𑁭. 𑀮𑀓𑁆𑀔𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀯𑀡𑁆𑀡𑀦𑀸

𑁧𑁯𑁯. 𑀅𑀪𑀺𑀦𑀻𑀳𑀸𑀭𑀸𑀤𑀺𑀕𑀼𑀡𑀫𑀳𑀢𑁆𑀢𑁂𑀦 𑀫𑀳𑀦𑁆𑀢𑁄 𑀧𑀼𑀭𑀺𑀲𑁄𑀢𑀺 𑀫𑀳𑀸𑀧𑀼𑀭𑀺𑀲𑁄, 𑀲𑁄 𑀮𑀓𑁆𑀔𑀻𑀬𑀢𑀺 𑀏𑀢𑁂𑀳𑀻𑀢𑀺 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺. 𑀢𑀁 𑀫𑀳𑀸𑀧𑀼𑀭𑀺𑀲𑀁 𑀩𑁆𑀬𑀜𑁆𑀚𑀬𑀦𑁆𑀢𑀺 𑀧𑀓𑀸𑀲𑁂𑀦𑁆𑀢𑀻𑀢𑀺 𑀫𑀳𑀸𑀧𑀼𑀭𑀺𑀲𑀩𑁆𑀬𑀜𑁆𑀚𑀦𑀸𑀦𑀺. 𑀫𑀳𑀸𑀧𑀼𑀭𑀺𑀲𑁄 𑀦𑀺𑀫𑀻𑀬𑀢𑀺 𑀅𑀦𑀼𑀫𑀻𑀬𑀢𑀺 𑀏𑀢𑁂𑀳𑀻𑀢𑀺 𑀫𑀳𑀸𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀸𑀦𑀺. 𑀢𑁂𑀦𑀸𑀳 ‘‘𑀅𑀬𑀁…𑀧𑁂… 𑀓𑀸𑀭𑀡𑀸𑀦𑀻’’𑀢𑀺.

𑁨𑁦𑁦. 𑀥𑀸𑀭𑁂𑀦𑁆𑀢𑀻𑀢𑀺 𑀮𑀓𑁆𑀔𑀡𑀧𑀸𑀞𑀁 𑀥𑀸𑀭𑁂𑀦𑁆𑀢𑀺, 𑀢𑁂𑀦 𑀮𑀓𑁆𑀔𑀡𑀸𑀦𑀺 𑀢𑁂 𑀲𑀭𑀽𑀧𑀢𑁄 𑀚𑀸𑀦𑀦𑁆𑀢𑀺, 𑀦 𑀧𑀦 𑀲𑀫𑀼𑀝𑁆𑀞𑀸𑀦𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀦𑁄 𑀘 𑀔𑁄’’𑀢𑀺𑀆𑀤𑀺, 𑀢𑁂𑀦 𑀅𑀦𑀜𑁆𑀜𑀲𑀸𑀥𑀸𑀭𑀡𑀫𑁂𑀢𑀁, 𑀬𑀤𑀺𑀤𑀁 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀁 𑀓𑀸𑀭𑀡𑀯𑀺𑀪𑀸𑀯𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀓𑀲𑁆𑀫𑀸 𑀆𑀳𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀲𑀫𑀼𑀝𑁆𑀞𑀸𑀦𑀓𑀸𑀭𑀡𑀁 𑀧𑀼𑀘𑁆𑀙𑀢𑀺, 𑀆𑀘𑀭𑀺𑀬𑁄 ‘‘𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀅𑀦𑀼𑀭𑀽𑀧𑀢𑁆𑀢𑀸’’𑀢𑀺 𑀯𑀢𑁆𑀯𑀸 𑀢𑀫𑁂𑀯𑀲𑁆𑀲 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀲𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑁄𑀢𑀺 𑀲𑀩𑁆𑀩𑀲𑁄 𑀲𑀫𑀦𑁆𑀢𑀢𑁄 𑀯𑀺𑀓𑀲𑀺𑀢𑀧𑀼𑀧𑁆𑀨𑁄. 𑀯𑀺𑀓𑀲𑀦𑀫𑁂𑀯 𑀳𑀺 𑀧𑀼𑀧𑁆𑀨𑀲𑁆𑀲 𑀦𑀺𑀧𑁆𑀨𑀢𑁆𑀢𑀺. 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀯𑀺𑀬𑀸𑀢𑀺 𑀅𑀦𑀼𑀲𑁆𑀲𑀯𑀮𑀤𑁆𑀥𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 𑀯𑀤𑀦𑁆𑀢𑀺. 𑀉𑀧𑁆𑀧𑀚𑁆𑀚𑀢𑀻𑀢𑀺 𑀮𑀩𑁆𑀪𑀢𑀺, 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀅𑀢𑁆𑀣𑁄.

𑀬𑁂𑀦 𑀓𑀫𑁆𑀫𑁂𑀦𑀸𑀢𑀺 𑀬𑁂𑀦 𑀓𑀼𑀲𑀮𑀓𑀫𑁆𑀫𑀼𑀦𑀸. 𑀬𑀁 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀬𑀁 𑀬𑀁 𑀮𑀓𑁆𑀔𑀡𑀁 𑀦𑀺𑀩𑁆𑀩𑀢𑁆𑀢𑀁. 𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀢𑀲𑁆𑀲 𑀢𑀲𑁆𑀲 𑀓𑀼𑀲𑀮𑀓𑀫𑁆𑀫𑀲𑁆𑀲 𑀲𑀭𑀽𑀧𑀢𑁄, 𑀓𑀺𑀘𑁆𑀘𑀢𑁄, 𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀲𑁂𑀲𑀢𑁄, 𑀧𑀘𑁆𑀘𑀬𑀢𑁄, 𑀨𑀮𑀯𑀺𑀲𑁂𑀲𑀢𑁄 𑀘 𑀤𑀲𑁆𑀲𑀦𑀢𑁆𑀣𑀁, 𑀏𑀢𑁂𑀦𑁂𑀯 𑀧𑀝𑀺𑀧𑀸𑀝𑀺𑀬𑀸 𑀉𑀤𑁆𑀤𑀺𑀝𑁆𑀞𑀸𑀦𑀁 𑀮𑀓𑁆𑀔𑀡𑀸𑀦𑀁 𑀅𑀲𑀫𑀼𑀤𑁆𑀤𑁂𑀲𑀓𑀸𑀭𑀡𑀯𑀺𑀪𑀸𑀯𑀦𑀸𑀬 𑀓𑀸𑀭𑀡𑀁 𑀤𑀻𑀧𑀺𑀢𑀁 𑀳𑁄𑀢𑀺 𑀲𑀫𑀸𑀦𑀓𑀸𑀭𑀡𑀸𑀦𑀁 𑀮𑀓𑁆𑀔𑀡𑀸𑀦𑀁 𑀏𑀓𑀚𑁆𑀛𑀁 𑀓𑀸𑀭𑀡𑀤𑀲𑁆𑀲𑀦𑀯𑀲𑁂𑀦𑀲𑁆𑀲 𑀧𑀯𑀢𑁆𑀢𑀢𑁆𑀢𑀸. 𑀏𑀯𑀫𑀸𑀳𑀸𑀢𑀺 ‘‘𑀩𑀸𑀳𑀺𑀭𑀓𑀸𑀧𑀺 𑀇𑀲𑀬𑁄 𑀥𑀸𑀭𑁂𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀇𑀫𑀺𑀦𑀸 𑀇𑀫𑀺𑀦𑀸 𑀧𑀓𑀸𑀭𑁂𑀦 𑀆𑀳.

𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑀢𑀸𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁦𑁧. ‘‘𑀧𑀼𑀭𑀺𑀫𑀁 𑀚𑀸𑀢𑀺𑀦𑁆𑀢𑀺 𑀧𑀼𑀭𑀺𑀫𑀸𑀬𑀁 𑀚𑀸𑀢𑀺𑀬𑀁, 𑀪𑀼𑀫𑁆𑀫𑀢𑁆𑀣𑁂 𑀏𑀢𑀁 𑀉𑀧𑀬𑁄𑀕𑀯𑀘𑀦’’𑀦𑁆𑀢𑀺 𑀯𑀤𑀦𑁆𑀢𑀺. ‘‘𑀧𑀼𑀩𑁆𑀩𑁂 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀲𑀦𑁆𑀢𑀸𑀦𑁂 𑀞𑀺𑀢𑁄’’𑀢𑀺 𑀯𑀘𑀦𑀢𑁄 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀯𑀸 𑀉𑀧𑀬𑁄𑀕𑀯𑀘𑀦𑀁. 𑀬𑀢𑁆𑀣 𑀬𑀢𑁆𑀣 𑀳𑀺 𑀚𑀸𑀢𑀺𑀬𑀁 𑀫𑀳𑀸𑀲𑀢𑁆𑀢𑁄 𑀧𑀼𑀜𑁆𑀜𑀓𑀫𑁆𑀫𑀁 𑀓𑀸𑀢𑀼𑀁 𑀆𑀭𑀪𑀢𑀺, 𑀆𑀭𑀪𑀢𑁄 𑀧𑀝𑁆𑀞𑀸𑀬 𑀅𑀘𑁆𑀘𑀦𑁆𑀢𑀫𑁂𑀯 𑀢𑀢𑁆𑀣 𑀧𑀼𑀜𑁆𑀜𑀓𑀫𑁆𑀫𑀧𑁆𑀧𑀲𑀼𑀢𑁄 𑀳𑁄𑀢𑀺. 𑀢𑁂𑀦𑀸𑀳 ‘‘𑀤𑀴𑁆𑀳𑀲𑀫𑀸𑀤𑀸𑀦𑁄’’𑀢𑀺𑀆𑀤𑀺. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀸 ‘‘𑀚𑀸𑀢𑀻’’𑀢𑀺 𑀯𑀼𑀢𑁆𑀢𑀸 𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑀸𑀬 𑀚𑀸𑀢𑀺𑀬𑀸 𑀅𑀪𑀸𑀯𑀢𑁄, 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀲𑁆𑀲 𑀘 𑀯𑀺𑀓𑀸𑀭𑀲𑁆𑀲 𑀇𑀥 𑀅𑀦𑀼𑀧𑀬𑀼𑀚𑁆𑀚𑀦𑀢𑁄. 𑀚𑀸𑀢𑀯𑀲𑁂𑀦𑀸𑀢𑀺 𑀚𑀸𑀬𑀦𑀯𑀲𑁂𑀦. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 ‘‘𑀧𑀼𑀩𑁆𑀩𑁂 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀸’’𑀢𑀺 𑀇𑀫𑀁 𑀧𑀤𑀁 𑀉𑀧𑀲𑀁𑀳𑀭𑀢𑀺. 𑀪𑀯𑀦𑀯𑀲𑁂𑀦𑀸𑀢𑀺 𑀧𑀘𑁆𑀘𑀬𑀢𑁄 𑀦𑀺𑀩𑁆𑀩𑀢𑁆𑀢𑀦𑀯𑀲𑁂𑀦. 𑀦𑀺𑀯𑀼𑀢𑁆𑀣𑀯𑀲𑁂𑀦𑀸𑀢𑀺 𑀦𑀺𑀯𑀼𑀲𑀺𑀢𑀢𑀸𑀯𑀲𑁂𑀦. 𑀆𑀮𑀬𑀝𑁆𑀞𑁂𑀦𑀸𑀢𑀺 𑀆𑀯𑀲𑀺𑀢𑀪𑀸𑀯𑁂𑀦. 𑀦𑀺𑀯𑀸𑀲𑀢𑁆𑀣𑁄 𑀳𑀺 𑀦𑀺𑀓𑁂𑀢𑀢𑁆𑀣𑁄.

𑀢𑀢𑁆𑀣𑀸𑀢𑀺 𑀤𑁂𑀯𑀮𑁄𑀓𑀸𑀤𑀺𑀫𑁆𑀳𑀺. 𑀆𑀤𑀺-𑀲𑀤𑁆𑀤𑁂𑀦 𑀏𑀓𑀘𑁆𑀘𑀁 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀦 𑀲𑀼𑀓𑀭𑀦𑁆𑀢𑀺 𑀤𑁂𑀯𑀕𑀢𑀺𑀬𑀸 𑀏𑀓𑀦𑁆𑀢𑀲𑀼𑀔𑀢𑀸𑀬, 𑀤𑀼𑀕𑁆𑀕𑀢𑀺𑀬𑀸 𑀏𑀓𑀦𑁆𑀢𑀤𑀼𑀓𑁆𑀔𑀢𑀸𑀬, 𑀤𑀼𑀓𑁆𑀔𑀩𑀳𑀼𑀮𑀢𑀸𑀬 𑀘 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀑𑀓𑀸𑀲𑁄 𑀦 𑀲𑀼𑀮𑀪𑀭𑀽𑀧𑁄 𑀧𑀘𑁆𑀘𑀬𑀲𑀫𑀯𑀸𑀬𑀲𑁆𑀲 𑀤𑀼𑀮𑁆𑀮𑀪𑀪𑀸𑀯𑀢𑁄, 𑀉𑀧𑁆𑀧𑀚𑁆𑀚𑀫𑀸𑀦𑀸 𑀘 𑀲𑀸 𑀉𑀴𑀸𑀭𑀸, 𑀯𑀺𑀧𑀼𑀮𑀸 𑀘 𑀦 𑀳𑁄𑀢𑀻𑀢𑀺 𑀕𑀢𑀺𑀯𑀲𑁂𑀦𑀸𑀧𑀺 𑀔𑁂𑀢𑁆𑀢𑀯𑀺𑀲𑁂𑀲𑀢𑀸 𑀇𑀘𑁆𑀙𑀺𑀢𑀩𑁆𑀩𑀸 ‘‘𑀢𑀺𑀭𑀘𑁆𑀙𑀸𑀦𑀕𑀢𑁂 𑀤𑀸𑀦𑀁 𑀤𑀢𑁆𑀯𑀸 𑀲𑀢𑀕𑀼𑀡𑀸 𑀤𑀓𑁆𑀔𑀺𑀡𑀸 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸, 𑀧𑀼𑀣𑀼𑀚𑁆𑀚𑀦𑀤𑀼𑀲𑁆𑀲𑀻𑀮𑁂 𑀤𑀸𑀦𑀁 𑀤𑀢𑁆𑀯𑀸 𑀲𑀳𑀲𑁆𑀲𑀕𑀼𑀡𑀸 𑀤𑀓𑁆𑀔𑀺𑀡𑀸 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸’’𑀢𑀺 (𑀫. 𑀦𑀺. 𑁩.𑁩𑁭𑁯) 𑀯𑀘𑀦𑀢𑁄. 𑀫𑀦𑀼𑀲𑁆𑀲𑀕𑀢𑀺𑀬𑀸 𑀧𑀦 𑀲𑀼𑀔𑀩𑀳𑀼𑀮𑀢𑀸𑀬 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀑𑀓𑀸𑀲𑁄 𑀲𑀼𑀮𑀪𑀭𑀽𑀧𑁄 𑀧𑀘𑁆𑀘𑀬𑀲𑀫𑀯𑀸𑀬𑀲𑁆𑀲 𑀘 𑀬𑁂𑀪𑀼𑀬𑁆𑀬𑁂𑀦 𑀲𑀼𑀮𑀪𑀪𑀸𑀯𑀢𑁄. 𑀬𑀜𑁆𑀘 𑀢𑀢𑁆𑀣 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀫𑁆𑀧𑀺 𑀯𑀺𑀲𑁂𑀲𑀢𑁄 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺, 𑀤𑀼𑀓𑁆𑀔𑀽𑀧𑀦𑀺𑀲𑀸 𑀲𑀤𑁆𑀥𑀸𑀢𑀺. 𑀬𑀣𑀸 𑀳𑀺 𑀅𑀬𑁄𑀖𑀦𑁂𑀦 𑀲𑀢𑁆𑀣𑀓𑁂 𑀦𑀺𑀧𑁆𑀨𑀸𑀤𑀺𑀬𑀫𑀸𑀦𑁂 𑀢𑀲𑁆𑀲 𑀏𑀓𑀦𑁆𑀢𑀢𑁄 𑀅𑀕𑁆𑀕𑀺𑀫𑁆𑀳𑀺 𑀢𑀸𑀧𑀦𑀁, 𑀉𑀤𑀓𑁂𑀦 𑀯𑀸 𑀢𑁂𑀫𑀦𑀁 𑀙𑁂𑀤𑀦𑀓𑀺𑀭𑀺𑀬𑀸𑀲𑀫𑀢𑁆𑀣𑀢𑀸𑀬 𑀦 𑀯𑀺𑀲𑁂𑀲𑀧𑀘𑁆𑀘𑀬𑁄, 𑀢𑀸𑀧𑁂𑀢𑁆𑀯𑀸 𑀧𑀦 𑀲𑀫𑀸𑀦𑀬𑁄𑀕𑀢𑁄 𑀉𑀤𑀓𑀢𑁂𑀫𑀦𑀁 𑀢𑀲𑁆𑀲𑀸 𑀯𑀺𑀲𑁂𑀲𑀧𑀘𑁆𑀘𑀬𑁄, 𑀏𑀯𑀫𑁂𑀯 𑀲𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀏𑀓𑀦𑁆𑀢𑀤𑀼𑀓𑁆𑀔𑀲𑀫𑀗𑁆𑀕𑀺𑀢𑀸 𑀤𑀼𑀓𑁆𑀔𑀩𑀳𑀼𑀮𑀢𑀸 𑀏𑀓𑀦𑁆𑀢𑀲𑀼𑀔𑀲𑀫𑀗𑁆𑀕𑀺𑀢𑀸 𑀲𑀼𑀔𑀩𑀳𑀼𑀮𑀢𑀸 𑀘 𑀧𑀼𑀜𑁆𑀜𑀓𑀺𑀭𑀺𑀬𑀸𑀲𑀫𑀢𑁆𑀣𑀢𑀸𑀬 𑀦 𑀯𑀺𑀲𑁂𑀲𑀧𑀘𑁆𑀘𑀬𑁄, 𑀲𑀢𑀺 𑀧𑀦 𑀲𑀫𑀸𑀦𑀬𑁄𑀕𑀢𑁄 𑀤𑀼𑀓𑁆𑀔𑀲𑀦𑁆𑀢𑀸𑀧𑀦𑁂, 𑀲𑀼𑀔𑀼𑀫𑀩𑁆𑀭𑀽𑀳𑀦𑁂 𑀘 𑀮𑀤𑁆𑀥𑀽𑀧𑀦𑀺𑀲𑁆𑀲𑀬𑀸 𑀧𑀼𑀜𑁆𑀜𑀓𑀺𑀭𑀺𑀬𑀸 𑀲𑀫𑀢𑁆𑀣𑀢𑀸𑀬 𑀲𑀫𑁆𑀪𑀯𑀢𑀺, 𑀢𑀣𑀸 𑀲𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀧𑀼𑀜𑁆𑀜𑀓𑀺𑀭𑀺𑀬𑀸 𑀫𑀳𑀸𑀚𑀼𑀢𑀺𑀓𑀸 𑀫𑀳𑀸𑀯𑀺𑀧𑁆𑀨𑀸𑀭𑀸 𑀧𑀝𑀺𑀧𑀓𑁆𑀔𑀘𑁆𑀙𑁂𑀤𑀦𑀲𑀫𑀢𑁆𑀣𑀸 𑀳𑁄𑀢𑀺. 𑀢𑀲𑁆𑀫𑀸 𑀫𑀦𑀼𑀲𑁆𑀲𑀪𑀸𑀯𑁄 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀯𑀺𑀲𑁂𑀲𑀧𑀘𑁆𑀘𑀬𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀢𑁆𑀣 𑀦 𑀲𑀼𑀓𑀭𑀁, 𑀫𑀦𑀼𑀲𑁆𑀲𑀪𑀽𑀢𑀲𑁆𑀲𑁂𑀯 𑀲𑀼𑀓𑀭’’𑀦𑁆𑀢𑀺.

𑀅𑀣 ‘‘𑀫𑀦𑀼𑀲𑁆𑀲𑀪𑀽𑀢𑀲𑁆𑀲𑀸’’𑀢𑀺 𑀏𑀢𑁆𑀣 𑀓𑁄 𑀯𑀘𑀦𑀢𑁆𑀣𑁄? ‘‘𑀫𑀦𑀲𑁆𑀲 𑀉𑀲𑁆𑀲𑀦𑁆𑀦𑀢𑀸𑀬 𑀫𑀦𑀼𑀲𑁆𑀲𑀸𑀢𑀺, 𑀲𑀽𑀭𑀪𑀸𑀯𑀲𑀢𑀺𑀫𑀦𑁆𑀢𑀢𑀸𑀩𑁆𑀭𑀳𑁆𑀫𑀘𑀭𑀺𑀬𑀬𑁄𑀕𑁆𑀬𑀢𑀸𑀤𑀺𑀕𑀼𑀡𑀯𑀲𑁂𑀦 𑀉𑀧𑀘𑀺𑀢𑀫𑀦𑀓𑀸 𑀉𑀓𑁆𑀓𑀝𑁆𑀞𑀕𑀼𑀡𑀘𑀺𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀓𑁂 𑀧𑀦 𑀢𑁂? 𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀲𑀢𑁆𑀢𑀯𑀺𑀲𑁂𑀲𑀸. 𑀢𑁂𑀦𑀸𑀳 𑀪𑀕𑀯𑀸 𑁋

‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀞𑀸𑀦𑁂𑀳𑀺 𑀚𑀫𑁆𑀩𑀼𑀤𑀻𑀧𑀓𑀸 𑀫𑀦𑀼𑀲𑁆𑀲𑀸 𑀉𑀢𑁆𑀢𑀭𑀓𑀼𑀭𑀼𑀓𑁂 𑀘 𑀫𑀦𑀼𑀲𑁆𑀲𑁂 𑀅𑀥𑀺𑀕𑁆𑀕𑀡𑁆𑀳𑀦𑁆𑀢𑀺 𑀤𑁂𑀯𑁂 𑀘 𑀢𑀸𑀯𑀢𑀺𑀁𑀲𑁂. 𑀓𑀢𑀫𑁂𑀳𑀺 𑀢𑀻𑀳𑀺? 𑀲𑀽𑀭𑀸 𑀲𑀢𑀺𑀫𑀦𑁆𑀢𑁄 𑀇𑀥 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’𑀢𑀺 (𑀅. 𑀦𑀺. 𑁯.𑁨𑁧; 𑀓𑀣𑀸. 𑁨𑁭𑁧).

𑀢𑀣𑀸 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸, 𑀅𑀕𑁆𑀕𑀲𑀸𑀯𑀓𑀸, 𑀫𑀳𑀸𑀲𑀸𑀯𑀓𑀸, 𑀘𑀓𑁆𑀓𑀯𑀢𑁆𑀢𑀺𑀦𑁄, 𑀅𑀜𑁆𑀜𑁂 𑀘 𑀫𑀳𑀸𑀦𑀼𑀪𑀸𑀯𑀸 𑀲𑀢𑁆𑀢𑀸 𑀢𑀢𑁆𑀣𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑁂 𑀳𑀺 𑀲𑀫𑀸𑀦𑀭𑀽𑀧𑀸𑀤𑀺𑀢𑀸𑀬 𑀧𑀦 𑀲𑀤𑁆𑀥𑀺𑀁 𑀧𑀭𑀺𑀢𑁆𑀢𑀤𑀻𑀧𑀯𑀸𑀲𑀻𑀳𑀺 𑀇𑀢𑀭𑀫𑀳𑀸𑀤𑀻𑀧𑀯𑀸𑀲𑀺𑀦𑁄𑀧𑀺 𑀫𑀦𑀼𑀲𑁆𑀲𑀸 𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀁𑀲𑀽’’𑀢𑀺 𑀓𑁂𑀘𑀺. 𑀅𑀧𑀭𑁂 𑀧𑀦 𑀪𑀡𑀦𑁆𑀢𑀺 ‘‘𑀮𑁄𑀪𑀸𑀤𑀻𑀳𑀺, 𑀅𑀮𑁄𑀪𑀸𑀤𑀻𑀳𑀺 𑀘 𑀲𑀳𑀺𑀢𑀲𑁆𑀲 𑀫𑀦𑀲𑁆𑀲 𑀉𑀲𑁆𑀲𑀦𑁆𑀦𑀢𑀸𑀬 𑀫𑀦𑀼𑀲𑁆𑀲𑀸. 𑀬𑁂 𑀳𑀺 𑀲𑀢𑁆𑀢𑀸 𑀫𑀦𑀼𑀲𑁆𑀲𑀚𑀸𑀢𑀺𑀓𑀸, 𑀢𑁂𑀲𑀼 𑀯𑀺𑀲𑁂𑀲𑀢𑁄 𑀮𑁄𑀪𑀸𑀤𑀬𑁄, 𑀅𑀮𑁄𑀪𑀸𑀤𑀬𑁄 𑀘 𑀉𑀲𑁆𑀲𑀦𑁆𑀦𑀸, 𑀢𑁂 𑀮𑁄𑀪𑀸𑀤𑀺𑀉𑀲𑁆𑀲𑀦𑁆𑀦𑀢𑀸𑀬 𑀅𑀧𑀸𑀬𑀫𑀕𑁆𑀕𑀁, 𑀅𑀮𑁄𑀪𑀸𑀤𑀺𑀉𑀲𑁆𑀲𑀦𑁆𑀦𑀢𑀸𑀬 𑀲𑀼𑀕𑀢𑀺𑀫𑀕𑁆𑀕𑀁, 𑀦𑀺𑀩𑁆𑀩𑀸𑀦𑀕𑀸𑀫𑀺𑀫𑀕𑁆𑀕𑀜𑁆𑀘 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀢𑀲𑁆𑀫𑀸 𑀮𑁄𑀪𑀸𑀤𑀻𑀳𑀺, 𑀅𑀮𑁄𑀪𑀸𑀤𑀻𑀳𑀺 𑀘 𑀲𑀳𑀺𑀢𑀲𑁆𑀲 𑀫𑀦𑀲𑁆𑀲 𑀉𑀲𑁆𑀲𑀦𑁆𑀦𑀢𑀸𑀬 𑀧𑀭𑀺𑀢𑁆𑀢𑀤𑀻𑀧𑀯𑀸𑀲𑀻𑀳𑀺 𑀲𑀤𑁆𑀥𑀺𑀁 𑀘𑀢𑀼𑀤𑀻𑀧𑀯𑀸𑀲𑀺𑀦𑁄 𑀲𑀢𑁆𑀢𑀯𑀺𑀲𑁂𑀲𑀸 𑀫𑀦𑀼𑀲𑁆𑀲𑀸𑀢𑀺 𑀯𑀼𑀘𑁆𑀘𑀦𑁆𑀢𑀻’’𑀢𑀺. 𑀮𑁄𑀓𑀺𑀬𑀸 𑀧𑀦 ‘‘𑀫𑀦𑀼𑀦𑁄 𑀅𑀧𑀘𑁆𑀘𑀪𑀸𑀯𑁂𑀦 𑀫𑀦𑀼𑀲𑁆𑀲𑀸’’𑀢𑀺 𑀯𑀤𑀦𑁆𑀢𑀺. 𑀫𑀦𑀼 𑀦𑀸𑀫 𑀧𑀞𑀫𑀓𑀧𑁆𑀧𑀺𑀓𑁄 𑀮𑁄𑀓𑀫𑀭𑀺𑀬𑀸𑀤𑀸𑀬 𑀆𑀤𑀺𑀪𑀽𑀢𑁄 𑀲𑀢𑁆𑀢𑀸𑀦𑀁 𑀳𑀺𑀢𑀸𑀳𑀺𑀢𑀯𑀺𑀥𑀸𑀬𑀓𑁄 𑀓𑀢𑁆𑀢𑀩𑁆𑀩𑀸𑀓𑀢𑁆𑀢𑀩𑁆𑀩𑀢𑀸𑀲𑀼 𑀦𑀺𑀬𑁄𑀚𑀦𑀢𑀸𑀯𑀲𑁂𑀦 𑀧𑀺𑀢𑀼𑀝𑁆𑀞𑀸𑀦𑀺𑀬𑁄, 𑀬𑁄 𑀲𑀸𑀲𑀦𑁂 ‘‘𑀫𑀳𑀸𑀲𑀫𑁆𑀫𑀢𑁄’’𑀢𑀺 𑀯𑀼𑀘𑁆𑀘𑀢𑀺 𑀅𑀫𑁆𑀳𑀸𑀓𑀁 𑀫𑀳𑀸𑀩𑁄𑀥𑀺𑀲𑀢𑁆𑀢𑁄, 𑀧𑀘𑁆𑀘𑀓𑁆𑀔𑀢𑁄, 𑀧𑀭𑀫𑁆𑀧𑀭𑀸 𑀘 𑀢𑀲𑁆𑀲 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀬𑀁 𑀞𑀺𑀢𑀸 𑀲𑀢𑁆𑀢𑀸 𑀧𑀼𑀢𑁆𑀢𑀲𑀤𑀺𑀲𑀢𑀸𑀬 ‘‘𑀫𑀦𑀼𑀲𑁆𑀲𑀸, 𑀫𑀸𑀦𑀼𑀲𑀸’’𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁄 𑀏𑀯 𑀳𑀺 𑀢𑁂 ‘‘𑀫𑀸𑀦𑀯𑀸, 𑀫𑀦𑀼𑀚𑀸’’𑀢𑀺 𑀘 𑀯𑁄𑀳𑀭𑀻𑀬𑀦𑁆𑀢𑀺. 𑀫𑀦𑀼𑀲𑁆𑀲𑀪𑀽𑀢𑀲𑁆𑀲𑀸𑀢𑀺 𑀫𑀦𑀼𑀲𑁆𑀲𑁂𑀲𑀼 𑀪𑀽𑀢𑀲𑁆𑀲 𑀚𑀸𑀢𑀲𑁆𑀲, 𑀫𑀦𑀼𑀲𑁆𑀲𑀪𑀸𑀯𑀁 𑀯𑀸 𑀧𑀢𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀘 𑀦𑀬𑁄 𑀮𑁄𑀓𑀺𑀬𑀫𑀳𑀸𑀚𑀦𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑁄. 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀦 𑀲𑀦𑁆𑀢𑀸𑀦𑀲𑁆𑀲 𑀫𑀳𑀸𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀓𑀼𑀲𑀮𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀬𑀁 𑀲𑀫𑁆𑀫𑀤𑁂𑀯 𑀅𑀪𑀺𑀲𑀗𑁆𑀔𑀢𑀢𑁆𑀢𑀸 𑀢𑁂𑀲𑀁 𑀲𑀼𑀕𑀢𑀺𑀬𑀁, 𑀅𑀢𑁆𑀢𑀦𑁄 𑀉𑀧𑁆𑀧𑀚𑁆𑀚𑀦𑀤𑀼𑀕𑁆𑀕𑀢𑀺𑀬𑀜𑁆𑀘 𑀦𑀺𑀩𑁆𑀩𑀢𑁆𑀢𑀸𑀦𑀁 𑀓𑀼𑀲𑀮𑀓𑀫𑁆𑀫𑀁 𑀕𑀭𑀼𑀢𑀭𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀓𑀸𑀭𑀡𑀁 𑀯𑀸 𑀏𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀏𑀯𑀭𑀽𑀧𑁂 𑀅𑀢𑁆𑀢𑀪𑀸𑀯𑁂𑀢𑀺 𑀳𑀢𑁆𑀣𑀺𑀆𑀤𑀺𑀅𑀢𑁆𑀢𑀪𑀸𑀯𑁂. 𑀞𑀺𑀢𑁂𑀦 𑀓𑀢𑀓𑀫𑁆𑀫𑀁 𑀦 𑀲𑀓𑁆𑀓𑀸 𑀲𑀼𑀔𑁂𑀦 𑀤𑀻𑀧𑁂𑀢𑀼𑀁 𑀮𑁄𑀓𑁂 𑀅𑀧𑁆𑀧𑀜𑁆𑀜𑀸𑀢𑀭𑀽𑀧𑀢𑁆𑀢𑀸. 𑀲𑀼𑀔𑁂𑀦 𑀤𑀻𑀧𑁂𑀢𑀼𑀁 ‘‘𑀅𑀲𑀼𑀓𑀲𑁆𑀫𑀺𑀁 𑀤𑁂𑀲𑁂 𑀅𑀲𑀼𑀓𑀲𑁆𑀫𑀺𑀁 𑀦𑀕𑀭𑁂 𑀅𑀲𑀼𑀓𑁄 𑀦𑀸𑀫 𑀭𑀸𑀚𑀸, 𑀩𑁆𑀭𑀸𑀳𑁆𑀫𑀡𑁄 𑀳𑀼𑀢𑁆𑀯𑀸 𑀇𑀫𑀁 𑀓𑀼𑀲𑀮𑀓𑀫𑁆𑀫𑀁 𑀅𑀓𑀸𑀲𑀻’’𑀢𑀺 𑀏𑀯𑀁 𑀲𑀼𑀯𑀺𑀜𑁆𑀜𑀸𑀧𑀬𑀪𑀸𑀯𑀢𑁄. 𑀣𑀺𑀭𑀕𑁆𑀕𑀳𑀡𑁄𑀢𑀺 𑀅𑀲𑀺𑀣𑀺𑀮𑀕𑁆𑀕𑀸𑀳𑀻 𑀣𑀸𑀫𑀧𑁆𑀧𑀢𑁆𑀢𑀕𑁆𑀕𑀳𑀡𑁄. 𑀦𑀺𑀘𑁆𑀘𑀮𑀕𑁆𑀕𑀳𑀡𑁄𑀢𑀺 𑀅𑀘𑀜𑁆𑀘𑀮𑀕𑁆𑀕𑀸𑀳𑀻 𑀢𑀢𑁆𑀣 𑀓𑁂𑀦𑀘𑀺𑀧𑀺 𑀅𑀲𑀁𑀳𑀸𑀭𑀺𑀬𑁄. 𑀧𑀝𑀺𑀓𑀼𑀝𑀢𑀻𑀢𑀺 𑀲𑀁𑀓𑀼𑀝𑀢𑀺, 𑀚𑀺𑀕𑀼𑀘𑁆𑀙𑀦𑀯𑀲𑁂𑀦 𑀯𑀺𑀯𑀝𑁆𑀝𑀢𑀺 𑀯𑀸. 𑀧𑀲𑀸𑀭𑀺𑀬𑀢𑀻𑀢𑀺 𑀯𑀺𑀢𑁆𑀣𑀢𑀁 𑀳𑁄𑀢𑀺 𑀯𑁂𑀧𑀼𑀮𑁆𑀮𑀁 𑀧𑀸𑀧𑀼𑀡𑀸𑀢𑀺.

𑀢𑀯𑁂𑀲𑁄 𑀫𑀳𑀸𑀲𑀫𑀼𑀤𑁆𑀤𑀲𑀤𑀺𑀲𑁄𑀢𑀺 𑀏𑀲𑁄 𑀉𑀤𑀓𑁄𑀖𑁄 𑀢𑁂𑀯 𑀫𑀳𑀸𑀲𑀫𑀼𑀤𑁆𑀤𑀲𑀤𑀺𑀲𑁄.

