𑀦𑀺𑀲𑁆𑀲𑀕𑁆𑀕𑀺𑀬𑀓𑀡𑁆𑀟𑁄

𑁧. 𑀧𑀢𑁆𑀢𑀲𑀦𑁆𑀦𑀺𑀘𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀦𑀺𑀲𑁆𑀲𑀕𑁆𑀕𑀺𑀬𑁂𑀲𑀼 𑀆𑀤𑀺𑀯𑀕𑁆𑀕𑀲𑁆𑀲 𑀢𑀸𑀯 𑀧𑀞𑀫𑁂 𑀧𑀢𑁆𑀢𑀲𑀦𑁆𑀦𑀺𑀘𑀬𑀁 𑀓𑀭𑁂𑀬𑁆𑀬𑀸𑀢𑀺 𑀧𑀢𑁆𑀢𑀲𑀦𑁆𑀦𑀺𑀥𑀺𑀁 𑀓𑀭𑁂𑀬𑁆𑀬, 𑀏𑀓𑀸𑀳𑀁 𑀅𑀦𑀥𑀺𑀝𑁆𑀞𑀳𑀺𑀢𑁆𑀯𑀸 𑀯𑀸 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀸 𑀅𑀥𑀺𑀝𑁆𑀞𑀸𑀦𑀼𑀧𑀕𑀁 𑀧𑀢𑁆𑀢𑀁 𑀞𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀲𑀸𑀯𑀢𑁆𑀣𑀺𑀬𑀁 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑁄 𑀆𑀭𑀩𑁆𑀪 𑀧𑀢𑁆𑀢𑀲𑀦𑁆𑀦𑀺𑀘𑀬𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑁂𑀲𑀓𑀣𑀸𑀫𑀕𑁆𑀕𑁄 𑀪𑀺𑀓𑁆𑀔𑀼𑀧𑀸𑀢𑀺𑀫𑁄𑀓𑁆𑀔𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄, 𑀢𑀢𑁆𑀭 𑀳𑀺 𑀤𑀲𑀸𑀳𑀸𑀢𑀺𑀓𑁆𑀓𑀫𑁂 𑀆𑀧𑀢𑁆𑀢𑀺, 𑀇𑀥 𑀏𑀓𑀸𑀳𑀸𑀢𑀺𑀓𑁆𑀓𑀫𑁂𑀢𑀺 𑀏𑀢𑁆𑀢𑀓𑀫𑁂𑀯 𑀢𑀲𑁆𑀲 𑀘 𑀇𑀫𑀲𑁆𑀲 𑀘 𑀦𑀸𑀦𑀸𑀓𑀭𑀡𑀁, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺.

𑀧𑀢𑁆𑀢𑀲𑀦𑁆𑀦𑀺𑀘𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀓𑀸𑀮𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀼𑀢𑀺𑀬𑁂 𑀅𑀓𑀸𑀮𑀘𑀻𑀯𑀭𑀦𑁆𑀢𑀺 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀓𑀣𑀺𑀦𑀫𑀸𑀲𑁂𑀳𑀺, 𑀅𑀦𑀢𑁆𑀣𑀢𑁂 𑀘𑀻𑀯𑀭𑀫𑀸𑀲𑀢𑁄 𑀅𑀜𑁆𑀜𑀲𑁆𑀫𑀺𑀁 𑀓𑀸𑀮𑁂 𑀉𑀧𑁆𑀧𑀦𑁆𑀦𑀁, 𑀬𑀁 𑀯𑀸 𑀧𑀦 𑀓𑀸𑀮𑁂𑀧𑀺 𑀆𑀤𑀺𑀲𑁆𑀲 𑀤𑀺𑀦𑁆𑀦𑀁. 𑀆𑀤𑀺𑀲𑁆𑀲 𑀤𑀺𑀦𑁆𑀦𑀁 𑀦𑀸𑀫 ‘‘𑀲𑀫𑁆𑀧𑀢𑁆𑀢𑀸 𑀪𑀸𑀚𑁂𑀦𑁆𑀢𑀽’’𑀢𑀺 𑀯𑀢𑁆𑀯𑀸 𑀯𑀸, ‘‘𑀇𑀤𑀁 𑀕𑀡𑀲𑁆𑀲, 𑀇𑀤𑀁 𑀢𑀼𑀫𑁆𑀳𑀸𑀓𑀁 𑀤𑀫𑁆𑀫𑀻’’𑀢𑀺 𑀯𑀢𑁆𑀯𑀸 𑀯𑀸, 𑀤𑀸𑀢𑀼𑀓𑀸𑀫𑀢𑀸𑀬 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀯𑀸 𑀤𑀺𑀦𑁆𑀦𑀁. 𑀇𑀘𑁆𑀘𑁂𑀢𑀁 𑀅𑀓𑀸𑀮𑀘𑀻𑀯𑀭𑀁 ‘‘𑀓𑀸𑀮𑀘𑀻𑀯𑀭’’𑀦𑁆𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀪𑀸𑀚𑀸𑀧𑁂𑀦𑁆𑀢𑀺𑀬𑀸 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀬𑀁 𑀅𑀢𑁆𑀢𑀦𑀸 𑀮𑀤𑁆𑀥𑀁, 𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. 𑀦𑀺𑀲𑁆𑀲𑀝𑁆𑀞𑀁 𑀧𑀝𑀺𑀮𑀪𑀺𑀢𑁆𑀯𑀸𑀧𑀺 𑀬𑀣𑀸𑀤𑀸𑀦𑁂𑀬𑁂𑀯 𑀉𑀧𑀦𑁂𑀢𑀩𑁆𑀩𑀁, 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀏𑀯𑀭𑀽𑀧𑁂 𑀲𑀺𑀓𑁆𑀔𑀸𑀧𑀤𑁂 𑀏𑀲𑁂𑀯 𑀦𑀬𑁄.

