𑁧𑁦. 𑀲𑀗𑁆𑀕𑀻𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁯𑁬. 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀢𑀺 𑀩𑀼𑀤𑁆𑀥𑀔𑁂𑀢𑁆𑀢𑀪𑀽𑀢𑁂 𑀤𑀲𑀲𑀳𑀲𑁆𑀲𑀧𑀭𑀺𑀫𑀸𑀡𑁂 𑀘𑀓𑁆𑀓𑀯𑀸𑀴𑁂. 𑀢𑀢𑁆𑀣 𑀳𑀺 𑀇𑀫𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀤𑁂𑀯𑀫𑀦𑀼𑀲𑁆𑀲𑀸𑀬𑁂𑀯 𑀓𑀢𑀸𑀥𑀺𑀓𑀸𑀭𑀸, 𑀇𑀢𑀭𑁂𑀲𑀼 𑀤𑁂𑀯𑀸 𑀯𑀺𑀲𑁂𑀲𑀪𑀸𑀕𑀺𑀦𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀜𑀸𑀡𑀚𑀸𑀮𑀁 𑀧𑀢𑁆𑀣𑀭𑀺𑀢𑁆𑀯𑀸’’𑀢𑀺. 𑀜𑀸𑀡𑀚𑀸𑀮𑀧𑀢𑁆𑀣𑀭𑀡𑀦𑁆𑀢𑀺 𑀘 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀆𑀲𑀬𑀸𑀤𑀺𑀯𑀺𑀪𑀸𑀯𑀦𑀯𑀲𑁂𑀦 𑀜𑀸𑀡𑀲𑁆𑀲 𑀧𑀯𑀢𑁆𑀢𑀦𑀫𑁂𑀯. 𑀢𑁂𑀦𑀸𑀳 ‘‘𑀮𑁄𑀓𑀁 𑀯𑁄𑀮𑁄𑀓𑀬𑀫𑀸𑀦𑁄’’𑀢𑀺, 𑀲𑀢𑁆𑀢𑀮𑁄𑀓𑀁 𑀩𑁆𑀬𑀯𑀮𑁄𑀓𑀬𑀫𑀸𑀦𑁄 𑀆𑀲𑀬𑀸𑀦𑀼𑀲𑀬𑀘𑀭𑀺𑀢𑀸𑀥𑀺𑀫𑀼𑀢𑁆𑀢𑀺𑀆𑀤𑀺𑀓𑁂 𑀯𑀺𑀲𑁂𑀲𑀢𑁄 𑀑𑀕𑀸𑀳𑁂𑀢𑁆𑀯𑀸 𑀧𑀲𑁆𑀲𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀫𑀗𑁆𑀕𑀮𑀁 𑀪𑀡𑀸𑀧𑁂𑀲𑁆𑀲𑀦𑁆𑀢𑀺 ‘‘𑀢𑀁 𑀢𑁂𑀲𑀁 𑀆𑀬𑀢𑀺𑀁 𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀯𑀺𑀚𑁆𑀚𑀸𑀝𑁆𑀞𑀸𑀦𑀁 𑀳𑀼𑀢𑁆𑀯𑀸 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀸’’𑀢𑀺. 𑀢𑀻𑀳𑀺 𑀧𑀺𑀝𑀓𑁂𑀳𑀺 𑀲𑀫𑁆𑀫𑀲𑀺𑀢𑁆𑀯𑀸𑀢𑀺 𑀢𑀺𑀧𑀺𑀝𑀓𑀢𑁄 𑀏𑀓𑀓𑀤𑀼𑀓𑀸𑀤𑀺𑀦𑀸 𑀲𑀗𑁆𑀕𑀳𑁂𑀢𑀩𑁆𑀩𑀲𑁆𑀲 𑀲𑀗𑁆𑀕𑀡𑁆𑀳𑀦𑀯𑀲𑁂𑀦 𑀲𑀫𑁆𑀫𑀲𑀺𑀢𑁆𑀯𑀸 𑀯𑀻𑀫𑀁𑀲𑀺𑀢𑁆𑀯𑀸. 𑀜𑀸𑀢𑀼𑀁 𑀇𑀘𑁆𑀙𑀺𑀢𑀸 𑀅𑀢𑁆𑀣𑀸 𑀧𑀜𑁆𑀳𑀸, 𑀢𑁂 𑀧𑀦 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀏𑀓𑀓𑀸𑀤𑀺𑀯𑀲𑁂𑀦 𑀆𑀕𑀢𑀸 𑀲𑀳𑀲𑁆𑀲𑀁, 𑀘𑀼𑀤𑁆𑀤𑀲 𑀘𑀸𑀢𑀺 𑀆𑀳 ‘‘𑀘𑀼𑀤𑁆𑀤𑀲𑀧𑀜𑁆𑀳𑀸𑀥𑀺𑀓𑁂𑀦 𑀧𑀜𑁆𑀳𑀲𑀳𑀲𑁆𑀲𑁂𑀦 𑀧𑀝𑀺𑀫𑀡𑁆𑀟𑁂𑀢𑁆𑀯𑀸’’𑀢𑀺. 𑀏𑀯𑀫𑀺𑀥 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀤𑀲𑁆𑀲𑀺𑀢𑁂 𑀧𑀜𑁆𑀳𑁂 𑀧𑀭𑀢𑁄 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 ‘‘𑀏𑀓𑀓𑀯𑀲𑁂𑀦 𑀤𑁆𑀯𑁂 𑀧𑀜𑁆𑀳𑀸 𑀓𑀣𑀺𑀢𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑀅𑀝𑁆𑀞. 𑁩.𑁩𑁪𑁯) 𑀯𑀺𑀪𑀸𑀕𑁂𑀦 𑀧𑀭𑀺𑀕𑀡𑁂𑀢𑁆𑀯𑀸 𑀲𑀬𑀫𑁂𑀯 𑀤𑀲𑁆𑀲𑁂𑀲𑁆𑀲𑀢𑀺.

𑀉𑀩𑁆𑀪𑀢𑀓𑀦𑀯𑀲𑀦𑁆𑀥𑀸𑀕𑀸𑀭𑀯𑀡𑁆𑀡𑀦𑀸

𑁨𑁯𑁭. 𑀉𑀘𑁆𑀘𑀸𑀥𑀺𑀝𑁆𑀞𑀸𑀦𑀢𑀸𑀬 𑀢𑀁 𑀲𑀦𑁆𑀥𑀸𑀕𑀸𑀭𑀁 𑀪𑀽𑀫𑀺𑀢𑁄 𑀉𑀩𑁆𑀪𑀢𑀁 𑀯𑀺𑀬𑀸𑀢𑀺 ‘‘𑀉𑀩𑁆𑀪𑀢𑀓’’𑀦𑁆𑀢𑀺 𑀦𑀸𑀫𑀁 𑀮𑀪𑀢𑀺. 𑀢𑁂𑀦𑀸𑀳 ‘‘𑀉𑀘𑁆𑀘𑀢𑁆𑀢𑀸 𑀯𑀸 𑀏𑀯𑀁 𑀯𑀼𑀢𑁆𑀢’’𑀦𑁆𑀢𑀺. 𑀲𑀦𑁆𑀥𑀸𑀕𑀸𑀭𑀲𑀸𑀮𑀸𑀢𑀺 𑀏𑀓𑀸 𑀫𑀳𑀸𑀲𑀸𑀮𑀸. 𑀉𑀬𑁆𑀬𑁄𑀕𑀓𑀭𑀡𑀸𑀤𑀻𑀲𑀼 𑀳𑀺 𑀭𑀸𑀚𑀸𑀦𑁄 𑀢𑀢𑁆𑀣 𑀞𑀢𑁆𑀯𑀸 ‘‘𑀏𑀢𑁆𑀢𑀓𑀸 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀼, 𑀏𑀢𑁆𑀢𑀓𑀸 𑀧𑀘𑁆𑀙𑀸’’𑀢𑀺𑀆𑀤𑀺𑀦𑀸 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀲𑀦𑁆𑀥𑀁 𑀓𑀭𑁄𑀦𑁆𑀢𑀺 𑀫𑀭𑀺𑀬𑀸𑀤𑀁 𑀩𑀦𑁆𑀥𑀦𑁆𑀢𑀺, 𑀢𑀲𑁆𑀫𑀸 𑀢𑀁 𑀞𑀸𑀦𑀁 ‘‘𑀲𑀦𑁆𑀥𑀸𑀕𑀸𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀉𑀬𑁆𑀬𑁄𑀕𑀝𑁆𑀞𑀸𑀦𑀢𑁄 𑀘 𑀆𑀕𑀦𑁆𑀢𑁆𑀯𑀸 𑀬𑀸𑀯 𑀕𑁂𑀳𑀁 𑀕𑁄𑀫𑀬𑀧𑀭𑀺𑀪𑀡𑁆𑀟𑀸𑀤𑀺𑀯𑀲𑁂𑀦 𑀧𑀝𑀺𑀚𑀕𑁆𑀕𑀦𑀁 𑀓𑀭𑁄𑀦𑁆𑀢𑀺, 𑀢𑀸𑀯 𑀏𑀓𑀁 𑀤𑁆𑀯𑁂 𑀤𑀺𑀯𑀲𑁂 𑀢𑁂 𑀭𑀸𑀚𑀸𑀦𑁄 𑀢𑀢𑁆𑀣 𑀲𑀦𑁆𑀣𑀫𑁆𑀪𑀦𑁆𑀢𑀻𑀢𑀺𑀧𑀺 𑀲𑀦𑁆𑀥𑀸𑀕𑀸𑀭𑀁, 𑀢𑁂𑀲𑀁 𑀭𑀸𑀚𑀽𑀦𑀁 𑀲𑀳 𑀅𑀢𑁆𑀣𑀸𑀦𑀼𑀲𑀸𑀲𑀦𑀅𑀕𑀸𑀭𑀦𑁆𑀢𑀺𑀧𑀺 𑀲𑀦𑁆𑀥𑀸𑀕𑀸𑀭𑀦𑁆𑀢𑀺. 𑀬𑀲𑁆𑀫𑀸 𑀯𑀸 𑀢𑁂 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀓𑀲𑀺𑀢𑀼𑀁 𑀯𑀝𑁆𑀝𑀢𑀺, 𑀇𑀫𑀲𑁆𑀫𑀺𑀁 𑀓𑀸𑀮𑁂𑀯𑀧𑀺𑀢𑀼’’𑀦𑁆𑀢𑀺𑀆𑀤𑀺𑀦𑀸 𑀖𑀭𑀸𑀯𑀸𑀲𑀓𑀺𑀘𑁆𑀘𑀁 𑀲𑀦𑁆𑀥𑀭𑀦𑁆𑀢𑀺, 𑀢𑀲𑁆𑀫𑀸 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀁 𑀖𑀭𑀸𑀯𑀸𑀲𑀁 𑀢𑀢𑁆𑀣 𑀲𑀦𑁆𑀥𑀭𑀦𑁆𑀢𑀻𑀢𑀺𑀧𑀺 𑀲𑀦𑁆𑀥𑀸𑀕𑀸𑀭𑀁, 𑀲𑀸 𑀏𑀯 𑀲𑀸𑀮𑀸𑀢𑀺 𑀲𑀦𑁆𑀥𑀸𑀕𑀸𑀭𑀲𑀸𑀮𑀸. 𑀤𑁂𑀯𑀢𑀸𑀢𑀺 𑀖𑀭𑀤𑁂𑀯𑀢𑀸. 𑀦𑀺𑀯𑀸𑀲𑀯𑀲𑁂𑀦 𑀅𑀦𑀚𑁆𑀛𑀸𑀯𑀼𑀢𑁆𑀣𑀢𑁆𑀢𑀸 ‘‘𑀓𑁂𑀦𑀘𑀺 𑀯𑀸 𑀫𑀦𑀼𑀲𑁆𑀲𑀪𑀽𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀓𑀫𑁆𑀫𑀓𑀭𑀡𑀯𑀲𑁂𑀦 𑀧𑀦 𑀫𑀦𑀼𑀲𑁆𑀲𑀸 𑀢𑀢𑁆𑀣 𑀦𑀺𑀲𑀚𑁆𑀚𑀸𑀤𑀻𑀦𑀺 𑀓𑀧𑁆𑀧𑁂𑀲𑀼𑀫𑁂𑀯. ‘‘𑀲𑀬𑀫𑁂𑀯 𑀧𑀦 𑀲𑀢𑁆𑀣𑀼 𑀇𑀥𑀸𑀕𑀫𑀦𑀁 𑀅𑀫𑁆𑀳𑀸𑀓𑀁 𑀧𑀼𑀜𑁆𑀜𑀯𑀲𑁂𑀦𑁂𑀯, 𑀅𑀳𑁄 𑀫𑀬𑀁 𑀧𑀼𑀜𑁆𑀜𑀯𑀦𑁆𑀢𑁄’’𑀢𑀺 𑀳𑀝𑁆𑀞𑀢𑀼𑀝𑁆𑀞𑀸 𑀏𑀯𑀁 𑀲𑀫𑁆𑀫𑀸 𑀘𑀺𑀦𑁆𑀢𑁂𑀲𑀼𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀫𑁆𑀳𑁂𑀳𑀻’’𑀢𑀺𑀆𑀤𑀺𑀫𑀸𑀳.

𑁨𑁯𑁮. 𑀅𑀝𑁆𑀝𑀓𑀸𑀢𑀺 𑀘𑀺𑀢𑁆𑀢𑀓𑀫𑁆𑀫𑀓𑀭𑀡𑀢𑁆𑀣𑀁 𑀩𑀤𑁆𑀥𑀸 𑀫𑀜𑁆𑀘𑀓𑀸. 𑀫𑀼𑀢𑁆𑀢𑀫𑀢𑁆𑀢𑀸𑀢𑀺 𑀢𑀸𑀯𑀤𑁂𑀯 𑀲𑀦𑁆𑀥𑀸𑀕𑀸𑀭𑁂 𑀦𑀯𑀓𑀫𑁆𑀫𑀲𑁆𑀲 𑀦𑀺𑀝𑁆𑀞𑀸𑀧𑀺𑀢𑀪𑀸𑀯𑀫𑀸𑀳, 𑀢𑁂𑀦‘‘𑀅𑀘𑀺𑀭𑀓𑀸𑀭𑀺𑀢’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀺. 𑀅𑀭𑀜𑁆𑀜𑀁 𑀆𑀭𑀸𑀫𑁄 𑀆𑀭𑀫𑀺𑀢𑀩𑁆𑀩𑀝𑁆𑀞𑀸𑀦𑀁 𑀏𑀢𑁂𑀲𑀦𑁆𑀢𑀺 𑀅𑀭𑀜𑁆𑀜𑀸𑀭𑀸𑀫𑀸. 𑀲𑀦𑁆𑀣𑀭𑀡𑀁 𑀲𑀦𑁆𑀣𑀭𑀺, 𑀲𑀩𑁆𑀩𑁄 𑀲𑀓𑀮𑁄 𑀲𑀦𑁆𑀣𑀭𑀺 𑀏𑀢𑁆𑀣𑀸𑀢𑀺 𑀲𑀩𑁆𑀩𑀲𑀦𑁆𑀣𑀭𑀺, 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄𑀬𑀁. 𑀢𑁂𑀦𑀸𑀳 ‘‘𑀬𑀣𑀸 𑀲𑀩𑁆𑀩𑀁 𑀲𑀦𑁆𑀣𑀢𑀁 𑀳𑁄𑀢𑀺, 𑀏𑀯’’𑀦𑁆𑀢𑀺.

𑁨𑁯𑁯. 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑁄𑀢𑀺 𑀲𑀫𑀦𑁆𑀢𑀢𑁄 𑀲𑀩𑁆𑀩𑀪𑀸𑀕𑁂𑀦 𑀧𑀲𑀸𑀤𑀸𑀯𑀳𑁄 𑀘𑀸𑀢𑀼𑀭𑀺𑀬𑀲𑁄. ‘‘𑀅𑀲𑀻𑀢𑀺𑀳𑀢𑁆𑀣𑀁 𑀞𑀸𑀦𑀁 𑀕𑀡𑁆𑀳𑀸𑀢𑀻’’𑀢𑀺 𑀇𑀤𑀁 𑀩𑀼𑀤𑁆𑀥𑀸𑀦𑀁 𑀓𑀸𑀬𑀧𑁆𑀧𑀪𑀸𑀬 𑀧𑀓𑀢𑀺𑀬𑀸 𑀅𑀲𑀻𑀢𑀺𑀳𑀢𑁆𑀣𑁂 𑀞𑀸𑀦𑁂 𑀅𑀪𑀺𑀩𑁆𑀬𑀸𑀧𑀦𑀢𑁄 𑀯𑀼𑀢𑁆𑀢𑀁. 𑀇𑀤𑁆𑀥𑀸𑀦𑀼𑀪𑀸𑀯𑁂𑀦 𑀧𑀦 𑀅𑀦𑀦𑁆𑀢𑀁 𑀅𑀧𑀭𑀺𑀫𑀸𑀡𑀁 𑀞𑀸𑀦𑀁 𑀯𑀺𑀚𑁆𑀚𑁄𑀢𑀢𑁂𑀯. 𑀦𑀻𑀮𑀧𑀻𑀢𑀮𑁄𑀳𑀺𑀢𑁄𑀤𑀸𑀢𑀫𑀜𑁆𑀚𑀝𑁆𑀞𑀧𑀪𑀲𑁆𑀲𑀭𑀯𑀲𑁂𑀦 𑀙𑀩𑁆𑀩𑀡𑁆𑀡𑀸. 𑀲𑀩𑁆𑀩𑁂 𑀤𑀺𑀲𑀸𑀪𑀸𑀕𑀸𑀢𑀺 𑀲𑀭𑀻𑀭𑀧𑁆𑀧𑀪𑀸𑀬 𑀩𑀸𑀳𑀼𑀮𑁆𑀮𑀢𑁄 𑀯𑀼𑀢𑁆𑀢𑀁.

𑀅𑀩𑁆𑀪𑀫𑀳𑀺𑀓𑀸𑀤𑀻𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀲𑀼𑀜𑁆𑀜𑀁 𑀦 𑀲𑁄𑀪𑀢𑀺, 𑀢𑀸𑀭𑀓𑀸𑀘𑀺𑀢𑀁 𑀧𑀦 𑀅𑀦𑁆𑀢𑀮𑀺𑀓𑁆𑀔𑀁 𑀢𑀸𑀲𑀁 𑀧𑀪𑀸𑀳𑀺 𑀲𑀫𑀦𑁆𑀢𑀢𑁄 𑀯𑀺𑀚𑁆𑀚𑁄𑀢𑀫𑀸𑀦𑀁 𑀯𑀺𑀭𑁄𑀘𑀢𑀻𑀢𑀺 𑀆𑀳 ‘‘𑀲𑀫𑀼𑀕𑁆𑀕𑀢𑀢𑀸𑀭𑀓𑀁 𑀯𑀺𑀬 𑀕𑀕𑀦𑀢𑀮’’𑀦𑁆𑀢𑀺. 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑁄𑀢𑀺 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀸𑀔𑀕𑁆𑀕𑀸 𑀨𑀼𑀮𑁆𑀮𑁄. ‘‘𑀧𑀝𑀺𑀧𑀸𑀝𑀺𑀬𑀸𑀞𑀧𑀺𑀢𑀸𑀦’’𑀦𑁆𑀢𑀺𑀆𑀤𑀺 𑀧𑀭𑀺𑀓𑀧𑁆𑀧𑀽𑀧𑀫𑀸. 𑀢𑀣𑀸 𑀳𑀺 𑀯𑀺𑀬-𑀲𑀤𑁆𑀤𑀕𑁆𑀕𑀳𑀡𑀁 𑀓𑀢𑀁. 𑀲𑀺𑀭𑀺𑀬𑀸 𑀲𑀺𑀭𑀺𑀁 𑀅𑀪𑀺𑀪𑀯𑀫𑀸𑀦𑀁 𑀯𑀺𑀬𑀸𑀢𑀺 𑀅𑀢𑁆𑀢𑀦𑁄 𑀲𑁄𑀪𑀸𑀬 𑀢𑁂𑀲𑀁 𑀲𑁄𑀪𑀦𑁆𑀢𑀺 𑀅𑀢𑁆𑀣𑁄. ‘‘𑀪𑀺𑀓𑁆𑀔𑀽𑀧𑀺 𑀲𑀩𑁆𑀩𑁂𑀯𑀸’’𑀢𑀺 𑀇𑀤𑀁 𑀦𑁂𑀲𑀁 ‘‘𑀅𑀧𑁆𑀧𑀺𑀘𑁆𑀙𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀕𑀼𑀡𑁂𑀲𑀼 𑀮𑁄𑀓𑀺𑀬𑀕𑀼𑀡𑀸𑀦𑀁 𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀦 𑀳𑀺 𑀢𑁂 𑀲𑀩𑁆𑀩𑁂𑀯 𑀤𑀲𑀓𑀣𑀸𑀯𑀢𑁆𑀣𑀼𑀮𑀸𑀪𑀺𑀦𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀼𑀢𑁆𑀢𑀦𑁆𑀢𑀁 𑀆𑀯𑀚𑁆𑀚𑁂𑀢𑁆𑀯𑀸…𑀧𑁂… 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀻’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁩.𑁨𑁯𑁬). 𑀢𑀲𑁆𑀫𑀸 𑀬𑁂 𑀢𑀢𑁆𑀣 𑀅𑀭𑀺𑀬𑀸, 𑀢𑁂 𑀲𑀩𑁆𑀩𑁂𑀲𑀫𑁆𑀧𑀺 𑀧𑀤𑀸𑀦𑀁 𑀯𑀲𑁂𑀦 𑀩𑁄𑀥𑀺𑀢𑀸 𑀳𑁄𑀦𑁆𑀢𑀺. 𑀬𑁂 𑀧𑀦 𑀧𑀼𑀣𑀼𑀚𑁆𑀚𑀦𑀸, 𑀢𑁂 𑀮𑁄𑀓𑀺𑀬𑀕𑀼𑀡𑀤𑀻𑀧𑀓𑁂𑀳𑀺 𑀧𑀤𑁂𑀳𑀻𑀢𑀺 𑀦 𑀢𑀣𑀸 𑀳𑁂𑀝𑁆𑀞𑀸 ‘‘𑀅𑀲𑀻𑀢𑀺𑀫𑀳𑀸𑀣𑁂𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀼𑀩𑁆𑀩𑁂 𑀅𑀭𑀳𑀢𑁆𑀢𑀪𑀸𑀕𑀺𑀦𑁄 𑀕𑀳𑀺𑀢𑀸.

𑀭𑀽𑀧𑀓𑀸𑀬𑀲𑁆𑀲 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦-𑀧𑀝𑀺𑀫𑀡𑁆𑀟𑀺𑀢-𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀓𑀸𑀬𑀧𑁆𑀧𑀪𑀸𑀩𑁆𑀬𑀸𑀫𑀧𑁆𑀧𑀪𑀸𑀓𑁂𑀢𑀼𑀫𑀸𑀮𑀸𑀯𑀺𑀘𑀺𑀢𑁆𑀢𑀢𑀸𑀯 (𑀤𑀻. 𑀦𑀺. 𑁨.𑁩𑁩; 𑁩.𑁨𑁦𑁦; 𑀫. 𑀦𑀺. 𑁨.𑁩𑁮𑁫) 𑀩𑀼𑀤𑁆𑀥𑀯𑁂𑀲𑁄. 𑀙𑀩𑁆𑀩𑀡𑁆𑀡𑀸 𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀲𑁆𑀲 𑀪𑀕𑀯𑀢𑁄 𑀓𑀸𑀬𑀲𑁆𑀲 𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑀸𑀤𑀻𑀲𑀼 𑀧𑀭𑀫𑀼𑀓𑁆𑀓𑀁𑀲𑀕𑀢𑁄 𑀩𑀼𑀤𑁆𑀥𑀸𑀯𑁂𑀡𑀺𑀓𑁄 𑀅𑀘𑁆𑀘𑀦𑁆𑀢𑀼𑀧𑀲𑀫𑁄 𑀩𑀼𑀤𑁆𑀥𑀯𑀺𑀮𑀸𑀲𑁄. 𑀅𑀲𑁆𑀲𑀦𑁆𑀢𑀺 𑀢𑀲𑁆𑀲𑀁.

𑀲𑀦𑁆𑀥𑀸𑀕𑀸𑀭𑀸𑀦𑀼𑀫𑁄𑀤𑀦𑀧𑀝𑀺𑀲𑀁𑀬𑀼𑀢𑁆𑀢𑀸𑀢𑀺 ‘‘𑀲𑀻𑀢𑀁 𑀉𑀡𑁆𑀳𑀁 𑀧𑀝𑀺𑀳𑀦𑁆𑀢𑀻’’𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑁨𑁯𑁫, 𑁩𑁧𑁫) 𑀦𑀬𑁂𑀦 𑀲𑀦𑁆𑀥𑀸𑀕𑀸𑀭𑀕𑀼𑀡𑀽𑀧𑀲𑀜𑁆𑀳𑀺𑀢𑀸 𑀲𑀦𑁆𑀥𑀸𑀕𑀸𑀭𑀓𑀭𑀡𑀧𑀼𑀜𑁆𑀜𑀸𑀦𑀺𑀲𑀁𑀲𑀪𑀸𑀯𑀺𑀦𑀻. 𑀧𑀓𑀺𑀡𑁆𑀡𑀓𑀓𑀣𑀸𑀢𑀺 𑀲𑀗𑁆𑀕𑀻𑀢𑀺𑀅𑀦𑀸𑀭𑀼𑀴𑁆𑀳𑀸 𑀲𑀼𑀡𑀦𑁆𑀢𑀸𑀦𑀁 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀢𑀸𑀬 𑀯𑀺𑀯𑀺𑀥𑀯𑀺𑀧𑀼𑀮𑀳𑁂𑀢𑀽𑀧𑀫𑀸𑀲𑀫𑀸𑀮𑀗𑁆𑀓𑀢𑀸 𑀦𑀸𑀦𑀸𑀦𑀬𑀯𑀺𑀘𑀺𑀢𑁆𑀢𑀸 𑀯𑀺𑀢𑁆𑀣𑀸𑀭𑀓𑀣𑀸. 𑀢𑁂𑀦𑀸𑀳 ‘‘𑀢𑀤𑀸 𑀳𑀻’’𑀢𑀺𑀆𑀤𑀺. 𑀆𑀓𑀸𑀲𑀕𑀗𑁆𑀕𑀁 𑀑𑀢𑀸𑀭𑁂𑀦𑁆𑀢𑁄 𑀯𑀺𑀬 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀢𑀸𑀬 𑀲𑀼𑀯𑀺𑀲𑀼𑀤𑁆𑀥𑁂𑀦, 𑀯𑀺𑀧𑀼𑀮𑁄𑀤𑀸𑀭𑀢𑀸𑀬 𑀅𑀧𑀭𑀺𑀫𑁂𑀬𑁆𑀬𑁂𑀦 𑀘 𑀅𑀢𑁆𑀣𑁂𑀦 𑀲𑀼𑀡𑀦𑁆𑀢𑀸𑀦𑀁 𑀓𑀸𑀬𑀘𑀺𑀢𑁆𑀢𑀧𑀭𑀺𑀴𑀸𑀳𑀯𑀽𑀧𑀲𑀫𑀦𑀢𑁄. 𑀧𑀣𑀯𑁄𑀚𑀁 𑀆𑀓𑀟𑁆𑀠𑀦𑁆𑀢𑁄 𑀯𑀺𑀬 𑀅𑀜𑁆𑀜𑁂𑀲𑀁 𑀲𑀼𑀤𑀼𑀓𑁆𑀓𑀭𑀢𑀸𑀬, 𑀫𑀳𑀸𑀲𑀸𑀭𑀢𑀸𑀬 𑀯𑀸 𑀅𑀢𑁆𑀣𑀲𑁆𑀲. 𑀫𑀳𑀸𑀚𑀫𑁆𑀩𑀼𑀁 𑀫𑀢𑁆𑀣𑀓𑁂 𑀕𑀳𑁂𑀢𑁆𑀯𑀸 𑀘𑀸𑀮𑁂𑀦𑁆𑀢𑁄 𑀯𑀺𑀬 𑀘𑀸𑀮𑀦𑀧𑀘𑁆𑀘𑀬𑀝𑁆𑀞𑀸𑀦𑀯𑀲𑁂𑀦 𑀧𑀼𑀩𑁆𑀩𑁂𑀦𑀸𑀧𑀭𑀁 𑀅𑀦𑀼𑀲𑀦𑁆𑀥𑀸𑀦𑀢𑁄. 𑀬𑁄𑀚𑀦𑀺𑀬…𑀧𑁂… 𑀧𑀸𑀬𑀫𑀸𑀦𑁄 𑀯𑀺𑀬 𑀤𑁂𑀲𑀦𑀁 𑀘𑀢𑀼𑀲𑀘𑁆𑀘𑀬𑀦𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀢𑁆𑀣𑀯𑁂𑀤𑀥𑀫𑁆𑀫𑀯𑁂𑀤𑀲𑁆𑀲𑁂𑀯 𑀮𑀪𑀸𑀧𑀦𑁂𑀦 𑀲𑀸𑀢𑀫𑀥𑀼𑀭𑀥𑀫𑁆𑀫𑀸𑀫𑀢𑀭𑀲𑀽𑀧𑀲𑀁𑀳𑀭𑀡𑀢𑁄. 𑀫𑀥𑀼𑀕𑀡𑁆𑀟𑀦𑁆𑀢𑀺 𑀫𑀥𑀼𑀧𑀝𑀮𑀁.

𑁩𑁦𑁦. ‘‘𑀢𑀼𑀡𑁆𑀳𑀻𑀪𑀽𑀢𑀁 𑀢𑀼𑀡𑁆𑀳𑀻𑀪𑀽𑀢’’𑀦𑁆𑀢𑀺 𑀩𑁆𑀬𑀸𑀧𑀦𑀺𑀘𑁆𑀙𑀸𑀬𑀁 𑀇𑀤𑀁 𑀆𑀫𑁂𑀟𑀺𑀢𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀁 𑀬𑀦𑁆𑀤𑀺𑀲’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸𑀢𑀺 𑀏𑀢𑁆𑀣 𑀅𑀦𑀼-𑀲𑀤𑁆𑀤𑁄 ‘‘𑀧𑀭𑀻’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑁄, 𑀯𑀺𑀮𑁄𑀓𑀦𑀜𑁆𑀘𑁂𑀢𑁆𑀣 𑀲𑀢𑁆𑀣𑀼 𑀘𑀓𑁆𑀔𑀼𑀤𑁆𑀯𑀬𑁂𑀦𑀧𑀺 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 ‘‘𑀫𑀁𑀲𑀘𑀓𑁆𑀔𑀼𑀦𑀸…𑀧𑁂… 𑀢𑀢𑁄 𑀢𑀢𑁄 𑀯𑀺𑀮𑁄𑀓𑁂𑀢𑁆𑀯𑀸’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀢𑁆𑀯𑀸 𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀫𑀁𑀲𑀘𑀓𑁆𑀔𑀼𑀦𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀳𑀢𑁆𑀣𑁂𑀦 𑀓𑀼𑀘𑁆𑀙𑀺𑀢𑀁 𑀓𑀢𑀁 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀁 𑀓𑀼𑀓𑀢𑀫𑁂𑀯 𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀓𑀢𑁆𑀯𑀸. 𑀏𑀯𑀁 𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀁 𑀤𑀝𑁆𑀞𑀩𑁆𑀩𑀁. 𑀦𑀺𑀘𑁆𑀘𑀮𑀸 𑀦𑀺𑀲𑀻𑀤𑀺𑀁𑀲𑀼 𑀅𑀢𑁆𑀢𑀦𑁄 𑀲𑀼𑀯𑀺𑀦𑀻𑀢𑀪𑀸𑀯𑁂𑀦, 𑀩𑀼𑀤𑁆𑀥𑀕𑀸𑀭𑀯𑁂𑀦 𑀘. ‘‘𑀆𑀮𑁄𑀓𑀁 𑀧𑀦 𑀯𑀟𑁆𑀠𑀬𑀺𑀢𑁆𑀯𑀸’’𑀢𑀺𑀆𑀤𑀺 𑀓𑀤𑀸𑀘𑀺 𑀪𑀕𑀯𑀸 𑀏𑀯𑀫𑁆𑀧𑀺 𑀓𑀭𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁. 𑀦 𑀳𑀺 𑀲𑀢𑁆𑀣𑀼 𑀲𑀸𑀯𑀓𑀸𑀦𑀁 𑀯𑀺𑀬 𑀏𑀯𑀁 𑀧𑀬𑁄𑀕𑀲𑀫𑁆𑀧𑀸𑀤𑀦𑀻𑀬𑀫𑁂𑀢𑀁 𑀜𑀸𑀡𑀁. 𑀢𑀺𑀭𑁄𑀳𑀺𑀢𑀯𑀺𑀤𑀽𑀭𑀯𑀢𑁆𑀢𑀦𑀺𑀧𑀺 𑀭𑀽𑀧𑀕𑀢𑁂 𑀫𑀁𑀲𑀘𑀓𑁆𑀔𑀼𑀦𑁄 𑀧𑀯𑀢𑁆𑀢𑀺𑀬𑀸 𑀇𑀘𑁆𑀙𑀺𑀢𑀢𑁆𑀢𑀸 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀅𑀭𑀳𑀢𑁆𑀢𑀼𑀧𑀕𑀁 𑀅𑀭𑀳𑀢𑁆𑀢𑀧𑀤𑀝𑁆𑀞𑀸𑀦𑀁. 𑀘𑀓𑁆𑀔𑀼𑀢𑀮𑁂𑀲𑀼 𑀦𑀺𑀫𑀺𑀢𑁆𑀢𑀁 𑀞𑀧𑁂𑀢𑁆𑀯𑀸𑀢𑀺 𑀪𑀸𑀯𑀦𑀸𑀦𑀼𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀩𑁂𑀲𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀘𑀓𑁆𑀔𑀼𑀢𑀮𑁂𑀲𑀼 𑀮𑀩𑁆𑀪𑀫𑀸𑀦𑀁 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑀢𑀸𑀓𑀸𑀭𑀲𑀗𑁆𑀔𑀸𑀢𑀁 𑀦𑀺𑀫𑀺𑀢𑁆𑀢𑀁 𑀅𑀢𑁆𑀢𑀦𑁄 𑀳𑀤𑀬𑁂 𑀞𑀧𑁂𑀢𑁆𑀯𑀸 𑀲𑀮𑁆𑀮𑀓𑁆𑀔𑁂𑀢𑁆𑀯𑀸. 𑀓𑀲𑁆𑀫𑀸 𑀆𑀕𑀺𑀮𑀸𑀬𑀢𑀺 𑀓𑁄𑀝𑀺𑀲𑀢𑀲𑀳𑀲𑁆𑀲𑀳𑀢𑁆𑀣𑀺𑀦𑀸𑀕𑀸𑀦𑀁 𑀩𑀮𑀁 𑀥𑀸𑀭𑁂𑀦𑁆𑀢𑀲𑁆𑀲𑀸𑀢𑀺 𑀘𑁄𑀤𑀓𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. 𑀆𑀘𑀭𑀺𑀬𑁄 𑀏𑀲 𑀲𑀗𑁆𑀔𑀸𑀭𑀸𑀦𑀁 𑀲𑀪𑀸𑀯𑁄, 𑀬𑀤𑀺𑀤𑀁 𑀅𑀦𑀺𑀘𑁆𑀘𑀢𑀸. 𑀬𑁂 𑀧𑀦 𑀅𑀦𑀺𑀘𑁆𑀘𑀸, 𑀢𑁂 𑀏𑀓𑀦𑁆𑀢𑁂𑀦𑁂𑀯 𑀉𑀤𑀬𑀯𑀬𑀧𑀝𑀺𑀧𑀻𑀴𑀺𑀢𑀢𑀸𑀬 𑀤𑀼𑀓𑁆𑀔𑀸 𑀏𑀯, 𑀤𑀼𑀓𑁆𑀔𑀲𑀪𑀸𑀯𑁂𑀲𑀼 𑀢𑁂𑀲𑀼 𑀲𑀢𑁆𑀣𑀼 𑀓𑀸𑀬𑁂 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀬𑀸 𑀅𑀬𑀁 𑀧𑀘𑁆𑀘𑀬𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀪𑀕𑀯𑀢𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀺𑀝𑁆𑀞𑀺𑀯𑀸𑀢𑁄 𑀉𑀧𑁆𑀧𑀚𑁆𑀚𑀺, 𑀲𑁄 𑀘 𑀔𑁄 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀧𑀘𑁆𑀘𑀬𑀸. 𑀲𑁆𑀯𑀸𑀬𑀫𑀢𑁆𑀣𑁄 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀁 𑀉𑀤𑀸𑀦𑀝𑁆𑀞𑀓𑀣𑀸𑀬𑀁 𑀆𑀕𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀪𑀺𑀦𑁆𑀦𑀦𑀺𑀕𑀡𑁆𑀞𑀯𑀢𑁆𑀣𑀼𑀯𑀡𑁆𑀡𑀦𑀸

𑁩𑁦𑁧. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯 𑀧𑀸𑀲𑀸𑀤𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁩.𑁧𑁬𑁪).

𑁩𑁦𑁨. 𑀲𑁆𑀯𑀸𑀔𑁆𑀬𑀸𑀢𑀁 𑀥𑀫𑁆𑀫𑀁 𑀤𑁂𑀲𑁂𑀢𑀼𑀓𑀸𑀫𑁄𑀢𑀺 𑀲𑁆𑀯𑀸𑀔𑁆𑀬𑀸𑀢𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀓𑀣𑁂𑀢𑀼𑀓𑀸𑀫𑁄, 𑀲𑀢𑁆𑀣𑀸𑀭𑀸 𑀯𑀸 𑀲𑁆𑀯𑀸𑀔𑁆𑀬𑀸𑀢𑀁 𑀥𑀫𑁆𑀫𑀁 𑀲𑀬𑀁 𑀪𑀺𑀓𑁆𑀔𑀽𑀦𑀁 𑀓𑀣𑁂𑀢𑀼𑀓𑀸𑀫𑁄. 𑀲𑀢𑁆𑀣𑀸𑀭𑀸 𑀤𑁂𑀲𑀺𑀢𑀥𑀫𑁆𑀫𑀫𑁂𑀯 𑀳𑀺 𑀢𑀢𑁄 𑀢𑀢𑁄 𑀕𑀳𑁂𑀢𑁆𑀯𑀸 𑀲𑀸𑀯𑀓𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀓𑀣𑁂𑀦𑁆𑀢𑀺.

𑀏𑀓𑀓𑀯𑀡𑁆𑀡𑀦𑀸

𑁩𑁦𑁩. 𑀲𑀫𑀕𑁆𑀕𑁂𑀳𑀺 𑀪𑀸𑀲𑀺𑀢𑀩𑁆𑀩𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀁 𑀲𑀫𑀕𑁆𑀕𑁂𑀳𑀺 𑀳𑀼𑀢𑁆𑀯𑀸 𑀪𑀸𑀲𑀺𑀢𑀩𑁆𑀩𑀁, 𑀲𑀚𑁆𑀛𑀸𑀬𑀺𑀢𑀩𑁆𑀩𑀜𑁆𑀘𑁂𑀯 𑀯𑀡𑁆𑀡𑁂𑀢𑀩𑁆𑀩𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀬𑀣𑀸 𑀧𑀦 𑀲𑀫𑀕𑁆𑀕𑁂𑀳𑀺 𑀲𑀗𑁆𑀕𑀸𑀬𑀦𑀁 𑀳𑁄𑀢𑀺, 𑀢𑀫𑁆𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀯𑀘𑀦𑁂𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀓𑀯𑀘𑀦𑁂𑀳𑀻𑀢𑀺 𑀯𑀺𑀭𑁄𑀥𑀸𑀪𑀸𑀯𑁂𑀦 𑀲𑀫𑀸𑀦𑀯𑀘𑀦𑁂𑀳𑀺. 𑀢𑁂𑀦𑀸𑀳 ‘‘𑀅𑀯𑀺𑀭𑀼𑀤𑁆𑀥𑀯𑀘𑀦𑁂𑀳𑀻’’𑀢𑀺𑀆𑀤𑀺. 𑀲𑀸𑀫𑀕𑁆𑀕𑀺𑀭𑀲𑀁 𑀤𑀲𑁆𑀲𑁂𑀢𑀼𑀓𑀸𑀫𑁄𑀢𑀺 𑀬𑀲𑁆𑀫𑀺𑀁 𑀥𑀫𑁆𑀫𑁂 𑀲𑀗𑁆𑀕𑀸𑀬𑀦𑁂 𑀲𑀸𑀫𑀕𑁆𑀕𑀺𑀭𑀲𑀸𑀦𑀼𑀪𑀯𑀦𑀁 𑀇𑀘𑁆𑀙𑀺𑀢𑀁 𑀤𑁂𑀲𑀦𑀸𑀓𑀼𑀲𑀮𑀢𑀸𑀬, 𑀢𑀢𑁆𑀣 𑀏𑀓𑀓𑀤𑀼𑀓𑀢𑀺𑀓𑀸𑀤𑀺𑀯𑀲𑁂𑀦 𑀩𑀳𑀼𑀥𑀸 𑀲𑀸𑀫𑀕𑁆𑀕𑀺𑀭𑀲𑀁 𑀤𑀲𑁆𑀲𑁂𑀢𑀼𑀓𑀸𑀫𑁄. 𑀲𑀩𑁆𑀩𑁂 𑀲𑀢𑁆𑀢𑀸𑀢𑀺 𑀅𑀦𑀯𑀲𑁂𑀲𑀸 𑀲𑀢𑁆𑀢𑀸, 𑀢𑁂 𑀧𑀦 𑀪𑀯𑀪𑁂𑀤𑀢𑁄 𑀲𑀗𑁆𑀔𑁂𑀧𑁂𑀦𑁂𑀯 𑀪𑀺𑀦𑁆𑀤𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀸𑀫𑀪𑀯𑀸𑀤𑀻𑀲𑀽’’𑀢𑀺𑀆𑀤𑀺𑀫𑀸𑀳. 𑀩𑁆𑀬𑀥𑀺𑀓𑀭𑀡𑀸𑀦𑀫𑁆𑀧𑀺 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑁄 𑀳𑁄𑀢𑀺 𑀬𑀣𑀸 ‘‘𑀉𑀭𑀲𑀺𑀮𑁄𑀫𑁄’’𑀢𑀺 𑀆𑀳 ‘‘𑀆𑀳𑀸𑀭𑀢𑁄 𑀞𑀺𑀢𑀺 𑀏𑀢𑁂𑀲𑀦𑁆𑀢𑀺 𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺. 𑀢𑀺𑀝𑁆𑀞𑀢𑀺 𑀏𑀢𑁂𑀦𑀸𑀢𑀺 𑀞𑀺𑀢𑀺, 𑀆𑀳𑀸𑀭𑁄 𑀞𑀺𑀢𑀺 𑀏𑀢𑁂𑀲𑀦𑁆𑀢𑀺 𑀆𑀳𑀸𑀭𑀝𑁆𑀞𑀺𑀢𑀺𑀓𑀸𑀢𑀺 𑀏𑀯𑀁 𑀯𑀸 𑀏𑀢𑁆𑀣 𑀲𑀫𑀸𑀲𑀯𑀺𑀕𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀆𑀳𑀸𑀭𑀝𑁆𑀞𑀺𑀢𑀺𑀓𑀸𑀢𑀺 𑀧𑀘𑁆𑀘𑀬𑀝𑁆𑀞𑀺𑀢𑀺𑀓𑀸, 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀓𑀸𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀬𑀢𑁆𑀣𑁄 𑀳𑁂𑀢𑁆𑀣 𑀆𑀳𑀸𑀭-𑀲𑀤𑁆𑀤𑁄 ‘‘𑀅𑀬𑀁 𑀆𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲𑀉𑀧𑁆𑀧𑀸𑀤𑀸𑀬𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁫.𑁧𑁮𑁩, 𑁨𑁩𑁨) 𑀯𑀺𑀬. 𑀏𑀯𑀜𑁆𑀳𑀺 ‘‘𑀲𑀩𑁆𑀩𑁂 𑀲𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀅𑀲𑀜𑁆𑀜𑀲𑀢𑁆𑀢𑀸𑀧𑀺 𑀧𑀭𑀺𑀕𑁆𑀕𑀳𑀺𑀢𑀸 𑀳𑁄𑀦𑁆𑀢𑀺. 𑀲𑀸 𑀧𑀦𑀸𑀬𑀁 𑀆𑀳𑀸𑀭𑀝𑁆𑀞𑀺𑀢𑀺𑀓𑀢𑀸 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀲𑀗𑁆𑀔𑀸𑀭𑀥𑀫𑁆𑀫𑁄, 𑀦 𑀲𑀢𑁆𑀢𑀥𑀫𑁆𑀫𑁄. 𑀢𑁂𑀦𑁂𑀯𑀸𑀳𑀼 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸𑀢𑀺 𑀆𑀕𑀢𑀝𑁆𑀞𑀸𑀦𑁂 𑀲𑀗𑁆𑀔𑀸𑀭𑀮𑁄𑀓𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁧𑁩𑁬; 𑀧𑀸𑀭𑀸. 𑀅𑀝𑁆𑀞. 𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸; 𑀉𑀤𑀸. 𑀅𑀝𑁆𑀞. 𑁩𑁦; 𑀘𑀽𑀴𑀦𑀺. 𑀅𑀝𑁆𑀞. 𑁬𑁫; 𑀉𑀤𑀸. 𑀅𑀝𑁆𑀞. 𑁧𑁮𑁬) 𑀬𑀤𑀺 𑀏𑀯𑀁 ‘‘𑀲𑀩𑁆𑀩𑁂 𑀲𑀢𑁆𑀢𑀸’’𑀢𑀺 𑀇𑀤𑀁 𑀓𑀣𑀦𑁆𑀢𑀺? 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸 𑀤𑁂𑀲𑀦𑀸𑀢𑀺 𑀦𑀸𑀬𑀁 𑀤𑁄𑀲𑁄. 𑀬𑀣𑀸𑀳 𑀪𑀕𑀯𑀸 ‘‘𑀏𑀓𑀥𑀫𑁆𑀫𑁂 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀫𑀸𑀦𑁄 𑀲𑀫𑁆𑀫𑀸 𑀯𑀺𑀭𑀚𑁆𑀚𑀫𑀸𑀦𑁄 𑀲𑀫𑁆𑀫𑀸 𑀯𑀺𑀫𑀼𑀘𑁆𑀘𑀫𑀸𑀦𑁄 𑀲𑀫𑁆𑀫𑀸 𑀧𑀭𑀺𑀬𑀦𑁆𑀢𑀤𑀲𑁆𑀲𑀸𑀯𑀻 𑀲𑀫𑁆𑀫𑀢𑁆𑀢𑀁 𑀅𑀪𑀺𑀲𑀫𑁂𑀘𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺, 𑀓𑀢𑀫𑀲𑁆𑀫𑀺𑀁 𑀏𑀓𑀥𑀫𑁆𑀫𑁂? 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 (𑀅. 𑀦𑀺. 𑁧𑁦.𑁨𑁭) 𑀏𑀓𑁄 𑀥𑀫𑁆𑀫𑁄𑀢𑀺 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀓𑀣𑀸𑀬 𑀲𑀩𑁆𑀩𑁂𑀲𑀁 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀆𑀳𑀸𑀭𑀧𑀭𑀺𑀬𑀸𑀬𑁂𑀦 𑀲𑀸𑀫𑀜𑁆𑀜𑀢𑁄 𑀧𑀘𑁆𑀘𑀬𑀥𑀫𑁆𑀫𑁄 𑀯𑀼𑀢𑁆𑀢𑁄, 𑀅𑀬𑀁 𑀆𑀳𑀸𑀭𑁄 𑀦𑀸𑀫 𑀏𑀓𑁄 𑀥𑀫𑁆𑀫𑁄. 𑀬𑀸𑀣𑀸𑀯𑀢𑁄 𑀜𑀢𑁆𑀯𑀸𑀢𑀺 𑀬𑀣𑀸𑀲𑀪𑀸𑀯𑀢𑁄 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑁆𑀯𑀸. 𑀲𑀫𑁆𑀫𑀤𑀓𑁆𑀔𑀸𑀢𑁄𑀢𑀺 𑀢𑁂𑀦𑁂𑀯 𑀅𑀪𑀺𑀲𑀫𑁆𑀩𑀼𑀤𑁆𑀥𑀸𑀓𑀸𑀭𑁂𑀦 𑀲𑀫𑁆𑀫𑀤𑁂𑀯 𑀤𑁂𑀲𑀺𑀢𑁄.

𑀘𑁄𑀤𑀓𑁄 𑀯𑀼𑀢𑁆𑀢𑀫𑁆𑀧𑀺 𑀅𑀢𑁆𑀣𑀁 𑀬𑀸𑀣𑀸𑀯𑀢𑁄 𑀅𑀧𑁆𑀧𑀝𑀺𑀧𑀚𑁆𑀚𑀫𑀸𑀦𑁄 𑀦𑁂𑀬𑁆𑀬𑀢𑁆𑀣𑀁 𑀲𑀼𑀢𑁆𑀢𑀧𑀤𑀁 𑀦𑀻𑀢𑀢𑁆𑀣𑀢𑁄 𑀤𑀳𑀦𑁆𑀢𑁄 ‘‘𑀲𑀩𑁆𑀩𑁂 𑀲𑀢𑁆𑀢𑀸’’𑀢𑀺 𑀯𑀘𑀦𑀫𑀢𑁆𑀢𑁂 𑀞𑀢𑁆𑀯𑀸 ‘‘𑀦𑀦𑀼 𑀘𑀸’’𑀢𑀺𑀆𑀤𑀺𑀦𑀸 𑀘𑁄𑀤𑁂𑀢𑀺. 𑀆𑀘𑀭𑀺𑀬𑁄 𑀅𑀯𑀺𑀧𑀭𑀻𑀢𑀁 𑀢𑀢𑁆𑀣 𑀬𑀣𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀧𑀯𑁂𑀤𑁂𑀦𑁆𑀢𑁄 ‘‘𑀦 𑀯𑀺𑀭𑀼𑀚𑁆𑀛𑀢𑀻’’𑀢𑀺 𑀯𑀢𑁆𑀯𑀸 ‘‘𑀢𑁂𑀲𑀜𑁆𑀳𑀺 𑀛𑀸𑀦𑀁 𑀆𑀳𑀸𑀭𑁄 𑀳𑁄𑀢𑀻’’𑀢𑀺 𑀆𑀳. 𑀛𑀸𑀦𑀦𑁆𑀢𑀺 𑀏𑀓𑀯𑁄𑀓𑀸𑀭𑀪𑀯𑀸𑀯𑀳𑀁 𑀲𑀜𑁆𑀜𑀸𑀬 𑀯𑀺𑀭𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀁 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀁. 𑀧𑀸𑀴𑀺𑀬𑀁 𑀧𑀦 ‘‘𑀅𑀦𑀸𑀳𑀸𑀭𑀸’’𑀢𑀺 𑀯𑀘𑀦𑀁 𑀅𑀲𑀜𑁆𑀜𑀪𑀯𑁂 𑀘𑀢𑀼𑀦𑁆𑀦𑀁 𑀆𑀳𑀸𑀭𑀸𑀦𑀁 𑀅𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀧𑀘𑁆𑀘𑀬𑀸𑀳𑀸𑀭𑀲𑁆𑀲 𑀅𑀪𑀸𑀯𑀢𑁄. ‘‘𑀏𑀯𑀁 𑀲𑀦𑁆𑀢𑁂𑀧𑀻’’𑀢𑀺 𑀇𑀤𑀁 𑀲𑀸𑀲𑀦𑁂 𑀬𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀲𑁂𑀲𑀢𑁄 𑀆𑀳𑀸𑀭-𑀲𑀤𑁆𑀤𑁄 𑀦𑀺𑀭𑀼𑀴𑁆𑀳𑁄, ‘‘𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 𑀏𑀢𑁆𑀣 𑀬𑀤𑀺 𑀢𑁂 𑀏𑀯 𑀕𑀬𑁆𑀳𑀦𑁆𑀢𑀺, 𑀅𑀩𑁆𑀬𑀸𑀧𑀺𑀢𑀤𑁄𑀲𑁄 𑀆𑀧𑀦𑁆𑀦𑁄. 𑀅𑀣 𑀲𑀩𑁆𑀩𑁄𑀧𑀺 𑀧𑀘𑁆𑀘𑀬𑀥𑀫𑁆𑀫𑁄 𑀆𑀳𑀸𑀭𑁄𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀇𑀫𑀸𑀬 𑀆𑀳𑀸𑀭𑀧𑀸𑀴𑀺𑀬𑀸 𑀯𑀺𑀭𑁄𑀥𑁄 𑀆𑀧𑀦𑁆𑀦𑁄𑀢𑀺 𑀤𑀲𑁆𑀲𑁂𑀢𑀼𑀁 𑀆𑀭𑀤𑁆𑀥𑀁. ‘‘𑀦 𑀯𑀺𑀭𑀼𑀚𑁆𑀛𑀢𑀻’’𑀢𑀺 𑀬𑁂𑀦𑀸𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁, 𑀢𑀁 𑀯𑀺𑀯𑀭𑀦𑁆𑀢𑁄 ‘‘𑀏𑀢𑀲𑁆𑀫𑀺𑀜𑁆𑀳𑀺 𑀲𑀼𑀢𑁆𑀢𑁂’’𑀢𑀺𑀆𑀤𑀺𑀫𑀸𑀳. 𑀓𑀩𑀴𑀻𑀓𑀸𑀭𑀸𑀳𑀸𑀭𑀸𑀤𑀻𑀦𑀁 𑀑𑀚𑀝𑁆𑀞𑀫𑀓𑀭𑀽𑀧𑀸𑀳𑀭𑀡𑀸𑀤𑀺 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀆𑀳𑀸𑀭𑀪𑀸𑀯𑁄. 𑀬𑀣𑀸 𑀳𑀺 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀑𑀚𑀝𑁆𑀞𑀫𑀓𑀭𑀽𑀧𑀸𑀳𑀭𑀡𑁂𑀦 𑀭𑀽𑀧𑀓𑀸𑀬𑀁 𑀉𑀧𑀢𑁆𑀣𑀫𑁆𑀪𑁂𑀢𑀺, 𑀏𑀯𑀁 𑀨𑀲𑁆𑀲𑀸𑀤𑀬𑁄 𑀘 𑀯𑁂𑀤𑀦𑀸𑀤𑀺𑀆𑀳𑀭𑀡𑁂𑀦 𑀦𑀸𑀫𑀓𑀸𑀬𑀁 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑀺, 𑀢𑀲𑁆𑀫𑀸 𑀲𑀢𑀺𑀧𑀺 𑀚𑀦𑀓𑀪𑀸𑀯𑁂 𑀉𑀧𑀢𑁆𑀣𑀫𑁆𑀪𑀓𑀪𑀸𑀯𑁄 𑀑𑀚𑀸𑀤𑀻𑀲𑀼 𑀲𑀸𑀢𑀺𑀲𑀬𑁄 𑀮𑀩𑁆𑀪𑀫𑀸𑀦𑁄 𑀫𑀼𑀔𑁆𑀬𑁄 𑀆𑀳𑀸𑀭𑀝𑁆𑀞𑁄𑀢𑀺 𑀢𑁂 𑀏𑀯 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀆𑀳𑀸𑀭𑀮𑀓𑁆𑀔𑀡𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀗𑁆𑀕𑀻𑀢𑀺𑀲𑀼𑀢𑁆𑀢𑁂. 𑀧𑀭𑀺𑀬𑀸𑀬𑁂𑀦 𑀧𑀘𑁆𑀘𑀬𑁄 𑀆𑀳𑀸𑀭𑁄𑀢𑀺 𑀯𑀼𑀢𑁆𑀢𑁄 𑀲𑀩𑁆𑀩𑁄 𑀧𑀘𑁆𑀘𑀬𑁄 𑀥𑀫𑁆𑀫𑁄 𑀅𑀢𑁆𑀢𑀦𑁄 𑀨𑀮𑀁 𑀆𑀳𑀭𑀢𑀻𑀢𑀺 𑀇𑀫𑀁 𑀧𑀭𑀺𑀬𑀸𑀬𑀁 𑀮𑀪𑀢𑀻𑀢𑀺. 𑀢𑁂𑀦𑀸𑀳 ‘‘𑀲𑀩𑁆𑀩𑀥𑀫𑁆𑀫𑀸𑀦𑀜𑁆𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀲𑀩𑁆𑀩𑀥𑀫𑁆𑀫𑀸𑀦𑀦𑁆𑀢𑀺 𑀲𑀩𑁆𑀩𑁂𑀲𑀁 𑀲𑀗𑁆𑀔𑀢𑀥𑀫𑁆𑀫𑀸𑀦𑀁. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀲𑀼𑀢𑁆𑀢𑁂𑀦 (𑀅. 𑀦𑀺. 𑁧𑁦.𑁬𑁧) 𑀲𑀫𑀢𑁆𑀣𑁂𑀢𑀼𑀁 ‘‘𑀢𑁂𑀦𑁂𑀯𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀬𑀦𑁆𑀢𑀺 𑀧𑀘𑁆𑀘𑀬𑀸𑀳𑀸𑀭𑁄.

𑀦𑀺𑀧𑁆𑀧𑀭𑀺𑀬𑀸𑀬𑀸𑀳𑀸𑀭𑁄𑀧𑀺 𑀕𑀳𑀺𑀢𑁄𑀯 𑀳𑁄𑀢𑀺, 𑀬𑀸𑀯𑀢𑀸 𑀲𑁄𑀧𑀺 𑀧𑀘𑁆𑀘𑀬𑀪𑀸𑀯𑁂𑀦𑁂𑀯 𑀚𑀦𑀓𑁄, 𑀉𑀧𑀢𑁆𑀣𑀫𑁆𑀪𑀓𑁄 𑀘 𑀳𑀼𑀢𑁆𑀯𑀸 𑀢𑀁 𑀢𑀁 𑀨𑀮𑀁 𑀆𑀳𑀭𑀢𑀻𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀻𑀢𑀺. 𑀢𑀢𑁆𑀣𑀸𑀢𑀺 𑀧𑀭𑀺𑀬𑀸𑀬𑀸𑀳𑀸𑀭𑁄, 𑀦𑀺𑀧𑁆𑀧𑀭𑀺𑀬𑀸𑀬𑀸𑀳𑀸𑀭𑁄𑀢𑀺 𑀤𑁆𑀯𑀻𑀲𑀼 𑀆𑀳𑀸𑀭𑁂𑀲𑀼. 𑀅𑀲𑀜𑁆𑀜𑀪𑀯𑁂 𑀬𑀤𑀺𑀧𑀺 𑀦𑀺𑀧𑁆𑀧𑀭𑀺𑀬𑀸𑀬𑀸𑀳𑀸𑀭𑁄 𑀦 𑀮𑀩𑁆𑀪𑀢𑀺, 𑀧𑀘𑁆𑀘𑀬𑀸𑀳𑀸𑀭𑁄 𑀧𑀦 𑀮𑀩𑁆𑀪𑀢𑀺 𑀧𑀭𑀺𑀬𑀸𑀬𑀸𑀳𑀸𑀭𑀮𑀓𑁆𑀔𑀡𑁄. 𑀇𑀤𑀸𑀦𑀺 𑀇𑀫𑀫𑁂𑀯𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀼𑀧𑁆𑀧𑀦𑁆𑀦𑁂 𑀳𑀺 𑀩𑀼𑀤𑁆𑀥𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀢𑀺𑀢𑁆𑀣𑀓𑀭𑀫𑀢𑀦𑀺𑀲𑁆𑀲𑀺𑀢𑀸𑀦𑀁 𑀛𑀸𑀦𑀪𑀸𑀯𑀦𑀸𑀬 𑀅𑀲𑀺𑀚𑁆𑀛𑀦𑀢𑁄 ‘‘𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂’’𑀢𑀺 𑀯𑀼𑀢𑁆𑀢𑀁. 𑀲𑀸𑀲𑀦𑀺𑀓𑀸 𑀢𑀸𑀤𑀺𑀲𑀁 𑀛𑀸𑀦𑀁 𑀦 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀻𑀢𑀺 ‘‘𑀢𑀺𑀢𑁆𑀣𑀸𑀬𑀢𑀦𑁂 𑀧𑀩𑁆𑀩𑀚𑀺𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑀺𑀢𑁆𑀣𑀺𑀬𑀸 𑀳𑀺 𑀉𑀧𑀢𑁆𑀢𑀺𑀯𑀺𑀲𑁂𑀲𑁂 𑀯𑀺𑀫𑀼𑀢𑁆𑀢𑀺𑀲𑀜𑁆𑀜𑀺𑀦𑁄, 𑀅𑀜𑁆𑀜𑀸𑀯𑀺𑀭𑀸𑀕𑀸𑀯𑀺𑀭𑀸𑀕𑁂𑀲𑀼 𑀆𑀤𑀻𑀦𑀯𑀸𑀦𑀺𑀲𑀁𑀲𑀤𑀲𑁆𑀲𑀺𑀦𑁄 𑀯𑀸 𑀳𑀼𑀢𑁆𑀯𑀸 𑀅𑀲𑀜𑁆𑀜𑀲𑀫𑀸𑀧𑀢𑁆𑀢𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀓𑁆𑀔𑀡𑀪𑀽𑀫𑀺𑀬𑀁 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀲𑀸𑀲𑀦𑀺𑀓𑀸. 𑀯𑀸𑀬𑁄𑀓𑀲𑀺𑀡𑁂 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸𑀢𑀺 𑀯𑀸𑀬𑁄𑀓𑀲𑀺𑀡𑁂 𑀧𑀞𑀫𑀸𑀤𑀻𑀦𑀺 𑀢𑀻𑀡𑀺 𑀛𑀸𑀦𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀢𑀺𑀬𑀚𑁆𑀛𑀸𑀦𑁂 𑀘𑀺𑀡𑁆𑀡𑀯𑀲𑀻 𑀳𑀼𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀥𑀺𑀕𑀫𑀸𑀬 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸. 𑀢𑁂𑀦𑀸𑀳 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸’’𑀢𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀯𑀸𑀬𑁄𑀓𑀲𑀺𑀡𑁂𑀬𑁂𑀯 𑀧𑀭𑀺𑀓𑀫𑁆𑀫𑀁 𑀯𑀼𑀢𑁆𑀢𑀦𑁆𑀢𑀺? 𑀬𑀤𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀩𑁆𑀭𑀳𑁆𑀫𑀚𑀸𑀮𑀝𑀻𑀓𑀸𑀬𑀁 (𑀤𑀻. 𑀦𑀺. 𑀝𑀻. 𑁧.𑁪𑁧) 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀥𑀻𑀢𑀺 𑀚𑀺𑀕𑀼𑀘𑁆𑀙𑀦𑀢𑁆𑀣𑁂 𑀦𑀺𑀧𑀸𑀢𑁄, 𑀢𑀲𑁆𑀫𑀸 𑀥𑀻 𑀘𑀺𑀢𑁆𑀢𑀦𑁆𑀢𑀺 𑀘𑀺𑀢𑁆𑀢𑀁 𑀚𑀺𑀕𑀼𑀘𑁆𑀙𑀸𑀫𑀻𑀢𑀺 𑀅𑀢𑁆𑀣𑁄. 𑀥𑀺𑀩𑁆𑀩𑀢𑁂𑀢𑀁 𑀘𑀺𑀢𑁆𑀢𑀦𑁆𑀢𑀺 𑀏𑀢𑀁 𑀫𑀫 𑀘𑀺𑀢𑁆𑀢𑀁 𑀚𑀺𑀕𑀼𑀘𑁆𑀙𑀺𑀢𑀁 𑀯𑀢 𑀳𑁄𑀢𑀼. 𑀯𑀢𑀸𑀢𑀺 𑀲𑀫𑁆𑀪𑀸𑀯𑀦𑁂, 𑀢𑁂𑀦 𑀚𑀺𑀕𑀼𑀘𑁆𑀙𑀁 𑀲𑀫𑁆𑀪𑀸𑀯𑁂𑀦𑁆𑀢𑁄 𑀯𑀤𑀢𑀺. 𑀦𑀸𑀫𑀸𑀢𑀺 𑀘 𑀲𑀫𑁆𑀪𑀸𑀯𑀦𑁂 𑀏𑀯, 𑀢𑁂𑀦 𑀘𑀺𑀢𑁆𑀢𑀲𑁆𑀲 𑀅𑀪𑀸𑀯𑀁 𑀲𑀫𑁆𑀪𑀸𑀯𑁂𑀢𑀺. 𑀘𑀺𑀢𑁆𑀢𑀲𑁆𑀲 𑀪𑀸𑀯𑀸𑀪𑀸𑀯𑁂𑀲𑀼 𑀆𑀤𑀻𑀦𑀯𑀸𑀦𑀺𑀲𑀁𑀲𑁂 𑀤𑀲𑁆𑀲𑁂𑀢𑀼𑀁 ‘‘𑀘𑀺𑀢𑁆𑀢𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀔𑀦𑁆𑀢𑀺𑀁 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸𑀢𑀺 ‘‘𑀘𑀺𑀢𑁆𑀢𑀲𑁆𑀲 𑀅𑀪𑀸𑀯𑁄 𑀏𑀯 𑀲𑀸𑀥𑀼 𑀲𑀼𑀝𑁆𑀞𑀽’’𑀢𑀺 𑀇𑀫𑀁 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀁, 𑀢𑀢𑁆𑀣 𑀘 𑀅𑀪𑀺𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸.

𑀢𑀣𑀸 𑀪𑀸𑀯𑀺𑀢𑀲𑁆𑀲 𑀛𑀸𑀦𑀲𑁆𑀲 𑀞𑀺𑀢𑀺𑀪𑀸𑀕𑀺𑀬𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑀲𑁆𑀲 𑀢𑀺𑀢𑁆𑀣𑀸𑀬𑀢𑀦𑁂 𑀧𑀩𑁆𑀩𑀚𑀺𑀢𑀲𑁆𑀲𑁂𑀯 𑀢𑀣𑀸 𑀛𑀸𑀦𑀪𑀸𑀯𑀦𑀸 𑀳𑁄𑀢𑀻𑀢𑀺 𑀆𑀳 ‘‘𑀫𑀦𑀼𑀲𑁆𑀲𑀮𑁄𑀓𑁂’’𑀢𑀺. 𑀧𑀡𑀺𑀳𑀺𑀢𑁄 𑀅𑀳𑁄𑀲𑀻𑀢𑀺 𑀫𑀭𑀡𑀲𑁆𑀲 𑀆𑀲𑀦𑁆𑀦𑀓𑀸𑀮𑁂 𑀞𑀧𑀺𑀢𑁄 𑀅𑀳𑁄𑀲𑀺. 𑀬𑀤𑀺 𑀞𑀸𑀦𑀸𑀤𑀺𑀦𑀸 𑀆𑀓𑀸𑀭𑁂𑀦 𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀓𑀫𑁆𑀫𑀩𑀮𑁂𑀦 𑀬𑀸𑀯 𑀪𑁂𑀤𑀸 𑀢𑁂𑀦𑁂𑀯𑀸𑀓𑀸𑀭𑁂𑀦 𑀢𑀺𑀝𑁆𑀞𑁂𑀬𑁆𑀬 𑀯𑀸𑀢𑀺 𑀆𑀳 ‘‘𑀲𑁄 𑀢𑁂𑀦 𑀇𑀭𑀺𑀬𑀸𑀧𑀣𑁂𑀦𑀸’’𑀢𑀺𑀆𑀤𑀺.

𑀏𑀯 𑀭𑀽𑀧𑀸𑀦𑀫𑁆𑀧𑀻𑀢𑀺 𑀏𑀯𑀁 𑀅𑀘𑁂𑀢𑀦𑀸𑀦𑀫𑁆𑀧𑀺. 𑀧𑀺-𑀲𑀤𑁆𑀤𑁂𑀦 𑀧𑀕𑁂𑀯 𑀲𑀘𑁂𑀢𑀦𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀓𑀣𑀁 𑀧𑀦 𑀅𑀘𑁂𑀢𑀦𑀸𑀦𑀁 𑀦𑁂𑀲𑀁 𑀧𑀘𑁆𑀘𑀬𑀸𑀳𑀸𑀭𑀲𑁆𑀲 𑀉𑀧𑀓𑀧𑁆𑀧𑀦𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬 𑀢𑀢𑁆𑀣 𑀦𑀺𑀤𑀲𑁆𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸’’𑀢𑀺𑀆𑀤𑀺𑀫𑀸𑀳.

𑀬𑁂 𑀉𑀝𑁆𑀞𑀸𑀦𑀯𑀻𑀭𑀺𑀬𑁂𑀦𑁂𑀯 𑀤𑀺𑀯𑀲𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀢𑀲𑁆𑀲 𑀦𑀺𑀲𑁆𑀲𑀦𑁆𑀤𑀨𑀮𑀫𑀢𑁆𑀢𑀁 𑀓𑀺𑀜𑁆𑀘𑀺𑀤𑁂𑀯 𑀮𑀪𑀺𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀺, 𑀢𑁂 𑀉𑀝𑁆𑀞𑀸𑀦𑀨𑀮𑀽𑀧𑀚𑀻𑀯𑀺𑀦𑁄. 𑀬𑁂 𑀧𑀦 𑀅𑀢𑁆𑀢𑀦𑁄 𑀧𑀼𑀜𑁆𑀜𑀨𑀮𑀫𑁂𑀯 𑀉𑀧𑀚𑀻𑀯𑁂𑀦𑁆𑀢𑀺, 𑀢𑁂 𑀧𑀼𑀜𑁆𑀜𑀨𑀮𑀽𑀧𑀚𑀻𑀯𑀺𑀦𑁄. 𑀦𑁂𑀭𑀬𑀺𑀓𑀸𑀦𑀁 𑀧𑀦 𑀦𑁂𑀯 𑀉𑀝𑁆𑀞𑀸𑀦𑀯𑀻𑀭𑀺𑀬𑀯𑀲𑁂𑀦 𑀚𑀻𑀯𑀺𑀓𑀸𑀓𑀧𑁆𑀧𑀦𑀁, 𑀧𑀼𑀜𑁆𑀜𑀨𑀮𑀲𑁆𑀲 𑀧𑀦 𑀮𑁂𑀲𑁄𑀧𑀺 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 ‘‘𑀬𑁂 𑀧𑀦 𑀢𑁂 𑀦𑁂𑀭𑀬𑀺𑀓𑀸…𑀧𑁂… 𑀦 𑀧𑀼𑀜𑁆𑀜𑀨𑀮𑀽𑀧𑀚𑀻𑀯𑀻𑀢𑀺 𑀯𑀼𑀢𑁆𑀢𑀸’’𑀢𑀺. 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀆𑀳𑀭𑀡𑁂𑀦 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄𑀢𑀺 𑀯𑀼𑀢𑁆𑀢𑀸, 𑀦 𑀬𑀲𑁆𑀲 𑀓𑀲𑁆𑀲𑀘𑀺 𑀨𑀮𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀓𑀺𑀁 𑀧𑀜𑁆𑀘 𑀆𑀳𑀸𑀭𑀸 𑀅𑀢𑁆𑀣𑀻’’𑀢𑀺 𑀘𑁄𑀤𑁂𑀢𑀺. 𑀆𑀘𑀭𑀺𑀬𑁄 𑀦𑀺𑀧𑁆𑀧𑀭𑀺𑀬𑀸𑀬𑀸𑀳𑀸𑀭𑁂 𑀅𑀥𑀺𑀧𑁆𑀧𑁂𑀢𑁂 𑀲𑀺𑀬𑀸 𑀢𑀯 𑀘𑁄𑀤𑀦𑀸𑀬𑀸𑀯𑀲𑀭𑁄, 𑀲𑀸 𑀧𑀦 𑀏𑀢𑁆𑀣 𑀅𑀦𑀯𑀲𑀭𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀜𑁆𑀘 𑀦 𑀧𑀜𑁆𑀘𑀸𑀢𑀺 𑀇𑀤𑀁 𑀦 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀧𑀭𑀺𑀬𑀸𑀬𑀸𑀳𑀸𑀭𑀲𑁆𑀲𑁂𑀯 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑁂𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀦𑀼 𑀧𑀘𑁆𑀘𑀬𑁄 𑀆𑀳𑀸𑀭𑁄𑀢𑀺 𑀯𑀼𑀢𑁆𑀢𑀫𑁂𑀢’’𑀦𑁆𑀢𑀺 𑀆𑀳. 𑀢𑀲𑁆𑀫𑀸𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀘𑁆𑀘𑀬𑀲𑁆𑀲 ‘‘𑀆𑀳𑀸𑀭𑁄’’𑀢𑀺 𑀇𑀘𑁆𑀙𑀺𑀢𑀢𑁆𑀢𑀸. 𑀇𑀤𑀸𑀦𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀴𑀺𑀬𑀸 𑀲𑀫𑀢𑁆𑀣𑁂𑀦𑁆𑀢𑁄 ‘‘𑀬𑀁 𑀲𑀦𑁆𑀥𑀸𑀬𑀸’’𑀢𑀺𑀆𑀤𑀺𑀫𑀸𑀳.

