𑁯. 𑀆𑀝𑀸𑀦𑀸𑀝𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑀧𑀞𑀫𑀪𑀸𑀡𑀯𑀸𑀭𑀯𑀡𑁆𑀡𑀦𑀸

𑁨𑁭𑁫. ‘‘𑀘𑀢𑀼𑀤𑁆𑀤𑀺𑀲𑀁 𑀭𑀓𑁆𑀔𑀁 𑀞𑀧𑁂𑀢𑁆𑀯𑀸’’𑀢𑀺 𑀇𑀤𑀁 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀞𑀧𑀺𑀢𑀁 𑀭𑀓𑁆𑀔𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀢𑀤𑀼𑀪𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀲𑀼𑀭𑀲𑁂𑀦𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀢𑁆𑀢𑀦𑁄 𑀳𑀺 𑀅𑀥𑀺𑀓𑀸𑀭𑁂, 𑀅𑀢𑁆𑀢𑀦𑁄 𑀭𑀓𑁆𑀔𑀸𑀬 𑀘 𑀅𑀧𑁆𑀧𑀫𑀚𑁆𑀚𑀦𑁂𑀦 𑀢𑁂𑀲𑀁 𑀇𑀤𑀁 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀆𑀭𑀓𑁆𑀔𑀝𑁆𑀞𑀧𑀦𑀁. 𑀬𑀜𑁆𑀳𑀺 𑀢𑀁 𑀅𑀲𑀼𑀭𑀲𑁂𑀦𑀸𑀬 𑀧𑀝𑀺𑀲𑁂𑀥𑀦𑀢𑁆𑀣𑀁 𑀤𑁂𑀯𑀧𑀼𑀭𑁂 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀆𑀭𑀓𑁆𑀔𑀝𑁆𑀞𑀧𑀦𑀁, 𑀢𑀁 𑀅𑀢𑁆𑀢𑀦𑁄 𑀅𑀥𑀺𑀓𑀸𑀭𑁂 𑀅𑀧𑁆𑀧𑀫𑀚𑁆𑀚𑀦𑀁. 𑀬𑀁 𑀧𑀦 𑀦𑁂𑀲𑀁 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀦𑁂 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀆𑀭𑀓𑁆𑀔𑀝𑁆𑀞𑀧𑀦𑀁, 𑀢𑀁 𑀅𑀢𑁆𑀢𑀦𑁄 𑀓𑀢𑀸 𑀭𑀓𑁆𑀔𑀸𑀬 𑀅𑀧𑁆𑀧𑀫𑀚𑁆𑀚𑀦𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀲𑀼𑀭𑀲𑁂𑀦𑀸𑀬 𑀦𑀺𑀯𑀸𑀭𑀡𑀢𑁆𑀣’’𑀦𑁆𑀢𑀺𑀆𑀤𑀺. 𑀧𑀸𑀴𑀺𑀬𑀁 𑀘𑀢𑀼𑀤𑁆𑀤𑀺𑀲𑀦𑁆𑀢𑀺 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀪𑀼𑀫𑁆𑀫𑀯𑀲𑁂𑀦 𑀢𑀤𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀢𑀽𑀲𑀼 𑀤𑀺𑀲𑀸𑀲𑀽’’𑀢𑀺 𑀆𑀳. 𑀆𑀭𑀓𑁆𑀔𑀁 𑀞𑀧𑁂𑀢𑁆𑀯𑀸𑀢𑀺 𑀯𑁂𑀲𑁆𑀲𑀯𑀡𑀸𑀤𑀬𑁄 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀅𑀢𑁆𑀢𑀦𑀸 𑀅𑀢𑁆𑀢𑀦𑀸 𑀭𑀓𑁆𑀔𑀺𑀢𑀩𑁆𑀩𑀤𑀺𑀲𑀸𑀲𑀼 𑀆𑀭𑀓𑁆𑀔𑀁 𑀞𑀧𑁂𑀢𑁆𑀯𑀸 𑀕𑀼𑀢𑁆𑀢𑀺𑀁 𑀲𑀫𑁆𑀫𑀤𑁂𑀯 𑀯𑀺𑀤𑀳𑀺𑀢𑁆𑀯𑀸. 𑀩𑀮𑀕𑀼𑀫𑁆𑀩𑀁 𑀞𑀧𑁂𑀢𑁆𑀯𑀸𑀢𑀺 𑀬𑀓𑁆𑀔𑀲𑁂𑀦𑀸𑀤𑀺𑀲𑁂𑀦𑀸𑀩𑀮𑀲𑀫𑀽𑀳𑀁 𑀞𑀧𑁂𑀢𑁆𑀯𑀸. 𑀑𑀯𑀭𑀡𑀁 𑀞𑀧𑁂𑀢𑁆𑀯𑀸𑀢𑀺 𑀧𑀝𑀺𑀧𑀓𑁆𑀔𑀦𑀺𑀲𑁂𑀥𑀦𑀲𑀫𑀢𑁆𑀣𑀁 𑀆𑀯𑀭𑀡𑀁 𑀞𑀧𑁂𑀢𑁆𑀯𑀸. 𑀇𑀢𑀺 𑀢𑀻𑀳𑀺 𑀧𑀤𑁂𑀳𑀺 𑀬𑀣𑀸𑀓𑁆𑀓𑀫𑀁 𑀧𑀘𑁆𑀘𑁂𑀓𑀁 𑀤𑁂𑀯𑀦𑀕𑀭𑀤𑁆𑀯𑀸𑀭𑀲𑁆𑀲 𑀅𑀦𑁆𑀢𑁄, 𑀤𑁆𑀯𑀸𑀭𑀲𑀫𑀻𑀧𑁂, 𑀤𑁆𑀯𑀸𑀭𑀢𑁄 𑀩𑀳𑀺, 𑀤𑀺𑀲𑀸𑀭𑀓𑁆𑀔𑀸𑀯𑀲𑀦𑁄𑀢𑀺 𑀢𑀺𑀯𑀺𑀥𑀸𑀬 𑀭𑀓𑁆𑀔𑀸𑀬 𑀞𑀧𑀺𑀢𑀪𑀸𑀯𑁄 𑀯𑀸 𑀤𑀻𑀧𑀺𑀢𑁄. 𑀢𑁂𑀦𑀸𑀳 ‘‘𑀏𑀯𑀁 𑀲𑀓𑁆𑀓𑀲𑁆𑀲…𑀧𑁂… 𑀓𑀢𑁆𑀯𑀸’’𑀢𑀺. 𑀲𑀢𑁆𑀢 𑀩𑀼𑀤𑁆𑀥𑁂 𑀆𑀭𑀩𑁆𑀪𑀸𑀢𑀺 𑀏𑀢𑁆𑀣 𑀲𑀢𑁆𑀢𑁂𑀯 𑀩𑀼𑀤𑁆𑀥𑁂 𑀆𑀭𑀩𑁆𑀪 𑀧𑀭𑀺𑀩𑀦𑁆𑀥𑀦𑀓𑀸𑀭𑀡𑀁 𑀫𑀳𑀸𑀧𑀤𑀸𑀦𑀝𑀻𑀓𑀸𑀬𑀁 (𑀤𑀻. 𑀦𑀺. 𑀝𑀻. 𑁨.𑁧𑁨) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀥𑀫𑁆𑀫𑀆𑀡𑀦𑁆𑀢𑀺 𑀥𑀫𑁆𑀫𑀫𑀬𑀁 𑀆𑀡𑀁, 𑀲𑀢𑁆𑀣𑀼 𑀥𑀫𑁆𑀫𑀘𑀓𑁆𑀓𑀦𑁆𑀢𑀺 𑀅𑀢𑁆𑀣𑁄. ‘‘𑀧𑀭𑀺𑀲𑀢𑁄 𑀩𑀸𑀳𑀺𑀭𑀪𑀸𑀯𑁄, 𑀅𑀲𑀫𑁆𑀪𑁄𑀕𑁄’’𑀢𑀺 𑀏𑀯𑀫𑀸𑀤𑀺𑀁 𑀇𑀤𑀜𑁆𑀘𑀺𑀤𑀜𑁆𑀘 𑀯𑀺𑀯𑀚𑁆𑀚𑀦𑀓𑀭𑀡𑀁 𑀓𑀭𑀺𑀲𑁆𑀲𑀸𑀫𑀸𑀢𑀺. 𑀲𑀸𑀯𑀦𑀦𑁆𑀢𑀺 𑀘𑀢𑀼𑀦𑁆𑀦𑀫𑁆𑀧𑀺 𑀧𑀭𑀺𑀲𑀸𑀦𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀭𑀺𑀯𑀸𑀭𑁂𑀦 𑀅𑀦𑀼𑀲𑀸𑀯𑀦𑀁, 𑀬𑀣𑀸 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀅𑀲𑀼𑀭𑀲𑁂𑀦𑀸𑀬 𑀦𑀺𑀯𑀸𑀭𑀡𑀢𑁆𑀣𑀁 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀆𑀭𑀓𑁆𑀔𑀁 𑀞𑀧𑀸𑀧𑁂𑀢𑀺, 𑀏𑀯𑀁 𑀫𑀳𑀸𑀭𑀸𑀚𑀸𑀦𑁄𑀧𑀺 𑀢𑀸𑀤𑀺𑀲𑁂 𑀓𑀺𑀘𑁆𑀘𑀯𑀺𑀲𑁂𑀲𑁂 𑀅𑀢𑁆𑀢𑀦𑁄 𑀆𑀭𑀓𑁆𑀔𑀁 𑀞𑀧𑁂𑀦𑁆𑀢𑀺. 𑀇𑀫𑁂𑀲𑀫𑁆𑀧𑀺 𑀳𑀺 𑀢𑀢𑁄 𑀲𑀸𑀲𑀗𑁆𑀓𑀁 𑀲𑀧𑁆𑀧𑀝𑀺𑀪𑀬𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀦𑁄𑀧𑀻’’𑀢𑀺𑀆𑀤𑀺.

𑀅𑀪𑀺𑀓𑁆𑀓𑀦𑁆𑀢𑀸𑀢𑀺 𑀅𑀢𑀺𑀓𑁆𑀓𑀦𑁆𑀢𑀸, 𑀯𑀺𑀕𑀢𑀸𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀔𑀬𑁂 𑀤𑀺𑀲𑁆𑀲𑀢𑀻’’𑀢𑀺. 𑀢𑁂𑀦𑁂𑀯 𑀳𑀺 ‘‘𑀦𑀺𑀓𑁆𑀔𑀦𑁆𑀢𑁄 𑀧𑀞𑀫𑁄 𑀬𑀸𑀫𑁄’’𑀢𑀺 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑀁. 𑀅𑀪𑀺𑀓𑁆𑀓𑀦𑁆𑀢𑀢𑀭𑁄𑀢𑀺 𑀅𑀢𑀺𑀯𑀺𑀬 𑀓𑀦𑁆𑀢𑀢𑀭𑁄. 𑀢𑀸𑀤𑀺𑀲𑁄 𑀘 𑀲𑀼𑀦𑁆𑀤𑀭𑁄 𑀪𑀤𑁆𑀤𑀓𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀲𑀼𑀦𑁆𑀤𑀭𑁂 𑀤𑀺𑀲𑁆𑀲𑀢𑀻’’𑀢𑀺.

𑀓𑁄𑀢𑀺 𑀤𑁂𑀯𑀦𑀸𑀕𑀬𑀓𑁆𑀔𑀕𑀦𑁆𑀥𑀩𑁆𑀩𑀸𑀤𑀻𑀲𑀼 𑀓𑁄 𑀓𑀢𑀫𑁄. 𑀫𑁂𑀢𑀺 𑀫𑀫. 𑀧𑀸𑀤𑀸𑀦𑀻𑀢𑀺 𑀧𑀸𑀤𑁂. 𑀇𑀤𑁆𑀥𑀺𑀬𑀸𑀢𑀺 𑀇𑀫𑀸𑀬 𑀏𑀯𑀭𑀽𑀧𑀸𑀬 𑀤𑁂𑀯𑀺𑀤𑁆𑀥𑀺𑀬𑀸. ‘‘𑀬𑀲𑀲𑀸’’𑀢𑀺 𑀇𑀫𑀺𑀦𑀸 𑀏𑀤𑀺𑀲𑁂𑀦 𑀧𑀭𑀺𑀯𑀸𑀭𑁂𑀦, 𑀧𑀭𑀺𑀘𑁆𑀙𑁂𑀤𑁂𑀦 𑀘. 𑀚𑀮𑀦𑁆𑀢𑀺 𑀯𑀺𑀚𑁆𑀚𑁄𑀢𑀫𑀸𑀦𑁄. 𑀅𑀪𑀺𑀓𑁆𑀓𑀦𑁆𑀢𑁂𑀦𑀸𑀢𑀺 𑀅𑀢𑀺𑀯𑀺𑀬 𑀓𑀦𑁆𑀢𑁂𑀦 𑀓𑀫𑀦𑀻𑀬𑁂𑀦 𑀅𑀪𑀺𑀭𑀽𑀧𑁂𑀦. 𑀯𑀡𑁆𑀡𑁂𑀦𑀸𑀢𑀺 𑀲𑀭𑀻𑀭𑀯𑀡𑁆𑀡𑀦𑀺𑀪𑀸𑀬. 𑀲𑀩𑁆𑀩𑀸 𑀑𑀪𑀸𑀲𑀬𑀁 𑀤𑀺𑀲𑀸𑀢𑀺 𑀤𑀲𑀧𑀺 𑀤𑀺𑀲𑀸 𑀧𑀪𑀸𑀲𑁂𑀦𑁆𑀢𑁄 𑀘𑀦𑁆𑀤𑁄 𑀯𑀺𑀬, 𑀲𑀽𑀭𑀺𑀬𑁄 𑀯𑀺𑀬 𑀘 𑀏𑀓𑁄𑀪𑀸𑀲𑀁 𑀏𑀓𑀸𑀮𑁄𑀓𑀁 𑀓𑀭𑁄𑀦𑁆𑀢𑁄𑀢𑀺 𑀕𑀸𑀣𑀸𑀬 𑀅𑀢𑁆𑀣𑁄. 𑀅𑀪𑀺𑀭𑀽𑀧𑁂𑀢𑀺 𑀉𑀴𑀸𑀭𑀭𑀽𑀧𑁂 𑀲𑀫𑁆𑀧𑀦𑁆𑀦𑀭𑀽𑀧𑁂. 𑀅𑀩𑁆𑀪𑀦𑀼𑀫𑁄𑀤𑀦𑁂𑀢𑀺 𑀲𑀫𑁆𑀧𑀳𑀁𑀲𑀦𑁂. 𑀇𑀥 𑀧𑀦𑀸𑀢𑀺 ‘‘𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸’’𑀢𑀺 𑀏𑀢𑀲𑁆𑀫𑀺𑀁 𑀧𑀤𑁂. 𑀢𑁂𑀦𑀸𑀢𑀺 𑀔𑀬𑀧𑀭𑀺𑀬𑀸𑀬𑀢𑁆𑀢𑀸.

𑀭𑀽𑀧𑀸𑀬𑀢𑀦𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀓𑁆𑀔𑀭𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀲𑀼𑀯𑀡𑁆𑀡𑀯𑀡𑁆𑀡𑁄𑀢𑀺 𑀲𑀼𑀯𑀡𑁆𑀡𑀘𑁆𑀙𑀯𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 ‘‘𑀙𑀯𑀺𑀬’’𑀦𑁆𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑁄’’𑀢𑀺 (𑀤𑀻. 𑀦𑀺. 𑁨.𑁩𑁫; 𑁩.𑁨𑁦𑁦, 𑁨𑁧𑁮; 𑀫. 𑀦𑀺. 𑁨.𑁩𑁮𑁬) 𑀲𑀜𑁆𑀜𑀽𑀴𑁆𑀳𑀸𑀢𑀺 𑀲𑀗𑁆𑀕𑀦𑁆𑀣𑀺𑀢𑀸. 𑀯𑀡𑁆𑀡𑀸𑀢𑀺 𑀕𑀼𑀡𑀯𑀡𑁆𑀡𑀦𑀸𑀢𑀺 𑀆𑀳 ‘‘𑀣𑀼𑀢𑀺𑀬’’𑀦𑁆𑀢𑀺, 𑀣𑁄𑀫𑀦𑀸𑀬𑀦𑁆𑀢𑀺 𑀅𑀢𑁆𑀣𑁄. 𑀓𑀼𑀮𑀯𑀕𑁆𑀕𑁂𑀢𑀺 𑀔𑀢𑁆𑀢𑀺𑀬𑀸𑀤𑀺𑀓𑀼𑀮𑀓𑁄𑀝𑁆𑀞𑀸𑀲𑁂. 𑀢𑀢𑁆𑀣 ‘‘𑀅𑀘𑁆𑀙𑁄 𑀯𑀺𑀧𑁆𑀧𑀲𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀯𑀡𑁆𑀡𑀺𑀢𑀩𑁆𑀩𑀝𑁆𑀞𑁂𑀦 𑀯𑀡𑁆𑀡𑁄, 𑀙𑀯𑀺. 𑀯𑀡𑁆𑀡𑀦𑀝𑁆𑀞𑁂𑀦 𑀯𑀡𑁆𑀡𑁄, 𑀣𑀼𑀢𑀺. 𑀅𑀪𑀺𑀢𑁆𑀣𑀯𑀦𑀝𑁆𑀞𑁂𑀦 𑀯𑀡𑁆𑀡𑁄, 𑀣𑀼𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀅𑀲𑀗𑁆𑀓𑀭𑀢𑁄 𑀯𑀡𑁆𑀡𑀺𑀢𑀩𑁆𑀩𑀢𑁄 𑀞𑀧𑁂𑀢𑀩𑁆𑀩𑀢𑁄 𑀯𑀡𑁆𑀡𑁄, 𑀔𑀢𑁆𑀢𑀺𑀬𑀸𑀤𑀺𑀓𑀼𑀮𑀯𑀕𑁆𑀕𑁄. 𑀯𑀡𑁆𑀡𑀻𑀬𑀢𑀺 𑀜𑀸𑀧𑀻𑀬𑀢𑀺 𑀏𑀢𑁂𑀦𑀸𑀢𑀺 𑀯𑀡𑁆𑀡𑁄, 𑀜𑀸𑀧𑀓𑀁 𑀓𑀸𑀭𑀡𑀁. 𑀯𑀡𑁆𑀡𑀦𑀢𑁄 𑀣𑀽𑀮𑀭𑀲𑁆𑀲𑀸𑀤𑀺𑀪𑀸𑀯𑁂𑀦 𑀉𑀧𑀝𑁆𑀞𑀸𑀦𑀢𑁄 𑀯𑀡𑁆𑀡𑁄, 𑀲𑀡𑁆𑀞𑀸𑀦𑀁. ‘‘𑀫𑀳𑀦𑁆𑀢𑀁 𑀔𑀼𑀤𑁆𑀤𑀓𑀁, 𑀫𑀚𑁆𑀛𑀺𑀫’’𑀦𑁆𑀢𑀺 𑀯𑀡𑁆𑀡𑁂𑀢𑀩𑁆𑀩𑀢𑁄 𑀧𑀫𑀸𑀡𑁂𑀢𑀩𑁆𑀩𑀢𑁄 𑀯𑀡𑁆𑀡𑁄, 𑀧𑀫𑀸𑀡𑀁. 𑀯𑀡𑁆𑀡𑀻𑀬𑀢𑀺 𑀘𑀓𑁆𑀔𑀼𑀦𑀸 𑀯𑀺𑀯𑀭𑀻𑀬𑀢𑀻𑀢𑀺 𑀯𑀡𑁆𑀡𑁄, 𑀭𑀽𑀧𑀸𑀬𑀢𑀦𑀦𑁆𑀢𑀺 𑀏𑀯𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀯𑀡𑁆𑀡-𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁄𑀢𑀺 𑀯𑀡𑁆𑀡𑀲𑀤𑁆𑀤𑁄. 𑀙𑀯𑀺𑀬𑀁 𑀤𑀝𑁆𑀞𑀩𑁆𑀩𑁄 𑀭𑀽𑀧𑀸𑀬𑀢𑀦𑁂 𑀕𑀬𑁆𑀳𑀫𑀸𑀦𑀲𑁆𑀲 𑀙𑀯𑀺𑀫𑀼𑀔𑁂𑀦𑁂𑀯 𑀕𑀳𑁂𑀢𑀩𑁆𑀩𑀢𑁄. ‘‘𑀙𑀯𑀺𑀕𑀢𑀸 𑀧𑀦 𑀯𑀡𑁆𑀡𑀥𑀸𑀢𑀼 𑀏𑀯 𑀲𑀼𑀯𑀡𑁆𑀡𑀯𑀡𑁆𑀡𑁄𑀢𑀺 𑀏𑀢𑁆𑀣 𑀯𑀡𑁆𑀡𑀕𑁆𑀕𑀳𑀡𑁂𑀦 𑀕𑀳𑀺𑀢𑀸’’𑀢𑀺 𑀅𑀧𑀭𑁂.

𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀏𑀓𑀤𑁂𑀲𑀫𑁆𑀧𑀺 𑀅𑀲𑁂𑀲𑁂𑀢𑁆𑀯𑀸 𑀦𑀺𑀭𑀯𑀲𑁂𑀲𑀢𑁄𑀯 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 ‘‘𑀅𑀦𑀯𑀲𑁂𑀲𑀢𑀸 𑀅𑀢𑁆𑀣𑁄’’𑀢𑀺. 𑀓𑁂𑀯𑀮𑀓𑀧𑁆𑀧𑀸𑀢𑀺 𑀓𑀧𑁆𑀧-𑀲𑀤𑁆𑀤𑁄 𑀦𑀺𑀧𑀸𑀢𑁄 𑀧𑀤𑀧𑀽𑀭𑀡𑀫𑀢𑁆𑀢𑀁, 𑀓𑁂𑀯𑀮𑀁 𑀇𑀘𑁆𑀘𑁂𑀯 𑀅𑀢𑁆𑀣𑁄. 𑀓𑁂𑀯𑀮-𑀲𑀤𑁆𑀤𑁄 𑀩𑀳𑀼𑀮𑀯𑀸𑀘𑀻𑀢𑀺 𑀆𑀳 ‘‘𑀬𑁂𑀪𑀼𑀬𑁆𑀬𑀢𑀸 𑀅𑀢𑁆𑀣𑁄’’𑀢𑀺. 𑀓𑁂𑀘𑀺 𑀧𑀦 ‘‘𑀈𑀲𑀓𑀁 𑀅𑀲𑀫𑀢𑁆𑀢𑀸 𑀓𑁂𑀯𑀮𑀓𑀧𑁆𑀧𑀸’’𑀢𑀺 𑀯𑀤𑀦𑁆𑀢𑀺. 𑀏𑀯𑀁 𑀲𑀢𑀺 𑀅𑀦𑀯𑀲𑁂𑀲𑀢𑁆𑀣𑁄 𑀏𑀯 𑀓𑁂𑀯𑀮-𑀲𑀤𑁆𑀤𑀢𑁆𑀣𑁄 𑀲𑀺𑀬𑀸, 𑀅𑀦𑀢𑁆𑀣𑀦𑁆𑀢𑀭𑁂𑀦 𑀧𑀦 𑀓𑀧𑁆𑀧-𑀲𑀤𑁆𑀤𑁂𑀦 𑀧𑀤𑀯𑀟𑁆𑀠𑀦𑀁 𑀓𑀢𑀁 𑀓𑁂𑀯𑀮𑀫𑁂𑀯 𑀓𑁂𑀯𑀮𑀓𑀧𑁆𑀧𑀦𑁆𑀢𑀺. 𑀅𑀣 𑀯𑀸 𑀓𑀧𑁆𑀧𑀦𑀻𑀬𑀢𑀸, 𑀧𑀜𑁆𑀜𑀸𑀧𑁂𑀢𑀩𑁆𑀩𑀢𑀸 𑀓𑁂𑀯𑀮𑀓𑀧𑁆𑀧𑀸. 𑀅𑀩𑁆𑀬𑀸𑀫𑀺𑀲𑁆𑀲𑀢𑀸 𑀯𑀺𑀚𑀸𑀢𑀺𑀬𑁂𑀦 𑀅𑀲𑀗𑁆𑀓𑀭𑀸 𑀲𑀼𑀤𑁆𑀥𑀢𑀸. 𑀅𑀦𑀢𑀺𑀭𑁂𑀓𑀢𑀸 𑀢𑀁𑀧𑀭𑀫𑀢𑀸 𑀯𑀺𑀲𑁂𑀲𑀸𑀪𑀸𑀯𑁄. 𑀓𑁂𑀯𑀮𑀓𑀧𑁆𑀧𑀦𑁆𑀢𑀺 𑀓𑁂𑀯𑀮𑀁 𑀤𑀴𑁆𑀳𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑁂𑀯𑀮𑀁 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁 𑀲𑀩𑁆𑀩𑀲𑀗𑁆𑀔𑀢𑀯𑀺𑀯𑀺𑀢𑁆𑀢𑀢𑁆𑀢𑀸. 𑀢𑀁 𑀏𑀢𑀲𑁆𑀲 𑀅𑀥𑀺𑀕𑀢𑀁 𑀅𑀢𑁆𑀣𑀻𑀢𑀺 𑀓𑁂𑀯𑀮𑀻, 𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑁄 𑀔𑀻𑀡𑀸𑀲𑀯𑁄.

𑀓𑀧𑁆𑀧-𑀲𑀤𑁆𑀤𑁄 𑀧𑀦𑀸𑀬𑀁 𑀲-𑀉𑀧𑀲𑀕𑁆𑀕𑁄, 𑀅𑀦𑀼𑀧𑀲𑀕𑁆𑀕𑁄 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀑𑀓𑀧𑁆𑀧𑀦𑀺𑀬𑀧𑀤𑁂 𑀮𑀩𑁆𑀪𑀫𑀸𑀦𑀁 𑀓𑀧𑁆𑀧𑀦𑀺𑀬𑀲𑀤𑁆𑀤𑀫𑀢𑁆𑀢𑀁 𑀦𑀺𑀤𑀲𑁆𑀲𑁂𑀢𑀺, 𑀅𑀜𑁆𑀜𑀣𑀸 𑀓𑀧𑁆𑀧-𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁂 𑀑𑀓𑀧𑁆𑀧𑀦𑀺𑀬𑀧𑀤𑀁 𑀅𑀦𑀺𑀤𑀲𑁆𑀲𑀦𑀫𑁂𑀯 𑀲𑀺𑀬𑀸. 𑀲𑀫𑀡𑀓𑀧𑁆𑀧𑁂𑀳𑀻𑀢𑀺 𑀯𑀺𑀦𑀬𑀓𑁆𑀓𑀫𑀲𑀺𑀤𑁆𑀥𑁂𑀳𑀺 𑀲𑀫𑀡𑀯𑁄𑀳𑀸𑀭𑁂𑀳𑀺. 𑀦𑀺𑀘𑁆𑀘𑀓𑀧𑁆𑀧𑀦𑁆𑀢𑀺 𑀦𑀺𑀘𑁆𑀘𑀓𑀸𑀮𑀁. 𑀧𑀜𑁆𑀜𑀢𑁆𑀢𑀻𑀢𑀺 𑀦𑀸𑀫𑀜𑁆𑀳𑁂𑀢𑀁 𑀢𑀲𑁆𑀲 𑀆𑀬𑀲𑁆𑀫𑀢𑁄, 𑀬𑀤𑀺𑀤𑀁 𑀓𑀧𑁆𑀧𑁄𑀢𑀺. 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀽𑀢𑀺 𑀓𑀢𑁆𑀢𑀭𑀺𑀬𑀸 𑀙𑁂𑀤𑀺𑀢𑀓𑁂𑀲𑀫𑀲𑁆𑀲𑀼. 𑀤𑁆𑀯𑀗𑁆𑀕𑀼𑀮𑀓𑀧𑁆𑀧𑁄𑀢𑀺 𑀫𑀚𑁆𑀛𑀦𑁆𑀳𑀺𑀓𑀯𑁂𑀮𑀸𑀬 𑀯𑀻𑀢𑀺𑀓𑁆𑀓𑀦𑁆𑀢𑀸𑀬 𑀤𑁆𑀯𑀗𑁆𑀕𑀼𑀮𑀢𑀸𑀯𑀺𑀓𑀧𑁆𑀧𑁄. 𑀮𑁂𑀲𑁄𑀢𑀺 𑀅𑀧𑀤𑁂𑀲𑁄. 𑀅𑀦𑀯𑀲𑁂𑀲𑀁 𑀨𑀭𑀺𑀢𑀼𑀁 𑀲𑀫𑀢𑁆𑀣𑀲𑁆𑀲 𑀑𑀪𑀸𑀲𑀲𑁆𑀲 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀏𑀓𑀤𑁂𑀲𑀨𑀭𑀡𑀫𑁆𑀧𑀺 𑀲𑀺𑀬𑀸, 𑀅𑀬𑀁 𑀧𑀦 𑀲𑀩𑁆𑀩𑀲𑁄𑀯 𑀨𑀭𑀻𑀢𑀺 𑀤𑀲𑁆𑀲𑁂𑀢𑀼𑀁 𑀲𑀫𑀦𑁆𑀢𑀢𑁆𑀣𑁄 𑀓𑀧𑁆𑀧-𑀲𑀤𑁆𑀤𑁄 𑀕𑀳𑀺𑀢𑁄𑀢𑀺 𑀆𑀳 ‘‘𑀅𑀦𑀯𑀲𑁂𑀲𑀁 𑀲𑀫𑀦𑁆𑀢𑀢𑁄’’𑀢𑀺.

𑀬𑀲𑁆𑀫𑀸 𑀤𑁂𑀯𑀢𑀸𑀦𑀁 𑀲𑀭𑀻𑀭𑀧𑁆𑀧𑀪𑀸 𑀤𑁆𑀯𑀸𑀤𑀲𑀬𑁄𑀚𑀦𑀫𑀢𑁆𑀢𑀁 𑀞𑀸𑀦𑀁, 𑀢𑀢𑁄 𑀪𑀺𑀬𑁆𑀬𑁄𑀧𑀺 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀢𑀣𑀸 𑀯𑀢𑁆𑀣𑀸𑀪𑀭𑀡𑀸𑀤𑀻𑀳𑀺 𑀲𑀫𑀼𑀝𑁆𑀞𑀺𑀢𑀸 𑀧𑀪𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀘𑀦𑁆𑀤𑀺𑀫𑀸 𑀯𑀺𑀬, 𑀲𑀽𑀭𑀺𑀬𑁄 𑀯𑀺𑀬 𑀘 𑀏𑀓𑁄𑀪𑀸𑀲𑀁 𑀏𑀓𑀁 𑀧𑀚𑁆𑀚𑁄𑀢𑀁 𑀓𑀭𑀺𑀢𑁆𑀯𑀸’’𑀢𑀺. 𑀓𑀲𑁆𑀫𑀸 𑀏𑀢𑁂 𑀫𑀳𑀸𑀭𑀸𑀚𑀸𑀦𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺𑀁𑀲𑀼? 𑀦𑀦𑀼 𑀬𑁂𑀪𑀼𑀬𑁆𑀬𑁂𑀦 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀉𑀧𑀕𑀢𑀸 𑀞𑀢𑁆𑀯𑀸𑀯 𑀓𑀣𑁂𑀢𑀩𑁆𑀩𑀁 𑀓𑀣𑁂𑀦𑁆𑀢𑀸 𑀕𑀘𑁆𑀙𑀦𑁆𑀢𑀻𑀢𑀺? 𑀲𑀘𑁆𑀘𑀫𑁂𑀢𑀁, 𑀇𑀥 𑀧𑀦 𑀦𑀺𑀲𑀻𑀤𑀦𑁂 𑀓𑀸𑀭𑀡𑀁 𑀅𑀢𑁆𑀣𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀤𑁂𑀯𑀢𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀇𑀤𑀁 𑀧𑀭𑀺𑀢𑁆𑀢𑀁 𑀦𑀸𑀫 𑀲𑀢𑁆𑀢𑀩𑀼𑀤𑁆𑀥𑀧𑀝𑀺𑀲𑀁𑀬𑀼𑀢𑁆𑀢𑀁 𑀕𑀭𑀼, 𑀢𑀲𑁆𑀫𑀸 𑀦 𑀅𑀫𑁆𑀳𑁂𑀳𑀺 𑀞𑀢𑁆𑀯𑀸 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀭𑀺𑀢𑁆𑀢𑀕𑀸𑀭𑀯𑀯𑀲𑁂𑀦 𑀦𑀺𑀲𑀻𑀤𑀺𑀁𑀲𑀼.

𑁨𑁭𑁬. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀯𑁂𑀲𑁆𑀲𑀯𑀡𑁄 𑀏𑀯 𑀓𑀣𑁂𑀲𑀺, 𑀦 𑀇𑀢𑀭𑁂𑀲𑀼 𑀬𑁄 𑀓𑁄𑀘𑀻𑀢𑀺? 𑀢𑀢𑁆𑀣 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀲𑁆𑀲𑀸𑀲𑀺𑀓𑁄 𑀅𑀪𑀺𑀡𑁆𑀳𑀁 𑀉𑀧𑀲𑀗𑁆𑀓𑀫𑀦𑁂𑀦. 𑀩𑁆𑀬𑀢𑁆𑀢𑁄𑀢𑀺 𑀯𑀺𑀲𑀸𑀭𑀤𑁄, 𑀢𑀜𑁆𑀘𑀲𑁆𑀲 𑀯𑁂𑀬𑁆𑀬𑀢𑁆𑀢𑀺𑀬𑀁 𑀲𑀼𑀝𑁆𑀞𑀼 𑀲𑀺𑀓𑁆𑀔𑀺𑀢𑀪𑀸𑀯𑁂𑀦𑀸𑀢𑀺 𑀆𑀳 ‘‘𑀲𑀼𑀲𑀺𑀓𑁆𑀔𑀺𑀢𑁄’’𑀢𑀺. 𑀫𑀦𑀼𑀲𑁆𑀲𑁂𑀲𑀼 𑀯𑀺𑀬 𑀳𑀺 𑀤𑁂𑀯𑁂𑀲𑀼𑀧𑀺 𑀓𑁄𑀘𑀺𑀤𑁂𑀯 𑀧𑀼𑀭𑀺𑀫𑀚𑀸𑀢𑀺𑀧𑀭𑀺𑀘𑀬𑁂𑀦 𑀲𑀼𑀲𑀺𑀓𑁆𑀔𑀺𑀢𑁄 𑀳𑁄𑀢𑀺, 𑀢𑀢𑁆𑀭𑀸𑀧𑀺 𑀓𑁄𑀘𑀺𑀤𑁂𑀯 𑀬𑀣𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀯𑀢𑁆𑀢𑀼𑀁 𑀲𑀫𑀢𑁆𑀣𑁄 𑀧𑀭𑀺𑀧𑀼𑀡𑁆𑀡𑀧𑀤𑀩𑁆𑀬𑀜𑁆𑀚𑀦𑀸𑀬 𑀧𑁄𑀭𑀺𑀬𑀸 𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑁄. ‘‘𑀫𑀳𑁂𑀲𑀓𑁆𑀔𑀸’’𑀢𑀺 𑀇𑀫𑀲𑁆𑀲 𑀅𑀢𑁆𑀣𑀯𑀘𑀦𑀁 ‘‘𑀆𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑀸’’𑀢𑀺, 𑀫𑀳𑁂𑀲𑀓𑁆𑀔𑀸𑀢𑀺 𑀯𑀸 𑀫𑀳𑀸𑀧𑀭𑀺𑀯𑀸𑀭𑀸𑀢𑀺 𑀅𑀢𑁆𑀣𑁄. 𑀧𑀸𑀡𑀸𑀢𑀺𑀧𑀸𑀢𑁂 𑀆𑀤𑀻𑀦𑀯𑀤𑀲𑁆𑀲𑀦𑁂𑀦𑁂𑀯 𑀢𑀁 𑀯𑀺𑀧𑀭𑀺𑀬𑀸𑀬𑀢𑁄 𑀢𑀢𑁄 𑀯𑁂𑀭𑀫𑀡𑀺𑀬𑀁 𑀆𑀦𑀺𑀲𑀁𑀲𑁄 𑀧𑀸𑀓𑀝𑁄 𑀳𑁄𑀢𑀻𑀢𑀺 ‘‘𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸’’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀢𑁂𑀲𑀼 𑀲𑁂𑀦𑀸𑀲𑀦𑁂𑀲𑀽𑀢𑀺 𑀬𑀸𑀦𑀺 ‘‘𑀅𑀭𑀜𑁆𑀜𑀯𑀦𑀧𑁆𑀧𑀢𑁆𑀣𑀸𑀦𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁩𑁪-𑁪𑁫) 𑀯𑀼𑀢𑁆𑀢𑀸𑀦𑀺 𑀪𑀺𑀓𑁆𑀔𑀽𑀦𑀁 𑀯𑀲𑀦𑀝𑁆𑀞𑀸𑀦𑀪𑀽𑀢𑀸𑀦𑀺 𑀅𑀭𑀜𑁆𑀜𑀸𑀬𑀢𑀦𑀸𑀦𑀺, 𑀢𑁂𑀲𑀼 𑀪𑀺𑀓𑁆𑀔𑀽𑀳𑀺 𑀲𑀬𑀺𑀢𑀩𑁆𑀩𑀢𑁄, 𑀆𑀲𑀺𑀢𑀩𑁆𑀩𑀢𑁄 𑀘 𑀲𑁂𑀦𑀸𑀲𑀦𑀲𑀜𑁆𑀜𑀺𑀢𑁂𑀲𑀼. 𑀦𑀺𑀩𑀤𑁆𑀥𑀯𑀸𑀲𑀺𑀦𑁄𑀢𑀺 𑀭𑀼𑀓𑁆𑀔𑀧𑀩𑁆𑀩𑀢𑀧𑀝𑀺𑀩𑀤𑁆𑀥𑁂𑀲𑀼 𑀯𑀺𑀫𑀸𑀦𑁂𑀲𑀼 𑀦𑀺𑀘𑁆𑀘𑀯𑀸𑀲𑀺𑀢𑀸𑀬 𑀦𑀺𑀩𑀤𑁆𑀥𑀯𑀸𑀲𑀺𑀦𑁄. 𑀩𑀤𑁆𑀥𑀢𑁆𑀢𑀸𑀢𑀺 𑀕𑀸𑀣𑀸𑀪𑀸𑀯𑁂𑀦 𑀕𑀦𑁆𑀣𑀺𑀢𑀢𑁆𑀢𑀸 𑀲𑀫𑁆𑀩𑀦𑁆𑀥𑀺𑀢𑀢𑁆𑀢𑀸.

‘‘𑀉𑀕𑁆𑀕𑀡𑁆𑀳𑀸𑀢𑀼 𑀪𑀦𑁆𑀢𑁂 𑀪𑀕𑀯𑀸’’𑀢𑀺 𑀅𑀢𑁆𑀢𑀦𑀸 𑀯𑀼𑀘𑁆𑀘𑀫𑀸𑀦𑀁 𑀧𑀭𑀺𑀢𑁆𑀢𑀁 𑀪𑀕𑀯𑀦𑁆𑀢𑀁 𑀉𑀕𑁆𑀕𑀡𑁆𑀳𑀸𑀧𑁂𑀢𑀼𑀓𑀸𑀫𑁄 𑀯𑁂𑀲𑁆𑀲𑀯𑀡𑁄 𑀅𑀯𑁄𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀘𑁄𑀤𑀓𑁄 ‘‘𑀓𑀺𑀁 𑀧𑀦 𑀪𑀕𑀯𑀢𑁄 𑀅𑀧𑁆𑀧𑀘𑁆𑀘𑀓𑁆𑀔𑀥𑀫𑁆𑀫𑁄 𑀦𑀸𑀫 𑀅𑀢𑁆𑀣𑀻’’𑀢𑀺 𑀘𑁄𑀤𑁂𑀲𑀺. 𑀆𑀘𑀭𑀺𑀬𑁄 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀜𑀸𑀡𑀘𑀸𑀭𑀲𑁆𑀲 𑀪𑀕𑀯𑀢𑁄 𑀦 𑀓𑀺𑀜𑁆𑀘𑀺 𑀅𑀧𑁆𑀧𑀘𑁆𑀘𑀓𑁆𑀔𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 ‘‘𑀉𑀕𑁆𑀕𑀡𑁆𑀳𑀸𑀢𑀼 𑀪𑀦𑁆𑀢𑁂 𑀪𑀕𑀯𑀸’’𑀢𑀺 𑀯𑀤𑀢𑁄 𑀯𑁂𑀲𑁆𑀲𑀯𑀡𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀦𑁆𑀢𑁄 ‘‘𑀑𑀓𑀸𑀲𑀓𑀭𑀡𑀢𑁆𑀣’’𑀦𑁆𑀢𑀺𑀆𑀤𑀺𑀫𑀸𑀳. 𑀬𑀣𑀸 𑀳𑀺 𑀧𑀜𑁆𑀘𑀲𑀺𑀔𑁄 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁, 𑀩𑁆𑀭𑀳𑁆𑀫𑀼𑀦𑁄 𑀘 𑀲𑀦𑀗𑁆𑀓𑀼𑀫𑀸𑀭𑀲𑁆𑀲 𑀲𑀫𑁆𑀫𑀼𑀔𑀸 𑀅𑀢𑁆𑀢𑀦𑁄 𑀬𑀣𑀸𑀲𑀼𑀢𑀁 𑀥𑀫𑁆𑀫𑀁 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀉𑀧𑀕𑀦𑁆𑀢𑁆𑀯𑀸 𑀧𑀯𑁂𑀤𑁂𑀢𑀺, 𑀏𑀯𑀫𑀬𑀫𑁆𑀧𑀺 𑀫𑀳𑀸𑀭𑀸𑀚𑀸 𑀇𑀢𑀭𑁂𑀳𑀺 𑀲𑀤𑁆𑀥𑀺𑀁 𑀆𑀝𑀸𑀦𑀸𑀝𑀦𑀕𑀭𑁂 𑀕𑀸𑀣𑀸𑀯𑀲𑁂𑀦 𑀩𑀦𑁆𑀥𑀺𑀢𑀁 𑀧𑀭𑀺𑀢𑁆𑀢𑀁 𑀪𑀕𑀯𑀢𑁄 𑀧𑀯𑁂𑀤𑁂𑀢𑀼𑀁 𑀑𑀓𑀸𑀲𑀁 𑀓𑀸𑀭𑁂𑀦𑁆𑀢𑁄 ‘‘𑀉𑀕𑁆𑀕𑀡𑁆𑀳𑀸𑀢𑀼 𑀪𑀦𑁆𑀢𑁂 𑀪𑀕𑀯𑀸’’𑀢𑀺 𑀆𑀳, 𑀦 𑀦𑀁 𑀢𑀲𑁆𑀲 𑀧𑀭𑀺𑀬𑀸𑀧𑀼𑀡𑀦𑁂 𑀦𑀺𑀬𑁄𑀚𑁂𑀦𑁆𑀢𑁄. 𑀢𑀲𑁆𑀫𑀸 𑀉𑀕𑁆𑀕𑀡𑁆𑀳𑀸𑀢𑀽𑀢𑀺 𑀬𑀣𑀺𑀤𑀁 𑀧𑀭𑀺𑀢𑁆𑀢𑀁 𑀫𑀬𑀸 𑀧𑀯𑁂𑀤𑀺𑀢𑀫𑀢𑁆𑀢𑀫𑁂𑀯 𑀳𑀼𑀢𑁆𑀯𑀸 𑀘𑀢𑀼𑀦𑁆𑀦𑀁 𑀧𑀭𑀺𑀲𑀸𑀦𑀁 𑀘𑀺𑀭𑀓𑀸𑀮𑀁 𑀳𑀺𑀢𑀸𑀯𑀳𑀁 𑀳𑁄𑀢𑀺, 𑀏𑀯𑀁 𑀉𑀤𑁆𑀥𑀁 𑀆𑀭𑀓𑁆𑀔𑀸𑀬 𑀕𑀡𑁆𑀳𑀸𑀢𑀼, 𑀲𑀫𑁆𑀧𑀝𑀺𑀘𑁆𑀙𑀢𑀽𑀢𑀺 𑀅𑀢𑁆𑀣𑁄. 𑀲𑀢𑁆𑀣𑀼 𑀓𑀣𑀺𑀢𑁂𑀢𑀺 𑀲𑀢𑁆𑀣𑀼 𑀆𑀭𑁄𑀘𑀺𑀢𑁂, 𑀘𑀢𑀼𑀦𑁆𑀦𑀁 𑀧𑀭𑀺𑀲𑀸𑀦𑀁 𑀲𑀢𑁆𑀣𑀼 𑀓𑀣𑀦𑁂 𑀯𑀸𑀢𑀺 𑀅𑀢𑁆𑀣𑁄. 𑀲𑀼𑀔𑀯𑀺𑀳𑀸𑀭𑀸𑀬𑀸𑀢𑀺 𑀬𑀓𑁆𑀔𑀸𑀤𑀻𑀳𑀺 𑀅𑀯𑀺𑀳𑀺𑀁𑀲𑀸𑀬 𑀮𑀤𑁆𑀥𑀩𑁆𑀩𑀲𑀼𑀔𑀯𑀺𑀳𑀸𑀭𑀸𑀬.

