𑁨. 𑀏𑀴𑀓𑀮𑁄𑀫𑀯𑀕𑁆𑀕𑁄

𑁧. 𑀓𑁄𑀲𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀓𑁄𑀲𑀺𑀬𑀫𑀺𑀲𑁆𑀲𑀓𑀦𑁆𑀢𑀺 ‘‘𑀓𑁄𑀲𑀓𑀸𑀭𑀓𑀸’’𑀢𑀺 𑀮𑀤𑁆𑀥𑀯𑁄𑀳𑀸𑀭𑀸𑀦𑀁 𑀧𑀸𑀡𑀓𑀸𑀦𑀁 𑀓𑁄𑀲𑀢𑁄 𑀦𑀺𑀩𑁆𑀩𑀢𑁆𑀢𑀁 𑀅𑀁𑀲𑀼 𑀓𑁄𑀲𑀺𑀬𑀁, 𑀢𑁂𑀦 𑀫𑀺𑀲𑁆𑀲𑀁 𑀓𑁄𑀲𑀺𑀬𑀫𑀺𑀲𑁆𑀲𑀓𑀁. 𑀢𑁂𑀦 𑀧𑀦 𑀓𑁄𑀲𑀺𑀬𑁂𑀦 𑀅𑀧𑁆𑀧𑀓𑁂𑀦𑀸𑀧𑀺 𑀫𑀺𑀲𑁆𑀲𑀺𑀢𑀁 𑀓𑁄𑀲𑀺𑀬𑀫𑀺𑀲𑁆𑀲𑀓𑀫𑁂𑀯, 𑀦 𑀇𑀤𑀁 𑀅𑀩𑁆𑀩𑁄𑀳𑀸𑀭𑀺𑀓𑀦𑁆𑀢𑀺 𑀯𑀢𑁆𑀢𑀼𑀁 𑀮𑀩𑁆𑀪𑀸. 𑀢𑁂𑀦𑀸𑀳 ‘‘𑀏𑀓𑁂𑀦𑀸𑀧𑀻’’𑀢𑀺𑀆𑀤𑀺. 𑀓𑁄𑀲𑀺𑀬𑀁𑀲𑀼𑀦𑀸𑀢𑀺 𑀓𑀺𑀫𑀺𑀓𑁄𑀲𑀲𑀫𑁆𑀪𑀯𑁂𑀦 𑀅𑀁𑀲𑀼𑀦𑀸. ‘‘𑀅𑀦𑁆𑀢𑀫𑀲𑁄’’𑀢𑀺𑀆𑀤𑀺𑀓𑀁 𑀧𑀦 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀘𑀺𑀢𑁆𑀢𑀓𑀢𑁆𑀢𑀸 𑀯𑀼𑀢𑁆𑀢𑀁. 𑀲𑀦𑁆𑀣𑀢𑀁 𑀦𑀸𑀫 𑀲𑀦𑁆𑀣𑀭𑀺𑀢𑁆𑀯𑀸 𑀓𑀢𑀁 𑀅𑀯𑀸𑀬𑀺𑀫𑀁. 𑀢𑁂𑀦𑀸𑀳 ‘‘𑀲𑀫𑁂 𑀪𑀽𑀫𑀺𑀪𑀸𑀕𑁂’’𑀢𑀺𑀆𑀤𑀺. 𑀇𑀫𑀲𑁆𑀲𑁂𑀯 𑀯𑀘𑀦𑀲𑁆𑀲 𑀅𑀦𑀼𑀲𑀸𑀭𑁂𑀦𑀸𑀢𑀺 𑀇𑀫𑀲𑁆𑀲𑁂𑀯 𑀧𑀞𑀫𑀲𑀦𑁆𑀣𑀢𑀲𑁆𑀲 𑀦𑀺𑀲𑁆𑀲𑀚𑁆𑀚𑀦𑀯𑀺𑀥𑀸𑀦𑀯𑀘𑀦𑀸𑀦𑀼𑀲𑀸𑀭𑁂𑀦. 𑀲𑀩𑁆𑀩𑀲𑀦𑁆𑀣𑀢𑀦𑁆𑀢𑀺 𑀲𑀩𑁆𑀩𑀲𑀦𑁆𑀣𑀢𑀦𑀺𑀲𑁆𑀲𑀚𑁆𑀚𑀦𑀯𑀺𑀥𑀸𑀦𑀁.

𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀓𑀸𑀭𑀸𑀧𑀦𑁂 𑀤𑀼𑀓𑁆𑀓𑀝𑀢𑁆𑀢𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀓𑀸𑀭𑀸𑀧𑀦𑀯𑀲𑁂𑀦 ‘‘𑀲𑀸𑀡𑀢𑁆𑀢𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀢𑀦𑀸 𑀯𑀺𑀧𑁆𑀧𑀓𑀢𑀧𑀭𑀺𑀬𑁄𑀲𑀸𑀧𑀦𑀦𑀬𑁂𑀦𑀸𑀢𑀺 ‘‘𑀅𑀢𑁆𑀢𑀦𑀸 𑀯𑀺𑀧𑁆𑀧𑀓𑀢𑀁 𑀅𑀢𑁆𑀢𑀦𑀸 𑀧𑀭𑀺𑀬𑁄𑀲𑀸𑀧𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀢𑁆𑀢𑀦𑀸 𑀯𑀺𑀧𑁆𑀧𑀓𑀢𑀁 𑀧𑀭𑁂𑀳𑀺 𑀧𑀭𑀺𑀬𑁄𑀲𑀸𑀧𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀧𑀭𑁂𑀳𑀺 𑀯𑀺𑀧𑁆𑀧𑀓𑀢𑀁 𑀅𑀢𑁆𑀢𑀦𑀸 𑀧𑀭𑀺𑀬𑁄𑀲𑀸𑀧𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀧𑀭𑁂𑀳𑀺 𑀯𑀺𑀧𑁆𑀧𑀓𑀢𑀁 𑀧𑀭𑁂𑀳𑀺 𑀧𑀭𑀺𑀬𑁄𑀲𑀸𑀧𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀭𑀸. 𑁫𑁪𑁫) 𑀇𑀫𑀺𑀦𑀸 𑀦𑀬𑁂𑀦. 𑀯𑀺𑀢𑀸𑀦𑀸𑀤𑀺𑀓𑀭𑀡𑁂𑀢𑀺 𑀯𑀺𑀢𑀸𑀦𑀪𑀽𑀫𑀢𑁆𑀣𑀭𑀡𑀲𑀸𑀡𑀺𑀧𑀸𑀓𑀸𑀭𑀪𑀺𑀲𑀺𑀩𑀺𑀩𑁆𑀩𑁄𑀳𑀦𑀓𑀭𑀡𑁂. 𑀬𑀣𑀸 𑀘 𑀯𑀺𑀢𑀸𑀦𑀸𑀤𑀺𑀓𑀭𑀡𑁂, 𑀏𑀯𑀁 𑀢𑁂𑀦𑀸𑀓𑀸𑀭𑁂𑀦 𑀧𑀭𑀺𑀪𑁄𑀕𑁂𑀧𑀺 𑀅𑀦𑀸𑀧𑀢𑁆𑀢𑀺. ‘‘𑀅𑀯𑀸𑀬𑀺𑀫’’𑀦𑁆𑀢𑀺 (𑀧𑀸𑀭𑀸. 𑁫𑁪𑁪) 𑀯𑀼𑀢𑁆𑀢𑀢𑁆𑀢𑀸 𑀯𑀸𑀬𑀺𑀢𑁆𑀯𑀸 𑀓𑀭𑁄𑀦𑁆𑀢𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀺.

𑀓𑁄𑀲𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀼𑀤𑁆𑀥𑀓𑀸𑀴𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀓𑀸𑀴𑀓𑀸𑀦𑀦𑁆𑀢𑀺 𑀲𑀪𑀸𑀯𑁂𑀦 𑀯𑀸 𑀭𑀚𑀦𑁂𑀦 𑀯𑀸 𑀓𑀸𑀴𑀓𑀸𑀦𑀁. 𑀬𑀣𑀸𑀳 ‘‘𑀓𑀸𑀴𑀓𑀁 𑀦𑀸𑀫 𑀤𑁆𑀯𑁂 𑀓𑀸𑀴𑀓𑀸𑀦𑀺 𑀚𑀸𑀢𑀺𑀬𑀸 𑀓𑀸𑀴𑀓𑀁 𑀯𑀸 𑀭𑀚𑀦𑀓𑀸𑀴𑀓𑀁 𑀯𑀸’’𑀢𑀺. 𑀅𑀜𑁆𑀜𑁂𑀳𑀺 𑀅𑀫𑀺𑀲𑁆𑀲𑀺𑀢𑀸𑀦𑀦𑁆𑀢𑀺 𑀅𑀜𑁆𑀜𑁂𑀳𑀺 𑀅𑀫𑀺𑀲𑁆𑀲𑀺𑀢𑀓𑀸𑀴𑀓𑀸𑀦𑀦𑁆𑀢𑀺 𑀅𑀢𑁆𑀣𑁄. ‘‘𑀬𑀣𑀸 𑀧𑀞𑀫𑁂 ‘𑀏𑀓𑁂𑀦𑀸𑀧𑀺 𑀓𑁄𑀲𑀺𑀬𑀁𑀲𑀼𑀦𑀸’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀓𑁄𑀲𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁, 𑀢𑀣𑀸 𑀇𑀥𑀸𑀧𑀺 ‘𑀏𑀓𑁂𑀦𑀸𑀧𑀺 𑀅𑀜𑁆𑀜𑁂𑀦 𑀅𑀫𑀺𑀲𑁆𑀲𑁂𑀢𑁆𑀯𑀸’𑀢𑀺 𑀅𑀯𑀼𑀢𑁆𑀢𑀢𑁆𑀢𑀸 𑀅𑀜𑁆𑀜𑁂𑀦 𑀧𑀦 𑀫𑀺𑀲𑁆𑀲𑀓𑀪𑁄𑀕𑁂𑀧𑀺 𑀅𑀧𑀜𑁆𑀜𑀸𑀬𑀫𑀸𑀦𑀭𑀽𑀧𑀓𑀁 𑀘𑁂 ‘𑀲𑀼𑀤𑁆𑀥𑀓𑀸𑀴𑀓’𑀫𑀺𑀘𑁆𑀘𑁂𑀯 𑀯𑀼𑀘𑁆𑀘𑀢𑀻’’𑀢𑀺 (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁫𑁪𑁭) 𑀯𑀤𑀦𑁆𑀢𑀺.

