𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀤𑀻𑀖𑀦𑀺𑀓𑀸𑀬𑁂

𑀧𑀸𑀣𑀺𑀓𑀯𑀕𑁆𑀕𑀝𑀻𑀓𑀸

𑁧. 𑀧𑀸𑀣𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑀲𑀼𑀦𑀓𑁆𑀔𑀢𑁆𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁧. 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸𑀢𑀺 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀳𑁂𑀝𑁆𑀞𑀸 𑀅𑀕𑁆𑀕𑀳𑀺𑀢𑀢𑀸𑀬 𑀅𑀧𑀼𑀩𑁆𑀩𑀲𑁆𑀲 𑀅𑀪𑀺𑀦𑀯𑀲𑁆𑀲 𑀧𑀤𑀲𑁆𑀲 𑀯𑀡𑁆𑀡𑀦𑀸 𑀅𑀢𑁆𑀣𑀯𑀺𑀪𑀸𑀯𑀦𑀸. ‘‘𑀳𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀸𑀕𑀢𑀫𑀢𑁆𑀣’’𑀦𑁆𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸) 𑀳𑀺 𑀯𑀼𑀢𑁆𑀢𑀁. 𑀫𑀮𑁆𑀮𑁂𑀲𑀽𑀢𑀺 𑀏𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀙𑀸𑀬𑀽𑀤𑀓𑀲𑀫𑁆𑀧𑀦𑁆𑀦𑁂 𑀯𑀦𑀲𑀡𑁆𑀟𑁂 𑀯𑀺𑀳𑀭𑀢𑀻𑀢𑀺 𑀅𑀦𑀼𑀧𑀺𑀬𑀲𑀸𑀫𑀦𑁆𑀢𑀸 𑀓𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀅𑀪𑀸𑀯𑀢𑁄. 𑀬𑀤𑀺 𑀦 𑀢𑀸𑀯 𑀧𑀯𑀺𑀝𑁆𑀞𑁄, 𑀓𑀲𑁆𑀫𑀸 ‘‘𑀧𑀸𑀯𑀺𑀲𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀧𑀯𑀺𑀲𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺, 𑀢𑁂𑀦 𑀅𑀯𑀲𑁆𑀲𑀁 𑀪𑀸𑀯𑀺𑀦𑀺 𑀪𑀽𑀢𑁂 𑀯𑀺𑀬 𑀉𑀧𑀘𑀸𑀭𑀸 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀬𑀣𑀸 𑀓𑀺’’𑀦𑁆𑀢𑀺𑀆𑀤𑀺𑀫𑀸𑀳. 𑀏𑀢𑀦𑁆𑀢𑀺 𑀏𑀢𑀁 ‘‘𑀅𑀢𑀺𑀧𑁆𑀧𑀕𑁄 𑀔𑁄’’𑀢𑀺𑀆𑀤𑀺𑀓𑀁 𑀘𑀺𑀦𑁆𑀢𑀦𑀁 𑀅𑀳𑁄𑀲𑀺. 𑀅𑀢𑀺𑀯𑀺𑀬 𑀧𑀕𑁄 𑀔𑁄𑀢𑀺 𑀅𑀢𑀺𑀯𑀺𑀬 𑀧𑀸𑀢𑁄𑀯. 𑀙𑀦𑁆𑀦𑀓𑁄𑀧𑀻𑀦𑀢𑀸𑀬, 𑀧𑀭𑀺𑀩𑁆𑀩𑀸𑀚𑀓𑀧𑀩𑁆𑀩𑀚𑁆𑀚𑀼𑀧𑀕𑀫𑁂𑀦 𑀘 𑀙𑀦𑁆𑀦𑀧𑀭𑀺𑀩𑁆𑀩𑀸𑀚𑀓𑀁, 𑀦 𑀦𑀕𑁆𑀕𑀧𑀭𑀺𑀩𑁆𑀩𑀸𑀚𑀓𑀁.

𑁨. 𑀬𑀲𑁆𑀫𑀸 𑀪𑀕𑀯𑀢𑁄 𑀉𑀘𑁆𑀘𑀸𑀓𑀼𑀮𑀧𑁆𑀧𑀲𑀼𑀢𑀢𑀁, 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀦𑀺𑀓𑁆𑀔𑀦𑁆𑀢𑀢𑀁, 𑀅𑀦𑀜𑁆𑀜𑀲𑀸𑀥𑀸𑀭𑀡𑀤𑀼𑀓𑁆𑀓𑀭𑀘𑀭𑀡𑀁, 𑀯𑀺𑀯𑁂𑀓𑀯𑀸𑀲𑀁, 𑀮𑁄𑀓𑀲𑀫𑁆𑀪𑀸𑀯𑀺𑀢𑀢𑀁, 𑀑𑀯𑀸𑀤𑀸𑀦𑀼𑀲𑀸𑀲𑀦𑀻𑀳𑀺 𑀮𑁄𑀓𑀲𑁆𑀲 𑀩𑀳𑀼𑀧𑀓𑀸𑀭𑀢𑀁, 𑀧𑀭𑀧𑁆𑀧𑀯𑀸𑀤𑀫𑀤𑁆𑀤𑀦𑀁, 𑀫𑀳𑀺𑀤𑁆𑀥𑀺𑀓𑀢𑀁, 𑀫𑀳𑀸𑀦𑀼𑀪𑀸𑀯𑀢𑀦𑁆𑀢𑀺 𑀏𑀯𑀫𑀸𑀤𑀺𑀓𑀁 𑀢𑀁𑀢𑀁𑀅𑀢𑁆𑀢𑀧𑀘𑁆𑀘𑀓𑁆𑀔𑀕𑀼𑀡𑀯𑀺𑀲𑁂𑀲𑀁 𑀦𑀺𑀲𑁆𑀲𑀸𑀬 𑀬𑁂𑀪𑀼𑀬𑁆𑀬𑁂𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀧𑀺 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀆𑀤𑀭𑀕𑀸𑀭𑀯𑀩𑀳𑀼𑀫𑀸𑀦𑀁 𑀤𑀲𑁆𑀲𑁂𑀦𑁆𑀢𑀺𑀬𑁂𑀯, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀫𑀸𑀦𑀣𑀤𑁆𑀥𑀢𑀁 𑀅𑀓𑀢𑁆𑀯𑀸’’𑀢𑀺𑀆𑀤𑀺. 𑀮𑁄𑀓𑀲𑀫𑀼𑀤𑀸𑀘𑀸𑀭𑀯𑀲𑁂𑀦𑀸𑀢𑀺 𑀮𑁄𑀓𑁄𑀧𑀘𑀸𑀭𑀯𑀲𑁂𑀦. 𑀘𑀺𑀭𑀲𑁆𑀲𑀦𑁆𑀢𑀺 𑀘𑀺𑀭𑀓𑀸𑀮𑁂𑀦. 𑀆𑀤𑀻𑀦𑀺 𑀯𑀤𑀦𑁆𑀢𑀺 𑀉𑀧𑀘𑀸𑀭𑀯𑀲𑁂𑀦. 𑀢𑀲𑁆𑀲𑀸𑀢𑀺 𑀪𑀕𑁆𑀕𑀯𑀕𑁄𑀢𑁆𑀢𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲. 𑀕𑀺𑀳𑀺𑀲𑀳𑀸𑀬𑁄𑀢𑀺 𑀕𑀺𑀳𑀺𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀳𑀸𑀬𑁄. 𑀧𑀘𑁆𑀘𑀓𑁆𑀔𑀸𑀢𑁄𑀢𑀺 𑀬𑁂𑀦𑀸𑀓𑀸𑀭𑁂𑀦 𑀧𑀘𑁆𑀘𑀓𑁆𑀔𑀸𑀦𑀸, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁩. 𑀉𑀤𑁆𑀤𑀺𑀲𑁆𑀲𑀸𑀢𑀺 𑀲𑀢𑁆𑀣𑀼𑀓𑀸𑀭𑀪𑀸𑀯𑁂𑀦 𑀉𑀤𑁆𑀤𑀺𑀲𑁆𑀲𑀸𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀕𑀯𑀸 𑀫𑁂’’𑀢𑀺𑀆𑀤𑀺𑀫𑀸𑀳. 𑀬𑀤𑀸 𑀲𑀼𑀦𑀓𑁆𑀔𑀢𑁆𑀢𑀲𑁆𑀲 ‘‘𑀪𑀕𑀯𑀦𑁆𑀢𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀯𑀸𑀘𑀸 𑀪𑀺𑀦𑁆𑀦𑀸, 𑀢𑀤𑀸 𑀏𑀯𑀲𑁆𑀲 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀓𑁄𑀘𑀺 𑀲𑀫𑁆𑀩𑀦𑁆𑀥𑁄 𑀦𑀢𑁆𑀣𑀺 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑀪𑀸𑀯𑀢𑁄 𑀲𑀸𑀲𑀦𑀢𑁄 𑀧𑀭𑀺𑀩𑀸𑀳𑀺𑀭𑀢𑁆𑀢𑀸. 𑀅𑀬𑀁 𑀢𑀸𑀯𑁂𑀢𑁆𑀣 𑀲𑀸𑀲𑀦𑀬𑀼𑀢𑁆𑀢𑀺, 𑀲𑀸 𑀧𑀦𑀸𑀬𑀁 𑀞𑀧𑁂𑀢𑁆𑀯𑀸 𑀲𑀸𑀲𑀦𑀬𑀼𑀢𑁆𑀢𑀺𑀓𑁄𑀯𑀺𑀤𑁂 𑀅𑀜𑁆𑀜𑁂𑀲𑀁 𑀦 𑀲𑀫𑁆𑀫𑀤𑁂𑀯 𑀯𑀺𑀲𑀬𑁄𑀢𑀺 𑀪𑀕𑀯𑀸 𑀲𑀩𑁆𑀩𑀲𑀸𑀥𑀸𑀭𑀡𑀯𑀲𑁂𑀦𑀲𑁆𑀲 𑀅𑀢𑁆𑀢𑀦𑀸 𑀲𑀫𑁆𑀩𑀦𑁆𑀥𑀸𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺 𑀦𑀽’’𑀢𑀺 𑀆𑀤𑀺𑀁 𑀯𑀢𑁆𑀯𑀸 𑀲𑀼𑀦𑀓𑁆𑀔𑀢𑁆𑀢𑀁 ‘‘𑀓𑁄 𑀲𑀦𑁆𑀢𑁄 𑀓𑀁 𑀧𑀘𑁆𑀘𑀸𑀘𑀺𑀓𑁆𑀔𑀲𑀻’’𑀢𑀺 𑀆𑀳. 𑀬𑀲𑁆𑀫𑀸 𑀫𑀼𑀔𑀸𑀕𑀢𑁄𑀬𑀁 𑀲𑀫𑁆𑀩𑀦𑁆𑀥𑁄, 𑀦 𑀧𑀽𑀚𑀸𑀕𑀢𑀸𑀤𑀺𑀓𑁄, 𑀬𑁄 𑀘 𑀬𑀸𑀘𑀓𑀬𑀸𑀘𑀺𑀢𑀩𑁆𑀩𑀢𑀸𑀯𑀲𑁂𑀦 𑀳𑁄𑀢𑀺, 𑀢𑀤𑀼𑀪𑀬𑀜𑁆𑀘𑁂𑀢𑁆𑀣 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 𑀲𑀼𑀦𑀓𑁆𑀔𑀢𑁆𑀢𑀁 ‘‘𑀓𑁄 𑀲𑀦𑁆𑀢𑁄 𑀓𑀁 𑀧𑀘𑁆𑀘𑀸𑀘𑀺𑀓𑁆𑀔𑀲𑀻’’𑀢𑀺 𑀅𑀯𑁄𑀘, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀸𑀘𑀓𑁄 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀸𑀘𑀺𑀢𑀓𑁄 𑀯𑀸 𑀬𑀸𑀘𑀓𑀁 𑀧𑀘𑁆𑀘𑀸𑀘𑀺𑀓𑁆𑀔𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁆𑀯𑀁 𑀧𑀦 𑀦𑁂𑀯 𑀬𑀸𑀘𑀓𑁄 ‘‘𑀅𑀳𑀁 𑀪𑀦𑁆𑀢𑁂 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀫𑀫 𑀲𑀦𑁆𑀢𑀺𑀓𑀁 𑀅𑀦𑀼𑀧𑀕𑀢𑀢𑁆𑀢𑀸. 𑀦 𑀬𑀸𑀘𑀺𑀢𑀓𑁄 ‘‘𑀏𑀳𑀺 𑀢𑁆𑀯𑀁 𑀲𑀼𑀦𑀓𑁆𑀔𑀢𑁆𑀢 𑀫𑀫𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀭𑀸𑀳𑀻’’𑀢𑀺 𑀏𑀯𑀁 𑀫𑀬𑀸 𑀅𑀧𑀢𑁆𑀣𑀺𑀢𑀢𑁆𑀢𑀸.

𑀓𑁄 𑀲𑀫𑀸𑀦𑁄𑀢𑀺 𑀬𑀸𑀘𑀓𑀬𑀸𑀘𑀺𑀢𑀓𑁂𑀲𑀼 𑀓𑁄 𑀦𑀸𑀫 𑀳𑁄𑀦𑁆𑀢𑁄. 𑀓𑀦𑁆𑀢𑀺 𑀬𑀸𑀘𑀓𑀬𑀸𑀘𑀺𑀢𑀓𑁂𑀲𑀼 𑀏𑀯 𑀓𑀁 𑀦𑀸𑀫 𑀳𑁄𑀦𑁆𑀢𑀁 𑀫𑀁 𑀧𑀘𑁆𑀘𑀸𑀘𑀺𑀓𑁆𑀔𑀲𑀺. 𑀢𑀼𑀘𑁆𑀙𑀧𑀼𑀭𑀺𑀲𑀸𑀢𑀺 𑀛𑀸𑀦𑀫𑀕𑁆𑀕𑀸𑀤𑀺𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂𑀲𑀼 𑀓𑀲𑁆𑀲𑀘𑀺𑀧𑀺 𑀅𑀪𑀸𑀯𑀸 𑀭𑀺𑀢𑁆𑀢𑀧𑀼𑀭𑀺𑀲𑀸. 𑀦𑀦𑀼 𑀘𑀸𑀬𑀁 𑀲𑀼𑀦𑀓𑁆𑀔𑀢𑁆𑀢𑁄 𑀮𑁄𑀓𑀺𑀬𑀚𑁆𑀛𑀸𑀦𑀸𑀦𑀺, 𑀏𑀓𑀘𑁆𑀘𑀸𑀪𑀺𑀜𑁆𑀜𑀜𑁆𑀘 𑀉𑀧𑁆𑀧𑀸𑀤𑁂𑀲𑀻𑀢𑀺? 𑀓𑀺𑀜𑁆𑀘𑀸𑀧𑀺 𑀉𑀧𑁆𑀧𑀸𑀤𑁂𑀲𑀺, 𑀢𑀢𑁄 𑀧𑀦 𑀪𑀕𑀯𑀢𑀺 𑀆𑀖𑀸𑀢𑀼𑀧𑁆𑀧𑀸𑀤𑀦𑁂𑀦 𑀲𑀳𑁂𑀯 𑀧𑀭𑀺𑀳𑀻𑀦𑁄 𑀅𑀳𑁄𑀲𑀺. 𑀅𑀧𑀭𑀸𑀥𑁄 𑀦𑀸𑀫 𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀯𑀺𑀭𑀚𑁆𑀛𑀦𑀳𑁂𑀢𑀼𑀪𑀽𑀢𑁄 𑀓𑀺𑀮𑁂𑀲𑀼𑀧𑁆𑀧𑀸𑀤𑁄𑀢𑀺 𑀆𑀳 ‘‘𑀬𑀢𑁆𑀢𑀓𑁄 𑀢𑁂 𑀅𑀧𑀭𑀸𑀥𑁄, 𑀢𑀢𑁆𑀢𑀓𑁄 𑀤𑁄𑀲𑁄’’𑀢𑀺. 𑀬𑀸𑀯𑀜𑁆𑀘𑀸𑀢𑀺 𑀅𑀯𑀥𑀺𑀧𑀭𑀺𑀘𑁆𑀙𑁂𑀤𑀪𑀸𑀯𑀤𑀲𑁆𑀲𑀦𑀁 ‘‘𑀬𑀸𑀯𑀜𑁆𑀘 𑀢𑁂𑀦 𑀪𑀕𑀯𑀢𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁩) 𑀯𑀺𑀬. 𑀢𑁂𑀢𑀺 𑀢𑀬𑀸. 𑀇𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀅𑀧𑀭𑀤𑁆𑀥𑀦𑁆𑀢𑀺 𑀅𑀧𑀭𑀚𑁆𑀛𑀺𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺𑀤𑀸𑀦𑀸𑀳𑀁 𑀪𑀦𑁆𑀢𑁂 𑀪𑀕𑀯𑀦𑁆𑀢’’𑀦𑁆𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁂𑀦 𑀢𑀼𑀘𑁆𑀙𑀧𑀼𑀭𑀺𑀲 𑀢𑀬𑀸 𑀬𑀸𑀯𑀜𑁆𑀘𑀺𑀤𑀁 𑀅𑀧𑀭𑀤𑁆𑀥𑀁, 𑀦 𑀢𑀲𑁆𑀲 𑀅𑀧𑀭𑀸𑀥𑀲𑁆𑀲 𑀧𑀫𑀸𑀡𑀁 𑀅𑀢𑁆𑀣𑀻𑀢𑀺.

𑁪. 𑀫𑀦𑀼𑀲𑁆𑀲𑀥𑀫𑁆𑀫𑀸𑀢𑀺 𑀪𑀸𑀯𑀦𑀸𑀦𑀼𑀬𑁄𑀕𑁂𑀦 𑀯𑀺𑀦𑀸 𑀫𑀦𑀼𑀲𑁆𑀲𑁂𑀳𑀺 𑀅𑀦𑀼𑀝𑁆𑀞𑀸𑀢𑀩𑁆𑀩𑀥𑀫𑁆𑀫𑀸. 𑀲𑁄 𑀳𑀺 𑀫𑀦𑀼𑀲𑁆𑀲𑀸𑀦𑀁 𑀘𑀺𑀢𑁆𑀢𑀸𑀥𑀺𑀝𑁆𑀞𑀸𑀦𑀫𑀢𑁆𑀢𑁂𑀦 𑀇𑀚𑁆𑀛𑀦𑀢𑁄 𑀢𑁂𑀲𑀁 𑀲𑀫𑁆𑀪𑀸𑀯𑀺𑀢𑀥𑀫𑁆𑀫𑁄 𑀯𑀺𑀬 𑀞𑀺𑀢𑁄 𑀢𑀣𑀸 𑀯𑀼𑀢𑁆𑀢𑁄, 𑀫𑀦𑀼𑀲𑁆𑀲𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀢𑁂𑀲𑀼 𑀩𑀳𑀼𑀮𑀁 𑀧𑀯𑀢𑁆𑀢𑀦𑀢𑁄. 𑀇𑀤𑁆𑀥𑀺𑀪𑀽𑀢𑀁 𑀧𑀸𑀝𑀺𑀳𑀸𑀭𑀺𑀬𑀁, 𑀦 𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀢𑁂𑀢𑀺 𑀧𑀯𑀢𑁆𑀢𑀺𑀢𑁂. 𑀦𑀺𑀬𑁆𑀬𑀸𑀢𑀻𑀢𑀺 𑀦𑀺𑀕𑁆𑀕𑀘𑁆𑀙𑀢𑀺, 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀕𑁆𑀕𑀫𑀦𑀯𑀲𑁂𑀦 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀥𑀫𑁆𑀫𑁂 𑀳𑀺 𑀦𑀺𑀕𑁆𑀕𑀘𑁆𑀙𑀦𑁆𑀢𑁂 𑀢𑀁𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑁄 ‘‘𑀦𑀺𑀕𑁆𑀕𑀘𑁆𑀙𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀦𑀺-𑀲𑀤𑁆𑀤𑁄 𑀉𑀧𑀲𑀕𑁆𑀕𑀫𑀢𑁆𑀢𑀁, 𑀬𑀸𑀢𑀺 𑀇𑀘𑁆𑀘𑁂𑀯 𑀅𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀼𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀢𑀢𑁆𑀭𑀸𑀢𑀺 𑀧𑀥𑀸𑀦𑀪𑀸𑀯𑁂𑀦 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀪𑀼𑀫𑁆𑀫𑀯𑀲𑁂𑀦 𑀧𑀝𑀺𑀦𑀺𑀤𑁆𑀤𑁂𑀲𑁄𑀢𑀺 𑀢𑀲𑁆𑀫𑀺𑀁 𑀥𑀫𑁆𑀫𑁂 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬 𑀦𑀺𑀬𑁆𑀬𑀦𑁆𑀢𑁂𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀲𑁆𑀫𑀺𑀁…𑀧𑁂… 𑀲𑀁𑀯𑀢𑁆𑀢𑀫𑀸𑀦𑁂’’𑀢𑀺.

𑁫. 𑀅𑀕𑁆𑀕𑀦𑁆𑀢𑀺 𑀜𑀸𑀬𑀢𑀻𑀢𑀺 𑀅𑀕𑁆𑀕𑀜𑁆𑀜𑀁. 𑀮𑁄𑀓𑀧𑀜𑁆𑀜𑀢𑁆𑀢𑀺𑀦𑁆𑀢𑀺 𑀮𑁄𑀓𑀲𑁆𑀲 𑀧𑀜𑁆𑀜𑀸𑀧𑀦𑀁. 𑀮𑁄𑀓𑀲𑁆𑀲 𑀅𑀕𑁆𑀕𑀦𑁆𑀢𑀺 𑀮𑁄𑀓𑀼𑀧𑁆𑀧𑀢𑁆𑀢𑀺𑀲𑀫𑀬𑁂 ‘‘𑀇𑀤𑀁 𑀦𑀸𑀫 𑀮𑁄𑀓𑀲𑁆𑀲 𑀅𑀕𑁆𑀕’’𑀦𑁆𑀢𑀺 𑀏𑀯𑀁 𑀚𑀸𑀦𑀺𑀢𑀩𑁆𑀩𑀁 𑀩𑀼𑀚𑁆𑀛𑀺𑀢𑀩𑁆𑀩𑀁. 𑀅𑀕𑁆𑀕𑀫𑀭𑀺𑀬𑀸𑀤𑀦𑁆𑀢𑀺 𑀆𑀤𑀺𑀫𑀭𑀺𑀬𑀸𑀤𑀁.

𑁬. 𑀏𑀢𑁆𑀢𑀓𑀁 𑀯𑀺𑀧𑁆𑀧𑀮𑀧𑀺𑀢𑁆𑀯𑀸𑀢𑀺 ‘‘𑀦 𑀤𑀸𑀦𑀸𑀳𑀁 𑀪𑀦𑁆𑀢𑁂 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀭𑀺𑀲𑁆𑀲𑀸𑀫𑀻’’𑀢𑀺, ‘‘𑀦 𑀳𑀺 𑀧𑀦 𑀫𑁂 𑀪𑀦𑁆𑀢𑁂 𑀪𑀕𑀯𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀢𑀻’’𑀢𑀺, ‘‘𑀦 𑀳𑀺 𑀧𑀦 𑀫𑁂 𑀪𑀦𑁆𑀢𑁂 𑀪𑀕𑀯𑀸 𑀅𑀕𑁆𑀕𑀜𑁆𑀜𑀁 𑀧𑀜𑁆𑀜𑀧𑁂𑀢𑀻’’𑀢𑀺 𑀘 𑀏𑀢𑁆𑀢𑀓𑀁 𑀯𑀺𑀧𑁆𑀧𑀮𑀧𑀺𑀢𑁆𑀯𑀸. 𑀇𑀤𑀁 𑀓𑀺𑀭 𑀲𑁄 𑀪𑀕𑀯𑀸 𑀲𑀢𑁆𑀣𑀼𑀓𑀺𑀘𑁆𑀘𑀁 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁, 𑀅𑀕𑁆𑀕𑀜𑁆𑀜𑀧𑀜𑁆𑀜𑀸𑀧𑀦𑀜𑁆𑀘 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀧𑀓𑀸𑀲𑁂𑀦𑁆𑀢𑁄 𑀓𑀣𑁂𑀲𑀺. 𑀢𑁂𑀦𑀸𑀳 ‘‘𑀲𑀼𑀦𑀓𑁆𑀔𑀢𑁆𑀢𑁄 𑀓𑀺𑀭𑀸’’𑀢𑀺𑀆𑀤𑀺. 𑀉𑀢𑁆𑀢𑀭𑀯𑀘𑀦𑀯𑀲𑁂𑀦 𑀧𑀢𑀺𑀝𑁆𑀞𑀸𑀪𑀸𑀯𑀢𑁄 𑀅𑀧𑁆𑀧𑀢𑀺𑀝𑁆𑀞𑁄. 𑀢𑀢𑁄 𑀏𑀯 𑀦𑀺𑀭𑀯𑁄 𑀦𑀺𑀲𑁆𑀲𑀤𑁆𑀤𑁄.

𑀆𑀤𑀻𑀦𑀯𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑁆𑀲 𑀆𑀤𑀻𑀦𑀯𑀲𑁆𑀲 𑀤𑀲𑁆𑀲𑀦𑀢𑁆𑀣𑀁. 𑀢𑁂𑀦𑀸𑀳 ‘‘𑀲𑀬𑀫𑁂𑀯 𑀕𑀭𑀳𑀁 𑀧𑀸𑀧𑀼𑀡𑀺𑀲𑁆𑀲𑀲𑀻’’𑀢𑀺. 𑀲𑀫𑁆𑀧𑀭𑀸𑀬𑀺𑀓𑀸 𑀧𑀦 𑀆𑀤𑀻𑀦𑀯𑀸 𑀅𑀦𑁂𑀓𑀯𑀺𑀥𑀸, 𑀢𑁂 𑀤𑀲𑁆𑀲𑁂𑀦𑁆𑀢𑁄 𑀲𑀼𑀦𑀓𑁆𑀔𑀢𑁆𑀢𑁄 𑀦 𑀲𑀤𑁆𑀤𑀳𑁂𑀬𑁆𑀬𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑁆𑀲𑁂𑀯 𑀕𑀳𑀡𑀁. 𑀅𑀦𑁂𑀓𑀓𑀸𑀭𑀡𑁂𑀦𑀸𑀢𑀺 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳’’𑀦𑁆𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁧𑁫𑁭, 𑁨𑁫𑁫) 𑀅𑀦𑁂𑀓𑀯𑀺𑀥𑁂𑀦 𑀯𑀡𑁆𑀡𑀓𑀸𑀭𑀡𑁂𑀦. 𑀏𑀯𑀁 𑀫𑁂 𑀅𑀯𑀡𑁆𑀡𑁄 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀅𑀚𑁆𑀛𑀸𑀲𑀬𑁂𑀦 𑀅𑀢𑁆𑀢𑀦𑁄 𑀩𑀸𑀮𑀢𑀸𑀬 𑀯𑀡𑁆𑀡𑀸𑀭𑀳𑀸𑀦𑀁 𑀅𑀯𑀡𑁆𑀡𑀁 𑀓𑀣𑁂𑀢𑁆𑀯𑀸. 𑀏𑀯𑀁 𑀪𑀕𑀯𑀸 𑀫𑀓𑁆𑀔𑀺𑀪𑀸𑀯𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀢𑀲𑁆𑀲 𑀓𑀣𑀦𑁂 𑀓𑀸𑀭𑀡𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀇𑀢𑀺 𑀔𑁄 𑀢𑁂’’𑀢𑀺𑀆𑀤𑀺𑀫𑀸𑀳𑀸𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀳𑀺 𑀲𑀼𑀦𑀓𑁆𑀔𑀢𑁆𑀢𑀲𑁆𑀲 𑀅𑀧𑁆𑀧𑀓𑁄𑀧𑀺 𑀯𑀘𑀦𑁄𑀓𑀸𑀲𑁄 𑀦 𑀪𑀯𑀺𑀲𑁆𑀲𑀢𑀻𑀢𑀺. 𑀅𑀧𑀓𑁆𑀓𑀫𑀻𑀢𑀺 𑀅𑀢𑁆𑀢𑀦𑀸 𑀬𑀣𑀸𑀞𑀺𑀢𑀸 𑀯𑀼𑀝𑁆𑀞𑀸𑀬 𑀅𑀧𑀲𑀓𑁆𑀓𑀺. 𑀅𑀧𑀓𑁆𑀓𑀦𑁆𑀢𑁄 𑀲𑀸𑀲𑀦𑀢𑁄 𑀪𑀝𑁆𑀞𑁄. 𑀢𑁂𑀦𑀸𑀳 ‘‘𑀘𑀼𑀢𑁄’’𑀢𑀺. 𑀏𑀯𑀫𑁂𑀯𑀸𑀢𑀺 𑀅𑀧𑀓𑁆𑀓𑀫𑀦𑁆𑀢𑁄 𑀘 𑀦 𑀬𑀣𑀸 𑀢𑀣𑀸 𑀅𑀧𑀓𑁆𑀓𑀫𑀺, 𑀬𑀣𑀸 𑀧𑀦 𑀓𑀸𑀬𑀲𑁆𑀲 𑀪𑁂𑀤𑀸 𑀅𑀧𑀸𑀬𑁂 𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀏𑀯𑀫𑁂𑀯 𑀅𑀧𑀓𑁆𑀓𑀫𑀺.

𑀓𑁄𑀭𑀔𑀢𑁆𑀢𑀺𑀬𑀯𑀢𑁆𑀣𑀼𑀯𑀡𑁆𑀡𑀦𑀸

𑁭. 𑀤𑁆𑀯𑀻𑀳𑀺 𑀧𑀤𑁂𑀳𑀻𑀢𑀺 𑀤𑁆𑀯𑀻𑀳𑀺 𑀯𑀸𑀓𑁆𑀬𑁂𑀳𑀺 𑀆𑀭𑀤𑁆𑀥𑀁 𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀢𑀤𑀼𑀪𑀬𑀢𑁆𑀣𑀦𑀺𑀤𑁆𑀤𑁂𑀲𑀯𑀲𑁂𑀦 𑀉𑀧𑀭𑀺𑀤𑁂𑀲𑀦𑀸𑀬 𑀧𑀯𑀢𑁆𑀢𑀢𑁆𑀢𑀸. 𑀅𑀦𑀼𑀲𑀦𑁆𑀥𑀺𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀬𑀣𑀸𑀦𑀼𑀲𑀦𑁆𑀥𑀺𑀲𑀗𑁆𑀔𑀸𑀢𑀅𑀦𑀼𑀲𑀦𑁆𑀥𑀺𑀤𑀲𑁆𑀲𑀦𑀯𑀲𑁂𑀦.

𑀏𑀓𑀁 𑀲𑀫𑀬𑀦𑁆𑀢𑀺 𑀘 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀏𑀓𑀲𑁆𑀫𑀺𑀁 𑀲𑀫𑀬𑁂’’𑀢𑀺 𑀘. 𑀣𑀽𑀮𑀽 𑀦𑀸𑀫 𑀚𑀦𑀧𑀤𑁄𑀢𑀺 𑀚𑀦𑀧𑀤𑀻𑀦𑀁 𑀭𑀸𑀚𑀓𑀼𑀫𑀸𑀭𑀸𑀦𑀁 𑀯𑀲𑁂𑀦 𑀢𑀣𑀸𑀮𑀤𑁆𑀥𑀦𑀸𑀫𑁄. 𑀓𑀼𑀓𑁆𑀓𑀼𑀭𑀯𑀢𑀁 𑀲𑀫𑀸𑀤𑀸𑀦𑀯𑀲𑁂𑀦 𑀏𑀢𑀲𑁆𑀫𑀺𑀁 𑀅𑀢𑁆𑀣𑀻𑀢𑀺 𑀓𑀼𑀓𑁆𑀓𑀼𑀭𑀯𑀢𑀺𑀓𑁄𑀢𑀺 𑀆𑀳 ‘‘𑀲𑀫𑀸𑀤𑀺𑀦𑁆𑀦𑀓𑀼𑀓𑁆𑀓𑀼𑀭𑀯𑀢𑁄’’𑀢𑀺. 𑀅𑀜𑁆𑀜𑀫𑁆𑀧𑀻𑀢𑀺 ‘‘𑀘𑀢𑀼𑀓𑁆𑀓𑁄𑀡𑁆𑀟𑀺𑀓𑀲𑁆𑀲𑁂𑀯 𑀯𑀺𑀘𑀭𑀡𑀁, 𑀢𑀣𑀸 𑀓𑀢𑁆𑀯𑀸𑀯 𑀔𑀸𑀤𑀦𑀁, 𑀪𑀼𑀜𑁆𑀚𑀦𑀁, 𑀯𑀸𑀫𑀧𑀸𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 𑀫𑀼𑀢𑁆𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀦’’𑀦𑁆𑀢𑀺 𑀏𑀯𑀫𑀸𑀤𑀺𑀓𑀁 𑀅𑀜𑁆𑀜𑀫𑁆𑀧𑀺 𑀲𑀼𑀦𑀔𑁂𑀳𑀺 𑀓𑀸𑀢𑀩𑁆𑀩𑀓𑀺𑀭𑀺𑀬𑀁. 𑀘𑀢𑀽𑀳𑀺 𑀲𑀭𑀻𑀭𑀸𑀯𑀬𑀯𑁂𑀳𑀺 𑀓𑀼𑀡𑁆𑀟𑀦𑀁 𑀕𑀫𑀦𑀁 𑀘𑀢𑀼𑀓𑁆𑀓𑁄𑀡𑁆𑀟𑁄, 𑀲𑁄 𑀏𑀢𑀲𑁆𑀫𑀺𑀁 𑀅𑀢𑁆𑀣𑀻𑀢𑀺 𑀘𑀢𑀼𑀓𑁆𑀓𑁄𑀡𑁆𑀟𑀺𑀓𑁄. 𑀲𑁄 𑀧𑀦 𑀬𑀲𑁆𑀫𑀸 𑀘𑀢𑀽𑀳𑀺 𑀲𑀭𑀻𑀭𑀸𑀯𑀬𑀯𑁂𑀳𑀺 𑀲𑀗𑁆𑀖𑀝𑁆𑀝𑀺𑀢𑀕𑀫𑀦𑁄 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀘𑀢𑀼𑀲𑀗𑁆𑀖𑀝𑁆𑀝𑀺𑀢𑁄’’𑀢𑀺. 𑀢𑁂𑀦𑁂𑀯𑀸𑀳 ‘‘𑀤𑁆𑀯𑁂 𑀚𑀡𑁆𑀡𑀽𑀦𑀻’’𑀢𑀺𑀆𑀤𑀺. 𑀪𑀓𑁆𑀔𑀲𑀦𑁆𑀢𑀺 𑀯𑀸 𑀪𑀓𑁆𑀔𑀺𑀢𑀩𑁆𑀩𑀁, 𑀅𑀲𑀺𑀢𑀩𑁆𑀩𑀜𑁆𑀘. 𑀢𑁂𑀦𑁂𑀯𑀸𑀳 ‘‘𑀬𑀁 𑀓𑀺𑀜𑁆𑀘𑀺 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬’’𑀦𑁆𑀢𑀺. 𑀓𑀸𑀫𑀁 𑀔𑀸𑀤𑀦𑀜𑁆𑀘 𑀦𑀸𑀫 𑀫𑀼𑀔𑁂𑀦 𑀓𑀸𑀢𑀩𑁆𑀩𑀁, 𑀳𑀢𑁆𑀣𑁂𑀦 𑀧𑀦 𑀢𑀢𑁆𑀣 𑀉𑀧𑀦𑀸𑀫𑀦𑀁 𑀦𑀺𑀯𑀸𑀭𑁂𑀢𑀼𑀁 𑀅𑀯𑀥𑀸𑀭𑀡𑀁 𑀓𑀢𑀦𑁆𑀢𑀺 𑀆𑀳 ‘‘𑀳𑀢𑁆𑀣𑁂𑀦 𑀅𑀧𑀭𑀸𑀫𑀲𑀺𑀢𑁆𑀯𑀸’’𑀢𑀺, 𑀅𑀕𑁆𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀼𑀦𑁆𑀤𑀭𑀭𑀽𑀧𑁄𑀢𑀺 𑀲𑀼𑀦𑁆𑀤𑀭𑀪𑀸𑀯𑁄. 𑀯𑀢𑀸𑀢𑀺 𑀧𑀢𑁆𑀣𑀦𑀢𑁆𑀣𑁂 𑀦𑀺𑀧𑀸𑀢𑁄 ‘‘𑀅𑀳𑁄 𑀯𑀢𑀸𑀳𑀁 𑀮𑀸𑀪𑀻 𑀅𑀲𑁆𑀲’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. ‘‘𑀲𑀫𑀡𑁂𑀦 𑀦𑀸𑀫 𑀏𑀯𑀭𑀽𑀧𑁂𑀦 𑀪𑀯𑀺𑀢𑀩𑁆𑀩𑀁 𑀅𑀳𑁄 𑀯𑀢𑀸𑀳𑀁 𑀏𑀤𑀺𑀲𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀏𑀯𑀁 𑀢𑀲𑁆𑀲 𑀧𑀢𑁆𑀣𑀦𑀸 𑀅𑀳𑁄𑀲𑀺. 𑀢𑁂𑀦𑀸𑀳 ‘‘𑀏𑀯𑀁 𑀓𑀺𑀭𑀸’’𑀢𑀺𑀆𑀤𑀺.

𑀕𑀭𑀳𑀢𑁆𑀣𑁂 𑀅𑀧𑀺-𑀓𑀸𑀭𑁄 ‘‘𑀅𑀧𑀺 𑀲𑀺𑀜𑁆𑀘𑁂 𑀧𑀮𑀡𑁆𑀟𑀓’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀅𑀭𑀳𑀦𑁆𑀢𑁂 𑀘 𑀩𑀼𑀤𑁆𑀥𑁂, 𑀩𑀼𑀤𑁆𑀥𑀲𑀸𑀯𑀓𑁂 ‘‘𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸 𑀦 𑀳𑁄𑀦𑁆𑀢𑀻’’𑀢𑀺 𑀏𑀯𑀁 𑀢𑀲𑁆𑀲 𑀤𑀺𑀝𑁆𑀞𑀺 𑀉𑀧𑁆𑀧𑀦𑁆𑀦𑀸. 𑀬𑀣𑀸𑀳 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑁂 ‘‘𑀦𑀢𑁆𑀣𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀸’’𑀢𑀺 (𑀫. 𑀦𑀺. 𑁧.𑁧𑁪𑁬). 𑀲𑀢𑁆𑀢𑀫𑀁 𑀤𑀺𑀯𑀲𑀦𑁆𑀢𑀺 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁. 𑀅𑀮𑀲𑀓𑁂𑀦𑀸𑀢𑀺 𑀅𑀚𑀻𑀭𑀡𑁂𑀦 𑀆𑀫𑀭𑁄𑀕𑁂𑀦.

