𑁮. 𑀲𑀺𑀗𑁆𑀕𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑀦𑀺𑀤𑀸𑀦𑀯𑀡𑁆𑀡𑀦𑀸

𑁨𑁪𑁨. 𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀕𑁄𑀧𑀼𑀭𑀝𑁆𑀝𑀸𑀮𑀓𑀬𑀼𑀢𑁆𑀢𑀦𑁆𑀢𑀺 𑀤𑁆𑀯𑀸𑀭𑀧𑀸𑀲𑀸𑀤𑁂𑀦 𑀘𑁂𑀯 𑀢𑀢𑁆𑀣 𑀢𑀢𑁆𑀣 𑀧𑀸𑀓𑀸𑀭𑀫𑀢𑁆𑀣𑀓𑁂 𑀧𑀢𑀺𑀝𑁆𑀞𑀸𑀧𑀺𑀢𑀅𑀝𑁆𑀝𑀸𑀮𑀓𑁂𑀳𑀺 𑀘 𑀬𑀼𑀢𑁆𑀢𑀁. 𑀯𑁂𑀴𑀽𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀢𑁆𑀢𑀸, 𑀅𑀩𑁆𑀪𑀦𑁆𑀢𑀭𑁂 𑀧𑀼𑀧𑁆𑀨𑀽𑀧𑀕𑀨𑀮𑀽𑀧𑀕𑀭𑀼𑀓𑁆𑀔𑀲𑀜𑁆𑀙𑀦𑁆𑀦𑀢𑁆𑀢𑀸 𑀘 𑀦𑀻𑀮𑁄𑀪𑀸𑀲𑀁. 𑀙𑀸𑀬𑀽𑀤𑀓𑀲𑀫𑁆𑀧𑀢𑁆𑀢𑀺𑀬𑀸, 𑀪𑀽𑀫𑀺𑀪𑀸𑀕𑀲𑀫𑁆𑀧𑀢𑁆𑀢𑀺𑀬𑀸 𑀘 𑀫𑀦𑁄𑀭𑀫𑀁.

𑀓𑀸𑀴𑀓𑀯𑁂𑀲𑁂𑀦𑀸𑀢𑀺 𑀓𑀮𑀦𑁆𑀤𑀓𑀭𑀽𑀧𑁂𑀦. 𑀦𑀺𑀯𑀸𑀧𑀦𑁆𑀢𑀺 𑀪𑁄𑀚𑀦𑀁. 𑀢𑀦𑁆𑀢𑀺 𑀉𑀬𑁆𑀬𑀸𑀦𑀁.

‘‘𑀔𑁄 𑀧𑀦𑀸’’𑀢𑀺 𑀯𑀘𑀦𑀸𑀮𑀗𑁆𑀓𑀸𑀭𑀫𑀢𑁆𑀢𑀫𑁂𑀢𑀦𑁆𑀢𑀺 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀅𑀢𑁆𑀣𑀯𑀘𑀦𑀁 𑀬𑀼𑀢𑁆𑀢𑀁. 𑀕𑀳𑀧𑀢𑀺 𑀫𑀳𑀸𑀲𑀸𑀮𑁄𑀢𑀺 𑀕𑀳𑀧𑀢𑀺𑀪𑀽𑀢𑁄 𑀫𑀳𑀸𑀲𑀸𑀭𑁄, 𑀭-𑀓𑀸𑀭𑀲𑁆𑀲 𑀮-𑀓𑀸𑀭𑀁 𑀓𑀢𑁆𑀯𑀸 𑀅𑀬𑀁 𑀦𑀺𑀤𑁆𑀤𑁂𑀲𑁄. 𑀯𑀺𑀪𑀯𑀲𑀫𑁆𑀧𑀢𑁆𑀢𑀺𑀬𑀸 𑀫𑀳𑀸𑀲𑀸𑀭𑀧𑁆𑀧𑀢𑁆𑀢𑁄 𑀓𑀼𑀝𑀼𑀫𑁆𑀩𑀺𑀓𑁄. ‘‘𑀧𑀼𑀢𑁆𑀢𑁄 𑀧𑀦𑀲𑁆𑀲 𑀅𑀲𑁆𑀲𑀤𑁆𑀥𑁄’’𑀢𑀺𑀆𑀤𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄 𑀬𑀁 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁄𑀢𑀺 𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 𑀆𑀭𑀤𑁆𑀥𑀁. 𑀓𑀫𑁆𑀫𑀨𑀮𑀲𑀤𑁆𑀥𑀸𑀬 𑀅𑀪𑀸𑀯𑁂𑀦 𑀅𑀲𑁆𑀲𑀤𑁆𑀥𑁄. 𑀭𑀢𑀦𑀢𑁆𑀢𑀬𑁂 𑀧𑀲𑀸𑀤𑀸𑀪𑀸𑀯𑁂𑀦 𑀅𑀧𑁆𑀧𑀲𑀦𑁆𑀦𑁄. 𑀏𑀯𑀫𑀸𑀳𑀸𑀢𑀺 𑀏𑀯𑀁 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑁂𑀦 𑀯𑀤𑀢𑀺.

𑀬𑀸𑀯𑀚𑀻𑀯𑀁 𑀅𑀦𑀼𑀲𑁆𑀲𑀭𑀡𑀻𑀬𑀸 𑀳𑁄𑀢𑀺 𑀳𑀺𑀢𑁂𑀲𑀺𑀢𑀸𑀬 𑀯𑀼𑀢𑁆𑀢𑀸 𑀧𑀘𑁆𑀙𑀺𑀫𑀸 𑀯𑀸𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦. 𑀧𑀼𑀣𑀼𑀤𑀺𑀲𑀸𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀤𑀺𑀲𑀸, 𑀢𑀸 𑀧𑀦 𑀅𑀦𑁂𑀓𑀸𑀢𑀺 𑀆𑀳 ‘‘𑀩𑀳𑀼𑀤𑀺𑀲𑀸’’𑀢𑀺.

𑁨𑁪𑁩. ‘‘𑀦 𑀢𑀸𑀯 𑀧𑀯𑀺𑀝𑁆𑀞𑁄’’𑀢𑀺𑀆𑀤𑀻𑀲𑀼 𑀯𑀢𑁆𑀢𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀦 𑀇𑀤𑀸𑀦𑁂𑀯𑀸𑀢𑀺 𑀦 𑀇𑀫𑀸𑀬 𑀏𑀯 𑀯𑁂𑀮𑀸𑀬. 𑀓𑀺𑀁 𑀘𑀭𑀳𑀻𑀢𑀺 𑀆𑀳 ‘‘𑀧𑀘𑁆𑀘𑀽𑀲𑀲𑀫𑀬𑁂𑀧𑀻’’𑀢𑀺𑀆𑀤𑀺. 𑀕𑀺𑀳𑀺𑀯𑀺𑀦𑀬𑀦𑁆𑀢𑀺 𑀕𑀺𑀳𑀻𑀦𑀁 𑀕𑀳𑀝𑁆𑀞𑀸𑀦𑀁 𑀯𑀺𑀦𑀬𑀢𑀦𑁆𑀢𑀺𑀪𑀽𑀢𑀁 ‘‘𑀕𑀺𑀳𑀺𑀦𑀸 𑀏𑀯𑀁 𑀯𑀢𑁆𑀢𑀺𑀢𑀩𑁆𑀩’’𑀦𑁆𑀢𑀺 𑀕𑀳𑀝𑁆𑀞𑀸𑀘𑀸𑀭𑀲𑁆𑀲 𑀕𑀳𑀝𑁆𑀞𑀯𑀢𑁆𑀢𑀲𑁆𑀲 𑀅𑀦𑀯𑀲𑁂𑀲𑀢𑁄 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀯𑀺𑀲𑁂𑀲𑀁 𑀓𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸. 𑀢𑀣𑁂𑀯𑀸𑀢𑀺 𑀬𑀣𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑀁, 𑀢𑀣𑁂𑀯 𑀧𑀲𑁆𑀲𑀺. 𑀦𑀫𑀲𑁆𑀲𑀢𑀺 𑀯𑀢𑁆𑀢𑀯𑀲𑁂𑀦 𑀓𑀢𑁆𑀢𑀩𑁆𑀩𑀦𑁆𑀢𑀺 𑀕𑀳𑁂𑀢𑁆𑀯𑀸 𑀞𑀺𑀢𑀢𑁆𑀢𑀸.

𑀙𑀤𑀺𑀲𑀸𑀤𑀺𑀯𑀡𑁆𑀡𑀦𑀸

𑁨𑁪𑁪. 𑀯𑀘𑀦𑀁 𑀲𑀼𑀢𑁆𑀯𑀸𑀯 𑀘𑀺𑀦𑁆𑀢𑁂𑀲𑀺 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀸𑀦𑀦𑀺𑀫𑀺𑀢𑁆𑀢𑁂𑀦 𑀧𑀼𑀜𑁆𑀜𑀩𑀮𑁂𑀦 𑀘 𑀘𑁄𑀤𑀺𑀬𑀫𑀸𑀦𑁄. 𑀦 𑀓𑀺𑀭 𑀢𑀸 𑀏𑀢𑀸𑀢𑀺 𑀢𑀸 𑀙 𑀤𑀺𑀲𑀸 𑀏𑀢𑀸 𑀇𑀤𑀸𑀦𑀺 𑀫𑀬𑀸 𑀦𑀫𑀲𑁆𑀲𑀺𑀬𑀫𑀸𑀦𑀸 𑀧𑀼𑀭𑀢𑁆𑀣𑀺𑀫𑀸𑀤𑀺𑀓𑀸 𑀦 𑀳𑁄𑀦𑁆𑀢𑀺 𑀓𑀺𑀭𑀸𑀢𑀺. 𑀦𑀺𑀧𑀸𑀢𑀫𑀢𑁆𑀢𑀦𑁆𑀢𑀺 𑀅𑀦𑀢𑁆𑀣𑀓𑀪𑀸𑀯𑀁 𑀢𑀲𑁆𑀲 𑀯𑀤𑀢𑀺. 𑀧𑀼𑀘𑁆𑀙𑀸𑀧𑀤𑀦𑁆𑀢𑀺 𑀧𑀼𑀘𑁆𑀙𑀸𑀯𑀘𑀦𑀁.

𑀪𑀕𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑁂𑀦 𑀦𑀫𑀲𑁆𑀲𑀺𑀢𑀩𑁆𑀩𑀸 𑀙 𑀤𑀺𑀲𑀸 𑀧𑀼𑀘𑁆𑀙𑀺𑀢𑁄 𑀤𑁂𑀲𑀦𑀸𑀓𑀼𑀲𑀮𑀢𑀸𑀬 𑀆𑀤𑀺𑀢𑁄 𑀏𑀯 𑀢𑀸 𑀅𑀓𑀣𑁂𑀢𑁆𑀯𑀸 𑀢𑀲𑁆𑀲 𑀢𑀸𑀯 𑀧𑀝𑀺𑀧𑀢𑁆𑀢𑀺𑀬𑀸 𑀦𑀁 𑀪𑀸𑀚𑀦𑀪𑀽𑀢𑀁 𑀓𑀸𑀢𑀼𑀁 𑀯𑀚𑁆𑀚𑀦𑀻𑀬𑀯𑀚𑁆𑀚𑀦𑀢𑁆𑀣𑀜𑁆𑀘𑁂𑀯 𑀲𑁂𑀯𑀺𑀢𑀩𑁆𑀩𑀲𑁂𑀯𑀦𑀢𑁆𑀣𑀜𑁆𑀘 𑀑𑀯𑀸𑀤𑀁 𑀤𑁂𑀦𑁆𑀢𑁄 ‘‘𑀬𑀢𑁄 𑀔𑁄 𑀕𑀳𑀧𑀢𑀺𑀧𑀼𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀓𑀫𑁆𑀫𑀓𑀺𑀮𑁂𑀲𑀸𑀢𑀺 𑀓𑀫𑁆𑀫𑀪𑀽𑀢𑀸 𑀲𑀁𑀓𑀺𑀮𑁂𑀲𑀸. 𑀓𑀺𑀮𑀺𑀲𑁆𑀲𑀦𑁆𑀢𑀻𑀢𑀺 𑀓𑀺𑀮𑀺𑀝𑁆𑀞𑀸 𑀫𑀮𑀻𑀦𑀸 𑀯𑀺𑀬 𑀞𑀺𑀢𑀸, 𑀉𑀧𑀢𑀸𑀧𑀺𑀢𑀸 𑀘 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀓𑀺𑀮𑀺𑀲𑁆𑀲𑀦𑀦𑀺𑀫𑀺𑀢𑁆𑀢𑀢𑁆𑀢𑀸. 𑀬𑀤𑀺𑀧𑀺 𑀲𑀼𑀭𑀸𑀧𑀸𑀦𑀁 𑀧𑀜𑁆𑀘𑀯𑁂𑀭𑀪𑀸𑀯𑁂𑀦 𑀉𑀧𑀸𑀲𑀓𑁂𑀳𑀺 𑀧𑀭𑀺𑀯𑀚𑁆𑀚𑀦𑀻𑀬𑀁, 𑀢𑀲𑁆𑀲 𑀧𑀦 𑀅𑀧𑀸𑀬𑀫𑀼𑀔𑀪𑀸𑀯𑁂𑀦 𑀧𑀭𑀢𑁄 𑀯𑀢𑁆𑀢𑀼𑀓𑀸𑀫𑀢𑀸𑀬 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀓𑁂 𑀏𑀯 𑀲𑀦𑁆𑀥𑀸𑀬 ‘‘𑀘𑀢𑁆𑀢𑀸𑀭𑁄’’𑀢𑀺 𑀯𑀼𑀢𑁆𑀢𑀁, 𑀦 ‘‘𑀧𑀜𑁆𑀘𑀸’’𑀢𑀺. ‘‘𑀯𑀺𑀲𑀼𑀁 𑀅𑀓𑀫𑁆𑀫𑀧𑀣𑀪𑀸𑀯𑀢𑁄 𑀘𑀸’’𑀢𑀺 𑀅𑀧𑀭𑁂. ‘‘𑀲𑀼𑀭𑀸𑀧𑀸𑀦𑀫𑁆𑀧𑀺 ‘𑀲𑀼𑀭𑀸𑀫𑁂𑀭𑀬𑀧𑀸𑀦𑀁, 𑀪𑀺𑀓𑁆𑀔𑀯𑁂, 𑀆𑀲𑁂𑀯𑀺𑀢𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀓’𑀦𑁆𑀢𑀺𑀆𑀤𑀺 (𑀅. 𑀦𑀺. 𑁮.𑁪𑁦) 𑀯𑀘𑀦𑀢𑁄 𑀯𑀺𑀲𑀼𑀁 𑀓𑀫𑁆𑀫𑀧𑀣𑀪𑀸𑀯𑁂𑀦 𑀆𑀕𑀢𑀁. 𑀢𑀣𑀸 𑀳𑀺 𑀢𑀁 𑀤𑀼𑀘𑁆𑀘𑀭𑀺𑀢𑀓𑀫𑁆𑀫𑀁 𑀳𑀼𑀢𑁆𑀯𑀸 𑀤𑀼𑀕𑁆𑀕𑀢𑀺𑀕𑀸𑀫𑀺𑀧𑀺𑀝𑁆𑀞𑀺𑀯𑀢𑁆𑀢𑀓𑀪𑀸𑀯𑁂𑀦 𑀦𑀺𑀬𑀢’’𑀦𑁆𑀢𑀺 𑀓𑁂𑀘𑀺, 𑀢𑁂𑀲𑀁 𑀫𑀢𑁂𑀦 𑀏𑀓𑀸𑀤𑀲 𑀓𑀫𑁆𑀫𑀧𑀣𑀸 𑀲𑀺𑀬𑀼𑀁. 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑁂𑀲𑁆𑀯𑁂𑀯 𑀓𑀫𑁆𑀫𑀧𑀣𑁂𑀲𑀼 𑀉𑀧𑀓𑀸𑀭𑀓𑀢𑁆𑀢𑀲𑀪𑀸𑀕𑀢𑁆𑀢𑀯𑀲𑁂𑀦 𑀅𑀦𑀼𑀧𑁆𑀧𑀯𑁂𑀲𑁄 𑀤𑀝𑁆𑀞𑀩𑁆𑀩𑁄𑀢𑀺 ‘‘𑀯𑀺𑀲𑀼𑀁 𑀅𑀓𑀫𑁆𑀫𑀧𑀣𑀪𑀸𑀯𑀢𑁄 𑀘𑀸’’𑀢𑀺 𑀲𑀼𑀯𑀼𑀢𑁆𑀢𑀫𑁂𑀢𑀁. 𑀲𑀼𑀭𑀸𑀧𑀸𑀦𑀲𑁆𑀲 𑀪𑁄𑀕𑀸𑀧𑀸𑀬𑀫𑀼𑀔𑀪𑀸𑀯𑁂𑀦 𑀯𑀢𑁆𑀢𑀼𑀓𑀸𑀫𑀢𑀸𑀬 ‘‘𑀘𑀢𑁆𑀢𑀸𑀭𑁄’’ 𑀢𑁆𑀯𑁂𑀯 𑀅𑀯𑁄𑀘. 𑀢𑀺𑀝𑁆𑀞𑀢𑀺 𑀏𑀢𑁆𑀣 𑀨𑀮𑀁 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀞𑀸𑀦𑀁, 𑀳𑁂𑀢𑀽𑀢𑀺 𑀆𑀳 ‘‘𑀞𑀸𑀦𑁂𑀳𑀻𑀢𑀺 𑀓𑀸𑀭𑀡𑁂𑀳𑀻’’𑀢𑀺. 𑀅𑀧𑁂𑀦𑁆𑀢𑀺 𑀅𑀧𑀕𑀘𑁆𑀙𑀦𑁆𑀢𑀺, 𑀅𑀧𑁂𑀢𑀺 𑀯𑀸 𑀏𑀢𑁂𑀳𑀻𑀢𑀺 𑀅𑀧𑀸𑀬𑀸, 𑀅𑀧𑀸𑀬𑀸𑀦𑀁, 𑀅𑀧𑀸𑀬𑀸 𑀏𑀯 𑀯𑀸 𑀫𑀼𑀔𑀸𑀦𑀺 𑀤𑁆𑀯𑀸𑀭𑀸𑀦𑀻𑀢𑀺 𑀅𑀧𑀸𑀬𑀫𑀼𑀔𑀸𑀦𑀺. 𑀯𑀺𑀦𑀸𑀲𑀫𑀼𑀔𑀸𑀦𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀓𑀺𑀜𑁆𑀘𑀸𑀧𑀺 ‘‘𑀅𑀭𑀺𑀬𑀲𑀸𑀯𑀓𑀲𑁆𑀲𑀸’’𑀢𑀺 𑀧𑀼𑀩𑁆𑀩𑁂 𑀲𑀸𑀥𑀸𑀭𑀡𑀢𑁄 𑀯𑀼𑀢𑁆𑀢𑀁, 𑀯𑀺𑀲𑁂𑀲𑀢𑁄 𑀧𑀦 𑀧𑀞𑀫𑀸𑀬 𑀪𑀽𑀫𑀺𑀬𑀁 𑀞𑀺𑀢𑀲𑁆𑀲𑁂𑀯 𑀯𑀓𑁆𑀔𑀫𑀸𑀦𑀦𑀬𑁄 𑀬𑀼𑀚𑁆𑀚𑀢𑀻𑀢𑀺 ‘‘𑀲𑁄𑀢𑀺 𑀲𑁄 𑀲𑁄𑀢𑀸𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑀁. 𑀧𑀸𑀧𑀓-𑀲𑀤𑁆𑀤𑁄 𑀦𑀺𑀳𑀻𑀦𑀧𑀭𑀺𑀬𑀸𑀬𑁄𑀢𑀺 ‘‘𑀮𑀸𑀫𑀓𑁂𑀳𑀻’’𑀢𑀺 𑀯𑀼𑀢𑁆𑀢𑀁. 𑀅𑀧𑀸𑀬𑀤𑀼𑀓𑁆𑀔𑀁, 𑀯𑀝𑁆𑀝𑀤𑀼𑀓𑁆𑀔𑀜𑁆𑀘 𑀧𑀸𑀧𑁂𑀦𑁆𑀢𑀻𑀢𑀺 𑀯𑀸 𑀧𑀸𑀧𑀓𑀸, 𑀢𑁂𑀳𑀺 𑀧𑀸𑀧𑀓𑁂𑀳𑀺. 𑀙 𑀤𑀺𑀲𑀸 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁄𑀢𑀺 𑀢𑁂𑀦 𑀢𑁂𑀦 𑀪𑀸𑀕𑁂𑀦 𑀤𑀺𑀲𑁆𑀲𑀦𑁆𑀢𑀻𑀢𑀺 ‘‘𑀤𑀺𑀲𑀸’’𑀢𑀺 𑀲𑀜𑁆𑀜𑀺𑀢𑁂 𑀙 𑀪𑀸𑀕𑁂 𑀲𑀢𑁆𑀢𑁂 𑀬𑀣𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀅𑀢𑁆𑀢𑀦𑁄 𑀙𑀺𑀤𑁆𑀤𑀁 𑀦 𑀳𑁄𑀢𑀺, 𑀏𑀯𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁄 𑀧𑀝𑀺𑀲𑀦𑁆𑀥𑀸𑀭𑁂𑀦𑁆𑀢𑁄. 𑀯𑀺𑀚𑀺𑀦𑀦𑀢𑁆𑀣𑀸𑀬𑀸𑀢𑀺 𑀅𑀪𑀺𑀪𑀯𑀦𑀢𑁆𑀣𑀸𑀬. 𑀬𑁄 𑀳𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀁, 𑀲𑀫𑁆𑀧𑀭𑀸𑀬𑀺𑀓𑀜𑁆𑀘 𑀅𑀦𑀢𑁆𑀣𑀁 𑀧𑀭𑀺𑀯𑀚𑁆𑀚𑀦𑀯𑀲𑁂𑀦 𑀅𑀪𑀺𑀪𑀯𑀢𑀺, 𑀢𑀢𑁄 𑀏𑀯 𑀢𑀤𑀼𑀪𑀬𑀢𑁆𑀣𑀁 𑀲𑀫𑁆𑀧𑀸𑀤𑁂𑀢𑀺, 𑀲𑁄 𑀉𑀪𑀬𑀮𑁄𑀓𑀯𑀺𑀚𑀬𑀸𑀬 𑀧𑀝𑀺𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺 𑀧𑀘𑁆𑀘𑀢𑁆𑀣𑀺𑀓𑀦𑀺𑀕𑁆𑀕𑀡𑁆𑀳𑀦𑀢𑁄, 𑀲𑀓𑀢𑁆𑀣𑀲𑀫𑁆𑀧𑀸𑀤𑀦𑀢𑁄 𑀘. 𑀢𑁂𑀦𑀸𑀳 ‘‘𑀅𑀬𑀜𑁆𑀘𑁂𑀯 𑀮𑁄𑀓𑁄’’𑀢𑀺𑀆𑀤𑀺. 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀧𑀜𑁆𑀘 𑀯𑁂𑀭𑀸𑀦𑀺 𑀯𑁂𑀭𑀧𑁆𑀧𑀲𑀯𑀦𑀢𑁄. 𑀆𑀭𑀤𑁆𑀥𑁄 𑀳𑁄𑀢𑀻𑀢𑀺 𑀲𑀁𑀲𑀸𑀥𑀺𑀢𑁄 𑀳𑁄𑀢𑀺, 𑀢𑀬𑀺𑀤𑀁 𑀲𑀁𑀲𑀸𑀥𑀦𑀁 𑀓𑀺𑀢𑁆𑀢𑀺𑀲𑀤𑁆𑀤𑁂𑀦 𑀇𑀥 𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑀢𑁄𑀲𑀦𑁂𑀦, 𑀯𑁂𑀭𑀸𑀪𑀸𑀯𑀸𑀧𑀸𑀤𑀦𑁂𑀦 𑀘 𑀳𑁄𑀢𑀻𑀢𑀺 𑀆𑀳 ‘‘𑀧𑀭𑀺𑀢𑁄𑀲𑀺𑀢𑁄 𑀘𑁂𑀯 𑀦𑀺𑀧𑁆𑀨𑀸𑀤𑀺𑀢𑁄 𑀘𑀸’’𑀢𑀺. 𑀧𑀼𑀦 𑀧𑀜𑁆𑀘 𑀯𑁂𑀭𑀸𑀦𑀻𑀢𑀺 𑀧𑀜𑁆𑀘 𑀯𑁂𑀭𑀨𑀮𑀸𑀦𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦.