𑀲𑀸𑀯𑀢𑁆𑀣𑀺𑀬𑀁 𑀣𑀼𑀮𑁆𑀮𑀦𑀦𑁆𑀤𑀁 𑀆𑀭𑀩𑁆𑀪 𑀅𑀓𑀸𑀮𑀘𑀻𑀯𑀭𑀁 ‘‘𑀓𑀸𑀮𑀘𑀻𑀯𑀭’’𑀦𑁆𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀪𑀸𑀚𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀅𑀓𑀸𑀮𑀘𑀻𑀯𑀭𑁂 𑀯𑁂𑀫𑀢𑀺𑀓𑀸𑀬, 𑀓𑀸𑀮𑀘𑀻𑀯𑀭𑁂 𑀅𑀓𑀸𑀮𑀘𑀻𑀯𑀭𑀲𑀜𑁆𑀜𑀸𑀬 𑀘𑁂𑀯 𑀯𑁂𑀫𑀢𑀺𑀓𑀸𑀬 𑀘 𑀤𑀼𑀓𑁆𑀓𑀝𑀁. 𑀉𑀪𑁄𑀲𑀼 𑀓𑀸𑀮𑀘𑀻𑀯𑀭𑀲𑀜𑁆𑀜𑀸𑀬, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀅𑀓𑀸𑀮𑀘𑀻𑀯𑀭𑀢𑀸, 𑀢𑀣𑀸𑀲𑀜𑁆𑀜𑀺𑀢𑀸, ‘‘𑀓𑀸𑀮𑀘𑀻𑀯𑀭’’𑀦𑁆𑀢𑀺 𑀅𑀥𑀺𑀝𑁆𑀞𑀸𑀬 𑀮𑁂𑀲𑁂𑀦 𑀪𑀸𑀚𑀸𑀧𑀦𑀁, 𑀧𑀝𑀺𑀮𑀸𑀪𑁄𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑀤𑀺𑀲𑀸𑀦𑀻𑀢𑀺.

𑀅𑀓𑀸𑀮𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀘𑀻𑀯𑀭𑀧𑀭𑀺𑀯𑀢𑁆𑀢𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀢𑀺𑀬𑁂 𑀳𑀦𑁆𑀤𑀸𑀢𑀺 𑀕𑀡𑁆𑀳. 𑀅𑀘𑁆𑀙𑀺𑀦𑁆𑀤𑁂𑀬𑁆𑀬𑀸𑀢𑀺 𑀲𑀬𑀁 𑀅𑀘𑁆𑀙𑀺𑀦𑁆𑀤𑀦𑁆𑀢𑀺𑀬𑀸 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑁂𑀲𑀼 𑀩𑀳𑀽𑀲𑀼𑀧𑀺 𑀏𑀓𑀸𑀧𑀢𑁆𑀢𑀺, 𑀇𑀢𑀭𑁂𑀲𑀼 𑀯𑀢𑁆𑀣𑀼𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁄. 𑀅𑀘𑁆𑀙𑀺𑀦𑁆𑀤𑀸𑀧𑀦𑁂 𑀧𑀦 𑀏𑀓𑀸𑀬 𑀆𑀡𑀢𑁆𑀢𑀺𑀬𑀸 𑀩𑀳𑀽𑀲𑀼 𑀅𑀘𑁆𑀙𑀺𑀦𑁆𑀦𑁂𑀲𑀼𑀧𑀺 𑀏𑀓𑀸𑀯𑀸𑀧𑀢𑁆𑀢𑀺.

