𑁧𑁧. 𑀤𑀲𑀼𑀢𑁆𑀢𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫𑁦. 𑀆𑀯𑀼𑀲𑁄 𑀪𑀺𑀓𑁆𑀔𑀯𑁂𑀢𑀺 𑀲𑀸𑀯𑀓𑀸𑀦𑀁 𑀆𑀮𑀧𑀦𑀦𑁆𑀢𑀺 𑀲𑀸𑀯𑀓𑀸𑀦𑀁 𑀆𑀫𑀦𑁆𑀢𑀦𑀯𑀲𑁂𑀦 𑀆𑀮𑀧𑀦𑀲𑀫𑀼𑀤𑀸𑀘𑀸𑀭𑁄, 𑀦 𑀓𑁂𑀯𑀮𑀁 ‘‘𑀪𑀺𑀓𑁆𑀔𑀯𑁂’’𑀢𑀺, 𑀲𑁄 𑀧𑀦 𑀩𑀼𑀤𑁆𑀥𑀸𑀦𑀁 𑀆𑀮𑀧𑀦𑀁. 𑀢𑁂𑀦𑀸𑀳 ‘‘𑀩𑀼𑀤𑁆𑀥𑀸 𑀳𑀻’’𑀢𑀺𑀆𑀤𑀺. 𑀲𑀢𑁆𑀣𑀼𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀅𑀲𑀫𑀼𑀤𑀸𑀘𑀸𑀭𑁄 𑀏𑀯𑁂𑀢𑁆𑀣 𑀲𑀢𑁆𑀣𑀼 𑀉𑀘𑁆𑀘𑀝𑁆𑀞𑀸𑀦𑁂 𑀞𑀧𑀦𑀁. 𑀲𑀫𑁆𑀧𑀢𑀺 𑀆𑀕𑀢𑀢𑁆𑀢𑀸 𑀓𑀢𑁆𑀣𑀘𑀺 𑀦 𑀦𑀺𑀩𑀤𑁆𑀥𑁄 𑀯𑀸𑀲𑁄 𑀏𑀢𑁂𑀲𑀦𑁆𑀢𑀺 𑀅𑀦𑀺𑀩𑀤𑁆𑀥𑀯𑀸𑀲𑀸, 𑀅𑀦𑁆𑀢𑁂𑀯𑀸𑀲𑀺𑀓𑀸. 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀬𑀲𑁂𑀦𑀸𑀲𑀦𑀁 𑀕𑀯𑁂𑀲𑀦𑁆𑀢𑀸 𑀬𑀁 𑀓𑀺𑀜𑁆𑀘𑀺 𑀤𑀺𑀲𑀁 𑀕𑀘𑁆𑀙𑀦𑁆𑀢𑀻𑀢𑀺 𑀤𑀺𑀲𑀸𑀕𑀫𑀦𑀻𑀬𑀸. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀩𑀼𑀤𑁆𑀥𑀓𑀸𑀮𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀏𑀓𑀸𑀤𑀲𑀯𑀺𑀥𑀁 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀁. 𑀢𑀢𑁆𑀣𑀸𑀧𑀺 𑀧𑀼𑀕𑁆𑀕𑀮𑀯𑁂𑀫𑀢𑁆𑀢𑀢𑀁 𑀜𑀢𑁆𑀯𑀸 𑀢𑀤𑀦𑀼𑀭𑀽𑀧𑀁 𑀢𑀤𑀦𑀼𑀭𑀽𑀧𑀫𑁂𑀯 𑀤𑁂𑀢𑀺. 𑀫𑁄𑀳𑀘𑀭𑀺𑀢𑀲𑁆𑀲𑀧𑀺 𑀓𑀸𑀫𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀲𑀧𑁆𑀧𑀸𑀬𑀁, 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀬 𑀧𑀦 𑀪𑀸𑀚𑀦𑀪𑀽𑀢𑀁 𑀓𑀸𑀢𑀼𑀁 𑀲𑀫𑁆𑀫𑁄𑀳𑀯𑀺𑀕𑀫𑀸𑀬 𑀧𑀞𑀫𑀁 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀥𑀫𑁆𑀫𑀲𑁆𑀲𑀯𑀦𑀥𑀫𑁆𑀫𑀲𑀸𑀓𑀘𑁆𑀙𑀸𑀲𑀼 𑀦𑀺𑀬𑁄𑀚𑁂𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 ‘‘𑀫𑁄𑀳𑀘𑀭𑀺𑀢𑀲𑁆𑀲…𑀧𑁂… 𑀆𑀘𑀺𑀓𑁆𑀔𑀢𑀻’’𑀢𑀺. 𑀲𑀤𑁆𑀥𑀸𑀘𑀭𑀺𑀢𑀲𑁆𑀲 𑀯𑀺𑀲𑁂𑀲𑀢𑁄 𑀧𑀼𑀭𑀺𑀫𑀸 𑀙 𑀅𑀦𑀼𑀲𑁆𑀲𑀢𑀺𑀬𑁄 𑀲𑀧𑁆𑀧𑀸𑀬𑀸, 𑀢𑀸𑀲𑀁 𑀧𑀦 𑀅𑀦𑀼𑀬𑀼𑀜𑁆𑀚𑀦𑁂 𑀅𑀬𑀁 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑀦𑁆𑀢𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀜𑀸𑀡𑀘𑀭𑀺𑀢𑀲𑁆𑀲𑀸𑀢𑀺 𑀩𑀼𑀤𑁆𑀥𑀺𑀘𑀭𑀺𑀢𑀲𑁆𑀲, 𑀢𑀲𑁆𑀲 𑀧𑀦 𑀫𑀭𑀡𑀲𑁆𑀲𑀢𑀺, 𑀉𑀧𑀲𑀫𑀸𑀦𑀼𑀲𑁆𑀲𑀢𑀺, 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀁, 𑀆𑀳𑀸𑀭𑁂𑀧𑀝𑀺𑀓𑀽𑀮𑀲𑀜𑁆𑀜𑀸 𑀯𑀺𑀲𑁂𑀲𑀢𑁄 𑀲𑀧𑁆𑀧𑀸𑀬𑀸, 𑀢𑁂𑀲𑀁 𑀧𑀦 𑀉𑀧𑀓𑀸𑀭𑀥𑀫𑁆𑀫𑀤𑀲𑁆𑀲𑀦𑀢𑁆𑀣𑀁 ‘‘𑀅𑀦𑀺𑀘𑁆𑀘𑀢𑀸𑀤𑀺…𑀧𑁂… 𑀓𑀣𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣𑁂𑀯𑀸𑀢𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀏𑀯. 𑀢𑁂𑀫𑀸𑀲𑀺𑀓𑀁 𑀧𑀝𑀺𑀧𑀤𑀦𑁆𑀢𑀺 𑀢𑀻𑀳𑀺 𑀫𑀸𑀲𑁂𑀳𑀺 𑀲𑀦𑁆𑀦𑀺𑀝𑁆𑀞𑀸𑀧𑁂𑀢𑀩𑁆𑀩𑀁 𑀧𑀝𑀺𑀧𑀤𑀁.

𑀇𑀫𑁂 𑀪𑀺𑀓𑁆𑀔𑀽𑀢𑀺 𑀇𑀫𑀺𑀲𑁆𑀲𑀸 𑀥𑀫𑁆𑀫𑀤𑁂𑀲𑀦𑀸𑀬 𑀪𑀸𑀚𑀦𑀪𑀽𑀢𑀸 𑀪𑀺𑀓𑁆𑀔𑀽. ‘‘𑀏𑀯𑀁 𑀆𑀕𑀦𑁆𑀢𑁆𑀯𑀸 𑀕𑀘𑁆𑀙𑀦𑁆𑀢𑁂 𑀧𑀦 𑀪𑀺𑀓𑁆𑀔𑀽’’𑀢𑀺 𑀇𑀤𑀁 ‘‘𑀩𑀼𑀤𑁆𑀥𑀓𑀸𑀮𑁂’’𑀢𑀺𑀆𑀤𑀺𑀦𑀸 𑀢𑀤𑀼𑀤𑁆𑀤𑁂𑀲𑀺𑀓𑀯𑀲𑁂𑀦 𑀯𑀼𑀢𑁆𑀢𑀪𑀺𑀓𑁆𑀔𑀽 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 ‘‘𑀇𑀫𑁂 𑀪𑀺𑀓𑁆𑀔𑀽’’𑀢𑀺 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑀪𑀺𑀓𑁆𑀔𑀽. 𑀢𑁂𑀦𑀸𑀳 ‘‘𑀧𑁂𑀲𑁂𑀢𑀻’’𑀢𑀺. 𑀅𑀧𑀮𑁄𑀓𑁂𑀣𑀸𑀢𑀺 𑀆𑀧𑀼𑀘𑁆𑀙𑀣. ‘‘𑀧𑀡𑁆𑀟𑀺𑀢𑀸’’𑀢𑀺𑀆𑀤𑀺 𑀲𑁂𑀯𑀦𑀪𑀚𑀦𑁂𑀲𑀼 𑀓𑀸𑀭𑀡𑀯𑀘𑀦𑀁. ‘‘𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀯𑀺𑀦𑁂𑀢𑀻’’𑀢𑀺𑀆𑀤𑀺 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀆𑀬𑀲𑁆𑀫𑀸 𑀳𑀺 𑀥𑀫𑁆𑀫𑀲𑁂𑀦𑀸𑀧𑀢𑀺 𑀪𑀺𑀓𑁆𑀔𑀽 𑀬𑁂𑀪𑀼𑀬𑁆𑀬𑁂𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀸𑀧𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀺 ‘‘𑀏𑀯𑀫𑁂𑀢𑁂 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸’’𑀢𑀺. 𑀆𑀬𑀲𑁆𑀫𑀸 𑀧𑀦 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 ‘‘𑀲𑀩𑁆𑀩𑀸𑀧𑀺 𑀪𑀯𑀽𑀧𑀧𑀢𑁆𑀢𑀺 𑀚𑀺𑀕𑀼𑀘𑁆𑀙𑀺𑀢𑀩𑁆𑀩𑀸𑀯𑀸’’𑀢𑀺 𑀪𑀺𑀓𑁆𑀔𑀽 𑀬𑁂𑀪𑀼𑀬𑁆𑀬𑁂𑀦 𑀉𑀢𑁆𑀢𑀫𑀢𑁆𑀣𑀁𑀬𑁂𑀯 𑀧𑀸𑀧𑁂𑀢𑀺.

𑀲𑀸𑀯𑀓𑁂𑀳𑀺 𑀯𑀺𑀦𑁂𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸 𑀲𑀸𑀯𑀓𑀯𑁂𑀦𑁂𑀬𑁆𑀬𑀸 𑀦𑀸𑀫 𑀦 𑀲𑀸𑀯𑀓𑁂𑀳𑁂𑀯 𑀯𑀺𑀦𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀸𑀯𑀓𑀯𑁂𑀦𑁂𑀬𑁆𑀬𑀸 𑀦𑀸𑀫𑀸’’𑀢𑀺𑀆𑀤𑀺. 𑀤𑀲𑀥𑀸 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸𑀢𑀺 𑀏𑀓𑀓𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀤𑀲𑀓𑀸 𑀤𑀲𑀥𑀸 𑀤𑀲𑀥𑀸 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀯𑀺𑀪𑀢𑁆𑀢𑁄𑀢𑀺 𑀤𑀲𑀼𑀢𑁆𑀢𑀭𑁄. 𑀤𑀲𑀼𑀢𑁆𑀢𑀭𑁄 𑀕𑀢𑁄𑀢𑀺𑀧𑀺 𑀤𑀲𑀼𑀢𑁆𑀢𑀭𑁄𑀢𑀺 𑀏𑀓𑀓𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀤𑀲𑀓𑀸 𑀤𑀲𑀳𑀺 𑀉𑀢𑁆𑀢𑀭𑁄 𑀅𑀥𑀺𑀓𑁄 𑀳𑀼𑀢𑁆𑀯𑀸 𑀕𑀢𑁄 𑀧𑀯𑀢𑁆𑀢𑁄𑀢𑀺𑀧𑀺 𑀤𑀲𑀼𑀢𑁆𑀢𑀭𑁄. 𑀏𑀓𑁂𑀓𑀲𑁆𑀫𑀺𑀁 𑀧𑀩𑁆𑀩𑁂𑀢𑀺 𑀏𑀓𑀓𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀤𑀲𑀓𑀸 𑀤𑀲𑀲𑀼 𑀧𑀩𑁆𑀩𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀧𑀩𑁆𑀩𑁂. 𑀤𑀲 𑀤𑀲 𑀧𑀜𑁆𑀳𑀸𑀢𑀺 ‘‘𑀓𑀢𑀫𑁄 𑀥𑀫𑁆𑀫𑁄 𑀩𑀳𑀼𑀓𑀸𑀭𑁄 𑀅𑀧𑁆𑀧𑀫𑀸𑀤𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺𑀆𑀤𑀺𑀦𑀸 𑀤𑀲 𑀤𑀲 𑀧𑀜𑁆𑀳𑀸. 𑀯𑀺𑀲𑁂𑀲𑀺𑀢𑀸𑀢𑀺 𑀯𑀺𑀲𑁆𑀲𑀚𑁆𑀚𑀺𑀢𑀸. 𑀤𑀲𑀼𑀢𑁆𑀢𑀭𑀁 𑀧𑀯𑀓𑁆𑀔𑀸𑀫𑀻𑀢𑀺 𑀤𑁂𑀲𑀺𑀬𑀫𑀸𑀦𑀁 𑀤𑁂𑀲𑀦𑀁 𑀦𑀸𑀫𑀓𑀺𑀢𑁆𑀢𑀦𑀫𑀼𑀔𑁂𑀦 𑀧𑀝𑀺𑀚𑀸𑀦𑀸𑀢𑀺 𑀯𑀡𑁆𑀡𑀪𑀡𑀦𑀢𑁆𑀣𑀁. 𑀧𑀯𑀓𑁆𑀔𑀸𑀫𑀻𑀢𑀺 𑀧𑀓𑀸𑀭𑁂𑀳𑀺 𑀯𑀓𑁆𑀔𑀸𑀫𑀺. 𑀢𑀣𑀸 𑀳𑁂𑀢𑁆𑀣 𑀧𑀜𑁆𑀜𑀸𑀲𑀸𑀥𑀺𑀓𑀸𑀦𑀁 𑀧𑀜𑁆𑀘𑀦𑁆𑀦𑀁 𑀧𑀜𑁆𑀳𑀲𑀢𑀸𑀦𑀁 𑀯𑀲𑁂𑀦 𑀤𑁂𑀲𑀦𑀸 𑀧𑀯𑀢𑁆𑀢𑀸. 𑀥𑀫𑁆𑀫𑀦𑁆𑀢𑀺 𑀇𑀥 𑀥𑀫𑁆𑀫-𑀲𑀤𑁆𑀤𑁄 𑀧𑀭𑀺𑀬𑀢𑁆𑀢𑀺𑀧𑀭𑀺𑀬𑀸𑀬𑁄 ‘‘𑀇𑀥 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁫.𑁭𑁩) 𑀯𑀺𑀬. 𑀲𑀼𑀢𑁆𑀢𑀮𑀓𑁆𑀔𑀡𑁄 𑀘𑀸𑀬𑀁 𑀥𑀫𑁆𑀫𑁄𑀢𑀺 𑀆𑀳 ‘‘𑀥𑀫𑁆𑀫𑀦𑁆𑀢𑀺 𑀲𑀼𑀢𑁆𑀢’’𑀦𑁆𑀢𑀺. 𑀲𑁆𑀯𑀸𑀬𑀁 𑀥𑀫𑁆𑀫𑁄 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑀲𑁆𑀲 𑀦𑀺𑀩𑁆𑀩𑀸𑀦𑀸𑀯𑀳𑁄. 𑀢𑀢𑁄 𑀏𑀯 𑀯𑀝𑁆𑀝𑀤𑀼𑀓𑁆𑀔𑀲𑀫𑀼𑀘𑁆𑀙𑁂𑀤𑀸𑀬 𑀳𑁄𑀢𑀺, 𑀲 𑀘𑀸𑀬𑀫𑀲𑁆𑀲 𑀆𑀦𑀼𑀪𑀸𑀯𑁄 𑀲𑀩𑁆𑀩𑁂𑀲𑀁 𑀔𑀦𑁆𑀥𑀸𑀦𑀁 𑀧𑀫𑁄𑀘𑀦𑀼𑀧𑀸𑀬𑀪𑀸𑀯𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀬𑀸’’𑀢𑀺𑀆𑀤𑀺.

𑀉𑀘𑁆𑀘𑀁 𑀓𑀭𑁄𑀦𑁆𑀢𑁄𑀢𑀺 𑀉𑀤𑀕𑁆𑀕𑀁 𑀉𑀴𑀸𑀭𑀁 𑀧𑀡𑀻𑀢𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄, 𑀧𑀕𑁆𑀕𑀡𑁆𑀳𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀧𑁂𑀫𑀁 𑀚𑀦𑁂𑀦𑁆𑀢𑁄𑀢𑀺 𑀪𑀢𑁆𑀢𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑁄. 𑀇𑀤𑀜𑁆𑀘 𑀤𑁂𑀲𑀦𑀸𑀬 𑀧𑀕𑁆𑀕𑀡𑁆𑀳𑀦𑀁 𑀩𑀼𑀤𑁆𑀥𑀸𑀦𑀫𑁆𑀧𑀺 𑀆𑀘𑀺𑀡𑁆𑀡𑀁 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑀸𑀬𑀦𑁄’’𑀢𑀺𑀆𑀤𑀺𑀫𑀸𑀳.