𑀅𑀝𑁆𑀞𑀺𑀢𑀘𑀫𑀢𑁆𑀢𑀢𑀸𑀬 𑀧𑀼𑀭𑀸𑀡𑀧𑀡𑁆𑀡𑀲𑀤𑀺𑀲𑁄.𑀩𑀻𑀭𑀡𑀢𑁆𑀣𑀫𑁆𑀩𑀓𑀦𑁆𑀢𑀺 𑀩𑀻𑀭𑀡𑀕𑀘𑁆𑀙𑀸.

𑀫𑀢𑁆𑀢𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑀢𑁆𑀢𑀁, 𑀪𑁄𑀚𑀦𑀫𑀢𑁆𑀢𑀯𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀫𑀸𑀡𑀬𑀼𑀢𑁆𑀢’’𑀦𑁆𑀢𑀺. 𑀫𑀦𑁆𑀢𑀸 𑀫𑀦𑁆𑀢𑀸𑀢𑀺 𑀫𑀦𑁆𑀢𑀸𑀬 𑀫𑀦𑁆𑀢𑀸𑀬.

𑁮. 𑀏𑀓𑀤𑁆𑀯𑀻𑀳𑀺𑀓𑀸𑀬 𑀕𑀡𑀦𑀸𑀬. 𑀦𑀺𑀭𑀸𑀳𑀸𑀭𑁄𑀯 𑀅𑀳𑁄𑀲𑀺 𑀪𑀕𑀯𑀢𑁄 𑀯𑀘𑀦𑀁 𑀅𑀜𑁆𑀜𑀣𑀸 𑀓𑀸𑀢𑀼𑀓𑀸𑀫𑁄, 𑀢𑀣𑀸𑀪𑀽𑀢𑁄𑀧𑀺 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀉𑀧𑀝𑁆𑀞𑀸𑀓𑁂𑀦 𑀉𑀧𑀦𑀻𑀢𑀁 𑀪𑀓𑁆𑀔𑀲𑀁 𑀤𑀺𑀲𑁆𑀯𑀸 ‘‘𑀥𑀻’’𑀢𑀺 𑀉𑀧𑀝𑁆𑀞𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀪𑁄𑀚𑀦𑀢𑀡𑁆𑀳𑀸𑀬 𑀆𑀓𑀟𑁆𑀠𑀺𑀬𑀫𑀸𑀦𑀳𑀤𑀬𑁄 𑀢𑀁 𑀓𑀼𑀘𑁆𑀙𑀺𑀧𑀽𑀭𑀁 𑀪𑀼𑀜𑁆𑀚𑀺𑀢𑁆𑀯𑀸 𑀪𑀕𑀯𑀢𑀸 𑀯𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀓𑀸𑀮𑀫𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀣𑀲𑁆𑀲𑀸’’𑀢𑀺𑀆𑀤𑀺. 𑀲𑀘𑁂𑀧𑀺…𑀧𑁂… 𑀘𑀺𑀦𑁆𑀢𑁂𑀬𑁆𑀬𑀸𑀢𑀺 𑀬𑀤𑀺 𑀏𑀲𑁄 𑀅𑀘𑁂𑀮𑁄 ‘‘𑀥𑀻’’𑀢𑀺 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 ‘‘𑀅𑀚𑁆𑀚𑀧𑀺 𑀅𑀳𑀁 𑀦 𑀪𑀼𑀜𑁆𑀚𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀬𑁆𑀬, 𑀢𑀣𑀸𑀘𑀺𑀦𑁆𑀢𑀦𑁂 𑀲𑀢𑀺𑀧𑀺 𑀤𑁂𑀯𑀢𑀸𑀯𑀺𑀕𑁆𑀕𑀳𑁂𑀦 𑀢𑀁 𑀤𑀺𑀯𑀲𑀁…𑀧𑁂… 𑀓𑀭𑁂𑀬𑁆𑀬. 𑀓𑀲𑁆𑀫𑀸? 𑀅𑀤𑁆𑀯𑁂𑀚𑁆𑀛𑀯𑀘𑀦𑀸 𑀳𑀺 𑀢𑀣𑀸𑀕𑀢𑀸, 𑀦 𑀢𑁂𑀲𑀁 𑀯𑀘𑀦𑀁 𑀯𑀺𑀢𑀣𑀁 𑀳𑁄𑀢𑀺.

𑀕𑀢𑀕𑀢𑀝𑁆𑀞𑀸𑀦𑀁 𑀅𑀗𑁆𑀕𑀡𑀫𑁂𑀯 𑀳𑁄𑀢𑀻𑀢𑀺 𑀢𑁂𑀳𑀺 𑀢𑀁 𑀓𑀟𑁆𑀠𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁂𑀳𑀺 𑀕𑀢𑀕𑀢𑀧𑁆𑀧𑀤𑁂𑀲𑁄 𑀉𑀢𑁆𑀢𑀭𑀓𑀲𑀸𑀫𑀦𑁆𑀢𑀸 𑀯𑀺𑀯𑀝𑀗𑁆𑀕𑀡𑀫𑁂𑀯 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺. 𑀢𑁂𑀢𑀺 𑀢𑀺𑀢𑁆𑀣𑀺𑀬𑀸. 𑀲𑀼𑀲𑀸𑀦𑀁𑀬𑁂𑀯 𑀕𑀦𑁆𑀢𑁆𑀯𑀸𑀢𑀺 ‘‘𑀩𑀻𑀭𑀡𑀢𑁆𑀣𑀫𑁆𑀩𑀓𑀁 𑀅𑀢𑀺𑀓𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺 𑀕𑀘𑁆𑀙𑀦𑁆𑀢𑀸𑀧𑀺 𑀅𑀦𑁂𑀓𑀯𑀸𑀭𑀁 𑀢𑀁 𑀅𑀦𑀼𑀲𑀁𑀬𑀸𑀬𑀺𑀢𑁆𑀯𑀸 𑀧𑀼𑀦𑀧𑀺 𑀢𑀁𑀬𑁂𑀯 𑀲𑀼𑀲𑀸𑀦𑀁 𑀉𑀧𑀕𑀦𑁆𑀢𑁆𑀯𑀸.

𑁯. 𑀇𑀤𑀦𑁆𑀢𑀺 𑀇𑀤𑀁 𑀫𑀢𑀲𑀭𑀻𑀭𑀁. ‘‘𑀢𑀫𑁂𑀯 𑀯𑀸 𑀲𑀭𑀻𑀭𑀁 𑀓𑀣𑀸𑀧𑁂𑀲𑀻𑀢𑀺 𑀢𑀁 𑀲𑀭𑀻𑀭𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀞𑀺𑀢𑀧𑁂𑀢𑁂𑀦 𑀓𑀣𑀸𑀧𑁂𑀲𑀻’’𑀢𑀺 𑀓𑁂𑀘𑀺. 𑀓𑁄𑀭𑀔𑀢𑁆𑀢𑀺𑀬𑀁 𑀯𑀸 𑀅𑀲𑀼𑀭𑀬𑁄𑀦𑀺𑀢𑁄 𑀆𑀦𑁂𑀢𑁆𑀯𑀸 𑀓𑀣𑀸𑀧𑁂𑀢𑀼 𑀅𑀜𑁆𑀜𑀁 𑀯𑀸 𑀧𑁂𑀢𑀁, 𑀓𑁄 𑀏𑀢𑁆𑀣 𑀯𑀺𑀲𑁂𑀲𑁄. ‘‘𑀅𑀘𑀺𑀦𑁆𑀢𑁂𑀬𑁆𑀬𑁄 𑀳𑀺 𑀩𑀼𑀤𑁆𑀥𑀯𑀺𑀲𑀬𑁄’’𑀢𑀺 𑀧𑀦 𑀯𑀘𑀦𑀢𑁄 𑀢𑀤𑁂𑀯 𑀲𑀭𑀻𑀭𑀁 𑀲𑀼𑀦𑀓𑁆𑀔𑀢𑁆𑀢𑁂𑀦 𑀧𑀳𑀢𑀫𑀢𑁆𑀢𑀁 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀉𑀝𑁆𑀞𑀸𑀬 𑀢𑀫𑀢𑁆𑀣𑀁 𑀜𑀸𑀧𑁂𑀲𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀼𑀭𑀺𑀫𑁄𑀬𑁂𑀯 𑀧𑀦 𑀅𑀢𑁆𑀣𑁄 𑀅𑀝𑁆𑀞𑀓𑀣𑀸𑀲𑀼 𑀯𑀺𑀦𑀺𑀘𑁆𑀙𑀺𑀢𑁄. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀢𑁄’’𑀢𑀺𑀆𑀤𑀺 (𑀤𑀻. 𑀦𑀺. 𑀅𑀝𑁆𑀞. 𑁩.𑁧𑁦).

𑁧𑁦. 𑀯𑀺𑀧𑀸𑀓𑀦𑁆𑀢𑀺 𑀨𑀮𑀁, 𑀅𑀢𑁆𑀣𑀦𑀺𑀩𑁆𑀩𑀢𑁆𑀢𑀻𑀢𑀺 𑀅𑀢𑁆𑀣𑁄.

𑀲𑀫𑀸𑀦𑁂𑀢𑀩𑁆𑀩𑀸𑀦𑀻𑀢𑀺 𑀲𑀫𑁆𑀫𑀸 𑀆𑀦𑁂𑀢𑀩𑁆𑀩𑀸𑀦𑀺, 𑀲𑀭𑀽𑀧𑀢𑁄 𑀆𑀦𑁂𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀸𑀦𑀻𑀢𑀺 𑀅𑀢𑁆𑀣𑁄. 𑀧𑀸𑀝𑀺𑀳𑀸𑀭𑀺𑀬𑀸𑀦𑀁 𑀧𑀞𑀫𑀸𑀤𑀺𑀢𑀸 𑀪𑀕𑀯𑀢𑀸 𑀯𑀼𑀢𑁆𑀢𑀸𑀦𑀼𑀧𑀼𑀩𑁆𑀩𑀺𑀬𑀸 𑀯𑁂𑀤𑀺𑀢𑀩𑁆𑀩𑀸. 𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀧𑀭𑀘𑀺𑀢𑁆𑀢𑀯𑀺𑀪𑀸𑀯𑀦𑀁, 𑀆𑀬𑀼𑀧𑀭𑀺𑀘𑁆𑀙𑁂𑀤𑀯𑀺𑀪𑀸𑀯𑀦𑀁, 𑀩𑁆𑀬𑀸𑀥𑀺𑀯𑀺𑀪𑀸𑀯𑀦𑀁, 𑀕𑀢𑀺𑀯𑀺𑀪𑀸𑀯𑀦𑀁, 𑀲𑀭𑀻𑀭𑀦𑀺𑀓𑁆𑀔𑁂𑀧𑀯𑀺𑀪𑀸𑀯𑀦𑀁, 𑀲𑀼𑀦𑀓𑁆𑀔𑀢𑁆𑀢𑁂𑀦 𑀲𑀤𑁆𑀥𑀺𑀁 𑀓𑀣𑀸𑀯𑀺𑀪𑀸𑀯𑀦𑀜𑁆𑀘𑀸𑀢𑀺 𑀙 𑀧𑀸𑀝𑀺𑀳𑀸𑀭𑀺𑀬𑀸𑀦𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀬𑀤𑀺 𑀲𑀼𑀦𑀓𑁆𑀔𑀢𑁆𑀢𑀲𑁆𑀲 𑀘𑀺𑀢𑁆𑀢𑀯𑀺𑀪𑀸𑀯𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀏𑀯𑀁 𑀲𑀢𑀺 ‘‘𑀲𑀢𑁆𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀢𑀲𑁆𑀲 𑀪𑀸𑀯𑀺𑀅𑀯𑀡𑁆𑀡𑀯𑀺𑀪𑀸𑀯𑀦𑀸𑀬 𑀲𑀤𑁆𑀥𑀺𑀁. 𑀅𑀣 𑀅𑀘𑁂𑀮𑀲𑁆𑀲 𑀫𑀭𑀡𑀘𑀺𑀢𑁆𑀢𑀯𑀺𑀪𑀸𑀯𑀦𑀁, 𑀢𑀁 ‘‘𑀲𑀢𑁆𑀢𑀫𑀁 𑀤𑀺𑀯𑀲𑀁 𑀓𑀸𑀮𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀇𑀫𑀺𑀦𑀸 𑀲𑀗𑁆𑀕𑀳𑀺𑀢𑀦𑁆𑀢𑀺 𑀯𑀺𑀲𑀼𑀁 𑀦 𑀯𑀢𑁆𑀢𑀩𑁆𑀩𑀁, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑀁.

𑀅𑀘𑁂𑀮𑀓𑀴𑀸𑀭𑀫𑀝𑁆𑀝𑀓𑀯𑀢𑁆𑀣𑀼𑀯𑀡𑁆𑀡𑀦𑀸

𑁧𑁧. 𑀦𑀺𑀓𑁆𑀔𑀦𑁆𑀢𑀤𑀦𑁆𑀢𑀫𑀝𑁆𑀝𑀓𑁄𑀢𑀺 𑀦𑀺𑀓𑁆𑀔𑀦𑁆𑀢𑀤𑀦𑁆𑀢𑁄 𑀫𑀝𑁆𑀝𑀓𑁄. 𑀲𑁄 𑀓𑀺𑀭 𑀅𑀘𑁂𑀮𑀓𑀪𑀸𑀯𑀢𑁄 𑀧𑀼𑀩𑁆𑀩𑁂 𑀫𑀝𑁆𑀝𑀓𑀺𑀢𑁄 𑀳𑀼𑀢𑁆𑀯𑀸 𑀯𑀺𑀘𑀭𑀺 𑀯𑀺𑀯𑀭𑀤𑀦𑁆𑀢𑁄 𑀘, 𑀢𑁂𑀦 𑀦𑀁 ‘‘𑀓𑁄𑀭𑀫𑀝𑁆𑀝𑀓𑁄’’𑀢𑀺 𑀲𑀜𑁆𑀚𑀸𑀦𑀦𑁆𑀢𑀺. 𑀬𑀁 𑀓𑀺𑀜𑁆𑀘𑀺 𑀢𑀲𑁆𑀲 𑀤𑁂𑀦𑁆𑀢𑁄 ‘‘𑀲𑀸𑀥𑀼𑀭𑀽𑀧𑁄 𑀅𑀬𑀁 𑀲𑀫𑀡𑁄’’𑀢𑀺 𑀲𑀫𑁆𑀪𑀸𑀯𑁂𑀦𑁆𑀢𑁄 𑀅𑀕𑁆𑀕𑀁 𑀲𑁂𑀝𑁆𑀞𑀁𑀬𑁂𑀯 𑀤𑁂𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀮𑀸𑀪𑀕𑁆𑀕𑀁 𑀧𑀢𑁆𑀢𑁄, 𑀅𑀕𑁆𑀕𑀮𑀸𑀪𑀁 𑀧𑀢𑁆𑀢𑁄’’𑀢𑀺. 𑀩𑀳𑀽 𑀅𑀘𑁂𑀮𑀓𑀸 𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀺, 𑀕𑀳𑀝𑁆𑀞𑀸 𑀘 𑀢𑀁 𑀩𑀳𑀽 𑀅𑀟𑁆𑀠𑀸 𑀯𑀺𑀪𑀯𑀲𑀫𑁆𑀧𑀦𑁆𑀦𑀸 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀬𑀺𑀭𑀼𑀧𑀸𑀲𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀲𑀕𑁆𑀕𑀁 𑀅𑀕𑁆𑀕𑀧𑀭𑀺𑀯𑀸𑀭𑀁 𑀧𑀢𑁆𑀢𑁄’’𑀢𑀺. 𑀯𑀢𑀸𑀦𑀺𑀬𑁂𑀯 𑀧𑀚𑁆𑀚𑀺𑀢𑀩𑁆𑀩𑀢𑁄 𑀧𑀤𑀸𑀦𑀺. 𑀅𑀜𑁆𑀜𑀫𑀜𑁆𑀜𑀁 𑀅𑀲𑀗𑁆𑀓𑀭𑀢𑁄 𑀯𑀢𑀓𑁄𑀝𑁆𑀞𑀸𑀲𑀸 𑀯𑀸.𑀲𑀫𑀢𑁆𑀢𑀸𑀦𑀻𑀢𑀺 𑀲𑀫𑀁 𑀅𑀢𑁆𑀢𑀦𑀺 𑀕𑀳𑀺𑀢𑀸𑀦𑀺. 𑀧𑀼𑀭𑀢𑁆𑀣𑀺𑀫𑁂𑀦𑀸𑀢𑀺 𑀏𑀦-𑀲𑀤𑁆𑀤𑀲𑀫𑁆𑀩𑀦𑁆𑀥𑁂𑀦 ‘‘𑀯𑁂𑀲𑀸𑀮𑀺’’𑀦𑁆𑀢𑀺 𑀉𑀧𑀬𑁄𑀕𑀯𑀘𑀦𑀁, 𑀅𑀯𑀺𑀤𑀽𑀭𑀢𑁆𑀣𑁂 𑀘 𑀏𑀦-𑀲𑀤𑁆𑀤𑁄 𑀧𑀜𑁆𑀘𑀫𑁆𑀬𑀦𑁆𑀢𑁄𑀢𑀺 𑀆𑀳 ‘‘𑀯𑁂𑀲𑀸𑀮𑀺𑀢𑁄 𑀅𑀯𑀺𑀤𑀽𑀭𑁂’’𑀢𑀺.

𑁧𑁨. 𑀲𑀸𑀲𑀦𑁂 𑀧𑀭𑀺𑀘𑀬𑀯𑀲𑁂𑀦 𑀢𑀺𑀮𑀓𑁆𑀔𑀡𑀸𑀳𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺.𑀦 𑀲𑀫𑁆𑀧𑀸𑀬𑀸𑀲𑀻𑀢𑀺 𑀦𑀸𑀯𑀩𑀼𑀚𑁆𑀛𑀺 𑀦 𑀲𑀫𑁆𑀧𑀸𑀤𑁂𑀲𑀺. 𑀢𑁂𑀦𑀸𑀳 ‘‘𑀲𑀫𑁆𑀫𑀸 𑀜𑀸𑀡𑀕𑀢𑀺𑀬𑀸’’𑀢𑀺𑀆𑀤𑀺. 𑀲𑀫𑁆𑀧𑀸𑀬𑀦𑀁 𑀯𑀸 𑀲𑀫𑁆𑀧𑀸𑀤𑀦𑀁. 𑀧𑀜𑁆𑀳𑀁 𑀧𑀼𑀝𑁆𑀞𑀲𑁆𑀲 𑀘 𑀲𑀫𑁆𑀧𑀸𑀤𑀦𑀁 𑀦𑀸𑀫 𑀲𑀫𑁆𑀫𑀤𑁂𑀯 𑀓𑀣𑀦𑀦𑁆𑀢𑀺 𑀢𑀤𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳. 𑀓𑁄𑀧𑀯𑀲𑁂𑀦 𑀢𑀲𑁆𑀲 𑀅𑀓𑁆𑀔𑀻𑀦𑀺 𑀓𑀫𑁆𑀧𑀦𑀪𑀸𑀯𑀁 𑀆𑀧𑀚𑁆𑀚𑀺𑀁𑀲𑀽𑀢𑀺 𑀆𑀳 ‘‘𑀓𑀫𑁆𑀧𑀦𑀓𑁆𑀔𑀻𑀦𑀺𑀧𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸’’𑀢𑀺. 𑀓𑁄𑀧𑀦𑁆𑀢𑀺 𑀓𑁄𑀥𑀁, 𑀲𑁄 𑀧𑀦 𑀘𑀺𑀢𑁆𑀢𑀲𑁆𑀲 𑀧𑀓𑀼𑀧𑁆𑀧𑀦𑀯𑀲𑁂𑀦 𑀧𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀓𑀼𑀧𑁆𑀧𑀦𑀸𑀓𑀸𑀭’’𑀦𑁆𑀢𑀺. 𑀤𑁄𑀲𑀦𑁆𑀢𑀺 𑀆𑀖𑀸𑀢𑀁, 𑀲𑁄 𑀧𑀦 𑀆𑀭𑀫𑁆𑀫𑀡𑁂 𑀤𑀼𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀻𑀢𑀺 𑀆𑀳 ‘‘𑀤𑀼𑀲𑁆𑀲𑀦𑀸𑀓𑀸𑀭’’𑀦𑁆𑀢𑀺. 𑀅𑀢𑀼𑀝𑁆𑀞𑀸𑀓𑀸𑀭𑀦𑁆𑀢𑀺 𑀢𑀼𑀝𑁆𑀞𑀺𑀬𑀸 𑀧𑀻𑀢𑀺𑀬𑀸 𑀧𑀝𑀺𑀧𑀓𑁆𑀔𑀪𑀽𑀢𑀧𑁆𑀧𑀯𑀢𑁆𑀢𑀺𑀆𑀓𑀸𑀭𑀁. 𑀓𑀸𑀬𑀯𑀘𑀻𑀯𑀺𑀓𑀸𑀭𑁂𑀳𑀺 𑀧𑀸𑀓𑀝𑀫𑀓𑀸𑀲𑀺. 𑀫𑀸 𑀯𑀢 𑀦𑁄𑀢𑀺 𑀏𑀢𑁆𑀣 𑀫𑀸𑀢𑀺 𑀧𑀝𑀺𑀓𑁆𑀔𑁂𑀧𑁄, 𑀦𑁄𑀢𑀺 𑀫𑀬𑁆𑀳𑀦𑁆𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀅𑀳𑁄 𑀯𑀢 𑀫𑁂 𑀦 𑀪𑀯𑁂𑀬𑁆𑀬𑀸’’𑀢𑀺. 𑀫𑀁 𑀯𑀢 𑀦𑁄𑀢𑀺 𑀏𑀢𑁆𑀣 𑀧𑀦 𑀦𑁄𑀢𑀺 𑀲𑀁𑀲𑀬𑁂𑀢𑀺 𑀆𑀳 ‘‘𑀅𑀳𑁄𑀲𑀺 𑀯𑀢 𑀦𑀼 𑀫𑀫𑀸’’𑀢𑀺.

𑁧𑁪. 𑀧𑀭𑀺𑀧𑀼𑀩𑁆𑀩𑁄 𑀤𑀳𑀺𑀢-𑀲𑀤𑁆𑀤𑁄 𑀯𑀢𑁆𑀣𑀦𑀺𑀯𑀸𑀲𑀦𑀁 𑀯𑀤𑀢𑀻𑀢𑀺 𑀆𑀳 ‘‘𑀧𑀭𑀺𑀤𑀳𑀺𑀢𑁄 𑀦𑀺𑀯𑀢𑁆𑀣𑀯𑀢𑁆𑀣𑁄’’𑀢𑀺. 𑀬𑀲𑀦𑀺𑀫𑀺𑀢𑁆𑀢𑀓𑀢𑀸𑀬 𑀮𑀸𑀪𑀲𑁆𑀲 𑀬𑀲𑀧𑀭𑀺𑀳𑀸𑀦𑀺𑀬𑀸𑀯 𑀮𑀸𑀪𑀧𑀭𑀺𑀳𑀸𑀦𑀺 𑀯𑀼𑀢𑁆𑀢𑀸 𑀳𑁄𑀢𑀻𑀢𑀺 𑀧𑀸𑀴𑀺𑀬𑀁 ‘‘𑀬𑀲𑀸 𑀦𑀺𑀳𑀻𑀦𑁄’’𑀢𑀺 𑀯𑀼𑀢𑁆𑀢𑀁.

𑀅𑀘𑁂𑀮𑀧𑀸𑀣𑀺𑀓𑀧𑀼𑀢𑁆𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁧𑁫. ‘‘𑀅𑀳𑀁 𑀲𑀩𑁆𑀩𑀁 𑀚𑀸𑀦𑀸𑀫𑀻’’𑀢𑀺 𑀏𑀯𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀯𑀤𑀢𑀺 𑀧𑀝𑀺𑀚𑀸𑀦𑀸𑀢𑀻𑀢𑀺 𑀜𑀸𑀡𑀯𑀸𑀤𑁄, 𑀢𑁂𑀦 𑀫𑀬𑀸 𑀜𑀸𑀡𑀯𑀸𑀤𑁂𑀦 𑀲𑀤𑁆𑀥𑀺𑀁.𑀅𑀢𑀺𑀓𑁆𑀓𑀫𑁆𑀫 𑀕𑀘𑁆𑀙𑀢𑁄𑀢𑀺 𑀉𑀧𑀟𑁆𑀠𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁 𑀧𑀤𑁂𑀲𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀸𑀢𑀼𑀁 𑀕𑀘𑁆𑀙𑀢𑁄. 𑀓𑀺𑀁 𑀧𑀦𑀸𑀬𑀁 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀧𑀫𑀸𑀡𑀁 𑀦 𑀚𑀸𑀦𑀸𑀢𑀻𑀢𑀺? 𑀦𑁄 𑀦 𑀚𑀸𑀦𑀸𑀢𑀺. 𑀬𑀤𑀺 𑀏𑀯𑀁, 𑀓𑀲𑁆𑀫𑀸 𑀲𑀼𑀓𑁆𑀔𑀕𑀚𑁆𑀚𑀺𑀢𑀁 𑀕𑀚𑁆𑀚𑀻𑀢𑀺? ‘‘𑀏𑀯𑀸𑀳𑀁 𑀮𑁄𑀓𑁂 𑀧𑀸𑀲𑀁𑀲𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀓𑁄𑀳𑀜𑁆𑀜𑁂 𑀓𑀢𑁆𑀯𑀸 𑀲𑀼𑀓𑁆𑀔𑀕𑀚𑁆𑀚𑀺𑀢𑀁 𑀕𑀚𑁆𑀚𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀕𑀭𑀯𑀸𑀲𑀺𑀦𑁄’’𑀢𑀺𑀆𑀤𑀺. 𑀧𑀝𑁆𑀞𑀧𑁂𑀢𑁆𑀯𑀸𑀢𑀺 𑀬𑀼𑀕𑀕𑁆𑀕𑀸𑀳𑀁 𑀆𑀭𑀪𑀺𑀢𑁆𑀯𑀸.

𑁧𑁬. 𑀳𑀻𑀦𑀚𑁆𑀛𑀸𑀲𑀬𑀢𑁆𑀢𑀸…𑀧𑁂… 𑀉𑀤𑀧𑀸𑀤𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑀸 𑀲𑀢𑁆𑀢𑀸 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑁂 𑀏𑀯 𑀲𑀢𑁆𑀢𑁂 𑀲𑁂𑀯𑀦𑁆𑀢𑀺 𑀪𑀚𑀦𑁆𑀢𑀺 𑀧𑀬𑀺𑀭𑀼𑀧𑀸𑀲𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁨.𑁯𑁮).

𑀬𑀲𑁆𑀫𑀸 𑀢𑀣𑀸𑀯𑀼𑀢𑁆𑀢𑀸 𑀯𑀸𑀘𑀸 𑀢𑀣𑀸𑀭𑀽𑀧𑀘𑀺𑀢𑁆𑀢𑀳𑁂𑀢𑀼𑀓𑀸, 𑀢𑀜𑁆𑀘 𑀘𑀺𑀢𑁆𑀢𑀁 𑀢𑀣𑀸𑀭𑀽𑀧𑀤𑀺𑀝𑁆𑀞𑀺𑀘𑀺𑀢𑁆𑀢𑀳𑁂𑀢𑀼𑀓𑀁, 𑀢𑀲𑁆𑀫𑀸 ‘‘𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬𑀸’’𑀢𑀺 𑀯𑀢𑁆𑀯𑀸 𑀬𑀣𑀸 𑀢𑀲𑁆𑀲𑀸 𑀅𑀧𑁆𑀧𑀳𑀸𑀦𑀁 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬𑀸’’𑀢𑀺 𑀆𑀳, 𑀢𑀲𑁆𑀲 𑀘 𑀬𑀣𑀸 𑀅𑀧𑁆𑀧𑀳𑀸𑀦𑀁 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸’’𑀢𑀺 𑀅𑀯𑁄𑀘. 𑀬𑀲𑁆𑀫𑀸 𑀯𑀸 𑀢𑀣𑀸𑀭𑀽𑀧𑀸 𑀯𑀸𑀘𑀸 𑀫𑀳𑀸𑀲𑀸𑀯𑀚𑁆𑀚𑀸, 𑀘𑀺𑀢𑁆𑀢𑀁 𑀢𑀢𑁄 𑀫𑀳𑀸𑀲𑀸𑀯𑀚𑁆𑀚𑀢𑀭𑀁 𑀢𑀁𑀲𑀫𑀼𑀝𑁆𑀞𑀸𑀧𑀓𑀪𑀸𑀯𑀢𑁄, 𑀤𑀺𑀝𑁆𑀞𑀺 𑀧𑀦 𑀢𑀢𑁄 𑀫𑀳𑀸𑀲𑀸𑀯𑀚𑁆𑀚𑀢𑀫𑀸 𑀢𑀤𑀼𑀪𑀬𑀲𑁆𑀲 𑀫𑀽𑀮𑀪𑀸𑀯𑀢𑁄, 𑀢𑀲𑁆𑀫𑀸 𑀢𑁂𑀲𑀁 𑀫𑀳𑀸𑀲𑀸𑀯𑀚𑁆𑀚𑀢𑀸𑀬 𑀇𑀫𑀁 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑁆𑀯𑀸 𑀅𑀬𑀁 𑀅𑀦𑀼𑀓𑁆𑀓𑀫𑁄 𑀞𑀧𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀲𑀁 𑀧𑀦 𑀬𑀣𑀸 𑀧𑀳𑀸𑀦𑀁 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀳’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀦𑀸𑀳𑀁 𑀩𑀼𑀤𑁆𑀥𑁄’’𑀢𑀺 𑀯𑀤𑀦𑁆𑀢𑁄𑀢𑀺 𑀲𑀸𑀞𑁂𑀬𑁆𑀬𑁂𑀦 𑀯𑀺𑀦𑀸 𑀉𑀚𑀼𑀓𑀫𑁂𑀯 ‘‘𑀅𑀳𑀁 𑀩𑀼𑀤𑁆𑀥𑁄 𑀦 𑀳𑁄𑀫𑀻’’𑀢𑀺 𑀯𑀤𑀦𑁆𑀢𑁄. 𑀘𑀺𑀢𑁆𑀢𑀤𑀺𑀝𑁆𑀞𑀺𑀧𑁆𑀧𑀳𑀸𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀯𑀺𑀧𑀢𑁂𑀬𑁆𑀬𑀸𑀢𑀺 𑀏𑀢𑁆𑀣 𑀯𑀺-𑀲𑀤𑁆𑀤𑁄 𑀧𑀞𑀫𑁂 𑀯𑀺𑀓𑀧𑁆𑀧𑁂 𑀉𑀧𑀲𑀕𑁆𑀕𑀫𑀢𑁆𑀢𑀁, 𑀤𑀼𑀢𑀺𑀬𑁂 𑀧𑀦 𑀯𑀺𑀲𑀭𑀡𑀢𑁆𑀣𑁄𑀢𑀺 𑀆𑀳 ‘‘𑀲𑀢𑁆𑀢𑀥𑀸 𑀯𑀸 𑀧𑀦 𑀨𑀮𑁂𑀬𑁆𑀬𑀸’’𑀢𑀺.

𑁧𑁭. 𑀏𑀓𑀁𑀲𑁂𑀦𑀸𑀢𑀺 𑀏𑀓𑀦𑁆𑀢𑁂𑀦, 𑀏𑀓𑀦𑁆𑀢𑀺𑀓𑀁 𑀧𑀦 𑀯𑀘𑀦𑀧𑀭𑀺𑀬𑀸𑀬𑀯𑀺𑀦𑀺𑀫𑀼𑀢𑁆𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑀸’’𑀢𑀺. 𑀑𑀥𑀸𑀭𑀺𑀢𑀸𑀢𑀺 𑀅𑀯𑀥𑀸𑀭𑀺𑀢𑀸 𑀦𑀺𑀬𑀫𑁂𑀢𑁆𑀯𑀸 𑀪𑀸𑀲𑀺𑀢𑀸. 𑀯𑀺𑀕𑀢𑀭𑀽𑀧𑁂𑀦𑀸𑀢𑀺 𑀅𑀧𑀕𑀢𑀲𑀪𑀸𑀯𑁂𑀦. 𑀢𑁂𑀦𑀸𑀳 ‘‘𑀯𑀺𑀕𑀘𑁆𑀙𑀺𑀢𑀲𑀪𑀸𑀯𑁂𑀦𑀸’’𑀢𑀺, 𑀇𑀤𑁆𑀥𑀸𑀦𑀼𑀪𑀸𑀯𑁂𑀦 𑀅𑀧𑀦𑀻𑀢𑀲𑀓𑀪𑀸𑀯𑁂𑀦. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀦𑁄’’𑀢𑀺𑀆𑀤𑀺.

𑁧𑁮. 𑀤𑁆𑀯𑀬𑀁 𑀕𑀘𑁆𑀙𑀢𑀻𑀢𑀺 𑀤𑁆𑀯𑀬𑀕𑀸𑀫𑀺𑀦𑀻. 𑀓𑀻𑀤𑀺𑀲𑀁 𑀤𑁆𑀯𑀬𑀦𑁆𑀢𑀺 𑀆𑀳 ‘‘𑀲𑀭𑀽𑀧𑁂𑀦𑀸’’𑀢𑀺𑀆𑀤𑀺. 𑀅𑀬𑀜𑁆𑀳𑀺 𑀲𑁄 𑀕𑀡𑁆𑀟𑀲𑁆𑀲𑀼𑀧𑀭𑀺𑀨𑁄𑀝𑁆𑀞𑀩𑁆𑀩𑀸𑀤𑁄𑀲𑀁.

𑁧𑁯. 𑀅𑀚𑀺𑀢𑀲𑁆𑀲 𑀮𑀺𑀘𑁆𑀙𑀯𑀺𑀲𑁂𑀦𑀸𑀧𑀢𑀺𑀲𑁆𑀲 𑀫𑀳𑀸𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀆𑀕𑀦𑁆𑀢𑁆𑀯𑀸 𑀅𑀘𑁂𑀮𑀲𑁆𑀲 𑀧𑀸𑀣𑀺𑀓𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀭𑁄𑀤𑀦𑀁. 𑀅𑀪𑀸𑀯𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀲𑁆𑀲 𑀅𑀪𑀸𑀯𑀸. 𑀪𑀕𑀯𑀸 𑀧𑀦 𑀲𑀦𑁆𑀦𑀺𑀧𑀢𑀺𑀢𑀧𑀭𑀺𑀲𑀸𑀬𑀁 𑀧𑀲𑀸𑀤𑀚𑀦𑀦𑀢𑁆𑀣𑀁 𑀢𑀤𑀦𑀼𑀭𑀽𑀧𑀁 𑀧𑀸𑀝𑀺𑀳𑀸𑀭𑀺𑀬𑀫𑀓𑀸𑀲𑀺𑀬𑁂𑀯. 𑀬𑀣𑀸𑀳 ‘‘𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸’’𑀢𑀺𑀆𑀤𑀺.

𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀓𑀣𑀸𑀯𑀡𑁆𑀡𑀦𑀸

𑁨𑁦. 𑀦𑀺𑀘𑀬𑀦𑀁 𑀥𑀦𑀥𑀜𑁆𑀜𑀸𑀦𑀁 𑀲𑀜𑁆𑀘𑀬𑀦𑀁 𑀦𑀺𑀘𑀬𑁄, 𑀢𑀢𑁆𑀣 𑀦𑀺𑀬𑀼𑀢𑁆𑀢𑀸𑀢𑀺 𑀦𑁂𑀘𑀬𑀺𑀓𑀸, 𑀕𑀳𑀧𑀢𑀺 𑀏𑀯 𑀦𑁂𑀘𑀬𑀺𑀓𑀸 𑀕𑀳𑀧𑀢𑀺𑀦𑁂𑀘𑀬𑀺𑀓𑀸. 𑀏𑀢𑁆𑀢𑀓𑀸𑀦𑀺 𑀚𑀗𑁆𑀖𑀲𑀳𑀲𑁆𑀲𑀸𑀦𑀻𑀢𑀺 𑀧𑀭𑀺𑀫𑀸𑀡𑀸𑀪𑀸𑀯𑀢𑁄 𑀲𑀳𑀲𑁆𑀲𑁂𑀳𑀺𑀧𑀺 𑀅𑀧𑀭𑀺𑀫𑀸𑀡𑀕𑀡𑀦𑀸. 𑀢𑁂𑀦𑁂𑀯𑀸𑀢𑀺 𑀇𑀫𑀲𑁆𑀲 𑀯𑀲𑁂𑀦 𑀲𑀦𑁆𑀦𑀺𑀧𑀢𑀺𑀢𑀸𑀬 𑀏𑀯𑀁 𑀫𑀳𑀢𑀺𑀬𑀸 𑀧𑀭𑀺𑀲𑀸𑀬 𑀩𑀦𑁆𑀥𑀦𑀫𑁄𑀓𑁆𑀔𑀁 𑀓𑀸𑀢𑀼𑀁 𑀮𑀩𑁆𑀪𑀢𑀺, 𑀏𑀢𑁂𑀦𑁂𑀯 𑀓𑀸𑀭𑀡𑁂𑀦.

