑀸𑀦𑀁 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀧𑀘𑁆𑀙𑀺𑀫𑀺𑀓𑀸𑀬 𑀯𑀲𑁆𑀲𑀽𑀧𑀕𑀢𑀸𑀦𑀁𑀬𑁂𑀯 𑀧𑀸𑀧𑀼𑀡𑀸𑀢𑀺, 𑀧𑀼𑀭𑀺𑀫𑀺𑀓𑀸𑀬 𑀯𑀲𑁆𑀲𑀽𑀧𑀕𑀢𑀸𑀦𑀜𑁆𑀘 𑀙𑀺𑀦𑁆𑀦𑀯𑀲𑁆𑀲𑀸𑀦𑀜𑁆𑀘 𑀦 𑀧𑀸𑀧𑀼𑀡𑀸𑀢𑀺.

𑀘𑀻𑀯𑀭𑀫𑀸𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀳𑁂𑀫𑀦𑁆𑀢𑀲𑁆𑀲 𑀧𑀘𑁆𑀙𑀺𑀫𑁄 𑀤𑀺𑀯𑀲𑁄, 𑀢𑀸𑀯 ‘‘𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑁂𑀫𑀸’’𑀢𑀺 𑀯𑀼𑀢𑁆𑀢𑁂 𑀓𑀣𑀺𑀦𑀁 𑀅𑀢𑁆𑀣𑀢𑀁 𑀯𑀸 𑀳𑁄𑀢𑀼, 𑀅𑀦𑀢𑁆𑀣𑀢𑀁 𑀯𑀸, 𑀅𑀢𑀻𑀢𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁𑀬𑁂𑀯 𑀧𑀸𑀧𑀼𑀡𑀸𑀢𑀺. 𑀕𑀺𑀫𑁆𑀳𑀸𑀦𑀁 𑀧𑀞𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀯𑀼𑀢𑁆𑀢𑁂 𑀧𑀦 𑀫𑀸𑀢𑀺𑀓𑀸 𑀆𑀭𑁄𑀧𑁂𑀢𑀩𑁆𑀩𑀸 ‘‘𑀅𑀢𑀻𑀢𑀯𑀲𑁆𑀲𑀸𑀯𑀸𑀲𑀲𑁆𑀲 𑀧𑀜𑁆𑀘 𑀫𑀸𑀲𑀸 𑀅𑀢𑀺𑀓𑁆𑀓𑀦𑁆𑀢𑀸, 𑀅𑀦𑀸𑀕𑀢𑁄 𑀘𑀢𑀼𑀫𑀸𑀲𑀘𑁆𑀘𑀬𑁂𑀦 𑀪𑀯𑀺𑀲𑁆𑀲𑀢𑀺, 𑀓𑀢𑀭𑀯𑀲𑁆𑀲𑀸𑀯𑀸𑀲𑀲𑁆𑀲 𑀤𑁂𑀲𑀻’’𑀢𑀺. 𑀲𑀘𑁂 ‘‘𑀅𑀢𑀻𑀢𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀤𑀫𑁆𑀫𑀻’’𑀢𑀺 𑀯𑀤𑀢𑀺, 𑀢𑀁𑀅𑀦𑁆𑀢𑁄𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀫𑁂𑀯 𑀧𑀸𑀧𑀼𑀡𑀸𑀢𑀺, 𑀤𑀺𑀲𑀸 𑀧𑀓𑁆𑀓𑀦𑁆𑀢𑀸𑀦𑀫𑁆𑀧𑀺 𑀲𑀪𑀸𑀕𑀸 𑀕𑀡𑁆𑀳𑀺𑀢𑀼𑀁 𑀮𑀪𑀦𑁆𑀢𑀺.

𑀲𑀘𑁂 ‘‘𑀅𑀦𑀸𑀕𑀢𑁂 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑀫𑁆𑀫𑀻’’𑀢𑀺 𑀯𑀤𑀢𑀺, 𑀢𑀁 𑀞𑀧𑁂𑀢𑁆𑀯𑀸 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀕𑀳𑁂𑀢𑀩𑁆𑀩𑀁. 𑀅𑀣 ‘‘𑀅𑀕𑀼𑀢𑁆𑀢𑁄 𑀯𑀺𑀳𑀸𑀭𑁄, 𑀘𑁄𑀭𑀪𑀬𑀁 𑀅𑀢𑁆𑀣𑀺, 𑀦 𑀲𑀓𑁆𑀓𑀸 𑀞𑀧𑁂𑀢𑀼𑀁, 𑀕𑀡𑁆𑀳𑀺𑀢𑁆𑀯𑀸 𑀯𑀸 𑀆𑀳𑀺𑀡𑁆𑀟𑀺𑀢𑀼’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀲𑀫𑁆𑀧𑀢𑁆𑀢𑀸𑀦𑀁 𑀤𑀫𑁆𑀫𑀻’’𑀢𑀺 𑀯𑀤𑀢𑀺, 𑀪𑀸𑀚𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀲𑀘𑁂 𑀯𑀤𑀢𑀺 ‘‘𑀇𑀢𑁄 𑀫𑁂, 𑀪𑀦𑁆𑀢𑁂, 𑀢𑀢𑀺𑀬𑁂 𑀯𑀲𑁆𑀲𑁂 𑀯𑀲𑁆𑀲𑀸𑀯𑀸𑀲𑀺𑀓𑀁 𑀦 𑀤𑀺𑀦𑁆𑀦𑀁, 𑀢𑀁 𑀤𑀫𑁆𑀫𑀻’’𑀢𑀺, 𑀢𑀲𑁆𑀫𑀺𑀁 𑀅𑀦𑁆𑀢𑁄𑀯𑀲𑁆𑀲𑁂 𑀯𑀼𑀝𑁆𑀞𑀪𑀺𑀓𑁆𑀔𑀽𑀦𑀁 𑀧𑀸𑀧𑀼𑀡𑀸𑀢𑀺. 𑀲𑀘𑁂 𑀢𑁂 𑀤𑀺𑀲𑀸 𑀧𑀓𑁆𑀓𑀦𑁆𑀢𑀸, 𑀅𑀜𑁆𑀜𑁄 𑀯𑀺𑀲𑁆𑀲𑀸𑀲𑀺𑀓𑁄 𑀕𑀡𑁆𑀳𑀸𑀢𑀺, 𑀤𑀸𑀢𑀩𑁆𑀩𑀁. 𑀅𑀣 𑀏𑀓𑁄𑀬𑁂𑀯 𑀅𑀯𑀲𑀺𑀝𑁆𑀞𑁄, 𑀲𑁂𑀲𑀸 𑀓𑀸𑀮𑀗𑁆𑀓𑀢𑀸, 𑀲𑀩𑁆𑀩𑀁 𑀏𑀓𑀲𑁆𑀲𑁂𑀯 𑀧𑀸𑀧𑀼𑀡𑀸𑀢𑀺. 𑀲𑀘𑁂 𑀏𑀓𑁄𑀧𑀺 𑀦𑀢𑁆𑀣𑀺, 𑀲𑀗𑁆𑀖𑀺𑀓𑀁 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑁂𑀳𑀺 𑀪𑀸𑀚𑀺𑀢𑀩𑁆𑀩𑀁.

𑀬𑁂𑀳𑀺 𑀦𑀺𑀫𑀦𑁆𑀢𑀺𑀢𑁂𑀳𑀺 𑀬𑀸𑀕𑀼 𑀧𑀻𑀢𑀸𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁭𑁯) 𑀦𑀺𑀫𑀦𑁆𑀢𑀺𑀢𑁂𑀳𑀺 𑀬𑁂𑀳𑀺 𑀪𑀺𑀓𑁆𑀔𑀽𑀳𑀺 𑀬𑀸𑀕𑀼 𑀧𑀻𑀢𑀸, 𑀬𑁂𑀳𑀺 𑀧𑀦 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦 𑀖𑀭𑀤𑁆𑀯𑀸𑀭𑁂𑀦 𑀕𑀘𑁆𑀙𑀦𑁆𑀢𑁂𑀳𑀺 𑀯𑀸 𑀖𑀭𑀁 𑀧𑀯𑀺𑀝𑁆𑀞𑁂𑀳𑀺 𑀯𑀸 𑀬𑀸𑀕𑀼 𑀮𑀤𑁆𑀥𑀸, 𑀬𑁂𑀲𑀁 𑀯𑀸 𑀆𑀲𑀦𑀲𑀸𑀮𑀢𑁄 𑀧𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀳𑀺 𑀦𑀻𑀢𑀸, 𑀬𑁂𑀲𑀁 𑀯𑀸 𑀣𑁂𑀭𑁂𑀳𑀺 𑀧𑁂𑀲𑀺𑀢𑀸, 𑀢𑁂𑀲𑀁 𑀦 𑀧𑀸𑀧𑀼𑀡𑀸𑀢𑀺. 𑀲𑀘𑁂 𑀧𑀦 𑀦𑀺𑀫𑀦𑁆𑀢𑀺𑀢𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀅𑀜𑁆𑀜𑁂𑀧𑀺 𑀩𑀳𑀽 𑀆𑀕𑀦𑁆𑀢𑁆𑀯𑀸 𑀅𑀦𑁆𑀢𑁄𑀕𑁂𑀳𑀜𑁆𑀘 𑀩𑀳𑀺𑀕𑁂𑀳𑀜𑁆𑀘 𑀧𑀽𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸, 𑀤𑀸𑀬𑀓𑁄 𑀘 𑀏𑀯𑀁 𑀯𑀤𑀢𑀺 ‘‘𑀦𑀺𑀫𑀦𑁆𑀢𑀺𑀢𑀸 𑀯𑀸 𑀳𑁄𑀦𑁆𑀢𑀼, 𑀅𑀦𑀺𑀫𑀦𑁆𑀢𑀺𑀢𑀸 𑀯𑀸, 𑀬𑁂𑀲𑀁 𑀫𑀬𑀸 𑀬𑀸𑀕𑀼 𑀤𑀺𑀦𑁆𑀦𑀸, 𑀲𑀩𑁆𑀩𑁂𑀲𑀁 𑀇𑀫𑀸𑀦𑀺 𑀯𑀢𑁆𑀣𑀸𑀦𑀺 𑀳𑁄𑀦𑁆𑀢𑀽’’𑀢𑀺, 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀺. 𑀬𑁂𑀳𑀺 𑀧𑀦 𑀣𑁂𑀭𑀸𑀦𑀁 𑀳𑀢𑁆𑀣𑀢𑁄 𑀬𑀸𑀕𑀼 𑀮𑀤𑁆𑀥𑀸, 𑀢𑁂𑀲𑀁 𑀦 𑀧𑀸𑀧𑀼𑀡𑀸𑀢𑀺. 𑀅𑀣 𑀲𑁄 ‘‘𑀬𑁂𑀳𑀺 𑀫𑀬𑁆𑀳𑀁 𑀬𑀸𑀕𑀼 𑀧𑀻𑀢𑀸, 𑀲𑀩𑁆𑀩𑁂𑀲𑀁 𑀳𑁄𑀢𑀽’’𑀢𑀺 𑀯𑀤𑀢𑀺, 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀺. 𑀪𑀢𑁆𑀢𑀔𑀚𑁆𑀚𑀓𑀸𑀤𑀻𑀳𑀻𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦𑀧𑀺 𑀘𑀻𑀯𑀭𑀲𑁂𑀦𑀸𑀲𑀦𑀪𑁂𑀲𑀚𑁆𑀚𑀸𑀦𑀁 𑀕𑀳𑀡𑀁.

𑀧𑀼𑀕𑁆𑀕𑀮𑀲𑁆𑀲𑀸𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁭𑁯) 𑀲𑀫𑁆𑀫𑀼𑀔𑀸𑀲𑀫𑁆𑀫𑀼𑀔𑀪𑀽𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀢𑁂𑀦𑀸𑀳 ‘‘𑀇𑀤𑀁 𑀘𑀻𑀯𑀭’’𑀦𑁆𑀢𑀺𑀆𑀤𑀺. 𑀲𑀘𑁂 𑀧𑀦 ‘‘𑀇𑀤𑀁 𑀢𑀼𑀫𑁆𑀳𑀸𑀓𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀁 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀜𑁆𑀘 𑀤𑀫𑁆𑀫𑀻’’𑀢𑀺 𑀏𑀯𑀁 𑀯𑀤𑀢𑀺, 𑀣𑁂𑀭𑀲𑁆𑀲 𑀘 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀜𑁆𑀘 𑀧𑀸𑀧𑀼𑀡𑀸𑀢𑀺. 𑀉𑀤𑁆𑀤𑁂𑀲𑀁 𑀕𑀳𑁂𑀢𑀼𑀁 𑀆𑀕𑀢𑁄, 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀘 𑀅𑀢𑁆𑀣𑀺, 𑀢𑀲𑁆𑀲𑀸𑀧𑀺 𑀧𑀸𑀧𑀼𑀡𑀸𑀢𑀺. 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀦𑀺𑀩𑀤𑁆𑀥𑀘𑀸𑀭𑀺𑀓𑀪𑀺𑀓𑁆𑀔𑀽𑀦𑀁 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀉𑀤𑁆𑀤𑁂𑀲𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀯𑀢𑁆𑀢𑀁 𑀓𑀢𑁆𑀯𑀸 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀸𑀦𑀁 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀺. 𑀏𑀢𑁆𑀣𑀸𑀢𑀺 𑀅𑀝𑁆𑀞𑀲𑀼 𑀫𑀸𑀢𑀺𑀓𑀸𑀲𑀼. 𑀬𑀤𑀺 𑀧𑀦 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀓𑀣𑀸, 𑀯𑀺𑀢𑁆𑀣𑀸𑀭𑁄 𑀧𑀦 𑀓𑀣𑀁 𑀜𑀸𑀢𑀩𑁆𑀩𑁄𑀢𑀺 𑀆𑀳 ‘‘𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀯𑀼𑀢𑁆𑀢𑁄’’𑀢𑀺. 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀘𑀻𑀯𑀭𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁩𑁭𑁯) 𑀯𑀼𑀢𑁆𑀢𑁄𑀢𑀺 𑀅𑀢𑁆𑀣𑁄.

‘‘𑀜𑀸𑀢𑀓𑁂𑀳𑀺 𑀯𑀸 𑀫𑁂 𑀘𑀻𑀯𑀭𑀢𑁆𑀣𑀸𑀬 𑀧𑁂𑀲𑀺𑀢𑀁, 𑀫𑀺𑀢𑁆𑀢𑁂𑀳𑀺 𑀯𑀸 𑀧𑁂𑀲𑀺𑀢𑀁, 𑀢𑁂 𑀆𑀪𑀢𑁂 𑀘𑀻𑀯𑀭𑁂 𑀤𑀲𑁆𑀲𑀦𑁆𑀢𑀻’’𑀢𑀺 𑀏𑀯𑀁 𑀜𑀸𑀢𑀺𑀢𑁄 𑀯𑀸 𑀫𑀺𑀢𑁆𑀢𑀢𑁄 𑀯𑀸 𑀧𑀘𑁆𑀘𑀸𑀲𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀧𑁆𑀧𑀺𑀬𑀪𑀡𑁆𑀟𑁂𑀦𑀸𑀢𑀺 𑀓𑀧𑁆𑀧𑀸𑀲𑀲𑀼𑀢𑁆𑀢𑀸𑀤𑀺𑀦𑀸 𑀅𑀢𑁆𑀢𑀦𑁄 𑀥𑀦𑁂𑀦. 𑀲𑀡𑁆𑀳𑀦𑁆𑀢𑀺 𑀲𑀼𑀔𑀼𑀫𑀁. 𑀅𑀜𑁆𑀜𑀁 𑀧𑀘𑁆𑀘𑀸𑀲𑀸𑀘𑀻𑀯𑀭𑀁 𑀮𑀪𑀺𑀢𑁆𑀯𑀸 𑀏𑀯 𑀓𑀸𑀮𑀩𑁆𑀪𑀦𑁆𑀢𑀭𑁂 𑀓𑀸𑀭𑁂𑀢𑀩𑁆𑀩𑀦𑁆𑀢𑀺 𑀅𑀜𑁆𑀜𑀁 𑀫𑀽𑀮𑀘𑀻𑀯𑀭𑀲𑀤𑀺𑀲𑀁 𑀧𑀘𑁆𑀘𑀸𑀲𑀸𑀘𑀻𑀯𑀭𑀁 𑀮𑀪𑀺𑀢𑁆𑀯𑀸𑀬𑁂𑀯 𑀫𑀸𑀲𑀩𑁆𑀪𑀦𑁆𑀢𑀭𑁂 𑀓𑀸𑀭𑁂𑀢𑀩𑁆𑀩𑀁. 𑀢𑀜𑁆𑀘 𑀔𑁄 𑀲𑀢𑀺𑀬𑀸𑀬𑁂𑀯 𑀧𑀘𑁆𑀘𑀸𑀲𑀸𑀬, 𑀅𑀲𑀢𑀺𑀬𑀸 𑀧𑀦 𑀧𑀘𑁆𑀘𑀸𑀲𑀸𑀬 𑀫𑀽𑀮𑀘𑀻𑀯𑀭𑀁 𑀤𑀲𑀸𑀳𑀁 𑀘𑁂 𑀲𑀫𑁆𑀧𑀢𑁆𑀢𑀁, 𑀢𑀤𑀳𑁂𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀲𑀘𑁂 𑀦 𑀮𑀪𑀢𑀻’’𑀢𑀺𑀆𑀤𑀺. 𑀧𑀘𑁆𑀘𑀸𑀲𑀸𑀘𑀻𑀯𑀭𑀫𑁆𑀧𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀧𑀞𑀫𑀢𑀭𑀁 𑀉𑀧𑁆𑀧𑀦𑁆𑀦𑀁 𑀣𑀽𑀮𑀧𑀘𑁆𑀘𑀸𑀲𑀸𑀘𑀻𑀯𑀭𑀫𑁆𑀧𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀺-𑀲𑀤𑁆𑀤𑁂𑀦 𑀦 𑀓𑁂𑀯𑀮𑀁 𑀫𑀽𑀮𑀘𑀻𑀯𑀭𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺.