𑀓𑀢𑀫𑀲𑁆𑀲𑀸𑀢𑀺 𑀓𑀢𑀫𑁂 𑀅𑀲𑁆𑀲. 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 𑀓𑀺𑀮𑁂𑀲𑁄𑀢𑀺 𑀢𑀁𑀬𑁄𑀕𑀢𑁄 𑀢𑀁𑀲𑀤𑀺𑀲𑀁 𑀯𑀤𑀢𑀺 𑀬𑀣𑀸 ‘‘𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁, (𑀤𑀻. 𑀦𑀺. 𑁧.𑁨𑁨𑁬; 𑀫. 𑀦𑀺. 𑁧.𑁨𑁭𑁧, 𑁨𑁮𑁭, 𑁨𑁯𑁭; 𑀲𑀁. 𑀦𑀺. 𑁨.𑁧𑁫𑁨; 𑀅. 𑀦𑀺. 𑁪.𑁧𑁨𑁩; 𑁫.𑁨𑁮; 𑀧𑀸𑀭𑀸. 𑁧𑁧; 𑀥. 𑀲. 𑁪𑁯𑁯; 𑀯𑀺𑀪. 𑁫𑁦𑁮) 𑀦𑀻𑀮𑀁 𑀯𑀢𑁆𑀣’’𑀦𑁆𑀢𑀺 𑀘. 𑀲𑀫𑁆𑀧𑀬𑀼𑀢𑁆𑀢𑀢𑀸 𑀘𑁂𑀢𑁆𑀣 𑀢𑀤𑁂𑀓𑀝𑁆𑀞𑀢𑀸𑀬 𑀯𑁂𑀤𑀺𑀢𑀩𑁆𑀩𑀸, 𑀦 𑀏𑀓𑀼𑀧𑁆𑀧𑀸𑀤𑀸𑀤𑀺𑀢𑀸𑀬. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀲𑁆𑀲 𑀤𑀺𑀝𑁆𑀞𑀺𑀫𑀸𑀦𑀮𑁄𑀪𑀸𑀤𑀻𑀳𑀺𑀧𑀺 𑀓𑀺𑀮𑀺𑀝𑁆𑀞𑀢𑀸 𑀲𑀺𑀤𑁆𑀥𑀸 𑀳𑁄𑀢𑀺, 𑀫𑀺𑀘𑁆𑀙𑀸𑀘𑀸𑀭𑀲𑁆𑀲 𑀤𑁄𑀲𑀸𑀤𑀻𑀳𑀺 𑀓𑀺𑀮𑀺𑀝𑁆𑀞𑀢𑀸. 𑀢𑁂𑀦𑀸𑀳 ‘‘𑀲𑀁𑀓𑀺𑀮𑁂𑀲𑁄𑀬𑁂𑀯𑀸’’𑀢𑀺𑀆𑀤𑀺. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀅𑀢𑁆𑀣𑀯𑀲𑁂𑀦 𑀧𑀦 𑀲𑀫𑁆𑀫𑀼𑀔𑁂𑀦𑀧𑀺 𑀦𑁂𑀲𑀁 𑀓𑀺𑀮𑁂𑀲𑀧𑀭𑀺𑀬𑀸𑀬𑁄 𑀮𑀩𑁆𑀪𑀢𑁂𑀯. 𑀏𑀢𑀤𑀢𑁆𑀣𑀧𑀭𑀺𑀤𑀻𑀧𑀓𑀫𑁂𑀯𑀸𑀢𑀺 𑀬𑁄 ‘‘𑀧𑀸𑀡𑀸𑀢𑀺𑀧𑀸𑀢𑁄 𑀔𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄, 𑀏𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀭𑀺𑀤𑀻𑀧𑀓𑀫𑁂𑀯. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀧𑀼𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀕𑀸𑀣𑀸𑀩𑀦𑁆𑀥’’𑀦𑁆𑀢𑀺, 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀪𑀕𑀯𑀸 𑀕𑀸𑀣𑀸𑀩𑀦𑁆𑀥𑀁 𑀅𑀯𑁄𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀘𑀢𑀼𑀞𑀸𑀦𑀸𑀤𑀺𑀯𑀡𑁆𑀡𑀦𑀸

𑁨𑁪𑁬. ‘‘𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀻’’𑀢𑀺 𑀓𑀲𑁆𑀫𑀸 𑀅𑀬𑀁 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑁄 𑀧𑀯𑀢𑁆𑀢𑁄𑀢𑀺 𑀅𑀦𑁆𑀢𑁄𑀮𑀻𑀦𑀘𑁄𑀤𑀦𑀁 𑀲𑀦𑁆𑀥𑀸𑀬 ‘‘𑀇𑀤𑀁 𑀪𑀕𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀼𑀓𑁆𑀓𑀧𑀓𑁆𑀔𑀯𑀲𑁂𑀦 𑀳𑀺 𑀉𑀤𑁆𑀤𑁂𑀲𑁄 𑀓𑀢𑁄, 𑀓𑀡𑁆𑀳𑀧𑀓𑁆𑀔𑀯𑀲𑁂𑀦 𑀘 𑀦𑀺𑀤𑁆𑀤𑁂𑀲𑁄 𑀆𑀭𑀤𑁆𑀥𑁄. 𑀓𑀸𑀭𑀓𑁂𑀢𑀺 𑀧𑀸𑀧𑀓𑀫𑁆𑀫𑀲𑁆𑀲 𑀓𑀸𑀭𑀓𑁂. 𑀅𑀓𑀸𑀭𑀓𑁄 𑀧𑀸𑀓𑀝𑁄 𑀳𑁄𑀢𑀺 𑀬𑀣𑀸 𑀧𑀝𑀺𑀧𑀚𑁆𑀚𑀦𑁆𑀢𑁄 𑀧𑀸𑀧𑀁 𑀓𑀭𑁄𑀢𑀺 𑀦𑀸𑀫, 𑀢𑀣𑀸 𑀅𑀧𑁆𑀧𑀝𑀺𑀧𑀚𑁆𑀚𑀦𑀢𑁄. 𑀲𑀁𑀓𑀺𑀮𑁂𑀲𑀥𑀫𑁆𑀫𑀯𑀺𑀯𑀚𑁆𑀚𑀦𑀧𑀼𑀩𑁆𑀩𑀓𑀁 𑀯𑁄𑀤𑀸𑀦𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀆𑀘𑀺𑀓𑁆𑀔𑀦𑀁 𑀇𑀥 𑀤𑁂𑀲𑀦𑀸𑀓𑁄𑀲𑀮𑁆𑀮𑀁. 𑀧𑀞𑀫𑀢𑀭𑀁 𑀓𑀸𑀭𑀓𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑀬𑀣𑀸 ‘‘𑀯𑀸𑀫𑀁 𑀫𑀼𑀜𑁆𑀘 𑀤𑀓𑁆𑀔𑀺𑀡𑀁 𑀕𑀡𑁆𑀳𑀸’’𑀢𑀺 (𑀥. 𑀲. 𑀅𑀝𑁆𑀞. 𑁪𑁯𑁮) 𑀢𑀣𑀸 𑀳𑀺 𑀪𑀕𑀯𑀸 𑀅𑀝𑁆𑀞𑀢𑀺𑀁𑀲 𑀫𑀗𑁆𑀕𑀮𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀲𑁂𑀯𑀦𑀸 𑀘 𑀩𑀸𑀮𑀸𑀦’’𑀦𑁆𑀢𑀺 (𑀔𑀼. 𑀧𑀸. 𑁫.𑁩; 𑀲𑀼. 𑀦𑀺. 𑁨𑁬𑁨) 𑀯𑀢𑁆𑀯𑀸 ‘‘𑀧𑀡𑁆𑀟𑀺𑀢𑀸𑀦𑀜𑁆𑀘 𑀲𑁂𑀯𑀦𑀸’’𑀢𑀺 (𑀔𑀼. 𑀧𑀸. 𑁫.𑁩; 𑀲𑀼. 𑀦𑀺. 𑁨𑁬𑁨) 𑀅𑀯𑁄𑀘. 𑀙𑀦𑁆𑀤𑀸𑀕𑀢𑀺𑀦𑁆𑀢𑀺 𑀏𑀢𑁆𑀣 𑀲𑀦𑁆𑀥𑀺𑀯𑀲𑁂𑀦 𑀲𑀭𑀮𑁄𑀧𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀙𑀦𑁆𑀤𑁂𑀦 𑀧𑁂𑀫𑁂𑀦 𑀅𑀕𑀢𑀺’’𑀦𑁆𑀢𑀺. 𑀙𑀦𑁆𑀤𑀸𑀢𑀺 𑀳𑁂𑀢𑀼𑀫𑁆𑀳𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀆𑀳 ‘‘𑀙𑀦𑁆𑀤𑁂𑀦𑀸’’𑀢𑀺. 𑀙𑀦𑁆𑀤-𑀲𑀤𑁆𑀤𑁄 𑀘𑁂𑀢𑁆𑀣 𑀢𑀡𑁆𑀳𑀸𑀧𑀭𑀺𑀬𑀸𑀬𑁄, 𑀦 𑀓𑀼𑀲𑀮𑀘𑁆𑀙𑀦𑁆𑀤𑀸𑀤𑀺𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀧𑁂𑀫𑁂𑀦𑀸’’𑀢𑀺. 𑀧𑀭𑀧𑀤𑁂𑀲𑀽𑀢𑀺 ‘‘𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄’’𑀢𑀺𑀆𑀤𑀻𑀲𑀼 𑀯𑀸𑀓𑁆𑀬𑁂𑀲𑀼. ‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 ‘‘𑀤𑁄𑀲𑁂𑀦 𑀓𑁄𑀧𑁂𑀦𑀸’’𑀢𑀺 𑀏𑀯𑀫𑀸𑀤𑀺 𑀅𑀢𑁆𑀣𑀯𑀘𑀦𑀁 𑀅𑀢𑀺𑀤𑀺𑀲𑀢𑀺. 𑀫𑀺𑀢𑁆𑀢𑁄𑀢𑀺 𑀤𑀴𑁆𑀳𑀫𑀺𑀢𑁆𑀢𑁄, 𑀲𑀫𑁆𑀪𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀲𑀦𑁆𑀤𑀺𑀝𑁆𑀞𑁄𑀢𑀺 𑀤𑀺𑀝𑁆𑀞𑀫𑀢𑁆𑀢𑀲𑀳𑀸𑀬𑁄. 𑀧𑀓𑀢𑀺𑀯𑁂𑀭𑀯𑀲𑁂𑀦𑀸𑀢𑀺 𑀧𑀓𑀢𑀺𑀬𑀸 𑀉𑀧𑁆𑀧𑀦𑁆𑀦𑀯𑁂𑀭𑀯𑀲𑁂𑀦, 𑀘𑀺𑀭𑀓𑀸𑀮𑀸𑀦𑀼𑀩𑀦𑁆𑀥𑀯𑀺𑀭𑁄𑀥𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀢𑀗𑁆𑀔𑀡𑀼𑀧𑁆𑀧𑀦𑁆𑀦𑀓𑁄𑀥𑀯𑀲𑁂𑀦 𑀯𑀸’’𑀢𑀺. 𑀬𑀁 𑀯𑀸 𑀢𑀁 𑀯𑀸 𑀅𑀬𑀼𑀢𑁆𑀢𑀁 𑀅𑀓𑀸𑀭𑀡𑀁 𑀯𑀢𑁆𑀯𑀸. 𑀯𑀺𑀲𑀫𑁂 𑀘𑁄𑀭𑀸𑀤𑀺𑀓𑁂, 𑀯𑀺𑀲𑀫𑀸𑀦𑀺 𑀯𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺 𑀲𑀫𑀸𑀤𑀸𑀬 𑀯𑀢𑁆𑀢𑀦𑁂𑀦 𑀦𑀺𑀲𑁆𑀲𑀺𑀢𑁄 𑀯𑀺𑀲𑀫𑀦𑀺𑀲𑁆𑀲𑀺𑀢𑁄.

𑀙𑀦𑁆𑀤𑀸𑀕𑀢𑀺𑀆𑀤𑀻𑀦𑀺 𑀦 𑀕𑀘𑁆𑀙𑀢𑀺 𑀫𑀕𑁆𑀕𑁂𑀦𑁂𑀯 𑀘𑀢𑀼𑀦𑁆𑀦𑀫𑁆𑀧𑀺 𑀅𑀕𑀢𑀺𑀕𑀫𑀦𑀸𑀦𑀁 𑀧𑀳𑀻𑀦𑀢𑁆𑀢𑀸, 𑀅𑀕𑀢𑀺𑀕𑀫𑀦𑀸𑀦𑀻𑀢𑀺 𑀘 𑀢𑀣𑀸𑀧𑀯𑀢𑁆𑀢𑀸 𑀅𑀧𑀸𑀬𑀕𑀫𑀦𑀻𑀬𑀸 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀯𑁂𑀤𑀺𑀢𑀩𑁆𑀩𑀸 𑀅𑀕𑀢𑀺 𑀕𑀘𑁆𑀙𑀢𑀺 𑀏𑀢𑁂𑀳𑀻𑀢𑀺.

𑀬𑀲𑁆𑀲𑀢𑀺 𑀢𑁂𑀦 𑀓𑀺𑀢𑁆𑀢𑀻𑀬𑀢𑀻𑀢𑀺 𑀬𑀲𑁄, 𑀣𑀼𑀢𑀺𑀖𑁄𑀲𑁄. 𑀬𑀲𑁆𑀲𑀢𑀺 𑀢𑁂𑀦 𑀧𑀼𑀭𑁂𑀘𑀭𑀸𑀦𑀼𑀘𑀭𑀪𑀸𑀯𑁂𑀦 𑀧𑀭𑀺𑀯𑀸𑀭𑀻𑀬𑀢𑀻𑀢𑀺 𑀬𑀲𑁄, 𑀧𑀭𑀺𑀯𑀸𑀭𑁄𑀢𑀺 𑀆𑀳 ‘‘𑀓𑀺𑀢𑁆𑀢𑀺𑀬𑀲𑁄𑀧𑀺 𑀧𑀭𑀺𑀯𑀸𑀭𑀬𑀲𑁄𑀧𑀻’’𑀢𑀺. 𑀧𑀭𑀺𑀳𑀸𑀬𑀢𑀻𑀢𑀺 𑀧𑀼𑀩𑁆𑀩𑁂 𑀬𑁄 𑀘 𑀬𑀸𑀯𑀢𑀓𑁂 𑀮𑀩𑁆𑀪𑀢𑀺, 𑀢𑀢𑁄 𑀧𑀭𑀺𑀢𑁄 𑀳𑀸𑀬𑀢𑀺 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀢𑀺.

𑀙𑀅𑀧𑀸𑀬𑀫𑀼𑀔𑀸𑀤𑀺𑀯𑀡𑁆𑀡𑀦𑀸

𑁨𑁪𑁭. 𑀧𑀽𑀯𑁂 𑀪𑀸𑀚𑀦𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀚𑁆𑀚𑀁 𑀉𑀤𑀓𑀁 𑀤𑀢𑁆𑀯𑀸 𑀫𑀤𑁆𑀤𑀺𑀢𑁆𑀯𑀸 𑀓𑀢𑀸 𑀧𑀽𑀯𑀲𑀼𑀭𑀸. 𑀏𑀯𑀁 𑀲𑁂𑀲𑀲𑀼𑀭𑀸𑀧𑀺. 𑀓𑀺𑀡𑁆𑀡𑀸𑀢𑀺 𑀧𑀦 𑀢𑀲𑁆𑀲𑀸 𑀲𑀼𑀭𑀸𑀬 𑀩𑀻𑀚𑀁 𑀯𑀼𑀘𑁆𑀘𑀢𑀺, 𑀬𑁂 ‘‘𑀲𑀼𑀭𑀸𑀫𑁄𑀤𑀓𑀸’’ 𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑀸 𑀓𑀺𑀡𑁆𑀡𑀧𑀓𑁆𑀔𑀺𑀢𑁆𑀢𑀸. 𑀳𑀭𑀻𑀢𑀓𑀻𑀲𑀸𑀲𑀧𑀸𑀤𑀺𑀦𑀸𑀦𑀸𑀲𑀫𑁆𑀪𑀸𑀭𑁂𑀳𑀺 𑀲𑀁𑀬𑁄𑀚𑀺𑀢𑀸 𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑀸. 𑀫𑀥𑀼𑀓𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀺𑀧𑀼𑀧𑁆𑀨𑀭𑀲𑁄 𑀘𑀺𑀭𑀧𑀸𑀭𑀺𑀯𑀸𑀲𑀺𑀓𑁄 𑀧𑀼𑀧𑁆𑀨𑀸𑀲𑀯𑁄. 𑀧𑀦𑀲𑀸𑀤𑀺𑀨𑀮𑀭𑀲𑁄 𑀨𑀮𑀸𑀲𑀯𑁄. 𑀫𑀼𑀤𑁆𑀤𑀺𑀓𑀸𑀭𑀲𑁄 𑀫𑀥𑁆𑀯𑀸𑀲𑀯𑁄. 𑀉𑀘𑁆𑀙𑀼𑀭𑀲𑁄 𑀕𑀼𑀴𑀸𑀲𑀯𑁄. 𑀳𑀭𑀻𑀢𑀓𑀸𑀫𑀮𑀓𑀓𑀝𑀼𑀓𑀪𑀡𑁆𑀟𑀸𑀤𑀺𑀦𑀸𑀦𑀸𑀲𑀫𑁆𑀪𑀸𑀭𑀸𑀦𑀁 𑀭𑀲𑁄 𑀘𑀺𑀭𑀧𑀸𑀭𑀺𑀯𑀸𑀲𑀺𑀓𑁄 𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑁄. 𑀢𑀁 𑀲𑀩𑁆𑀩𑀫𑁆𑀧𑀻𑀢𑀺 𑀢𑀁 𑀲𑀩𑁆𑀩𑀁 𑀤𑀲𑀯𑀺𑀥𑀫𑁆𑀧𑀺. 𑀫𑀤𑀓𑀭𑀡𑀯𑀲𑁂𑀦 𑀫𑀚𑁆𑀚𑀁 𑀧𑀺𑀯𑀦𑁆𑀢𑀁 𑀫𑀤𑀬𑀢𑀻𑀢𑀺 𑀓𑀢𑁆𑀯𑀸. 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑁂 𑀧𑀫𑀸𑀤𑀝𑁆𑀞𑀸𑀦𑀁 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀁. 𑀅𑀦𑀼 𑀅𑀦𑀼 𑀬𑁄𑀕𑁄𑀢𑀺 𑀧𑀼𑀦𑀧𑁆𑀧𑀼𑀦𑀁 𑀢𑀁𑀲𑀫𑀗𑁆𑀕𑀺𑀢𑀸. 𑀢𑁂𑀦𑀸𑀳 ‘‘𑀧𑀼𑀦𑀧𑁆𑀧𑀼𑀦𑀁 𑀓𑀭𑀡’’𑀦𑁆𑀢𑀺, 𑀅𑀧𑀭𑀸𑀧𑀭𑀁 𑀧𑀯𑀢𑁆𑀢𑀦𑀦𑁆𑀢𑀺 𑀅𑀢𑁆𑀣𑁄. 𑀉𑀧𑁆𑀧𑀦𑁆𑀦𑀸 𑀘𑁂𑀯 𑀪𑁄𑀕𑀸 𑀧𑀭𑀺𑀳𑀸𑀬𑀦𑁆𑀢𑀺 𑀧𑀸𑀦𑀩𑁆𑀬𑀲𑀦𑁂𑀦 𑀩𑁆𑀬𑀲𑀦𑀓𑀭𑀡𑀢𑁄. 𑀅𑀦𑀼𑀧𑁆𑀧𑀦𑁆𑀦𑀸 𑀘 𑀦𑀼𑀧𑁆𑀧𑀚𑁆𑀚𑀦𑁆𑀢𑀺 𑀧𑀫𑀢𑁆𑀢𑀲𑁆𑀲 𑀓𑀫𑁆𑀫𑀦𑁆𑀢𑁂𑀲𑀼 𑀜𑀸𑀬𑀓𑀭𑀡𑀸𑀪𑀸𑀯𑀢𑁄. 𑀪𑁄𑀕𑀸𑀦𑀦𑁆𑀢𑀺 𑀪𑀼𑀜𑁆𑀚𑀺𑀢𑀩𑁆𑀩𑀝𑁆𑀞𑁂𑀦 ‘‘𑀪𑁄𑀕𑀸’’𑀢𑀺 𑀮𑀤𑁆𑀥𑀦𑀸𑀫𑀸𑀦𑀁 𑀓𑀸𑀫𑀕𑀼𑀡𑀸𑀦𑀁. 𑀅𑀧𑀸𑀬𑀫𑀼𑀔-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄 𑀏𑀯. 𑀅𑀯𑁂𑀮𑀸𑀬𑀸𑀢𑀺 𑀅𑀬𑀼𑀢𑁆𑀢𑀯𑁂𑀮𑀸𑀬. 𑀬𑀤𑀸 𑀯𑀺𑀘𑀭𑀢𑁄 𑀅𑀢𑁆𑀣𑀭𑀓𑁆𑀔𑀸𑀤𑀬𑁄 𑀦 𑀳𑁄𑀦𑁆𑀢𑀺. 𑀯𑀺𑀲𑀺𑀔𑀸𑀲𑀼 𑀘𑀭𑀺𑀬𑀸𑀢𑀺 𑀭𑀘𑁆𑀙𑀸𑀲𑀼 𑀯𑀺𑀘𑀭𑀡𑀁.

𑀲𑀫𑀚𑁆𑀚𑀸 𑀯𑀼𑀘𑁆𑀘𑀢𑀺 𑀫𑀳𑁄, 𑀬𑀢𑁆𑀣 𑀦𑀘𑁆𑀘𑀸𑀦𑀺𑀧𑀺 𑀧𑀬𑁄𑀚𑀻𑀬𑀦𑁆𑀢𑀺, 𑀢𑁂𑀲𑀁 𑀤𑀲𑁆𑀲𑀦𑀸𑀤𑀺𑀅𑀢𑁆𑀣𑀁 𑀢𑀢𑁆𑀣 𑀅𑀪𑀺𑀭𑀢𑀺𑀯𑀲𑁂𑀦 𑀘𑀭𑀡𑀁 𑀉𑀧𑀕𑀫𑀦𑀁 𑀲𑀫𑀚𑁆𑀚𑀸𑀪𑀺𑀘𑀭𑀡𑀁. 𑀦𑀘𑁆𑀘𑀸𑀤𑀺𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀦𑀘𑁆𑀘𑀸𑀤𑀻𑀦𑀁 𑀤𑀲𑁆𑀲𑀦𑀸𑀤𑀺𑀯𑀲𑁂𑀦𑀸𑀢𑀺 𑀆𑀤𑀺𑀲𑀤𑁆𑀤𑀮𑁄𑀧𑁄 𑀤𑀝𑁆𑀞𑀩𑁆𑀩𑁄, 𑀤𑀲𑁆𑀲𑀦𑁂𑀦 𑀯𑀸 𑀲𑀯𑀦𑀫𑁆𑀧𑀺 𑀕𑀳𑀺𑀢𑀁 𑀯𑀺𑀭𑀽𑀧𑁂𑀓𑀲𑁂𑀲𑀦𑀬𑁂𑀦. 𑀆𑀮𑁄𑀘𑀦𑀲𑀪𑀸𑀯𑀢𑀸𑀬 𑀯𑀸 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀁 𑀲𑀯𑀦𑀓𑀺𑀭𑀺𑀬𑀸𑀬𑀧𑀺 𑀤𑀲𑁆𑀲𑀦𑀲𑀗𑁆𑀔𑁂𑀧𑀲𑀫𑁆𑀪𑀯𑀢𑁄 ‘‘𑀤𑀲𑁆𑀲𑀦𑀯𑀲𑁂𑀦’’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀇𑀥 𑀘𑀺𑀢𑁆𑀢𑀸𑀮𑀲𑀺𑀬𑀢𑀸 𑀅𑀓𑀸𑀭𑀡𑀦𑁆𑀢𑀺 ‘‘𑀓𑀸𑀬𑀸𑀮𑀲𑀺𑀬𑀢𑀸’’𑀢𑀺 𑀯𑀼𑀢𑁆𑀢𑀁. 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀢𑀸𑀢𑀺 𑀢𑀧𑁆𑀧𑀲𑀼𑀢𑀢𑀸 𑀅𑀢𑀺𑀭𑁂𑀓𑀢𑀭𑀢𑀸𑀬.

𑀲𑀼𑀭𑀸𑀫𑁂𑀭𑀬𑀲𑁆𑀲 𑀙𑀆𑀤𑀻𑀦𑀯𑀸𑀤𑀺𑀯𑀡𑁆𑀡𑀦𑀸

𑁨𑁪𑁮. 𑀲𑀬𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀲𑀦𑁆𑀤𑀺𑀝𑁆𑀞𑀁. 𑀲𑀦𑁆𑀤𑀺𑀝𑁆𑀞𑀫𑁂𑀯 𑀲𑀦𑁆𑀤𑀺𑀝𑁆𑀞𑀺𑀓𑀁, 𑀥𑀦𑀚𑀸𑀦𑀺𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀧𑀦 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀦𑀺𑀤𑁆𑀤𑁂𑀲𑁄, 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 ‘‘𑀇𑀥𑀮𑁄𑀓𑀪𑀸𑀯𑀺𑀦𑀻’’𑀢𑀺. 𑀲𑀫𑀁, 𑀲𑀫𑁆𑀫𑀸 𑀧𑀲𑁆𑀲𑀺𑀢𑀩𑁆𑀩𑀸𑀢𑀺 𑀯𑀸 𑀲𑀦𑁆𑀤𑀺𑀝𑁆𑀞𑀺𑀓𑀸, 𑀧𑀸𑀦𑀲𑀫𑀓𑀸𑀮𑀪𑀸𑀯𑀺𑀦𑀻𑀢𑀺 𑀅𑀢𑁆𑀣𑁄. 𑀓𑀮𑀳𑀧𑁆𑀧𑀯𑀟𑁆𑀠𑀦𑀻 𑀫𑀺𑀢𑁆𑀢𑀲𑁆𑀲 𑀓𑀮𑀳𑁂 𑀅𑀦𑀸𑀤𑀻𑀦𑀯𑀤𑀲𑁆𑀲𑀺𑀪𑀸𑀯𑀢𑁄. 𑀔𑁂𑀢𑁆𑀢𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑀢𑁄. 𑀆𑀬𑀢𑀦𑀦𑁆𑀢𑀺 𑀯𑀸 𑀓𑀸𑀭𑀡𑀁, 𑀆𑀓𑀭𑁄 𑀯𑀸𑀢𑀺 𑀅𑀢𑁆𑀣𑁄. 𑀧𑀭𑀮𑁄𑀓𑁂 𑀅𑀓𑀺𑀢𑁆𑀢𑀺𑀁 𑀧𑀸𑀧𑀼𑀡𑀦𑁆𑀢𑀺 𑀅𑀓𑀺𑀢𑁆𑀢𑀺𑀲𑀁𑀯𑀢𑁆𑀢𑀦𑀺𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀲𑀯𑀦𑀢𑁄. 𑀓𑁄𑀧𑀻𑀦𑀁 𑀯𑀸 𑀧𑀸𑀓𑀝𑀪𑀸𑀯𑁂𑀦 𑀅𑀓𑀢𑁆𑀢𑀩𑁆𑀩𑀭𑀳𑀲𑁆𑀲𑀓𑀫𑁆𑀫𑀁. 𑀲𑀼𑀭𑀸𑀫𑀤𑀫𑀢𑁆𑀢𑀸 𑀘 𑀧𑀼𑀩𑁆𑀩𑁂 𑀅𑀢𑁆𑀢𑀦𑀸 𑀓𑀢𑀁 𑀢𑀸𑀤𑀺𑀲𑀁 𑀓𑀫𑁆𑀫𑀁 𑀅𑀫𑀢𑁆𑀢𑀓𑀸𑀮𑁂 𑀙𑀸𑀤𑁂𑀦𑁆𑀢𑀸 𑀯𑀺𑀘𑀭𑀺𑀢𑁆𑀯𑀸 𑀫𑀢𑁆𑀢𑀓𑀸𑀮𑁂 𑀧𑀘𑁆𑀘𑀢𑁆𑀣𑀺𑀓𑀸𑀦𑀫𑁆𑀧𑀺 𑀯𑀺𑀯𑀭𑀦𑁆𑀢𑀺 𑀧𑀸𑀓𑀝𑀁 𑀓𑀭𑁄𑀦𑁆𑀢𑀺, 𑀢𑁂𑀦 𑀢𑁂𑀲𑀁 𑀲𑀸 𑀲𑀼𑀭𑀸 𑀢𑀲𑁆𑀲 𑀓𑁄𑀧𑀻𑀦𑀲𑁆𑀲 𑀦𑀺𑀤𑀁𑀲𑀦𑀢𑁄 ‘‘𑀓𑁄𑀧𑀻𑀦𑀦𑀺𑀤𑀁𑀲𑀦𑀻’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀓𑀫𑁆𑀫𑀲𑁆𑀲𑀓𑀢𑀸𑀧𑀜𑁆𑀜𑀦𑁆𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. ‘‘𑀬𑀁 𑀓𑀺𑀜𑁆𑀘𑀺 𑀮𑁄𑀓𑀺𑀬𑀁 𑀧𑀜𑁆𑀜𑀁 𑀤𑀼𑀩𑁆𑀩𑀮𑀁 𑀓𑀭𑁄𑀢𑀺𑀬𑁂𑀯𑀸’’𑀢𑀺 𑀳𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀢𑀣𑀸 𑀳𑀺 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀢𑀫𑀢𑁆𑀣𑀁 𑀧𑀢𑀺𑀝𑁆𑀞𑀧𑁂𑀢𑀼𑀁 ‘‘𑀫𑀕𑁆𑀕𑀧𑀜𑁆𑀜𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀅𑀦𑁆𑀢𑁄𑀫𑀼𑀔𑀫𑁂𑀯 𑀦 𑀧𑀯𑀺𑀲𑀢𑀻’’𑀢𑀺 𑀇𑀫𑀺𑀦𑀸 𑀲𑀼𑀭𑀸𑀬 𑀫𑀕𑁆𑀕𑀧𑀜𑁆𑀜𑀸𑀤𑀼𑀩𑁆𑀩𑀮𑀓𑀭𑀡𑀲𑁆𑀲 𑀤𑀼𑀭𑀲𑀫𑀼𑀲𑁆𑀲𑀸𑀭𑀺𑀢𑀪𑀸𑀯𑀫𑀸𑀳. 𑀦𑀦𑀼 𑀘𑁂𑀯𑀁 𑀲𑀼𑀭𑀸𑀬 𑀢𑀲𑁆𑀲𑀸 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀲𑀸𑀫𑀢𑁆𑀣𑀺𑀬𑀯𑀺𑀖𑀸𑀢𑁄 𑀅𑀘𑁄𑀤𑀺𑀢𑁄 𑀳𑁄𑀢𑀺 𑀅𑀭𑀺𑀬𑀸𑀦𑀁 𑀅𑀦𑀼𑀧𑁆𑀧𑀬𑁄𑀕𑀲𑁆𑀲𑁂𑀯 𑀘𑁄𑀤𑀺𑀢𑀢𑁆𑀢𑀸𑀢𑀺? 𑀦𑀬𑀺𑀤𑀁 𑀏𑀯𑀁 𑀉𑀧𑀬𑁄𑀕𑁄𑀧𑀺 𑀦𑀸𑀫 𑀲𑀤𑀸 𑀢𑁂𑀲𑀁 𑀦𑀢𑁆𑀣𑀺, 𑀓𑀼𑀢𑁄 𑀓𑀺𑀘𑁆𑀘𑀓𑀭𑀡𑀦𑁆𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀅𑀣 𑀧𑀦 𑀅𑀝𑁆𑀞𑀸𑀦𑀧𑀭𑀺𑀓𑀧𑁆𑀧𑀯𑀲𑁂𑀦𑀲𑁆𑀲𑀸 𑀓𑀤𑀸𑀘𑀺 𑀲𑀺𑀬𑀸 𑀉𑀧𑀬𑁄𑀕𑁄, 𑀢𑀣𑀸𑀧𑀺 𑀲𑁄 𑀢𑀲𑁆𑀲𑀸 𑀤𑀼𑀩𑁆𑀩𑀮𑀺𑀬𑀁 𑀈𑀲𑀓𑀫𑁆𑀧𑀺 𑀓𑀸𑀢𑀼𑀁 𑀦𑀸𑀮𑀫𑁂𑀯 𑀲𑀫𑁆𑀫𑀤𑁂𑀯 𑀧𑀝𑀺𑀧𑀓𑁆𑀔𑀤𑀽𑀭𑀻𑀪𑀸𑀯𑁂𑀦 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀫𑀕𑁆𑀕𑀧𑀜𑁆𑀜𑀁 𑀧𑀦 𑀤𑀼𑀩𑁆𑀩𑀮𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺. 𑀫𑀕𑁆𑀕𑀲𑀻𑀲𑁂𑀦 𑀘𑁂𑀢𑁆𑀣 𑀅𑀭𑀺𑀬𑀸𑀦𑀁 𑀲𑀩𑁆𑀩𑀲𑁆𑀲𑀸𑀧𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀬 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀪𑀸𑀯𑀸𑀧𑀸𑀤𑀸𑀦𑁂 𑀅𑀲𑀫𑀢𑁆𑀣𑀢𑀸 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀚𑁆𑀚𑀢𑀺 𑀏𑀢𑁂𑀦 𑀨𑀮𑀦𑁆𑀢𑀺 𑀧𑀤𑀁, 𑀓𑀸𑀭𑀡𑀁.