𑁨𑁧. 𑀘𑀺𑀢𑁆𑀢𑀼𑀢𑁆𑀭𑀸𑀲𑀪𑀬𑀦𑁆𑀢𑀺 𑀘𑀺𑀢𑁆𑀢𑀲𑁆𑀲 𑀉𑀢𑁆𑀭𑀸𑀲𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀪𑀬𑀁, 𑀦 𑀜𑀸𑀡𑀪𑀬𑀁, 𑀦𑀸𑀧𑀺 ‘‘𑀪𑀸𑀬𑀢𑀺 𑀏𑀢𑀲𑁆𑀫𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀆𑀭𑀫𑁆𑀫𑀡𑀪𑀬𑀁. 𑀙𑀫𑁆𑀪𑀺𑀢𑀢𑁆𑀢𑀦𑁆𑀢𑀺 𑀢𑁂𑀦𑁂𑀯 𑀘𑀺𑀢𑁆𑀢𑀼𑀢𑁆𑀭𑀸𑀲𑀪𑀬𑁂𑀦 𑀲𑀓𑀮𑀲𑀭𑀻𑀭𑀲𑁆𑀲 𑀙𑀫𑁆𑀪𑀺𑀢𑀪𑀸𑀯𑁄. 𑀮𑁄𑀫𑀳𑀁𑀲𑁄𑀢𑀺 𑀢𑁂𑀦𑁂𑀯 𑀪𑀬𑁂𑀦, 𑀢𑁂𑀦 𑀘 𑀙𑀫𑁆𑀪𑀺𑀢𑀢𑁆𑀢𑁂𑀦 𑀲𑀓𑀮𑀲𑀭𑀻𑀭𑁂 𑀮𑁄𑀫𑀸𑀦𑀁 𑀳𑀝𑁆𑀞𑀪𑀸𑀯𑁄, 𑀲𑁄 𑀧𑀦 𑀢𑁂𑀲𑀁 𑀪𑀺𑀢𑁆𑀢𑀺𑀬𑀁 𑀦𑀸𑀕𑀤𑀦𑁆𑀢𑀸𑀦𑀁 𑀯𑀺𑀬 𑀉𑀤𑁆𑀥𑀁𑀫𑀼𑀔𑀢𑀸𑀢𑀺 𑀆𑀳 ‘‘𑀮𑁄𑀫𑀸𑀦𑀁 𑀉𑀤𑁆𑀥𑀕𑁆𑀕𑀪𑀸𑀯𑁄’’𑀢𑀺. 𑀅𑀦𑁆𑀢𑀦𑁆𑀢𑁂𑀦 𑀆𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀦𑀺𑀲𑀻𑀤𑀦𑀢𑁆𑀣𑀁 𑀦𑀺𑀕𑀽𑀴𑁆𑀳𑀝𑁆𑀞𑀸𑀦𑀁 𑀉𑀧𑀧𑀭𑀺𑀓𑁆𑀔𑀦𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑀁 𑀧𑀭𑀺𑀬𑀦𑁆𑀢𑁂𑀦 𑀅𑀦𑀼𑀲𑀁𑀬𑀸𑀬𑀺𑀢𑁆𑀯𑀸, 𑀓𑀲𑁆𑀲𑀘𑀺𑀤𑁂𑀯 𑀲𑀼𑀦𑀓𑁆𑀔𑀢𑁆𑀢𑀲𑁆𑀲 𑀯𑀸 𑀲𑀼𑀦𑀓𑁆𑀔𑀢𑁆𑀢𑀲𑀤𑀺𑀲𑀲𑁆𑀲 𑀯𑀸 𑀲𑀩𑁆𑀩𑀜𑁆𑀜𑀼𑀧𑀝𑀺𑀜𑁆𑀜𑀁 𑀅𑀧𑁆𑀧𑀳𑀸𑀬 𑀲𑀢𑁆𑀣𑀼 𑀲𑀫𑁆𑀫𑀼𑀔𑀻𑀪𑀸𑀯𑁂 𑀲𑀢𑁆𑀢𑀥𑀸 𑀢𑀲𑁆𑀲 𑀫𑀼𑀤𑁆𑀥𑀸𑀨𑀮𑀦𑀁 𑀥𑀫𑁆𑀫𑀢𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀸 𑀦𑀲𑁆𑀲𑀢𑀼 𑀩𑀸𑀮𑁄’’𑀢𑀺𑀆𑀤𑀺.

𑁨𑁨. 𑀲𑀁𑀲𑀧𑁆𑀧𑀢𑀻𑀢𑀺 𑀢𑀢𑁆𑀣𑁂𑀯 𑀧𑀸𑀲𑀸𑀡𑀨𑀮𑀓𑁂 𑀩𑀸𑀮𑀤𑀸𑀭𑀓𑁄 𑀯𑀺𑀬 𑀉𑀝𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀯𑀲𑀻𑀤𑀦𑀯𑀲𑁂𑀦 𑀇𑀢𑁄 𑀘𑀺𑀢𑁄 𑀘 𑀲𑀁𑀲𑀧𑁆𑀧𑀢𑀺. 𑀢𑁂𑀦𑀸𑀳 ‘‘𑀑𑀲𑀻𑀤𑀢𑀻’’𑀢𑀺. 𑀢𑀢𑁆𑀣𑁂𑀯 𑀲𑀜𑁆𑀘𑀭𑀢𑀻𑀢𑀺 𑀢𑀲𑁆𑀫𑀺𑀁𑀬𑁂𑀯 𑀧𑀸𑀲𑀸𑀡𑁂 𑀆𑀦𑀺𑀲𑀤𑀼𑀧𑀝𑁆𑀞𑀺𑀦𑁄 𑀲𑀜𑁆𑀘𑀮𑀦𑀁 𑀦𑀺𑀲𑀚𑁆𑀚𑀯𑀲𑁂𑀦𑁂𑀯 𑀲𑀜𑁆𑀘𑀭𑀢𑀺, 𑀦 𑀉𑀝𑁆𑀞𑀸𑀬 𑀧𑀤𑀲𑀸.

𑁨𑁩. 𑀯𑀺𑀦𑀝𑁆𑀞𑀭𑀽𑀧𑁄𑀢𑀺 𑀲𑀫𑁆𑀪𑀸𑀯𑀦𑀸𑀬 𑀯𑀺𑀦𑀸𑀲𑁂𑀦, 𑀮𑀸𑀪𑀲𑁆𑀲 𑀯𑀺𑀦𑀸𑀲𑁂𑀦 𑀘 𑀯𑀺𑀦𑀝𑁆𑀞𑀲𑀪𑀸𑀯𑁄.

𑀧𑀞𑀫𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁫. 𑀕𑁄𑀬𑀼𑀢𑁆𑀢𑁂𑀳𑀻𑀢𑀺 𑀩𑀮𑀯𑀦𑁆𑀢𑀩𑀮𑀻𑀩𑀤𑁆𑀤𑀬𑁄𑀚𑀺𑀢𑁂𑀳𑀺.

𑁨𑁬. 𑀢𑀲𑁆𑀲𑀸𑀢𑀺 𑀚𑀸𑀮𑀺𑀬𑀲𑁆𑀲. 𑀅𑀬𑀜𑁆𑀳𑀺 𑀫𑀡𑁆𑀟𑀺𑀲𑁂𑀦 𑀧𑀭𑀺𑀩𑁆𑀩𑀸𑀚𑀓𑁂𑀦 𑀲𑀤𑁆𑀥𑀺𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀺, 𑀢𑀢𑁄 𑀧𑀼𑀭𑁂𑀢𑀭𑀁 𑀪𑀕𑀯𑀢𑁄 𑀕𑀼𑀡𑀸𑀦𑀁 𑀅𑀚𑀸𑀦𑀦𑀓𑀸𑀮𑁂 𑀅𑀬𑀁 𑀧𑀯𑀢𑁆𑀢𑀺. 𑀢𑁂𑀦𑁂𑀯𑀸𑀳 ‘‘𑀢𑀺𑀝𑁆𑀞𑀢𑀼 𑀢𑀸𑀯 𑀧𑀸𑀝𑀺𑀳𑀸𑀭𑀺𑀬𑀁…𑀧𑁂… 𑀧𑀭𑀸𑀚𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺.

𑁨𑁭. 𑀢𑀺𑀡𑀲𑀻𑀳𑁄𑀢𑀺 𑀢𑀺𑀡𑀲𑀤𑀺𑀲𑀳𑀭𑀺𑀢𑀯𑀡𑁆𑀡𑁄 𑀲𑀻𑀳𑁄. 𑀓𑀸𑀴𑀲𑀻𑀳𑁄𑀢𑀺 𑀓𑀸𑀴𑀯𑀡𑁆𑀡𑁄 𑀲𑀻𑀳𑁄. 𑀧𑀡𑁆𑀟𑀼𑀲𑀻𑀳𑁄𑀢𑀺 𑀧𑀡𑁆𑀟𑀼𑀯𑀡𑁆𑀡𑁄 𑀲𑀻𑀳𑁄. 𑀓𑁂𑀲𑀭𑀲𑀻𑀳𑁄𑀢𑀺 𑀓𑁂𑀲𑀭𑀯𑀦𑁆𑀢𑁄 𑀲𑁂𑀢𑀯𑀡𑁆𑀡𑁄, 𑀮𑁄𑀳𑀺𑀢𑀯𑀡𑁆𑀡𑁄 𑀯𑀸 𑀲𑀻𑀳𑁄. 𑀫𑀺𑀕𑀭𑀜𑁆𑀜𑁄𑀢𑀺 𑀏𑀢𑁆𑀣 𑀫𑀺𑀕-𑀲𑀤𑁆𑀤𑁄 𑀓𑀺𑀜𑁆𑀘𑀸𑀧𑀺 𑀧𑀲𑀤𑀓𑀼𑀭𑀼𑀗𑁆𑀕𑀸𑀤𑀻𑀲𑀼 𑀓𑁂𑀲𑀼𑀘𑀺𑀤𑁂𑀯 𑀘𑀢𑀼𑀧𑁆𑀧𑀤𑁂𑀲𑀼 𑀦𑀺𑀭𑀼𑀴𑁆𑀳𑁄, 𑀇𑀥 𑀧𑀦 𑀲𑀩𑁆𑀩𑀲𑀸𑀥𑀸𑀭𑀡𑀯𑀲𑁂𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀺𑀕𑀭𑀜𑁆𑀜𑁄𑀢𑀺 𑀲𑀩𑁆𑀩𑀘𑀢𑀼𑀧𑁆𑀧𑀤𑀸𑀦𑀁 𑀭𑀜𑁆𑀜𑁄’’𑀢𑀺 𑀯𑀼𑀢𑁆𑀢𑀁. 𑀆𑀕𑀦𑁆𑀢𑁆𑀯𑀸 𑀲𑁂𑀢𑀺 𑀏𑀢𑁆𑀣𑀸𑀢𑀺 𑀆𑀲𑀬𑁄, 𑀦𑀺𑀯𑀸𑀲𑀦𑀝𑁆𑀞𑀸𑀦𑀁. 𑀲𑀻𑀳𑀦𑀸𑀤𑀦𑁆𑀢𑀺 𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀦𑀢𑁄, 𑀧𑀝𑀺𑀧𑀓𑁆𑀔𑀲𑁆𑀲 𑀘 𑀳𑀦𑀦𑀢𑁄 ‘‘𑀲𑀻𑀳𑁄’’𑀢𑀺 𑀮𑀤𑁆𑀥𑀦𑀸𑀫𑀲𑁆𑀲 𑀫𑀺𑀕𑀸𑀥𑀺𑀧𑀲𑁆𑀲 𑀖𑁄𑀲𑀁, 𑀲𑁄 𑀧𑀦 𑀢𑁂𑀦 𑀬𑀲𑁆𑀫𑀸 𑀓𑀼𑀢𑁄𑀘𑀺𑀧𑀺 𑀅𑀪𑀻𑀢𑀪𑀸𑀯𑁂𑀦 𑀧𑀯𑀢𑁆𑀢𑀻𑀬𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀅𑀪𑀻𑀢𑀦𑀸𑀤’’𑀦𑁆𑀢𑀺. 𑀢𑀢𑁆𑀣 𑀢𑀢𑁆𑀣 𑀢𑀸𑀲𑀼 𑀢𑀸𑀲𑀼 𑀤𑀺𑀲𑀸𑀲𑀼 𑀕𑀦𑁆𑀢𑁆𑀯𑀸 𑀘𑀭𑀺𑀢𑀩𑁆𑀩𑀢𑀸𑀬 𑀪𑀓𑁆𑀔𑀺𑀢𑀩𑁆𑀩𑀢𑀸𑀬 𑀕𑁄𑀘𑀭𑁄 𑀖𑀸𑀲𑁄𑀢𑀺 𑀆𑀳 ‘‘𑀕𑁄𑀘𑀭𑀸𑀬𑀸𑀢𑀺 𑀆𑀳𑀸𑀭𑀢𑁆𑀣𑀸𑀬𑀸’’𑀢𑀺. 𑀯𑀭𑀁 𑀯𑀭𑀦𑁆𑀢𑀺 𑀫𑀺𑀕𑀲𑀗𑁆𑀖𑁂 𑀫𑀺𑀕𑀲𑀫𑀽𑀳𑁂 𑀫𑀼𑀤𑀼𑀫𑀁𑀲𑀢𑀸𑀬 𑀯𑀭𑀁 𑀯𑀭𑀁 𑀫𑀳𑀺𑀁𑀲𑀯𑀦𑀯𑀭𑀸𑀳𑀸𑀤𑀺𑀁 𑀯𑀥𑀺𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀢𑁂𑀦𑀸𑀳 ‘‘𑀣𑀽𑀮𑀁 𑀣𑀽𑀮’’𑀦𑁆𑀢𑀺. 𑀯𑀭𑀯𑀭𑀪𑀸𑀯𑁂𑀦 𑀳𑀺 𑀢𑀲𑁆𑀲 𑀯𑀭𑀪𑀸𑀯𑁄 𑀇𑀘𑁆𑀙𑀺𑀢𑁄. 𑀲𑀽𑀭𑀪𑀸𑀯𑀁 𑀲𑀦𑁆𑀦𑀺𑀲𑁆𑀲𑀺𑀢𑀁 𑀲𑀽𑀭𑀪𑀸𑀯𑀲𑀦𑁆𑀦𑀺𑀲𑁆𑀲𑀺𑀢𑀁, 𑀢𑁂𑀦. 𑀲𑀽𑀭𑀪𑀸𑀯𑁂𑀦𑀸𑀧𑀺 𑀳𑀺 ‘‘𑀓𑀺𑀁 𑀇𑀫𑁂 𑀧𑀸𑀡𑀓𑁂 𑀤𑀼𑀩𑁆𑀩𑀮𑁂 𑀳𑀦𑁆𑀢𑁆𑀯𑀸’’𑀢𑀺 𑀅𑀧𑁆𑀧𑀣𑀸𑀫𑁂𑀲𑀼 𑀧𑀸𑀡𑁂𑀲𑀼 𑀓𑀸𑀭𑀼𑀜𑁆𑀜𑀁 𑀉𑀧𑀢𑀺𑀝𑁆𑀞𑀢𑀺.

𑁨𑁮. 𑀯𑀺𑀖𑀸𑀲𑁄𑀢𑀺 𑀧𑀭𑀲𑁆𑀲 𑀪𑀓𑁆𑀔𑀺𑀢𑀲𑁂𑀲𑀢𑀸𑀬 𑀯𑀺𑀭𑀽𑀧𑁄 𑀖𑀸𑀲𑁄 𑀯𑀺𑀖𑀸𑀲𑁄, 𑀉𑀘𑁆𑀙𑀺𑀝𑁆𑀞𑀁. 𑀢𑁂𑀦𑀸𑀳 ‘‘𑀪𑀓𑁆𑀔𑀺𑀢𑀸𑀢𑀺𑀭𑀺𑀢𑁆𑀢𑀫𑀁𑀲’’𑀦𑁆𑀢𑀺, 𑀢𑀲𑁆𑀫𑀺𑀁 𑀯𑀺𑀖𑀸𑀲𑁂, 𑀯𑀺𑀖𑀸𑀲𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀲𑁆𑀫𑀺𑀫𑀸𑀦𑀤𑁄𑀲𑁂𑀦𑀸𑀢𑀺 𑀅𑀲𑁆𑀫𑀺𑀫𑀸𑀦𑀤𑁄𑀲𑀳𑁂𑀢𑀼, 𑀅𑀳𑀁𑀓𑀸𑀭𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑁄 𑀧𑀦𑀲𑁆𑀲 𑀅𑀲𑁆𑀫𑀺𑀫𑀸𑀦𑁄 𑀬𑀣𑀸 𑀉𑀧𑁆𑀧𑀚𑁆𑀚𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀭𑀸𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

‘‘𑀲𑁂𑀕𑀸𑀮𑀓𑀁𑀬𑁂𑀯𑀸’’𑀢𑀺𑀧𑀺 𑀧𑀸𑀞𑁄, 𑀬𑀣𑀸𑀯𑀼𑀢𑁆𑀢𑁄𑀯 𑀅𑀢𑁆𑀣𑁄. 𑀪𑁂𑀭𑀡𑁆𑀟𑀓𑀁𑀬𑁂𑀯𑀸𑀢𑀺 𑀪𑁂𑀭𑀡𑁆𑀟𑀲𑀓𑀼𑀡𑀭𑀯𑀲𑀤𑀺𑀲𑀁𑀬𑁂𑀯, 𑀪𑁂𑀭𑀡𑁆𑀟𑁄 𑀦𑀸𑀫 𑀏𑀓𑁄 𑀧𑀓𑁆𑀔𑀻 𑀤𑁆𑀯𑀺𑀫𑀼𑀔𑁄, 𑀢𑀲𑁆𑀲 𑀓𑀺𑀭 𑀲𑀤𑁆𑀤𑁄 𑀅𑀢𑀺𑀯𑀺𑀬 𑀯𑀺𑀭𑀽𑀧𑁄 𑀅𑀫𑀦𑀸𑀧𑁄. 𑀢𑁂𑀦𑀸𑀳 ‘‘𑀅𑀧𑁆𑀧𑀺𑀬𑀅𑀫𑀦𑀸𑀧𑀲𑀤𑁆𑀤𑀫𑁂𑀯𑀸’’𑀢𑀺. 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀯𑀺𑀲𑁂𑀲𑀢𑁄 𑀲𑀼𑀝𑁆𑀞𑀼 𑀕𑀢𑀸𑀢𑀺 𑀲𑀼𑀕𑀢𑀸, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸. 𑀢𑁂 𑀅𑀧𑀤𑀸𑀬𑀦𑁆𑀢𑀺 𑀲𑁄𑀥𑁂𑀦𑁆𑀢𑀺 𑀲𑀢𑁆𑀢𑀲𑀦𑁆𑀢𑀸𑀦𑀁 𑀏𑀢𑁂𑀳𑀻𑀢𑀺 𑀲𑀼𑀕𑀢𑀸𑀧𑀤𑀸𑀦𑀸𑀦𑀺, 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸. 𑀬𑀲𑁆𑀫𑀸 𑀢𑀸𑀳𑀺 𑀢𑁂 ‘‘𑀲𑀼𑀕𑀢𑀸’’𑀢𑀺 𑀮𑀓𑁆𑀔𑀻𑀬𑀦𑁆𑀢𑀺, 𑀢𑀸 𑀘 𑀢𑁂𑀲𑀁 𑀑𑀯𑀸𑀤𑀪𑀽𑀢𑀸, 𑀢𑀲𑁆𑀫𑀸 ‘‘𑀲𑀼𑀕𑀢𑀮𑀓𑁆𑀔𑀡𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀤𑀺 𑀢𑀸 𑀲𑀼𑀕𑀢𑀲𑁆𑀲 𑀮𑀓𑁆𑀔𑀡𑀪𑀽𑀢𑀸, 𑀲𑀸𑀲𑀦𑀪𑀽𑀢𑀸 𑀘, 𑀓𑀣𑀁 𑀧𑀦𑁂𑀲 𑀧𑀸𑀣𑀺𑀓𑀧𑀼𑀢𑁆𑀢𑁄 𑀢𑀢𑁆𑀣 𑀢𑀸𑀲𑀼 𑀲𑀺𑀓𑁆𑀔𑀸𑀲𑀼 𑀚𑀻𑀯𑀢𑀺, 𑀓𑁄 𑀢𑀲𑁆𑀲 𑀢𑀸𑀳𑀺 𑀲𑀫𑁆𑀩𑀦𑁆𑀥𑁄𑀢𑀺 𑀆𑀳 ‘‘𑀏𑀢𑀲𑁆𑀲 𑀳𑀻’’𑀢𑀺𑀆𑀤𑀺. 𑀲𑀫𑁆𑀩𑀼𑀤𑁆𑀥𑀸𑀦𑀁 𑀤𑁂𑀫𑀸𑀢𑀺 𑀤𑁂𑀦𑁆𑀢𑀻𑀢𑀺 𑀩𑀼𑀤𑁆𑀥𑀲𑀜𑁆𑀜𑀸𑀬 𑀤𑁂𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦 𑀏𑀲…𑀧𑁂… 𑀚𑀻𑀯𑀢𑀺 𑀦𑀸𑀫 𑀦 𑀲𑀼𑀕𑀢𑀦𑁆𑀯𑀬𑀅𑀚𑁆𑀛𑀼𑀧𑀕𑀫𑀦𑀢𑁄. ‘‘𑀢𑀣𑀸𑀕𑀢𑁂’’𑀢𑀺𑀆𑀤𑀺 𑀏𑀓𑀢𑁆𑀢𑁂 𑀧𑀼𑀣𑀼𑀯𑀘𑀦𑀦𑁆𑀢𑀺 𑀆𑀳 ‘‘𑀢𑀣𑀸𑀕𑀢’’𑀦𑁆𑀢𑀺𑀆𑀤𑀺. 𑀩𑀳𑀼𑀯𑀘𑀦𑀁 𑀏𑀯 𑀕𑀭𑀼𑀲𑁆𑀫𑀺𑀁 𑀏𑀓𑀲𑁆𑀫𑀺𑀫𑁆𑀧𑀺 𑀩𑀳𑀼𑀯𑀘𑀦𑀧𑁆𑀧𑀬𑁄𑀕𑀢𑁄 𑀏𑀓𑀯𑀘𑀦𑀁 𑀯𑀺𑀬 𑀯𑀼𑀢𑁆𑀢𑀁 𑀯𑀘𑀦𑀯𑀺𑀧𑀮𑁆𑀮𑀸𑀲𑁂𑀦.

𑁨𑁯. 𑀲𑀫𑁂𑀓𑁆𑀔𑀺𑀢𑁆𑀯𑀸𑀢𑀺 𑀲𑀫𑀁 𑀓𑀢𑁆𑀯𑀸 𑀫𑀺𑀘𑁆𑀙𑀸𑀤𑀲𑁆𑀲𑀦𑁂𑀦 𑀅𑀧𑁂𑀓𑁆𑀔𑀺𑀢𑁆𑀯𑀸, 𑀢𑀁 𑀧𑀦 𑀅𑀧𑁂𑀓𑁆𑀔𑀦𑀁 𑀢𑀣𑀸 𑀫𑀜𑁆𑀜𑀦𑀫𑁂𑀯𑀸𑀢𑀺 𑀆𑀳 ‘‘𑀫𑀜𑁆𑀜𑀺𑀢𑁆𑀯𑀸’’𑀢𑀺. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀲𑀫𑁂𑀓𑁆𑀔𑀦𑀫𑁆𑀧𑀺 𑀫𑀜𑁆𑀜𑀦𑀁 𑀏𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀫𑀜𑁆𑀜𑀻𑀢𑀺 𑀧𑀼𑀦 𑀅𑀫𑀜𑁆𑀜𑀺𑀢𑁆𑀣𑀸’’𑀢𑀺, 𑀢𑁂𑀦 𑀅𑀧𑀭𑀸𑀧𑀭𑀁 𑀢𑀲𑁆𑀲 𑀫𑀜𑁆𑀜𑀦𑀧𑁆𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀪𑁂𑀭𑀡𑁆𑀟𑀓𑀭𑀯𑀁 𑀓𑁄𑀲𑀢𑀺 𑀯𑀺𑀓𑁆𑀓𑁄𑀲𑀢𑀻𑀢𑀺 𑀓𑁄𑀢𑁆𑀣𑀼.

𑁩𑁦. 𑀢𑁂 𑀢𑁂 𑀧𑀸𑀡𑁂 𑀩𑁆𑀬𑀸𑀧𑀸𑀤𑁂𑀦𑁆𑀢𑁄 𑀖𑀲𑀢𑀻𑀢𑀺 𑀩𑁆𑀬𑀕𑁆𑀖𑁄𑀢𑀺 𑀇𑀫𑀺𑀦𑀸 𑀦𑀺𑀩𑁆𑀩𑀘𑀦𑁂𑀦 ‘‘𑀩𑁆𑀬𑀕𑁆𑀖𑁄’’𑀢𑀺 𑀫𑀺𑀕𑀭𑀸𑀚𑀲𑁆𑀲𑀧𑀺 𑀲𑀺𑀬𑀸 𑀦𑀸𑀫𑀦𑁆𑀢𑀺 𑀆𑀳 ‘‘𑀩𑁆𑀬𑀕𑁆𑀖𑁄𑀢𑀺 𑀫𑀜𑁆𑀜𑀢𑀻𑀢𑀺 𑀲𑀻𑀳𑁄𑀳𑀫𑀲𑁆𑀫𑀻𑀢𑀺 𑀫𑀜𑁆𑀜𑀢𑀻’’𑀢𑀺. 𑀬𑀤𑀺𑀧𑀺 𑀬𑀣𑀸𑀯𑀼𑀢𑁆𑀢𑀦𑀺𑀩𑁆𑀩𑀘𑀦𑀯𑀲𑁂𑀦 𑀲𑀻𑀳𑁄𑀧𑀺 ‘‘𑀩𑁆𑀬𑀕𑁆𑀖𑁄’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺, 𑀩𑁆𑀬𑀕𑁆𑀖-𑀲𑀤𑁆𑀤𑁄 𑀧𑀦 𑀫𑀺𑀕𑀭𑀸𑀚𑁂 𑀏𑀯 𑀦𑀺𑀭𑀼𑀴𑁆𑀳𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀻𑀳𑁂𑀦 𑀯𑀸’’𑀢𑀺𑀆𑀤𑀺𑀫𑀸𑀳.

𑁩𑁧. 𑀲𑀻𑀳𑁂𑀦 𑀯𑀺𑀘𑀭𑀺𑀢𑀯𑀦𑁂 𑀲𑀁𑀯𑀟𑁆𑀠𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀫𑀳𑀸𑀯𑀦𑁂 𑀲𑀼𑀜𑁆𑀜𑀯𑀦𑁂 𑀯𑀺𑀯𑀟𑁆𑀠𑁄’’𑀢𑀺.

𑁩𑁪. 𑀓𑀺𑀮𑁂𑀲𑀩𑀦𑁆𑀥𑀦𑀸𑀢𑀺 𑀢𑀡𑁆𑀳𑀸𑀩𑀦𑁆𑀥𑀦𑀢𑁄. 𑀢𑀡𑁆𑀳𑀸𑀩𑀦𑁆𑀥𑀦𑀜𑁆𑀳𑀺 𑀣𑀺𑀭𑀁 𑀤𑀴𑁆𑀳𑀩𑀦𑁆𑀥𑀦𑀁 𑀤𑀼𑀫𑁆𑀫𑁄𑀘𑀦𑀻𑀬𑀁. 𑀬𑀣𑀸𑀳 𑁋

‘‘𑀲𑀸𑀭𑀢𑁆𑀢𑀭𑀢𑁆𑀢𑀸 𑀫𑀡𑀺𑀓𑀼𑀡𑁆𑀟𑀮𑁂𑀲𑀼,

𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸;

𑀏𑀢𑀁 𑀤𑀴𑁆𑀳𑀁 𑀩𑀦𑁆𑀥𑀦𑀫𑀸𑀳𑀼 𑀥𑀻𑀭𑀸,

𑀑𑀳𑀸𑀭𑀺𑀦𑀁 𑀲𑀺𑀣𑀺𑀮𑀁 𑀤𑀼𑀧𑁆𑀧𑀫𑀼𑀜𑁆𑀘’’𑀦𑁆𑀢𑀺. (𑀥. 𑀧. 𑁩𑁪𑁬; 𑀚𑀸. 𑁧.𑁨.𑁧𑁦𑁨);

𑀓𑀺𑀮𑁂𑀲𑀩𑀦𑁆𑀥𑀦𑀸𑀢𑀺 𑀯𑀸 𑀤𑀲𑀯𑀺𑀥𑀲𑀁𑀬𑁄𑀚𑀦𑀢𑁄. 𑀫𑀳𑀸𑀯𑀺𑀤𑀼𑀕𑁆𑀕𑀁 𑀦𑀸𑀫 𑀘𑀢𑁆𑀢𑀸𑀭𑁄 𑀑𑀖𑀸 𑀫𑀳𑀦𑁆𑀢𑀁 𑀚𑀮𑀯𑀺𑀤𑀼𑀕𑁆𑀕𑀁 𑀯𑀺𑀬 𑀅𑀦𑀼𑀧𑀘𑀺𑀢𑀓𑀼𑀲𑀮𑀲𑀫𑁆𑀪𑀸𑀭𑁂𑀳𑀺 𑀤𑀼𑀕𑁆𑀕𑀫𑀝𑁆𑀞𑁂𑀦.

𑀅𑀕𑁆𑀕𑀜𑁆𑀜𑀧𑀜𑁆𑀜𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁩𑁬. 𑀇𑀫𑀲𑁆𑀲 𑀧𑀤𑀲𑁆𑀲. 𑀇𑀤𑀁 𑀦𑀸𑀫 𑀮𑁄𑀓𑀲𑁆𑀲 𑀅𑀕𑁆𑀕𑀦𑁆𑀢𑀺 𑀚𑀸𑀦𑀺𑀢𑀩𑁆𑀩𑀁, 𑀢𑀁 𑀅𑀕𑁆𑀕𑀜𑁆𑀜𑀁, 𑀲𑁄 𑀧𑀦 𑀮𑁄𑀓𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁄 𑀧𑀯𑀢𑁆𑀢𑀺 𑀧𑀯𑁂𑀡𑀻 𑀘𑀸𑀢𑀺 𑀆𑀳 ‘‘𑀮𑁄𑀓𑀼𑀧𑁆𑀧𑀢𑁆𑀢𑀺𑀘𑀭𑀺𑀬𑀯𑀁𑀲’’𑀦𑁆𑀢𑀺. 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀢𑁄 𑀉𑀢𑁆𑀢𑀭𑀺𑀢𑀭𑀁 𑀦𑀸𑀫 𑀓𑀺𑀜𑁆𑀘𑀺 𑀦𑀢𑁆𑀣𑀺 𑀧𑀚𑀸𑀦𑀺𑀢𑀩𑁆𑀩𑁂𑀲𑀼, 𑀢𑀁 𑀧𑀦 𑀓𑁄𑀝𑀺𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀸𑀯 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸 𑀧𑀚𑀸𑀦𑀸𑀫𑀻’’𑀢𑀺 𑀆𑀳. ‘‘𑀫𑀫 𑀧𑀚𑀸𑀦𑀦𑀸’’𑀢𑀺 𑀅𑀲𑁆𑀲𑀸𑀤𑁂𑀦𑁆𑀢𑁄 𑀢𑀡𑁆𑀳𑀸𑀯𑀲𑁂𑀦, ‘‘𑀅𑀳𑀁 𑀧𑀚𑀸𑀦𑀸𑀫𑀻’’𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑁄 𑀤𑀺𑀝𑁆𑀞𑀺𑀯𑀲𑁂𑀦, ‘‘𑀲𑀼𑀝𑁆𑀞𑀼 𑀧𑀚𑀸𑀦𑀸𑀫𑀺 𑀲𑀫𑁆𑀫𑀸 𑀧𑀚𑀸𑀦𑀸𑀫𑀻’’𑀢𑀺 𑀧𑀕𑁆𑀕𑀡𑁆𑀳𑀦𑁆𑀢𑁄 𑀫𑀸𑀦𑀯𑀲𑁂𑀦 𑀦 𑀧𑀭𑀸𑀫𑀲𑀸𑀫𑀻𑀢𑀺 𑀬𑁄𑀚𑀦𑀸. ‘‘𑀧𑀘𑁆𑀘𑀢𑁆𑀢𑀜𑁆𑀜𑁂𑀯𑀸’’𑀢𑀺 𑀧𑀤𑀁 ‘‘𑀦𑀺𑀩𑁆𑀩𑀼𑀢𑀺 𑀯𑀺𑀤𑀺𑀢𑀸’’𑀢𑀺 𑀧𑀤𑀤𑁆𑀯𑀬𑁂𑀦𑀸𑀧𑀺 𑀬𑁄𑀚𑁂𑀢𑀩𑁆𑀩𑀁 ‘‘𑀧𑀘𑁆𑀘𑀢𑁆𑀢𑀁𑀬𑁂𑀯 𑀉𑀧𑁆𑀧𑀸𑀤𑀺𑀢𑀸 𑀦𑀺𑀩𑁆𑀩𑀼𑀢𑀺 𑀘 𑀧𑀘𑁆𑀘𑀢𑁆𑀢𑀁𑀬𑁂𑀯 𑀯𑀺𑀤𑀺𑀢𑀸’’𑀢𑀺, 𑀲𑀬𑀫𑁆𑀪𑀼𑀜𑀸𑀡𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑀸 𑀦𑀺𑀩𑁆𑀩𑀼𑀢𑀺 𑀲𑀬𑀫𑁂𑀯 𑀯𑀺𑀤𑀺𑀢𑀸𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀧𑀘𑁆𑀘𑀢𑁆𑀢’’𑀦𑁆𑀢𑀺 𑀧𑀤𑀁 𑀯𑀺𑀯𑀺𑀥𑀯𑀺𑀪𑀢𑁆𑀢𑀺𑀓𑀁 𑀳𑀼𑀢𑁆𑀯𑀸 𑀆𑀯𑀼𑀢𑁆𑀢𑀺𑀦𑀬𑁂𑀦 𑀆𑀯𑀢𑁆𑀢𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀢𑁆𑀢𑀦𑀸𑀬𑁂𑀯 𑀅𑀢𑁆𑀢𑀦𑀻’’𑀢𑀺 𑀯𑀼𑀢𑁆𑀢𑀁. 𑀅𑀯𑀺𑀤𑀺𑀢𑀦𑀺𑀩𑁆𑀩𑀸𑀦𑀸𑀢𑀺 𑀅𑀧𑁆𑀧𑀝𑀺𑀮𑀤𑁆𑀥𑀦𑀺𑀩𑁆𑀩𑀸𑀦𑀸 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀢𑁆𑀢𑀸. 𑀧𑀚𑀸𑀦𑀦𑀫𑁆𑀧𑀺 𑀳𑀺 𑀢𑀤𑀥𑀺𑀕𑀫𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀏𑀢𑀺 𑀇𑀝𑁆𑀞𑀪𑀸𑀯𑁂𑀦 𑀧𑀯𑀢𑁆𑀢𑀢𑀻𑀢𑀺 𑀅𑀬𑁄, 𑀲𑀼𑀔𑀁. 𑀢𑀧𑁆𑀧𑀝𑀺𑀓𑁆𑀔𑁂𑀧𑁂𑀦 𑀅𑀦𑀬𑁄, 𑀤𑀼𑀓𑁆𑀔𑀁. 𑀢𑀤𑁂𑀯 𑀳𑀺𑀢𑀲𑀼𑀔𑀲𑁆𑀲 𑀩𑁆𑀬𑀲𑀦𑀢𑁄 𑀩𑁆𑀬𑀲𑀦𑀁.

𑁩𑁭. 𑀢𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀪𑀕𑀯𑀸𑀧𑀺 ‘‘𑀅𑀜𑁆𑀜𑀢𑀺𑀢𑁆𑀣𑀺𑀬𑁄 𑀢𑀢𑁆𑀣 𑀲𑀸𑀭𑀲𑀜𑁆𑀜𑀻’’𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄. 𑀆𑀥𑀺𑀧𑀘𑁆𑀘𑀪𑀸𑀯𑁂𑀦𑀸𑀢𑀺 𑀆𑀥𑀺𑀧𑀘𑁆𑀘𑀲𑀪𑀸𑀯𑁂𑀦. 𑀬𑀲𑁆𑀲 𑀆𑀘𑀭𑀺𑀬𑀯𑀸𑀤𑀲𑁆𑀲 𑀯𑀲𑁂𑀦 𑀧𑀼𑀭𑀺𑀲𑁄 ‘‘𑀆𑀘𑀭𑀺𑀬𑁄’’𑀢𑀺 𑀯𑀼𑀘𑁆𑀘𑀢𑀺, 𑀲𑁄 𑀆𑀘𑀭𑀺𑀬𑀯𑀸𑀤𑁄 𑀆𑀘𑀭𑀺𑀬𑀪𑀸𑀯𑁄𑀢𑀺 𑀆𑀳 ‘‘𑀆𑀘𑀭𑀺𑀬𑀪𑀸𑀯𑀁 𑀆𑀘𑀭𑀺𑀬𑀯𑀸𑀤’’𑀦𑁆𑀢𑀺. 𑀏𑀢𑁆𑀣𑀸𑀢𑀺 𑀆𑀘𑀭𑀺𑀬𑀯𑀸𑀤𑁂. 𑀇𑀢𑀺 𑀓𑀢𑁆𑀯𑀸𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦. 𑀲𑁄𑀢𑀺 𑀆𑀘𑀭𑀺𑀬𑀯𑀸𑀤𑁄. ‘‘𑀅𑀕𑁆𑀕𑀜𑁆𑀜𑀁’’ 𑀢𑁆𑀯𑁂𑀯 𑀯𑀼𑀢𑁆𑀢𑁄 𑀅𑀕𑁆𑀕𑀜𑁆𑀜𑀯𑀺𑀲𑀬𑀢𑁆𑀢𑀸. 𑀓𑁂𑀦 𑀯𑀺𑀳𑀺𑀢𑀦𑁆𑀢𑀺 𑀓𑁂𑀦 𑀧𑀓𑀸𑀭𑁂𑀦 𑀯𑀺𑀳𑀺𑀢𑀁. 𑀢𑁂𑀦𑀸𑀳 ‘‘𑀓𑁂𑀦 𑀯𑀺𑀳𑀺𑀢𑀁 𑀓𑀺𑀦𑁆𑀢𑀺 𑀯𑀺𑀳𑀺𑀢’’𑀦𑁆𑀢𑀺. 𑀩𑁆𑀭𑀳𑁆𑀫𑀚𑀸𑀮𑁂𑀢𑀺 𑀩𑁆𑀭𑀳𑁆𑀫𑀚𑀸𑀮𑀲𑀁𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁮). 𑀢𑀢𑁆𑀣 𑀳𑀺 𑀯𑀺𑀢𑁆𑀣𑀸𑀭𑀢𑁄 𑀯𑀼𑀢𑁆𑀢𑀯𑀺𑀥𑀺𑀁 𑀇𑀥 𑀅𑀢𑀺𑀤𑀺𑀲𑀢𑀺, 𑀧𑀸𑀴𑀺 𑀧𑀦 𑀢𑀢𑁆𑀣 𑀘𑁂𑀯 𑀇𑀥 𑀘 𑀏𑀓𑀲𑀤𑀺𑀲𑀸 𑀯𑀸𑀢𑀺.