𑀏𑀢𑁆𑀣 𑀘 ‘‘𑀇𑀤𑀁 𑀫𑁂, 𑀪𑀦𑁆𑀢𑁂, 𑀲𑀼𑀤𑁆𑀥𑀓𑀸𑀴𑀓𑀸𑀦𑀁 𑀏𑀴𑀓𑀮𑁄𑀫𑀸𑀦𑀁 𑀲𑀦𑁆𑀣𑀢’’𑀦𑁆𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁫𑁪𑁯) 𑀦𑀺𑀲𑁆𑀲𑀚𑁆𑀚𑀦𑀯𑀺𑀥𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀦𑁆𑀢𑀺 𑀧𑀼𑀩𑁆𑀩𑀧𑀬𑁄𑀕𑀤𑀼𑀓𑁆𑀓𑀝𑀘𑀢𑀼𑀓𑁆𑀓𑀧𑀸𑀘𑀺𑀢𑁆𑀢𑀺𑀬𑀸𑀤𑀺𑀓𑀁. 𑀅𑀗𑁆𑀕𑁂𑀲𑀼 𑀧𑀦 ‘‘𑀲𑀼𑀤𑁆𑀥𑀓𑀸𑀴𑀓𑀪𑀸𑀯𑁄’’𑀢𑀺 𑀅𑀬𑀁 𑀯𑀺𑀲𑁂𑀲𑁄.

𑀲𑀼𑀤𑁆𑀥𑀓𑀸𑀴𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀤𑁆𑀯𑁂𑀪𑀸𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀕𑀳𑁂𑀢𑀩𑁆𑀩𑀸𑀢𑀺 𑀬𑀣𑀸 𑀓𑀸𑀴𑀓𑀸 𑀅𑀥𑀺𑀓𑀸 𑀦 𑀳𑁄𑀦𑁆𑀢𑀺, 𑀢𑀣𑀸 𑀕𑀳𑁂𑀢𑀩𑁆𑀩𑀸. 𑀞𑀧𑁂𑀢𑁆𑀯𑀸 𑀘𑁂𑀢𑁆𑀣 𑀓𑀸𑀴𑀓𑀑𑀤𑀸𑀢𑁂 𑀅𑀯𑀲𑁂𑀲𑀸 𑀕𑁄𑀘𑀭𑀺𑀬𑁂𑀲𑀼𑀬𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁫𑁫𑁨) 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣 𑀘 𑀤𑁆𑀯𑁂 𑀪𑀸𑀕𑀸𑀢𑀺 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄 𑀓𑀸𑀴𑀓𑀸𑀦𑀁 𑀅𑀥𑀺𑀓𑀕𑁆𑀕𑀳𑀡𑀲𑁆𑀲 𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀲𑀺𑀓𑁆𑀔𑀸𑀧𑀤𑀲𑁆𑀲 𑀧𑀜𑁆𑀜𑀢𑁆𑀢𑀢𑁆𑀢𑀸. 𑀢𑀲𑁆𑀫𑀸 𑀓𑀸𑀴𑀓𑀸𑀦𑀁 𑀪𑀸𑀕𑀤𑁆𑀯𑀬𑀢𑁄 𑀅𑀥𑀺𑀓𑀁 𑀦 𑀯𑀝𑁆𑀝𑀢𑀺, 𑀊𑀦𑀓𑀁 𑀯𑀝𑁆𑀝𑀢𑀺. 𑀢𑁂𑀦𑀸𑀳 ‘‘𑀏𑀓𑀲𑁆𑀲𑀸𑀧𑀻’’𑀢𑀺𑀆𑀤𑀺. 𑀏𑀓𑀲𑁆𑀲𑀸𑀧𑀺 𑀓𑀸𑀴𑀓𑀮𑁄𑀫𑀲𑁆𑀲 𑀅𑀢𑀺𑀭𑁂𑀓𑀪𑀸𑀯𑁂𑀢𑀺 𑀢𑀼𑀮𑀸𑀬 𑀥𑀸𑀭𑀬𑀺𑀢𑁆𑀯𑀸 𑀞𑀧𑀺𑀢𑁂𑀲𑀼 𑀅𑀦𑁆𑀢𑀫𑀲𑁄 𑀯𑀸𑀢𑀯𑁂𑀕𑁂𑀦𑀧𑀺 𑀧𑀳𑀺𑀢𑀲𑁆𑀲 𑀏𑀓𑀲𑁆𑀲𑀸𑀧𑀺 𑀓𑀸𑀴𑀓𑀮𑁄𑀫𑀲𑁆𑀲 𑀅𑀥𑀺𑀓𑀪𑀸𑀯𑁂 𑀲𑀢𑀻𑀢𑀺 𑀅𑀢𑁆𑀣𑁄. ‘‘𑀢𑀢𑀺𑀬𑀁 𑀑𑀤𑀸𑀢𑀸𑀦𑀁, 𑀘𑀢𑀼𑀢𑁆𑀣𑀁 𑀕𑁄𑀘𑀭𑀺𑀬𑀸𑀦’’𑀦𑁆𑀢𑀺 𑀇𑀤𑀁 𑀧𑀦 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁄 𑀢𑁂𑀲𑀁 𑀅𑀥𑀺𑀓𑀕𑁆𑀕𑀳𑀡𑁂 𑀧𑀝𑀺𑀓𑁆𑀔𑁂𑀧𑀸𑀪𑀸𑀯𑀢𑁄. 𑀢𑀲𑁆𑀫𑀸 𑀢𑁂𑀲𑀁 𑀯𑀼𑀢𑁆𑀢𑀧𑁆𑀧𑀫𑀸𑀡𑀢𑁄 𑀅𑀥𑀺𑀓𑀫𑁆𑀧𑀺 𑀯𑀝𑁆𑀝𑀢𑀺.

𑀏𑀢𑁆𑀣 𑀘 ‘‘𑀇𑀤𑀁 𑀫𑁂, 𑀪𑀦𑁆𑀢𑁂, 𑀲𑀦𑁆𑀣𑀢𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀤𑁆𑀯𑁂 𑀢𑀼𑀮𑁂 𑀲𑀼𑀤𑁆𑀥𑀓𑀸𑀴𑀓𑀸𑀦𑀁 𑀏𑀴𑀓𑀮𑁄𑀫𑀸𑀦𑀁, 𑀢𑀼𑀮𑀁 𑀑𑀤𑀸𑀢𑀸𑀦𑀁, 𑀢𑀼𑀮𑀁 𑀕𑁄𑀘𑀭𑀺𑀬𑀸𑀦𑀁 𑀲𑀦𑁆𑀣𑀢𑀁 𑀓𑀸𑀭𑀸𑀧𑀺𑀢𑀁 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 (𑀧𑀸𑀭𑀸. 𑁫𑁫𑁪) 𑀇𑀫𑀺𑀦𑀸 𑀦𑀬𑁂𑀦 𑀦𑀺𑀲𑁆𑀲𑀚𑁆𑀚𑀦𑀯𑀺𑀥𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀆𑀤𑀸𑀬 𑀘 𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑁂𑀦 𑀅𑀦𑀸𑀤𑀸𑀬 𑀘 𑀓𑀭𑀡𑀢𑁄 𑀓𑀺𑀭𑀺𑀬𑀸𑀓𑀺𑀭𑀺𑀬𑀁. 𑀲𑁂𑀲𑀦𑁆𑀢𑀺 𑀧𑀼𑀩𑁆𑀩𑀧𑀬𑁄𑀕𑀤𑀼𑀓𑁆𑀓𑀝𑀘𑀢𑀼𑀓𑁆𑀓𑀧𑀸𑀘𑀺𑀢𑁆𑀢𑀺𑀬𑀸𑀤𑀺𑀓𑀁. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀢𑀼𑀮𑀁 𑀑𑀤𑀸𑀢𑀸𑀦𑀁 𑀢𑀼𑀮𑀁 𑀕𑁄𑀘𑀭𑀺𑀬𑀸𑀦𑀁 𑀆𑀤𑀺𑀬𑀺𑀢𑁆𑀯𑀸 𑀓𑀭𑀡𑁂, 𑀩𑀳𑀼𑀢𑀭𑀁 𑀑𑀤𑀸𑀢𑀸𑀦𑀁 𑀩𑀳𑀼𑀢𑀭𑀁 𑀕𑁄𑀘𑀭𑀺𑀬𑀸𑀦𑀁 𑀆𑀤𑀺𑀬𑀺𑀢𑁆𑀯𑀸 𑀓𑀭𑀡𑁂, 𑀲𑀼𑀤𑁆𑀥𑀁 𑀑𑀤𑀸𑀢𑀸𑀦𑀁 𑀲𑀼𑀤𑁆𑀥𑀁 𑀕𑁄𑀘𑀭𑀺𑀬𑀸𑀦𑀁 𑀆𑀤𑀺𑀬𑀺𑀢𑁆𑀯𑀸 𑀓𑀭𑀡𑁂 𑀘 𑀅𑀦𑀸𑀧𑀢𑁆𑀢𑀻𑀢𑀺.

𑀅𑀗𑁆𑀕𑁂𑀲𑀼 𑀧𑀦 𑀧𑀞𑀫𑀗𑁆𑀕𑀁 𑀓𑀸𑀴𑀓𑀸𑀦𑀁 𑀤𑁆𑀯𑁂𑀪𑀸𑀕𑀢𑁄 𑀅𑀢𑀺𑀭𑁂𑀓𑀪𑀸𑀯𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀫𑀸𑀦𑀺 𑀢𑀻𑀡𑀺 𑀦 𑀓𑁂𑀯𑀮𑀁 𑀅𑀦𑀺𑀲𑁆𑀲𑀝𑁆𑀞𑀸𑀦𑁂𑀯 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀦𑁆𑀢𑀻𑀢𑀺 𑀆𑀳 ‘‘𑀇𑀫𑀸𑀦𑀺 𑀧𑀦𑀸’’𑀢𑀺𑀆𑀤𑀺. ‘‘𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀬𑀤𑀺 𑀧𑀭𑀺𑀪𑀼𑀜𑁆𑀚𑀢𑀺, 𑀤𑀼𑀓𑁆𑀓𑀝𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀤𑁆𑀯𑁂𑀪𑀸𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀙𑀩𑁆𑀩𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀬𑀁 𑀲𑀦𑁆𑀣𑀢𑀲𑀫𑁆𑀫𑀼𑀢𑀺𑀁 𑀤𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀺𑀮𑀸𑀦𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺 𑀬𑀲𑁆𑀲 𑀯𑀺𑀦𑀸 𑀲𑀦𑁆𑀣𑀢𑀸 𑀦 𑀨𑀸𑀲𑀼 𑀳𑁄𑀢𑀺, 𑀦 𑀲𑀓𑁆𑀓𑁄𑀢𑀺 𑀘 𑀲𑀦𑁆𑀣𑀢𑀁 𑀆𑀤𑀸𑀬 𑀧𑀓𑁆𑀓𑀫𑀺𑀢𑀼𑀁, 𑀏𑀯𑀁𑀪𑀽𑀢𑀲𑁆𑀲 𑀕𑀺𑀮𑀸𑀦𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀲𑀦𑁆𑀣𑀢𑀲𑀫𑁆𑀫𑀼𑀢𑀺𑀁 𑀤𑁂𑀢𑀻𑀢𑀺 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄 𑀦 𑀲𑀓𑁆𑀓𑁄𑀢𑀺 𑀲𑀦𑁆𑀣𑀢𑀁 𑀆𑀤𑀸𑀬 𑀧𑀓𑁆𑀓𑀫𑀺𑀢𑀼’’𑀦𑁆𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁫𑁬𑁦) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀸𑀬 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀬 𑀲𑀦𑁆𑀣𑀢𑀲𑀫𑁆𑀫𑀼𑀢𑀺𑀁 𑀤𑁂𑀢𑀺.