𑁨𑁪𑁯. 𑀅𑀢𑁆𑀢𑀸𑀧𑀺𑀲𑁆𑀲 𑀅𑀓𑀸𑀮𑀘𑀸𑀭𑀺𑀲𑁆𑀲 𑀅𑀕𑀼𑀢𑁆𑀢𑁄 𑀲𑀭𑀲𑀢𑁄 𑀅𑀭𑀓𑁆𑀔𑀺𑀢𑁄 𑀉𑀧𑀓𑁆𑀓𑀫𑀢𑁄𑀧𑀺 𑀧𑀭𑀺𑀯𑀚𑁆𑀚𑀦𑀻𑀬𑀸𑀦𑀁 𑀅𑀧𑀭𑀺𑀯𑀚𑁆𑀚𑀦𑀢𑁄. 𑀢𑁂𑀦𑀸𑀳 ‘‘𑀅𑀯𑁂𑀮𑀸𑀬 𑀘𑀭𑀦𑁆𑀢𑁄 𑀳𑀻’’𑀢𑀺𑀆𑀤𑀺. 𑀓𑀡𑁆𑀝𑀓𑀸𑀤𑀻𑀦𑀺𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀲𑁄𑀩𑁆𑀪𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀯𑁂𑀭𑀺𑀦𑁄𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀘𑁄𑀭𑀸𑀤𑀺𑀓𑀸 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀧𑀼𑀢𑁆𑀢𑀤𑀸𑀭𑀸𑀢𑀺 𑀏𑀢𑁆𑀣 𑀧𑀼𑀢𑁆𑀢𑀕𑁆𑀕𑀳𑀡𑁂𑀦 𑀧𑀼𑀢𑁆𑀢𑀻𑀧𑀺 𑀕𑀳𑀺𑀢𑀸𑀢𑀺 𑀆𑀳 ‘‘𑀧𑀼𑀢𑁆𑀢𑀥𑀻𑀢𑀭𑁄’’𑀢𑀺. 𑀩𑀳𑀺 𑀧𑀢𑁆𑀣𑀦𑀦𑁆𑀢𑀺 𑀓𑀸𑀫𑀧𑀢𑁆𑀣𑀦𑀸𑀯𑀲𑁂𑀦 𑀅𑀦𑁆𑀢𑁄𑀕𑁂𑀳𑀲𑁆𑀲𑀺𑀢𑀢𑁄 𑀦𑀺𑀩𑀤𑁆𑀥𑀯𑀢𑁆𑀣𑀼𑀢𑁄 𑀩𑀳𑀺𑀤𑁆𑀥𑀸 𑀧𑀢𑁆𑀣𑀦𑀁 𑀓𑀢𑁆𑀯𑀸. 𑀅𑀜𑁆𑀜𑁂𑀳𑀺 𑀓𑀢𑀧𑀸𑀧𑀓𑀫𑁆𑀫𑁂𑀲𑀽𑀢𑀺 𑀧𑀭𑁂𑀳𑀺 𑀓𑀢𑀸𑀲𑀼 𑀧𑀸𑀧𑀓𑀺𑀭𑀺𑀬𑀸𑀲𑀼. 𑀲𑀗𑁆𑀓𑀺𑀢𑀩𑁆𑀩𑁄 𑀳𑁄𑀢𑀺 𑀅𑀓𑀸𑀮𑁂 𑀢𑀢𑁆𑀣 𑀢𑀢𑁆𑀣 𑀘𑀭𑀡𑀢𑁄. 𑀭𑀼𑀳𑀢𑀺 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀘𑁄𑀭𑀺𑀓𑀸 𑀧𑀯𑀢𑁆𑀢𑀸, 𑀢𑀢𑁆𑀣 𑀧𑀭𑁂𑀳𑀺 𑀤𑀺𑀝𑁆𑀞𑀢𑁆𑀢𑀸. 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸𑀢𑀺 ‘‘𑀏𑀢𑁆𑀢𑀓𑀁 𑀤𑀼𑀓𑁆𑀔𑀁, 𑀏𑀢𑁆𑀢𑀓𑀁 𑀤𑁄𑀫𑀦𑀲𑁆𑀲’’𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸. 𑀢𑀁 𑀲𑀩𑁆𑀩𑀫𑁆𑀧𑀺 𑀯𑀺𑀓𑀸𑀮𑀘𑀸𑀭𑀺𑀫𑁆𑀳𑀺 𑀧𑀼𑀕𑁆𑀕𑀮𑁂 𑀆𑀳𑀭𑀺𑀢𑀩𑁆𑀩𑀁 𑀢𑀲𑁆𑀲 𑀉𑀧𑀭𑀺 𑀧𑀓𑁆𑀔𑀺𑀧𑀺𑀢𑀩𑁆𑀩𑀁 𑀳𑁄𑀢𑀺. 𑀓𑀣𑀁? 𑀅𑀜𑁆𑀜𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀢𑀣𑀸𑀭𑀽𑀧𑁂 𑀆𑀲𑀗𑁆𑀓𑀺𑀢𑀩𑁆𑀩𑁂 𑀅𑀲𑀢𑀺. 𑀇𑀢𑀻𑀢𑀺 𑀏𑀯𑀁. 𑀲𑁄𑀢𑀺 𑀯𑀺𑀓𑀸𑀮𑀘𑀸𑀭𑀻. 𑀧𑀼𑀭𑀓𑁆𑀔𑀢𑁄 𑀧𑀼𑀭𑀢𑁄 𑀅𑀢𑁆𑀢𑀦𑁄 𑀉𑀧𑀭𑀺 𑀆𑀲𑀗𑁆𑀓𑀦𑁆𑀢𑁂 𑀓𑀢𑁆𑀯𑀸 𑀘𑀭𑀢𑀺.

𑁨𑁫𑁦. 𑀦𑀝𑀦𑀸𑀝𑀓𑀸𑀤𑀺𑀦𑀘𑁆𑀘𑀦𑁆𑀢𑀺 𑀦𑀝𑁂𑀳𑀺 𑀦𑀸𑀝𑀓𑁂𑀳𑀺 𑀦𑀘𑁆𑀘𑀺𑀢𑀩𑁆𑀩𑀦𑀸𑀝𑀓𑀸𑀤𑀺𑀦𑀘𑁆𑀘𑀯𑀺𑀥𑀺. 𑀆𑀤𑀺-𑀲𑀤𑁆𑀤𑁂𑀦 𑀅𑀯𑀲𑀺𑀝𑁆𑀞𑀁 𑀲𑀩𑁆𑀩𑀁 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀢𑀢𑁆𑀣 𑀕𑀦𑁆𑀢𑀩𑁆𑀩𑀁 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀢𑀢𑁆𑀣𑀲𑁆𑀲 𑀕𑀫𑀦𑁂𑀦 𑀬𑀣𑀸 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀪𑁄𑀕𑀸𑀦𑀁 𑀅𑀦𑀼𑀧𑁆𑀧𑀸𑀤𑁄, 𑀉𑀧𑁆𑀧𑀦𑁆𑀦𑀸𑀦𑀜𑁆𑀘 𑀯𑀺𑀦𑀸𑀲𑁄 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀕𑀻𑀢𑀦𑁆𑀢𑀺 𑀲𑀭𑀕𑀢𑀁, 𑀧𑀓𑀭𑀡𑀕𑀢𑀁, 𑀢𑀸𑀴𑀕𑀢𑀁, 𑀅𑀧𑀥𑀸𑀦𑀕𑀢𑀦𑁆𑀢𑀺 𑀕𑀦𑁆𑀥𑀩𑁆𑀩𑀲𑀢𑁆𑀣𑀯𑀺𑀳𑀺𑀢𑀁 𑀅𑀜𑁆𑀜𑀫𑁆𑀧𑀺 𑀲𑀩𑁆𑀩𑀁 𑀕𑀻𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀸𑀤𑀺𑀢𑀦𑁆𑀢𑀺 𑀯𑀻𑀡𑀸𑀯𑁂𑀡𑀼𑀫𑀼𑀤𑀺𑀗𑁆𑀕𑀸𑀤𑀺𑀯𑀸𑀤𑀦𑀁. 𑀅𑀓𑁆𑀔𑀸𑀦𑀦𑁆𑀢𑀺 𑀪𑀸𑀭𑀢𑀬𑀼𑀤𑁆𑀥𑀲𑀻𑀢𑀸𑀳𑀭𑀡𑀸𑀤𑀺𑀅𑀓𑁆𑀔𑀸𑀦𑀁. 𑀧𑀸𑀡𑀺𑀲𑁆𑀲𑀭𑀦𑁆𑀢𑀺 𑀓𑀁𑀲𑀢𑀸𑀴𑀁, ‘‘𑀧𑀸𑀡𑀺𑀢𑀸𑀴’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀓𑀼𑀫𑁆𑀪𑀣𑀽𑀦𑀦𑁆𑀢𑀺 𑀘𑀢𑀼𑀭𑀲𑁆𑀲𑀅𑀫𑁆𑀩𑀡𑀓𑀢𑀸𑀴𑀁. ‘‘𑀓𑀼𑀝𑀪𑁂𑀭𑀺𑀲𑀤𑁆𑀤𑁄’’𑀢𑀺 𑀓𑁂𑀘𑀺. ‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 ‘‘𑀓𑀲𑁆𑀫𑀺𑀁 𑀞𑀸𑀦𑁂’’𑀢𑀺𑀆𑀤𑀺𑀦𑀸 𑀦𑀘𑁆𑀘𑁂 𑀯𑀼𑀢𑁆𑀢𑀫𑀢𑁆𑀣𑀁 𑀕𑀻𑀢𑀸𑀤𑀻𑀲𑀼 𑀅𑀢𑀺𑀤𑀺𑀲𑀢𑀺.

𑁨𑁫𑁧. 𑀚𑀬𑀦𑁆𑀢𑀺 𑀚𑀽𑀢𑀁 𑀚𑀺𑀦𑀦𑁆𑀢𑁄. 𑀯𑁂𑀭𑀦𑁆𑀢𑀺 𑀚𑀺𑀢𑁂𑀦 𑀓𑀻𑀴𑀓𑀧𑀼𑀭𑀺𑀲𑁂𑀦 𑀚𑀬𑀦𑀺𑀫𑀺𑀢𑁆𑀢𑀁 𑀅𑀢𑁆𑀢𑀦𑁄 𑀉𑀧𑀭𑀺 𑀯𑁂𑀭𑀁 𑀯𑀺𑀭𑁄𑀥𑀁 𑀧𑀲𑀯𑀢𑀺 𑀉𑀧𑁆𑀧𑀸𑀤𑁂𑀢𑀺. 𑀢𑀜𑁆𑀳𑀺𑀲𑁆𑀲 𑀯𑁂𑀭𑀧𑀲𑀯𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀚𑀺𑀢𑀁 𑀫𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀚𑀺𑀦𑁄𑀢𑀺 𑀚𑀽𑀢𑀧𑀭𑀸𑀚𑀬𑀸𑀧𑀦𑁆𑀦𑀸𑀬 𑀥𑀦𑀚𑀸𑀦𑀺𑀬𑀸 𑀚𑀺𑀦𑁄. 𑀢𑁂𑀦𑀸𑀳 ‘‘𑀅𑀜𑁆𑀜𑁂𑀦 𑀚𑀺𑀢𑁄 𑀲𑀫𑀸𑀦𑁄’’𑀢𑀺𑀆𑀤𑀺. 𑀯𑀺𑀢𑁆𑀢𑀁 𑀅𑀦𑀼𑀲𑁄𑀘𑀢𑀻𑀢𑀺 𑀢𑀁 𑀚𑀺𑀦𑀁 𑀯𑀺𑀢𑁆𑀢𑀁 𑀉𑀤𑁆𑀤𑀺𑀲𑁆𑀲 𑀅𑀦𑀼𑀢𑁆𑀣𑀼𑀦𑀢𑀺. 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂𑀢𑀺 𑀬𑀲𑁆𑀫𑀺𑀁 𑀓𑀺𑀲𑁆𑀫𑀺𑀜𑁆𑀘𑀺 𑀅𑀝𑁆𑀝𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂. 𑀲𑀓𑁆𑀔𑀺𑀧𑀼𑀝𑁆𑀞𑀲𑁆𑀲𑀸𑀢𑀺 𑀲𑀓𑁆𑀔𑀺𑀪𑀸𑀯𑁂𑀦 𑀧𑀼𑀝𑁆𑀞𑀲𑁆𑀲. 𑀅𑀓𑁆𑀔𑀲𑁄𑀡𑁆𑀟𑁄𑀢𑀺 𑀅𑀓𑁆𑀔𑀥𑀼𑀢𑁆𑀢𑁄. 𑀚𑀽𑀢𑀓𑀭𑁄𑀢𑀺 𑀚𑀽𑀢𑀧𑀫𑀸𑀤𑀝𑁆𑀞𑀸𑀦𑀸𑀦𑀼𑀬𑀼𑀢𑁆𑀢𑁄. 𑀢𑁆𑀯𑀫𑁆𑀧𑀺 𑀦𑀸𑀫 𑀓𑀼𑀮𑀧𑀼𑀢𑁆𑀢𑁄𑀢𑀺 𑀓𑀼𑀮𑀧𑀼𑀢𑁆𑀢𑁄 𑀦𑀸𑀫 𑀢𑁆𑀯𑀁, 𑀦 𑀫𑀬𑀁 𑀢𑀬𑀺 𑀓𑁄𑀮𑀧𑀼𑀢𑁆𑀢𑀺𑀬𑀁 𑀇𑀤𑀸𑀦𑀺 𑀧𑀲𑁆𑀲𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀙𑀺𑀦𑁆𑀦𑀪𑀺𑀦𑁆𑀦𑀓𑁄𑀢𑀺 𑀙𑀺𑀦𑁆𑀦𑀪𑀺𑀦𑁆𑀦𑀳𑀺𑀭𑁄𑀢𑁆𑀢𑀧𑁆𑀧𑁄, 𑀅𑀳𑀺𑀭𑀺𑀓𑁄 𑀅𑀦𑁄𑀢𑁆𑀢𑀧𑁆𑀧𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀓𑀸𑀭𑀡𑀸𑀢𑀺 𑀢𑀲𑁆𑀲 𑀅𑀢𑁆𑀣𑀸𑀬.

𑀅𑀦𑀺𑀘𑁆𑀙𑀺𑀢𑁄𑀢𑀺 𑀦 𑀇𑀘𑁆𑀙𑀺𑀢𑁄. 𑀧𑁄𑀲𑀺𑀢𑀩𑁆𑀩𑀸 𑀪𑀯𑀺𑀲𑁆𑀲𑀢𑀺 𑀚𑀽𑀢𑀧𑀭𑀸𑀚𑀬𑁂𑀦 𑀲𑀩𑁆𑀩𑀓𑀸𑀮𑀁 𑀭𑀺𑀢𑁆𑀢𑀢𑀼𑀘𑁆𑀙𑀪𑀸𑀯𑀢𑁄.

𑀧𑀸𑀧𑀫𑀺𑀢𑁆𑀢𑀢𑀸𑀬 𑀙𑀆𑀤𑀻𑀦𑀯𑀸𑀤𑀺𑀯𑀡𑁆𑀡𑀦𑀸

𑁨𑁫𑁨. 𑀅𑀓𑁆𑀔𑀥𑀼𑀢𑁆𑀢𑀸𑀢𑀺 𑀅𑀓𑁆𑀔𑁂𑀲𑀼 𑀥𑀼𑀢𑁆𑀢𑀸, 𑀅𑀓𑁆𑀔𑀦𑀺𑀫𑀺𑀢𑁆𑀢𑀁 𑀅𑀢𑁆𑀣𑀯𑀺𑀦𑀸𑀲𑀓𑀸. 𑀇𑀢𑁆𑀣𑀺𑀲𑁄𑀡𑁆𑀟𑀸𑀢𑀺 𑀇𑀢𑁆𑀣𑀻𑀲𑀼 𑀲𑁄𑀡𑁆𑀟𑀸, 𑀇𑀢𑁆𑀣𑀺𑀲𑀫𑁆𑀪𑁄𑀕𑀦𑀺𑀫𑀺𑀢𑁆𑀢𑀁 𑀆𑀢𑀧𑁆𑀧𑀦𑀓𑀸. 𑀢𑀣𑀸 𑀪𑀢𑁆𑀢𑀲𑁄𑀡𑁆𑀟𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀧𑀺𑀧𑀸𑀲𑀸𑀢𑀺 𑀉𑀧𑀭𑀽𑀧𑀭𑀺 𑀲𑀼𑀭𑀸𑀧𑀺𑀧𑀸𑀲𑀸. 𑀢𑁂𑀦𑀸𑀳 ‘‘𑀧𑀸𑀦𑀲𑁄𑀡𑁆𑀟𑀸’’𑀢𑀺. 𑀦𑁂𑀓𑀢𑀺𑀓𑀸𑀤𑀬𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸 𑀏𑀯. 𑀫𑁂𑀢𑁆𑀢𑀺𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑀸𑀬 𑀫𑀺𑀢𑁆𑀢𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸𑀢𑀺 𑀧𑀸𑀧𑀫𑀺𑀢𑁆𑀢𑀢𑀸𑀬.

𑁨𑁫𑁩. 𑀓𑀫𑁆𑀫𑀦𑁆𑀢𑀦𑁆𑀢𑀺 𑀓𑀫𑁆𑀫𑀁, 𑀬𑀣𑀸 𑀲𑀼𑀢𑁆𑀢𑀁𑀬𑁂𑀯 𑀲𑀼𑀢𑁆𑀢𑀦𑁆𑀢𑁄, 𑀏𑀯𑀁 𑀓𑀫𑁆𑀫𑀁𑀬𑁂𑀯 𑀓𑀫𑁆𑀫𑀦𑁆𑀢𑁄, 𑀢𑀁 𑀓𑀸𑀢𑀼𑀁 𑀕𑀘𑁆𑀙𑀸𑀫𑀸𑀢𑀺 𑀯𑀼𑀢𑁆𑀢𑁄. 𑀓𑀫𑁆𑀫𑀁 𑀯𑀸 𑀅𑀦𑁆𑀢𑁄 𑀦𑀺𑀝𑁆𑀞𑀸𑀦𑀁 𑀕𑀘𑁆𑀙𑀢𑀺 𑀏𑀢𑁆𑀣𑀸𑀢𑀺 𑀓𑀫𑁆𑀫𑀦𑁆𑀢𑁄, 𑀓𑀫𑁆𑀫𑀓𑀭𑀡𑀝𑁆𑀞𑀸𑀦𑀁, 𑀢𑀁 𑀕𑀘𑁆𑀙𑀸𑀫𑀸𑀢𑀺 𑀯𑀼𑀢𑁆𑀢𑁄.

𑀧𑀦𑁆𑀦𑀲𑀔𑀸𑀢𑀺 𑀲𑀼𑀭𑀁 𑀧𑀸𑀢𑀼𑀁 𑀧𑀦𑁆𑀦𑁂 𑀧𑀝𑀺𑀧𑀚𑁆𑀚𑀦𑁆𑀢𑁂 𑀏𑀯 𑀲𑀔𑀸𑀢𑀺 𑀧𑀦𑁆𑀦𑀲𑀔𑀸. 𑀢𑁂𑀦𑀸𑀳 ‘‘𑀅𑀬𑀫𑁂𑀯𑀢𑁆𑀣𑁄’’𑀢𑀺. ‘‘𑀲𑀫𑁆𑀫𑀺𑀬𑀲𑀫𑁆𑀫𑀺𑀬𑁄’’𑀢𑀺 𑀯𑀘𑀦𑀫𑁂𑀢𑁆𑀣 𑀅𑀢𑁆𑀣𑀻𑀢𑀺 𑀲𑀫𑁆𑀫𑀺𑀬𑀲𑀫𑁆𑀫𑀺𑀬𑁄. 𑀢𑁂𑀦𑀸𑀳 ‘‘𑀲𑀫𑁆𑀫𑀲𑀫𑁆𑀫𑀸𑀢𑀺 𑀯𑀤𑀦𑁆𑀢𑁄’’𑀢𑀺. 𑀲𑀳𑀸𑀬𑁄 𑀳𑁄𑀢𑀻𑀢𑀺 𑀲𑀳𑀸𑀬𑁄 𑀯𑀺𑀬 𑀳𑁄𑀢𑀺. 𑀑𑀢𑀸𑀭𑀫𑁂𑀯 𑀕𑀯𑁂𑀲𑀢𑀻𑀢𑀺 𑀭𑀦𑁆𑀥𑀫𑁂𑀯 𑀧𑀭𑀺𑀬𑁂𑀲𑀢𑀺 𑀅𑀦𑀢𑁆𑀣𑀫𑀲𑁆𑀲 𑀓𑀸𑀢𑀼𑀓𑀸𑀫𑁄. 𑀯𑁂𑀭𑀧𑁆𑀧𑀲𑀯𑁄𑀢𑀺 𑀧𑀭𑁂𑀳𑀺 𑀅𑀢𑁆𑀢𑀦𑀺 𑀯𑁂𑀭𑀲𑁆𑀲 𑀧𑀲𑀯𑀦𑀁 𑀅𑀦𑀼𑀧𑀯𑀢𑁆𑀢𑀦𑀁. 𑀢𑁂𑀦𑀸𑀳 ‘‘𑀯𑁂𑀭𑀩𑀳𑀼𑀮𑀢𑀸’’𑀢𑀺. 𑀧𑀭𑁂𑀲𑀁 𑀓𑀭𑀺𑀬𑀫𑀸𑀦𑁄 𑀅𑀦𑀢𑁆𑀣𑁄 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀅𑀦𑀢𑁆𑀣𑁄, 𑀢𑀩𑁆𑀪𑀸𑀯𑁄 𑀅𑀦𑀢𑁆𑀣𑀢𑀸𑀢𑀺 𑀆𑀳 ‘‘𑀅𑀦𑀢𑁆𑀣𑀓𑀸𑀭𑀺𑀢𑀸’’𑀢𑀺. 𑀬𑁄 𑀳𑀺 𑀧𑀭𑁂𑀲𑀁 𑀅𑀦𑀢𑁆𑀣𑀁 𑀓𑀭𑁄𑀢𑀺, 𑀲𑁄 𑀅𑀢𑁆𑀣𑀢𑁄 𑀅𑀢𑁆𑀢𑀦𑁄 𑀅𑀦𑀢𑁆𑀣𑀓𑀸𑀭𑁄 𑀦𑀸𑀫, 𑀢𑀲𑁆𑀫𑀸 𑀅𑀦𑀢𑁆𑀣𑀢𑀸𑀢𑀺 𑀉𑀪𑀬𑀸𑀦𑀢𑁆𑀣𑀓𑀸𑀭𑀺𑀢𑀸. 𑀅𑀭𑀺𑀬𑁄 𑀯𑀼𑀘𑁆𑀘𑀢𑀺 𑀲𑀢𑁆𑀢𑁄, 𑀓𑀼𑀘𑁆𑀙𑀺𑀢𑁄 𑀅𑀭𑀺𑀬𑁄 𑀓𑀤𑀭𑀺𑀬𑁄. 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀯𑀲𑁂𑀦 𑀲𑁄 ‘‘𑀓𑀤𑀭𑀺𑀬𑁄’’𑀢𑀺 𑀯𑀼𑀘𑁆𑀘𑀢𑀺, 𑀲𑁄 𑀥𑀫𑁆𑀫𑁄 𑀓𑀤𑀭𑀺𑀬𑀢𑀸, 𑀫𑀘𑁆𑀙𑀭𑀺𑀬𑀁. 𑀢𑀁 𑀧𑀦 𑀤𑀼𑀩𑁆𑀩𑀺𑀲𑀚𑁆𑀚𑀦𑀻𑀬𑀪𑀸𑀯𑁂 𑀞𑀺𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀼𑀝𑁆𑀞𑀼 𑀓𑀤𑀭𑀺𑀬𑀢𑀸 𑀣𑀤𑁆𑀥𑀫𑀘𑁆𑀙𑀭𑀺𑀬𑀪𑀸’’𑀯𑁄𑀢𑀺. 𑀅𑀯𑀺𑀧𑀡𑁆𑀡𑀲𑀪𑀸𑀯𑀢𑁄 𑀉𑀝𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀘 𑀇𑀡𑀁 𑀕𑀡𑁆𑀳𑀦𑁆𑀢𑁄 𑀲𑀁𑀲𑀻𑀤𑀦𑁆𑀢𑁄𑀯 𑀇𑀡𑀁 𑀯𑀺𑀕𑀸𑀳𑀢𑀺 𑀦𑀸𑀫. 𑀲𑀽𑀭𑀺𑀬𑁂 𑀅𑀦𑀼𑀕𑁆𑀕𑀢𑁂 𑀏𑀯 𑀓𑀫𑁆𑀫𑀦𑁆𑀢𑁂 𑀅𑀦𑀸𑀭𑀪𑀦𑁆𑀢𑁄 𑀭𑀢𑁆𑀢𑀺𑀁 𑀅𑀦𑀼𑀝𑁆𑀞𑀸𑀦𑀲𑀻𑀮𑁄.