𑀤𑀻𑀬𑀢𑀺 𑀏𑀢𑁂𑀦𑀸𑀢𑀺 𑀤𑀸𑀦𑀁, 𑀧𑀭𑀺𑀘𑁆𑀘𑀸𑀕𑀘𑁂𑀢𑀦𑀸. 𑀤𑀺𑀬𑁆𑀬𑀦𑀯𑀲𑁂𑀦𑀸𑀢𑀺 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀧𑀭𑀺𑀬𑀢𑁆𑀢𑀁 𑀓𑀢𑁆𑀯𑀸 𑀧𑀭𑀺𑀘𑁆𑀘𑀚𑀦𑀯𑀲𑁂𑀦 𑀤𑀸𑀦𑀁. 𑀲𑀁𑀯𑀺𑀪𑀸𑀕𑀓𑀭𑀡𑀯𑀲𑁂𑀦𑀸𑀢𑀺 𑀢𑀲𑁆𑀲𑁂𑀯 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀧𑀭𑀲𑁆𑀲 𑀲𑀁𑀯𑀺𑀪𑀚𑀦𑀯𑀲𑁂𑀦 𑀲𑀁𑀯𑀺𑀪𑀸𑀕𑁄, 𑀢𑀣𑀸𑀧𑀯𑀢𑁆𑀢𑀸 𑀘𑁂𑀢𑀦𑀸. 𑀲𑀻𑀮𑀲𑀫𑀸𑀤𑀸𑀦𑁂𑀢𑀺 𑀲𑀻𑀮𑀲𑁆𑀲 𑀲𑀫𑁆𑀫𑀤𑁂𑀯 𑀆𑀤𑀸𑀦𑁂, 𑀕𑀳𑀡𑁂 𑀧𑀯𑀢𑁆𑀢𑀦𑁂𑀢𑀺 𑀅𑀢𑁆𑀣𑁄. 𑀢𑀁 𑀧𑀯𑀢𑁆𑀢𑀺𑀓𑀸𑀮𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀽𑀭𑀡𑀓𑀸𑀮𑁂’’𑀢𑀺 𑀆𑀳. 𑀫𑀸𑀢𑀼 𑀳𑀺𑀢𑁄 𑀫𑀢𑁆𑀢𑁂𑀬𑁆𑀬𑁄, 𑀬𑀲𑁆𑀲 𑀧𑀦 𑀥𑀫𑁆𑀫𑀲𑁆𑀲 𑀯𑀲𑁂𑀦 𑀲𑁄 ‘‘𑀫𑀢𑁆𑀢𑁂𑀬𑁆𑀬𑁄’’𑀢𑀺 𑀯𑀼𑀘𑁆𑀘𑀢𑀺, 𑀲𑁄 𑀫𑀢𑁆𑀢𑁂𑀬𑁆𑀬𑀢𑀸𑀢𑀺 𑀆𑀳 ‘‘𑀫𑀸𑀢𑀼 𑀓𑀸𑀢𑀩𑁆𑀩𑀯𑀢𑁆𑀢𑁂’’𑀢𑀺. 𑀏𑀲𑁂𑀯 𑀦𑀬𑁄 ‘‘𑀧𑁂𑀢𑁆𑀢𑁂𑀬𑁆𑀬𑀢𑀸𑀬𑀸’’𑀢𑀺𑀆𑀤𑀻𑀲𑀼. 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀲𑀽𑀢𑀺 𑀅𑀜𑁆𑀜𑀫𑀜𑁆𑀜𑀯𑀺𑀲𑀺𑀝𑁆𑀞𑁂𑀲𑀼 𑀅𑀜𑁆𑀜𑁂𑀲𑀼, 𑀢𑁂 𑀧𑀦 𑀓𑀼𑀲𑀮𑀪𑀸𑀯𑁂𑀦 𑀯𑀼𑀢𑁆𑀢𑀸 𑀓𑀼𑀲𑀮𑀸𑀢𑀺 𑀆𑀳 ‘‘𑀏𑀯𑀭𑀽𑀧𑁂𑀲𑀽’’𑀢𑀺. 𑀅𑀥𑀺𑀓𑀼𑀲𑀮𑁂𑀲𑀽𑀢𑀺 𑀅𑀪𑀺𑀯𑀺𑀲𑀺𑀝𑁆𑀞𑁂𑀲𑀼 𑀓𑀼𑀲𑀮𑁂𑀲𑀼, 𑀲𑀸 𑀧𑀦 𑀅𑀪𑀺𑀯𑀺𑀲𑀺𑀝𑁆𑀞𑀢𑀸 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀳𑁄𑀢𑀺. 𑀬𑀁 𑀧𑀦𑁂𑀢𑁆𑀣 𑀉𑀓𑁆𑀓𑀁𑀲𑀕𑀢𑀁 𑀅𑀥𑀺𑀓𑀼𑀲𑀮𑀁, 𑀢𑀤𑀼𑀓𑁆𑀓𑀁𑀲𑀦𑀬𑁂𑀦 𑀇𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀢𑁆𑀣𑀺 𑀓𑀼𑀲𑀮𑀸, 𑀅𑀢𑁆𑀣𑀺 𑀅𑀥𑀺𑀓𑀼𑀲𑀮𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀦𑀼 𑀧𑀜𑁆𑀜𑀸𑀧𑀸𑀭𑀫𑀺𑀲𑀗𑁆𑀕𑀳𑀜𑀸𑀡𑀲𑀫𑁆𑀪𑀸𑀭𑀪𑀽𑀢𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀝𑀺𑀮𑀸𑀪𑀧𑀘𑁆𑀘𑀬𑀸 𑀓𑀼𑀲𑀮𑀸 𑀦𑀸𑀫, 𑀇𑀫𑁂 𑀧𑀦 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀦𑀺𑀩𑁆𑀩𑀢𑁆𑀢𑀓𑀸 𑀧𑀼𑀜𑁆𑀜𑀲𑀫𑁆𑀪𑀸𑀭𑀪𑀽𑀢𑀸 𑀓𑀲𑁆𑀫𑀸 𑀢𑀣𑀸 𑀯𑀼𑀢𑁆𑀢𑀸𑀢𑀺? 𑀲𑀩𑁆𑀩𑁂𑀲𑀫𑁆𑀧𑀺 𑀫𑀳𑀸𑀩𑁄𑀥𑀺𑀲𑀢𑁆𑀢𑀲𑀦𑁆𑀢𑀸𑀦𑀕𑀢𑀸𑀦𑀁 𑀧𑀸𑀭𑀫𑀺𑀥𑀫𑁆𑀫𑀸𑀦𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀝𑀺𑀮𑀸𑀪𑀧𑀘𑁆𑀘𑀬𑀪𑀸𑀯𑀢𑁄. 𑀫𑀳𑀸𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀳𑀺 𑀫𑀳𑀸𑀧𑀼𑀭𑀺𑀲𑁄 𑀬𑀁 𑀓𑀺𑀜𑁆𑀘𑀺 𑀧𑀼𑀜𑁆𑀜𑀁 𑀓𑀭𑁄𑀢𑀺, 𑀲𑀩𑁆𑀩𑀁 𑀢𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀲𑀫𑀥𑀺𑀕𑀫𑀸𑀬𑁂𑀯 𑀧𑀭𑀺𑀡𑀸𑀫𑁂𑀢𑀺. 𑀢𑀣𑀸 𑀳𑀺 𑀲𑀲𑀫𑁆𑀪𑀸𑀭𑀸𑀩𑁆𑀬𑀸𑀲𑁄, 𑀤𑀻𑀖𑀓𑀸𑀮𑀸𑀩𑁆𑀬𑀸𑀲𑁄, 𑀦𑀺𑀭𑀦𑁆𑀢𑀭𑀸𑀩𑁆𑀬𑀸𑀲𑁄, 𑀲𑀓𑁆𑀓𑀘𑁆𑀘𑀸𑀩𑁆𑀬𑀸𑀲𑁄𑀢𑀺 𑀘𑀢𑁆𑀢𑀸𑀭𑁄 𑀅𑀩𑁆𑀬𑀸𑀲𑀸 𑀘𑀢𑀼𑀭𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀺𑀢𑀲𑀫𑁆𑀩𑀦𑁆𑀥𑀸 𑀅𑀦𑀼𑀧𑀼𑀩𑁆𑀩𑁂𑀦 𑀫𑀳𑀸𑀩𑁄𑀥𑀺𑀝𑁆𑀞𑀸𑀦𑀸 𑀲𑀫𑁆𑀧𑀚𑁆𑀚𑀦𑁆𑀢𑀺.

𑀲𑀓𑀺𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀅𑀦𑁂𑀓𑀯𑀸𑀭𑀫𑁆𑀧𑀺 𑀓𑀢𑀁 𑀯𑀺𑀚𑀸𑀢𑀺𑀬𑁂𑀦 𑀅𑀦𑁆𑀢𑀭𑀺𑀢𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀪𑀺𑀡𑁆𑀳𑀓𑀭𑀡𑁂𑀦𑀸𑀢𑀺 𑀩𑀳𑀼𑀮𑀻𑀓𑀸𑀭𑁂𑀦. 𑀉𑀧𑀘𑀺𑀢𑀦𑁆𑀢𑀺 𑀉𑀧𑀭𑀽𑀧𑀭𑀺 𑀯𑀟𑁆𑀠𑀺𑀢𑀁. 𑀧𑀺𑀡𑁆𑀟𑀻𑀓𑀢𑀦𑁆𑀢𑀺 𑀧𑀺𑀡𑁆𑀟𑀲𑁄 𑀓𑀢𑀁. 𑀭𑀸𑀲𑀻𑀓𑀢𑀦𑁆𑀢𑀺 𑀭𑀸𑀲𑀺𑀪𑀸𑀯𑁂𑀦 𑀓𑀢𑀁. 𑀅𑀦𑁂𑀓𑀓𑁆𑀔𑀢𑁆𑀢𑀼𑀜𑁆𑀳𑀺 𑀧𑀯𑀢𑁆𑀢𑀺𑀬𑀫𑀸𑀦𑀁 𑀓𑀼𑀲𑀮𑀓𑀫𑁆𑀫𑀁 𑀲𑀦𑁆𑀢𑀸𑀦𑁂 𑀢𑀣𑀸𑀮𑀤𑁆𑀥𑀧𑀭𑀺𑀪𑀸𑀯𑀦𑀁 𑀧𑀺𑀡𑁆𑀟𑀻𑀪𑀽𑀢𑀁 𑀯𑀺𑀬, 𑀭𑀸𑀲𑀻𑀪𑀽𑀢𑀁 𑀯𑀺𑀬 𑀘 𑀳𑁄𑀢𑀺. 𑀯𑀺𑀧𑀸𑀓𑀁 𑀧𑀢𑀺 𑀲𑀁𑀳𑀘𑁆𑀘𑀓𑀸𑀭𑀺𑀪𑀸𑀯𑀢𑁆𑀢𑀸 𑀘𑀓𑁆𑀓𑀯𑀸𑀴𑀁 𑀅𑀢𑀺𑀲𑀫𑁆𑀩𑀸𑀥𑀁 𑀪𑀯𑀕𑁆𑀕𑀁 𑀅𑀢𑀺𑀦𑀻𑀘𑀁, 𑀲𑀘𑁂 𑀧𑀦𑁂 𑀢𑀁 𑀭𑀽𑀧𑀁 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀧𑀼𑀮𑀢𑁆𑀢𑀸𑀢𑀺 𑀫𑀳𑀦𑁆𑀢𑀢𑁆𑀢𑀸. 𑀬𑀲𑁆𑀫𑀸 𑀧𑀦 𑀢𑀁 𑀓𑀫𑁆𑀫𑀁 𑀫𑁂𑀢𑁆𑀢𑀸𑀓𑀭𑀼𑀡𑀸𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀳𑀺 𑀧𑀭𑀺𑀕𑁆𑀕𑀳𑀺𑀢𑀢𑀸𑀬 𑀤𑀼𑀭𑀲𑀫𑀼𑀲𑁆𑀲𑀸𑀭𑀺𑀢𑀁 𑀧𑀫𑀸𑀡𑀓𑀭𑀡𑀥𑀫𑁆𑀫𑀦𑁆𑀢𑀺 𑀧𑀫𑀸𑀡𑀭𑀳𑀺𑀢𑀢𑀸𑀬 ‘‘𑀅𑀧𑁆𑀧𑀫𑀸𑀡’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺, 𑀢𑀲𑁆𑀫𑀸 ‘‘𑀅𑀧𑁆𑀧𑀫𑀸𑀡𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁.

𑀅𑀥𑀺𑀪𑀯𑀢𑀻𑀢𑀺 𑀨𑀮𑀲𑁆𑀲 𑀉𑀴𑀸𑀭𑀪𑀸𑀯𑁂𑀦 𑀅𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀺. 𑀅𑀢𑁆𑀣𑀢𑁄 𑀧𑀡𑀻𑀢𑀧𑀡𑀻𑀢𑀸𑀦𑀁 𑀪𑁄𑀕𑀸𑀦𑀁 𑀧𑀝𑀺𑀮𑀸𑀪𑁄 𑀏𑀯𑀸𑀢𑀺 𑀆𑀳 ‘‘𑀅𑀢𑀺𑀭𑁂𑀓𑀁 𑀮𑀪𑀢𑀻’’𑀢𑀺. 𑀅𑀥𑀺𑀕𑀘𑁆𑀙𑀢𑀻𑀢𑀺 𑀯𑀺𑀦𑁆𑀤𑀢𑀺, 𑀦𑀺𑀩𑁆𑀩𑀢𑁆𑀢𑀫𑀸𑀦𑁄𑀯 𑀢𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀓𑀤𑁂𑀲𑁂𑀦 𑀅𑀨𑀼𑀲𑀺𑀢𑁆𑀯𑀸 𑀲𑀩𑁆𑀩𑀧𑁆𑀧𑀤𑁂𑀲𑁂𑀳𑀺 𑀨𑀼𑀲𑀦𑀢𑁄 𑀲𑀩𑁆𑀩𑀧𑁆𑀧𑀤𑁂𑀲𑁂𑀳𑀺 𑀨𑀼𑀲𑀦𑁆𑀢𑀺𑀬𑁄 𑀏𑀢𑁂𑀲𑀁 𑀧𑀸𑀤𑀢𑀮𑀸𑀦𑀁 𑀲𑀦𑁆𑀢𑀻𑀢𑀺 ‘‘𑀲𑀩𑁆𑀩𑀸𑀯𑀦𑁆𑀢𑁂𑀳𑀺 𑀧𑀸𑀤𑀢𑀮𑁂𑀳𑀻’’𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀦𑀺𑀓𑁆𑀔𑀺𑀧𑀦𑁂 𑀲𑀩𑁆𑀩𑁂 𑀧𑀸𑀤𑀢𑀮𑀧𑁆𑀧𑀤𑁂𑀲𑀸 𑀲𑀁𑀳𑀘𑁆𑀘𑀓𑀸𑀭𑀺𑀦𑁄 𑀅𑀦𑀺𑀦𑁆𑀦𑀢𑀸𑀬 𑀲𑀫𑀪𑀸𑀯𑀢𑁄, 𑀏𑀯𑀁 𑀉𑀤𑁆𑀥𑀭𑀡𑁂𑀧𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀫𑀁 𑀨𑀼𑀲𑀢𑀺, 𑀲𑀫𑀁 𑀉𑀤𑁆𑀥𑀭𑀢𑀻’’𑀢𑀺. 𑀇𑀤𑀸𑀦𑀺 𑀇𑀫𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀲𑁆𑀲 𑀲𑀫𑀥𑀺𑀕𑀫𑁂𑀦 𑀮𑀤𑁆𑀥𑀩𑁆𑀩𑀦𑀺𑀲𑁆𑀲𑀦𑁆𑀤𑀨𑀮𑀯𑀺𑀪𑀸𑀯𑀦𑀫𑀼𑀔𑁂𑀦 𑀆𑀦𑀼𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀲𑀘𑁂𑀧𑀺 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀭𑀓𑀦𑁆𑀢𑀺 𑀆𑀯𑀸𑀝𑀁. 𑀅𑀦𑁆𑀢𑁄 𑀧𑀯𑀺𑀲𑀢𑀺 𑀲𑀫𑀪𑀸𑀯𑀸𑀧𑀢𑁆𑀢𑀺𑀬𑀸. ‘‘𑀘𑀓𑁆𑀓𑀮𑀓𑁆𑀔𑀡𑁂𑀦𑀧𑀢𑀺𑀝𑁆𑀞𑀸𑀢𑀩𑁆𑀩𑀝𑁆𑀞𑀸𑀦’’𑀦𑁆𑀢𑀺 𑀇𑀤𑀁 𑀬𑀁 𑀪𑀽𑀫𑀺𑀧𑁆𑀧𑀤𑁂𑀲𑀁 𑀧𑀸𑀤𑀢𑀮𑀁 𑀨𑀼𑀲𑀢𑀺, 𑀢𑀢𑁆𑀣 𑀘𑀓𑁆𑀓𑀮𑀓𑁆𑀔𑀡𑀫𑁆𑀧𑀺 𑀨𑀼𑀲𑀦𑀯𑀲𑁂𑀦 𑀧𑀢𑀺𑀝𑁆𑀞𑀸𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀲𑁆𑀲 𑀧𑀦 𑀢𑀣𑀸 𑀧𑀢𑀺𑀝𑁆𑀞𑀸𑀦𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑀢𑀸𑀬 𑀏𑀯𑀸𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑀢𑀸𑀬 𑀆𑀦𑀼𑀪𑀸𑀯𑀓𑀺𑀢𑁆𑀢𑀦𑁂 ‘‘𑀮𑀓𑁆𑀔𑀡𑀦𑁆𑀢𑀭𑀸𑀦𑀬𑀦𑀁 𑀓𑀺𑀫𑀢𑁆𑀣𑀺𑀬’’𑀦𑁆𑀢𑀺 𑀦 𑀘𑀺𑀦𑁆𑀢𑁂𑀢𑀩𑁆𑀩𑀁. 𑀲𑀻𑀮𑀢𑁂𑀚𑁂𑀦𑀸𑀢𑀺 𑀲𑀻𑀮𑀧𑁆𑀧𑀪𑀸𑀯𑁂𑀦. 𑀧𑀼𑀜𑁆𑀜𑀢𑁂𑀚𑁂𑀦𑀸𑀢𑀺 𑀓𑀼𑀲𑀮𑀧𑁆𑀧𑀪𑀸𑀯𑁂𑀦. 𑀥𑀫𑁆𑀫𑀢𑁂𑀚𑁂𑀦𑀸𑀢𑀺 𑀜𑀸𑀡𑀧𑁆𑀧𑀪𑀸𑀯𑁂𑀦. 𑀢𑀻𑀳𑀺𑀧𑀺 𑀧𑀤𑁂𑀳𑀺 𑀪𑀕𑀯𑀢𑁄 𑀩𑀼𑀤𑁆𑀥𑀪𑀽𑀢𑀲𑁆𑀲 𑀥𑀫𑁆𑀫𑀸 𑀕𑀳𑀺𑀢𑀸, ‘‘𑀤𑀲𑀦𑁆𑀦𑀁 𑀧𑀸𑀭𑀫𑀻𑀦’’𑀦𑁆𑀢𑀺 𑀇𑀫𑀺𑀦𑀸 𑀩𑀼𑀤𑁆𑀥𑀓𑀭𑀥𑀫𑁆𑀫𑀸 𑀕𑀳𑀺𑀢𑀸.

𑁨𑁦𑁨. 𑀫𑀳𑀸𑀲𑀫𑀼𑀤𑁆𑀤𑁄𑀯 𑀲𑀻𑀫𑀸 𑀲𑀩𑁆𑀩𑀪𑀽𑀫𑀺𑀲𑁆𑀲𑀭𑀪𑀸𑀯𑀢𑁄. ‘‘𑀅𑀔𑀺𑀮𑀫𑀦𑀺𑀫𑀺𑀢𑁆𑀢𑀫𑀓𑀡𑁆𑀝𑀓’’𑀦𑁆𑀢𑀺 𑀢𑀻𑀳𑀺𑀧𑀺 𑀧𑀤𑁂𑀳𑀺 𑀣𑁂𑀬𑁆𑀬𑀸𑀪𑀸𑀯𑁄𑀯 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀦𑀺𑀘𑁆𑀘𑁄𑀭’’𑀦𑁆𑀢𑀺𑀆𑀤𑀺. 𑀔𑀭𑀲𑀫𑁆𑀨𑀲𑁆𑀲𑀝𑁆𑀞𑁂𑀦𑀸𑀢𑀺 𑀖𑀝𑁆𑀝𑀦𑁂𑀦 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑀪𑀸𑀯𑁂𑀦 𑀔𑀺𑀮𑀸𑀢𑀺. 𑀉𑀧𑀤𑁆𑀤𑀯𑀧𑀘𑁆𑀘𑀬𑀝𑁆𑀞𑁂𑀦𑀸𑀢𑀺 𑀅𑀦𑀢𑁆𑀣𑀳𑁂𑀢𑀼𑀢𑀸𑀬 𑀦𑀺𑀫𑀺𑀢𑁆𑀢𑀸𑀢𑀺. ‘‘𑀅𑀔𑀺𑀮’’𑀦𑁆𑀢𑀺𑀆𑀤𑀺𑀦𑀸 𑀏𑀓𑀘𑀸𑀭𑀻𑀳𑀺 𑀘𑁄𑀭𑀸𑀪𑀸𑀯𑁄 𑀯𑀼𑀢𑁆𑀢𑁄, ‘‘𑀦𑀺𑀭𑀩𑁆𑀩𑀼𑀤’’𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀕𑀡𑀩𑀦𑁆𑀥𑀯𑀲𑁂𑀦 𑀯𑀺𑀘𑀭𑀡𑀘𑁄𑀭𑀸𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀕𑀼𑀫𑁆𑀩𑀁 𑀕𑀼𑀫𑁆𑀩𑀁 𑀳𑀼𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀯𑀺𑀓𑁆𑀔𑀫𑁆𑀪𑀦𑀻𑀬𑁄𑀢𑀺 𑀦 𑀯𑀺𑀩𑀦𑁆𑀥𑀦𑀻𑀬𑁄 𑀓𑁂𑀦𑀘𑀺 𑀅𑀧𑁆𑀧𑀝𑀺𑀩𑀸𑀳𑀦𑀻𑀬𑁄 𑀞𑀸𑀦𑀢𑁄 𑀅𑀦𑀺𑀓𑁆𑀓𑀟𑁆𑀠𑀦𑀻𑀬𑁄. 𑀧𑀝𑀺𑀧𑀓𑁆𑀔𑀁 𑀅𑀦𑀺𑀝𑁆𑀞𑀁 𑀅𑀢𑁆𑀣𑁂𑀢𑀻𑀢𑀺 𑀧𑀘𑁆𑀘𑀢𑁆𑀣𑀺𑀓𑁄, 𑀏𑀢𑁂𑀦 𑀧𑀸𑀓𑀝𑀪𑀸𑀯𑁂𑀦 𑀯𑀺𑀭𑁄𑀥𑀁 𑀅𑀓𑀭𑁄𑀦𑁆𑀢𑁄 𑀯𑁂𑀭𑀺𑀧𑀼𑀕𑁆𑀕𑀮𑁄 𑀯𑀼𑀢𑁆𑀢𑁄. 𑀧𑀝𑀺𑀯𑀺𑀭𑀼𑀤𑁆𑀥𑁄 𑀅𑀫𑀺𑀢𑁆𑀢𑁄 𑀧𑀘𑁆𑀘𑀸𑀫𑀺𑀢𑁆𑀢𑁄, 𑀏𑀢𑁂𑀦 𑀧𑀸𑀓𑀝𑀪𑀸𑀯𑁂𑀦 𑀯𑀺𑀭𑁄𑀥𑀁 𑀓𑀭𑁄𑀦𑁆𑀢𑁄 𑀯𑁂𑀭𑀺𑀧𑀼𑀕𑁆𑀕𑀮𑁄 𑀯𑀼𑀢𑁆𑀢𑁄. 𑀯𑀺𑀓𑁆𑀔𑀫𑁆𑀪𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀅𑀜𑁆𑀜𑀤𑀢𑁆𑀣𑀼 𑀲𑀬𑀫𑁂𑀯 𑀯𑀺𑀖𑀸𑀢𑀩𑁆𑀬𑀲𑀦𑀁 𑀧𑀸𑀧𑀼𑀡𑀺𑀁𑀲𑀼 𑀘𑁂𑀯 𑀲𑀸𑀯𑀓𑀢𑁆𑀢𑀜𑁆𑀘 𑀧𑀯𑁂𑀤𑁂𑀲𑀼𑀁.

‘‘𑀓𑀫𑁆𑀫’’𑀦𑁆𑀢𑀺𑀆𑀤𑀻𑀲𑀼 𑀓𑀫𑁆𑀫𑀁 𑀦𑀸𑀫 𑀩𑀼𑀤𑁆𑀥𑀪𑀸𑀯𑀁 𑀉𑀤𑁆𑀤𑀺𑀲𑁆𑀲 𑀓𑀢𑀽𑀧𑀘𑀺𑀢𑁄 𑀮𑀓𑁆𑀔𑀡𑀲𑀁𑀯𑀢𑁆𑀢𑀦𑀺𑀬𑁄 𑀧𑀼𑀜𑁆𑀜𑀲𑀫𑁆𑀪𑀸𑀭𑁄. 𑀢𑁂𑀦𑀸𑀳 ‘‘𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀥𑀺𑀓𑀸𑀦𑀻’’𑀢𑀺𑀆𑀤𑀺. 𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀦𑀸𑀫 𑀢𑀲𑁆𑀲𑁂𑀯 𑀧𑀼𑀜𑁆𑀜𑀲𑀫𑁆𑀪𑀸𑀭𑀲𑁆𑀲 𑀓𑀭𑀡𑀓𑀸𑀮𑁂 𑀓𑁂𑀦𑀘𑀺 𑀅𑀓𑀫𑁆𑀧𑀦𑀻𑀬𑀲𑁆𑀲 𑀤𑀴𑁆𑀳𑀸𑀯𑀢𑁆𑀣𑀺𑀢𑀪𑀸𑀯𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑀢𑀸𑀲𑀗𑁆𑀔𑀸𑀢𑀲𑁆𑀲 𑀮𑀓𑁆𑀔𑀡𑀲𑁆𑀲 𑀧𑀭𑁂𑀳𑀺 𑀅𑀯𑀺𑀓𑁆𑀔𑀫𑁆𑀪𑀦𑀻𑀬𑀢𑀸𑀬 𑀜𑀸𑀧𑀓𑀦𑀺𑀫𑀺𑀢𑁆𑀢𑀪𑀸𑀯𑁄, 𑀲𑁆𑀯𑀸𑀬𑀁 𑀦𑀺𑀫𑀺𑀢𑁆𑀢𑀪𑀸𑀯𑁄 𑀢𑀲𑁆𑀲𑁂𑀯 𑀮𑀓𑁆𑀔𑀡𑀲𑁆𑀲𑀸𑀢𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀦𑀸𑀫…𑀧𑁂… 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀞𑀸𑀦𑀕𑀫𑀦𑁂𑀲𑀼 𑀧𑀸𑀤𑀸𑀦𑀁 𑀤𑀴𑁆𑀳𑀸𑀯𑀢𑁆𑀣𑀺𑀢𑀪𑀸𑀯𑁄 𑀮𑀓𑁆𑀔𑀡𑀁 𑀦𑀸𑀫. 𑀧𑀸𑀤𑀸𑀦𑀁 𑀪𑀽𑀫𑀺𑀬𑀁 𑀲𑀫𑀁 𑀦𑀺𑀓𑁆𑀔𑀺𑀧𑀦𑀁, 𑀧𑀸𑀤𑀢𑀮𑀸𑀦𑀁 𑀲𑀩𑁆𑀩𑀪𑀸𑀕𑁂𑀳𑀺 𑀨𑀼𑀲𑀦𑀁, 𑀲𑀫𑀫𑁂𑀯 𑀉𑀤𑁆𑀥𑀭𑀡𑀁, 𑀢𑀲𑁆𑀫𑀸 𑀲𑀼𑀝𑁆𑀞𑀼 𑀲𑀫𑀁 𑀲𑀩𑁆𑀩𑀪𑀸𑀕𑁂𑀳𑀺 𑀧𑀢𑀺𑀝𑁆𑀞𑀺𑀢𑀸 𑀧𑀸𑀤𑀸 𑀏𑀢𑀲𑁆𑀲𑀸𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑁄, 𑀢𑀲𑁆𑀲 𑀪𑀸𑀯𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑀢𑀸𑀢𑀺 𑀯𑀼𑀘𑁆𑀘𑀢𑀺 𑀮𑀓𑁆𑀔𑀡𑀁. 𑀲𑀼𑀝𑁆𑀞𑀼 𑀲𑀫𑀁 𑀪𑀽𑀫𑀺𑀬𑀸 𑀨𑀼𑀲𑀦𑁂𑀦𑁂𑀯 𑀳𑀺 𑀦𑁂𑀲𑀁 𑀢𑀢𑁆𑀣 𑀤𑀴𑁆𑀳𑀸𑀯𑀢𑁆𑀣𑀺𑀢𑀪𑀸𑀯𑁄 𑀲𑀺𑀤𑁆𑀥𑁄, 𑀬𑀁 ‘‘𑀓𑀫𑁆𑀫𑀲𑀭𑀺𑀓𑁆𑀔𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀮𑀓𑁆𑀔𑀡𑀸𑀦𑀺𑀲𑀁𑀲𑁄𑀢𑀺 𑀮𑀓𑁆𑀔𑀡𑀧𑀝𑀺𑀮𑀸𑀪𑀲𑁆𑀲 𑀉𑀤𑁆𑀭𑀬𑁄, 𑀮𑀓𑁆𑀔𑀡𑀲𑀁𑀯𑀢𑁆𑀢𑀦𑀺𑀬𑀲𑁆𑀲 𑀓𑀫𑁆𑀫𑀲𑁆𑀲 𑀆𑀦𑀺𑀲𑀁𑀲𑀨𑀮𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀲𑁆𑀲𑀦𑁆𑀤𑀨𑀮𑀁 𑀧𑀦 𑀳𑁂𑀝𑁆𑀞𑀸 𑀪𑀸𑀯𑀺𑀢𑀫𑁂𑀯.