𑀲𑀸𑀢𑀺 𑀲𑀦𑁆𑀣𑀢𑀲𑀫𑁆𑀫𑀼𑀢𑀺. 𑀯𑀽𑀧𑀲𑀦𑁆𑀢𑁄 𑀯𑀸 𑀧𑀼𑀦 𑀓𑀼𑀧𑁆𑀧𑀢𑀻𑀢𑀺 𑀯𑀽𑀧𑀲𑀦𑁆𑀢𑁄 𑀯𑀸 𑀲𑁄 𑀆𑀩𑀸𑀥𑁄 𑀧𑀼𑀦 𑀓𑀼𑀧𑁆𑀧𑀢𑀺, 𑀅𑀦𑀼𑀯𑀲𑁆𑀲𑀫𑁆𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀧𑀼𑀦 𑀲𑀫𑁆𑀫𑀼𑀢𑀺𑀤𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀓𑁂𑀯𑀮𑀁 𑀢𑀲𑁆𑀫𑀺𑀁𑀬𑁂𑀯 𑀭𑁄𑀕𑁂 𑀓𑀼𑀧𑁆𑀧𑀺𑀢𑁂, 𑀅𑀣 𑀔𑁄 𑀅𑀜𑁆𑀜𑀲𑁆𑀫𑀺𑀁 𑀭𑁄𑀕𑁂 𑀓𑀼𑀧𑁆𑀧𑀺𑀢𑁂𑀧𑀺 𑀕𑀢𑀕𑀢𑀝𑁆𑀞𑀸𑀦𑁂 𑀅𑀦𑀼𑀯𑀲𑁆𑀲𑀁 𑀓𑀸𑀢𑀼𑀁 𑀮𑀪𑀢𑀺. 𑀢𑁂𑀦𑁂𑀯 𑀳𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 ‘‘𑀲𑀘𑁂 𑀅𑀭𑁄𑀕𑁄 𑀳𑀼𑀢𑁆𑀯𑀸 𑀧𑀼𑀦 𑀫𑀽𑀮𑀩𑁆𑀬𑀸𑀥𑀺𑀦𑀸𑀯 𑀕𑀺𑀮𑀸𑀦𑁄 𑀳𑁄𑀢𑀺, 𑀲𑁄𑀬𑁂𑀯 𑀧𑀭𑀺𑀳𑀸𑀭𑁄, 𑀦𑀢𑁆𑀣𑀜𑁆𑀜𑀁 ‘𑀲𑀫𑁆𑀫𑀼𑀢𑀺𑀓𑀺𑀘𑁆𑀘’𑀦𑁆𑀢𑀺 𑀨𑀼𑀲𑁆𑀲𑀤𑁂𑀯𑀢𑁆𑀣𑁂𑀭𑁄 𑀆𑀳. 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄 𑀧𑀦 𑀲𑁄 𑀯𑀸 𑀩𑁆𑀬𑀸𑀥𑀺 𑀧𑀝𑀺𑀓𑀼𑀧𑁆𑀧𑀢𑀼, 𑀅𑀜𑁆𑀜𑁄 𑀯𑀸, 𑀲𑀓𑀺𑀁 ‘𑀕𑀺𑀮𑀸𑀦𑁄’𑀢𑀺 𑀦𑀸𑀫𑀁 𑀮𑀤𑁆𑀥𑀁 𑀮𑀤𑁆𑀥𑀫𑁂𑀯, 𑀧𑀼𑀦 ‘𑀲𑀫𑁆𑀫𑀼𑀢𑀺𑀓𑀺𑀘𑁆𑀘𑀁 𑀦𑀢𑁆𑀣𑀻’𑀢𑀺 𑀆𑀳𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁫𑁭) 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑀯𑀸𑀤𑁄 𑀧𑀘𑁆𑀙𑀸 𑀯𑀼𑀢𑁆𑀢𑁄.

𑀏𑀢𑁆𑀣 𑀘 ‘‘𑀇𑀤𑀁 𑀫𑁂, 𑀪𑀦𑁆𑀢𑁂, 𑀲𑀦𑁆𑀣𑀢𑀁 𑀊𑀦𑀓𑀙𑀩𑁆𑀩𑀲𑁆𑀲𑀸𑀦𑀺 𑀓𑀸𑀭𑀸𑀧𑀺𑀢𑀁 𑀅𑀜𑁆𑀜𑀢𑁆𑀭 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 (𑀧𑀸𑀭𑀸. 𑁫𑁬𑁨) 𑀇𑀫𑀺𑀦𑀸 𑀦𑀬𑁂𑀦 𑀦𑀺𑀲𑁆𑀲𑀚𑁆𑀚𑀦𑀯𑀺𑀥𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. ‘‘𑀲𑁂𑀲𑀁 𑀧𑀞𑀫𑀲𑀤𑀺𑀲𑀫𑁂𑀯𑀸’’𑀢𑀺 𑀇𑀫𑀺𑀦𑀸 ‘‘𑀅𑀢𑁆𑀢𑀦𑀸 𑀓𑀢𑀁 𑀧𑀭𑁂𑀳𑀺 𑀧𑀭𑀺𑀬𑁄𑀲𑀸𑀧𑁂𑀢𑀻’’𑀢𑀺𑀆𑀤𑀺𑀓𑀁 𑀅𑀢𑀺𑀤𑀺𑀝𑁆𑀞𑀁. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀧𑀭𑀺𑀧𑀼𑀡𑁆𑀡𑁂 𑀙𑀩𑁆𑀩𑀲𑁆𑀲𑁂 𑀯𑀸 𑀅𑀢𑀺𑀭𑁂𑀓𑀙𑀩𑁆𑀩𑀲𑁆𑀲𑁂 𑀯𑀸 𑀅𑀦𑀸𑀧𑀢𑁆𑀢𑀺. 𑀅𑀗𑁆𑀕𑁂𑀲𑀼 𑀘 𑀙𑀩𑁆𑀩𑀲𑁆𑀲𑀸𑀦𑀁 𑀅𑀦𑁆𑀢𑁄𑀪𑀸𑀯𑁄 𑀦𑀸𑀦𑀸𑀢𑁆𑀢𑀁.

𑀙𑀩𑁆𑀩𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀦𑀺𑀲𑀻𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀦𑀺𑀲𑀻𑀤𑀦𑀲𑀦𑁆𑀣𑀢𑀦𑁆𑀢𑀺 ‘‘𑀦𑀺𑀲𑀻𑀤𑀦𑀁 𑀦𑀸𑀫 𑀲𑀤𑀲𑀁 𑀯𑀼𑀘𑁆𑀘𑀢𑀻’’𑀢𑀺 𑀏𑀢𑁆𑀣 𑀧𑀤𑀪𑀸𑀚𑀦𑀺𑀬𑀁 (𑀧𑀸𑀭𑀸. 𑁫𑁬𑁮) 𑀯𑀼𑀢𑁆𑀢𑀢𑁆𑀢𑀸 𑀲𑀤𑀲𑀁 𑀲𑀦𑁆𑀣𑀢𑀁, 𑀏𑀢𑁆𑀣 𑀘 𑀦𑀺𑀲𑀻𑀤𑀦𑀕𑁆𑀕𑀳𑀡𑀁 𑀲𑀦𑁆𑀣𑀢𑁂 𑀘𑀻𑀯𑀭𑀲𑀜𑁆𑀜𑀸𑀦𑀺𑀯𑀸𑀭𑀡𑀢𑁆𑀣𑀁, 𑀬𑀢𑁄 𑀢𑁂 𑀪𑀺𑀓𑁆𑀔𑀽 𑀓𑀫𑁆𑀩𑀮𑀘𑀻𑀯𑀭𑀲𑀜𑁆𑀜𑀸𑀬 𑀲𑀦𑁆𑀣𑀢𑀁 𑀙𑀟𑁆𑀟𑁂𑀢𑁆𑀯𑀸 𑀥𑀼𑀢𑀗𑁆𑀕𑀸𑀦𑀺 𑀲𑀫𑀸𑀤𑀺𑀬𑀺𑀁𑀲𑀼. 𑀲𑀬𑀦𑀸𑀲𑀦𑀧𑁆𑀧𑀬𑁄𑀚𑀦𑀢𑁆𑀢𑀸 𑀲𑀦𑁆𑀣𑀢𑀲𑁆𑀲 ‘‘𑀧𑀼𑀭𑀸𑀡𑀲𑀦𑁆𑀣𑀢𑀁 𑀦𑀸𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀲𑀦𑁆𑀣𑀢𑁂. 𑀯𑀺𑀤𑀢𑁆𑀣𑀺𑀫𑀢𑁆𑀢𑀦𑁆𑀢𑀺 𑀲𑀼𑀕𑀢𑀯𑀺𑀤𑀢𑁆𑀣𑀺𑀫𑀢𑁆𑀢𑀁. 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄 𑀘𑀸𑀬𑀁 ‘‘𑀅𑀦𑀸𑀧𑀢𑁆𑀢𑀺 𑀅𑀮𑀪𑀦𑁆𑀢𑁄 𑀣𑁄𑀓𑀢𑀭𑀁 𑀆𑀤𑀺𑀬𑀺𑀢𑁆𑀯𑀸 𑀓𑀭𑁄𑀢𑀻’’𑀢𑀺 (𑀧𑀸𑀭𑀸. 𑁫𑁭𑁦) 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀢𑁆𑀢𑀸. 𑀏𑀓𑀤𑁂𑀲𑁂𑀢𑀺 𑀇𑀤𑀸𑀦𑀺 𑀓𑀢𑁆𑀢𑀩𑁆𑀩𑀦𑀯𑀲𑀦𑁆𑀣𑀢𑀲𑁆𑀲 𑀏𑀓𑀧𑁆𑀧𑀤𑁂𑀲𑁂. 𑀯𑀺𑀚𑀝𑁂𑀢𑁆𑀯𑀸𑀢𑀺 𑀯𑀺𑀤𑁆𑀥𑀁𑀲𑁂𑀢𑁆𑀯𑀸. 𑀅𑀦𑀸𑀤𑀸𑀢𑀺 𑀬-𑀓𑀸𑀭𑀮𑁄𑀧𑁂𑀦𑀸𑀬𑀁 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀲𑀢𑀺 𑀧𑀼𑀭𑀸𑀡𑀲𑀦𑁆𑀣𑀢𑁂 𑀅𑀕𑁆𑀕𑀳𑁂𑀢𑁆𑀯𑀸’’𑀢𑀺.