𑀫𑀼𑀔𑁆𑀬𑀸𑀳𑀸𑀭𑀯𑀲𑁂𑀦𑀧𑀺 𑀦𑁂𑀭𑀬𑀺𑀓𑀸𑀦𑀁 𑀆𑀳𑀸𑀭𑀝𑁆𑀞𑀺𑀢𑀺𑀓𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀩𑀴𑀻𑀓𑀸𑀭𑀁 𑀆𑀳𑀸𑀭𑀁…𑀧𑁂… 𑀲𑀸𑀥𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀏𑀯𑀁 𑀦𑁂𑀭𑀬𑀺𑀓𑀸 𑀲𑀼𑀔𑀧𑀝𑀺𑀲𑀁𑀯𑁂𑀤𑀺𑀦𑁄𑀧𑀺 𑀳𑁄𑀦𑁆𑀢𑀻𑀢𑀺? 𑀦𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀔𑁂𑀴𑁄𑀧𑀺 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀬𑁄𑀢𑀺 𑀢𑀬𑁄 𑀅𑀭𑀽𑀧𑀸𑀳𑀸𑀭𑀸 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁆𑀲 𑀅𑀪𑀸𑀯𑀢𑁄. 𑀅𑀯𑀲𑁂𑀲𑀸𑀦𑀦𑁆𑀢𑀺 𑀅𑀲𑀜𑁆𑀜𑀲𑀢𑁆𑀢𑁂𑀳𑀺 𑀅𑀯𑀲𑁂𑀲𑀸𑀦𑀁. 𑀓𑀸𑀫𑀪𑀯𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸𑀦𑀁 𑀧𑀘𑁆𑀘𑀬𑀸𑀳𑀸𑀭𑁄 𑀳𑀺 𑀲𑀩𑁆𑀩𑁂𑀲𑀁 𑀲𑀸𑀥𑀸𑀭𑀡𑁄𑀢𑀺. 𑀏𑀢𑀁 𑀧𑀜𑁆𑀳𑀦𑁆𑀢𑀺 ‘‘𑀓𑀢𑀫𑁄 𑀏𑀓𑁄 𑀥𑀫𑁆𑀫𑁄’’𑀢𑀺 𑀏𑀯𑀁 𑀘𑁄𑀤𑀺𑀢𑀫𑁂𑀢𑀁 𑀧𑀜𑁆𑀳𑀁. 𑀓𑀣𑁂𑀢𑁆𑀯𑀸𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸.

‘‘𑀢𑀢𑁆𑀣 𑀢𑀢𑁆𑀣…𑀧𑁂… 𑀤𑀼𑀓𑁆𑀔𑀁 𑀳𑁄𑀢𑀻’’𑀢𑀺 𑀏𑀢𑁂𑀦 𑀬𑀣𑀸 𑀇𑀥 𑀧𑀞𑀫𑀲𑁆𑀲 𑀧𑀜𑁆𑀳𑀲𑁆𑀲 𑀦𑀺𑀬𑁆𑀬𑀸𑀢𑀦𑀁, 𑀤𑀼𑀢𑀺𑀬𑀲𑁆𑀲 𑀉𑀤𑁆𑀥𑀭𑀡𑀁 𑀦 𑀓𑀢𑀁, 𑀏𑀯𑀁 𑀇𑀫𑀺𑀦𑀸 𑀏𑀯 𑀅𑀥𑀺𑀧𑁆𑀧𑀸𑀬𑁂𑀦 𑀇𑀢𑁄 𑀧𑀭𑁂𑀲𑀼 𑀤𑀼𑀓𑀢𑀺𑀓𑀸𑀤𑀺𑀧𑀜𑁆𑀳𑁂𑀲𑀼 𑀢𑀢𑁆𑀣 𑀢𑀢𑁆𑀣 𑀆𑀤𑀺𑀧𑀭𑀺𑀬𑁄𑀲𑀸𑀦𑁂𑀲𑀼 𑀏𑀯 𑀉𑀤𑁆𑀥𑀭𑀡𑀦𑀺𑀬𑁆𑀬𑀸𑀢𑀦𑀸𑀦𑀺 𑀓𑀢𑁆𑀯𑀸 𑀲𑁂𑀲𑁂𑀲𑀼 𑀦 𑀓𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀧𑀝𑀺𑀘𑁆𑀘 𑀏𑀢𑀲𑁆𑀫𑀸 𑀨𑀮𑀁 𑀏𑀢𑀻𑀢𑀺 𑀧𑀘𑁆𑀘𑀬𑁄, 𑀓𑀸𑀭𑀡𑀁, 𑀢𑀤𑁂𑀯 𑀅𑀢𑁆𑀢𑀦𑁄 𑀨𑀮𑀁 𑀲𑀗𑁆𑀔𑀭𑁄𑀢𑀻𑀢𑀺 𑀲𑀗𑁆𑀔𑀸𑀭𑁄𑀢𑀺 𑀆𑀳 ‘‘𑀇𑀫𑀲𑁆𑀫𑀺𑀫𑁆𑀧𑀺…𑀧𑁂… 𑀲𑀗𑁆𑀔𑀸𑀭𑁄𑀢𑀺 𑀯𑀼𑀢𑁆𑀢𑁄’’𑀢𑀺. 𑀆𑀳𑀸𑀭𑀧𑀘𑁆𑀘𑀬𑁄𑀢𑀺 𑀆𑀳𑀭𑀡𑀝𑁆𑀞𑀯𑀺𑀲𑀺𑀝𑁆𑀞𑁄 𑀧𑀘𑁆𑀘𑀬𑁄. 𑀆𑀳𑀭𑀡𑀜𑁆𑀘𑁂𑀢𑁆𑀣 𑀉𑀧𑁆𑀧𑀸𑀤𑀓𑀢𑁆𑀢𑀧𑁆𑀧𑀥𑀸𑀦𑀁, 𑀲𑀗𑁆𑀔𑀭𑀡𑀁 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑀧𑁆𑀧𑀥𑀸𑀦𑀦𑁆𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀢𑁂𑀦𑀸𑀳 ‘‘𑀅𑀬𑀫𑁂𑀢𑁆𑀣 𑀳𑁂𑀝𑁆𑀞𑀺𑀫𑀢𑁄 𑀯𑀺𑀲𑁂𑀲𑁄’’𑀢𑀺. 𑀦𑀺𑀧𑁆𑀧𑀭𑀺𑀬𑀸𑀬𑀸𑀳𑀸𑀭𑁂 𑀕𑀳𑀺𑀢𑁂 ‘‘𑀲𑀩𑁆𑀩𑁂 𑀲𑀢𑁆𑀢𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀅𑀲𑀜𑁆𑀜𑀲𑀢𑁆𑀢𑀸 𑀦 𑀕𑀳𑀺𑀢𑀸 𑀏𑀯 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀧𑀤𑁂𑀲𑀯𑀺𑀲𑀬𑁄 𑀲𑀩𑁆𑀩-𑀲𑀤𑁆𑀤𑁄 𑀳𑁄𑀢𑀺 𑀬𑀣𑀸 ‘‘𑀲𑀩𑁆𑀩𑁂 𑀢𑀲𑀦𑁆𑀢𑀺𑀤𑀡𑁆𑀟𑀲𑁆𑀲𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁧𑁩𑁦). 𑀦 𑀳𑁂𑀢𑁆𑀣 𑀔𑀻𑀡𑀸𑀲𑀯𑀸𑀤𑀻𑀦𑀁 𑀕𑀳𑀡𑀁 𑀳𑁄𑀢𑀺. 𑀧𑀸𑀓𑀝𑁄 𑀪𑀯𑁂𑀬𑁆𑀬 𑀯𑀺𑀲𑁂𑀲𑀲𑀸𑀫𑀜𑁆𑀜𑀲𑁆𑀲 𑀯𑀺𑀲𑀬𑀢𑁆𑀢𑀸 𑀧𑀜𑁆𑀳𑀸𑀦𑀁. 𑀦𑁄 𑀘 𑀕𑀡𑁆𑀳𑀺𑀁𑀲𑀼 𑀅𑀝𑁆𑀞𑀓𑀣𑀸𑀘𑀭𑀺𑀬𑀸. 𑀥𑀫𑁆𑀫𑁄 𑀦𑀸𑀫 𑀦𑀢𑁆𑀣𑀺 𑀲𑀗𑁆𑀔𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀥 𑀤𑀼𑀢𑀺𑀬𑀧𑀜𑁆𑀳𑁂 ‘‘𑀲𑀗𑁆𑀔𑀸𑀭𑁄’’𑀢𑀺 𑀧𑀘𑁆𑀘𑀬𑁄 𑀏𑀯 𑀓𑀣𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄.

𑀬𑀤𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀲𑀫𑀥𑀺𑀕𑀢𑁄, 𑀢𑀤𑀸 𑀏𑀯 𑀲𑀩𑁆𑀩𑀜𑁂𑀬𑁆𑀬𑀁 𑀲𑀘𑁆𑀙𑀺𑀓𑀢𑀁 𑀚𑀸𑀢𑀦𑁆𑀢𑀺 𑀆𑀳 ‘‘𑀫𑀳𑀸𑀩𑁄𑀥𑀺𑀫𑀡𑁆𑀟𑁂 𑀦𑀺𑀲𑀻𑀤𑀺𑀢𑁆𑀯𑀸’’𑀢𑀺. 𑀲𑀬𑀦𑁆𑀢𑀺 𑀲𑀸𑀫𑀁𑀬𑁂𑀯. 𑀅𑀤𑁆𑀥𑀦𑀺𑀬𑀦𑁆𑀢𑀺 𑀅𑀤𑁆𑀥𑀸𑀦𑀓𑁆𑀔𑀫𑀁 𑀘𑀺𑀭𑀓𑀸𑀮𑀸𑀯𑀝𑁆𑀞𑀸𑀬𑀺 𑀧𑀸𑀭𑀫𑁆𑀧𑀭𑀺𑀬𑀯𑀲𑁂𑀦. 𑀢𑁂𑀦𑀸𑀳 ‘‘𑀏𑀓𑁂𑀦 𑀳𑀻’’𑀢𑀺𑀆𑀤𑀺. 𑀧𑀭𑀫𑁆𑀧𑀭𑀓𑀣𑀸𑀦𑀺𑀬𑀫𑁂𑀦𑀸𑀢𑀺 𑀧𑀭𑀫𑁆𑀧𑀭𑀓𑀣𑀸𑀓𑀣𑀦𑀦𑀺𑀬𑀫𑁂𑀦, 𑀦𑀺𑀬𑀫𑀺𑀢𑀢𑁆𑀣𑀩𑁆𑀬𑀜𑁆𑀚𑀦𑀸𑀦𑀼𑀧𑀼𑀩𑁆𑀩𑀺𑀬𑀸 𑀓𑀣𑀸𑀬𑀸𑀢𑀺 𑀅𑀢𑁆𑀣𑁄. 𑀏𑀓𑀓𑀯𑀲𑁂𑀦𑀸𑀢𑀺 𑀏𑀓𑀁 𑀏𑀓𑀁 𑀧𑀭𑀺𑀫𑀸𑀡𑀁 𑀏𑀢𑀲𑁆𑀲𑀸𑀢𑀺 𑀏𑀓𑀓𑁄, 𑀧𑀜𑁆𑀳𑁄. 𑀢𑀲𑁆𑀲 𑀏𑀓𑀓𑀲𑁆𑀲 𑀯𑀲𑁂𑀦. 𑀏𑀓𑀓𑀁 𑀦𑀺𑀝𑁆𑀞𑀺𑀢𑀁 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄𑀢𑀺.

𑀏𑀓𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀓𑀯𑀡𑁆𑀡𑀦𑀸

𑁩𑁦𑁪. 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸𑀢𑀺 𑀢𑁂𑀲𑀁 𑀢𑀸𑀯 𑀦𑀸𑀫𑀦𑀝𑁆𑀞𑁂𑀦 𑀦𑀸𑀫𑀪𑀸𑀯𑀁 𑀧𑀞𑀫𑀁 𑀯𑀢𑁆𑀯𑀸 𑀧𑀘𑁆𑀙𑀸 𑀦𑀺𑀩𑁆𑀩𑀸𑀦𑀲𑁆𑀲 𑀯𑀢𑁆𑀢𑀼𑀓𑀸𑀫𑁄 𑀆𑀳. 𑀢𑀲𑁆𑀲𑀸𑀧𑀺 𑀳𑀺 𑀢𑀣𑀸 𑀦𑀸𑀫𑀪𑀸𑀯𑀁 𑀧𑀭𑀢𑁄 𑀯𑀓𑁆𑀔𑀢𑀺. ‘‘𑀦𑀸𑀫𑀁 𑀓𑀭𑁄𑀢𑀺 𑀦𑀸𑀫𑀬𑀢𑀻’’𑀢𑀺 𑀏𑀢𑁆𑀣 𑀬𑀁 𑀦𑀸𑀫𑀓𑀭𑀡𑀁, 𑀢𑀁 𑀦𑀸𑀫𑀦𑁆𑀢𑀺 𑀆𑀳 ‘‘𑀦𑀸𑀫𑀦𑀝𑁆𑀞𑁂𑀦𑀸𑀢𑀺 𑀦𑀸𑀫𑀓𑀭𑀡𑀝𑁆𑀞𑁂𑀦𑀸’’𑀢𑀺, 𑀅𑀢𑁆𑀢𑀦𑁄𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀜𑁆𑀳𑀺 𑀲𑀸𑀢𑀺𑀲𑀬𑀫𑀺𑀤𑀁 𑀢𑁂𑀲𑀁 𑀦𑀸𑀫𑀓𑀭𑀡𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀅𑀢𑁆𑀢𑀦𑁄 𑀦𑀸𑀫𑀁 𑀓𑀭𑁄𑀦𑁆𑀢𑀸𑀯 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺𑀆𑀤𑀺. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀲𑁆𑀲 𑀦𑀸𑀫𑀲𑁆𑀲 𑀓𑀭𑀡𑁂𑀦𑁂𑀯 𑀢𑁂 ‘‘𑀦𑀸𑀫’’𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀁 𑀲𑀸𑀫𑀜𑁆𑀜𑀦𑀸𑀫𑀁, 𑀓𑀺𑀢𑁆𑀢𑀺𑀫𑀦𑀸𑀫𑀁, 𑀕𑀼𑀡𑀦𑀸𑀫𑀁 𑀯𑀸 𑀦 𑀳𑁄𑀢𑀺, 𑀅𑀣 𑀔𑁄 𑀑𑀧𑀧𑀸𑀢𑀺𑀓𑀦𑀸𑀫𑀦𑁆𑀢𑀺 𑀧𑀼𑀭𑀺𑀫𑀸𑀦𑀺 𑀢𑀻𑀡𑀺 𑀦𑀸𑀫𑀸𑀦𑀺 𑀉𑀤𑀸𑀳𑀭𑀡𑀯𑀲𑁂𑀦 𑀤𑀲𑁆𑀲𑁂𑀢𑁆𑀯𑀸 ‘‘𑀦 𑀏𑀯𑀁 𑀯𑁂𑀤𑀦𑀸𑀤𑀻𑀦’’𑀦𑁆𑀢𑀺 𑀢𑁂 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀢𑀭𑀦𑀸𑀫𑀫𑁂𑀯 𑀦𑀸𑀫𑀓𑀭𑀡𑀝𑁆𑀞𑁂𑀦 𑀦𑀸𑀫𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀯𑁂𑀤𑀦𑀸𑀤𑀬𑁄 𑀳𑀻’’𑀢𑀺𑀆𑀤𑀺𑀫𑀸𑀳. ‘‘𑀫𑀳𑀸𑀧𑀣𑀯𑀺𑀆𑀤𑀬𑁄’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀧𑀣𑀯𑀺𑀆𑀧𑀸𑀤𑀬𑁄 𑀇𑀥 𑀦𑀸𑀫𑀦𑁆𑀢𑀺 𑀅𑀦𑀥𑀺𑀧𑁆𑀧𑁂𑀢𑀸, 𑀭𑀽𑀧𑀦𑁆𑀢𑀺 𑀧𑀦 𑀅𑀥𑀺𑀧𑁆𑀧𑁂𑀢𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀨𑀲𑁆𑀲𑀯𑁂𑀤𑀦𑀸𑀤𑀻𑀦𑀁 𑀯𑀺𑀬 𑀧𑀦 𑀧𑀣𑀯𑀺𑀆𑀤𑀻𑀦𑀁 𑀑𑀧𑀧𑀸𑀢𑀺𑀓𑀦𑀸𑀫𑀢𑀸𑀲𑀸𑀫𑀜𑁆𑀜𑁂𑀦 ‘‘𑀧𑀣𑀯𑀺𑀆𑀤𑀬𑁄 𑀯𑀺𑀬𑀸’’𑀢𑀺 𑀦𑀺𑀤𑀲𑁆𑀲𑀦𑀁 𑀓𑀢𑀁, 𑀦 𑀅𑀭𑀽𑀧𑀥𑀫𑁆𑀫𑀸 𑀯𑀺𑀬 𑀭𑀽𑀧𑀥𑀫𑁆𑀫𑀸𑀦𑀁 𑀦𑀸𑀫𑀲𑀪𑀸𑀯𑀢𑁆𑀢𑀸. 𑀨𑀲𑁆𑀲𑀯𑁂𑀤𑀦𑀸𑀤𑀻𑀦𑀜𑁆𑀳𑀺 𑀅𑀭𑀽𑀧𑀥𑀫𑁆𑀫𑀸𑀦𑀁 𑀲𑀩𑁆𑀩𑀤𑀸𑀧𑀺 𑀨𑀲𑁆𑀲𑀸𑀤𑀺𑀦𑀸𑀫𑀓𑀢𑁆𑀢𑀸, 𑀧𑀣𑀯𑀺𑀆𑀤𑀻𑀦𑀁 𑀓𑁂𑀲𑀓𑀼𑀫𑁆𑀪𑀸𑀤𑀺𑀦𑀸𑀫𑀦𑁆𑀢𑀭𑀸𑀧𑀢𑁆𑀢𑀺 𑀯𑀺𑀬 𑀦𑀸𑀫𑀦𑁆𑀢𑀭𑀸𑀦𑀸𑀧𑀚𑁆𑀚𑀦𑀢𑁄 𑀘 𑀲𑀤𑀸 𑀅𑀢𑁆𑀢𑀦𑀸𑀯 𑀓𑀢𑀦𑀸𑀫𑀢𑀸𑀬 𑀘𑀢𑀼𑀓𑁆𑀔𑀦𑁆𑀥𑀦𑀺𑀩𑁆𑀩𑀸𑀦𑀸𑀦𑀺 𑀦𑀸𑀫𑀓𑀭𑀡𑀝𑁆𑀞𑁂𑀦 𑀦𑀸𑀫𑀁. 𑀅𑀣 𑀯𑀸 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑁄 𑀯𑀺𑀬 𑀅𑀥𑀺𑀯𑀘𑀦𑀦𑀸𑀫𑀫𑀦𑁆𑀢𑀭𑁂𑀦 𑀬𑁂 𑀅𑀦𑀼𑀧𑀘𑀺𑀢𑀲𑀫𑁆𑀪𑀸𑀭𑀸𑀦𑀁 𑀕𑀳𑀡𑀁 𑀦 𑀕𑀘𑁆𑀙𑀦𑁆𑀢𑀺, 𑀢𑁂 𑀦𑀸𑀫𑀸𑀬𑀢𑁆𑀢𑀕𑁆𑀕𑀳𑀡𑀸 𑀦𑀸𑀫𑀁. 𑀭𑀽𑀧𑀁 𑀧𑀦 𑀯𑀺𑀦𑀸𑀧𑀺 𑀦𑀸𑀫𑀲𑀸𑀥𑀦𑀁 𑀅𑀢𑁆𑀢𑀦𑁄 𑀭𑀼𑀧𑁆𑀧𑀦𑀲𑀪𑀸𑀯𑁂𑀦 𑀕𑀳𑀡𑀁 𑀉𑀧𑀬𑀸𑀢𑀻𑀢𑀺 𑀭𑀽𑀧𑀁. 𑀢𑁂𑀦𑀸𑀳 ‘‘𑀢𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀽’’𑀢𑀺𑀆𑀤𑀺. 𑀇𑀥𑀸𑀧𑀺 ‘‘𑀬𑀣𑀸𑀧𑀣𑀯𑀺𑀬𑀸’’𑀢𑀺𑀆𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 𑀦𑀺𑀤𑀲𑁆𑀲𑀦𑀯𑀲𑁂𑀦 𑀆𑀕𑀢𑀢𑁆𑀢𑀸. ‘‘𑀅𑀢𑀻𑀢𑁂𑀧𑀻’’𑀢𑀺𑀆𑀤𑀺𑀦𑀸 𑀯𑁂𑀤𑀦𑀸𑀤𑀻𑀲𑀼 𑀦𑀸𑀫𑀲𑀜𑁆𑀜𑀸 𑀦𑀺𑀭𑀼𑀴𑁆𑀳𑀸, 𑀅𑀦𑀸𑀤𑀺𑀓𑀸𑀮𑀺𑀓𑀸 𑀘𑀸𑀢𑀺 𑀤𑀲𑁆𑀲𑁂𑀢𑀺.

𑀇𑀢𑀺 𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑀯𑀦𑁆𑀢𑀸𑀦𑀫𑁆𑀧𑀺 𑀯𑁂𑀤𑀦𑀸𑀤𑀻𑀦𑀁 𑀦𑀸𑀫𑀓𑀭𑀡𑀝𑁆𑀞𑁂𑀦 𑀦𑀸𑀫𑀪𑀸𑀯𑁄 𑀏𑀓𑀦𑁆𑀢𑀺𑀓𑁄, 𑀢𑀩𑁆𑀩𑀺𑀪𑀸𑀕𑀭𑀳𑀺𑀢𑁂 𑀧𑀦 𑀏𑀓𑀲𑀪𑀸𑀯𑁂 𑀦𑀺𑀘𑁆𑀘𑁂 𑀦𑀺𑀩𑁆𑀩𑀸𑀦𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀺𑀩𑁆𑀩𑀸𑀦𑀁 𑀧𑀦…𑀧𑁂… 𑀦𑀸𑀫𑀦𑀝𑁆𑀞𑁂𑀦 𑀦𑀸𑀫’’𑀦𑁆𑀢𑀺 𑀆𑀳. 𑀦𑀸𑀫𑀦𑀝𑁆𑀞𑁂𑀦𑀸𑀢𑀺 𑀦𑀸𑀫𑀓𑀭𑀡𑀝𑁆𑀞𑁂𑀦. 𑀦𑀫𑀦𑁆𑀢𑀻𑀢𑀺 𑀏𑀓𑀦𑁆𑀢𑀢𑁄 𑀲𑀸𑀭𑀫𑁆𑀫𑀡𑀢𑁆𑀢𑀸 𑀢𑀦𑁆𑀦𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀢𑁂𑀳𑀺 𑀯𑀺𑀦𑀸 𑀦𑀧𑁆𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀦𑁆𑀢𑀺 𑀔𑀦𑁆𑀥𑀘𑀢𑀼𑀓𑁆𑀓𑀁, 𑀦𑀺𑀩𑁆𑀩𑀸𑀦𑀜𑁆𑀘. 𑀬𑀲𑁆𑀫𑀺𑀁 𑀆𑀭𑀫𑁆𑀫𑀡𑁂𑀬𑁂𑀯 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀢𑀁𑀲𑀫𑁆𑀧𑀬𑀼𑀢𑁆𑀢𑀢𑀸𑀬 𑀲𑀜𑁆𑀜𑀸𑀓𑁆𑀔𑀦𑁆𑀥𑀸𑀤𑀬𑁄𑀧𑀺 𑀢𑀢𑁆𑀣 𑀧𑀯𑀢𑁆𑀢𑀦𑁆𑀢𑀻𑀢𑀺 𑀲𑁄 𑀦𑁂 𑀢𑀢𑁆𑀣 𑀦𑀸𑀫𑁂𑀦𑁆𑀢𑁄 𑀯𑀺𑀬 𑀳𑁄𑀢𑀺 𑀯𑀺𑀦𑀸 𑀅𑀧𑁆𑀧𑀯𑀢𑁆𑀢𑀦𑀢𑁄. 𑀏𑀲 𑀦𑀬𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑀸𑀤𑀻𑀲𑀼𑀧𑀻𑀢𑀺 𑀯𑀼𑀢𑁆𑀢𑀁 ‘‘𑀆𑀭𑀫𑁆𑀫𑀡𑁂 𑀅𑀜𑁆𑀜𑀫𑀜𑁆𑀜𑀁 𑀦𑀸𑀫𑁂𑀦𑁆𑀢𑀻’’𑀢𑀺. 𑀅𑀦𑀯𑀚𑁆𑀚𑀥𑀫𑁆𑀫𑁂 𑀫𑀕𑁆𑀕𑀨𑀮𑀸𑀤𑀺𑀓𑁂. 𑀓𑀸𑀫𑀁 𑀓𑁂𑀲𑀼𑀘𑀺 𑀭𑀽𑀧𑀥𑀫𑁆𑀫𑁂𑀲𑀼𑀧𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀪𑀸𑀯𑁄 𑀮𑀩𑁆𑀪𑀢𑁂𑀯, 𑀦𑀺𑀩𑁆𑀩𑀸𑀦𑁂 𑀧𑀦𑁂𑀲 𑀲𑀸𑀢𑀺𑀲𑀬𑁄 𑀢𑀲𑁆𑀲 𑀅𑀘𑁆𑀘𑀦𑁆𑀢𑀲𑀦𑁆𑀢𑀧𑀡𑀻𑀢𑀢𑀸𑀓𑀧𑁆𑀧𑀪𑀸𑀯𑀢𑁄𑀢𑀺 𑀢𑀤𑁂𑀯 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑀢𑀸𑀬 ‘‘𑀅𑀢𑁆𑀢𑀦𑀺 𑀦𑀸𑀫𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀅𑀭𑀺𑀬𑀸 𑀲𑀓𑀮𑀫𑁆𑀧𑀺 𑀤𑀺𑀯𑀲𑀪𑀸𑀕𑀁 𑀢𑀁 𑀆𑀭𑀩𑁆𑀪 𑀯𑀻𑀢𑀺𑀦𑀸𑀫𑁂𑀦𑁆𑀢𑀸𑀧𑀺 𑀢𑀺𑀢𑁆𑀢𑀺𑀁 𑀦 𑀕𑀘𑁆𑀙𑀦𑁆𑀢𑀺.

‘‘𑀭𑀼𑀧𑁆𑀧𑀦𑀝𑁆𑀞𑁂𑀦𑀸’’𑀢𑀺 𑀏𑀢𑁂𑀦 𑀭𑀼𑀧𑁆𑀧𑀢𑀻𑀢𑀺 𑀭𑀽𑀧𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀲𑀻𑀢𑀸𑀤𑀺𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀦𑁆𑀦𑀺𑀧𑀸𑀢𑁂 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺 𑀭𑀼𑀧𑁆𑀧𑀦𑀁. 𑀦𑀦𑀼 𑀘 𑀅𑀭𑀽𑀧𑀥𑀫𑁆𑀫𑀸𑀦𑀫𑁆𑀧𑀺 𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀫𑀸𑀕𑀫𑁂 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺 𑀮𑀩𑁆𑀪𑀢𑀻𑀢𑀺? 𑀲𑀘𑁆𑀘𑀁 𑀮𑀩𑁆𑀪𑀢𑀺, 𑀦 𑀧𑀦 𑀯𑀺𑀪𑀽𑀢𑀢𑀭𑀁. 𑀯𑀺𑀪𑀽𑀢𑀢𑀭𑀜𑁆𑀳𑁂𑀢𑁆𑀣 𑀭𑀼𑀧𑁆𑀧𑀦𑀁 𑀅𑀥𑀺𑀧𑁆𑀧𑁂𑀢𑀁 𑀲𑀻𑀢𑀸𑀤𑀺𑀕𑁆𑀕𑀳𑀡𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀭𑀼𑀧𑁆𑀧𑀢𑀻𑀢𑀺 𑀔𑁄 𑀪𑀺𑀓𑁆𑀔𑀯𑁂 𑀢𑀲𑁆𑀫𑀸 ‘𑀭𑀽𑀧’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑁂𑀦 𑀭𑀼𑀧𑁆𑀧𑀢𑀺? 𑀲𑀻𑀢𑁂𑀦𑀧𑀺 𑀭𑀼𑀧𑁆𑀧𑀢𑀺, 𑀉𑀡𑁆𑀳𑁂𑀦𑀧𑀺 𑀭𑀼𑀧𑁆𑀧𑀢𑀻’’𑀢𑀺𑀆𑀤𑀺 (𑀲𑀁. 𑀦𑀺. 𑁩.𑁭𑁯). 𑀬𑀤𑀺 𑀏𑀯𑀁 𑀓𑀣𑀁 𑀩𑁆𑀭𑀳𑁆𑀫𑀮𑁄𑀓𑁂 𑀭𑀽𑀧𑀲𑀫𑀜𑁆𑀜𑀸𑀢𑀺? 𑀢𑀢𑁆𑀣𑀸𑀧𑀺 𑀢𑀁𑀲𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄 𑀳𑁄𑀢𑀺𑀬𑁂𑀯 𑀭𑀽𑀧𑀲𑀫𑀜𑁆𑀜𑀸. 𑀅𑀦𑀼𑀕𑁆𑀕𑀸𑀳𑀓𑀧𑀘𑁆𑀘𑀬𑀯𑀲𑁂𑀦 𑀯𑀸 𑀯𑀺𑀲𑀤𑀺𑀲𑀧𑀘𑁆𑀘𑀬𑀲𑀦𑁆𑀦𑀺𑀧𑀸𑀢𑁂𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀬𑁄 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀯𑀺𑀚𑁆𑀚𑀫𑀸𑀦𑀲𑁆𑀲𑀬𑁂𑀯 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑁄, 𑀢𑀁 𑀭𑀼𑀧𑁆𑀧𑀦’’𑀦𑁆𑀢𑀺 𑀅𑀜𑁆𑀜𑁂. 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀭𑀽𑀧𑀬𑀢𑀺 𑀯𑀺𑀓𑀸𑀭𑀫𑀸𑀧𑀸𑀤𑁂𑀢𑀻𑀢𑀺 𑀭𑀽𑀧𑀁. ‘‘𑀲𑀗𑁆𑀖𑀝𑁆𑀝𑀦𑁂𑀦 𑀯𑀺𑀓𑀸𑀭𑀸𑀧𑀢𑁆𑀢𑀺𑀬𑀁 𑀭𑀼𑀧𑁆𑀧𑀦-𑀲𑀤𑁆𑀤𑁄 𑀦𑀺𑀭𑀼𑀴𑁆𑀳𑁄’’𑀢𑀺 𑀓𑁂𑀘𑀺. 𑀏𑀢𑀲𑁆𑀫𑀺𑀁 𑀧𑀓𑁆𑀔𑁂 𑀅𑀭𑀽𑀧𑀥𑀫𑁆𑀫𑁂𑀲𑀼 𑀭𑀽𑀧𑀲𑀫𑀜𑁆𑀜𑀸𑀬 𑀧𑀲𑀗𑁆𑀕𑁄 𑀏𑀯 𑀦𑀢𑁆𑀣𑀺 𑀲𑀗𑁆𑀖𑀝𑁆𑀝𑀦𑀸𑀪𑀸𑀯𑀢𑁄. ‘‘𑀧𑀝𑀺𑀖𑀢𑁄 𑀭𑀼𑀧𑁆𑀧𑀦’’𑀦𑁆𑀢𑀺 𑀅𑀧𑀭𑁂. ‘‘𑀢𑀲𑁆𑀲𑀸𑀢𑀺 𑀭𑀽𑀧𑀲𑁆𑀲𑀸’’𑀢𑀺 𑀯𑀤𑀦𑁆𑀢𑀺, 𑀦𑀸𑀫𑀭𑀽𑀧𑀲𑁆𑀲𑀸𑀢𑀺 𑀧𑀦 𑀬𑀼𑀢𑁆𑀢𑀁. 𑀬𑀣𑀸 𑀳𑀺 𑀭𑀽𑀧𑀲𑁆𑀲, 𑀏𑀯𑀁 𑀦𑀸𑀫𑀲𑁆𑀲𑀸𑀧𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀯𑀲𑁂𑀦, 𑀫𑀤𑀦𑀺𑀫𑁆𑀫𑀤𑀦𑀸𑀤𑀺𑀯𑀲𑁂𑀦 𑀘 𑀯𑀺𑀢𑁆𑀣𑀸𑀭𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁪𑁫𑁬) 𑀯𑀼𑀢𑁆𑀢𑀸 𑀏𑀯𑀸𑀢𑀺. 𑀇𑀢𑀺 𑀅𑀬𑀁 𑀤𑀼𑀓𑁄 𑀓𑀼𑀲𑀮𑀢𑁆𑀢𑀺𑀓𑁂𑀦 𑀲𑀗𑁆𑀕𑀳𑀺𑀢𑁂 𑀲𑀪𑀸𑀯𑀥𑀫𑁆𑀫𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑁄𑀢𑀺.

𑀅𑀯𑀺𑀚𑁆𑀚𑀸𑀢𑀺 𑀅𑀯𑀺𑀦𑁆𑀤𑀺𑀬𑀁 ‘‘𑀅𑀢𑁆𑀢𑀸, 𑀚𑀻𑀯𑁄, 𑀇𑀢𑁆𑀣𑀻, 𑀧𑀼𑀭𑀺𑀲𑁄’’𑀢𑀺 𑀏𑀯𑀫𑀸𑀤𑀺𑀓𑀁 𑀯𑀺𑀦𑁆𑀤𑀢𑀻𑀢𑀺 𑀅𑀯𑀺𑀚𑁆𑀚𑀸. 𑀯𑀺𑀦𑁆𑀤𑀺𑀬𑀁 ‘‘𑀤𑀼𑀓𑁆𑀔𑀁, 𑀲𑀫𑀼𑀤𑀬𑁄’’𑀢𑀺 𑀏𑀯𑀫𑀸𑀤𑀺𑀓𑀁 𑀦 𑀯𑀺𑀦𑁆𑀤𑀢𑀻𑀢𑀺 𑀅𑀯𑀺𑀚𑁆𑀚𑀸. 𑀲𑀩𑁆𑀩𑀫𑁆𑀧𑀺 𑀥𑀫𑁆𑀫𑀚𑀸𑀢𑀁 𑀅𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦 𑀅𑀯𑀺𑀚𑁆𑀚𑀸. 𑀅𑀦𑁆𑀢𑀭𑀳𑀺𑀢𑁂 𑀲𑀁𑀲𑀸𑀭𑁂 𑀲𑀢𑁆𑀢𑁂 𑀚𑀯𑀸𑀧𑁂𑀢𑀻𑀢𑀺 𑀅𑀯𑀺𑀚𑁆𑀚𑀸. 𑀅𑀢𑁆𑀣𑀢𑁄 𑀧𑀦 𑀲𑀸 𑀤𑀼𑀓𑁆𑀔𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀲𑀪𑀸𑀯𑀘𑁆𑀙𑀸𑀤𑀓𑁄 𑀲𑀫𑁆𑀫𑁄𑀳𑁄 𑀳𑁄𑀢𑀻𑀢𑀺 𑀆𑀳 ‘‘𑀤𑀼𑀓𑁆𑀔𑀸𑀤𑀻𑀲𑀼 𑀅𑀜𑁆𑀜𑀸𑀡’’𑀦𑁆𑀢𑀺. 𑀪𑀯𑀧𑀢𑁆𑀣𑀦𑀸 𑀦𑀸𑀫 𑀓𑀸𑀫𑀪𑀯𑀸𑀤𑀻𑀦𑀁 𑀧𑀢𑁆𑀣𑀦𑀸𑀯𑀲𑁂𑀦 𑀧𑀯𑀢𑁆𑀢𑀢𑀡𑁆𑀳𑀸. 𑀢𑁂𑀦𑀸𑀳 ‘‘𑀬𑁄 𑀪𑀯𑁂𑀲𑀼 𑀪𑀯𑀘𑁆𑀙𑀦𑁆𑀤𑁄’’𑀢𑀺𑀆𑀤𑀺. 𑀇𑀢𑀺 ‘‘𑀅𑀬𑀁 𑀤𑀼𑀓𑁄 𑀯𑀝𑁆𑀝𑀫𑀽𑀮𑀲𑀫𑀼𑀤𑀸𑀘𑀸𑀭𑀤𑀲𑁆𑀲𑀦𑀢𑁆𑀣𑀁 𑀕𑀳𑀺𑀢𑁄.

𑀪𑀯𑀤𑀺𑀝𑁆𑀞𑀻𑀢𑀺 𑀔𑀦𑁆𑀥𑀧𑀜𑁆𑀘𑀓𑀁 ‘‘𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 𑀕𑀸𑀳𑁂𑀢𑁆𑀯𑀸 𑀢𑀁 ‘‘𑀪𑀯𑀺𑀲𑁆𑀲𑀢𑀻’’𑀢𑀺 𑀕𑀡𑁆𑀳𑀦𑀯𑀲𑁂𑀦 𑀦𑀺𑀯𑀺𑀝𑁆𑀞𑀸 𑀲𑀲𑁆𑀲𑀢𑀤𑀺𑀝𑁆𑀞𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀪𑀯𑁄 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀺. 𑀪𑀯𑀺𑀲𑁆𑀲𑀢𑀻𑀢𑀺 𑀪𑀯𑁄, 𑀢𑀺𑀝𑁆𑀞𑀢𑀺 𑀲𑀩𑁆𑀩𑀓𑀸𑀮𑀁 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀲𑀲𑁆𑀲𑀢𑀦𑁆𑀢𑀺 𑀲𑀲𑁆𑀲𑀢𑀪𑀸𑀯𑁄. 𑀯𑀺𑀪𑀯𑀤𑀺𑀝𑁆𑀞𑀻𑀢𑀺 𑀔𑀦𑁆𑀥𑀧𑀜𑁆𑀘𑀓𑀫𑁂𑀯 ‘‘𑀅𑀢𑁆𑀢𑀸’’𑀢𑀺 𑀘 ‘‘𑀮𑁄𑀓𑁄’’𑀢𑀺 𑀘 𑀕𑀳𑁂𑀢𑁆𑀯𑀸 𑀢𑀁 ‘‘𑀦 𑀪𑀯𑀺𑀲𑁆𑀲𑀢𑀻’’𑀢𑀺 𑀕𑀡𑁆𑀳𑀦𑀯𑀲𑁂𑀦 𑀦𑀺𑀯𑀺𑀝𑁆𑀞𑀸 𑀉𑀘𑁆𑀙𑁂𑀤𑀤𑀺𑀝𑁆𑀞𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀯𑀺𑀪𑀯𑁄 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀺. 𑀯𑀺𑀪𑀯𑀺𑀲𑁆𑀲𑀢𑀺 𑀯𑀺𑀦𑀲𑁆𑀲𑀢𑀺 𑀉𑀘𑁆𑀙𑀺𑀚𑁆𑀚𑀢𑀻𑀢𑀺 𑀯𑀺𑀪𑀯𑁄, 𑀉𑀘𑁆𑀙𑁂𑀤𑁄.

𑀬𑀁 𑀦 𑀳𑀺𑀭𑀻𑀬𑀢𑀻𑀢𑀺 𑀬𑁂𑀦 𑀥𑀫𑁆𑀫𑁂𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀲𑀫𑀽𑀳𑁄, 𑀧𑀼𑀕𑁆𑀕𑀮𑁄 𑀯𑀸 𑀦 𑀳𑀺𑀭𑀻𑀬𑀢𑀺 𑀦 𑀮𑀚𑁆𑀚𑀢𑀺, 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀁 𑀯𑀸 𑀓𑀢𑁆𑀯𑀸 𑀬𑁄 𑀥𑀫𑁆𑀫𑁄𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀳𑀺𑀭𑀻𑀬𑀺𑀢𑀩𑁆𑀩𑁂𑀦𑀸𑀢𑀺 𑀉𑀧𑀬𑁄𑀕𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀳𑀺𑀭𑀻𑀬𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀥𑀫𑁆𑀫𑀁 𑀦 𑀚𑀺𑀕𑀼𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀦𑀺𑀮𑁆𑀮𑀚𑁆𑀚𑀢𑀸𑀢𑀺 𑀧𑀸𑀧𑀲𑁆𑀲 𑀅𑀚𑀺𑀕𑀼𑀘𑁆𑀙𑀦𑀸. 𑀬𑀁 𑀦 𑀑𑀢𑁆𑀢𑀧𑁆𑀧𑀢𑀻𑀢𑀺 𑀏𑀢𑁆𑀣𑀸𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀑𑀢𑁆𑀢𑀧𑁆𑀧𑀺𑀢𑀩𑁆𑀩𑁂𑀦𑀸𑀢𑀺 𑀧𑀦 𑀳𑁂𑀢𑀼𑀅𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀑𑀢𑁆𑀢𑀧𑁆𑀧𑀺𑀢𑀩𑁆𑀩𑀬𑀼𑀢𑁆𑀢𑀓𑁂𑀦 𑀑𑀢𑁆𑀢𑀧𑁆𑀧𑀲𑁆𑀲 𑀳𑁂𑀢𑀼𑀪𑀽𑀢𑁂𑀦 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀦𑀸𑀢𑀺 𑀅𑀢𑁆𑀣𑁄. 𑀳𑀺𑀭𑀻𑀬𑀺𑀢𑀩𑁆𑀩𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 𑀯𑀸 𑀏𑀯𑀫𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀪𑀸𑀬𑀦𑀓𑀆𑀓𑀸𑀭𑁄𑀢𑀺 𑀧𑀸𑀧𑀢𑁄 𑀅𑀦𑀼𑀢𑁆𑀢𑀸𑀲𑀦𑀸𑀓𑀸𑀭𑁄.

‘‘𑀬𑀁 𑀳𑀺𑀭𑀻𑀬𑀢𑀻’’𑀢𑀺𑀆𑀤𑀻𑀲𑀼 𑀅𑀦𑀦𑁆𑀢𑀭𑀤𑀼𑀓𑁂 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀦𑀺𑀬𑀓𑀚𑁆𑀛𑀢𑁆𑀢𑀁 𑀚𑀸𑀢𑀺𑀆𑀤𑀺𑀲𑀫𑀼𑀝𑁆𑀞𑀸𑀦𑀁 𑀏𑀢𑀺𑀲𑁆𑀲𑀸𑀢𑀺 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀸. 𑀦𑀺𑀬𑀓𑀚𑁆𑀛𑀢𑁆𑀢𑀢𑁄 𑀩𑀳𑀺𑀪𑀸𑀯𑀢𑁄 𑀩𑀳𑀺𑀤𑁆𑀥𑀸 𑀧𑀭𑀲𑀦𑁆𑀢𑀸𑀦𑁂 𑀲𑀫𑀼𑀝𑁆𑀞𑀸𑀦𑀁 𑀏𑀢𑀺𑀲𑁆𑀲𑀸𑀢𑀺 𑀩𑀳𑀺𑀤𑁆𑀥𑀸 𑀲𑀫𑀼𑀝𑁆𑀞𑀸𑀦𑀸. 𑀅𑀢𑁆𑀢𑀸 𑀏𑀯 𑀅𑀥𑀺𑀧𑀢𑀺 𑀅𑀢𑁆𑀢𑀸𑀥𑀺𑀧𑀢𑀺, 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀢𑁆𑀢𑀸 𑀏𑀯 𑀅𑀢𑁆𑀢𑀸𑀥𑀺𑀧𑀢𑀺𑀢𑁄 𑀆𑀕𑀫𑀦𑀢𑁄 𑀅𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀸. 𑀮𑁄𑀓𑀸𑀥𑀺𑀧𑀢𑁂𑀬𑁆𑀬𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀮𑀚𑁆𑀚𑀸𑀲𑀪𑀸𑀯𑀲𑀡𑁆𑀞𑀺𑀢𑀸𑀢𑀺 𑀧𑀸𑀧𑀢𑁄 𑀚𑀺𑀕𑀼𑀘𑁆𑀙𑀦𑀭𑀽𑀧𑁂𑀦 𑀅𑀯𑀝𑁆𑀞𑀺𑀢𑀸. 𑀪𑀬𑀲𑀪𑀸𑀯𑀲𑀡𑁆𑀞𑀺𑀢𑀦𑁆𑀢𑀺 𑀢𑀢𑁄 𑀉𑀢𑁆𑀢𑀸𑀲𑀦𑀭𑀽𑀧𑁂𑀦 𑀅𑀯𑀝𑁆𑀞𑀺𑀢𑀁. 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀤𑀺𑀢𑀸 𑀘 𑀳𑀺𑀭𑁄𑀢𑁆𑀢𑀧𑁆𑀧𑀸𑀦𑀁 𑀢𑀢𑁆𑀣 𑀢𑀢𑁆𑀣 𑀧𑀸𑀓𑀝𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀦 𑀧𑀦 𑀢𑁂𑀲𑀁 𑀓𑀤𑀸𑀘𑀺𑀧𑀺 𑀅𑀜𑁆𑀜𑀫𑀜𑁆𑀜𑀯𑀺𑀧𑁆𑀧𑀬𑁄𑀕𑀢𑁄. 𑀦 𑀳𑀺 𑀮𑀚𑁆𑀚𑀦𑀁 𑀦𑀺𑀩𑁆𑀪𑀬𑀁, 𑀧𑀸𑀧𑀪𑀬𑀁 𑀯𑀸 𑀅𑀮𑀚𑁆𑀚𑀦𑀁 𑀅𑀢𑁆𑀣𑀻𑀢𑀺.

𑀤𑀼𑀓𑁆𑀔𑀦𑁆𑀢𑀺 𑀓𑀺𑀘𑁆𑀙𑀁, 𑀅𑀦𑀺𑀝𑁆𑀞𑀦𑁆𑀢𑀺 𑀯𑀸 𑀅𑀢𑁆𑀣𑁄. 𑀯𑀺𑀧𑁆𑀧𑀝𑀺𑀓𑀽𑀮𑀕𑀸𑀳𑀺𑀫𑁆𑀳𑀻𑀢𑀺 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀬𑀸 𑀯𑀺𑀮𑁄𑀫𑀕𑀸𑀳𑀓𑁂. 𑀢𑀲𑁆𑀲𑀸 𑀏𑀯 𑀯𑀺𑀧𑀘𑁆𑀘𑀦𑀻𑀓𑀁 𑀤𑀼𑀧𑁆𑀧𑀝𑀺𑀧𑀢𑁆𑀢𑀺 𑀲𑀸𑀢𑀁 𑀇𑀝𑁆𑀞𑀁 𑀏𑀢𑀲𑁆𑀲𑀸𑀢𑀺 𑀯𑀺𑀧𑀘𑁆𑀘𑀦𑀻𑀓𑀲𑀸𑀢𑁄, 𑀢𑀲𑁆𑀫𑀺𑀁 𑀯𑀺𑀧𑀘𑁆𑀘𑀦𑀻𑀓𑀲𑀸𑀢𑁂. 𑀏𑀯𑀁𑀪𑀽𑀢𑁄 𑀘 𑀑𑀯𑀸𑀤𑀪𑀽𑀢𑁂 𑀲𑀸𑀲𑀦𑀓𑁆𑀓𑀫𑁂 𑀑𑀯𑀸𑀤𑀓𑁂 𑀘 𑀆𑀤𑀭𑀪𑀸𑀯𑀭𑀳𑀺𑀢𑁄 𑀳𑁄𑀢𑀻𑀢𑀺 𑀆𑀳 ‘‘𑀅𑀦𑀸𑀤𑀭𑁂’’𑀢𑀺. 𑀢𑀲𑁆𑀲 𑀓𑀫𑁆𑀫𑀦𑁆𑀢𑀺 𑀢𑀲𑁆𑀲 𑀤𑀼𑀩𑁆𑀩𑀘𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀦𑀸𑀤𑀭𑀺𑀬𑀯𑀲𑁂𑀦 𑀧𑀯𑀢𑁆𑀢𑀘𑁂𑀢𑀦𑀸 𑀤𑁄𑀯𑀘𑀲𑁆𑀲𑀁. 𑀢𑀲𑁆𑀲 𑀪𑀸𑀯𑁄𑀢𑀺 𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑁆𑀲 𑀤𑁄𑀯𑀘𑀲𑁆𑀲𑀲𑁆𑀲 𑀅𑀢𑁆𑀣𑀺𑀪𑀸𑀯𑁄 𑀤𑁄𑀯𑀘𑀲𑁆𑀲𑀢𑀸, 𑀅𑀢𑁆𑀣𑀢𑁄 𑀤𑁄𑀯𑀘𑀲𑁆𑀲𑀫𑁂𑀯. 𑀢𑁂𑀦𑁂𑀯𑀸𑀳 ‘‘𑀲𑀸 𑀅𑀢𑁆𑀣𑀢𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀳𑁄𑀢𑀻’’𑀢𑀺. 𑀘𑁂𑀢𑀦𑀸𑀧𑁆𑀧𑀥𑀸𑀦𑀢𑀸𑀬 𑀳𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑁆𑀲 𑀏𑀯𑀁 𑀯𑀼𑀢𑁆𑀢𑀁. 𑀏𑀢𑁂𑀦𑀸𑀓𑀸𑀭𑁂𑀦𑀸𑀢𑀺 𑀅𑀧𑁆𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀺𑀢𑀸𑀓𑀸𑀭𑁂𑀦. 𑀅𑀲𑁆𑀲𑀤𑁆𑀥𑀺𑀬𑀤𑀼𑀲𑁆𑀲𑀻𑀮𑁆𑀬𑀸𑀤𑀺𑀧𑀸𑀧𑀥𑀫𑁆𑀫𑀬𑁄𑀕𑀢𑁄 𑀧𑀼𑀕𑁆𑀕𑀮𑀸 𑀧𑀸𑀧𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑁂 𑀢𑁂 𑀧𑀼𑀕𑁆𑀕𑀮𑀸 𑀅𑀲𑁆𑀲𑀤𑁆𑀥𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀸𑀬 𑀘𑁂𑀢𑀦𑀸𑀬 𑀧𑀼𑀕𑁆𑀕𑀮𑁄 𑀧𑀸𑀧𑀲𑀫𑁆𑀧𑀯𑀗𑁆𑀓𑁄 𑀦𑀸𑀫 𑀳𑁄𑀢𑀺, 𑀲𑀸 𑀘𑁂𑀢𑀦𑀸 𑀧𑀸𑀧𑀫𑀺𑀢𑁆𑀢𑀢𑀸, 𑀘𑀢𑁆𑀢𑀸𑀭𑁄𑀧𑀺 𑀯𑀸 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸 𑀢𑀤𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀧𑀸𑀧𑀫𑀺𑀢𑁆𑀢𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀸𑀧𑀺 𑀅𑀢𑁆𑀣𑀢𑁄 𑀤𑁄𑀯𑀘𑀲𑁆𑀲𑀢𑀸 𑀯𑀺𑀬 𑀤𑀝𑁆𑀞𑀩𑁆𑀩𑀸’’𑀢𑀺 𑀆𑀳.

‘‘𑀲𑀼𑀔𑀁 𑀯𑀘𑁄 𑀏𑀢𑀲𑁆𑀫𑀺𑀁 𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀺𑀫𑁆𑀳𑀺 𑀅𑀦𑀼𑀮𑁄𑀫𑀲𑀸𑀢𑁂 𑀲𑀸𑀤𑀭𑁂 𑀧𑀼𑀕𑁆𑀕𑀮𑁂𑀢𑀺 𑀲𑀼𑀩𑁆𑀩𑀘𑁄𑀢𑀺𑀆𑀤𑀺𑀦𑀸, ‘‘𑀓𑀮𑁆𑀬𑀸𑀡𑀸 𑀲𑀤𑁆𑀥𑀸𑀤𑀬𑁄 𑀧𑀼𑀕𑁆𑀕𑀮𑀸 𑀏𑀢𑀲𑁆𑀲 𑀫𑀺𑀢𑁆𑀢𑀸𑀢𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀘 𑀅𑀦𑀦𑁆𑀢𑀭𑀤𑀼𑀓𑀲𑁆𑀲 𑀅𑀢𑁆𑀣𑁄 𑀇𑀘𑁆𑀙𑀺𑀢𑁄𑀢𑀺 𑀆𑀳 𑀲𑁄𑀯𑀘𑀲𑁆𑀲𑀢𑀸…𑀧𑁂… 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸’’𑀢𑀺. 𑀉𑀪𑁄𑀢𑀺 𑀲𑁄𑀯𑀘𑀲𑁆𑀲𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀘. 𑀢𑁂𑀲𑀁 𑀔𑀦𑁆𑀥𑀸𑀦𑀁 𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀲𑁂𑀲𑀸 ‘‘𑀲𑁄𑀯𑀘𑀲𑁆𑀲𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸’’𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺, 𑀢𑁂 𑀮𑁄𑀓𑀺𑀬𑀸𑀧𑀺 𑀳𑁄𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀸𑀧𑀻𑀢𑀺 𑀆𑀳 ‘‘𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀓𑀣𑀺𑀢𑀸’’𑀢𑀺.

𑀯𑀢𑁆𑀣𑀼𑀪𑁂𑀤𑀸𑀤𑀺𑀦𑀸 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑀸 𑀢𑀁𑀢𑀁𑀚𑀸𑀢𑀺𑀯𑀲𑁂𑀦 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀭𑀸𑀲𑀺𑀢𑁄 𑀕𑀬𑁆𑀳𑀫𑀸𑀦𑀸 𑀆𑀧𑀢𑁆𑀢𑀺𑀬𑁄𑀯 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸. 𑀢𑀸 𑀧𑀦 𑀅𑀦𑁆𑀢𑀭𑀸𑀧𑀢𑁆𑀢𑀻𑀦𑀁 𑀅𑀕𑁆𑀕𑀳𑀡𑁂 𑀧𑀜𑁆𑀘𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀆𑀧𑀢𑁆𑀢𑀺𑀬𑁄, 𑀢𑀸𑀲𑀁 𑀧𑀦 𑀕𑀳𑀡𑁂 𑀲𑀢𑁆𑀢𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀆𑀧𑀢𑁆𑀢𑀺𑀬𑁄. ‘‘𑀇𑀫𑀸 𑀆𑀧𑀢𑁆𑀢𑀺𑀬𑁄, 𑀏𑀢𑁆𑀢𑀓𑀸 𑀆𑀧𑀢𑁆𑀢𑀺𑀬𑁄, 𑀏𑀯𑀜𑁆𑀘 𑀢𑁂𑀲𑀁 𑀆𑀧𑀚𑁆𑀚𑀦𑀁 𑀳𑁄𑀢𑀻’’𑀢𑀺 𑀚𑀸𑀦𑀦𑀧𑀜𑁆𑀜𑀸 𑀆𑀧𑀢𑁆𑀢𑀺𑀓𑀼𑀲𑀮𑀢𑀸𑀢𑀺 𑀆𑀳 ‘‘𑀬𑀸 𑀢𑀸𑀲’’𑀦𑁆𑀢𑀺𑀆𑀤𑀺. 𑀢𑀸𑀲𑀁 𑀆𑀧𑀢𑁆𑀢𑀻𑀦𑀦𑁆𑀢𑀺 𑀢𑀸𑀲𑀼 𑀆𑀧𑀢𑁆𑀢𑀻𑀲𑀼. 𑀢𑀢𑁆𑀣 𑀬𑀁 𑀲𑀫𑁆𑀪𑀺𑀦𑁆𑀦𑀯𑀢𑁆𑀣𑀼𑀓𑀸𑀲𑀼 𑀯𑀺𑀬 𑀞𑀺𑀢𑀸𑀲𑀼, 𑀤𑀼𑀯𑀺𑀜𑁆𑀜𑁂𑀬𑁆𑀬𑀯𑀺𑀪𑀸𑀕𑀸𑀲𑀼 𑀘 𑀆𑀧𑀢𑁆𑀢𑀻𑀲𑀼 𑀅𑀲𑀗𑁆𑀓𑀭𑀢𑁄 𑀯𑀯𑀢𑁆𑀣𑀸𑀦, 𑀅𑀬𑀁 𑀯𑀺𑀲𑁂𑀲𑀢𑁄 𑀆𑀧𑀢𑁆𑀢𑀺𑀓𑀼𑀲𑀮𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 𑀤𑀼𑀢𑀺𑀬𑀁 𑀆𑀧𑀢𑁆𑀢𑀺𑀕𑁆𑀕𑀳𑀡𑀁 𑀓𑀢𑀁. 𑀲𑀳 𑀓𑀫𑁆𑀫𑀯𑀸𑀘𑀸𑀬𑀸𑀢𑀺 𑀓𑀫𑁆𑀫𑀯𑀸𑀘𑀸𑀬 𑀲𑀳𑁂𑀯. 𑀆𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀧𑀦𑀧𑀬𑁄𑀕𑀢𑀸𑀬 𑀓𑀫𑁆𑀫𑀪𑀽𑀢𑀸 𑀯𑀸𑀘𑀸 𑀓𑀫𑁆𑀫𑀯𑀸𑀘𑀸, 𑀢𑀣𑀸𑀪𑀽𑀢𑀸 𑀅𑀦𑀼𑀲𑀸𑀯𑀦𑀯𑀸𑀘𑀸 𑀘𑁂𑀯 ‘‘𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀯𑀸𑀘𑀸 𑀘. 𑀢𑀸𑀬 𑀓𑀫𑁆𑀫𑀯𑀸𑀘𑀸𑀬 𑀲𑀤𑁆𑀥𑀺𑀁 𑀲𑀫𑀓𑀸𑀮𑀫𑁂𑀯 ‘‘𑀇𑀫𑀸𑀬 𑀓𑀫𑁆𑀫𑀯𑀸𑀘𑀸𑀬 𑀇𑀢𑁄 𑀆𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀳𑁄𑀦𑁆𑀢𑀜𑁆𑀘 𑀧𑀞𑀫𑁂 𑀯𑀸 𑀢𑀢𑀺𑀬𑁂 𑀯𑀸 𑀅𑀦𑀼𑀲𑀸𑀯𑀦𑁂𑀬𑁆𑀬𑀓𑀸𑀭𑀧𑁆𑀧𑀢𑁆𑀢𑁂, ‘𑀲𑀁𑀯𑀭𑀺𑀲𑁆𑀲𑀸𑀫𑀻’𑀢𑀺 𑀯𑀸 𑀧𑀤𑁂 𑀧𑀭𑀺𑀬𑁄𑀲𑀺𑀢𑁂 𑀳𑁄𑀢𑀻’’𑀢𑀺 𑀏𑀯𑀁 𑀢𑀁 𑀢𑀁 𑀆𑀧𑀢𑁆𑀢𑀻𑀳𑀺 𑀯𑀼𑀝𑁆𑀞𑀸𑀦𑀧𑀭𑀺𑀘𑁆𑀙𑁂𑀤𑀧𑀭𑀺𑀚𑀸𑀦𑀦𑀧𑀜𑁆𑀜𑀸 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀓𑀼𑀲𑀮𑀢𑀸. 𑀯𑀼𑀝𑁆𑀞𑀸𑀦𑀦𑁆𑀢𑀺 𑀘 𑀬𑀣𑀸𑀧𑀦𑁆𑀦𑀸𑀬 𑀆𑀧𑀢𑁆𑀢𑀺𑀬𑀸 𑀬𑀣𑀸 𑀢𑀣𑀸 𑀅𑀦𑀦𑁆𑀢𑀭𑀸𑀬𑀢𑀸𑀧𑀸𑀤𑀦𑀁, 𑀏𑀯𑀁 𑀯𑀼𑀝𑁆𑀞𑀸𑀦𑀕𑁆𑀕𑀳𑀡𑁂𑀦𑁂𑀯 𑀤𑁂𑀲𑀦𑀸𑀬𑀧𑀺 𑀲𑀗𑁆𑀕𑀳𑁄 𑀲𑀺𑀤𑁆𑀥𑁄 𑀳𑁄𑀢𑀺.

‘‘𑀇𑀢𑁄 𑀧𑀼𑀩𑁆𑀩𑁂 𑀧𑀭𑀺𑀓𑀫𑁆𑀫𑀁 𑀧𑀯𑀢𑁆𑀢𑀁, 𑀇𑀢𑁄 𑀧𑀭𑀁 𑀪𑀯𑀗𑁆𑀕 𑀫𑀚𑁆𑀛𑁂 𑀲𑀫𑀸𑀧𑀢𑁆𑀢𑀻’’𑀢𑀺 𑀏𑀯𑀁 𑀲𑀫𑀸𑀧𑀢𑁆𑀢𑀻𑀦𑀁 𑀅𑀧𑁆𑀧𑀦𑀸𑀧𑀭𑀺𑀘𑁆𑀙𑁂𑀤𑀚𑀸𑀦𑀦𑀧𑀜𑁆𑀜𑀸 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑀢𑀸. 𑀯𑀼𑀝𑁆𑀞𑀸𑀦𑁂 𑀓𑀼𑀲𑀮𑀪𑀸𑀯𑁄 𑀯𑀼𑀝𑁆𑀞𑀸𑀦𑀓𑀼𑀲𑀮𑀢𑀸, 𑀧𑀕𑁂𑀯 𑀯𑀼𑀝𑁆𑀞𑀸𑀦 𑀧𑀭𑀺𑀘𑁆𑀙𑁂𑀤𑀓𑀭𑀁 𑀜𑀸𑀡𑀁. 𑀢𑁂𑀦𑀸𑀳 ‘‘𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀲𑀫𑀬𑀯𑀲𑁂𑀦𑁂𑀯𑀸’’𑀢𑀺𑀆𑀤𑀺. 𑀯𑀼𑀝𑁆𑀞𑀸𑀦𑀲𑀫𑀢𑁆𑀣𑀸𑀢𑀺 𑀯𑀼𑀝𑁆𑀞𑀸𑀧𑀦𑁂 𑀲𑀫𑀢𑁆𑀣𑀸.

‘‘𑀥𑀸𑀢𑀼𑀓𑀼𑀲𑀮𑀢𑀸’’𑀢𑀺 𑀏𑀢𑁆𑀣 𑀧𑀣𑀯𑀻𑀥𑀸𑀢𑀼𑀆𑀤𑀬𑁄, 𑀲𑀼𑀔𑀥𑀸𑀢𑀼𑀆𑀤𑀬𑁄, 𑀓𑀸𑀫𑀥𑀸𑀢𑀼𑀆𑀤𑀬𑁄 𑀘 𑀥𑀸𑀢𑀼𑀬𑁄 𑀏𑀢𑀸𑀲𑁆𑀯𑁂𑀯 𑀅𑀦𑁆𑀢𑁄𑀕𑀥𑀸𑀢𑀺 𑀏𑀢𑀸𑀲𑀼 𑀓𑁄𑀲𑀮𑁆𑀮𑁂 𑀤𑀲𑁆𑀲𑀺𑀢𑁂 𑀢𑀸𑀲𑀼𑀧𑀺 𑀓𑁄𑀲𑀮𑁆𑀮𑀁 𑀤𑀲𑁆𑀲𑀺𑀢𑀫𑁂𑀯 𑀳𑁄𑀢𑀻𑀢𑀺 ‘‘𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀘𑀓𑁆𑀔𑀼𑀥𑀸𑀢𑀼…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽’’𑀢𑀺 𑀯𑀢𑁆𑀯𑀸 ‘‘𑀅𑀝𑁆𑀞𑀸𑀭𑀲𑀦𑁆𑀦𑀁 𑀥𑀸𑀢𑀽𑀦𑀁 𑀲𑀪𑀸𑀯𑀧𑀭𑀺𑀘𑁆𑀙𑁂𑀤𑀓𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀪𑀸𑀯𑀧𑀭𑀺𑀘𑁆𑀙𑁂𑀤𑀓𑀸𑀢𑀺 𑀬𑀣𑀸𑀪𑀽𑀢𑀲𑀪𑀸𑀯𑀸𑀯𑀩𑁄𑀥𑀺𑀦𑀻. ‘‘𑀲𑀯𑀦𑀧𑀜𑁆𑀜𑀸 𑀥𑀸𑀭𑀡𑀧𑀜𑁆𑀜𑀸’’𑀢𑀺𑀆𑀤𑀺𑀦𑀸 𑀧𑀘𑁆𑀘𑁂𑀓𑀁 𑀧𑀜𑁆𑀜𑀸-𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄. 𑀥𑀸𑀢𑀽𑀦𑀁 𑀲𑀯𑀦𑀥𑀸𑀭𑀡𑀧𑀜𑁆𑀜𑀸 𑀲𑀼𑀢𑀫𑀬𑀸, 𑀇𑀢𑀭𑀸 𑀪𑀸𑀯𑀦𑀸𑀫𑀬𑀸. 𑀢𑀢𑁆𑀣𑀸𑀧𑀺 𑀲𑀫𑁆𑀫𑀲𑀦𑀧𑀜𑁆𑀜𑀸 𑀮𑁄𑀓𑀺𑀬𑀸. 𑀯𑀺𑀧𑀲𑁆𑀲𑀦𑀸 𑀧𑀜𑁆𑀜𑀸 𑀳𑀺 𑀲𑀸, 𑀇𑀢𑀭𑀸 𑀮𑁄𑀓𑀼𑀢𑁆𑀢𑀭𑀸. 𑀮𑀓𑁆𑀔𑀡𑀸𑀤𑀺𑀯𑀲𑁂𑀦, 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀘 𑀫𑀦𑀲𑀺𑀓𑀭𑀡𑀁 𑀫𑀦𑀲𑀺𑀓𑀸𑀭𑁄, 𑀢𑀢𑁆𑀣 𑀓𑁄𑀲𑀮𑁆𑀮𑀁 𑀫𑀦𑀲𑀺𑀓𑀸𑀭𑀓𑀼𑀲𑀮𑀢𑀸. 𑀢𑀁 𑀧𑀦 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀯𑀲𑁂𑀦 𑀢𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀫𑁆𑀫𑀲𑀦𑀧𑀝𑀺𑀯𑁂𑀥𑀧𑀘𑁆𑀘𑀯𑁂𑀓𑁆𑀔𑀡𑀧𑀜𑁆𑀜𑀸’’𑀢𑀺 𑀆𑀳. 𑀲𑀫𑁆𑀫𑀲𑀦𑀧𑀜𑁆𑀜𑀸 𑀳𑀺 𑀢𑀲𑁆𑀲𑀸 𑀆𑀤𑀺, 𑀧𑀝𑀺𑀯𑁂𑀥𑀧𑀜𑁆𑀜𑀸 𑀫𑀚𑁆𑀛𑁂, 𑀧𑀘𑁆𑀘𑀯𑁂𑀓𑁆𑀔𑀡𑀧𑀜𑁆𑀜𑀸 𑀧𑀭𑀺𑀬𑁄𑀲𑀸𑀦𑀁.

𑀆𑀬𑀢𑀦𑀸𑀦𑀁 𑀕𑀦𑁆𑀣𑀢𑁄 𑀘 𑀅𑀢𑁆𑀣𑀢𑁄 𑀘 𑀉𑀕𑁆𑀕𑀡𑁆𑀳𑀦𑀯𑀲𑁂𑀦 𑀢𑁂𑀲𑀁 𑀥𑀸𑀢𑀼𑀮𑀓𑁆𑀔𑀡𑀸𑀤𑀺𑀯𑀺𑀪𑀸𑀕𑀲𑁆𑀲 𑀚𑀸𑀦𑀦𑀧𑀜𑁆𑀜𑀸 𑀉𑀕𑁆𑀕𑀳𑀚𑀸𑀦𑀦𑀧𑀜𑁆𑀜𑀸. 𑀲𑀫𑁆𑀫𑀲𑀦𑀧𑀝𑀺𑀯𑁂𑀥𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀥𑀺𑀦𑁄 𑀚𑀸𑀦𑀦𑀧𑀜𑁆𑀜𑀸 𑀫𑀦𑀲𑀺𑀓𑀸𑀭𑀚𑀸𑀦𑀦𑀧𑀜𑁆𑀜𑀸. 𑀬𑀲𑁆𑀫𑀸 𑀆𑀬𑀢𑀦𑀸𑀦𑀺𑀧𑀺 𑀅𑀢𑁆𑀣𑀢𑁄 𑀥𑀸𑀢𑀼𑀬𑁄𑀯 𑀫𑀦𑀲𑀺𑀓𑀸𑀭𑁄 𑀘 𑀉𑀕𑁆𑀕𑀡𑁆𑀳𑀦𑀸𑀤𑀺𑀯𑀲𑁂𑀦 𑀢𑁂𑀲𑀫𑁂𑀯 𑀫𑀦𑀲𑀺𑀓𑀸𑀭𑀯𑀺𑀥𑀺, 𑀢𑀲𑁆𑀫𑀸 𑀥𑀸𑀢𑀼𑀓𑀼𑀲𑀮𑀢𑀸𑀤𑀺𑀓𑀸 𑀢𑀺𑀲𑁆𑀲𑁄𑀧𑀺 𑀓𑀼𑀲𑀮𑀢𑀸 𑀏𑀓𑀤𑁂𑀲𑁂 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀯𑀦𑀁 𑀯𑀺𑀬 𑀉𑀕𑁆𑀕𑀡𑁆𑀳𑀦𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺𑀧𑀺 𑀧𑀭𑀺𑀢𑁆𑀢𑀜𑀸𑀡𑀓𑀢𑁆𑀢𑀼𑀓𑀸𑀦𑀻𑀢𑀺 𑀆𑀳 ‘‘𑀲𑀯𑀦 𑀉𑀕𑁆𑀕𑀳𑀡𑀧𑀘𑁆𑀘𑀯𑁂𑀓𑁆𑀔𑀡𑀸 𑀮𑁄𑀓𑀺𑀬𑀸’’𑀢𑀺. 𑀅𑀭𑀺𑀬𑀫𑀕𑁆𑀕𑀓𑁆𑀔𑀡𑁂 𑀲𑀫𑁆𑀫𑀲𑀦𑀫𑀦𑀲𑀺𑀓𑀸𑀭𑀸𑀦𑀁 𑀦𑀺𑀧𑁆𑀨𑀢𑁆𑀢𑀺 𑀧𑀭𑀺𑀦𑀺𑀝𑁆𑀞𑀸𑀦𑀦𑁆𑀢𑀺 𑀢𑁂𑀲𑀁 𑀮𑁄𑀓𑀼𑀢𑁆𑀢𑀭𑀢𑀸𑀧𑀭𑀺𑀬𑀸𑀬𑁄𑀧𑀺 𑀮𑀩𑁆𑀪𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀫𑁆𑀫𑀲𑀦𑀫𑀦𑀲𑀺𑀓𑀸𑀭𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸’’𑀢𑀺. 𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀳𑁂𑀢𑀼𑀆𑀤𑀻𑀦𑀁 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀪𑀸𑀯𑁂𑀦 𑀧𑀘𑁆𑀘𑀬𑀪𑀸𑀯𑁄 𑀧𑀘𑁆𑀘𑀬𑀸𑀓𑀸𑀭𑁄, 𑀲𑁄 𑀧𑀦 𑀅𑀯𑀺𑀚𑁆𑀚𑀸𑀤𑀻𑀦𑀁 𑀤𑁆𑀯𑀸𑀤𑀲𑀦𑁆𑀦𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑀸𑀦𑀁 𑀯𑀲𑁂𑀦 𑀤𑁆𑀯𑀸𑀤𑀲𑀯𑀺𑀥𑁄𑀢𑀺 𑀆𑀳 ‘‘𑀤𑁆𑀯𑀸𑀤𑀲𑀦𑁆𑀦𑀁 𑀧𑀘𑁆𑀘𑀬𑀸𑀓𑀸𑀭𑀸𑀦’’𑀦𑁆𑀢𑀺. 𑀉𑀕𑁆𑀕𑀳𑀸𑀤𑀺𑀯𑀲𑁂𑀦𑀸𑀢𑀺 𑀉𑀕𑁆𑀕𑀳𑀫𑀦𑀲𑀺𑀓𑀸𑀭𑀲𑀯𑀦𑀲𑀫𑁆𑀫𑀲𑀦𑀧𑀝𑀺𑀯𑁂𑀥𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦.

