𑁬. 𑀧𑀸𑀲𑀸𑀤𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑀦𑀺𑀕𑀡𑁆𑀞𑀦𑀸𑀝𑀧𑀼𑀢𑁆𑀢𑀓𑀸𑀮𑀗𑁆𑀓𑀺𑀭𑀺𑀬𑀯𑀡𑁆𑀡𑀦𑀸

𑁧𑁬𑁪. 𑀮𑀓𑁆𑀔𑀲𑁆𑀲 𑀲𑀭𑀯𑁂𑀥𑀁 𑀅𑀯𑀺𑀭𑀚𑁆𑀛𑀺𑀢𑁆𑀯𑀸𑀦 𑀯𑀺𑀚𑁆𑀛𑀦𑀯𑀺𑀥𑀺𑀁 𑀚𑀸𑀦𑀦𑁆𑀢𑀻𑀢𑀺 𑀯𑁂𑀥𑀜𑁆𑀜𑀸. 𑀢𑁂𑀦𑀸𑀳 ‘‘𑀥𑀦𑀼𑀫𑁆𑀳𑀺 𑀓𑀢𑀲𑀺𑀓𑁆𑀔𑀸’’𑀢𑀺. 𑀲𑀺𑀧𑁆𑀧𑀁 𑀉𑀕𑁆𑀕𑀳𑀡𑀢𑁆𑀣𑀸𑀬𑀸𑀢𑀺 𑀥𑀦𑀼𑀲𑀺𑀧𑁆𑀧𑀸𑀤𑀺𑀲𑀺𑀧𑁆𑀧𑀲𑁆𑀲 𑀉𑀕𑁆𑀕𑀳𑀡𑀢𑁆𑀣𑀸𑀬. 𑀫𑀚𑁆𑀛𑀺𑀫𑁂𑀦 𑀧𑀫𑀸𑀡𑁂𑀦 𑀲𑀭𑀧𑀸𑀢𑀬𑁄𑀕𑁆𑀬𑀢𑀸𑀯𑀲𑁂𑀦 𑀓𑀢𑀢𑁆𑀢𑀸 𑀤𑀻𑀖𑀧𑀸𑀲𑀸𑀤𑁄.

𑀲𑀫𑁆𑀧𑀢𑀺 𑀓𑀸𑀮𑀁 𑀓𑀢𑁄𑀢𑀺 𑀅𑀘𑀺𑀭𑀓𑀸𑀮𑀁 𑀓𑀢𑁄. 𑀤𑁆𑀯𑁂𑀥𑀺𑀓𑀚𑀸𑀢𑀸𑀢𑀺 𑀚𑀸𑀢𑀤𑁆𑀯𑁂𑀥𑀺𑀓𑀸 𑀲𑀜𑁆𑀚𑀸𑀢𑀪𑁂𑀤𑀸. 𑀤𑁆𑀯𑁂𑀚𑁆𑀛𑀚𑀸𑀢𑀸𑀢𑀺 𑀤𑀼𑀯𑀺𑀥𑀪𑀸𑀯𑀧𑁆𑀧𑀢𑁆𑀢𑀸. 𑀪𑀡𑁆𑀟𑀦𑁆𑀢𑀺 𑀧𑀭𑀺𑀪𑀸𑀲𑀦𑁆𑀢𑀺 𑀏𑀢𑁂𑀦𑀸𑀢𑀺 𑀪𑀡𑁆𑀟𑀦𑀁, 𑀯𑀺𑀭𑀼𑀤𑁆𑀥𑀘𑀺𑀢𑁆𑀢𑀁. 𑀢𑀦𑁆𑀢𑀺 𑀪𑀡𑁆𑀟𑀦𑀁. ‘‘𑀇𑀤𑀁 𑀦𑀳𑀸𑀦𑀸𑀤𑀺 𑀦 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀧𑀜𑁆𑀜𑀢𑁆𑀢𑀯𑀢𑁆𑀢𑀁 𑀧𑀡𑁆𑀡𑀢𑁆𑀢𑀺. 𑀥𑀫𑁆𑀫𑀯𑀺𑀦𑀬𑀦𑁆𑀢𑀺 𑀧𑀸𑀯𑀘𑀦𑀁 𑀲𑀺𑀤𑁆𑀥𑀦𑁆𑀢𑀁. 𑀯𑀺𑀚𑁆𑀛𑀦𑁆𑀢𑀸 𑀫𑀼𑀔𑀲𑀢𑁆𑀢𑀻𑀳𑀺. 𑀲𑀳𑀺𑀢𑀁 𑀫𑁂𑀢𑀺 𑀫𑀬𑁆𑀳𑀁 𑀯𑀘𑀦𑀁 𑀲𑀳𑀺𑀢𑀁 𑀲𑀺𑀮𑀺𑀝𑁆𑀞𑀁 𑀧𑀼𑀩𑁆𑀩𑀸𑀧𑀭𑀲𑀫𑁆𑀩𑀦𑁆𑀥𑀁 𑀅𑀢𑁆𑀣𑀬𑀼𑀢𑁆𑀢𑀁 𑀓𑀸𑀭𑀡𑀬𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀅𑀢𑁆𑀣𑀲𑀁𑀳𑀺𑀢’’𑀦𑁆𑀢𑀺. 𑀅𑀥𑀺𑀘𑀺𑀡𑁆𑀡𑀦𑁆𑀢𑀺 𑀆𑀘𑀺𑀡𑁆𑀡𑀁. 𑀯𑀺𑀧𑀭𑀸𑀯𑀢𑁆𑀢𑀦𑁆𑀢𑀺 𑀯𑀺𑀭𑁄𑀥𑀤𑀲𑁆𑀲𑀦𑀯𑀲𑁂𑀦 𑀧𑀭𑀸𑀯𑀢𑁆𑀢𑀺𑀢𑀁, 𑀧𑀭𑀸𑀯𑀢𑁆𑀢𑀁 𑀤𑀽𑀲𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀘𑀺𑀭𑀓𑀸𑀮𑀯𑀲𑁂𑀦 𑀧𑀕𑀼𑀡𑀁, 𑀢𑀁 𑀫𑀫 𑀯𑀸𑀤𑀁 𑀆𑀕𑀫𑁆𑀫 𑀦𑀺𑀯𑀢𑁆𑀢’’𑀦𑁆𑀢𑀺. 𑀧𑀭𑀺𑀬𑁂𑀲𑀫𑀸𑀦𑁄 𑀯𑀺𑀘𑀭 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀺𑀓𑁆𑀔𑀸𑀢𑀺 𑀅𑀢𑁆𑀣𑁄. 𑀲𑀘𑁂 𑀲𑀓𑁆𑀓𑁄𑀲𑀺, 𑀇𑀤𑀸𑀦𑀺𑀬𑁂𑀯 𑀫𑀬𑀸 𑀯𑁂𑀞𑀺𑀢𑀁 𑀤𑁄𑀲𑀁 𑀦𑀺𑀩𑁆𑀩𑁂𑀞𑁂𑀳𑀺. 𑀫𑀭𑀡𑀫𑁂𑀯𑀸𑀢𑀺 𑀅𑀜𑁆𑀜𑀫𑀜𑁆𑀜𑀖𑀸𑀢𑀦𑀯𑀲𑁂𑀦 𑀫𑀭𑀡𑀫𑁂𑀯. 𑀦𑀸𑀝𑀧𑀼𑀢𑁆𑀢𑀲𑁆𑀲 𑀇𑀫𑁂𑀢𑀺 𑀦𑀸𑀝𑀧𑀼𑀢𑁆𑀢𑀺𑀬𑀸, 𑀢𑁂 𑀧𑀦 𑀢𑀲𑁆𑀲 𑀲𑀺𑀲𑁆𑀲𑀸𑀢𑀺 𑀆𑀳 ‘‘𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀽’’𑀢𑀺. 𑀧𑀼𑀭𑀺𑀫𑀧𑀝𑀺𑀧𑀢𑁆𑀢𑀺𑀢𑁄 𑀧𑀝𑀺𑀦𑀺𑀯𑀢𑁆𑀢𑀦𑀁 𑀧𑀝𑀺𑀯𑀸𑀦𑀁, 𑀢𑀁 𑀭𑀽𑀧𑀁 𑀲𑀪𑀸𑀯𑁄 𑀏𑀢𑁂𑀲𑀦𑁆𑀢𑀺 𑀧𑀝𑀺𑀯𑀸𑀦𑀭𑀽𑀧𑀸. 𑀢𑁂𑀦𑀸𑀳 ‘‘𑀦𑀺𑀯𑀢𑁆𑀢𑀦𑀲𑀪𑀸𑀯𑀸’’𑀢𑀺. 𑀓𑀣𑀦𑀁 𑀅𑀢𑁆𑀣𑀲𑁆𑀲 𑀆𑀘𑀺𑀓𑁆𑀔𑀦𑀁. 𑀧𑀯𑁂𑀤𑀦𑀁 𑀳𑁂𑀢𑀼𑀤𑀸𑀳𑀭𑀡𑀸𑀦𑀺 𑀆𑀳𑀭𑀺𑀢𑁆𑀯𑀸 𑀩𑁄𑀥𑀦𑀁. 𑀢𑁂𑀦𑀸𑀳 ‘‘𑀤𑀼𑀧𑁆𑀧𑀯𑁂𑀤𑀺𑀢𑁂𑀢𑀺 𑀤𑀼𑀯𑀺𑀜𑁆𑀜𑀸𑀧𑀺𑀢𑁂’’𑀢𑀺. 𑀦 𑀉𑀧𑀲𑀫𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀅𑀦𑀼𑀧𑀲𑀫𑀲𑀁𑀯𑀢𑁆𑀢𑀦𑀁, 𑀢𑀤𑁂𑀯 𑀅𑀦𑀼𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑀁, 𑀢𑀲𑁆𑀫𑀺𑀁. 𑀲𑀫𑀼𑀲𑁆𑀲𑀺𑀢𑀁 𑀳𑀼𑀢𑁆𑀯𑀸 𑀧𑀢𑀺𑀝𑁆𑀞𑀸𑀳𑁂𑀢𑀼𑀪𑀸𑀯𑀢𑁄 𑀣𑀽𑀧𑀁, 𑀧𑀢𑀺𑀝𑁆𑀞𑀸𑀢𑀺 𑀆𑀳 ‘‘𑀪𑀺𑀦𑁆𑀦𑀣𑀽𑀧𑁂𑀢𑀺 𑀪𑀺𑀦𑁆𑀦𑀧𑀢𑀺𑀝𑁆𑀞𑁂’’𑀢𑀺, 𑀣𑀽𑀧𑁄𑀢𑀺 𑀯𑀸 𑀥𑀫𑁆𑀫𑀲𑁆𑀲 𑀦𑀺𑀬𑁆𑀬𑀸𑀦𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄 𑀅𑀜𑁆𑀜𑁂 𑀥𑀫𑁆𑀫𑁂 𑀅𑀪𑀺𑀪𑀼𑀬𑁆𑀬 𑀲𑀫𑀼𑀲𑁆𑀲𑀺𑀢𑀝𑁆𑀞𑁂𑀦, 𑀲𑁄 𑀦𑀺𑀕𑀡𑁆𑀞𑀲𑁆𑀲 𑀲𑀫𑀬𑁂. 𑀓𑁂𑀳𑀺𑀘𑀺 𑀅𑀪𑀺𑀦𑁆𑀦𑀲𑀫𑁆𑀫𑀢𑁄𑀧𑀺 𑀪𑀺𑀦𑁆𑀦𑁄 𑀯𑀺𑀦𑀝𑁆𑀞𑁄 𑀏𑀯 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀪𑀸𑀯𑀢𑁄𑀢𑀺 𑀲𑁄 𑀪𑀺𑀦𑁆𑀦𑀣𑀽𑀧𑁄, 𑀲𑁄 𑀏𑀯 𑀦𑀺𑀬𑁆𑀬𑀸𑀦𑀪𑀸𑀯𑁄 𑀯𑀝𑁆𑀝𑀤𑀼𑀓𑁆𑀔𑀢𑁄 𑀫𑀼𑀘𑁆𑀘𑀺𑀢𑀼𑀓𑀸𑀫𑀸𑀦𑀁 𑀧𑀝𑀺𑀲𑀭𑀡𑀁, 𑀢𑀫𑁂𑀢𑁆𑀣 𑀦𑀢𑁆𑀣𑀻𑀢𑀺 𑀅𑀧𑁆𑀧𑀝𑀺𑀲𑀭𑀡𑁄, 𑀢𑀲𑁆𑀫𑀺𑀁 𑀪𑀺𑀦𑁆𑀦𑀣𑀽𑀧𑁂 𑀅𑀧𑁆𑀧𑀝𑀺𑀲𑀭𑀡𑁂𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀆𑀘𑀭𑀺𑀬𑀧𑁆𑀧𑀫𑀸𑀡𑀦𑁆𑀢𑀺 𑀆𑀘𑀭𑀺𑀬𑀫𑀼𑀝𑁆𑀞𑀺 𑀳𑀼𑀢𑁆𑀯𑀸 𑀧𑀫𑀸𑀡𑀪𑀽𑀢𑀁. 𑀦𑀸𑀦𑀸𑀦𑀻𑀳𑀸𑀭𑁂𑀦𑀸𑀢𑀺 𑀦𑀸𑀦𑀸𑀓𑀸𑀭𑁂𑀦.

𑁧𑁬𑁫. 𑀢𑀣𑁂𑀯 𑀲𑀫𑀼𑀤𑀸𑀘𑀭𑀺𑀁𑀲𑀼 𑀪𑀽𑀢𑀧𑀼𑀩𑁆𑀩𑀕𑀢𑀺𑀬𑀸. 𑀲𑀸𑀫𑀸𑀓𑀸𑀦𑀦𑁆𑀢𑀺 𑀲𑀸𑀫𑀸𑀓𑀥𑀜𑁆𑀜𑀸𑀦𑀁.

‘‘𑀬𑁂𑀦𑀲𑁆𑀲 𑀉𑀧𑀚𑁆𑀛𑀸𑀬𑁄’’𑀢𑀺 𑀯𑀢𑁆𑀯𑀸 𑀬𑀣𑀸𑀲𑁆𑀲 𑀆𑀬𑀲𑁆𑀫𑀢𑁄 𑀘𑀼𑀦𑁆𑀤𑀲𑁆𑀲 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁄 𑀉𑀧𑀚𑁆𑀛𑀸𑀬𑁄 𑀅𑀳𑁄𑀲𑀺, 𑀢𑀁 𑀯𑀺𑀢𑁆𑀣𑀸𑀭𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀩𑀼𑀤𑁆𑀥𑀓𑀸𑀮𑁂 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀩𑀼𑀤𑁆𑀥𑀓𑀸𑀮𑁂𑀢𑀺 𑀪𑀽𑀢𑀓𑀣𑀦𑀫𑁂𑀢𑀁, 𑀦 𑀯𑀺𑀲𑁂𑀲𑀦𑀁. 𑀲𑀢𑁆𑀣𑀼 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀧𑀼𑀭𑁂𑀢𑀭𑀫𑁂𑀯 𑀳𑀺 𑀥𑀫𑁆𑀫𑀲𑁂𑀦𑀸𑀧𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁄.

𑀥𑀫𑁆𑀫𑀭𑀢𑀦𑀧𑀽𑀚𑀸𑀯𑀡𑁆𑀡𑀦𑀸

𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀅𑀤𑀸𑀲𑀻𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀓𑀢𑁆𑀯𑀸 𑀅𑀤𑀸𑀲𑀺.