𑁨𑁭𑁭. 𑀲𑀢𑁆𑀢𑀧𑀺 𑀩𑀼𑀤𑁆𑀥𑀸 𑀘𑀓𑁆𑀔𑀼𑀫𑀦𑁆𑀢𑁄 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀪𑀸𑀯𑁂 𑀯𑀺𑀲𑁂𑀲𑀸𑀪𑀸𑀯𑀢𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀘𑀓𑁆𑀔𑀼𑀫𑀪𑀸𑀯𑁄 𑀯𑀺𑀬 𑀲𑀩𑁆𑀩𑀪𑀽𑀢𑀸𑀦𑀼𑀓𑀫𑁆𑀧𑀺𑀢𑀸𑀤𑀬𑁄 𑀲𑀩𑁆𑀩𑁂𑀧𑀺 𑀯𑀺𑀲𑁂𑀲𑀸 𑀲𑀢𑁆𑀢𑀦𑁆𑀦𑀫𑁆𑀧𑀺 𑀩𑀼𑀤𑁆𑀥𑀸𑀦𑀁 𑀲𑀸𑀥𑀸𑀭𑀡𑀸, 𑀢𑀲𑁆𑀫𑀸, 𑀕𑀼𑀡𑀦𑁂𑀫𑀺𑀢𑁆𑀢𑀓𑀸𑀦𑁂𑀯 𑀯𑀸 𑀬𑀲𑁆𑀫𑀸 𑀩𑀼𑀤𑁆𑀥𑀸𑀦𑀁 𑀦𑀸𑀫𑀸𑀦𑀺 𑀦𑀸𑀫, 𑀦 𑀮𑀺𑀗𑁆𑀕𑀺𑀓𑀸𑀯𑀢𑁆𑀣𑀺𑀓𑀬𑀸𑀤𑀺𑀘𑁆𑀙𑀓𑀸𑀦𑀺, 𑀢𑀲𑁆𑀫𑀸 𑀩𑀼𑀤𑁆𑀥𑀸𑀦𑀁 𑀕𑀼𑀡𑀯𑀺𑀲𑁂𑀲𑀤𑀻𑀧𑀦𑀸𑀦𑀺 ‘‘𑀘𑀓𑁆𑀔𑀼𑀫𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁨𑁭𑁭) 𑀯𑀼𑀢𑁆𑀢𑀸𑀦𑀺 𑀏𑀢𑀸𑀦𑀺 𑀏𑀓𑁂𑀓𑀲𑁆𑀲 𑀲𑀢𑁆𑀢 𑀲𑀢𑁆𑀢 𑀦𑀸𑀫𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀲𑀁 𑀦𑀸𑀫𑀸𑀦𑀁 𑀲𑀸𑀥𑀸𑀭𑀡𑀪𑀸𑀯𑀁 𑀅𑀢𑁆𑀣𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑁂𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀪𑀽𑀢𑀸𑀦𑀼𑀓𑀫𑁆𑀧𑀺𑀦𑁄𑀢𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀫𑀳𑀸𑀓𑀭𑀼𑀡𑀸𑀬 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀦𑀼𑀓𑀫𑁆𑀧𑀺𑀓𑀸. 𑀦𑁆𑀳𑀸𑀢𑀓𑀺𑀮𑁂𑀲𑀢𑁆𑀢𑀸𑀢𑀺 𑀅𑀝𑁆𑀞𑀗𑁆𑀕𑀺𑀓𑁂𑀦 𑀅𑀭𑀺𑀬𑀫𑀕𑁆𑀕𑀚𑀮𑁂𑀦 𑀲𑀧𑀭𑀲𑀦𑁆𑀢𑀸𑀦𑁂𑀲𑀼 𑀦𑀺𑀭𑀯𑀲𑁂𑀲𑀢𑁄 𑀥𑁄𑀢𑀓𑀺𑀮𑁂𑀲𑀫𑀮𑀢𑁆𑀢𑀸. 𑀫𑀸𑀭𑀲𑁂𑀦𑀸𑀧𑀫𑀤𑁆𑀤𑀺𑀦𑁄𑀢𑀺 𑀲𑀧𑀭𑀺𑀯𑀸𑀭𑁂 𑀧𑀜𑁆𑀘𑀧𑀺 𑀫𑀸𑀭𑁂 𑀧𑀫𑀤𑁆𑀤𑀺𑀢𑀯𑀦𑁆𑀢𑁄. 𑀯𑀼𑀲𑀺𑀢𑀯𑀦𑁆𑀢𑁄𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁, 𑀤𑀲𑀯𑀺𑀥𑀁 𑀅𑀭𑀺𑀬𑀯𑀸𑀲𑀜𑁆𑀘 𑀯𑀼𑀲𑀺𑀢𑀯𑀦𑁆𑀢𑁄. 𑀯𑀼𑀲𑀺𑀢𑀯𑀦𑁆𑀢𑀢𑀸𑀬 𑀏𑀯 𑀩𑀸𑀳𑀺𑀢𑀧𑀸𑀧𑀢𑀸 𑀯𑀼𑀢𑁆𑀢𑀸 𑀳𑁄𑀢𑀻𑀢𑀺 ‘‘𑀩𑁆𑀭𑀸𑀳𑁆𑀫𑀡𑀲𑁆𑀲𑀸’’𑀢𑀺 𑀧𑀤𑀁 𑀅𑀦𑀸𑀫𑀝𑁆𑀞𑀁. 𑀯𑀺𑀫𑀼𑀢𑁆𑀢𑀸𑀢𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀸𑀦𑀁 𑀧𑀜𑁆𑀘𑀦𑁆𑀦𑀫𑁆𑀧𑀺 𑀯𑀺𑀫𑀼𑀢𑁆𑀢𑀻𑀦𑀁 𑀯𑀲𑁂𑀦 𑀦𑀺𑀭𑀯𑀲𑁂𑀲𑀢𑁄 𑀫𑀼𑀢𑁆𑀢𑀸. 𑀅𑀗𑁆𑀕𑀢𑁄𑀢𑀺 𑀲𑀭𑀻𑀭𑀗𑁆𑀕𑀢𑁄, 𑀜𑀸𑀡𑀗𑁆𑀕𑀢𑁄 𑀘, 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡- (𑀤𑀻. 𑀦𑀺. 𑁨.𑁩𑁩; 𑁩.𑁨𑁦𑁦; 𑀫. 𑀦𑀺. 𑁨.𑁩𑁮𑁫) 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑁂𑀳𑀺 𑀦𑀺𑀓𑁆𑀔𑀫𑀦𑀧𑁆𑀧𑀪𑀸, 𑀩𑁆𑀬𑀸𑀫𑀧𑁆𑀧𑀪𑀸, 𑀓𑁂𑀢𑀼𑀫𑀸𑀮𑀸𑀉𑀡𑁆𑀳𑀻𑀲𑀧𑁆𑀧𑀪𑀸 𑀘 𑀲𑀭𑀻𑀭𑀗𑁆𑀕𑀢𑁄 𑀦𑀺𑀓𑁆𑀔𑀫𑀦𑀓𑀭𑀲𑁆𑀫𑀺𑀬𑁄, 𑀬𑀫𑀓𑀫𑀳𑀸𑀧𑀸𑀝𑀺𑀳𑀸𑀭𑀺𑀬𑀸𑀤𑀻𑀲𑀼 𑀉𑀧𑁆𑀧𑀚𑁆𑀚𑀦𑀓𑀧𑁆𑀧𑀪𑀸 𑀜𑀸𑀡𑀗𑁆𑀕𑀢𑁄 𑀦𑀺𑀓𑁆𑀔𑀫𑀦𑀓𑀭𑀲𑁆𑀫𑀺𑀬𑁄. 𑀦 𑀏𑀢𑀸𑀦𑁂𑀯 ‘‘𑀘𑀓𑁆𑀔𑀼𑀫𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁨𑁭𑁭) 𑀯𑀼𑀢𑁆𑀢𑀸𑀦𑀺 𑀲𑀢𑁆𑀢 𑀦𑀸𑀫𑀸𑀦𑀺, 𑀅𑀣 𑀔𑁄 𑀅𑀜𑁆𑀜𑀸𑀦𑀺𑀧𑀺 𑀩𑀳𑀽𑀦𑀺 𑀅𑀧𑀭𑀺𑀫𑀺𑀢𑀸𑀦𑀺 𑀦𑀸𑀫𑀸𑀦𑀺. 𑀓𑀣𑀦𑁆𑀢𑀺 𑀆𑀳 ‘‘𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀦𑀸𑀫𑀸𑀦𑀺 𑀲𑀕𑀼𑀡𑁂𑀦 𑀫𑀳𑁂𑀲𑀺𑀦𑁄𑀢𑀺 𑀯𑀼𑀢𑁆𑀢’’𑀦𑁆𑀢𑀺 (𑀥. 𑀲. 𑀅𑀝𑁆𑀞. 𑁧𑁩𑁧𑁩; 𑀉𑀤𑀸. 𑀅𑀝𑁆𑀞. 𑁫𑁩; 𑀧𑀝𑀺. 𑀅𑀝𑁆𑀞. 𑁭𑁬). 𑀓𑁂𑀦 𑀯𑀼𑀢𑁆𑀢𑀁? 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸.

𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀯𑁂𑀲𑁆𑀲𑀯𑀡𑁄 𑀏𑀢𑀸𑀦𑁂𑀯 𑀕𑀡𑁆𑀳𑀻𑀢𑀺 𑀆𑀳 ‘‘𑀅𑀢𑁆𑀢𑀦𑁄 𑀧𑀸𑀓𑀝𑀦𑀸𑀫𑀯𑀲𑁂𑀦𑀸’’𑀢𑀺. 𑀔𑀻𑀡𑀸𑀲𑀯𑀸 𑀚𑀦𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑁂 𑀳𑀺 𑀓𑀫𑁆𑀫𑀓𑀺𑀮𑁂𑀲𑁂𑀳𑀺 𑀚𑀸𑀢𑀸𑀧𑀺 𑀏𑀯𑀁 𑀦 𑀧𑀼𑀦 𑀚𑀸𑀬𑀺𑀲𑁆𑀲𑀦𑁆𑀢𑀻𑀢𑀺 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀚𑀦𑀸. 𑀬𑀣𑀸𑀳 ‘‘𑀬𑁄 𑀘 𑀓𑀸𑀮𑀖𑀲𑁄 𑀪𑀽𑀢𑁄’’𑀢𑀺 (𑀚𑀸. 𑁧.𑁨.𑁧𑁯𑁦) 𑀤𑁂𑀲𑀦𑀸𑀲𑀻𑀲𑀫𑀢𑁆𑀢𑀦𑁆𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀦𑁆𑀢𑀺 𑀅𑀢𑁆𑀣𑁄, 𑀅𑀯𑀬𑀯𑁂𑀦 𑀯𑀸 𑀲𑀫𑀼𑀤𑀸𑀬𑀼𑀧𑀮𑀓𑁆𑀔𑀡𑀫𑁂𑀢𑀁. 𑀲𑀢𑀺 𑀘 𑀧𑀺𑀲𑀼𑀡𑀯𑀸𑀘𑀧𑁆𑀧𑀳𑀸𑀦𑁂 𑀨𑀭𑀼𑀲𑀯𑀸𑀘𑀸 𑀧𑀳𑀻𑀦𑀸𑀯 𑀳𑁄𑀢𑀺, 𑀧𑀕𑁂𑀯 𑀘 𑀫𑀼𑀲𑀸𑀯𑀸𑀤𑁄𑀢𑀺 ‘‘𑀅𑀧𑀺𑀲𑀼𑀡𑀸’’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑀸. 𑀫𑀳𑀢𑁆𑀢𑀸𑀢𑀺 𑀫𑀳𑀸 𑀅𑀢𑁆𑀢𑀸 𑀲𑀪𑀸𑀯𑁄 𑀏𑀢𑁂𑀲𑀦𑁆𑀢𑀺 𑀫𑀳𑀢𑁆𑀢𑀸. 𑀢𑁂𑀦𑀸𑀳 ‘‘𑀫𑀳𑀦𑁆𑀢𑀪𑀸𑀯𑀁 𑀧𑀢𑁆𑀢𑀸’’𑀢𑀺. 𑀫𑀳𑀦𑁆𑀢𑀸𑀢𑀺 𑀯𑀸 𑀫𑀳𑀸 𑀅𑀦𑁆𑀢𑀸, 𑀧𑀭𑀺𑀦𑀺𑀩𑁆𑀩𑀸𑀦𑀧𑀭𑀺𑀬𑁄𑀲𑀸𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀳𑀦𑁆𑀢𑁂𑀳𑀺 𑀯𑀸 𑀲𑀻𑀮𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀅𑀬𑀁 𑀢𑀸𑀯 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀦𑀬𑁂𑀦 𑀅𑀢𑁆𑀣𑁄. 𑀇𑀢𑀭𑁂𑀲𑀁 𑀧𑀦 𑀫𑀢𑁂𑀦 𑀩𑀼𑀤𑁆𑀥𑀸𑀤𑀻𑀳𑀺 𑀅𑀭𑀺𑀬𑁂𑀳𑀺 𑀫𑀳𑀦𑀻𑀬𑀢𑁄 𑀧𑀽𑀚𑀦𑀻𑀬𑀢𑁄 𑀫𑀳𑀁 𑀦𑀸𑀫 𑀦𑀺𑀩𑁆𑀩𑀸𑀦𑀁, 𑀫𑀳𑀫𑀦𑁆𑀢𑁄 𑀏𑀢𑁂𑀲𑀦𑁆𑀢𑀺 𑀫𑀳𑀦𑁆𑀢𑀸, 𑀦𑀺𑀩𑁆𑀩𑀸𑀦𑀤𑀺𑀝𑁆𑀞𑀸𑀢𑀺 𑀅𑀢𑁆𑀣𑁄. 𑀦𑀺𑀲𑁆𑀲𑀸𑀭𑀤𑀸𑀢𑀺 𑀲𑀸𑀭𑀚𑁆𑀚𑀭𑀳𑀺𑀢𑀸, 𑀦𑀺𑀩𑁆𑀪𑀬𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀯𑀺𑀕𑀢𑀮𑁄𑀫𑀳𑀁𑀲𑀸’’𑀢𑀺.

𑀳𑀺𑀢𑀦𑁆𑀢𑀺 𑀳𑀺𑀢𑀘𑀺𑀢𑁆𑀢𑀁, 𑀲𑀢𑁆𑀢𑀸𑀦𑀁 𑀳𑀺𑀢𑁂𑀲𑀻𑀢𑀺 𑀅𑀢𑁆𑀣𑁄. 𑀬𑀣𑀸𑀪𑀽𑀢𑀁 𑀯𑀺𑀧𑀲𑁆𑀲𑀺𑀲𑀼𑀦𑁆𑀢𑀺 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀲𑀫𑀼𑀤𑀬𑀸𑀤𑀺𑀢𑁄 𑀬𑀸𑀣𑀸𑀯𑀢𑁄 𑀯𑀺𑀯𑀺𑀥𑁂𑀦𑀸𑀓𑀸𑀭𑁂𑀦 𑀧𑀲𑁆𑀲𑀺𑀁𑀲𑀼. ‘‘𑀬𑁂 𑀘𑀸𑀧𑀻’’𑀢𑀺 𑀧𑀼𑀩𑁆𑀩𑁂 𑀧𑀘𑁆𑀘𑀢𑁆𑀢𑀩𑀳𑀼𑀯𑀘𑀦𑁂𑀦 𑀅𑀦𑀺𑀬𑀫𑀢𑁄 𑀯𑀼𑀢𑁆𑀢𑁂 𑀢𑁂𑀲𑀫𑁆𑀧𑀻𑀢𑀺 𑀅𑀢𑁆𑀣𑀁 𑀲𑀫𑁆𑀧𑀤𑀸𑀦𑀩𑀳𑀼𑀯𑀘𑀦𑀯𑀲𑁂𑀦 𑀦𑀺𑀬𑀫𑁂𑀢𑁆𑀯𑀸 ‘‘𑀦𑀫𑀢𑁆𑀣𑀽’’𑀢𑀺 𑀘 𑀧𑀤𑀁 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀺 𑀬𑀁 𑀢𑀁-𑀲𑀤𑁆𑀤𑀸𑀦𑀁 𑀅𑀩𑁆𑀬𑀪𑀺𑀘𑀸𑀭𑀺𑀢𑀲𑀫𑁆𑀩𑀦𑁆𑀥𑀪𑀸𑀯𑀢𑁄. 𑀯𑀺𑀧𑀲𑁆𑀲𑀺𑀁𑀲𑀼 𑀦𑀫𑀲𑁆𑀲𑀦𑁆𑀢𑀻𑀢𑀺 𑀯𑀸 𑀬𑁄𑀚𑀦𑀸. 𑀧𑀞𑀫𑀕𑀸𑀣𑀸𑀬𑀸𑀢𑀺 ‘‘𑀬𑁂 𑀘𑀸𑀧𑀺 𑀦𑀺𑀩𑁆𑀩𑀼𑀢𑀸 𑀮𑁄𑀓𑁂’’𑀢𑀺 𑀏𑀯𑀁 𑀯𑀼𑀢𑁆𑀢𑀕𑀸𑀣𑀸𑀬. 𑀤𑀼𑀢𑀺𑀬𑀕𑀸𑀣𑀸𑀬𑀸𑀢𑀺 𑀢𑀤𑀦𑁆𑀢𑀭𑀕𑀸𑀣𑀸𑀬. 𑀢𑀢𑁆𑀣 𑀤𑁂𑀲𑀦𑀸𑀫𑀼𑀔𑀫𑀢𑁆𑀢𑀦𑁆𑀢𑀺 𑀇𑀢𑀭𑁂𑀲𑀫𑁆𑀧𑀺 𑀩𑀼𑀤𑁆𑀥𑀸𑀦𑀁 𑀦𑀸𑀫𑀕𑁆𑀕𑀳𑀡𑁂 𑀧𑀢𑁆𑀢𑁂 𑀇𑀫𑀲𑁆𑀲𑁂𑀯 𑀪𑀕𑀯𑀢𑁄 𑀦𑀸𑀫𑀕𑁆𑀕𑀳𑀡𑀁 𑀢𑀣𑀸 𑀤𑁂𑀲𑀦𑀸𑀬 𑀫𑀼𑀔𑀫𑀢𑁆𑀢𑀁, 𑀢𑀲𑁆𑀫𑀸 𑀢𑁂𑀧𑀺 𑀅𑀢𑁆𑀣𑀢𑁄 𑀕𑀳𑀺𑀢𑀸 𑀏𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀅𑀬𑀫𑁆𑀧𑀺 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀅𑀬𑀦𑁆𑀢𑀺 𑀅𑀬𑀁 𑀕𑀸𑀣𑀸. 𑀧𑀼𑀭𑀺𑀫𑀬𑁄𑀚𑀦𑀸𑀬𑀁 𑀢𑀲𑁆𑀲𑀸𑀢𑀺 𑀯𑀺𑀲𑁂𑀲𑀺𑀢𑀩𑁆𑀩𑀢𑀸𑀬 𑀅𑀪𑀸𑀯𑀢𑁄 ‘‘𑀬𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀇𑀥 𑀧𑀦 ‘‘𑀢𑀲𑁆𑀲 𑀦𑀫𑀢𑁆𑀣𑀽’’𑀢𑀺 𑀏𑀯𑀁 𑀲𑀫𑁆𑀩𑀦𑁆𑀥𑀲𑁆𑀲 𑀘 𑀇𑀘𑁆𑀙𑀺𑀢𑀢𑁆𑀢𑀸 ‘‘𑀬’’𑀦𑁆𑀢𑀺 𑀦𑀸𑀫𑀧𑀤𑀁 𑀉𑀧𑀬𑁄𑀕𑁂𑀓𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀁 𑀦𑀫𑀲𑁆𑀲𑀦𑁆𑀢𑀺 𑀕𑁄𑀢𑀫’’𑀦𑁆𑀢𑀺 𑀆𑀳.

