𑀲𑀗𑁆𑀖𑀸𑀤𑀺𑀲𑁂𑀲𑀓𑀡𑁆𑀟𑁄

𑁧. 𑀉𑀲𑁆𑀲𑀬𑀯𑀸𑀤𑀺𑀓𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀗𑁆𑀖𑀸𑀤𑀺𑀲𑁂𑀲𑁂𑀲𑀼 𑀧𑀞𑀫𑁂 𑀉𑀲𑁆𑀲𑀬𑀯𑀸𑀤𑀺𑀓𑀸𑀢𑀺 𑀫𑀸𑀦𑀼𑀲𑁆𑀲𑀬𑀯𑀲𑁂𑀦 𑀓𑁄𑀥𑀼𑀲𑁆𑀲𑀬𑀯𑀲𑁂𑀦 𑀅𑀟𑁆𑀟𑀓𑀭𑀡𑀢𑁆𑀣𑀸𑀬 𑀯𑀺𑀦𑀺𑀘𑁆𑀙𑀬𑀫𑀳𑀸𑀫𑀢𑁆𑀢𑀸𑀦𑀁 𑀲𑀦𑁆𑀢𑀺𑀓𑁂 𑀯𑀺𑀯𑀤𑀫𑀸𑀦𑀸. 𑀕𑀳𑀧𑀢𑀺𑀦𑀸 𑀯𑀸𑀢𑀺𑀆𑀤𑀻𑀳𑀺 𑀞𑀧𑁂𑀢𑁆𑀯𑀸 𑀧𑀜𑁆𑀘 𑀲𑀳𑀥𑀫𑁆𑀫𑀺𑀓𑁂 𑀅𑀯𑀲𑁂𑀲𑀸 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸 𑀲𑀗𑁆𑀕𑀳𑀺𑀢𑀸. 𑀅𑀬𑀁 𑀪𑀺𑀓𑁆𑀔𑀼𑀦𑀻 𑀧𑀞𑀫𑀸𑀧𑀢𑁆𑀢𑀺𑀓𑀦𑁆𑀢𑀺 𑀆𑀤𑀺𑀫𑁆𑀳𑀺 𑀧𑀞𑀫𑀁 𑀆𑀧𑀢𑁆𑀢𑀺 𑀏𑀢𑀲𑁆𑀲𑀸𑀢𑀺 𑀧𑀞𑀫𑀸𑀧𑀢𑁆𑀢𑀺𑀓𑁄, 𑀯𑀻𑀢𑀺𑀓𑁆𑀓𑀫𑀓𑁆𑀔𑀡𑁂𑀬𑁂𑀯 𑀆𑀧𑀚𑁆𑀚𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄, 𑀢𑀁 𑀧𑀞𑀫𑀸𑀧𑀢𑁆𑀢𑀺𑀓𑀁. 𑀆𑀧𑀦𑁆𑀦𑀸𑀢𑀺 𑀅𑀟𑁆𑀟𑀧𑀭𑀺𑀬𑁄𑀲𑀸𑀦𑁂 𑀆𑀧𑀦𑁆𑀦𑀸. 𑀪𑀺𑀓𑁆𑀔𑀼𑀦𑀺𑀁 𑀲𑀗𑁆𑀖𑀢𑁄 𑀦𑀺𑀲𑁆𑀲𑀸𑀭𑁂𑀢𑀻𑀢𑀺 𑀦𑀺𑀲𑁆𑀲𑀸𑀭𑀡𑀻𑀬𑁄, 𑀢𑀁 𑀦𑀺𑀲𑁆𑀲𑀸𑀭𑀡𑀻𑀬𑀁. 𑀲𑀗𑁆𑀖𑀸𑀤𑀺𑀲𑁂𑀲𑀦𑁆𑀢𑀺 𑀏𑀯𑀁𑀦𑀸𑀫𑀓𑀁.

𑀲𑀸𑀯𑀢𑁆𑀣𑀺𑀬𑀁 𑀣𑀼𑀮𑁆𑀮𑀦𑀦𑁆𑀤𑀁 𑀆𑀭𑀩𑁆𑀪 𑀉𑀲𑁆𑀲𑀬𑀯𑀸𑀤𑀺𑀓𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑀸𑀡𑀢𑁆𑀢𑀺𑀓𑀁, ‘‘𑀅𑀟𑁆𑀟𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀬𑀁𑀓𑀺𑀜𑁆𑀘𑀺 𑀤𑀼𑀢𑀺𑀬𑀺𑀓𑀁 𑀯𑀸 𑀲𑀓𑁆𑀔𑀺𑀁 𑀯𑀸 𑀲𑀳𑀸𑀬𑀁 𑀯𑀸 𑀧𑀭𑀺𑀬𑁂𑀲𑀦𑁆𑀢𑀺𑀬𑀸 𑀧𑀭𑀺𑀬𑁂𑀲𑀦𑁂 𑀤𑀼𑀓𑁆𑀓𑀝𑀁, 𑀬𑀢𑁆𑀣 𑀞𑀺𑀢𑀸𑀬 ‘‘𑀅𑀟𑁆𑀟𑀁 𑀓𑀸𑀢𑀼𑀁 𑀕𑀘𑁆𑀙𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀕𑀘𑁆𑀙𑀦𑁆𑀢𑀺𑀬𑀸 𑀧𑀤𑁂 𑀧𑀤𑁂 𑀤𑀼𑀓𑁆𑀓𑀝𑀁, 𑀬𑀢𑁆𑀣𑀓𑀢𑁆𑀣𑀘𑀺 𑀅𑀦𑁆𑀢𑀫𑀲𑁄 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀆𑀕𑀢𑁂𑀧𑀺 𑀯𑁄𑀳𑀸𑀭𑀺𑀓𑁂 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀓𑀣𑀁 𑀆𑀭𑁄𑀘𑁂𑀦𑁆𑀢𑀺𑀬𑀸 𑀤𑀼𑀓𑁆𑀓𑀝𑀁. 𑀇𑀢𑀭𑁂𑀦 𑀅𑀢𑁆𑀢𑀦𑁄 𑀓𑀣𑀸𑀬 𑀆𑀭𑁄𑀘𑀺𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀁, 𑀧𑀞𑀫𑀁 𑀇𑀢𑀭𑁂𑀦 𑀧𑀘𑁆𑀙𑀸 𑀪𑀺𑀓𑁆𑀔𑀼𑀦𑀺𑀬𑀸 𑀆𑀭𑁄𑀘𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀦 𑀪𑀺𑀓𑁆𑀔𑀼𑀦𑀻 𑀢𑀁 𑀯𑀤𑀢𑀺 ‘‘𑀫𑀫 𑀘 𑀢𑀯 𑀘 𑀓𑀣𑀁 𑀢𑁆𑀯𑀁𑀬𑁂𑀯 𑀆𑀭𑁄𑀘𑁂𑀳𑀻’’𑀢𑀺, 𑀲𑁄 𑀅𑀢𑁆𑀢𑀦𑁄 𑀯𑀸 𑀓𑀣𑀁 𑀧𑀞𑀫𑀁 𑀆𑀭𑁄𑀘𑁂𑀢𑀼, 𑀢𑀲𑁆𑀲𑀸 𑀯𑀸, 𑀧𑀞𑀫𑀸𑀭𑁄𑀘𑀦𑁂 𑀪𑀺𑀓𑁆𑀔𑀼𑀦𑀺𑀬𑀸 𑀤𑀼𑀓𑁆𑀓𑀝𑀁, 𑀤𑀼𑀢𑀺𑀬𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀢𑁂𑀦 𑀏𑀯𑀁 𑀯𑀼𑀢𑁆𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀆𑀭𑁄𑀘𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀦 𑀪𑀺𑀓𑁆𑀔𑀼𑀦𑀻 𑀅𑀜𑁆𑀜𑁂𑀦 𑀓𑀣𑀸𑀧𑁂𑀢𑀺, 𑀢𑀢𑁆𑀭𑀸𑀧𑀺 𑀏𑀲𑁂𑀯 𑀦𑀬𑁄. 𑀬𑀣𑀸 𑀯𑀸 𑀢𑀣𑀸 𑀯𑀸 𑀳𑀺 𑀆𑀭𑁄𑀘𑀺𑀬𑀫𑀸𑀦𑁂 𑀧𑀞𑀫𑀸𑀭𑁄𑀘𑀦𑁂 𑀪𑀺𑀓𑁆𑀔𑀼𑀦𑀺𑀬𑀸 𑀤𑀼𑀓𑁆𑀓𑀝𑀁, 𑀤𑀼𑀢𑀺𑀬𑁂 𑀣𑀼𑀮𑁆𑀮𑀘𑁆𑀘𑀬𑀁. 𑀉𑀪𑀺𑀦𑁆𑀦𑀁 𑀧𑀦 𑀓𑀣𑀁 𑀲𑀼𑀢𑁆𑀯𑀸 𑀯𑁄𑀳𑀸𑀭𑀺𑀓𑁂𑀳𑀺 𑀯𑀺𑀦𑀺𑀘𑁆𑀙𑀬𑁂 𑀓𑀢𑁂 𑀅𑀟𑁆𑀟𑀧𑀭𑀺𑀬𑁄𑀲𑀸𑀦𑀁 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀺𑀁 𑀅𑀟𑁆𑀟𑀧𑀭𑀺𑀬𑁄𑀲𑀸𑀦𑁂 𑀪𑀺𑀓𑁆𑀔𑀼𑀦𑀺𑀬𑀸 𑀚𑀬𑁂𑀧𑀺 𑀧𑀭𑀸𑀚𑀬𑁂𑀧𑀺 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀬𑀸 𑀧𑀦 𑀧𑀘𑁆𑀘𑀢𑁆𑀣𑀺𑀓𑀫𑀦𑀼𑀲𑁆𑀲𑁂𑀳𑀺 𑀤𑀽𑀢𑀁 𑀯𑀸 𑀧𑀳𑀺𑀡𑀺𑀢𑁆𑀯𑀸, 𑀲𑀬𑀁 𑀯𑀸 𑀆𑀕𑀦𑁆𑀢𑁆𑀯𑀸 ‘‘𑀏𑀳𑀺, 𑀅𑀬𑁆𑀬𑁂’’𑀢𑀺 𑀆𑀓𑀟𑁆𑀠𑀺𑀬𑀫𑀸𑀦𑀸 𑀕𑀘𑁆𑀙𑀢𑀺, 𑀬𑀸 𑀯𑀸 𑀉𑀧𑀲𑁆𑀲𑀬𑁂 𑀅𑀜𑁆𑀜𑁂𑀳𑀺 𑀓𑀢𑀁 𑀅𑀦𑀸𑀘𑀸𑀭𑀁 𑀅𑀦𑁄𑀤𑀺𑀲𑁆𑀲 𑀆𑀘𑀺𑀓𑁆𑀔𑀦𑁆𑀢𑀻 𑀭𑀓𑁆𑀔𑀁 𑀬𑀸𑀘𑀢𑀺, 𑀬𑀸𑀬 𑀘 𑀓𑀺𑀜𑁆𑀘𑀺 𑀅𑀯𑀼𑀢𑁆𑀢𑀸 𑀯𑁄𑀳𑀸𑀭𑀺𑀓𑀸 𑀅𑀜𑁆𑀜𑀢𑁄 𑀲𑀼𑀢𑁆𑀯𑀸 𑀲𑀬𑀫𑁂𑀯 𑀅𑀟𑁆𑀟𑀁 𑀧𑀭𑀺𑀬𑁄𑀲𑀸𑀧𑁂𑀦𑁆𑀢𑀺, 𑀢𑀲𑁆𑀲𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀅𑀜𑁆𑀜𑁂𑀳𑀺 𑀅𑀦𑀸𑀓𑀟𑁆𑀠𑀺𑀢𑀸𑀬 𑀅𑀟𑁆𑀟𑀓𑀭𑀡𑀁, 𑀅𑀟𑁆𑀟𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀤𑁆𑀯𑁂 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀧𑀞𑀫𑀓𑀣𑀺𑀦𑀲𑀤𑀺𑀲𑀸𑀦𑀺, 𑀇𑀤𑀁 𑀧𑀦 𑀓𑀺𑀭𑀺𑀬𑀫𑁂𑀯𑀸𑀢𑀺.