𑀏𑀓𑀥𑀫𑁆𑀫𑀯𑀡𑁆𑀡𑀦𑀸

𑁩𑁫𑁧. (𑀓) 𑀓𑀸𑀭-𑀲𑀤𑁆𑀤𑁄 𑀉𑀧-𑀲𑀤𑁆𑀤𑁂𑀦 𑀯𑀺𑀦𑀸𑀧𑀺 𑀉𑀧𑀓𑀸𑀭𑀢𑁆𑀣𑀁 𑀯𑀤𑀢𑀺, ‘‘𑀩𑀳𑀼𑀓𑀸𑀭𑀸, 𑀪𑀺𑀓𑁆𑀔𑀯𑁂, 𑀫𑀸𑀢𑀸𑀧𑀺𑀢𑀭𑁄 𑀧𑀼𑀢𑁆𑀢𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑁨.𑁩𑁪) 𑀯𑀺𑀬𑀸𑀢𑀺 𑀆𑀳 ‘‘𑀩𑀳𑀼𑀓𑀸𑀭𑁄𑀢𑀺 𑀩𑀳𑀽𑀧𑀓𑀸𑀭𑁄’’𑀢𑀺.

(𑀔) 𑀯𑀟𑁆𑀠𑀦𑁂 𑀯𑀼𑀢𑁆𑀢𑁂 𑀦𑀸𑀦𑀦𑁆𑀢𑀭𑀺𑀬𑀢𑀸𑀬 𑀉𑀧𑁆𑀧𑀸𑀤𑀦𑀁 𑀯𑀼𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 ‘‘𑀪𑀸𑀯𑁂𑀢𑀩𑁆𑀩𑁄𑀢𑀺 𑀯𑀟𑁆𑀠𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑁄. 𑀉𑀧𑁆𑀧𑀸𑀤𑀦𑀧𑀼𑀩𑁆𑀩𑀺𑀓𑀸 𑀳𑀺 𑀯𑀟𑁆𑀠𑀦𑀸𑀢𑀺. 𑀦𑀦𑀼 𑀘 ‘‘𑀏𑀓𑁄 𑀥𑀫𑁆𑀫𑁄 𑀉𑀧𑁆𑀧𑀸𑀤𑁂𑀢𑀩𑁆𑀩𑁄’’𑀢𑀺 𑀉𑀧𑁆𑀧𑀸𑀤𑀦𑀁 𑀧𑁂𑀢𑁆𑀣 𑀯𑀺𑀲𑀼𑀁 𑀕𑀳𑀺𑀢𑀁 𑀏𑀯𑀸𑀢𑀺? 𑀅𑀜𑁆𑀜𑀯𑀺𑀲𑀬𑀢𑁆𑀢𑀸 𑀢𑀲𑁆𑀲 𑀦𑀸𑀬𑀁 𑀯𑀺𑀭𑁄𑀥𑁄. 𑀢𑀣𑀸 𑀳𑀺 ‘‘𑀏𑀓𑁄 𑀥𑀫𑁆𑀫𑁄 𑀧𑀭𑀺𑀜𑁆𑀜𑁂𑀬𑁆𑀬𑁄’’𑀢𑀺 𑀢𑀻𑀳𑀺𑀧𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀜𑁆𑀜𑁂𑀬𑁆𑀬𑀢𑀁 𑀯𑀢𑁆𑀯𑀸𑀧𑀺 ‘‘𑀏𑀓𑁄 𑀥𑀫𑁆𑀫𑁄 𑀧𑀳𑀸𑀢𑀩𑁆𑀩𑁄’’𑀢𑀺 𑀧𑀳𑀸𑀢𑀩𑁆𑀩𑀢𑀸 𑀯𑀼𑀢𑁆𑀢𑀸.

(𑀕) 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀻𑀢𑀺 𑀜𑀸𑀢𑀢𑀻𑀭𑀡𑀧𑀳𑀸𑀦𑀧𑀭𑀺𑀜𑁆𑀜𑀸𑀳𑀺.

(𑀖) 𑀧𑀳𑀸𑀦𑀸𑀦𑀼𑀧𑀲𑁆𑀲𑀦𑀸𑀬𑀸𑀢𑀺 𑀧𑀚𑀳𑀦𑀯𑀲𑁂𑀦 𑀧𑀯𑀢𑁆𑀢𑀸𑀬 𑀅𑀦𑀼𑀧𑀲𑁆𑀲𑀦𑀸𑀬. 𑀫𑀺𑀲𑁆𑀲𑀓𑀯𑀲𑁂𑀦 𑀘𑁂𑀢𑀁 𑀅𑀦𑀼𑀧𑀲𑁆𑀲𑀦𑀸𑀕𑀳𑀡𑀁 𑀤𑀝𑁆𑀞𑀩𑁆𑀩𑀁.

(𑀗) 𑀲𑀻𑀮𑀲𑀫𑁆𑀧𑀤𑀸𑀤𑀻𑀦𑀁 𑀧𑀭𑀺𑀳𑀸𑀦𑀸𑀯𑀳𑁄 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑀓𑁄.

(𑀘) 𑀛𑀸𑀦𑀸𑀤𑀺𑀯𑀺𑀲𑁂𑀲𑀁 𑀕𑀫𑁂𑀢𑀻𑀢𑀺 𑀯𑀺𑀲𑁂𑀲𑀕𑀸𑀫𑀻.

(𑀙) 𑀤𑀼𑀧𑁆𑀧𑀘𑁆𑀘𑀓𑁆𑀔𑀓𑀭𑁄𑀢𑀺 𑀅𑀦𑀼𑀧𑀘𑀺𑀢𑀜𑀸𑀡𑀲𑀫𑁆𑀪𑀸𑀭𑁂𑀳𑀺 𑀧𑀘𑁆𑀘𑀓𑁆𑀔𑀁 𑀓𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄.

(𑀛) 𑀅𑀪𑀺𑀚𑀸𑀦𑀺𑀢𑀩𑁆𑀩𑁄𑀢𑀺 𑀅𑀪𑀺𑀫𑀼𑀔𑀁 𑀜𑀸𑀡𑁂𑀦 𑀚𑀸𑀦𑀺𑀢𑀩𑁆𑀩𑁄.

𑀲𑀩𑁆𑀩𑀢𑁆𑀣 𑀫𑀸𑀢𑀺𑀓𑀸𑀲𑀽𑀢𑀺 𑀤𑀼𑀓𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀸𑀲𑀼 𑀲𑀩𑁆𑀩𑀸𑀲𑀼 𑀫𑀸𑀢𑀺𑀓𑀸𑀲𑀼. 𑀏𑀢𑁆𑀣 𑀘 𑀆𑀬𑀲𑁆𑀫𑀸 𑀥𑀫𑁆𑀫𑀲𑁂𑀦𑀸𑀧𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀸𑀯𑀦𑀸𑀬 𑀦𑀺𑀬𑁄𑀚𑁂𑀢𑁆𑀯𑀸 𑀉𑀢𑁆𑀢𑀫𑀢𑁆𑀣𑁂 𑀧𑀢𑀺𑀝𑁆𑀞𑀸𑀧𑁂𑀢𑀼𑀓𑀸𑀫𑁄 𑀧𑀞𑀫𑀁 𑀢𑀸𑀯 𑀪𑀸𑀯𑀦𑀸𑀬 𑀉𑀧𑀓𑀸𑀭𑀥𑀫𑁆𑀫𑀁 𑀉𑀤𑁆𑀤𑁂𑀲𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑁄 𑀥𑀫𑁆𑀫𑁄 𑀩𑀳𑀼𑀓𑀸𑀭𑁄’’𑀢𑀺 𑀯𑀢𑁆𑀯𑀸 𑀢𑁂𑀦 𑀉𑀧𑀓𑀸𑀭𑀓𑁂𑀦 𑀉𑀧𑀓𑀢𑁆𑀢𑀩𑁆𑀩𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑁄 𑀥𑀫𑁆𑀫𑁄 𑀪𑀸𑀯𑁂𑀢𑀩𑁆𑀩𑁄’’𑀢𑀺 𑀆𑀳. 𑀅𑀬𑀜𑁆𑀘 𑀪𑀸𑀯𑀦𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀇𑀘𑁆𑀙𑀺𑀢𑀸𑀢𑀺 𑀆𑀳 ‘‘𑀏𑀓𑁄 𑀥𑀫𑁆𑀫𑁄 𑀧𑀭𑀺𑀜𑁆𑀜𑁂𑀬𑁆𑀬𑁄’’𑀢𑀺. 𑀧𑀭𑀺𑀜𑁆𑀜𑀸 𑀘 𑀦𑀸𑀫 𑀬𑀸𑀯𑀤𑁂𑀯 𑀧𑀳𑀸𑀢𑀩𑁆𑀩𑀧𑀚𑀳𑀦𑀢𑁆𑀣𑀸𑀢𑀺 𑀆𑀳 ‘‘𑀏𑀓𑁄 𑀥𑀫𑁆𑀫𑁄 𑀧𑀳𑀸𑀢𑀩𑁆𑀩𑁄’’𑀢𑀺. 𑀧𑀚𑀳𑀦𑁆𑀢𑁂𑀦 𑀘 𑀳𑀸𑀦𑀪𑀸𑀕𑀺𑀬𑀁 𑀦𑀻𑀳𑀭𑀺𑀢𑁆𑀯𑀸 𑀯𑀺𑀲𑁂𑀲𑀪𑀸𑀕𑀺𑀬𑁂 𑀅𑀯𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀏𑀓𑁄 𑀥𑀫𑁆𑀫𑁄 𑀳𑀸𑀦𑀪𑀸𑀕𑀺𑀬𑁄, 𑀏𑀓𑁄 𑀥𑀫𑁆𑀫𑁄 𑀯𑀺𑀲𑁂𑀲𑀪𑀸𑀕𑀺𑀬𑁄’’𑀢𑀺. 𑀯𑀺𑀲𑁂𑀲𑀪𑀸𑀕𑀺𑀬𑁂 𑀅𑀯𑀝𑁆𑀞𑀸𑀦𑀜𑁆𑀘 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀦𑁂𑀦, 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀧𑀝𑀺𑀯𑀺𑀚𑁆𑀛𑀦𑀜𑁆𑀘𑁂 𑀇𑀚𑁆𑀛𑀢𑀺, 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀦𑀺𑀧𑁆𑀨𑀸𑀤𑀦𑀁 𑀲𑀺𑀤𑁆𑀥𑀫𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀏𑀓𑁄 𑀥𑀫𑁆𑀫𑁄 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑁄, 𑀏𑀓𑁄 𑀥𑀫𑁆𑀫𑁄 𑀉𑀧𑁆𑀧𑀸𑀤𑁂𑀢𑀩𑁆𑀩𑁄’’𑀢𑀺. 𑀢𑀬𑀺𑀤𑀁 𑀤𑁆𑀯𑀬𑀁 𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀺𑀚𑀸𑀦𑀦𑁂𑀦 𑀳𑁄𑀢𑀻𑀢𑀺 𑀆𑀳 ‘‘𑀏𑀓𑁄 𑀥𑀫𑁆𑀫𑁄 𑀅𑀪𑀺𑀜𑁆𑀜𑁂𑀬𑁆𑀬𑁄’’𑀢𑀺. 𑀅𑀪𑀺𑀜𑁆𑀜𑁂𑀬𑁆𑀬𑀜𑁆𑀘𑁂 𑀅𑀪𑀺𑀜𑁆𑀜𑀸𑀢𑀁, 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀢𑀫𑁂𑀯 𑀳𑁄𑀢𑀻𑀢𑀺. 𑀏𑀢𑁆𑀢𑀸𑀯𑀢𑀸 𑀘 𑀦𑀺𑀝𑁆𑀞𑀺𑀢𑀓𑀺𑀘𑁆𑀘𑁄𑀯 𑀳𑁄𑀢𑀺, 𑀦𑀸𑀲𑁆𑀲 𑀉𑀢𑁆𑀢𑀭𑀺 𑀓𑀺𑀜𑁆𑀘𑀺 𑀓𑀭𑀡𑀻𑀬𑀦𑁆𑀢𑀺 𑀏𑀯𑀁 𑀢𑀸𑀯 𑀫𑀳𑀸𑀣𑁂𑀭𑁄 𑀏𑀓𑀓𑀯𑀲𑁂𑀦 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀧𑀝𑀺𑀧𑀢𑁆𑀢𑀺𑀯𑀺𑀥𑀺𑀁 𑀉𑀤𑁆𑀤𑀺𑀲𑀦𑁆𑀢𑁄 𑀇𑀫𑀸𑀦𑀺 𑀤𑀲 𑀧𑀤𑀸𑀦𑀺 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀉𑀤𑁆𑀤𑀺𑀲𑀺.

(𑀓) 𑀏𑀯𑀁 𑀅𑀦𑀺𑀬𑀫𑀢𑁄 𑀉𑀤𑁆𑀤𑀺𑀝𑁆𑀞𑀥𑀫𑁆𑀫𑁂 𑀲𑀭𑀽𑀧𑀢𑁄 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀓𑀢𑀫𑁄 𑀏𑀓𑁄 𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 𑀤𑁂𑀲𑀦𑀁 𑀆𑀭𑀪𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀇𑀢𑀺 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄’’𑀢𑀺𑀆𑀤𑀺. 𑀏𑀲 𑀦𑀬𑁄 𑀤𑀼𑀓𑀸𑀤𑀻𑀲𑀼. 𑀯𑁂𑀴𑀼𑀓𑀸𑀭𑁄𑀢𑀺 𑀯𑁂𑀦𑁄. 𑀲𑁄 𑀳𑀺 𑀯𑁂𑀴𑀼𑀯𑀺𑀓𑀸𑀭𑁂𑀳𑀺 𑀓𑀺𑀮𑀜𑁆𑀚𑀸𑀤𑀺𑀓𑀭𑀡𑁂𑀦 ‘‘𑀯𑁂𑀴𑀼𑀓𑀸𑀭𑁄’’𑀢𑀺 𑀯𑀼𑀢𑁆𑀢𑁄. 𑀅𑀦𑁆𑀢𑁄, 𑀩𑀳𑀺 𑀘 𑀲𑀩𑁆𑀩𑀕𑀢𑀕𑀡𑁆𑀞𑀺𑀁 𑀦𑀻𑀳𑀭𑀡𑁂𑀦 𑀦𑀺𑀕𑁆𑀕𑀡𑁆𑀞𑀺𑀁 𑀓𑀢𑁆𑀯𑀸. 𑀏𑀓𑁂𑀓𑀓𑁄𑀝𑁆𑀞𑀸𑀲𑁂𑀢𑀺 𑀏𑀓𑀓𑀸𑀤𑀻𑀲𑀼 𑀤𑀲𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂.

𑀲𑀩𑁆𑀩𑀢𑁆𑀣𑀓𑀁 𑀉𑀧𑀓𑀸𑀭𑀓𑀦𑁆𑀢𑀺 𑀲𑀩𑁆𑀩𑀢𑁆𑀣𑀓𑀫𑁂𑀯 𑀲𑀫𑁆𑀫𑀸 𑀧𑀝𑀺𑀧𑀢𑁆𑀢𑀺𑀬𑀸 𑀉𑀧𑀓𑀸𑀭𑀯𑀦𑁆𑀢𑀁. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀧𑀲𑁆𑀲𑀦𑀸𑀕𑀩𑁆𑀪𑀁 𑀕𑀡𑁆𑀳𑀸𑀧𑀦𑁂𑀢𑀺 𑀬𑀣𑀸 𑀉𑀧𑀭𑀺 𑀯𑀺𑀧𑀲𑁆𑀲𑀦𑀸 𑀧𑀭𑀺𑀧𑀘𑁆𑀘𑀢𑀺 𑀢𑀺𑀓𑁆𑀔𑀸 𑀯𑀺𑀲𑀤𑀸 𑀳𑀼𑀢𑁆𑀯𑀸 𑀫𑀕𑁆𑀕𑁂𑀦 𑀖𑀝𑁂𑀢𑀺, 𑀏𑀯𑀁 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸𑀯𑀟𑁆𑀠𑀦𑁂. 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀤𑀻𑀲𑀽𑀢𑀺 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀤𑀻𑀲𑀼 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂𑀲𑀼, 𑀢𑁂𑀲𑀁 𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺. 𑀞𑀸𑀦𑀸𑀝𑁆𑀞𑀸𑀦𑁂𑀲𑀽𑀢𑀺 𑀞𑀸𑀦𑁂, 𑀅𑀝𑁆𑀞𑀸𑀦𑁂 𑀘 𑀚𑀸𑀦𑀺𑀢𑀩𑁆𑀩𑁂. 𑀫𑀳𑀸𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀦𑁆𑀢𑀺 𑀫𑀳𑀢𑀺𑀬𑀁 𑀛𑀸𑀦𑀸𑀤𑀺𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀁. 𑀯𑀺𑀧𑀲𑁆𑀲𑀦𑀸𑀜𑀸𑀡𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀫𑀦𑁄𑀫𑀬𑀺𑀤𑁆𑀥𑀺 𑀆𑀤𑀺𑀓𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀝𑁆𑀞𑀲𑀼 𑀯𑀺𑀚𑁆𑀚𑀸𑀲𑀽𑀢𑀺 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑁂 (𑀤𑀻. 𑀦𑀺. 𑁧.𑁨𑁭𑁯) 𑀆𑀕𑀢𑀦𑀬𑀸𑀲𑀼 𑀅𑀝𑁆𑀞𑀲𑀼 𑀯𑀺𑀚𑁆𑀚𑀸𑀲𑀼.

𑀢𑁂𑀦𑁂𑀯 𑀪𑀕𑀯𑀸 𑀣𑁄𑀫𑁂𑀢𑀻𑀢𑀺 𑀬𑁄𑀚𑀦𑀸. 𑀦𑀦𑁆𑀢𑀺 𑀅𑀧𑁆𑀧𑀫𑀸𑀤𑀁.