𑀓𑀣𑀸𑀬 𑀫𑀽𑀮𑀦𑁆𑀢𑀺 𑀪𑀕𑀯𑀢𑁄 𑀲𑀦𑁆𑀢𑀺𑀓𑀸 𑀮𑀪𑀺𑀢𑀩𑁆𑀩𑀥𑀫𑁆𑀫𑀓𑀣𑀸𑀬 𑀓𑀸𑀭𑀡𑀁. 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀉𑀝𑁆𑀞𑀸𑀧𑁂𑀢𑀺, 𑀤𑀸𑀮𑀺𑀤𑁆𑀤𑀺𑀬𑀧𑀗𑁆𑀓𑀢𑁄 𑀉𑀤𑁆𑀥𑀭𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀦𑁆𑀥𑀫𑀦𑁆𑀢𑀺 𑀲𑀫𑁆𑀫𑀤𑁂𑀯 𑀥𑀫𑀦𑁆𑀢𑁄. 𑀏𑀓𑁂𑀓𑀲𑁆𑀫𑀺𑀁 𑀧𑀳𑀸𑀭𑁂𑀬𑁂𑀯 𑀢𑀬𑁄 𑀢𑀬𑁄 𑀯𑀸𑀭𑁂 𑀓𑀢𑁆𑀯𑀸 𑀤𑀺𑀯𑀸 𑀦𑀯𑀯𑀸𑀭𑁂 𑀭𑀢𑁆𑀢𑀺𑀁 𑀦𑀯𑀯𑀸𑀭𑁂.𑀉𑀧𑀝𑁆𑀞𑀸𑀦𑀫𑁂𑀯 𑀕𑀘𑁆𑀙𑀢𑀺 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀯𑀲𑁂𑀦, 𑀧𑀜𑁆𑀳𑀸𑀧𑀼𑀘𑁆𑀙𑀦𑀸𑀤𑀺𑀯𑀲𑁂𑀦 𑀧𑀦 𑀅𑀦𑁆𑀢𑀭𑀦𑁆𑀢𑀭𑀸𑀧𑀺 𑀕𑀘𑁆𑀙𑀢𑁂𑀯, 𑀕𑀘𑁆𑀙𑀦𑁆𑀢𑁄 𑀘 𑀤𑀺𑀯𑀲𑀲𑁆𑀲…𑀧𑁂… 𑀕𑀘𑁆𑀙𑀢𑀺. 𑀜𑀸𑀢𑀼𑀁 𑀇𑀘𑁆𑀙𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀉𑀤𑁆𑀥𑀭𑀡𑀪𑀸𑀯𑀢𑁄 𑀧𑀜𑁆𑀳𑁄𑀯 𑀧𑀜𑁆𑀳𑀼𑀤𑁆𑀥𑀸𑀭𑁄, 𑀢𑀁 𑀕𑀳𑁂𑀢𑁆𑀯𑀸𑀯 𑀕𑀘𑁆𑀙𑀢𑀺 𑀅𑀢𑁆𑀢𑀦𑁄 𑀫𑀳𑀸𑀧𑀜𑁆𑀜𑀢𑀸𑀬, 𑀲𑀢𑁆𑀣𑀼 𑀘 𑀥𑀫𑁆𑀫𑀤𑁂𑀲𑀦𑀸𑀬𑀁 𑀅𑀓𑀺𑀮𑀸𑀲𑀼𑀪𑀸𑀯𑀢𑁄.

𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑀥𑀫𑁆𑀫𑀯𑀺𑀦𑀬𑀯𑀡𑁆𑀡𑀦𑀸

𑁧𑁬𑁬. 𑀆𑀭𑁄𑀘𑀺𑀢𑁂𑀧𑀺 𑀢𑀲𑁆𑀫𑀺𑀁 𑀅𑀢𑁆𑀣𑁂. 𑀲𑀸𑀫𑀺𑀓𑁄 𑀳𑁄𑀢𑀺, 𑀢𑀲𑁆𑀲 𑀲𑀸𑀫𑀺𑀓𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁄𑀯 𑀢𑀲𑁆𑀲𑀸 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀚𑀸𑀦𑀸𑀢𑀻’’𑀢𑀺 𑀆𑀳. 𑀏𑀯𑀦𑁆𑀢𑀺 𑀯𑀘𑀦𑀲𑀫𑁆𑀧𑀝𑀺𑀘𑁆𑀙𑀦𑀁. 𑀘𑀼𑀦𑁆𑀤𑀢𑁆𑀣𑁂𑀭𑁂𑀦 𑀳𑀺 𑀆𑀦𑀻𑀢𑀁 𑀓𑀣𑀸𑀧𑀸𑀪𑀢𑀁 𑀪𑀕𑀯𑀸 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 ‘‘𑀏𑀯’’𑀦𑁆𑀢𑀺 𑀆𑀳. ‘‘𑀏𑀯’’𑀦𑁆𑀢𑀺 𑀤𑀼𑀭𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀲𑀸𑀯𑀓𑀸𑀦𑀁 𑀤𑁆𑀯𑁂𑀥𑀺𑀓𑀸𑀤𑀺𑀪𑀸𑀯𑁂𑀦 𑀯𑀺𑀳𑀭𑀡𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀜𑁆𑀳𑁂𑀢𑀁.

𑀬𑀲𑁆𑀫𑀸 …𑀧𑁂… 𑀧𑀸𑀓𑀝𑀁 𑀳𑁄𑀢𑀺 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀘 𑀦𑁂𑀬𑁆𑀬𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀪𑀽𑀢𑀪𑀸𑀯𑀸𑀧𑀢𑁆𑀢𑀺𑀢𑁄. 𑀅𑀣 𑀯𑀸 𑀬𑀲𑁆𑀫𑀸…𑀧𑁂… 𑀧𑀸𑀓𑀝𑀁 𑀳𑁄𑀢𑀺 𑀤𑁄𑀲𑁂𑀲𑀼 𑀆𑀤𑀻𑀦𑀯𑀤𑀲𑁆𑀲𑀦𑁂𑀦 𑀢𑀧𑁆𑀧𑀝𑀺𑀧𑀓𑁆𑀔𑁂𑀲𑀼 𑀕𑀼𑀡𑁂𑀲𑀼 𑀆𑀦𑀺𑀲𑀁𑀲𑀲𑁆𑀲 𑀯𑀺𑀪𑀽𑀢𑀪𑀸𑀯𑀸𑀧𑀢𑁆𑀢𑀺𑀢𑁄. 𑀯𑁄𑀓𑁆𑀓𑀫𑁆𑀫𑀸𑀢𑀺 𑀅𑀧𑀲𑀓𑁆𑀓𑁂𑀢𑁆𑀯𑀸. 𑀆𑀫𑁂𑀟𑀺𑀢𑀮𑁄𑀧𑁂𑀦 𑀘𑀸𑀬𑀁 𑀦𑀺𑀤𑁆𑀤𑁂𑀲𑁄, 𑀯𑁄𑀓𑁆𑀓𑀫𑁆𑀫 𑀯𑁄𑀓𑁆𑀓𑀫𑁆𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑁂𑀦 𑀢𑀲𑁆𑀲 𑀯𑁄𑀓𑁆𑀓𑀫𑀦𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑀸𑀢𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀦 𑀦𑀺𑀭𑀦𑁆𑀢𑀭’’𑀦𑁆𑀢𑀺𑀆𑀤𑀺. 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀆𑀤𑀬𑁄𑀢𑀺 𑀢𑁂𑀦 𑀲𑀢𑁆𑀣𑀸𑀭𑀸 𑀯𑀼𑀢𑁆𑀢𑀫𑀼𑀢𑁆𑀢𑀺𑀥𑀫𑁆𑀫𑀲𑁆𑀲 𑀅𑀦𑀼𑀥𑀫𑁆𑀫𑀁 𑀅𑀧𑁆𑀧𑀝𑀺𑀧𑀚𑁆𑀚𑀦𑀸𑀤𑀬𑁄. 𑀆𑀤𑀺-𑀲𑀤𑁆𑀤𑁂𑀦 𑀧𑀸𑀴𑀺𑀬𑀁 𑀆𑀕𑀢𑀸 𑀅𑀲𑀸𑀫𑀻𑀘𑀺𑀧𑀝𑀺𑀧𑀤𑀸𑀤𑀬𑁄 𑀘 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀫𑀦𑀼𑀲𑁆𑀲𑀢𑁆𑀢𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 ‘‘𑀯𑀺𑀘𑀸𑀭𑀡𑀧𑀜𑁆𑀜𑀸𑀬 𑀅𑀲𑀫𑁆𑀪𑀯𑁄, 𑀤𑁄𑀲𑁂𑀲𑀼 𑀅𑀦𑀪𑀺𑀦𑀺𑀯𑁂𑀲𑀺𑀢𑀸, 𑀅𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀺𑀢𑀸’’𑀢𑀺 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. ‘‘𑀢𑀣𑀸 𑀏𑀯’’𑀦𑁆𑀢𑀺 𑀧𑀤𑁂𑀳𑀺 𑀬𑀣𑀸𑀓𑁆𑀓𑀫𑀁 𑀧𑀓𑀸𑀭𑀲𑁆𑀲 𑀓𑀸𑀫𑀁 𑀢𑀺𑀭𑁄𑀓𑁆𑀔𑀢𑀸, 𑀧𑀘𑁆𑀘𑀓𑁆𑀔𑀢𑀸 𑀯𑀼𑀘𑁆𑀘𑀢𑀺, 𑀢𑀣𑀸𑀧𑀺 𑀬𑀣𑀸 ‘‘𑀢𑀣𑀸 𑀧𑀝𑀺𑀧𑀚𑁆𑀚𑀢𑀽’’𑀢𑀺 𑀧𑀤𑁂𑀦 𑀧𑀝𑀺𑀧𑀚𑁆𑀚𑀦𑀸𑀓𑀸𑀭𑁄 𑀦𑀺𑀬𑀫𑁂𑀢𑁆𑀯𑀸 𑀯𑀺𑀳𑀺𑀢𑁄, 𑀢𑀣𑀸 ‘‘𑀏𑀯𑀁 𑀧𑀝𑀺𑀧𑀚𑁆𑀚𑀢𑀽’’𑀢𑀺 𑀇𑀫𑀺𑀦𑀸𑀧𑀻𑀢𑀺 𑀇𑀤𑀁 𑀢𑀲𑁆𑀲 𑀅𑀢𑁆𑀣𑀤𑀲𑁆𑀲𑀦𑀪𑀸𑀯𑁂𑀦 𑀯𑀼𑀢𑁆𑀢𑀁. 𑀲𑀫𑀸𑀤𑀧𑀺𑀢𑀢𑁆𑀢𑀸 𑀫𑀺𑀘𑁆𑀙𑀸𑀧𑀝𑀺𑀧𑀤𑀸𑀬 𑀅𑀧𑀼𑀜𑁆𑀜𑀁 𑀧𑀲𑀯𑀢𑀺.

𑁧𑁬𑁭. 𑀜𑀸𑀬𑀢𑀺 𑀫𑀼𑀢𑁆𑀢𑀺𑀥𑀫𑁆𑀫𑁄 𑀏𑀢𑁂𑀦𑀸𑀢𑀺 𑀜𑀸𑀬𑁄, 𑀢𑁂𑀦 𑀲𑀢𑁆𑀣𑀸𑀭𑀸 𑀯𑀼𑀢𑁆𑀢𑁄 𑀥𑀫𑁆𑀫𑀸𑀦𑀼𑀥𑀫𑁆𑀫𑁄, 𑀢𑀁 𑀧𑀝𑀺𑀧𑀦𑁆𑀦𑁄𑀢𑀺 𑀜𑀸𑀬𑀧𑁆𑀧𑀝𑀺𑀧𑀦𑁆𑀦𑁄, 𑀲𑁄 𑀧𑀦 𑀬𑀲𑁆𑀫𑀸 𑀢𑀲𑁆𑀲 𑀫𑀼𑀢𑁆𑀢𑀺𑀥𑀫𑁆𑀫𑀲𑁆𑀲 𑀅𑀥𑀺𑀕𑀫𑁂 𑀓𑀸𑀭𑀡𑀲𑀫𑁆𑀫𑀢𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀓𑀸𑀭𑀡𑀧𑁆𑀧𑀝𑀺𑀧𑀦𑁆𑀦𑁄’’𑀢𑀺. 𑀦𑀺𑀧𑁆𑀨𑀸𑀤𑁂𑀲𑁆𑀲𑀢𑀻𑀢𑀺 𑀲𑀸𑀥𑁂𑀲𑁆𑀲𑀢𑀺, 𑀲𑀺𑀤𑁆𑀥𑀺𑀁 𑀕𑀫𑀺𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀼𑀓𑁆𑀔𑀦𑀺𑀩𑁆𑀩𑀢𑁆𑀢𑀓𑀦𑁆𑀢𑀺 𑀲𑀫𑁆𑀧𑀢𑀺, 𑀆𑀬𑀢𑀺𑀜𑁆𑀘 𑀤𑀼𑀓𑁆𑀔𑀲𑁆𑀲 𑀦𑀺𑀩𑁆𑀩𑀢𑁆𑀢𑀓𑀁. 𑀯𑀻𑀭𑀺𑀬𑀁 𑀓𑀭𑁄𑀢𑀺 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀢𑁆𑀢𑀸.

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑀥𑀫𑁆𑀫𑀯𑀺𑀦𑀬𑀸𑀤𑀺𑀯𑀡𑁆𑀡𑀦𑀸

𑁧𑁬𑁮. 𑀦𑀺𑀬𑁆𑀬𑀸𑀢𑀻𑀢𑀺 𑀯𑀢𑁆𑀢𑀢𑀺, 𑀲𑀁𑀯𑀢𑁆𑀢𑀢𑀻𑀢𑀺 𑀯𑀸 𑀅𑀢𑁆𑀣𑁄.