𑀲𑀸𑀯𑀢𑁆𑀣𑀺𑀬𑀁 𑀣𑀼𑀮𑁆𑀮𑀦𑀦𑁆𑀤𑀁 𑀆𑀭𑀩𑁆𑀪 𑀘𑀻𑀯𑀭𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀅𑀘𑁆𑀙𑀺𑀦𑁆𑀤𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑀸𑀡𑀢𑁆𑀢𑀺𑀓𑀁, 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀅𑀜𑁆𑀜𑀲𑁆𑀫𑀺𑀁 𑀧𑀭𑀺𑀓𑁆𑀔𑀸𑀭𑁂 𑀢𑀺𑀓𑀤𑀼𑀓𑁆𑀓𑀝𑀁, 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀬 𑀘𑀻𑀯𑀭𑁂𑀧𑀺 𑀢𑀺𑀓𑀤𑀼𑀓𑁆𑀓𑀝𑀫𑁂𑀯. 𑀬𑀸 𑀧𑀦 𑀢𑀸𑀬 𑀯𑀸 𑀤𑀺𑀬𑁆𑀬𑀫𑀸𑀦𑀁, 𑀢𑀲𑁆𑀲𑀸 𑀯𑀸 𑀯𑀺𑀲𑁆𑀲𑀸𑀲𑀁 𑀕𑀡𑁆𑀳𑀸𑀢𑀺, 𑀢𑀲𑁆𑀲𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀉𑀧𑀲𑀫𑁆𑀧𑀦𑁆𑀦𑀢𑀸, 𑀧𑀭𑀺𑀯𑀢𑁆𑀢𑀺𑀢𑀘𑀻𑀯𑀭𑀲𑁆𑀲 𑀯𑀺𑀓𑀧𑁆𑀧𑀦𑀼𑀧𑀕𑀢𑀸, 𑀲𑀓𑀲𑀜𑁆𑀜𑀸𑀬 𑀅𑀘𑁆𑀙𑀺𑀦𑁆𑀤𑀦𑀁 𑀯𑀸 𑀅𑀘𑁆𑀙𑀺𑀦𑁆𑀤𑀸𑀧𑀦𑀁 𑀯𑀸𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑀤𑀺𑀲𑀸𑀦𑀺, 𑀇𑀤𑀁 𑀧𑀦 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀘𑀻𑀯𑀭𑀧𑀭𑀺𑀯𑀢𑁆𑀢𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀜𑁆𑀜𑀯𑀺𑀜𑁆𑀜𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀘𑀢𑀼𑀢𑁆𑀣𑁂 𑀯𑀺𑀜𑁆𑀜𑀸𑀧𑁂𑀢𑁆𑀯𑀸𑀢𑀺 𑀚𑀸𑀦𑀸𑀧𑁂𑀢𑁆𑀯𑀸, ‘‘𑀇𑀤𑀁 𑀦𑀸𑀫 𑀆𑀳𑀭𑀸’’𑀢𑀺 𑀬𑀸𑀘𑀺𑀢𑁆𑀯𑀸 𑀯𑀸. 𑀅𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀬𑁆𑀬𑀸𑀢𑀺 𑀬𑀁 𑀧𑀼𑀩𑁆𑀩𑁂 ‘‘𑀓𑀺𑀦𑁆𑀢𑁂, 𑀅𑀬𑁆𑀬𑁂, 𑀅𑀨𑀸𑀲𑀼, 𑀓𑀺𑀁 𑀆𑀳𑀭𑀺𑀬𑀢𑀽’’𑀢𑀺 𑀯𑀼𑀢𑁆𑀢𑀸𑀬 𑀯𑀺𑀜𑁆𑀜𑀸𑀧𑀺𑀢𑀁, 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀜𑁆𑀘𑁂𑀯 𑀅𑀜𑁆𑀜𑀜𑁆𑀘 𑀕𑀳𑁂𑀢𑀼𑀓𑀸𑀫𑀸 𑀢𑀢𑁄 𑀅𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀬𑁆𑀬, 𑀢𑀲𑁆𑀲𑀸 𑀯𑀺𑀜𑁆𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁, 𑀧𑀝𑀺𑀮𑀸𑀪𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺.