𑀅𑀓𑀸𑀮𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀼𑀭𑀸𑀡𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀅𑀫𑁆𑀳𑀸𑀓𑀫𑁂𑀯 𑀜𑀸𑀢𑀻’’𑀢𑀺 𑀜𑀸𑀬𑀢𑀻𑀢𑀺 𑀜𑀸𑀢𑀺, 𑀲𑀸𑀯 𑀜𑀸𑀢𑀺𑀓𑀸, 𑀦 𑀜𑀸𑀢𑀺𑀓𑀸 𑀅𑀜𑁆𑀜𑀸𑀢𑀺𑀓𑀸, 𑀢𑀸𑀬 𑀅𑀜𑁆𑀜𑀸𑀢𑀺𑀓𑀸𑀬. 𑀢𑁂𑀦𑀸𑀳 ‘‘𑀦 𑀜𑀸𑀢𑀺𑀓𑀸𑀬𑀸’’𑀢𑀺. 𑀫𑀸𑀢𑀺𑀢𑁄 𑀯𑀸 𑀧𑀺𑀢𑀺𑀢𑁄 𑀯𑀸𑀢𑀺 𑀫𑀸𑀢𑀺𑀧𑀓𑁆𑀔𑀢𑁄 𑀯𑀸 𑀧𑀺𑀢𑀺𑀧𑀓𑁆𑀔𑀢𑁄 𑀯𑀸. 𑀬𑀸𑀯 𑀲𑀢𑁆𑀢𑀫𑀁 𑀬𑀼𑀕𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁦𑁩-𑁫𑁦𑁫) 𑀬𑀸𑀯 𑀲𑀢𑁆𑀢𑀫𑀲𑁆𑀲 𑀧𑀼𑀭𑀺𑀲𑀲𑁆𑀲, 𑀲𑀢𑁆𑀢𑀫𑀸𑀬 𑀯𑀸 𑀇𑀢𑁆𑀣𑀺𑀬𑀸 𑀆𑀬𑀼𑀧𑁆𑀧𑀫𑀸𑀡𑀁, 𑀬𑀸𑀯 𑀧𑀺𑀢𑀸𑀫𑀳𑀬𑀼𑀕𑀁 𑀧𑀺𑀢𑀸𑀫𑀳𑀺𑀬𑀼𑀕𑀁 𑀫𑀸𑀢𑀸𑀫𑀳𑀬𑀼𑀕𑀁 𑀫𑀸𑀢𑀸𑀫𑀳𑀺𑀬𑀼𑀕𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀬𑀸𑀯 𑀲𑀢𑁆𑀢𑀫𑀁 𑀬𑀼𑀕𑀦𑁆𑀢𑀺 𑀬𑀸𑀯 𑀲𑀢𑁆𑀢𑀫𑀤𑁆𑀯𑀦𑁆𑀤𑀦𑁆𑀢𑀺 𑀅𑀢𑁆𑀣𑁄. 𑀬𑀼𑀕𑀲𑀤𑁆𑀤𑁄 𑀘𑁂𑀢𑁆𑀣 𑀏𑀓𑀲𑁂𑀲𑀦𑀬𑁂𑀦 𑀤𑀝𑁆𑀞𑀩𑁆𑀩𑁄 ‘‘𑀬𑀼𑀕𑁄 𑀘 𑀬𑀼𑀕𑁄 𑀘 𑀬𑀼𑀕𑀸’’𑀢𑀺. 𑀏𑀯𑀜𑁆𑀳𑀺 𑀢𑀢𑁆𑀣 𑀢𑀢𑁆𑀣 𑀤𑁆𑀯𑀦𑁆𑀤𑀁 𑀕𑀳𑀺𑀢𑀁 𑀳𑁄𑀢𑀺. 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀅𑀲𑀫𑁆𑀩𑀤𑁆𑀥𑀸𑀬𑀸𑀢𑀺 𑀪𑀸𑀢𑀼𑀪𑀕𑀺𑀦𑀺𑀪𑀸𑀕𑀺𑀦𑁂𑀬𑁆𑀬𑀧𑀼𑀢𑁆𑀢𑀧𑀧𑀼𑀢𑁆𑀢𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀅𑀲𑀫𑁆𑀩𑀤𑁆𑀥𑀸𑀬. 𑀧𑀺𑀢𑀸, 𑀧𑀺𑀢𑀼𑀧𑀺𑀢𑀸, 𑀢𑀲𑁆𑀲 𑀧𑀺𑀢𑀸, 𑀢𑀲𑁆𑀲𑀸𑀧𑀺 𑀧𑀺𑀢𑀸𑀢𑀺 𑀏𑀯𑀁 𑀬𑀸𑀯 𑀲𑀢𑁆𑀢𑀫𑀸 𑀬𑀼𑀕𑀸, 𑀧𑀺𑀢𑀸, 𑀧𑀺𑀢𑀼𑀫𑀸𑀢𑀸, 𑀢𑀲𑁆𑀲𑀸 𑀧𑀺𑀢𑀸 𑀘 𑀫𑀸𑀢𑀸 𑀘 𑀪𑀸𑀢𑀸 𑀘 𑀪𑀕𑀺𑀦𑀻 𑀘, 𑀧𑀼𑀢𑁆𑀢𑀸 𑀘, 𑀥𑀻𑀢𑀭𑁄 𑀘𑀸𑀢𑀺 𑀏𑀯𑀫𑁆𑀧𑀺 𑀉𑀤𑁆𑀥𑀜𑁆𑀘 𑀅𑀥𑁄 𑀘 𑀬𑀸𑀯 𑀲𑀢𑁆𑀢𑀫𑀸 𑀬𑀼𑀕𑀸, 𑀧𑀺𑀢𑀸, 𑀧𑀺𑀢𑀼𑀪𑀸𑀢𑀸, 𑀧𑀺𑀢𑀼𑀪𑀕𑀺𑀦𑀻, 𑀧𑀺𑀢𑀼𑀧𑀼𑀢𑁆𑀢𑀸, 𑀧𑀺𑀢𑀼𑀥𑀻𑀢𑀭𑁄, 𑀢𑁂𑀲𑀫𑁆𑀧𑀺 𑀧𑀼𑀢𑁆𑀢𑀥𑀻𑀢𑀼𑀧𑀭𑀫𑁆𑀧𑀭𑀸𑀢𑀺 𑀏𑀯𑀫𑁆𑀧𑀺 𑀬𑀸𑀯 𑀲𑀢𑁆𑀢𑀫𑀸 𑀬𑀼𑀕𑀸, 𑀫𑀸𑀢𑀸, 𑀫𑀸𑀢𑀼𑀫𑀸𑀢𑀸, 𑀢𑀲𑁆𑀲𑀸 𑀫𑀸𑀢𑀸, 𑀢𑀲𑁆𑀲𑀸𑀧𑀺 𑀫𑀸𑀢𑀸𑀢𑀺 𑀏𑀯𑀁 𑀬𑀸𑀯 𑀲𑀢𑁆𑀢𑀫𑀸 𑀬𑀼𑀕𑀸, 𑀫𑀸𑀢𑀸, 𑀫𑀸𑀢𑀼𑀧𑀺𑀢𑀸, 𑀢𑀲𑁆𑀲 𑀧𑀺𑀢𑀸 𑀘 𑀫𑀸𑀢𑀸 𑀘 𑀪𑀸𑀢𑀸 𑀘 𑀪𑀕𑀺𑀦𑀻 𑀘 𑀧𑀼𑀢𑁆𑀢𑀸 𑀘 𑀥𑀻𑀢𑀭𑁄 𑀘𑀸𑀢𑀺 𑀏𑀯𑀫𑁆𑀧𑀺 𑀉𑀤𑁆𑀥𑀜𑁆𑀘 𑀅𑀥𑁄 𑀘 𑀬𑀸𑀯 𑀲𑀢𑁆𑀢𑀫𑀸 𑀬𑀼𑀕𑀸, 𑀫𑀸𑀢𑀸, 𑀫𑀸𑀢𑀼𑀪𑀸𑀢𑀸, 𑀫𑀸𑀢𑀼𑀪𑀕𑀺𑀦𑀻, 𑀫𑀸𑀢𑀼𑀧𑀼𑀢𑁆𑀢𑀸, 𑀫𑀸𑀢𑀼𑀥𑀻𑀢𑀭𑁄, 𑀢𑁂𑀲𑀫𑁆𑀧𑀺 𑀧𑀼𑀢𑁆𑀢𑀥𑀻𑀢𑀼𑀧𑀭𑀫𑁆𑀧𑀭𑀸𑀢𑀺 𑀏𑀯𑀫𑁆𑀧𑀺 𑀬𑀸𑀯 𑀲𑀢𑁆𑀢𑀫𑀸 𑀬𑀼𑀕𑀸, 𑀢𑀸𑀯 𑀦𑁂𑀯 𑀫𑀸𑀢𑀼𑀲𑀫𑁆𑀩𑀦𑁆𑀥𑁂𑀦, 𑀦 𑀧𑀺𑀢𑀼𑀲𑀫𑁆𑀩𑀦𑁆𑀥𑁂𑀦 𑀬𑀸 𑀲𑀫𑁆𑀩𑀤𑁆𑀥𑀸, 𑀲𑀸 ‘‘𑀅𑀜𑁆𑀜𑀸𑀢𑀺𑀓𑀸 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀸𑀓𑀺𑀬𑀸𑀦𑀺𑀬𑁄 𑀯𑀺𑀬𑀸𑀢𑀺 𑀧𑀜𑁆𑀘𑀲𑀢𑀫𑀢𑁆𑀢𑀸 𑀲𑀸𑀓𑀺𑀬𑀸𑀦𑀺𑀬𑁄 𑀯𑀺𑀬. 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁, 𑀢𑀲𑁆𑀫𑀸 𑀪𑀺𑀓𑁆𑀔𑀼𑀪𑀸𑀯𑁂 𑀞𑀢𑁆𑀯𑀸 𑀧𑀭𑀺𑀯𑀢𑁆𑀢𑀮𑀺𑀗𑁆𑀕𑀸 𑀪𑀺𑀓𑁆𑀔𑀼𑀦𑀺𑀬𑁄𑀧𑀺 𑀇𑀥 𑀲𑀼𑀤𑁆𑀥𑀪𑀺𑀓𑁆𑀔𑀼𑀲𑀗𑁆𑀖𑁂 ‘‘𑀉𑀧𑀲𑀫𑁆𑀧𑀦𑁆𑀦𑀸’’ 𑀇𑀘𑁆𑀘𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀉𑀪𑀢𑁄𑀲𑀗𑁆𑀖𑁂 𑀯𑀸𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦, 𑀪𑀺𑀓𑁆𑀔𑀼𑀲𑀗𑁆𑀖𑁂 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦𑀸𑀢𑀺 𑀏𑀯𑀁 𑀉𑀪𑀢𑁄𑀲𑀗𑁆𑀖𑁂 𑀯𑀸. 𑀧𑀼𑀭𑀸𑀡𑀘𑀻𑀯𑀭𑀦𑁆𑀢𑀺 𑀏𑀢𑁆𑀣 𑀘𑀻𑀯𑀭𑀦𑁆𑀢𑀺 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀼𑀧𑀕𑀫𑁂𑀯 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀭𑀚𑀺𑀢𑁆𑀯𑀸’’𑀢𑀺𑀆𑀤𑀺. 𑀓𑀧𑁆𑀧𑀁 𑀓𑀢𑁆𑀯𑀸𑀢𑀺 𑀓𑀧𑁆𑀧𑀩𑀺𑀦𑁆𑀤𑀼𑀁 𑀤𑀢𑁆𑀯𑀸. ‘‘𑀇𑀫𑀺𑀦𑀸 𑀅𑀤𑀺𑀦𑁆𑀦𑀓𑀧𑁆𑀧𑀁 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀼 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀻’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁫𑁦𑁫) 𑀯𑀤𑀦𑁆𑀢𑀺. 𑀧𑀭𑀺𑀪𑁄𑀕𑀲𑀻𑀲𑁂𑀦𑀸𑀢𑀺 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀧𑀭𑀺𑀪𑁄𑀕𑀲𑀻𑀲𑁂𑀦. 𑀅𑀁𑀲𑁂𑀢𑀺 𑀚𑀢𑁆𑀢𑀼𑀫𑁆𑀳𑀺. 𑀫𑀢𑁆𑀣𑀓𑁂𑀢𑀺 𑀲𑀻𑀲𑀫𑀢𑁆𑀣𑀓𑁂. 𑀲𑀘𑁂 𑀧𑀦 𑀧𑀘𑁆𑀘𑀢𑁆𑀣𑀭𑀡𑀲𑁆𑀲 𑀳𑁂𑀝𑁆𑀞𑀸 𑀓𑀢𑁆𑀯𑀸 𑀦𑀺𑀧𑀚𑁆𑀚𑀢𑀺, 𑀳𑀢𑁆𑀣𑁂𑀳𑀺 𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀆𑀓𑀸𑀲𑁂 𑀯𑀺𑀢𑀸𑀦𑀁 𑀓𑀢𑁆𑀯𑀸 𑀲𑀻𑀲𑁂𑀦 𑀅𑀲𑀫𑁆𑀨𑀼𑀲𑀦𑁆𑀢𑁄 𑀕𑀘𑁆𑀙𑀢𑀺, 𑀅𑀬𑀁 𑀧𑀭𑀺𑀪𑁄𑀕𑁄 𑀦𑀸𑀫 𑀦 𑀳𑁄𑀢𑀺.

𑀓𑀸𑀬𑀯𑀺𑀓𑀸𑀭𑀁 𑀯𑀸 𑀓𑀭𑁄𑀢𑀻𑀢𑀺 𑀬𑀣𑀸 𑀲𑀸 ‘‘𑀥𑁄𑀯𑀸𑀧𑁂𑀢𑀼𑀓𑀸𑀫𑁄 𑀅𑀬’’𑀦𑁆𑀢𑀺 𑀚𑀸𑀦𑀸𑀢𑀺, 𑀏𑀯𑀁 𑀓𑀸𑀬𑀯𑀺𑀓𑀸𑀭𑀁 𑀓𑀭𑁄𑀢𑀺. ‘‘𑀅𑀦𑁆𑀢𑁄𑀤𑁆𑀯𑀸𑀤𑀲𑀳𑀢𑁆𑀣𑁂 𑀑𑀓𑀸𑀲𑁂 𑀞𑀢𑁆𑀯𑀸 𑀉𑀧𑀭𑀺 𑀯𑀸 𑀔𑀺𑀧𑀢𑀻’’𑀢𑀺 𑀇𑀫𑀺𑀦𑀸 𑀉𑀧𑀘𑀸𑀭𑀁 𑀫𑀼𑀜𑁆𑀘𑀺𑀢𑁆𑀯𑀸 𑀑𑀭𑀢𑁄 𑀔𑀺𑀧𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀜𑁆𑀜𑀲𑁆𑀲 𑀯𑀸 𑀳𑀢𑁆𑀣𑁂 𑀧𑁂𑀲𑁂𑀢𑀻𑀢𑀺 𑀅𑀦𑁆𑀢𑁄𑀤𑁆𑀯𑀸𑀤𑀲𑀳𑀢𑁆𑀣𑁂 𑀑𑀓𑀸𑀲𑁂 𑀞𑀢𑁆𑀯𑀸 𑀲𑀺𑀓𑁆𑀔𑀫𑀸𑀦𑀲𑀸𑀫𑀡𑁂𑀭𑀲𑀸𑀫𑀡𑁂𑀭𑀺𑀉𑀧𑀸𑀲𑀓𑀇𑀢𑁆𑀣𑀺𑀬𑀸𑀤𑀻𑀲𑀼 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀜𑁆𑀜𑀲𑁆𑀲 𑀳𑀢𑁆𑀣𑁂 𑀯𑀸 𑀧𑁂𑀲𑁂𑀢𑀺. 𑀲𑁄𑀢𑀺 𑀉𑀧𑀸𑀲𑀓𑁄 𑀘 𑀲𑀸𑀫𑀡𑁂𑀭𑁄 𑀘. 𑀉𑀧𑀲𑀫𑁆𑀧𑀚𑁆𑀚𑀺𑀢𑁆𑀯𑀸 𑀥𑁄𑀯𑀢𑀻𑀢𑀺 𑀏𑀢𑁆𑀣 𑀉𑀧𑀸𑀲𑀓𑁄 𑀮𑀺𑀗𑁆𑀕𑁂 𑀧𑀭𑀺𑀯𑀢𑁆𑀢𑁂 𑀪𑀺𑀓𑁆𑀔𑀼𑀦𑀻𑀲𑀼 𑀧𑀩𑁆𑀩𑀚𑀺𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚𑀺𑀢𑁆𑀯𑀸 𑀥𑁄𑀯𑀢𑀺, 𑀲𑀸𑀫𑀡𑁂𑀭𑁄 𑀮𑀺𑀗𑁆𑀕𑁂 𑀧𑀭𑀺𑀯𑀢𑁆𑀢𑁂 𑀪𑀺𑀓𑁆𑀔𑀼𑀦𑀻𑀲𑀼 𑀉𑀧𑀲𑀫𑁆𑀧𑀚𑁆𑀚𑀺𑀢𑁆𑀯𑀸 𑀥𑁄𑀯𑀢𑀻𑀢𑀺 𑀬𑀣𑀸𑀬𑁄𑀕𑀁 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀲𑀘𑁂 𑀧𑀦 𑀪𑀺𑀓𑁆𑀔𑀼𑀦𑀺𑀬𑀸 𑀳𑀢𑁆𑀣𑁂 𑀤𑀺𑀦𑁆𑀦𑀁 𑀳𑁄𑀢𑀺, 𑀲𑀘𑁂 𑀮𑀺𑀗𑁆𑀕𑁂 𑀧𑀭𑀺𑀯𑀢𑁆𑀢𑁂 𑀥𑁄𑀯𑀢𑀺, 𑀯𑀝𑁆𑀝𑀢𑀺.

𑀏𑀢𑁆𑀣 𑀘 𑀏𑀓𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀦𑀺𑀲𑁆𑀲𑀚𑁆𑀚𑀦𑀸𑀪𑀸𑀯𑀢𑁄 𑀢𑀻𑀡𑀺𑀧𑀺 𑀓𑀸𑀭𑁂𑀦𑁆𑀢𑀲𑁆𑀲 𑀏𑀓𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀤𑁆𑀯𑀻𑀳𑀺 𑀤𑁆𑀯𑁂 𑀤𑀼𑀓𑁆𑀓𑀝𑀸𑀦𑀺. 𑀤𑁆𑀯𑁂 𑀓𑀸𑀭𑁂𑀦𑁆𑀢𑀲𑁆𑀲 𑀏𑀓𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀤𑀼𑀢𑀺𑀬𑁂𑀦 𑀤𑀼𑀓𑁆𑀓𑀝𑀁. 𑀢𑁂𑀦𑀸𑀳 ‘‘𑀥𑁄𑀯𑀦𑀸𑀤𑀻𑀦𑀺 𑀢𑀻𑀡𑀻’’𑀢𑀺𑀆𑀤𑀺. ‘‘𑀏𑀓𑁂𑀦 𑀯𑀢𑁆𑀣𑀼𑀦𑀸’’𑀢𑀺 𑀧𑀞𑀫𑀁 𑀓𑀢𑁆𑀯𑀸 𑀦𑀺𑀝𑁆𑀞𑀸𑀧𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀘𑁂 𑀧𑀦 ‘‘𑀇𑀫𑀁 𑀘𑀻𑀯𑀭𑀁 𑀭𑀚𑀺𑀢𑁆𑀯𑀸 𑀥𑁄𑀯𑀺𑀢𑁆𑀯𑀸 𑀆𑀦𑁂𑀳𑀻’’𑀢𑀺 𑀯𑀼𑀢𑁆𑀢𑁂 𑀲𑀸 𑀪𑀺𑀓𑁆𑀔𑀼𑀦𑀻 𑀧𑀞𑀫𑀁 𑀥𑁄𑀯𑀺𑀢𑁆𑀯𑀸 𑀧𑀘𑁆𑀙𑀸 𑀭𑀚𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀤𑀼𑀓𑁆𑀓𑀝𑀫𑁂𑀯, 𑀏𑀯𑀁 𑀲𑀩𑁆𑀩𑁂𑀲𑀼 𑀯𑀺𑀧𑀭𑀻𑀢𑀯𑀘𑀦𑁂𑀲𑀼 𑀦𑀬𑁄 𑀦𑁂𑀢𑀩𑁆𑀩𑁄. 𑀲𑀘𑁂 𑀧𑀦 ‘‘𑀥𑁄𑀯𑀺𑀢𑁆𑀯𑀸 𑀆𑀦𑁂𑀳𑀻’’𑀢𑀺 𑀯𑀼𑀢𑁆𑀢𑀸 𑀥𑁄𑀯𑀢𑀺 𑀘𑁂𑀯 𑀭𑀚𑀢𑀺 𑀘, 𑀥𑁄𑀯𑀸𑀧𑀦𑀧𑀘𑁆𑀘𑀬𑀸 𑀏𑀯 𑀆𑀧𑀢𑁆𑀢𑀺, 𑀭𑀚𑀦𑁂 𑀅𑀦𑀸𑀧𑀢𑁆𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣. 𑀢𑁂𑀦𑀸𑀳 ‘‘𑀲𑀘𑁂 𑀧𑀦‘𑀥𑁄𑀯𑀸’𑀢𑀺 𑀯𑀼𑀢𑁆𑀢𑀸’’𑀢𑀺𑀆𑀤𑀺. 𑀪𑀺𑀓𑁆𑀔𑀽𑀦𑀁 𑀯𑀲𑁂𑀦 𑀏𑀓𑀢𑁄 𑀉𑀧𑀲𑀫𑁆𑀧𑀦𑁆𑀦𑀸𑀬 𑀥𑁄𑀯𑀸𑀧𑁂𑀦𑁆𑀢𑀲𑁆𑀲 𑀬𑀣𑀸𑀯𑀢𑁆𑀣𑀼𑀓𑀫𑁂𑀯𑀸𑀢𑀺 𑀆𑀳 ‘‘𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀯𑀲𑁂𑀦𑀸’’𑀢𑀺𑀆𑀤𑀺.