𑁪𑁧. 𑀔𑀺𑀟𑁆𑀟𑀸 𑀧𑀤𑁄𑀲𑀺𑀓𑀸 𑀫𑀽𑀮𑀪𑀽𑀢𑀸 𑀏𑀢𑁆𑀣 𑀲𑀦𑁆𑀢𑀻𑀢𑀺 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀁, 𑀆𑀘𑀭𑀺𑀬𑀓𑀁. 𑀢𑁂𑀦𑁂𑀯𑀸𑀳 ‘‘𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀫𑀽𑀮𑀓’’𑀦𑁆𑀢𑀺. 𑀫𑀦𑁄𑀧𑀤𑁄𑀲𑀺𑀓𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑁪𑁭. 𑀬𑁂𑀦 𑀯𑀘𑀦𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀺, 𑀢𑀲𑁆𑀲 𑀅𑀯𑀺𑀚𑁆𑀚𑀫𑀸𑀦𑀢𑀸 𑀦𑀸𑀫 𑀅𑀢𑁆𑀣𑀯𑀲𑁂𑀦𑁂𑀯𑀸𑀢𑀺 𑀆𑀳 ‘‘𑀅𑀲𑀁𑀯𑀺𑀚𑁆𑀚𑀫𑀸𑀦𑀝𑁆𑀞𑁂𑀦𑀸’’𑀢𑀺. 𑀢𑀼𑀘𑁆𑀙𑀸, 𑀫𑀼𑀲𑀸𑀢𑀺 𑀘 𑀓𑀭𑀡𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀢𑀼𑀘𑁆𑀙𑁂𑀦, 𑀫𑀼𑀲𑀸𑀯𑀸𑀤𑁂𑀦𑀸’’𑀢𑀺. 𑀯𑀘𑀦𑀲𑁆𑀲 𑀅𑀦𑁆𑀢𑁄𑀲𑀸𑀭𑀁 𑀦𑀸𑀫 𑀅𑀯𑀺𑀧𑀭𑀻𑀢𑁄 𑀅𑀢𑁆𑀣𑁄𑀢𑀺 𑀢𑀤𑀪𑀸𑀯𑁂𑀦𑀸𑀳 ‘‘𑀅𑀦𑁆𑀢𑁄𑀲𑀸𑀭𑀯𑀺𑀭𑀳𑀺𑀢𑁂𑀦𑀸’’𑀢𑀺. 𑀅𑀪𑀺𑀆𑀘𑀺𑀓𑁆𑀔𑀦𑁆𑀢𑀻𑀢𑀺 𑀅𑀪𑀺𑀪𑀯𑀺𑀢𑁆𑀯𑀸 𑀖𑀝𑁆𑀝𑁂𑀦𑁆𑀢𑀸 𑀓𑀣𑁂𑀦𑁆𑀢𑀺, 𑀅𑀓𑁆𑀓𑁄𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀧𑀭𑀻𑀢𑀲𑀜𑁆𑀜𑁄𑀢𑀺 𑀅𑀬𑀸𑀣𑀸𑀯𑀲𑀜𑁆𑀜𑁄. 𑀲𑀼𑀪𑀁 𑀯𑀺𑀫𑁄𑀓𑁆𑀔𑀦𑁆𑀢𑀺 ‘‘𑀲𑀼𑀪’’𑀦𑁆𑀢𑀺 𑀯𑀼𑀢𑁆𑀢𑀯𑀺𑀫𑁄𑀓𑁆𑀔𑀁. 𑀯𑀡𑁆𑀡𑀓𑀲𑀺𑀡𑀦𑁆𑀢𑀺 𑀲𑀼𑀦𑀻𑀮𑀓𑀲𑀼𑀧𑀻𑀢𑀓𑀸𑀤𑀺𑀯𑀡𑁆𑀡𑀓𑀲𑀺𑀡𑀁. 𑀲𑀩𑁆𑀩𑀦𑁆𑀢𑀺 𑀬𑀁 𑀲𑀼𑀪𑀁, 𑀅𑀲𑀼𑀪𑀜𑁆𑀘 𑀯𑀡𑁆𑀡𑀓𑀲𑀺𑀡𑀁, 𑀢𑀜𑁆𑀘 𑀲𑀩𑁆𑀩𑀁. 𑀦 𑀅𑀲𑀼𑀪𑀦𑁆𑀢𑀺 𑀅𑀲𑀼𑀪𑀫𑁆𑀧𑀺 ‘‘𑀅𑀲𑀼𑀪’’𑀦𑁆𑀢𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀲𑀜𑁆𑀚𑀸𑀦𑀸𑀢𑀺, 𑀅𑀣 𑀔𑁄 ‘‘𑀲𑀼𑀪𑀁’’ 𑀢𑁆𑀯𑁂𑀯 𑀲𑀜𑁆𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀧𑀭𑀻𑀢𑀸 𑀅𑀬𑀸𑀣𑀸𑀯𑀕𑀸𑀳𑀺𑀢𑀸𑀬, 𑀅𑀬𑀸𑀣𑀸𑀯𑀯𑀸𑀤𑀺𑀢𑀸𑀬 𑀘.

𑁪𑁮. 𑀬𑀲𑁆𑀫𑀸 𑀲𑁄 𑀧𑀭𑀺𑀩𑁆𑀩𑀸𑀚𑀓𑁄 𑀅𑀯𑀺𑀲𑁆𑀲𑀝𑁆𑀞𑀫𑀺𑀘𑁆𑀙𑀸𑀕𑀸𑀳𑀺𑀢𑀸𑀬 𑀲𑀫𑁆𑀫𑀸 𑀅𑀧𑁆𑀧𑀝𑀺𑀧𑀚𑁆𑀚𑀺𑀢𑀼𑀓𑀸𑀫𑁄 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀁 𑀯𑀺𑀬 𑀫𑀁 𑀲𑀫𑀡𑁄 𑀕𑁄𑀢𑀫𑁄, 𑀪𑀺𑀓𑁆𑀔𑀯𑁄 𑀘 𑀲𑀜𑁆𑀚𑀸𑀦𑀦𑁆𑀢𑀽𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀼’’𑀦𑁆𑀢𑀺𑀆𑀤𑀺𑀫𑀸𑀳, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀫𑀬𑀸 𑀏𑀢𑀲𑁆𑀲…𑀧𑁂… 𑀯𑀝𑁆𑀝𑀢𑀻’’𑀢𑀺. 𑀫𑀫𑁆𑀫𑀦𑁆𑀢𑀺 𑀫𑀫𑁆𑀫𑀧𑁆𑀧𑀤𑁂𑀲𑀁 𑀧𑀻𑀴𑀸𑀚𑀦𑀦𑀝𑁆𑀞𑀸𑀦𑀁. 𑀲𑀼𑀝𑁆𑀞𑀽𑀢𑀺 𑀲𑀓𑁆𑀓𑀘𑁆𑀘𑀁. 𑀬𑀣𑀸 𑀦 𑀯𑀺𑀦𑀲𑁆𑀲𑀢𑀺, 𑀏𑀯𑀁 𑀅𑀦𑀼𑀭𑀓𑁆𑀔.

𑀯𑀸𑀲𑀦𑀸𑀬𑀸𑀢𑀺 𑀓𑀺𑀮𑁂𑀲𑀓𑁆𑀔𑀬𑀸𑀯𑀳𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀯𑀸𑀲𑀦𑀸𑀬. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀧𑀸𑀣𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.

𑁨. 𑀉𑀤𑀼𑀫𑁆𑀩𑀭𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑀦𑀺𑀕𑁆𑀭𑁄𑀥𑀧𑀭𑀺𑀩𑁆𑀩𑀸𑀚𑀓𑀯𑀢𑁆𑀣𑀼𑀯𑀡𑁆𑀡𑀦𑀸

𑁪𑁯. 𑀉𑀤𑀼𑀫𑁆𑀩𑀭𑀺𑀓𑀸𑀬𑀸𑀢𑀺 𑀲𑀫𑁆𑀩𑀦𑁆𑀥𑁂 𑀲𑀸𑀫𑀺𑀯𑀘𑀦𑀦𑁆𑀢𑀺 𑀆𑀳 ‘‘𑀉𑀤𑀼𑀫𑁆𑀩𑀭𑀺𑀓𑀸𑀬 𑀤𑁂𑀯𑀺𑀬𑀸 𑀲𑀦𑁆𑀢𑀓𑁂 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑁂’’𑀢𑀺. ‘‘𑀉𑀤𑀼𑀫𑁆𑀩𑀭𑀺𑀓𑀸𑀬’’𑀦𑁆𑀢𑀺 𑀯𑀸 𑀧𑀸𑀞𑁄, 𑀢𑀣𑀸 𑀲𑀢𑀺 𑀅𑀥𑀺𑀓𑀭𑀡𑁂 𑀏𑀢𑀁 𑀪𑀼𑀫𑁆𑀫𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑀉𑀤𑀼𑀫𑁆𑀩𑀭𑀺𑀓𑀸𑀬 𑀭𑀜𑁆𑀜𑁄 𑀤𑁂𑀯𑀺𑀬𑀸 𑀦𑀺𑀩𑁆𑀩𑀢𑁆𑀢𑀺𑀢𑁄 𑀆𑀭𑀸𑀫𑁄 𑀉𑀤𑀼𑀫𑁆𑀩𑀭𑀺𑀓𑀸, 𑀢𑀲𑁆𑀲𑀁 𑀉𑀤𑀼𑀫𑁆𑀩𑀭𑀺𑀓𑀸𑀬𑀁. 𑀢𑁂𑀦𑀸𑀳 ‘‘𑀉𑀤𑀼𑀫𑁆𑀩𑀭𑀺𑀓𑀸𑀬 𑀤𑁂𑀯𑀺𑀬𑀸 𑀲𑀦𑁆𑀢𑀓𑁂’’𑀢𑀺. 𑀢𑀸𑀬 𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑁄 𑀢𑀲𑁆𑀲𑀸 𑀲𑀦𑁆𑀢𑀓𑁄. 𑀯𑀭𑀡𑀸𑀤𑀺𑀧𑀸𑀞𑀯𑀲𑁂𑀦 𑀘𑁂𑀢𑁆𑀣 𑀦𑀺𑀩𑁆𑀩𑀢𑁆𑀢𑀢𑁆𑀣𑀩𑁄𑀥𑀓𑀲𑁆𑀲 𑀲𑀤𑁆𑀤𑀲𑁆𑀲 𑀅𑀤𑀲𑁆𑀲𑀦𑀁. 𑀲𑀦𑁆𑀥𑀸𑀦𑁄𑀢𑀺 𑀪𑀺𑀦𑁆𑀦𑀸𑀦𑀫𑁆𑀧𑀺 𑀢𑁂𑀲𑀁 𑀲𑀦𑁆𑀥𑀸𑀧𑀦𑁂𑀦 ‘‘𑀲𑀦𑁆𑀥𑀸𑀦𑁄’’𑀢𑀺 𑀏𑀯𑀁 𑀮𑀤𑁆𑀥𑀦𑀸𑀫𑁄. 𑀲𑀁𑀯𑀡𑁆𑀡𑀺𑀢𑁄𑀢𑀺 𑀧𑀲𑀁𑀲𑀺𑀢𑁄. 𑀇𑀭𑀺𑀬𑀢𑀻𑀢𑀺 𑀧𑀯𑀢𑁆𑀢𑀢𑀺. 𑀅𑀭𑀺𑀬𑁂𑀦 𑀜𑀸𑀡𑁂𑀦𑀸𑀢𑀺 𑀓𑀺𑀮𑁂𑀲𑁂𑀳𑀺 𑀆𑀭𑀓𑀢𑁆𑀢𑀸 𑀅𑀭𑀺𑀬𑁂𑀦 𑀮𑁄𑀓𑀼𑀢𑁆𑀢𑀭𑁂𑀦 𑀜𑀸𑀡𑁂𑀦. 𑀅𑀭𑀺𑀬𑀸𑀬 𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀲𑀼𑀯𑀺𑀲𑀼𑀤𑁆𑀥𑀸𑀬 𑀮𑁄𑀓𑀼𑀢𑁆𑀢𑀭𑀨𑀮𑀯𑀺𑀫𑀼𑀢𑁆𑀢𑀺𑀬𑀸.

𑀤𑀺𑀯𑀸-𑀲𑀤𑁆𑀤𑁄 𑀤𑀺𑀦-𑀲𑀤𑁆𑀤𑁄 𑀯𑀺𑀬 𑀤𑀺𑀯𑀲𑀧𑀭𑀺𑀬𑀸𑀬𑁄, 𑀢𑀲𑁆𑀲 𑀯𑀺𑀲𑁂𑀲𑀦𑀪𑀸𑀯𑁂𑀦 𑀯𑀼𑀘𑁆𑀘𑀫𑀸𑀦𑁄 𑀤𑀺𑀯𑀸-𑀲𑀤𑁆𑀤𑁄 𑀲𑀯𑀺𑀲𑁂𑀲𑀁 𑀤𑀺𑀯𑀲𑀪𑀸𑀕𑀁 𑀤𑀻𑀧𑁂𑀢𑀻𑀢𑀺 𑀆𑀳 ‘‘𑀤𑀺𑀯𑀲𑀲𑁆𑀲 𑀤𑀺𑀯𑀸’’𑀢𑀺𑀆𑀤𑀺. 𑀬𑀲𑁆𑀫𑀸 𑀲𑀫𑀸𑀧𑀦𑁆𑀦𑀲𑁆𑀲 𑀘𑀺𑀢𑁆𑀢𑀁 𑀦𑀸𑀦𑀸𑀭𑀫𑁆𑀫𑀡𑀢𑁄 𑀧𑀝𑀺𑀲𑀁𑀳𑀢𑀁 𑀳𑁄𑀢𑀺, 𑀛𑀸𑀦𑀲𑀫𑀗𑁆𑀕𑀻 𑀘 𑀧𑀯𑀺𑀯𑁂𑀓𑀽𑀧𑀕𑀫𑀦𑁂𑀦 𑀲𑀗𑁆𑀕𑀡𑀺𑀓𑀸𑀪𑀸𑀯𑀢𑁄 𑀏𑀓𑀸𑀓𑀺𑀬𑀸𑀬 𑀦𑀺𑀮𑀻𑀦𑁄 𑀯𑀺𑀬 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀢𑀢𑁄 𑀢𑀢𑁄…𑀧𑁂… 𑀕𑀢𑁄’’𑀢𑀺. 𑀫𑀦𑁄 𑀪𑀯𑀦𑁆𑀢𑀺 𑀫𑀦𑀲𑁄 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑀁 𑀯𑀟𑁆𑀠𑀺𑀁 𑀆𑀯𑀳𑀦𑁆𑀢𑀻𑀢𑀺 𑀫𑀦𑁄𑀪𑀸𑀯𑀦𑀺𑀬𑀸𑀢𑀺 𑀆𑀳 ‘‘𑀫𑀦𑀯𑀟𑁆𑀠𑀓𑀸𑀦’’𑀦𑁆𑀢𑀺𑀆𑀤𑀺. 𑀉𑀦𑁆𑀦𑀫𑀢𑀺 𑀦 𑀲𑀗𑁆𑀓𑀼𑀘𑀢𑀺, 𑀅𑀮𑀻𑀦𑀜𑁆𑀘 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁫𑁧. 𑀬𑀸𑀯𑀢𑀸𑀢𑀺 𑀬𑀸𑀯𑀦𑁆𑀢𑁄𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 ‘‘𑀬𑀢𑁆𑀢𑀓𑀸’’𑀢𑀺. 𑀢𑁂𑀲𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀺𑀯𑀘𑀦𑀁. 𑀦𑀺𑀤𑁆𑀥𑀸𑀭𑀡𑀜𑁆𑀘 𑀓𑁂𑀦𑀘𑀺 𑀯𑀺𑀲𑁂𑀲𑁂𑀦 𑀇𑀘𑁆𑀙𑀺𑀢𑀩𑁆𑀩𑀁. 𑀬𑁂𑀳𑀺 𑀘 𑀕𑀼𑀡𑀯𑀺𑀲𑁂𑀲𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀪𑀕𑀯𑀢𑁄 𑀲𑀸𑀯𑀓𑀸 𑀉𑀧𑀸𑀲𑀓𑀸 𑀭𑀸𑀚𑀕𑀳𑁂 𑀧𑀝𑀺𑀯𑀲𑀦𑁆𑀢𑀺, 𑀅𑀬𑀜𑁆𑀘 𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀇𑀫𑀁 𑀯𑀺𑀲𑁂𑀲𑀁 𑀤𑀻𑀧𑁂𑀢𑀼𑀁 ‘‘𑀢𑁂𑀲𑀁 𑀅𑀩𑁆𑀪𑀦𑁆𑀢𑀭𑁄’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀪𑀕𑀯𑀢𑁄 𑀓𑀺𑀭𑀸’’𑀢𑀺𑀆𑀤𑀺.

𑁫𑁨. 𑀢𑁂𑀲𑀦𑁆𑀢𑀺 𑀧𑀭𑀺𑀩𑁆𑀩𑀸𑀚𑀓𑀸𑀦𑀁. 𑀓𑀣𑀸𑀬𑀸𑀢𑀺 𑀢𑀺𑀭𑀘𑁆𑀙𑀸𑀦𑀓𑀣𑀸𑀬. 𑀤𑀲𑁆𑀲𑀦𑁂𑀦𑀸𑀢𑀺 𑀤𑀺𑀝𑁆𑀞𑀺𑀤𑀲𑁆𑀲𑀦𑁂𑀦. 𑀆𑀓𑀧𑁆𑀧𑁂𑀦𑀸𑀢𑀺 𑀯𑁂𑀲𑁂𑀦. 𑀓𑀼𑀢𑁆𑀢𑁂𑀦𑀸𑀢𑀺 𑀓𑀺𑀭𑀺𑀬𑀸𑀬. 𑀆𑀘𑀸𑀭𑁂𑀦𑀸𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀫𑀺𑀁 𑀆𑀘𑀭𑀺𑀢𑀩𑁆𑀩𑀆𑀘𑀸𑀭𑁂𑀦. 𑀯𑀺𑀳𑀸𑀭𑁂𑀦𑀸𑀢𑀺 𑀭𑀢𑁆𑀢𑀺𑀦𑁆𑀤𑀺𑀯𑀁 𑀯𑀺𑀳𑀭𑀺𑀢𑀩𑁆𑀩𑀯𑀺𑀳𑀭𑀡𑁂𑀦. 𑀇𑀭𑀺𑀬𑀸𑀧𑀣𑁂𑀦𑀸𑀢𑀺 𑀞𑀸𑀦𑀸𑀤𑀺𑀇𑀭𑀺𑀬𑀸𑀧𑀣𑁂𑀦. 𑀅𑀜𑁆𑀜𑀸𑀓𑀸𑀭𑀢𑀸𑀬 𑀅𑀜𑁆𑀜𑀢𑀺𑀢𑁆𑀣𑁂 𑀦𑀺𑀬𑀼𑀢𑁆𑀢𑀸𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀸. 𑀲𑀗𑁆𑀕𑀦𑁆𑀢𑁆𑀯𑀸 𑀲𑀫𑀸𑀕𑀦𑁆𑀢𑁆𑀯𑀸 𑀭𑀸𑀲𑀻 𑀳𑀼𑀢𑁆𑀯𑀸 𑀧𑀭𑁂𑀳𑀺 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂. 𑀅𑀭𑀜𑁆𑀜𑀸𑀦𑀺 𑀘 𑀢𑀸𑀦𑀺 𑀯𑀦𑀧𑀢𑁆𑀣𑀸𑀦𑀺 𑀘𑀸𑀢𑀺 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺. 𑀢𑀢𑁆𑀣 𑀬𑀁 𑀅𑀭𑀜𑁆𑀜𑀓𑀗𑁆𑀕𑀦𑀺𑀧𑁆𑀨𑀸𑀤𑀓𑀁 𑀆𑀭𑀜𑁆𑀜𑀓𑀸𑀦𑀁, 𑀢𑀁 ‘‘𑀅𑀭𑀜𑁆𑀜’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀦𑀧𑀢𑁆𑀣𑀦𑁆𑀢𑀺 𑀕𑀸𑀫𑀦𑁆𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀅𑀦𑀼𑀧𑀘𑀸𑀭𑀝𑁆𑀞𑀸𑀦𑀁, 𑀬𑀢𑁆𑀣 𑀦 𑀓𑀲𑀻𑀬𑀢𑀺 𑀦 𑀯𑀧𑁆𑀧𑀻𑀬𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀯𑀦𑀧𑀢𑁆𑀣𑀦𑁆𑀢𑀺 𑀤𑀽𑀭𑀸𑀦𑀫𑁂𑀢𑀁 𑀲𑁂𑀦𑀸𑀲𑀦𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺 ‘‘𑀯𑀦𑀧𑀢𑁆𑀣𑀦𑁆𑀢𑀺 𑀯𑀦𑀲𑀡𑁆𑀟𑀸𑀦𑀫𑁂𑀢𑀁 𑀲𑁂𑀦𑀸𑀲𑀦𑀸𑀦𑀁, 𑀯𑀦𑀧𑀢𑁆𑀣𑀦𑁆𑀢𑀺 𑀪𑀻𑀲𑀦𑀓𑀸𑀦𑀫𑁂𑀢𑀁, 𑀯𑀦𑀧𑀢𑁆𑀣𑀦𑁆𑀢𑀺 𑀲𑀮𑁄𑀫𑀳𑀁𑀲𑀸𑀦𑀫𑁂𑀢𑀁, 𑀯𑀦𑀧𑀢𑁆𑀣𑀦𑁆𑀢𑀺 𑀧𑀭𑀺𑀬𑀦𑁆𑀢𑀸𑀦𑀫𑁂𑀢𑀁 𑀯𑀦𑀧𑀢𑁆𑀣𑀦𑁆𑀢𑀺 𑀦 𑀫𑀦𑀼𑀲𑁆𑀲𑀽𑀧𑀘𑀸𑀭𑀸𑀦𑀫𑁂𑀢𑀁 𑀲𑁂𑀦𑀸𑀲𑀦𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀯𑀺𑀪. 𑁫𑁩𑁧). 𑀢𑁂𑀦 𑀯𑀼𑀢𑁆𑀢𑀁 ‘‘𑀕𑀸𑀫𑀽𑀧𑀘𑀸𑀭𑀢𑁄 𑀫𑀼𑀢𑁆𑀢𑀸𑀦𑀻’’𑀢𑀺𑀆𑀤𑀺. 𑀧𑀦𑁆𑀢𑀸𑀦𑀻𑀢𑀺 𑀧𑀭𑀺𑀬𑀦𑁆𑀢𑀸𑀦𑀺 𑀅𑀢𑀺𑀤𑀽𑀭𑀸𑀦𑀺. 𑀢𑁂𑀦𑀸𑀳 ‘‘𑀤𑀽𑀭𑀢𑀭𑀸𑀦𑀻’’𑀢𑀺𑀆𑀤𑀺. 𑀯𑀺𑀳𑀸𑀭𑀽𑀧𑀘𑀸𑀭𑁂𑀦𑀸𑀢𑀺 𑀯𑀺𑀳𑀸𑀭𑀲𑁆𑀲 𑀉𑀧𑀘𑀸𑀭𑀧𑁆𑀧𑀤𑁂𑀲𑁂𑀦. 𑀅𑀤𑁆𑀥𑀺𑀓𑀚𑀦𑀲𑁆𑀲𑀸𑀢𑀺 𑀫𑀕𑁆𑀕𑀕𑀸𑀫𑀺𑀦𑁄 𑀚𑀦𑀲𑁆𑀲. 𑀫𑀦𑁆𑀤𑀲𑀤𑁆𑀤𑀸𑀦𑀻𑀢𑀺 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀸𑀪𑀸𑀯𑀢𑁄 𑀢𑀦𑀼𑀲𑀤𑁆𑀤𑀸𑀦𑀺. 𑀫𑀦𑀼𑀲𑁆𑀲𑁂𑀳𑀺 𑀲𑀫𑀸𑀕𑀫𑁆𑀫 𑀏𑀓𑀚𑁆𑀛𑀁 𑀧𑀯𑀢𑁆𑀢𑀺𑀢𑀲𑀤𑁆𑀤𑁄 𑀦𑀺𑀕𑁆𑀖𑁄𑀲𑁄, 𑀢𑀲𑁆𑀲 𑀬𑀲𑁆𑀫𑀸 𑀅𑀢𑁆𑀣𑁄 𑀤𑀼𑀩𑁆𑀩𑀺𑀪𑀸𑀯𑀺𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀅𑀯𑀺𑀪𑀸𑀯𑀺𑀢𑀢𑁆𑀣𑁂𑀦 𑀦𑀺𑀕𑁆𑀖𑁄𑀲𑁂𑀦𑀸’’𑀢𑀺. 𑀯𑀺𑀕𑀢𑀯𑀸𑀢𑀸𑀦𑀻𑀢𑀺 𑀯𑀺𑀕𑀢𑀲𑀤𑁆𑀤𑀸𑀦𑀺. ‘‘𑀭𑀳𑀲𑁆𑀲 𑀓𑀭𑀡𑀲𑁆𑀲 𑀬𑀼𑀢𑁆𑀢𑀸𑀦𑀻’’𑀢𑀺 𑀇𑀫𑀺𑀦𑀸𑀧𑀺 𑀢𑁂𑀲𑀁 𑀞𑀸𑀦𑀸𑀦𑀁 𑀅𑀭𑀜𑁆𑀜𑀮𑀓𑁆𑀔𑀡𑀬𑀼𑀢𑁆𑀢𑀢𑀁, 𑀚𑀦𑀯𑀺𑀯𑀺𑀢𑁆𑀢𑀢𑀁, 𑀯𑀦𑀯𑀺𑀯𑀺𑀢𑁆𑀢𑀫𑁂𑀯 𑀘 𑀯𑀺𑀪𑀸𑀯𑁂𑀢𑀺, 𑀢𑀣𑀸 ‘‘𑀏𑀓𑀻𑀪𑀸𑀯𑀲𑁆𑀲 𑀅𑀦𑀼𑀭𑀽𑀧𑀸𑀦𑀻’’𑀢𑀺 𑀇𑀫𑀺𑀦𑀸.

𑁫𑁩. 𑀓𑁂𑀦𑀸𑀢𑀺 𑀳𑁂𑀢𑀼𑀫𑁆𑀳𑀺, 𑀲𑀳𑀬𑁄𑀕𑁂 𑀘 𑀓𑀭𑀡𑀯𑀘𑀦𑀦𑁆𑀢𑀺 𑀆𑀳 ‘‘𑀓𑁂𑀦 𑀓𑀸𑀭𑀡𑁂𑀦 𑀓𑁂𑀦 𑀧𑀼𑀕𑁆𑀕𑀮𑁂𑀦 𑀲𑀤𑁆𑀥𑀺’’𑀦𑁆𑀢𑀺. 𑀏𑀓𑁄𑀧𑀺 𑀳𑀺 𑀯𑀺𑀪𑀢𑁆𑀢𑀺𑀦𑀺𑀤𑁆𑀤𑁂𑀲𑁄 𑀅𑀦𑁂𑀓𑀢𑁆𑀣𑀯𑀺𑀪𑀸𑀯𑀦𑁄 𑀳𑁄𑀢𑀺, 𑀢𑀣𑀸 𑀢𑀤𑁆𑀥𑀺𑀢𑀢𑁆𑀣𑀧𑀤𑀲𑀫𑀸𑀳𑀸𑀭𑁂𑀢𑀺.

𑀲𑀁𑀲𑀦𑁆𑀤𑀦𑀦𑁆𑀢𑀺 𑀆𑀮𑀸𑀧𑀲𑀮𑁆𑀮𑀸𑀧𑀯𑀲𑁂𑀦 𑀓𑀣𑀸𑀲𑀁𑀲𑀦𑁆𑀤𑀦𑀁. 𑀜𑀸𑀡𑀩𑁆𑀬𑀢𑁆𑀢𑀪𑀸𑀯𑀦𑁆𑀢𑀺 𑀩𑁆𑀬𑀢𑁆𑀢𑀜𑀸𑀡𑀪𑀸𑀯𑀁, 𑀲𑁄 𑀧𑀦 𑀧𑀭𑀲𑁆𑀲 𑀯𑀘𑀦𑁂 𑀉𑀢𑁆𑀢𑀭𑀤𑀸𑀦𑀯𑀲𑁂𑀦, 𑀧𑀭𑁂𑀦 𑀯𑀸 𑀯𑀼𑀢𑁆𑀢𑀉𑀢𑁆𑀢𑀭𑁂 𑀧𑀘𑁆𑀘𑀼𑀢𑁆𑀢𑀭𑀤𑀸𑀦𑀯𑀲𑁂𑀦 𑀲𑀺𑀬𑀸𑀢𑀺 𑀆𑀳 ‘‘𑀉𑀢𑁆𑀢𑀭𑀧𑀘𑁆𑀘𑀼𑀢𑁆𑀢𑀭𑀦𑀬𑁂𑀦𑀸’’𑀢𑀺. 𑀬𑁄 𑀳𑀺 𑀧𑀭𑀲𑁆𑀲 𑀯𑀘𑀦𑀁 𑀢𑀺𑀧𑀼𑀓𑁆𑀔𑀮𑁂𑀦 𑀦𑀬𑁂𑀦 𑀭𑀽𑀧𑁂𑀢𑀺, 𑀢𑀣𑀸 𑀧𑀭𑀲𑁆𑀲 𑀭𑀽𑀧𑀦𑀯𑀘𑀦𑀁 𑀚𑀸𑀢𑀺𑀪𑀸𑀯𑀁 𑀆𑀧𑀸𑀤𑁂𑀢𑀺, 𑀢𑀲𑁆𑀲 𑀢𑀸𑀤𑀺𑀲𑀁 𑀯𑀘𑀦𑀲𑀪𑀸𑀯𑀁 𑀜𑀸𑀡𑀯𑁂𑀬𑁆𑀬𑀢𑁆𑀢𑀺𑀬𑀁 𑀯𑀺𑀪𑀸𑀯𑁂𑀢𑀺 𑀧𑀸𑀓𑀝𑀁 𑀓𑀭𑁄𑀢𑀻𑀢𑀺. 𑀲𑀼𑀜𑁆𑀜𑀸𑀕𑀸𑀭𑁂𑀲𑀼 𑀦𑀝𑁆𑀞𑀸𑀢𑀺 𑀲𑀼𑀜𑁆𑀜𑀸𑀕𑀸𑀭𑁂𑀲𑀼 𑀦𑀺𑀯𑀸𑀲𑁂𑀲𑀼 𑀦𑀝𑁆𑀞𑀸 𑀯𑀺𑀦𑀝𑁆𑀞𑀸 𑀅𑀪𑀸𑀯𑀁 𑀕𑀢𑀸. 𑀦𑀸𑀲𑁆𑀲 𑀧𑀜𑁆𑀜𑀸 𑀦𑀲𑁆𑀲𑁂𑀬𑁆𑀬 𑀢𑁂𑀳𑀺 𑀢𑁂𑀳𑀺 𑀓𑀢𑀧𑀼𑀘𑁆𑀙𑀦𑀧𑀝𑀺𑀧𑀼𑀘𑁆𑀙𑀦𑀦𑀺𑀫𑀺𑀢𑁆𑀢𑀁 𑀦𑀸𑀦𑀸𑀧𑀝𑀺𑀪𑀸𑀦𑀼𑀧𑁆𑀧𑀢𑁆𑀢𑀺𑀬𑀸 𑀯𑀺𑀲𑀸𑀭𑀫𑀸𑀧𑀦𑁆𑀦𑀁 𑀧𑀼𑀘𑁆𑀙𑀺𑀢𑀁 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀅𑀲𑀫𑀢𑁆𑀣𑀢𑀸𑀬. 𑀑𑀭𑁄𑀥𑁂𑀬𑁆𑀬𑀸𑀫𑀸𑀢𑀺 𑀦𑀺𑀭𑀼𑀲𑁆𑀲𑀸𑀳𑀁 𑀯𑀺𑀬 𑀓𑀭𑁄𑀦𑁆𑀢𑀸 𑀅𑀯𑀭𑁄𑀥𑁂𑀬𑁆𑀬𑀸𑀫, 𑀢𑀁 𑀧𑀭𑀲𑁆𑀲 𑀑𑀭𑁄𑀥𑀦𑀁 𑀯𑀸𑀤𑀚𑀸𑀮𑁂𑀦 𑀯𑀺𑀦𑀦𑁆𑀥𑀦𑀁 𑀯𑀺𑀬 𑀳𑁄𑀢𑀻𑀢𑀺 𑀆𑀳 ‘‘𑀯𑀺𑀦𑀦𑁆𑀥𑁂𑀬𑁆𑀬𑀸𑀫𑀸’’𑀢𑀺. 𑀢𑀤𑀢𑁆𑀣𑀁 𑀢𑁂𑀦 𑀢𑀼𑀘𑁆𑀙𑀓𑀼𑀫𑁆𑀪𑀺𑀦𑀺𑀤𑀲𑁆𑀲𑀦𑀁 𑀓𑀢𑀁, 𑀢𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀧𑀽𑀭𑀺𑀢𑀖𑀝𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀩𑀮𑀁 𑀤𑀻𑀧𑁂𑀦𑁆𑀢𑁄𑀢𑀺 𑀅𑀪𑀽𑀢𑀫𑁂𑀯 𑀅𑀢𑁆𑀢𑀦𑁄 𑀜𑀸𑀡𑀩𑀮𑀁 𑀧𑀓𑀸𑀲𑁂𑀦𑁆𑀢𑁄. 𑀅𑀲𑀫𑁆𑀪𑀺𑀦𑁆𑀦𑀦𑁆𑀢𑀺 𑀚𑀸𑀢𑀺𑀲𑀫𑁆𑀪𑁂𑀤𑀸𑀪𑀸𑀯𑁂𑀦 𑀅𑀲𑀫𑁆𑀪𑀺𑀦𑁆𑀦𑀁. 𑀅𑀜𑁆𑀜𑀚𑀸𑀢𑀺𑀲𑀫𑁆𑀪𑁂𑀤𑁂 𑀲𑀢𑀺 𑀅𑀲𑁆𑀲𑀢𑀭𑀲𑁆𑀲 𑀅𑀲𑁆𑀲𑀲𑁆𑀲 𑀚𑀸𑀢𑀪𑀸𑀯𑁄 𑀯𑀺𑀬 𑀲𑀻𑀳𑀲𑁆𑀲𑀧𑀺 𑀲𑀻𑀳𑀣𑀸𑀫𑀸𑀪𑀸𑀯𑁄 𑀲𑀺𑀬𑀸𑀢𑀺 𑀆𑀳 ‘‘𑀅𑀲𑀫𑁆𑀪𑀺𑀦𑁆𑀦𑀓𑁂𑀲𑀭𑀲𑀻𑀳’’𑀦𑁆𑀢𑀺. 𑀞𑀸𑀦𑀲𑁄 𑀯𑀸𑀢𑀺 𑀢𑀗𑁆𑀔𑀡𑁂 𑀏𑀯.

𑁫𑁪. ‘‘𑀲𑀼𑀫𑀸𑀕𑀥𑀸 𑀦𑀸𑀫 𑀦𑀤𑀻’’𑀢𑀺 𑀓𑁂𑀘𑀺, 𑀢𑀁 𑀫𑀺𑀘𑁆𑀙𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀼𑀫𑀸𑀕𑀥𑀸 𑀦𑀸𑀫 𑀧𑁄𑀓𑁆𑀔𑀭𑀡𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀲𑀸 𑀧𑁄𑀓𑁆𑀔𑀭𑀡𑀺𑀪𑀸𑀯𑀲𑁆𑀲 𑀲𑀼𑀢𑁆𑀢𑀦𑁆𑀢𑀭𑁂 𑀆𑀕𑀢𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀲𑀸 𑀢𑀻𑀭𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑁄𑀭𑀸𑀦𑀁 𑀦𑀺𑀯𑀸𑀧𑁄 𑀏𑀢𑁆𑀣𑀸𑀢𑀺 𑀫𑁄𑀭𑀦𑀺𑀯𑀸𑀧𑁄. 𑀩𑁆𑀬𑀥𑀺𑀓𑀭𑀡𑀸𑀦𑀫𑁆𑀧𑀺 𑀳𑀺 𑀧𑀤𑀸𑀦𑀁 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑁄 𑀳𑁄𑀢𑀺𑀬𑁂𑀯 𑀬𑀣𑀸 ‘‘𑀉𑀭𑀲𑀺𑀮𑁄𑀫𑁄’’𑀢𑀺. 𑀅𑀣 𑀯𑀸 𑀦𑀺𑀯𑀼𑀢𑁆𑀣𑀁 𑀏𑀢𑁆𑀣𑀸𑀢𑀺 𑀦𑀺𑀯𑀸𑀧𑁄, 𑀫𑁄𑀭𑀸𑀦𑀁 𑀦𑀺𑀯𑀸𑀧𑁄 𑀫𑁄𑀭𑀦𑀺𑀯𑀸𑀧𑁄, 𑀫𑁄𑀭𑀸𑀦𑀁 𑀦𑀺𑀯𑀸𑀧𑀤𑀺𑀦𑁆𑀦𑀝𑁆𑀞𑀸𑀦𑀁. 𑀢𑁂𑀦𑀸𑀳 ‘‘𑀬𑀢𑁆𑀣 𑀫𑁄𑀭𑀸𑀦’’𑀦𑁆𑀢𑀺𑀆𑀤𑀺. 𑀬𑀲𑁆𑀫𑀸 𑀦𑀺𑀕𑁆𑀭𑁄𑀥𑁄 𑀢𑀧𑁄𑀚𑀺𑀕𑀼𑀘𑁆𑀙𑀯𑀸𑀤𑁄, 𑀲𑀸𑀲𑀦𑁂 𑀘 𑀪𑀺𑀓𑁆𑀔𑀽 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀁 𑀯𑀚𑁆𑀚𑁂𑀢𑁆𑀯𑀸 𑀪𑀸𑀯𑀦𑀸𑀦𑀼𑀬𑁄𑀕𑁂𑀦 𑀧𑀭𑀫𑀲𑁆𑀲𑀸𑀲𑀧𑁆𑀧𑀢𑁆𑀢𑁂 𑀯𑀺𑀳𑀭𑀦𑁆𑀢𑁂 𑀧𑀲𑁆𑀲𑀢𑀺, 𑀢𑀲𑁆𑀫𑀸 ‘‘𑀓𑀣𑀁 𑀦𑀼 𑀔𑁄 𑀲𑀫𑀡𑁄 𑀕𑁄𑀢𑀫𑁄 𑀓𑀸𑀬𑀓𑀺𑀮𑀫𑀣𑁂𑀦 𑀯𑀺𑀦𑀸𑀯 𑀲𑀸𑀯𑀓𑁂 𑀯𑀺𑀦𑁂𑀢𑀻’’𑀢𑀺 𑀲𑀜𑁆𑀚𑀸𑀢𑀲𑀦𑁆𑀤𑁂𑀳𑁄 ‘‘𑀓𑁄 𑀦𑀸𑀫 𑀲𑁄’’𑀢𑀺𑀆𑀤𑀺𑀦𑀸 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺. 𑀅𑀲𑁆𑀲𑀲𑀢𑀺 𑀅𑀦𑀼𑀲𑀗𑁆𑀓𑀺𑀢𑀧𑀭𑀺𑀲𑀗𑁆𑀓𑀺𑀢𑁄 𑀳𑁄𑀢𑀺 𑀏𑀢𑁂𑀦𑀸𑀢𑀺 𑀅𑀲𑁆𑀲𑀸𑀲𑁄, 𑀧𑀻𑀢𑀺𑀲𑁄𑀫𑀦𑀲𑁆𑀲𑀦𑁆𑀢𑀺 𑀆𑀳 ‘‘𑀅𑀲𑁆𑀲𑀸𑀲𑀧𑁆𑀧𑀢𑁆𑀢𑀸𑀢𑀺 𑀢𑀼𑀝𑁆𑀞𑀺𑀧𑁆𑀧𑀢𑁆𑀢𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀸’’𑀢𑀺. 𑀅𑀥𑀺𑀓𑁄 𑀲𑁂𑀝𑁆𑀞𑁄 𑀆𑀲𑀬𑁄 𑀦𑀺𑀲𑁆𑀲𑀬𑁄 𑀅𑀚𑁆𑀛𑀸𑀲𑀬𑁄𑀢𑀺 𑀆𑀳 ‘‘𑀉𑀢𑁆𑀢𑀫𑀦𑀺𑀲𑁆𑀲𑀬𑀪𑀽𑀢’’𑀦𑁆𑀢𑀺. 𑀆𑀤𑀺𑀪𑀽𑀢𑀁 𑀧𑀼𑀭𑀸𑀢𑀦𑀁 𑀲𑁂𑀝𑁆𑀞𑀘𑀭𑀺𑀬𑀁 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀁, 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀦𑁆𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑁂𑀲 𑀲𑀩𑁆𑀩𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑁂𑀳𑀺 𑀢𑁂𑀦𑁂𑀯 𑀆𑀓𑀸𑀭𑁂𑀦 𑀅𑀥𑀺𑀕𑀢𑁄. 𑀢𑁂𑀦𑀸𑀳 ‘‘𑀧𑀼𑀭𑀸𑀡…𑀧𑁂… 𑀅𑀭𑀺𑀬𑀫𑀕𑁆𑀕’’𑀦𑁆𑀢𑀺. 𑀢𑀣𑀸 𑀳𑀺 𑀢𑀁 𑀪𑀕𑀯𑀸 ‘‘𑀅𑀤𑁆𑀤𑀲 𑀧𑀼𑀭𑀸𑀡𑀁 𑀫𑀕𑁆𑀕𑀁 𑀧𑀼𑀭𑀸𑀡𑀫𑀜𑁆𑀚𑀲’’𑀦𑁆𑀢𑀺 𑀅𑀯𑁄𑀘. 𑀧𑀽𑀭𑁂𑀢𑁆𑀯𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀯𑀲𑁂𑀦. ‘‘𑀧𑀽𑀭𑁂𑀢𑁆𑀯𑀸’’𑀢𑀺 𑀯𑀸 𑀇𑀤𑀁 ‘‘𑀅𑀚𑁆𑀛𑀸𑀲𑀬𑀁 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀏𑀢𑁆𑀣 𑀧𑀸𑀞𑀲𑁂𑀲𑁄𑀢𑀺 𑀯𑀤𑀦𑁆𑀢𑀺. ‘‘𑀅𑀚𑁆𑀛𑀸𑀲𑀬𑀁 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀝𑀺𑀚𑀸𑀦𑀦𑁆𑀢𑀺 𑀅𑀲𑁆𑀲𑀸𑀲𑀧𑁆𑀧𑀢𑁆𑀢𑀸’’𑀢𑀺 𑀏𑀯𑀁 𑀯𑀸 𑀏𑀢𑁆𑀣 𑀬𑁄𑀚𑀦𑀸.