𑀲𑀸𑀯𑀢𑁆𑀣𑀺𑀬𑀁 𑀣𑀼𑀮𑁆𑀮𑀦𑀦𑁆𑀤𑀁 𑀆𑀭𑀩𑁆𑀪 𑀅𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀅𑀜𑁆𑀜𑀁 𑀯𑀺𑀜𑁆𑀜𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀅𑀦𑀜𑁆𑀜𑁂 𑀤𑁆𑀯𑀺𑀓𑀤𑀼𑀓𑁆𑀓𑀝𑀁. 𑀅𑀦𑀜𑁆𑀜𑁂 𑀅𑀦𑀜𑁆𑀜𑀲𑀜𑁆𑀜𑀸𑀬 𑀧𑀦, 𑀢𑀲𑁆𑀫𑀺𑀁 𑀅𑀧𑁆𑀧𑀳𑁄𑀦𑁆𑀢𑁂 𑀧𑀼𑀦 𑀢𑀜𑁆𑀜𑁂𑀯, 𑀅𑀜𑁆𑀜𑁂𑀦𑀧𑀺 𑀅𑀢𑁆𑀣𑁂 𑀲𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀅𑀜𑁆𑀜𑀜𑁆𑀘, 𑀬𑀜𑁆𑀘 𑀯𑀺𑀜𑁆𑀜𑀢𑁆𑀢𑀁, 𑀢𑀢𑁄 𑀘𑁂 𑀅𑀜𑁆𑀜𑀁 𑀲𑀫𑀕𑁆𑀖𑀢𑀭𑀁 𑀳𑁄𑀢𑀺, 𑀇𑀫𑀁 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀲𑀼𑀤𑁆𑀥𑀁 𑀅𑀜𑁆𑀜𑀫𑁂𑀯 𑀘 𑀯𑀺𑀜𑁆𑀜𑀸𑀧𑁂𑀦𑁆𑀢𑀺𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀮𑁂𑀲𑁂𑀦 𑀕𑀳𑁂𑀢𑀼𑀓𑀸𑀫𑀢𑀸, 𑀅𑀜𑁆𑀜𑀲𑁆𑀲 𑀯𑀺𑀜𑁆𑀜𑀸𑀧𑀦𑀁, 𑀧𑀝𑀺𑀮𑀸𑀪𑁄𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀲𑀜𑁆𑀘𑀭𑀺𑀢𑁆𑀢𑀲𑀤𑀺𑀲𑀸𑀦𑀻𑀢𑀺.

𑀅𑀜𑁆𑀜𑀯𑀺𑀜𑁆𑀜𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀅𑀜𑁆𑀜𑀘𑁂𑀢𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀜𑁆𑀘𑀫𑁂 𑀅𑀜𑁆𑀜𑀁 𑀘𑁂𑀢𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀓𑀧𑁆𑀧𑀺𑀬𑀪𑀡𑁆𑀟𑁂𑀦 ‘‘𑀇𑀤𑀁 𑀦𑀸𑀫 𑀆𑀳𑀭𑀸’’𑀢𑀺 𑀅𑀜𑁆𑀜𑀁 𑀧𑀭𑀺𑀯𑀢𑁆𑀢𑀸𑀧𑁂𑀢𑁆𑀯𑀸. 𑀅𑀜𑁆𑀜𑀁 𑀘𑁂𑀢𑀸𑀧𑁂𑀬𑁆𑀬𑀸𑀢𑀺 ‘‘𑀏𑀯𑀁 𑀫𑁂 𑀇𑀤𑀁 𑀤𑀢𑁆𑀯𑀸 𑀅𑀜𑁆𑀜𑀫𑁆𑀧𑀺 𑀆𑀳𑀭𑀺𑀲𑁆𑀲𑀢𑀻’’𑀢𑀺 𑀫𑀜𑁆𑀜𑀫𑀸𑀦𑀸 ‘‘𑀦 𑀫𑁂 𑀇𑀫𑀺𑀦𑀸 𑀅𑀢𑁆𑀣𑁄, 𑀇𑀤𑀁 𑀦𑀸𑀫 𑀫𑁂 𑀆𑀳𑀭𑀸’’𑀢𑀺 𑀢𑀢𑁄 𑀅𑀜𑁆𑀜𑀁 𑀘𑁂𑀢𑀸𑀧𑁂𑀬𑁆𑀬. 𑀢𑀲𑁆𑀲𑀸 𑀘𑁂𑀢𑀸𑀧𑀦𑀧𑁆𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀧𑀝𑀺𑀮𑀸𑀪𑁂𑀦 𑀢𑁂𑀦 𑀯𑀸 𑀅𑀜𑁆𑀜𑁂𑀦 𑀯𑀸 𑀫𑀽𑀮𑁂𑀦 𑀆𑀳𑀝𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺, 𑀲𑁂𑀲𑀁 𑀘𑀢𑀼𑀢𑁆𑀣𑀲𑀤𑀺𑀲𑀫𑁂𑀯𑀸𑀢𑀺.