𑀅𑀢𑁆𑀣𑀸𑀢𑀺 𑀥𑀦𑀸𑀦𑀺. 𑀅𑀢𑀺𑀓𑁆𑀓𑀫𑀦𑁆𑀢𑀻𑀢𑀺 𑀅𑀧𑀕𑀘𑁆𑀙𑀦𑁆𑀢𑀺. 𑀅𑀣 𑀯𑀸 𑀅𑀢𑁆𑀣𑀸𑀢𑀺 𑀓𑀺𑀘𑁆𑀘𑀸𑀦𑀺. 𑀅𑀢𑀺𑀓𑁆𑀓𑀫𑀦𑁆𑀢𑀻𑀢𑀺 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀸𑀦𑀺 𑀳𑁄𑀦𑁆𑀢𑀺, 𑀢𑁂𑀲𑀁 𑀅𑀢𑀺𑀓𑁆𑀓𑀫𑁄𑀧𑀺 𑀅𑀢𑁆𑀣𑀢𑁄 𑀥𑀦𑀸𑀦𑀫𑁂𑀯 𑀅𑀢𑀺𑀓𑁆𑀓𑀫𑁄. 𑀇𑀫𑀺𑀦𑀸 𑀓𑀣𑀸𑀫𑀕𑁆𑀕𑁂𑀦𑀸𑀢𑀺 𑀇𑀫𑀺𑀦𑀸 ‘‘𑀬𑀢𑁄 𑀔𑁄 𑀕𑀳𑀧𑀢𑀺𑀧𑀼𑀢𑁆𑀢𑀸’’𑀢𑀺𑀆𑀤𑀺 (𑀤𑀻. 𑀦𑀺. 𑁩.𑁨𑁪𑁪) 𑀦𑀬𑀧𑁆𑀧𑀯𑀢𑁆𑀢𑁂𑀦 𑀓𑀣𑀸𑀲𑀗𑁆𑀔𑀸𑀢𑁂𑀦 𑀳𑀺𑀢𑀸𑀥𑀺𑀕𑀫𑀽𑀧𑀸𑀬𑁂𑀦. 𑀏𑀢𑁆𑀢𑀓𑀁 𑀓𑀫𑁆𑀫𑀦𑁆𑀢𑀺 𑀘𑀢𑁆𑀢𑀸𑀭𑁄 𑀓𑀫𑁆𑀫𑀓𑀺𑀮𑁂𑀲𑀸, 𑀘𑀢𑁆𑀢𑀸𑀭𑀺 𑀅𑀕𑀢𑀺𑀕𑀫𑀦𑀸𑀦𑀺, 𑀙 𑀪𑁄𑀕𑀸𑀦𑀁 𑀅𑀧𑀸𑀬𑀫𑀼𑀔𑀸𑀦𑀻𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀘𑀼𑀤𑁆𑀤𑀲𑀯𑀺𑀥𑀁 𑀧𑀸𑀧𑀓𑀫𑁆𑀫𑀁.

𑀫𑀺𑀢𑁆𑀢𑀧𑀢𑀺𑀭𑀽𑀧𑀓𑀯𑀡𑁆𑀡𑀦𑀸

𑁨𑁫𑁪. 𑀅𑀦𑀢𑁆𑀣𑁄𑀢𑀺 ‘‘𑀪𑁄𑀕𑀚𑀸𑀦𑀺, 𑀆𑀬𑀲𑀓𑁆𑀬𑀁, 𑀧𑀭𑀺𑀲𑀫𑀚𑁆𑀛𑁂 𑀫𑀗𑁆𑀓𑀼𑀪𑀸𑀯𑁄, 𑀲𑀫𑁆𑀫𑀽𑀴𑁆𑀳𑀫𑀭𑀡’’𑀦𑁆𑀢𑀺 𑀏𑀯𑀁 𑀆𑀤𑀺𑀓𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 ‘‘𑀤𑀼𑀕𑁆𑀕𑀢𑀺𑀧𑀭𑀺𑀓𑀺𑀮𑁂𑀲𑁄, 𑀲𑀼𑀕𑀢𑀺𑀬𑀜𑁆𑀘 𑀅𑀧𑁆𑀧𑀸𑀬𑀼𑀓𑀢𑀸, 𑀩𑀳𑁆𑀯𑀸𑀩𑀸𑀥𑀢𑀸, 𑀅𑀢𑀺𑀤𑀮𑀺𑀤𑁆𑀤𑀢𑀸, 𑀅𑀧𑁆𑀧𑀦𑁆𑀦𑀧𑀸𑀦𑀢𑀸’’𑀢𑀺 𑀏𑀯𑀁 𑀆𑀤𑀺𑀓𑁄 𑀘 𑀅𑀦𑀢𑁆𑀣𑁄 𑀉𑀧𑁆𑀧𑀚𑁆𑀚𑀢𑀺. 𑀬𑀸𑀦𑀺 𑀓𑀸𑀦𑀺𑀘𑀺 𑀪𑀬𑀸𑀦𑀻𑀢𑀺 𑀅𑀢𑁆𑀢𑀸𑀦𑀼𑀯𑀸𑀤𑀪𑀬𑀧𑀭𑀸𑀦𑀼𑀯𑀸𑀤𑀪𑀬𑀤𑀡𑁆𑀟𑀪𑀬𑀸𑀤𑀻𑀦𑀺 𑀮𑁄𑀓𑁂 𑀮𑀩𑁆𑀪𑀫𑀸𑀦𑀸𑀦𑀺 𑀬𑀸𑀦𑀺 𑀓𑀸𑀦𑀺𑀘𑀺 𑀪𑀬𑀸𑀦𑀺. 𑀉𑀧𑀤𑁆𑀤𑀯𑀸𑀢𑀺 𑀅𑀦𑁆𑀢𑀭𑀸𑀬𑀸. 𑀉𑀧𑀲𑀕𑁆𑀕𑀸𑀢𑀺 𑀲𑀭𑀻𑀭𑁂𑀦 𑀲𑀁𑀲𑀝𑁆𑀞𑀸𑀦𑀺 𑀯𑀺𑀬 𑀉𑀧𑀭𑀽𑀧𑀭𑀺 𑀉𑀧𑁆𑀧𑀚𑁆𑀚𑀦𑀓𑀸𑀦𑀺 𑀩𑁆𑀬𑀲𑀦𑀸𑀦𑀺. 𑀅𑀜𑁆𑀜𑀤𑀢𑁆𑀣𑀽𑀢𑀺 𑀏𑀓𑀦𑁆𑀢𑁂𑀦𑀸𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀦𑀺𑀧𑀸𑀢𑁄 ‘‘𑀅𑀜𑁆𑀜𑀤𑀢𑁆𑀣𑀼𑀤𑀲𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁪𑁨) 𑀯𑀺𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀏𑀓𑀁𑀲𑁂𑀦𑀸’’𑀢𑀺. 𑀬𑀁 𑀓𑀺𑀜𑁆𑀘𑀺 𑀕𑀳𑀡𑀬𑁄𑀕𑁆𑀬𑀁 𑀳𑀭𑀢𑀺𑀬𑁂𑀯 𑀕𑀡𑁆𑀳𑀸𑀢𑀺𑀬𑁂𑀯. 𑀯𑀸𑀘𑀸 𑀏𑀯 𑀧𑀭𑀫𑀸 𑀏𑀢𑀲𑁆𑀲 𑀓𑀫𑁆𑀫𑀦𑁆𑀢𑀺 𑀯𑀘𑀻𑀧𑀭𑀫𑁄. 𑀢𑁂𑀦𑀸𑀳 ‘‘𑀯𑀘𑀦𑀫𑀢𑁆𑀢𑁂𑀦𑁂𑀯𑀸’’𑀢𑀺𑀆𑀤𑀺. 𑀅𑀦𑀼𑀧𑁆𑀧𑀺𑀬𑀦𑁆𑀢𑀺 𑀢𑀓𑁆𑀓𑀦𑀁, 𑀬𑀁 𑀯𑀸 ‘‘𑀭𑀼𑀘𑀻’’𑀢𑀺 𑀯𑀼𑀘𑁆𑀘𑀢𑀺 𑀬𑁂𑀳𑀺 𑀲𑀼𑀭𑀸𑀧𑀸𑀦𑀸𑀤𑀻𑀳𑀺 𑀪𑁄𑀕𑀸 𑀅𑀧𑁂𑀦𑁆𑀢𑀺 𑀯𑀺𑀕𑀘𑁆𑀙𑀦𑁆𑀢𑀺, 𑀢𑁂𑀲𑀼 𑀢𑁂𑀲𑀁 𑀅𑀧𑀸𑀬𑁂𑀲𑀼 𑀩𑁆𑀬𑀲𑀦𑀳𑁂𑀢𑀽𑀲𑀼 𑀲𑀳𑀸𑀬𑁄 𑀳𑁄𑀢𑀺.

𑁨𑁫𑁫. 𑀳𑀸𑀭𑀓𑁄𑀬𑁂𑀯 𑀳𑁄𑀢𑀺, 𑀦 𑀤𑀸𑀬𑀓𑁄, 𑀢𑀫𑀲𑁆𑀲 𑀏𑀓𑀁𑀲𑀢𑁄 𑀳𑀸𑀭𑀓𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀳𑀸𑀬𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀁 𑀓𑀺𑀜𑁆𑀘𑀺 𑀅𑀧𑁆𑀧𑀓𑀦𑁆𑀢𑀺 𑀧𑀼𑀧𑁆𑀨𑀨𑀮𑀸𑀤𑀺 𑀬𑀁 𑀓𑀺𑀜𑁆𑀘𑀺 𑀧𑀭𑀺𑀢𑁆𑀢𑀁 𑀯𑀢𑁆𑀣𑀼𑀁 𑀤𑀢𑁆𑀯𑀸, 𑀩𑀳𑀼𑀁 𑀧𑀢𑁆𑀣𑁂𑀢𑀺 𑀩𑀳𑀼𑀁 𑀫𑀳𑀕𑁆𑀖𑀁 𑀯𑀢𑁆𑀣𑀬𑀼𑀕𑀸𑀤𑀺𑀁 𑀧𑀘𑁆𑀘𑀸𑀲𑀻𑀲𑀢𑀺. 𑀤𑀸𑀲𑁄 𑀯𑀺𑀬 𑀳𑀼𑀢𑁆𑀯𑀸 𑀫𑀺𑀢𑁆𑀢𑀲𑁆𑀲 𑀢𑀁 𑀢𑀁 𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑁄 𑀓𑀣𑀁 𑀅𑀫𑀺𑀢𑁆𑀢𑁄 𑀦𑀸𑀫 𑀚𑀸𑀢𑁄𑀢𑀺 𑀆𑀳 ‘‘𑀅𑀬’’𑀦𑁆𑀢𑀺𑀆𑀤𑀺. 𑀬𑀲𑁆𑀲 𑀓𑀺𑀘𑁆𑀘𑀁 𑀓𑀭𑁄𑀢𑀺 𑀅𑀦𑀢𑁆𑀣𑀧𑀭𑀺𑀳𑀸𑀭𑀢𑁆𑀣𑀁, 𑀅𑀢𑁆𑀢𑀦𑁄 𑀫𑀺𑀢𑁆𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘, 𑀢𑀁 𑀲𑁂𑀯𑀢𑀺. 𑀅𑀢𑁆𑀣𑀓𑀸𑀭𑀡𑀸𑀢𑀺 𑀯𑀟𑁆𑀠𑀺𑀦𑀺𑀫𑀺𑀢𑁆𑀢𑀁, 𑀅𑀬𑀫𑁂𑀢𑁂𑀲𑀁 𑀪𑁂𑀤𑁄.

𑁨𑁫𑁬. 𑀧𑀭𑁂𑀢𑀺 𑀧𑀭𑀤𑀺𑀯𑀲𑁂. 𑀦 𑀆𑀕𑀢𑁄 𑀲𑀻𑀢𑀺 𑀆𑀕𑀢𑁄 𑀦𑀸𑀳𑁄𑀲𑀺. 𑀔𑀻𑀡𑀦𑁆𑀢𑀺 𑀢𑀸𑀤𑀺𑀲𑀲𑁆𑀲, 𑀅𑀲𑀼𑀓𑀲𑁆𑀲 𑀘 𑀤𑀺𑀦𑁆𑀦𑀢𑁆𑀢𑀸. 𑀲𑀲𑁆𑀲𑀲𑀗𑁆𑀕𑀳𑁂𑀢𑀺 𑀲𑀲𑁆𑀲𑀢𑁄 𑀓𑀸𑀢𑀩𑁆𑀩𑀥𑀜𑁆𑀜𑀲𑀗𑁆𑀕𑀳𑁂 𑀓𑀢𑁂.

𑁨𑁫𑁭. ‘‘𑀤𑀸𑀦𑀸𑀤𑀻𑀲𑀼 𑀬𑀁 𑀓𑀺𑀜𑁆𑀘𑀺 𑀓𑀭𑁄𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀼 𑀲𑀫𑁆𑀫 𑀓𑀭𑁄𑀫𑀸’’𑀢𑀺 𑀅𑀦𑀼𑀚𑀸𑀦𑀸𑀢𑀻𑀢𑀺 𑀇𑀫𑀫𑀢𑁆𑀣𑀁 ‘‘𑀓𑀮𑁆𑀬𑀸𑀡𑁂𑀧𑀺 𑀏𑀲𑁂𑀯 𑀦𑀬𑁄’’𑀢𑀺 𑀅𑀢𑀺𑀤𑀺𑀲𑀢𑀺. 𑀦𑀦𑀼 𑀏𑀯𑀁 𑀅𑀦𑀼𑀚𑀸𑀦𑀦𑁆𑀢𑁄 𑀅𑀬𑀁 𑀫𑀺𑀢𑁆𑀢𑁄 𑀏𑀯, 𑀦 𑀅𑀫𑀺𑀢𑁆𑀢𑁄 𑀫𑀺𑀢𑁆𑀢𑀧𑀢𑀺𑀭𑀽𑀧𑀓𑁄𑀢𑀺? 𑀅𑀦𑀼𑀧𑁆𑀧𑀺𑀬𑀪𑀸𑀡𑀻𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁. 𑀲𑀳𑀸𑀬𑁂𑀦 𑀯𑀸 𑀤𑁂𑀲𑀓𑀸𑀮𑀁, 𑀢𑀲𑁆𑀫𑀺𑀁 𑀯𑀸 𑀓𑀢𑁂 𑀉𑀧𑁆𑀧𑀚𑁆𑀚𑀦𑀓𑀯𑀺𑀭𑁄𑀥𑀸𑀤𑀺𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀓𑀭𑁄𑀫𑀸’’𑀢𑀺 𑀯𑀼𑀢𑁆𑀢𑁂 𑀬𑁄 𑀢𑀁 𑀚𑀸𑀦𑀦𑁆𑀢𑁄 𑀏𑀯 ‘‘𑀲𑀸𑀥𑀼 𑀲𑀫𑁆𑀫 𑀓𑀭𑁄𑀫𑀸’’𑀢𑀺 𑀅𑀦𑀼𑀧𑁆𑀧𑀺𑀬𑀁 𑀪𑀡𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀓𑀮𑁆𑀬𑀸𑀡𑀁 𑀧𑀺𑀲𑁆𑀲 𑀅𑀦𑀼𑀚𑀸𑀦𑀸𑀢𑀻’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑀮𑁆𑀬𑀸𑀡𑁂𑀧𑀺 𑀏𑀲𑁂𑀯 𑀦𑀬𑁄’’𑀢𑀺.

𑁨𑁫𑁯. 𑀫𑀺𑀢𑁆𑀢𑀧𑀢𑀺𑀭𑀽𑀧𑀓𑀸 𑀏𑀢𑁂 𑀫𑀺𑀢𑁆𑀢𑀸𑀢𑀺 𑀏𑀯𑀁 𑀚𑀸𑀦𑀺𑀢𑁆𑀯𑀸.

𑀲𑀼𑀳𑀤𑀫𑀺𑀢𑁆𑀢𑀯𑀡𑁆𑀡𑀦𑀸

𑁨𑁬𑁦. 𑀲𑀼𑀦𑁆𑀤𑀭𑀳𑀤𑀬𑀸𑀢𑀺 𑀧𑁂𑀫𑀲𑁆𑀲 𑀅𑀢𑁆𑀣𑀺𑀯𑀲𑁂𑀦 𑀪𑀤𑁆𑀤𑀘𑀺𑀢𑁆𑀢𑀸.

𑁨𑁬𑁧. 𑀧𑀫𑀢𑁆𑀢𑀁 𑀭𑀓𑁆𑀔𑀢𑀻𑀢𑀺 𑀏𑀢𑁆𑀣 𑀧𑀫𑀸𑀤𑀯𑀲𑁂𑀦 𑀓𑀺𑀜𑁆𑀘𑀺 𑀅𑀬𑀼𑀢𑁆𑀢𑁂 𑀓𑀢𑁂 𑀢𑀸𑀤𑀺𑀲𑁂 𑀓𑀸𑀮𑁂 𑀭𑀓𑁆𑀔𑀡𑀁 ‘‘𑀪𑀻𑀢𑀲𑁆𑀲 𑀲𑀭𑀡𑀁 𑀳𑁄𑀢𑀻’’𑀢𑀺 𑀇𑀫𑀺𑀦𑀸𑀯 𑀢𑀁 𑀕𑀳𑀺𑀢𑀦𑁆𑀢𑀺 𑀢𑀢𑁄 𑀅𑀜𑁆𑀜𑀫𑁂𑀯 𑀧𑀫𑀢𑁆𑀢𑀲𑁆𑀲 𑀭𑀓𑁆𑀔𑀡𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀚𑁆𑀚𑀁 𑀧𑀺𑀯𑀺𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀕𑁂𑀳𑁂 𑀆𑀭𑀓𑁆𑀔𑀁 𑀅𑀲𑀁𑀯𑀺𑀳𑀺𑀢𑀲𑁆𑀲 𑀩𑀳𑀺𑀕𑀫𑀦𑀫𑁆𑀧𑀺 𑀧𑀫𑀸𑀤𑀧𑀓𑁆𑀔𑀺𑀓𑀫𑁂𑀯𑀸𑀢𑀺 ‘‘𑀲𑀳𑀸𑀬𑁄 𑀩𑀳𑀺𑀕𑀢𑁄 𑀯𑀸 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀪𑀬𑀁 𑀳𑀭𑀦𑁆𑀢𑁄𑀢𑀺 𑀪𑀬𑀁 𑀧𑀝𑀺𑀩𑀸𑀳𑀦𑁆𑀢𑁄. 𑀪𑁄𑀕𑀳𑁂𑀢𑀼𑀢𑀸𑀬 𑀨𑀮𑀽𑀧𑀘𑀸𑀭𑁂𑀦 𑀥𑀦𑀁 ‘‘𑀪𑁄𑀕’’𑀦𑁆𑀢𑀺 𑀯𑀤𑀢𑀺. 𑀓𑀺𑀘𑁆𑀘𑀓𑀭𑀡𑀻𑀬𑁂𑀢𑀺 𑀔𑀼𑀤𑁆𑀤𑀓𑁂, 𑀫𑀳𑀦𑁆𑀢𑁂 𑀘 𑀓𑀸𑀢𑀩𑁆𑀩𑁂 𑀉𑀧𑁆𑀧𑀦𑁆𑀦𑁂.

𑁨𑁬𑁨. 𑀦𑀺𑀕𑀽𑀳𑀺𑀢𑀼𑀁 𑀬𑀼𑀢𑁆𑀢𑀓𑀣𑀦𑁆𑀢𑀺 𑀦𑀺𑀕𑀽𑀳𑀺𑀢𑀼𑀁 𑀙𑀸𑀤𑁂𑀢𑀼𑀁 𑀬𑀼𑀢𑁆𑀢𑀓𑀣𑀁, 𑀦𑀺𑀕𑀽𑀳𑀺𑀢𑀼𑀁 𑀯𑀸 𑀬𑀼𑀢𑁆𑀢𑀸 𑀓𑀣𑀸 𑀏𑀢𑀲𑁆𑀲𑀸𑀢𑀺 𑀦𑀺𑀕𑀽𑀳𑀺𑀢𑀼𑀁 𑀬𑀼𑀢𑁆𑀢𑀓𑀣𑀁, 𑀅𑀢𑁆𑀢𑀦𑁄 𑀓𑀫𑁆𑀫𑀁. 𑀭𑀓𑁆𑀔𑀢𑀻𑀢𑀺 𑀅𑀦𑀸𑀯𑀺𑀓𑀭𑁄𑀦𑁆𑀢𑁄 𑀙𑀸𑀤𑁂𑀢𑀺. 𑀚𑀻𑀯𑀺𑀢𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀓𑀺𑀫𑀗𑁆𑀕𑀁 𑀧𑀦 𑀅𑀜𑁆𑀜𑀁 𑀧𑀭𑀺𑀕𑁆𑀕𑀳𑀺𑀢𑀯𑀢𑁆𑀣𑀼𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁨𑁬𑁩. 𑀧𑀲𑁆𑀲𑀦𑁆𑀢𑁂𑀲𑀼 𑀧𑀲𑁆𑀲𑀦𑁆𑀢𑁂𑀲𑀽𑀢𑀺 𑀆𑀫𑁂𑀟𑀺𑀢𑀯𑀘𑀦𑁂𑀦 𑀦𑀺𑀯𑀸𑀭𑀺𑀬𑀫𑀸𑀦𑀲𑁆𑀲 𑀧𑀸𑀧𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀓𑀭𑀡𑀁 𑀤𑀻𑀧𑁂𑀢𑀺. 𑀧𑀼𑀦𑀧𑁆𑀧𑀼𑀦𑀁 𑀓𑀭𑁄𑀦𑁆𑀢𑁄 𑀳𑀺 𑀧𑀸𑀧𑀢𑁄 𑀯𑀺𑀲𑁂𑀲𑁂𑀦 𑀦𑀺𑀯𑀸𑀭𑁂𑀢𑀩𑁆𑀩𑁄 𑀳𑁄𑀢𑀺. 𑀲𑀭𑀡𑁂𑀲𑀽𑀢𑀺 𑀲𑀭𑀡𑁂𑀲𑀼 𑀯𑀢𑁆𑀢𑀲𑁆𑀲𑀼 𑀅𑀪𑀺𑀦𑁆𑀦𑀸𑀦𑀺 𑀓𑀢𑁆𑀯𑀸 𑀧𑀝𑀺𑀧𑀚𑁆𑀚, 𑀲𑀭𑀡𑁂𑀲𑀼 𑀯𑀸 𑀉𑀧𑀸𑀲𑀓𑀪𑀸𑀯𑁂𑀦 𑀯𑀢𑁆𑀢𑀲𑁆𑀲𑀼. 𑀦𑀺𑀧𑀼𑀡𑀦𑁆𑀢𑀺 𑀲𑀡𑁆𑀳𑀁. 𑀓𑀸𑀭𑀡𑀦𑁆𑀢𑀺 𑀓𑀫𑁆𑀫𑀲𑁆𑀲𑀓𑀢𑀸𑀤𑀺𑀪𑁂𑀤𑀬𑀼𑀢𑁆𑀢𑀁. 𑀇𑀤𑀁 𑀓𑀫𑁆𑀫𑀦𑁆𑀢𑀺 𑀇𑀫𑀁 𑀤𑀸𑀦𑀸𑀤𑀺𑀪𑁂𑀤𑀁 𑀓𑀼𑀲𑀮𑀓𑀫𑁆𑀫𑀁. ‘‘𑀓𑀫𑁆𑀫’’𑀦𑁆𑀢𑀺 𑀲𑀸𑀥𑀸𑀭𑀡𑀢𑁄 𑀯𑀼𑀢𑁆𑀢𑀲𑁆𑀲𑀸𑀧𑀺 𑀢𑀲𑁆𑀲 ‘‘𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀻’’𑀢𑀺 𑀧𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑁂𑀦 𑀲𑀤𑁆𑀥𑀸𑀳𑀺𑀭𑁄𑀢𑁆𑀢𑀧𑁆𑀧𑀸𑀮𑁄𑀪𑀸𑀤𑀺𑀕𑀼𑀡𑀥𑀫𑁆𑀫𑀲𑀫𑀗𑁆𑀕𑀺𑀢𑀸 𑀯𑀺𑀬 𑀓𑀼𑀲𑀮𑀪𑀸𑀯𑁄 𑀚𑁄𑀢𑀺𑀢𑁄 𑀳𑁄𑀢𑀺. 𑀲𑀤𑁆𑀥𑀸𑀤𑀬𑁄 𑀳𑀺 𑀥𑀫𑁆𑀫𑀸 𑀲𑀕𑁆𑀕𑀕𑀸𑀫𑀺𑀫𑀕𑁆𑀕𑁄. 𑀬𑀣𑀸𑀳 𑁋

‘‘𑀲𑀤𑁆𑀥𑀸 𑀳𑀺𑀭𑀺𑀬𑀁 𑀓𑀼𑀲𑀮𑀜𑁆𑀘 𑀤𑀸𑀦𑀁,

𑀥𑀫𑁆𑀫𑀸 𑀏𑀢𑁂 𑀲𑀧𑁆𑀧𑀼𑀭𑀺𑀲𑀸𑀦𑀼𑀬𑀸𑀢𑀸;

𑀏𑀢𑀜𑁆𑀳𑀺 𑀫𑀕𑁆𑀕𑀁 𑀤𑀺𑀯𑀺𑀬𑀁 𑀯𑀤𑀦𑁆𑀢𑀺,

𑀏𑀢𑁂𑀦 𑀳𑀺 𑀕𑀘𑁆𑀙𑀢𑀺 𑀤𑁂𑀯𑀮𑁄𑀓’’𑀦𑁆𑀢𑀺. (𑀅. 𑀦𑀺. 𑁮.𑁩𑁨);

𑁨𑁬𑁪. 𑀪𑀯𑀦𑀁 𑀲𑀫𑁆𑀧𑀢𑁆𑀢𑀺𑀯𑀟𑁆𑀠𑀦𑀁 𑀪𑀯𑁄𑀢𑀺 𑀅𑀢𑁆𑀣𑁄, 𑀢𑀧𑁆𑀧𑀝𑀺𑀓𑁆𑀔𑁂𑀧𑁂𑀦 𑀅𑀪𑀯𑁄𑀢𑀺 𑀆𑀳 ‘‘𑀅𑀪𑀯𑁂𑀦 𑀅𑀯𑀼𑀟𑁆𑀠𑀺𑀬𑀸’’𑀢𑀺. 𑀧𑀸𑀭𑀺𑀚𑀼𑀜𑁆𑀜𑀦𑁆𑀢𑀺 𑀚𑀸𑀦𑀺. 𑀅𑀦𑀢𑁆𑀢𑀫𑀦𑁄 𑀳𑁄𑀢𑀻𑀢𑀺 𑀅𑀢𑁆𑀢𑀫𑀦𑁄 𑀦 𑀳𑁄𑀢𑀺 𑀅𑀦𑀼𑀓𑀫𑁆𑀧𑀓𑀪𑀸𑀯𑀢𑁄. 𑀅𑀜𑁆𑀜𑀤𑀢𑁆𑀣𑀼 𑀢𑀁 𑀅𑀪𑀯𑀁 𑀅𑀢𑁆𑀢𑀦𑀺 𑀆𑀧𑀢𑀺𑀢𑀁 𑀯𑀺𑀬 𑀫𑀜𑁆𑀜𑀢𑀺. 𑀇𑀤𑀸𑀦𑀺 𑀢𑀁 𑀪𑀯𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀢𑀣𑀸𑀭𑀽𑀧’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀭𑀽𑀧𑁄𑀢𑀺 𑀩𑀻𑀪𑀘𑁆𑀙𑁄. 𑀦 𑀧𑀸𑀲𑀸𑀤𑀺𑀓𑁄𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀲𑀼𑀚𑀸𑀢𑁄𑀢𑀺 𑀲𑀼𑀦𑁆𑀤𑀭𑀚𑀸𑀢𑀺𑀓𑁄 𑀚𑀸𑀢𑀺𑀲𑀫𑁆𑀧𑀦𑁆𑀦𑁄.