𑀅𑀜𑁆𑀜𑀲𑁆𑀲 𑀯𑀸 𑀲𑀦𑁆𑀢𑀓𑀦𑁆𑀢𑀺 𑀅𑀜𑁆𑀜𑀲𑁆𑀲 𑀲𑀦𑁆𑀢𑀓𑀁 𑀧𑀼𑀭𑀸𑀡𑀘𑀻𑀯𑀭𑀁 𑀥𑁄𑀯𑀸𑀧𑁂𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀦𑀺𑀲𑀻𑀤𑀦𑀧𑀘𑁆𑀘𑀢𑁆𑀣𑀭𑀡𑀦𑁆𑀢𑀺 𑀅𑀜𑁆𑀜𑀲𑁆𑀲 𑀯𑀸 𑀅𑀢𑁆𑀢𑀦𑁄 𑀯𑀸 𑀲𑀦𑁆𑀢𑀓𑀁 𑀦𑀺𑀲𑀻𑀤𑀦𑀜𑁆𑀘𑁂𑀯 𑀧𑀘𑁆𑀘𑀢𑁆𑀣𑀭𑀡𑀜𑁆𑀘. 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀼𑀧𑀕𑀲𑁆𑀲𑁂𑀯 𑀘 𑀇𑀥 ‘‘𑀧𑀼𑀭𑀸𑀡𑀘𑀻𑀯𑀭’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀫𑁆𑀧𑀺 𑀦𑀺𑀲𑀻𑀤𑀦𑀧𑀘𑁆𑀘𑀢𑁆𑀣𑀭𑀡𑀁 𑀥𑁄𑀯𑀸𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯 𑀳𑁄𑀢𑀺, 𑀦 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀅𑀯𑀼𑀢𑁆𑀢𑀸 𑀯𑀸 𑀥𑁄𑀯𑀢𑀻𑀢𑀺 𑀉𑀤𑁆𑀤𑁂𑀲𑀸𑀬 𑀯𑀸 𑀑𑀯𑀸𑀤𑀸𑀬 𑀯𑀸 𑀆𑀕𑀢𑀸 𑀓𑀺𑀮𑀺𑀝𑁆𑀞𑀘𑀻𑀯𑀭𑀁 𑀤𑀺𑀲𑁆𑀯𑀸 𑀞𑀧𑀺𑀢𑀝𑁆𑀞𑀸𑀦𑀢𑁄 𑀯𑀸 𑀕𑀳𑁂𑀢𑁆𑀯𑀸, ‘‘𑀤𑁂𑀣 𑀅𑀬𑁆𑀬, 𑀥𑁄𑀯𑀺𑀲𑁆𑀲𑀸𑀫𑀻’’𑀢𑀺 𑀆𑀳𑀭𑀸𑀧𑁂𑀢𑁆𑀯𑀸 𑀯𑀸 𑀥𑁄𑀯𑀢𑀺 𑀘𑁂𑀯 𑀭𑀚𑀢𑀺 𑀘 𑀆𑀓𑁄𑀝𑁂𑀢𑀺 𑀘, 𑀅𑀬𑀁 𑀅𑀯𑀼𑀢𑁆𑀢𑀸 𑀥𑁄𑀯𑀢𑀺 𑀦𑀸𑀫. 𑀬𑀸𑀧𑀺 ‘‘𑀇𑀫𑀁 𑀘𑀻𑀯𑀭𑀁 𑀥𑁄𑀯𑀸’’𑀢𑀺 𑀤𑀳𑀭𑀁 𑀯𑀸 𑀲𑀸𑀫𑀡𑁂𑀭𑀁 𑀯𑀸 𑀆𑀡𑀸𑀧𑁂𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀆𑀳𑀭𑀣𑀬𑁆𑀬, 𑀅𑀳𑀁 𑀥𑁄𑀯𑀺𑀲𑁆𑀲𑀸𑀫𑀻’’𑀢𑀺 𑀥𑁄𑀯𑀢𑀺, 𑀢𑀸𑀯𑀓𑀸𑀮𑀺𑀓𑀁 𑀯𑀸 𑀕𑀳𑁂𑀢𑁆𑀯𑀸 𑀥𑁄𑀯𑀺𑀢𑁆𑀯𑀸 𑀭𑀚𑀺𑀢𑁆𑀯𑀸 𑀤𑁂𑀢𑀺, 𑀅𑀬𑀫𑁆𑀧𑀺 𑀅𑀯𑀼𑀢𑁆𑀢𑀸 𑀥𑁄𑀯𑀢𑀺 𑀦𑀸𑀫.

𑀅𑀜𑁆𑀜𑀁 𑀯𑀸 𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀉𑀧𑀸𑀳𑀦𑀢𑁆𑀣𑀯𑀺𑀓𑀧𑀢𑁆𑀢𑀢𑁆𑀣𑀯𑀺𑀓𑀅𑀁𑀲𑀩𑀤𑁆𑀥𑀓𑀓𑀸𑀬𑀩𑀦𑁆𑀥𑀦𑀫𑀜𑁆𑀘𑀧𑀻𑀞𑀢𑀝𑁆𑀝𑀺𑀓𑀸𑀤𑀺𑀁 𑀬𑀁 𑀓𑀺𑀜𑁆𑀘𑀺. ‘‘𑀉𑀧𑀘𑀸𑀭𑁂 𑀞𑀢𑁆𑀯𑀸’’𑀢𑀺 𑀯𑀘𑀦𑀢𑁄 𑀧𑁂𑀲𑀺𑀢𑁆𑀯𑀸 𑀥𑁄𑀯𑀦𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀉𑀧𑀘𑀸𑀭𑁂𑀢𑀺 𑀅𑀦𑁆𑀢𑁄𑀤𑁆𑀯𑀸𑀤𑀲𑀳𑀢𑁆𑀣𑁂 𑀑𑀓𑀸𑀲𑁂.

𑀧𑀼𑀭𑀸𑀡𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀘𑀻𑀯𑀭𑀧𑁆𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀙𑀦𑁆𑀦𑀦𑁆𑀢𑀺 𑀔𑁄𑀫𑀸𑀤𑀻𑀦𑀁 𑀙𑀦𑁆𑀦𑀁 𑀘𑀻𑀯𑀭𑀸𑀦𑀁 𑀫𑀚𑁆𑀛𑁂. 𑀉𑀧𑀘𑀸𑀭𑀁 𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀤𑁆𑀯𑀸𑀤𑀲𑀳𑀢𑁆𑀣𑀽𑀧𑀘𑀸𑀭𑀁 𑀫𑀼𑀜𑁆𑀘𑀺𑀢𑁆𑀯𑀸. 𑀧𑀺-𑀲𑀤𑁆𑀤𑁂𑀦 𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑀲𑁆𑀲 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀘𑀻𑀯𑀭𑀸𑀦𑀺 𑀘 𑀦𑀸𑀦𑀸𑀯𑀺𑀭𑀸𑀕𑀯𑀢𑁆𑀣𑀸𑀦𑀺 𑀘 𑀆𑀳𑀭𑀺𑀢𑁆𑀯𑀸 𑀧𑀸𑀤𑀫𑀽𑀮𑁂 𑀞𑀧𑁂𑀦𑁆𑀢𑀺, 𑀉𑀧𑀘𑀸𑀭𑁂 𑀯𑀸 𑀞𑀢𑁆𑀯𑀸 𑀉𑀧𑀭𑀺 𑀔𑀺𑀧𑀦𑁆𑀢𑀺, ‘‘𑀲𑀘𑁂 𑀲𑀸𑀤𑀺𑀬𑀢𑀺, 𑀧𑀝𑀺𑀕𑁆𑀕𑀳𑀺𑀢𑀫𑁂𑀯𑀸’’𑀢𑀺 𑀏𑀢𑁆𑀣 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀔𑀺𑀧𑀢𑀽𑀢𑀺 𑀤𑀺𑀯𑀸 𑀯𑀸 𑀭𑀢𑁆𑀢𑀺𑀪𑀸𑀕𑁂 𑀯𑀸 𑀔𑀺𑀧𑀢𑀼. 𑀧𑀝𑀺𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀻𑀢𑀺 𑀓𑀺𑀜𑁆𑀘𑀸𑀧𑀺 ‘‘𑀇𑀤𑀁 𑀪𑀺𑀓𑁆𑀔𑀼𑀦𑀺𑀬𑀸, 𑀇𑀤𑀁 𑀅𑀜𑁆𑀜𑁂𑀲’’𑀦𑁆𑀢𑀺 𑀜𑀸𑀢𑀼𑀁 𑀦 𑀲𑀓𑁆𑀓𑀸, 𑀢𑀣𑀸𑀧𑀺 𑀅𑀘𑀺𑀢𑁆𑀢𑀓𑀪𑀸𑀯𑁂𑀦 𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀦 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲𑀸𑀢𑀺 𑀲𑀺𑀓𑁆𑀔𑀫𑀸𑀦𑀲𑀸𑀫𑀡𑁂𑀭𑀲𑀸𑀫𑀡𑁂𑀭𑀺𑀉𑀧𑀸𑀲𑀓𑀉𑀧𑀸𑀲𑀺𑀓𑀸𑀤𑀻𑀲𑀼 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲. 𑀞𑀧𑀺𑀢𑀦𑁆𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀞𑀧𑀺𑀢𑀁. 𑀧𑀁𑀲𑀼𑀓𑀽𑀮𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸𑀢𑀺 ‘‘𑀅𑀲𑁆𑀲𑀸𑀫𑀺𑀓𑀁 𑀇𑀤’’𑀦𑁆𑀢𑀺 𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀅𑀲𑁆𑀲𑀸𑀫𑀺𑀓𑀜𑁆𑀳𑀺 ‘‘𑀧𑀁𑀲𑀼𑀓𑀽𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀺𑀦𑀸 ‘‘𑀅𑀫𑁆𑀳𑀸𑀓𑀫𑀢𑁆𑀣𑀸𑀬 𑀞𑀧𑀺𑀢’’𑀦𑁆𑀢𑀺𑀆𑀤𑀺𑀓𑀸𑀬 𑀲𑀜𑁆𑀜𑀸𑀬 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀜𑁆𑀜𑀢𑁆𑀭 𑀧𑀸𑀭𑀺𑀯𑀢𑁆𑀢𑀓𑀸𑀢𑀺 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀁 𑀧𑀭𑀺𑀯𑀢𑁆𑀢𑀁, 𑀧𑀭𑀺𑀯𑀢𑁆𑀢𑀫𑁂𑀯 𑀧𑀸𑀭𑀺𑀯𑀢𑁆𑀢𑀓𑀁, 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀤𑀺𑀬𑁆𑀬𑀫𑀸𑀦𑀁, 𑀢𑀁 𑀯𑀺𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀬𑀁 𑀅𑀦𑁆𑀢𑀫𑀲𑁄 𑀳𑀭𑀻𑀝𑀓𑀓𑁆𑀔𑀡𑁆𑀟𑀫𑁆𑀧𑀻’’𑀢𑀺𑀆𑀤𑀺. 𑀆𑀪𑁄𑀕𑀁 𑀓𑀢𑁆𑀯𑀸𑀢𑀺 𑀘𑀺𑀢𑁆𑀢𑁂𑀦 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸. 𑀲𑀘𑁂 𑀪𑀺𑀓𑁆𑀔𑀼𑀦𑀻 𑀯𑀲𑁆𑀲𑀸𑀯𑀸𑀲𑀺𑀓𑀫𑁆𑀧𑀺 𑀤𑁂𑀢𑀺, 𑀢𑀫𑁆𑀧𑀺 𑀬𑀣𑀸𑀯𑀼𑀢𑁆𑀢𑀯𑀺𑀥𑀸𑀦𑀁 𑀅𑀓𑀢𑁆𑀯𑀸 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀝𑀺𑀮𑀸𑀪𑁂𑀦𑀸𑀢𑀺 𑀕𑀳𑀡𑁂𑀦. 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀢𑀻𑀡𑀺 𑀧𑀭𑀺𑀫𑀸𑀡𑀸𑀦𑀺 𑀅𑀲𑁆𑀲𑀸𑀢𑀺 𑀢𑀺𑀓𑀁,𑀢𑀺𑀓𑀜𑁆𑀘 𑀢𑀁 𑀧𑀸𑀘𑀺𑀢𑁆𑀢𑀺𑀬𑀜𑁆𑀘𑀸𑀢𑀺 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀅𑀜𑁆𑀜𑀸𑀢𑀺𑀓𑀸𑀬 𑀜𑀸𑀢𑀺𑀓𑀲𑀜𑁆𑀜𑀺𑀯𑁂𑀫𑀢𑀺𑀓𑀅𑀜𑁆𑀜𑀸𑀢𑀺𑀓𑀲𑀜𑁆𑀜𑀻𑀦𑀁 𑀯𑀲𑁂𑀦 𑀢𑀻𑀡𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀻𑀢𑀺 𑀅𑀢𑁆𑀣𑁄. 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸𑀬𑀸𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀦𑁆𑀦𑀸𑀬. 𑀢𑀸𑀬 𑀳𑀺 𑀳𑀢𑁆𑀣𑀢𑁄 𑀅𑀜𑁆𑀜𑀢𑁆𑀭 𑀧𑀸𑀭𑀺𑀯𑀢𑁆𑀢𑀓𑀸 𑀘𑀻𑀯𑀭𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁, 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀦𑁆𑀦𑀸𑀬 𑀧𑀦 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. ‘‘𑀧𑀢𑁆𑀢𑀢𑁆𑀣𑀯𑀺𑀓𑀸𑀤𑀺𑀫𑁆𑀳𑀺 𑀘 𑀅𑀦𑀥𑀺𑀝𑁆𑀞𑀸𑀢𑀩𑁆𑀩𑀧𑀭𑀺𑀓𑁆𑀔𑀸𑀭𑁂’’𑀢𑀺 𑀇𑀫𑀺𑀦𑀸 𑀪𑀺𑀲𑀺𑀘𑁆𑀙𑀯𑀺𑀫𑁆𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀸 𑀳𑀺 𑀫𑀳𑀦𑁆𑀢𑀸𑀧𑀺 𑀲𑁂𑀦𑀸𑀲𑀦𑀲𑀗𑁆𑀕𑀳𑀺𑀢𑀢𑁆𑀢𑀸 𑀘𑀻𑀯𑀭𑀲𑀗𑁆𑀔𑀁 𑀦 𑀕𑀘𑁆𑀙𑀢𑀻𑀢𑀺 𑀦𑁂𑀯 𑀅𑀥𑀺𑀝𑁆𑀞𑀸𑀦𑀼𑀧𑀕𑀸, 𑀦 𑀯𑀺𑀓𑀧𑁆𑀧𑀦𑀼𑀧𑀕𑀸 𑀘. 𑀯𑀼𑀢𑁆𑀢𑀜𑁆𑀳𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 ‘‘𑀲𑀘𑁂𑀧𑀺 𑀫𑀜𑁆𑀘𑀧𑁆𑀧𑀫𑀸𑀡𑀸 𑀪𑀺𑀲𑀺𑀘𑁆𑀙𑀯𑀺 𑀳𑁄𑀢𑀺, 𑀯𑀝𑁆𑀝𑀢𑀺𑀬𑁂𑀯𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁧𑁪). ‘‘𑀳𑀢𑁆𑀣𑀢𑁄 𑀘𑀻𑀯𑀭𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺 𑀯𑀘𑀦𑀢𑁄 𑀧𑀦 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀧𑁂𑀲𑀺𑀢𑀕𑁆𑀕𑀳𑀡𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀧𑀝𑀺𑀕𑁆𑀕𑀳𑀡𑀢𑁄, 𑀧𑀭𑀺𑀯𑀢𑁆𑀢𑀦𑀸𑀓𑀭𑀡𑀢𑁄 𑀘 𑀓𑀺𑀭𑀺𑀬𑀸𑀓𑀺𑀭𑀺𑀬𑀁.

𑀘𑀻𑀯𑀭𑀧𑁆𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀕𑁂𑀳𑀲𑁆𑀲 𑀧𑀢𑀺 𑀚𑁂𑀝𑁆𑀞𑁄𑀢𑀺 𑀕𑀳𑀧𑀢𑀺, 𑀢𑀁 𑀕𑀳𑀧𑀢𑀺𑀁, 𑀇𑀥 𑀧𑀦 𑀅𑀧𑀩𑁆𑀩𑀚𑀺𑀢𑁄 𑀬𑁄 𑀓𑁄𑀘𑀺 𑀫𑀦𑀼𑀲𑁆𑀲𑁄 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀦𑀸𑀳 ‘‘𑀪𑀺𑀓𑁆𑀔𑀽𑀲𑀼 𑀅𑀧𑀩𑁆𑀩𑀚𑀺𑀢𑀫𑀦𑀼𑀲𑁆𑀲’’𑀦𑁆𑀢𑀺. 𑀏𑀲𑁂𑀯 𑀦𑀬𑁄 𑀕𑀳𑀧𑀢𑀸𑀦𑀺𑀦𑁆𑀢𑀺 𑀏𑀢𑁆𑀣𑀸𑀧𑀺. ‘‘𑀯𑀺𑀜𑁆𑀜𑀸𑀧𑁂𑀬𑁆𑀬𑀸’’𑀢𑀺 𑀇𑀤𑀁 𑀲𑀼𑀤𑁆𑀥𑀓𑀢𑁆𑀢𑀼𑀅𑀢𑁆𑀣𑁂 𑀘 𑀳𑁂𑀢𑀼𑀓𑀢𑁆𑀢𑀼𑀅𑀢𑁆𑀣𑁂 𑀘 𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀬𑀸𑀘𑁂𑀬𑁆𑀬 𑀯𑀸 𑀬𑀸𑀘𑀸𑀧𑁂𑀬𑁆𑀬 𑀯𑀸’’𑀢𑀺. 𑀬𑀸𑀘𑀸𑀧𑀦𑀜𑁆𑀘𑁂𑀢𑁆𑀣 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀜𑁆𑀘 𑀧𑀦 𑀓𑀢𑁆𑀯𑀸 ‘‘𑀅𑀦𑀸𑀡𑀢𑁆𑀢𑀺𑀓’’𑀦𑁆𑀢𑀺 𑀇𑀤𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀅𑀜𑁆𑀜𑀢𑁆𑀭 𑀲𑀫𑀬𑀸𑀢𑀺 𑀲𑀫𑁂𑀢𑀺 𑀏𑀢𑁆𑀣, 𑀏𑀢𑁂𑀦 𑀯𑀸 𑀲𑀁𑀕𑀘𑁆𑀙𑀢𑀺 𑀲𑀢𑁆𑀢𑁄, 𑀲𑀪𑀸𑀯𑀥𑀫𑁆𑀫𑁄 𑀯𑀸 𑀲𑀳𑀚𑀸𑀢𑀸𑀤𑀻𑀳𑀺, 𑀉𑀧𑁆𑀧𑀸𑀤𑀸𑀤𑀻𑀳𑀺 𑀯𑀸𑀢𑀺 𑀲𑀫𑀬𑁄, 𑀓𑀸𑀮𑁄, 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀢𑀸𑀬 𑀅𑀢𑁆𑀣𑀢𑁄 𑀅𑀪𑀽𑀢𑁄𑀧𑀺 𑀳𑀺 𑀓𑀸𑀮𑁄 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸 𑀅𑀥𑀺𑀓𑀭𑀡𑀁, 𑀓𑀭𑀡𑀁 𑀯𑀺𑀬 𑀘 𑀓𑀧𑁆𑀧𑀦𑀸𑀫𑀢𑁆𑀢𑀲𑀺𑀤𑁆𑀥𑁂𑀦 𑀭𑀽𑀧𑁂𑀦 𑀯𑁄𑀳𑀭𑀻𑀬𑀢𑀺, 𑀢𑀁 𑀲𑀫𑀬𑀁 𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀬𑁄 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑁄 𑀯𑀸 𑀳𑁄𑀢𑀻’’𑀢𑀺𑀆𑀤𑀺. 𑀢𑀢𑁆𑀣 𑀭𑀸𑀚𑀸𑀤𑀻𑀲𑀼 𑀬𑁂𑀳𑀺 𑀓𑁂𑀳𑀺𑀘𑀺 𑀅𑀘𑁆𑀙𑀺𑀦𑁆𑀦𑀁 𑀘𑀻𑀯𑀭𑀁 𑀏𑀢𑀲𑁆𑀲𑀸𑀢𑀺 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑁄. 𑀬𑀣𑀸𑀳 ‘‘𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑁄 𑀦𑀸𑀫 𑀪𑀺𑀓𑁆𑀔𑀼𑀲𑁆𑀲 𑀘𑀻𑀯𑀭𑀁 𑀅𑀘𑁆𑀙𑀺𑀦𑁆𑀦𑀁 𑀳𑁄𑀢𑀺, 𑀭𑀸𑀚𑀽𑀳𑀺 𑀯𑀸 𑀘𑁄𑀭𑁂𑀳𑀺 𑀯𑀸 𑀥𑀼𑀢𑁆𑀢𑁂𑀳𑀺 𑀯𑀸 𑀬𑁂𑀳𑀺 𑀓𑁂𑀳𑀺𑀘𑀺 𑀯𑀸 𑀅𑀘𑁆𑀙𑀺𑀦𑁆𑀦𑀁 𑀳𑁄𑀢𑀻’’𑀢𑀺. 𑀅𑀕𑁆𑀕𑀺𑀆𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀦𑀝𑁆𑀞𑀁 𑀘𑀻𑀯𑀭𑀫𑁂𑀢𑀲𑁆𑀲𑀸𑀢𑀺 𑀦𑀝𑁆𑀞𑀘𑀻𑀯𑀭𑁄. 𑀬𑀣𑀸𑀳 ‘‘𑀦𑀝𑁆𑀞𑀘𑀻𑀯𑀭𑁄 𑀦𑀸𑀫 𑀪𑀺𑀓𑁆𑀔𑀼𑀲𑁆𑀲 𑀘𑀻𑀯𑀭𑀁 𑀅𑀕𑁆𑀕𑀺𑀦𑀸 𑀯𑀸 𑀤𑀟𑁆𑀠𑀁 𑀳𑁄𑀢𑀺, 𑀉𑀤𑀓𑁂𑀦 𑀯𑀸 𑀯𑀽𑀴𑁆𑀳𑀁 𑀳𑁄𑀢𑀺, 𑀉𑀦𑁆𑀤𑀽𑀭𑁂𑀳𑀺 𑀯𑀸 𑀉𑀧𑀘𑀺𑀓𑀸𑀳𑀺 𑀯𑀸 𑀔𑀸𑀬𑀺𑀢𑀁 𑀳𑁄𑀢𑀺, 𑀧𑀭𑀺𑀪𑁄𑀕𑀚𑀺𑀡𑁆𑀡𑀁 𑀯𑀸 𑀳𑁄𑀢𑀻’’𑀢𑀺 (𑀧𑀸𑀭𑀸. 𑁫𑁧𑁯). 𑀲𑀫𑀬𑀸𑀢𑀺 𑀅𑀜𑁆𑀜𑀢𑁆𑀭𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀉𑀧𑀬𑁄𑀕𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀆𑀳 ‘‘𑀢𑀁 𑀲𑀫𑀬’’𑀦𑁆𑀢𑀺. 𑀅𑀜𑁆𑀜𑀲𑁆𑀫𑀺𑀦𑁆𑀢𑀺 𑀅𑀜𑁆𑀜𑀲𑁆𑀫𑀺𑀁 𑀲𑀫𑀬𑁂.

𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀜𑁆𑀜𑀸𑀢𑀓𑁂 𑀅𑀜𑁆𑀜𑀸𑀢𑀓𑀲𑀜𑁆𑀜𑀺𑀯𑁂𑀫𑀢𑀺𑀓𑀜𑁆𑀜𑀸𑀢𑀓𑀲𑀜𑁆𑀜𑀻𑀦𑀁 𑀯𑀲𑁂𑀦 𑀢𑀻𑀡𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀲𑀫𑀬𑁂𑀢𑀺 𑀬𑀣𑀸𑀯𑀼𑀢𑁆𑀢𑁂 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀓𑀸𑀮𑁂 𑀘 𑀦𑀝𑁆𑀞𑀘𑀻𑀯𑀭𑀓𑀸𑀮𑁂 𑀘. 𑀜𑀸𑀢𑀓𑀧𑁆𑀧𑀯𑀸𑀭𑀺𑀢𑁂 𑀯𑀸 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲𑀸𑀢𑀺 𑀜𑀸𑀢𑀓𑁂, 𑀧𑀯𑀸𑀭𑀺𑀢𑁂 𑀘 ‘‘𑀢𑀼𑀫𑁆𑀳𑀸𑀓𑀁 𑀲𑀦𑁆𑀣𑀢𑀁 𑀤𑁂𑀣𑀸’’𑀢𑀺 𑀬𑀸𑀘𑀦𑁆𑀢𑀲𑁆𑀲. 𑀏𑀢𑁆𑀣 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁨𑁧) 𑀘 𑀲𑀗𑁆𑀖𑀯𑀲𑁂𑀦 𑀧𑀯𑀸𑀭𑀺𑀢𑁂 𑀧𑀫𑀸𑀡𑀫𑁂𑀯 𑀬𑀸𑀘𑀺𑀢𑀼𑀁 𑀯𑀝𑁆𑀝𑀢𑀺, 𑀧𑀼𑀕𑁆𑀕𑀮𑀺𑀓𑀯𑀲𑁂𑀦 𑀧𑀯𑀸𑀭𑀺𑀢𑁂 𑀧𑀦 𑀬𑀁 𑀬𑀁 𑀧𑀯𑀸𑀭𑁂𑀦𑁆𑀢𑀺, 𑀢𑀁 𑀢𑀫𑁂𑀯 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑀁. 𑀬𑁄 𑀳𑀺 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀧𑀯𑀸𑀭𑁂𑀢𑁆𑀯𑀸 𑀲𑀬𑀫𑁂𑀯 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀓𑀸𑀮𑀸𑀦𑀼𑀓𑀸𑀮𑀁 𑀘𑀻𑀯𑀭𑀸𑀤𑀻𑀦𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀺 𑀤𑁂𑀢𑀺, 𑀏𑀯𑀁 𑀬𑁂𑀦 𑀬𑁂𑀦 𑀅𑀢𑁆𑀣𑁄, 𑀢𑀁 𑀢𑀁 𑀤𑁂𑀢𑀺, 𑀢𑀲𑁆𑀲 𑀯𑀺𑀜𑁆𑀜𑀸𑀧𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀬𑁄 𑀧𑀦 𑀧𑀯𑀸𑀭𑁂𑀢𑁆𑀯𑀸 𑀩𑀸𑀮𑀢𑀸𑀬 𑀯𑀸 𑀲𑀢𑀺𑀲𑀫𑁆𑀫𑁄𑀲𑁂𑀦 𑀯𑀸 𑀦 𑀤𑁂𑀢𑀺, 𑀲𑁄 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑁄. 𑀬𑁄 ‘‘𑀫𑀬𑁆𑀳𑀁 𑀕𑁂𑀳𑀁 𑀧𑀯𑀸𑀭𑁂𑀫𑀻’’𑀢𑀺 𑀯𑀤𑀢𑀺, 𑀢𑀲𑁆𑀲 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀬𑀣𑀸𑀲𑀼𑀔𑀁 𑀦𑀺𑀲𑀻𑀤𑀺𑀢𑀩𑁆𑀩𑀁 𑀦𑀺𑀧𑀚𑁆𑀚𑀺𑀢𑀩𑁆𑀩𑀁, 𑀦 𑀓𑀺𑀜𑁆𑀘𑀺 𑀕𑀳𑁂𑀢𑀩𑁆𑀩𑀁. 𑀬𑁄 𑀧𑀦 ‘‘𑀬𑀁 𑀫𑀬𑁆𑀳𑀁 𑀕𑁂𑀳𑁂 𑀅𑀢𑁆𑀣𑀺, 𑀢𑀁 𑀧𑀯𑀸𑀭𑁂𑀫𑀻’’𑀢𑀺 𑀯𑀤𑀢𑀺, 𑀬𑀁 𑀢𑀢𑁆𑀣 𑀓𑀧𑁆𑀧𑀺𑀬𑀁, 𑀢𑀁 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑀁. 𑀕𑁂𑀳𑁂 𑀧𑀦 𑀦𑀺𑀲𑀻𑀤𑀺𑀢𑀼𑀁 𑀯𑀸 𑀦𑀺𑀧𑀚𑁆𑀚𑀺𑀢𑀼𑀁 𑀯𑀸 𑀦 𑀮𑀩𑁆𑀪𑀢𑀺. 𑀢𑀲𑁆𑀲𑁂𑀯𑀢𑁆𑀣𑀸𑀬𑀸𑀢𑀺 ‘‘𑀅𑀜𑁆𑀜𑀲𑁆𑀲𑀸’’𑀢𑀺 𑀮𑀤𑁆𑀥𑀯𑁄𑀳𑀸𑀭𑀲𑁆𑀲 𑀢𑀲𑁆𑀲𑁂𑀯 𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲 𑀯𑀸 𑀥𑀫𑁆𑀫𑀭𑀓𑁆𑀔𑀺𑀢𑀲𑁆𑀲 𑀯𑀸 𑀅𑀢𑁆𑀣𑀸𑀬. 𑀅𑀢𑁆𑀢𑀦𑁄 𑀥𑀦𑁂𑀦 𑀕𑀡𑁆𑀳𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀢𑀦𑁄 𑀓𑀧𑁆𑀧𑀺𑀬𑀪𑀡𑁆𑀟𑁂𑀦 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦𑁂𑀯 𑀕𑀡𑁆𑀳𑀦𑁆𑀢𑀲𑁆𑀲 𑀘𑁂𑀢𑀸𑀧𑁂𑀦𑁆𑀢𑀲𑁆𑀲, 𑀧𑀭𑀺𑀯𑀢𑁆𑀢𑀸𑀧𑁂𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄.

𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀢𑀢𑀼𑀢𑁆𑀢𑀭𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀁-𑀲𑀤𑁆𑀤𑁄 𑀘𑁂𑀢𑁆𑀣 𑀧𑀓𑀢𑀢𑁆𑀣𑀯𑀘𑀦𑁄. 𑀘𑁂𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀘𑁂𑀢𑀺 𑀯𑀸 𑀬𑀤𑀻𑀢𑀺 𑀅𑀢𑁆𑀣𑁄, 𑀢𑀲𑁆𑀲 ‘‘𑀧𑀯𑀸𑀭𑁂𑀬𑁆𑀬𑀸’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀯𑀸𑀭𑁂𑀬𑁆𑀬 𑀘𑁂𑀢𑀺 𑀬𑀤𑀺 𑀧𑀯𑀸𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. ‘‘𑀅𑀪𑀻𑀢𑀺 𑀉𑀧𑀲𑀕𑁆𑀕𑁄’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁫𑁨𑁩-𑁫𑁨𑁪) 𑀇𑀫𑀺𑀦𑀸 𑀢𑀲𑁆𑀲 𑀅𑀢𑁆𑀣𑀯𑀺𑀲𑁂𑀲𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀳𑀭𑀺𑀢𑀼𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀧𑀯𑀸𑀭𑀲𑀤𑁆𑀤𑀲𑁆𑀲 𑀇𑀘𑁆𑀙𑀸𑀬𑀁 𑀯𑀢𑁆𑀢𑀫𑀸𑀦𑀢𑁆𑀢𑀸 ‘‘𑀇𑀘𑁆𑀙𑀸𑀧𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀁. 𑀇𑀘𑁆𑀙𑀁 𑀉𑀧𑁆𑀧𑀸𑀤𑁂𑀬𑁆𑀬𑀸𑀢𑀺 𑀧𑀘𑁆𑀘𑀬𑁂 𑀇𑀘𑁆𑀙𑀁 𑀉𑀧𑁆𑀧𑀸𑀤𑁂𑀬𑁆𑀬. 𑀉𑀧𑀦𑀺𑀫𑀦𑁆𑀢𑀦𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂𑀦𑀸𑀳 ‘‘𑀬𑀸𑀯𑀢𑁆𑀢𑀓’’𑀦𑁆𑀢𑀺𑀆𑀤𑀺. 𑀦𑁂𑀓𑁆𑀔𑀫𑁆𑀫𑀦𑁆𑀢𑀺 𑀧𑀩𑁆𑀩𑀚𑁆𑀚𑀁. 𑀤𑀝𑁆𑀞𑀽𑀢𑀺 𑀤𑀝𑁆𑀞𑀼𑀁. 𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑀢𑁆𑀣𑀜𑁆𑀳𑁂𑀢𑁆𑀣 𑀅𑀦𑀼𑀦𑀸𑀲𑀺𑀓𑀮𑁄𑀧𑁄. 𑀔𑁂𑀫𑀢𑁄𑀢𑀺 𑀦𑀺𑀩𑁆𑀪𑀬𑀢𑁄. 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀅𑀪𑀺𑀳𑀭𑀺𑀢𑁆𑀯𑀸 𑀦𑀺𑀫𑀦𑁆𑀢𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀣𑀸 𑀘 𑀓𑀸𑀬𑁂𑀦 𑀅𑀪𑀺𑀳𑀭𑁂𑀬𑁆𑀬, 𑀯𑀸𑀘𑀸𑀬 𑀘, 𑀢𑀁 𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀉𑀧𑀦𑁂𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁 𑀲𑀅𑀦𑁆𑀢𑀭𑀦𑁆𑀢𑀺 𑀅𑀦𑁆𑀢𑀭𑀯𑀸𑀲𑀓𑀲𑀳𑀺𑀢𑀁. 𑀉𑀢𑁆𑀢𑀭𑀦𑁆𑀢𑀺 𑀉𑀢𑁆𑀢𑀭𑀸𑀲𑀗𑁆𑀕𑀁. 𑀧𑀭𑀫𑀦𑁆𑀢𑀺 𑀅𑀯𑀲𑀸𑀦𑀁. 𑀅𑀲𑁆𑀲 𑀘𑀻𑀯𑀭𑀲𑁆𑀲𑀸𑀢𑀺 𑀅𑀲𑁆𑀲 𑀲𑀫𑀼𑀤𑀸𑀬𑀪𑀽𑀢𑀲𑁆𑀲 𑀳𑀭𑀺𑀢𑀩𑁆𑀩𑀲𑁆𑀲 𑀘𑀻𑀯𑀭𑀲𑁆𑀲. 𑀢𑀕𑁆𑀕𑀼𑀡𑀲𑀁𑀯𑀺𑀜𑁆𑀜𑀸𑀡𑁄 𑀳𑀺 𑀅𑀬𑀁 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑁄 𑀬𑀣𑀸 ‘‘𑀮𑀫𑁆𑀩𑀓𑀡𑁆𑀡𑁄’’𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 ‘‘𑀦𑀺𑀯𑀸𑀲𑀦𑁂𑀦𑀸’’𑀢𑀺𑀆𑀤𑀺. 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀳𑀺 𑀲𑀩𑁆𑀩𑁂 𑀢𑀁𑀧𑀭𑀫𑀁𑀬𑁂𑀯 𑀕𑀳𑁂𑀢𑀼𑀁 𑀮𑀪𑀦𑁆𑀢𑀺.

𑀬𑀲𑁆𑀫𑀸 𑀅𑀘𑁆𑀙𑀺𑀦𑁆𑀦𑀲𑀩𑁆𑀩𑀘𑀻𑀯𑀭𑁂𑀦 𑀢𑀺𑀘𑀻𑀯𑀭𑀫𑀢𑁆𑀢𑀓𑁂𑀦𑁂𑀯 𑀪𑀺𑀓𑁆𑀔𑀼𑀦𑀸 𑀏𑀯𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁, 𑀅𑀜𑁆𑀜𑁂𑀦 𑀧𑀦 𑀅𑀜𑁆𑀜𑀣𑀸𑀧𑀺, 𑀢𑀲𑁆𑀫𑀸 𑀢𑀁 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀥𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀲𑀸𑀢𑀺 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀦𑀬𑁂𑀦 𑀯𑀸 𑀧𑀭𑀺𑀓𑁆𑀔𑀸𑀭𑀘𑁄𑀴𑀯𑀲𑁂𑀦 𑀯𑀸 𑀬𑁂𑀦 𑀓𑁂𑀦𑀘𑀺 𑀅𑀥𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀲, 𑀇𑀤𑀜𑁆𑀘 𑀬𑁂𑀪𑀼𑀬𑁆𑀬𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀢𑁄 𑀯𑀼𑀢𑁆𑀢𑀁, 𑀦 𑀧𑀦 𑀅𑀦𑀥𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀲 𑀘𑀻𑀯𑀭𑁂 𑀅𑀘𑁆𑀙𑀺𑀦𑁆𑀦𑁂 𑀅𑀬𑀁 𑀯𑀺𑀥𑀺 𑀦 𑀲𑀫𑁆𑀪𑀯𑀢𑀻𑀢𑀺. 𑀬𑀲𑁆𑀲 𑀯𑀸 𑀢𑀺𑀘𑀻𑀯𑀭𑀢𑁄 𑀅𑀥𑀺𑀓𑀫𑁆𑀧𑀺 𑀘𑀻𑀯𑀭𑀁 𑀅𑀜𑁆𑀜𑀢𑁆𑀣 𑀅𑀢𑁆𑀣𑀺, 𑀢𑀢𑁆𑀣 𑀦𑀢𑁆𑀣𑀺, 𑀢𑁂𑀦𑀸𑀧𑀺 𑀢𑀤𑀸 𑀢𑀢𑁆𑀣 𑀅𑀪𑀸𑀯𑀢𑁄 𑀤𑁆𑀯𑁂 𑀲𑀸𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀧𑀓𑀢𑀺𑀬𑀸𑀯 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀘𑀭𑀢𑀻𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁫𑁨𑁩-𑁫𑁨𑁪) 𑀅𑀢𑁆𑀣𑀢𑀓𑀣𑀺𑀦𑀢𑁆𑀢𑀸 𑀯𑀸 𑀲𑀸𑀲𑀗𑁆𑀓𑀲𑀺𑀓𑁆𑀔𑀸𑀧𑀤𑀯𑀲𑁂𑀦 𑀯𑀸 𑀅𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺𑀯𑀲𑁂𑀦 𑀯𑀸 𑀢𑀢𑀺𑀬𑀲𑁆𑀲 𑀅𑀮𑀸𑀪𑁂𑀦 𑀯𑀸 𑀘𑀭𑀢𑀺. ‘‘𑀤𑁆𑀯𑁂 𑀦𑀝𑁆𑀞𑀸𑀦𑀻’’𑀢𑀺 𑀅𑀥𑀺𑀓𑀸𑀭𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀤𑁆𑀯𑁂 𑀲𑀸𑀤𑀺𑀢𑀩𑁆𑀩𑀸𑀦𑀻’’𑀢𑀺. 𑀏𑀓𑀁 𑀲𑀸𑀤𑀺𑀬𑀦𑁆𑀢𑁂𑀦𑁂𑀯 𑀲𑀫𑁄 𑀪𑀯𑀺𑀲𑁆𑀲𑀢𑀻𑀢𑀺 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀤𑁆𑀯𑀻𑀲𑀼 𑀦𑀝𑁆𑀞𑁂𑀦 𑀏𑀓𑀁 𑀲𑀸𑀤𑀺𑀬𑀦𑁆𑀢𑁂𑀦 𑀲𑀫𑁄 𑀪𑀯𑀺𑀲𑁆𑀲𑀢𑀺 𑀉𑀪𑀺𑀦𑁆𑀦𑀫𑁆𑀧𑀺 𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀢𑀸𑀬 𑀅𑀯𑀝𑁆𑀞𑀸𑀦𑀢𑁄. 𑀬𑀲𑁆𑀲 𑀏𑀓𑀁𑀬𑁂𑀯 𑀳𑁄𑀢𑀺 𑀅𑀜𑁆𑀜𑁂𑀦 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀯𑀺𑀦𑀝𑁆𑀞𑀲𑁂𑀲𑀘𑀻𑀯𑀭𑀢𑁆𑀢𑀸.

𑀧𑀜𑁆𑀘𑀲𑀼 𑀦𑀝𑁆𑀞𑁂𑀲𑀽𑀢𑀺 𑀢𑀺𑀘𑀻𑀯𑀭𑀁 𑀉𑀤𑀓𑀲𑀸𑀝𑀺𑀓𑀸 𑀲𑀁𑀓𑀘𑁆𑀘𑀺𑀓𑀸𑀢𑀺 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀘𑀻𑀯𑀭𑁂𑀲𑀼 𑀦𑀝𑁆𑀞𑁂𑀲𑀼. ‘‘𑀏𑀓𑀲𑁆𑀫𑀺𑀁 𑀯𑀸 𑀦𑀝𑁆𑀞𑁂’’𑀢𑀺 𑀯𑀘𑀦𑀯𑀺𑀧𑀭𑀺𑀡𑀸𑀫𑀁 𑀓𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁄 𑀉𑀢𑁆𑀢𑀭𑀻𑀢𑀺 𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀢𑁄 𑀉𑀢𑁆𑀢𑀭𑀺.

𑀲𑁂𑀲𑀓𑀁 𑀆𑀳𑀭𑀺𑀲𑁆𑀲𑀸𑀫𑀻𑀢𑀺 𑀤𑁆𑀯𑁂 𑀘𑀻𑀯𑀭𑀸𑀦𑀺 𑀓𑀢𑁆𑀯𑀸 ‘‘𑀲𑁂𑀲𑀓𑀁 𑀧𑀼𑀦 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀣𑁄. 𑀲𑁂𑀲𑀓𑀁 𑀢𑀼𑀬𑁆𑀳𑀁𑀬𑁂𑀯 𑀳𑁄𑀢𑀽𑀢𑀺 𑀯𑀼𑀢𑁆𑀢𑀲𑁆𑀲𑀸𑀢𑀺 𑀤𑀸𑀦𑀲𑀫𑀬𑁂 𑀏𑀯𑀁 𑀯𑀼𑀢𑁆𑀢𑀲𑁆𑀲. 𑀲𑀘𑁂 𑀧𑀦 ‘‘𑀲𑁂𑀲𑀓𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀕𑀳𑁂𑀢𑁆𑀯𑀸 𑀕𑀫𑀦𑀲𑀫𑀬𑁂𑀧𑀺 ‘‘𑀲𑁂𑀲𑀓𑀁 𑀢𑀼𑀬𑁆𑀳𑀁𑀬𑁂𑀯 𑀳𑁄𑀢𑀽’’𑀢𑀺 𑀯𑀤𑀦𑁆𑀢𑀺, 𑀮𑀤𑁆𑀥𑀓𑀧𑁆𑀧𑀺𑀬𑀫𑁂𑀯. 𑀦 𑀅𑀘𑁆𑀙𑀺𑀦𑁆𑀦𑀦𑀝𑁆𑀞𑀓𑀸𑀭𑀡𑀸 𑀤𑀺𑀦𑁆𑀦𑀦𑁆𑀢𑀺 𑀩𑀸𑀳𑀼𑀲𑀘𑁆𑀘𑀸𑀤𑀺𑀕𑀼𑀡𑀯𑀲𑁂𑀦 𑀤𑀺𑀦𑁆𑀦𑀁. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀜𑀸𑀢𑀓𑀧𑁆𑀧𑀯𑀸𑀭𑀺𑀢𑁂 𑀯𑀸 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲, 𑀲𑀫𑀬𑁂 𑀘 𑀅𑀜𑁆𑀜𑀲𑁆𑀲 𑀯𑀸 𑀜𑀸𑀢𑀓𑀧𑁆𑀧𑀯𑀸𑀭𑀺𑀢𑁂 𑀢𑀲𑁆𑀲𑁂𑀯𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲’’𑀢𑀺 𑀯𑀼𑀢𑁆𑀢𑀦𑀬𑁂𑀦.