𑀅𑀜𑁆𑀜𑀘𑁂𑀢𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀧𑀞𑀫𑀲𑀗𑁆𑀖𑀺𑀓𑀘𑁂𑀢𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀙𑀝𑁆𑀞𑁂 𑀅𑀜𑁆𑀜𑀤𑀢𑁆𑀣𑀺𑀓𑁂𑀦𑀸𑀢𑀺 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀤𑀺𑀦𑁆𑀦𑁂𑀦. 𑀅𑀜𑁆𑀜𑀼𑀤𑁆𑀤𑀺𑀲𑀺𑀓𑁂𑀦𑀸𑀢𑀺 𑀅𑀜𑁆𑀜𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀤𑀺𑀦𑁆𑀦𑁂𑀦. 𑀲𑀗𑁆𑀖𑀺𑀓𑁂𑀦𑀸𑀢𑀺 𑀲𑀗𑁆𑀖𑀲𑁆𑀲 𑀧𑀭𑀺𑀘𑁆𑀘𑀢𑁆𑀢𑁂𑀦. 𑀧𑀭𑀺𑀓𑁆𑀔𑀸𑀭𑁂𑀦𑀸𑀢𑀺 𑀓𑀧𑁆𑀧𑀺𑀬𑀪𑀡𑁆𑀟𑁂𑀦. 𑀅𑀜𑁆𑀜𑀁 𑀘𑁂𑀢𑀸𑀧𑁂𑀬𑁆𑀬𑀸𑀢𑀺 ‘‘𑀇𑀤𑀁 𑀦𑀸𑀫 𑀧𑀭𑀺𑀪𑀼𑀜𑁆𑀚𑁂𑀬𑁆𑀬𑀸𑀣𑀸’’𑀢𑀺 𑀬𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀦𑀺𑀬𑀫𑁂𑀢𑁆𑀯𑀸 𑀬𑁄 𑀧𑀭𑀺𑀓𑁆𑀔𑀸𑀭𑁄 𑀤𑀺𑀦𑁆𑀦𑁄, 𑀢𑀢𑁄 𑀅𑀜𑁆𑀜𑀁 𑀧𑀭𑀺𑀯𑀢𑁆𑀢𑀸𑀧𑁂𑀬𑁆𑀬, 𑀢𑀲𑁆𑀲𑀸 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀧𑀝𑀺𑀮𑀸𑀪𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁.

𑀲𑀸𑀯𑀢𑁆𑀣𑀺𑀬𑀁 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀼𑀦𑀺𑀬𑁄 𑀆𑀭𑀩𑁆𑀪 𑀢𑀸𑀤𑀺𑀲𑁂𑀦 𑀧𑀭𑀺𑀓𑁆𑀔𑀸𑀭𑁂𑀦 𑀅𑀜𑁆𑀜𑀁 𑀘𑁂𑀢𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀅𑀦𑀜𑁆𑀜𑀤𑀢𑁆𑀣𑀺𑀓𑁂 𑀤𑁆𑀯𑀺𑀓𑀤𑀼𑀓𑁆𑀓𑀝𑀁. 𑀢𑀲𑁆𑀫𑀺𑀁 𑀧𑀦 𑀅𑀦𑀜𑁆𑀜𑀤𑀢𑁆𑀣𑀺𑀓𑀲𑀜𑁆𑀜𑀸𑀬, 𑀲𑁂𑀲𑀓𑀁 𑀉𑀧𑀦𑁂𑀦𑁆𑀢𑀺𑀬𑀸, ‘‘𑀢𑀼𑀫𑁆𑀳𑁂𑀳𑀺 𑀏𑀢𑀤𑀢𑁆𑀣𑀸𑀬 𑀤𑀺𑀦𑁆𑀦𑁄, 𑀅𑀫𑁆𑀳𑀸𑀓𑀜𑁆𑀘 𑀇𑀫𑀺𑀦𑀸 𑀦𑀸𑀫 𑀅𑀢𑁆𑀣𑁄’’𑀢𑀺 𑀲𑀸𑀫𑀺𑀓𑁂 𑀅𑀧𑀮𑁄𑀓𑁂𑀢𑁆𑀯𑀸 𑀉𑀧𑀦𑁂𑀦𑁆𑀢𑀺𑀬𑀸, 𑀬𑀤𑀸 𑀪𑀺𑀓𑁆𑀔𑀼𑀦𑀺𑀬𑁄 𑀯𑀺𑀳𑀸𑀭𑀫𑁆𑀧𑀺 𑀙𑀟𑁆𑀟𑁂𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀺, 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀼 𑀉𑀧𑀦𑁂𑀦𑁆𑀢𑀻𑀦𑀁, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀘𑀢𑀼𑀢𑁆𑀣𑀲𑀤𑀺𑀲𑀫𑁂𑀯𑀸𑀢𑀺.