𑁨𑁬𑁫. 𑀚𑀮𑀦𑁆𑀢𑀺 𑀚𑀮𑀦𑁆𑀢𑁄. 𑀅𑀕𑁆𑀕𑀻𑀯𑀸𑀢𑀺 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀯𑀺𑀬. 𑀪𑀸𑀲𑀢𑀻𑀢𑀺 𑀯𑀺𑀭𑁄𑀘𑀢𑀺. 𑀬𑀲𑁆𑀫𑀸𑀲𑁆𑀲 𑀪𑀕𑀯𑀢𑀸 𑀲𑀯𑀺𑀲𑁂𑀲𑀁 𑀯𑀺𑀭𑁄𑀘𑀦𑀁 𑀮𑁄𑀓𑁂 𑀧𑀸𑀓𑀝𑀪𑀸𑀯𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀚𑀮𑀁 𑀅𑀕𑁆𑀕𑀻𑀯 𑀪𑀸𑀲𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀬𑀤𑀸 𑀅𑀕𑁆𑀕𑀺 𑀲𑀯𑀺𑀲𑁂𑀲𑀁 𑀯𑀺𑀭𑁄𑀘𑀢𑀺, 𑀬𑀢𑁆𑀣 𑀘 𑀞𑀺𑀢𑁄 𑀤𑀽𑀭𑁂 𑀞𑀺𑀢𑀸𑀦𑀫𑁆𑀧𑀺 𑀧𑀜𑁆𑀜𑀸𑀬𑀢𑀺, 𑀢𑀁 𑀤𑀲𑁆𑀲𑀦𑀸𑀤𑀺𑀯𑀲𑁂𑀦 𑀢𑀫𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀭𑀢𑁆𑀢𑀺’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

‘‘𑀪𑀫𑀭𑀲𑁆𑀲𑁂𑀯 𑀇𑀭𑀻𑀬𑀢𑁄’’𑀢𑀺 𑀏𑀢𑁂𑀦𑁂𑀯𑀲𑁆𑀲 𑀪𑁄𑀕𑀲𑀁𑀳𑀭𑀡𑀁 𑀥𑀫𑁆𑀫𑀺𑀓𑀁 𑀜𑀸𑀬𑁄𑀧𑁂𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀢𑁆𑀢𑀸𑀦𑀫𑁆𑀧𑀻’’𑀢𑀺𑀆𑀤𑀺𑀫𑀸𑀳. 𑀭𑀸𑀲𑀺𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀬𑀣𑀸𑀲𑁆𑀲 𑀥𑀦𑀥𑀜𑁆𑀜𑀸𑀤𑀺𑀪𑁄𑀕𑀚𑀸𑀢𑀁 𑀲𑀫𑁆𑀧𑀺𑀡𑁆𑀟𑀺𑀢𑀁 𑀭𑀸𑀲𑀺𑀪𑀽𑀢𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀏𑀯𑀁 𑀇𑀭𑀻𑀬𑀢𑁄 𑀆𑀬𑀽𑀳𑀦𑁆𑀢𑀲𑁆𑀲 𑀘. 𑀘𑀓𑁆𑀓𑀧𑁆𑀧𑀫𑀸𑀡𑀦𑁆𑀢𑀺 𑀭𑀣𑀘𑀓𑁆𑀓𑀧𑁆𑀧𑀫𑀸𑀡𑀁. 𑀦𑀺𑀘𑀬𑀦𑁆𑀢𑀺 𑀯𑀼𑀟𑁆𑀠𑀺𑀁 𑀧𑀭𑀺𑀯𑀼𑀟𑁆𑀠𑀺𑀁. ‘‘𑀪𑁄𑀕𑀸 𑀲𑀦𑁆𑀦𑀺𑀘𑀬𑀁 𑀬𑀦𑁆𑀢𑀻’’𑀢𑀺 𑀓𑁂𑀘𑀺 𑀧𑀞𑀦𑁆𑀢𑀺.

𑀲𑀫𑀸𑀳𑀢𑁆𑀯𑀸𑀢𑀺 𑀲𑀁𑀳𑀭𑀺𑀢𑁆𑀯𑀸. 𑀅𑀮𑀁-𑀲𑀤𑁆𑀤𑁄 ‘‘𑀅𑀮𑀫𑁂𑀯 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁, 𑀅𑀮𑀁 𑀯𑀺𑀭𑀚𑁆𑀚𑀺𑀢𑀼’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁨𑁭𑁨; 𑀲𑀁. 𑀦𑀺. 𑁨.𑁧𑁨𑁪, 𑁧𑁨𑁯, 𑁧𑁩𑁪, 𑁧𑁪𑁩) 𑀬𑀼𑀢𑁆𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀚𑁄𑀢𑁂𑀢𑀺, ‘‘𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁨𑁮) 𑀧𑀭𑀺𑀬𑀢𑁆𑀢𑀦𑁆𑀢𑀺. 𑀬𑁄 𑀯𑁂𑀞𑀺𑀢𑀢𑁆𑀢𑁄𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁨𑁧𑁭) 𑀯𑀺𑀬 𑀅𑀢𑁆𑀢-𑀲𑀤𑁆𑀤𑁄 𑀲𑀪𑀸𑀯𑀧𑀭𑀺𑀬𑀸𑀬𑁄𑀢𑀺 𑀢𑀁 𑀲𑀩𑁆𑀩𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀼𑀢𑁆𑀢𑀲𑀪𑀸𑀯𑁄’’𑀢𑀺𑀆𑀤𑀺𑀫𑀸𑀳. 𑀲𑀡𑁆𑀞𑀧𑁂𑀢𑀼𑀦𑁆𑀢𑀺 𑀲𑀫𑁆𑀫𑀸 𑀞𑀧𑁂𑀢𑀼𑀁, 𑀲𑀫𑁆𑀫𑀤𑁂𑀯 𑀧𑀯𑀢𑁆𑀢𑁂𑀢𑀼𑀦𑁆𑀢𑀺 𑀅𑀢𑁆𑀣𑁄.

𑀏𑀯𑀁 𑀯𑀺𑀪𑀚𑀦𑁆𑀢𑁄𑀢𑀺 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀢𑀦𑁄 𑀥𑀦𑀁 𑀘𑀢𑀼𑀥𑀸 𑀯𑀺𑀪𑀚𑀦𑁆𑀢𑁄 𑀯𑀺𑀪𑀚𑀦𑀳𑁂𑀢𑀼 𑀫𑀺𑀢𑁆𑀢𑀸𑀦𑀺 𑀕𑀦𑁆𑀣𑀢𑀺 𑀲𑁄𑀴𑀲 𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀦𑀺 𑀫𑁂𑀢𑁆𑀢𑀸𑀬 𑀅𑀚𑀻𑀭𑀸𑀧𑀦𑁂𑀦 𑀧𑀩𑀦𑁆𑀥𑀢𑀺. 𑀢𑁂𑀦𑀸𑀳 ‘‘𑀅𑀪𑁂𑀚𑁆𑀚𑀫𑀸𑀦𑀸𑀦𑀺 𑀞𑀧𑁂𑀢𑀻’’𑀢𑀺. 𑀓𑀣𑀁 𑀧𑀦 𑀯𑀼𑀢𑁆𑀢𑀦𑀬𑁂𑀦 𑀘𑀢𑀼𑀥𑀸 𑀪𑁄𑀕𑀸𑀦𑀁 𑀯𑀺𑀪𑀚𑀦𑁂𑀦 𑀫𑀺𑀢𑁆𑀢𑀸𑀦𑀺 𑀕𑀦𑁆𑀣𑀢𑀻𑀢𑀺 𑀆𑀳 ‘‘𑀬𑀲𑁆𑀲 𑀳𑀻’’𑀢𑀺𑀆𑀤𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀤𑀤𑀁 𑀫𑀺𑀢𑁆𑀢𑀸𑀦𑀺 𑀕𑀦𑁆𑀣𑀢𑀻’’𑀢𑀺 (𑀲𑀁. 𑀦𑀺. 𑁧.𑁨𑁪𑁬). 𑀪𑀼𑀜𑁆𑀚𑁂𑀬𑁆𑀬𑀸𑀢𑀺 𑀉𑀧𑀪𑀼𑀜𑁆𑀚𑁂𑀬𑁆𑀬, 𑀉𑀧𑀬𑀼𑀜𑁆𑀚𑁂𑀬𑁆𑀬 𑀘𑀸𑀢𑀺 𑀅𑀢𑁆𑀣𑁄. 𑀲𑀫𑀡𑀩𑁆𑀭𑀸𑀳𑁆𑀫𑀡𑀓𑀧𑀡𑀤𑁆𑀥𑀺𑀓𑀸𑀤𑀻𑀦𑀁 𑀤𑀸𑀦𑀯𑀲𑁂𑀦 𑀘𑁂𑀯 𑀅𑀥𑀺𑀯𑀢𑁆𑀣𑀤𑁂𑀯𑀢𑀸𑀤𑀻𑀦𑀁 𑀧𑁂𑀢𑀩𑀮𑀺𑀯𑀲𑁂𑀦, 𑀦𑁆𑀳𑀸𑀧𑀺𑀢𑀸𑀤𑀻𑀦𑀁 𑀯𑁂𑀢𑀦𑀯𑀲𑁂𑀦 𑀘 𑀯𑀺𑀦𑀺𑀬𑁄𑀕𑁄𑀧𑀺 𑀉𑀧𑀬𑁄𑀕𑁄 𑀏𑀯. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀇𑀫𑁂𑀲𑀼 𑀧𑀦𑀸’’𑀢𑀺𑀆𑀤𑀺 𑀆𑀬𑁄 𑀦𑀸𑀫 𑀳𑁂𑀝𑁆𑀞𑀺𑀫𑀦𑁆𑀢𑁂𑀦 𑀯𑀬𑀢𑁄 𑀘𑀢𑀼𑀕𑁆𑀕𑀼𑀡𑁄 𑀇𑀘𑁆𑀙𑀺𑀢𑀩𑁆𑀩𑁄, 𑀅𑀜𑁆𑀜𑀣𑀸 𑀯𑀬𑁄 𑀅𑀯𑀺𑀘𑁆𑀙𑁂𑀤𑀯𑀲𑁂𑀦 𑀦 𑀲𑀦𑁆𑀢𑀸𑀦𑁂𑀬𑁆𑀬, 𑀦𑀺𑀥𑁂𑀬𑁆𑀬, 𑀪𑀸𑀚𑁂𑀬𑁆𑀬 𑀘 𑀅𑀲𑀫𑁆𑀪𑀢𑁂𑀢𑀺 𑀯𑀼𑀢𑁆𑀢𑀁 ‘‘𑀤𑁆𑀯𑀻𑀳𑀺 𑀓𑀫𑁆𑀫𑀁 𑀧𑀬𑁄𑀚𑀬𑁂’’𑀢𑀺. 𑀦𑀺𑀥𑁂𑀢𑁆𑀯𑀸𑀢𑀺 𑀦𑀺𑀤𑀳𑀺𑀢𑁆𑀯𑀸, 𑀪𑀽𑀫𑀺𑀕𑀢𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀭𑀸𑀚𑀸𑀤𑀺𑀯𑀲𑁂𑀦𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀕𑁆𑀕𑀺𑀉𑀤𑀓𑀘𑁄𑀭𑀤𑀼𑀩𑁆𑀪𑀺𑀓𑁆𑀔𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀦𑁆𑀳𑀸𑀧𑀺𑀢𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀼𑀮𑀸𑀮𑀭𑀚𑀓𑀸𑀤𑀻𑀦𑀁 𑀲𑀗𑁆𑀕𑀳𑁄.

𑀙𑀤𑁆𑀤𑀺𑀲𑀸𑀧𑀝𑀺𑀘𑁆𑀙𑀸𑀤𑀦𑀓𑀡𑁆𑀟𑀯𑀡𑁆𑀡𑀦𑀸

𑁨𑁬𑁬. 𑀘𑀢𑀽𑀳𑀺 𑀓𑀸𑀭𑀡𑁂𑀳𑀻𑀢𑀺 𑀦 𑀙𑀦𑁆𑀤𑀕𑀫𑀦𑀸𑀤𑀻𑀳𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺. 𑀅𑀓𑀼𑀲𑀮𑀁 𑀧𑀳𑀸𑀬𑀸𑀢𑀺 ‘‘𑀘𑀢𑁆𑀢𑀸𑀭𑁄 𑀓𑀫𑁆𑀫𑀓𑀺𑀮𑁂𑀲𑀸’’𑀢𑀺 𑀯𑀼𑀢𑁆𑀢𑀁 𑀅𑀓𑀼𑀲𑀮𑀜𑁆𑀘𑁂𑀯 𑀅𑀕𑀢𑀺𑀕𑀫𑀦𑀸𑀓𑀼𑀲𑀮𑀜𑁆𑀘 𑀧𑀚𑀳𑀺𑀢𑁆𑀯𑀸. 𑀙𑀳𑀺 𑀓𑀸𑀭𑀡𑁂𑀳𑀻𑀢𑀺 𑀲𑀼𑀭𑀸𑀧𑀸𑀦𑀸𑀤𑀻𑀲𑀼 𑀆𑀤𑀻𑀦𑀯𑀤𑀲𑁆𑀲𑀦𑀲𑀗𑁆𑀔𑀸𑀢𑁂𑀳𑀺 𑀙𑀳𑀺 𑀓𑀸𑀭𑀡𑁂𑀳𑀺. 𑀲𑀼𑀭𑀸𑀧𑀸𑀦𑀸𑀦𑀼𑀬𑁄𑀕𑀸𑀤𑀺𑀪𑁂𑀤𑀁 𑀙𑀩𑁆𑀩𑀺𑀥𑀁 𑀪𑁄𑀕𑀸𑀦𑀁 𑀅𑀧𑀸𑀬𑀫𑀼𑀔𑀁 𑀯𑀺𑀦𑀸𑀲𑀫𑀼𑀔𑀁 𑀯𑀚𑁆𑀚𑁂𑀢𑁆𑀯𑀸. 𑀲𑁄𑀴𑀲 𑀫𑀺𑀢𑁆𑀢𑀸𑀦𑀻𑀢𑀺 𑀉𑀧𑀓𑀸𑀭𑀸𑀤𑀺𑀯𑀲𑁂𑀦 𑀘𑀢𑁆𑀢𑀸𑀭𑁄, 𑀧𑀫𑀢𑁆𑀢𑀭𑀓𑁆𑀔𑀡𑀸𑀤𑀺𑀓𑀺𑀘𑁆𑀘𑀯𑀺𑀲𑁂𑀲𑀯𑀲𑁂𑀦 𑀧𑀘𑁆𑀘𑁂𑀓𑀁 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀓𑀢𑁆𑀯𑀸 𑀲𑁄𑀴𑀲𑀯𑀺𑀥𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀦𑁆𑀢𑁄 𑀪𑀚𑀦𑁆𑀢𑁄. 𑀲𑀢𑁆𑀣𑀯𑀸𑀡𑀺𑀚𑁆𑀚𑀸𑀤𑀺𑀫𑀺𑀘𑁆𑀙𑀸𑀚𑀻𑀯𑀁 𑀧𑀳𑀸𑀬 𑀜𑀸𑀬𑁂𑀦𑁂𑀯 𑀯𑀢𑁆𑀢𑀦𑀢𑁄 𑀥𑀫𑁆𑀫𑀺𑀓𑁂𑀦 𑀆𑀚𑀻𑀯𑁂𑀦 𑀚𑀻𑀯𑀢𑀺. 𑀦𑀫𑀲𑁆𑀲𑀺𑀢𑀩𑁆𑀩𑀸𑀢𑀺 𑀉𑀧𑀓𑀸𑀭𑀯𑀲𑁂𑀦, 𑀕𑀼𑀡𑀯𑀲𑁂𑀦 𑀘 𑀦𑀫𑀲𑁆𑀲𑀺𑀢𑀩𑁆𑀩𑀸 𑀲𑀩𑁆𑀩𑀤𑀸 𑀦𑀢𑁂𑀦 𑀳𑀼𑀢𑁆𑀯𑀸 𑀯𑀢𑁆𑀢𑀺𑀢𑀩𑁆𑀩𑀸. 𑀤𑀺𑀲𑀸-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄 𑀏𑀯. 𑀆𑀕𑀫𑀦𑀪𑀬𑀦𑁆𑀢𑀺 𑀢𑀢𑁆𑀣 𑀲𑀫𑁆𑀫𑀸 𑀅𑀧𑁆𑀧𑀝𑀺𑀧𑀢𑁆𑀢𑀺𑀬𑀸, 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀬𑀸 𑀘 𑀉𑀧𑁆𑀧𑀚𑁆𑀚𑀦𑀓𑀅𑀦𑀢𑁆𑀣𑁄. 𑀲𑁄 𑀳𑀺 𑀪𑀸𑀬𑀦𑁆𑀢𑀺 𑀏𑀢𑀲𑁆𑀫𑀸𑀢𑀺 ‘‘𑀪𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑁂𑀦 𑀓𑀸𑀭𑀡𑁂𑀦 𑀫𑀸𑀢𑀸𑀧𑀺𑀢𑀼𑀆𑀤𑀬𑁄 𑀧𑀼𑀭𑀢𑁆𑀣𑀺𑀫𑀸𑀤𑀺𑀪𑀸𑀯𑁂𑀦 𑀅𑀧𑀤𑀺𑀝𑁆𑀞𑀸, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀩𑁆𑀩𑀼𑀧𑀓𑀸𑀭𑀺𑀢𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑁂𑀦 𑀅𑀢𑁆𑀣𑀲𑀭𑀺𑀓𑁆𑀔𑀢𑀸𑀬 𑀦𑁂𑀲𑀁 𑀧𑀼𑀭𑀢𑁆𑀣𑀺𑀫𑀸𑀤𑀺𑀪𑀸𑀯𑁄𑀢𑀺 𑀤𑀲𑁆𑀲𑁂𑀢𑀺. 𑀢𑀣𑀸 𑀳𑀺 𑀫𑀸𑀢𑀸𑀧𑀺𑀢𑀭𑁄 𑀧𑀼𑀢𑁆𑀢𑀸𑀦𑀁 𑀧𑀼𑀭𑀢𑁆𑀣𑀺𑀫𑀪𑀸𑀯𑁂𑀦 𑀢𑀸𑀯 𑀉𑀧𑀓𑀸𑀭𑀺𑀪𑀸𑀯𑁂𑀦 𑀤𑀺𑀲𑁆𑀲𑀦𑀢𑁄, 𑀅𑀧𑀤𑀺𑀲𑁆𑀲𑀦𑀢𑁄 𑀘 𑀧𑀼𑀭𑀢𑁆𑀣𑀺𑀫𑀸 𑀤𑀺𑀲𑀸. 𑀆𑀘𑀭𑀺𑀬𑀸 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀤𑀓𑁆𑀔𑀺𑀡𑀪𑀸𑀯𑁂𑀦, 𑀳𑀺𑀢𑀸𑀳𑀺𑀢𑀁 𑀧𑀢𑀺𑀓𑀼𑀲𑀮𑀪𑀸𑀯𑁂𑀦 𑀤𑀓𑁆𑀔𑀺𑀡𑀸𑀭𑀳𑀢𑀸𑀬 𑀘 𑀯𑀼𑀢𑁆𑀢𑀦𑀬𑁂𑀦 𑀤𑀓𑁆𑀔𑀺𑀡𑀸 𑀤𑀺𑀲𑀸. 𑀇𑀫𑀺𑀦𑀸 𑀦𑀬𑁂𑀦 ‘‘𑀧𑀘𑁆𑀙𑀺𑀫𑀸 𑀤𑀺𑀲𑀸’’𑀢𑀺𑀆𑀤𑀻𑀲𑀼 𑀬𑀣𑀸𑀭𑀳𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀖𑀭𑀸𑀯𑀸𑀲𑀲𑁆𑀲 𑀤𑀼𑀓𑁆𑀔𑀩𑀳𑀼𑀮𑀢𑀸𑀬 𑀢𑁂 𑀢𑁂 𑀘 𑀓𑀺𑀘𑁆𑀘𑀯𑀺𑀲𑁂𑀲𑀸 𑀬𑀣𑀸𑀉𑀧𑁆𑀧𑀢𑀺𑀢𑀤𑀼𑀓𑁆𑀔𑀦𑀺𑀢𑁆𑀣𑀭𑀡𑀢𑁆𑀣𑀸𑀢𑀺 𑀯𑀼𑀢𑁆𑀢𑀁 ‘‘𑀢𑁂 𑀢𑁂 𑀤𑀼𑀓𑁆𑀔𑀯𑀺𑀲𑁂𑀲𑁂 𑀉𑀢𑁆𑀢𑀭𑀢𑀻’’𑀢𑀺. 𑀬𑀲𑁆𑀫𑀸 𑀤𑀸𑀲𑀓𑀫𑁆𑀫𑀓𑀭𑀸 𑀲𑀸𑀫𑀺𑀓𑀲𑁆𑀲 𑀧𑀸𑀤𑀸𑀦𑀁 𑀧𑀬𑀺𑀭𑀼𑀧𑀸𑀲𑀦𑀯𑀲𑁂𑀦 𑀘𑁂𑀯 𑀢𑀤𑀦𑀼𑀘𑁆𑀙𑀯𑀺𑀓𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀘 𑀬𑁂𑀪𑀼𑀬𑁆𑀬𑁂𑀦 𑀲𑀦𑁆𑀢𑀺𑀓𑀸𑀯𑀘𑀭𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀸𑀤𑀫𑀽𑀮𑁂 𑀧𑀢𑀺𑀝𑁆𑀞𑀸𑀦𑀯𑀲𑁂𑀦𑀸’’𑀢𑀺. 𑀕𑀼𑀡𑁂𑀳𑀻𑀢𑀺 𑀉𑀧𑀭𑀺𑀪𑀸𑀯𑀸𑀯𑀳𑁂𑀳𑀺 𑀕𑀼𑀡𑁂𑀳𑀺. 𑀉𑀧𑀭𑀺 𑀞𑀺𑀢𑀪𑀸𑀯𑁂𑀦𑀸𑀢𑀺 𑀲𑀕𑁆𑀕𑀫𑀕𑁆𑀕𑁂 𑀫𑁄𑀓𑁆𑀔𑀫𑀕𑁆𑀕𑁂 𑀘 𑀧𑀢𑀺𑀝𑁆𑀞𑀺𑀢𑀪𑀸𑀯𑁂𑀦.

𑁨𑁬𑁭. 𑀪𑀢𑁄𑀢𑀺 𑀧𑁄𑀲𑀺𑀢𑁄, 𑀢𑀁 𑀧𑀦 𑀪𑀭𑀡𑀁 𑀚𑀸𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀼𑀔𑀧𑀘𑁆𑀘𑀬𑀽𑀧𑀳𑀭𑀡𑁂𑀦 𑀤𑀼𑀓𑁆𑀔𑀧𑀘𑁆𑀘𑀬𑀸𑀧𑀳𑀭𑀡𑁂𑀦 𑀘 𑀢𑁂𑀳𑀺 𑀧𑀯𑀢𑁆𑀢𑀺𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀣𑀜𑁆𑀜𑀁 𑀧𑀸𑀬𑁂𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀚𑀕𑁆𑀕𑀺𑀢𑁄𑀢𑀺 𑀧𑀝𑀺𑀚𑀕𑁆𑀕𑀺𑀢𑁄. 𑀢𑁂𑀢𑀺 𑀫𑀸𑀢𑀸𑀧𑀺𑀢𑀭𑁄.

𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀓𑀁 𑀔𑁂𑀢𑁆𑀢𑀸𑀤𑀺𑀁 𑀅𑀯𑀺𑀦𑀸𑀲𑁂𑀢𑁆𑀯𑀸 𑀭𑀓𑁆𑀔𑀺𑀢𑀁 𑀢𑁂𑀲𑀁 𑀧𑀭𑀫𑁆𑀧𑀭𑀸𑀬 𑀞𑀺𑀢𑀺𑀬𑀸 𑀓𑀸𑀭𑀡𑀁 𑀳𑁄𑀢𑀻𑀢𑀺 ‘‘𑀢𑀁 𑀭𑀓𑁆𑀔𑀦𑁆𑀢𑁄 𑀓𑀼𑀮𑀯𑀁𑀲𑀁 𑀲𑀡𑁆𑀞𑀧𑁂𑀢𑀺 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀅𑀥𑀫𑁆𑀫𑀺𑀓𑀯𑀁𑀲𑀢𑁄𑀢𑀺 ‘‘𑀓𑀼𑀮𑀧𑁆𑀧𑀤𑁂𑀲𑀸𑀤𑀺𑀦𑀸 𑀅𑀢𑁆𑀢𑀦𑀸 𑀲𑀤𑀺𑀲𑀁 𑀏𑀓𑀁 𑀧𑀼𑀭𑀺𑀲𑀁 𑀖𑀝𑁂𑀢𑁆𑀯𑀸 𑀯𑀸 𑀕𑀻𑀯𑀸𑀬𑀁 𑀯𑀸 𑀳𑀢𑁆𑀣𑁂 𑀯𑀸 𑀩𑀦𑁆𑀥𑀫𑀡𑀺𑀬𑀁 𑀯𑀸 𑀳𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀏𑀯𑀁 𑀆𑀤𑀺𑀦𑀸 𑀧𑀯𑀢𑁆𑀢𑀅𑀥𑀫𑁆𑀫𑀺𑀓𑀧𑀯𑁂𑀡𑀺𑀢𑁄. 𑀳𑀸𑀭𑁂𑀢𑁆𑀯𑀸𑀢𑀺 𑀅𑀧𑀦𑁂𑀢𑁆𑀯𑀸 𑀢𑀁 𑀕𑀸𑀳𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸. 𑀫𑀸𑀢𑀸𑀧𑀺𑀢𑀭𑁄 𑀢𑀢𑁄 𑀕𑀸𑀳𑀢𑁄 𑀯𑀺𑀯𑁂𑀘𑀦𑁂𑀦𑁂𑀯 𑀳𑀺 𑀆𑀬𑀢𑀺𑀁 𑀢𑁂𑀲𑀁 𑀧𑀭𑀫𑁆𑀧𑀭𑀸𑀳𑀸𑀭𑀺𑀓𑀸 𑀲𑀺𑀬𑀸. 𑀥𑀫𑁆𑀫𑀺𑀓𑀯𑀁𑀲𑁂𑀢𑀺 𑀳𑀺𑀁𑀲𑀸𑀤𑀺𑀯𑀺𑀭𑀢𑀺𑀬𑀸 𑀥𑀫𑁆𑀫𑀺𑀓𑁂 𑀯𑀁𑀲𑁂 𑀥𑀫𑁆𑀫𑀺𑀓𑀸𑀬 𑀧𑀯𑁂𑀡𑀺𑀬𑀁. 𑀞𑀧𑁂𑀦𑁆𑀢𑁄𑀢𑀺 𑀧𑀢𑀺𑀝𑁆𑀞𑀧𑁂𑀦𑁆𑀢𑁄. 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀅𑀦𑀼𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀲𑀮𑀸𑀓𑀪𑀢𑁆𑀢𑀤𑀸𑀦𑀸𑀤𑀻𑀦𑀺 𑀅𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸.

𑀤𑀸𑀬𑀚𑁆𑀚𑀁 𑀧𑀝𑀺𑀧𑀚𑁆𑀚𑀸𑀫𑀻𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀤𑀸𑀬𑀧𑀝𑀺𑀮𑀸𑀪𑀲𑁆𑀲 𑀬𑁄𑀕𑁆𑀬𑀪𑀸𑀯𑁂𑀦 𑀯𑀢𑁆𑀢𑀫𑀸𑀦𑁄𑀬𑁂𑀯 𑀤𑀸𑀬𑀚𑁆𑀚𑀁 𑀧𑀝𑀺𑀧𑀚𑁆𑀚𑀢𑀺 𑀦𑀸𑀫, 𑀦 𑀇𑀢𑀭𑁄, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀸𑀢𑀸𑀧𑀺𑀢𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀸𑀭𑀓𑁂𑀢𑀺 𑀧𑀼𑀢𑁆𑀢𑁂. 𑀯𑀺𑀦𑀺𑀘𑁆𑀙𑀬𑀁 𑀧𑀢𑁆𑀯𑀸𑀢𑀺 ‘‘𑀧𑀼𑀢𑁆𑀢𑀲𑁆𑀲 𑀘𑀚𑀯𑀺𑀲𑁆𑀲𑀚𑁆𑀚𑀦’’𑀦𑁆𑀢𑀺 𑀏𑀯𑀁 𑀆𑀕𑀢𑀁 𑀯𑀺𑀦𑀺𑀘𑁆𑀙𑀬𑀁 𑀆𑀕𑀫𑁆𑀫. 𑀤𑀸𑀬𑀚𑁆𑀚𑀁 𑀧𑀝𑀺𑀧𑀚𑁆𑀚𑀸𑀫𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 ‘‘𑀤𑀸𑀬𑀚𑁆𑀚𑀁 𑀧𑀝𑀺𑀧𑀚𑁆𑀚𑀸𑀫𑀻’’ 𑀢𑀺 𑀇𑀤𑀁 𑀘𑀢𑀼𑀢𑁆𑀣𑀁 𑀯𑀢𑁆𑀢𑀦𑀝𑁆𑀞𑀸𑀦𑀁 𑀯𑀼𑀢𑁆𑀢𑀁. 𑀢𑁂𑀲𑀦𑁆𑀢𑀺 𑀫𑀸𑀢𑀸𑀧𑀺𑀢𑀽𑀦𑀁. 𑀢𑀢𑀺𑀬𑀤𑀺𑀯𑀲𑀢𑁄 𑀧𑀝𑁆𑀞𑀸𑀬𑀸𑀢𑀺 𑀫𑀢𑀤𑀺𑀯𑀲𑀢𑁄 𑀢𑀢𑀺𑀬𑀤𑀺𑀯𑀲𑀢𑁄 𑀧𑀝𑁆𑀞𑀸𑀬.