𑀣𑀸𑀫𑀲𑀫𑁆𑀧𑀦𑁆𑀦𑁂𑀦𑀸𑀢𑀺 𑀜𑀸𑀡𑀩𑀮𑀲𑀫𑀦𑁆𑀦𑀸𑀕𑀢𑁂𑀦. 𑀤𑀻𑀧𑁂𑀢𑁆𑀯𑀸𑀢𑀺 ‘‘𑀏𑀯𑀫𑁆𑀧𑀺 𑀅𑀧𑁆𑀧𑀫𑀸𑀤𑁄 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑁆𑀧𑀸𑀤𑀦𑁂 𑀩𑀳𑀼𑀧𑀓𑀸𑀭𑁄’’𑀢𑀺 𑀧𑀓𑀸𑀲𑁂𑀢𑁆𑀯𑀸. 𑀬𑀁 𑀓𑀺𑀜𑁆𑀘𑀺 𑀅𑀦𑀯𑀚𑁆𑀚𑀧𑀓𑁆𑀔𑀺𑀓𑀫𑀢𑁆𑀣𑀁 𑀅𑀧𑁆𑀧𑀫𑀸𑀤𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀣𑁂𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀁 𑀓𑀺𑀜𑁆𑀘𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

(𑀔) 𑀓𑀸𑀬𑀕𑀢𑀸𑀲𑀢𑀻𑀢𑀺 𑀭𑀲𑁆𑀲𑀁 𑀅𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄, 𑀦𑀺𑀤𑁆𑀤𑁂𑀲𑁂𑀦 𑀯𑀸 𑀏𑀢𑀁 𑀲𑀫𑀸𑀲𑀧𑀤𑀁 𑀤𑀝𑁆𑀞𑀩𑁆𑀩𑀁. ‘‘𑀅𑀝𑁆𑀞𑀺𑀓𑀸𑀦𑀺 𑀧𑀼𑀜𑁆𑀚𑀓𑀺𑀢𑀸𑀦𑀺 𑀢𑁂𑀭𑁄𑀯𑀲𑁆𑀲𑀺𑀓𑀸𑀦𑀺…𑀧𑁂… 𑀧𑀽𑀢𑀻𑀦𑀺 𑀘𑀼𑀡𑁆𑀡𑀺𑀓𑀚𑀸𑀢𑀸𑀦𑀻’’𑀢𑀺 (𑀤𑀻. 𑀦𑀺. 𑁨.𑁩𑁭𑁯) 𑀏𑀯𑀁 𑀧𑀯𑀢𑁆𑀢𑀫𑀦𑀲𑀺𑀓𑀸𑀭𑁄 ‘‘𑀘𑀼𑀡𑁆𑀡𑀺𑀓𑀫𑀦𑀲𑀺𑀓𑀸𑀭𑁄’’𑀢𑀺 𑀯𑀤𑀦𑁆𑀢𑀺. 𑀅𑀧𑀭𑁂 𑀧𑀦 𑀪𑀡𑀦𑁆𑀢𑀺 ‘‘𑀘𑀼𑀡𑁆𑀡𑀺𑀓𑀇𑀭𑀺𑀬𑀸𑀧𑀣𑁂𑀲𑀼 𑀧𑀯𑀢𑁆𑀢𑀫𑀦𑀲𑀺𑀓𑀸𑀭𑁄’’𑀢𑀺. 𑀏𑀢𑁆𑀣 𑀉𑀧𑁆𑀧𑀦𑁆𑀦𑀲𑀢𑀺𑀬𑀸𑀢𑀺 𑀏𑀢𑀲𑁆𑀫𑀺𑀁 𑀬𑀣𑀸𑀯𑀼𑀢𑁆𑀢𑁂 𑀏𑀓𑀽𑀦𑀢𑀺𑀁𑀲𑀯𑀺𑀥𑁂 𑀞𑀸𑀦𑁂 𑀉𑀧𑁆𑀧𑀦𑁆𑀦𑀸𑀬 𑀲𑀢𑀺𑀬𑀸. 𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑀸, 𑀧𑀭𑀺𑀬𑀸𑀬𑀢𑁄 𑀧𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀉𑀧𑁂𑀓𑁆𑀔𑀸𑀧𑀺 ‘‘𑀲𑀼𑀔’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀺 𑀲𑀦𑁆𑀢𑀲𑀪𑀸𑀯𑀢𑁆𑀢𑀸.

(𑀕) 𑀧𑀘𑁆𑀘𑀬𑀪𑀽𑀢𑁄 𑀆𑀭𑀫𑁆𑀫𑀡𑀸𑀤𑀺𑀯𑀺𑀲𑀬𑁄𑀧𑀺 𑀆𑀭𑀫𑁆𑀫𑀡𑀪𑀸𑀯𑁂𑀦 𑀯𑀡𑁄 𑀯𑀺𑀬 𑀆𑀲𑀯𑁂 𑀧𑀕𑁆𑀖𑀭𑀢𑀺, 𑀲𑁄 𑀲𑀫𑁆𑀧𑀬𑁄𑀕𑀲𑀫𑁆𑀪𑀯𑀸𑀪𑀸𑀯𑁂𑀧𑀺 𑀲𑀳 𑀆𑀲𑀯𑁂𑀳𑀻𑀢𑀺 𑀲𑀸𑀲𑀯𑁄. 𑀢𑀣𑀸 𑀉𑀧𑀸𑀤𑀸𑀦𑀸𑀦𑀁 𑀳𑀺𑀢𑁄𑀢𑀺 𑀉𑀧𑀸𑀤𑀸𑀦𑀺𑀬𑁄. 𑀇𑀢𑀭𑀣𑀸 𑀧𑀦 𑀧𑀘𑁆𑀘𑀬𑀪𑀸𑀯𑁂𑀦 𑀯𑀺𑀥𑀺 𑀧𑀝𑀺𑀓𑁆𑀔𑁂𑀧𑁄.

(𑀖) 𑀅𑀲𑁆𑀫𑀻𑀢𑀺 𑀫𑀸𑀦𑁄𑀢𑀺 ‘‘𑀅𑀲𑁆𑀫𑀻’’𑀢𑀺 𑀧𑀯𑀢𑁆𑀢𑁄 𑀫𑀸𑀦𑁄.

(𑀘) 𑀯𑀺𑀧𑀭𑀺𑀬𑀸𑀬𑁂𑀦𑀸𑀢𑀺 ‘‘𑀅𑀦𑀺𑀘𑁆𑀘𑁂 𑀅𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑁄 𑀧𑀣𑀫𑀦𑀲𑀺𑀓𑀸𑀭𑁄.

(𑀙) 𑀇𑀥 𑀧𑀦 𑀯𑀺𑀧𑀲𑁆𑀲𑀦𑀸𑀦𑀦𑁆𑀢𑀭𑁄 𑀫𑀕𑁆𑀕𑁄 ‘‘𑀆𑀦𑀦𑁆𑀢𑀭𑀺𑀓𑁄 𑀘𑁂𑀢𑁄𑀲𑀫𑀸𑀥𑀻’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀓𑀲𑁆𑀫𑀸? 𑀯𑀺𑀧𑀲𑁆𑀲𑀦𑀸𑀬 𑀅𑀦𑀦𑁆𑀢𑀭𑀢𑁆𑀢𑀸, 𑀅𑀢𑁆𑀢𑀦𑁄 𑀯𑀸 𑀧𑀯𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑀁 𑀨𑀮𑀤𑀸𑀬𑀓𑀢𑁆𑀢𑀸. 𑀲𑀤𑁆𑀤𑀢𑁆𑀣𑀢𑁄 𑀧𑀦 𑀅𑀦𑀦𑁆𑀢𑀭𑀁 𑀨𑀮𑀁 𑀅𑀦𑀦𑁆𑀢𑀭𑀁, 𑀢𑀲𑁆𑀫𑀺𑀁 𑀅𑀦𑀦𑁆𑀢𑀭𑁂 𑀦𑀺𑀬𑀼𑀢𑁆𑀢𑀸, 𑀢𑀁 𑀯𑀸 𑀅𑀭𑀳𑀢𑀺, 𑀅𑀦𑀦𑁆𑀢𑀭𑀧𑀬𑁄𑀚𑀦𑁄𑀢𑀺 𑀯𑀸 𑀆𑀦𑀦𑁆𑀢𑀭𑀺𑀓𑁄.

(𑀚) 𑀨𑀮𑀦𑁆𑀢𑀺 𑀨𑀮𑀧𑀜𑁆𑀜𑀸. 𑀧𑀘𑁆𑀘𑀯𑁂𑀓𑁆𑀔𑀡𑀧𑀜𑁆𑀜𑀸 𑀅𑀥𑀺𑀧𑁆𑀧𑁂𑀢𑀸 𑀅𑀓𑀼𑀧𑁆𑀧𑀸𑀭𑀫𑁆𑀫𑀡𑀢𑀸𑀬.

(𑀛) 𑀅𑀢𑁆𑀢𑀦𑁄 𑀨𑀮𑀁 𑀆𑀳𑀭𑀢𑀻𑀢𑀺 𑀆𑀳𑀸𑀭𑁄, 𑀧𑀘𑁆𑀘𑀬𑁄𑀢𑀺 𑀆𑀳 ‘‘𑀆𑀳𑀸𑀭𑀝𑁆𑀞𑀺𑀢𑀺𑀓𑀸𑀢𑀺 𑀧𑀘𑁆𑀘𑀬𑀝𑁆𑀞𑀺𑀢𑀺𑀓𑀸’’𑀢𑀺. 𑀅𑀬𑀁 𑀏𑀓𑁄 𑀥𑀫𑁆𑀫𑁄𑀢𑀺 𑀅𑀬𑀁 𑀧𑀘𑁆𑀘𑀬𑀲𑀗𑁆𑀔𑀸𑀢𑁄 𑀏𑀓𑁄 𑀥𑀫𑁆𑀫𑁄𑀢𑀺 𑀧𑀘𑁆𑀘𑀬𑀢𑀸𑀲𑀫𑀜𑁆𑀜𑁂𑀦 𑀏𑀓𑀁 𑀓𑀢𑁆𑀯𑀸 𑀯𑀤𑀢𑀺. 𑀜𑀸𑀢𑀧𑀭𑀺𑀜𑁆𑀜𑀸𑀬 𑀅𑀪𑀺𑀜𑁆𑀜𑀸𑀬𑀸𑀢𑀺 𑀜𑀸𑀢𑀧𑀭𑀺𑀜𑁆𑀜𑀸𑀲𑀗𑁆𑀔𑀸𑀢𑀸𑀬 𑀅𑀪𑀺𑀜𑁆𑀜𑀸𑀬.

(𑀜) 𑀅𑀓𑀼𑀧𑁆𑀧𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺 𑀅𑀓𑀼𑀧𑁆𑀧𑀪𑀸𑀯𑁂𑀦 𑀉𑀓𑁆𑀓𑀁𑀲𑀕𑀢𑀢𑁆𑀢𑀸. 𑀅𑀜𑁆𑀜𑀣𑀸 𑀲𑀩𑁆𑀩𑀸𑀧𑀺 𑀨𑀮𑀲𑀫𑀸𑀧𑀢𑁆𑀢𑀺𑀬𑁄 𑀅𑀓𑀼𑀧𑁆𑀧𑀸 𑀏𑀯 𑀧𑀝𑀺𑀧𑀓𑁆𑀔𑁂𑀳𑀺 𑀅𑀓𑁄𑀧𑀦𑀻𑀬𑀢𑁆𑀢𑀸.

𑀅𑀪𑀺𑀜𑁆𑀜𑀸𑀬𑀸𑀢𑀺 ‘‘𑀅𑀪𑀺𑀜𑁆𑀜𑁂𑀬𑁆𑀬𑁄’’𑀢𑀺 𑀏𑀢𑁆𑀣 𑀮𑀤𑁆𑀥𑀅𑀪𑀺𑀜𑁆𑀜𑀸𑀬. 𑀧𑀭𑀺𑀜𑁆𑀜𑀸𑀬𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀧𑀳𑀸𑀢𑀩𑁆𑀩𑀲𑀘𑁆𑀙𑀺𑀓𑀸𑀢𑀩𑁆𑀩𑁂𑀳𑀻𑀢𑀺 𑀧𑀳𑀸𑀢𑀩𑁆𑀩𑀲𑀘𑁆𑀙𑀺𑀓𑀸𑀢𑀩𑁆𑀩𑀧𑀤𑁂𑀳𑀺. 𑀧𑀳𑀸𑀦𑀧𑀭𑀺𑀜𑁆𑀜𑀸𑀯 𑀓𑀣𑀺𑀢𑀸 𑀧𑀳𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀦𑀁 𑀏𑀓𑀸𑀯𑀸𑀭𑀢𑀸𑀬 𑀧𑀭𑀺𑀜𑁆𑀜𑀸𑀬 𑀲𑀳𑁂𑀯 𑀇𑀚𑁆𑀛𑀦𑀢𑁄. 𑀲𑀘𑁆𑀙𑀺𑀓𑀸𑀢𑀩𑁆𑀩𑁄𑀢𑀺 𑀯𑀺𑀲𑁂𑀲𑀢𑁄 𑀨𑀮𑀁 𑀓𑀣𑀺𑀢𑀁. 𑀏𑀓𑀲𑁆𑀫𑀺𑀁𑀬𑁂𑀯 𑀲𑀢𑁆𑀢𑀫𑁂 𑀏𑀯 𑀧𑀤𑁂 𑀮𑀩𑁆𑀪𑀢𑀺. 𑀨𑀮𑀁 𑀧𑀦 𑀅𑀦𑁂𑀓𑁂𑀲𑀼𑀧𑀺 𑀧𑀤𑁂𑀲𑀼 𑀮𑀩𑁆𑀪𑀢𑀺 𑀧𑀞𑀫𑀝𑁆𑀞𑀫𑀦𑀯𑀫𑀤𑀲𑀫𑁂𑀲𑀼 𑀮𑀩𑁆𑀪𑀦𑀢𑁄. 𑀬𑀲𑁆𑀫𑀸 𑀢𑀁 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀤𑀲𑀫𑁂 𑀏𑀯 𑀮𑀩𑁆𑀪𑀢𑀺, 𑀇𑀢𑀭𑁂𑀲𑀼 𑀧𑀭𑀺𑀬𑀸𑀬𑀢𑁄 𑀢𑀲𑁆𑀫𑀸 ‘‘𑀮𑀩𑁆𑀪𑀢𑀺 𑀏𑀯𑀸’’𑀢𑀺 𑀲𑀸𑀲𑀗𑁆𑀓𑀁 𑀯𑀤𑀢𑀺.

𑀲𑀪𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑀸𑀢𑀺 𑀬𑁂𑀦 𑀩𑀳𑀼𑀓𑀸𑀭𑀸𑀤𑀺𑀲𑀪𑀸𑀯𑁂𑀦 𑀤𑁂𑀲𑀺𑀢𑀸, 𑀢𑁂𑀦 𑀲𑀪𑀸𑀯𑁂𑀦 𑀧𑀭𑀫𑀢𑁆𑀣𑀢𑁄 𑀉𑀧𑀮𑀩𑁆𑀪𑀫𑀸𑀦𑀸. 𑀬𑀸𑀣𑀸𑀯𑀸𑀢𑀺 𑀅𑀯𑀺𑀧𑀭𑀻𑀢𑀸. 𑀢𑀣𑀸𑀲𑀪𑀸𑀯𑀸𑀢𑀺 𑀢𑀁𑀲𑀪𑀸𑀯𑀸. 𑀦 𑀢𑀣𑀸 𑀦 𑀳𑁄𑀦𑁆𑀢𑀻𑀢𑀺 𑀅𑀯𑀺𑀢𑀣𑀢𑁆𑀢𑀸 𑀢𑀣𑀸𑀯 𑀳𑁄𑀦𑁆𑀢𑀺. 𑀢𑀢𑁄 𑀏𑀯 𑀯𑀼𑀢𑁆𑀢𑀧𑁆𑀧𑀓𑀸𑀭𑀢𑁄 𑀅𑀜𑁆𑀜𑀣𑀸 𑀦 𑀳𑁄𑀦𑁆𑀢𑀻𑀢𑀺 𑀧𑀜𑁆𑀘𑀳𑀺𑀧𑀺 𑀧𑀤𑁂𑀳𑀺 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀬𑀣𑀸𑀪𑀽𑀢𑀫𑁂𑀯 𑀯𑀤𑀢𑀺. 𑀲𑀫𑁆𑀫𑀸𑀢𑀺 𑀜𑀸𑀬𑁂𑀦. 𑀬𑀁 𑀧𑀦 𑀜𑀸𑀢𑀁, 𑀢𑀁 𑀳𑁂𑀢𑀼𑀬𑀼𑀢𑁆𑀢𑀁 𑀓𑀸𑀭𑀡𑀬𑀼𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀳𑁂𑀢𑀼𑀦𑀸 𑀓𑀸𑀭𑀡𑁂𑀦𑀸’’𑀢𑀺. 𑀑𑀓𑀧𑁆𑀧𑀦𑀁 𑀚𑀦𑁂𑀲𑀻𑀢𑀺 𑀚𑀺𑀦𑀯𑀘𑀦𑀪𑀸𑀯𑁂𑀦 𑀅𑀪𑀺𑀧𑁆𑀧𑀲𑀸𑀤𑀁 𑀉𑀧𑁆𑀧𑀸𑀤𑁂𑀲𑀺.