𑀉𑀲𑁆𑀲𑀬𑀯𑀸𑀤𑀺𑀓𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀘𑁄𑀭𑀺𑀯𑀼𑀝𑁆𑀞𑀸𑀧𑀺𑀓𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀼𑀢𑀺𑀬𑁂 𑀬𑀸𑀬 𑀧𑀜𑁆𑀘𑀫𑀸𑀲𑀕𑁆𑀖𑀦𑀓𑀢𑁄 𑀧𑀝𑁆𑀞𑀸𑀬 𑀬𑀁𑀓𑀺𑀜𑁆𑀘𑀺 𑀧𑀭𑀲𑀦𑁆𑀢𑀓𑀁 𑀅𑀯𑀳𑀭𑀺𑀢𑀁, 𑀅𑀬𑀁 𑀘𑁄𑀭𑀻 𑀦𑀸𑀫, 𑀢𑀁 𑀘𑁄𑀭𑀺𑀁. 𑀯𑀚𑁆𑀛𑀁 𑀯𑀺𑀤𑀺𑀢𑀦𑁆𑀢𑀺 𑀢𑁂𑀦 𑀓𑀫𑁆𑀫𑁂𑀦 ‘‘𑀯𑀥𑀸𑀭𑀳𑀸 𑀅𑀬’’𑀦𑁆𑀢𑀺 𑀏𑀯𑀁 𑀯𑀺𑀤𑀺𑀢𑀁. 𑀅𑀦𑀧𑀮𑁄𑀓𑁂𑀢𑁆𑀯𑀸𑀢𑀺 𑀅𑀦𑀸𑀧𑀼𑀘𑁆𑀙𑀸. 𑀕𑀡𑀦𑁆𑀢𑀺 𑀫𑀮𑁆𑀮𑀕𑀡𑀪𑀝𑀺𑀧𑀼𑀢𑁆𑀢𑀕𑀡𑀸𑀤𑀺𑀓𑀁. 𑀧𑀽𑀕𑀦𑁆𑀢𑀺 𑀥𑀫𑁆𑀫𑀕𑀡𑀁. 𑀲𑁂𑀡𑀺𑀦𑁆𑀢𑀺 𑀕𑀦𑁆𑀥𑀺𑀓𑀲𑁂𑀡𑀺𑀤𑀼𑀲𑁆𑀲𑀺𑀓𑀲𑁂𑀡𑀺𑀆𑀤𑀺𑀓𑀁. 𑀬𑀢𑁆𑀣 𑀬𑀢𑁆𑀣 𑀳𑀺 𑀭𑀸𑀚𑀸𑀦𑁄 𑀕𑀡𑀸𑀤𑀻𑀦𑀁 𑀕𑀸𑀫𑀦𑀺𑀕𑀫𑁂 𑀦𑀺𑀬𑁆𑀬𑀸𑀢𑁂𑀦𑁆𑀢𑀺 ‘‘𑀢𑀼𑀫𑁆𑀳𑁂𑀯 𑀏𑀢𑁆𑀣 𑀅𑀦𑀼𑀲𑀸𑀲𑀣𑀸’’𑀢𑀺, 𑀢𑀢𑁆𑀣 𑀢𑀢𑁆𑀣 𑀢𑁂𑀬𑁂𑀯 𑀇𑀲𑁆𑀲𑀭𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀭𑀸𑀚𑀸𑀦𑀁 𑀯𑀸 𑀕𑀡𑀸𑀤𑀺𑀓𑁂 𑀯𑀸 𑀅𑀧𑀮𑁄𑀓𑁂𑀢𑁆𑀯𑀸𑀧𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀅𑀧𑀮𑁄𑀓𑁂𑀢𑀩𑁆𑀩𑁄𑀯. 𑀅𑀜𑁆𑀜𑀢𑁆𑀭 𑀓𑀧𑁆𑀧𑀸𑀢𑀺 𑀢𑀺𑀢𑁆𑀣𑀺𑀬𑁂𑀲𑀼 𑀯𑀸 𑀅𑀜𑁆𑀜𑀪𑀺𑀓𑁆𑀔𑀼𑀦𑀻𑀲𑀼 𑀯𑀸 𑀧𑀩𑁆𑀩𑀚𑀺𑀢𑀧𑀼𑀩𑁆𑀩𑀸 𑀓𑀧𑁆𑀧𑀸 𑀦𑀸𑀫, 𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺𑀬𑀸 𑀕𑀡𑀆𑀘𑀭𑀺𑀦𑀻 𑀧𑀢𑁆𑀢𑀘𑀻𑀯𑀭𑀧𑀭𑀺𑀬𑁂𑀲𑀦𑁂𑀲𑀼 𑀲𑀻𑀫𑀸𑀲𑀫𑁆𑀫𑀼𑀢𑀺𑀬𑀸 𑀜𑀢𑁆𑀢𑀺𑀬𑀸 𑀘 𑀤𑀼𑀓𑁆𑀓𑀝𑀁, 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀣𑀼𑀮𑁆𑀮𑀘𑁆𑀘𑀬𑀁, 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀲𑀸𑀯𑀢𑁆𑀣𑀺𑀬𑀁 𑀣𑀼𑀮𑁆𑀮𑀦𑀦𑁆𑀤𑀁 𑀆𑀭𑀩𑁆𑀪 𑀘𑁄𑀭𑀺𑀁 𑀯𑀼𑀝𑁆𑀞𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀘𑁄𑀭𑀺𑀬𑀸 𑀯𑁂𑀫𑀢𑀺𑀓𑀸𑀬 𑀤𑀼𑀓𑁆𑀓𑀝𑀁, 𑀢𑀣𑀸 𑀅𑀘𑁄𑀭𑀺𑀬𑀸 𑀘𑁄𑀭𑀺𑀲𑀜𑁆𑀜𑀸𑀬 𑀘𑁂𑀯 𑀯𑁂𑀫𑀢𑀺𑀓𑀸𑀬 𑀘. 𑀅𑀘𑁄𑀭𑀺𑀲𑀜𑁆𑀜𑀸𑀬, 𑀅𑀚𑀸𑀦𑀦𑁆𑀢𑀺𑀬𑀸, 𑀅𑀧𑀮𑁄𑀓𑁂𑀢𑁆𑀯𑀸 𑀯𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑀸, 𑀓𑀧𑁆𑀧𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀘𑁄𑀭𑀺𑀢𑀸, 𑀘𑁄𑀭𑀺𑀲𑀜𑁆𑀜𑀺𑀢𑀸, 𑀅𑀜𑁆𑀜𑀢𑁆𑀭 𑀅𑀦𑀼𑀜𑁆𑀜𑀸𑀢𑀓𑀸𑀭𑀡𑀸 𑀯𑀼𑀝𑁆𑀞𑀸𑀧𑀦𑀦𑁆𑀢𑀺, 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀘𑁄𑀭𑀺𑀯𑀼𑀝𑁆𑀞𑀸𑀧𑀦𑀲𑀫𑀼𑀝𑁆𑀞𑀸𑀦𑀁, 𑀓𑀺𑀭𑀺𑀬𑀸𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀘𑁄𑀭𑀺𑀯𑀼𑀝𑁆𑀞𑀸𑀧𑀺𑀓𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀏𑀓𑀕𑀸𑀫𑀦𑁆𑀢𑀭𑀕𑀫𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀢𑀺𑀬𑁂 𑀕𑀸𑀫𑀦𑁆𑀢𑀭𑀦𑁆𑀢𑀺𑀆𑀤𑀻𑀲𑀼 𑀲𑀓𑀕𑀸𑀫𑀢𑁄 𑀢𑀸𑀯 𑀦𑀺𑀓𑁆𑀔𑀫𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀦 𑀅𑀜𑁆𑀜𑀁 𑀕𑀸𑀫𑀁 𑀕𑀘𑁆𑀙𑀦𑁆𑀢𑀺𑀬𑀸 𑀧𑀤𑁂 𑀧𑀤𑁂 𑀤𑀼𑀓𑁆𑀓𑀝𑀁, 𑀏𑀓𑁂𑀦 𑀧𑀸𑀤𑁂𑀦 𑀇𑀢𑀭𑀲𑁆𑀲 𑀕𑀸𑀫𑀲𑁆𑀲 𑀧𑀭𑀺𑀓𑁆𑀔𑁂𑀧𑁂 𑀯𑀸 𑀉𑀧𑀘𑀸𑀭𑁂 𑀯𑀸 𑀅𑀢𑀺𑀓𑁆𑀓𑀦𑁆𑀢𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀤𑀼𑀢𑀺𑀬𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀼𑀦 𑀲𑀓𑀕𑀸𑀫𑀁 𑀧𑀯𑀺𑀲𑀦𑁆𑀢𑀺𑀬𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀦 𑀔𑀡𑁆𑀟𑀧𑀸𑀓𑀸𑀭𑁂𑀦 𑀯𑀸 𑀯𑀢𑀺𑀘𑁆𑀙𑀺𑀤𑁆𑀤𑁂𑀦 𑀯𑀸 𑀪𑀺𑀓𑁆𑀔𑀼𑀦𑀺𑀯𑀺𑀳𑀸𑀭𑀪𑀽𑀫𑀺𑀁𑀬𑁂𑀯 𑀲𑀓𑁆𑀓𑀸 𑀳𑁄𑀢𑀺 𑀧𑀯𑀺𑀲𑀺𑀢𑀼𑀁, 𑀏𑀯𑀁 𑀧𑀯𑀺𑀲𑀫𑀸𑀦𑀸𑀬 𑀓𑀧𑁆𑀧𑀺𑀬𑀪𑀽𑀫𑀺𑀬𑀸 𑀧𑀯𑀺𑀝𑁆𑀞𑀸 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀯𑀝𑁆𑀝𑀢𑀺. 𑀩𑀳𑀺𑀕𑀸𑀫𑁂 𑀞𑀢𑁆𑀯𑀸 𑀬𑀁𑀓𑀺𑀜𑁆𑀘𑀺 𑀲𑀓𑀕𑀸𑀫𑀁 𑀯𑀸 𑀧𑀭𑀕𑀸𑀫𑀁 𑀯𑀸 𑀅𑀓𑀧𑁆𑀧𑀺𑀬𑀪𑀽𑀫𑀺𑀁 𑀧𑀤𑀲𑀸 𑀧𑀯𑀺𑀲𑀦𑁆𑀢𑀺𑀬𑀸 𑀆𑀧𑀢𑁆𑀢𑀻𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄.