𑀞𑀸𑀦𑀜𑁆𑀘𑁂𑀯 𑀢𑀺𑀝𑁆𑀞𑀢𑀺 𑀨𑀮𑀁 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀓𑀸𑀭𑀡𑀜𑁆𑀘 𑀳𑁂𑀢𑀼𑀧𑀘𑁆𑀘𑀬𑀪𑀸𑀯𑁂𑀦 𑀓𑀭𑀡𑀢𑁄 𑀦𑀺𑀧𑁆𑀨𑀸𑀤𑀦𑀢𑁄. 𑀢𑁂𑀲𑀁 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀦𑀁. 𑀏𑀢𑀲𑁆𑀫𑀺𑀁 𑀤𑀼𑀓𑁂 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁂 𑀥𑀫𑁆𑀫𑀸 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀓𑀸𑀭𑀡𑀪𑀸𑀯𑀢𑁄 𑀞𑀸𑀦𑀁, 𑀢𑁂𑀯 𑀥𑀫𑁆𑀫𑀸 𑀢𑀁𑀯𑀺𑀥𑀼𑀭𑀲𑁆𑀲 𑀥𑀫𑁆𑀫𑀲𑁆𑀲 𑀅𑀓𑀸𑀭𑀡𑀪𑀸𑀯𑀢𑁄 𑀅𑀝𑁆𑀞𑀸𑀦𑀦𑁆𑀢𑀺 𑀧𑀞𑀫𑀦𑀬𑁂 𑀨𑀮𑀪𑁂𑀤𑁂𑀦 𑀢𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀞𑀸𑀦𑀸𑀝𑁆𑀞𑀸𑀦𑀢𑀸 𑀤𑀻𑀧𑀺𑀢𑀸; 𑀤𑀼𑀢𑀺𑀬𑀦𑀬𑁂 𑀧𑀦 𑀅𑀪𑀺𑀦𑁆𑀦𑁂𑀧𑀺 𑀨𑀮𑁂 𑀧𑀘𑁆𑀘𑀬𑀥𑀫𑁆𑀫𑀪𑁂𑀤𑁂𑀦 𑀢𑁂𑀲𑀁 𑀞𑀸𑀦𑀸𑀝𑁆𑀞𑀸𑀦𑀢𑀸 𑀤𑀻𑀧𑀺𑀢𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀦 𑀳𑀺 𑀓𑀤𑀸𑀘𑀺 𑀅𑀭𑀺𑀬𑀸 𑀤𑀺𑀝𑁆𑀞𑀺𑀲𑀫𑁆𑀧𑀤𑀸 𑀦𑀺𑀘𑁆𑀘𑀕𑁆𑀕𑀸𑀳𑀲𑁆𑀲 𑀓𑀸𑀭𑀡𑀁 𑀳𑁄𑀢𑀺, 𑀅𑀓𑀺𑀭𑀺𑀬𑀢𑀸 𑀧𑀦 𑀲𑀺𑀬𑀸 𑀢𑀲𑁆𑀲 𑀓𑀸𑀭𑀡𑀦𑁆𑀢𑀺.

𑀉𑀚𑀼𑀦𑁄 𑀪𑀸𑀯𑁄 𑀅𑀚𑁆𑀚𑀯𑀁, 𑀅𑀚𑀺𑀫𑁆𑀳𑀢𑀸 𑀅𑀓𑀼𑀝𑀺𑀮𑀢𑀸 𑀅𑀯𑀗𑁆𑀓𑀢𑀸𑀢𑀺 𑀅𑀢𑁆𑀣𑁄𑀢𑀺 𑀢𑀫𑀢𑁆𑀣𑀁 𑀅𑀦𑀚𑁆𑀚𑀯𑀧𑀝𑀺𑀓𑁆𑀔𑁂𑀧𑀫𑀼𑀔𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀕𑁄𑀫𑀼𑀢𑁆𑀢𑀯𑀗𑁆𑀓𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁆𑀯𑀸𑀬𑀁 𑀅𑀦𑀚𑁆𑀚𑀯𑁄 𑀪𑀺𑀓𑁆𑀔𑀽𑀦𑀁 𑀬𑁂𑀪𑀼𑀬𑁆𑀬𑁂𑀦 𑀅𑀦𑁂𑀲𑀦𑀸𑀬, 𑀅𑀕𑁄𑀘𑀭𑀘𑀸𑀭𑀺𑀢𑀸𑀬 𑀘 𑀳𑁄𑀢𑀻𑀢𑀺 𑀆𑀳 ‘‘𑀏𑀓𑀘𑁆𑀘𑁄 𑀳𑀺…𑀧𑁂… 𑀘𑀭𑀢𑀻’’𑀢𑀺. 𑀅𑀬𑀁 𑀕𑁄𑀫𑀼𑀢𑁆𑀢𑀯𑀗𑁆𑀓𑀢𑀸 𑀦𑀸𑀫 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸 𑀧𑀝𑀺𑀧𑀢𑁆𑀢𑀺𑀬𑀸 𑀯𑀗𑁆𑀓𑀪𑀸𑀯𑀢𑁄. 𑀧𑀼𑀭𑀺𑀫𑀲𑀤𑀺𑀲𑁄𑀢𑀺 𑀧𑀞𑀫𑀁 𑀯𑀼𑀢𑁆𑀢𑀪𑀺𑀓𑁆𑀔𑀼𑀲𑀤𑀺𑀲𑁄. 𑀘𑀦𑁆𑀤𑀯𑀗𑁆𑀓𑀢𑀸 𑀦𑀸𑀫 𑀧𑀝𑀺𑀧𑀢𑁆𑀢𑀺𑀬𑀸 𑀫𑀚𑁆𑀛𑀝𑁆𑀞𑀸𑀦𑁂 𑀯𑀗𑁆𑀓𑀪𑀸𑀯𑀸𑀧𑀢𑁆𑀢𑀺𑀢𑁄. 𑀦𑀗𑁆𑀕𑀮𑀓𑁄𑀝𑀺𑀯𑀗𑁆𑀓𑀢𑀸 𑀦𑀸𑀫 𑀧𑀭𑀺𑀬𑁄𑀲𑀸𑀦𑁂 𑀯𑀗𑁆𑀓𑀪𑀸𑀯𑀸𑀧𑀢𑁆𑀢𑀺𑀢𑁄. 𑀇𑀤𑀁 𑀅𑀚𑁆𑀚𑀯𑀁 𑀦𑀸𑀫 𑀲𑀩𑁆𑀩𑀢𑁆𑀣𑀓𑀫𑁂𑀯 𑀉𑀚𑀼𑀪𑀸𑀯𑀲𑀺𑀤𑁆𑀥𑀺𑀢𑁄. 𑀅𑀚𑁆𑀚𑀯𑀢𑀸𑀢𑀺 𑀆𑀓𑀸𑀭𑀦𑀺𑀤𑁆𑀤𑁂𑀲𑁄, 𑀬𑁂𑀦𑀸𑀓𑀸𑀭𑁂𑀦𑀲𑁆𑀲 𑀅𑀚𑁆𑀚𑀯𑁄 𑀧𑀯𑀢𑁆𑀢𑀢𑀺, 𑀢𑀤𑀸𑀓𑀸𑀭𑀦𑀺𑀤𑁆𑀤𑁂𑀲𑁄𑀢𑀺 𑀅𑀢𑁆𑀣𑁄. 𑀮𑀚𑁆𑀚𑀢𑀻𑀢𑀺 𑀮𑀚𑁆𑀚𑀻, 𑀳𑀺𑀭𑀺𑀫𑀸, 𑀢𑀲𑁆𑀲 𑀪𑀸𑀯𑁄 𑀮𑀚𑁆𑀚𑀯𑀁, 𑀳𑀺𑀭𑀻𑀢𑀺 𑀅𑀢𑁆𑀣𑁄. 𑀮𑀚𑁆𑀚𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀮𑀚𑁆𑀚𑀻 𑀬𑀣𑀸 ‘‘𑀫𑀸𑀮𑀻, 𑀫𑀸𑀬𑀻’’𑀢𑀺 𑀘, 𑀢𑀲𑁆𑀲 𑀪𑀸𑀯𑁄 𑀮𑀚𑁆𑀚𑀻𑀪𑀸𑀯𑁄, 𑀲𑀸 𑀏𑀯 𑀮𑀚𑁆𑀚𑀸.

𑀧𑀭𑀸𑀧𑀭𑀸𑀥𑀸𑀤𑀻𑀦𑀁 𑀅𑀥𑀺𑀯𑀸𑀲𑀦𑀓𑁆𑀔𑀫𑀁 𑀅𑀥𑀺𑀯𑀸𑀲𑀦𑀔𑀦𑁆𑀢𑀺. 𑀲𑀼𑀘𑀺𑀲𑀻𑀮𑀢𑀸 𑀲𑁄𑀭𑀘𑁆𑀘𑀁. 𑀲𑀸 𑀳𑀺 𑀲𑁄𑀪𑀦𑀓𑀫𑁆𑀫𑀭𑀢𑀢𑀸, 𑀲𑀼𑀝𑁆𑀞𑀼 𑀯𑀸 𑀧𑀸𑀧𑀢𑁄 𑀑𑀭𑀢𑀪𑀸𑀯𑁄 𑀯𑀺𑀭𑀢𑀢𑀸 𑀲𑁄𑀭𑀘𑁆𑀘𑀁. 𑀢𑁂𑀦𑀸𑀳 ‘‘𑀲𑀼𑀭𑀢𑀪𑀸𑀯𑁄’’𑀢𑀺.

‘‘𑀦𑀸𑀫𑀜𑁆𑀘 𑀭𑀽𑀧𑀜𑁆𑀘𑀸’’𑀢𑀺𑀆𑀤𑀻𑀲𑀼 𑀅𑀬𑀁 𑀅𑀧𑀭𑁄 𑀦𑀬𑁄 𑁋 𑀦𑀸𑀫𑀓𑀭𑀡𑀝𑁆𑀞𑁂𑀦𑀸𑀢𑀺 𑀅𑀜𑁆𑀜𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀲𑀬𑀫𑁂𑀯 𑀅𑀢𑁆𑀢𑀦𑁄 𑀦𑀸𑀫𑀓𑀭𑀡𑀲𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀬𑀜𑁆𑀳𑀺 𑀧𑀭𑀲𑁆𑀲 𑀦𑀸𑀫𑀁 𑀓𑀭𑁄𑀢𑀺, 𑀢𑀲𑁆𑀲 𑀘 𑀢𑀤𑀧𑁂𑀓𑁆𑀔𑀢𑁆𑀢𑀸 𑀅𑀜𑁆𑀜𑀸𑀧𑁂𑀓𑁆𑀔𑀁 𑀦𑀸𑀫𑀓𑀭𑀡𑀦𑁆𑀢𑀺 𑀦𑀸𑀫𑀓𑀭𑀡𑀲𑀪𑀸𑀯𑀢𑀸 𑀦 𑀳𑁄𑀢𑀺, 𑀢𑀲𑁆𑀫𑀸 𑀫𑀳𑀸𑀚𑀦𑀲𑁆𑀲 𑀜𑀸𑀢𑀻𑀦𑀁, 𑀕𑀼𑀡𑀸𑀦𑀜𑁆𑀘 𑀲𑀸𑀫𑀜𑁆𑀜𑀦𑀸𑀫𑀸𑀤𑀺𑀓𑀸𑀭𑀓𑀸𑀦𑀁 𑀦𑀸𑀫𑀪𑀸𑀯𑁄 𑀦𑀸𑀧𑀚𑁆𑀚𑀢𑀺. 𑀬𑀲𑁆𑀲 𑀘 𑀅𑀜𑁆𑀜𑁂𑀳𑀺 𑀦𑀸𑀫𑀁 𑀓𑀭𑀻𑀬𑀢𑀺, 𑀢𑀲𑁆𑀲 𑀘 𑀦𑀸𑀫𑀓𑀭𑀡𑀲𑀪𑀸𑀯𑀢𑀸 𑀦𑀢𑁆𑀣𑀻𑀢𑀺, 𑀦𑀢𑁆𑀣𑀺𑀬𑁂𑀯 𑀦𑀸𑀫𑀪𑀸𑀯𑁄. 𑀯𑁂𑀤𑀦𑀸𑀤𑀻𑀦𑀁 𑀧𑀦 𑀲𑀪𑀸𑀯𑀲𑀺𑀤𑁆𑀥𑀢𑁆𑀢𑀸 𑀯𑁂𑀤𑀦𑀸𑀤𑀺𑀦𑀸𑀫𑀲𑁆𑀲 𑀦𑀸𑀫𑀓𑀭𑀡𑀲𑀪𑀸𑀯𑀢𑁄 𑀦𑀸𑀫𑀢𑀸 𑀯𑀼𑀢𑁆𑀢𑀸. 𑀧𑀣𑀯𑀻𑀆𑀤𑀺 𑀦𑀺𑀤𑀲𑁆𑀲𑀦𑁂𑀦 𑀦𑀸𑀫𑀲𑁆𑀲 𑀲𑀪𑀸𑀯𑀲𑀺𑀤𑁆𑀥𑀢𑀁𑀬𑁂𑀯 𑀦𑀺𑀤𑀲𑁆𑀲𑁂𑀢𑀺, 𑀦 𑀦𑀸𑀫𑀪𑀸𑀯𑀲𑀸𑀫𑀜𑁆𑀜𑀁, 𑀦𑀺𑀭𑀼𑀴𑁆𑀳𑀢𑁆𑀢𑀸 𑀧𑀦 𑀦𑀸𑀫-𑀲𑀤𑁆𑀤𑁄 𑀅𑀭𑀽𑀧𑀥𑀫𑁆𑀫𑁂𑀲𑀼 𑀏𑀯 𑀯𑀢𑁆𑀢𑀢𑀺, 𑀦 𑀧𑀣𑀯𑀻𑀆𑀤𑀻𑀲𑀽𑀢𑀺 𑀦 𑀢𑁂𑀲𑀁 𑀦𑀸𑀫𑀪𑀸𑀯𑁄. 𑀦 𑀳𑀺 𑀧𑀣𑀯𑀻𑀆𑀤𑀺𑀦𑀸𑀫𑀁 𑀯𑀺𑀚𑀳𑀺𑀢𑁆𑀯𑀸 𑀓𑁂𑀲𑀸𑀤𑀺𑀦𑀸𑀫𑁂𑀳𑀺 𑀭𑀽𑀧𑀥𑀫𑁆𑀫𑀸𑀦𑀁 𑀯𑀺𑀬 𑀯𑁂𑀤𑀦𑀸𑀤𑀺𑀦𑀸𑀫𑀁 𑀯𑀺𑀚𑀳𑀺𑀢𑁆𑀯𑀸 𑀅𑀜𑁆𑀜𑁂𑀦 𑀦𑀸𑀫𑁂𑀦 𑀅𑀭𑀽𑀧𑀥𑀫𑁆𑀫𑀸𑀦𑀁 𑀯𑁄𑀳𑀭𑀺𑀢𑀩𑁆𑀩𑁂𑀦 𑀧𑀺𑀡𑁆𑀟𑀸𑀓𑀸𑀭𑁂𑀦 𑀧𑀯𑀢𑁆𑀢𑀺 𑀅𑀢𑁆𑀣𑀻𑀢𑀺.

𑀅𑀣 𑀯𑀸 𑀭𑀽𑀧𑀥𑀫𑁆𑀫𑀸 𑀘𑀓𑁆𑀔𑀸𑀤𑀬𑁄 𑀭𑀽𑀧𑀸𑀤𑀬𑁄 𑀘, 𑀢𑁂𑀲𑀁 𑀧𑀓𑀸𑀲𑀓𑀧𑀓𑀸𑀲𑀺𑀢𑀩𑁆𑀩𑀪𑀸𑀯𑀢𑁄 𑀯𑀺𑀦𑀸𑀧𑀺 𑀦𑀸𑀫𑁂𑀦 𑀧𑀸𑀓𑀝𑀸 𑀳𑁄𑀦𑁆𑀢𑀺, 𑀦 𑀏𑀯𑀁 𑀅𑀭𑀽𑀧𑀥𑀫𑁆𑀫𑀸𑀢𑀺 𑀢𑁂 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑁄 𑀯𑀺𑀬 𑀦𑀸𑀫𑀸𑀬𑀢𑁆𑀢𑀕𑁆𑀕𑀳𑀡𑀻𑀬𑀪𑀸𑀯𑁂𑀦 ‘‘𑀦𑀸𑀫’’𑀦𑁆𑀢𑀺 𑀯𑀼𑀢𑁆𑀢𑀸. 𑀧𑀝𑀺𑀖𑀲𑀫𑁆𑀨𑀲𑁆𑀲𑁄 𑀘 𑀦 𑀘𑀓𑁆𑀔𑀸𑀤𑀻𑀦𑀺 𑀯𑀺𑀬 𑀦𑀸𑀫𑁂𑀦 𑀯𑀺𑀦𑀸 𑀧𑀸𑀓𑀝𑁄𑀢𑀺 ‘‘𑀦𑀸𑀫’’𑀦𑁆𑀢𑀺 𑀯𑀼𑀢𑁆𑀢𑁄, 𑀅𑀭𑀽𑀧𑀢𑀸𑀬 𑀯𑀸 𑀅𑀜𑁆𑀜𑀦𑀸𑀫𑀲𑀪𑀸𑀕𑀢𑁆𑀢𑀸 𑀲𑀗𑁆𑀕𑀳𑀺𑀢𑁄𑀬𑀁, 𑀅𑀜𑁆𑀜𑀨𑀲𑁆𑀲𑀲𑀪𑀸𑀕𑀢𑁆𑀢𑀸 𑀯𑀸. 𑀯𑀘𑀦𑀢𑁆𑀣𑁄𑀧𑀺 𑀳𑀺 𑀭𑀽𑀧𑀬𑀢𑀻𑀢𑀺 𑀭𑀽𑀧𑀁, 𑀦𑀸𑀫𑀬𑀢𑀻𑀢𑀺 𑀦𑀸𑀫𑀦𑁆𑀢𑀺 𑀇𑀥 𑀧𑀘𑁆𑀙𑀺𑀫𑀧𑀼𑀭𑀺𑀫𑀸𑀦𑀁 𑀲𑀫𑁆𑀪𑀯𑀢𑀺. 𑀭𑀽𑀧𑀬𑀢𑀻𑀢𑀺 𑀯𑀺𑀦𑀸𑀧𑀺 𑀦𑀸𑀫𑁂𑀦 𑀅𑀢𑁆𑀢𑀸𑀦𑀁 𑀧𑀓𑀸𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀦𑀸𑀫𑀬𑀢𑀻𑀢𑀺 𑀦𑀸𑀫𑁂𑀦 𑀯𑀺𑀦𑀸 𑀅𑀧𑀸𑀓𑀝𑀪𑀸𑀯𑀢𑁄 𑀅𑀢𑁆𑀢𑀦𑁄 𑀧𑀓𑀸𑀲𑀓𑀁 𑀦𑀸𑀫𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑀢𑀸𑀬𑀸𑀢𑀺 𑀲𑀢𑀺𑀧𑀺 𑀭𑀽𑀧𑀲𑁆𑀲 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑀪𑀸𑀯𑁂 𑀦 𑀢𑀁 𑀧𑀭𑀫𑀲𑁆𑀲𑀸𑀲𑀪𑀽𑀢𑀁 𑀦𑀺𑀩𑁆𑀩𑀸𑀦𑀁 𑀯𑀺𑀬 𑀲𑀸𑀢𑀺𑀲𑀬𑀁 𑀦𑀸𑀫𑀦𑀪𑀸𑀯𑁂𑀦 𑀧𑀘𑁆𑀘𑀬𑁄𑀢𑀺 𑀦𑀺𑀩𑁆𑀩𑀸𑀦𑀫𑁂𑀯 ‘‘𑀦𑀸𑀫’’𑀦𑁆𑀢𑀺 𑀯𑀼𑀢𑁆𑀢𑀁.

‘‘𑀅𑀯𑀺𑀚𑁆𑀚𑀸 𑀘 𑀪𑀯𑀢𑀡𑁆𑀳𑀸 𑀘𑀸’’𑀢𑀺 𑀅𑀬𑀁 𑀤𑀼𑀓𑁄 𑀲𑀢𑁆𑀢𑀸𑀦𑀁 𑀯𑀝𑁆𑀝𑀫𑀽𑀮𑀲𑀫𑀼𑀤𑀸𑀘𑀸𑀭𑀤𑀲𑁆𑀲𑀦𑀢𑁆𑀣𑁄. 𑀲𑀫𑀼𑀤𑀸𑀘𑀭𑀢𑀻𑀢𑀺 𑀳𑀺 𑀲𑀫𑀼𑀤𑀸𑀘𑀸𑀭𑁄, 𑀯𑀝𑁆𑀝𑀫𑀽𑀮𑀫𑁂𑀯 𑀲𑀫𑀼𑀤𑀸𑀘𑀸𑀭𑁄 𑀯𑀝𑁆𑀝𑀫𑀽𑀮𑀲𑀫𑀼𑀤𑀸𑀘𑀸𑀭𑁄, 𑀯𑀝𑁆𑀝𑀫𑀽𑀮𑀤𑀲𑁆𑀲𑀦𑁂𑀦 𑀯𑀸 𑀯𑀝𑁆𑀝𑀫𑀽𑀮𑀸𑀦𑀁 𑀧𑀯𑀢𑁆𑀢𑀺 𑀤𑀲𑁆𑀲𑀺𑀢𑀸 𑀳𑁄𑀢𑀻𑀢𑀺 𑀯𑀝𑁆𑀝𑀫𑀽𑀮𑀸𑀦𑀁 𑀲𑀫𑀼𑀤𑀸𑀘𑀸𑀭𑁄 𑀯𑀝𑁆𑀝𑀫𑀽𑀮𑀲𑀫𑀼𑀤𑀸𑀘𑀸𑀭𑁄, 𑀢𑀁𑀤𑀲𑁆𑀲𑀦𑀢𑁆𑀣𑁄𑀢𑀺 𑀅𑀢𑁆𑀣𑁄.

𑀏𑀓𑁂𑀓𑀲𑁆𑀫𑀺𑀜𑁆𑀘 ‘‘𑀅𑀢𑁆𑀢𑀸’’𑀢𑀺 𑀘 ‘‘𑀮𑁄𑀓𑁄’’𑀢𑀺 𑀘 𑀕𑀳𑀡𑀯𑀺𑀲𑁂𑀲𑀁 𑀉𑀧𑀸𑀤𑀸𑀬 ‘‘𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 𑀯𑀼𑀢𑁆𑀢𑀁, 𑀏𑀓𑀁 𑀯𑀸 𑀔𑀦𑁆𑀥𑀁 ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀅𑀜𑁆𑀜𑀁 𑀅𑀢𑁆𑀢𑀦𑁄 𑀉𑀧𑀪𑁄𑀕𑀪𑀽𑀢𑀁 ‘‘𑀮𑁄𑀓𑁄’’𑀢𑀺 𑀕𑀡𑁆𑀳𑀦𑁆𑀢𑀲𑁆𑀲, 𑀅𑀢𑁆𑀢𑀦𑁄 𑀅𑀢𑁆𑀢𑀸𑀦𑀁 ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀧𑀭𑀲𑁆𑀲 𑀅𑀢𑁆𑀢𑀸𑀦𑀁 ‘‘𑀮𑁄𑀓𑁄’’𑀢𑀺 𑀕𑀡𑁆𑀳𑀦𑁆𑀢𑀲𑁆𑀲 𑀯𑀸 𑀯𑀲𑁂𑀦 ‘‘𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 𑀯𑀼𑀢𑁆𑀢𑀁.

𑀲𑀳 𑀲𑀺𑀓𑁆𑀔𑀺𑀢𑀩𑁆𑀩𑁄 𑀥𑀫𑁆𑀫𑁄 𑀲𑀳𑀥𑀫𑁆𑀫𑁄, 𑀢𑀢𑁆𑀣 𑀪𑀯𑀁 𑀲𑀳𑀥𑀫𑁆𑀫𑀺𑀓𑀁, 𑀢𑀲𑁆𑀫𑀺𑀁 𑀲𑀳𑀥𑀫𑁆𑀫𑀺𑀓𑁂. 𑀤𑁄𑀯𑀘𑀲𑁆𑀲-𑀲𑀤𑁆𑀤𑀢𑁄 𑀆𑀬-𑀲𑀤𑁆𑀤𑀁 𑀅𑀦𑀜𑁆𑀜𑀢𑁆𑀢𑀁 𑀓𑀢𑁆𑀯𑀸 ‘‘𑀤𑁄𑀯𑀘𑀲𑁆𑀲𑀸𑀬’’𑀦𑁆𑀢𑀺 𑀯𑀼𑀢𑁆𑀢𑀁, 𑀤𑁄𑀯𑀘𑀲𑁆𑀲𑀲𑁆𑀲 𑀯𑀸 𑀅𑀬𑀦𑀁 𑀧𑀯𑀢𑁆𑀢𑀺 𑀤𑁄𑀯𑀘𑀲𑁆𑀲𑀸𑀬𑀁. 𑀆𑀲𑁂𑀯𑀦𑁆𑀢𑀲𑁆𑀲𑀸𑀧𑀺 𑀅𑀦𑀼𑀲𑀺𑀓𑁆𑀔𑀦𑀸 𑀅𑀚𑁆𑀛𑀸𑀲𑀬𑁂𑀦 𑀪𑀚𑀦𑀸𑀢𑀺 𑀆𑀳 ‘‘𑀲𑁂𑀯𑀦𑀸…𑀧𑁂… 𑀪𑀚𑀦𑀸’’𑀢𑀺. 𑀲𑀩𑁆𑀩𑀢𑁄𑀪𑀸𑀕𑁂𑀦 𑀪𑀢𑁆𑀢𑀺 𑀲𑀫𑁆𑀪𑀢𑁆𑀢𑀺.

𑀲𑀳 𑀓𑀫𑁆𑀫𑀯𑀸𑀘𑀸𑀬𑀸𑀢𑀺 𑀅𑀩𑁆𑀪𑀸𑀦𑀢𑀺𑀡𑀯𑀢𑁆𑀣𑀸𑀭𑀓𑀓𑀫𑁆𑀫𑀯𑀸𑀘𑀸𑀬, ‘‘𑀅𑀳𑀁 𑀪𑀦𑁆𑀢𑁂 𑀇𑀢𑁆𑀣𑀦𑁆𑀦𑀸𑀫𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺’’𑀦𑁆𑀢𑀺𑀆𑀤𑀺𑀓𑀸𑀬 𑀘 𑀲𑀳𑁂𑀯. 𑀲𑀳𑁂𑀯 𑀳𑀺 𑀓𑀫𑁆𑀫𑀯𑀸𑀘𑀸𑀬 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀜𑁆𑀘 𑀧𑀭𑀺𑀘𑁆𑀙𑀺𑀚𑁆𑀚𑀢𑀺, ‘‘𑀧𑀜𑁆𑀜𑀢𑁆𑀢𑀺𑀮𑀓𑁆𑀔𑀡𑀸𑀬 𑀆𑀧𑀢𑁆𑀢𑀺𑀬𑀸 𑀯𑀸 𑀓𑀸𑀭𑀡𑀁 𑀯𑀻𑀢𑀺𑀓𑁆𑀓𑀫𑀮𑀓𑁆𑀔𑀡𑀁 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁 𑀯𑀸, 𑀯𑀼𑀝𑁆𑀞𑀸𑀦𑀲𑁆𑀲 𑀓𑀸𑀭𑀡𑀁 𑀓𑀫𑁆𑀫𑀯𑀸𑀘𑀸’’𑀢𑀺 𑀓𑀸𑀭𑀡𑁂𑀦 𑀲𑀳 𑀨𑀮𑀲𑁆𑀲 𑀚𑀸𑀦𑀦𑀯𑀲𑁂𑀦 ‘‘𑀲𑀳 𑀓𑀫𑁆𑀫𑀯𑀸𑀘𑀸𑀬𑀸’’𑀢𑀺 𑀯𑀼𑀢𑁆𑀢𑀁.‘‘𑀲𑀳 𑀓𑀫𑁆𑀫𑀯𑀸𑀘𑀸𑀬𑀸’’𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀳 𑀧𑀭𑀺𑀓𑀫𑁆𑀫𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀥𑀸𑀢𑀼𑀯𑀺𑀲𑀬𑀸 𑀲𑀩𑁆𑀩𑀸𑀧𑀺 𑀧𑀜𑁆𑀜𑀸 𑀥𑀸𑀢𑀼𑀓𑀼𑀲𑀮𑀢𑀸. 𑀢𑀤𑁂𑀓𑀤𑁂𑀲𑀸 𑀫𑀦𑀲𑀺𑀓𑀸𑀭𑀓𑀼𑀲𑀮𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀧𑀼𑀭𑀺𑀫𑀧𑀤𑁂𑀧𑀺 𑀲𑀫𑁆𑀫𑀲𑀦𑀧𑀝𑀺𑀯𑁂𑀥𑀧𑀜𑁆𑀜𑀸 𑀯𑀼𑀢𑁆𑀢𑀸. 𑀬𑀲𑁆𑀫𑀸 𑀧𑀦 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀯𑀺𑀧𑀲𑁆𑀲𑀦𑀸𑀤𑀺𑀧𑀜𑁆𑀜𑀸 𑀏𑀯 𑀫𑀦𑀲𑀺𑀓𑀸𑀭𑀓𑁄𑀲𑀮𑁆𑀮𑀁, 𑀢𑀲𑁆𑀫𑀸 ‘‘𑀢𑀸𑀲𑀁𑀬𑁂𑀯 𑀥𑀸𑀢𑀽𑀦𑀁 𑀲𑀫𑁆𑀫𑀲𑀦𑀧𑀝𑀺𑀯𑁂𑀥𑀧𑀘𑁆𑀘𑀯𑁂𑀓𑁆𑀔𑀡𑀧𑀜𑁆𑀜𑀸’’𑀢𑀺 𑀯𑀼𑀢𑁆𑀢𑀁.

𑀆𑀬𑀢𑀦𑀯𑀺𑀲𑀬𑀸 𑀲𑀩𑁆𑀩𑀸𑀧𑀺 𑀧𑀜𑁆𑀜𑀸 𑀆𑀬𑀢𑀦𑀓𑀼𑀲𑀮𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀤𑁆𑀯𑀸𑀤𑀲𑀦𑁆𑀦𑀁 𑀆𑀬𑀢𑀦𑀸𑀦𑀁 𑀉𑀕𑁆𑀕𑀳𑀫𑀦𑀲𑀺𑀓𑀸𑀭𑀚𑀸𑀦𑀦𑀧𑀜𑁆𑀜𑀸’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑁆𑀯𑀻𑀲𑀼𑀧𑀺 𑀯𑀸 𑀧𑀤𑁂𑀲𑀼 𑀯𑀸𑀘𑀼𑀕𑁆𑀕𑀢𑀸𑀬 𑀆𑀬𑀢𑀦𑀧𑀸𑀴𑀺𑀬𑀸, 𑀥𑀸𑀢𑀼𑀧𑀸𑀴𑀺𑀬𑀸 𑀘 𑀫𑀦𑀲𑀺𑀓𑀭𑀡𑀁 𑀫𑀦𑀲𑀺𑀓𑀸𑀭𑁄. 𑀢𑀣𑀸 𑀉𑀕𑁆𑀕𑀡𑁆𑀳𑀦𑁆𑀢𑀻, 𑀫𑀦𑀲𑀺 𑀓𑀭𑁄𑀦𑁆𑀢𑀻, 𑀢𑀤𑀢𑁆𑀣𑀁 𑀲𑀼𑀡𑀦𑁆𑀢𑀻, 𑀕𑀦𑁆𑀣𑀢𑁄 𑀘 𑀅𑀢𑁆𑀣𑀢𑁄 𑀘 𑀥𑀸𑀭𑁂𑀦𑁆𑀢𑀻, ‘‘𑀇𑀤𑀁 𑀘𑀓𑁆𑀔𑀸𑀬𑀢𑀦𑀁 𑀦𑀸𑀫, 𑀅𑀬𑀁 𑀘𑀓𑁆𑀔𑀼𑀥𑀸𑀢𑀼 𑀦𑀸𑀫𑀸’’𑀢𑀺𑀆𑀤𑀺𑀦𑀸 𑀲𑀪𑀸𑀯𑀢𑁄, 𑀕𑀡𑀦𑀢𑁄 𑀘 𑀧𑀭𑀺𑀘𑁆𑀙𑁂𑀤𑀁 𑀚𑀸𑀦𑀦𑁆𑀢𑀻 𑀘 𑀧𑀜𑁆𑀜𑀸 𑀉𑀕𑁆𑀕𑀳𑀧𑀜𑁆𑀜𑀸𑀤𑀺𑀓𑀸 𑀯𑀼𑀢𑁆𑀢𑀸. 𑀫𑀦𑀲𑀺𑀓𑀸𑀭𑀧𑀤𑁂 𑀧𑀦 𑀘𑀢𑀼𑀩𑁆𑀩𑀺𑀥𑀸𑀧𑀺 𑀧𑀜𑁆𑀜𑀸 𑀉𑀕𑁆𑀕𑀳𑁄𑀢𑀺 𑀢𑀢𑁄 𑀧𑀯𑀢𑁆𑀢𑁄 𑀅𑀦𑀺𑀘𑁆𑀘𑀸𑀤𑀺𑀫𑀦𑀲𑀺𑀓𑀸𑀭𑁄 ‘‘𑀉𑀕𑁆𑀕𑀳𑀫𑀦𑀲𑀺𑀓𑀸𑀭𑁄’’𑀢𑀺 𑀯𑀼𑀢𑁆𑀢𑁄. 𑀢𑀲𑁆𑀲 𑀚𑀸𑀦𑀦𑀁 𑀧𑀯𑀢𑁆𑀢𑀦𑀫𑁂𑀯, ‘‘𑀬𑀣𑀸 𑀧𑀯𑀢𑁆𑀢𑀁 𑀯𑀸 𑀉𑀕𑁆𑀕𑀳𑀁, 𑀏𑀯𑀫𑁂𑀯 𑀧𑀯𑀢𑁆𑀢𑁄 𑀉𑀕𑁆𑀕𑀳𑁄’’𑀢𑀺 𑀚𑀸𑀦𑀦𑀁 𑀉𑀕𑁆𑀕𑀳𑀚𑀸𑀦𑀦𑀁. ‘‘𑀫𑀦𑀲𑀺𑀓𑀸𑀭𑁄 𑀏𑀯𑀁 𑀧𑀯𑀢𑁆𑀢𑁂𑀢𑀩𑁆𑀩𑁄, 𑀏𑀯𑀜𑁆𑀘 𑀧𑀯𑀢𑁆𑀢𑁄’’𑀢𑀺 𑀚𑀸𑀦𑀦𑀁 𑀫𑀦𑀲𑀺𑀓𑀸𑀭𑀚𑀸𑀦𑀦𑀁. 𑀢𑀤𑀼𑀪𑀬𑀫𑁆𑀧𑀺 ‘‘𑀫𑀦𑀲𑀺𑀓𑀸𑀭𑀓𑁄𑀲𑀮𑁆𑀮’’𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀕𑁆𑀕𑀳𑁄𑀧𑀺 𑀳𑀺 𑀫𑀦𑀲𑀺𑀓𑀸𑀭𑀲𑀫𑁆𑀧𑀬𑁄𑀕𑀢𑁄 𑀫𑀦𑀲𑀺𑀓𑀸𑀭𑀦𑀺𑀭𑀼𑀢𑁆𑀢𑀺𑀁 𑀮𑀤𑁆𑀥𑀼𑀁 𑀅𑀭𑀳𑀢𑀺. 𑀬𑁄 𑀘 𑀫𑀦𑀲𑀺𑀓𑀸𑀢𑀩𑁆𑀩𑁄, 𑀬𑁄 𑀘 𑀫𑀦𑀲𑀺𑀓𑀭𑀡𑀽𑀧𑀸𑀬𑁄, 𑀲𑀩𑁆𑀩𑁄 𑀲𑁄 ‘‘𑀫𑀦𑀲𑀺𑀓𑀸𑀭𑁄’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺, 𑀢𑀢𑁆𑀣 𑀓𑁄𑀲𑀮𑁆𑀮𑀁 𑀫𑀦𑀲𑀺𑀓𑀸𑀭𑀓𑀼𑀲𑀮𑀢𑀸𑀢𑀺. 𑀲𑀫𑁆𑀫𑀲𑀦𑀁 𑀧𑀜𑁆𑀜𑀸, 𑀲𑀸 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀅𑀦𑀺𑀘𑁆𑀘𑀸𑀤𑀺𑀲𑀫𑁆𑀫𑀲𑀦𑀓𑀺𑀘𑁆𑀘𑀁 𑀲𑀸𑀥𑁂𑀢𑀺 𑀦𑀺𑀘𑁆𑀘𑀲𑀜𑁆𑀜𑀸𑀤𑀺𑀧𑀚𑀳𑀦𑀢𑁄. 𑀫𑀦𑀲𑀺𑀓𑀸𑀭𑁄 𑀲𑀫𑁆𑀫𑀲𑀦𑀲𑀫𑁆𑀧𑀬𑀼𑀢𑁆𑀢𑁄, 𑀲𑁄 𑀢𑀢𑁆𑀣𑁂𑀯 𑀅𑀦𑀺𑀘𑁆𑀘𑀸𑀤𑀺𑀫𑀦𑀲𑀺𑀓𑀸𑀭𑀓𑀺𑀘𑁆𑀘𑀁 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑁄 𑀲𑀸𑀥𑁂𑀢𑀻𑀢𑀺 𑀆𑀳 ‘‘𑀲𑀫𑁆𑀫𑀲𑀦𑀫𑀦𑀲𑀺𑀓𑀸𑀭𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸’’𑀢𑀺. ‘‘𑀇𑀫𑀺𑀦𑀸 𑀧𑀘𑁆𑀘𑀬𑁂𑀦𑀺𑀤𑀁 𑀳𑁄𑀢𑀻’’𑀢𑀺 𑀏𑀯𑀁 𑀅𑀯𑀺𑀚𑁆𑀚𑀸𑀤𑀻𑀦𑀁 𑀲𑀗𑁆𑀔𑀸𑀭𑀸𑀤𑀺𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀧𑀘𑁆𑀘𑀬𑀪𑀸𑀯𑀚𑀸𑀦𑀦𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀼𑀲𑀮𑀢𑀸.

𑀅𑀥𑀺𑀯𑀸𑀲𑀦𑀁 𑀔𑀫𑀦𑀁. 𑀢𑀜𑁆𑀳𑀺 𑀧𑀭𑁂𑀲𑀁 𑀤𑀼𑀓𑁆𑀓𑀝𑀁 𑀤𑀼𑀭𑀼𑀢𑁆𑀢𑀜𑁆𑀘 𑀧𑀝𑀺𑀯𑀺𑀭𑁄𑀥𑀸𑀓𑀭𑀡𑁂𑀦 𑀅𑀢𑁆𑀢𑀦𑁄 𑀉𑀧𑀭𑀺 𑀆𑀭𑁄𑀧𑁂𑀢𑁆𑀯𑀸 𑀯𑀸𑀲𑀦𑀁 ‘‘𑀅𑀥𑀺𑀯𑀸𑀲𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀘𑀡𑁆𑀟𑀺𑀓𑁆𑀓𑀦𑁆𑀢𑀺 𑀅𑀓𑀼𑀚𑁆𑀛𑀦𑀁. 𑀤𑁄𑀫𑀦𑀲𑁆𑀲𑀯𑀲𑁂𑀦 𑀧𑀭𑁂𑀲𑀁 𑀅𑀓𑁆𑀔𑀻𑀲𑀼 𑀅𑀲𑁆𑀲𑀽𑀦𑀁 𑀅𑀦𑀼𑀧𑁆𑀧𑀸𑀤𑀦𑀸 𑀅𑀦𑀲𑁆𑀲𑀼𑀭𑁄𑀧𑁄. 𑀅𑀢𑁆𑀢𑀫𑀦𑀢𑀸𑀢𑀺 𑀲𑀓𑀫𑀦𑀢𑀸. 𑀘𑀺𑀢𑁆𑀢𑀲𑁆𑀲 𑀅𑀩𑁆𑀬𑀸𑀧𑀦𑁆𑀦𑁄 𑀲𑀓𑁄 𑀫𑀦𑁄𑀪𑀸𑀯𑁄 𑀅𑀢𑁆𑀢𑀫𑀦𑀢𑀸. 𑀘𑀺𑀢𑁆𑀢𑀦𑁆𑀢𑀺 𑀯𑀸 𑀘𑀺𑀢𑁆𑀢𑀧𑁆𑀧𑀩𑀦𑁆𑀥𑀁 𑀏𑀓𑀢𑁆𑀢𑁂𑀦 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀅𑀦𑁆𑀢𑀭𑀸 𑀉𑀧𑁆𑀧𑀦𑁆𑀦𑁂𑀦 𑀧𑀻𑀢𑀺𑀲𑀳𑀕𑀢𑀫𑀦𑁂𑀦 𑀲𑀓𑀫𑀦𑀢𑀸. 𑀅𑀢𑁆𑀢𑀫𑀦𑁄 𑀯𑀸 𑀧𑀼𑀕𑁆𑀕𑀮𑁄, 𑀢𑀲𑁆𑀲 𑀪𑀸𑀯𑁄 𑀅𑀢𑁆𑀢𑀫𑀦𑀢𑀸, 𑀲𑀸 𑀦 𑀲𑀢𑁆𑀢𑀲𑁆𑀲𑀸𑀢𑀺 𑀧𑀼𑀕𑁆𑀕𑀮𑀤𑀺𑀝𑁆𑀞𑀺𑀦𑀺𑀯𑀸𑀭𑀡𑀢𑁆𑀣𑀁 ‘‘𑀘𑀺𑀢𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀅𑀥𑀺𑀯𑀸𑀲𑀦𑀮𑀓𑁆𑀔𑀡𑀸 𑀔𑀦𑁆𑀢𑀺 𑀅𑀥𑀺𑀯𑀸𑀲𑀦𑀔𑀦𑁆𑀢𑀺. 𑀲𑀼𑀘𑀺𑀲𑀻𑀮𑀢𑀸 𑀲𑁄𑀭𑀘𑁆𑀘𑀁. 𑀲𑀸 𑀳𑀺 𑀲𑁄𑀪𑀦𑀓𑀫𑁆𑀫𑀭𑀢𑀢𑀸. 𑀲𑀼𑀝𑁆𑀞𑀼 𑀧𑀸𑀧𑀢𑁄 𑀑𑀭𑀢𑀪𑀸𑀯𑁄 𑀯𑀺𑀭𑀢𑀢𑀸 𑀲𑁄𑀭𑀘𑁆𑀘𑀁. 𑀢𑁂𑀦𑀸𑀳 ‘‘𑀲𑀼𑀭𑀢𑀪𑀸𑀯𑁄’’𑀢𑀺.

𑀲𑀔𑀺𑀮𑁄 𑀯𑀼𑀘𑁆𑀘𑀢𑀺 𑀲𑀡𑁆𑀳𑀯𑀸𑀘𑁄, 𑀢𑀲𑁆𑀲 𑀪𑀸𑀯𑁄 𑀲𑀸𑀔𑀮𑁆𑀬𑀁, 𑀲𑀡𑁆𑀳𑀯𑀸𑀘𑀢𑀸. 𑀢𑀁 𑀧𑀦 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀯𑀺𑀪𑀸𑀯𑁂𑀦𑁆𑀢𑀻 𑀬𑀸 𑀧𑀸𑀴𑀺 𑀧𑀯𑀢𑁆𑀢𑀸, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀓𑀢𑀫𑀁 𑀲𑀸𑀔𑀮𑁆𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀡𑁆𑀟𑀓𑀸𑀢𑀺 𑀲𑀤𑁄𑀲𑀯𑀡𑁂 𑀭𑀼𑀓𑁆𑀔𑁂 𑀦𑀺𑀬𑁆𑀬𑀸𑀲𑀧𑀺𑀡𑁆𑀟𑀺𑀬𑁄, 𑀅𑀳𑀺𑀘𑁆𑀙𑀢𑁆𑀢𑀓𑀸𑀤𑀻𑀦𑀺 𑀯𑀸 𑀉𑀝𑁆𑀞𑀺𑀢𑀸𑀦𑀺 ‘‘𑀅𑀡𑁆𑀟𑀓𑀸𑀦𑀻’’𑀢𑀺 𑀯𑀤𑀦𑁆𑀢𑀺. 𑀨𑁂𑀕𑁆𑀕𑀼𑀭𑀼𑀓𑁆𑀔𑀲𑁆𑀲 𑀧𑀦 𑀓𑀼𑀣𑀺𑀢𑀲𑁆𑀲 𑀅𑀡𑁆𑀟𑀸𑀦𑀺 𑀯𑀺𑀬 𑀉𑀝𑁆𑀞𑀺𑀢𑀸 𑀘𑀼𑀡𑁆𑀡𑀧𑀺𑀡𑁆𑀟𑀺𑀬𑁄, 𑀕𑀡𑁆𑀞𑀺𑀬𑁄 𑀯𑀸 𑀅𑀡𑁆𑀟𑀓𑀸. 𑀇𑀥 𑀧𑀦 𑀩𑁆𑀬𑀸𑀧𑀚𑁆𑀚𑀦𑀓𑀓𑁆𑀓𑀲𑀸𑀤𑀺𑀪𑀸𑀯𑀢𑁄 𑀅𑀡𑁆𑀟𑀓𑀧𑀓𑀢𑀺𑀪𑀸𑀯𑁂𑀦 𑀯𑀸𑀘𑀸 ‘‘𑀅𑀡𑁆𑀟𑀓𑀸’’𑀢𑀺 𑀯𑀼𑀢𑁆𑀢𑀸. 𑀧𑀤𑀼𑀫𑀦𑀸𑀴𑀁 𑀯𑀺𑀬 𑀲𑁄𑀢𑀁 𑀖𑀁𑀲𑀬𑀫𑀸𑀦𑀸 𑀧𑀯𑀺𑀲𑀦𑁆𑀢𑀻 𑀓𑀓𑁆𑀓𑀲𑀸 𑀤𑀝𑁆𑀞𑀩𑁆𑀩𑀸. 𑀓𑁄𑀥𑁂𑀦 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀢𑀲𑁆𑀲 𑀧𑀭𑀺𑀯𑀸𑀭𑀪𑀽𑀢𑀸 𑀓𑁄𑀥𑀲𑀸𑀫𑀦𑁆𑀢𑀸. 𑀧𑀼𑀭𑁂 𑀲𑀁𑀯𑀤𑁆𑀥𑀦𑀸𑀭𑀻 𑀧𑁄𑀭𑀻, 𑀲𑀸 𑀯𑀺𑀬 𑀲𑀼𑀓𑀼𑀫𑀸𑀭𑀸 𑀫𑀼𑀤𑀼𑀓𑀸 𑀯𑀸𑀘𑀸 𑀧𑁄𑀭𑀻 𑀯𑀺𑀬𑀸𑀢𑀺 𑀧𑁄𑀭𑀻. 𑀢𑀢𑁆𑀣𑀸𑀢𑀺 ‘‘𑀪𑀸𑀲𑀺𑀢𑀸 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀸𑀬 𑀓𑀺𑀭𑀺𑀬𑀸𑀬𑀸𑀢𑀺𑀧𑀺 𑀬𑁄𑀚𑀦𑀸 𑀲𑀫𑁆𑀪𑀯𑀢𑀺, 𑀢𑀢𑁆𑀣 𑀯𑀸𑀘𑀸𑀬𑀸𑀢𑀺 𑀯𑀸. ‘‘𑀲𑀡𑁆𑀳𑀯𑀸𑀘𑀢𑀸’’𑀢𑀺𑀆𑀤𑀺𑀦𑀸 𑀢𑀁 𑀯𑀸𑀘𑀁 𑀧𑀯𑀢𑁆𑀢𑀬𑀫𑀸𑀦𑀁 𑀘𑁂𑀢𑀦𑀁 𑀤𑀲𑁆𑀲𑁂𑀢𑀺. 𑀲𑀫𑁆𑀫𑁄𑀤𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀫𑀼𑀤𑀼𑀓𑀪𑀸𑀯𑁄 𑀫𑀤𑁆𑀤𑀯𑀁 𑀲𑀫𑁆𑀫𑁄𑀤𑀓𑀫𑀼𑀤𑀼𑀓𑀪𑀸𑀯𑁄. 𑀆𑀫𑀺𑀲𑁂𑀦 𑀅𑀮𑀩𑁆𑀪𑀫𑀸𑀦𑁂𑀦, 𑀢𑀣𑀸 𑀥𑀫𑁆𑀫𑁂𑀦 𑀘𑀸𑀢𑀺 𑀤𑁆𑀯𑀻𑀳𑀺 𑀙𑀺𑀤𑁆𑀤𑁄. 𑀆𑀫𑀺𑀲𑀲𑁆𑀲, 𑀥𑀫𑁆𑀫𑀲𑁆𑀲 𑀘 𑀅𑀮𑀸𑀪𑁂𑀦 𑀅𑀢𑁆𑀢𑀦𑁄 𑀧𑀭𑀲𑁆𑀲 𑀘 𑀅𑀦𑁆𑀢𑀭𑁂 𑀲𑀫𑁆𑀪𑀯𑀦𑁆𑀢𑀲𑁆𑀲 𑀳𑀺 𑀙𑀺𑀤𑁆𑀤𑀲𑁆𑀲 𑀯𑀺𑀯𑀭𑀲𑁆𑀲 𑀪𑁂𑀤𑀲𑁆𑀲 𑀧𑀝𑀺𑀲𑀦𑁆𑀣𑀭𑀡𑀁 𑀧𑀺𑀤𑀳𑀦𑀁 𑀲𑀗𑁆𑀕𑀡𑁆𑀳𑀦𑀁 𑀧𑀝𑀺𑀲𑀦𑁆𑀣𑀸𑀭𑁄. 𑀢𑀁 𑀲𑀭𑀽𑀧𑀢𑁄, 𑀧𑀝𑀺𑀧𑀢𑁆𑀢𑀺𑀢𑁄 𑀘 𑀧𑀸𑀴𑀺𑀤𑀲𑁆𑀲𑀦𑀫𑀼𑀔𑁂𑀦 𑀯𑀺𑀪𑀸𑀯𑁂𑀢𑀼𑀁 ‘‘𑀅𑀪𑀺𑀥𑀫𑁆𑀫𑁂𑀧𑀻’’𑀢𑀺𑀆𑀤𑀺𑀫𑀸𑀳. 𑀅𑀕𑁆𑀕𑀁 𑀅𑀕𑁆𑀕𑀳𑁂𑀢𑁆𑀯𑀸𑀢𑀺 𑀅𑀕𑁆𑀕𑀁 𑀅𑀢𑁆𑀢𑀦𑁄 𑀅𑀕𑁆𑀕𑀳𑁂𑀢𑁆𑀯𑀸. 𑀉𑀤𑁆𑀤𑁂𑀲𑀤𑀸𑀦𑀦𑁆𑀢𑀺 𑀧𑀸𑀴𑀺𑀬𑀸, 𑀅𑀝𑁆𑀞𑀓𑀣𑀸𑀬 𑀘 𑀉𑀤𑁆𑀤𑀺𑀲𑀦𑀁. 𑀧𑀸𑀴𑀺𑀯𑀡𑁆𑀡𑀦𑀸𑀢𑀺 𑀧𑀸𑀴𑀺𑀬𑀸 𑀅𑀢𑁆𑀣𑀯𑀡𑁆𑀡𑀦𑀸. 𑀥𑀫𑁆𑀫𑀓𑀣𑀸𑀓𑀣𑀦𑀦𑁆𑀢𑀺 𑀲𑀭𑀪𑀜𑁆𑀜𑀲𑀭𑀪𑀡𑀦𑀸𑀤𑀺𑀯𑀲𑁂𑀦 𑀥𑀫𑁆𑀫𑀓𑀣𑀦𑀁.

𑀓𑀭𑀼𑀡𑀸𑀢𑀺 𑀓𑀭𑀼𑀡𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑀫𑀸𑀳. 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄𑀢𑀺 𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀉𑀧𑀘𑀸𑀭𑀚𑁆𑀛𑀸𑀦𑀁 𑀯𑀤𑀢𑀺. 𑀧𑀸𑀴𑀺𑀧𑀤𑁂 𑀧𑀦 𑀬𑀸 𑀓𑀸𑀘𑀺 𑀓𑀭𑀼𑀡𑀸 ‘‘𑀓𑀭𑀼𑀡𑀸’’𑀢𑀺 𑀯𑀼𑀢𑁆𑀢𑀸, 𑀓𑀭𑀼𑀡𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀢𑀺 𑀧𑀦 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸𑀯. 𑀫𑁂𑀢𑁆𑀢𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀲𑀼𑀘𑀺-𑀲𑀤𑁆𑀤𑀢𑁄 𑀪𑀸𑀯𑁂 𑀬𑁆𑀬-𑀓𑀸𑀭𑀁, 𑀇-𑀓𑀸𑀭𑀲𑁆𑀲 𑀘 𑀏-𑀓𑀸𑀭𑀸𑀤𑁂𑀲𑀁 𑀓𑀢𑁆𑀯𑀸 𑀅𑀬𑀁 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀲𑁄𑀘𑁂𑀬𑁆𑀬𑀦𑁆𑀢𑀺 𑀲𑀼𑀘𑀺𑀪𑀸𑀯𑁄’’𑀢𑀺. 𑀳𑁄𑀢𑀼 𑀢𑀸𑀯 𑀲𑀼𑀘𑀺𑀪𑀸𑀯𑁄 𑀲𑁄𑀘𑁂𑀬𑁆𑀬𑀁, 𑀢𑀲𑁆𑀲 𑀧𑀦 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑀢𑀸 𑀓𑀣𑀦𑁆𑀢𑀺 𑀆𑀳 ‘‘𑀯𑀼𑀢𑁆𑀢𑀫𑁆𑀧𑀺 𑀘𑁂𑀢’’𑀦𑁆𑀢𑀺𑀆𑀤𑀺.

𑀫𑀼𑀝𑁆𑀞𑀸 𑀲𑀢𑀺 𑀏𑀢𑀲𑁆𑀲𑀸𑀢𑀺 𑀫𑀼𑀝𑁆𑀞𑀲𑁆𑀲𑀢𑀺, 𑀢𑀲𑁆𑀲 𑀪𑀸𑀯𑁄 𑀫𑀼𑀝𑁆𑀞𑀲𑁆𑀲𑀘𑁆𑀘𑀁, 𑀲𑀢𑀺𑀧𑀝𑀺𑀧𑀓𑁆𑀔𑁄 𑀥𑀫𑁆𑀫𑁄, 𑀦 𑀲𑀢𑀺𑀬𑀸 𑀅𑀪𑀸𑀯𑀫𑀢𑁆𑀢𑀁. 𑀬𑀲𑁆𑀫𑀸 𑀧𑀝𑀺𑀧𑀓𑁆𑀔𑁂 𑀲𑀢𑀺 𑀢𑀲𑁆𑀲 𑀯𑀲𑁂𑀦 𑀲𑀢𑀺𑀯𑀺𑀕𑀢𑀸 𑀯𑀺𑀧𑁆𑀧𑀯𑀼𑀢𑁆𑀣𑀸 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀢𑀺𑀯𑀺𑀧𑁆𑀧𑀯𑀸𑀲𑁄’’𑀢𑀺. ‘‘𑀅𑀲𑁆𑀲𑀢𑀻’’𑀢𑀺𑀆𑀤𑀻𑀲𑀼 𑀅-𑀓𑀸𑀭𑁄 𑀧𑀝𑀺𑀧𑀓𑁆𑀔𑁂 𑀤𑀝𑁆𑀞𑀩𑁆𑀩𑁄, 𑀦 𑀲𑀢𑁆𑀢𑀧𑀝𑀺𑀲𑁂𑀥𑁂. 𑀉𑀤𑀓𑁂 𑀮𑀸𑀩𑀼 𑀯𑀺𑀬 𑀬𑁂𑀦 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑁂 𑀧𑀺𑀮𑀯𑀦𑁆𑀢𑀸 𑀯𑀺𑀬 𑀢𑀺𑀝𑁆𑀞𑀢𑀺, 𑀦 𑀑𑀕𑀸𑀳𑀢𑀺, 𑀲𑀸 𑀧𑀺𑀮𑀸𑀧𑀦𑀢𑀸. 𑀬𑁂𑀦 𑀕𑀳𑀺𑀢𑀫𑁆𑀧𑀺 𑀆𑀭𑀫𑁆𑀫𑀡𑀁 𑀲𑀫𑁆𑀫𑀼𑀲𑁆𑀲𑀢𑀺 𑀦 𑀲𑀭𑀢𑀺, 𑀲𑀸 𑀲𑀫𑁆𑀫𑀼𑀲𑁆𑀲𑀦𑀢𑀸. 𑀬𑀣𑀸 𑀯𑀺𑀚𑁆𑀚𑀸𑀧𑀝𑀺𑀧𑀓𑁆𑀔𑀸 𑀅𑀯𑀺𑀚𑁆𑀚𑀸 𑀯𑀺𑀚𑁆𑀚𑀸𑀬 𑀧𑀳𑀸𑀢𑀩𑁆𑀩𑀢𑁄, 𑀏𑀯𑀁 𑀲𑀫𑁆𑀧𑀚𑀜𑁆𑀜𑀧𑀝𑀺𑀧𑀓𑁆𑀔𑀁 𑀅𑀲𑀫𑁆𑀧𑀚𑀜𑁆𑀜𑀁, 𑀅𑀯𑀺𑀚𑁆𑀚𑀸𑀬𑁂𑀯.

𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀪𑁂𑀤𑁄𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀯𑀺𑀦𑀸𑀲𑁄. 𑀅𑀧𑁆𑀧𑀝𑀺𑀲𑀗𑁆𑀔𑀸𑀢𑀺 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀅𑀬𑁄𑀦𑀺𑀲𑁄 𑀘 𑀆𑀳𑀸𑀭𑀧𑀭𑀺𑀪𑁄𑀕𑁂 𑀆𑀤𑀻𑀦𑀯𑀸𑀦𑀺𑀲𑀁𑀲𑁂 𑀅𑀯𑀻𑀫𑀁𑀲𑀺𑀢𑁆𑀯𑀸.

𑀅𑀧𑁆𑀧𑀝𑀺𑀲𑀗𑁆𑀔𑀸𑀬𑀸𑀢𑀺 𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀲𑀼 𑀅𑀧𑁆𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀦𑀸𑀫𑀁. 𑀅𑀜𑁆𑀜𑀸𑀡𑀁 𑀅𑀧𑁆𑀧𑀝𑀺𑀲𑀗𑁆𑀔𑀸𑀢 𑀦𑀺𑀫𑀺𑀢𑁆𑀢𑀁. 𑀅𑀓𑀫𑁆𑀧𑀦𑀜𑀸𑀡𑀦𑁆𑀢𑀺 𑀢𑀸𑀬 𑀅𑀦𑀪𑀺𑀪𑀯𑀦𑀻𑀬𑀁 𑀜𑀸𑀡𑀁, 𑀢𑀢𑁆𑀣 𑀢𑀢𑁆𑀣 𑀧𑀘𑁆𑀘𑀯𑁂𑀓𑁆𑀔𑀡𑀸𑀜𑀸𑀡𑀜𑁆𑀘𑁂𑀯 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀫𑀼𑀤𑁆𑀥𑀪𑀽𑀢𑀁 𑀮𑁄𑀓𑀼𑀢𑁆𑀢𑀭𑀜𑀸𑀡𑀜𑁆𑀘. 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀫𑀕𑁆𑀕𑀪𑀸𑀯𑀦𑀸 𑀪𑀸𑀯𑀦𑀸 𑀦𑀸𑀫, 𑀬𑀸 𑀘 𑀢𑀤𑀢𑁆𑀣𑀸, 𑀢𑀤𑀼𑀪𑀬𑀜𑁆𑀘 𑀪𑀸𑀯𑁂𑀦𑁆𑀢𑀲𑁆𑀲𑁂𑀯 𑀇𑀘𑁆𑀙𑀺𑀢𑀩𑁆𑀩𑀁, 𑀦 𑀪𑀸𑀯𑀺𑀢𑀪𑀸𑀯𑀦𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 ‘‘𑀪𑀸𑀯𑁂𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀁 𑀩𑀮’’𑀦𑁆𑀢𑀺. 𑀢𑁂𑀦𑀸𑀳 ‘‘𑀬𑀸 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀆𑀲𑁂𑀯𑀦𑀸 𑀪𑀸𑀯𑀦𑀸 𑀩𑀳𑀼𑀮𑀻𑀓𑀫𑁆𑀫’’𑀦𑁆𑀢𑀺.

𑀓𑀸𑀫𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀣𑀺𑀭𑀪𑀸𑀯𑁄𑀧𑀺 𑀩𑀮𑀝𑁆𑀞𑁄 𑀏𑀯, 𑀧𑀝𑀺𑀧𑀓𑁆𑀔𑁂𑀳𑀺 𑀧𑀦 𑀅𑀓𑀫𑁆𑀧𑀦𑀻𑀬𑀢𑀸 𑀲𑀸𑀢𑀺𑀲𑀬𑀁 𑀩𑀮𑀝𑁆𑀞𑁄𑀢𑀺 𑀯𑀼𑀢𑁆𑀢𑀁 ‘‘𑀅𑀲𑁆𑀲𑀢𑀺𑀬𑀸 𑀅𑀓𑀫𑁆𑀧𑀦𑀯𑀲𑁂𑀦𑀸’’𑀢𑀺. 𑀧𑀘𑁆𑀘𑀦𑀻𑀓𑀥𑀫𑁆𑀫𑀲𑀫𑀦𑀢𑁄 𑀲𑀫𑀣𑁄 𑀲𑀫𑀸𑀥𑀺. 𑀅𑀦𑀺𑀘𑁆𑀘𑀸𑀤𑀺𑀦𑀸 𑀯𑀺𑀯𑀺𑀥𑁂𑀦𑀸𑀓𑀸𑀭𑁂𑀦 𑀤𑀲𑁆𑀲𑀦𑀢𑁄 𑀯𑀺𑀧𑀲𑁆𑀲𑀦𑀸 𑀧𑀜𑁆𑀜𑀸. 𑀢𑀁 𑀆𑀓𑀸𑀭𑀁 𑀕𑀳𑁂𑀢𑁆𑀯𑀸𑀢𑀺 𑀲𑀫𑀸𑀥𑀸𑀦𑀸𑀓𑀸𑀭𑀁 𑀕𑀳𑁂𑀢𑁆𑀯𑀸. 𑀬𑁂𑀦𑀸𑀓𑀸𑀭𑁂𑀦 𑀧𑀼𑀩𑁆𑀩𑁂 𑀅𑀮𑀻𑀦𑀁 𑀅𑀦𑀼𑀤𑁆𑀥𑀢𑀁 𑀫𑀚𑁆𑀛𑀺𑀫𑀁 𑀪𑀸𑀯𑀦𑀸𑀯𑀻𑀣𑀺𑀧𑀝𑀺𑀧𑀦𑁆𑀦𑀁 𑀳𑀼𑀢𑁆𑀯𑀸 𑀘𑀺𑀢𑁆𑀢𑀁 𑀲𑀫𑀸𑀳𑀺𑀢𑀁 𑀳𑁄𑀢𑀺, 𑀢𑀁 𑀆𑀓𑀸𑀭𑀁 𑀕𑀳𑁂𑀢𑁆𑀯𑀸 𑀲𑀮𑁆𑀮𑀓𑁆𑀔𑁂𑀢𑁆𑀯𑀸. 𑀦𑀺𑀫𑀺𑀢𑁆𑀢𑀯𑀲𑁂𑀦𑀸𑀢𑀺 𑀓𑀸𑀭𑀡𑀯𑀲𑁂𑀦. ‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 𑀧𑀕𑁆𑀕𑀳𑁄𑀯 𑀢𑀁 𑀆𑀓𑀸𑀭𑀁 𑀕𑀳𑁂𑀢𑁆𑀯𑀸 𑀧𑀼𑀦 𑀧𑀯𑀢𑁆𑀢𑁂𑀢𑀩𑁆𑀩𑀲𑁆𑀲 𑀧𑀕𑁆𑀕𑀸𑀳𑀲𑁆𑀲 𑀦𑀺𑀫𑀺𑀢𑁆𑀢𑀯𑀲𑁂𑀦 𑀧𑀕𑁆𑀕𑀸𑀳𑀦𑀺𑀫𑀺𑀢𑁆𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀅𑀢𑀺𑀤𑀺𑀲𑀢𑀺, 𑀢𑀲𑁆𑀲𑀢𑁆𑀣𑁄 𑀲𑀫𑀣𑁂 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀧𑀕𑁆𑀕𑀸𑀳𑁄 𑀯𑀻𑀭𑀺𑀬𑀁 𑀓𑁄𑀲𑀚𑁆𑀚𑀧𑀓𑁆𑀔𑀢𑁄 𑀘𑀺𑀢𑁆𑀢𑀲𑁆𑀲 𑀧𑀢𑀺𑀢𑀼𑀁 𑀅𑀤𑀢𑁆𑀯𑀸 𑀧𑀕𑁆𑀕𑀡𑁆𑀳𑀦𑀢𑁄. 𑀅𑀯𑀺𑀓𑁆𑀔𑁂𑀧𑁄 𑀏𑀓𑀕𑁆𑀕𑀢𑀸 𑀯𑀺𑀓𑁆𑀔𑁂𑀧𑀲𑁆𑀲 𑀉𑀤𑁆𑀥𑀘𑁆𑀘𑀲𑁆𑀲 𑀧𑀝𑀺𑀧𑀓𑁆𑀔𑀪𑀸𑀯𑀢𑁄. 𑀧𑀝𑀺𑀲𑀗𑁆𑀔𑀸𑀦𑀓𑀺𑀘𑁆𑀘𑀦𑀺𑀩𑁆𑀩𑀢𑁆𑀢𑀺𑀪𑀸𑀯𑀢𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀁 𑀧𑀝𑀺𑀲𑀗𑁆𑀔𑀸𑀦𑀩𑀮𑀪𑀸𑀯𑁄, 𑀢𑀣𑀸 𑀧𑀼𑀩𑁆𑀩𑁂 𑀧𑀯𑀢𑁆𑀢𑀸𑀓𑀸𑀭𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀲𑀫𑀣𑀧𑀕𑁆𑀕𑀸𑀳𑀸𑀦𑀁 𑀉𑀧𑀭𑀺 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄 𑀲𑀫𑀣𑀦𑀺𑀫𑀺𑀢𑁆𑀢𑀤𑀼𑀓𑀲𑁆𑀲𑀧𑀺 𑀫𑀺𑀲𑁆𑀲𑀓𑀢𑀸 𑀯𑀼𑀢𑁆𑀢𑀸.

𑀬𑀣𑀸𑀲𑀫𑀸𑀤𑀺𑀦𑁆𑀦𑀲𑁆𑀲 𑀲𑀻𑀮𑀲𑁆𑀲 𑀪𑁂𑀤𑀓𑀭𑁄 𑀯𑀻𑀢𑀺𑀓𑁆𑀓𑀫𑁄. 𑀲𑀻𑀮𑀯𑀺𑀦𑀸𑀲𑀓𑁄 𑀅𑀲𑀁𑀯𑀭𑁄. 𑀲𑀫𑁆𑀫𑀸𑀤𑀺𑀝𑁆𑀞𑀺𑀯𑀺𑀦𑀸𑀲𑀺𑀓𑀸𑀢𑀺 ‘‘𑀅𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺 (𑀫. 𑀦𑀺. 𑁧.𑁪𑁪𑁧; 𑁨.𑁯𑁪; 𑀯𑀺𑀪. 𑁭𑁯𑁩) 𑀦𑀬𑀧𑁆𑀧𑀯𑀢𑁆𑀢𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀤𑀽𑀲𑀺𑀓𑀸.