𑀧𑀞𑀫𑀲𑀗𑁆𑀖𑀺𑀓𑀘𑁂𑀢𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀤𑀼𑀢𑀺𑀬𑀲𑀗𑁆𑀖𑀺𑀓𑀘𑁂𑀢𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀢𑁆𑀢𑀫𑁂 𑀲𑀜𑁆𑀜𑀸𑀘𑀺𑀓𑁂𑀦𑀸𑀢𑀺 𑀲𑀬𑀁 𑀬𑀸𑀘𑀺𑀢𑀓𑁂𑀦𑀸𑀧𑀺. 𑀏𑀢𑀤𑁂𑀯𑁂𑀢𑁆𑀣 𑀦𑀸𑀦𑀸𑀓𑀭𑀡𑀁, 𑀲𑁂𑀲𑀁 𑀙𑀝𑁆𑀞𑀲𑀤𑀺𑀲𑀫𑁂𑀯𑀸𑀢𑀺.

𑀤𑀼𑀢𑀺𑀬𑀲𑀗𑁆𑀖𑀺𑀓𑀘𑁂𑀢𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀧𑀞𑀫𑀕𑀡𑀺𑀓𑀘𑁂𑀢𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀝𑁆𑀞𑀫𑁂 𑀫𑀳𑀸𑀚𑀦𑀺𑀓𑁂𑀦𑀸𑀢𑀺 𑀕𑀡𑀲𑁆𑀲 𑀧𑀭𑀺𑀘𑁆𑀘𑀢𑁆𑀢𑁂𑀦, 𑀇𑀤𑀫𑁂𑀢𑁆𑀣 𑀙𑀝𑁆𑀞𑀢𑁄 𑀦𑀸𑀦𑀸𑀓𑀭𑀡𑀁.

𑀧𑀞𑀫𑀕𑀡𑀺𑀓𑀘𑁂𑀢𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀤𑀼𑀢𑀺𑀬𑀕𑀡𑀺𑀓𑀘𑁂𑀢𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀦𑀯𑀫𑁂 𑀲𑀜𑁆𑀜𑀸𑀘𑀺𑀓𑁂𑀦𑀸𑀢𑀺 𑀇𑀤𑀁 𑀅𑀝𑁆𑀞𑀫𑀢𑁄 𑀅𑀢𑀺𑀭𑀺𑀢𑁆𑀢𑀁, 𑀲𑁂𑀲𑀁 𑀤𑁆𑀯𑀻𑀲𑀼𑀧𑀺 𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀲𑀤𑀺𑀲𑀫𑁂𑀯𑀸𑀢𑀺.

𑀤𑀼𑀢𑀺𑀬𑀕𑀡𑀺𑀓𑀘𑁂𑀢𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀧𑀼𑀕𑁆𑀕𑀮𑀺𑀓𑀘𑁂𑀢𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀲𑀫𑁂 𑀧𑀼𑀕𑁆𑀕𑀮𑀺𑀓𑁂𑀦𑀸𑀢𑀺 𑀏𑀓𑀪𑀺𑀓𑁆𑀔𑀼𑀦𑀺𑀬𑀸 𑀧𑀭𑀺𑀘𑁆𑀘𑀢𑁆𑀢𑁂𑀦. 𑀲𑀜𑁆𑀜𑀸𑀘𑀺𑀓𑁂𑀦𑀸𑀢𑀺 𑀲𑀬𑀁 𑀬𑀸𑀘𑀺𑀢𑀓𑁂𑀦 𑀘. 𑀅𑀜𑁆𑀜𑀁 𑀘𑁂𑀢𑀸𑀧𑁂𑀬𑁆𑀬𑀸𑀢𑀺 𑀬𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀤𑀺𑀦𑁆𑀦𑀁, 𑀢𑀢𑁄 𑀅𑀜𑁆𑀜𑀁 𑀘𑁂𑀢𑀸𑀧𑁂𑀦𑁆𑀢𑀺𑀬𑀸 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀧𑀝𑀺𑀮𑀸𑀪𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺.