𑀏𑀢𑁆𑀣 𑀘 ‘‘𑀇𑀤𑀁 𑀫𑁂, 𑀪𑀦𑁆𑀢𑁂, 𑀦𑀺𑀲𑀻𑀤𑀦𑀲𑀦𑁆𑀣𑀢𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀧𑀼𑀭𑀸𑀡𑀲𑀦𑁆𑀣𑀢𑀲𑁆𑀲 𑀲𑀸𑀫𑀦𑁆𑀢𑀸 𑀲𑀼𑀕𑀢𑀯𑀺𑀤𑀢𑁆𑀣𑀺𑀁 𑀓𑀸𑀭𑀸𑀧𑀺𑀢𑀁 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 (𑀧𑀸𑀭𑀸. 𑁫𑁬𑁮) 𑀇𑀫𑀺𑀦𑀸 𑀦𑀬𑁂𑀦 𑀦𑀺𑀲𑁆𑀲𑀚𑁆𑀚𑀦𑀯𑀺𑀥𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀦𑁆𑀣𑀢𑀯𑀺𑀲𑁆𑀲𑀚𑁆𑀚𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀦𑁆𑀢𑀺 𑀪𑀕𑀯𑀢𑀸 𑀲𑀦𑁆𑀣𑀢𑀸𑀦𑀺 𑀯𑀺𑀧𑁆𑀧𑀓𑀺𑀡𑁆𑀡𑀸𑀦𑀺 𑀤𑀺𑀲𑁆𑀯𑀸 ‘‘𑀲𑀤𑁆𑀥𑀸𑀤𑁂𑀬𑁆𑀬𑀯𑀺𑀦𑀺𑀧𑀸𑀢𑀦𑁂 𑀓𑀸𑀭𑀡𑀁 𑀦𑀢𑁆𑀣𑀺, 𑀧𑀭𑀺𑀪𑁄𑀕𑀼𑀧𑀸𑀬𑀁 𑀦𑁂𑀲𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁬𑁬) 𑀲𑀦𑁆𑀣𑀢𑀯𑀺𑀲𑁆𑀲𑀚𑁆𑀚𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁. 𑀓𑀺𑀭𑀺𑀬𑀸𑀓𑀺𑀭𑀺𑀬𑀢𑁆𑀢𑀸 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 ‘‘𑀲𑁂𑀲𑀁 𑀢𑀢𑀺𑀬𑀲𑀤𑀺𑀲𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁, 𑀤𑁆𑀯𑁂𑀪𑀸𑀕𑀲𑀺𑀓𑁆𑀔𑀸𑀧𑀤𑀲𑀤𑀺𑀲𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀧𑀼𑀭𑀸𑀡𑀲𑀦𑁆𑀣𑀢𑀲𑁆𑀲 𑀲𑀸𑀫𑀦𑁆𑀢𑀸 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑀸 𑀆𑀤𑀸𑀬 𑀓𑀭𑀡𑁂, 𑀅𑀮𑀪𑀦𑁆𑀢𑀲𑁆𑀲 𑀣𑁄𑀓𑀢𑀭𑀁 𑀆𑀤𑀸𑀬 𑀓𑀭𑀡𑁂, 𑀲𑀩𑁆𑀩𑀣𑀸 𑀅𑀮𑀪𑀦𑁆𑀢𑀲𑁆𑀲 𑀅𑀦𑀸𑀤𑀸𑀬 𑀓𑀭𑀡𑁂 𑀘 𑀅𑀦𑀸𑀧𑀢𑁆𑀢𑀻𑀢𑀺. 𑀅𑀗𑁆𑀕𑁂𑀲𑀼 𑀧𑀦𑁂𑀢𑁆𑀣 𑀧𑀞𑀫𑀗𑁆𑀕𑀧𑀼𑀭𑀸𑀡𑀲𑀦𑁆𑀣𑀢𑀲𑁆𑀲 𑀲𑀸𑀫𑀦𑁆𑀢𑀸 𑀲𑀼𑀕𑀢𑀯𑀺𑀤𑀢𑁆𑀣𑀺𑀅𑀦𑀸𑀤𑀺𑀬𑀦𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀦𑀺𑀲𑀻𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀏𑀴𑀓𑀮𑁄𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀲𑁆𑀲𑀸𑀢𑀺 𑀅𑀤𑁆𑀥𑀸𑀦𑀫𑁂𑀯 𑀫𑀕𑁆𑀕𑁄 𑀅𑀤𑁆𑀥𑀸𑀦𑀫𑀕𑁆𑀕𑁄, 𑀢𑀁 𑀧𑀝𑀺𑀧𑀦𑁆𑀦𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀤𑁆𑀥𑀸𑀦𑀲𑀗𑁆𑀔𑀸𑀢’’𑀦𑁆𑀢𑀺𑀆𑀤𑀺. 𑀅𑀤𑁆𑀥𑀸𑀦𑀲𑀤𑁆𑀤𑁂𑀦 𑀯𑀺𑀲𑁂𑀲𑀺𑀢𑀢𑁆𑀢𑀸 𑀧𑀦 ‘‘𑀤𑀻𑀖𑀫𑀕𑁆𑀕’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀤𑁆𑀥𑀸𑀦𑀕𑀫𑀦𑀲𑀫𑀬𑀲𑁆𑀲 𑀯𑀺𑀪𑀗𑁆𑀕𑁂 ‘‘𑀅𑀤𑁆𑀥𑀬𑁄𑀚𑀦𑀁 𑀕𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀧𑀸𑀘𑀺. 𑁨𑁧𑁮) 𑀅𑀤𑁆𑀥𑀬𑁄𑀚𑀦𑀫𑁆𑀧𑀺 𑀅𑀤𑁆𑀥𑀸𑀦𑀫𑀕𑁆𑀕𑁄 𑀳𑁄𑀢𑀺. 𑀏𑀴𑀓𑀮𑁄𑀫𑀸𑀦𑀺 𑀘𑁂𑀢𑀸𑀦𑀺 𑀅𑀤𑁆𑀥𑀸𑀦𑀫𑀕𑁆𑀕𑀢𑁄 𑀅𑀜𑁆𑀜𑀢𑁆𑀣 𑀉𑀧𑁆𑀧𑀦𑁆𑀦𑀸𑀦𑀺 𑀧𑀝𑀺𑀕𑁆𑀕𑀳𑁂𑀢𑀼𑀁 𑀦 𑀯𑀝𑁆𑀝𑀦𑁆𑀢𑀺, 𑀬𑀢𑁄 ‘‘𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀲𑁆𑀲𑀸’’𑀢𑀺𑀆𑀤𑀺𑀓𑀁 𑀯𑀼𑀢𑁆𑀢𑀦𑁆𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀩𑁆𑀩𑀜𑁆𑀘𑁂𑀢’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀲𑀩𑁆𑀩𑀜𑁆𑀘𑁂𑀢𑀦𑁆𑀢𑀺 ‘‘𑀪𑀺𑀓𑁆𑀔𑀼𑀦𑁄 𑀧𑀦𑁂𑀯 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀲𑁆𑀲 𑀏𑀴𑀓𑀮𑁄𑀫𑀸𑀦𑀺 𑀉𑀧𑁆𑀧𑀚𑁆𑀚𑁂𑀬𑁆𑀬𑀼’’𑀦𑁆𑀢𑀺𑀆𑀤𑀺𑀓𑀁 𑀏𑀢𑀁 𑀲𑀩𑁆𑀩𑀁. 𑀯𑀢𑁆𑀣𑀼𑀫𑀢𑁆𑀢𑀤𑀻𑀧𑀦𑀫𑁂𑀯𑀸𑀢𑀺 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 𑀲𑀸𑀯𑀢𑁆𑀣𑀺𑀁 𑀕𑀘𑁆𑀙𑀦𑁆𑀢𑀲𑁆𑀲 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀴𑀓𑀮𑁄𑀫𑀸𑀦𑀺 𑀉𑀧𑁆𑀧𑀚𑁆𑀚𑀺𑀁𑀲𑀽’’𑀢𑀺𑀆𑀤𑀺𑀓𑀲𑁆𑀲 (𑀧𑀸𑀭𑀸. 𑁫𑁭𑁧) 𑀯𑀢𑁆𑀣𑀼𑀫𑀢𑁆𑀢𑀲𑁆𑀲 𑀤𑀻𑀧𑀦𑀫𑁂𑀯. 𑀬𑀢𑁆𑀣 𑀓𑀢𑁆𑀣𑀘𑀻𑀢𑀺 𑀅𑀤𑁆𑀥𑀸𑀦𑀢𑁄 𑀅𑀜𑁆𑀜𑀢𑁆𑀣𑀸𑀧𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀸𑀦𑁂𑀲𑀼. 𑀲𑀳𑀢𑁆𑀣𑀸𑀢𑀺 𑀓𑀭𑀡𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀆𑀳 ‘‘𑀲𑀳𑀢𑁆𑀣𑁂𑀦𑀸’’𑀢𑀺. 𑀮𑀓𑁆𑀔𑀡𑀯𑀘𑀦𑀜𑁆𑀘𑁂𑀢𑀁, 𑀢𑀲𑁆𑀫𑀸 𑀬𑁂𑀦 𑀓𑁂𑀦𑀘𑀺 𑀲𑀭𑀻𑀭𑀸𑀯𑀬𑀯𑁂𑀦𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦𑀸𑀳 ‘‘𑀅𑀢𑁆𑀢𑀦𑀸 𑀳𑀭𑀺𑀢𑀩𑁆𑀩𑀸𑀦𑀻𑀢𑀺 𑀅𑀢𑁆𑀣𑁄’’𑀢𑀺. 𑀅𑀲𑀦𑁆𑀢𑁂 𑀳𑀸𑀭𑀓𑁂𑀢𑀺 𑀏𑀢𑁆𑀣 𑀧𑀤𑀸𑀦𑀁 𑀅𑀦𑁆𑀢𑁄𑀕𑀥𑀸𑀯𑀥𑀸𑀭𑀡𑀢𑁄 𑀅𑀯𑀥𑀸𑀭𑀡𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀅𑀲𑀦𑁆𑀢𑁂𑀬𑁂𑀯𑀸’’𑀢𑀺𑀆𑀤𑀺.