𑀢𑀧𑁄𑀚𑀺𑀕𑀼𑀘𑁆𑀙𑀸𑀯𑀸𑀤𑀯𑀡𑁆𑀡𑀦𑀸

𑁫𑁫. 𑀧𑀓𑀢𑀸 𑀳𑀼𑀢𑁆𑀯𑀸 𑀯𑀺𑀘𑁆𑀙𑀺𑀦𑁆𑀦𑀸 𑀯𑀺𑀧𑁆𑀧𑀓𑀢𑀸𑀢𑀺 𑀆𑀳 ‘‘𑀅𑀦𑀺𑀝𑁆𑀞𑀺𑀢𑀸𑀯 𑀳𑀼𑀢𑁆𑀯𑀸 𑀞𑀺𑀢𑀸’’𑀢𑀺.

𑁫𑁬. 𑀯𑀻𑀭𑀺𑀬𑁂𑀦 𑀧𑀸𑀧𑀚𑀺𑀕𑀼𑀘𑁆𑀙𑀦𑀯𑀸𑀤𑁄𑀢𑀺 𑀮𑀽𑀔𑀧𑀝𑀺𑀧𑀢𑁆𑀢𑀺𑀲𑀸𑀥𑀦𑁂𑀦 𑀯𑀻𑀭𑀺𑀬𑁂𑀦 𑀅𑀢𑁆𑀢𑀢𑀡𑁆𑀳𑀸𑀯𑀺𑀦𑁄𑀤𑀦𑀯𑀲𑁂𑀦 𑀧𑀸𑀧𑀓𑀲𑁆𑀲 𑀚𑀺𑀕𑀼𑀘𑁆𑀙𑀦𑀯𑀸𑀤𑁄. 𑀚𑀺𑀕𑀼𑀘𑁆𑀙𑀢𑀻𑀢𑀺 𑀚𑀺𑀕𑀼𑀘𑁆𑀙𑁄, 𑀢𑀩𑁆𑀪𑀸𑀯𑁄 𑀚𑁂𑀕𑀼𑀘𑁆𑀙𑀁, 𑀅𑀥𑀺𑀓𑀁 𑀚𑁂𑀕𑀼𑀘𑁆𑀙𑀁 𑀅𑀥𑀺𑀚𑁂𑀕𑀼𑀘𑁆𑀙𑀁, 𑀅𑀢𑀺𑀯𑀺𑀬 𑀧𑀸𑀧𑀚𑀺𑀕𑀼𑀘𑁆𑀙𑀦𑀁, 𑀢𑀲𑁆𑀫𑀺𑀁 𑀅𑀥𑀺𑀚𑁂𑀕𑀼𑀘𑁆𑀙𑁂. 𑀓𑀸𑀬𑀤𑀴𑁆𑀳𑀻𑀩𑀳𑀼𑀮𑀁 𑀢𑀧𑀢𑀻𑀢𑀺 𑀢𑀧𑁄, 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀯𑀲𑁂𑀦 𑀧𑀯𑀢𑁆𑀢𑀁 𑀯𑀻𑀭𑀺𑀬𑀁, 𑀢𑁂𑀦 𑀓𑀸𑀬𑀤𑀴𑁆𑀳𑀻𑀩𑀳𑀼𑀮𑀢𑀸𑀦𑀺𑀫𑀺𑀢𑁆𑀢𑀲𑁆𑀲 𑀧𑀸𑀧𑀲𑁆𑀲 𑀚𑀺𑀕𑀼𑀘𑁆𑀙𑀦𑀁, 𑀯𑀺𑀭𑀚𑁆𑀚𑀦𑀫𑁆𑀧𑀺 𑀢𑀧𑁄𑀚𑀺𑀕𑀼𑀘𑁆𑀙𑀸𑀢𑀺 𑀆𑀳 ‘‘𑀯𑀻𑀭𑀺𑀬𑁂𑀦 𑀧𑀸𑀧𑀚𑀺𑀕𑀼𑀘𑁆𑀙𑀸’’𑀢𑀺. 𑀖𑀸𑀲𑀘𑁆𑀙𑀸𑀤𑀦𑀲𑁂𑀦𑀸𑀲𑀦𑀢𑀡𑁆𑀳𑀸𑀯𑀺𑀦𑁄𑀤𑀦𑀫𑀼𑀔𑁂𑀦 𑀅𑀢𑁆𑀢𑀲𑁆𑀦𑁂𑀳𑀯𑀺𑀭𑀚𑁆𑀚𑀦𑀦𑁆𑀢𑀺 𑀅𑀢𑁆𑀣𑁄. 𑀉𑀧𑀭𑀺 𑀯𑀼𑀘𑁆𑀘𑀫𑀸𑀦𑁂𑀲𑀼 𑀦𑀸𑀦𑀸𑀓𑀸𑀭𑁂𑀲𑀼 𑀅𑀘𑁂𑀮𑀓𑀸𑀤𑀺𑀯𑀢𑁂𑀲𑀼 𑀏𑀓𑀚𑁆𑀛𑀁 𑀲𑀫𑀸𑀤𑀺𑀦𑁆𑀦𑀸𑀦𑀁 𑀧𑀭𑀺𑀲𑁄𑀥𑀦𑀫𑁂𑀯𑁂𑀢𑁆𑀣 𑀧𑀸𑀭𑀺𑀧𑀽𑀭𑀡𑀁, 𑀦 𑀲𑀩𑁆𑀩𑁂𑀲𑀁 𑀅𑀦𑀯𑀲𑁂𑀲𑀢𑁄 𑀲𑀫𑀸𑀤𑀸𑀦𑀁 𑀢𑀲𑁆𑀲 𑀅𑀲𑀫𑁆𑀪𑀯𑀢𑁄𑀢𑀺 𑀆𑀳 ‘‘𑀧𑀭𑀺𑀧𑀼𑀡𑁆𑀡𑀸𑀢𑀺 𑀧𑀭𑀺𑀲𑀼𑀤𑁆𑀥𑀸’’𑀢𑀺. 𑀧𑀭𑀺𑀲𑁄𑀥𑀦𑀜𑁆𑀘 𑀦𑁂𑀲𑀁 𑀲𑀓𑀲𑀫𑀬𑀲𑀺𑀤𑁆𑀥𑁂𑀦 𑀦𑀬𑁂𑀦 𑀧𑀝𑀺𑀧𑀚𑁆𑀚𑀦𑀫𑁂𑀯. 𑀯𑀺𑀧𑀭𑀺𑀬𑀸𑀬𑁂𑀦 𑀅𑀧𑀭𑀺𑀲𑀼𑀤𑁆𑀥𑀢𑀸 𑀯𑁂𑀤𑀺𑀢𑀩𑁆𑀩𑀸.

𑁫𑁭. ‘‘𑀏𑀓𑀁 𑀧𑀜𑁆𑀳𑀫𑁆𑀧𑀺 𑀦 𑀓𑀣𑁂𑀢𑀻’’𑀢𑀺 𑀧𑀞𑀫𑀁 𑀅𑀢𑁆𑀢𑀦𑀸 𑀧𑀼𑀘𑁆𑀙𑀺𑀢𑀧𑀜𑁆𑀳𑀲𑁆𑀲 𑀅𑀓𑀣𑀺𑀢𑀢𑁆𑀢𑀸 𑀯𑀼𑀢𑁆𑀢𑀁.

𑀢𑀧𑀦𑀺𑀲𑁆𑀲𑀺𑀢𑀓𑁄𑀢𑀺 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀲𑀗𑁆𑀔𑀸𑀢𑀁 𑀢𑀧𑀁 𑀦𑀺𑀲𑁆𑀲𑀸𑀬 𑀲𑀫𑀸𑀤𑀸𑀬 𑀯𑀢𑁆𑀢𑀦𑀓𑁄. 𑀲𑀻𑀳𑀦𑀸𑀤𑁂𑀢𑀺 𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁. 𑀬𑀲𑁆𑀫𑀸 𑀢𑀢𑁆𑀣 𑀯𑀺𑀢𑁆𑀣𑀸𑀭𑀺𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺, 𑀢𑀲𑁆𑀫𑀸 𑀢𑀲𑁆𑀲𑀸 𑀅𑀢𑁆𑀣𑀧𑁆𑀧𑀓𑀸𑀲𑀦𑀸𑀬 𑀯𑀼𑀢𑁆𑀢𑀦𑀬𑁂𑀦𑀧𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀉𑀧𑀓𑁆𑀓𑀺𑀮𑁂𑀲𑀯𑀡𑁆𑀡𑀦𑀸

𑁫𑁮. ‘‘𑀲𑀫𑁆𑀫𑀸 𑀆𑀤𑀺𑀬𑀢𑀻’’𑀢𑀺 𑀯𑀢𑁆𑀯𑀸 𑀲𑀫𑁆𑀫𑀸 𑀆𑀤𑀺𑀬𑀦𑀜𑁆𑀘𑀲𑁆𑀲 𑀤𑀴𑁆𑀳𑀕𑁆𑀕𑀸𑀳𑁄 𑀏𑀯𑀸𑀢𑀺 𑀆𑀳 ‘‘𑀤𑀴𑁆𑀳𑀁 𑀕𑀡𑁆𑀳𑀸𑀢𑀻’’𑀢𑀺. ‘‘𑀲𑀸𑀲𑀦𑀸𑀯𑀘𑀭𑁂𑀦𑀸𑀧𑀺 𑀤𑀻𑀧𑁂𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀘𑁆𑀘𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑁂𑀦 𑀥𑀼𑀢𑀗𑁆𑀕𑀥𑀭𑀢𑀸𑀫𑀢𑁆𑀢𑁂𑀦 𑀅𑀢𑁆𑀢𑀫𑀦𑀢𑀸, 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑀢𑀸 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀉𑀧𑀓𑁆𑀓𑀺𑀮𑁂𑀲𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀦 𑀬𑀣𑀸𑀯𑀼𑀢𑁆𑀢𑀢𑀧𑀲𑀫𑀸𑀤𑀸𑀦𑀥𑀼𑀢𑀗𑁆𑀕𑀥𑀭𑀢𑀸𑀦𑀁 𑀲𑀢𑀺𑀧𑀺 𑀅𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑁂 𑀲𑀤𑀺𑀲𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

‘‘𑀤𑀼𑀯𑀺𑀥𑀲𑁆𑀲𑀸𑀧𑀻𑀢𑀺 ‘𑀅𑀢𑁆𑀢𑀫𑀦𑁄 𑀳𑁄𑀢𑀺 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄’𑀢𑀺 𑀘 𑀏𑀯𑀁 𑀉𑀧𑀓𑁆𑀓𑀺𑀮𑁂𑀲𑀪𑁂𑀤𑁂𑀦 𑀯𑀼𑀢𑁆𑀢𑀲𑁆𑀲 𑀤𑀼𑀯𑀺𑀥𑀲𑁆𑀲𑀸𑀧𑀺 𑀢𑀧𑀲𑁆𑀲𑀺𑀦𑁄’’𑀢𑀺 𑀓𑁂𑀘𑀺. 𑀬𑀲𑁆𑀫𑀸 𑀧𑀦 𑀅𑀝𑁆𑀞𑀓𑀣𑀸𑀬𑀁 𑀲𑀸𑀲𑀦𑀺𑀓𑀯𑀲𑁂𑀦𑀸𑀧𑀺 𑀅𑀢𑁆𑀣𑁄 𑀤𑀻𑀧𑀺𑀢𑁄, 𑀢𑀲𑁆𑀫𑀸 𑀩𑀸𑀳𑀺𑀭𑀓𑀲𑁆𑀲, 𑀲𑀸𑀲𑀦𑀺𑀓𑀲𑁆𑀲 𑀘𑀸𑀢𑀺 𑀏𑀯𑀁 𑀤𑀼𑀯𑀺𑀥𑀲𑁆𑀲𑀸𑀧𑀺 𑀢𑀧𑀲𑁆𑀲𑀺𑀦𑁄𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀘𑁂𑀯 𑀳𑀺 𑀉𑀧𑀭𑀺𑀧𑀺 𑀅𑀢𑁆𑀣𑀯𑀡𑁆𑀡𑀦𑀁 𑀯𑀓𑁆𑀔𑀢𑀻𑀢𑀺. 𑀏𑀢𑁆𑀢𑀸𑀯𑀢𑀸𑀢𑀺 𑀬𑀤𑀺𑀤𑀁 ‘‘𑀓𑁄 𑀅𑀜𑁆𑀜𑁄 𑀫𑀬𑀸 𑀲𑀤𑀺𑀲𑁄’’𑀢𑀺 𑀏𑀯𑀁 𑀅𑀢𑀺𑀫𑀸𑀦𑀲𑁆𑀲, 𑀅𑀦𑀺𑀝𑁆𑀞𑀺𑀢𑀓𑀺𑀘𑁆𑀘𑀲𑁆𑀲𑁂𑀯 𑀘 ‘‘𑀅𑀮𑀫𑁂𑀢𑁆𑀢𑀸𑀯𑀢𑀸’’𑀢𑀺 𑀏𑀯𑀁 𑀅𑀢𑀺𑀫𑀸𑀦𑀲𑁆𑀲 𑀘 𑀉𑀧𑁆𑀧𑀸𑀤𑀦𑀁, 𑀏𑀢𑁆𑀢𑀸𑀯𑀢𑀸.

𑀉𑀓𑁆𑀓𑀁𑀲𑀢𑀻𑀢𑀺 𑀉𑀓𑁆𑀓𑀝𑁆𑀞𑀁 𑀓𑀭𑁄𑀢𑀺. 𑀉𑀓𑁆𑀔𑀺𑀧𑀢𑀻𑀢𑀺 𑀅𑀜𑁆𑀜𑁂𑀲𑀁 𑀉𑀧𑀭𑀺 𑀔𑀺𑀧𑀢𑀺, 𑀧𑀕𑁆𑀕𑀡𑁆𑀳𑀸𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀁 𑀲𑀁𑀳𑀸𑀭𑁂𑀢𑀻𑀢𑀺 𑀧𑀭𑀁 𑀲𑀁𑀳𑀭𑀁 𑀦𑀺𑀳𑀻𑀦𑀁 𑀓𑀭𑁄𑀢𑀺. 𑀅𑀯𑀓𑁆𑀔𑀺𑀧𑀢𑀻𑀢𑀺 𑀅𑀥𑁄 𑀔𑀺𑀧𑀢𑀺, 𑀅𑀯𑀫𑀜𑁆𑀜𑀢𑀻𑀢𑀺 𑀅𑀢𑁆𑀣𑁄.

𑀫𑀸𑀦𑀫𑀤𑀓𑀭𑀡𑁂𑀦𑀸𑀢𑀺 𑀫𑀸𑀦𑀲𑀗𑁆𑀔𑀸𑀢𑀲𑁆𑀲 𑀫𑀤𑀲𑁆𑀲 𑀓𑀭𑀡𑁂𑀦 𑀉𑀧𑁆𑀧𑀸𑀤𑀦𑁂𑀦. 𑀫𑀼𑀘𑁆𑀙𑀺𑀢𑁄 𑀳𑁄𑀢𑀻𑀢𑀺 𑀫𑀼𑀘𑁆𑀙𑀸𑀧𑀦𑁆𑀦𑁄 𑀳𑁄𑀢𑀺, 𑀲𑀸 𑀧𑀦 𑀫𑀼𑀘𑁆𑀙𑀸𑀧𑀢𑁆𑀢𑀺 𑀅𑀪𑀺𑀚𑁆𑀛𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀓𑀸𑀬𑀕𑀦𑁆𑀣𑁂𑀳𑀺 𑀕𑀥𑀺𑀢𑀘𑀺𑀢𑁆𑀢𑀢𑀸, 𑀢𑀢𑁆𑀣 𑀘 𑀅𑀢𑀺𑀮𑀕𑁆𑀕𑀪𑀸𑀯𑁄𑀢𑀺 𑀆𑀳 ‘‘𑀕𑀥𑀺𑀢𑁄 𑀅𑀚𑁆𑀛𑁄𑀲𑀦𑁆𑀦𑁄’’𑀢𑀺. 𑀧𑀫𑀚𑁆𑀚𑀦𑀜𑁆𑀘𑁂𑀢𑁆𑀣 𑀧𑀫𑀚𑁆𑀚𑀦𑀫𑁂𑀯𑀸𑀢𑀺 𑀆𑀳 ‘‘𑀧𑀫𑀸𑀤𑀫𑀸𑀧𑀚𑁆𑀚𑀢𑀻’’𑀢𑀺. 𑀓𑁂𑀯𑀮𑀁 𑀥𑀼𑀢𑀗𑁆𑀕𑀲𑀼𑀤𑁆𑀥𑀺𑀓𑁄 𑀳𑀼𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀦𑀼𑀬𑀼𑀜𑁆𑀚𑀦𑁆𑀢𑁄 𑀢𑀸𑀬 𑀏𑀯 𑀥𑀼𑀢𑀗𑁆𑀕𑀲𑀼𑀤𑁆𑀥𑀺𑀓𑀢𑀸𑀬 𑀅𑀢𑁆𑀢𑀼𑀓𑁆𑀓𑀁𑀲𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑁂𑀬𑁆𑀬𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀸𑀲𑀦𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀥𑀼𑀢𑀗𑁆𑀕𑀫𑁂𑀯…𑀧𑁂… 𑀧𑀘𑁆𑀘𑁂𑀢𑀻’’𑀢𑀺.

𑁫𑁯. 𑀢𑁂𑀬𑁂𑀯 𑀧𑀘𑁆𑀘𑀬𑀸. 𑀲𑀼𑀝𑁆𑀞𑀼 𑀓𑀢𑁆𑀯𑀸 𑀧𑀝𑀺𑀲𑀗𑁆𑀔𑀭𑀺𑀢𑁆𑀯𑀸 𑀮𑀤𑁆𑀥𑀸𑀢𑀺 𑀆𑀤𑀭𑀕𑀸𑀭𑀯𑀬𑁄𑀕𑁂𑀦 𑀲𑀓𑁆𑀓𑀘𑁆𑀘𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀤𑀸𑀦𑀯𑀲𑁂𑀦 𑀉𑀧𑀦𑀬𑀯𑀲𑁂𑀦 𑀮𑀤𑁆𑀥𑀸. 𑀯𑀡𑁆𑀡𑀪𑀡𑀦𑀦𑁆𑀢𑀺 𑀕𑀼𑀡𑀓𑀺𑀢𑁆𑀢𑀦𑀁. 𑀅𑀲𑁆𑀲𑀸𑀢𑀺 𑀢𑀧𑀲𑁆𑀲𑀺𑀦𑁄.

𑁬𑁦. 𑀯𑁄𑀤𑀸𑀲𑀦𑁆𑀢𑀺 𑀩𑁆𑀬𑀸𑀲𑀦𑀁, 𑀯𑀺𑀪𑀚𑁆𑀚𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀧𑀦𑁂𑀢𑁆𑀣 𑀯𑀺𑀪𑀚𑁆𑀚𑀦𑀁 𑀤𑁆𑀯𑀺𑀥𑀸 𑀇𑀘𑁆𑀙𑀺𑀢𑀦𑁆𑀢𑀺 𑀆𑀳 ‘‘𑀤𑁆𑀯𑁂𑀪𑀸𑀕𑀁 𑀆𑀧𑀚𑁆𑀚𑀢𑀻’’𑀢𑀺. 𑀤𑁆𑀯𑁂 𑀪𑀸𑀕𑁂 𑀓𑀭𑁄𑀢𑀺 𑀭𑀼𑀘𑁆𑀘𑀦𑀸𑀭𑀼𑀘𑁆𑀘𑀦𑀯𑀲𑁂𑀦. 𑀕𑁂𑀥𑀚𑀸𑀢𑁄𑀢𑀺 𑀲𑀜𑁆𑀚𑀸𑀢𑀕𑁂𑀥𑁄. 𑀫𑀼𑀘𑁆𑀙𑀦𑀁 𑀦𑀸𑀫 𑀲𑀢𑀺𑀯𑀺𑀧𑁆𑀧𑀯𑀸𑀲𑁂𑀦𑁂𑀯 𑀳𑁄𑀢𑀺, 𑀦 𑀲𑀢𑀺𑀬𑀸 𑀲𑀢𑀻𑀢𑀺 𑀆𑀳 ‘‘𑀲𑀫𑀼𑀝𑁆𑀞𑀲𑁆𑀲𑀢𑀻’’𑀢𑀺. 𑀆𑀤𑀻𑀦𑀯𑀫𑀢𑁆𑀢𑀫𑁆𑀧𑀻𑀢𑀺 𑀕𑀥𑀺𑀢𑀸𑀤𑀺𑀪𑀸𑀯𑁂𑀦 𑀧𑀭𑀺𑀪𑁄𑀕𑁂 𑀆𑀤𑀻𑀦𑀯𑀫𑀢𑁆𑀢𑀫𑁆𑀧𑀺 𑀦 𑀧𑀲𑁆𑀲𑀢𑀺. 𑀫𑀢𑁆𑀢𑀜𑁆𑀜𑀼𑀢𑀸𑀢𑀺 𑀧𑀭𑀺𑀪𑁄𑀕𑁂 𑀫𑀢𑁆𑀢𑀜𑁆𑀜𑀼𑀢𑀸. 𑀧𑀘𑁆𑀘𑀯𑁂𑀓𑁆𑀔𑀡𑀧𑀭𑀺𑀪𑁄𑀕𑀫𑀢𑁆𑀢𑀫𑁆𑀧𑀻𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀫𑀢𑁆𑀢𑁂𑀦 𑀧𑀭𑀺𑀪𑁄𑀕𑀫𑁆𑀧𑀺 𑀏𑀓𑀯𑀸𑀭𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸𑀧𑀺 𑀧𑀭𑀺𑀪𑀼𑀜𑁆𑀚𑀦𑀫𑁆𑀧𑀺 𑀦 𑀓𑀭𑁄𑀢𑀺.

𑁬𑁧. 𑀯𑀺𑀘𑀓𑁆𑀓𑀲𑀡𑁆𑀞𑀸𑀦𑀸𑀢𑀺 𑀯𑀺𑀧𑀼𑀮𑀢𑀫𑀘𑀓𑁆𑀓𑀲𑀡𑁆𑀞𑀸𑀦𑀸. 𑀲𑀩𑁆𑀩𑀲𑁆𑀲 𑀪𑀼𑀜𑁆𑀚𑀦𑀢𑁄 𑀅𑀬𑁄𑀓𑀽𑀝𑀲𑀤𑀺𑀲𑀸 𑀤𑀦𑁆𑀢𑀸 𑀏𑀯 𑀤𑀦𑁆𑀢𑀓𑀽𑀝𑀁.𑀅𑀧𑀲𑀸𑀤𑁂𑀢𑀻𑀢𑀺 𑀧𑀲𑀸𑀤𑁂𑀢𑀺. 𑀅𑀘𑁂𑀮𑀓𑀸𑀤𑀺𑀯𑀲𑁂𑀦𑀸𑀢𑀺 𑀅𑀘𑁂𑀮𑀓𑀯𑀢𑀸𑀤𑀺𑀯𑀲𑁂𑀦. 𑀮𑀽𑀔𑀸𑀚𑀻𑀯𑀺𑀦𑁆𑀢𑀺 𑀲𑀮𑁆𑀮𑁂𑀔𑀧𑀝𑀺𑀧𑀢𑁆𑀢𑀺𑀬𑀸 𑀮𑀽𑀔𑀚𑀻𑀯𑀺𑀓𑀁.

𑁬𑁨. 𑀢𑀧𑀁 𑀓𑀭𑁄𑀢𑀻𑀢𑀺 𑀪𑀸𑀯𑀦𑀸𑀫𑀦𑀲𑀺𑀓𑀸𑀭𑀮𑀓𑁆𑀔𑀡𑀁 𑀢𑀧𑀁 𑀘𑀭𑀢𑀺 𑀘𑀭𑀦𑁆𑀢𑁄 𑀯𑀺𑀬 𑀳𑁄𑀢𑀺. 𑀘𑀗𑁆𑀓𑀫𑀁 𑀑𑀢𑀭𑀢𑀺 𑀪𑀸𑀯𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀯𑀺𑀬. 𑀯𑀺𑀳𑀸𑀭𑀗𑁆𑀕𑀡𑀁 𑀲𑀫𑁆𑀫𑀚𑁆𑀚𑀢𑀺 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑁂𑀦𑁆𑀢𑁄 𑀯𑀺𑀬.

‘‘𑀆𑀤𑀲𑁆𑀲𑀬𑀫𑀸𑀦𑁄’’𑀢𑀺 𑀯𑀸 𑀧𑀸𑀞𑁄.

𑀓𑀺𑀜𑁆𑀘𑀺 𑀯𑀚𑁆𑀚𑀦𑁆𑀢𑀺 𑀓𑀺𑀜𑁆𑀘𑀺 𑀓𑀸𑀬𑀺𑀓𑀁 𑀯𑀸 𑀯𑀸𑀘𑀲𑀺𑀓𑀁 𑀯𑀸 𑀤𑁄𑀲𑀁. 𑀤𑀺𑀝𑁆𑀞𑀺𑀕𑀢𑀦𑁆𑀢𑀺 𑀯𑀺𑀧𑀭𑀻𑀢𑀤𑀲𑁆𑀲𑀦𑀁. 𑀅𑀭𑀼𑀘𑁆𑀘𑀫𑀸𑀦𑀦𑁆𑀢𑀺 𑀅𑀢𑁆𑀢𑀦𑁄 𑀲𑀺𑀤𑁆𑀥𑀦𑁆𑀢𑁂 𑀧𑀝𑀺𑀓𑁆𑀔𑀺𑀢𑁆𑀢𑀪𑀸𑀯𑁂𑀦 𑀅𑀭𑀼𑀘𑁆𑀘𑀫𑀸𑀦𑀁. 𑀭𑀼𑀘𑁆𑀘𑀢𑀺 𑀫𑁂𑀢𑀺 ‘‘𑀓𑀧𑁆𑀧𑀢𑀺 𑀫𑁂’’𑀢𑀺 𑀯𑀤𑀢𑀺. 𑀅𑀦𑀼𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀢𑀘𑁆𑀙𑀸𑀯𑀺𑀧𑀭𑀻𑀢𑀪𑀽𑀢𑀪𑀸𑀯𑁂𑀦 ‘‘𑀏𑀯𑀫𑁂𑀢’’𑀦𑁆𑀢𑀺 𑀅𑀦𑀼𑀚𑀸𑀦𑀺𑀢𑀩𑁆𑀩𑀁. 𑀲𑀯𑀦𑀫𑀦𑁄𑀳𑀸𑀭𑀺𑀢𑀸𑀬 ‘‘𑀲𑀸𑀥𑀼 𑀲𑀼𑀝𑁆𑀞𑀽’’𑀢𑀺 𑀅𑀦𑀼𑀫𑁄𑀤𑀺𑀢𑀩𑁆𑀩𑀁.

𑁬𑁩. 𑀓𑀼𑀚𑁆𑀛𑀦𑀲𑀻𑀮𑀢𑀸𑀬 𑀓𑁄𑀥𑀦𑁄. 𑀯𑀼𑀢𑁆𑀢𑀮𑀓𑁆𑀔𑀡𑁄 𑀉𑀧𑀦𑀸𑀳𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀉𑀧𑀦𑀸𑀳𑀻. 𑀏𑀯𑀁𑀪𑀽𑀢𑁄 𑀘 𑀢𑀁𑀲𑀫𑀗𑁆𑀕𑀻 𑀳𑁄𑀢𑀻𑀢𑀺 ‘‘𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺.

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀇𑀲𑁆𑀲𑀢𑀺 𑀉𑀲𑀽𑀬𑀢𑀻𑀢𑀺 𑀉𑀲𑁆𑀲𑀼𑀓𑀻. 𑀲𑀞𑀦𑀁 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀁 𑀲𑀞𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀞𑁄. 𑀲𑀦𑁆𑀢𑀤𑁄𑀲𑀧𑀝𑀺𑀘𑁆𑀙𑀸𑀤𑀦𑀲𑀪𑀸𑀯𑀸 𑀫𑀸𑀬𑀸, 𑀫𑀸𑀬𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑀸𑀬𑀸𑀯𑀻. 𑀕𑀭𑀼𑀝𑁆𑀞𑀸𑀦𑀺𑀬𑀸𑀦𑀫𑁆𑀧𑀺 𑀧𑀡𑀺𑀧𑀸𑀢𑀸𑀓𑀭𑀡𑀮𑀓𑁆𑀔𑀡𑀁 𑀣𑀫𑁆𑀪𑀦𑀁 𑀣𑀤𑁆𑀥𑀁, 𑀢𑀫𑁂𑀢𑁆𑀣 𑀅𑀢𑁆𑀣𑀻𑀢𑀺 𑀣𑀤𑁆𑀥𑁄. 𑀕𑀼𑀡𑁂𑀳𑀺 𑀲𑀫𑀸𑀦𑀁, 𑀅𑀥𑀺𑀓𑀜𑁆𑀘 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑀺𑀳𑀻𑀦𑀁 𑀓𑀢𑁆𑀯𑀸 𑀫𑀜𑁆𑀜𑀦𑀲𑀻𑀮𑀢𑀸𑀬 𑀅𑀢𑀺𑀫𑀸𑀦𑀻. 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀢𑁆𑀣𑀺𑀓𑀢𑀸𑀲𑀗𑁆𑀔𑀸𑀢𑀸 𑀧𑀸𑀧𑀸 𑀮𑀸𑀫𑀓𑀸 𑀇𑀘𑁆𑀙𑀸 𑀏𑀢𑀲𑁆𑀲𑀸𑀢𑀺 𑀧𑀸𑀧𑀺𑀘𑁆𑀙𑁄. 𑀫𑀺𑀘𑁆𑀙𑀸 𑀯𑀺𑀧𑀭𑀻𑀢𑀸 𑀤𑀺𑀝𑁆𑀞𑀺 𑀏𑀢𑀲𑁆𑀲𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄. ‘‘𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜’’𑀦𑁆𑀢𑀺 (𑀫. 𑀦𑀺. 𑁧𑁮𑁭, 𑁨𑁦𑁨, 𑁪𑁨𑁭; 𑁩.𑁨𑁭, 𑁨𑁯; 𑀉𑀤𑀸. 𑁫𑁫; 𑀫𑀳𑀸𑀦𑀺. 𑁨𑁦; 𑀦𑁂𑀢𑁆𑀢𑀺. 𑁫𑁮) 𑀏𑀯𑀁 𑀅𑀢𑁆𑀢𑀦𑀸 𑀅𑀢𑁆𑀢𑀸𑀪𑀺𑀦𑀺𑀯𑀺𑀝𑁆𑀞𑀢𑀸𑀬 𑀲𑀢𑀸 𑀤𑀺𑀝𑁆𑀞𑀺 𑀲𑀦𑁆𑀤𑀺𑀝𑁆𑀞𑀺, 𑀢𑀫𑁂𑀯 𑀧𑀭𑀸𑀫𑀲𑀢𑀻𑀢𑀺 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀲𑀬𑀁 𑀤𑀺𑀝𑁆𑀞𑀺 𑀲𑀦𑁆𑀤𑀺𑀝𑁆𑀞𑀻’’𑀢𑀺 𑀯𑀢𑁆𑀣𑀼𑀯𑀲𑁂𑀦 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀆 𑀩𑀸𑀴𑁆𑀳𑀁 𑀯𑀺𑀬 𑀥𑀻𑀬𑀢𑀻𑀢𑀺 𑀆𑀥𑀸𑀦𑀦𑁆𑀢𑀺 𑀆𑀳 ‘‘𑀤𑀴𑁆𑀳𑀁 𑀲𑀼𑀝𑁆𑀞𑀼 𑀞𑀧𑀺𑀢’’𑀦𑁆𑀢𑀺. 𑀬𑀣𑀸𑀕𑀳𑀺𑀢𑀁 𑀕𑀸𑀳𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀲𑀻𑀮𑁄 𑀧𑀝𑀺𑀦𑀺𑀲𑁆𑀲𑀕𑁆𑀕𑀻, 𑀢𑀧𑁆𑀧𑀝𑀺𑀓𑁆𑀔𑁂𑀧𑁂𑀦 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻. 𑀧𑀝𑀺𑀲𑁂𑀥𑀢𑁆𑀣𑁄 𑀳𑀺 𑀅𑀬𑀁 𑀤𑀼-𑀲𑀤𑁆𑀤𑁄 𑀬𑀣𑀸 ‘‘𑀤𑀼𑀧𑁆𑀧𑀜𑁆𑀜𑁄, (𑀫. 𑀦𑀺. 𑁧.𑁪𑁪𑁯) 𑀤𑀼𑀲𑁆𑀲𑀻𑀮𑁄’’𑀢𑀺 (𑀅. 𑀦𑀺. 𑁫.𑁨𑁧𑁩; 𑁧𑁦.𑁭𑁫; 𑀧𑀸𑀭𑀸. 𑁧𑁯𑁫; 𑀥. 𑀧. 𑁩𑁦𑁮) 𑀘.

𑀧𑀭𑀺𑀲𑀼𑀤𑁆𑀥𑀧𑀧𑀝𑀺𑀓𑀧𑁆𑀧𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁬𑁪. 𑀇𑀥 𑀦𑀺𑀕𑁆𑀭𑁄𑀥 𑀢𑀧𑀲𑁆𑀲𑀻𑀢𑀺 𑀬𑀣𑀸𑀦𑀼𑀓𑁆𑀓𑀦𑁆𑀢𑀁 𑀧𑀼𑀭𑀺𑀫𑀧𑀸𑀴𑀺𑀁 𑀦𑀺𑀕𑀫𑀦𑀯𑀲𑁂𑀦 𑀏𑀓𑀤𑁂𑀲𑁂𑀦 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀏𑀯𑀁 𑀪𑀕𑀯𑀸’’𑀢𑀺𑀆𑀤𑀺. 𑀕𑀳𑀺𑀢𑀮𑀤𑁆𑀥𑀺𑀦𑁆𑀢𑀺 ‘‘𑀅𑀘𑁂𑀮𑀓𑀸𑀤𑀺𑀪𑀸𑀯𑁄 𑀲𑁂𑀬𑁆𑀬𑁄, 𑀢𑁂𑀦 𑀘 𑀲𑀁𑀲𑀸𑀭𑀲𑀼𑀤𑁆𑀥𑀺 𑀳𑁄𑀢𑀻’’𑀢𑀺 𑀏𑀯𑀁 𑀕𑀳𑀺𑀢𑀮𑀤𑁆𑀥𑀺𑀁. 𑀭𑀓𑁆𑀔𑀺𑀢𑀁 𑀢𑀧𑀦𑁆𑀢𑀺 𑀢𑀸𑀬 𑀮𑀤𑁆𑀥𑀺𑀬𑀸 𑀲𑀫𑀸𑀤𑀺𑀬𑀺𑀢𑁆𑀯𑀸 𑀭𑀓𑁆𑀔𑀺𑀢𑀁 𑀅𑀘𑁂𑀮𑀓𑀯𑀢𑀸𑀤𑀺𑀢𑀧𑀁. ‘‘𑀲𑀩𑁆𑀩𑀫𑁂𑀯 𑀲𑀁𑀓𑀺𑀮𑀺𑀝𑁆𑀞’’𑀦𑁆𑀢𑀺 𑀇𑀫𑀺𑀦𑀸 𑀬𑀁 𑀯𑀓𑁆𑀔𑀢𑀺 𑀧𑀭𑀺𑀲𑀼𑀤𑁆𑀥𑀧𑀸𑀴𑀺𑀯𑀡𑁆𑀡𑀦𑀸𑀬𑀁 ‘‘𑀮𑀽𑀔𑀢𑀧𑀲𑁆𑀲𑀺𑀦𑁄 𑀘𑁂𑀯 𑀥𑀼𑀢𑀗𑁆𑀕𑀥𑀭𑀲𑁆𑀲 𑀘 𑀯𑀲𑁂𑀦 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁩.𑁬𑁪), 𑀢𑀲𑁆𑀲 𑀧𑀭𑀺𑀓𑀧𑁆𑀧𑀺𑀢𑀭𑀽𑀧𑀲𑁆𑀲 𑀮𑀽𑀔𑀲𑁆𑀲 𑀢𑀧𑀲𑁆𑀲𑀺𑀦𑁄𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀧𑀭𑀺𑀲𑀼𑀤𑁆𑀥𑀧𑀸𑀴𑀺𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺 𑀘 𑀇𑀫𑀺𑀦𑀸 𑀢𑀺𑀢𑁆𑀣𑀺𑀬𑀸𑀦𑀁 𑀯𑀲𑁂𑀦 𑀧𑀸𑀴𑀺 𑀬𑁂𑀯𑁂𑀢𑁆𑀣 𑀮𑀩𑁆𑀪𑀢𑀺, 𑀦 𑀧𑀦 𑀢𑀤𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀯𑀼𑀢𑁆𑀢𑀯𑀺𑀧𑀓𑁆𑀔𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀝𑀺𑀧𑀓𑁆𑀔𑀯𑀲𑁂𑀦, 𑀧𑀝𑀺𑀓𑁆𑀔𑁂𑀧𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀺𑀁 𑀞𑀸𑀦𑁂𑀢𑀺 𑀳𑁂𑀢𑀼𑀅𑀢𑁆𑀣𑁂 𑀪𑀼𑀫𑁆𑀫𑀦𑁆𑀢𑀺 𑀢𑀲𑁆𑀲 𑀳𑁂𑀢𑀼𑀅𑀢𑁆𑀣𑁂𑀦 𑀓𑀭𑀡𑀯𑀘𑀦𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀁 𑀲𑁄 𑀢𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀉𑀢𑁆𑀢𑀭𑀺 𑀯𑀸𑀬𑀫𑀫𑀸𑀦𑁄𑀢𑀺 𑀬𑀣𑀸𑀲𑀫𑀸𑀤𑀺𑀦𑁆𑀦𑁂𑀳𑀺 𑀥𑀼𑀢𑀥𑀫𑁆𑀫𑁂𑀳𑀺 𑀅𑀧𑀭𑀺𑀢𑀼𑀝𑁆𑀞𑁄, 𑀅𑀧𑀭𑀺𑀬𑁄𑀲𑀺𑀢𑀲𑀗𑁆𑀓𑀧𑁆𑀧𑁄 𑀘 𑀳𑀼𑀢𑁆𑀯𑀸 𑀉𑀧𑀭𑀺 𑀪𑀸𑀯𑀦𑀸𑀦𑀼𑀬𑁄𑀕𑀯𑀲𑁂𑀦 𑀲𑀫𑁆𑀫𑀸𑀯𑀸𑀬𑀸𑀫𑀁 𑀓𑀭𑁄𑀦𑁆𑀢𑁄.