𑀲𑀻𑀮𑀲𑁆𑀲 𑀲𑀫𑁆𑀧𑀸𑀤𑀦𑀁 𑀦𑀸𑀫 𑀲𑀩𑁆𑀩𑀪𑀸𑀕𑀢𑁄 𑀢𑀲𑁆𑀲 𑀅𑀦𑀽𑀦𑀢𑀸𑀧𑀸𑀤𑀦𑀦𑁆𑀢𑀺 𑀆𑀳 ‘‘𑀲𑀫𑁆𑀧𑀸𑀤𑀦𑀢𑁄 𑀧𑀭𑀺𑀧𑀽𑀭𑀡𑀢𑁄’’𑀢𑀺. 𑀧𑀸𑀭𑀺𑀧𑀽𑀭𑀢𑁆𑀣𑁄 𑀳𑀺 𑀲𑀫𑁆𑀧𑀤𑀸-𑀲𑀤𑁆𑀤𑁄𑀢𑀺. 𑀫𑀸𑀦𑀲𑀺𑀓𑀲𑀻𑀮𑀁 𑀦𑀸𑀫 𑀲𑀻𑀮𑀯𑀺𑀲𑁄𑀥𑀦𑀯𑀲𑁂𑀦 𑀅𑀪𑀺𑀚𑁆𑀛𑀸𑀤𑀺𑀧𑁆𑀧𑀳𑀸𑀦𑀁. 𑀤𑀺𑀝𑁆𑀞𑀺𑀧𑀸𑀭𑀺𑀧𑀽𑀭𑀺𑀪𑀽𑀢𑀁 𑀜𑀸𑀡𑀦𑁆𑀢𑀺 𑀅𑀢𑁆𑀣𑀺𑀓𑀤𑀺𑀝𑁆𑀞𑀺𑀆𑀤𑀺𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀧𑀸𑀭𑀺𑀧𑀽𑀭𑀺𑀪𑀸𑀯𑁂𑀦 𑀧𑀯𑀢𑁆𑀢𑀁 𑀜𑀸𑀡𑀁.

𑀯𑀺𑀲𑀼𑀤𑁆𑀥𑀺𑀁 𑀧𑀸𑀧𑁂𑀢𑀼𑀁 𑀲𑀫𑀢𑁆𑀣𑀦𑁆𑀢𑀺 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀆𑀤𑀺𑀉𑀧𑀭𑀺𑀯𑀺𑀲𑀼𑀤𑁆𑀥𑀺𑀬𑀸 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀫𑀢𑁆𑀣𑀁. 𑀲𑀼𑀯𑀺𑀲𑀼𑀤𑁆𑀥𑀫𑁂𑀯 𑀳𑀺 𑀲𑀻𑀮𑀁 𑀢𑀲𑁆𑀲𑀸 𑀧𑀤𑀝𑁆𑀞𑀸𑀦𑀁 𑀳𑁄𑀢𑀻𑀢𑀺. 𑀯𑀺𑀲𑀼𑀤𑁆𑀥𑀺𑀁 𑀧𑀸𑀧𑁂𑀢𑀼𑀁 𑀲𑀫𑀢𑁆𑀣𑀁 𑀤𑀲𑁆𑀲𑀦𑀦𑁆𑀢𑀺 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀁, 𑀧𑀭𑀫𑀢𑁆𑀣𑀯𑀺𑀲𑀼𑀤𑁆𑀥𑀺𑀦𑀺𑀩𑁆𑀩𑀸𑀦𑀜𑁆𑀘 𑀧𑀸𑀧𑁂𑀢𑀼𑀁 𑀉𑀧𑀦𑁂𑀢𑀼𑀁 𑀲𑀫𑀢𑁆𑀣𑀁 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑀸𑀤𑀺𑀲𑀫𑁆𑀫𑀸𑀤𑀲𑁆𑀲𑀦𑀁. 𑀢𑁂𑀦𑀸𑀳 ‘‘𑀅𑀪𑀺𑀥𑀫𑁆𑀫𑁂’’𑀢𑀺𑀆𑀤𑀺. 𑀏𑀢𑁆𑀣 𑀘 ‘‘𑀇𑀤𑀁 𑀅𑀓𑀼𑀲𑀮𑀁 𑀓𑀫𑁆𑀫𑀁 𑀦𑁄 𑀲𑀓𑀁, 𑀇𑀤𑀁 𑀧𑀦 𑀓𑀫𑁆𑀫𑀁 𑀲𑀓’’𑀦𑁆𑀢𑀺 𑀏𑀯𑀁 𑀩𑁆𑀬𑀢𑀺𑀭𑁂𑀓𑀢𑁄 𑀅𑀦𑁆𑀯𑀬𑀢𑁄 𑀘 𑀓𑀫𑁆𑀫𑀲𑁆𑀲𑀓𑀢𑀸𑀚𑀸𑀦𑀦𑀜𑀸𑀡𑀁 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑀁. 𑀢𑁂𑀦𑀸𑀳 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺. ‘‘𑀧𑀭𑁂𑀦 𑀓𑀢𑀫𑁆𑀧𑀻’’𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁 𑀬𑀣𑀸 𑀧𑀭𑁂𑀦 𑀓𑀢𑀁, 𑀏𑀯𑀁 𑀅𑀢𑁆𑀢𑀦𑀸 𑀓𑀢𑀫𑁆𑀧𑀺 𑀲𑀓𑀓𑀫𑁆𑀫𑀁 𑀦𑀸𑀫 𑀦 𑀳𑁄𑀢𑀻𑀢𑀺. 𑀅𑀢𑁆𑀢𑀦𑀸 𑀯𑀸 𑀉𑀲𑁆𑀲𑀸𑀳𑀺𑀢𑁂𑀦 𑀧𑀭𑁂𑀦 𑀓𑀢𑀁𑀧𑀻𑀢𑀺 𑀏𑀯𑀁 𑀯𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑀜𑁆𑀳𑀺 𑀢𑀁 𑀧𑀭𑀲𑁆𑀲 𑀉𑀲𑁆𑀲𑀸𑀳𑀦𑀯𑀲𑁂𑀦 𑀓𑀢𑀁, 𑀢𑀫𑁆𑀧𑀺 𑀲𑀓𑀓𑀫𑁆𑀫𑀁 𑀦𑀸𑀫 𑀳𑁄𑀢𑀻𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀅𑀢𑁆𑀣𑀪𑀜𑁆𑀚𑀦𑀢𑁄𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀲𑀩𑁆𑀩𑀅𑀢𑁆𑀣𑀯𑀺𑀦𑀸𑀲𑀦𑀢𑁄. 𑀅𑀢𑁆𑀣𑀚𑀦𑀦𑀢𑁄𑀢𑀺 𑀇𑀥𑀮𑁄𑀓𑀢𑁆𑀣𑀧𑀭𑀮𑁄𑀓𑀢𑁆𑀣𑀧𑀭𑀫𑀢𑁆𑀣𑀸𑀦𑀁 𑀉𑀧𑁆𑀧𑀸𑀤𑀦𑀢𑁄. 𑀆𑀭𑀩𑁆𑀪𑀓𑀸𑀮𑁂 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸’’𑀢𑀺 𑀧𑀯𑀢𑁆𑀢𑀫𑁆𑀧𑀺 𑀯𑀘𑀻𑀲𑀘𑁆𑀘𑀜𑁆𑀘 𑀮𑀓𑁆𑀔𑀡𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀅𑀦𑀼𑀮𑁄𑀫𑁂𑀢𑀺 𑀢𑀢𑁆𑀣𑁂𑀯 𑀧𑀝𑀺𑀯𑀺𑀚𑁆𑀛𑀦𑀢𑁄. 𑀧𑀭𑀫𑀢𑁆𑀣𑀲𑀘𑁆𑀘𑀜𑁆𑀘 𑀦𑀺𑀩𑁆𑀩𑀸𑀦𑀁 𑀦 𑀯𑀺𑀮𑁄𑀫𑁂𑀢𑀺 𑀦 𑀯𑀺𑀭𑁄𑀥𑁂𑀢𑀺 𑀏𑀓𑀦𑁆𑀢𑁂𑀦𑁂𑀯 𑀲𑀫𑁆𑀧𑀸𑀧𑀦𑀢𑁄.

𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀜𑀸𑀡𑀪𑀽𑀢𑀁 𑀤𑀲𑁆𑀲𑀦𑀁, 𑀢𑁂𑀦 𑀫𑀕𑁆𑀕𑀁 𑀯𑀤𑀢𑀺. 𑀢𑀁𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀯𑀻𑀭𑀺𑀬𑀦𑁆𑀢𑀺 𑀧𑀞𑀫𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀁 𑀯𑀻𑀭𑀺𑀬𑀫𑀸𑀳. 𑀲𑀩𑁆𑀩𑀸𑀧𑀺 𑀫𑀕𑁆𑀕𑀧𑀜𑁆𑀜𑀸 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀬𑀫𑁂𑀯 𑀘 𑀦𑀬𑁄 𑀅𑀪𑀺𑀥𑀫𑁆𑀫𑀧𑀸𑀴𑀺𑀬𑀸 (𑀥. 𑀲. 𑁫𑁫𑁦) 𑀲𑀫𑁂𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀪𑀺𑀥𑀫𑁆𑀫𑁂 𑀧𑀦𑀸’’𑀢𑀺 𑀆𑀤𑀺𑀁 𑀅𑀯𑁄𑀘.

𑀬𑀲𑁆𑀫𑀸 𑀲𑀁𑀯𑁂𑀕𑁄 𑀦𑀸𑀫 𑀲𑀳𑁄𑀢𑁆𑀢𑀧𑁆𑀧𑀜𑀸𑀡𑀁, 𑀢𑀲𑁆𑀫𑀸 𑀲𑀁𑀯𑁂𑀕𑀯𑀢𑁆𑀣𑀼𑀁 𑀪𑀬𑀢𑁄 𑀪𑀸𑀬𑀺𑀢𑀩𑁆𑀩𑀢𑁄 𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀜𑀸𑀡𑀁. 𑀢𑁂𑀦𑀸𑀳 ‘‘𑀚𑀸𑀢𑀺𑀪𑀬’’𑀦𑁆𑀢𑀺𑀆𑀤𑀺. 𑀪𑀸𑀬𑀦𑁆𑀢𑀺 𑀏𑀢𑀲𑁆𑀫𑀸𑀢𑀺 𑀪𑀬𑀁, 𑀚𑀸𑀢𑀺 𑀏𑀯 𑀪𑀬𑀁 𑀚𑀸𑀢𑀺𑀪𑀬𑀁. 𑀲𑀁𑀯𑁂𑀚𑀦𑀻𑀬𑀦𑁆𑀢𑀺 𑀲𑀁𑀯𑀺𑀚𑁆𑀚𑀺𑀢𑀩𑁆𑀩𑀁 𑀪𑀸𑀬𑀺𑀢𑀩𑁆𑀩𑀁 𑀉𑀢𑁆𑀢𑀸𑀲𑀺𑀢𑀩𑁆𑀩𑀁. 𑀞𑀸𑀦𑀦𑁆𑀢𑀺 𑀓𑀸𑀭𑀡𑀁, 𑀯𑀢𑁆𑀣𑀽𑀢𑀺 𑀅𑀢𑁆𑀣𑁄. 𑀲𑀁𑀯𑁂𑀕𑀚𑀸𑀢𑀲𑁆𑀲𑀸𑀢𑀺 𑀉𑀧𑁆𑀧𑀦𑁆𑀦𑀲𑀁𑀯𑁂𑀕𑀲𑁆𑀲. 𑀉𑀧𑀸𑀬𑀧𑀥𑀸𑀦𑀦𑁆𑀢𑀺 𑀉𑀧𑀸𑀬𑁂𑀦 𑀧𑀯𑀢𑁆𑀢𑁂𑀢𑀩𑁆𑀩𑀁 𑀯𑀻𑀭𑀺𑀬𑀁.

𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀲𑀻𑀮𑀸𑀤𑀻𑀦𑀁 𑀅𑀦𑀯𑀚𑁆𑀚𑀥𑀫𑁆𑀫𑀸𑀦𑀁. 𑀪𑀸𑀯𑀦𑀸𑀬𑀸𑀢𑀺 𑀉𑀧𑁆𑀧𑀸𑀤𑀦𑁂𑀦 𑀯𑀟𑁆𑀠𑀦𑁂𑀦 𑀘. 𑀅𑀲𑀦𑁆𑀢𑀼𑀝𑁆𑀞𑀲𑁆𑀲𑀸𑀢𑀺 ‘‘𑀅𑀮𑀁 𑀏𑀢𑁆𑀢𑀸𑀯𑀢𑀸, 𑀓𑀣𑀁 𑀏𑀢𑁆𑀢𑀸𑀯𑀢𑀸’’𑀢𑀺 𑀲𑀗𑁆𑀓𑁄𑀘𑀸𑀧𑀢𑁆𑀢𑀺𑀯𑀲𑁂𑀦 𑀦 𑀲𑀦𑁆𑀢𑀼𑀝𑁆𑀞𑀲𑁆𑀲. 𑀪𑀺𑀬𑁆𑀬𑁄𑀓𑀫𑁆𑀬𑀢𑀸𑀢𑀺 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀉𑀧𑁆𑀧𑀸𑀤𑀦𑀺𑀘𑁆𑀙𑀸. 𑀯𑁄𑀲𑀸𑀦𑀦𑁆𑀢𑀺 𑀲𑀗𑁆𑀓𑁄𑀘𑀁 𑀅𑀲𑀫𑀢𑁆𑀣𑀦𑁆𑀢𑀺. 𑀢𑀼𑀲𑁆𑀲𑀦𑀁 𑀢𑀼𑀝𑁆𑀞𑀺 𑀲𑀦𑁆𑀢𑀼𑀝𑁆𑀞𑀺, 𑀦𑀢𑁆𑀣𑀺 𑀏𑀢𑀲𑁆𑀲 𑀲𑀦𑁆𑀢𑀼𑀝𑁆𑀞𑀻𑀢𑀺 𑀅𑀲𑀦𑁆𑀢𑀼𑀝𑁆𑀞𑀺, 𑀢𑀲𑁆𑀲 𑀪𑀸𑀯𑁄 𑀅𑀲𑀦𑁆𑀢𑀼𑀝𑁆𑀞𑀺𑀢𑀸. 𑀯𑀻𑀭𑀺𑀬𑀧𑁆𑀧𑀯𑀸𑀳𑁂 𑀯𑀢𑁆𑀢𑀫𑀸𑀦𑁂 𑀅𑀦𑁆𑀢𑀭𑀸 𑀏𑀯 𑀧𑀝𑀺𑀕𑀫𑀦𑀁 𑀦𑀺𑀯𑀢𑁆𑀢𑀦𑀁 𑀧𑀝𑀺𑀯𑀸𑀦𑀁, 𑀢𑀁 𑀢𑀲𑁆𑀲 𑀅𑀢𑁆𑀣𑀻𑀢𑀺 𑀧𑀝𑀺𑀯𑀸𑀦𑀻, 𑀦 𑀧𑀝𑀺𑀯𑀸𑀦𑀻 𑀅𑀧𑁆𑀧𑀝𑀺𑀯𑀸𑀦𑀻, 𑀢𑀲𑁆𑀲 𑀪𑀸𑀯𑁄 𑀅𑀧𑁆𑀧𑀝𑀺𑀯𑀸𑀦𑀺𑀢𑀸. 𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀢𑀸𑀢𑀺 𑀓𑀼𑀲𑀮𑀸𑀦𑀁 𑀓𑀭𑀡𑁂 𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀢𑀸 𑀆𑀤𑀭𑀓𑀺𑀭𑀺𑀬𑀢𑀸. 𑀲𑀸𑀢𑀘𑁆𑀘𑀓𑀺𑀭𑀺𑀬𑀢𑀸𑀢𑀺 𑀲𑀢𑀢𑀫𑁂𑀯 𑀓𑀭𑀡𑀁. 𑀅𑀝𑁆𑀞𑀺𑀢𑀓𑀺𑀭𑀺𑀬𑀢𑀸𑀢𑀺 𑀅𑀦𑁆𑀢𑀭𑀸 𑀅𑀝𑁆𑀞𑀧𑁂𑀢𑁆𑀯𑀸 𑀔𑀡𑁆𑀟𑀁 𑀅𑀓𑀢𑁆𑀯𑀸 𑀓𑀭𑀡𑀁. 𑀅𑀦𑁄𑀮𑀻𑀦𑀯𑀼𑀢𑁆𑀢𑀺𑀢𑀸𑀢𑀺 𑀦 𑀮𑀻𑀦𑀧𑁆𑀧𑀯𑀢𑁆𑀢𑀺𑀢𑀸. 𑀅𑀦𑀺𑀓𑁆𑀔𑀺𑀢𑁆𑀢𑀙𑀦𑁆𑀤𑀢𑀸𑀢𑀺 𑀓𑀼𑀲𑀮𑀘𑁆𑀙𑀦𑁆𑀤𑀲𑁆𑀲 𑀅𑀦𑀺𑀓𑁆𑀔𑀺𑀧𑀦𑀁. 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀸𑀢𑀺 𑀓𑀼𑀲𑀮𑀓𑀭𑀡𑁂 𑀯𑀻𑀭𑀺𑀬𑀥𑀼𑀭𑀲𑁆𑀲 𑀅𑀦𑀺𑀓𑁆𑀔𑀺𑀧𑀦𑀁. 𑀆𑀲𑁂𑀯𑀦𑀸𑀢𑀺 𑀆𑀤𑀭𑁂𑀦 𑀲𑁂𑀯𑀦𑀸. 𑀪𑀸𑀯𑀦𑀸𑀢𑀺 𑀯𑀟𑁆𑀠𑀦𑀸 𑀩𑁆𑀭𑀽𑀳𑀦𑀸. 𑀩𑀳𑀼𑀮𑀻𑀓𑀫𑁆𑀫𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀓𑀭𑀡𑀁.

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁, 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀆𑀲𑀯𑀓𑁆𑀔𑀬𑀜𑀸𑀡𑀦𑁆𑀢𑀺 𑀇𑀫𑀸 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸. 𑀧𑀝𑀺𑀧𑀓𑁆𑀔𑀯𑀺𑀚𑁆𑀛𑀦𑀝𑁆𑀞𑁂𑀦 𑀧𑀼𑀩𑁆𑀩𑁂 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀸𑀤𑀻𑀦𑀁 𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦 𑀯𑀺𑀲𑀺𑀝𑁆𑀞𑀸 𑀫𑀼𑀢𑁆𑀢𑀻𑀢𑀺 𑀯𑀺𑀫𑀼𑀢𑁆𑀢𑀺. 𑀲𑁆𑀯𑀸𑀬𑀁 𑀯𑀺𑀲𑁂𑀲𑁄 𑀧𑀝𑀺𑀧𑀓𑁆𑀔𑀯𑀺𑀕𑀫𑀦𑁂𑀦, 𑀧𑀝𑀺𑀬𑁄𑀕𑀺𑀯𑀺𑀕𑀫𑀦𑁂𑀦 𑀘 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀢𑀤𑀼𑀪𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑁂𑀦 𑀯𑀺𑀲𑁂𑀲𑁂𑀦 𑀲𑀫𑀸𑀧𑀢𑁆𑀢𑀺𑀬𑁄 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀲𑀼𑀝𑁆𑀞𑀼 𑀫𑀼𑀢𑁆𑀢𑀸, 𑀢𑀢𑁄 𑀦𑀺𑀭𑀸𑀲𑀗𑁆𑀓𑀢𑀸𑀬 𑀆𑀭𑀫𑁆𑀫𑀡𑁂 𑀘 𑀅𑀪𑀺𑀭𑀢𑀸, 𑀢𑀁 𑀯𑀺𑀲𑁂𑀲𑀁 𑀉𑀧𑀸𑀤𑀸𑀬 𑀢𑀸 𑀅𑀥𑀺𑀓𑀁 𑀫𑀼𑀘𑁆𑀘𑀦𑀢𑁄, 𑀆𑀭𑀫𑁆𑀫𑀡𑁂 𑀅𑀥𑀺𑀫𑀼𑀘𑁆𑀘𑀦𑀢𑁄 𑀘 𑀅𑀥𑀺𑀫𑀼𑀢𑁆𑀢𑀺𑀬𑁄 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑀲𑁆𑀲 𑀘 𑀅𑀥𑀺𑀫𑀼𑀢𑁆𑀢𑀻’’𑀢𑀺. 𑀫𑀼𑀢𑁆𑀢𑀢𑁆𑀢𑀸𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑁂𑀳𑀺 𑀯𑀺𑀲𑁂𑀲𑁂𑀦 𑀦𑀺𑀲𑁆𑀲𑀝𑀢𑁆𑀢𑀸 𑀯𑀺𑀫𑀼𑀢𑁆𑀢𑀺.

𑀔𑀬𑁂 𑀜𑀸𑀡𑀦𑁆𑀢𑀺 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀓𑀺𑀮𑁂𑀲𑁂 𑀔𑁂𑀧𑁂𑀢𑀻𑀢𑀺 𑀔𑀬𑁄, 𑀅𑀭𑀺𑀬𑀫𑀕𑁆𑀕𑁄, 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀁 𑀜𑀸𑀡𑀁 𑀔𑀬𑁂 𑀜𑀸𑀡𑀁.𑀧𑀝𑀺𑀲𑀦𑁆𑀥𑀺𑀯𑀲𑁂𑀦𑀸𑀢𑀺 𑀓𑀺𑀮𑁂𑀲𑀸𑀦𑀁 𑀢𑀁𑀢𑀁𑀫𑀕𑁆𑀕𑀯𑀚𑁆𑀛𑀸𑀦𑀁 𑀉𑀧𑁆𑀧𑀦𑁆𑀦𑀫𑀕𑁆𑀕𑁂 𑀔𑀦𑁆𑀥𑀲𑀦𑁆𑀢𑀸𑀦𑁂 𑀧𑀼𑀦 𑀲𑀦𑁆𑀤𑀳𑀦𑀯𑀲𑁂𑀦. 𑀅𑀦𑀼𑀧𑁆𑀧𑀸𑀤𑀪𑀽𑀢𑁂𑀢𑀺 𑀢𑀁𑀢𑀁𑀨𑀮𑁂. 𑀅𑀦𑀼𑀧𑁆𑀧𑀸𑀤𑀧𑀭𑀺𑀬𑁄𑀲𑀸𑀦𑁂𑀢𑀺 𑀅𑀦𑀼𑀧𑁆𑀧𑀸𑀤𑀓𑀭𑁄 𑀫𑀕𑁆𑀕𑁄 𑀅𑀦𑀼𑀧𑁆𑀧𑀸𑀤𑁄, 𑀢𑀲𑁆𑀲 𑀧𑀭𑀺𑀬𑁄𑀲𑀸𑀦𑁂, 𑀓𑀺𑀮𑁂𑀲𑀸𑀦𑀁 𑀯𑀸 𑀅𑀦𑀼𑀧𑁆𑀧𑀚𑁆𑀚𑀦𑀲𑀗𑁆𑀔𑀸𑀢𑁂 𑀧𑀭𑀺𑀬𑁄𑀲𑀸𑀦𑁂, 𑀪𑀗𑁆𑀕𑁂𑀢𑀺 𑀅𑀢𑁆𑀣𑁄𑀢𑀺.

𑀤𑀼𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀺𑀓𑀯𑀡𑁆𑀡𑀦𑀸

𑁩𑁦𑁫. 𑀥𑀫𑁆𑀫𑀢𑁄 𑀅𑀜𑁆𑀜𑁄 𑀓𑀢𑁆𑀢𑀸 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 𑀓𑀢𑁆𑀢𑀼𑀲𑀸𑀥𑀦𑀯𑀲𑁂𑀦 ‘‘𑀮𑀼𑀩𑁆𑀪𑀢𑀻𑀢𑀺 𑀮𑁄𑀪𑁄’’𑀢𑀺 𑀯𑀼𑀢𑁆𑀢𑀁. 𑀮𑀼𑀩𑁆𑀪𑀢𑀺 𑀢𑁂𑀦, 𑀮𑀼𑀩𑁆𑀪𑀦𑀫𑀢𑁆𑀢𑀫𑁂𑀢𑀦𑁆𑀢𑀺 𑀓𑀭𑀡𑀪𑀸𑀯𑀲𑀸𑀥𑀦𑀯𑀲𑁂𑀦𑀧𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑁂𑀯. 𑀤𑀼𑀲𑁆𑀲𑀢𑀺 𑀫𑀼𑀬𑁆𑀳𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀅𑀓𑀼𑀲𑀮𑀜𑁆𑀘 𑀢𑀁 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁂𑀦 𑀏𑀓𑀦𑁆𑀢𑀸𑀓𑀼𑀲𑀮𑀪𑀸𑀯𑀢𑁄 𑀫𑀽𑀮𑀜𑁆𑀘 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑀢𑁄, 𑀦 𑀅𑀓𑀼𑀲𑀮𑀪𑀸𑀯𑀲𑀸𑀥𑀦𑀢𑁄. 𑀦 𑀳𑀺 𑀫𑀽𑀮𑀓𑀢𑁄 𑀅𑀓𑀼𑀲𑀮𑀸𑀦𑀁 𑀅𑀓𑀼𑀲𑀮𑀪𑀸𑀯𑁄, 𑀓𑀼𑀲𑀮𑀸𑀤𑀻𑀦𑀜𑁆𑀘 𑀓𑀼𑀲𑀮𑀸𑀤𑀺𑀪𑀸𑀯𑁄. 𑀢𑀣𑀸 𑀲𑀢𑀺 𑀫𑁄𑀫𑀽𑀳𑀘𑀺𑀢𑁆𑀢𑀤𑁆𑀯𑀬𑁂 𑀫𑁄𑀳𑀲𑁆𑀲 𑀅𑀓𑀼𑀲𑀮𑀪𑀸𑀯𑁄 𑀦 𑀲𑀺𑀬𑀸. 𑀢𑁂𑀲𑀦𑁆𑀢𑀺 𑀮𑁄𑀪𑀸𑀤𑀻𑀦𑀁. ‘‘𑀦 𑀮𑀼𑀩𑁆𑀪𑀢𑀻𑀢𑀺 𑀅𑀮𑁄𑀪𑁄’’𑀢𑀺𑀆𑀤𑀺𑀦𑀸 𑀧𑀝𑀺𑀧𑀓𑁆𑀔𑀦𑀬𑁂𑀦.

𑀤𑀼𑀝𑁆𑀞𑀼 𑀘𑀭𑀺𑀢𑀸𑀦𑀻𑀢𑀺 𑀧𑀘𑁆𑀘𑀬𑀢𑁄, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀢𑁄, 𑀧𑀯𑀢𑁆𑀢𑀺𑀆𑀓𑀸𑀭𑀢𑁄 𑀘 𑀦 𑀲𑀼𑀝𑁆𑀞𑀼 𑀅𑀲𑀫𑁆𑀫𑀸 𑀧𑀯𑀢𑁆𑀢𑀺𑀢𑀸𑀦𑀺. 𑀯𑀺𑀭𑀽𑀧𑀸𑀦𑀻𑀢𑀺 𑀩𑀻𑀪𑀘𑁆𑀙𑀸𑀦𑀺 𑀲𑀫𑁆𑀧𑀢𑀺, 𑀆𑀬𑀢𑀺𑀜𑁆𑀘 𑀅𑀦𑀺𑀝𑁆𑀞𑀭𑀽𑀧𑀢𑁆𑀢𑀸. 𑀓𑀸𑀬𑁂𑀦𑀸𑀢𑀺 𑀓𑀸𑀬𑀤𑁆𑀯𑀸𑀭𑁂𑀦 𑀓𑀭𑀡𑀪𑀽𑀢𑁂𑀦. 𑀓𑀸𑀬𑀢𑁄𑀢𑀺 𑀓𑀸𑀬𑀤𑁆𑀯𑀸𑀭𑀢𑁄. ‘‘𑀲𑀼𑀝𑁆𑀞𑀼 𑀘𑀭𑀺𑀢𑀸𑀦𑀻’’𑀢𑀺𑀆𑀤𑀻𑀲𑀼 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀯𑀻𑀢𑀺𑀓𑁆𑀓𑀫𑁂 𑀓𑀸𑀬𑀲𑀫𑀼𑀝𑁆𑀞𑀸𑀦𑀸 𑀆𑀧𑀢𑁆𑀢𑀺 𑀳𑁄𑀢𑀺, 𑀢𑀁 𑀓𑀸𑀬𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀁. 𑀅𑀯𑀻𑀢𑀺𑀓𑁆𑀓𑀫𑁄 𑀓𑀸𑀬𑀲𑀼𑀘𑀭𑀺𑀢𑀦𑁆𑀢𑀺 𑀯𑀸𑀭𑀺𑀢𑁆𑀢𑀲𑀻𑀮𑀲𑁆𑀲 𑀯𑀲𑁂𑀦 𑀯𑀤𑀢𑀺, 𑀘𑀸𑀭𑀺𑀢𑁆𑀢𑀲𑀻𑀮𑀲𑁆𑀲𑀧𑀺 𑀯𑀸, 𑀬𑀲𑁆𑀲 𑀅𑀓𑀭𑀡𑁂 𑀆𑀧𑀢𑁆𑀢𑀺 𑀳𑁄𑀢𑀺. 𑀯𑀘𑀻𑀤𑀼𑀘𑁆𑀘𑀭𑀺𑀢𑀲𑀼𑀘𑀭𑀺𑀢𑀦𑀺𑀤𑁆𑀥𑀸𑀭𑀡𑀫𑁆𑀧𑀺 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀉𑀪𑀬𑀢𑁆𑀣 𑀧𑀜𑁆𑀜𑀢𑁆𑀢𑀲𑁆𑀲𑀸𑀢𑀺 𑀓𑀸𑀬𑀤𑁆𑀯𑀸𑀭𑁂, 𑀯𑀘𑀻𑀤𑁆𑀯𑀸𑀭𑁂 𑀘 𑀧𑀜𑁆𑀜𑀢𑁆𑀢𑀲𑁆𑀲. 𑀲𑀺𑀓𑁆𑀔𑀸𑀧𑀤𑀲𑁆𑀲 𑀯𑀻𑀢𑀺𑀓𑁆𑀓𑀫𑁄𑀯 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀪𑀸𑀯𑀢𑁄, 𑀢𑀬𑀺𑀤𑀁 𑀤𑁆𑀯𑀸𑀭𑀤𑁆𑀯𑀬𑁂 𑀅𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀸𑀬 𑀆𑀧𑀢𑁆𑀢𑀺𑀬𑀸 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀯𑀻𑀢𑀺𑀓𑁆𑀓𑀫𑁄𑀢𑀺 𑀬𑀣𑀸𑀯𑀼𑀢𑁆𑀢𑀸𑀬 𑀆𑀧𑀢𑁆𑀢𑀺𑀬𑀸 𑀅𑀯𑀻𑀢𑀺𑀓𑁆𑀓𑀫𑁄 𑀫𑀦𑁄𑀲𑀼𑀘𑀭𑀺𑀢𑀁. ‘‘𑀲𑀩𑁆𑀩𑀲𑁆𑀲𑀸𑀧𑀺 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀯𑀻𑀢𑀺𑀓𑁆𑀓𑀫𑁄 𑀫𑀦𑁄𑀲𑀼𑀘𑀭𑀺𑀢’’𑀦𑁆𑀢𑀺 𑀓𑁂𑀘𑀺. 𑀢𑀤𑀼𑀪𑀬𑀜𑁆𑀳𑀺 𑀘𑀸𑀭𑀺𑀢𑁆𑀢𑀲𑀻𑀮𑀁 𑀉𑀤𑁆𑀤𑀺𑀲𑁆𑀲𑀧𑀜𑁆𑀜𑀢𑁆𑀢𑀁 𑀲𑀺𑀓𑁆𑀔𑀸𑀧𑀤𑀁, 𑀢𑀲𑁆𑀲 𑀅𑀯𑀻𑀢𑀺𑀓𑁆𑀓𑀫𑁄 𑀲𑀺𑀬𑀸 𑀓𑀸𑀬𑀲𑀼𑀘𑀭𑀺𑀢𑀁, 𑀲𑀺𑀬𑀸 𑀯𑀘𑀻𑀲𑀼𑀘𑀭𑀺𑀢𑀦𑁆𑀢𑀺.

𑀧𑀸𑀡𑁄 𑀅𑀢𑀺𑀧𑀸𑀢𑀻𑀬𑀢𑀺 𑀏𑀢𑀸𑀬𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑁄, 𑀢𑀣𑀸𑀧𑀯𑀢𑁆𑀢𑀸 𑀘𑁂𑀢𑀦𑀸, 𑀏𑀯𑀁 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀬𑁄𑀧𑀻𑀢𑀺 𑀆𑀳 ‘‘𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 𑀧𑀦 𑀢𑀺𑀲𑁆𑀲𑁄 𑀘𑁂𑀢𑀦𑀸’’𑀢𑀺. 𑀯𑀘𑀻𑀤𑁆𑀯𑀸𑀭𑁂𑀧𑀺 𑀉𑀧𑁆𑀧𑀦𑁆𑀦𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀤𑁆𑀯𑀸𑀭𑀦𑁆𑀢𑀭𑁂 𑀉𑀧𑁆𑀧𑀦𑁆𑀦𑀲𑁆𑀲𑀸𑀧𑀺 𑀓𑀫𑁆𑀫𑀲𑁆𑀲 𑀲𑀦𑀸𑀫𑀸𑀧𑀭𑀺𑀘𑁆𑀘𑀸𑀕𑀢𑁄 𑀬𑁂𑀪𑀼𑀬𑁆𑀬𑀯𑀼𑀢𑁆𑀢𑀺𑀬𑀸, 𑀢𑀩𑁆𑀩𑀳𑀼𑀮𑀯𑀼𑀢𑁆𑀢𑀺𑀬𑀸 𑀘. 𑀢𑁂𑀦𑀸𑀳𑀼 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑁋

‘‘𑀤𑁆𑀯𑀸𑀭𑁂 𑀘𑀭𑀦𑁆𑀢𑀺 𑀓𑀫𑁆𑀫𑀸𑀦𑀺, 𑀦 𑀤𑁆𑀯𑀸𑀭𑀸 𑀤𑁆𑀯𑀸𑀭𑀘𑀸𑀭𑀺𑀦𑁄;

𑀢𑀲𑁆𑀫𑀸 𑀤𑁆𑀯𑀸𑀭𑁂𑀳𑀺 𑀓𑀫𑁆𑀫𑀸𑀦𑀺, 𑀅𑀜𑁆𑀜𑀫𑀜𑁆𑀜𑀁 𑀯𑀯𑀢𑁆𑀣𑀺𑀢𑀸’’𑀢𑀺. (𑀥. 𑀲. 𑀅𑀝𑁆𑀞. 𑀓𑀸𑀫𑀸𑀯𑀘𑀭𑀓𑀼𑀲𑀮𑀤𑁆𑀯𑀸𑀭𑀓𑀣𑀸);

𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀓𑀸𑀬𑀤𑁆𑀯𑀸𑀭𑁂𑀧𑀺 𑀯𑀘𑀻𑀤𑁆𑀯𑀸𑀭𑁂𑀧𑀺 𑀉𑀧𑁆𑀧𑀦𑁆𑀦𑀸𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀢𑀺 𑀫𑀦𑁄𑀓𑀫𑁆𑀫𑀪𑀽𑀢𑀸𑀬 𑀘𑁂𑀢𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸. 𑀓𑀸𑀬𑀯𑀘𑀻𑀓𑀫𑁆𑀫𑀪𑀽𑀢𑀸𑀬 𑀧𑀦 𑀘𑁂𑀢𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀅𑀪𑀺𑀚𑁆𑀛𑀸𑀤𑀬𑁄 𑀢𑀁 𑀢𑀁 𑀧𑀓𑁆𑀔𑀺𑀓𑀸 𑀯𑀸 𑀳𑁄𑀦𑁆𑀢𑀺 𑀅𑀩𑁆𑀩𑁄𑀳𑀸𑀭𑀺𑀓𑀸 𑀯𑀸𑀢𑀺. 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀫𑀦𑁄𑀲𑀼𑀘𑀭𑀺𑀢𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀺𑀯𑀺𑀥𑀲𑁆𑀲 𑀤𑀼𑀘𑁆𑀘𑀭𑀺𑀢𑀲𑁆𑀲 𑀅𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀸 𑀢𑀺𑀲𑁆𑀲𑁄 𑀘𑁂𑀢𑀦𑀸𑀧𑀺 𑀯𑀺𑀭𑀢𑀺𑀬𑁄𑀧𑀺 𑀓𑀸𑀬𑀲𑀼𑀘𑀭𑀺𑀢𑀁 𑀓𑀸𑀬𑀺𑀓𑀲𑁆𑀲 𑀯𑀻𑀢𑀺𑀓𑁆𑀓𑀫𑀲𑁆𑀲 𑀅𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀦𑀢𑁄, 𑀓𑀸𑀬𑁂𑀦 𑀧𑀦 𑀲𑀺𑀓𑁆𑀔𑀸𑀧𑀤𑀸𑀦𑀁 𑀲𑀫𑀸𑀤𑀺𑀬𑀦𑁂 𑀲𑀻𑀮𑀲𑁆𑀲 𑀓𑀸𑀬𑀲𑀼𑀘𑀭𑀺𑀢𑀪𑀸𑀯𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀏𑀲𑁂𑀯 𑀦𑀬𑁄 𑀯𑀘𑀻𑀲𑀼𑀘𑀭𑀺𑀢𑁂.

𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑁄𑀢𑀺 𑀏𑀢𑁆𑀣 𑀤𑁆𑀯𑁂 𑀓𑀸𑀫𑀸 𑀯𑀢𑁆𑀣𑀼𑀓𑀸𑀫𑁄 𑀘 𑀓𑀺𑀮𑁂𑀲𑀓𑀸𑀫𑁄 𑀘. 𑀢𑀢𑁆𑀣 𑀯𑀢𑁆𑀣𑀼𑀓𑀸𑀫𑀧𑀓𑁆𑀔𑁂 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀓𑀸𑀫𑁂𑀳𑀺 𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀓𑀸𑀫𑀯𑀺𑀢𑀓𑁆𑀓𑁄. 𑀓𑀺𑀮𑁂𑀲𑀓𑀸𑀫𑀧𑀓𑁆𑀔𑁂 𑀧𑀦 𑀲𑀫𑁆𑀧𑀬𑁄𑀕𑀯𑀲𑁂𑀦 𑀓𑀸𑀫𑁂𑀦 𑀧𑀝𑀺𑀲𑀁𑀬𑀼𑀢𑁆𑀢𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. ‘‘𑀩𑁆𑀬𑀸𑀧𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑁄’’𑀢𑀺𑀆𑀤𑀻𑀲𑀼 𑀲𑀫𑁆𑀧𑀬𑁄𑀕𑀯𑀲𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀩𑁆𑀬𑀸𑀧𑀸𑀤𑀯𑀢𑁆𑀣𑀼𑀧𑀝𑀺𑀲𑀁𑀬𑀼𑀢𑁆𑀢𑁄𑀧𑀺 𑀩𑁆𑀬𑀸𑀧𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑁄𑀢𑀺 𑀕𑀬𑁆𑀳𑀫𑀸𑀦𑁂 𑀉𑀪𑀬𑀣𑀸𑀧𑀺 𑀬𑁄𑀚𑀦𑀸 𑀮𑀩𑁆𑀪𑀢𑁂𑀯. 𑀯𑀺𑀳𑀺𑀁𑀲𑀸𑀧𑀝𑀺𑀲𑀁𑀬𑀼𑀢𑁆𑀢𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀯𑀺𑀳𑀺𑀁𑀲𑀦𑁆𑀢𑀺 𑀏𑀢𑀸𑀬 𑀲𑀢𑁆𑀢𑁂, 𑀯𑀺𑀳𑀺𑀁𑀲𑀦𑀁 𑀯𑀸 𑀏𑀲𑀸 𑀲𑀢𑁆𑀢𑀸𑀦𑀦𑁆𑀢𑀺 𑀯𑀺𑀳𑀺𑀁𑀲𑀸, 𑀢𑀸𑀬 𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀳𑀺𑀁𑀲𑀸𑀧𑀝𑀺𑀲𑀁𑀬𑀼𑀢𑁆𑀢𑁄𑀢𑀺 𑀏𑀯𑀁 𑀲𑀤𑁆𑀤𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀧𑁆𑀧𑀺𑀬𑁂 𑀅𑀫𑀦𑀸𑀧𑁂 𑀲𑀗𑁆𑀔𑀸𑀭𑁂 𑀆𑀭𑀩𑁆𑀪 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀧𑁆𑀧𑀯𑀢𑁆𑀢𑀺 𑀅𑀝𑁆𑀞𑀸𑀦𑀸𑀖𑀸𑀢𑀯𑀲𑁂𑀦 𑀤𑀻𑀧𑁂𑀢𑀩𑁆𑀩𑀸. 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀲𑁆𑀲 𑀅𑀯𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀸𑀯 𑀯𑀺𑀦𑀸𑀲𑀦𑀸’’𑀢𑀺 𑀯𑀼𑀢𑁆𑀢𑀁. 𑀯𑀺𑀦𑀸𑀲𑀦𑀁 𑀧𑀦 𑀧𑀸𑀡𑀸𑀢𑀺𑀧𑀸𑀢𑁄 𑀏𑀯𑀸𑀢𑀺. ‘‘𑀲𑀗𑁆𑀔𑀸𑀭𑁄’’ 𑀳𑀺 𑀤𑀼𑀓𑁆𑀔𑀸𑀧𑁂𑀢𑀩𑁆𑀩𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀬𑁂 ‘‘𑀤𑀼𑀓𑁆𑀔𑀸𑀧𑁂𑀢𑀩𑁆𑀩𑀸’’𑀢𑀺 𑀇𑀘𑁆𑀙𑀺𑀢𑀸 𑀲𑀢𑁆𑀢𑀲𑀜𑁆𑀜𑀺𑀢𑀸, 𑀢𑁂𑀧𑀺 𑀅𑀢𑁆𑀣𑀢𑁄 𑀲𑀗𑁆𑀔𑀸𑀭𑀸 𑀏𑀯𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀬𑁂 𑀧𑀦 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀸 𑀲𑀯𑀺𑀜𑁆𑀜𑀸𑀡𑀓𑀢𑀸𑀬 𑀤𑀼𑀓𑁆𑀔𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀲𑁆𑀲 𑀯𑀺𑀲𑀬𑀸 𑀇𑀘𑁆𑀙𑀺𑀢𑀸 𑀲𑀢𑁆𑀢𑀲𑀜𑁆𑀜𑀺𑀢𑀸. 𑀬𑁂 𑀧𑀦 𑀦 𑀤𑀼𑀓𑁆𑀔𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀺 𑀯𑀼𑀢𑁆𑀢𑀮𑀓𑁆𑀔𑀡𑀸𑀬𑁄𑀕𑀢𑁄, 𑀢𑁂 𑀲𑀦𑁆𑀥𑀸𑀬 ‘‘𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀲𑀗𑁆𑀔𑀸𑀭𑁂𑀲𑀼 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀢𑁆𑀣 𑀧𑀦 𑀉𑀧𑁆𑀧𑀚𑁆𑀚𑀢𑀺, 𑀬𑀣𑀸 𑀘 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀫𑁂 𑀲𑀢𑁆𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀦𑁂𑀓𑁆𑀔𑀫𑁆𑀫𑀁 𑀯𑀼𑀘𑁆𑀘𑀢𑀺 𑀮𑁄𑀪𑀢𑁄 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀅𑀮𑁄𑀪𑁄, 𑀦𑀻𑀯𑀭𑀡𑁂𑀳𑀺 𑀦𑀺𑀓𑁆𑀔𑀦𑁆𑀢𑀢𑁆𑀢𑀸𑀧𑀺 𑀧𑀞𑀫𑀚𑁆𑀛𑀸𑀦𑀁, 𑀲𑀩𑁆𑀩𑀸𑀓𑀼𑀲𑀮𑁂𑀳𑀺 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀲𑀩𑁆𑀩𑁄 𑀓𑀼𑀲𑀮𑁄 𑀥𑀫𑁆𑀫𑁄, 𑀲𑀩𑁆𑀩𑀲𑀗𑁆𑀔𑀢𑁂𑀳𑀺 𑀧𑀦 𑀦𑀺𑀓𑁆𑀔𑀦𑁆𑀢𑀢𑁆𑀢𑀸, 𑀦𑀺𑀩𑁆𑀩𑀸𑀦𑀁. 𑀉𑀧𑀦𑀺𑀲𑁆𑀲𑀬𑀢𑁄, 𑀲𑀫𑁆𑀧𑀬𑁄𑀕𑀢𑁄, 𑀆𑀭𑀫𑁆𑀫𑀡𑀓𑀭𑀡𑀢𑁄 𑀘 𑀦𑁂𑀓𑁆𑀔𑀫𑁆𑀫𑁂𑀦 𑀧𑀝𑀺𑀲𑀁𑀬𑀼𑀢𑁆𑀢𑁄𑀢𑀺 𑀦𑁂𑀓𑁆𑀔𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑁄. 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑁄 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄. 𑀇𑀤𑀸𑀦𑀺 𑀢𑀁 𑀪𑀽𑀫𑀺𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀲𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀲𑀼𑀪𑀧𑀼𑀩𑁆𑀩𑀪𑀸𑀕𑁂𑀢𑀺 𑀅𑀲𑀼𑀪𑀚𑁆𑀛𑀸𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑁂. 𑀅𑀲𑀼𑀪𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀓𑀸𑀫𑀯𑀺𑀢𑀓𑁆𑀓𑀲𑁆𑀲 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀤𑀲𑁆𑀲𑀦𑀢𑁆𑀣𑀁 𑀓𑀢𑀁. 𑀓𑀸𑀫𑀯𑀺𑀢𑀓𑁆𑀓𑀧𑀝𑀺𑀧𑀓𑁆𑀔𑁄 𑀳𑀺 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑁄𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀉𑀧𑀭𑀺𑀯𑀺𑀢𑀓𑁆𑀓𑀤𑁆𑀯𑀬𑀲𑁆𑀲 𑀪𑀽𑀫𑀺𑀁 𑀤𑀲𑁆𑀲𑁂𑀦𑁆𑀢𑁂𑀦 𑀲𑀧𑀼𑀩𑁆𑀩𑀪𑀸𑀕𑀸𑀦𑀺 𑀫𑁂𑀢𑁆𑀢𑀸𑀓𑀭𑀼𑀡𑀸𑀛𑀸𑀦𑀸𑀤𑀻𑀦𑀺 𑀉𑀤𑁆𑀥𑀝𑀸𑀦𑀺. 𑀅𑀲𑀼𑀪𑀚𑁆𑀛𑀸𑀦𑁂𑀢𑀺 𑀅𑀲𑀼𑀪𑀸𑀭𑀫𑁆𑀫𑀡𑁂 𑀧𑀞𑀫𑀚𑁆𑀛𑀸𑀦𑁂. 𑀅𑀯𑀬𑀯𑁂 𑀳𑀺 𑀲𑀫𑀼𑀤𑀸𑀬𑀯𑁄𑀳𑀸𑀭𑀁 𑀓𑀢𑁆𑀯𑀸 𑀦𑀺𑀤𑁆𑀤𑀺𑀲𑀢𑀺 𑀬𑀣𑀸 ‘‘𑀭𑀼𑀓𑁆𑀔𑁂 𑀲𑀸𑀔𑀸’’𑀢𑀺. 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁. 𑀢𑀁 𑀛𑀸𑀦𑀁 𑀲𑀫𑁆𑀫𑀲𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀫𑀕𑁆𑀕𑀨𑀮𑀓𑀸𑀮𑁂𑀧𑀺 𑀳𑀺 𑀲𑁄 𑀮𑁄𑀓𑀼𑀢𑁆𑀢𑀭𑁄𑀢𑀺. 𑀩𑁆𑀬𑀸𑀧𑀸𑀤𑀲𑁆𑀲 𑀧𑀝𑀺𑀧𑀓𑁆𑀔𑁄, 𑀓𑀺𑀜𑁆𑀘𑀺𑀧𑀺 𑀦 𑀩𑁆𑀬𑀸𑀧𑀸𑀤𑁂𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀅𑀩𑁆𑀬𑀸𑀧𑀸𑀤𑁄, 𑀫𑁂𑀢𑁆𑀢𑀸, 𑀢𑀸𑀬 𑀧𑀝𑀺𑀲𑀁𑀬𑀼𑀢𑁆𑀢𑁄 𑀅𑀩𑁆𑀬𑀸𑀧𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑁄. 𑀫𑁂𑀢𑁆𑀢𑀸𑀛𑀸𑀦𑁂𑀢𑀺 𑀫𑁂𑀢𑁆𑀢𑀸𑀪𑀸𑀯𑀦𑀸𑀯𑀲𑁂𑀦 𑀅𑀥𑀺𑀕𑀢𑁂 𑀧𑀞𑀫𑀚𑁆𑀛𑀸𑀦𑁂. 𑀓𑀭𑀼𑀡𑀸𑀛𑀸𑀦𑁂𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀯𑀺𑀳𑀺𑀁𑀲𑀸𑀬 𑀧𑀝𑀺𑀧𑀓𑁆𑀔𑁄, 𑀦 𑀯𑀺𑀳𑀺𑀁𑀲𑀦𑁆𑀢𑀺 𑀯𑀸 𑀏𑀢𑀸𑀬 𑀲𑀢𑁆𑀢𑁂𑀢𑀺 𑀅𑀯𑀺𑀳𑀺𑀁𑀲𑀸, 𑀓𑀭𑀼𑀡𑀸.

𑀦𑀦𑀼 𑀘 𑀅𑀮𑁄𑀪𑀸𑀤𑁄𑀲𑀸𑀦𑀁 𑀅𑀜𑁆𑀜𑀫𑀜𑁆𑀜𑀸𑀯𑀺𑀭𑀳𑀢𑁄 𑀢𑁂𑀲𑀁 𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀸𑀦𑀁 𑀇𑀫𑁂𑀲𑀁 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀸𑀤𑀻𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀲𑀗𑁆𑀓𑀭𑀡𑀢𑁄 𑀯𑀯𑀢𑁆𑀣𑀸𑀦𑀁 𑀦 𑀳𑁄𑀢𑀻𑀢𑀺? 𑀦𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀤𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀅𑀮𑁄𑀪𑁄 𑀲𑀻𑀲𑀁 𑀳𑁄𑀢𑀻𑀢𑀺 𑀅𑀮𑁄𑀪𑁄 𑀧𑀥𑀸𑀦𑁄 𑀳𑁄𑀢𑀺. 𑀦𑀺𑀬𑀫𑀺𑀢𑀧𑀭𑀺𑀡𑀢𑀲𑀫𑀼𑀤𑀸𑀘𑀸𑀭𑀸𑀤𑀺𑀯𑀲𑁂𑀦 𑀬𑀤𑀸 𑀅𑀮𑁄𑀪𑀧𑁆𑀧𑀥𑀸𑀦𑁄 𑀦𑁂𑀓𑁆𑀔𑀫𑁆𑀫𑀕𑀭𑀼𑀓𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀳𑁄𑀢𑀺, 𑀢𑀤𑀸 𑀮𑀤𑁆𑀥𑀸𑀯𑀲𑀭𑁄 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑁄 𑀧𑀢𑀺𑀝𑁆𑀞𑀳𑀢𑀺. 𑀢𑀁𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀧𑀦 𑀅𑀤𑁄𑀲𑀮𑀓𑁆𑀔𑀡𑀲𑁆𑀲 𑀅𑀩𑁆𑀬𑀸𑀧𑀸𑀤𑀲𑁆𑀲 𑀯𑀲𑁂𑀦 𑀬𑁄 𑀢𑀲𑁆𑀲𑁂𑀯 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀪𑀸𑀯𑁄 𑀲𑀫𑁆𑀪𑀯𑁂𑀬𑁆𑀬, 𑀲𑀢𑀺 𑀘 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀪𑀸𑀯𑁂 𑀓𑀲𑁆𑀲𑀘𑀺𑀧𑀺 𑀅𑀯𑀺𑀳𑁂𑀞𑀦𑀚𑀸𑀢𑀺𑀓𑀢𑀸𑀬 𑀅𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀪𑀸𑀯𑁄 𑀘 𑀲𑀫𑁆𑀪𑀯𑁂𑀬𑁆𑀬, 𑀢𑁂 𑀇𑀢𑀭𑁂 𑀤𑁆𑀯𑁂. 𑀢𑀤𑀦𑁆𑀯𑀬𑀺𑀓𑀸𑀢𑀺 𑀢𑀲𑁆𑀲𑁂𑀯 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀲𑁆𑀲 𑀅𑀦𑀼𑀕𑀸𑀫𑀺𑀦𑁄, 𑀲𑀭𑀽𑀧𑀢𑁄 𑀅𑀤𑀺𑀲𑁆𑀲𑀦𑀢𑁄 ‘‘𑀢𑀲𑁆𑀫𑀺𑀁 𑀲𑀢𑀺 𑀳𑁄𑀦𑁆𑀢𑀺, 𑀅𑀲𑀢𑀺 𑀦 𑀳𑁄𑀦𑁆𑀢𑀻’’𑀢𑀺 𑀢𑀤𑀦𑀼𑀫𑀸𑀦𑀦𑁂𑀬𑁆𑀬𑀸 𑀪𑀯𑀦𑁆𑀢𑀺. 𑀲𑁂𑀲𑀤𑁆𑀯𑀬𑁂𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑁄 𑀲𑀗𑁆𑀓𑀧𑁆𑀧𑁄 𑀓𑀸𑀫𑀲𑀗𑁆𑀓𑀧𑁆𑀧𑁄’’𑀢𑀺𑀆𑀤𑀺𑀦𑀸 𑀯𑀺𑀢𑀓𑁆𑀓𑀢𑁆𑀢𑀺𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 (𑀤𑀻. 𑀦𑀺. 𑁩.𑁨𑁮𑁮) 𑀯𑁂𑀤𑀺𑀢𑀩𑁆𑀩𑁄 𑀅𑀢𑁆𑀣𑀢𑁄 𑀅𑀪𑀺𑀦𑁆𑀦𑀢𑁆𑀢𑀸. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀧𑀼𑀦 𑀤𑁂𑀲𑀦𑀸 𑀓𑀢𑀸𑀢𑀺? 𑀢𑀣𑀸 𑀤𑁂𑀲𑀦𑀸𑀬 𑀩𑀼𑀚𑁆𑀛𑀦𑀓𑀸𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 𑀤𑁂𑀲𑀦𑀸𑀫𑀢𑁆𑀢𑀫𑁂𑀯𑁂𑀢𑀁.

𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀦𑀁 𑀯𑀺𑀬 𑀉𑀧𑁆𑀧𑀚𑁆𑀚𑀦𑀸𑀓𑀸𑀭𑁄 𑀯𑁂𑀤𑀺𑀢𑀩𑁆𑀩𑁄 ‘‘𑀢𑀸𑀲𑀼 𑀤𑁆𑀯𑁂 𑀲𑀢𑁆𑀢𑁂𑀲𑀼𑀧𑀺 𑀲𑀗𑁆𑀔𑀸𑀭𑁂𑀲𑀼𑀧𑀺 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀬𑁂𑀯 𑀳𑀺 𑀏𑀢𑀸’’𑀢𑀺. 𑀢𑀣𑁂𑀯𑀸𑀢𑀺 𑀬𑀣𑀸 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀸𑀤𑀻𑀦𑀁 ‘‘𑀅𑀲𑀼𑀪𑀧𑀼𑀩𑁆𑀩𑀪𑀸𑀕𑁂 𑀓𑀸𑀫𑀸𑀯𑀘𑀭𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀓𑀸𑀫𑀸𑀯𑀘𑀭𑀸𑀤𑀺𑀪𑀸𑀯𑁄 𑀯𑀼𑀢𑁆𑀢𑁄, 𑀢𑀣𑁂𑀯 𑀢𑀸𑀲𑀫𑁆𑀧𑀺 𑀦𑁂𑀓𑁆𑀔𑀫𑁆𑀫𑀲𑀜𑁆𑀜𑀸𑀤𑀻𑀦𑀫𑁆𑀧𑀺 𑀓𑀸𑀫𑀸𑀯𑀘𑀭𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑁄𑀢𑀺 𑀲𑀫𑁆𑀧𑀬𑁄𑀕𑀯𑀲𑁂𑀦 𑀓𑀸𑀫𑁂𑀦 𑀧𑀝𑀺𑀲𑀁𑀬𑀼𑀢𑁆𑀢𑁄. 𑀢𑀓𑁆𑀓𑀦𑀯𑀲𑁂𑀦 𑀢𑀓𑁆𑀓𑁄. 𑀯𑀺𑀲𑁂𑀲𑀢𑁄 𑀢𑀓𑁆𑀓𑀦𑀯𑀲𑁂𑀦 𑀯𑀺𑀢𑀓𑁆𑀓𑁄. 𑀲𑀗𑁆𑀓𑀧𑁆𑀧𑀦𑀧𑀭𑀺𑀓𑀧𑁆𑀧𑀦𑀯𑀲𑁂𑀦 𑀲𑀗𑁆𑀓𑀧𑁆𑀧𑁄. 𑀅𑀜𑁆𑀜𑁂𑀲𑀼𑀧𑀺 𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀯𑀺𑀢𑀓𑁆𑀓𑁂 𑀏𑀯 𑀓𑀸𑀫𑁄𑀧𑀧𑀤𑁄 𑀥𑀸𑀢𑀼-𑀲𑀤𑁆𑀤𑁄 𑀦𑀺𑀭𑀼𑀴𑁆𑀳𑁄 𑀯𑁂𑀤𑀺𑀢𑀩𑁆𑀩𑁄 𑀯𑀺𑀢𑀓𑁆𑀓𑀲𑁆𑀲 𑀓𑀸𑀫𑀲𑀗𑁆𑀓𑀧𑁆𑀧𑀧𑁆𑀧𑀯𑀢𑁆𑀢𑀺𑀬𑀸 𑀲𑀸𑀢𑀺𑀲𑀬𑀢𑁆𑀢𑀸. 𑀏𑀲 𑀦𑀬𑁄 𑀩𑁆𑀬𑀸𑀧𑀸𑀤𑀥𑀸𑀢𑀼𑀆𑀤𑀻𑀲𑀼. 𑀲𑀩𑁆𑀩𑁂𑀧𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀓𑀸𑀫𑀥𑀸𑀢𑀽 𑀳𑀻𑀦𑀚𑁆𑀛𑀸𑀲𑀬𑁂𑀳𑀺 𑀓𑀸𑀫𑀺𑀢𑀩𑁆𑀩𑀥𑀸𑀢𑀼𑀪𑀸𑀯𑀢𑁄 𑀓𑀺𑀮𑁂𑀲𑀓𑀸𑀫𑀲𑁆𑀲 𑀆𑀭𑀫𑁆𑀫𑀡𑀲𑀪𑀸𑀯𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀯𑀺𑀳𑁂𑀞𑁂𑀢𑀻𑀢𑀺 𑀯𑀺𑀩𑀸𑀥𑀢𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀬𑀣𑀸𑀯𑀼𑀢𑁆𑀢𑁂 𑀓𑀸𑀫𑀥𑀸𑀢𑀼𑀢𑁆𑀢𑀺𑀓𑁂. 𑀲𑀩𑁆𑀩𑀸𑀓𑀼𑀲𑀮𑀲𑀗𑁆𑀕𑀸𑀳𑀺𑀓𑀸𑀬 𑀓𑀸𑀫𑀥𑀸𑀢𑀼𑀬𑀸 𑀇𑀢𑀭𑀸 𑀤𑁆𑀯𑁂 𑀲𑀗𑁆𑀕𑀳𑁂𑀢𑁆𑀯𑀸 𑀓𑀣𑀦𑀁 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀸 𑀓𑀣𑀸. 𑀢𑀺𑀲𑁆𑀲𑁄 𑀥𑀸𑀢𑀼𑀬𑁄 𑀅𑀜𑁆𑀜𑀫𑀜𑁆𑀜𑀁 𑀅𑀲𑀗𑁆𑀓𑀭𑀢𑁄 𑀓𑀣𑀸 𑀅𑀲𑀫𑁆𑀪𑀺𑀦𑁆𑀦𑀸. 𑀇𑀢𑀭𑀸 𑀤𑁆𑀯𑁂 𑀕𑀳𑀺𑀢𑀸𑀯 𑀳𑁄𑀦𑁆𑀢𑀻𑀢𑀺 𑀇𑀢𑀭𑀸 𑀤𑁆𑀯𑁂 𑀥𑀸𑀢𑀼𑀬𑁄 𑀕𑀳𑀺𑀢𑀸 𑀏𑀯 𑀳𑁄𑀦𑁆𑀢𑀺 𑀲𑀩𑁆𑀩𑁂𑀧𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀓𑀸𑀫𑀥𑀸𑀢𑀽’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀸𑀫𑀜𑁆𑀜𑀚𑁄𑀢𑀦𑀸𑀬 𑀲𑀯𑀺𑀲𑀬𑀲𑁆𑀲 𑀅𑀢𑀺𑀩𑁆𑀬𑀸𑀧𑀦𑁂𑀦. 𑀢𑀢𑁄𑀢𑀺 𑀇𑀢𑀭𑀥𑀸𑀢𑀼𑀤𑁆𑀯𑀬𑀲𑀗𑁆𑀕𑀸𑀳𑀺𑀓𑀸𑀬 𑀓𑀸𑀫𑀥𑀸𑀢𑀼𑀬𑀸. 𑀦𑀻𑀳𑀭𑀺𑀢𑁆𑀯𑀸𑀢𑀺 𑀦𑀺𑀤𑁆𑀥𑀸𑀭𑁂𑀢𑁆𑀯𑀸. 𑀤𑀲𑁆𑀲𑁂𑀢𑀻𑀢𑀺 𑀏𑀯𑀁 𑀪𑀕𑀯𑀸 𑀤𑀲𑁆𑀲𑁂𑀢𑀻𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀩𑁆𑀬𑀸𑀧𑀸𑀤𑀥𑀸𑀢𑀼𑀁…𑀧𑁂… 𑀓𑀣𑁂𑀲𑀺. 𑀓𑀲𑁆𑀫𑀸? 𑀧𑀕𑁂𑀯 𑀅𑀧𑀯𑀸𑀤𑀸 𑀅𑀪𑀺𑀦𑀺𑀯𑀺𑀲𑀦𑁆𑀢𑀺, 𑀢𑀢𑁄 𑀧𑀭𑀁 𑀉𑀲𑁆𑀲𑀕𑁆𑀕𑁄 𑀧𑀯𑀢𑁆𑀢𑀢𑀺, 𑀞𑀧𑁂𑀢𑁆𑀯𑀸 𑀯𑀸 𑀅𑀧𑀯𑀸𑀤𑀯𑀺𑀲𑀬𑀁 𑀢𑀁 𑀧𑀭𑀺𑀳𑀭𑀦𑁆𑀢𑁄𑀯 𑀉𑀲𑁆𑀲𑀕𑁆𑀕𑁄 𑀧𑀯𑀢𑁆𑀢𑀢𑀻𑀢𑀺, 𑀜𑀸𑀬𑁄 𑀳𑁂𑀲 𑀮𑁄𑀓𑁂 𑀦𑀺𑀭𑀼𑀴𑁆𑀳𑁄𑀢𑀺.

𑀤𑁆𑀯𑁂 𑀓𑀣𑀸𑀢𑀺 ‘‘𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀸, 𑀅𑀲𑀫𑁆𑀪𑀺𑀦𑁆𑀦𑀸 𑀘𑀸’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁩.𑁩𑁦𑁫) 𑀅𑀦𑀦𑁆𑀢𑀭𑀢𑁆𑀢𑀺𑀓𑁂 𑀯𑀼𑀢𑁆𑀢𑀸 𑀤𑁆𑀯𑁂 𑀓𑀣𑀸. 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀆𑀦𑁂𑀢𑁆𑀯𑀸 𑀓𑀣𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀅𑀢𑁆𑀣𑁄 𑀇𑀥𑀸𑀧𑀺 𑀆𑀳𑀭𑀺𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑁄 ‘‘𑀦𑁂𑀓𑁆𑀔𑀫𑁆𑀫𑀥𑀸𑀢𑀼𑀬𑀸 𑀕𑀳𑀺𑀢𑀸𑀬 𑀇𑀢𑀭𑀸 𑀤𑁆𑀯𑁂 𑀕𑀳𑀺𑀢𑀸𑀯 𑀳𑁄𑀦𑁆𑀢𑀻’’𑀢𑀺𑀆𑀤𑀺𑀦𑀸.

𑀲𑀼𑀜𑁆𑀜𑀢𑀝𑁆𑀞𑁂𑀦𑀸𑀢𑀺 𑀅𑀢𑁆𑀢𑀲𑀼𑀜𑁆𑀜𑀢𑀸𑀬. 𑀓𑀸𑀫𑀪𑀯𑁄 𑀓𑀸𑀫𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀲𑀼𑀜𑁆𑀜𑀢𑀝𑁆𑀞𑁂𑀦 𑀥𑀸𑀢𑀼 𑀘𑀸𑀢𑀺 𑀓𑀸𑀫𑀥𑀸𑀢𑀼. 𑀩𑁆𑀭𑀳𑁆𑀫𑀮𑁄𑀓𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀲𑀜𑁆𑀜𑀺𑀢𑀁 𑀩𑁆𑀭𑀳𑁆𑀫𑀮𑁄𑀓𑀁. 𑀥𑀸𑀢𑀼𑀬𑀸 𑀆𑀕𑀢𑀝𑁆𑀞𑀸𑀦𑀫𑁆𑀳𑀻𑀢𑀺 ‘‘𑀓𑀸𑀫𑀥𑀸𑀢𑀼 𑀭𑀽𑀧𑀥𑀸𑀢𑀽’’𑀢𑀺𑀆𑀤𑀺𑀦𑀸 𑀥𑀸𑀢𑀼𑀕𑁆𑀕𑀳𑀡𑁂 𑀓𑀢𑁂. 𑀪𑀯𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀸𑀢𑀺 ‘‘𑀓𑀸𑀫𑀪𑀯𑁄 𑀭𑀽𑀧𑀪𑀯𑁄’’𑀢𑀺𑀆𑀤𑀺𑀦𑀸 𑀪𑀯𑀯𑀲𑁂𑀦 𑀢𑀤𑀢𑁆𑀣𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄, 𑀦 𑀬𑀸𑀬 𑀓𑀸𑀬𑀘𑀺 𑀥𑀸𑀢𑀼𑀬𑀸 𑀯𑀲𑁂𑀦. 𑀬𑀤𑀕𑁆𑀕𑁂𑀦 𑀘 𑀥𑀸𑀢𑀼𑀬𑀸 𑀆𑀕𑀢𑀝𑁆𑀞𑀸𑀦𑁂 𑀪𑀯𑁂𑀦 𑀧𑀭𑀺𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄, 𑀢𑀤𑀕𑁆𑀕𑁂𑀦 𑀪𑀯𑀲𑁆𑀲 𑀆𑀕𑀢𑀝𑁆𑀞𑀸𑀦𑁂 𑀥𑀸𑀢𑀼𑀬𑀸 𑀧𑀭𑀺𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄 𑀪𑀯𑀯𑀲𑁂𑀦 𑀥𑀸𑀢𑀼𑀬𑀸 𑀧𑀭𑀺𑀘𑁆𑀙𑀺𑀚𑁆𑀚𑀦𑀢𑁄. 𑀦𑀺𑀭𑀼𑀚𑁆𑀛𑀢𑀺 𑀓𑀺𑀮𑁂𑀲𑀯𑀝𑁆𑀝𑀫𑁂𑀢𑁆𑀣𑀸𑀢𑀺 𑀦𑀺𑀭𑁄𑀥𑁄, 𑀲𑀸 𑀏𑀯 𑀲𑀼𑀜𑁆𑀜𑀢𑀝𑁆𑀞𑁂𑀦 𑀥𑀸𑀢𑀽𑀢𑀺 𑀦𑀺𑀭𑁄𑀥𑀥𑀸𑀢𑀼, 𑀦𑀺𑀩𑁆𑀩𑀸𑀦𑀁. 𑀦𑀺𑀭𑀼𑀤𑁆𑀥𑁂 𑀘 𑀓𑀺𑀮𑁂𑀲𑀯𑀝𑁆𑀝𑁂 𑀓𑀫𑁆𑀫𑀯𑀺𑀧𑀸𑀓𑀯𑀝𑁆𑀝𑀸 𑀦𑀺𑀭𑀼𑀤𑁆𑀥𑀸 𑀏𑀯 𑀳𑁄𑀦𑁆𑀢𑀺.

𑀳𑀻𑀦𑀥𑀸𑀢𑀼𑀢𑁆𑀢𑀺𑀓𑁄 𑀅𑀪𑀺𑀥𑀫𑁆𑀫𑁂 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁧𑁪) 𑀳𑀻𑀦𑀢𑁆𑀢𑀺𑀓𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 ‘‘𑀳𑀻𑀦𑀸 𑀥𑀸𑀢𑀽𑀢𑀺 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸’’𑀢𑀺. 𑀢𑁂 𑀳𑀺 𑀮𑀸𑀫𑀓𑀝𑁆𑀞𑁂𑀦 𑀳𑀻𑀦𑀥𑀸𑀢𑀼. 𑀳𑀻𑀦𑀧𑀡𑀻𑀢𑀸𑀦𑀁 𑀫𑀚𑁆𑀛𑁂 𑀪𑀯𑀸𑀢𑀺 𑀫𑀚𑁆𑀛𑀺𑀫𑀥𑀸𑀢𑀼, 𑀅𑀯𑀲𑁂𑀲𑀸 𑀢𑁂𑀪𑀽𑀫𑀓𑀥𑀫𑁆𑀫𑀸. 𑀉𑀢𑁆𑀢𑀫𑀝𑁆𑀞𑁂𑀦 𑀅𑀢𑀧𑁆𑀧𑀓𑀝𑁆𑀞𑁂𑀦 𑀘 𑀧𑀡𑀻𑀢𑀥𑀸𑀢𑀼, 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸.