𑀏𑀓𑀥𑀫𑁆𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑁆𑀯𑁂𑀥𑀫𑁆𑀫𑀯𑀡𑁆𑀡𑀦𑀸

𑁩𑁫𑁨. (𑀓) ‘‘𑀲𑀩𑁆𑀩𑀢𑁆𑀣𑀸’’ 𑀢𑀺 𑀇𑀤𑀁 ‘‘𑀲𑀻𑀮𑀧𑀽𑀭𑀡𑀸𑀤𑀻𑀲𑀽’’𑀢𑀺 𑀏𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. ‘‘𑀲𑀻𑀮𑀧𑀽𑀭𑀡𑀸𑀤𑀻𑀲𑀼 𑀲𑀩𑁆𑀩𑀢𑁆𑀣 𑀅𑀧𑁆𑀧𑀫𑀸𑀤𑁄 𑀯𑀺𑀬 𑀉𑀧𑀓𑀸𑀭𑀓𑀸’’𑀢𑀺 𑀏𑀢𑁂𑀦 𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀦𑀫𑁆𑀧𑀺 𑀅𑀧𑁆𑀧𑀫𑀸𑀤𑀲𑁆𑀲 𑀯𑀺𑀬 𑀲𑀩𑁆𑀩𑀢𑁆𑀣 𑀉𑀧𑀓𑀸𑀭𑀓𑀢𑀸 𑀧𑀓𑀸𑀲𑀺𑀢𑀸 𑀳𑁄𑀢𑀺 𑀅𑀢𑁆𑀣𑀢𑁄 𑀦𑀸𑀢𑀺𑀯𑀺𑀮𑀓𑁆𑀔𑀡𑀢𑁆𑀢𑀸 𑀢𑀢𑁄 𑀢𑁂𑀲𑀁. 𑀲𑀢𑀺𑀅𑀯𑀺𑀧𑁆𑀧𑀯𑀸𑀲𑁄 𑀳𑀺 𑀅𑀧𑁆𑀧𑀫𑀸𑀤𑁄, 𑀲𑁄 𑀘 𑀅𑀢𑁆𑀣𑀢𑁄 𑀲𑀩𑁆𑀩𑀢𑁆𑀣 𑀅𑀯𑀺𑀚𑀳𑀺𑀢𑀸 𑀲𑀢𑀺 𑀏𑀯, 𑀲𑀸 𑀘 𑀔𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀏𑀯 𑀤𑀝𑁆𑀞𑀩𑁆𑀩𑀸, 𑀇𑀢𑀭𑀸𑀬 𑀢𑀣𑀸𑀭𑀽𑀧𑀲𑀫𑀢𑁆𑀣𑀢𑀸𑀪𑀸𑀯𑀢𑁄.

(𑀔) 𑀢𑁂𑀲𑀁 𑀧𑀜𑁆𑀘𑀲𑀢𑀫𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀢𑁆𑀢𑀺𑀯𑀲𑁂𑀦 𑀤𑁂𑀲𑀺𑀢𑀢𑁆𑀢𑀸 𑀧𑀼𑀩𑁆𑀩𑀪𑀸𑀕𑀸 𑀓𑀣𑀺𑀢𑀸.

(𑀙) 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀲𑀁𑀓𑀺𑀮𑁂𑀲𑀲𑁆𑀲 𑀫𑀽𑀮𑀓𑀸𑀭𑀡𑀪𑀸𑀯𑁂𑀦 𑀧𑀯𑀢𑁆𑀢𑁄 𑀳𑁂𑀢𑀼, 𑀧𑀭𑀺𑀩𑁆𑀭𑀽𑀳𑀦𑀪𑀸𑀯𑁂𑀦 𑀧𑀯𑀢𑁆𑀢𑁄 𑀧𑀘𑁆𑀘𑀬𑁄. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑀣𑀸 𑀘 𑀲𑀢𑁆𑀢𑀸𑀦𑀁 𑀲𑀁𑀓𑀺𑀮𑁂𑀲𑀸𑀬, 𑀯𑀺𑀲𑀼𑀤𑁆𑀥𑀺𑀬𑀸 𑀘 𑀧𑀘𑁆𑀘𑀬𑀪𑀽𑀢𑀸 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄𑀢𑀺 ‘‘𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀸’’𑀢𑀺 𑀏𑀢𑁆𑀣 𑀦𑀻𑀳𑀭𑀺𑀢𑁆𑀯𑀸 𑀯𑀼𑀢𑁆𑀢𑀸, 𑀏𑀯𑀁 𑀇𑀫𑁂𑀳𑀺 𑀥𑀫𑁆𑀫𑀸 𑀦𑀻𑀳𑀭𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀲𑀼𑀪𑀚𑁆𑀛𑀸𑀦𑀸𑀤𑀬𑁄 𑀘𑀢𑁆𑀢𑀸𑀭𑁄 𑀯𑀺𑀲𑀁𑀬𑁄𑀕𑀸 𑀦𑀸𑀫 𑀓𑀸𑀫𑀬𑁄𑀕𑀸𑀤𑀺𑀧𑀝𑀺𑀧𑀓𑁆𑀔𑀪𑀸𑀯𑀢𑁄. ‘‘𑀏𑀯𑀁 𑀧𑀪𑁂𑀤𑀸’’𑀢𑀺 𑀇𑀫𑀺𑀦𑀸 ‘‘𑀅𑀯𑀺𑀚𑁆𑀚𑀸𑀪𑀸𑀕𑀺𑀦𑁄 𑀥𑀫𑁆𑀫𑀸, 𑀯𑀺𑀚𑁆𑀚𑀸𑀪𑀸𑀕𑀺𑀦𑁄 𑀥𑀫𑁆𑀫𑀸, 𑀓𑀡𑁆𑀳𑀸 𑀥𑀫𑁆𑀫𑀸, 𑀲𑀼𑀓𑁆𑀓𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑁧𑁦𑁧, 𑁧𑁦𑁪) 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

(𑀛) 𑀧𑀘𑁆𑀘𑀬𑁂𑀳𑀺 𑀲𑀫𑁂𑀘𑁆𑀘 𑀲𑀫𑁆𑀪𑀼𑀬𑁆𑀬 𑀓𑀢𑀢𑁆𑀢𑀸 𑀧𑀜𑁆𑀘𑀓𑁆𑀔𑀦𑁆𑀥𑀸 𑀲𑀗𑁆𑀔𑀢𑀸 𑀥𑀸𑀢𑀼. 𑀓𑁂𑀦𑀘𑀺 𑀅𑀦𑀪𑀺𑀲𑀗𑁆𑀔𑀢𑀢𑁆𑀢𑀸 𑀦𑀺𑀩𑁆𑀩𑀸𑀦𑀁 𑀅𑀲𑀗𑁆𑀔𑀢𑀸 𑀥𑀸𑀢𑀼.

(𑀜) 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀯𑀺𑀚𑁆𑀚𑀦𑀝𑁆𑀞𑁂𑀦, 𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦 𑀘 𑀯𑀺𑀚𑁆𑀚𑀸. 𑀯𑀺𑀫𑀼𑀢𑁆𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑀁 𑀧𑀝𑀺𑀧𑀓𑁆𑀔𑀢𑁄 𑀲𑀩𑁆𑀩𑀲𑁄 𑀯𑀺𑀫𑀼𑀢𑁆𑀢𑀢𑁆𑀢𑀸.

𑀅𑀪𑀺𑀜𑁆𑀜𑀸𑀤𑀻𑀦𑀻𑀢𑀺 𑀅𑀪𑀺𑀜𑁆𑀜𑀸𑀧𑀜𑁆𑀜𑀸𑀤𑀻𑀦𑀺. 𑀏𑀓𑀓𑀲𑀤𑀺𑀲𑀸𑀦𑁂𑀯 𑀧𑀼𑀭𑀺𑀫𑀯𑀸𑀭𑁂 𑀯𑀺𑀬 𑀯𑀺𑀪𑀚𑁆𑀚 𑀓𑀣𑁂𑀢𑀩𑁆𑀩𑀢𑁄. 𑀫𑀕𑁆𑀕𑁄 𑀓𑀣𑀺𑀢𑁄𑀢𑀺 𑀏𑀢𑁆𑀣 ‘‘𑀫𑀕𑁆𑀕𑁄𑀯 𑀓𑀣𑀺𑀢𑁄’’𑀢𑀺 𑀏𑀯𑀫𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀫𑀕𑁆𑀕𑁄 𑀓𑀣𑀺𑀢𑁄𑀯𑀸’’𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄 ‘‘𑀅𑀦𑀼𑀧𑁆𑀧𑀸𑀤𑁂 𑀜𑀸𑀡’’𑀦𑁆𑀢𑀺 𑀇𑀫𑀺𑀦𑀸 𑀨𑀮𑀲𑁆𑀲 𑀕𑀳𑀺𑀢𑀢𑁆𑀢𑀸. 𑀲𑀘𑁆𑀙𑀺𑀓𑀸𑀢𑀩𑁆𑀩𑀧𑀤𑁂 𑀨𑀮𑀁 𑀓𑀣𑀺𑀢𑀦𑁆𑀢𑀺 𑀏𑀢𑁆𑀣𑀸𑀧𑀺 ‘‘𑀨𑀮𑀫𑁂𑀯 𑀓𑀣𑀺𑀢’’𑀦𑁆𑀢𑀺 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀨𑀮𑀁 𑀓𑀣𑀺𑀢𑀫𑁂𑀯𑀸’’𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄 𑀯𑀺𑀚𑁆𑀚𑀸𑀕𑁆𑀕𑀳𑀡𑁂𑀦 𑀢𑀤𑀜𑁆𑀜𑀲𑁆𑀲 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀏𑀲 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼.

𑀤𑁆𑀯𑁂𑀥𑀫𑁆𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀬𑁄𑀥𑀫𑁆𑀫𑀯𑀡𑁆𑀡𑀦𑀸

𑁩𑁫𑁩. (𑀙) 𑀲𑁄𑀢𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑁄. 𑀲𑀩𑁆𑀩𑀲𑁄 𑀓𑀸𑀫𑀸𑀦𑀁 𑀦𑀺𑀲𑁆𑀲𑀭𑀡𑀁 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀚𑀳𑀦𑀢𑁄. 𑀆𑀭𑀼𑀧𑁆𑀧𑁂 𑀅𑀭𑀳𑀢𑁆𑀢𑀫𑀕𑁆𑀕𑁄 𑀦𑀸𑀫 𑀅𑀭𑀽𑀧𑀚𑁆𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑁄 𑀅𑀕𑁆𑀕𑀫𑀕𑁆𑀕𑁄. 𑀧𑀼𑀦 𑀉𑀧𑁆𑀧𑀢𑁆𑀢𑀺𑀦𑀺𑀯𑀸𑀭𑀡𑀢𑁄𑀢𑀺 𑀭𑀽𑀧𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀲𑀩𑁆𑀩𑀲𑁄 𑀦𑀺𑀯𑀸𑀭𑀡𑀢𑁄. 𑀦𑀺𑀭𑀼𑀚𑁆𑀛𑀦𑁆𑀢𑀺 𑀲𑀗𑁆𑀔𑀸𑀭𑀸 𑀏𑀢𑁂𑀦𑀸𑀢𑀺 𑀦𑀺𑀭𑁄𑀥𑁄, 𑀅𑀕𑁆𑀕𑀫𑀕𑁆𑀕𑁄. 𑀢𑁂𑀦 𑀳𑀺 𑀓𑀺𑀮𑁂𑀲𑀯𑀝𑁆𑀝𑁂 𑀦𑀺𑀭𑁄𑀥𑀺𑀢𑁂 𑀇𑀢𑀭𑀫𑁆𑀧𑀺 𑀯𑀝𑁆𑀝𑀤𑁆𑀯𑀬𑀁 𑀦𑀺𑀭𑁄𑀥𑀺𑀢𑀫𑁂𑀯 𑀳𑁄𑀢𑀺. 𑀢𑀲𑁆𑀲 𑀧𑀦 𑀦𑀺𑀭𑁄𑀥𑀲𑁆𑀲 𑀧𑀭𑀺𑀬𑁄𑀲𑀸𑀦𑀢𑁆𑀢𑀸 𑀅𑀕𑁆𑀕𑀨𑀮𑀁 ‘‘𑀦𑀺𑀭𑁄𑀥𑁄’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀅𑀭𑀳𑀢𑁆𑀢𑀨𑀮𑀁 𑀦𑀺𑀭𑁄𑀥𑁄𑀢𑀺 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺. ‘‘𑀅𑀭𑀳𑀢𑁆𑀢𑀨𑀮𑁂𑀦 𑀳𑀺 𑀦𑀺𑀩𑁆𑀩𑀸𑀦𑁂 𑀤𑀺𑀝𑁆𑀞𑁂’’ 𑀢𑀺 𑀇𑀤𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀲𑁆𑀲𑀸𑀬𑀁 𑀦𑀺𑀩𑁆𑀩𑀢𑁆𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀅𑀭𑀳𑀢𑁆𑀢𑀲𑀗𑁆𑀔𑀸𑀢𑀦𑀺𑀭𑁄𑀥𑀲𑁆𑀲 𑀧𑀘𑁆𑀘𑀬𑀢𑁆𑀢𑀸’’ 𑀢𑀺 𑀇𑀤𑀫𑁆𑀧𑀺 𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺.

(𑀚) 𑀅𑀢𑀻𑀢𑀁 𑀲𑀸𑀭𑀫𑁆𑀫𑀡𑀦𑁆𑀢𑀺 𑀅𑀢𑀻𑀢𑀓𑁄𑀝𑁆𑀞𑀸𑀲𑀸𑀭𑀫𑁆𑀫𑀡𑀁 𑀜𑀸𑀡𑀁, 𑀅𑀢𑀻𑀢𑀸 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄 𑀆𑀭𑀩𑁆𑀪 𑀧𑀯𑀢𑁆𑀢𑀦𑀓𑀜𑀸𑀡𑀦𑁆𑀢𑀺 𑀅𑀢𑁆𑀣𑁄. ‘‘𑀫𑀕𑁆𑀕𑁄 𑀓𑀣𑀺𑀢𑁄𑀯𑀸’’𑀢𑀺 𑀅𑀯𑀥𑀸𑀭𑀡𑀁 𑀤𑀝𑁆𑀞𑀩𑁆𑀩𑀁, 𑀢𑀣𑀸 ‘‘𑀲𑀘𑁆𑀙𑀺𑀓𑀸𑀢𑀩𑁆𑀩𑁂 𑀨𑀮𑀁 𑀓𑀣𑀺𑀢𑀫𑁂𑀯𑀸’’𑀢𑀺.

(𑀜) 𑀆𑀲𑀯𑀸𑀦𑀁 𑀔𑀬𑁂 𑀜𑀸𑀡𑀦𑁆𑀢𑀺 𑀘 𑀆𑀲𑀯𑀸𑀦𑀁 𑀔𑀬𑀦𑁆𑀢𑁂 𑀜𑀸𑀡𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀅𑀜𑁆𑀜𑀣𑀸 𑀫𑀕𑁆𑀕𑁄 𑀓𑀣𑀺𑀢𑁄 𑀲𑀺𑀬𑀸.

𑀢𑀬𑁄𑀥𑀫𑁆𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀥𑀫𑁆𑀫𑀯𑀡𑁆𑀡𑀦𑀸

𑁩𑁫𑁪. (𑀓) 𑀤𑀸𑀭𑀼𑀫𑀬𑀁 𑀘𑀓𑁆𑀓𑀁 𑀤𑀸𑀭𑀼𑀘𑀓𑁆𑀓𑀁, 𑀢𑀣𑀸 𑀭𑀢𑀦𑀘𑀓𑁆𑀓𑀁. 𑀆𑀡𑀝𑁆𑀞𑁂𑀦 𑀥𑀫𑁆𑀫𑁄 𑀏𑀯 𑀥𑀫𑁆𑀫𑀘𑀓𑁆𑀓𑀁. 𑀇𑀭𑀺𑀬𑀸𑀧𑀣𑀸𑀦𑀁 𑀅𑀧𑀭𑀸𑀧𑀭𑀧𑁆𑀧𑀯𑀢𑁆𑀢𑀺𑀢𑁄 𑀇𑀭𑀺𑀬𑀸𑀧𑀣𑀘𑀓𑁆𑀓𑀁, 𑀢𑀣𑀸 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀦𑀼𑀘𑁆𑀙𑀯𑀺𑀓𑁂 𑀤𑁂𑀲𑁂𑀢𑀺 𑀧𑀼𑀜𑁆𑀜𑀓𑀺𑀭𑀺𑀬𑀸𑀬, 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑀼𑀭𑀽𑀧𑀤𑁂𑀲𑁂. 𑀲𑁂𑀯𑀦𑀁 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀲𑀗𑁆𑀓𑀫𑀦𑀁. 𑀪𑀚𑀦𑀁 𑀪𑀢𑁆𑀢𑀺𑀯𑀲𑁂𑀦 𑀧𑀬𑀺𑀭𑀼𑀧𑀸𑀲𑀦𑀁. 𑀅𑀢𑁆𑀢𑀦𑁄 𑀲𑀫𑁆𑀫𑀸 𑀞𑀧𑀦𑀦𑁆𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀬𑁄𑀦𑀺𑀲𑁄 𑀞𑀧𑀦𑀁 𑀲𑀤𑁆𑀥𑀸𑀤𑀻𑀲𑀼 𑀦𑀺𑀯𑁂𑀲𑀦𑀦𑁆𑀢𑀺 𑀆𑀳 ‘‘𑀲𑀘𑁂’’𑀢𑀺𑀆𑀤𑀺. 𑀇𑀤𑀫𑁂𑀯𑁂𑀢𑁆𑀣 𑀧𑀫𑀸𑀡𑀦𑁆𑀢𑀺 𑀇𑀤𑀫𑁂𑀯 𑀧𑀼𑀩𑁆𑀩𑁂𑀓𑀢𑀧𑀼𑀜𑁆𑀜𑀢𑀸𑀲𑀗𑁆𑀔𑀸𑀢𑀁 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑀫𑁂𑀢𑁆𑀣 𑀏𑀢𑁂𑀲𑀼 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑁂𑀲𑀼 𑀧𑀫𑀸𑀡𑀪𑀽𑀢𑀁 𑀇𑀢𑀭𑁂𑀲𑀁 𑀓𑀸𑀭𑀡𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀬𑁂𑀦 𑀳𑀻’’𑀢𑀺𑀆𑀤𑀺. 𑀲𑁄 𑀏𑀯 𑀘 𑀓𑀢𑀧𑀼𑀜𑁆𑀜𑁄 𑀧𑀼𑀕𑁆𑀕𑀮𑁄 𑀅𑀢𑁆𑀢𑀸𑀦𑀁 𑀲𑀫𑁆𑀫𑀸 𑀞𑀧𑁂𑀢𑀺 𑀅𑀓𑀢𑀧𑀼𑀜𑁆𑀜𑀲𑁆𑀲 𑀢𑀤𑀪𑀸𑀯𑀢𑁄. 𑀧𑀞𑀫𑁄 𑀮𑁄𑀓𑀺𑀬𑁄𑀯, 𑀢𑀢𑁆𑀣𑀸𑀧𑀺 𑀓𑀸𑀫𑀸𑀯𑀘𑀭𑁄𑀯. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀤𑀲𑀼𑀢𑁆𑀢𑀭𑀲𑀼𑀢𑁆𑀢𑁂. 𑀧𑀼𑀩𑁆𑀩𑀪𑀸𑀕𑁂 𑀮𑁄𑀓𑀺𑀬𑀸𑀯𑀸𑀢𑀺 𑀫𑀕𑁆𑀕𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀧𑀯𑀢𑁆𑀢𑀦𑀓𑀸 𑀮𑁄𑀓𑀺𑀬𑀸 𑀏𑀯. 𑀢𑀢𑁆𑀣 𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯.