𑁨𑁦𑁩. 𑀓𑀫𑁆𑀫𑀸𑀤𑀺𑀪𑁂𑀤𑁂𑀢𑀺 𑀓𑀫𑁆𑀫𑀓𑀫𑁆𑀫𑀲𑀭𑀺𑀓𑁆𑀔𑀓𑀮𑀓𑁆𑀔𑀡 𑀮𑀓𑁆𑀔𑀡𑀸𑀦𑀺𑀲𑀁𑀲𑀯𑀺𑀲𑀜𑁆𑀜𑀺𑀢𑁂 𑀯𑀺𑀪𑀸𑀕𑁂. 𑀕𑀸𑀣𑀸𑀩𑀦𑁆𑀥𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀢𑁆𑀣𑁄 𑀧𑀦 𑀅𑀧𑀼𑀩𑁆𑀩𑀁 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑁄𑀭𑀸𑀡𑀓𑀢𑁆𑀣𑁂𑀭𑀸𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸. 𑀯𑀡𑁆𑀡𑀦𑀸𑀕𑀸𑀣𑀸𑀢𑀺 𑀣𑁄𑀫𑀦𑀸𑀕𑀸𑀣𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀕𑀳𑁂𑀢𑁆𑀯𑀸 𑀣𑁄𑀫𑀦𑀸𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸. 𑀅𑀧𑀭𑀪𑀸𑀕𑁂 𑀣𑁂𑀭𑀸 𑀦𑀸𑀫 𑀧𑀸𑀴𑀺𑀁, 𑀅𑀝𑁆𑀞𑀓𑀣𑀜𑁆𑀘 𑀧𑁄𑀢𑁆𑀣𑀓𑀸𑀭𑁄𑀧𑀦𑀯𑀲𑁂𑀦 𑀲𑀫𑀸𑀕𑀢𑀸 𑀫𑀳𑀸𑀣𑁂𑀭𑀸, 𑀬𑁂 𑀲𑀸𑀝𑁆𑀞𑀓𑀣𑀁 𑀧𑀺𑀝𑀓𑀢𑁆𑀢𑀬𑀁 𑀧𑁄𑀢𑁆𑀣𑀓𑀸𑀭𑀼𑀴𑁆𑀳𑀁 𑀓𑀢𑁆𑀯𑀸 𑀲𑀤𑁆𑀥𑀫𑁆𑀫𑀁 𑀅𑀤𑁆𑀥𑀦𑀺𑀬𑀘𑀺𑀭𑀝𑁆𑀞𑀺𑀢𑀺𑀓𑀁 𑀅𑀓𑀁𑀲𑀼. 𑀏𑀓𑀧𑀤𑀺𑀓𑁄𑀢𑀺 ‘‘𑀤𑀴𑁆𑀳𑀲𑀫𑀸𑀤𑀸𑀦𑁄 𑀅𑀳𑁄𑀲𑀻’’𑀢𑀺𑀆𑀤𑀺𑀧𑀸𑀞𑁂 𑀏𑀓𑁂𑀓𑀧𑀤𑀕𑀸𑀳𑀻. 𑀅𑀢𑁆𑀣𑀼𑀤𑁆𑀥𑀸𑀭𑁄𑀢𑀺 𑀢𑀤𑀢𑁆𑀣𑀲𑁆𑀲 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀉𑀤𑁆𑀥𑀭𑀡𑀢𑁄 𑀅𑀢𑁆𑀣𑀼𑀤𑁆𑀥𑀸𑀭𑀪𑀽𑀢𑁄, 𑀢𑀬𑀺𑀤𑀁 𑀧𑀸𑀴𑀺𑀬𑀁 𑀆𑀕𑀢𑀧𑀤𑀸𑀦𑀺 𑀕𑀳𑁂𑀢𑁆𑀯𑀸 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀢𑀤𑀢𑁆𑀣𑀯𑀺𑀘𑀸𑀭𑀡𑀪𑀸𑀯𑀤𑀲𑁆𑀲𑀦𑀁, 𑀦 𑀧𑀦 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀞𑀧𑀺𑀢𑀪𑀸𑀯𑀧𑀝𑀺𑀓𑁆𑀔𑀺𑀧𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀓𑀼𑀲𑀮𑀥𑀫𑁆𑀫𑀸𑀦𑀁 𑀯𑀘𑀻𑀲𑀘𑁆𑀘𑀲𑁆𑀲 𑀩𑀳𑀼𑀓𑀸𑀭𑀢𑀁, 𑀢𑀧𑁆𑀧𑀝𑀺𑀧𑀓𑁆𑀔𑀲𑁆𑀲 𑀘 𑀫𑀼𑀲𑀸𑀯𑀸𑀤𑀲𑁆𑀲 𑀫𑀳𑀸𑀲𑀸𑀯𑀚𑁆𑀚𑀢𑀁 𑀤𑀲𑁆𑀲𑁂𑀢𑀼𑀁 𑀅𑀦𑀦𑁆𑀢𑀭𑀫𑁂𑀯 𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑁂 𑀯𑀤𑀦𑁆𑀢𑁄𑀧𑀺 𑀢𑀢𑁄 𑀯𑀘𑀻𑀲𑀘𑁆𑀘𑀁 𑀦𑀻𑀳𑀭𑀺𑀢𑁆𑀯𑀸 𑀓𑀣𑁂𑀢𑀺 𑀲𑀘𑁆𑀘𑁂𑀢𑀺 𑀯𑀸 𑀲𑀦𑁆𑀦𑀺𑀥𑀸𑀦𑁂𑀯 ‘‘𑀥𑀫𑁆𑀫𑁂’’𑀢𑀺 𑀯𑀼𑀘𑁆𑀘𑀫𑀸𑀦𑀸 𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑀸 𑀏𑀯 𑀬𑀼𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀥𑀫𑁆𑀫𑁂𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑁂’’𑀢𑀺. 𑀕𑁄𑀩𑀮𑀻𑀩𑀤𑁆𑀤𑀜𑀸𑀬𑁂𑀦 𑀯𑀸 𑀏𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀦𑁆𑀤𑁆𑀭𑀺𑀬𑀤𑀫𑀦𑁂𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂. 𑀓𑀼𑀲𑀮𑀓𑀫𑁆𑀫𑀧𑀣𑀕𑁆𑀖𑀡𑁂𑀦𑀲𑁆𑀲 𑀯𑀸𑀭𑀺𑀢𑁆𑀢𑀲𑀻𑀮𑀫𑁂𑀯 𑀕𑀳𑀺𑀢𑀦𑁆𑀢𑀺 𑀇𑀢𑀭𑀫𑁆𑀧𑀺 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀲𑀁𑀬𑀫𑀲𑁆𑀲𑁂𑀯 𑀕𑀳𑀡𑀁 𑀓𑀢𑀦𑁆𑀢𑀺 ‘‘𑀲𑀁𑀬𑀫𑁂𑀢𑀺 𑀲𑀻𑀮𑀲𑀁𑀬𑀫𑁂’’𑀢𑀺 𑀯𑀼𑀢𑁆𑀢𑀁. 𑀲𑀼𑀘𑀺 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀯𑀲𑁂𑀦, 𑀢𑀁 𑀲𑁄𑀘𑁂𑀬𑁆𑀬𑀁, 𑀓𑀸𑀬𑀲𑀼𑀘𑀭𑀺𑀢𑀸𑀤𑀺. 𑀏𑀢𑀲𑁆𑀲𑁂𑀯 𑀳𑀺 𑀯𑀺𑀪𑀸𑀕𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀧𑀼𑀦 𑀯𑀼𑀢𑁆𑀢𑀁, 𑀫𑀦𑁄𑀲𑁄𑀘𑁂𑀬𑁆𑀬𑀕𑁆𑀕𑀳𑀡𑁂𑀦 𑀯𑀸 𑀛𑀸𑀦𑀸𑀤𑀺𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀦𑀫𑁆𑀧𑀺 𑀲𑀗𑁆𑀕𑀡𑁆𑀳𑀦𑀢𑁆𑀣𑀁 𑀲𑁄𑀘𑁂𑀬𑁆𑀬𑀕𑁆𑀕𑀳𑀡𑀁. 𑀆𑀮𑀬𑀪𑀽𑀢𑀦𑁆𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀅𑀥𑀺𑀝𑁆𑀞𑀸𑀦𑀪𑀽𑀢𑀁. 𑀉𑀧𑁄𑀲𑀣𑀓𑀫𑁆𑀫𑀦𑁆𑀢𑀺 𑀉𑀧𑁄𑀲𑀣𑀤𑀺𑀯𑀲𑁂 𑀲𑀫𑀸𑀤𑀺𑀬𑀺𑀢𑁆𑀯𑀸 𑀲𑀫𑀸𑀘𑀭𑀺𑀢𑀩𑁆𑀩𑀁 𑀧𑀼𑀜𑁆𑀜𑀓𑀫𑁆𑀫𑀁 𑀉𑀧𑁄𑀲𑀣𑁄 𑀲𑀳𑀘𑀭𑀡𑀜𑀸𑀬𑁂𑀦. ‘‘𑀅𑀯𑀺𑀳𑀺𑀁𑀲𑀸𑀬𑀸𑀢𑀺 𑀲𑀢𑁆𑀢𑀸𑀦𑀁 𑀅𑀯𑀺𑀳𑁂𑀞𑀦𑀸𑀬𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀧𑀦 𑀲𑀻𑀮𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀁. 𑀢𑀲𑁆𑀫𑀸 𑀅𑀯𑀺𑀳𑀺𑀁𑀲𑀸𑀬𑀸𑀢𑀺 𑀓𑀭𑀼𑀡𑀸𑀬𑀸𑀢𑀺 𑀅𑀢𑁆𑀣𑁄. 𑀅𑀯𑀺𑀳𑀺𑀁𑀲𑀸𑀕𑁆𑀕𑀳𑀡𑁂𑀦𑁂𑀯 𑀘𑁂𑀢𑁆𑀣 𑀅𑀧𑁆𑀧𑀫𑀜𑁆𑀜𑀸𑀲𑀸𑀫𑀜𑁆𑀜𑁂𑀦 𑀘𑀢𑁆𑀢𑀸𑀭𑁄𑀧𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑀸 𑀉𑀧𑀘𑀸𑀭𑀸𑀯𑀢𑁆𑀣𑀸 𑀕𑀳𑀺𑀢𑀸 𑀮𑀓𑁆𑀔𑀡𑀳𑀸𑀭𑀦𑀬𑁂𑀦. 𑀲𑀓𑀮𑀦𑁆𑀢𑀺 𑀅𑀦𑀯𑀲𑁂𑀲𑀁 𑀧𑀭𑀺𑀧𑀼𑀡𑁆𑀡𑀁. 𑀏𑀯𑀫𑁂𑀢𑁆𑀣 𑀓𑀸𑀫𑀸𑀯𑀘𑀭𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀮𑀓𑁆𑀔𑀡𑀲𑁆𑀲 𑀢𑀁𑀲𑀁𑀯𑀢𑁆𑀢𑀦𑀺𑀓𑀓𑀸𑀫𑀸𑀯𑀘𑀭𑀓𑀼𑀲𑀮𑀥𑀫𑁆𑀫𑀸 𑀏𑀯 𑀧𑀸𑀭𑀫𑀺𑀢𑀸𑀲𑀗𑁆𑀕𑀳𑀧𑀼𑀜𑁆𑀜𑀲𑀫𑁆𑀪𑀸𑀭𑀪𑀽𑀢𑀓𑀸𑀬𑀲𑀼𑀘𑀭𑀺𑀢𑀸𑀤𑀻𑀳𑀺 𑀤𑁆𑀯𑀸𑀤𑀲𑀥𑀸 𑀯𑀺𑀪𑀢𑁆𑀢𑀸 𑀏𑀯. 𑀕𑀸𑀣𑀸𑀬𑀁 ‘‘𑀲𑀘𑁆𑀘𑁂’’𑀢𑀺𑀆𑀤𑀺𑀦𑀸 𑀤𑀲𑀥𑀸 𑀲𑀗𑁆𑀕𑀬𑁆𑀳 𑀤𑀲𑁆𑀲𑀺𑀢𑀸. 𑀏𑀲 𑀦𑀬𑁄 𑀲𑁂𑀲𑀮𑀓𑁆𑀔𑀡𑁂𑀧𑀺.

𑀅𑀁𑀦𑀼𑀪𑀻𑀢𑀺 𑀕𑀸𑀣𑀸𑀲𑀼𑀔𑀢𑁆𑀣𑀁 𑀅𑀓𑀸𑀭𑀁 𑀲𑀸𑀦𑀼𑀦𑀸𑀲𑀺𑀓𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀩𑁆𑀬𑀜𑁆𑀚𑀦𑀸𑀦𑀺 𑀮𑀓𑁆𑀔𑀡𑀸𑀦𑀺 𑀆𑀘𑀺𑀓𑁆𑀔𑀦𑁆𑀢𑀻𑀢𑀺 𑀯𑁂𑀬𑀜𑁆𑀚𑀦𑀺𑀓𑀸.𑀯𑀺𑀓𑁆𑀔𑀫𑁆𑀪𑁂𑀢𑀩𑁆𑀩𑀦𑁆𑀢𑀺 𑀧𑀝𑀺𑀩𑀸𑀳𑀺𑀢𑀩𑁆𑀩𑀁 𑀢𑀲𑁆𑀲𑀸𑀢𑀺 𑀫𑀳𑀸𑀧𑀼𑀭𑀺𑀲𑀲𑁆𑀲, 𑀢𑀲𑁆𑀲 𑀯𑀸 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀲𑁆𑀲. 𑀮𑀓𑁆𑀔𑀡𑀲𑀻𑀲𑁂𑀦 𑀘𑁂𑀢𑁆𑀣 𑀢𑀁𑀲𑀁𑀯𑀢𑁆𑀢𑀦𑀺𑀓𑀧𑀼𑀜𑁆𑀜𑀲𑀫𑁆𑀪𑀸𑀭𑁄 𑀯𑀼𑀘𑁆𑀘𑀢𑀺.

𑀧𑀸𑀤𑀢𑀮𑀘𑀓𑁆𑀓𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁦𑁪. 𑀪𑀬𑀁 𑀦𑀸𑀫 𑀪𑀻𑀢𑀺, 𑀢𑀁 𑀧𑀦 𑀉𑀩𑁆𑀩𑀺𑀚𑁆𑀚𑀦𑀸𑀓𑀸𑀭𑁂𑀦, 𑀉𑀢𑁆𑀢𑀲𑀦𑀸𑀓𑀸𑀭𑁂𑀦 𑀘 𑀧𑀯𑀢𑁆𑀢𑀺𑀬𑀸 𑀤𑀼𑀯𑀺𑀥𑀦𑁆𑀢𑀺 𑀆𑀳 ‘‘𑀉𑀩𑁆𑀩𑁂𑀕𑀪𑀬𑀜𑁆𑀘𑁂𑀯 𑀉𑀢𑁆𑀢𑀸𑀲𑀪𑀬𑀜𑁆𑀘𑀸’’𑀢𑀺. 𑀢𑀤𑀼𑀪𑀬𑀫𑁆𑀧𑀺 𑀪𑀬𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀧𑀦𑀽𑀤𑀺𑀢𑀸𑀢𑀺 𑀬𑀣𑀸 𑀘𑁄𑀭𑀸𑀤𑀬𑁄 𑀯𑀺𑀮𑀼𑀧𑁆𑀧𑀦𑀩𑀦𑁆𑀥𑀦𑀸𑀤𑀻𑀦𑀺 𑀧𑀭𑀲𑁆𑀲 𑀦 𑀓𑀭𑁄𑀦𑁆𑀢𑀺, 𑀓𑀢𑀜𑁆𑀘 𑀧𑀘𑁆𑀘𑀸𑀳𑀭𑀡𑀸𑀤𑀺𑀦𑀸 𑀧𑀝𑀺𑀧𑀸𑀓𑀢𑀺𑀓𑀁 𑀳𑁄𑀢𑀺, 𑀏𑀯𑀁 𑀬𑀣𑀸 𑀘 𑀘𑀡𑁆𑀟𑀳𑀢𑁆𑀣𑀺𑀆𑀤𑀬𑁄 𑀤𑀽𑀭𑀢𑁄 𑀧𑀭𑀺𑀯𑀚𑁆𑀚𑀺𑀢𑀸 𑀳𑁄𑀦𑁆𑀢𑀺, 𑀅𑀧𑀭𑀺𑀯𑀚𑁆𑀚𑀺𑀢𑁂 𑀢𑀲𑁆𑀲 𑀬𑀣𑀸 𑀞𑀸𑀦𑁂 𑀞𑀺𑀢𑁂𑀳𑀺 𑀅𑀪𑀺𑀪𑀯𑁄 𑀦 𑀳𑁄𑀢𑀺, 𑀏𑀯𑀁 𑀅𑀧𑀦𑀽𑀤𑀺𑀢𑀸. 𑀅𑀢𑀺𑀯𑀸𑀳𑁂𑀢𑀻𑀢𑀺 𑀅𑀢𑀺𑀓𑁆𑀓𑀸𑀫𑁂𑀢𑀺. 𑀢𑀁 𑀞𑀸𑀦𑀦𑁆𑀢𑀺 𑀢𑀁 𑀲𑀸𑀲𑀗𑁆𑀓𑀝𑁆𑀞𑀸𑀦𑀁. 𑀅𑀲𑀓𑁆𑀓𑁄𑀦𑁆𑀢𑀸𑀦𑀦𑁆𑀢𑀺 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀅𑀲𑀓𑁆𑀓𑁄𑀦𑁆𑀢𑁂𑀢𑀺 𑀅𑀢𑁆𑀣𑁄. 𑀅𑀲𑀓𑁆𑀓𑁄𑀦𑁆𑀢𑀸𑀦𑀦𑁆𑀢𑀺 𑀯𑀸 𑀅𑀦𑀸𑀤𑀭𑁂 𑀲𑀸𑀫𑀺𑀯𑀘𑀦𑀁. 𑀲𑀳 𑀧𑀭𑀺𑀯𑀸𑀭𑁂𑀦𑀸𑀢𑀺 𑀲𑀧𑀭𑀺𑀯𑀸𑀭𑀁. 𑀢𑀢𑁆𑀣 𑀓𑀺𑀜𑁆𑀘𑀺 𑀤𑁂𑀬𑁆𑀬𑀥𑀫𑁆𑀫𑀁 𑀤𑁂𑀦𑁆𑀢𑁄 𑀬𑀤𑀸 𑀢𑀲𑁆𑀲 𑀧𑀭𑀺𑀯𑀸𑀭𑀪𑀸𑀯𑁂𑀦 𑀅𑀜𑁆𑀜𑀫𑁆𑀧𑀺 𑀤𑁂𑀬𑁆𑀬𑀥𑀫𑁆𑀫𑀁 𑀤𑁂𑀢𑀺, 𑀏𑀯𑀁 𑀢𑀲𑁆𑀲 𑀢𑀁 𑀤𑀸𑀦𑀫𑀬𑀁 𑀧𑀼𑀜𑁆𑀜𑀁 𑀲𑀧𑀭𑀺𑀯𑀸𑀭𑀁 𑀦𑀸𑀫 𑀳𑁄𑀢𑀺.

𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀅𑀦𑁆𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀣𑀸 𑀤𑁂𑀬𑁆𑀬𑀥𑀫𑁆𑀫𑀁 𑀢𑀲𑁆𑀲 𑀅𑀦𑁆𑀦𑀤𑀸𑀦𑀲𑁆𑀲 𑀧𑀭𑀺𑀯𑀸𑀭𑁄, 𑀏𑀯𑀁 𑀢𑀲𑁆𑀲 𑀲𑀓𑁆𑀓𑀘𑁆𑀘𑀓𑀭𑀡𑀁 𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀣 𑀔𑁄’’𑀢𑀺𑀆𑀤𑀺𑀫𑀸𑀳. 𑀬𑀸𑀕𑀼𑀪𑀢𑁆𑀢𑀁 𑀤𑀢𑁆𑀯𑀸𑀯 𑀅𑀤𑀸𑀲𑀻𑀢𑀺 𑀬𑁄𑀚𑀦𑀸. 𑀏𑀲 𑀦𑀬𑁄 𑀇𑀢𑁄 𑀧𑀭𑀢𑁄𑀧𑀺. 𑀲𑀼𑀢𑁆𑀢𑀁 𑀯𑀝𑁆𑀝𑁂𑀢𑀻𑀢𑀺 𑀘𑀻𑀯𑀭𑀲𑁆𑀲 𑀲𑀺𑀩𑁆𑀩𑀦𑀲𑀼𑀢𑁆𑀢𑀓𑀁 𑀤𑀼𑀯𑀝𑁆𑀝𑀢𑀺𑀯𑀝𑁆𑀝𑀸𑀤𑀺𑀯𑀲𑁂𑀦 𑀯𑀝𑁆𑀝𑀺𑀢𑀁 𑀅𑀓𑀸𑀲𑀺. 𑀭𑀚𑀦𑀦𑁆𑀢𑀺 𑀅𑀮𑁆𑀮𑀺𑀆𑀤𑀺𑀭𑀚𑀦𑀯𑀢𑁆𑀣𑀼𑀁. 𑀧𑀡𑁆𑀟𑀼𑀧𑀮𑀸𑀲𑀦𑁆𑀢𑀺 𑀭𑀚𑀦𑀼𑀧𑀕𑀫𑁂𑀯 𑀧𑀡𑁆𑀟𑀼𑀯𑀡𑁆𑀡𑀁 𑀧𑀮𑀸𑀲𑀁.

𑀳𑁂𑀝𑁆𑀞𑀺𑀫𑀸𑀦𑀻𑀢𑀺 𑀅𑀦𑁆𑀦𑀸𑀤𑀻𑀦𑀺 𑀘𑀢𑁆𑀢𑀸𑀭𑀺. 𑀦𑀺𑀲𑀤𑀕𑁆𑀕𑀳𑀡𑁂𑀦𑁂𑀯 𑀦𑀺𑀲𑀤𑀧𑁄𑀢𑁄𑀧𑀺 𑀕𑀳𑀺𑀢𑁄. 𑀘𑀻𑀦𑀧𑀺𑀝𑁆𑀞𑀁 𑀲𑀺𑀦𑁆𑀥𑀼𑀭𑀓𑀘𑀼𑀡𑁆𑀡𑀁. 𑀓𑁄𑀚𑀯𑀦𑁆𑀢𑀺 𑀉𑀤𑁆𑀤𑀮𑁄𑀫𑀺𑀏𑀓𑀦𑁆𑀢𑀮𑁄𑀫𑀺𑀆𑀤𑀺𑀓𑁄𑀚𑀯𑀢𑁆𑀣𑀭𑀡. 𑀲𑀼𑀯𑀺𑀪𑀢𑁆𑀢𑀅𑀦𑁆𑀢𑀭𑀸𑀦𑀻𑀢𑀺 𑀲𑀼𑀝𑁆𑀞𑀼 𑀯𑀺𑀪𑀢𑁆𑀢𑀅𑀦𑁆𑀢𑀭𑀸𑀦𑀺, 𑀏𑀢𑁂𑀦 𑀘𑀓𑁆𑀓𑀸𑀯𑀬𑀯𑀝𑁆𑀞𑀸𑀦𑀸𑀦𑀁 𑀲𑀼𑀧𑀭𑀺𑀘𑁆𑀙𑀺𑀦𑁆𑀦𑀢𑀁 𑀤𑀲𑁆𑀲𑁂𑀢𑀺.

𑀮𑀤𑁆𑀥𑀸𑀪𑀺𑀲𑁂𑀓𑀸 𑀔𑀢𑁆𑀢𑀺𑀬𑀸 𑀅𑀢𑁆𑀢𑀦𑁄 𑀯𑀺𑀚𑀺𑀢𑁂 𑀯𑀺𑀲𑀯𑀺𑀢𑀸𑀬 𑀩𑁆𑀭𑀸𑀳𑁆𑀫𑀡𑀸𑀤𑀺𑀓𑁂 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀭𑀜𑁆𑀚𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀦 𑀇𑀢𑀭𑀸𑀢𑀺 𑀆𑀳 ‘‘𑀭𑀸𑀚𑀸𑀦𑁄𑀢𑀺 𑀅𑀪𑀺𑀲𑀺𑀢𑁆𑀢𑀸’’𑀢𑀺. 𑀭𑀸𑀚𑀢𑁄 𑀬𑀣𑀸𑀮𑀤𑁆𑀥𑀕𑀸𑀫𑀦𑀺𑀕𑀫𑀸𑀤𑀺𑀁 𑀇𑀲𑁆𑀲𑀭𑀯𑀢𑀸𑀬 𑀪𑀼𑀜𑁆𑀚𑀦𑁆𑀢𑀻𑀢𑀺 𑀪𑁄𑀚𑀓𑀸, 𑀢𑀸𑀤𑀺𑀲𑁄 𑀪𑁄𑀕𑁄 𑀏𑀢𑁂𑀲𑀁 𑀅𑀢𑁆𑀣𑀺, 𑀢𑀢𑁆𑀣 𑀯𑀸 𑀦𑀺𑀬𑀼𑀢𑁆𑀢𑀸𑀢𑀺 𑀪𑁄𑀕𑀺𑀓𑀸, 𑀢𑁂 𑀏𑀯 ‘‘𑀪𑁄𑀕𑀺𑀬𑀸’’𑀢𑀺 𑀯𑀼𑀢𑁆𑀢𑀸. 𑀲𑀧𑀭𑀺𑀯𑀸𑀭𑀁 𑀤𑀸𑀦𑀦𑁆𑀢𑀺 𑀯𑀼𑀢𑁆𑀢𑀦𑀬𑁂𑀦 𑀲𑀧𑀭𑀺𑀯𑀸𑀭𑀤𑀸𑀦𑀁. 𑀚𑀸𑀦𑀸𑀢𑀽𑀢𑀺 ‘‘𑀲𑀤𑁂𑀯𑀓𑁄 𑀮𑁄𑀓𑁄 𑀚𑀸𑀦𑀸𑀢𑀽’’𑀢𑀺 𑀇𑀫𑀺𑀦𑀸 𑀯𑀺𑀬 𑀅𑀥𑀺𑀧𑁆𑀧𑀸𑀬𑁂𑀦 𑀦𑀺𑀩𑁆𑀩𑀢𑁆𑀢𑀁 𑀘𑀓𑁆𑀓𑀮𑀓𑁆𑀔𑀡𑀦𑁆𑀢𑀺 𑀮𑀓𑁆𑀔𑀡𑀲𑁆𑀲𑁂𑀯 𑀓𑀫𑁆𑀫𑀲𑀭𑀺𑀓𑁆𑀔𑀢𑀸 𑀤𑀲𑁆𑀲𑀺𑀢𑀸. 𑀏𑀯𑀁 𑀲𑀢𑀺 𑀢𑀺𑀓𑀫𑁂𑀯 𑀲𑀺𑀬𑀸, 𑀦 𑀘𑀢𑀼𑀓𑁆𑀓𑀁, 𑀢𑀲𑁆𑀫𑀸 𑀘𑀓𑁆𑀓𑀮𑀓𑁆𑀔𑀡𑀲𑁆𑀲 𑀫𑀳𑀸𑀧𑀭𑀺𑀯𑀸𑀭𑀢𑀸𑀬 𑀜𑀸𑀧𑀓𑀦𑀺𑀫𑀺𑀢𑁆𑀢𑀪𑀸𑀯𑁄 𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀦𑀸𑀫. 𑀢𑁂𑀦𑁂𑀯𑀸𑀳 ‘‘𑀲𑀧𑀭𑀺𑀯𑀸𑀭𑀁…𑀧𑁂… 𑀚𑀸𑀦𑀸𑀢𑀽𑀢𑀺 𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺. ‘‘𑀤𑀻𑀖𑀸𑀬𑀼𑀓𑀢𑀸𑀬 𑀢𑀁 𑀦𑀺𑀫𑀺𑀢𑁆𑀢’’𑀦𑁆𑀢𑀺 (𑀤𑀻. 𑀦𑀺. 𑁩.𑁨𑁦𑁭) 𑀘 𑀯𑀓𑁆𑀔𑀢𑀺, 𑀢𑀣𑀸 ‘‘𑀢𑀁 𑀮𑀓𑁆𑀔𑀡𑀁 𑀪𑀯𑀢𑀺 𑀢𑀤𑀢𑁆𑀣𑀚𑁄𑀢𑀓’’𑀦𑁆𑀢𑀺 (𑀤𑀻. 𑀦𑀺. 𑁩.𑁨𑁨𑁧) 𑀘. 𑀦𑀺𑀲𑁆𑀲𑀦𑁆𑀤𑀨𑀮𑀁 𑀧𑀦 𑀧𑀝𑀺𑀧𑀓𑁆𑀔𑀸𑀪𑀺𑀪𑀯𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦𑁂𑀯𑀸𑀳 𑀕𑀸𑀣𑀸𑀬𑀁 ‘‘𑀲𑀢𑁆𑀢𑀼𑀫𑀤𑁆𑀤𑀦𑁄’’𑀢𑀺.

𑁨𑁦𑁫. 𑀏𑀢𑀦𑁆𑀢𑀺 𑀏𑀢𑀁 𑀕𑀸𑀣𑀸𑀩𑀦𑁆𑀥𑀪𑀽𑀢𑀁 𑀯𑀘𑀦𑀁, 𑀢𑀁 𑀧𑀦𑀢𑁆𑀣𑀢𑁄 𑀕𑀸𑀣𑀸 𑀏𑀯𑀸𑀢𑀺 𑀆𑀳 ‘‘𑀇𑀫𑀸 𑀢𑀤𑀢𑁆𑀣𑀧𑀭𑀺𑀤𑀻𑀧𑀦𑀸 𑀕𑀸𑀣𑀸 𑀯𑀼𑀘𑁆𑀘𑀦𑁆𑀢𑀻’’𑀢𑀺.

𑀧𑀼𑀭𑀢𑁆𑀣𑀸𑀢𑀺 𑀯𑀸 ‘‘𑀧𑀼𑀭𑁂’’𑀢𑀺 𑀯𑀼𑀢𑁆𑀢𑀢𑁄𑀧𑀺 𑀧𑀼𑀩𑁆𑀩𑁂. 𑀬𑀲𑁆𑀫𑀸 𑀫𑀳𑀸𑀧𑀼𑀭𑀺𑀲𑁄 𑀦 𑀅𑀢𑀻𑀢𑀸𑀬 𑀏𑀓𑀚𑀸𑀢𑀺𑀬𑀁, 𑀦𑀸𑀧𑀺 𑀓𑀢𑀺𑀧𑀬𑀚𑀸𑀢𑀻𑀲𑀼, 𑀅𑀣 𑀔𑁄 𑀧𑀼𑀭𑀺𑀫𑀧𑀼𑀭𑀺𑀫𑀢𑀭𑀸𑀲𑀼 𑀢𑀣𑀸𑀯 𑀧𑀝𑀺𑀧𑀦𑁆𑀦𑁄, 𑀢𑀲𑁆𑀫𑀸 𑀢𑀢𑁆𑀣 𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀭𑁂 𑀧𑀼𑀭𑀢𑁆𑀣𑀸’’𑀢𑀺 𑀯𑀼𑀢𑁆𑀢𑀁. 𑀇𑀫𑀺𑀲𑁆𑀲𑀸𑀧𑀺 𑀚𑀸𑀢𑀺𑀬𑀁 𑀅𑀢𑀻𑀢𑀓𑀸𑀮𑀯𑀲𑁂𑀦 ‘‘𑀧𑀼𑀭𑁂𑀧𑀼𑀭𑀢𑁆𑀣𑀸’’𑀢𑀺 𑀯𑀢𑁆𑀢𑀼𑀁 𑀮𑀩𑁆𑀪𑀸𑀢𑀺 𑀢𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀧𑀼𑀭𑀺𑀫𑀸𑀲𑀼 𑀚𑀸𑀢𑀻𑀲𑀽’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀇𑀫𑀺𑀲𑁆𑀲𑀸’’𑀢𑀺𑀆𑀤𑀺. 𑀓𑁂𑀘𑀺 ‘‘𑀇𑀫𑀺𑀲𑁆𑀲𑀸 𑀚𑀸𑀢𑀺𑀬𑀸 𑀧𑀼𑀩𑁆𑀩𑁂 𑀢𑀼𑀲𑀺𑀢𑀤𑁂𑀯𑀮𑁄𑀓𑁂 𑀓𑀢𑀓𑀫𑁆𑀫𑀧𑀝𑀺𑀓𑁆𑀔𑁂𑀧𑀯𑀘𑀦’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁 𑀢𑀢𑁆𑀣 𑀢𑀸𑀤𑀺𑀲𑀲𑁆𑀲 𑀓𑀢𑀓𑀫𑁆𑀫𑀲𑁆𑀲 𑀅𑀪𑀸𑀯𑀢𑁄. 𑀅𑀧𑀦𑀽𑀤𑀦𑁄𑀢𑀺 𑀅𑀧𑀦𑁂𑀢𑀸. 𑀅𑀥𑀺𑀫𑀼𑀢𑁆𑀢𑁄𑀢𑀺 𑀬𑀼𑀢𑁆𑀢𑀧𑀬𑀼𑀢𑁆𑀢𑁄.

𑀧𑀼𑀜𑁆𑀜𑀓𑀫𑁆𑀫𑁂𑀦𑀸𑀢𑀺 𑀤𑀸𑀦𑀸𑀤𑀺𑀧𑀼𑀜𑁆𑀜𑀓𑀫𑁆𑀫𑁂𑀦. 𑀏𑀯𑀁 𑀲𑀦𑁆𑀢𑁂𑀢𑀺 𑀲𑀢𑀫𑀢𑁆𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀏𑀓𑁂𑀓𑀁 𑀮𑀓𑁆𑀔𑀡𑀁 𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀏𑀯𑀁 𑀲𑀢𑀺. 𑀦 𑀭𑁄𑀘𑀬𑀺𑀁𑀲𑀽𑀢𑀺 𑀓𑁂𑀯𑀮𑀁 𑀲𑀢𑀫𑀢𑁆𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀮𑀓𑁆𑀔𑀡𑀦𑀺𑀩𑁆𑀩𑀢𑁆𑀢𑀺𑀁 𑀦 𑀭𑁄𑀘𑀬𑀺𑀁𑀲𑀼 𑀅𑀝𑁆𑀞𑀓𑀣𑀸𑀘𑀭𑀺𑀬𑀸. 𑀓𑀣𑀁 𑀧𑀦 𑀭𑁄𑀘𑀬𑀺𑀁𑀲𑀽𑀢𑀺 𑀆𑀳 ‘‘𑀅𑀦𑀦𑁆𑀢𑁂𑀲𑀼 𑀧𑀦𑀸’’𑀢𑀺𑀆𑀤𑀺. 𑀏𑀓𑁂𑀓𑀁 𑀓𑀫𑁆𑀫𑀦𑁆𑀢𑀺 𑀏𑀓𑁂𑀓𑀁 𑀤𑀸𑀦𑀸𑀤𑀺𑀧𑀼𑀩𑁆𑀩𑀓𑀫𑁆𑀫𑀁. 𑀏𑀓𑁂𑀓𑀁 𑀲𑀢𑀕𑀼𑀡𑀁 𑀓𑀢𑁆𑀯𑀸𑀢𑀺 𑀅𑀦𑀦𑁆𑀢𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀬𑀢𑁆𑀢𑀓𑀸 𑀲𑀢𑁆𑀢𑀸, 𑀢𑁂𑀳𑀺 𑀲𑀩𑁆𑀩𑁂𑀳𑀺 𑀧𑀘𑁆𑀘𑁂𑀓𑀁 𑀲𑀢𑀓𑁆𑀔𑀢𑁆𑀢𑀼𑀁 𑀓𑀢𑀸𑀦𑀺 𑀤𑀸𑀦𑀸𑀤𑀺𑀧𑀼𑀜𑁆𑀜𑀓𑀫𑁆𑀫𑀸𑀦𑀺 𑀬𑀢𑁆𑀢𑀓𑀸𑀦𑀺, 𑀢𑀢𑁄 𑀏𑀓𑁂𑀓𑀁 𑀧𑀼𑀜𑁆𑀜𑀓𑀫𑁆𑀫𑀁 𑀫𑀳𑀸𑀲𑀢𑁆𑀢𑁂𑀦 𑀲𑀢𑀕𑀼𑀡𑀁 𑀓𑀢𑀁 ‘‘𑀲𑀢’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸 𑀇𑀥 𑀲𑀢-𑀲𑀤𑁆𑀤𑁄 𑀩𑀳𑀼𑀪𑀸𑀯𑀧𑀭𑀺𑀬𑀸𑀬𑁄, 𑀦 𑀲𑀗𑁆𑀔𑁆𑀬𑀸𑀯𑀘𑀦𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀲𑀢𑀕𑁆𑀖𑀺 𑀲𑀢𑀁 𑀤𑁂𑀯𑀫𑀦𑀼𑀲𑁆𑀲𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀢𑁂𑀦𑀸𑀳 ‘‘𑀢𑀲𑁆𑀫𑀸 𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑁄𑀢𑀺 𑀇𑀫𑀫𑀢𑁆𑀣𑀁 𑀭𑁄𑀘𑀬𑀺𑀁𑀲𑀽’’𑀢𑀺.

𑀆𑀬𑀢𑀧𑀡𑁆𑀳𑀺𑀢𑀸𑀤𑀺𑀢𑀺𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁦𑁬. 𑀲𑀭𑀲𑀘𑀼𑀢𑀺 𑀦𑀸𑀫 𑀚𑀸𑀢𑀲𑁆𑀲 𑀲𑀢𑁆𑀢𑀲𑁆𑀲 𑀬𑀸𑀯𑀚𑀻𑀯𑀁 𑀚𑀻𑀯𑀺𑀢𑁆𑀯𑀸 𑀧𑀓𑀢𑀺𑀬𑀸 𑀫𑀭𑀡𑀁. 𑀆𑀓𑀟𑁆𑀠𑀚𑀺𑀬𑀲𑁆𑀲 𑀥𑀦𑀼𑀤𑀡𑁆𑀟𑀲𑁆𑀲 𑀯𑀺𑀬 𑀧𑀸𑀤𑀸𑀦𑀁 𑀅𑀦𑁆𑀢𑁄𑀫𑀼𑀔𑀁 𑀓𑀼𑀝𑀺𑀮𑀢𑀸𑀬 𑀅𑀦𑁆𑀢𑁄𑀯𑀗𑁆𑀓𑀧𑀸𑀤𑀢𑀸. 𑀩𑀳𑀺𑀫𑀼𑀔𑀁 𑀓𑀼𑀝𑀺𑀮𑀢𑀸𑀬 𑀩𑀳𑀺𑀯𑀗𑁆𑀓𑀧𑀸𑀤𑀢𑀸. 𑀧𑀸𑀤𑀢𑀮𑀲𑁆𑀲 𑀫𑀚𑁆𑀛𑁂 𑀊𑀦𑀢𑀸𑀬 𑀉𑀓𑁆𑀓𑀼𑀝𑀺𑀓𑀧𑀸𑀤𑀢𑀸. 𑀅𑀕𑁆𑀕𑀧𑀸𑀤𑁂𑀦 𑀔𑀜𑁆𑀚𑀦𑀓𑀸 𑀅𑀕𑁆𑀕𑀓𑁄𑀡𑁆𑀟𑀸. 𑀧𑀡𑁆𑀳𑀺𑀧𑁆𑀧𑀤𑁂𑀲𑁂𑀦 𑀔𑀜𑁆𑀚𑀦𑀓𑀸 𑀧𑀡𑁆𑀳𑀺𑀓𑁄𑀡𑁆𑀟𑀸. 𑀉𑀦𑁆𑀦𑀢𑀓𑀸𑀬𑁂𑀦𑀸𑀢𑀺 𑀅𑀦𑁄𑀦𑀢𑀪𑀸𑀯𑁂𑀦 𑀲𑀫𑀼𑀲𑁆𑀲𑀺𑀢𑀲𑀭𑀻𑀭𑁂𑀦. 𑀫𑀼𑀝𑁆𑀞𑀺𑀓𑀢𑀳𑀢𑁆𑀣𑀸𑀢𑀺 𑀆𑀯𑀼𑀥𑀸𑀤𑀻𑀦𑀁 𑀕𑀳𑀡𑀢𑁆𑀣𑀁 𑀓𑀢𑀫𑀼𑀝𑁆𑀞𑀺𑀳𑀢𑁆𑀣𑀸. 𑀨𑀡𑀳𑀢𑁆𑀣𑀓𑀸𑀢𑀺 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀝𑁆𑀞𑀗𑁆𑀕𑀼𑀮𑀺𑀳𑀢𑁆𑀣𑀸. 𑀇𑀤𑀫𑁂𑀢𑁆𑀣 𑀓𑀫𑁆𑀫𑀲𑀭𑀺𑀓𑁆𑀔𑀓𑀦𑁆𑀢𑀺 𑀇𑀤𑀁 𑀇𑀫𑁂𑀲𑀁 𑀢𑀺𑀡𑁆𑀡𑀫𑁆𑀧𑀺 𑀮𑀓𑁆𑀔𑀡𑀸𑀦𑀁 𑀢𑀣𑀸𑀕𑀢𑀲𑁆𑀲 𑀤𑀻𑀖𑀸𑀬𑀼𑀓𑀢𑀸𑀬 𑀜𑀸𑀧𑀓𑀦𑀺𑀫𑀺𑀢𑁆𑀢𑀪𑀸𑀯𑁄 𑀏𑀢𑁆𑀣 𑀆𑀬𑀢𑀧𑀡𑁆𑀳𑀺𑀢𑀸, 𑀤𑀻𑀖𑀗𑁆𑀕𑀼𑀮𑀺𑀢𑀸 𑀩𑁆𑀭𑀳𑁆𑀫𑀼𑀚𑀼𑀕𑀢𑁆𑀢𑀢𑀸𑀢𑀺 𑀏𑀢𑀲𑁆𑀫𑀺𑀁 𑀮𑀓𑁆𑀔𑀡𑀢𑁆𑀢𑀬𑁂 𑀓𑀫𑁆𑀫𑀲𑀭𑀺𑀓𑁆𑀔𑀓𑀢𑁆𑀢𑀁. 𑀦𑀺𑀲𑁆𑀲𑀦𑁆𑀤𑀨𑀮𑀁 𑀧𑀦 𑀅𑀦𑀦𑁆𑀢𑀭𑀸𑀬𑀢𑀸𑀤𑀺 𑀤𑀝𑁆𑀞𑀩𑁆𑀩𑀁.

