𑁧𑁩. 𑀧𑀸𑀧𑀲𑀫𑀸𑀘𑀸𑀭𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑁂𑀭𑀲𑀫𑁂 𑀏𑀯𑀁 𑀯𑀤𑁂𑀬𑁆𑀬𑀸𑀢𑀺 𑀢𑀸 𑀲𑀫𑀦𑀼𑀪𑀝𑁆𑀞𑀸 𑀪𑀺𑀓𑁆𑀔𑀼𑀦𑀺𑀬𑁄 𑀏𑀯𑀁 𑀯𑀤𑁂𑀬𑁆𑀬. 𑀏𑀯𑀸𑀘𑀸𑀭𑀸𑀢𑀺 𑀏𑀯𑀁𑀆𑀘𑀸𑀭𑀸, 𑀬𑀸𑀤𑀺𑀲𑁄 𑀢𑀼𑀫𑁆𑀳𑀸𑀓𑀁 𑀆𑀘𑀸𑀭𑁄, 𑀢𑀸𑀤𑀺𑀲𑁄 𑀆𑀘𑀸𑀭𑁄𑀢𑀺 𑀅𑀢𑁆𑀣𑁄, 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀉𑀜𑁆𑀜𑀸𑀬𑀸𑀢𑀺 𑀅𑀯𑀜𑁆𑀜𑀸𑀬 𑀦𑀻𑀘𑀁 𑀓𑀢𑁆𑀯𑀸 𑀚𑀸𑀦𑀦𑀸𑀬. 𑀧𑀭𑀺𑀪𑀯𑁂𑀦𑀸𑀢𑀺 ‘‘𑀓𑀺𑀁 𑀇𑀫𑀸 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀏𑀯𑀁 𑀧𑀭𑀺𑀪𑀯𑀺𑀢𑁆𑀯𑀸 𑀚𑀸𑀦𑀦𑁂𑀦. 𑀅𑀓𑁆𑀔𑀦𑁆𑀢𑀺𑀬𑀸𑀢𑀺 𑀅𑀲𑀳𑀦𑀢𑀸𑀬, 𑀓𑁄𑀥𑁂𑀦𑀸𑀢𑀺 𑀅𑀢𑁆𑀣𑁄. 𑀯𑁂𑀪𑀲𑁆𑀲𑀺𑀬𑀸𑀢𑀺 𑀩𑀮𑀯𑀦𑁆𑀢𑀲𑁆𑀲 𑀪𑀸𑀯𑁂𑀦, 𑀅𑀢𑁆𑀢𑀦𑁄 𑀩𑀮𑀧𑁆𑀧𑀓𑀸𑀲𑀦𑁂𑀦 𑀲𑀫𑀼𑀢𑁆𑀭𑀸𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀤𑀼𑀩𑁆𑀩𑀮𑁆𑀬𑀸𑀢𑀺 𑀢𑀼𑀫𑁆𑀳𑀸𑀓𑀁 𑀤𑀼𑀩𑁆𑀩𑀮𑀪𑀸𑀯𑁂𑀦, 𑀲𑀩𑁆𑀩𑀢𑁆𑀣 𑀉𑀜𑁆𑀜𑀸𑀬 𑀘 𑀧𑀭𑀺𑀪𑀯𑁂𑀦 𑀘𑀸𑀢𑀺 𑀏𑀯𑀁 𑀲𑀫𑀼𑀘𑁆𑀘𑀬𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀯𑀺𑀯𑀺𑀘𑁆𑀘𑀣𑀸𑀢𑀺 𑀦𑀸𑀦𑀸 𑀳𑁄𑀣, 𑀅𑀦𑀦𑀼𑀮𑁄𑀫𑀺𑀓𑀁 𑀓𑀸𑀬𑀺𑀓𑀯𑀸𑀘𑀲𑀺𑀓𑀲𑀁𑀲𑀕𑁆𑀕𑀁 𑀧𑀚𑀳𑀣𑀸𑀢𑀺 𑀅𑀢𑁆𑀣𑁄.

𑀲𑀸𑀯𑀢𑁆𑀣𑀺𑀬𑀁 𑀣𑀼𑀮𑁆𑀮𑀦𑀦𑁆𑀤𑀁 𑀆𑀭𑀩𑁆𑀪 ‘‘𑀲𑀁𑀲𑀝𑁆𑀞𑀸𑀯, 𑀅𑀬𑁆𑀬𑁂, 𑀢𑀼𑀫𑁆𑀳𑁂 𑀯𑀺𑀳𑀭𑀣, 𑀫𑀸 𑀢𑀼𑀫𑁆𑀳𑁂 𑀦𑀸𑀦𑀸 𑀯𑀺𑀳𑀭𑀺𑀢𑁆𑀣𑀸’’𑀢𑀺 𑀉𑀬𑁆𑀬𑁄𑀚𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑁂𑀲𑀫𑁂𑀢𑁆𑀣𑀸𑀧𑀺 𑀤𑀲𑀫𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀧𑀸𑀧𑀲𑀫𑀸𑀘𑀸𑀭𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.