𑁨𑁭𑁮. ‘‘𑀬𑀢𑁄 𑀉𑀕𑁆𑀕𑀘𑁆𑀙𑀢𑀺 𑀲𑀽𑀭𑀺𑀬𑁄’’𑀢𑀺𑀆𑀤𑀺𑀓𑀁 𑀓𑀲𑁆𑀫𑀸 𑀆𑀭𑀤𑁆𑀥𑀁? 𑀬𑀁 𑀬𑁂 𑀬𑀓𑁆𑀔𑀸𑀤𑀬𑁄 𑀲𑀢𑁆𑀣𑀼 𑀥𑀫𑁆𑀫𑀆𑀡𑀁, 𑀅𑀢𑁆𑀢𑀦𑁄 𑀘 𑀭𑀸𑀚𑀸𑀡𑀁 𑀦𑀸𑀤𑀺𑀬𑀦𑁆𑀢𑀺, 𑀢𑁂𑀲𑀁 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀦𑀺𑀕𑁆𑀕𑀳𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀸𑀯𑀦𑀁 𑀓𑀸𑀢𑀼𑀓𑀸𑀫𑀸 𑀢𑀢𑁆𑀣 𑀢𑀢𑁆𑀣 𑀤𑁆𑀯𑀺𑀲𑀳𑀲𑁆𑀲𑀧𑀭𑀺𑀢𑁆𑀢𑀤𑀻𑀧𑀧𑀭𑀺𑀯𑀸𑀭𑁂𑀲𑀼 𑀘𑀢𑀽𑀲𑀼 𑀫𑀳𑀸𑀤𑀻𑀧𑁂𑀲𑀼 𑀅𑀢𑁆𑀢𑀦𑁄 𑀆𑀡𑀸𑀬 𑀯𑀢𑁆𑀢𑀸𑀦𑀁 𑀅𑀢𑁆𑀢𑀦𑁄 𑀧𑀼𑀢𑁆𑀢𑀸𑀦𑀁, 𑀅𑀝𑁆𑀞𑀯𑀻𑀲𑀢𑀺𑀬𑀸 𑀬𑀓𑁆𑀔𑀲𑁂𑀦𑀸𑀧𑀢𑀺𑀆𑀤𑀻𑀦𑀜𑁆𑀘 𑀲𑀢𑁆𑀣𑀭𑀺 𑀧𑀲𑀸𑀤𑀕𑀸𑀭𑀯𑀩𑀳𑀼𑀫𑀸𑀦𑀜𑁆𑀘 𑀧𑀯𑁂𑀤𑁂𑀢𑁆𑀯𑀸 𑀦𑀺𑀕𑁆𑀕𑀳𑀸𑀭𑀳𑀸𑀦𑀁 𑀲𑀦𑁆𑀢𑀚𑁆𑀚𑀦𑀢𑁆𑀣𑀁 𑀆𑀭𑀤𑁆𑀥𑀁. 𑀢𑀢𑁆𑀣 ‘‘𑀬𑀢𑁄 𑀉𑀕𑁆𑀕𑀘𑁆𑀙𑀢𑀻’’𑀢𑀺𑀆𑀤𑀻𑀲𑀼 ‘‘𑀬𑀢𑁄 𑀞𑀸𑀦𑀢𑁄 𑀉𑀤𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀓𑀼𑀢𑁄 𑀧𑀦 𑀞𑀸𑀦𑀢𑁄 𑀉𑀤𑁂𑀢𑀻𑀢𑀺 𑀯𑀼𑀘𑁆𑀘𑀢𑀺? 𑀧𑀼𑀩𑁆𑀩𑀯𑀺𑀤𑁂𑀳𑀯𑀸𑀲𑀻𑀦𑀁 𑀢𑀸𑀯 𑀫𑀚𑁆𑀛𑀦𑁆𑀳𑀺𑀓𑀝𑁆𑀞𑀸𑀦𑁂 𑀞𑀺𑀢𑁄 𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀦𑀁 𑀉𑀤𑁂𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀉𑀢𑁆𑀢𑀭𑀓𑀼𑀭𑀼𑀓𑀸𑀦𑀁 𑀧𑀦 𑀑𑀕𑁆𑀕𑀘𑁆𑀙𑀢𑀻𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀤𑀻𑀧𑁂𑀲𑀼𑀧𑀺 𑀲𑀽𑀭𑀺𑀬𑀲𑁆𑀲 𑀉𑀕𑁆𑀕𑀘𑁆𑀙𑀦𑁄𑀕𑁆𑀕𑀘𑁆𑀙𑀦𑀧𑀭𑀺𑀬𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀜𑁆𑀘 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀅𑀕𑁆𑀕𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁩.𑁧𑁨𑁧) 𑀧𑀓𑀸𑀲𑀺𑀢𑁄 𑀏𑀯. 𑀅𑀤𑀺𑀢𑀺𑀬𑀸 𑀧𑀼𑀢𑁆𑀢𑁄𑀢𑀺 𑀮𑁄𑀓𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀯𑀼𑀢𑁆𑀢𑀁. 𑀮𑁄𑀓𑀺𑀬𑀸 𑀳𑀺 𑀤𑁂𑀯𑁂 𑀅𑀤𑀺𑀢𑀺𑀬𑀸 𑀧𑀼𑀢𑁆𑀢𑀸, 𑀅𑀲𑀼𑀭𑁂 𑀅𑀢𑀺𑀣𑀺𑀬𑀸 𑀧𑀼𑀢𑁆𑀢𑀸𑀢𑀺 𑀯𑀤𑀦𑁆𑀢𑀺. 𑀆𑀤𑀺𑀧𑁆𑀧𑀦𑀢𑁄 𑀧𑀦 𑀆𑀤𑀺𑀘𑁆𑀘𑁄, 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀢𑀻𑀲𑀼 𑀤𑀻𑀧𑁂𑀲𑀼 𑀆𑀮𑁄𑀓𑀯𑀺𑀤𑀁𑀲𑀦𑁂𑀦 𑀲𑀫𑀼𑀚𑁆𑀚𑀮𑀦𑀢𑁄𑀢𑀺 𑀅𑀢𑁆𑀣𑁄. 𑀫𑀡𑁆𑀟𑀮𑀻𑀢𑀺 𑀏𑀢𑁆𑀣 𑀈-𑀓𑀸𑀭𑁄 𑀪𑀼𑀲𑀢𑁆𑀣𑁄𑀢𑀺 𑀆𑀳 ‘‘𑀫𑀳𑀦𑁆𑀢𑀁 𑀫𑀡𑁆𑀟𑀮𑀁 𑀅𑀲𑁆𑀲𑀸𑀢𑀺 𑀫𑀡𑁆𑀟𑀮𑀻’’𑀢𑀺. 𑀫𑀳𑀦𑁆𑀢𑀁 𑀳𑀺𑀲𑁆𑀲 𑀯𑀺𑀫𑀸𑀦𑀫𑀡𑁆𑀟𑀮𑀁 𑀧𑀜𑁆𑀜𑀸𑀲𑀬𑁄𑀚𑀦𑀸𑀬𑀸𑀫𑀯𑀺𑀢𑁆𑀣𑀸𑀭𑀢𑁄. ‘‘𑀲𑀁𑀯𑀭𑀻𑀧𑀺 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀇𑀫𑀺𑀦𑀸𑀯 𑀤𑀺𑀯𑀲𑁄𑀧𑀺 𑀚𑀸𑀬𑀢𑀻𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀭𑀢𑁆𑀢𑀺 𑀅𑀦𑁆𑀢𑀭𑀥𑀸𑀬𑀢𑀻𑀢𑀺 𑀲𑀺𑀦𑁂𑀭𑀼𑀧𑀘𑁆𑀙𑀸𑀬𑀸𑀮𑀓𑁆𑀔𑀡𑀲𑁆𑀲 𑀅𑀦𑁆𑀥𑀓𑀸𑀭𑀲𑁆𑀲 𑀯𑀺𑀕𑀘𑁆𑀙𑀦𑀢𑁄.

𑀉𑀤𑀓𑀭𑀳𑀤𑁄𑀢𑀺 𑀚𑀮𑀥𑀺. ‘‘𑀢𑀲𑁆𑀫𑀺𑀁 𑀞𑀸𑀦𑁂’’𑀢𑀺 𑀇𑀤𑀁 𑀧𑀼𑀭𑀢𑁆𑀣𑀺𑀫𑀲𑀫𑀼𑀤𑁆𑀤𑀲𑁆𑀲 𑀉𑀧𑀭𑀺𑀪𑀸𑀕𑁂𑀦 𑀲𑀽𑀭𑀺𑀬𑀲𑁆𑀲 𑀕𑀫𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀚𑀫𑁆𑀩𑀼𑀤𑀻𑀧𑁂 𑀞𑀺𑀢𑀸𑀦𑀁 𑀧𑀼𑀭𑀢𑁆𑀣𑀺𑀫𑀲𑀫𑀼𑀤𑁆𑀤𑀢𑁄 𑀲𑀽𑀭𑀺𑀬𑁄 𑀉𑀕𑁆𑀕𑀘𑁆𑀙𑀦𑁆𑀢𑁄 𑀯𑀺𑀬 𑀉𑀧𑀝𑁆𑀞𑀸𑀢𑀺. 𑀢𑁂𑀦𑀸𑀳 ‘‘𑀬𑀢𑁄 𑀉𑀕𑁆𑀕𑀘𑁆𑀙𑀢𑀺 𑀲𑀽𑀭𑀺𑀬𑁄’’𑀢𑀺. 𑀲𑀫𑀼𑀤𑁆𑀤𑀦𑀝𑁆𑀞𑁂𑀦 𑀅𑀢𑁆𑀢𑀦𑀺 𑀧𑀢𑀺𑀢𑀲𑁆𑀲 𑀲𑀫𑁆𑀫𑀤𑁂𑀯, 𑀲𑀩𑁆𑀩𑀲𑁄 𑀘 𑀉𑀦𑁆𑀤𑀦𑀝𑁆𑀞𑁂𑀦 𑀓𑀺𑀮𑁂𑀤𑀦𑀝𑁆𑀞𑁂𑀦 𑀲𑀫𑀼𑀤𑁆𑀤𑁄. 𑀲𑀫𑀼𑀤𑁆𑀤𑁄 𑀳𑀺 𑀓𑀺𑀮𑁂𑀤𑀦𑀝𑁆𑀞𑁄 𑀭𑀳𑀤𑁄. 𑀲𑀸𑀭𑀺𑀢𑁄𑀤𑀓𑁄𑀢𑀺 𑀅𑀦𑁂𑀓𑀸𑀦𑀺 𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀯𑀺𑀢𑁆𑀣𑀺𑀡𑁆𑀡𑁄𑀤𑀓𑁄, 𑀲𑀭𑀺𑀢𑀸 𑀦𑀤𑀺𑀬𑁄 𑀉𑀤𑀓𑁂 𑀏𑀢𑀲𑁆𑀲𑀸𑀢𑀺 𑀯𑀸 𑀲𑀭𑀺𑀢𑁄𑀤𑀓𑁄.

𑀲𑀺𑀦𑁂𑀭𑀼𑀧𑀩𑁆𑀩𑀢𑀭𑀸𑀚𑀸 𑀘𑀓𑁆𑀓𑀯𑀸𑀴𑀲𑁆𑀲 𑀯𑁂𑀫𑀚𑁆𑀛𑁂 𑀞𑀺𑀢𑁄, 𑀢𑀁 𑀧𑀥𑀸𑀦𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀇𑀢𑁄𑀢𑀺 𑀲𑀺𑀦𑁂𑀭𑀼𑀢𑁄’’𑀢𑀺 𑀯𑀢𑁆𑀯𑀸 𑀢𑀣𑀸 𑀧𑀦 𑀤𑀺𑀲𑀸𑀯𑀯𑀢𑁆𑀣𑀸𑀦𑀁 𑀅𑀦𑀯𑀝𑁆𑀞𑀺𑀢𑀦𑁆𑀢𑀺 ‘‘𑀢𑁂𑀲𑀁 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀢𑁄 𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀲𑀦𑁆𑀢𑀺 𑀘𑀢𑀼𑀦𑁆𑀦𑀁 𑀫𑀳𑀸𑀭𑀸𑀚𑀸𑀦𑀁. 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁 𑀆𑀝𑀸𑀦𑀸𑀝𑀦𑀕𑀭𑀁. 𑀢𑀢𑁆𑀣 𑀳𑀺 𑀦𑀺𑀲𑀺𑀦𑁆𑀦𑀸 𑀢𑁂 𑀇𑀫𑀁 𑀧𑀭𑀺𑀢𑁆𑀢𑀁 𑀩𑀦𑁆𑀥𑀺𑀁𑀲𑀼. 𑀢𑁂𑀲𑀁 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀢𑁄𑀢𑀺 𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀢𑁂𑀲𑀁 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀢𑁄. 𑀉𑀪𑀬𑀣𑀸𑀧𑀺 𑀲𑀽𑀭𑀺𑀬𑀲𑁆𑀲 𑀉𑀤𑀬𑀝𑁆𑀞𑀸𑀦𑀸 𑀧𑀼𑀭𑀢𑁆𑀣𑀺𑀫𑀸 𑀤𑀺𑀲𑀸 𑀦𑀸𑀫 𑀳𑁄𑀢𑀺. 𑀧𑀼𑀭𑀺𑀫𑀧𑀓𑁆𑀔𑀁𑀬𑁂𑀯𑁂𑀢𑁆𑀣 𑀯𑀡𑁆𑀡𑁂𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀇𑀢𑁄 𑀲𑀸 𑀧𑀼𑀭𑀺𑀫𑀸 𑀤𑀺𑀲𑀸’’𑀢𑀺. 𑀲𑀽𑀭𑀺𑀬𑁄, 𑀧𑀦 𑀘𑀦𑁆𑀤𑀦𑀓𑁆𑀔𑀢𑁆𑀢𑀸𑀤𑀬𑁄 𑀘 𑀲𑀺𑀦𑁂𑀭𑀼𑀁 𑀤𑀓𑁆𑀔𑀺𑀡𑀢𑁄, 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀜𑁆𑀘 𑀯𑀸𑀫𑀢𑁄 𑀓𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀦𑁆𑀢𑀺. 𑀬𑀢𑁆𑀣 𑀘 𑀦𑁂𑀲𑀁 𑀉𑀕𑁆𑀕𑀫𑀦𑀁 𑀧𑀜𑁆𑀜𑀸𑀬𑀢𑀺, 𑀲𑀸 𑀧𑀼𑀭𑀢𑁆𑀣𑀺𑀫𑀸 𑀤𑀺𑀲𑀸. 𑀬𑀢𑁆𑀣 𑀑𑀓𑁆𑀓𑀫𑀦𑀁 𑀧𑀜𑁆𑀜𑀸𑀬𑀢𑀺, 𑀲𑀸 𑀧𑀘𑁆𑀙𑀺𑀫𑀸 𑀤𑀺𑀲𑀸. 𑀤𑀓𑁆𑀔𑀺𑀡𑀧𑀲𑁆𑀲𑁂 𑀉𑀢𑁆𑀢𑀭𑀸 𑀤𑀺𑀲𑀸, 𑀯𑀸𑀫𑀧𑀲𑁆𑀲𑁂 𑀤𑀓𑁆𑀔𑀺𑀡𑀸 𑀤𑀺𑀲𑀸𑀢𑀺 𑀘𑀢𑀼𑀫𑀳𑀸𑀤𑀻𑀧𑀯𑀸𑀲𑀻𑀦𑀁 𑀧𑀘𑁆𑀘𑁂𑀓𑀁 𑀲𑀺𑀦𑁂𑀭𑀼 𑀉𑀢𑁆𑀢𑀭𑀸𑀤𑀺𑀲𑀸𑀬𑀫𑁂𑀯, 𑀢𑀲𑁆𑀫𑀸 𑀅𑀦𑀯𑀝𑁆𑀞𑀺𑀢𑀸 𑀤𑀺𑀲𑀸𑀯𑀯𑀢𑁆𑀣𑀸𑀢𑀺 𑀆𑀳 ‘‘𑀇𑀢𑀺 𑀦𑀁 𑀆𑀘𑀺𑀓𑁆𑀔𑀢𑀺 𑀚𑀦𑁄’’𑀢𑀺. 𑀬𑀁 𑀤𑀺𑀲𑀦𑁆𑀢𑀺 𑀬𑀁 𑀧𑀼𑀭𑀢𑁆𑀣𑀺𑀫𑀤𑀺𑀲𑀁 𑀬𑀲𑀲𑁆𑀲𑀻𑀢𑀺 𑀫𑀳𑀸𑀧𑀭𑀺𑀯𑀸𑀭𑁄. 𑀓𑁄𑀝𑀺𑀲𑀢𑀲𑀳𑀲𑁆𑀲𑀧𑀭𑀺𑀫𑀸𑀡𑀸 𑀳𑀺 𑀤𑁂𑀯𑀢𑀸 𑀅𑀪𑀺𑀡𑁆𑀳𑀁 𑀧𑀭𑀺𑀯𑀸𑀭𑁂𑀦𑁆𑀢𑀺. 𑀘𑀦𑁆𑀤𑀦𑀦𑀸𑀕𑀭𑀼𑀓𑁆𑀔𑀸𑀤𑀻𑀲𑀼 𑀑𑀲𑀥𑀺𑀢𑀺𑀡𑀯𑀦𑀧𑁆𑀧𑀢𑀺𑀲𑀼𑀕𑀦𑁆𑀥𑀸𑀦𑀁 𑀅𑀩𑁆𑀩𑀦𑀢𑁄, 𑀢𑁂𑀳𑀺 𑀤𑀺𑀢𑁆𑀢𑀪𑀸𑀯𑀽𑀧𑀕𑀫𑀦𑀢𑁄 ‘‘𑀕𑀦𑁆𑀥𑀩𑁆𑀩𑀸’’𑀢𑀺 𑀮𑀤𑁆𑀥𑀦𑀸𑀫𑀸𑀦𑀁 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀤𑁂𑀯𑀸𑀦𑀁 𑀅𑀥𑀺𑀧𑀢𑀺 𑀪𑀸𑀯𑀢𑁄. 𑀫𑁂 𑀲𑀼𑀢𑀦𑁆𑀢𑀺 𑀏𑀢𑁆𑀣 𑀫𑁂𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀲𑀼𑀢𑀦𑁆𑀢𑀺 𑀯𑀺𑀲𑁆𑀲𑀼𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀳𑁂𑀢𑁆𑀣 𑀬𑁄𑀚𑀦𑀸 𑁋 𑀢𑀲𑁆𑀲 𑀥𑀢𑀭𑀝𑁆𑀞𑀫𑀳𑀸𑀭𑀸𑀚𑀲𑁆𑀲 𑀧𑀼𑀢𑁆𑀢𑀸𑀧𑀺 𑀩𑀳𑀯𑁄. 𑀓𑀺𑀢𑁆𑀢𑀓𑀸? 𑀅𑀲𑀻𑀢𑀺, 𑀤𑀲 𑀏𑀓𑁄 𑀘. 𑀏𑀓𑀦𑀸𑀫𑀸. 𑀓𑀣𑀁? 𑀇𑀦𑁆𑀤𑀦𑀸𑀫𑀸. ‘‘𑀫𑀳𑀧𑁆𑀨𑀮𑀸’’𑀢𑀺 𑀘 𑀲𑀼𑀢𑀁 𑀯𑀺𑀲𑁆𑀲𑀼𑀢𑀫𑁂𑀢𑀁 𑀮𑁄𑀓𑁂𑀢𑀺.

𑀆𑀤𑀺𑀘𑁆𑀘𑁄 𑀕𑁄𑀢𑀫𑀕𑁄𑀢𑁆𑀢𑁄, 𑀪𑀕𑀯𑀸𑀧𑀺 𑀕𑁄𑀢𑀫𑀕𑁄𑀢𑁆𑀢𑁄, 𑀆𑀤𑀺𑀘𑁆𑀘𑁂𑀦 𑀲𑀫𑀸𑀦𑀕𑁄𑀢𑁆𑀢𑀢𑀸𑀬 𑀆𑀤𑀺𑀘𑁆𑀘𑁄 𑀩𑀦𑁆𑀥𑀼 𑀏𑀢𑀲𑁆𑀲𑀸𑀢𑀺𑀧𑀺 𑀆𑀤𑀺𑀘𑁆𑀘𑀩𑀦𑁆𑀥𑀼, 𑀆𑀤𑀺𑀘𑁆𑀘𑀲𑁆𑀲 𑀯𑀸 𑀩𑀦𑁆𑀥𑀽𑀢𑀺 𑀆𑀤𑀺𑀘𑁆𑀘𑀩𑀦𑁆𑀥𑀼, 𑀢𑀁 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀁.𑀅𑀦𑀯𑀚𑁆𑀚𑁂𑀦𑀸𑀢𑀺 𑀅𑀯𑀚𑁆𑀚𑀧𑀝𑀺𑀧𑀓𑁆𑀔𑁂𑀦 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀦. 𑀲𑀫𑁂𑀓𑁆𑀔𑀲𑀺 𑀑𑀥𑀺𑀲𑁄, 𑀅𑀦𑁄𑀥𑀺𑀲𑁄 𑀘 𑀨𑀭𑀡𑁂𑀦 𑀑𑀮𑁄𑀓𑁂𑀲𑀺𑀆𑀲𑀬𑀸𑀦𑀼𑀲𑀬𑀘𑀭𑀺𑀬𑀸𑀥𑀺𑀫𑀼𑀢𑁆𑀢𑀺𑀆𑀤𑀺𑀯𑀺𑀪𑀸𑀕𑀸𑀯𑀩𑁄𑀥𑀯𑀲𑁂𑀦. 𑀯𑀢𑁆𑀯𑀸 𑀯𑀦𑁆𑀤𑀦𑁆𑀢𑀻𑀢𑀺 ‘‘𑀮𑁄𑀓𑀲𑁆𑀲 𑀅𑀦𑀼𑀓𑀫𑁆𑀧𑀓𑁄’’𑀢𑀺 𑀓𑀺𑀢𑁆𑀢𑁂𑀢𑁆𑀯𑀸 𑀯𑀦𑁆𑀤𑀦𑁆𑀢𑀺. 𑀲𑀼𑀢𑀁 𑀦𑁂𑀢𑀦𑁆𑀢𑀺 𑀲𑀼𑀢𑀁 𑀦𑀦𑀽𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀦𑀼-𑀲𑀤𑁆𑀤𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀦𑁄𑀓𑀸𑀭𑁄𑀬𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀅𑀫𑁆𑀳𑁂𑀳𑀻𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀏𑀢𑀦𑁆𑀢𑀺 𑀏𑀢𑀁 𑀢𑀣𑀸 𑀧𑀭𑀺𑀓𑀺𑀢𑁆𑀢𑁂𑀢𑁆𑀯𑀸 𑀅𑀫𑀦𑀼𑀲𑁆𑀲𑀸𑀦𑀁 𑀤𑁂𑀯𑀢𑀸𑀦𑀁 𑀯𑀦𑁆𑀤𑀦𑀁. 𑀯𑀤𑀦𑁆𑀢𑀺 𑀥𑀢𑀭𑀝𑁆𑀞𑀫𑀳𑀸𑀭𑀸𑀚𑀲𑁆𑀲 𑀧𑀼𑀢𑁆𑀢𑀸.