(𑀘) 𑀓𑀸𑀫𑀬𑁄𑀕𑀯𑀺𑀲𑀁𑀬𑁄𑀕𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑁄, 𑀤𑀺𑀝𑁆𑀞𑀺𑀬𑁄𑀕𑀯𑀺𑀲𑀁𑀬𑁄𑀕𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄, 𑀇𑀢𑀭𑁂 𑀤𑁆𑀯𑁂 𑀅𑀭𑀳𑀢𑁆𑀢𑀫𑀕𑁆𑀕𑁄𑀢𑀺 𑀏𑀯𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑀸𑀤𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸.

(𑀙) 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀺𑀦𑁆𑀢𑀺 𑀬𑁆𑀯𑀸𑀬𑀁 𑀅𑀧𑁆𑀧𑀕𑀼𑀡𑀲𑁆𑀲 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻, 𑀢𑀁. 𑀓𑀸𑀫𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀢𑀢𑁄 𑀯𑀼𑀝𑁆𑀞𑀺𑀢𑀁 𑀆𑀭𑀫𑁆𑀫𑀡𑀯𑀲𑁂𑀦 𑀓𑀸𑀫𑀲𑀳𑀕𑀢𑀸 𑀳𑀼𑀢𑁆𑀯𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀺 𑀘𑁄𑀤𑁂𑀦𑁆𑀢𑀺 𑀢𑀼𑀤𑁂𑀦𑁆𑀢𑀺. 𑀢𑀲𑁆𑀲 𑀓𑀸𑀫𑀸𑀦𑀼𑀧𑀓𑁆𑀔𑀦𑁆𑀤𑀸𑀦𑀁 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 𑀯𑀲𑁂𑀦 𑀲𑁄 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺 𑀳𑀸𑀬𑀢𑀺 𑀧𑀭𑀺𑀳𑀸𑀬𑀢𑀺, 𑀢𑀲𑁆𑀫𑀸 ‘‘𑀳𑀸𑀦𑀪𑀸𑀕𑀺𑀬𑁄 𑀲𑀫𑀸𑀥𑀻’’𑀢𑀺 𑀯𑀼𑀢𑁆𑀢𑁄. 𑀢𑀤𑀦𑀼𑀥𑀫𑁆𑀫𑀢𑀸𑀢𑀺 𑀢𑀤𑀦𑀼𑀭𑀽𑀧𑀲𑀪𑀸𑀯𑁄. ‘‘𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀻’’𑀢𑀺 𑀇𑀤𑀁 𑀫𑀺𑀘𑁆𑀙𑀸𑀲𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀲𑁆𑀲 𑀳𑀺 𑀧𑀞𑀫𑀚𑁆𑀛𑀸𑀦𑀸𑀦𑀼𑀭𑀽𑀧𑀲𑀪𑀸𑀯𑀸 𑀧𑀞𑀫𑀚𑁆𑀛𑀸𑀦𑀁 𑀲𑀦𑁆𑀢𑀢𑁄 𑀧𑀡𑀻𑀢𑀢𑁄 𑀤𑀺𑀲𑁆𑀯𑀸 𑀅𑀲𑁆𑀲𑀸𑀤𑀬𑀫𑀸𑀦𑀸 𑀅𑀧𑁂𑀓𑁆𑀔𑀫𑀸𑀦𑀸 𑀅𑀪𑀺𑀦𑀦𑁆𑀤𑀫𑀸𑀦𑀸 𑀦𑀺𑀓𑀦𑁆𑀢𑀺 𑀳𑁄𑀢𑀺, 𑀢𑀲𑁆𑀲 𑀦𑀺𑀓𑀦𑁆𑀢𑀺𑀯𑀲𑁂𑀦 𑀲𑁄 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺 𑀦𑁂𑀯 𑀳𑀸𑀬𑀢𑀺, 𑀦 𑀯𑀟𑁆𑀠𑀢𑀺, 𑀞𑀺𑀢𑀺𑀓𑁄𑀝𑁆𑀞𑀸𑀲𑀺𑀓𑁄 𑀳𑁄𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀞𑀺𑀢𑀺𑀪𑀸𑀕𑀺𑀬𑁄 𑀲𑀫𑀸𑀥𑀻’’𑀢𑀺.

𑀅𑀯𑀺𑀢𑀓𑁆𑀓𑀲𑀳𑀕𑀢𑀸𑀢𑀺 𑀅𑀯𑀺𑀢𑀓𑁆𑀓𑀁 𑀤𑀼𑀢𑀺𑀬𑀚𑁆𑀛𑀸𑀦𑀁 𑀲𑀦𑁆𑀢𑀢𑁄 𑀧𑀡𑀻𑀢𑀢𑁄 𑀫𑀦𑀲𑀺 𑀓𑀭𑁄𑀢𑁄 𑀆𑀭𑀫𑁆𑀫𑀡𑀯𑀲𑁂𑀦 𑀅𑀯𑀺𑀢𑀓𑁆𑀓𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸. 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀧𑀕𑀼𑀡𑀧𑀞𑀫𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀺𑀢𑀁 𑀤𑀼𑀢𑀺𑀬𑀚𑁆𑀛𑀸𑀦𑀸𑀥𑀺𑀕𑀫𑀢𑁆𑀣𑀸𑀬 𑀘𑁄𑀤𑁂𑀦𑁆𑀢𑀺 𑀢𑀼𑀤𑁂𑀦𑁆𑀢𑀺, 𑀢𑀲𑁆𑀲 𑀉𑀧𑀭𑀺 𑀤𑀼𑀢𑀺𑀬𑀚𑁆𑀛𑀸𑀦𑀼𑀧𑀓𑁆𑀔𑀦𑁆𑀤𑀸𑀦𑀁 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 𑀯𑀲𑁂𑀦 𑀲𑁄 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺 𑀯𑀺𑀲𑁂𑀲𑀪𑀽𑀢𑀲𑁆𑀲 𑀤𑀼𑀢𑀺𑀬𑀚𑁆𑀛𑀸𑀦𑀲𑁆𑀲 𑀉𑀧𑁆𑀧𑀢𑁆𑀢𑀺𑀧𑀤𑀝𑁆𑀞𑀸𑀦𑀢𑀸𑀬 ‘‘𑀯𑀺𑀲𑁂𑀲𑀪𑀸𑀕𑀺𑀬𑁄 𑀲𑀫𑀸𑀥𑀻’’𑀢𑀺 𑀯𑀼𑀢𑁆𑀢𑁄. 𑀦𑀺𑀩𑁆𑀩𑀺𑀤𑀸𑀲𑀳𑀕𑀢𑀸𑀢𑀺 𑀢𑀫𑁂𑀯 𑀧𑀞𑀫𑀚𑁆𑀛𑀸𑀦𑀮𑀸𑀪𑀺𑀁 𑀛𑀸𑀦𑀢𑁄 𑀯𑀼𑀝𑁆𑀞𑀺𑀢𑀁 𑀦𑀺𑀩𑁆𑀩𑀺𑀤𑀸𑀲𑀗𑁆𑀔𑀸𑀢𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀲𑀳𑀕𑀢𑀸. 𑀯𑀺𑀧𑀲𑁆𑀲𑀦𑀸𑀜𑀸𑀡𑀜𑁆𑀳𑀺 𑀛𑀸𑀦𑀗𑁆𑀕𑁂𑀲𑀼 𑀧𑀪𑁂𑀤𑁂𑀦 𑀉𑀧𑀝𑁆𑀞𑀳𑀦𑁆𑀢𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀢𑀺 𑀉𑀓𑁆𑀓𑀡𑁆𑀞𑀢𑀺, 𑀢𑀲𑁆𑀫𑀸 ‘‘𑀦𑀺𑀩𑁆𑀩𑀺𑀤𑀸’’𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀭𑀡𑀢𑁆𑀣𑀸𑀬 𑀘𑁄𑀤𑁂𑀦𑁆𑀢𑀺 𑀢𑀼𑀤𑁂𑀦𑁆𑀢𑀺. 𑀯𑀺𑀭𑀸𑀕𑀽𑀧𑀲𑀜𑁆𑀳𑀺𑀢𑁄𑀢𑀺 𑀯𑀺𑀭𑀸𑀕𑀲𑀗𑁆𑀔𑀸𑀢𑁂𑀦 𑀦𑀺𑀩𑁆𑀩𑀸𑀦𑁂𑀦 𑀉𑀧𑀲𑀜𑁆𑀳𑀺𑀢𑁄. 𑀯𑀺𑀧𑀲𑁆𑀲𑀦𑀸𑀜𑀸𑀡𑀜𑁆𑀳𑀺 ‘‘𑀲𑀓𑁆𑀓𑀸 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀯𑀺𑀭𑀸𑀕𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀸𑀢𑀼’’𑀦𑁆𑀢𑀺 𑀧𑀯𑀢𑁆𑀢𑀺𑀢𑁄 ‘‘𑀯𑀺𑀭𑀸𑀕𑀽𑀧𑀲𑀜𑁆𑀳𑀺𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀧𑀺 𑀯𑀺𑀭𑀸𑀕𑀽𑀧𑀲𑀜𑁆𑀳𑀺𑀢𑀸 𑀏𑀯 𑀦𑀸𑀫. 𑀢𑀲𑁆𑀲 𑀢𑁂𑀲𑀁 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 𑀯𑀲𑁂𑀦 𑀲𑁄 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺 𑀅𑀭𑀺𑀬𑀫𑀕𑁆𑀕𑀧𑀝𑀺𑀯𑁂𑀥𑀲𑁆𑀲 𑀧𑀤𑀝𑁆𑀞𑀸𑀦𑀢𑀸𑀬 ‘‘𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁄 𑀲𑀫𑀸𑀥𑀻’’𑀢𑀺 𑀯𑀼𑀢𑁆𑀢𑁄. 𑀲𑀩𑁆𑀩𑀲𑀫𑀸𑀧𑀢𑁆𑀢𑀺𑀬𑁄𑀢𑀺 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀓𑀸 𑀲𑀩𑁆𑀩𑀸 𑀲𑀫𑀸𑀧𑀢𑁆𑀢𑀺𑀬𑁄. 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀳𑀸𑀦𑀪𑀸𑀕𑀺𑀬𑀸𑀤𑀺𑀅𑀢𑁆𑀣𑁄 𑀢𑀸𑀯 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑁄.

𑀫𑀕𑁆𑀕𑁄 𑀓𑀣𑀺𑀢𑁄 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀉𑀤𑁆𑀥𑀝𑀢𑁆𑀢𑀸. 𑀨𑀮𑀁 𑀓𑀣𑀺𑀢𑀁 𑀲𑀭𑀽𑀧𑁂𑀦𑁂𑀯.

𑀘𑀢𑀼𑀥𑀫𑁆𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀥𑀫𑁆𑀫𑀯𑀡𑁆𑀡𑀦𑀸

𑁩𑁫𑁫. (𑀔) ‘‘𑀧𑀜𑁆𑀘𑀗𑁆𑀕𑀺𑀓𑁄 𑀲𑀫𑁆𑀫𑀸𑀲𑀫𑀸𑀥𑀻’’𑀢𑀺 𑀲𑀫𑀸𑀥𑀺𑀅𑀗𑁆𑀕𑀪𑀸𑀯𑁂𑀦 𑀧𑀜𑁆𑀜𑀸 𑀉𑀤𑁆𑀤𑀺𑀝𑁆𑀞𑀸𑀢𑀺 𑀧𑀻𑀢𑀺𑀨𑀭𑀡𑀢𑀸𑀤𑀺𑀯𑀘𑀦𑁂𑀦 𑀳𑀺 𑀢𑀫𑁂𑀯 𑀯𑀺𑀪𑀚𑀢𑀺. 𑀢𑁂𑀦𑀸𑀳 ‘‘𑀧𑀻𑀢𑀺𑀁 𑀨𑀭𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺.‘‘𑀲𑁄 𑀇𑀫𑀫𑁂𑀯 𑀓𑀸𑀬𑀁 𑀯𑀺𑀯𑁂𑀓𑀚𑁂𑀦 𑀧𑀻𑀢𑀺𑀲𑀼𑀔𑁂𑀦 𑀅𑀪𑀺𑀲𑀦𑁆𑀤𑁂𑀢𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁪𑁨𑁭) 𑀦𑀬𑁂𑀦 𑀧𑀻𑀢𑀺𑀬𑀸, 𑀲𑀼𑀔𑀲𑁆𑀲 𑀘 𑀨𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀭𑀸𑀕𑀯𑀺𑀭𑀸𑀕𑀢𑀸𑀤𑀺𑀯𑀺𑀪𑀸𑀕𑀤𑀲𑁆𑀲𑀦𑀯𑀲𑁂𑀦 𑀧𑀭𑁂𑀲𑀁 𑀘𑁂𑀢𑁄 𑀨𑀭𑀫𑀸𑀦𑀸. 𑀆𑀮𑁄𑀓𑀨𑀭𑀡𑁂𑀢𑀺 𑀓𑀲𑀺𑀡𑀸𑀮𑁄𑀓𑀲𑁆𑀲 𑀨𑀭𑀡𑁂 𑀲𑀢𑀺 𑀢𑁂𑀦𑁂𑀯 𑀆𑀮𑁄𑀓𑁂𑀦 𑀨𑀭𑀺𑀢𑀧𑁆𑀧𑀤𑁂𑀲𑁂. 𑀢𑀲𑁆𑀲 𑀲𑀫𑀸𑀥𑀺𑀲𑁆𑀲 𑀭𑀽𑀧𑀤𑀲𑁆𑀲𑀦𑀧𑀘𑁆𑀘𑀬𑀢𑁆𑀢𑀸 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀧𑀘𑁆𑀘𑀯𑁂𑀓𑁆𑀔𑀡𑀦𑀺𑀫𑀺𑀢𑁆𑀢𑀁.

𑀧𑀻𑀢𑀺𑀨𑀭𑀡𑀢𑀸 𑀲𑀼𑀔𑀨𑀭𑀡𑀢𑀸𑀢𑀺 𑀆𑀭𑀫𑁆𑀫𑀡𑁂 𑀞𑀢𑁆𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲 𑀉𑀧𑁆𑀧𑀸𑀤𑀦𑀢𑁄 𑀢𑀸 ‘‘𑀧𑀸𑀤𑀸 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀸. 𑀘𑁂𑀢𑁄𑀨𑀭𑀡𑀢𑀸 𑀆𑀮𑁄𑀓𑀨𑀭𑀡𑀢𑀸𑀢𑀺 𑀢𑀁𑀢𑀁𑀓𑀺𑀘𑁆𑀘𑀲𑀸𑀥𑀦𑀢𑁄 𑀢𑀸 ‘‘𑀳𑀢𑁆𑀣𑀸 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀸. 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀥𑀸𑀦𑀲𑁆𑀲 𑀲𑀭𑀻𑀭𑀪𑀸𑀯𑀢𑁄 ‘‘𑀫𑀚𑁆𑀛𑀺𑀫𑀓𑀸𑀬𑁄 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀧𑀘𑁆𑀘𑀯𑁂𑀓𑁆𑀔𑀡𑀦𑀺𑀫𑀺𑀢𑁆𑀢𑀁 𑀉𑀢𑁆𑀢𑀫𑀗𑁆𑀕𑀪𑀸𑀯𑀢𑁄 ‘‘𑀲𑀻𑀲𑀁 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀁.

(𑀚) 𑀲𑀩𑁆𑀩𑀲𑁄 𑀓𑀺𑀮𑁂𑀲𑀤𑀼𑀓𑁆𑀔𑀤𑀭𑀣𑀧𑀭𑀺𑀴𑀸𑀳𑀸𑀦𑀁 𑀯𑀺𑀕𑀢𑀢𑁆𑀢𑀸 𑀮𑁄𑀓𑀺𑀬𑀲𑀫𑀸𑀥𑀺𑀲𑁆𑀲 𑀲𑀸𑀢𑀺𑀲𑀬𑀫𑁂𑀢𑁆𑀣 𑀲𑀼𑀔𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀅𑀧𑁆𑀧𑀺𑀢𑀧𑁆𑀧𑀺𑀢𑀓𑁆𑀔𑀡𑁂 𑀲𑀼𑀔𑀢𑁆𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑁄’’𑀢𑀺. 𑀧𑀼𑀭𑀺𑀫𑀲𑁆𑀲 𑀧𑀼𑀭𑀺𑀫𑀲𑁆𑀲 𑀯𑀲𑁂𑀦 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀮𑀤𑁆𑀥𑀸𑀲𑁂𑀯𑀦𑀢𑀸𑀬 𑀲𑀦𑁆𑀢𑀢𑀭𑀧𑀡𑀻𑀢𑀢𑀭𑀪𑀸𑀯𑀧𑁆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀆𑀳 ‘‘𑀧𑀼𑀭𑀺𑀫𑁄 𑀧𑀼𑀭𑀺𑀫𑁄…𑀧𑁂… 𑀲𑀼𑀔𑀯𑀺𑀧𑀸𑀓𑁄’’𑀢𑀺.