𑁧𑁭𑁦. 𑀇𑀥 𑀲𑀸𑀯𑀓𑀲𑁆𑀲 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀏𑀓𑀦𑁆𑀢𑀺𑀓𑀅𑀧𑀲𑁆𑀲𑀬𑀤𑀲𑁆𑀲𑀦𑀢𑁆𑀣𑀁 𑀲𑀢𑁆𑀣𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑀸, 𑀥𑀫𑁆𑀫𑀲𑁆𑀲 𑀘 𑀲𑁆𑀯𑀸𑀓𑁆𑀔𑀸𑀢𑀢𑀸 𑀓𑀺𑀢𑁆𑀢𑀺𑀢𑀸𑀢𑀺 ‘‘𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀧𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀳𑀺 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀪𑀸𑀯𑁂𑀦 𑀉𑀝𑁆𑀞𑀺𑀢𑀸𑀬 𑀯𑁄𑀤𑀸𑀦𑀪𑀸𑀕𑀺𑀬𑀪𑀸𑀯𑁂𑀦 𑀬𑀣𑀸𑀦𑀼𑀲𑀦𑁆𑀥𑀺𑀦𑀸 𑀧𑀯𑀢𑁆𑀢𑀺 𑀤𑀻𑀧𑀺𑀢𑀸 𑀳𑁄𑀢𑀺. 𑀅𑀩𑁄𑀥𑀺𑀢𑀢𑁆𑀣𑀸𑀢𑀺 𑀅𑀧𑁆𑀧𑀯𑁂𑀤𑀺𑀢𑀢𑁆𑀣𑀸, 𑀧𑀭𑀫𑀢𑁆𑀣𑀁 𑀘𑀢𑀼𑀢𑁆𑀣𑀲𑀘𑁆𑀘𑀧𑀝𑀺𑀯𑁂𑀥𑀁 𑀅𑀧𑀸𑀧𑀺𑀢𑀸𑀢𑀺 𑀅𑀢𑁆𑀣𑁄. 𑀧𑀸𑀴𑀺𑀬𑀁 ‘‘𑀅𑀲𑁆𑀲𑀸’’𑀢𑀺 𑀧𑀤𑀁 ‘‘𑀲𑀸𑀯𑀓𑀸 𑀲𑀤𑁆𑀥𑀫𑁆𑀫𑁂’’𑀢𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀬𑁄𑀚𑁂𑀢𑀩𑁆𑀩𑀁 ‘‘𑀅𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑀸, 𑀅𑀲𑁆𑀲 𑀲𑀤𑁆𑀥𑀫𑁆𑀫𑁂’’𑀢𑀺. 𑀲𑀩𑁆𑀩𑀲𑀗𑁆𑀕𑀳𑀧𑀤𑁂𑀳𑀺 𑀓𑀢𑀦𑁆𑀢𑀺 𑀲𑀩𑁆𑀩𑀲𑁆𑀲 𑀲𑀸𑀲𑀦𑀢𑁆𑀣𑀲𑁆𑀲 𑀲𑀗𑁆𑀕𑀡𑁆𑀳𑀦𑀧𑀤𑁂𑀳𑀺 𑀏𑀓𑀚𑁆𑀛𑀁 𑀓𑀢𑀁. 𑀢𑁂𑀦𑀸𑀳 ‘‘𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀁 𑀓𑀢𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄’’𑀢𑀺. 𑀧𑀼𑀩𑁆𑀩𑁂𑀦𑀸𑀧𑀭𑀁 𑀲𑀫𑁆𑀩𑀦𑁆𑀥𑀢𑁆𑀣𑀪𑀸𑀯𑁂𑀦 𑀲𑀗𑁆𑀕𑀳𑁂𑀢𑀩𑁆𑀩𑀢𑀸𑀬 𑀯𑀸 𑀲𑀗𑁆𑀕𑀳𑀸𑀦𑀺 𑀧𑀤𑀸𑀦𑀺 𑀓𑀢𑀸𑀦𑀺 𑀏𑀢𑀲𑁆𑀲𑀸𑀢𑀺 𑀲𑀗𑁆𑀕𑀳𑀧𑀤𑀓𑀢𑀁, 𑀩𑁆𑀭𑀳𑁆𑀫𑀘𑀭𑀺𑀬𑀁. 𑀢𑀧𑁆𑀧𑀝𑀺𑀓𑁆𑀔𑁂𑀧𑁂𑀦 𑀦 𑀘 𑀲𑀗𑁆𑀕𑀳𑀧𑀤𑀓𑀢𑀦𑁆𑀢𑀺 𑀬𑁄𑀚𑀦𑀸. 𑀭𑀸𑀕𑀸𑀤𑀺𑀧𑀝𑀺𑀧𑀓𑁆𑀔𑀳𑀭𑀡𑀁, 𑀬𑀣𑀸𑀦𑀼𑀲𑀺𑀝𑁆𑀞𑀁 𑀯𑀸 𑀧𑀝𑀺𑀧𑀚𑁆𑀚𑀫𑀸𑀦𑀸𑀦𑀁 𑀯𑀝𑁆𑀝𑀤𑀼𑀓𑁆𑀔𑀢𑁄 𑀧𑀝𑀺𑀳𑀭𑀡𑀁 𑀦𑀺𑀩𑁆𑀩𑀸𑀦𑀧𑀸𑀧𑀦𑀁 𑀧𑀝𑀺𑀳𑀸𑀭𑁄, 𑀲𑁄 𑀏𑀯 𑀆-𑀓𑀸𑀭𑀲𑁆𑀲 𑀇-𑀓𑀸𑀭𑀁 𑀓𑀢𑁆𑀯𑀸 𑀧𑀝𑀺𑀳𑀺𑀭𑁄, 𑀧𑀝𑀺𑀳𑀺𑀭𑁄 𑀏𑀯 𑀧𑀸𑀝𑀺𑀳𑀺𑀭𑁄, 𑀲𑀳 𑀧𑀸𑀝𑀺𑀳𑀺𑀭𑁂𑀦𑀸𑀢𑀺 𑀲𑀧𑁆𑀧𑀸𑀝𑀺𑀳𑀺𑀭𑀁, 𑀢𑀣𑀸 𑀲𑀼𑀧𑁆𑀧𑀯𑁂𑀤𑀺𑀢𑀢𑀸𑀬 𑀲𑀧𑁆𑀧𑀸𑀝𑀺𑀳𑀺𑀭𑀁 𑀓𑀢𑀦𑁆𑀢𑀺 𑀲𑀧𑁆𑀧𑀸𑀝𑀺𑀳𑀺𑀭𑀓𑀢𑀁. 𑀢𑀸𑀤𑀺𑀲𑀁 𑀧𑀦 𑀯𑀝𑁆𑀝𑀢𑁄 𑀦𑀺𑀬𑁆𑀬𑀸𑀦𑁂 𑀦𑀺𑀬𑀼𑀢𑁆𑀢𑀁, 𑀦𑀺𑀬𑁆𑀬𑀸𑀦𑀧𑁆𑀧𑀬𑁄𑀚𑀦𑀜𑁆𑀘 𑀳𑁄𑀢𑀻𑀢𑀺 𑀆𑀳 ‘‘𑀦𑀺𑀬𑁆𑀬𑀸𑀦𑀺𑀓’’𑀦𑁆𑀢𑀺. 𑀤𑁂𑀯𑀮𑁄𑀓𑀢𑁄𑀢𑀺 𑀤𑁂𑀯𑀮𑁄𑀓𑀢𑁄 𑀧𑀝𑁆𑀞𑀸𑀬 𑀭𑀽𑀧𑀻𑀤𑁂𑀯𑀦𑀺𑀓𑀸𑀬𑀢𑁄 𑀧𑀪𑀼𑀢𑀺. 𑀲𑀼𑀧𑁆𑀧𑀓𑀸𑀲𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 𑀧𑀓𑀸𑀲𑀺𑀢𑀁. 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀻𑀢𑀺 𑀯𑀸 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀬𑀢𑁆𑀢𑀓𑀸 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀘, 𑀢𑀸𑀯 𑀢𑁂 𑀲𑀩𑁆𑀩𑁂 𑀅𑀪𑀺𑀩𑁆𑀬𑀸𑀧𑁂𑀢𑁆𑀯𑀸 𑀲𑀼𑀧𑁆𑀧𑀓𑀸𑀲𑀺𑀢𑀁. 𑀅𑀦𑀼𑀢𑀸𑀧𑀸𑀬 𑀳𑁄𑀢𑀻𑀢𑀺 𑀅𑀦𑀼𑀢𑀧𑁆𑀧𑁄, 𑀲𑁄 𑀧𑀦 𑀅𑀦𑀼𑀢𑀸𑀧𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀦𑀼𑀢𑀸𑀧𑀓𑀭𑁄 𑀳𑁄𑀢𑀻’’𑀢𑀺.

𑁧𑁭𑁨. 𑀣𑀺𑀭𑁄𑀢𑀺 𑀞𑀺𑀢𑀥𑀫𑁆𑀫𑁄 𑀓𑁂𑀦𑀘𑀺 𑀅𑀲𑀁𑀳𑀸𑀭𑀺𑀬𑁄, 𑀅𑀲𑁂𑀓𑁆𑀔𑀸 𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 𑀣𑁂𑀭𑀓𑀸𑀭𑀓𑀸 𑀥𑀫𑁆𑀫𑀸.

𑁧𑁭𑁩. 𑀬𑁄𑀕𑁂𑀳𑀺 𑀔𑁂𑀫𑀢𑁆𑀢𑀸𑀢𑀺 𑀬𑁄𑀕𑁂𑀳𑀺 𑀅𑀦𑀼𑀧𑀤𑁆𑀤𑀼𑀢𑀢𑁆𑀢𑀸. 𑀲𑀤𑁆𑀥𑀫𑁆𑀫𑀲𑁆𑀲𑀸𑀢𑀺 𑀅𑀲𑁆𑀲 𑀲𑀤𑁆𑀥𑀫𑁆𑀫𑀲𑁆𑀲. 𑀅𑀲𑁆𑀲𑀸𑀢𑀺 𑀘 𑀅𑀲𑁆𑀲 𑀲𑀢𑁆𑀣𑀼𑀦𑁄.

𑁧𑁭𑁪. 𑀉𑀧𑀸𑀲𑀓𑀸 𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀦𑀸𑀫 𑀯𑀺𑀲𑁂𑀲𑀢𑁄 𑀅𑀦𑀸𑀕𑀸𑀫𑀺𑀦𑁄. 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄𑀧𑀺 𑀢𑀸𑀤𑀺𑀲𑀸 𑀢𑀣𑀸 𑀯𑀼𑀘𑁆𑀘𑀦𑁆𑀢𑀻𑀢𑀺 ‘‘𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀯𑀲𑀫𑀸𑀦𑀸 𑀅𑀭𑀺𑀬𑀲𑀸𑀯𑀓𑀸’’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁.

𑁧𑁭𑁬. 𑀲𑀩𑁆𑀩𑀓𑀸𑀭𑀡𑀲𑀫𑁆𑀧𑀦𑁆𑀦𑀦𑁆𑀢𑀺 𑀬𑀢𑁆𑀢𑀓𑁂𑀳𑀺 𑀓𑀸𑀭𑀡𑁂𑀳𑀺 𑀲𑀫𑁆𑀧𑀦𑁆𑀦𑀁 𑀦𑀸𑀫 𑀳𑁄𑀢𑀺, 𑀢𑁂𑀳𑀺 𑀲𑀩𑁆𑀩𑁂𑀳𑀺 𑀓𑀸𑀭𑀡𑁂𑀳𑀺 𑀲𑀫𑁆𑀧𑀦𑁆𑀦𑀁 𑀲𑀫𑁆𑀧𑀢𑁆𑀢𑀁 𑀉𑀧𑀕𑀢𑀁 𑀧𑀭𑀺𑀧𑀼𑀡𑁆𑀡𑀁, 𑀲𑀫𑀦𑁆𑀦𑀸𑀕𑀢𑀁 𑀯𑀸. 𑀇𑀫𑀫𑁂𑀯 𑀥𑀫𑁆𑀫𑀦𑁆𑀢𑀺 𑀇𑀫𑀫𑁂𑀯 𑀲𑀸𑀲𑀦𑀥𑀫𑁆𑀫𑀁.

𑀉𑀤𑀓𑁂𑀦 𑀧𑀤𑁂𑀲𑀜𑁆𑀜𑀼𑀦𑀸 𑀅𑀢𑁆𑀢𑀦𑁄 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀢𑀁 𑀤𑀲𑁆𑀲𑁂𑀢𑀼𑀁 𑀅𑀦𑀺𑀬𑁆𑀬𑀸𑀦𑀺𑀓𑁂 𑀅𑀢𑁆𑀣𑁂 𑀧𑀬𑀼𑀢𑁆𑀢𑀁 𑀧𑀳𑁂𑀴𑀺𑀓𑀲𑀤𑀺𑀲𑀁 𑀯𑀘𑀦𑀁, 𑀪𑀕𑀯𑀢𑀸 𑀅𑀢𑁆𑀢𑀦𑁄 𑀲𑀩𑁆𑀩𑀜𑁆𑀜𑀼𑀢𑀸𑀬 𑀦𑀺𑀬𑁆𑀬𑀸𑀦𑀺𑀓𑁂 𑀅𑀢𑁆𑀣𑁂 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀉𑀤𑀓𑁄 𑀲𑀼𑀤’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁄 𑀓𑀺𑀭𑀸’’𑀢𑀺𑀆𑀤𑀺𑀫𑀸𑀳.

𑀲𑀗𑁆𑀕𑀸𑀬𑀺𑀢𑀩𑁆𑀩𑀥𑀫𑁆𑀫𑀸𑀤𑀺𑀯𑀡𑁆𑀡𑀦𑀸

𑁧𑁭𑁭. 𑀲𑀗𑁆𑀕𑀫𑁆𑀫 𑀲𑀫𑀸𑀕𑀫𑁆𑀫𑀸𑀢𑀺 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀮𑀩𑁆𑀪𑀫𑀸𑀦𑀸𑀦𑀁 𑀕𑀢𑀺𑀯𑀲𑁂𑀦 𑀲𑀗𑁆𑀕𑀫𑁆𑀫 𑀞𑀸𑀦𑀦𑁆𑀢𑀭𑀢𑁄 𑀧𑀓𑁆𑀓𑁄𑀲𑀦𑁂𑀦 𑀲𑀫𑀸𑀕𑀢𑀸𑀦𑀁 𑀯𑀲𑁂𑀦 𑀲𑀫𑀸𑀕𑀫𑁆𑀫. 𑀢𑁂𑀦𑀸𑀳 ‘‘𑀲𑀗𑁆𑀕𑀦𑁆𑀢𑁆𑀯𑀸 𑀲𑀫𑀸𑀕𑀦𑁆𑀢𑁆𑀯𑀸’’𑀢𑀺. 𑀅𑀢𑁆𑀣𑁂𑀦 𑀅𑀢𑁆𑀣𑀦𑁆𑀢𑀺 𑀧𑀤𑀦𑁆𑀢𑀭𑁂 𑀆𑀕𑀢𑀅𑀢𑁆𑀣𑁂𑀦 𑀲𑀳 𑀢𑀢𑁆𑀣 𑀢𑀢𑁆𑀣 𑀆𑀕𑀢𑀫𑀢𑁆𑀣𑀁. 𑀩𑁆𑀬𑀜𑁆𑀚𑀦𑁂𑀦 𑀩𑁆𑀬𑀜𑁆𑀚𑀦𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀫𑀸𑀦𑁂𑀦𑁆𑀢𑁂𑀳𑀻𑀢𑀺 𑀲𑀫𑀸𑀦𑀁 𑀓𑀭𑁄𑀦𑁆𑀢𑁂𑀳𑀺, 𑀑𑀧𑀫𑁆𑀫𑀁 𑀯𑀸 𑀆𑀦𑁂𑀦𑁆𑀢𑁂𑀳𑀺. 𑀲𑀗𑁆𑀕𑀸𑀬𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀫𑀤𑁂𑀯 𑀕𑀸𑀬𑀺𑀢𑀩𑁆𑀩𑀁 𑀓𑀣𑁂𑀢𑀩𑁆𑀩𑀁, 𑀢𑀁 𑀧𑀦 𑀲𑀗𑁆𑀕𑀸𑀬𑀦𑀁 𑀯𑀸𑀘𑀦𑀸𑀫𑀕𑁆𑀕𑁄𑀢𑀺 𑀆𑀳 ‘‘𑀯𑀸𑀘𑁂𑀢𑀩𑁆𑀩’’𑀦𑁆𑀢𑀺.

𑁧𑁭𑁮. 𑀢𑀲𑁆𑀲 𑀯𑀸 𑀪𑀸𑀲𑀺𑀢𑁂𑀢𑀺 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀸𑀲𑀺𑀢𑁂 𑀅𑀢𑁆𑀣𑁂 𑀘𑁂𑀯 𑀩𑁆𑀬𑀜𑁆𑀚𑀦𑁂 𑀘. 𑀅𑀢𑁆𑀣𑀫𑀺𑀘𑁆𑀙𑀸𑀕𑀳𑀡𑀭𑁄𑀧𑀦𑀸𑀦𑀺 𑀬𑀣𑀸 𑀳𑁄𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀭𑀫𑁆𑀫𑀡𑀁 ‘‘𑀲𑀢𑀺𑀧𑀝𑁆𑀞𑀸𑀦’’𑀦𑁆𑀢𑀺 𑀕𑀡𑁆𑀳𑀸𑀢𑀺, 𑀦 𑀲𑀢𑀺𑀬𑁂𑀯 ‘‘𑀲𑀢𑀺𑀧𑀝𑁆𑀞𑀸𑀦’’𑀦𑁆𑀢𑀺. ‘‘𑀲𑀢𑀺𑀧𑀝𑁆𑀞𑀸𑀦𑀸𑀦𑀻’’𑀢𑀺 𑀩𑁆𑀬𑀜𑁆𑀚𑀦𑀁 𑀭𑁄𑀧𑁂𑀢𑀺 𑀢𑀲𑁆𑀫𑀺𑀁 𑀅𑀢𑁆𑀣𑁂, 𑀦 ‘‘𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺. 𑀉𑀧𑀧𑀦𑁆𑀦𑀢𑀭𑀸𑀦𑀻𑀢𑀺 𑀬𑀼𑀢𑁆𑀢𑀢𑀭𑀸𑀦𑀺. 𑀅𑀮𑁆𑀮𑀻𑀦𑀢𑀭𑀸𑀦𑀻𑀢𑀺 𑀲𑀺𑀮𑀺𑀝𑁆𑀞𑀢𑀭𑀸𑀦𑀺. 𑀬𑀸 𑀘𑁂𑀯𑀸𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁, 𑀯𑀺𑀪𑀢𑁆𑀢𑀺𑀮𑁄𑀧𑁂𑀦 𑀯𑀸. 𑀧𑀼𑀦 𑀬𑀸 𑀘𑁂𑀯𑀸𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦𑁂𑀯 𑀦𑀺𑀤𑁆𑀤𑁂𑀲𑁄. 𑀦𑁂𑀯 𑀉𑀲𑁆𑀲𑀸𑀤𑁂𑀢𑀩𑁆𑀩𑁄𑀢𑀺 𑀦 𑀉𑀓𑁆𑀓𑀁𑀲𑁂𑀢𑀩𑁆𑀩𑁄 𑀯𑀺𑀭𑀚𑁆𑀛𑀺𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸. 𑀦 𑀅𑀧𑀲𑀸𑀤𑁂𑀢𑀩𑁆𑀩𑁄𑀢𑀺 𑀦 𑀲𑀦𑁆𑀢𑀚𑁆𑀚𑁂𑀢𑀩𑁆𑀩𑁄 𑀯𑀺𑀯𑀸𑀤𑀧𑀭𑀺𑀳𑀭𑀡𑀢𑁆𑀣𑀁. 𑀥𑀸𑀭𑀡𑀢𑁆𑀣𑀦𑁆𑀢𑀺 𑀉𑀧𑀥𑀸𑀭𑀡𑀢𑁆𑀣𑀁 𑀲𑀮𑁆𑀮𑀓𑁆𑀔𑀡𑀢𑁆𑀣𑀁.