𑁨𑁭𑁯. 𑀬𑁂𑀦 𑀧𑁂𑀢𑀸 𑀧𑀯𑀼𑀘𑁆𑀘𑀦𑁆𑀢𑀻𑀢𑀺 𑀏𑀢𑁆𑀣 𑀯𑀘𑀦𑀲𑁂𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀦 𑀬𑀣𑀸𑀭𑀼𑀢𑀯𑀲𑁂𑀦𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁂𑀦 𑀤𑀺𑀲𑀸𑀪𑀸𑀕𑁂𑀦 𑀦𑀻𑀳𑀭𑀻𑀬𑀦𑁆𑀢𑀽𑀢𑀺 𑀯𑀼𑀘𑁆𑀘𑀦𑁆𑀢𑀻’’𑀢𑀺 𑀆𑀳. 𑀟𑀬𑁆𑀳𑀦𑁆𑀢𑀼 𑀯𑀸𑀢𑀺 𑀧𑁂𑀢𑁂 𑀲𑀦𑁆𑀥𑀸𑀬 𑀯𑀤𑀢𑀺. 𑀙𑀺𑀚𑁆𑀚𑀦𑁆𑀢𑀼 𑀯𑀸 𑀳𑀢𑁆𑀣𑀧𑀸𑀤𑀸𑀤𑀺𑀓𑁂 𑀧𑀺𑀲𑀼𑀡𑀸 𑀧𑀺𑀝𑁆𑀞𑀺𑀫𑀁𑀲𑀺𑀓𑀸. 𑀳𑀜𑁆𑀜𑀦𑁆𑀢𑀼 𑀧𑀸𑀡𑀸𑀢𑀺𑀧𑀸𑀢𑀺𑀦𑁄𑀢𑀺𑀆𑀤𑀺𑀓𑀸. 𑀧𑀯𑀼𑀘𑁆𑀘𑀦𑁆𑀢𑀻𑀢𑀺 𑀯𑀸 𑀲𑀫𑀼𑀘𑁆𑀘𑀦𑁆𑀢𑀺, ‘‘𑀅𑀮𑀁 𑀢𑁂𑀲’’𑀦𑁆𑀢𑀺 𑀲𑀫𑀸𑀘𑀺𑀦𑀻𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀜𑁆𑀳𑀺 𑀯𑀘𑀦𑀲𑁂𑀲𑁂𑀦 𑀯𑀺𑀦𑀸 𑀏𑀯 𑀅𑀢𑁆𑀣𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀭𑀳𑀲𑁆𑀲𑀗𑁆𑀕𑀦𑁆𑀢𑀺 𑀩𑀻𑀚𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑁨𑁮𑁦. 𑀬𑀲𑁆𑀫𑀺𑀁 𑀤𑀺𑀲𑀸𑀪𑀸𑀕𑁂 𑀲𑀽𑀭𑀺𑀬𑁄 𑀅𑀢𑁆𑀣𑀁 𑀕𑀘𑁆𑀙𑀢𑀻𑀢𑀺 𑀏𑀢𑁆𑀣 ‘‘𑀬𑀢𑁄 𑀞𑀸𑀦𑀢𑁄 𑀉𑀤𑁂𑀢𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁨𑁮𑁧. 𑀬𑁂𑀦 𑀤𑀺𑀲𑀸𑀪𑀸𑀕𑁂𑀦 𑀉𑀢𑁆𑀢𑀭𑀓𑀼𑀭𑀼 𑀭𑀫𑁆𑀫𑁄 𑀅𑀯𑀝𑁆𑀞𑀺𑀢𑁄, 𑀇𑀢𑁄 𑀲𑀸 𑀉𑀢𑁆𑀢𑀭𑀸 𑀤𑀺𑀲𑀸𑀢𑀺 𑀬𑁄𑀚𑀦𑀸. 𑀫𑀳𑀸𑀦𑁂𑀭𑀽𑀢𑀺 𑀫𑀳𑀦𑁆𑀢𑁄, 𑀫𑀳𑀦𑀻𑀬𑁄 𑀘 𑀦𑁂𑀭𑀼𑀲𑀗𑁆𑀔𑀸𑀢𑁄 𑀧𑀩𑁆𑀩𑀢𑁄. 𑀢𑁂𑀦𑀸𑀳 ‘‘𑀫𑀳𑀸𑀲𑀺𑀦𑁂𑀭𑀼 𑀧𑀩𑁆𑀩𑀢𑀭𑀸𑀚𑀸’’𑀢𑀺. 𑀭𑀚𑀢𑀫𑀬𑀁. 𑀢𑀣𑀸 𑀳𑀺 𑀢𑀲𑁆𑀲 𑀧𑀪𑀸𑀬 𑀅𑀚𑁆𑀛𑁄𑀢𑁆𑀣𑀢𑀁 𑀢𑀲𑁆𑀲𑀁 𑀤𑀺𑀲𑀸𑀬𑀁 𑀲𑀫𑀼𑀤𑁆𑀤𑁄𑀤𑀓𑀁 𑀔𑀻𑀭𑀁 𑀯𑀺𑀬 𑀧𑀜𑁆𑀜𑀸𑀬𑀢𑀺. 𑀫𑀡𑀺𑀫𑀬𑀦𑁆𑀢𑀺 𑀇𑀦𑁆𑀤𑀦𑀻𑀮𑀫𑀬𑀁. 𑀢𑀣𑀸 𑀳𑀺 𑀤𑀓𑁆𑀔𑀺𑀡𑀤𑀺𑀲𑀸𑀬 𑀲𑀫𑀼𑀤𑁆𑀤𑁄𑀤𑀓𑀁 𑀬𑁂𑀪𑀼𑀬𑁆𑀬𑁂𑀦 𑀦𑀻𑀮𑀯𑀡𑁆𑀡𑀁 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀢𑀺, 𑀢𑀣𑀸 𑀆𑀓𑀸𑀲𑀁. 𑀫𑀦𑀼𑀲𑁆𑀲𑀸 𑀚𑀸𑀬𑀦𑁆𑀢𑀺. 𑀓𑀣𑀁 𑀚𑀸𑀬𑀦𑁆𑀢𑀺? 𑀅𑀫𑀫𑀸 𑀅𑀧𑀭𑀺𑀕𑁆𑀕𑀳𑀸𑀢𑀺 𑀬𑁄𑀚𑀦𑀸. 𑀫𑀫𑀢𑁆𑀢𑀯𑀺𑀭𑀳𑀺𑀢𑀸𑀢𑀺 ‘‘𑀇𑀤𑀁 𑀫𑀫 𑀇𑀤𑀁 𑀫𑀫𑀸’’𑀢𑀺 𑀫𑀫𑀗𑁆𑀓𑀸𑀭𑀯𑀺𑀭𑀳𑀺𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀤𑀺 𑀢𑁂𑀲𑀁 ‘‘𑀅𑀬𑀁 𑀫𑀬𑁆𑀳𑀁 𑀪𑀭𑀺𑀬𑀸’’𑀢𑀺 𑀧𑀭𑀺𑀕𑁆𑀕𑀳𑁄 𑀦𑀢𑁆𑀣𑀺, ‘‘𑀅𑀬𑀁 𑀫𑁂 𑀫𑀸𑀢𑀸, 𑀅𑀬𑀁 𑀪𑀕𑀺𑀦𑀻’’𑀢𑀺 𑀏𑀯𑀭𑀽𑀧𑀸 𑀇𑀥 𑀯𑀺𑀬 𑀫𑀭𑀺𑀬𑀸𑀤𑀸𑀧𑀺 𑀦 𑀲𑀺𑀬𑀸 𑀫𑀸𑀢𑀼𑀆𑀤𑀺𑀪𑀸𑀯𑀲𑁆𑀲 𑀅𑀚𑀸𑀦𑀦𑀢𑁄𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀫𑀸𑀢𑀭𑀁 𑀯𑀸’’𑀢𑀺𑀆𑀤𑀺. 𑀙𑀦𑁆𑀤𑀭𑀸𑀕𑁄 𑀦𑀼𑀧𑁆𑀧𑀚𑁆𑀚𑀢𑀻𑀢𑀺 𑀏𑀢𑁆𑀣 ‘‘𑀥𑀫𑁆𑀫𑀢𑀸𑀲𑀺𑀤𑁆𑀥𑀲𑁆𑀲 𑀲𑀻𑀮𑀲𑁆𑀲 𑀆𑀦𑀼𑀪𑀸𑀯𑁂𑀦 𑀧𑀼𑀢𑁆𑀢𑁂 𑀤𑀺𑀝𑁆𑀞𑀫𑀢𑁆𑀢𑁂 𑀏𑀯 𑀫𑀸𑀢𑀼 𑀣𑀦𑀢𑁄 𑀣𑀜𑁆𑀜𑀁 𑀧𑀕𑁆𑀖𑀭𑀢𑀺, 𑀢𑁂𑀦 𑀲𑀜𑁆𑀜𑀸𑀡𑁂𑀦 𑀦𑁂𑀲𑀁 𑀫𑀸𑀢𑀭𑀺 𑀧𑀼𑀢𑁆𑀢𑀲𑁆𑀲 𑀫𑀸𑀢𑀼𑀲𑀜𑁆𑀜𑀸, 𑀫𑀸𑀢𑀼 𑀘 𑀧𑀼𑀢𑁆𑀢𑁂 𑀧𑀼𑀢𑁆𑀢𑀲𑀜𑁆𑀜𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑀸’’𑀢𑀺 𑀓𑁂𑀘𑀺.

𑀦𑀗𑁆𑀕𑀮𑀸𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀦𑀗𑁆𑀕𑀮𑀸𑀦𑀺𑀧𑀻’’𑀢𑀺. 𑀅𑀓𑀝𑁆𑀞𑁂𑀢𑀺 𑀅𑀓𑀲𑀺𑀢𑁂 𑀅𑀓𑀢𑀓𑀲𑀺𑀓𑀫𑁆𑀫𑁂.

𑀢𑀡𑁆𑀟𑀼𑀮𑀸𑀯 𑀢𑀲𑁆𑀲 𑀨𑀮𑀦𑁆𑀢𑀺 𑀲𑀢𑁆𑀢𑀸𑀦𑀁 𑀧𑀼𑀜𑁆𑀜𑀸𑀦𑀼𑀪𑀸𑀯𑀳𑁂𑀢𑀼𑀓𑀸 𑀣𑀼𑀲𑀸𑀤𑀺𑀅𑀪𑀸𑀯𑁂𑀦 𑀢𑀡𑁆𑀟𑀼𑀮𑀸 𑀏𑀯 𑀢𑀲𑁆𑀲 𑀲𑀸𑀮𑀺𑀲𑁆𑀲 𑀨𑀮𑀁. 𑀢𑀼𑀡𑁆𑀟𑀺𑀓𑀺𑀭𑀦𑁆𑀢𑀺 𑀧𑀘𑀦𑀪𑀸𑀚𑀦𑀲𑁆𑀲 𑀦𑀸𑀫𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀉𑀓𑁆𑀔𑀮𑀺𑀬’’𑀦𑁆𑀢𑀺. 𑀆𑀓𑀺𑀭𑀺𑀢𑁆𑀯𑀸𑀢𑀺 𑀢𑀡𑁆𑀟𑀼𑀮𑀸𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸. 𑀦𑀺𑀤𑁆𑀥𑀽𑀫𑀗𑁆𑀕𑀸𑀭𑁂𑀦𑀸𑀢𑀺 𑀥𑀽𑀫𑀗𑁆𑀕𑀸𑀭𑀭𑀳𑀺𑀢𑁂𑀦 𑀓𑁂𑀯𑀮𑁂𑀦 𑀅𑀕𑁆𑀕𑀺𑀦𑀸. 𑀚𑁄𑀢𑀺𑀓𑀧𑀸𑀲𑀸𑀡𑀢𑁄 𑀅𑀕𑁆𑀕𑀺𑀫𑁆𑀳𑀺 𑀉𑀝𑁆𑀞𑀳𑀦𑁆𑀢𑁂 𑀓𑀼𑀢𑁄 𑀥𑀽𑀫𑀗𑁆𑀕𑀸𑀭𑀸𑀦𑀁 𑀲𑀫𑁆𑀪𑀯𑁄. 𑀪𑁄𑀚𑀦𑀦𑁆𑀢𑀺 𑀑𑀤𑀦𑀫𑁂𑀯𑀸𑀥𑀺𑀧𑁆𑀧𑁂𑀢𑀦𑁆𑀢𑀺 ‘‘𑀪𑁄𑀚𑀦𑀫𑁂𑀯𑀸’’𑀢𑀺 𑀅𑀯𑀥𑀸𑀭𑀡𑀁 𑀓𑀢𑁆𑀯𑀸 𑀢𑁂𑀦 𑀦𑀺𑀯𑀢𑁆𑀢𑁂𑀢𑀩𑁆𑀩𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀜𑁆𑀜𑁄 𑀲𑀽𑀧𑁄 𑀯𑀸 𑀩𑁆𑀬𑀜𑁆𑀚𑀦𑀁 𑀯𑀸 𑀦 𑀳𑁄𑀢𑀻’’𑀢𑀺 𑀆𑀳. 𑀬𑀤𑀺 𑀏𑀯𑀁 𑀭𑀲𑀯𑀺𑀲𑁂𑀲𑀬𑀼𑀢𑁆𑀢𑁄 𑀢𑁂𑀲𑀁 𑀆𑀳𑀸𑀭𑁄 𑀦 𑀳𑁄𑀢𑀻𑀢𑀺? 𑀦𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀼𑀜𑁆𑀚𑀦𑁆𑀢𑀸𑀦𑀁…𑀧𑁂… 𑀭𑀲𑁄 𑀳𑁄𑀢𑀻’’𑀢𑀺 𑀆𑀳. 𑀫𑀘𑁆𑀙𑀭𑀺𑀬𑀘𑀺𑀢𑁆𑀢𑀁 𑀦𑀸𑀫 𑀦 𑀳𑁄𑀢𑀻𑀢𑀺 𑀥𑀫𑁆𑀫𑀢𑀸𑀲𑀺𑀤𑁆𑀥𑀲𑁆𑀲 𑀲𑀻𑀮𑀲𑁆𑀲 𑀆𑀦𑀼𑀪𑀸𑀯𑁂𑀦. 𑀢𑀣𑀸 𑀳𑀺 𑀢𑁂 𑀓𑀢𑁆𑀣𑀘𑀺𑀧𑀺 𑀅𑀫𑀫𑀸 𑀧𑀭𑀺𑀕𑁆𑀕𑀳𑀸𑀯 𑀳𑀼𑀢𑁆𑀯𑀸 𑀯𑀲𑀦𑁆𑀢𑀺.

𑀅𑀧𑀺𑀘 𑀢𑀢𑁆𑀣 𑀉𑀢𑁆𑀢𑀭𑀓𑀼𑀭𑀼𑀓𑀸𑀦𑀁 𑀧𑀼𑀜𑁆𑀜𑀸𑀦𑀼𑀪𑀸𑀯𑀲𑀺𑀤𑁆𑀥𑁄 𑀅𑀬𑀫𑁆𑀧𑀺 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀢𑀢𑁆𑀣 𑀓𑀺𑀭 𑀢𑁂𑀲𑀼 𑀢𑁂𑀲𑀼 𑀧𑀤𑁂𑀲𑁂𑀲𑀼 𑀖𑀦𑀘𑀺𑀢𑀧𑀢𑁆𑀢𑀲𑀜𑁆𑀙𑀦𑁆𑀦𑀲𑀸𑀔𑀸𑀧𑀲𑀸𑀔𑀸 𑀓𑀽𑀝𑀸𑀕𑀸𑀭𑀽𑀧𑀫𑀸 𑀫𑀦𑁄𑀭𑀫𑀸 𑀭𑀼𑀓𑁆𑀔𑀸 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀦𑀺𑀯𑁂𑀲𑀦𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀺, 𑀬𑀢𑁆𑀣 𑀲𑀼𑀔𑀁 𑀦𑀺𑀯𑀲𑀦𑁆𑀢𑀺, 𑀅𑀜𑁆𑀜𑁂𑀧𑀺 𑀢𑀢𑁆𑀣 𑀭𑀼𑀓𑁆𑀔𑀸 𑀲𑀼𑀚𑀸𑀢𑀸 𑀲𑀩𑁆𑀩𑀤𑀸𑀧𑀺 𑀧𑀼𑀧𑁆𑀨𑀺𑀢𑀕𑁆𑀕𑀸 𑀢𑀺𑀝𑁆𑀞𑀦𑁆𑀢𑀺, 𑀚𑀮𑀸𑀲𑀬𑀸𑀧𑀺 𑀯𑀺𑀓𑀲𑀺𑀢𑀓𑀫𑀮𑀓𑀼𑀯𑀮𑀬𑀧𑀼𑀡𑁆𑀟𑀭𑀻𑀓𑀲𑁄𑀕𑀦𑁆𑀥𑀺𑀓𑀸𑀤𑀺𑀧𑀼𑀧𑁆𑀨𑀲𑀜𑁆𑀙𑀦𑁆𑀦𑀸 𑀲𑀩𑁆𑀩𑀓𑀸𑀮𑀁 𑀧𑀭𑀫𑀲𑀼𑀕𑀦𑁆𑀥𑀁 𑀲𑀫𑀦𑁆𑀢𑀢𑁄 𑀧𑀯𑀸𑀬𑀦𑁆𑀢𑀸 𑀢𑀺𑀝𑁆𑀞𑀦𑁆𑀢𑀺. 𑀲𑀭𑀻𑀭𑀫𑁆𑀧𑀺 𑀢𑁂𑀲𑀁 𑀅𑀢𑀺𑀤𑀻𑀖𑀢𑀸𑀤𑀺𑀤𑁄𑀲𑀭𑀳𑀺𑀢𑀁 𑀆𑀭𑁄𑀳𑀧𑀭𑀺𑀡𑀸𑀳𑀲𑀫𑁆𑀧𑀦𑁆𑀦𑀁 𑀚𑀭𑀸𑀬 𑀅𑀦𑀪𑀺𑀪𑀽𑀢𑀢𑁆𑀢𑀸 𑀯𑀮𑀺𑀧𑀮𑀺𑀢𑀸𑀤𑀺𑀤𑁄𑀲𑀭𑀳𑀺𑀢𑀁 𑀬𑀸𑀯𑀢𑀸𑀬𑀼𑀓𑀁 𑀅𑀧𑀭𑀺𑀓𑁆𑀔𑀻𑀡𑀚𑀯𑀩𑀮𑀧𑀭𑀓𑁆𑀓𑀫𑀲𑁄𑀪𑀫𑁂𑀯 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀅𑀦𑀼𑀝𑁆𑀞𑀸𑀦𑀨𑀮𑀽𑀧𑀚𑀻𑀯𑀺𑀢𑀸𑀬 𑀦 𑀘 𑀦𑁂𑀲𑀁 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺𑀯𑀲𑁂𑀦, 𑀆𑀳𑀸𑀭𑀧𑀭𑀺𑀬𑁂𑀝𑁆𑀞𑀺𑀯𑀲𑁂𑀦 𑀤𑀼𑀓𑁆𑀔𑀁 𑀅𑀢𑁆𑀣𑀺, 𑀢𑀢𑁄 𑀏𑀯 𑀦 𑀤𑀸𑀲𑀤𑀸𑀲𑀺𑀓𑀫𑁆𑀫𑀓𑀭𑀸𑀤𑀺𑀧𑀭𑀺𑀕𑁆𑀕𑀳𑁄 𑀅𑀢𑁆𑀣𑀺, 𑀦 𑀘 𑀢𑀢𑁆𑀣 𑀲𑀻𑀢𑀼𑀡𑁆𑀳𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀯𑀸𑀴𑀸𑀤𑀺𑀧𑀭𑀺𑀲𑁆𑀲𑀬𑁄 𑀅𑀢𑁆𑀣𑀺. 𑀬𑀣𑀸 𑀦𑀸𑀫𑁂𑀢𑁆𑀣 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀧𑀘𑁆𑀘𑀽𑀲𑀯𑁂𑀮𑀸𑀬𑀁 𑀲𑀫𑀲𑀻𑀢𑀼𑀡𑁆𑀳𑀉𑀢𑀼 𑀳𑁄𑀢𑀺, 𑀏𑀯𑀫𑁂𑀯 𑀲𑀩𑁆𑀩𑀓𑀸𑀮𑀁 𑀲𑀫𑀲𑀻𑀢𑀼𑀡𑁆𑀳𑁄𑀯 𑀉𑀢𑀼 𑀳𑁄𑀢𑀺, 𑀦 𑀘 𑀢𑁂𑀲𑀁 𑀓𑁄𑀘𑀺 𑀉𑀧𑀖𑀸𑀢𑁄, 𑀯𑀺𑀳𑁂𑀲𑀸 𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀅𑀓𑀝𑁆𑀞𑀧𑀸𑀓𑀺𑀫𑀫𑁂𑀯 𑀲𑀸𑀮𑀺𑀁 𑀅𑀓𑀡𑀁 𑀅𑀣𑀼𑀲𑀁 𑀲𑀼𑀕𑀦𑁆𑀥𑀁 𑀢𑀡𑁆𑀟𑀼𑀮𑀨𑀮𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀸𑀦𑀁 𑀦𑁂𑀲𑀁 𑀓𑀼𑀝𑁆𑀞𑀁, 𑀕𑀡𑁆𑀟𑁄, 𑀓𑀺𑀮𑀸𑀲𑁄, 𑀲𑁄𑀲𑁄, 𑀓𑀸𑀲𑁄, 𑀲𑀸𑀲𑁄, 𑀅𑀧𑀫𑀸𑀭𑁄, 𑀚𑀭𑁄𑀢𑀺 𑀏𑀯𑀫𑀸𑀤𑀺𑀓𑁄 𑀦 𑀓𑁄𑀘𑀺 𑀭𑁄𑀕𑁄 𑀉𑀧𑁆𑀧𑀚𑁆𑀚𑀢𑀺. 𑀦 𑀢𑁂 𑀔𑀼𑀚𑁆𑀚𑀸 𑀯𑀸 𑀯𑀸𑀫𑀦𑀓𑀸 𑀯𑀸 𑀓𑀸𑀡𑀸 𑀯𑀸 𑀓𑀼𑀡𑀻 𑀯𑀸 𑀔𑀜𑁆𑀚𑀸 𑀯𑀸 𑀧𑀓𑁆𑀔𑀳𑀢𑀸 𑀯𑀸 𑀯𑀺𑀓𑀮𑀗𑁆𑀕𑀸 𑀯𑀸 𑀯𑀺𑀓𑀮𑀺𑀦𑁆𑀤𑁆𑀭𑀺𑀬𑀸 𑀯𑀸 𑀳𑁄𑀦𑁆𑀢𑀺. 𑀇𑀢𑁆𑀣𑀺𑀬𑁄𑀧𑀺 𑀢𑀢𑁆𑀣 𑀦𑀸𑀢𑀺𑀤𑀻𑀖𑀸 𑀦𑀸𑀢𑀺𑀭𑀲𑁆𑀲𑀸 𑀦𑀸𑀢𑀺𑀓𑀺𑀲𑀸 𑀦𑀸𑀢𑀺𑀣𑀽𑀮𑀸 𑀦𑀸𑀢𑀺𑀓𑀸𑀴𑀸 𑀦𑀸𑀘𑁆𑀘𑁄𑀤𑀸𑀢𑀸 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀭𑀽𑀧𑀸 𑀳𑁄𑀦𑁆𑀢𑀺. 𑀢𑀣𑀸 𑀳𑀺 𑀤𑀻𑀖𑀗𑁆𑀕𑀼𑀮𑀻 𑀢𑀫𑁆𑀩𑀦𑀔𑀻 𑀮𑀫𑁆𑀩𑀢𑁆𑀣𑀦𑀸 𑀢𑀦𑀼𑀫𑀚𑁆𑀛𑀸 𑀧𑀼𑀡𑁆𑀡𑀘𑀦𑁆𑀤𑀫𑀼𑀔𑀻 𑀯𑀺𑀲𑀸𑀮𑀓𑁆𑀔𑀻 𑀫𑀼𑀤𑀼𑀕𑀢𑁆𑀢𑀸 𑀲𑀁𑀳𑀺𑀢𑀽𑀭𑀽 𑀑𑀤𑀸𑀢𑀤𑀦𑁆𑀢𑀸 𑀕𑀫𑁆𑀪𑀻𑀭𑀦𑀸𑀪𑀻 𑀢𑀦𑀼𑀚𑀗𑁆𑀖𑀸 𑀤𑀻𑀖𑀦𑀻𑀮𑀯𑁂𑀮𑁆𑀮𑀺𑀢𑀓𑁂𑀲𑀻 𑀧𑀼𑀣𑀼𑀮𑀲𑀼𑀲𑁄𑀡𑀻 𑀦𑀸𑀢𑀺𑀮𑁄𑀫𑀸𑀦𑀸𑀮𑁄𑀫𑀸 𑀲𑀼𑀪𑀕𑀸 𑀉𑀢𑀼𑀲𑀼𑀔𑀲𑀫𑁆𑀨𑀲𑁆𑀲𑀸 𑀲𑀡𑁆𑀳𑀸 𑀲𑀔𑀺𑀮𑀲𑀫𑁆𑀪𑀸𑀲𑀸 𑀦𑀸𑀦𑀸𑀪𑀭𑀡𑀯𑀺𑀪𑀽𑀲𑀺𑀢𑀸 𑀯𑀺𑀘𑀭𑀦𑁆𑀢𑀺. 𑀲𑀩𑁆𑀩𑀤𑀸 𑀳𑀺 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀯𑀺𑀬 𑀳𑁄𑀦𑁆𑀢𑀺. 𑀧𑀼𑀭𑀺𑀲𑀸 𑀘 𑀧𑀜𑁆𑀘𑀯𑀻𑀲𑀢𑀺𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀯𑀺𑀬, 𑀦 𑀧𑀼𑀢𑁆𑀢𑀤𑀸𑀭𑁂𑀲𑀼 𑀭𑀚𑁆𑀚𑀦𑁆𑀢𑀺. 𑀅𑀬𑀁 𑀢𑀢𑁆𑀣 𑀥𑀫𑁆𑀫𑀢𑀸.