𑀏𑀢𑁆𑀣 𑀘 ‘‘𑀇𑀫𑀸𑀦𑀺 𑀫𑁂, 𑀪𑀦𑁆𑀢𑁂, 𑀏𑀴𑀓𑀮𑁄𑀫𑀸𑀦𑀺 𑀢𑀺𑀬𑁄𑀚𑀦𑀁 𑀅𑀢𑀺𑀓𑁆𑀓𑀸𑀫𑀺𑀢𑀸𑀦𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁫𑁭𑁩) 𑀦𑀺𑀲𑁆𑀲𑀚𑁆𑀚𑀦𑀯𑀺𑀥𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀢𑀺𑀭𑁂𑀓𑀢𑀺𑀬𑁄𑀚𑀦𑁂 𑀅𑀢𑀺𑀭𑁂𑀓𑀢𑀺𑀬𑁄𑀚𑀦𑀲𑀜𑁆𑀜𑀺𑀯𑁂𑀫𑀢𑀺𑀓𑀊𑀦𑀓𑀲𑀜𑁆𑀜𑀻𑀦𑀁 𑀯𑀲𑁂𑀦 𑀢𑀻𑀡𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀯𑀸𑀲𑀸𑀥𑀺𑀧𑁆𑀧𑀸𑀬𑁂𑀦 𑀕𑀦𑁆𑀢𑁆𑀯𑀸 𑀢𑀢𑁄 𑀧𑀭𑀁 𑀳𑀭𑀡𑁂𑀢𑀺 𑀬𑀢𑁆𑀣 𑀕𑀢𑁄, 𑀢𑀢𑁆𑀣 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀦𑀁 𑀯𑀸 𑀧𑀘𑁆𑀘𑀬𑀸𑀤𑀻𑀦𑀁 𑀯𑀸 𑀅𑀮𑀸𑀪𑁂𑀦 𑀢𑀢𑁄 𑀧𑀭𑀁 𑀅𑀜𑁆𑀜𑀢𑁆𑀣 𑀳𑀭𑀡𑁂, 𑀢𑀢𑁄𑀧𑀺 𑀅𑀜𑁆𑀜𑀢𑁆𑀣𑀸𑀢𑀺 𑀏𑀯𑀁 𑀬𑁄𑀚𑀦𑀲𑀢𑀫𑁆𑀧𑀺 𑀳𑀭𑀡𑁂 𑀅𑀦𑀸𑀧𑀢𑁆𑀢𑀺. 𑀅𑀘𑁆𑀙𑀺𑀦𑁆𑀦𑀁 𑀯𑀸 𑀦𑀺𑀲𑁆𑀲𑀝𑁆𑀞𑀁 𑀯𑀸𑀢𑀺 𑀘𑁄𑀭𑁂𑀳𑀺 𑀅𑀘𑁆𑀙𑀺𑀦𑁆𑀦𑀁 𑀯𑀸 𑀯𑀺𑀦𑀬𑀓𑀫𑁆𑀫𑀓𑀢𑀁 𑀯𑀸. 𑀓𑀢𑀪𑀡𑁆𑀟𑀦𑁆𑀢𑀺 𑀓𑀢𑀁 𑀪𑀡𑁆𑀟𑀁 𑀓𑀫𑁆𑀩𑀮𑀓𑁄𑀚𑀯𑀲𑀦𑁆𑀣𑀢𑀸𑀤𑀺 𑀬𑀁 𑀓𑀺𑀜𑁆𑀘𑀺 𑀅𑀦𑁆𑀢𑀫𑀲𑁄 𑀲𑀼𑀢𑁆𑀢𑀓𑁂𑀦 𑀩𑀤𑁆𑀥𑀫𑀢𑁆𑀢𑀫𑁆𑀧𑀺. 𑀢𑁂𑀦𑀸𑀳 ‘‘𑀅𑀦𑁆𑀢𑀫𑀲𑁄’’𑀢𑀺𑀆𑀤𑀺. 𑀬𑁄 𑀧𑀦 𑀢𑀦𑀼𑀓𑀧𑀢𑁆𑀢𑀢𑁆𑀣𑀯𑀺𑀓𑀦𑁆𑀢𑀭𑁂 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁭𑁫) 𑀯𑀸 𑀆𑀬𑁄𑀕𑀅𑀁𑀲𑀩𑀤𑁆𑀥𑀓𑀓𑀸𑀬𑀩𑀦𑁆𑀥𑀦𑀸𑀤𑀻𑀦𑀁 𑀅𑀦𑁆𑀢𑀭𑁂𑀲𑀼 𑀯𑀸 𑀧𑀺𑀧𑁆𑀨𑀮𑀺𑀓𑀸𑀤𑀻𑀦𑀁 𑀫𑀮𑀭𑀓𑁆𑀔𑀡𑀢𑁆𑀣𑀁 𑀲𑀺𑀧𑀸𑀝𑀺𑀓𑀸𑀬𑀁 𑀯𑀸 𑀅𑀦𑁆𑀢𑀫𑀲𑁄 𑀯𑀸𑀢𑀸𑀩𑀸𑀥𑀺𑀓𑁄 𑀓𑀡𑁆𑀡𑀘𑁆𑀙𑀺𑀤𑁆𑀤𑁂𑀧𑀺 𑀮𑁄𑀫𑀸𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀆𑀧𑀢𑁆𑀢𑀺𑀬𑁂𑀯. 𑀲𑀼𑀢𑁆𑀢𑀓𑁂𑀦 𑀧𑀦 𑀩𑀦𑁆𑀥𑀺𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑀁 𑀓𑀢𑀪𑀡𑁆𑀟𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺, 𑀯𑁂𑀡𑀺𑀁 𑀓𑀢𑁆𑀯𑀸 𑀳𑀭𑀢𑀺, 𑀇𑀤𑀁 𑀦𑀺𑀥𑀸𑀦𑀫𑀼𑀔𑀁 𑀦𑀸𑀫, 𑀆𑀧𑀢𑁆𑀢𑀺𑀬𑁂𑀯.

𑀧𑀞𑀫𑀧𑁆𑀧𑀝𑀺𑀮𑀸𑀪𑁄𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀏𑀴𑀓𑀮𑁄𑀫𑀸𑀦𑀁 𑀧𑀞𑀫𑀼𑀧𑁆𑀧𑀢𑁆𑀢𑀺. 𑀏𑀢𑁂𑀦 𑀅𑀘𑁆𑀙𑀺𑀦𑁆𑀦𑀦𑀺𑀲𑁆𑀲𑀝𑁆𑀞𑀧𑁆𑀧𑀝𑀺𑀮𑀤𑁆𑀥𑀸𑀦𑀁 𑀧𑀝𑀺𑀓𑁆𑀔𑁂𑀧𑁄. 𑀅𑀜𑁆𑀜𑀲𑁆𑀲 𑀅𑀚𑀸𑀦𑀦𑁆𑀢𑀲𑁆𑀲 𑀬𑀸𑀦𑁂 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁭𑁨) 𑀕𑀘𑁆𑀙𑀦𑁆𑀢𑁂 𑀭𑀣𑀸𑀤𑀺𑀓𑁂 𑀯𑀸 𑀳𑀢𑁆𑀣𑀺𑀧𑀺𑀝𑁆𑀞𑀺𑀆𑀤𑀻𑀲𑀼 𑀯𑀸 𑀲𑀸𑀫𑀺𑀓𑀲𑁆𑀲 𑀅𑀚𑀸𑀦𑀦𑁆𑀢𑀲𑁆𑀲𑁂𑀯 ‘‘𑀳𑀭𑀺𑀲𑁆𑀲𑀢𑀻’’𑀢𑀺 𑀧𑀓𑁆𑀔𑀺𑀧𑀺𑀢𑁆𑀯𑀸. 𑀅𑀕𑀘𑁆𑀙𑀦𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀦 𑀅𑀕𑀘𑁆𑀙𑀦𑁆𑀢𑁂 𑀭𑀣𑀸𑀤𑀺𑀫𑁆𑀳𑀺 𑀯𑀸 𑀳𑀢𑁆𑀣𑀺𑀧𑀺𑀝𑁆𑀞𑀺𑀆𑀤𑀻𑀲𑀼 𑀯𑀸 𑀞𑀧𑁂𑀢𑁆𑀯𑀸 𑀆𑀭𑁄𑀳𑀺𑀢𑁆𑀯𑀸 𑀲𑀸𑀭𑁂𑀢𑀺, 𑀳𑁂𑀝𑁆𑀞𑀸 𑀯𑀸 𑀕𑀘𑁆𑀙𑀦𑁆𑀢𑁄 𑀘𑁄𑀤𑁂𑀢𑀺, 𑀧𑀓𑁆𑀓𑁄𑀲𑀦𑁆𑀢𑁄 𑀯𑀸 𑀅𑀦𑀼𑀩𑀦𑁆𑀥𑀸𑀧𑁂𑀢𑀺, ‘‘𑀅𑀜𑁆𑀜𑀁 𑀳𑀭𑀸𑀧𑁂𑀢𑀻’’𑀢𑀺 (𑀧𑀸𑀭𑀸. 𑁫𑁭𑁫) 𑀯𑀘𑀦𑀢𑁄 𑀅𑀦𑀸𑀧𑀢𑁆𑀢𑀺. 𑀏𑀢𑁆𑀣 𑀘 ‘‘𑀅𑀚𑀸𑀦𑀦𑁆𑀢𑀲𑁆𑀲 𑀬𑀸𑀦𑁂’’𑀢𑀺 𑀇𑀫𑀺𑀦𑀸 𑀚𑀸𑀦𑀦𑁆𑀢𑀲𑁆𑀲 𑀘𑁂 𑀬𑀸𑀦𑁂 𑀧𑀓𑁆𑀔𑀺𑀧𑀢𑀺, 𑀅𑀜𑁆𑀜𑀁 𑀳𑀭𑀸𑀧𑁂𑀢𑀺 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀳𑀭𑀡𑀧𑀘𑁆𑀘𑀸𑀳𑀭𑀡𑀦𑁆𑀢𑀺 𑀳𑀭𑀡𑀧𑀘𑁆𑀘𑀸𑀳𑀭𑀡𑀸𑀦𑀫𑀪𑀸𑀯𑁄.