𑁧𑁮𑁧. 𑀅𑀢𑁆𑀣𑁂𑀦 𑀉𑀧𑁂𑀢𑀦𑁆𑀢𑀺 𑀅𑀯𑀺𑀧𑀭𑀻𑀢𑁂𑀦 𑀅𑀢𑁆𑀣𑁂𑀦 𑀉𑀧𑁂𑀢𑀁 𑀢𑀁 ‘‘𑀅𑀬𑀫𑁂𑀢𑁆𑀣 𑀅𑀢𑁆𑀣𑁄’’𑀢𑀺 𑀉𑀧𑁂𑀘𑁆𑀘 𑀧𑀝𑀺𑀚𑀸𑀦𑀺𑀢𑁆𑀯𑀸 𑀞𑀺𑀢𑀁. 𑀢𑀣𑀸𑀭𑀽𑀧𑁄 𑀘 𑀢𑀲𑁆𑀲 𑀩𑀼𑀚𑁆𑀛𑀺𑀢𑀸 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀢𑀸𑀭’’𑀦𑁆𑀢𑀺. 𑀏𑀯𑀫𑁂𑀢𑀁 𑀪𑀺𑀓𑁆𑀔𑀼𑀁 𑀧𑀲𑀁𑀲𑀣𑀸𑀢𑀺 𑀯𑀼𑀢𑁆𑀢𑀦𑀬𑁂𑀦 𑀥𑀫𑁆𑀫𑀪𑀸𑀡𑀓𑀁 𑀅𑀫𑀼𑀁 𑀪𑀺𑀓𑁆𑀔𑀼𑀁 ‘‘𑀏𑀯𑀁 𑀮𑀸𑀪𑀸 𑀦𑁄 𑀆𑀯𑀼𑀲𑁄’’𑀢𑀺𑀆𑀤𑀺𑀆𑀓𑀸𑀭𑁂𑀦 𑀧𑀲𑀁𑀲𑀣. 𑀇𑀤𑀸𑀦𑀺𑀲𑁆𑀲 𑀧𑀲𑀁𑀲𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀲𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀲𑀸𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲 𑀲𑀢𑁆𑀣𑀼𑀓𑀺𑀘𑁆𑀘𑀓𑀭𑀡𑀢𑁄, 𑀢𑀢𑁆𑀣 𑀘𑀲𑁆𑀲 𑀲𑀫𑁆𑀫𑀤𑁂𑀯 𑀅𑀯𑀝𑁆𑀞𑀺𑀢𑀪𑀸𑀯𑀢𑁄 ‘‘𑀩𑀼𑀤𑁆𑀥𑁄 𑀦𑀸𑀫 𑀏𑀲𑀸’’𑀢𑀺 𑀯𑀼𑀢𑁆𑀢𑁄. ‘‘𑀮𑀸𑀪𑀸 𑀦𑁄’’𑀢𑀺𑀆𑀤𑀺𑀦𑀸 𑀘𑀲𑁆𑀲 𑀪𑀺𑀓𑁆𑀔𑀽𑀦𑀁 𑀧𑀺𑀬𑀕𑀭𑀼𑀪𑀸𑀯𑀁 𑀯𑀺𑀪𑀸𑀯𑁂𑀦𑁆𑀢𑁄 𑀲𑀢𑁆𑀣𑀸 𑀢𑀁 𑀅𑀢𑁆𑀢𑀦𑁄 𑀞𑀸𑀦𑁂 𑀞𑀧𑁂𑀲𑀻𑀢𑀺 𑀯𑀼𑀢𑁆𑀢𑁄.

𑀧𑀘𑁆𑀘𑀬𑀸𑀦𑀼𑀜𑁆𑀜𑀸𑀢𑀓𑀸𑀭𑀡𑀸𑀤𑀺𑀯𑀡𑁆𑀡𑀦𑀸

𑁧𑁮𑁨. 𑀢𑀢𑁄𑀧𑀺 𑀉𑀢𑁆𑀢𑀭𑀺𑀢𑀭𑀦𑁆𑀢𑀺 𑀬𑀸 𑀧𑀼𑀩𑁆𑀩𑁂 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀲𑀁𑀲𑀦𑀯𑀲𑁂𑀦 ‘‘𑀇𑀥 𑀧𑀦 𑀘𑀼𑀦𑁆𑀤 𑀲𑀢𑁆𑀣𑀸 𑀘 𑀳𑁄𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁧𑁬𑁭, 𑁧𑁬𑁯) 𑀧𑀯𑀢𑁆𑀢𑀺𑀢𑀤𑁂𑀲𑀦𑀸𑀬 𑀉𑀧𑀭𑀺 ‘‘𑀇𑀥 𑀘𑀼𑀦𑁆𑀤 𑀲𑀢𑁆𑀣𑀸 𑀘 𑀮𑁄𑀓𑁂 𑀉𑀤𑀧𑀸𑀤𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁧𑁭𑁦, 𑁧𑁭𑁧) 𑀤𑁂𑀲𑀦𑀸 𑀯𑀟𑁆𑀠𑀺𑀢𑀸. 𑀢𑀢𑁄𑀧𑀺 𑀉𑀢𑁆𑀢𑀭𑀺𑀢𑀭𑀁 𑀲𑀯𑀺𑀲𑁂𑀲𑀁 𑀤𑁂𑀲𑀦𑀁 𑀯𑀟𑁆𑀠𑁂𑀦𑁆𑀢𑁄 ‘‘𑀧𑀘𑁆𑀘𑀬𑀳𑁂𑀢𑀽’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀘𑁆𑀘𑀬𑀳𑁂𑀢𑀽𑀢𑀺 𑀧𑀘𑁆𑀘𑀬𑀲𑀁𑀯𑀢𑁆𑀢𑀦𑀳𑁂𑀢𑀼. 𑀉𑀧𑁆𑀧𑀚𑁆𑀚𑀦𑀓𑀸 𑀆𑀲𑀯𑀸𑀢𑀺 𑀧𑀘𑁆𑀘𑀬𑀸𑀦𑀁 𑀧𑀭𑀺𑀬𑁂𑀲𑀦𑀳𑁂𑀢𑀼 𑀘𑁂𑀯 𑀧𑀭𑀺𑀪𑁄𑀕𑀳𑁂𑀢𑀼 𑀘 𑀉𑀧𑁆𑀧𑀚𑁆𑀚𑀦𑀓𑀸 𑀓𑀸𑀫𑀸𑀲𑀯𑀸𑀤𑀬𑁄. 𑀢𑁂𑀲𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀆𑀲𑀯𑀸𑀦𑀁 ‘‘𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀫𑀺𑀘𑁆𑀙𑀸𑀆𑀚𑀻𑀯𑀁 𑀧𑀳𑀸𑀬 𑀲𑀫𑁆𑀫𑀸𑀆𑀚𑀻𑀯𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑁂𑀢𑀻’’𑀢𑀺 (𑀲𑀁. 𑀦𑀺. 𑁫.𑁮) ‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀘𑀻𑀯𑀭𑀁 𑀧𑀝𑀺𑀲𑁂𑀯𑀢𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁩; 𑀅. 𑀦𑀺. 𑁬.𑁫𑁮) 𑀘 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀉𑀧𑀤𑀺𑀲𑀦𑁆𑀢𑁄 𑀪𑀕𑀯𑀸 𑀧𑀝𑀺𑀖𑀸𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀦𑀸𑀫. ‘‘𑀬𑁄 𑀢𑀼𑀫𑁆𑀳𑁂𑀲𑀼 𑀧𑀸𑀴𑀺𑀬𑀸 𑀅𑀢𑁆𑀣𑀩𑁆𑀬𑀜𑁆𑀚𑀦𑀸𑀦𑀺 𑀫𑀺𑀘𑁆𑀙𑀸 𑀕𑀡𑁆𑀳𑀸𑀢𑀺, 𑀲𑁄 𑀦𑁂𑀯 𑀉𑀲𑁆𑀲𑀸𑀤𑁂𑀢𑀩𑁆𑀩𑁄, 𑀦 𑀅𑀧𑀲𑀸𑀤𑁂𑀢𑀩𑁆𑀩𑁄, 𑀲𑀸𑀥𑀼𑀓𑀁 𑀲𑀜𑁆𑀜𑀸𑀧𑁂𑀢𑀩𑁆𑀩𑁄 𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀦𑀺𑀲𑀦𑁆𑀢𑀺𑀬𑀸’’𑀢𑀺 𑀏𑀯𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁂 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑁂 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀁 𑀪𑀺𑀓𑁆𑀔𑀽 𑀦𑀺𑀬𑁄𑀚𑁂𑀦𑁆𑀢𑁄 𑀪𑀕𑀯𑀸 𑀪𑀡𑁆𑀟𑀦𑀳𑁂𑀢𑀼 𑀉𑀧𑁆𑀧𑀚𑁆𑀚𑀦𑀓𑀸𑀦𑀁 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀆𑀲𑀯𑀸𑀦𑀁 𑀧𑀝𑀺𑀖𑀸𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀦𑀸𑀫. 𑀬𑀣𑀸 𑀢𑁂 𑀦 𑀧𑀯𑀺𑀲𑀦𑁆𑀢𑀻𑀢𑀺 𑀢𑁂 𑀆𑀲𑀯𑀸 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀬𑀣𑀸 𑀦 𑀑𑀢𑀭𑀦𑁆𑀢𑀺. 𑀫𑀽𑀮𑀖𑀸𑀢𑁂𑀦 𑀧𑀝𑀺𑀳𑀦𑀦𑀸𑀬𑀸𑀢𑀺 𑀬𑀣𑀸 𑀫𑀽𑀮𑀖𑀸𑀢𑁄 𑀳𑁄𑀢𑀺, 𑀏𑀯𑀁 𑀫𑀽𑀮𑀖𑀸𑀢𑀯𑀲𑁂𑀦 𑀧𑀚𑀳𑀦𑀸𑀬. 𑀢𑀦𑁆𑀢𑀺 𑀘𑀻𑀯𑀭𑀁. 𑀬𑀣𑀸 𑀘𑀻𑀯𑀭𑀁 𑀇𑀤𑀫𑀢𑁆𑀣𑀺𑀓𑀢𑀫𑁂𑀯 𑀉𑀧𑀸𑀤𑀸𑀬 𑀅𑀦𑀼𑀜𑁆𑀜𑀸𑀢𑀁, 𑀏𑀯𑀁 𑀧𑀺𑀡𑁆𑀟𑀧𑀸𑀢𑀸𑀤𑀬𑁄𑀧𑀺.

𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀸𑀤𑀺𑀯𑀡𑁆𑀡𑀦𑀸

𑁧𑁮𑁩. 𑀲𑀼𑀔𑀺𑀢𑀦𑁆𑀢𑀺 𑀲𑀜𑁆𑀚𑀸𑀢𑀲𑀼𑀔𑀁. 𑀧𑀻𑀡𑀺𑀢𑀦𑁆𑀢𑀺 𑀥𑀸𑀢𑀁 𑀲𑀼𑀳𑀺𑀢𑀁. 𑀢𑀣𑀸𑀪𑀽𑀢𑁄 𑀧𑀦 𑀬𑀲𑁆𑀫𑀸 𑀣𑀽𑀮𑀲𑀭𑀻𑀭𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀣𑀽𑀮𑀁 𑀓𑀭𑁄𑀢𑀻’’𑀢𑀺 𑀯𑀼𑀢𑁆𑀢𑀁.

𑁧𑁮𑁬. 𑀦𑀞𑀺𑀢𑀲𑀪𑀸𑀯𑀸𑀢𑀺 𑀅𑀦𑀯𑀝𑁆𑀞𑀺𑀢𑀲𑀪𑀸𑀯𑀸, 𑀏𑀯𑀭𑀽𑀧𑀸𑀬 𑀓𑀣𑀸𑀬 𑀅𑀦𑀯𑀝𑁆𑀞𑀸𑀦𑀪𑀸𑀯𑀢𑁄 𑀲𑀪𑀸𑀯𑁄𑀧𑀺 𑀢𑁂𑀲𑀁 𑀅𑀦𑀯𑀝𑁆𑀞𑀺𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀚𑀺𑀯𑁆𑀳𑀸 𑀦𑁄 𑀅𑀢𑁆𑀣𑀻’’𑀢𑀺𑀆𑀤𑀺. 𑀓𑀸𑀫𑀁 ‘‘𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀻’’𑀢𑀺 𑀯𑀼𑀢𑁆𑀢𑀁, 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀧𑀦 𑀘𑀢𑁆𑀢𑀸𑀭𑀺 𑀘𑀓𑁆𑀔𑀽𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀜𑁆𑀳𑀺 𑀲𑀫𑀦𑁆𑀢𑀘𑀓𑁆𑀔𑀽𑀢𑀺. 𑀢𑀲𑁆𑀲 𑀯𑀸 𑀜𑁂𑀬𑁆𑀬𑀥𑀫𑁆𑀫𑁂𑀲𑀼 𑀚𑀸𑀦𑀦𑀯𑀲𑁂𑀦 𑀧𑀯𑀢𑁆𑀢𑀺𑀁 𑀉𑀧𑀸𑀤𑀸𑀬 ‘‘𑀚𑀸𑀦𑀢𑀸’’𑀢𑀺 𑀯𑀼𑀢𑁆𑀢𑀁. 𑀳𑀢𑁆𑀣𑀸𑀫𑀮𑀓𑀁 𑀯𑀺𑀬 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀺𑀁 𑀉𑀧𑀸𑀤𑀸𑀬 ‘‘𑀧𑀲𑁆𑀲𑀢𑀸’’𑀢𑀺 𑀯𑀼𑀢𑁆𑀢𑀁. 𑀦𑁂𑀫𑀁 𑀯𑀼𑀘𑁆𑀘𑀢𑀺 𑀣𑀫𑁆𑀪𑀸𑀤𑀻𑀳𑀺 𑀅𑀦𑀼𑀧𑀯𑀺𑀝𑁆𑀞𑀪𑀽𑀫𑀺𑀧𑁆𑀧𑁂𑀤𑁂𑀲𑁄𑀢𑀺 𑀆𑀳 ‘‘𑀕𑀫𑁆𑀪𑀻𑀭𑀪𑀽𑀫𑀺𑀁 𑀅𑀦𑀼𑀧𑀯𑀺𑀝𑁆𑀞𑁄’’𑀢𑀺. 𑀲𑀼𑀝𑁆𑀞𑀼 𑀦𑀺𑀔𑀸𑀢𑁄𑀢𑀺 𑀪𑀽𑀫𑀺𑀁 𑀦𑀺𑀔𑀦𑀺𑀢𑁆𑀯𑀸 𑀲𑀫𑁆𑀫𑀤𑁂𑀯 𑀞𑀧𑀺𑀢𑁄. 𑀢𑀲𑁆𑀫𑀺𑀦𑁆𑀢𑀺 𑀔𑀻𑀡𑀸𑀲𑀯𑁂. 𑀅𑀦𑀚𑁆𑀛𑀸𑀘𑀸𑀭𑁄 𑀅𑀘𑀮𑁄 𑀅𑀲𑀫𑁆𑀧𑀯𑁂𑀥𑀻, 𑀬𑀲𑁆𑀫𑀸 𑀅𑀚𑁆𑀛𑀸𑀘𑀸𑀭𑁄 𑀲𑁂𑀢𑀼𑀖𑀸𑀢𑁄 𑀔𑀻𑀡𑀸𑀲𑀯𑀸𑀦𑀁. 𑀲𑁄𑀢𑀸𑀧𑀦𑁆𑀦𑀸𑀤𑀬𑁄𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀕𑀳𑀺𑀢𑁂𑀲𑀼 𑀅𑀦𑀸𑀕𑀸𑀫𑀺𑀦𑁄 𑀢𑀸𑀯 𑀦𑀯𑀲𑀼𑀧𑀺 𑀞𑀸𑀦𑁂𑀲𑀼 𑀔𑀻𑀡𑀸𑀲𑀯𑀸 𑀯𑀺𑀬 𑀅𑀪𑀩𑁆𑀩𑀸, 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄 𑀧𑀦 ‘‘𑀢𑀢𑀺𑀬𑀧𑀜𑁆𑀘𑀫𑀝𑁆𑀞𑀸𑀦𑁂𑀲𑀼 𑀅𑀪𑀩𑁆𑀩𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀸, 𑀇𑀢𑀭𑁂𑀲𑀼 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀅𑀪𑀩𑁆𑀩𑀸𑀯.