𑀲𑀢𑁆𑀢𑀸𑀳𑀺𑀓𑀫𑁂𑀯 𑀘 𑀢𑀢𑁆𑀣 𑀇𑀢𑁆𑀣𑀺𑀧𑀼𑀭𑀺𑀲𑀸 𑀓𑀸𑀫𑀭𑀢𑀺𑀬𑀸 𑀯𑀺𑀳𑀭𑀦𑁆𑀢𑀺, 𑀢𑀢𑁄 𑀯𑀻𑀢𑀭𑀸𑀕𑀸 𑀬𑀣𑀸𑀲𑀓𑀁 𑀕𑀘𑁆𑀙𑀦𑁆𑀢𑀺. 𑀦 𑀢𑀢𑁆𑀣 𑀇𑀥 𑀯𑀺𑀬 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀫𑀽𑀮𑀓𑀁, 𑀕𑀩𑁆𑀪𑀧𑀭𑀺𑀳𑀭𑀡𑀫𑀽𑀮𑀓𑀁, 𑀯𑀺𑀚𑀸𑀬𑀦𑀫𑀽𑀮𑀓𑀁 𑀯𑀸 𑀤𑀼𑀓𑁆𑀔𑀁 𑀳𑁄𑀢𑀺. 𑀭𑀢𑁆𑀢𑀓𑀜𑁆𑀘𑀼𑀓𑀢𑁄 𑀓𑀜𑁆𑀘𑀦𑀧𑀝𑀺𑀫𑀸 𑀯𑀺𑀬 𑀤𑀸𑀭𑀓𑀸 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀅𑀫𑀓𑁆𑀔𑀺𑀢𑀸 𑀏𑀯 𑀲𑁂𑀫𑁆𑀳𑀸𑀤𑀺𑀦𑀸 𑀲𑀼𑀔𑁂𑀦𑁂𑀯 𑀦𑀺𑀓𑁆𑀔𑀫𑀦𑁆𑀢𑀺, 𑀅𑀬𑀁 𑀢𑀢𑁆𑀣 𑀥𑀫𑁆𑀫𑀢𑀸.

𑀫𑀸𑀢𑀸 𑀧𑀦 𑀧𑀼𑀢𑁆𑀢𑀁 𑀯𑀸 𑀥𑀻𑀢𑀭𑀁 𑀯𑀸 𑀯𑀺𑀚𑀸𑀬𑀺𑀢𑁆𑀯𑀸 𑀢𑁂𑀲𑀁 𑀯𑀺𑀘𑀭𑀡𑀧𑁆𑀧𑀤𑁂𑀲𑁂 𑀞𑀧𑁂𑀢𑁆𑀯𑀸 𑀅𑀦𑀧𑁂𑀓𑁆𑀔𑀸 𑀬𑀣𑀸𑀭𑀼𑀘𑀺 𑀕𑀘𑁆𑀙𑀢𑀺. 𑀢𑁂𑀲𑀁 𑀢𑀢𑁆𑀣 𑀲𑀬𑀺𑀢𑀸𑀦𑀁 𑀬𑁂 𑀧𑀲𑁆𑀲𑀦𑁆𑀢𑀺 𑀧𑀼𑀭𑀺𑀲𑀸, 𑀇𑀢𑁆𑀣𑀺𑀬𑁄 𑀯𑀸, 𑀢𑁂 𑀅𑀢𑁆𑀢𑀦𑁄 𑀅𑀗𑁆𑀕𑀼𑀮𑀺𑀬𑁄 𑀉𑀧𑀦𑀸𑀫𑁂𑀦𑁆𑀢𑀺, 𑀢𑁂𑀲𑀁 𑀓𑀫𑁆𑀫𑀩𑀮𑁂𑀦 𑀢𑀢𑁄 𑀔𑀻𑀭𑀁 𑀧𑀯𑀢𑁆𑀢𑀢𑀺, 𑀢𑁂𑀦 𑀤𑀸𑀭𑀓𑀸 𑀬𑀸𑀧𑁂𑀦𑁆𑀢𑀺. 𑀏𑀯𑀁 𑀧𑀦 𑀯𑀟𑁆𑀠𑀦𑁆𑀢𑀸 𑀓𑀢𑀺𑀧𑀬𑀤𑀺𑀯𑀲𑁂𑀳𑁂𑀯 𑀮𑀤𑁆𑀥𑀩𑀮𑀸 𑀳𑀼𑀢𑁆𑀯𑀸 𑀤𑀸𑀭𑀺𑀓𑀸 𑀇𑀢𑁆𑀣𑀺𑀬𑁄 𑀉𑀧𑀕𑀘𑁆𑀙𑀦𑁆𑀢𑀺, 𑀤𑀸𑀭𑀓𑀸 𑀧𑀼𑀭𑀺𑀲𑁂. 𑀓𑀧𑁆𑀧𑀭𑀼𑀓𑁆𑀔𑀢𑁄 𑀏𑀯 𑀘 𑀢𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀯𑀢𑁆𑀣𑀸𑀪𑀭𑀡𑀸𑀦𑀺 𑀦𑀺𑀧𑁆𑀧𑀚𑁆𑀚𑀦𑁆𑀢𑀺. 𑀦𑀸𑀦𑀸𑀯𑀺𑀭𑀸𑀕𑀯𑀡𑁆𑀡𑀯𑀺𑀘𑀺𑀢𑁆𑀢𑀸𑀦𑀺 𑀳𑀺 𑀲𑀼𑀔𑀼𑀫𑀸𑀦𑀺 𑀫𑀼𑀤𑀼𑀲𑀼𑀔𑀲𑀫𑁆𑀨𑀲𑁆𑀲𑀸𑀦𑀺 𑀯𑀢𑁆𑀣𑀸𑀦𑀺 𑀢𑀢𑁆𑀣 𑀢𑀢𑁆𑀣 𑀓𑀧𑁆𑀧𑀭𑀼𑀓𑁆𑀔𑁂𑀲𑀼 𑀑𑀮𑀫𑁆𑀩𑀦𑁆𑀢𑀸𑀦𑀺 𑀇𑀝𑁆𑀞𑀦𑁆𑀢𑀺. 𑀦𑀸𑀦𑀸𑀯𑀺𑀥𑀭𑀁𑀲𑀺𑀚𑀸𑀮𑀲𑀫𑀼𑀚𑁆𑀚𑀮𑀯𑀺𑀯𑀺𑀥𑀯𑀡𑁆𑀡𑀭𑀢𑀦𑀯𑀺𑀦𑀤𑁆𑀥𑀸𑀦𑀺 𑀅𑀦𑁂𑀓𑀯𑀺𑀥𑀫𑀸𑀮𑀸𑀓𑀫𑁆𑀫𑀮𑀢𑀸𑀓𑀫𑁆𑀫𑀪𑀺𑀢𑁆𑀢𑀺𑀓𑀫𑁆𑀫𑀯𑀺𑀘𑀺𑀢𑁆𑀢𑀸𑀦𑀺 𑀲𑀻𑀲𑀽𑀧𑀕𑀕𑀻𑀯𑀽𑀧𑀕𑀳𑀢𑁆𑀣𑀽𑀧𑀕𑀓𑀝𑀽𑀧𑀕𑀧𑀸𑀤𑀽𑀧𑀕𑀸𑀦𑀺 𑀲𑁄𑀯𑀡𑁆𑀡𑀫𑀬𑀸𑀦𑀺 𑀆𑀪𑀭𑀡𑀸𑀦𑀺 𑀘 𑀓𑀧𑁆𑀧𑀭𑀼𑀓𑁆𑀔𑀢𑁄 𑀑𑀮𑀫𑁆𑀩𑀦𑁆𑀢𑀺. 𑀢𑀣𑀸 𑀯𑀻𑀡𑀸𑀫𑀼𑀤𑀺𑀗𑁆𑀕𑀧𑀡𑀯𑀲𑀫𑁆𑀫𑀢𑀸𑀴𑀲𑀗𑁆𑀔𑀯𑀁𑀲𑀯𑁂𑀢𑀸𑀴𑀧𑀭𑀺𑀯𑀸𑀦𑀺𑀯𑀮𑁆𑀮𑀓𑀻𑀧𑀪𑀼𑀢𑀺𑀓𑀸 𑀢𑀽𑀭𑀺𑀬𑀪𑀡𑁆𑀟𑀸𑀧𑀺 𑀢𑀢𑁄 𑀢𑀢𑁄 𑀑𑀮𑀫𑁆𑀩𑀦𑁆𑀢𑀺. 𑀢𑀢𑁆𑀣 𑀘 𑀩𑀳𑀽 𑀨𑀮𑀭𑀼𑀓𑁆𑀔𑀸 𑀓𑀼𑀫𑁆𑀪𑀫𑀢𑁆𑀢𑀸𑀦𑀺 𑀨𑀮𑀸𑀦𑀺 𑀨𑀮𑀦𑁆𑀢𑀺 𑀫𑀥𑀼𑀭𑀭𑀲𑀸𑀦𑀺, 𑀬𑀸𑀦𑀺 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀲𑀢𑁆𑀢𑀸𑀳𑀫𑁆𑀧𑀺 𑀔𑀼𑀧𑁆𑀧𑀺𑀧𑀸𑀲𑀸𑀳𑀺 𑀦 𑀩𑀸𑀥𑀻𑀬𑀦𑁆𑀢𑀺. 𑀦𑀚𑁆𑀚𑁄𑀧𑀺 𑀢𑀢𑁆𑀣 𑀲𑀼𑀯𑀺𑀲𑀼𑀤𑁆𑀥𑀚𑀮𑀸 𑀲𑀼𑀧𑀢𑀺𑀢𑁆𑀣𑀸 𑀭𑀫𑀡𑀻𑀬𑀸 𑀅𑀓𑀤𑁆𑀤𑀫𑀸 𑀯𑀸𑀮𑀼𑀓𑀢𑀮𑀸 𑀦𑀸𑀢𑀺𑀲𑀻𑀢𑀸 𑀦𑀸𑀘𑁆𑀘𑀼𑀡𑁆𑀳𑀸 𑀲𑀼𑀭𑀪𑀺𑀕𑀦𑁆𑀥𑀻𑀳𑀺 𑀚𑀮𑀚𑀧𑀼𑀧𑁆𑀨𑁂𑀳𑀺 𑀲𑀜𑁆𑀙𑀦𑁆𑀦𑀸 𑀲𑀩𑁆𑀩𑀓𑀸𑀮𑀁 𑀲𑀼𑀭𑀪𑀺𑀁 𑀯𑀸𑀬𑀦𑁆𑀢𑀺𑀬𑁄 𑀲𑀦𑁆𑀤𑀦𑁆𑀢𑀺. 𑀦 𑀢𑀢𑁆𑀣 𑀓𑀡𑁆𑀝𑀓𑀢𑀺𑀡𑀓𑀓𑁆𑀔𑀴𑀕𑀘𑁆𑀙𑀮𑀢𑀸 𑀳𑁄𑀦𑁆𑀢𑀺, 𑀅𑀓𑀡𑁆𑀝𑀓𑀸 𑀧𑀼𑀧𑁆𑀨𑀨𑀮𑀲𑀫𑁆𑀧𑀦𑁆𑀦𑀸 𑀏𑀯 𑀳𑁄𑀦𑁆𑀢𑀺. 𑀘𑀦𑁆𑀤𑀦𑀦𑀸𑀕𑀭𑀼𑀓𑁆𑀔𑀸 𑀲𑀬𑀫𑁂𑀯 𑀭𑀲𑀁 𑀧𑀕𑁆𑀖𑀭𑀦𑁆𑀢𑀺. 𑀦𑁆𑀳𑀸𑀬𑀺𑀢𑀼𑀓𑀸𑀫𑀸 𑀘 𑀦𑀤𑀻𑀢𑀺𑀢𑁆𑀣𑁂 𑀏𑀓𑀚𑁆𑀛𑀁 𑀯𑀢𑁆𑀣𑀸𑀪𑀭𑀡𑀸𑀦𑀺 𑀞𑀧𑁂𑀢𑁆𑀯𑀸 𑀦𑀤𑀺𑀁 𑀑𑀢𑀭𑀺𑀢𑁆𑀯𑀸 𑀦𑁆𑀳𑀢𑁆𑀯𑀸 𑀉𑀢𑁆𑀢𑀺𑀡𑁆𑀡𑀼𑀢𑁆𑀢𑀺𑀡𑁆𑀡𑀸 𑀉𑀧𑀭𑀺𑀝𑁆𑀞𑀺𑀫𑀁 𑀯𑀢𑁆𑀣𑀸𑀪𑀭𑀡𑀁 𑀕𑀡𑁆𑀳𑀦𑁆𑀢𑀺, 𑀦 𑀢𑁂𑀲𑀁 𑀏𑀯𑀁 𑀳𑁄𑀢𑀺 ‘‘𑀇𑀤𑀁 𑀫𑀫, 𑀇𑀤𑀁 𑀧𑀭𑀲𑁆𑀲𑀸’’𑀢𑀺, 𑀢𑀢𑁄 𑀏𑀯 𑀦 𑀢𑁂𑀲𑀁 𑀓𑁄𑀘𑀺 𑀯𑀺𑀕𑁆𑀕𑀳𑁄 𑀯𑀸 𑀯𑀺𑀯𑀸𑀤𑁄 𑀯𑀸. 𑀲𑀢𑁆𑀢𑀸𑀳𑀺𑀓𑀸 𑀏𑀯 𑀘 𑀦𑁂𑀲𑀁 𑀓𑀸𑀫𑀭𑀢𑀺𑀓𑀻𑀴𑀸 𑀳𑁄𑀢𑀺, 𑀢𑀢𑁄 𑀯𑀻𑀢𑀭𑀸𑀕𑀸 𑀯𑀺𑀬 𑀯𑀺𑀘𑀭𑀦𑁆𑀢𑀺. 𑀬𑀢𑁆𑀣 𑀘 𑀭𑀼𑀓𑁆𑀔𑁂 𑀲𑀬𑀺𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀢𑀢𑁆𑀣𑁂𑀯 𑀲𑀬𑀦𑀁 𑀉𑀧𑀮𑀪𑀦𑁆𑀢𑀺. 𑀫𑀢𑁂 𑀘 𑀲𑀢𑁆𑀢𑁂 𑀤𑀺𑀲𑁆𑀯𑀸 𑀦 𑀭𑁄𑀤𑀦𑁆𑀢𑀺, 𑀦 𑀲𑁄𑀘𑀦𑁆𑀢𑀺, 𑀢𑀜𑁆𑀘 𑀫𑀡𑁆𑀟𑀬𑀺𑀢𑁆𑀯𑀸 𑀦𑀺𑀓𑁆𑀔𑀺𑀧𑀦𑁆𑀢𑀺. 𑀢𑀸𑀯𑀤𑁂𑀯 𑀘 𑀦𑁂𑀲𑀁 𑀢𑀣𑀸𑀭𑀽𑀧𑀸 𑀲𑀓𑀼𑀡𑀸 𑀉𑀧𑀕𑀦𑁆𑀢𑁆𑀯𑀸 𑀫𑀢𑀁 𑀤𑀻𑀧𑀦𑁆𑀢𑀭𑀁 𑀦𑁂𑀦𑁆𑀢𑀺. 𑀢𑀲𑁆𑀫𑀸 𑀲𑀼𑀲𑀸𑀦𑀁 𑀯𑀸 𑀅𑀲𑀼𑀘𑀺𑀝𑁆𑀞𑀸𑀦𑀁 𑀯𑀸 𑀢𑀢𑁆𑀣 𑀦𑀢𑁆𑀣𑀺. 𑀦 𑀘 𑀢𑀢𑁄 𑀫𑀢𑀸 𑀦𑀺𑀭𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸 𑀧𑁂𑀢𑁆𑀢𑀺𑀯𑀺𑀲𑀬𑀁 𑀯𑀸 𑀉𑀧𑀧𑀚𑁆𑀚𑀦𑁆𑀢𑀺. ‘‘𑀥𑀫𑁆𑀫𑀢𑀸𑀲𑀺𑀤𑁆𑀥𑀲𑁆𑀲 𑀧𑀜𑁆𑀘𑀲𑀻𑀮𑀲𑁆𑀲 𑀆𑀦𑀼𑀪𑀸𑀯𑁂𑀦 𑀢𑁂 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀯𑀲𑁆𑀲𑀲𑀳𑀲𑁆𑀲𑀫𑁂𑀯 𑀘 𑀦𑁂𑀲𑀁 𑀲𑀩𑁆𑀩𑀓𑀸𑀮𑀁 𑀆𑀬𑀼𑀧𑁆𑀧𑀫𑀸𑀡𑀁. 𑀲𑀩𑁆𑀩𑀫𑁂𑀢𑀁 𑀢𑁂𑀲𑀁 𑀧𑀜𑁆𑀘𑀲𑀻𑀮𑀁 𑀯𑀺𑀬 𑀥𑀫𑁆𑀫𑀢𑀸𑀲𑀺𑀤𑁆𑀥𑀁 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀉𑀢𑁆𑀢𑀭𑀓𑀼𑀭𑀼𑀤𑀻𑀧𑁂.

𑀏𑀓𑀔𑀼𑀭𑀁 𑀓𑀢𑁆𑀯𑀸𑀢𑀺 𑀅𑀦𑁂𑀓𑀲𑀨𑀫𑁆𑀧𑀺 𑀏𑀓𑀲𑀨𑀁 𑀯𑀺𑀬 𑀓𑀢𑁆𑀯𑀸, 𑀅𑀲𑁆𑀲𑀁 𑀯𑀺𑀬 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀕𑀸𑀯𑀺’’𑀦𑁆𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀧𑀲𑀼’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀕𑀸𑀯𑀺𑀢𑁄 𑀇𑀢𑀭𑁄 𑀲𑀩𑁆𑀩𑁄 𑀘𑀢𑀼𑀧𑁆𑀧𑀤𑁄 𑀇𑀥 ‘‘𑀧𑀲𑀽’’𑀢𑀺 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀞𑀧𑁂𑀢𑁆𑀯𑀸 𑀕𑀸𑀯𑀺’’𑀦𑁆𑀢𑀺.

𑀢𑀲𑁆𑀲𑀸𑀢𑀺 𑀕𑀩𑁆𑀪𑀺𑀦𑀺𑀢𑁆𑀣𑀺𑀬𑀸. 𑀧𑀺𑀝𑁆𑀞𑀺 𑀑𑀦𑀫𑀺𑀢𑀼𑀁 𑀲𑀳𑀢𑀻𑀢𑀺 𑀓𑀼𑀘𑁆𑀙𑀺𑀬𑀸 𑀕𑀭𑀼𑀪𑀸𑀭𑀢𑀸𑀬 𑀢𑁂𑀲𑀁 𑀆𑀭𑀼𑀴𑁆𑀳𑀓𑀸𑀮𑁂 𑀧𑀺𑀝𑁆𑀞𑀺 𑀑𑀦𑀫𑀢𑀺, 𑀢𑁂𑀲𑀁 𑀦𑀺𑀲𑀚𑁆𑀚𑀁 𑀲𑀳𑀢𑀺 𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑀸 𑀯𑀺𑀬 𑀳𑁄𑀦𑁆𑀢𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁂𑀢𑀺 𑀓𑀫𑁆𑀫𑀧𑀣𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁂. 𑀏𑀢𑁆𑀣𑀸𑀢𑀺 𑀚𑀫𑁆𑀩𑀼𑀤𑀻𑀧𑁂. 𑀏𑀢𑁆𑀣 𑀳𑀺 𑀚𑀦𑀧𑀤𑀯𑁄𑀳𑀸𑀭𑁄, 𑀦 𑀉𑀢𑁆𑀢𑀭𑀓𑀼𑀭𑀼𑀫𑁆𑀳𑀺. 𑀢𑀣𑀸 𑀳𑀺 ‘‘𑀧𑀘𑁆𑀘𑀦𑁆𑀢𑀺𑀫𑀫𑀺𑀮𑀓𑁆𑀔𑀼𑀯𑀸𑀲𑀺𑀓𑁂’’𑀢𑀺 𑀘 𑀯𑀼𑀢𑁆𑀢𑀁.