𑀧𑀜𑁆𑀘𑀓𑀸𑀫𑀕𑀼𑀡𑀸 𑀯𑀺𑀲𑀬𑀪𑀽𑀢𑀸 𑀏𑀢𑀲𑁆𑀲 𑀲𑀦𑁆𑀢𑀻𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄, 𑀓𑀸𑀫𑀭𑀸𑀕𑁄. 𑀭𑀽𑀧𑀸𑀭𑀽𑀧𑀪𑀯𑁂𑀲𑀽𑀢𑀺 𑀭𑀽𑀧𑀸𑀭𑀽𑀧𑀽𑀧𑀧𑀢𑁆𑀢𑀺𑀪𑀯𑁂𑀲𑀼 𑀬𑀣𑀸𑀥𑀺𑀕𑀢𑁂𑀲𑀼. 𑀅𑀦𑀥𑀺𑀕𑀢𑁂𑀲𑀼 𑀧𑀦 𑀲𑁄 𑀧𑀢𑁆𑀣𑀦𑀸 𑀦𑀸𑀫 𑀦 𑀳𑁄𑀢𑀻𑀢𑀺 𑀪𑀯𑀯𑀲𑁂𑀦 𑀧𑀢𑁆𑀣𑀦𑀸𑀢𑀺 𑀇𑀫𑀺𑀦𑀸𑀯 𑀕𑀳𑀺𑀢𑁄. 𑀛𑀸𑀦𑀦𑀺𑀓𑀦𑁆𑀢𑀻𑀢𑀺 𑀭𑀽𑀧𑀸𑀭𑀽𑀧𑀚𑁆𑀛𑀸𑀦𑁂𑀲𑀼 𑀦𑀺𑀓𑀦𑁆𑀢𑀺. 𑀪𑀯𑀯𑀲𑁂𑀦 𑀧𑀢𑁆𑀣𑀦𑀸𑀢𑀺 𑀪𑀯𑁂𑀲𑀼 𑀧𑀢𑁆𑀣𑀦𑀸𑀢𑀺. 𑀏𑀯𑀁 𑀘𑀢𑀽𑀳𑀺𑀧𑀺 𑀧𑀤𑁂𑀳𑀺 𑀬𑀣𑀸𑀓𑁆𑀓𑀫𑀁 𑀫𑀳𑀕𑁆𑀕𑀢𑀽𑀧𑀧𑀢𑁆𑀢𑀺𑀪𑀯𑀯𑀺𑀲𑀬𑀸, 𑀫𑀳𑀕𑁆𑀕𑀢𑀓𑀫𑁆𑀫𑀪𑀯𑀯𑀺𑀲𑀬𑀸, 𑀪𑀯𑀤𑀺𑀝𑁆𑀞𑀺𑀲𑀳𑀕𑀢𑀸, 𑀪𑀯𑀧𑀢𑁆𑀣𑀦𑀸𑀪𑀽𑀢𑀸 𑀘 𑀢𑀡𑁆𑀳𑀸 ‘‘𑀪𑀯𑀢𑀡𑁆𑀳𑀸’’𑀢𑀺 𑀯𑀼𑀢𑁆𑀢𑀸. 𑀯𑀺𑀪𑀯𑀤𑀺𑀝𑁆𑀞𑀺 𑀯𑀺𑀪𑀯𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀯𑀺𑀪𑀯𑀲𑀳𑀕𑀢𑀸 𑀢𑀡𑁆𑀳𑀸 𑀯𑀺𑀪𑀯𑀢𑀡𑁆𑀳𑀸. 𑀭𑀽𑀧𑀸𑀤𑀺𑀧𑀜𑁆𑀘𑀯𑀢𑁆𑀣𑀼 𑀓𑀸𑀫𑀯𑀺𑀲𑀬𑀸 𑀩𑀮𑀯𑀭𑀸𑀕𑀪𑀽𑀢𑀸 𑀢𑀡𑁆𑀳𑀸 𑀓𑀸𑀫𑀢𑀡𑁆𑀳𑀸𑀢𑀺 𑀧𑀞𑀫𑀦𑀬𑁄, ‘‘𑀲𑀩𑁆𑀩𑁂𑀧𑀺 𑀢𑁂𑀪𑀽𑀫𑀓𑀥𑀫𑁆𑀫𑀸 𑀓𑀸𑀫𑀦𑀻𑀬𑀝𑁆𑀞𑁂𑀦 𑀓𑀸𑀫𑀸’’𑀢𑀺 (𑀫𑀳𑀸𑀦𑀺. 𑁧) 𑀯𑀘𑀦𑀢𑁄 𑀢𑁂 𑀆𑀭𑀩𑁆𑀪 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀸 𑀲𑀩𑁆𑀩𑀸𑀧𑀺 𑀢𑀡𑁆𑀳𑀸 𑀓𑀸𑀫𑀢𑀡𑁆𑀳𑀸𑀢𑀺 𑀤𑀼𑀢𑀺𑀬𑀦𑀬𑁄𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑀅𑀪𑀺𑀥𑀫𑁆𑀫𑁂 𑀧𑀦𑀸𑀢𑀺 𑀧𑀦-𑀲𑀤𑁆𑀤𑁄 𑀯𑀺𑀲𑁂𑀲𑀢𑁆𑀣𑀚𑁄𑀢𑀦𑁄, 𑀢𑁂𑀦 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀢𑁄 𑀅𑀜𑁆𑀜𑁄𑀧𑀺 𑀓𑀸𑀫𑀸𑀯𑀘𑀭𑀥𑀫𑁆𑀫𑀯𑀺𑀲𑀬𑁄 𑀮𑁄𑀪𑁄 𑀅𑀪𑀺𑀥𑀫𑁆𑀫𑁂 (𑀯𑀺𑀪. 𑁯𑁧𑁫) ‘‘𑀓𑀸𑀫𑀢𑀡𑁆𑀳𑀸’’𑀢𑀺 𑀆𑀕𑀢𑁄𑀢𑀺 𑀇𑀫𑀁 𑀯𑀺𑀲𑁂𑀲𑀁 𑀚𑁄𑀢𑁂𑀢𑀺. 𑀢𑀺𑀓𑀦𑁆𑀢𑀭𑀫𑁆𑀧𑀺 𑀲𑀫𑀸𑀦𑀁 𑀢𑀡𑁆𑀳𑀁𑀬𑁂𑀯 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀺𑀢𑀤𑁂𑀲𑀦𑀸𑀦𑀦𑁆𑀢𑀭𑀢𑀸𑀬 𑀢𑀁 ‘‘𑀯𑀸𑀭𑁄’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀻𑀢𑀺 ‘‘𑀇𑀫𑀺𑀦𑀸 𑀯𑀸𑀭𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀯𑀸𑀭𑁂𑀦𑀸𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀭𑀚𑀦𑀻𑀬𑀝𑁆𑀞𑁂𑀦𑀸𑀢𑀺 𑀓𑀸𑀫𑀦𑀻𑀬𑀝𑁆𑀞𑁂𑀦. 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸𑀢𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸. 𑀢𑀢𑁄𑀢𑀺 𑀓𑀸𑀫𑀢𑀡𑁆𑀳𑀸𑀬. 𑀦𑀻𑀳𑀭𑀺𑀢𑁆𑀯𑀸𑀢𑀺 𑀦𑀺𑀤𑁆𑀥𑀸𑀭𑁂𑀢𑁆𑀯𑀸. 𑀇𑀢𑀭𑀸 𑀤𑁆𑀯𑁂 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀁, 𑀅𑀭𑀽𑀧𑀢𑀡𑁆𑀳𑀜𑁆𑀘 𑀤𑀲𑁆𑀲𑁂𑀢𑀺. 𑀏𑀢𑁂𑀦 ‘‘𑀓𑀸𑀫𑀢𑀡𑁆𑀳𑀸’’𑀢𑀺 𑀲𑀸𑀥𑀸𑀭𑀡𑀯𑀘𑀦𑀫𑁂𑀢𑀁 𑀲𑀩𑁆𑀩𑀲𑁆𑀲𑀧𑀺 𑀮𑁄𑀪𑀲𑁆𑀲, 𑀢𑀲𑁆𑀲 𑀧𑀦 ‘‘𑀭𑀽𑀧𑀢𑀡𑁆𑀳𑀸 𑀅𑀭𑀽𑀧𑀢𑀡𑁆𑀳𑀸’’𑀢𑀺 𑀯𑀺𑀲𑁂𑀲𑀯𑀘𑀦𑀁 𑀬𑀣𑀸 𑀓𑀸𑀫𑀕𑀼𑀡𑀺𑀓𑀭𑀸𑀕𑁄 𑀭𑀽𑀧𑀭𑀸𑀕𑁄 𑀅𑀭𑀽𑀧𑀭𑀸𑀕𑁄𑀢𑀺 𑀤𑀲𑁆𑀲𑁂𑀢𑀺. 𑀦𑀺𑀭𑁄𑀥𑀢𑀡𑁆𑀳𑀸𑀢𑀺 𑀪𑀯𑀦𑀺𑀭𑁄𑀥𑁂 𑀪𑀯𑀲𑀫𑀼𑀘𑁆𑀙𑁂𑀤𑁂 𑀢𑀡𑁆𑀳𑀸. 𑀬𑀲𑁆𑀫𑀸 𑀳𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂, 𑀓𑀸𑀫𑀸𑀯𑀘𑀭𑀤𑁂𑀯𑀢𑁆𑀢𑀪𑀸𑀯𑁂, 𑀭𑀽𑀧𑀸𑀯𑀘𑀭𑀅𑀭𑀽𑀧𑀸𑀯𑀘𑀭𑀢𑁆𑀢𑀪𑀸𑀯𑁂 𑀞𑀺𑀢𑀲𑁆𑀲 𑀅𑀢𑁆𑀢𑀦𑁄 𑀲𑀫𑁆𑀫𑀸 𑀲𑀫𑀼𑀘𑁆𑀙𑁂𑀤𑁄 𑀳𑁄𑀢𑀻𑀢𑀺 𑀪𑀯𑀦𑀺𑀭𑁄𑀥𑀁 𑀆𑀭𑀩𑁆𑀪 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀢𑀁𑀲𑀳𑀕𑀢𑀸𑀧𑀺 𑀢𑀡𑁆𑀳𑀸 𑀢𑀫𑁂𑀯 𑀆𑀭𑀩𑁆𑀪 𑀧𑀯𑀢𑁆𑀢𑀢𑀻𑀢𑀺.

𑀯𑀝𑁆𑀝𑀲𑁆𑀫𑀺𑀦𑁆𑀢𑀺 𑀢𑀺𑀯𑀺𑀥𑁂𑀧𑀺 𑀯𑀝𑁆𑀝𑁂. 𑀬𑀣𑀸 𑀢𑁂 𑀳𑀺 𑀦𑀺𑀲𑁆𑀲𑀭𑀺𑀢𑀼𑀁 𑀅𑀧𑁆𑀧𑀤𑀸𑀦𑀯𑀲𑁂𑀦 𑀓𑀫𑁆𑀫𑀯𑀺𑀧𑀸𑀓𑀯𑀝𑁆𑀝𑁂 𑀢𑀁𑀲𑀫𑀗𑁆𑀕𑀺𑀲𑀢𑁆𑀢𑀁 𑀢𑁂𑀲𑀁 𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑀪𑀸𑀯𑁂𑀦 𑀲𑀁𑀬𑁄𑀚𑁂𑀦𑁆𑀢𑀺, 𑀏𑀯𑀁 𑀓𑀺𑀮𑁂𑀲𑀯𑀝𑁆𑀝𑁂𑀧𑀻𑀢𑀺. 𑀲𑀢𑀻𑀢𑀺 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑁂. 𑀭𑀽𑀧𑀸𑀤𑀺𑀪𑁂𑀤𑁂𑀢𑀺 𑀭𑀽𑀧𑀯𑁂𑀤𑀦𑀸𑀤𑀺𑀯𑀺𑀪𑀸𑀕𑁂. 𑀓𑀸𑀬𑁂𑀢𑀺 𑀔𑀦𑁆𑀥𑀲𑀫𑀽𑀳𑁂. 𑀯𑀺𑀚𑁆𑀚𑀫𑀸𑀦𑀸𑀢𑀺 𑀲𑀢𑀻 𑀧𑀭𑀫𑀢𑁆𑀣𑀢𑁄 𑀉𑀧𑀮𑀩𑁆𑀪𑀫𑀸𑀦𑀸. 𑀤𑀺𑀝𑁆𑀞𑀺𑀬𑀸 𑀧𑀭𑀺𑀓𑀧𑁆𑀧𑀺𑀢𑁄 𑀳𑀺 𑀅𑀢𑁆𑀢𑀸𑀤𑀺 𑀧𑀭𑀫𑀢𑁆𑀣𑀢𑁄 𑀦𑀢𑁆𑀣𑀺, 𑀤𑀺𑀝𑁆𑀞𑀺 𑀧𑀦 𑀅𑀬𑀁 𑀅𑀢𑁆𑀣𑁂𑀯𑀸𑀢𑀺. 𑀯𑀺𑀘𑀺𑀦𑀦𑁆𑀢𑁄𑀢𑀺 𑀥𑀫𑁆𑀫𑀲𑀪𑀸𑀯𑀁 𑀯𑀻𑀫𑀁𑀲𑀦𑁆𑀢𑁄. 𑀓𑀺𑀘𑁆𑀙𑀢𑀻𑀢𑀺 𑀓𑀺𑀮𑀫𑀢𑀺. 𑀧𑀭𑀸𑀫𑀲𑀢𑀻𑀢𑀺 𑀧𑀭𑀢𑁄 𑀆𑀫𑀲𑀢𑀺. ‘‘𑀲𑀻𑀮𑁂𑀦 𑀲𑀼𑀤𑁆𑀥𑀺, 𑀯𑀢𑁂𑀦 𑀲𑀼𑀤𑁆𑀥𑀻’’𑀢𑀺 𑀕𑀡𑁆𑀳𑀦𑁆𑀢𑁄 𑀳𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀲𑁆𑀲 𑀧𑀭𑀢𑁄 𑀆𑀫𑀲𑀢𑀺 𑀦𑀸𑀫. 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀤𑀺𑀝𑁆𑀞𑀻𑀢𑀺 𑀭𑀽𑀧𑀸𑀤𑀺-𑀥𑀫𑁆𑀫𑁂, 𑀧𑀘𑁆𑀘𑁂𑀓𑀁 𑀢𑁂 𑀯𑀸 𑀦𑀺𑀲𑁆𑀲𑀺𑀢𑀁, 𑀢𑁂𑀲𑀁 𑀯𑀸 𑀦𑀺𑀲𑁆𑀲𑀬𑀪𑀽𑀢𑀁, 𑀲𑀸𑀫𑀺𑀪𑀽𑀢𑀁 𑀯𑀸 𑀓𑀢𑁆𑀯𑀸 𑀧𑀭𑀺𑀓𑀧𑁆𑀧𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀅𑀢𑁆𑀢𑀤𑀺𑀝𑁆𑀞𑀺 𑀯𑀻𑀲𑀢𑀺. 𑀯𑀺𑀫𑀢𑀻𑀢𑀺 𑀥𑀫𑁆𑀫𑁂𑀲𑀼 𑀲𑀫𑁆𑀫𑀸, 𑀫𑀺𑀘𑁆𑀙𑀸 𑀯𑀸 𑀫𑀦𑀦𑀸𑀪𑀸𑀯𑀢𑁄 𑀲𑀁𑀲𑀬𑀺𑀢𑀝𑁆𑀞𑁂𑀦 𑀅𑀫𑀢𑀺, 𑀅𑀧𑁆𑀧𑀝𑀺𑀧𑀚𑁆𑀚𑀦𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀧𑀭𑀺𑀬𑀸𑀲𑀕𑁆𑀕𑀸𑀳𑁄𑀢𑀺 𑀅𑀲𑀼𑀤𑁆𑀥𑀺𑀫𑀕𑁆𑀕𑁂 ‘‘𑀲𑀼𑀤𑁆𑀥𑀺𑀫𑀕𑁆𑀕𑁄’’𑀢𑀺 𑀯𑀺𑀧𑀭𑀻𑀢𑀕𑁆𑀕𑀸𑀳𑁄.

𑀘𑀺𑀭𑀧𑀸𑀭𑀺𑀯𑀸𑀲𑀺𑀬𑀝𑁆𑀞𑁂𑀦𑀸𑀢𑀺 𑀘𑀺𑀭𑀧𑀭𑀺𑀯𑀼𑀢𑁆𑀣𑀢𑀸𑀬 𑀧𑀼𑀭𑀸𑀡𑀪𑀸𑀯𑁂𑀦. 𑀆𑀲𑀯𑀦𑀝𑁆𑀞𑁂𑀦𑀸𑀢𑀺 𑀲𑀦𑁆𑀤𑀦𑀝𑁆𑀞𑁂𑀦, 𑀧𑀯𑀢𑁆𑀢𑀦𑀝𑁆𑀞𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀯𑀢𑀻𑀢𑀺 𑀧𑀯𑀢𑁆𑀢𑀢𑀺. 𑀅𑀯𑀥𑀺𑀅𑀢𑁆𑀣𑁄 𑀆-𑀓𑀸𑀭𑁄, 𑀅𑀯𑀥𑀺 𑀘 𑀫𑀭𑀺𑀬𑀸𑀤𑀸𑀪𑀺𑀯𑀺𑀥𑀺𑀪𑁂𑀤𑀢𑁄 𑀤𑀼𑀯𑀺𑀥𑁄. 𑀢𑀢𑁆𑀣 𑀫𑀭𑀺𑀬𑀸𑀤𑁄 𑀓𑀺𑀭𑀺𑀬𑀁 𑀩𑀳𑀺 𑀓𑀢𑁆𑀯𑀸 𑀧𑀯𑀢𑁆𑀢𑀢𑀺 𑀬𑀣𑀸 ‘‘𑀆 𑀧𑀸𑀝𑀮𑀺𑀧𑀼𑀢𑁆𑀢𑀸 𑀯𑀼𑀝𑁆𑀞𑁄 𑀤𑁂𑀯𑁄’’𑀢𑀺. 𑀅𑀪𑀺𑀯𑀺𑀥𑀺 𑀓𑀺𑀭𑀺𑀬𑀁 𑀩𑁆𑀬𑀸𑀧𑁂𑀢𑁆𑀯𑀸 𑀧𑀯𑀢𑁆𑀢𑀢𑀺 𑀬𑀣𑀸 ‘‘𑀆 𑀪𑀯𑀕𑁆𑀕𑀸 𑀪𑀕𑀯𑀢𑁄 𑀬𑀲𑁄 𑀧𑀯𑀢𑁆𑀢𑁄’’𑀢𑀺. 𑀅𑀪𑀺𑀯𑀺𑀥𑀺𑀅𑀢𑁆𑀣𑁄 𑀅𑀬𑀁 𑀆-𑀓𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀢𑁆𑀣𑀘𑀺 𑀤𑁆𑀯𑁂 𑀆𑀲𑀯𑀸 𑀆𑀕𑀢𑀸𑀢𑀺 𑀯𑀺𑀦𑀬𑀧𑀸𑀴𑀺𑀁 (𑀧𑀸𑀭𑀸. 𑁩𑁯) 𑀲𑀦𑁆𑀥𑀸𑀬𑀸𑀳. 𑀢𑀢𑁆𑀣 𑀳𑀺 ‘‘𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬, 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀆𑀲𑀯𑀸𑀦𑀁 𑀧𑀝𑀺𑀖𑀸𑀢𑀸𑀬𑀸’’𑀢𑀺 (𑀧𑀸𑀭𑀸. 𑁩𑁯) 𑀤𑁆𑀯𑀺𑀥𑀸 𑀆𑀲𑀯𑀸 𑀆𑀕𑀢𑀸𑀢𑀺. 𑀓𑀢𑁆𑀣𑀘𑀻𑀢𑀺 𑀢𑀺𑀓𑀦𑀺𑀧𑀸𑀢𑁂 𑀆𑀲𑀯𑀲𑀼𑀢𑁆𑀢𑁂, (𑀇𑀢𑀺𑀯𑀼. 𑁫𑁬; 𑀲𑀁. 𑀦𑀺. 𑁫.𑁧𑁬𑁩) 𑀅𑀜𑁆𑀜𑁂𑀲𑀼 𑀘 𑀲𑀴𑀸𑀬𑀢𑀦𑀲𑀼𑀢𑁆𑀢𑀸𑀤𑀻𑀲𑀼 (𑀲𑀁. 𑀦𑀺. 𑁪.𑁩𑁨𑁧). 𑀲𑀴𑀸𑀬𑀢𑀦𑀲𑀼𑀢𑁆𑀢𑁂𑀲𑀼𑀧𑀺 𑀳𑀺 ‘‘𑀢𑀬𑁄𑀫𑁂 𑀆𑀯𑀼𑀲𑁄 𑀆𑀲𑀯𑀸 𑀓𑀸𑀫𑀸𑀲𑀯𑁄 𑀪𑀯𑀸𑀲𑀯𑁄 𑀅𑀯𑀺𑀚𑁆𑀚𑀸𑀲𑀯𑁄’’𑀢𑀺 𑀢𑀬𑁄 𑀏𑀯 𑀆𑀕𑀢𑀸𑀢𑀺. 𑀦𑀺𑀭𑀬𑀁 𑀕𑀫𑁂𑀦𑁆𑀢𑀻𑀢𑀺 𑀦𑀺𑀭𑀬𑀕𑀸𑀫𑀺𑀦𑀻𑀬𑀸. 𑀬𑀲𑁆𑀫𑀸 𑀇𑀥 𑀲𑀸𑀲𑀯𑀁 𑀓𑀼𑀲𑀮𑀸𑀓𑀼𑀲𑀮𑀁 𑀓𑀫𑁆𑀫𑀁 𑀆𑀲𑀯𑀧𑀭𑀺𑀬𑀸𑀬𑁂𑀦 𑀤𑁂𑀲𑀺𑀢𑀁, 𑀢𑀲𑁆𑀫𑀸 𑀧𑀜𑁆𑀘𑀕𑀢𑀺𑀲𑀁𑀯𑀢𑁆𑀢𑀦𑀻𑀬𑀪𑀸𑀯𑁂𑀦 𑀆𑀲𑀯𑀸 𑀆𑀕𑀢𑀸. 𑀇𑀫𑀲𑁆𑀫𑀺𑀁 𑀲𑀗𑁆𑀕𑀻𑀢𑀺𑀲𑀼𑀢𑁆𑀢𑁂 𑀢𑀬𑁄 𑀆𑀕𑀢𑀸𑀢𑀺. 𑀏𑀢𑁆𑀣 𑀬𑀲𑁆𑀫𑀸 𑀅𑀜𑁆𑀜𑁂𑀲𑀼 𑀘 𑀆 𑀪𑀯𑀕𑁆𑀕𑀁 𑀆 𑀕𑁄𑀢𑁆𑀭𑀪𑀼𑀁 𑀧𑀯𑀢𑁆𑀢𑀦𑁆𑀢𑁂𑀲𑀼 𑀫𑀸𑀦𑀸𑀤𑀻𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀅𑀢𑁆𑀢𑀢𑁆𑀢𑀦𑀺𑀬𑀸𑀤𑀺𑀕𑁆𑀕𑀸𑀳𑀯𑀲𑁂𑀦, 𑀅𑀪𑀺𑀩𑁆𑀬𑀸𑀧𑀦𑀫𑀤𑀓𑀭𑀡𑀯𑀲𑁂𑀦 𑀆𑀲𑀯𑀲𑀤𑀺𑀲𑀢𑀸 𑀘 𑀏𑀢𑁂𑀲𑀁𑀬𑁂𑀯, 𑀦 𑀅𑀜𑁆𑀜𑁂𑀲𑀁, 𑀢𑀲𑁆𑀫𑀸 𑀏𑀢𑁂𑀲𑁆𑀯𑁂𑀯 𑀆𑀲𑀯-𑀲𑀤𑁆𑀤𑁄 𑀦𑀺𑀭𑀼𑀴𑁆𑀳𑁄 𑀤𑀝𑁆𑀞𑀩𑁆𑀩𑁄. 𑀦 𑀘𑁂𑀢𑁆𑀣 ‘‘𑀤𑀺𑀝𑁆𑀞𑀸𑀲𑀯𑁄 𑀦𑀸𑀕𑀢𑁄’’𑀢𑀺 𑀘𑀺𑀦𑁆𑀢𑁂𑀢𑀩𑁆𑀩𑀁 𑀪𑀯𑀢𑀡𑁆𑀳𑀸𑀬, 𑀪𑀯𑀤𑀺𑀝𑁆𑀞𑀺𑀬𑀸𑀧𑀺 𑀪𑀯𑀸𑀲𑀯𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀢𑁆𑀢𑀸. 𑀓𑀸𑀫𑀸𑀲𑀯𑁄 𑀦𑀸𑀫 𑀓𑀸𑀫𑀦𑀝𑁆𑀞𑁂𑀦, 𑀆𑀲𑀯𑀦𑀝𑁆𑀞𑁂𑀦 𑀘. 𑀯𑀼𑀢𑁆𑀢𑀸𑀬𑁂𑀯 𑀅𑀢𑁆𑀣𑀢𑁄 𑀦𑀺𑀦𑁆𑀦𑀸𑀦𑀸𑀓𑀭𑀡𑀢𑁄.

𑀓𑀸𑀫𑁂 𑀏𑀲𑀢𑀺 𑀕𑀯𑁂𑀲𑀢𑀺 𑀏𑀢𑀸𑀬𑀸𑀢𑀺 𑀓𑀸𑀫𑁂𑀲𑀦𑀸, 𑀓𑀸𑀫𑀸𑀦𑀁 𑀅𑀪𑀺𑀧𑀢𑁆𑀣𑀦𑀸𑀯𑀲𑁂𑀦, 𑀧𑀭𑀺𑀬𑁂𑀝𑁆𑀞𑀺𑀯𑀲𑁂𑀦, 𑀧𑀭𑀺𑀪𑀼𑀜𑁆𑀚𑀦𑀯𑀲𑁂𑀦 𑀯𑀸 𑀧𑀯𑀢𑁆𑀢𑀭𑀸𑀕𑁄. 𑀪𑀯𑁂𑀲𑀦𑀸 𑀧𑀦 𑀪𑀯𑀧𑀢𑁆𑀣𑀦𑀸, 𑀪𑀯𑀸𑀪𑀺𑀭𑀢𑀺𑀪𑀯𑀚𑁆𑀛𑁄𑀲𑀸𑀦𑀯𑀲𑁂𑀦 𑀧𑀯𑀢𑁆𑀢𑀭𑀸𑀕𑁄. 𑀤𑀺𑀝𑁆𑀞𑀺𑀕𑀢𑀺𑀓𑀲𑀫𑁆𑀫𑀢𑀲𑁆𑀲𑀸𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑁂𑀳𑀺 𑀧𑀭𑀺𑀓𑀧𑁆𑀧𑀺𑀢𑀲𑁆𑀲, 𑀲𑀫𑁆𑀪𑀸𑀯𑀺𑀢𑀲𑁆𑀲 𑀘. 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲𑀸𑀢𑀺 𑀢𑀧𑁄𑀧𑀓𑁆𑀓𑀫𑀲𑁆𑀲. 𑀢𑀤𑁂𑀓𑀝𑁆𑀞𑀦𑁆𑀢𑀺 𑀢𑀸𑀳𑀺 𑀭𑀸𑀕𑀤𑀺𑀝𑁆𑀞𑀻𑀳𑀺 𑀲𑀳𑀚𑁂𑀓𑀝𑁆𑀞𑀁. 𑀓𑀫𑁆𑀫𑀦𑁆𑀢𑀺 𑀅𑀓𑀼𑀲𑀮𑀓𑀫𑁆𑀫𑀁. 𑀢𑀫𑁆𑀧𑀺 𑀳𑀺 𑀓𑀸𑀫𑀸𑀤𑀺𑀓𑁂 𑀦𑀺𑀩𑁆𑀩𑀢𑁆𑀢𑀦𑀸𑀥𑀺𑀝𑁆𑀞𑀸𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀁 ‘‘𑀏𑀲𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀻𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁. 𑀬𑀸 𑀓𑀸𑀘𑀺 𑀧𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀢𑀧𑁄𑀧𑀓𑁆𑀓𑀫𑀳𑁂𑀢𑀼𑀓𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸 𑀏𑀯.

𑀆𑀓𑀸𑀭𑀲𑀡𑁆𑀞𑀸𑀦𑀦𑁆𑀢𑀺 𑀯𑀺𑀲𑀺𑀝𑁆𑀞𑀸𑀓𑀸𑀭𑀸𑀯𑀝𑁆𑀞𑀸𑀦𑀁 𑀓𑀣𑀁𑀯𑀺𑀥𑀦𑁆𑀢𑀺 𑀳𑀺 𑀓𑁂𑀦 𑀧𑀓𑀸𑀭𑁂𑀦 𑀲𑀡𑁆𑀞𑀺𑀢𑀁, 𑀲𑀫𑀯𑀝𑁆𑀞𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀤𑁆𑀤𑀢𑁆𑀣𑀢𑁄 𑀧𑀦 𑀯𑀺𑀤𑀳𑀦𑀁 𑀯𑀺𑀲𑀺𑀝𑁆𑀞𑀸𑀓𑀸𑀭𑁂𑀦 𑀅𑀯𑀝𑁆𑀞𑀸𑀦𑀁 𑀯𑀺𑀥𑀸, 𑀯𑀺𑀥𑀻𑀬𑀢𑀺 𑀯𑀺𑀲𑀤𑀺𑀲𑀸𑀓𑀸𑀭𑁂𑀦 𑀞𑀧𑀻𑀬𑀢𑀻𑀢𑀺 𑀯𑀺𑀥𑀸, 𑀓𑁄𑀝𑁆𑀞𑀸𑀲𑁄. 𑀯𑀺𑀤𑀳𑀦𑀢𑁄 𑀳𑀻𑀦𑀸𑀤𑀺𑀯𑀲𑁂𑀦 𑀯𑀺𑀯𑀺𑀥𑁂𑀦𑀸𑀓𑀸𑀭𑁂𑀦 𑀤𑀳𑀦𑀢𑁄 𑀉𑀧𑀥𑀸𑀭𑀡𑀢𑁄 𑀯𑀺𑀥𑀸, 𑀫𑀸𑀦𑁄𑀯. 𑀲𑁂𑀬𑁆𑀬𑀲𑀤𑀺𑀲𑀳𑀻𑀦𑀸𑀦𑀁 𑀯𑀲𑁂𑀦𑀸𑀢𑀺 𑀲𑁂𑀬𑁆𑀬𑀲𑀤𑀺𑀲𑀳𑀻𑀦𑀪𑀸𑀯𑀸𑀦𑀁 𑀬𑀸𑀣𑀸𑀯𑀸’ 𑀬𑀸𑀣𑀸𑀯𑀪𑀽𑀢𑀸𑀦𑀁 𑀯𑀲𑁂𑀦. 𑀢𑀬𑁄 𑀫𑀸𑀦𑀸 𑀯𑀼𑀢𑁆𑀢𑀸 𑀲𑁂𑀬𑁆𑀬𑀲𑁆𑀲𑁂𑀯 𑀉𑀧𑁆𑀧𑀚𑁆𑀚𑀦𑀓𑀸. 𑀏𑀲 𑀦𑀬𑁄 𑀲𑀤𑀺𑀲𑀳𑀻𑀦𑁂𑀲𑀼𑀧𑀺. 𑀢𑁂𑀦𑀸𑀳 ‘‘𑀅𑀬𑀜𑁆𑀳𑀺 𑀫𑀸𑀦𑁄’’𑀢𑀺𑀆𑀤𑀺. 𑀇𑀤𑀸𑀦𑀺 𑀬𑀣𑀸𑀉𑀤𑁆𑀤𑀺𑀝𑁆𑀞𑁂 𑀦𑀯𑀯𑀺𑀥𑁂𑀧𑀺 𑀫𑀸𑀦𑁂 𑀯𑀢𑁆𑀣𑀼𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀭𑀸𑀚𑀽𑀦𑀜𑁆𑀘𑁂𑀯 𑀧𑀩𑁆𑀩𑀚𑀺𑀢𑀸𑀦𑀜𑁆𑀘 𑀉𑀧𑁆𑀧𑀚𑁆𑀚𑀢𑀺 𑀓𑀲𑁆𑀫𑀸? 𑀢𑁂 𑀯𑀺𑀲𑁂𑀲𑀢𑁄 𑀅𑀢𑁆𑀢𑀸𑀦𑀁 𑀲𑁂𑀬𑁆𑀬𑀢𑁄 𑀤𑀳𑀦𑁆𑀢𑀻𑀢𑀺. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀭𑀸𑀚𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀓𑁄 𑀫𑀬𑀸 𑀲𑀤𑀺𑀲𑁄 𑀅𑀢𑁆𑀣𑀻𑀢𑀺 𑀓𑁄-𑀲𑀤𑁆𑀤𑁄 𑀧𑀝𑀺𑀓𑁆𑀔𑁂𑀧𑀢𑁆𑀣𑁄, 𑀅𑀜𑁆𑀜𑁄 𑀲𑀤𑀺𑀲𑁄 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁂𑀲𑀁𑀬𑁂𑀯𑀸𑀢𑀺 𑀭𑀸𑀚𑀽𑀦𑀁, 𑀧𑀩𑁆𑀩𑀚𑀺𑀢𑀸𑀦𑀜𑁆𑀘. 𑀉𑀧𑁆𑀧𑀚𑁆𑀚𑀢𑀺 𑀲𑁂𑀝𑁆𑀞𑀯𑀢𑁆𑀣𑀼𑀓𑀢𑁆𑀢𑀸 𑀢𑀲𑁆𑀲. ‘‘𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁂𑀧𑀺 𑀏𑀲𑁂𑀯 𑀦𑀬𑁄.

‘‘𑀓𑁄 𑀫𑀬𑀸 𑀲𑀤𑀺𑀲𑁄 𑀅𑀜𑁆𑀜𑁄 𑀭𑀸𑀚𑀧𑀼𑀭𑀺𑀲𑁄 𑀅𑀢𑁆𑀣𑀻’’𑀢𑀺 𑀯𑀸 ‘‘𑀫𑀬𑁆𑀳𑀁 𑀅𑀜𑁆𑀜𑁂𑀳𑀺 𑀲𑀤𑁆𑀥𑀺𑀁 𑀓𑀺𑀁 𑀦𑀸𑀦𑀸𑀓𑀭𑀡’’𑀦𑁆𑀢𑀺 𑀯𑀸 ‘‘𑀅𑀫𑀘𑁆𑀘𑁄 𑀢𑀺 𑀦𑀸𑀫𑀸𑀫𑁂𑀯…𑀧𑁂… 𑀦𑀸𑀫𑀸𑀳’’𑀦𑁆𑀢𑀺 𑀯𑀸𑀢𑀺 𑀲𑀤𑀺𑀲𑀲𑁆𑀲 𑀲𑁂𑀬𑁆𑀬𑀫𑀸𑀦𑀸𑀤𑀻𑀦𑀁 𑀢𑀺𑀡𑁆𑀡𑀁 𑀧𑀯𑀢𑁆𑀢𑀺𑀆𑀓𑀸𑀭𑀤𑀲𑁆𑀲𑀦𑀁.

𑀤𑀸𑀲𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀪𑀢𑀺𑀓 𑀓𑀫𑁆𑀫𑀓𑀭𑀸𑀤𑀻𑀦𑀁 𑀧𑀭𑀸𑀥𑀻𑀦𑀯𑀼𑀢𑁆𑀢𑀺𑀓𑀸𑀦𑀁 𑀕𑀳𑀡𑀁. 𑀆𑀤𑀺-𑀲𑀤𑁆𑀤𑁂𑀦 𑀯𑀸 𑀕𑀳𑀺𑀢𑁂 𑀏𑀯 ‘‘𑀧𑀼𑀓𑁆𑀓𑀼𑀲𑀘𑀡𑁆𑀟𑀸𑀮𑀸𑀤𑀬𑁄𑀧𑀻’’𑀢𑀺 𑀲𑀬𑀫𑁂𑀯 𑀤𑀲𑁆𑀲𑁂𑀢𑀺. 𑀦𑀦𑀼 𑀘 𑀫𑀸𑀦𑁄 𑀦𑀸𑀫𑀸𑀬𑀁 𑀲𑀁𑀧𑀕𑁆𑀕𑀳𑀭𑀲𑁄, 𑀲𑁄 𑀓𑀣𑀁 𑀑𑀫𑀸𑀦𑁂 𑀲𑀫𑁆𑀪𑀯𑀢𑀻𑀢𑀺? 𑀲𑁄𑀧𑀺 𑀅𑀯𑀓𑀭𑀡𑀫𑀼𑀔𑁂𑀦 𑀯𑀺𑀥𑀸𑀦𑀯𑀢𑁆𑀣𑀼𑀦𑀸 𑀧𑀕𑁆𑀕𑀡𑁆𑀳𑀦𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀻𑀢𑀺 𑀦𑀸𑀬𑀁 𑀯𑀺𑀭𑁄𑀥𑁄. 𑀢𑁂𑀦𑁂𑀯𑀸𑀳 ‘‘𑀓𑀺𑀁 𑀤𑀸𑀲𑁄 𑀦𑀸𑀫 𑀅𑀳𑀦𑁆𑀢𑀺 𑀏𑀢𑁂 𑀫𑀸𑀦𑁂 𑀓𑀭𑁄𑀢𑀻’’𑀢𑀺. 𑀢𑀣𑀸 𑀳𑀺𑀲𑁆𑀲 𑀬𑀸𑀣𑀸𑀯𑀫𑀸𑀦𑀢𑀸 𑀯𑀼𑀢𑁆𑀢𑀸.

𑀬𑀸𑀣𑀸𑀯𑀫𑀸𑀦𑀸 𑀪𑀯𑀦𑀺𑀓𑀦𑁆𑀢𑀺 𑀯𑀺𑀬, 𑀅𑀢𑁆𑀢𑀤𑀺𑀝𑁆𑀞𑀺 𑀯𑀺𑀬 𑀘 𑀦 𑀫𑀳𑀸𑀲𑀸𑀯𑀚𑁆𑀚𑀸, 𑀢𑀲𑁆𑀫𑀸 𑀢𑁂 𑀦 𑀅𑀧𑀸𑀬𑀕𑀫𑀦𑀻𑀬𑀸. 𑀬𑀣𑀸𑀪𑀽𑀢𑀯𑀢𑁆𑀣𑀼𑀓𑀢𑀸𑀬 𑀳𑀺 𑀢𑁂 𑀬𑀸𑀣𑀸𑀯𑀫𑀸𑀦𑀸. ‘‘𑀅𑀭𑀳𑀢𑁆𑀢𑀫𑀕𑁆𑀕𑀯𑀚𑁆𑀛𑀸’’𑀢𑀺 𑀘 𑀢𑀲𑁆𑀲 𑀅𑀦𑀯𑀲𑁂𑀲𑀧𑁆𑀧𑀳𑀸𑀬𑀺𑀢𑀸𑀬 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀢𑀢𑀺𑀬𑀫𑀕𑁆𑀕𑁂𑀳𑀺 𑀘 𑀢𑁂 𑀬𑀣𑀸𑀓𑁆𑀓𑀫𑀁 𑀧𑀳𑀻𑀬𑀦𑁆𑀢𑀺, 𑀬𑁂 𑀑𑀴𑀸𑀭𑀺𑀓𑀢𑀭𑀸, 𑀑𑀴𑀸𑀭𑀺𑀓𑀢𑀫𑀸 𑀘. 𑀫𑀸𑀦𑁄 𑀳𑀺 ‘‘𑀅𑀳𑀁 𑀅𑀲𑁆𑀫𑀻’’𑀢𑀺 𑀧𑀯𑀢𑁆𑀢𑀺𑀬𑀸 𑀉𑀧𑀭𑀺𑀫𑀕𑁆𑀕𑁂𑀲𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑁄 𑀳𑀼𑀢𑁆𑀯𑀸 𑀧𑀳𑀻𑀬𑀢𑀺. 𑀅𑀬𑀸𑀣𑀸𑀯𑀫𑀸𑀦𑀸 𑀦𑀸𑀫 𑀅𑀬𑀣𑀸𑀪𑀽𑀢𑀯𑀢𑁆𑀣𑀼𑀓𑀢𑀸𑀬, 𑀢𑁂𑀦𑁂𑀯 𑀢𑁂 𑀫𑀳𑀸𑀲𑀸𑀯𑀚𑁆𑀚𑀪𑀸𑀯𑁂𑀦 𑀧𑀞𑀫𑀫𑀕𑁆𑀕𑀯𑀚𑁆𑀛𑀸 𑀯𑀼𑀢𑁆𑀢𑀸.

𑀅𑀢𑀢𑀺 𑀲𑀢𑀢𑀁 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀅𑀤𑁆𑀥𑀸, 𑀓𑀸𑀮𑁄𑀢𑀺 𑀆𑀳 ‘‘𑀢𑀬𑁄 𑀅𑀤𑁆𑀥𑀸𑀢𑀺 𑀢𑀬𑁄 𑀓𑀸𑀮𑀸’’𑀢𑀺. 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦𑀸𑀢𑀺 𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑀸𑀤𑀻𑀲𑀼 (𑀫. 𑀦𑀺. 𑁩.𑁨𑁮𑁩) 𑀆𑀕𑀢𑀦𑀬𑁂𑀦. 𑀢𑀢𑁆𑀣 𑀳𑀺 ‘‘𑀬𑁄 𑀘𑀸𑀯𑀼𑀲𑁄 𑀫𑀦𑁄, 𑀬𑁂 𑀘 𑀥𑀫𑁆𑀫𑀸, 𑀉𑀪𑀬𑀫𑁂𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀢𑀲𑁆𑀫𑀺𑀁 𑀘𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀙𑀦𑁆𑀤𑀭𑀸𑀕𑀧𑀝𑀺𑀩𑀤𑁆𑀥𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀁, 𑀙𑀦𑁆𑀤𑀭𑀸𑀕𑀧𑀝𑀺𑀩𑀤𑁆𑀥𑀢𑁆𑀢𑀸 𑀯𑀺𑀜𑁆𑀜𑀸𑀡𑀲𑁆𑀲 𑀢𑀤𑀪𑀺𑀦𑀦𑁆𑀤𑀢𑀺, 𑀢𑀤𑀪𑀺𑀦𑀦𑁆𑀤𑀦𑁆𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀲𑀁𑀳𑀻𑀭𑀢𑀻’’𑀢𑀺 (𑀫. 𑀦𑀺. 𑁩.𑁨𑁮𑁪) 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀲𑀦𑁆𑀥𑀸𑀬 𑀏𑀯𑀁 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀧𑀝𑀺𑀲𑀦𑁆𑀥𑀺𑀢𑁄 𑀧𑀼𑀩𑁆𑀩𑁂’’𑀢𑀺𑀆𑀤𑀺. 𑀢𑀤𑀦𑁆𑀢𑀭𑀦𑁆𑀢𑀺 𑀢𑁂𑀲𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀻𑀦𑀁 𑀯𑁂𑀫𑀚𑁆𑀛𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀤𑁆𑀥𑀸, 𑀬𑁄 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀸𑀦𑀁 𑀯𑁂𑀫𑀚𑁆𑀛𑀢𑀸𑀬 ‘‘𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂 𑀓𑀗𑁆𑀔𑀢𑀺, (𑀥. 𑀲. 𑁧𑁧𑁨𑁩) 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂 𑀅𑀜𑁆𑀜𑀸𑀡’’𑀦𑁆𑀢𑀺 (𑀥. 𑀲. 𑁧𑁦𑁬𑁭, 𑁧𑁧𑁦𑁬, 𑁧𑁧𑁨𑁮) 𑀏𑀯𑀫𑀸𑀤𑀻𑀲𑀼 ‘‘𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁄’’𑀢𑀺 𑀘 𑀯𑀼𑀘𑁆𑀘𑀢𑀺. 𑀪𑀗𑁆𑀕𑁄 𑀥𑀫𑁆𑀫𑁄 𑀅𑀢𑀻𑀢𑀁𑀲𑁂𑀦 𑀲𑀗𑁆𑀕𑀳𑀺𑀢𑁄𑀢𑀺 𑀆𑀳 ‘‘𑀪𑀗𑁆𑀕𑀢𑁄 𑀉𑀤𑁆𑀥𑀁 𑀅𑀢𑀻𑀢𑁄 𑀅𑀤𑁆𑀥𑀸 𑀦𑀸𑀫𑀸’’𑀢𑀺. 𑀢𑀣𑀸 𑀅𑀦𑀼𑀧𑁆𑀧𑀦𑁆𑀦𑁄 𑀥𑀫𑁆𑀫𑁄 𑀅𑀦𑀸𑀕𑀢𑀁𑀲𑁂𑀦 𑀲𑀗𑁆𑀕𑀳𑀺𑀢𑁄𑀢𑀺 𑀆𑀳 ‘‘𑀉𑀧𑁆𑀧𑀸𑀤𑀢𑁄 𑀧𑀼𑀩𑁆𑀩𑁂 𑀅𑀦𑀸𑀕𑀢𑁄 𑀅𑀤𑁆𑀥𑀸 𑀦𑀸𑀫𑀸’’𑀢𑀺. 𑀔𑀡𑀢𑁆𑀢𑀬𑁂𑀢𑀺 𑀉𑀧𑁆𑀧𑀸𑀤𑁄, 𑀞𑀺𑀢𑀺, 𑀪𑀗𑁆𑀕𑁄𑀢𑀺 𑀢𑀻𑀲𑀼 𑀔𑀡𑁂𑀲𑀼. 𑀬𑀤𑀸 𑀳𑀺 𑀥𑀫𑁆𑀫𑁄 𑀳𑁂𑀢𑀼𑀧𑀘𑁆𑀘𑀬𑀲𑁆𑀲 𑀲𑀫𑀯𑀸𑀬𑁂 𑀉𑀧𑁆𑀧𑀚𑁆𑀚𑀢𑀺, 𑀬𑀤𑀸 𑀘 𑀯𑁂𑀢𑀺, 𑀇𑀢𑀺 𑀤𑁆𑀯𑀻𑀲𑀼𑀧𑀺 𑀔𑀡𑁂𑀲𑀼 𑀞𑀺𑀢𑀺𑀓𑁆𑀔𑀡𑁂 𑀯𑀺𑀬 𑀧𑀘𑁆𑀘𑀼𑀧𑁆𑀧𑀦𑁆𑀦𑁄𑀢𑀺. 𑀥𑀫𑁆𑀫𑀸𑀦𑀜𑁆𑀳𑀺 𑀧𑀸𑀓𑀪𑀸𑀯𑀽𑀧𑀸𑀥𑀺𑀓𑀁 𑀧𑀢𑁆𑀢𑀩𑁆𑀩𑀁 𑀉𑀤𑀬𑁄, 𑀯𑀺𑀤𑁆𑀥𑀁𑀲𑀪𑀸𑀯𑀽𑀧𑀸𑀥𑀺𑀓𑀁 𑀯𑀬𑁄, 𑀢𑀤𑀼𑀪𑀬𑀯𑁂𑀫𑀚𑁆𑀛𑀁 𑀞𑀺𑀢𑀺. 𑀬𑀤𑀺 𑀏𑀯𑀁 𑀅𑀤𑁆𑀥𑀸 𑀦𑀸𑀫𑀸𑀬𑀁 𑀥𑀫𑁆𑀫𑁄 𑀏𑀯 𑀆𑀧𑀦𑁆𑀦𑁄𑀢𑀺? 𑀦 𑀥𑀫𑁆𑀫𑁄, 𑀥𑀫𑁆𑀫𑀲𑁆𑀲 𑀧𑀦 𑀅𑀯𑀢𑁆𑀣𑀸𑀪𑁂𑀤𑁄, 𑀢𑀜𑁆𑀘 𑀉𑀧𑀸𑀤𑀸𑀬 𑀮𑁄𑀓𑁂 𑀓𑀸𑀮𑀲𑀫𑀜𑁆𑀜𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀢𑀻𑀢𑀸𑀤𑀺𑀪𑁂𑀤𑁄 𑀘 𑀦𑀸𑀫 𑀅𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂. 𑀢𑁂𑀦𑁂𑀯 𑀯𑁄𑀳𑀸𑀭𑁂𑀦𑀸𑀢𑀺 𑀢𑀁 𑀢𑀁 𑀅𑀯𑀢𑁆𑀣𑀸𑀯𑀺𑀲𑁂𑀲𑀁 𑀉𑀧𑀸𑀤𑀸𑀬 𑀥𑀫𑁆𑀫𑁄 ‘‘𑀅𑀢𑀻𑀢𑁄 𑀅𑀦𑀸𑀕𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄’’𑀢𑀺 𑀬𑁂𑀦 𑀯𑁄𑀳𑀸𑀭𑁂𑀦 𑀯𑁄𑀳𑀭𑀻𑀬𑀢𑀺, 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀢𑀸𑀬 𑀳𑀺 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑁄𑀧𑀺 𑀓𑀸𑀮𑁄 𑀢𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀧𑀯𑀢𑁆𑀢𑀺𑀅𑀯𑀢𑁆𑀣𑀸𑀯𑀺𑀲𑁂𑀲𑀁 𑀉𑀧𑀸𑀤𑀸𑀬 𑀢𑁂𑀦𑁂𑀯 𑀯𑁄𑀳𑀸𑀭𑁂𑀦 ‘‘𑀅𑀢𑀻𑀢𑁄 𑀅𑀤𑁆𑀥𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄.

𑀅𑀦𑁆𑀢-𑀲𑀤𑁆𑀤𑁄 𑀮𑁄𑀓𑁂 𑀧𑀭𑀺𑀬𑁄𑀲𑀸𑀦𑁂, 𑀓𑁄𑀝𑀺𑀬𑀁 𑀦𑀺𑀭𑀼𑀴𑁆𑀳𑁄𑀢𑀺 𑀢𑀤𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑁆𑀢𑁄𑀬𑁂𑀯 𑀅𑀦𑁆𑀢𑁄’’𑀢𑀺 𑀆𑀳, 𑀓𑁄𑀝𑀺 𑀅𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀧𑀭𑀪𑀸𑀕𑁄𑀢𑀺 𑀧𑀸𑀭𑀺𑀫𑀦𑁆𑀢𑁄. 𑀅𑀫𑀢𑀺 𑀕𑀘𑁆𑀙𑀢𑀺 𑀪𑀯𑀧𑁆𑀧𑀩𑀦𑁆𑀥𑁄 𑀦𑀺𑀝𑁆𑀞𑀸𑀦𑀁 𑀏𑀢𑁆𑀣𑀸𑀢𑀺 𑀅𑀦𑁆𑀢𑁄, 𑀓𑁄𑀝𑀺. 𑀅𑀫𑀦𑀁 𑀦𑀺𑀝𑁆𑀞𑀸𑀦𑀕𑀫𑀦𑀦𑁆𑀢𑀺 𑀅𑀦𑁆𑀢𑁄, 𑀑𑀲𑀸𑀦𑀁. 𑀲𑁄 𑀧𑀦 ‘‘𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀸’’𑀢𑀺 (𑀫. 𑀦𑀺. 𑁩.𑁩𑁯𑁩; 𑀲𑀁. 𑀦𑀺. 𑁨.𑁫𑁧) 𑀯𑀼𑀢𑁆𑀢𑀢𑁆𑀢𑀸 𑀤𑀼𑀓𑁆𑀔𑀡𑁆𑀡𑀯𑀲𑁆𑀲 𑀧𑀸𑀭𑀺𑀫𑀦𑁆𑀢𑁄𑀢𑀺 𑀆𑀳 ‘‘𑀧𑀭𑀪𑀸𑀕𑁄’’𑀢𑀺. 𑀅𑀫𑁆𑀫𑀢𑀺 𑀧𑀭𑀺𑀪𑀼𑀬𑁆𑀬𑀢𑀺 𑀳𑀻𑀴𑀻𑀬𑀢𑀻𑀢𑀺 𑀅𑀦𑁆𑀢𑁄, 𑀮𑀸𑀫𑀓𑁄. 𑀅𑀫𑁆𑀫𑀢𑀺 𑀪𑀸𑀕𑀲𑁄 𑀜𑀸𑀬𑀢𑀻𑀢𑀺 𑀅𑀦𑁆𑀢𑁄, 𑀅𑀁𑀲𑁄𑀢𑀺 𑀆𑀳 ‘‘𑀓𑁄𑀝𑁆𑀞𑀸𑀲𑁄 𑀅𑀦𑁆𑀢𑁄’’𑀢𑀺. 𑀲𑀦𑁆𑀢𑁄 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑁄 𑀓𑀸𑀬𑁄 𑀥𑀫𑁆𑀫𑀲𑀫𑀽𑀳𑁄𑀢𑀺 𑀲𑀓𑁆𑀓𑀸𑀬𑁄, 𑀔𑀦𑁆𑀥𑀸, 𑀢𑁂 𑀧𑀦 𑀅𑀭𑀺𑀬𑀲𑀘𑁆𑀘𑀪𑀽𑀢𑀸 𑀇𑀥𑀸𑀥𑀺𑀧𑁆𑀧𑁂𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸’’𑀢𑀺. 𑀧𑀼𑀭𑀺𑀫𑀢𑀡𑁆𑀳𑀸𑀢𑀺 𑀬𑁂𑀲𑀁 𑀦𑀺𑀩𑁆𑀩𑀢𑁆𑀢𑀺𑀓𑀸, 𑀢𑀦𑁆𑀦𑀺𑀩𑁆𑀩𑀢𑁆𑀢𑀺𑀢𑁄 𑀧𑀕𑁂𑀯 𑀲𑀺𑀤𑁆𑀥𑀸 𑀢𑀡𑁆𑀳𑀸. 𑀅𑀧𑁆𑀧𑀯𑀢𑁆𑀢𑀺𑀪𑀽𑀢𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀢𑀺 𑀢𑀤𑀼𑀪𑀬𑀁 𑀏𑀢𑁆𑀣𑀸𑀢𑀺 𑀢𑁂𑀲𑀁 𑀅𑀧𑁆𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀁. 𑀬𑀤𑀺 ‘‘𑀲𑀓𑁆𑀓𑀸𑀬𑁄 𑀅𑀦𑁆𑀢𑁄’’𑀢𑀺𑀆𑀤𑀺𑀦𑀸 𑀅𑀜𑁆𑀜𑀫𑀜𑁆𑀜𑀁 𑀯𑀺𑀪𑀢𑁆𑀢𑀺𑀢𑀸𑀬 𑀤𑀼𑀓𑁆𑀔𑀲𑀘𑁆𑀘𑀸𑀤𑀬𑁄 𑀕𑀳𑀺𑀢𑀸, 𑀅𑀣 𑀓𑀲𑁆𑀫𑀸 𑀫𑀕𑁆𑀕𑁄 𑀦 𑀕𑀳𑀺𑀢𑁄𑀢𑀺 𑀆𑀳 ‘‘𑀫𑀕𑁆𑀕𑁄 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀉𑀧𑀸𑀬𑀢𑁆𑀢𑀸𑀢𑀺 𑀉𑀧𑀸𑀬𑀪𑀸𑀯𑀢𑁄, 𑀲𑀫𑁆𑀧𑀸𑀧𑀓𑀳𑁂𑀢𑀼𑀪𑀸𑀯𑀢𑁄𑀢𑀺 𑀅𑀢𑁆𑀣𑁄.

𑀬𑀤𑀺 𑀧𑀦 𑀳𑁂𑀢𑀼𑀫𑀦𑁆𑀢𑀕𑁆𑀕𑀳𑀡𑁂𑀦𑁂𑀯 𑀳𑁂𑀢𑀼 𑀕𑀳𑀺𑀢𑁄 𑀳𑁄𑀢𑀺, 𑀦𑀦𑀼 𑀏𑀯𑀁 𑀲𑀓𑁆𑀓𑀸𑀬𑀕𑁆𑀕𑀳𑀡𑁂𑀦𑁂𑀯 𑀢𑀲𑁆𑀲 𑀳𑁂𑀢𑀼𑀪𑀽𑀢𑁄 𑀲𑀓𑁆𑀓𑀸𑀬𑀲𑀫𑀼𑀤𑀬𑁄 𑀕𑀳𑀺𑀢𑁄 𑀳𑁄𑀢𑀻𑀢𑀺? 𑀢𑀲𑁆𑀲 𑀕𑀳𑀡𑁂 𑀲𑀗𑁆𑀔𑀢𑀤𑀼𑀓𑁄 𑀯𑀺𑀬, 𑀲𑀧𑁆𑀧𑀘𑁆𑀘𑀬𑀤𑀼𑀓𑁄 𑀯𑀺𑀬 𑀘 𑀤𑀼𑀓𑁄𑀯𑀸𑀬𑀁 𑀆𑀧𑀚𑁆𑀚𑀢𑀺, 𑀦 𑀢𑀺𑀓𑁄. 𑀬𑀣𑀸 𑀧𑀦 𑀲𑀓𑁆𑀓𑀸𑀬𑀁 𑀕𑀳𑁂𑀢𑁆𑀯𑀸 𑀲𑀓𑁆𑀓𑀸𑀬𑀲𑀫𑀼𑀤𑀬𑁄𑀧𑀺 𑀕𑀳𑀺𑀢𑁄, 𑀏𑀯𑀁 𑀲𑀓𑁆𑀓𑀸𑀬𑀦𑀺𑀭𑁄𑀥𑀁 𑀕𑀳𑁂𑀢𑁆𑀯𑀸 𑀲𑀓𑁆𑀓𑀸𑀬𑀦𑀺𑀭𑁄𑀥𑀼𑀧𑀸𑀬𑁄 𑀕𑀬𑁆𑀳𑁂𑀬𑁆𑀬, 𑀏𑀯𑀁 𑀲𑀢𑀺 𑀘𑀢𑀼𑀓𑁆𑀓𑁄 𑀅𑀬𑀁 𑀆𑀧𑀚𑁆𑀚𑁂𑀬𑁆𑀬, 𑀦 𑀢𑀺𑀓𑁄, 𑀢𑀲𑁆𑀫𑀸 𑀳𑁂𑀢𑀼𑀫𑀦𑁆𑀢𑀕𑁆𑀕𑀳𑀡𑁂𑀦 𑀳𑁂𑀢𑀼𑀕𑁆𑀕𑀳𑀡𑀁 𑀦 𑀘𑀺𑀦𑁆𑀢𑁂𑀢𑀩𑁆𑀩𑀁. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀬𑀼𑀢𑁆𑀢𑁄 𑀲𑀺𑀬𑀸 𑁋 𑀇𑀥 𑀲𑀓𑁆𑀓𑀸𑀬𑀲𑀓𑁆𑀓𑀸𑀬𑀲𑀫𑀼𑀤𑀬𑀸 𑀅𑀦𑀸𑀤𑀺𑀓𑀸𑀮𑀺𑀓𑀸, 𑀅𑀲𑀢𑀺 𑀫𑀕𑁆𑀕𑀪𑀸𑀯𑀦𑀸𑀬𑀁 𑀧𑀘𑁆𑀘𑀬𑀸𑀦𑀼𑀧𑀭𑀫𑁂𑀦 𑀅𑀧𑀭𑀺𑀬𑀦𑁆𑀢𑀸 𑀘, 𑀦𑀺𑀩𑁆𑀩𑀸𑀦𑀁 𑀧𑀦 𑀅𑀧𑁆𑀧𑀘𑁆𑀘𑀬𑀢𑁆𑀢𑀸 𑀅𑀢𑁆𑀢𑀦𑁄 𑀦𑀺𑀘𑁆𑀘𑀢𑀸𑀬 𑀏𑀯 𑀲𑀩𑁆𑀩𑀤𑀸𑀪𑀸𑀯𑀻𑀢𑀺 𑀅𑀦𑀸𑀤𑀺𑀓𑀸𑀮𑀺𑀓𑁄, 𑀅𑀧𑀭𑀺𑀬𑀦𑁆𑀢𑁄 𑀘. 𑀇𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀫𑀳𑀸𑀣𑁂𑀭𑁄 𑀇𑀫𑀸𑀬 𑀲𑀪𑀸𑀕𑀢𑀸𑀬 ‘‘𑀢𑀬𑁄 𑀅𑀦𑁆𑀢𑀸’’𑀢𑀺 𑀢𑀺𑀓𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀅𑀭𑀺𑀬𑀫𑀕𑁆𑀕𑁄 𑀧𑀦 𑀓𑀤𑀸𑀘𑀺 𑀓𑀭𑀳𑀘𑀺 𑀮𑀩𑁆𑀪𑀫𑀸𑀦𑁄 𑀦 𑀢𑀣𑀸𑀢𑀺 𑀢𑀲𑁆𑀲 𑀅𑀢𑀺𑀯𑀺𑀬 𑀤𑀼𑀮𑁆𑀮𑀪𑀧𑀸𑀢𑀼𑀪𑀸𑀯𑀢𑀁 𑀤𑀻𑀧𑁂𑀢𑀼𑀁 𑀢𑀺𑀓𑀢𑁄 𑀩𑀳𑀺𑀓𑀢𑁄𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀢𑀦𑁄𑀫𑀢𑀺.

𑀤𑀼𑀓𑁆𑀔𑀢𑀸𑀢𑀺 𑀤𑀼𑀓𑁆𑀔𑀪𑀸𑀯𑁄, 𑀤𑀼𑀓𑁆𑀔𑀁𑀬𑁂𑀯 𑀯𑀸 𑀬𑀣𑀸 𑀤𑁂𑀯𑁄 𑀏𑀯 𑀤𑁂𑀯𑀢𑀸. 𑀤𑀼𑀓𑁆𑀔-𑀲𑀤𑁆𑀤𑁄 𑀘𑀸𑀬𑀁 𑀅𑀤𑀼𑀓𑁆𑀔𑀲𑀪𑀸𑀯𑁂𑀲𑀼𑀧𑀺 𑀲𑀼𑀔𑀼𑀧𑁂𑀓𑁆𑀔𑀸𑀲𑀼 𑀓𑀜𑁆𑀘𑀺 𑀅𑀦𑀺𑀝𑁆𑀞𑀢𑀸𑀯𑀺𑀲𑁂𑀲𑀁 𑀉𑀧𑀸𑀤𑀸𑀬 𑀧𑀯𑀢𑁆𑀢𑀢𑀻𑀢𑀺 𑀢𑀢𑁄 𑀦𑀺𑀯𑀢𑁆𑀢𑁂𑀦𑁆𑀢𑁄 𑀲𑀪𑀸𑀯𑀤𑀼𑀓𑁆𑀔𑀯𑀸𑀘𑀺𑀦𑀸 𑀏𑀓𑁂𑀦 𑀤𑀼𑀓𑁆𑀔-𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 ‘‘𑀤𑀼𑀓𑁆𑀔𑀤𑀼𑀓𑁆𑀔𑀢𑀸’’𑀢𑀺 𑀆𑀳. 𑀪𑀯𑀢𑀺 𑀳𑀺 𑀏𑀓𑀦𑁆𑀢𑀢𑁄 𑀢𑀁𑀲𑀪𑀸𑀯𑁂𑀧𑀺 𑀅𑀢𑁆𑀣𑁂 𑀅𑀜𑁆𑀜𑀲𑁆𑀲 𑀥𑀫𑁆𑀫𑀲𑁆𑀲 𑀬𑁂𑀦 𑀓𑁂𑀦𑀘𑀺 𑀲𑀤𑀺𑀲𑀢𑀸𑀮𑁂𑀲𑁂𑀦 𑀩𑁆𑀬𑀪𑀺𑀘𑀸𑀭𑀸𑀲𑀗𑁆𑀓𑀸𑀢𑀺 𑀯𑀺𑀲𑁂𑀲𑀺𑀢𑀩𑁆𑀩𑀢𑀸 𑀬𑀣𑀸 ‘‘𑀭𑀽𑀧𑀭𑀽𑀧𑀁 𑀢𑀺𑀮𑀢𑁂𑀮’’𑀦𑁆𑀢𑀺 (𑀯𑀺𑀪. 𑀅𑀝𑁆𑀞. 𑀧𑀓𑀺𑀡𑁆𑀡𑀓𑀣𑀸) 𑀘. 𑀲𑀗𑁆𑀔𑀸𑀭𑀪𑀸𑀯𑁂𑀦𑀸𑀢𑀺 𑀲𑀗𑁆𑀔𑀢𑀪𑀸𑀯𑁂𑀦. 𑀧𑀘𑁆𑀘𑀬𑁂𑀳𑀺 𑀲𑀗𑁆𑀔𑀭𑀻𑀬𑀦𑁆𑀢𑀻𑀢𑀺 𑀲𑀗𑁆𑀔𑀸𑀭𑀸, 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀸. 𑀲𑀗𑁆𑀔𑀭𑀺𑀬𑀫𑀸𑀦𑀢𑁆𑀢𑀸 𑀏𑀯 𑀳𑀺 𑀅𑀲𑀸𑀭𑀓𑀢𑀸𑀬 𑀧𑀭𑀺𑀤𑀼𑀩𑁆𑀩𑀮𑀪𑀸𑀯𑁂𑀦 𑀪𑀗𑁆𑀕𑀪𑀗𑁆𑀕𑀸𑀪𑀺𑀫𑀼𑀔𑀓𑁆𑀔𑀡𑁂𑀲𑀼 𑀯𑀺𑀬 𑀅𑀢𑁆𑀢𑀮𑀸𑀪𑀓𑁆𑀔𑀡𑁂𑀧𑀺 𑀯𑀺𑀩𑀸𑀥𑀧𑁆𑀧𑀢𑁆𑀢𑀸 𑀏𑀯 𑀳𑀼𑀢𑁆𑀯𑀸 𑀲𑀗𑁆𑀔𑀸𑀭𑀸 𑀧𑀯𑀢𑁆𑀢𑀦𑁆𑀢𑀻𑀢𑀺 𑀆𑀳 ‘‘𑀲𑀗𑁆𑀔𑀢𑀢𑁆𑀢𑀸 𑀉𑀧𑁆𑀧𑀸𑀤𑀚𑀭𑀸𑀪𑀗𑁆𑀕𑀧𑀻𑀴𑀺𑀢𑀸’’𑀢𑀺. 𑀢𑀲𑁆𑀫𑀸𑀢𑀺 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑀢𑁄. 𑀅𑀜𑁆𑀜𑀤𑀼𑀓𑁆𑀔𑀲𑀪𑀸𑀯𑀯𑀺𑀭𑀳𑀢𑁄𑀢𑀺 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸𑀲𑀗𑁆𑀔𑀸𑀢𑀲𑁆𑀲 𑀅𑀜𑁆𑀜𑀲𑁆𑀲 𑀤𑀼𑀓𑁆𑀔𑀲𑀪𑀸𑀯𑀲𑁆𑀲 𑀅𑀪𑀸𑀯𑀢𑁄. 𑀯𑀺𑀧𑀭𑀺𑀡𑀸𑀫𑁂𑀢𑀺 𑀧𑀭𑀺𑀡𑀸𑀫𑁂, 𑀯𑀺𑀕𑀫𑁂𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 𑀧𑀧𑀜𑁆𑀘𑀲𑀽𑀤𑀦𑀺𑀬𑀁 ‘‘𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀸𑀢𑀺 𑀦𑀢𑁆𑀣𑀺𑀪𑀸𑀯𑁄 𑀤𑀼𑀓𑁆𑀔’’𑀦𑁆𑀢𑀺. 𑀅𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀓𑀸𑀦𑀜𑁆𑀳𑀺 𑀲𑀼𑀔𑀯𑁂𑀤𑀦𑀼𑀧𑀭𑀫𑁄 𑀤𑀼𑀓𑁆𑀔𑀢𑁄 𑀉𑀧𑀝𑁆𑀞𑀸𑀢𑀺, 𑀲𑁆𑀯𑀸𑀬𑀫𑀢𑁆𑀣𑁄 𑀧𑀺𑀬𑀯𑀺𑀧𑁆𑀧𑀬𑁄𑀕𑁂𑀦 𑀤𑀻𑀧𑁂𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀲𑀼𑀔𑀲𑁆𑀲 𑀳𑀻’’𑀢𑀺𑀆𑀤𑀺. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁄 𑀧𑀤𑁂𑀲𑀦𑀺𑀲𑁆𑀲𑀺𑀢𑁄 𑀯𑁂𑀤𑀦𑀸𑀯𑀺𑀲𑁂𑀲𑀫𑀢𑁆𑀢𑀯𑀺𑀲𑀬𑀢𑁆𑀢𑀸𑀢𑀺 𑀅𑀦𑀯𑀲𑁂𑀲𑀢𑁄 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺 𑀤𑀼𑀢𑀺𑀬𑀦𑀬𑁄 𑀯𑀼𑀢𑁆𑀢𑁄. 𑀦𑀦𑀼 𑀘 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺 (𑀥. 𑀧. 𑁨𑁭𑁮) 𑀯𑀘𑀦𑀢𑁄 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸𑀦𑀫𑁆𑀧𑀺 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸 𑀆𑀧𑀦𑁆𑀦𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀲𑀸 𑀧𑀦 𑀲𑀸𑀫𑀜𑁆𑀜𑀚𑁄𑀢𑀦𑀸𑀅𑀧𑀯𑀸𑀤𑀪𑀽𑀢𑁂𑀦 𑀇𑀢𑀭𑀤𑀼𑀓𑁆𑀔𑀢𑀸𑀯𑀘𑀦𑁂𑀦 𑀦𑀺𑀯𑀢𑁆𑀢𑀻𑀬𑀢𑀻𑀢𑀺 𑀦𑀸𑀬𑀁 𑀯𑀺𑀭𑁄𑀥𑁄. 𑀢𑁂𑀦𑁂𑀯𑀸𑀳 ‘‘𑀞𑀧𑁂𑀢𑁆𑀯𑀸 𑀤𑀼𑀓𑁆𑀔𑀯𑁂𑀤𑀦𑀁 𑀲𑀼𑀔𑀯𑁂𑀤𑀦𑀜𑁆𑀘𑀸’’𑀢𑀺.