𑀲𑀸𑀯𑀢𑁆𑀣𑀺𑀬𑀁 𑀣𑀼𑀮𑁆𑀮𑀦𑀦𑁆𑀤𑀁 𑀆𑀭𑀩𑁆𑀪 𑀢𑀸𑀤𑀺𑀲𑁂𑀦 𑀧𑀭𑀺𑀓𑁆𑀔𑀸𑀭𑁂𑀦 𑀅𑀜𑁆𑀜𑀁 𑀘𑁂𑀢𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑁂𑀲𑀁 𑀙𑀝𑁆𑀞𑀲𑀤𑀺𑀲𑀫𑁂𑀯𑀸𑀢𑀺.

𑀧𑀼𑀕𑁆𑀕𑀮𑀺𑀓𑀘𑁂𑀢𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀢𑁆𑀢𑀯𑀕𑁆𑀕𑁄 𑀧𑀞𑀫𑁄.

𑁧𑁧. 𑀕𑀭𑀼𑀧𑀸𑀯𑀼𑀭𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀕𑀭𑀼𑀧𑀸𑀯𑀼𑀭𑀡𑀦𑁆𑀢𑀺 𑀲𑀻𑀢𑀓𑀸𑀮𑁂 𑀧𑀸𑀯𑀼𑀭𑀡𑀁. 𑀘𑀢𑀼𑀓𑁆𑀓𑀁𑀲𑀧𑀭𑀫𑀦𑁆𑀢𑀺 𑀓𑀁𑀲𑁄 𑀦𑀸𑀫 𑀘𑀢𑀼𑀓𑁆𑀓𑀳𑀸𑀧𑀡𑀺𑀓𑁄 𑀳𑁄𑀢𑀺, 𑀢𑀲𑁆𑀫𑀸 𑀲𑁄𑀴𑀲𑀓𑀳𑀸𑀧𑀡𑀕𑁆𑀖𑀦𑀓𑀁. 𑀘𑁂𑀢𑀸𑀧𑁂𑀢𑀩𑁆𑀩𑀦𑁆𑀢𑀺 𑀞𑀧𑁂𑀢𑁆𑀯𑀸 𑀲𑀳𑀥𑀫𑁆𑀫𑀺𑀓𑁂 𑀘 𑀜𑀸𑀢𑀓𑀧𑁆𑀧𑀯𑀸𑀭𑀺𑀢𑁂 𑀘 𑀅𑀜𑁆𑀜𑁂𑀦 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀕𑀼𑀡𑁂 𑀧𑀭𑀺𑀢𑀼𑀝𑁆𑀞𑁂𑀦 ‘‘𑀯𑀤𑁂𑀣𑀸𑀬𑁆𑀬𑁂, 𑀬𑁂𑀦𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀸𑀬 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑀁. 𑀢𑀢𑁄 𑀘𑁂 𑀉𑀢𑁆𑀢𑀭𑀻𑀢𑀺 𑀢𑀢𑀼𑀢𑁆𑀢𑀭𑀺 𑀯𑀺𑀜𑁆𑀜𑀸𑀧𑁂𑀦𑁆𑀢𑀺𑀬𑀸 𑀤𑀼𑀓𑁆𑀓𑀝𑀁, 𑀧𑀝𑀺𑀮𑀤𑁆𑀥𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺.