𑀦𑀤𑀺𑀧𑀸𑀭𑀕𑀫𑀦𑁂 𑀯𑀼𑀢𑁆𑀢𑀮𑀓𑁆𑀔𑀡𑀸𑀬 𑀦𑀤𑀺𑀬𑀸 𑀤𑀼𑀢𑀺𑀬𑀺𑀓𑀁 𑀯𑀺𑀦𑀸 𑀧𑀭𑀢𑀻𑀭𑀁 𑀕𑀘𑁆𑀙𑀦𑁆𑀢𑀺𑀬𑀸 𑀯𑀸 𑀅𑀦𑁆𑀢𑀭𑀸𑀦𑀤𑀺𑀬𑀁 𑀤𑀼𑀢𑀺𑀬𑀺𑀓𑀸𑀬 𑀲𑀤𑁆𑀥𑀺𑀁 𑀪𑀡𑁆𑀟𑀺𑀢𑁆𑀯𑀸 𑀧𑀼𑀦 𑀑𑀭𑀺𑀫𑀢𑀻𑀭𑀫𑁂𑀯 𑀧𑀘𑁆𑀘𑀼𑀢𑁆𑀢𑀭𑀦𑁆𑀢𑀺𑀬𑀸 𑀯𑀸 𑀧𑀞𑀫𑀧𑀸𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 𑀢𑀻𑀭𑁂 𑀞𑀧𑀺𑀢𑀓𑁆𑀔𑀡𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀤𑀼𑀢𑀺𑀬𑀧𑀸𑀤𑀼𑀤𑁆𑀥𑀸𑀭𑁂 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀇𑀤𑁆𑀥𑀺𑀲𑁂𑀢𑀼𑀬𑀸𑀦𑀦𑀸𑀯𑀸𑀳𑀺 𑀧𑀦 𑀧𑀭𑀢𑀻𑀭𑀁 𑀑𑀢𑀭𑀺𑀢𑀼𑀁, 𑀦𑀳𑀸𑀦𑀸𑀤𑀺𑀓𑀸𑀭𑀡𑁂𑀦 𑀘 𑀑𑀢𑀺𑀡𑁆𑀡𑀸𑀬 𑀑𑀭𑀺𑀫𑀢𑀻𑀭𑀁 𑀧𑀤𑀲𑀸𑀧𑀺 𑀧𑀘𑁆𑀘𑀼𑀢𑁆𑀢𑀭𑀺𑀢𑀼𑀁 𑀯𑀝𑁆𑀝𑀢𑀺.

𑀭𑀢𑁆𑀢𑀺𑀯𑀺𑀧𑁆𑀧𑀯𑀸𑀲𑁂 ‘‘𑀧𑀼𑀭𑁂𑀅𑀭𑀼𑀡𑁂𑀬𑁂𑀯 𑀤𑀼𑀢𑀺𑀬𑀺𑀓𑀸𑀬 𑀳𑀢𑁆𑀣𑀧𑀸𑀲𑀁 𑀑𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑀁 𑀯𑀺𑀦𑀸 𑀏𑀓𑀕𑀩𑁆𑀪𑁂𑀧𑀺 𑀤𑀼𑀢𑀺𑀬𑀺𑀓𑀸𑀬 𑀳𑀢𑁆𑀣𑀧𑀸𑀲𑀸𑀢𑀺𑀓𑁆𑀓𑀫𑁂 𑀞𑀢𑁆𑀯𑀸 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀦𑁆𑀢𑀺𑀬𑀸 𑀆𑀧𑀢𑁆𑀢𑀺.

𑀏𑀓𑀸 𑀯𑀸 𑀕𑀡𑀫𑁆𑀳𑀸𑀢𑀺 𑀏𑀢𑁆𑀣 𑀧𑀦 𑀏𑀓𑀸 𑀪𑀺𑀓𑁆𑀔𑀼𑀦𑀻𑀧𑀺 𑀕𑀡𑁄𑀬𑁂𑀯. 𑀑𑀳𑀻𑀬𑁂𑀬𑁆𑀬𑀸𑀢𑀺 𑀅𑀯𑀳𑀻𑀬𑁂𑀬𑁆𑀬, 𑀤𑀲𑁆𑀲𑀦𑀽𑀧𑀘𑀸𑀭𑀁 𑀯𑀸 𑀲𑀯𑀦𑀽𑀧𑀘𑀸𑀭𑀁 𑀯𑀸 𑀯𑀺𑀚𑀳𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀇𑀦𑁆𑀤𑀔𑀻𑀮𑀸𑀢𑀺𑀓𑁆𑀓𑀫𑀢𑁄 𑀧𑀝𑁆𑀞𑀸𑀬 𑀩𑀳𑀺𑀕𑀸𑀫𑁂 𑀭𑀼𑀓𑁆𑀔𑀣𑀫𑁆𑀪𑀲𑀸𑀡𑀺𑀧𑀸𑀓𑀸𑀭𑀸𑀤𑀺𑀅𑀦𑁆𑀢𑀭𑀺𑀢𑀪𑀸𑀯𑁂𑀦𑀸𑀧𑀺 𑀤𑀼𑀢𑀺𑀬𑀺𑀓𑀸𑀬 𑀤𑀲𑁆𑀲𑀦𑀽𑀧𑀘𑀸𑀭𑁂 𑀯𑀺𑀚𑀳𑀺𑀢𑁂 𑀲𑀘𑁂𑀧𑀺 𑀲𑀯𑀦𑀽𑀧𑀘𑀸𑀭𑁄 𑀅𑀢𑁆𑀣𑀺, 𑀆𑀧𑀢𑁆𑀢𑀺𑀬𑁂𑀯. 𑀅𑀚𑁆𑀛𑁄𑀓𑀸𑀲𑁂 𑀧𑀦 𑀤𑀽𑀭𑁂𑀧𑀺 𑀤𑀲𑁆𑀲𑀦𑀽𑀧𑀘𑀸𑀭𑁄 𑀳𑁄𑀢𑀺, 𑀢𑀢𑁆𑀣 𑀫𑀕𑁆𑀕𑀫𑀽𑀴𑁆𑀳𑀲𑀤𑁆𑀤𑁂𑀦 𑀯𑀺𑀬 𑀥𑀫𑁆𑀫𑀲𑁆𑀲𑀯𑀦𑀸𑀭𑁄𑀘𑀦𑀲𑀤𑁆𑀤𑁂𑀦 𑀯𑀺𑀬 𑀘 ‘𑀅𑀬𑁆𑀬𑁂’𑀢𑀺 𑀲𑀤𑁆𑀤𑀸𑀬𑀦𑁆𑀢𑀺𑀬𑀸 𑀲𑀤𑁆𑀤𑀲𑁆𑀲𑀯𑀦𑀸𑀢𑀺𑀓𑁆𑀓𑀫𑁂 𑀆𑀧𑀢𑁆𑀢𑀺𑀬𑁂𑀯. 𑀲𑀘𑁂 𑀧𑀦 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑀻 𑀑𑀳𑀻𑀬𑀺𑀢𑁆𑀯𑀸 ‘‘𑀇𑀤𑀸𑀦𑀺 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀲𑀉𑀲𑁆𑀲𑀸𑀳𑀸 𑀅𑀦𑀼𑀩𑀦𑁆𑀥𑀢𑀺, 𑀯𑀝𑁆𑀝𑀢𑀺.