𑀧𑀜𑁆𑀳𑀩𑁆𑀬𑀸𑀓𑀭𑀡𑀯𑀡𑁆𑀡𑀦𑀸

𑁧𑁮𑁭. 𑀕𑀺𑀳𑀺𑀩𑁆𑀬𑀜𑁆𑀚𑀦𑁂𑀦𑀸𑀢𑀺 𑀕𑀺𑀳𑀺𑀮𑀺𑀗𑁆𑀕𑁂𑀦. 𑀔𑀻𑀡𑀸𑀲𑀯𑁄 𑀧𑀦 𑀕𑀺𑀳𑀺𑀩𑁆𑀬𑀜𑁆𑀚𑀦𑁂𑀦 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄𑀧𑀺 𑀦 𑀢𑀺𑀝𑁆𑀞𑀢𑀺 𑀯𑀺𑀯𑁂𑀓𑀝𑁆𑀞𑀸𑀦𑀲𑁆𑀲 𑀅𑀪𑀸𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀲𑁆𑀲 𑀯𑀲𑁂𑀦𑀸𑀢𑀺 𑀪𑀼𑀫𑁆𑀫𑀤𑁂𑀯𑀢𑁆𑀢𑀪𑀸𑀯𑁂 𑀞𑀢𑁆𑀯𑀸 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀲𑁆𑀲 𑀯𑀲𑁂𑀦. 𑀅𑀬𑀁 𑀧𑀜𑁆𑀳𑁄𑀢𑀺 ‘‘𑀅𑀪𑀩𑁆𑀩𑁄 𑀲𑁄 𑀦𑀯 𑀞𑀸𑀦𑀸𑀦𑀺 𑀅𑀚𑁆𑀛𑀸𑀘𑀭𑀺𑀢𑀼’’𑀦𑁆𑀢𑀺 𑀅𑀬𑀁 𑀧𑀜𑁆𑀳𑁄 𑀆𑀕𑀢𑁄 𑀇𑀢𑀭𑀲𑁆𑀲 𑀧𑀩𑁆𑀩𑀚𑁆𑀚𑀸𑀬, 𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀯𑀸 𑀅𑀪𑀩𑁆𑀩𑀢𑀸𑀬 𑀅𑀯𑀼𑀢𑁆𑀢𑀲𑀺𑀤𑁆𑀥𑀢𑁆𑀢𑀸. 𑀬𑀤𑀺 𑀏𑀯𑀁 𑀓𑀣𑀁 𑀪𑀺𑀓𑁆𑀔𑀼𑀕𑀳𑀡𑀦𑁆𑀢𑀺 𑀆𑀳 ‘‘𑀪𑀺𑀦𑁆𑀦𑀤𑁄𑀲𑀢𑁆𑀢𑀸’’𑀢𑀺𑀆𑀤𑀺. 𑀅𑀧𑀭𑀺𑀘𑁆𑀙𑁂𑀤𑀦𑁆𑀢𑀺 𑀅𑀧𑀭𑀺𑀬𑀦𑁆𑀢𑀁, 𑀢𑀬𑀺𑀤𑀁 𑀲𑀼𑀯𑀺𑀧𑀼𑀮𑀦𑁆𑀢𑀺 𑀆𑀳 ‘‘𑀫𑀳𑀦𑁆𑀢’’𑀦𑁆𑀢𑀺. 𑀜𑁂𑀬𑁆𑀬𑀲𑁆𑀲 𑀳𑀺 𑀯𑀺𑀧𑀼𑀮𑀢𑀸𑀬 𑀜𑀸𑀡𑀲𑁆𑀲 𑀯𑀺𑀧𑀼𑀮𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀏𑀢𑁂𑀦 ‘‘𑀅𑀧𑀭𑀺𑀘𑁆𑀙𑁂𑀤’’𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑀫𑁆𑀧𑀺 𑀜𑁂𑀬𑁆𑀬𑀁 𑀲𑀢𑁆𑀣𑀼 𑀜𑀸𑀡𑀲𑁆𑀲 𑀯𑀲𑁂𑀦 𑀧𑀭𑀺𑀘𑁆𑀙𑁂𑀤𑀫𑁂𑀯𑀸𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀜𑀸𑀡𑀧𑀭𑀺𑀬𑀦𑁆𑀢𑀺𑀓𑀁 𑀦𑁂𑀬𑁆𑀬’’𑀦𑁆𑀢𑀺 (𑀫𑀳𑀸𑀦𑀺. 𑁬𑁯, 𑁧𑁫𑁬; 𑀘𑀽𑀴𑀦𑀺. 𑁮𑁫; 𑀧𑀝𑀺. 𑀫. 𑁩.𑁫) 𑀅𑀦𑀸𑀕𑀢𑁂 𑀅𑀧𑀜𑁆𑀜𑀸𑀧𑀦𑀦𑁆𑀢𑀺 𑀅𑀦𑀸𑀕𑀢𑁂 𑀯𑀺𑀲𑀬𑁂 𑀜𑀸𑀡𑀲𑁆𑀲 𑀅𑀧𑀜𑁆𑀜𑀸𑀧𑀦𑀁. ‘‘𑀧𑀘𑁆𑀘𑀓𑁆𑀔𑀁 𑀯𑀺𑀬 𑀓𑀢𑁆𑀯𑀸’’𑀢𑀺 𑀓𑀲𑁆𑀫𑀸 𑀯𑀺𑀬-𑀲𑀤𑁆𑀤𑀕𑁆𑀕𑀳𑀡𑀁 𑀓𑀢𑀁, 𑀦𑀦𑀼 𑀩𑀼𑀤𑁆𑀥𑀸𑀦𑀁 𑀲𑀩𑁆𑀩𑀫𑁆𑀧𑀺 𑀜𑀸𑀡𑀁 𑀅𑀢𑁆𑀢𑀦𑁄 𑀯𑀺𑀲𑀬𑀁 𑀧𑀘𑁆𑀘𑀓𑁆𑀔𑀫𑁂𑀯 𑀓𑀢𑁆𑀯𑀸 𑀧𑀯𑀢𑁆𑀢𑀢𑀺 𑀏𑀓𑀧𑁆𑀧𑀫𑀸𑀡𑀪𑀸𑀯𑀢𑁄𑀢𑀺? 𑀲𑀘𑁆𑀘𑀫𑁂𑀢𑀁, ‘‘𑀅𑀓𑁆𑀔’’𑀦𑁆𑀢𑀺 𑀧𑀦 𑀘𑀓𑁆𑀔𑀸𑀤𑀺𑀇𑀦𑁆𑀤𑁆𑀭𑀺𑀬𑀁 𑀯𑀼𑀘𑁆𑀘𑀢𑀺, 𑀢𑀁 𑀅𑀓𑁆𑀔𑀁 𑀧𑀢𑀺 𑀯𑀢𑁆𑀢𑀢𑀻𑀢𑀺 𑀘𑀓𑁆𑀔𑀸𑀤𑀺𑀦𑀺𑀲𑁆𑀲𑀺𑀢𑀁 𑀯𑀺𑀜𑁆𑀜𑀸𑀡𑀁, 𑀢𑀲𑁆𑀲 𑀘 𑀆𑀭𑀫𑁆𑀫𑀡𑀁 ‘‘𑀧𑀘𑁆𑀘𑀓𑁆𑀔’’𑀦𑁆𑀢𑀺 𑀮𑁄𑀓𑁂 𑀦𑀺𑀭𑀼𑀴𑁆𑀳𑀫𑁂𑀢𑀦𑁆𑀢𑀺 𑀢𑀁 𑀦𑀺𑀤𑀲𑁆𑀲𑀦𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀘𑁆𑀘𑀓𑁆𑀔𑀁 𑀯𑀺𑀬 𑀓𑀢𑁆𑀯𑀸’’𑀢𑀺 𑀅𑀯𑁄𑀘, 𑀦 𑀧𑀦 𑀪𑀕𑀯𑀢𑁄 𑀜𑀸𑀡𑀲𑁆𑀲 𑀅𑀧𑁆𑀧𑀘𑁆𑀘𑀓𑁆𑀔𑀸𑀓𑀸𑀭𑁂𑀦 𑀧𑀯𑀢𑁆𑀢𑀦𑀢𑁄. 𑀢𑀣𑀸 𑀳𑀺 𑀯𑀤𑀦𑁆𑀢𑀺 𑁋

‘‘𑀆𑀯𑀺𑀪𑀽𑀢𑀁 𑀧𑀓𑀸𑀲𑀦𑀁, 𑀅𑀦𑀼𑀧𑀤𑁆𑀤𑀼𑀢𑀘𑁂𑀢𑀲𑀁;

𑀅𑀢𑀻𑀢𑀸𑀦𑀸𑀕𑀢𑁂 𑀜𑀸𑀡𑀁, 𑀧𑀘𑁆𑀘𑀓𑁆𑀔𑀸𑀦𑀁 𑀯𑀲𑀺𑀲𑁆𑀲𑀢𑀻’’𑀢𑀺.

𑀅𑀜𑁆𑀜𑀢𑁆𑀣 𑀯𑀺𑀳𑀺𑀢𑀓𑁂𑀦𑀸𑀢𑀺 𑀅𑀜𑁆𑀜𑀲𑁆𑀫𑀺𑀁 𑀯𑀺𑀲𑀬𑁂 𑀧𑀯𑀢𑁆𑀢𑀺𑀢𑁂𑀦. 𑀲𑀗𑁆𑀕𑀸𑀳𑁂𑀢𑀩𑁆𑀩𑀦𑁆𑀢𑀺 𑀲𑀫𑀁 𑀓𑀢𑁆𑀯𑀸 𑀓𑀣𑀬𑀺𑀢𑀩𑁆𑀩𑀁, 𑀓𑀣𑀦𑀁 𑀧𑀦 𑀧𑀜𑁆𑀜𑀸𑀧𑀦𑀁 𑀦𑀸𑀫 𑀳𑁄𑀢𑀻𑀢𑀺 𑀧𑀜𑁆𑀜𑀸𑀧𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀢𑀸𑀤𑀺𑀲𑀦𑁆𑀢𑀺 𑀲𑀢𑀢𑀁 𑀲𑀫𑀺𑀢𑀁 𑀧𑀯𑀢𑁆𑀢𑀓𑀁. 𑀜𑀸𑀡𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀆𑀯𑀚𑁆𑀚𑀦𑁂𑀦 𑀯𑀺𑀦𑀸 𑀜𑀸𑀡𑀼𑀧𑁆𑀧𑀢𑁆𑀢𑀺𑀬𑀸 𑀅𑀲𑀫𑁆𑀪𑀯𑀢𑁄. 𑀏𑀓𑀸𑀓𑀸𑀭𑁂𑀦 𑀘 𑀜𑀸𑀡𑁂 𑀧𑀯𑀢𑁆𑀢𑀫𑀸𑀦𑁂 𑀦𑀸𑀦𑀸𑀓𑀸𑀭𑀲𑁆𑀲 𑀯𑀺𑀲𑀬𑀲𑁆𑀲 𑀅𑀯𑀩𑁄𑀥𑁄 𑀦 𑀲𑀺𑀬𑀸. 𑀅𑀣𑀸𑀧𑀺 𑀲𑀺𑀬𑀸, 𑀅𑀦𑀺𑀭𑀼𑀧𑀺𑀢𑀭𑀽𑀧𑁂𑀦𑁂𑀯 𑀅𑀯𑀩𑁄𑀥𑁄 𑀲𑀺𑀬𑀸, 𑀢𑁂𑀦 𑀘 𑀜𑀸𑀡𑀁 𑀜𑁂𑀬𑁆𑀬𑀁 𑀅𑀜𑁆𑀜𑀸𑀢𑀲𑀤𑀺𑀲𑀫𑁂𑀯 𑀲𑀺𑀬𑀸. 𑀦 𑀳𑀺 ‘‘𑀇𑀤𑀁 𑀢’’𑀦𑁆𑀢𑀺 𑀯𑀺𑀯𑁂𑀓𑁂𑀦 𑀅𑀦𑀯𑀩𑀼𑀤𑁆𑀥𑁄 𑀅𑀢𑁆𑀣𑁄 𑀜𑀸𑀢𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 ‘‘𑀘𑀭𑀢𑁄 𑀘 𑀢𑀺𑀝𑁆𑀞𑀢𑁄 𑀘𑀸’’𑀢𑀺𑀆𑀤𑀺 𑀩𑀸𑀮𑀮𑀸𑀧𑀦𑀫𑀢𑁆𑀢𑀁. 𑀢𑁂𑀦𑀸𑀳 ‘‘𑀬𑀣𑀭𑀺𑀯 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸, 𑀏𑀯𑀁 𑀫𑀜𑁆𑀜𑀦𑁆𑀢𑀻’’𑀢𑀺.