𑁬𑁯. 𑀇𑀢𑁄 𑀧𑀭𑀦𑁆𑀢𑀺 𑀇𑀢𑁄 𑀬𑀣𑀸𑀯𑀼𑀢𑁆𑀢𑀦𑀬𑀢𑁄 𑀧𑀭𑀁. 𑀅𑀕𑁆𑀕𑀪𑀸𑀯𑀁 𑀯𑀸 𑀲𑀸𑀭𑀪𑀸𑀯𑀁 𑀯𑀸𑀢𑀺 𑀢𑀧𑁄𑀚𑀺𑀕𑀼𑀘𑁆𑀙𑀸𑀬 𑀅𑀕𑁆𑀕𑀪𑀸𑀯𑀁 𑀯𑀸 𑀲𑀸𑀭𑀪𑀸𑀯𑀁 𑀯𑀸 𑀅𑀚𑀸𑀦𑀦𑁆𑀢𑁄. ‘‘𑀅𑀬𑀫𑁂𑀯𑀲𑁆𑀲 𑀅𑀕𑁆𑀕𑀪𑀸𑀯𑁄 𑀲𑀸𑀭𑀪𑀸𑀯𑁄’’𑀢𑀺 𑀫𑀜𑁆𑀜𑀫𑀸𑀦𑁄 ‘‘𑀅𑀕𑁆𑀕𑀧𑁆𑀧𑀢𑁆𑀢𑀸, 𑀲𑀸𑀭𑀧𑁆𑀧𑀢𑁆𑀢𑀸 𑀘𑀸’’𑀢𑀺 𑀆𑀳.

𑀧𑀭𑀺𑀲𑀼𑀤𑁆𑀥𑀢𑀘𑀧𑁆𑀧𑀢𑁆𑀢𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁭𑁦. 𑀬𑀫𑀦𑀁 𑀲𑀁𑀬𑀫𑀦𑀁 𑀬𑀸𑀫𑁄, 𑀳𑀺𑀁𑀲𑀸𑀤𑀻𑀦𑀁 𑀅𑀓𑀭𑀡𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄 𑀬𑀸𑀫𑁄𑀯 𑀘𑀸𑀢𑀼𑀬𑀸𑀫𑁄, 𑀲𑁄 𑀏𑀯 𑀲𑀁𑀯𑀭𑁄, 𑀢𑁂𑀦 𑀲𑀁𑀯𑀼𑀢𑁄 𑀕𑀼𑀢𑁆𑀢𑀲𑀩𑁆𑀩𑀤𑁆𑀯𑀸𑀭𑁄 𑀘𑀸𑀢𑀼𑀬𑀸𑀫𑀲𑀁𑀯𑀭𑀲𑀁𑀯𑀼𑀢𑁄. 𑀢𑁂𑀦𑀸𑀳 ‘‘𑀘𑀢𑀼𑀩𑁆𑀩𑀺𑀥𑁂𑀦 𑀲𑀁𑀯𑀭𑁂𑀦 𑀧𑀺𑀳𑀺𑀢𑁄’’𑀢𑀺. 𑀅𑀢𑀺𑀧𑀸𑀢𑀦𑀁 𑀳𑀺𑀁𑀲𑀦𑀦𑁆𑀢𑀺 𑀆𑀳 ‘‘𑀧𑀸𑀡𑀁 𑀦 𑀳𑀦𑀢𑀻’’𑀢𑀺. 𑀮𑁄𑀪𑀘𑀺𑀢𑁆𑀢𑁂𑀦 𑀪𑀸𑀯𑀺𑀢𑀁 𑀲𑀫𑁆𑀪𑀸𑀯𑀺𑀢𑀦𑁆𑀢𑀺 𑀓𑀢𑁆𑀯𑀸 𑀪𑀸𑀯𑀺𑀢𑀁 𑀦𑀸𑀫 𑀧𑀜𑁆𑀘 𑀓𑀸𑀫𑀕𑀼𑀡𑀸. 𑀅𑀬𑀜𑁆𑀘 𑀢𑁂𑀲𑀼 𑀢𑁂𑀲𑀁𑀬𑁂𑀯 𑀲𑀫𑀼𑀤𑀸𑀘𑀸𑀭𑁄 𑀫𑀕𑁆𑀕𑁄𑀝𑁆𑀞𑀸𑀧𑀓𑀁 𑀯𑀺𑀬𑀸𑀢𑀺 𑀆𑀳 ‘‘𑀢𑁂𑀲𑀁 𑀲𑀜𑁆𑀜𑀸𑀬𑀸’’𑀢𑀺.

𑀏𑀢𑀦𑁆𑀢𑀺 𑀅𑀪𑀺𑀳𑀭𑀡𑀁, 𑀳𑀻𑀦𑀸𑀬 𑀅𑀦𑀸𑀯𑀢𑁆𑀢𑀦𑀜𑁆𑀘. 𑀢𑁂𑀦𑀸𑀳 ‘‘𑀲𑁄 𑀅𑀪𑀺𑀳𑀭𑀢𑀻𑀢𑀺 𑀆𑀤𑀺𑀮𑀓𑁆𑀔𑀡’’𑀦𑁆𑀢𑀺. 𑀅𑀪𑀺𑀳𑀭𑀢𑀻𑀢𑀺 𑀅𑀪𑀺𑀩𑀼𑀤𑁆𑀥𑀺𑀁 𑀦𑁂𑀢𑀺. 𑀢𑁂𑀦𑀸𑀳 ‘‘𑀉𑀧𑀭𑀽𑀧𑀭𑀺 𑀯𑀟𑁆𑀠𑁂𑀢𑀻’’𑀢𑀺. 𑀘𑀓𑁆𑀓𑀯𑀢𑁆𑀢𑀺𑀦𑀸𑀧𑀺 𑀧𑀩𑁆𑀩𑀚𑀺𑀢𑀲𑁆𑀲 𑀅𑀪𑀺𑀯𑀸𑀤𑀦𑀸𑀤𑀺 𑀓𑀭𑀻𑀬𑀢𑁂𑀯𑀸𑀢𑀺 𑀧𑀩𑁆𑀩𑀚𑁆𑀚𑀸 𑀲𑁂𑀝𑁆𑀞𑀸 𑀕𑀼𑀡𑀯𑀺𑀲𑁂𑀲𑀬𑁄𑀕𑀢𑁄, 𑀤𑁄𑀲𑀯𑀺𑀭𑀳𑀺𑀢𑀢𑁄 𑀘, 𑀬𑀢𑁄 𑀲𑀸 𑀧𑀡𑁆𑀟𑀺𑀢𑀧𑀜𑁆𑀜𑀢𑁆𑀢𑀸 𑀯𑀼𑀢𑁆𑀢𑀸. 𑀕𑀺𑀳𑀺𑀪𑀸𑀯𑁄 𑀧𑀦 𑀦𑀺𑀳𑀻𑀦𑁄 𑀢𑀤𑀼𑀪𑀬𑀸𑀪𑀸𑀯𑀢𑁄𑀢𑀺 𑀆𑀳 ‘‘𑀳𑀻𑀦𑀸𑀬 𑀕𑀺𑀳𑀺𑀪𑀸𑀯𑀢𑁆𑀣𑀸𑀬𑀸’’𑀢𑀺.

𑁭𑁧. 𑀢𑀘𑀧𑁆𑀧𑀢𑁆𑀢𑀸𑀢𑀺 𑀢𑀘𑀁 𑀧𑀢𑁆𑀢𑀸, 𑀢𑀘𑀲𑀤𑀺𑀲𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁭𑁪. 𑀢𑀺𑀢𑁆𑀣𑀺𑀬𑀸𑀦𑀁 𑀯𑀲𑁂𑀦𑀸𑀢𑀺 𑀢𑀺𑀢𑁆𑀣𑀺𑀬𑀸𑀦𑀁 𑀲𑀫𑀬𑀯𑀲𑁂𑀦. 𑀦𑁂𑀲𑀦𑁆𑀢𑀺 𑀢𑀺𑀢𑁆𑀣𑀺𑀬𑀸𑀦𑀁. 𑀢𑀦𑁆𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀁. 𑀲𑀻𑀮𑀲𑀫𑁆𑀧𑀤𑀸𑀢𑀺 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑀁 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀢𑀘𑀲𑀸𑀭𑀲𑀫𑁆𑀧𑀢𑁆𑀢𑀺𑀢𑁄𑀢𑀺 𑀢𑀘𑀢𑀧𑁄𑀚𑀺𑀕𑀼𑀘𑁆𑀙𑀸𑀬𑀸𑀲𑀸𑀭𑀲𑀫𑁆𑀧𑀢𑁆𑀢𑀺𑀢𑁄. 𑀯𑀺𑀲𑁂𑀲𑀪𑀸𑀯𑀦𑁆𑀢𑀺 𑀯𑀺𑀲𑁂𑀲𑀲𑀪𑀸𑀯𑀁.

𑀅𑀘𑁂𑀮𑀓𑀧𑀸𑀴𑀺𑀫𑀢𑁆𑀢𑀫𑁆𑀧𑀻𑀢𑀺 𑀅𑀘𑁂𑀮𑀓𑀧𑀸𑀴𑀺𑀆𑀕𑀢𑀢𑁆𑀣𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀺, 𑀢𑀲𑁆𑀫𑀸 𑀫𑀬𑀁 𑀅𑀦𑀲𑁆𑀲𑀸𑀫 𑀯𑀺𑀦𑀝𑁆𑀞𑀸𑀢𑀺 𑀅𑀢𑁆𑀣𑁄. 𑀅-𑀓𑀸𑀭𑁄 𑀯𑀸 𑀦𑀺𑀧𑀸𑀢𑀫𑀢𑁆𑀢𑀁, 𑀦𑀲𑁆𑀲𑀸𑀫𑀸𑀢𑀺 𑀯𑀺𑀦𑀲𑁆𑀲𑀸𑀫. 𑀓𑀼𑀢𑁄 𑀧𑀭𑀺𑀲𑀼𑀤𑁆𑀥𑀧𑀸𑀴𑀻𑀢𑀺 𑀓𑀼𑀢𑁄 𑀏𑀯 𑀅𑀫𑁆𑀳𑁂𑀲𑀼 𑀧𑀭𑀺𑀲𑀼𑀤𑁆𑀥𑀧𑀸𑀴𑀺𑀆𑀕𑀢𑀧𑀝𑀺𑀧𑀢𑁆𑀢𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀲𑀼𑀢𑀺𑀯𑀲𑁂𑀦𑀸𑀧𑀻𑀢𑀺 𑀲𑁄𑀢𑀧𑀣𑀸𑀕𑀫𑀦𑀫𑀢𑁆𑀢𑁂𑀦𑀸𑀧𑀺 𑀦 𑀚𑀸𑀦𑀸𑀫.

𑀦𑀺𑀕𑁆𑀭𑁄𑀥𑀲𑁆𑀲𑀧𑀚𑁆𑀛𑀸𑀬𑀦𑀯𑀡𑁆𑀡𑀦𑀸

𑁭𑁫. 𑀅𑀲𑁆𑀲𑀸𑀢𑀺 𑀲𑀦𑁆𑀥𑀸𑀦𑀲𑁆𑀲 𑀕𑀳𑀧𑀢𑀺𑀲𑁆𑀲. 𑀓𑀓𑁆𑀔𑀴𑀦𑁆𑀢𑀺 𑀨𑀭𑀼𑀲𑀁. 𑀤𑀼𑀭𑀸𑀲𑀤𑀯𑀘𑀦𑀦𑁆𑀢𑀺 𑀅𑀯𑀢𑁆𑀢𑀩𑁆𑀩𑀯𑀘𑀦𑀁. 𑀬𑀲𑁆𑀫𑀸 𑀨𑀭𑀼𑀲𑀯𑀘𑀦𑀁 𑀬𑀁 𑀉𑀤𑁆𑀤𑀺𑀲𑁆𑀲 𑀧𑀬𑀼𑀢𑁆𑀢𑀁, 𑀢𑀲𑁆𑀫𑀺𑀁 𑀔𑀫𑀸𑀧𑀺𑀢𑁂 𑀔𑀫𑀸𑀧𑀓𑀲𑁆𑀲 𑀧𑀝𑀺𑀧𑀸𑀓𑀢𑀺𑀓𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀅𑀬𑀁 𑀫𑀬𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁭𑁬. 𑀩𑁄𑀥𑀢𑁆𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀦 𑀅𑀢𑁆𑀢𑀦𑁄 𑀩𑀼𑀤𑁆𑀥𑀪𑀸𑀯𑀖𑁄𑀲𑀦𑀢𑁆𑀣𑀸𑀬. 𑀯𑀸𑀤𑀢𑁆𑀣𑀸𑀬𑀸𑀢𑀺 𑀧𑀭𑀯𑀸𑀤𑀪𑀜𑁆𑀚𑀦𑀯𑀸𑀤𑀢𑁆𑀣𑀸𑀬. 𑀭𑀸𑀕𑀸𑀤𑀺𑀲𑀫𑀦𑀢𑁆𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀦 𑀅𑀦𑁆𑀢𑁂𑀯𑀸𑀲𑀺𑀓𑀫𑁆𑀬𑀢𑀸𑀬. 𑀑𑀖𑀦𑀺𑀢𑁆𑀣𑀭𑀡𑀢𑁆𑀣𑀸𑀬𑀸𑀢𑀺 𑀘𑀢𑀼𑀭𑁄𑀖𑀦𑀺𑀢𑁆𑀣𑀭𑀡𑀢𑁆𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀲𑀩𑁆𑀩𑀲𑁄 𑀑𑀭𑀧𑀸𑀭𑀸𑀢𑀺𑀡𑁆𑀡𑀫𑀸𑀯𑀳𑀢𑁆𑀢𑀸 𑀤𑁂𑀲𑀦𑀸𑀬. 𑀲𑀩𑁆𑀩𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀓𑀺𑀮𑁂𑀲𑀸𑀦𑀁 𑀮𑁂𑀲𑁂𑀦𑀧𑀺 𑀤𑁂𑀲𑀦𑀸𑀬 𑀅𑀧𑀭𑀸𑀫𑀝𑁆𑀞𑀪𑀸𑀯𑀢𑁄.

𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀸𑀤𑀺𑀯𑀡𑁆𑀡𑀦𑀸

𑁭𑁭. 𑀇𑀤𑀁 𑀲𑀩𑁆𑀩𑀫𑁆𑀧𑀻𑀢𑀺 𑀲𑀢𑁆𑀢𑀯𑀲𑁆𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 ‘‘𑀲𑀢𑁆𑀢𑀸𑀳’’𑀦𑁆𑀢𑀺 𑀧𑀤𑀁, 𑀇𑀤𑀁 𑀲𑀩𑁆𑀩𑀫𑁆𑀧𑀺 𑀯𑀘𑀦𑀁. 𑀅𑀲𑀞𑁄 𑀧𑀦 𑀅𑀫𑀸𑀬𑀸𑀯𑀻 𑀉𑀚𑀼𑀚𑀸𑀢𑀺𑀓𑁄 𑀢𑀺𑀓𑁆𑀔𑀧𑀜𑁆𑀜𑁄 𑀉𑀕𑁆𑀖𑀝𑀺𑀢𑀜𑁆𑀜𑀽𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁄 𑀳𑀺 𑀢𑀁𑀫𑀼𑀳𑀼𑀢𑁆𑀢𑁂𑀦𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻𑀢𑀺. 𑀯𑀗𑁆𑀓𑀯𑀗𑁆𑀓𑁄𑀢𑀺 𑀓𑀸𑀬𑀯𑀗𑁆𑀓𑀸𑀤𑀻𑀳𑀺𑀧𑀺 𑀯𑀗𑁆𑀓𑁂𑀳𑀺 𑀯𑀗𑁆𑀓𑁄 𑀚𑀺𑀫𑁆𑀳𑁄 𑀓𑀼𑀝𑀺𑀮𑁄. ‘‘𑀲𑀞𑀁 𑀧𑀦𑀸𑀳𑀁 𑀅𑀦𑀼𑀲𑀸𑀲𑀺𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺 𑀦 𑀇𑀤𑀁 𑀪𑀕𑀯𑀸 𑀓𑀺𑀮𑀸𑀲𑀼𑀪𑀸𑀯𑁂𑀦𑁂𑀯 𑀯𑀤𑀢𑀺, 𑀅𑀣 𑀔𑁄 𑀢𑀲𑁆𑀲 𑀅𑀪𑀸𑀚𑀦𑀪𑀸𑀯𑁂𑀦𑁂𑀯.

𑁭𑁮. 𑀧𑀓𑀢𑀺𑀬𑀸 𑀆𑀘𑀭𑀺𑀬𑁄𑀢𑀺 𑀬𑁄 𑀏𑀯 𑀢𑀼𑀫𑁆𑀳𑀸𑀓𑀁 𑀇𑀢𑁄 𑀧𑀼𑀩𑁆𑀩𑁂 𑀧𑀓𑀢𑀺𑀬𑀸 𑀆𑀘𑀭𑀺𑀬𑁄 𑀅𑀳𑁄𑀲𑀺, 𑀲𑁄 𑀏𑀯 𑀇𑀤𑀸𑀦𑀺𑀧𑀺 𑀧𑀼𑀩𑁆𑀩𑀸𑀘𑀺𑀡𑁆𑀡𑀯𑀲𑁂𑀦 𑀆𑀘𑀭𑀺𑀬𑁄 𑀳𑁄𑀢𑀼, 𑀦 𑀫𑀬𑀁 𑀢𑀼𑀫𑁆𑀳𑁂 𑀅𑀦𑁆𑀢𑁂𑀯𑀸𑀲𑀺𑀓𑁂 𑀓𑀸𑀢𑀼𑀓𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀫𑀬𑀁 𑀢𑀼𑀫𑁆𑀳𑀸𑀓𑀁 𑀉𑀤𑁆𑀤𑁂𑀲𑁂𑀦 𑀅𑀢𑁆𑀣𑀺𑀓𑀸, 𑀥𑀫𑁆𑀫𑀢𑀦𑁆𑀢𑀺 𑀫𑁂𑀯 𑀧𑀦 𑀢𑀼𑀫𑁆𑀳𑁂 𑀜𑀸𑀧𑁂𑀢𑀼𑀓𑀸𑀫𑀫𑁆𑀳𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀚𑀻𑀯𑀢𑁄𑀢𑀺 𑀚𑀻𑀯𑀺𑀓𑀸𑀬 𑀯𑀼𑀢𑁆𑀢𑀺𑀢𑁄. 𑀅𑀓𑀼𑀲𑀮𑀸𑀢𑀺 𑀓𑁄𑀝𑁆𑀞𑀸𑀲𑀁 𑀧𑀢𑁆𑀢𑀸𑀢𑀺 𑀅𑀓𑀼𑀲𑀮𑀸𑀢𑀺 𑀢𑀁 𑀢𑀁 𑀓𑁄𑀝𑁆𑀞𑀸𑀲𑀢𑀁𑀬𑁂𑀯 𑀉𑀧𑀕𑀢𑀸. 𑀓𑀺𑀮𑁂𑀲𑀤𑀭𑀣𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀓𑀺𑀮𑁂𑀲𑀤𑀭𑀣𑀲𑀳𑀺𑀢𑀸 𑀢𑀁𑀲𑀫𑁆𑀩𑀦𑁆𑀥𑀦𑀢𑁄. 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀁 𑀳𑀺𑀢𑀸𑀢𑀺 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑀸. 𑀲𑀁𑀓𑀺𑀮𑁂𑀲𑁄 𑀏𑀢𑁆𑀣 𑀅𑀢𑁆𑀣𑀺, 𑀲𑀁𑀓𑀺𑀮𑁂𑀲𑁂 𑀯𑀸 𑀦𑀺𑀬𑀼𑀢𑁆𑀢𑀸𑀢𑀺 𑀲𑀁𑀓𑀺𑀮𑁂𑀲𑀺𑀓𑀸. 𑀯𑁄𑀤𑀸𑀦𑀁 𑀯𑀼𑀘𑁆𑀘𑀢𑀺 𑀯𑀺𑀲𑀼𑀤𑁆𑀥𑀺, 𑀢𑀲𑁆𑀲 𑀧𑀘𑁆𑀘𑀬𑀪𑀽𑀢𑀢𑁆𑀢𑀸 𑀯𑁄𑀤𑀸𑀦𑀺𑀬𑀸. 𑀢𑀣𑀸𑀪𑀽𑀢𑀸 𑀘𑁂𑀢𑁂 𑀯𑁄𑀤𑀸𑀧𑁂𑀦𑁆𑀢𑀻𑀢𑀺 𑀆𑀳 ‘‘𑀲𑀢𑁆𑀢𑁂 𑀯𑁄𑀤𑀸𑀧𑁂𑀦𑁆𑀢𑀻’’𑀢𑀺. 𑀲𑀺𑀔𑀸𑀧𑁆𑀧𑀢𑁆𑀢𑀸 𑀧𑀜𑁆𑀜𑀸𑀬 𑀧𑀸𑀭𑀺𑀧𑀽𑀭𑀺𑀯𑁂𑀧𑀼𑀮𑁆𑀮𑀢𑀸 𑀫𑀕𑁆𑀕𑀨𑀮𑀯𑀲𑁂𑀦𑁂𑀯 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀫𑀕𑁆𑀕𑀧𑀜𑁆𑀜𑀸…𑀧𑁂… 𑀯𑁂𑀧𑀼𑀮𑁆𑀮𑀢’’𑀦𑁆𑀢𑀺. 𑀉𑀪𑁄𑀧𑀺 𑀯𑀸 𑀏𑀢𑀸𑀦𑀺 𑀧𑀸𑀭𑀺𑀧𑀽𑀭𑀺𑀯𑁂𑀧𑀼𑀮𑁆𑀮𑀸𑀦𑀺. 𑀬𑀸 𑀳𑀺 𑀢𑀲𑁆𑀲 𑀧𑀸𑀭𑀺𑀧𑀽𑀭𑀻, 𑀲𑀸 𑀏𑀯 𑀯𑁂𑀧𑀼𑀮𑁆𑀮𑀢𑀸𑀢𑀺. 𑀢𑀢𑁄𑀢𑀺 𑀲𑀁𑀓𑀺𑀮𑁂𑀲𑀥𑀫𑁆𑀫𑀧𑁆𑀧𑀳𑀸𑀦𑀯𑁄𑀤𑀸𑀦𑀥𑀫𑁆𑀫𑀸𑀪𑀺𑀩𑀼𑀤𑁆𑀥𑀺𑀳𑁂𑀢𑀼.

𑁭𑁯. ‘‘𑀬𑀣𑀸 𑀫𑀸𑀭𑁂𑀦𑀸’’𑀢𑀺 𑀦𑀬𑀺𑀤𑀁 𑀦𑀺𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀅𑀣 𑀔𑁄 𑀢𑀣𑀸𑀪𑀸𑀯𑀓𑀣𑀦𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀫𑀸𑀭𑁄 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀣𑀸𑀢𑀺 𑀫𑀸𑀭𑁂𑀦 𑀢𑁂𑀲𑀁 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀢𑁆𑀢𑀺𑀢𑁄 𑀧𑀘𑁆𑀙𑀸 𑀅𑀜𑁆𑀜𑀸𑀲𑀻𑀢𑀺 𑀬𑁄𑀚𑀦𑀸. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀧𑀕𑁂𑀯 𑀦 𑀅𑀜𑁆𑀜𑀸𑀲𑀻𑀢𑀺? 𑀅𑀦𑀸𑀯𑀚𑁆𑀚𑀺𑀢𑀢𑁆𑀢𑀸. 𑀫𑀸𑀭𑀁 𑀧𑀝𑀺𑀩𑀸𑀳𑀺𑀢𑁆𑀯𑀸𑀢𑀺 𑀫𑀸𑀭𑁂𑀦 𑀢𑁂𑀲𑀼 𑀓𑀢𑀁 𑀧𑀭𑀺𑀬𑀼𑀝𑁆𑀞𑀸𑀦𑀁 𑀯𑀺𑀥𑀫𑁂𑀢𑁆𑀯𑀸, 𑀦 𑀢𑁂𑀲𑀁 𑀲𑀢𑀺 𑀧𑀬𑁄𑀚𑀦𑁂 𑀩𑀼𑀤𑁆𑀥𑀸𑀦𑀁 𑀤𑀼𑀓𑁆𑀓𑀭𑀁. 𑀲𑁄𑀢𑀺 𑀫𑀕𑁆𑀕𑀨𑀮𑀼𑀧𑁆𑀧𑀢𑁆𑀢𑀺𑀳𑁂𑀢𑀼. 𑀢𑁂𑀲𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁.

𑀨𑀼𑀝𑁆𑀞𑀸𑀢𑀺 𑀧𑀭𑀺𑀬𑀼𑀝𑁆𑀞𑀸𑀦𑀯𑀲𑁂𑀦 𑀨𑀼𑀝𑁆𑀞𑀸. 𑀬𑀢𑁆𑀭𑀸𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀦𑁆𑀢𑀺 𑀆𑀳 ‘‘𑀬𑁂𑀲𑀽’’𑀢𑀺. 𑀅𑀜𑁆𑀜𑀸𑀡𑀢𑁆𑀣𑀦𑁆𑀢𑀺 𑀆𑀚𑀸𑀦𑀦𑀢𑁆𑀣𑀁, 𑀉𑀧𑀲𑀕𑁆𑀕𑀫𑀢𑁆𑀢𑀜𑁆𑀘𑁂𑀢𑁆𑀣 𑀆-𑀓𑀸𑀭𑁄𑀢𑀺 𑀆𑀳 ‘‘𑀚𑀸𑀦𑀦𑀢𑁆𑀣’’𑀦𑁆𑀢𑀺, 𑀯𑀻𑀫𑀁𑀲𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑀁 𑀦𑀼𑀧𑁆𑀧𑀦𑁆𑀦𑀦𑁆𑀢𑀺 ‘‘𑀚𑀸𑀦𑀸𑀫 𑀢𑀸𑀯𑀲𑁆𑀲 𑀥𑀫𑁆𑀫’’𑀦𑁆𑀢𑀺 𑀆𑀚𑀸𑀦𑀦𑀢𑁆𑀣𑀁 ‘‘𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀲𑁆𑀲𑀸𑀫𑀸’’𑀢𑀺 𑀏𑀓𑀲𑁆𑀫𑀺𑀁 𑀤𑀺𑀯𑀲𑁂 𑀏𑀓𑀯𑀸𑀭𑀫𑁆𑀧𑀺 𑀢𑁂𑀲𑀁 𑀘𑀺𑀢𑁆𑀢𑀁 𑀦𑀼𑀧𑁆𑀧𑀦𑁆𑀦𑀁. 𑀲𑀢𑁆𑀢𑀸𑀳𑁄 𑀧𑀦 𑀯𑀼𑀘𑁆𑀘𑀫𑀸𑀦𑁄 𑀏𑀢𑁂𑀲𑀁 𑀓𑀺𑀁 𑀓𑀭𑀺𑀲𑁆𑀲𑀢𑀻𑀢𑀺 𑀬𑁄𑀚𑀦𑀸. 𑀲𑀢𑁆𑀢𑀸𑀳𑀁 𑀧𑀽𑀭𑁂𑀢𑀼𑀦𑁆𑀢𑀺 𑀲𑀢𑁆𑀢𑀸𑀳𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀽𑀭𑁂𑀢𑀼𑀁, 𑀩𑁆𑀭𑀳𑁆𑀫𑀘𑀭𑀺𑀬𑀯𑀲𑁂𑀦 𑀯𑀸 𑀲𑀢𑁆𑀢𑀸𑀳𑀁 𑀧𑀽𑀭𑁂𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀯𑀸𑀤𑀪𑀺𑀦𑁆𑀤𑀦𑀦𑁆𑀢𑀺 𑀧𑀭𑀯𑀸𑀤𑀫𑀤𑁆𑀤𑀦𑀁. 𑀲𑀓𑀯𑀸𑀤𑀲𑀫𑀼𑀲𑁆𑀲𑀸𑀧𑀦𑀦𑁆𑀢𑀺 𑀲𑀓𑀯𑀸𑀤𑀧𑀕𑁆𑀕𑀡𑁆𑀳𑀦𑀁. 𑀯𑀸𑀲𑀦𑀸𑀬𑀸𑀢𑀺 𑀲𑀘𑁆𑀘𑀲𑀫𑁆𑀧𑀝𑀺𑀯𑁂𑀥𑀯𑀸𑀲𑀦𑀸𑀬. 𑀦𑁂𑀲𑀦𑁆𑀢𑀺 𑀘 𑀧𑀓𑀭𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀤𑀜𑁆𑀜𑁂𑀲𑀫𑁆𑀧𑀺 𑀳𑀺 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸, 𑀧𑀭𑀫𑁆𑀧𑀭𑀸𑀬 𑀘 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀲𑀼𑀡𑀦𑁆𑀢𑀸𑀦𑀁 𑀯𑀸𑀲𑀦𑀸𑀬 𑀧𑀘𑁆𑀘𑀬𑁄 𑀏𑀯𑀸𑀢𑀺. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀦 𑀯𑀺𑀪𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀉𑀤𑀼𑀫𑁆𑀩𑀭𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.

𑁩. 𑀘𑀓𑁆𑀓𑀯𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑀅𑀢𑁆𑀢𑀤𑀻𑀧𑀲𑀭𑀡𑀢𑀸𑀯𑀡𑁆𑀡𑀦𑀸

𑁮𑁦. 𑀉𑀢𑁆𑀢𑀸𑀦𑀁 𑀯𑀼𑀘𑁆𑀘𑀢𑀺 𑀧𑀸𑀓𑀝𑀁, 𑀢𑀧𑁆𑀧𑀝𑀺𑀓𑁆𑀔𑁂𑀧𑁂𑀦 𑀅𑀦𑀼𑀢𑁆𑀢𑀸𑀦𑀁 𑀅𑀧𑀸𑀓𑀝𑀁, 𑀧𑀝𑀺𑀘𑁆𑀙𑀦𑁆𑀦𑀁, 𑀅𑀧𑀘𑀼𑀭𑀁, 𑀤𑀼𑀯𑀺𑀜𑁆𑀜𑁂𑀬𑁆𑀬𑀜𑁆𑀘. 𑀅𑀦𑀼𑀢𑁆𑀢𑀸𑀦𑀸𑀦𑀁 𑀧𑀤𑀸𑀦𑀁 𑀯𑀡𑁆𑀡𑀦𑀸 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸. 𑀉𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸𑀬 𑀧𑀬𑁄𑀚𑀦𑀸𑀪𑀸𑀯𑀢𑁄 𑀅𑀦𑀼𑀢𑁆𑀢𑀸𑀦𑀕𑁆𑀕𑀳𑀡𑀁. ‘‘𑀫𑀸𑀢𑀼𑀮𑀸’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀮𑀤𑁆𑀥𑀦𑀸𑀫𑁄 𑀏𑀓𑁄 𑀭𑀼𑀓𑁆𑀔𑁄, 𑀢𑀲𑁆𑀲𑀸 𑀆𑀲𑀦𑁆𑀦𑀧𑁆𑀧𑀤𑁂𑀲𑁂 𑀫𑀸𑀧𑀺𑀢𑀢𑁆𑀢𑀸 𑀦𑀕𑀭𑀫𑁆𑀧𑀺 ‘‘𑀫𑀸𑀢𑀼𑀮𑀸’’ 𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀸𑀢𑀼𑀮𑀸𑀬𑀦𑁆𑀢𑀺 𑀏𑀯𑀁 𑀦𑀸𑀫𑀓𑁂 𑀦𑀕𑀭𑁂’’𑀢𑀺. 𑀅𑀯𑀺𑀤𑀽𑀭𑁂𑀢𑀺 𑀢𑀲𑁆𑀲 𑀦𑀕𑀭𑀲𑁆𑀲 𑀅𑀯𑀺𑀤𑀽𑀭𑁂.

𑀓𑀸𑀫𑀜𑁆𑀘𑁂𑀢𑁆𑀣 𑀲𑀼𑀢𑁆𑀢𑁂 ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀭𑀸𑀚𑀸 𑀤𑀴𑁆𑀳𑀦𑁂𑀫𑀺 𑀦𑀸𑀫 𑀅𑀳𑁄𑀲𑀻’’𑀢𑀺𑀆𑀤𑀺𑀦𑀸 𑀅𑀢𑀻𑀢𑀯𑀁𑀲𑀤𑀻𑀧𑀺𑀓𑀸 𑀓𑀣𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀆𑀕𑀢𑀸, ‘‘𑀅𑀟𑁆𑀠𑀢𑁂𑀬𑁆𑀬𑀯𑀲𑁆𑀲𑀲𑀢𑀸𑀬𑀼𑀓𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀯𑀲𑁆𑀲𑀲𑀢𑀸𑀬𑀼𑀓𑀸 𑀧𑀼𑀢𑁆𑀢𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀧𑀦 𑀲𑀯𑀺𑀲𑁂𑀲𑀁 𑀅𑀦𑀸𑀕𑀢𑀢𑁆𑀣𑀧𑀝𑀺𑀲𑀁𑀬𑀼𑀢𑁆𑀢𑀸 𑀓𑀣𑀸 𑀆𑀕𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀦𑀸𑀕𑀢𑀯𑀁𑀲𑀤𑀻𑀧𑀺𑀓𑀸𑀬 𑀲𑀼𑀢𑁆𑀢𑀦𑁆𑀢𑀓𑀣𑀸𑀬𑀸’’𑀢𑀺. 𑀅𑀦𑀸𑀕𑀢𑀢𑁆𑀣𑀤𑀻𑀧𑀦𑀜𑁆𑀳𑀺 𑀅𑀘𑁆𑀙𑀭𑀺𑀬𑀁, 𑀢𑀢𑁆𑀣𑀸𑀧𑀺 𑀅𑀦𑀸𑀕𑀢𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀝𑀺𑀧𑀢𑁆𑀢𑀺𑀓𑀺𑀢𑁆𑀢𑀦𑀁 𑀅𑀘𑁆𑀙𑀭𑀺𑀬𑀢𑀫𑀁. 𑀲𑀫𑀸𑀕𑀫𑁂𑀦𑀸𑀢𑀺 𑀲𑀦𑁆𑀦𑀺𑀧𑀸𑀢𑁂𑀦.

‘‘𑀪𑀢𑁆𑀢𑀕𑁆𑀕𑀁 𑀅𑀫𑀦𑀸𑀧’’𑀦𑁆𑀢𑀺𑀆𑀤𑀺 𑀓𑁂𑀯𑀮𑀁 𑀢𑁂𑀲𑀁 𑀧𑀭𑀺𑀯𑀺𑀢𑀓𑁆𑀓𑀫𑀢𑁆𑀢𑀁. 𑀅𑀫𑀦𑀸𑀧𑀦𑁆𑀢𑀺 𑀅𑀫𑀦𑀼𑀜𑁆𑀜𑀁. 𑀩𑀼𑀤𑁆𑀥𑁂𑀲𑀼 𑀓𑀢𑁄 𑀅𑀧𑁆𑀧𑀓𑁄𑀧𑀺 𑀅𑀧𑀭𑀸𑀥𑁄 𑀅𑀧𑁆𑀧𑀓𑁄 𑀓𑀸𑀭𑁄 𑀯𑀺𑀬 𑀕𑀭𑀼𑀢𑀭𑀯𑀺𑀧𑀸𑀓𑁄𑀢𑀺 𑀆𑀳 ‘‘𑀩𑀼𑀤𑁆𑀥𑁂𑀳𑀺 𑀲𑀤𑁆𑀥𑀺𑀁…𑀧𑁂… 𑀲𑀤𑀺𑀲𑀁 𑀳𑁄𑀢𑀻’’𑀢𑀺. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀫𑀸𑀢𑀼𑀮𑀦𑀕𑀭𑀲𑁆𑀲 𑀲𑀫𑀻𑀧𑁂, 𑀢𑀲𑁆𑀲𑀁 𑀯𑀸 𑀧𑀭𑀺𑀲𑀸𑀬𑀁.