𑀲𑀸𑀯𑀢𑁆𑀣𑀺𑀬𑀁 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀦𑀺𑀁 𑀆𑀭𑀩𑁆𑀪 𑀕𑀸𑀫𑀦𑁆𑀢𑀭𑀕𑀫𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, ‘‘𑀏𑀓𑀸 𑀯𑀸 𑀦𑀤𑀺𑀧𑀸𑀭’’𑀦𑁆𑀢𑀺𑀆𑀤𑀺𑀓𑀸 𑀏𑀢𑁆𑀣 𑀢𑀺𑀯𑀺𑀥𑀸 𑀅𑀦𑀼𑀧𑀜𑁆𑀜𑀢𑁆𑀢𑀺, 𑀧𑀼𑀭𑁂 𑀅𑀭𑀼𑀡𑁂 𑀲𑀓𑀕𑀸𑀫𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀭𑀼𑀡𑀼𑀕𑁆𑀕𑀫𑀦𑀓𑀸𑀮𑁂 𑀕𑀸𑀫𑀦𑁆𑀢𑀭𑀧𑀭𑀺𑀬𑀸𑀧𑀦𑁆𑀦𑀁 𑀦𑀤𑀺𑀧𑀸𑀭𑀁 𑀑𑀓𑁆𑀓𑀫𑀦𑀦𑁆𑀢𑀺𑀬𑀸 𑀧𑀦 𑀘𑀢𑀲𑁆𑀲𑁄𑀧𑀺 𑀆𑀧𑀢𑁆𑀢𑀺𑀬𑁄 𑀏𑀓𑀓𑁆𑀔𑀡𑁂𑀬𑁂𑀯 𑀳𑁄𑀦𑁆𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀲𑀺𑀓𑁆𑀔𑀸𑀧𑀤𑀸 𑀩𑀼𑀤𑁆𑀥𑀯𑀭𑁂𑀦 𑀯𑀡𑁆𑀡𑀺𑀢𑀸;

𑀲𑀗𑁆𑀖𑀸𑀤𑀺𑀲𑁂𑀲𑀸 𑀘𑀢𑀼𑀭𑁄 𑀪𑀯𑁂𑀬𑁆𑀬𑀼𑀁;

𑀆𑀧𑀚𑁆𑀚𑁂𑀬𑁆𑀬 𑀏𑀓𑀧𑀬𑁄𑀕𑁂𑀦 𑀲𑀩𑁆𑀩𑀸;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸’’𑀢𑀺. (𑀧𑀭𑀺. 𑁪𑁭𑁯);

𑀏𑀢𑁂𑀦𑀼𑀧𑀸𑀬𑁂𑀦 𑀢𑀺𑀡𑁆𑀡𑀁, 𑀤𑁆𑀯𑀺𑀦𑁆𑀦𑀜𑁆𑀘 𑀏𑀓𑀢𑁄𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀤𑀼𑀢𑀺𑀬𑀺𑀓𑀸𑀬 𑀧𑀦 𑀧𑀓𑁆𑀓𑀦𑁆𑀢𑀸𑀬 𑀯𑀸 𑀯𑀺𑀩𑁆𑀪𑀦𑁆𑀢𑀸𑀬 𑀯𑀸 𑀓𑀸𑀮𑀗𑁆𑀓𑀢𑀸𑀬 𑀯𑀸 𑀧𑀓𑁆𑀔𑀲𑀗𑁆𑀓𑀦𑁆𑀢𑀸𑀬 𑀯𑀸 𑀆𑀧𑀤𑀸𑀲𑀼 𑀯𑀸 𑀕𑀸𑀫𑀦𑁆𑀢𑀭𑀕𑀫𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀺𑀬𑀸 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀅𑀦𑁆𑀢𑀭𑀸𑀬𑁂𑀦 𑀏𑀓𑀢𑁄𑀪𑀸𑀯𑁄, 𑀕𑀸𑀫𑀦𑁆𑀢𑀭𑀕𑀫𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀢𑀸𑀧𑀚𑁆𑀚𑀦𑀁, 𑀆𑀧𑀤𑀸𑀬 𑀅𑀪𑀸𑀯𑁄𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀧𑀞𑀫𑀧𑀸𑀭𑀸𑀚𑀺𑀓𑀲𑀤𑀺𑀲𑀸𑀦𑀺, 𑀇𑀤𑀁 𑀧𑀦 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀏𑀓𑀕𑀸𑀫𑀦𑁆𑀢𑀭𑀕𑀫𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀉𑀓𑁆𑀔𑀺𑀢𑁆𑀢𑀓𑀑𑀲𑀸𑀭𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀘𑀢𑀼𑀢𑁆𑀣𑁂 𑀉𑀓𑁆𑀔𑀺𑀢𑁆𑀢𑀦𑁆𑀢𑀺 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑀸𑀤𑀻𑀲𑀼 𑀉𑀓𑁆𑀔𑀺𑀢𑁆𑀢𑀁. 𑀅𑀦𑀜𑁆𑀜𑀸𑀬 𑀕𑀡𑀲𑁆𑀲 𑀙𑀦𑁆𑀤𑀦𑁆𑀢𑀺 𑀢𑀲𑁆𑀲𑁂𑀯 𑀓𑀸𑀭𑀓𑀲𑀗𑁆𑀖𑀲𑁆𑀲 𑀙𑀦𑁆𑀤𑀁 𑀅𑀚𑀸𑀦𑀺𑀢𑁆𑀯𑀸. 𑀑𑀲𑀸𑀭𑁂𑀬𑁆𑀬𑀸𑀢𑀺 𑀑𑀲𑀸𑀭𑀡𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀢𑀲𑁆𑀲𑀸 𑀏𑀯𑀁 𑀓𑀭𑁄𑀦𑁆𑀢𑀺𑀬𑀸, 𑀕𑀡𑀧𑀭𑀺𑀬𑁂𑀲𑀦𑁂 𑀲𑀻𑀫𑀸𑀲𑀫𑁆𑀫𑀼𑀢𑀺𑀬𑀸 𑀜𑀢𑁆𑀢𑀺𑀬𑀸 𑀘 𑀤𑀼𑀓𑁆𑀓𑀝𑀁, 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀣𑀼𑀮𑁆𑀮𑀘𑁆𑀘𑀬𑀁, 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀲𑀸𑀯𑀢𑁆𑀣𑀺𑀬𑀁 𑀣𑀼𑀮𑁆𑀮𑀦𑀦𑁆𑀤𑀁 𑀆𑀭𑀩𑁆𑀪 𑀏𑀯𑀁 𑀑𑀲𑀸𑀭𑀡𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀢𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀁, 𑀅𑀥𑀫𑁆𑀫𑀓𑀫𑁆𑀫𑁂 𑀢𑀺𑀓𑀤𑀼𑀓𑁆𑀓𑀝𑀁, 𑀓𑀸𑀭𑀓𑀲𑀗𑁆𑀖𑀁 𑀯𑀸 𑀆𑀧𑀼𑀘𑁆𑀙𑀺𑀢𑁆𑀯𑀸, 𑀕𑀡𑀲𑁆𑀲 𑀯𑀸 𑀙𑀦𑁆𑀤𑀁 𑀚𑀸𑀦𑀺𑀢𑁆𑀯𑀸, 𑀯𑀢𑁆𑀢𑁂 𑀯𑀸 𑀯𑀢𑁆𑀢𑀦𑁆𑀢𑀺𑀁, 𑀅𑀲𑀦𑁆𑀢𑁂 𑀓𑀸𑀭𑀓𑀲𑀗𑁆𑀖𑁂 𑀑𑀲𑀸𑀭𑁂𑀦𑁆𑀢𑀺𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀥𑀫𑁆𑀫𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑀢𑀸, 𑀅𑀜𑁆𑀜𑀢𑁆𑀭 𑀅𑀦𑀼𑀜𑁆𑀜𑀸𑀢𑀓𑀸𑀭𑀡𑀸 𑀑𑀲𑀸𑀭𑀡𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀤𑁆𑀯𑁂 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀲𑀗𑁆𑀖𑀪𑁂𑀤𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑀸𑀦𑁂𑀯, 𑀇𑀤𑀁 𑀧𑀦 𑀓𑀺𑀭𑀺𑀬𑀸𑀓𑀺𑀭𑀺𑀬𑀦𑁆𑀢𑀺.