𑀲𑀢𑀺𑀁 𑀅𑀦𑀼𑀲𑁆𑀲𑀭𑀢𑀻𑀢𑀺 𑀲𑀢𑀸𑀦𑀼𑀲𑀸𑀭𑀺, 𑀲𑀢𑀺𑀬𑀸𑀦𑀼𑀯𑀢𑁆𑀢𑀦𑀯𑀲𑁂𑀦 𑀧𑀯𑀢𑁆𑀢𑀜𑀸𑀡𑀁. 𑀢𑁂𑀦𑀸𑀳 ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀲𑀫𑁆𑀧𑀬𑀼𑀢𑁆𑀢𑀓’’𑀦𑁆𑀢𑀺. 𑀜𑀸𑀡𑀁 𑀧𑁂𑀲𑁂𑀲𑀻𑀢𑀺 𑀜𑀸𑀡𑀁 𑀧𑀯𑀢𑁆𑀢𑁂𑀲𑀺. 𑀲𑀩𑁆𑀩𑀢𑁆𑀣𑀓𑀫𑁂𑀯 𑀜𑁂𑀬𑁆𑀬𑀸𑀯𑀭𑀡𑀲𑁆𑀲 𑀲𑀼𑀧𑁆𑀧𑀳𑀻𑀦𑀢𑁆𑀢𑀸 𑀅𑀧𑁆𑀧𑀝𑀺𑀳𑀢𑀁 𑀅𑀦𑀺𑀯𑀸𑀭𑀺𑀢𑀁 𑀜𑀸𑀡𑀁 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀺𑀘𑁆𑀘𑁂𑀯 𑀅𑀢𑁆𑀣𑁄. ‘‘𑀩𑁄𑀥𑀺 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡’’𑀦𑁆𑀢𑀺 (𑀘𑀽𑀴𑀦𑀺. 𑁨𑁧𑁧) 𑀯𑀘𑀦𑀢𑁄 𑀘𑀢𑀼𑀫𑀕𑁆𑀕𑀜𑀸𑀡𑀁 𑀩𑁄𑀥𑀺, 𑀢𑀢𑁄 𑀢𑀲𑁆𑀲 𑀅𑀥𑀺𑀕𑀢𑀢𑁆𑀢𑀸 𑀉𑀧𑁆𑀧𑀚𑁆𑀚𑀦𑀓𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 ‘‘𑀩𑁄𑀥𑀺𑀚𑀁 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀩𑁄𑀥𑀺𑀚𑀁 𑀩𑁄𑀥𑀺𑀫𑀽𑀮𑁂 𑀚𑀸𑀢𑀁 𑀘𑀢𑀼𑀫𑀕𑁆𑀕𑀜𑀸𑀡𑀁, 𑀢𑀜𑁆𑀘 𑀔𑁄 𑀅𑀦𑀸𑀕𑀢𑀁 𑀆𑀭𑀩𑁆𑀪 𑀉𑀤𑁆𑀤𑀺𑀲𑁆𑀲 𑀢𑀲𑁆𑀲 𑀅𑀧𑁆𑀧𑀯𑀢𑁆𑀢𑀺𑀅𑀢𑁆𑀣𑀁 𑀢𑀣𑀸𑀕𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺 𑀢𑀲𑁆𑀲 𑀉𑀧𑁆𑀧𑀦𑁆𑀦𑀢𑁆𑀢𑀸 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀸𑀯𑀢𑁄. 𑀓𑀣𑀁 𑀢𑀣𑀸𑀕𑀢𑁄 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀆𑀭𑀩𑁆𑀪 𑀅𑀢𑀻𑀭𑀓𑀁 𑀜𑀸𑀡𑀤𑀲𑁆𑀲𑀦𑀁 𑀧𑀜𑁆𑀜𑀸𑀧𑁂𑀢𑀻𑀢𑀺? 𑀅𑀢𑀻𑀢𑀲𑁆𑀲 𑀧𑀦 𑀅𑀤𑁆𑀥𑀼𑀦𑁄 𑀫𑀳𑀦𑁆𑀢𑀢𑀸𑀬 𑀅𑀢𑀻𑀭𑀓𑀁 𑀜𑀸𑀡𑀤𑀲𑁆𑀲𑀦𑀁 𑀢𑀢𑁆𑀣 𑀧𑀜𑁆𑀜𑀸𑀧𑁂𑀢𑀻𑀢𑀺 𑀓𑁄 𑀏𑀢𑁆𑀣 𑀯𑀺𑀭𑁄𑀥𑁄. 𑀢𑀺𑀢𑁆𑀣𑀺𑀬𑀸 𑀧𑀦 𑀇𑀫𑀫𑀢𑁆𑀣𑀁 𑀬𑀸𑀣𑀸𑀯𑀢𑁄 𑀅𑀚𑀸𑀦𑀦𑁆𑀢𑀸 𑁋 ‘‘𑀢𑀬𑀺𑀤𑀁 𑀓𑀺𑀁 𑀲𑀼, 𑀢𑀬𑀺𑀤𑀁 𑀓𑀣𑀁𑀲𑀽’’𑀢𑀺 𑀅𑀢𑁆𑀢𑀦𑁄 𑀅𑀜𑁆𑀜𑀸𑀡𑀫𑁂𑀯 𑀧𑀸𑀓𑀝𑀁 𑀓𑀭𑁄𑀦𑁆𑀢𑀺. 𑀢𑀲𑁆𑀫𑀸 𑀪𑀕𑀯𑀢𑀸 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 ‘‘𑀅𑀜𑁆𑀜𑀯𑀺𑀳𑀺𑀢𑀓𑀁 𑀜𑀸𑀡𑀤𑀲𑁆𑀲𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀢𑀭𑀁 𑀧𑀦 𑀲𑀦𑁆𑀥𑀸𑀬 𑀯𑀼𑀘𑁆𑀘𑀫𑀸𑀦𑁂 𑀲𑀢𑀺 𑀢𑀣𑀸𑀭𑀽𑀧𑁂 𑀧𑀬𑁄𑀚𑀦𑁂 𑀅𑀦𑀸𑀕𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀆𑀭𑀩𑁆𑀪 𑀅𑀢𑀻𑀭𑀓𑀫𑁂𑀯 𑀜𑀸𑀡𑀤𑀲𑁆𑀲𑀦𑀁 𑀧𑀜𑁆𑀜𑀸𑀧𑁂𑀬𑁆𑀬 𑀪𑀕𑀯𑀸𑀢𑀺 𑀅𑀦𑀢𑁆𑀣𑀲𑀁𑀳𑀺𑀢𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 ‘‘𑀦 𑀇𑀥𑀮𑁄𑀓𑀢𑁆𑀣𑀁 𑀯𑀸 𑀧𑀭𑀮𑁄𑀓𑀢𑁆𑀣𑀁 𑀯𑀸 𑀦𑀺𑀲𑁆𑀲𑀺𑀢’’𑀦𑁆𑀢𑀺. 𑀬𑀁 𑀧𑀦 𑀲𑀢𑁆𑀢𑀸𑀦𑀁 𑀅𑀦𑀢𑁆𑀣𑀸𑀯𑀳𑀢𑁆𑀢𑀸 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀢𑀢𑁆𑀣 𑀲𑁂𑀢𑀼𑀖𑀸𑀢𑁄 𑀢𑀣𑀸𑀕𑀢𑀲𑁆𑀲. ‘‘𑀪𑀸𑀭𑀢𑀬𑀼𑀤𑁆𑀥𑀲𑀻𑀢𑀸𑀳𑀭𑀡𑀲𑀤𑀺𑀲’’𑀦𑁆𑀢𑀺 𑀇𑀫𑀺𑀦𑀸 𑀢𑀲𑁆𑀲𑀸 𑀓𑀣𑀸𑀬 𑀬𑁂𑀪𑀼𑀬𑁆𑀬𑁂𑀦 𑀅𑀪𑀽𑀢𑀢𑁆𑀣𑀢𑀁 𑀤𑀻𑀧𑁂𑀢𑀺. 𑀲𑀳𑁂𑀢𑀼𑀓𑀦𑁆𑀢𑀺 𑀜𑀸𑀧𑀓𑁂𑀦 𑀳𑁂𑀢𑀼𑀦𑀸 𑀲𑀳𑁂𑀢𑀼𑀓𑀁. 𑀲𑁄 𑀧𑀦 𑀳𑁂𑀢𑀼 𑀬𑁂𑀦 𑀦𑀺𑀤𑀲𑁆𑀲𑀦𑁂𑀦 𑀲𑀸𑀥𑀻𑀬𑀢𑀺, 𑀢𑀁 𑀢𑀲𑁆𑀲 𑀓𑀸𑀭𑀡𑀦𑁆𑀢𑀺 𑀢𑁂𑀦 𑀲𑀓𑀸𑀭𑀡𑀁 𑀓𑀢𑁆𑀯𑀸. 𑀬𑀣𑀸 𑀳𑀺 𑀧𑀝𑀺𑀜𑁆𑀜𑀸𑀢𑀢𑁆𑀣𑀲𑀸𑀥𑀦𑀢𑁄 𑀳𑁂𑀢𑀼, 𑀏𑀯𑀁 𑀲𑀸𑀥𑀓𑀁 𑀦𑀺𑀤𑀲𑁆𑀲𑀦𑀦𑁆𑀢𑀺. 𑀬𑀼𑀢𑁆𑀢𑀧𑀢𑁆𑀢𑀓𑀸𑀮𑁂𑀬𑁂𑀯𑀸𑀢𑀺 𑀬𑀼𑀢𑁆𑀢𑀸𑀦𑀁 𑀧𑀢𑁆𑀢𑀓𑀸𑀮𑁂 𑀏𑀯. 𑀬𑁂 𑀳𑀺 𑀯𑁂𑀦𑁂𑀬𑁆𑀬𑀸 𑀢𑀲𑁆𑀲𑀸 𑀓𑀣𑀸𑀬 𑀬𑀼𑀢𑁆𑀢𑀸 𑀅𑀦𑀼𑀘𑁆𑀙𑀯𑀺𑀓𑀸, 𑀢𑁂𑀲𑀁𑀬𑁂𑀯 𑀬𑁄𑀚𑀦𑁂 𑀲𑀦𑁆𑀥𑀸𑀬 𑀯𑀸 𑀓𑀣𑀸𑀬 𑀧𑀢𑁆𑀢𑁄 𑀉𑀧𑀓𑀸𑀭𑀸𑀯𑀳𑁄 𑀓𑀸𑀮𑁄, 𑀢𑀤𑀸 𑀏𑀯 𑀓𑀣𑁂𑀢𑀻𑀢𑀺 𑀅𑀢𑁆𑀣𑁄.

𑁧𑁮𑁮. ‘‘𑀢𑀣𑀸 𑀢𑀣𑁂𑀯 𑀕𑀤𑀦𑀢𑁄’’𑀢𑀺 𑀇𑀫𑀺𑀦𑀸 ‘‘𑀢𑀣𑀸𑀕𑀢𑁄’’𑀢𑀺 𑀆𑀫𑁂𑀟𑀺𑀢𑀮𑁄𑀧𑁂𑀦𑀸𑀬𑀁 𑀦𑀺𑀤𑁆𑀤𑁂𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀢𑀣𑀸 𑀢𑀣𑁂𑀯𑀸𑀢𑀺 𑀘 𑀥𑀫𑁆𑀫𑀅𑀢𑁆𑀣𑀲𑀪𑀸𑀯𑀸𑀦𑀼𑀭𑀽𑀧𑀁, 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀜𑁆𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀺𑀝𑁆𑀞𑀦𑁆𑀢𑀺 𑀭𑀽𑀧𑀸𑀬𑀢𑀦𑀁 𑀤𑀝𑁆𑀞𑀩𑁆𑀩𑀢𑁄, 𑀢𑁂𑀦 𑀬𑀁 𑀤𑀺𑀝𑁆𑀞𑀁, 𑀬𑀁 𑀤𑀺𑀲𑁆𑀲𑀢𑀺, 𑀬𑀁 𑀤𑀓𑁆𑀔𑀢𑀺, 𑀬𑀁 𑀲𑀢𑀺 𑀲𑀫𑀯𑀸𑀬𑁂 𑀧𑀲𑁆𑀲𑁂𑀬𑁆𑀬𑀁, 𑀢𑀁 𑀲𑀩𑁆𑀩𑀁 ‘‘𑀤𑀺𑀝𑁆𑀞𑀁’’ 𑀢𑁆𑀯𑁂𑀯 𑀕𑀳𑀺𑀢𑀁 𑀓𑀸𑀮𑀯𑀺𑀲𑁂𑀲𑀲𑁆𑀲 𑀅𑀦𑀸𑀫𑀝𑁆𑀞𑀪𑀸𑀯𑀢𑁄. ‘‘𑀲𑀼𑀢’’𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀼𑀢𑀦𑁆𑀢𑀺 𑀲𑀤𑁆𑀤𑀸𑀬𑀢𑀦𑀁 𑀲𑁄𑀢𑀩𑁆𑀩𑀢𑁄. 𑀫𑀼𑀢𑀦𑁆𑀢𑀺 𑀲𑀦𑀺𑀲𑁆𑀲𑀬𑁂𑀦 𑀖𑀸𑀦𑀸𑀤𑀺𑀇𑀦𑁆𑀤𑁆𑀭𑀺𑀬𑁂𑀦 𑀲𑀬𑀁 𑀧𑀢𑁆𑀯𑀸 𑀧𑀸𑀧𑀼𑀡𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀧𑀢𑁆𑀯𑀸 𑀕𑀳𑁂𑀢𑀩𑁆𑀩𑀢𑁄’’𑀢𑀺. 𑀯𑀺𑀜𑁆𑀜𑀸𑀢𑀦𑁆𑀢𑀺 𑀯𑀺𑀚𑀸𑀦𑀺𑀢𑀩𑁆𑀩𑀁, 𑀢𑀁 𑀧𑀦 𑀤𑀺𑀝𑁆𑀞𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀁 𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀆𑀳 ‘‘𑀲𑀼𑀔𑀤𑀼𑀓𑁆𑀔𑀸𑀤𑀺𑀥𑀫𑁆𑀫𑀸𑀬𑀢𑀦’’𑀦𑁆𑀢𑀺. 𑀧𑀢𑁆𑀢𑀦𑁆𑀢𑀺 𑀬𑀣𑀸 𑀢𑀣𑀸 𑀧𑀢𑁆𑀢𑀁, 𑀳𑀢𑁆𑀣𑀕𑀢𑀁 𑀅𑀥𑀺𑀕𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀭𑀺𑀬𑁂𑀲𑀺𑀢𑁆𑀯𑀸 𑀯𑀸 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀯𑀸’’𑀢𑀺. 𑀧𑀭𑀺𑀬𑁂𑀲𑀺𑀢𑀦𑁆𑀢𑀺 𑀧𑀢𑁆𑀢𑀺𑀬𑀸𑀫𑀢𑁆𑀣𑀁 𑀧𑀭𑀺𑀬𑀺𑀝𑁆𑀞𑀁, 𑀢𑀁 𑀧𑀦 𑀧𑀢𑁆𑀢𑀁 𑀯𑀸 𑀲𑀺𑀬𑀸 𑀅𑀧𑁆𑀧𑀢𑁆𑀢𑀁 𑀯𑀸 𑀉𑀪𑀬𑀣𑀸𑀧𑀺 𑀧𑀭𑀺𑀬𑁂𑀲𑀺𑀢𑀫𑁂𑀯𑀸𑀢𑀺 𑀆𑀳 ‘‘𑀧𑀢𑁆𑀢𑀁 𑀯𑀸 𑀅𑀧𑁆𑀧𑀢𑁆𑀢𑀁 𑀯𑀸’’𑀢𑀺. 𑀧𑀤𑀤𑁆𑀯𑀬𑁂𑀦𑀸𑀧𑀺 𑀤𑁆𑀯𑀺𑀧𑁆𑀧𑀓𑀸𑀭𑀫𑁆𑀧𑀺 𑀧𑀢𑁆𑀢𑀁, 𑀤𑁆𑀯𑀺𑀧𑁆𑀧𑀓𑀸𑀭𑀫𑁆𑀧𑀺 𑀧𑀭𑀺𑀬𑁂𑀲𑀺𑀢𑀁, 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀘𑀺𑀢𑁆𑀢𑁂𑀦 𑀅𑀦𑀼𑀲𑀜𑁆𑀘𑀭𑀺𑀢𑀦𑁆𑀢𑀺 𑀘𑁄𑀧𑀦𑀁 𑀅𑀧𑀸𑀧𑁂𑀢𑁆𑀯𑀸 𑀘𑀺𑀢𑁆𑀢𑁂𑀦𑁂𑀯 𑀅𑀦𑀼𑀲𑀁𑀘𑀭𑀺𑀢𑀁, 𑀧𑀭𑀺𑀯𑀺𑀢𑀓𑁆𑀓𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀻𑀢𑀓𑀦𑁆𑀢𑀺 𑀆𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀮𑁄𑀳𑀺𑀢𑀓𑀑𑀤𑀸𑀢𑀸𑀤𑀺 𑀲𑀩𑁆𑀩𑀁 𑀭𑀽𑀧𑀸𑀭𑀫𑁆𑀫𑀡𑀯𑀺𑀪𑀸𑀕𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀼𑀫𑀦𑁄𑀢𑀺 𑀭𑀸𑀕𑀯𑀲𑁂𑀦, 𑀮𑁄𑀪𑀯𑀲𑁂𑀦, 𑀲𑀤𑁆𑀥𑀸𑀤𑀺𑀯𑀲𑁂𑀦 𑀯𑀸 𑀲𑀼𑀫𑀦𑁄. 𑀤𑀼𑀫𑁆𑀫𑀦𑁄𑀢𑀺 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀯𑀲𑁂𑀦, 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀯𑀲𑁂𑀦 𑀯𑀸 𑀤𑀼𑀫𑁆𑀫𑀦𑁄. 𑀫𑀚𑁆𑀛𑀢𑁆𑀢𑁄𑀢𑀺 𑀅𑀜𑁆𑀜𑀸𑀡𑀯𑀲𑁂𑀦 𑀯𑀸 𑀜𑀸𑀡𑀯𑀲𑁂𑀦 𑀯𑀸 𑀫𑀚𑁆𑀛𑀢𑁆𑀢𑁄. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑀢𑁆𑀣. 𑀢𑀢𑁆𑀣 𑀢𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀲𑀗𑁆𑀔𑀲𑀤𑁆𑀤𑁄 𑀧𑀡𑀯𑀲𑀤𑁆𑀤𑁄, 𑀧𑀢𑁆𑀢𑀕𑀦𑁆𑀥𑁄 𑀧𑀼𑀧𑁆𑀨𑀕𑀦𑁆𑀥𑁄, 𑀧𑀢𑁆𑀢𑀭𑀲𑁄 𑀨𑀮𑀭𑀲𑁄, 𑀉𑀧𑀸𑀤𑀺𑀦𑁆𑀦𑀁 𑀅𑀦𑀼𑀧𑀸𑀤𑀺𑀦𑁆𑀦𑀁, 𑀫𑀚𑁆𑀛𑀢𑁆𑀢𑀯𑁂𑀤𑀦𑀸 𑀓𑀼𑀲𑀮𑀓𑀫𑁆𑀫𑀁 𑀅𑀓𑀼𑀲𑀮𑀓𑀫𑁆𑀫𑀦𑁆𑀢𑀺 𑀏𑀯𑀁 𑀆𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀅𑀧𑁆𑀧𑀢𑁆𑀢𑀦𑁆𑀢𑀺 𑀜𑀸𑀡𑁂𑀦 𑀅𑀲𑀫𑁆𑀧𑀢𑁆𑀢𑀁, 𑀅𑀯𑀺𑀤𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀜𑀸𑀡𑁂𑀦 𑀅𑀲𑀘𑁆𑀙𑀺𑀓𑀢’’𑀦𑁆𑀢𑀺. 𑀢𑀣𑁂𑀯 𑀕𑀢𑀢𑁆𑀢𑀸𑀢𑀺 𑀢𑀣𑁂𑀯 𑀜𑀸𑀢𑀢𑁆𑀢𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀢𑀸. 𑀕𑀢-𑀲𑀤𑁆𑀤𑁂𑀦 𑀏𑀓𑀢𑁆𑀣𑀁 𑀩𑀼𑀤𑁆𑀥𑀺𑀅𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. ‘‘𑀕𑀢𑀺𑀅𑀢𑁆𑀣𑀸 𑀳𑀺 𑀥𑀸𑀢𑀯𑁄 𑀩𑀼𑀤𑁆𑀥𑀺𑀅𑀢𑁆𑀣𑀸 𑀪𑀯𑀦𑁆𑀢𑀻’’𑀢𑀺 𑀅𑀓𑁆𑀔𑀭𑀘𑀺𑀦𑁆𑀢𑀓𑀸.