𑀢𑀲𑁆𑀲 𑀭𑀜𑁆𑀜𑁄𑀢𑀺 𑀯𑁂𑀲𑁆𑀲𑀯𑀡𑀫𑀳𑀸𑀭𑀸𑀚𑀲𑁆𑀲. 𑀇𑀢𑀺 𑀲𑁄 𑀅𑀢𑁆𑀢𑀸𑀦𑀫𑁂𑀯 𑀧𑀭𑀁 𑀯𑀺𑀬 𑀓𑀢𑁆𑀯𑀸 𑀯𑀤𑀢𑀺. 𑀏𑀲𑁂𑀯 𑀦𑀬𑁄 𑀧𑀭𑀢𑁄𑀧𑀺. 𑀩𑀳𑀼𑀯𑀺𑀥𑀁 𑀦𑀸𑀦𑀸𑀭𑀢𑀦𑀯𑀺𑀘𑀺𑀢𑁆𑀢𑀁 𑀦𑀸𑀦𑀸𑀲𑀡𑁆𑀞𑀸𑀦𑀁 𑀭𑀣𑀸𑀤𑀺 𑀤𑀺𑀩𑁆𑀩𑀬𑀸𑀦𑀁 𑀉𑀧𑀝𑁆𑀞𑀺𑀢𑀫𑁂𑀯 𑀳𑁄𑀢𑀺 𑀲𑀼𑀤𑀦𑁆𑀢𑀯𑀸𑀳𑀦𑀬𑀼𑀢𑁆𑀢𑀁, 𑀦 𑀦𑁂𑀲𑀁 𑀬𑀸𑀦𑀸𑀦𑀁 𑀉𑀧𑀝𑁆𑀞𑀸𑀧𑀦𑁂 𑀉𑀲𑁆𑀲𑀼𑀓𑁆𑀓𑀁 𑀆𑀧𑀚𑁆𑀚𑀺𑀢𑀩𑁆𑀩𑀁 𑀅𑀢𑁆𑀣𑀺. 𑀏𑀢𑀸𑀦𑀻𑀢𑀺 𑀳𑀢𑁆𑀣𑀺𑀬𑀸𑀦𑀸𑀤𑀻𑀦𑀺. 𑀦𑁂𑀲𑀦𑁆𑀢𑀺 𑀯𑁂𑀲𑁆𑀲𑀯𑀡𑀧𑀭𑀺𑀘𑀸𑀭𑀺𑀓𑀸𑀦𑀁. 𑀓𑀧𑁆𑀧𑀺𑀢𑀸𑀦𑀺 𑀳𑀼𑀢𑁆𑀯𑀸 𑀉𑀝𑁆𑀞𑀺𑀢𑀸𑀦𑀺 𑀆𑀭𑀼𑀳𑀺𑀢𑀼𑀁 𑀉𑀧𑀓𑀧𑁆𑀧𑀦𑀬𑀸𑀦𑀸𑀦𑀺. 𑀦𑀺𑀧𑀦𑁆𑀦𑀸𑀧𑀺 𑀦𑀺𑀲𑀺𑀦𑁆𑀦𑀸𑀧𑀺 𑀯𑀺𑀘𑀭𑀦𑁆𑀢𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀯𑀺𑀬 𑀬𑀣𑀸𑀲𑀓𑀁 𑀯𑀺𑀫𑀸𑀦𑁂𑀲𑀼.

𑀦𑀕𑀭𑀸 𑀅𑀳𑀽𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀦𑀕𑀭𑀸𑀦𑀺 𑀪𑀯𑀺𑀁𑀲𑀽𑀢𑀺 𑀅𑀢𑁆𑀣𑁄’’𑀢𑀺. 𑀆𑀝𑀸𑀦𑀸𑀝𑀸 𑀦𑀸𑀫𑀸𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀮𑀤𑁆𑀥𑀦𑀸𑀫𑀁 𑀦𑀕𑀭𑀁 𑀆𑀲𑀺.

𑀢𑀲𑁆𑀫𑀺𑀁 𑀞𑀢𑁆𑀯𑀸𑀢𑀺 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀧𑀭𑀓𑀼𑀲𑀺𑀝𑀦𑀸𑀝𑀸𑀦𑀸𑀫𑀓𑁂 𑀦𑀕𑀭𑁂 𑀞𑀢𑁆𑀯𑀸. 𑀢𑀢𑁄 𑀉𑀚𑀼𑀁 𑀉𑀢𑁆𑀢𑀭𑀤𑀺𑀲𑀸𑀬𑀁. 𑀏𑀢𑀲𑁆𑀲𑀸𑀢𑀺 𑀓𑀲𑀺𑀯𑀦𑁆𑀢𑀦𑀕𑀭𑀲𑁆𑀲. 𑀅𑀧𑀭𑀪𑀸𑀕𑁂 𑀅𑀧𑀭𑀓𑁄𑀝𑁆𑀞𑀸𑀲𑁂, 𑀧𑀭𑀢𑁄 𑀇𑀘𑁆𑀘𑁂𑀯 𑀅𑀢𑁆𑀣𑁄.

𑀓𑀼𑀯𑁂𑀭𑁄𑀢𑀺 𑀢𑀲𑁆𑀲 𑀧𑀼𑀭𑀺𑀫𑀚𑀸𑀢𑀺𑀲𑀫𑀼𑀤𑀸𑀕𑀢𑀁 𑀦𑀸𑀫𑀦𑁆𑀢𑀺 𑀢𑁂𑀦𑁂𑀯 𑀧𑀲𑀗𑁆𑀕𑁂𑀦 𑀬𑁂𑀦𑀸𑀬𑀁 𑀲𑀫𑁆𑀧𑀢𑁆𑀢𑀺 𑀅𑀥𑀺𑀕𑀢𑀸, 𑀢𑀤𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀁 𑀆𑀘𑀺𑀓𑁆𑀔𑀺𑀢𑀼𑀁 ‘‘𑀅𑀬𑀁 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀘𑁆𑀙𑀼𑀯𑀧𑁆𑀧𑀦𑁆𑀢𑀺 𑀉𑀘𑁆𑀙𑀼𑀲𑀲𑁆𑀲𑀁. 𑀅𑀯𑀲𑁂𑀲𑀲𑀸𑀮𑀸𑀳𑀻𑀢𑀺 𑀅𑀯𑀲𑁂𑀲𑀬𑀦𑁆𑀢𑀲𑀸𑀮𑀸𑀳𑀺, 𑀦𑀺𑀲𑁆𑀲𑀓𑁆𑀓𑀯𑀘𑀦𑀜𑁆𑀘𑁂𑀢𑀁. 𑀢𑀢𑁆𑀣𑁂𑀯𑀸𑀢𑀺 𑀧𑀼𑀜𑁆𑀜𑀢𑁆𑀣𑀁 𑀤𑀺𑀦𑁆𑀦𑀲𑀸𑀮𑀸𑀬𑀫𑁂𑀯.

𑀧𑀝𑀺𑀏𑀲𑀦𑁆𑀢𑁄𑀢𑀺 𑀧𑀢𑀺 𑀧𑀢𑀺 𑀅𑀢𑁆𑀣𑁂 𑀏𑀲𑀦𑁆𑀢𑁄 𑀯𑀻𑀫𑀁𑀲𑀦𑁆𑀢𑁄. 𑀦 𑀓𑁂𑀯𑀮𑀁 𑀢𑁂 𑀯𑀻𑀫𑀁𑀲𑀦𑁆𑀢𑀺 𑀏𑀯, 𑀅𑀣 𑀔𑁄 𑀢𑀫𑀢𑁆𑀣𑀁 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑀻𑀢𑀺 𑀆𑀳 ‘‘𑀯𑀺𑀲𑀼𑀁 𑀯𑀺𑀲𑀼𑀁 𑀅𑀢𑁆𑀣𑁂 𑀉𑀧𑀧𑀭𑀺𑀓𑁆𑀔𑀫𑀸𑀦𑀸 𑀅𑀦𑀼𑀲𑀸𑀲𑀫𑀸𑀦𑀸’’𑀢𑀺. 𑀬𑀓𑁆𑀔𑀭𑀝𑁆𑀞𑀺𑀓𑀸𑀢𑀺 𑀬𑀓𑁆𑀔𑀭𑀝𑁆𑀞𑀸𑀥𑀺𑀧𑀢𑀺𑀦𑁄. 𑀬𑀓𑁆𑀔𑀸 𑀘 𑀯𑁂𑀲𑁆𑀲𑀯𑀡𑀲𑁆𑀲 𑀭𑀜𑁆𑀜𑁄 𑀦𑀺𑀯𑁂𑀲𑀦𑀤𑁆𑀯𑀸𑀭𑁂 𑀦𑀺𑀬𑀼𑀢𑁆𑀢𑀸 𑀘𑀸𑀢𑀺 𑀬𑀓𑁆𑀔𑀤𑁄𑀯𑀸𑀭𑀺𑀓𑀸, 𑀢𑁂𑀲𑀁 𑀬𑀓𑁆𑀔𑀤𑁄𑀯𑀸𑀭𑀺𑀓𑀸𑀦𑀁.

𑀬𑀲𑁆𑀫𑀸 𑀥𑀭𑀡𑀻𑀧𑁄𑀭𑀓𑁆𑀔𑀡𑀺𑀢𑁄 𑀧𑀼𑀭𑀸𑀡𑁄𑀤𑀓𑀁 𑀪𑀲𑁆𑀲𑀬𑀦𑁆𑀢𑀁 𑀳𑁂𑀝𑁆𑀞𑀸 𑀯𑀼𑀝𑁆𑀞𑀺 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑀢𑀺, 𑀢𑀲𑁆𑀫𑀸 𑀢𑀁 𑀢𑀢𑁄 𑀕𑀳𑁂𑀢𑁆𑀯𑀸 𑀫𑁂𑀖𑁂𑀳𑀺 𑀧𑀯𑀼𑀝𑁆𑀞𑀁 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀬𑀢𑁄 𑀧𑁄𑀓𑁆𑀔𑀭𑀡𑀺𑀢𑁄 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀫𑁂𑀖𑀸 𑀧𑀯𑀲𑁆𑀲𑀦𑁆𑀢𑀻’’𑀢𑀺. 𑀬𑀢𑁄𑀢𑀺 𑀬𑀢𑁄 𑀥𑀭𑀡𑀻𑀧𑁄𑀓𑁆𑀔𑀭𑀡𑀺𑀢𑁄. 𑀲𑀪𑀸𑀢𑀺 𑀬𑀓𑁆𑀔𑀸𑀦𑀁 𑀉𑀧𑀝𑁆𑀞𑀸𑀦𑀲𑀪𑀸.

𑀢𑀲𑁆𑀫𑀺𑀁 𑀞𑀸𑀦𑁂𑀢𑀺 𑀢𑀲𑁆𑀲𑀸 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂 𑀬𑀓𑁆𑀔𑀸𑀦𑀁 𑀯𑀲𑀦𑀯𑀦𑁂. 𑀲𑀤𑀸 𑀨𑀮𑀺𑀢𑀸𑀢𑀺 𑀦𑀺𑀘𑁆𑀘𑀓𑀸𑀮𑀁 𑀲𑀜𑁆𑀚𑀸𑀢𑀨𑀮𑀸. 𑀦𑀺𑀘𑁆𑀘𑀧𑀼𑀧𑁆𑀨𑀺𑀢𑀸𑀢𑀺 𑀦𑀺𑀘𑁆𑀘𑀁 𑀲𑀜𑁆𑀚𑀸𑀢𑀧𑀼𑀧𑁆𑀨𑀸. 𑀦𑀸𑀦𑀸𑀤𑀺𑀚𑀕𑀡𑀸𑀬𑀼𑀢𑀸𑀢𑀺 𑀦𑀸𑀦𑀸𑀯𑀺𑀥𑁂𑀳𑀺 𑀤𑀺𑀚𑀕𑀡𑁂𑀳𑀺 𑀬𑀼𑀢𑁆𑀢𑀸. 𑀢𑁂𑀳𑀺 𑀧𑀦 𑀲𑀓𑀼𑀡𑀲𑀗𑁆𑀖𑁂𑀳𑀺 𑀇𑀢𑁄 𑀘𑀺𑀢𑁄 𑀘 𑀲𑀫𑁆𑀧𑀢𑀦𑁆𑀢𑁂𑀳𑀺 𑀧𑀭𑀺𑀩𑁆𑀪𑀫𑀦𑁆𑀢𑁂𑀳𑀺 𑀬𑀲𑁆𑀫𑀸 𑀲𑀸 𑀧𑁄𑀓𑁆𑀔𑀭𑀡𑀻 𑀆𑀓𑀼𑀮𑀸 𑀯𑀺𑀬 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀯𑀺𑀯𑀺𑀥𑀧𑀓𑁆𑀔𑀺𑀲𑀗𑁆𑀖𑀲𑀫𑀸𑀓𑀼𑀮𑀸’’𑀢𑀺. 𑀓𑁄𑀜𑁆𑀘𑀲𑀓𑀼𑀡𑁂𑀳𑀻𑀢𑀺 𑀲𑀸𑀭𑀲𑀲𑀓𑀼𑀦𑁆𑀢𑁂𑀳𑀺.

‘‘𑀏𑀯𑀁 𑀯𑀺𑀭𑀯𑀦𑁆𑀢𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀢𑀣𑀸 𑀯𑀲𑁆𑀲𑀺𑀢𑀯𑀲𑁂𑀦 ‘‘𑀚𑀻𑀯𑀜𑁆𑀚𑀻𑀯𑀓𑀸’’𑀢𑀺 𑀅𑀬𑀁 𑀢𑁂𑀲𑀁 𑀲𑀫𑀜𑁆𑀜𑀸𑀢𑀺 𑀤𑀲𑁆𑀲𑁂𑀢𑀺. 𑀉𑀝𑁆𑀞𑀯𑀘𑀺𑀢𑁆𑀢𑀓𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀦𑀸𑀳 ‘‘𑀏𑀯𑀁 𑀯𑀲𑁆𑀲𑀫𑀸𑀦𑀸’’𑀢𑀺. 𑀧𑁄𑀓𑁆𑀔𑀭𑀲𑀸𑀢𑀓𑀸𑀢𑀺 𑀧𑁄𑀓𑁆𑀔𑀭𑀲𑀡𑁆𑀞𑀸𑀦𑀢𑀸𑀬 ‘‘𑀧𑁄𑀓𑁆𑀔𑀭𑀲𑀸𑀢𑀓𑀸’’𑀢𑀺 𑀏𑀯𑀁 𑀮𑀤𑁆𑀥𑀦𑀸𑀫𑀸.

𑀲𑀩𑁆𑀩𑀓𑀸𑀮𑀁 𑀲𑁄𑀪𑀢𑀻𑀢𑀺 𑀲𑀩𑁆𑀩𑀉𑀢𑀽𑀲𑀼 𑀲𑁄𑀪𑀢𑀺, 𑀦 𑀢𑀲𑁆𑀲𑀸 𑀳𑁂𑀫𑀦𑁆𑀢𑀸𑀤𑀺𑀯𑀲𑁂𑀦 𑀲𑁄𑀪𑀸𑀯𑀺𑀭𑀢𑁄 𑀅𑀢𑁆𑀣𑀺. 𑀏𑀯𑀁𑀪𑀽𑀢𑀸 𑀘 𑀦𑀺𑀘𑁆𑀘𑀁 𑀧𑀼𑀧𑁆𑀨𑀺𑀢𑀚𑀮𑀚𑀣𑀮𑀚𑀧𑀼𑀧𑁆𑀨𑀢𑀸𑀬, 𑀨𑀮𑀪𑀸𑀭𑀪𑀭𑀺𑀢𑀭𑀼𑀓𑁆𑀔𑀧𑀭𑀺𑀯𑀸𑀭𑀺𑀢𑀢𑀸𑀬, 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀲𑀮𑀺𑀮𑀢𑀸𑀬 𑀘 𑀦𑀺𑀭𑀦𑁆𑀢𑀭𑀁 𑀲𑁄𑀪𑀢𑀺.

𑁨𑁮𑁨. 𑀧𑀭𑀺𑀓𑀫𑁆𑀫𑀦𑁆𑀢𑀺 𑀧𑀼𑀩𑁆𑀩𑀼𑀧𑀘𑀸𑀭𑀁. 𑀧𑀭𑀺𑀲𑁄𑀥𑁂𑀢𑁆𑀯𑀸𑀢𑀺 𑀏𑀓𑀓𑁆𑀔𑀭𑀲𑁆𑀲𑀸𑀧𑀺 𑀅𑀯𑀺𑀭𑀸𑀥𑀦𑀯𑀲𑁂𑀦 𑀆𑀘𑀭𑀺𑀬𑀲𑀦𑁆𑀢𑀺𑀓𑁂 𑀲𑀩𑁆𑀩𑀁 𑀲𑁄𑀥𑁂𑀢𑁆𑀯𑀸. 𑀲𑀼𑀝𑁆𑀞𑀼 𑀉𑀕𑁆𑀕𑀳𑀺𑀢𑀸𑀢𑀺 𑀧𑀭𑀺𑀫𑀡𑁆𑀟𑀮𑀧𑀤𑀩𑁆𑀬𑀜𑁆𑀚𑀦𑀸𑀬 𑀧𑁄𑀭𑀺𑀬𑀸 𑀯𑀸𑀘𑀸𑀬 𑀯𑀺𑀲𑁆𑀲𑀝𑁆𑀞𑀸𑀬 𑀅𑀦𑁂𑀮𑀕𑀴𑀸𑀬 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀻𑀬𑀸 𑀲𑀫𑁆𑀫𑀤𑁂𑀯 𑀉𑀕𑁆𑀕𑀳𑀺𑀢𑀸. 𑀢𑀣𑀸 𑀳𑀺 ‘‘𑀅𑀢𑁆𑀣𑀜𑁆𑀘 𑀩𑁆𑀬𑀜𑁆𑀚𑀦𑀜𑁆𑀘 𑀧𑀭𑀺𑀲𑁄𑀥𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀣𑀁 𑀚𑀸𑀦𑀢𑁄 𑀏𑀯 𑀳𑀺 𑀩𑁆𑀬𑀜𑁆𑀚𑀦𑀁 𑀧𑀭𑀺𑀲𑀼𑀚𑁆𑀛𑀢𑀺, 𑀦𑁄 𑀅𑀚𑀸𑀦𑀢𑁄. 𑀧𑀤𑀩𑁆𑀬𑀜𑁆𑀚𑀦𑀸𑀦𑀻𑀢𑀺 𑀧𑀤𑀜𑁆𑀘𑁂𑀯 𑀩𑁆𑀬𑀜𑁆𑀚𑀦𑀜𑁆𑀘 𑀅𑀳𑀸𑀧𑁂𑀢𑁆𑀯𑀸. 𑀏𑀯𑀜𑁆𑀳𑀺 𑀧𑀭𑀺𑀧𑀼𑀡𑁆𑀡𑀸 𑀦𑀸𑀫 𑀳𑁄𑀢𑀻𑀢𑀺. 𑀯𑀺𑀲𑀁𑀯𑀸𑀤𑁂𑀢𑁆𑀯𑀸𑀢𑀺 𑀅𑀜𑁆𑀜𑀣𑀸 𑀓𑀢𑁆𑀯𑀸. 𑀢𑁂𑀚𑀯𑀦𑁆𑀢𑀁 𑀦 𑀳𑁄𑀢𑀺 𑀯𑀺𑀭𑀚𑁆𑀛𑀦𑀢𑁄 𑀘𑁂𑀯 𑀯𑀺𑀫𑁆𑀳𑀬𑀢𑁆𑀣𑀪𑀸𑀯𑀢𑁄 𑀘. 𑀲𑀩𑁆𑀩𑀲𑁄𑀢𑀺 𑀅𑀦𑀯𑀲𑁂𑀲𑀢𑁄 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀢𑁄. 𑀢𑁂𑀚𑀯𑀦𑁆𑀢𑀁 𑀳𑁄𑀢𑀻𑀢𑀺 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀁 𑀅𑀯𑀺𑀭𑀸𑀥𑁂𑀢𑁆𑀯𑀸 𑀲𑀼𑀧𑁆𑀧𑀯𑀢𑁆𑀢𑀺𑀪𑀸𑀯𑁂𑀦 𑀲𑀸𑀥𑀦𑀢𑁄. 𑀏𑀯𑀁 𑀧𑀬𑁄𑀕𑀯𑀺𑀧𑀢𑁆𑀢𑀺𑀁 𑀧𑀳𑀸𑀬 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀢𑀺 𑀧𑀭𑀺𑀢𑁆𑀢𑀲𑁆𑀲 𑀅𑀢𑁆𑀣𑀲𑀸𑀥𑀓𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀚𑁆𑀛𑀸𑀲𑀬𑀯𑀺𑀧𑀢𑁆𑀢𑀺𑀁 𑀧𑀳𑀸𑀬 𑀅𑀚𑁆𑀛𑀸𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀅𑀢𑁆𑀣𑀲𑀸𑀥𑀓𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀮𑀸𑀪𑀳𑁂𑀢𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀤𑀁 𑀧𑀭𑀺𑀢𑁆𑀢𑀪𑀡𑀦𑀁 𑀲𑀢𑁆𑀢𑀸𑀦𑀁 𑀅𑀦𑀢𑁆𑀣𑀧𑀝𑀺𑀩𑀸𑀳𑀦𑀳𑁂𑀢𑀽𑀢𑀺 𑀢𑀲𑁆𑀲 𑀜𑀸𑀡𑀓𑀭𑀼𑀡𑀸𑀧𑀼𑀩𑁆𑀩𑀓𑀢𑀸 𑀦𑀺𑀲𑁆𑀲𑀭𑀡𑀧𑀓𑁆𑀔𑁄. 𑀫𑁂𑀢𑁆𑀢𑀁 𑀧𑀼𑀭𑁂𑀘𑀸𑀭𑀺𑀓𑀁 𑀓𑀢𑁆𑀯𑀸𑀢𑀺 𑀫𑁂𑀢𑁆𑀢𑀸𑀫𑀦𑀲𑀺𑀓𑀸𑀭𑁂𑀦 𑀲𑀢𑁆𑀢𑁂𑀲𑀼 𑀳𑀺𑀢𑀨𑀭𑀡𑀁 𑀧𑀼𑀭𑀓𑁆𑀔𑀢𑁆𑀯𑀸.