𑀉𑀓𑁆𑀔𑀺𑀢𑁆𑀢𑀓𑀑𑀲𑀸𑀭𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀪𑁄𑀚𑀦𑀧𑁆𑀧𑀝𑀺𑀕𑁆𑀕𑀳𑀡𑀧𑀞𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀜𑁆𑀘𑀫𑁂 𑀅𑀯𑀲𑁆𑀲𑀼𑀢𑀸𑀢𑀺 𑀙𑀦𑁆𑀤𑀭𑀸𑀕𑁂𑀦 𑀢𑀺𑀦𑁆𑀢𑀸. 𑀅𑀯𑀲𑁆𑀲𑀼𑀢𑀲𑁆𑀲𑀸𑀢𑀺 𑀢𑀸𑀤𑀺𑀲𑀲𑁆𑀲𑁂𑀯. 𑀔𑀸𑀤𑁂𑀬𑁆𑀬 𑀯𑀸 𑀪𑀼𑀜𑁆𑀚𑁂𑀬𑁆𑀬 𑀯𑀸𑀢𑀺 𑀏𑀢𑁆𑀣 𑀧𑀝𑀺𑀕𑁆𑀕𑀳𑀡𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀲𑀸𑀯𑀢𑁆𑀣𑀺𑀬𑀁 𑀲𑀼𑀦𑁆𑀤𑀭𑀻𑀦𑀦𑁆𑀤𑀁 𑀆𑀭𑀩𑁆𑀪 𑀅𑀯𑀲𑁆𑀲𑀼𑀢𑀸𑀬 𑀅𑀯𑀲𑁆𑀲𑀼𑀢𑀲𑁆𑀲 𑀳𑀢𑁆𑀣𑀢𑁄 𑀆𑀫𑀺𑀲𑀧𑁆𑀧𑀝𑀺𑀕𑁆𑀕𑀳𑀡𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀏𑀓𑀢𑁄𑀅𑀯𑀲𑁆𑀲𑀼𑀢𑁂 𑀧𑀝𑀺𑀕𑁆𑀕𑀳𑀡𑁂 𑀤𑀼𑀓𑁆𑀓𑀝𑀁, 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀬𑀓𑁆𑀔𑀧𑁂𑀢𑀧𑀡𑁆𑀟𑀓𑀢𑀺𑀭𑀘𑁆𑀙𑀸𑀦𑀕𑀢𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀸𑀦𑀁 𑀳𑀢𑁆𑀣𑀢𑁄 𑀉𑀪𑀢𑁄𑀅𑀯𑀲𑁆𑀲𑀼𑀢𑁂𑀧𑀺 𑀲𑀢𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀧𑀦 𑀏𑀓𑀢𑁄𑀅𑀯𑀲𑁆𑀲𑀼𑀢𑁂 𑀲𑀢𑀺 𑀤𑀼𑀓𑁆𑀓𑀝𑀁, 𑀲𑀩𑁆𑀩𑀢𑁆𑀣 𑀉𑀤𑀓𑀤𑀦𑁆𑀢𑀧𑁄𑀦𑀕𑁆𑀕𑀳𑀡𑁂𑀧𑀺 𑀧𑀭𑀺𑀪𑁄𑀕𑁂𑀧𑀺 𑀤𑀼𑀓𑁆𑀓𑀝𑀫𑁂𑀯. 𑀉𑀪𑁄𑀲𑀼 𑀅𑀦𑀯𑀲𑁆𑀲𑀼𑀢𑁂𑀲𑀼, ‘‘𑀅𑀦𑀯𑀲𑁆𑀲𑀼𑀢𑁄’’𑀢𑀺 𑀯𑀸 𑀜𑀢𑁆𑀯𑀸 𑀕𑀡𑁆𑀳𑀦𑁆𑀢𑀺𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀉𑀤𑀓𑀤𑀦𑁆𑀢𑀧𑁄𑀦𑀢𑁄 𑀅𑀜𑁆𑀜𑀁 𑀅𑀚𑁆𑀛𑁄𑀳𑀭𑀡𑀻𑀬𑀁, 𑀉𑀪𑀢𑁄𑀅𑀯𑀲𑁆𑀲𑀼𑀢𑀢𑀸, 𑀲𑀳𑀢𑁆𑀣𑀸 𑀕𑀳𑀡𑀁, 𑀅𑀚𑁆𑀛𑁄𑀳𑀭𑀡𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀧𑀞𑀫𑀧𑀸𑀭𑀸𑀚𑀺𑀓𑀲𑀤𑀺𑀲𑀸𑀦𑀻𑀢𑀺.

𑀪𑁄𑀚𑀦𑀧𑁆𑀧𑀝𑀺𑀕𑁆𑀕𑀳𑀡𑀧𑀞𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀪𑁄𑀚𑀦𑀧𑁆𑀧𑀝𑀺𑀕𑁆𑀕𑀳𑀡𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀙𑀝𑁆𑀞𑁂 𑀬𑀢𑁄 𑀢𑁆𑀯𑀦𑁆𑀢𑀺 𑀬𑀲𑁆𑀫𑀸 𑀢𑁆𑀯𑀁. 𑀇𑀗𑁆𑀖𑀸𑀢𑀺 𑀉𑀬𑁆𑀬𑁄𑀚𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀅𑀬𑀫𑁆𑀧𑀻𑀢𑀺 𑀬𑀸 𑀏𑀯𑀁 𑀉𑀬𑁆𑀬𑁄𑀚𑁂𑀢𑀺, 𑀲𑀸 𑀏𑀯𑀁 𑀉𑀬𑁆𑀬𑁄𑀚𑀦𑁂𑀦 𑀘 𑀢𑁂𑀦 𑀯𑀘𑀦𑁂𑀦 𑀇𑀢𑀭𑀺𑀲𑁆𑀲𑀸 𑀧𑀝𑀺𑀕𑁆𑀕𑀳𑀡𑁂𑀦 𑀘 𑀤𑀼𑀓𑁆𑀓𑀝𑀸𑀦𑀺, 𑀅𑀚𑁆𑀛𑁄𑀳𑀸𑀭𑀕𑀡𑀦𑀸𑀬 𑀣𑀼𑀮𑁆𑀮𑀘𑁆𑀘𑀬𑀸𑀦𑀺 𑀘 𑀆𑀧𑀚𑁆𑀚𑀺𑀢𑁆𑀯𑀸 𑀪𑁄𑀚𑀦𑀧𑀭𑀺𑀬𑁄𑀲𑀸𑀦𑁂 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑀢𑀺.

𑀲𑀸𑀯𑀢𑁆𑀣𑀺𑀬𑀁 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀦𑀺𑀁 𑀆𑀭𑀩𑁆𑀪 𑀏𑀯𑀁 𑀉𑀬𑁆𑀬𑁄𑀚𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑀸𑀡𑀢𑁆𑀢𑀺𑀓𑀫𑁂𑀯, 𑀧𑀼𑀭𑀺𑀲𑀲𑁆𑀲 𑀯𑀸 𑀬𑀓𑁆𑀔𑀸𑀤𑀻𑀦𑀁 𑀯𑀸 𑀳𑀢𑁆𑀣𑀢𑁄 𑀉𑀤𑀓𑀤𑀦𑁆𑀢𑀧𑁄𑀦𑀧𑁆𑀧𑀝𑀺𑀕𑁆𑀕𑀳𑀡𑀼𑀬𑁆𑀬𑁄𑀚𑀦𑁂 𑀘 𑀢𑁂𑀲𑀁 𑀧𑀭𑀺𑀪𑁄𑀕𑁂 𑀘 𑀤𑀼𑀓𑁆𑀓𑀝𑀁, 𑀏𑀲 𑀦𑀬𑁄 𑀬𑀓𑁆𑀔𑀸𑀤𑀻𑀦𑀁 𑀳𑀢𑁆𑀣𑀢𑁄 𑀅𑀯𑀲𑁂𑀲𑀕𑁆𑀕𑀳𑀡𑀢𑁆𑀣𑀁 𑀉𑀬𑁆𑀬𑁄𑀚𑀦𑁂, 𑀢𑁂𑀲𑀁 𑀕𑀳𑀡𑁂, 𑀅𑀚𑁆𑀛𑁄𑀳𑀸𑀭𑁂 𑀘. 𑀪𑁄𑀚𑀦𑀧𑀭𑀺𑀬𑁄𑀲𑀸𑀦𑁂 𑀧𑀦 𑀣𑀼𑀮𑁆𑀮𑀘𑁆𑀘𑀬𑀁. ‘‘𑀅𑀦𑀯𑀲𑁆𑀲𑀼𑀢𑁄’’𑀢𑀺 𑀜𑀢𑁆𑀯𑀸 𑀯𑀸, ‘‘𑀓𑀼𑀧𑀺𑀢𑀸 𑀦 𑀧𑀝𑀺𑀕𑁆𑀕𑀡𑁆𑀳𑀢𑀻’’𑀢𑀺 𑀯𑀸, ‘‘𑀓𑀼𑀮𑀸𑀦𑀼𑀤𑁆𑀤𑀬𑀢𑀸𑀬 𑀦 𑀧𑀝𑀺𑀕𑁆𑀕𑀡𑁆𑀳𑀢𑀻’’𑀢𑀺 𑀯𑀸 𑀉𑀬𑁆𑀬𑁄𑀚𑁂𑀦𑁆𑀢𑀺𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀫𑀦𑀼𑀲𑁆𑀲𑀧𑀼𑀭𑀺𑀲𑀢𑀸, 𑀅𑀜𑁆𑀜𑀢𑁆𑀭 𑀅𑀦𑀼𑀜𑁆𑀜𑀸𑀢𑀓𑀸𑀭𑀡𑀸, ‘‘𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀸’’𑀢𑀺 𑀉𑀬𑁆𑀬𑁄𑀚𑀦𑀸, 𑀢𑁂𑀦 𑀯𑀘𑀦𑁂𑀦 𑀕𑀳𑁂𑀢𑁆𑀯𑀸 𑀇𑀢𑀭𑀺𑀲𑁆𑀲𑀸 𑀪𑁄𑀚𑀦𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑀤𑀺𑀲𑀸𑀦𑀻𑀢𑀺.