𑀅𑀩𑁆𑀬𑀸𑀓𑀢𑀝𑁆𑀞𑀸𑀦𑀸𑀤𑀺𑀯𑀡𑁆𑀡𑀦𑀸

𑁧𑁮𑁯. ‘‘𑀅𑀲𑀫𑀢𑀁 𑀓𑀣𑁂𑀢𑁆𑀯𑀸’’𑀢𑀺 𑀯𑀢𑁆𑀯𑀸 𑀲𑀫𑁄𑀧𑀺 𑀦𑀸𑀫 𑀓𑁄𑀘𑀺 𑀦𑀢𑁆𑀣𑀺, 𑀓𑀼𑀢𑁄 𑀉𑀢𑁆𑀢𑀭𑀺𑀢𑀭𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀼𑀢𑁆𑀢𑀭𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀸 𑀧𑀦𑀸𑀬𑀁 𑀅𑀲𑀫𑀢𑀸, 𑀅𑀦𑀼𑀢𑁆𑀢𑀭𑀢𑀸 𑀘 𑀲𑀩𑁆𑀩𑀜𑁆𑀜𑀼𑀢𑀁 𑀧𑀽𑀭𑁂𑀢𑁆𑀯𑀸 𑀞𑀺𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀜𑁆𑀜𑀼𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀸 𑀲𑀩𑁆𑀩𑀜𑁆𑀜𑀼𑀢𑀸 𑀲𑀤𑁆𑀥𑀫𑁆𑀫𑀯𑀭𑀘𑀓𑁆𑀓𑀯𑀢𑁆𑀢𑀺𑀪𑀸𑀯𑁂𑀦 𑀮𑁄𑀓𑁂 𑀧𑀸𑀓𑀝𑀸 𑀚𑀸𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀥𑀫𑁆𑀫𑀭𑀸𑀚𑀪𑀸𑀯𑀁 𑀓𑀣𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀲𑀩𑁆𑀩𑀜𑁆𑀜𑀼𑀪𑀸𑀯𑁂𑀦 𑀘 𑀲𑀢𑁆𑀣𑀸 𑀇𑀫𑁂𑀲𑀼 𑀤𑀺𑀝𑁆𑀞𑀺𑀕𑀢𑀯𑀺𑀧𑀮𑁆𑀮𑀸𑀲𑁂𑀲𑀼 𑀏𑀯𑀁 𑀧𑀝𑀺𑀧𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀤𑀸𑀦𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀻𑀳𑀦𑀸𑀤𑀦𑁆𑀢𑀺 𑀅𑀪𑀻𑀢𑀦𑀸𑀤𑀁 𑀲𑁂𑀝𑁆𑀞𑀦𑀸𑀤𑀁. 𑀲𑁂𑀝𑁆𑀞𑀦𑀸𑀤𑁄 𑀳𑁂𑀲, 𑀬𑀤𑀺𑀤𑀁 𑀞𑀧𑀦𑀻𑀬𑀲𑁆𑀲 𑀧𑀜𑁆𑀳𑀲𑁆𑀲 𑀞𑀧𑀦𑀻𑀬𑀪𑀸𑀯𑀤𑀲𑁆𑀲𑀦𑀁. 𑀞𑀧𑀦𑀻𑀬𑀢𑀸 𑀘𑀲𑁆𑀲 𑀧𑀸𑀴𑀺𑀆𑀭𑀼𑀴𑁆𑀳𑀸 𑀏𑀯 ‘‘𑀦 𑀳𑁂𑀢’’𑀦𑁆𑀢𑀺𑀆𑀤𑀺𑀦𑀸. 𑀬𑀣𑀸 𑀉𑀧𑀘𑀺𑀢𑀓𑀫𑁆𑀫𑀓𑀺𑀮𑁂𑀲𑁂𑀦 𑀇𑀢𑁆𑀣𑀢𑁆𑀢𑀁 𑀆𑀕𑀦𑁆𑀢𑀩𑁆𑀩𑀁, 𑀢𑀣𑀸 𑀦𑀁 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀲𑀢𑁆𑀢𑁄. 𑀢𑀣𑀸 𑀳𑀺 𑀲𑁄 𑀭𑀽𑀧𑀸𑀤𑀻𑀲𑀼 𑀲𑀢𑁆𑀢𑁄 𑀯𑀺𑀲𑀢𑁆𑀢𑁄𑀢𑀺 𑀓𑀢𑁆𑀯𑀸 ‘‘𑀲𑀢𑁆𑀢𑁄’’𑀢𑀺 𑀘 𑀯𑀼𑀘𑁆𑀘𑀢𑀺. 𑀇𑀢𑁆𑀣𑀢𑁆𑀢𑀦𑁆𑀢𑀺 𑀘 𑀧𑀝𑀺𑀮𑀤𑁆𑀥𑀢𑁆𑀢𑀸 𑀢𑀣𑀸 𑀧𑀘𑁆𑀘𑀓𑁆𑀔𑀪𑀽𑀢𑁄 𑀅𑀢𑁆𑀢𑀪𑀸𑀯𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

‘‘𑀅𑀢𑁆𑀣𑀲𑀁𑀳𑀺𑀢𑀁 𑀦 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀉𑀪𑀬𑀢𑁆𑀣 𑀯𑀺𑀥𑀼𑀭𑀢𑀸𑀤𑀲𑁆𑀲𑀦𑁂𑀦 𑀦𑀺𑀭𑀢𑁆𑀣𑀓𑀯𑀺𑀧𑁆𑀧𑀮𑀸𑀧𑀢𑀁 𑀢𑀲𑁆𑀲 𑀯𑀸𑀤𑀲𑁆𑀲 𑀯𑀺𑀪𑀸𑀯𑁂𑀢𑀺, 𑀉𑀪𑀬𑀮𑁄𑀓𑀢𑁆𑀣𑀯𑀺𑀥𑀼𑀭𑀫𑁆𑀧𑀺 𑀲𑀫𑀸𑀦𑀁 ‘‘𑀓𑀺𑀁 𑀦𑀼 𑀔𑁄 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢’’𑀦𑁆𑀢𑀺 𑀓𑁄𑀘𑀺 𑀆𑀲𑀗𑁆𑀓𑁂𑀬𑁆𑀬𑀸𑀢𑀺 𑀢𑀤𑀸𑀲𑀗𑁆𑀓𑀸𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀦 𑀘 𑀥𑀫𑁆𑀫𑀲𑀁𑀳𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀲𑁆𑀲𑀺𑀢𑀁 𑀦 𑀳𑁄𑀢𑀻’’𑀢𑀺. 𑀬𑀤𑀺𑀧𑀺 𑀢𑀁 𑀦 𑀯𑀺𑀯𑀝𑁆𑀝𑁄𑀕𑀢𑀁 𑀳𑁄𑀢𑀺, 𑀯𑀺𑀯𑀝𑁆𑀝𑀲𑁆𑀲 𑀧𑀦 𑀅𑀥𑀺𑀝𑁆𑀞𑀸𑀦𑀪𑀽𑀢𑀁 𑀦𑀼 𑀔𑁄𑀢𑀺 𑀓𑁄𑀘𑀺 𑀆𑀲𑀗𑁆𑀓𑁂𑀬𑁆𑀬𑀸𑀢𑀺 𑀢𑀤𑀸𑀲𑀗𑁆𑀓𑀸𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀦 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁧𑁯𑁦. 𑀓𑀸𑀫𑀁 𑀢𑀡𑁆𑀳𑀸𑀧𑀺 𑀤𑀼𑀓𑁆𑀔𑀲𑀪𑀸𑀯𑀢𑁆𑀢𑀸 ‘‘𑀤𑀼𑀓𑁆𑀔’’𑀦𑁆𑀢𑀺 𑀩𑁆𑀬𑀸𑀓𑀸𑀢𑀩𑁆𑀩𑀸, 𑀧𑀪𑀯𑀪𑀸𑀯𑁂𑀦 𑀧𑀦 𑀲𑀸 𑀢𑀢𑁄 𑀯𑀺𑀲𑀼𑀁 𑀓𑀸𑀢𑀩𑁆𑀩𑀸𑀢𑀺 ‘‘𑀢𑀡𑁆𑀳𑀁 𑀞𑀧𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀢𑀲𑁆𑀲𑁂𑀯 𑀤𑀼𑀓𑁆𑀔𑀲𑁆𑀲 𑀧𑀪𑀸𑀯𑀺𑀓𑀸’’𑀢𑀺𑀆𑀤𑀺. 𑀦𑀦𑀼 𑀘 𑀅𑀯𑀺𑀚𑁆𑀚𑀸𑀤𑀬𑁄𑀧𑀺 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑁄𑀢𑀺? 𑀲𑀘𑁆𑀘𑀁 𑀲𑀫𑀼𑀤𑀬𑁄, 𑀢𑀲𑁆𑀲𑀸 𑀧𑀦 𑀓𑀫𑁆𑀫𑀲𑁆𑀲 𑀯𑀺𑀘𑀺𑀢𑁆𑀢𑀪𑀸𑀯𑀳𑁂𑀢𑀼𑀢𑁄, 𑀤𑀼𑀓𑁆𑀔𑀼𑀧𑁆𑀧𑀸𑀤𑀦𑁂 𑀯𑀺𑀲𑁂𑀲𑀧𑀘𑁆𑀘𑀬𑀪𑀸𑀯𑀢𑁄 𑀘 𑀲𑀸𑀢𑀺𑀲𑀬𑁄 𑀲𑀫𑀼𑀤𑀬𑀝𑁆𑀞𑁄𑀢𑀺 𑀲𑀸 𑀏𑀯 𑀲𑀼𑀢𑁆𑀢𑁂𑀲𑀼 𑀢𑀣𑀸 𑀯𑀼𑀢𑁆𑀢𑀸. 𑀢𑁂𑀦𑀸𑀳 ‘‘𑀢𑀡𑁆𑀳𑀸 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺 𑀩𑁆𑀬𑀸𑀓𑀢’’𑀦𑁆𑀢𑀺. 𑀉𑀪𑀺𑀦𑁆𑀦𑀁 𑀅𑀧𑁆𑀧𑀯𑀢𑁆𑀢𑀻𑀢𑀺 𑀤𑀼𑀓𑁆𑀔𑀲𑀫𑀼𑀤𑀬𑀸𑀦𑀁 𑀅𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁. ‘‘𑀤𑀼𑀓𑁆𑀔𑀧𑀭𑀺𑀚𑀸𑀦𑀦𑁄’’𑀢𑀺𑀆𑀤𑀺 𑀫𑀕𑁆𑀕𑀓𑀺𑀘𑁆𑀘𑀤𑀲𑁆𑀲𑀦𑀁, 𑀢𑁂𑀦 𑀫𑀕𑁆𑀕𑀲𑁆𑀲 𑀪𑀸𑀯𑀦𑀢𑁆𑀣𑁄𑀧𑀺 𑀅𑀢𑁆𑀣𑀢𑁄 𑀤𑀲𑁆𑀲𑀺𑀢𑁄𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀪𑀸𑀯𑀦𑀸𑀪𑀺𑀲𑀫𑀬𑁂𑀦 𑀯𑀺𑀦𑀸 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀬𑁄 𑀲𑀫𑁆𑀪𑀯𑀦𑁆𑀢𑀻𑀢𑀺. 𑀲𑀘𑁆𑀘𑀯𑀯𑀢𑁆𑀣𑀸𑀧𑀦𑀁 𑀅𑀧𑁆𑀧𑀫𑀸𑀤𑀧𑀝𑀺𑀧𑀢𑁆𑀢𑀺𑀪𑀸𑀯𑀢𑁄 𑀅𑀲𑀫𑁆𑀫𑁄𑀳𑀓𑀮𑁆𑀬𑀸𑀡𑀓𑀺𑀢𑁆𑀢𑀺𑀲𑀤𑁆𑀤𑀸𑀤𑀺𑀦𑀺𑀫𑀺𑀢𑁆𑀢𑀢𑀸𑀬 𑀬𑀣𑀸 𑀲𑀸𑀢𑀺𑀲𑀬𑀁 𑀇𑀥𑀮𑁄𑀓𑀢𑁆𑀣𑀸𑀯𑀳𑀁, 𑀏𑀯𑀁 𑀬𑀸𑀯 𑀜𑀸𑀡𑀲𑁆𑀲 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑁂𑀦 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑀫𑁆𑀧𑀸𑀧𑀓𑀁 𑀦 𑀳𑁄𑀢𑀺, 𑀢𑀸𑀯 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀧𑀢𑁆𑀢𑀺𑀪𑀯𑁂 𑀅𑀩𑁆𑀪𑀼𑀤𑀬𑀲𑀫𑁆𑀧𑀢𑁆𑀢𑀺 𑀅𑀦𑀼𑀕𑀢𑀫𑁂𑀯 𑀲𑀺𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀏𑀢𑀁 𑀇𑀥𑀮𑁄𑀓𑀧𑀭𑀮𑁄𑀓𑀢𑁆𑀣𑀦𑀺𑀲𑁆𑀲𑀺𑀢’’𑀦𑁆𑀢𑀺. 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀲𑁆𑀲𑀺𑀢𑀦𑁆𑀢𑀺 𑀦𑀯𑀯𑀺𑀥𑀫𑁆𑀧𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀁 𑀢𑀤𑀥𑀺𑀕𑀫𑀽𑀧𑀸𑀬𑀪𑀸𑀯𑀢𑁄. 𑀬𑀲𑁆𑀫𑀸 𑀲𑀘𑁆𑀘𑀲𑀫𑁆𑀩𑁄𑀥𑀁 𑀉𑀤𑁆𑀤𑀺𑀲𑁆𑀲 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺, 𑀦 𑀅𑀜𑁆𑀜𑀤𑀢𑁆𑀣𑀁, 𑀢𑀲𑁆𑀫𑀸 𑀏𑀢𑀁 𑀲𑀘𑁆𑀘𑀯𑀯𑀢𑁆𑀣𑀸𑀧𑀦𑀁 ‘‘𑀆𑀤𑀺𑀧𑀥𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁 𑀧𑀞𑀫𑀢𑀭𑀁 𑀘𑀺𑀢𑁆𑀢𑁂 𑀆𑀤𑀸𑀢𑀩𑁆𑀩𑀢𑁄.