𑀓𑀺𑀮𑁂𑀲𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸𑀢𑀺 𑀓𑀺𑀮𑁂𑀲𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁂𑀦 𑀮𑀤𑁆𑀥𑀢𑁆𑀢𑀸. 𑀓𑀺𑀮𑁂𑀲𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀪𑀸𑀯𑀦𑁆𑀢𑀺 𑀓𑀺𑀮𑁂𑀲𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀪𑀸𑀯𑀁. 𑀮𑀤𑁆𑀥𑀢𑁆𑀢𑀸 𑀧𑀢𑁆𑀢𑀢𑁆𑀢𑀸 𑀢𑀩𑁆𑀪𑀸𑀯𑀁 𑀉𑀧𑀕𑀢𑀢𑁆𑀢𑀸. 𑀮𑁄𑀓𑀺𑀬𑀲𑀫𑀸𑀥𑀺𑀲𑁆𑀲 𑀧𑀘𑁆𑀘𑀦𑀻𑀓𑀸𑀦𑀺 𑀦𑀻𑀯𑀭𑀡𑀧𑀞𑀫𑀚𑁆𑀛𑀸𑀦𑀦𑀺𑀓𑀦𑁆𑀢𑀺𑀆𑀤𑀻𑀦𑀺 𑀦𑀺𑀕𑁆𑀕𑀳𑁂𑀢𑀩𑁆𑀩𑀸𑀦𑀺, 𑀅𑀜𑁆𑀜𑁂 𑀓𑀺𑀮𑁂𑀲𑀸 𑀯𑀸𑀭𑁂𑀢𑀩𑁆𑀩𑀸, 𑀇𑀫𑀲𑁆𑀲 𑀧𑀦 𑀅𑀭𑀳𑀢𑁆𑀢𑀲𑀫𑀸𑀥𑀺𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀲𑀩𑁆𑀩𑀓𑀺𑀮𑁂𑀲𑀢𑁆𑀢𑀸 𑀦 𑀦𑀺𑀕𑁆𑀕𑀳𑁂𑀢𑀩𑁆𑀩𑀁, 𑀯𑀸𑀭𑁂𑀢𑀩𑁆𑀩𑀜𑁆𑀘 𑀅𑀢𑁆𑀣𑀻𑀢𑀺 𑀫𑀕𑁆𑀕𑀸𑀦𑀦𑁆𑀢𑀭𑀁 𑀲𑀫𑀸𑀧𑀢𑁆𑀢𑀺𑀓𑁆𑀔𑀡𑁂 𑀘 𑀅𑀧𑁆𑀧𑀬𑁄𑀕𑁂𑀦 𑀅𑀥𑀺𑀕𑀢𑀢𑁆𑀢𑀸, 𑀞𑀧𑀺𑀢𑀢𑁆𑀢𑀸 𑀘 𑀅𑀧𑀭𑀺𑀳𑀸𑀦𑀯𑀲𑁂𑀦 𑀯𑀸 𑀞𑀧𑀺𑀢𑀢𑁆𑀢𑀸 𑀦𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀯𑀸𑀯𑀝𑁄. ‘‘𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀢𑁆𑀢𑀸’’𑀢𑀺 𑀏𑀢𑁂𑀦 𑀅𑀧𑁆𑀧𑀯𑀢𑁆𑀢𑀫𑀸𑀦𑀸𑀬𑀧𑀺 𑀲𑀢𑀺𑀬𑀸 𑀲𑀢𑀺𑀩𑀳𑀼𑀮𑀢𑀸𑀬 𑀲𑀢𑁄 𑀏𑀯 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺, ‘‘𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀯𑀲𑁂𑀦𑀸’’𑀢𑀺 𑀏𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀦𑀲𑀢𑀺𑀬𑀸 𑀲𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀲𑁂𑀲𑁂𑀲𑀼 𑀜𑀸𑀡𑀗𑁆𑀕𑁂𑀲𑀼. 𑀧𑀜𑁆𑀘𑀜𑀸𑀡𑀺𑀓𑁄𑀢𑀺 𑀏𑀢𑁆𑀣 𑀯𑀼𑀢𑁆𑀢𑀲𑀫𑀸𑀥𑀺𑀫𑀼𑀔𑁂𑀦 𑀧𑀜𑁆𑀘 𑀜𑀸𑀡𑀸𑀦𑁂𑀯 𑀉𑀤𑁆𑀤𑀺𑀝𑁆𑀞𑀸𑀦𑀺, 𑀦𑀺𑀤𑁆𑀤𑀺𑀝𑁆𑀞𑀸𑀦𑀺 𑀘.

𑀫𑀕𑁆𑀕𑁄 𑀓𑀣𑀺𑀢𑁄 𑀇𑀦𑁆𑀤𑁆𑀭𑀺𑀬𑀲𑀻𑀲𑁂𑀦 𑀲𑀫𑁆𑀫𑀸𑀯𑀸𑀬𑀸𑀫𑀸𑀤𑀻𑀦𑀁 𑀓𑀣𑀺𑀢𑀢𑁆𑀢𑀸. 𑀨𑀮𑀁 𑀓𑀣𑀺𑀢𑀁 𑀅𑀲𑁂𑀓𑁆𑀔𑀸𑀦𑀁 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀦𑀁 𑀓𑀣𑀺𑀢𑀢𑁆𑀢𑀸.

𑀧𑀜𑁆𑀘𑀥𑀫𑁆𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀙𑀥𑀫𑁆𑀫𑀯𑀡𑁆𑀡𑀦𑀸

𑁩𑁫𑁬. 𑀫𑀕𑁆𑀕𑁄 𑀓𑀣𑀺𑀢𑁄𑀢𑀺 𑀏𑀢𑁆𑀣 𑀯𑀢𑁆𑀢𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑀲𑀢𑁆𑀢𑀥𑀫𑁆𑀫𑀯𑀡𑁆𑀡𑀦𑀸

𑁩𑁫𑁭. (𑀜) 𑀳𑁂𑀢𑀼𑀦𑀸𑀢𑀺 𑀆𑀤𑀺𑀅𑀦𑁆𑀢𑀯𑀦𑁆𑀢𑀢𑁄, 𑀅𑀦𑀘𑁆𑀘𑀦𑁆𑀢𑀺𑀓𑀢𑁄, 𑀢𑀸𑀯𑀓𑀸𑀮𑀺𑀓𑀢𑁄, 𑀦𑀺𑀘𑁆𑀘𑀧𑀝𑀺𑀓𑁆𑀔𑁂𑀧𑀢𑁄𑀢𑀺 𑀏𑀯𑀁 𑀆𑀤𑀺𑀦𑀸 𑀳𑁂𑀢𑀼𑀦𑀸. 𑀦𑀬𑁂𑀦𑀸𑀢𑀺 ‘‘𑀬𑀣𑀸 𑀇𑀫𑁂 𑀲𑀗𑁆𑀔𑀸𑀭𑀸 𑀏𑀢𑀭𑀳𑀺, 𑀏𑀯𑀁 𑀅𑀢𑀻𑀢𑁂, 𑀅𑀦𑀸𑀕𑀢𑁂 𑀘 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀔𑀬𑀥𑀫𑁆𑀫𑀸 𑀯𑀬𑀥𑀫𑁆𑀫𑀸 𑀯𑀺𑀭𑀸𑀕𑀥𑀫𑁆𑀫𑀸 𑀦𑀺𑀭𑁄𑀥𑀥𑀫𑁆𑀫𑀸’’𑀢𑀺 𑀅𑀢𑀻𑀢𑀸𑀦𑀸𑀕𑀢𑁂𑀲𑀼 𑀦𑀬𑀦𑀦𑀬𑁂𑀦. 𑀓𑀸𑀫𑀁 𑀔𑀻𑀡𑀸𑀲𑀯𑀲𑁆𑀲 𑀲𑀩𑁆𑀩𑁂𑀲𑀁 𑀲𑀗𑁆𑀔𑀸𑀭𑀸𑀦𑀁 𑀅𑀦𑀺𑀘𑁆𑀘𑀢𑀸𑀤𑀺 𑀲𑀼𑀤𑀺𑀝𑁆𑀞𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸, 𑀢𑀁 𑀧𑀦 𑀅𑀲𑀫𑁆𑀫𑁄𑀳𑀦𑀯𑀲𑁂𑀦 𑀓𑀺𑀘𑁆𑀘𑀢𑁄, 𑀯𑀺𑀧𑀲𑁆𑀲𑀦𑀸𑀬 𑀧𑀦 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀲𑀼𑀤𑀺𑀝𑁆𑀞𑀸 𑀳𑁄𑀦𑁆𑀢𑀻’’𑀢𑀺. 𑀓𑀺𑀮𑁂𑀲𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑁄 𑀧𑀭𑀺𑀴𑀸𑀳𑁄 𑀯𑀢𑁆𑀣𑀼𑀓𑀸𑀫𑀲𑀦𑁆𑀦𑀺𑀲𑁆𑀲𑀬𑁄, 𑀯𑀢𑁆𑀣𑀼𑀓𑀸𑀫𑀸𑀯𑀲𑁆𑀲𑀬𑁄 𑀘𑀸𑀢𑀺 𑀯𑀼𑀢𑁆𑀢𑀁 ‘‘𑀤𑁆𑀯𑁂𑀧𑀺 𑀲𑀧𑀭𑀺𑀴𑀸𑀳𑀝𑁆𑀞𑁂𑀦 𑀅𑀗𑁆𑀕𑀸𑀭𑀓𑀸𑀲𑀼 𑀯𑀺𑀬𑀸’’𑀢𑀺. 𑀦𑀺𑀦𑁆𑀦𑀲𑁆𑀲𑁂𑀯𑀸𑀢𑀺 [𑀦𑀺𑀦𑁆𑀦𑀲𑁆𑀲 (𑀅𑀝𑁆𑀞𑀓𑀣𑀸𑀬𑀁)] 𑀦𑀺𑀦𑁆𑀦𑀪𑀸𑀯𑀲𑁆𑀲𑁂𑀯. 𑀅𑀦𑁆𑀢𑁄 𑀯𑀼𑀘𑁆𑀘𑀢𑀺 𑀮𑀸𑀫𑀓𑀝𑁆𑀞𑁂𑀦 𑀢𑀡𑁆𑀳𑀸. 𑀩𑁆𑀬𑀦𑁆𑀢𑀁 𑀯𑀺𑀕𑀢𑀦𑁆𑀢𑀁 𑀪𑀽𑀢𑀦𑁆𑀢𑀺 𑀩𑁆𑀬𑀦𑁆𑀢𑀻𑀪𑀽𑀢𑀦𑁆𑀢𑀺 𑀆𑀳 ‘‘𑀦𑀺𑀭𑀢𑀺𑀪𑀽𑀢𑀁, [𑀦𑀺𑀬𑀢𑀺𑀪𑀽𑀢𑀁 (𑀅𑀝𑁆𑀞𑀓𑀣𑀸𑀬𑀁) 𑀯𑀺𑀕𑀢𑀦𑁆𑀢𑀺𑀪𑀽𑀢𑀁 (?)] 𑀦𑀺𑀢𑁆𑀢𑀡𑁆𑀳𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀇𑀥 𑀲𑀢𑁆𑀢𑀓𑁂. 𑀪𑀸𑀯𑁂𑀢𑀩𑁆𑀩𑀧𑀤𑁂 𑀫𑀕𑁆𑀕𑁄 𑀓𑀣𑀺𑀢𑁄 𑀩𑁄𑀚𑁆𑀛𑀗𑁆𑀕𑀸𑀦𑀁 𑀯𑀼𑀢𑁆𑀢𑀢𑁆𑀢𑀸.

𑀧𑀞𑀫𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀝𑁆𑀞𑀥𑀫𑁆𑀫𑀯𑀡𑁆𑀡𑀦𑀸

𑁩𑁫𑁮. (𑀓) 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀺𑀓𑀸𑀬𑀸𑀢𑀺 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀸 𑀏𑀯 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀺𑀓𑀸 𑀬𑀣𑀸 ‘‘𑀯𑀺𑀦𑀬𑁄 𑀏𑀯 𑀯𑁂𑀦𑀬𑀺𑀓𑁄’’𑀢𑀺, 𑀢𑀲𑁆𑀲𑀸 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀺𑀓𑀸𑀬. 𑀓𑀸 𑀧𑀦 𑀲𑀸𑀢𑀺 𑀆𑀳 ‘‘𑀧𑀜𑁆𑀜𑀸𑀬𑀸’’𑀢𑀺. 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀲𑁆𑀲𑀸𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀺𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀲𑁆𑀲. 𑀉𑀧𑀘𑀸𑀭𑀚𑁆𑀛𑀸𑀦𑀲𑀳𑀕𑀢𑀸 𑀢𑀭𑀼𑀡𑀲𑀫𑀣𑀧𑀜𑁆𑀜𑀸𑀯 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀧𑀯𑀢𑁆𑀢𑀸 𑀢𑀭𑀼𑀡𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸 [𑀢𑀭𑀼𑀡𑀲𑀫𑀣𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸 (𑀅𑀝𑁆𑀞𑀓𑀣𑀸𑀬𑀁)]. 𑀆𑀤𑀺𑀪𑀽𑀢𑀸𑀬𑀸𑀢𑀺 𑀧𑀞𑀫𑀸𑀯𑀬𑀯𑀪𑀽𑀢𑀸𑀬, 𑀤𑁂𑀲𑀦𑀸𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁. 𑀉𑀧𑁆𑀧𑀢𑁆𑀢𑀺𑀓𑀸𑀮𑁂 𑀧𑀦 𑀦𑀢𑁆𑀣𑀺 𑀫𑀕𑁆𑀕𑀥𑀫𑁆𑀫𑀸𑀦𑀁 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀢𑀸 𑀏𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀏𑀓𑀚𑁆𑀛𑀁𑀬𑁂𑀯 𑀉𑀧𑁆𑀧𑀚𑁆𑀚𑀦𑀢𑁄. 𑀧𑁂𑀫𑀦𑁆𑀢𑀺 𑀤𑀴𑁆𑀳𑀪𑀢𑁆𑀢𑀺, 𑀢𑀁 𑀧𑀦 𑀯𑀮𑁆𑀮𑀪𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀕𑁂𑀳𑀲𑀺𑀢𑀲𑀤𑀺𑀲𑀁 𑀳𑁄𑀢𑀻𑀢𑀺 ‘‘𑀕𑁂𑀳𑀲𑀺𑀢𑀧𑁂𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀕𑀭𑀼𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀕𑀭𑀼 𑀘𑀺𑀢𑁆𑀢𑀁 𑀏𑀢𑀲𑁆𑀲𑀸𑀢𑀺 𑀕𑀭𑀼𑀘𑀺𑀢𑁆𑀢𑁄, 𑀢𑀲𑁆𑀲 𑀪𑀸𑀯𑁄 𑀕𑀭𑀼𑀘𑀺𑀢𑁆𑀢𑀪𑀸𑀯𑁄, 𑀕𑀭𑀼𑀫𑁆𑀳𑀺 𑀕𑀭𑀼𑀓𑀸𑀭𑁄. ‘‘𑀓𑀺𑀮𑁂𑀲𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀁 𑀮𑀪𑀢𑀻’’𑀢𑀺. 𑀕𑀭𑀽𑀦𑀜𑁆𑀳𑀺 𑀲𑀦𑁆𑀢𑀺𑀓𑁂 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀁 𑀮𑀪𑀺𑀢𑁆𑀯𑀸 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀦𑁆𑀢𑀲𑁆𑀲 𑀓𑀺𑀮𑁂𑀲𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑁂𑀦𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺.

(𑀙) 𑀧𑁂𑀢𑀸𑀢𑀺 𑀧𑁂𑀢𑀫𑀳𑀺𑀤𑁆𑀥𑀺𑀓𑀸. 𑀅𑀲𑀼𑀭𑀸𑀦𑀦𑁆𑀢𑀺 𑀤𑁂𑀯𑀸𑀲𑀼𑀭𑀸𑀦𑀁. 𑀧𑁂𑀢𑀸𑀲𑀼𑀭𑀸 𑀧𑀦 𑀧𑁂𑀢𑀸 𑀏𑀯𑀸𑀢𑀺 𑀢𑁂𑀲𑀁 𑀧𑁂𑀢𑁂𑀳𑀺 𑀲𑀗𑁆𑀕𑀳𑁄 𑀅𑀯𑀼𑀢𑁆𑀢𑀲𑀺𑀤𑁆𑀥𑁄𑀯. 𑀆𑀯𑀸𑀳𑀦𑀁 𑀕𑀘𑁆𑀙𑀦𑁆𑀢𑀻𑀢𑀺 𑀲𑀫𑁆𑀪𑁄𑀕𑀲𑀁𑀲𑀕𑁆𑀕𑀫𑀼𑀔𑁂𑀦 𑀧𑁂𑀢𑁂𑀳𑁂𑀯 𑀅𑀲𑀼𑀭𑀸𑀦𑀁 𑀲𑀗𑁆𑀕𑀳𑀡𑁂 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺.