𑀅𑀢𑁆𑀢𑀤𑀻𑀧𑀸𑀢𑀺 𑀏𑀢𑁆𑀣 𑀓𑀸𑀫𑀁 𑀬𑁄 𑀧𑀭𑁄 𑀦 𑀳𑁄𑀢𑀺, 𑀲𑁄 𑀅𑀢𑁆𑀢𑀸𑀢𑀺 𑀲𑀲𑀦𑁆𑀢𑀸𑀦𑁄 ‘‘𑀅𑀢𑁆𑀢𑀸’’𑀢𑀺 𑀯𑀼𑀘𑁆𑀘𑀢𑀺, 𑀳𑀺𑀢𑀲𑀼𑀔𑁂𑀲𑀺𑀪𑀸𑀯𑁂𑀦 𑀧𑀦 𑀅𑀢𑁆𑀢𑀦𑀺𑀩𑁆𑀩𑀺𑀲𑁂𑀲𑀢𑁆𑀢𑀸 𑀥𑀫𑁆𑀫𑁄 𑀇𑀥 ‘‘𑀅𑀢𑁆𑀢𑀸’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀦𑀸𑀳 ‘‘𑀅𑀢𑁆𑀢𑀸 𑀦𑀸𑀫 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁄 𑀥𑀫𑁆𑀫𑁄’’𑀢𑀺. 𑀤𑁆𑀯𑀺𑀥𑀸 𑀆𑀧𑁄 𑀕𑀢𑁄 𑀏𑀢𑁆𑀣𑀸𑀢𑀺 𑀤𑀻𑀧𑁄, 𑀑𑀖𑁂𑀦 𑀅𑀦𑀚𑁆𑀛𑁄𑀢𑁆𑀣𑀢𑁄 𑀪𑀽𑀫𑀺𑀪𑀸𑀕𑁄. 𑀇𑀥 𑀧𑀦 𑀓𑀸𑀫𑁄𑀖𑀸𑀤𑀻𑀳𑀺 𑀅𑀦𑀚𑁆𑀛𑁄𑀢𑁆𑀣𑀭𑀡𑀻𑀬𑀢𑁆𑀢𑀸 𑀤𑀻𑀧𑁄 𑀯𑀺𑀬𑀸𑀢𑀺 𑀤𑀻𑀧𑁄, 𑀅𑀢𑁆𑀢𑀸 𑀤𑀻𑀧𑁄 𑀧𑀢𑀺𑀝𑁆𑀞𑀸 𑀏𑀢𑁂𑀲𑀦𑁆𑀢𑀺 𑀅𑀢𑁆𑀢𑀤𑀻𑀧𑀸. 𑀢𑁂𑀦𑀸𑀳 ‘‘𑀅𑀢𑁆𑀢𑀸𑀦𑀁 𑀤𑀻𑀧’’𑀦𑁆𑀢𑀺𑀆𑀤𑀺. 𑀤𑀻𑀧𑀪𑀸𑀯𑁄 𑀘𑁂𑀢𑁆𑀣 𑀧𑀝𑀺𑀲𑀭𑀡𑀢𑀸𑀢𑀺 𑀆𑀳 ‘‘𑀇𑀤𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦’’𑀦𑁆𑀢𑀺. 𑀅𑀜𑁆𑀜𑀲𑀭𑀡𑀧𑀝𑀺𑀓𑁆𑀔𑁂𑀧𑀯𑀘𑀦𑀦𑁆𑀢𑀺 𑀅𑀜𑁆𑀜𑀲𑀭𑀡𑀪𑀸𑀯𑀧𑀝𑀺𑀓𑁆𑀔𑁂𑀧𑀯𑀘𑀦𑀁. 𑀇𑀤𑀜𑁆𑀳𑀺 𑀦 𑀅𑀜𑁆𑀜𑀁 𑀲𑀭𑀡𑀁 𑀓𑀢𑁆𑀯𑀸 𑀯𑀺𑀳𑀭𑀡𑀲𑁆𑀲𑁂𑀯 𑀧𑀝𑀺𑀓𑁆𑀔𑁂𑀧𑀯𑀘𑀦𑀁, 𑀅𑀣 𑀔𑁄 𑀅𑀜𑁆𑀜𑀲𑁆𑀲 𑀲𑀭𑀡𑀲𑀪𑀸𑀯𑀲𑁆𑀲𑁂𑀯 𑀧𑀝𑀺𑀓𑁆𑀔𑁂𑀧𑀯𑀘𑀦𑀁 𑀢𑀧𑁆𑀧𑀝𑀺𑀓𑁆𑀔𑁂𑀧𑁂 𑀘 𑀢𑁂𑀦 𑀇𑀢𑀭𑀲𑁆𑀲𑀸𑀧𑀺 𑀧𑀝𑀺𑀓𑁆𑀔𑁂𑀧𑀲𑀺𑀤𑁆𑀥𑀺𑀢𑁄. 𑀢𑁂𑀦𑀸𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀇𑀤𑀸𑀦𑀺 𑀢𑀫𑁂𑀯𑀢𑁆𑀣𑀁 𑀲𑀼𑀢𑁆𑀢𑀦𑁆𑀢𑀭𑁂𑀦 𑀲𑀸𑀥𑁂𑀢𑀼𑀁 ‘‘𑀯𑀼𑀢𑁆𑀢𑀫𑁆𑀧𑀺 𑀘𑁂𑀢’’𑀦𑁆𑀢𑀺𑀆𑀤𑀺. 𑀬𑀤𑀺 𑀏𑀢𑁆𑀣 𑀧𑀸𑀓𑀢𑀺𑀓𑁄 𑀅𑀢𑁆𑀢𑀸 𑀇𑀘𑁆𑀙𑀺𑀢𑁄, 𑀓𑀣𑀁 𑀢𑀲𑁆𑀲 𑀤𑀻𑀧𑀲𑀭𑀡𑀪𑀸𑀯𑁄, 𑀢𑀲𑁆𑀫𑀸 𑀅𑀥𑀺𑀧𑁆𑀧𑀸𑀬𑀺𑀓𑁄 𑀏𑀢𑁆𑀣 𑀅𑀢𑁆𑀢𑀸 𑀪𑀯𑁂𑀬𑁆𑀬𑀸𑀢𑀺 𑀧𑀼𑀘𑁆𑀙𑀢𑀺 ‘‘𑀓𑁄 𑀧𑀦𑁂𑀢𑁆𑀣 𑀅𑀢𑁆𑀢𑀸 𑀦𑀸𑀫𑀸’’𑀢𑀺. 𑀇𑀢𑀭𑁄 𑀬𑀣𑀸𑀥𑀺𑀧𑁆𑀧𑁂𑀢𑀁 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁄 𑀥𑀫𑁆𑀫𑁄’’𑀢𑀺. 𑀤𑀼𑀢𑀺𑀬𑀯𑀸𑀭𑁄𑀧𑀺 𑀧𑀞𑀫𑀯𑀸𑀭𑀲𑁆𑀲𑁂𑀯 𑀧𑀭𑀺𑀬𑀸𑀬𑀪𑀸𑀯𑁂𑀦 𑀤𑁂𑀲𑀺𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀦𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀕𑁄𑀘𑀭𑁂𑀢𑀺 𑀪𑀺𑀓𑁆𑀔𑀽𑀦𑀁 𑀕𑁄𑀘𑀭𑀝𑁆𑀞𑀸𑀦𑀪𑀽𑀢𑁂. 𑀢𑁂𑀦𑀸𑀳 ‘‘𑀘𑀭𑀺𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑁂’’𑀢𑀺. 𑀲𑀓𑁂𑀢𑀺 𑀓𑀣𑀁 𑀧𑀦𑀸𑀬𑀁 𑀪𑀺𑀓𑁆𑀔𑀽𑀦𑀁 𑀲𑀓𑁄𑀢𑀺 𑀆𑀳 ‘‘𑀧𑁂𑀢𑁆𑀢𑀺𑀓𑁂 𑀯𑀺𑀲𑀬𑁂’’𑀢𑀺. 𑀧𑀺𑀢𑀺𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑁄 𑀆𑀕𑀢𑀢𑁆𑀢𑀸 ‘‘𑀅𑀬𑀁 𑀢𑀼𑀫𑁆𑀳𑀸𑀓𑀁 𑀕𑁄𑀘𑀭𑁄’’𑀢𑀺 𑀢𑁂𑀦 𑀉𑀤𑁆𑀤𑀺𑀝𑁆𑀞𑀢𑁆𑀢𑀸 𑀧𑁂𑀢𑁆𑀢𑀺𑀓𑁂 𑀯𑀺𑀲𑀬𑁂𑀢𑀺. 𑀘𑀭𑀦𑁆𑀢𑀦𑁆𑀢𑀺 𑀲𑀸𑀫𑀺𑀅𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀅𑀬𑀫𑁂𑀯𑀢𑁆𑀣𑁄’’𑀢𑀺, 𑀘𑀭𑀦𑁆𑀢𑀸𑀦𑀦𑁆𑀢𑀺 𑀘 𑀅𑀢𑁆𑀣𑁄, 𑀢𑁂𑀦𑀸𑀬𑀁 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁂𑀦𑀧𑀺 𑀯𑀘𑀦𑀯𑀺𑀧𑀮𑁆𑀮𑀸𑀲𑁂𑀦𑀧𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀺𑀮𑁂𑀲𑀫𑀸𑀭𑀲𑁆𑀲 𑀑𑀢𑀸𑀭𑀸𑀮𑀸𑀪𑁂𑀦𑁂𑀯 𑀇𑀢𑀭𑀫𑀸𑀭𑀸𑀦𑀫𑁆𑀧𑀺 𑀑𑀢𑀸𑀭𑀸𑀮𑀸𑀪𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦𑀢𑁆𑀣𑁄𑀢𑀺 𑀕𑁄𑀘𑀭𑁂 𑀘𑀭𑀡𑀁 𑀲𑀦𑁆𑀥𑀸𑀬𑀸𑀳, 𑀯𑀢𑁆𑀣𑀼 𑀧𑀦 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀆𑀕𑀢𑀁.

𑀲𑀓𑀼𑀡𑁂 𑀳𑀦𑁆𑀢𑀻𑀢𑀺 𑀲𑀓𑀼𑀡𑀕𑁆𑀖𑀺, 𑀫𑀳𑀸𑀲𑁂𑀦𑀲𑀓𑀼𑀡𑁄. 𑀅𑀚𑁆𑀛𑀧𑁆𑀧𑀢𑁆𑀢𑀸𑀢𑀺 𑀅𑀪𑀺𑀪𑀯𑀦𑀯𑀲𑁂𑀦 𑀧𑀢𑁆𑀢𑀸 𑀉𑀧𑀕𑀢𑀸. 𑀦 𑀫𑁆𑀬𑀸𑀬𑀦𑁆𑀢𑀺 𑀫𑁂 𑀅𑀬𑀁 𑀲𑀓𑀼𑀡𑀕𑁆𑀖𑀺 𑀦𑀸𑀮𑀁 𑀅𑀪𑀯𑀺𑀲𑁆𑀲. 𑀦𑀗𑁆𑀕𑀮𑀓𑀝𑁆𑀞𑀓𑀭𑀡𑀦𑁆𑀢𑀺 𑀦𑀗𑁆𑀕𑀮𑁂𑀦 𑀓𑀲𑀺𑀢𑀧𑁆𑀧𑀤𑁂𑀲𑁄. 𑀮𑁂𑀟𑁆𑀟𑀼𑀝𑁆𑀞𑀸𑀦𑀦𑁆𑀢𑀺 𑀮𑁂𑀟𑁆𑀟𑀽𑀦𑀁 𑀉𑀝𑁆𑀞𑀧𑀺𑀢𑀝𑁆𑀞𑀸𑀦𑀁. 𑀲𑀓𑁂 𑀩𑀮𑁂𑀢𑀺 𑀅𑀢𑁆𑀢𑀦𑁄 𑀩𑀮𑀳𑁂𑀢𑀼. 𑀅𑀧𑀢𑁆𑀣𑀤𑁆𑀥𑀸𑀢𑀺 𑀅𑀯𑀕𑀸𑀴𑁆𑀳𑀢𑁆𑀣𑀫𑁆𑀪𑀸 𑀲𑀜𑁆𑀚𑀸𑀢𑀢𑁆𑀣𑀫𑁆𑀪𑀸. 𑀅𑀲𑁆𑀲𑀭𑀫𑀸𑀦𑀸𑀢𑀺 𑀅𑀯𑁆𑀳𑀸𑀬𑀦𑁆𑀢𑀻.

𑀫𑀳𑀦𑁆𑀢𑀁 𑀮𑁂𑀟𑁆𑀟𑀼𑀦𑁆𑀢𑀺 𑀦𑀗𑁆𑀕𑀮𑁂𑀦 𑀪𑀺𑀦𑁆𑀦𑀝𑁆𑀞𑀸𑀦𑁂 𑀲𑀼𑀓𑁆𑀔𑀢𑀸𑀬 𑀢𑀺𑀔𑀺𑀡𑀲𑀺𑀗𑁆𑀕𑀅𑀬𑁄𑀖𑀦𑀲𑀤𑀺𑀲𑀁 𑀫𑀳𑀦𑁆𑀢𑀁 𑀮𑁂𑀟𑁆𑀟𑀼𑀁. 𑀅𑀪𑀺𑀭𑀼𑀳𑀺𑀢𑁆𑀯𑀸𑀢𑀺 𑀢𑀲𑁆𑀲 𑀅𑀥𑁄𑀪𑀸𑀕𑁂𑀦 𑀅𑀢𑁆𑀢𑀦𑀸 𑀧𑀯𑀺𑀲𑀺𑀢𑁆𑀯𑀸 𑀦𑀺𑀮𑀻𑀦𑀬𑁄𑀕𑁆𑀕𑀧𑁆𑀧𑀤𑁂𑀲𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀲𑁆𑀲𑀼𑀧𑀭𑀺 𑀘𑀗𑁆𑀓𑀫𑀦𑁆𑀢𑁄 𑀅𑀲𑁆𑀲𑀭𑀫𑀸𑀦𑁄 𑀅𑀝𑁆𑀞𑀸𑀲𑀺. ‘‘𑀏𑀳𑀺 𑀔𑁄’’𑀢𑀺𑀆𑀤𑀺 𑀢𑀲𑁆𑀲 𑀅𑀲𑁆𑀲𑀭𑀫𑀸𑀦𑀸𑀓𑀸𑀭𑀤𑀲𑁆𑀲𑀦𑀁. 𑀲𑀦𑁆𑀦𑀬𑁆𑀳𑀸𑀢𑀺 𑀯𑀸𑀢𑀕𑁆𑀕𑀳𑀡𑀯𑀲𑁂𑀦 𑀉𑀪𑁄 𑀧𑀓𑁆𑀔𑁂 𑀲𑀫𑀁 𑀞𑀧𑁂𑀢𑁆𑀯𑀸. 𑀧𑀘𑁆𑀘𑀼𑀧𑀸𑀤𑀻𑀢𑀺 𑀧𑀸𑀯𑀺𑀲𑀺. 𑀢𑀢𑁆𑀣𑁂𑀯𑀸𑀢𑀺 𑀬𑀢𑁆𑀣 𑀧𑀼𑀩𑁆𑀩𑁂 𑀮𑀸𑀧𑁄 𑀞𑀺𑀢𑁄, 𑀢𑀢𑁆𑀣𑁂𑀯 𑀮𑁂𑀟𑁆𑀟𑀼𑀫𑁆𑀳𑀺. 𑀉𑀭𑀦𑁆𑀢𑀺 𑀅𑀢𑁆𑀢𑀦𑁄 𑀉𑀭𑀧𑁆𑀧𑀤𑁂𑀲𑀁. 𑀧𑀘𑁆𑀘𑀢𑀸𑀴𑁂𑀲𑀻𑀢𑀺 𑀧𑀢𑀺 𑀅𑀢𑀸𑀴𑁂𑀲𑀺 𑀲𑀸𑀭𑀫𑁆𑀪𑀯𑀲𑁂𑀦 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀧𑀳𑀭𑀡𑀢𑁄 𑀯𑀺𑀥𑀸𑀭𑁂𑀦𑁆𑀢𑀻 𑀧𑀢𑀸𑀴𑁂𑀲𑀺. 𑀆𑀭𑀫𑁆𑀫𑀡𑀦𑁆𑀢𑀺 𑀧𑀘𑁆𑀘𑀬𑀁. ‘‘𑀅𑀯𑀲𑀭’’𑀦𑁆𑀢𑀺 𑀓𑁂𑀘𑀺.

‘‘𑀓𑀼𑀲𑀮𑀸𑀦’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀸𑀬 𑀤𑁂𑀲𑀦𑀸𑀬 𑀓𑁄 𑀅𑀦𑀼𑀲𑀦𑁆𑀥𑀺? 𑀬𑀣𑀸𑀅𑀦𑀼𑀲𑀦𑁆𑀥𑀺 𑀏𑀯. 𑀆𑀤𑀺𑀢𑁄 𑀳𑀺 ‘‘𑀅𑀢𑁆𑀢𑀤𑀻𑀧𑀸, 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀣𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁮𑁦) 𑀬𑁂𑀯 𑀅𑀢𑁆𑀢𑀥𑀫𑁆𑀫𑀧𑀭𑀺𑀬𑀸𑀬𑁂𑀦 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀕𑀳𑀺𑀢𑀸, 𑀢𑁂 𑀬𑁂𑀯𑁂𑀢𑁆𑀣 𑀓𑀼𑀲𑀮𑀕𑁆𑀕𑀳𑀡𑁂𑀦 𑀕𑀳𑀺𑀢𑀸𑀢𑀺. 𑀅𑀦𑀯𑀚𑁆𑀚𑀮𑀓𑁆𑀔𑀡𑀸𑀦𑀦𑁆𑀢𑀺 𑀅𑀯𑀚𑁆𑀚𑀧𑀝𑀺𑀧𑀓𑁆𑀔𑀲𑀪𑀸𑀯𑀸𑀦𑀁. ‘‘𑀅𑀯𑀚𑁆𑀚𑀭𑀳𑀺𑀢𑀲𑀪𑀸𑀯𑀸𑀦’’𑀦𑁆𑀢𑀺 𑀓𑁂𑀘𑀺. 𑀢𑀢𑁆𑀣 𑀧𑀼𑀭𑀺𑀫𑁂 𑀅𑀢𑁆𑀣𑀯𑀺𑀓𑀧𑁆𑀧𑁂 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸 𑀏𑀯 𑀕𑀳𑀺𑀢𑀸, 𑀤𑀼𑀢𑀺𑀬𑁂 𑀧𑀦 𑀯𑀺𑀧𑀸𑀓𑀥𑀫𑁆𑀫𑀸𑀧𑀺. 𑀬𑀤𑀺 𑀏𑀯𑀁, 𑀓𑀣𑀁 𑀢𑁂𑀲𑀁 𑀲𑀫𑀸𑀤𑀸𑀬 𑀯𑀢𑁆𑀢𑀦𑀦𑁆𑀢𑀺? 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁 ‘‘𑀯𑀺𑀧𑀸𑀓𑀥𑀫𑁆𑀫𑀸 𑀲𑀻𑀮𑀸𑀤𑀺 𑀯𑀺𑀬 𑀲𑀫𑀸𑀤𑀸𑀬 𑀯𑀢𑁆𑀢𑀺𑀢𑀩𑁆𑀩𑀸’’𑀢𑀺. 𑀲𑀫𑀸𑀤𑀸𑀦𑀦𑁆𑀢𑀺 𑀧𑀦 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀲𑀫𑁆𑀫𑀸 𑀆𑀤𑀸𑀦𑀁 𑀧𑀘𑁆𑀘𑀬𑀯𑀲𑁂𑀦 𑀧𑀯𑀢𑁆𑀢𑀺 𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀧𑀸𑀓𑀥𑀫𑁆𑀫𑀸 𑀳𑀺 𑀧𑀘𑁆𑀘𑀬𑀯𑀺𑀲𑁂𑀲𑁂𑀳𑀺 𑀲𑀢𑁆𑀢𑀲𑀦𑁆𑀢𑀸𑀦𑁂 𑀲𑀫𑁆𑀫𑀤𑁂𑀯 𑀆𑀳𑀺𑀢𑀸 𑀆𑀬𑀼𑀆𑀤𑀺𑀲𑀫𑁆𑀧𑀢𑁆𑀢𑀺𑀯𑀺𑀲𑁂𑀲𑀪𑀽𑀢𑀸 𑀉𑀧𑀭𑀽𑀧𑀭𑀺𑀓𑀼𑀲𑀮𑀯𑀺𑀲𑁂𑀲𑀼𑀧𑁆𑀧𑀢𑁆𑀢𑀺𑀬𑀸 𑀉𑀧𑀦𑀺𑀲𑁆𑀲𑀬𑀸 𑀳𑁄𑀦𑁆𑀢𑀻𑀢𑀺 𑀯𑀤𑀦𑁆𑀢𑀺. 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀏𑀢𑁆𑀣 𑀧𑀼𑀜𑁆𑀜𑀦𑁆𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦𑀸𑀬𑀁 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀧𑀼𑀜𑁆𑀜𑀨𑀮𑀁 𑀯𑀟𑁆𑀠𑀢𑀻’’𑀢𑀺. 𑀧𑀼𑀜𑁆𑀜𑀨𑀮𑀦𑁆𑀢𑀺 𑀘 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑁂𑀦 𑀯𑀼𑀢𑁆𑀢𑀁 ‘‘𑀧𑀼𑀜𑁆𑀜𑀜𑁆𑀘 𑀧𑀼𑀜𑁆𑀜𑀨𑀮𑀜𑁆𑀘 𑀧𑀼𑀜𑁆𑀜𑀨𑀮’’𑀦𑁆𑀢𑀺 𑀆𑀳 ‘‘𑀉𑀧𑀭𑀽𑀧𑀭𑀺 𑀧𑀼𑀜𑁆𑀜𑀫𑁆𑀧𑀺 𑀧𑀼𑀜𑁆𑀜𑀯𑀺𑀧𑀸𑀓𑁄𑀧𑀺 𑀯𑁂𑀤𑀺𑀢𑀩𑁆𑀩𑁄’’𑀢𑀺.

‘‘𑀫𑀸𑀢𑀸𑀧𑀺𑀢𑀽𑀦’’𑀦𑁆𑀢𑀺𑀆𑀤𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀢𑀲𑁆𑀫𑀸 𑀅𑀜𑁆𑀜𑀫𑁆𑀧𑀺 𑀏𑀯𑀭𑀽𑀧𑀁 𑀳𑁂𑀢𑀽𑀧𑀦𑀺𑀲𑁆𑀲𑀬𑀁 𑀓𑀼𑀲𑀮𑀁 𑀤𑀝𑁆𑀞𑀩𑁆𑀩𑀁. 𑀲𑀺𑀦𑁂𑀳𑀯𑀲𑁂𑀦𑀸𑀢𑀺 𑀉𑀧𑀦𑀺𑀲𑁆𑀲𑀬𑀪𑀽𑀢𑀲𑁆𑀲 𑀲𑀺𑀦𑁂𑀳𑀲𑁆𑀲 𑀯𑀲𑁂𑀦, 𑀦 𑀲𑀫𑁆𑀧𑀬𑀼𑀢𑁆𑀢𑀲𑁆𑀲. 𑀦 𑀳𑀺 𑀲𑀺𑀦𑁂𑀳𑀲𑀫𑁆𑀧𑀬𑀼𑀢𑁆𑀢𑀁 𑀦𑀸𑀫 𑀓𑀼𑀲𑀮𑀁 𑀅𑀢𑁆𑀣𑀺. 𑀫𑀼𑀤𑀼𑀫𑀤𑁆𑀤𑀯𑀘𑀺𑀢𑁆𑀢𑀦𑁆𑀢𑀺 𑀫𑁂𑀢𑁆𑀢𑀸𑀯𑀲𑁂𑀦 𑀅𑀢𑀺𑀯𑀺𑀬 𑀫𑀤𑁆𑀤𑀯𑀦𑁆𑀢𑀁 𑀘𑀺𑀢𑁆𑀢𑀁. 𑀬𑀣𑀸 𑀫𑀢𑁆𑀣𑀓𑀧𑁆𑀧𑀢𑁆𑀢𑀁 𑀯𑀝𑁆𑀝𑀕𑀸𑀫𑀺𑀓𑀼𑀲𑀮𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀸𑀢𑀸𑀧𑀺𑀢𑀽𑀦𑀁 …𑀧𑁂… 𑀫𑀼𑀤𑀼𑀫𑀤𑁆𑀤𑀯𑀘𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀫𑀢𑁆𑀣𑀓𑀧𑁆𑀧𑀢𑁆𑀢𑀫𑁂𑀯 𑀯𑀺𑀯𑀝𑁆𑀝𑀕𑀸𑀫𑀺𑀓𑀼𑀲𑀮𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀢𑁆𑀢𑀸𑀭𑁄 𑀲𑀢𑀺…𑀧𑁂… 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀁. 𑀢𑀤𑀜𑁆𑀜𑁂𑀧𑀺 𑀧𑀦 𑀤𑀸𑀦𑀲𑀻𑀮𑀸𑀤𑀺𑀥𑀫𑁆𑀫𑀸 𑀯𑀝𑁆𑀝𑀲𑁆𑀲 𑀉𑀧𑀦𑀺𑀲𑁆𑀲𑀬𑀪𑀽𑀢𑀸 𑀯𑀝𑁆𑀝𑀕𑀸𑀫𑀺𑀓𑀼𑀲𑀮𑀁 𑀯𑀺𑀯𑀝𑁆𑀝𑀲𑁆𑀲 𑀉𑀧𑀦𑀺𑀲𑁆𑀲𑀬𑀪𑀽𑀢𑀸 𑀯𑀺𑀯𑀝𑁆𑀝𑀕𑀸𑀫𑀺𑀓𑀼𑀲𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀨𑀮𑀯𑀺𑀲𑁂𑀲𑀸𑀯𑀳𑀢𑀸𑀬 𑀨𑀮𑀤𑀸𑀬 𑀓𑁄𑀝𑀺 𑀲𑀺𑀔𑀸𑀧𑁆𑀧𑀢𑁆𑀢𑀺, 𑀤𑁂𑀯𑀮𑁄𑀓𑁂 𑀘 𑀧𑀯𑀢𑁆𑀢𑀺𑀲𑀺𑀭𑀺𑀯𑀺𑀪𑀯𑁄𑀢𑀺 𑀧𑀭𑀺𑀬𑁄𑀲𑀸𑀦𑀁 ‘‘𑀫𑀦𑀼𑀲𑁆𑀲𑀮𑁄𑀓𑁂’’𑀢𑀺 𑀯𑀺𑀲𑁂𑀲𑀺𑀢𑀁, 𑀫𑀦𑀼𑀲𑁆𑀲𑀮𑁄𑀓𑀯𑀲𑁂𑀦𑁂𑀯 𑀘𑀸𑀬𑀁 𑀤𑁂𑀲𑀦𑀸 𑀆𑀕𑀢𑀸𑀢𑀺. 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀬𑁄𑀚𑀦𑀸. 𑀯𑀺𑀯𑀝𑁆𑀝𑀕𑀸𑀫𑀺𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑀁 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 𑀤𑀲𑁆𑀲𑀺𑀲𑁆𑀲𑀢𑀺 ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑁄 𑀦𑀸𑀫 𑀭𑀸𑀚𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁧𑁦𑁮).

𑀤𑀴𑁆𑀳𑀦𑁂𑀫𑀺𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀓𑀣𑀸𑀯𑀡𑁆𑀡𑀦𑀸

𑁮𑁧. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 ‘‘𑀓𑀼𑀲𑀮𑀸𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦’’𑀦𑁆𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁧𑁧𑁦) 𑀲𑀼𑀢𑁆𑀢𑀤𑁂𑀲𑀦𑀸𑀬 𑀆𑀭𑀤𑁆𑀥𑀝𑁆𑀞𑀸𑀦𑁂 𑀯𑀝𑁆𑀝𑀯𑀺𑀯𑀝𑁆𑀝𑀕𑀸𑀫𑀺𑀪𑀸𑀯𑁂𑀦 𑀲𑀸𑀥𑀸𑀭𑀡𑁂 𑀓𑀼𑀲𑀮𑀕𑁆𑀕𑀳𑀡𑁂. 𑀢𑀢𑁆𑀣 𑀯𑀝𑁆𑀝𑀕𑀸𑀫𑀺𑀓𑀼𑀲𑀮𑀸𑀦𑀼𑀲𑀦𑁆𑀥𑀺𑀯𑀲𑁂𑀦 ‘‘𑀪𑀽𑀢𑀧𑀼𑀩𑁆𑀩𑀁 𑀪𑀺𑀓𑁆𑀔𑀯𑁂’’𑀢𑀺 𑀤𑁂𑀲𑀦𑀁 𑀆𑀭𑀪𑀺, 𑀆𑀭𑀪𑀦𑁆𑀢𑁄 𑀘 𑀤𑁂𑀲𑀺𑀬𑀫𑀸𑀦𑀫𑀢𑁆𑀢𑀁. 𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀗𑁆𑀔𑁂𑀧𑀢𑁄 𑀏𑀯𑀁 𑀤𑀻𑀧𑁂𑀢𑁆𑀯𑀸 𑀆𑀭𑀪𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀧𑀞𑀫𑀁 𑀢𑀣𑀸 𑀅𑀤𑀻𑀧𑁂𑀦𑁆𑀢𑁄𑀧𑀺 𑀪𑀕𑀯𑀸 𑀅𑀢𑁆𑀣𑀢𑁄 𑀤𑀻𑀧𑁂𑀢𑀺 𑀯𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁮𑁨. 𑀈𑀲𑀓𑀫𑁆𑀧𑀻𑀢𑀺 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺. 𑀅𑀯𑀲𑀓𑁆𑀓𑀺𑀢𑀦𑁆𑀢𑀺 𑀑𑀕𑀢𑀪𑀝𑁆𑀞𑀁. 𑀦𑁂𑀫𑀺𑀅𑀪𑀺𑀫𑀼𑀔𑀦𑁆𑀢𑀺 𑀦𑁂𑀫𑀺𑀧𑁆𑀧𑀤𑁂𑀲𑀲𑁆𑀲 𑀲𑀫𑁆𑀫𑀼𑀔𑀸. 𑀩𑀦𑁆𑀥𑀺𑀁𑀲𑀼 𑀘𑀓𑁆𑀓𑀭𑀢𑀦𑀲𑁆𑀲 𑀑𑀲𑀓𑁆𑀓𑀺𑀢𑀸𑀦𑁄𑀲𑀓𑁆𑀓𑀺𑀢𑀪𑀸𑀯𑀁 𑀚𑀸𑀦𑀺𑀢𑀼𑀁. 𑀢𑀤𑁂𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀝𑁆𑀞𑀸𑀦𑀸 𑀘𑀯𑀦𑀁. 𑀅𑀢𑀺𑀩𑀮𑀯𑀤𑁄𑀲𑁂𑀢𑀺 𑀭𑀜𑁆𑀜𑁄 𑀩𑀮𑀯𑀢𑀺 𑀅𑀦𑀢𑁆𑀣𑁂 𑀉𑀧𑀝𑁆𑀞𑀺𑀢𑁂 𑀲𑀢𑀺.

𑀅𑀧𑁆𑀧𑀫𑀢𑁆𑀢𑁄𑀢𑀺 𑀭𑀜𑁆𑀜𑁄 𑀆𑀡𑀸𑀬 𑀧𑀫𑀸𑀤𑀁 𑀅𑀓𑀭𑁄𑀦𑁆𑀢𑁄.

𑀏𑀓𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀫𑁂𑀯𑀸𑀢𑀺 𑀚𑀫𑁆𑀩𑀼𑀤𑀻𑀧𑀫𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑁄 𑀉𑀢𑁆𑀢𑀭𑀢𑁄 𑀅𑀲𑁆𑀲𑀓𑀡𑁆𑀡𑀧𑀩𑁆𑀩𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁 𑀳𑀼𑀢𑁆𑀯𑀸 𑀅𑀢𑁆𑀢𑀸𑀦𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀏𑀓𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑁄. 𑀧𑀼𑀜𑁆𑀜𑀺𑀤𑁆𑀥𑀺𑀯𑀲𑁂𑀦𑀸𑀢𑀺 𑀘𑀓𑁆𑀓𑀯𑀢𑁆𑀢𑀺𑀪𑀸𑀯𑀸𑀯𑀳𑀸𑀬 𑀧𑀼𑀜𑁆𑀜𑀺𑀤𑁆𑀥𑀺𑀬𑀸 𑀯𑀲𑁂𑀦.

𑁮𑁩. 𑀏𑀯𑀁 𑀓𑀢𑁆𑀯𑀸𑀢𑀺 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸. 𑀲𑀼𑀓𑀢𑀁 𑀓𑀫𑁆𑀫𑀦𑁆𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀫𑁂𑀯 𑀯𑀤𑀢𑀺.

‘‘𑀤𑀲𑀯𑀺𑀥𑀁, 𑀤𑁆𑀯𑀸𑀤𑀲𑀯𑀺𑀥’’𑀦𑁆𑀢𑀺 𑀘 𑀯𑀼𑀢𑁆𑀢𑀯𑀺𑀪𑀸𑀕𑁄 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀺. 𑀧𑀽𑀭𑁂𑀦𑁆𑀢𑁂𑀦𑁂𑀯𑀸𑀢𑀺 𑀧𑀽𑀭𑁂𑀢𑁆𑀯𑀸 𑀞𑀺𑀢𑁂𑀦𑁂𑀯. 𑀦𑀺𑀤𑁆𑀤𑁄𑀲𑁂𑀢𑀺 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀸𑀦𑀁 𑀤𑁄𑀲𑀸𑀦𑀁 𑀅𑀧𑀕𑀫𑀦𑁂 𑀦𑀺𑀤𑁆𑀤𑁄𑀲𑁂. 𑀘𑀓𑁆𑀓𑀯𑀢𑁆𑀢𑀻𑀦𑀁 𑀯𑀢𑁆𑀢𑁂𑀢𑀺 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀽𑀳𑀺 𑀯𑀢𑁆𑀢𑀺𑀢𑀩𑁆𑀩𑀯𑀢𑁆𑀢𑁂. 𑀪𑀸𑀯𑀺𑀦𑀺 𑀪𑀽𑀢𑁂 𑀯𑀺𑀬 𑀳𑀺 𑀉𑀧𑀘𑀸𑀭𑁄 𑀬𑀣𑀸 ‘‘𑀅𑀕𑀫𑀸 𑀭𑀸𑀚𑀕𑀳𑀁 𑀩𑀼𑀤𑁆𑀥𑁄’’𑀢𑀺 (𑀲𑀼. 𑀦𑀺. 𑁪𑁧𑁦). 𑀅𑀥𑀺𑀕𑀢𑀘𑀓𑁆𑀓𑀯𑀢𑁆𑀢𑀺𑀪𑀸𑀯𑀸𑀧𑀺 𑀳𑀺 𑀢𑁂 𑀢𑀢𑁆𑀣 𑀯𑀢𑁆𑀢𑀦𑁆𑀢𑁂𑀯𑀸𑀢𑀺 𑀢𑀣𑀸 𑀯𑀼𑀢𑁆𑀢𑀁.

𑀘𑀓𑁆𑀓𑀯𑀢𑁆𑀢𑀺𑀅𑀭𑀺𑀬𑀯𑀢𑁆𑀢𑀯𑀡𑁆𑀡𑀦𑀸

𑁮𑁪. 𑀅𑀜𑁆𑀜𑀣𑀸 𑀯𑀢𑁆𑀢𑀺𑀢𑀼𑀁 𑀅𑀤𑁂𑀦𑁆𑀢𑁄 𑀲𑁄 𑀥𑀫𑁆𑀫𑁄 𑀅𑀥𑀺𑀝𑁆𑀞𑀸𑀦𑀁 𑀏𑀢𑀲𑁆𑀲𑀸𑀢𑀺 𑀢𑀤𑀥𑀺𑀝𑁆𑀞𑀸𑀦𑀁, 𑀢𑁂𑀦 𑀢𑀤𑀥𑀺𑀝𑁆𑀞𑀸𑀦𑁂𑀦 𑀘𑁂𑀢𑀲𑀸. 𑀲𑀓𑁆𑀓𑀭𑁄𑀦𑁆𑀢𑁄𑀢𑀺 𑀆𑀤𑀭𑀓𑀺𑀭𑀺𑀬𑀸𑀯𑀲𑁂𑀦 𑀓𑀭𑁄𑀦𑁆𑀢𑁄. 𑀢𑁂𑀦𑀸𑀳 ‘‘𑀬𑀣𑀸’’𑀢𑀺𑀆𑀤𑀺. 𑀕𑀭𑀼𑀁 𑀓𑀭𑁄𑀦𑁆𑀢𑁄𑀢𑀺 𑀧𑀸𑀲𑀸𑀡𑀘𑁆𑀙𑀢𑁆𑀢𑀁 𑀯𑀺𑀬 𑀕𑀭𑀼𑀓𑀭𑀡𑀯𑀲𑁂𑀦 𑀕𑀭𑀼𑀁 𑀓𑀭𑁄𑀦𑁆𑀢𑁄. 𑀢𑁂𑀦𑁂𑀯𑀸𑀳 ‘‘𑀢𑀲𑁆𑀫𑀺𑀁 𑀕𑀸𑀭𑀯𑀼𑀧𑁆𑀧𑀢𑁆𑀢𑀺𑀬𑀸’’𑀢𑀺. 𑀫𑀸𑀦𑁂𑀦𑁆𑀢𑁄𑀢𑀺 𑀲𑀫𑁆𑀪𑀸𑀯𑀦𑀸𑀯𑀲𑁂𑀦 𑀫𑀦𑁂𑀦 𑀧𑀺𑀬𑀸𑀬𑀦𑁆𑀢𑁄. 𑀢𑁂𑀦𑀸𑀳 ‘‘𑀢𑀫𑁂𑀯𑀸’’𑀢𑀺𑀆𑀤𑀺. 𑀏𑀯𑀁 𑀧𑀽𑀚𑀬𑀢𑁄 𑀅𑀧𑀘𑀸𑀬𑀢𑁄 𑀏𑀯𑀜𑁆𑀘 𑀬𑀣𑀸𑀯𑀼𑀢𑁆𑀢𑀲𑀓𑁆𑀓𑀸𑀭𑀸𑀤𑀺𑀲𑀫𑁆𑀪𑀯𑁄𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀁 𑀅𑀧𑀤𑀺𑀲𑀺𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀥𑀫𑁆𑀫𑀸𑀥𑀺𑀧𑀢𑀺𑀪𑀽𑀢𑁄 𑀆𑀕𑀢𑀪𑀸𑀯𑁂𑀦𑀸’’𑀢𑀺 𑀇𑀫𑀺𑀦𑀸 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀲𑁆𑀲 𑀚𑁂𑀝𑁆𑀞𑀓𑀪𑀸𑀯𑁂𑀦 𑀧𑀼𑀭𑀺𑀫𑀧𑀼𑀭𑀺𑀫𑀢𑀭𑀅𑀢𑁆𑀢𑀪𑀸𑀯𑁂𑀲𑀼 𑀲𑀓𑁆𑀓𑀘𑁆𑀘 𑀲𑀫𑀼𑀧𑀘𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. ‘‘𑀥𑀫𑁆𑀫𑀯𑀲𑁂𑀦𑁂𑀯 𑀲𑀩𑁆𑀩𑀓𑀺𑀭𑀺𑀬𑀸𑀦𑀁 𑀓𑀭𑀡𑁂𑀦𑀸’’𑀢𑀺 𑀏𑀢𑁂𑀦 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀲𑁆𑀲𑀸𑀢𑀺 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀬𑀸. 𑀧𑀭𑀁 𑀭𑀓𑁆𑀔𑀦𑁆𑀢𑁄 𑀅𑀜𑁆𑀜𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀅𑀦𑀢𑁆𑀣𑀢𑁄 𑀭𑀓𑁆𑀔𑀦𑁆𑀢𑁄 𑀢𑁂𑀦𑁂𑀯 𑀧𑀭𑀢𑁆𑀣𑀲𑀸𑀥𑀦𑁂𑀦 𑀔𑀦𑁆𑀢𑀺𑀆𑀤𑀺𑀕𑀼𑀡𑁂𑀦 𑀅𑀢𑁆𑀢𑀸𑀦𑀁 𑀢𑀢𑁄 𑀏𑀯 𑀭𑀓𑁆𑀔𑀢𑀺. 𑀫𑁂𑀢𑁆𑀢𑀘𑀺𑀢𑁆𑀢𑀢𑀸𑀢𑀺 𑀫𑁂𑀢𑁆𑀢𑀘𑀺𑀢𑁆𑀢𑀢𑀸𑀬. 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀕𑁂𑀳𑀸𑀤𑀻𑀦𑀁 𑀲𑀻𑀢𑀼𑀡𑁆𑀳𑀸𑀤𑀺𑀧𑀝𑀺𑀩𑀸𑀳𑀦𑁂𑀦 𑀆𑀯𑀭𑀡𑀁. 𑀅𑀦𑁆𑀢𑁄 𑀚𑀦𑀲𑁆𑀫𑀺𑀦𑁆𑀢𑀺 𑀅𑀩𑁆𑀪𑀦𑁆𑀢𑀭𑀪𑀽𑀢𑁂 𑀧𑀼𑀢𑁆𑀢𑀤𑀸𑀭𑀸𑀤𑀺𑀚𑀦𑁂.