𑀧𑀼𑀩𑁆𑀩𑀦𑁆𑀢𑀲𑀳𑀕𑀢𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀯𑀡𑁆𑀡𑀦𑀸

𑁧𑁯𑁧. 𑀢𑀁 𑀫𑀬𑀸 𑀩𑁆𑀬𑀸𑀓𑀢𑀫𑁂𑀯𑀸𑀢𑀺 𑀢𑀁 𑀫𑀬𑀸 𑀢𑀣𑀸 𑀩𑁆𑀬𑀸𑀓𑀢𑀫𑁂𑀯, 𑀩𑁆𑀬𑀸𑀓𑀸𑀢𑀩𑁆𑀩𑀁 𑀦𑀸𑀫 𑀫𑀬𑀸 𑀅𑀩𑁆𑀬𑀸𑀓𑀢𑀁 𑀦𑀢𑁆𑀣𑀻𑀢𑀺 𑀩𑁆𑀬𑀸𑀓𑀭𑀡𑀸𑀯𑁂𑀓𑀮𑁆𑀮𑁂𑀦 𑀅𑀢𑁆𑀢𑀦𑁄 𑀥𑀫𑁆𑀫𑀲𑀼𑀥𑀫𑁆𑀫𑀢𑀸𑀬 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀁 𑀯𑀺𑀪𑀸𑀯𑁂𑀢𑀺. 𑀢𑁂𑀦𑀸𑀳 ‘‘𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄’’𑀢𑀺. 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀸 𑀤𑀺𑀝𑁆𑀞𑀺𑀬𑁄 𑀅𑀧𑀭𑀸𑀧𑀭𑀼𑀧𑁆𑀧𑀦𑁆𑀦𑀸𑀦𑀁 𑀤𑀺𑀝𑁆𑀞𑀻𑀦𑀁 𑀅𑀯𑀲𑁆𑀲𑀬𑀸 𑀳𑁄𑀦𑁆𑀢𑀻𑀢𑀺 ‘‘𑀤𑀺𑀝𑁆𑀞𑀺𑀬𑁄𑀯 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀸’’𑀢𑀺 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀺𑀕𑀢𑀺𑀓𑀸𑀢𑀺 𑀤𑀺𑀝𑁆𑀞𑀺𑀕𑀢𑀺𑀬𑁄, 𑀤𑀺𑀝𑁆𑀞𑀺𑀧𑁆𑀧𑀯𑀢𑁆𑀢𑀺𑀬𑁄𑀢𑀺 𑀅𑀢𑁆𑀣𑁄. 𑀇𑀤𑀫𑁂𑀯 𑀤𑀲𑁆𑀲𑀦𑀁 𑀲𑀘𑁆𑀘𑀦𑁆𑀢𑀺 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 𑀇𑀤𑀫𑁂𑀯 𑀤𑀲𑁆𑀲𑀦𑀁 𑀲𑀘𑁆𑀘𑀁 𑀅𑀫𑁄𑀖𑀁 𑀅𑀯𑀺𑀧𑀭𑀻𑀢𑀁. 𑀅𑀜𑁆𑀜𑁂𑀲𑀁 𑀯𑀘𑀦𑀁 𑀫𑁄𑀖𑀦𑁆𑀢𑀺 ‘‘𑀅𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 𑀏𑀯𑀫𑀸𑀤𑀺𑀓𑀁 𑀅𑀜𑁆𑀜𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀘𑀦𑀁 𑀫𑁄𑀖𑀁 𑀢𑀼𑀘𑁆𑀙𑀁, 𑀫𑀺𑀘𑁆𑀙𑀸𑀢𑀺 𑀅𑀢𑁆𑀣𑁄. 𑀦 𑀲𑀬𑀁 𑀓𑀸𑀢𑀩𑁆𑀩𑁄𑀢𑀺 𑀅𑀲𑀬𑀁𑀓𑀸𑀭𑁄𑀢𑀺 𑀆𑀳 ‘‘𑀅𑀲𑀬𑀁𑀓𑀢𑁄’’𑀢𑀺, 𑀬𑀸𑀤𑀺𑀘𑁆𑀙𑀺𑀓𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁯𑁨. 𑀅𑀢𑁆𑀣𑀺 𑀔𑁄𑀢𑀺 𑀏𑀢𑁆𑀣 𑀔𑁄-𑀲𑀤𑁆𑀤𑁄 𑀧𑀼𑀘𑁆𑀙𑀸𑀬𑀁, 𑀅𑀢𑁆𑀣𑀺 𑀦𑀽𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 ‘‘𑀅𑀢𑁆𑀣𑀺 𑀔𑁄 𑀇𑀤𑀁 𑀆𑀯𑀼𑀲𑁄 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀺. 𑀆𑀯𑀼𑀲𑁄 𑀬𑀁 𑀢𑀼𑀫𑁆𑀳𑁂𑀳𑀺 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 𑀯𑀼𑀘𑁆𑀘𑀢𑀺, 𑀇𑀤𑀫𑀢𑁆𑀣𑀺 𑀔𑁄 𑀇𑀤𑀁 𑀯𑀸𑀘𑀸𑀫𑀢𑁆𑀢𑀁, 𑀦𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀯𑀸𑀘𑀸𑀯𑀢𑁆𑀣𑀼𑀫𑀢𑁆𑀢𑀢𑁄 𑀢𑀲𑁆𑀲 𑀬𑀁 𑀔𑁄 𑀢𑁂 𑀏𑀯𑀫𑀸𑀳𑀁𑀲𑀼 ‘‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀁 𑀅𑀜𑁆𑀜’’𑀦𑁆𑀢𑀺, 𑀢𑀁 𑀢𑁂𑀲𑀁 𑀦𑀸𑀦𑀼𑀚𑀸𑀦𑀸𑀫𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀘 𑀬𑁄𑀚𑀦𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀩𑁆𑀭𑀳𑁆𑀫𑀚𑀸𑀮𑀝𑀻𑀓𑀸𑀬𑀁 (𑀤𑀻. 𑀦𑀺. 𑀝𑀻. 𑁧.𑁩𑁦) 𑀯𑀼𑀢𑁆𑀢𑀫𑁂𑀯. 𑀤𑀺𑀝𑁆𑀞𑀺𑀧𑀜𑁆𑀜𑀢𑁆𑀢𑀺𑀬𑀸𑀢𑀺 𑀤𑀺𑀝𑁆𑀞𑀺𑀬𑀸 𑀧𑀜𑁆𑀜𑀸𑀧𑀦𑁂 ‘‘𑀏𑀯𑀁 𑀏𑀲𑀸 𑀤𑀺𑀝𑁆𑀞𑀺 𑀉𑀧𑁆𑀧𑀦𑁆𑀦𑀸’’𑀢𑀺 𑀢𑀲𑁆𑀲𑀸 𑀤𑀺𑀝𑁆𑀞𑀺𑀬𑀸 𑀲𑀫𑀼𑀤𑀬𑀢𑁄, 𑀅𑀢𑁆𑀣𑀗𑁆𑀕𑀫𑀢𑁄, 𑀅𑀲𑁆𑀲𑀸𑀤𑀢𑁄, 𑀆𑀤𑀻𑀦𑀯𑀢𑁄, 𑀦𑀺𑀲𑁆𑀲𑀭𑀡𑀢𑁄 𑀘 𑀬𑀸𑀣𑀸𑀯𑀢𑁄 𑀧𑀜𑁆𑀜𑀸𑀧𑀦𑁂. 𑀅𑀯𑀺𑀧𑀭𑀻𑀢𑀯𑀼𑀢𑁆𑀢𑀺𑀬𑀸 𑀲𑀫𑁂𑀦 𑀜𑀸𑀡𑁂𑀦 𑀲𑀫𑀁 𑀓𑀜𑁆𑀘𑀺 𑀦𑁂𑀯 𑀲𑀫𑀦𑀼𑀧𑀲𑁆𑀲𑀸𑀫𑀺. 𑀅𑀥𑀺𑀧𑀜𑁆𑀜𑀢𑁆𑀢𑀻𑀢𑀺 𑀅𑀪𑀺𑀜𑁆𑀜𑁂𑀬𑁆𑀬𑀥𑀫𑁆𑀫𑀧𑀜𑁆𑀜𑀸𑀧𑀦𑀸. 𑀬𑀁 𑀅𑀚𑀸𑀦𑀦𑁆𑀢𑀸 𑀩𑀸𑀳𑀺𑀭𑀓𑀸 𑀤𑀺𑀝𑁆𑀞𑀺𑀧𑀜𑁆𑀜𑀢𑁆𑀢𑀺𑀬𑁂𑀯 𑀅𑀮𑁆𑀮𑀻𑀦𑀸𑀢𑀺 𑀢𑀜𑁆𑀘 𑀧𑀜𑁆𑀜𑀢𑁆𑀢𑀺𑀢𑁄 𑀅𑀚𑀸𑀦𑀦𑁆𑀢𑀸 𑀣𑀸𑀫𑀲𑀸 𑀧𑀭𑀸𑀫𑀸𑀲𑀸 𑀅𑀪𑀺𑀦𑀺𑀯𑀺𑀲𑁆𑀲 𑀯𑁄𑀳𑀭𑀦𑁆𑀢𑀺. 𑀏𑀢𑁆𑀣 𑀘 𑀬𑀸𑀬𑀁 ‘‘𑀤𑀺𑀝𑁆𑀞𑀺𑀧𑀜𑁆𑀜𑀢𑁆𑀢𑀺 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀸 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀕𑀢𑀺𑀓𑁂𑀳𑀺 𑀏𑀯𑀁 𑀕𑀳𑀺𑀢𑀢𑀸𑀬 𑀯𑀺𑀪𑀸𑀯𑀦𑀸, 𑀢𑀢𑁆𑀣 𑀘 𑀪𑀕𑀯𑀢𑁄 𑀉𑀢𑁆𑀢𑀭𑀺𑀢𑀭𑁄 𑀦𑀸𑀫 𑀓𑁄𑀘𑀺 𑀦𑀢𑁆𑀣𑀺, 𑀲𑁆𑀯𑀸𑀬𑀫𑀢𑁆𑀣𑁄 𑀩𑁆𑀭𑀳𑁆𑀫𑀚𑀸𑀮𑁂 (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁦) 𑀯𑀺𑀪𑀸𑀯𑀺𑀢𑁄 𑀏𑀯. ‘‘𑀅𑀥𑀺𑀧𑀜𑁆𑀜𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀸 𑀧𑀦 𑀯𑀺𑀪𑀸𑀯𑀺𑀬𑀫𑀸𑀦𑀸 𑀮𑁄𑀓𑀲𑁆𑀲 𑀦𑀺𑀩𑁆𑀩𑀺𑀤𑀸𑀳𑁂𑀢𑀼𑀪𑀸𑀯𑁂𑀦 𑀩𑀳𑀼𑀮𑀻𑀓𑀸𑀭𑀸𑀢𑀺 𑀢𑀲𑁆𑀲𑀸 𑀯𑀲𑁂𑀦 𑀪𑀕𑀯𑀸 𑀅𑀦𑀼𑀢𑁆𑀢𑀭𑀪𑀸𑀯𑀁 𑀧𑀯𑁂𑀤𑁂𑀦𑁆𑀢𑁄 ‘𑀦𑁂𑀯 𑀅𑀢𑁆𑀢𑀦𑀸 𑀲𑀫𑀲𑀫𑀁 𑀲𑀫𑀦𑀼𑀧𑀲𑁆𑀲𑀸𑀫𑀻’𑀢𑀺 𑀲𑀻𑀳𑀦𑀸𑀤𑀁 𑀦𑀤𑀻’’𑀢𑀺 𑀓𑁂𑀘𑀺. 𑀅𑀝𑁆𑀞𑀓𑀣𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁩.𑁧𑁯𑁨) 𑀧𑀦 ‘‘𑀬𑀜𑁆𑀘 𑀯𑀼𑀢𑁆𑀢𑀁 ‘𑀧𑀜𑁆𑀜𑀢𑁆𑀢𑀺𑀬𑀸’𑀢𑀺 𑀬𑀜𑁆𑀘 ‘𑀅𑀥𑀺𑀧𑀜𑁆𑀜𑀢𑁆𑀢𑀻’𑀢𑀺, 𑀉𑀪𑀬𑀫𑁂𑀢𑀁 𑀅𑀢𑁆𑀣𑀢𑁄 𑀏𑀓’’𑀦𑁆𑀢𑀺 ‘‘𑀇𑀥 𑀧𑀦 𑀧𑀜𑁆𑀜𑀢𑁆𑀢𑀺𑀬𑀸𑀢𑀺 𑀏𑀢𑁆𑀣𑀸𑀧𑀺 𑀧𑀜𑁆𑀜𑀢𑁆𑀢𑀺 𑀘𑁂𑀯 𑀅𑀥𑀺𑀧𑀜𑁆𑀜𑀢𑁆𑀢𑀺 𑀘 𑀅𑀥𑀺𑀧𑁆𑀧𑁂𑀢𑀸, 𑀅𑀥𑀺𑀧𑀜𑁆𑀜𑀢𑁆𑀢𑀻𑀢𑀺 𑀏𑀢𑁆𑀣𑀸𑀧𑀻’’𑀢𑀺 𑀘 𑀯𑀼𑀢𑁆𑀢𑀸, 𑀉𑀪𑀬𑀲𑁆𑀲𑀧𑀺 𑀯𑀲𑁂𑀦𑁂𑀢𑁆𑀣 𑀪𑀕𑀯𑀸 𑀲𑀻𑀳𑀦𑀸𑀤𑀁 𑀦𑀤𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀉𑀪𑀬𑀁 𑀧𑁂𑀢𑀁 𑀅𑀢𑁆𑀣𑀢𑁄 𑀏𑀓𑀦𑁆𑀢𑀺 𑀘 𑀧𑀜𑁆𑀜𑀢𑁆𑀢𑀺𑀪𑀸𑀯𑀲𑀸𑀫𑀜𑁆𑀜𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀪𑁂𑀤𑀸𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀪𑁂𑀤𑀢𑁄 𑀳𑀻’’𑀢𑀺𑀆𑀤𑀺. 𑀔𑀦𑁆𑀥𑀧𑀜𑁆𑀜𑀢𑁆𑀢𑀻𑀢𑀺 𑀔𑀦𑁆𑀥𑀸𑀦𑀁 ‘‘𑀔𑀦𑁆𑀥𑀸’’𑀢𑀺 𑀧𑀜𑁆𑀜𑀸𑀧𑀦𑀸 𑀤𑀲𑁆𑀲𑀦𑀸 𑀧𑀓𑀸𑀲𑀦𑀸 𑀞𑀧𑀦𑀸 𑀦𑀺𑀓𑁆𑀔𑀺𑀧𑀦𑀸. ‘‘𑀆𑀘𑀺𑀓𑁆𑀔𑀢𑀺 𑀤𑀲𑁆𑀲𑁂𑀢𑀺 𑀧𑀜𑁆𑀜𑀸𑀧𑁂𑀢𑀺 𑀧𑀝𑁆𑀞𑀧𑁂𑀢𑀻’’𑀢𑀺 (𑀲𑀁. 𑀦𑀺. 𑁨.𑁨𑁦, 𑁯𑁭) 𑀆𑀕𑀢𑀝𑁆𑀞𑀸𑀦𑁂 𑀳𑀺 𑀧𑀜𑁆𑀜𑀸𑀧𑀦𑀸 𑀤𑀲𑁆𑀲𑀦𑀸 𑀧𑀓𑀸𑀲𑀦𑀸 𑀧𑀜𑁆𑀜𑀢𑁆𑀢𑀺 𑀦𑀸𑀫, ‘‘𑀲𑀼𑀧𑀜𑁆𑀜𑀢𑁆𑀢𑀁 𑀫𑀜𑁆𑀘𑀧𑀻𑀞’’𑀦𑁆𑀢𑀺 (𑀧𑀸𑀭𑀸. 𑁨𑁬𑁯) 𑀆𑀕𑀢𑀝𑁆𑀞𑀸𑀦𑁂 𑀞𑀧𑀦𑀸 𑀦𑀺𑀓𑁆𑀔𑀺𑀧𑀦𑀸 𑀧𑀜𑁆𑀜𑀢𑁆𑀢𑀺 𑀦𑀸𑀫, 𑀇𑀥 𑀉𑀪𑀬𑀫𑁆𑀧𑀺 𑀬𑀼𑀚𑁆𑀚𑀢𑀺.

𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀧𑁆𑀧𑀳𑀸𑀦𑀯𑀡𑁆𑀡𑀦𑀸

𑁧𑁯𑁬. 𑀧𑀚𑀳𑀦𑀢𑁆𑀣𑀦𑁆𑀢𑀺 𑀅𑀘𑁆𑀘𑀦𑁆𑀢𑀸𑀬 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀢𑁆𑀣𑀁. 𑀬𑀲𑁆𑀫𑀸 𑀢𑁂𑀦 𑀧𑀚𑀳𑀦𑁂𑀦 𑀲𑀩𑁆𑀩𑁂 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀸 𑀲𑀫𑁆𑀫𑀤𑁂𑀯 𑀅𑀢𑀺𑀓𑁆𑀓𑀦𑁆𑀢𑀸 𑀳𑁄𑀦𑁆𑀢𑀺 𑀯𑀻𑀢𑀺𑀓𑁆𑀓𑀦𑁆𑀢𑀸, 𑀢𑀲𑁆𑀫𑀸 ‘‘𑀲𑀫𑀢𑀺𑀓𑁆𑀓𑀫𑀸𑀬𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦’’𑀦𑁆𑀢𑀺 𑀅𑀯𑁄𑀘. 𑀦 𑀓𑁂𑀯𑀮𑀁 𑀲𑀢𑀺𑀧𑀝𑁆𑀞𑀸𑀦𑀸 𑀓𑀣𑀺𑀢𑀫𑀢𑁆𑀢𑀸, 𑀅𑀣 𑀔𑁄 𑀯𑁂𑀦𑁂𑀬𑁆𑀬𑀲𑀦𑁆𑀢𑀸𑀦𑁂 𑀧𑀢𑀺𑀝𑁆𑀞𑀸𑀧𑀺𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀤𑁂𑀲𑀺𑀢𑀸’’𑀢𑀺 𑀯𑀢𑁆𑀯𑀸 ‘‘𑀧𑀜𑁆𑀜𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀤𑁂𑀲𑀺𑀢𑀸𑀢𑀺 𑀓𑀣𑀺𑀢𑀸. 𑀧𑀜𑁆𑀜𑀢𑁆𑀢𑀸𑀢𑀺 𑀞𑀧𑀺𑀢𑀸’’𑀢𑀺. 𑀇𑀤𑀸𑀦𑀺 𑀲𑀢𑀺𑀧𑀝𑁆𑀞𑀸𑀦𑀤𑁂𑀲𑀦𑀸𑀬 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀸𑀦𑀁 𑀏𑀓𑀦𑁆𑀢𑀺𑀓𑀁 𑀧𑀳𑀸𑀦𑀸𑀯𑀳𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀬 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀬𑀸𑀢𑀺 𑀇𑀫𑀺𑀦𑀸 𑀢𑁂𑀲𑀁 𑀪𑀸𑀯𑀦𑀸𑀬 𑀏𑀯 𑀦𑁂𑀲𑀁 𑀧𑀳𑀸𑀦𑀁, 𑀤𑁂𑀲𑀦𑀸 𑀧𑀦 𑀢𑀤𑀼𑀧𑀦𑀺𑀲𑁆𑀲𑀬𑀪𑀸𑀯𑀢𑁄 𑀢𑀣𑀸 𑀯𑀼𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀲𑁂𑀲𑀁 𑀲𑀩𑁆𑀩𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀧𑀸𑀲𑀸𑀤𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.