‘‘𑀯𑀢𑁆𑀣𑀼𑀁 𑀯𑀸’’𑀢𑀺𑀆𑀤𑀺 𑀧𑀼𑀩𑁆𑀩𑁂 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀓𑀢𑀸𑀬 𑀲𑀸𑀥𑀦𑀸𑀬 𑀪𑀕𑀯𑀢𑁄 𑀧𑀯𑁂𑀤𑀦𑀁. 𑀖𑀭𑀯𑀢𑁆𑀣𑀼𑀦𑁆𑀢𑀺 𑀯𑀲𑀦𑀕𑁂𑀳𑀁. 𑀦𑀺𑀩𑀤𑁆𑀥𑀯𑀸𑀲𑀦𑁆𑀢𑀺 𑀧𑀭𑀕𑁂𑀳𑁂𑀧𑀺 𑀦𑁂𑀯𑀸𑀲𑀺𑀓𑀪𑀸𑀯𑁂𑀦 𑀯𑀸𑀲𑀁 𑀦 𑀮𑀪𑁂𑀬𑁆𑀬, 𑀬𑀁 𑀧𑀦 𑀫𑀳𑀸𑀭𑀸𑀚𑀸𑀦𑀁, 𑀬𑀓𑁆𑀔𑀲𑁂𑀦𑀸𑀧𑀢𑀻𑀦𑀜𑁆𑀘 𑀅𑀚𑀸𑀦𑀦𑁆𑀢𑀸𑀦𑀁𑀬𑁂𑀯 𑀓𑀤𑀸𑀘𑀺 𑀯𑀲𑀺𑀢𑁆𑀯𑀸 𑀕𑀫𑀦𑀁, 𑀢𑀁 𑀅𑀧𑁆𑀧𑀫𑀸𑀡𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀫𑀺𑀢𑀺𑀦𑁆𑀢𑀺 𑀬𑀓𑁆𑀔𑀸𑀤𑀺𑀲𑀫𑀸𑀕𑀫𑀁. 𑀓𑀸𑀫𑀁 𑀧𑀸𑀴𑀺𑀬𑀁 ‘‘𑀦 𑀫𑁂 𑀲𑁄’’𑀢𑀺 𑀆𑀕𑀢𑀁, 𑀇𑀢𑀭𑁂𑀲𑀫𑁆𑀧𑀺 𑀧𑀦 𑀫𑀳𑀸𑀭𑀸𑀚𑀸𑀦𑀫𑀢𑁆𑀢𑀦𑀸 𑀏𑀓𑀚𑁆𑀛𑀸𑀲𑀬𑀢𑀸𑀬 𑀢𑁂𑀲𑀫𑁆𑀧𑀺 𑀅𑀚𑁆𑀛𑀸𑀲𑀬𑀁 𑀳𑀤𑀬𑁂 𑀞𑀧𑁂𑀢𑁆𑀯𑀸 𑀯𑁂𑀲𑁆𑀲𑀯𑀡𑁄 𑀢𑀣𑀸 𑀅𑀯𑁄𑀘. 𑀓𑀜𑁆𑀜𑀁 𑀅𑀦𑀼 𑀅𑀦𑀼 𑀯𑀳𑀺𑀢𑀼𑀁 𑀅𑀬𑀼𑀢𑁆𑀢𑁄 𑀅𑀦𑀸𑀯𑀬𑁆𑀳𑁄, 𑀲𑀩𑁆𑀩𑀓𑀸𑀮𑀁 𑀓𑀜𑁆𑀜𑀁 𑀮𑀤𑁆𑀥𑀼𑀁 𑀅𑀬𑀼𑀢𑁆𑀢𑁄𑀢𑀺 𑀅𑀢𑁆𑀣𑁄, 𑀢𑀁 𑀅𑀦𑀸𑀯𑀬𑁆𑀳𑀁. 𑀢𑁂𑀦𑀸𑀳 ‘‘𑀦 𑀆𑀯𑀸𑀳𑀬𑀼𑀢𑁆𑀢’’𑀦𑁆𑀢𑀺. 𑀦 𑀯𑀺𑀯𑀬𑁆𑀳𑀦𑁆𑀢𑀺 𑀅𑀯𑀺𑀯𑀬𑁆𑀳𑀁, 𑀓𑀜𑁆𑀜𑀁 𑀕𑀳𑁂𑀢𑀼𑀫𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀦 𑀯𑀺𑀯𑀸𑀳𑀬𑀼𑀢𑁆𑀢’’𑀦𑁆𑀢𑀺. 𑀆𑀳𑀺𑀢𑁄 𑀅𑀳𑀁𑀫𑀸𑀦𑁄 𑀏𑀢𑁆𑀣𑀸𑀢𑀺 𑀅𑀢𑁆𑀢𑀸, 𑀅𑀢𑁆𑀢𑀪𑀸𑀯𑁄. 𑀅𑀢𑁆𑀢𑀸 𑀯𑀺𑀲𑀬𑀪𑀽𑀢𑁄 𑀏𑀢𑀸𑀲𑀁 𑀅𑀢𑁆𑀣𑀻𑀢𑀺 𑀅𑀢𑁆𑀢𑀸, 𑀧𑀭𑀺𑀪𑀸𑀲𑀸, 𑀢𑀸𑀳𑀺. 𑀧𑀭𑀺𑀬𑀢𑁆𑀢𑀁 𑀓𑀢𑁆𑀯𑀸 𑀯𑀘𑀦𑁂𑀦 𑀧𑀭𑀺𑀧𑀼𑀡𑁆𑀡𑀸𑀳𑀺. 𑀬𑀣𑀸 𑀬𑀓𑁆𑀔𑀸 𑀅𑀓𑁆𑀓𑁄𑀲𑀺𑀢𑀩𑁆𑀩𑀸, 𑀏𑀯𑀁 𑀧𑀯𑀢𑁆𑀢𑀸 𑀅𑀓𑁆𑀓𑁄𑀲𑀸 𑀬𑀓𑁆𑀔𑀅𑀓𑁆𑀓𑁄𑀲𑀸 𑀦𑀸𑀫, 𑀢𑁂𑀳𑀺. 𑀢𑁂 𑀧𑀦 ‘‘𑀓𑀴𑀸𑀭𑀓𑁆𑀔𑀺 𑀓𑀴𑀸𑀭𑀤𑀦𑁆𑀢𑀸 𑀓𑀸𑀴𑀯𑀡𑁆𑀡𑀸’’𑀢𑀺 𑀏𑀯𑀁 𑀆𑀤𑀬𑁄.

𑀯𑀺𑀭𑀼𑀤𑁆𑀥𑀸𑀢𑀺 𑀯𑀺𑀭𑀼𑀚𑁆𑀛𑀦𑀓𑀸 𑀧𑀭𑁂𑀳𑀺 𑀯𑀺𑀭𑁄𑀥𑀺𑀦𑁄. 𑀭𑀪𑀲𑀸𑀢𑀺 𑀲𑀸𑀭𑀫𑁆𑀪𑀓𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀓𑀭𑀡𑀼𑀢𑁆𑀢𑀭𑀺𑀬𑀸’’𑀢𑀺. 𑀭𑀪𑀲𑀸𑀢𑀺 𑀯𑀸 𑀲𑀸𑀳𑀲𑀺𑀓𑀸. 𑀲𑀸𑀫𑀺𑀦𑁄 𑀫𑀦𑀲𑁄 𑀅𑀲𑁆𑀲𑀯𑀸𑀢𑀺 𑀫𑀦𑀲𑁆𑀲𑀸, 𑀓𑀺𑀗𑁆𑀓𑀭𑀸. 𑀬𑁂 𑀳𑀺 ‘‘𑀓𑀺𑀁 𑀓𑀭𑁄𑀫𑀺 𑀪𑀤𑁆𑀤𑀦𑁆𑀢𑁂’’𑀢𑀺 𑀲𑀸𑀫𑀺𑀓𑀲𑁆𑀲 𑀯𑀲𑁂 𑀯𑀢𑁆𑀢𑀦𑁆𑀢𑀺, 𑀢𑁂 𑀏𑀯𑀁 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀓𑁆𑀔𑀲𑁂𑀦𑀸𑀧𑀢𑀻𑀦𑀁 𑀬𑁂 𑀫𑀦𑀲𑁆𑀲𑀸, 𑀢𑁂𑀲’’𑀦𑁆𑀢𑀺. 𑀆𑀡𑀸𑀬 𑀅𑀯𑀭𑁄𑀥𑀺𑀢𑀼𑀧𑀘𑀸𑀭𑀸 𑀅𑀯𑀭𑀼𑀤𑁆𑀥𑀸, 𑀢𑁂 𑀧𑀦 𑀆𑀡𑀸𑀯𑀢𑁄 𑀧𑀘𑁆𑀘𑀢𑁆𑀣𑀺𑀓𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 ‘‘𑀧𑀘𑁆𑀘𑀸𑀫𑀺𑀢𑁆𑀢𑀸 𑀯𑁂𑀭𑀺𑀦𑁄’’𑀢𑀺 𑀯𑀼𑀢𑁆𑀢𑀁. 𑀉𑀚𑁆𑀛𑀸𑀧𑁂𑀢𑀩𑁆𑀩𑀦𑁆𑀢𑀺 𑀳𑁂𑀝𑁆𑀞𑀸 𑀓𑀢𑁆𑀯𑀸 𑀘𑀺𑀦𑁆𑀢𑀸𑀧𑁂𑀢𑀩𑁆𑀩𑀁, 𑀢𑀁 𑀧𑀦 𑀉𑀚𑁆𑀛𑀸𑀧𑀦𑀁 𑀢𑁂𑀲𑀁 𑀦𑀻𑀘𑀓𑀺𑀭𑀺𑀬𑀸𑀬 𑀚𑀸𑀦𑀸𑀧𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀚𑀸𑀦𑀸𑀧𑁂𑀢𑀩𑁆𑀩𑀸’’𑀢𑀺.

𑀧𑀭𑀺𑀢𑁆𑀢𑀧𑀭𑀺𑀓𑀫𑁆𑀫𑀓𑀣𑀸𑀯𑀡𑁆𑀡𑀦𑀸

𑀧𑀭𑀺𑀢𑁆𑀢𑀲𑁆𑀲 𑀧𑀭𑀺𑀓𑀫𑁆𑀫𑀁 𑀓𑀣𑁂𑀢𑀩𑁆𑀩𑀦𑁆𑀢𑀺 𑀆𑀝𑀸𑀦𑀸𑀝𑀺𑀬𑀧𑀭𑀺𑀢𑁆𑀢𑀲𑁆𑀲 𑀧𑀭𑀺𑀓𑀫𑁆𑀫𑀁 𑀧𑀼𑀩𑁆𑀩𑀼𑀧𑀘𑀸𑀭𑀝𑁆𑀞𑀸𑀦𑀺𑀬𑀁 𑀫𑁂𑀢𑁆𑀢𑀲𑀼𑀢𑁆𑀢𑀸𑀤𑀺 𑀓𑀣𑁂𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀢𑀁 𑀮𑀤𑁆𑀥𑀸𑀲𑁂𑀯𑀦𑀁 𑀳𑀼𑀢𑁆𑀯𑀸 𑀢𑁂𑀚𑀯𑀦𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀧𑀞𑀫𑀫𑁂𑀯 𑀳𑀻’’𑀢𑀺𑀆𑀤𑀺. 𑀧𑀺𑀝𑁆𑀞𑀁 𑀯𑀸 𑀫𑀁𑀲𑀁 𑀯𑀸𑀢𑀺 𑀯𑀸-𑀲𑀤𑁆𑀤𑁄 𑀅𑀦𑀺𑀬𑀫𑀢𑁆𑀣𑁄, 𑀢𑁂𑀦 𑀫𑀘𑁆𑀙𑀖𑀢𑀲𑀽𑀧𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀑𑀢𑀸𑀭𑀁 𑀮𑀪𑀦𑁆𑀢𑀺 𑀅𑀢𑁆𑀢𑀦𑀸 𑀧𑀺𑀬𑀸𑀬𑀺𑀢𑀩𑁆𑀩𑀆𑀳𑀸𑀭𑀯𑀲𑁂𑀦 𑀧𑀺𑀬𑀸𑀬𑀺𑀢𑀩𑁆𑀩𑀝𑁆𑀞𑀸𑀦𑀯𑀲𑁂𑀦 𑀘. ‘‘𑀧𑀭𑀺𑀢𑁆𑀢…𑀧𑁂… 𑀦𑀺𑀲𑀻𑀤𑀺𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸𑀯 𑀧𑀭𑀺𑀢𑁆𑀢𑀓𑀸𑀭𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀲𑀼𑀤𑁆𑀥𑀺𑀧𑀺 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺.

‘‘𑀧𑀭𑀺𑀢𑁆𑀢𑀓𑀸𑀭𑀓𑁄…𑀧𑁂… 𑀲𑀫𑁆𑀧𑀭𑀺𑀯𑀸𑀭𑀺𑀢𑁂𑀦𑀸’’𑀢𑀺 𑀇𑀤𑀁 𑀧𑀭𑀺𑀢𑁆𑀢𑀓𑀭𑀡𑁂 𑀩𑀸𑀳𑀺𑀭𑀭𑀓𑁆𑀔𑀸𑀲𑀁𑀯𑀺𑀥𑀸𑀦𑀁. ‘‘𑀫𑁂𑀢𑁆𑀢𑀘𑀺𑀢𑁆𑀢𑀁 …𑀧𑁂… 𑀓𑀸𑀢𑀩𑁆𑀩’’𑀦𑁆𑀢𑀺 𑀇𑀤𑀁 𑀅𑀩𑁆𑀪𑀦𑁆𑀢𑀭𑀭𑀓𑁆𑀔𑀸 𑀉𑀪𑀬𑀢𑁄 𑀭𑀓𑁆𑀔𑀸𑀲𑀁𑀯𑀺𑀥𑀸𑀦𑀁. 𑀏𑀯𑀜𑁆𑀳𑀺 𑀅𑀫𑀦𑀼𑀲𑁆𑀲𑀸 𑀧𑀭𑀺𑀢𑁆𑀢𑀓𑀭𑀡𑀲𑁆𑀲 𑀅𑀦𑁆𑀢𑀭𑀸𑀬𑀁 𑀓𑀸𑀢𑀼𑀁 𑀦 𑀯𑀺𑀲𑀳𑀦𑁆𑀢𑀺. 𑀫𑀗𑁆𑀕𑀮𑀓𑀣𑀸 𑀯𑀢𑁆𑀢𑀩𑁆𑀩𑀸 𑀧𑀼𑀩𑁆𑀩𑀼𑀧𑀘𑀸𑀭𑀯𑀲𑁂𑀦. 𑀲𑀩𑁆𑀩𑀲𑀦𑁆𑀦𑀺𑀧𑀸𑀢𑁄𑀢𑀺 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂, 𑀢𑀲𑁆𑀫𑀺𑀁 𑀯𑀸 𑀕𑀸𑀫𑀔𑁂𑀢𑁆𑀢𑁂 𑀲𑀩𑁆𑀩𑁂𑀲𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀦𑀺𑀧𑀸𑀢𑁄. 𑀖𑁄𑀲𑁂𑀢𑀩𑁆𑀩𑁄,‘‘𑀘𑁂𑀢𑀺𑀬𑀗𑁆𑀕𑀡𑁂 𑀲𑀩𑁆𑀩𑁂𑀳𑀺 𑀲𑀦𑁆𑀦𑀺𑀧𑀢𑀺𑀢𑀩𑁆𑀩’’𑀦𑁆𑀢𑀺. 𑀅𑀦𑀸𑀕𑀦𑁆𑀢𑀼𑀁 𑀦𑀸𑀫 𑀦 𑀮𑀩𑁆𑀪𑀢𑀺 𑀅𑀫𑀦𑀼𑀲𑁆𑀲𑁂𑀦 𑀩𑀼𑀤𑁆𑀥𑀸𑀡𑀸𑀪𑀬𑁂𑀦, 𑀭𑀸𑀚𑀸𑀡𑀸𑀪𑀬𑁂𑀦 𑀘. 𑀕𑀳𑀺𑀢𑀓𑀸𑀧𑀤𑁂𑀲𑁂𑀦 𑀅𑀫𑀦𑀼𑀲𑁆𑀲𑁄𑀯 𑀧𑀼𑀘𑁆𑀙𑀺𑀢𑁄 𑀳𑁄𑀢𑀻𑀢𑀺 𑀆𑀳 ‘‘𑀅𑀫𑀦𑀼𑀲𑁆𑀲𑀕𑁆𑀕𑀳𑀺𑀢𑀓𑁄 ‘𑀢𑁆𑀯𑀁 𑀓𑁄 𑀦𑀸𑀫𑀸’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄’’𑀢𑀺. 𑀫𑀸𑀮𑀸𑀕𑀦𑁆𑀥𑀸𑀤𑀻𑀲𑀼 𑀧𑀽𑀚𑀦𑀢𑁆𑀣𑀁 𑀯𑀺𑀦𑀺𑀬𑀼𑀜𑁆𑀚𑀺𑀬𑀫𑀸𑀦𑁂𑀲𑀼. 𑀧𑀢𑁆𑀢𑀻𑀢𑀺 𑀢𑀼𑀬𑁆𑀳𑀁 𑀧𑀢𑁆𑀢𑀺𑀤𑀸𑀦𑀁. 𑀧𑀺𑀡𑁆𑀟𑀧𑀸𑀢𑁂 𑀧𑀢𑁆𑀢𑀻𑀢𑀺 𑀧𑀺𑀡𑁆𑀟𑀧𑀸𑀢𑁂 𑀤𑀺𑀬𑁆𑀬𑀫𑀸𑀦𑁂 𑀧𑀢𑁆𑀢𑀺𑀤𑀸𑀦𑀁. 𑀤𑁂𑀯𑀢𑀸𑀦𑀦𑁆𑀢𑀺 𑀬𑀓𑁆𑀔𑀲𑁂𑀦𑀸𑀧𑀢𑀻𑀦𑀁. 𑀧𑀭𑀺𑀢𑁆𑀢𑀁 𑀪𑀡𑀺𑀢𑀩𑁆𑀩𑀦𑁆𑀢𑀺 𑀏𑀢𑁆𑀣𑀸𑀧𑀺 ‘‘𑀫𑁂𑀢𑁆𑀢𑀘𑀺𑀢𑁆𑀢𑀁 𑀧𑀼𑀭𑁂𑀘𑀸𑀭𑀺𑀓𑀁 𑀓𑀢𑁆𑀯𑀸’’𑀢𑀺 𑀘 ‘‘𑀫𑀗𑁆𑀕𑀮𑀓𑀣𑀸 𑀯𑀢𑁆𑀢𑀩𑁆𑀩𑀸’’𑀢𑀺 𑀘 ‘‘𑀯𑀺𑀳𑀸𑀭𑀲𑁆𑀲 𑀉𑀧𑀯𑀦𑁂’’𑀢𑀺 𑀏𑀯𑀫𑀸𑀤𑀺 𑀘 𑀲𑀩𑁆𑀩𑀁 𑀕𑀺𑀳𑀻𑀦𑀁 𑀧𑀭𑀺𑀢𑁆𑀢𑀓𑀭𑀡𑁂 𑀯𑀼𑀢𑁆𑀢𑀁 𑀧𑀭𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀫𑁂𑀯.

𑀲𑀭𑀻𑀭𑁂 𑀅𑀥𑀺𑀫𑀼𑀘𑁆𑀘𑀢𑀻𑀢𑀺 𑀲𑀭𑀻𑀭𑀁 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀯𑀺𑀬 𑀆𑀯𑀺𑀲𑀦𑁆𑀢𑁄 𑀬𑀣𑀸 𑀕𑀳𑀺𑀢𑀓𑀲𑁆𑀲 𑀯𑀲𑁂𑀦 𑀦 𑀯𑀢𑁆𑀢𑀢𑀺, 𑀅𑀢𑁆𑀢𑀦𑁄 𑀏𑀯 𑀯𑀲𑁂𑀦 𑀯𑀢𑁆𑀢𑀢𑀺, 𑀏𑀯𑀁 𑀅𑀥𑀺𑀫𑀼𑀘𑁆𑀘𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀢𑁂𑀦𑀸𑀳 ‘‘𑀆𑀯𑀺𑀲𑀢𑀻𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦’’𑀦𑁆𑀢𑀺. 𑀮𑀕𑁆𑀕𑀢𑀻𑀢𑀺 𑀢𑀢𑁆𑀣𑁂𑀯 𑀮𑀕𑁆𑀕𑁄 𑀅𑀮𑁆𑀮𑀻𑀦𑁄 𑀳𑁄𑀢𑀺. 𑀢𑁂𑀦𑀸𑀳 ‘‘𑀦 𑀅𑀧𑁂𑀢𑀻’’𑀢𑀺. 𑀭𑁄𑀕𑀁 𑀯𑀟𑁆𑀠𑁂𑀦𑁆𑀢𑁄𑀢𑀺 𑀥𑀸𑀢𑀽𑀦𑀁 𑀲𑀫𑀪𑀸𑀯𑁂𑀦 𑀯𑀢𑁆𑀢𑀺𑀢𑀼𑀁 𑀅𑀧𑁆𑀧𑀤𑀸𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀭𑁄𑀕𑀁 𑀯𑀟𑁆𑀠𑁂𑀦𑁆𑀢𑁄. 𑀥𑀸𑀢𑀽𑀦𑀁 𑀯𑀺𑀲𑀫𑀪𑀸𑀯𑀸𑀧𑀢𑁆𑀢𑀺𑀬𑀸 𑀘 𑀆𑀳𑀸𑀭𑀲𑁆𑀲 𑀘 𑀅𑀭𑀼𑀘𑁆𑀘𑀦𑁂𑀦 𑀕𑀳𑀺𑀢𑀓𑀲𑁆𑀲 𑀲𑀭𑀻𑀭𑁂 𑀮𑁄𑀳𑀺𑀢𑀁 𑀲𑀼𑀲𑁆𑀲𑀢𑀺, 𑀫𑀁𑀲𑀁 𑀫𑀺𑀮𑀸𑀬𑀢𑀺, 𑀢𑀁 𑀧𑀦𑀲𑁆𑀲 𑀬𑀓𑁆𑀔𑁄 𑀥𑀸𑀢𑀼𑀓𑁆𑀔𑁄𑀪𑀦𑀺𑀫𑀺𑀢𑁆𑀢𑀢𑀸𑀬 𑀓𑀭𑁄𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀧𑁆𑀧𑀫𑀁𑀲𑀮𑁄𑀳𑀺𑀢𑀁 𑀓𑀭𑁄𑀦𑁆𑀢𑁄’’𑀢𑀺.

𑁨𑁮𑁩. 𑀢𑁂𑀲𑀁 𑀦𑀸𑀫𑀸𑀦𑀺 𑀇𑀦𑁆𑀤𑀸𑀤𑀺𑀦𑀸𑀫𑀪𑀸𑀯𑁂𑀦 𑀯𑁄𑀳𑀭𑀺𑀢𑀩𑁆𑀩𑀢𑁄. 𑀢𑀢𑁄𑀢𑀺 𑀢𑀢𑁄 𑀆𑀭𑁄𑀘𑀦𑀢𑁄 𑀧𑀭𑀁. 𑀢𑁂𑀢𑀺 𑀬𑀓𑁆𑀔𑀲𑁂𑀦𑀸𑀧𑀢𑀬𑁄. 𑀑𑀓𑀸𑀲𑁄 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀺𑀬𑁄, 𑀉𑀧𑀸𑀲𑀓𑀉𑀧𑀸𑀲𑀺𑀓𑀸𑀬𑁄 𑀯𑀺𑀳𑁂𑀞𑁂𑀢𑀼𑀁 𑀅𑀯𑀲𑀭𑁄 𑀦 𑀪𑀯𑀺𑀲𑁆𑀲𑀢𑀺 𑀲𑀫𑁆𑀫𑀤𑁂𑀯 𑀆𑀭𑀓𑁆𑀔𑀸𑀬 𑀯𑀺𑀳𑀺𑀢𑀢𑁆𑀢𑀸𑀢𑀺.

𑀆𑀝𑀸𑀦𑀸𑀝𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.