𑀢𑀢𑀼𑀢𑁆𑀢𑀭𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀧𑀞𑀫𑀉𑀧𑀓𑁆𑀔𑀝𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀪𑀺𑀓𑁆𑀔𑀼𑀁 𑀧𑀦𑁂𑀯 𑀉𑀤𑁆𑀤𑀺𑀲𑁆𑀲𑀸𑀢𑀺 𑀏𑀢𑁆𑀣 𑀧𑀦𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀢𑀣𑀸 𑀏𑀯-𑀲𑀤𑁆𑀤𑁄𑀧𑀺. 𑀢𑁂𑀦𑀸𑀳 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲𑀸’’𑀢𑀺𑀆𑀤𑀺. 𑀅𑀧𑀤𑀺𑀲𑀺𑀢𑁆𑀯𑀸𑀢𑀺 𑀓𑀣𑁂𑀢𑁆𑀯𑀸, 𑀆𑀭𑀩𑁆𑀪𑀸𑀢𑀺 𑀯𑀸 𑀅𑀢𑁆𑀣𑁄. 𑀅𑀜𑁆𑀜𑀸𑀢𑀓𑀲𑁆𑀲 𑀕𑀳𑀧𑀢𑀺𑀲𑁆𑀲𑀸𑀢𑀺 𑀅𑀜𑁆𑀜𑀸𑀢𑀓𑀕𑀳𑀧𑀢𑀺𑀦𑀸𑀢𑀺 𑀅𑀢𑁆𑀣𑁄. 𑀓𑀭𑀡𑀢𑁆𑀣𑁂 𑀳𑀺 𑀇𑀤𑀁 𑀲𑀸𑀫𑀺𑀯𑀘𑀦𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀇𑀤𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀦 𑀯𑀺𑀘𑀸𑀭𑀺𑀢𑀁. 𑀘𑀻𑀯𑀭𑀁 𑀘𑁂𑀢𑀸𑀧𑁂𑀦𑁆𑀢𑀺 𑀧𑀭𑀺𑀯𑀢𑁆𑀢𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 (𑀲𑀸𑀭𑀢𑁆𑀣. 𑀝𑀻. 𑁨.𑁫𑁨𑁮-𑁫𑁨𑁯), 𑀘𑀻𑀯𑀭𑀫𑀽𑀮𑀁, 𑀦-𑀓𑀸𑀭𑁄 𑀧𑀦𑁂𑀢𑁆𑀣 𑀆𑀕𑀫𑁄, ‘‘𑀘𑀻𑀯𑀭𑀘𑁂𑀢𑀸𑀧𑀦’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺. 𑀢𑀁 𑀧𑀦 𑀬𑀲𑁆𑀫𑀸 𑀳𑀺𑀭𑀜𑁆𑀜𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀳𑀺𑀭𑀜𑁆𑀜𑀸𑀤𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺𑀭𑀜𑁆𑀜𑀦𑁆𑀢𑀺 𑀓𑀳𑀸𑀧𑀡𑁄 𑀯𑀼𑀘𑁆𑀘𑀢𑀺. 𑀆𑀤𑀺𑀲𑀤𑁆𑀤𑁂𑀦 𑀲𑀼𑀯𑀡𑁆𑀡𑀸𑀤𑀻𑀦𑀁 𑀕𑀳𑀡𑀁. 𑀉𑀧𑀓𑁆𑀔𑀝𑀦𑁆𑀢𑀺 𑀉𑀧𑀝𑁆𑀞𑀸𑀧𑀺𑀢𑀁. 𑀢𑀁 𑀉𑀧𑀓𑁆𑀔𑀭𑀡𑀁 𑀢𑁂𑀲𑀁 𑀢𑀣𑀸 𑀲𑀚𑁆𑀚𑀺𑀢𑀦𑁆𑀢𑀺 𑀆𑀳 ‘‘𑀉𑀧𑀓𑁆𑀔𑀝𑀁 𑀳𑁄𑀢𑀻𑀢𑀺 𑀲𑀚𑁆𑀚𑀺𑀢𑀁 𑀳𑁄𑀢𑀻’’𑀢𑀺. 𑀲𑀁𑀳𑀭𑀺𑀢𑁆𑀯𑀸 𑀞𑀧𑀺𑀢𑀦𑁆𑀢𑀺 𑀭𑀸𑀲𑀺𑀁 𑀓𑀢𑁆𑀯𑀸 𑀞𑀧𑀺𑀢𑀁. 𑀧𑀭𑀺𑀯𑀢𑁆𑀢𑀦𑀜𑁆𑀘 𑀅𑀓𑀢𑀲𑁆𑀲 𑀓𑀸𑀭𑀸𑀧𑀦𑀁, 𑀓𑀢𑀲𑁆𑀲 𑀓𑀺𑀡𑀦𑀦𑁆𑀢𑀺 𑀆𑀳 ‘‘𑀓𑀸𑀭𑁂𑀢𑁆𑀯𑀸 𑀯𑀸 𑀓𑀺𑀡𑀺𑀢𑁆𑀯𑀸 𑀯𑀸𑀢𑀺 𑀅𑀢𑁆𑀣𑁄’’𑀢𑀺. 𑀅𑀘𑁆𑀙𑀸𑀤𑁂𑀲𑁆𑀲𑀸𑀫𑀻𑀢𑀺 𑀧𑀸𑀭𑀼𑀧𑁂𑀲𑁆𑀲𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀯𑁄𑀳𑀸𑀭𑀯𑀘𑀦𑀫𑁂𑀢’’𑀦𑁆𑀢𑀺. 𑀯𑁄𑀳𑀸𑀭𑀯𑀘𑀦𑀦𑁆𑀢𑀺 𑀘 𑀉𑀧𑀘𑀸𑀭𑀯𑀘𑀦𑀦𑁆𑀢𑀺 𑀅𑀢𑁆𑀣𑁄.

‘‘𑀢𑀢𑁆𑀭 𑀘𑁂 𑀲𑁄 𑀪𑀺𑀓𑁆𑀔𑀽’’𑀢𑀺𑀆𑀤𑀻𑀲𑀼 𑀓𑁄 𑀧𑀤𑀲𑀫𑁆𑀩𑀦𑁆𑀥𑁄𑀢𑀺 𑀆𑀳 ‘‘𑀬𑀢𑁆𑀭 𑀲𑁄 𑀕𑀳𑀧𑀢𑀺 𑀯𑀸’’𑀢𑀺𑀆𑀤𑀺. 𑀧𑀼𑀩𑁆𑀩𑁂 𑀅𑀧𑁆𑀧𑀯𑀸𑀭𑀺𑀢𑁄𑀢𑀺 ‘‘𑀤𑀲𑁆𑀲𑀸𑀫𑀺, 𑀓𑀻𑀤𑀺𑀲𑁂𑀦 𑀢𑁂, 𑀪𑀦𑁆𑀢𑁂, 𑀘𑀻𑀯𑀭𑁂𑀦 𑀅𑀢𑁆𑀣𑁄, 𑀓𑀻𑀤𑀺𑀲𑀁 𑀢𑁂 𑀘𑀻𑀯𑀭𑀁 𑀘𑁂𑀢𑀸𑀧𑁂𑀫𑀻’’𑀢𑀺 𑀧𑀼𑀩𑁆𑀩𑁂 𑀅𑀯𑀼𑀢𑁆𑀢𑁄. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸𑀢𑀺 𑀕𑀦𑁆𑀢𑁆𑀯𑀸. 𑀧𑀤𑀪𑀸𑀚𑀦𑁂 𑀧𑀘𑀼𑀭𑀯𑁄𑀳𑀸𑀭𑀯𑀲𑁂𑀦 ‘‘𑀖𑀭𑀁 𑀕𑀦𑁆𑀢𑁆𑀯𑀸’’𑀢𑀺 (𑀧𑀸𑀭𑀸. 𑁫𑁨𑁯) 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀧𑀘𑀼𑀭𑀯𑁄𑀳𑀸𑀭𑀯𑀲𑁂𑀦𑀸𑀢𑀺 𑀬𑁂𑀪𑀼𑀬𑁆𑀬𑀯𑁄𑀳𑀸𑀭𑀯𑀲𑁂𑀦. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀖𑀭𑀲𑀸𑀫𑀺𑀓𑀁 𑀤𑀝𑁆𑀞𑀼𑀓𑀸𑀫𑀸 𑀢𑀲𑁆𑀲 𑀖𑀭𑀁 𑀕𑀘𑁆𑀙𑀦𑁆𑀢𑀻𑀢𑀺 𑀢𑀣𑁂𑀯 𑀩𑀳𑀼𑀮𑀯𑁄𑀳𑀸𑀭𑁄. 𑀯𑀺𑀓𑀧𑁆𑀧𑀦𑁆𑀢𑀺 𑀯𑀺𑀲𑀺𑀝𑁆𑀞𑁄 𑀓𑀧𑁆𑀧𑁄 𑀯𑀺𑀓𑀧𑁆𑀧𑁄, 𑀯𑀺-𑀲𑀤𑁆𑀤𑁄 𑀘𑁂𑀢𑁆𑀣 𑀯𑀺𑀲𑀺𑀝𑁆𑀞𑀢𑁆𑀣𑁄. 𑀢𑁂𑀦𑀸𑀳 ‘‘𑀯𑀺𑀲𑀺𑀝𑁆𑀞𑀓𑀧𑁆𑀧’’𑀦𑁆𑀢𑀺. 𑀇𑀫𑀺𑀦𑀸 𑀯𑀘𑀦𑀢𑁆𑀣𑀫𑀸𑀳. ‘‘𑀅𑀥𑀺𑀓𑀯𑀺𑀥𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀅𑀥𑀺𑀧𑁆𑀧𑀸𑀬𑀢𑁆𑀣𑀁. 𑀬𑀣𑀸 𑀧𑀦 𑀢𑀫𑀸𑀧𑀚𑁆𑀚𑀢𑀻𑀢𑀺 𑀬𑁂𑀦𑀸𑀓𑀸𑀭𑁂𑀦 𑀢𑀁 𑀯𑀺𑀓𑀧𑁆𑀧𑀁 𑀆𑀧𑀚𑁆𑀚𑀢𑀺. 𑀢𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀢𑀁 𑀆𑀓𑀸𑀭𑀁 𑀤𑀲𑁆𑀲𑁂𑀢𑀼𑀁.

‘‘𑀲𑀸𑀥𑀽’’𑀢𑀺 𑀅𑀬𑀁 𑀲𑀤𑁆𑀤𑁄 𑀲𑀫𑁆𑀧𑀝𑀺𑀘𑁆𑀙𑀦𑀲𑀫𑁆𑀧𑀳𑀁𑀲𑀦𑀲𑀼𑀦𑁆𑀤𑀭𑀸𑀬𑀸𑀘𑀦𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑁂𑀲 ‘‘𑀲𑀸𑀥𑀼, 𑀪𑀦𑁆𑀢𑁂𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁮𑁬) 𑀲𑀫𑁆𑀧𑀝𑀺𑀘𑁆𑀙𑀦𑁂 𑀤𑀺𑀲𑁆𑀲𑀢𑀺, ‘‘𑀲𑀸𑀥𑀼 𑀲𑀸𑀥𑀼 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁪𑁯; 𑀫. 𑀦𑀺. 𑁧.𑁩𑁪𑁦) 𑀲𑀫𑁆𑀧𑀳𑀁𑀲𑀦𑁂.

‘‘𑀲𑀸𑀥𑀼 𑀥𑀫𑁆𑀫𑀭𑀼𑀘𑀺 𑀭𑀸𑀚𑀸, 𑀲𑀸𑀥𑀼 𑀧𑀜𑁆𑀜𑀸𑀡𑀯𑀸 𑀦𑀭𑁄;

𑀲𑀸𑀥𑀼 𑀫𑀺𑀢𑁆𑀢𑀸𑀦𑀫𑀤𑁆𑀤𑀼𑀩𑁆𑀪𑁄, 𑀧𑀸𑀧𑀲𑁆𑀲𑀸𑀓𑀭𑀡𑀁 𑀲𑀼𑀔’’𑀦𑁆𑀢𑀺𑀆𑀤𑀻𑀲𑀼. (𑀚𑀸. 𑁨.𑁧𑁮.𑁧𑁦𑁧) 𑁋

𑀲𑀼𑀦𑁆𑀤𑀭𑁂, ‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂 𑀪𑀕𑀯𑀸, 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀽’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁩.𑁬𑁪-𑁬𑁮) 𑀆𑀬𑀸𑀘𑀦𑁂, 𑀇𑀥𑀸𑀧𑀺 𑀆𑀬𑀸𑀘𑀦𑁂𑀬𑁂𑀯 𑀤𑀝𑁆𑀞𑀩𑁆𑀩𑁄𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁮𑁯; 𑀫. 𑀦𑀺. 𑀅𑀝𑁆𑀞. 𑁧.𑁧 𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸; 𑀲𑀼. 𑀦𑀺. 𑀅𑀝𑁆𑀞. 𑁧.𑁧𑁧𑁫 𑀅𑀕𑁆𑀕𑀺𑀓𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸; 𑀩𑀼. 𑀯𑀁. 𑀅𑀝𑁆𑀞. 𑁧.𑁪𑁯) 𑀆𑀳 ‘‘𑀲𑀸𑀥𑀽𑀢𑀺𑀆𑀬𑀸𑀘𑀦𑁂 𑀦𑀺𑀧𑀸𑀢𑁄’’𑀢𑀺. 𑀢𑀢𑁆𑀣 𑀆𑀬𑀸𑀘𑀦𑁂𑀢𑀺 𑀅𑀪𑀺𑀫𑀼𑀔𑀁 𑀬𑀸𑀘𑀦𑁂, 𑀅𑀪𑀺𑀧𑀢𑁆𑀣𑀦𑀸𑀬𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀺𑀯𑀺𑀢𑀓𑁆𑀓𑁂 𑀦𑀺𑀧𑀸𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀮𑀧𑀢𑀻𑀢𑀺 𑀆𑀫𑀦𑁆𑀢𑁂𑀢𑀺. 𑀆𑀬𑀢𑀸𑀤𑀻𑀲𑀽𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀯𑀺𑀢𑁆𑀣𑀢𑀅𑀧𑁆𑀧𑀺𑀢𑀲𑀡𑁆𑀳𑀸𑀦𑀁 𑀕𑀳𑀡𑀁. 𑀬𑀲𑁆𑀫𑀸 𑀧𑀦 𑀦 𑀇𑀫𑀲𑁆𑀲 𑀆𑀧𑀚𑁆𑀚𑀦𑀫𑀢𑁆𑀢𑁂𑀦𑁂𑀯 𑀆𑀧𑀢𑁆𑀢𑀺 𑀲𑀻𑀲𑀁 𑀏𑀢𑀺, 𑀢𑀲𑁆𑀫𑀸 ‘‘𑀢𑀲𑁆𑀲 𑀯𑀘𑀦𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀬𑁄𑀕𑁂𑀢𑀺 𑀲𑀼𑀢𑁆𑀢𑀧𑀭𑀺𑀬𑁂𑀲𑀦𑀸𑀤𑀺𑀧𑀬𑁄𑀕𑁂.

𑀫𑀳𑀕𑁆𑀖𑀁 𑀘𑁂𑀢𑀸𑀧𑁂𑀢𑀼𑀓𑀸𑀫𑀁 𑀅𑀧𑁆𑀧𑀕𑁆𑀖𑀦𑁆𑀢𑀺 𑀯𑀻𑀲𑀢𑀺𑀅𑀕𑁆𑀖𑀦𑀓𑀁 𑀘𑀻𑀯𑀭𑀁 𑀘𑁂𑀢𑀸𑀧𑁂𑀢𑀼𑀓𑀸𑀫𑀁 ‘‘𑀅𑀮𑀁 𑀫𑀬𑁆𑀳𑀁 𑀢𑁂𑀦, 𑀤𑀲𑀅𑀕𑁆𑀖𑀦𑀓𑀁 𑀯𑀸 𑀅𑀝𑁆𑀞𑀕𑁆𑀖𑀦𑀓𑀁 𑀯𑀸 𑀤𑁂𑀳𑀻’’𑀢𑀺 𑀯𑀤𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀏𑀯𑀭𑀽𑀧𑀦𑁆𑀢𑀺 𑀏𑀯𑀁 𑀲𑀫𑀪𑀸𑀕𑀁, 𑀇𑀫𑀺𑀦𑀸 𑀲𑀫𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀜𑁆𑀘 𑀔𑁄 𑀅𑀕𑁆𑀖𑀯𑀲𑁂𑀦𑁂𑀯, 𑀦 𑀧𑀫𑀸𑀡𑀯𑀲𑁂𑀦. 𑀅𑀕𑁆𑀖𑀯𑀟𑁆𑀠𑀦𑀓𑀜𑁆𑀳𑀺 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁.

𑀧𑀞𑀫𑀉𑀧𑀓𑁆𑀔𑀝𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀤𑀼𑀢𑀺𑀬𑀉𑀧𑀓𑁆𑀔𑀝𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀓𑀲𑁆𑀫𑀸 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀇𑀤𑀜𑁆𑀳𑀻’’𑀢𑀺𑀆𑀤𑀺. 𑀳𑀻𑀢𑀺 𑀓𑀸𑀭𑀡𑀢𑁆𑀣𑁂 𑀦𑀺𑀧𑀸𑀢𑁄. 𑀦 𑀓𑁄𑀘𑀺 𑀯𑀺𑀲𑁂𑀲𑁄𑀢𑀺 𑀆𑀳 ‘‘𑀓𑁂𑀯𑀮’’𑀦𑁆𑀢𑀺𑀆𑀤𑀺.