𑁨𑁦𑁭. 𑀪𑀸𑀬𑀺𑀢𑀩𑁆𑀩𑀯𑀢𑁆𑀣𑀼𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀫𑁆𑀧𑀺 𑀪𑀬𑀁 𑀅𑀢𑁆𑀢𑀲𑀺𑀦𑁂𑀳𑀳𑁂𑀢𑀼𑀓𑀁 𑀧𑀳𑀻𑀦𑀲𑀺𑀦𑁂𑀳𑀲𑁆𑀲 𑀢𑀤𑀪𑀸𑀯𑀢𑁄𑀢𑀺 𑀆𑀳 ‘‘𑀬𑀣𑀸 𑀫𑀬𑁆𑀳𑀁 𑀫𑀭𑀡𑀢𑁄 𑀪𑀬𑀁 𑀫𑀫 𑀚𑀻𑀯𑀺𑀢𑀁 𑀧𑀺𑀬’’𑀦𑁆𑀢𑀺. 𑀲𑀼𑀘𑀺𑀡𑁆𑀡𑁂𑀦𑀸𑀢𑀺 𑀲𑀼𑀝𑁆𑀞𑀼 𑀓𑀢𑀽𑀧𑀘𑀺𑀢𑁂𑀦 𑀲𑀼𑀘𑀭𑀺𑀢𑀓𑀫𑁆𑀫𑀼𑀦𑀸.

𑀘𑀯𑀺𑀢𑁆𑀯𑀸𑀢𑀺 𑀲𑀕𑁆𑀕𑀢𑁄 𑀘𑀯𑀺𑀢𑁆𑀯𑀸. ‘‘𑀲𑀼𑀚𑀸𑀢𑀕𑀢𑁆𑀢𑁄 𑀲𑀼𑀪𑀼𑀚𑁄’’𑀢𑀺 𑀆𑀤𑀬𑁄 𑀲𑀭𑀻𑀭𑀸𑀯𑀬𑀯𑀕𑀼𑀡𑀸 𑀇𑀫𑁂𑀳𑀺 𑀮𑀓𑁆𑀔𑀡𑁂𑀳𑀺 𑀅𑀯𑀺𑀦𑀸𑀪𑀸𑀯𑀺𑀦𑁄𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀸. 𑀘𑀺𑀭𑀬𑀧𑀦𑀸𑀬𑀸𑀢𑀺 𑀅𑀢𑁆𑀢𑀪𑀸𑀯𑀲𑁆𑀲 𑀘𑀺𑀭𑀓𑀸𑀮𑀁 𑀧𑀯𑀢𑁆𑀢𑀦𑀸𑀬. 𑀢𑁂𑀦𑀸𑀳 ‘‘𑀤𑀻𑀖𑀸𑀬𑀼𑀓𑀪𑀸𑀯𑀸𑀬𑀸’’𑀢𑀺. 𑀢𑀢𑁄𑀢𑀺 𑀘𑀓𑁆𑀓𑀯𑀢𑁆𑀢𑀻 𑀳𑀼𑀢𑁆𑀯𑀸 𑀬𑀸𑀧𑀦𑀢𑁄. 𑀯𑀲𑀺𑀧𑁆𑀧𑀢𑁆𑀢𑁄𑀢𑀺 𑀛𑀸𑀦𑀸𑀤𑀻𑀲𑀼 𑀯𑀲𑀻𑀪𑀸𑀯𑀜𑁆𑀘𑁂𑀯 𑀘𑁂𑀢𑁄𑀯𑀲𑀺𑀪𑀸𑀯𑀜𑁆𑀘 𑀧𑀢𑁆𑀢𑁄 𑀳𑀼𑀢𑁆𑀯𑀸, 𑀓𑀣𑀁 𑀇𑀤𑁆𑀥𑀺𑀪𑀸𑀯𑀦𑀸𑀬 𑀇𑀤𑁆𑀥𑀺𑀧𑀸𑀤𑀪𑀸𑀯𑀦𑀸𑀬𑀸𑀢𑀺 𑀅𑀢𑁆𑀣𑁄. 𑀬𑀸𑀧𑁂𑀢𑀺 𑀘𑀺𑀭𑀢𑀭𑀦𑁆𑀢𑀺 𑀬𑁄𑀚𑀦𑀸.

𑀲𑀢𑁆𑀢𑀼𑀲𑁆𑀲𑀤𑀢𑀸𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁦𑁮. 𑀭𑀲𑁄 𑀚𑀸𑀢𑁄 𑀏𑀢𑁂𑀲𑀦𑁆𑀢𑀺 𑀭𑀲𑀺𑀢𑀸𑀦𑀺, 𑀫𑀳𑀸𑀭𑀲𑀸𑀦𑀺. 𑀢𑁂𑀦𑀸𑀳 ‘‘𑀭𑀲𑀲𑀫𑁆𑀧𑀦𑁆𑀦𑀸𑀦’’𑀦𑁆𑀢𑀺. 𑀧𑀺𑀝𑁆𑀞𑀔𑀚𑁆𑀚𑀓𑀸𑀤𑀻𑀦𑀻𑀢𑀺 𑀧𑀽𑀧𑀲𑀓𑁆𑀔𑀮𑀺𑀫𑁄𑀤𑀓𑀸𑀤𑀻𑀦𑀺. 𑀆𑀤𑀺-𑀲𑀤𑁆𑀤𑁂𑀦 𑀧𑀦 𑀓𑀤𑀮𑀺𑀨𑀮𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀺𑀝𑁆𑀞𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑀺𑀢𑀩𑁆𑀩𑀧𑀸𑀬𑀲𑀁 𑀧𑀺𑀝𑁆𑀞𑀧𑀸𑀬𑀲𑀁. 𑀆𑀤𑀺-𑀲𑀤𑁆𑀤𑁂𑀦 𑀢𑀣𑀸𑀭𑀽𑀧𑀪𑁄𑀚𑁆𑀚𑀬𑀸𑀕𑀼𑀆𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀇𑀥 𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀦𑀸𑀫 𑀲𑀢𑁆𑀢𑀼𑀲𑁆𑀲𑀤𑀢𑀸𑀮𑀓𑁆𑀔𑀡𑀲𑁆𑀲 𑀧𑀡𑀻𑀢𑀮𑀸𑀪𑀺𑀢𑀸𑀬 𑀜𑀸𑀧𑀓𑀦𑀺𑀫𑀺𑀢𑁆𑀢𑀪𑀸𑀯𑁄. 𑀇𑀫𑀺𑀦𑀸 𑀦𑀬𑁂𑀦 𑀢𑀢𑁆𑀣 𑀢𑀢𑁆𑀣 𑀮𑀓𑁆𑀔𑀡𑁂 𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁.

𑁨𑁦𑁯. 𑀉𑀢𑁆𑀢𑀫𑁄 𑀅𑀕𑁆𑀕𑀭𑀲𑀤𑀸𑀬𑀓𑁄𑀢𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀉𑀢𑁆𑀢𑀫𑁄 𑀮𑁄𑀓𑀦𑀸𑀣𑁄 𑀅𑀕𑁆𑀕𑀸𑀦𑀁 𑀧𑀡𑀻𑀢𑀸𑀦𑀁 𑀭𑀲𑀸𑀦𑀁 𑀤𑀸𑀬𑀓𑁄. 𑀉𑀢𑁆𑀢𑀫𑀸𑀦𑀁 𑀅𑀕𑁆𑀕𑀭𑀲𑀸𑀦𑀦𑁆𑀢𑀺 𑀧𑀡𑀻𑀢𑁂𑀲𑀼𑀧𑀺 𑀧𑀡𑀻𑀢𑀭𑀲𑀸𑀦𑀁. 𑀔𑀚𑁆𑀚𑀪𑁄𑀚𑁆𑀚𑀸𑀤𑀺𑀚𑁄𑀢𑀓𑀦𑁆𑀢𑀺 𑀔𑀚𑁆𑀚𑀪𑁄𑀚𑁆𑀚𑀸𑀤𑀺𑀮𑀸𑀪𑀚𑁄𑀢𑀓𑀁. 𑀮𑀸𑀪𑀲𑀁𑀯𑀢𑁆𑀢𑀦𑀺𑀓𑀲𑁆𑀲 𑀓𑀫𑁆𑀫𑀲𑁆𑀲 𑀨𑀮𑀁 ‘‘𑀮𑀸𑀪𑀲𑀁𑀯𑀢𑁆𑀢𑀦𑀺𑀓’’𑀦𑁆𑀢𑀺 𑀓𑀸𑀭𑀡𑀽𑀧𑀘𑀸𑀭𑁂𑀦 𑀯𑀤𑀢𑀺. 𑀢𑀤𑀢𑁆𑀣𑀚𑁄𑀢𑀓𑀦𑁆𑀢𑀺 𑀯𑀸 𑀢𑀲𑁆𑀲 𑀧𑀡𑀻𑀢𑀪𑁄𑀚𑀦𑀤𑀸𑀬𑀓𑀢𑁆𑀢𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀚𑁄𑀢𑀓𑀁. 𑀢𑀤𑀸𑀥𑀺𑀕𑀘𑁆𑀙𑀢𑀻𑀢𑀺 𑀏𑀢𑁆𑀣 𑀆-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀦𑁆𑀢𑀺 𑀆𑀳 ‘‘𑀢𑀁 𑀅𑀥𑀺𑀕𑀘𑁆𑀙𑀢𑀻’’𑀢𑀺. 𑀮𑀸𑀪𑀺𑀭𑀼𑀢𑁆𑀢𑀫𑀦𑁆𑀢𑀺 𑀭-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄.

𑀓𑀭𑀘𑀭𑀡𑀸𑀤𑀺𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁧𑁦. 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑀁 𑀧𑀢𑁆𑀢𑀘𑀻𑀯𑀭𑀸𑀤𑀺𑀁 𑀕𑀺𑀳𑀺𑀧𑀭𑀺𑀓𑁆𑀔𑀸𑀭𑀁 𑀯𑀢𑁆𑀣𑀸𑀯𑀼𑀥𑀬𑀸𑀦𑀲𑀬𑀦𑀸𑀤𑀺𑀁.

𑀲𑀩𑁆𑀩𑀦𑁆𑀢𑀺 𑀲𑀩𑁆𑀩𑀁 𑀉𑀧𑀓𑀸𑀭𑀁. 𑀫𑀓𑁆𑀔𑁂𑀢𑁆𑀯𑀸 𑀦𑀸𑀲𑁂𑀢𑀺 𑀫𑀓𑁆𑀔𑀺𑀪𑀸𑀯𑁂 𑀞𑀢𑁆𑀯𑀸. 𑀢𑁂𑀮𑁂𑀦 𑀯𑀺𑀬 𑀫𑀓𑁆𑀔𑁂𑀢𑀻𑀢𑀺 𑀲𑀢𑀥𑁄𑀢𑀢𑁂𑀮𑁂𑀦 𑀫𑀓𑁆𑀔𑁂𑀢𑀺 𑀯𑀺𑀬. 𑀅𑀢𑁆𑀣𑀲𑀁𑀯𑀟𑁆𑀠𑀦𑀓𑀣𑀸𑀬𑀸𑀢𑀺 𑀳𑀺𑀢𑀸𑀯𑀳𑀓𑀣𑀸𑀬. 𑀓𑀣𑀸𑀕𑀳𑀡𑀜𑁆𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀫𑀢𑁆𑀢𑀁. 𑀧𑀭𑁂𑀲𑀁 𑀳𑀺𑀢𑀸𑀯𑀳𑁄 𑀓𑀸𑀬𑀧𑀬𑁄𑀕𑁄𑀧𑀺 𑀅𑀢𑁆𑀣𑀘𑀭𑀺𑀬𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀘𑀻𑀧𑀬𑁄𑀕𑀯𑀲𑁂𑀦𑁂𑀯 𑀅𑀢𑁆𑀣𑀘𑀭𑀺𑀬𑀸 𑀯𑀼𑀢𑁆𑀢𑀸.

𑀲𑀫𑀸𑀦𑀢𑁆𑀢𑀢𑀸𑀬𑀸𑀢𑀺 𑀲𑀤𑀺𑀲𑀪𑀸𑀯𑁂 𑀲𑀫𑀸𑀦𑀝𑁆𑀞𑀸𑀦𑁂 𑀞𑀧𑀦𑁂𑀦, 𑀢𑀁 𑀧𑀦𑀲𑁆𑀲 𑀲𑀫𑀸𑀦𑀝𑁆𑀞𑀸𑀦𑁂 𑀞𑀧𑀦𑀁 𑀅𑀢𑁆𑀢𑀲𑀤𑀺𑀲𑀢𑀸𑀓𑀭𑀡𑀁, 𑀲𑀼𑀔𑁂𑀦 𑀏𑀓𑀲𑀫𑁆𑀪𑁄𑀕𑀢𑀸, 𑀅𑀢𑁆𑀢𑀦𑁄 𑀲𑀼𑀔𑀼𑀧𑁆𑀧𑀢𑁆𑀢𑀺𑀬𑀁; 𑀢𑀲𑁆𑀲 𑀘 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀬𑀁 𑀢𑁂𑀦 𑀅𑀢𑁆𑀢𑀦𑁄 𑀏𑀓𑀲𑀫𑁆𑀪𑁄𑀕𑀢𑀸𑀢𑀺 𑀆𑀳 ‘‘𑀲𑀫𑀸𑀦𑀲𑀼𑀔𑀤𑀼𑀓𑁆𑀔𑀪𑀸𑀯𑁂𑀦𑀸’’𑀢𑀺. 𑀲𑀸 𑀘 𑀲𑀫𑀸𑀦𑀲𑀼𑀔𑀤𑀼𑀓𑁆𑀔𑀢𑀸 𑀏𑀓𑀢𑁄 𑀦𑀺𑀲𑀚𑁆𑀚𑀸𑀤𑀺𑀦𑀸 𑀧𑀸𑀓𑀝𑀸 𑀳𑁄𑀢𑀻𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑀸𑀲𑀦𑁂’’𑀢𑀺𑀆𑀤𑀺𑀫𑀸𑀳. 𑀦 𑀳𑀺 𑀲𑀓𑁆𑀓𑀸 𑀏𑀓𑀧𑀭𑀺𑀪𑁄𑀕𑁄 𑀓𑀸𑀢𑀼𑀁 𑀚𑀸𑀢𑀺𑀬𑀸 𑀳𑀻𑀦𑀢𑁆𑀢𑀸. 𑀢𑀣𑀸 𑀅𑀓𑀭𑀺𑀬𑀫𑀸𑀦𑁂 𑀘 𑀲𑁄 𑀓𑀼𑀚𑁆𑀛𑀢𑀺 𑀪𑁄𑀕𑁂𑀦 𑀅𑀥𑀺𑀓𑀢𑁆𑀢𑀸, 𑀢𑀲𑁆𑀫𑀸 𑀤𑀼𑀲𑁆𑀲𑀗𑁆𑀕𑀳𑁄. 𑀦 𑀳𑀺 𑀲𑁄 𑀏𑀓𑀧𑀭𑀺𑀪𑁄𑀕𑀁 𑀇𑀘𑁆𑀙𑀢𑀺 𑀚𑀸𑀢𑀺𑀬𑀸 𑀳𑀻𑀦𑀪𑀸𑀯𑀢𑁄. 𑀦 𑀅𑀓𑀭𑀺𑀬𑀫𑀸𑀦𑁂 𑀘 𑀓𑀼𑀚𑁆𑀛𑀢𑀺 𑀪𑁄𑀕𑁂𑀦 𑀳𑀻𑀦𑀪𑀸𑀯𑀢𑁄. 𑀉𑀪𑁄𑀳𑀻𑀢𑀺 𑀚𑀸𑀢𑀺𑀪𑁄𑀕𑁂𑀳𑀺. 𑀲𑀤𑀺𑀲𑁄𑀧𑀺 𑀲𑀼𑀲𑀗𑁆𑀕𑀳𑁄 𑀏𑀓𑀲𑀤𑀺𑀲𑀪𑀸𑀯𑁂𑀦𑁂𑀯 𑀇𑀢𑀭𑁂𑀦 𑀲𑀳 𑀏𑀓𑀧𑀭𑀺𑀪𑁄𑀕𑀲𑁆𑀲 𑀧𑀘𑁆𑀘𑀸𑀲𑀻𑀲𑀸𑀬, 𑀅𑀓𑀭𑀡𑁂 𑀘 𑀢𑀲𑁆𑀲 𑀓𑀼𑀚𑁆𑀛𑀦𑀲𑁆𑀲𑀸𑀪𑀸𑀯𑀢𑁄. 𑀅𑀤𑀻𑀬𑀫𑀸𑀦𑁂𑀧𑀺 𑀓𑀺𑀲𑁆𑀫𑀺𑀜𑁆𑀘𑀺 𑀆𑀫𑀺𑀲𑁂 𑀅𑀓𑀭𑀺𑀬𑀫𑀸𑀦𑁂𑀧𑀺 𑀲𑀗𑁆𑀕𑀳𑁂. 𑀦 𑀧𑀸𑀧𑀓𑁂𑀦 𑀘𑀺𑀢𑁆𑀢𑁂𑀦 𑀧𑀲𑁆𑀲𑀢𑀺 𑀧𑁂𑀲𑀮𑀪𑀸𑀯𑀢𑁄. 𑀢𑀢𑁄 𑀏𑀯 𑀧𑀭𑀺𑀪𑁄𑀕𑁄𑀧𑀺…𑀧𑁂… 𑀳𑁄𑀢𑀺.𑀏𑀯𑀭𑀽𑀧𑀦𑁆𑀢𑀺 𑀕𑀺𑀳𑀻 𑀘𑁂, 𑀉𑀪𑁄𑀳𑀺 𑀲𑀤𑀺𑀲𑀁; 𑀧𑀩𑁆𑀩𑀚𑀺𑀢𑁄 𑀘𑁂, 𑀲𑀻𑀮𑀯𑀦𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀼𑀲𑀗𑁆𑀕𑀳𑀺𑀢𑀸𑀯 𑀳𑁄𑀦𑁆𑀢𑀻𑀢𑀺 𑀲𑀼𑀝𑁆𑀞𑀼 𑀲𑀗𑁆𑀕𑀳𑀺𑀢𑀸 𑀏𑀯 𑀳𑁄𑀦𑁆𑀢𑀺 𑀤𑀴𑁆𑀳𑀪𑀢𑁆𑀢𑀺𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀦 𑀪𑀺𑀚𑁆𑀚𑀦𑁆𑀢𑀻’’𑀢𑀺.

𑀤𑀸𑀦𑀸𑀤𑀺𑀲𑀗𑁆𑀕𑀳𑀓𑀫𑁆𑀫𑀦𑁆𑀢𑀺 𑀤𑀸𑀦𑀸𑀤𑀺𑀪𑁂𑀤𑀁 𑀧𑀭𑀲𑀗𑁆𑀕𑀡𑁆𑀳𑀦𑀯𑀲𑁂𑀦 𑀧𑀯𑀢𑁆𑀢𑀁 𑀓𑀼𑀲𑀮𑀓𑀫𑁆𑀫𑀁.

𑁨𑁧𑁧. 𑀅𑀦𑀯𑀜𑁆𑀜𑀸𑀢𑁂𑀦 𑀅𑀧𑀭𑀺𑀪𑀽𑀢𑁂𑀦 𑀲𑀫𑁆𑀪𑀸𑀯𑀺𑀢𑁂𑀦. 𑀧𑀫𑁄𑀤𑁄 𑀯𑀼𑀘𑁆𑀘𑀢𑀺 𑀳𑀸𑀲𑁄, 𑀦 𑀅𑀧𑁆𑀧𑀫𑁄𑀤𑁂𑀦𑀸𑀢𑀺 𑀏𑀢𑁆𑀣 𑀧𑀝𑀺𑀲𑁂𑀥𑀤𑁆𑀯𑀬𑁂𑀦 𑀲𑁄 𑀏𑀯 𑀯𑀼𑀢𑁆𑀢𑁄. 𑀲𑁄 𑀘 𑀑𑀤𑀕𑁆𑀬𑀲𑀪𑀸𑀯𑀢𑁆𑀢𑀸 𑀦 𑀤𑀻𑀦𑁄 𑀥𑀫𑁆𑀫𑀽𑀧𑀲𑀜𑁆𑀳𑀺𑀢𑀢𑁆𑀢𑀸 𑀦 𑀕𑀩𑁆𑀪𑀬𑀼𑀢𑁆𑀢𑁄𑀢𑀺 𑀆𑀳 ‘‘𑀦 𑀤𑀻𑀦𑁂𑀦 𑀦 𑀕𑀩𑁆𑀪𑀺𑀢𑁂𑀦𑀸𑀢𑀺 𑀅𑀢𑁆𑀣𑁄’’𑀢𑀺. 𑀲𑀢𑁆𑀢𑀸𑀦𑀁 𑀅𑀕𑀡𑁆𑀳𑀦𑀕𑀼𑀡𑁂𑀦𑀸𑀢𑀺 𑀬𑁄𑀚𑀦𑀸.

𑀅𑀢𑀺𑀭𑀼𑀘𑀺𑀭𑀦𑁆𑀢𑀺 𑀅𑀢𑀺𑀯𑀺𑀬 𑀭𑀼𑀘𑀺𑀭𑀓𑀢𑀁, 𑀢𑀁 𑀧𑀦 𑀧𑀲𑁆𑀲𑀦𑁆𑀢𑀸𑀦𑀁 𑀧𑀲𑀸𑀤𑀸𑀯𑀳𑀦𑁆𑀢𑀺 𑀆𑀳 ‘‘𑀲𑀼𑀧𑀸𑀲𑀸𑀤𑀺𑀓’’𑀦𑁆𑀢𑀺. 𑀲𑀼𑀝𑁆𑀞𑀼 𑀙𑁂𑀓𑀦𑁆𑀢𑀺 𑀅𑀢𑀺𑀯𑀺𑀬 𑀲𑀼𑀦𑁆𑀤𑀭𑀁. 𑀯𑀺𑀥𑀸𑀢𑀩𑁆𑀩𑁄𑀢𑀺 𑀯𑀺𑀥𑀸𑀢𑀼𑀁 𑀲𑀦𑁆𑀤𑀺𑀲𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑁄. 𑀧𑀺𑀬𑀁 𑀯𑀤𑀢𑀻𑀢𑀺 𑀧𑀺𑀬𑀯𑀤𑀽 𑀬𑀣𑀸 ‘‘𑀲𑀩𑁆𑀩𑀯𑀺𑀤𑀽’’𑀢𑀺. 𑀲𑀼𑀔𑀫𑁂𑀯 𑀲𑀼𑀔𑀢𑀸, 𑀢𑀁 𑀲𑀼𑀔𑀢𑀁. 𑀥𑀫𑁆𑀫𑀜𑁆𑀘 𑀅𑀦𑀼𑀥𑀫𑁆𑀫𑀜𑁆𑀘𑀸𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀜𑁆𑀘𑁂𑀯 𑀢𑀲𑁆𑀲 𑀅𑀦𑀼𑀭𑀽𑀧𑀧𑀼𑀩𑁆𑀩𑀪𑀸𑀕𑀥𑀫𑁆𑀫𑀜𑁆𑀘.

𑀉𑀲𑁆𑀲𑀗𑁆𑀔𑀧𑀸𑀤𑀸𑀤𑀺𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁧𑁨. ‘‘𑀅𑀢𑁆𑀣𑀽𑀧𑀲𑀁𑀳𑀺𑀢’’𑀦𑁆𑀢𑀺 𑀇𑀫𑀺𑀦𑀸 𑀯𑀝𑁆𑀝𑀦𑀺𑀲𑁆𑀲𑀺𑀢𑀸 𑀥𑀫𑁆𑀫𑀓𑀣𑀸 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀇𑀥𑀮𑁄𑀓𑀧𑀭𑀮𑁄𑀓𑀢𑁆𑀣𑀦𑀺𑀲𑁆𑀲𑀺𑀢’’𑀦𑁆𑀢𑀺. ‘‘𑀥𑀫𑁆𑀫𑀽𑀧𑀲𑀁𑀳𑀺𑀢’’𑀦𑁆𑀢𑀺 𑀇𑀫𑀺𑀦𑀸 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑀸, 𑀢𑀲𑁆𑀫𑀸 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀸 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀬𑀸 𑀯𑁂𑀤𑀺𑀢𑀩𑁆𑀩𑀸. 𑀦𑀺𑀤𑀁𑀲𑁂𑀲𑀻𑀢𑀺 𑀲𑀦𑁆𑀤𑀲𑁆𑀲𑁂𑀲𑀺 𑀢𑁂 𑀥𑀫𑁆𑀫𑁂 𑀧𑀘𑁆𑀘𑀓𑁆𑀔𑁂 𑀓𑀢𑁆𑀯𑀸 𑀧𑀓𑀸𑀲𑁂𑀲𑀺. 𑀦𑀺𑀤𑀁𑀲𑀦𑀓𑀣𑀦𑁆𑀢𑀺 𑀧𑀸𑀓𑀝𑀓𑀭𑀡𑀓𑀣𑀁. 𑀚𑁂𑀝𑁆𑀞𑀝𑁆𑀞𑁂𑀦 𑀅𑀕𑁆𑀕𑁄, 𑀧𑀸𑀲𑀁𑀲𑀝𑁆𑀞𑁂𑀦 𑀲𑁂𑀝𑁆𑀞𑁄, 𑀧𑀫𑀼𑀔𑀝𑁆𑀞𑁂𑀦 𑀧𑀸𑀫𑁄𑀓𑁆𑀔𑁄, 𑀧𑀥𑀸𑀦𑀝𑁆𑀞𑁂𑀦 𑀉𑀢𑁆𑀢𑀫𑁄, 𑀳𑀺𑀢𑀲𑀼𑀔𑀢𑁆𑀣𑀺𑀓𑁂𑀳𑀺 𑀧𑀓𑀸𑀭𑀢𑁄 𑀯𑀭𑀡𑀻𑀬𑀢𑁄 𑀭𑀚𑀦𑀻𑀬𑀢𑁄 𑀧𑀯𑀭𑁄𑀢𑀺 𑀏𑀯𑀁 𑀅𑀢𑁆𑀣𑀯𑀺𑀲𑁂𑀲𑀯𑀸𑀘𑀻𑀦𑀫𑁆𑀧𑀺 ‘‘𑀅𑀕𑁆𑀕𑁄’’𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀪𑀸𑀯𑀢𑁆𑀣𑀲𑁆𑀲 𑀪𑁂𑀤𑀸𑀪𑀸𑀯𑀢𑁄 ‘‘𑀲𑀩𑁆𑀩𑀸𑀦𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑀻’’𑀢𑀺 𑀆𑀳.

𑀉𑀤𑁆𑀥𑀗𑁆𑀕𑀫𑀦𑀻𑀬𑀸𑀢𑀺 𑀲𑀼𑀡𑀦𑁆𑀢𑀸𑀦𑀁 𑀉𑀧𑀭𑀽𑀧𑀭𑀺 𑀯𑀺𑀲𑁂𑀲𑀁 𑀕𑀫𑁂𑀦𑁆𑀢𑀻𑀢𑀺 𑀉𑀤𑁆𑀥𑀗𑁆𑀕𑀫𑀦𑀻𑀬𑀸. 𑀲𑀗𑁆𑀔𑀸𑀬 𑀅𑀥𑁄 𑀧𑀺𑀝𑁆𑀞𑀺𑀧𑀸𑀤𑀲𑀫𑀻𑀧𑁂 𑀏𑀯 𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀅𑀥𑁄𑀲𑀗𑁆𑀔𑀸 𑀧𑀸𑀤𑀸 𑀏𑀢𑀲𑁆𑀲𑀸𑀢𑀺 𑀅𑀥𑁄𑀲𑀗𑁆𑀔𑀧𑀸𑀤𑁄. 𑀲𑀗𑁆𑀔𑀸𑀢𑀺 𑀘 𑀕𑁄𑀧𑁆𑀨𑀓𑀸𑀦𑀫𑀺𑀤𑀁 𑀦𑀸𑀫𑀁.

𑁨𑁧𑁩. 𑀥𑀫𑁆𑀫𑀤𑀸𑀦𑀬𑀜𑁆𑀜𑀦𑁆𑀢𑀺 𑀥𑀫𑁆𑀫𑀤𑀸𑀦𑀲𑀗𑁆𑀔𑀸𑀢𑀁 𑀬𑀜𑁆𑀜𑀁.

𑀲𑀼𑀝𑁆𑀞𑀼 𑀲𑀡𑁆𑀞𑀺𑀢𑀸𑀢𑀺 𑀲𑀫𑁆𑀫𑀤𑁂𑀯 𑀲𑀡𑁆𑀞𑀺𑀢𑀸. 𑀧𑀺𑀝𑁆𑀞𑀺𑀧𑀸𑀤𑀲𑁆𑀲 𑀉𑀧𑀭𑀺 𑀧𑀓𑀢𑀺𑀅𑀗𑁆𑀕𑀼𑀮𑁂𑀦 𑀘𑀢𑀼𑀭𑀗𑁆𑀕𑀼𑀮𑁂 𑀚𑀗𑁆𑀖𑀸𑀧𑀤𑁂𑀲𑁂 𑀦𑀺𑀕𑀽𑀴𑁆𑀳𑀸 𑀅𑀧𑀜𑁆𑀜𑀸𑀬𑀫𑀸𑀦𑀭𑀽𑀧𑀸 𑀳𑀼𑀢𑁆𑀯𑀸 𑀞𑀺𑀢𑀸𑀢𑀺 𑀅𑀢𑁆𑀣𑁄.

𑀏𑀡𑀺𑀚𑀗𑁆𑀖𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁧𑁪. 𑀲𑀺𑀧𑁆𑀧𑀦𑁆𑀢𑀺 𑀲𑀺𑀓𑁆𑀔𑀺𑀢𑀩𑁆𑀩𑀝𑁆𑀞𑁂𑀦 ‘‘𑀲𑀺𑀧𑁆𑀧’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀲𑀢𑁆𑀢𑀸𑀦𑀁 𑀚𑀻𑀯𑀺𑀓𑀸𑀳𑁂𑀢𑀼𑀪𑀽𑀢𑀁 𑀆𑀚𑀻𑀯𑀯𑀺𑀥𑀺𑀁. 𑀚𑀻𑀯𑀺𑀓𑀢𑁆𑀣𑀁, 𑀲𑀢𑁆𑀢𑀸𑀦𑀁 𑀉𑀧𑀓𑀸𑀭𑀢𑁆𑀣𑀜𑁆𑀘 𑀯𑁂𑀤𑀺𑀢𑀩𑁆𑀩𑀝𑁆𑀞𑁂𑀦 𑀯𑀺𑀚𑁆𑀚𑀸, 𑀫𑀦𑁆𑀢𑀲𑀢𑁆𑀣𑀸𑀤𑀺. 𑀘𑀭𑀦𑁆𑀢𑀺 𑀢𑁂𑀦 𑀲𑀼𑀕𑀢𑀺𑀁, 𑀲𑀼𑀔𑀜𑁆𑀘 𑀕𑀘𑁆𑀙𑀦𑁆𑀢𑀻𑀢𑀺 𑀘𑀭𑀡𑀁. 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑀁 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 ‘‘𑀓𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀓𑀫𑁆𑀫𑀦𑁆𑀢𑀺 𑀓𑀫𑁆𑀫𑀲𑁆𑀲𑀓𑀢𑀸𑀚𑀸𑀦𑀦𑀧𑀜𑁆𑀜𑀸’’𑀢𑀺. 𑀢𑀸𑀦𑀺 𑀘𑁂𑀯𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀳𑀢𑁆𑀣𑀺𑀆𑀤𑀻𑀦𑀺 𑀘𑁂𑀯. 𑀲𑀢𑁆𑀢 𑀭𑀢𑀦𑀸𑀦𑀻𑀢𑀺 𑀫𑀼𑀢𑁆𑀢𑀸𑀤𑀻𑀦𑀺 𑀲𑀢𑁆𑀢 𑀭𑀢𑀦𑀸𑀦𑀺. 𑀘-𑀲𑀤𑁆𑀤𑁂𑀦 𑀭𑀜𑁆𑀜𑁄 𑀉𑀧𑀪𑁄𑀕𑀪𑀽𑀢𑀸𑀦𑀁 𑀯𑀢𑁆𑀣𑀲𑁂𑀬𑁆𑀬𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀭𑀜𑁆𑀜𑁄 𑀅𑀦𑀼𑀘𑁆𑀙𑀯𑀺𑀓𑀸𑀦𑀻𑀢𑀺 𑀭𑀜𑁆𑀜𑁄 𑀧𑀭𑀺𑀪𑀼𑀜𑁆𑀚𑀦𑀬𑁄𑀕𑁆𑀬𑀸𑀦𑀺. 𑀲𑀩𑁆𑀩𑁂𑀲𑀦𑁆𑀢𑀺 ‘‘𑀭𑀸𑀚𑀸𑀭𑀳𑀸𑀦𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸𑀦𑀁 𑀲𑀩𑁆𑀩𑁂𑀲𑀁𑀬𑁂𑀯 𑀏𑀓𑀚𑁆𑀛𑀁 𑀕𑀳𑀡𑀁. 𑀩𑀼𑀤𑁆𑀥𑀸𑀦𑀁 𑀧𑀭𑀺𑀲𑀸 𑀦𑀸𑀫 𑀑𑀥𑀺𑀲𑁄 𑀅𑀦𑁄𑀥𑀺𑀲𑁄 𑀘 𑀲𑀫𑀺𑀢𑀧𑀸𑀧𑀸, 𑀢𑀣𑀢𑁆𑀣𑀸𑀬 𑀧𑀝𑀺𑀧𑀦𑁆𑀦𑀸 𑀘 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀫𑀡𑀸𑀦𑀁 𑀓𑁄𑀝𑁆𑀞𑀸𑀲𑀪𑀽𑀢𑀸 𑀘𑀢𑀲𑁆𑀲𑁄 𑀧𑀭𑀺𑀲𑀸’’𑀢𑀺.