𑀏𑀴𑀓𑀮𑁄𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀏𑀴𑀓𑀮𑁄𑀫𑀥𑁄𑀯𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀓𑁆𑀓𑁂𑀲𑀽𑀢𑀺 ‘‘𑀲𑀓𑁆𑀬𑀸 𑀯𑀢, 𑀪𑁄 𑀓𑀼𑀫𑀸𑀭𑀸’’𑀢𑀺 (𑀤𑀻. 𑀦𑀺. 𑁧.𑁨𑁬𑁭) 𑀉𑀤𑀸𑀦𑀁 𑀧𑀝𑀺𑀘𑁆𑀘 ‘‘𑀲𑀓𑁆𑀬𑀸’’𑀢𑀺 𑀮𑀤𑁆𑀥𑀦𑀸𑀫𑀸𑀦𑀁 𑀦𑀺𑀯𑀸𑀲𑁄 𑀏𑀓𑁄𑀧𑀺 𑀚𑀦𑀧𑀤𑁄 𑀭𑀼𑀴𑁆𑀳𑀺𑀲𑀤𑁆𑀤𑁂𑀦 ‘‘𑀲𑀓𑁆𑀓𑀸’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁 𑀲𑀓𑁆𑀓𑁂𑀲𑀼 𑀚𑀦𑀧𑀤𑁂. 𑀙𑀩𑁆𑀩𑀕𑁆𑀕𑀺𑀬𑀸 𑀦𑀸𑀫 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸𑀤𑀬𑁄 𑀙𑀫𑀽𑀮𑀓𑀸, 𑀢𑁂𑀲𑀁 𑀲𑀺𑀲𑁆𑀲𑀸 𑀘.

𑀏𑀴𑀓𑀮𑁄𑀫𑀥𑁄𑀯𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀚𑀸𑀢𑀭𑀽𑀧𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀭𑀚𑀢𑀦𑁆𑀢𑀺 𑀦 𑀓𑁂𑀯𑀮𑀁 𑀭𑀽𑀧𑀺𑀬𑀫𑁂𑀯 𑀇𑀥𑀸𑀥𑀺𑀧𑁆𑀧𑁂𑀢𑀁, 𑀅𑀣 𑀔𑁄 𑀬𑀁 𑀓𑀺𑀜𑁆𑀘𑀺 𑀯𑁄𑀳𑀸𑀭𑀕𑀫𑀦𑀻𑀬𑀁 𑀓𑀳𑀸𑀧𑀡𑀸𑀤𑀺 𑀘 𑀏𑀢𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀅𑀧𑀺𑀘𑀸’’𑀢𑀺𑀆𑀤𑀺. 𑀢𑀢𑁆𑀣 𑀓𑀳𑀸𑀧𑀡𑁄𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁮𑁩-𑁫𑁮𑁪) 𑀲𑀼𑀯𑀡𑁆𑀡𑀫𑀬𑁄 𑀯𑀸 𑀭𑀽𑀧𑀺𑀬𑀫𑀬𑁄 𑀯𑀸 𑀧𑀸𑀓𑀢𑀺𑀓𑁄 𑀯𑀸. 𑀮𑁄𑀳𑀫𑀸𑀲𑀓𑁄 𑀦𑀸𑀫 𑀢𑀫𑁆𑀩𑀮𑁄𑀳𑀸𑀤𑀻𑀳𑀺 𑀓𑀢𑀫𑀸𑀲𑀓𑁄. 𑀤𑀸𑀭𑀼𑀫𑀸𑀲𑀓𑁄 𑀦𑀸𑀫 𑀲𑀸𑀭𑀤𑀸𑀭𑀼𑀦𑀸 𑀯𑀸 𑀯𑁂𑀴𑀼𑀧𑁂𑀲𑀺𑀓𑀸𑀬 𑀯𑀸 𑀅𑀦𑁆𑀢𑀫𑀲𑁄 𑀢𑀸𑀮𑀧𑀡𑁆𑀡𑁂𑀦𑀧𑀺 𑀭𑀽𑀧𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑀢𑀫𑀸𑀲𑀓𑁄. 𑀚𑀢𑀼𑀫𑀸𑀲𑀓𑁄 𑀦𑀸𑀫 𑀮𑀸𑀔𑀸𑀬 𑀯𑀸 𑀦𑀺𑀬𑁆𑀬𑀸𑀲𑁂𑀦 𑀯𑀸 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀓𑀢𑀫𑀸𑀲𑀓𑁄. ‘‘𑀬𑁂 𑀯𑁄𑀳𑀸𑀭𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀧𑀦 𑀧𑀤𑁂𑀦 𑀬𑁄 𑀬𑁄 𑀬𑀢𑁆𑀣 𑀬𑀢𑁆𑀣 𑀚𑀦𑀧𑀤𑁂 𑀬𑀤𑀸 𑀬𑀤𑀸 𑀯𑁄𑀳𑀸𑀭𑀁 𑀕𑀘𑁆𑀙𑀢𑀺, 𑀅𑀦𑁆𑀢𑀫𑀲𑁄 𑀅𑀝𑁆𑀞𑀺𑀫𑀬𑁄𑀧𑀺 𑀘𑀫𑁆𑀫𑀫𑀬𑁄𑀧𑀺 𑀭𑀼𑀓𑁆𑀔𑀨𑀮𑀩𑀻𑀚𑀫𑀬𑁄𑀧𑀺 𑀲𑀫𑀼𑀝𑁆𑀞𑀸𑀧𑀺𑀢𑀭𑀽𑀧𑁄𑀧𑀺 𑀅𑀲𑀫𑀼𑀝𑁆𑀞𑀸𑀧𑀺𑀢𑀭𑀽𑀧𑁄𑀧𑀺 𑀲𑀩𑁆𑀩𑁄 𑀲𑀗𑁆𑀕𑀳𑀺𑀢𑁄. 𑀢𑀤𑁂𑀯𑀸𑀢𑀺 𑀚𑀸𑀢𑀭𑀽𑀧𑀭𑀚𑀢𑀫𑁂𑀯. 𑀳𑀺𑀭𑀜𑁆𑀜𑀁 𑀦𑀸𑀫 𑀓𑀳𑀸𑀧𑀡𑁄.

‘‘𑀲𑀸𑀤𑀺𑀬𑀢𑀻’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀺 ‘‘𑀕𑀡𑁆𑀳𑀺𑀢𑀼𑀓𑀸𑀫𑁄 𑀳𑁄𑀢𑀻’’𑀢𑀺. 𑀦 𑀓𑁂𑀯𑀮𑀁 𑀓𑀸𑀬𑀯𑀸𑀘𑀸𑀳𑀺 𑀧𑀝𑀺𑀓𑁆𑀔𑀺𑀢𑁆𑀢𑀫𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺, 𑀅𑀣 𑀔𑁄 𑀫𑀦𑀲𑀸𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀁 𑀧𑀝𑀺𑀓𑁆𑀔𑀺𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀓𑀸𑀬𑀯𑀸𑀘𑀸𑀳𑀻’’𑀢𑀺𑀆𑀤𑀺. 𑀲𑀘𑁂 𑀧𑀦 𑀓𑀸𑀬𑀯𑀸𑀘𑀸𑀳𑀺 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀘𑀺𑀢𑁆𑀢𑁂𑀦 𑀅𑀥𑀺𑀯𑀸𑀲𑁂𑀢𑀺, 𑀓𑀸𑀬𑀯𑀸𑀘𑀸𑀳𑀺 𑀓𑀢𑁆𑀢𑀩𑁆𑀩𑀲𑁆𑀲 𑀧𑀝𑀺𑀓𑁆𑀔𑁂𑀧𑀲𑁆𑀲 𑀅𑀓𑀭𑀡𑀢𑁄 𑀅𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀁 𑀓𑀸𑀬𑀯𑀘𑀻𑀤𑁆𑀯𑀸𑀭𑁂 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀫𑀦𑁄𑀤𑁆𑀯𑀸𑀭𑁂 𑀧𑀦 𑀆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺.

𑀏𑀓𑁄 𑀲𑀢𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁮𑁩-𑁫𑁮𑁪) 𑀯𑀸 𑀲𑀳𑀲𑁆𑀲𑀁 𑀯𑀸 𑀧𑀸𑀤𑀫𑀽𑀮𑁂 𑀞𑀧𑁂𑀢𑀺 ‘‘𑀢𑀼𑀬𑁆𑀳𑀺𑀤𑀁 𑀳𑁄𑀢𑀽’’𑀢𑀺, 𑀪𑀺𑀓𑁆𑀔𑀼 ‘‘𑀦𑀬𑀺𑀤𑀁 𑀓𑀧𑁆𑀧𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀉𑀧𑀸𑀲𑀓𑁄 ‘‘𑀧𑀭𑀺𑀘𑁆𑀘𑀢𑁆𑀢𑀁 𑀫𑀬𑀸 𑀢𑀼𑀫𑁆𑀳𑀸𑀓’’𑀦𑁆𑀢𑀺 𑀕𑀢𑁄, 𑀅𑀜𑁆𑀜𑁄 𑀢𑀢𑁆𑀣 𑀆𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀢𑀺 ‘‘𑀓𑀺𑀁, 𑀪𑀦𑁆𑀢𑁂, 𑀇𑀤’’𑀦𑁆𑀢𑀺. 𑀬𑀁 𑀢𑁂𑀦 𑀘 𑀅𑀢𑁆𑀢𑀦𑀸 𑀘 𑀯𑀼𑀢𑁆𑀢𑀁, 𑀢𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀲𑁄 𑀘𑁂 𑀯𑀤𑀢𑀺 ‘‘𑀕𑁄𑀧𑁂𑀲𑁆𑀲𑀸𑀫𑀺, 𑀪𑀦𑁆𑀢𑁂, 𑀕𑀼𑀢𑁆𑀢𑀝𑁆𑀞𑀸𑀦𑀁 𑀤𑀲𑁆𑀲𑁂𑀣𑀸’’𑀢𑀺, 𑀲𑀢𑁆𑀢𑀪𑀽𑀫𑀺𑀓𑀫𑁆𑀧𑀺 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 ‘‘𑀇𑀤𑀁 𑀕𑀼𑀢𑁆𑀢𑀝𑁆𑀞𑀸𑀦’’𑀦𑁆𑀢𑀺 𑀆𑀘𑀺𑀓𑁆𑀔𑀺𑀢𑀩𑁆𑀩𑀁, ‘‘𑀇𑀥 𑀦𑀺𑀓𑁆𑀔𑀺𑀧𑀸𑀳𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀓𑀧𑁆𑀧𑀺𑀬𑀜𑁆𑀘 𑀅𑀓𑀧𑁆𑀧𑀺𑀬𑀜𑁆𑀘 𑀦𑀺𑀲𑁆𑀲𑀸𑀬 𑀞𑀺𑀢𑀁 𑀳𑁄𑀢𑀺, 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀭𑀓𑁆𑀔𑀦𑁆𑀢𑁂𑀦 𑀯𑀲𑀺𑀢𑀩𑁆𑀩𑀁. 𑀲𑀘𑁂 𑀓𑀺𑀜𑁆𑀘𑀺 𑀯𑀺𑀓𑁆𑀓𑀸𑀬𑀺𑀓𑀪𑀡𑁆𑀟𑀁 𑀧𑀢𑁆𑀢𑀁 𑀯𑀸 𑀘𑀻𑀯𑀭𑀁 𑀯𑀸 𑀆𑀕𑀘𑁆𑀙𑀢𑀺, ‘‘𑀇𑀤𑀁 𑀕𑀳𑁂𑀲𑁆𑀲𑀣, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀉𑀧𑀸𑀲𑀓, 𑀅𑀢𑁆𑀣𑀺 𑀅𑀫𑁆𑀳𑀸𑀓𑀁 𑀇𑀫𑀺𑀦𑀸 𑀅𑀢𑁆𑀣𑁄, 𑀯𑀢𑁆𑀣𑀼 𑀘 𑀏𑀯𑀭𑀽𑀧𑀁 𑀦𑀸𑀫 𑀲𑀁𑀯𑀺𑀚𑁆𑀚𑀢𑀺, 𑀓𑀧𑁆𑀧𑀺𑀬𑀓𑀸𑀭𑀓𑁄 𑀦𑀢𑁆𑀣𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀲𑁄 𑀯𑀤𑀢𑀺 ‘‘𑀅𑀳𑀁 𑀓𑀧𑁆𑀧𑀺𑀬𑀓𑀸𑀭𑀓𑁄 𑀪𑀯𑀺𑀲𑁆𑀲𑀸𑀫𑀺, 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀤𑁂𑀣𑀸’’𑀢𑀺, 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀑𑀓𑀸𑀲𑁂 𑀞𑀧𑀺𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁, ‘‘𑀇𑀫𑀁 𑀕𑀡𑁆𑀳𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀏𑀯𑀜𑁆𑀘 𑀓𑀧𑁆𑀧𑀺𑀬𑀜𑁆𑀘 𑀅𑀓𑀧𑁆𑀧𑀺𑀬𑀜𑁆𑀘 𑀦𑀺𑀲𑁆𑀲𑀸𑀬 𑀞𑀺𑀢𑀫𑁂𑀯 𑀳𑁄𑀢𑀺. 𑀲𑁄 𑀘𑁂𑀢𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀓𑀧𑁆𑀧𑀺𑀬𑀪𑀡𑁆𑀟𑀁 𑀤𑁂𑀢𑀺, 𑀯𑀝𑁆𑀝𑀢𑀺. 𑀲𑀘𑁂 𑀅𑀥𑀺𑀓𑀁 𑀕𑀡𑁆𑀳𑀸𑀢𑀺, ‘‘𑀦 𑀫𑀬𑀁 𑀢𑀯 𑀪𑀡𑁆𑀟𑀁 𑀕𑀡𑁆𑀳𑀸𑀫, 𑀦𑀺𑀓𑁆𑀔𑀫𑀸𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄.