(𑀚) 𑀅𑀧𑁆𑀧𑀺𑀘𑁆𑀙𑀲𑁆𑀲𑀸𑀢𑀺 𑀦𑀺𑀇𑀘𑁆𑀙𑀲𑁆𑀲. 𑀅𑀪𑀸𑀯𑀢𑁆𑀣𑁄 𑀳𑁂𑀢𑁆𑀣 𑀅𑀧𑁆𑀧-𑀲𑀤𑁆𑀤𑁄 ‘‘𑀅𑀧𑁆𑀧𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁧𑁦.𑁧𑁧) 𑀯𑀺𑀬. 𑀧𑀘𑁆𑀘𑀬𑁂𑀲𑀼 𑀅𑀧𑁆𑀧𑀺𑀘𑁆𑀙𑁄 𑀧𑀘𑁆𑀘𑀬𑀅𑀧𑁆𑀧𑀺𑀘𑁆𑀙𑁄, 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑁂𑀲𑀼 𑀇𑀘𑁆𑀙𑀸𑀭𑀳𑀺𑀢𑁄. 𑀅𑀥𑀺𑀕𑀫𑀅𑀧𑁆𑀧𑀺𑀘𑁆𑀙𑁄𑀢𑀺 𑀛𑀸𑀦𑀸𑀤𑀺𑀅𑀥𑀺𑀕𑀫𑀯𑀺𑀪𑀸𑀯𑀦𑁂 𑀇𑀘𑁆𑀙𑀸𑀭𑀳𑀺𑀢𑁄. 𑀧𑀭𑀺𑀬𑀢𑁆𑀢𑀺𑀅𑀧𑁆𑀧𑀺𑀘𑁆𑀙𑁄𑀢𑀺 𑀧𑀭𑀺𑀬𑀢𑁆𑀢𑀺𑀬𑀁 𑀩𑀸𑀳𑀼𑀲𑀘𑁆𑀘𑀯𑀺𑀪𑀸𑀯𑀦𑁂 𑀇𑀘𑁆𑀙𑀸𑀭𑀳𑀺𑀢𑁄. 𑀥𑀼𑀢𑀗𑁆𑀕𑀅𑀧𑁆𑀧𑀺𑀘𑁆𑀙𑁄𑀢𑀺 𑀥𑀼𑀢𑀗𑁆𑀕𑁂𑀲𑀼 𑀅𑀧𑁆𑀧𑀺𑀘𑁆𑀙𑁄 𑀥𑀼𑀢𑀗𑁆𑀕𑀯𑀺𑀪𑀸𑀯𑁂𑀦 𑀇𑀘𑁆𑀙𑀸𑀭𑀳𑀺𑀢𑁄. 𑀲𑀦𑁆𑀢𑀕𑀼𑀡𑀦𑀺𑀕𑀽𑀳𑀦𑁂𑀦𑀸𑀢𑀺 𑀅𑀢𑁆𑀢𑀦𑀺 𑀲𑀁𑀯𑀺𑀚𑁆𑀚𑀫𑀸𑀦𑀸𑀦𑀁 𑀛𑀸𑀦𑀸𑀤𑀺𑀕𑀼𑀡𑀸𑀦𑀜𑁆𑀘𑁂𑀯 𑀩𑀸𑀳𑀼𑀲𑀘𑁆𑀘𑀕𑀼𑀡𑀲𑁆𑀲 𑀘 𑀥𑀼𑀢𑀗𑁆𑀕𑀕𑀼𑀡𑀲𑁆𑀲 𑀘 𑀦𑀺𑀕𑀽𑀳𑀦𑁂𑀦 𑀙𑀸𑀤𑀦𑁂𑀦. 𑀲𑀫𑁆𑀧𑀚𑁆𑀚𑀢𑀻𑀢𑀺 𑀦𑀺𑀧𑁆𑀧𑀚𑁆𑀚𑀢𑀺 𑀲𑀺𑀚𑁆𑀛𑀢𑀺. 𑀦𑁄 𑀫𑀳𑀺𑀘𑁆𑀙𑀲𑁆𑀲𑀸𑀢𑀺 𑀫𑀳𑀢𑀺𑀬𑀸 𑀇𑀘𑁆𑀙𑀸𑀬 𑀲𑀫𑀦𑁆𑀦𑀸𑀕𑀢𑀲𑁆𑀲, 𑀇𑀘𑁆𑀙𑀁 𑀯𑀸 𑀫𑀳𑀦𑁆𑀢𑀲𑁆𑀲 𑀦𑁄 𑀲𑀫𑁆𑀧𑀚𑁆𑀚𑀢𑀺 𑀅𑀦𑀼𑀥𑀫𑁆𑀫𑀲𑁆𑀲𑀸𑀧𑀺 𑀅𑀦𑀺𑀘𑁆𑀙𑀦𑀢𑁄.

𑀧𑀯𑀺𑀯𑀺𑀢𑁆𑀢𑀲𑁆𑀲𑀸𑀢𑀺 𑀧𑀓𑀸𑀭𑁂𑀳𑀺 𑀯𑀺𑀯𑀺𑀢𑁆𑀢𑀲𑁆𑀲. 𑀢𑁂𑀦𑀸𑀳 ‘‘𑀓𑀸𑀬𑀘𑀺𑀢𑁆𑀢𑀉𑀧𑀥𑀺𑀯𑀺𑀯𑁂𑀓𑁂𑀳𑀺 𑀯𑀺𑀯𑀺𑀢𑁆𑀢𑀲𑁆𑀲𑀸’’𑀢𑀺. ‘‘𑀅𑀝𑁆𑀞𑀆𑀭𑀫𑁆𑀪𑀯𑀢𑁆𑀣𑀼𑀯𑀲𑁂𑀦𑀸’’𑀢𑀺 𑀏𑀢𑁂𑀦 𑀪𑀸𑀯𑀦𑀸𑀪𑀺𑀬𑁄𑀕𑀯𑀲𑁂𑀦 𑀏𑀓𑀻𑀪𑀸𑀯𑁄𑀯 𑀇𑀥 ‘‘𑀓𑀸𑀬𑀯𑀺𑀯𑁂𑀓𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀦 𑀕𑀡𑀲𑀗𑁆𑀕𑀡𑀺𑀓𑀸𑀪𑀸𑀯𑀫𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀓𑀫𑁆𑀫𑀦𑁆𑀢𑀺 𑀬𑁄𑀕𑀓𑀫𑁆𑀫𑀁.

𑀲𑀢𑁆𑀢𑁂𑀳𑀺 𑀓𑀺𑀮𑁂𑀲𑁂𑀳𑀺 𑀘 𑀲𑀗𑁆𑀕𑀡𑀦𑀁 𑀲𑀫𑁄𑀥𑀸𑀦𑀁 𑀲𑀗𑁆𑀕𑀡𑀺𑀓𑀸, 𑀲𑀸 𑀆𑀭𑀫𑀺𑀢𑀩𑁆𑀩𑀝𑁆𑀞𑁂𑀦 𑀆𑀭𑀸𑀫𑁄 𑀏𑀢𑀲𑁆𑀲𑀸𑀢𑀺 𑀲𑀗𑁆𑀕𑀡𑀺𑀓𑀸𑀭𑀸𑀫𑁄, 𑀢𑀲𑁆𑀲. 𑀢𑁂𑀦𑀸𑀳 ‘‘𑀕𑀡𑀲𑀗𑁆𑀕𑀡𑀺𑀓𑀸𑀬 𑀘𑁂𑀯𑀸’’𑀢𑀺𑀆𑀤𑀺. 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲𑀸𑀢𑀺 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑀲𑁆𑀲, 𑀢𑀜𑁆𑀘 𑀔𑁄 𑀉𑀧𑀥𑀺𑀯𑀺𑀯𑁂𑀓𑁂 𑀦𑀺𑀦𑁆𑀦𑀢𑀸𑀯𑀲𑁂𑀦 ‘‘𑀅𑀬𑀁 𑀥𑀫𑁆𑀫𑁄’’𑀢𑀺 𑀯𑀘𑀦𑀢𑁄. 𑀏𑀲 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺. 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀁𑀬𑁂𑀯 𑀳𑀺 𑀲𑀫𑀸𑀥𑀸𑀦𑀁 𑀇𑀥𑀸𑀥𑀺𑀧𑁆𑀧𑁂𑀢𑀁, 𑀢𑀣𑀸 𑀧𑀜𑁆𑀜𑀸𑀧𑀺. 𑀓𑀫𑁆𑀫𑀲𑁆𑀲𑀓𑀢𑀸𑀧𑀜𑁆𑀜𑀸𑀬 𑀳𑀺 𑀧𑀢𑀺𑀝𑁆𑀞𑀢𑁄 𑀓𑀫𑁆𑀫𑀯𑀲𑁂𑀦 ‘‘𑀪𑀯𑁂𑀲𑀼 𑀦𑀸𑀦𑀧𑁆𑀧𑀓𑀸𑀭𑁄 𑀅𑀦𑀢𑁆𑀣𑁄’’𑀢𑀺 𑀚𑀸𑀦𑀦𑁆𑀢𑁄 𑀓𑀫𑁆𑀫𑀓𑁆𑀔𑀬𑀓𑀭𑀜𑀸𑀡𑀁 𑀅𑀪𑀺𑀧𑀢𑁆𑀣𑁂𑀢𑀺, 𑀢𑀤𑀢𑁆𑀣𑀜𑁆𑀘 𑀉𑀲𑁆𑀲𑀸𑀳𑀁 𑀓𑀭𑁄𑀢𑀺. 𑀫𑀸𑀦𑀸𑀤𑀬𑁄 𑀲𑀢𑁆𑀢𑀲𑀦𑁆𑀢𑀸𑀦𑀁 𑀲𑀁𑀲𑀸𑀭𑁂 𑀧𑀧𑀜𑁆𑀘𑁂𑀦𑁆𑀢𑀺 𑀯𑀺𑀢𑁆𑀣𑀸𑀭𑁂𑀦𑁆𑀢𑀻𑀢𑀺 𑀧𑀧𑀜𑁆𑀘𑀸𑀢𑀺 𑀆𑀳 ‘‘𑀦𑀺𑀧𑁆𑀧𑀧𑀜𑁆𑀘𑀲𑁆𑀲𑀸𑀢𑀺 𑀯𑀺𑀕𑀢𑀫𑀸𑀦𑀢𑀡𑁆𑀳𑀸𑀤𑀺𑀝𑁆𑀞𑀺𑀧𑀧𑀜𑁆𑀘𑀲𑁆𑀲𑀸’’𑀢𑀺.

𑀫𑀕𑁆𑀕𑁄 𑀓𑀣𑀺𑀢𑁄 𑀲𑀭𑀽𑀧𑁂𑀦𑁂𑀯.

𑀦𑀯𑀥𑀫𑁆𑀫𑀯𑀡𑁆𑀡𑀦𑀸

𑁩𑁫𑁯. (𑀔) 𑀯𑀺𑀲𑀼𑀤𑁆𑀥𑀺𑀦𑁆𑀢𑀺 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀁, 𑀅𑀘𑁆𑀘𑀦𑁆𑀢𑀯𑀺𑀲𑀼𑀤𑁆𑀥𑀺𑀫𑁂𑀯 𑀯𑀸. 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀸𑀤𑀺𑀦𑀺𑀭𑀼𑀧𑀓𑁆𑀓𑀺𑀮𑀺𑀝𑁆𑀞𑀢𑀸𑀬 𑀘𑀢𑀼𑀩𑁆𑀩𑀺𑀥𑀧𑀭𑀺𑀲𑀼𑀤𑁆𑀥𑀺𑀯𑀦𑁆𑀢𑀁 𑀲𑀻𑀮𑀁. 𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑀦𑁆𑀢𑀺 𑀧𑀼𑀕𑁆𑀕𑀮𑀲𑁆𑀲 𑀧𑀭𑀺𑀲𑀼𑀤𑁆𑀥𑀺𑀬𑀸 𑀧𑀥𑀸𑀦𑀪𑀽𑀢𑀁 𑀅𑀗𑁆𑀕𑀁. 𑀢𑁂𑀦𑀸𑀳 ‘‘𑀧𑀭𑀺𑀲𑀼𑀤𑁆𑀥𑀪𑀸𑀯𑀲𑁆𑀲 𑀧𑀥𑀸𑀦𑀗𑁆𑀕’’𑀦𑁆𑀢𑀺. 𑀲𑀫𑀣𑀲𑁆𑀲 𑀯𑀺𑀲𑀼𑀤𑁆𑀥𑀺𑀪𑀸𑀯𑁄 𑀯𑁄𑀤𑀸𑀦𑀁 𑀧𑀕𑀼𑀡𑀪𑀸𑀯𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀆𑀳 ‘‘𑀅𑀝𑁆𑀞 𑀧𑀕𑀼𑀡𑀲𑀫𑀸𑀧𑀢𑁆𑀢𑀺𑀬𑁄’’𑀢𑀺. 𑀯𑀺𑀕𑀢𑀼𑀧𑀓𑁆𑀓𑀺𑀮𑁂𑀲𑀜𑁆𑀳𑀺 ‘‘𑀧𑀕𑀼𑀡’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀩𑁆𑀪𑀢𑀺, 𑀦 𑀲𑀉𑀧𑀓𑁆𑀓𑀺𑀮𑁂𑀲𑀁 𑀳𑀸𑀦𑀪𑀸𑀕𑀺𑀬𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑀺𑀢𑁄. 𑀲𑀢𑁆𑀢𑀤𑀺𑀝𑁆𑀞𑀺𑀫𑀮𑀯𑀺𑀲𑀼𑀤𑁆𑀥𑀺𑀢𑁄 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁄 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺. 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁄 𑀅𑀤𑁆𑀥𑀢𑁆𑀢𑀬𑀓𑀗𑁆𑀔𑀸𑀫𑀮𑀯𑀺𑀥𑀫𑀦𑀢𑁄 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺. 𑀬𑀲𑁆𑀫𑀸 𑀦𑀸𑀫𑀭𑀽𑀧𑀁 𑀦𑀸𑀫 𑀲𑀧𑁆𑀧𑀘𑁆𑀘𑀬𑀫𑁂𑀯, 𑀢𑀲𑁆𑀫𑀸 𑀢𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁂𑀦 𑀅𑀢𑁆𑀣𑀢𑁄 𑀢𑀲𑁆𑀲 𑀲𑀧𑁆𑀧𑀘𑁆𑀘𑀬𑀢𑀸𑀧𑀺 𑀧𑀭𑀺𑀕𑁆𑀕𑀳𑀺𑀢𑀸 𑀏𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀻𑀢𑀺 𑀲𑀧𑁆𑀧𑀘𑁆𑀘𑀬𑀁 𑀦𑀸𑀫𑀭𑀽𑀧𑀤𑀲𑁆𑀲𑀦’’𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁂𑀦 𑀢𑀻𑀲𑀼 𑀅𑀤𑁆𑀥𑀸𑀲𑀼 𑀓𑀗𑁆𑀔𑀸𑀫𑀮𑀯𑀺𑀢𑀭𑀡𑀧𑀘𑁆𑀘𑀬𑀸𑀓𑀸𑀭𑀸𑀯𑀩𑁄𑀥𑀯𑀲𑁂𑀦𑁂𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀧𑀘𑁆𑀘𑀬𑀸𑀓𑀸𑀭𑀜𑀸𑀡’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁 𑀬𑀣𑀸 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺 ‘‘𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀫𑀕𑁆𑀕𑀸𑀫𑀕𑁆𑀕𑁂 𑀜𑀸𑀡𑀦𑁆𑀢𑀺 𑀫𑀕𑁆𑀕𑀸𑀫𑀕𑁆𑀕𑁂 𑀯𑀯𑀢𑁆𑀣𑀧𑁂𑀢𑁆𑀯𑀸 𑀞𑀺𑀢𑀜𑀸𑀡𑀁. 𑀜𑀸𑀡𑀦𑁆𑀢𑀺 𑀇𑀥 𑀢𑀭𑀼𑀡𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 ‘‘𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀻’’𑀢𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑀸 𑀯𑀺𑀧𑀲𑁆𑀲𑀦𑀸𑀬 𑀯𑀼𑀘𑁆𑀘𑀫𑀸𑀦𑀢𑁆𑀢𑀸. 𑀬𑀤𑀺 ‘‘𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀻’’𑀢𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸 𑀅𑀥𑀺𑀧𑁆𑀧𑁂𑀢𑀸, ‘‘𑀧𑀜𑁆𑀜𑀸’’𑀢𑀺 𑀘 𑀅𑀭𑀳𑀢𑁆𑀢𑀨𑀮𑀧𑀜𑁆𑀜𑀸, 𑀫𑀕𑁆𑀕𑁄 𑀧𑀦 𑀓𑀣𑀦𑁆𑀢𑀺? 𑀫𑀕𑁆𑀕𑁄 𑀩𑀳𑀼𑀓𑀸𑀭𑀧𑀤𑁂 𑀯𑀺𑀭𑀸𑀕𑀕𑁆𑀕𑀳𑀡𑁂𑀦 𑀕𑀳𑀺𑀢𑁄. 𑀯𑀓𑁆𑀔𑀢𑀺 𑀳𑀺 ‘‘𑀇𑀥 𑀩𑀳𑀼𑀓𑀸𑀭𑀧𑀤𑁂 𑀫𑀕𑁆𑀕𑁄 𑀓𑀣𑀺𑀢𑁄’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁩.𑁩𑁫𑁯).