𑀪𑁄𑀚𑀦𑀧𑁆𑀧𑀝𑀺𑀕𑁆𑀕𑀳𑀡𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭-𑁮-𑁯. 𑀲𑀜𑁆𑀘𑀭𑀺𑀢𑁆𑀢𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀢𑁆𑀢𑀫𑀅𑀝𑁆𑀞𑀫𑀦𑀯𑀫𑀲𑀺𑀓𑁆𑀔𑀸𑀧𑀤𑀸𑀦𑀁 𑀲𑀜𑁆𑀘𑀭𑀺𑀢𑁆𑀢𑀸𑀤𑀺𑀢𑁆𑀢𑀬𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀜𑁆𑀘𑀭𑀺𑀢𑁆𑀢𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀲𑀺𑀓𑁆𑀔𑀁𑀧𑀘𑁆𑀘𑀸𑀘𑀺𑀓𑁆𑀔𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀲𑀫𑁂 𑀓𑀺𑀁𑀦𑀼𑀫𑀸𑀯 𑀲𑀫𑀡𑀺𑀬𑁄𑀢𑀺 𑀓𑀺𑀁𑀦𑀼 𑀇𑀫𑀸 𑀏𑀯 𑀲𑀫𑀡𑀺𑀬𑁄. 𑀢𑀸𑀲𑀸𑀳𑀦𑁆𑀢𑀺 𑀢𑀸𑀲𑀁 𑀅𑀳𑀁. 𑀬𑀸𑀯𑀢𑀢𑀺𑀬𑀓𑀧𑀤𑀢𑁆𑀣𑁄 𑀪𑀺𑀓𑁆𑀔𑀼𑀧𑀸𑀢𑀺𑀫𑁄𑀓𑁆𑀔𑀯𑀡𑁆𑀡𑀦𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀕𑀫𑀦𑀯𑀡𑁆𑀡𑀦𑀸), 𑀅𑀯𑀲𑁂𑀲𑀯𑀺𑀦𑀺𑀘𑁆𑀙𑀬𑁄 𑀘 𑀢𑀢𑁆𑀣𑁂𑀯 𑀲𑀗𑁆𑀖𑀪𑁂𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄, 𑀇𑀤𑀁 𑀧𑀦 𑀲𑀸𑀯𑀢𑁆𑀣𑀺𑀬𑀁 𑀘𑀡𑁆𑀟𑀓𑀸𑀴𑀺𑀪𑀺𑀓𑁆𑀔𑀼𑀦𑀺𑀁 (𑀧𑀸𑀘𑀺. 𑁭𑁦𑁯) 𑀆𑀭𑀩𑁆𑀪 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀻’’𑀢𑀺𑀆𑀤𑀺𑀯𑀘𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀏𑀯𑀁 𑀯𑀘𑀦𑀫𑁂𑀯 𑀘𑁂𑀢𑁆𑀣 𑀘𑀢𑀽𑀲𑀼 𑀅𑀗𑁆𑀕𑁂𑀲𑀼 𑀧𑀞𑀫𑀁 𑀅𑀗𑁆𑀕𑀦𑁆𑀢𑀺 𑀅𑀬𑀁 𑀯𑀺𑀲𑁂𑀲𑁄, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺.

𑀲𑀺𑀓𑁆𑀔𑀁𑀧𑀘𑁆𑀘𑀸𑀘𑀺𑀓𑁆𑀔𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀅𑀥𑀺𑀓𑀭𑀡𑀓𑀼𑀧𑀺𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀏𑀓𑀸𑀤𑀲𑀫𑁂 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀅𑀥𑀺𑀓𑀭𑀡𑁂𑀢𑀺 𑀘𑀢𑀼𑀦𑁆𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁. 𑀧𑀘𑁆𑀘𑀸𑀓𑀢𑀸𑀢𑀺 𑀧𑀭𑀸𑀚𑀺𑀢𑀸. 𑀇𑀤𑀫𑁆𑀧𑀺 𑀲𑀸𑀯𑀢𑁆𑀣𑀺𑀬𑀁 𑀘𑀡𑁆𑀟𑀓𑀸𑀴𑀺𑀁 𑀆𑀭𑀩𑁆𑀪 ‘‘𑀙𑀦𑁆𑀤𑀕𑀸𑀫𑀺𑀦𑀺𑀬𑁄 𑀘 𑀪𑀺𑀓𑁆𑀔𑀼𑀦𑀺𑀬𑁄’’𑀢𑀺𑀆𑀤𑀺𑀯𑀘𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑁂𑀲𑀁 𑀤𑀲𑀫𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀅𑀥𑀺𑀓𑀭𑀡𑀓𑀼𑀧𑀺𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀧𑀸𑀧𑀲𑀫𑀸𑀘𑀸𑀭𑀧𑀞𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑁆𑀯𑀸𑀤𑀲𑀫𑁂 𑀲𑀁𑀲𑀝𑁆𑀞𑀸𑀢𑀺 𑀧𑀩𑁆𑀩𑀚𑀺𑀢𑀸𑀦𑀁 𑀅𑀦𑀦𑀼𑀮𑁄𑀫𑁂𑀦 𑀕𑀺𑀳𑀻𑀦𑀁 𑀓𑁄𑀝𑁆𑀝𑀦𑀧𑀘𑀦𑀲𑀸𑀲𑀦𑀳𑀭𑀡𑀸𑀤𑀺𑀦𑀸 𑀓𑀸𑀬𑀺𑀓𑀯𑀸𑀘𑀲𑀺𑀓𑁂𑀦 𑀫𑀺𑀲𑁆𑀲𑀻𑀪𑀽𑀢𑀸. 𑀧𑀸𑀧𑁄 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀆𑀘𑀸𑀭𑁄 𑀏𑀢𑀸𑀲𑀦𑁆𑀢𑀺 𑀧𑀸𑀧𑀸𑀘𑀸𑀭𑀸. 𑀧𑀸𑀧𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀏𑀢𑀸𑀲𑀦𑁆𑀢𑀺 𑀧𑀸𑀧𑀲𑀤𑁆𑀤𑀸. 𑀧𑀸𑀧𑁄 𑀆𑀚𑀻𑀯𑀲𑀗𑁆𑀔𑀸𑀢𑁄 𑀲𑀺𑀮𑁄𑀓𑁄 𑀏𑀢𑀸𑀲𑀦𑁆𑀢𑀺 𑀧𑀸𑀧𑀲𑀺𑀮𑁄𑀓𑀸. 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀯𑀺𑀳𑁂𑀲𑀺𑀓𑀸𑀢𑀺 𑀅𑀜𑁆𑀜𑀫𑀜𑁆𑀜𑀺𑀲𑁆𑀲𑀸 𑀓𑀫𑁆𑀫𑁂 𑀓𑀭𑀺𑀬𑀫𑀸𑀦𑁂 𑀧𑀝𑀺𑀓𑁆𑀓𑁄𑀲𑀦𑁂𑀦 𑀯𑀺𑀳𑁂𑀲𑀺𑀓𑀸. 𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸𑀢𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀲𑁆𑀲 𑀯𑀚𑁆𑀚𑀲𑁆𑀲 𑀧𑀝𑀺𑀘𑁆𑀙𑀸𑀤𑀺𑀓𑀸.

𑀲𑀸𑀯𑀢𑁆𑀣𑀺𑀬𑀁 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀼𑀦𑀺𑀬𑁄 𑀆𑀭𑀩𑁆𑀪 𑀲𑀁𑀲𑀝𑁆𑀞𑀯𑀺𑀳𑀸𑀭𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑁂𑀲𑀫𑁂𑀢𑁆𑀣𑀸𑀧𑀺 𑀤𑀲𑀫𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁, 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑀓𑀸𑀮𑁂 𑀧𑀦 𑀤𑁆𑀯𑁂𑀢𑀺𑀲𑁆𑀲𑁄 𑀏𑀓𑀢𑁄 𑀲𑀫𑀦𑀼𑀪𑀸𑀲𑀺𑀢𑀩𑁆𑀩𑀸𑀢𑀺.

𑀧𑀸𑀧𑀲𑀫𑀸𑀘𑀸𑀭𑀧𑀞𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀧𑀸𑀧𑀲𑀫𑀸𑀘𑀸𑀭𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑁂𑀭𑀲𑀫𑁂 𑀏𑀯𑀁 𑀯𑀤𑁂𑀬𑁆𑀬𑀸𑀢𑀺 𑀢𑀸 𑀲𑀫𑀦𑀼𑀪𑀝𑁆𑀞𑀸 𑀪𑀺𑀓𑁆𑀔𑀼𑀦𑀺𑀬𑁄 𑀏𑀯𑀁 𑀯𑀤𑁂𑀬𑁆𑀬. 𑀏𑀯𑀸𑀘𑀸𑀭𑀸𑀢𑀺 𑀏𑀯𑀁𑀆𑀘𑀸𑀭𑀸, 𑀬𑀸𑀤𑀺𑀲𑁄 𑀢𑀼𑀫𑁆𑀳𑀸𑀓𑀁 𑀆𑀘𑀸𑀭𑁄, 𑀢𑀸𑀤𑀺𑀲𑁄 𑀆𑀘𑀸𑀭𑁄𑀢𑀺 𑀅𑀢𑁆𑀣𑁄, 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀉𑀜𑁆𑀜𑀸𑀬𑀸𑀢𑀺 𑀅𑀯𑀜𑁆𑀜𑀸𑀬 𑀦𑀻𑀘𑀁 𑀓𑀢𑁆𑀯𑀸 𑀚𑀸𑀦𑀦𑀸𑀬. 𑀧𑀭𑀺𑀪𑀯𑁂𑀦𑀸𑀢𑀺 ‘‘𑀓𑀺𑀁 𑀇𑀫𑀸 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀏𑀯𑀁 𑀧𑀭𑀺𑀪𑀯𑀺𑀢𑁆𑀯𑀸 𑀚𑀸𑀦𑀦𑁂𑀦. 𑀅𑀓𑁆𑀔𑀦𑁆𑀢𑀺𑀬𑀸𑀢𑀺 𑀅𑀲𑀳𑀦𑀢𑀸𑀬, 𑀓𑁄𑀥𑁂𑀦𑀸𑀢𑀺 𑀅𑀢𑁆𑀣𑁄. 𑀯𑁂𑀪𑀲𑁆𑀲𑀺𑀬𑀸𑀢𑀺 𑀩𑀮𑀯𑀦𑁆𑀢𑀲𑁆𑀲 𑀪𑀸𑀯𑁂𑀦, 𑀅𑀢𑁆𑀢𑀦𑁄 𑀩𑀮𑀧𑁆𑀧𑀓𑀸𑀲𑀦𑁂𑀦 𑀲𑀫𑀼𑀢𑁆𑀭𑀸𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀤𑀼𑀩𑁆𑀩𑀮𑁆𑀬𑀸𑀢𑀺 𑀢𑀼𑀫𑁆𑀳𑀸𑀓𑀁 𑀤𑀼𑀩𑁆𑀩𑀮𑀪𑀸𑀯𑁂𑀦, 𑀲𑀩𑁆𑀩𑀢𑁆𑀣 𑀉𑀜𑁆𑀜𑀸𑀬 𑀘 𑀧𑀭𑀺𑀪𑀯𑁂𑀦 𑀘𑀸𑀢𑀺 𑀏𑀯𑀁 𑀲𑀫𑀼𑀘𑁆𑀘𑀬𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀯𑀺𑀯𑀺𑀘𑁆𑀘𑀣𑀸𑀢𑀺 𑀦𑀸𑀦𑀸 𑀳𑁄𑀣, 𑀅𑀦𑀦𑀼𑀮𑁄𑀫𑀺𑀓𑀁 𑀓𑀸𑀬𑀺𑀓𑀯𑀸𑀘𑀲𑀺𑀓𑀲𑀁𑀲𑀕𑁆𑀕𑀁 𑀧𑀚𑀳𑀣𑀸𑀢𑀺 𑀅𑀢𑁆𑀣𑁄.