𑀲𑀸𑀯𑀢𑁆𑀣𑀺𑀬𑀁 𑀣𑀼𑀮𑁆𑀮𑀦𑀦𑁆𑀤𑀁 𑀆𑀭𑀩𑁆𑀪 𑀭𑀸𑀚𑀸𑀦𑀁 𑀓𑀫𑁆𑀩𑀮𑀁 𑀯𑀺𑀜𑁆𑀜𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀊𑀦𑀓𑀘𑀢𑀼𑀓𑁆𑀓𑀁𑀲𑁂 𑀤𑁆𑀯𑀺𑀓𑀤𑀼𑀓𑁆𑀓𑀝𑀁. 𑀢𑀲𑁆𑀫𑀺𑀁 𑀧𑀦 𑀊𑀦𑀓𑀲𑀜𑁆𑀜𑀸𑀬, 𑀘𑀢𑀼𑀓𑁆𑀓𑀁𑀲𑀧𑀭𑀫𑀁 𑀘𑁂𑀢𑀸𑀧𑁂𑀦𑁆𑀢𑀺𑀬𑀸, 𑀜𑀸𑀢𑀓𑀧𑁆𑀧𑀯𑀸𑀭𑀺𑀢𑁂 𑀯𑀸, 𑀅𑀜𑁆𑀜𑀲𑁆𑀲 𑀯𑀸 𑀅𑀢𑁆𑀣𑀸𑀬, 𑀅𑀢𑁆𑀢𑀦𑁄 𑀯𑀸 𑀥𑀦𑁂𑀦, 𑀫𑀳𑀕𑁆𑀖𑀁 𑀘𑁂𑀢𑀸𑀧𑁂𑀦𑁆𑀢𑀁 𑀅𑀧𑁆𑀧𑀕𑁆𑀖𑀁 𑀘𑁂𑀢𑀸𑀧𑁂𑀦𑁆𑀢𑀺𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀕𑀭𑀼𑀧𑀸𑀯𑀼𑀭𑀡𑀢𑀸, 𑀅𑀢𑀺𑀭𑁂𑀓𑀘𑀢𑀼𑀓𑁆𑀓𑀁𑀲𑀢𑀸, 𑀅𑀦𑀦𑀼𑀜𑁆𑀜𑀸𑀢𑀝𑁆𑀞𑀸𑀦𑁂 𑀯𑀺𑀜𑁆𑀜𑀢𑁆𑀢𑀺, 𑀧𑀝𑀺𑀮𑀸𑀪𑁄𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀲𑀜𑁆𑀘𑀭𑀺𑀢𑁆𑀢𑀲𑀤𑀺𑀲𑀸𑀦𑀻𑀢𑀺.

𑀕𑀭𑀼𑀧𑀸𑀯𑀼𑀭𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀮𑀳𑀼𑀧𑀸𑀯𑀼𑀭𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀼𑀢𑀺𑀬𑁂 𑀮𑀳𑀼𑀧𑀸𑀯𑀼𑀭𑀡𑀦𑁆𑀢𑀺 𑀉𑀡𑁆𑀳𑀓𑀸𑀮𑁂 𑀧𑀸𑀯𑀼𑀭𑀡𑀁. 𑀅𑀟𑁆𑀠𑀢𑁂𑀬𑁆𑀬𑀓𑀁𑀲𑀧𑀭𑀫𑀦𑁆𑀢𑀺 𑀤𑀲𑀓𑀳𑀸𑀧𑀡𑀕𑁆𑀖𑀦𑀓𑀁, 𑀲𑁂𑀲𑀁 𑀧𑀞𑀫𑀲𑀤𑀺𑀲𑀫𑁂𑀯𑀸𑀢𑀺.

𑀮𑀳𑀼𑀧𑀸𑀯𑀼𑀭𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑁄 𑀧𑀭𑀸𑀦𑀺 𑀇𑀫𑀲𑁆𑀫𑀺𑀁 𑀯𑀕𑁆𑀕𑁂 𑀅𑀝𑁆𑀞, 𑀢𑀢𑀺𑀬𑀯𑀕𑁆𑀕𑁂 𑀤𑀲𑀸𑀢𑀺 𑀇𑀫𑀸𑀦𑀺 𑀅𑀝𑁆𑀞𑀸𑀭𑀲 𑀲𑀺𑀓𑁆𑀔𑀸𑀧𑀤𑀸𑀦𑀺 𑀪𑀺𑀓𑁆𑀔𑀼𑀧𑀸𑀢𑀺𑀫𑁄𑀓𑁆𑀔𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺.

𑀚𑀸𑀢𑀭𑀽𑀧𑀯𑀕𑁆𑀕𑁄 𑀢𑀢𑀺𑀬𑁄.

𑀉𑀤𑁆𑀤𑀺𑀝𑁆𑀞𑀸 𑀔𑁄 𑀅𑀬𑁆𑀬𑀸𑀬𑁄 𑀢𑀺𑀁𑀲 𑀦𑀺𑀲𑁆𑀲𑀕𑁆𑀕𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸 𑀥𑀫𑁆𑀫𑀸𑀢𑀺 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀸 𑀲𑀸𑀥𑀸𑀭𑀡𑀸 𑀅𑀝𑁆𑀞𑀸𑀭𑀲, 𑀅𑀲𑀸𑀥𑀸𑀭𑀡𑀸 𑀤𑁆𑀯𑀸𑀤𑀲𑀸𑀢𑀺 𑀏𑀯𑀁 𑀢𑀺𑀁𑀲. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀯𑀡𑁆𑀡𑀦𑀸𑀬 𑀪𑀺𑀓𑁆𑀔𑀼𑀦𑀺𑀧𑀸𑀢𑀺𑀫𑁄𑀓𑁆𑀔𑁂

𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.