𑀲𑀺𑀧𑁆𑀧𑀸𑀤𑀺𑀯𑀸𑀘𑀦𑀦𑁆𑀢𑀺 𑀲𑀺𑀧𑁆𑀧𑀸𑀦𑀁 𑀲𑀺𑀓𑁆𑀔𑀸𑀧𑀦𑀁. 𑀧𑀸𑀴𑀺𑀬𑀫𑁆𑀧𑀺 𑀳𑀺 ‘‘𑀯𑀸𑀘𑁂𑀢𑀸’’𑀢𑀺 𑀯𑀸𑀘𑀦𑀲𑀻𑀲𑁂𑀦 𑀲𑀺𑀓𑁆𑀔𑀸𑀧𑀦𑀁 𑀤𑀲𑁆𑀲𑀺𑀢𑀁. 𑀉𑀓𑁆𑀓𑀼𑀝𑀺𑀓𑀸𑀲𑀦𑀦𑁆𑀢𑀺 𑀢𑀁𑀢𑀁𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀡𑁂𑀦 𑀉𑀓𑁆𑀓𑀼𑀝𑀺𑀓𑀲𑁆𑀲 𑀦𑀺𑀲𑀚𑁆𑀚𑀸. 𑀧𑀬𑁄𑀚𑀦𑀯𑀲𑁂𑀦 𑀕𑁂𑀳𑀢𑁄 𑀕𑁂𑀳𑀁 𑀕𑀸𑀫𑀢𑁄 𑀕𑀸𑀫𑀁 𑀚𑀗𑁆𑀖𑀸𑀬𑁄 𑀓𑀺𑀮𑀫𑁂𑀢𑁆𑀯𑀸 𑀧𑁂𑀲𑀦𑀁 𑀚𑀗𑁆𑀖𑀧𑁂𑀲𑀦𑀺𑀓𑀸. 𑀮𑀺𑀔𑀺𑀢𑁆𑀯𑀸 𑀧𑀸𑀢𑀺𑀢𑀁 𑀯𑀺𑀬 𑀳𑁄𑀢𑀺 𑀅𑀧𑀭𑀺𑀧𑀼𑀡𑁆𑀡𑀪𑀸𑀯𑀢𑁄. 𑀅𑀦𑀼𑀧𑀼𑀩𑁆𑀩𑀉𑀕𑁆𑀕𑀢𑀯𑀝𑁆𑀝𑀺𑀢𑀦𑁆𑀢𑀺 𑀕𑁄𑀧𑁆𑀨𑀓𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀚𑀸𑀡𑀼𑀧𑁆𑀧𑀤𑁂𑀲𑀸 𑀫𑀁𑀲𑀽𑀧𑀘𑀬𑀲𑁆𑀲 𑀅𑀦𑀼𑀓𑁆𑀓𑀫𑁂𑀦 𑀲𑀫𑀦𑁆𑀢𑀢𑁄 𑀯𑀟𑁆𑀠𑀺𑀢𑀢𑁆𑀢𑀸 𑀅𑀦𑀼𑀧𑀼𑀩𑁆𑀩𑁂𑀦 𑀉𑀕𑁆𑀕𑀢𑀁 𑀳𑀼𑀢𑁆𑀯𑀸 𑀲𑀼𑀯𑀝𑁆𑀝𑀺𑀢𑀁. 𑀏𑀡𑀺𑀚𑀗𑁆𑀖𑀮𑀓𑁆𑀔𑀡𑀦𑁆𑀢𑀺 𑀲𑀡𑁆𑀞𑀸𑀦𑀫𑀢𑁆𑀢𑁂𑀦 𑀏𑀡𑀺𑀫𑀺𑀕𑀚𑀗𑁆𑀖𑀸𑀲𑀤𑀺𑀲𑀚𑀗𑁆𑀖𑀮𑀓𑁆𑀔𑀡𑀁.

𑁨𑁧𑁫. ‘‘𑀬𑀢𑀼𑀧𑀖𑀸𑀢𑀸𑀬𑀸’’𑀢𑀺 𑀏𑀢𑁆𑀣 𑀢-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀅𑀦𑀼𑀦𑀸𑀲𑀺𑀓𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀬’’𑀦𑁆𑀢𑀺𑀆𑀤𑀺. ‘‘𑀉𑀤𑁆𑀥𑀕𑁆𑀕𑀮𑁄𑀫𑀸 𑀲𑀼𑀔𑀼𑀫𑀢𑁆𑀢𑀘𑁄𑀢𑁆𑀣𑀢𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀘𑁄𑀤𑀓𑁂𑀦 ‘‘𑀓𑀺𑀁 𑀧𑀦 𑀅𑀜𑁆𑀜𑁂𑀦 𑀓𑀫𑁆𑀫𑁂𑀦 𑀅𑀜𑁆𑀜𑀁 𑀮𑀓𑁆𑀔𑀡𑀁 𑀦𑀺𑀩𑁆𑀩𑀢𑁆𑀢𑀢𑀻’’𑀢𑀺 𑀘𑁄𑀤𑀺𑀢𑁄, 𑀆𑀘𑀭𑀺𑀬𑁄 ‘‘𑀦 𑀦𑀺𑀩𑁆𑀩𑀢𑁆𑀢𑀢𑀻’’𑀢𑀺 𑀯𑀢𑁆𑀯𑀸 ‘‘𑀬𑀤𑀺 𑀏𑀯𑀁 𑀇𑀥 𑀓𑀲𑁆𑀫𑀸 𑀮𑀓𑁆𑀔𑀡𑀦𑁆𑀢𑀭𑀁 𑀓𑀣𑀺𑀢’’𑀦𑁆𑀢𑀺 𑀅𑀦𑁆𑀢𑁄𑀮𑀻𑀦𑀫𑁂𑀯 𑀘𑁄𑀤𑀦𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀬𑀁 𑀧𑀦 𑀦𑀺𑀩𑁆𑀩𑀢𑁆𑀢𑀢𑀻𑀢𑀺…𑀧𑁂… 𑀇𑀥 𑀯𑀼𑀢𑁆𑀢’’𑀦𑁆𑀢𑀺 𑀆𑀳. 𑀢𑀢𑁆𑀣 𑀬𑀁 𑀧𑀦 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀬𑀁 𑀮𑀓𑁆𑀔𑀡𑀁 𑀯𑀼𑀘𑁆𑀘𑀫𑀸𑀦𑀮𑀓𑁆𑀔𑀡𑀦𑀺𑀩𑁆𑀩𑀢𑁆𑀢𑀓𑁂𑀦 𑀓𑀫𑁆𑀫𑀼𑀦𑀸 𑀦𑀺𑀩𑁆𑀩𑀢𑁆𑀢𑀢𑀺. 𑀢𑀁 𑀅𑀦𑀼𑀩𑁆𑀬𑀜𑁆𑀚𑀦𑀁 𑀳𑁄𑀢𑀻𑀢𑀺 𑀢𑀁 𑀮𑀓𑁆𑀔𑀡𑀁 𑀯𑀼𑀘𑁆𑀘𑀫𑀸𑀦𑀲𑁆𑀲 𑀮𑀓𑁆𑀔𑀡𑀲𑁆𑀲 𑀅𑀦𑀼𑀓𑀽𑀮𑀮𑀓𑁆𑀔𑀡𑀁 𑀦𑀸𑀫 𑀳𑁄𑀢𑀺. 𑀢𑀲𑁆𑀫𑀸 𑀢𑁂𑀦 𑀓𑀸𑀭𑀡𑁂𑀦 𑀇𑀥 𑀏𑀡𑀺𑀚𑀗𑁆𑀖𑀮𑀓𑁆𑀔𑀡𑀓𑀣𑀦𑁂 ‘‘𑀉𑀤𑁆𑀥𑀕𑁆𑀕𑀮𑁄𑀫𑀸 𑀲𑀼𑀔𑀼𑀫𑀢𑁆𑀢𑀘𑁄𑀢𑁆𑀣𑀢𑀸’’𑀢𑀺 𑀮𑀓𑁆𑀔𑀡𑀦𑁆𑀢𑀭𑀁 𑀯𑀼𑀢𑁆𑀢𑀁.

𑀲𑀼𑀔𑀼𑀫𑀘𑁆𑀙𑀯𑀺𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁧𑁬. 𑀲𑀫𑀺𑀢𑀧𑀸𑀧𑀝𑁆𑀞𑁂𑀦 𑀲𑀫𑀡𑀁, 𑀦 𑀧𑀩𑁆𑀩𑀚𑁆𑀚𑀸𑀫𑀢𑁆𑀢𑁂𑀦. 𑀩𑀸𑀳𑀺𑀢𑀧𑀸𑀧𑀝𑁆𑀞𑁂𑀦 𑀩𑁆𑀭𑀸𑀳𑁆𑀫𑀡𑀁, 𑀦 𑀚𑀸𑀢𑀺𑀫𑀢𑁆𑀢𑁂𑀦.

𑀫𑀳𑀦𑁆𑀢𑀸𑀦𑀁 𑀅𑀢𑁆𑀣𑀸𑀦𑀁 𑀧𑀭𑀺𑀕𑁆𑀕𑀡𑁆𑀳𑀦𑀢𑁄 𑀫𑀳𑀢𑀻 𑀧𑀜𑁆𑀜𑀸 𑀏𑀢𑀲𑁆𑀲𑀸𑀢𑀺 𑀫𑀳𑀸𑀧𑀜𑁆𑀜𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀆𑀳 ‘‘𑀫𑀳𑀸𑀧𑀜𑁆𑀜𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄’’𑀢𑀺. 𑀦𑀸𑀦𑀢𑁆𑀢𑀦𑁆𑀢𑀺 𑀬𑀸𑀳𑀺 𑀫𑀳𑀸𑀧𑀜𑁆𑀜𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀪𑀕𑀯𑀸 ‘‘𑀫𑀳𑀸𑀧𑀜𑁆𑀜𑁄’’𑀢𑀺𑀆𑀤𑀺𑀦𑀸 𑀓𑀺𑀢𑁆𑀢𑀻𑀬𑀢𑀺, 𑀢𑀸𑀲𑀁 𑀫𑀳𑀸𑀧𑀜𑁆𑀜𑀸𑀤𑀻𑀦𑀁 𑀇𑀤𑀁 𑀦𑀸𑀦𑀢𑁆𑀢𑀁 𑀅𑀬𑀁 𑀯𑁂𑀫𑀢𑁆𑀢𑀢𑀸.

𑀬𑀲𑁆𑀲 𑀓𑀲𑁆𑀲𑀘𑀺 𑀯𑀺𑀲𑁂𑀲𑀢𑁄 𑀅𑀭𑀽𑀧𑀥𑀫𑁆𑀫𑀲𑁆𑀲 𑀫𑀳𑀢𑁆𑀢𑀁 𑀦𑀸𑀫 𑀓𑀺𑀘𑁆𑀘𑀲𑀺𑀤𑁆𑀥𑀺𑀬𑀸 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀢𑀤𑀲𑁆𑀲𑀸 𑀓𑀺𑀘𑁆𑀘𑀲𑀺𑀤𑁆𑀥𑀺𑀬𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀳𑀦𑁆𑀢𑁂 𑀲𑀻𑀮𑀓𑁆𑀔𑀦𑁆𑀥𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀫𑀳𑀸𑀧𑀜𑁆𑀜𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀳𑁂𑀢𑀼𑀫𑀳𑀦𑁆𑀢𑀢𑀸𑀬, 𑀧𑀘𑁆𑀘𑀬𑀫𑀳𑀦𑁆𑀢𑀢𑀸𑀬, 𑀦𑀺𑀲𑁆𑀲𑀬𑀫𑀳𑀦𑁆𑀢𑀢𑀸𑀬, 𑀧𑀪𑁂𑀤𑀫𑀳𑀦𑁆𑀢𑀢𑀸𑀬, 𑀓𑀺𑀘𑁆𑀘𑀫𑀳𑀦𑁆𑀢𑀢𑀸𑀬, 𑀨𑀮𑀫𑀳𑀦𑁆𑀢𑀢𑀸𑀬, 𑀆𑀦𑀺𑀲𑀁𑀲𑀫𑀳𑀦𑁆𑀢𑀢𑀸𑀬 𑀘 𑀲𑀻𑀮𑀓𑁆𑀔𑀦𑁆𑀥𑀲𑁆𑀲 𑀫𑀳𑀦𑁆𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀳𑁂𑀢𑀼 𑀅𑀮𑁄𑀪𑀸𑀤𑀬𑁄. 𑀧𑀘𑁆𑀘𑀬𑁄 𑀳𑀺𑀭𑁄𑀢𑁆𑀢𑀧𑁆𑀧𑀲𑀤𑁆𑀥𑀸𑀲𑀢𑀺𑀯𑀻𑀭𑀺𑀬𑀸𑀤𑀬𑁄. 𑀦𑀺𑀲𑁆𑀲𑀬𑁄 𑀲𑀸𑀯𑀓𑀩𑁄𑀥𑀺𑀧𑀘𑁆𑀘𑁂𑀓𑀩𑁄𑀥𑀺𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀦𑀺𑀬𑀢𑀢𑀸, 𑀢𑀁𑀲𑀫𑀗𑁆𑀕𑀺𑀦𑁄 𑀘 𑀧𑀼𑀭𑀺𑀲𑀯𑀺𑀲𑁂𑀲𑀸. 𑀧𑀪𑁂𑀤𑁄 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀸𑀤𑀺𑀯𑀺𑀪𑀸𑀕𑁄. 𑀓𑀺𑀘𑁆𑀘𑀁 𑀢𑀤𑀗𑁆𑀕𑀸𑀤𑀺𑀯𑀲𑁂𑀦 𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑀁. 𑀆𑀦𑀺𑀲𑀁𑀲𑁄 𑀧𑀺𑀬𑀫𑀦𑀸𑀧𑀢𑀸𑀤𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂, (𑀯𑀺𑀲𑀼𑀤𑁆𑀥𑀺. 𑁧.𑁬) 𑀆𑀓𑀗𑁆𑀔𑁂𑀬𑁆𑀬𑀲𑀼𑀢𑁆𑀢𑀸𑀤𑀻𑀲𑀼 (𑀫. 𑀦𑀺. 𑁧.𑁬𑁫) 𑀘 𑀆𑀕𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀦𑀸 𑀦𑀬𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑀸𑀤𑀻𑀦𑀫𑁆𑀧𑀺 𑀫𑀳𑀦𑁆𑀢𑀢𑀸 𑀬𑀣𑀸𑀭𑀳𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸. 𑀞𑀸𑀦𑀸𑀞𑀸𑀦𑀸𑀦𑀁 𑀧𑀦 𑀫𑀳𑀸𑀯𑀺𑀲𑀬𑀢𑀸𑀬, 𑀲𑀸 𑀩𑀳𑀼𑀥𑀸𑀢𑀼𑀓𑀲𑀼𑀢𑁆𑀢𑁂 𑀆𑀕𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑀦𑀺𑀤𑁆𑀥𑀸𑀭𑀡𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀅𑀭𑀺𑀬𑀲𑀘𑁆𑀘𑀸𑀦𑀁 𑀲𑀓𑀮𑀲𑀸𑀲𑀦𑀲𑀗𑁆𑀕𑀳𑀢𑁄, 𑀲𑁄 𑀲𑀘𑁆𑀘𑀯𑀺𑀪𑀗𑁆𑀕- (𑀯𑀺𑀪. 𑁧𑁮𑁯) 𑀢𑀁𑀲𑀁𑀯𑀡𑁆𑀡𑀦𑀸𑀲𑀼 (𑀯𑀺𑀪. 𑀅𑀝𑁆𑀞. 𑁧𑁮𑁯) 𑀆𑀕𑀢𑀦𑀬𑁂𑀦, 𑀲𑀢𑀺𑀧𑀝𑁆𑀞𑀸𑀦𑀸 𑀤𑀻𑀦𑀁 𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀗𑁆𑀕𑀸𑀤𑀻𑀲𑀼, (𑀯𑀺𑀪. 𑁩𑁫𑁫) 𑀢𑀁𑀲𑀁𑀯𑀡𑁆𑀡𑀦𑀸𑀲𑀼 (𑀯𑀺𑀪. 𑀅𑀝𑁆𑀞. 𑁩𑁫𑁫) 𑀘 𑀆𑀕𑀢𑀦𑀬𑁂𑀦, 𑀲𑀸𑀫𑀜𑁆𑀜𑀨𑀮𑀸𑀦𑀁 𑀫𑀳𑀢𑁄 𑀳𑀺𑀢𑀲𑁆𑀲, 𑀫𑀳𑀢𑁄 𑀲𑀼𑀔𑀲𑁆𑀲, 𑀫𑀳𑀢𑁄 𑀅𑀢𑁆𑀣𑀲𑁆𑀲, 𑀫𑀳𑀢𑁄 𑀬𑁄𑀕𑀓𑁆𑀔𑁂𑀫𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀪𑀸𑀯𑀢𑁄, 𑀲𑀦𑁆𑀢𑀧𑀡𑀻𑀢𑀦𑀺𑀧𑀼𑀡𑀅𑀢𑀓𑁆𑀓𑀸𑀯𑀘𑀭𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀪𑀸𑀯𑀢𑁄 𑀘; 𑀅𑀪𑀺𑀜𑁆𑀜𑀸𑀦𑀁 𑀫𑀳𑀸𑀲𑀫𑁆𑀪𑀸𑀭𑀢𑁄, 𑀫𑀳𑀸𑀯𑀺𑀲𑀬𑀢𑁄, 𑀫𑀳𑀸𑀓𑀺𑀘𑁆𑀘𑀢𑁄, 𑀫𑀳𑀸𑀦𑀼𑀪𑀸𑀯𑀢𑁄, 𑀫𑀳𑀸𑀦𑀺𑀩𑁆𑀩𑀢𑁆𑀢𑀺𑀢𑁄 𑀘, 𑀦𑀺𑀩𑁆𑀩𑀸𑀦𑀲𑁆𑀲 𑀫𑀤𑀦𑀺𑀫𑁆𑀫𑀤𑀦𑀸𑀤𑀺𑀫𑀳𑀢𑁆𑀢𑀲𑀺𑀤𑁆𑀥𑀺𑀢𑁄 𑀫𑀳𑀦𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀧𑀼𑀣𑀼𑀧𑀜𑁆𑀜𑀸𑀢𑀺 𑀏𑀢𑁆𑀣𑀸𑀧𑀺 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀦𑀸𑀦𑀸𑀔𑀦𑁆𑀥𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 ‘‘𑀅𑀬𑀁 𑀭𑀽𑀧𑀓𑁆𑀔𑀦𑁆𑀥𑁄 𑀦𑀸𑀫…𑀧𑁂… 𑀅𑀬𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀦𑀸𑀫𑀸’’𑀢𑀺 𑀏𑀯𑀁 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀸𑀦𑀸𑀓𑀭𑀡𑀁 𑀧𑀝𑀺𑀘𑁆𑀘 𑀜𑀸𑀡𑀁 𑀧𑀯𑀢𑁆𑀢𑀢𑀺. 𑀢𑁂𑀲𑀼𑀧𑀺 ‘‘𑀏𑀓𑀯𑀺𑀥𑁂𑀦 𑀭𑀽𑀧𑀓𑁆𑀔𑀦𑁆𑀥𑁄, 𑀏𑀓𑀸𑀤𑀲𑀯𑀺𑀥𑁂𑀦 𑀭𑀽𑀧𑀓𑁆𑀔𑀦𑁆𑀥𑁄. 𑀏𑀓𑀯𑀺𑀥𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀩𑀳𑀼𑀯𑀺𑀥𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄. 𑀏𑀓𑀯𑀺𑀥𑁂𑀦 𑀲𑀜𑁆𑀜𑀸𑀓𑁆𑀔𑀦𑁆𑀥𑁄. 𑀏𑀓𑀯𑀺𑀥𑁂𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄. 𑀏𑀓𑀯𑀺𑀥𑁂𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀩𑀳𑀼𑀯𑀺𑀥𑁂𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺 𑀏𑀯𑀁 𑀏𑀓𑁂𑀓𑀲𑁆𑀲 𑀔𑀦𑁆𑀥𑀲𑁆𑀲 𑀅𑀢𑀻𑀢𑀸𑀤𑀺𑀪𑁂𑀤𑀯𑀲𑁂𑀦𑀸𑀧𑀺 𑀦𑀸𑀦𑀸𑀓𑀭𑀡𑀁 𑀧𑀝𑀺𑀘𑁆𑀘 𑀜𑀸𑀡𑀁 𑀧𑀯𑀢𑁆𑀢𑀢𑀺. 𑀢𑀣𑀸 ‘‘𑀇𑀤𑀁 𑀘𑀓𑁆𑀔𑀸𑀬𑀢𑀦𑀁 𑀦𑀸𑀫…𑀧𑁂...𑀇𑀤𑀁 𑀥𑀫𑁆𑀫𑀸𑀬𑀢𑀦𑀁 𑀦𑀸𑀫. 𑀢𑀢𑁆𑀣 𑀤𑀲𑀸𑀬𑀢𑀦𑀸 𑀓𑀸𑀫𑀸𑀯𑀘𑀭𑀸, 𑀤𑁆𑀯𑁂 𑀘𑀢𑀼𑀪𑀽𑀫𑀓𑀸’’𑀢𑀺 𑀏𑀯𑀁 𑀆𑀬𑀢𑀦𑀸𑀦𑀁 𑀦𑀸𑀦𑀢𑁆𑀢𑀁 𑀧𑀝𑀺𑀘𑁆𑀘 𑀜𑀸𑀡𑀁 𑀧𑀯𑀢𑁆𑀢𑀢𑀺. 𑀦𑀸𑀦𑀸𑀥𑀸𑀢𑀽𑀲𑀽𑀢𑀺 ‘‘𑀅𑀬𑀁 𑀘𑀓𑁆𑀔𑀼𑀥𑀸𑀢𑀼 𑀦𑀸𑀫…𑀧𑁂… 𑀅𑀬𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀦𑀸𑀫. 𑀢𑀢𑁆𑀣 𑀲𑁄𑀴𑀲 𑀥𑀸𑀢𑀼𑀬𑁄 𑀓𑀸𑀫𑀸𑀯𑀘𑀭𑀸, 𑀤𑁆𑀯𑁂 𑀥𑀸𑀢𑀼𑀬𑁄 𑀘𑀢𑀼𑀪𑀽𑀫𑀺𑀓𑀸’’𑀢𑀺 𑀏𑀯𑀁 𑀦𑀸𑀦𑀸𑀥𑀸𑀢𑀽𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀺, 𑀢𑀬𑀺𑀤𑀁 𑀉𑀧𑀸𑀤𑀺𑀦𑁆𑀦𑀓𑀥𑀸𑀢𑀼𑀯𑀲𑁂𑀦 𑀯𑀼𑀢𑁆𑀢𑀁. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀫𑁆𑀧𑀺 𑀳𑀺 𑀤𑁆𑀯𑀺𑀦𑁆𑀦𑀜𑁆𑀘 𑀅𑀕𑁆𑀕𑀲𑀸𑀯𑀓𑀸𑀦𑀁 𑀉𑀧𑀸𑀤𑀺𑀦𑁆𑀦𑀓𑀥𑀸𑀢𑀽𑀲𑀼 𑀏𑀯𑀁 𑀦𑀸𑀦𑀸𑀓𑀭𑀡𑀁 𑀧𑀝𑀺𑀘𑁆𑀘 𑀜𑀸𑀡𑀁 𑀧𑀯𑀢𑁆𑀢𑀢𑀺, 𑀢𑀜𑁆𑀘 𑀔𑁄 𑀏𑀓𑀤𑁂𑀲𑀢𑁄𑀯, 𑀦 𑀦𑀺𑀧𑁆𑀧𑀤𑁂𑀲𑀢𑁄. 𑀅𑀦𑀼𑀧𑀸𑀤𑀺𑀦𑁆𑀦𑀓𑀥𑀸𑀢𑀽𑀦𑀁 𑀧𑀦 𑀮𑀓𑁆𑀔𑀡𑀸𑀤𑀺𑀫𑀢𑁆𑀢𑀫𑁂𑀯 𑀚𑀸𑀦𑀦𑁆𑀢𑀺, 𑀦 𑀦𑀸𑀦𑀸𑀓𑀭𑀡𑀁. 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀫𑁂𑀯 𑀧𑀦 ‘‘𑀇𑀫𑀸𑀬 𑀦𑀸𑀫𑀥𑀸𑀢𑀼𑀬𑀸 𑀉𑀲𑁆𑀲𑀦𑁆𑀦𑀢𑁆𑀢𑀸 𑀇𑀫𑀲𑁆𑀲 𑀭𑀼𑀓𑁆𑀔𑀲𑁆𑀲 𑀔𑀦𑁆𑀥𑁄 𑀲𑁂𑀢𑁄, 𑀇𑀫𑀲𑁆𑀲 𑀓𑀸𑀴𑁄, 𑀇𑀫𑀲𑁆𑀲 𑀫𑀝𑁆𑀞𑁄, 𑀇𑀫𑀲𑁆𑀲 𑀩𑀳𑀮𑀢𑁆𑀢𑀘𑁄, 𑀇𑀫𑀲𑁆𑀲 𑀢𑀦𑀼𑀢𑀘𑁄. 𑀇𑀫𑀲𑁆𑀲 𑀧𑀢𑁆𑀢𑀁 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀺𑀯𑀲𑁂𑀦 𑀏𑀯𑀭𑀽𑀧𑀁. 𑀇𑀫𑀲𑁆𑀲 𑀧𑀼𑀧𑁆𑀨𑀁 𑀦𑀻𑀮𑀁, 𑀇𑀫𑀲𑁆𑀲 𑀧𑀻𑀢𑀓𑀁, 𑀮𑁄𑀳𑀺𑀢𑀓𑀁, 𑀑𑀤𑀸𑀢𑀁, 𑀲𑀼𑀕𑀦𑁆𑀥𑀁, 𑀤𑀼𑀕𑁆𑀕𑀦𑁆𑀥𑀁. 𑀨𑀮𑀁 𑀔𑀼𑀤𑁆𑀤𑀓𑀁, 𑀫𑀳𑀦𑁆𑀢𑀁, 𑀤𑀻𑀖𑀁, 𑀯𑀝𑁆𑀝𑀁, 𑀲𑀼𑀲𑀡𑁆𑀞𑀸𑀦𑀁, 𑀤𑀼𑀲𑁆𑀲𑀡𑁆𑀞𑀸𑀦𑀁, 𑀫𑀝𑁆𑀞𑀁, 𑀨𑀭𑀼𑀲𑀁, 𑀲𑀼𑀕𑀦𑁆𑀥𑀁, 𑀤𑀼𑀕𑁆𑀕𑀦𑁆𑀥𑀁, 𑀫𑀥𑀼𑀭𑀁, 𑀢𑀺𑀢𑁆𑀢𑀓𑀁, 𑀅𑀫𑁆𑀩𑀺𑀮𑀁, 𑀓𑀝𑀼𑀓𑀁, 𑀓𑀲𑀸𑀯𑀁. 𑀓𑀡𑁆𑀝𑀓𑁄 𑀢𑀺𑀔𑀺𑀡𑁄, 𑀅𑀢𑀺𑀔𑀺𑀡𑁄, 𑀉𑀚𑀼𑀓𑁄, 𑀓𑀼𑀝𑀺𑀮𑁄, 𑀓𑀡𑁆𑀳𑁄, 𑀦𑀻𑀮𑁄, 𑀑𑀤𑀸𑀢𑁄 𑀳𑁄𑀢𑀻’’𑀢𑀺 𑀥𑀸𑀢𑀼𑀦𑀸𑀦𑀢𑁆𑀢𑀁 𑀧𑀝𑀺𑀘𑁆𑀘 𑀜𑀸𑀡𑀁 𑀧𑀯𑀢𑁆𑀢𑀢𑀺.

𑀦𑀸𑀦𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀲𑀽𑀢𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀪𑁂𑀤𑀢𑁄 𑀘 𑀦𑀸𑀦𑀸𑀧𑀪𑁂𑀤𑁂𑀲𑀼 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑁂𑀲𑀼. 𑀅𑀯𑀺𑀚𑁆𑀚𑀸𑀤𑀺𑀅𑀗𑁆𑀕𑀸𑀦𑀺 𑀳𑀺 𑀧𑀘𑁆𑀘𑁂𑀓𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑀜𑁆𑀜𑀺𑀢𑀸𑀦𑀺. 𑀢𑁂𑀦𑀸𑀳 𑀲𑀗𑁆𑀔𑀸𑀭𑀧𑀺𑀝𑀓𑁂 ‘‘𑀤𑁆𑀯𑀸𑀤𑀲 𑀧𑀘𑁆𑀘𑀬𑀸 𑀤𑁆𑀯𑀸𑀤𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸’’𑀢𑀺. 𑀦𑀸𑀦𑀸𑀲𑀼𑀜𑁆𑀜𑀢𑀫𑀦𑀼𑀧𑀮𑀩𑁆𑀪𑁂𑀲𑀽𑀢𑀺 𑀦𑀸𑀦𑀸𑀲𑀪𑀸𑀯𑁂𑀲𑀼 𑀦𑀺𑀘𑁆𑀘𑀲𑀸𑀭𑀸𑀤𑀺𑀯𑀺𑀭𑀳𑀺𑀢𑁂𑀲𑀼 𑀲𑀼𑀜𑁆𑀜𑀢𑀪𑀸𑀯𑁂𑀲𑀼 𑀢𑀢𑁄 𑀏𑀯 𑀇𑀢𑁆𑀣𑀺𑀧𑀼𑀭𑀺𑀲𑀅𑀢𑁆𑀢𑀢𑁆𑀢𑀦𑀺𑀬𑀸𑀤𑀺𑀯𑀲𑁂𑀦 𑀅𑀦𑀼𑀧𑀮𑀩𑁆𑀪𑀦𑀲𑀪𑀸𑀯𑁂𑀲𑀼 𑀧𑀓𑀸𑀭𑁂𑀲𑀼. 𑀫-𑀓𑀸𑀭𑁄 𑀳𑁂𑀢𑁆𑀣 𑀧𑀤𑀲𑀦𑁆𑀥𑀺𑀓𑀭𑁄. 𑀦𑀸𑀦𑀸𑀅𑀢𑁆𑀣𑁂𑀲𑀽𑀢𑀺 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀬 𑀯𑀺𑀲𑀬𑀪𑀽𑀢𑁂𑀲𑀼 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀤𑀺𑀯𑀲𑁂𑀦 𑀦𑀸𑀦𑀸𑀯𑀺𑀥𑁂𑀲𑀼 𑀅𑀢𑁆𑀣𑁂𑀲𑀼. 𑀥𑀫𑁆𑀫𑁂𑀲𑀽𑀢𑀺 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸𑀬 𑀯𑀺𑀲𑀬𑀪𑀽𑀢𑁂𑀲𑀼 𑀧𑀘𑁆𑀘𑀬𑀸𑀤𑀺𑀯𑀲𑁂𑀦 𑀦𑀸𑀦𑀸𑀯𑀺𑀥𑁂𑀲𑀼 𑀥𑀫𑁆𑀫𑁂𑀲𑀼. 𑀦𑀺𑀭𑀼𑀢𑁆𑀢𑀻𑀲𑀽𑀢𑀺 𑀢𑁂𑀲𑀁𑀬𑁂𑀯 𑀅𑀢𑁆𑀣𑀥𑀫𑁆𑀫𑀸𑀦𑀁 𑀦𑀺𑀤𑁆𑀥𑀸𑀭𑀡𑀯𑀘𑀦𑀲𑀗𑁆𑀔𑀸𑀢𑁂𑀲𑀼 𑀦𑀸𑀦𑀸𑀦𑀺𑀭𑀼𑀢𑁆𑀢𑀻𑀲𑀼. 𑀧𑀝𑀺𑀪𑀸𑀦𑁂𑀲𑀽𑀢𑀺 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀤𑀻𑀲𑀼 𑀯𑀺𑀲𑀬𑀪𑀽𑀢𑁂𑀲𑀼 ‘‘𑀇𑀫𑀸𑀦𑀺 𑀜𑀸𑀡𑀸𑀦𑀺 𑀇𑀤𑀫𑀢𑁆𑀣𑀚𑁄𑀢𑀓𑀸𑀦𑀻’’𑀢𑀺 (𑀯𑀺𑀪. 𑁭𑁨𑁬, 𑁭𑁨𑁯, 𑁭𑁩𑁧, 𑁭𑁩𑁨, 𑁭𑁩𑁪, 𑁭𑁩𑁬, 𑁭𑁩𑁯) 𑀢𑀣𑀸 𑀢𑀣𑀸 𑀧𑀝𑀺𑀪𑀸𑀦𑀢𑁄 𑀉𑀧𑀢𑀺𑀝𑁆𑀞𑀦𑀢𑁄 ‘‘𑀧𑀝𑀺𑀪𑀸𑀦𑀸𑀦𑀻’’𑀢𑀺 𑀮𑀤𑁆𑀥𑀦𑀸𑀫𑁂𑀲𑀼 𑀦𑀸𑀦𑀸𑀜𑀸𑀡𑁂𑀲𑀼. ‘‘𑀧𑀼𑀣𑀼𑀦𑀸𑀦𑀸𑀲𑀻𑀮𑀓𑁆𑀔𑀦𑁆𑀥𑁂𑀲𑀽’’𑀢𑀺𑀆𑀤𑀻𑀲𑀼 𑀲𑀻𑀮𑀲𑁆𑀲 𑀧𑀼𑀣𑀼𑀢𑁆𑀢𑀁 𑀯𑀼𑀢𑁆𑀢𑀫𑁂𑀯, 𑀇𑀢𑀭𑁂𑀲𑀁 𑀧𑀦 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀧𑀸𑀓𑀝𑀫𑁂𑀯. 𑀬𑀁 𑀧𑀦 𑀅𑀪𑀺𑀦𑁆𑀦𑀁 𑀏𑀓𑀫𑁂𑀯 𑀦𑀺𑀩𑁆𑀩𑀸𑀦𑀁, 𑀢𑀢𑁆𑀣 𑀉𑀧𑀘𑀸𑀭𑀯𑀲𑁂𑀦 𑀧𑀼𑀣𑀼𑀢𑁆𑀢𑀁 𑀕𑀳𑁂𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀧𑀼𑀣𑀼𑀚𑁆𑀚𑀦𑀲𑀸𑀥𑀸𑀭𑀡𑁂 𑀥𑀫𑁆𑀫𑁂 𑀲𑀫𑀢𑀺𑀓𑁆𑀓𑀫𑁆𑀫𑀸’’𑀢𑀺, 𑀢𑁂𑀦𑀲𑁆𑀲 𑀫𑀤𑀦𑀺𑀫𑁆𑀫𑀤𑀦𑀸𑀤𑀺𑀧𑀭𑀺𑀬𑀸𑀬𑁂𑀦 𑀧𑀼𑀣𑀼𑀢𑁆𑀢𑀁 𑀧𑀭𑀺𑀤𑀻𑀧𑀺𑀢𑀁 𑀳𑁄𑀢𑀺.