𑀤𑀼𑀢𑀺𑀬𑀉𑀧𑀓𑁆𑀔𑀝𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀭𑀸𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀭𑀸𑀚𑀢𑁄 𑀪𑁄𑀕𑁆𑀕𑀦𑁆𑀢𑀺 𑀭𑀸𑀚𑀢𑁄 𑀮𑀤𑁆𑀥𑀪𑁄𑀕𑁆𑀕𑀁. 𑀭𑀸𑀚𑀪𑁄𑀕𑁆𑀕𑁄𑀢𑀺 𑀭𑀸𑀚𑀸𑀫𑀢𑁆𑀢𑁄. 𑀭𑀸𑀚𑀢𑁄 𑀪𑁄𑀕𑁄𑀢𑀺 𑀭𑀜𑁆𑀜𑀸 𑀤𑀺𑀦𑁆𑀦𑀁 𑀇𑀲𑁆𑀲𑀭𑀺𑀬𑀁. 𑀇𑀫𑀺𑀦𑀸𑀢𑀺𑀆𑀤𑀻𑀢𑀺 ‘‘𑀇𑀫𑀺𑀦𑀸 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑁂𑀦 𑀘𑀻𑀯𑀭𑀁 𑀘𑁂𑀢𑀸𑀧𑁂𑀢𑁆𑀯𑀸 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑁂𑀦 𑀅𑀘𑁆𑀙𑀸𑀤𑁂𑀳𑀻’’𑀢𑀺 𑀇𑀤𑀁. 𑀆𑀕𑀫𑀦𑀲𑀼𑀤𑁆𑀥𑀺𑀦𑁆𑀢𑀺 𑀫𑀽𑀮𑀲𑀼𑀤𑁆𑀥𑀺𑀁. 𑀬𑀤𑀺 𑀳𑀺 𑀇𑀫𑀺𑀦𑀸 𑀓𑀧𑁆𑀧𑀺𑀬𑀦𑀻𑀳𑀸𑀭𑁂𑀦 𑀅𑀧𑁂𑀲𑁂𑀢𑁆𑀯𑀸 ‘‘𑀇𑀤𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁂𑀳𑀻’’𑀢𑀺 𑀧𑁂𑀲𑁂𑀬𑁆𑀬, 𑀲𑁄𑀧𑀺 𑀤𑀽𑀢𑁄 𑀢𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑁂𑀬𑁆𑀬 ‘‘𑀇𑀤𑀁 𑀔𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀆𑀪𑀢𑀁, 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀆𑀬𑀲𑁆𑀫𑀸 𑀘𑀻𑀯𑀭𑀘𑁂𑀢𑀸𑀧𑀦𑁆𑀦’’𑀦𑁆𑀢𑀺 (𑀧𑀸𑀭𑀸. 𑁫𑁩𑁮), 𑀢𑀤𑀸 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀧𑀺 𑀓𑀧𑁆𑀧𑀺𑀬𑀓𑀸𑀭𑀓𑀁 𑀧𑀼𑀝𑁆𑀞𑁂𑀦 𑀢𑀁 𑀦𑀺𑀤𑁆𑀤𑀺𑀲𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀢𑁂𑀦𑀸𑀳 ‘‘𑀲𑀘𑁂 𑀳𑀻’’𑀢𑀺𑀆𑀤𑀺. 𑀅𑀓𑀧𑁆𑀧𑀺𑀬𑀯𑀢𑁆𑀣𑀼𑀁 𑀆𑀭𑀩𑁆𑀪𑀸𑀢𑀺 𑀳𑀺𑀭𑀜𑁆𑀜𑀸𑀤𑀺𑀁 𑀆𑀭𑀩𑁆𑀪. 𑀈𑀤𑀺𑀲𑁂𑀦 𑀤𑀽𑀢𑀯𑀘𑀦𑁂𑀦𑀸𑀢𑀺 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀆𑀬𑀲𑁆𑀫𑀸 𑀘𑀻𑀯𑀭𑀘𑁂𑀢𑀸𑀧𑀦𑁆𑀦’’𑀦𑁆𑀢𑀺 𑀏𑀯𑀭𑀽𑀧𑁂𑀦 𑀤𑀽𑀢𑀯𑀘𑀦𑁂𑀦. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀅𑀓𑀧𑁆𑀧𑀺𑀬𑀁 𑀳𑁄𑀢𑀺, 𑀢𑀲𑁆𑀫𑀸. 𑀲𑀼𑀯𑀡𑁆𑀡𑀦𑁆𑀢𑀺 𑀚𑀸𑀢𑀭𑀽𑀧𑀁. 𑀭𑀚𑀢𑀦𑁆𑀢𑀺 𑀭𑀽𑀧𑀺𑀬𑀁. 𑀓𑀳𑀸𑀧𑀡𑁂𑀦𑀸𑀢𑀺 𑀲𑀼𑀯𑀡𑁆𑀡𑀫𑀬𑁄 𑀯𑀸 𑀭𑀽𑀧𑀺𑀬𑀫𑀬𑁄 𑀯𑀸 𑀧𑀸𑀓𑀢𑀺𑀓𑁄 𑀯𑀸 𑀓𑀳𑀸𑀧𑀡𑁄. 𑀫𑀸𑀲𑀓𑁄𑀢𑀺 𑀮𑁄𑀳𑀫𑀸𑀲𑀓𑁄 𑀯𑀸 𑀳𑁄𑀢𑀼, 𑀤𑀸𑀭𑀼𑀫𑀸𑀲𑀓𑁄 𑀯𑀸 𑀳𑁄𑀢𑀼, 𑀚𑀢𑀼𑀫𑀸𑀲𑀓𑁄 𑀯𑀸 𑀳𑁄𑀢𑀼, 𑀬𑁄 𑀬𑁄 𑀬𑀢𑁆𑀣 𑀬𑀢𑁆𑀣 𑀚𑀦𑀧𑀤𑁂 𑀬𑀤𑀸 𑀬𑀤𑀸 𑀯𑁄𑀳𑀸𑀭𑀁 𑀕𑀘𑁆𑀙𑀢𑀺, 𑀅𑀦𑁆𑀢𑀫𑀲𑁄 𑀅𑀝𑁆𑀞𑀺𑀫𑀬𑁄𑀧𑀺 𑀘𑀫𑁆𑀫𑀫𑀬𑁄𑀧𑀺 𑀭𑀼𑀓𑁆𑀔𑀨𑀮𑀩𑀻𑀚𑀫𑀬𑁄𑀧𑀺 𑀲𑀫𑀼𑀝𑁆𑀞𑀸𑀧𑀺𑀢𑀭𑀽𑀧𑁄𑀧𑀺 𑀅𑀲𑀫𑀼𑀝𑁆𑀞𑀸𑀧𑀺𑀢𑀭𑀽𑀧𑁄𑀧𑀺 𑀲𑀩𑁆𑀩𑁄 𑀇𑀥 𑀫𑀸𑀲𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀘 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀭𑀽𑀧𑀺𑀬𑀲𑀺𑀓𑁆𑀔𑀸𑀧𑀤𑁂 𑀯𑀓𑁆𑀔𑀸𑀫.

𑀫𑀼𑀢𑁆𑀢𑀸𑀢𑀺 𑀳𑀢𑁆𑀣𑀺𑀓𑀼𑀫𑁆𑀪𑀚𑀸𑀤𑀺𑀓𑀸 𑀅𑀝𑁆𑀞𑀯𑀺𑀥𑀸 𑀫𑀼𑀢𑁆𑀢𑀸. 𑀢𑀣𑀸 𑀳𑀺 𑀳𑀢𑁆𑀣𑀺𑀓𑀼𑀫𑁆𑀪𑀁 𑀯𑀭𑀸𑀳𑀤𑀸𑀞𑀁, 𑀪𑀼𑀚𑀗𑁆𑀕𑀲𑀻𑀲𑀁, 𑀯𑀮𑀸𑀳𑀓𑀁, 𑀯𑁂𑀴𑀼, 𑀫𑀘𑁆𑀙𑀲𑀺𑀭𑁄, 𑀲𑀗𑁆𑀔𑁄, 𑀲𑀺𑀧𑁆𑀧𑀻𑀢𑀺 𑀅𑀝𑁆𑀞 𑀫𑀼𑀢𑁆𑀢𑀸𑀬𑁄𑀦𑀺𑀬𑁄. 𑀢𑀢𑁆𑀣 𑀬𑀸 𑀫𑀘𑁆𑀙𑀲𑀗𑁆𑀔𑀲𑀺𑀧𑁆𑀧𑀺𑀚𑀸𑀢𑀸, 𑀲𑀸 𑀲𑀸𑀫𑀼𑀤𑁆𑀤𑀺𑀓𑀸, 𑀪𑀼𑀚𑀗𑁆𑀕𑀚𑀸𑀧𑀺 𑀓𑀸𑀘𑀺 𑀲𑀸𑀫𑀼𑀤𑁆𑀤𑀺𑀓𑀸 𑀳𑁄𑀢𑀺. 𑀇𑀢𑀭𑀸 𑀅𑀲𑀸𑀫𑀼𑀤𑁆𑀤𑀺𑀓𑀸. 𑀬𑀲𑁆𑀫𑀸 𑀧𑀦 𑀩𑀳𑀼𑀮𑀁 𑀲𑀸𑀫𑀼𑀤𑁆𑀤𑀺𑀓𑀸𑀯 𑀫𑀼𑀢𑁆𑀢𑀸 𑀮𑁄𑀓𑁂 𑀤𑀺𑀲𑁆𑀲𑀦𑁆𑀢𑀺, 𑀢𑀢𑁆𑀣𑀸𑀧𑀺 𑀲𑀺𑀧𑁆𑀧𑀺𑀚𑀸𑀯, 𑀇𑀢𑀭𑀸 𑀓𑀤𑀸𑀘𑀺. 𑀢𑀲𑁆𑀫𑀸 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 ‘‘𑀫𑀼𑀢𑁆𑀢𑀸𑀢𑀺 𑀲𑀸𑀫𑀼𑀤𑁆𑀤𑀺𑀓𑀫𑀼𑀢𑁆𑀢𑀸’’𑀢𑀺 (𑀯𑀺𑀪. 𑀅𑀝𑁆𑀞. 𑁧𑁭𑁨) 𑀯𑀼𑀢𑁆𑀢𑀁. 𑀫𑀡𑀻𑀢𑀺 𑀞𑀧𑁂𑀢𑁆𑀯𑀸 𑀯𑁂𑀴𑀼𑀭𑀺𑀬𑀸𑀤𑀺𑀓𑁂 𑀅𑀦𑁆𑀢𑀫𑀲𑁄 𑀚𑀸𑀢𑀺𑀨𑀮𑀺𑀓𑀁 𑀉𑀧𑀸𑀤𑀸𑀬 𑀲𑀩𑁆𑀩𑁄𑀧𑀺 𑀦𑀻𑀮𑀧𑀻𑀢𑀸𑀤𑀺𑀯𑀡𑁆𑀡𑀪𑁂𑀤𑁄 𑀫𑀡𑀻𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀧𑀘𑀺𑀢𑁆𑀯𑀸 𑀓𑀢𑁄 𑀧𑀦 𑀓𑀸𑀘𑀫𑀡𑀺𑀬𑁂𑀯𑁂𑀓𑁄 𑀧𑀢𑁆𑀢𑀸𑀤𑀺𑀪𑀡𑁆𑀟𑀫𑀽𑀮𑀢𑁆𑀣𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺. 𑀯𑁂𑀴𑀼𑀭𑀺𑀬𑁄 𑀦𑀸𑀫 𑀯𑀁𑀲𑀯𑀡𑁆𑀡𑀫𑀡𑀺. 𑀲𑀗𑁆𑀔𑁄𑀢𑀺 𑀥𑀫𑀦𑀲𑀗𑁆𑀔𑁄 𑀥𑁄𑀢𑀯𑀺𑀤𑁆𑀥𑁄 𑀭𑀢𑀦𑀫𑀺𑀲𑁆𑀲𑁄, 𑀧𑀸𑀦𑀻𑀬𑀲𑀗𑁆𑀔𑁄 𑀧𑀦 𑀭𑀢𑀦𑀸𑀫𑀺𑀲𑁆𑀲𑀓𑀢𑁄, 𑀲𑁄 𑀘 𑀅𑀜𑁆𑀚𑀦𑀸𑀤𑀺𑀪𑁂𑀲𑀚𑁆𑀚𑀢𑁆𑀣𑀸𑀬, 𑀪𑀡𑁆𑀟𑀫𑀽𑀮𑀢𑁆𑀣𑀸𑀬 𑀘 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀺𑀮𑀸𑀢𑀺 𑀥𑁄𑀢𑀯𑀺𑀤𑁆𑀥𑀸 𑀭𑀢𑀦𑀲𑀁𑀬𑀼𑀢𑁆𑀢𑀸 𑀫𑀼𑀕𑁆𑀕𑀯𑀡𑁆𑀡𑀸 𑀲𑀺𑀮𑀸. 𑀭𑀢𑀦𑁂𑀦 𑀧𑀦 𑀅𑀫𑀺𑀲𑁆𑀲𑀸 𑀲𑀢𑁆𑀣𑀓𑀦𑀺𑀲𑀸𑀦𑀸𑀤𑀺𑀅𑀢𑁆𑀣𑀸𑀬 𑀧𑀝𑀺𑀕𑁆𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺. 𑀏𑀢𑁆𑀣 𑀘 ‘‘𑀭𑀢𑀦𑀲𑀁𑀬𑀼𑀢𑁆𑀢𑀸𑀢𑀺 𑀲𑀼𑀯𑀡𑁆𑀡𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀧𑀘𑀺𑀢𑁆𑀯𑀸 𑀓𑀢𑀸’’𑀢𑀺 𑀯𑀤𑀦𑁆𑀢𑀺. 𑀧𑀯𑀸𑀴𑀦𑁆𑀢𑀺 𑀥𑁄𑀢𑀫𑁆𑀧𑀺 𑀅𑀥𑁄𑀢𑀫𑁆𑀧𑀺 𑀲𑀩𑁆𑀩𑀁 𑀧𑀯𑀸𑀴𑀁. 𑀮𑁄𑀳𑀺𑀢𑀗𑁆𑀓𑁄𑀢𑀺 𑀭𑀢𑁆𑀢𑀫𑀡𑀺. 𑀫𑀲𑀸𑀭𑀕𑀮𑁆𑀮𑀦𑁆𑀢𑀺 𑀓𑀩𑀭𑀫𑀡𑀺. 𑀬𑀁 ‘‘𑀫𑀭𑀓𑀢’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺.

𑀲𑀢𑁆𑀢 𑀥𑀜𑁆𑀜𑀸𑀦𑀻𑀢𑀺 𑀲𑀸𑀦𑀼𑀮𑁄𑀫𑀸𑀦𑀺 𑀲𑀸𑀮𑀺𑀆𑀤𑀻𑀦𑀺 𑀲𑀢𑁆𑀢 𑀥𑀜𑁆𑀜𑀸𑀦𑀺. 𑀦𑀻𑀯𑀸𑀭𑀸𑀤𑀺𑀉𑀧𑀥𑀜𑁆𑀜𑀲𑁆𑀲 𑀧𑀦 𑀲𑀸𑀮𑀺𑀆𑀤𑀺𑀫𑀽𑀮𑀥𑀜𑁆𑀜𑀦𑁆𑀢𑁄𑀕𑀥𑀢𑁆𑀢𑀸 ‘‘𑀲𑀢𑁆𑀢 𑀥𑀜𑁆𑀜𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀤𑀸𑀲𑀺𑀤𑀸𑀲𑀔𑁂𑀢𑁆𑀢𑀯𑀢𑁆𑀣𑀼𑀧𑀼𑀧𑁆𑀨𑀸𑀭𑀸𑀫𑀨𑀮𑀸𑀭𑀸𑀫𑀸𑀤𑀬𑁄𑀢𑀺 𑀏𑀢𑁆𑀣 𑀤𑀸𑀲𑀻 𑀦𑀸𑀫 𑀅𑀦𑁆𑀢𑁄𑀚𑀸𑀢𑀥𑀦𑀓𑁆𑀓𑀻𑀢𑀓𑀭𑀫𑀭𑀸𑀦𑀻𑀢𑀧𑁆𑀧𑀪𑁂𑀤𑀸. 𑀢𑀣𑀸 𑀤𑀸𑀲𑁄. 𑀔𑁂𑀢𑁆𑀢𑀁 𑀦𑀸𑀫 𑀬𑀲𑁆𑀫𑀺𑀁 𑀧𑀼𑀩𑁆𑀩𑀡𑁆𑀡𑀁 𑀭𑀼𑀳𑀢𑀺. 𑀯𑀢𑁆𑀣𑀼 𑀦𑀸𑀫 𑀬𑀲𑁆𑀫𑀺𑀁 𑀅𑀧𑀭𑀡𑁆𑀡𑀁 𑀭𑀼𑀳𑀢𑀺. 𑀬𑀢𑁆𑀣 𑀯𑀸 𑀉𑀪𑀬𑀫𑁆𑀧𑀺 𑀭𑀼𑀳𑀢𑀺, 𑀢𑀁 𑀔𑁂𑀢𑁆𑀢𑀁. 𑀢𑀤𑀢𑁆𑀣𑀸𑀬 𑀅𑀓𑀢𑀪𑀽𑀫𑀺𑀪𑀸𑀕𑁄 𑀯𑀢𑁆𑀣𑀼. 𑀔𑁂𑀢𑁆𑀢𑀯𑀢𑁆𑀣𑀼𑀲𑀻𑀲𑁂𑀦 𑀘𑁂𑀢𑁆𑀣 𑀯𑀸𑀧𑀺𑀢𑀴𑀸𑀓𑀸𑀤𑀻𑀦𑀺𑀧𑀺 𑀲𑀗𑁆𑀕𑀳𑀺𑀢𑀸𑀦𑁂𑀯. 𑀯𑀲𑁆𑀲𑀺𑀓𑀸𑀤𑀻𑀦𑀁 𑀧𑀼𑀧𑁆𑀨𑀦𑀓𑁄 𑀧𑀼𑀧𑁆𑀨𑀸𑀭𑀸𑀫𑁄. 𑀅𑀫𑁆𑀩𑀨𑀮𑀸𑀤𑀻𑀦𑀁 𑀨𑀮𑀦𑀓𑁄 𑀨𑀮𑀸𑀭𑀸𑀫𑁄. 𑀦 𑀓𑁂𑀯𑀮𑀜𑁆𑀘 𑀅𑀢𑁆𑀢𑀦𑁄𑀬𑁂𑀯𑀢𑁆𑀣𑀸𑀬 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀘𑁂𑀧𑀺 𑀓𑁄𑀘𑀺 𑀚𑀸𑀢𑀭𑀽𑀧𑀭𑀚𑀢𑀁 𑀆𑀦𑁂𑀢𑁆𑀯𑀸 ‘‘𑀇𑀤𑀁 𑀲𑀗𑁆𑀖𑀲𑁆𑀲 𑀤𑀫𑁆𑀫𑀺, 𑀆𑀭𑀸𑀫𑀁 𑀯𑀸 𑀓𑀭𑁄𑀣, 𑀘𑁂𑀢𑀺𑀬𑀁 𑀯𑀸 𑀪𑁄𑀚𑀦𑀲𑀸𑀮𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭’’𑀦𑁆𑀢𑀺 𑀯𑀤𑀢𑀺, 𑀇𑀤𑀫𑁆𑀧𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀦 𑀯𑀝𑁆𑀝𑀢𑀺. ‘‘𑀬𑀲𑁆𑀲 𑀓𑀲𑁆𑀲𑀘𑀺 𑀳𑀺 𑀅𑀜𑁆𑀜𑀲𑁆𑀲 𑀅𑀢𑁆𑀣𑀸𑀬 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀳𑁄𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁩𑁮-𑁫𑁩𑁯) 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀘𑁂𑀢𑀺𑀬𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑀸𑀦𑀁 𑀯𑀸 𑀅𑀢𑁆𑀣𑀸𑀬 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀦 𑀯𑀝𑁆𑀝𑀦𑁆𑀢𑀻’’𑀢𑀺.

𑀲𑀘𑁂 𑀧𑀦 𑀲𑀗𑁆𑀖𑀁 𑀯𑀸 𑀕𑀡𑀁 𑀯𑀸 𑀧𑀼𑀕𑁆𑀕𑀮𑀁 𑀯𑀸 𑀅𑀦𑀸𑀫𑀲𑀺𑀢𑁆𑀯𑀸 ‘‘𑀇𑀤𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀘𑁂𑀢𑀺𑀬𑀲𑁆𑀲 𑀤𑁂𑀫, 𑀯𑀺𑀳𑀸𑀭𑀲𑁆𑀲 𑀤𑁂𑀫, 𑀦𑀯𑀓𑀫𑁆𑀫𑀲𑁆𑀲 𑀤𑁂𑀫𑀸’’𑀢𑀺 𑀯𑀤𑀦𑁆𑀢𑀺, 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀺. ‘‘𑀇𑀫𑁂 𑀇𑀤𑀁 𑀪𑀡𑀦𑁆𑀢𑀻’’𑀢𑀺 𑀓𑀧𑁆𑀧𑀺𑀬𑀓𑀸𑀭𑀓𑀸𑀦𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. ‘‘𑀘𑁂𑀢𑀺𑀬𑀸𑀤𑀻𑀦𑀁 𑀅𑀢𑁆𑀣𑀸𑀬 𑀢𑀼𑀫𑁆𑀳𑁂 𑀕𑀳𑁂𑀢𑁆𑀯𑀸 𑀞𑀧𑁂𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀦 ‘‘𑀅𑀫𑁆𑀳𑀸𑀓𑀁 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀁.

𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄𑀢𑀺 𑀓𑀺𑀘𑁆𑀘𑀓𑀭𑁄. 𑀇𑀥 𑀧𑀦 𑀲𑀩𑁆𑀩𑁄 𑀓𑀺𑀘𑁆𑀘𑀓𑀭𑁄𑀯 ‘‘𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀓𑀧𑁆𑀧𑀺𑀬𑀓𑀸𑀭𑀓𑁄’’𑀢𑀺. 𑀏𑀲𑁄 𑀔𑁄𑀢𑀺 ‘‘𑀅𑀲𑀼𑀓𑀯𑀻𑀣𑀺𑀬𑀁 𑀅𑀲𑀼𑀓𑀖𑀭𑁂 𑀅𑀲𑀼𑀓𑀦𑀸𑀫𑁄’’𑀢𑀺 𑀧𑀭𑀫𑁆𑀫𑀼𑀔𑀁 𑀯𑀤𑀢𑀺. 𑀇𑀢𑀭𑀫𑁆𑀧𑀻𑀢𑀺 𑀧𑀭𑀫𑁆𑀫𑀼𑀔𑀸𑀦𑀺𑀤𑁆𑀤𑀺𑀝𑁆𑀞𑀫𑁆𑀧𑀺. ‘‘𑀅𑀢𑁆𑀣𑁄 𑀫𑁂, 𑀆𑀯𑀼𑀲𑁄, 𑀘𑀻𑀯𑀭𑁂𑀦𑀸’’𑀢𑀺 𑀏𑀢𑀁 𑀘𑁄𑀤𑀦𑀸𑀮𑀓𑁆𑀔𑀡𑀦𑀺𑀤𑀲𑁆𑀲𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀘𑁄𑀤𑀦𑀸𑀮𑀓𑁆𑀔𑀡𑀦𑀺𑀤𑀲𑁆𑀲𑀦𑀦𑁆𑀢𑀺 𑀯𑀸𑀘𑀸𑀬 𑀘𑁄𑀤𑀦𑀸𑀮𑀓𑁆𑀔𑀡𑀦𑀺𑀤𑀲𑁆𑀲𑀦𑀁. 𑀢𑁂𑀦𑀸𑀳 ‘‘𑀲𑀘𑁂 𑀳𑀻’’𑀢𑀺𑀆𑀤𑀺. 𑀇𑀤𑀁 𑀯𑀸 𑀯𑀘𑀦𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑀲𑁆𑀲 𑀯𑀸 𑀅𑀢𑁆𑀣𑁄 𑀬𑀸𑀬 𑀓𑀸𑀬𑀘𑀺 𑀪𑀸𑀲𑀸𑀬 𑀯𑀢𑁆𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀤𑁂𑀳𑀺 𑀫𑁂 𑀘𑀻𑀯𑀭𑀁, 𑀆𑀳𑀭 𑀫𑁂 𑀘𑀻𑀯𑀭𑀁, 𑀧𑀭𑀺𑀯𑀢𑁆𑀢𑁂𑀳𑀺 𑀫𑁂 𑀘𑀻𑀯𑀭𑀁, 𑀘𑁂𑀢𑀸𑀧𑁂𑀳𑀺 𑀫𑁂 𑀘𑀻𑀯𑀭’’𑀦𑁆𑀢𑀺 𑀏𑀢𑀸𑀦𑀺 𑀧𑀦 𑀯𑀘𑀦𑀸𑀦𑀺 𑀏𑀢𑁂𑀲𑀁 𑀯𑀸 𑀅𑀢𑁆𑀣𑁄 𑀬𑀸𑀬 𑀓𑀸𑀬𑀘𑀺 𑀪𑀸𑀲𑀸𑀬 𑀦 𑀯𑀢𑁆𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀤𑁂𑀳𑀺 𑀫𑁂’’𑀢𑀺𑀆𑀤𑀺. 𑀲𑀸𑀥𑁂𑀬𑁆𑀬𑀸𑀢𑀺 𑀦𑀺𑀧𑁆𑀨𑀸𑀤𑁂𑀬𑁆𑀬. 𑀇𑀘𑁆𑀘𑁂𑀢𑀁 𑀓𑀼𑀲𑀮𑀦𑁆𑀢𑀺 𑀏𑀯𑀁 𑀬𑀸𑀯𑀢𑀢𑀺𑀬𑀁 𑀘𑁄𑀤𑀦𑁂𑀦 𑀢𑀲𑁆𑀲 𑀘𑀻𑀯𑀭𑀲𑁆𑀲 𑀬𑀤𑁂𑀢𑀁 𑀅𑀪𑀺𑀦𑀺𑀧𑁆𑀨𑀸𑀤𑀦𑀁, 𑀏𑀢𑀁 𑀓𑀼𑀲𑀮𑀁 𑀲𑀸𑀥𑀼 𑀲𑀼𑀝𑁆𑀞𑀽𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀏𑀢𑀁 𑀲𑀼𑀦𑁆𑀤𑀭’’𑀦𑁆𑀢𑀺.

𑀙𑀓𑁆𑀔𑀢𑁆𑀢𑀼𑀁 𑀧𑀭𑀫𑁄 𑀧𑀭𑀺𑀘𑁆𑀙𑁂𑀤𑁄 𑀅𑀲𑁆𑀲𑀸𑀢𑀺 𑀙𑀓𑁆𑀔𑀢𑁆𑀢𑀼𑀧𑀭𑀫𑀁. 𑀇𑀤𑀜𑁆𑀳𑀺 ‘‘𑀞𑀸𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀲𑁆𑀲𑀸 𑀓𑀺𑀭𑀺𑀬𑀸𑀬 𑀯𑀺𑀲𑁂𑀲𑀦𑀁, 𑀙𑀓𑁆𑀔𑀢𑁆𑀢𑀼𑀧𑀭𑀫𑀁 𑀞𑀸𑀦𑀁 𑀓𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀪𑀸𑀯𑀦𑀧𑀼𑀁𑀲𑀓𑀯𑀘𑀦𑀫𑁂𑀢’’𑀦𑁆𑀢𑀺, 𑀏𑀢𑀁 𑀪𑀸𑀯𑁂 𑀞𑀸𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀥𑀸𑀢𑁆𑀯𑀢𑁆𑀣𑀫𑀢𑁆𑀢𑁂 𑀲𑀸𑀥𑁂𑀢𑀩𑁆𑀩𑁂 𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀦 𑀦𑀺𑀲𑀻𑀤𑀺𑀢𑀩𑁆𑀩𑀦𑁆𑀢𑀺 ‘‘𑀇𑀥, 𑀪𑀦𑁆𑀢𑁂, 𑀦𑀺𑀲𑀻𑀤𑀣𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀦 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀦 𑀆𑀫𑀺𑀲𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀦𑁆𑀢𑀺 𑀬𑀸𑀕𑀼𑀔𑀚𑁆𑀚𑀓𑀸𑀤𑀺𑀪𑁂𑀤𑀁 𑀓𑀺𑀜𑁆𑀘𑀺 𑀆𑀫𑀺𑀲𑀁 ‘‘𑀕𑀡𑁆𑀳𑀣, 𑀪𑀦𑁆𑀢𑁂’’𑀢𑀺 𑀬𑀸𑀘𑀺𑀬𑀫𑀸𑀦𑁂𑀦𑀸𑀧𑀺 𑀦 𑀕𑀡𑁆𑀳𑀺𑀢𑀩𑁆𑀩𑀁. 𑀦 𑀥𑀫𑁆𑀫𑁄 𑀪𑀸𑀲𑀺𑀢𑀩𑁆𑀩𑁄𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁩𑁮-𑁫𑁩𑁯) ‘‘𑀫𑀗𑁆𑀕𑀮𑀁 𑀯𑀸 𑀅𑀦𑀼𑀫𑁄𑀤𑀦𑀁 𑀯𑀸 𑀪𑀸𑀲𑀣𑀸’’𑀢𑀺 𑀬𑀸𑀘𑀺𑀬𑀫𑀸𑀦𑁂𑀦𑀸𑀧𑀺 𑀦 𑀓𑀺𑀜𑁆𑀘𑀺 𑀪𑀸𑀲𑀺𑀢𑀩𑁆𑀩𑀁. 𑀞𑀸𑀦𑀁 𑀪𑀜𑁆𑀚𑀢𑀻𑀢𑀺 𑀞𑀺𑀢𑀺𑀁 𑀯𑀺𑀦𑀸𑀲𑁂𑀢𑀺. 𑀞𑀢𑁆𑀯𑀸 𑀘𑀻𑀯𑀭𑀁 𑀕𑀳𑁂𑀢𑀼𑀁 𑀆𑀕𑀢𑁂𑀦 𑀳𑀺 𑀢𑀁 𑀉𑀤𑁆𑀤𑀺𑀲𑁆𑀲 𑀢𑀼𑀡𑁆𑀳𑀻𑀪𑀽𑀢𑁂𑀦 𑀞𑀸𑀢𑀩𑁆𑀩𑀫𑁂𑀯, 𑀦 𑀦𑀺𑀲𑀚𑁆𑀚𑀸𑀤𑀺𑀓𑀁 𑀓𑀸𑀢𑀩𑁆𑀩𑀁. 𑀇𑀫𑀺𑀦𑀸 𑀧𑀦 𑀢𑀁 𑀓𑀢𑀦𑁆𑀢𑀺 𑀞𑀸𑀦𑀁 𑀯𑀺𑀦𑀸𑀲𑀺𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀆𑀕𑀢𑀓𑀸𑀭𑀡𑀁 𑀯𑀺𑀦𑀸𑀲𑁂𑀢𑀻’’𑀢𑀺. ‘‘𑀆𑀕𑀢𑀓𑀸𑀭𑀡𑀁 𑀦𑀸𑀫 𑀞𑀸𑀦𑀫𑁂𑀯, 𑀢𑀲𑁆𑀫𑀸 ‘𑀦 𑀓𑀸𑀢𑀩𑁆𑀩’𑀦𑁆𑀢𑀺 𑀯𑀸𑀭𑀺𑀢𑀲𑁆𑀲 𑀓𑀢𑀢𑁆𑀢𑀸 𑀦𑀺𑀲𑀚𑁆𑀚𑀸𑀤𑀻𑀲𑀼 𑀓𑀢𑁂𑀲𑀼 𑀙𑀲𑀼 𑀞𑀸𑀦𑁂𑀲𑀼 𑀏𑀓𑀁 𑀞𑀸𑀦𑀁 𑀪𑀜𑁆𑀚𑀢𑀻’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁫𑁩𑁭-𑁫𑁩𑁯) 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀙𑀓𑁆𑀔𑀢𑁆𑀢𑀼𑀧𑀭𑀫𑀁 𑀢𑀼𑀡𑁆𑀳𑀻𑀪𑀽𑀢𑁂𑀦 𑀉𑀤𑁆𑀤𑀺𑀲𑁆𑀲 𑀞𑀸𑀢𑀩𑁆𑀩𑀁. ‘‘𑀦 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀓𑀸𑀢𑀩𑁆𑀩’’𑀦𑁆𑀢𑀺 𑀳𑀺 𑀇𑀤𑀁 𑀞𑀸𑀦𑀮𑀓𑁆𑀔𑀡𑀁. 𑀢𑁂𑀦𑁂𑀯𑀸𑀳 ‘‘𑀇𑀤’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀇𑀤𑀦𑁆𑀢𑀺 ‘‘𑀘𑀢𑀼𑀓𑁆𑀔𑀢𑁆𑀢𑀼𑀁 𑀧𑀜𑁆𑀘𑀓𑁆𑀔𑀢𑁆𑀢𑀼𑀁, 𑀙𑀓𑁆𑀔𑀢𑁆𑀢𑀼𑀧𑀭𑀫𑀁 𑀢𑀼𑀡𑁆𑀳𑀻𑀪𑀽𑀢𑁂𑀦 𑀉𑀤𑁆𑀤𑀺𑀲𑁆𑀲 𑀞𑀸𑀢𑀩𑁆𑀩’’𑀦𑁆𑀢𑀺 𑀯𑀘𑀦𑀁. 𑀏𑀢𑁆𑀣 𑀘 ‘‘𑀦𑀺𑀲𑀻𑀤𑀦𑀸𑀤𑀺𑀫𑁆𑀳𑀺 𑀓𑀢𑁂 𑀧𑀼𑀦 𑀘𑀻𑀯𑀭𑀁 𑀕𑀳𑁂𑀢𑀼𑀁 𑀦 𑀮𑀪𑀢𑀻’’𑀢𑀺 𑀓𑁂𑀘𑀺. ‘‘𑀤𑁆𑀯𑁂 𑀞𑀸𑀦𑀸𑀦𑀺 𑀧𑀭𑀺𑀳𑀸𑀬𑀦𑁆𑀢𑀻’’𑀢𑀺 𑀅𑀜𑁆𑀜𑁂. ‘‘𑀏𑀓𑀁 𑀞𑀸𑀦𑀁 𑀧𑀭𑀺𑀳𑀸𑀬𑀢𑀻’’𑀢𑀺 𑀅𑀧𑀭𑁂. 𑀉𑀪𑀬𑀁 𑀓𑀭𑁄𑀢𑀻𑀢𑀺 𑀘𑁄𑀤𑁂𑀢𑀺𑀧𑀺 𑀢𑀺𑀝𑁆𑀞𑀢𑀺𑀧𑀺.

‘‘𑀢𑀢𑁆𑀭 𑀢𑀢𑁆𑀭 𑀞𑀸𑀦𑁂 𑀢𑀺𑀝𑁆𑀞𑀢𑀻’’𑀢𑀺 𑀇𑀤𑀁 𑀘𑁄𑀤𑀓𑀲𑁆𑀲 𑀞𑀺𑀢𑀝𑁆𑀞𑀺𑀢𑀝𑁆𑀞𑀸𑀦𑀢𑁄 𑀅𑀧𑀓𑁆𑀓𑀫𑁆𑀫 𑀢𑀢𑁆𑀭 𑀢𑀢𑁆𑀭 𑀘𑀻𑀯𑀭𑀁 𑀉𑀤𑁆𑀤𑀺𑀲𑁆𑀲 𑀞𑀸𑀦𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀤𑁆𑀯𑀻𑀲𑀼 𑀘𑁄𑀤𑀦𑀸𑀝𑁆𑀞𑀸𑀦𑁂𑀲𑀼.

𑀓𑀺𑀁 𑀧𑀦 𑀲𑀩𑁆𑀩𑀓𑀧𑁆𑀧𑀺𑀬𑀓𑀸𑀭𑀓𑁂𑀲𑀼 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁩𑁮-𑁫𑁩𑁯; 𑀯𑀺. 𑀲𑀗𑁆𑀕. 𑀅𑀝𑁆𑀞. 𑁬𑁫) 𑀏𑀯𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺? 𑀦 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀅𑀬𑀜𑁆𑀳𑀺 𑀓𑀧𑁆𑀧𑀺𑀬𑀓𑀸𑀭𑀓𑁄 𑀦𑀸𑀫 𑀲𑀗𑁆𑀔𑁂𑀧𑀢𑁄 𑀤𑀼𑀯𑀺𑀥𑁄 𑀦𑀺𑀤𑁆𑀤𑀺𑀝𑁆𑀞𑁄 𑀘 𑀅𑀦𑀺𑀤𑁆𑀤𑀺𑀝𑁆𑀞𑁄 𑀘. 𑀢𑀢𑁆𑀣 𑀘 𑀦𑀺𑀤𑁆𑀤𑀺𑀝𑁆𑀞𑁄 𑀤𑀼𑀯𑀺𑀥𑁄 𑀪𑀺𑀓𑁆𑀔𑀼𑀦𑀸 𑀦𑀺𑀤𑁆𑀤𑀺𑀝𑁆𑀞𑁄, 𑀤𑀽𑀢𑁂𑀦 𑀦𑀺𑀤𑁆𑀤𑀺𑀝𑁆𑀞𑁄𑀢𑀺. 𑀅𑀦𑀺𑀤𑁆𑀤𑀺𑀝𑁆𑀞𑁄𑀧𑀺 𑀤𑀼𑀯𑀺𑀥𑁄 𑀫𑀼𑀔𑀯𑁂𑀯𑀝𑀺𑀓𑀓𑀧𑁆𑀧𑀺𑀬𑀓𑀸𑀭𑀓𑁄, 𑀧𑀭𑀫𑁆𑀫𑀼𑀔𑀓𑀧𑁆𑀧𑀺𑀬𑀓𑀸𑀭𑀓𑁄𑀢𑀺. 𑀢𑁂𑀲𑀼 𑀪𑀺𑀓𑁆𑀔𑀼𑀦𑀸 𑀦𑀺𑀤𑁆𑀤𑀺𑀝𑁆𑀞𑁄 𑀲𑀫𑁆𑀫𑀼𑀔𑀸𑀲𑀫𑁆𑀫𑀼𑀔𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺, 𑀢𑀣𑀸 𑀤𑀽𑀢𑁂𑀦 𑀦𑀺𑀤𑁆𑀤𑀺𑀝𑁆𑀞𑁄𑀧𑀺.

𑀓𑀣𑀁? 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼𑀲𑁆𑀲 𑀘𑀻𑀯𑀭𑀢𑁆𑀣𑀸𑀬 𑀤𑀽𑀢𑁂𑀦 𑀅𑀓𑀧𑁆𑀧𑀺𑀬𑀯𑀢𑁆𑀣𑀼𑀁 𑀧𑀳𑀺𑀡𑀢𑀺, 𑀤𑀽𑀢𑁄 𑀘 𑀢𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀇𑀤𑀁, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑁂𑀦 𑀢𑀼𑀫𑁆𑀳𑀸𑀓𑀁 𑀘𑀻𑀯𑀭𑀢𑁆𑀣𑀸𑀬 𑀧𑀳𑀺𑀢𑀁, 𑀕𑀡𑁆𑀳𑀣 𑀦’’𑀦𑁆𑀢𑀺 𑀯𑀤𑀢𑀺. 𑀪𑀺𑀓𑁆𑀔𑀼 ‘‘𑀇𑀤𑀁 𑀦 𑀓𑀧𑁆𑀧𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀽𑀢𑁄 ‘‘𑀅𑀢𑁆𑀣𑀺 𑀧𑀦 𑀢𑁂, 𑀪𑀦𑁆𑀢𑁂, 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄’’𑀢𑀺 𑀧𑀼𑀘𑁆𑀙𑀢𑀺, 𑀧𑀼𑀜𑁆𑀜𑀢𑁆𑀣𑀺𑀓𑁂𑀳𑀺 𑀘 𑀉𑀧𑀸𑀲𑀓𑁂𑀳𑀺 ‘‘𑀪𑀺𑀓𑁆𑀔𑀽𑀦𑀁 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁄𑀣𑀸’’𑀢𑀺 𑀆𑀡𑀢𑁆𑀢𑀸 𑀯𑀸 𑀪𑀺𑀓𑁆𑀔𑀽𑀦𑀁 𑀯𑀸 𑀲𑀦𑁆𑀤𑀺𑀝𑁆𑀞𑀸 𑀲𑀫𑁆𑀪𑀢𑁆𑀢𑀸 𑀓𑁂𑀘𑀺 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀅𑀜𑁆𑀜𑀢𑀭𑁄 𑀢𑀲𑁆𑀫𑀺𑀁 𑀔𑀡𑁂 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀪𑀺𑀓𑁆𑀔𑀼 𑀢𑀁 𑀦𑀺𑀤𑁆𑀤𑀺𑀲𑀢𑀺 ‘‘𑀅𑀬𑀁 𑀪𑀺𑀓𑁆𑀔𑀽𑀦𑀁 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄’’𑀢𑀺. 𑀤𑀽𑀢𑁄 𑀢𑀲𑁆𑀲 𑀳𑀢𑁆𑀣𑁂 𑀅𑀓𑀧𑁆𑀧𑀺𑀬𑀯𑀢𑁆𑀣𑀼𑀁 𑀤𑀢𑁆𑀯𑀸 ‘‘𑀣𑁂𑀭𑀲𑁆𑀲 𑀘𑀻𑀯𑀭𑀁 𑀓𑀺𑀡𑀺𑀢𑁆𑀯𑀸 𑀤𑁂𑀳𑀻’’𑀢𑀺 𑀕𑀘𑁆𑀙𑀢𑀺, 𑀅𑀬𑀁 𑀪𑀺𑀓𑁆𑀔𑀼𑀦𑀸 𑀲𑀫𑁆𑀫𑀼𑀔𑀸𑀦𑀺𑀤𑁆𑀤𑀺𑀝𑁆𑀞𑁄.

𑀦𑁄 𑀘𑁂 𑀪𑀺𑀓𑁆𑀔𑀼𑀲𑁆𑀲 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁩𑁭; 𑀯𑀺. 𑀲𑀗𑁆𑀕. 𑀅𑀝𑁆𑀞. 𑁬𑁫) 𑀲𑀦𑁆𑀢𑀺𑀓𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀅𑀧𑀺𑀘 𑀔𑁄 𑀪𑀺𑀓𑁆𑀔𑀼 𑀦𑀺𑀤𑁆𑀤𑀺𑀲𑀢𑀺 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀕𑀸𑀫𑁂 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀽𑀦𑀁 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄’’𑀢𑀺. 𑀲𑁄 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑁂 𑀅𑀓𑀧𑁆𑀧𑀺𑀬𑀯𑀢𑁆𑀣𑀼𑀁 𑀤𑀢𑁆𑀯𑀸 ‘‘𑀣𑁂𑀭𑀲𑁆𑀲 𑀘𑀻𑀯𑀭𑀁 𑀓𑀺𑀡𑀺𑀢𑁆𑀯𑀸 𑀤𑀤𑁂𑀬𑁆𑀬𑀸𑀲𑀻’’𑀢𑀺 𑀆𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀅𑀬𑀫𑁂𑀓𑁄 𑀪𑀺𑀓𑁆𑀔𑀼𑀦𑀸 𑀅𑀲𑀫𑁆𑀫𑀼𑀔𑀸𑀦𑀺𑀤𑁆𑀤𑀺𑀝𑁆𑀞𑁄.

𑀦 𑀳𑁂𑀯 𑀔𑁄 𑀲𑁄 𑀤𑀽𑀢𑁄 𑀅𑀢𑁆𑀢𑀦𑀸 𑀆𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀢𑀺, 𑀅𑀧𑀺𑀘 𑀔𑁄 𑀅𑀜𑁆𑀜𑀁 𑀧𑀳𑀺𑀡𑀢𑀺 ‘‘𑀤𑀺𑀦𑁆𑀦𑀁 𑀫𑀬𑀸, 𑀪𑀦𑁆𑀢𑁂, 𑀢𑀲𑁆𑀲 𑀳𑀢𑁆𑀣𑁂 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁, 𑀘𑀻𑀯𑀭𑀁 𑀕𑀡𑁆𑀳𑁂𑀬𑁆𑀬𑀸𑀣𑀸’’𑀢𑀺, 𑀅𑀬𑀁 𑀤𑀼𑀢𑀺𑀬𑁄 𑀪𑀺𑀓𑁆𑀔𑀼𑀦𑀸 𑀅𑀲𑀫𑁆𑀫𑀼𑀔𑀸𑀦𑀺𑀤𑁆𑀤𑀺𑀝𑁆𑀞𑁄.