𑀧𑀸𑀧𑀢𑁄 𑀦𑀺𑀯𑀸𑀭𑀡𑀁 𑀦𑀸𑀫 𑀅𑀦𑀸𑀕𑀢𑀯𑀺𑀲𑀬𑀁. 𑀲𑀫𑁆𑀧𑀢𑁆𑀢𑀯𑀢𑁆𑀣𑀼𑀢𑁄𑀧𑀺 𑀳𑀺 𑀦𑀺𑀯𑀸𑀭𑀡𑀁 𑀯𑀻𑀢𑀺𑀓𑁆𑀓𑀫𑁂 𑀅𑀦𑀸𑀕𑀢𑁂 𑀏𑀯 𑀲𑀺𑀬𑀸, 𑀦 𑀯𑀢𑁆𑀢𑀫𑀸𑀦𑁂. 𑀦𑀺𑀩𑁆𑀩𑀢𑁆𑀢𑀺𑀢𑀸 𑀧𑀦 𑀧𑀸𑀧𑀓𑀺𑀭𑀺𑀬𑀸 𑀕𑀭𑀳𑀡𑀫𑀢𑁆𑀢𑀧𑀝𑀺𑀓𑀸𑀭𑀸𑀢𑀺 𑀆𑀳 ‘‘𑀓𑀢𑀫𑁆𑀧𑀺 𑀕𑀭𑀳𑀦𑁆𑀢𑀻’’𑀢𑀺. 𑀦𑀺𑀯𑁂𑀲𑁂𑀦𑁆𑀢𑀻𑀢𑀺 𑀧𑀢𑀺𑀝𑁆𑀞𑀧𑁂𑀦𑁆𑀢𑀺. 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀫𑀸𑀢𑀸𑀧𑀺𑀢𑀭𑁄 𑀅𑀦𑀯𑀚𑁆𑀚𑀫𑁂𑀯 𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀫𑀼𑀤𑁆𑀤𑀸𑀕𑀡𑀦𑀸𑀤𑀺𑀲𑀺𑀧𑁆𑀧’’𑀦𑁆𑀢𑀺. 𑀭𑀽𑀧𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀪𑁄𑀕𑀧𑀭𑀺𑀯𑀸𑀭𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀦𑀼𑀭𑀽𑀧𑁂𑀦𑀸𑀢𑀺 𑀅𑀦𑀼𑀘𑁆𑀙𑀯𑀺𑀓𑁂𑀦.

𑀦𑀺𑀘𑁆𑀘𑀪𑀽𑀢𑁄 𑀲𑀫𑀬𑁄 𑀅𑀪𑀺𑀡𑁆𑀳𑀓𑀭𑀡𑀓𑀸𑀮𑁄. 𑀅𑀪𑀺𑀡𑁆𑀳𑀢𑁆𑀣𑁄 𑀳𑀺 𑀅𑀬𑀁 𑀦𑀺𑀘𑁆𑀘-𑀲𑀤𑁆𑀤𑁄 ‘‘𑀦𑀺𑀘𑁆𑀘𑀧𑀳𑀁𑀲𑀺𑀢𑁄 𑀦𑀺𑀘𑁆𑀘𑀧𑀳𑀝𑁆𑀞𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀬𑀼𑀢𑁆𑀢𑀧𑀢𑁆𑀢𑀓𑀸𑀮𑁄 𑀏𑀯 𑀲𑀫𑀬𑁄 𑀓𑀸𑀮𑀲𑀫𑀬𑁄. ‘‘𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬𑀸’’𑀢𑀺 𑀇𑀫𑀺𑀦𑀸𑀲𑁆𑀲 𑀦𑀺𑀘𑁆𑀘𑀫𑁂𑀯 𑀤𑀸𑀦𑁂 𑀢𑁂𑀲𑀁 𑀬𑀼𑀢𑁆𑀢𑀧𑀬𑀼𑀢𑁆𑀢𑀢𑀁 𑀤𑀲𑁆𑀲𑁂𑀢𑀺. 𑀲𑀺𑀔𑀸𑀞𑀧𑀦𑀁 𑀤𑀸𑀭𑀓𑀓𑀸𑀮𑁂. 𑀆𑀯𑀸𑀳𑀯𑀺𑀯𑀸𑀳𑀁 𑀧𑀼𑀢𑁆𑀢𑀥𑀻𑀢𑀽𑀦𑀁 𑀬𑁄𑀩𑁆𑀩𑀦𑀧𑁆𑀧𑀢𑁆𑀢𑀓𑀸𑀮𑁂.

𑀢𑀁 𑀪𑀬𑀁 𑀬𑀣𑀸 𑀦𑀸𑀕𑀘𑁆𑀙𑀢𑀺, 𑀏𑀯𑀁 𑀧𑀺𑀳𑀺𑀢𑀸 𑀳𑁄𑀢𑀺 ‘‘𑀧𑀼𑀭𑀢𑁆𑀣𑀺𑀫𑀸 𑀤𑀺𑀲𑀸’’𑀢𑀺 𑀯𑀺𑀪𑀢𑁆𑀢𑀺𑀁 𑀧𑀭𑀺𑀡𑀸𑀫𑁂𑀢𑁆𑀯𑀸 𑀬𑁄𑀚𑀦𑀸. 𑀬𑀣𑀸 𑀧𑀦 𑀢𑀁 𑀪𑀬𑀁 𑀆𑀕𑀘𑁆𑀙𑁂𑀬𑁆𑀬, 𑀬𑀣𑀸 𑀘 𑀦𑀸𑀕𑀘𑁆𑀙𑁂𑀬𑁆𑀬, 𑀢𑀤𑀼𑀪𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁂 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀧𑁆𑀧𑀝𑀺𑀧𑀦𑁆𑀦𑀸𑀢𑀺 ‘‘𑀪𑀢𑁄 𑀦𑁂 𑀪𑀭𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀉𑀢𑁆𑀢𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀅𑀓𑀸𑀭𑀡𑁂𑀦 𑀘𑁂𑀯 𑀢𑀧𑁆𑀧𑀝𑀺𑀧𑀓𑁆𑀔𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀬𑀸 𑀅𑀓𑀭𑀡𑁂𑀦 𑀘 𑀯𑀺𑀧𑁆𑀧𑀝𑀺𑀧𑀦𑁆𑀦𑀸 𑀧𑀼𑀢𑁆𑀢𑀸 𑀅𑀲𑁆𑀲𑀼. 𑀏𑀢𑀁 𑀪𑀬𑀦𑁆𑀢𑀺 𑀏𑀢𑀁 ‘‘𑀫𑀸𑀢𑀸𑀧𑀺𑀢𑀽𑀦𑀁 𑀅𑀧𑁆𑀧𑀢𑀺𑀭𑀽𑀧𑀸𑀢𑀺 𑀯𑀺𑀜𑁆𑀜𑀽𑀦𑀁 𑀕𑀭𑀳𑀺𑀢𑀩𑁆𑀩𑀢𑀸𑀪𑀬𑀁, 𑀧𑀭𑀯𑀸𑀤𑀪𑀬’’𑀦𑁆𑀢𑀺 𑀏𑀯𑀫𑀸𑀤𑀺 𑀆𑀕𑀘𑁆𑀙𑁂𑀬𑁆𑀬 𑀧𑀼𑀢𑁆𑀢𑁂𑀲𑀼. 𑀧𑀼𑀢𑁆𑀢𑀸𑀦𑀁 𑀦𑀸𑀦𑀼𑀭𑀽𑀧𑀸𑀢𑀺 𑀏𑀢𑁆𑀣 ‘‘𑀧𑀼𑀢𑁆𑀢𑀸𑀦’’𑀦𑁆𑀢𑀺 𑀧𑀤𑀁 𑀏𑀢𑀁 𑀪𑀬𑀁 𑀧𑀼𑀢𑁆𑀢𑀸𑀦𑀁 𑀆𑀕𑀘𑁆𑀙𑁂𑀬𑁆𑀬𑀸𑀢𑀺 𑀏𑀯𑀁 𑀇𑀥𑀸𑀧𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑀸𑀤𑀺𑀲𑀸𑀦𑀜𑁆𑀳𑀺 𑀫𑀸𑀢𑀸𑀧𑀺𑀢𑀽𑀦𑀁 𑀧𑀼𑀢𑁆𑀢𑀸𑀦𑀁 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀬𑁄 𑀤𑀸𑀢𑀼𑀁 𑀲𑀫𑀢𑁆𑀣𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑀸 𑀢𑁂𑀲𑀁 𑀤𑀸𑀢𑀩𑁆𑀩𑀸 𑀏𑀯𑀸𑀢𑀺 𑀓𑀢𑁆𑀯𑀸 𑀢𑀣𑀸 𑀯𑀼𑀢𑁆𑀢𑀁. 𑀧𑀼𑀢𑁆𑀢𑀸𑀦𑀜𑁆𑀳𑀺 𑀯𑀲𑁂𑀦𑀸𑀬𑀁 𑀤𑁂𑀲𑀦𑀸 𑀅𑀦𑀸𑀕𑀢𑀸 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁂𑀲𑀼 𑀉𑀪𑁄𑀲𑀼 𑀅𑀢𑁆𑀢𑀦𑁄, 𑀫𑀸𑀢𑀸𑀧𑀺𑀢𑀽𑀦𑀜𑁆𑀘 𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀢𑀸𑀬 𑀲𑀩𑁆𑀩𑀁 𑀪𑀬𑀁 𑀦 𑀳𑁄𑀢𑀺 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀢𑁆𑀢𑀸. 𑀏𑀯𑀁 𑀧𑀝𑀺𑀧𑀦𑁆𑀦𑀢𑁆𑀢𑀸 𑀏𑀯 𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀺 𑀢𑀢𑁆𑀣 𑀓𑀸𑀢𑀩𑁆𑀩𑀧𑀝𑀺𑀲𑀦𑁆𑀣𑀸𑀭𑀲𑁆𑀲 𑀲𑀫𑁆𑀫𑀤𑁂𑀯 𑀓𑀢𑀢𑁆𑀢𑀸. 𑀔𑁂𑀫𑀸𑀢𑀺 𑀅𑀦𑀼𑀧𑀤𑁆𑀤𑀯𑀸. 𑀬𑀣𑀸𑀯𑀼𑀢𑁆𑀢𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀅𑀓𑀭𑀡𑁂𑀦 𑀳𑀺 𑀉𑀧𑁆𑀧𑀚𑁆𑀚𑀦𑀓𑀉𑀧𑀤𑁆𑀤𑀯𑀸 𑀓𑀭𑀡𑁂𑀦 𑀦 𑀳𑁄𑀦𑁆𑀢𑀻𑀢𑀺.

‘‘𑀦 𑀔𑁄 𑀢𑁂’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄 𑀲𑀗𑁆𑀕𑀻𑀢𑀺𑀅𑀦𑀸𑀭𑀼𑀴𑁆𑀳𑁄 𑀪𑀕𑀯𑀢𑀸 𑀢𑀤𑀸 𑀢𑀲𑁆𑀲 𑀯𑀼𑀢𑁆𑀢𑁄 𑀧𑀭𑀫𑁆𑀧𑀭𑀸𑀕𑀢𑁄 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀪𑀕𑀯𑀸 𑀲𑀺𑀗𑁆𑀕𑀸𑀮𑀓𑀁 𑀏𑀢𑀤𑀯𑁄𑀘𑀸’’𑀢𑀺. 𑀅𑀬𑀜𑁆𑀳𑀻𑀢𑀺 𑀏𑀢𑁆𑀣 𑀳𑀺-𑀲𑀤𑁆𑀤𑁄 𑀅𑀯𑀥𑀸𑀭𑀡𑁂. 𑀢𑀣𑀸 𑀳𑀺 ‘‘𑀦𑁄 𑀅𑀜𑁆𑀜𑀸’’𑀢𑀺 𑀅𑀜𑁆𑀜𑀤𑀺𑀲𑀁 𑀦𑀺𑀯𑀢𑁆𑀢𑁂𑀢𑀺.

𑁨𑁬𑁮. 𑀆𑀘𑀭𑀺𑀬𑀁 𑀤𑀽𑀭𑀢𑁄𑀯 𑀤𑀺𑀲𑁆𑀯𑀸 𑀉𑀝𑁆𑀞𑀸𑀦𑀯𑀘𑀦𑁂𑀦𑁂𑀯 𑀢𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀦𑀸𑀤𑀺𑀲𑀸𑀫𑀻𑀘𑀺𑀓𑀺𑀭𑀺𑀬𑀸 𑀅𑀯𑀼𑀢𑁆𑀢𑀲𑀺𑀤𑁆𑀥𑀸𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. 𑀉𑀧𑀝𑁆𑀞𑀸𑀦𑁂𑀦𑀸𑀢𑀺 𑀧𑀬𑀺𑀭𑀼𑀧𑀸𑀲𑀦𑁂𑀦. 𑀢𑀺𑀓𑁆𑀔𑀢𑁆𑀢𑀼𑀁𑀉𑀧𑀝𑁆𑀞𑀸𑀦𑀕𑀫𑀦𑁂𑀦𑀸𑀢𑀺 𑀧𑀸𑀢𑁄, 𑀫𑀚𑁆𑀛𑀦𑁆𑀳𑀺𑀓𑁂, 𑀲𑀸𑀬𑀦𑁆𑀢𑀺 𑀢𑀻𑀲𑀼 𑀓𑀸𑀮𑁂𑀲𑀼 𑀉𑀧𑀝𑁆𑀞𑀸𑀦𑀢𑁆𑀣𑀁 𑀉𑀧𑀕𑀫𑀦𑁂𑀦. 𑀲𑀺𑀧𑁆𑀧𑀼𑀕𑁆𑀕𑀳𑀡𑀢𑁆𑀣𑀁 𑀧𑀦 𑀉𑀧𑀕𑀫𑀦𑀁 𑀉𑀧𑀝𑁆𑀞𑀸𑀦𑀦𑁆𑀢𑁄𑀕𑀥𑀁 𑀧𑀬𑁄𑀚𑀦𑀯𑀲𑁂𑀦 𑀕𑀫𑀦𑀪𑀸𑀯𑀢𑁄𑀢𑀺 𑀆𑀳 ‘‘𑀲𑀺𑀧𑁆𑀧𑀼𑀕𑁆𑀕𑀳𑀡…𑀧𑁂… 𑀳𑁄𑀢𑀻’’𑀢𑀺. 𑀲𑁄𑀢𑀼𑀁 𑀇𑀘𑁆𑀙𑀸 𑀲𑀼𑀲𑁆𑀲𑀽𑀲𑀸, 𑀲𑀸 𑀧𑀦 𑀆𑀘𑀭𑀺𑀬𑁂 𑀲𑀺𑀓𑁆𑀔𑀺𑀢𑀩𑁆𑀩𑀲𑀺𑀓𑁆𑀔𑁂 𑀘 𑀆𑀤𑀭𑀕𑀸𑀭𑀯𑀧𑀼𑀩𑁆𑀩𑀺𑀓𑀸 𑀇𑀘𑁆𑀙𑀺𑀢𑀩𑁆𑀩𑀸 ‘‘𑀅𑀤𑁆𑀥𑀸 𑀇𑀫𑀺𑀦𑀸 𑀲𑀺𑀧𑁆𑀧𑁂𑀦 𑀲𑀺𑀓𑁆𑀔𑀺𑀢𑁂𑀦 𑀏𑀯𑀭𑀽𑀧𑀁𑀕𑀼𑀡𑀁 𑀧𑀝𑀺𑀮𑀪𑀺𑀲𑁆𑀲𑀸𑀫𑀻’’𑀢𑀺. 𑀢𑀣𑀸𑀪𑀽𑀢𑀜𑁆𑀘 𑀢𑀁 𑀲𑀯𑀦𑀁 𑀲𑀤𑁆𑀥𑀸𑀧𑀼𑀩𑁆𑀩𑀗𑁆𑀕𑀫𑀁 𑀳𑁄𑀢𑀻𑀢𑀺 𑀆𑀳 ‘‘𑀲𑀤𑁆𑀤𑀳𑀺𑀢𑁆𑀯𑀸 𑀲𑀯𑀦𑁂𑀦𑀸’’𑀢𑀺. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀲𑀤𑁆𑀤𑀳𑀺𑀢𑁆𑀯𑀸…𑀧𑁂… 𑀦𑀸𑀥𑀺𑀕𑀘𑁆𑀙𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀢𑀲𑁆𑀲𑀢𑁆𑀣𑁄 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀬𑀁 𑀲𑀦𑁆𑀥𑀸𑀬 ‘‘𑀅𑀯𑀲𑁂𑀲𑀔𑀼𑀤𑁆𑀤𑀓𑀧𑀸𑀭𑀺𑀘𑀭𑀺𑀬𑀸𑀬𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀯𑀺𑀪𑀚𑀦𑀁 𑀅𑀦𑀯𑀲𑁂𑀲𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀆𑀲𑀦𑀧𑀜𑁆𑀜𑀸𑀧𑀦𑀁 𑀩𑀻𑀚𑀦𑀦𑁆𑀢𑀺 𑀏𑀯𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀦𑁆𑀢𑁂𑀯𑀸𑀲𑀺𑀓𑀯𑀢𑁆𑀢𑀦𑁆𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀆𑀘𑀭𑀺𑀬𑀫𑁆𑀳𑀺 𑀲𑀫𑁆𑀫𑀸𑀯𑀢𑁆𑀢𑀺𑀢𑀩𑁆𑀩𑀯𑀢𑁆𑀢𑀁. 𑀲𑀺𑀧𑁆𑀧𑀧𑀝𑀺𑀕𑁆𑀕𑀳𑀡𑁂𑀦𑀸𑀢𑀺 𑀲𑀺𑀧𑁆𑀧𑀕𑀦𑁆𑀣𑀲𑁆𑀲 𑀲𑀓𑁆𑀓𑀘𑁆𑀘𑀁 𑀉𑀕𑁆𑀕𑀳𑀡𑁂𑀦. 𑀢𑀲𑁆𑀲 𑀳𑀺 𑀲𑀼𑀝𑁆𑀞𑀼 𑀉𑀕𑁆𑀕𑀳𑀡𑁂𑀦 𑀢𑀤𑀦𑀼𑀲𑀸𑀭𑁂𑀦𑀲𑁆𑀲 𑀧𑀬𑁄𑀕𑁄𑀧𑀺 𑀲𑀫𑁆𑀫𑀤𑁂𑀯 𑀉𑀕𑁆𑀕𑀳𑀺𑀢𑁄 𑀳𑁄𑀢𑀻𑀢𑀺. 𑀢𑁂𑀦𑀸𑀳 ‘‘𑀣𑁄𑀓𑀁 𑀕𑀳𑁂𑀢𑁆𑀯𑀸’’𑀢𑀺𑀆𑀤𑀺.

𑀲𑀼𑀯𑀺𑀦𑀻𑀢𑀁 𑀯𑀺𑀦𑁂𑀦𑁆𑀢𑀻𑀢𑀺 𑀇𑀥 𑀆𑀘𑀸𑀭𑀯𑀺𑀦𑀬𑁄 𑀅𑀥𑀺𑀧𑁆𑀧𑁂𑀢𑁄. 𑀲𑀺𑀧𑁆𑀧𑀲𑁆𑀫𑀺𑀁 𑀧𑀦 𑀲𑀺𑀓𑁆𑀔𑀸𑀧𑀦𑀯𑀺𑀦𑀬𑁄 ‘‘𑀲𑀼𑀕𑁆𑀕𑀳𑀺𑀢𑀁 𑀕𑀸𑀳𑀸𑀧𑁂𑀦𑁆𑀢𑀻’’𑀢𑀺 𑀇𑀫𑀺𑀦𑀸𑀯 𑀲𑀗𑁆𑀕𑀳𑀺𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀏𑀯𑀁 𑀢𑁂 𑀦𑀺𑀲𑀻𑀤𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺. 𑀆𑀘𑀭𑀺𑀬𑀸 𑀳𑀺 𑀦𑀸𑀫 𑀅𑀦𑁆𑀢𑁂𑀯𑀸𑀲𑀺𑀓𑁂 𑀦 𑀤𑀺𑀝𑁆𑀞𑀥𑀫𑁆𑀫𑀺𑀓𑁂 𑀏𑀯 𑀯𑀺𑀦𑁂𑀦𑁆𑀢𑀺, 𑀅𑀣 𑀔𑁄 𑀲𑀫𑁆𑀧𑀭𑀸𑀬𑀺𑀓𑁂𑀧𑀻𑀢𑀺 𑀆𑀳 ‘‘𑀧𑀸𑀧𑀫𑀺𑀢𑁆𑀢𑀸 𑀯𑀚𑁆𑀚𑁂𑀢𑀩𑁆𑀩𑀸’’𑀢𑀺. 𑀲𑀺𑀧𑁆𑀧𑀕𑀦𑁆𑀣𑀲𑁆𑀲 𑀉𑀕𑁆𑀕𑀡𑁆𑀳𑀦𑀁 𑀦𑀸𑀫 𑀬𑀸𑀯𑀤𑁂𑀯 𑀧𑀬𑁄𑀕𑀲𑀫𑁆𑀧𑀸𑀤𑀦𑀢𑁆𑀣𑀦𑁆𑀢𑀺 𑀆𑀳 ‘‘𑀧𑀬𑁄𑀕𑀁 𑀤𑀲𑁆𑀲𑁂𑀢𑁆𑀯𑀸 𑀕𑀡𑁆𑀳𑀸𑀧𑁂𑀦𑁆𑀢𑀻’’𑀢𑀺. 𑀫𑀺𑀢𑁆𑀢𑀸𑀫𑀘𑁆𑀘𑁂𑀲𑀽𑀢𑀺 𑀅𑀢𑁆𑀢𑀦𑁄 𑀫𑀺𑀢𑁆𑀢𑀸𑀫𑀘𑁆𑀘𑁂𑀲𑀼. 𑀧𑀝𑀺𑀬𑀸𑀤𑁂𑀦𑁆𑀢𑀻𑀢𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀦𑀁 𑀫𑀫𑀢𑁆𑀢𑀯𑀲𑁂𑀦 𑀧𑀝𑀺𑀬𑀸𑀤𑁂𑀦𑁆𑀢𑀺. ‘‘𑀅𑀬𑀁 𑀅𑀫𑁆𑀳𑀸𑀓𑀁 𑀅𑀦𑁆𑀢𑁂𑀯𑀸𑀲𑀺𑀓𑁄’’𑀢𑀺𑀆𑀤𑀺𑀦𑀸 𑀳𑀺 𑀅𑀢𑁆𑀢𑀦𑁄 𑀧𑀭𑀺𑀕𑁆𑀕𑀳𑀺𑀢𑀤𑀲𑁆𑀲𑀦𑀫𑀼𑀔𑁂𑀦 𑀘𑁂𑀯 ‘‘𑀩𑀳𑀼𑀲𑁆𑀲𑀼𑀢𑁄’’𑀢𑀺𑀆𑀤𑀺𑀦𑀸 𑀢𑀲𑁆𑀲 𑀕𑀼𑀡𑀧𑀭𑀺𑀕𑁆𑀕𑀡𑁆𑀳𑀦𑀫𑀼𑀔𑁂 𑀘 𑀢𑀁 𑀢𑁂𑀲𑀁 𑀧𑀝𑀺𑀬𑀸𑀤𑁂𑀦𑁆𑀢𑀺. 𑀲𑀩𑁆𑀩𑀤𑀺𑀲𑀸𑀲𑀼 𑀭𑀓𑁆𑀔𑀁 𑀓𑀭𑁄𑀦𑁆𑀢𑀺 𑀘𑀸𑀢𑀼𑀤𑁆𑀤𑀺𑀲𑀪𑀸𑀯𑀲𑀫𑁆𑀧𑀸𑀤𑀦𑁂𑀦𑀲𑁆𑀲 𑀲𑀩𑁆𑀩𑀢𑁆𑀣 𑀲𑀼𑀔𑀚𑀻𑀯𑀺𑀪𑀸𑀯𑀲𑀸𑀥𑀦𑀢𑁄. 𑀢𑁂𑀦𑀸𑀳 ‘‘𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑁄 𑀳𑀻’’𑀢𑀺𑀆𑀤𑀺. 𑀲𑀢𑁆𑀢𑀸𑀦𑀜𑁆𑀳𑀺 𑀤𑀼𑀯𑀺𑀥𑀸 𑀲𑀭𑀻𑀭𑀭𑀓𑁆𑀔𑀸 𑀅𑀩𑁆𑀪𑀦𑁆𑀢𑀭𑀧𑀭𑀺𑀲𑁆𑀲𑀬𑀧𑀝𑀺𑀖𑀸𑀢𑁂𑀦, 𑀩𑀸𑀳𑀺𑀭𑀧𑀭𑀺𑀲𑁆𑀲𑀬𑀧𑀝𑀺𑀖𑀸𑀢𑁂𑀦 𑀘. 𑀢𑀢𑁆𑀣 𑀅𑀩𑁆𑀪𑀦𑁆𑀢𑀭𑀧𑀭𑀺𑀲𑁆𑀲𑀬𑁄 𑀔𑀼𑀧𑁆𑀧𑀺𑀧𑀸𑀲𑀸𑀤𑀺𑀪𑁂𑀤𑁄, 𑀲𑁄 𑀮𑀸𑀪𑀲𑀺𑀤𑁆𑀥𑀺𑀬𑀸 𑀧𑀝𑀺𑀳𑀜𑁆𑀜𑀢𑀺 𑀢𑀸𑀬 𑀢𑀚𑁆𑀚𑀸𑀧𑀭𑀺𑀳𑀸𑀭𑀲𑀁𑀯𑀺𑀥𑀸𑀦𑀢𑁄. 𑀩𑀸𑀳𑀺𑀭𑀧𑀭𑀺𑀲𑁆𑀲𑀬𑁄 𑀘𑁄𑀭𑀅𑀫𑀦𑀼𑀲𑁆𑀲𑀸𑀤𑀺𑀳𑁂𑀢𑀼𑀓𑁄, 𑀲𑁄 𑀯𑀺𑀚𑁆𑀚𑀸𑀲𑀺𑀤𑁆𑀥𑀺𑀬𑀸 𑀧𑀝𑀺𑀳𑀜𑁆𑀜𑀢𑀺 𑀢𑀸𑀬 𑀢𑀚𑁆𑀚𑀸𑀧𑀭𑀺𑀳𑀸𑀭𑀲𑀁𑀯𑀺𑀥𑀸𑀦𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀁 𑀬𑀁 𑀤𑀺𑀲’’𑀦𑁆𑀢𑀺𑀆𑀤𑀺.