𑀲𑀗𑁆𑀖𑀫𑀚𑁆𑀛𑁂𑀬𑁂𑀯 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀭𑀽𑀧𑀺𑀬𑀁 𑀦𑀸𑀫 𑀅𑀓𑀧𑁆𑀧𑀺𑀬𑀁, 𑀢𑀲𑁆𑀫𑀸 ‘‘𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸’’𑀢𑀺 𑀦 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀢𑀁 𑀧𑀝𑀺𑀕𑁆𑀕𑀳𑀺𑀢𑀫𑀢𑁆𑀢𑀫𑁂𑀯, 𑀦 𑀢𑁂𑀦 𑀓𑀺𑀜𑁆𑀘𑀺 𑀓𑀧𑁆𑀧𑀺𑀬𑀪𑀡𑁆𑀟𑀁 𑀘𑁂𑀢𑀸𑀧𑀺𑀢𑀁, 𑀢𑀲𑁆𑀫𑀸 𑀉𑀧𑀸𑀬𑁂𑀦 𑀧𑀭𑀺𑀪𑁄𑀕𑀤𑀲𑁆𑀲𑀦𑀢𑁆𑀣𑀁 ‘‘𑀲𑀗𑁆𑀖𑀫𑀚𑁆𑀛𑁂𑀬𑁂𑀯 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀆𑀤𑀺-𑀲𑀤𑁆𑀤𑁂𑀦 𑀢𑁂𑀮𑀸𑀤𑀻𑀦𑀁 𑀕𑀳𑀡𑀁. 𑀲𑁄𑀢𑀺 𑀬𑁄 𑀕𑀳𑀝𑁆𑀞𑁄 ‘‘𑀲𑀧𑁆𑀧𑀺 𑀯𑀸 𑀢𑁂𑀮𑀁 𑀯𑀸 𑀯𑀝𑁆𑀝𑀢𑀺 𑀉𑀧𑀸𑀲𑀓𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁄, 𑀲𑁄. 𑀅𑀜𑁆𑀜𑁂𑀦 𑀮𑀪𑀺𑀢𑁆𑀯𑀸𑀢𑀺 𑀪𑀺𑀓𑁆𑀔𑀼𑀦𑀸 𑀯𑀸 𑀆𑀭𑀸𑀫𑀺𑀓𑁂𑀦 𑀯𑀸 𑀅𑀢𑁆𑀢𑀦𑁄 𑀯𑀲𑁆𑀲𑀕𑁆𑀕𑁂𑀦 𑀮𑀪𑀺𑀢𑁆𑀯𑀸. 𑀢𑀢𑁄 𑀦𑀺𑀩𑁆𑀩𑀢𑁆𑀢𑀭𑀼𑀓𑁆𑀔𑀘𑁆𑀙𑀸𑀬𑀸𑀧𑀻𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀦𑀸 𑀆𑀳𑀝𑀩𑀻𑀚𑀢𑁄 𑀦𑀺𑀩𑁆𑀩𑀢𑁆𑀢𑀭𑀼𑀓𑁆𑀔𑀧𑀭𑀺𑀘𑁆𑀙𑁂𑀤𑁂𑀦 𑀞𑀺𑀢𑀘𑁆𑀙𑀸𑀬𑀸𑀧𑀺, 𑀧𑀭𑀺𑀘𑁆𑀙𑁂𑀤𑀸𑀢𑀺𑀓𑁆𑀓𑀦𑁆𑀢𑀸 𑀧𑀦 𑀆𑀕𑀦𑁆𑀢𑀼𑀓𑀢𑁆𑀢𑀸 𑀯𑀝𑁆𑀝𑀢𑀺. 𑀦𑁄 𑀘𑁂 𑀙𑀟𑁆𑀟𑁂𑀢𑀻𑀢𑀺 𑀅𑀣 𑀦𑁂𑀯 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀦 𑀙𑀟𑁆𑀟𑁂𑀢𑀺, ‘‘𑀓𑀺𑀁 𑀫𑀬𑁆𑀳𑀁 𑀇𑀫𑀺𑀦𑀸 𑀩𑁆𑀬𑀸𑀧𑀸𑀭𑁂𑀦𑀸’’𑀢𑀺 𑀬𑁂𑀦𑀓𑀸𑀫𑀁 𑀧𑀓𑁆𑀓𑀫𑀢𑀺. 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁄 ‘‘𑀬𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀙𑀟𑁆𑀟𑀺𑀢𑀸𑀙𑀟𑁆𑀟𑀺𑀢𑀜𑁆𑀘 𑀚𑀸𑀦𑁂𑀬𑁆𑀬𑀸’’𑀢𑀺 (𑀧𑀸𑀭𑀸. 𑁫𑁮𑁪) 𑀏𑀯𑀁 𑀯𑀼𑀢𑁆𑀢𑀧𑀜𑁆𑀘𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄𑀢𑀺 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀭𑀽𑀧𑀺𑀬𑀙𑀟𑁆𑀟𑀓𑀁 𑀲𑀫𑁆𑀫𑀦𑁆𑀦𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀸𑀬 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀬 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄.

𑀅𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀕𑀽𑀣𑀁 𑀯𑀺𑀬 𑀙𑀟𑁆𑀟𑁂𑀢𑀩𑁆𑀩𑀦𑁆𑀢𑀺 𑀧𑀢𑀺𑀢𑀝𑁆𑀞𑀸𑀦𑀁 𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀦𑀺𑀫𑀺𑀢𑁆𑀢𑀁 𑀅𑀓𑀢𑁆𑀯𑀸 𑀕𑀽𑀣𑀁 𑀯𑀺𑀬 𑀙𑀟𑁆𑀟𑁂𑀢𑀩𑁆𑀩𑀁, 𑀅𑀓𑁆𑀔𑀻𑀦𑀺 𑀦𑀺𑀫𑀻𑀮𑁂𑀢𑁆𑀯𑀸𑀯 𑀦𑀤𑀺𑀬𑀸 𑀯𑀸 𑀧𑀧𑀸𑀢𑁂 𑀯𑀸 𑀯𑀦𑀕𑀳𑀦𑁂 𑀯𑀸 𑀕𑀽𑀣𑀁 𑀯𑀺𑀬 𑀅𑀦𑀧𑁂𑀓𑁆𑀔𑁂𑀦 𑀧𑀢𑀺𑀢𑁄𑀓𑀸𑀲𑀁 𑀅𑀲𑀫𑀦𑁆𑀦𑀸𑀳𑀭𑀦𑁆𑀢𑁂𑀦 𑀧𑀸𑀢𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀕𑀽𑀣𑀁 𑀯𑀺𑀬 𑀙𑀟𑁆𑀟𑁂𑀢𑀩𑁆𑀩’’𑀦𑁆𑀢𑀺. 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀭𑀽𑀧𑀺𑀬𑀲𑀜𑁆𑀜𑀺𑀯𑁂𑀫𑀢𑀺𑀓𑀅𑀭𑀽𑀧𑀺𑀬𑀲𑀜𑁆𑀜𑀻𑀦𑀁 𑀯𑀲𑁂𑀦 𑀢𑀻𑀡𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀅𑀭𑀽𑀧𑀺𑀬𑁂 𑀭𑀽𑀧𑀺𑀬𑀲𑀜𑁆𑀜𑀺𑀦𑁄𑀢𑀺 𑀔𑀭𑀧𑀢𑁆𑀢𑀸𑀤𑀻𑀲𑀼 𑀲𑀼𑀯𑀡𑁆𑀡𑀸𑀤𑀺𑀲𑀜𑁆𑀜𑀺𑀦𑁄. 𑀭𑀢𑀦𑀲𑀺𑀓𑁆𑀔𑀸𑀧𑀤𑀦𑀬𑁂𑀦𑀸𑀢𑀺 ‘‘𑀅𑀚𑁆𑀛𑀸𑀭𑀸𑀫𑁂 𑀯𑀸 𑀅𑀚𑁆𑀛𑀸𑀯𑀲𑀣𑁂 𑀯𑀸’’𑀢𑀺 (𑀧𑀸𑀘𑀺. 𑁫𑁦𑁫) 𑀏𑀢𑁆𑀣 𑀯𑀼𑀢𑁆𑀢𑀯𑀺𑀥𑀺𑀦𑀸.