𑀦 𑀳𑁂𑀯 𑀔𑁄 𑀅𑀜𑁆𑀜𑀁 𑀧𑀳𑀺𑀡𑀢𑀺, 𑀅𑀧𑀺𑀘 𑀔𑁄 𑀕𑀘𑁆𑀙𑀦𑁆𑀢𑁄𑀯 𑀪𑀺𑀓𑁆𑀔𑀼𑀁 𑀯𑀤𑀢𑀺 ‘‘𑀅𑀳𑀁 𑀢𑀲𑁆𑀲 𑀳𑀢𑁆𑀣𑁂 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀤𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀘𑀻𑀯𑀭𑀁 𑀕𑀡𑁆𑀳𑁂𑀬𑁆𑀬𑀸𑀣𑀸’’𑀢𑀺, 𑀅𑀬𑀁 𑀢𑀢𑀺𑀬𑁄 𑀪𑀺𑀓𑁆𑀔𑀼𑀦𑀸 𑀅𑀲𑀫𑁆𑀫𑀼𑀔𑀸𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀏𑀯𑀁 𑀏𑀓𑁄 𑀲𑀫𑁆𑀫𑀼𑀔𑀸𑀦𑀺𑀤𑁆𑀤𑀺𑀝𑁆𑀞𑁄 𑀢𑀬𑁄 𑀅𑀲𑀫𑁆𑀫𑀼𑀔𑀸𑀦𑀺𑀤𑁆𑀤𑀺𑀝𑁆𑀞𑀸𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀼𑀦𑀸 𑀦𑀺𑀤𑁆𑀤𑀺𑀝𑁆𑀞𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀸 𑀦𑀸𑀫. 𑀏𑀢𑁂𑀲𑀼 𑀇𑀫𑀲𑁆𑀫𑀺𑀁 𑀭𑀸𑀚𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁.

𑀅𑀧𑀭𑁄 𑀪𑀺𑀓𑁆𑀔𑀼 𑀧𑀼𑀭𑀺𑀫𑀦𑀬𑁂𑀦𑁂𑀯 𑀤𑀽𑀢𑁂𑀦 𑀧𑀼𑀘𑁆𑀙𑀺𑀢𑁄 𑀦𑀢𑁆𑀣𑀺𑀢𑀸𑀬 𑀯𑀸 𑀅𑀯𑀺𑀘𑀸𑀭𑁂𑀢𑀼𑀓𑀸𑀫𑀢𑀸𑀬 𑀯𑀸 ‘‘𑀦𑀢𑁆𑀣𑀫𑁆𑀳𑀸𑀓𑀁 𑀓𑀧𑁆𑀧𑀺𑀬𑀓𑀸𑀭𑀓𑁄’’𑀢𑀺 𑀯𑀤𑀢𑀺, 𑀢𑀲𑁆𑀫𑀺𑀜𑁆𑀘 𑀔𑀡𑁂 𑀓𑁄𑀘𑀺 𑀫𑀦𑀼𑀲𑁆𑀲𑁄 𑀆𑀕𑀘𑁆𑀙𑀢𑀺, 𑀤𑀽𑀢𑁄 𑀢𑀲𑁆𑀲 𑀳𑀢𑁆𑀣𑁂 𑀅𑀓𑀧𑁆𑀧𑀺𑀬𑀯𑀢𑁆𑀣𑀼𑀁 𑀤𑀢𑁆𑀯𑀸 ‘‘𑀇𑀫𑀲𑁆𑀲 𑀳𑀢𑁆𑀣𑀢𑁄 𑀘𑀻𑀯𑀭𑀁 𑀕𑀡𑁆𑀳𑁂𑀬𑁆𑀬𑀸𑀣𑀸’’𑀢𑀺 𑀯𑀢𑁆𑀯𑀸 𑀕𑀘𑁆𑀙𑀢𑀺, 𑀅𑀬𑀁 𑀤𑀽𑀢𑁂𑀦 𑀲𑀫𑁆𑀫𑀼𑀔𑀸𑀦𑀺𑀤𑁆𑀤𑀺𑀝𑁆𑀞𑁄.

𑀅𑀧𑀭𑁄 𑀤𑀽𑀢𑁄 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀅𑀢𑁆𑀢𑀦𑀸 𑀅𑀪𑀺𑀭𑀼𑀘𑀺𑀢𑀲𑁆𑀲 𑀓𑀲𑁆𑀲𑀘𑀺 𑀳𑀢𑁆𑀣𑁂 𑀅𑀓𑀧𑁆𑀧𑀺𑀬𑀯𑀢𑁆𑀣𑀼𑀁 𑀤𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀆𑀕𑀦𑁆𑀢𑁆𑀯𑀸 𑀯𑀸 𑀆𑀭𑁄𑀘𑁂𑀢𑀺, 𑀅𑀜𑁆𑀜𑀁 𑀯𑀸 𑀧𑀳𑀺𑀡𑀢𑀺, ‘‘𑀅𑀳𑀁 𑀅𑀲𑀼𑀓𑀲𑁆𑀲 𑀦𑀸𑀫 𑀳𑀢𑁆𑀣𑁂 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀤𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀘𑀻𑀯𑀭𑀁 𑀕𑀡𑁆𑀳𑁂𑀬𑁆𑀬𑀸𑀣𑀸’’𑀢𑀺 𑀯𑀢𑁆𑀯𑀸 𑀯𑀸 𑀕𑀘𑁆𑀙𑀢𑀺, 𑀅𑀬𑀁 𑀢𑀢𑀺𑀬𑁄 𑀤𑀽𑀢𑁂𑀦 𑀅𑀲𑀫𑁆𑀫𑀼𑀔𑀸𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀏𑀯𑀁 𑀏𑀓𑁄 𑀲𑀫𑁆𑀫𑀼𑀔𑀸𑀦𑀺𑀤𑁆𑀤𑀺𑀝𑁆𑀞𑁄, 𑀢𑀬𑁄 𑀅𑀲𑀫𑁆𑀫𑀼𑀔𑀸𑀦𑀺𑀤𑁆𑀤𑀺𑀝𑁆𑀞𑀸𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀤𑀽𑀢𑁂𑀦 𑀦𑀺𑀤𑁆𑀤𑀺𑀝𑁆𑀞𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀸 𑀦𑀸𑀫. 𑀏𑀢𑁂𑀲𑀼 𑀫𑁂𑀡𑁆𑀟𑀓𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁.

𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀸 𑀲𑀤𑁆𑀥𑀸 𑀧𑀲𑀦𑁆𑀦𑀸, 𑀢𑁂 𑀓𑀧𑁆𑀧𑀺𑀬𑀓𑀸𑀭𑀓𑀸𑀦𑀁 𑀳𑀢𑁆𑀣𑁂 𑀳𑀺𑀭𑀜𑁆𑀜𑀁 𑀉𑀧𑀦𑀺𑀓𑁆𑀔𑀺𑀧𑀦𑁆𑀢𑀺 ‘𑀇𑀫𑀺𑀦𑀸 𑀅𑀬𑁆𑀬𑀲𑁆𑀲 𑀬𑀁 𑀓𑀧𑁆𑀧𑀺𑀬𑀁, 𑀢𑀁 𑀤𑁂𑀣𑀸’𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀁 𑀢𑀢𑁄 𑀓𑀧𑁆𑀧𑀺𑀬𑀁, 𑀢𑀁 𑀲𑀸𑀤𑀺𑀢𑀼𑀁, 𑀦 𑀢𑁆𑀯𑁂𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀚𑀸𑀢𑀭𑀽𑀧𑀭𑀚𑀢𑀁 𑀲𑀸𑀤𑀺𑀢𑀩𑁆𑀩𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀦𑁆𑀢𑀺 𑀯𑀤𑀸𑀫𑀻’’𑀢𑀺 (𑀫𑀳𑀸𑀯. 𑁨𑁯𑁯).

𑀏𑀢𑁆𑀣 𑀘 𑀘𑁄𑀤𑀦𑀸𑀬 𑀧𑀭𑀺𑀫𑀸𑀡𑀁 𑀦𑀢𑁆𑀣𑀺. 𑀫𑀽𑀮𑀁 𑀅𑀲𑀸𑀤𑀺𑀬𑀦𑁆𑀢𑁂𑀦 𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀫𑁆𑀧𑀺 𑀘𑁄𑀤𑀦𑀸𑀬 𑀯𑀸 𑀞𑀸𑀦𑁂𑀦 𑀯𑀸 𑀓𑀧𑁆𑀧𑀺𑀬𑀪𑀡𑁆𑀟𑀁 𑀲𑀸𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀦𑁄 𑀘𑁂 𑀤𑁂𑀢𑀺, 𑀅𑀜𑁆𑀜𑀁 𑀓𑀧𑁆𑀧𑀺𑀬𑀓𑀸𑀭𑀓𑀁 𑀞𑀧𑁂𑀢𑁆𑀯𑀸𑀧𑀺 𑀆𑀳𑀭𑀸𑀧𑁂𑀢𑀩𑁆𑀩𑀁. 𑀲𑀘𑁂 𑀇𑀘𑁆𑀙𑀢𑀺, 𑀫𑀽𑀮𑀲𑀸𑀫𑀺𑀓𑀸𑀦𑀫𑁆𑀧𑀺 𑀓𑀣𑁂𑀢𑀩𑁆𑀩𑀁. 𑀦𑁄 𑀘𑁂 𑀇𑀘𑁆𑀙𑀢𑀺, 𑀦 𑀓𑀣𑁂𑀢𑀩𑁆𑀩𑀁.

𑀅𑀧𑀭𑁄 𑀪𑀺𑀓𑁆𑀔𑀼 𑀧𑀼𑀭𑀺𑀫𑀦𑀬𑁂𑀦𑁂𑀯 𑀤𑀽𑀢𑁂𑀦 𑀧𑀼𑀘𑁆𑀙𑀺𑀢𑁄 ‘‘𑀦𑀢𑁆𑀣𑀫𑁆𑀳𑀸𑀓𑀁 𑀓𑀧𑁆𑀧𑀺𑀬𑀓𑀸𑀭𑀓𑁄’’𑀢𑀺 𑀯𑀤𑀢𑀺, 𑀢𑀤𑀜𑁆𑀜𑁄 𑀲𑀫𑀻𑀧𑁂 𑀞𑀺𑀢𑁄 𑀲𑀼𑀢𑁆𑀯𑀸 ‘‘𑀆𑀳𑀭, 𑀪𑁄, 𑀅𑀳𑀁 𑀅𑀬𑁆𑀬𑀲𑁆𑀲 𑀘𑀻𑀯𑀭𑀁 𑀘𑁂𑀢𑀸𑀧𑁂𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺. 𑀤𑀽𑀢𑁄 ‘‘𑀳𑀦𑁆𑀤, 𑀪𑁄, 𑀤𑀤𑁂𑀬𑁆𑀬𑀸𑀲𑀻’’𑀢𑀺 𑀢𑀲𑁆𑀲 𑀳𑀢𑁆𑀣𑁂 𑀤𑀢𑁆𑀯𑀸 𑀪𑀺𑀓𑁆𑀔𑀼𑀲𑁆𑀲 𑀅𑀦𑀸𑀭𑁄𑀘𑁂𑀢𑁆𑀯𑀸𑀯 𑀕𑀘𑁆𑀙𑀢𑀺, 𑀅𑀬𑀁 𑀫𑀼𑀔𑀯𑁂𑀯𑀝𑀺𑀓𑀓𑀧𑁆𑀧𑀺𑀬𑀓𑀸𑀭𑀓𑁄.

𑀅𑀧𑀭𑁄 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁩𑁮-𑁫𑁩𑁯; 𑀯𑀺. 𑀲𑀗𑁆𑀕. 𑀅𑀝𑁆𑀞. 𑁬𑁫) 𑀪𑀺𑀓𑁆𑀔𑀼𑀦𑁄 𑀉𑀧𑀝𑁆𑀞𑀸𑀓𑀲𑁆𑀲 𑀯𑀸 𑀅𑀜𑁆𑀜𑀲𑁆𑀲 𑀯𑀸 𑀳𑀢𑁆𑀣𑁂 𑀅𑀓𑀧𑁆𑀧𑀺𑀬𑀯𑀢𑁆𑀣𑀼𑀁 𑀤𑀢𑁆𑀯𑀸 ‘‘𑀣𑁂𑀭𑀲𑁆𑀲 𑀘𑀻𑀯𑀭𑀁 𑀤𑀤𑁂𑀬𑁆𑀬𑀸𑀲𑀻’’𑀢𑀺 𑀏𑀢𑁆𑀢𑁄𑀯 𑀧𑀓𑁆𑀓𑀫𑀢𑀺, 𑀅𑀬𑀁 𑀧𑀭𑀫𑁆𑀫𑀼𑀔𑀓𑀧𑁆𑀧𑀺𑀬𑀓𑀸𑀭𑀓𑁄𑀢𑀺 𑀇𑀫𑁂 𑀤𑁆𑀯𑁂 𑀅𑀦𑀺𑀤𑁆𑀤𑀺𑀝𑁆𑀞𑀓𑀧𑁆𑀧𑀺𑀬𑀓𑀸𑀭𑀓𑀸 𑀦𑀸𑀫. 𑀏𑀢𑁂𑀲𑀼 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑁂𑀲𑀼 𑀯𑀺𑀬 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁.

𑀲𑀘𑁂 𑀲𑀬𑀫𑁂𑀯 𑀘𑀻𑀯𑀭𑀁 𑀆𑀦𑁂𑀢𑁆𑀯𑀸 𑀤𑁂𑀦𑁆𑀢𑀺, 𑀕𑀳𑁂𑀢𑀩𑁆𑀩𑀁. 𑀦𑁄 𑀘𑁂, 𑀦 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀸. 𑀢𑁂𑀦𑀸𑀳 ‘‘𑀲𑀘𑁂’’𑀢𑀺𑀆𑀤𑀺. 𑀓𑀧𑁆𑀧𑀺𑀬𑀓𑀸𑀭𑀓𑁂𑀢𑀺 𑀲𑀫𑁆𑀫𑀼𑀔𑀸𑀲𑀫𑁆𑀫𑀼𑀔𑀯𑀲𑁂𑀦 𑀘𑀢𑁆𑀢𑀸𑀭𑁄 𑀓𑀧𑁆𑀧𑀺𑀬𑀓𑀸𑀭𑀓𑁂𑀢𑀺 𑀅𑀢𑁆𑀣𑁄. ‘‘𑀤𑀸𑀬𑀓𑁄 𑀲𑀬𑀫𑁂𑀯𑀸’’𑀢𑀺 𑀇𑀫𑀺𑀦𑀸 𑀪𑀺𑀓𑁆𑀔𑀼𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀦 𑀤𑀽𑀢𑀁. 𑀢𑀲𑁆𑀫𑀸 𑀤𑀽𑀢𑁂𑀦 𑀦𑀺𑀤𑁆𑀤𑀺𑀝𑁆𑀞𑁄𑀧𑀺 𑀬𑀣𑀸𑀭𑀼𑀘𑀺 𑀘𑁄𑀤𑁂𑀢𑀼𑀁 𑀯𑀝𑁆𑀝𑀢𑀺. 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀲𑀬𑀫𑁂𑀯 𑀓𑀧𑁆𑀧𑀺𑀬𑀓𑀸𑀭𑀓𑀢𑁆𑀢𑀁 𑀉𑀧𑀕𑀢𑁄𑀢𑀺 𑀫𑀼𑀔𑀯𑁂𑀯𑀝𑀺𑀓𑀓𑀧𑁆𑀧𑀺𑀬𑀓𑀸𑀭𑀓𑁄. 𑀏𑀯𑀦𑁆𑀢𑀺 ‘‘𑀏𑀲𑁄 𑀔𑁄’’𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑁂𑀦 𑀆𑀓𑀸𑀭𑁂𑀦. 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺 𑀲𑀗𑁆𑀔𑁂𑀧𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀯𑀼𑀢𑁆𑀢𑀘𑁄𑀤𑀦𑀸𑀝𑁆𑀞𑀸𑀦𑀧𑀭𑀺𑀫𑀸𑀡𑀢𑁄𑀢𑀺 𑀯𑀼𑀢𑁆𑀢𑀘𑁄𑀤𑀦𑀸𑀧𑀭𑀺𑀫𑀸𑀡𑀢𑁄 𑀘 𑀯𑀼𑀢𑁆𑀢𑀝𑁆𑀞𑀸𑀦𑀧𑀭𑀺𑀫𑀸𑀡𑀢𑁄 𑀘. 𑀲𑀦𑁆𑀢𑀺𑀓𑀦𑁆𑀢𑀺 𑀲𑀫𑀻𑀧𑀁. 𑀢𑀢𑁆𑀣𑀸𑀢𑀺 𑀏𑀢𑁆𑀣 𑀓𑀣𑀫𑀬𑀫𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀲𑀫𑀻𑀧𑀢𑁆𑀣𑁂 𑀳𑀺 𑀇𑀤𑀁 𑀪𑀼𑀫𑁆𑀫𑀯𑀘𑀦’’𑀦𑁆𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀕𑀗𑁆𑀕𑀸𑀬𑀁 𑀕𑁄𑀬𑀽𑀣𑀸𑀦𑀺 𑀘𑀭𑀦𑁆𑀢𑀺, 𑀓𑀽𑀧𑁂 𑀕𑀕𑁆𑀕𑀓𑀽𑀮’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀬𑀲𑁆𑀫𑀸 𑀲𑀫𑀻𑀧𑀸𑀥𑀸𑀭𑁂 𑀇𑀤𑀁 𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀺𑀯𑀘𑀦𑀁, 𑀢𑀲𑁆𑀫𑀸 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀻𑀢𑀺. 𑀏𑀯𑀁 𑀅𑀓𑀭𑁄𑀦𑁆𑀢𑁄𑀢𑀺 𑀲𑀸𑀫𑀁 𑀯𑀸 𑀅𑀕𑀘𑁆𑀙𑀦𑁆𑀢𑁄, 𑀤𑀽𑀢𑀁 𑀯𑀸 𑀅𑀧𑀸𑀳𑁂𑀦𑁆𑀢𑁄.

𑀅𑀚𑁆𑀚𑀡𑁆𑀳𑁄, 𑀪𑀦𑁆𑀢𑁂, 𑀆𑀕𑀫𑁂𑀳𑀻𑀢𑀺, 𑀪𑀦𑁆𑀢𑁂, 𑀅𑀚𑁆𑀚 𑀏𑀓𑀤𑀺𑀯𑀲𑀁 𑀅𑀫𑁆𑀳𑀸𑀓𑀁 𑀢𑀺𑀝𑁆𑀞, 𑀅𑀥𑀺𑀯𑀸𑀲𑁂𑀳𑀻𑀢𑀺 𑀅𑀢𑁆𑀣𑁄. 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀢𑀺𑀭𑁂𑀓𑁂𑀲𑀼 𑀘𑁄𑀤𑀦𑀸𑀝𑁆𑀞𑀸𑀦𑁂𑀲𑀼 𑀅𑀢𑀺𑀭𑁂𑀓𑀲𑀜𑁆𑀜𑀺𑀯𑁂𑀫𑀢𑀺𑀓𑀊𑀦𑀓𑀲𑀜𑁆𑀜𑀻𑀦𑀁 𑀯𑀲𑁂𑀦 𑀢𑀻𑀡𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀢𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑀦𑀸𑀬 𑀙𑀓𑁆𑀔𑀢𑁆𑀢𑀼𑀁 𑀞𑀸𑀦𑁂𑀦, 𑀊𑀦𑀓𑀢𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑀦𑀸𑀬 𑀊𑀦𑀓𑀘𑁆𑀙𑀓𑁆𑀔𑀢𑁆𑀢𑀼𑀁 𑀞𑀸𑀦𑁂𑀦 𑀮𑀤𑁆𑀥𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀅𑀧𑁆𑀧𑀺𑀢𑀢𑀸𑀢𑀺 𑀧𑀢𑀺𑀝𑁆𑀞𑀸𑀧𑀺𑀢𑀢𑀸, ‘‘𑀲𑀜𑁆𑀜𑀢𑁆𑀢𑁄 𑀲𑁄 𑀫𑀬𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁫𑁩𑁮) 𑀓𑀣𑀺𑀢𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀭𑀸𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀻𑀯𑀭𑀯𑀕𑁆𑀕𑁄 𑀧𑀞𑀫𑁄.