𑀏𑀯𑀁 𑀯𑀺𑀲𑀬𑀯𑀲𑁂𑀦 𑀧𑀜𑁆𑀜𑀸𑀬 𑀫𑀳𑀢𑁆𑀢𑀁, 𑀧𑀼𑀣𑀼𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀯𑀲𑁂𑀦 𑀳𑀸𑀲𑀪𑀸𑀯𑀁, 𑀧𑀯𑀢𑁆𑀢𑀺𑀆𑀓𑀸𑀭𑀯𑀲𑁂𑀦 𑀚𑀯𑀦𑀪𑀸𑀯𑀁, 𑀓𑀺𑀘𑁆𑀘𑀯𑀲𑁂𑀦 𑀢𑀺𑀓𑁆𑀔𑀸𑀤𑀺𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀢𑀫𑀸 𑀳𑀸𑀲𑀧𑀜𑁆𑀜𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀸𑀲𑀩𑀳𑀼𑀮𑁄𑀢𑀺 𑀧𑀻𑀢𑀺𑀩𑀳𑀼𑀮𑁄. 𑀲𑁂𑀲𑀧𑀤𑀸𑀦𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺. 𑀲𑀻𑀮𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑀳𑀝𑁆𑀞𑀧𑀳𑀝𑁆𑀞𑁄 𑀉𑀤𑀕𑁆𑀕𑀼𑀤𑀕𑁆𑀕𑁄 𑀳𑀼𑀢𑁆𑀯𑀸 𑀞𑀧𑁂𑀢𑁆𑀯𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀁 𑀢𑀲𑁆𑀲 𑀯𑀺𑀲𑀼𑀁 𑀯𑀼𑀢𑁆𑀢𑀢𑁆𑀢𑀸 𑀅𑀦𑀯𑀲𑁂𑀲𑀲𑀻𑀮𑀁 𑀧𑀭𑀺𑀧𑀽𑀭𑁂𑀢𑀺. 𑀧𑀻𑀢𑀺𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀳𑀺 𑀧𑀜𑁆𑀜𑀸 𑀅𑀪𑀺𑀭𑀢𑀺𑀯𑀲𑁂𑀦 𑀆𑀭𑀫𑁆𑀫𑀡𑁂 𑀨𑀼𑀮𑁆𑀮𑀺𑀢𑀯𑀺𑀓𑀲𑀺𑀢𑀸 𑀯𑀺𑀬 𑀧𑀯𑀢𑁆𑀢𑀢𑀺, 𑀦 𑀏𑀯𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀸. 𑀧𑀼𑀦 𑀲𑀻𑀮𑀓𑁆𑀔𑀦𑁆𑀥𑀦𑁆𑀢𑀺 𑀅𑀭𑀺𑀬𑀲𑀻𑀮𑀓𑁆𑀔𑀦𑁆𑀥𑀫𑀸𑀳. ‘‘𑀲𑀫𑀸𑀥𑀺𑀓𑁆𑀔𑀦𑁆𑀥’’𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀲𑀩𑁆𑀩𑀁 𑀢𑀁 𑀭𑀽𑀧𑀁 𑀅𑀦𑀺𑀘𑁆𑀘𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀬𑀸 𑀭𑀽𑀧𑀥𑀫𑁆𑀫𑁂 ‘‘𑀅𑀦𑀺𑀘𑁆𑀘𑀸’’𑀢𑀺 𑀲𑀻𑀖𑀯𑁂𑀕𑁂𑀦 𑀧𑀯𑀢𑁆𑀢𑀢𑀺, 𑀧𑀝𑀺𑀧𑀓𑁆𑀔𑀤𑀽𑀭𑀪𑀸𑀯𑁂𑀦 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀲𑁆𑀲 𑀲𑀸𑀢𑀺𑀲𑀬𑀢𑁆𑀢𑀸 𑀇𑀦𑁆𑀤𑁂𑀦 𑀯𑀺𑀲𑁆𑀲𑀝𑁆𑀞𑀯𑀚𑀺𑀭𑀁 𑀯𑀺𑀬 𑀮𑀓𑁆𑀔𑀡𑀁 𑀅𑀯𑀺𑀭𑀚𑁆𑀛𑀦𑁆𑀢𑀻 𑀅𑀤𑀦𑁆𑀥𑀸𑀬𑀦𑁆𑀢𑀻 𑀭𑀽𑀧𑀓𑁆𑀔𑀦𑁆𑀥𑁂 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀯𑁂𑀕𑀲𑀸 𑀧𑀝𑀺𑀯𑀺𑀚𑁆𑀛𑀢𑀺, 𑀲𑀸 𑀚𑀯𑀦𑀧𑀜𑁆𑀜𑀸 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀚𑀯𑀦𑀧𑀜𑁆𑀜𑀁 𑀤𑀲𑁆𑀲𑁂𑀢𑁆𑀯𑀸 𑀩𑀮𑀯𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀔𑀬𑀝𑁆𑀞𑁂𑀦𑀸𑀢𑀺 𑀬𑀢𑁆𑀣 𑀬𑀢𑁆𑀣 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀪𑀺𑀚𑁆𑀚𑀦𑀢𑁄 𑀔𑀬𑀲𑀪𑀸𑀯𑀢𑁆𑀢𑀸. 𑀪𑀬𑀝𑁆𑀞𑁂𑀦𑀸𑀢𑀺 𑀪𑀬𑀸𑀦𑀓𑀪𑀸𑀯𑀢𑁄. 𑀅𑀲𑀸𑀭𑀓𑀝𑁆𑀞𑁂𑀦𑀸𑀢𑀺 𑀅𑀲𑀸𑀭𑀓𑀪𑀸𑀯𑀢𑁄 𑀅𑀢𑁆𑀢𑀲𑀸𑀭𑀯𑀺𑀭𑀳𑀢𑁄, 𑀦𑀺𑀘𑁆𑀘𑀲𑀸𑀭𑀸𑀤𑀺𑀯𑀺𑀭𑀳𑀢𑁄 𑀘. 𑀢𑀼𑀮𑀬𑀺𑀢𑁆𑀯𑀸𑀢𑀺 𑀢𑀼𑀮𑀦𑀪𑀽𑀢𑀸𑀬 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀢𑀼𑀮𑁂𑀢𑁆𑀯𑀸. 𑀢𑀻𑀭𑀬𑀺𑀢𑁆𑀯𑀸𑀢𑀺 𑀢𑀸𑀬 𑀏𑀯 𑀢𑀻𑀭𑀡𑀪𑀽𑀢𑀸𑀬 𑀢𑀻𑀭𑀬𑀺𑀢𑁆𑀯𑀸. 𑀯𑀺𑀪𑀸𑀯𑀬𑀺𑀢𑁆𑀯𑀸𑀢𑀺 𑀬𑀸𑀣𑀸𑀯𑀢𑁄 𑀧𑀓𑀸𑀲𑁂𑀢𑁆𑀯𑀸 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸. 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑀧𑀸𑀓𑀝𑀁 𑀓𑀢𑁆𑀯𑀸. 𑀭𑀽𑀧𑀦𑀺𑀭𑁄𑀥𑁂𑀢𑀺 𑀭𑀽𑀧𑀓𑁆𑀔𑀦𑁆𑀥𑀦𑀺𑀭𑁄𑀥𑀳𑁂𑀢𑀼𑀪𑀽𑀢𑁂 𑀦𑀺𑀩𑁆𑀩𑀸𑀦𑁂 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀪𑀸𑀯𑁂𑀦. 𑀇𑀤𑀸𑀦𑀺 𑀲𑀺𑀔𑀸𑀧𑁆𑀧𑀢𑁆𑀢𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀚𑀯𑀦𑀧𑀜𑁆𑀜𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 ‘‘𑀭𑀽𑀧’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑀸’’𑀢𑀺 𑀓𑁂𑀘𑀺.

𑀜𑀸𑀡𑀲𑁆𑀲 𑀢𑀺𑀓𑁆𑀔𑀪𑀸𑀯𑁄 𑀦𑀸𑀫 𑀲𑀯𑀺𑀲𑁂𑀲𑀁 𑀧𑀝𑀺𑀧𑀓𑁆𑀔𑀧𑀳𑀸𑀦𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺. ‘‘𑀔𑀺𑀧𑁆𑀧𑀁 𑀓𑀺𑀮𑁂𑀲𑁂 𑀙𑀺𑀦𑁆𑀤𑀢𑀻𑀢𑀺 𑀢𑀺𑀓𑁆𑀔𑀧𑀜𑁆𑀜𑀸’’𑀢𑀺 𑀯𑀢𑁆𑀯𑀸 𑀢𑁂 𑀧𑀦 𑀓𑀺𑀮𑁂𑀲𑁂 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀺𑀓𑁆𑀔𑀧𑀜𑁆𑀜𑁄 𑀔𑀺𑀧𑁆𑀧𑀸𑀪𑀺𑀜𑁆𑀜𑁄 𑀳𑁄𑀢𑀺, 𑀧𑀝𑀺𑀧𑀤𑀸 𑀘𑀲𑁆𑀲 𑀦 𑀘𑀮𑀢𑀻𑀢𑀺 𑀆𑀳 ‘‘𑀏𑀓𑀲𑁆𑀫𑀺𑀁 𑀆𑀲𑀦𑁂 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸…𑀧𑁂… 𑀅𑀥𑀺𑀕𑀢𑀸 𑀳𑁄𑀦𑁆𑀢𑀻’’𑀢𑀺𑀆𑀤𑀺.

‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸, 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀔𑀬𑀥𑀫𑁆𑀫𑀸 𑀯𑀬𑀥𑀫𑁆𑀫𑀸 𑀯𑀺𑀭𑀸𑀕𑀥𑀫𑁆𑀫𑀸 𑀦𑀺𑀭𑁄𑀥𑀥𑀫𑁆𑀫𑀸’’𑀢𑀺 𑀬𑀸𑀣𑀸𑀯𑀢𑁄 𑀤𑀲𑁆𑀲𑀦𑁂𑀦 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁄 𑀇𑀚𑁆𑀛𑀢𑀺, 𑀦 𑀅𑀜𑁆𑀜𑀣𑀸𑀢𑀺 𑀓𑀸𑀭𑀡𑀫𑀼𑀔𑁂𑀦 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀉𑀩𑁆𑀩𑁂𑀕𑀩𑀳𑀼𑀮𑁄 𑀳𑁄𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀩𑁆𑀩𑁂𑀕𑀩𑀳𑀼𑀮𑁄𑀢𑀺 𑀯𑀼𑀢𑁆𑀢𑀦𑀬𑁂𑀦 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀅𑀪𑀺𑀡𑁆𑀳𑀧𑀯𑀢𑁆𑀢𑀲𑀁𑀯𑁂𑀕𑁄. 𑀉𑀢𑁆𑀢𑀸𑀲𑀩𑀳𑀼𑀮𑁄𑀢𑀺 𑀜𑀸𑀡𑀼𑀢𑁆𑀢𑀸𑀲𑀯𑀲𑁂𑀦 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀩𑀳𑀼𑀲𑁄 𑀉𑀢𑁆𑀭𑀸𑀲𑀫𑀸𑀦𑀲𑁄, 𑀏𑀢𑁂𑀦 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀫𑀸𑀳. ‘‘𑀉𑀓𑁆𑀓𑀡𑁆𑀞𑀦𑀩𑀳𑀼𑀮𑁄’’𑀢𑀺 𑀧𑀦 𑀇𑀫𑀺𑀦𑀸 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀫𑀸𑀳, ‘‘𑀅𑀭𑀢𑀺𑀩𑀳𑀼𑀮𑁄’’𑀢𑀺𑀆𑀤𑀺𑀦𑀸 𑀢𑀲𑁆𑀲𑀸 𑀏𑀯 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀁. 𑀩𑀳𑀺𑀫𑀼𑀔𑁄𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑀢𑁄 𑀩𑀳𑀺𑀪𑀽𑀢𑀁 𑀦𑀺𑀩𑁆𑀩𑀸𑀦𑀁 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀜𑀸𑀡𑀫𑀼𑀔𑁄, 𑀢𑀣𑀸 𑀯𑀸 𑀧𑀯𑀢𑁆𑀢𑀺𑀢𑀯𑀺𑀫𑁄𑀓𑁆𑀔𑀫𑀼𑀔𑁄. 𑀦𑀺𑀩𑁆𑀩𑀺𑀚𑁆𑀛𑀦𑀁 𑀦𑀺𑀩𑁆𑀩𑁂𑀥𑁄, 𑀲𑁄 𑀏𑀢𑀺𑀲𑁆𑀲𑀸 𑀅𑀢𑁆𑀣𑀺, 𑀦𑀺𑀩𑁆𑀩𑀺𑀚𑁆𑀛𑀢𑀻𑀢𑀺 𑀯𑀸 𑀦𑀺𑀩𑁆𑀩𑁂𑀥𑀺𑀓𑀸, 𑀲𑀸 𑀏𑀯 𑀧𑀜𑁆𑀜𑀸 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀅𑀯𑀺𑀪𑀢𑁆𑀢𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸, 𑀉𑀢𑁆𑀢𑀸𑀦𑀢𑁆𑀣𑀢𑁆𑀢𑀸 𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁨𑁧𑁭. 𑀧𑀩𑁆𑀩𑀚𑀺𑀢𑀁 𑀉𑀧𑀸𑀲𑀺𑀢𑀸𑀢𑀺 𑀏𑀢𑁆𑀣 𑀬𑀸𑀤𑀺𑀲𑀁 𑀧𑀩𑁆𑀩𑀚𑀺𑀢𑀁 𑀉𑀧𑀸𑀲𑀢𑁄 𑀧𑀜𑁆𑀜𑀸𑀧𑀝𑀺𑀮𑀸𑀪𑁄 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀡𑁆𑀟𑀺𑀢𑀁 𑀧𑀩𑁆𑀩𑀚𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀧𑀸𑀲𑀦𑀜𑁆𑀘𑁂𑀢𑁆𑀣 𑀉𑀧𑀝𑁆𑀞𑀸𑀦𑀯𑀲𑁂𑀦 𑀇𑀘𑁆𑀙𑀺𑀢𑀁, 𑀦 𑀉𑀧𑀦𑀺𑀲𑀻𑀤𑀦𑀫𑀢𑁆𑀢𑁂𑀦𑀸𑀢𑀺 𑀆𑀳 ‘‘𑀧𑀬𑀺𑀭𑀼𑀧𑀸𑀲𑀺𑀢𑀸’’𑀢𑀺. 𑀅𑀢𑁆𑀣𑀦𑁆𑀢𑀺 𑀳𑀺𑀢𑀁. 𑀅𑀩𑁆𑀪𑀦𑁆𑀢𑀭𑀁 𑀓𑀭𑀺𑀢𑁆𑀯𑀸𑀢𑀺 𑀅𑀩𑁆𑀪𑀦𑁆𑀢𑀭𑀕𑀢𑀁 𑀓𑀢𑁆𑀯𑀸. 𑀢𑁂𑀦𑀸𑀳 ‘‘𑀅𑀢𑁆𑀣𑀬𑀼𑀢𑁆𑀢’’𑀦𑁆𑀢𑀺. 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄 𑀘𑀸𑀬𑀁, 𑀳𑀺𑀢𑀽𑀧𑀲𑀜𑁆𑀳𑀺𑀢𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀦𑁆𑀢𑀭-𑀲𑀤𑁆𑀤𑁄 𑀯𑀸 𑀘𑀺𑀢𑁆𑀢𑀧𑀭𑀺𑀬𑀸𑀬𑁄 ‘‘𑀬𑀲𑁆𑀲𑀦𑁆𑀢𑀭𑀢𑁄 𑀦 𑀲𑀦𑁆𑀢𑀺 𑀓𑁄𑀧𑀸’’𑀢𑀺𑀆𑀤𑀻𑀲𑀼 (𑀉𑀤𑀸. 𑁨𑁦) 𑀯𑀺𑀬. 𑀢𑀲𑁆𑀫𑀸 𑀅𑀢𑁆𑀣𑀦𑁆𑀢𑀭𑁄𑀢𑀺 𑀳𑀺𑀢𑀚𑁆𑀛𑀸𑀲𑀬𑁄𑀢𑀺 𑀅𑀢𑁆𑀣𑁄.

𑀧𑀝𑀺𑀮𑀸𑀪𑀢𑁆𑀣𑀸𑀬 𑀕𑀢𑁂𑀦𑀸𑀢𑀺 𑀧𑀝𑀺𑀮𑀸𑀪𑀢𑁆𑀣𑀸𑀬 𑀧𑀯𑀢𑁆𑀢𑁂𑀦, 𑀧𑀝𑀺𑀮𑀸𑀪𑀲𑀁𑀯𑀢𑁆𑀢𑀦𑀺𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀉𑀧𑁆𑀧𑀸𑀤𑁂 𑀘 𑀦𑀺𑀫𑀺𑀢𑁆𑀢𑁂 𑀘 𑀙𑁂𑀓𑀸𑀢𑀺 𑀉𑀧𑁆𑀧𑀸𑀤𑀯𑀺𑀥𑀺𑀫𑁆𑀳𑀺 𑀘𑁂𑀯 𑀦𑀺𑀫𑀺𑀢𑁆𑀢𑀯𑀺𑀥𑀺𑀫𑁆𑀳𑀺 𑀘 𑀓𑀼𑀲𑀮𑀸. 𑀉𑀧𑁆𑀧𑀸𑀤𑀦𑀺𑀫𑀺𑀢𑁆𑀢𑀓𑁄𑀯𑀺𑀤𑀢𑀸𑀲𑀻𑀲𑁂𑀦 𑀘𑁂𑀢𑁆𑀣 𑀮𑀓𑁆𑀔𑀡𑀓𑁄𑀲𑀮𑁆𑀮𑀫𑁂𑀯 𑀤𑀲𑁆𑀲𑁂𑀢𑀺. 𑀅𑀣 𑀯𑀸 𑀲𑁂𑀲𑀮𑀓𑁆𑀔𑀡𑀸𑀦𑀁 𑀦𑀺𑀩𑁆𑀩𑀢𑁆𑀢𑀺𑀬𑀸 𑀩𑀼𑀤𑁆𑀥𑀸𑀦𑀁, 𑀘𑀓𑁆𑀓𑀯𑀢𑁆𑀢𑀻𑀦𑀜𑁆𑀘 𑀉𑀧𑁆𑀧𑀸𑀤𑁄 𑀅𑀦𑀼𑀫𑀻𑀬𑀢𑀺, 𑀬𑀸𑀦𑀺 𑀢𑁂𑀳𑀺 𑀮𑀤𑁆𑀥𑀩𑁆𑀩𑀆𑀦𑀺𑀲𑀁𑀲𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺, 𑀢𑀲𑁆𑀫𑀺𑀁 𑀉𑀧𑁆𑀧𑀸𑀤𑁂 𑀘 𑀦𑀺𑀫𑀺𑀢𑁆𑀢𑁂 𑀘 𑀅𑀦𑀼𑀫𑀺𑀦𑀦𑀸𑀤𑀺𑀯𑀲𑁂𑀦 𑀙𑁂𑀓𑀸 𑀦𑀺𑀧𑀼𑀡𑀸𑀢𑀺 𑀅𑀢𑁆𑀣𑁄. 𑀜𑀢𑁆𑀯𑀸 𑀧𑀲𑁆𑀲𑀺𑀲𑁆𑀲𑀢𑀻𑀢𑀺 𑀜𑀸𑀡𑁂𑀦 𑀚𑀸𑀦𑀺𑀢𑁆𑀯𑀸 𑀧𑀲𑁆𑀲𑀺𑀲𑁆𑀲𑀢𑀺, 𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀢𑁆𑀣𑀸𑀦𑀼𑀲𑀸𑀲𑀦𑀻𑀲𑀽𑀢𑀺 𑀅𑀢𑁆𑀣𑀸𑀦𑀁 𑀳𑀺𑀢𑀸𑀦𑀁 𑀅𑀦𑀼𑀲𑀸𑀲𑀦𑀻𑀲𑀼. 𑀬𑀲𑁆𑀫𑀸 𑀅𑀦𑀢𑁆𑀣𑀧𑀝𑀺𑀯𑀚𑁆𑀚𑀦𑀧𑀼𑀩𑁆𑀩𑀺𑀓𑀸 𑀲𑀢𑁆𑀢𑀸𑀦𑀁 𑀅𑀢𑁆𑀣𑀧𑀝𑀺𑀧𑀢𑁆𑀢𑀺, 𑀢𑀲𑁆𑀫𑀸 𑀅𑀦𑀢𑁆𑀣𑁄𑀧𑀺 𑀧𑀭𑀺𑀘𑁆𑀙𑀺𑀚𑁆𑀚 𑀕𑀳𑁂𑀢𑀩𑁆𑀩𑁄, 𑀚𑀸𑀦𑀺𑀢𑀩𑁆𑀩𑁄 𑀘𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀢𑁆𑀣𑀸𑀦𑀢𑁆𑀣𑀁 𑀧𑀭𑀺𑀕𑁆𑀕𑀸𑀳𑀓𑀸𑀦𑀺 𑀜𑀸𑀡𑀸𑀦𑀻’’𑀢𑀺, 𑀬𑀢𑁄 ‘‘𑀆𑀬𑀼𑀧𑀸𑀬𑀓𑁄𑀲𑀮𑁆𑀮𑀁 𑀯𑀺𑀬 𑀅𑀧𑀸𑀬𑀓𑁄𑀲𑀮𑁆𑀮𑀫𑁆𑀧𑀺 𑀇𑀘𑁆𑀙𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁.

𑀲𑀼𑀯𑀡𑁆𑀡𑀯𑀡𑁆𑀡𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁧𑁮. 𑀧𑀝𑀺𑀲𑀗𑁆𑀔𑀸𑀦𑀩𑀮𑁂𑀦 𑀓𑁄𑀥𑀯𑀺𑀦𑀬𑁂𑀦 𑀅𑀓𑁆𑀓𑁄𑀥𑀦𑁄, 𑀦 𑀪𑀸𑀯𑀦𑀸𑀩𑀮𑁂𑀦𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀁 𑀅𑀓𑁆𑀓𑁄𑀥𑀯𑀲𑀺𑀓𑀢𑁆𑀢𑀸𑀢𑀺 𑀏𑀯𑀁 𑀫𑀖𑀫𑀸𑀡𑀯𑁄 𑀯𑀺𑀬 𑀦 𑀓𑁄𑀥𑀯𑀲𑀁 𑀕𑀢𑀢𑁆𑀢𑀸. 𑀦𑀸𑀪𑀺𑀲𑀚𑁆𑀚𑀻𑀢𑀺 𑀓𑀼𑀚𑁆𑀛𑀦𑀯𑀲𑁂𑀦𑁂𑀯 𑀦 𑀅𑀪𑀺𑀲𑀚𑁆𑀚𑀺. 𑀬𑀜𑁆𑀳𑀺 𑀓𑁄𑀥𑀲𑁆𑀲 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑁂 𑀆𑀭𑀫𑁆𑀫𑀡𑁂 𑀉𑀧𑀦𑀸𑀳𑀲𑁆𑀲 𑀧𑀘𑁆𑀘𑀬𑀪𑀽𑀢𑀁 𑀓𑀼𑀚𑁆𑀛𑀦𑀯𑀲𑁂𑀦 𑀅𑀪𑀺𑀲𑀚𑁆𑀚𑀦𑀁, 𑀢𑀁 𑀇𑀥𑀸𑀥𑀺𑀧𑁆𑀧𑁂𑀢𑀁, 𑀦 𑀮𑀼𑀩𑁆𑀪𑀦𑀯𑀲𑁂𑀦. 𑀢𑁂𑀦𑀸𑀳 ‘‘𑀓𑀼𑀝𑀺𑀮𑀓𑀡𑁆𑀝𑀓𑁄 𑀯𑀺𑀬𑀸’’𑀢𑀺𑀆𑀤𑀺. 𑀲𑁄 𑀳𑀺 𑀬𑀢𑁆𑀣 𑀮𑀕𑁆𑀕𑀢𑀺, 𑀢𑀁 𑀔𑁄𑀪𑁂𑀦𑁆𑀢𑁄 𑀏𑀯 𑀮𑀕𑁆𑀕𑀢𑀺. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀫𑀫𑁆𑀫𑀝𑁆𑀞𑀸𑀦𑁂. 𑀫𑀫𑁆𑀫𑀦𑁆𑀢𑀺 𑀨𑀼𑀝𑁆𑀞𑀫𑀢𑁆𑀢𑁂𑀧𑀺 𑀭𑀼𑀚𑁆𑀚𑀦𑀝𑁆𑀞𑀸𑀦𑀁. 𑀧𑀼𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑁄𑀢𑀺 𑀧𑀞𑀫𑀼𑀧𑁆𑀧𑀦𑁆𑀦𑁄. 𑀢𑀢𑁄 𑀩𑀮𑀯𑀢𑀭𑁄 𑀩𑁆𑀬𑀸𑀧𑀸𑀤𑁄 𑀮𑀤𑁆𑀥𑀸𑀲𑁂𑀯𑀦𑀢𑀸𑀬 𑀘𑀺𑀢𑁆𑀢𑀲𑁆𑀲 𑀩𑁆𑀬𑀸𑀧𑀚𑁆𑀚𑀦𑀢𑁄. 𑀢𑀢𑁄 𑀩𑀮𑀯𑀢𑀭𑀸 𑀧𑀢𑀺𑀢𑁆𑀣𑀺𑀬𑀦𑀸𑀢𑀺 𑀲𑀸𑀢𑀺𑀲𑀬𑀁 𑀮𑀤𑁆𑀥𑀸𑀲𑁂𑀯𑀦𑀢𑀸𑀬 𑀢𑀢𑁄 𑀩𑁆𑀬𑀸𑀧𑀸𑀤𑀸𑀯𑀢𑁆𑀣𑀸𑀬𑀧𑀺 𑀩𑀮𑀯𑀢𑀭𑀸 𑀧𑀢𑀺𑀢𑁆𑀣𑀺𑀬𑀦𑀸 𑀧𑀘𑁆𑀘𑀢𑁆𑀣𑀺𑀓𑀪𑀸𑀯𑁂𑀦 𑀣𑀸𑀫𑀧𑁆𑀧𑀢𑁆𑀢𑀺𑀢𑁄.

𑀲𑀼𑀔𑀼𑀫𑀢𑁆𑀣𑀭𑀡𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀡𑀻𑀢𑀪𑁄𑀚𑀦𑀻𑀬𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄 𑀪𑁄𑀚𑀦𑀤𑀸𑀦𑀲𑁆𑀲𑀧𑀺 𑀯𑀡𑁆𑀡𑀲𑀫𑁆𑀧𑀤𑀸𑀦𑀺𑀫𑀺𑀢𑁆𑀢𑀪𑀸𑀯𑀢𑁄. 𑀢𑁂𑀦𑀸𑀳 𑀪𑀕𑀯𑀸 ‘‘𑀪𑁄𑀚𑀦𑀁 𑀪𑀺𑀓𑁆𑀔𑀯𑁂 𑀤𑀤𑀫𑀸𑀦𑁄 𑀤𑀸𑀬𑀓𑁄 𑀧𑀝𑀺𑀕𑁆𑀕𑀸𑀳𑀓𑀸𑀦𑀁…𑀧𑁂… 𑀆𑀬𑀼𑀁 𑀤𑁂𑀢𑀺, 𑀯𑀡𑁆𑀡𑀁 𑀤𑁂𑀢𑀻’’𑀢𑀺 (𑀅. 𑀦𑀺. 𑁫.𑁩𑁭) 𑀢𑀣𑀸 𑀘 𑀯𑀓𑁆𑀔𑀢𑀺 ‘‘𑀆𑀫𑀺𑀲𑀤𑀸𑀦𑁂𑀦 𑀯𑀸’’𑀢𑀺.

𑁨𑁧𑁯. 𑀢𑀺 𑀅𑀤𑀸𑀲𑀺. 𑀤𑁂𑀯𑁄𑀢𑀺 𑀫𑁂𑀖𑁄, 𑀧𑀚𑁆𑀚𑀼𑀦𑁆𑀦𑁄 𑀏𑀯 𑀯𑀸. 𑀯𑀭𑀢𑀭𑁄𑀢𑀺 𑀉𑀢𑁆𑀢𑀫𑀢𑀭𑁄. 𑀧𑀩𑁆𑀩𑀚𑁆𑀚𑀸𑀬 𑀯𑀺𑀲𑀤𑀺𑀲𑀸𑀯𑀢𑁆𑀣𑀸𑀤𑀺 𑀪𑀸𑀯𑀢𑁄 𑀦 𑀧𑀩𑁆𑀩𑀚𑁆𑀚𑀸𑀢𑀺 𑀅𑀧𑀩𑁆𑀩𑀚𑁆𑀚𑀸, 𑀕𑀺𑀳𑀺𑀪𑀸𑀯𑁄. 𑀅𑀘𑁆𑀙𑀸𑀤𑁂𑀦𑁆𑀢𑀺 𑀓𑁄𑀧𑀻𑀦𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀺 𑀏𑀢𑁂𑀳𑀻𑀢𑀺 𑀅𑀘𑁆𑀙𑀸𑀤𑀦𑀸𑀦𑀺, 𑀦𑀺𑀯𑀸𑀲𑀦𑀸𑀦𑀺, 𑀢𑁂𑀲𑀁 𑀅𑀘𑁆𑀙𑀸𑀤𑀦𑀸𑀦𑀜𑁆𑀘𑁂𑀯 𑀲𑁂𑀲 𑀯𑀢𑁆𑀣𑀸𑀦𑀜𑁆𑀘 𑀓𑁄𑀚𑀯𑀸𑀤𑀺 𑀉𑀢𑁆𑀢𑀫𑀧𑀸𑀯𑀼𑀭𑀡𑀸𑀦𑀜𑁆𑀘. 𑀯𑀺𑀦𑀸𑀲𑁄𑀢𑀺 𑀓𑀢𑀲𑁆𑀲 𑀓𑀫𑁆𑀫𑀲𑁆𑀲 𑀅𑀯𑀺𑀧𑀘𑁆𑀘𑀺𑀢𑁆𑀯𑀸 𑀯𑀺𑀦𑀸𑀲𑁄.

𑀓𑁄𑀲𑁄𑀳𑀺𑀢𑀯𑀢𑁆𑀣𑀕𑀼𑀬𑁆𑀳𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁨𑁦. 𑀲𑀫𑀸𑀦𑁂𑀢𑀸𑀢𑀺 𑀲𑀫𑁆𑀫𑀤𑁂𑀯 𑀆𑀦𑁂𑀢𑀸 𑀲𑀫𑀸𑀕𑀫𑁂𑀢𑀸. 𑀭𑀚𑁆𑀚𑁂 𑀧𑀢𑀺𑀝𑁆𑀞𑀺𑀢𑁂𑀦 𑀲𑀓𑁆𑀓𑀸 𑀓𑀸𑀢𑀼𑀁 𑀩𑀳𑀼𑀪𑀢𑀺𑀓𑀲𑁆𑀲𑁂𑀯 𑀇𑀚𑁆𑀛𑀦𑀢𑁄. 𑀓𑀢𑁆𑀢𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀯𑀚𑁆𑀚𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀻𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄, 𑀓𑀭𑁄𑀦𑁆𑀢𑀺 𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀦𑀓𑀫𑁆𑀫𑀦𑁆𑀢𑀺 𑀯𑀸. 𑀦𑀦𑀼 𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀦𑀓𑀫𑁆𑀫𑀁 𑀦𑀸𑀫 𑀲𑀸𑀯𑀚𑁆𑀚𑀦𑁆𑀢𑀺? 𑀲𑀘𑁆𑀘𑀁 𑀲𑀸𑀯𑀚𑁆𑀚𑀁 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁂𑀦 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀲𑁆𑀲, 𑀇𑀤𑀁 𑀧𑀦 𑀅𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁂𑀦 𑀧𑀭𑀲𑁆𑀲 𑀉𑀧𑁆𑀧𑀚𑁆𑀚𑀦𑀓𑀅𑀦𑀢𑁆𑀣𑀁 𑀧𑀭𑀺𑀳𑀭𑀡𑀯𑀲𑁂𑀦 𑀧𑀯𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁. ‘‘𑀜𑀸𑀢𑀺𑀲𑀗𑁆𑀕𑀳𑀁 𑀓𑀭𑁄𑀦𑁆𑀢𑁂𑀦𑀸’’𑀢𑀺 𑀏𑀢𑁂𑀦 𑀜𑀸𑀢𑀢𑁆𑀣𑀘𑀭𑀺𑀬𑀸𑀯𑀲𑁂𑀦 𑀢𑀁 𑀓𑀫𑁆𑀫𑀁 𑀧𑀯𑀢𑁆𑀢𑀢𑀻𑀢𑀺 𑀤𑀲𑁆𑀲𑁂𑀢𑀺.

𑁨𑁨𑁧. 𑀅𑀫𑀺𑀢𑁆𑀢𑀢𑀸𑀧𑀦𑀸𑀢𑀺 𑀅𑀫𑀺𑀢𑁆𑀢𑀸𑀦𑀁 𑀢𑀧𑀦𑀲𑀻𑀮𑀸, 𑀅𑀫𑀺𑀢𑁆𑀢𑀢𑀸𑀧𑀦𑀁 𑀳𑁄𑀢𑀼 𑀯𑀸 𑀫𑀸 𑀯𑀸 𑀏𑀯𑀁𑀲𑀪𑀸𑀯𑀸𑀢𑀺 𑀅𑀢𑁆𑀣𑁄. 𑀦 𑀳𑀺 𑀘𑀓𑁆𑀓𑀯𑀢𑁆𑀢𑀺𑀦𑁄 𑀧𑀼𑀢𑁆𑀢𑀸𑀦𑀁 𑀅𑀫𑀺𑀢𑁆𑀢𑀸 𑀦𑀸𑀫 𑀓𑁂𑀘𑀺 𑀳𑁄𑀦𑁆𑀢𑀺, 𑀬𑁂 𑀢𑁂 𑀪𑀯𑁂𑀬𑁆𑀬𑀼𑀁, 𑀘𑀓𑁆𑀓𑀸𑀦𑀼𑀪𑀸𑀯𑁂𑀦𑁂𑀯 𑀲𑀩𑁆𑀩𑁂𑀧𑀺 𑀔𑀢𑁆𑀢𑀺𑀬𑀸𑀤𑀬𑁄 𑀅𑀦𑀼𑀯𑀢𑁆𑀢𑀓𑀸 𑀢𑁂𑀲𑀁 𑀪𑀯𑀦𑁆𑀢𑀺.

𑀧𑀞𑀫𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀭𑀺𑀫𑀡𑁆𑀟𑀮𑀸𑀤𑀺𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁨𑁨. 𑀲𑀫𑀦𑁆𑀢𑀺 𑀲𑀫𑀸𑀦𑀁. 𑀢𑁂𑀦 𑀢𑁂𑀦 𑀮𑁄𑀓𑁂 𑀯𑀺𑀜𑁆𑀜𑀸𑀢𑀕𑀼𑀡𑁂𑀦 𑀲𑀫𑀁 𑀲𑀫𑀸𑀦𑀁 𑀚𑀸𑀦𑀸𑀢𑀺, 𑀬𑀢𑁄 𑀢𑀢𑁆𑀣 𑀧𑀝𑀺𑀧𑀚𑁆𑀚𑀦𑀯𑀺𑀥𑀺𑀦𑀸𑀯 𑀇𑀢𑀭𑀲𑁆𑀫𑀺𑀁 𑀧𑀝𑀺𑀧𑀚𑁆𑀚𑀢𑀺. 𑀲𑀬𑀁 𑀚𑀸𑀦𑀸𑀢𑀻𑀢𑀺 𑀅𑀧𑀭𑀦𑁂𑀬𑁆𑀬𑁄 𑀳𑀼𑀢𑁆𑀯𑀸 𑀲𑀬𑀫𑁂𑀯 𑀚𑀸𑀦𑀸𑀢𑀺. 𑀧𑀼𑀭𑀺𑀲𑀁 𑀚𑀸𑀦𑀸𑀢𑀻𑀢𑀺 𑀯𑀸 ‘‘𑀅𑀬𑀁 𑀲𑁂𑀝𑁆𑀞𑁄, 𑀅𑀬𑀁 𑀫𑀚𑁆𑀛𑀺𑀫𑁄, 𑀅𑀬𑀁 𑀦𑀺𑀳𑀻𑀦𑁄’’𑀢𑀺 𑀢𑀁 𑀢𑀁 𑀧𑀼𑀭𑀺𑀲𑀁 𑀬𑀸𑀣𑀸𑀯𑀢𑁄 𑀚𑀸𑀦𑀸𑀢𑀺. 𑀧𑀼𑀭𑀺𑀲𑀯𑀺𑀲𑁂𑀲𑀁 𑀚𑀸𑀦𑀸𑀢𑀻𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀼𑀭𑀺𑀲𑁂 𑀯𑀺𑀚𑁆𑀚𑀫𑀸𑀦𑀁 𑀯𑀺𑀲𑁂𑀲𑀁 𑀚𑀸𑀦𑀸𑀢𑀺, 𑀬𑀢𑁄 𑀢𑀢𑁆𑀣 𑀢𑀢𑁆𑀣 𑀅𑀦𑀼𑀭𑀽𑀧𑀤𑀸𑀦𑀧𑀤𑀸𑀦𑀸𑀤𑀺𑀧𑀝𑀺𑀧𑀢𑁆𑀢𑀺𑀬𑀸 𑀬𑀼𑀢𑁆𑀢𑀧𑀢𑁆𑀢𑀓𑀸𑀭𑀻 𑀳𑁄𑀢𑀺. 𑀢𑁂𑀦𑀸𑀳 ‘‘𑀅𑀬𑀫𑀺𑀤𑀫𑀭𑀳𑀢𑀻’’𑀢𑀺𑀆𑀤𑀺.