‘‘𑀲𑀻𑀮𑀲𑀁𑀯𑀭𑁂 𑀧𑀢𑀺𑀝𑁆𑀞𑀸𑀧𑁂𑀳𑀻’’𑀢𑀺 𑀇𑀫𑀺𑀦𑀸 𑀭𑀓𑁆𑀔𑀁 𑀤𑀲𑁆𑀲𑁂𑀢𑀺, ‘‘𑀯𑀢𑁆𑀣𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀤𑁂𑀳𑀻’’𑀢𑀺 𑀇𑀫𑀺𑀦𑀸 𑀆𑀯𑀭𑀡𑀁, 𑀇𑀢𑀭𑁂𑀦 𑀕𑀼𑀢𑁆𑀢𑀺𑀁. 𑀪𑀢𑁆𑀢𑀯𑁂𑀢𑀦𑀲𑀫𑁆𑀧𑀤𑀸𑀦𑁂𑀦𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀲𑀻𑀮𑀲𑀁𑀯𑀭𑁂 𑀧𑀢𑀺𑀝𑁆𑀞𑀸𑀧𑀦𑀸𑀤𑀻𑀦𑀺 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀏𑀲𑁂𑀯 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺 𑀧𑀺-𑀲𑀤𑁆𑀤𑀕𑁆𑀕𑀳𑀡𑁂𑀲𑀼. 𑀦𑀺𑀕𑀫𑁄 𑀦𑀺𑀯𑀸𑀲𑁄 𑀏𑀢𑁂𑀲𑀦𑁆𑀢𑀺 𑀦𑁂𑀕𑀫𑀸, 𑀏𑀯𑀁 𑀚𑀸𑀦𑀧𑀤𑀸𑀢𑀺 𑀆𑀳 ‘‘𑀦𑀺𑀕𑀫𑀯𑀸𑀲𑀺𑀦𑁄’’𑀢𑀺𑀆𑀤𑀺.

𑀦𑀯𑀯𑀺𑀥𑀸 𑀫𑀸𑀦𑀫𑀤𑀸𑀢𑀺 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺 (𑀲𑀁. 𑀦𑀺. 𑁪.𑁧𑁦𑁮; 𑀥. 𑀲. 𑁧𑁧𑁨𑁧; 𑀯𑀺𑀪. 𑁮𑁬𑁬; 𑀫𑀳𑀸𑀦𑀺. 𑁨𑁧, 𑁧𑁭𑁮) 𑀦𑀬𑀧𑁆𑀧𑀯𑀢𑁆𑀢𑀺𑀬𑀸 𑀦𑀯𑀯𑀺𑀥𑀸 𑀫𑀸𑀦𑀲𑀗𑁆𑀔𑀸𑀢𑀸 𑀫𑀤𑀸. 𑀫𑀸𑀦𑁄 𑀏𑀯 𑀳𑁂𑀢𑁆𑀣 𑀧𑀫𑀚𑁆𑀚𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀺𑀬𑀸 𑀫𑀸𑀦𑀫𑀤𑁄. 𑀲𑁄𑀪𑀦𑁂 𑀓𑀸𑀬𑀺𑀓𑀯𑀸𑀘𑀲𑀺𑀓𑀓𑀫𑁆𑀫𑁂 𑀭𑀢𑁄𑀢𑀺 𑀲𑀽𑀭𑀢𑁄 𑀉-𑀓𑀸𑀭𑀲𑁆𑀲 𑀤𑀻𑀖𑀁 𑀓𑀢𑁆𑀯𑀸, 𑀢𑀲𑁆𑀲 𑀪𑀸𑀯𑁄 𑀲𑁄𑀭𑀘𑁆𑀘𑀁, 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄, 𑀲𑀩𑁆𑀩𑀁 𑀯𑀸 𑀓𑀸𑀬𑀯𑀘𑀻𑀲𑀼𑀘𑀭𑀺𑀢𑀁. 𑀲𑀼𑀝𑁆𑀞𑀼 𑀑𑀭𑀢𑁄𑀢𑀺 𑀲𑁄𑀭𑀢𑁄, 𑀢𑀲𑁆𑀲 𑀪𑀸𑀯𑁄 𑀲𑁄𑀭𑀘𑁆𑀘𑀁, 𑀬𑀣𑀸𑀯𑀼𑀢𑁆𑀢𑀫𑁂𑀯 𑀲𑀼𑀘𑀭𑀺𑀢𑀁. 𑀭𑀸𑀕𑀸𑀤𑀻𑀦𑀦𑁆𑀢𑀺 𑀭𑀸𑀕𑀤𑁄𑀲𑀫𑁄𑀳𑀫𑀸𑀦𑀸𑀤𑀻𑀦𑀁. 𑀤𑀫𑀦𑀸𑀤𑀻𑀳𑀻𑀢𑀺 𑀤𑀫𑀦𑀲𑀫𑀦𑀧𑀭𑀺𑀦𑀺𑀩𑁆𑀩𑀸𑀧𑀦𑁂𑀳𑀺. 𑀏𑀓𑀫𑀢𑁆𑀢𑀸𑀦𑀦𑁆𑀢𑀺 𑀏𑀓𑀁 𑀘𑀺𑀢𑁆𑀢𑀁, 𑀏𑀓𑀘𑁆𑀘𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀭𑀸𑀕𑀸𑀤𑀻𑀦𑀜𑁆𑀳𑀺 𑀧𑀼𑀩𑁆𑀩𑀪𑀸𑀕𑀺𑀬𑀁 𑀤𑀫𑀦𑀸𑀤𑀺𑀧𑀘𑁆𑀘𑁂𑀓𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀦 𑀫𑀕𑁆𑀕𑀓𑁆𑀔𑀡𑁂 𑀯𑀺𑀬 𑀏𑀓𑀚𑁆𑀛𑀁 𑀧𑀝𑀺𑀲𑀗𑁆𑀔𑀸𑀦𑀫𑀼𑀔𑁂𑀦 𑀧𑀚𑀳𑀦𑀢𑁄. 𑀏𑀓𑀫𑀢𑁆𑀢𑀸𑀦𑀦𑁆𑀢𑀺 𑀯𑀸 𑀯𑀺𑀯𑁂𑀓𑀯𑀲𑁂𑀦 𑀏𑀓𑀁 𑀏𑀓𑀸𑀓𑀺𑀦𑀁 𑀅𑀢𑁆𑀢𑀸𑀦𑀁. 𑀓𑀸𑀮𑁂 𑀓𑀸𑀮𑁂𑀢𑀺 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁂 𑀓𑀸𑀮𑁂 𑀓𑀸𑀮𑁂.

𑀇𑀥 𑀞𑀢𑁆𑀯𑀸𑀢𑀺 ‘‘𑀇𑀤𑀁 𑀔𑁄, 𑀢𑀸𑀢, 𑀢’’𑀦𑁆𑀢𑀺 𑀏𑀯𑀁 𑀦𑀺𑀕𑀫𑀦𑀯𑀲𑁂𑀦 𑀯𑀼𑀢𑁆𑀢𑀝𑁆𑀞𑀸𑀦𑁂 𑀞𑀢𑁆𑀯𑀸. 𑀯𑀢𑁆𑀢𑀦𑁆𑀢𑀺 𑀅𑀭𑀺𑀬𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀁. 𑀲𑀫𑀸𑀦𑁂𑀢𑀩𑁆𑀩𑀦𑁆𑀢𑀺 ‘‘𑀤𑀲𑀯𑀺𑀥𑀁, 𑀤𑁆𑀯𑀸𑀤𑀲𑀯𑀺𑀥’’𑀦𑁆𑀢𑀺 𑀘 𑀳𑁂𑀝𑁆𑀞𑀸 𑀯𑀼𑀢𑁆𑀢𑀕𑀡𑀦𑀸𑀬 𑀘 𑀲𑀫𑀸𑀦𑀁 𑀓𑀸𑀢𑀩𑁆𑀩𑀁 𑀅𑀦𑀽𑀦𑀁 𑀅𑀦𑀥𑀺𑀓𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀁. 𑀅𑀥𑀫𑁆𑀫𑀭𑀸𑀕𑀲𑁆𑀲𑀸𑀢𑀺 𑀅𑀬𑀼𑀢𑁆𑀢𑀝𑁆𑀞𑀸𑀦𑁂 𑀭𑀸𑀕𑀲𑁆𑀲. 𑀯𑀺𑀲𑀫𑀮𑁄𑀪𑀲𑁆𑀲𑀸𑀢𑀺 𑀬𑀼𑀢𑁆𑀢𑀝𑁆𑀞𑀸𑀦𑁂𑀧𑀺 𑀅𑀢𑀺𑀯𑀺𑀬 𑀩𑀮𑀯𑀪𑀸𑀯𑁂𑀦 𑀧𑀯𑀢𑁆𑀢𑀮𑁄𑀪𑀲𑁆𑀲.

𑀘𑀓𑁆𑀓𑀭𑀢𑀦𑀧𑀸𑀢𑀼𑀪𑀸𑀯𑀯𑀡𑁆𑀡𑀦𑀸

𑁮𑁫. 𑀯𑀢𑁆𑀢𑀫𑀸𑀦𑀲𑁆𑀲𑀸𑀢𑀺 𑀧𑀭𑀺𑀧𑀼𑀡𑁆𑀡𑁂 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑁂 𑀯𑀢𑁆𑀢𑀫𑀸𑀦𑀲𑁆𑀲, 𑀦𑁄 𑀅𑀧𑀭𑀺𑀧𑀼𑀡𑁆𑀡𑁂𑀢𑀺 𑀆𑀳 ‘‘𑀧𑀽𑀭𑁂𑀢𑁆𑀯𑀸 𑀯𑀢𑁆𑀢𑀫𑀸𑀦𑀲𑁆𑀲𑀸’’𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀧𑀦𑀲𑁆𑀲 𑀧𑀸𑀭𑀺𑀧𑀽𑀭𑀻 𑀳𑁄𑀢𑀻𑀢𑀺? 𑀢𑀢𑁆𑀣 ‘‘𑀓𑀢𑀸𑀥𑀺𑀓𑀸𑀭𑀲𑁆𑀲 𑀢𑀸𑀯 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀤𑁆𑀯𑀸𑀤𑀲𑀳𑀺𑀧𑀺 𑀲𑀁𑀯𑀘𑁆𑀙𑀭𑁂𑀳𑀺 𑀧𑀽𑀭𑀢𑀺, 𑀧𑀜𑁆𑀘𑀯𑀻𑀲𑀢𑀺𑀬𑀸, 𑀧𑀜𑁆𑀜𑀸𑀲𑀸𑀬 𑀯𑀸 𑀲𑀁𑀯𑀘𑁆𑀙𑀭𑁂𑀳𑀺. 𑀅𑀬𑀜𑁆𑀘 𑀪𑁂𑀤𑁄 𑀥𑀫𑁆𑀫𑀘𑁆𑀙𑀦𑁆𑀤𑀲𑁆𑀲𑀧𑀺 𑀢𑀺𑀓𑁆𑀔𑀫𑀚𑁆𑀛𑀫𑀼𑀤𑀼𑀢𑀸𑀯𑀲𑁂𑀦, 𑀇𑀢𑀭𑀲𑁆𑀲 𑀢𑀢𑁄 𑀪𑀺𑀬𑁆𑀬𑁄𑀧𑀻’’𑀢𑀺 𑀯𑀤𑀦𑁆𑀢𑀺.

𑀤𑀼𑀢𑀺𑀬𑀸𑀤𑀺𑀘𑀓𑁆𑀓𑀯𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁯𑁦. 𑀅𑀢𑁆𑀢𑀦𑁄 𑀫𑀢𑀺𑀬𑀸𑀢𑀺 𑀧𑀭𑀫𑁆𑀧𑀭𑀸𑀕𑀢𑀁 𑀧𑀼𑀭𑀸𑀡𑀁 𑀢𑀦𑁆𑀢𑀺𑀁 𑀧𑀯𑁂𑀡𑀺𑀁 𑀮𑀗𑁆𑀖𑀺𑀢𑁆𑀯𑀸 𑀅𑀢𑁆𑀢𑀦𑁄 𑀇𑀘𑁆𑀙𑀺𑀢𑀸𑀓𑀸𑀭𑁂𑀦. 𑀢𑁂𑀦𑀸𑀳 ‘‘𑀧𑁄𑀭𑀸𑀡𑀓’’𑀦𑁆𑀢𑀺𑀆𑀤𑀺.

𑀦 𑀧𑀩𑁆𑀩𑀦𑁆𑀢𑀻𑀢𑀺 𑀲𑀫𑀺𑀤𑁆𑀥𑀺𑀬𑀸 𑀦 𑀧𑀽𑀭𑁂𑀦𑁆𑀢𑀺, 𑀨𑀻𑀢𑀸 𑀦 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀦 𑀯𑀟𑁆𑀠𑀦𑁆𑀢𑀻’’𑀢𑀺. 𑀢𑀣𑀸 𑀘𑀸𑀳 ‘‘𑀓𑀢𑁆𑀣𑀘𑀺 𑀲𑀼𑀜𑁆𑀜𑀸 𑀳𑁄𑀦𑁆𑀢𑀻’’𑀢𑀺. 𑀢𑀢𑁆𑀣 𑀢𑀢𑁆𑀣 𑀭𑀸𑀚𑀓𑀺𑀘𑁆𑀘𑁂 𑀭𑀜𑁆𑀜𑀸 𑀅𑀫𑀸 𑀲𑀳 𑀯𑀢𑁆𑀢𑀦𑁆𑀢𑀻𑀢𑀺 𑀅𑀫𑀘𑁆𑀘𑀸, 𑀬𑁂𑀳𑀺 𑀯𑀺𑀦𑀸 𑀭𑀸𑀚𑀓𑀺𑀘𑁆𑀘𑀁 𑀦𑀧𑁆𑀧𑀯𑀢𑁆𑀢𑀢𑀺. 𑀧𑀭𑀫𑁆𑀧𑀭𑀸𑀕𑀢𑀸 𑀳𑀼𑀢𑁆𑀯𑀸 𑀭𑀜𑁆𑀜𑁄 𑀧𑀭𑀺𑀲𑀸𑀬 𑀪𑀯𑀸𑀢𑀺 𑀧𑀸𑀭𑀺𑀲𑀚𑁆𑀚𑀸. 𑀢𑁂𑀦𑀸𑀳 ‘‘𑀧𑀭𑀺𑀲𑀸𑀯𑀘𑀭𑀸’’𑀢𑀺. 𑀢𑀲𑁆𑀫𑀺𑀁 𑀞𑀸𑀦𑀦𑁆𑀢𑀭𑁂 𑀞𑀧𑀺𑀢𑀸 𑀳𑀼𑀢𑁆𑀯𑀸 𑀭𑀜𑁆𑀜𑁄 𑀆𑀬𑀁, 𑀯𑀬𑀜𑁆𑀘 𑀬𑀸𑀣𑀸𑀯𑀢𑁄 𑀕𑀡𑁂𑀦𑁆𑀢𑀻𑀢𑀺 𑀕𑀡𑀓𑀸. 𑀚𑀸𑀢𑀺𑀓𑀼𑀮𑀲𑀼𑀢𑀸𑀘𑀸𑀭𑀸𑀤𑀺𑀯𑀲𑁂𑀦 𑀧𑀼𑀣𑀼𑀢𑁆𑀢𑀁 𑀕𑀢𑀢𑁆𑀢𑀸 𑀫𑀳𑀢𑀻 𑀫𑀢𑁆𑀢𑀸 𑀏𑀢𑁂𑀲𑀦𑁆𑀢𑀺 𑀫𑀳𑀸𑀫𑀢𑁆𑀢𑀸, 𑀢𑁂 𑀧𑀦 𑀫𑀳𑀸𑀦𑀼𑀪𑀸𑀯𑀸 𑀅𑀫𑀘𑁆𑀘𑀸 𑀏𑀯𑀸𑀢𑀺 𑀆𑀳 ‘‘𑀫𑀳𑀸𑀅𑀫𑀘𑁆𑀘𑀸’’𑀢𑀺. 𑀬𑁂 𑀭𑀜𑁆𑀜𑁄 𑀳𑀢𑁆𑀣𑀸𑀦𑀻𑀓𑀸𑀤𑀻𑀲𑀼 𑀅𑀯𑀝𑁆𑀞𑀺𑀢𑀸, 𑀢𑁂 𑀅𑀦𑀻𑀓𑀝𑁆𑀞𑀸𑀢𑀺 𑀆𑀳 ‘‘𑀳𑀢𑁆𑀣𑀺𑀆𑀘𑀭𑀺𑀬𑀸𑀤𑀬𑁄’’𑀢𑀺. 𑀫𑀦𑁆𑀢𑀁 𑀧𑀜𑁆𑀜𑀁 𑀅𑀲𑀺𑀢𑀸 𑀳𑀼𑀢𑁆𑀯𑀸 𑀚𑀻𑀯𑀦𑁆𑀢𑀻𑀢𑀺 𑀫𑀦𑁆𑀢𑀲𑁆𑀲𑀸𑀚𑀻𑀯𑀺𑀦𑁄, 𑀫𑀢𑀺𑀲𑀚𑀻𑀯𑀸𑀢𑀺 𑀅𑀢𑁆𑀣𑁄, 𑀬𑁂 𑀢𑀢𑁆𑀣 𑀢𑀢𑁆𑀣 𑀭𑀸𑀚𑀓𑀺𑀘𑁆𑀘𑁂 𑀉𑀧𑀤𑁂𑀲𑀤𑀸𑀬𑀺𑀦𑁄. 𑀢𑁂𑀦𑀸𑀳 ‘‘𑀫𑀦𑁆𑀢𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸’’𑀢𑀺𑀆𑀤𑀺.

𑀆𑀬𑀼𑀯𑀡𑁆𑀡𑀸𑀤𑀺𑀧𑀭𑀺𑀳𑀸𑀦𑀺𑀓𑀣𑀸𑀯𑀡𑁆𑀡𑀦𑀸

𑁯𑁧. 𑀩𑀮𑀯𑀮𑁄𑀪𑀢𑁆𑀢𑀸𑀢𑀺 ‘‘𑀇𑀫𑀲𑁆𑀫𑀺𑀁 𑀮𑁄𑀓𑁂 𑀇𑀤𑀸𑀦𑀺 𑀤𑀮𑀺𑀤𑁆𑀤𑀫𑀦𑀼𑀲𑁆𑀲𑀸 𑀦𑀸𑀫 𑀩𑀳𑀽, 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀥𑀦𑁂 𑀅𑀦𑀼𑀧𑁆𑀧𑀤𑀺𑀬𑀫𑀸𑀦𑁂 𑀫𑀬𑁆𑀳𑀁 𑀓𑁄𑀲𑀲𑁆𑀲 𑀧𑀭𑀺𑀓𑁆𑀔𑀬𑁄 𑀳𑁄𑀢𑀻’’𑀢𑀺 𑀏𑀯𑀁 𑀉𑀧𑁆𑀧𑀦𑁆𑀦𑀩𑀮𑀯𑀮𑁄𑀪𑀢𑁆𑀢𑀸. 𑀉𑀧𑀭𑀽𑀧𑀭𑀺𑀪𑀽𑀫𑀻𑀲𑀽𑀢𑀺 𑀙𑀓𑀸𑀫𑀲𑀕𑁆𑀕𑀲𑀗𑁆𑀔𑀸𑀢𑀸𑀲𑀼 𑀉𑀧𑀭𑀽𑀧𑀭𑀺𑀓𑀸𑀫𑀪𑀽𑀫𑀻𑀲𑀼. 𑀓𑀫𑁆𑀫𑀲𑁆𑀲 𑀨𑀮𑀁 𑀅𑀕𑁆𑀕𑀁 𑀦𑀸𑀫, 𑀢𑀁 𑀧𑀦𑁂𑀢𑁆𑀣 𑀉𑀤𑁆𑀥𑀕𑀸𑀫𑀻𑀢𑀺 𑀆𑀳 ‘‘𑀉𑀤𑁆𑀥𑀁 𑀅𑀕𑁆𑀕𑀁 𑀅𑀲𑁆𑀲𑀸’’𑀢𑀺. 𑀲𑀕𑁆𑀕𑁂 𑀦𑀺𑀬𑀼𑀢𑁆𑀢𑀸, 𑀲𑀕𑁆𑀕𑀧𑁆𑀧𑀬𑁄𑀚𑀦𑀸𑀢𑀺 𑀯𑀸 𑀲𑁄𑀯𑀕𑁆𑀕𑀺𑀓𑀸. 𑀤𑀲𑀦𑁆𑀦𑀁 𑀯𑀺𑀲𑁂𑀲𑀸𑀦𑀦𑁆𑀢𑀺 𑀤𑀺𑀩𑁆𑀩𑀆𑀬𑀼𑀯𑀡𑁆𑀡𑀬𑀲𑀲𑀼𑀔𑀆𑀥𑀺𑀧𑀢𑁂𑀬𑁆𑀬𑀸𑀦𑀜𑁆𑀘𑁂𑀯 𑀤𑀺𑀩𑁆𑀩𑀭𑀽𑀧𑀸𑀤𑀻𑀦𑀜𑁆𑀘 𑀨𑀮𑀯𑀺𑀲𑁂𑀲𑀸𑀦𑀁. 𑀯𑀡𑁆𑀡𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀲𑀓𑁄 𑀅𑀢𑁆𑀢𑀪𑀸𑀯𑀯𑀡𑁆𑀡𑁄 𑀕𑀳𑀺𑀢𑁄, 𑀭𑀽𑀧𑀕𑁆𑀕𑀳𑀡𑁂𑀦 𑀩𑀳𑀺𑀤𑁆𑀥𑀸 𑀭𑀽𑀧𑀸𑀭𑀫𑁆𑀫𑀡𑀁.

𑁯𑁨. 𑀲𑀼𑀝𑁆𑀞𑀼 𑀦𑀺𑀲𑀺𑀤𑁆𑀥𑀦𑁆𑀢𑀺 𑀬𑀣𑀸𑀬𑀁 𑀇𑀫𑀺𑀦𑀸 𑀅𑀢𑁆𑀢𑀪𑀸𑀯𑁂𑀦 𑀅𑀤𑀺𑀦𑁆𑀦𑀁 𑀆𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀁 𑀲𑀫𑁆𑀫𑀤𑁂𑀯 𑀢𑀢𑁄 𑀦𑀺𑀲𑁂𑀥𑀺𑀢𑀁 𑀓𑀢𑁆𑀯𑀸. 𑀫𑀽𑀮𑀳𑀢𑀦𑁆𑀢𑀺 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑁂𑀦 𑀫𑀽𑀮𑁂 𑀏𑀯 𑀳𑀢𑀁.

𑁯𑁬. 𑀭𑀸𑀕𑀯𑀲𑁂𑀦 𑀘𑀭𑀡𑀁 𑀘𑀭𑀺𑀢𑁆𑀢𑀁, 𑀘𑀭𑀺𑀢𑁆𑀢𑀫𑁂𑀯 𑀘𑀸𑀭𑀺𑀢𑁆𑀢𑀁, 𑀫𑁂𑀣𑀼𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀢𑀁 𑀧𑀦 ‘‘𑀧𑀭𑁂𑀲𑀁 𑀤𑀸𑀭𑁂𑀲𑀽’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀫𑀺𑀘𑁆𑀙𑀸𑀘𑀸𑀭’’𑀦𑁆𑀢𑀺 𑀆𑀳.

𑁧𑁦𑁦. 𑀧𑀘𑁆𑀘𑀦𑀻𑀓𑀤𑀺𑀝𑁆𑀞𑀻𑀢𑀺 ‘‘𑀅𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀓𑀸𑀬 (𑀫. 𑀦𑀺. 𑁧.𑁪𑁪𑁧; 𑁨.𑁯𑁪; 𑀯𑀺𑀪. 𑁭𑁯𑁩) 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀧𑀝𑀺𑀧𑀓𑁆𑀔𑀪𑀽𑀢𑀸 𑀤𑀺𑀝𑁆𑀞𑀺.

𑁧𑁦𑁧. 𑀫𑀸𑀢𑀼𑀘𑁆𑀙𑀸𑀤𑀺𑀓𑀸 𑀉𑀧𑀭𑀺 𑀲𑀬𑀫𑁂𑀯 𑀯𑀓𑁆𑀔𑀢𑀺. 𑀅𑀢𑀺𑀩𑀮𑀯𑀮𑁄𑀪𑁄𑀢𑀺 𑀅𑀢𑀺𑀯𑀺𑀬 𑀩𑀮𑀯𑀸 𑀩𑀳𑀮𑀓𑀺𑀮𑁂𑀲𑁄, 𑀬𑁂𑀦 𑀅𑀓𑀸𑀮𑁂, 𑀅𑀤𑁂𑀲𑁂 𑀘 𑀧𑀯𑀢𑁆𑀢𑀢𑀺. 𑀫𑀺𑀘𑁆𑀙𑀸𑀥𑀫𑁆𑀫𑁄𑀢𑀺 𑀫𑀺𑀘𑁆𑀙𑀸 𑀯𑀺𑀧𑀭𑀻𑀢𑁄 𑀅𑀯𑀺𑀲𑀪𑀸𑀕𑀯𑀢𑁆𑀣𑀼𑀓𑁄 𑀮𑁄𑀪𑀥𑀫𑁆𑀫𑁄. 𑀢𑁂𑀦𑀸𑀳 ‘‘𑀧𑀼𑀭𑀺𑀲𑀸𑀦’’𑀦𑁆𑀢𑀺𑀆𑀤𑀺.

𑀢𑀲𑁆𑀲 𑀪𑀸𑀯𑁄𑀢𑀺 𑀬𑁂𑀦 𑀫𑁂𑀢𑁆𑀢𑀸𑀓𑀭𑀼𑀡𑀸𑀧𑀼𑀩𑁆𑀩𑀗𑁆𑀕𑀫𑁂𑀦 𑀘𑀺𑀢𑁆𑀢𑁂𑀦 𑀧𑀼𑀕𑁆𑀕𑀮𑁄 ‘‘𑀫𑀢𑁆𑀢𑁂𑀬𑁆𑀬𑁄’’𑀢𑀺 𑀯𑀼𑀘𑁆𑀘𑀢𑀺, 𑀲𑁄 𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄, 𑀢𑀁𑀲𑀫𑀼𑀝𑁆𑀞𑀸𑀦𑀸 𑀘 𑀓𑀺𑀭𑀺𑀬𑀸 𑀫𑀢𑁆𑀢𑁂𑀬𑁆𑀬𑀢𑀸. 𑀢𑁂𑀦𑀸𑀳 ‘‘𑀫𑀸𑀢𑀭𑀺 𑀲𑀫𑁆𑀫𑀸 𑀧𑀝𑀺𑀧𑀢𑁆𑀢𑀺𑀬𑀸 𑀏𑀢𑀁 𑀦𑀸𑀫’’𑀦𑁆𑀢𑀺. 𑀬𑀸 𑀲𑀫𑁆𑀫𑀸 𑀧𑀚𑁆𑀚𑀺𑀢𑀩𑁆𑀩𑁂 𑀲𑀫𑁆𑀫𑀸 𑀅𑀧𑁆𑀧𑀝𑀺𑀧𑀢𑁆𑀢𑀺, 𑀲𑁄𑀧𑀺 𑀤𑁄𑀲𑁄 𑀅𑀕𑀸𑀭𑀯𑀓𑀺𑀭𑀺𑀬𑀸𑀤𑀺𑀪𑀸𑀯𑀢𑁄. 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀬𑀁 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀆𑀳 ‘‘𑀢𑀲𑁆𑀲𑀸 𑀅𑀪𑀸𑀯𑁄 𑀘𑁂𑀯 𑀢𑀧𑁆𑀧𑀝𑀺𑀧𑀓𑁆𑀔𑀢𑀸 𑀘 𑀅𑀫𑀢𑁆𑀢𑁂𑀬𑁆𑀬𑀢𑀸’’𑀢𑀺. 𑀓𑀼𑀮𑁂 𑀚𑁂𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀢𑀦𑁄 𑀓𑀼𑀮𑁂 𑀯𑀼𑀤𑁆𑀥𑀸𑀦𑀁 𑀫𑀳𑀸𑀧𑀺𑀢𑀼𑀘𑀽𑀴𑀧𑀺𑀢𑀼𑀚𑁂𑀝𑁆𑀞𑀓𑀪𑀸𑀢𑀺𑀓𑀸𑀤𑀻𑀦𑀁.

𑀤𑀲𑀯𑀲𑁆𑀲𑀸𑀬𑀼𑀓𑀲𑀫𑀬𑀯𑀡𑁆𑀡𑀦𑀸

𑁧𑁦𑁩. ‘‘𑀬’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑀬𑁄 𑀆𑀫𑀝𑁆𑀞𑁄, 𑀪𑀼𑀫𑁆𑀫𑀢𑁆𑀣𑁂 𑀘𑁂𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀬𑀲𑁆𑀫𑀺𑀁 𑀲𑀫𑀬𑁂’’𑀢𑀺. 𑀅𑀮𑀁 𑀧𑀢𑀺𑀦𑁄𑀢𑀺 𑀅𑀮𑀁𑀧𑀢𑁂𑀬𑁆𑀬𑀸. 𑀢𑀲𑁆𑀲𑀸 𑀧𑀭𑀺𑀬𑀢𑁆𑀢𑀢𑀸 𑀪𑀭𑀺𑀬𑀸𑀪𑀸𑀯𑁂𑀦𑀸𑀢𑀺 𑀆𑀳 ‘‘𑀤𑀸𑀢𑀼𑀁 𑀬𑀼𑀢𑁆𑀢𑀸’’𑀢𑀺. 𑀅𑀕𑁆𑀕𑀭𑀲𑀸𑀦𑀻𑀢𑀺 𑀫𑀥𑀼𑀭𑀪𑀸𑀯𑁂𑀦, 𑀪𑁂𑀲𑀚𑁆𑀚𑀪𑀸𑀯𑁂𑀦 𑀘 𑀅𑀕𑁆𑀕𑀪𑀽𑀢𑀭𑀲𑀸𑀦𑀺.

𑀤𑀺𑀧𑁆𑀧𑀺𑀲𑁆𑀲𑀦𑁆𑀢𑀻𑀢𑀺 𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀲𑀫𑀼𑀚𑁆𑀚𑀮𑀺𑀲𑁆𑀲𑀦𑁆𑀢𑀺. 𑀢𑁂𑀦𑀸𑀳 ‘‘𑀓𑀼𑀲𑀮𑀦𑁆𑀢𑀺𑀧𑀺 𑀦 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀳𑁄 𑀧𑀼𑀭𑀺𑀲𑁄𑀢𑀺 𑀫𑀸𑀢𑀸𑀤𑀻𑀲𑀼𑀧𑀺 𑀈𑀤𑀺𑀲𑁄, 𑀅𑀜𑁆𑀜𑁂𑀲𑀁 𑀓𑁂𑀲𑀁 𑀓𑀺𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀢𑀺, 𑀅𑀳𑁄 𑀢𑁂𑀚𑀯𑀧𑀼𑀭𑀺𑀲𑁄𑀢𑀺.

𑀕𑁂𑀳𑁂 𑀫𑀸𑀢𑀼𑀕𑀸𑀫𑀁 𑀯𑀺𑀬𑀸𑀢𑀺 𑀅𑀢𑁆𑀢𑀦𑁄 𑀕𑁂𑀳𑁂 𑀤𑀸𑀲𑀺𑀪𑀭𑀺𑀬𑀸𑀪𑀽𑀢𑀫𑀸𑀢𑀼𑀕𑀸𑀫𑀁 𑀯𑀺𑀬. 𑀫𑀺𑀲𑁆𑀲𑀻𑀪𑀸𑀯𑀦𑁆𑀢𑀺 𑀫𑀸𑀢𑀸𑀤𑀻𑀲𑀼 𑀪𑀭𑀺𑀬𑀸𑀬 𑀯𑀺𑀬 𑀘𑀸𑀭𑀺𑀢𑁆𑀢𑀲𑀗𑁆𑀓𑀭𑀁.

𑀩𑀮𑀯𑀓𑁄𑀧𑁄𑀢𑀺 𑀳𑀦𑁆𑀢𑀼𑀓𑀸𑀫𑀢𑀸𑀯𑀲𑁂𑀦 𑀉𑀧𑁆𑀧𑀢𑁆𑀢𑀺𑀬𑀸 𑀩𑀮𑀯𑀓𑁄𑀧𑁄. 𑀆𑀖𑀸𑀢𑁂𑀢𑀻𑀢𑀺 𑀆𑀳𑀦𑀢𑀺, 𑀅𑀢𑁆𑀢𑀦𑁄 𑀓𑀓𑁆𑀔𑀴𑀨𑀭𑀼𑀲𑀪𑀸𑀯𑁂𑀦 𑀘𑀺𑀢𑁆𑀢𑀁 𑀯𑀺𑀩𑀸𑀥𑀢𑀻𑀢𑀺 𑀅𑀢𑁆𑀣𑁄. 𑀦𑀺𑀲𑁆𑀲𑀬𑀤𑀳𑀦𑀭𑀲𑁄 𑀳𑀺 𑀤𑁄𑀲𑁄. 𑀩𑁆𑀬𑀸𑀧𑀸𑀤𑁂𑀢𑀻𑀢𑀺 𑀯𑀺𑀦𑀸𑀲𑁂𑀢𑀺, 𑀫𑀦𑁄𑀧𑀤𑀽𑀲𑀦𑀢𑁄 𑀫𑀦𑀲𑁆𑀲 𑀧𑀓𑁄𑀧𑀦𑀢𑁄. 𑀢𑀺𑀩𑁆𑀩𑀦𑁆𑀢𑀺 𑀢𑀺𑀓𑁆𑀔𑀁, 𑀲𑀸 𑀧𑀦𑀲𑁆𑀲 𑀢𑀺𑀓𑁆𑀔𑀢𑀸 𑀲𑀭𑀻𑀭𑁂 𑀅𑀯𑀳𑀦𑁆𑀢𑁂𑀧𑀺 𑀲𑀺𑀦𑁂𑀳𑀯𑀢𑁆𑀣𑀼𑀁 𑀮𑀗𑁆𑀖𑀺𑀢𑁆𑀯𑀸𑀧𑀺 𑀧𑀯𑀢𑁆𑀢𑀺𑀬𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀧𑀺𑀬𑀫𑀸𑀦𑀲𑁆𑀲𑀧𑀻’’𑀢𑀺𑀆𑀤𑀺.

𑁧𑁦𑁪. 𑀓𑀧𑁆𑀧𑀯𑀺𑀦𑀸𑀲𑁄 𑀓𑀧𑁆𑀧𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀅𑀦𑁆𑀢𑀭𑀸𑀯 𑀓𑀧𑁆𑀧𑁄 𑀅𑀦𑁆𑀢𑀭𑀓𑀧𑁆𑀧𑁄. 𑀢𑀡𑁆𑀳𑀸𑀤𑀺𑀪𑁂𑀤𑁄 𑀓𑀧𑁆𑀧𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀓𑀧𑁆𑀧𑁄, 𑀲𑀢𑁆𑀢𑀮𑁄𑀓𑁄𑀢𑀺 𑀆𑀳 ‘‘𑀅𑀦𑁆𑀢𑀭𑀸𑀯 𑀮𑁄𑀓𑀯𑀺𑀦𑀸𑀲𑁄’’𑀢𑀺. 𑀲𑁆𑀯𑀸𑀬𑀁 𑀅𑀦𑁆𑀢𑀭𑀓𑀧𑁆𑀧𑁄 𑀓𑀢𑀺𑀯𑀺𑀥𑁄, 𑀓𑀣𑀜𑁆𑀘𑀲𑁆𑀲 𑀲𑀫𑁆𑀪𑀯𑁄, 𑀓𑀺𑀁 𑀕𑀢𑀺𑀓𑁄𑀢𑀺 𑀅𑀦𑁆𑀢𑁄𑀕𑀥𑀁 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀦𑁆𑀢𑀭𑀓𑀧𑁆𑀧𑁄 𑀘 𑀦𑀸𑀫𑀸’’𑀢𑀺𑀆𑀤𑀺. 𑀮𑁄𑀪𑀼𑀲𑁆𑀲𑀤𑀸𑀬𑀸𑀢𑀺 𑀮𑁄𑀪𑀸𑀥𑀺𑀓𑀸𑀬 𑀧𑀚𑀸𑀬 𑀯𑀢𑁆𑀢𑀫𑀸𑀦𑀸𑀬.