𑀫𑀺𑀘𑁆𑀙𑀸𑀲𑀪𑀸𑀯𑁄𑀢𑀺 ‘‘𑀳𑀺𑀢𑀲𑀼𑀔𑀸𑀯𑀳𑁄 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀆𑀲𑀻𑀲𑀺𑀢𑁄𑀧𑀺 𑀢𑀣𑀸 𑀅𑀪𑀸𑀯𑀢𑁄, 𑀅𑀲𑀼𑀪𑀸𑀤𑀻𑀲𑀼𑀬𑁂𑀯 ‘‘𑀲𑀼𑀪’’𑀦𑁆𑀢𑀺𑀆𑀤𑀺𑀯𑀺𑀧𑀭𑀻𑀢𑀧𑁆𑀧𑀯𑀢𑁆𑀢𑀺𑀢𑁄 𑀘 𑀫𑀺𑀘𑁆𑀙𑀸𑀲𑀪𑀸𑀯𑁄, 𑀫𑀼𑀲𑀸𑀲𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀫𑀸𑀢𑀼𑀖𑀸𑀢𑀓𑀸𑀤𑀻𑀲𑀼 𑀧𑀯𑀢𑁆𑀢𑀫𑀸𑀦𑀸𑀧𑀺 𑀳𑀺 𑀳𑀺𑀢𑀲𑀼𑀔𑀁 𑀇𑀘𑁆𑀙𑀦𑁆𑀢𑀸𑀯 𑀧𑀯𑀢𑁆𑀢𑀦𑁆𑀢𑀻𑀢𑀺 𑀢𑁂 𑀥𑀫𑁆𑀫𑀸 ‘‘𑀳𑀺𑀢𑀲𑀼𑀔𑀸𑀯𑀳𑀸 𑀫𑁂 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀆𑀲𑀻𑀲𑀺𑀢𑀸 𑀳𑁄𑀦𑁆𑀢𑀺. 𑀢𑀣𑀸 𑀅𑀲𑀼𑀪𑀸𑀲𑀼𑀔𑀸𑀦𑀺𑀘𑁆𑀘𑀸𑀦𑀢𑁆𑀢𑁂𑀲𑀼 𑀲𑀼𑀪𑀸𑀤𑀺𑀯𑀺𑀧𑀭𑀺𑀬𑀸𑀲𑀤𑀴𑁆𑀳𑀢𑀸𑀬 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀲𑀼 𑀧𑀯𑀢𑁆𑀢𑀺 𑀳𑁄𑀢𑀻𑀢𑀺 𑀢𑁂 𑀥𑀫𑁆𑀫𑀸 𑀅𑀲𑀼𑀪𑀸𑀤𑀻𑀲𑀼 𑀲𑀼𑀪𑀸𑀤𑀺𑀯𑀺𑀧𑀭𑀻𑀢𑀧𑁆𑀧𑀯𑀢𑁆𑀢𑀺𑀓𑀸 𑀳𑁄𑀦𑁆𑀢𑀺. 𑀯𑀺𑀧𑀸𑀓𑀤𑀸𑀦𑁂 𑀲𑀢𑀺 𑀔𑀦𑁆𑀥𑀪𑁂𑀤𑀸𑀦𑀦𑁆𑀢𑀭𑀫𑁂𑀯 𑀯𑀺𑀧𑀸𑀓𑀤𑀸𑀦𑀢𑁄 𑀦𑀺𑀬𑀢𑁄, 𑀫𑀺𑀘𑁆𑀙𑀢𑁆𑀢𑁄 𑀘 𑀲𑁄 𑀦𑀺𑀬𑀢𑁄 𑀘𑀸𑀢𑀺 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁄. 𑀅𑀦𑁂𑀓𑁂𑀲𑀼 𑀆𑀦𑀦𑁆𑀢𑀭𑀺𑀬𑁂𑀲𑀼 𑀓𑀢𑁂𑀲𑀼 𑀬𑀁 𑀢𑀢𑁆𑀣 𑀩𑀮𑀯𑀁, 𑀢𑀁 𑀯𑀺𑀧𑀘𑁆𑀘𑀢𑀺, 𑀦 𑀇𑀢𑀭𑀸𑀦𑀻𑀢𑀺 𑀏𑀓𑀦𑁆𑀢𑀯𑀺𑀧𑀸𑀓𑀚𑀦𑀓𑀢𑀸𑀬 𑀦𑀺𑀬𑀢𑀢𑀸 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 ‘‘𑀯𑀺𑀧𑀸𑀓𑀤𑀸𑀦𑁂 𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀔𑀦𑁆𑀥𑀪𑁂𑀤𑀸𑀦𑀦𑁆𑀢𑀭𑀦𑁆𑀢𑀺 𑀘𑀼𑀢𑀺𑀅𑀦𑀦𑁆𑀢𑀭𑀦𑁆𑀢𑀺 𑀅𑀢𑁆𑀣𑁄. 𑀘𑀼𑀢𑀺 𑀳𑀺 𑀫𑀭𑀡𑀦𑀺𑀤𑁆𑀤𑁂𑀲𑁂 ‘‘𑀔𑀦𑁆𑀥𑀸𑀦𑀁 𑀪𑁂𑀤𑁄’’𑀢𑀺 (𑀤𑀻. 𑀦𑀺. 𑁨.𑁩𑁯𑁦; 𑀫. 𑀦𑀺. 𑁧.𑁧𑁨𑁩; 𑁩.𑁩𑁭𑁩; 𑀯𑀺𑀪. 𑁧𑁯𑁩) 𑀯𑀼𑀢𑁆𑀢𑀸, 𑀏𑀢𑁂𑀦 𑀯𑀘𑀦𑁂𑀦 𑀲𑀢𑀺 𑀨𑀮𑀤𑀸𑀦𑁂 𑀘𑀼𑀢𑀺𑀅𑀦𑀦𑁆𑀢𑀭𑁄 𑀏𑀯 𑀏𑀢𑁂𑀲𑀁 𑀨𑀮𑀓𑀸𑀮𑁄, 𑀦 𑀅𑀜𑁆𑀜𑁄𑀢𑀺 𑀨𑀮𑀓𑀸𑀮𑀦𑀺𑀬𑀫𑁂𑀦 𑀦𑀺𑀬𑀢𑀢𑀸 𑀯𑀼𑀢𑁆𑀢𑀸 𑀳𑁄𑀢𑀺, 𑀦 𑀨𑀮𑀤𑀸𑀦𑀦𑀺𑀬𑀫𑁂𑀦𑀸𑀢𑀺 𑀦𑀺𑀬𑀢𑀨𑀮𑀓𑀸𑀮𑀸𑀦𑀁 𑀅𑀜𑁆𑀜𑁂𑀲𑀫𑁆𑀧𑀺 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀸𑀦𑀁, 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸𑀦𑀫𑁆𑀧𑀺 𑀦𑀺𑀬𑀢𑀢𑀸 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀦𑁆𑀢𑀭𑀯𑀺𑀓𑀮𑀢𑀸𑀤𑀻𑀳𑀺 𑀅𑀯𑀺𑀧𑀘𑁆𑀘𑀫𑀸𑀦𑀸𑀦𑀫𑁆𑀧𑀺 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀯𑀺𑀧𑀸𑀓𑀥𑀫𑁆𑀫𑀢𑀸 𑀯𑀺𑀬 𑀩𑀮𑀯𑀢𑀸 𑀆𑀦𑀦𑁆𑀢𑀭𑀺𑀬𑁂𑀦 𑀯𑀺𑀧𑀸𑀓𑁂 𑀤𑀺𑀦𑁆𑀦𑁂 𑀅𑀯𑀺𑀧𑀘𑁆𑀘𑀫𑀸𑀦𑀸𑀦𑀫𑁆𑀧𑀺 𑀆𑀦𑀦𑁆𑀢𑀭𑀺𑀬𑀸𑀦𑀁 𑀨𑀮𑀤𑀸𑀦𑁂 𑀦𑀺𑀬𑀢𑀲𑀪𑀸𑀯𑀸, 𑀆𑀦𑀦𑁆𑀢𑀭𑀺𑀬𑀲𑀪𑀸𑀯𑀸 𑀘 𑀧𑀯𑀢𑁆𑀢𑀻𑀢𑀺 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀨𑀮𑀤𑀸𑀦𑀦𑀺𑀬𑀫𑁂𑀦𑁂𑀯 𑀦𑀺𑀬𑀢𑀢𑀸, 𑀆𑀦𑀦𑁆𑀢𑀭𑀺𑀬𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀅𑀯𑀲𑁆𑀲𑀜𑁆𑀘 𑀦𑀺𑀬𑀢𑀲𑀪𑀸𑀯𑀸, 𑀆𑀦𑀦𑁆𑀢𑀭𑀺𑀬𑀲𑀪𑀸𑀯𑀸 𑀘 𑀢𑁂𑀲𑀁 𑀧𑀯𑀢𑁆𑀢𑀻𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀫𑁂𑀢𑀁 𑀅𑀜𑁆𑀜𑀲𑁆𑀲 𑀩𑀮𑀯𑀢𑁄 𑀆𑀦𑀦𑁆𑀢𑀭𑀺𑀬𑀲𑁆𑀲 𑀅𑀪𑀸𑀯𑁂 𑀘𑀼𑀢𑀺𑀅𑀦𑀦𑁆𑀢𑀭𑀁 𑀏𑀓𑀦𑁆𑀢𑁂𑀦 𑀨𑀮𑀤𑀸𑀦𑀢𑁄.

𑀦𑀦𑀼 𑀏𑀯𑀁 𑀅𑀜𑁆𑀜𑁂𑀲𑀫𑁆𑀧𑀺 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀸𑀦𑀁 𑀅𑀜𑁆𑀜𑀲𑁆𑀫𑀺𑀁 𑀯𑀺𑀧𑀸𑀓𑀤𑀸𑀬𑀓𑁂 𑀅𑀲𑀢𑀺 𑀘𑀼𑀢𑀺𑀅𑀦𑀦𑁆𑀢𑀭𑀫𑁂𑀯 𑀏𑀓𑀦𑁆𑀢𑁂𑀦 𑀨𑀮𑀤𑀸𑀦𑀢𑁄 𑀆𑀦𑀦𑁆𑀢𑀭𑀺𑀬𑀲𑀪𑀸𑀯𑀸, 𑀦𑀺𑀬𑀢𑀲𑀪𑀸𑀯𑀸 𑀘 𑀧𑀯𑀢𑁆𑀢𑀺 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺 𑀅𑀲𑀫𑀸𑀦𑀚𑀸𑀢𑀺𑀓𑁂𑀦 𑀘𑁂𑀢𑁄𑀧𑀡𑀺𑀥𑀺𑀯𑀲𑁂𑀦, 𑀉𑀧𑀖𑀸𑀢𑀓𑁂𑀦 𑀘 𑀦𑀺𑀯𑀢𑁆𑀢𑁂𑀢𑀩𑁆𑀩𑀯𑀺𑀧𑀸𑀓𑀢𑁆𑀢𑀸 𑀅𑀦𑀦𑁆𑀢𑀭𑁂𑀓𑀦𑁆𑀢𑀨𑀮𑀤𑀸𑀬𑀓𑀢𑁆𑀢𑀸𑀪𑀸𑀯𑀸, 𑀦 𑀧𑀦 𑀆𑀦𑀦𑁆𑀢𑀭𑀺𑀬𑀸𑀦𑀁 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀺 𑀯𑀺𑀬 𑀅𑀲𑀫𑀸𑀦𑀚𑀸𑀢𑀺𑀓𑀁 𑀨𑀮𑀦𑀺𑀯𑀢𑁆𑀢𑀓𑀁 𑀅𑀢𑁆𑀣𑀺 𑀲𑀩𑁆𑀩𑀸𑀦𑀦𑁆𑀢𑀭𑀺𑀬𑀸𑀦𑀁 𑀅𑀯𑀻𑀘𑀺𑀨𑀮𑀢𑁆𑀢𑀸, 𑀦 𑀘 𑀳𑁂𑀝𑁆𑀞𑀽𑀧𑀧𑀢𑁆𑀢𑀺𑀁 𑀇𑀘𑁆𑀙𑀢𑁄 𑀲𑀻𑀮𑀯𑀢𑁄 𑀘𑁂𑀢𑁄𑀧𑀡𑀺𑀥𑀺 𑀯𑀺𑀬 𑀉𑀧𑀭𑀽𑀧𑀧𑀢𑁆𑀢𑀺𑀚𑀦𑀓𑀓𑀫𑁆𑀫𑀩𑀮𑀁 𑀆𑀦𑀦𑁆𑀢𑀭𑀺𑀬𑀩𑀮𑀁 𑀦𑀺𑀯𑀢𑁆𑀢𑁂𑀢𑀼𑀁 𑀲𑀫𑀢𑁆𑀣𑁄 𑀘𑁂𑀢𑁄𑀧𑀡𑀺𑀥𑀺 𑀅𑀢𑁆𑀣𑀺 𑀅𑀦𑀺𑀘𑁆𑀙𑀦𑁆𑀢𑀲𑁆𑀲𑁂𑀯 𑀅𑀯𑀻𑀘𑀺𑀧𑀸𑀢𑀦𑀢𑁄, 𑀦 𑀘 𑀆𑀦𑀦𑁆𑀢𑀭𑀺𑀬𑀼𑀧𑀖𑀸𑀢𑀓𑀁 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀅𑀢𑁆𑀣𑀺. 𑀢𑀲𑁆𑀫𑀸 𑀢𑁂𑀲𑀁𑀬𑁂𑀯 𑀅𑀦𑀦𑁆𑀢𑀭𑁂𑀓𑀦𑁆𑀢𑀯𑀺𑀧𑀸𑀓𑀚𑀦𑀓𑀲𑀪𑀸𑀯𑀸 𑀧𑀯𑀢𑁆𑀢𑀻𑀢𑀺. 𑀅𑀦𑁂𑀓𑀸𑀦𑀺 𑀘 𑀆𑀦𑀦𑁆𑀢𑀭𑀺𑀬𑀸𑀦𑀺 𑀓𑀢𑀸𑀦𑀺 𑀏𑀓𑀦𑁆𑀢𑁂 𑀯𑀺𑀧𑀸𑀓𑁂 𑀦𑀺𑀬𑀢𑀢𑁆𑀢𑀸 𑀉𑀧𑀭𑀢𑀸𑀯𑀺𑀧𑀘𑁆𑀘𑀦𑀲𑀪𑀸𑀯𑀸𑀲𑀗𑁆𑀓𑀢𑁆𑀢𑀸 𑀦𑀺𑀘𑁆𑀙𑀺𑀢𑀸𑀦𑀺 𑀲𑀪𑀸𑀯𑀢𑁄 𑀦𑀺𑀬𑀢𑀸𑀦𑁂𑀯. 𑀘𑀼𑀢𑀺𑀅𑀦𑀦𑁆𑀢𑀭𑀁 𑀧𑀦 𑀨𑀮𑀁 𑀅𑀦𑀦𑁆𑀢𑀭𑀁 𑀦𑀸𑀫, 𑀢𑀲𑁆𑀫𑀺𑀁 𑀅𑀦𑀦𑁆𑀢𑀭𑁂 𑀦𑀺𑀬𑀼𑀢𑁆𑀢𑀸𑀦𑀺, 𑀢𑀦𑁆𑀦𑀺𑀩𑁆𑀩𑀢𑁆𑀢𑀦𑁂𑀦 𑀅𑀦𑀦𑁆𑀢𑀭𑀓𑀭𑀡𑀲𑀻𑀮𑀸𑀦𑀺 𑀅𑀦𑀦𑁆𑀢𑀭𑀧𑀬𑁄𑀚𑀦𑀸𑀦𑀺 𑀘𑀸𑀢𑀺 𑀲𑀪𑀸𑀯𑀢𑁄 𑀆𑀦𑀦𑁆𑀢𑀭𑀺𑀬𑀸𑀦𑁂𑀯 𑀘 𑀳𑁄𑀦𑁆𑀢𑀺. 𑀢𑁂𑀲𑀼 𑀧𑀦 𑀲𑀫𑀸𑀦𑀲𑀪𑀸𑀯𑁂𑀲𑀼 𑀏𑀓𑁂𑀦 𑀯𑀺𑀧𑀸𑀓𑁂 𑀤𑀺𑀦𑁆𑀦𑁂 𑀇𑀢𑀭𑀸𑀦𑀺 𑀅𑀢𑁆𑀢𑀦𑀸 𑀓𑀸𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀢𑁂𑀦𑁂𑀯 𑀓𑀢𑀢𑁆𑀢𑀸 𑀦 𑀤𑀼𑀢𑀺𑀬𑀁 𑀢𑀢𑀺𑀬𑀜𑁆𑀘 𑀧𑀝𑀺𑀲𑀦𑁆𑀥𑀺𑀁 𑀓𑀭𑁄𑀦𑁆𑀢𑀺, 𑀦 𑀲𑀫𑀢𑁆𑀣𑀢𑀸𑀯𑀺𑀖𑀸𑀢𑀢𑁆𑀢𑀸𑀢𑀺 𑀦𑀢𑁆𑀣𑀺 𑀢𑁂𑀲𑀁 𑀦𑀺𑀬𑀢𑀸𑀦𑀦𑁆𑀢𑀭𑀺𑀬𑀢𑀸𑀦𑀺𑀯𑀢𑁆𑀢𑀻𑀢𑀺. 𑀦 𑀳𑀺 𑀲𑀫𑀸𑀦𑀲𑀪𑀸𑀯𑀁 𑀲𑀫𑀸𑀦𑀲𑀪𑀸𑀯𑀲𑁆𑀲 𑀲𑀫𑀢𑁆𑀣𑀢𑀁 𑀯𑀺𑀳𑀦𑀢𑀻𑀢𑀺. 𑀏𑀓𑀲𑁆𑀲 𑀧𑀦 𑀅𑀜𑁆𑀜𑀸𑀦𑀺𑀧𑀺 𑀉𑀧𑀢𑁆𑀣𑀫𑁆𑀪𑀓𑀸𑀦𑀺 𑀳𑁄𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀻𑀢𑀺. 𑀲𑀫𑁆𑀫𑀸𑀲𑀪𑀸𑀯𑁂𑀢𑀺 𑀲𑀘𑁆𑀘𑀲𑀪𑀸𑀯𑁂. 𑀦𑀺𑀬𑀢𑁄 𑀏𑀓𑀦𑁆𑀢𑀺𑀓𑁄 𑀅𑀦𑀦𑁆𑀢𑀭𑀫𑁂𑀯 𑀨𑀮𑀤𑀸𑀦𑁂𑀦𑀸𑀢𑀺 𑀲𑀫𑁆𑀫𑀢𑁆𑀢𑀦𑀺𑀬𑀫𑀢𑁄.𑀦 𑀦𑀺𑀬𑀢𑁄𑀢𑀺 𑀉𑀪𑀬𑀣𑀸𑀧𑀺 𑀦 𑀦𑀺𑀬𑀢𑁄. 𑀅𑀯𑀲𑁂𑀲𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀓𑀺𑀮𑁂𑀲𑀸𑀦𑀦𑁆𑀢𑀭𑀺𑀬𑀓𑀫𑁆𑀫𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑁂𑀳𑀺 𑀅𑀜𑁆𑀜𑁂𑀲𑀁 𑀥𑀫𑁆𑀫𑀸𑀦𑀁.

𑀢𑀫𑀦𑁆𑀥𑀓𑀸𑀭𑁄𑀢𑀺 𑀢𑀫𑁄 𑀅𑀦𑁆𑀥𑀓𑀸𑀭𑁄𑀢𑀺 𑀧𑀤𑀯𑀺𑀪𑀸𑀕𑁄. 𑀅𑀯𑀺𑀚𑁆𑀚𑀸 𑀢𑀫𑁄 𑀦𑀸𑀫 𑀆𑀭𑀫𑁆𑀫𑀡𑀲𑁆𑀲 𑀙𑀸𑀤𑀦𑀝𑁆𑀞𑁂𑀦. 𑀢𑁂𑀦𑁂𑀯𑀸𑀳 ‘‘𑀢𑀫𑁄 𑀯𑀺𑀳𑀢𑁄, 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄 (𑀫. 𑀦𑀺. 𑁧.𑁩𑁮𑁫; 𑀧𑀸𑀭𑀸. 𑁧𑁨), 𑀢𑀫𑁄𑀓𑁆𑀔𑀦𑁆𑀥𑁄 𑀧𑀤𑀸𑀮𑀺𑀢𑁄’’𑀢𑀺 (𑀲𑀁. 𑀦𑀺. 𑁧.𑁧𑁬𑁪) 𑀘 𑀆𑀤𑀺. 𑀅𑀯𑀺𑀚𑁆𑀚𑀸𑀲𑀻𑀲𑁂𑀦 𑀯𑀺𑀘𑀺𑀓𑀺𑀘𑁆𑀙𑀸 𑀯𑀼𑀢𑁆𑀢𑀸 𑀫𑀳𑀢𑀸 𑀲𑀫𑁆𑀫𑁄𑀳𑁂𑀦 𑀲𑀩𑁆𑀩𑀓𑀸𑀮𑀁 𑀅𑀯𑀺𑀬𑀼𑀚𑁆𑀚𑀦𑀢𑁄. 𑀆𑀕𑀫𑁆𑀫𑀸𑀢𑀺 𑀧𑀢𑁆𑀯𑀸. 𑀓𑀗𑁆𑀔𑀢𑀻𑀢𑀺 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀁 𑀅𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦) 𑀓𑀗𑁆𑀔𑀁 𑀉𑀧𑁆𑀧𑀸𑀤𑁂𑀢𑀺 𑀲𑀁𑀲𑀬𑀁 𑀆𑀧𑀚𑁆𑀚𑀢𑀺. 𑀅𑀥𑀺𑀫𑀼𑀘𑁆𑀘𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀧𑀲𑀸𑀤𑀸𑀥𑀺𑀫𑁄𑀓𑁆𑀔𑀯𑀲𑁂𑀦 𑀅𑀥𑀺𑀫𑀼𑀘𑁆𑀘𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑁂𑀦𑀸𑀳 ‘‘𑀦 𑀲𑀫𑁆𑀧𑀲𑀻𑀤𑀢𑀻’’𑀢𑀺. 𑀬𑀸𑀯𑀢𑁆𑀢𑀓𑀜𑁆𑀳𑀺 𑀬𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀯𑀺𑀘𑀺𑀓𑀺𑀘𑁆𑀙𑀸 𑀦 𑀯𑀺𑀕𑀘𑁆𑀙𑀢𑀺, 𑀢𑀸𑀯 𑀢𑀢𑁆𑀣 𑀲𑀤𑁆𑀥𑀸𑀥𑀺𑀫𑁄𑀓𑁆𑀔𑁄 𑀅𑀦𑀯𑀲𑀭𑁄𑀯. 𑀦 𑀓𑁂𑀯𑀮𑀁 𑀲𑀤𑁆𑀥𑀸𑀥𑀺𑀫𑁄𑀓𑁆𑀔𑁄, 𑀦𑀺𑀘𑁆𑀙𑀬𑀸𑀥𑀺𑀫𑁄𑀓𑁆𑀔𑁄𑀧𑀺 𑀢𑀢𑁆𑀣 𑀦 𑀧𑀢𑀺𑀝𑁆𑀞𑀳𑀢𑀺 𑀏𑀯.

𑀦 𑀭𑀓𑁆𑀔𑀺𑀢𑀩𑁆𑀩𑀸𑀦𑀻𑀢𑀺 ‘‘𑀇𑀫𑀸𑀦𑀺 𑀫𑀬𑀸 𑀭𑀓𑁆𑀔𑀺𑀢𑀩𑁆𑀩𑀸𑀦𑀻’’𑀢𑀺 𑀏𑀯𑀁 𑀓𑀢𑁆𑀣𑀘𑀺 𑀭𑀓𑁆𑀔𑀸𑀓𑀺𑀘𑁆𑀘𑀁 𑀦𑀢𑁆𑀣𑀺 𑀧𑀭𑀢𑁄 𑀭𑀓𑁆𑀔𑀺𑀢𑀩𑁆𑀩𑀲𑁆𑀲𑁂𑀯 𑀅𑀪𑀸𑀯𑀢𑁄. 𑀲𑀢𑀺𑀬𑀸 𑀏𑀯 𑀭𑀓𑁆𑀔𑀺𑀢𑀸𑀦𑀻𑀢𑀺 𑀫𑀼𑀝𑁆𑀞𑀲𑁆𑀲𑀘𑁆𑀘𑀲𑁆𑀲 𑀩𑁄𑀥𑀺𑀫𑀽𑀮𑁂 𑀏𑀯 𑀲𑀯𑀸𑀲𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀲𑀢𑀺𑀬𑀸 𑀭𑀓𑁆𑀔𑀺𑀢𑀩𑁆𑀩𑀸𑀦𑀺 𑀦𑀸𑀫 𑀲𑀩𑁆𑀩𑀤𑀸𑀧𑀺 𑀭𑀓𑁆𑀔𑀺𑀢𑀸𑀦𑀺 𑀏𑀯. 𑀦𑀢𑁆𑀣𑀺 𑀢𑀣𑀸𑀕𑀢𑀲𑁆𑀲 𑀓𑀸𑀬𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀢𑀣𑀸𑀕𑀢𑀲𑁆𑀲 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀦𑀸𑀫 𑀦𑀢𑁆𑀣𑁂𑀯, 𑀬𑀢𑁄 𑀲𑀼𑀧𑀭𑀺𑀲𑀼𑀤𑁆𑀥𑁄 𑀓𑀸𑀬𑀲𑀫𑀸𑀘𑀸𑀭𑁄 𑀪𑀕𑀯𑀢𑁄. 𑀦𑁄 𑀅𑀧𑀭𑀺𑀲𑀼𑀤𑁆𑀥𑀸, 𑀧𑀭𑀺𑀲𑀼𑀤𑁆𑀥𑀸 𑀏𑀯 𑀅𑀧𑀭𑀺𑀲𑀼𑀤𑁆𑀥𑀺𑀳𑁂𑀢𑀽𑀦𑀁 𑀓𑀺𑀮𑁂𑀲𑀸𑀦𑀁 𑀧𑀳𑀻𑀦𑀢𑁆𑀢𑀸. 𑀢𑀣𑀸𑀧𑀺 𑀯𑀺𑀦𑀬𑁂 𑀅𑀧𑀓𑀢𑀜𑁆𑀜𑀼𑀢𑀸𑀯𑀲𑁂𑀦 𑀲𑀺𑀬𑀸 𑀢𑁂𑀲𑀁 𑀅𑀧𑀸𑀭𑀺𑀲𑀼𑀤𑁆𑀥𑀺𑀮𑁂𑀲𑁄, 𑀦 𑀪𑀕𑀯𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀺𑀳𑀸𑀭𑀓𑀸𑀭𑀁 𑀆𑀧𑀢𑁆𑀢𑀺𑀦𑁆𑀢𑀺 𑀏𑀓𑀯𑀘𑀦𑀯𑀲𑁂𑀦 ‘‘𑀆𑀧𑀢𑁆𑀢𑀺𑀬𑁄’’𑀢𑀺 𑀏𑀢𑁆𑀣 𑀆𑀧𑀢𑁆𑀢𑀺-𑀲𑀤𑁆𑀤𑀁 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀅𑀪𑀺𑀥𑁂𑀬𑁆𑀬𑀸𑀦𑀼𑀭𑀽𑀧𑀜𑁆𑀳𑀺 𑀮𑀺𑀗𑁆𑀕𑀯𑀘𑀦𑀸𑀦𑀺 𑀳𑁄𑀦𑁆𑀢𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. ‘‘𑀫𑀦𑁄𑀤𑁆𑀯𑀸𑀭𑁂’’𑀢𑀺 𑀇𑀤𑀁 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀅𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀢𑀸𑀬 𑀯𑀼𑀢𑁆𑀢𑀁. 𑀦 𑀳𑀺 𑀫𑀦𑁄𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀸 𑀆𑀧𑀢𑁆𑀢𑀺 𑀅𑀢𑁆𑀣𑀻𑀢𑀺. 𑀲𑀉𑀧𑀸𑀭𑀫𑁆𑀪𑀯𑀲𑁂𑀦𑀸𑀢𑀺 𑀲𑀯𑀢𑁆𑀢𑀩𑁆𑀩𑀢𑀸𑀯𑀲𑁂𑀦, 𑀦 𑀧𑀦 𑀤𑀼𑀘𑁆𑀘𑀭𑀺𑀢𑀮𑀓𑁆𑀔𑀡𑀸𑀧𑀢𑁆𑀢𑀺𑀯𑀲𑁂𑀦, 𑀬𑀢𑁄 𑀦𑀁 𑀪𑀕𑀯𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀬𑀣𑀸 𑀆𑀬𑀲𑁆𑀫𑀢𑁄 𑀫𑀳𑀸𑀓𑀧𑁆𑀧𑀺𑀦𑀲𑁆𑀲𑀸𑀧𑀺 ‘‘𑀕𑀘𑁆𑀙𑁂𑀬𑁆𑀬𑀁 𑀯𑀸𑀳𑀁 𑀉𑀧𑁄𑀲𑀣𑀁, 𑀦 𑀯𑀸 𑀕𑀘𑁆𑀙𑁂𑀬𑁆𑀬𑀁. 𑀕𑀘𑁆𑀙𑁂𑀬𑁆𑀬𑀁 𑀯𑀸𑀳𑀁 𑀲𑀗𑁆𑀖𑀓𑀫𑁆𑀫𑀁, 𑀦 𑀯𑀸 𑀕𑀘𑁆𑀙𑁂𑀬𑁆𑀬’’𑀦𑁆𑀢𑀺 (𑀫𑀳𑀸𑀯. 𑁧𑁩𑁭) 𑀧𑀭𑀺𑀯𑀺𑀢𑀓𑁆𑀓𑀺𑀢𑀁. 𑀫𑀦𑁄𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀫𑀦𑁄𑀤𑁆𑀯𑀸𑀭𑀺𑀓𑀁 𑀅𑀧𑁆𑀧𑀲𑀢𑁆𑀣𑀁 𑀘𑀭𑀺𑀢𑀁. 𑀲𑀢𑁆𑀣𑀸𑀭𑀸 𑀅𑀧𑁆𑀧𑀲𑀢𑁆𑀣𑀢𑀸𑀬 𑀳𑀺 𑀢𑀁 𑀤𑀼𑀘𑁆𑀘𑀭𑀺𑀢𑀁 𑀦𑀸𑀫 𑀚𑀸𑀢𑀁, 𑀦 𑀲𑀪𑀸𑀯𑀢𑁄.

𑀬𑀲𑁆𑀫𑀸 𑀫𑀳𑀸𑀓𑀸𑀭𑀼𑀡𑀺𑀓𑁄 𑀪𑀕𑀯𑀸 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀳𑀺𑀢𑀲𑀼𑀔𑀸𑀬 𑀏𑀯 𑀧𑀝𑀺𑀧𑀚𑁆𑀚𑀫𑀸𑀦𑁄 𑀅𑀘𑁆𑀘𑀦𑁆𑀢𑀯𑀺𑀯𑁂𑀓𑀚𑁆𑀛𑀸𑀲𑀬𑀢𑀸𑀬 𑀢𑀩𑁆𑀩𑀺𑀥𑀼𑀭𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘‘𑀦 𑀔𑁄 𑀢𑁂…𑀧𑁂… 𑀉𑀧𑁆𑀧𑀸𑀤𑁂𑀢𑀩𑁆𑀩’’𑀦𑁆𑀢𑀺 𑀅𑀯𑁄𑀘, 𑀢𑀲𑁆𑀫𑀸 𑀲𑁄 𑀣𑁂𑀭𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀪𑀕𑀯𑀢𑁄 𑀦 𑀧𑀸𑀲𑀁𑀲𑁄𑀢𑀺 𑀓𑀢𑁆𑀯𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀦𑀸𑀫 𑀚𑀸𑀢𑁄, 𑀢𑀲𑁆𑀲 𑀘 𑀧𑀝𑀺𑀓𑁆𑀔𑁂𑀧𑁄 𑀉𑀧𑀸𑀭𑀫𑁆𑀪𑁄𑀢𑀺 𑀆𑀳 ‘‘𑀢𑀲𑁆𑀫𑀺𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑁂 𑀉𑀧𑀸𑀭𑀫𑁆𑀪𑀁 𑀆𑀭𑁄𑀧𑁂𑀦𑁆𑀢𑁄’’𑀢𑀺. 𑀪𑀕𑀯𑀢𑁄 𑀧𑀦 𑀏𑀢𑁆𑀢𑀓𑀫𑁆𑀧𑀺 𑀦𑀢𑁆𑀣𑀺, 𑀬𑀢𑁄 𑀧𑀯𑀸𑀭𑀡𑀸𑀲𑀼𑀢𑁆𑀢𑁂 ‘‘𑀳𑀦𑁆𑀤 𑀤𑀸𑀦𑀺, 𑀪𑀺𑀓𑁆𑀔𑀯𑁂, 𑀧𑀯𑀸𑀭𑁂𑀫𑀺 𑀯𑁄, 𑀦 𑀘 𑀫𑁂 𑀓𑀺𑀜𑁆𑀘𑀺 𑀕𑀭𑀳𑀣 𑀓𑀸𑀬𑀺𑀓𑀁 𑀯𑀸 𑀯𑀸𑀘𑀲𑀺𑀓𑀁 𑀯𑀸’’𑀢𑀺 (𑀲𑀁. 𑀦𑀺. 𑁧.𑁨𑁧𑁫) 𑀯𑀼𑀢𑁆𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 ‘‘𑀦 𑀔𑁄 𑀫𑀬𑀁 𑀪𑀦𑁆𑀢𑁂 𑀪𑀕𑀯𑀢𑁄 𑀓𑀺𑀜𑁆𑀘𑀺 𑀕𑀭𑀳𑀸𑀫 𑀓𑀸𑀬𑀺𑀓𑀁 𑀯𑀸 𑀯𑀸𑀘𑀲𑀺𑀓𑀁 𑀯𑀸’’𑀢𑀺 𑀲𑀢𑁆𑀣𑀼 𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑀸𑀤𑀺𑀓𑀁 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀺. 𑀅𑀬𑀜𑁆𑀳𑀺 𑀮𑁄𑀓𑀦𑀸𑀣𑀲𑁆𑀲 𑀤𑀼𑀘𑁆𑀘𑀭𑀺𑀢𑀸𑀪𑀸𑀯𑁄 𑀩𑁄𑀥𑀺𑀲𑀢𑁆𑀢𑀪𑀽𑀫𑀺𑀬𑀫𑁆𑀧𑀺 𑀘𑀭𑀺𑀬𑀸𑀘𑀺𑀭𑀸𑀦𑀼𑀕𑀢𑁄 𑀅𑀳𑁄𑀲𑀺, 𑀧𑀕𑁂𑀯 𑀩𑀼𑀤𑁆𑀥𑀪𑀽𑀫𑀺𑀬𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀘𑁆𑀙𑀭𑀺𑀬𑀜𑁆𑀘𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳.

𑀩𑀼𑀤𑁆𑀥𑀸𑀦𑀁𑀬𑁂𑀯 𑀥𑀫𑁆𑀫𑀸 𑀕𑀼𑀡𑀸, 𑀦 𑀅𑀜𑁆𑀜𑁂𑀲𑀦𑁆𑀢𑀺 𑀩𑀼𑀤𑁆𑀥𑀥𑀫𑁆𑀫𑀸. 𑀢𑀣𑀸 𑀳𑀺 𑀢𑁂 𑀩𑀼𑀤𑁆𑀥𑀸𑀦𑀁 𑀆𑀯𑁂𑀡𑀺𑀓𑀥𑀫𑁆𑀫𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁆𑀣 ‘‘𑀦𑀢𑁆𑀣𑀺 𑀢𑀣𑀸𑀕𑀢𑀲𑁆𑀲 𑀓𑀸𑀬𑀤𑀼𑀘𑁆𑀘𑀭𑀺𑀢’’𑀦𑁆𑀢𑀺𑀆𑀤𑀺𑀦𑀸 𑀓𑀸𑀬𑀯𑀘𑀻𑀫𑀦𑁄𑀤𑀼𑀘𑁆𑀘𑀭𑀺𑀢𑀸𑀪𑀸𑀯𑀯𑀘𑀦𑀁 𑀬𑀣𑀸𑀥𑀺𑀓𑀸𑀭𑀁 𑀓𑀸𑀬𑀓𑀫𑁆𑀫𑀸𑀤𑀻𑀦𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀢𑀸𑀬 𑀮𑀤𑁆𑀥𑀕𑀼𑀡𑀓𑀺𑀢𑁆𑀢𑀦𑀁, 𑀦 𑀆𑀯𑁂𑀡𑀺𑀓𑀥𑀫𑁆𑀫𑀦𑁆𑀢𑀭𑀤𑀲𑁆𑀲𑀦𑀁. 𑀲𑀩𑁆𑀩𑀲𑁆𑀫𑀺𑀜𑁆𑀳𑀺 𑀓𑀸𑀬𑀓𑀫𑁆𑀫𑀸𑀤𑀺𑀓𑁂 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑀺 𑀓𑀼𑀢𑁄 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀲𑀫𑁆𑀪𑀯𑁄. ‘‘𑀩𑀼𑀤𑁆𑀥𑀲𑁆𑀲 𑀅𑀧𑁆𑀧𑀝𑀺𑀳𑀢𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸𑀦𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀢𑁄 𑀯𑀺𑀲𑀼𑀁𑀬𑁂𑀯 𑀢𑀻𑀡𑀺 𑀜𑀸𑀡𑀸𑀦𑀺 𑀘𑀢𑀼𑀬𑁄𑀦𑀺𑀧𑀜𑁆𑀘𑀕𑀢𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀸𑀦𑀺 𑀯𑀺𑀬𑀸’’𑀢𑀺 𑀯𑀤𑀦𑁆𑀢𑀺. 𑀏𑀓𑀁𑀬𑁂𑀯 𑀳𑀼𑀢𑁆𑀯𑀸 𑀢𑀻𑀲𑀼 𑀓𑀸𑀮𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀁 𑀦𑀸𑀫 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯. 𑀦𑀢𑁆𑀣𑀺 𑀙𑀦𑁆𑀤𑀲𑁆𑀲 𑀳𑀸𑀦𑀻𑀢𑀺 𑀲𑀢𑁆𑀢𑁂𑀲𑀼 𑀳𑀺𑀢𑀙𑀦𑁆𑀤𑀲𑁆𑀲 𑀳𑀸𑀦𑀺 𑀦𑀢𑁆𑀣𑀺. 𑀦𑀢𑁆𑀣𑀺 𑀯𑀻𑀭𑀺𑀬𑀲𑁆𑀲 𑀳𑀸𑀦𑀻𑀢𑀺 𑀔𑁂𑀫𑀧𑀯𑀺𑀯𑁂𑀓𑀯𑀺𑀢𑀓𑁆𑀓𑀸𑀦𑀼𑀕𑀢𑀲𑁆𑀲 𑀯𑀻𑀭𑀺𑀬𑀲𑁆𑀲 𑀳𑀸𑀦𑀺 𑀦𑀢𑁆𑀣𑀺. ‘‘𑀦𑀢𑁆𑀣𑀺 𑀤𑀯𑀸𑀢𑀺 𑀔𑀺𑀟𑁆𑀟𑀸𑀥𑀺𑀧𑁆𑀧𑀸𑀬𑁂𑀦 𑀓𑀺𑀭𑀺𑀬𑀸 𑀦𑀢𑁆𑀣𑀺. 𑀦𑀢𑁆𑀣𑀺 𑀭𑀯𑀸𑀢𑀺 𑀲𑀳𑀲𑀸 𑀓𑀺𑀭𑀺𑀬𑀸 𑀦𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀺, 𑀲𑀳𑀲𑀸 𑀧𑀦 𑀓𑀺𑀭𑀺𑀬𑀸 𑀤𑀯𑀸 ‘‘𑀅𑀜𑁆𑀜𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀜𑁆𑀜𑀓𑀭𑀡𑀁 𑀭𑀯𑀸. 𑀔𑀮𑀺𑀢𑀦𑁆𑀢𑀺 𑀯𑀺𑀭𑀚𑁆𑀛𑀦𑀁 𑀜𑀸𑀡𑁂𑀦 𑀅𑀧𑁆𑀨𑀼𑀝𑀁. 𑀲𑀳𑀲𑀸𑀢𑀺 𑀯𑁂𑀕𑀸𑀬𑀺𑀢𑀢𑁆𑀢𑀁 𑀢𑀼𑀭𑀺𑀢𑀓𑀺𑀭𑀺𑀬𑀸. 𑀅𑀩𑁆𑀬𑀸𑀯𑀝𑁄 𑀫𑀦𑁄𑀢𑀺 𑀦𑀺𑀭𑀢𑁆𑀣𑀓𑁄 𑀘𑀺𑀢𑁆𑀢𑀲𑀫𑀼𑀤𑀸𑀘𑀸𑀭𑁄. 𑀅𑀓𑀼𑀲𑀮𑀘𑀺𑀢𑁆𑀢𑀦𑁆𑀢𑀺 𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀫𑀸𑀳, 𑀅𑀬𑀜𑁆𑀘 𑀤𑀻𑀖𑀪𑀸𑀡𑀓𑀸𑀦𑀁 𑀧𑀸𑀞𑁄 𑀆𑀓𑀼𑀮𑁄 𑀯𑀺𑀬. 𑀅𑀬𑀁 𑀧𑀦 𑀧𑀸𑀞𑁄 𑀅𑀦𑀸𑀓𑀼𑀮𑁄 𑁋

𑀅𑀢𑀻𑀢𑀁𑀲𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀧𑁆𑀧𑀝𑀺𑀳𑀢𑀜𑀸𑀡𑀁, 𑀅𑀦𑀸𑀕𑀢𑀁𑀲𑁂, 𑀧𑀘𑁆𑀘𑀼𑀧𑁆𑀧𑀦𑁆𑀦𑀁𑀲𑁂. 𑀇𑀫𑁂𑀳𑀺 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀩𑁆𑀩𑀁 𑀓𑀸𑀬𑀓𑀫𑁆𑀫𑀁 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺, 𑀲𑀩𑁆𑀩𑀁 𑀯𑀘𑀻𑀓𑀫𑁆𑀫𑀁, 𑀲𑀩𑁆𑀩𑀁 𑀫𑀦𑁄𑀓𑀫𑁆𑀫𑀁. 𑀇𑀫𑁂𑀳𑀺 𑀙𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀦𑀢𑁆𑀣𑀺 𑀙𑀦𑁆𑀤𑀲𑁆𑀲 𑀳𑀸𑀦𑀺, 𑀦𑀢𑁆𑀣𑀺 𑀥𑀫𑁆𑀫𑀤𑁂𑀲𑀦𑀸𑀬, 𑀦𑀢𑁆𑀣𑀺 𑀯𑀻𑀭𑀺𑀬𑀲𑁆𑀲, 𑀦𑀢𑁆𑀣𑀺 𑀲𑀫𑀸𑀥𑀺𑀲𑁆𑀲, 𑀦𑀢𑁆𑀣𑀺 𑀧𑀜𑁆𑀜𑀸𑀬, 𑀦𑀢𑁆𑀣𑀺 𑀯𑀺𑀫𑀼𑀢𑁆𑀢𑀺𑀬𑀸. 𑀇𑀫𑁂𑀳𑀺 𑀤𑁆𑀯𑀸𑀤𑀲𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀦𑀢𑁆𑀣𑀺 𑀤𑀯𑀸, 𑀦𑀢𑁆𑀣𑀺 𑀭𑀯𑀸, 𑀦𑀢𑁆𑀣𑀺 𑀅𑀧𑁆𑀨𑀼𑀝𑀁, 𑀦𑀢𑁆𑀣𑀺 𑀯𑁂𑀕𑀸𑀬𑀺𑀢𑀢𑁆𑀢𑀁, 𑀦𑀢𑁆𑀣𑀺 𑀅𑀩𑁆𑀬𑀸𑀯𑀝𑀫𑀦𑁄, 𑀦𑀢𑁆𑀣𑀺 𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑀼𑀧𑁂𑀓𑁆𑀔𑀸𑀢𑀺.

𑀢𑀢𑁆𑀣 𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑀼𑀧𑁂𑀓𑁆𑀔𑀸𑀢𑀺 𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀏𑀢𑁆𑀣 𑀘 𑀢𑀣𑀸𑀕𑀢𑀲𑁆𑀲 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀁 𑀓𑀸𑀬𑀯𑀘𑀻𑀫𑀦𑁄𑀲𑀫𑀸𑀘𑀸𑀭𑀧𑀸𑀭𑀺𑀲𑀼𑀤𑁆𑀥𑀺𑀬𑀸𑀯 𑀲𑀗𑁆𑀕𑀳𑁂𑀢𑁆𑀯𑀸 𑀲𑀫𑀸𑀘𑀸𑀭𑀢𑁆𑀢𑀬𑀯𑀲𑁂𑀦 𑀫𑀳𑀸𑀣𑁂𑀭𑁂𑀦 𑀢𑀺𑀓𑁄 𑀤𑁂𑀲𑀺𑀢𑁄.

𑀓𑀺𑀜𑁆𑀘𑀦𑀸𑀢𑀺 𑀓𑀺𑀜𑁆𑀘𑀺𑀓𑁆𑀔𑀸. 𑀇𑀫𑁂 𑀧𑀦 𑀭𑀸𑀕𑀸𑀤𑀬𑁄 𑀧𑀮𑀺𑀩𑀼𑀦𑁆𑀥𑀦𑀝𑁆𑀞𑁂𑀦 𑀓𑀺𑀜𑁆𑀘𑀦𑀸 𑀯𑀺𑀬𑀸𑀢𑀺 𑀓𑀺𑀜𑁆𑀘𑀦𑀸. 𑀢𑁂𑀦𑀸𑀳 ‘‘𑀓𑀺𑀜𑁆𑀘𑀦𑀸𑀢𑀺 𑀧𑀮𑀺𑀩𑁄𑀥𑀸’’𑀢𑀺.

𑀅𑀦𑀼𑀤𑀳𑀦𑀝𑁆𑀞𑁂𑀦𑀸𑀢𑀺 𑀅𑀦𑀼 𑀅𑀦𑀼 𑀤𑀳𑀦𑀝𑁆𑀞𑁂𑀦. 𑀭𑀸𑀕𑀸𑀤𑀬𑁄 𑀅𑀭𑀽𑀧𑀥𑀫𑁆𑀫𑀸 𑀇𑀢𑁆𑀢𑀭𑀓𑁆𑀔𑀡𑀸 𑀓𑀣𑀁 𑀅𑀦𑀼𑀤𑀳𑀦𑁆𑀢𑀻𑀢𑀺 𑀆𑀲𑀗𑁆𑀓𑀁 𑀦𑀺𑀯𑀢𑁆𑀢𑁂𑀢𑀼𑀁 ‘‘𑀢𑀢𑁆𑀣 𑀯𑀢𑁆𑀣𑀽𑀦𑀻’’𑀢𑀺 𑀯𑀼𑀢𑁆𑀢𑀁, 𑀤𑀝𑁆𑀞𑀩𑁆𑀩𑀸𑀦𑀻𑀢𑀺 𑀯𑀘𑀦𑀲𑁂𑀲𑁄. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀭𑀸𑀕𑀸𑀤𑀻𑀦𑀁 𑀅𑀦𑀼𑀤𑀳𑀦𑀝𑁆𑀞𑁂. 𑀯𑀢𑁆𑀣𑀽𑀦𑀻𑀢𑀺 𑀲𑀸𑀲𑀦𑁂, 𑀮𑁄𑀓𑁂 𑀘 𑀧𑀸𑀓𑀝𑀢𑁆𑀢𑀸 𑀧𑀘𑁆𑀘𑀓𑁆𑀔𑀪𑀽𑀢𑀸𑀦𑀺 𑀓𑀸𑀭𑀡𑀸𑀦𑀺. 𑀭𑀸𑀕𑁄 𑀉𑀧𑁆𑀧𑀦𑁆𑀦𑁄 𑀢𑀺𑀔𑀺𑀡𑀓𑀭𑁄 𑀳𑀼𑀢𑁆𑀯𑀸. 𑀢𑀲𑁆𑀫𑀸 𑀢𑀁𑀲𑀫𑀼𑀝𑁆𑀞𑀸𑀦𑀸 𑀢𑁂𑀚𑁄𑀥𑀸𑀢𑀼 𑀅𑀢𑀺𑀯𑀺𑀬 𑀢𑀺𑀔𑀺𑀡𑀪𑀸𑀯𑁂𑀦 𑀲𑀤𑁆𑀥𑀺𑀁 𑀅𑀢𑁆𑀢𑀦𑀸 𑀲𑀳𑀚𑀸𑀢𑀥𑀫𑁆𑀫𑁂𑀳𑀺 𑀳𑀤𑀬𑀧𑁆𑀧𑀤𑁂𑀲𑀁 𑀛𑀸𑀧𑁂𑀲𑀺 𑀬𑀣𑀸 𑀢𑀁 𑀩𑀸𑀳𑀺𑀭𑀸 𑀢𑁂𑀚𑁄𑀥𑀸𑀢𑀼 𑀲𑀦𑀺𑀲𑁆𑀲𑀬𑀁. 𑀢𑁂𑀦 𑀲𑀸 𑀪𑀺𑀓𑁆𑀔𑀼𑀦𑀻 𑀲𑀼𑀧𑀢𑁄 𑀯𑀺𑀬 𑀩𑁆𑀬𑀸𑀥𑀺 𑀛𑀸𑀬𑀺𑀢𑁆𑀯𑀸 𑀫𑀢𑀸. 𑀢𑁂𑀦𑀸𑀳 ‘‘𑀢𑁂𑀦𑁂𑀯 𑀛𑀸𑀬𑀺𑀢𑁆𑀯𑀸 𑀓𑀸𑀮𑀫𑀓𑀸𑀲𑀻’’𑀢𑀺. 𑀤𑁄𑀲𑀲𑁆𑀲 𑀦𑀺𑀲𑁆𑀲𑀬𑀸𑀦𑀁 𑀤𑀳𑀦𑀢𑀸 𑀧𑀸𑀓𑀝𑀸 𑀏𑀯𑀸𑀢𑀺 𑀇𑀢𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀫𑁄𑀳𑀯𑀲𑁂𑀦 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀢𑀺𑀯𑀢𑁆𑀢𑀺𑀢𑁆𑀯𑀸𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸.

𑀓𑀸𑀫𑀁 𑀆𑀳𑀼𑀦𑁂𑀬𑁆𑀬𑀕𑁆𑀕𑀺𑀆𑀤𑀬𑁄 𑀢𑀬𑁄 𑀅𑀕𑁆𑀕𑀻 𑀩𑁆𑀭𑀸𑀳𑁆𑀫𑀡𑁂𑀳𑀺 𑀇𑀘𑁆𑀙𑀺𑀢𑀸 𑀲𑀦𑁆𑀢𑀺, 𑀢𑁂 𑀧𑀦 𑀢𑁂𑀳𑀺 𑀇𑀘𑁆𑀙𑀺𑀢𑀫𑀢𑁆𑀢𑀸, 𑀦 𑀲𑀢𑁆𑀢𑀸𑀦𑀁 𑀢𑀸𑀤𑀺𑀲𑀸 𑀅𑀢𑁆𑀣𑀲𑀸𑀥𑀓𑀸. 𑀬𑁂 𑀧𑀦 𑀲𑀢𑁆𑀢𑀸𑀦𑀁 𑀅𑀢𑁆𑀣𑀲𑀸𑀥𑀓𑀸, 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀆𑀳𑀼𑀦𑀁 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀤𑀭𑁂𑀦 𑀳𑀼𑀦𑀦𑀁 𑀧𑀽𑀚𑀦𑀁 𑀆𑀳𑀼𑀦𑀦𑁆𑀢𑀺 𑀲𑀓𑁆𑀓𑀸𑀭𑁄 ‘‘𑀆𑀳𑀼𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀆𑀳𑀼𑀦𑀁 𑀅𑀭𑀳𑀦𑁆𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀆𑀳𑀼𑀦𑁂𑀬𑁆𑀬𑀸𑀢𑀺 𑀪𑀺𑀓𑁆𑀔𑀯𑁂 𑀫𑀸𑀢𑀸𑀧𑀺𑀢𑀽𑀦𑀫𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀇𑀢𑀺𑀯𑀼. 𑁧𑁦𑁬). 𑀬𑀤𑀕𑁆𑀕𑁂𑀦 𑀘 𑀢𑁂 𑀧𑀼𑀢𑁆𑀢𑀸𑀦𑀁 𑀩𑀳𑀼𑀓𑀸𑀭𑀢𑀸𑀬 𑀆𑀳𑀼𑀦𑁂𑀬𑁆𑀬𑀸𑀢𑀺 𑀢𑁂𑀲𑀼 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀦𑁂𑀲𑀁 𑀳𑀺𑀢𑀲𑀼𑀔𑀸𑀯𑀳𑀸, 𑀢𑀤𑀕𑁆𑀕𑁂𑀦 𑀢𑁂𑀲𑀼 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺 𑀅𑀳𑀺𑀢𑀤𑀼𑀓𑁆𑀔𑀸𑀯𑀳𑀸𑀢𑀺 𑀆𑀳 ‘‘𑀢𑁂𑀲𑀼…𑀧𑁂… 𑀦𑀺𑀩𑁆𑀩𑀢𑁆𑀢𑀦𑁆𑀢𑀻’’𑀢𑀺. 𑀲𑁆𑀯𑀸𑀬𑀫𑀢𑁆𑀣𑁄𑀢𑀺 𑀬𑁄 𑀫𑀸𑀢𑀸𑀧𑀺𑀢𑀽𑀦𑀁 𑀅𑀢𑁆𑀢𑀦𑁄 𑀉𑀧𑀭𑀺 𑀯𑀺𑀧𑁆𑀧𑀝𑀺𑀧𑀦𑁆𑀦𑀸𑀦𑀁 𑀧𑀼𑀢𑁆𑀢𑀸𑀦𑀁 𑀅𑀦𑀼𑀤𑀳𑀦𑀲𑁆𑀲 𑀧𑀘𑁆𑀘𑀬𑀪𑀸𑀯𑁂𑀦 𑀅𑀦𑀼𑀤𑀳𑀦𑀝𑁆𑀞𑁄, 𑀲𑁄 𑀅𑀬𑀫𑀢𑁆𑀣𑁄. 𑀫𑀺𑀢𑁆𑀢𑀯𑀺𑀦𑁆𑀤𑀓𑀯𑀢𑁆𑀣𑀼𑀦𑀸𑀢𑀺 𑀫𑀺𑀢𑁆𑀢𑀯𑀺𑀦𑁆𑀤𑀓𑀲𑁆𑀲 𑀦𑀸𑀫 𑀫𑀸𑀢𑀭𑀺 𑀯𑀺𑀧𑁆𑀧𑀝𑀺𑀧𑀦𑁆𑀦𑀲𑁆𑀲 𑀧𑀼𑀭𑀺𑀲𑀲𑁆𑀲 𑀢𑀸𑀬 𑀏𑀯 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀘𑀺𑀭𑀢𑀭𑀁 𑀓𑀸𑀮𑀁 𑀆𑀧𑀸𑀬𑀺𑀓𑀤𑀼𑀓𑁆𑀔𑀸𑀦𑀼𑀪𑀯𑀦𑀤𑀻𑀧𑀦𑁂𑀦 𑀯𑀢𑁆𑀣𑀼𑀦𑀸 𑀯𑁂𑀤𑀺𑀢𑀩𑁆𑀩𑁄.

𑀇𑀤𑀸𑀦𑀺 𑀢𑀫𑀢𑁆𑀣𑀁 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀧𑀯𑀢𑁆𑀢𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀫𑀺𑀢𑁆𑀢𑀯𑀺𑀦𑁆𑀤𑀓𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀥𑀦𑀮𑁄𑀪𑁂𑀦, 𑀦 𑀥𑀫𑁆𑀫𑀘𑁆𑀙𑀦𑁆𑀤𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀓𑀼𑀢𑁄𑀪𑀬𑀁 𑀓𑁂𑀦𑀘𑀺 𑀅𑀦𑀼𑀝𑁆𑀞𑀸𑀧𑀦𑀻𑀬𑀢𑀸𑀬. 𑀦𑀺𑀯𑀸𑀭𑁂𑀲𑀺 𑀲𑀫𑀼𑀤𑁆𑀤𑀧𑀬𑀸𑀢𑀸 𑀦𑀸𑀫 𑀩𑀳𑁆𑀯𑀦𑁆𑀢𑀭𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦. 𑀅𑀦𑁆𑀢𑀭𑀁 𑀓𑀢𑁆𑀯𑀸𑀢𑀺 𑀅𑀢𑀺𑀓𑁆𑀓𑀫𑀦𑀯𑀲𑁂𑀦 𑀤𑁆𑀯𑀺𑀦𑁆𑀦𑀁 𑀧𑀸𑀤𑀸𑀦𑀁 𑀅𑀦𑁆𑀢𑀭𑁂 𑀓𑀢𑁆𑀯𑀸.

𑀦𑀸𑀯𑀸 𑀅𑀝𑁆𑀞𑀸𑀲𑀺 𑀢𑀲𑁆𑀲 𑀧𑀸𑀧𑀓𑀫𑁆𑀫𑀩𑀮𑁂𑀦 𑀯𑀸𑀢𑀲𑁆𑀲 𑀅𑀯𑀸𑀬𑀦𑀢𑁄. 𑀏𑀓𑀤𑀺𑀯𑀲𑀁 𑀭𑀓𑁆𑀔𑀺𑀢𑀉𑀧𑁄𑀲𑀣𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁄. 𑀬𑀣𑀸 𑀧𑀼𑀭𑀺𑀫𑀸𑀳𑀺 𑀧𑀭𑀢𑁄 𑀫𑀸 𑀅𑀕𑀫𑀸𑀲𑀻𑀢𑀺 𑀯𑀼𑀢𑁆𑀢𑁄, 𑀏𑀯𑀁 𑀅𑀧𑀭𑀸𑀧𑀭𑀸𑀳𑀺𑀧𑀻𑀢𑀺 𑀆𑀳 ‘‘𑀢𑀸𑀳𑀺 ‘𑀧𑀭𑀢𑁄 𑀧𑀭𑀢𑁄 𑀫𑀸 𑀅𑀕𑀫𑀸𑀲𑀻’𑀢𑀺 𑀯𑀼𑀘𑁆𑀘𑀫𑀸𑀦𑁄’’𑀢𑀺. 𑀔𑀼𑀭𑀘𑀓𑁆𑀓𑀥𑀭𑀦𑁆𑀢𑀺 𑀔𑀼𑀭𑀥𑀸𑀭𑀽𑀧𑀫𑀘𑀓𑁆𑀓𑀥𑀭𑀁 𑀏𑀓𑀁 𑀧𑀼𑀭𑀺𑀲𑀁. 𑀉𑀧𑀝𑁆𑀞𑀸𑀲𑀺 𑀧𑀸𑀧𑀓𑀫𑁆𑀫𑀲𑁆𑀲 𑀩𑀮𑁂𑀦.

𑀘𑀢𑀼𑀩𑁆𑀪𑀻𑀢𑀺 𑀘𑀢𑀽𑀳𑀺 𑀅𑀘𑁆𑀙𑀭𑀸𑀲𑀤𑀺𑀲𑀻𑀳𑀺 𑀯𑀺𑀫𑀸𑀦𑀧𑁂𑀢𑀻𑀳𑀺, 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸𑀢𑀺 𑀯𑀘𑀦𑀲𑁂𑀲𑁄. 𑀅𑀝𑁆𑀞𑀚𑁆𑀛𑀕𑀫𑀸𑀢𑀺 𑀭𑀽𑀧𑀸𑀤𑀺𑀓𑀸𑀫𑀕𑀼𑀡𑁂𑀳𑀺 𑀢𑀢𑁄 𑀯𑀺𑀲𑀺𑀝𑁆𑀞𑀢𑀭𑀸 𑀅𑀝𑁆𑀞 𑀯𑀺𑀫𑀸𑀦𑀧𑁂𑀢𑀺𑀬𑁄 𑀅𑀥𑀺𑀕𑀘𑁆𑀙𑀺. 𑀅𑀢𑁆𑀭𑀺𑀘𑁆𑀙𑀦𑁆𑀢𑀺 𑀅𑀢𑁆𑀭𑀺𑀘𑁆𑀙𑀸𑀲𑀗𑁆𑀔𑀸𑀢𑁂𑀦 𑀅𑀢𑀺𑀮𑁄𑀪𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀅𑀢𑁆𑀭 𑀅𑀢𑁆𑀭 𑀓𑀸𑀫𑀕𑀼𑀡𑁂 𑀇𑀘𑁆𑀙𑀦𑁆𑀢𑁄. 𑀘𑀓𑁆𑀓𑀦𑁆𑀢𑀺 𑀔𑀼𑀭𑀘𑀓𑁆𑀓𑀁. 𑀆𑀲𑀤𑁄𑀢𑀺 𑀅𑀦𑀢𑁆𑀣𑀸𑀯𑀳𑀪𑀸𑀯𑁂𑀦 𑀆𑀲𑀸𑀤𑁂𑀢𑀺.

𑀲𑁄𑀢𑀺 𑀕𑁂𑀳𑀲𑀸𑀫𑀺𑀓𑁄 𑀪𑀢𑁆𑀢𑀸. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 𑀅𑀦𑀼𑀤𑀳𑀦𑀲𑁆𑀲 𑀧𑀘𑁆𑀘𑀬𑀢𑀸𑀬.

𑀅𑀢𑀺𑀘𑀸𑀭𑀺𑀦𑀻𑀢𑀺 𑀲𑀸𑀫𑀺𑀓𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀘𑀸𑀭𑀺𑀦𑀻 𑀫𑀺𑀘𑁆𑀙𑀸𑀘𑀸𑀭𑀺𑀦𑀻. 𑀭𑀢𑁆𑀢𑀺𑀁 𑀤𑀼𑀓𑁆𑀔𑀦𑁆𑀢𑀺 𑀅𑀢𑁆𑀢𑀦𑁄 𑀧𑀸𑀧𑀓𑀫𑁆𑀫𑀸𑀦𑀼𑀪𑀸𑀯𑀲𑀫𑀼𑀧𑀝𑁆𑀞𑀺𑀢𑁂𑀦 𑀲𑀼𑀦𑀔𑁂𑀦 𑀔𑀸𑀤𑀺𑀢𑀩𑁆𑀩𑀢𑀸𑀤𑀼𑀓𑁆𑀔𑀁. 𑀯𑀜𑁆𑀘𑁂𑀢𑁆𑀯𑀸𑀢𑀺 𑀢𑀁 𑀅𑀚𑀸𑀦𑀸𑀧𑁂𑀢𑁆𑀯𑀸𑀯 𑀓𑀸𑀭𑀡𑀝𑁆𑀞𑀸𑀦𑀕𑀫𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀝𑀧𑀝𑀦𑁆𑀢𑀻𑀢𑀺 𑀧𑀝𑀧𑀝𑀸 𑀓𑀢𑁆𑀯𑀸. 𑀅𑀦𑀼𑀭𑀯𑀤𑀲𑁆𑀲𑀦𑀜𑁆𑀳𑁂𑀢𑀁. 𑀫𑀼𑀝𑁆𑀞𑀺𑀬𑁄𑀕𑁄 𑀓𑀺𑀭𑀸𑀬𑀁 𑀢𑀲𑁆𑀲 𑀲𑀼𑀦𑀔𑀦𑁆𑀢𑀭𑀥𑀸𑀦𑀲𑁆𑀲, 𑀬𑀤𑀺𑀤𑀁 𑀔𑁂𑀴𑀧𑀺𑀡𑁆𑀟𑀁 𑀪𑀽𑀫𑀺𑀬𑀁 𑀦𑀺𑀝𑁆𑀞𑀼𑀪𑀺𑀢𑁆𑀯𑀸 𑀧𑀸𑀤𑁂𑀦 𑀖𑀁𑀲𑀦𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑁄 𑀢𑀣𑀸 𑀅𑀓𑀸𑀲𑀺.𑀲𑀼𑀦𑀔𑀸 𑀅𑀦𑁆𑀢𑀭𑀥𑀸𑀬𑀺𑀁𑀲𑀽’’𑀢𑀺.

𑀤𑀓𑁆𑀔𑀺𑀡𑀸𑀢𑀺 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀤𑀺𑀬𑁆𑀬𑀫𑀸𑀦𑀸 𑀤𑀓𑁆𑀔𑀦𑁆𑀢𑀺 𑀏𑀢𑁂𑀳𑀺 𑀳𑀺𑀢𑀲𑀼𑀔𑀸𑀦𑀻𑀢𑀺. 𑀢𑀁 𑀤𑀓𑁆𑀔𑀺𑀡𑀁 𑀅𑀭𑀳𑀢𑀻𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑁄, 𑀪𑀺𑀓𑁆𑀔𑀼𑀲𑀗𑁆𑀖𑁄. 𑀭𑁂𑀯𑀢𑀻𑀯𑀢𑁆𑀣𑀼 𑀯𑀺𑀫𑀸𑀦𑀯𑀢𑁆𑀣𑀼𑀧𑁂𑀢𑀯𑀢𑁆𑀣𑀽𑀲𑀼 (𑀯𑀺. 𑀯. 𑁮𑁬𑁧 𑀆𑀤𑀬𑁄) 𑀢𑁂𑀲𑀁 𑀅𑀝𑁆𑀞𑀓𑀣𑀸𑀬𑀜𑁆𑀘 (𑀯𑀺. 𑀯. 𑁯𑁭𑁭-𑁯𑁮𑁦; 𑀧𑁂. 𑀯. 𑀅𑀝𑁆𑀞. 𑁭𑁧𑁪-𑁭𑁩𑁬) 𑀆𑀕𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁.

‘‘𑀢𑀺𑀯𑀺𑀥𑁂𑀦 𑀭𑀽𑀧𑀲𑀗𑁆𑀕𑀳𑁄’’𑀢𑀺 𑀏𑀢𑁆𑀣 𑀦𑀦𑀼 𑀲𑀗𑁆𑀕𑀳𑁄 𑀏𑀓𑀯𑀺𑀥𑁄𑀯, 𑀲𑁄 𑀓𑀲𑁆𑀫𑀸 ‘‘𑀘𑀢𑀼𑀩𑁆𑀩𑀺𑀥𑁄’’𑀢𑀺 𑀯𑀼𑀢𑁆𑀢𑁄𑀢𑀺? ‘‘𑀲𑀗𑁆𑀕𑀳𑁄’’𑀢𑀺 𑀅𑀢𑁆𑀣𑀁 𑀅𑀯𑀢𑁆𑀯𑀸 𑀅𑀦𑀺𑀤𑁆𑀥𑀸𑀭𑀺𑀢𑀢𑁆𑀣𑀲𑁆𑀲 𑀲𑀤𑁆𑀤𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸. ‘‘𑀢𑀺𑀯𑀺𑀥𑁂𑀦 𑀭𑀽𑀧𑀲𑀗𑁆𑀕𑀳𑁄’’𑀢𑀺𑀆𑀤𑀻𑀲𑀼 (𑀥. 𑀲. 𑀭𑀽𑀧𑀓𑀡𑁆𑀟-𑀢𑀺𑀓𑁂) 𑀧𑀤𑁂𑀲𑀼 𑀲𑀗𑁆𑀕𑀳-𑀲𑀤𑁆𑀤𑁄 𑀢𑀸𑀯 𑀅𑀢𑁆𑀢𑀦𑁄 𑀅𑀢𑁆𑀣𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. 𑀅𑀢𑁆𑀣𑁄𑀧𑀺 𑀯𑀸 𑀅𑀦𑀺𑀤𑁆𑀥𑀸𑀭𑀺𑀢𑀯𑀺𑀲𑁂𑀲𑁄 𑀲𑀸𑀫𑀜𑁆𑀜𑁂𑀦 𑀕𑀳𑁂𑀢𑀩𑁆𑀩𑀢𑀁 𑀧𑀢𑁆𑀢𑁄 ‘‘𑀢𑀺𑀯𑀺𑀥𑁂𑀦 𑀭𑀽𑀧𑀲𑀗𑁆𑀕𑀳𑁄’’𑀢𑀺𑀆𑀤𑀻𑀲𑀼 (𑀥. 𑀲. 𑀭𑀽𑀧𑀓𑀡𑁆𑀟-𑀢𑀺𑀓𑁂) ‘‘𑀲𑀗𑁆𑀕𑀳𑁄’’𑀢𑀺 𑀯𑀼𑀢𑁆𑀢𑁄𑀢𑀺 𑀦 𑀓𑁄𑀘𑀺 𑀤𑁄𑀲𑁄. 𑀦𑀺𑀤𑁆𑀥𑀸𑀭𑀺𑀢𑁂 𑀳𑀺 𑀯𑀺𑀲𑁂𑀲𑁂 𑀢𑀲𑁆𑀲 𑀏𑀓𑀯𑀺𑀥𑀢𑀸 𑀲𑀺𑀬𑀸, 𑀦 𑀢𑀢𑁄 𑀧𑀼𑀩𑁆𑀩𑁂𑀢𑀺. ‘‘𑀚𑀸𑀢𑀺𑀲𑀗𑁆𑀕𑀳𑁄’’𑀢𑀺 𑀯𑀼𑀢𑁆𑀢𑁂𑀧𑀺 𑀚𑀸𑀢𑀺-𑀲𑀤𑁆𑀤𑀲𑁆𑀲 𑀲𑀸𑀧𑁂𑀓𑁆𑀔𑀲𑀤𑁆𑀤𑀢𑁆𑀢𑀸 𑀅𑀢𑁆𑀢𑀦𑁄 𑀚𑀸𑀢𑀺𑀬𑀸 𑀲𑀗𑁆𑀕𑀳𑁄𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑁂𑀯 𑀲𑀫𑁆𑀩𑀦𑁆𑀥𑀸𑀭𑀳𑀲𑁆𑀲 𑀅𑀜𑁆𑀜𑀲𑁆𑀲 𑀅𑀯𑀼𑀢𑁆𑀢𑀢𑁆𑀢𑀸 𑀬𑀣𑀸 ‘‘𑀫𑀸𑀢𑀸𑀧𑀺𑀢𑀼 𑀉𑀧𑀝𑁆𑀞𑀸𑀦’’𑀦𑁆𑀢𑀺 (𑀔𑀼. 𑀧𑀸. 𑁫.𑁬; 𑀲𑀼. 𑀦𑀺. 𑁨𑁬𑁫). 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀬𑀣𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀅𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀚𑀸𑀢𑀺𑀲𑀗𑁆𑀕𑀳𑁄’’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀲𑀫𑀸𑀦𑀚𑀸𑀢𑀺𑀓𑀸𑀦𑀁 𑀲𑀗𑁆𑀕𑀳𑁄, 𑀲𑀫𑀸𑀦𑀚𑀸𑀢𑀺𑀬𑀸 𑀯𑀸 𑀲𑀗𑁆𑀕𑀳𑁄 𑀲𑀚𑀸𑀢𑀺𑀲𑀗𑁆𑀕𑀳𑁄. 𑀲𑀜𑁆𑀚𑀸𑀬𑀢𑀺 𑀏𑀢𑁆𑀣𑀸𑀢𑀺 𑀲𑀜𑁆𑀚𑀸𑀢𑀺, 𑀲𑀜𑁆𑀚𑀸𑀢𑀺𑀬𑀸 𑀲𑀗𑁆𑀕𑀳𑁄 𑀲𑀜𑁆𑀚𑀸𑀢𑀺𑀲𑀗𑁆𑀕𑀳𑁄, 𑀲𑀜𑁆𑀚𑀸𑀢𑀺𑀤𑁂𑀲𑁂𑀦 𑀲𑀗𑁆𑀕𑀳𑁄𑀢𑀺 𑀅𑀢𑁆𑀣𑁄. 𑀓𑀺𑀭𑀺𑀬𑀸𑀬 𑀏𑀯𑀭𑀽𑀧𑀸𑀬 𑀲𑀗𑁆𑀕𑀳𑁄 𑀓𑀺𑀭𑀺𑀬𑀸𑀲𑀗𑁆𑀕𑀳𑁄. 𑀭𑀽𑀧𑀓𑁆𑀔𑀦𑁆𑀥𑀕𑀡𑀦𑀦𑁆𑀢𑀺 ‘‘𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺 𑀕𑀡𑀦𑀁 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺 𑀭𑀼𑀧𑁆𑀧𑀦𑀲𑀪𑀸𑀯𑀢𑁆𑀢𑀸. 𑀢𑀻𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀭𑀽𑀧𑀕𑀡𑀦𑀸𑀢𑀺 𑀯𑀓𑁆𑀔𑀫𑀸𑀦𑁂𑀳𑀺 𑀢𑀻𑀳𑀺 𑀪𑀸𑀕𑁂𑀳𑀺 𑀭𑀽𑀧𑀲𑁆𑀲 𑀲𑀗𑁆𑀕𑀳𑁄, 𑀕𑀡𑁂𑀢𑀩𑁆𑀩𑀢𑀸𑀢𑀺 𑀅𑀢𑁆𑀣𑁄.