𑀧𑀼𑀩𑁆𑀩𑁂 ‘‘𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑁄 𑀳𑀻’’𑀢𑀺𑀆𑀤𑀺𑀦𑀸 𑀲𑀺𑀧𑁆𑀧𑀲𑀺𑀓𑁆𑀔𑀸𑀧𑀦𑁂𑀦𑁂𑀯 𑀮𑀸𑀪𑀼𑀧𑁆𑀧𑀢𑁆𑀢𑀺𑀬𑀸 𑀤𑀺𑀲𑀸𑀲𑀼 𑀧𑀭𑀺𑀢𑁆𑀢𑀸𑀡𑀓𑀭𑀡𑀁 𑀤𑀲𑁆𑀲𑀺𑀢𑀁, 𑀇𑀤𑀸𑀦𑀺 ‘‘𑀬𑀁 𑀯𑀸 𑀲𑁄’’𑀢𑀺𑀆𑀤𑀺𑀦𑀸 𑀢𑀲𑁆𑀲 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑀲𑁆𑀲 𑀦𑀺𑀧𑁆𑀨𑀢𑁆𑀢𑀺𑀯𑀲𑁂𑀦 𑀕𑀼𑀡𑀓𑀺𑀢𑁆𑀢𑀦𑀫𑀼𑀔𑁂𑀦 𑀧𑀕𑁆𑀕𑀡𑁆𑀳𑀦𑁂𑀦𑀧𑀺 𑀮𑀸𑀪𑀼𑀧𑁆𑀧𑀢𑁆𑀢𑀺𑀬𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀓𑀧𑁆𑀧𑀸𑀦𑀁 𑀪𑁂𑀤𑁄. 𑀲𑁂𑀲𑀦𑁆𑀢𑀺 ‘‘𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀻’’𑀢𑀺𑀆𑀤𑀺𑀓𑀁 𑀧𑀸𑀴𑀺𑀆𑀕𑀢𑀁, ‘‘𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸’’𑀢𑀺𑀆𑀤𑀺𑀓𑀁 𑀅𑀝𑁆𑀞𑀓𑀣𑀸𑀕𑀢𑀜𑁆𑀘. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀤𑀼𑀢𑀺𑀬𑀤𑀺𑀲𑀸𑀯𑀸𑀭𑁂. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 𑀧𑀼𑀩𑁆𑀩𑁂 𑀧𑀞𑀫𑀤𑀺𑀲𑀸𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯.

𑁨𑁬𑁯. 𑀲𑀫𑁆𑀫𑀸𑀦𑀦𑀸 𑀦𑀸𑀫 𑀲𑀫𑁆𑀪𑀸𑀯𑀦𑀸, 𑀲𑀸 𑀧𑀦 𑀅𑀢𑁆𑀣𑀘𑀭𑀺𑀬𑀸𑀮𑀓𑁆𑀔𑀡𑀸 𑀘 𑀤𑀸𑀦𑀮𑀓𑁆𑀔𑀡𑀸 𑀘 𑀘𑀢𑀼𑀢𑁆𑀣𑀧𑀜𑁆𑀘𑀫𑀝𑁆𑀞𑀸𑀦𑁂𑀳𑁂𑀯 𑀲𑀗𑁆𑀕𑀳𑀺𑀢𑀸𑀢𑀺 𑀧𑀺𑀬𑀯𑀘𑀦𑀮𑀓𑁆𑀔𑀡𑀁 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀫𑁆𑀪𑀸𑀯𑀺𑀢𑀓𑀣𑀸𑀓𑀣𑀦𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀯𑀺𑀕𑀢𑀫𑀸𑀦𑀦𑀸 𑀯𑀺𑀫𑀸𑀦𑀦𑀸, 𑀦 𑀯𑀺𑀫𑀸𑀦𑀦𑀸 𑀅𑀯𑀺𑀫𑀸𑀦𑀦𑀸, 𑀯𑀺𑀫𑀸𑀦𑀦𑀸𑀬 𑀅𑀓𑀭𑀡𑀁. 𑀢𑁂𑀦𑀸𑀳 ‘‘𑀬𑀣𑀸 𑀤𑀸𑀲𑀓𑀫𑁆𑀫𑀓𑀭𑀸𑀤𑀬𑁄’’𑀢𑀺𑀆𑀤𑀺. 𑀲𑀸𑀫𑀺𑀓𑁂𑀦 𑀳𑀺 𑀯𑀺𑀫𑀸𑀦𑀺𑀢𑀸𑀦𑀁 𑀇𑀢𑁆𑀣𑀻𑀦𑀁 𑀲𑀩𑁆𑀩𑁄 𑀧𑀭𑀺𑀚𑀦𑁄 𑀯𑀺𑀫𑀸𑀦𑁂𑀢𑀺𑀬𑁂𑀯. 𑀧𑀭𑀺𑀘𑀭𑀦𑁆𑀢𑁄𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀭𑀺𑀘𑀭𑀦𑁆𑀢𑁄. 𑀢𑀁 𑀅𑀢𑀺𑀘𑀭𑀢𑀺 𑀦𑀸𑀫 𑀢𑀁 𑀅𑀢𑁆𑀢𑀦𑁄 𑀕𑀺𑀳𑀺𑀦𑀺𑀁 𑀅𑀢𑀺𑀫𑀜𑁆𑀜𑀺𑀢𑁆𑀯𑀸 𑀅𑀕𑀡𑁂𑀢𑁆𑀯𑀸 𑀯𑀢𑁆𑀢𑀦𑀢𑁄. 𑀇𑀲𑁆𑀲𑀭𑀺𑀬𑀯𑁄𑀲𑁆𑀲𑀕𑁆𑀕𑁂𑀦𑀸𑀢𑀺 𑀏𑀢𑁆𑀣 𑀬𑀸𑀤𑀺𑀲𑁄 𑀇𑀲𑁆𑀲𑀭𑀺𑀬𑀯𑁄𑀲𑁆𑀲𑀕𑁆𑀕𑁄 𑀕𑀺𑀳𑀺𑀦𑀺𑀬𑀸 𑀅𑀦𑀼𑀘𑁆𑀙𑀯𑀺𑀓𑁄, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀢𑁆𑀢𑀕𑁂𑀳𑁂 𑀯𑀺𑀲𑁆𑀲𑀝𑁆𑀞𑁂’’𑀢𑀺 𑀆𑀳. 𑀕𑁂𑀳𑁂 𑀏𑀯 𑀞𑀢𑁆𑀯𑀸 𑀯𑀺𑀘𑀸𑀭𑁂𑀢𑀩𑁆𑀩𑀫𑁆𑀧𑀺 𑀳𑀺 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑀁 𑀓𑀼𑀮𑀺𑀢𑁆𑀣𑀺𑀬𑀸 𑀪𑀸𑀭𑁄 𑀦 𑀳𑁄𑀢𑀺, 𑀲𑀸𑀫𑀺𑀓𑀲𑁆𑀲𑁂𑀯 𑀪𑀸𑀭𑁄, 𑀢𑀢𑁄 𑀆𑀕𑀢𑀲𑀸𑀧𑀢𑁂𑀬𑁆𑀬𑀁 𑀧𑀦 𑀢𑀸𑀬 𑀲𑀼𑀕𑀼𑀢𑁆𑀢𑀁 𑀓𑀢𑁆𑀯𑀸 𑀞𑀧𑁂𑀢𑀩𑁆𑀩𑀁 𑀳𑁄𑀢𑀺. ‘‘𑀲𑀩𑁆𑀩𑀁 𑀇𑀲𑁆𑀲𑀭𑀺𑀬𑀁 𑀯𑀺𑀲𑁆𑀲𑀝𑁆𑀞𑀁 𑀦𑀸𑀫 𑀳𑁄𑀢𑀻’’𑀢𑀺 𑀏𑀢𑀸 𑀫𑀜𑁆𑀜𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀢𑁆𑀣𑀺𑀬𑁄 𑀦𑀸𑀫 𑀧𑀼𑀢𑁆𑀢𑀮𑀸𑀪𑁂𑀦 𑀯𑀺𑀬 𑀫𑀳𑀕𑁆𑀖𑀯𑀺𑀧𑀼𑀮𑀸𑀮𑀗𑁆𑀓𑀸𑀭𑀮𑀸𑀪𑁂𑀦𑀧𑀺 𑀦 𑀲𑀦𑁆𑀢𑀼𑀲𑁆𑀲𑀦𑁆𑀢𑁂𑀯𑀸𑀢𑀺 𑀢𑀸𑀲𑀁 𑀢𑁄𑀲𑀦𑀁 𑀅𑀮𑀗𑁆𑀓𑀸𑀭𑀤𑀸𑀦𑀦𑁆𑀢𑀺 𑀆𑀳 ‘‘𑀅𑀢𑁆𑀢𑀦𑁄 𑀯𑀺𑀪𑀯𑀸𑀦𑀼𑀭𑀽𑀧𑁂𑀦𑀸’’𑀢𑀺.

𑀓𑀼𑀮𑀺𑀢𑁆𑀣𑀺𑀬𑀸 𑀲𑀁𑀯𑀺𑀳𑀺𑀢𑀩𑁆𑀩𑀓𑀫𑁆𑀫𑀦𑁆𑀢𑀸 𑀦𑀸𑀫 𑀆𑀳𑀸𑀭𑀲𑀫𑁆𑀧𑀸𑀤𑀦𑀯𑀺𑀘𑀸𑀭𑀧𑁆𑀧𑀓𑀸𑀭𑀸𑀢𑀺 𑀆𑀳 ‘‘𑀬𑀸𑀕𑀼𑀪𑀢𑁆𑀢𑀧𑀘𑀦𑀓𑀸𑀮𑀸𑀤𑀻𑀦𑀻’’𑀢𑀺𑀆𑀤𑀺. 𑀲𑀫𑁆𑀫𑀸𑀦𑀦𑀸𑀤𑀻𑀳𑀺 𑀬𑀣𑀸𑀭𑀳𑀁 𑀧𑀺𑀬𑀯𑀘𑀦𑁂𑀳𑀺 𑀘𑁂𑀯 𑀪𑁄𑀚𑀦𑀤𑀸𑀦𑀸𑀤𑀻𑀳𑀺 𑀘 𑀧𑀳𑁂𑀡𑀓𑀧𑁂𑀲𑀦𑀸𑀤𑀻𑀳𑀺 𑀅𑀜𑁆𑀜𑀢𑁄, 𑀢𑀢𑁆𑀣𑁂𑀯 𑀯𑀸 𑀉𑀧𑁆𑀧𑀦𑁆𑀦𑀲𑁆𑀲 𑀧𑀡𑁆𑀡𑀸𑀓𑀸𑀭𑀲𑁆𑀲 𑀙𑀡𑀤𑀺𑀯𑀲𑀸𑀤𑀻𑀲𑀼 𑀧𑁂𑀲𑁂𑀢𑀩𑁆𑀩𑀧𑀺𑀬𑀪𑀡𑁆𑀟𑁂𑀳𑀺 𑀘 𑀲𑀗𑁆𑀕𑀳𑀺𑀢𑀧𑀭𑀺𑀚𑀦𑀸. 𑀕𑁂𑀳𑀲𑀸𑀫𑀺𑀦𑀺𑀬𑀸 𑀅𑀦𑁆𑀢𑁄𑀕𑁂𑀳𑀚𑀦𑁄 𑀦𑀺𑀘𑁆𑀘𑀁 𑀲𑀗𑁆𑀕𑀳𑀺𑀢𑁄 𑀏𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀇𑀥 𑀧𑀭𑀺𑀚𑀦𑁄 𑀦𑀸𑀫…𑀧𑁂… 𑀜𑀸𑀢𑀺𑀚𑀦𑁄’’𑀢𑀺. 𑀆𑀪𑀢𑀥𑀦𑀦𑁆𑀢𑀺 𑀩𑀸𑀳𑀺𑀭𑀢𑁄 𑀅𑀦𑁆𑀢𑁄𑀕𑁂𑀳𑀁 𑀧𑀯𑁂𑀲𑀺𑀢𑀥𑀦𑀁. 𑀕𑀺𑀳𑀺𑀦𑀺𑀬𑀸 𑀦𑀸𑀫 𑀧𑀞𑀫𑀁 𑀆𑀳𑀸𑀭𑀲𑀫𑁆𑀧𑀸𑀤𑀦𑁂 𑀓𑁄𑀲𑀮𑁆𑀮𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀢𑀢𑁆𑀣 𑀘 𑀬𑀼𑀢𑁆𑀢𑀧𑀬𑀼𑀢𑁆𑀢𑀢𑀸, 𑀢𑀢𑁄 𑀲𑀸𑀫𑀺𑀓𑀲𑁆𑀲 𑀇𑀢𑁆𑀣𑀺𑀚𑀦𑀸𑀬𑀢𑁆𑀢𑁂𑀲𑀼 𑀓𑀺𑀘𑁆𑀘𑀸𑀓𑀺𑀘𑁆𑀘𑁂𑀲𑀼, 𑀢𑀢𑁄 𑀧𑀼𑀢𑁆𑀢𑀸𑀦𑀁 𑀧𑀭𑀺𑀚𑀦𑀲𑁆𑀲 𑀓𑀸𑀢𑀩𑁆𑀩𑀓𑀺𑀘𑁆𑀘𑁂𑀲𑀽𑀢𑀺 𑀆𑀳 ‘‘𑀬𑀸𑀕𑀼𑀪𑀢𑁆𑀢𑀲𑀫𑁆𑀧𑀸𑀤𑀦𑀸𑀤𑀻𑀲𑀽’’𑀢𑀺𑀆𑀤𑀺. ‘‘𑀦𑀺𑀓𑁆𑀓𑁄𑀲𑀚𑁆𑀚𑀸’’𑀢𑀺 𑀯𑀢𑁆𑀯𑀸 𑀢𑀫𑁂𑀯 𑀦𑀺𑀓𑁆𑀓𑁄𑀲𑀚𑁆𑀚𑀢𑀁 𑀩𑁆𑀬𑀢𑀺𑀭𑁂𑀓𑀢𑁄, 𑀅𑀦𑁆𑀯𑀬𑀢𑁄 𑀘 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀢𑀢𑀺𑀬𑀤𑀺𑀲𑀸𑀯𑀸𑀭𑁂. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 𑀧𑀞𑀫𑀤𑀺𑀲𑀸𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀇𑀢𑀺 𑀪𑀕𑀯𑀸 ‘‘𑀧𑀘𑁆𑀙𑀺𑀫𑀸 𑀤𑀺𑀲𑀸 𑀧𑀼𑀢𑁆𑀢𑀤𑀸𑀭𑀸’’𑀢𑀺 𑀉𑀤𑁆𑀤𑀺𑀲𑀺𑀢𑁆𑀯𑀸𑀧𑀺 𑀤𑀸𑀭𑀯𑀲𑁂𑀦𑁂𑀯 𑀧𑀘𑁆𑀙𑀺𑀫𑀁 𑀤𑀺𑀲𑀁 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀦 𑀧𑀼𑀢𑁆𑀢𑀯𑀲𑁂𑀦. 𑀓𑀲𑁆𑀫𑀸? 𑀧𑀼𑀢𑁆𑀢𑀸 𑀳𑀺 𑀤𑀸𑀭𑀓𑀓𑀸𑀮𑁂 𑀅𑀢𑁆𑀢𑀦𑁄 𑀫𑀸𑀢𑀼 𑀅𑀦𑀼𑀕𑁆𑀕𑀡𑁆𑀳𑀦𑁂𑀦𑁂𑀯 𑀅𑀦𑀼𑀕𑁆𑀕𑀳𑀺𑀢𑀸 𑀳𑁄𑀦𑁆𑀢𑀺 𑀅𑀦𑀼𑀓𑀫𑁆𑀧𑀺𑀢𑀸, 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑀓𑀸𑀮𑁂 𑀧𑀦 𑀬𑀣𑀸 𑀢𑁂𑀧𑀺 𑀢𑀤𑀸 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑀸, 𑀲𑁆𑀯𑀸𑀬𑀁 𑀯𑀺𑀥𑀺 ‘‘𑀧𑀸𑀧𑀸 𑀦𑀺𑀯𑀸𑀭𑁂𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀧𑀞𑀫𑀤𑀺𑀲𑀸𑀯𑀸𑀭𑁂 𑀤𑀲𑁆𑀲𑀺𑀢𑁄 𑀏𑀯𑀸𑀢𑀺 𑀓𑀺𑀁 𑀧𑀼𑀦 𑀯𑀺𑀲𑁆𑀲𑀚𑁆𑀚𑀦𑁂𑀦𑀸𑀢𑀺. 𑀤𑀸𑀦𑀸𑀤𑀺𑀲𑀗𑁆𑀕𑀳𑀯𑀢𑁆𑀣𑀽𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯𑀸𑀢𑀺.

𑁨𑁭𑁦. 𑀘𑀢𑁆𑀢𑀸𑀭𑀺𑀧𑀺 𑀞𑀸𑀦𑀸𑀦𑀺 𑀮𑀗𑁆𑀖𑀺𑀢𑁆𑀯𑀸 𑀧𑀜𑁆𑀘𑀫𑀫𑁂𑀯 𑀞𑀸𑀦𑀁 𑀯𑀺𑀯𑀭𑀺𑀢𑀼𑀁 ‘‘𑀅𑀯𑀺𑀲𑀁𑀯𑀸𑀤𑀦𑀢𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀲𑁆𑀲 𑀬𑀲𑁆𑀲 𑀦𑀸𑀫𑀁 𑀕𑀡𑁆𑀳𑀸𑀢𑀻𑀢𑀺 𑀲𑀳𑀸𑀬𑁄 𑀅𑀢𑁆𑀣𑀺𑀓𑀪𑀸𑀯𑁂𑀦 𑀬𑀲𑁆𑀲 𑀬𑀲𑁆𑀲 𑀯𑀢𑁆𑀣𑀼𑀦𑁄 𑀦𑀸𑀫𑀁 𑀓𑀣𑁂𑀢𑀺. 𑀅𑀯𑀺𑀲𑀁𑀯𑀸𑀤𑁂𑀢𑁆𑀯𑀸𑀢𑀺 𑀏𑀢𑁆𑀣 𑀤𑀼𑀯𑀺𑀥𑀁 𑀅𑀯𑀺𑀲𑀁𑀯𑀸𑀤𑀦𑀁 𑀯𑀸𑀘𑀸𑀬, 𑀧𑀬𑁄𑀕𑁂𑀦 𑀘𑀸𑀢𑀺 𑀢𑀁 𑀤𑀼𑀯𑀺𑀥𑀫𑁆𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀇𑀤𑀫𑁆𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀤𑀸𑀦𑁂𑀦𑀸’’𑀢𑀺 𑀘 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁 𑀇𑀢𑀭𑀲𑀗𑁆𑀕𑀳𑀯𑀢𑁆𑀣𑀼𑀯𑀲𑁂𑀦𑀧𑀺 𑀅𑀯𑀺𑀲𑀁𑀯𑀸𑀤𑁂𑀢𑁆𑀯𑀸 𑀲𑀗𑁆𑀕𑀡𑁆𑀳𑀦𑀲𑁆𑀲 𑀮𑀩𑁆𑀪𑀦𑀢𑁄, 𑀇𑀘𑁆𑀙𑀺𑀢𑀩𑁆𑀩𑀢𑁄 𑀘. 𑀅𑀧𑀭𑀸 𑀧𑀘𑁆𑀙𑀺𑀫𑀸 𑀧𑀚𑀸 𑀅𑀧𑀭𑀧𑀚𑀸, 𑀅𑀧𑀭𑀸𑀧𑀭𑀁 𑀉𑀧𑁆𑀧𑀦𑁆𑀦𑀸 𑀯𑀸 𑀧𑀚𑀸 𑀅𑀧𑀭𑀧𑀚𑀸. 𑀧𑀝𑀺𑀧𑀽𑀚𑀦𑀸 𑀦𑀸𑀫 𑀫𑀫𑀸𑀬𑀦𑀸, 𑀲𑀓𑁆𑀓𑀸𑀭𑀓𑀺𑀭𑀺𑀬𑀸 𑀘𑀸𑀢𑀺 𑀢𑀤𑀼𑀪𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀓𑁂𑀮𑀸𑀬𑀦𑁆𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀫𑀸𑀬𑀦𑁆𑀢𑀻𑀢𑀺 𑀫𑀫𑀢𑁆𑀢𑀁 𑀓𑀭𑁄𑀦𑁆𑀢𑀺.

𑁨𑁭𑁧. 𑀬𑀣𑀸𑀩𑀮𑀁 𑀓𑀫𑁆𑀫𑀦𑁆𑀢𑀲𑀁𑀯𑀺𑀥𑀸𑀦𑁂𑀦𑀸𑀢𑀺 𑀤𑀸𑀲𑀓𑀫𑁆𑀫𑀓𑀭𑀸𑀦𑀁 𑀬𑀣𑀸𑀩𑀮𑀁 𑀩𑀮𑀸𑀦𑀼𑀭𑀽𑀧𑀁 𑀢𑁂𑀲𑀁 𑀢𑁂𑀲𑀁 𑀓𑀫𑁆𑀫𑀦𑁆𑀢𑀸𑀦𑀁 𑀲𑀁𑀯𑀺𑀤𑀳𑀦𑁂𑀦 𑀯𑀺𑀘𑀸𑀭𑀡𑁂𑀦, 𑀓𑀸𑀭𑀸𑀧𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀤𑀳𑀭𑁂𑀳𑀻’’𑀢𑀺𑀆𑀤𑀺. 𑀪𑀢𑁆𑀢𑀯𑁂𑀢𑀦𑀸𑀦𑀼𑀧𑁆𑀧𑀤𑀸𑀦𑁂𑀦𑀸𑀢𑀺 𑀢𑀲𑁆𑀲 𑀢𑀲𑁆𑀲 𑀤𑀸𑀲𑀓𑀫𑁆𑀫𑀓𑀭𑀲𑁆𑀲 𑀅𑀦𑀼𑀭𑀽𑀧𑀁 𑀪𑀢𑁆𑀢𑀲𑁆𑀲, 𑀯𑁂𑀢𑀦𑀲𑁆𑀲 𑀘 𑀧𑀤𑀸𑀦𑁂𑀦. 𑀢𑁂𑀦𑁂𑀯𑀸𑀳 ‘‘𑀅𑀬𑀁 𑀔𑀼𑀤𑁆𑀤𑀓𑀧𑀼𑀢𑁆𑀢𑁄’’𑀢𑀺𑀆𑀤𑀺. 𑀪𑁂𑀲𑀚𑁆𑀚𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀧𑁆𑀧𑀸𑀬𑀸𑀳𑀸𑀭𑀯𑀲𑀦𑀝𑁆𑀞𑀸𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀸𑀢𑀪𑀸𑀯𑁄 𑀏𑀯 𑀭𑀲𑀸𑀦𑀁 𑀅𑀘𑁆𑀙𑀭𑀺𑀬𑀢𑀸𑀢𑀺 𑀆𑀳 ‘‘𑀅𑀘𑁆𑀙𑀭𑀺𑀬𑁂 𑀫𑀥𑀼𑀭𑀭𑀲𑁂’’𑀢𑀺. 𑀢𑁂𑀲𑀦𑁆𑀢𑀺 𑀤𑀸𑀲𑀓𑀫𑁆𑀫𑀓𑀭𑀸𑀦𑀁. 𑀯𑁄𑀲𑁆𑀲𑀚𑁆𑀚𑀦𑁂𑀦𑀸𑀢𑀺 𑀓𑀫𑁆𑀫𑀓𑀭𑀡𑀢𑁄 𑀯𑀺𑀲𑁆𑀲𑀚𑁆𑀚𑀦𑁂𑀦. 𑀯𑁂𑀮𑀁 𑀜𑀢𑁆𑀯𑀸𑀢𑀺 ‘‘𑀧𑀳𑀸𑀭𑀸𑀯𑀲𑁂𑀲𑁄, 𑀉𑀧𑀟𑁆𑀠𑀧𑀳𑀸𑀭𑀸𑀯𑀲𑁂𑀲𑁄 𑀯𑀸 𑀤𑀺𑀯𑀲𑁄’’𑀢𑀺 𑀯𑁂𑀮𑀁 𑀚𑀸𑀦𑀺𑀢𑁆𑀯𑀸. 𑀬𑁄 𑀓𑁄𑀘𑀺 𑀫𑀳𑀼𑀲𑁆𑀲𑀯𑁄 𑀙𑀡𑁄 𑀦𑀸𑀫. 𑀓𑀢𑁆𑀢𑀺𑀓𑀼𑀲𑁆𑀲𑀯𑁄, 𑀨𑀕𑁆𑀕𑀼𑀡𑀼𑀲𑁆𑀲𑀯𑁄𑀢𑀺 𑀏𑀯𑀁 𑀦𑀓𑁆𑀔𑀢𑁆𑀢𑀲𑀮𑁆𑀮𑀓𑁆𑀔𑀺𑀢𑁄 𑀫𑀳𑀼𑀲𑁆𑀲𑀯𑁄 𑀦𑀓𑁆𑀔𑀢𑁆𑀢𑀁.𑀧𑀼𑀩𑁆𑀩𑀼𑀝𑁆𑀞𑀸𑀬𑀺𑀢𑀸, 𑀧𑀘𑁆𑀙𑀸𑀦𑀺𑀧𑀸𑀢𑀺𑀢𑀸 𑀘 𑀫𑀳𑀸𑀲𑀼𑀤𑀲𑁆𑀲𑀦𑁂 𑀯𑀼𑀢𑁆𑀢𑀸 𑀏𑀯𑀸𑀢𑀺 𑀇𑀥 𑀅𑀦𑀸𑀫𑀝𑁆𑀞𑀸.

𑀤𑀺𑀦𑁆𑀦𑀸𑀤𑀸𑀬𑀺𑀦𑁄𑀢𑀺 𑀧𑀼𑀩𑁆𑀩𑀧𑀤𑀸𑀯𑀥𑀸𑀭𑀡𑀯𑀲𑁂𑀦 𑀲𑀸𑀯𑀥𑀸𑀭𑀡𑀯𑀘𑀦𑀦𑁆𑀢𑀺 𑀅𑀯𑀥𑀸𑀭𑀡𑁂𑀦 𑀦𑀺𑀯𑀢𑁆𑀢𑀺𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀘𑁄𑀭𑀺𑀓𑀸𑀬 𑀓𑀺𑀜𑁆𑀘𑀺 𑀅𑀕𑁆𑀕𑀳𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀲𑀸𑀫𑀺𑀓𑁂𑀳𑀺 𑀤𑀺𑀦𑁆𑀦𑀲𑁆𑀲𑁂𑀯 𑀆𑀤𑀸𑀬𑀺𑀦𑁄’’𑀢𑀺. 𑀦 𑀫𑀬𑀁 𑀓𑀺𑀜𑁆𑀘𑀺 𑀮𑀪𑀸𑀫𑀸𑀢𑀺 𑀅𑀦𑀼𑀚𑁆𑀛𑀸𑀬𑀺𑀢𑁆𑀯𑀸𑀢𑀺 𑀧𑀝𑀺𑀲𑁂𑀥𑀤𑁆𑀯𑀬𑁂𑀦 𑀢𑁂𑀳𑀺 𑀮𑀤𑁆𑀥𑀩𑁆𑀩𑀲𑁆𑀲 𑀮𑀸𑀪𑀁 𑀤𑀲𑁆𑀲𑁂𑀢𑀺. ‘‘𑀓𑀺𑀁 𑀏𑀢𑀲𑁆𑀲 𑀓𑀫𑁆𑀫𑁂𑀦 𑀓𑀢𑁂𑀦𑀸𑀢𑀺 𑀅𑀦𑀼𑀚𑁆𑀛𑀸𑀬𑀺𑀢𑁆𑀯𑀸’’𑀢𑀺 𑀇𑀤𑀁 𑀢𑀼𑀝𑁆𑀞𑀳𑀤𑀬𑀢𑀸𑀬 𑀓𑀸𑀭𑀡𑀤𑀲𑁆𑀲𑀦𑀁 𑀧𑀝𑀺𑀧𑀓𑁆𑀔𑀤𑀽𑀭𑀻𑀪𑀸𑀯𑀢𑁄. 𑀢𑀼𑀝𑁆𑀞𑀳𑀤𑀬𑀢𑀸𑀤𑀲𑁆𑀲𑀦𑀫𑁆𑀧𑀺 𑀓𑀫𑁆𑀫𑀲𑁆𑀲 𑀲𑀼𑀓𑀢𑀓𑀸𑀭𑀺𑀢𑀸𑀬 𑀓𑀸𑀭𑀡𑀤𑀲𑁆𑀲𑀦𑀁. 𑀓𑀺𑀢𑁆𑀢𑀺 𑀏𑀯 𑀯𑀡𑁆𑀡𑁄 𑀓𑀺𑀢𑁆𑀢𑀺𑀯𑀡𑁆𑀡𑁄, 𑀢𑀁 𑀓𑀺𑀢𑁆𑀢𑀺𑀯𑀡𑁆𑀡𑀁 𑀕𑀼𑀡𑀓𑀣𑀁 𑀳𑀭𑀦𑁆𑀢𑀺, 𑀢𑀁 𑀢𑀁 𑀤𑀺𑀲𑀁 𑀉𑀧𑀸𑀳𑀭𑀦𑁆𑀢𑀻𑀢𑀺 𑀓𑀺𑀢𑁆𑀢𑀺𑀯𑀡𑁆𑀡𑀳𑀭𑀸. 𑀢𑀣𑀸 𑀢𑀣𑀸 𑀓𑀺𑀢𑁆𑀢𑁂𑀢𑀩𑁆𑀩𑀢𑁄 𑀳𑀺 𑀓𑀺𑀢𑁆𑀢𑀺, 𑀕𑀼𑀡𑁄, 𑀢𑁂𑀲𑀁 𑀯𑀡𑁆𑀡𑀦𑀁 𑀓𑀣𑀦𑀁 𑀯𑀡𑁆𑀡𑁄. 𑀢𑁂𑀦𑀸𑀳 ‘‘𑀕𑀼𑀡𑀓𑀣𑀸𑀳𑀸𑀭𑀓𑀸’’𑀢𑀺.