𑀲𑀫𑁆𑀧𑀢𑁆𑀢𑀺𑀧𑀝𑀺𑀮𑀸𑀪𑀝𑁆𑀞𑁂𑀦𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀲𑀫𑁆𑀧𑀢𑁆𑀢𑀻𑀦𑀁 𑀧𑀝𑀺𑀮𑀸𑀪𑀸𑀧𑀦𑀝𑁆𑀞𑁂𑀦. 𑀲𑀫𑀲𑀗𑁆𑀕𑀳𑀓𑀫𑁆𑀫𑀦𑁆𑀢𑀺 𑀲𑀫𑀁 𑀚𑀸𑀦𑀺𑀢𑁆𑀯𑀸 𑀢𑀤𑀦𑀼𑀭𑀽𑀧𑀁 𑀢𑀲𑁆𑀲 𑀢𑀲𑁆𑀲 𑀲𑀗𑁆𑀕𑀡𑁆𑀳𑀦𑀓𑀫𑁆𑀫𑀁.

𑁨𑁨𑁩. 𑀢𑀼𑀮𑀬𑀺𑀢𑁆𑀯𑀸𑀢𑀺 𑀢𑀻𑀭𑀬𑀺𑀢𑁆𑀯𑀸. 𑀧𑀝𑀺𑀯𑀺𑀘𑀺𑀦𑀺𑀢𑁆𑀯𑀸𑀢𑀺 𑀯𑀻𑀫𑀁𑀲𑀺𑀢𑁆𑀯𑀸. 𑀦𑀺𑀧𑀼𑀡𑀬𑁄𑀕𑀢𑁄 𑀦𑀺𑀧𑀼𑀡𑀸, 𑀅𑀢𑀺𑀯𑀺𑀬 𑀦𑀺𑀧𑀼𑀡𑀸 𑀅𑀢𑀺𑀦𑀺𑀧𑀼𑀡𑀸, 𑀲𑀸 𑀧𑀦 𑀢𑁂𑀲𑀁 𑀦𑀺𑀧𑀼𑀡𑀢𑀸 𑀲𑀡𑁆𑀳𑀲𑀼𑀔𑀼𑀫𑀸 𑀧𑀜𑁆𑀜𑀸𑀢𑀺 𑀆𑀳 ‘‘𑀲𑀼𑀔𑀼𑀫𑀧𑀜𑁆𑀜𑀸’’𑀢𑀺.

𑀲𑀻𑀳𑀧𑀼𑀩𑁆𑀩𑀤𑁆𑀥𑀓𑀸𑀬𑀸𑀤𑀺𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁨𑁪. 𑀔𑁂𑀫𑀓𑀸𑀫𑁄𑀢𑀺 𑀅𑀦𑀼𑀧𑀤𑁆𑀤𑀯𑀓𑀸𑀫𑁄. 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑀁 𑀲𑀢𑁆𑀢𑀸𑀦𑀁 𑀯𑀟𑁆𑀠𑀺𑀆𑀯𑀳𑀁 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀯𑀺𑀥𑀸𑀬𑀓𑀦𑁆𑀢𑀺 𑀆𑀳 ‘‘𑀧𑀜𑁆𑀜𑀸𑀬𑀸𑀢𑀺 𑀓𑀫𑁆𑀫𑀲𑁆𑀲𑀓𑀢𑀸𑀧𑀜𑁆𑀜𑀸𑀬𑀸’’𑀢𑀺.

𑀲𑀫𑀦𑁆𑀢𑀧𑀭𑀺𑀧𑀽𑀭𑀸𑀦𑀻𑀢𑀺 𑀲𑀫𑀦𑁆𑀢𑀢𑁄 𑀲𑀩𑁆𑀩𑀪𑀸𑀕𑁂𑀳𑀺 𑀧𑀭𑀺𑀧𑀼𑀡𑁆𑀡𑀸𑀦𑀺. 𑀢𑀢𑁄 𑀏𑀯 𑀅𑀳𑀻𑀦𑀸𑀦𑀺 𑀅𑀦𑀽𑀦𑀸𑀦𑀺. 𑀥𑀦𑀸𑀤𑀻𑀳𑀻𑀢𑀺 𑀥𑀦𑀥𑀜𑁆𑀜𑀸𑀤𑀻𑀳𑀺.

𑁨𑁨𑁫. 𑀑𑀓𑀧𑁆𑀧𑀦𑀲𑀤𑁆𑀥𑀸 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀁 𑀑𑀓𑁆𑀓𑀦𑁆𑀤𑀺𑀢𑁆𑀯𑀸 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀲𑀤𑁆𑀤𑀳𑀦𑀲𑀤𑁆𑀥𑀸. 𑀲𑀸 𑀏𑀯 𑀧𑀲𑀸𑀤𑀦𑀻𑀬𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 𑀅𑀪𑀺𑀧𑁆𑀧𑀲𑀻𑀤𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀧𑀲𑀸𑀤𑀲𑀤𑁆𑀥𑀸.𑀧𑀭𑀺𑀬𑀢𑁆𑀢𑀺𑀲𑀯𑀦𑁂𑀦𑀸𑀢𑀺 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀸𑀯𑀳𑀸𑀬 𑀧𑀭𑀺𑀬𑀢𑁆𑀢𑀺𑀬𑀸 𑀲𑀯𑀦𑁂𑀦. 𑀥𑀸𑀭𑀡𑀧𑀭𑀺𑀘𑀬𑀸𑀤𑀻𑀦𑀁 𑀢𑀁𑀫𑀽𑀮𑀓𑀢𑁆𑀢𑀸 𑀢𑀣𑀸 𑀯𑀼𑀢𑁆𑀢𑀁. 𑀏𑀢𑁂𑀲𑀦𑁆𑀢𑀺 𑀲𑀤𑁆𑀥𑀸𑀤𑀻𑀦𑀁. 𑀲𑀳 𑀳𑀸𑀦𑀥𑀫𑁆𑀫𑁂𑀦𑀸𑀢𑀺 𑀲𑀳𑀸𑀦𑀥𑀫𑁆𑀫𑁄, 𑀦 𑀲𑀳𑀸𑀦𑀥𑀫𑁆𑀫𑁄𑀢𑀺 𑀅𑀲𑀳𑀸𑀦𑀥𑀫𑁆𑀫𑁄, 𑀢𑀲𑁆𑀲 𑀪𑀸𑀯𑁄 𑀅𑀲𑀳𑀸𑀦𑀥𑀫𑁆𑀫𑀢𑀸, 𑀢𑀁 𑀅𑀲𑀳𑀸𑀦𑀥𑀫𑁆𑀫𑀢𑀁, 𑀅𑀧𑀭𑀺𑀳𑀸𑀦𑀺𑀬𑀲𑀪𑀸𑀯𑀦𑁆𑀢𑀺 𑀅𑀢𑁆𑀣𑁄.

𑀭𑀲𑀕𑁆𑀕𑀲𑀕𑁆𑀕𑀺𑀢𑀸𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁨𑁬. 𑀢𑀺𑀮𑀨𑀮𑀫𑀢𑁆𑀢𑀫𑁆𑀧𑀺 𑀪𑁄𑀚𑀦𑀁. 𑀲𑀩𑁆𑀩𑀢𑁆𑀣 𑀨𑀭𑀢𑀻𑀢𑀺 𑀲𑀩𑁆𑀩𑀸 𑀭𑀲𑀸𑀳𑀭𑀡𑀺𑀬𑁄 𑀅𑀦𑀼𑀲𑁆𑀲𑀭𑀦𑁆𑀢𑀁 𑀲𑀪𑀸𑀯𑁂𑀦 𑀲𑀩𑁆𑀩𑀲𑁆𑀫𑀺𑀁 𑀓𑀸𑀬𑁂 𑀨𑀭𑀢𑀺. 𑀲𑀫𑀸 𑀳𑀼𑀢𑁆𑀯𑀸 𑀯𑀳𑀦𑁆𑀢𑀻𑀢𑀺 𑀅𑀯𑀺𑀲𑀫𑀸 𑀉𑀚𑀼𑀓𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺.

𑀆𑀭𑁄𑀕𑁆𑀬𑀓𑀭𑀡𑀓𑀫𑁆𑀫𑀦𑁆𑀢𑀺 𑀅𑀭𑁄𑀕𑀪𑀸𑀯𑀓𑀭𑀁 𑀲𑀢𑁆𑀢𑀸𑀦𑀁 𑀅𑀯𑀺𑀳𑁂𑀞𑀦𑀓𑀫𑁆𑀫𑀁. 𑀫𑀥𑀼𑀭𑀸𑀤𑀺𑀪𑁂𑀤𑀁 𑀭𑀲𑀁 𑀕𑀲𑀢𑀺 𑀳𑀭𑀢𑀺 𑀏𑀢𑁂𑀳𑀺, 𑀲𑀬𑀫𑁂𑀯 𑀯𑀸 𑀢𑀁 𑀕𑀲𑀦𑁆𑀢𑀺 𑀕𑀺𑀮𑀦𑁆𑀢𑀺 𑀅𑀦𑁆𑀢𑁄 𑀧𑀯𑁂𑀲𑁂𑀦𑁆𑀢𑀻𑀢𑀺 𑀭𑀲𑀕𑁆𑀕𑀲𑀸, 𑀭𑀲𑀕𑁆𑀕𑀲𑀸𑀦𑀁 𑀅𑀕𑁆𑀕𑀸 𑀭𑀲𑀕𑁆𑀕𑀲𑀕𑁆𑀕𑀸, 𑀢𑁂 𑀏𑀢𑁆𑀣 𑀲𑀦𑁆𑀢𑀻𑀢𑀺 𑀭𑀲𑀕𑁆𑀕𑀲𑀕𑁆𑀕𑀻, 𑀢𑀤𑁂𑀯 𑀮𑀓𑁆𑀔𑀡𑀁. 𑀪𑀯𑀢𑀺 𑀳𑀺 𑀅𑀪𑀺𑀦𑁆𑀦𑁂𑀧𑀺 𑀯𑀢𑁆𑀣𑀼𑀲𑁆𑀫𑀺𑀁 𑀢𑀕𑁆𑀕𑀢𑀯𑀺𑀲𑁂𑀲𑀸𑀯𑀩𑁄𑀥𑀦𑀢𑁆𑀣𑀁 𑀪𑀺𑀦𑁆𑀦𑀁 𑀯𑀺𑀬 𑀓𑀢𑁆𑀯𑀸 𑀯𑁄𑀳𑀸𑀭𑁄 𑀬𑀣𑀸 ‘‘𑀲𑀺𑀮𑀸𑀧𑀼𑀢𑁆𑀢𑀓𑀲𑁆𑀲 𑀲𑀭𑀻𑀭’’𑀦𑁆𑀢𑀺. 𑀭𑀲𑀕𑁆𑀕𑀲𑀕𑁆𑀕𑀺𑀢𑀸𑀲𑀗𑁆𑀔𑀸𑀢𑀁 𑀯𑀸 𑀮𑀓𑁆𑀔𑀡𑀁 𑀭𑀲𑀕𑁆𑀕𑀲𑀕𑁆𑀕𑀺𑀮𑀓𑁆𑀔𑀡𑀁.

𑁨𑁨𑁭. 𑀯𑀥-𑀲𑀤𑁆𑀤𑁄 ‘‘𑀅𑀢𑁆𑀢𑀸𑀦𑀁 𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸 𑀭𑁄𑀤𑀢𑀻’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁮𑁭𑁯) 𑀩𑀸𑀥𑀦𑀢𑁆𑀣𑁄𑀧𑀺 𑀳𑁄𑀢𑀻𑀢𑀺 𑀢𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀫𑀸𑀭𑀡𑀯𑀥𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀫𑀸𑀭𑀡𑀲𑀗𑁆𑀔𑀸𑀢𑁂𑀦 𑀯𑀥𑁂𑀦𑀸𑀢𑀺 𑀅𑀢𑁆𑀣𑁄. 𑀩𑀸𑀥𑀦𑀢𑁆𑀣𑁄 𑀏𑀯 𑀯𑀸 𑀯𑀥-𑀲𑀤𑁆𑀤𑁄, 𑀫𑀸𑀭𑀡𑁂𑀦, 𑀩𑀸𑀥𑀦𑁂𑀦 𑀘𑀸𑀢𑀺 𑀅𑀢𑁆𑀣𑁄. 𑀉𑀩𑁆𑀩𑀸𑀥𑀦𑀸𑀬𑀸𑀢𑀺 𑀩𑀦𑁆𑀥𑀦𑀸𑀕𑀸𑀭𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀉𑀤𑁆𑀥𑀁 𑀉𑀤𑁆𑀥𑀁 𑀩𑀸𑀥𑀦𑁂𑀦. 𑀢𑁂𑀦𑀸𑀳 ‘‘𑀩𑀦𑁆𑀥𑀦𑀸𑀕𑀸𑀭𑀧𑁆𑀧𑀯𑁂𑀲𑀦𑁂𑀦𑀸’’𑀢𑀺.

𑀅𑀪𑀺𑀦𑀻𑀮𑀦𑁂𑀢𑁆𑀢𑀸𑀤𑀺𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁨𑁮. 𑀯𑀺𑀲𑀝𑀦𑁆𑀢𑀺 𑀓𑀼𑀚𑁆𑀛𑀦𑀯𑀲𑁂𑀦 𑀯𑀺𑀦𑀺𑀲𑀝𑀁 𑀓𑀢𑁆𑀯𑀸. 𑀢𑁂𑀦𑀸𑀳 ‘‘𑀓𑀓𑁆𑀓𑀝𑀓𑁄 𑀯𑀺𑀬𑀸’’𑀢𑀺𑀆𑀤𑀺. 𑀯𑀺𑀲𑀸𑀘𑀻𑀢𑀺 𑀯𑀺𑀭𑀽𑀧𑀁 𑀲𑀸𑀘𑀺𑀢𑀓𑀁, 𑀯𑀺𑀚𑀺𑀫𑁆𑀳𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀯𑀗𑁆𑀓𑀓𑁆𑀔𑀺𑀓𑁄𑀝𑀺𑀬𑀸’’𑀢𑀺, 𑀓𑀼𑀝𑀺𑀮𑀅𑀓𑁆𑀔𑀺𑀓𑁄𑀝𑀺𑀧𑀸𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀯𑀺𑀘𑁂𑀬𑁆𑀬 𑀧𑁂𑀓𑁆𑀔𑀺𑀢𑀸𑀢𑀺 𑀉𑀚𑀼𑀓𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀤𑀺𑀝𑁆𑀞𑀺𑀧𑀸𑀢𑀁 𑀯𑀺𑀘𑀸𑀭𑁂𑀢𑁆𑀯𑀸 𑀑𑀮𑁄𑀓𑁂𑀢𑁆𑀯𑀸. 𑀢𑁂𑀦𑀸𑀳 ‘‘𑀬𑁄 𑀓𑀼𑀚𑁆𑀛𑀺𑀢𑁆𑀯𑀸’’𑀢𑀺𑀆𑀤𑀺. 𑀧𑀭𑁄𑀢𑀺 𑀓𑀼𑀚𑁆𑀛𑀺𑀢𑁄. 𑀦 𑀑𑀮𑁄𑀓𑁂𑀢𑀺 𑀢𑀁 𑀲𑀫𑁆𑀫𑀼𑀔𑀸 𑀕𑀘𑁆𑀙𑀦𑁆𑀢𑀁 𑀓𑀼𑀚𑁆𑀛𑀺𑀢𑁆𑀯𑀸 𑀦 𑀑𑀮𑁄𑀓𑁂𑀢𑀺, 𑀧𑀭𑀫𑁆𑀫𑀼𑀔𑀸. 𑀯𑀺𑀢𑁂𑀬𑁆𑀬𑀸𑀢𑀺 𑀯𑀺𑀭𑀽𑀧𑀁 𑀢𑀺𑀭𑀺𑀬𑀁, 𑀯𑀺𑀜𑁆𑀜𑀽𑀦𑀁 𑀑𑀮𑁄𑀓𑀦𑀓𑁆𑀓𑀫𑀁 𑀯𑀻𑀢𑀺𑀓𑁆𑀓𑀫𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀚𑀺𑀫𑁆𑀳𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀉𑀚𑀼𑀓𑀁 𑀑𑀮𑁄𑀓𑀦𑀁 𑀦𑀸𑀫 𑀓𑀼𑀝𑀺𑀮𑀪𑀸𑀯𑀓𑀭𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀅𑀪𑀸𑀚𑀦𑀉𑀚𑀼𑀓𑀢𑀘𑀺𑀢𑁆𑀢𑀢𑀲𑁆𑀲𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀉𑀚𑀼𑀫𑀦𑁄 𑀳𑀼𑀢𑁆𑀯𑀸 𑀉𑀚𑀼𑀁 𑀧𑁂𑀓𑁆𑀔𑀺𑀢𑀸’’𑀢𑀺. 𑀬𑀣𑀸 𑀘 𑀉𑀚𑀼𑀁 𑀧𑁂𑀓𑁆𑀔𑀺𑀢𑀸 𑀳𑁄𑀢𑀻𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀧𑀲𑀝𑀦𑁆𑀢𑀺 𑀉𑀫𑁆𑀫𑀻𑀮𑀦𑀯𑀲𑁂𑀦 𑀲𑀫𑁆𑀫𑀤𑁂𑀯 𑀧𑀢𑁆𑀣𑀝𑀁. 𑀯𑀺𑀧𑀼𑀮𑀁 𑀯𑀺𑀢𑁆𑀣𑀢𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀧𑀺𑀬𑀁 𑀧𑀺𑀬𑀸𑀬𑀺𑀢𑀩𑁆𑀩𑀁 𑀤𑀲𑁆𑀲𑀦𑀁 𑀑𑀮𑁄𑀓𑀦𑀁 𑀏𑀢𑀲𑁆𑀲𑀸𑀢𑀺 𑀧𑀺𑀬𑀤𑀲𑁆𑀲𑀦𑁄.

𑀓𑀸𑀡𑁄𑀢𑀺 𑀅𑀓𑁆𑀔𑀻𑀦𑀺 𑀦𑀺𑀫𑁆𑀫𑀻𑀮𑁂𑀢𑁆𑀯𑀸 𑀧𑁂𑀓𑁆𑀔𑀦𑀓𑁄. 𑀓𑀸𑀓𑀓𑁆𑀔𑀻𑀢𑀺 𑀓𑁂𑀓𑀭𑀓𑁆𑀔𑁄. 𑀯𑀗𑁆𑀓𑀓𑁆𑀔𑀻𑀢𑀺 𑀚𑀺𑀫𑁆𑀳𑀧𑁂𑀓𑁆𑀔𑀦𑀓𑁄. 𑀆𑀯𑀺𑀮𑀓𑁆𑀔𑀻𑀢𑀺 𑀆𑀓𑀼𑀮𑀤𑀺𑀝𑁆𑀞𑀺𑀧𑀸𑀢𑁄. 𑀦𑀻𑀮𑀧𑀻𑀢𑀮𑁄𑀳𑀺𑀢𑀲𑁂𑀢𑀓𑀸𑀴𑀯𑀡𑁆𑀡𑀸𑀦𑀁 𑀯𑀲𑁂𑀦 𑀧𑀜𑁆𑀘𑀯𑀡𑁆𑀡𑁄. 𑀢𑀢𑁆𑀣 𑀧𑀻𑀢𑀮𑁄𑀳𑀺𑀢𑀯𑀡𑁆𑀡𑀸 𑀲𑁂𑀢𑀫𑀡𑁆𑀟𑀮𑀕𑀢𑀭𑀸𑀚𑀺𑀯𑀲𑁂𑀦, 𑀦𑀻𑀮𑀲𑁂𑀢𑀓𑀸𑀴𑀯𑀡𑁆𑀡𑀸 𑀧𑀦 𑀢𑀁𑀢𑀁𑀫𑀡𑁆𑀟𑀮𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. ‘‘𑀧𑀲𑀸𑀤𑁄𑀢𑀺 𑀧𑀦 𑀢𑁂𑀲𑀁 𑀯𑀡𑁆𑀡𑀸𑀦𑀁 𑀧𑀲𑀦𑁆𑀦𑀸𑀓𑀸𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀓𑁂𑀘𑀺. 𑀧𑀜𑁆𑀘𑀯𑀡𑁆𑀡𑁄 𑀧𑀲𑀸𑀤𑁄𑀢𑀺 𑀧𑀦 𑀬𑀣𑀸𑀯𑀼𑀢𑁆𑀢𑀧𑀜𑁆𑀘𑀯𑀡𑁆𑀡𑀧𑀭𑀺𑀯𑀸𑀭𑁄, 𑀢𑁂𑀳𑀺 𑀯𑀸 𑀧𑀝𑀺𑀫𑀡𑁆𑀟𑀺𑀢𑁄 𑀧𑀲𑀸𑀤𑁄𑀢𑀺 𑀅𑀢𑁆𑀣𑁄. 𑀦𑁂𑀢𑁆𑀢𑀲𑀫𑁆𑀧𑀢𑁆𑀢𑀺𑀓𑀭𑀸𑀦𑀻𑀢𑀺 ‘‘𑀧𑀜𑁆𑀘𑀯𑀡𑁆𑀡𑀧𑀲𑀸𑀤𑀢𑀸 𑀢𑀺𑀭𑁄𑀳𑀺𑀢𑀯𑀺𑀤𑀽𑀭𑀕𑀢𑀤𑀲𑁆𑀲𑀦𑀲𑀫𑀢𑁆𑀣𑀢𑀸’’𑀢𑀺 𑀏𑀯𑀫𑀸𑀤𑀺 𑀘𑀓𑁆𑀔𑀼𑀲𑀫𑁆𑀧𑀤𑀸𑀬 𑀓𑀸𑀭𑀡𑀸𑀦𑀺. 𑀮𑀓𑁆𑀔𑀡𑀲𑀢𑁆𑀣𑁂 𑀬𑀼𑀢𑁆𑀢𑀸𑀢𑀺 𑀮𑀓𑁆𑀔𑀡𑀲𑀢𑁆𑀣𑁂 𑀆𑀬𑀼𑀢𑁆𑀢𑀸 𑀲𑀼𑀓𑀼𑀲𑀮𑀸.

𑀉𑀡𑁆𑀳𑀻𑀲𑀲𑀻𑀲𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁩𑁦. 𑀧𑀼𑀩𑁆𑀩𑀗𑁆𑀕𑀫𑁄𑀢𑀺 𑀏𑀢𑁆𑀣 𑀧𑀼𑀩𑁆𑀩𑀗𑁆𑀕𑀫𑀢𑀸 𑀦𑀸𑀫 𑀧𑀫𑀼𑀔𑀢𑀸, 𑀚𑁂𑀝𑁆𑀞𑀲𑁂𑀝𑁆𑀞𑀓𑀪𑀸𑀯𑁄 𑀩𑀳𑀼𑀚𑀦𑀲𑁆𑀲 𑀅𑀦𑀼𑀯𑀢𑁆𑀢𑀦𑀻𑀬𑀢𑀸𑀢𑀺 𑀆𑀳 ‘‘𑀕𑀡𑀚𑁂𑀝𑁆𑀞𑀓𑁄’’𑀢𑀺𑀆𑀤𑀺.

𑀧𑀼𑀩𑁆𑀩𑀗𑁆𑀕𑀫𑀢𑀸𑀢𑀺 𑀧𑀼𑀩𑁆𑀩𑀗𑁆𑀕𑀫𑀲𑁆𑀲 𑀓𑀫𑁆𑀫𑀁. 𑀬𑀲𑁆𑀲 𑀳𑀺 𑀓𑀸𑀬𑀲𑀼𑀘𑀭𑀺𑀢𑀸𑀤𑀺𑀓𑀫𑁆𑀫𑀲𑁆𑀲 𑀯𑀲𑁂𑀦 𑀫𑀳𑀸𑀧𑀼𑀭𑀺𑀲𑁄 𑀩𑀳𑀼𑀚𑀦𑀲𑁆𑀲 𑀧𑀼𑀩𑁆𑀩𑀗𑁆𑀕𑀫𑁄 𑀅𑀳𑁄𑀲𑀺, 𑀢𑀤𑀲𑁆𑀲 𑀓𑀫𑁆𑀫𑀁 ‘‘𑀧𑀼𑀩𑁆𑀩𑀗𑁆𑀕𑀫𑀢𑀸’’𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀦 𑀧𑀼𑀩𑁆𑀩𑀗𑁆𑀕𑀫𑀪𑀸𑀯𑁄. 𑀢𑁂𑀦𑀸𑀳 ‘‘𑀇𑀥 𑀓𑀫𑁆𑀫𑀁 𑀦𑀸𑀫 𑀧𑀼𑀩𑁆𑀩𑀗𑁆𑀕𑀫𑀢𑀸’’𑀢𑀺. 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀧𑀭𑀺𑀧𑀼𑀡𑁆𑀡𑀲𑀻𑀲𑁄𑀢𑀺 𑀧𑀻𑀢𑀺𑀬𑀸, 𑀧𑀸𑀫𑁄𑀚𑁆𑀚𑁂𑀦 𑀘 𑀲𑀫𑁆𑀧𑀼𑀡𑁆𑀡𑀧𑀜𑁆𑀜𑀸𑀲𑀻𑀲𑁄 𑀩𑀳𑀼𑀮𑀁 𑀲𑁄𑀫𑀦𑀲𑁆𑀲𑀲𑀳𑀕𑀢𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑀫𑀗𑁆𑀕𑀻 𑀏𑀯 𑀳𑀼𑀢𑁆𑀯𑀸 𑀯𑀺𑀘𑀭𑀢𑀺. 𑀫𑀳𑀸𑀧𑀼𑀭𑀺𑀲𑁄𑀢𑀺 𑀫𑀳𑀸𑀧𑀼𑀭𑀺𑀲𑀚𑀸𑀢𑀺𑀓𑁄.

𑁨𑁩𑁧. 𑀩𑀳𑀼𑀚𑀦𑀦𑁆𑀢𑀺 𑀲𑀸𑀫𑀺𑀅𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀩𑀳𑀼𑀚𑀦𑀲𑁆𑀲𑀸’’𑀢𑀺. 𑀧𑀭𑀺𑀪𑀼𑀜𑁆𑀚𑀦𑀝𑁆𑀞𑁂𑀦 𑀧𑀝𑀺𑀪𑁄𑀕𑁄, 𑀉𑀧𑀬𑁄𑀕𑀯𑀢𑁆𑀣𑀼 𑀧𑀝𑀺𑀪𑁄𑀕𑁄, 𑀢𑀲𑁆𑀲 𑀳𑀺𑀢𑀸𑀢𑀺 𑀧𑀝𑀺𑀪𑁄𑀕𑀺𑀬𑀸. 𑀤𑁂𑀲𑀓𑀸𑀮𑀁 𑀜𑀢𑁆𑀯𑀸 𑀢𑀤𑀼𑀧𑀓𑀭𑀡𑀽𑀧𑀝𑁆𑀞𑀸𑀦𑀸𑀤𑀺 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀸 𑀲𑀢𑁆𑀢𑀸. 𑀅𑀪𑀺𑀳𑀭𑀦𑁆𑀢𑀻𑀢𑀺 𑀩𑁆𑀬𑀸𑀳𑀭𑀦𑁆𑀢𑀺. 𑀢𑀲𑁆𑀲 𑀢𑀲𑁆𑀲 𑀯𑁂𑀬𑁆𑀬𑀸𑀯𑀘𑁆𑀘𑀲𑁆𑀲 𑀧𑀝𑀺𑀳𑀭𑀡𑀢𑁄 𑀧𑀯𑀢𑁆𑀢𑀦𑀓𑀭𑀡𑀢𑁄 𑀧𑀝𑀺𑀳𑀸𑀭𑁄, 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄, 𑀢𑀲𑁆𑀲 𑀪𑀸𑀯𑁄 𑀧𑀝𑀺𑀳𑀸𑀭𑀓𑀦𑁆𑀢𑀺 𑀆𑀳 ‘‘𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀪𑀸𑀯’’𑀦𑁆𑀢𑀺. 𑀯𑀺𑀲𑀯𑀦𑀁 𑀯𑀺𑀲𑀯𑁄, 𑀓𑀸𑀫𑀓𑀸𑀭𑁄 𑀯𑀲𑀺𑀢𑀸, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀯𑀺𑀲𑀯𑀻𑀢𑀺 𑀆𑀳 ‘‘𑀘𑀺𑀡𑁆𑀡𑀯𑀲𑀻’’𑀢𑀺.

𑀏𑀓𑁂𑀓𑀮𑁄𑀫𑀢𑀸𑀤𑀺𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁩𑁨. 𑀉𑀧𑀯𑀢𑁆𑀢𑀢𑀻𑀢𑀺 𑀅𑀦𑀼𑀓𑀽𑀮𑀪𑀸𑀯𑀁 𑀉𑀧𑁂𑀘𑁆𑀘 𑀯𑀢𑁆𑀢𑀢𑀺. 𑀢𑁂𑀦𑀸𑀳 ‘‘𑀅𑀚𑁆𑀛𑀸𑀲𑀬𑀁 𑀅𑀦𑀼𑀯𑀢𑁆𑀢𑀢𑀻’’𑀢𑀺.

𑀏𑀓𑁂𑀓𑀮𑁄𑀫𑀮𑀓𑁆𑀔𑀡𑀦𑁆𑀢𑀺 𑀏𑀓𑁂𑀓𑀲𑁆𑀫𑀺𑀁 𑀮𑁄𑀫𑀓𑀽𑀧𑁂 𑀏𑀓𑁂𑀓𑀮𑁄𑀫𑀢𑀸𑀮𑀓𑁆𑀔𑀡𑀁. 𑀏𑀓𑁂𑀓𑁂𑀳𑀺 𑀮𑁄𑀫𑁂𑀳𑀻𑀢𑀺 𑀅𑀜𑁆𑀜𑁂𑀲𑀁 𑀲𑀭𑀻𑀭𑁂 𑀏𑀓𑁂𑀓𑀲𑁆𑀫𑀺𑀫𑁆𑀧𑀺 𑀮𑁄𑀫𑀓𑀽𑀧𑁂 𑀅𑀦𑁂𑀓𑀸𑀦𑀺𑀧𑀺 𑀮𑁄𑀫𑀸𑀦𑀺 𑀉𑀝𑁆𑀞𑀳𑀦𑁆𑀢𑀺, 𑀦 𑀢𑀣𑀸𑀕𑀢𑀲𑁆𑀲. 𑀢𑁂𑀳𑀺 𑀧𑀼𑀦 𑀧𑀘𑁆𑀘𑁂𑀓𑀁 𑀮𑁄𑀫𑀓𑀽𑀧𑁂𑀲𑀼 𑀏𑀓𑁂𑀓𑁂𑀳𑁂𑀯 𑀉𑀧𑁆𑀧𑀦𑁆𑀦𑁂𑀳𑀺 𑀓𑀼𑀡𑁆𑀟𑀮𑀸𑀯𑀢𑁆𑀢𑁂𑀳𑀺 𑀧𑀤𑀓𑁆𑀔𑀺𑀡𑀸𑀯𑀢𑁆𑀢𑀓𑀚𑀸𑀢𑁂𑀳𑀺 𑀦𑀺𑀘𑀺𑀢𑀁 𑀯𑀺𑀬 𑀲𑀭𑀻𑀭𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀏𑀓𑁂𑀓𑀮𑁄𑀫𑀽𑀧𑀘𑀺𑀢𑀗𑁆𑀕𑀯𑀸’’𑀢𑀺.

𑀘𑀢𑁆𑀢𑀸𑀮𑀻𑀲𑀸𑀤𑀺𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁩𑁪. 𑀅𑀪𑀺𑀦𑁆𑀤𑀺𑀢𑀩𑁆𑀩𑀧𑀭𑀺𑀲𑁄𑀢𑀺 𑀧𑀭𑁂𑀳𑀺 𑀓𑁂𑀦𑀘𑀺 𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑁂𑀢𑁆𑀯𑀸, 𑀬𑀼𑀢𑁆𑀢𑀺𑀓𑀸𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 𑀯𑀸 𑀦 𑀪𑀺𑀦𑁆𑀤𑀺𑀢𑀩𑁆𑀩𑀧𑀭𑀺𑀲𑁄.

𑀅𑀧𑀺𑀲𑀼𑀡𑀯𑀸𑀘𑀸𑀬𑀸𑀢𑀺 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀧𑁂𑀲𑀼𑀜𑁆𑀜𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀁 𑀓𑀼𑀲𑀮𑀓𑀫𑁆𑀫𑀁. 𑀧𑀺𑀲𑀼𑀡𑀸 𑀯𑀸𑀘𑀸 𑀏𑀢𑀲𑁆𑀲𑀸𑀢𑀺 𑀧𑀺𑀲𑀼𑀡𑀯𑀸𑀘𑁄, 𑀢𑀲𑁆𑀲 𑀧𑀺𑀲𑀼𑀡𑀯𑀸𑀘𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀅𑀧𑀭𑀺𑀧𑀼𑀡𑁆𑀡𑀸𑀢𑀺 𑀘𑀢𑁆𑀢𑀸𑀭𑀻𑀲𑀢𑁄 𑀊𑀦𑀪𑀸𑀯𑁂𑀦 𑀦 𑀧𑀭𑀺𑀧𑀼𑀡𑁆𑀡𑀸. 𑀯𑀺𑀭𑀴𑀸𑀢𑀺 𑀲𑀯𑀺𑀯𑀭𑀸.

𑀧𑀳𑀽𑀢𑀚𑀺𑀯𑁆𑀳𑀸𑀤𑀺𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁩𑁬. 𑀆𑀤𑁂𑀬𑁆𑀬𑀯𑀸𑀘𑁄𑀢𑀺 𑀆𑀤𑀭𑀕𑀸𑀭𑀯𑀯𑀲𑁂𑀦 𑀆𑀤𑀸𑀢𑀩𑁆𑀩𑀯𑀘𑀦𑁄. ‘‘𑀏𑀯𑀫𑁂𑀢’’𑀦𑁆𑀢𑀺 𑀕𑀳𑁂𑀢𑀩𑁆𑀩𑀯𑀘𑀦𑁄 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀲𑀸𑀲𑀦𑁄.