𑀭𑀽𑀧𑀸𑀬𑀢𑀦𑀁 𑀦𑀺𑀧𑀲𑁆𑀲𑀢𑀺 𑀧𑀘𑁆𑀘𑀓𑁆𑀔𑀢𑁄 𑀯𑀺𑀚𑀸𑀦𑀸𑀢𑀻𑀢𑀺 𑀦𑀺𑀤𑀲𑁆𑀲𑀦𑀁, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀦𑀺𑀤𑀲𑁆𑀲𑀢𑀻𑀢𑀺 𑀯𑀸 𑀦𑀺𑀤𑀲𑁆𑀲𑀦𑀁, 𑀤𑀝𑁆𑀞𑀩𑁆𑀩𑀪𑀸𑀯𑁄, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀕𑁄𑀘𑀭𑀪𑀸𑀯𑁄, 𑀢𑀲𑁆𑀲 𑀘 𑀭𑀽𑀧𑀸𑀬𑀢𑀦𑀢𑁄 𑀅𑀦𑀜𑁆𑀜𑀢𑁆𑀢𑁂𑀧𑀺 𑀅𑀜𑁆𑀜𑁂𑀳𑀺 𑀥𑀫𑁆𑀫𑁂𑀳𑀺 𑀭𑀽𑀧𑀸𑀬𑀢𑀦𑀁 𑀯𑀺𑀲𑁂𑀲𑁂𑀢𑀼𑀁 𑀅𑀜𑁆𑀜𑀁 𑀯𑀺𑀬 𑀓𑀢𑁆𑀯𑀸 ‘‘𑀲𑀳 𑀦𑀺𑀤𑀲𑁆𑀲𑀦𑁂𑀦𑀸𑀢𑀺 𑀲𑀦𑀺𑀤𑀲𑁆𑀲𑀦’’𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀥𑀫𑁆𑀫𑀲𑀪𑀸𑀯𑀲𑀸𑀫𑀜𑁆𑀜𑁂𑀦 𑀳𑀺 𑀏𑀓𑀻𑀪𑀽𑀢𑁂𑀲𑀼 𑀥𑀫𑁆𑀫𑁂𑀲𑀼 𑀬𑁄 𑀦𑀸𑀦𑀢𑁆𑀢𑀓𑀭𑁄 𑀲𑀪𑀸𑀯𑁄, 𑀲𑁄 𑀅𑀜𑁆𑀜𑁄 𑀯𑀺𑀬 𑀓𑀢𑁆𑀯𑀸 𑀉𑀧𑀘𑀭𑀺𑀢𑀼𑀁 𑀬𑀼𑀢𑁆𑀢𑁄. 𑀏𑀯𑀜𑁆𑀳𑀺 𑀅𑀢𑁆𑀣𑀯𑀺𑀲𑁂𑀲𑀸𑀯𑀩𑁄𑀥𑁄 𑀳𑁄𑀢𑀻𑀢𑀺. 𑀘𑀓𑁆𑀔𑀼𑀧𑀝𑀺𑀳𑀦𑀦𑀲𑀫𑀢𑁆𑀣𑀢𑁄𑀢𑀺 𑀘𑀓𑁆𑀔𑀼𑀦𑁄 𑀖𑀝𑁆𑀝𑀦𑀲𑀫𑀢𑁆𑀣𑀢𑀸𑀬. 𑀖𑀝𑁆𑀝𑀦𑀁 𑀯𑀺𑀬 𑀘 𑀖𑀝𑁆𑀝𑀦𑀁 𑀤𑀝𑁆𑀞𑀩𑁆𑀩𑀁. 𑀤𑀼𑀢𑀺𑀬𑁂𑀦 𑀅𑀢𑁆𑀣𑀯𑀺𑀓𑀧𑁆𑀧𑁂𑀦 𑀤𑀝𑁆𑀞𑀩𑁆𑀩𑀪𑀸𑀯𑀲𑀗𑁆𑀔𑀸𑀢𑀁 𑀦𑀸𑀲𑁆𑀲 𑀦𑀺𑀤𑀲𑁆𑀲𑀦𑀦𑁆𑀢𑀺 𑀅𑀦𑀺𑀤𑀲𑁆𑀲𑀦𑀦𑁆𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 𑀤𑀲𑀦𑁆𑀦𑀁 𑀆𑀬𑀢𑀦𑀸𑀦𑀁 𑀬𑀣𑀸𑀭𑀳𑀁 𑀲𑀬𑀁, 𑀦𑀺𑀲𑁆𑀲𑀬𑀯𑀲𑁂𑀦 𑀘 𑀲𑀫𑁆𑀧𑀢𑁆𑀢𑀸𑀦𑀁, 𑀅𑀲𑀫𑁆𑀧𑀢𑁆𑀢𑀸𑀦𑀜𑁆𑀘 𑀧𑀝𑀺𑀫𑀼𑀔𑀪𑀸𑀯𑁄 𑀅𑀜𑁆𑀜𑀫𑀜𑁆𑀜𑀧𑀢𑀦𑀁 𑀧𑀝𑀺𑀳𑀦𑀦𑀁, 𑀬𑁂𑀦 𑀩𑁆𑀬𑀸𑀧𑀸𑀭𑀸𑀤𑀺𑀯𑀺𑀓𑀸𑀭𑀧𑀘𑁆𑀘𑀬𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑁂 𑀘𑀓𑁆𑀔𑀸𑀤𑀻𑀦𑀁 𑀯𑀺𑀲𑀬𑁂𑀲𑀼 𑀯𑀺𑀓𑀸𑀭𑀼𑀧𑁆𑀧𑀢𑁆𑀢𑀺. 𑀢𑀢𑁆𑀣 𑀩𑁆𑀬𑀸𑀧𑀸𑀭𑁄 𑀘𑀓𑁆𑀔𑀸𑀤𑀻𑀦𑀁 𑀲𑀯𑀺𑀲𑀬𑁂𑀲𑀼 𑀆𑀯𑀺𑀘𑁆𑀙𑀦𑁆𑀦𑀁, 𑀭𑀽𑀧𑀸𑀤𑀻𑀦𑀁 𑀇𑀝𑁆𑀞𑀸𑀦𑀺𑀝𑁆𑀞𑀢𑀸, 𑀢𑀢𑁆𑀣 𑀘 𑀘𑀺𑀢𑁆𑀢𑀲𑁆𑀲 𑀆𑀪𑀼𑀚𑀦𑀦𑁆𑀢𑀺 𑀇𑀫𑁂 𑀆𑀤𑀺𑀲𑀤𑁆𑀤𑀲𑀗𑁆𑀕𑀳𑀺𑀢𑀸. 𑀢𑁂𑀳𑀺 𑀯𑀺𑀓𑀸𑀭𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑀦𑁆𑀢𑀭𑀩𑁆𑀬𑀸𑀧𑀸𑀭𑀢𑁄 𑀅𑀜𑁆𑀜𑀦𑁆𑀢𑀺 𑀓𑀢𑁆𑀯𑀸 𑀅𑀦𑀼𑀕𑁆𑀕𑀳𑀽𑀧𑀖𑀸𑀢𑁄 𑀯𑀺𑀓𑀸𑀭𑁄. 𑀉𑀧𑀦𑀺𑀲𑁆𑀲𑀬𑁄 𑀧𑀦 𑀅𑀧𑁆𑀧𑀥𑀸𑀦𑀲𑁆𑀲 𑀧𑀘𑁆𑀘𑀬𑁄 𑀇𑀥 𑀕𑀳𑀺𑀢𑁄. 𑀓𑀸𑀭𑀡𑀓𑀸𑀭𑀡𑀫𑁆𑀧𑀺 𑀓𑀸𑀭𑀡𑀫𑁂𑀯𑀸𑀢𑀺 𑀕𑀬𑁆𑀳𑀫𑀸𑀦𑁂 𑀲𑀺𑀬𑀸 𑀢𑀲𑁆𑀲𑀸𑀧𑀺 𑀲𑀗𑁆𑀕𑀳𑁄𑀢𑀺. 𑀯𑀼𑀢𑁆𑀢𑀧𑁆𑀧𑀓𑀸𑀭𑀦𑁆𑀢𑀺 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀗𑁆𑀔𑀸𑀢’’𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀁. 𑀦𑀸𑀲𑁆𑀲 𑀧𑀝𑀺𑀖𑁄𑀢𑀺 𑀏𑀢𑁆𑀣𑀸𑀧𑀺 ‘‘𑀯𑀼𑀢𑁆𑀢𑀧𑁆𑀧𑀓𑀸𑀭’’𑀦𑁆𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀅𑀯𑀲𑁂𑀲𑀁 𑀲𑁄𑀴𑀲𑀯𑀺𑀥𑀁 𑀲𑀼𑀔𑀼𑀫𑀭𑀽𑀧𑀁.

𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀲𑀫𑁆𑀧𑀺𑀡𑁆𑀟𑁂𑀦𑁆𑀢𑀺. 𑀘𑁂𑀢𑀦𑀸 𑀳𑀺 𑀆𑀬𑀽𑀳𑀦𑀭𑀲𑀢𑀸𑀬 𑀬𑀣𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀬𑀣𑀸𑀲𑀓𑀁 𑀓𑀺𑀘𑁆𑀘𑁂𑀲𑀼 𑀲𑀁𑀯𑀺𑀤𑀳𑀦𑁆𑀢𑀻 𑀯𑀺𑀬 𑀅𑀪𑀺𑀲𑀦𑁆𑀤𑀳𑀦𑁆𑀢𑀻 𑀯𑀢𑁆𑀢𑀫𑀸𑀦𑀸 𑀢𑁂𑀦𑁂𑀯 𑀓𑀺𑀘𑁆𑀘𑀯𑀺𑀲𑁂𑀲𑁂𑀦 𑀢𑁂 𑀲𑀫𑁆𑀧𑀺𑀡𑁆𑀟𑁂𑀦𑁆𑀢𑀻 𑀯𑀺𑀬 𑀳𑁄𑀢𑀺, 𑀏𑀯𑀁 𑀅𑀢𑁆𑀢𑀦𑁄 𑀯𑀺𑀧𑀸𑀓𑀥𑀫𑁆𑀫𑁂𑀧𑀺 𑀧𑀘𑁆𑀘𑀬𑀲𑀫𑀯𑀸𑀬𑁂 𑀲𑀗𑁆𑀔𑀭𑁄𑀦𑁆𑀢𑀻 𑀲𑀫𑁆𑀧𑀺𑀡𑁆𑀟𑁂𑀦𑁆𑀢𑀻 𑀯𑀺𑀬 𑀳𑁄𑀢𑀺. 𑀢𑁂𑀦𑀸𑀳 ‘‘𑀲𑀳𑀚𑀸𑀢…𑀧𑁂… 𑀭𑀸𑀲𑀻 𑀓𑀭𑁄𑀦𑁆𑀢𑀻’’𑀢𑀺. 𑀅𑀪𑀺𑀲𑀗𑁆𑀔𑀭𑁄𑀢𑀻𑀢𑀺 𑀅𑀪𑀺𑀯𑀺𑀲𑀺𑀝𑁆𑀞𑀁 𑀓𑀢𑁆𑀯𑀸 𑀲𑀗𑁆𑀔𑀭𑁄𑀢𑀺. 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀳𑀺 𑀅𑀢𑁆𑀢𑀦𑁄 𑀨𑀮𑀁 𑀇𑀢𑀭𑀲𑁆𑀲 𑀨𑀮𑀢𑁄 𑀅𑀢𑀺𑀯𑀺𑀬 𑀯𑀺𑀲𑀺𑀝𑁆𑀞𑀁 𑀪𑀺𑀦𑁆𑀦𑀁 𑀓𑀢𑁆𑀯𑀸 𑀲𑀗𑁆𑀔𑀭𑁄𑀢𑀺 𑀧𑀘𑁆𑀘𑀬𑀢𑁄, 𑀲𑀪𑀸𑀯𑀢𑁄, 𑀧𑀯𑀢𑁆𑀢𑀺𑀆𑀓𑀸𑀭𑀢𑁄 𑀘 𑀲𑀬𑀁 𑀇𑀢𑀭𑁂𑀳𑀺 𑀯𑀺𑀲𑀺𑀝𑁆𑀞𑀲𑀪𑀸𑀯𑀢𑁆𑀢𑀸. 𑀏𑀲 𑀦𑀬𑁄 𑀇𑀢𑀭𑁂𑀳𑀺𑀧𑀺. 𑀧𑀼𑀚𑁆𑀚𑀪𑀯𑀨𑀮𑀦𑀺𑀩𑁆𑀩𑀢𑁆𑀢𑀦𑀢𑁄, 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀲𑁆𑀲 𑀧𑀼𑀦𑀦𑀢𑁄 𑀘 𑀧𑀼𑀜𑁆𑀜𑁄.

𑀫𑀳𑀸𑀘𑀺𑀢𑁆𑀢𑀘𑁂𑀢𑀦𑀸𑀦𑀦𑁆𑀢𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀬𑀼𑀦𑀺𑀧𑁆𑀨𑀸𑀤𑀦𑀸𑀤𑀺𑀫𑀳𑀸𑀦𑀼𑀪𑀸𑀯𑀢𑀸𑀬 𑀫𑀳𑀸𑀘𑀺𑀢𑁆𑀢𑁂𑀲𑀼 𑀧𑀯𑀢𑁆𑀢𑀘𑁂𑀢𑀦𑀸𑀦𑀁. 𑀅𑀝𑁆𑀞𑁂𑀯 𑀘𑁂𑀢𑀦𑀸 𑀳𑁄𑀦𑁆𑀢𑀺, 𑀬𑀸 𑀓𑀸𑀫𑀸𑀯𑀘𑀭𑀸 𑀓𑀼𑀲𑀮𑀸. ‘‘𑀢𑁂𑀭𑀲𑀧𑀻’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 ‘‘𑀦𑀯𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀦 𑀳𑀺 𑀪𑀸𑀯𑀦𑀸 𑀜𑀸𑀡𑀭𑀳𑀺𑀢𑀸 𑀬𑀼𑀢𑁆𑀢𑀸𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬𑀸𑀳 ‘‘𑀬𑀣𑀸 𑀳𑀻’’𑀢𑀺𑀆𑀤𑀺. 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀓𑀲𑀺𑀡𑁂𑀲𑀼 𑀛𑀸𑀦𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲. ‘‘𑀧𑀣𑀯𑀻 𑀧𑀣𑀯𑀻’’𑀢𑀺𑀆𑀤𑀺 𑀪𑀸𑀯𑀦𑀸 𑀳𑀺 𑀓𑀲𑀺𑀡𑀧𑀭𑀺𑀓𑀫𑁆𑀫𑀁. 𑀢𑀲𑁆𑀲 𑀳𑀺 𑀧𑀭𑀺𑀓𑀫𑁆𑀫𑀲𑁆𑀲 𑀲𑀼𑀧𑀕𑀼𑀡𑀪𑀸𑀯𑀢𑁄 𑀅𑀦𑀼𑀬𑀼𑀢𑁆𑀢𑀲𑁆𑀲 𑀢𑀢𑁆𑀣 𑀆𑀤𑀭𑀸𑀓𑀭𑀡𑁂𑀦 𑀲𑀺𑀬𑀸 𑀜𑀸𑀡𑀭𑀳𑀺𑀢𑀘𑀺𑀢𑁆𑀢𑀁. 𑀛𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀓𑁂𑀘𑀺 𑀫𑀡𑁆𑀟𑀮𑀓𑀭𑀡𑀫𑁆𑀧𑀺 𑀪𑀸𑀯𑀦𑀁 𑀪𑀚𑀸𑀧𑁂𑀦𑁆𑀢𑀺.

𑀤𑀸𑀦𑀯𑀲𑁂𑀦 𑀧𑀯𑀢𑁆𑀢𑀘𑀺𑀢𑁆𑀢𑀘𑁂𑀢𑀲𑀺𑀓𑀥𑀫𑁆𑀫𑀸 𑀤𑀸𑀦𑀁, 𑀢𑀢𑁆𑀣 𑀩𑁆𑀬𑀸𑀧𑀸𑀭𑀪𑀽𑀢𑀸 𑀆𑀬𑀽𑀳𑀦𑀘𑁂𑀢𑀦𑀸 𑀤𑀸𑀦𑀁 𑀆𑀭𑀩𑁆𑀪, 𑀤𑀸𑀦𑀜𑁆𑀘 𑀅𑀥𑀺𑀓𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀸. 𑀏𑀯𑀁 𑀇𑀢𑀭𑁂𑀲𑀼𑀧𑀺. 𑀅𑀬𑀁 𑀲𑀗𑁆𑀔𑁂𑀧𑀤𑁂𑀲𑀦𑀸𑀢𑀺 𑀅𑀬𑀁 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁂 𑀲𑀗𑁆𑀔𑁂𑀧𑀢𑁄 𑀅𑀢𑁆𑀣𑀤𑁂𑀲𑀦𑀸, 𑀅𑀢𑁆𑀣𑀯𑀡𑁆𑀡𑀦𑀸𑀢𑀺 𑀅𑀢𑁆𑀣𑁄.

𑀲𑁄𑀫𑀦𑀲𑁆𑀲𑀘𑀺𑀢𑁆𑀢𑁂𑀦𑀸𑀢𑀺 𑀅𑀦𑀼𑀫𑁄𑀤𑀦𑀸𑀧𑀯𑀢𑁆𑀢𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁 𑀤𑀝𑁆𑀞𑀩𑁆𑀩𑀁. 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦𑀸𑀧𑀺 𑀳𑀺 𑀅𑀦𑀼𑀲𑁆𑀲𑀭𑀢𑀺 𑀏𑀯𑀸𑀢𑀺. 𑀓𑀸𑀫𑀁 𑀦𑀺𑀘𑁆𑀘𑀲𑀻𑀮𑀁, 𑀉𑀧𑁄𑀲𑀣𑀲𑀻𑀮𑀁, 𑀦𑀺𑀬𑀫𑀲𑀻𑀮𑀫𑁆𑀧𑀺 𑀲𑀻𑀮𑀫𑁂𑀯, 𑀧𑀭𑀺𑀧𑀼𑀡𑁆𑀡𑀁 𑀧𑀦 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑀁 𑀲𑀻𑀮𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀻𑀮𑀧𑀽𑀭𑀡𑀢𑁆𑀣𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀬𑀤𑀲𑁆𑀲𑀦𑀁 𑀯𑀸 𑀏𑀢𑀁, 𑀢𑀲𑁆𑀫𑀸 ‘‘𑀦𑀺𑀘𑁆𑀘𑀲𑀻𑀮𑀁, 𑀉𑀧𑁄𑀲𑀣𑀲𑀻𑀮𑀁, 𑀦𑀺𑀬𑀫𑀲𑀻𑀮𑀁 𑀲𑀫𑀸𑀤𑀺𑀬𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑀲𑁆𑀲, 𑀲𑀫𑀸𑀤𑀺𑀬𑀺𑀢𑁆𑀯𑀸 𑀲𑀫𑀸𑀤𑀺𑀦𑁆𑀦𑀲𑀻𑀮𑁂 𑀘 𑀢𑀲𑁆𑀫𑀺𑀁, ‘‘𑀲𑀸𑀥𑀼 𑀲𑀼𑀝𑁆𑀞𑀽’’𑀢𑀺 𑀆𑀯𑀚𑁆𑀚𑀦𑁆𑀢𑀲𑁆𑀲, 𑀢𑀁 𑀲𑀻𑀮𑀁 𑀲𑁄𑀥𑁂𑀦𑁆𑀢𑀲𑁆𑀲 𑀘 𑀧𑀯𑀢𑁆𑀢𑀸 𑀘𑁂𑀢𑀦𑀸 𑀲𑀻𑀮𑀫𑀬𑀸𑀢𑀺 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀧𑀼𑀩𑁆𑀩𑁂 𑀲𑀫𑀣𑀯𑀲𑁂𑀦 𑀪𑀸𑀯𑀦𑀸𑀦𑀬𑁄 𑀕𑀳𑀺𑀢𑁄𑀢𑀺 𑀇𑀤𑀸𑀦𑀺 𑀲𑀫𑁆𑀫𑀲𑀦𑀦𑀬𑁂𑀦 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀯𑀼𑀢𑁆𑀢𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀦𑀺𑀘𑁆𑀘𑀢𑁄𑀢𑀺 𑀅𑀦𑀺𑀘𑁆𑀘𑀪𑀸𑀯𑀢𑁄. 𑀤𑀼𑀓𑁆𑀔𑀢𑁄, 𑀅𑀦𑀢𑁆𑀢𑀢𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀣 𑀬𑁂 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀦𑀸𑀫𑀭𑀽𑀧𑀪𑀸𑀯𑁂𑀦 𑀧𑀭𑀺𑀕𑁆𑀕𑀳𑀺𑀢𑀸, 𑀢𑁂 𑀬𑀲𑁆𑀫𑀸 𑀤𑁆𑀯𑀸𑀭𑀸𑀭𑀫𑁆𑀫𑀡𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀥𑀫𑁆𑀫𑀯𑀲𑁂𑀦 𑀯𑀺𑀪𑀸𑀕𑀁 𑀮𑀪𑀦𑁆𑀢𑀺, 𑀢𑀲𑁆𑀫𑀸 𑀤𑁆𑀯𑀸𑀭𑀙𑀓𑁆𑀓𑀸𑀤𑀺𑀯𑀲𑁂𑀦 𑀙 𑀙𑀓𑁆𑀓𑀸 𑀕𑀳𑀺𑀢𑀸. 𑀬𑀲𑁆𑀫𑀸 𑀧𑀦 𑀮𑀓𑁆𑀔𑀡𑁂𑀲𑀼 𑀅𑀦𑀢𑁆𑀢𑀮𑀓𑁆𑀔𑀡𑀁 𑀤𑀼𑀩𑁆𑀩𑀺𑀪𑀸𑀯𑀁, 𑀢𑀲𑁆𑀫𑀸 𑀢𑀲𑁆𑀲 𑀯𑀺𑀪𑀸𑀯𑀦𑀸𑀬 𑀙 𑀥𑀸𑀢𑀼𑀬𑁄 𑀕𑀳𑀺𑀢𑀸. 𑀢𑀢𑁄 𑀬𑁂𑀲𑀼 𑀓𑀲𑀺𑀡𑁂𑀲𑀼 𑀇𑀢𑁄 𑀩𑀸𑀳𑀺𑀭𑀓𑀸𑀦𑀁 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑁄, 𑀢𑀸𑀦𑀺 𑀇𑀫𑁂𑀲𑀁 𑀛𑀸𑀦𑀸𑀦𑀁 𑀆𑀭𑀫𑁆𑀫𑀡𑀪𑀸𑀯𑁂𑀦 𑀉𑀧𑀝𑁆𑀞𑀸𑀦𑀸𑀓𑀸𑀭𑀫𑀢𑁆𑀢𑀸𑀦𑀺, 𑀇𑀫𑀸𑀦𑀺 𑀧𑀦 𑀢𑀸𑀦𑀺 𑀛𑀸𑀦𑀸𑀦𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀤𑀲 𑀓𑀲𑀺𑀡𑀸𑀦𑀺 𑀕𑀳𑀺𑀢𑀸𑀦𑀺. 𑀢𑀢𑁄 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀧𑀭𑀺𑀯𑀸𑀭𑀪𑀸𑀯𑁂𑀦 𑀧𑀝𑀺𑀓𑁆𑀓𑀽𑀮𑀸𑀓𑀸𑀭𑀯𑀲𑁂𑀦 𑀤𑁆𑀯𑀢𑁆𑀢𑀺𑀁𑀲 𑀓𑁄𑀝𑁆𑀞𑀸𑀲𑀸 𑀕𑀳𑀺𑀢𑀸. 𑀧𑀼𑀩𑁆𑀩𑁂 𑀔𑀦𑁆𑀥𑀯𑀲𑁂𑀦 𑀲𑀗𑁆𑀔𑁂𑀧𑀢𑁄 𑀇𑀫𑁂 𑀥𑀫𑁆𑀫𑀸 𑀕𑀳𑀺𑀢𑀸, 𑀇𑀤𑀸𑀦𑀺 𑀦𑀸𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀦𑀬𑁂𑀦 𑀘 𑀫𑀦𑀲𑀺 𑀓𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺, 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀘 𑀕𑀳𑀺𑀢𑀸. 𑀢𑁂𑀲𑀼 𑀇𑀫𑁂 𑀥𑀫𑁆𑀫𑀸 𑀲𑀢𑀺𑀧𑀺 𑀲𑀼𑀜𑁆𑀜𑀸𑀦𑀺𑀭𑀻𑀳𑀅𑀩𑁆𑀬𑀸𑀧𑀸𑀭𑀪𑀸𑀯𑁂 𑀥𑀫𑁆𑀫𑀲𑀪𑀸𑀯𑀢𑁄 𑀆𑀥𑀺𑀧𑀘𑁆𑀘𑀪𑀸𑀯𑁂𑀦 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀦𑀢𑁆𑀢𑀪𑀸𑀯𑀯𑀺𑀪𑀸𑀯𑀦𑀢𑁆𑀣𑀁 𑀇𑀦𑁆𑀤𑁆𑀭𑀺𑀬𑀸𑀦𑀺 𑀕𑀳𑀺𑀢𑀸𑀦𑀺. 𑀏𑀯𑀁 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑀸𑀧𑀺 𑀇𑀫𑁂 𑀥𑀫𑁆𑀫𑀸 𑀪𑀽𑀫𑀺𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀢𑀺𑀯𑀺𑀥𑀸𑀯 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀢𑀺𑀲𑁆𑀲𑁄 𑀥𑀸𑀢𑀼𑀬𑁄 𑀕𑀳𑀺𑀢𑀸. 𑀏𑀢𑁆𑀢𑀸𑀯𑀢𑀸 𑀦𑀺𑀫𑀺𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀧𑀯𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 𑀓𑀸𑀫𑀪𑀯𑀸𑀤𑀬𑁄 𑀦𑀯 𑀪𑀯𑀸 𑀕𑀳𑀺𑀢𑀸. 𑀏𑀢𑁆𑀢𑀓𑁂 𑀅𑀪𑀺𑀜𑁆𑀜𑁂𑀬𑁆𑀬𑀯𑀺𑀲𑁂𑀲𑁂 𑀧𑀯𑀢𑁆𑀢𑀫𑀦𑀲𑀺𑀓𑀸𑀭𑀓𑁄𑀲𑀮𑁆𑀮𑁂𑀦 𑀲𑀡𑁆𑀳𑀲𑀼𑀔𑀼𑀫𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑀫𑀳𑀕𑁆𑀕𑀢𑀥𑀫𑁆𑀫𑁂𑀲𑀼 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀛𑀸𑀦𑀅𑀧𑁆𑀧𑀫𑀜𑁆𑀜𑀸𑀭𑀽𑀧𑀸𑀦𑀺 𑀕𑀳𑀺𑀢𑀸𑀦𑀺. 𑀢𑀢𑁆𑀣 𑀛𑀸𑀦𑀸𑀦𑀺 𑀦𑀸𑀫 𑀯𑀼𑀢𑁆𑀢𑀸𑀯𑀲𑁂𑀲𑀸𑀭𑀫𑁆𑀫𑀡𑀸𑀦𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺. 𑀧𑀼𑀦 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀺𑀪𑀸𑀕𑀢𑁄 𑀇𑀫𑁂 𑀥𑀫𑁆𑀫𑀸 𑀯𑀺𑀪𑀚𑁆𑀚 𑀫𑀦𑀲𑀺𑀓𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑀸𑀦𑀺 𑀕𑀳𑀺𑀢𑀸𑀦𑀺. 𑀧𑀘𑁆𑀘𑀬𑀸𑀓𑀸𑀭𑀫𑀦𑀲𑀺𑀓𑀸𑀭𑁄 𑀳𑀺 𑀲𑀼𑀔𑁂𑀦, 𑀲𑀼𑀝𑁆𑀞𑀼𑀢𑀭𑀜𑁆𑀘 𑀮𑀓𑁆𑀔𑀡𑀢𑁆𑀢𑀬𑀁 𑀯𑀺𑀪𑀸𑀯𑁂𑀢𑀺, 𑀢𑀲𑁆𑀫𑀸 𑀲𑁄 𑀧𑀘𑁆𑀙𑀢𑁄 𑀕𑀳𑀺𑀢𑁄. 𑀏𑀯𑀁 𑀏𑀢𑁂 𑀲𑀫𑁆𑀫𑀲𑀦𑀻𑀬𑀪𑀸𑀯𑁂𑀦 𑀕𑀳𑀺𑀢𑀸 𑀔𑀦𑁆𑀥𑀸𑀤𑀺𑀯𑀲𑁂𑀦 𑀓𑁄𑀝𑁆𑀞𑀸𑀲𑀢𑁄 𑀧𑀜𑁆𑀘𑀯𑀻𑀲𑀢𑀺𑀯𑀺𑀥𑀸, 𑀧𑀪𑁂𑀤𑀢𑁄 𑀧𑀦 𑀅𑀢𑀻𑀢𑀸𑀤𑀺𑀪𑁂𑀤𑀁 𑀅𑀦𑀸𑀫𑀲𑀺𑀢𑁆𑀯𑀸 𑀕𑀬𑁆𑀳𑀫𑀸𑀦𑀸 𑀤𑁆𑀯𑀻𑀳𑀺 𑀊𑀦𑀸𑀦𑀺 𑀤𑁆𑀯𑁂𑀲𑀢𑀸𑀦𑀺 𑀳𑁄𑀦𑁆𑀢𑀺. 𑀇𑀤𑀁 𑀢𑀸𑀯𑁂𑀢𑁆𑀣 𑀧𑀸𑀴𑀺𑀯𑀯𑀢𑁆𑀣𑀸𑀦𑀁, 𑀅𑀢𑁆𑀣𑀯𑀺𑀘𑀸𑀭𑀁 𑀧𑀦 𑀇𑀘𑁆𑀙𑀦𑁆𑀢𑁂𑀳𑀺 𑀧𑀭𑀫𑀢𑁆𑀣𑀫𑀜𑁆𑀚𑀽𑀲𑀸𑀬𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀦 𑀧𑀼𑀜𑁆𑀜𑁄𑀢𑀺 𑀅𑀧𑀼𑀜𑁆𑀜𑁄. 𑀢𑀲𑁆𑀲 𑀧𑀼𑀜𑁆𑀜-𑀲𑀤𑁆𑀤𑁂 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀦𑁆𑀢𑀸𑀦𑀲𑁆𑀲 𑀇𑀜𑁆𑀚𑀦𑀳𑁂𑀢𑀽𑀦𑀁 𑀦𑀻𑀯𑀭𑀡𑀸𑀤𑀻𑀦𑀁 𑀲𑀼𑀯𑀺𑀓𑁆𑀔𑀫𑁆𑀪𑀦𑀢𑁄 𑀭𑀽𑀧𑀢𑀡𑁆𑀳𑀸𑀲𑀗𑁆𑀔𑀸𑀢𑀲𑁆𑀲 𑀇𑀜𑁆𑀚𑀺𑀢𑀲𑁆𑀲 𑀅𑀪𑀸𑀯𑀢𑁄 𑀅𑀦𑀺𑀜𑁆𑀚𑀁, 𑀅𑀦𑀺𑀜𑁆𑀚𑀫𑁂𑀯 ‘‘𑀆𑀦𑁂𑀜𑁆𑀚’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀭𑀽𑀧𑀸𑀭𑀫𑁆𑀫𑀡𑀁 𑀭𑀽𑀧𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀁 𑀲𑀩𑁆𑀩𑀫𑁆𑀧𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 ‘‘𑀆𑀦𑁂𑀜𑁆𑀚’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀘𑀢𑁆𑀢𑀸𑀭𑁄 𑀫𑀕𑁆𑀕𑀝𑁆𑀞𑀸, 𑀳𑁂𑀝𑁆𑀞𑀺𑀫𑀸 𑀢𑀬𑁄 𑀨𑀮𑀝𑁆𑀞𑀸𑀢𑀺 𑀏𑀯𑀁 𑀲𑀢𑁆𑀢𑀯𑀺𑀥𑁄. 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸𑀢𑀺 𑀅𑀥𑀺𑀲𑀻𑀮𑀸𑀤𑀺𑀓𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸. 𑀢𑀸𑀲𑀼 𑀚𑀸𑀢𑁄𑀢𑀺 𑀯𑀸 𑀲𑁂𑀓𑁆𑀔𑁄, 𑀅𑀭𑀺𑀬𑀧𑀼𑀕𑁆𑀕𑀮𑁄 𑀳𑀺 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀬𑀫𑀸𑀦𑁄 𑀲𑀺𑀓𑁆𑀔𑀸𑀲𑀼 𑀚𑀸𑀬𑀢𑀺, 𑀦 𑀬𑁄𑀦𑀺𑀬𑀁. 𑀲𑀺𑀓𑁆𑀔𑀦𑀲𑀻𑀮𑁄𑀢𑀺 𑀯𑀸 𑀲𑁂𑀓𑁆𑀔𑁄. 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀯𑀸 𑀓𑀣𑀸𑀬 𑀲𑁂𑀓𑁆𑀔𑀲𑁆𑀲 𑀅𑀬𑀦𑁆𑀢𑀺 𑀅𑀜𑁆𑀜𑀸𑀲𑀸𑀥𑀸𑀭𑀡𑀫𑀕𑁆𑀕𑀨𑀮𑀢𑁆𑀢𑀬𑀥𑀫𑁆𑀫𑀸 𑀲𑁂𑀓𑁆𑀔𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀸. 𑀅𑀲𑁂𑀓𑁆𑀔𑁄𑀢𑀺 𑀘 𑀬𑀢𑁆𑀣 𑀲𑁂𑀓𑁆𑀔𑀪𑀸𑀯𑀸𑀲𑀗𑁆𑀓𑀸 𑀅𑀢𑁆𑀣𑀺, 𑀢𑀢𑁆𑀣𑀸𑀬𑀁 𑀧𑀝𑀺𑀲𑁂𑀥𑁄𑀢𑀺 𑀮𑁄𑀓𑀺𑀬𑀦𑀺𑀩𑁆𑀩𑀸𑀦𑁂𑀲𑀼 𑀅𑀲𑁂𑀓𑁆𑀔𑀪𑀸𑀯𑀦𑀸𑀧𑀢𑁆𑀢𑀺 𑀤𑀝𑁆𑀞𑀩𑁆𑀩𑀸. 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑀸 𑀳𑀺 𑀲𑀺𑀓𑁆𑀔𑀸 𑀅𑀢𑁆𑀢𑀦𑁄 𑀧𑀝𑀺𑀧𑀓𑁆𑀔𑀓𑀺𑀮𑁂𑀲𑁂𑀳𑀺𑀯𑀺𑀧𑁆𑀧𑀫𑀼𑀢𑁆𑀢𑀸 𑀧𑀭𑀺𑀲𑀼𑀤𑁆𑀥𑀸 𑀉𑀧𑀓𑁆𑀓𑀺𑀮𑁂𑀲𑀸𑀦𑀁 𑀆𑀭𑀫𑁆𑀫𑀡𑀪𑀸𑀯𑀫𑁆𑀧𑀺 𑀅𑀦𑀼𑀧𑀕𑀫𑀦𑀢𑁄 𑀏𑀢𑀸 ‘‘𑀲𑀺𑀓𑁆𑀔𑀸’’𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀸 𑀅𑀝𑁆𑀞𑀲𑀼𑀧𑀺 𑀫𑀕𑁆𑀕𑀨𑀮𑁂𑀲𑀼 𑀯𑀺𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀘𑀢𑀼𑀫𑀕𑁆𑀕𑀳𑁂𑀝𑁆𑀞𑀺𑀫𑀨𑀮𑀢𑁆𑀢𑀬𑀲𑀫𑀗𑁆𑀕𑀺𑀦𑁄 𑀯𑀺𑀬 𑀅𑀭𑀳𑀢𑁆𑀢𑀨𑀮𑀲𑀫𑀗𑁆𑀕𑀻𑀧𑀺 𑀢𑀸𑀲𑀼 𑀲𑀺𑀓𑁆𑀔𑀸𑀲𑀼 𑀚𑀸𑀢𑁄𑀢𑀺 𑀘 𑀢𑀁𑀲𑀫𑀗𑁆𑀕𑀺𑀦𑁄 𑀅𑀭𑀳𑀢𑁄 𑀇𑀢𑀭𑁂𑀲𑀁 𑀯𑀺𑀬 𑀲𑁂𑀓𑁆𑀔𑀢𑁆𑀢𑁂 𑀲𑀢𑀺 𑀲𑁂𑀓𑁆𑀔𑀲𑁆𑀲 𑀅𑀬𑀦𑁆𑀢𑀺 𑀘 𑀲𑀺𑀓𑁆𑀔𑀸 𑀲𑀻𑀮𑀁 𑀏𑀢𑀲𑁆𑀲𑀸𑀢𑀺 𑀘 ‘‘𑀲𑁂𑀓𑁆𑀔𑁄’’𑀢𑀺 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸𑀢𑀺 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 𑀅𑀲𑁂𑀓𑁆𑀔𑁄𑀢𑀺 𑀬𑀣𑀸𑀯𑀼𑀢𑁆𑀢𑀲𑁂𑀓𑁆𑀔𑀪𑀸𑀯𑀧𑀝𑀺𑀲𑁂𑀥𑁄 𑀓𑀢𑁄. 𑀅𑀭𑀳𑀢𑁆𑀢𑀨𑀮𑁂 𑀳𑀺 𑀧𑀯𑀢𑁆𑀢𑀫𑀸𑀦𑀸 𑀲𑀺𑀓𑁆𑀔𑀸 𑀧𑀭𑀺𑀦𑀺𑀝𑁆𑀞𑀺𑀢𑀲𑀺𑀓𑁆𑀔𑀸𑀓𑀺𑀘𑁆𑀘𑀢𑁆𑀢𑀸 𑀦 𑀲𑀺𑀓𑁆𑀔𑀸𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺, 𑀓𑁂𑀯𑀮𑀁 𑀲𑀺𑀓𑁆𑀔𑀸𑀨𑀮𑀪𑀸𑀯𑁂𑀦𑁂𑀯 𑀧𑀯𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀦 𑀢𑀸 𑀲𑀺𑀓𑁆𑀔𑀸𑀯𑀘𑀦𑀁 𑀅𑀭𑀳𑀦𑁆𑀢𑀺, 𑀦𑀸𑀧𑀺 𑀢𑀁𑀲𑀫𑀗𑁆𑀕𑀻 𑀲𑁂𑀓𑁆𑀔𑀯𑀘𑀦𑀁, 𑀦 𑀘 ‘‘𑀲𑀺𑀓𑁆𑀔𑀦𑀲𑀻𑀮𑁄, 𑀲𑀺𑀓𑁆𑀔𑀸𑀲𑀼 𑀚𑀸𑀢𑁄’’𑀢𑀺 𑀘 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺. 𑀳𑁂𑀝𑁆𑀞𑀺𑀫𑀨𑀮𑁂𑀲𑀼 𑀧𑀦 𑀲𑀺𑀓𑁆𑀔𑀸 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀯𑀺𑀧𑀲𑁆𑀲𑀦𑀸𑀤𑀻𑀦𑀁 𑀉𑀧𑀦𑀺𑀲𑁆𑀲𑀬𑀪𑀸𑀯𑀢𑁄 𑀲𑀺𑀓𑁆𑀔𑀸𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀻𑀢𑀺 𑀲𑀺𑀓𑁆𑀔𑀸𑀯𑀘𑀦𑀁 𑀅𑀭𑀳𑀦𑁆𑀢𑀺, 𑀢𑀁𑀲𑀫𑀗𑁆𑀕𑀺𑀦𑁄 𑀘 𑀲𑁂𑀓𑁆𑀔𑀯𑀘𑀦𑀁, ‘‘𑀲𑀺𑀓𑁆𑀔𑀦𑀲𑀻𑀮𑀸, 𑀲𑀺𑀓𑁆𑀔𑀸𑀲𑀼 𑀚𑀸𑀢𑀸’’𑀢𑀺 𑀘 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀦𑁆𑀢𑀺.

‘‘𑀲𑀺𑀓𑁆𑀔𑀢𑀻𑀢𑀺 𑀲𑁂𑀓𑁆𑀔𑁄’’𑀢𑀺 𑀘 𑀅𑀧𑀭𑀺𑀬𑁄𑀲𑀺𑀢𑀲𑀺𑀓𑁆𑀔𑁄 𑀤𑀲𑁆𑀲𑀺𑀢𑁄𑀢𑀺. 𑀅𑀦𑀦𑁆𑀢𑀭𑀫𑁂𑀯 ‘‘𑀔𑀻𑀡𑀸𑀲𑀯𑁄’’𑀢𑀺 𑀆𑀤𑀺𑀁 𑀯𑀢𑁆𑀯𑀸 ‘‘𑀦 𑀲𑀺𑀓𑁆𑀔𑀢𑀻𑀢𑀺 𑀅𑀲𑁂𑀓𑁆𑀔𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀭𑀺𑀬𑁄𑀲𑀺𑀢𑀲𑀺𑀓𑁆𑀔𑁄 𑀤𑀲𑁆𑀲𑀺𑀢𑁄, 𑀦 𑀲𑀺𑀓𑁆𑀔𑀸𑀭𑀳𑀺𑀢𑁄 𑀢𑀲𑁆𑀲 𑀢𑀢𑀺𑀬𑀧𑀼𑀕𑁆𑀕𑀮𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸. 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀲𑀺𑀓𑁆𑀔𑁄 𑀯𑀸 𑀅𑀲𑁂𑀓𑁆𑀔𑁄𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀲𑁂𑀓𑁆𑀔𑀥𑀫𑁆𑀫𑁂𑀲𑀼 𑀏𑀯 𑀞𑀺𑀢𑀲𑁆𑀲 𑀓𑀲𑁆𑀲𑀘𑀺 𑀅𑀭𑀺𑀬𑀲𑁆𑀲 𑀅𑀲𑁂𑀓𑁆𑀔𑀪𑀸𑀯𑀸𑀧𑀢𑁆𑀢𑀻𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀥𑀫𑁆𑀫𑀸 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀸, 𑀬𑀣𑀸𑀯𑀼𑀢𑁆𑀢𑁂𑀳𑀺 𑀘 𑀅𑀢𑁆𑀣𑁂𑀳𑀺 𑀲𑁂𑀓𑁆𑀔𑁄𑀢𑀺 𑀓𑀢𑁆𑀯𑀸 𑀢𑀁𑀲𑀫𑀗𑁆𑀕𑀺𑀦𑁄 𑀅𑀕𑁆𑀕𑀫𑀕𑁆𑀕𑀝𑁆𑀞𑀲𑁆𑀲 𑀅𑀲𑁂𑀓𑁆𑀔𑀪𑀸𑀯𑁄 𑀆𑀧𑀦𑁆𑀦𑁄𑀢𑀺? 𑀦 𑀢𑀁𑀲𑀤𑀺𑀲𑁂𑀲𑀼 𑀢𑀩𑁆𑀩𑁄𑀳𑀸𑀭𑀢𑁄. 𑀅𑀭𑀳𑀢𑁆𑀢𑀫𑀕𑁆𑀕𑀢𑁄 𑀳𑀺 𑀦𑀺𑀦𑁆𑀦𑀸𑀦𑀸𑀓𑀭𑀡𑀁 𑀅𑀭𑀳𑀢𑁆𑀢𑀨𑀮𑀁 𑀞𑀧𑁂𑀢𑁆𑀯𑀸 𑀧𑀭𑀺𑀜𑁆𑀜𑀸𑀤𑀺𑀓𑀺𑀘𑁆𑀘𑀓𑀭𑀡𑀁, 𑀯𑀺𑀧𑀸𑀓𑀪𑀸𑀯𑀜𑁆𑀘, 𑀢𑀲𑁆𑀫𑀸 𑀢𑁂 𑀏𑀯 𑀲𑁂𑀓𑁆𑀔𑀥𑀫𑁆𑀫𑀸 ‘‘𑀅𑀕𑁆𑀕𑀨𑀮𑀥𑀫𑁆𑀫𑀪𑀸𑀯𑀁 𑀆𑀧𑀦𑁆𑀦𑀸’’𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀓𑀼𑀲𑀮𑀲𑀼𑀔𑀢𑁄 𑀘 𑀯𑀺𑀧𑀸𑀓𑀲𑀼𑀔𑀁 𑀲𑀦𑁆𑀢𑀢𑀭𑀢𑀸𑀬 𑀧𑀡𑀻𑀢𑀢𑀭𑀦𑁆𑀢𑀺, 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀸 𑀘 𑀢𑁂 𑀥𑀫𑁆𑀫𑀸 𑀳𑁄𑀦𑁆𑀢𑀻𑀢𑀺 𑀢𑀁𑀲𑀫𑀗𑁆𑀕𑀻 ‘‘𑀅𑀲𑁂𑀓𑁆𑀔𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀚𑀸𑀢𑀺𑀫𑀳𑀮𑁆𑀮𑀓𑁄𑀢𑀺 𑀚𑀸𑀢𑀺𑀬𑀸 𑀯𑀼𑀟𑁆𑀠𑀢𑀭𑁄 𑀅𑀤𑁆𑀥𑀕𑀢𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄. 𑀲𑁄 𑀳𑀺 𑀭𑀢𑁆𑀢𑀜𑁆𑀜𑀼𑀢𑀸𑀬 𑀬𑁂𑀪𑀼𑀬𑁆𑀬𑁂𑀦 𑀚𑀸𑀢𑀺𑀥𑀫𑁆𑀫𑀓𑀼𑀮𑀥𑀫𑁆𑀫𑀧𑀤𑁂𑀲𑀼 𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑀺𑀬𑀸 𑀚𑀸𑀢𑀺𑀣𑁂𑀭𑁄 𑀦𑀸𑀫. 𑀣𑁂𑀭𑀓𑀭𑀡𑀸 𑀥𑀫𑁆𑀫𑀸𑀢𑀺 𑀲𑀸𑀲𑀦𑁂 𑀣𑀺𑀭𑀪𑀸𑀯𑀓𑀭𑀸 𑀕𑀼𑀡𑀸 𑀧𑀝𑀺𑀧𑀓𑁆𑀔𑀦𑀺𑀫𑁆𑀫𑀤𑀦𑀓𑀸. 𑀣𑁂𑀭𑁄𑀢𑀺 𑀯𑀓𑁆𑀔𑀫𑀸𑀦𑁂𑀲𑀼 𑀥𑀫𑁆𑀫𑁂𑀲𑀼 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑁄. 𑀲𑀻𑀮𑀯𑀸𑀢𑀺 𑀧𑀸𑀲𑀁𑀲𑁂𑀦 𑀲𑀸𑀢𑀺𑀲𑀬𑁂𑀦 𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺 𑀅𑀢𑁆𑀣𑁄, 𑀏𑀢𑁂𑀦 𑀤𑀼𑀲𑁆𑀲𑀻𑀮𑁆𑀬𑀲𑀗𑁆𑀔𑀸𑀢𑀲𑁆𑀲 𑀩𑀸𑀮𑁆𑀬𑀲𑁆𑀲 𑀅𑀪𑀸𑀯𑀫𑀸𑀳. 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺 𑀩𑀳𑀼 𑀲𑀼𑀢𑀁 𑀏𑀢𑁂𑀦𑀸𑀢𑀺 𑀩𑀳𑀼𑀲𑁆𑀲𑀼𑀢𑁄, 𑀏𑀢𑁂𑀦𑀸𑀲𑁆𑀲 𑀲𑀼𑀢𑀯𑀺𑀭𑀳𑀲𑀗𑁆𑀔𑀸𑀢𑀲𑁆𑀲 𑀩𑀸𑀮𑁆𑀬𑀲𑁆𑀲 𑀅𑀪𑀸𑀯𑀁, 𑀧𑀝𑀺𑀲𑀗𑁆𑀔𑀸𑀦𑀩𑀮𑁂𑀦 𑀘 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀯𑀤𑀢𑀺. ‘‘𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀮𑀸𑀪𑀻’’𑀢𑀺 𑀇𑀫𑀺𑀦𑀸 𑀦𑀻𑀯𑀭𑀡𑀸𑀤𑀺𑀲𑀗𑁆𑀔𑀸𑀢𑀲𑁆𑀲 𑀩𑀸𑀮𑁆𑀬𑀲𑁆𑀲 𑀅𑀪𑀸𑀯𑀁, 𑀪𑀸𑀯𑀦𑀸𑀩𑀮𑁂𑀦 𑀘 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀓𑀣𑁂𑀢𑀺. ‘‘𑀆𑀲𑀯𑀸𑀦𑀁 𑀔𑀬𑀸’’𑀢𑀺𑀆𑀤𑀺𑀦𑀸 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑀲𑁆𑀲 𑀩𑀸𑀮𑁆𑀬𑀲𑁆𑀲 𑀲𑀩𑁆𑀩𑀲𑁄 𑀅𑀪𑀸𑀯𑀁, 𑀔𑀻𑀡𑀸𑀲𑀯𑀢𑁆𑀣𑁂𑀭𑀪𑀸𑀯𑁂𑀦 𑀧𑀢𑀺𑀝𑁆𑀞𑀺𑀢𑀪𑀸𑀯𑀜𑁆𑀘𑀲𑁆𑀲 𑀤𑀲𑁆𑀲𑁂𑀢𑀺. 𑀦 𑀘𑁂𑀢𑁆𑀣 𑀲𑀫𑀼𑀤𑀸𑀬𑁂 𑀯𑀸𑀓𑁆𑀬𑀧𑀭𑀺𑀲𑀫𑀸𑀧𑀦𑀁, 𑀅𑀣 𑀔𑁄 𑀧𑀘𑁆𑀘𑁂𑀓𑀁 𑀯𑀸𑀓𑁆𑀬𑀧𑀭𑀺𑀲𑀫𑀸𑀧𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀁 𑀯𑀼𑀢𑁆𑀢𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺𑀆𑀤𑀺𑀫𑀸𑀳. 𑀣𑁂𑀭𑀦𑀸𑀫𑀓𑁄 𑀯𑀸 ‘‘𑀣𑁂𑀭𑁄’’𑀢𑀺 𑀏𑀯𑀁 𑀦𑀸𑀫𑀓𑁄 𑀯𑀸.

𑀅𑀦𑀼𑀕𑁆𑀕𑀳𑀯𑀲𑁂𑀦, 𑀧𑀽𑀚𑀸𑀯𑀲𑁂𑀦 𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀧𑀭𑀲𑁆𑀲 𑀤𑀻𑀬𑀢𑀺 𑀏𑀢𑁂𑀦𑀸𑀢𑀺 𑀤𑀸𑀦𑀁, 𑀧𑀭𑀺𑀘𑁆𑀘𑀸𑀕𑀘𑁂𑀢𑀦𑀸. 𑀤𑀸𑀦𑀫𑁂𑀯 𑀤𑀸𑀦𑀫𑀬𑀁. 𑀧𑀤𑀧𑀽𑀭𑀡𑀫𑀢𑁆𑀢𑀁 𑀫𑀬-𑀲𑀤𑁆𑀤𑁄. 𑀧𑀼𑀜𑁆𑀜𑀜𑁆𑀘 𑀢𑀁 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀓𑀺𑀭𑀺𑀬𑀸 𑀘 𑀓𑀫𑁆𑀫𑀪𑀸𑀯𑀢𑁄𑀢𑀺 𑀧𑀼𑀜𑁆𑀜𑀓𑀺𑀭𑀺𑀬𑀸. 𑀧𑀭𑁂𑀲𑀁 𑀧𑀺𑀬𑀫𑀦𑀸𑀧𑀢𑀸𑀲𑁂𑀯𑀦𑀻𑀬𑀢𑀸𑀤𑀻𑀦𑀁 𑀆𑀦𑀺𑀲𑀁𑀲𑀸𑀦𑀁. 𑀧𑀼𑀩𑁆𑀩𑁂…𑀧𑁂… 𑀯𑀲𑁂𑀦𑁂𑀯𑀸𑀢𑀺 𑀲𑀗𑁆𑀔𑀸𑀭𑀢𑁆𑀢𑀺𑀓𑁂 (𑀤𑀻. 𑀦𑀺. 𑁩.𑁩𑁦𑁫; 𑀤𑀻. 𑀦𑀺. 𑀅𑀝𑁆𑀞. 𑁩.𑁩𑁦𑁫) 𑀯𑀼𑀢𑁆𑀢𑀤𑀸𑀦𑀫𑀬𑀲𑀻𑀮𑀫𑀬𑀪𑀸𑀯𑀦𑀸𑀫𑀬𑀘𑁂𑀢𑀦𑀸𑀯𑀲𑁂𑀦𑁂𑀯. 𑀇𑀫𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀲𑀼. 𑀓𑀸𑀬𑁂𑀦 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀢𑀦𑁄 𑀓𑀸𑀬𑁂𑀦 𑀧𑀭𑀺𑀘𑁆𑀘𑀸𑀕𑀧𑀬𑁄𑀕𑀁 𑀧𑀯𑀢𑁆𑀢𑁂𑀦𑁆𑀢𑀲𑁆𑀲. 𑀢𑀤𑀢𑁆𑀣𑀦𑁆𑀢𑀺 𑀤𑀸𑀦𑀢𑁆𑀣𑀁. ‘‘𑀇𑀫𑀁 𑀤𑁂𑀬𑁆𑀬𑀥𑀫𑁆𑀫𑀁 𑀤𑁂𑀳𑀻’’𑀢𑀺 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑀲𑁆𑀲. 𑀤𑀸𑀦𑀧𑀸𑀭𑀫𑀺𑀁 𑀆𑀯𑀚𑁆𑀚𑁂𑀢𑁆𑀯𑀸 𑀯𑀸𑀢𑀺 𑀬𑀣𑀸 𑀓𑁂𑀯𑀮𑀁 ‘‘𑀅𑀦𑁆𑀦𑀤𑀸𑀦𑀸𑀤𑀻𑀦𑀺 𑀤𑁂𑀫𑀻’’𑀢𑀺 𑀤𑀸𑀦𑀓𑀸𑀮𑁂 𑀢𑀁 𑀤𑀸𑀦𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀳𑁄𑀢𑀺, 𑀏𑀯𑀁 ‘‘𑀇𑀫𑀁 𑀤𑀸𑀦𑀫𑀬𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀽’’𑀢𑀺 𑀤𑀸𑀦𑀧𑀸𑀭𑀫𑀺𑀁 𑀆𑀯𑀚𑁆𑀚𑁂𑀢𑁆𑀯𑀸 𑀤𑀸𑀦𑀓𑀸𑀮𑁂𑀧𑀺 𑀤𑀸𑀦𑀲𑀻𑀲𑁂𑀦𑁂𑀯 𑀧𑀯𑀢𑁆𑀢𑀺𑀢𑀢𑁆𑀢𑀸. 𑀯𑀢𑁆𑀢𑀲𑀻𑀲𑁂 𑀞𑀢𑁆𑀯𑀸𑀢𑀺 ‘‘𑀏𑀢𑀁 𑀤𑀸𑀦𑀁 𑀦𑀸𑀫 𑀫𑀬𑁆𑀳𑀁 𑀓𑀼𑀮𑀯𑀁𑀲𑁄 𑀓𑀼𑀮𑀢𑀦𑁆𑀢𑀺 𑀓𑀼𑀮𑀧𑀯𑁂𑀡𑀻 𑀓𑀼𑀮𑀘𑀸𑀭𑀺𑀢𑁆𑀢’’𑀦𑁆𑀢𑀺 𑀘𑀸𑀭𑀺𑀢𑁆𑀢𑀲𑀻𑀮𑁂 𑀞𑀢𑁆𑀯𑀸 𑀤𑀤𑀢𑁄 𑀘𑀸𑀭𑀺𑀢𑁆𑀢𑀲𑀻𑀮𑀫𑀬𑀁. 𑀬𑀣𑀸 𑀤𑁂𑀬𑁆𑀬𑀥𑀫𑁆𑀫𑀧𑀭𑀺𑀘𑁆𑀘𑀸𑀕𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸𑀧𑀺 𑀤𑀸𑀦𑀘𑁂𑀢𑀦𑀸 𑀯𑀢𑁆𑀢𑀲𑀻𑀲𑁂 𑀞𑀢𑁆𑀯𑀸 𑀤𑀤𑀢𑁄 𑀲𑀻𑀮𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀳𑁄𑀢𑀺 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀲𑁆𑀲, 𑀅𑀧𑀭𑀪𑀸𑀕𑀘𑁂𑀢𑀦𑀸𑀬 𑀘 𑀢𑀣𑀸 𑀧𑀯𑀢𑁆𑀢𑀢𑁆𑀢𑀸, 𑀏𑀯𑀁 𑀤𑁂𑀬𑁆𑀬𑀥𑀫𑁆𑀫𑁂 𑀔𑀬𑀢𑁄, 𑀯𑀬𑀢𑁄 𑀲𑀫𑁆𑀫𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀤𑀤𑀢𑁄 𑀪𑀸𑀯𑀦𑀸𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀳𑁄𑀢𑀺 𑀧𑀼𑀩𑁆𑀩𑀪𑀸𑀕𑀘𑁂𑀢𑀦𑀸𑀬, 𑀤𑁂𑀬𑁆𑀬𑀥𑀫𑁆𑀫𑁂 𑀅𑀧𑀭𑀪𑀸𑀕𑀘𑁂𑀢𑀦𑀸𑀬 𑀘 𑀢𑀣𑀸 𑀧𑀯𑀢𑁆𑀢𑀢𑁆𑀢𑀸.

𑀅𑀧𑀘𑀻𑀢𑀺𑀘𑁂𑀢𑀦𑀸 𑀅𑀧𑀘𑀺𑀢𑀺𑀲𑀳𑀕𑀢𑀁 𑀅𑀧𑀘𑀻𑀬𑀢𑀺 𑀏𑀢𑀸𑀬𑀸𑀢𑀺 𑀬𑀣𑀸 𑀦𑀦𑁆𑀤𑀻𑀭𑀸𑀕𑁄 𑀏𑀯 𑀦𑀦𑁆𑀤𑀻𑀭𑀸𑀕𑀲𑀳𑀕𑀢𑀸, 𑀬𑀣𑀸𑀯𑀼𑀢𑁆𑀢𑀸𑀬 𑀯𑀸 𑀅𑀧𑀘𑀺𑀢𑀺𑀬𑀸 𑀲𑀳𑀕𑀢𑀁 𑀲𑀳𑀧𑀯𑀢𑁆𑀢𑀦𑁆𑀢𑀺 𑀅𑀧𑀘𑀺𑀢𑀺𑀲𑀳𑀕𑀢𑀁. 𑀅𑀧𑀘𑀸𑀬𑀦𑀯𑀲𑁂𑀦 𑀧𑀯𑀢𑁆𑀢𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼. 𑀯𑀬𑀲𑀸 𑀕𑀼𑀡𑁂𑀳𑀺 𑀘 𑀯𑀼𑀟𑁆𑀠𑀢𑀭𑀸𑀦𑀁 𑀯𑀢𑁆𑀢𑀧𑀝𑀺𑀧𑀢𑁆𑀢𑀻𑀲𑀼 𑀩𑁆𑀬𑀸𑀯𑀝𑁄 𑀳𑁄𑀢𑀺 𑀬𑀸𑀬 𑀘𑁂𑀢𑀦𑀸𑀬, 𑀲𑀸 𑀯𑁂𑀬𑁆𑀬𑀸𑀯𑀘𑁆𑀘𑀁, 𑀯𑁂𑀬𑁆𑀬𑀸𑀯𑀘𑁆𑀘𑀫𑁂𑀯 𑀯𑁂𑀬𑁆𑀬𑀸𑀯𑀘𑁆𑀘𑀲𑀳𑀕𑀢𑀁. 𑀯𑁂𑀬𑁆𑀬𑀸𑀯𑀘𑁆𑀘𑀲𑀗𑁆𑀔𑀸𑀢𑀸𑀬 𑀯𑀸 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀲𑀫𑀼𑀝𑁆𑀞𑀸𑀧𑀦𑀯𑀲𑁂𑀦𑁂𑀯 𑀲𑀳𑀕𑀢𑀁 𑀧𑀯𑀢𑁆𑀢𑀦𑁆𑀢𑀺 𑀯𑁂𑀬𑁆𑀬𑀸𑀯𑀘𑁆𑀘𑀲𑀳𑀕𑀢𑀁, 𑀢𑀣𑀸𑀧𑀯𑀢𑁆𑀢𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼. 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀧𑀢𑁆𑀢𑀁 𑀧𑀼𑀜𑁆𑀜𑀁 𑀅𑀦𑀼𑀧𑁆𑀧𑀤𑀻𑀬𑀢𑀺 𑀏𑀢𑁂𑀦𑀸𑀢𑀺 𑀧𑀢𑁆𑀢𑀸𑀦𑀼𑀧𑁆𑀧𑀤𑀸𑀦𑀁. 𑀢𑀣𑀸 𑀧𑀭𑁂𑀦 𑀅𑀦𑀼𑀧𑁆𑀧𑀤𑀺𑀦𑁆𑀦𑀢𑀸𑀬 𑀧𑀢𑁆𑀢𑀁 𑀅𑀩𑁆𑀪𑀦𑀼𑀫𑁄𑀤𑀢𑀺 𑀏𑀢𑁂𑀦𑀸𑀢𑀺 𑀧𑀢𑁆𑀢𑀩𑁆𑀪𑀦𑀼𑀫𑁄𑀤𑀦𑀁. 𑀅𑀦𑀦𑀼𑀧𑁆𑀧𑀤𑀺𑀦𑁆𑀦𑀁 𑀧𑀦 𑀓𑁂𑀯𑀮𑀁 𑀅𑀩𑁆𑀪𑀦𑀼𑀫𑁄𑀤𑀻𑀬𑀢𑀺 𑀏𑀢𑁂𑀦𑀸𑀢𑀺 𑀅𑀩𑁆𑀪𑀦𑀼𑀫𑁄𑀤𑀦𑀁. 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀏𑀢𑀸𑀬𑀸𑀢𑀺 𑀤𑁂𑀲𑀦𑀸, 𑀤𑁂𑀲𑀦𑀸𑀯 𑀤𑁂𑀲𑀦𑀸𑀫𑀬𑀁. 𑀲𑀼𑀡𑀸𑀢𑀺 𑀏𑀢𑁂𑀦𑀸𑀢𑀺 𑀲𑀯𑀦𑀁, 𑀲𑀯𑀦𑀫𑁂𑀯 𑀲𑀯𑀦𑀫𑀬𑀁. 𑀤𑀺𑀝𑁆𑀞𑀺𑀬𑀸 𑀜𑀸𑀡𑀲𑁆𑀲 𑀉𑀚𑀼𑀕𑀫𑀦𑀁 𑀤𑀺𑀝𑁆𑀞𑀺𑀚𑀼𑀕𑀢𑀁. 𑀲𑀩𑁆𑀩𑀢𑁆𑀣 ‘‘𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽’’𑀢𑀺 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑀸.

𑀧𑀽𑀚𑀸𑀯𑀲𑁂𑀦 𑀲𑀸𑀫𑀻𑀘𑀺𑀓𑀺𑀭𑀺𑀬𑀸 𑀅𑀧𑀘𑀸𑀬𑀦𑀁 𑀅𑀧𑀘𑀺𑀢𑀺. 𑀯𑀬𑀲𑀸 𑀕𑀼𑀡𑁂𑀳𑀺 𑀘 𑀚𑁂𑀝𑁆𑀞𑀸𑀦𑀁 𑀕𑀺𑀮𑀸𑀦𑀸𑀦𑀜𑁆𑀘 𑀢𑀁𑀢𑀁𑀓𑀺𑀘𑁆𑀘𑀓𑀭𑀡𑀁 𑀯𑁂𑀬𑁆𑀬𑀸𑀯𑀘𑁆𑀘𑀁. 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄𑀢𑀺 𑀆𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀤𑀢𑁆𑀯𑀸 𑀲𑀩𑁆𑀩𑀲𑀢𑁆𑀢𑀸𑀦𑀦𑁆𑀢𑀺 𑀘 𑀏𑀓𑀤𑁂𑀲𑀢𑁄 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁄, 𑀬𑀁 𑀓𑀺𑀜𑁆𑀘𑀺 𑀤𑁂𑀬𑁆𑀬𑀥𑀫𑁆𑀫𑀁 𑀤𑀢𑁆𑀯𑀸, 𑀧𑀼𑀜𑁆𑀜𑀁 𑀯𑀸 𑀓𑀢𑁆𑀯𑀸 ‘‘𑀓𑀢𑀺𑀧𑀬𑀸𑀦𑀁, 𑀏𑀓𑀲𑁆𑀲𑁂𑀯 𑀯𑀸 𑀧𑀢𑁆𑀢𑀺 𑀳𑁄𑀢𑀽’’𑀢𑀺 𑀧𑀭𑀺𑀡𑀸𑀫𑀦𑀫𑁆𑀧𑀺 𑀧𑀢𑁆𑀢𑀸𑀦𑀼𑀧𑁆𑀧𑀤𑀸𑀦𑀫𑁂𑀯. 𑀢𑀁 𑀦 𑀫𑀳𑀧𑁆𑀨𑀮𑀁 𑀢𑀡𑁆𑀳𑀸𑀬 𑀧𑀭𑀸𑀫𑀝𑁆𑀞𑀢𑁆𑀢𑀸. 𑀧𑀭𑁂𑀲𑀁 𑀤𑁂𑀲𑁂𑀢𑀺 𑀳𑀺𑀢𑀨𑀭𑀡𑁂𑀦 𑀫𑀼𑀤𑀼𑀘𑀺𑀢𑁆𑀢𑁂𑀦𑀸𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀏𑀯𑀦𑁆𑀢𑀺 𑀏𑀯𑀁 𑀇𑀫𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀩𑀳𑀼𑀲𑁆𑀲𑀼𑀢𑁄 𑀳𑀼𑀢𑁆𑀯𑀸 𑀧𑀭𑁂 𑀥𑀫𑁆𑀫𑀤𑁂𑀲𑀦𑀸𑀬 𑀅𑀦𑀼𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀳𑀺𑀢𑀨𑀭𑀡𑁂𑀦 𑀫𑀼𑀤𑀼𑀘𑀺𑀢𑁆𑀢𑁂𑀦 𑀥𑀫𑁆𑀫𑀁 𑀲𑀼𑀡𑀸𑀢𑀺. 𑀏𑀯𑀜𑁆𑀳𑀺𑀲𑁆𑀲 𑀲𑀯𑀦𑀁 𑀅𑀢𑁆𑀢𑀦𑁄, 𑀧𑀭𑁂𑀲𑀜𑁆𑀘 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑀪𑀸𑀯𑀢𑁄 𑀫𑀳𑀧𑁆𑀨𑀮𑀁 𑀪𑀯𑀺𑀲𑁆𑀲𑀢𑀻𑀢𑀺. 𑀲𑀩𑁆𑀩𑁂𑀲𑀦𑁆𑀢𑀺 𑀲𑀩𑁆𑀩𑁂𑀲𑀫𑁆𑀧𑀺 𑀤𑀲𑀦𑁆𑀦𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀁. 𑀦𑀺𑀬𑀫𑀮𑀓𑁆𑀔𑀡𑀦𑁆𑀢𑀺 𑀫𑀳𑀧𑁆𑀨𑀮𑀪𑀸𑀯𑀲𑁆𑀲 𑀦𑀺𑀬𑀸𑀫𑀓𑀲𑀪𑀸𑀯𑀁. 𑀤𑀺𑀝𑁆𑀞𑀺𑀬𑀸 𑀉𑀚𑀼𑀪𑀸𑀯𑁂𑀦𑁂𑀯𑀸𑀢𑀺 ‘‘𑀅𑀢𑁆𑀣𑀺, 𑀦𑀢𑁆𑀣𑀻’’𑀢𑀺 𑀅𑀦𑁆𑀢𑀤𑁆𑀯𑀬𑀲𑁆𑀲 𑀤𑀼𑀭𑀲𑀫𑀼𑀲𑁆𑀲𑀸𑀭𑀺𑀢𑀢𑀸𑀬 ‘‘𑀅𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺 (𑀫. 𑀦𑀺. 𑁨.𑁯𑁪; 𑁩.𑁧𑁩𑁬; 𑀯𑀺𑀪. 𑁭𑁯𑁩) 𑀦𑀬𑀧𑁆𑀧𑀯𑀢𑁆𑀢𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀉𑀚𑀼𑀓𑀫𑁂𑀯 𑀧𑀯𑀢𑁆𑀢𑀺𑀬𑀸. 𑀤𑀸𑀦𑀸𑀤𑀻𑀲𑀼 𑀳𑀺 𑀬𑀁 𑀓𑀺𑀜𑁆𑀘𑀺 𑀇𑀫𑀸𑀬 𑀏𑀯 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀧𑀭𑀺𑀲𑁄𑀥𑀺𑀢𑀁 𑀫𑀳𑀸𑀚𑀼𑀢𑀺𑀓𑀁 𑀫𑀳𑀸𑀯𑀺𑀧𑁆𑀨𑀸𑀭𑀁 𑀪𑀯𑀢𑀺.

𑀧𑀼𑀭𑀺𑀫𑁂𑀳𑁂𑀯 𑀢𑀻𑀳𑀻𑀢𑀺 𑀧𑀸𑀴𑀺𑀬𑀁 𑀆𑀕𑀢𑁂𑀳𑁂𑀯 𑀢𑀻𑀳𑀺. 𑀲𑀻𑀮𑀫𑀬𑁂 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀫𑁆𑀳𑀺 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺 𑀘𑀸𑀭𑀺𑀢𑁆𑀢𑀲𑀻𑀮𑀪𑀸𑀯𑀢𑁄. 𑀤𑀸𑀦𑀫𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺 𑀤𑀸𑀦𑀲𑀪𑀸𑀯𑀢𑁆𑀢𑀸, 𑀤𑀸𑀦𑀯𑀺𑀲𑀬𑀢𑁆𑀢𑀸 𑀘. 𑀓𑀸𑀫𑀁 𑀤𑁂𑀲𑀦𑀸 𑀥𑀫𑁆𑀫𑀤𑀸𑀦𑀲𑀪𑀸𑀯𑀢𑁄 𑀤𑀸𑀦𑀫𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀸, 𑀓𑀼𑀲𑀮𑀥𑀫𑁆𑀫𑀸𑀲𑁂𑀯𑀦𑀪𑀸𑀯𑀢𑁄 𑀧𑀦 𑀯𑀺𑀫𑀼𑀢𑁆𑀢𑀸𑀬𑀢𑀦𑀲𑀻𑀲𑁂 𑀞𑀢𑁆𑀯𑀸 𑀧𑀯𑀢𑁆𑀢𑀺𑀢𑀸 𑀯𑀺𑀬 𑀲𑀯𑀦𑁂𑀦 𑀲𑀤𑁆𑀥𑀺𑀁 𑀪𑀸𑀯𑀦𑀸𑀫𑀬𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑀼𑀢𑁆𑀢𑀁. ‘‘𑀤𑀺𑀝𑁆𑀞𑀺𑀚𑀼𑀕𑀢𑀁 𑀪𑀸𑀯𑀦𑀸𑀫𑀬𑁂’’𑀢𑀺 𑀓𑁂𑀘𑀺. 𑀤𑀺𑀝𑁆𑀞𑀺𑀚𑀼𑀕𑀢𑁂 𑀏𑀯 𑀘 𑀅𑀢𑁆𑀢𑀦𑀸 𑀓𑀢𑀲𑁆𑀲 𑀧𑀼𑀜𑁆𑀜𑀲𑁆𑀲 𑀅𑀦𑀼𑀲𑁆𑀲𑀭𑀡𑀁, 𑀢𑀲𑁆𑀲 𑀘 𑀧𑀭𑁂𑀲𑀁 𑀅𑀢𑁆𑀣𑀸𑀬 𑀧𑀭𑀺𑀡𑀸𑀫𑀦𑀁, 𑀕𑀼𑀡𑀧𑀲𑀁𑀲𑀸, 𑀅𑀜𑁆𑀜𑁂𑀳𑀺 𑀓𑀭𑀺𑀬𑀫𑀸𑀦𑀸𑀬 𑀧𑀼𑀜𑁆𑀜𑀓𑀺𑀭𑀺𑀬𑀸𑀬, 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀘 𑀅𑀦𑀼𑀫𑁄𑀤𑀦𑀁 𑀲𑀭𑀡𑀕𑀫𑀦𑀦𑁆𑀢𑀺 𑀏𑀯𑀁 𑀆𑀤𑀬𑁄 𑀧𑀼𑀜𑁆𑀜𑀯𑀺𑀲𑁂𑀲𑀸 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀯𑀲𑁂𑀦𑁂𑀯 𑀢𑁂𑀲𑀁 𑀇𑀚𑁆𑀛𑀦𑀢𑁄.