𑁨𑁭𑁨. 𑀓𑀸𑀭𑀡𑀪𑀽𑀢𑀸 𑀫𑁂𑀢𑁆𑀢𑀸 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀫𑁂𑀢𑁆𑀢𑀸𑀦𑀺, 𑀓𑀸𑀬𑀓𑀫𑁆𑀫𑀸𑀤𑀻𑀦𑀺. 𑀬𑀸𑀦𑀺 𑀧𑀦 𑀢𑀸𑀦𑀺 𑀬𑀣𑀸 𑀬𑀣𑀸 𑀘 𑀲𑀫𑁆𑀪𑀯𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀯𑀺𑀳𑀸𑀭𑀕𑀫𑀦’’𑀦𑁆𑀢𑀺𑀆𑀤𑀻𑀲𑀼 ‘‘𑀫𑁂𑀢𑁆𑀢𑀘𑀺𑀢𑁆𑀢𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸’’𑀢𑀺 𑀧𑀤𑀁 𑀆𑀳𑀭𑀺𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀅𑀦𑀸𑀯𑀝𑀤𑁆𑀯𑀸𑀭𑀢𑀸𑀬𑀸𑀢𑀺 𑀏𑀢𑁆𑀣 𑀤𑁆𑀯𑀸𑀭𑀁 𑀦𑀸𑀫 𑀅𑀮𑁄𑀪𑀚𑁆𑀛𑀸𑀲𑀬𑀢𑀸 𑀤𑀸𑀦𑀲𑁆𑀲 𑀫𑀼𑀔𑀪𑀸𑀯𑀢𑁄. 𑀢𑀲𑁆𑀲 𑀲𑀢𑁄 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀤𑀸𑀢𑀼𑀓𑀸𑀫𑀢𑀸 𑀅𑀦𑀸𑀯𑀝𑀢𑀸 𑀏𑀯𑀜𑁆𑀳𑀺 𑀖𑀭𑀫𑀸𑀯𑀲𑀦𑁆𑀢𑁄 𑀓𑀼𑀮𑀧𑀼𑀢𑁆𑀢𑁄 𑀕𑁂𑀳𑀤𑁆𑀯𑀸𑀭𑁂 𑀧𑀺𑀳𑀺𑀢𑁂𑀧𑀺 𑀅𑀦𑀸𑀯𑀝𑀤𑁆𑀯𑀸𑀭𑁄 𑀏𑀯, 𑀅𑀜𑁆𑀜𑀣𑀸 𑀅𑀧𑀺𑀳𑀺𑀢𑁂𑀧𑀺 𑀖𑀭𑀤𑁆𑀯𑀸𑀭𑁂 𑀆𑀯𑀝𑀤𑁆𑀯𑀸𑀭𑁄 𑀏𑀯𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀯𑀺𑀯𑀭𑀺𑀢𑁆𑀯𑀸𑀧𑀺 𑀯𑀲𑀦𑁆𑀢𑁄𑀢𑀺 𑀯𑀘𑀦𑀲𑁂𑀲𑁄. 𑀧𑀺𑀤𑀳𑀺𑀢𑁆𑀯𑀸𑀧𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. ‘‘𑀲𑀻𑀮𑀯𑀦𑁆𑀢𑁂𑀲𑀽’’𑀢𑀺 𑀇𑀤𑀁 𑀧𑀝𑀺𑀕𑁆𑀕𑀸𑀳𑀓𑀢𑁄 𑀤𑀓𑁆𑀔𑀺𑀡𑀯𑀺𑀲𑀼𑀤𑁆𑀥𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀓𑀭𑀼𑀡𑀸𑀔𑁂𑀢𑁆𑀢𑁂𑀧𑀺 𑀤𑀸𑀦𑁂𑀦 𑀅𑀦𑀸𑀯𑀝𑀤𑁆𑀯𑀸𑀭𑀢𑀸 𑀏𑀯. ‘‘𑀲𑀦𑁆𑀢𑀜𑁆𑀜𑁂𑀯𑀸’’𑀢𑀺 𑀇𑀫𑀺𑀦𑀸 𑀅𑀲𑀦𑁆𑀢𑀁 𑀦𑀢𑁆𑀣𑀺𑀯𑀘𑀦𑀁 𑀧𑀼𑀘𑁆𑀙𑀺𑀢𑀧𑀝𑀺𑀯𑀘𑀦𑀁 𑀯𑀺𑀬 𑀇𑀘𑁆𑀙𑀺𑀢𑀩𑁆𑀩𑀁 𑀏𑀯𑀸𑀢𑀺 𑀤𑀲𑁆𑀲𑁂𑀢𑀺 𑀯𑀺𑀜𑁆𑀜𑀽𑀦𑀁 𑀅𑀢𑁆𑀣𑀺𑀓𑀸𑀦𑀁 𑀘𑀺𑀢𑁆𑀢𑀫𑀤𑁆𑀤𑀯𑀓𑀭𑀡𑀢𑁄. ‘‘𑀧𑀼𑀭𑁂𑀪𑀢𑁆𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀓’’𑀦𑁆𑀢𑀺 𑀇𑀤𑀁 𑀬𑀸𑀯𑀓𑀸𑀮𑀺𑀓𑁂 𑀏𑀯 𑀆𑀫𑀺𑀲𑀪𑀸𑀯𑀲𑁆𑀲 𑀦𑀺𑀭𑀼𑀴𑁆𑀳𑀢𑀸𑀬 𑀯𑀼𑀢𑁆𑀢𑀁.

‘‘𑀲𑀩𑁆𑀩𑁂 𑀲𑀢𑁆𑀢𑀸’’𑀢𑀺 𑀇𑀤𑀁 𑀢𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀚𑁆𑀛𑀸𑀲𑀬𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀁 𑀧𑀓𑁆𑀔𑀧𑀸𑀢𑀸𑀪𑀸𑀯𑀤𑀻𑀧𑀦𑀢𑁄, 𑀑𑀥𑀺𑀲𑁄 𑀨𑀭𑀡𑀸𑀬𑀧𑀺 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀮𑀩𑁆𑀪𑀦𑀢𑁄. 𑀬𑀸𑀬 𑀓𑀼𑀲𑀮𑀸𑀪𑀺𑀯𑀟𑁆𑀠𑀺𑀆𑀓𑀗𑁆𑀔𑀸𑀬 𑀢𑁂𑀲𑀁 𑀉𑀧𑀝𑁆𑀞𑀸𑀓𑀸𑀦𑀁, 𑀢𑀣𑀸 𑀦𑁂𑀲𑀁 𑀕𑁂𑀳𑀧𑀯𑀺𑀲𑀦𑀁, 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀯𑀺𑀲𑀦𑁆𑀢𑀸𑀧𑀺 𑀓𑀮𑁆𑀬𑀸𑀡𑁂𑀦 𑀘𑁂𑀢𑀲𑀸 𑀅𑀦𑀼𑀓𑀫𑁆𑀧𑀦𑁆𑀢𑀺 𑀦𑀸𑀫𑀸’’𑀢𑀺. 𑀲𑀼𑀢𑀲𑁆𑀲 𑀧𑀭𑀺𑀬𑁄𑀤𑀸𑀧𑀦𑀁 𑀦𑀸𑀫 𑀢𑀲𑁆𑀲 𑀬𑀸𑀣𑀸𑀯𑀢𑁄 𑀅𑀢𑁆𑀣𑀁 𑀯𑀺𑀪𑀸𑀯𑁂𑀢𑁆𑀯𑀸 𑀯𑀺𑀘𑀺𑀓𑀺𑀘𑁆𑀙𑀸𑀢𑀫𑀯𑀺𑀥𑀫𑀦𑁂𑀦 𑀯𑀺𑀲𑁄𑀥𑀦𑀦𑁆𑀢𑀺 𑀆𑀳 ‘‘𑀅𑀢𑁆𑀣𑀁 𑀓𑀣𑁂𑀢𑁆𑀯𑀸 𑀓𑀗𑁆𑀔𑀁 𑀯𑀺𑀦𑁄𑀤𑁂𑀦𑁆𑀢𑀻’’𑀢𑀺. 𑀲𑀯𑀦𑀁 𑀦𑀸𑀫 𑀥𑀫𑁆𑀫𑀲𑁆𑀲 𑀬𑀸𑀯𑀤𑁂𑀯 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀦𑀸𑀬 𑀅𑀲𑀢𑀺 𑀢𑀲𑁆𑀫𑀺𑀁 𑀢𑀲𑁆𑀲 𑀦𑀺𑀭𑀢𑁆𑀣𑀓𑀪𑀸𑀯𑀢𑁄, 𑀢𑀲𑁆𑀫𑀸 𑀲𑀼𑀢𑀲𑁆𑀲 𑀧𑀭𑀺𑀬𑁄𑀤𑀸𑀧𑀦𑀁 𑀦𑀸𑀫 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀸𑀧𑀦𑀦𑁆𑀢𑀺 𑀆𑀳 ‘‘𑀢𑀣𑀢𑁆𑀢𑀸𑀬 𑀯𑀸 𑀧𑀝𑀺𑀧𑀚𑁆𑀚𑀸𑀧𑁂𑀦𑁆𑀢𑀻’’𑀢𑀺.

𑁨𑁭𑁩. 𑀅𑀮𑀫𑀢𑁆𑀢𑁄𑀢𑀺 𑀲𑀫𑀢𑁆𑀣𑀲𑀪𑀸𑀯𑁄, 𑀲𑁄 𑀘 𑀅𑀢𑁆𑀣𑀢𑁄 𑀲𑀫𑀢𑁆𑀣𑁄 𑀏𑀯𑀸𑀢𑀺 ‘‘𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀦𑀲𑀫𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀤𑀺𑀲𑀸𑀦𑀫𑀲𑁆𑀲𑀦𑀝𑁆𑀞𑀸𑀦𑁂𑀢𑀺 𑀬𑀣𑀸𑀯𑀼𑀢𑁆𑀢𑀤𑀺𑀲𑀸𑀦𑀁 𑀧𑀘𑁆𑀘𑀼𑀧𑀝𑁆𑀞𑀸𑀦𑀲𑀜𑁆𑀜𑀺𑀢𑁂 𑀦𑀫𑀲𑁆𑀲𑀦𑀓𑀸𑀭𑀡𑁂. 𑀧𑀡𑁆𑀟𑀺𑀢𑁄 𑀳𑀼𑀢𑁆𑀯𑀸 𑀓𑀼𑀲𑀮𑁄 𑀙𑁂𑀓𑁄 𑀮𑀪𑀢𑁂 𑀬𑀲𑀦𑁆𑀢𑀺 𑀬𑁄𑀚𑀦𑀸. 𑀲𑀡𑁆𑀳𑀕𑀼𑀡𑀬𑁄𑀕𑀢𑁄 𑀲𑀡𑁆𑀳𑁄, 𑀲𑀡𑁆𑀳𑀕𑀼𑀡𑁄𑀢𑀺 𑀧𑀦𑁂𑀢𑁆𑀣 𑀲𑀼𑀔𑀼𑀫𑀦𑀺𑀧𑀼𑀡𑀧𑀜𑁆𑀜𑀸, 𑀫𑀼𑀤𑀼𑀯𑀸𑀘𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀼𑀔𑀼𑀫…𑀧𑁂… 𑀪𑀡𑀦𑁂𑀦 𑀯𑀸’’𑀢𑀺 𑀯𑀼𑀢𑁆𑀢𑀁. 𑀤𑀺𑀲𑀸𑀦𑀫𑀲𑁆𑀲𑀦𑀝𑁆𑀞𑀸𑀦𑁂𑀦𑀸𑀢𑀺 𑀬𑁂𑀦 𑀜𑀸𑀡𑁂𑀦 𑀬𑀣𑀸𑀯𑀼𑀢𑁆𑀢𑀸 𑀙 𑀤𑀺𑀲𑀸 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀧𑀚𑁆𑀚𑀦𑁆𑀢𑁄 𑀦𑀫𑀲𑁆𑀲𑀢𑀺 𑀦𑀸𑀫, 𑀢𑀁 𑀜𑀸𑀡𑀁 𑀤𑀺𑀲𑀸𑀦𑀫𑀲𑁆𑀲𑀦𑀝𑁆𑀞𑀸𑀦𑀁, 𑀢𑁂𑀦 𑀧𑀝𑀺𑀪𑀸𑀦𑀯𑀸. 𑀢𑁂𑀦 𑀳𑀺 𑀢𑀁𑀢𑀁𑀓𑀺𑀘𑁆𑀘𑀬𑀼𑀢𑁆𑀢𑀧𑀢𑁆𑀢𑀯𑀲𑁂𑀦 𑀧𑀝𑀺𑀧𑀚𑁆𑀚𑀦𑁆𑀢𑁄 𑀇𑀥 ‘‘𑀧𑀝𑀺𑀪𑀸𑀦𑀯𑀸’’𑀢𑀺 𑀯𑀼𑀢𑁆𑀢𑁄. 𑀦𑀺𑀯𑀸𑀢𑀯𑀼𑀢𑁆𑀢𑀻𑀢𑀺 𑀧𑀡𑀺𑀧𑀸𑀢𑀲𑀻𑀮𑁄. 𑀅𑀢𑁆𑀣𑀤𑁆𑀥𑁄𑀢𑀺 𑀦 𑀣𑀤𑁆𑀥𑁄 𑀣𑀫𑁆𑀪𑀭𑀳𑀺𑀢𑁄𑀢𑀺 𑀘𑀺𑀢𑁆𑀢𑀲𑁆𑀲 𑀉𑀤𑁆𑀥𑀼𑀫𑀸𑀢𑀮𑀓𑁆𑀔𑀡𑁂𑀦 𑀣𑀫𑁆𑀪𑀺𑀢𑀪𑀸𑀯𑁂𑀦 𑀯𑀺𑀭𑀳𑀺𑀢𑁄. 𑀉𑀝𑁆𑀞𑀸𑀦𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑁄𑀢𑀺 𑀓𑀸𑀬𑀺𑀓𑁂𑀦 𑀯𑀻𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀦𑀺𑀭𑀦𑁆𑀢𑀭𑀓𑀭𑀡𑀯𑀲𑁂𑀦𑀸𑀢𑀺 𑀆𑀭𑀤𑁆𑀥𑀲𑁆𑀲 𑀓𑀫𑁆𑀫𑀲𑁆𑀲 𑀲𑀢𑀢𑀓𑀸𑀭𑀺𑀢𑀸𑀯𑀲𑁂𑀦. 𑀞𑀸𑀦𑀼𑀧𑁆𑀧𑀢𑁆𑀢𑀺𑀬𑀸 𑀧𑀜𑁆𑀜𑀸𑀬𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀣𑀓𑀺𑀘𑁆𑀘𑁂 𑀉𑀧𑀝𑁆𑀞𑀺𑀢𑁂 𑀞𑀸𑀦𑀲𑁄 𑀢𑀗𑁆𑀔𑀡𑁂 𑀏𑀯 𑀉𑀧𑁆𑀧𑀚𑁆𑀚𑀦𑀓𑀧𑀜𑁆𑀜𑀸𑀬.

𑀲𑀗𑁆𑀕𑀳𑀓𑀭𑁄𑀢𑀺 𑀬𑀣𑀸𑀭𑀳𑀁 𑀲𑀢𑁆𑀢𑀸𑀦𑀁 𑀲𑀗𑁆𑀕𑀡𑁆𑀳𑀦𑀓𑁄. 𑀫𑀺𑀢𑁆𑀢𑀓𑀭𑁄𑀢𑀺 𑀫𑀺𑀢𑁆𑀢𑀪𑀸𑀯𑀓𑀭𑁄, 𑀲𑁄 𑀧𑀦 𑀅𑀢𑁆𑀣𑀢𑁄 𑀫𑀺𑀢𑁆𑀢𑁂 𑀧𑀭𑀺𑀬𑁂𑀲𑀦𑀓𑁄 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀫𑀺𑀢𑁆𑀢𑀕𑀯𑁂𑀲𑀦𑁄’’𑀢𑀺. 𑀬𑀣𑀸𑀯𑀼𑀢𑁆𑀢𑀁 𑀯𑀤𑀁 𑀯𑀘𑀦𑀁 𑀚𑀸𑀦𑀸𑀢𑀻𑀢𑀺 𑀯𑀤𑀜𑁆𑀜𑀽𑀢𑀺 𑀆𑀳 ‘‘𑀧𑀼𑀩𑁆𑀩𑀓𑀸𑀭𑀺𑀦𑀸 𑀯𑀼𑀢𑁆𑀢𑀯𑀘𑀦𑀁 𑀚𑀸𑀦𑀸𑀢𑀻’’𑀢𑀺. 𑀇𑀤𑀸𑀦𑀺 𑀢𑀫𑁂𑀯𑀢𑁆𑀣𑀁 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀁 𑀯𑀺𑀢𑁆𑀣𑀸𑀭𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀲𑀳𑀸𑀬𑀓𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀼𑀩𑁆𑀩𑁂 𑀬𑀣𑀸𑀧𑀯𑀢𑁆𑀢𑀸𑀬 𑀯𑀸𑀘𑀸𑀬 𑀚𑀸𑀦𑀦𑁂 𑀯𑀤𑀜𑁆𑀜𑀼𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀆𑀓𑀸𑀭𑀲𑀮𑁆𑀮𑀓𑁆𑀔𑀡𑁂𑀦 𑀅𑀧𑁆𑀧𑀯𑀢𑁆𑀢𑀸𑀬 𑀯𑀸𑀘𑀸𑀬 𑀚𑀸𑀦𑀦𑁂𑀧𑀺 𑀯𑀤𑀜𑁆𑀜𑀼𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀬𑁂𑀦 𑀬𑁂𑀦 𑀯𑀸 𑀧𑀦𑀸’’𑀢𑀺𑀆𑀤𑀺𑀦𑀸 𑀯𑀘𑀦𑀻𑀬𑀢𑁆𑀣𑀢𑀁 𑀯𑀤𑀜𑁆𑀜𑀽-𑀲𑀤𑁆𑀤𑀲𑁆𑀲 𑀤𑀲𑁆𑀲𑁂𑀢𑀺. 𑀦𑁂𑀢𑀸𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀧𑀘𑁆𑀘𑀓𑁆𑀔𑀢𑁄 𑀧𑀸𑀧𑁂𑀢𑀸. 𑀢𑁂𑀦𑀸𑀳 ‘‘𑀢𑀁 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀧𑀜𑁆𑀜𑀸𑀬 𑀦𑁂𑀢𑀸’’𑀢𑀺. 𑀦𑁂𑀢𑀺 𑀢𑀁 𑀢𑀫𑀢𑁆𑀣𑀦𑁆𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀧𑀼𑀦𑀧𑁆𑀧𑀼𑀦𑀁 𑀦𑁂𑀢𑀻𑀢𑀺 𑀅𑀦𑀼 𑀅𑀦𑀼 𑀦𑁂𑀢𑀺, 𑀢𑀁 𑀢𑀫𑀢𑁆𑀣𑀦𑁆𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑀦𑀸.

𑀢𑀲𑁆𑀫𑀺𑀁 𑀢𑀲𑁆𑀫𑀺𑀦𑁆𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀤𑀸𑀦𑀸𑀤𑀻𑀳𑀺 𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀳𑁂𑀢𑀩𑁆𑀩𑁂 𑀧𑀼𑀕𑁆𑀕𑀮𑁂. 𑀆𑀡𑀺𑀬𑀸𑀢𑀺 𑀅𑀓𑁆𑀔𑀲𑀻𑀲𑀕𑀢𑀸𑀬 𑀆𑀡𑀺𑀬𑀸. 𑀬𑀸𑀬𑀢𑁄𑀢𑀺 𑀕𑀘𑁆𑀙𑀢𑁄. 𑀧𑀼𑀢𑁆𑀢𑀓𑀸𑀭𑀡𑀸𑀢𑀺 𑀧𑀼𑀢𑁆𑀢𑀦𑀺𑀫𑀺𑀢𑁆𑀢𑀁. 𑀧𑀼𑀢𑁆𑀢𑀳𑁂𑀢𑀼𑀓𑀜𑁆𑀳𑀺 𑀧𑀼𑀢𑁆𑀢𑁂𑀦 𑀓𑀢𑁆𑀢𑀩𑁆𑀩𑀁 𑀫𑀸𑀦𑀁 𑀯𑀸 𑀧𑀽𑀚𑀁 𑀯𑀸.

𑀉𑀧𑀬𑁄𑀕𑀯𑀘𑀦𑁂𑀢𑀺 𑀉𑀧𑀬𑁄𑀕𑀢𑁆𑀣𑁂. 𑀯𑀼𑀘𑁆𑀘𑀢𑀻𑀢𑀺 𑀯𑀘𑀦𑀁, 𑀅𑀢𑁆𑀣𑁄. 𑀉𑀧𑀬𑁄𑀕𑀯𑀘𑀦𑁂 𑀯𑀸 𑀯𑀢𑁆𑀢𑀩𑁆𑀩𑁂. 𑀧𑀘𑁆𑀘𑀢𑁆𑀢𑀦𑁆𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀲𑀫𑁆𑀫𑀸 𑀧𑁂𑀓𑁆𑀔𑀦𑁆𑀢𑀻𑀢𑀺 𑀲𑀫𑁆𑀫𑀤𑁂𑀯 𑀓𑀸𑀢𑀩𑁆𑀩𑁂 𑀧𑁂𑀓𑁆𑀔𑀦𑁆𑀢𑀺. 𑀧𑀲𑀁𑀲𑀦𑀻𑀬𑀸𑀢𑀺 𑀧𑀲𑀁𑀲𑀺𑀢𑀩𑁆𑀩𑀸. 𑀪𑀯𑀦𑁆𑀢𑀺 𑀏𑀢𑁂 𑀲𑀗𑁆𑀕𑀳𑁂𑀢𑀩𑁆𑀩𑁂 𑀢𑀢𑁆𑀣 𑀧𑀼𑀕𑁆𑀕𑀮𑁂 𑀬𑀣𑀸𑀭𑀳𑀁 𑀧𑀯𑀢𑁆𑀢𑁂𑀦𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁭𑁪. ‘‘𑀇𑀢𑀺 𑀪𑀕𑀯𑀸’’𑀢𑀺𑀆𑀤𑀺 𑀦𑀺𑀕𑀫𑀦𑀁. 𑀬𑀸 𑀤𑀺𑀲𑀸𑀢𑀺 𑀬𑀸 𑀫𑀸𑀢𑀸𑀧𑀺𑀢𑀼𑀆𑀤𑀺𑀮𑀓𑁆𑀔𑀡𑀸 𑀧𑀼𑀭𑀢𑁆𑀣𑀺𑀫𑀸𑀤𑀺𑀤𑀺𑀲𑀸. 𑀦𑀫𑀲𑁆𑀲𑀸𑀢𑀺 𑀦𑀫𑀲𑁆𑀲𑁂𑀬𑁆𑀬𑀸𑀲𑀻𑀢𑀺 𑀅𑀢𑁆𑀣𑁄 ‘‘𑀬𑀣𑀸 𑀓𑀣𑀁 𑀧𑀦𑀸’’𑀢𑀺𑀆𑀤𑀺𑀓𑀸𑀬 𑀕𑀳𑀧𑀢𑀺𑀧𑀼𑀢𑁆𑀢𑀲𑁆𑀲 𑀧𑀼𑀘𑁆𑀙𑀸𑀬 𑀯𑀲𑁂𑀦 𑀤𑁂𑀲𑀦𑀸𑀬 𑀆𑀭𑀤𑁆𑀥𑀢𑁆𑀢𑀸 ‘‘𑀧𑀼𑀘𑁆𑀙𑀸𑀬 𑀞𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀅𑀓𑀣𑀺𑀢𑀁 𑀦𑀢𑁆𑀣𑀺 𑀕𑀺𑀳𑀻𑀳𑀺 𑀓𑀢𑁆𑀢𑀩𑁆𑀩𑀓𑀫𑁆𑀫𑁂 𑀅𑀧𑁆𑀧𑀫𑀸𑀤𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑀯𑀲𑁂𑀲𑀢𑁄 𑀓𑀣𑀺𑀢𑀢𑁆𑀢𑀸. 𑀫𑀸𑀢𑀸𑀧𑀺𑀢𑀼𑀆𑀤𑀻𑀲𑀼 𑀳𑀺 𑀢𑁂𑀳𑀺 𑀘 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀧𑀝𑀺𑀧𑀢𑁆𑀢𑀺𑀬𑀸 𑀦𑀺𑀭𑀯𑀲𑁂𑀲𑀢𑁄 𑀓𑀣𑀦𑁂𑀦𑁂𑀯 𑀭𑀸𑀚𑀸𑀤𑀻𑀲𑀼𑀧𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀯𑀺𑀥𑀺 𑀅𑀢𑁆𑀣𑀢𑁄 𑀓𑀣𑀺𑀢𑁄 𑀏𑀯 𑀳𑁄𑀢𑀻𑀢𑀺. 𑀕𑀺𑀳𑀺𑀦𑁄 𑀯𑀺𑀦𑀻𑀬𑀦𑁆𑀢𑀺, 𑀯𑀺𑀦𑀬𑀁 𑀉𑀧𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀕𑀺𑀳𑀺𑀯𑀺𑀦𑀬𑁄. 𑀬𑀣𑀸𑀦𑀼𑀲𑀺𑀝𑁆𑀞𑀦𑁆𑀢𑀺 𑀬𑀣𑀸 𑀇𑀥 𑀲𑀢𑁆𑀣𑀸𑀭𑀸 𑀅𑀦𑀼𑀲𑀺𑀝𑁆𑀞𑀁 𑀕𑀺𑀳𑀺𑀘𑀸𑀭𑀺𑀢𑁆𑀢𑀁, 𑀢𑀣𑀸 𑀢𑁂𑀦 𑀧𑀓𑀸𑀭𑁂𑀦 𑀢𑀁 𑀅𑀯𑀺𑀭𑀸𑀥𑁂𑀢𑁆𑀯𑀸. 𑀧𑀝𑀺𑀧𑀚𑁆𑀚𑀫𑀸𑀦𑀲𑁆𑀲 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀳𑀺 𑀯𑀼𑀤𑁆𑀥𑀺𑀬𑁂𑀯 𑀇𑀘𑁆𑀙𑀺𑀢𑀩𑁆𑀩𑀸 𑀅𑀯𑀲𑁆𑀲𑀫𑁆𑀪𑀸𑀯𑀺𑀦𑀻𑀢𑀺.

𑀲𑀺𑀗𑁆𑀕𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.