𑀲𑀸𑀯𑀢𑁆𑀣𑀺𑀬𑀁 𑀣𑀼𑀮𑁆𑀮𑀦𑀦𑁆𑀤𑀁 𑀆𑀭𑀩𑁆𑀪 ‘‘𑀲𑀁𑀲𑀝𑁆𑀞𑀸𑀯, 𑀅𑀬𑁆𑀬𑁂, 𑀢𑀼𑀫𑁆𑀳𑁂 𑀯𑀺𑀳𑀭𑀣, 𑀫𑀸 𑀢𑀼𑀫𑁆𑀳𑁂 𑀦𑀸𑀦𑀸 𑀯𑀺𑀳𑀭𑀺𑀢𑁆𑀣𑀸’’𑀢𑀺 𑀉𑀬𑁆𑀬𑁄𑀚𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑁂𑀲𑀫𑁂𑀢𑁆𑀣𑀸𑀧𑀺 𑀤𑀲𑀫𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀧𑀸𑀧𑀲𑀫𑀸𑀘𑀸𑀭𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀲𑀗𑁆𑀖𑀪𑁂𑀤𑀓𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀗𑁆𑀖𑀪𑁂𑀤𑀸𑀤𑀻𑀲𑀼 𑀘𑀢𑀽𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀯𑀮𑀜𑁆𑀳𑀺 𑀪𑀺𑀓𑁆𑀔𑀼𑀦𑀻 𑀲𑀗𑁆𑀖𑀁 𑀦 𑀪𑀺𑀦𑁆𑀤𑀢𑀺, 𑀪𑁂𑀤𑀸𑀬 𑀧𑀦 𑀧𑀭𑀓𑁆𑀓𑀫𑀢𑀺 𑀘𑁂𑀯 𑀅𑀦𑀼𑀯𑀢𑁆𑀢𑀢𑀺 𑀘. 𑀉𑀤𑁆𑀤𑀺𑀝𑁆𑀞𑀸 𑀔𑁄 𑀅𑀬𑁆𑀬𑀸𑀬𑁄 𑀲𑀢𑁆𑀢𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑀸 𑀥𑀫𑁆𑀫𑀸𑀢𑀺 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀸 𑀲𑀸𑀥𑀸𑀭𑀡𑀸 𑀲𑀢𑁆𑀢, 𑀅𑀲𑀸𑀥𑀸𑀭𑀡𑀸 𑀤𑀲𑀸𑀢𑀺 𑀏𑀯𑀁 𑀲𑀢𑁆𑀢𑀭𑀲. 𑀉𑀪𑀢𑁄𑀲𑀗𑁆𑀖𑁂 𑀧𑀓𑁆𑀔𑀫𑀸𑀦𑀢𑁆𑀢𑀁 𑀘𑀭𑀺𑀢𑀩𑁆𑀩𑀦𑁆𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀳𑀺 𑀆𑀧𑀢𑁆𑀢𑀺𑀁 𑀙𑀸𑀤𑁂𑀦𑁆𑀢𑀺𑀬𑀸𑀧𑀺 𑀧𑀭𑀺𑀯𑀸𑀲𑁄 𑀦𑀸𑀫 𑀦𑀢𑁆𑀣𑀺, 𑀙𑀸𑀤𑀦𑀧𑀘𑁆𑀘𑀬𑀸𑀧𑀺 𑀦 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀙𑀸𑀤𑁂𑀢𑁆𑀯𑀸𑀧𑀺 𑀅𑀙𑀸𑀤𑁂𑀢𑁆𑀯𑀸𑀧𑀺 𑀏𑀓𑀁 𑀧𑀓𑁆𑀔𑀫𑀸𑀦𑀢𑁆𑀢𑀫𑁂𑀯 𑀘𑀭𑀺𑀢𑀩𑁆𑀩𑀁. 𑀢𑀁 𑀪𑀺𑀓𑁆𑀔𑀼𑀦𑀻𑀳𑀺 𑀅𑀢𑁆𑀢𑀦𑁄 𑀲𑀻𑀫𑀁 𑀲𑁄𑀥𑁂𑀢𑁆𑀯𑀸 𑀯𑀺𑀳𑀸𑀭𑀲𑀻𑀫𑀸𑀬 𑀯𑀸, 𑀲𑁄𑀥𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻𑀳𑀺 𑀔𑀡𑁆𑀟𑀲𑀻𑀫𑀸𑀬 𑀯𑀸 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀘𑀢𑀼𑀯𑀕𑁆𑀕𑀁 𑀕𑀡𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀲𑀘𑁂 𑀏𑀓𑀸 𑀆𑀧𑀢𑁆𑀢𑀺 𑀳𑁄𑀢𑀺, 𑀏𑀓𑀺𑀲𑁆𑀲𑀸 𑀯𑀲𑁂𑀦, 𑀲𑀘𑁂 𑀤𑁆𑀯𑁂 𑀯𑀸 𑀢𑀺𑀲𑁆𑀲𑁄 𑀯𑀸 𑀲𑀫𑁆𑀩𑀳𑀼𑀮𑀸 𑀯𑀸 𑀏𑀓𑀯𑀢𑁆𑀣𑀼𑀓𑀸 𑀯𑀸 𑀦𑀸𑀦𑀸𑀯𑀢𑁆𑀣𑀼𑀓𑀸 𑀯𑀸, 𑀢𑀸𑀲𑀁 𑀢𑀸𑀲𑀁 𑀯𑀲𑁂𑀦 𑀪𑀺𑀓𑁆𑀔𑀼𑀧𑀸𑀢𑀺𑀫𑁄𑀓𑁆𑀔𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀯𑀢𑁆𑀣𑀼𑀕𑁄𑀢𑁆𑀢𑀦𑀸𑀫𑀆𑀧𑀢𑁆𑀢𑀺𑀪𑁂𑀤𑁂𑀲𑀼 𑀬𑀁 𑀬𑀁 𑀇𑀘𑁆𑀙𑀢𑀺, 𑀢𑀁 𑀢𑀁 𑀆𑀤𑀸𑀬 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀢𑀢𑁆𑀭𑀺𑀤𑀁 𑀧𑀞𑀫𑀸𑀧𑀢𑁆𑀢𑀺𑀯𑀲𑁂𑀦 𑀫𑀼𑀔𑀫𑀢𑁆𑀢𑀦𑀺𑀤𑀲𑁆𑀲𑀦𑀁 𑁋 𑀢𑀸𑀬 𑀆𑀧𑀦𑁆𑀦𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲𑀯𑀘𑀦𑀻𑀬𑁄 ‘‘𑀅𑀳𑀁, 𑀅𑀬𑁆𑀬𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀉𑀲𑁆𑀲𑀬𑀯𑀸𑀤𑀁, 𑀲𑀸𑀳𑀁, 𑀅𑀬𑁆𑀬𑁂, 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀉𑀲𑁆𑀲𑀬𑀯𑀸𑀤𑀸𑀬 𑀧𑀓𑁆𑀔𑀫𑀸𑀦𑀢𑁆𑀢𑀁 𑀬𑀸𑀘𑀸𑀫𑀻’’𑀢𑀺, 𑀏𑀯𑀁 𑀢𑀺𑀓𑁆𑀔𑀢𑁆𑀢𑀼𑀁 𑀬𑀸𑀘𑀸𑀧𑁂𑀢𑁆𑀯𑀸 𑀩𑁆𑀬𑀢𑁆𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀧𑀝𑀺𑀩𑀮𑀸𑀬 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀅𑀬𑁆𑀬𑁂, 𑀲𑀗𑁆𑀖𑁄, 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑀸 𑀪𑀺𑀓𑁆𑀔𑀼𑀦𑀻 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀉𑀲𑁆𑀲𑀬𑀯𑀸𑀤𑀁, 𑀲𑀸 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀉𑀲𑁆𑀲𑀬𑀯𑀸𑀤𑀸𑀬 𑀧𑀓𑁆𑀔𑀫𑀸𑀦𑀢𑁆𑀢𑀁 𑀬𑀸𑀘𑀢𑀺, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀉𑀲𑁆𑀲𑀬𑀯𑀸𑀤𑀸𑀬 𑀧𑀓𑁆𑀔𑀫𑀸𑀦𑀢𑁆𑀢𑀁 𑀤𑀤𑁂𑀬𑁆𑀬, 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀅𑀬𑁆𑀬𑁂, 𑀲𑀗𑁆𑀖𑁄, 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑀸 𑀪𑀺𑀓𑁆𑀔𑀼𑀦𑀻…𑀧𑁂… 𑀤𑀼𑀢𑀺𑀬𑀫𑁆𑀧𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺, 𑀲𑀼𑀡𑀸𑀢𑀼 𑀫𑁂, 𑀅𑀬𑁆𑀬𑁂, 𑀲𑀗𑁆𑀖𑁄…𑀧𑁂… 𑀲𑀸 𑀪𑀸𑀲𑁂𑀬𑁆𑀬. 𑀤𑀺𑀦𑁆𑀦𑀁 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀉𑀲𑁆𑀲𑀬𑀯𑀸𑀤𑀸𑀬 𑀧𑀓𑁆𑀔𑀫𑀸𑀦𑀢𑁆𑀢𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 ‘‘𑀯𑀢𑁆𑀢𑀁 𑀲𑀫𑀸𑀤𑀺𑀬𑀸𑀫𑀺, 𑀫𑀸𑀦𑀢𑁆𑀢𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀲𑀗𑁆𑀖𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑁂𑀦 𑀢𑀸𑀯 𑀯𑀲𑀺𑀢𑀼𑀓𑀸𑀫𑀸𑀬 𑀢𑀢𑁆𑀣𑁂𑀯 𑀲𑀗𑁆𑀖𑀫𑀚𑁆𑀛𑁂 𑀯𑀸 𑀧𑀓𑁆𑀓𑀦𑁆𑀢𑀸𑀲𑀼 𑀪𑀺𑀓𑁆𑀔𑀼𑀦𑀻𑀲𑀼 𑀏𑀓𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀤𑀼𑀢𑀺𑀬𑀺𑀓𑀸𑀬 𑀯𑀸 𑀲𑀦𑁆𑀢𑀺𑀓𑁂 ‘‘𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀸𑀫𑀺, 𑀫𑀸𑀦𑀢𑁆𑀢𑀁 𑀦𑀺𑀓𑁆𑀔𑀺𑀧𑀸𑀫𑀻’’𑀢𑀺 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀅𑀜𑁆𑀜𑀺𑀲𑁆𑀲𑀸 𑀧𑀦 𑀆𑀕𑀦𑁆𑀢𑀼𑀓𑀸𑀬 𑀲𑀦𑁆𑀢𑀺𑀓𑁂 𑀆𑀭𑁄𑀘𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀦𑀺𑀓𑁆𑀔𑀺𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀓𑀢𑀢𑁆𑀢𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺, 𑀢𑀢𑁄 𑀧𑀼𑀭𑁂𑀅𑀭𑀼𑀡𑁂𑀬𑁂𑀯 𑀘𑀢𑀽𑀳𑀺 𑀪𑀺𑀓𑁆𑀔𑀼𑀦𑀻𑀳𑀺 𑀢𑀁 𑀪𑀺𑀓𑁆𑀔𑀼𑀦𑀺𑀁 𑀕𑀳𑁂𑀢𑁆𑀯𑀸 𑀕𑀸𑀫𑀽𑀧𑀘𑀸𑀭𑀢𑁄 𑀘 𑀪𑀺𑀓𑁆𑀔𑀽𑀦𑀁 𑀯𑀺𑀳𑀸𑀭𑀽𑀧𑀘𑀸𑀭𑀢𑁄 𑀘 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀳𑀸𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀕𑀼𑀫𑁆𑀩𑀯𑀢𑀺𑀆𑀤𑀻𑀳𑀺 𑀧𑀝𑀺𑀘𑁆𑀙𑀦𑁆𑀦𑁂 𑀑𑀓𑀸𑀲𑁂 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀘𑀢𑀽𑀳𑀺 𑀪𑀺𑀓𑁆𑀔𑀽𑀳𑀺𑀧𑀺 𑀢𑀢𑁆𑀣 𑀕𑀦𑁆𑀢𑀩𑁆𑀩𑀁, 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀅𑀯𑀺𑀤𑀽𑀭𑁂 𑀯𑀺𑀲𑀼𑀁 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀅𑀣 𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀢𑁆𑀢𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀢𑀸𑀯 𑀏𑀯𑀁 𑀆𑀭𑁄𑀘𑁂𑀢𑀩𑁆𑀩𑀁 𑁋