(𑀙) 𑀘𑀓𑁆𑀔𑀸𑀤𑀺𑀥𑀸𑀢𑀼𑀦𑀸𑀦𑀢𑁆𑀢𑀦𑁆𑀢𑀺 𑀘𑀓𑁆𑀔𑀸𑀤𑀺𑀭𑀽𑀧𑀸𑀤𑀺𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀥𑀸𑀢𑀽𑀦𑀁 𑀯𑁂𑀫𑀢𑁆𑀢𑀢𑀁 𑀦𑀺𑀲𑁆𑀲𑀸𑀬. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺𑀦𑀸𑀦𑀢𑁆𑀢𑀦𑁆𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀲𑁄𑀢𑀲𑀫𑁆𑀨𑀲𑁆𑀲𑀖𑀸𑀦𑀲𑀫𑁆𑀨𑀲𑁆𑀲𑀸𑀤𑀺𑀲𑀫𑁆𑀨𑀲𑁆𑀲𑀯𑀺𑀪𑀸𑀕𑀁. 𑀲𑀜𑁆𑀜𑀸𑀦𑀸𑀦𑀢𑁆𑀢𑀦𑁆𑀢𑀺 𑀏𑀢𑁆𑀣 𑀭𑀽𑀧𑀲𑀜𑁆𑀜𑀸𑀤𑀺𑀲𑀜𑁆𑀜𑀸𑀦𑀸𑀦𑀢𑁆𑀢𑀫𑁆𑀧𑀺 𑀮𑀩𑁆𑀪𑀢𑁂𑀯, 𑀢𑀁 𑀧𑀦 𑀓𑀸𑀫𑀲𑀜𑁆𑀜𑀸𑀤𑀺𑀕𑁆𑀕𑀳𑀡𑁂𑀦𑁂𑀯 𑀕𑀬𑁆𑀳𑀢𑀺. 𑀓𑀸𑀫𑀲𑀜𑁆𑀜𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀩𑁆𑀬𑀸𑀧𑀸𑀤𑀲𑀜𑁆𑀜𑀸𑀤𑀻𑀦𑀁 𑀕𑀳𑀡𑀁. 𑀲𑀜𑁆𑀜𑀸𑀦𑀺𑀤𑀸𑀦𑀢𑁆𑀢𑀸 𑀧𑀧𑀜𑁆𑀘𑀲𑀗𑁆𑀔𑀸𑀦𑀁 ‘‘𑀲𑀜𑁆𑀜𑀸𑀦𑀸𑀦𑀢𑁆𑀢𑀁 𑀧𑀝𑀺𑀘𑁆𑀘 𑀲𑀗𑁆𑀓𑀧𑁆𑀧𑀦𑀸𑀦𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁, ‘‘𑀬𑀁 𑀲𑀗𑁆𑀓𑀧𑁆𑀧𑁂𑀢𑀺, 𑀢𑀁 𑀧𑀧𑀜𑁆𑀘𑁂𑀢𑀻’’𑀢𑀺 𑀯𑀘𑀦𑀢𑁄 ‘‘𑀲𑀗𑁆𑀓𑀧𑁆𑀧𑀦𑀸𑀦𑀢𑁆𑀢𑀁 𑀧𑀝𑀺𑀘𑁆𑀘 𑀙𑀦𑁆𑀤𑀦𑀸𑀦𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀙𑀦𑁆𑀤𑀦𑀸𑀦𑀢𑁆𑀢𑀦𑁆𑀢𑀺 𑀘 𑀢𑀡𑁆𑀳𑀸𑀙𑀦𑁆𑀤𑀲𑁆𑀲 𑀦𑀸𑀦𑀢𑁆𑀢𑀁. 𑀭𑀽𑀧𑀧𑀭𑀺𑀴𑀸𑀳𑁄𑀢𑀺 𑀭𑀽𑀧𑀯𑀺𑀲𑀬𑁄 𑀭𑀽𑀧𑀸𑀪𑀺𑀧𑀢𑁆𑀣𑀦𑀸𑀯𑀲𑁂𑀦 𑀧𑀯𑀢𑁆𑀢𑁄 𑀓𑀺𑀮𑁂𑀲𑀧𑀭𑀺𑀴𑀸𑀳𑁄. 𑀲𑀤𑁆𑀤𑀧𑀭𑀺𑀴𑀸𑀳𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀓𑀺𑀮𑁂𑀲𑁄 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀅𑀧𑁆𑀧𑀢𑁆𑀢𑁂𑀧𑀺 𑀆𑀭𑀫𑁆𑀫𑀡𑁂 𑀧𑀢𑁆𑀢𑁄 𑀯𑀺𑀬 𑀧𑀭𑀺𑀴𑀸𑀳𑁄𑀯 𑀉𑀧𑁆𑀧𑀚𑁆𑀚𑀢𑀺. 𑀢𑀣𑀸𑀪𑀽𑀢𑀲𑁆𑀲 𑀧𑀦 𑀓𑀺𑀮𑁂𑀲𑀙𑀦𑁆𑀤𑀲𑁆𑀲 𑀯𑀲𑁂𑀦 𑀭𑀽𑀧𑀸𑀤𑀺𑀧𑀭𑀺𑀬𑁂𑀲𑀦𑀸 𑀳𑁄𑀢𑀻𑀢𑀺 𑀆𑀳 ‘‘𑀧𑀭𑀺𑀴𑀸𑀳𑀦𑀸𑀦𑀢𑁆𑀢𑀢𑀸𑀬 𑀭𑀽𑀧𑀧𑀭𑀺𑀬𑁂𑀲𑀦𑀸𑀤𑀺𑀦𑀸𑀦𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺. 𑀢𑀣𑀸 𑀧𑀭𑀺𑀬𑁂𑀲𑀦𑁆𑀢𑀲𑁆𑀲 𑀲𑀘𑁂 𑀢𑀁 𑀭𑀽𑀧𑀸𑀤𑀺 𑀮𑀩𑁆𑀪𑁂𑀬𑁆𑀬, 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀭𑀺𑀬𑁂𑀲𑀦𑀸𑀤𑀺𑀦𑀸𑀦𑀢𑁆𑀢𑀢𑀸𑀬 𑀭𑀽𑀧𑀧𑀝𑀺𑀮𑀸𑀪𑀸𑀤𑀺𑀦𑀸𑀦𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺.

(𑀚) 𑀫𑀭𑀡𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑁂𑀢𑀺 𑀫𑀭𑀡𑀲𑁆𑀲 𑀅𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀧𑀯𑀢𑁆𑀢𑀜𑀸𑀡𑁂, 𑀫𑀭𑀡𑀸𑀦𑀼𑀲𑁆𑀲𑀢𑀺𑀲𑀳𑀕𑀢𑀧𑀜𑁆𑀜𑀸𑀬𑀸𑀢𑀺 𑀅𑀢𑁆𑀣𑁄. 𑀆𑀳𑀸𑀭𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀸𑀢𑀺 𑀕𑀫𑀦𑀸𑀤𑀺𑀯𑀲𑁂𑀦 𑀆𑀳𑀸𑀭𑀁 𑀧𑀝𑀺𑀓𑁆𑀓𑀽𑀮𑀢𑁄 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲. 𑀉𑀓𑁆𑀓𑀡𑁆𑀞𑀦𑁆𑀢𑀲𑁆𑀲𑀸𑀢𑀺 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑀲𑁆𑀲 𑀓𑀢𑁆𑀣𑀘𑀺𑀧𑀺 𑀅𑀲𑀚𑁆𑀚𑀦𑁆𑀢𑀲𑁆𑀲.

𑀤𑀲𑀥𑀫𑁆𑀫𑀯𑀡𑁆𑀡𑀦𑀸

𑁩𑁬𑁦. (𑀛) 𑀦𑀺𑀚𑁆𑀚𑀭𑀓𑀸𑀭𑀡𑀸𑀦𑀻𑀢𑀺 𑀧𑀚𑀳𑀦𑀓𑀸𑀭𑀡𑀸𑀦𑀺. 𑀇𑀫𑀲𑁆𑀫𑀺𑀁 𑀅𑀪𑀺𑀜𑁆𑀜𑀸𑀧𑀤𑁂 𑀫𑀕𑁆𑀕𑁄 𑀓𑀣𑀻𑀬𑀢𑀻𑀢𑀺 𑀓𑀢𑁆𑀯𑀸 ‘‘𑀅𑀬𑀁 𑀳𑁂𑀝𑁆𑀞𑀸..𑀧𑁂… 𑀧𑀼𑀦 𑀕𑀳𑀺𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀇𑀥 𑀅𑀪𑀺𑀜𑁆𑀜𑀸𑀧𑀤𑁂 𑀫𑀕𑁆𑀕𑁄 𑀓𑀣𑀺𑀢𑁄’’ (𑀤𑀻. 𑀦𑀺. 𑀅𑀝𑁆𑀞. 𑁩.𑁩𑁬𑁦) 𑀓𑀺𑀜𑁆𑀘𑀸𑀧𑀺 𑀦𑀺𑀚𑁆𑀚𑀺𑀡𑁆𑀡𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀬𑀣𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀯𑀺𑀧𑀲𑁆𑀲𑀦𑀸𑀬 𑀦𑀺𑀚𑁆𑀚𑀺𑀡𑁆𑀡𑀸𑀧𑀺 𑀦 𑀲𑀫𑀼𑀘𑁆𑀙𑀺𑀦𑁆𑀦𑀸𑀢𑀺 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀤𑀲𑁆𑀲𑀦𑀢𑁆𑀣𑀁 𑀧𑀼𑀦 𑀕𑀳𑀺𑀢𑀸, 𑀏𑀯𑀁 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸𑀤𑀬𑁄𑀧𑀺 𑀯𑀺𑀧𑀲𑁆𑀲𑀦𑀸𑀬 𑀧𑀳𑀻𑀦𑀸𑀧𑀺 𑀅𑀲𑀫𑀼𑀘𑁆𑀙𑀺𑀦𑁆𑀦𑀢𑀸𑀬 𑀇𑀥 𑀧𑀼𑀦 𑀕𑀳𑀺𑀢𑀸𑀢𑀺 𑀅𑀬𑀫𑀢𑁆𑀣𑁄 ‘‘𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄’’𑀢𑀺𑀆𑀤𑀻𑀲𑀼 𑀲𑀩𑁆𑀩𑀧𑀤𑁂𑀲𑀼 𑀯𑀢𑁆𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀏𑀯𑀁 𑀲𑀩𑁆𑀩𑀧𑀤𑁂𑀲𑀼 𑀦𑀬𑁄 𑀦𑁂𑀢𑀩𑁆𑀩𑁄’’𑀢𑀺 𑀇𑀫𑀺𑀦𑀸.

𑀏𑀢𑁆𑀣 𑀘𑀸𑀢𑀺 ‘‘𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀏𑀢𑀲𑁆𑀫𑀺𑀁 𑀧𑀸𑀴𑀺𑀧𑀤𑁂. 𑀏𑀢𑁆𑀣 𑀘 𑀲𑀫𑀼𑀘𑁆𑀙𑁂𑀤𑀯𑀲𑁂𑀦, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀘 𑀧𑀝𑀺𑀧𑀓𑁆𑀔𑀥𑀫𑁆𑀫𑀸 𑀲𑀫𑁆𑀫𑀤𑁂𑀯 𑀯𑀺𑀫𑀼𑀘𑁆𑀘𑀦𑀁 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺, 𑀢𑀧𑁆𑀧𑀘𑁆𑀘𑀬𑀸 𑀘 𑀫𑀕𑁆𑀕𑀨𑀮𑁂𑀲𑀼 𑀅𑀝𑁆𑀞 𑀇𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸𑀦𑀺𑀧𑀺 𑀲𑀤𑁆𑀥𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀉𑀤𑁆𑀥𑀝𑀸𑀦𑀺. 𑀫𑀕𑁆𑀕𑀯𑀲𑁂𑀦 𑀳𑀺 𑀨𑀮𑁂𑀲𑀼 𑀪𑀸𑀯𑀦𑀸 𑀧𑀸𑀭𑀺𑀧𑀽𑀭𑀻 𑀦𑀸𑀫𑀸𑀢𑀺. 𑀅𑀪𑀺𑀦𑀦𑁆𑀤𑀦𑀝𑁆𑀞𑁂𑀦𑀸𑀢𑀺 𑀅𑀢𑀺𑀯𑀺𑀬 𑀲𑀺𑀦𑁂𑀳𑀦𑀝𑁆𑀞𑁂𑀦𑀺𑀤𑀜𑁆𑀳𑀺. 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀉𑀓𑁆𑀓𑀁𑀲𑀕𑀢𑀲𑀸𑀢𑀲𑀪𑀸𑀯𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀲𑀺𑀦𑁂𑀳𑀦𑁆𑀢𑀁 𑀢𑁂𑀫𑁂𑀦𑁆𑀢𑀁 𑀯𑀺𑀬 𑀧𑀯𑀢𑁆𑀢𑀢𑀺. 𑀧𑀯𑀢𑁆𑀢𑀲𑀦𑁆𑀢𑀢𑀺𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦𑀸𑀢𑀺 𑀯𑀺𑀧𑀸𑀓𑀲𑀦𑁆𑀢𑀸𑀦𑀲𑁆𑀲 𑀚𑀻𑀯𑀦𑁂 𑀅𑀥𑀺𑀧𑀢𑀺𑀪𑀸𑀯𑁂𑀦. ‘‘𑀏𑀯’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀦𑀺𑀕𑀫𑀦𑀁.

𑀅𑀤𑁆𑀥𑁂𑀦 𑀲𑀳 𑀙𑀝𑁆𑀞𑀸𑀦𑀺 𑀧𑀜𑁆𑀳𑀲𑀢𑀸𑀦𑀺, 𑀧𑀜𑁆𑀜𑀸𑀲𑀸𑀥𑀺𑀓𑀸𑀦𑀺 𑀲𑀳 𑀧𑀜𑁆𑀳𑀲𑀢𑀸𑀦𑀻𑀢𑀺 𑀅𑀢𑁆𑀣𑁄.

𑀏𑀢𑁆𑀣 𑀘 𑀆𑀬𑀲𑁆𑀫𑀸 𑀥𑀫𑁆𑀫𑀲𑁂𑀦𑀸𑀧𑀢𑀺 ‘‘𑀤𑀲𑀲𑀼 𑀦𑀸𑀣𑀓𑀭𑀡𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀬 𑀤𑀲𑀓𑀲𑀺𑀡𑀸𑀬𑀢𑀦𑀸𑀦𑀺 𑀪𑀸𑀯𑁂𑀦𑁆𑀢𑁄 𑀤𑀲𑀆𑀬𑀢𑀦𑀫𑀼𑀔𑁂𑀦 𑀧𑀭𑀺𑀜𑁆𑀜𑀁 𑀧𑀝𑁆𑀞𑀧𑁂𑀢𑁆𑀯𑀸 𑀧𑀭𑀺𑀜𑁆𑀜𑁂𑀬𑁆𑀬𑀥𑀫𑁆𑀫𑁂 𑀧𑀭𑀺𑀚𑀸𑀦𑀦𑁆𑀢𑁄 𑀤𑀲𑀫𑀺𑀘𑁆𑀙𑀢𑁆𑀢𑁂, 𑀤𑀲𑀅𑀓𑀼𑀲𑀮𑀓𑀫𑁆𑀫𑀧𑀣𑁂 𑀘 𑀧𑀳𑀸𑀬 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑁂𑀲𑀼 𑀘 𑀅𑀯𑀝𑁆𑀞𑀺𑀢𑁄 𑀤𑀲𑀲𑀼 𑀅𑀭𑀺𑀬𑀸𑀯𑀸𑀲𑁂𑀲𑀼 𑀆𑀯𑀲𑀺𑀢𑀼𑀓𑀸𑀫𑁄 𑀤𑀲𑀲𑀜𑁆𑀜𑀸 𑀉𑀧𑁆𑀧𑀸𑀤𑁂𑀦𑁆𑀢𑁄 𑀤𑀲𑀦𑀺𑀚𑁆𑀚𑀭𑀯𑀢𑁆𑀣𑀽𑀦𑀺 𑀅𑀪𑀺𑀜𑁆𑀜𑀸𑀬 𑀤𑀲𑀅𑀲𑁂𑀓𑁆𑀔𑀥𑀫𑁆𑀫𑁂 𑀅𑀥𑀺𑀕𑀘𑁆𑀙𑀢𑀻’’𑀢𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀑𑀯𑀸𑀤𑀁 𑀫𑀢𑁆𑀣𑀓𑀁 𑀧𑀸𑀧𑁂𑀦𑁆𑀢𑁄 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀲𑀺. 𑀧𑀫𑁄𑀤𑀯𑀲𑁂𑀦 𑀧𑀝𑀺𑀕𑁆𑀕𑀡𑁆𑀳𑀦𑀁 𑀅𑀪𑀺𑀦𑀦𑁆𑀤𑀦𑀦𑁆𑀢𑀺 𑀆𑀳 ‘‘𑀲𑀸𑀥𑀼 𑀲𑀸𑀥𑀽𑀢𑀺 𑀅𑀪𑀺𑀦𑀦𑁆𑀤𑀦𑁆𑀢𑀸 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀽’’𑀢𑀺. 𑀢𑀸𑀬 𑀅𑀢𑁆𑀢𑀫𑀦𑀢𑀸𑀬𑀸𑀢𑀺 𑀢𑀸𑀬 𑀬𑀣𑀸𑀤𑁂𑀲𑀺𑀢𑀤𑁂𑀲𑀦𑀸𑀕𑀢𑀸𑀬 𑀧𑀳𑀝𑁆𑀞𑀘𑀺𑀢𑁆𑀢𑀢𑀸𑀬, 𑀢𑀢𑁆𑀣 𑀬𑀣𑀸𑀮𑀤𑁆𑀥𑀅𑀢𑁆𑀣𑀯𑁂𑀤𑀥𑀫𑁆𑀫𑀯𑁂𑀤𑁂𑀳𑀻𑀢𑀺 𑀅𑀢𑁆𑀣𑁄. 𑀇𑀫𑀫𑁂𑀯 𑀲𑀼𑀢𑁆𑀢𑀁 𑀆𑀯𑀚𑁆𑀚𑀫𑀸𑀦𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀢𑀢𑁆𑀣 𑀢𑀢𑁆𑀣 𑀆𑀕𑀢𑁂 𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀺𑀪𑁂𑀤𑁂 𑀥𑀫𑁆𑀫𑁂 𑀅𑀪𑀺𑀚𑀸𑀦𑀦𑀸𑀤𑀺𑀯𑀲𑁂𑀦 𑀲𑀫𑀦𑁆𑀦𑀸𑀳𑀭𑀦𑁆𑀢𑀸. 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺…𑀧𑁂… 𑀧𑀢𑀺𑀝𑁆𑀞𑀳𑀺𑀁𑀲𑀽𑀢𑀺 𑀅𑀢𑁆𑀢𑀦𑁄 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀢𑀸𑀬, 𑀣𑁂𑀭𑀲𑁆𑀲 𑀘 𑀤𑁂𑀲𑀦𑀸𑀦𑀼𑀪𑀸𑀯𑁂𑀦 𑀬𑀣𑀸𑀭𑀤𑁆𑀥𑀁 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑁂𑀢𑁆𑀯𑀸 𑀧𑀝𑀺𑀲𑀫𑁆𑀪𑀺𑀤𑀸𑀧𑀭𑀺𑀯𑀸𑀭𑀸𑀬 𑀅𑀪𑀺𑀜𑁆𑀜𑀸𑀬 𑀲𑀡𑁆𑀞𑀳𑀺𑀁𑀲𑀽𑀢𑀺.

𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀤𑀲𑀼𑀢𑁆𑀢𑀭𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.