𑀩𑀤𑁆𑀥𑀚𑀺𑀯𑁆𑀳𑀸𑀢𑀺 𑀬𑀣𑀸 𑀲𑀼𑀔𑁂𑀦 𑀧𑀭𑀺𑀯𑀢𑁆𑀢𑀢𑀺, 𑀏𑀯𑀁 𑀲𑀺𑀭𑀸𑀤𑀻𑀳𑀺 𑀧𑀮𑀺𑀩𑀼𑀤𑁆𑀥𑀚𑀺𑀯𑁆𑀳𑀸. 𑀕𑀽𑀴𑁆𑀳𑀚𑀺𑀯𑁆𑀳𑀸𑀢𑀺 𑀭𑀲𑀩𑀳𑀮𑀢𑀸𑀬 𑀕𑀽𑀴𑁆𑀳𑀕𑀡𑁆𑀟𑀲𑀤𑀺𑀲𑀚𑀺𑀯𑁆𑀳𑀸. 𑀤𑁆𑀯𑀺𑀚𑀺𑀯𑁆𑀳𑀸𑀢𑀺 𑀅𑀕𑁆𑀕𑁂 𑀓𑀧𑁆𑀧𑀪𑀸𑀯𑁂𑀦 𑀤𑁆𑀯𑀺𑀥𑀸𑀪𑀽𑀢𑀚𑀺𑀯𑁆𑀳𑀸. 𑀫𑀫𑁆𑀫𑀦𑀸𑀢𑀺 𑀅𑀧𑁆𑀧𑀭𑀺𑀧𑁆𑀧𑀼𑀝𑀢𑀮𑀸𑀧𑀸. 𑀔𑀭𑀨𑀭𑀼𑀲𑀓𑀓𑁆𑀓𑀲𑀸𑀤𑀺𑀯𑀲𑁂𑀦 𑀲𑀤𑁆𑀤𑁄 𑀪𑀺𑀚𑁆𑀚𑀢𑀺 𑀪𑀺𑀦𑁆𑀦𑀓𑀸𑀭𑁄 𑀳𑁄𑀢𑀺. 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀯𑀢𑁆𑀢𑀲𑁆𑀲𑀭𑀢𑀸𑀬 𑀙𑀺𑀦𑁆𑀦𑀲𑁆𑀲𑀭𑀸 𑀯𑀸. 𑀅𑀦𑁂𑀓𑀸𑀓𑀸𑀭𑀢𑀸𑀬 𑀪𑀺𑀦𑁆𑀦𑀲𑁆𑀲𑀭𑀸 𑀯𑀸. 𑀓𑀸𑀓𑀲𑁆𑀲 𑀯𑀺𑀬 𑀅𑀫𑀦𑀼𑀜𑁆𑀜𑀲𑁆𑀲𑀭𑀢𑀸𑀬 𑀓𑀸𑀓𑀲𑁆𑀲𑀭𑀸 𑀯𑀸. 𑀫𑀥𑀼𑀭𑁄𑀢𑀺 𑀇𑀝𑁆𑀞𑁂, 𑀓𑀫𑁆𑀫𑀨𑀮𑁂𑀦 𑀯𑀢𑁆𑀣𑀼𑀦𑁄 𑀲𑀼𑀯𑀺𑀲𑀼𑀤𑁆𑀥𑀢𑁆𑀢𑀸. 𑀧𑁂𑀫𑀦𑀻𑀬𑁄𑀢𑀺 𑀧𑀻𑀢𑀺𑀲𑀜𑁆𑀚𑀦𑀦𑁄, 𑀧𑀺𑀬𑀸𑀬𑀺𑀢𑀩𑁆𑀩𑁄 𑀯𑀸.

𑁨𑁩𑁭. 𑀅𑀓𑁆𑀓𑁄𑀲𑀬𑀼𑀢𑁆𑀢𑀢𑁆𑀢𑀸𑀢𑀺 𑀅𑀓𑁆𑀓𑁄𑀲𑀼𑀧𑀲𑀜𑁆𑀳𑀺𑀢𑀢𑁆𑀢𑀸 𑀅𑀓𑁆𑀓𑁄𑀲𑀯𑀢𑁆𑀣𑀼𑀲𑀳𑀺𑀢𑀢𑁆𑀢𑀸. 𑀆𑀩𑀸𑀥𑀓𑀭𑀺𑀦𑁆𑀢𑀺 𑀖𑀝𑁆𑀝𑀦𑀯𑀲𑁂𑀦 𑀧𑀭𑁂𑀲𑀁 𑀧𑀻𑀴𑀸𑀯𑀳𑀁. 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀯𑀫𑀤𑁆𑀤𑀦𑀢𑁄, 𑀧𑀫𑀤𑁆𑀤𑀸𑀪𑀸𑀯𑀓𑀭𑀡𑀢𑁄 𑀯𑀸 𑀩𑀳𑀼𑀚𑀦𑀧𑁆𑀧𑀫𑀤𑁆𑀤𑀦𑀁. 𑀅𑀩𑀸𑀴𑁆𑀳𑀦𑁆𑀢𑀺 𑀯𑀸 𑀏𑀢𑁆𑀣 𑀅-𑀓𑀸𑀭𑁄 𑀯𑀼𑀤𑁆𑀥𑀺𑀅𑀢𑁆𑀣𑁄 ‘‘𑀅𑀲𑁂𑀓𑁆𑀔𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁧𑁧) 𑀯𑀺𑀬, 𑀢𑀲𑁆𑀫𑀸 𑀅𑀢𑀺𑀯𑀺𑀬 𑀩𑀸𑀴𑁆𑀳𑀁 𑀨𑀭𑀼𑀲𑀁 𑀕𑀺𑀭𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀦 𑀪𑀡𑀻𑀢𑀺 𑀘𑁂𑀢𑁆𑀣 ‘‘𑀦 𑀅𑀪𑀡𑀺 𑀦 𑀪𑀡𑀻’’𑀢𑀺 𑀲𑀭𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄. 𑀲𑀼𑀲𑀁𑀳𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 𑀲𑀁𑀳𑀺𑀢𑀁. 𑀓𑁂𑀦 𑀧𑀦 𑀲𑀼𑀝𑁆𑀞𑀼 𑀲𑀁𑀳𑀺𑀢𑀁? ‘‘𑀫𑀥𑀼𑀭’’𑀦𑁆𑀢𑀺 𑀅𑀦𑀦𑁆𑀢𑀭𑀫𑁂𑀯 𑀯𑀼𑀢𑁆𑀢𑀢𑁆𑀢𑀸 𑀫𑀥𑀼𑀭𑀢𑀸𑀬𑀸𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀓𑀸 𑀧𑀦𑀲𑁆𑀲 𑀫𑀥𑀼𑀭𑀢𑀸𑀢𑀺 𑀆𑀳 ‘‘𑀲𑀼𑀝𑁆𑀞𑀼 𑀧𑁂𑀫𑀲𑀁𑀳𑀺𑀢’’𑀦𑁆𑀢𑀺. 𑀉𑀧𑀬𑁄𑀕𑀧𑀼𑀣𑀼𑀢𑁆𑀢𑀯𑀺𑀲𑀬𑁄 𑀬𑀁 𑀯𑀸𑀘𑀸-𑀲𑀤𑁆𑀤𑁄𑀢𑀺 𑀆𑀳 ‘‘𑀯𑀸𑀘𑀸𑀬𑁄’’𑀢𑀺, 𑀲𑀸 𑀘𑀲𑁆𑀲𑀸 𑀉𑀧𑀬𑁄𑀕𑀧𑀼𑀣𑀼𑀢𑁆𑀢𑀯𑀺𑀲𑀬𑀢𑀸 ‘‘𑀳𑀤𑀬𑀕𑀸𑀫𑀺𑀦𑀺𑀬𑁄’’𑀢𑀺 𑀧𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀢𑀸𑀬 𑀤𑀝𑁆𑀞𑀩𑁆𑀩𑀸. ‘‘𑀓𑀡𑁆𑀡𑀲𑀼𑀔’’𑀦𑁆𑀢𑀺 𑀧𑀸𑀞𑁂 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄𑀬𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑁂𑀤𑀬𑀣𑀸𑀢𑀺 𑀓𑀸𑀮𑀯𑀺𑀧𑀮𑁆𑀮𑀸𑀲𑁂𑀦𑀸𑀬𑀁 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀯𑁂𑀤𑀬𑀺𑀢𑁆𑀣𑀸’’𑀢𑀺. 𑀩𑁆𑀭𑀳𑁆𑀫𑀲𑁆𑀲𑀭𑀢𑀦𑁆𑀢𑀺 𑀲𑁂𑀝𑁆𑀞𑀲𑁆𑀲𑀭𑀢𑀁, 𑀩𑁆𑀭𑀳𑁆𑀫𑀼𑀦𑁄 𑀲𑀭𑀲𑀤𑀺𑀲𑀲𑁆𑀲𑀭𑀢𑀁 𑀯𑀸. 𑀩𑀳𑀽𑀦𑀁 𑀩𑀳𑀼𑀦𑁆𑀢𑀺 𑀩𑀳𑀽𑀦𑀁 𑀚𑀦𑀸𑀦𑀁 𑀩𑀳𑀼𑀁 𑀲𑀼𑀪𑀡𑀺𑀢𑀦𑁆𑀢𑀺 𑀬𑁄𑀚𑀦𑀸.

𑀲𑀻𑀳𑀳𑀦𑀼𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁩𑁮. 𑀅𑀧𑁆𑀧𑀥𑀁𑀲𑀺𑀓𑁄𑀢𑀺 𑀅𑀧𑁆𑀧𑀥𑀁𑀲𑀺𑀬𑁄. 𑀬-𑀓𑀸𑀭𑀲𑁆𑀲 𑀳𑀺 𑀓-𑀓𑀸𑀭𑀁 𑀓𑀢𑁆𑀯𑀸 𑀅𑀬𑀁 𑀦𑀺𑀤𑁆𑀤𑁂𑀲𑁄 𑀬𑀣𑀸 ‘‘𑀦𑀺𑀬𑁆𑀬𑀸𑀦𑀺𑀓𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁯𑁭) 𑀕𑀼𑀡𑀢𑁄𑀢𑀺 𑀅𑀢𑁆𑀢𑀦𑀸 𑀅𑀥𑀺𑀕𑀢𑀕𑀼𑀡𑀢𑁄. 𑀞𑀸𑀦𑀢𑁄𑀢𑀺 𑀬𑀣𑀸𑀞𑀺𑀢𑀝𑁆𑀞𑀸𑀦𑀦𑁆𑀢𑀭𑀢𑁄.

𑀧𑀮𑀸𑀧𑀓𑀣𑀸𑀬𑀸𑀢𑀺 𑀲𑀫𑁆𑀨𑀧𑁆𑀧𑀮𑀸𑀧𑀓𑀣𑀸𑀬. 𑀅𑀦𑁆𑀢𑁄𑀧𑀯𑀺𑀝𑁆𑀞𑀳𑀦𑀼𑀓𑀸 𑀏𑀓𑀢𑁄, 𑀉𑀪𑀢𑁄 𑀯𑀸 𑀲𑀁𑀓𑀼𑀘𑀺𑀢𑀯𑀺𑀲𑀼𑀓𑀸. 𑀯𑀗𑁆𑀓𑀳𑀦𑀼𑀓𑀸 𑀏𑀓𑀧𑀲𑁆𑀲𑁂𑀦 𑀓𑀼𑀝𑀺𑀮𑀯𑀺𑀲𑀼𑀓𑀸. 𑀧𑀩𑁆𑀪𑀸𑀭𑀳𑀦𑀼𑀓𑀸 𑀧𑀼𑀭𑀢𑁄 𑀑𑀮𑀫𑁆𑀩𑀫𑀸𑀦𑀯𑀺𑀲𑀼𑀓𑀸.

𑁨𑁩𑁯. 𑀯𑀺𑀓𑀺𑀡𑁆𑀡𑀯𑀘𑀦𑀸 𑀦𑀸𑀫 𑀲𑀫𑁆𑀨𑀧𑁆𑀧𑀮𑀸𑀧𑀺𑀦𑁄, 𑀢𑀧𑁆𑀧𑀝𑀺𑀓𑁆𑀔𑁂𑀧𑁂𑀦 𑀅𑀯𑀺𑀓𑀺𑀡𑁆𑀡𑀯𑀘𑀦𑀸 𑀫𑀳𑀸𑀩𑁄𑀥𑀺𑀲𑀢𑁆𑀢𑀸. 𑀯𑀸𑀘𑀸 𑀏𑀯 𑀢𑀤𑀢𑁆𑀣𑀸𑀥𑀺𑀕𑀫𑀼𑀧𑀸𑀬𑀢𑀸𑀬 ‘‘𑀩𑁆𑀬𑀸𑀧𑁆𑀧𑀣𑁄’’𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀅𑀯𑀺𑀓𑀺𑀡𑁆𑀡…𑀧𑁂… 𑀯𑀘𑀦𑀧𑀣𑁄 𑀅𑀲𑁆𑀲𑀸’’𑀢𑀺. ‘‘𑀤𑁆𑀯𑀻𑀳𑀺 𑀤𑁆𑀯𑀻𑀳𑀻’’𑀢𑀺 𑀦𑀬𑀺𑀤𑀁 𑀆𑀫𑁂𑀟𑀺𑀢𑀯𑀘𑀦𑀁 𑀅𑀲𑀫𑀸𑀦𑀸𑀥𑀺𑀓𑀭𑀡𑀢𑁄, 𑀅𑀣 𑀔𑁄 𑀤𑁆𑀯𑀻𑀳𑀺 𑀤𑀺𑀕𑀼𑀡𑀢𑀸𑀤𑀲𑁆𑀲𑀦𑀦𑁆𑀢𑀺 𑀆𑀳 ‘‘𑀤𑁆𑀯𑀻𑀳𑀺 𑀤𑁆𑀯𑀻𑀳𑀻𑀢𑀺 𑀘𑀢𑀽𑀳𑀻’’𑀢𑀺. 𑀢𑀲𑁆𑀫𑀸 ‘‘𑀤𑁆𑀯𑀺𑀤𑀼𑀕𑀫𑀸’’𑀢𑀺 𑀘𑀢𑀼𑀕𑀫𑀸 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀘𑀢𑀼𑀧𑁆𑀧𑀤𑀸𑀦’’𑀦𑁆𑀢𑀺. 𑀢𑀣𑀸𑀲𑀪𑀸𑀯𑁄𑀢𑀺 𑀬𑀣𑀸𑀲𑁆𑀲 𑀯𑀼𑀢𑁆𑀢𑀦𑀬𑁂𑀦 𑀓𑁂𑀦𑀘𑀺 𑀅𑀧𑁆𑀧𑀥𑀁𑀲𑀺𑀬𑀢𑀸 𑀳𑁄𑀢𑀺 𑀕𑀼𑀡𑁂𑀳𑀺, 𑀢𑀣𑀸𑀲𑀪𑀸𑀯𑁄.

𑀲𑀫𑀤𑀦𑁆𑀢𑀸𑀤𑀺𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁪𑁦. 𑀯𑀺𑀲𑀼𑀤𑁆𑀥𑀲𑀻𑀮𑀸𑀘𑀸𑀭𑀢𑀸𑀬 𑀧𑀭𑀺𑀲𑀼𑀤𑁆𑀥𑀸 𑀲𑀫𑀦𑁆𑀢𑀢𑁄 𑀲𑀩𑁆𑀩𑀣𑀸 𑀯𑀸 𑀲𑀼𑀤𑁆𑀥𑀸 𑀧𑀼𑀕𑁆𑀕𑀮𑀸 𑀧𑀭𑀺𑀯𑀸𑀭𑀸 𑀏𑀢𑀲𑁆𑀲𑀸𑀢𑀺 𑀧𑀭𑀺𑀲𑀼𑀤𑁆𑀥𑀧𑀭𑀺𑀯𑀸𑀭𑁄.

𑁨𑁪𑁧. 𑀧𑀳𑀸𑀲𑀻𑀢𑀺 𑀢𑀤𑀗𑁆𑀕𑀯𑀲𑁂𑀦, 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀘 𑀧𑀭𑀺𑀘𑁆𑀘𑀚𑀺. 𑀢𑀺𑀤𑀺𑀯𑀁 𑀢𑀸𑀯𑀢𑀺𑀁𑀲𑀪𑀯𑀦𑀁 𑀧𑀼𑀭𑀁 𑀦𑀕𑀭𑀁 𑀏𑀢𑁂𑀲𑀦𑁆𑀢𑀺 𑀢𑀺𑀤𑀺𑀯𑀧𑀼𑀭𑀸, 𑀢𑀸𑀯𑀢𑀺𑀁𑀲𑀤𑁂𑀯𑀸, 𑀢𑁂𑀲𑀁 𑀯𑀭𑁄 𑀢𑀺𑀤𑀺𑀯𑀧𑀼𑀭𑀯𑀭𑁄, 𑀇𑀦𑁆𑀤𑁄. 𑀢𑁂𑀦 𑀢𑀺𑀤𑀺𑀯𑀧𑀼𑀭𑀯𑀭𑁂𑀦. 𑀢𑁂𑀦𑀸𑀳 ‘‘𑀲𑀓𑁆𑀓𑁂𑀦𑀸’’𑀢𑀺. 𑀮𑀧𑀦𑁆𑀢𑀺 𑀓𑀣𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀮𑀧𑀦𑀁, 𑀫𑀼𑀔𑀦𑁆𑀢𑀺 𑀆𑀳 ‘‘𑀮𑀧𑀦𑀚𑀦𑁆𑀢𑀺 𑀫𑀼𑀔𑀚’’𑀦𑁆𑀢𑀺. 𑀲𑀼𑀝𑁆𑀞𑀼 𑀥𑀯𑀮𑀢𑀸𑀬 𑀲𑀼𑀓𑁆𑀓𑀸, 𑀈𑀲𑀓𑀫𑁆𑀧𑀺 𑀅𑀲𑀁𑀓𑀺𑀮𑀺𑀝𑁆𑀞𑀢𑀸𑀬 𑀲𑀼𑀘𑀺. 𑀲𑀼𑀦𑁆𑀤𑀭𑀲𑀡𑁆𑀞𑀸𑀦𑀢𑀸𑀬 𑀲𑀼𑀝𑁆𑀞𑀼 𑀪𑀸𑀯𑀦𑀢𑁄, 𑀯𑀺𑀧𑀲𑁆𑀲𑀦𑀢𑁄 𑀘 𑀲𑁄𑀪𑀦𑀸. 𑀓𑀸𑀫𑀁 𑀚𑀦𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀦𑀺𑀯𑀸𑀲𑀦𑀝𑁆𑀞𑀸𑀦𑀸𑀤𑀺𑀪𑀸𑀯𑁂𑀦 𑀧𑀢𑀺𑀝𑁆𑀞𑀸𑀪𑀽𑀢𑁄 𑀤𑁂𑀲𑀯𑀺𑀲𑁂𑀲𑁄 ‘‘𑀚𑀦𑀧𑀤𑁄’’𑀢𑀺 𑀯𑀼𑀘𑁆𑀘𑀢𑀺, 𑀇𑀥 𑀧𑀦 𑀲𑀧𑀭𑀺𑀯𑀸𑀭𑀘𑀢𑀼𑀫𑀳𑀸𑀤𑀻𑀧𑀲𑀜𑁆𑀜𑀺𑀢𑁄 𑀲𑀩𑁆𑀩𑁄 𑀧𑀤𑁂𑀲𑁄 𑀢𑀣𑀸 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀘𑀓𑁆𑀓𑀯𑀸𑀴𑀧𑀭𑀺𑀘𑁆𑀙𑀺𑀦𑁆𑀦𑁄 𑀚𑀦𑀧𑀤𑁄’’𑀢𑀺. 𑀦𑀦𑀼 𑀘 𑀬𑀣𑀸𑀯𑀼𑀢𑁆𑀢𑁄 𑀧𑀤𑁂𑀲𑁄 𑀲𑀫𑀼𑀤𑁆𑀤𑀧𑀭𑀺𑀘𑁆𑀙𑀺𑀦𑁆𑀦𑁄, 𑀦 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀧𑀭𑀺𑀘𑁆𑀙𑀺𑀦𑁆𑀦𑁄𑀢𑀺? 𑀲𑁄 𑀧𑀤𑁂𑀲𑁄 𑀘𑀓𑁆𑀓𑀯𑀸𑀴𑀧𑀭𑀺𑀘𑁆𑀙𑀺𑀦𑁆𑀦𑁄𑀧𑀺 𑀳𑁄𑀢𑀻𑀢𑀺 𑀢𑀣𑀸 𑀯𑀼𑀢𑁆𑀢𑀁. 𑀬𑁂 𑀯𑀸 𑀲𑀫𑀼𑀤𑁆𑀤𑀦𑀺𑀲𑁆𑀲𑀺𑀢𑀸, 𑀘𑀓𑁆𑀓𑀯𑀸𑀴𑀧𑀸𑀤𑀦𑀺𑀲𑁆𑀲𑀺𑀢𑀸 𑀘 𑀲𑀢𑁆𑀢𑀸, 𑀢𑁂𑀲𑀁 𑀢𑁂 𑀢𑁂 𑀧𑀤𑁂𑀲𑀸 𑀧𑀢𑀺𑀝𑁆𑀞𑀸𑀢𑀺 𑀢𑁂𑀧𑀺 𑀲𑀗𑁆𑀕𑀡𑁆𑀳𑀦𑁆𑀢𑁄 ‘‘𑀘𑀓𑁆𑀓𑀯𑀸𑀴𑀧𑀭𑀺𑀘𑁆𑀙𑀺𑀦𑁆𑀦𑁄’’𑀢𑀺 𑀅𑀯𑁄𑀘. 𑀘𑀓𑁆𑀓𑀯𑀸𑀴𑀧𑀭𑀺𑀘𑁆𑀙𑀺𑀦𑁆𑀦𑁄𑀢𑀺 𑀘 𑀘𑀓𑁆𑀓𑀯𑀸𑀴𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀘𑀓𑁆𑀓𑀯𑀢𑁆𑀢𑀺𑀦𑁄. 𑀧𑀼𑀦 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀚𑀦𑀧𑀤𑀲𑁆𑀲. 𑀩𑀳𑀼𑀚𑀦 𑀲𑀼𑀔𑀦𑁆𑀢𑀺 𑀏𑀢𑁆𑀣 𑀧𑀘𑁆𑀘𑀢𑁆𑀢𑀩𑀳𑀼𑀯𑀘𑀦𑀮𑁄𑀧𑁂𑀦 𑀩𑀳𑀼𑀚𑀦𑀕𑁆𑀕𑀳𑀡𑀦𑁆𑀢𑀺 𑀆𑀳 ‘‘𑀩𑀳𑀼𑀚𑀦𑀸’’𑀢𑀺. 𑀬𑀣𑀸 𑀧𑀦 𑀢𑁂 𑀳𑀺𑀢𑀲𑀼𑀔𑀁 𑀘𑀭𑀦𑁆𑀢𑀺, 𑀢𑀁 𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀫𑀸𑀦𑀲𑀼𑀔𑀤𑀼𑀓𑁆𑀔𑀸 𑀳𑀼𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀯𑀺𑀕𑀢𑀧𑀸𑀧𑁄𑀢𑀺 𑀲𑀩𑁆𑀩𑀲𑁄 𑀲𑀫𑀼𑀘𑁆𑀙𑀺𑀦𑁆𑀤𑀦𑁂𑀦 𑀯𑀺𑀦𑀺𑀤𑁆𑀥𑀼𑀢𑀧𑀸𑀧𑀥𑀫𑁆𑀫𑁄. 𑀤𑀭𑀣𑁄 𑀯𑀼𑀘𑁆𑀘𑀢𑀺 𑀓𑀸𑀬𑀺𑀓𑁄, 𑀘𑁂𑀢𑀲𑀺𑀓𑁄 𑀘 𑀧𑀭𑀺𑀴𑀸𑀳𑁄. 𑀢𑀢𑁆𑀣 𑀘𑁂𑀢𑀲𑀺𑀓𑀧𑀭𑀺𑀴𑀸𑀳𑁄 ‘‘𑀯𑀺𑀕𑀢𑀧𑀸𑀧𑁄’’𑀢𑀺 𑀇𑀫𑀺𑀦𑀸𑀯 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀯𑀺𑀕𑀢𑀓𑀸𑀬𑀺𑀓𑀤𑀭𑀣𑀓𑀺𑀮𑀫𑀣𑁄’’𑀢𑀺. 𑀭𑀸𑀕𑀸𑀤𑀬𑁄 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀉𑀧𑁆𑀧𑀦𑁆𑀦𑀸, 𑀢𑀲𑁆𑀲 𑀫𑀮𑀻𑀦𑀪𑀸𑀯𑀓𑀭𑀡𑁂𑀦 𑀫𑀮𑀸. 𑀓𑀘𑀯𑀭𑀪𑀸𑀯𑁂𑀦 𑀔𑀺𑀮𑀸. 𑀲𑀢𑁆𑀢𑀸𑀦𑀁 𑀫𑀳𑀸𑀦𑀢𑁆𑀣𑀓𑀭𑀢𑁆𑀢𑀸 𑀯𑀺𑀲𑁂𑀲𑀢𑁄 𑀤𑁄𑀲𑁄 𑀓𑀮𑀻𑀢𑀺 𑀯𑀼𑀢𑁆𑀢𑀁 ‘‘𑀤𑁄𑀲𑀓𑀮𑀻𑀦𑀜𑁆𑀘𑀸’’𑀢𑀺. 𑀧𑀦𑀽𑀤𑁂𑀳𑀻𑀢𑀺 𑀲𑀫𑀼𑀘𑁆𑀙𑀺𑀦𑁆𑀤𑀦𑀯𑀲𑁂𑀦 𑀲𑀲𑀦𑁆𑀢𑀸𑀦𑀢𑁄 𑀦𑀻𑀳𑀸𑀭𑀓𑁂𑀳𑀺, 𑀧𑀚𑀳𑀦𑀓𑁂𑀳𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀏𑀢𑁆𑀣 𑀘 𑀬𑀲𑁆𑀫𑀸 𑀲𑀩𑁆𑀩𑁂𑀲𑀫𑁆𑀧𑀺 𑀮𑀓𑁆𑀔𑀡𑀸𑀦𑀁 𑀫𑀳𑀸𑀧𑀼𑀭𑀺𑀲𑀲𑀦𑁆𑀢𑀸𑀦𑀕𑀢𑀧𑀼𑀜𑁆𑀜𑀲𑀫𑁆𑀪𑀸𑀭𑀳𑁂𑀢𑀼𑀓𑀪𑀸𑀯𑁂𑀦 𑀲𑀩𑁆𑀩𑀁𑀬𑁂𑀯 𑀢𑀁 𑀧𑀼𑀜𑁆𑀜𑀓𑀫𑁆𑀫𑀁 𑀲𑀩𑁆𑀩𑀲𑁆𑀲 𑀮𑀓𑁆𑀔𑀡𑀲𑁆𑀲 𑀓𑀸𑀭𑀡𑀁 𑀯𑀺𑀲𑀺𑀝𑁆𑀞𑀭𑀽𑀧𑀢𑁆𑀢𑀸 𑀨𑀮𑀲𑁆𑀲. 𑀦 𑀳𑀺 𑀅𑀪𑀺𑀦𑁆𑀦𑀭𑀽𑀧𑀓𑀸𑀭𑀡𑀁 𑀪𑀺𑀦𑁆𑀦𑀲𑀪𑀸𑀯𑀲𑁆𑀲 𑀨𑀮𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀬𑀲𑁆𑀲 𑀬𑀲𑁆𑀲 𑀮𑀓𑁆𑀔𑀡𑀲𑁆𑀲 𑀬𑀁 𑀬𑀁 𑀧𑀼𑀜𑁆𑀜𑀓𑀫𑁆𑀫𑀁 𑀯𑀺𑀲𑁂𑀲𑀓𑀸𑀭𑀡𑀁, 𑀢𑀁 𑀢𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀦𑁆𑀢𑀻 𑀅𑀬𑀁 𑀤𑁂𑀲𑀦𑀸 𑀧𑀯𑀢𑁆𑀢𑀸. 𑀢𑀢𑁆𑀣 𑀬𑀣𑀸 𑀬𑀸𑀤𑀺𑀲𑀁 𑀓𑀸𑀬𑀲𑀼𑀘𑀭𑀺𑀢𑀸𑀤𑀺𑀧𑀼𑀜𑁆𑀜𑀓𑀫𑁆𑀫𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑀢𑀸𑀬 𑀓𑀸𑀭𑀡𑀁 𑀯𑀼𑀢𑁆𑀢𑀁, 𑀢𑀸𑀤𑀺𑀲𑀫𑁂𑀯 ‘‘𑀉𑀡𑁆𑀳𑀻𑀲𑀲𑀻𑀲𑀢𑀸𑀬’’ 𑀓𑀸𑀭𑀡𑀦𑁆𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀤𑀴𑁆𑀳𑀲𑀫𑀸𑀤𑀸𑀦𑀢𑀸𑀯𑀺𑀲𑀺𑀝𑁆𑀞𑀲𑁆𑀲 𑀢𑀲𑁆𑀲 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑀢𑀸𑀬 𑀓𑀸𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀢𑁆𑀢𑀸, 𑀇𑀢𑀭𑀲𑁆𑀲 𑀘 𑀧𑀼𑀩𑁆𑀩𑀗𑁆𑀕𑀫𑀢𑀸𑀯𑀺𑀲𑀺𑀝𑁆𑀞𑀲𑁆𑀲 𑀯𑀼𑀢𑁆𑀢𑀢𑁆𑀢𑀸, 𑀏𑀯𑀁 𑀬𑀸𑀤𑀺𑀲𑀁 𑀆𑀬𑀢𑀧𑀡𑁆𑀳𑀺𑀢𑀸𑀬 𑀓𑀸𑀭𑀡𑀁, 𑀦 𑀢𑀸𑀤𑀺𑀲𑀫𑁂𑀯 𑀤𑀻𑀖𑀗𑁆𑀕𑀼𑀮𑀺𑀢𑀸𑀬, 𑀩𑁆𑀭𑀳𑁆𑀫𑀼𑀚𑀼𑀕𑀢𑁆𑀢𑀢𑀸𑀬 𑀘 𑀓𑀸𑀭𑀡𑀁 𑀯𑀺𑀲𑀺𑀝𑁆𑀞𑀭𑀽𑀧𑀢𑁆𑀢𑀸 𑀨𑀮𑀲𑁆𑀲. 𑀦 𑀳𑀺 𑀅𑀪𑀺𑀦𑁆𑀦𑀭𑀽𑀧𑀓𑀸𑀭𑀡𑀁 𑀪𑀺𑀦𑁆𑀦𑀲𑀪𑀸𑀯𑀲𑁆𑀲 𑀨𑀮𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀢𑀢𑁆𑀣 𑀬𑀣𑀸 𑀏𑀓𑁂𑀦𑁂𑀯 𑀓𑀫𑁆𑀫𑀼𑀦𑀸 𑀘𑀓𑁆𑀔𑀸𑀤𑀺𑀦𑀸𑀦𑀺𑀦𑁆𑀤𑁆𑀭𑀺𑀬𑀼𑀧𑁆𑀧𑀢𑁆𑀢𑀺𑀬𑀁 𑀅𑀯𑀢𑁆𑀣𑀸𑀪𑁂𑀤𑀢𑁄, 𑀲𑀸𑀫𑀢𑁆𑀣𑀺𑀬𑀪𑁂𑀤𑀢𑁄 𑀯𑀸 𑀓𑀫𑁆𑀫𑀪𑁂𑀤𑁄 𑀇𑀘𑁆𑀙𑀺𑀢𑀩𑁆𑀩𑁄. 𑀦 𑀳𑀺 𑀬𑀤𑀯𑀢𑁆𑀣𑀁 𑀓𑀫𑁆𑀫𑀁 𑀘𑀓𑁆𑀔𑀼𑀲𑁆𑀲 𑀓𑀸𑀭𑀡𑀁, 𑀢𑀤𑀯𑀢𑁆𑀣𑀫𑁂𑀯 𑀲𑁄𑀢𑀸𑀤𑀻𑀦𑀁 𑀓𑀸𑀭𑀡𑀁 𑀳𑁄𑀢𑀺 𑀅𑀪𑀺𑀦𑁆𑀦𑀲𑀸𑀫𑀢𑁆𑀣𑀺𑀬𑀁 𑀯𑀸, 𑀢𑀲𑁆𑀫𑀸 𑀧𑀜𑁆𑀘𑀸𑀬𑀢𑀦𑀺𑀓𑀢𑁆𑀢𑀪𑀸𑀯𑀧𑀢𑁆𑀣𑀦𑀸𑀪𑀽𑀢𑀸 𑀧𑀼𑀭𑀺𑀫𑀦𑀺𑀧𑁆𑀨𑀦𑁆𑀦𑀸 𑀓𑀸𑀫𑀢𑀡𑁆𑀳𑀸 𑀧𑀘𑁆𑀘𑀬𑀯𑀲𑁂𑀦 𑀯𑀺𑀲𑀺𑀝𑁆𑀞𑀲𑀪𑀸𑀯𑀸 𑀓𑀫𑁆𑀫𑀲𑁆𑀲 𑀯𑀺𑀲𑀺𑀝𑁆𑀞𑀲𑀪𑀸𑀯𑀨𑀮𑀦𑀺𑀩𑁆𑀩𑀢𑁆𑀢𑀦𑀲𑀫𑀢𑁆𑀣𑀢𑀸𑀲𑀸𑀥𑀦𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀏𑀓𑀫𑁆𑀧𑀺 𑀅𑀦𑁂𑀓𑀯𑀺𑀥𑀨𑀮𑀦𑀺𑀩𑁆𑀩𑀢𑁆𑀢𑀦𑀲𑀫𑀢𑁆𑀣𑀢𑀸𑀯𑀲𑁂𑀦 𑀅𑀦𑁂𑀓𑀭𑀽𑀧𑀢𑀁 𑀆𑀧𑀦𑁆𑀦𑀁 𑀯𑀺𑀬 𑀳𑁄𑀢𑀺, 𑀏𑀯𑀫𑀺𑀥𑀸𑀧𑀺 ‘‘𑀏𑀓𑀫𑁆𑀧𑀺 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀯𑀲𑁂𑀦 𑀧𑀯𑀢𑁆𑀢𑀁 𑀓𑀼𑀲𑀮𑀓𑀫𑁆𑀫𑀁 𑀆𑀬𑀢𑀧𑀡𑁆𑀳𑀺𑀢𑀸𑀤𑀻𑀦𑀁 𑀢𑀺𑀡𑁆𑀡𑀫𑁆𑀧𑀺 𑀮𑀓𑁆𑀔𑀡𑀸𑀦𑀁 𑀦𑀺𑀩𑁆𑀩𑀢𑁆𑀢𑀓𑀁 𑀳𑁄𑀢𑀻’’𑀢𑀺 𑀯𑀼𑀘𑁆𑀘𑀫𑀸𑀦𑁂𑀧𑀺 𑀦 𑀓𑁄𑀘𑀺 𑀯𑀺𑀭𑁄𑀥𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑁄 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸…𑀧𑁂… 𑀇𑀫𑀸𑀦𑀺 𑀢𑀻𑀡𑀺 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀧𑀝𑀺𑀮𑀪𑀢𑀻’’𑀢𑀺 𑀦𑀸𑀦𑀸𑀓𑀫𑁆𑀫𑀼𑀦𑀸 𑀧𑀦 𑀢𑁂𑀲𑀁 𑀦𑀺𑀩𑁆𑀩𑀢𑁆𑀢𑀺𑀬𑀁 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, 𑀧𑀸𑀴𑀺𑀬𑀁 𑀧𑀦 ‘‘𑀢𑀲𑁆𑀲 𑀓𑀫𑁆𑀫𑀲𑁆𑀲𑀸’’𑀢𑀺 𑀏𑀓𑀯𑀘𑀦𑀦𑀺𑀤𑁆𑀤𑁂𑀲𑁄 𑀲𑀸𑀫𑀜𑁆𑀜𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. ‘‘𑀇𑀫𑀸𑀦𑀺 𑀤𑁆𑀯𑁂 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀧𑀝𑀺𑀮𑀪𑀢𑀻’’𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺.

𑀮𑀓𑁆𑀔𑀡𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.