‘‘𑀅𑀳𑀁, 𑀅𑀬𑁆𑀬𑁂, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁 𑀉𑀲𑁆𑀲𑀬𑀯𑀸𑀤𑀁, 𑀲𑀸𑀳𑀁 𑀲𑀗𑁆𑀖𑀁 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀉𑀲𑁆𑀲𑀬𑀯𑀸𑀤𑀸𑀬 𑀧𑀓𑁆𑀔𑀫𑀸𑀦𑀢𑁆𑀢𑀁 𑀬𑀸𑀘𑀺𑀁, 𑀢𑀲𑁆𑀲𑀸 𑀫𑁂 𑀲𑀗𑁆𑀖𑁄 𑀏𑀓𑀺𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀉𑀲𑁆𑀲𑀬𑀯𑀸𑀤𑀸𑀬 𑀧𑀓𑁆𑀔𑀫𑀸𑀦𑀢𑁆𑀢𑀁 𑀅𑀤𑀸𑀲𑀺, 𑀲𑀸𑀳𑀁 𑀫𑀸𑀦𑀢𑁆𑀢𑀁 𑀘𑀭𑀸𑀫𑀺, 𑀯𑁂𑀤𑀬𑀸𑀫𑀳𑀁, 𑀅𑀬𑁆𑀬𑁂, ‘𑀯𑁂𑀤𑀬𑀢𑀻’𑀢𑀺 𑀫𑀁 𑀲𑀗𑁆𑀖𑁄 𑀥𑀸𑀭𑁂𑀢𑀽’’𑀢𑀺.

𑀢𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀯𑀁 𑀆𑀭𑁄𑀘𑁂𑀢𑀩𑁆𑀩𑀁 ‘‘𑀅𑀳𑀁, 𑀅𑀬𑁆𑀬𑀸, 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀁…𑀧𑁂… 𑀯𑁂𑀤𑀬𑀸𑀫𑀳𑀁, 𑀅𑀬𑁆𑀬𑀸, ‘𑀯𑁂𑀤𑀬𑀢𑀻’𑀢𑀺 𑀫𑀁 𑀲𑀗𑁆𑀖𑁄 𑀥𑀸𑀭𑁂𑀢𑀽’’𑀢𑀺. 𑀆𑀭𑁄𑀘𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀢𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀽𑀲𑀼 𑀯𑀸, 𑀤𑀼𑀢𑀺𑀬𑀺𑀓𑀁 𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀲𑀼 𑀯𑀸 𑀧𑀓𑁆𑀓𑀦𑁆𑀢𑀸𑀲𑀼𑀧𑀺 𑀉𑀪𑀢𑁄𑀲𑀗𑁆𑀖𑁂 𑀫𑀸𑀦𑀢𑁆𑀢𑀁 𑀘𑀺𑀡𑁆𑀡𑀫𑁂𑀯 𑀳𑁄𑀢𑀺. 𑀬𑀸𑀯 𑀅𑀭𑀼𑀡𑀁 𑀦 𑀉𑀝𑁆𑀞𑀳𑀢𑀺, 𑀢𑀸𑀯 𑀬𑀁 𑀧𑀞𑀫𑀁 𑀧𑀲𑁆𑀲𑀢𑀺 𑀪𑀺𑀓𑁆𑀔𑀼𑀁 𑀯𑀸 𑀪𑀺𑀓𑁆𑀔𑀼𑀦𑀺𑀁 𑀯𑀸, 𑀢𑀲𑁆𑀲𑀸 𑀆𑀭𑁄𑀘𑁂𑀢𑀩𑁆𑀩𑀁. 𑀉𑀝𑁆𑀞𑀺𑀢𑁂 𑀅𑀭𑀼𑀡𑁂 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀲𑁆𑀲𑀬𑀁 𑀕𑀦𑁆𑀢𑀩𑁆𑀩𑀁, 𑀏𑀯𑀁 𑀧𑀜𑁆𑀘𑀤𑀲 𑀅𑀭𑀼𑀡𑀸 𑀕𑀳𑁂𑀢𑀩𑁆𑀩𑀸.

𑀅𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑀸𑀬 𑀧𑀦 𑀆𑀕𑀦𑁆𑀢𑀼𑀓𑁂𑀲𑀼 𑀅𑀲𑀢𑀺 𑀘𑀢𑀼𑀦𑁆𑀦𑀁 𑀪𑀺𑀓𑁆𑀔𑀽𑀦𑀜𑁆𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀤𑁂𑀯𑀲𑀺𑀓𑀁 𑀆𑀭𑁄𑀘𑁂𑀢𑁆𑀯𑀸, 𑀆𑀕𑀦𑁆𑀢𑀼𑀓𑁂𑀲𑀼 𑀲𑀢𑀺 𑀲𑀩𑁆𑀩𑁂𑀲𑀫𑁆𑀧𑀺 𑀆𑀕𑀦𑁆𑀢𑀼𑀓𑀸𑀦𑀁 𑀆𑀭𑁄𑀘𑁂𑀦𑁆𑀢𑀺𑀬𑀸 𑀧𑀜𑁆𑀘𑀤𑀲 𑀤𑀺𑀯𑀲𑀸𑀦𑀺 𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁭𑁫 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀦𑁆𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀘𑀽𑀴𑀯. 𑀅𑀝𑁆𑀞. 𑁭𑁫 𑀆𑀤𑀬𑁄) 𑀯𑀼𑀢𑁆𑀢𑁄, 𑀘𑀺𑀡𑁆𑀡𑀫𑀸𑀦𑀢𑁆𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸𑀢𑀺 𑀬𑀤𑀸 𑀏𑀯𑀁 𑀘𑀺𑀡𑁆𑀡𑀫𑀸𑀦𑀢𑁆𑀢𑀸 𑀪𑀺𑀓𑁆𑀔𑀼𑀦𑀻 𑀳𑁄𑀢𑀺, 𑀅𑀣𑀲𑁆𑀲𑀸 𑀬𑀢𑁆𑀣 𑀲𑀺𑀬𑀸 𑀯𑀻𑀲𑀢𑀺𑀕𑀡𑁄 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀩𑁆𑀪𑀸𑀦𑀓𑀫𑁆𑀫𑀁 𑀓𑀸𑀢𑀩𑁆𑀩𑀁, 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀯𑀡𑁆𑀡𑀦𑀸𑀬

𑀪𑀺𑀓𑁆𑀔𑀼𑀦𑀺𑀧𑀸𑀢𑀺𑀫𑁄𑀓𑁆𑀔𑁂

𑀲𑀗𑁆𑀖𑀸𑀤𑀺𑀲𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.