𑀧𑀭𑀲𑁆𑀲 𑀧𑀝𑀺𑀧𑀢𑁆𑀢𑀺𑀬𑀸 𑀲𑁄𑀥𑀦𑀢𑁆𑀣𑁄 𑀅𑀦𑀼𑀬𑁄𑀕𑁄 𑀘𑁄𑀤𑀦𑀸, 𑀲𑀸 𑀬𑀸𑀦𑀺 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀢𑀺, 𑀢𑀸𑀦𑀺 𑀘𑁄𑀤𑀦𑀸𑀯𑀢𑁆𑀣𑀽𑀦𑀺 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀸𑀦𑀺. 𑀢𑁂𑀦𑀸𑀳 ‘‘𑀘𑁄𑀤𑀦𑀸𑀓𑀸𑀭𑀡𑀸𑀦𑀻’’𑀢𑀺. 𑀤𑀺𑀝𑁆𑀞𑁂𑀦𑀸𑀢𑀺 𑀘 𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀘𑀦𑀁, 𑀤𑀺𑀝𑁆𑀞𑁂𑀦 𑀳𑁂𑀢𑀼𑀦𑀸𑀢𑀺 𑀅𑀢𑁆𑀣𑁄. 𑀓𑀺𑀁 𑀧𑀦 𑀢𑀁 𑀤𑀺𑀝𑁆𑀞𑀦𑁆𑀢𑀺 𑀆𑀳 ‘‘𑀯𑀻𑀢𑀺𑀓𑁆𑀓𑀫’’𑀦𑁆𑀢𑀺. 𑀤𑀺𑀲𑁆𑀯𑀸𑀢𑀺 𑀘 𑀤𑀲𑁆𑀲𑀦𑀳𑁂𑀢𑀽𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑀬𑀣𑀸 ‘‘𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸’’𑀢𑀺. ‘‘𑀲𑀼𑀢𑁂𑀦𑀸’’𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀭𑀲𑁆𑀲𑀸𑀢𑀺 𑀧𑀭𑀢𑁄, 𑀧𑀭𑀲𑁆𑀲 𑀯𑀸 𑀯𑀘𑀦𑀁 𑀲𑀼𑀢𑁆𑀯𑀸.𑀤𑀺𑀝𑁆𑀞𑀧𑀭𑀺𑀲𑀗𑁆𑀓𑀺𑀢𑁂𑀦𑀸𑀢𑀺 𑀤𑀺𑀝𑁆𑀞𑀸𑀦𑀼𑀕𑀢𑁂𑀦 𑀧𑀭𑀺𑀲𑀗𑁆𑀓𑀺𑀢𑁂𑀦, 𑀢𑀣𑀸 𑀧𑀭𑀺𑀲𑀗𑁆𑀓𑀺𑀢𑁂𑀦 𑀯𑀸 𑀯𑀻𑀢𑀺𑀓𑁆𑀓𑀫𑁂𑀦. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀘𑁄𑀤𑁂𑀢𑀺 𑀯𑀢𑁆𑀣𑀼𑀲𑀦𑁆𑀤𑀲𑁆𑀲𑀦𑁂𑀦 𑀯𑀸 𑀲𑀁𑀯𑀸𑀲𑀧𑁆𑀧𑀝𑀺𑀓𑁆𑀔𑁂𑀧𑁂𑀦 𑀯𑀸 𑀲𑀸𑀫𑀻𑀘𑀺𑀧𑁆𑀧𑀝𑀺𑀓𑁆𑀔𑁂𑀧𑁂𑀦 𑀯𑀸. 𑀇𑀫𑀲𑁆𑀫𑀺𑀁 𑀧𑀦 𑀅𑀢𑁆𑀣𑁂 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑁂 𑀅𑀢𑀺𑀧𑁆𑀧𑀧𑀜𑁆𑀘𑁄 𑀳𑁄𑀢𑀻𑀢𑀺 𑀆𑀳 ‘‘𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄’’𑀢𑀺. 𑀯𑀺𑀢𑁆𑀣𑀸𑀭𑀁 𑀧𑀦 𑀇𑀘𑁆𑀙𑀦𑁆𑀢𑀸𑀦𑀁 𑀢𑀲𑁆𑀲 𑀅𑀥𑀺𑀕𑀫𑀼𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀢𑁆𑀣𑀸𑀭𑁄 𑀧𑀦…𑀧𑁂… 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀆𑀳.

𑀓𑀸𑀫𑀽𑀧𑀧𑀢𑁆𑀢𑀺𑀬𑁄𑀢𑀺 𑀓𑀸𑀫𑁂𑀳𑀺 𑀉𑀧𑀧𑀦𑁆𑀦𑀢𑀸, 𑀲𑀫𑀦𑁆𑀦𑀸𑀕𑀢𑀢𑀸𑀢𑀺 𑀅𑀢𑁆𑀣𑁄. 𑀲𑀫𑀦𑁆𑀦𑀸𑀕𑀫𑁄 𑀘 𑀢𑁂𑀲𑀁 𑀧𑀝𑀺𑀲𑁂𑀯𑀦𑀁, 𑀲𑀫𑀥𑀺𑀕𑀫𑁄 𑀘𑀸𑀢𑀺 𑀆𑀳 ‘‘𑀓𑀸𑀫𑀽𑀧𑀲𑁂𑀯𑀦𑀸 𑀓𑀸𑀫𑀧𑀝𑀺𑀮𑀸𑀪𑀸 𑀯𑀸’’𑀢𑀺. 𑀧𑀘𑁆𑀘𑀼𑀧𑀝𑁆𑀞𑀺𑀢𑀓𑀸𑀫𑀸𑀢𑀺 𑀤𑀼𑀢𑀺𑀬𑀢𑀢𑀺𑀬𑀭𑀸𑀲𑀻𑀦𑀁 𑀯𑀺𑀬 𑀲𑀬𑀁, 𑀧𑀭𑁂𑀳𑀺 𑀘 𑀅𑀦𑀺𑀫𑁆𑀫𑀺𑀢𑀸. 𑀉𑀝𑁆𑀞𑀸𑀦𑀓𑀫𑁆𑀫𑀨𑀮𑀽𑀧𑀚𑀻𑀯𑀺𑀪𑀸𑀯𑀢𑁄 𑀧𑀦 𑀢𑀤𑀼𑀪𑀬𑀯𑀲𑁂𑀦 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀓𑀸𑀫𑀸 𑀏𑀢𑁂𑀲𑀦𑁆𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀓𑀸𑀫𑀸. 𑀢𑁂 𑀧𑀦 𑀢𑁂𑀲𑀁 𑀬𑁂𑀪𑀼𑀬𑁆𑀬𑁂𑀦 𑀦𑀺𑀩𑀤𑁆𑀥𑀸𑀦𑀺 𑀳𑁄𑀦𑁆𑀢𑀻𑀢𑀺 ‘‘𑀦𑀺𑀩𑀤𑁆𑀥𑀓𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀘𑀢𑀼𑀤𑁂𑀯𑀮𑁄𑀓𑀯𑀸𑀲𑀺𑀦𑁄𑀢𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀢𑀼𑀲𑀺𑀢𑀸 𑀤𑁂𑀯𑀸. 𑀯𑀺𑀦𑀺𑀧𑀸𑀢𑀺𑀓𑀸𑀢𑀺 𑀆𑀧𑀸𑀬𑀺𑀓𑀸. 𑀧𑀭𑀦𑀺𑀫𑁆𑀫𑀺𑀢𑀸 𑀓𑀸𑀫𑀸 𑀏𑀢𑁂𑀲𑀦𑁆𑀢𑀺 𑀧𑀭𑀦𑀺𑀫𑁆𑀫𑀺𑀢𑀓𑀸𑀫𑀸.

𑀧𑀓𑀢𑀺𑀲𑁂𑀯𑀦𑀯𑀲𑁂𑀦𑀸𑀢𑀺 𑀅𑀦𑀼𑀫𑀸𑀦𑀢𑁄 𑀚𑀸𑀦𑀦𑀁 𑀯𑀤𑀢𑀺, 𑀦 𑀧𑀘𑁆𑀘𑀓𑁆𑀔𑀢𑁄. 𑀯𑀲𑀁 𑀯𑀢𑁆𑀢𑁂𑀦𑁆𑀢𑀻𑀢𑀺 𑀬𑀣𑀸𑀭𑀼𑀘𑀺 𑀧𑀸𑀢𑀩𑁆𑀬𑀢𑀁 𑀆𑀧𑀚𑁆𑀚𑀦𑁆𑀢𑀺. ‘‘𑀫𑁂𑀣𑀼𑀦𑀁 𑀧𑀝𑀺𑀲𑁂𑀯𑀦𑁆𑀢𑀻’’𑀢𑀺 𑀇𑀤𑀁 𑀧𑀦 𑀓𑁂𑀘𑀺𑀯𑀸𑀤𑀧𑀝𑀺𑀲𑁂𑀥𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀓𑁂𑀘𑀺 𑀧𑀦𑀸’’𑀢𑀺𑀆𑀤𑀺. 𑀢𑁂 ‘‘𑀬𑀸𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀆𑀮𑀺𑀗𑁆𑀕𑀺𑀢𑀫𑀢𑁆𑀢𑁂𑀦, 𑀢𑀼𑀲𑀺𑀢𑀸𑀦𑀁 𑀳𑀢𑁆𑀣𑀸𑀫𑀲𑀦𑀫𑀢𑁆𑀢𑁂𑀦, 𑀦𑀺𑀫𑁆𑀫𑀸𑀦𑀭𑀢𑀻𑀦𑀁 𑀳𑀲𑀺𑀢𑀫𑀢𑁆𑀢𑁂𑀦, 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁 𑀑𑀮𑁄𑀓𑀺𑀢𑀫𑀢𑁆𑀢𑁂𑀦 𑀓𑀸𑀫𑀓𑀺𑀘𑁆𑀘𑀁 𑀇𑀚𑁆𑀛𑀢𑀻’’𑀢𑀺 𑀯𑀤𑀦𑁆𑀢𑀺. ‘‘𑀇𑀢𑀭𑁂𑀲𑀁 𑀤𑁆𑀯𑀺𑀦𑁆𑀦𑀁 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺𑀬𑀸 𑀯𑀸’’𑀢𑀺 𑀯𑀤𑀦𑁆𑀢𑀺 𑀢𑀸𑀤𑀺𑀲𑀲𑁆𑀲 𑀓𑀸𑀫𑁂𑀲𑀼 𑀯𑀺𑀭𑀚𑁆𑀚𑀦𑀲𑁆𑀲 𑀢𑁂𑀲𑀼 𑀅𑀪𑀸𑀯𑀢𑁄, 𑀓𑀸𑀫𑀸𑀦𑀜𑁆𑀘 𑀉𑀢𑁆𑀢𑀭𑀼𑀢𑁆𑀢𑀭𑀺 𑀧𑀡𑀻𑀢𑀧𑀡𑀻𑀢𑀢𑀭𑀧𑀡𑀻𑀢𑀢𑀫𑀪𑀸𑀯𑀢𑁄. 𑀓𑁂𑀯𑀮𑀁 𑀧𑀦 𑀦𑀺𑀲𑁆𑀲𑀦𑁆𑀤𑀸𑀪𑀸𑀯𑁄 𑀢𑁂𑀲𑀁 𑀯𑀢𑁆𑀢𑀩𑁆𑀩𑁄. 𑀓𑀸𑀫𑀓𑀺𑀘𑁆𑀘𑀦𑁆𑀢𑀺 𑀢𑀗𑁆𑀔𑀡𑀺𑀓𑀧𑀭𑀺𑀴𑀸𑀳𑀽𑀧𑀲𑀫𑀸𑀯𑀳𑀁 𑀨𑀲𑁆𑀲𑀲𑀼𑀔𑀁. 𑀓𑀸𑀫𑀸𑀢𑀺 𑀓𑀸𑀫𑀽𑀧𑀪𑁄𑀕𑀸. 𑀧𑀸𑀓𑀢𑀺𑀓𑀸 𑀏𑀯𑀸𑀢𑀺 𑀳𑁂𑀝𑁆𑀞𑀺𑀫𑁂𑀳𑀺 𑀏𑀓𑀲𑀤𑀺𑀲𑀸 𑀏𑀯. 𑀏𑀓𑀲𑀗𑁆𑀔𑀸𑀢𑀦𑁆𑀢𑀺 𑀏𑀓𑀭𑀽𑀧𑀁 𑀲𑀫𑀸𑀦𑀭𑀽𑀧𑀦𑁆𑀢𑀺, 𑀲𑀫𑀜𑁆𑀜𑀸𑀢𑀁 𑀲𑀫𑀸𑀦𑀪𑀸𑀯𑀦𑁆𑀢𑀺 𑀯𑀸 𑀅𑀢𑁆𑀣𑁄.

𑀲𑀼𑀔𑀧𑀝𑀺𑀮𑀸𑀪𑀸𑀢𑀺 𑀲𑀼𑀔𑀲𑀫𑀥𑀺𑀕𑀫𑀸. 𑀳𑁂𑀝𑁆𑀞𑀸𑀢𑀺 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀢𑁄 𑀳𑁂𑀝𑁆𑀞𑀸 𑀫𑀦𑀼𑀲𑁆𑀲𑁂𑀲𑀼, 𑀤𑁂𑀯𑁂𑀲𑀼 𑀯𑀸. 𑀧𑀞𑀫𑀚𑁆𑀛𑀸𑀦𑀲𑀼𑀔𑀦𑁆𑀢𑀺 𑀓𑀼𑀲𑀮𑀧𑀞𑀫𑀚𑁆𑀛𑀸𑀦𑀁. 𑀪𑀽𑀫𑀺𑀯𑀲𑁂𑀦𑀧𑀺 𑀳𑁂𑀝𑁆𑀞𑀼𑀧𑀭𑀺𑀪𑀸𑀯𑁄 𑀮𑀩𑁆𑀪𑀢𑁂𑀯 𑀩𑁆𑀭𑀳𑁆𑀫𑀓𑀸𑀬𑀺𑀓𑁂𑀲𑀼, 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑁂𑀲𑀼 𑀯𑀸 𑀓𑀼𑀲𑀮𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑁂𑀲𑀼, 𑀫𑀳𑀸𑀩𑁆𑀭𑀳𑁆𑀫𑁂𑀲𑀼 𑀯𑀸 𑀯𑀺𑀧𑀸𑀓𑀲𑀼𑀔𑀸𑀦𑀼𑀪𑀯𑀦𑀲𑁆𑀲 𑀮𑀩𑁆𑀪𑀦𑀢𑁄. 𑀏𑀢𑁆𑀣 𑀘 𑀤𑀼𑀢𑀺𑀬𑀢𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀯𑀲𑁂𑀦 𑀤𑀼𑀢𑀺𑀬𑀢𑀢𑀺𑀬𑀲𑀼𑀔𑀽𑀧𑀧𑀢𑁆𑀢𑀻𑀦𑀁 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀯𑀲𑁂𑀦𑁂𑀯 𑀧𑀞𑀫𑀚𑁆𑀛𑀸𑀦𑀲𑀼𑀔𑀽𑀧𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀢𑀺𑀦𑁆𑀢𑀸𑀢𑀺 𑀢𑁂𑀫𑀺𑀢𑀸, 𑀛𑀸𑀦𑀲𑀼𑀔𑁂𑀦 𑀘𑁂𑀯 𑀛𑀸𑀦𑀲𑀫𑀼𑀝𑁆𑀞𑀸𑀦𑀧𑀡𑀻𑀢𑀭𑀽𑀧𑀨𑀼𑀝𑁆𑀞𑀓𑀸𑀬𑁂𑀦 𑀘 𑀧𑀡𑀻𑀢𑀸 𑀯𑀺𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀲𑀫𑀦𑁆𑀢𑀢𑁄 𑀢𑀺𑀦𑁆𑀢𑀸’’𑀢𑀺𑀆𑀤𑀺. 𑀬𑀲𑁆𑀫𑀸 𑀓𑀼𑀲𑀮𑀲𑀼𑀔𑀢𑁄 𑀯𑀺𑀧𑀸𑀓𑀲𑀼𑀔𑀁 𑀲𑀦𑁆𑀢𑀢𑀭𑀢𑀸𑀬 𑀧𑀡𑀻𑀢𑀢𑀭𑀁 𑀩𑀳𑀼𑀮𑀜𑁆𑀘 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀇𑀤𑀫𑁆𑀧𑀺 𑀯𑀺𑀧𑀸𑀓𑀚𑁆𑀛𑀸𑀦𑀲𑀼𑀔𑀁 𑀏𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺. 𑀢𑁂𑀲𑀦𑁆𑀢𑀺 𑀆𑀪𑀲𑁆𑀲𑀭𑀸𑀦𑀁. 𑀲𑀧𑁆𑀧𑀻𑀢𑀺𑀓𑀲𑁆𑀲 𑀲𑀼𑀔𑀲𑁆𑀲 𑀅𑀢𑀺𑀯𑀺𑀬 𑀉𑀴𑀸𑀭𑀪𑀸𑀯𑀢𑁄 𑀢𑁂𑀦 𑀅𑀚𑁆𑀛𑁄𑀢𑁆𑀣𑀢𑀘𑀺𑀢𑁆𑀢𑀸𑀦𑀁 𑀪𑀯𑀮𑁄𑀪𑁄 𑀫𑀳𑀸 𑀉𑀧𑁆𑀧𑀚𑁆𑀚𑀢𑀺. 𑀲𑀦𑁆𑀢𑀫𑁂𑀯𑀸𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀲𑀗𑁆𑀔𑁄𑀪𑀧𑀻𑀢𑀺𑀉𑀩𑁆𑀩𑀺𑀮𑀸𑀯𑀺𑀯𑀺𑀕𑀫𑁂𑀦 𑀅𑀢𑀺𑀯𑀺𑀬 𑀉𑀧𑀲𑀦𑁆𑀢𑀁𑀬𑁂𑀯. 𑀢𑀣𑀸 𑀲𑀦𑁆𑀢𑀪𑀸𑀯𑁂𑀦𑁂𑀯 𑀳𑀺 𑀢𑀁 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀧𑀥𑀸𑀦𑀪𑀸𑀯𑀁 𑀦𑀻𑀢𑀢𑀸𑀬 ‘‘𑀧𑀡𑀻𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀧𑀡𑀻𑀢𑀫𑁂𑀯𑀸’’𑀢𑀺. 𑀅𑀢𑀧𑁆𑀧𑀓𑁂𑀦 𑀲𑀼𑀔𑀧𑀸𑀭𑀫𑀺𑀧𑁆𑀧𑀢𑁆𑀢𑁂𑀦 𑀲𑀼𑀔𑁂𑀦 𑀲𑀁𑀬𑀼𑀢𑁆𑀢𑀸𑀬 𑀢𑀼𑀲𑀸𑀬 𑀧𑀻𑀢𑀺𑀬𑀸 𑀇𑀢𑀸 𑀧𑀯𑀢𑁆𑀢𑀸𑀢𑀺 𑀢𑀼𑀲𑀺𑀢𑀸. 𑀬𑀲𑁆𑀫𑀸 𑀢𑁂 𑀢𑀢𑁄 𑀉𑀢𑁆𑀢𑀭𑀺 𑀲𑀼𑀔𑀲𑁆𑀲 𑀅𑀪𑀸𑀯𑀢𑁄 𑀏𑀯 𑀦 𑀧𑀢𑁆𑀣𑁂𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀢𑀢𑁄…𑀧𑁂… 𑀲𑀦𑁆𑀢𑀼𑀝𑁆𑀞𑀸 𑀳𑀼𑀢𑁆𑀯𑀸’’𑀢𑀺. 𑀢𑀢𑀺𑀬𑀚𑁆𑀛𑀸𑀦𑀲𑀼𑀔𑀦𑁆𑀢𑀺 𑀢𑀢𑀺𑀬𑀚𑁆𑀛𑀸𑀦𑀯𑀺𑀧𑀸𑀓𑀲𑀼𑀔𑀁.

𑀲𑀢𑁆𑀢 𑀅𑀭𑀺𑀬𑀧𑀜𑁆𑀜𑀸𑀢𑀺 𑀅𑀝𑁆𑀞𑀫𑀓𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀦𑁆𑀦𑀁 𑀅𑀭𑀺𑀬𑀸𑀦𑀁 𑀢𑁂𑀲𑀁 𑀢𑁂𑀲𑀁 𑀆𑀯𑁂𑀡𑀺𑀓𑀧𑀜𑁆𑀜𑀸. 𑀞𑀧𑁂𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀁 𑀧𑀜𑁆𑀜𑀁 𑀅𑀯𑀲𑁂𑀲𑀸 𑀧𑀜𑁆𑀜𑀸 𑀦𑀸𑀫. 𑀲𑀩𑁆𑀩𑀸𑀧𑀺 𑀢𑁂𑀪𑀽𑀫𑀺𑀓𑀸 𑀧𑀜𑁆𑀜𑀸 ‘‘𑀲𑁂𑀓𑁆𑀔𑀸’’𑀢𑀺𑀧𑀺 𑀦 𑀯𑀢𑁆𑀢𑀩𑁆𑀩𑀸, ‘‘𑀅𑀲𑁂𑀓𑁆𑀔𑀸’’𑀢𑀺𑀧𑀺 𑀦 𑀯𑀢𑁆𑀢𑀩𑁆𑀩𑀸𑀢𑀺 𑀦𑁂𑀯𑀲𑁂𑀓𑁆𑀔𑀸𑀦𑀸𑀲𑁂𑀓𑁆𑀔𑀸, 𑀧𑀼𑀣𑀼𑀚𑁆𑀚𑀦𑀧𑀜𑁆𑀜𑀸.

𑀬𑁄𑀕𑀯𑀺𑀳𑀺𑀢𑁂𑀲𑀽𑀢𑀺 𑀧𑀜𑁆𑀜𑀸𑀯𑀺𑀳𑀺𑀢𑁂𑀲𑀼 𑀧𑀜𑁆𑀜𑀸𑀧𑀭𑀺𑀡𑀸𑀫𑀺𑀢𑁂𑀲𑀼 𑀉𑀧𑀸𑀬𑀧𑀜𑁆𑀜𑀸𑀬 𑀲𑀫𑁆𑀧𑀸𑀤𑀺𑀢𑁂𑀲𑀼. 𑀓𑀫𑁆𑀫𑀸𑀬𑀢𑀦𑁂𑀲𑀽𑀢𑀺 𑀏𑀢𑁆𑀣 𑀓𑀫𑁆𑀫𑀫𑁂𑀯 𑀓𑀫𑁆𑀫𑀸𑀬𑀢𑀦𑀁, 𑀓𑀫𑁆𑀫𑀜𑁆𑀘 𑀢𑀁 𑀆𑀬𑀢𑀦𑀜𑁆𑀘 𑀆𑀚𑀻𑀯𑀸𑀤𑀻𑀦𑀦𑁆𑀢𑀺 𑀯𑀸 𑀓𑀫𑁆𑀫𑀸𑀬𑀢𑀦𑀁. 𑀏𑀲 𑀦𑀬𑁄 𑀲𑀺𑀧𑁆𑀧𑀸𑀬𑀢𑀦𑁂𑀲𑀼𑀧𑀺. 𑀢𑀢𑁆𑀣 𑀘 𑀤𑀼𑀯𑀺𑀥𑀁 𑀓𑀫𑁆𑀫𑀁 𑀳𑀻𑀦𑀜𑁆𑀘 𑀯𑀟𑁆𑀠𑀓𑀺𑀓𑀫𑁆𑀫𑀸𑀤𑀺, 𑀉𑀓𑁆𑀓𑀝𑁆𑀞𑀜𑁆𑀘 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺. 𑀲𑀺𑀧𑁆𑀧𑀫𑁆𑀧𑀺 𑀤𑀼𑀯𑀺𑀥𑀁 𑀳𑀻𑀦𑀜𑁆𑀘 𑀦𑀴𑀓𑀸𑀭𑀲𑀺𑀧𑁆𑀧𑀸𑀤𑀺, 𑀉𑀓𑁆𑀓𑀝𑁆𑀞𑀜𑁆𑀘 𑀫𑀼𑀤𑁆𑀤𑀕𑀡𑀦𑀸𑀤𑀺. 𑀯𑀺𑀚𑁆𑀚𑀸𑀯 𑀯𑀺𑀚𑁆𑀚𑀸𑀝𑁆𑀞𑀸𑀦𑀁, 𑀢𑀁 𑀥𑀫𑁆𑀫𑀺𑀓𑀫𑁂𑀯 𑀦𑀸𑀕𑀫𑀡𑁆𑀟𑀮𑀧𑀭𑀺𑀢𑁆𑀢𑀨𑀼𑀥𑀫𑀦𑀓𑀫𑀦𑁆𑀢𑀲𑀤𑀺𑀲𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀸𑀦𑀺 𑀧𑀦𑁂𑀢𑀸𑀦𑀺 𑀏𑀓𑀘𑁆𑀘𑁂 𑀧𑀡𑁆𑀟𑀺𑀢𑀸 𑀩𑁄𑀥𑀺𑀲𑀢𑁆𑀢𑀲𑀤𑀺𑀲𑀸 𑀫𑀦𑀼𑀲𑁆𑀲𑀸𑀦𑀁 𑀨𑀸𑀲𑀼𑀯𑀺𑀳𑀸𑀭𑀁 𑀆𑀓𑀗𑁆𑀔𑀦𑁆𑀢𑀸 𑀦𑁂𑀯 𑀅𑀜𑁆𑀜𑁂𑀳𑀺 𑀓𑀭𑀺𑀬𑀫𑀸𑀦𑀸𑀦𑀺 𑀧𑀲𑁆𑀲𑀦𑁆𑀢𑀺, 𑀦 𑀯𑀸 𑀓𑀢𑀸𑀦𑀺 𑀉𑀕𑁆𑀕𑀡𑁆𑀳𑀦𑁆𑀢𑀺. 𑀦 𑀓𑀭𑁄𑀦𑁆𑀢𑀸𑀦𑀁 𑀲𑀼𑀡𑀦𑁆𑀢𑀺, 𑀅𑀣 𑀔𑁄 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀘𑀺𑀦𑁆𑀢𑀸𑀬 𑀓𑀭𑁄𑀦𑁆𑀢𑀺. 𑀧𑀜𑁆𑀜𑀯𑀦𑁆𑀢𑁂𑀳𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀘𑀺𑀦𑁆𑀢𑀸𑀬 𑀓𑀢𑀸𑀦𑀺𑀧𑀺 𑀅𑀜𑁆𑀜𑁂𑀳𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀓𑀭𑁄𑀦𑁆𑀢𑁂𑀳𑀺 𑀓𑀢𑀲𑀤𑀺𑀲𑀸𑀦𑁂𑀯 𑀳𑁄𑀦𑁆𑀢𑀺. 𑀓𑀫𑁆𑀫𑀲𑁆𑀲𑀓𑀢𑀦𑁆𑀢𑀺 ‘‘𑀇𑀤𑀁 𑀓𑀫𑁆𑀫𑀁 𑀲𑀢𑁆𑀢𑀸𑀦𑀁 𑀲𑀓𑀁, 𑀇𑀤𑀁 𑀦𑁄 𑀲𑀓’’𑀦𑁆𑀢𑀺 𑀏𑀯𑀁 𑀚𑀸𑀦𑀦𑀜𑀸𑀡𑀁. 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀁. 𑀢𑀜𑁆𑀳𑀺 𑀲𑀘𑁆𑀘𑀧𑀝𑀺𑀯𑁂𑀥𑀲𑁆𑀲 𑀅𑀦𑀼𑀮𑁄𑀫𑀦𑀢𑁄 ‘‘𑀲𑀘𑁆𑀘𑀸𑀦𑀼𑀮𑁄𑀫𑀺𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀸𑀦𑀺𑀲𑁆𑀲 𑀧𑀯𑀢𑁆𑀢𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀁 𑀅𑀦𑀺𑀘𑁆𑀘𑀦𑁆𑀢𑀺 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀸-𑀲𑀤𑁆𑀤𑁂𑀦 𑀅𑀦𑀺𑀬𑀫𑀢𑁆𑀣𑁂𑀦 𑀤𑀼𑀓𑁆𑀔𑀸𑀦𑀢𑁆𑀢𑀮𑀓𑁆𑀔𑀡𑀸𑀦𑀺𑀧𑀺 𑀕𑀳𑀺𑀢𑀸𑀦𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁 𑀦𑀸𑀦𑀦𑁆𑀢𑀭𑀺𑀬𑀓𑀪𑀸𑀯𑀢𑁄. 𑀬𑀜𑁆𑀳𑀺 𑀅𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔𑀁. 𑀬𑀁 𑀤𑀼𑀓𑁆𑀔𑀁, 𑀢𑀤𑀦𑀢𑁆𑀢𑀸𑀢𑀺 [(𑀲𑀺𑀚𑁆𑀛𑀦𑀢𑁄) 𑀅𑀥𑀺𑀓𑀧𑀸𑀞𑁄 𑀯𑀺𑀬 𑀤𑀺𑀲𑁆𑀲𑀢𑀺]. 𑀬𑀁 𑀏𑀯𑀭𑀽𑀧𑀦𑁆𑀢𑀺 𑀬𑀁 𑀏𑀯𑀁 𑀳𑁂𑀝𑁆𑀞𑀸 𑀦𑀺𑀤𑁆𑀤𑀺𑀝𑁆𑀞𑀲𑀪𑀸𑀯𑀁. ‘‘𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺’’𑀦𑁆𑀢𑀺𑀆𑀤𑀻𑀦𑀺 𑀧𑀜𑁆𑀜𑀸𑀯𑁂𑀯𑀘𑀦𑀸𑀦𑀺. 𑀲𑀸 𑀳𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀁 𑀓𑀫𑁆𑀫𑀸𑀬𑀢𑀦𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀓𑀸𑀭𑀡𑀸𑀦𑀁 𑀅𑀧𑀘𑁆𑀘𑀦𑀻𑀓𑀤𑀲𑁆𑀲𑀦𑁂𑀦 𑀅𑀦𑀼𑀮𑁄𑀫𑀦𑀢𑁄, 𑀢𑀣𑀸 𑀲𑀢𑁆𑀢𑀸𑀦𑀁 𑀳𑀺𑀢𑀘𑀭𑀺𑀬𑀸𑀬 𑀫𑀕𑁆𑀕𑀲𑀘𑁆𑀘𑀲𑁆𑀲, 𑀧𑀭𑀫𑀢𑁆𑀣𑀲𑀘𑁆𑀘𑀲𑁆𑀲 𑀘 𑀦𑀺𑀩𑁆𑀩𑀸𑀦𑀲𑁆𑀲 𑀅𑀯𑀺𑀮𑁄𑀫𑀦𑀢𑁄 𑀅𑀦𑀼𑀮𑁄𑀫𑁂𑀢𑀻𑀢𑀺 𑀘 𑀅𑀦𑀼𑀮𑁄𑀫𑀺𑀓𑀸. 𑀲𑀩𑁆𑀩𑀸𑀦𑀺𑀧𑀺 𑀏𑀢𑀸𑀦𑀺 𑀓𑀸𑀭𑀡𑀸𑀦𑀺 𑀔𑀫𑀢𑀺 𑀲𑀳𑀢𑀺 𑀤𑀝𑁆𑀞𑀼𑀁 𑀲𑀓𑁆𑀓𑁄𑀢𑀻𑀢𑀺 𑀔𑀦𑁆𑀢𑀺. 𑀧𑀲𑁆𑀲𑀢𑀻𑀢𑀺 𑀤𑀺𑀝𑁆𑀞𑀺. 𑀭𑁄𑀘𑁂𑀢𑀻𑀢𑀺 𑀭𑀼𑀘𑀺. 𑀫𑀼𑀦𑀸𑀢𑀻𑀢𑀺 𑀫𑀼𑀢𑀺. 𑀧𑁂𑀓𑁆𑀔𑀢𑀻𑀢𑀺 𑀧𑁂𑀓𑁆𑀔𑀸. 𑀢𑁂 𑀘 𑀓𑀫𑁆𑀫𑀸𑀬𑀢𑀦𑀸𑀤𑀬𑁄 𑀥𑀫𑁆𑀫𑀸 𑀦𑀺𑀚𑁆𑀛𑀸𑀬𑀫𑀸𑀦𑀸 𑀏𑀢𑀸𑀬 𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀻𑀢𑀺 𑀥𑀫𑁆𑀫𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺. 𑀧𑀭𑀢𑁄 𑀅𑀲𑀼𑀢𑁆𑀯𑀸 𑀧𑀝𑀺𑀮𑀪𑀢𑀻𑀢𑀺 𑀅𑀜𑁆𑀜𑀲𑁆𑀲 𑀉𑀧𑀤𑁂𑀲𑀯𑀘𑀦𑀁 𑀅𑀲𑀼𑀢𑁆𑀯𑀸 𑀲𑀬𑀫𑁂𑀯 𑀘𑀺𑀦𑁆𑀢𑁂𑀦𑁆𑀢𑁄 𑀧𑀝𑀺𑀮𑀪𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀘𑀺𑀦𑁆𑀢𑀸𑀫𑀬𑀸 𑀧𑀜𑁆𑀜𑀸 𑀦𑀸𑀫 𑀯𑀼𑀘𑁆𑀘𑀢𑀺. 𑀲𑀸 𑀧𑀦𑁂𑀲𑀸 𑀅𑀪𑀺𑀜𑁆𑀜𑀸𑀢𑀸𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀫𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀣𑀸𑀧𑀺 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀜𑀸𑀡𑀁 𑀤𑁆𑀯𑀺𑀦𑁆𑀦𑀫𑁂𑀯 𑀩𑁄𑀥𑀺𑀲𑀢𑁆𑀢𑀸𑀦𑀁 𑀅𑀦𑁆𑀢𑀺𑀫𑀪𑀯𑀺𑀓𑀸𑀦𑀁, 𑀲𑁂𑀲𑀧𑀜𑁆𑀜𑀸 𑀲𑀩𑁆𑀩𑁂𑀲𑀫𑁆𑀧𑀺 𑀧𑀽𑀭𑀺𑀢𑀧𑀸𑀭𑀫𑀻𑀦𑀁 𑀫𑀳𑀸𑀧𑀜𑁆𑀜𑀸𑀦𑀁 𑀉𑀧𑁆𑀧𑀚𑁆𑀚𑀢𑀺.

𑀧𑀭𑀢𑁄 𑀲𑀼𑀢𑁆𑀯𑀸 𑀧𑀝𑀺𑀮𑀪𑀢𑀻𑀢𑀺 𑀓𑀫𑁆𑀫𑀸𑀬𑀢𑀦𑀸𑀤𑀻𑀦𑀺 𑀧𑀭𑁂𑀦 𑀓𑀭𑀺𑀬𑀫𑀸𑀦𑀸𑀦𑀺, 𑀧𑀭𑁂𑀦 𑀓𑀢𑀸𑀦𑀺 𑀯𑀸 𑀤𑀺𑀲𑁆𑀯𑀸𑀧𑀺 𑀧𑀭𑀲𑁆𑀲 𑀓𑀣𑀬𑀫𑀸𑀦𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸𑀧𑀺 𑀆𑀘𑀭𑀺𑀬𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑁂𑀢𑁆𑀯𑀸𑀧𑀺 𑀧𑀝𑀺𑀮𑀤𑁆𑀥𑀸 𑀲𑀩𑁆𑀩𑀸 𑀧𑀭𑀢𑁄 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀫𑀸𑀧𑀦𑁆𑀦𑀲𑁆𑀲𑀸𑀢𑀺 𑀲𑀫𑀸𑀧𑀢𑁆𑀢𑀺𑀲𑀫𑀗𑁆𑀕𑀺𑀲𑁆𑀲, 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁. 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀧𑀜𑁆𑀜𑀸 𑀳𑀺 𑀇𑀥 ‘‘𑀪𑀸𑀯𑀦𑀸𑀧𑀜𑁆𑀜𑀸’’𑀢𑀺 𑀯𑀺𑀲𑁂𑀲𑀢𑁄 𑀇𑀘𑁆𑀙𑀺𑀢𑀸𑀢𑀺.

𑀆𑀯𑀼𑀥𑀁 𑀦𑀸𑀫 𑀧𑀝𑀺𑀧𑀓𑁆𑀔𑀯𑀺𑀫𑀣𑀦𑀢𑁆𑀣𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀭𑀸𑀕𑀸𑀤𑀺𑀲𑀤𑀺𑀲𑁄 𑀘 𑀧𑀝𑀺𑀧𑀓𑁆𑀔𑁄 𑀦𑀢𑁆𑀣𑀺, 𑀢𑀲𑁆𑀲 𑀘 𑀯𑀺𑀫𑀣𑀦𑀁 𑀩𑀼𑀤𑁆𑀥𑀯𑀘𑀦𑀫𑁂𑀯𑀸𑀢𑀺 ‘‘𑀲𑀼𑀢𑀫𑁂𑀯 𑀆𑀯𑀼𑀥’’𑀦𑁆𑀢𑀺 𑀯𑀢𑁆𑀯𑀸 ‘‘𑀢𑀁 𑀅𑀢𑁆𑀣𑀢𑁄 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦’’𑀦𑁆𑀢𑀺 𑀆𑀳. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀢𑀁 𑀳𑀻’’𑀢𑀺 𑀆𑀤𑀺𑀁 𑀯𑀢𑁆𑀯𑀸 ‘‘𑀲𑀼𑀢𑀸𑀯𑀼𑀥𑁄’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁭.𑁬𑁭) 𑀲𑀼𑀢𑁆𑀢𑀧𑀤𑁂𑀦 𑀲𑀫𑀢𑁆𑀣𑁂𑀢𑀺. 𑀢𑀢𑁆𑀣 𑀅𑀓𑀼𑀲𑀮𑀁 𑀧𑀚𑀳𑀢𑀻𑀢𑀺 𑀢𑀤𑀗𑁆𑀕𑀸𑀤𑀺𑀯𑀲𑁂𑀦 𑀅𑀓𑀼𑀲𑀮𑀁 𑀧𑀭𑀺𑀘𑁆𑀘𑀚𑀢𑀺. 𑀓𑀼𑀲𑀮𑀁 𑀪𑀸𑀯𑁂𑀢𑀻𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀤𑀺𑀓𑀼𑀲𑀮𑀁 𑀥𑀫𑁆𑀫𑀁 𑀉𑀧𑁆𑀧𑀸𑀤𑁂𑀢𑀺 𑀯𑀟𑁆𑀠𑁂𑀢𑀺 𑀘. 𑀲𑀼𑀤𑁆𑀥𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀻𑀢𑀺 𑀢𑁂𑀦 𑀅𑀓𑀼𑀲𑀮𑀧𑁆𑀧𑀳𑀸𑀦𑁂𑀦, 𑀢𑀸𑀬 𑀘 𑀓𑀼𑀲𑀮𑀪𑀸𑀯𑀦𑀸𑀬 𑀭𑀸𑀕𑀸𑀤𑀺𑀲𑀁𑀓𑀺𑀮𑁂𑀲𑀢𑁄 𑀯𑀺𑀲𑀼𑀤𑁆𑀥𑀁 𑀅𑀢𑁆𑀢𑀪𑀸𑀯𑀁 𑀧𑀯𑀢𑁆𑀢𑁂𑀢𑀺.

𑀯𑀺𑀯𑁂𑀓𑀝𑁆𑀞𑀓𑀸𑀬𑀸𑀦𑀦𑁆𑀢𑀺 𑀕𑀡𑀲𑀗𑁆𑀕𑀡𑀺𑀓𑀁 𑀯𑀚𑁆𑀚𑁂𑀢𑁆𑀯𑀸 𑀢𑀢𑁄 𑀅𑀧𑀓𑀟𑁆𑀠𑀺𑀢𑀓𑀸𑀬𑀸𑀦𑀁. 𑀲𑁆𑀯𑀸𑀬𑀁 𑀓𑀸𑀬𑀯𑀺𑀯𑁂𑀓𑁄 𑀦 𑀓𑁂𑀯𑀮𑀁 𑀏𑀓𑀸𑀓𑀻𑀪𑀸𑀯𑁄, 𑀅𑀣 𑀔𑁄 𑀧𑀞𑀫𑀚𑁆𑀛𑀸𑀦𑀸𑀤𑀺 𑀦𑁂𑀓𑁆𑀔𑀫𑁆𑀫𑀬𑁄𑀕𑀢𑁄𑀢𑀺 𑀆𑀳 ‘‘𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑀸𑀦’’𑀦𑁆𑀢𑀺. 𑀘𑀺𑀢𑁆𑀢𑀯𑀺𑀯𑁂𑀓𑁄𑀢𑀺 𑀓𑀺𑀮𑁂𑀲𑀲𑀗𑁆𑀕𑀡𑀺𑀓𑀁 𑀧𑀳𑀸𑀬 𑀢𑀢𑁄 𑀘𑀺𑀢𑁆𑀢𑀲𑁆𑀲 𑀯𑀺𑀯𑀺𑀢𑁆𑀢𑀢𑀸. 𑀲𑀸 𑀧𑀦 𑀛𑀸𑀦𑀯𑀺𑀫𑁄𑀓𑁆𑀔𑀸𑀤𑀻𑀦𑀁 𑀯𑀲𑁂𑀦 𑀳𑁄𑀢𑀻𑀢𑀺 𑀆𑀳 ‘‘𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑀸𑀦𑀁 𑀧𑀭𑀫𑀯𑁄𑀤𑀸𑀦𑀧𑁆𑀧𑀢𑁆𑀢𑀸𑀦’’𑀦𑁆𑀢𑀺. 𑀉𑀧𑀥𑀺𑀯𑀺𑀯𑁂𑀓𑁄𑀢𑀺 𑀦𑀺𑀩𑁆𑀩𑀸𑀦𑀁. 𑀢𑀤𑀥𑀺𑀕𑀫𑁂𑀦 𑀳𑀺 𑀧𑀼𑀕𑁆𑀕𑀮𑀲𑁆𑀲 𑀦𑀺𑀭𑀼𑀧𑀥𑀺𑀢𑀸. 𑀢𑁂𑀦𑀸𑀳 ‘‘𑀦𑀺𑀭𑀼𑀧𑀥𑀻𑀦𑀁 𑀧𑀼𑀕𑁆𑀕𑀮𑀸𑀦’’𑀦𑁆𑀢𑀺, 𑀯𑀺𑀲𑀗𑁆𑀔𑀸𑀭𑀕𑀢𑀸𑀦𑀁 𑀅𑀥𑀺𑀕𑀢𑀦𑀺𑀩𑁆𑀩𑀸𑀦𑀸𑀦𑀁, 𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑀗𑁆𑀕𑀻𑀦𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀲𑀼𑀢𑀫𑁆𑀧𑀺 𑀅𑀯𑀲𑁆𑀲𑀬𑀝𑁆𑀞𑁂𑀦𑁂𑀯 𑀆𑀯𑀼𑀥𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀬𑀫𑁆𑀧𑀻’’𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀢𑀜𑁆𑀳𑀺 𑀦𑀺𑀲𑁆𑀲𑀸𑀬𑀸’’𑀢𑀺. 𑀓𑀸𑀫𑀜𑁆𑀘𑁂𑀢𑁆𑀣 𑀲𑀼𑀢𑀧𑀯𑀺𑀯𑁂𑀓𑀸𑀧𑀺 𑀧𑀜𑁆𑀜𑀸𑀯𑀲𑁂𑀦𑁂𑀯 𑀬𑀣𑀸𑀥𑀺𑀧𑁆𑀧𑁂𑀢𑀆𑀯𑀼𑀥𑀢𑁆𑀢𑀲𑀸𑀥𑀓𑀸, 𑀧𑀜𑁆𑀜𑀸 𑀧𑀦 𑀲𑀼𑀢𑁂𑀦, 𑀏𑀓𑀘𑁆𑀘𑀧𑀯𑀺𑀯𑁂𑀓𑁂𑀦 𑀯𑀸 𑀯𑀺𑀦𑀸𑀧𑀺 𑀇𑀥𑀸𑀥𑀺𑀧𑁆𑀧𑁂𑀢𑀆𑀯𑀼𑀥𑀢𑁆𑀢𑀲𑀸𑀥𑀦𑀻𑀢𑀺 𑀢𑀢𑁄 𑀧𑀜𑁆𑀜𑀸 𑀲𑀸𑀫𑀢𑁆𑀣𑀺𑀬𑀤𑀲𑁆𑀲𑀦𑀢𑁆𑀣𑀁 𑀯𑀺𑀲𑀼𑀁 𑀆𑀯𑀼𑀥𑀪𑀸𑀯𑁂𑀦 𑀯𑀼𑀢𑁆𑀢𑀸. 𑀢𑁂𑀦𑀸𑀳 ‘‘𑀬𑀲𑁆𑀲 𑀲𑀸 𑀅𑀢𑁆𑀣𑀺, 𑀲𑁄 𑀦 𑀓𑀼𑀢𑁄𑀘𑀻’’𑀢𑀺𑀆𑀤𑀺.

𑀦𑀸𑀜𑁆𑀜𑀸𑀢𑀁 𑀅𑀯𑀺𑀤𑀺𑀢𑀁 𑀥𑀫𑁆𑀫𑀦𑁆𑀢𑀺 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑀯𑀝𑁆𑀝𑁂 𑀦 𑀅𑀜𑁆𑀜𑀸𑀢𑀁 𑀅𑀯𑀺𑀤𑀺𑀢𑀁 𑀅𑀫𑀢𑀥𑀫𑁆𑀫𑀁, 𑀘𑀢𑀼𑀲𑀘𑁆𑀘𑀥𑀫𑁆𑀫𑀫𑁂𑀯 𑀯𑀸 𑀚𑀸𑀦𑀺𑀲𑁆𑀲𑀸𑀫𑀻𑀢𑀺 𑀧𑀝𑀺𑀧𑀦𑁆𑀦𑀲𑁆𑀲 𑀇𑀫𑀺𑀦𑀸 𑀧𑀼𑀩𑁆𑀩𑀸𑀪𑁄𑀕𑁂𑀦 𑀉𑀧𑁆𑀧𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀁. 𑀬𑀁 𑀧𑀸𑀴𑀺𑀬𑀁 𑀲𑀗𑁆𑀕𑀳𑀯𑀸𑀭𑁂 ‘‘𑀦𑀯 𑀇𑀦𑁆𑀤𑁆𑀭𑀺𑀬𑀸𑀦𑀺 𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀼𑀩𑁆𑀩𑀸𑀪𑁄𑀕𑀲𑀺𑀤𑁆𑀥𑀁 𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀲𑁂𑀲𑀁 𑀤𑀻𑀧𑁂𑀢𑀼𑀁 𑀯𑀼𑀢𑁆𑀢𑀁, 𑀅𑀢𑁆𑀣𑀢𑁄 𑀧𑀦 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺 𑀏𑀯 𑀲𑀸𑀢𑀺 𑀆𑀳 ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀆𑀚𑀸𑀦𑀦𑀓𑀇𑀦𑁆𑀤𑁆𑀭𑀺𑀬𑀁, 𑀧𑀞𑀫𑀫𑀕𑁆𑀕𑁂𑀦 𑀜𑀸𑀢𑀫𑀭𑀺𑀬𑀸𑀤𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑁂𑀲𑀁𑀬𑁂𑀯 𑀢𑁂𑀦 𑀫𑀕𑁆𑀕𑁂𑀦 𑀜𑀸𑀢𑀸𑀦𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀸𑀦𑀁 𑀚𑀸𑀦𑀦𑀓𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀅𑀜𑁆𑀜𑀸𑀪𑀽𑀢𑀁 𑀆𑀚𑀸𑀦𑀦𑀪𑀽𑀢𑀁 𑀇𑀦𑁆𑀤𑁆𑀭𑀺𑀬’’𑀦𑁆𑀢𑀺. 𑀆𑀚𑀸𑀦𑀸𑀢𑀻𑀢𑀺 𑀅𑀜𑁆𑀜𑁄, 𑀅𑀜𑁆𑀜𑀲𑁆𑀲 𑀪𑀽𑀢𑀁, 𑀆𑀚𑀸𑀦𑀦𑀯𑀲𑁂𑀦 𑀯𑀸 𑀪𑀽𑀢𑀦𑁆𑀢𑀺 𑀅𑀜𑁆𑀜𑀪𑀽𑀢𑀁.𑀅𑀜𑁆𑀜𑀸𑀢𑀸𑀯𑀻𑀲𑀽𑀢𑀺 𑀚𑀸𑀦𑀺𑀢𑀩𑁆𑀩𑀁 𑀘𑀢𑀼𑀅𑀭𑀺𑀬𑀲𑀘𑁆𑀘𑀁 𑀆𑀚𑀸𑀦𑀺𑀢𑁆𑀯𑀸 𑀞𑀺𑀢𑁂𑀲𑀼. 𑀢𑁂𑀦𑀸𑀳 ‘‘𑀚𑀸𑀦𑀦𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑀧𑁆𑀧𑀢𑁆𑀢𑁂𑀲𑀽’’𑀢𑀺, 𑀧𑀭𑀺𑀜𑁆𑀜𑀸𑀤𑀺𑀪𑁂𑀤𑀲𑁆𑀲 𑀚𑀸𑀦𑀦𑀓𑀺𑀘𑁆𑀘𑀲𑁆𑀲 𑀧𑀭𑀺𑀦𑀺𑀝𑁆𑀞𑀸𑀦𑀧𑁆𑀧𑀢𑁆𑀢𑁂𑀲𑀼.

𑀫𑀁𑀲𑀘𑀓𑁆𑀔𑀼 𑀘𑀓𑁆𑀔𑀼𑀧𑀲𑀸𑀤𑁄𑀢𑀺 𑀫𑀁𑀲𑀘𑀓𑁆𑀔𑀼 𑀦𑀸𑀫 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄, 𑀯𑀡𑁆𑀡𑁄, 𑀕𑀦𑁆𑀥𑁄, 𑀭𑀲𑁄, 𑀑𑀚𑀸, 𑀲𑀫𑁆𑀪𑀯𑁄, 𑀲𑀡𑁆𑀞𑀸𑀦𑀁, 𑀚𑀻𑀯𑀺𑀢𑀁, 𑀪𑀸𑀯𑁄, 𑀓𑀸𑀬𑀧𑁆𑀧𑀲𑀸𑀤𑁄, 𑀘𑀓𑁆𑀔𑀼𑀧𑀲𑀸𑀤𑁄𑀢𑀺 𑀏𑀯𑀁 𑀘𑀼𑀤𑁆𑀤𑀲𑀲𑀫𑁆𑀪𑀸𑀭𑁄 𑀫𑀁𑀲𑀧𑀺𑀡𑁆𑀟𑁄.

𑀓𑀲𑀺𑀡𑀸𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀢𑀢𑁆𑀣 𑀭𑀽𑀧𑀤𑀲𑁆𑀲𑀦𑀢𑁄 ‘‘𑀤𑀺𑀩𑁆𑀩𑀘𑀓𑁆𑀔𑀼 𑀆𑀮𑁄𑀓𑀦𑀺𑀲𑁆𑀲𑀺𑀢𑀁 𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀤𑀺𑀩𑁆𑀩𑀘𑀓𑁆𑀔𑀼𑀧𑀜𑁆𑀜𑀸𑀯𑀺𑀦𑀺𑀫𑀼𑀢𑁆𑀢𑀸 𑀏𑀯 𑀮𑁄𑀓𑀺𑀬𑀧𑀜𑁆𑀜𑀸 𑀧𑀜𑁆𑀜𑀸𑀘𑀓𑁆𑀔𑀽𑀢𑀺 𑀅𑀬𑀫𑀢𑁆𑀣𑁄 𑀅𑀯𑀼𑀢𑁆𑀢𑀲𑀺𑀤𑁆𑀥𑁄 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀜𑁆𑀜𑀸𑀘𑀓𑁆𑀔𑀼 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀸’’𑀢𑀺.

𑀅𑀥𑀺𑀓𑀁 𑀯𑀺𑀲𑀺𑀝𑁆𑀞𑀁 𑀲𑀻𑀮𑀦𑁆𑀢𑀺 𑀅𑀥𑀺𑀲𑀻𑀮𑀁. 𑀲𑀺𑀓𑁆𑀔𑀺𑀢𑀩𑁆𑀩𑀢𑁄𑀢𑀺 𑀆𑀲𑁂𑀯𑀺𑀢𑀩𑁆𑀩𑀢𑁄. 𑀅𑀥𑀺𑀲𑀻𑀮𑀁 𑀦𑀸𑀫 𑀅𑀦𑀯𑀲𑁂𑀲𑀓𑀸𑀬𑀺𑀓𑀯𑀸𑀘𑀲𑀺𑀓𑀲𑀁𑀯𑀭𑀪𑀸𑀯𑀢𑁄, 𑀫𑀕𑁆𑀕𑀲𑀻𑀮𑀲𑁆𑀲 𑀧𑀤𑀝𑁆𑀞𑀸𑀦𑀪𑀸𑀯𑀢𑁄 𑀘. 𑀅𑀥𑀺𑀘𑀺𑀢𑁆𑀢𑀁 𑀫𑀕𑁆𑀕𑀲𑀫𑀸𑀥𑀺𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄. 𑀅𑀥𑀺𑀧𑀜𑁆𑀜𑀸 𑀫𑀕𑁆𑀕𑀧𑀜𑁆𑀜𑀸𑀬 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄. 𑀇𑀤𑀸𑀦𑀺 𑀦𑁂𑀲𑀁 𑀅𑀥𑀺𑀲𑀻𑀮𑀸𑀤𑀺𑀪𑀸𑀯𑀁 𑀓𑀸𑀭𑀡𑁂𑀦 𑀧𑀝𑀺𑀧𑀸𑀤𑁂𑀢𑀼𑀁 ‘‘𑀅𑀦𑀼𑀧𑁆𑀧𑀦𑁆𑀦𑁂𑀧𑀺 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀦𑀼𑀧𑁆𑀧𑀦𑁆𑀦𑁂𑀢𑀺 𑀅𑀧𑁆𑀧𑀯𑀢𑁆𑀢𑁂. 𑀅𑀥𑀺𑀲𑀻𑀮𑀫𑁂𑀯 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀲𑁆𑀲 𑀧𑀘𑁆𑀘𑀬𑀪𑀸𑀯𑀢𑁄. 𑀲𑀫𑀸𑀧𑀦𑁆𑀦𑀸𑀢𑀺 𑀏𑀢𑁆𑀣 ‘‘𑀦𑀺𑀩𑁆𑀩𑀸𑀦𑀁 𑀧𑀢𑁆𑀣𑀬𑀦𑁆𑀢𑁂𑀦𑀸’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁.

‘‘𑀓𑀮𑁆𑀬𑀸𑀡𑀓𑀸𑀭𑀻 𑀓𑀮𑁆𑀬𑀸𑀡𑀁, 𑀧𑀸𑀧𑀓𑀸𑀭𑀻 𑀘 𑀧𑀸𑀧𑀓𑀁;

𑀅𑀦𑀼𑀪𑁄𑀢𑀺 𑀤𑁆𑀯𑀬𑀫𑁆𑀧𑁂𑀢𑀼𑀁, 𑀅𑀦𑀼𑀩𑀦𑁆𑀥𑀜𑁆𑀳𑀺 𑀓𑀸𑀭𑀓’’𑀦𑁆𑀢𑀺. (𑀲𑀁. 𑀦𑀺. 𑁧.𑁨𑁫𑁬);

𑀏𑀯𑀁 𑀅𑀢𑀻𑀢𑁂, 𑀅𑀦𑀸𑀕𑀢𑁂 𑀘 𑀯𑀝𑁆𑀝𑀫𑀽𑀮𑀓𑀤𑀼𑀓𑁆𑀔𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀲𑀁𑀯𑁂𑀕𑀯𑀢𑁆𑀣𑀼𑀢𑀸𑀬 𑀯𑀺𑀫𑀼𑀢𑁆𑀢𑀺𑀆𑀓𑀗𑁆𑀔𑀸𑀬 𑀧𑀘𑁆𑀘𑀬𑀪𑀽𑀢𑀸 𑀓𑀫𑁆𑀫𑀲𑁆𑀲𑀓𑀢𑀸𑀧𑀜𑁆𑀜𑀸 𑀅𑀥𑀺𑀧𑀜𑁆𑀜𑀸’’𑀢𑀺 𑀯𑀤𑀦𑁆𑀢𑀺. 𑀮𑁄𑀓𑀺𑀬𑀲𑀻𑀮𑀸𑀤𑀻𑀦𑀁 𑀅𑀥𑀺𑀲𑀻𑀮𑀸𑀤𑀺𑀪𑀸𑀯𑁄 𑀧𑀭𑀺𑀬𑀸𑀬𑁂𑀦𑀸𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀫𑁂𑀯 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀧𑀜𑁆𑀘𑀤𑁆𑀯𑀸𑀭𑀺𑀓𑀓𑀸𑀬𑁄𑀢𑀺 𑀧𑀜𑁆𑀘𑀤𑁆𑀯𑀸𑀭𑁂𑀲𑀼 𑀓𑀸𑀬𑁄 𑀨𑀲𑁆𑀲𑀸𑀤𑀺𑀥𑀫𑁆𑀫𑀲𑀫𑀽𑀳𑁄. 𑀓𑀸𑀬𑁄 𑀘 𑀲𑁄 𑀪𑀸𑀯𑀺𑀢𑀪𑀸𑀯𑁂𑀦 𑀪𑀸𑀯𑀦𑀸 𑀘𑀸𑀢𑀺 𑀓𑀸𑀬𑀪𑀸𑀯𑀦𑀸 𑀦𑀸𑀫. 𑀬𑀲𑁆𑀫𑀸 𑀔𑀻𑀡𑀸𑀲𑀯𑀸𑀦𑀁 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑀦𑁂𑀦 𑀲𑀩𑁆𑀩𑀲𑀁𑀓𑀺𑀮𑁂𑀲𑀸 𑀧𑀳𑀻𑀦𑀸𑀢𑀺 𑀧𑀳𑀻𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀲𑁄 𑀆𑀲𑁂𑀯𑀦𑀸𑀪𑀸𑀯𑀢𑁄 𑀦𑀢𑁆𑀣𑀺 𑀢𑁂𑀲𑀁 𑀪𑀸𑀯𑀺𑀦𑀺𑀬𑀸𑀧𑀺 𑀘𑀓𑁆𑀔𑀼𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸, 𑀧𑀕𑁂𑀯 𑀓𑀸𑀴𑀓𑀸, 𑀢𑀲𑁆𑀫𑀸 𑀧𑀜𑁆𑀘𑀤𑁆𑀯𑀸𑀭𑀺𑀓𑀓𑀸𑀬𑁄 𑀲𑀼𑀪𑀸𑀯𑀺𑀢𑁄 𑀏𑀯 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀔𑀻𑀡𑀸𑀲𑀯𑀲𑁆𑀲 𑀳𑀺…𑀧𑁂… 𑀲𑀼𑀪𑀸𑀯𑀺𑀢𑁄 𑀳𑁄𑀢𑀻’’𑀢𑀺. 𑀦 𑀅𑀜𑁆𑀜𑁂𑀲𑀁 𑀯𑀺𑀬 𑀤𑀼𑀩𑁆𑀩𑀮𑀸 𑀤𑀼𑀩𑁆𑀩𑀮𑀪𑀸𑀯𑀓𑀭𑀸𑀦𑀁 𑀓𑀺𑀮𑁂𑀲𑀸𑀦𑀁 𑀲𑀩𑁆𑀩𑀲𑁄 𑀧𑀳𑀻𑀦𑀢𑁆𑀢𑀸.

𑀯𑀺𑀧𑀲𑁆𑀲𑀦𑀸 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀁 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀺𑀯𑀲𑁂𑀦 𑀲𑀗𑁆𑀔𑀸𑀭𑀸𑀦𑀁 𑀲𑀫𑁆𑀫𑀤𑁂𑀯 𑀤𑀲𑁆𑀲𑀦𑀢𑁄. 𑀫𑀕𑁆𑀕𑁄 𑀧𑀝𑀺𑀧𑀤𑀸𑀦𑀼𑀢𑁆𑀢𑀭𑀺𑀬𑀁 𑀢𑀤𑀼𑀢𑁆𑀢𑀭𑀺𑀧𑀝𑀺𑀧𑀤𑀸𑀬 𑀅𑀪𑀸𑀯𑀢𑁄. 𑀨𑀮𑀁 𑀯𑀺𑀫𑀼𑀢𑁆𑀢𑀸𑀦𑀼𑀢𑁆𑀢𑀭𑀺𑀬𑀁 𑀅𑀓𑀼𑀧𑁆𑀧𑀪𑀸𑀯𑀢𑁄. 𑀨𑀮𑀁 𑀯𑀸 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀁 𑀤𑀺𑀯𑀲𑀫𑁆𑀧𑀺 𑀦𑀺𑀩𑁆𑀩𑀸𑀦𑀁 𑀧𑀘𑁆𑀘𑀓𑁆𑀔𑀢𑁄 𑀤𑀺𑀲𑁆𑀯𑀸 𑀧𑀯𑀢𑁆𑀢𑀦𑀢𑁄. 𑀦𑀺𑀩𑁆𑀩𑀸𑀦𑀁 𑀯𑀺𑀫𑀼𑀢𑁆𑀢𑀸𑀦𑀼𑀢𑁆𑀢𑀭𑀺𑀬𑀁 𑀲𑀩𑁆𑀩𑀲𑀗𑁆𑀔𑀢𑀯𑀺𑀦𑀺𑀲𑁆𑀲𑀝𑀢𑁆𑀢𑀸. 𑀤𑀲𑁆𑀲𑀦-𑀲𑀤𑁆𑀤𑀁 𑀓𑀫𑁆𑀫𑀲𑀸𑀥𑀦𑀁 𑀕𑀳𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀲𑁆𑀲 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀢𑀸 𑀯𑀼𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁄 𑀉𑀢𑁆𑀢𑀭𑀜𑁆𑀳𑀺 𑀤𑀝𑁆𑀞𑀩𑁆𑀩𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀆𑀳. 𑀦𑀢𑁆𑀣𑀺 𑀇𑀢𑁄 𑀉𑀢𑁆𑀢𑀭𑀦𑁆𑀢𑀺 𑀅𑀦𑀼𑀢𑁆𑀢𑀭𑀁, 𑀅𑀦𑀼𑀢𑁆𑀢𑀭𑀫𑁂𑀯 𑀅𑀦𑀼𑀢𑁆𑀢𑀭𑀺𑀬𑀦𑁆𑀢𑀺 𑀆𑀳 ‘‘𑀉𑀢𑁆𑀢𑀫𑀁 𑀚𑁂𑀝𑁆𑀞𑀓’’𑀦𑁆𑀢𑀺.

𑀲𑁂𑀲𑁄𑀢𑀺 𑀯𑀼𑀢𑁆𑀢𑀸𑀯𑀲𑁂𑀲𑁄 𑀧𑀜𑁆𑀘𑀓𑀦𑀬𑁂𑀦, 𑀘𑀢𑀼𑀓𑁆𑀓𑀦𑀬𑁂𑀦 𑀘 𑀢𑀺𑀯𑀺𑀥𑁄 𑀲𑀫𑀸𑀥𑀺, 𑀇𑀫𑀺𑀦𑀸 𑀏𑀯 𑀘 𑀲𑀫𑀸𑀥𑀺𑀢𑁆𑀢𑀬𑀸𑀧𑀤𑁂𑀲𑁂𑀦 𑀲𑀼𑀢𑁆𑀢𑀦𑁆𑀢𑁂𑀲𑀼𑀧𑀺 𑀧𑀜𑁆𑀘𑀓𑀦𑀬𑁄 𑀆𑀕𑀢𑁄 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀫𑀢𑁆𑀣𑀫𑀜𑁆𑀚𑀽𑀲𑀸𑀬𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑀝𑀻. 𑁧.𑁩𑁮) 𑀯𑀼𑀢𑁆𑀢𑀫𑁂𑀯, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀆𑀕𑀘𑁆𑀙𑀢𑀺 𑀦𑀸𑀫𑀁 𑀏𑀢𑀲𑁆𑀫𑀸𑀢𑀺 𑀆𑀕𑀫𑀦𑀁, 𑀢𑀢𑁄 𑀆𑀕𑀫𑀦𑀢𑁄.𑀲𑀕𑀼𑀡𑀢𑁄𑀢𑀺 𑀲𑀭𑀲𑀢𑁄. 𑀆𑀭𑀫𑁆𑀫𑀡𑀢𑁄𑀢𑀺 𑀆𑀭𑀫𑁆𑀫𑀡𑀥𑀫𑁆𑀫𑀢𑁄. 𑀅𑀦𑀢𑁆𑀢𑀢𑁄 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸𑀢𑀺 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀢𑁆𑀢𑀸’’𑀢𑀺 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸. 𑀅𑀦𑀢𑁆𑀢𑀢𑁄 𑀤𑀺𑀲𑁆𑀯𑀸𑀢𑀺 𑀧𑀞𑀫𑀁 𑀲𑀗𑁆𑀔𑀸𑀭𑀸𑀦𑀁 ‘‘𑀅𑀦𑀢𑁆𑀢𑀸’’𑀢𑀺 𑀅𑀦𑀢𑁆𑀢𑀮𑀓𑁆𑀔𑀡𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸. 𑀅𑀦𑀢𑁆𑀢𑀢𑁄 𑀯𑀼𑀝𑁆𑀞𑀸𑀢𑀻𑀢𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀬 𑀅𑀦𑀢𑁆𑀢𑀸𑀓𑀸𑀭𑀢𑁄 𑀧𑀯𑀢𑁆𑀢𑀸𑀬 𑀫𑀕𑁆𑀕𑀯𑀼𑀝𑁆𑀞𑀸𑀦𑀁 𑀧𑀸𑀧𑀼𑀡𑀸𑀢𑀺. 𑀅𑀲𑀼𑀜𑁆𑀜𑀢𑀢𑁆𑀢𑀓𑀸𑀭𑀓𑀸𑀦𑀁 𑀓𑀺𑀮𑁂𑀲𑀸𑀦𑀁 𑀅𑀪𑀸𑀯𑀸𑀢𑀺 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑀧𑀘𑁆𑀘𑀬𑀸𑀦𑀁 𑀤𑀺𑀝𑁆𑀞𑁂𑀓𑀝𑁆𑀞𑀸𑀦𑀁 𑀓𑀺𑀮𑁂𑀲𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀢𑁄 𑀯𑀺𑀧𑀲𑁆𑀲𑀦𑀸 𑀲𑀼𑀜𑁆𑀜𑀢𑀸 𑀦𑀸𑀫 𑀅𑀢𑁆𑀢𑀲𑀼𑀜𑁆𑀜𑀢𑀸𑀬 𑀬𑀸𑀣𑀸𑀯𑀢𑁄 𑀕𑀳𑀡𑀢𑁄. 𑀦𑀦𑀼 𑀏𑀯𑀁 𑀯𑀺𑀧𑀲𑁆𑀲𑀦𑀸𑀬 𑀲𑀕𑀼𑀡𑀢𑁄 𑀲𑀼𑀜𑁆𑀜𑀢𑀸, 𑀦 𑀆𑀕𑀫𑀦𑀢𑁄𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀦𑀢𑁆𑀣𑀻𑀢𑀺? 𑀲𑀘𑁆𑀘𑀫𑁂𑀢𑀁 𑀦𑀸𑀫𑀮𑀸𑀪𑁂, 𑀦 𑀧𑀦 𑀦𑀸𑀫𑀤𑀸𑀦𑁂𑀢𑀺 𑀦𑀸𑀬𑀁 𑀤𑁄𑀲𑁄. 𑀅𑀣 𑀯𑀸 𑀲𑀼𑀢𑁆𑀢𑀦𑁆𑀢𑀓𑀣𑀸 𑀦𑀸𑀫 𑀧𑀭𑀺𑀬𑀸𑀬𑀓𑀣𑀸, 𑀦 𑀅𑀪𑀺𑀥𑀫𑁆𑀫𑀓𑀣𑀸 𑀯𑀺𑀬 𑀦𑀺𑀧𑁆𑀧𑀭𑀺𑀬𑀸𑀬𑀸𑀢𑀺 𑀪𑀺𑀬𑁆𑀬𑁄𑀧𑀺 𑀦 𑀓𑁄𑀘𑀺 𑀤𑁄𑀲𑁄.

𑀬𑀲𑁆𑀫𑀸 𑀲𑀕𑀼𑀡𑀢𑁄, 𑀆𑀭𑀫𑁆𑀫𑀡𑀢𑁄 𑀘 𑀦𑀸𑀫𑀮𑀸𑀪𑁂 𑀲𑀗𑁆𑀓𑀭𑁄 𑀳𑁄𑀢𑀺 𑀏𑀓𑀲𑁆𑀲𑁂𑀯 𑀦𑀸𑀫𑀦𑁆𑀢𑀭𑀮𑀸𑀪𑀲𑀫𑁆𑀪𑀯𑀢𑁄. 𑀆𑀕𑀫𑀦𑀢𑁄 𑀧𑀦 𑀦𑀸𑀫𑀮𑀸𑀪𑁂 𑀲𑀗𑁆𑀓𑀭𑁄 𑀦𑀢𑁆𑀣𑀺 𑀦𑀸𑀫𑀦𑁆𑀢𑀭𑀮𑀸𑀪𑀸𑀪𑀸𑀯𑀢𑁄, 𑀅𑀲𑀫𑁆𑀪𑀯𑀢𑁄 𑀘, 𑀢𑀲𑁆𑀫𑀸 ‘‘𑀅𑀧𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀺𑀫𑀺𑀢𑁆𑀢𑀓𑀸𑀭𑀓𑀓𑀺𑀮𑁂𑀲𑀸𑀪𑀸𑀯𑀸𑀢𑀺 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀸𑀤𑀺𑀕𑁆𑀕𑀸𑀳𑀓𑀧𑀘𑁆𑀘𑀬𑀸𑀦𑀁 𑀓𑀺𑀮𑁂𑀲𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀢𑁄. 𑀓𑀸𑀫𑀜𑁆𑀘𑀸𑀬𑀁 𑀯𑀺𑀧𑀲𑁆𑀲𑀦𑀸 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀸𑀤𑀺𑀁 𑀉𑀕𑁆𑀖𑀸𑀝𑁂𑀦𑁆𑀢𑀻 𑀧𑀯𑀢𑁆𑀢𑀢𑀺, 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀲𑁆𑀲 𑀧𑀦 𑀅𑀯𑀺𑀲𑁆𑀲𑀚𑁆𑀚𑀦𑀢𑁄 𑀦 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀅𑀦𑀺𑀫𑀺𑀢𑁆𑀢𑀦𑀸𑀫𑀁 𑀮𑀪𑀢𑀻𑀢𑀺. 𑀧𑀭𑀺𑀬𑀸𑀬𑁂𑀦 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀦𑀺𑀧𑁆𑀧𑀭𑀺𑀬𑀸𑀬𑀤𑁂𑀲𑀦𑀢𑁆𑀢𑀸 𑀅𑀪𑀺𑀥𑀫𑁆𑀫𑁂 𑀫𑀕𑁆𑀕𑀲𑁆𑀲 𑀅𑀦𑀺𑀫𑀺𑀢𑁆𑀢𑀦𑀸𑀫𑀁 𑀉𑀤𑁆𑀥𑀝𑀁. 𑀲𑀼𑀢𑁆𑀢𑁂 𑀘 𑁋

‘‘𑀅𑀦𑀺𑀫𑀺𑀢𑁆𑀢𑀜𑁆𑀘 𑀪𑀸𑀯𑁂𑀳𑀺, 𑀫𑀸𑀦𑀸𑀦𑀼𑀲𑀬𑀫𑀼𑀚𑁆𑀚𑀳;

𑀢𑀢𑁄 𑀫𑀸𑀦𑀸𑀪𑀺𑀲𑀫𑀬𑀸, 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀻’’𑀢𑀺. (𑀲𑀼. 𑀦𑀺. 𑁩𑁪𑁪; 𑀲𑀁. 𑀦𑀺. 𑁧.𑁨𑁧𑁨);