𑁧𑁨. 𑀧𑀸𑀧𑀲𑀫𑀸𑀘𑀸𑀭𑀧𑀞𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑁆𑀯𑀸𑀤𑀲𑀫𑁂 𑀲𑀁𑀲𑀝𑁆𑀞𑀸𑀢𑀺 𑀧𑀩𑁆𑀩𑀚𑀺𑀢𑀸𑀦𑀁 𑀅𑀦𑀦𑀼𑀮𑁄𑀫𑁂𑀦 𑀕𑀺𑀳𑀻𑀦𑀁 𑀓𑁄𑀝𑁆𑀝𑀦𑀧𑀘𑀦𑀲𑀸𑀲𑀦𑀳𑀭𑀡𑀸𑀤𑀺𑀦𑀸 𑀓𑀸𑀬𑀺𑀓𑀯𑀸𑀘𑀲𑀺𑀓𑁂𑀦 𑀫𑀺𑀲𑁆𑀲𑀻𑀪𑀽𑀢𑀸. 𑀧𑀸𑀧𑁄 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀆𑀘𑀸𑀭𑁄 𑀏𑀢𑀸𑀲𑀦𑁆𑀢𑀺 𑀧𑀸𑀧𑀸𑀘𑀸𑀭𑀸. 𑀧𑀸𑀧𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀏𑀢𑀸𑀲𑀦𑁆𑀢𑀺 𑀧𑀸𑀧𑀲𑀤𑁆𑀤𑀸. 𑀧𑀸𑀧𑁄 𑀆𑀚𑀻𑀯𑀲𑀗𑁆𑀔𑀸𑀢𑁄 𑀲𑀺𑀮𑁄𑀓𑁄 𑀏𑀢𑀸𑀲𑀦𑁆𑀢𑀺 𑀧𑀸𑀧𑀲𑀺𑀮𑁄𑀓𑀸. 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀯𑀺𑀳𑁂𑀲𑀺𑀓𑀸𑀢𑀺 𑀅𑀜𑁆𑀜𑀫𑀜𑁆𑀜𑀺𑀲𑁆𑀲𑀸 𑀓𑀫𑁆𑀫𑁂 𑀓𑀭𑀺𑀬𑀫𑀸𑀦𑁂 𑀧𑀝𑀺𑀓𑁆𑀓𑁄𑀲𑀦𑁂𑀦 𑀯𑀺𑀳𑁂𑀲𑀺𑀓𑀸. 𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸𑀢𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀲𑁆𑀲 𑀯𑀚𑁆𑀚𑀲𑁆𑀲 𑀧𑀝𑀺𑀘𑁆𑀙𑀸𑀤𑀺𑀓𑀸.

𑀲𑀸𑀯𑀢𑁆𑀣𑀺𑀬𑀁 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀼𑀦𑀺𑀬𑁄 𑀆𑀭𑀩𑁆𑀪 𑀲𑀁𑀲𑀝𑁆𑀞𑀯𑀺𑀳𑀸𑀭𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑁂𑀲𑀫𑁂𑀢𑁆𑀣𑀸𑀧𑀺 𑀤𑀲𑀫𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁, 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑀓𑀸𑀮𑁂 𑀧𑀦 𑀤𑁆𑀯𑁂𑀢𑀺𑀲𑁆𑀲𑁄 𑀏𑀓𑀢𑁄 𑀲𑀫𑀦𑀼𑀪𑀸𑀲𑀺𑀢𑀩𑁆𑀩𑀸𑀢𑀺.

𑀧𑀸𑀧𑀲𑀫𑀸𑀘𑀸𑀭𑀧𑀞𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.