𑀚𑀸𑀢𑀭𑀽𑀧𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀓𑀢𑀸𑀤𑀺𑀯𑀲𑁂𑀦𑀸𑀢𑀺 𑀓𑀢𑀅𑀓𑀢𑀓𑀢𑀸𑀓𑀢𑀯𑀲𑁂𑀦. 𑀲𑀼𑀯𑀡𑁆𑀡𑀸𑀤𑀺𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼 𑀇𑀥 𑀭𑀽𑀧𑀺𑀬𑀕𑁆𑀕𑀳𑀡𑁂𑀦 𑀕𑀳𑀺𑀢𑀦𑁆𑀢𑀺 𑀆𑀳 ‘‘𑀚𑀸𑀢𑀭𑀽𑀧𑀭𑀚𑀢𑀧𑀭𑀺𑀯𑀢𑁆𑀢𑀦’’𑀦𑁆𑀢𑀺. 𑀇𑀤𑀜𑁆𑀘 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 ‘‘𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂𑀦 𑀳𑀻’’𑀢𑀺𑀆𑀤𑀺. 𑀧𑀭𑀺𑀯𑀢𑁆𑀢𑀦𑀦𑁆𑀢𑀺 𑀲𑀸𑀤𑀺𑀢𑀭𑀽𑀧𑀺𑀬𑀲𑁆𑀲 𑀧𑀭𑀺𑀯𑀢𑁆𑀢𑀦𑀁. 𑀧𑀼𑀭𑀺𑀫𑀦𑀬𑀸𑀦𑀼𑀲𑀸𑀭𑁂𑀦𑀸𑀢𑀺 ‘‘𑀅𑀳𑀁, 𑀪𑀦𑁆𑀢𑁂, 𑀦𑀸𑀦𑀧𑁆𑀧𑀓𑀸𑀭𑀓𑀁 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀁 𑀲𑀫𑀸𑀧𑀚𑁆𑀚𑀺𑀁, 𑀇𑀤𑀁 𑀫𑁂 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁫𑁮𑁯).

𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀧𑀝𑀺𑀕𑁆𑀕𑀳𑀡𑀲𑁆𑀲𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀧𑀝𑀺𑀕𑁆𑀕𑀳𑀺𑀢𑀧𑀭𑀺𑀯𑀢𑁆𑀢𑀦𑁂 𑀤𑁄𑀲𑀁 𑀅𑀤𑀺𑀲𑁆𑀯𑀸 𑀭𑀽𑀧𑀺𑀬𑀧𑀭𑀺𑀯𑀢𑁆𑀢𑀦𑁂. 𑀢𑀲𑁆𑀲 𑀯𑀸𑀢𑀺 𑀧𑀭𑀺𑀯𑀢𑁆𑀢𑀺𑀢𑀲𑁆𑀲 𑀯𑀸. 𑀥𑀦𑀲𑁆𑀲 𑀯𑀸𑀢𑀺 𑀅𑀢𑁆𑀢𑀦𑁄 𑀫𑀽𑀮𑀥𑀦𑀲𑁆𑀲 𑀯𑀸. 𑀅𑀢𑁆𑀢𑀦𑁄 𑀯𑀸 𑀳𑀺 𑀅𑀭𑀽𑀧𑀺𑀬𑁂𑀦 𑀧𑀭𑀲𑁆𑀲 𑀭𑀽𑀧𑀺𑀬𑀁 𑀘𑁂𑀢𑀸𑀧𑁂𑀬𑁆𑀬, 𑀅𑀢𑁆𑀢𑀦𑁄 𑀯𑀸 𑀭𑀽𑀧𑀺𑀬𑁂𑀦 𑀧𑀭𑀲𑁆𑀲 𑀅𑀭𑀽𑀧𑀺𑀬𑀁, 𑀉𑀪𑀬𑀣𑀸𑀧𑀺 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑁄 𑀓𑀢𑁄𑀯 𑀳𑁄𑀢𑀻𑀢𑀺.

𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀓𑀬𑀯𑀺𑀓𑁆𑀓𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀲𑁆𑀲 𑀧𑀦 𑀳𑁂𑀝𑁆𑀞𑀸𑀲𑀺𑀓𑁆𑀔𑀸𑀧𑀤𑁂𑀦 𑀕𑀳𑀺𑀢𑀢𑁆𑀢𑀸 𑀓𑀧𑁆𑀧𑀺𑀬𑀪𑀡𑁆𑀟𑀸𑀦𑀫𑁂𑀯𑁂𑀢𑁆𑀣 𑀕𑀳𑀡𑀦𑁆𑀢𑀺 𑀆𑀳 ‘‘𑀘𑀻𑀯𑀭𑀸𑀤𑀻𑀦’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀘𑀻𑀯𑀭𑀸𑀤𑀻𑀦𑀁 𑀓𑀧𑁆𑀧𑀺𑀬𑀪𑀡𑁆𑀟𑀸𑀦𑀦𑁆𑀢𑀺 𑀅𑀦𑁆𑀢𑀫𑀲𑁄 𑀤𑀲𑀺𑀓𑀲𑀼𑀢𑁆𑀢𑀁 𑀉𑀧𑀸𑀤𑀸𑀬 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀸𑀦𑀁 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀓𑀧𑁆𑀧𑀺𑀬𑀪𑀡𑁆𑀟𑀸𑀦𑀁. 𑀓𑀬𑀁 𑀦𑀸𑀫 𑀧𑀭𑀪𑀡𑁆𑀟𑀲𑁆𑀲 𑀕𑀳𑀡𑀁. 𑀯𑀺𑀓𑁆𑀓𑀬𑀁 𑀦𑀸𑀫 𑀅𑀢𑁆𑀢𑀦𑁄 𑀪𑀡𑁆𑀟𑀲𑁆𑀲 𑀤𑀸𑀦𑀁. 𑀢𑁂𑀦𑀸𑀳 ‘‘𑀇𑀫𑀺𑀦𑀸 𑀇𑀫𑀁 𑀤𑁂𑀳𑀻’’𑀢𑀺𑀆𑀤𑀺. 𑀧𑀭𑀲𑁆𑀲𑀸𑀢𑀺 𑀞𑀧𑁂𑀢𑁆𑀯𑀸 𑀧𑀜𑁆𑀘 𑀲𑀳𑀥𑀫𑁆𑀫𑀺𑀓𑁂 𑀅𑀜𑁆𑀜𑀲𑁆𑀲. 𑀏𑀢𑁆𑀣 𑀘 ‘‘𑀅𑀳𑀁, 𑀪𑀦𑁆𑀢𑁂, 𑀦𑀸𑀦𑀧𑁆𑀧𑀓𑀸𑀭𑀓𑀁 𑀓𑀬𑀯𑀺𑀓𑁆𑀓𑀬𑀁 𑀲𑀫𑀸𑀧𑀚𑁆𑀚𑀺𑀁, 𑀇𑀤𑀁 𑀫𑁂 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀇𑀫𑀸𑀳𑀁 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁫𑁯𑁫) 𑀦𑀬𑁂𑀦 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀯𑀼𑀢𑁆𑀢𑀮𑀓𑁆𑀔𑀡𑀯𑀲𑁂𑀦𑀸’’𑀢𑀺𑀆𑀤𑀺. 𑀦𑀦𑀼 𑀘𑁂𑀢𑁆𑀣 𑀘𑀻𑀯𑀭𑀥𑁄𑀯𑀦𑁂 𑀯𑀸 𑀓𑁂𑀲𑀘𑁆𑀙𑁂𑀤𑀦𑁂 𑀯𑀸 𑀪𑀽𑀫𑀺𑀲𑁄𑀥𑀦𑀸𑀤𑀺𑀦𑀯𑀓𑀫𑁆𑀫𑁂 𑀯𑀸 𑀧𑀭𑀪𑀡𑁆𑀟𑀁 𑀅𑀢𑁆𑀢𑀦𑁄 𑀳𑀢𑁆𑀣𑀕𑀢𑀁 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁 𑀦𑀸𑀫 𑀦𑀢𑁆𑀣𑀺, 𑀢𑀢𑁆𑀣 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀅𑀲𑀦𑁆𑀢𑁂 𑀧𑀸𑀘𑀺𑀢𑁆𑀢𑀺𑀬𑀁 𑀤𑁂𑀲𑁂𑀢𑀩𑁆𑀩𑀫𑁂𑀯𑀸’’𑀢𑀺. 𑀬𑀣𑀸 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀫𑁆𑀳𑀺 𑀧𑀭𑀺𑀪𑀼𑀢𑁆𑀢𑁂 𑀯𑀸 𑀦𑀝𑁆𑀞𑁂 𑀯𑀸 𑀧𑀸𑀘𑀺𑀢𑁆𑀢𑀺𑀬𑀁 𑀤𑁂𑀲𑁂𑀢𑀺, 𑀏𑀯𑀁 𑀇𑀥𑀸𑀧𑀺 𑀤𑁂𑀲𑁂𑀢𑀩𑁆𑀩𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀤𑀁 𑀅𑀫𑁆𑀳𑀸𑀓𑀁 𑀅𑀢𑁆𑀣𑀻𑀢𑀺 𑀇𑀤𑀁 𑀧𑀝𑀺𑀕𑁆𑀕𑀳𑀺𑀢𑀁 𑀢𑁂𑀮𑀁 𑀯𑀸 𑀲𑀧𑁆𑀧𑀺 𑀯𑀸 𑀅𑀫𑁆𑀳𑀸𑀓𑀁 𑀲𑀁𑀯𑀺𑀚𑁆𑀚𑀢𑀺. 𑀅𑀫𑁆𑀳𑀸𑀓𑀜𑁆𑀘 𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀅𑀢𑁆𑀣𑁄𑀢𑀺 𑀅𑀫𑁆𑀳𑀸𑀓𑀜𑁆𑀘 𑀢𑀤𑀜𑁆𑀜𑁂𑀦 𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑁂𑀦 𑀅𑀢𑁆𑀣𑁄. ‘‘𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑁂 𑀯𑀼𑀢𑁆𑀢𑀦𑀬𑀫𑁂𑀯𑀸’’𑀢𑀺 𑀇𑀫𑀺𑀦𑀸 ‘‘𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀅𑀓𑀬𑀯𑀺𑀓𑁆𑀓𑀬𑁂 𑀓𑀬𑀯𑀺𑀓𑁆𑀓𑀬𑀲𑀜𑁆𑀜𑀺𑀦𑁄 𑀘 𑀯𑁂𑀫𑀢𑀺𑀓𑀲𑁆𑀲 𑀘 𑀤𑀼𑀓𑁆𑀓𑀝’’𑀦𑁆𑀢𑀺 𑀇𑀫𑀁 𑀦𑀬𑀫𑀢𑀺𑀤𑀺𑀲𑀢𑀺.

𑀓𑀬𑀯𑀺𑀓𑁆𑀓𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀏𑀴𑀓𑀮𑁄𑀫𑀯𑀕𑁆𑀕𑁄 𑀤𑀼𑀢𑀺𑀬𑁄.